𑁭. 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁪. 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀏𑀢𑁆𑀣 𑀬𑀣𑀸 𑀯𑀺𑀤𑀺𑀢𑀸𑀦𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀯𑀝𑁆𑀝𑀤𑀼𑀓𑁆𑀔𑀲𑀫𑀢𑀺𑀓𑁆𑀓𑀫𑀸𑀬 𑀳𑁄𑀦𑁆𑀢𑀺, 𑀢𑀣𑀸 𑀯𑁂𑀤𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 𑁋 ‘‘𑀲𑀳𑀯𑀺𑀧𑀲𑁆𑀲𑀦𑁂𑀦 𑀫𑀕𑁆𑀕𑁂𑀦 𑀚𑀸𑀦𑀺𑀢𑀩𑁆𑀩𑀸𑀦𑀻’’𑀢𑀺. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀢𑁄 𑀫𑀕𑁆𑀕𑁂𑀦 𑀅𑀲𑀫𑁆𑀫𑁄𑀳𑀢𑁄 𑀚𑀸𑀦𑀦𑀁 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑁄 𑀲𑀯𑀺𑀲𑁂𑀲𑀁 𑀉𑀧𑀯𑀺𑀘𑀭𑀢𑀺 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀢𑀺 𑀏𑀢𑁂𑀳𑀻𑀢𑀺 𑀫𑀦𑁄𑀧𑀯𑀺𑀘𑀸𑀭𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸. 𑀆𑀭𑀫𑁆𑀫𑀡𑁂 𑀳𑀺 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀫𑀚𑁆𑀚𑀦𑁂𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀲𑀳 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀦 𑀢𑀩𑁆𑀩𑀺𑀭𑀳𑀺𑀢𑀁. 𑀢𑁂𑀦𑀸𑀳 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀸’’𑀢𑀺𑀆𑀤𑀺. 𑀲𑀢𑁆𑀢𑀸 𑀧𑀚𑁆𑀚𑀦𑁆𑀢𑀺 𑀏𑀢𑁂𑀳𑀺 𑀬𑀣𑀸𑀭𑀳𑀁 𑀯𑀝𑁆𑀝𑀁 𑀯𑀺𑀯𑀝𑁆𑀝𑀜𑁆𑀘𑀸𑀢𑀺 𑀲𑀢𑁆𑀢𑀧𑀤𑀸, 𑀕𑁂𑀳𑀦𑀺𑀲𑁆𑀲𑀺𑀢𑀸 𑀯𑀝𑁆𑀝𑀧𑀤𑀸. 𑀬𑁄𑀕𑁆𑀕𑀸𑀦𑀁 𑀤𑀫𑀦𑀆𑀘𑀭𑀺𑀬𑀸 𑀬𑁄𑀕𑁆𑀕𑀸𑀘𑀭𑀺𑀬𑀸. 𑀢𑁂𑀦𑀸𑀳 ‘‘𑀤𑀫𑁂𑀢𑀩𑁆𑀩𑀤𑀫𑀓𑀸𑀦’’𑀦𑁆𑀢𑀺. 𑀲𑁂𑀲𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀏𑀓𑀲𑀢𑁆𑀢𑀢𑀺𑀯𑀺𑀥𑀯𑀺𑀜𑁆𑀜𑀸𑀡𑀁 𑀲𑀨𑀲𑁆𑀲𑀭𑀽𑀧𑀓𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑁩𑁦𑁫. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀁 𑀙𑀯𑀺𑀜𑁆𑀜𑀸𑀡𑀓𑀸𑀬𑀤𑁂𑀲𑀦𑀸𑀬𑀁. 𑀫𑀦𑁄𑀥𑀸𑀢𑀼𑀢𑁆𑀢𑀬𑀯𑀺𑀦𑀺𑀫𑀼𑀢𑁆𑀢𑀫𑁂𑀯 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀓𑁆𑀔𑀼𑀫𑁆𑀳𑀺 𑀲𑀫𑁆𑀨𑀲𑁆𑀲𑁄𑀢𑀺 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀲𑀫𑁆𑀨𑀲𑁆𑀲𑁄. 𑀢𑁂𑀦𑀸𑀳 𑁋 ‘‘𑀘𑀓𑁆𑀔𑀼𑀯𑀺𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑀫𑁆𑀨𑀲𑁆𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀬𑀣𑀸 𑀓𑁂𑀯𑀮𑁂𑀦 𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀤𑀲𑁆𑀲𑀦𑀁 𑀦 𑀳𑁄𑀢𑀺, 𑀏𑀯𑀁 𑀓𑁂𑀯𑀮𑁂𑀦 𑀘𑀓𑁆𑀔𑀼𑀧𑀲𑀸𑀤𑁂𑀦𑀧𑀻𑀢𑀺 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦𑀸’’𑀢𑀺. 𑀢𑁂𑀦 𑀧𑀸𑀴𑀺𑀬𑀁 𑀘𑀓𑁆𑀔𑀼𑀦𑀸𑀢𑀺 𑀦𑀺𑀲𑁆𑀲𑀬𑀫𑀼𑀔𑁂𑀦 𑀦𑀺𑀲𑁆𑀲𑀺𑀢𑀓𑀺𑀘𑁆𑀘𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦. ‘‘𑀉𑀧𑀯𑀺𑀘𑀭𑀢𑀺’’𑀘𑁆𑀘𑁂𑀯 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑀢𑁆𑀣 𑀯𑀺𑀢𑀓𑁆𑀓𑀩𑁆𑀬𑀸𑀧𑀸𑀭𑁄𑀧𑀺 𑀅𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀅𑀢𑁆𑀣𑀺. 𑀲𑁄 𑀧𑀦𑁂𑀢𑁆𑀣 𑀢𑀕𑁆𑀕𑀢𑀺𑀓𑁄𑀢𑀺 𑀆𑀳 𑁋 ‘‘𑀯𑀺𑀢𑀓𑁆𑀓𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀘𑀸’’𑀢𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀉𑀧𑀯𑀺𑀘𑀭𑀡𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁𑀬𑁂𑀯𑁂𑀢𑁆𑀣 𑀓𑀺𑀘𑁆𑀘𑀦𑁆𑀢𑀺 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀗𑁆𑀔𑀸𑀢𑀸 𑀫𑀦𑁄𑀧𑀯𑀺𑀘𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑁄 𑀉𑀧𑀯𑀺𑀘𑀸𑀭𑁄 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑁄 𑀬𑀣𑀸 ‘‘𑀆𑀚𑀜𑁆𑀜𑀭𑀣𑁄’’𑀢𑀺 𑀆𑀳 ‘‘𑀲𑁄𑀫𑀦𑀲𑁆𑀲𑁂𑀦 𑀲𑀤𑁆𑀥𑀺’’𑀦𑁆𑀢𑀺𑀆𑀤𑀺.

𑁩𑁦𑁬. 𑀉𑀧𑀯𑀺𑀘𑀸𑀭𑀸𑀦𑀁 𑀉𑀧𑀲𑁆𑀲𑀬𑀝𑁆𑀞𑁂𑀦 𑀕𑁂𑀳𑀁 𑀯𑀺𑀬𑀸𑀢𑀺 𑀕𑁂𑀳𑀁, 𑀭𑀽𑀧𑀸𑀤𑀬𑁄𑀢𑀺 𑀆𑀳 𑁋 ‘‘𑀕𑁂𑀳𑀲𑁆𑀲𑀺𑀢𑀸𑀦𑀻𑀢𑀺 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸𑀦𑀻’’𑀢𑀺. 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀦𑀺𑀓𑁆𑀔𑀫𑀦𑀢𑁄 𑀦𑁂𑀓𑁆𑀔𑀫𑁆𑀫𑀁 𑀯𑀺𑀧𑀲𑁆𑀲𑀦𑀸𑀢𑀺, ‘‘𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸𑀦𑀻𑀢𑀺 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀇𑀝𑁆𑀞𑀸𑀦𑀦𑁆𑀢𑀺 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀯𑀲𑁂𑀦 𑀧𑀭𑀺𑀬𑀺𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀧𑀭𑀺𑀬𑁂𑀲𑀺𑀢𑀸𑀦’’𑀦𑁆𑀢𑀺. 𑀧𑀺𑀬𑀪𑀸𑀯𑁄 𑀧𑀦 𑀓𑀦𑁆𑀢𑀲𑀤𑁆𑀤𑁂𑀦𑁂𑀯 𑀓𑀣𑀺𑀢𑁄𑀢𑀺 𑀓𑀸𑀫𑀺𑀢𑀩𑁆𑀩𑀸𑀦𑀁 𑀫𑀦𑁄 𑀭𑀫𑁂𑀢𑀻𑀢𑀺 𑀫𑀦𑁄𑀭𑀫𑀸𑀦𑀁. 𑀮𑁄𑀓𑁂𑀦 𑀆𑀫𑀲𑀻𑀬𑀢𑀻𑀢𑀺 𑀮𑁄𑀓𑀸𑀫𑀺𑀲𑀁, 𑀢𑀡𑁆𑀳𑀸. 𑀢𑀸𑀬 𑀕𑀳𑁂𑀢𑀩𑁆𑀩𑀢𑀸𑀬 𑀇𑀝𑁆𑀞𑀪𑀸𑀯𑀸𑀧𑀸𑀤𑀦𑁂𑀦 𑀧𑀝𑀺𑀲𑀗𑁆𑀔𑀢𑀢𑀸𑀬 𑀘 𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁. 𑀅𑀢𑀻𑀢𑁂 𑀓𑀢𑀁 𑀉𑀧𑁆𑀧𑀚𑁆𑀚𑀢𑀺 𑀆𑀭𑀫𑁆𑀫𑀡𑀺𑀓𑀅𑀦𑀼𑀪𑀯𑀦𑀲𑁆𑀲 𑀅𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀤𑀺𑀲𑀁 𑀅𑀦𑀼𑀲𑁆𑀲𑀭𑀡𑀁 𑀤𑀺𑀝𑁆𑀞𑀕𑁆𑀕𑀳𑀡𑀸𑀦𑀼𑀲𑁆𑀲𑀭𑁂𑀦 𑀘 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀬𑀣𑀸𑀳’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀦𑀺𑀘𑁆𑀘𑀸𑀓𑀸𑀭𑀦𑁆𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑀁. 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀦𑁆𑀢𑀺 𑀚𑀭𑀸𑀬 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑁂𑀥𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀜𑁆𑀘𑁂𑀯, 𑀢𑀢𑁄 𑀏𑀯 𑀧𑀮𑁄𑀓𑀺𑀢𑀁 𑀪𑀗𑁆𑀕𑀜𑁆𑀘. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀲𑁆𑀫𑀸 𑀉𑀧𑁆𑀧𑀦𑁆𑀦𑀁 𑀭𑀽𑀧𑀁 𑀢𑁂𑀦𑁂𑀯𑀸𑀓𑀸𑀭𑁂𑀦 𑀦 𑀢𑀺𑀝𑁆𑀞𑀢𑀺, 𑀅𑀣 𑀔𑁄 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀲𑀗𑁆𑀔𑀸𑀢𑀁 𑀧𑀓𑀢𑀺𑀁 𑀯𑀺𑀚𑀳𑀢𑀺, 𑀯𑀺𑀚𑀳𑀺𑀢𑀜𑁆𑀘 𑀚𑀭𑀸𑀯𑀢𑁆𑀣𑀸𑀬 𑀢𑀢𑁄 𑀯𑀺𑀕𑀘𑁆𑀙𑀢𑀺, 𑀯𑀺𑀕𑀘𑁆𑀙𑀦𑁆𑀢𑀜𑁆𑀘 𑀪𑀗𑁆𑀕𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑀼𑀚𑁆𑀛𑀢𑀻𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁, ‘‘𑀧𑀓𑀢𑀺𑀯𑀺𑀚𑀳𑀦𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄’’𑀢𑀺 𑀯𑀼𑀢𑁆𑀢𑀁, 𑀅𑀦𑀼𑀩𑁄𑀥𑀜𑀸𑀡𑀁 𑀧𑀦 𑀅𑀥𑀺𑀧𑁆𑀧𑁂𑀢𑀁 𑀯𑀻𑀣𑀺𑀧𑀝𑀺𑀧𑀦𑁆𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦𑀸𑀢𑀺 ‘‘𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀸’’𑀢𑀺 𑀯𑀼𑀢𑁆𑀢𑀁 𑀉𑀧𑀯𑀺𑀘𑀸𑀭𑀦𑀺𑀤𑁆𑀤𑁂𑀲𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀙𑀲𑀼𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂’’𑀢𑀺𑀆𑀤𑀺. 𑀲𑀗𑁆𑀔𑀸𑀭𑀸𑀦𑀁 𑀪𑁂𑀤𑀁 𑀧𑀲𑁆𑀲𑀢𑁄𑀢𑀺 𑀲𑀩𑁆𑀩𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀲𑀪𑀸𑀯𑀁 𑀯𑀻𑀣𑀺𑀧𑀝𑀺𑀧𑀦𑁆𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀧𑀲𑁆𑀲𑀢𑁄. 𑀢𑁂𑀦𑀸𑀳 ‘‘𑀲𑀗𑁆𑀔𑀸𑀭𑀕𑀢𑀫𑁆𑀳𑀺 𑀢𑀺𑀓𑁆𑀔𑁂’’𑀢𑀺𑀆𑀤𑀺. 𑀢𑀢𑁆𑀣 𑀲𑀗𑁆𑀔𑀸𑀕𑀢𑀫𑁆𑀳𑀻𑀢𑀺 𑀲𑀗𑁆𑀔𑀸𑀭𑀕𑀢𑁂 𑀯𑀺𑀲𑀬𑀪𑀽𑀢𑁂. 𑀢𑀺𑀓𑁆𑀔𑁂𑀢𑀺 𑀪𑀸𑀯𑀦𑀸𑀩𑀮𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀸𑀬 𑀢𑀺𑀩𑁆𑀩𑁂. 𑀲𑀽𑀭𑁂𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀽𑀢𑀢𑀸𑀬, 𑀢𑁂𑀲𑀜𑁆𑀘 𑀅𑀪𑀺𑀪𑀯𑀦𑀲𑀫𑀢𑁆𑀣𑀢𑀸𑀬 𑀯𑀺𑀲𑀤𑁂 𑀧𑀝𑀼𑀪𑀽𑀢𑁂 𑀧𑀯𑀢𑁆𑀢𑀦𑁆𑀢𑁂.

𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀽𑀧𑀲𑀦𑁆𑀢𑀢𑀸𑀬 𑀲𑀦𑁆𑀢𑀘𑀺𑀢𑁆𑀢𑀲𑁆𑀲, 𑀲𑀁𑀲𑀸𑀭𑁂 𑀪𑀬𑀲𑁆𑀲 𑀇𑀓𑁆𑀔𑀦𑀢𑁄 𑀪𑀺𑀓𑁆𑀔𑀼𑀦𑁄, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀅𑀫𑀸𑀦𑀼𑀲𑀻 𑀭𑀢𑀻𑀢𑀺 𑀯𑀺𑀯𑁂𑀓𑀭𑀢𑀺 𑀦𑁂𑀓𑁆𑀔𑀫𑁆𑀫𑀭𑀢𑀺. 𑀬𑀢𑁄 𑀬𑀢𑁄𑀢𑀺 𑀬𑀣𑀸 𑀬𑀣𑀸 𑀦𑀬𑀯𑀺𑀧𑀲𑁆𑀲𑀦𑀸𑀤𑀻𑀲𑀼 𑀬𑁂𑀦 𑀬𑁂𑀦 𑀲𑀫𑁆𑀫𑀲𑀦𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀦𑁆𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀧𑁆𑀧𑀸𑀤𑀜𑁆𑀘 𑀪𑀗𑁆𑀕𑀜𑁆𑀘. 𑀅𑀫𑀢𑀦𑁆𑀢𑀁 𑀯𑀺𑀚𑀸𑀦𑀢𑀦𑁆𑀢𑀺 𑀯𑀺𑀚𑀸𑀦𑀦𑁆𑀢𑀸𑀦𑀁 𑀯𑀺𑀜𑁆𑀜𑀽𑀦𑀁 𑀆𑀭𑀤𑁆𑀥𑀯𑀺𑀧𑀲𑁆𑀲𑀦𑀸𑀦𑀁 𑀢𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀅𑀫𑀢𑀸𑀥𑀺𑀕𑀫𑀳𑁂𑀢𑀼𑀢𑀸𑀬 𑀅𑀫𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂𑀢𑀺 𑀭𑀽𑀧𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑁂 𑀇𑀝𑁆𑀞𑀸𑀭𑀫𑁆𑀫𑀡𑁂 𑀬𑀣𑀸𑀭𑀳𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀆𑀧𑀸𑀣𑀕𑀢𑁂. 𑀯𑀺𑀲𑀬𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁.

𑁩𑁦𑁭. 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀅𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑁄 𑀦𑀸𑀫 𑀅𑀭𑀳𑀢𑁆𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦. 𑀓𑀣𑀁 𑀧𑀦 𑀢𑀢𑁆𑀣 𑀧𑀺𑀳𑀁 𑀉𑀧𑀝𑁆𑀞𑀧𑁂𑀢𑀺, 𑀦 𑀳𑀺 𑀅𑀥𑀺𑀕𑀢𑀁 𑀅𑀭𑀳𑀢𑁆𑀢𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀦 𑀘 𑀢𑀁 𑀆𑀭𑀩𑁆𑀪 𑀧𑀺𑀳𑀸 𑀧𑀯𑀢𑁆𑀢𑀢𑀻𑀢𑀺? 𑀓𑁄 𑀯𑀸 𑀏𑀯𑀫𑀸𑀳 𑁋 ‘‘𑀅𑀭𑀳𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀺𑀳𑀁 𑀉𑀧𑀝𑁆𑀞𑀧𑁂𑀢𑀻’’𑀢𑀺. 𑀅𑀦𑀼𑀲𑁆𑀲𑀼𑀢𑀺𑀮𑀤𑁆𑀥𑀁 𑀧𑀦 𑀧𑀭𑀺𑀓𑀧𑁆𑀧𑀲𑀺𑀤𑁆𑀥𑀁 𑀅𑀭𑀳𑀢𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀢𑁆𑀣𑀦𑀁 𑀞𑀧𑁂𑀢𑀺, 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀆𑀬𑀢𑀦𑀦𑁆𑀢𑀺 𑀅𑀭𑀳𑀢𑁆𑀢𑀫𑁂𑀯 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀫𑀸𑀤𑀺𑀓𑀸𑀭𑀡𑀪𑀸𑀯𑀢𑁄, 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀪𑀸𑀯𑀢𑁄 𑀘 𑀢𑀣𑀸 𑀯𑀼𑀢𑁆𑀢𑀁, 𑀢𑀁 𑀧𑀦𑁂𑀢𑀁 𑀤𑁄𑀫𑀦𑀲𑁆𑀲𑀁 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀧𑀢𑁆𑀣𑀦𑀸𑀬 𑀲𑀳𑀸𑀯𑀢𑁆𑀢𑀦𑀢𑁄. 𑀦 𑀳𑀺 𑀮𑁄𑀪𑀤𑁄𑀲𑀸𑀦𑀁 𑀲𑀳 𑀯𑀼𑀢𑁆𑀢𑀺 𑀅𑀢𑁆𑀣𑀺. 𑀧𑀢𑁆𑀣𑀦𑀸𑀫𑀽𑀮𑀓𑀢𑁆𑀢𑀸𑀢𑀺 𑀇𑀫𑀺𑀦𑀸 𑀉𑀧𑀝𑁆𑀞𑀸𑀧𑀬𑀢𑁄 𑀧𑀤𑀲𑁆𑀲 𑀳𑁂𑀢𑀼𑀅𑀢𑁆𑀣𑀚𑁄𑀢𑀓𑀢𑀫𑀸𑀳. 𑀏𑀯𑀦𑁆𑀢𑀺 ‘‘𑀓𑀼𑀤𑀸𑀲𑁆𑀲𑀼𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀓𑀸𑀭𑁂𑀦. 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀦𑁆𑀢𑀺 𑀬𑀣𑀸 𑀫𑀕𑁆𑀕𑁂𑀦 𑀖𑀝𑁂𑀢𑀺, 𑀏𑀯𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁.

𑁩𑁦𑁮. 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀢𑀺 𑀅𑀜𑁆𑀜𑀸𑀡𑀲𑀳𑀺𑀢𑀸 𑀉𑀧𑁂𑀓𑁆𑀔𑀸 𑀅𑀲𑀫𑀧𑁂𑀓𑁆𑀔𑀦𑀧𑀯𑀢𑁆𑀢𑀸. 𑀢𑁂𑀦 𑀢𑁂𑀦 𑀫𑀕𑁆𑀕𑁄𑀥𑀺𑀦𑀸 𑀢𑀲𑁆𑀲 𑀢𑀲𑁆𑀲 𑀅𑀧𑀸𑀬𑀕𑀫𑀦𑀻𑀬𑀓𑀺𑀮𑁂𑀲𑁄𑀥𑀺𑀲𑁆𑀲 𑀅𑀦𑀯𑀲𑁂𑀲𑀢𑁄 𑀚𑀺𑀢𑀢𑁆𑀢𑀸 𑀔𑀻𑀡𑀸𑀲𑀯𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀑𑀥𑀺𑀚𑀺𑀦𑁄 𑀦𑀸𑀫; 𑀢𑀤𑀪𑀸𑀯𑀢𑁄 𑀧𑀼𑀣𑀼𑀚𑁆𑀚𑀦𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀅𑀦𑁄𑀥𑀺𑀚𑀺𑀦𑁄 𑀦𑀸𑀫; 𑀲𑁂𑀔𑁄 𑀧𑀦 𑀲𑀺𑀬𑀸 𑀧𑀭𑀺𑀬𑀸𑀬𑀢𑁄 𑀑𑀥𑀺𑀚𑀺𑀦𑁄𑀢𑀺. 𑀢𑀫𑁆𑀧𑀺 𑀦𑀺𑀯𑀢𑁆𑀢𑁂𑀦𑁆𑀢𑁄, ‘‘𑀅𑀔𑀻𑀡𑀸𑀲𑀯𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀚𑀺𑀦𑀺𑀢𑁆𑀯𑀸𑀢𑀺 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀲𑀩𑁆𑀩𑀲𑁄 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀔𑀻𑀡𑀸𑀲𑀯𑁄𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀯𑀺𑀧𑀸𑀓𑀚𑀺𑀦𑁄 𑀦𑀸𑀫; 𑀢𑀤𑀪𑀸𑀯𑀢𑁄 𑀧𑀼𑀣𑀼𑀚𑁆𑀚𑀦𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀯𑀺𑀧𑀸𑀓𑀚𑀺𑀦𑁄 𑀦𑀸𑀫; 𑀲𑁂𑀔𑁄 𑀧𑀦 𑀲𑀺𑀬𑀸 𑀧𑀭𑀺𑀬𑀸𑀬𑀢𑁄 𑀯𑀺𑀧𑀸𑀓𑀚𑀺𑀦𑁄𑀢𑀺. 𑀢𑀫𑁆𑀧𑀺 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀅𑀔𑀻𑀡𑀸𑀲𑀯𑀲𑁆𑀲𑁂𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀅𑀧𑀲𑁆𑀲𑀦𑁆𑀢𑀲𑁆𑀲 𑀭𑀽𑀧𑀦𑁆𑀢𑀺 𑀧𑀸𑀴𑀺𑀢𑁄 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀧𑀸𑀴𑀺𑀬𑀁 𑀧𑀼𑀩𑁆𑀩𑁂 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺 𑀯𑀘𑀦𑀁 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀬𑀁 𑀉𑀧𑁂𑀓𑁆𑀔𑀸, 𑀦 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀕𑁂𑀳𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸 𑀳𑀺 𑀬𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀯𑀢𑁆𑀣𑀼𑀁 𑀅𑀧𑁂𑀓𑁆𑀔𑀲𑁆𑀲𑁂𑀯, 𑀦 𑀦𑀺𑀭𑀧𑁂𑀓𑁆𑀔𑀲𑁆𑀲𑀸𑀢𑀺 𑀇𑀝𑁆𑀞𑁂, 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀯𑀸 𑀆𑀭𑀫𑁆𑀫𑀡𑁂 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂’’𑀢𑀺. 𑀅𑀜𑁆𑀜𑀸𑀡𑁂𑀦 𑀧𑀦 𑀢𑀢𑁆𑀣 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀓𑀸𑀭𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀢𑁂𑀦𑀸𑀳 ‘‘𑀕𑀼𑀴𑀧𑀺𑀡𑁆𑀟𑀓𑁂’’𑀢𑀺𑀆𑀤𑀺.

𑀇𑀝𑁆𑀞𑁂 𑀅𑀭𑀚𑁆𑀚𑀦𑁆𑀢𑀲𑁆𑀲 𑀅𑀦𑀺𑀝𑁆𑀞𑁂 𑀅𑀤𑀼𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸𑀦𑀁 𑀇𑀝𑁆𑀞𑁂 𑀭𑀚𑁆𑀚𑀦𑀁, 𑀅𑀦𑀺𑀝𑁆𑀞𑁂 𑀤𑀼𑀲𑁆𑀲𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀬𑁄𑀦𑀺𑀬𑁄𑀫𑀦𑀲𑀺𑀓𑀸𑀭𑁄 𑀳𑀺 𑀢𑀁𑀢𑀁𑀆𑀭𑀫𑁆𑀫𑀡𑀯𑀲𑁂𑀦 𑀦 𑀓𑀢𑁆𑀣𑀘𑀺𑀧𑀺 𑀚𑀯𑀦𑀦𑀺𑀬𑀫𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀯𑀺𑀧𑀭𑀻𑀢𑁂𑀧𑀺 𑀆𑀭𑀫𑁆𑀫𑀡𑁂 𑀭𑀚𑁆𑀚𑀦𑀤𑀼𑀲𑁆𑀲𑀦𑀁 𑀲𑀫𑁆𑀪𑀯𑀢𑀺, 𑀢𑀣𑀸𑀧𑀺𑀲𑁆𑀲 𑀭𑀚𑁆𑀚𑀦𑀤𑀼𑀲𑁆𑀲𑀦𑀁 𑀅𑀢𑁆𑀣𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀲𑀫𑀧𑁂𑀓𑁆𑀔𑀦𑁂𑀢𑀺 𑀅𑀲𑀫𑀁 𑀅𑀬𑀼𑀢𑁆𑀢𑀤𑀲𑁆𑀲𑀦𑁂 𑀅𑀬𑁄𑀦𑀺𑀲𑁄 𑀲𑀫𑁆𑀫𑁄𑀳𑀧𑀼𑀩𑁆𑀩𑀓𑀁 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑁂.

𑁩𑁦𑁯. 𑀧𑀯𑀢𑁆𑀢𑀦𑀯𑀲𑁂𑀦𑀸𑀢𑀺 𑀉𑀧𑁆𑀧𑀸𑀤𑀦𑀯𑀲𑁂𑀦 𑀘𑁂𑀯 𑀩𑀳𑀼𑀮𑀻𑀓𑀭𑀡𑀯𑀲𑁂𑀦 𑀘. 𑀦𑀺𑀲𑁆𑀲𑀸𑀬 𑀘𑁂𑀯 𑀆𑀕𑀫𑁆𑀫 𑀘𑀸𑀢𑀺 𑀆𑀕𑀫𑀦𑀝𑁆𑀞𑀸𑀦𑀪𑀽𑀢𑁂 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑁂 𑀘 𑀓𑀢𑁆𑀯𑀸. 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑁂𑀦 𑀉𑀲𑁆𑀲𑀸𑀭𑁂𑀦𑁆𑀢𑀸 𑀲𑀫𑀼𑀲𑁆𑀲𑀸𑀭𑁂𑀦𑁆𑀢𑀸.

𑀲𑁄𑀫𑀦𑀲𑁆𑀲𑀪𑀸𑀯𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸, ‘‘𑀲𑀭𑀺𑀓𑁆𑀔𑀓𑁂𑀦𑁂𑀯 𑀲𑀭𑀺𑀓𑁆𑀔𑀓𑀁 𑀚𑀳𑀸𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀧𑀳𑀸𑀬𑀓𑀁 𑀦𑀸𑀫 𑀧𑀳𑀸𑀢𑀩𑁆𑀩𑀢𑁄 𑀩𑀮𑀯𑀫𑁂𑀯, 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀩𑀮𑀯𑀪𑀸𑀯𑀢𑁄 𑀲𑀸𑀢𑀺𑀲𑀬𑀁 𑀧𑀦 𑀩𑀮𑀯𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀇𑀤𑀸𑀦𑀺 𑀩𑀮𑀯𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀮𑀯𑀪𑀸𑀯𑀢𑁄 𑀯𑁄𑀤𑀸𑀦𑀥𑀫𑁆𑀫𑀸𑀦𑀁 𑀅𑀥𑀺𑀕𑀫𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀳𑁂𑀢𑁆𑀣 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀸𑀦𑀫𑁆𑀧𑀺 𑀧𑀳𑀸𑀦𑀁 𑀚𑁄𑀢𑀺𑀢𑀁.

𑀉𑀧𑁂𑀓𑁆𑀔𑀸𑀬 𑀧𑀳𑀸𑀬𑀓𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀉𑀧𑁂𑀓𑁆𑀔𑀸𑀓𑀣𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀛𑀸𑀦𑀲𑁆𑀲 𑀅𑀮𑀸𑀪𑀺𑀦𑁄 𑀘 𑀮𑀸𑀪𑀺𑀦𑁄 𑀘 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑀲𑀫𑁆𑀫𑀲𑀦𑀁 𑀲𑀦𑁆𑀥𑀸𑀬, ‘‘𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀘 𑀧𑀸𑀤𑀓𑁂 𑀓𑀢𑁆𑀯𑀸’’𑀢𑀺. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺 𑀪𑀸𑀯𑀦𑀸𑀬 𑀧𑀕𑀼𑀡𑀪𑀸𑀯𑀁 𑀆𑀕𑀫𑁆𑀫 𑀓𑀤𑀸𑀘𑀺 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦𑀧𑀺 𑀳𑀺 𑀲𑀫𑁆𑀫𑀲𑀦𑀁 𑀳𑁄𑀢𑀻𑀢𑀺. 𑀧𑀸𑀤𑀓𑀚𑁆𑀛𑀸𑀦𑀯𑀲𑁂𑀦, 𑀲𑀫𑁆𑀫𑀲𑀺𑀢𑀥𑀫𑁆𑀫𑀯𑀲𑁂𑀦 𑀯𑀸 𑀆𑀕𑀫𑀦𑀯𑀺𑀧𑀲𑁆𑀲𑀦𑀸𑀬 𑀩𑀳𑀼𑀮𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑀢𑁄 ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀧𑀦 𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀯𑀸’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀳𑁄𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀼𑀭𑀺𑀫𑀲𑀤𑀺𑀲𑀸𑀯𑀸𑀢𑀺 𑀧𑀼𑀭𑀺𑀫𑀲𑀤𑀺𑀲𑀸 𑀏𑀯, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀯𑀸 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀲𑀦𑁆𑀥𑀸𑀬𑀸𑀢𑀺 𑀬𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀤𑀺𑀧𑀸𑀤𑀓𑀢𑁄 𑀏𑀯 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀁 𑀦𑀺𑀲𑁆𑀲𑀸𑀬 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀧𑀳𑀸𑀦𑀁, 𑀇𑀤𑀁 𑀲𑀦𑁆𑀥𑀸𑀬. 𑀧𑀳𑀸𑀦𑀦𑁆𑀢𑀺 𑀘𑁂𑀢𑁆𑀣 𑀲𑀫𑀢𑀺𑀓𑁆𑀓𑀫𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀏𑀢𑀁 𑀯𑀺𑀲𑁂𑀲𑀁 𑀯𑀺𑀧𑀲𑁆𑀲𑀦𑀸𑀬 𑀆𑀯𑀚𑁆𑀚𑀦𑀝𑁆𑀞𑀸𑀦𑀪𑀽𑀢𑀁. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀆𑀲𑀦𑁆𑀦𑁂 𑀲𑀫𑀸𑀧𑀦𑁆𑀦𑀚𑁆𑀛𑀸𑀦𑀯𑀺𑀧𑀲𑁆𑀲𑀦𑀸 𑀧𑀸𑀤𑀓𑀚𑁆𑀛𑀸𑀦𑀯𑀺𑀧𑀲𑁆𑀲𑀦𑀸, 𑀲𑀫𑁆𑀫𑀲𑀺𑀢𑀥𑀫𑁆𑀫𑁄𑀢𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸. 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄𑀢𑀺 𑀧𑀸𑀤𑀓𑀚𑁆𑀛𑀸𑀦𑀲𑁆𑀲 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀲𑁆𑀲 𑀘 𑀪𑁂𑀤𑁂 𑀲𑀢𑀺 𑀧𑀝𑀺𑀧𑀚𑁆𑀚𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, ‘‘𑀅𑀳𑁄 𑀯𑀢 𑀫𑀬𑁆𑀳𑀁 𑀧𑀜𑁆𑀘𑀗𑁆𑀕𑀺𑀓𑀁 𑀛𑀸𑀦𑀁 𑀪𑀯𑁂𑀬𑁆𑀬 𑀘𑀢𑀼𑀭𑀗𑁆𑀕𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀧𑀯𑀢𑁆𑀢𑀅𑀚𑁆𑀛𑀸𑀲𑀬𑁄. 𑀢𑁂𑀲𑀫𑁆𑀧𑀺 𑀯𑀸𑀤𑁂𑀢𑀺 𑀏𑀢𑁆𑀣 𑀧𑀞𑀫𑀣𑁂𑀭𑀯𑀸𑀤𑁂. 𑀅𑀬𑀫𑁂𑀯…𑀧𑁂… 𑀦𑀺𑀬𑀫𑁂𑀢𑀺 𑀢𑀢𑁄 𑀢𑀢𑁄 𑀤𑀼𑀢𑀺𑀬𑀸𑀤𑀺𑀧𑀸𑀤𑀓𑀚𑁆𑀛𑀸𑀦𑀢𑁄 𑀉𑀧𑁆𑀧𑀦𑁆𑀦𑀲𑁆𑀲 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀲𑁆𑀲 𑀧𑀸𑀤𑀓𑀚𑁆𑀛𑀸𑀦𑀸𑀢𑀺𑀓𑁆𑀓𑀦𑁆𑀢𑀸𑀦𑀁 𑀅𑀗𑁆𑀕𑀸𑀦𑀁 𑀅𑀲𑀫𑀸𑀧𑀚𑁆𑀚𑀺𑀢𑀼𑀓𑀸𑀫𑀢𑀸 𑀯𑀺𑀭𑀸𑀕𑀪𑀸𑀯𑀦𑀸𑀪𑀸𑀯𑀢𑁄 𑀇𑀢𑀭𑀲𑁆𑀲 𑀘 𑀅𑀢𑀩𑁆𑀪𑀸𑀯𑀢𑁄. 𑀏𑀢𑁂𑀦𑁂𑀯 𑀳𑀺 𑀧𑀞𑀫𑀣𑁂𑀭𑀯𑀸𑀤𑁂 𑀅𑀧𑀸𑀤𑀓𑀧𑀞𑀫𑀚𑁆𑀛𑀸𑀦𑀧𑀸𑀤𑀓𑀫𑀕𑁆𑀕𑀸 𑀧𑀞𑀫𑀚𑁆𑀛𑀸𑀦𑀺𑀓𑀸𑀯 𑀳𑁄𑀦𑁆𑀢𑀺, 𑀇𑀢𑀭𑁂 𑀘 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀺𑀫𑀕𑁆𑀕𑀸 𑀧𑀸𑀤𑀓𑀚𑁆𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁂𑀳𑀺 𑀢𑀁𑀢𑀁𑀛𑀸𑀦𑀺𑀓𑀸𑀯. 𑀏𑀯𑀁 𑀲𑁂𑀲𑀯𑀸𑀤𑁂𑀲𑀼𑀧𑀺 𑀯𑀺𑀧𑀲𑁆𑀲𑀦𑀸𑀦𑀺𑀬𑀫𑁄 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀦𑀸𑀳 𑁋 ‘‘𑀢𑁂𑀲𑀫𑁆𑀧𑀺 𑀯𑀸𑀤𑁂 𑀅𑀬𑀫𑁂𑀯 𑀧𑀼𑀩𑁆𑀩𑀪𑀸𑀕𑁂 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀯 𑀦𑀺𑀬𑀫𑁂𑀢𑀻’’𑀢𑀺. 𑀯𑀼𑀢𑁆𑀢𑀸𑀯, 𑀢𑀲𑁆𑀫𑀸 𑀦 𑀇𑀥 𑀯𑀢𑁆𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁧𑁦. 𑀦𑀸𑀦𑀢𑁆𑀢𑀸𑀤𑀺 𑀓𑀸𑀫𑀸𑀯𑀘𑀭𑀸𑀤𑀺𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑀢𑁄 𑀦𑀸𑀦𑀸𑀯𑀺𑀥𑀸. 𑀢𑁂𑀦𑀸𑀳 ‘‘𑀅𑀦𑁂𑀓𑀧𑁆𑀧𑀓𑀸𑀭𑀸’’𑀢𑀺. 𑀦𑀸𑀦𑀢𑁆𑀢𑀲𑀺𑀢𑀸𑀢𑀺 𑀭𑀽𑀧𑀲𑀤𑁆𑀤𑀸𑀤𑀺𑀦𑀸𑀦𑀸𑀭𑀫𑁆𑀫𑀡𑀦𑀺𑀲𑁆𑀲𑀬𑀸. 𑀏𑀓𑀢𑁆𑀢𑀸 𑀏𑀓𑀲𑀪𑀸𑀯𑀸 𑀚𑀸𑀢𑀺𑀪𑀽𑀫𑀺𑀆𑀤𑀺𑀯𑀺𑀪𑀸𑀕𑀸𑀪𑀸𑀯𑀢𑁄. 𑀏𑀓𑀸𑀭𑀫𑁆𑀫𑀡𑀦𑀺𑀲𑁆𑀲𑀺𑀢𑀸𑀢𑀺 𑀏𑀓𑀧𑁆𑀧𑀓𑀸𑀭𑁂𑀦𑁂𑀯 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀸. 𑀳𑁂𑀝𑁆𑀞𑀸 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸 𑀯𑀼𑀢𑁆𑀢𑀸 ‘‘𑀩𑀸𑀮𑀲𑁆𑀲 𑀫𑀼𑀴𑁆𑀳𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁦𑁮). 𑀉𑀧𑀭𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀯𑀓𑁆𑀔𑀢𑀺 ‘‘𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁧𑁧). 𑀤𑁆𑀯𑁂 𑀉𑀧𑁂𑀓𑁆𑀔𑀸 𑀕𑀳𑀺𑀢𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀢𑁆𑀢𑀸, 𑀏𑀓𑀚𑁆𑀛𑀁 𑀕𑀳𑁂𑀢𑀩𑁆𑀩𑀢𑁄, 𑀦𑀸𑀦𑀢𑁆𑀢𑀲𑀺𑀢𑀸𑀬 𑀉𑀧𑁂𑀓𑁆𑀔𑀸𑀬 𑀧𑀓𑀸𑀲𑀺𑀢𑀪𑀸𑀯𑀢𑁄 𑀘.

𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸 𑀅𑀜𑁆𑀜𑀸 𑀲𑀤𑁆𑀤𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣𑁂𑀯 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀭𑀽𑀧𑁂𑀲𑀽𑀢𑀺 𑀘 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀭𑀽𑀧𑀸𑀬𑀢𑀦𑀯𑀺𑀲𑁂𑀲𑀸 𑀏𑀯 𑀕𑀳𑀺𑀢𑀸, 𑀅𑀣 𑀔𑁄 𑀓𑀲𑀺𑀡𑀭𑀽𑀧𑀸𑀦𑀺𑀧𑀻𑀢𑀺 𑀆𑀳 𑁋 ‘‘𑀭𑀽𑀧𑁂 𑀉𑀧𑁂𑀓𑁆𑀔𑀸𑀪𑀸𑀯𑀜𑁆𑀘 𑀅𑀜𑁆𑀜𑀸’’𑀢𑀺𑀆𑀤𑀺. 𑀏𑀓𑀢𑁆𑀢𑀲𑀺𑀢𑀪𑀸𑀯𑁄𑀧𑀺 𑀇𑀥 𑀏𑀓𑀢𑁆𑀢𑀯𑀺𑀲𑀬𑀲𑀫𑁆𑀧𑀬𑁄𑀕𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑁄, 𑀦 𑀆𑀭𑀫𑁆𑀫𑀡𑀯𑀲𑁂𑀦 𑀘𑀸𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦𑀸𑀢𑀺 𑀲𑀫𑁆𑀧𑀬𑁄𑀕𑀯𑀲𑁂𑀦. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀦𑀺𑀲𑁆𑀲𑀬𑀢𑀻𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑀺𑀲𑁆𑀲𑀺𑀢𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀔𑀦𑁆𑀥𑀦𑀺𑀲𑁆𑀲𑀺𑀢𑀸. 𑀲𑁂𑀲𑀸𑀲𑀼𑀧𑀻𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑀺𑀲𑁆𑀲𑀺𑀢𑀸𑀤𑀻𑀲𑀼𑀧𑀺.

𑀅𑀭𑀽𑀧𑀸𑀯𑀘𑀭𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀬𑀸𑀢𑀺 𑀅𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀭𑀫𑁆𑀫𑀡𑀸𑀬 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀬. 𑀭𑀽𑀧𑀸𑀯𑀘𑀭𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀸𑀬 𑀓𑀸𑀫𑀭𑀽𑀧𑀸𑀭𑀽𑀧𑀪𑁂𑀤𑀸𑀬 𑀢𑀡𑁆𑀳𑀸𑀬 𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑀫𑁆𑀫𑀬𑀸, 𑀢𑁂𑀪𑀽𑀫𑀓𑀥𑀫𑁆𑀫𑀸, 𑀢𑁂𑀲𑀁 𑀪𑀸𑀯𑁄 𑀢𑀫𑁆𑀫𑀬𑀢𑀸, 𑀢𑀡𑁆𑀳𑀸 𑀬𑀲𑁆𑀲 𑀕𑀼𑀡𑀲𑁆𑀲 𑀯𑀲𑁂𑀦 𑀅𑀢𑁆𑀣𑁂 𑀲𑀤𑁆𑀤𑀦𑀺𑀯𑁂𑀲𑁄, 𑀢𑀤𑀪𑀺𑀥𑀸𑀦𑀓𑁄𑀢𑀺 𑀆𑀳 𑁋 ‘‘𑀢𑀫𑁆𑀫𑀬𑀢𑀸 𑀦𑀸𑀫 𑀢𑀡𑁆𑀳𑀸’’𑀢𑀺. 𑀅𑀢𑀫𑁆𑀫𑀬𑀢𑀸 𑀢𑀫𑁆𑀫𑀬𑀢𑀸𑀬 𑀧𑀝𑀺𑀧𑀓𑁆𑀔𑁄𑀢𑀺 𑀓𑀢𑁆𑀯𑀸. 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀦𑁆𑀢𑀺, ‘‘𑀬𑀤𑀢𑁆𑀣𑀺 𑀬𑀁 𑀪𑀽𑀢𑀁, 𑀢𑀁 𑀧𑀚𑀳𑀢𑀺 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀻’’𑀢𑀺 (𑀤𑀻. 𑀦𑀺. 𑁩.𑁭𑁧; 𑀅. 𑀦𑀺. 𑁭.𑁫𑁫) 𑀏𑀯𑀫𑀸𑀕𑀢𑀁 𑀲𑀗𑁆𑀔𑀸𑀭𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀪𑀽𑀢𑀁 𑀉𑀧𑁂𑀓𑁆𑀔𑀁.

𑁩𑁧𑁧. 𑀬𑀤𑀭𑀺𑀬𑁄𑀢𑀺 𑀏𑀢𑁆𑀣 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀉𑀧𑀬𑁄𑀕𑀧𑀼𑀣𑀼𑀯𑀘𑀦𑁂 𑀘 𑀬-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀬𑁂 𑀲𑀢𑀺𑀧𑀝𑁆𑀞𑀸𑀦𑁂 𑀅𑀭𑀺𑀬𑁄’’𑀢𑀺 𑀆𑀳. 𑀓𑀸𑀫𑀁 ‘‘𑀅𑀭𑀺𑀬𑁄’’𑀢𑀺 𑀧𑀤𑀁 𑀲𑀩𑁆𑀩𑁂𑀲𑀫𑁆𑀧𑀺 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸𑀦𑀁 𑀲𑀸𑀥𑀸𑀭𑀡𑀁, 𑀯𑀓𑁆𑀔𑀫𑀸𑀦𑀲𑁆𑀲 𑀧𑀦 𑀯𑀺𑀲𑁂𑀲𑀲𑁆𑀲 𑀩𑀼𑀤𑁆𑀥𑀸𑀯𑁂𑀡𑀺𑀓𑀢𑁆𑀢𑀸, ‘‘𑀅𑀭𑀺𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀦𑀁 𑀅𑀬𑀫𑀸𑀦𑀼𑀪𑀸𑀯𑁄 𑀅𑀢𑁆𑀣𑀺. 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 𑀦 𑀲𑀼𑀲𑁆𑀲𑀽𑀲𑀦𑁆𑀢𑀻𑀢𑀺 𑀯𑀸, 𑀏𑀓𑀘𑁆𑀘𑁂 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺 𑀏𑀓𑀘𑁆𑀘𑁂 𑀲𑀼𑀲𑁆𑀲𑀽𑀲𑀦𑁆𑀢𑀻𑀢𑀺 𑀯𑀸, 𑀲𑀼𑀲𑁆𑀲𑀽𑀲𑀦𑁆𑀢𑀻𑀢𑀺 𑀯𑀸, 𑀧𑀝𑀺𑀧𑀦𑁆𑀦𑀸𑀧𑀝𑀺𑀧𑀦𑁆𑀦𑀸𑀦𑀁 𑀲𑀸𑀯𑀓𑀸𑀦𑀁 𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼. 𑀲𑀢𑀺𑀁 𑀧𑀝𑁆𑀞𑀧𑁂𑀦𑁆𑀢𑁄𑀢𑀺 𑀧𑀝𑀺𑀖𑀸𑀦𑀼𑀦𑀬𑁂𑀳𑀺 𑀅𑀦𑀯𑀲𑁆𑀲𑀼𑀢𑀢𑁆𑀢𑀸 𑀢𑀤𑀼𑀪𑀬𑀦𑀺𑀯𑀢𑁆𑀢𑀢𑁆𑀢𑀸 𑀲𑀩𑁆𑀩𑀤𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄. 𑀩𑀼𑀤𑁆𑀥𑀸𑀦𑀫𑁂𑀯 𑀲𑀸 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑀢𑀺𑀢𑀸, 𑀦 𑀇𑀢𑀭𑁂𑀲𑀁 𑀆𑀯𑁂𑀡𑀺𑀓𑀥𑀫𑁆𑀫𑀪𑀸𑀯𑀢𑁄. 𑀆𑀤𑀭𑁂𑀦 𑀲𑁄𑀢𑀼𑀫𑀺𑀘𑁆𑀙𑀸 𑀇𑀥 𑀲𑀼𑀲𑁆𑀲𑀽𑀲𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀲𑀤𑁆𑀤𑀳𑀺𑀢𑁆𑀯𑀸 𑀲𑁄𑀢𑀼𑀁 𑀦 𑀇𑀘𑁆𑀙𑀦𑁆𑀢𑀻’’𑀢𑀺 𑀆𑀳. 𑀦 𑀅𑀜𑁆𑀜𑀸𑀢𑀺 ‘‘𑀦 𑀅𑀜𑁆𑀜𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀬𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀦 𑀚𑀸𑀦𑀦𑀢𑁆𑀣𑀸𑀬𑀸’’𑀢𑀺. 𑀲𑀢𑁆𑀣𑀼 𑀑𑀯𑀸𑀤𑀲𑁆𑀲 𑀅𑀦𑀸𑀤𑀺𑀬𑀦𑀫𑁂𑀯 𑀯𑁄𑀓𑁆𑀓𑀫𑀦𑀦𑁆𑀢𑀺 𑀆𑀳 𑁋 ‘‘𑀅𑀢𑀺𑀓𑁆𑀓𑀫𑀺𑀢𑁆𑀯𑀸…𑀧𑁂… 𑀫𑀜𑁆𑀜𑀦𑁆𑀢𑀻’’𑀢𑀺.

𑀕𑁂𑀳𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀯𑀲𑁂𑀦𑀸𑀢𑀺 𑀇𑀤𑀁 𑀇𑀥 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀫𑀢𑁆𑀢𑀤𑀲𑁆𑀲𑀦𑀧𑀤𑀁 𑀤𑀝𑁆𑀞𑀩𑁆𑀩𑀁. 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀲𑁆𑀲𑀧𑀺 𑀲𑀢𑁆𑀣𑀼 𑀧𑀲𑀗𑁆𑀕𑀯𑀲𑁂𑀦 ‘‘𑀦 𑀘𑁂𑀯 𑀅𑀢𑁆𑀢𑀫𑀦𑁄 𑀳𑁄𑀢𑀻’’𑀢𑀺 𑀅𑀢𑁆𑀢𑀫𑀦𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀢𑁆𑀢𑀫𑀦𑀢𑀸 𑀯𑀼𑀢𑁆𑀢𑀸 𑀯𑀺𑀬 𑀳𑁄𑀢𑀻𑀢𑀺 𑀢𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑁋 ‘‘𑀅𑀧𑁆𑀧𑀢𑀻𑀢𑁄 𑀳𑁄𑀢𑀻𑀢𑀺 𑀦 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺. 𑀢𑀲𑁆𑀲 𑀲𑁂𑀢𑀼𑀖𑀸𑀢𑁄 𑀳𑀺 𑀢𑀣𑀸𑀕𑀢𑀸𑀦𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀅𑀢𑁆𑀢𑀫𑀦𑀢𑀸𑀧𑀝𑀺𑀓𑁆𑀔𑁂𑀧𑁄𑀢𑀺 𑀆𑀳 𑁋 ‘‘𑀅𑀧𑁆𑀧𑀝𑀺𑀧𑀦𑁆𑀦𑀓𑁂𑀲𑀼 𑀧𑀦 𑀅𑀦𑀢𑁆𑀢𑀫𑀦𑀢𑀸𑀓𑀸𑀭𑀡𑀲𑁆𑀲 𑀅𑀪𑀸𑀯𑁂𑀦𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺. 𑀧𑀝𑀺𑀖𑀅𑀯𑀲𑁆𑀲𑀯𑁂𑀦𑀸𑀢𑀺 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀧𑀝𑀺𑀖𑀯𑀺𑀲𑁆𑀲𑀦𑁆𑀤𑀦𑁂𑀦, 𑀧𑀝𑀺𑀖𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀺𑀮𑀸𑀯𑀺𑀢𑁄𑀢𑀺 𑀦 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀲𑁆𑀲 𑀩𑁄𑀥𑀺𑀫𑀽𑀮𑁂 𑀏𑀯 𑀧𑀳𑀻𑀦𑀢𑁆𑀢𑀸. 𑀧𑀝𑀺𑀧𑀦𑁆𑀦𑀓𑁂𑀲𑀽𑀢𑀺 𑀇𑀤𑀁 𑀅𑀥𑀺𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀧𑁆𑀧𑀝𑀺𑀧𑀦𑁆𑀦𑀓𑁂𑀲𑀼𑀧𑀺 𑀢𑀣𑀸𑀕𑀢𑀲𑁆𑀲 𑀅𑀦𑀢𑁆𑀢𑀫𑀦𑀢𑀸𑀓𑀸𑀭𑀡𑀁 𑀦𑀢𑁆𑀣𑁂𑀯. 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀏𑀢𑀁 ‘‘𑀅𑀢𑁆𑀢𑀫𑀦𑁄 𑀘𑁂𑀯 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀁 𑀲𑀸𑀯𑀓𑀸𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀢𑁆𑀣𑀼 𑀅𑀦𑀯𑀚𑁆𑀚𑀸𑀬 𑀘𑀺𑀢𑁆𑀢𑀸𑀭𑀸𑀥𑀦𑀸𑀬 𑀲𑀫𑁆𑀪𑀯𑀢𑁄.

𑁩𑁧𑁨. 𑀤𑀫𑀺𑀢𑁄𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀸𑀧𑀸𑀤𑀦𑁂𑀦 𑀲𑀺𑀓𑁆𑀔𑀸𑀧𑀺𑀢𑁄. 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀅𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀏𑀓𑀤𑀺𑀲𑀸𑀬 𑀏𑀯 𑀲𑀢𑁆𑀢𑀤𑀺𑀲𑀸𑀯𑀺𑀥𑀸𑀯𑀦𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑀸𑀭𑀺𑀢𑀸𑀦𑀁 𑀳𑀢𑁆𑀣𑀺𑀤𑀫𑁆𑀫𑀸𑀤𑀻𑀦𑀁 𑀏𑀓𑀤𑀺𑀲𑀸𑀥𑀸𑀯𑀦𑀫𑁆𑀧𑀺 𑀅𑀦𑀺𑀯𑀢𑁆𑀢𑀦𑀯𑀲𑁂𑀦𑁂𑀯 𑀬𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀥𑀸𑀯𑀦𑁆𑀢𑁄 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀻’’𑀢𑀺. 𑀓𑀸𑀬𑁂𑀦 𑀅𑀦𑀺𑀯𑀢𑁆𑀢𑀺𑀢𑁆𑀯𑀸𑀯𑀸𑀢𑀺 𑀓𑀸𑀬𑁂𑀦 𑀅𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀏𑀯. 𑀯𑀺𑀫𑁄𑀓𑁆𑀔𑀯𑀲𑁂𑀦 𑀅𑀝𑁆𑀞 𑀤𑀺𑀲𑀸 𑀯𑀺𑀥𑀸𑀯𑀢𑀺, 𑀦 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀯𑀲𑁂𑀦. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯𑀸𑀢𑀺 𑀏𑀓𑀦𑀻𑀳𑀸𑀭𑁂𑀦𑁂𑀯, 𑀏𑀓𑀲𑁆𑀫𑀺𑀁𑀬𑁂𑀯 𑀯𑀸 𑀤𑀺𑀯𑀲𑁂 𑀏𑀓𑀪𑀸𑀕𑁂𑀦. ‘‘𑀧𑀳𑀸𑀭𑁄’’𑀢𑀺 𑀳𑀺 𑀤𑀺𑀯𑀲𑀲𑁆𑀲 𑀢𑀢𑀺𑀬𑁄 𑀪𑀸𑀕𑁄 𑀯𑀼𑀘𑁆𑀘𑀢𑀺. 𑀯𑀺𑀥𑀸𑀯𑀦𑀜𑁆𑀘𑁂𑀢𑁆𑀣 𑀛𑀸𑀦𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀅𑀓𑀮𑀗𑁆𑀓𑀫𑀧𑁆𑀧𑀢𑀺𑀲𑀸𑀢𑀁 𑀚𑀯𑀦𑀘𑀺𑀢𑁆𑀢𑀧𑀯𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀫𑀸𑀧𑀚𑁆𑀚𑀢𑀺𑀬𑁂𑀯𑀸’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.