𑁫. 𑀲𑀴𑀸𑀬𑀢𑀦𑀯𑀕𑁆𑀕𑁄

𑁧. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁩. 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑁄𑀢𑀺 𑀅𑀥𑀺𑀓𑀸𑀬 𑀫𑀢𑁆𑀢𑀸𑀬 𑀫𑀭𑀡𑀲𑁆𑀲 𑀆𑀲𑀦𑁆𑀦𑀢𑀸𑀬 𑀅𑀢𑀺𑀯𑀺𑀬 𑀕𑀺𑀮𑀸𑀦𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀫𑀭𑀡𑀲𑁂𑀬𑁆𑀬𑀁 𑀉𑀧𑀕𑀢𑁄’’𑀢𑀺. 𑀅𑀔𑀡𑁆𑀟𑀁 𑀅𑀓𑀸𑀲𑀺 𑀕𑀳𑀧𑀢𑀺𑀦𑁄 𑀲𑀢𑁆𑀣𑀭𑀺 𑀧𑀭𑀫𑀧𑁂𑀫𑀢𑁆𑀢𑀸. 𑀬𑀢𑁆𑀢𑀓𑀁 𑀘𑀲𑁆𑀲𑀸𑀢𑀺, ‘‘𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸’’𑀢𑀺 𑀯𑀼𑀢𑁆𑀢𑀁 𑀬𑀢𑁆𑀢𑀓𑀁 𑀅𑀲𑁆𑀲 𑀕𑀳𑀧𑀢𑀺𑀲𑁆𑀲.

𑁩𑁮𑁪. 𑀑𑀲𑀓𑁆𑀓𑀦𑁆𑀢𑀻𑀢𑀺 𑀧𑀭𑀺𑀳𑀸𑀬𑀦𑁆𑀢𑀺. 𑀑𑀢𑁆𑀣𑀭𑀦𑁆𑀢𑀻𑀢𑀺 𑀅𑀪𑀺𑀪𑀯𑀦𑁆𑀢𑀺. 𑀉𑀲𑁆𑀫𑀸 𑀦𑀸𑀫 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼, 𑀲𑀸 𑀲𑀳 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑀺𑀭𑁄𑀥𑀸 𑀧𑀭𑀺𑀬𑀸𑀤𑀺𑀬𑀢𑀺, 𑀬𑀸𑀯 𑀢𑀸 𑀆𑀬𑀼𑀉𑀲𑁆𑀫𑀸 𑀯𑀢𑁆𑀢𑀦𑁆𑀢𑀺, 𑀢𑀸𑀯 𑀫𑀭𑀡𑀦𑁆𑀢𑀺𑀓𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑁂𑀯 𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀺𑀭𑀼𑀤𑁆𑀥𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑀸𑀯 𑀉𑀲𑁆𑀫𑀸’’𑀢𑀺𑀆𑀤𑀺.

𑁩𑁮𑁫. 𑀢𑀻𑀳𑀺 𑀕𑀸𑀳𑁂𑀳𑀻𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑁂𑀳𑀺. 𑀧𑀝𑀺𑀩𑀸𑀳𑀺𑀢𑀼𑀁 𑀯𑀺𑀓𑁆𑀔𑀫𑁆𑀪𑁂𑀢𑀼𑀁. 𑀘𑀓𑁆𑀔𑀼𑀁 𑀢𑀻𑀳𑀺 𑀕𑀸𑀳𑁂𑀳𑀺 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀫𑀸𑀦𑀕𑁆𑀕𑀸𑀳𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀘𑀓𑁆𑀔𑀼𑀲𑁆𑀫𑀺𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀳𑀺 𑀲𑀢𑀺 𑀅𑀧𑁆𑀧𑀢𑀺𑀝𑁆𑀞𑁄 𑀫𑀸𑀦𑀕𑁆𑀕𑀸𑀳𑁄, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀲𑀢𑀺 𑀅𑀧𑁆𑀧𑀢𑀺𑀝𑁆𑀞𑁄 𑀢𑀡𑁆𑀳𑀸𑀕𑁆𑀕𑀸𑀳𑁄, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀲𑀢𑀺 𑀅𑀧𑁆𑀧𑀢𑀺𑀝𑁆𑀞𑁄 𑀤𑀺𑀝𑁆𑀞𑀺𑀕𑁆𑀕𑀸𑀳𑁄𑀢𑀺, 𑀕𑀸𑀳𑁄 𑀘 𑀦𑀸𑀫 𑀑𑀴𑀸𑀭𑀺𑀓𑁄, 𑀢𑀲𑁆𑀫𑀺𑀁 𑀯𑀺𑀕𑀢𑁂𑀧𑀺 𑀦𑀺𑀓𑀦𑁆𑀢𑀺 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀢𑀁 𑀯𑀺𑀚𑀳𑀸𑀧𑁂𑀢𑀼𑀓𑀸𑀫𑁂𑀦, 𑁋 ‘‘𑀦 𑀘 𑀫𑁂 𑀘𑀓𑁆𑀔𑀼𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀧𑀺 𑀫𑁂 𑀘𑀓𑁆𑀔𑀼𑀦𑀺𑀲𑁆𑀲𑀺𑀢𑀁 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀩𑁆𑀩𑀁 𑀓𑀸𑀫𑀪𑀯𑀭𑀽𑀧𑀦𑁆𑀢𑀺 𑀓𑀸𑀫𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀁 𑀲𑀩𑁆𑀩𑀁 𑀭𑀽𑀧𑀓𑁆𑀔𑀦𑁆𑀥𑀫𑀸𑀳 𑁋 ‘‘𑀓𑀸𑀫𑀭𑀽𑀧𑀪𑀯𑀭𑀽𑀧’’𑀦𑁆𑀢𑀺 𑀯𑀸 𑀧𑀸𑀞𑁄. 𑀲𑁄 𑀬𑀼𑀢𑁆𑀢𑁄 𑀇𑀫𑀲𑁆𑀲 𑀯𑀸𑀭𑀲𑁆𑀲 𑀏𑀯 𑀅𑀦𑀯𑀲𑁂𑀲𑀧𑀜𑁆𑀘𑀯𑁄𑀓𑀸𑀭𑀪𑀯𑀧𑀭𑀺𑀬𑀸𑀧𑀦𑁆𑀦𑀢𑁄. 𑀢𑀣𑀸 𑀳𑀺 𑀉𑀧𑀭𑀺 𑀘𑀢𑀼𑀯𑁄𑀓𑀸𑀭𑀪𑀯𑁄 𑀅𑀦𑀯𑀲𑁂𑀲𑀢𑁄 𑀯𑀼𑀢𑁆𑀢𑁄.

𑁩𑁮𑁬. 𑀇𑀥𑀮𑁄𑀓𑀦𑁆𑀢𑀺 𑀏𑀢𑁆𑀣 𑀲𑀗𑁆𑀔𑀸𑀭𑀮𑁄𑀓𑀯𑀺𑀲𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦, ‘‘𑀯𑀲𑀦𑀝𑁆𑀞𑀸𑀦𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀔𑁄 𑀧𑀞𑀫𑀤𑀼𑀢𑀺𑀬𑀯𑀸𑀭𑁂𑀳𑀺 𑀇𑀥𑀮𑁄𑀓𑁄 𑀕𑀳𑀺𑀢𑁄𑀢𑀺 𑀓𑀢𑁆𑀯𑀸. 𑀧𑀞𑀫𑀤𑀼𑀢𑀺𑀬𑀯𑀸𑀭𑁂𑀳𑀺 𑀧𑀦 𑀇𑀥𑀮𑁄𑀓𑁄 𑀧𑀭𑀮𑁄𑀓𑁄𑀢𑀺 𑀯𑀺𑀪𑀸𑀕𑁂𑀦 𑀯𑀺𑀦𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀕𑀳𑀺𑀢𑁄; 𑀢𑀣𑀸 𑀢𑀢𑀺𑀬𑀯𑀸𑀭𑁂 𑀧𑀜𑁆𑀘𑀯𑁄𑀓𑀸𑀭𑀪𑀯𑁄 𑀘𑀢𑀼𑀯𑁄𑀓𑀸𑀭𑀪𑀯𑁄 𑀘 𑀕𑀳𑀺𑀢𑁄𑀢𑀺 𑀧𑀼𑀦 𑀤𑀺𑀝𑁆𑀞𑀥𑀫𑁆𑀫𑀲𑀫𑁆𑀧𑀭𑀸𑀬𑀯𑀲𑁂𑀦 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁, ‘‘𑀦 𑀇𑀥𑀮𑁄𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥𑀮𑁄𑀓𑀦𑁆𑀢𑀺 𑀘 𑀲𑀢𑁆𑀢𑀲𑀗𑁆𑀔𑀸𑀭𑀯𑀲𑁂𑀦𑁂𑀯 𑀕𑀳𑀺𑀢𑀁. 𑀲𑀩𑁆𑀩𑀫𑁆𑀧𑀺 𑀲𑀗𑁆𑀔𑀸𑀭𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁, ‘‘𑀬𑀫𑁆𑀧𑀺 𑀫𑁂 𑀤𑀺𑀝𑁆𑀞’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺. 𑀅𑀧𑀭𑀺𑀢𑀲𑁆𑀲𑀦𑀢𑁆𑀣𑀁 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸𑀬 𑀅𑀦𑀼𑀧𑁆𑀧𑀸𑀤𑀦𑀢𑁆𑀣𑀁. 𑀬𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀧𑀦 𑀅𑀪𑀸𑀯𑀢𑁄, ‘‘𑀫𑀦𑀼𑀲𑁆𑀲𑀮𑁄𑀓𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀧𑀭𑀮𑁄𑀓𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀬𑁂𑀲𑀁 𑀧𑀦 ‘‘𑀇𑀥𑀮𑁄𑀓’’𑀦𑁆𑀢𑀺 𑀇𑀫𑀺𑀦𑀸 𑀲𑀢𑁆𑀢𑀮𑁄𑀓𑀲𑁆𑀲𑀧𑀺 𑀕𑀳𑀡𑀁 𑀇𑀘𑁆𑀙𑀺𑀢𑀁. 𑀢𑁂𑀲𑀁 𑀫𑀢𑁂𑀦, ‘‘𑀫𑀦𑀼𑀲𑁆𑀲𑀮𑁄𑀓𑀁 𑀞𑀧𑁂𑀢𑁆𑀯𑀸’’𑀢𑀺 𑀬𑁄𑀚𑀦𑀸.

𑁩𑁮𑁭. 𑀅𑀮𑁆𑀮𑀻𑀬𑀲𑀻𑀢𑀺 𑀅𑀢𑁆𑀢𑀪𑀸𑀯𑁂 𑀪𑁄𑀕𑁂𑀲𑀼 𑀘 𑀅𑀧𑁂𑀓𑁆𑀔𑀁 𑀓𑀭𑁄𑀲𑀻𑀢𑀺 𑀅𑀢𑁆𑀣𑁄. 𑀏𑀯𑀭𑀽𑀧𑀻𑀢𑀺 𑀬𑀸𑀤𑀺𑀲𑀻 𑀢𑀤𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀓𑀣𑀺𑀢𑀸, 𑀏𑀯𑀭𑀽𑀧𑀻. 𑀥𑀫𑁆𑀫𑀓𑀣𑀸 𑀦 𑀲𑀼𑀢𑀧𑀼𑀩𑁆𑀩𑀸𑀢𑀺 𑀬𑀣𑀸𑀓𑀣𑀺𑀢𑀸𑀓𑀸𑀭𑀫𑁂𑀯 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑁂𑀧𑁄, 𑀦 𑀲𑀼𑀔𑀼𑀫𑀕𑀫𑁆𑀪𑀻𑀭𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀢𑀸𑀲𑀸𑀫𑀜𑁆𑀜𑀁. 𑀢𑁂𑀦𑀸𑀳 ‘‘𑀏𑀯𑀁 𑀧𑀦𑀸’’𑀢𑀺𑀆𑀤𑀺.

𑀫𑀬𑀸 𑀕𑀢𑀫𑀕𑁆𑀕𑀫𑁂𑀯 𑀅𑀦𑀼𑀕𑀘𑁆𑀙𑀲𑀻𑀢𑀺 𑀤𑀸𑀦𑀫𑀬𑀧𑀼𑀜𑁆𑀜𑀪𑀸𑀯𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀯𑀤𑀢𑀺, 𑀦 𑀩𑁄𑀥𑀺𑀲𑀢𑁆𑀢𑀤𑀸𑀦𑀪𑀽𑀢𑀁 𑀤𑀸𑀦𑀧𑀸𑀭𑀫𑀺𑀢𑀁. 𑀦 𑀧𑀝𑀺𑀪𑀸𑀢𑀻𑀢𑀺 𑀭𑀼𑀘𑁆𑀘𑀦𑀯𑀲𑁂𑀦 𑀘𑀺𑀢𑁆𑀢𑁂 𑀦 𑀉𑀧𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 ‘‘𑀦 𑀭𑀼𑀘𑁆𑀘𑀢𑀻’’𑀢𑀺. 𑀢𑀣𑀸 𑀳𑁂𑀲 𑀯𑀝𑁆𑀝𑀸𑀪𑀺𑀭𑀢𑁄𑀢𑀺. 𑀉𑀚𑀼𑀫𑀕𑁆𑀕𑀸𑀯𑀳𑀸 𑀯𑀺𑀧𑀲𑁆𑀲𑀦𑀸 𑀪𑀕𑀯𑀢𑀸 𑀧𑀦𑀲𑁆𑀲 𑀓𑀣𑀺𑀢𑀧𑀼𑀩𑁆𑀩𑀸.

𑁩𑁮𑁮. 𑀏𑀲𑀺𑀢𑀕𑀼𑀡𑀢𑁆𑀢𑀸 𑀏𑀲𑀺𑀬𑀫𑀸𑀦𑀕𑀼𑀡𑀢𑁆𑀢𑀸 𑀘 𑀇𑀲𑀺, 𑀅𑀲𑁂𑀓𑁆𑀔𑀸 𑀲𑁂𑀓𑁆𑀔𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸 𑀘, 𑀇𑀲𑀻𑀦𑀁 𑀲𑀗𑁆𑀖𑁄, 𑀢𑁂𑀦 𑀦𑀺𑀲𑁂𑀯𑀺𑀢𑀦𑁆𑀢𑀺 𑀇𑀲𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀁. 𑀓𑀸𑀫𑀁 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀕𑀦𑁆𑀥𑀓𑀼𑀝𑀺𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀺𑀯𑀲𑁂𑀦 𑀦𑀺𑀲𑀻𑀤𑀦𑀦𑀺𑀧𑀚𑁆𑀚𑀦𑀸𑀬 𑀭𑀼𑀓𑁆𑀔𑀮𑀢𑀸𑀤𑀺𑀯𑀲𑁂𑀦 𑀪𑀽𑀫𑀺𑀲𑀬𑀸𑀤𑀺𑀯𑀲𑁂𑀦 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀫𑀳𑀢𑀻 𑀭𑀫𑀡𑀻𑀬𑀢𑀸 𑀅𑀢𑁆𑀣𑁂𑀯, 𑀲𑀸 𑀧𑀦 𑀕𑁂𑀳𑀲𑁆𑀲𑀺𑀢𑀪𑀸𑀯𑁂𑀦 𑀅𑀭𑀺𑀬𑀸𑀦𑀁 𑀘𑀺𑀢𑁆𑀢𑀁 𑀢𑀣𑀸 𑀦 𑀢𑁄𑀲𑁂𑀢𑀺; 𑀬𑀣𑀸 𑀅𑀭𑀺𑀬𑀸𑀦𑀁 𑀦𑀺𑀲𑁂𑀯𑀺𑀢𑀪𑀸𑀯𑁂𑀦𑀸𑀢𑀺 𑀆𑀳 𑁋 ‘‘𑀧𑀞𑀫𑀕𑀸𑀣𑀸𑀬 𑀚𑁂𑀢𑀯𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺 (𑀥. 𑀧. 𑁯𑁮; 𑀣𑁂𑀭𑀕𑀸. 𑁯𑁯𑁧; 𑀲𑀁. 𑀦𑀺. 𑁧.𑁨𑁬𑁧). 𑀅𑀧𑀘𑀬𑀕𑀸𑀫𑀺𑀦𑀻 𑀘𑁂𑀢𑀦𑀸 𑀲𑀢𑁆𑀢𑀸𑀦𑀁 𑀲𑀼𑀤𑁆𑀥𑀺𑀫𑀸𑀯𑀳𑀢𑀻𑀢𑀺 𑀆𑀳 𑁋 ‘‘𑀓𑀫𑁆𑀫𑀦𑁆𑀢𑀺 𑀫𑀕𑁆𑀕𑀘𑁂𑀢𑀦𑀸’’𑀢𑀺. 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀝𑁆𑀞𑁂𑀦 𑀘 𑀯𑀺𑀚𑁆𑀚𑀸, 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀆𑀳 𑁋 ‘‘𑀯𑀺𑀚𑁆𑀚𑀸𑀢𑀺 𑀫𑀕𑁆𑀕𑀧𑀜𑁆𑀜𑀸’’𑀢𑀺. 𑀲𑀫𑀸𑀥𑀺𑀧𑀓𑁆𑀔𑀺𑀓𑁄 𑀥𑀫𑁆𑀫𑁄 𑀦𑀸𑀫 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄. 𑀢𑀣𑀸 𑀳𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑁄 𑀲𑀫𑀸𑀥𑀺𑀧𑀺 𑀲𑀫𑀸𑀥𑀺𑀧𑀓𑁆𑀔𑀺𑀓𑁄. 𑀲𑀻𑀮𑀁 𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀦𑁆𑀢𑀺 𑀆𑀳 𑁋 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀚𑀻𑀯𑀺𑀢𑀁 𑀉𑀢𑁆𑀢𑀫’’𑀦𑁆𑀢𑀺. 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑁄𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀢𑀢𑁆𑀣 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀉𑀧𑀓𑀸𑀭𑀓𑀪𑀸𑀯𑁂𑀦 𑀯𑀺𑀚𑁆𑀚𑀸𑀪𑀸𑀕𑁄. 𑀢𑀣𑀸 𑀳𑀺 𑀲𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄, 𑀏𑀯𑀁 𑀯𑀸𑀬𑀸𑀫𑀲𑀢𑀺𑀬𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸𑀢𑀺. 𑀢𑁂𑀦𑀸𑀳 𑁋 ‘‘𑀥𑀫𑁆𑀫𑁄𑀢𑀺 𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄’’𑀢𑀺. ‘‘𑀥𑀫𑁆𑀫𑁄’’𑀢𑀺 𑀳𑀺 𑀇𑀥 𑀲𑀫𑁆𑀫𑀸𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄, 𑁋 ‘‘𑀏𑀯𑀁 𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁩; 𑀫. 𑀦𑀺. 𑁩.𑁧𑁯𑁮; 𑀲𑀁. 𑀦𑀺. 𑁫.𑁩𑁭𑁮) 𑀯𑀺𑀬. 𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀢𑀺 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀏𑀯, 𑀢𑁂 𑀲𑀩𑁆𑀩𑁂𑀧𑀺 𑀕𑀳𑀺𑀢𑀸𑀢𑀺. 𑀢𑁂𑀦𑀸𑀳 𑁋 ‘‘𑀏𑀢𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦𑀸’’𑀢𑀺.

𑀉𑀧𑀸𑀬𑁂𑀦𑀸𑀢𑀺 𑀬𑁂𑀦 𑀯𑀺𑀥𑀺𑀦𑀸 𑀅𑀭𑀺𑀬𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄, 𑀢𑁂𑀦 𑀲𑀫𑀸𑀥𑀺𑀧𑀓𑁆𑀔𑀺𑀬𑀁 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀜𑁆𑀘𑁂𑀯 𑀫𑀕𑁆𑀕𑀥𑀫𑁆𑀫𑀜𑁆𑀘. ‘‘𑀅𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀺𑀁 𑀤𑁂𑀲𑁂𑀲𑁆𑀲𑀸𑀫𑀺 𑀲𑀉𑀧𑀦𑀺𑀲𑀁 𑀲𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺 (𑀫. 𑀦𑀺. 𑁩.𑁧𑁩𑁬) 𑀳𑀺 𑀯𑀘𑀦𑀢𑁄 𑀲𑀫𑁆𑀫𑀸𑀲𑀫𑀸𑀥𑀺𑀆𑀤𑀬𑁄 𑀫𑀕𑁆𑀕𑀥𑀫𑁆𑀫𑀸𑀧𑀺 𑀲𑀫𑀸𑀥𑀺𑀧𑀓𑁆𑀔𑀺𑀬𑀸. 𑀯𑀺𑀘𑀺𑀦𑁂𑀬𑁆𑀬𑀸𑀢𑀺 𑀯𑀻𑀫𑀁𑀲𑁂𑀬𑁆𑀬, 𑀪𑀸𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀯𑀘𑀦𑀁. 𑀅𑀭𑀺𑀬𑀫𑀕𑁆𑀕𑀳𑁂𑀢𑀼𑀓𑀸 𑀳𑀺 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺. 𑀢𑁂𑀦𑀸𑀳 𑁋 ‘‘𑀢𑀲𑁆𑀫𑀺𑀁 𑀅𑀭𑀺𑀬𑀫𑀕𑁆𑀕𑁂 𑀯𑀺𑀲𑀼𑀚𑁆𑀛𑀢𑀻’’𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑀁 𑀯𑀺𑀘𑀺𑀦𑁂𑀬𑁆𑀬, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀯𑀺𑀧𑀲𑁆𑀲𑁂𑀬𑁆𑀬. 𑀢𑁂𑀲𑀼 𑀳𑀺 𑀯𑀺𑀧𑀲𑁆𑀲𑀺𑀬𑀫𑀸𑀦𑁂𑀲𑀼 𑀯𑀺𑀧𑀲𑁆𑀲𑀦𑀸 𑀉𑀓𑁆𑀓𑀁𑀲𑀕𑀢𑀸. 𑀬𑀤𑀕𑁆𑀕𑁂𑀦 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀻𑀬𑀢𑀺, 𑀢𑀤𑀕𑁆𑀕𑁂𑀦 𑀲𑀫𑀼𑀤𑀬𑀲𑀘𑁆𑀘𑀁 𑀧𑀳𑀸𑀦𑀧𑀝𑀺𑀯𑁂𑀥𑁂𑀦 𑀦𑀺𑀭𑁄𑀥𑀲𑀘𑁆𑀘𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁂𑀦, 𑀫𑀕𑁆𑀕𑀲𑀘𑁆𑀘𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀻𑀬𑀢𑀺, 𑀏𑀯𑀁 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀲𑀼𑀚𑁆𑀛𑀢𑀺. 𑀢𑁂𑀦𑀸𑀳 𑁋 ‘‘𑀏𑀯𑀁 𑀢𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀯𑀺𑀲𑀼𑀚𑁆𑀛𑀢𑀻’’𑀢𑀺. 𑀇𑀥𑀸𑀧𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀲𑀘𑁆𑀘𑁂𑀲𑀼 𑀯𑀸 𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑁂𑀲𑀽𑀢𑀺 𑀯𑀘𑀦𑀲𑁂𑀲𑁄.

𑀅𑀯𑀥𑀸𑀭𑀡𑀯𑀘𑀦𑀦𑁆𑀢𑀺 𑀯𑀯𑀢𑁆𑀣𑀸𑀧𑀦𑀯𑀘𑀦𑀁, 𑀅𑀯𑀥𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀸𑀭𑀺𑀧𑀼𑀢𑁆𑀢𑁄𑀯𑀸𑀢𑀺 𑀘 𑀅𑀯𑀥𑀸𑀭𑀡𑀁 𑀢𑀲𑁆𑀲 𑀲𑀸𑀯𑀓𑀪𑀸𑀯𑀢𑁄 𑀲𑀸𑀯𑀓𑁂𑀲𑀼 𑀲𑀸𑀭𑀺𑀧𑀼𑀢𑁆𑀢𑁄𑀯 𑀲𑁂𑀬𑁆𑀬𑁄𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀓𑀺𑀮𑁂𑀲𑀉𑀧𑀲𑀫𑁂𑀦𑀸𑀢𑀺 𑀇𑀫𑀺𑀦𑀸 𑀫𑀳𑀸𑀣𑁂𑀭𑀲𑁆𑀲 𑀢𑀸𑀤𑀺𑀲𑁄 𑀓𑀺𑀮𑁂𑀲𑀽𑀧𑀲𑀫𑁄𑀢𑀺 𑀤𑀲𑁆𑀲𑁂𑀢𑀺, 𑀬𑀲𑁆𑀲 𑀲𑀸𑀯𑀓𑀲𑁆𑀲 𑀯𑀺𑀲𑀬𑁂 𑀧𑀜𑁆𑀜𑀸𑀬 𑀧𑀸𑀭𑀫𑀺𑀧𑁆𑀧𑀢𑁆𑀢𑀺 𑀅𑀳𑁄𑀲𑀺. 𑀬𑀤𑀺 𑀏𑀯𑀁 𑁋 ‘‘𑀬𑁄𑀧𑀺 𑀧𑀸𑀭𑀗𑁆𑀕𑀢𑁄 𑀪𑀺𑀓𑁆𑀔𑀼, 𑀏𑀢𑀸𑀯𑀧𑀭𑀫𑁄 𑀲𑀺𑀬𑀸’’𑀢𑀺 𑀇𑀤𑀁 𑀓𑀣𑀦𑁆𑀢𑀺? 𑀢𑁂𑀲𑀁 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀧𑀜𑁆𑀜𑀸𑀬 𑀧𑀸𑀭𑀫𑀺𑀧𑁆𑀧𑀢𑁆𑀢𑀲𑀸𑀯𑀓𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑁋 ‘‘𑀦𑀢𑁆𑀣𑀺 𑀯𑀺𑀫𑀼𑀢𑁆𑀢𑀺𑀬𑀸 𑀦𑀸𑀦𑀢𑁆𑀢’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁩.𑁧𑁪𑁧; 𑀯𑀺𑀪. 𑀫𑀽𑀮𑀝𑀻. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸) 𑀯𑀘𑀦𑀢𑁄 𑀲𑀸𑀯𑀓𑁂𑀳𑀺 𑀯𑀺𑀫𑀼𑀢𑁆𑀢𑀺𑀧𑀜𑁆𑀜𑀸𑀫𑀢𑁆𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀧𑀸𑀭𑀗𑁆𑀕𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀕𑀢𑁄’’𑀢𑀺𑀆𑀤𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀙𑀦𑁆𑀦𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁯. 𑀙𑀦𑁆𑀦𑁄𑀢𑀺 𑀇𑀤𑀁 𑀢𑀲𑁆𑀲 𑀦𑀸𑀫𑀦𑁆𑀢𑀺 𑀆𑀳 ‘‘𑀏𑀯𑀁𑀦𑀸𑀫𑀓𑁄 𑀣𑁂𑀭𑁄’’𑀢𑀺. 𑀬𑀲𑁆𑀲 𑀧𑀦 𑀲𑀢𑁆𑀣𑀸𑀭𑀸 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀩𑁆𑀭𑀳𑁆𑀫𑀤𑀡𑁆𑀟𑁄 𑀆𑀡𑀢𑁆𑀢𑁄, 𑀅𑀬𑀁 𑀲𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀦 𑀅𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑀢𑁆𑀣𑁂𑀭𑁄’’𑀢𑀺, 𑀮𑁄𑀓𑀦𑀸𑀣𑀲𑁆𑀲 𑀅𑀪𑀺𑀦𑀺𑀓𑁆𑀔𑀫𑀦𑀓𑀸𑀮𑁂 𑀓𑀧𑀺𑀮𑀧𑀼𑀭𑀢𑁄 𑀦𑀺𑀓𑁆𑀔𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀕𑀺𑀮𑀸𑀦𑀧𑀼𑀘𑁆𑀙𑀓𑀸𑀢𑀺 𑀕𑀺𑀮𑀸𑀦𑀲𑁆𑀲 𑀧𑀼𑀘𑁆𑀙𑀦𑀓𑀸, 𑀕𑀺𑀮𑀸𑀦𑀪𑀸𑀯𑀲𑁆𑀲 𑀅𑀯𑀢𑁆𑀣𑀁 𑀲𑁄𑀢𑀼𑀓𑀸𑀫𑀸𑀢𑀺 𑀅𑀢𑁆𑀣𑁄. 𑀲𑀲𑀦𑀢𑁄 𑀳𑀺𑀁𑀲𑀦𑀢𑁄 𑀲𑀢𑁆𑀣𑀦𑁆𑀢𑀺 𑀆𑀳 ‘‘𑀚𑀻𑀯𑀺𑀢𑀳𑀸𑀭𑀓𑀲𑀢𑁆𑀣’’𑀦𑁆𑀢𑀺.

𑁩𑁯𑁦. 𑀉𑀧𑀯𑀚𑁆𑀚𑀁 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀦𑀼𑀧𑀯𑀚𑁆𑀚𑀁, 𑀓𑀭𑀚𑀓𑀸𑀬𑀁 𑀓𑀢𑁆𑀯𑀸 𑀆𑀬𑀢𑀺𑀁 𑀉𑀧𑁆𑀧𑀢𑁆𑀢𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀦𑀼𑀧𑁆𑀧𑀢𑁆𑀢𑀺𑀓’’𑀦𑁆𑀢𑀺.

𑁩𑁯𑁧. 𑀔𑀬𑀯𑀬𑀁 𑀜𑀢𑁆𑀯𑀸𑀢𑀺 𑀲𑀗𑁆𑀔𑀸𑀭𑀕𑀢𑀁 𑀔𑀡𑀪𑀗𑁆𑀕𑀁 𑀦𑁂𑀢𑁆𑀯𑀸 𑀜𑀸𑀡𑁂𑀦 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸. 𑀦𑁂𑀢𑀁 𑀫𑀫𑀸𑀢𑀺 𑀤𑀼𑀓𑁆𑀔𑀢𑁄 𑀲𑀫𑀦𑀼𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑁂𑀲𑀼 𑀤𑀺𑀝𑁆𑀞𑁂𑀲𑀼 𑀫𑀫𑀁𑀓𑀸𑀭𑀸𑀪𑀸𑀯𑀢𑁄. 𑀦𑁂𑀲𑁄𑀳𑀫𑀲𑁆𑀫𑀻𑀢𑀺 𑀅𑀦𑀺𑀘𑁆𑀘𑀢𑁄 𑀲𑀫𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀢𑁄 𑀢𑁂𑀲𑀼 𑀤𑀺𑀝𑁆𑀞𑁂𑀲𑀼 𑀅𑀳𑀁𑀓𑀸𑀭𑀸𑀪𑀸𑀯𑀢𑁄. 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑀅𑀦𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑀸 𑀅𑀦𑀢𑁆𑀢𑀢𑁄 𑀢𑁂𑀲𑀼 𑀤𑀺𑀝𑁆𑀞𑁂𑀲𑀼 𑀅𑀢𑁆𑀢𑀕𑁆𑀕𑀸𑀳𑀸𑀪𑀸𑀯𑀢𑁄𑀢𑀺 𑀆𑀳 𑁋 ‘‘𑀦𑁂𑀢𑀁 𑀫𑀫…𑀧𑁂… 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺.

𑁩𑁯𑁩. 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄𑀢𑀺 𑀬𑀲𑁆𑀫𑀸 𑀅𑀭𑀺𑀬𑁄 𑀲𑀩𑁆𑀩𑀲𑁄 𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑁄 𑀤𑀼𑀓𑁆𑀔𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄, 𑀓𑁂𑀯𑀮𑀁 𑀧𑀦 𑀅𑀥𑀺𑀫𑀸𑀦𑁂𑀦𑁂𑀯 𑁋 ‘‘𑀦𑀸𑀪𑀺𑀓𑀗𑁆𑀔𑀸𑀫𑀺 𑀚𑀻𑀯𑀺𑀢𑀁, 𑀧𑀭𑀺𑀘𑀺𑀡𑁆𑀡𑁄 𑀫𑁂 𑀲𑀢𑁆𑀣𑀸, 𑀦𑀺𑀭𑁄𑀥𑀁 𑀤𑀺𑀲𑁆𑀯𑀸’’𑀢𑀺 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀫𑁆𑀧𑀻𑀢𑀺 𑀇𑀤𑀫𑁆𑀧𑀺, ‘‘𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢’’𑀦𑁆𑀢𑀺𑀆𑀤𑀺. 𑀢𑀡𑁆𑀳𑀸𑀦𑀺𑀲𑁆𑀲𑀺𑀢𑀪𑀸𑀯𑁂𑀦 𑀳𑀺 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀫𑀸𑀭𑀡𑀦𑁆𑀢𑀺𑀓𑀁 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀧𑀭𑀺𑀯𑀢𑁆𑀢𑀦𑁆𑀢𑁄 𑀘𑀮𑀢𑀺 𑀯𑀺𑀧𑁆𑀨𑀦𑁆𑀤𑀢𑀺, 𑀢𑀲𑁆𑀫𑀸 ‘‘𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢’’𑀦𑁆𑀢𑀺𑀆𑀤𑀺 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀢𑁂𑀦 𑀇𑀤𑀁 𑀲𑀩𑁆𑀩𑀁 𑀢𑀁 𑀯𑀺𑀧𑁆𑀨𑀦𑁆𑀤𑀺𑀢𑀁 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀧𑁆𑀧𑀲𑀤𑁆𑀤𑁄 𑀓𑀸𑀮𑀧𑀭𑀺𑀬𑀸𑀬𑁄𑀧𑀺 𑀳𑁄𑀢𑀺, 𑀦 𑀓𑀸𑀮𑀯𑀺𑀲𑁂𑀲𑀯𑀸𑀘𑀓𑁄 𑀏𑀯𑀸𑀢𑀺 𑀆𑀳 𑁋 ‘‘𑀦𑀺𑀘𑁆𑀘𑀓𑀧𑁆𑀧𑀦𑁆𑀢𑀺 𑀦𑀺𑀘𑁆𑀘𑀓𑀸𑀮’’𑀦𑁆𑀢𑀺. 𑀬𑀣𑀸 𑀅𑀧𑁆𑀧𑀳𑀻𑀦𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑁄 𑀧𑀼𑀕𑁆𑀕𑀮𑁄 𑀢𑀁𑀦𑀺𑀲𑁆𑀲𑀺𑀢𑁄 𑀅𑀮𑁆𑀮𑀺𑀦𑁄, 𑀏𑀯𑀁 𑀢𑀸𑀳𑀺𑀧𑀺 𑀦𑀺𑀲𑁆𑀲𑀺𑀢𑁄 𑀅𑀫𑀼𑀢𑁆𑀢𑀪𑀸𑀯𑀢𑁄𑀢𑀺 𑀆𑀳 𑁋 ‘‘𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦𑀺𑀲𑁆𑀲𑀺𑀢𑀲𑁆𑀲𑀸’’𑀢𑀺. 𑀘𑀮𑀺𑀢𑀦𑁆𑀢𑀺 𑀬𑀣𑀸 𑀬𑀣𑀸 𑀅𑀲𑀫𑀸𑀭𑀤𑁆𑀥𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀆𑀤𑀻𑀦𑀯𑀯𑀲𑁂𑀦 𑀘𑀮𑀦𑁆𑀢𑀁 𑀧𑀦 𑀬𑀲𑁆𑀫𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀯𑀺𑀭𑀽𑀧𑀁 𑀘𑀮𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀆𑀳 𑁋 ‘‘𑀯𑀺𑀧𑁆𑀨𑀦𑁆𑀤𑀺𑀢𑀁 𑀳𑁄𑀢𑀻’’𑀢𑀺. 𑀢𑀸𑀤𑀺𑀲𑁂 𑀧𑀦 𑀧𑀧𑀜𑁆𑀘𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀘𑀮𑀺𑀢𑁂 𑀅𑀲𑀢𑀺 𑀪𑀸𑀯𑀦𑀸𑀬 𑀯𑀻𑀣𑀺𑀧𑀝𑀺𑀧𑀦𑁆𑀦𑀢𑀸𑀬 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀘𑀮𑀺𑀢𑁂 𑀅𑀲𑀢𑀺 𑀧𑀲𑁆𑀲𑀤𑁆𑀥𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀓𑀺𑀮𑁂𑀲𑀧𑀲𑁆𑀲𑀤𑁆𑀥𑀺 𑀦𑀸𑀫 𑀳𑁄𑀢𑀻’’𑀢𑀺.

𑀪𑀯𑀦𑁆𑀢𑀭𑀁 𑀤𑀺𑀲𑁆𑀯𑀸 𑀦𑀫𑀦𑀝𑁆𑀞𑁂𑀦 𑀦𑀢𑀺. 𑀢𑁂𑀦𑀸𑀳 𑁋 ‘‘𑀦𑀢𑀺𑀬𑀸 𑀅𑀲𑀢𑀻𑀢𑀺 𑀪𑀯𑀢𑁆𑀣𑀸𑀬 𑀆𑀮𑀬𑀦𑀺𑀓𑀦𑁆𑀢𑀺𑀧𑀭𑀺𑀬𑀼𑀝𑁆𑀞𑀸𑀦𑁂𑀲𑀼 𑀅𑀲𑀢𑀻’’𑀢𑀺. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑀺 𑀦𑀸𑀫𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀪𑀯𑀦𑁆𑀢𑀭𑀢𑁄 𑀇𑀥𑁂𑀯 𑀆𑀕𑀫𑀦𑀁 𑀦𑀸𑀫, 𑀘𑀼𑀢𑀺𑀯𑀲𑁂𑀦 𑀘𑀯𑀦𑀯𑀲𑁂𑀦 𑀇𑀢𑁄 𑀪𑀯𑀦𑁆𑀢𑀭𑀲𑁆𑀲 𑀕𑀫𑀦𑀁 𑀦𑀸𑀫 𑀦 𑀳𑁄𑀢𑀺 𑀆𑀕𑀢𑀺𑀕𑀢𑀺𑀬𑀸 𑀅𑀲𑀢𑀺 𑀓𑀢𑀽𑀧𑀘𑀺𑀢𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀉𑀧𑁆𑀧𑀢𑁆𑀢𑀺𑀧𑀭𑀺𑀓𑀧𑁆𑀧𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀘𑀯𑀦𑀯𑀲𑁂𑀦𑀸𑀢𑀺 𑀦𑀺𑀩𑁆𑀩𑀢𑁆𑀢𑀪𑀯𑀢𑁄 𑀘𑀯𑀦𑀯𑀲𑁂𑀦 𑀘𑀼𑀢𑀺, 𑀆𑀬𑀢𑀺𑀁 𑀉𑀧𑀧𑀚𑁆𑀚𑀦𑀯𑀲𑁂𑀦 𑀉𑀧𑀧𑀸𑀢𑁄 𑀦 𑀳𑁄𑀢𑀺. 𑀬𑀢𑁄 𑀕𑀢𑀺 𑀆𑀕𑀢𑀺 𑀘𑀯𑀦𑀁 𑀉𑀧𑀧𑀸𑀢𑁄 𑀦 𑀳𑁄𑀢𑀺, 𑀢𑀢𑁄 𑀏𑀯 𑀦𑁂𑀯𑀺𑀥, 𑀦 𑀳𑀼𑀭𑀁, 𑀦 𑀉𑀪𑀬𑀫𑀦𑁆𑀢𑀭𑁂𑀦, 𑀓𑀸𑀬𑀲𑁆𑀲 𑀕𑀢𑀺𑀬𑀸 𑀆𑀕𑀢𑀺𑀬𑀸 𑀘 𑀅𑀪𑀸𑀯𑀢𑁄 𑀲𑀩𑁆𑀩𑀲𑁄 𑀘𑀼𑀢𑀽𑀧𑀧𑀸𑀢𑁄 𑀦𑀢𑁆𑀣𑀺; 𑀢𑁂𑀦 𑀦 𑀇𑀥𑀮𑁄𑀓𑁂 𑀞𑀺𑀢𑁄𑀢𑀺 𑀯𑀢𑁆𑀢𑀩𑁆𑀩𑁄. 𑀦 𑀧𑀭𑀮𑁄𑀓𑁂 𑀞𑀺𑀢𑁄𑀢𑀺 𑀯𑀢𑁆𑀢𑀩𑁆𑀩𑁄, 𑀦 𑀉𑀪𑀬𑀫𑀦𑁆𑀢𑀭𑁂𑀦 𑀞𑀺𑀢𑁄𑀢𑀺 𑀯𑀢𑁆𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀦𑀬𑀺𑀥 𑀮𑁄𑀓𑁂’’𑀢𑀺𑀆𑀤𑀺. 𑀢𑀢𑁆𑀣 𑀇𑀥𑀮𑁄𑀓𑀧𑀭𑀮𑁄𑀓𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀁𑀲𑀭𑀡𑀧𑀤𑁂𑀲𑀲𑁆𑀲 𑀅𑀪𑀸𑀯𑀢𑁄, ‘‘𑀦 𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺 𑀯𑀼𑀢𑁆𑀢𑁄𑀢𑀺 𑀉𑀪𑀬𑀧𑀭𑀺𑀬𑀸𑀧𑀦𑁆𑀦𑁄 𑀦 𑀳𑁄𑀢𑀻𑀢𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑁄, ‘‘𑀦 𑀉𑀪𑀬𑀢𑁆𑀣 𑀳𑁄𑀢𑀻’’𑀢𑀺 𑀆𑀳. 𑀅𑀬𑀫𑁂𑀯 𑀅𑀦𑁆𑀢𑁄𑀢𑀺 𑀬𑁄 𑀇𑀥𑀮𑁄𑀓𑁂 𑀧𑀭𑀮𑁄𑀓𑁂 𑀘 𑀅𑀪𑀸𑀯𑁄 𑀅𑀯𑀺𑀚𑁆𑀚𑀫𑀸𑀦𑀢𑀸 𑀅𑀦𑀼𑀧𑁆𑀧𑀚𑁆𑀚𑀦𑀁, 𑀅𑀬𑀫𑁂𑀯 𑀲𑀓𑀮𑀲𑁆𑀲 𑀤𑀼𑀓𑁆𑀔𑀫𑀽𑀮𑀲𑁆𑀲 𑀅𑀦𑁆𑀢𑁄 𑀧𑀭𑀺𑀬𑁄𑀲𑀸𑀦𑀁.

𑁩𑁯𑁪. 𑀓𑀡𑁆𑀞𑀦𑀸𑀴𑀺𑀁 𑀙𑀺𑀦𑁆𑀤𑀻𑀢𑀺 𑀦𑀸𑀴𑀺𑀁 𑀙𑀺𑀦𑁆𑀤𑀺𑀢𑀼𑀁 𑀆𑀭𑀪𑀺. 𑀢𑀲𑁆𑀫𑀺𑀁 𑀙𑀺𑀦𑁆𑀤𑀺𑀢𑀼𑀁 𑀆𑀭𑀤𑁆𑀥𑀓𑁆𑀔𑀡𑁂 𑀙𑁂𑀤𑁄 𑀘 𑀯𑀢𑁆𑀢𑀢𑀺; 𑀫𑀭𑀡𑀪𑀬𑀜𑁆𑀘 𑀑𑀓𑁆𑀓𑀫𑀺 𑀅𑀯𑀻𑀢𑀭𑀸𑀕𑀪𑀸𑀯𑀢𑁄, 𑀢𑀢𑁄 𑀏𑀯 𑀕𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀺. ‘‘𑀲𑁄𑀧𑀺 𑀦𑀸𑀫 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀦𑀼𑀧𑀯𑀚𑁆𑀚𑀢𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀲𑀭𑀸𑀕𑀫𑀭𑀡𑀁 𑀫𑀭𑀺𑀲𑁆𑀲𑀢𑀻’’𑀢𑀺 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄. 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀩𑀳𑀼𑀲𑁄 𑀯𑀺𑀧𑀲𑁆𑀲𑀦𑀸𑀬 𑀉𑀤𑀬𑀩𑁆𑀩𑀬𑀜𑀸𑀡𑀁 𑀧𑀸𑀯𑀺𑀢𑀢𑁆𑀢𑀸 𑀢𑀸𑀯𑀤𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀦𑁆𑀢𑀭𑀁 𑀓𑀡𑁆𑀞𑀦𑀸𑀴𑀺𑀘𑁆𑀙𑁂𑀤𑀧𑀘𑁆𑀘𑀬𑀸 𑀚𑀻𑀯𑀺𑀢𑀦𑀺𑀭𑁄𑀥𑁂𑀦 𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀦 𑀳𑀺 𑀅𑀦𑁆𑀢𑀺𑀫𑀪𑀯𑀺𑀓𑀲𑁆𑀲 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀣𑁂𑀭𑀲𑁆𑀲𑀸𑀢𑀺 𑀆𑀬𑀲𑁆𑀫𑀢𑁄 𑀙𑀦𑁆𑀦𑀢𑁆𑀣𑁂𑀭𑀲𑁆𑀲. 𑀩𑁆𑀬𑀸𑀓𑀭𑀡𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁 ‘‘𑀩𑁆𑀬𑀸𑀓𑀭𑀡𑁂𑀦 𑀳𑁂𑀢𑀼𑀦𑀸’’𑀢𑀺. 𑀢𑀦𑁆𑀦𑀺𑀫𑀺𑀢𑁆𑀢𑀜𑁆𑀳𑀺 𑀣𑁂𑀭𑁄 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀺. 𑀇𑀫𑀺𑀦𑀸𑀢𑀺, ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑁂𑀦. 𑀣𑁂𑀭𑁄𑀢𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄. 𑀧𑀼𑀘𑁆𑀙𑀢𑀻𑀢𑀺, 𑀪𑀦𑁆𑀢𑁂, 𑀢𑀣𑀸 𑀓𑀼𑀮𑀲𑀁𑀲𑀕𑁆𑀕𑀧𑀲𑀼𑀢𑁄 𑀓𑀣𑀁 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀢𑀺. ‘‘𑀧𑀼𑀩𑁆𑀩𑁂 𑀓𑀼𑀮𑁂𑀲𑀼 𑀲𑀁𑀲𑀝𑁆𑀞𑀯𑀺𑀳𑀸𑀭𑀻’’𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀜𑁆𑀜𑀸𑀢𑀲𑁆𑀲𑀧𑀺 𑀇𑀫𑀲𑁆𑀫𑀺𑀁 ‘‘𑀳𑁄𑀦𑁆𑀢𑀺 𑀳𑁂𑀢𑁂 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀯𑀼𑀢𑁆𑀢-𑀝𑁆𑀞𑀸𑀦𑁂 𑀅𑀲𑀁𑀲𑀝𑁆𑀞𑀪𑀸𑀯𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀧𑀓𑁆𑀓𑀫𑁆𑀧𑀺 𑀦𑀺𑀧𑀓𑁆𑀓𑀁 𑀯𑀺𑀬 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑀸𑀧𑀺 𑀓𑁂𑀘𑀺 𑀅𑀲𑀜𑁆𑀜𑀢𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀙𑀦𑁆𑀦𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀧𑀼𑀡𑁆𑀡𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁫. 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 ‘‘𑀧𑀝𑀺𑀲𑀮𑁆𑀮𑀸𑀦𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀅𑀭𑀺𑀬𑀯𑀺𑀳𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀇𑀥 𑀧𑀦 𑀅𑀓𑀢𑀓𑀺𑀘𑁆𑀘𑀲𑁆𑀲 𑀧𑀝𑀺𑀲𑀮𑁆𑀮𑀸𑀦𑀁 𑀦𑀸𑀫 𑀓𑀸𑀬𑀯𑀺𑀯𑁂𑀓𑁄𑀢𑀺 𑀆𑀳 𑁋 ‘‘𑀧𑀝𑀺𑀲𑀮𑁆𑀮𑀸𑀦𑀸𑀢𑀺 𑀏𑀓𑀻𑀪𑀸𑀯𑀸’’𑀢𑀺. ‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸’’𑀢𑀺 𑀧𑀦𑁂𑀢𑁆𑀣 𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀁 𑀯𑀺𑀚𑀸𑀦𑀦𑁆𑀢𑀲𑁆𑀲 𑀤𑁆𑀯𑀸𑀭𑀪𑀽𑀢𑀁 𑀘𑀓𑁆𑀔𑀼𑀦𑁆𑀢𑀺 𑀉𑀪𑀬𑀁 𑀅𑀚𑁆𑀛𑀢𑁆𑀢𑀺𑀓𑀁 𑀩𑀸𑀳𑀺𑀭𑀜𑁆𑀘 𑀆𑀬𑀢𑀦𑀁 𑀅𑀪𑀺𑀦𑀦𑁆𑀤𑀺𑀢𑀸𑀤𑀺𑀲𑀸𑀫𑀜𑁆𑀜𑁂𑀦 𑀢𑀜𑁆𑀘𑁂𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑁂𑀦 𑀏𑀓𑀚𑁆𑀛𑀁 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀆𑀳 𑁋 ‘‘𑀢𑀜𑁆𑀘𑁂𑀢𑀺 𑀢𑀁 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀜𑁆𑀘𑀸’’𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀺𑀜𑁆𑀜𑁂𑀬𑁆𑀬𑀲𑀤𑁆𑀤𑁂𑀦 𑀚𑁄𑀢𑀺𑀢𑀁 𑀯𑀺𑀜𑁆𑀜𑀸𑀡𑀁 𑀢𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀢𑀺 𑀢𑀤𑀼𑀪𑀬𑀁, ‘‘𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸’’𑀢𑀺 𑀧𑀤𑁂𑀦 𑀓𑀣𑀺𑀢𑀫𑁂𑀯𑀸𑀢𑀺 𑀇𑀥 𑀦 𑀕𑀳𑀺𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑁄𑀥𑀸𑀦𑁂𑀦𑀸𑀢𑀺 𑀲𑀳𑀸𑀯𑀝𑁆𑀞𑀸𑀦𑁂𑀦, 𑀘𑀺𑀢𑁆𑀢𑁂𑀦 𑀦𑀦𑁆𑀤𑀺𑀬𑀸 𑀢𑀡𑁆𑀳𑀸𑀬 𑀲𑀳 𑀧𑀯𑀢𑁆𑀢𑀺𑀬𑀸 𑀘𑀺𑀢𑁆𑀢𑀲𑀳𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻’’𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀲𑁆𑀲 𑀲𑀫𑁄𑀥𑀸𑀦𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀧𑀘𑁆𑀘𑀯𑁄𑀓𑀸𑀭𑁂 𑀲𑀳𑀧𑁆𑀧𑀯𑀢𑁆𑀢𑀺 𑀳𑁄𑀢𑀺. 𑀬𑀲𑁆𑀫𑀸 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁𑀬𑁂𑀯 𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀲𑀫𑀼𑀤𑀬𑁄𑀢𑀺, 𑀢𑀲𑁆𑀫𑀸 𑀆𑀳 𑁋 ‘‘𑀇𑀢𑀺 𑀙𑀲𑀼 𑀤𑁆𑀯𑀸𑀭𑁂𑀲𑀽’’𑀢𑀺𑀆𑀤𑀺. 𑀓𑀺𑀮𑁂𑀲𑀯𑀝𑁆𑀝𑀲𑁆𑀲 𑀓𑀫𑁆𑀫𑀯𑀝𑁆𑀝𑀲𑁆𑀲 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀘 𑀓𑀣𑀺𑀢𑀢𑁆𑀢𑀸 𑀆𑀳 𑁋 ‘‘𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑀻’’𑀢𑀺. 𑀤𑀼𑀢𑀺𑀬𑀦𑀬𑁂𑀢𑀺 ‘‘𑀲𑀦𑁆𑀢𑀺 𑀘 𑀔𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀤𑀼𑀢𑀺𑀬𑁂 𑀤𑁂𑀲𑀦𑀸𑀦𑀬𑁂. 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻𑀢𑀺 𑀦 𑀬𑀣𑀸𑀦𑀼𑀲𑀦𑁆𑀥𑀺 𑀦𑀸𑀧𑀺 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀲𑁆𑀲 𑀧𑀦 𑀇𑀥 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀻𑀢𑀺. 𑀲𑀢𑁆𑀢𑀲𑀼 𑀞𑀸𑀦𑁂𑀲𑀽𑀢𑀺 𑀅𑀓𑁆𑀓𑁄𑀲𑀦𑁂 𑀧𑀭𑀺𑀪𑀸𑀲𑀦𑁂 𑀧𑀸𑀡𑀺𑀧𑁆𑀧𑀳𑀸𑀭𑁂 𑀮𑁂𑀟𑁆𑀟𑀼𑀧𑁆𑀧𑀳𑀸𑀭𑁂 𑀤𑀡𑁆𑀟𑀧𑁆𑀧𑀳𑀸𑀭𑁂 𑀲𑀢𑁆𑀣𑀧𑁆𑀧𑀳𑀸𑀭𑁂 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑁂𑀢𑀺 𑀇𑀫𑁂𑀲𑀼 𑀲𑀢𑁆𑀢𑀲𑀼. ‘‘𑀪𑀤𑁆𑀤𑀓𑀸 𑀯𑀢𑀺𑀫𑁂’’𑀢𑀺𑀆𑀤𑀺𑀦𑀸 𑀔𑀦𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀁.

𑁩𑁯𑁬. 𑀘𑀡𑁆𑀟𑀸𑀢𑀺 𑀓𑁄𑀥𑀦𑀸, 𑀢𑁂𑀦 𑀤𑀽𑀲𑀺𑀢𑀘𑀺𑀢𑁆𑀢𑀢𑀸𑀬 𑀤𑀼𑀝𑁆𑀞𑀸𑀢𑀺 𑀯𑀼𑀢𑁆𑀢𑀸. 𑀓𑀺𑀩𑁆𑀩𑀺𑀲𑀸𑀢𑀺 𑀧𑀸𑀧𑀸. 𑀨𑀭𑀼𑀲𑀸𑀢𑀺 𑀈𑀲𑀓𑀫𑁆𑀧𑀺 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀮𑀼𑀤𑁆𑀤𑀸. 𑀨𑀭𑀼𑀲𑀯𑀘𑀦𑀢𑀸𑀬 𑀯𑀸 𑀨𑀭𑀼𑀲𑀸, 𑀢𑀣𑀸𑀪𑀽𑀢𑀸 𑀧𑀦 𑀮𑀼𑀤𑁆𑀤𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀓𑁆𑀔𑀴𑀸’’𑀢𑀺. 𑀇𑀤𑀜𑁆𑀘 𑀢𑁂𑀢𑀺, ‘‘𑀳𑀢𑁆𑀣𑀘𑁆𑀙𑁂𑀤𑀁 𑀦𑀸𑀲𑀺𑀓𑀘𑁆𑀙𑁂𑀤’’𑀦𑁆𑀢𑀺 𑀏𑀯𑀫𑀸𑀤𑀺𑀁 𑀇𑀤𑀜𑁆𑀘 𑀅𑀦𑀺𑀝𑁆𑀞𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀪𑀬𑀤𑀲𑁆𑀲𑀦𑁂𑀦 𑀢𑀚𑁆𑀚𑁂𑀲𑁆𑀲𑀦𑁆𑀢𑀺.

𑀖𑀝𑀺𑀓𑀫𑀼𑀕𑁆𑀕𑀭𑁂𑀦𑀸𑀢𑀺 𑀤𑀡𑁆𑀟𑀸𑀦𑀁 𑀓𑀺𑀭 𑀅𑀕𑁆𑀕𑀧𑀲𑁆𑀲𑁂 𑀖𑀝𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀺, 𑀢𑁂𑀦 𑀲𑁄 ‘‘𑀖𑀝𑀺𑀓𑀫𑀼𑀕𑁆𑀕𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀢𑁄𑀥𑀸𑀭𑀸𑀤𑀺𑀦𑀸 𑀲𑀢𑁆𑀣𑁂𑀦 𑀓𑀭𑀯𑀸𑀮𑀔𑀕𑁆𑀕𑀸𑀤𑀺𑀦𑀸. ‘‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀁 𑀏𑀢𑀁 𑀦𑀸𑀫’’𑀦𑁆𑀢𑀺 𑀯𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀬𑁄 ‘‘𑀤𑀫𑁄’’𑀢𑀺 𑀯𑀼𑀢𑁆𑀢𑀸, 𑀢𑀁 𑀧𑀸𑀞𑀧𑀤𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁆𑀘𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑀫𑁂𑀢𑀺 𑀲𑀁𑀯𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, 𑀤𑀫𑁄. 𑀭𑀸𑀕𑀸𑀤𑀺𑀧𑀸𑀧𑀥𑀫𑁆𑀫𑁂 𑀤𑀫𑁂𑀢𑀺 𑀉𑀧𑀲𑀫𑁂𑀢𑀻𑀢𑀺 𑀤𑀫𑁄, 𑀧𑀜𑁆𑀜𑀸. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀫𑁆𑀫𑀓𑀺𑀮𑁂𑀲𑁂 𑀤𑀫𑁂𑀢𑀺 𑀉𑀧𑀲𑀫𑁂𑀢𑀺 𑀯𑀺𑀓𑁆𑀔𑀫𑁆𑀪𑁂𑀢𑀻𑀢𑀺 𑀤𑀫𑁄 𑀉𑀧𑁄𑀲𑀣𑁄. 𑀩𑁆𑀬𑀸𑀧𑀸𑀤𑀯𑀺𑀳𑁂𑀲𑀸𑀤𑀺𑀓𑁂 𑀤𑀫𑁂𑀢𑀺 𑀯𑀺𑀦𑁂𑀢𑀻𑀢𑀺 𑀤𑀫𑁄𑀢𑀺 𑀆𑀳 𑁋 ‘‘𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀔𑀦𑁆𑀢𑀺 ‘𑀤𑀫𑁄’𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀉𑀧𑀲𑀫𑁄𑀢𑀺 𑀢𑀲𑁆𑀲𑁂𑀯 𑀤𑀫𑀲𑁆𑀲 𑀯𑁂𑀯𑀘𑀦𑀁, 𑀢𑀲𑁆𑀫𑀸 𑀤𑀫𑁄 𑀘 𑀲𑁄 𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀯𑀺𑀦𑀬𑀦𑀝𑁆𑀞𑁂𑀦 𑀢𑁂𑀲𑀁𑀬𑁂𑀯 𑀉𑀧𑀲𑀫𑀦𑀝𑁆𑀞𑁂𑀦 𑀉𑀧𑀲𑀫𑁄 𑀘𑀸𑀢𑀺 𑀤𑀫𑀽𑀧𑀲𑀫𑁄, 𑀅𑀥𑀺𑀯𑀸𑀲𑀦𑀔𑀦𑁆𑀢𑀺.

𑁩𑁯𑁭. 𑀢𑀢𑁆𑀣 𑀔𑀦𑁆𑀢𑀺𑀬𑀁 𑀓𑀢𑀸𑀥𑀺𑀓𑀸𑀭𑁄 𑀢𑀁 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀅𑀯𑀲𑁆𑀲𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀤𑀲𑁆𑀲 𑀅𑀧𑀤𑀸𑀦𑀁 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀯𑀺𑀪𑀸𑀯𑁂𑀢𑀼𑀁, ‘‘𑀓𑁄 𑀧𑀦𑁂𑀲 𑀧𑀼𑀡𑁆𑀡𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀼𑀦𑀸𑀧𑀭𑀦𑁆𑀢𑀚𑀦𑀧𑀤𑁂. 𑀅𑀲𑀧𑁆𑀧𑀸𑀬𑀯𑀺𑀳𑀸𑀭𑀦𑁆𑀢𑀺 𑀪𑀸𑀯𑀦𑀸𑀪𑀺𑀬𑁄𑀕𑀲𑁆𑀲 𑀦 𑀲𑀧𑁆𑀧𑀸𑀬𑀁 𑀯𑀺𑀳𑀸𑀭𑀁.

𑀤𑁆𑀯𑁂 𑀪𑀸𑀢𑀭𑁄𑀢𑀺 𑀅𑀯𑀺𑀪𑀢𑁆𑀢𑀲𑀸𑀧𑀢𑁂𑀬𑁆𑀬𑀸 𑀅𑀯𑀺𑀪𑀢𑁆𑀢𑀯𑁄𑀳𑀸𑀭𑀲𑀁𑀬𑁄𑀕𑀸. 𑀢𑁂𑀦𑀸𑀳 ‘‘𑀢𑁂𑀲𑀽’’𑀢𑀺𑀆𑀤𑀺. 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀚𑀦𑀧𑀤𑁂𑀲𑀼 𑀯𑀺𑀓𑁆𑀓𑀬𑀁 𑀓𑀭𑁄𑀦𑁆𑀢𑁄.

‘‘𑀩𑀼𑀤𑁆𑀥𑀧𑀽𑀚𑀁 𑀥𑀫𑁆𑀫𑀧𑀽𑀚𑀁 𑀲𑀗𑁆𑀖𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀢𑀦𑁆𑀦𑀺𑀦𑁆𑀦𑀸. 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀻𑀢𑀺, ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀅𑀲𑁆𑀲𑀼𑀢𑀧𑀼𑀩𑁆𑀩𑀁 𑀲𑁄𑀢𑀧𑀣𑀁 𑀉𑀧𑀕𑀢𑀁 𑀅𑀦𑀧𑁆𑀧𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀁 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑁂𑀳𑀺 𑀙𑀯𑀺𑀘𑀫𑁆𑀫𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀯𑀺𑀓𑁆𑀓𑀺𑀡𑀦𑀯𑀲𑁂𑀦 𑀯𑀺𑀦𑀺𑀬𑁄𑀚𑀺𑀢𑀁. 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀉𑀧𑀝𑁆𑀞𑀸𑀢𑀻𑀢𑀺 𑀪𑀸𑀯𑀦𑀸𑀯𑀻𑀣𑀺𑀁 𑀦 𑀑𑀢𑀭𑀢𑀺. 𑀫𑀬𑁆𑀳𑀁 𑀅𑀲𑀧𑁆𑀧𑀸𑀬𑁄𑀢𑀺 𑀫𑀬𑁆𑀳𑀁 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬 𑀲𑀧𑁆𑀧𑀸𑀬𑁄 𑀉𑀧𑀓𑀸𑀭𑁄 𑀦 𑀳𑁄𑀢𑀺.

𑀓𑁄𑀘𑀺 𑀘𑀗𑁆𑀓𑀫𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺 𑀫𑀳𑀢𑀸 𑀲𑀫𑀼𑀤𑁆𑀤𑀯𑀻𑀘𑀺𑀲𑀤𑁆𑀤𑁂𑀦 𑀉𑀧𑀤𑁆𑀤𑀼𑀢𑀢𑁆𑀢𑀸 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀲𑁆𑀲 𑀅𑀦𑀪𑀺𑀲𑀫𑁆𑀪𑀼𑀡𑀦𑀢𑁄. 𑀢𑁂𑀦𑀸𑀳 ‘‘𑀲𑀫𑀼𑀤𑁆𑀤𑀯𑀻𑀘𑀺𑀬𑁄’’𑀢𑀺𑀆𑀤𑀺. 𑀲𑁄𑀢𑀺 𑀫𑀓𑀼𑀴𑀯𑀺𑀳𑀸𑀭𑁄.

𑀉𑀢𑁆𑀢𑀫𑀚𑀯𑁂𑀦 𑀕𑀘𑁆𑀙𑀫𑀸𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑀢𑀭𑀁 𑀤𑀻𑀧𑀓𑀁 𑀧𑀸𑀧𑀼𑀡𑀺.

𑀉𑀧𑁆𑀧𑀸𑀤𑀺𑀓𑀁 𑀉𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀫𑀳𑀸𑀯𑀸𑀢𑀫𑀡𑁆𑀟𑀮𑀲𑀫𑀼𑀝𑁆𑀞𑀸𑀧𑀦𑁂𑀦 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑀸𑀲𑀫𑀼𑀤𑁆𑀤𑀁 𑀲𑀁𑀔𑁄𑀪𑁂𑀦𑁆𑀢𑁄 𑀫𑀳𑀦𑁆𑀢𑀁 𑀉𑀧𑁆𑀧𑀸𑀤𑀁 𑀉𑀝𑁆𑀞𑀧𑁂𑀢𑁆𑀯𑀸.

𑀣𑁂𑀭𑁄, ‘‘𑀅𑀫𑁆𑀳𑁂 𑀆𑀯𑀚𑁆𑀚𑁂𑀬𑁆𑀬𑀸𑀣𑀸’’𑀢𑀺 𑀓𑀦𑀺𑀝𑁆𑀞𑀲𑁆𑀲 𑀯𑀘𑀦𑀁 𑀲𑀭𑀺𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀆𑀯𑀚𑁆𑀚𑁂𑀢𑀺, 𑀢𑀲𑁆𑀫𑀸 𑀢𑀤𑀸𑀧𑀺 𑀆𑀯𑀚𑁆𑀚𑁂𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀆𑀯𑀚𑁆𑀚𑀺𑀢𑁆𑀯𑀸’’𑀢𑀺. 𑀲𑀫𑁆𑀫𑀼𑀔𑁂𑀢𑀺 𑀲𑀻𑀲𑀝𑁆𑀞𑀸𑀦𑁂. 𑀧𑀝𑀺𑀯𑁂𑀤𑁂𑀲𑀼𑀦𑁆𑀢𑀺 𑀧𑀯𑁂𑀤𑁂𑀲𑀼𑀁, 𑀉𑀧𑀸𑀲𑀓𑀸 𑀫𑀬𑀦𑁆𑀢𑀺 𑀧𑀝𑀺𑀚𑀸𑀦𑀺𑀁𑀲𑀼. 𑀇𑀫𑀺𑀦𑀸𑀢𑀺 𑀇𑀫𑀺𑀦𑀸 𑀫𑀬𑁆𑀳𑀁 𑀧𑀭𑀺𑀘𑁆𑀘𑀢𑁆𑀢𑀓𑁄𑀝𑁆𑀞𑀸𑀲𑁂𑀦. 𑀫𑀡𑁆𑀟𑀮𑀫𑀸𑀴𑀦𑁆𑀢𑀺 𑀫𑀼𑀡𑁆𑀟𑀫𑀡𑁆𑀟𑀮𑀫𑀸𑀴𑀲𑀤𑀺𑀲𑀁 𑀧𑀝𑀺𑀲𑁆𑀲𑀬𑀁. 𑀧𑀭𑀺𑀘𑀸𑀭𑀓𑀸𑀢𑀺 𑀅𑀯𑀲𑁂𑀲𑀕𑀸𑀫𑀺𑀦𑁄.

𑀲𑀘𑁆𑀘𑀩𑀦𑁆𑀥𑀲𑁆𑀲 𑀑𑀓𑀸𑀲𑀁 𑀓𑀭𑁄𑀦𑁆𑀢𑁄 ‘‘𑀏𑀓𑀽𑀦𑀧𑀜𑁆𑀘𑀲𑀢𑀸𑀦’’𑀦𑁆𑀢𑀺 𑀆𑀳. 𑀢𑀁 𑀤𑀺𑀯𑀲𑀁…𑀧𑁂… 𑀅𑀕𑁆𑀕𑀳𑁂𑀲𑀺, 𑀢𑁂𑀦 𑀲𑁄 𑀣𑁂𑀭𑁄 𑀧𑀞𑀫𑀁 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀸𑀦𑀁 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄.

𑀯𑀸𑀡𑀺𑀚𑀕𑀸𑀫𑀁 𑀕𑀦𑁆𑀢𑁆𑀯𑀸𑀢𑀺 𑀯𑀸𑀡𑀺𑀚𑀕𑀸𑀫𑀲𑀫𑀻𑀧𑀁 𑀕𑀦𑁆𑀢𑁆𑀯𑀸. 𑀩𑀼𑀤𑁆𑀥𑀓𑁄𑀮𑀸𑀳𑀮𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀉𑀧𑀕𑀫𑁆𑀫 𑀲𑀢𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑀓𑀼𑀢𑀽𑀳𑀮𑀁.

𑀫𑀳𑀸𑀕𑀦𑁆𑀥𑀓𑀼𑀝𑀺𑀬𑀁𑀬𑁂𑀯𑀸𑀢𑀺 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀫𑀳𑀸𑀕𑀦𑁆𑀥𑀓𑀼𑀝𑀺𑀬𑀁𑀬𑁂𑀯. 𑀧𑀭𑀺𑀘𑀭𑀺𑀢𑀩𑁆𑀩𑀦𑁆𑀢𑀺 𑀉𑀧𑀝𑁆𑀞𑀸𑀢𑀩𑁆𑀩𑀁.

𑀕𑀦𑁆𑀥𑀓𑀝𑁆𑀞𑀸𑀦𑀻𑀢𑀺 𑀘𑀦𑁆𑀤𑀦𑀅𑀕𑀭𑀼𑀲𑀮𑀴𑀸𑀤𑀻𑀦𑀺 𑀲𑀼𑀕𑀦𑁆𑀥𑀓𑀝𑁆𑀞𑀸𑀦𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀼𑀡𑁆𑀡𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀦𑀦𑁆𑀤𑀓𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁮. 𑀲𑀗𑁆𑀖𑀲𑁆𑀲 𑀪𑀸𑀭𑀁 𑀅𑀓𑀸𑀲𑀺 𑀉𑀧𑀸𑀬𑁂𑀦 𑀦𑀦𑁆𑀤𑀓𑀢𑁆𑀣𑁂𑀭𑀲𑁆𑀲 𑀑𑀯𑀸𑀤𑁂𑀦 𑀯𑀺𑀦𑁂𑀢𑀩𑁆𑀩𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀦𑀬𑀢𑁆𑀣𑀁. 𑀢𑁂𑀦𑀸𑀳 ‘‘𑀇𑀫𑀁 𑀧𑀦𑀸’’𑀢𑀺𑀆𑀤𑀺. 𑀧𑀭𑀺𑀬𑀸𑀬𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀧𑀝𑀺𑀧𑀸𑀝𑀻𑀢𑀺 𑀆𑀳 𑁋 ‘‘𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀸𑀭𑁂𑀦𑀸’’𑀢𑀺. 𑀅𑀲𑁆𑀲𑀸𑀢𑀺 𑀦𑀦𑁆𑀤𑀓𑀢𑁆𑀣𑁂𑀭𑀲𑁆𑀲. 𑀯𑀤𑀸𑀧𑁂𑀲𑀺 𑀅𑀜𑁆𑀜𑁂𑀳𑀺 𑀅𑀢𑁆𑀢𑀦𑁄 𑀅𑀦𑁄𑀓𑀸𑀲𑀪𑀸𑀯𑀁. 𑀧𑀭𑀺𑀬𑀸𑀬𑁂𑀦 𑀑𑀯𑀤𑀦𑁆𑀢𑀻𑀢𑀺 𑀑𑀯𑀤𑀺𑀢𑀼𑀁 𑀲𑀫𑀢𑁆𑀣𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀸𑀭𑁂𑀦 𑀑𑀯𑀤𑀦𑁆𑀢𑀺. 𑀇𑀤𑀁 𑀧𑀭𑀺𑀬𑀸𑀬𑁂𑀦 𑀑𑀯𑀤𑀦𑀁. 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺 𑀧𑀲𑀻𑀤𑀢𑀺 𑀧𑀼𑀩𑁆𑀩𑀘𑀭𑀺𑀬𑀲𑀺𑀤𑁆𑀥𑁂𑀦 𑀕𑀸𑀭𑀯𑀩𑀳𑀼𑀫𑀸𑀦𑁂𑀦 𑀕𑁂𑀳𑀲𑁆𑀲𑀺𑀢𑀧𑁂𑀫𑀯𑀲𑁂𑀦.

𑀕𑁄𑀢𑀫𑀻𑀢𑀺 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻. 𑀲𑁂𑀝𑁆𑀞𑀺𑀲𑁆𑀲𑀸𑀢𑀺 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺𑀦𑁄.

𑀢𑁂𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁂. 𑀓𑀺𑀁 𑀦𑀼 𑀔𑁄𑀢𑀺 𑀧𑀼𑀘𑁆𑀙𑀺 𑀘𑀺𑀭𑀢𑀭𑀓𑀸𑀮𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀧𑀭𑀺𑀪𑀸𑀯𑀺𑀢𑀲𑀦𑁆𑀢𑀸𑀦𑀢𑀸𑀬, 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀘 𑀕𑀸𑀭𑀯𑀩𑀳𑀼𑀫𑀸𑀦𑀢𑀸𑀬. 𑀤𑀼𑀕𑁆𑀕𑀢𑁂𑀳𑀺𑀧𑀺 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀤𑀼𑀕𑁆𑀕𑀢𑁂𑀳𑀺𑀧𑀺 𑀬𑀣𑀸𑀯𑀺𑀪𑀯𑀁 𑀓𑀢𑀸 𑀓𑀼𑀝𑀺 𑀢𑀼𑀫𑁆𑀳𑀸𑀓𑀁 𑀯𑀲𑀺𑀢𑀼𑀁 𑀲𑀓𑁆𑀓𑀸𑀢𑀺 𑀧𑀼𑀘𑁆𑀙𑀺.

𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸𑀢𑀺 𑀳𑀢𑁆𑀣𑀓𑀫𑁆𑀫𑀁 𑀓𑀢𑁆𑀯𑀸 𑀤𑁂𑀣𑀸𑀢𑀺 𑀅𑀢𑁆𑀣𑁄. 𑀆𑀦𑀺𑀲𑀁𑀲𑀁 𑀆𑀘𑀺𑀓𑁆𑀔𑀺𑀢𑁆𑀯𑀸𑀢𑀺 ‘‘𑀢𑀸𑀤𑀺𑀲𑀸𑀦𑀁 𑀫𑀳𑁂𑀲𑀻𑀦𑀁 𑀓𑀢𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀅𑀫𑁆𑀳𑀸𑀓𑀫𑁆𑀧𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀳𑁄𑀢𑀺. 𑀆𑀯𑀸𑀲𑀤𑀸𑀦𑀜𑁆𑀘 𑀦𑀸𑀫 𑀫𑀳𑀧𑁆𑀨𑀮𑀁 𑀫𑀳𑀸𑀦𑀺𑀲𑀁𑀲𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀫𑀳𑀸𑀲𑀫𑁆𑀧𑀢𑁆𑀢𑀺𑀆𑀯𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀆𑀦𑀺𑀲𑀁𑀲𑀁 𑀆𑀘𑀺𑀓𑁆𑀔𑀺𑀢𑁆𑀯𑀸. 𑀕𑀸𑀴𑁆𑀳𑁂𑀦 𑀑𑀯𑀸𑀤𑁂𑀦 𑀢𑀚𑁆𑀚𑁂𑀢𑁆𑀯𑀸𑀢𑀺, ‘‘𑀇𑀫𑁂𑀲𑀼 𑀦𑀸𑀫 𑀓𑀭𑁄𑀦𑁆𑀢𑁂𑀲𑀼 𑀢𑁆𑀯𑀁 𑀓𑀲𑁆𑀫𑀸 𑀦 𑀓𑀭𑁄𑀲𑀺, 𑀫𑀫 𑀚𑁂𑀝𑁆𑀞𑀓𑀤𑀸𑀲𑀲𑁆𑀲 𑀪𑀭𑀺𑀬𑀪𑀸𑀯𑀁 𑀦 𑀚𑀸𑀦𑀸𑀲𑀺. 𑀲𑀩𑁆𑀩𑁂𑀳𑀺𑀧𑀺 𑀓𑀭𑀺𑀬𑀫𑀸𑀦𑀲𑁆𑀲 𑀳𑀢𑁆𑀣𑀓𑀫𑁆𑀫𑀲𑁆𑀲 𑀅𑀓𑀭𑀡𑁂 𑀢𑀼𑀬𑁆𑀳𑀁 𑀇𑀤𑀜𑁆𑀘𑀺𑀤𑀜𑁆𑀘 𑀤𑀼𑀓𑁆𑀔𑀁 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸. 𑀲𑀢𑀁 𑀲𑀢𑀁 𑀳𑀼𑀢𑁆𑀯𑀸𑀢𑀺 𑀲𑀢𑀁 𑀲𑀢𑀁 𑀤𑀸𑀲𑀧𑀼𑀢𑁆𑀢𑀸 𑀏𑀓𑀚𑁆𑀛𑀁 𑀳𑀼𑀢𑁆𑀯𑀸 𑀏𑀓𑀜𑁆𑀘 𑀏𑀓𑀜𑁆𑀘 𑀓𑀼𑀝𑀺𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀘𑀗𑁆𑀓𑀫𑀦𑀸𑀤𑀺𑀧𑀭𑀺𑀯𑀸𑀭𑀦𑁆𑀢𑀺 𑀘𑀗𑁆𑀓𑀫𑀦𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀪𑁄𑀚𑀦𑀸𑀤𑀺𑀧𑀭𑀺𑀯𑀸𑀭𑀝𑁆𑀞𑀸𑀦𑀲𑀳𑀺𑀢𑀁. 𑀚𑀕𑁆𑀕𑀺𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀢𑁆𑀯𑀸. 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀻𑀢𑀺 𑀧𑀭𑀺𑀘𑁆𑀘𑀚𑀸𑀧𑁂𑀲𑀺. 𑀧𑀭𑀺𑀯𑀢𑁆𑀢𑀸𑀧𑁂𑀢𑁆𑀯𑀸𑀢𑀺 𑀘𑁂𑀢𑀸𑀧𑁂𑀢𑁆𑀯𑀸. 𑀢𑀺𑀘𑀻𑀯𑀭𑀸𑀦𑀻𑀢𑀺 𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀦𑀺 𑀢𑀺𑀘𑀻𑀯𑀭𑀸𑀦𑀺 𑀓𑀢𑁆𑀯𑀸 𑀅𑀤𑀸𑀲𑀺. 𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀓𑀸𑀮𑁂 𑀓𑀸𑀮𑁂, 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀭𑀚𑁆𑀚𑁂 𑀞𑀺𑀢𑀲𑁆𑀲𑀸𑀢𑀺 𑀲𑀩𑁆𑀩𑀪𑀽𑀢𑀽𑀧𑀓𑀸𑀭𑀭𑀚𑁆𑀚𑁂 𑀞𑀺𑀢𑀲𑁆𑀲.

𑀦𑀦𑁆𑀤𑀓𑀢𑁆𑀣𑁂𑀭𑁄𑀧𑀻𑀢𑀺 𑀢𑀤𑀸 𑀚𑁂𑀝𑁆𑀞𑀓𑀤𑀸𑀲𑁄 𑀏𑀢𑀭𑀳𑀺 𑀦𑀦𑁆𑀤𑀓𑀢𑁆𑀣𑁂𑀭𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀚𑁂𑀝𑁆𑀞𑀓𑀤𑀸𑀲𑀺𑀥𑀻𑀢𑀸 …𑀧𑁂… 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀬𑀫𑀸𑀬𑀲𑁆𑀫𑀸 𑀦𑀦𑁆𑀤𑀓𑁄𑀢𑀺 𑀅𑀬𑀫𑁂𑀯 𑀲𑀫𑀼𑀤𑀸𑀕𑀫𑀢𑁄 𑀆𑀬𑀲𑁆𑀫𑀸 𑀦𑀦𑁆𑀤𑀓𑀢𑁆𑀣𑁂𑀭𑁄. 𑀏𑀢𑀸𑀯 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀏𑀢𑀸𑀯𑀢𑀸 𑀲𑀫𑀼𑀤𑀸𑀕𑀫𑀢𑁄 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀼𑀦𑀺𑀬𑁄.

𑁩𑁯𑁯. 𑀳𑁂𑀢𑀼𑀦𑀸𑀢𑀺 𑀜𑀸𑀬𑁂𑀦 𑀅𑀯𑀺𑀧𑀭𑀻𑀢𑀧𑀝𑀺𑀧𑀢𑁆𑀢𑀺𑀬𑀸. 𑀧𑀼𑀩𑁆𑀩𑀪𑀸𑀕𑀸 𑀳𑀺 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀝𑀺𑀧𑀤𑀸 𑀧𑀘𑁆𑀙𑀺𑀫𑀸𑀬 𑀓𑀸𑀭𑀡𑀁. 𑀬𑀸𑀣𑀸𑀯𑀲𑀭𑀲𑀢𑁄 𑀤𑀺𑀝𑁆𑀞𑀦𑁆𑀢𑀺 𑀬𑀣𑀸𑀪𑀽𑀢𑀲𑀪𑀸𑀯𑀢𑁄 𑀧𑀘𑁆𑀘𑀓𑁆𑀔𑀁 𑀯𑀺𑀬.

𑁪𑁦𑁧. 𑀢𑀁 𑀲𑀪𑀸𑀯𑀁 𑀢𑀁𑀲𑀪𑀸𑀯𑀦𑁆𑀢𑀺 𑀢𑀲𑁆𑀲𑀸 𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀸𑀯𑁂𑀦 𑀅𑀦𑀼𑀭𑀽𑀧𑀁.

𑁪𑁦𑁩. 𑀧𑀞𑀫𑀢𑀭𑀁𑀬𑁂𑀯 𑀅𑀦𑀺𑀘𑁆𑀘𑀸𑀢𑀺 𑀢𑀲𑁆𑀲𑀸𑀧𑀺 𑀙𑀸𑀬𑀸𑀬 𑀅𑀦𑀺𑀘𑁆𑀘𑀪𑀸𑀯𑁄 𑀧𑀞𑀫𑀢𑀭𑀁𑀬𑁂𑀯 𑀲𑀺𑀤𑁆𑀥𑁄. 𑀦 𑀳𑀺 𑀓𑀤𑀸𑀘𑀺 𑀅𑀦𑀺𑀘𑁆𑀘𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀓𑀺𑀜𑁆𑀘𑀺 𑀦𑀺𑀘𑁆𑀘𑀁 𑀦𑀸𑀫 𑀅𑀢𑁆𑀣𑀻𑀢𑀺.

𑁪𑁦𑁪. 𑀅𑀦𑀼𑀧𑀳𑀦𑀺𑀢𑁆𑀯𑀸𑀢𑀺 𑀅𑀯𑀺𑀦𑀸𑀲𑁂𑀢𑁆𑀯𑀸. 𑀓𑀣𑀁 𑀧𑀦 𑀫𑀁𑀲𑀓𑀸𑀬𑀁 𑀘𑀫𑁆𑀫𑀓𑀸𑀬𑀜𑁆𑀘 𑀅𑀯𑀺𑀦𑀸𑀲𑁂𑀢𑁆𑀯𑀸 𑀇𑀢𑀭𑁂𑀲𑀁 𑀓𑀦𑁆𑀢𑀦𑀁 𑀳𑁄𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁, ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀫𑁆𑀫𑀁 𑀅𑀮𑁆𑀮𑀺𑀬𑀸𑀧𑁂𑀦𑁆𑀢𑁄𑀢𑀺 𑀘𑀫𑁆𑀫𑁂 𑀮𑀕𑁆𑀕𑀸𑀧𑁂𑀦𑁆𑀢𑁄 𑀘𑀫𑁆𑀫𑀧𑀝𑀺𑀩𑀤𑁆𑀥𑀁 𑀓𑀭𑁄𑀦𑁆𑀢𑁄. 𑀘𑀫𑁆𑀫𑀁 𑀩𑀤𑁆𑀥𑀁 𑀓𑀢𑁆𑀯𑀸𑀢𑀺 𑀯𑀺𑀯𑀭𑀓𑀸𑀮𑁂 𑀦 𑀨𑀸𑀮𑁂𑀦𑁆𑀢𑁄 𑀘𑀫𑁆𑀫𑀩𑀤𑁆𑀥𑁂 𑀓𑀢𑁆𑀯𑀸. 𑀏𑀯𑀁 𑀅𑀓𑀢𑁆𑀯𑀸𑀢𑀺 𑀏𑀯𑀁 𑀫𑀁𑀲𑀘𑀫𑁆𑀫𑀓𑀸𑀬𑀸𑀦𑀁 𑀯𑀺𑀦𑀸𑀲𑀦𑀁 𑀅𑀓𑀢𑁆𑀯𑀸, 𑀯𑀺𑀮𑀺𑀫𑀁𑀲𑀸𑀤𑀺𑀯𑀺𑀓𑀦𑁆𑀢𑀦𑁂𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑁂𑀘𑁂𑀢𑁆𑀯𑀸. 𑀢𑀢𑁆𑀣 𑀯𑀺𑀮𑀺𑀫𑀁𑀲𑀦𑁆𑀢𑀺 𑀘𑀫𑁆𑀫𑀦𑀺𑀲𑁆𑀲𑀺𑀢𑀫𑀁𑀲𑀁, 𑀧𑀝𑀺𑀘𑁆𑀙𑀦𑁆𑀦𑀓𑀺𑀮𑁄𑀫𑀓𑀦𑁆𑀢𑀺 𑀘 𑀯𑀤𑀦𑁆𑀢𑀺. 𑀦𑁆𑀳𑀸𑀭𑀽𑀢𑀺 𑀲𑀼𑀔𑀼𑀫𑀦𑁆𑀳𑀸𑀭𑀼. 𑀩𑀦𑁆𑀥𑀦𑀦𑁆𑀢𑀺 𑀘𑀫𑁆𑀫𑀫𑀁𑀲𑀸𑀦𑀁 𑀲𑀫𑁆𑀩𑀦𑁆𑀥𑀁. 𑀢𑁂𑀦𑀸𑀳 𑁋 ‘‘𑀲𑀩𑁆𑀩𑀘𑀫𑁆𑀫𑁂 𑀮𑀕𑁆𑀕𑀯𑀺𑀮𑀺𑀧𑀦𑀫𑀁𑀲𑀫𑁂𑀯𑀸’’𑀢𑀺. 𑀅𑀦𑁆𑀢𑀭𑀓𑀺𑀮𑁂𑀲𑀫𑁂𑀯𑀸𑀢𑀺 𑀅𑀦𑁆𑀢𑀭𑁂 𑀘𑀺𑀢𑁆𑀢𑁂 𑀚𑀸𑀢𑀢𑁆𑀢𑀸 𑀲𑀢𑁆𑀢𑀲𑀦𑁆𑀢𑀸𑀦𑀦𑁆𑀢𑁄𑀕𑀥𑀢𑀸𑀬 𑀅𑀩𑁆𑀪𑀦𑁆𑀢𑀭𑀪𑀽𑀢𑀓𑀺𑀮𑁂𑀲𑀫𑁂𑀯.

𑁪𑁦𑁫. 𑀢𑀚𑁆𑀚𑀁 𑀯𑀸𑀬𑀸𑀫𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀧𑀼𑀭𑀺𑀲𑁂𑀦 𑀓𑀼𑀞𑀸𑀭𑀺𑀦𑀸 𑀙𑁂𑀚𑁆𑀚𑀁 𑀙𑀺𑀦𑁆𑀤𑀺𑀢𑁂 𑀙𑁂𑀚𑁆𑀚𑀝𑁆𑀞𑀸𑀦𑀲𑁆𑀲 𑀲𑀮𑁆𑀮𑀓𑁆𑀔𑀡𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀲𑁆𑀲 𑀧𑀝𑀺𑀖𑀸𑀢𑀪𑀸𑀯𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀓𑀸𑀬𑀧𑀭𑀺𑀴𑀸𑀳𑀸𑀪𑀸𑀯𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀢𑀲𑁆𑀲 𑀅𑀯𑀝𑁆𑀞𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀓𑀺𑀘𑁆𑀘𑀦𑁆𑀢𑀭𑁂 𑀅𑀚𑁆𑀛𑀼𑀧𑁂𑀓𑁆𑀔𑀡𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 𑀧𑀜𑁆𑀜𑀸𑀬 𑀓𑀺𑀮𑁂𑀲𑁂 𑀙𑀺𑀦𑁆𑀤𑀦𑁆𑀢𑀲𑁆𑀲 𑀬𑁄𑀕𑀺𑀦𑁄 𑀯𑀻𑀭𑀺𑀬𑀩𑀮𑁂𑀦 𑀲𑀤𑁆𑀥𑀺𑀁 𑀲𑀢𑀺-𑀧𑀻𑀢𑀺-𑀧𑀲𑁆𑀲𑀤𑁆𑀥𑀺-𑀲𑀫𑀸𑀥𑀺-𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀏𑀯𑀁 𑀦 𑀯𑀺𑀦𑀸 𑀙𑀳𑀺…𑀧𑁂… 𑀲𑀓𑁆𑀓𑁄𑀢𑀻’’𑀢𑀺.

𑁪𑁦𑁭. 𑀢𑁂𑀦 𑀓𑀸𑀭𑀡𑁂𑀦𑀸𑀢𑀺 𑀬𑁂𑀦 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀸 𑀥𑀫𑁆𑀫𑀤𑁂𑀲𑀦𑀸 𑀲𑀧𑁆𑀧𑀸𑀬𑀸, 𑀆𑀲𑁂𑀯𑀦𑀫𑀦𑁆𑀤𑀢𑀸𑀬 𑀧𑀦 𑀅𑀚𑁆𑀛𑀸𑀲𑀬𑁂𑀦 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸 𑀦 𑀚𑀸𑀢𑀸𑀬𑁂𑀯; 𑀧𑀼𑀦 𑀢𑀣𑀸 𑀤𑁂𑀲𑀦𑀸𑀬 𑀲𑀢𑀺 𑀆𑀲𑁂𑀯𑀦𑀩𑀮𑀯𑀢𑀸𑀬 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸 𑀪𑀯𑀺𑀲𑁆𑀲𑀦𑁆𑀢𑀺; 𑀢𑁂𑀦 𑀓𑀸𑀭𑀡𑁂𑀦 𑀢𑁆𑀯𑀫𑁆𑀧𑀺 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀦𑁂𑀯 𑀑𑀯𑀸𑀤𑁂𑀦 𑀑𑀯𑀤𑁂𑀬𑁆𑀬𑀸𑀲𑀻𑀢𑀺.

𑁪𑁧𑁫. 𑀲𑀩𑁆𑀩𑀧𑀘𑁆𑀙𑀺𑀫𑀺𑀓𑀸𑀢𑀺 𑀲𑀩𑁆𑀩𑀸𑀲𑀁 𑀓𑀦𑀺𑀝𑁆𑀞𑀸 𑀲𑁄𑀢𑀸𑀧𑀦𑁆𑀦𑀸, 𑀅𑀦𑀭𑀺𑀬𑀸 𑀢𑀢𑁆𑀣 𑀓𑀸𑀘𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀲𑁂𑀲𑀸 𑀧𑀦…𑀧𑁂… 𑀔𑀻𑀡𑀸𑀲𑀯𑀸 𑀘𑀸’’𑀢𑀺. 𑀬𑀤𑀺 𑀏𑀯𑀦𑁆𑀢𑀺 𑀅𑀔𑀻𑀡𑀸𑀲𑀯𑀸𑀧𑀺 𑀢𑀸𑀤𑀺𑀲𑀸 𑀪𑀺𑀓𑁆𑀔𑀼𑀦𑀻 𑀅𑀢𑁆𑀣𑀺. 𑀏𑀯𑀁 𑀲𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀪𑀸𑀯𑁂𑀦𑀧𑀺 𑀲𑀢𑀺 𑀔𑀻𑀡𑀸𑀲𑀯𑀪𑀸𑀯𑁂 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀘𑁄𑀤𑁂𑀢𑀺, ‘‘𑀓𑀣𑀁 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸’’𑀢𑀺? 𑀇𑀢𑀭𑁄 𑀅𑀚𑁆𑀛𑀸𑀲𑀬𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸, ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. 𑀅𑀚𑁆𑀛𑀸𑀲𑀬𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑀧𑀸𑀭𑀺𑀧𑀽𑀭𑀺𑀬𑀸, 𑀦 𑀲𑀩𑁆𑀩𑀲𑁄 𑀕𑀼𑀡𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀓𑀤𑀸 𑀦𑀼 𑀔𑁄’’𑀢𑀺𑀆𑀤𑀺. 𑀏𑀢𑁂𑀦 𑀧𑀸𑀤𑀓𑀚𑁆𑀛𑀸𑀦𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀸𑀦𑀁 𑀯𑀺𑀲𑀤𑀺𑀲𑀢𑀸𑀬 𑀧𑀼𑀕𑁆𑀕𑀮𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑀸𑀮𑁂 𑀧𑀯𑀢𑁆𑀢𑀅𑀚𑁆𑀛𑀸𑀲𑀬𑀯𑀲𑁂𑀦 𑀅𑀭𑀺𑀬𑀫𑀕𑁆𑀕𑁂 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀸𑀦𑀁 𑀯𑀺𑀲𑁂𑀲𑀢𑀸𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀦𑁆𑀤𑀓𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁬. 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀧𑀸𑀘𑁂𑀦𑁆𑀢𑀻𑀢𑀺 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺𑀪𑀽𑀢𑀁 𑀅𑀭𑀳𑀢𑁆𑀢𑀁 𑀲𑀩𑁆𑀩𑀲𑁄 𑀧𑀸𑀘𑁂𑀦𑁆𑀢𑀺 𑀲𑀸𑀥𑁂𑀦𑁆𑀢𑀺 𑀦𑀺𑀩𑁆𑀩𑀸𑀧𑁂𑀦𑁆𑀢𑀻𑀢𑀺 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸. 𑀥𑀫𑁆𑀫𑀸𑀢𑀺 𑀓𑀸𑀭𑀡𑀥𑀫𑁆𑀫𑀸. 𑀢𑁂𑀦𑀸𑀳 𑁋 ‘‘𑀯𑀺𑀲𑀼𑀤𑁆𑀥𑀺𑀓𑀸𑀭𑀡𑀯𑀲𑁂𑀦𑀸’’𑀢𑀺, 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑀸𑀬 𑀯𑀺𑀲𑀼𑀤𑁆𑀥𑀺𑀬𑀸 𑀲𑀫𑁆𑀧𑀸𑀤𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀬𑁄 𑀯𑀺𑀲𑀼𑀚𑁆𑀛𑀫𑀸𑀦𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸𑀯 𑀲𑀩𑁆𑀩𑀲𑁄 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀳𑀺 𑀘𑀺𑀢𑁆𑀢𑀁 𑀯𑀺𑀫𑁄𑀘𑁂𑀦𑁆𑀢𑀸 𑀅𑀕𑁆𑀕𑀨𑀮𑀯𑀺𑀫𑀼𑀢𑁆𑀢𑀺𑀁 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀢𑁂𑀲𑀁 𑀧𑀦 𑀯𑀺𑀲𑀼𑀤𑁆𑀥𑀺 𑀩𑀸𑀮𑀧𑀭𑀺𑀯𑀚𑁆𑀚𑀦𑁂𑀦 𑀧𑀡𑁆𑀟𑀺𑀢𑀧𑀬𑀺𑀭𑀼𑀧𑀸𑀲𑀦𑁂𑀦 𑀧𑀲𑀸𑀤𑀸𑀯𑀳𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀘 𑀳𑁄𑀢𑀺. 𑀢𑀢𑁄 𑀇𑀥 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀲𑁆𑀲𑀤𑁆𑀥𑁂 𑀧𑀼𑀕𑁆𑀕𑀮𑁂𑀢𑀺 𑀲𑀤𑁆𑀥𑀸𑀭𑀳𑀺𑀢𑁂 𑀧𑀼𑀕𑁆𑀕𑀮𑁂. 𑀢𑁂 𑀳𑀺 𑀦𑀺𑀲𑁆𑀲𑀸𑀬 𑀦 𑀓𑀤𑀸𑀘𑀺 𑀲𑀤𑁆𑀥𑀸 𑀲𑀫𑁆𑀪𑀯𑀢𑀺, 𑀢𑁂𑀲𑀁 𑀧𑀦 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑁂𑀦 𑀅𑀜𑁆𑀜𑀤𑀢𑁆𑀣𑀼 𑀅𑀲𑀤𑁆𑀥𑀺𑀬𑀫𑁂𑀯 𑀯𑀟𑁆𑀠𑀢𑀺, 𑀢𑀲𑁆𑀫𑀸 𑀢𑁂 𑀧𑀝𑀺𑀪𑀬𑀫𑀕𑁆𑀕𑁄 𑀯𑀺𑀬 𑀤𑀽𑀭𑀢𑁄 𑀯𑀚𑁆𑀚𑁂𑀢𑀩𑁆𑀩𑀸. 𑀅𑀲𑁆𑀲𑀤𑁆𑀥𑀺𑀬𑀦𑁆𑀢𑀺 𑀘 𑀲𑀤𑁆𑀥𑀸𑀬 𑀧𑀝𑀺𑀧𑀓𑁆𑀔𑀪𑀽𑀢𑀸 𑀅𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀅𑀥𑀺𑀫𑀼𑀘𑁆𑀘𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀤𑁆𑀥𑁂 𑀧𑀼𑀕𑁆𑀕𑀮𑁂𑀢𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂 𑀧𑀼𑀕𑁆𑀕𑀮𑁂. 𑀢𑁂 𑀳𑀺 𑀦𑀺𑀲𑁆𑀲𑀸𑀬 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀪𑀺𑀬𑁆𑀬𑁄𑀪𑀸𑀯𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀢𑀺. 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀽𑀢𑀺 𑀘 𑀩𑀼𑀤𑁆𑀥𑀸𑀤𑀻𑀦𑀺 𑀭𑀢𑀦𑀸𑀦𑀺 𑀓𑀫𑁆𑀫𑀓𑀫𑁆𑀫𑀨𑀮𑀸𑀦𑀺 𑀘. 𑀲𑁂𑀯𑀢𑁄𑀢𑀺 𑀮𑀩𑁆𑀪𑀫𑀸𑀦𑀁 𑀲𑀤𑁆𑀥𑀸𑀲𑀫𑁆𑀧𑀤𑀁 𑀉𑀧𑁆𑀧𑀸𑀤𑁂𑀢𑀼𑀁 𑀯𑀟𑁆𑀠𑁂𑀢𑀼𑀜𑁆𑀘 𑀦𑀺𑀲𑁂𑀯𑀢𑁄. 𑀲𑁂𑀲𑀧𑀤𑀸𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀅𑀣 𑀯𑀸 𑀲𑁂𑀯𑀢𑁄 𑀉𑀧𑀲𑀗𑁆𑀓𑀫𑀢𑁄. 𑀪𑀚𑀢𑁄 𑀢𑁂𑀲𑀁 𑀧𑀝𑀺𑀧𑀢𑁆𑀢𑀺𑀬𑀁 𑀪𑀢𑁆𑀢𑀺𑀁 𑀓𑀼𑀩𑁆𑀩𑀢𑁄. 𑀧𑀬𑀺𑀭𑀼𑀧𑀸𑀲𑀢𑁄𑀢𑀺 𑀢𑁂𑀲𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀓𑀭𑀡𑀯𑀲𑁂𑀦 𑀉𑀧𑀝𑁆𑀞𑀳𑀢𑁄. 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀸 𑀦𑀸𑀫 𑀩𑀼𑀤𑁆𑀥𑀸𑀤𑀺𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀸 𑀧𑀲𑀸𑀤𑀸𑀯𑀳𑀸 𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀸𑀤𑀬𑁄. 𑀢𑁂 𑀳𑀺 𑀧𑀘𑁆𑀘𑀯𑁂𑀓𑁆𑀔𑀢𑁄 𑀩𑀼𑀤𑁆𑀥𑀸𑀤𑀻𑀲𑀼 𑀅𑀦𑀼𑀧𑁆𑀧𑀦𑁆𑀦𑀸 𑀧𑀲𑀦𑁆𑀦𑀸 𑀉𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀪𑀺𑀬𑁆𑀬𑁄𑀪𑀸𑀯𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀢𑀺. 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀇𑀫𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑀢𑁄 𑀧𑀘𑁆𑀘𑁂𑀓𑀁 𑀲𑀽𑀧𑀳𑀸𑀭𑀢𑁄 𑀘 𑀆𑀲𑁂𑀯𑀦𑀁 𑀪𑀸𑀯𑀦𑀁 𑀮𑀪𑀦𑁆𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺 𑀫𑀕𑁆𑀕𑀨𑀮𑀸𑀯𑀳𑀪𑀸𑀯𑁂𑀦 𑀅𑀘𑁆𑀙𑀢𑀺 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀓𑀼𑀲𑀻𑀢𑁂𑀢𑀺 𑀅𑀮𑀲𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁂. 𑀆𑀭𑀤𑁆𑀥𑀯𑀻𑀭𑀺𑀬𑁂𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂. 𑀲𑀫𑁆𑀫𑀧𑁆𑀧𑀥𑀸𑀦𑁂𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁂 𑀘𑀢𑁆𑀢𑀸𑀭𑁄 𑀉𑀧𑀸𑀬𑀧𑁆𑀧𑀥𑀸𑀦𑁂. 𑀧𑀘𑁆𑀘𑀯𑁂𑀓𑁆𑀔𑀢𑁄 𑀧𑀝𑀺𑀧𑀢𑁆𑀢𑀺𑀁 𑀅𑀯𑁂𑀓𑁆𑀔𑀢𑁄. 𑀢𑁂 𑀳𑀺 𑀧𑀘𑁆𑀘𑀯𑁂𑀓𑁆𑀔𑀢𑁄 𑀮𑀻𑀦𑀁 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑁆𑀫𑀤𑁂𑀯 𑀆𑀭𑀫𑁆𑀪𑀥𑀸𑀢𑀼𑀆𑀤𑀺 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀯𑀺𑀥𑀺𑀦𑀸 𑀲𑀢𑀺𑀲𑀫𑁆𑀧𑀤𑀸𑀬 𑀉𑀧𑁆𑀧𑀸𑀤𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺. 𑀅𑀲𑀫𑀸𑀳𑀺𑀢𑁂 𑀪𑀦𑁆𑀢𑀫𑀺𑀕𑀪𑀦𑁆𑀢𑀕𑁄𑀡𑀲𑀧𑁆𑀧𑀝𑀺𑀪𑀸𑀕𑁂 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁂. 𑀲𑀫𑀸𑀳𑀺𑀢𑁂 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀦𑀸 𑀘 𑀲𑀫𑁆𑀫𑀤𑁂𑀯 𑀲𑀫𑀸𑀳𑀺𑀢𑀘𑀺𑀢𑁆𑀢𑁂. 𑀛𑀸𑀦𑀯𑀺𑀫𑁄𑀓𑁆𑀔𑁂𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀺𑀛𑀸𑀦𑀸𑀦𑀺 𑀧𑀞𑀫𑀸𑀤𑀺𑀯𑀺𑀫𑁄𑀓𑁆𑀔𑁂 𑀘. 𑀢𑁂𑀲𑀜𑁆𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸 𑀉𑀧𑀭𑀽𑀧𑀭𑀺 𑀅𑀘𑁆𑀘𑀦𑁆𑀢𑀫𑁂𑀯 𑀲𑀫𑀸𑀥𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀤𑀼𑀧𑁆𑀧𑀜𑁆𑀜𑁂𑀢𑀺 𑀦𑀺𑀧𑁆𑀧𑀜𑁆𑀜𑁂, 𑀅𑀭𑀺𑀬𑀥𑀫𑁆𑀫𑀲𑁆𑀲 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀲𑀯𑀦𑀲𑀫𑁆𑀫𑀲𑀦𑀸𑀪𑀸𑀯𑁂𑀦 𑀲𑀩𑁆𑀩𑀲𑁄 𑀧𑀜𑁆𑀜𑀸𑀭𑀳𑀺𑀢𑁂 𑀘. 𑀧𑀜𑁆𑀜𑀯𑀦𑁆𑀢𑁂𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘𑁂𑀯 𑀫𑀕𑁆𑀕𑀧𑀜𑁆𑀜𑀸𑀬 𑀘 𑀲𑀫𑀦𑁆𑀦𑀸𑀕𑀢𑁂. 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀦𑁆𑀢𑀺 𑀕𑀫𑁆𑀪𑀻𑀭𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑀁 𑀜𑀸𑀡𑀲𑁆𑀲 𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁, 𑀬𑀢𑁆𑀣 𑀯𑀸 𑀕𑀫𑁆𑀪𑀻𑀭𑀜𑀸𑀡𑀲𑁆𑀲 𑀘𑀭𑀺𑀬𑀁 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸 𑀲𑀫𑁆𑀫𑁄𑀳𑀁 𑀯𑀺𑀥𑀫𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀸𑀤𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺. 𑀲𑀼𑀢𑁆𑀢𑀦𑁆𑀢𑀓𑁆𑀔𑀦𑁆𑀥𑁂𑀢𑀺 𑀲𑀼𑀢𑁆𑀢𑀲𑀫𑀽𑀳𑁂.

𑀧𑀼𑀩𑁆𑀩𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀺𑀲𑀼𑀤𑁆𑀥𑀺𑀓𑀸𑀭𑀡𑀸𑀦𑀺, ‘‘𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸𑀦𑀻𑀢𑀺 𑀇𑀥 𑀲𑀤𑁆𑀥𑀸𑀤𑀺𑀓𑁂 𑀅𑀜𑁆𑀜𑁂 𑀘 𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄, ‘‘𑀅𑀧𑀭𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀤𑁆𑀥𑀸𑀤𑀻𑀦𑀁 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀢𑀸 𑀤𑀲𑁆𑀲𑀺𑀢𑀸 𑀏𑀯, 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀧𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀢𑀸𑀬 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 𑀯𑀺𑀧𑀲𑁆𑀲𑀦𑀸𑀪𑀸𑀯𑀢𑁄. 𑀢𑁂𑀦𑀸𑀳 𑁋 ‘‘𑀇𑀫𑁂 𑀧𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸’’𑀢𑀺. 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀬𑁄𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀲𑀻𑀮𑀲𑀁𑀯𑀭𑁄 𑀅𑀪𑀺𑀲𑀮𑁆𑀮𑁂𑀔𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀺𑀩𑁆𑀩𑁂𑀥𑀺𑀓𑀸 𑀧𑀜𑁆𑀜𑀸 𑀇𑀫𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 ‘‘𑀫𑁂𑀖𑀺𑀬𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬𑀁’’ (𑀉𑀤𑀸. 𑀅𑀝𑁆𑀞. 𑁩𑁧) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀲𑀢𑁆𑀢𑀮𑁄𑀓𑀁 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀯𑀺𑀲𑁂𑀲𑀢𑁄 𑀑𑀮𑁄𑀓𑁂𑀦𑁆𑀢𑀲𑁆𑀲.

𑁪𑁧𑁯. 𑀆𑀬𑀲𑁆𑀫𑀢𑁄 𑀭𑀸𑀳𑀼𑀮𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀓𑁆𑀓𑀢𑁆𑀢𑀸 𑀲𑀤𑁆𑀥𑀺𑀁 𑀧𑀝𑁆𑀞𑀧𑀺𑀢𑀧𑀢𑁆𑀣𑀦𑀸 𑀤𑁂𑀯𑀢𑀸 𑀉𑀤𑀺𑀓𑁆𑀔𑀫𑀸𑀦𑀸 𑀢𑀺𑀝𑁆𑀞𑀦𑁆𑀢𑀺, 𑁋 ‘‘𑀓𑀤𑀸 𑀦𑀼 𑀔𑁄 𑀉𑀢𑁆𑀢𑀭𑀺 𑀆𑀲𑀯𑀸𑀦𑀁 𑀔𑀬𑁂 𑀯𑀺𑀦𑁂𑀲𑁆𑀲𑀢𑀻’’𑀢𑀺. 𑀬𑀤𑀸 𑀧𑀦 𑀲𑀢𑁆𑀣𑀸 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁂𑀲𑀺, 𑀢𑀸𑀯𑀤𑁂𑀯 𑀲𑀫𑀸𑀦𑀚𑁆𑀛𑀸𑀲𑀬𑀢𑀸𑀬 𑀲𑀩𑁆𑀩𑀓𑀸𑀮𑀁 𑀢𑀗𑁆𑀔𑀡𑀁 𑀆𑀕𑀫𑁂𑀦𑁆𑀢𑀺𑀬𑁄 𑀢𑀸 𑀤𑁂𑀯𑀢𑀸𑀬𑁄 𑀢𑀁 𑀲𑀫𑀯𑀸𑀬𑀁 𑀤𑀺𑀲𑁆𑀯𑀸 𑀏𑀓𑀲𑁆𑀫𑀺𑀁 𑀅𑀦𑁆𑀥𑀯𑀦𑀲𑁆𑀫𑀺𑀁𑀬𑁂𑀯 𑀲𑀦𑁆𑀦𑀺𑀧𑀢𑀺𑀢𑀸. 𑀉𑀧𑀸𑀮𑀺𑀲𑁆𑀲 𑀕𑀳𑀧𑀢𑀺𑀦𑁄 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀼 𑀤𑀲𑁆𑀲𑀦𑀓𑀺𑀘𑁆𑀘𑁂𑀦 𑀧𑀯𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄𑀢𑀺 𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 (𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁩𑁦) 𑀧𑀞𑀫𑀫𑀕𑁆𑀕𑁄 ‘‘𑀥𑀫𑁆𑀫𑀘𑀓𑁆𑀔𑀼’’𑀦𑁆𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸, 𑀩𑁆𑀭𑀳𑁆𑀫𑀸𑀬𑀼𑀦𑁄 𑀧𑀦 𑀨𑀮𑀜𑀸𑀡𑀸𑀦𑀺 𑀳𑁂𑀝𑁆𑀞𑀺𑀫𑀸𑀦𑀺 𑀢𑀻𑀡𑀺 𑀲𑀸𑀢𑀺𑀲𑀬𑀸𑀦𑀻𑀢𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂(𑀫. 𑀦𑀺. 𑁨.𑁩𑁮𑁩 𑀆𑀤𑀬𑁄) 𑀢𑀻𑀡𑀺 𑀨𑀮𑀸𑀦𑀺 ‘‘𑀥𑀫𑁆𑀫𑀘𑀓𑁆𑀔𑀼’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀺. 𑀇𑀤𑀁 𑀧𑀦𑁂𑀢𑁆𑀣 𑀆𑀬𑀲𑁆𑀫𑀢𑁄 𑀭𑀸𑀳𑀼𑀮𑀲𑁆𑀲 𑀫𑀕𑁆𑀕𑀜𑀸𑀡𑀁 𑀨𑀮𑀜𑀸𑀡𑀜𑁆𑀘 𑀤𑀲𑁆𑀲𑀦𑀢𑁆𑀣𑁄 𑀲𑀸𑀢𑀺𑀲𑀬𑁄, 𑀢𑀸𑀳𑀺 𑀘 𑀤𑁂𑀯𑀢𑀸𑀳𑀺 𑀬𑀁 𑀜𑀸𑀡𑀁 𑀅𑀥𑀺𑀕𑀢𑀁, 𑀢𑀁 𑀲𑀸𑀢𑀺𑀲𑀬𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀨𑀮𑀸𑀦𑀺 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺. 𑀓𑀺𑀁 𑀧𑀦 𑀲𑀸𑀯𑀓𑀸𑀦𑀁 𑀲𑀘𑁆𑀘𑀸𑀪𑀺𑀲𑀫𑀬𑀜𑀸𑀡𑁂 𑀅𑀢𑁆𑀣𑀺 𑀓𑁄𑀘𑀺 𑀯𑀺𑀲𑁂𑀲𑁄𑀢𑀺? 𑀆𑀫 𑀅𑀢𑁆𑀣𑀺. 𑀲𑁄 𑀘 𑀔𑁄 𑀧𑀼𑀩𑁆𑀩𑀪𑀸𑀕𑁂 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀧𑀯𑀢𑁆𑀢𑀺𑀬𑀸𑀓𑀸𑀭𑀯𑀺𑀲𑁂𑀲𑁂𑀦 𑀮𑀪𑁂𑀬𑁆𑀬 𑀓𑀸𑀘𑀺 𑀯𑀺𑀲𑁂𑀲𑀫𑀢𑁆𑀢𑀸. 𑀲𑁆𑀯𑀸𑀬𑀫𑀢𑁆𑀣𑁄 𑀅𑀪𑀺𑀥𑀫𑁆𑀫𑁂 ‘‘𑀦𑁄 𑀘 𑀔𑁄 𑀬𑀣𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲𑀸’’𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀧𑀢𑀺 𑀯𑀺𑀲𑁂𑀲𑀓𑀺𑀢𑁆𑀢𑀦𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀓𑀺𑀁 𑀧𑀦 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀯𑀺𑀬 𑀢𑀸 𑀤𑁂𑀯𑀢𑀸 𑀲𑀩𑁆𑀩𑀸 𑀏𑀓𑀘𑀺𑀢𑁆𑀢𑀸 𑀧𑀕𑁂𑀯 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀅𑀥𑀺𑀕𑀡𑁆𑀳𑀺𑀁𑀲𑀽𑀢𑀺? 𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺𑀫𑀸𑀳. 𑀓𑀺𑀢𑁆𑀢𑀓𑀸 𑀧𑀦 𑀢𑀸 𑀤𑁂𑀯𑀢𑀸𑀢𑀺 𑀆𑀳 ‘‘𑀢𑀸𑀲𑀜𑁆𑀘 𑀧𑀦𑀸’’𑀢𑀺𑀆𑀤𑀺.

𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀙𑀙𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨𑁦. 𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀦𑁆𑀢𑀺 𑀆𑀤𑀺𑀓𑁄𑀝𑁆𑀞𑀸𑀲𑁂 𑀓𑀮𑁆𑀬𑀸𑀡𑀁 𑀏𑀢𑀲𑁆𑀲𑀸𑀢𑀺 𑀯𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀢𑀁 𑀆𑀤𑀺𑀓𑀮𑁆𑀬𑀸𑀡𑀁, 𑀆𑀤𑀺𑀓𑀮𑁆𑀬𑀸𑀡𑀪𑀸𑀯𑁄 𑀘 𑀤𑁄𑀲𑀯𑀺𑀕𑀫𑁂𑀦 𑀇𑀘𑁆𑀙𑀺𑀢𑀩𑁆𑀩𑁄. 𑀬𑀜𑁆𑀳𑀺 𑀲𑀩𑁆𑀩𑀲𑁄 𑀯𑀺𑀕𑀢𑀤𑁄𑀲𑀁, 𑀢𑀁 𑀧𑀭𑀺𑀧𑀼𑀡𑁆𑀡𑀕𑀼𑀡𑀫𑁂𑀯 𑀳𑁄𑀢𑀻𑀢𑀺 ‘‘𑀦𑀺𑀤𑁆𑀤𑁄𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀢𑁆𑀯𑀸𑀢𑀺 𑀘 𑀧𑀤𑀁, ‘‘𑀓𑀮𑁆𑀬𑀸𑀡𑀁 𑀓𑀢𑁆𑀯𑀸 𑀪𑀤𑁆𑀤𑀓𑀁 𑀓𑀢𑁆𑀯𑀸’’𑀢𑀺 𑀧𑀼𑀭𑀺𑀫𑀧𑀤𑀤𑁆𑀯𑀬𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀤𑁂𑀲𑀦𑀸𑀓𑀸𑀭𑁄 𑀳𑀺 𑀇𑀥 𑀓𑀮𑁆𑀬𑀸𑀡𑀲𑀤𑁆𑀤𑁂𑀦 𑀕𑀳𑀺𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀓𑀮𑁆𑀬𑀸𑀡𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀻’’𑀢𑀺, 𑀤𑀼𑀢𑀺𑀬𑁂 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀓𑀮𑁆𑀬𑀸𑀡𑀢𑀸 𑀫𑀼𑀔𑁆𑀬𑁂𑀦𑁂𑀯 𑀓𑀣𑀺𑀢𑀸 𑀇𑀢𑀭𑀲𑁆𑀲 𑀅𑀢𑁆𑀣𑀸𑀧𑀢𑁆𑀢𑀺𑀢𑁄. 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀜𑁆𑀘 𑀤𑁂𑀲𑀦𑀸𑀬 𑀣𑁄𑀫𑀦𑀸 𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀸𑀯𑀸𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀇𑀢𑀺 𑀪𑀕𑀯𑀸 𑀅𑀭𑀺𑀬𑀯𑀁𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀕𑁆𑀕𑀳𑀡𑀫𑁆𑀧𑀺 𑀤𑁂𑀲𑀦𑀸𑀬 𑀣𑁄𑀫𑀦𑀸 𑀏𑀯𑀸𑀢𑀺 ‘‘𑀦𑀯𑀳𑀺 𑀧𑀤𑁂𑀳𑀻’’𑀢𑀺 𑀯𑀼𑀢𑁆𑀢𑀁.

𑀯𑁂𑀤𑀦𑀸 𑀬𑀸𑀣𑀸𑀯𑀢𑁄 𑀚𑀸𑀦𑀦𑀁, 𑀢𑀜𑁆𑀘 𑀫𑀕𑁆𑀕𑀓𑀺𑀘𑁆𑀘𑀁, 𑀢𑀲𑁆𑀲 𑀉𑀧𑀸𑀬𑁄 𑀯𑀺𑀧𑀲𑁆𑀲𑀦𑀸𑀢𑀺𑀆𑀳 𑁋 ‘‘𑀲𑀳𑀯𑀺𑀧𑀲𑁆𑀲𑀦𑁂𑀦 𑀫𑀕𑁆𑀕𑁂𑀦 𑀚𑀸𑀦𑀺𑀢𑀩𑁆𑀩𑀸𑀦𑀻’’𑀢𑀺. 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀓𑀺𑀘𑁆𑀘𑁂𑀦 𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀲𑀫𑁆𑀫𑁄𑀳𑀢𑁄 𑀘 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄. 𑀢𑁂𑀪𑀽𑀫𑀓𑀘𑀺𑀢𑁆𑀢𑀫𑁂𑀯 𑀓𑀣𑀺𑀢𑀁 𑀲𑀫𑁆𑀫𑀲𑀦𑀝𑁆𑀞𑀸𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀲 𑀦𑀬𑁄 𑀥𑀫𑁆𑀫𑀸𑀬𑀢𑀦𑀸𑀤𑀻𑀲𑀼𑀧𑀺. 𑀥𑀫𑁆𑀫𑀸𑀬𑀢𑀦𑀲𑁆𑀲 𑀯𑀸 𑀆𑀬𑀢𑀦𑀪𑀸𑀯𑀢𑁄 𑀩𑀳𑀺𑀤𑁆𑀥𑀸𑀕𑀳𑀡𑀁, 𑀦 𑀲𑀩𑁆𑀩𑀲𑁄 𑀅𑀦𑀚𑁆𑀛𑀢𑁆𑀢𑀪𑀸𑀯𑀢𑁄. 𑀯𑀺𑀧𑀸𑀓𑀯𑁂𑀤𑀦𑀸𑀧𑀘𑁆𑀘𑀬𑀸 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀢𑀡𑁆𑀳𑀸𑀢𑀺 𑀙𑀢𑁆𑀢𑀺𑀁𑀲𑀯𑀺𑀧𑀸𑀓𑀯𑁂𑀤𑀦𑀁 𑀦𑀺𑀲𑁆𑀲𑀸𑀬 𑀏𑀯𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀅𑀦𑀼𑀪𑀯𑁂𑀬𑁆𑀬𑀦𑁆𑀢𑀺 𑀅𑀓𑀼𑀲𑀮𑀚𑀯𑀦𑀓𑁆𑀔𑀡𑀢𑁄 𑀉𑀧𑁆𑀧𑀦𑁆𑀦𑀢𑀡𑁆𑀳𑀸.

𑁪𑁨𑁨. 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀆𑀤𑀻𑀦𑀁 𑀅𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸𑀢𑀺 𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀢𑀡𑁆𑀳𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀤𑀲𑁆𑀲𑀦𑁂𑀦 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀭𑀽𑀧𑀸𑀬𑀢𑀦𑀸𑀤𑀻𑀦𑀜𑁆𑀘 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀤𑀻𑀧𑀺𑀢𑀸 𑀅𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑀸𑀪𑀸𑀯𑀢𑁄, 𑀬𑀜𑁆𑀘 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀁, 𑀢𑀁 𑀅𑀦𑀺𑀘𑁆𑀘𑀁 𑀉𑀧𑁆𑀧𑀸𑀤𑀲𑀫𑁆𑀪𑀯𑀢𑁄, 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸𑀢𑀺 𑀔𑀦𑁆𑀥𑀧𑀜𑁆𑀘𑀓𑁂 𑀘 𑀙𑀦𑁆𑀦𑀁 𑀙𑀓𑁆𑀓𑀸𑀦𑀁 𑀯𑀲𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑀓𑀭𑀡𑁂𑀦 𑀅𑀢𑁆𑀣𑀢𑁄 𑀅𑀦𑀢𑁆𑀢𑀮𑀓𑁆𑀔𑀡𑀁 𑀯𑀺𑀪𑀸𑀯𑀺𑀢𑀁. 𑀦 𑀲𑀭𑀽𑀧𑀢𑁄𑀢𑀺 𑀲𑀭𑀽𑀧𑀢𑁄𑀧𑀺 𑀢𑀁 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 𑀢𑁂𑀦𑁂𑀯 𑀙𑀙𑀓𑁆𑀓𑀸𑀦𑀁 𑀯𑀲𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑀦𑀬𑁂𑀦 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀅𑀦𑁆𑀯𑀬𑀢𑁄 𑀘 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑁋 ‘‘𑀘𑀓𑁆𑀔𑀼 𑀅𑀢𑁆𑀢𑀸𑀢𑀺 𑀬𑁄 𑀯𑀤𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀓𑀸𑀯 𑀤𑁂𑀲𑀦𑀸 𑀯𑀺𑀪𑀸𑀯𑀺𑀢𑀸. 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀸 𑀓𑀣𑀺𑀢𑀸𑀦𑀁 𑀳𑀻’’𑀢𑀺𑀆𑀤𑀺. 𑀳𑁂𑀝𑁆𑀞𑀸 𑀧𑀦 𑀙𑀦𑁆𑀦𑀁 𑀙𑀓𑁆𑀓𑀸𑀦𑀁 𑀯𑀲𑁂𑀦 𑀯𑀺𑀦𑀺𑀩𑁆𑀪𑁄𑀕𑀤𑀲𑁆𑀲𑀦𑀫𑀢𑁆𑀢𑀁, 𑀦 𑀅𑀦𑀢𑁆𑀢𑀮𑀓𑁆𑀔𑀡𑀁 𑀯𑀺𑀪𑀸𑀯𑀺𑀢𑀁, 𑀇𑀥 𑀧𑀦 𑀲𑀭𑀽𑀧𑀢𑁄 𑀅𑀦𑀢𑁆𑀢𑀮𑀓𑁆𑀔𑀡𑀁 𑀯𑀺𑀪𑀸𑀯𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀦𑀼𑀲𑀦𑁆𑀥𑀦𑁆𑀢𑀭𑀪𑀸𑀯𑀚𑁄𑀢𑀦𑀸. 𑀬𑀤𑀺𑀧𑀺 𑀅𑀦𑀢𑁆𑀢𑀪𑀸𑀯𑁄 𑀦𑀸𑀫 𑀘𑀢𑀽𑀲𑀼𑀧𑀺 𑀲𑀘𑁆𑀘𑁂𑀲𑀼 𑀮𑀩𑁆𑀪𑀢𑁂𑀯, 𑀲𑀩𑁆𑀩𑁂𑀧𑀺 𑀳𑀺 𑀥𑀫𑁆𑀫𑀸 𑀅𑀦𑀢𑁆𑀢𑀸, 𑀇𑀫𑁂 𑀧𑀦𑁂𑀢𑁆𑀣 𑀤𑁆𑀯𑁂𑀧𑀺 𑀦𑀬𑀸 𑀲𑀫𑁆𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀦𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺. 𑀦 𑀉𑀧𑀧𑀚𑁆𑀚𑀢𑀻𑀢𑀺 𑀉𑀧𑀧𑀢𑁆𑀢𑀺𑀲𑀗𑁆𑀔𑀸𑀢𑀬𑀼𑀢𑁆𑀢𑀺𑀬𑀸 𑀦 𑀲𑀫𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀦 𑀬𑀼𑀚𑁆𑀚𑀢𑀻’’𑀢𑀺. 𑀅𑀢𑁆𑀢𑀯𑀸𑀤𑀺𑀦𑀸 𑁋 ‘‘𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄’’𑀢𑀺 𑀅𑀪𑀺𑀫𑀢𑁄, 𑀘𑀓𑁆𑀔𑀼𑀜𑁆𑀘 𑀉𑀧𑁆𑀧𑀸𑀤𑀯𑀦𑁆𑀢𑀢𑀸𑀬 𑀅𑀦𑀺𑀘𑁆𑀘𑀁, 𑀬𑀁 𑀧𑀘𑁆𑀘𑀬𑀸𑀬𑀢𑁆𑀣𑀯𑀼𑀢𑁆𑀢𑀺𑀢𑀸, 𑀢𑀲𑁆𑀫𑀸 ‘‘𑀘𑀓𑁆𑀔𑀼 𑀅𑀢𑁆𑀢𑀸𑀢𑀺 𑀬𑁄 𑀯𑀤𑁂𑀬𑁆𑀬, 𑀢𑀁 𑀦 𑀉𑀧𑀧𑀚𑁆𑀚𑀢𑀻’’𑀢𑀺𑀆𑀤𑀺. 𑀲𑀓𑁆𑀓𑀸𑀬𑀯𑀢𑁆𑀣𑀼 𑀘𑀓𑁆𑀔𑀼 𑀅𑀦𑀢𑁆𑀢𑀸 𑀅𑀦𑀺𑀘𑁆𑀘𑀪𑀸𑀯𑀢𑁄 𑀲𑁂𑀬𑁆𑀬𑀣𑀸𑀧𑀺 𑀖𑀝𑁄, 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀪𑀸𑀯𑀢𑁄 𑀲𑁂𑀬𑁆𑀬𑀣𑀸𑀧𑀺 𑀖𑀝𑁄, 𑀘𑀓𑁆𑀔𑀼 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺 𑀉𑀧𑁆𑀧𑀸𑀤𑀸𑀤𑀺𑀲𑀫𑁆𑀪𑀯𑀢𑁄 𑀲𑁂𑀬𑁆𑀬𑀣𑀸𑀧𑀺 𑀖𑀝𑁄. 𑀯𑀺𑀕𑀘𑁆𑀙𑀢𑀻𑀢𑀺 𑀪𑀗𑁆𑀕𑀼𑀧𑁆𑀧𑀢𑁆𑀢𑀺𑀬𑀸 𑀲𑀪𑀸𑀯𑀸𑀯𑀺𑀕𑀫𑁂𑀦 𑀯𑀺𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀦𑀺𑀭𑀼𑀚𑁆𑀛𑀢𑀻’’𑀢𑀺.

𑁪𑁨𑁪. 𑀬𑀲𑁆𑀫𑀸 𑀓𑀺𑀮𑁂𑀲𑀯𑀝𑁆𑀝𑀫𑀽𑀮𑀓𑀁 𑀓𑀫𑁆𑀫𑀯𑀝𑁆𑀝𑀁, 𑀓𑀫𑁆𑀫𑀯𑀝𑁆𑀝𑀫𑀽𑀮𑀓𑀜𑁆𑀘 𑀯𑀺𑀧𑀸𑀓𑀯𑀝𑁆𑀝𑀁. 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺 𑀘 𑀢𑀡𑁆𑀳𑀸𑀤𑀺𑀕𑁆𑀕𑀸𑀳𑀧𑀼𑀩𑁆𑀩𑀺𑀓𑀸, 𑀢𑀲𑁆𑀫𑀸 ‘‘𑀢𑀺𑀡𑁆𑀡𑀁 𑀯𑀸 𑀕𑀸𑀳𑀸𑀦𑀁 𑀯𑀲𑁂𑀦 𑀯𑀝𑁆𑀝𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀆𑀳. 𑀬𑀲𑁆𑀫𑀸 𑀧𑀦 𑀢𑀡𑁆𑀳𑀸𑀧𑀓𑁆𑀔𑀺𑀓𑀸 𑀥𑀫𑁆𑀫𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀘𑀓𑁆𑀔𑀸𑀤𑀬𑁄 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀯𑀲𑁂𑀦 𑀯𑀝𑁆𑀝𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺. 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑀸𑀯 𑀯𑁂𑀤𑀺𑀢𑀩𑁆𑀩𑀸 𑀲𑀓𑁆𑀓𑀸𑀬𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀕𑀳𑀡𑀫𑁂𑀯𑁂𑀢𑁆𑀣 𑀅𑀦𑀼𑀧𑀲𑁆𑀲𑀦𑀸𑀢𑀺 𑀆𑀳 𑁋 ‘‘𑀕𑀸𑀳𑀢𑁆𑀢𑀬𑀯𑀲𑁂𑀦 𑀧𑀲𑁆𑀲𑀢𑀻’’𑀢𑀺.

𑀢𑀺𑀡𑁆𑀡𑀁 𑀕𑀸𑀳𑀸𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀤𑀺𑀕𑁆𑀕𑀸𑀳𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀁 𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦, 𑀢𑀸𑀳𑀺 𑀯𑀸 𑀢𑀺𑀡𑁆𑀡𑀁 𑀕𑀸𑀳𑀸𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀺𑀦𑀺𑀯𑁂𑀞𑀦𑀯𑀲𑁂𑀦 𑀅𑀦𑀼𑀧𑁆𑀧𑀸𑀤𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀏𑀢𑁆𑀣 𑀦𑀺𑀭𑁄𑀥𑀥𑀫𑁆𑀫𑁄 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑁄𑀢𑀺 𑀆𑀳 𑁋 ‘‘𑀦𑀺𑀭𑁄𑀥𑁄…𑀧𑁂… 𑀤𑀲𑁆𑀲𑁂𑀢𑀼’’𑀦𑁆𑀢𑀺. 𑀧𑀝𑀺𑀲𑁂𑀥𑀯𑀘𑀦𑀸𑀦𑀻𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀸𑀦𑀺.

𑁪𑁨𑁫. 𑀢𑀡𑁆𑀳𑀸𑀤𑀻𑀦𑀁 𑀅𑀦𑀼𑀧𑀸𑀤𑀺𑀬𑀦𑀯𑀘𑀦𑀸𑀦𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑁂𑀯 𑀯𑀼𑀢𑁆𑀢𑀸𑀦𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀁𑀬𑁂𑀯 𑀅𑀪𑀺𑀦𑀦𑁆𑀤𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀅𑀧𑁆𑀧𑀳𑀻𑀦𑀢𑁆𑀣𑁄 𑀅𑀦𑀼𑀲𑀬𑀢𑁆𑀣𑁄𑀢𑀺 𑀆𑀳 𑁋 ‘‘𑀅𑀦𑀼𑀲𑁂𑀢𑀻𑀢𑀺 𑀅𑀧𑁆𑀧𑀳𑀻𑀦𑁄 𑀳𑁄𑀢𑀻’’𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀳𑀺 𑀅𑀧𑁆𑀧𑀳𑀻𑀦𑁄 𑀣𑀸𑀫𑀕𑀢𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑁄 𑀅𑀦𑀼𑀲𑀬𑁄 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀪𑀸𑀯𑀢𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀯𑀝𑁆𑀝𑀤𑀼𑀓𑁆𑀔𑀓𑀺𑀮𑁂𑀲𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀘𑁂𑀯 𑀓𑀺𑀮𑁂𑀲𑀤𑀼𑀓𑁆𑀔𑀲𑁆𑀲 𑀘. 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀜𑁆𑀳𑀺 𑀓𑀺𑀮𑁂𑀲𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀭𑀡𑀁, 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀯𑀝𑁆𑀝𑀤𑀼𑀓𑁆𑀔𑀲𑁆𑀲.

𑁪𑁨𑁬. 𑀢𑁂𑀲𑀦𑁆𑀢𑀺 𑀅𑀦𑀼𑀲𑀬𑀸𑀦𑀁. 𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸𑀢𑀺 𑀧𑀚𑀳𑀦𑀯𑀲𑁂𑀦, 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀁 𑀧𑀚𑀳𑀺𑀢𑁆𑀯𑀸𑀢𑀺 𑀅𑀦𑀯𑀲𑁂𑀲𑀢𑁄 𑀅𑀯𑀺𑀚𑁆𑀚𑀁 𑀅𑀧𑁆𑀧𑀯𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀢𑁆𑀯𑀸. 𑀓𑀸𑀫𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀜𑀸𑀡𑀫𑁆𑀧𑀺 𑀅𑀯𑀺𑀚𑁆𑀚𑀸𑀧𑀳𑀸𑀬𑀺𑀦𑀻 𑀯𑀺𑀚𑁆𑀚𑀸 𑀏𑀯, 𑀢𑀁 𑀧𑀦 𑀜𑀸𑀡𑀁 𑀅𑀯𑀺𑀚𑁆𑀚𑀸𑀬 𑀅𑀦𑀯𑀲𑁂𑀲𑀧𑁆𑀧𑀳𑀸𑀬𑀓𑀁 𑀦 𑀳𑁄𑀢𑀺, 𑀅𑀕𑁆𑀕𑀫𑀕𑁆𑀕𑀜𑀸𑀡𑁂 𑀧𑀦 𑀉𑀧𑁆𑀧𑀦𑁆𑀦𑁂 𑀅𑀯𑀺𑀚𑁆𑀚𑀸𑀬 𑀮𑁂𑀲𑁄𑀧𑀺 𑀦𑀸𑀯𑀲𑀺𑀲𑁆𑀲𑀢𑀻𑀢𑀺 𑀢𑀤𑁂𑀯 𑀅𑀯𑀺𑀚𑁆𑀚𑀸𑀬 𑀧𑀳𑀸𑀬𑀓𑀦𑁆𑀢𑀺 𑀆𑀳 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺.

𑁪𑁨𑁭. 𑀲𑀬𑀫𑁂𑀯 𑀢𑀣𑀸𑀕𑀢𑁂 𑀅𑀢𑁆𑀢𑀦𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀤𑁂𑀲𑁂𑀦𑁆𑀢𑁂 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀢𑀺 𑀅𑀦𑀘𑁆𑀙𑀭𑀺𑀬𑀫𑁂𑀢𑀁, 𑀅𑀣 𑀓𑀺𑀁 𑀅𑀘𑁆𑀙𑀭𑀺𑀬𑀦𑁆𑀢𑀺 𑀆𑀳 ‘‘𑀇𑀫’’𑀦𑁆𑀢𑀺𑀆𑀤𑀺. 𑀓𑀣𑁂𑀦𑁆𑀢𑁂𑀧𑀻𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀇𑀫𑀺𑀦𑀸𑀯 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀢𑁆𑀢𑀸 𑀏𑀯𑀸𑀢𑀺 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀏𑀯𑀸𑀢𑀺 𑀬𑁄𑀚𑀦𑀸. 𑀏𑀢𑀫𑁆𑀧𑀺 𑀅𑀦𑀘𑁆𑀙𑀭𑀺𑀬𑀁, 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀲𑀸𑀯𑀓𑀸 𑀲𑀫𑀼𑀤𑀸𑀕𑀫𑀸 𑀫𑀳𑀸𑀪𑀺𑀜𑁆𑀜𑀸 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸 𑀢𑀣𑀸 𑀢𑀣𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺. 𑀢𑁂𑀦𑀸𑀳 𑁋 ‘‘𑀫𑀳𑀸𑀪𑀺𑀜𑁆𑀜𑀧𑁆𑀧𑀢𑁆𑀢𑀸 𑀳𑀺 𑀢𑁂 𑀲𑀸𑀯𑀓𑀸’’𑀢𑀺.

𑀫𑀳𑀸𑀫𑀡𑁆𑀟𑀧𑁂𑀢𑀺 𑀮𑁄𑀳𑀧𑀸𑀲𑀸𑀤𑀲𑁆𑀲 𑀧𑀼𑀭𑀢𑁄 𑀏𑀯 𑀫𑀳𑀸𑀪𑀺𑀓𑁆𑀔𑀼𑀲𑀦𑁆𑀦𑀺𑀧𑀸𑀢𑁄 𑀚𑀸𑀢𑁄𑀢𑀺 𑀢𑁂𑀲𑀁 𑀧𑀳𑁄𑀦𑀓𑀯𑀲𑁂𑀦 𑀓𑀢𑁂 𑀫𑀳𑀢𑀺 𑀲𑀸𑀡𑀺𑀫𑀡𑁆𑀟𑀧𑁂𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀼𑀧𑀺 𑀞𑀸𑀦𑁂𑀲𑀽𑀢𑀺 𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑀫𑀳𑀸𑀫𑀡𑁆𑀟𑀧𑀸𑀤𑀻𑀲𑀼 𑀞𑀸𑀦𑁂𑀲𑀼. 𑀫𑀳𑀸𑀣𑁂𑀭𑁄 𑀅𑀢𑁆𑀣𑀻𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀤𑁂𑀯𑀢𑁆𑀣𑁂𑀭𑀲𑁆𑀲 𑀕𑀼𑀡𑁂 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀫𑀳𑀸𑀣𑁂𑀭𑁄, 𑀢𑀣𑀸𑀧𑀺 𑀯𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀻𑀤𑀺𑀢𑁆𑀯𑀸 ‘‘𑀢𑁆𑀯𑀁 𑀧𑀦 𑀦𑁆𑀳𑀸𑀧𑁂𑀳𑀻’’𑀢𑀺 𑀆𑀳.

𑀳𑁂𑀝𑁆𑀞𑀸𑀧𑀸𑀲𑀸𑀤𑁂𑀢𑀺 𑀘 𑀓𑀮𑁆𑀬𑀸𑀡𑀺𑀬𑀫𑀳𑀸𑀯𑀺𑀳𑀸𑀭𑁂 𑀉𑀧𑁄𑀲𑀣𑀸𑀕𑀸𑀭𑁂 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀏𑀓𑀤𑀸 𑀉𑀧𑀭𑀺𑀧𑀸𑀲𑀸𑀤𑁂 𑀏𑀓𑀤𑀸, 𑀓𑀣𑁂𑀲𑀻𑀢𑀺. 𑀘𑀽𑀴𑀦𑀸𑀕𑀲𑁆𑀲 𑀢𑀣𑀸 𑀫𑀳𑀢𑀻 𑀧𑀭𑀺𑀲𑀸 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀅𑀪𑀺𑀜𑁆𑀜𑀸𑀧𑀸𑀤𑀦𑀁 𑀅𑀳𑁄𑀲𑀻𑀢𑀺 𑀓𑁂𑀘𑀺. 𑀣𑁂𑀭𑁄 𑀧𑀦 𑀫𑀳𑀺𑀤𑁆𑀥𑀺𑀓𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀢𑀸𑀯 𑀫𑀳𑀢𑀺𑀁 𑀧𑀭𑀺𑀲𑀁 𑀅𑀪𑀺𑀜𑁆𑀜𑀸𑀧𑁂𑀲𑀻𑀢𑀺 𑀅𑀧𑀭𑁂.

𑀢𑀢𑁄 𑀢𑀢𑁄𑀢𑀺 𑀢𑀲𑁆𑀲𑀁 𑀢𑀲𑁆𑀲𑀁 𑀤𑀺𑀲𑀸𑀬𑀁. 𑀏𑀓𑁄𑀯𑀸𑀢𑀺 𑀏𑀓𑀘𑁆𑀘𑁄 𑀏𑀯, 𑀦 𑀩𑀳𑀼𑀲𑁄, 𑀓𑀢𑀺𑀧𑀬𑀸𑀯 𑀧𑀼𑀣𑀼𑀚𑁆𑀚𑀦𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀙𑀙𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁭. 𑀫𑀳𑀸𑀲𑀴𑀸𑀬𑀢𑀦𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨𑁮. 𑀫𑀳𑀦𑁆𑀢𑀸𑀦𑀺 𑀲𑀴𑀸𑀬𑀢𑀦𑀸𑀦𑀺 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀢𑁆𑀢𑀸 𑀫𑀳𑀸𑀲𑀴𑀸𑀬𑀢𑀦𑀺𑀓𑀁, 𑀫𑀳𑀦𑁆𑀢𑀢𑀸 𑀘 𑀢𑁂𑀲𑀁 𑀫𑀳𑀦𑁆𑀢𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑀁 𑀅𑀪𑀺𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀢𑁆𑀢𑀸 𑀅𑀬𑁄𑀦𑀺𑀲𑁄 𑀕𑀬𑁆𑀳𑀫𑀸𑀦𑀸𑀦𑀁 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀢𑁄, 𑀬𑁄𑀦𑀺𑀲𑁄 𑀕𑀬𑁆𑀳𑀫𑀸𑀦𑀸𑀦𑀁 𑀫𑀳𑀢𑁄 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑀢𑁄 𑀘 𑀤𑀝𑁆𑀞𑀩𑁆𑀩𑀸. 𑀚𑁄𑀢𑀓𑀦𑁆𑀢𑀺 𑀩𑁄𑀥𑀓𑀁.

𑁪𑁨𑁯. 𑀲𑀺𑀔𑀸𑀧𑁆𑀧𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀚𑀸𑀦𑀦𑀫𑁆𑀧𑀺 𑀬𑀣𑀸𑀪𑀽𑀢𑀚𑀸𑀦𑀦𑀫𑁂𑀯 𑀫𑀕𑁆𑀕𑁂𑀦 𑀚𑀸𑀦𑀦𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀪𑀸𑀯𑀢𑁄𑀢𑀺 𑀆𑀳 𑁋 ‘‘𑀲𑀳𑀯𑀺𑀧𑀲𑁆𑀲𑀦𑁂𑀦 𑀫𑀕𑁆𑀕𑁂𑀦 𑀅𑀚𑀸𑀦𑀦𑁆𑀢𑁄’’𑀢𑀺. 𑀯𑀼𑀟𑁆𑀠𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀧𑀘𑁆𑀘𑀬𑀲𑀫𑁄𑀥𑀸𑀦𑁂𑀦 𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀧𑀸𑀴𑀺𑀬𑀸 𑀅𑀧𑀭𑀸𑀧𑀭𑀁 𑀧𑀭𑀺𑀯𑀼𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁𑀪𑀽𑀢𑀸 𑀧𑀕𑀼𑀡𑀪𑀸𑀯𑀫𑀸𑀧𑀸𑀤𑀺𑀢𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀸 𑀯𑀺𑀬 𑀲𑀼𑀝𑁆𑀞𑀼𑀢𑀭𑀁 𑀯𑀲𑀻𑀪𑀸𑀯𑀁 𑀧𑀸𑀧𑀺𑀢𑀸 𑀛𑀸𑀦𑀸𑀪𑀺𑀜𑁆𑀜𑀸 𑀯𑀺𑀬 𑀘 𑀯𑀲𑀻𑀪𑀽𑀢𑀸 𑀳𑀼𑀢𑁆𑀯𑀸 𑀉𑀧𑀭𑀽𑀧𑀭𑀺 𑀩𑁆𑀭𑀽𑀳𑁂𑀦𑁆𑀢𑀻𑀢𑀺 𑀆𑀳 𑁋 ‘‘𑀯𑀲𑀻𑀪𑀸𑀯𑀁 𑀕𑀘𑁆𑀙𑀦𑁆𑀢𑀻’’𑀢𑀺. 𑀢𑀣𑀸 𑀳𑀺 𑀢𑁂 𑀓𑀤𑀸𑀘𑀺 𑀪𑀯𑀧𑀢𑁆𑀣𑀦𑀸𑀬 𑀅𑀦𑀼𑀧𑁆𑀧𑀸𑀤𑀺𑀢𑀸𑀬𑀧𑀺 𑀅𑀧𑁆𑀧𑀳𑀻𑀦𑀪𑀸𑀯𑁂𑀦𑁂𑀯𑀲𑁆𑀲𑀸 𑀢𑀺𑀝𑁆𑀞𑀦𑁆𑀢𑀺. 𑀅𑀓𑀼𑀲𑀮𑀸 𑀥𑀫𑁆𑀫𑀸𑀯 𑀬𑁂𑀪𑀼𑀬𑁆𑀬𑁂𑀦 𑀤𑀲𑁆𑀲𑀦𑀸𑀬𑀢𑀦𑁂𑀦 𑀯𑀺𑀦𑀸𑀲𑀤𑀲𑁆𑀲𑀦𑀢𑁄 𑀧𑀯𑀢𑁆𑀢𑀦𑁆𑀢𑀺 𑀧𑀭𑀺𑀯𑀟𑁆𑀠𑀦𑁆𑀢𑀺 𑀘. 𑀧𑀜𑁆𑀘𑀤𑁆𑀯𑀸𑀭𑀺𑀓𑀤𑀭𑀣𑀸𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀲𑀳𑀕𑀢𑀸 𑀅𑀓𑀼𑀲𑀮𑀤𑀭𑀣𑀸. 𑀏𑀯𑀁 𑀫𑀦𑁄𑀤𑁆𑀯𑀸𑀭𑀺𑀓𑀤𑀭𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀦𑁆𑀢𑀸𑀧𑀸𑀢𑀺 𑀤𑀭𑀣𑁂𑀳𑀺 𑀩𑀮𑀯𑀦𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀦𑀺𑀲𑁆𑀲𑀬𑀲𑁆𑀲 𑀘 𑀲𑀦𑁆𑀢𑀸𑀧𑀦𑀓𑀭𑀸. 𑀧𑀭𑀺𑀴𑀸𑀳𑀸𑀢𑀺 𑀢𑀢𑁄𑀧𑀺 𑀩𑀮𑀯𑀢𑀭𑀸 𑀢𑁂𑀲𑀁𑀬𑁂𑀯 𑀧𑀭𑀺𑀤𑀳𑀦𑀓𑀭𑀸.

𑁪𑁩𑁦. 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀼𑀔𑀁, 𑀦 𑀓𑀸𑀬𑀧𑁆𑀧𑀲𑀸𑀤𑀲𑀦𑁆𑀦𑀺𑀲𑁆𑀲𑀺𑀢𑀲𑀼𑀔𑀫𑁂𑀯. 𑀫𑀦𑁄𑀤𑁆𑀯𑀸𑀭𑀺𑀓𑀲𑀼𑀔𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀲𑀼𑀔𑀁, 𑀦 𑀬𑀁 𑀓𑀺𑀜𑁆𑀘𑀺 𑀘𑁂𑀢𑀲𑀺𑀓𑀲𑀼𑀔𑀁 𑀢𑀲𑁆𑀲 𑀓𑀸𑀬𑀺𑀓𑀲𑀼𑀔𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸. 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑁂𑀦 𑀲𑀫𑀸𑀧𑀚𑁆𑀚𑀦𑀁 𑀯𑀸 𑀯𑀼𑀝𑁆𑀞𑀸𑀦𑀁 𑀯𑀸 𑀦𑀢𑁆𑀣𑀻𑀢𑀺 𑀇𑀤𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑁂𑀦 𑀢𑀲𑁆𑀲 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁, 𑀫𑀕𑁆𑀕𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀧𑀦 𑀢𑀧𑁆𑀧𑀲𑀗𑁆𑀕𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁. 𑀯𑀺𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁆𑀧𑀺 𑀚𑀦𑁂𑀢𑀼𑀁 𑀅𑀲𑀫𑀢𑁆𑀣𑀁 𑀲𑀫𑀸𑀧𑀚𑁆𑀚𑀦𑀲𑁆𑀲 𑀓𑀣𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀩𑀼𑀤𑁆𑀥𑀸𑀦𑀁 𑀧𑀦 𑀪𑀕𑀯𑀦𑁆𑀢𑀸𑀦𑀁 𑀳𑁄𑀢𑀻𑀢𑀺 𑀘𑁂? 𑀢𑀣𑀸𑀧𑀺 𑀢𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑁄 𑀏𑀯 𑀢𑀸𑀤𑀺𑀲𑀲𑁆𑀲 𑀧𑀼𑀩𑁆𑀩𑀸𑀪𑁄𑀕𑀲𑁆𑀲 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀲𑀫𑁆𑀪𑀯𑀢𑁄. 𑀏𑀢𑁂𑀦𑁂𑀯 𑀬𑀸 𑀓𑁂𑀲𑀜𑁆𑀘𑀺 𑀅𑀭𑀺𑀬𑀥𑀫𑁆𑀫𑁂 𑀅𑀓𑁄𑀯𑀺𑀤𑀸𑀦𑀁 𑀖𑀝𑀲𑀪𑀸𑀯𑀸𑀤𑀻𑀲𑀼 𑀩𑀼𑀤𑁆𑀥𑀺𑀢𑀼𑀮𑁆𑀬𑀓𑀸𑀭𑀺𑀢𑀸𑀧𑀢𑁆𑀢𑀺𑀘𑁄𑀤𑀦𑀸; 𑀲𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸 𑀢𑀁𑀢𑀁𑀧𑀼𑀭𑀺𑀫𑀸𑀪𑁄𑀕𑀯𑀲𑁂𑀦 𑀢𑁂𑀦 𑀢𑁂𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀸𑀪𑀺𑀦𑀺𑀬𑀢𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀧𑀭𑀢𑁄 𑀧𑀯𑀢𑁆𑀢𑀫𑀸𑀦𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀺𑀲𑁂𑀲𑀲𑁆𑀲 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀢𑁄. 𑀉𑀧𑁆𑀧𑀦𑁆𑀦𑀫𑀢𑁆𑀢𑀓𑀫𑁂𑀯 𑀳𑁄𑀢𑀻𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀁 𑀢𑀸𑀤𑀺𑀲𑀁 𑀓𑀺𑀜𑁆𑀘𑀺 𑀅𑀢𑁆𑀣𑀦𑀺𑀘𑁆𑀙𑀬𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑁂𑀯𑀮𑀁 𑀉𑀧𑁆𑀧𑀦𑁆𑀦𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀅𑀬𑀦𑁆𑀢𑀺 ‘‘𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀺𑀦𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸.

𑁪𑁩𑁧. 𑀓𑀼𑀲𑀮𑀘𑀺𑀢𑁆𑀢…𑀧𑁂… 𑀪𑀽𑀢𑀲𑁆𑀲𑀸𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑁄𑀲𑀼𑀔𑀲𑀫𑀗𑁆𑀕𑀻𑀪𑀽𑀢𑀲𑁆𑀲. 𑀧𑀼𑀩𑁆𑀩𑀲𑀼𑀤𑁆𑀥𑀺𑀓𑀸𑀢𑀺 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀢𑁄, 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑀢𑁄𑀧𑀺 𑀯𑀸 𑀧𑀼𑀩𑁆𑀩𑁂𑀯 𑀲𑀼𑀤𑁆𑀥𑀸. 𑀢𑁂𑀦𑀸𑀳 𑁋 ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀲𑀼𑀤𑁆𑀥𑀸𑀯 𑀳𑁄𑀦𑁆𑀢𑀻’’𑀢𑀺. 𑀲𑀩𑁆𑀩𑀢𑁆𑀣𑀓𑀓𑀸𑀭𑀸𑀧𑀓𑀗𑁆𑀕𑀸𑀦𑀻𑀢𑀺 𑀲𑀻𑀮𑀯𑀺𑀲𑁄𑀥𑀦𑀲𑁆𑀲 𑀘𑀺𑀢𑁆𑀢𑀲𑀫𑀸𑀥𑀸𑀦𑀲𑁆𑀲 𑀯𑀺𑀧𑀲𑁆𑀲𑀦𑀸𑀪𑀺𑀬𑁄𑀕𑀲𑁆𑀲 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑀧𑀳𑀸𑀦𑀲𑁆𑀲𑀸𑀢𑀺 𑀲𑀩𑁆𑀩𑀲𑁆𑀲𑀧𑀺 𑀫𑀕𑁆𑀕𑀲𑀫𑁆𑀪𑀸𑀭𑀓𑀺𑀘𑁆𑀘𑀲𑁆𑀲 𑀓𑀸𑀭𑀸𑀧𑀓𑀗𑁆𑀕𑀸𑀦𑀺. 𑀅𑀝𑁆𑀞𑀗𑁆𑀕𑀺𑀓𑁄 𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑁄 𑀯𑀸 𑀅𑀝𑁆𑀞𑀗𑁆𑀕𑀺𑀓𑁄, 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁄 𑀯𑀸 𑀲𑀢𑁆𑀢𑀗𑁆𑀕𑀺𑀓𑁄 𑀳𑁄𑀢𑀺.

𑀇𑀫𑀫𑁂𑀯 𑀲𑀼𑀢𑁆𑀢𑀧𑀤𑁂𑀲𑀁 𑀕𑀳𑁂𑀢𑁆𑀯𑀸𑀢𑀺, ‘‘𑀬𑀸 𑀢𑀣𑀸𑀪𑀽𑀢𑀲𑁆𑀲 𑀤𑀺𑀝𑁆𑀞𑀻’’𑀢𑀺𑀆𑀤𑀺𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁𑀬𑁂𑀯 𑀢𑀲𑁆𑀫𑀺𑀁 𑀞𑀸𑀦𑁂 𑀕𑀳𑀺𑀢𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀧𑀜𑁆𑀘𑀗𑁆𑀕𑀺𑀓𑁄𑀢𑀺 𑀯𑀤𑀢𑀺. 𑀲𑁄𑀢𑀺 𑀢𑀣𑀸 𑀯𑀤𑀦𑁆𑀢𑁄 𑀯𑀺𑀢𑀡𑁆𑀟𑀯𑀸𑀤𑀻. 𑀅𑀦𑀦𑁆𑀢𑀭𑀯𑀘𑀦𑁂𑀦𑁂𑀯𑀸𑀢𑀺, ‘‘𑀬𑀸 𑀢𑀣𑀸𑀪𑀽𑀢𑀲𑁆𑀲 𑀤𑀺𑀝𑁆𑀞𑀻’’𑀢𑀺𑀆𑀤𑀺𑀯𑀘𑀦𑀲𑁆𑀲, ‘‘𑀏𑀯𑀫𑀲𑁆𑀲𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀦𑁆𑀢𑀭𑀯𑀘𑀦𑁂𑀦. 𑀧𑀝𑀺𑀲𑁂𑀥𑀺𑀢𑀩𑁆𑀩𑁄𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑁄. ‘‘𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 𑀳𑀺 𑀇𑀤𑀁 𑀯𑀘𑀦𑀁 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀪𑀸𑀯𑀁 𑀉𑀚𑀼𑀓𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀤𑀺 𑀏𑀯𑀁 ‘‘𑀬𑀸 𑀢𑀣𑀸𑀪𑀽𑀢𑀲𑁆𑀲 𑀤𑀺𑀝𑁆𑀞𑀻’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀏𑀯 𑀅𑀗𑁆𑀕𑀸𑀦𑀁 𑀕𑀳𑀡𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀉𑀢𑁆𑀢𑀭𑀺 𑀘𑀸’’𑀢𑀺𑀆𑀤𑀺. 𑀲𑀫𑁆𑀫𑀸𑀯𑀸𑀘𑀁 𑀪𑀸𑀯𑁂𑀢𑀺 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀻. 𑀢𑁂𑀦𑀸𑀳 ‘‘𑀫𑀺𑀘𑁆𑀙𑀸𑀯𑀸𑀘𑀁 𑀧𑀚𑀳𑀢𑀻’’𑀢𑀺. 𑀬𑀲𑁆𑀫𑀺𑀜𑁆𑀳𑀺 𑀔𑀡𑁂 𑀲𑀫𑁆𑀫𑀸𑀯𑀸𑀘𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀫𑀺𑀘𑁆𑀙𑀸𑀯𑀸𑀘𑀸 𑀧𑀚𑀳𑀻𑀬𑀢𑀻𑀢𑀺. 𑀲𑀳𑁂𑀯 𑀯𑀺𑀭𑀢𑀺𑀬𑀸 𑀧𑀽𑀭𑁂𑀦𑁆𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺𑀬𑀸 𑀯𑀺𑀦𑀸 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀤𑀻𑀦𑀁 𑀅𑀲𑀫𑁆𑀪𑀯𑀢𑁄. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀲𑀼𑀤𑁆𑀥𑀸𑀦𑁂𑀯 𑀯𑀝𑁆𑀝𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲𑁂𑀯 𑀪𑀸𑀯𑀦𑀸𑀬 𑀇𑀚𑁆𑀛𑀦𑀢𑁄. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀕𑀦𑁆𑀣𑀦𑁆𑀢𑀭𑁂𑀦𑀧𑀺 𑀲𑀫𑀢𑁆𑀣𑁂𑀢𑀼𑀁, ‘‘𑀲𑀼𑀪𑀤𑁆𑀤𑀲𑀼𑀢𑁆𑀢𑁂𑀧𑀺 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀲𑀢𑁂𑀲𑀼 𑀅𑀝𑁆𑀞𑀗𑁆𑀕𑀺𑀓𑁄𑀯 𑀫𑀕𑁆𑀕𑁄 𑀆𑀕𑀢𑁄, 𑀦 𑀧𑀜𑁆𑀘𑀗𑁆𑀕𑀺𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀫𑁆𑀫𑀸𑀲𑀢𑀺 𑀫𑀕𑁆𑀕𑀓𑁆𑀔𑀡𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀘𑀢𑀼𑀓𑀺𑀘𑁆𑀘𑀲𑀸𑀥𑀺𑀓𑀸 𑀳𑁄𑀢𑀻𑀢𑀺 𑀢𑀁 𑀘𑀢𑀼𑀩𑁆𑀩𑀺𑀥𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄, ‘‘𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀯 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀆𑀳. 𑀦 𑀘𑀢𑀼𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀢𑀸𑀯𑀲𑁂𑀦. 𑀏𑀲 𑀦𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀻𑀲𑀼𑀧𑀺. 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀫𑀸𑀦𑀸 𑀬𑀼𑀕𑀦𑀤𑁆𑀥𑀸 𑀬𑀼𑀢𑁆𑀢𑀸 𑀯𑀺𑀬 𑀅𑀭𑀺𑀬𑀫𑀕𑁆𑀕𑀬𑀼𑀕𑀦𑀤𑁆𑀥𑀸 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀩𑀤𑁆𑀥𑀸𑀢𑀺 𑀬𑀼𑀕𑀦𑀤𑁆𑀥𑀸. 𑀢𑁂𑀦𑀸𑀳 𑁋 ‘‘𑀏𑀓𑀓𑁆𑀔𑀡𑀺𑀓𑀬𑀼𑀕𑀦𑀦𑁆𑀥𑀸’’𑀢𑀺 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀏𑀯 𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀓𑁆𑀔𑀡𑀺𑀓𑀸 𑀳𑀼𑀢𑁆𑀯𑀸 𑀲𑀫𑀥𑀼𑀭𑀁 𑀯𑀢𑁆𑀢𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀏𑀢𑁂 𑀳𑀻’’𑀢𑀺𑀆𑀤𑀺. 𑀅𑀜𑁆𑀜𑀲𑁆𑀫𑀺𑀁 𑀔𑀡𑁂 𑀲𑀫𑀸𑀧𑀢𑁆𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸𑀢𑀺 𑀇𑀤𑀁 𑀢𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀓𑀺𑀘𑁆𑀘𑀢𑁄 𑀅𑀥𑀺𑀓𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑀣𑀸. 𑀦 𑀳𑀺 𑀧𑀜𑁆𑀜𑀸𑀭𑀳𑀺𑀢𑀸 𑀲𑀫𑀸𑀧𑀢𑁆𑀢𑀺, 𑀲𑀫𑀸𑀥𑀺𑀭𑀳𑀺𑀢𑀸 𑀘 𑀯𑀺𑀧𑀲𑁆𑀲𑀦𑀸 𑀅𑀢𑁆𑀣𑀺. 𑀅𑀭𑀺𑀬𑀫𑀕𑁆𑀕𑁂 𑀧𑀦 𑀏𑀓𑀓𑁆𑀔𑀡𑀺𑀓𑀸 𑀲𑀫𑀥𑀼𑀭𑀢𑀸𑀬 𑀏𑀓𑀭𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀨𑀮𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀲𑀴𑀸𑀬𑀢𑀦𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁮. 𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁫. 𑀲𑀫𑀯𑀺𑀲𑀫𑀁 𑀘𑀭𑀦𑁆𑀢𑀻𑀢𑀺 𑀓𑀸𑀬𑀲𑀫𑀸𑀤𑀺𑀁 𑀲𑀫𑀜𑁆𑀜𑁂𑀯, 𑀓𑀸𑀬𑀯𑀺𑀲𑀫𑀸𑀤𑀺𑀁 𑀯𑀺𑀲𑀫𑀜𑁆𑀜𑁂𑀯 𑀘𑀭𑀦𑁆𑀢𑀺 𑀓𑀭𑁄𑀦𑁆𑀢𑀺 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀢𑀁 𑀧𑀦 𑀲𑀫𑀯𑀺𑀲𑀫𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀢𑁆𑀢𑀸 𑀯𑀺𑀲𑀤𑀺𑀲𑀢𑁆𑀢𑀸 𑀦 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀲𑀫𑁆𑀪𑀯𑀢𑀻𑀢𑀺 𑀆𑀳 𑁋 ‘‘𑀓𑀸𑀮𑁂𑀦 𑀲𑀫𑀁 𑀓𑀸𑀮𑁂𑀦 𑀯𑀺𑀲𑀫’’𑀦𑁆𑀢𑀺. 𑀲𑀫𑀘𑀭𑀺𑀬𑀫𑁆𑀧𑀺 𑀳𑀺 𑀏𑀢𑀦𑁆𑀢𑀺 𑀧𑀼𑀩𑁆𑀩𑁂 𑀲𑀫𑀘𑀭𑀺𑀬𑀸𑀬 𑀚𑁄𑀢𑀺𑀢𑀢𑁆𑀢𑀸 𑀯𑀼𑀢𑁆𑀢𑀁.

𑁪𑁩𑁭. 𑀆𑀓𑀭𑁄𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀜𑀸𑀧𑁂𑀦𑁆𑀢𑀺 𑀧𑀩𑁄𑀥𑁂𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀜𑀸𑀧𑀓𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀓𑁂 𑀆𑀓𑀸𑀭𑀸𑀢𑀺 𑀓𑀸𑀦𑀺 𑀓𑀸𑀭𑀡𑀸𑀦𑀻’’𑀢𑀺. 𑀅𑀦𑀼𑀩𑀼𑀤𑁆𑀥𑀺𑀬𑁄𑀢𑀺 𑀅𑀦𑀼𑀫𑀸𑀦𑀜𑀸𑀡𑀸𑀦𑀺. 𑀢𑀜𑁆𑀳𑀺 𑀬𑀣𑀸𑀤𑀺𑀝𑁆𑀞𑀫𑀢𑁆𑀣𑀁 𑀤𑀺𑀝𑁆𑀞𑀪𑀸𑀯𑁂𑀦 𑀅𑀦𑁆𑀯𑁂𑀢𑀺 𑀅𑀦𑀼𑀕𑀘𑁆𑀙𑀢𑀻𑀢𑀺 ‘‘𑀅𑀦𑁆𑀯𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀳𑀭𑀺𑀢𑀢𑀺𑀡𑀘𑀫𑁆𑀧𑀓𑀯𑀦𑀸𑀤𑀺𑀯𑀲𑁂𑀦𑀸𑀢𑀺 𑀳𑀭𑀺𑀢𑀓𑀫𑁆𑀩𑀮𑀸𑀤𑀺𑀲𑀤𑀺𑀲𑀢𑀺𑀡𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀺𑀢𑀓𑀦𑀓𑀧𑀝𑀸𑀤𑀺𑀲𑀤𑀺𑀯𑀺𑀓𑀲𑀺𑀢𑀘𑀫𑁆𑀧𑀓𑀯𑀦𑀸𑀤𑀺𑀯𑀲𑁂𑀦. 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀓𑀻𑀘𑀓𑀯𑁂𑀡𑀼𑀲𑀤𑁆𑀤𑀫𑀥𑀼𑀭𑀲𑀨𑀮𑀸𑀨𑀮𑀯𑀲𑁂𑀦 𑀲𑀤𑁆𑀤𑀭𑀲𑀸𑀦𑀁 𑀅𑀢𑁆𑀣𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀘𑀫𑁆𑀧𑀓𑀯𑀲𑁂𑀦𑁂𑀯 𑀧𑀦 𑀨𑀲𑁆𑀲𑀕𑀦𑁆𑀥𑀸𑀦𑀫𑁆𑀧𑀺 𑀅𑀢𑁆𑀣𑀺𑀪𑀸𑀯𑁄 𑀯𑀼𑀢𑁆𑀢𑁄𑀢𑀺. 𑀢𑁂𑀦𑀸𑀳 𑁋 ‘‘𑀭𑀽𑀧𑀸𑀤𑀬𑁄 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀅𑀢𑁆𑀣𑀻’’𑀢𑀺. ‘‘𑀇𑀢𑁆𑀣𑀺𑀭𑀽𑀧𑀸𑀤𑀻𑀦𑀺 𑀲𑀦𑁆𑀥𑀸𑀬𑁂𑀢𑀁 𑀓𑀣𑀺𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀯𑀸 𑀳𑁄𑀦𑁆𑀢𑀼 𑀭𑀽𑀧𑀸𑀤𑀬𑁄 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀯𑀸, 𑀲𑀩𑁆𑀩𑁂𑀧𑀺 𑀘𑁂𑀢𑁂 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀓𑀸𑀫𑀕𑀼𑀡𑀸 𑀏𑀯𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 𑀯𑀺𑀲𑀪𑀸𑀕𑀺𑀢𑁆𑀣𑀺𑀕𑀢𑀸 𑀭𑀽𑀧𑀸𑀤𑀬𑁄 𑀲𑀯𑀺𑀲𑁂𑀲𑀁 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀢𑀸𑀦𑀺 𑀳𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀢𑀸𑀦𑀻𑀢𑀺 𑀭𑀽𑀧𑀸𑀤𑀻𑀦𑀺. 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀢𑀺, ‘‘𑀬𑀲𑁆𑀫𑀸 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀢𑀲𑁆𑀫𑀸 𑀇𑀢𑁆𑀣𑀺𑀭𑀽𑀧𑀸𑀤𑀻𑀦𑀺 𑀲𑀦𑁆𑀥𑀸𑀬 𑀏𑀢𑀁 𑀓𑀣𑀺𑀢’’𑀦𑁆𑀢𑀺. 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀧𑀼𑀭𑀺𑀲𑀲𑁆𑀲 𑀘𑀢𑀼𑀪𑀽𑀫𑀓𑀁 𑀓𑀼𑀲𑀮𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀫𑀼𑀝𑁆𑀞𑀺𑀕𑀢𑀁 𑀯𑀺𑀬 𑀓𑀢𑁆𑀯𑀸. ‘‘𑀳𑀢𑁆𑀣𑀺𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁨𑁬) 𑀳𑀺 𑀕𑀳𑀡𑀁 𑀧𑀭𑀺𑀬𑀸𑀤𑀸𑀦𑀁 𑀦𑀸𑀫, ‘‘𑀅𑀦𑀺𑀘𑁆𑀘𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀩𑁆𑀩𑀁 𑀓𑀸𑀫𑀭𑀸𑀕𑀁 𑀧𑀭𑀺𑀬𑀸𑀤𑀺𑀬𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁧𑁦𑁨) 𑀔𑁂𑀧𑀦𑀁 𑀧𑀭𑀺𑀬𑀸𑀤𑀸𑀦𑀁, 𑀇𑀥 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀺. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀢𑁆𑀢𑁂𑀦𑁂𑀯 𑀲𑀸𑀥𑁂𑀢𑀼𑀁, ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀻𑀲𑀼 𑀦-𑀓𑀸𑀭𑁄 𑀧𑀝𑀺𑀲𑁂𑀥𑀢𑁆𑀣𑁄. 𑀅𑀳𑀦𑁆𑀢𑀺 𑀪𑀕𑀯𑀸 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀪𑀺𑀓𑁆𑀔𑀯𑁂𑀢𑀺 𑀪𑀺𑀓𑁆𑀔𑀽 𑀆𑀮𑀧𑀢𑀺. 𑀅𑀜𑁆𑀜𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀇𑀢𑁆𑀣𑀺𑀭𑀽𑀧𑀢𑁄 𑀅𑀜𑁆𑀜𑀁. 𑀏𑀓𑀭𑀽𑀧𑀫𑁆𑀧𑀻𑀢𑀺 𑀏𑀓𑀫𑁆𑀧𑀺 𑀭𑀽𑀧𑀁. 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀜𑀸𑀡𑀲𑁆𑀲 𑀲𑀫𑀦𑀼𑀧𑀲𑁆𑀲𑀦𑀸 𑀅𑀥𑀺𑀧𑁆𑀧𑁂𑀢𑀸, 𑀳𑁂𑀝𑁆𑀞𑀸 𑀦-𑀓𑀸𑀭𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 ‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀩𑁆𑀩𑀲𑁄 𑀑𑀮𑁄𑀓𑁂𑀦𑁆𑀢𑁄 𑀅𑀜𑁆𑀜𑀁 𑀏𑀓𑀭𑀽𑀧𑀫𑁆𑀧𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺. 𑀬𑀁 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻𑀢𑀺 𑀬𑀁 𑀭𑀽𑀧𑀁 𑀭𑀽𑀧𑀕𑀭𑀼𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀩𑁆𑀩𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀁 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀔𑁂𑀧𑁂𑀢𑁆𑀯𑀸 𑀘 𑀢𑀺𑀝𑁆𑀞𑀢𑀺. 𑀬𑀣𑀬𑀺𑀤𑀁 𑀇𑀢𑁆𑀣𑀺𑀭𑀽𑀧𑀦𑁆𑀢𑀺 𑀇𑀢𑁆𑀣𑀺𑀬𑀸 𑀭𑀽𑀧𑀓𑀸𑀬𑀁. 𑀭𑀽𑀧𑀲𑀤𑁆𑀤𑁄 𑀔𑀦𑁆𑀥𑀸𑀤𑀺𑀅𑀦𑁂𑀓𑀢𑁆𑀣𑀯𑀸𑀘𑀓𑁄, 𑀇𑀥 𑀧𑀦 𑀇𑀢𑁆𑀣𑀺𑀬𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑁂 𑀭𑀽𑀧𑀸𑀬𑀢𑀦𑁂 𑀯𑀡𑁆𑀡𑀥𑀸𑀢𑀼𑀬𑀁 𑀤𑀝𑁆𑀞𑀩𑁆𑀩𑁄. ‘‘𑀇𑀢𑁆𑀣𑀺𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺 𑀇𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀁 ‘‘𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀭𑀽𑀧’’𑀦𑁆𑀢𑀺 𑀇𑀤𑀁 𑀑𑀧𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀤𑀁 𑀧𑀭𑀺𑀬𑀸𑀤𑀸𑀦𑀪𑀸𑀯𑁂 𑀦𑀺𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁯. 𑀧𑀺𑀡𑁆𑀟𑀧𑀸𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁮. 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀧𑀝𑀺𑀲𑀮𑁆𑀮𑀻𑀬𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀉𑀧𑀭𑀺 𑀘 𑀧𑀸𑀴𑀺𑀬𑀁, ‘‘𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁂𑀦 𑀔𑁄 𑀅𑀳𑀁, 𑀪𑀦𑁆𑀢𑁂, 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀸𑀫𑀻’’𑀢𑀺 (𑀫. 𑀦𑀺. 𑁩.𑁪𑁩𑁮) 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀝𑀺𑀲𑀮𑁆𑀮𑀸𑀦𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄’’𑀢𑀺 𑀆𑀳.

𑀯𑀺𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀯𑀺𑀲𑁂𑀲𑀢𑁄 𑀧𑀲𑀦𑁆𑀦𑀸𑀦𑀺. 𑀑𑀓𑀸𑀲𑀯𑀲𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀯𑀲𑁂𑀦. 𑀦𑀦𑀼 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀪𑀸𑀯𑀢𑁄 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀳𑁄𑀦𑁆𑀢𑀻𑀢𑀺? 𑀲𑀘𑁆𑀘𑀁 𑀳𑁄𑀦𑁆𑀢𑀺. 𑀦 𑀳𑀺𑀤𑀁 𑀢𑀸𑀤𑀺𑀲𑀁 𑀧𑀲𑀦𑁆𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀇𑀤𑀁 𑀧𑀦 𑀲𑀦𑁆𑀢𑀧𑀡𑀻𑀢𑀲𑀫𑀸𑀧𑀢𑁆𑀢𑀺𑀲𑀫𑀼𑀝𑁆𑀞𑀺𑀢𑀸𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀦𑀁 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀯𑀲𑁂𑀦 𑀲𑁂𑀲𑀢𑀺𑀲𑀦𑁆𑀢𑀢𑀺𑀭𑀽𑀧𑀸𑀦𑀁 𑀲𑁂𑀝𑁆𑀞𑀢𑀭𑀁 𑀧𑀡𑀻𑀢𑀪𑀸𑀯𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀨𑀮𑀲𑀫𑀸𑀧𑀢𑁆𑀢𑀺𑀢𑁄𑀢𑀺 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀲𑀫𑀸𑀧𑀦𑁆𑀦𑀨𑀮𑀲𑀫𑀸𑀧𑀢𑁆𑀢𑀺𑀢𑁄. 𑀫𑀳𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀧𑀼𑀭𑀺𑀲𑀸𑀦𑀁 𑀯𑀺𑀳𑀸𑀭𑁄 𑀫𑀳𑀸𑀧𑀼𑀭𑀺𑀲𑀯𑀺𑀳𑀸𑀭𑁄. 𑀢𑁂𑀦𑀸𑀳 𑁋 ‘‘𑀩𑀼𑀤𑁆𑀥…𑀧𑁂… 𑀯𑀺𑀳𑀸𑀭𑁄’’𑀢𑀺. 𑀯𑀺𑀳𑀸𑀭𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁂 𑀘 𑀯𑀺𑀳𑀸𑀭𑁂 𑀧𑀭𑀺𑀓𑁆𑀔𑁂𑀧𑀢𑁄 𑀧𑀝𑁆𑀞𑀸𑀬, 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀘 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬. 𑀓𑁂𑀘𑀺 𑀧𑀦 ‘‘𑀯𑀺𑀳𑀸𑀭𑀩𑁆𑀪𑀦𑁆𑀢𑀭𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀤𑀦𑁆𑀢𑀺. 𑀬𑀸𑀯 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑀸𑀢𑀺 𑀕𑀸𑀫𑀲𑁆𑀲 𑀅𑀩𑁆𑀪𑀦𑁆𑀢𑀭𑀺𑀦𑁆𑀤𑀔𑀻𑀮𑁄. 𑀕𑁂𑀳𑀧𑀝𑀺𑀧𑀸𑀝𑀺𑀬𑀸𑀘𑀭𑀺𑀢𑁆𑀯𑀸𑀢𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸. 𑀬𑀸𑀯 𑀦𑀕𑀭𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑀸𑀢𑀺 𑀦𑀕𑀭𑀤𑁆𑀯𑀸𑀭𑁂𑀦 𑀬𑀸𑀯 𑀦𑀺𑀓𑁆𑀔𑀫𑀦𑀧𑀤𑁂𑀲𑀸. 𑀬𑀸𑀯 𑀯𑀺𑀳𑀸𑀭𑀸𑀢𑀺 𑀬𑀸𑀯 𑀯𑀺𑀳𑀸𑀭𑀩𑁆𑀪𑀦𑁆𑀢𑀭𑀸. 𑀧𑀝𑀺𑀓𑁆𑀓𑀦𑁆𑀢𑀫𑀕𑁆𑀕𑁄𑀢𑀺 𑀦𑀺𑀯𑀢𑁆𑀢𑀦𑀫𑀕𑁆𑀕𑁄. 𑀆𑀭𑀫𑁆𑀫𑀡𑁂 𑀧𑀝𑀺𑀳𑀜𑁆𑀜𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑁂 𑀧𑀝𑀺𑀳𑀦𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀆𑀳 𑁋 ‘‘𑀘𑀺𑀢𑁆𑀢𑁂 𑀧𑀝𑀺𑀳𑀜𑁆𑀜𑀦𑀓𑀺𑀮𑁂𑀲𑀚𑀸𑀢’’𑀦𑁆𑀢𑀺. 𑀤𑀺𑀯𑀲𑀜𑁆𑀘 𑀭𑀢𑁆𑀢𑀺𑀜𑁆𑀘 𑀅𑀦𑀼𑀲𑀺𑀓𑁆𑀔𑀦𑁆𑀢𑁂𑀦𑀸𑀢𑀺 𑀏𑀢𑀁𑀬𑁂𑀯 𑀭𑀸𑀕𑀸𑀤𑀺𑀧𑁆𑀧𑀳𑀸𑀬𑀺𑀦𑀺𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀺𑀯𑀸 𑀘 𑀭𑀢𑁆𑀢𑀺𑀜𑁆𑀘 𑀅𑀦𑀼 𑀅𑀦𑀼 𑀲𑀺𑀓𑁆𑀔𑀦𑁆𑀢𑁂𑀦 𑀉𑀧𑀭𑀽𑀧𑀭𑀺 𑀯𑀟𑁆𑀠𑁂𑀦𑁆𑀢𑁂𑀦.

𑁪𑁪𑁦. 𑀧𑀳𑀻𑀦𑀸 𑀦𑀼 𑀔𑁄 𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸𑀢𑀺 𑀏𑀢𑁆𑀣 𑀓𑀸𑀫𑀕𑀼𑀡𑀧𑁆𑀧𑀳𑀸𑀦𑀁 𑀦𑀸𑀫 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀢𑀺𑀝𑁆𑀞𑀦𑁆𑀢𑀺 𑀘𑀺𑀢𑁆𑀭𑀸𑀦𑀺 𑀢𑀣𑁂𑀯 𑀮𑁄𑀓𑁂, 𑀅𑀣𑁂𑀢𑁆𑀣 𑀥𑀻𑀭𑀸 𑀯𑀺𑀦𑀬𑀦𑁆𑀢𑀺 𑀙𑀦𑁆𑀤’’𑀦𑁆𑀢𑀺. 𑀏𑀓𑀪𑀺𑀓𑁆𑀔𑀼𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀦𑀸𑀢𑀺 𑀏𑀓𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄, ‘‘𑀧𑀳𑀻𑀦𑀸 𑀦𑀼 𑀔𑁄 𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 𑀆𑀕𑀢𑀸 𑀦𑀸𑀦𑀸𑀧𑀘𑁆𑀘𑀯𑁂𑀓𑁆𑀔𑀡𑀸 𑀳𑁄𑀦𑁆𑀢𑀺. 𑀦𑀸𑀦𑀸𑀪𑀺𑀓𑁆𑀔𑀽𑀦𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀦𑁂𑀓𑁂𑀲𑀁 𑀪𑀺𑀓𑁆𑀔𑀽𑀦𑀁. 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀦𑀸𑀢𑀺 𑀯𑀼𑀢𑁆𑀢𑀦𑀸𑀦𑀸𑀧𑀘𑁆𑀘𑀯𑁂𑀓𑁆𑀔𑀡𑀸. 𑀇𑀤𑀸𑀦𑀺 𑀢𑀫𑁂𑀯 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁, ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀧𑀘𑁆𑀘𑀯𑁂𑀓𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀣𑀁 𑀧𑀦 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀆𑀳 ‘‘𑀧𑀳𑀻𑀦𑀸 𑀦𑀼 𑀔𑁄’’𑀢𑀺𑀆𑀤𑀺. 𑀯𑀻𑀭𑀺𑀬𑀁 𑀧𑀕𑁆𑀕𑀬𑁆𑀳𑀸𑀢𑀺 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀁 𑀆𑀭𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑀺𑀢𑁆𑀯𑀸. 𑀫𑀕𑁆𑀕𑀸𑀦𑀦𑁆𑀢𑀭𑀁 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸𑀢𑀺 𑀯𑀘𑀦𑀲𑁂𑀲𑁄. 𑀨𑀮𑀸𑀦𑀦𑁆𑀢𑀭𑀁 𑀫𑀕𑁆𑀕𑀦𑁆𑀢𑀺 𑀢𑀲𑁆𑀫𑀺𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀞𑀺𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀅𑀕𑁆𑀕𑀫𑀕𑁆𑀕𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀦 𑀘𑀺𑀭𑁂𑀦𑁂𑀯 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀕𑀡𑁆𑀳𑀦𑁆𑀢𑁄 𑀦𑀺𑀭𑁄𑀥𑀥𑀫𑁆𑀫𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀸𑀪𑀸𑀯𑀢𑁄 𑀨𑀮𑀸𑀦𑀦𑁆𑀢𑀭𑀁 𑀫𑀕𑁆𑀕𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸.

𑀢𑀢𑁄 𑀯𑀼𑀝𑁆𑀞𑀸𑀬𑀸𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀢𑁄 𑀯𑀼𑀝𑁆𑀞𑀸𑀬. 𑀫𑀕𑁆𑀕𑀸𑀦𑀦𑁆𑀢𑀭𑀢𑁄 𑀳𑀺 𑀯𑀼𑀝𑁆𑀞𑀺𑀢𑁄 𑀫𑀕𑁆𑀕𑀢𑁄 𑀯𑀼𑀝𑁆𑀞𑀺𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀁. ‘‘𑀨𑀮𑀸𑀦𑀦𑁆𑀢𑀭𑀁 𑀫𑀕𑁆𑀕’’𑀦𑁆𑀢𑀺 𑀏𑀢𑁆𑀣 𑀨𑀮𑀁 𑀅𑀦𑀦𑁆𑀢𑀭𑀁 𑀏𑀢𑀲𑁆𑀲𑀸𑀢𑀺 𑀨𑀮𑀸𑀦𑀦𑁆𑀢𑀭𑀁. ‘‘𑀨𑀮𑀸𑀦𑀦𑁆𑀢𑀭𑀁 𑀫𑀕𑁆𑀕’’𑀦𑁆𑀢𑀺 𑀧𑀤𑀤𑁆𑀯𑀬𑁂𑀦𑀧𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀨𑀮𑀸𑀦𑀺 𑀘𑁂𑀯 𑀯𑀤𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀻𑀯𑀭𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁆𑀣, ‘‘𑀧𑀳𑀻𑀦𑀸 𑀦𑀼 𑀔𑁄 𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸’’𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀲𑀦𑁆𑀢𑀺 𑀏𑀢𑁆𑀣 𑀏𑀢𑁂𑀲𑀁 𑀦𑀻𑀯𑀭𑀡𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁. 𑀧𑀳𑀸𑀦𑀸𑀤𑀻𑀦𑀻𑀢𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀸. 𑀦𑀸𑀦𑀸𑀧𑀘𑁆𑀘𑀯𑁂𑀓𑁆𑀔𑀡𑀸 𑀳𑁄𑀢𑀻𑀢𑀺 𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑀸𑀲𑀼 𑀧𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀽𑀢𑀺 𑀏𑀢𑀸𑀲𑀼 𑀓𑀸𑀫𑀕𑀼𑀡𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀲𑀼 𑀤𑁆𑀯𑀸𑀤𑀲𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀼. 𑀏𑀓𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 𑀧𑀘𑁆𑀘𑀯𑁂𑀓𑁆𑀔𑀢𑀺 𑀤𑁆𑀯𑀸𑀤𑀲𑀲𑀼 𑀦𑀬𑁂𑀲𑀼 𑀏𑀓𑁂𑀦𑁂𑀯 𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄. 𑀅𑀜𑁆𑀜𑁄 𑀪𑀺𑀓𑁆𑀔𑀼. 𑀏𑀓𑀦𑁆𑀢𑀺 𑀅𑀜𑁆𑀜𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀅𑀜𑁆𑀜𑀢𑁆𑀣𑁄 𑀳𑀺 𑀅𑀬𑀁 𑀏𑀓𑀲𑀤𑁆𑀤𑁄 ‘‘𑀇𑀢𑁆𑀣𑁂𑀓𑁂’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁧, 𑁨𑁭) 𑀯𑀺𑀬𑀸𑀢𑀺. 𑀦𑀸𑀦𑀸𑀪𑀺𑀓𑁆𑀔𑀽𑀦𑀁 𑀧𑀦 𑀏𑀓𑀸 𑀧𑀘𑁆𑀘𑀯𑁂𑀓𑁆𑀔𑀡𑀸, 𑀦𑀸𑀦𑀸𑀪𑀺𑀓𑁆𑀔𑀽𑀦𑀁 𑀦𑀸𑀦𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀏𑀯𑀁 𑀘𑀢𑀼𑀓𑁆𑀓𑀧𑀘𑁆𑀘𑀯𑁂𑀓𑁆𑀔𑀡𑀫𑁆𑀧𑀺 𑀏𑀢𑁆𑀣 𑀲𑀫𑁆𑀪𑀯𑀢𑀺. 𑀇𑀫𑀲𑁆𑀲 𑀧𑀦 𑀤𑁆𑀯𑀬𑀲𑁆𑀲 𑀯𑀲𑁂𑀦 𑀅𑀪𑀺𑀲𑀫𑀬𑁄 𑀦𑀢𑁆𑀣𑀻𑀢𑀺 𑀢𑀤𑀼𑀪𑀬𑀁 𑀅𑀝𑁆𑀞𑀓𑀣𑀸𑀬𑀁 𑀦 𑀉𑀤𑁆𑀥𑀝𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀺𑀡𑁆𑀟𑀧𑀸𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁧𑁦. 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫𑁩. 𑀏𑀯𑀁𑀦𑀸𑀫𑀓𑁂𑀢𑀺 ‘‘𑀕𑀚𑀗𑁆𑀕𑀮𑀸’’𑀢𑀺 𑀏𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑀓𑁂 𑀫𑀚𑁆𑀛𑀺𑀫𑀧𑀤𑁂𑀲𑀲𑁆𑀲 𑀫𑀭𑀺𑀬𑀸𑀤𑀝𑁆𑀞𑀸𑀦𑀪𑀽𑀢𑁂 𑀦𑀺𑀕𑀫𑁂. 𑀲𑀼𑀯𑁂𑀴𑀼 𑀦𑀸𑀫 𑀦𑀺𑀘𑀮𑀭𑀼𑀓𑁆𑀔𑁄𑀢𑀺 𑀯𑀤𑀦𑁆𑀢𑀺. 𑀢𑀢𑁄 𑀅𑀜𑁆𑀜𑀁 𑀏𑀯𑀸𑀢𑀺 𑀧𑀦 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀏𑀓𑀸 𑀭𑀼𑀓𑁆𑀔𑀚𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀲𑁄𑀢𑀸𑀦𑀁 𑀬𑀣𑀸𑀲𑀓𑀯𑀺𑀲𑀬𑀢𑁄 𑀦𑀺𑀯𑀸𑀭𑀡𑀁 𑀤𑀫𑀦𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸, 𑀢𑀜𑁆𑀘 𑀔𑁄 𑀲𑀩𑁆𑀩𑀲𑁄 𑀅𑀤𑀲𑁆𑀲𑀦𑁂𑀦 𑀅𑀲𑀯𑀦𑁂𑀦𑀸𑀢𑀺 𑀆𑀳 𑁋 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀦 𑀧𑀲𑁆𑀲𑀢𑀺, 𑀲𑁄𑀢𑁂𑀦 𑀲𑀤𑁆𑀤𑀁 𑀦 𑀲𑀼𑀡𑀸𑀢𑀻’’𑀢𑀺. 𑀲𑀢𑀺 𑀳𑀺 𑀤𑀲𑁆𑀲𑀦𑁂 𑀲𑀯𑀦𑁂 𑀘 𑀢𑀸𑀦𑀺 𑀅𑀤𑀦𑁆𑀢𑀸𑀦𑀺 𑀅𑀪𑀸𑀯𑀺𑀢𑀸𑀦𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀓𑁆𑀔𑀼𑀲𑁄𑀢𑀸𑀦𑀺 𑀘 𑀅𑀲𑀫𑁆𑀧𑀢𑁆𑀢𑀕𑁆𑀕𑀸𑀳𑀺𑀢𑀸𑀬 𑀤𑀼𑀭𑀓𑁆𑀔𑀺𑀢𑀸𑀦𑀻𑀢𑀺 𑀩𑁆𑀭𑀸𑀳𑁆𑀫𑀡𑁄 𑀢𑁂𑀲𑀁𑀬𑁂𑀯 𑀯𑀺𑀲𑀬𑀕𑁆𑀕𑀳𑀡𑀁 𑀧𑀝𑀺𑀓𑁆𑀔𑀺𑀧𑀺. 𑀅𑀲𑀤𑀺𑀲𑀸𑀬𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀫𑀬𑁂𑀳𑀺 𑀅𑀲𑀸𑀥𑀸𑀭𑀡𑀸𑀬. 𑀆𑀮𑀬𑀦𑁆𑀢𑀺 𑀓𑀣𑁂𑀢𑀼𑀓𑀸𑀫𑀢𑀸𑀓𑀸𑀭𑀦𑁆𑀢𑀺 𑀅𑀢𑁆𑀣𑁄.

𑁪𑁫𑁪. 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀢𑀺 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀮𑀓𑁆𑀔𑀡𑀢𑁆𑀢𑀬𑁂 𑀤𑀺𑀝𑁆𑀞𑁂 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀪𑀸𑀯𑀸𑀤𑀺𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀪𑀽𑀢𑀸 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸 𑀉𑀧𑁂𑀓𑁆𑀔𑀸. 𑀲𑀸 𑀧𑀦 𑀬𑀲𑁆𑀫𑀸 𑀪𑀸𑀯𑀦𑀸𑀯𑀺𑀲𑁂𑀲𑀧𑁆𑀧𑀢𑁆𑀢𑀺𑀬𑀸 𑀳𑁂𑀝𑁆𑀞𑀺𑀫𑁂𑀳𑀺 𑀯𑀺𑀧𑀲𑁆𑀲𑀦𑀸𑀯𑀸𑀭𑁂𑀳𑀺 𑀲𑀦𑁆𑀢𑀸 𑀘𑁂𑀯 𑀧𑀡𑀻𑀢𑀸 𑀘, 𑀧𑀕𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀳𑀕𑀢𑀸𑀳𑀺 𑀉𑀧𑁂𑀓𑁆𑀔𑀸𑀳𑀺, 𑀢𑀲𑁆𑀫𑀸 𑀆𑀳 𑁋 ‘‘𑀏𑀲𑀸 𑀲𑀦𑁆𑀢𑀸 𑀏𑀲𑀸 𑀧𑀡𑀻𑀢𑀸’’𑀢𑀺. 𑀅𑀢𑀧𑁆𑀧𑀺𑀓𑀸𑀢𑀺 𑀲𑀦𑁆𑀢𑀧𑀡𑀻𑀢𑀪𑀸𑀯𑀦𑀸𑀭𑀲𑀯𑀲𑁂𑀦 𑀢𑀺𑀢𑁆𑀢𑀺𑀁 𑀦 𑀚𑀦𑁂𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄’’𑀢𑀺. (𑀥. 𑀧. 𑁩𑁭𑁩);

𑀇𑀢𑀻𑀢𑀺 𑀏𑀯𑀁 𑀯𑀓𑁆𑀔𑀫𑀸𑀦𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀪𑀺𑀓𑁆𑀔𑀽𑀢𑀺 𑀅𑀬𑀁 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀪𑀺𑀓𑁆𑀔𑀽𑀢𑀺 𑀬𑁄𑀚𑀦𑀸. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀭𑀽𑀧𑀸𑀭𑀫𑁆𑀫𑀡𑀫𑁆𑀳𑀻𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀧𑀸𑀣𑀕𑀢𑁂 𑀭𑀽𑀧𑀸𑀭𑀫𑁆𑀫𑀡𑁂. 𑀫𑀦𑀸𑀧𑀦𑁆𑀢𑀺 𑀫𑀦𑀸𑀧𑀪𑀸𑀯𑁂𑀦 𑀧𑀯𑀢𑁆𑀢𑀦𑀓𑀁. 𑀫𑀚𑁆𑀛𑀢𑁆𑀢𑁂 𑀫𑀦𑀸𑀧𑀸𑀫𑀦𑀸𑀧𑀦𑁆𑀢𑀺 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀫𑀦𑀸𑀧𑀪𑀸𑀯𑁂𑀦 𑀅𑀫𑀦𑀸𑀧𑀪𑀸𑀯𑁂𑀦 𑀘 𑀧𑀯𑀢𑁆𑀢𑀦𑀓𑀁 𑀫𑀦𑀸𑀧𑀸𑀫𑀦𑀸𑀧𑀁 𑀦𑀸𑀫𑀸𑀢𑀺. 𑀢𑁂𑀦𑀸𑀳 (‘‘𑀦𑁂𑀯 𑀫𑀦𑀸𑀧𑀁 𑀦 𑀅𑀫𑀦𑀸𑀧’’𑀦𑁆𑀢𑀺). 𑀇𑀫𑀺𑀦𑀸 𑀫𑀦𑀸𑀧𑀪𑀸𑀯𑁄 𑀕𑀳𑀺𑀢𑁄, ‘‘𑀦𑁂𑀯 𑀫𑀦𑀸𑀧’’𑀦𑁆𑀢𑀺 𑀇𑀫𑀺𑀦𑀸 𑀫𑀦𑀸𑀧𑀪𑀸𑀯𑁄 𑀫𑀚𑁆𑀛𑀢𑁆𑀢𑁄 𑀘 𑀉𑀪𑀬𑀁 𑀏𑀓𑀤𑁂𑀲𑀢𑁄 𑀮𑀩𑁆𑀪𑀢𑀻𑀢𑀺, ‘‘𑀫𑀦𑀸𑀧𑀸𑀫𑀦𑀸𑀧’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀆𑀭𑀫𑁆𑀫𑀡𑁂 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀸𑀓𑀢𑀺𑀓𑀁 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀧𑁆𑀧𑀝𑀺𑀲𑁂𑀥𑁂𑀦 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀁 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀁 𑀤𑀲𑁆𑀲𑁂𑀢𑀼𑀁, ‘‘𑀢𑀲𑁆𑀲 𑀭𑀚𑁆𑀚𑀺𑀢𑀼𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀢𑀲𑁆𑀲 𑀘𑀺𑀢𑁆𑀢𑀁 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀭𑀚𑁆𑀚𑀺𑀢𑀼𑀁 𑀯𑀸 𑀅𑀦𑀺𑀝𑁆𑀞𑁂 𑀆𑀭𑀫𑁆𑀫𑀡𑁂 𑀤𑀼𑀲𑁆𑀲𑀺𑀢𑀼𑀁 𑀯𑀸 𑀫𑀚𑁆𑀛𑀢𑁆𑀢𑁂 𑀆𑀭𑀫𑁆𑀫𑀡𑁂 𑀫𑀼𑀬𑁆𑀳𑀺𑀢𑀼𑀁 𑀯𑀸. 𑀅𑀤𑀢𑁆𑀯𑀸𑀢𑀺 𑀦𑀺𑀲𑁂𑀥𑁂𑀢𑁆𑀯𑀸. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀧𑀭𑀺𑀚𑀸𑀦𑀦𑀯𑀲𑁂𑀦 𑀜𑀸𑀡𑁂𑀦 𑀕𑀳𑁂𑀢𑁆𑀯𑀸 𑀜𑀸𑀢𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀯𑀺𑀧𑀲𑁆𑀲𑀦𑀁 𑀫𑀚𑁆𑀛𑀢𑁆𑀢𑁂 𑀞𑀧𑁂𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀁 𑀧𑀸𑀧𑁂𑀢𑁆𑀯𑀸 𑀞𑀧𑁂𑀢𑀺. 𑀘𑀓𑁆𑀔𑀼𑀫𑀸𑀢𑀺 𑀦 𑀧𑀲𑀸𑀤𑀘𑀓𑁆𑀔𑀼𑀦𑁄 𑀅𑀢𑁆𑀣𑀺𑀢𑀸𑀫𑀢𑁆𑀢𑀚𑁄𑀢𑀦𑀁; 𑀅𑀣 𑀔𑁄 𑀢𑀲𑁆𑀲 𑀅𑀢𑀺𑀲𑀬𑁂𑀦 𑀅𑀢𑁆𑀣𑀺𑀢𑀸𑀚𑁄𑀢𑀦𑀁, ‘‘𑀲𑀻𑀮𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀆𑀳 𑁋 ‘‘𑀘𑀓𑁆𑀔𑀼𑀫𑀸𑀢𑀺 𑀲𑀫𑁆𑀧𑀦𑁆𑀦𑀘𑀓𑁆𑀔𑀼 𑀯𑀺𑀲𑀼𑀤𑁆𑀥𑀦𑁂𑀢𑁆𑀢𑁄’’𑀢𑀺.

𑁪𑁫𑁬. 𑀈𑀲𑀓𑀁 𑀧𑁄𑀡𑁂𑀢𑀺 𑀫𑀚𑁆𑀛𑁂 𑀉𑀘𑁆𑀘𑀁 𑀳𑀼𑀢𑁆𑀯𑀸 𑀈𑀲𑀓𑀁 𑀧𑁄𑀡𑁂, 𑀦 𑀅𑀦𑁆𑀢𑀦𑁆𑀢𑁂𑀦 𑀯𑀗𑁆𑀓𑁂. 𑀢𑁂𑀦𑀸𑀳 𑁋 ‘‘𑀭𑀣𑀻𑀲𑀸 𑀯𑀺𑀬 𑀉𑀝𑁆𑀞𑀳𑀺𑀢𑁆𑀯𑀸 𑀞𑀺𑀢𑁂’’𑀢𑀺.

𑁪𑁬𑁧. 𑀧𑀝𑀺𑀓𑀽𑀮𑁂𑀢𑀺 𑀅𑀫𑀦𑀼𑀜𑁆𑀜𑁂 𑀆𑀭𑀫𑁆𑀫𑀡𑁂. 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻𑀢𑀺 𑀦 𑀧𑀝𑀺𑀓𑀽𑀮𑀲𑀜𑁆𑀜𑀻. 𑀢𑀁 𑀧𑀦 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀺𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀫𑁂𑀢𑁆𑀢𑀸𑀨𑀭𑀡𑁂𑀦 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀝𑀺𑀓𑀽𑀮𑁂 𑀅𑀦𑀺𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀢𑁆𑀢𑀲𑀜𑁆𑀜𑀺𑀢𑁂 𑀫𑁂𑀢𑁆𑀢𑀸𑀨𑀭𑀡𑁂𑀦 𑀯𑀸 𑀥𑀸𑀢𑀼𑀲𑁄 𑀉𑀧𑀲𑀁𑀳𑀸𑀭𑁂𑀦 𑀯𑀸 𑀲𑀗𑁆𑀔𑀸𑀭𑀲𑀜𑁆𑀜𑀺𑀢𑁂 𑀧𑀦 𑀥𑀸𑀢𑀼𑀲𑁄 𑀉𑀧𑀲𑀁𑀳𑀸𑀭𑁂𑀦 𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀻𑀢𑀺 𑀳𑀺𑀢𑁂𑀲𑀺𑀢𑀸𑀬 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀦𑀸𑀬 𑀘 𑀦𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀳𑀼𑀢𑁆𑀯𑀸 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺. 𑀅𑀧𑁆𑀧𑀝𑀺𑀓𑀽𑀮𑁂 𑀇𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀢𑁆𑀢𑀲𑀜𑁆𑀜𑀺𑀢𑁂 𑀓𑁂𑀲𑀸𑀤𑀺𑀅𑀲𑀼𑀘𑀺𑀓𑁄𑀝𑁆𑀞𑀸𑀲𑀫𑀢𑁆𑀢𑀫𑁂𑀯𑀸𑀢𑀺 𑀅𑀲𑀼𑀪𑀨𑀭𑀡𑁂𑀦 𑀯𑀸𑀢𑀺 𑀅𑀲𑀼𑀪𑀢𑁄 𑀫𑀦𑀲𑀺𑀓𑀸𑀭𑀯𑀲𑁂𑀦. 𑀇𑀤𑀁 𑀭𑀽𑀧𑀸𑀭𑀽𑀧𑀫𑀢𑁆𑀢𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀦𑁆𑀢𑀺 𑀅𑀦𑀺𑀘𑁆𑀘𑀢𑁄 𑀉𑀧𑀲𑀁𑀳𑀸𑀭𑁂𑀦 𑀯𑀸. 𑀢𑀢𑁄 𑀏𑀯, ‘‘𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫’’𑀦𑁆𑀢𑀺 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀲𑁂𑀲𑀧𑀤𑁂𑀲𑀽𑀢𑀺, ‘‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘𑀸’’𑀢𑀺𑀆𑀤𑀺𑀦𑀸 𑀆𑀕𑀢𑁂𑀲𑀼 𑀲𑁂𑀲𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼. 𑀢𑀢𑁆𑀣 𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑀯𑀢𑁆𑀣𑀽𑀦𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 𑀬𑀣𑀸 𑀲𑀢𑁆𑀢𑀸𑀦𑀁 𑀧𑀞𑀫𑀁 𑀧𑀝𑀺𑀓𑀽𑀮𑀢𑁄 𑀉𑀧𑀝𑁆𑀞𑀺𑀢𑀫𑁂𑀯 𑀧𑀘𑁆𑀙𑀸 𑀕𑀳𑀡𑀸𑀓𑀸𑀭𑀯𑀲𑁂𑀦 𑀅𑀯𑀢𑁆𑀣𑀦𑁆𑀢𑀭𑁂𑀦 𑀯𑀸 𑀅𑀧𑁆𑀧𑀝𑀺𑀓𑀽𑀮𑀢𑁄 𑀉𑀧𑀝𑁆𑀞𑀸𑀢𑀺. 𑀬𑀜𑁆𑀘 𑀅𑀧𑁆𑀧𑀝𑀺𑀓𑀽𑀮𑀢𑁄 𑀉𑀧𑀝𑁆𑀞𑀺𑀢𑀫𑁂𑀯 𑀧𑀘𑁆𑀙𑀸 𑀧𑀝𑀺𑀓𑀽𑀮𑀢𑁄 𑀉𑀧𑀝𑁆𑀞𑀸𑀢𑀺, 𑀢𑀤𑀼𑀪𑀬𑁂𑀧𑀺 𑀔𑀻𑀡𑀸𑀲𑀯𑁄 𑀲𑀘𑁂 𑀆𑀓𑀗𑁆𑀔𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀸𑀢𑀺.

𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸𑀢𑀺 𑀲𑀪𑀸𑀯𑀢𑁄 𑀪𑀸𑀯𑀦𑀸𑀦𑀼𑀪𑀸𑀯𑀢𑁄 𑀘 𑀉𑀧𑀝𑁆𑀞𑀺𑀢𑀁 𑀆𑀭𑀫𑁆𑀫𑀡𑀁 𑀧𑀝𑀺𑀓𑀽𑀮𑀲𑀪𑀸𑀯𑀁 𑀅𑀧𑁆𑀧𑀝𑀺𑀓𑀽𑀮𑀲𑀪𑀸𑀯𑀁 𑀯𑀸𑀢𑀺 𑀢𑀁 𑀉𑀪𑀬𑀁 𑀧𑀳𑀸𑀬 𑀅𑀕𑁆𑀕𑀳𑁂𑀢𑁆𑀯𑀸. 𑀲𑀩𑁆𑀩𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀦, ‘‘𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀺𑀢𑀼𑀓𑀸𑀫𑁄 𑀓𑀺𑀁 𑀓𑀭𑁄𑀢𑀻’’𑀢𑀺, 𑀯𑀢𑁆𑀯𑀸 𑀢𑀢𑁆𑀣 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼…𑀧𑁂… 𑀤𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀻’’𑀢𑀺 𑀆𑀳. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀬𑀸 𑀯𑀺𑀪𑀸𑀯𑁂𑀢𑀼𑀁, ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁄 𑀏𑀯. 𑀲𑀢𑁄𑀢𑀺 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀲𑀢𑀺𑀫𑀸. 𑀲𑀫𑁆𑀧𑀚𑀸𑀦𑁄𑀢𑀺 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀧𑀚𑀸𑀦𑀓𑀸𑀭𑀻. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀓𑀸𑀭𑀡𑀯𑀲𑁂𑀦 𑀘𑀓𑁆𑀔𑀽𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀦 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦, 𑀘𑀓𑁆𑀔𑀼𑀦𑀸 𑀯𑀸 𑀓𑀭𑀡𑀪𑀽𑀢𑁂𑀦 𑀭𑀽𑀧𑀁 𑀧𑀲𑁆𑀲𑀺𑀢𑁆𑀯𑀸. 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀕𑁂𑀳𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀧𑀝𑀺𑀓𑁆𑀔𑁂𑀧𑁂𑀦 𑀦𑁂𑀓𑁆𑀔𑀫𑁆𑀫𑀧𑀓𑁆𑀔𑀺𑀓𑀸𑀬 𑀓𑀺𑀭𑀺𑀬𑀸𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀬.

𑀇𑀫𑁂𑀲𑀼 𑀘𑀸𑀢𑀺 ‘‘𑀅𑀜𑁆𑀜𑀣𑀸 𑀘 𑀧𑀦𑀸𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑀼𑀢𑁆𑀢𑀭𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁪𑁫𑁩), 𑁋 ‘‘𑀓𑀣𑀜𑁆𑀘𑀸𑀦𑀦𑁆𑀤, 𑀲𑁂𑀔𑁄 𑀳𑁄𑀢𑀺 𑀧𑀝𑀺𑀧𑀤𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁪𑁬𑁦); 𑁋 ‘‘𑀓𑀣𑀜𑁆𑀘𑀸𑀦𑀦𑁆𑀤, 𑀅𑀭𑀺𑀬𑁄 𑀳𑁄𑀢𑀺 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁪𑁬𑁧) 𑀘 𑀆𑀕𑀢𑁂𑀲𑀼 𑀢𑀺𑀯𑀺𑀥𑁂𑀲𑀼 𑀦𑀬𑁂𑀲𑀼. 𑀫𑀦𑀸𑀧𑀁 𑀅𑀫𑀦𑀸𑀧𑀁 𑀫𑀦𑀸𑀧𑀸𑀫𑀦𑀸𑀧𑀦𑁆𑀢𑀺 𑀏𑀢𑁆𑀣 𑀫𑀦𑀸𑀧𑀕𑁆𑀕𑀳𑀡𑁂𑀦 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀓𑀼𑀲𑀮𑀸𑀓𑀼𑀲𑀮𑀸𑀦𑀁, 𑀅𑀫𑀦𑀸𑀧𑀕𑁆𑀕𑀳𑀡𑁂𑀦 𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑀅𑀓𑀼𑀲𑀮𑀸𑀦𑀁, 𑀫𑀦𑀸𑀧𑀸𑀫𑀦𑀸𑀧𑀕𑁆𑀕𑀳𑀡𑁂𑀦 𑀢𑀩𑁆𑀩𑀺𑀥𑀼𑀭𑀼𑀧𑁂𑀓𑁆𑀔𑀸𑀬𑀼𑀢𑁆𑀢𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀧𑀞𑀫𑀦𑀬𑁂 ‘‘𑀲𑀁𑀓𑀺𑀮𑁂𑀲𑀁 𑀯𑀝𑁆𑀝𑀢𑀺, 𑀦𑀺𑀓𑁆𑀓𑀺𑀮𑁂𑀲𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀞𑀫𑀦𑀬𑁂 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑀁𑀓𑀺𑀮𑁂𑀲𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀫𑁆𑀧𑀺 𑀬𑀼𑀚𑁆𑀚𑀢𑀺. 𑀤𑀼𑀢𑀺𑀬𑀦𑀬𑁂 𑀧𑀦 ‘‘𑀲𑁄…𑀧𑁂… 𑀅𑀟𑁆𑀟𑀻𑀬𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 ‘‘𑀧𑀞𑀫𑀁 𑀲𑀁𑀓𑀺𑀮𑁂𑀲𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀓𑁆𑀔𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀘𑀲𑁆𑀲 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀯𑀲𑁂𑀦, ‘‘𑀲𑀁𑀓𑀺𑀮𑁂𑀲𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑀺𑀬𑀦𑀬𑁂 𑀅𑀭𑀳𑀢𑁄 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, ‘‘𑀢𑀢𑀺𑀬𑀁 𑀦𑀺𑀓𑁆𑀓𑀺𑀮𑁂𑀲𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀓𑁆𑀔𑀯𑀸𑀭𑁂 𑀧𑀦 ‘‘𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀓𑀸 𑀉𑀧𑀫𑀸 𑀏𑀓𑀫𑁂𑀯 𑀅𑀢𑁆𑀣𑀁 𑀜𑀸𑀧𑁂𑀢𑀼𑀁 𑀆𑀳. 𑀢𑀲𑁆𑀫𑀸 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀲 𑀉𑀧𑁆𑀧𑀦𑁆𑀦𑁂 𑀭𑀸𑀕𑀸𑀤𑀺𑀓𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀬 𑀧𑀢𑀺𑀝𑁆𑀞𑀸𑀦𑀁 𑀅𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀢𑀺. 𑀧𑀞𑀫𑀦𑀬𑁄 𑀯𑀺𑀧𑀲𑁆𑀲𑀓𑀯𑀲𑁂𑀦 𑀆𑀕𑀢𑁄, 𑀤𑀼𑀢𑀺𑀬𑁄 𑀲𑁂𑀓𑁆𑀔𑀲𑁆𑀲 𑀯𑀲𑁂𑀦, 𑀧𑀞𑀫𑀤𑀼𑀢𑀺𑀬𑁄 𑀘 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦, 𑀢𑀢𑀺𑀬𑁄 𑀔𑀻𑀡𑀸𑀲𑀯𑀲𑁆𑀲 𑀅𑀭𑀺𑀬𑀯𑀺𑀳𑀸𑀭𑀯𑀲𑁂𑀦 𑀆𑀕𑀢𑁄. 𑀧𑀞𑀫𑀦𑀬𑁂 𑀘 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀲𑁂𑀦, 𑀤𑀼𑀢𑀺𑀬𑀦𑀬𑁂 𑀲𑁂𑀓𑁆𑀔𑀲𑁆𑀲 𑀯𑀲𑁂𑀦 𑀓𑀼𑀲𑀮𑀁 𑀯𑀼𑀢𑁆𑀢𑀁, 𑀢𑀢𑀺𑀬𑀦𑀬𑁂 𑀅𑀲𑁂𑀓𑁆𑀔𑀲𑁆𑀲 𑀯𑀲𑁂𑀦 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀴𑀸𑀬𑀢𑀦𑀯𑀕𑁆𑀕𑀯𑀡𑁆𑀡𑀦𑀸.

𑀉𑀧𑀭𑀺𑀧𑀡𑁆𑀡𑀸𑀲𑀝𑀻𑀓𑀸 𑀲𑀫𑀢𑁆𑀢𑀸.