𑁧𑁨. 𑀤𑀓𑁆𑀔𑀺𑀡𑀸𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁬. 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀢𑀺 𑀏𑀢𑁆𑀣 𑀕𑁄𑀢𑀫𑀻𑀢𑀺 𑀢𑀲𑁆𑀲 𑀕𑁄𑀢𑀫𑀕𑁄𑀢𑁆𑀢𑀢𑁄 𑀆𑀕𑀢𑀁 𑀦𑀸𑀫𑀁, 𑀫𑀳𑀸𑀧𑀚𑀸𑀧𑀢𑀺 𑀧𑀦 𑀕𑀼𑀡𑀢𑁄. 𑀢𑀁 𑀯𑀺𑀯𑀭𑀺𑀢𑀼𑀁, ‘‘𑀦𑀸𑀫𑀓𑀭𑀡𑀤𑀺𑀯𑀲𑁂 𑀧𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀳𑀢𑀺𑀁 𑀉𑀴𑀸𑀭𑀁 𑀧𑀚𑀁 𑀚𑀦𑀦𑀧𑁄𑀲𑀦𑁂𑀳𑀺 𑀧𑀭𑀺𑀭𑀓𑁆𑀔𑀢𑀻𑀢𑀺 𑀫𑀳𑀸𑀧𑀚𑀸𑀧𑀢𑀺. 𑀧𑀭𑀺𑀪𑁄𑀕𑀯𑀲𑁂𑀦 𑀦 𑀳𑀜𑁆𑀜𑀢𑀻𑀢𑀺 𑀅𑀳𑀢𑀁. 𑀲𑀺𑀧𑁆𑀧𑀺𑀓𑀸𑀦𑀦𑁆𑀢𑀺 𑀢𑀦𑁆𑀢𑀯𑀸𑀬𑀸𑀦𑀁. 𑀯𑀸𑀬𑀦𑀝𑁆𑀞𑀸𑀦𑀦𑁆𑀢𑀺 𑀯𑀻𑀦𑀝𑁆𑀞𑀸𑀦𑀁. 𑀢𑀸𑀦𑀺 𑀫𑀁 𑀦 𑀢𑁄𑀲𑁂𑀦𑁆𑀢𑀺 𑀓𑀸𑀬𑀺𑀓𑀲𑁆𑀲 𑀧𑀼𑀜𑁆𑀜𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑀸𑀳 𑁋 ‘‘𑀲𑀳𑀢𑁆𑀣𑀸 𑀓𑀢𑀫𑁂𑀯 𑀫𑀁 𑀢𑁄𑀲𑁂𑀢𑀻’’𑀢𑀺. 𑀧𑀺𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑀁 𑀓𑀢𑁆𑀯𑀸. 𑀧𑁄𑀣𑁂𑀢𑁆𑀯𑀸𑀢𑀺 𑀲𑀼𑀔𑀼𑀫𑀪𑀸𑀯𑀸𑀧𑀸𑀤𑀦𑀢𑁆𑀣𑀁 𑀥𑀦𑀼𑀓𑁂𑀦 𑀦𑁂𑀢𑁆𑀯𑀸. 𑀓𑀸𑀮𑀸𑀦𑀼𑀓𑀸𑀮𑀜𑁆𑀘 𑀥𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀕𑀦𑁆𑀢𑁆𑀯𑀸 𑀯𑁂𑀫𑀓𑁄𑀝𑀺𑀁 𑀅𑀕𑁆𑀕𑀳𑁂𑀲𑀺 𑀏𑀓𑀤𑀺𑀯𑀲𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 ‘‘𑀏𑀓𑀤𑀺𑀯𑀲𑀁 𑀧𑀦…𑀧𑁂… 𑀅𑀓𑀸𑀲𑀻’’𑀢𑀺 𑀧𑀼𑀭𑀺𑀫𑀯𑀘𑀦𑁂𑀦 𑀢𑀁 𑀦 𑀯𑀺𑀭𑀼𑀚𑁆𑀛𑁂𑀬𑁆𑀬.

𑀙 𑀘𑁂𑀢𑀦𑀸𑀢𑀺 𑀙𑀩𑁆𑀩𑀺𑀥𑀸 𑀘𑁂𑀢𑀦𑀸. 𑀦 𑀳𑀺 𑀢𑀸 𑀙𑀬𑁂𑀯 𑀘𑁂𑀢𑀦𑀸𑀢𑀺. 𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺…𑀧𑁂… 𑀲𑀗𑁆𑀖𑁄 𑀘𑀸𑀢𑀺 𑀇𑀤𑀫𑁂𑀯 𑀲𑀼𑀢𑁆𑀢𑀧𑀤𑀁. 𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀻𑀢𑀺 𑀲𑀗𑁆𑀖𑀲𑁆𑀲 𑀤𑀸𑀦𑀸𑀬 𑀦𑀺𑀬𑁄𑀚𑁂𑀲𑀺, 𑀢𑀲𑁆𑀫𑀸 𑀲𑀗𑁆𑀖𑁄𑀯 𑀤𑀓𑁆𑀔𑀺𑀡𑁂𑀬𑁆𑀬𑀢𑀭𑁄𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄. 𑀬𑀤𑀺 𑀏𑀯𑀦𑁆𑀢𑀺𑀆𑀤𑀺𑀦𑀸 𑀢𑀢𑁆𑀣 𑀩𑁆𑀬𑀪𑀺𑀘𑀸𑀭𑀁 𑀤𑀲𑁆𑀲𑁂𑀢𑀺. 𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄𑀢𑀺𑀆𑀤𑀺𑀦𑀸 𑀢𑀢𑁆𑀣 𑀩𑁆𑀬𑀢𑀺𑀭𑁂𑀓𑀢𑁄 𑀦𑀺𑀤𑀲𑁆𑀲𑀦𑀁 𑀆𑀳. 𑀫𑀳𑀦𑁆𑀢𑀢𑀭𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀆𑀦𑀼𑀪𑀸𑀯𑀸𑀤𑀺𑀦𑀸 𑀫𑀳𑀦𑁆𑀢𑀢𑀭𑀸 𑀪𑀯𑁂𑀬𑁆𑀬𑀼𑀁, 𑀦 𑀘 𑀢𑀁 𑀅𑀢𑁆𑀣𑀻𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀕𑀼𑀡𑀯𑀺𑀲𑀺𑀝𑁆𑀞𑀳𑁂𑀢𑀼𑀓𑀁 𑀤𑀓𑁆𑀔𑀺𑀡𑁂𑀬𑁆𑀬𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀻𑀬𑀫𑀸𑀦𑀲𑁆𑀲 𑀤𑀸𑀧𑀦𑀁 𑀮𑀪𑀢𑀺, 𑀢𑀲𑁆𑀫𑀸. 𑀫𑀸 𑀏𑀯𑀁 𑀕𑀡𑁆𑀳𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀲𑀗𑁆𑀖𑁄𑀯 𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺 𑀫𑀸 𑀕𑀡𑁆𑀳.

𑀢𑀢𑁆𑀣 𑀦𑀺𑀘𑁆𑀙𑀬𑀲𑀸𑀥𑀓𑀁 𑀲𑀼𑀢𑁆𑀢𑀧𑀤𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀦𑀬𑀺𑀫𑀲𑁆𑀫𑀺𑀁 𑀮𑁄𑀓𑁂…𑀧𑁂… 𑀯𑀺𑀧𑀼𑀮𑀨𑀮𑁂𑀲𑀺𑀦’’𑀦𑁆𑀢𑀺 𑀆𑀳. 𑀲𑁆𑀯𑀸𑀬𑀫𑀢𑁆𑀣𑁄 𑀭𑀢𑀦𑀲𑀼𑀢𑁆𑀢𑁂 (𑀔𑀼. 𑀧𑀸. 𑁬.𑁩; 𑀲𑀼. 𑀦𑀺. 𑁨𑁨𑁬), ‘‘𑀬𑀁 𑀓𑀺𑀜𑁆𑀘𑀺 𑀯𑀺𑀢𑁆𑀢’’𑀦𑁆𑀢𑀺 𑀕𑀸𑀣𑀸𑀬, 𑀅𑀕𑁆𑀕𑀧𑀲𑀸𑀤𑀲𑀼𑀢𑁆𑀢𑀸𑀤𑀻𑀳𑀺 (𑀇𑀢𑀺𑀯𑀼. 𑁯𑁦) 𑀘 𑀯𑀺𑀪𑀸𑀯𑁂𑀢𑀩𑁆𑀩𑁄𑀢𑀺. 𑀢𑁂𑀦𑀸𑀳 𑁋 ‘‘𑀲𑀢𑁆𑀣𑀸𑀭𑀸 𑀉𑀢𑁆𑀢𑀭𑀺𑀢𑀭𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺.

𑀕𑁄𑀢𑀫𑀺𑀬𑀸 𑀅𑀦𑁆𑀢𑀺𑀫𑀪𑀯𑀺𑀓𑀢𑀸𑀬 𑀤𑀸𑀦𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀅𑀦𑀼𑀧𑁆𑀧𑀸𑀤𑀦𑀢𑁄 𑀦 𑀢𑀁 𑀕𑀭𑀼𑀢𑀭𑀁 𑀲𑀗𑁆𑀖𑀲𑁆𑀲 𑀧𑀸𑀤𑀸𑀧𑀦𑁂 𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀧𑀘𑁆𑀙𑀺𑀫𑀸𑀬 𑀚𑀦𑀢𑀸𑀬𑀸’’𑀢𑀺𑀆𑀤𑀺. 𑀯𑀘𑀦𑀢𑁄𑀧𑀻𑀢𑀺 𑀢𑀲𑁆𑀲 𑀯𑀢𑁆𑀣𑀬𑀼𑀕𑀲𑁆𑀲 𑀲𑀢𑁆𑀣𑀼 𑀏𑀯 𑀧𑀝𑀺𑀕𑁆𑀕𑀳𑀡𑀸𑀬 𑀯𑀘𑀦𑀢𑁄𑀧𑀺. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺.

𑀲𑀢𑁆𑀣𑀸 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑁄𑀯 𑀈𑀤𑀺𑀲𑁂 𑀞𑀸𑀦𑁂 𑀅𑀕𑁆𑀕𑀨𑀮𑀝𑁆𑀞𑀢𑀸𑀬 𑀅𑀝𑁆𑀞-𑀅𑀭𑀺𑀬𑀧𑀼𑀕𑁆𑀕𑀮𑀪𑀸𑀯𑀢𑁄, 𑀲𑀘𑁂 𑀧𑀦𑀲𑁆𑀲 𑀦 𑀲𑀬𑀁 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀢𑀸, 𑀓𑀣𑀁 𑀲𑀗𑁆𑀖𑁂 𑀧𑀽𑀚𑀺𑀢𑁂 𑀲𑀢𑁆𑀣𑀸 𑀧𑀽𑀚𑀺𑀢𑁄 𑀦𑀸𑀫 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀻𑀡𑀺 𑀲𑀭𑀡𑀕𑀫𑀦𑀸𑀦𑀺 𑀢𑀬𑁄 𑀏𑀯 𑀅𑀕𑁆𑀕𑀧𑀲𑀸𑀤𑀸𑀢𑀺 𑀯𑀓𑁆𑀔𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀪𑀺𑀥𑁂𑀬𑁆𑀬𑀸𑀦𑀼𑀭𑀽𑀧𑀸𑀦𑀺 𑀳𑀺 𑀮𑀺𑀗𑁆𑀕𑀯𑀘𑀦𑀸𑀦𑀺. 𑀦 𑀭𑀼𑀳𑀢𑀺 𑀅𑀬𑀸𑀣𑀸𑀯𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄, 𑀦 𑀕𑀺𑀳𑀺𑀯𑁂𑀲𑀕𑁆𑀕𑀳𑀡𑀸𑀤𑀺𑀦𑀸 𑀕𑀺𑀳𑀺𑀪𑀸𑀯𑀲𑁆𑀲 𑀧𑀝𑀺𑀓𑁆𑀔𑀺𑀧𑀺𑀢𑀢𑁆𑀢𑀸. 𑀦 𑀯𑀢𑁆𑀢𑀩𑁆𑀩𑀫𑁂𑀢𑀁 ‘‘𑀲𑀢𑁆𑀣𑀸 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺 𑀲𑀢𑁆𑀣𑀼𑀪𑀸𑀯𑀢𑁄. 𑀲𑀸𑀯𑀓𑀲𑀫𑀽𑀳𑁄 𑀳𑀺 𑀲𑀗𑁆𑀖𑁄. 𑀲𑀗𑁆𑀖𑀕𑀡𑁂 𑀳𑀺 𑀲𑀢𑁆𑀣𑀸 𑀉𑀢𑁆𑀢𑀭𑀺𑀢𑀭𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀪𑀸𑀯𑀢𑁄 𑀫𑀽𑀮𑀭𑀢𑀦𑀪𑀸𑀯𑀢𑁄 𑀘.

𑁩𑁭𑁭. 𑀲𑀫𑁆𑀧𑀢𑀺𑀚𑀸𑀢𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀕𑀫𑀦𑀁 𑀥𑀫𑁆𑀫𑀢𑀸𑀯𑀲𑁂𑀦 𑀚𑀸𑀢𑀁, 𑀧𑀭𑀁 𑀢𑀤𑀜𑁆𑀜𑀤𑀳𑀭𑀲𑀤𑀺𑀲𑀻 𑀧𑀝𑀺𑀧𑀢𑁆𑀢𑀻𑀢𑀺 𑀆𑀳 𑁋 ‘‘𑀳𑀢𑁆𑀣𑀧𑀸𑀤𑀓𑀺𑀘𑁆𑀘𑀁 𑀅𑀲𑀸𑀥𑁂𑀦𑁆𑀢𑁂𑀲𑀽’’𑀢𑀺.

𑁩𑁭𑁮. 𑀧𑀘𑁆𑀘𑀽𑀧𑀓𑀸𑀭𑀁 𑀦 𑀲𑀼𑀓𑀭𑀁 𑀯𑀤𑀸𑀫𑀺 𑀅𑀦𑀼𑀘𑁆𑀙𑀯𑀺𑀓𑀓𑀺𑀭𑀺𑀬𑀸𑀬 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀅𑀪𑀺𑀯𑀸𑀤𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀪𑀺𑀯𑀸𑀤𑀦𑀁. 𑀯𑀦𑁆𑀤𑀫𑀸𑀦𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀆𑀘𑀭𑀺𑀬𑀁 ‘‘𑀲𑀼𑀔𑀻 𑀳𑁄𑀢𑀽’’𑀢𑀺𑀆𑀤𑀺𑀦𑀸 𑀅𑀪𑀺𑀯𑀸𑀤𑁂𑀦𑁆𑀢𑀺 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀪𑀺𑀯𑀸𑀤𑀦’’𑀦𑁆𑀢𑀺. 𑀢𑀤𑀪𑀺𑀫𑀼𑀔𑁄…𑀧𑁂… 𑀯𑀦𑁆𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀓𑀸𑀮𑀸𑀦𑀼𑀓𑀸𑀮𑀁 𑀉𑀧𑀝𑁆𑀞𑀸𑀦𑀁 𑀩𑀻𑀚𑀬𑀦𑀧𑀸𑀤𑀲𑀫𑁆𑀩𑀸𑀳𑀦𑀸𑀤𑀺 𑀅𑀦𑀼𑀘𑁆𑀙𑀯𑀺𑀓𑀓𑀫𑁆𑀫𑀲𑁆𑀲 𑀓𑀭𑀡𑀁 𑀦𑀸𑀫. 𑀅𑀦𑀼𑀘𑁆𑀙𑀯𑀺𑀓𑀁 𑀓𑀺𑀭𑀺𑀬𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺𑀬𑁂𑀯, 𑀬𑀲𑁆𑀫𑀸 𑀆𑀘𑀭𑀺𑀬𑁂𑀦 𑀓𑀢𑀲𑁆𑀲 𑀥𑀫𑁆𑀫𑀸𑀦𑀼𑀕𑁆𑀕𑀳𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀦𑀸 𑀓𑀭𑀺𑀬𑀫𑀸𑀦𑁄 𑀆𑀫𑀺𑀲𑀸𑀦𑀼𑀕𑁆𑀕𑀳𑁄 𑀲𑀗𑁆𑀔𑀫𑁆𑀧𑀺 𑀓𑀮𑀫𑁆𑀧𑀺 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺𑀬𑁂𑀯𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀲𑀼𑀧𑁆𑀧𑀢𑀺𑀓𑀸𑀭𑀁 𑀯𑀤𑀸𑀫𑀻’’𑀢𑀺.

𑁩𑁭𑁯. 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀤𑀓𑁆𑀔𑀺𑀡𑀁 𑀆𑀭𑀩𑁆𑀪 𑀲𑀫𑀼𑀝𑁆𑀞𑀺𑀢𑀁, ‘‘𑀢𑀁 𑀫𑁂 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀢𑀽’’𑀢𑀺 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀯𑀘𑀦𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀤𑁂𑀲𑀦𑀸𑀬 𑀉𑀝𑁆𑀞𑀺𑀢𑀢𑁆𑀢𑀸. 𑀦 𑀓𑁂𑀯𑀮𑀜𑁆𑀘 𑀢𑀲𑁆𑀲𑀸 𑀏𑀯 𑀯𑀘𑀦𑀁, 𑀅𑀣 𑀔𑁄 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺…𑀧𑁂… 𑀲𑀫𑀸𑀤𑀧𑁂𑀲𑀺, 𑀢𑀲𑁆𑀫𑀸 𑀯𑀺𑀪𑀸𑀕𑀢𑁄 𑀘𑀼𑀤𑁆𑀤𑀲𑀲𑀼…𑀧𑁂… 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁, 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀧𑀢𑀺𑀧𑀘𑁆𑀘𑁂𑀓𑀁 𑀧𑀼𑀕𑁆𑀕𑀮𑀁 𑀤𑀻𑀬𑀢𑀻𑀢𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁. 𑀧𑀞𑀫𑀲𑀤𑁆𑀤𑁄 𑀬𑀣𑀸 𑀅𑀕𑁆𑀕𑀢𑁆𑀣𑁄, 𑀏𑀯𑀁 𑀲𑁂𑀝𑁆𑀞𑀧𑀭𑀺𑀬𑀸𑀬𑁄𑀧𑀻𑀢𑀺 𑀆𑀳 ‘‘𑀚𑁂𑀝𑁆𑀞𑀓𑀯𑀲𑁂𑀦𑀧𑀻’’𑀢𑀺. 𑀅𑀕𑁆𑀕𑀸 𑀉𑀢𑁆𑀢𑀫𑁂 𑀔𑁂𑀢𑁆𑀢𑁂 𑀧𑀯𑀢𑁆𑀢𑀢𑁆𑀢𑀸. 𑀤𑀼𑀢𑀺𑀬𑀢𑀢𑀺𑀬𑀸𑀧𑀺 𑀧𑀭𑀫𑀤𑀓𑁆𑀔𑀺𑀡𑀸𑀬𑁂𑀯 𑀲𑀩𑁆𑀩𑀲𑁄 𑀲𑀫𑁆𑀫𑀸𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑀸𑀤𑀺𑀓𑀺𑀮𑁂𑀲𑀢𑁆𑀢𑀸. 𑀭𑀸𑀕𑀸𑀤𑀬𑁄 𑀳𑀺 𑀅𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀲𑁆𑀲 𑀓𑀸𑀭𑀡𑀁. 𑀢𑁂𑀦𑁂𑀯𑀸𑀳 𑁋 ‘‘𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀭𑀸𑀕𑀤𑁄𑀲𑀸 𑀅𑀬𑀁 𑀧𑀚𑀸’’𑀢𑀺𑀆𑀤𑀺 (𑀥. 𑀧. 𑁩𑁫𑁬). 𑀬𑀲𑁆𑀫𑀸 𑀧𑀦 𑀲𑀯𑀸𑀲𑀦𑀁 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑁂𑀳𑀺 𑀢𑀢𑁄 𑀏𑀯 𑀲𑀩𑁆𑀩𑀲𑁄 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑁂𑀳𑀺 𑀅𑀦𑀦𑁆𑀢𑀸𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀲𑀤𑀺𑀲𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁄𑀘𑀺 𑀤𑀓𑁆𑀔𑀺𑀡𑁂𑀬𑁆𑀬𑁄 𑀦𑀢𑁆𑀣𑀺. 𑀢𑀲𑁆𑀫𑀸 ‘‘𑀧𑀭𑀫𑀤𑀓𑁆𑀔𑀺𑀡𑀸𑀬𑁂𑀯𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺. 𑀬𑀲𑁆𑀫𑀸 𑀧𑀜𑁆𑀘𑀸𑀪𑀺𑀜𑁆𑀜𑁄 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀏𑀯 𑀳𑁄𑀢𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀦𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀅𑀥𑀺𑀝𑁆𑀞𑀸𑀦𑀢𑁆𑀢𑀸, 𑀢𑀲𑁆𑀫𑀸 ‘‘𑀮𑁄𑀓𑀺𑀬𑀧𑀜𑁆𑀘𑀸𑀪𑀺𑀜𑁆𑀜𑁂’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 ‘‘𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀫𑁆𑀳𑀻’’𑀢𑀺 𑀢𑀸𑀬 𑀅𑀯𑀼𑀢𑁆𑀢𑀲𑀺𑀤𑁆𑀥𑀢𑁆𑀢𑀸. 𑀕𑁄𑀲𑀻𑀮𑀥𑀸𑀢𑀼𑀓𑁄𑀢𑀺 𑀕𑁄𑀲𑀻𑀮𑀲𑀪𑀸𑀯𑁄, 𑀲𑀻𑀮𑀯𑀢𑀸 𑀲𑀤𑀺𑀲𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀲𑀞𑁄’’𑀢𑀺𑀆𑀤𑀺. 𑀢𑁂𑀦 𑀦 𑀅𑀮𑀚𑁆𑀚𑀺𑀥𑀸𑀢𑀼𑀓𑁄 𑀧𑀓𑀢𑀺𑀲𑀺𑀤𑁆𑀥𑁄 𑀇𑀥 𑀧𑀼𑀣𑀼𑀚𑁆𑀚𑀦𑀲𑀻𑀮𑀯𑀸𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄𑀢𑀺 𑀏𑀢𑁆𑀢𑀓𑁄𑀢𑀺 𑀧𑀘𑁆𑀘𑁂𑀓𑀧𑁆𑀧𑀫𑀸𑀡𑀢𑁄 𑀢𑀢𑁄 𑀏𑀯 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄𑀯 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄. 𑀓𑀣𑀁 𑀧𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑁄 𑀯𑀺𑀧𑀸𑀓𑁄 𑀧𑀭𑀺𑀘𑁆𑀙𑀺𑀦𑁆𑀦𑁄 𑀳𑁄𑀢𑀺? 𑀲𑁄𑀧𑀺 𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀏𑀯 𑀇𑀢𑀭𑁂𑀳𑀺 𑀅𑀲𑀁𑀓𑀺𑀡𑁆𑀡𑀪𑀸𑀯𑀤𑀻𑀧𑀦𑀢𑁄, 𑀏𑀢𑀤𑀢𑁆𑀣𑀫𑁂𑀯 𑀧𑀼𑀩𑁆𑀩𑁂 𑀅𑀲𑀗𑁆𑀓𑀭𑀕𑁆𑀕𑀳𑀡𑀁 𑀓𑀢𑀁. 𑀕𑀼𑀡𑀯𑀲𑁂𑀦𑀸𑀢𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸𑀤𑀺𑀕𑀼𑀡𑀯𑀲𑁂𑀦. 𑀉𑀧𑀓𑀸𑀭𑀯𑀲𑁂𑀦𑀸𑀢𑀺 𑀪𑁄𑀕𑀭𑀓𑁆𑀔𑀸𑀤𑀺𑀉𑀧𑀓𑀸𑀭𑀯𑀲𑁂𑀦. 𑀬𑀁 𑀧𑁄𑀲𑀦𑀢𑁆𑀣𑀁 𑀤𑀺𑀦𑁆𑀦𑀁, 𑀇𑀤𑀁 𑀦 𑀕𑀳𑀺𑀢𑀁 𑀤𑀸𑀦𑀮𑀓𑁆𑀔𑀡𑀸𑀬𑁄𑀕𑀢𑁄. 𑀅𑀦𑀼𑀕𑁆𑀕𑀳𑀧𑀽𑀚𑀦𑀺𑀘𑁆𑀙𑀸𑀯𑀲𑁂𑀦 𑀳𑀺 𑀅𑀢𑁆𑀢𑀦𑁄 𑀤𑁂𑀬𑁆𑀬𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀁 𑀪𑀬𑀭𑀸𑀕𑀮𑀤𑁆𑀥𑀼𑀓𑀸𑀫𑀓𑀼𑀮𑀸𑀤𑀺𑀯𑀲𑁂𑀦 𑀲𑀸𑀯𑀚𑁆𑀚𑀸𑀪𑀸𑀯𑀢𑁄. 𑀢𑀫𑁆𑀧𑀺 𑀦 𑀕𑀳𑀺𑀢𑀁 𑀅𑀬𑀸𑀯𑀤𑀢𑁆𑀣𑀢𑀸𑀅𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑀨𑀮𑀤𑀸𑀦𑀸𑀲𑀫𑀢𑁆𑀣𑀪𑀸𑀯𑀢𑁄. 𑀲𑀫𑁆𑀧𑀢𑁆𑀢𑀲𑁆𑀲𑀸𑀢𑀺 𑀲𑀦𑁆𑀢𑀺𑀓𑀸𑀕𑀢𑀲𑁆𑀲. 𑀢𑁂𑀦 𑀲𑀫𑁆𑀧𑀢𑁆𑀢𑀺𑀧𑀬𑁄𑀚𑀦𑁂 𑀅𑀦𑀧𑁂𑀓𑁆𑀔𑀢𑀁 𑀤𑀲𑁆𑀲𑁂𑀢𑀺. 𑀨𑀮𑀁 𑀧𑀝𑀺𑀓𑀗𑁆𑀔𑀺𑀢𑁆𑀯𑀸𑀢𑀺 ‘‘𑀇𑀤𑀁 𑀫𑁂 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀆𑀬𑀢𑀺𑀁 𑀲𑀼𑀔𑀳𑀺𑀢𑀪𑀸𑀯𑀸𑀬 𑀳𑁄𑀢𑀽’’𑀢𑀺𑀆𑀤𑀺𑀦𑀸 𑀨𑀮𑀁 𑀧𑀘𑁆𑀘𑀸𑀲𑀻𑀲𑀺𑀢𑁆𑀯𑀸. 𑀢𑁂𑀦𑀲𑁆𑀲 𑀨𑀮𑀤𑀸𑀦𑁂 𑀦𑀫𑀺𑀬𑀢𑀁 𑀤𑀲𑁆𑀲𑁂𑀢𑀺, 𑀬𑀸𑀯𑀤𑀢𑁆𑀣𑀦𑁆𑀢𑀺 𑀇𑀫𑀺𑀦𑀸 𑀧𑀭𑀺𑀧𑀼𑀡𑁆𑀡𑀨𑀮𑀢𑀁. 𑀲𑀢𑀕𑀼𑀡𑀸𑀢𑀺 𑀏𑀢𑁆𑀣 𑀕𑀼𑀡𑀲𑀤𑁆𑀤𑁄 𑀦 ‘‘𑀕𑀼𑀡𑁂𑀦 𑀦𑀸𑀫𑀁 𑀉𑀤𑁆𑀥𑀭𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑀅𑀝𑁆𑀞. 𑁧𑁩𑁧𑁩; 𑀉𑀤𑀸. 𑀅𑀝𑁆𑀞. 𑁫𑁩; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁭𑁬; 𑀦𑁂𑀢𑁆𑀢𑀺. 𑀅𑀝𑁆𑀞. 𑁪.𑁩𑁮) 𑀯𑀺𑀬 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁄, ‘‘𑀢𑀤𑁆𑀤𑀺𑀕𑀼𑀡’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀦 𑀯𑀟𑁆𑀠𑀦𑀢𑁆𑀣𑁄, ‘‘𑀧𑀜𑁆𑀘 𑀓𑀸𑀫𑀕𑀼𑀡𑀸 𑀮𑁄𑀓𑁂, 𑀫𑀦𑁄𑀙𑀝𑁆𑀞𑀸 𑀧𑀯𑁂𑀤𑀺𑀢𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁭𑁩) 𑀯𑀺𑀬 𑀦 𑀓𑁄𑀝𑁆𑀞𑀸𑀲𑀢𑁆𑀣𑁄, ‘‘𑀅𑀦𑁆𑀢𑀁 𑀅𑀦𑁆𑀢𑀕𑀼𑀡’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦; 𑀔𑀼. 𑀧𑀸. 𑁩) 𑀯𑀺𑀬 𑀦 𑀅𑀦𑁆𑀢𑀪𑀸𑀕𑀢𑁆𑀣𑁄, 𑀅𑀣 𑀔𑁄 𑀆𑀦𑀺𑀲𑀁𑀲𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀲𑀢𑀸𑀦𑀺𑀲𑀁𑀲𑀸’’𑀢𑀺 𑀆𑀳, 𑀢𑁂 𑀆𑀦𑀺𑀲𑀁𑀲𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁, ‘‘𑀆𑀬𑀼𑀲𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑀕𑀼𑀡𑀸𑀢𑀺 𑀯𑀸 𑀲𑀢𑀯𑀟𑁆𑀠𑀺𑀓𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀧𑁆𑀧𑀭𑀺𑀢𑀲𑀁 𑀓𑀭𑁄𑀢𑀻𑀢𑀺 𑀆𑀬𑀼𑀆𑀤𑀻𑀦𑀁 𑀆𑀦𑀺𑀲𑀁𑀲𑀸𑀦𑀁 𑀅𑀧𑀭𑀺𑀢𑁆𑀢𑀸𑀲𑀁 𑀓𑀭𑁄𑀢𑀺. 𑀅𑀣 𑀯𑀸 𑀦𑀺𑀧𑁆𑀧𑀭𑀺𑀢𑀲𑀁 𑀓𑀭𑁄𑀢𑀻𑀢𑀺 𑀆𑀬𑀼𑀆𑀤𑀺𑀦𑀺𑀫𑀺𑀢𑁆𑀢𑀁 𑀅𑀧𑀭𑀺𑀢𑁆𑀢𑀸𑀲𑀁 𑀓𑀭𑁄𑀢𑀺. 𑀅𑀣 𑀯𑀸 𑀦𑀺𑀧𑁆𑀧𑀭𑀺𑀢𑀲𑀁 𑀓𑀭𑁄𑀢𑀻𑀢𑀺 𑀆𑀬𑀼𑀆𑀤𑀻𑀦𑀺 𑀢𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀆𑀳𑀸𑀭𑀸𑀤𑀺𑀳𑁂𑀢𑀼 𑀅𑀧𑀭𑀺𑀢𑁆𑀢𑀸𑀲𑀁 𑀓𑀭𑁄𑀢𑀺. 𑀅𑀢𑁆𑀢𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀲𑀜𑁆𑀘𑀭𑀡𑀲𑁆𑀲 𑀅𑀪𑀸𑀯𑀸, ‘‘𑀪𑀯𑀲𑀢𑁂𑀧𑀺 𑀯𑀼𑀢𑁆𑀢𑁂 𑀅𑀬𑀫𑁂𑀯𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺, ‘‘𑀧𑀼𑀣𑀼𑀚𑁆𑀚𑀦𑀤𑀼𑀲𑁆𑀲𑀻𑀮𑁂’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀯𑀸𑀭𑁂𑀲𑀼. 𑀦𑀬𑁄 𑀦𑁂𑀢𑀩𑁆𑀩𑁄𑀢𑀺, ‘‘𑀆𑀬𑀼𑀲𑀳𑀲𑁆𑀲𑀁 𑀯𑀡𑁆𑀡𑀲𑀳𑀲𑁆𑀲’’𑀦𑁆𑀢𑀺𑀆𑀤𑀺𑀓𑁄 𑀦𑀬𑁄.

𑀲𑀸𑀲𑀦𑀸𑀯𑀢𑀭𑀡𑀁 𑀦𑀸𑀫 𑀬𑀸𑀯𑀤𑁂𑀯 𑀯𑀝𑁆𑀝𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀢𑁆𑀣𑀁, 𑀢𑀜𑁆𑀘 𑀫𑀕𑁆𑀕𑀧𑀝𑀺𑀯𑁂𑀥𑀦𑀁, 𑀢𑀲𑁆𑀫𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀭𑀡𑀕𑀫𑀦𑀁 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑀁 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀲𑀻𑀮𑀧𑀭𑀺𑀧𑀽𑀭𑀡𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀦𑀼𑀬𑁄𑀕𑁄 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀢𑀺 𑀲𑀩𑁆𑀩𑀸𑀧𑁂𑀲𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀢𑁆𑀢𑀺 𑀏𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀢𑀺𑀲𑀭𑀡𑀁 𑀕𑀢𑁄 𑀉𑀧𑀸𑀲𑀓𑁄𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀬𑀣𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄 𑀲𑀫𑀸𑀥𑀺 𑀢𑀸𑀯 𑀦𑀸𑀫 𑀧𑀭𑀫𑁆𑀧𑀭𑀸𑀬 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀉𑀧𑀦𑀺𑀲𑁆𑀲𑀬𑁄; 𑀢𑀣𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀻𑀮𑀧𑀭𑀺𑀧𑀽𑀭𑀡𑀁 𑀉𑀧𑀲𑀫𑁆𑀧𑀤𑀸 𑀧𑀩𑁆𑀩𑀚𑁆𑀚𑀸 𑀉𑀧𑀸𑀲𑀓𑀲𑁆𑀲 𑀤𑀲𑀲𑀼 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀦𑀁 𑀅𑀦𑁆𑀢𑀫𑀲𑁄 𑀲𑀭𑀡𑀸𑀤𑀺𑀕𑀫𑀦𑀫𑁆𑀧𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺𑀬𑁂𑀯𑀸𑀢𑀺, ‘‘𑀲𑀩𑁆𑀩𑀸𑀧𑁂𑀲𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣 𑀅𑀦𑀜𑁆𑀜𑀲𑀸𑀥𑀸𑀭𑀡-𑀯𑀺𑀚𑁆𑀚𑀸𑀘𑀭𑀡𑀸𑀤𑀺-𑀅𑀲𑀗𑁆𑀔𑁆𑀬𑁂𑀬𑁆𑀬𑀅𑀧𑀭𑀺𑀫𑁂𑀬𑁆𑀬-𑀕𑀼𑀡-𑀲𑀫𑀼𑀤𑀬𑀧𑀽𑀭𑀺𑀢𑁂 𑀪𑀕𑀯𑀢𑀺 𑀲𑀤𑁆𑀥𑀫𑁆𑀫𑁂 𑀅𑀭𑀺𑀬𑀲𑀗𑁆𑀖𑁂 𑀉𑀴𑀸𑀭𑀢𑀭𑀩𑀳𑀼𑀫𑀸𑀦𑀕𑀸𑀭𑀯𑀢𑀁 𑀕𑀢𑁄. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀢𑀧𑁆𑀧𑀭𑀸𑀬𑀡𑀢𑀸𑀤𑀺𑀆𑀓𑀸𑀭𑀧𑁆𑀧𑀢𑁆𑀢𑁄 𑀜𑀸𑀡𑀧𑀭𑀺𑀲𑁄𑀥𑀺𑀢𑁄 𑀧𑀲𑀸𑀤𑁄 𑀲𑀭𑀡𑀕𑀫𑀦𑀦𑁆𑀢𑀺 𑀢𑁂𑀦 𑀯𑀢𑁆𑀣𑀼𑀕𑀢𑁂𑀦 𑀧𑀲𑀸𑀤𑁂𑀦 𑀧𑀭𑀺𑀪𑀸𑀯𑀺𑀢𑁂 𑀲𑀦𑁆𑀢𑀸𑀦𑁂 𑀓𑀢𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀧𑁆𑀨𑀮𑀁 𑀫𑀳𑀸𑀦𑀺𑀲𑀁𑀲𑀫𑁂𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀢𑀲𑁆𑀫𑀺𑀁 𑀤𑀺𑀦𑁆𑀦𑀤𑀸𑀦𑀫𑁆𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬’’𑀦𑁆𑀢𑀺. 𑀢𑀬𑀺𑀤𑀁 𑀲𑀭𑀡𑀁 𑀯𑀢𑁆𑀣𑀼𑀢𑁆𑀢𑀬𑁂 𑀧𑀲𑀸𑀤𑀪𑀸𑀯𑁂𑀦 𑀅𑀚𑁆𑀛𑀸𑀲𑀬𑀲𑀫𑁆𑀧𑀢𑁆𑀢𑀺𑀫𑀢𑁆𑀢𑀁, 𑀢𑀸𑀤𑀺𑀲𑀲𑁆𑀲 𑀧𑀦 𑀧𑀜𑁆𑀘𑀲𑀻𑀮𑀁 𑀅𑀚𑁆𑀛𑀸𑀲𑀬𑀲𑀫𑁆𑀧𑀢𑁆𑀢𑀺𑀉𑀧𑀣𑀫𑁆𑀪𑀺𑀢𑁄 𑀓𑀸𑀬𑀯𑀘𑀻𑀲𑀁𑀬𑀫𑁄𑀢𑀺 𑀢𑀢𑁆𑀣 𑀤𑀺𑀦𑁆𑀦𑀁 𑀢𑀢𑁄 𑀉𑀢𑁆𑀢𑀭𑀺 𑀫𑀳𑀧𑁆𑀨𑀮𑀦𑁆𑀢𑀺, 𑀤𑀲𑀲𑀻𑀮𑀁 𑀧𑀦 𑀧𑀭𑀺𑀧𑀼𑀡𑁆𑀡𑀼𑀧𑁄𑀲𑀣𑀲𑀻𑀮𑀁, 𑀢𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺, ‘‘𑀢𑀢𑁄 𑀉𑀢𑁆𑀢𑀭𑀺 𑀫𑀳𑀧𑁆𑀨𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀡𑁂𑀭𑀲𑀻𑀮𑀸𑀤𑀻𑀦𑀁 𑀧𑀦 𑀉𑀢𑁆𑀢𑀭𑀺 𑀯𑀺𑀲𑀺𑀝𑁆𑀞𑀢𑀭𑀸𑀤𑀺𑀪𑀸𑀯𑀢𑁄 𑀢𑀢𑁆𑀣 𑀢𑀢𑁆𑀣 𑀤𑀺𑀦𑁆𑀦𑀲𑁆𑀲 𑀯𑀺𑀲𑁂𑀲𑀫𑀳𑀧𑁆𑀨𑀮𑀢𑀸 𑀯𑀼𑀢𑁆𑀢𑀸.

𑀫𑀕𑁆𑀕𑀲𑀫𑀗𑁆𑀕𑀺𑀢𑀸 𑀦𑀸𑀫 𑀫𑀕𑁆𑀕𑀘𑀺𑀢𑁆𑀢𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑀸, 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀓𑀣𑀁 𑀤𑀸𑀢𑀼𑀁 𑀧𑀝𑀺𑀕𑁆𑀕𑀳𑁂𑀢𑀼𑀜𑁆𑀘 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑁂𑀢𑀺 ‘‘𑀓𑀺𑀁 𑀧𑀦 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀲𑀓𑁆𑀓𑀸 𑀤𑀸𑀦𑀁 𑀤𑀸𑀢𑀼’’𑀦𑁆𑀢𑀺. 𑀇𑀢𑀭𑁄 𑀢𑀸𑀤𑀺𑀲𑁂 𑀲𑀢𑀺 𑀲𑀫𑀬𑁂𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀆𑀫 𑀲𑀓𑁆𑀓𑀸’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸, ‘‘𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄’’𑀢𑀺𑀆𑀤𑀺𑀦𑀸 𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. 𑀢𑀲𑁆𑀫𑀺𑀁 𑀔𑀡𑁂𑀢𑀺 𑀢𑀲𑁆𑀫𑀺𑀁 𑀧𑀓𑁆𑀔𑀺𑀧𑀦𑀓𑁆𑀔𑀡𑁂. 𑀬𑀤𑀺 𑀅𑀝𑁆𑀞𑀫𑀓𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀨𑀮𑀢𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑁂𑀯, 𑀓𑁄 𑀦𑁂𑀲𑀁 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑁂𑀦 𑀲𑀢𑀺𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀪𑀸𑀯𑀲𑀸𑀫𑀜𑁆𑀜𑁂 𑀅𑀢𑁆𑀣𑀺 𑀦𑁂𑀲𑀁 𑀅𑀧𑁆𑀧𑀩𑀳𑀼𑀪𑀸𑀯𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑀳𑀸𑀓𑀧𑁆𑀧𑀸𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀫𑀕𑁆𑀕𑀲𑀫𑀗𑁆𑀕𑀻𑀦𑀁 𑀢𑁂𑀦 𑀢𑁂𑀦 𑀑𑀥𑀺𑀦𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀧𑀳𑀻𑀬𑀫𑀸𑀦𑀢𑁆𑀢𑀸 𑀯𑁄𑀤𑀸𑀦𑀥𑀫𑁆𑀫𑀸𑀦𑀁 𑀯𑀟𑁆𑀠𑀫𑀸𑀦𑀢𑁆𑀢𑀸 𑀅𑀧𑀭𑀺𑀬𑁄𑀲𑀺𑀢𑀓𑀺𑀘𑁆𑀘𑀢𑁆𑀢𑀸 𑀅𑀧𑀭𑀺𑀧𑀼𑀡𑁆𑀡𑀕𑀼𑀡𑀢𑀸, 𑀧𑀭𑀺𑀬𑁄𑀲𑀺𑀢𑀓𑀺𑀘𑁆𑀘𑀢𑁆𑀢𑀸 𑀨𑀮𑀲𑀫𑀗𑁆𑀕𑀻𑀦𑀁 𑀧𑀭𑀺𑀧𑀼𑀡𑁆𑀡𑀕𑀼𑀡𑀢𑀸𑀢𑀺 𑀢𑀁𑀢𑀁𑀫𑀕𑁆𑀕𑀝𑁆𑀞𑁂𑀳𑀺 𑀨𑀮𑀝𑁆𑀞𑀸𑀦𑀁 𑀔𑁂𑀢𑁆𑀢𑀸𑀢𑀺𑀲𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑁂𑀳𑀺 𑀧𑀦 𑀫𑀕𑁆𑀕𑀝𑁆𑀞𑁂𑀳𑀺 𑀉𑀧𑀭𑀺𑀫𑀸𑀦𑀁 𑀫𑀕𑁆𑀕𑀝𑁆𑀞𑀸𑀦𑀁 𑀨𑀮𑀝𑁆𑀞𑁂𑀳𑀺 𑀨𑀮𑀝𑁆𑀞𑀸𑀦𑀁 𑀉𑀢𑁆𑀢𑀭𑀺𑀢𑀭𑀢𑀸 𑀧𑀸𑀓𑀝𑀸 𑀏𑀯. 𑀢𑀣𑀸 𑀳𑀺 𑀉𑀧𑀭𑀺𑀫𑀸𑀦𑀁 𑀤𑀺𑀦𑁆𑀦𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀢𑀸 𑀯𑀼𑀢𑁆𑀢𑀸.

𑁩𑁮𑁦. 𑀓𑀸𑀫𑀜𑁆𑀘𑁂𑀢𑁆𑀣 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀉𑀪𑀢𑁄𑀲𑀗𑁆𑀖𑁂 𑀓𑁂𑀯𑀮𑁂 𑀘 𑀪𑀺𑀓𑁆𑀔𑀼𑀲𑀗𑁆𑀖𑁂 𑀤𑀸𑀦𑀁 𑀅𑀢𑁆𑀣𑀺 𑀏𑀯, 𑀦 𑀧𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀪𑀺𑀓𑁆𑀔𑀼𑀲𑀗𑁆𑀖𑁂, 𑀢𑀁 𑀧𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀉𑀪𑀢𑁄𑀲𑀗𑁆𑀖𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀅𑀯𑀺𑀭𑀼𑀤𑁆𑀥𑀁. 𑀦 𑀧𑀸𑀧𑀼𑀡𑀦𑁆𑀢𑀺 𑀫𑀳𑀧𑁆𑀨𑀮𑀪𑀸𑀯𑁂𑀦 𑀲𑀤𑀺𑀲𑀢𑀫𑁆𑀧𑀺, 𑀓𑀼𑀢𑁄 𑀅𑀥𑀺𑀓𑀢𑀁.

‘‘𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀉𑀪𑀢𑁄𑀲𑀗𑁆𑀖𑀲𑁆𑀲’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀢𑁆𑀢𑀸 𑁋 ‘‘𑀓𑀺𑀁 𑀧𑀦𑀸’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀇𑀢𑀭𑁄 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀣𑀸𑀕𑀢𑁂 𑀢𑀁 𑀉𑀤𑁆𑀤𑀺𑀲𑁆𑀲 𑀕𑀦𑁆𑀥𑀧𑀼𑀧𑁆𑀨𑀸𑀤𑀺𑀧𑀭𑀺𑀘𑁆𑀘𑀸𑀕𑁄 𑀯𑀺𑀬 𑀘𑀻𑀯𑀭𑀸𑀤𑀺𑀧𑀭𑀺𑀘𑁆𑀘𑀸𑀕𑁄𑀧𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺𑀬𑁂𑀯𑀸𑀢𑀺 𑀓𑀢𑁆𑀯𑀸 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁, ‘‘𑀉𑀪𑀢𑁄𑀲𑀗𑁆𑀖𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀏𑀢𑁆𑀢𑀓𑀸𑀬𑁂𑀯, 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀣𑀸’’𑀢𑀺 𑀏𑀯𑀁 𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀓𑀭𑀡𑁂𑀦 𑀉𑀧𑀘𑀸𑀭𑀲𑀻𑀫𑀸𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀔𑁂𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀯𑀲𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀓𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂.

𑀕𑁄𑀢𑁆𑀢𑀁 𑀯𑀼𑀘𑁆𑀘𑀢𑀺 𑀲𑀸𑀥𑀸𑀭𑀡𑀦𑀸𑀫𑀁, 𑀫𑀢𑁆𑀢𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀢𑀲𑁆𑀫𑀸 𑀲𑀫𑀡𑀸𑀢𑀺 𑀕𑁄𑀢𑁆𑀢𑀫𑀢𑁆𑀢𑀁 𑀅𑀦𑀼𑀪𑀯𑀦𑁆𑀢𑀺 𑀥𑀸𑀭𑁂𑀦𑁆𑀢𑀻𑀢𑀺 𑀕𑁄𑀢𑁆𑀭𑀪𑀼𑀦𑁄. 𑀢𑁂𑀦𑀸𑀳 ‘‘𑀦𑀸𑀫𑀫𑀢𑁆𑀢𑀲𑀫𑀡𑀸’’𑀢𑀺. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑁄 𑀲𑀫𑀡𑀕𑀡𑁄 𑀲𑀗𑁆𑀖𑁄, 𑀢𑀲𑁆𑀫𑀸 𑀲𑀗𑁆𑀖𑁄 𑀤𑀼𑀲𑁆𑀲𑀻𑀮𑁄 𑀦𑀸𑀫 𑀦𑀢𑁆𑀣𑀺. 𑀕𑀼𑀡𑀲𑀗𑁆𑀔𑀸𑀬𑀸𑀢𑀺 𑀆𑀦𑀺𑀲𑀁𑀲𑀕𑀡𑀦𑀸𑀬, 𑀫𑀳𑀧𑁆𑀨𑀮𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀓𑀸𑀲𑀸𑀯…𑀧𑁂… 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀢𑁆𑀢𑀸. 𑀬𑀣𑀸 𑀧𑀦 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀳𑁄𑀢𑀺, 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁, ‘‘𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀺𑀢𑁆𑀢𑀻𑀓𑀸𑀭𑀦𑁆𑀢𑀺 𑀕𑀸𑀭𑀯𑀁.

𑀲𑀗𑁆𑀖𑀢𑁄 𑀦 𑀧𑀼𑀕𑁆𑀕𑀮𑀢𑁄. 𑀅𑀜𑁆𑀜𑀣𑀢𑁆𑀢𑀁 𑀆𑀧𑀚𑁆𑀚𑀢𑀻𑀢𑀺 ‘‘𑀇𑀫𑀲𑁆𑀲 𑀫𑀬𑀸 𑀤𑀺𑀦𑁆𑀦𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀳𑁄𑀢𑀻’’𑀢𑀺 𑀏𑀯𑀁 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸, ‘‘𑀲𑀗𑁆𑀖𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀤𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀦𑀸𑀫 𑀤𑀸𑀢𑀩𑁆𑀩𑀁 𑀚𑀸𑀢𑀦𑁆𑀢𑀺 𑀅𑀜𑁆𑀜𑀣𑀢𑁆𑀢𑀁 𑀆𑀧𑀚𑁆𑀚𑀢𑀺; 𑀢𑀲𑁆𑀫𑀸 𑀢𑀲𑁆𑀲 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀦 𑀳𑁄𑀢𑀺𑀬𑁂𑀯 𑀧𑀼𑀕𑁆𑀕𑀮𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀧𑀭𑀺𑀡𑀸𑀫𑀺𑀢𑀢𑁆𑀢𑀸. 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑀼𑀢𑁆𑀯𑀸𑀢𑀺 ‘‘𑀓𑀺𑀁 𑀦𑀼 𑀔𑁄 𑀫𑀬𑀸 𑀇𑀫𑀲𑁆𑀲 𑀤𑀺𑀦𑁆𑀦𑀁 𑀳𑁄𑀢𑀺 𑀯𑀸 𑀦 𑀯𑀸’’𑀢𑀺 𑀯𑀺𑀫𑀢𑀺𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸, ‘‘𑀬𑁄 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀓𑀸𑀭𑁂𑀦 𑀓𑀭𑁄𑀢𑀺.

𑀢𑀢𑁆𑀣𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀢𑁆𑀣𑀁 𑀯𑀢𑁆𑀣𑀼𑀁 𑀦𑀺𑀤𑀲𑁆𑀲𑁂𑀢𑀺, ‘‘𑀧𑀭𑀲𑀫𑀼𑀤𑁆𑀤𑀯𑀸𑀲𑀺𑀦𑁄’’𑀢𑀺𑀆𑀤𑀺𑀦𑀸. 𑀑𑀧𑀼𑀜𑁆𑀚𑀸𑀧𑁂𑀢𑁆𑀯𑀸 𑀧𑀭𑀺𑀪𑀡𑁆𑀟𑀁 𑀓𑀸𑀭𑁂𑀢𑁆𑀯𑀸, 𑀳𑀭𑀺𑀢𑀕𑁄𑀫𑀬𑁂𑀦 𑀉𑀧𑀮𑀺𑀫𑁆𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀸𑀲𑀸𑀯𑀓𑀡𑁆𑀞𑀲𑀗𑁆𑀖𑀲𑁆𑀲𑀸𑀢𑀺 𑀓𑀸𑀲𑀸𑀯𑀓𑀡𑁆𑀞𑀲𑀫𑀽𑀳𑀲𑁆𑀲. 𑀓𑁄 𑀲𑁄𑀥𑁂𑀢𑀻𑀢𑀺 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀓𑁄 𑀯𑀺𑀲𑁄𑀥𑁂𑀢𑀺. 𑀫𑀳𑀧𑁆𑀨𑀮𑀪𑀸𑀯𑀸𑀧𑀢𑁆𑀢𑀺𑀬𑀸 𑀳𑀺 𑀤𑀓𑁆𑀔𑀺𑀡𑀸 𑀯𑀺𑀲𑀼𑀚𑁆𑀛𑀢𑀺 𑀦𑀸𑀫. 𑀢𑀢𑁆𑀣 𑀬𑁂𑀲𑀁 𑀳𑀢𑁆𑀣𑁂 𑀤𑀺𑀦𑁆𑀦𑀁, 𑀢𑁂𑀲𑀁 𑀯𑀲𑁂𑀦 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀓𑁆𑀔𑀺𑀡𑀸𑀬 𑀯𑀺𑀲𑀼𑀤𑁆𑀥𑀢𑁆𑀢𑀸, 𑁋 ‘‘𑀢𑀤𑀸𑀧𑀸𑀳𑀁, 𑀆𑀦𑀦𑁆𑀤, 𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁩.𑁩𑁮𑁦) 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀫𑁆𑀫𑀯𑀲𑁂𑀦𑁂𑀯 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀁 𑀧𑀼𑀘𑁆𑀙𑀢𑀺. 𑀇𑀢𑀭𑁄 𑀅𑀭𑀺𑀬𑀲𑀗𑁆𑀖𑁂 𑀤𑀺𑀦𑁆𑀦𑀤𑀓𑁆𑀔𑀺𑀡𑀸𑀬 𑀦𑀺𑀩𑁆𑀩𑀺𑀲𑀺𑀝𑁆𑀞𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀲𑁆𑀲𑁂𑀯 𑀅𑀭𑀺𑀬𑀲𑀗𑁆𑀖𑀲𑁆𑀲 𑀯𑀲𑁂𑀦 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀲𑀸𑀭𑀺𑀧𑀼𑀢𑁆𑀢…𑀧𑁂… 𑀲𑁄𑀥𑁂𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦, ‘‘𑀬𑁂 𑀓𑁂𑀘𑀺 𑀅𑀭𑀳𑀦𑁆𑀢𑁄 𑀲𑁄𑀥𑁂𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀣𑁂𑀭𑀸 𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑀸𑀢𑀺 𑀇𑀤𑀁 𑀅𑀚𑁆𑀚𑀢𑀦𑀸𑀦𑀫𑁆𑀧𑀺 𑀅𑀭𑀺𑀬𑀸𑀦𑀁 𑀲𑀸𑀯𑀓𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 𑀫𑀕𑁆𑀕𑀲𑁄𑀥𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀦 𑀉𑀤𑁆𑀤𑀺𑀲𑁆𑀲 𑀧𑀼𑀜𑁆𑀜𑀓𑀭𑀡𑁂 𑀲𑀢𑀺 𑀅𑀓𑀭𑀡𑀧𑁆𑀧𑀢𑁆𑀢𑀺𑀬𑀸. 𑀏𑀯𑀜𑁆𑀳𑀺 ‘‘𑀅𑀲𑀻𑀢𑀺𑀫𑀳𑀸𑀣𑁂𑀭𑀸 𑀲𑁄𑀥𑁂𑀦𑁆𑀢𑀻’’𑀢𑀺 𑀇𑀤𑀁 𑀲𑀼𑀯𑀼𑀢𑁆𑀢𑀁 𑀳𑁄𑀢𑀺, 𑀦 𑀅𑀜𑁆𑀜𑀣𑀸.

‘‘𑀲𑀗𑁆𑀖𑀕𑀢𑀸𑀬 𑀤𑀓𑁆𑀔𑀺𑀡𑀸𑀬𑀸’’𑀢𑀺 𑀓𑀸𑀫𑀜𑁆𑀘𑁂𑀢𑀁 𑀲𑀸𑀥𑀸𑀭𑀡𑀯𑀘𑀦𑀁, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀧𑀼𑀕𑁆𑀕𑀮𑀯𑀺𑀲𑁂𑀲𑁄 𑀜𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀅𑀢𑁆𑀣𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄’’𑀢𑀺𑀆𑀤𑀺𑀫𑀸𑀳. 𑀦 𑀉𑀧𑀦𑁂𑀢𑀩𑁆𑀩𑁄 𑀪𑀕𑀯𑀢𑁄 𑀓𑀸𑀮𑁂 𑀪𑀺𑀓𑁆𑀔𑀽𑀦𑀁 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀕𑀼𑀡𑀯𑀲𑁂𑀦 𑀅𑀢𑀺𑀯𑀺𑀬 𑀉𑀴𑀸𑀭𑀪𑀸𑀯𑀢𑁄, 𑀏𑀢𑀭𑀳𑀺 𑀢𑀤𑀪𑀸𑀯𑀢𑁄. 𑀏𑀢𑀭𑀳𑀺 𑀲𑀗𑁆𑀖𑁄…𑀧𑁂… 𑀦 𑀉𑀧𑀦𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀢𑁂𑀦 𑀢𑁂𑀦𑁂𑀯 𑀲𑀫𑀬𑁂𑀦𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀓𑀸𑀮𑀲𑁆𑀲 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀫𑀼𑀔𑁂𑀦 𑀧𑀝𑀺𑀧𑀢𑁆𑀢𑀺𑀬𑀸 𑀉𑀴𑀸𑀭𑀢𑀁 𑀅𑀦𑀼𑀴𑀸𑀭𑀢𑀜𑁆𑀘 𑀉𑀮𑁆𑀮𑀺𑀗𑁆𑀕𑁂𑀢𑀺. 𑀬𑀢𑁆𑀣 𑀳𑀺 𑀪𑀺𑀓𑁆𑀔𑀽 𑀕𑀼𑀡𑁂𑀳𑀺 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸 𑀇𑀢𑀭𑀲𑁆𑀫𑀺𑀁 𑀲𑀫𑀬𑁂 𑀤𑀓𑁆𑀔𑀺𑀡𑀢𑁄 𑀫𑀳𑀧𑁆𑀨𑀮𑀢𑀭𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲𑀸𑀢𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀁 𑀲𑀗𑁆𑀖𑁂 𑀆𑀯𑀚𑁆𑀚𑀺𑀢𑁆𑀯𑀸 𑀲𑀗𑁆𑀖𑀕𑀢𑁂𑀦 𑀧𑀲𑀸𑀤𑁂𑀦 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀯𑀺𑀬 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀘 𑀕𑀸𑀭𑀯𑀯𑀲𑁂𑀦 𑀤𑁂𑀦𑁆𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑀫𑀡𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀢𑀭𑀁 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀕𑀳𑀺𑀢𑀢𑁆𑀢𑀸, ‘‘𑀲𑀗𑁆𑀖𑀲𑁆𑀲 𑀤𑁂𑀫𑀻’’𑀢𑀺𑀬𑁂𑀯 𑀤𑀺𑀦𑁆𑀦𑀢𑁆𑀢𑀸 𑀘.

𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸, ‘‘𑀲𑁄𑀢𑀸𑀧𑀦𑁆𑀦𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺 𑀏𑀯𑀫𑀸𑀤𑀺𑀁 𑀅𑀢𑀺𑀤𑀺𑀲𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀉𑀤𑁆𑀤𑀺𑀲𑀺𑀢𑁆𑀯𑀸 𑀕𑀳𑀺𑀢𑁄 𑀲𑀓𑀤𑀸𑀕𑀸𑀫𑀻, 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑁄 𑀅𑀦𑀸𑀕𑀸𑀫𑀻𑀢𑀺 𑀏𑀯𑀫𑀸𑀤𑀺 𑀲𑀗𑁆𑀕𑀳𑀺𑀢𑀁. 𑀫𑀳𑀧𑁆𑀨𑀮𑀢𑀭𑀫𑁂𑀯. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦 𑀢𑁆𑀯𑁂𑀯𑀸𑀳𑀁, 𑀆𑀦𑀦𑁆𑀤, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀕𑀢𑀸𑀬 𑀤𑀓𑁆𑀔𑀺𑀡𑀸𑀬 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁩.𑁩𑁮𑁦). 𑀬𑀤𑀺 𑀔𑀻𑀡𑀸𑀲𑀯𑁂 𑀤𑀺𑀦𑁆𑀦𑀤𑀸𑀦𑀢𑁄 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀕𑀳𑀺𑀢𑀤𑀼𑀲𑁆𑀲𑀻𑀮𑁂𑀧𑀺 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀁, 𑀏𑀯𑀁 𑀲𑀦𑁆𑀢𑁂 𑁋 ‘‘𑀲𑀻𑀮𑀯𑀢𑁄, 𑀫𑀳𑀸𑀭𑀸𑀚, 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦𑁄 𑀢𑀣𑀸 𑀤𑀼𑀲𑁆𑀲𑀻𑀮𑁂’’𑀢𑀺 𑀇𑀤𑀁 𑀓𑀣𑀦𑁆𑀢𑀺 𑀆𑀳 𑁋 ‘‘𑀢𑀁 𑀇𑀫𑀁 𑀦𑀬𑀁 𑀕𑀳𑀸𑀬𑀸’’𑀢𑀺𑀆𑀤𑀺. 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀕𑀳𑀡𑀯𑀺𑀥𑀺𑀁 𑀧𑀳𑀸𑀬 𑀤𑀼𑀲𑁆𑀲𑀻𑀮𑀲𑁆𑀲𑁂𑀯 𑀕𑀳𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀤𑀝𑁆𑀞𑀩𑁆𑀩𑀦𑁆𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀯𑀲𑁂𑀦 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀳𑀺 ‘‘𑀧𑀝𑀺𑀕𑁆𑀕𑀸𑀳𑀓𑀸 𑀳𑁄𑀦𑁆𑀢𑀺 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸’’𑀢𑀺 𑀆𑀕𑀢𑀁.

𑁩𑁮𑁧. 𑀯𑀺𑀲𑀼𑀚𑁆𑀛𑀢𑀻𑀢𑀺 𑀦 𑀓𑀺𑀮𑀺𑀲𑁆𑀲𑀢𑀺, 𑀫𑀳𑀸𑀚𑀼𑀢𑀺𑀓𑀸𑀭𑀻 𑀫𑀳𑀸𑀯𑀺𑀧𑁆𑀨𑀸𑀭𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀘𑀺𑀥𑀫𑁆𑀫𑁄𑀢𑀺 𑀭𑀸𑀕𑀸𑀤𑀺𑀅𑀲𑀼𑀘𑀺𑀯𑀺𑀥𑀫𑀦𑁂𑀦 𑀲𑀼𑀘𑀺𑀲𑀪𑀸𑀯𑁄. 𑀦 𑀧𑀸𑀧𑀥𑀫𑁆𑀫𑁄𑀢𑀺 𑀦 𑀦𑀺𑀳𑀻𑀦𑀲𑀪𑀸𑀯𑁄 𑀧𑀸𑀧𑀓𑀺𑀭𑀺𑀬𑀸𑀬. 𑀅𑀓𑀼𑀲𑀮𑀥𑀫𑁆𑀫𑁄 𑀳𑀺 𑀏𑀓𑀦𑁆𑀢𑀦𑀺𑀳𑀻𑀦𑁄. 𑀚𑀽𑀚𑀓𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀦 𑀳𑁄𑀢𑀺. 𑀢𑀲𑁆𑀲 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀦𑀁 𑀤𑀸𑀦𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀕𑀡𑁆𑀳𑀦𑁆𑀢𑀁 𑀫𑀳𑀸𑀧𑀣𑀯𑀻𑀓𑀫𑁆𑀧𑀦𑀲𑀫𑀢𑁆𑀣𑀁 𑀚𑀸𑀢𑀁, 𑀲𑁆𑀯𑀸𑀬𑀁 𑀤𑀸𑀦𑀕𑀼𑀡𑁄 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀜𑁆𑀜𑀸 𑀓𑀣𑁂𑀢𑀩𑁆𑀩𑁄𑀢𑀺.

𑀉𑀤𑁆𑀥𑀭𑀢𑀻𑀢𑀺 𑀩𑀳𑀼𑀮𑀁 𑀓𑀢𑀧𑀸𑀧𑀓𑀫𑁆𑀫𑀯𑀲𑁂𑀦 𑀮𑀤𑁆𑀥𑀯𑀺𑀦𑀺𑀧𑀸𑀢𑀢𑁄 𑀉𑀤𑁆𑀥𑀭𑀢𑀺. 𑀢𑀲𑁆𑀫𑀸 𑀦𑀢𑁆𑀣𑀺 𑀫𑀬𑁆𑀳𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑁂𑀢𑀤𑀓𑁆𑀔𑀺𑀡𑀦𑁆𑀢𑀺 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀤𑀸𑀢𑀩𑁆𑀩𑀤𑀓𑁆𑀔𑀺𑀡𑀁. 𑀧𑀸𑀧𑀺𑀢𑀓𑀸𑀮𑁂𑀬𑁂𑀯𑀸𑀢𑀺, ‘‘𑀇𑀤𑀁 𑀤𑀸𑀦𑀁 𑀅𑀲𑀼𑀓𑀲𑁆𑀲 𑀧𑁂𑀢𑀲𑁆𑀲 𑀳𑁄𑀢𑀽’’𑀢𑀺 𑀉𑀤𑁆𑀤𑀺𑀲𑀦𑀯𑀲𑁂𑀦 𑀧𑀢𑁆𑀢𑁂 𑀧𑀸𑀧𑀺𑀢𑀓𑀸𑀮𑁂𑀬𑁂𑀯. 𑀅𑀲𑁆𑀲𑀸𑀢𑀺 𑀧𑁂𑀢𑀲𑁆𑀲. 𑀧𑀸𑀧𑀼𑀡𑀻𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀲𑁂𑀦 𑀧𑀸𑀧𑀼𑀡𑀺. 𑀅𑀬𑀜𑁆𑀳𑀺 𑀧𑁂𑀢𑁂 𑀉𑀤𑁆𑀤𑀺𑀲𑁆𑀲 𑀤𑀸𑀦𑁂 𑀥𑀫𑁆𑀫𑀢𑀸.

𑀢𑀤𑀸 𑀓𑁄𑀲𑀮𑀭𑀜𑁆𑀜𑁄 𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀅𑀢𑀺𑀯𑀺𑀬 𑀉𑀴𑀸𑀭𑀚𑁆𑀛𑀸𑀲𑀬𑀢𑀁, 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀓𑁆𑀓𑀁𑀲𑀕𑀢𑀕𑀼𑀡𑀯𑀺𑀲𑀺𑀝𑁆𑀞𑀢𑀁 𑀲𑀦𑁆𑀥𑀸𑀬𑀸𑀳, ‘‘𑀅𑀲𑀤𑀺𑀲𑀤𑀸𑀦𑀁 𑀓𑀣𑁂𑀢𑀩𑁆𑀩’’𑀦𑁆𑀢𑀺.

𑀅𑀲𑀸𑀭𑀫𑁆𑀧𑀺 𑀔𑁂𑀢𑁆𑀢𑀦𑁆𑀢𑀺 𑀲𑀸𑀭𑀳𑀻𑀦𑀁 𑀤𑀼𑀓𑁆𑀔𑁂𑀢𑁆𑀢𑀁. 𑀲𑀫𑀬𑁂𑀢𑀺 𑀓𑀲𑀦𑀸𑀭𑀳𑁂 𑀓𑀸𑀮𑁂. 𑀧𑀁𑀲𑀼𑀁 𑀅𑀧𑀦𑁂𑀢𑁆𑀯𑀸𑀢𑀺 𑀦𑀺𑀲𑁆𑀲𑀸𑀭𑀁 𑀧𑀁𑀲𑀼𑀁 𑀦𑀻𑀳𑀭𑀺𑀢𑁆𑀯𑀸. 𑀲𑀸𑀭𑀩𑀻𑀚𑀸𑀦𑀻𑀢𑀺 𑀲𑀪𑀸𑀯𑀢𑁄 𑀅𑀪𑀺𑀲𑀗𑁆𑀔𑀸𑀭𑀢𑁄 𑀘 𑀲𑀸𑀭𑀪𑀽𑀢𑀸𑀦𑀺 𑀩𑀻𑀚𑀸𑀦𑀺. 𑀧𑀢𑀺𑀝𑁆𑀞𑀧𑁂𑀢𑁆𑀯𑀸𑀢𑀺 𑀯𑀧𑀺𑀢𑁆𑀯𑀸. 𑀏𑀯𑀦𑁆𑀢𑀺 𑀬𑀣𑀸 𑀓𑀲𑁆𑀲𑀓𑁄 𑀅𑀢𑁆𑀢𑀦𑁄 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀅𑀲𑀸𑀭𑁂𑀧𑀺 𑀔𑁂𑀢𑁆𑀢𑁂 𑀨𑀮𑀁 𑀅𑀥𑀺𑀕𑀘𑁆𑀙𑀢𑀺. 𑀏𑀯𑀁 𑀲𑀻𑀮𑀯𑀸 𑀅𑀢𑁆𑀢𑀦𑁄 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀲𑁆𑀲𑀻𑀮𑀲𑁆𑀲𑀧𑀺 𑀤𑀢𑁆𑀯𑀸 𑀨𑀮𑀁 𑀫𑀳𑀦𑁆𑀢𑀁 𑀅𑀥𑀺𑀕𑀘𑁆𑀙𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦𑀸𑀢𑀺 𑀇𑀫𑀺𑀦𑀸 𑀧𑀞𑀫𑀧𑀤𑁂 𑀯𑀼𑀢𑁆𑀢𑀦𑀬𑁂𑀦. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀲𑀼 𑀯𑀺𑀲𑀼𑀚𑁆𑀛𑀦𑀁 𑀯𑀼𑀢𑁆𑀢𑀁, 𑀢𑀢𑀺𑀬𑀧𑀤𑁂 𑀧𑀦 𑀯𑀺𑀲𑀼𑀚𑁆𑀛𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯.

𑁩𑁮𑁨. 𑀅𑀭𑀳𑀢𑁄 𑀤𑀺𑀦𑁆𑀦𑀤𑀸𑀦𑀫𑁂𑀯 𑀅𑀕𑁆𑀕𑀁 𑀤𑀸𑀦𑀘𑁂𑀢𑀦𑀸𑀬 𑀓𑁂𑀦𑀘𑀺 𑀉𑀧𑀓𑁆𑀓𑀺𑀮𑁂𑀲𑁂𑀦 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑁆𑀢𑀸, 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸. 𑀢𑁂𑀦𑀸𑀳 𑁋 ‘‘𑀪𑀯𑀸𑀮𑀬𑀲𑁆𑀲 𑀪𑀯𑀧𑀢𑁆𑀣𑀦𑀸𑀬 𑀅𑀪𑀸𑀯𑀢𑁄’’𑀢𑀺, ‘‘𑀉𑀪𑀺𑀦𑁆𑀦𑀫𑁆𑀧𑀻’’𑀢𑀺 𑀯𑀘𑀦𑀲𑁂𑀲𑁄. 𑀔𑀻𑀡𑀸𑀲𑀯𑁄 𑀤𑀸𑀦𑀨𑀮𑀁 𑀦 𑀲𑀤𑁆𑀤𑀳𑀢𑀻𑀢𑀺 𑀇𑀤𑀁 𑀢𑀲𑁆𑀲 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀚𑀦𑀲𑁆𑀲 𑀯𑀺𑀬 𑀓𑀫𑁆𑀫𑀓𑀫𑁆𑀫𑀨𑀮𑀸𑀦𑀁 𑀲𑀤𑁆𑀤𑀳𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀬𑀢𑁄 𑀅𑀭𑀳𑀸 ‘‘𑀅𑀲𑀤𑁆𑀥𑁄 𑀅𑀓𑀢𑀜𑁆𑀜𑀽 𑀘…𑀧𑁂… 𑀧𑁄𑀭𑀺𑀲𑁄’’𑀢𑀺 (𑀥. 𑀧. 𑁯𑁭) 𑀣𑁄𑀫𑀻𑀬𑀢𑀺. 𑀅𑀲𑀤𑁆𑀤𑀳𑀦𑀁 𑀅𑀦𑀼𑀫𑀸𑀦𑀧𑀓𑁆𑀔𑀺𑀓𑀁, 𑀅𑀦𑀼𑀫𑀸𑀦𑀜𑁆𑀘 𑀲𑀁𑀲𑀬𑀧𑀼𑀩𑁆𑀩𑀓𑀁, 𑀦𑀺𑀲𑁆𑀲𑀦𑁆𑀤𑀺𑀤𑁆𑀥𑁄 𑀘 𑀓𑀫𑁆𑀫𑀓𑀫𑁆𑀫𑀨𑀮𑁂𑀲𑀼 𑀧𑀘𑁆𑀘𑀓𑁆𑀔𑀪𑀸𑀯𑀁 𑀕𑀢𑁄. 𑀢𑀫𑁂𑀯 𑀳𑀺 𑀦𑀺𑀘𑁆𑀙𑀺𑀢𑀪𑀸𑀯𑀲𑀺𑀤𑁆𑀥𑀁 𑀦𑀺𑀲𑁆𑀲𑀦𑁆𑀤𑀺𑀤𑁆𑀥𑀢𑀁 𑀲𑀦𑁆𑀥𑀸𑀬 𑁋 ‘‘𑀤𑀸𑀦𑀨𑀮𑀁 𑀲𑀤𑁆𑀤𑀳𑀦𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀢𑁂𑀦 𑀓𑀢𑀓𑀫𑁆𑀫𑀁 𑀓𑀫𑁆𑀫𑀮𑀓𑁆𑀔𑀡𑀧𑁆𑀧𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀔𑀻𑀡𑀸𑀲𑀯𑁂𑀦𑀸’’𑀢𑀺𑀆𑀤𑀺. 𑀢𑁂𑀦𑁂𑀯𑀸𑀳 𑁋 ‘‘𑀦𑀺𑀘𑁆𑀙𑀦𑁆𑀤𑀭𑀸𑀕𑀢𑁆𑀢𑀸’’𑀢𑀺, 𑀏𑀢𑀜𑁆𑀘 𑀮𑀓𑁆𑀔𑀡𑀯𑀘𑀦𑀁, 𑀓𑁂𑀦𑀘𑀺 𑀓𑀺𑀮𑁂𑀲𑁂𑀦 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲𑀸𑀢𑀺 𑀔𑀻𑀡𑀸𑀲𑀯𑀲𑁆𑀲 𑀤𑀸𑀦𑀁.

𑀓𑀺𑀁 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺𑀆𑀤𑀺𑀦𑀸 𑀤𑀸𑀬𑀓𑀢𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺 𑀘𑁄𑀤𑀺𑀢𑀸, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀸𑀢𑀺𑀆𑀤𑀺𑀦𑀸 𑀧𑀦 𑀧𑀝𑀺𑀕𑁆𑀕𑀸𑀳𑀓𑀢𑁄𑀢𑀺 𑀯𑀤𑀦𑁆𑀢𑀺; 𑀢𑀤𑀬𑀼𑀢𑁆𑀢𑀁, 𑀲𑀸𑀯𑀓𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑁂 𑀲𑀁𑀲𑀬𑀸𑀪𑀸𑀯𑀢𑁄, 𑀳𑁂𑀝𑁆𑀞𑀸 𑀦𑀺𑀘𑁆𑀙𑀺𑀢𑀢𑁆𑀢𑀸 𑀘, 𑀢𑀲𑁆𑀫𑀸 𑀉𑀪𑀬𑁂𑀦𑀧𑀺 𑀤𑀸𑀬𑀓𑀢𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺 𑀏𑀯 𑀘𑁄𑀤𑀺𑀢𑀸. 𑀲𑀸 𑀳𑀺 𑀇𑀥 𑀲𑀸𑀥𑀸𑀭𑀡𑀯𑀲𑁂𑀦 𑀦𑀺𑀘𑁆𑀙𑀺𑀢𑀢𑁆𑀢𑀸 𑀲𑀁𑀲𑀬𑀯𑀢𑁆𑀣𑀼. 𑀢𑁂𑀦𑀸𑀳 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦…𑀧𑁂… 𑀯𑀤𑀦𑁆𑀢𑀻’’𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀳𑀻𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀅𑀜𑁆𑀜𑁄 𑀤𑀸𑀦𑀲𑁆𑀲 𑀯𑀺𑀧𑀸𑀓𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺 𑀲𑀩𑁆𑀩𑀲𑁄 𑀲𑀢𑁆𑀢𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀯𑀺𑀪𑀸𑀕𑀚𑀸𑀦𑀦𑀜𑀸𑀡𑀲𑁆𑀲 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀤𑀸𑀦𑀲𑀁𑀯𑀺𑀪𑀸𑀕𑀲𑁆𑀲 𑀯𑀺𑀧𑀸𑀓𑀁 𑀬𑀣𑀸𑀳𑀁 𑀚𑀸𑀦𑀸𑀫𑀺, 𑀢𑀲𑁆𑀫𑀸 𑀅𑀤𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺𑀆𑀤𑀺 (𑀇𑀢𑀺𑀯𑀼. 𑁨𑁬). 𑀏𑀢𑁂𑀦 𑀏𑀢𑁆𑀣 𑀜𑀸𑀡𑀯𑀺𑀲𑁄𑀥𑀦𑀁 𑀦𑀸𑀫 𑀓𑀣𑀺𑀢𑀁, 𑀦 𑀤𑀓𑁆𑀔𑀺𑀡𑀸𑀬 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀤𑀸𑀬𑀓𑀢𑁄 𑀧𑀝𑀺𑀕𑁆𑀕𑀸𑀳𑀓𑀢𑁄 𑀘 𑀯𑀲𑁂𑀦 𑀳𑁄𑀢𑀻𑀢𑀺; 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀲𑀩𑁆𑀩𑀲𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀺𑀬𑀸 𑀜𑀸𑀡𑀲𑁆𑀲 𑀘 𑀅𑀢𑀺𑀯𑀺𑀬 𑀉𑀴𑀸𑀭𑀢𑁆𑀢𑀸 𑀫𑀳𑀸𑀦𑀼𑀪𑀸𑀯𑀁 𑀦𑀸𑀫 𑀲𑀺𑀬𑀸 𑀫𑀳𑀸𑀢𑁂𑀚𑀯𑀦𑁆𑀢𑀜𑁆𑀘; 𑀦 𑀫𑀳𑀧𑁆𑀨𑀮𑀁 𑀢𑁂𑀲𑀁 𑀲𑀦𑁆𑀢𑀸𑀦𑁂 𑀧𑀭𑀺𑀧𑀼𑀡𑁆𑀡𑀨𑀮𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀬𑀤𑀺 𑀤𑀺𑀦𑁆𑀦𑀤𑀸𑀦𑀁 𑀧𑀭𑀺𑀧𑀼𑀡𑁆𑀡𑀨𑀮𑀁 𑀦 𑀳𑁄𑀢𑀺 𑀉𑀪𑀬𑀯𑀺𑀧𑀸𑀓𑀤𑀸𑀦𑀸𑀪𑀸𑀯𑀢𑁄, 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀻 𑀧𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀤𑀸𑀦𑀁 𑀳𑀻’’𑀢𑀺𑀆𑀤𑀺𑀫𑀸𑀳.

𑀘𑀢𑀽𑀳𑀻𑀢𑀺 𑀲𑀳𑀬𑁄𑀕𑁂 𑀓𑀭𑀡𑀯𑀘𑀦𑀁, 𑀘𑀢𑀽𑀳𑀺 𑀲𑀫𑁆𑀧𑀤𑀸𑀳𑀺 𑀲𑀳𑀕𑀢𑀸 𑀲𑀳𑀺𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀸 𑀘𑀢𑀲𑁆𑀲𑁄 𑀲𑀫𑁆𑀧𑀤𑀸 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀸, 𑀦 𑀬𑀣𑀸𑀥𑀺𑀕𑀢𑀧𑀼𑀕𑁆𑀕𑀮𑀯𑀲𑁂𑀦. 𑀢𑁂𑀦𑀸𑀳 𑁋 ‘‘𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀥𑀫𑁆𑀫𑁂𑀦𑀸’’𑀢𑀺𑀆𑀤𑀺. 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂𑀢𑀺 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀢𑀁 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺, 𑀘𑁂𑀢𑀦𑀸𑀬 𑀫𑀳𑀦𑁆𑀢𑀢𑁆𑀢𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀘𑁂𑀢𑀦𑀸𑀤𑀺𑀯𑀲𑁂𑀦𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀧𑀓𑀚𑀯𑀦𑀯𑀻𑀣𑀺𑀢𑁄 𑀧𑀼𑀩𑁆𑀩𑀸𑀧𑀭𑀯𑀻𑀣𑀺𑀘𑁂𑀢𑀦𑀸𑀯𑀲𑁂𑀦, 𑀅𑀜𑁆𑀜𑀣𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀯𑀻𑀣𑀺𑀬𑀁𑀬𑁂𑀯 𑀧𑀼𑀩𑁆𑀩𑀘𑁂𑀢𑀦𑀸𑀤𑀺𑀯𑀲𑁂𑀦𑀸𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀲𑀸 𑀳𑀺 𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀪𑀽𑀢𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺, 𑀦 𑀇𑀢𑀭𑀸. 𑀫𑀳𑀢𑁆𑀢𑀢𑀸𑀢𑀺 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀜𑀸𑀡𑀲𑀫𑁆𑀧𑀬𑁄𑀕𑀸𑀤𑀺𑀯𑀲𑁂𑀦 𑀘𑁂𑀢𑀦𑀸𑀬 𑀉𑀴𑀸𑀭𑀢𑀸. 𑀔𑀻𑀡𑀸𑀲𑀯𑀪𑀸𑀯𑁂𑀦𑀸𑀢𑀺 𑀬𑀲𑁆𑀲 𑀤𑁂𑀢𑀺, 𑀢𑀲𑁆𑀲 𑀔𑀻𑀡𑀸𑀲𑀯𑀪𑀸𑀯𑁂𑀦. 𑀯𑀢𑁆𑀣𑀼𑀲𑀫𑁆𑀧𑀦𑁆𑀦𑀢𑀸𑀢𑀺 𑀏𑀢𑁆𑀣 𑀬𑀣𑀸 𑀧𑀝𑀺𑀖𑀲𑀜𑁆𑀜𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀯𑀺𑀕𑀫𑁂𑀦 𑀤𑀺𑀩𑁆𑀩𑀯𑀺𑀳𑀸𑀭𑀸𑀦𑀁 𑀯𑀲𑁂𑀦, 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀤𑀻𑀦𑀁 𑀯𑀺𑀕𑀫𑁂𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀯𑀲𑁂𑀦, 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀯𑀺𑀕𑀫𑁂𑀦 𑀆𑀦𑁂𑀜𑁆𑀚𑀯𑀺𑀳𑀸𑀭𑀸𑀦𑀁 𑀯𑀲𑁂𑀦 𑀲𑀩𑁆𑀩𑀲𑁄 𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀫𑀼𑀔𑀢𑀸𑀬 𑀅𑀭𑀺𑀬𑀯𑀺𑀳𑀸𑀭𑀸𑀦𑀁 𑀯𑀲𑁂𑀦 𑀯𑀢𑁆𑀣𑀼𑀲𑀫𑁆𑀧𑀦𑁆𑀦𑀢𑀸 𑀇𑀘𑁆𑀙𑀺𑀢𑀸. 𑀢𑀁𑀢𑀁𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂𑀦 𑀲𑀦𑁆𑀢𑀸𑀦𑀲𑁆𑀲 𑀦𑀺𑀭𑁄𑀥𑀲𑀸𑀥𑀦𑀢𑀸 𑀢𑀁 𑀤𑀺𑀯𑀲𑀁 𑀦𑀺𑀭𑁄𑀥𑀲𑁆𑀲 𑀲𑀸𑀥𑀦𑀢𑀸 𑀦𑀸𑀫. 𑀯𑀢𑁆𑀣𑀼𑀲𑀫𑁆𑀧𑀦𑁆𑀦𑀢𑀸𑀢𑀺 𑀲𑀩𑁆𑀩𑀲𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂𑀦 𑀯𑀢𑁆𑀣𑀼𑀲𑀫𑁆𑀧𑀦𑁆𑀦𑀢𑀸 𑀇𑀘𑁆𑀙𑀺𑀢𑀸; 𑀦 𑀲𑀩𑁆𑀩𑀲𑁄 𑀅𑀦𑀯𑀲𑁂𑀲𑀲𑀜𑁆𑀜𑀸𑀦𑀺𑀭𑁄𑀥𑀢𑀸𑀬𑀸𑀢𑀺 𑀆𑀳 𑁋 ‘‘𑀢𑀁 𑀤𑀺𑀯𑀲𑀁 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀺𑀢𑀪𑀸𑀯𑁂𑀦 𑀯𑀢𑁆𑀣𑀼𑀲𑀫𑁆𑀧𑀦𑁆𑀦𑀢𑀸’’𑀢𑀺. 𑀲𑀜𑁆𑀜𑀸𑀦𑀺𑀭𑁄𑀥𑀲𑁆𑀲 𑀘𑁂𑀢𑁆𑀣 𑀅𑀘𑁆𑀘𑀸𑀲𑀦𑁆𑀦𑀢𑀁 𑀲𑀦𑁆𑀥𑀸𑀬, ‘‘𑀢𑀁 𑀤𑀺𑀯𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀓𑁆𑀔𑀺𑀡𑀸𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀯𑀺𑀪𑀗𑁆𑀕𑀯𑀕𑁆𑀕𑀯𑀡𑁆𑀡𑀦𑀸.