𑁫. 𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮𑁯. 𑀅𑀗𑁆𑀕𑀲𑀼𑀪𑀢𑀸𑀬𑀸𑀢𑀺 𑀅𑀗𑁆𑀕𑀸𑀦𑀁 𑀳𑀢𑁆𑀣𑀧𑀸𑀤𑀸𑀤𑀺𑀲𑀭𑀻𑀭𑀸𑀯𑀬𑀯𑀸𑀦𑀁 𑀲𑀼𑀦𑁆𑀤𑀭𑀪𑀸𑀯𑁂𑀦. 𑀬𑀁 𑀅𑀧𑀘𑁆𑀘𑀁 𑀓𑀼𑀘𑁆𑀙𑀺𑀢𑀁 𑀫𑀼𑀤𑁆𑀥𑀁 𑀯𑀸, 𑀢𑀢𑁆𑀣 𑀮𑁄𑀓𑁂 𑀫𑀸𑀡𑀯𑀯𑁄𑀳𑀸𑀭𑁄, 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀤𑀳𑀭𑀓𑀸𑀮𑁂 𑀲𑀼𑀤𑁆𑀥𑀥𑀸𑀢𑀼𑀓𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, ‘‘𑀢𑀭𑀼𑀡𑀓𑀸𑀮𑁂 𑀯𑁄𑀳𑀭𑀺𑀁𑀲𑀽’’𑀢𑀺. 𑀅𑀥𑀺𑀧𑀢𑀺𑀢𑁆𑀢𑀸𑀢𑀺 𑀇𑀲𑁆𑀲𑀭𑀪𑀸𑀯𑀢𑁄.

𑀲𑀫𑀸𑀳𑀸𑀭𑀦𑁆𑀢𑀺 𑀲𑀦𑁆𑀦𑀺𑀘𑀬𑀁. 𑀧𑀡𑁆𑀟𑀺𑀢𑁄 𑀖𑀭𑀫𑀸𑀯𑀲𑁂𑀢𑀺 𑀬𑀲𑁆𑀫𑀸 𑀅𑀧𑁆𑀧𑀢𑀭𑁂𑀧𑀺 𑀩𑁆𑀬𑀬𑀫𑀸𑀦𑁂 𑀪𑁄𑀕𑀸 𑀔𑀻𑀬𑀦𑁆𑀢𑀺, 𑀅𑀧𑁆𑀧𑀢𑀭𑁂𑀧𑀺 𑀲𑀜𑁆𑀘𑀬𑀫𑀸𑀦𑁂 𑀯𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀜𑁆𑀜𑀼𑀚𑀸𑀢𑀺𑀓𑁄 𑀓𑀺𑀜𑁆𑀘𑀺 𑀩𑁆𑀬𑀬𑀁 𑀅𑀓𑀢𑁆𑀯𑀸 𑀅𑀬𑀫𑁂𑀯 𑀉𑀧𑁆𑀧𑀸𑀤𑁂𑀦𑁆𑀢𑁄 𑀖𑀭𑀸𑀯𑀸𑀲𑀁 𑀅𑀦𑀼𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀮𑁄𑀪𑀸𑀤𑁂𑀲𑀺𑀢𑀫𑀢𑁆𑀣𑀁 𑀯𑀤𑀢𑀺.

𑀥𑀦𑀮𑁄𑀪𑁂𑀦…𑀧𑁂… 𑀦𑀺𑀩𑁆𑀩𑀢𑁆𑀢𑁄. 𑀮𑁄𑀪𑀯𑀲𑀺𑀓𑀲𑁆𑀲 𑀳𑀺 𑀕𑀢𑀺 𑀦𑀺𑀭𑀬𑁄 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀯𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀣𑀺𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀲𑁆𑀲𑀸𑀤𑀕𑀣𑀺𑀢𑀁 𑀯𑀸. 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀮𑀗𑁆𑀓𑀭𑁂𑀬𑁆𑀬, 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸’’𑀢𑀺 (𑀲𑀁. 𑀦𑀺. 𑁪.𑁨𑁩𑁫). 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀓𑀢𑁄𑀓𑀸𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀢𑁄.

𑀧𑀢𑁆𑀢𑀓𑁆𑀔𑀦𑁆𑀥𑀅𑀥𑁄𑀫𑀼𑀔𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀑𑀦𑀸𑀫𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀩𑁆𑀭𑀸𑀳𑁆𑀫𑀡𑀘𑀸𑀭𑀺𑀢𑁆𑀢𑀲𑁆𑀲 𑀪𑀸𑀯𑀺𑀢𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀻𑀢𑀺 𑀲𑀼𑀢𑀫𑁂𑀢𑀁 𑀫𑀬𑀸, ‘‘𑀫𑀬𑁆𑀳𑀁 𑀧𑀺𑀢𑀸 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺, 𑀏𑀢𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀓𑀺𑀫𑀺𑀤𑀁 𑀯𑀼𑀢𑁆𑀢𑀦𑁆𑀢𑀺 𑀇𑀫𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺.

𑀢𑀣𑁂𑀯 𑀯𑀢𑁆𑀯𑀸𑀢𑀺 𑀬𑀣𑀸 𑀲𑀼𑀦𑀔𑀲𑁆𑀲 𑀯𑀼𑀢𑁆𑀢𑀁, 𑀢𑀣𑁂𑀯 𑀯𑀢𑁆𑀯𑀸. 𑀅𑀯𑀺𑀲𑀁𑀯𑀸𑀤𑀦𑀢𑁆𑀣𑀦𑁆𑀢𑀺, ‘‘𑀢𑁄𑀤𑁂𑀬𑁆𑀬𑀩𑁆𑀭𑀸𑀳𑁆𑀫𑀡𑁄 𑀲𑀼𑀦𑀔𑁄 𑀚𑀸𑀢𑁄’’𑀢𑀺 𑀅𑀢𑁆𑀢𑀦𑁄 𑀯𑀘𑀦𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑀢𑁆𑀣𑀁, 𑀯𑀺𑀲𑀁𑀯𑀸𑀤𑀦𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀜𑀸𑀢𑁄𑀫𑁆𑀳𑀺 𑀇𑀫𑀺𑀦𑀸𑀢𑀺 𑀇𑀫𑀺𑀦𑀸 𑀫𑀫 𑀧𑀼𑀢𑁆𑀢𑁂𑀦 𑀫𑀬𑁆𑀳𑀁 𑀧𑀼𑀭𑀺𑀫𑀚𑀸𑀢𑀺𑀬𑀁 𑀧𑀺𑀢𑀸𑀢𑀺 𑀏𑀯𑀁 𑀜𑀸𑀢𑁄 𑀅𑀫𑁆𑀳𑀻𑀢𑀺 𑀚𑀸𑀦𑀺𑀢𑁆𑀯𑀸. 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀓𑀺𑀭 𑀲𑀼𑀦𑀔𑁄 𑀢𑀣𑀸 𑀤𑀲𑁆𑀲𑁂𑀢𑀺, 𑀦 𑀚𑀸𑀢𑀺𑀲𑁆𑀲𑀭𑀢𑀸𑀬. 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀪𑀼𑀓𑁆𑀓𑀭𑀡𑀁 𑀧𑀦 𑀧𑀼𑀭𑀺𑀫𑀚𑀸𑀢𑀺𑀲𑀺𑀤𑁆𑀥𑀯𑀸𑀲𑀦𑀸𑀬. 𑀪𑀯𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀪𑀯𑀦𑁆𑀢𑀭𑀪𑀸𑀯𑁂𑀦 𑀧𑀝𑀺𑀘𑁆𑀙𑀦𑁆𑀦𑀁. 𑀦𑀸𑀫-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂. 𑀧𑀝𑀺𑀲𑀦𑁆𑀥𑀺𑀅𑀦𑁆𑀢𑀭𑀦𑁆𑀢𑀺 𑀅𑀜𑁆𑀜𑀚𑀸𑀢𑀺𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂𑀦 𑀳𑁂𑀝𑁆𑀞𑀺𑀫𑀚𑀸𑀢𑀁 𑀕𑀢𑀺𑀁. 𑀅𑀗𑁆𑀕𑀯𑀺𑀚𑁆𑀚𑀸𑀧𑀸𑀞𑀓𑁄 𑀓𑀺𑀭𑁂𑀲, 𑀢𑁂𑀦 𑀅𑀧𑁆𑀧𑀸𑀬𑀼𑀓𑀤𑀻𑀖𑀸𑀬𑀼𑀓𑀢𑀸𑀤𑀺𑀯𑀲𑁂𑀦 𑀘𑀼𑀤𑁆𑀤𑀲 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺; 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺, ‘‘𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀧𑁆𑀧𑀸𑀬𑀼𑀓𑀢𑀸𑀤𑀬𑁄 𑀯𑀺𑀲𑁂𑀲𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀯𑀲𑁂𑀦 𑀲𑀮𑁆𑀮𑀓𑁆𑀔𑀺𑀬𑀦𑁆𑀢𑀺. 𑀦 𑀔𑁄 𑀧𑀦𑁂𑀢𑀁 𑀬𑀼𑀢𑁆𑀢𑀁 ‘𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀬𑀸𑀯 𑀢𑁂𑀲𑀁 𑀢𑁂𑀲𑀁 𑀓𑀸𑀭𑀡’𑀦𑁆𑀢𑀺; 𑀢𑀲𑁆𑀫𑀸 𑀪𑀯𑀺𑀢𑀩𑁆𑀩𑀫𑁂𑀢𑁆𑀣 𑀅𑀜𑁆𑀜𑁂𑀦𑁂𑀯 𑀓𑀸𑀭𑀡𑁂𑀦. 𑀲𑀫𑀡𑁄 𑀕𑁄𑀢𑀫𑁄 𑀢𑀁 𑀓𑀸𑀭𑀡𑀁 𑀯𑀺𑀪𑀚𑀺𑀢𑁆𑀯𑀸 𑀓𑀣𑁂𑀲𑁆𑀲𑀢𑀺, 𑀏𑀯𑀸𑀬𑀁 𑀲𑀩𑁆𑀩𑀜𑁆𑀜𑀽𑀢𑀺 𑀦𑀺𑀘𑁆𑀙𑀬𑁄 𑀫𑁂 𑀅𑀧𑀡𑁆𑀡𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺, ‘‘𑀢𑀺𑀭𑀘𑁆𑀙𑀸𑀦𑀕𑀢𑀁 𑀫𑀦𑀼𑀲𑁆𑀲𑀁 𑀯𑀸 𑀆𑀯𑀺𑀲𑀺𑀢𑁆𑀯𑀸 𑀇𑀘𑁆𑀙𑀺𑀢𑀢𑁆𑀣𑀓𑀲𑀸𑀯𑀦𑀁 𑀦𑀸𑀫 𑀫𑀳𑀸𑀫𑀦𑁆𑀢𑀯𑀺𑀚𑁆𑀚𑀸𑀯𑀲𑁂𑀦 𑀳𑁄𑀢𑀺; 𑀢𑀲𑁆𑀫𑀸 𑀦 𑀏𑀢𑁆𑀢𑀸𑀯𑀢𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀸 𑀲𑀼𑀦𑀺𑀘𑁆𑀙𑀺𑀢𑀸 𑀳𑁄𑀢𑀺. 𑀬𑀁 𑀦𑀽𑀦𑀸𑀳𑀁 𑀓𑀫𑁆𑀫𑀨𑀮𑀫𑀲𑁆𑀲 𑀉𑀤𑁆𑀤𑀺𑀲𑁆𑀲 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀁, 𑀢𑀢𑁆𑀣 𑀘 𑀫𑁂 𑀘𑀺𑀢𑁆𑀢𑀁 𑀆𑀭𑀸𑀥𑁂𑀦𑁆𑀢𑁄 𑀧𑀜𑁆𑀳𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀺. 𑀏𑀯𑀸𑀬𑀁 𑀲𑀩𑁆𑀩𑀜𑁆𑀜𑀽𑀢𑀺 𑀯𑀺𑀦𑀺𑀘𑁆𑀙𑀬𑁄 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀢𑁂 𑀧𑀜𑁆𑀳𑁂 𑀧𑀼𑀘𑁆𑀙𑀢𑀻’’𑀢𑀺.

𑀪𑀡𑁆𑀟𑀓𑀦𑁆𑀢𑀺 𑀲𑀸𑀧𑀢𑁂𑀬𑁆𑀬𑀁, 𑀲𑀦𑁆𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀼𑀦𑀸 𑀤𑀸𑀢𑀩𑁆𑀩𑀁 𑀆𑀤𑀺𑀬𑀦𑁆𑀢𑀻𑀢𑀺 𑀓𑀫𑁆𑀫𑀤𑀸𑀬𑀸𑀤𑀸, 𑀅𑀢𑁆𑀢𑀦𑀸 𑀓𑀢𑀽𑀧𑀘𑀺𑀢𑀓𑀫𑁆𑀫𑀨𑀮𑀪𑀸𑀕𑀻𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀓𑀫𑁆𑀫𑀤𑀸𑀬𑀚𑁆𑀚𑀁 𑀓𑀸𑀭𑀡𑁄𑀧𑀘𑀸𑀭𑁂𑀦 𑀯𑀤𑀦𑁆𑀢𑁄, ‘‘𑀓𑀫𑁆𑀫𑀁 𑀏𑀢𑁂𑀲𑀁 𑀤𑀸𑀬𑀚𑁆𑀚𑀁 𑀪𑀡𑁆𑀟𑀓𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀆𑀳 𑁋 𑀬𑀣𑀸 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺 (𑀤𑀻. 𑀦𑀺. 𑁩.𑁮𑁦). 𑀬𑀯𑀢𑀺 𑀨𑀮𑀁 𑀲𑀪𑀸𑀯𑀢𑁄 𑀪𑀺𑀦𑁆𑀦𑀫𑁆𑀧𑀺 𑀅𑀪𑀺𑀦𑁆𑀦𑀁 𑀯𑀺𑀬 𑀫𑀺𑀲𑁆𑀲𑀺𑀢𑀁 𑀳𑁄𑀢𑀺, 𑀏𑀢𑁂𑀦𑀸𑀢𑀺 𑀬𑁄𑀦𑀻𑀢𑀺 𑀆𑀳 𑁋 ‘‘𑀓𑀫𑁆𑀫𑀁 𑀏𑀢𑁂𑀲𑀁 𑀬𑁄𑀦𑀺 𑀓𑀸𑀭𑀡’’𑀦𑁆𑀢𑀺. 𑀫𑀫𑀢𑁆𑀢𑀯𑀲𑁂𑀦 𑀩𑀚𑁆𑀛𑀢𑀺 𑀲𑀁𑀩𑀚𑁆𑀛𑀢𑀻𑀢𑀺 𑀩𑀦𑁆𑀥𑀼, 𑀜𑀸𑀢𑀺 𑀲𑀸𑀮𑁄𑀳𑀺𑀢𑁄 𑀘. 𑀓𑀫𑁆𑀫𑀁 𑀧𑀦 𑀏𑀓𑀦𑁆𑀢𑀲𑀫𑁆𑀩𑀦𑁆𑀥𑀫𑁂𑀯𑀸𑀢𑀺 𑀆𑀳 𑁋 ‘‘𑀓𑀫𑁆𑀫𑀁 𑀏𑀢𑁂𑀲𑀁 𑀩𑀦𑁆𑀥𑀽’’𑀢𑀺. 𑀧𑀢𑀺𑀝𑁆𑀞𑀸𑀢𑀺 𑀅𑀯𑀲𑁆𑀲𑀬𑁄. 𑀓𑀫𑁆𑀫𑀲𑀤𑀺𑀲𑁄 𑀳𑀺 𑀲𑀢𑁆𑀢𑀸𑀦𑀁 𑀅𑀯𑀲𑁆𑀲𑀬𑁄 𑀦𑀢𑁆𑀣𑀺, 𑀅𑀜𑁆𑀜𑁄 𑀓𑁄𑀘𑀺 𑀇𑀲𑁆𑀲𑀭𑁄 𑀩𑁆𑀭𑀳𑁆𑀫𑀸 𑀯𑀸 𑀦 𑀓𑀭𑁄𑀢𑀺 𑀢𑀸𑀤𑀺𑀲𑀁 𑀓𑀢𑁆𑀢𑀼𑀁 𑀲𑀚𑁆𑀚𑀺𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀢𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀓𑀫𑁆𑀫𑀫𑁂𑀯𑀸𑀢𑀺 𑀓𑀲𑁆𑀫𑀸 𑀅𑀯𑀥𑀸𑀭𑀺𑀢𑀁, 𑀦𑀦𑀼 𑀓𑀺𑀮𑁂𑀲𑀸𑀧𑀺 𑀲𑀢𑁆𑀢𑀸𑀦𑀁 𑀳𑀻𑀦𑀧𑀡𑀻𑀢𑀪𑀸𑀯𑀓𑀸𑀭𑀡𑀁, 𑀦 𑀓𑁂𑀯𑀮𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀓𑀺𑀮𑁂𑀲𑀧𑀬𑁄𑀕𑁂𑀦 𑀯𑀺𑀧𑀸𑀓𑀯𑀝𑁆𑀝𑀁 𑀦𑀺𑀩𑁆𑀩𑀢𑁆𑀢𑀁 𑀓𑀫𑁆𑀫𑀧𑀯𑀢𑁆𑀢𑀺𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀓𑀣𑀺𑀢𑀲𑁆𑀲 𑀅𑀢𑁆𑀣𑀁 𑀦 𑀲𑀜𑁆𑀚𑀸𑀦𑀸𑀲𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀢𑁆𑀯𑀸 𑀦𑀦𑀼 𑀪𑀕𑀯𑀸 𑀫𑀳𑀸𑀓𑀸𑀭𑀼𑀡𑀺𑀓𑁄 𑀧𑀭𑁂𑀲𑀁 𑀜𑀸𑀧𑀦𑀢𑁆𑀣𑀫𑁂𑀯 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀆𑀳 𑁋 ‘‘𑀫𑀸𑀦𑀦𑀺𑀲𑁆𑀲𑀺𑀢𑁄 𑀓𑀺𑀭𑁂𑀲𑀸’’𑀢𑀺𑀆𑀤𑀺.

𑁨𑁯𑁦. 𑀲𑀫𑀢𑁆𑀢𑁂𑀦𑀸𑀢𑀺 𑀧𑀭𑀺𑀬𑀢𑁆𑀢𑁂𑀦, 𑀬𑀣𑀸 𑀢𑀁 𑀨𑀮𑀁 𑀤𑀸𑀢𑀼𑀁 𑀲𑀫𑀢𑁆𑀣𑀁 𑀳𑁄𑀢𑀺, 𑀏𑀯𑀁 𑀓𑀢𑁂𑀦, 𑀉𑀧𑀘𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑀁 𑀧𑀦 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂 𑀅𑀦𑀽𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑁂𑀦𑀸’’𑀢𑀺. 𑀲𑀫𑀸𑀤𑀺𑀦𑁆𑀦𑁂𑀦𑀸𑀢𑀺 𑀏𑀢𑁆𑀣 𑀲𑀫𑀸𑀤𑀸𑀦𑀁 𑀦𑀸𑀫 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀕𑀳𑀡𑀁 𑀧𑀭𑀸𑀫𑀲𑀦𑀦𑁆𑀢𑀺 𑀆𑀳 𑁋 ‘‘𑀕𑀳𑀺𑀢𑁂𑀦 𑀧𑀭𑀸𑀫𑀝𑁆𑀞𑁂𑀦𑀸’’𑀢𑀺. 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀢𑀺 𑀧𑀝𑀺𑀧𑀤𑀸, 𑀓𑀫𑁆𑀫𑀁. 𑀢𑀣𑀸 𑀳𑀺 𑀢𑀁 ‘‘𑀓𑀫𑁆𑀫𑀧𑀣𑁄’’𑀢𑀺 𑀯𑀼𑀘𑁆𑀘𑀢𑀺.

𑀏𑀲𑀸𑀢𑀺 𑀧𑀝𑀺𑀧𑀤𑀸. 𑀤𑀼𑀩𑁆𑀩𑀮𑀁 𑀉𑀧𑀖𑀸𑀢𑀓𑀫𑁂𑀯 𑀲𑀺𑀬𑀸𑀢𑀺 𑀉𑀧𑀧𑀻𑀴𑀓𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁, ‘‘𑀩𑀮𑀯𑀓𑀫𑁆𑀫𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀮𑀯𑀓𑀫𑁆𑀫𑁂𑀦𑀸𑀢𑀺 𑀧𑀼𑀜𑁆𑀜𑀓𑀫𑁆𑀫𑁂𑀦. 𑀯𑀤𑀢𑀺 𑀦𑀸𑀫𑀸𑀢𑀺 𑀯𑀤𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀦𑀺𑀩𑁆𑀩𑀢𑁆𑀢𑀸𑀧𑁂𑀬𑁆𑀬𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀉𑀧𑀧𑀻𑀴𑀓𑀲𑀪𑀸𑀯𑀁 𑀓𑀫𑁆𑀫𑀁 𑀚𑀦𑀓𑀲𑀪𑀸𑀯𑀁 𑀦 𑀳𑁄𑀢𑀻𑀢𑀺? 𑀲𑀩𑁆𑀩𑀫𑁂𑀢𑀁 𑀧𑀭𑀺𑀓𑀧𑁆𑀧𑀦𑀯𑀘𑀦𑀁, 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀘𑁆𑀘𑀢𑁆𑀣𑀺𑀓𑀁 𑀧𑀝𑀺𑀧𑀓𑁆𑀔𑀁 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀅𑀲𑀫𑀢𑁆𑀣𑀸𑀧𑀺 𑀓𑁂𑀘𑀺 𑀆𑀮𑀫𑁆𑀩𑀦𑀯𑀲𑁂𑀦 𑀲𑀫𑀢𑁆𑀣𑀸 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 𑁋 𑀬𑀲𑁆𑀲𑀺𑀤𑀁 𑀓𑀫𑁆𑀫𑀲𑁆𑀲𑀯𑀺𑀧𑀸𑀓𑀁 𑀧𑀻𑀴𑁂𑀢𑀺, 𑀲𑀘𑁂 𑀢𑀲𑁆𑀫𑀺𑀁 𑀅𑀦𑁄𑀓𑀸𑀲𑁂 𑀏𑀯 𑀲𑀬𑀁 𑀯𑀺𑀧𑀘𑁆𑀘𑀺𑀢𑀼𑀁 𑀑𑀓𑀸𑀲𑀁 𑀮𑀪𑁂𑀬𑁆𑀬, 𑀅𑀧𑀸𑀬𑁂𑀲𑀼 𑀏𑀯 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀁 𑀦𑀺𑀩𑁆𑀩𑀢𑁆𑀢𑀸𑀧𑁂𑀬𑁆𑀬, 𑀬𑀲𑁆𑀫𑀸 𑀢𑀁 𑀓𑀫𑁆𑀫𑀁 𑀩𑀮𑀯𑀁 𑀳𑀼𑀢𑁆𑀯𑀸 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂𑀦 𑀯𑀺𑀧𑀘𑁆𑀘𑀺𑀢𑀼𑀁 𑀆𑀭𑀤𑁆𑀥𑀁, 𑀢𑀲𑁆𑀫𑀸 𑀇𑀢𑀭𑀁 𑀢𑀲𑁆𑀲 𑀯𑀺𑀧𑀸𑀓𑀁 𑀯𑀺𑀩𑀸𑀥𑁂𑀦𑁆𑀢𑀁 𑀉𑀧𑀧𑀻𑀴𑀓𑀁 𑀦𑀸𑀫 𑀚𑀸𑀢𑀁. 𑀏𑀢𑀤𑀢𑁆𑀣𑀫𑁂𑀯 𑀘𑁂𑀢𑁆𑀣 ‘‘𑀩𑀮𑀯𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀩𑀮𑀯𑀕𑁆𑀕𑀳𑀡𑀁 𑀓𑀢𑀁. 𑀓𑀺𑀘𑁆𑀘𑀯𑀲𑁂𑀦 𑀳𑀺 𑀦𑁂𑀲𑀁 𑀓𑀫𑁆𑀫𑀸𑀦𑀁 𑀏𑀢𑀸 𑀲𑀫𑀜𑁆𑀜𑀸, 𑀬𑀤𑀺𑀤𑀁 𑀉𑀧𑀧𑀻𑀴𑀓𑀁 𑀉𑀧𑀘𑁆𑀙𑁂𑀤𑀓𑀁 𑀚𑀦𑀓𑀁 𑀉𑀧𑀢𑁆𑀣𑀫𑁆𑀪𑀓𑀦𑁆𑀢𑀺, 𑀦 𑀓𑀼𑀲𑀮𑀸𑀦𑀺 𑀯𑀺𑀬 𑀉𑀧𑀢𑁆𑀣𑀫𑁆𑀪𑀸𑀦𑀺 𑀳𑁄𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀢𑁆𑀣𑀸𑀬. 𑀧𑀻𑀴𑁂𑀢𑁆𑀯𑀸𑀢𑀺 𑀯𑀺𑀳𑁂𑀞𑁂𑀢𑁆𑀯𑀸 𑀧𑀝𑀺𑀖𑀸𑀝𑀦𑀸𑀤𑀺𑀯𑀲𑁂𑀦 𑀉𑀘𑁆𑀙𑀼𑀢𑁂𑀮𑀬𑀦𑁆𑀢𑀸𑀤𑀬𑁄 𑀯𑀺𑀬 𑀉𑀘𑁆𑀙𑀼𑀢𑀺𑀮𑀸𑀤𑀺𑀓𑁂 𑀯𑀺𑀩𑀸𑀥𑁂𑀢𑁆𑀯𑀸. 𑀦𑀺𑀭𑁄𑀚𑀦𑁆𑀢𑀺 𑀦𑀺𑀢𑁆𑀢𑁂𑀚𑀁. 𑀦𑀺𑀬𑀽𑀲𑀦𑁆𑀢𑀺 𑀦𑀺𑀭𑀲𑀁. 𑀓𑀲𑀝𑀦𑁆𑀢𑀺 𑀦𑀺𑀲𑁆𑀲𑀸𑀭𑀁. 𑀧𑀭𑀺𑀲𑁆𑀲𑀬𑀦𑁆𑀢𑀺 𑀉𑀧𑀤𑁆𑀤𑀯𑀁.

𑀇𑀤𑀸𑀦𑀺 𑀧𑀭𑀺𑀲𑁆𑀲𑀬𑀲𑁆𑀲 𑀉𑀧𑀦𑀬𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁂𑀦 𑀢𑀢𑁆𑀣, ‘‘𑀤𑀸𑀭𑀓𑀲𑁆𑀲𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀪𑁄𑀕𑀸𑀦𑀁 𑀯𑀺𑀦𑀸𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁, 𑀧𑀼𑀦 ‘‘𑀤𑀸𑀭𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀼𑀫𑁆𑀪𑀤𑁄𑀳𑀦𑀸𑀢𑀺 𑀓𑀼𑀫𑁆𑀪𑀧𑀽𑀭𑀔𑀻𑀭𑀸. 𑀕𑁄𑀫𑀡𑁆𑀟𑀮𑁂𑀢𑀺 𑀕𑁄𑀬𑀽𑀣𑁂.

𑀅𑀝𑁆𑀞𑀼𑀲𑀪𑀕𑀫𑀦𑀁 𑀓𑀢𑁆𑀯𑀸𑀢𑀺 𑀅𑀝𑁆𑀞𑀉𑀲𑀪𑀧𑁆𑀧𑀫𑀸𑀡𑀁 𑀧𑀤𑁂𑀲𑀁 𑀧𑀘𑁆𑀘𑀢𑁆𑀣𑀺𑀓𑀁 𑀉𑀤𑁆𑀤𑀺𑀲𑁆𑀲 𑀥𑀦𑀼𑀕𑁆𑀕𑀳𑁄 𑀅𑀦𑀼𑀬𑀸𑀬𑀺𑀁 𑀓𑀢𑁆𑀯𑀸. 𑀢𑀦𑁆𑀢𑀺 𑀲𑀭𑀁. 𑀅𑀜𑁆𑀜𑁄𑀢𑀺 𑀧𑀘𑁆𑀘𑀢𑁆𑀣𑀺𑀓𑁄. 𑀢𑀢𑁆𑀣𑁂𑀯 𑀧𑀸𑀢𑁂𑀬𑁆𑀬 𑀅𑀘𑁆𑀘𑀸𑀲𑀦𑁆𑀦𑀁 𑀓𑀢𑁆𑀯𑀸 𑀲𑀭𑀲𑁆𑀲 𑀔𑀺𑀢𑁆𑀢𑀢𑁆𑀢𑀸. 𑀯𑀸𑀴𑀫𑀘𑁆𑀙𑁄𑀤𑀓𑀦𑁆𑀢𑀺 𑀫𑀓𑀭𑀸𑀤𑀺𑀯𑀸𑀴𑀫𑀘𑁆𑀙𑀯𑀦𑁆𑀢𑀁 𑀉𑀤𑀓𑀁.

𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀓𑀁 𑀓𑀫𑁆𑀫𑀁 𑀚𑀦𑀓𑀓𑀫𑁆𑀫𑀁 𑀦𑀸𑀫 𑀧𑀭𑀺𑀧𑀼𑀡𑁆𑀡𑀯𑀺𑀧𑀸𑀓𑀤𑀸𑀬𑀺𑀪𑀸𑀯𑀢𑁄, 𑀦 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀦𑀺𑀩𑁆𑀩𑀢𑁆𑀢𑀓𑀁. 𑀪𑁄𑀕𑀲𑀫𑁆𑀧𑀤𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀭𑁄𑀕𑁆𑀬𑀲𑀫𑁆𑀧𑀤𑀸𑀤𑀺-𑀧𑀭𑀺𑀯𑀸𑀭𑀲𑀫𑁆𑀧𑀤𑀸𑀤𑀻𑀦𑀺 𑀕𑀡𑁆𑀳𑀸𑀢𑀺. 𑀦 𑀤𑀻𑀖𑀸𑀬𑀼𑀓𑀢𑀸𑀤𑀻𑀦𑀺 𑀳𑀺 𑀅𑀧𑁆𑀧𑀸𑀬𑀼𑀓𑀢𑀸𑀲𑀁𑀯𑀢𑁆𑀢𑀦𑀺𑀓𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀸𑀦𑀺; 𑀅𑀜𑁆𑀜𑀁 𑀤𑀻𑀖𑀸𑀬𑀼𑀓𑀢𑀸𑀓𑀭𑀡𑁂𑀦 𑀉𑀧𑀢𑁆𑀣𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀢𑀺; 𑀦 𑀅𑀢𑀺𑀤𑀼𑀩𑁆𑀩𑀡𑁆𑀡𑀁 𑀅𑀧𑁆𑀧𑁂𑀲𑀓𑁆𑀔𑀁 𑀦𑀻𑀘𑀓𑀼𑀮𑀻𑀦𑀁 𑀤𑀼𑀧𑁆𑀧𑀜𑁆𑀜𑀁 𑀯𑀸 𑀯𑀡𑁆𑀡𑀯𑀦𑁆𑀢𑀢𑀸𑀤𑀺𑀯𑀲𑁂𑀦. 𑀢𑀣𑀸 𑀳𑀺 𑀯𑀓𑁆𑀔𑀢𑀺, ‘‘𑀇𑀫𑀲𑁆𑀫𑀺𑀁 𑀧𑀦 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂’’𑀢𑀺𑀆𑀤𑀺, 𑀢𑀁 𑀧𑀦 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀭𑀺𑀫𑀸𑀦𑀻𑀢𑀺 𑀉𑀧𑀧𑀻𑀴𑀓𑁄𑀧𑀘𑁆𑀙𑁂𑀤𑀓𑀸𑀦𑀺. 𑀉𑀧𑀧𑀻𑀴𑀓𑀼𑀧𑀖𑀸𑀢𑀸 𑀦𑀸𑀫 𑀓𑀼𑀲𑀮𑀯𑀺𑀧𑀸𑀓𑀧𑀝𑀺𑀩𑀸𑀳𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑁆𑀯𑁂 𑀅𑀓𑀼𑀲𑀮𑀸𑀦𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑀢𑁆𑀣𑀫𑁆𑀪𑀓𑀁 𑀓𑀼𑀲𑀮𑀫𑁂𑀯𑀸𑀢𑀺 𑀏𑀢𑁆𑀣 𑀬𑀣𑀸 𑀚𑀦𑀓𑀁 𑀉𑀪𑀬𑀲𑀪𑀸𑀯𑀁, 𑀏𑀯𑀁 𑀇𑀢𑀭𑁂𑀲𑀫𑁆𑀧𑀺 𑀉𑀪𑀬𑀲𑀪𑀸𑀯𑀢𑀸𑀬 𑀯𑀼𑀘𑁆𑀘𑀫𑀸𑀦𑀸𑀬 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀤𑁂𑀯𑀤𑀢𑁆𑀢𑀸𑀤𑀻𑀦𑀜𑁆𑀳𑀺 𑀦𑀸𑀕𑀸𑀤𑀻𑀦𑀁 𑀇𑀢𑁄 𑀅𑀦𑀼𑀧𑁆𑀧𑀯𑀘𑁆𑀙𑀺𑀢𑀸𑀦𑀁 𑀧𑁂𑀢𑀸𑀤𑀻𑀦𑀜𑁆𑀘 𑀦𑀭𑀓𑀸𑀤𑀻𑀲𑀼 𑀅𑀓𑀼𑀲𑀮𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀼𑀧𑀧𑀻𑀴𑀦𑀼𑀧𑀖𑀸𑀢𑀦𑀸𑀦𑀺 𑀦 𑀦 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀸 𑀳𑁂𑀝𑁆𑀞𑀸 𑀩𑀳𑀽𑀲𑀼 𑀆𑀦𑀦𑁆𑀢𑀭𑀺𑀬𑁂𑀲𑀼 𑀏𑀓𑁂𑀦 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀇𑀢𑀭𑁂𑀲𑀁 𑀢𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀢𑀸 𑀯𑀼𑀢𑁆𑀢𑀸, 𑀲𑀸𑀧𑀺 𑀲𑀫𑀢𑁆𑀣𑀺𑀢𑀸 𑀳𑁄𑀢𑀺. 𑀬𑀲𑁆𑀫𑀺𑀜𑁆𑀳𑀺 𑀓𑀫𑁆𑀫𑁂 𑀓𑀢𑁂 𑀚𑀦𑀓𑀦𑀺𑀩𑁆𑀩𑀢𑁆𑀢𑀁 𑀓𑀼𑀲𑀮𑀨𑀮𑀁 𑀯𑀸 𑀅𑀓𑀼𑀲𑀮𑀨𑀮𑀁 𑀯𑀸 𑀩𑁆𑀬𑀸𑀥𑀺𑀥𑀸𑀢𑀼𑀲𑀫𑀢𑀸𑀤𑀺𑀦𑀺𑀫𑀺𑀢𑁆𑀢𑀁 𑀯𑀺𑀩𑀸𑀥𑀻𑀬𑀢𑀺, 𑀢𑀫𑀼𑀧𑀢𑁆𑀣𑀫𑁆𑀪𑀓𑀁. 𑀬𑀲𑁆𑀫𑀺𑀁 𑀧𑀦 𑀓𑀢𑁂 𑀚𑀸𑀢𑀺𑀲𑀫𑀢𑁆𑀣𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑀺𑀬𑀜𑁆𑀘 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀢𑀁 𑀚𑀦𑀓𑀁. 𑀬𑀲𑁆𑀫𑀺𑀁 𑀧𑀦 𑀓𑀢𑁂 𑀅𑀜𑁆𑀜𑁂𑀦 𑀚𑀦𑀺𑀢𑀲𑁆𑀲 𑀇𑀝𑁆𑀞𑀲𑁆𑀲 𑀯𑀸 𑀅𑀦𑀺𑀝𑁆𑀞𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀺𑀩𑀸𑀥𑀸𑀯𑀺𑀘𑁆𑀙𑁂𑀤𑀧𑀘𑁆𑀘𑀬𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀩𑁆𑀭𑀽𑀳𑀦𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀬𑀸 𑀘 𑀚𑀦𑀓𑀲𑀸𑀫𑀢𑁆𑀣𑀺𑀬𑀸𑀦𑀼𑀭𑀽𑀧𑀁 𑀧𑀭𑀺𑀯𑀼𑀢𑁆𑀢𑀺𑀘𑀺𑀭𑀢𑀭𑀧𑀩𑀦𑁆𑀥𑀸 𑀳𑁄𑀢𑀺, 𑀏𑀢𑀁 𑀉𑀧𑀢𑁆𑀣𑀫𑁆𑀪𑀓𑀁. 𑀢𑀣𑀸 𑀬𑀲𑁆𑀫𑀺𑀁 𑀓𑀢𑁂 𑀚𑀦𑀓𑀦𑀺𑀩𑁆𑀩𑀢𑁆𑀢𑀁 𑀓𑀼𑀲𑀮𑀨𑀮𑀁 𑀅𑀓𑀼𑀲𑀮𑀨𑀮𑀁 𑀯𑀸 𑀩𑁆𑀬𑀸𑀥𑀺𑀥𑀸𑀢𑀼𑀲𑀫𑀢𑀸𑀤𑀺𑀦𑀺𑀫𑀺𑀢𑁆𑀢𑀁 𑀯𑀺𑀩𑀸𑀥𑀻𑀬𑀢𑀺, 𑀢𑀁 𑀉𑀧𑀧𑀻𑀴𑀓𑀁. 𑀬𑀲𑁆𑀫𑀺𑀁 𑀧𑀦 𑀓𑀢𑁂 𑀚𑀦𑀓𑀲𑀸𑀫𑀢𑁆𑀣𑀺𑀬𑀯𑀲𑁂𑀦 𑀘𑀺𑀭𑀢𑀭𑀧𑀩𑀦𑁆𑀥𑀸𑀭𑀳𑀫𑁆𑀧𑀺 𑀲𑀫𑀸𑀦𑀁 𑀨𑀮𑀁 𑀯𑀺𑀘𑁆𑀙𑁂𑀤𑀓𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀘𑁆𑀙𑀺𑀚𑁆𑀚𑀢𑀺, 𑀢𑀁 𑀉𑀧𑀖𑀸𑀢𑀓𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀸𑀭𑁄.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀓𑀫𑁆𑀫𑁂𑀲𑀼. 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑁂𑀦𑀸𑀢𑀺 𑀆𑀬𑀼𑀦𑁄 𑀉𑀧𑀖𑀸𑀢𑀓𑀓𑀫𑁆𑀫𑁂𑀦. 𑀲𑁆𑀯𑀸𑀬𑀫𑀼𑀧𑀖𑀸𑀢𑀓𑀪𑀸𑀯𑁄 𑀤𑁆𑀯𑀺𑀥𑀸 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀡𑀸𑀢𑀺𑀧𑀸𑀢𑀺𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀲𑀓𑁆𑀓𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀼𑀦𑀸 𑀲𑀦𑁆𑀢𑀸𑀦𑀲𑁆𑀲 𑀢𑀣𑀸𑀪𑀺𑀲𑀗𑁆𑀔𑀢𑀢𑁆𑀢𑀸. 𑀬𑀲𑁆𑀫𑀺𑀜𑁆𑀳𑀺 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀲 𑀢𑁂𑀦 𑀅𑀪𑀺𑀲𑀗𑁆𑀔𑀢𑀢𑀸 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀸 𑀢𑀢𑁆𑀣𑁂𑀯 𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀯𑀺𑀦𑀺𑀩𑀦𑁆𑀥𑀦𑀢𑁄. 𑀏𑀢𑁂𑀦 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 𑀧𑀸𑀡𑀸𑀢𑀺𑀧𑀸𑀢𑁄 𑀢𑀸𑀤𑀺𑀲𑀁 𑀲𑀸𑀫𑀢𑁆𑀣𑀺𑀬𑀼𑀧𑀖𑀸𑀢𑀁 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀢𑀢𑁄 𑀓𑀫𑁆𑀫𑀁 𑀅𑀧𑁆𑀧𑀨𑀮𑀁 𑀳𑁄𑀢𑀺. ‘‘𑀤𑀻𑀖𑀸𑀬𑀼𑀓𑀸’’𑀢𑀺𑀆𑀤𑀺𑀦𑀸 𑀉𑀧𑀖𑀸𑀢𑀲𑀸𑀫𑀢𑁆𑀣𑀺𑀬𑁂𑀦 𑀔𑁂𑀢𑁆𑀢𑁂 𑀉𑀧𑁆𑀧𑀦𑁆𑀦𑀲𑀲𑁆𑀲𑀁 𑀯𑀺𑀬 𑀉𑀧𑀧𑀢𑁆𑀢𑀺𑀦𑀺𑀬𑀸𑀫𑀓𑀸 𑀥𑀫𑁆𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀧𑀢𑁆𑀢𑀺 𑀦𑀺𑀬𑀢𑀯𑀺𑀲𑁂𑀲𑁂 𑀯𑀺𑀧𑀘𑁆𑀘𑀺𑀢𑀼𑀁 𑀑𑀓𑀸𑀲𑁂 𑀓𑀭𑁄𑀦𑁆𑀢𑁂 𑀏𑀯 𑀓𑀼𑀲𑀮𑀓𑀫𑁆𑀫𑁂 𑀆𑀓𑀟𑁆𑀠𑀺𑀬𑀫𑀸𑀦𑀧𑀝𑀺𑀲𑀦𑁆𑀥𑀺𑀓𑀁 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀅𑀧𑁆𑀧𑀸𑀬𑀼𑀓𑀢𑁆𑀣𑀸𑀬 𑀦𑀺𑀬𑀫𑁂𑀢𑀻𑀢𑀺 𑀆𑀳 𑁋 ‘‘𑀧𑀝𑀺𑀲𑀦𑁆𑀥𑀺𑀫𑁂𑀯 𑀯𑀸 𑀦𑀺𑀬𑀸𑀫𑁂𑀢𑁆𑀯𑀸 𑀅𑀧𑁆𑀧𑀸𑀬𑀼𑀓𑀁 𑀓𑀭𑁄𑀢𑀻’’𑀢𑀺. 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀬 𑀅𑀘𑁆𑀘𑀦𑁆𑀢𑀓𑀝𑀼𑀓𑀯𑀺𑀧𑀸𑀓𑀢𑁆𑀢𑀸 𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀸𑀬 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺 𑀢𑀲𑁆𑀲𑀸 𑀅𑀢𑁆𑀣𑀲𑁆𑀲 𑀔𑀻𑀡𑀸𑀪𑀸𑀯𑀢𑁄; 𑀇𑀢𑀭𑁂 𑀧𑀦 𑀦 𑀢𑀣𑀸 𑀪𑀸𑀭𑀺𑀬𑀸𑀢𑀺 𑀆𑀳 𑁋 ‘‘𑀧𑀼𑀩𑁆𑀩𑀸…𑀧𑁂… 𑀳𑁄𑀢𑀻’’𑀢𑀺. 𑀇𑀥 𑀧𑀦 𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀤𑀺𑀲𑀁, 𑀢𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀧𑀭𑀺𑀲𑁆𑀲𑀬𑀸𑀢𑀺 𑀫𑀸𑀦𑀼𑀲𑀓𑀸 𑀅𑀫𑀸𑀦𑀼𑀲𑀓𑀸 𑀘 𑀉𑀧𑀤𑁆𑀤𑀯𑀸. 𑀧𑀼𑀭𑀢𑁄𑀢𑀺 𑀧𑀼𑀩𑁆𑀩𑀤𑁆𑀯𑀸𑀭𑀢𑁄. 𑀧𑀘𑁆𑀙𑀢𑁄𑀢𑀺 𑀧𑀘𑁆𑀙𑀺𑀫𑀯𑀢𑁆𑀣𑀼𑀢𑁄. 𑀧𑀯𑀝𑁆𑀝𑀫𑀸𑀦𑀸𑀢𑀺 𑀧𑀭𑀺𑀚𑀦𑀲𑁆𑀲, 𑀤𑁂𑀯𑀢𑀸𑀦𑀁 𑀯𑀸 𑀤𑁂𑀲𑁂𑀦 𑀧𑀯𑀝𑁆𑀝𑀫𑀸𑀦𑀸. 𑀧𑀭𑁂𑀳𑀻𑀢𑀺 𑀧𑀼𑀭𑀸𑀢𑀦𑁂𑀳𑀺 𑀧𑀭𑁂𑀳𑀺. 𑀲𑀫𑁆𑀫𑀼𑀔𑀻𑀪𑀸𑀯𑀦𑁆𑀢𑀺 𑀲𑀸𑀫𑀺𑀪𑀸𑀯𑀯𑀲𑁂𑀦 𑀧𑀘𑁆𑀘𑀓𑁆𑀔𑀢𑁆𑀢𑀁. 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺 𑀇𑀡𑀸𑀬𑀺𑀓𑀸. 𑀓𑀫𑁆𑀫𑀦𑁆𑀢𑀸𑀢𑀺 𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀸𑀦𑀺. 𑀅𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀓𑀫𑁆𑀫𑀁; 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀤𑀻𑀖𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀁 𑀳𑁄𑀢𑀺 𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀲𑀭𑀺𑀓𑁆𑀔𑀪𑀸𑀯𑀢𑁄. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀇𑀫𑀺𑀦𑀸 𑀅𑀧𑁆𑀧𑀸𑀬𑀼𑀓𑀤𑀻𑀖𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑁂𑀲𑀼 𑀓𑀫𑁆𑀫𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀦 𑀢𑀁 𑀲𑀁𑀯𑀢𑁆𑀢𑀦𑀺𑀓𑀯𑀺𑀪𑀸𑀯𑀦𑀦𑀬𑁂𑀦.

𑀯𑀺𑀳𑁂𑀞𑀦𑀓𑀫𑁆𑀫𑀸𑀤𑀻𑀦𑀺𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀓𑁄𑀥𑀇𑀲𑁆𑀲𑀸𑀫𑀦𑀓𑀫𑀘𑁆𑀙𑁂𑀭𑀣𑀤𑁆𑀥𑀅𑀯𑀺𑀤𑁆𑀤𑀲𑀼𑀪𑀸𑀯𑀯𑀲𑁂𑀦 𑀧𑀯𑀢𑁆𑀢𑀺𑀢𑀓𑀫𑁆𑀫𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁, 𑀢𑀣𑁂𑀯 𑀯𑀤𑀫𑀸𑀦𑀸𑀦𑀺 𑀯𑀺𑀬. ‘‘𑀬𑀁 𑀬𑀤𑁂𑀯𑀸𑀢𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺 (𑀔𑀼. 𑀧𑀸. 𑁮.𑁧𑁦) 𑀯𑀘𑀦𑀢𑁄 𑀬𑀣𑀸 𑀲𑀩𑁆𑀩𑀓𑀼𑀲𑀮𑀁 𑀲𑀩𑁆𑀩𑀸𑀲𑀁 𑀲𑀫𑁆𑀧𑀢𑁆𑀢𑀻𑀦𑀁 𑀉𑀧𑀦𑀺𑀲𑁆𑀲𑀬𑁄, 𑀏𑀯𑀁 𑀲𑀩𑁆𑀩𑀁 𑀅𑀓𑀼𑀲𑀮𑀁 𑀲𑀩𑁆𑀩𑀸𑀲𑀁 𑀯𑀺𑀧𑀢𑁆𑀢𑀻𑀦𑀁 𑀉𑀧𑀦𑀺𑀲𑁆𑀲𑀬𑁄𑀢𑀺, ‘‘𑀉𑀧𑀧𑀻𑀴𑀦𑁂𑀦 𑀦𑀺𑀩𑁆𑀪𑁄𑀕𑀢𑀁 𑀆𑀧𑀸𑀤𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀯𑀲𑁂𑀦𑀧𑀺 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄. 𑀅𑀯𑀺𑀳𑁂𑀞𑀦𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀓𑁆𑀓𑁄𑀥𑀦-𑀅𑀦𑀺𑀲𑁆𑀲𑀸𑀫𑀦-𑀤𑀸𑀦-𑀅𑀦𑀢𑀺𑀫𑀸𑀦-𑀯𑀺𑀤𑁆𑀤𑀲𑀼𑀪𑀸𑀯𑁂𑀦 𑀧𑀯𑀢𑁆𑀢𑀓𑀫𑁆𑀫𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁯𑁩. 𑀇𑀲𑁆𑀲𑀸 𑀫𑀦𑁄 𑀏𑀢𑀲𑁆𑀲𑀸𑀢𑀺 𑀇𑀲𑁆𑀲𑀸𑀫𑀦𑀓𑁄𑀢𑀺 𑀆𑀳 ‘‘𑀇𑀲𑁆𑀲𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁄’’𑀢𑀺. 𑀉𑀧𑀓𑁆𑀓𑁄𑀲𑀦𑁆𑀢𑁄𑀢𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑁄. 𑀇𑀲𑁆𑀲𑀁 𑀩𑀦𑁆𑀥𑀢𑀻𑀢𑀺 𑀇𑀲𑁆𑀲𑀁 𑀅𑀦𑀼𑀩𑀦𑁆𑀥𑀢𑀺 𑀇𑀲𑁆𑀲𑀸𑀲𑀳𑀺𑀢𑀫𑁂𑀯 𑀘𑀺𑀢𑁆𑀢𑀁 𑀅𑀦𑀼𑀧𑀯𑀢𑁆𑀢𑁂𑀢𑀺. 𑀅𑀧𑁆𑀧𑁂𑀲𑀓𑁆𑀔𑁄𑀢𑀺 𑀅𑀧𑁆𑀧𑀸𑀦𑀼𑀪𑀸𑀯𑁄 𑀅𑀧𑁆𑀧𑀜𑁆𑀜𑀸𑀢𑁄. 𑀢𑁂𑀦𑀸𑀳 ‘‘𑀦 𑀧𑀜𑁆𑀜𑀸𑀬𑀢𑀻’’𑀢𑀺. 𑀲𑀸 𑀧𑀦𑀲𑁆𑀲 𑀅𑀧𑁆𑀧𑀸𑀦𑀼𑀪𑀸𑀯𑀢𑀸 𑀧𑀭𑀺𑀯𑀸𑀭𑀸𑀪𑀸𑀯𑁂𑀦 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀆𑀳 ‘‘𑀅𑀧𑁆𑀧𑀧𑀭𑀺𑀯𑀸𑀭𑁄’’𑀢𑀺.

𑁨𑁯𑁪. 𑀫𑀘𑁆𑀙𑀭𑀺𑀬𑀯𑀲𑁂𑀦 𑀦 𑀤𑀸𑀢𑀸 𑀳𑁄𑀢𑀻𑀢𑀺 𑀲𑀩𑁆𑀩𑀲𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀪𑀸𑀯𑁂𑀦 𑀦 𑀤𑀸𑀢𑀸 𑀦 𑀳𑁄𑀢𑀺. 𑀅𑀫𑀘𑁆𑀙𑀭𑀻 𑀳𑀺 𑀧𑀼𑀕𑁆𑀕𑀮𑁄 𑀲𑀢𑀺 𑀤𑁂𑀬𑁆𑀬𑀥𑀫𑁆𑀫𑁂 𑀬𑀣𑀸𑀭𑀳𑀁 𑀤𑁂𑀢𑀺𑀬𑁂𑀯.

𑁨𑁯𑁫. 𑀅𑀪𑀺𑀯𑀸𑀤𑁂𑀢𑀩𑁆𑀩𑀁 𑀔𑁂𑀢𑁆𑀢𑀯𑀲𑁂𑀦 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀩𑀼𑀤𑁆𑀥𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀧𑀺 𑀫𑀸𑀢𑀼𑀧𑀺𑀢𑀼𑀚𑁂𑀝𑁆𑀞𑀪𑀸𑀢𑀭𑀸𑀤𑀬𑁄 𑀅𑀪𑀺𑀯𑀸𑀤𑀦𑀸𑀤𑀺𑀅𑀭𑀳𑀸 𑀲𑀦𑁆𑀢𑀺, 𑀢𑁂𑀲𑀼 𑀣𑀤𑁆𑀥𑀸𑀤𑀺𑀯𑀲𑁂𑀦 𑀓𑀭𑀡𑀁 𑀦𑀻𑀘𑀓𑀼𑀮𑀲𑀁𑀯𑀢𑁆𑀢𑀦𑀺𑀓𑀫𑁂𑀯. 𑀦 𑀳𑀺 𑀧𑀯𑀢𑁆𑀢𑁂 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀦𑁄 𑀓𑀫𑁆𑀫𑀲𑁆𑀲 𑀯𑀺𑀲𑀬𑁄 𑀏𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀧𑀝𑀺𑀲𑀦𑁆𑀥𑀺𑀫𑁂𑀯 𑀧𑀦𑀸’’𑀢𑀺𑀆𑀤𑀺.

𑁨𑁯𑁬. 𑀅𑀧𑀭𑀺𑀧𑀼𑀘𑁆𑀙𑀦𑁂𑀦𑀸𑀢𑀺 𑀅𑀧𑀭𑀺𑀧𑀼𑀘𑁆𑀙𑀸𑀫𑀢𑁆𑀢𑁂𑀦 𑀦𑀺𑀭𑀬𑁂 𑀦 𑀦𑀺𑀩𑁆𑀩𑀢𑁆𑀢𑀢𑀺; 𑀅𑀧𑀭𑀺𑀧𑀼𑀘𑁆𑀙𑀸𑀳𑁂𑀢𑀼 𑀧𑀦 𑀓𑀢𑁆𑀢𑀩𑁆𑀩𑀸𑀓𑀭𑀡𑀸𑀤𑀻𑀳𑀺 𑀲𑀺𑀬𑀸 𑀦𑀺𑀭𑀬𑀦𑀺𑀩𑁆𑀩𑀢𑁆𑀢𑀻𑀢𑀺 𑀧𑀸𑀴𑀺𑀬𑀁, ‘‘𑀦 𑀧𑀭𑀺𑀧𑀼𑀘𑁆𑀙𑀺𑀢𑀸 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀅𑀧𑀭𑀺𑀧𑀼𑀘𑁆𑀙𑀓𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑀸𑀦𑀼𑀲𑀦𑁆𑀥𑀺𑀁 𑀧𑀸𑀧𑁂𑀲𑀻𑀢𑀺 𑀤𑁂𑀲𑀦𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀺𑀝𑁆𑀞𑀸𑀦𑀁 𑀧𑀸𑀧𑁂𑀲𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.