𑁬. 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯𑁮. 𑀓𑀫𑁆𑀫𑀲𑁆𑀲 𑀫𑁄𑀖𑀪𑀸𑀯𑁄 𑀦𑀸𑀫 𑀨𑀮𑁂𑀦 𑀢𑀼𑀘𑁆𑀙𑀢𑀸 𑀨𑀮𑀸𑀪𑀸𑀯𑁄𑀢𑀺 𑀆𑀳 𑁋 ‘‘𑀫𑁄𑀖𑀦𑁆𑀢𑀺 𑀢𑀼𑀘𑁆𑀙𑀁 𑀅𑀨𑀮’’𑀦𑁆𑀢𑀺. 𑀢𑀣𑀁 𑀪𑀽𑀢𑀦𑁆𑀢𑀺 𑀲𑀘𑁆𑀘𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳. 𑀧𑀭𑀺𑀩𑁆𑀩𑀸𑀚𑀓𑁄 𑀧𑀦 ‘‘𑀲𑀘𑁆𑀘’’𑀦𑁆𑀢𑀺 𑀇𑀫𑀺𑀦𑀸 𑀢𑀫𑁂𑀯 𑀲𑀨𑀮𑀦𑁆𑀢𑀺 𑀯𑀤𑀢𑀺. 𑀲𑀨𑀮𑀜𑁆𑀳𑀺 𑀓𑀫𑁆𑀫𑀁 𑀲𑀢𑁆𑀣𑀼 𑀅𑀪𑀺𑀫𑀢𑀫𑀦𑁄𑀓𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀜𑁆𑀘 ‘‘𑀫𑁄𑀖𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀯𑀘𑀦𑀁. 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀧𑀭𑀫𑁆𑀧𑀭𑀸𑀬 𑀕𑀳𑁂𑀢𑁆𑀯𑀸. 𑀏𑀲𑀸𑀢𑀺 𑀧𑁄𑀢𑀮𑀺𑀧𑀼𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄. 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀓𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀸𑀧𑀺 𑀳𑀺 𑀢𑀺𑀢𑁆𑀣𑀺𑀬𑀸𑀦𑀁 𑀅𑀦𑁆𑀢𑀭𑁂 𑀧𑀸𑀓𑀝𑀸 𑀚𑀸𑀢𑀸𑀢𑀺. 𑀣𑁂𑀭𑁄𑀢𑀺 𑀲𑀫𑀺𑀤𑁆𑀥𑀺𑀢𑁆𑀣𑁂𑀭𑁄. 𑀬𑀣𑀸 𑀪𑀕𑀯𑀢𑀸 𑀯𑀼𑀢𑁆𑀢𑀁, 𑀢𑀢𑁄 𑀘 𑀅𑀜𑁆𑀜𑀣𑀸𑀯 𑀤𑁄𑀲𑀸𑀭𑁄𑀧𑀦𑀪𑀬𑁂𑀦 𑀕𑀳𑁂𑀢𑁆𑀯𑀸 𑀢𑀢𑁄 𑀪𑀕𑀯𑀦𑁆𑀢𑀁 𑀣𑁂𑀭𑁄 𑀭𑀓𑁆𑀔𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀭𑀺𑀩𑁆𑀩𑀸𑀚𑀓𑁄, ‘‘𑀧𑀭𑀺𑀭𑀓𑁆𑀔𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀻’’𑀢𑀺 𑀅𑀯𑁄𑀘𑀸𑀢𑀺 𑀆𑀳 𑁋 ‘‘𑀧𑀭𑀺𑀭𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀕𑀭𑀳𑀢𑁄 𑀫𑁄𑀘𑀦𑁂𑀦 𑀭𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀲𑀜𑁆𑀘𑁂𑀢𑀦𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀜𑁆𑀘𑁂𑀢𑀦𑀺𑀓𑀁. 𑀓𑀫𑁆𑀫𑀦𑁆𑀢𑀺 𑀲𑀜𑁆𑀘𑁂𑀢𑀦𑀺𑀓𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀅𑀢𑁆𑀢𑀦𑁄 𑀲𑀫𑀬𑁂 𑀇𑀘𑁆𑀙𑀺𑀢𑀢𑁆𑀢𑀸 𑀧𑀭𑀺𑀩𑁆𑀩𑀸𑀚𑀓𑁂𑀦 𑀯𑀼𑀢𑁆𑀢𑀁.

𑀲𑀗𑁆𑀔𑀢𑀲𑀗𑁆𑀔𑀸𑀭𑀢𑀸𑀬 𑀭𑀽𑀧𑀫𑁂𑀯 ‘‘𑀢𑀺𑀮𑀫𑀢𑁆𑀢𑀫𑁆𑀧𑀺 𑀲𑀗𑁆𑀔𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀫𑀁𑀲𑀘𑀓𑁆𑀔𑀼𑀦𑀸𑀯 𑀧𑀲𑁆𑀲𑀢𑀻’’𑀢𑀺. 𑀲𑀫𑀸𑀕𑀫𑀤𑀲𑁆𑀲𑀦𑀁 𑀲𑀦𑁆𑀥𑀸𑀬𑀸𑀢𑀺 𑀓𑀢𑁆𑀣𑀘𑀺𑀧𑀺 𑀢𑀲𑁆𑀲 𑀤𑀲𑁆𑀲𑀦𑀁 𑀲𑀦𑁆𑀥𑀸𑀬, 𑀦 𑀧𑀭𑀺𑀜𑁆𑀜𑀸𑀤𑀲𑁆𑀲𑀦𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀓𑀼𑀢𑁄 𑀧𑀦𑁂𑀯𑀭𑀽𑀧𑀁 𑀓𑀣𑀸𑀲𑀮𑁆𑀮𑀸𑀧’’𑀦𑁆𑀢𑀺.

𑁨𑁯𑁯. 𑀯𑀝𑁆𑀝𑀤𑀼𑀓𑁆𑀔𑀦𑁆𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑀁. 𑀓𑀺𑀮𑁂𑀲𑀤𑀼𑀓𑁆𑀔𑀦𑁆𑀢𑀺 𑀓𑀺𑀮𑁂𑀲𑀲𑀫𑁆𑀪𑀯𑀭𑀸𑀕𑀧𑀭𑀺𑀴𑀸𑀳𑀤𑀼𑀓𑁆𑀔𑀁. 𑀲𑀗𑁆𑀔𑀸𑀭𑀤𑀼𑀓𑁆𑀔𑀦𑁆𑀢𑀺 𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀤𑀼𑀓𑁆𑀔𑀁. 𑀲𑀘𑁂 𑀪𑀸𑀲𑀺𑀢𑀁 𑀪𑀯𑁂𑀬𑁆𑀬𑀸𑀢𑀺 𑀇𑀫𑀁 𑀈𑀤𑀺𑀲𑀁 𑀤𑀼𑀓𑁆𑀔𑀁 𑀲𑀦𑁆𑀥𑀸𑀬 𑀆𑀬𑀲𑁆𑀫𑀢𑀸 𑀲𑀫𑀺𑀤𑁆𑀥𑀺𑀦𑀸 𑀪𑀸𑀲𑀺𑀢𑀁 𑀲𑀺𑀬𑀸 𑀦𑀼 𑀪𑀕𑀯𑀸, 𑀅𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀭𑀡𑀁 𑀬𑀼𑀢𑁆𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁦𑁦. 𑀉𑀫𑁆𑀫𑀗𑁆𑀕𑀦𑁆𑀢𑀺 𑀉𑀫𑁆𑀫𑀼𑀚𑁆𑀚𑀦𑀁, 𑀓𑀣𑀸𑀫𑀼𑀴𑁆𑀳𑁂𑀦 𑀅𑀦𑁆𑀢𑀭𑀸 𑀅𑀜𑁆𑀜𑀸𑀡𑀯𑀺𑀲𑀬𑀧𑀜𑁆𑀳𑀸 𑀉𑀫𑁆𑀫𑀗𑁆𑀕𑀁. 𑀢𑁂𑀦𑀸𑀳 𑁋 ‘‘𑀧𑀜𑁆𑀳𑀸𑀉𑀫𑁆𑀫𑀗𑁆𑀕’’𑀦𑁆𑀢𑀺 𑀦𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦 𑀳𑀺 𑀢𑀁 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀯𑀺𑀲𑀬𑀦𑁆𑀢𑀺? 𑀓𑀸𑀫𑀜𑁆𑀘𑁂𑀢𑀁 𑀦 𑀤𑀺𑀩𑁆𑀩𑀘𑀓𑁆𑀔𑀼𑀯𑀺𑀲𑀬𑀁, 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀪𑀡𑁆𑀟𑀜𑀸𑀯𑀺𑀲𑀬𑀁 𑀧𑀦 𑀲𑀺𑀬𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀅𑀥𑀺𑀧𑁆𑀧𑀸𑀬𑁂𑀦𑁂𑀯𑀸𑀢𑀺 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁂𑀦𑁂𑀯 𑀕𑀬𑁆𑀳𑀫𑀸𑀦𑁂𑀦 𑀢𑀁 𑀅𑀬𑁄𑀦𑀺𑀬𑁄 𑀉𑀫𑁆𑀫𑀼𑀚𑁆𑀚𑀦𑀁 𑀅𑀜𑁆𑀜𑀸𑀲𑀺. 𑀲𑀦𑁆𑀦𑀺𑀲𑀻𑀤𑀺𑀢𑀼𑀁 𑀧𑀼𑀩𑁆𑀩𑁂 𑀦𑀺𑀲𑀺𑀦𑁆𑀦𑀸𑀓𑀸𑀭𑁂𑀦 𑀲𑀦𑁆𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀫𑀺𑀤𑁆𑀥𑀺𑀢𑁆𑀣𑁂𑀭𑁂𑀦 𑀅𑀦𑀪𑀺𑀲𑀗𑁆𑀔𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀓𑀣𑀺𑀢𑀢𑁆𑀢𑀸, ‘‘𑀬𑀁 𑀅𑀪𑀽𑀢𑀁, 𑀢𑀤𑁂𑀯 𑀓𑀣𑁂𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀼𑀘𑁆𑀙𑀺𑀢𑀸, ‘‘𑀓𑀺𑀁 𑀲𑁄 𑀯𑁂𑀤𑀺𑀬𑀢𑀻’’𑀢𑀺 𑀅𑀯𑀺𑀪𑀸𑀕𑁂𑀦 𑀯𑁂𑀤𑀺𑀬𑀫𑀸𑀦𑀲𑁆𑀲 𑀚𑀸𑀢𑀺𑀢𑀢𑁆𑀢𑀸. 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀳𑀺𑀢𑀦𑁆𑀢𑀺 𑀲𑀼𑀔𑀯𑁂𑀤𑀦𑀺𑀬𑀁. 𑀢𑁂𑀦𑀸𑀳 𑁋 ‘‘𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢’’𑀦𑁆𑀢𑀺. 𑀲𑁂𑀲𑁂𑀲𑀽𑀢𑀺, ‘‘𑀤𑀼𑀓𑁆𑀔𑀯𑁂𑀤𑀦𑀺𑀬’’𑀦𑁆𑀢𑀺𑀆𑀤𑀻𑀲𑀼.

𑀳𑁂𑀝𑁆𑀞𑀸 𑀢𑀺𑀓𑀚𑁆𑀛𑀸𑀦𑀘𑁂𑀢𑀦𑀸𑀢𑀺 𑀏𑀢𑁆𑀣, ‘‘𑀓𑀼𑀲𑀮𑀢𑁄’’𑀢𑀺 𑀅𑀥𑀺𑀓𑀸𑀭𑀢𑁄 𑀭𑀽𑀧𑀸𑀯𑀘𑀭𑀓𑀼𑀲𑀮𑀢𑁄 𑀳𑁂𑀝𑁆𑀞𑀸 𑀢𑀺𑀓𑀚𑁆𑀛𑀸𑀦𑀘𑁂𑀢𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀲𑀼𑀔𑀯𑁂𑀤𑀦𑀺𑀬𑀓𑀫𑁆𑀫𑁂𑀲𑀼. 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀇𑀝𑁆𑀞𑀸𑀭𑀫𑁆𑀫𑀡𑁂 𑀲𑀼𑀔𑀫𑁆𑀧𑀻𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺.

𑀬𑀤𑀺 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑁄 𑀅𑀜𑁆𑀜𑀢𑁆𑀣 𑀅𑀤𑀼𑀓𑁆𑀔𑀫𑀲𑀼𑀔𑀁 𑀚𑀦𑁂𑀢𑀺, 𑀅𑀣 𑀓𑀲𑁆𑀫𑀸, ‘‘𑀤𑀼𑀓𑁆𑀔𑀲𑁆𑀲𑁂𑀯 𑀚𑀦𑀦𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀲𑀸 𑀧𑀦 𑀯𑁂𑀤𑀦𑀸’’𑀢𑀺𑀆𑀤𑀺.

𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑁂𑀢𑀦𑀸𑀢𑀺 𑀏𑀢𑁆𑀣 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀬𑀣𑀸 𑀳𑀺 ‘‘𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’’𑀢𑀺 𑀏𑀢𑁆𑀣 𑀬𑀣𑀸𑀮𑀸𑀪𑀕𑁆𑀕𑀳𑀡𑀯𑀲𑁂𑀦 𑀫𑀦𑀲𑀸 𑀲𑀼𑀔𑀯𑁂𑀤𑀦𑀺𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀦𑁆𑀢𑀺 𑀅𑀬𑀫𑀢𑁆𑀣𑁄 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑁂𑀧𑀺 𑀮𑀩𑁆𑀪𑀢𑀻𑀢𑀺 𑀲𑀼𑀔𑀫𑁆𑀧𑀺 𑀚𑀦𑁂𑀢𑀺 𑀉𑀓𑁆𑀓𑀝𑁆𑀞𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀲𑁆𑀲 𑀲𑁄𑀴𑀲𑀯𑀺𑀧𑀸𑀓𑀘𑀺𑀢𑁆𑀢𑀦𑀺𑀩𑁆𑀩𑀢𑁆𑀢𑀦𑀢𑁄, 𑀅𑀬𑀜𑁆𑀘 𑀦𑀬𑁄 𑀳𑁂𑀝𑁆𑀞𑀸, ‘‘𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀻’’𑀢𑀺 𑀏𑀢𑁆𑀣𑀸𑀧𑀺 𑀯𑀢𑁆𑀢𑀩𑁆𑀩𑁄. 𑀧𑀼𑀩𑁆𑀩𑁂 𑀧𑀭𑀺𑀬𑀸𑀬𑀢𑁄 𑀤𑀼𑀓𑁆𑀔𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀲𑀼𑀢𑁆𑀢𑀦𑁆𑀢𑀲𑀁𑀯𑀡𑁆𑀡𑀦𑀸 𑀳𑁂𑀲𑀸𑀢𑀺 𑀇𑀤𑀸𑀦𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀼𑀦 𑀤𑀲𑁆𑀲𑁂𑀢𑀼𑀁, ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀏𑀢𑁆𑀣 𑀤𑀼𑀓𑁆𑀔𑀯𑁂𑀤𑀦𑀺𑀬𑀁 𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀯𑀝𑁆𑀝𑀢𑀻𑀢𑀺. 𑀏𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀯𑁂𑀤𑀦𑀺𑀬𑀲𑁆𑀲 𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀬𑀼𑀚𑁆𑀚𑀫𑀸𑀦𑀢𑁆𑀢𑀸 𑀏𑀢𑀲𑁆𑀲 𑀯𑀲𑁂𑀦 𑀲𑀩𑁆𑀩𑀁 𑀲𑀼𑀔𑀯𑁂𑀤𑀦𑀺𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀜𑁆𑀘 𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀆𑀮𑀬𑁄𑀢𑀺 𑀅𑀪𑀺𑀭𑀼𑀘𑀺. 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀦𑁆𑀢𑀺 𑀫𑀳𑀢𑀺 𑀓𑀫𑁆𑀫𑀯𑀺𑀪𑀚𑀦𑁂 𑀜𑀸𑀡𑀁, 𑀫𑀳𑀦𑁆𑀢𑀁 𑀯𑀸 𑀓𑀫𑁆𑀫𑀯𑀺𑀪𑀚𑀦𑀜𑀸𑀡𑀁. 𑀪𑀸𑀚𑀦𑀁 𑀦𑀸𑀫 𑀦𑀺𑀤𑁆𑀤𑁂𑀲𑁄, 𑀅𑀬𑀁 𑀧𑀦 𑀉𑀤𑁆𑀤𑁂𑀲𑁄𑀢𑀺 𑀓𑀢𑁆𑀯𑀸 𑀆𑀳 𑁋 ‘‘𑀓𑀢𑀫𑁂 𑀘𑀢𑁆𑀢𑀸𑀭𑁄…𑀧𑁂… 𑀫𑀸𑀢𑀺𑀓𑀸𑀝𑁆𑀞𑀧𑀦’’𑀦𑁆𑀢𑀺.

𑁩𑁦𑁧. 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑀲𑁆𑀲 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀲𑁆𑀲 𑀅𑀪𑀸𑀚𑀦𑀪𑀸𑀯𑀢𑁄, 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀻𑀲𑀼 𑀘 𑀅𑀦𑀦𑁆𑀢𑁄𑀕𑀥𑀢𑁆𑀢𑀸. 𑀢𑁂𑀦𑀸𑀳 ‘‘𑀇𑀤𑀁 𑀳𑀻’’𑀢𑀺𑀆𑀤𑀺. 𑀇𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀇𑀥, ‘‘𑀧𑀸𑀡𑀸𑀢𑀺𑀧𑀸𑀢𑀺𑀁 𑀅𑀤𑀺𑀦𑁆𑀦𑀸𑀤𑀸𑀬𑀺’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀯𑀼𑀢𑁆𑀢𑀁 𑀓𑀫𑁆𑀫𑀯𑀺𑀪𑀗𑁆𑀕𑀁 𑀆𑀭𑀩𑁆𑀪. 𑀇𑀫𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀇𑀤𑀁 𑀤𑀲𑁆𑀲𑀦𑀁 𑀕𑀡𑁆𑀳𑀦𑁆𑀢𑀻𑀢𑀺 𑀇𑀤𑀁, ‘‘𑀅𑀢𑁆𑀣𑀺 𑀓𑀺𑀭, 𑀪𑁄, 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀺, 𑀦𑀢𑁆𑀣𑀺 𑀓𑀺𑀭, 𑀪𑁄, 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀻’’𑀢𑀺 𑀘 𑀆𑀤𑀻𑀦𑀺 𑀳𑀢𑁆𑀣𑀺𑀤𑀲𑁆𑀲𑀓𑀅𑀦𑁆𑀥𑀸𑀯𑀺𑀬 𑀤𑀺𑀝𑁆𑀞𑀫𑀢𑁆𑀢𑁂 𑀏𑀯 𑀞𑀢𑁆𑀯𑀸 𑀅𑀘𑀺𑀢𑁆𑀢𑀓𑀤𑀲𑁆𑀲𑀦𑀜𑁆𑀘 𑀕𑀡𑁆𑀳𑀦𑁆𑀢𑀺. 𑀯𑀻𑀭𑀺𑀬𑀁 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀯𑀲𑁂𑀦 𑀆𑀢𑀧𑁆𑀧𑀁, 𑀢𑀤𑁂𑀯 𑀧𑀤𑀳𑀯𑀲𑁂𑀦 𑀧𑀥𑀸𑀦𑀁, 𑀧𑀼𑀦𑀧𑁆𑀧𑀼𑀦𑀁 𑀬𑀼𑀜𑁆𑀚𑀦𑀯𑀲𑁂𑀦 𑀅𑀦𑀼𑀬𑁄𑀕𑁄, 𑀢𑀣𑀸 𑀪𑀸𑀯𑀦𑀸𑀬 𑀦𑀧𑁆𑀧𑀫𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀅𑀧𑁆𑀧𑀫𑀸𑀤𑁄, 𑀲𑀫𑁆𑀫𑀸 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦, ‘‘𑀧𑀜𑁆𑀘𑀧𑀺 𑀯𑀻𑀭𑀺𑀬𑀲𑁆𑀲𑁂𑀯 𑀦𑀸𑀫𑀸𑀦𑀻’’𑀢𑀺 𑀆𑀳. 𑀅𑀧𑁆𑀧𑀫𑀸𑀤𑁄 𑀯𑀸 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁄. 𑀬𑀲𑁆𑀫𑀺𑀁 𑀫𑀦𑀲𑀺𑀓𑀸𑀭𑁂 𑀲𑀢𑀺 𑀢𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀇𑀚𑁆𑀛𑀢𑀺, 𑀅𑀬𑀫𑁂𑀢𑁆𑀣 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑁄𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀘𑁂𑀢𑁄𑀲𑀫𑀸𑀥𑀺𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑀳𑀕𑀢𑀁 𑀘𑀺𑀢𑁆𑀢𑀲𑀫𑀸𑀥𑀺𑀁. 𑀢𑁂𑀦𑀸𑀳 ‘‘𑀤𑀺𑀩𑁆𑀩𑀘𑀓𑁆𑀔𑀼𑀲𑀫𑀸𑀥𑀺’’𑀦𑁆𑀢𑀺. 𑀅𑀜𑁆𑀜𑀣𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀓𑀭𑀡𑀢𑁄 𑀅𑀜𑁆𑀜𑀣𑀸, 𑀢𑀁 𑀧𑀦 𑀓𑀼𑀲𑀮𑀓𑀫𑁆𑀫𑀓𑀭𑀡𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀬𑁂 𑀤𑀲𑁆𑀲𑀦𑁆𑀦𑀁 𑀓𑀼𑀲𑀮𑀸𑀦𑀁 𑀓𑀫𑁆𑀫𑀧𑀣𑀸𑀦𑀁 𑀧𑀽𑀭𑀺𑀢𑀢𑁆𑀢𑀸’’𑀢𑀺 𑀤𑀺𑀝𑁆𑀞𑀺𑀣𑀸𑀫𑁂𑀦𑀸𑀢𑀺 𑀤𑀺𑀝𑁆𑀞𑀺𑀯𑀲𑁂𑀦 𑀤𑀺𑀝𑁆𑀞𑀺𑀩𑀮𑁂𑀦. 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦𑀸𑀢𑀺 𑀤𑀺𑀝𑁆𑀞𑀺𑀯𑀲𑁂𑀦 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀸𑀫𑀸𑀲𑁂𑀦. 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺, ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀥𑀺𑀝𑁆𑀞𑀸𑀬 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸. 𑀆𑀤𑀺𑀬𑀺𑀢𑁆𑀯𑀸𑀢𑀺 𑀤𑀴𑁆𑀳𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸. 𑀯𑁄𑀳𑀭𑀢𑀻𑀢𑀺 𑀅𑀢𑁆𑀢𑀦𑁄 𑀕𑀳𑀺𑀢𑀕𑁆𑀕𑀳𑀡𑀁 𑀧𑀭𑁂𑀲𑀁 𑀤𑀻𑀧𑁂𑀦𑁆𑀢𑁄 𑀯𑁄𑀳𑀭𑀢𑀺.

𑁩𑁦𑁨. 𑀢𑀢𑁆𑀭𑀸𑀦𑀦𑁆𑀤𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀇𑀤𑀫𑁆𑀧𑀻𑀢𑀺 𑀇𑀤𑀁 𑀯𑀘𑀦𑀁. ‘‘𑀢𑀢𑁆𑀭𑀸𑀦𑀦𑁆𑀤𑀸’’𑀢𑀺 𑀏𑀯𑀫𑀸𑀤𑀺𑀯𑀘𑀦𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀦 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀲𑁆𑀲 𑀪𑀸𑀚𑀦𑀁 𑀢𑀲𑁆𑀲 𑀅𑀦𑀺𑀤𑁆𑀤𑁂𑀲𑀪𑀸𑀯𑀢𑁄. 𑀅𑀲𑁆𑀲𑀸𑀢𑀺 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀲𑁆𑀲 𑀫𑀸𑀢𑀺𑀓𑀸𑀝𑁆𑀞𑀧𑀦𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀲𑁂𑀦 𑀅𑀦𑀼𑀜𑁆𑀜𑀸𑀢𑀩𑁆𑀩𑀲𑁆𑀲 𑀘 𑀤𑀲𑁆𑀲𑀦𑀯𑀲𑁂𑀦 𑀉𑀤𑁆𑀤𑁂𑀲𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑁆𑀣 𑀧𑀦𑀸𑀢𑀺 ‘‘𑀢𑀢𑁆𑀭𑀸𑀦𑀦𑁆𑀤𑀸’’𑀢𑀺𑀆𑀤𑀺𑀧𑀸𑀞𑁂. 𑀏𑀢𑁂𑀲𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀏𑀢𑁂𑀲𑀁 𑀳𑁂𑀝𑁆𑀞𑀸 𑀘𑀢𑀽𑀲𑀼𑀧𑀺 𑀯𑀸𑀭𑁂𑀲𑀼 𑀆𑀕𑀢𑀸𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁. 𑀏𑀢𑁆𑀢𑀓𑀸𑀢𑀺 𑀏𑀓𑀘𑁆𑀘𑀺𑀬𑀸 𑀲𑀘𑁆𑀘𑀕𑀺𑀭𑀸. 𑀅𑀦𑀼𑀜𑁆𑀜𑀸𑀢𑀸𑀢𑀺 𑀅𑀦𑀼𑀚𑀸𑀦𑀺𑀢𑀸. 𑀅𑀦𑀦𑀼𑀜𑁆𑀜𑀸𑀢𑀸𑀢𑀺 𑀧𑀝𑀺𑀓𑁆𑀔𑁂𑀧𑀺𑀢𑀸. 𑀇𑀥 𑀅𑀦𑀦𑀼𑀜𑁆𑀜𑀸𑀢𑀫𑀼𑀔𑁂𑀦 𑀤𑀻𑀧𑀺𑀢𑀁 𑀅𑀦𑀦𑀼𑀜𑁆𑀜𑀸𑀢𑀪𑀸𑀯𑀫𑀢𑁆𑀢𑀁. 𑀢𑀢𑁆𑀭𑀸𑀦𑀦𑁆𑀤𑀸𑀢𑀺𑀆𑀤𑀺𑀓𑁂 𑀢𑀢𑁆𑀭𑀸𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀢𑁂𑀲𑀼 𑀘𑀢𑀽𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀽’’𑀢𑀺 𑀆𑀳. 𑀇𑀤𑀁 𑀯𑀘𑀦𑀁 ‘‘𑀅𑀢𑁆𑀣𑀺 𑀓𑀺𑀭, 𑀪𑁄…𑀧𑁂… 𑀯𑀺𑀧𑀸𑀓𑁄’’𑀢𑀺 𑀇𑀤𑀁 𑀏𑀯𑀁 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀢𑀣𑀸𑀯𑀸𑀤𑀺𑀦𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑁆𑀲. 𑀅𑀜𑁆𑀜𑁂𑀦𑀸𑀓𑀸𑀭𑁂𑀦𑀸𑀢𑀺 ‘‘𑀬𑁄 𑀓𑀺𑀭, 𑀪𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀓𑀸𑀭𑀡𑀢𑁄 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀽𑀢𑀺 ‘‘𑀅𑀢𑁆𑀣𑀺 𑀓𑀺𑀭, 𑀪𑁄…𑀧𑁂… 𑀯𑀺𑀧𑀸𑀓𑁄’’𑀢𑀺 𑀘, ‘‘𑀅𑀧𑀸𑀬𑀁…𑀧𑁂… 𑀦𑀺𑀭𑀬𑀁 𑀉𑀧𑀧𑀦𑁆𑀦’’𑀦𑁆𑀢𑀺 𑀘 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀧𑀸𑀞𑀧𑀤𑁂𑀲𑁂𑀲𑀼. 𑀅𑀦𑀼𑀜𑁆𑀜𑀸𑀢𑀸 𑀢𑀤𑀢𑁆𑀣𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄. 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 ‘‘𑀬𑁄 𑀓𑀺𑀭, 𑀪𑁄…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺’’, ‘‘𑀬𑀫𑁆𑀧𑀺 𑀲𑁄…𑀧𑁂… 𑀢𑁂 𑀲𑀜𑁆𑀚𑀸𑀦𑀦𑁆𑀢𑀺’’, ‘‘𑀬𑀫𑁆𑀧𑀺 𑀲𑁄 𑀬𑀤𑁂𑀯…𑀧𑁂… 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀧𑀸𑀞𑀧𑀤𑁂𑀲𑁂𑀲𑀼. 𑀅𑀦𑀦𑀼𑀜𑁆𑀜𑀸𑀢𑀸 𑀢𑀤𑀢𑁆𑀣𑀲𑁆𑀲𑀸𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀢𑁄 𑀘. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀜𑁆𑀜𑀣𑀸 𑀳𑀺, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡’’𑀦𑁆𑀢𑀺. 𑀬𑀣𑀸 𑀢𑁂 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀸 𑀧𑀤𑁂𑀲𑀜𑀸𑀡𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀫𑁆𑀫𑀯𑀺𑀪𑀗𑁆𑀕𑀁 𑀲𑀜𑁆𑀚𑀸𑀦𑀦𑁆𑀢𑀺, 𑀢𑀢𑁄 𑀅𑀜𑁆𑀜𑀣𑀸𑀯 𑀲𑀩𑁆𑀩𑀲𑁄 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀲𑁆𑀲 𑀢𑀣𑀸 𑀆𑀕𑀫𑀦𑀸𑀤𑀺𑀅𑀢𑁆𑀣𑁂𑀦 𑀢𑀣𑀸𑀕𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁦𑁩. 𑀇𑀫𑀺𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀓𑁂𑀦 𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀤𑀺𑀝𑁆𑀞𑁄, 𑀢𑀢𑁄 𑀧𑀼𑀩𑁆𑀩𑁂𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀢𑀢𑁄 𑀓𑀭𑀺𑀬𑀫𑀸𑀦𑀓𑀫𑁆𑀫𑀢𑁄 𑀧𑀼𑀩𑁆𑀩𑁂. 𑀔𑀦𑁆𑀤𑁄𑀢𑀺 𑀓𑀼𑀫𑀸𑀭𑁄. 𑀲𑀺𑀯𑁄𑀢𑀺 𑀇𑀲𑁆𑀲𑀭𑁄. 𑀧𑀺𑀢𑀸𑀫𑀳𑁄𑀢𑀺 𑀩𑁆𑀭𑀳𑁆𑀫𑀸. 𑀇𑀲𑁆𑀲𑀭𑀸𑀤𑀻𑀳𑀻𑀢𑀺 𑀇𑀲𑁆𑀲𑀭𑀩𑁆𑀭𑀳𑁆𑀫𑀧𑀚𑀸𑀧𑀢𑀺𑀆𑀤𑀻𑀳𑀺. 𑀯𑀺𑀲𑀝𑁆𑀞𑁄𑀢𑀺 𑀦𑀺𑀫𑁆𑀫𑀺𑀢𑁄. 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦𑀸𑀢𑀺 𑀫𑀺𑀘𑁆𑀙𑀸𑀤𑀲𑁆𑀲𑀦𑀯𑀲𑁂𑀦. 𑀬𑀦𑁆𑀢𑀺 𑀬𑀁 𑀓𑀫𑁆𑀫𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀓𑀫𑁆𑀫𑁂𑀲𑀼. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀬𑁄𑀚𑀦𑀸. 𑀉𑀧𑀧𑀚𑁆𑀚𑀺𑀢𑁆𑀯𑀸𑀢𑀺 𑀤𑀼𑀢𑀺𑀬𑀪𑀯𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸. 𑀅𑀧𑀭𑀲𑁆𑀫𑀺𑀁 𑀧𑀭𑀺𑀬𑀸𑀬𑁂𑀢𑀺 𑀅𑀜𑁆𑀜𑀲𑁆𑀫𑀺𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀯𑁂.

𑀏𑀓𑀁 𑀓𑀫𑁆𑀫𑀭𑀸𑀲𑀺𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀪𑁂𑀤𑁂𑀦 𑀏𑀓𑀁 𑀓𑀫𑁆𑀫𑀲𑀫𑀼𑀤𑀸𑀬𑀁. 𑀏𑀓𑀁 𑀯𑀺𑀧𑀸𑀓𑀭𑀸𑀲𑀺𑀦𑁆𑀢𑀺 𑀢𑀲𑁆𑀲𑁂𑀯 𑀅𑀗𑁆𑀕𑁂𑀦 𑀏𑀓𑀁 𑀯𑀺𑀧𑀸𑀓𑀲𑀫𑀼𑀤𑀸𑀬𑀁. 𑀇𑀫𑀺𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀓𑁂𑀦 𑀲𑀫𑀡𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀅𑀤𑀺𑀝𑁆𑀞𑀸. 𑀢𑀬𑁄𑀢𑀺 ‘‘𑀧𑀼𑀩𑁆𑀩𑁂 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸 𑀢𑀬𑁄. 𑀤𑁆𑀯𑁂 𑀯𑀺𑀧𑀸𑀓𑀭𑀸𑀲𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀺𑀬𑁄 𑀅𑀧𑀭𑀸𑀧𑀭𑀺𑀬𑀸𑀬𑀯𑁂𑀤𑀦𑀺𑀬𑁄𑀢𑀺 𑀤𑁆𑀯𑁂 𑀯𑀺𑀧𑀸𑀓𑀭𑀸𑀲𑀻. 𑀉𑀧𑀧𑀚𑁆𑀚𑀯𑁂𑀤𑀦𑀺𑀬𑀁 𑀧𑀦 𑀢𑁂𑀦 𑀤𑀺𑀝𑁆𑀞𑀁, 𑀢𑀲𑁆𑀫𑀸 ‘‘𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑁄 𑀏𑀓𑁄, 𑀅𑀤𑀺𑀝𑁆𑀞𑀸 𑀢𑀬𑁄𑀢𑀺 𑀤𑀺𑀝𑁆𑀞𑁂 𑀘 𑀅𑀤𑀺𑀝𑁆𑀞𑁂 𑀘 𑀘𑀢𑁆𑀢𑀸𑀭𑁄 𑀓𑀫𑁆𑀫𑀭𑀸𑀲𑀻, 𑀢𑀣𑀸 𑀤𑀺𑀝𑁆𑀞𑁄 𑀏𑀓𑁄, 𑀅𑀤𑀺𑀝𑁆𑀞𑀸 𑀤𑁆𑀯𑁂𑀢𑀺 𑀢𑀬𑁄 𑀯𑀺𑀧𑀸𑀓𑀭𑀸𑀲𑀻. 𑀇𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀲𑀢𑁆𑀢 𑀜𑀸𑀡𑀲𑁆𑀲 𑀧𑀯𑀢𑁆𑀢𑀦𑀝𑁆𑀞𑀸𑀦𑀸𑀦𑀺. ‘‘𑀇𑀫𑀲𑁆𑀲 𑀦𑀸𑀫 𑀓𑀫𑁆𑀫𑀲𑁆𑀲 𑀇𑀤𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀓𑀫𑁆𑀫𑀲𑁆𑀲, 𑀨𑀮𑀲𑁆𑀲 𑀯𑀸 𑀅𑀤𑀺𑀝𑁆𑀞𑀢𑁆𑀢𑀸, ‘‘𑀤𑀼𑀢𑀺𑀬𑀯𑀸𑀭𑁂 𑀤𑀺𑀩𑁆𑀩𑀘𑀓𑁆𑀔𑀼𑀓𑁂𑀦 𑀓𑀺𑀜𑁆𑀘𑀺 𑀦 𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀞𑀫𑀁 𑀯𑀼𑀢𑁆𑀢𑀦𑀬𑁂𑀦 𑀢𑀬𑁄 𑀓𑀫𑁆𑀫𑀭𑀸𑀲𑀻 𑀯𑁂𑀤𑀺𑀢𑀩𑁆𑀩𑀸, 𑀇𑀥 𑀤𑀺𑀩𑁆𑀩𑀘𑀓𑁆𑀔𑀼𑀓𑁂𑀦 𑀤𑀺𑀝𑁆𑀞𑀲𑁆𑀲 𑀅𑀪𑀸𑀯𑀢𑁄, ‘‘𑀧𑀘𑁆𑀘𑀢𑁆𑀢𑀝𑁆𑀞𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀪𑀯𑀢𑀺 𑀯𑀟𑁆𑀠𑀢𑀺 𑀏𑀢𑁂𑀦𑀸𑀢𑀺 𑀪𑀩𑁆𑀩𑀁, 𑀯𑀟𑁆𑀠𑀺𑀦𑀺𑀫𑀺𑀢𑁆𑀢𑀁. 𑀦 𑀪𑀩𑁆𑀩𑀁 𑀅𑀪𑀩𑁆𑀩𑀦𑁆𑀢𑀺 𑀆𑀳 ‘‘𑀪𑀽𑀢𑀯𑀺𑀭𑀳𑀺𑀢’’𑀦𑁆𑀢𑀺. 𑀅𑀢𑁆𑀢𑀦𑁄 𑀨𑀮𑁂 𑀪𑀸𑀲𑀦𑀁 𑀤𑀺𑀩𑁆𑀩𑀦𑀁 𑀆𑀪𑀸𑀲𑀦𑀦𑁆𑀢𑀺 𑀆𑀳 𑁋 ‘‘𑀆𑀪𑀸𑀲𑀢𑀺 𑀅𑀪𑀺𑀪𑀯𑀢𑀺 𑀧𑀝𑀺𑀩𑀸𑀳𑀢𑀻’’𑀢𑀺. 𑀩𑀮𑀯𑀓𑀫𑁆𑀫𑀦𑁆𑀢𑀺 𑀫𑀳𑀸𑀲𑀸𑀯𑀚𑁆𑀚𑀁 𑀓𑀫𑁆𑀫𑀁 𑀕𑀭𑀼𑀲𑀫𑀸𑀲𑁂𑀯𑀺𑀢𑀸𑀤𑀺𑀪𑁂𑀤𑀁. 𑀆𑀲𑀦𑁆𑀦𑁂𑀢𑀺 𑀫𑀭𑀡𑁂, 𑀅𑀪𑀺𑀡𑁆𑀳𑀁 𑀉𑀧𑀝𑁆𑀞𑀸𑀦𑁂𑀦 𑀯𑀸 𑀢𑀲𑁆𑀲 𑀫𑀭𑀡𑀘𑀺𑀢𑁆𑀢𑀲𑁆𑀲 𑀆𑀲𑀦𑁆𑀦𑁂. 𑀩𑀮𑀯𑀓𑀫𑁆𑀫𑀦𑁆𑀢𑀺 𑀕𑀭𑀼𑀲𑀫𑀸𑀲𑁂𑀯𑀺𑀢𑀢𑀸𑀤𑀺𑀯𑀲𑁂𑀦 𑀩𑀮𑀯𑀁 𑀓𑀼𑀲𑀮𑀓𑀫𑁆𑀫𑀁. 𑀤𑀼𑀩𑁆𑀩𑀮𑀓𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀤𑀼𑀩𑁆𑀩𑀮𑀲𑁆𑀲. 𑀆𑀲𑀦𑁆𑀦𑁂 𑀓𑀼𑀲𑀮𑀁 𑀓𑀢𑀦𑁆𑀢𑀺 𑀇𑀥𑀸𑀧𑀺 𑀆𑀲𑀦𑁆𑀦𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀦𑀸𑀢𑀺 𑀫𑀭𑀡𑀲𑁆𑀲 𑀆𑀲𑀦𑁆𑀦𑀓𑀸𑀮𑁂 𑀓𑀫𑁆𑀫𑀲𑁆𑀲 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀦. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀪𑀽𑀢𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺 𑀅𑀓𑀼𑀲𑀮𑀦𑁆𑀢𑀺 𑀬𑁄𑀚𑀦𑀸. 𑀢𑀺𑀢𑁆𑀣𑀺𑀬𑀸 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑁂𑀲𑀼 𑀅𑀓𑀼𑀲𑀮𑀢𑀸𑀬 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀺𑀧𑀸𑀓𑀲𑁆𑀲 𑀓𑀸𑀭𑀡𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀺 𑀳𑀢𑁆𑀣𑀺𑀤𑀲𑁆𑀲𑀓𑀅𑀦𑁆𑀥𑀸𑀤𑀬𑁄 𑀯𑀺𑀬 𑀤𑀺𑀝𑁆𑀞𑀫𑀢𑁆𑀢𑀸𑀪𑀺𑀦𑀺𑀯𑁂𑀲𑀺𑀦𑁄𑀢𑀺, ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸…𑀧𑁂… 𑀉𑀧𑀝𑁆𑀞𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀢𑀭𑀲𑁆𑀫𑀺𑀦𑁆𑀢𑀺 𑀪𑀩𑁆𑀩𑀜𑁆𑀘𑁂𑀯 𑀪𑀩𑁆𑀩𑀸𑀪𑀸𑀲𑀜𑁆𑀘, 𑀪𑀩𑁆𑀩𑀁 𑀅𑀪𑀩𑁆𑀩𑀸𑀪𑀸𑀲𑀦𑁆𑀢𑀺 𑀇𑀫𑀲𑁆𑀫𑀺𑀁 𑀤𑁆𑀯𑀬𑁂. 𑀏𑀲𑁂𑀯 𑀦𑀬𑁄 𑀧𑀞𑀫𑀤𑀼𑀢𑀺𑀬𑀧𑀼𑀕𑁆𑀕𑀮𑀯𑀲𑁂𑀦 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀓𑀫𑁆𑀫𑀸𑀦𑀁 𑀬𑁄𑀚𑀦𑀸𑀦𑀬𑁄 𑀯𑀼𑀢𑁆𑀢𑁄 𑀉𑀧𑀝𑁆𑀞𑀸𑀦𑀸𑀓𑀸𑀭𑀯𑀲𑁂𑀦. 𑀅𑀬𑀫𑁂𑀯 𑀢𑀢𑀺𑀬𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀯𑀲𑁂𑀦 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀓𑀫𑁆𑀫𑀸𑀦𑀁 𑀬𑁄𑀚𑀦𑀸𑀦𑀬𑁄. 𑀢𑀢𑀺𑀬𑀲𑁆𑀲 𑀳𑀺 𑀓𑀫𑁆𑀫𑀲𑁆𑀲 𑀓𑀼𑀲𑀮𑀢𑁆𑀢𑀸 𑀢𑀲𑁆𑀲 𑀘 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀢𑀢𑁆𑀣 𑀓𑀸𑀭𑀡𑀪𑀽𑀢𑀁 𑀓𑀼𑀲𑀮𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺; 𑀢𑀣𑀸 𑀘𑀢𑀼𑀢𑁆𑀣𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀓𑀼𑀲𑀮𑀢𑁆𑀢𑀸, 𑀢𑀲𑁆𑀲 𑀧𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀪𑀽𑀢𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀅𑀓𑀼𑀲𑀮𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.