𑁧𑁦. 𑀤𑁂𑀯𑀤𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁧. 𑀤𑁆𑀯𑁂 𑀅𑀕𑀸𑀭𑀸𑀢𑀺𑀆𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀲𑀤𑁆𑀯𑀸𑀭𑀸…𑀧𑁂… 𑀅𑀦𑀼𑀯𑀺𑀘𑀭𑀦𑁆𑀢𑁂𑀧𑀻’’𑀢𑀺 𑀏𑀢𑀫𑀢𑁆𑀣𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀢𑀓𑀫𑁂𑀯 𑀳𑀺 𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁪𑁩𑁨; 𑀫. 𑀦𑀺. 𑀅𑀝𑁆𑀞. 𑁧.𑁪𑁩𑁨) 𑀯𑀺𑀢𑁆𑀣𑀸𑀭𑀺𑀢𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸’’𑀢𑀺𑀆𑀤𑀺 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁩𑁯𑁭) 𑀢𑀣𑀸 𑀯𑀺𑀢𑁆𑀣𑀸𑀭𑀺𑀢𑀫𑁆𑀧𑀺 𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸 𑀳𑁄𑀢𑀻𑀢𑀺 𑀓𑀢𑁆𑀯𑀸, ‘‘𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑁨𑁬𑁨. 𑀦𑀺𑀭𑀬𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀁 𑀤𑁂𑀯𑀮𑁄𑀓𑁂𑀦 𑀑𑀲𑀸𑀧𑁂𑀢𑀻𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑁂𑀳𑀺 𑀲𑀁𑀯𑁂𑀚𑁂𑀢𑁆𑀯𑀸 𑀯𑁄𑀤𑀸𑀦𑀥𑀫𑁆𑀫𑁂𑀳𑀺 𑀦𑀺𑀝𑁆𑀞𑀸𑀧𑁂𑀦𑁆𑀢𑁄. 𑀤𑀼𑀢𑀺𑀬𑀁 𑀧𑀦 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀢𑀤𑀺𑀤𑀁 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀺𑀲𑀺𑀝𑁆𑀞𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀸𑀦𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁, ‘‘𑀲𑀘𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀢𑀺 𑀪𑀕𑀯𑀸.

𑀏𑀓𑀘𑁆𑀘𑁂 𑀣𑁂𑀭𑀸𑀢𑀺 (𑀓𑀣𑀸. 𑀅𑀦𑀼𑀝𑀻. 𑁮𑁬𑁬-𑁮𑁬𑁮; 𑀅. 𑀦𑀺. 𑀝𑀻. 𑁨.𑁩.𑁩𑁬) 𑀅𑀦𑁆𑀥𑀓𑀸𑀤𑀺𑀓𑁂, 𑀯𑀺𑀜𑁆𑀜𑀸𑀡𑀯𑀸𑀤𑀺𑀦𑁄 𑀘 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑁂𑀭𑀬𑀺𑀓𑁂 𑀦𑀺𑀭𑀬𑁂 𑀧𑀸𑀮𑁂𑀦𑁆𑀢𑀺 𑀢𑀢𑁄 𑀦𑀺𑀕𑁆𑀕𑀦𑁆𑀢𑀼𑀫𑀧𑁆𑀧𑀤𑀸𑀦𑀯𑀲𑁂𑀦 𑀭𑀓𑁆𑀔𑀦𑁆𑀢𑀻𑀢𑀺 𑀦𑀺𑀭𑀬𑀧𑀸𑀮𑀸. 𑀦𑁂𑀭𑀬𑀺𑀓𑀸𑀦𑀁 𑀦𑀭𑀓𑀤𑀼𑀓𑁆𑀔𑁂𑀦 𑀧𑀭𑀺𑀬𑁄𑀦𑀤𑁆𑀥𑀸𑀬 𑀅𑀮𑀁 𑀲𑀫𑀢𑁆𑀣𑀸𑀢𑀺 𑀯𑀸 𑀦𑀺𑀭𑀬𑀧𑀸𑀮𑀸. 𑀢𑀦𑁆𑀢𑀺 ‘‘𑀦𑀢𑁆𑀣𑀺 𑀦𑀺𑀭𑀬𑀧𑀸𑀮𑀸’’𑀢𑀺𑀯𑀘𑀦𑀁. 𑀧𑀝𑀺𑀲𑁂𑀥𑀺𑀢𑀫𑁂𑀯𑀸𑀢𑀺 ‘‘𑀅𑀢𑁆𑀣𑀺 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸, 𑀅𑀢𑁆𑀣𑀺 𑀘 𑀓𑀸𑀭𑀡𑀺𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 (𑀓𑀣𑀸. 𑁮𑁬𑁬) 𑀧𑀝𑀺𑀲𑁂𑀥𑀺𑀢𑀫𑁂𑀯. 𑀬𑀤𑀺 𑀦𑀺𑀭𑀬𑀧𑀸𑀮𑀸 𑀦𑀸𑀫 𑀦 𑀲𑀺𑀬𑀼𑀁, 𑀓𑀫𑁆𑀫𑀓𑀸𑀭𑀡𑀸𑀧𑀺 𑀦 𑀪𑀯𑁂𑀬𑁆𑀬. 𑀲𑀢𑀺 𑀳𑀺 𑀓𑀸𑀭𑀡𑀺𑀓𑁂 𑀓𑀫𑁆𑀫𑀓𑀸𑀭𑀡𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀏𑀢𑁆𑀣𑀸𑀳 𑁋 ‘‘𑀓𑀺𑀁 𑀧𑀦𑁂𑀢𑁂 𑀦𑀺𑀭𑀬𑀧𑀸𑀮𑀸 𑀦𑁂𑀭𑀬𑀺𑀓𑀸, 𑀉𑀤𑀸𑀳𑀼 𑀅𑀦𑁂𑀭𑀬𑀺𑀓𑀸’’𑀢𑀺. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀦𑁂𑀭𑀬𑀺𑀓𑀸, 𑀇𑀫𑁂 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀸𑀢𑀺 𑀲𑀬𑀫𑁆𑀧𑀺 𑀦𑀺𑀭𑀬𑀤𑀼𑀓𑁆𑀔𑀁 𑀅𑀦𑀼𑀪𑀯𑁂𑀬𑁆𑀬𑀼𑀁, 𑀢𑀣𑀸 𑀲𑀢𑀺 𑀅𑀜𑁆𑀜𑁂𑀲𑀁 𑀦𑁂𑀭𑀬𑀺𑀓𑀸𑀦𑀁 𑀬𑀸𑀢𑀦𑀸𑀬 𑀅𑀲𑀫𑀢𑁆𑀣𑀸 𑀲𑀺𑀬𑀼𑀁, ‘‘𑀇𑀫𑁂 𑀦𑁂𑀭𑀬𑀺𑀓𑀸, 𑀇𑀫𑁂 𑀦𑀺𑀭𑀬𑀧𑀸𑀮𑀸’’𑀢𑀺 𑀯𑀯𑀢𑁆𑀣𑀸𑀦𑀜𑁆𑀘 𑀦 𑀲𑀺𑀬𑀸, 𑀬𑁂 𑀘 𑀬𑁂 𑀬𑀸𑀢𑁂𑀦𑁆𑀢𑀺, 𑀢𑁂𑀳𑀺 𑀲𑀫𑀸𑀦𑀭𑀽𑀧𑀩𑀮𑀧𑁆𑀧𑀫𑀸𑀡𑁂𑀳𑀺 𑀇𑀢𑀭𑁂𑀲𑀁 𑀪𑀬𑀲𑀦𑁆𑀢𑀸𑀲𑀸 𑀦 𑀲𑀺𑀬𑀼𑀁. 𑀅𑀣 𑀅𑀦𑁂𑀭𑀬𑀺𑀓𑀸, 𑀦𑁂𑀲𑀁 𑀢𑀢𑁆𑀣 𑀓𑀣𑀁 𑀲𑀫𑁆𑀪𑀯𑁄𑀢𑀺 𑀯𑀼𑀘𑁆𑀘𑀢𑁂 𑁋 𑀅𑀦𑁂𑀭𑀬𑀺𑀓𑀸 𑀦𑀺𑀭𑀬𑀧𑀸𑀮𑀸 𑀅𑀦𑀺𑀭𑀬𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀢𑁄. 𑀦𑀺𑀭𑀬𑀽𑀧𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀢𑁄 𑀳𑀺 𑀅𑀜𑁆𑀜𑁂𑀦𑁂𑀯 𑀓𑀫𑁆𑀫𑀼𑀦𑀸 𑀢𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀭𑀓𑁆𑀔𑀲𑀚𑀸𑀢𑀺𑀓𑀢𑁆𑀢𑀸. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑀲𑀩𑁆𑀩𑀢𑁆𑀣𑀺𑀯𑀸𑀤𑀺𑀦𑁄 𑁋

‘‘𑀓𑁄𑀥𑀦𑀸 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸, 𑀧𑀸𑀧𑀸𑀪𑀺𑀭𑀼𑀘𑀺𑀦𑁄 𑀲𑀤𑀸;

𑀤𑀼𑀓𑁆𑀔𑀺𑀢𑁂𑀲𑀼 𑀘 𑀦𑀦𑁆𑀤𑀦𑁆𑀢𑀺, 𑀚𑀸𑀬𑀦𑁆𑀢𑀺 𑀬𑀫𑀭𑀓𑁆𑀔𑀲𑀸’’𑀢𑀺. (𑀓𑀣𑀸. 𑀅𑀦𑀼𑀝𑀻. 𑁮𑁬𑁬-𑁮𑁬𑁮; 𑀅. 𑀦𑀺. 𑀝𑀻. 𑁨.𑁩.𑁩𑁬);

𑀢𑀢𑁆𑀣 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀬𑀸𑀢𑀦𑀸𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀬𑁆𑀬𑀼𑀁, 𑀅𑀣 𑀯𑀸 𑀅𑀜𑁆𑀜𑀫𑀜𑁆𑀜𑀁 𑀬𑀸𑀢𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺, 𑀢𑀬𑀺𑀤𑀁 𑀅𑀲𑀸𑀭𑀁 𑀦𑀺𑀭𑀬𑀧𑀸𑀮𑀸𑀦𑀁 𑀦𑁂𑀭𑀬𑀺𑀓𑀪𑀸𑀯𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀬𑀤𑀺𑀧𑀺 𑀅𑀦𑁂𑀭𑀬𑀺𑀓𑀸 𑀦𑀺𑀭𑀬𑀧𑀸𑀮𑀸, 𑀅𑀬𑁄𑀫𑀬𑀸𑀬 𑀧𑀦 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀦𑀺𑀭𑀬𑀪𑀽𑀫𑀺𑀬𑀸 𑀧𑀭𑀺𑀓𑁆𑀓𑀫𑀫𑀸𑀦𑀸 𑀓𑀣𑀁 𑀤𑀸𑀳𑀤𑀼𑀓𑁆𑀔𑀁 𑀦𑀸𑀦𑀼𑀪𑀯𑀦𑁆𑀢𑀻𑀢𑀺? 𑀓𑀫𑁆𑀫𑀸𑀦𑀼𑀪𑀸𑀯𑀢𑁄. 𑀬𑀣𑀸 𑀳𑀺 𑀇𑀤𑁆𑀥𑀺𑀫𑀦𑁆𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀦𑁂𑀭𑀬𑀺𑀓𑁂 𑀅𑀦𑀼𑀓𑀫𑁆𑀧𑀦𑁆𑀢𑀸 𑀇𑀤𑁆𑀥𑀺𑀩𑀮𑁂𑀦 𑀦𑀺𑀭𑀬𑀪𑀽𑀫𑀺𑀁 𑀉𑀧𑀕𑀢𑀸 𑀤𑀸𑀳𑀤𑀼𑀓𑁆𑀔𑁂𑀦 𑀦 𑀩𑀸𑀥𑀻𑀬𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀇𑀤𑁆𑀥𑀺𑀯𑀺𑀲𑀬𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄𑀢𑀺 𑀘𑁂? 𑀇𑀤𑀫𑁆𑀧𑀺 𑀢𑀁𑀲𑀫𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄. 𑀢𑀣𑀸𑀭𑀽𑀧𑁂𑀦 𑀳𑀺 𑀓𑀫𑁆𑀫𑀼𑀦𑀸 𑀢𑁂 𑀦𑀺𑀩𑁆𑀩𑀢𑁆𑀢𑀸. 𑀬𑀣𑀸 𑀦𑀺𑀭𑀬𑀤𑀼𑀓𑁆𑀔𑁂𑀦 𑀅𑀩𑀸𑀥𑀺𑀢𑀸 𑀏𑀯 𑀳𑀼𑀢𑁆𑀯𑀸 𑀦𑁂𑀭𑀬𑀺𑀓𑁂 𑀬𑀸𑀢𑁂𑀦𑁆𑀢𑀺, 𑀦 𑀘𑁂𑀢𑁆𑀢𑀓𑁂𑀦 𑀩𑀸𑀳𑀺𑀭𑀯𑀺𑀲𑀬𑀸𑀪𑀸𑀯𑁄 𑀬𑀼𑀚𑁆𑀚𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀢𑀸𑀬 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀧𑀼𑀭𑀺𑀲𑁂𑀲𑀼 𑀯𑀺𑀪𑀢𑁆𑀢𑀲𑀪𑀸𑀯𑀢𑁆𑀢𑀸. 𑀢𑀣𑀸 𑀳𑀺 𑀏𑀓𑀘𑁆𑀘𑀲𑁆𑀲 𑀤𑁆𑀯𑀸𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘 𑀇𑀝𑁆𑀞𑀁 𑀏𑀓𑀘𑁆𑀘𑀲𑁆𑀲 𑀅𑀦𑀺𑀝𑁆𑀞𑀁, 𑀏𑀓𑀘𑁆𑀘𑀲𑁆𑀲 𑀘 𑀅𑀦𑀺𑀝𑁆𑀞𑀁 𑀏𑀓𑀘𑁆𑀘𑀲𑁆𑀲 𑀇𑀝𑁆𑀞𑀁 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀤𑁂𑀓𑁂 𑀯𑀤𑀦𑁆𑀢𑀺 𑁋 ‘‘𑀦𑀢𑁆𑀣𑀺 𑀓𑀫𑁆𑀫𑀯𑀲𑁂𑀦 𑀢𑁂𑀚𑀲𑀸 𑀧𑀭𑀽𑀧𑀢𑀸𑀧𑀦’’𑀦𑁆𑀢𑀺𑀆𑀤𑀺, 𑀢𑀤𑀧𑀸𑀳𑀢𑀁 𑀳𑁄𑀢𑀺. 𑀬𑀁 𑀧𑀦 𑀯𑀤𑀦𑁆𑀢𑀺 𑁋 ‘‘𑀅𑀦𑁂𑀭𑀬𑀺𑀓𑀸𑀦𑀁 𑀦𑁂𑀲𑀁 𑀓𑀣𑀁 𑀢𑀢𑁆𑀣 𑀲𑀫𑁆𑀪𑀯𑁄’’𑀢𑀺 𑀦𑀺𑀭𑀬𑁂 𑀦𑁂𑀭𑀬𑀺𑀓𑀸𑀦𑀁 𑀬𑀸𑀢𑀦𑀸𑀲𑀩𑁆𑀪𑀸𑀯𑀢𑁄. 𑀦𑁂𑀭𑀬𑀺𑀓𑀲𑀢𑁆𑀢𑀬𑀸𑀢𑀦𑀸𑀬𑁄𑀕𑁆𑀬𑀜𑁆𑀳𑀺 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀁 𑀓𑀫𑁆𑀫𑀁 𑀢𑀸𑀤𑀺𑀲𑀦𑀺𑀓𑀦𑁆𑀢𑀺𑀯𑀺𑀦𑀸𑀫𑀺𑀢𑀁 𑀦𑀺𑀭𑀬𑀝𑁆𑀞𑀸𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑁂 𑀘 𑀦𑁂𑀭𑀬𑀺𑀓𑁂𑀳𑀺 𑀅𑀥𑀺𑀓𑀢𑀭𑀩𑀮𑀸𑀭𑁄𑀳𑀧𑀭𑀺𑀡𑀸𑀳𑀸 𑀅𑀢𑀺𑀯𑀺𑀬 𑀪𑀬𑀸𑀦𑀓𑀤𑀲𑁆𑀲𑀦𑀸 𑀓𑀼𑀭𑀽𑀭𑀢𑀭𑀧𑀬𑁄𑀕𑀸 𑀘 𑀳𑁄𑀦𑁆𑀢𑀺. 𑀏𑀢𑁂𑀦𑁂𑀯 𑀢𑀢𑁆𑀣 𑀦𑁂𑀭𑀬𑀺𑀓𑀸𑀦𑀁 𑀯𑀺𑀩𑀸𑀥𑀓𑀓𑀸𑀓𑀲𑀼𑀦𑀔𑀸𑀤𑀻𑀦𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀺 𑀲𑀁𑀯𑀡𑁆𑀡𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀣𑀁 𑀅𑀜𑁆𑀜𑀕𑀢𑀺𑀓𑁂𑀳𑀺 𑀅𑀜𑁆𑀜𑀕𑀢𑀺𑀓𑀩𑀸𑀥𑀦𑀦𑁆𑀢𑀺 𑀘 𑀦 𑀯𑀢𑁆𑀢𑀩𑁆𑀩𑀁 𑀅𑀜𑁆𑀜𑀢𑁆𑀣𑀸𑀧𑀺 𑀢𑀣𑀸 𑀤𑀲𑁆𑀲𑀦𑀢𑁄. 𑀬𑀁 𑀧𑀦𑁂𑀓𑁂 𑀯𑀤𑀦𑁆𑀢𑀺 𑁋 ‘‘𑀅𑀲𑀢𑁆𑀢𑀲𑀪𑀸𑀯𑀸 𑀏𑀯 𑀦𑀺𑀭𑀬𑀧𑀸𑀮𑀸 𑀦𑀺𑀭𑀬𑀲𑀼𑀦𑀔𑀸𑀤𑀬𑁄 𑀘𑀸’’𑀢𑀺 𑀢𑀫𑁆𑀧𑀺 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀅𑀜𑁆𑀜𑀢𑁆𑀣 𑀢𑀣𑀸 𑀅𑀤𑀲𑁆𑀲𑀦𑀢𑁄. 𑀦 𑀳𑀺 𑀓𑀸𑀘𑀺 𑀅𑀢𑁆𑀣𑀺 𑀢𑀸𑀤𑀺𑀲𑀻 𑀥𑀫𑁆𑀫𑀧𑁆𑀧𑀯𑀢𑁆𑀢𑀺, 𑀬𑀸 𑀅𑀲𑀢𑁆𑀢𑀲𑀪𑀸𑀯𑀸, 𑀲𑀫𑁆𑀧𑀢𑀺𑀲𑀢𑁆𑀢𑁂𑀳𑀺 𑀅𑀧𑁆𑀧𑀬𑁄𑀚𑀺𑀢𑀸 𑀘 𑀲𑀢𑁆𑀢𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀻 𑀤𑀺𑀝𑁆𑀞𑀧𑀼𑀩𑁆𑀩𑀸. 𑀧𑁂𑀢𑀸𑀦𑀁 𑀧𑀸𑀦𑀻𑀬𑀦𑀺𑀯𑀸𑀭𑀓𑀸𑀦𑀁 𑀤𑀡𑁆𑀟𑀸𑀤𑀺𑀳𑀢𑁆𑀣𑀧𑀼𑀭𑀺𑀲𑀸𑀦𑀫𑁆𑀧𑀺 𑀲𑀩𑁆𑀪𑀸𑀯𑁂, 𑀅𑀲𑀢𑁆𑀢𑀪𑀸𑀯𑁂 𑀘 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀺. 𑀲𑀼𑀧𑀺𑀦𑁄𑀧𑀖𑀸𑀢𑁄𑀧𑀺 𑀅𑀢𑁆𑀣𑀺, 𑀓𑀺𑀘𑁆𑀘𑀲𑀫𑀢𑁆𑀣𑀢𑀸 𑀧𑀦 𑀅𑀧𑁆𑀧𑀫𑀸𑀡𑀁 𑀤𑀲𑁆𑀲𑀦𑀸𑀤𑀺𑀫𑀢𑁆𑀢𑁂𑀦𑀧𑀺 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄. 𑀢𑀣𑀸 𑀳𑀺 𑀲𑀼𑀧𑀺𑀦𑁂 𑀆𑀳𑀸𑀭𑀽𑀧𑀪𑁄𑀕𑀸𑀤𑀺𑀦𑀸 𑀦 𑀅𑀢𑁆𑀣𑀲𑀺𑀤𑁆𑀥𑀺, 𑀇𑀤𑁆𑀥𑀺𑀦𑀺𑀫𑁆𑀫𑀸𑀦𑀭𑀽𑀧𑀁 𑀧𑀦𑁂𑀢𑁆𑀣 𑀮𑀤𑁆𑀥𑀧𑀭𑀺𑀳𑀸𑀭𑀁 𑀇𑀤𑁆𑀥𑀺𑀯𑀺𑀲𑀬𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄. 𑀇𑀥𑀸𑀧𑀺 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄𑀢𑀺 𑀘𑁂? 𑀢𑀁 𑀦, 𑀅𑀲𑀺𑀤𑁆𑀥𑀢𑁆𑀢𑀸. 𑀦𑁂𑀭𑀬𑀺𑀓𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀢𑁄 𑀦𑀺𑀭𑀬𑀧𑀸𑀮𑀸𑀢𑀺 𑀅𑀲𑀺𑀤𑁆𑀥𑀫𑁂𑀢𑀁, 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀧𑀸𑀴𑀺𑀢𑁄 𑀘 𑀢𑁂𑀲𑀁 𑀲𑀢𑁆𑀢𑀪𑀸𑀯𑁄 𑀏𑀯 𑀲𑀺𑀤𑁆𑀥𑁄𑀢𑀺. 𑀲𑀓𑁆𑀓𑀸 𑀳𑀺 𑀯𑀢𑁆𑀢𑀼𑀁, ‘‘𑀲𑀢𑁆𑀢𑀲𑀗𑁆𑀔𑀸𑀢𑀸 𑀦𑀺𑀭𑀬𑀧𑀸𑀮𑀲𑀜𑁆𑀜𑀺𑀢𑀸 𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀲𑀸𑀪𑀺𑀲𑀦𑁆𑀥𑀺𑀓𑀧𑀭𑀽𑀧𑀖𑀸𑀢𑀻 𑀅𑀢𑁆𑀣𑀺 𑀓𑀺𑀘𑁆𑀘𑀲𑀩𑁆𑀪𑀸𑀯𑀢𑁄 𑀑𑀚𑀸𑀳𑀸𑀭𑀸𑀤𑀺𑀭𑀓𑁆𑀔𑀲𑀲𑀦𑁆𑀢𑀢𑀺 𑀯𑀺𑀬𑀸’’𑀢𑀺. 𑀅𑀪𑀺𑀲𑀦𑁆𑀥𑀺𑀧𑀼𑀩𑁆𑀩𑀓𑀢𑀸 𑀘𑁂𑀢𑁆𑀣 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀢𑀣𑀸 𑀢𑀣𑀸 𑀅𑀪𑀺𑀲𑀦𑁆𑀥𑀺𑀬𑀸 𑀬𑀸𑀢𑀦𑀢𑁄, 𑀢𑀢𑁄 𑀏𑀯 𑀦 𑀲𑀗𑁆𑀖𑀸𑀢𑀧𑀩𑁆𑀩𑀢𑀸𑀤𑀻𑀳𑀺 𑀅𑀦𑁂𑀓𑀦𑁆𑀢𑀺𑀓𑀢𑀸. 𑀬𑁂 𑀧𑀦 𑀯𑀤𑀦𑁆𑀢𑀺 𑁋 ‘‘𑀪𑀽𑀢𑀯𑀺𑀲𑁂𑀲𑀸 𑀏𑀯 𑀏𑀢𑁂 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀺𑀲𑁂𑀲𑀯𑀦𑁆𑀢𑁄 𑀪𑁂𑀭𑀯𑀸𑀓𑀸𑀭𑀸 ‘𑀦𑀭𑀓𑀧𑀸𑀮𑀸’𑀢𑀺 𑀲𑀫𑀜𑁆𑀜𑀁 𑀮𑀪𑀦𑁆𑀢𑀻’’𑀢𑀺. 𑀢𑀤𑀲𑀺𑀤𑁆𑀥𑀁 𑀉𑀚𑀼𑀓𑀫𑁂𑀯 𑀧𑀸𑀴𑀺𑀬𑀁, 𑁋 ‘‘𑀅𑀢𑁆𑀣𑀺 𑀦𑀺𑀭𑀬𑁂𑀲𑀼 𑀦𑀺𑀭𑀬𑀧𑀸𑀮𑀸’’𑀢𑀺 (𑀓𑀣𑀸. 𑁮𑁬𑁬) 𑀯𑀸𑀤𑀲𑁆𑀲 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸.

𑀅𑀧𑀺𑀘 𑀬𑀣𑀸 𑀅𑀭𑀺𑀬𑀯𑀺𑀦𑀬𑁂 𑀦𑀭𑀓𑀧𑀸𑀮𑀸𑀦𑀁 𑀪𑀽𑀢𑀫𑀢𑁆𑀢𑀢𑀸 𑀅𑀲𑀺𑀤𑁆𑀥𑀸, 𑀢𑀣𑀸 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀯𑀸𑀤𑀺𑀦𑁄𑀧𑀺 𑀢𑁂𑀲𑀁 𑀪𑀽𑀢𑀫𑀢𑁆𑀢𑀢𑀸 𑀅𑀲𑀺𑀤𑁆𑀥𑀸𑀯 𑀲𑀩𑁆𑀩𑀲𑁄 𑀭𑀽𑀧𑀥𑀫𑁆𑀫𑀸𑀦𑀁 𑀅𑀢𑁆𑀣𑀺 𑀪𑀸𑀯𑀲𑁆𑀲𑁂𑀯 𑀅𑀧𑁆𑀧𑀝𑀺𑀚𑀸𑀦𑀦𑀢𑁄. 𑀦 𑀳𑀺 𑀢𑀲𑁆𑀲 𑀪𑀽𑀢𑀸𑀦𑀺 𑀦𑀸𑀫 𑀧𑀭𑀫𑀢𑁆𑀣𑀢𑁄 𑀲𑀦𑁆𑀢𑀺. 𑀬𑀤𑀺 𑀧𑀭𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀺, 𑀅𑀣 𑀓𑀲𑁆𑀫𑀸 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀺 𑀧𑀝𑀺𑀓𑁆𑀔𑀺𑀧𑀢𑀻𑀢𑀺? 𑀢𑀺𑀝𑁆𑀞𑀢𑁂𑀲𑀸 𑀅𑀦𑀯𑀝𑁆𑀞𑀺𑀢𑀢𑀓𑁆𑀓𑀸𑀦𑀁 𑀅𑀧𑁆𑀧𑀳𑀻𑀦𑀲𑀫𑁆𑀫𑁄𑀳𑀯𑀺𑀧𑀮𑁆𑀮𑀸𑀲𑀸𑀦𑀁 𑀯𑀸𑀤𑀯𑀻𑀫𑀁𑀲𑀸, 𑀏𑀯𑀁, ‘‘𑀅𑀢𑁆𑀣𑁂𑀯 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸’’𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀲𑀢𑀺 𑀘 𑀦𑁂𑀲𑀁 𑀲𑀩𑁆𑀪𑀸𑀯𑁂, 𑀅𑀲𑀢𑀺𑀧𑀺 𑀩𑀸𑀳𑀺𑀭𑁂 𑀯𑀺𑀲𑀬𑁂 𑀦𑀭𑀓𑁂 𑀯𑀺𑀬 𑀤𑁂𑀲𑀸𑀤𑀺𑀦𑀺𑀬𑀫𑁄 𑀳𑁄𑀢𑀻𑀢𑀺 𑀯𑀸𑀤𑁄 𑀦 𑀲𑀺𑀚𑁆𑀛𑀢𑀺, 𑀲𑀢𑀺 𑀏𑀯 𑀧𑀦 𑀩𑀸𑀳𑀺𑀭𑁂 𑀯𑀺𑀲𑀬𑁂 𑀤𑁂𑀲𑀸𑀤𑀺𑀦𑀺𑀬𑀫𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀤𑁂𑀯𑀤𑀽𑀢𑀲𑀭𑀸𑀧𑀦𑀯𑀲𑁂𑀦 𑀲𑀢𑁆𑀢𑁂 𑀬𑀣𑀽𑀧𑀘𑀺𑀢𑁂 𑀧𑀼𑀜𑁆𑀜𑀓𑀫𑁆𑀫𑁂 𑀬𑀫𑁂𑀢𑀺 𑀦𑀺𑀬𑀫𑁂𑀢𑀻𑀢𑀺 𑀬𑀫𑁄, 𑀢𑀲𑁆𑀲 𑀬𑀫𑀲𑁆𑀲 𑀯𑁂𑀫𑀸𑀦𑀺𑀓𑀧𑁂𑀢𑀸𑀦𑀁 𑀭𑀸𑀚𑀪𑀸𑀯𑀢𑁄 𑀭𑀜𑁆𑀜𑁄. 𑀢𑁂𑀦𑀸𑀳 𑁋 ‘‘𑀬𑀫𑀭𑀸𑀚𑀸 𑀦𑀸𑀫 𑀯𑁂𑀫𑀸𑀦𑀺𑀓𑀧𑁂𑀢𑀭𑀸𑀚𑀸’’𑀢𑀺. 𑀓𑀫𑁆𑀫𑀯𑀺𑀧𑀸𑀓𑀦𑁆𑀢𑀺 𑀅𑀓𑀼𑀲𑀮𑀓𑀫𑁆𑀫𑀯𑀺𑀧𑀸𑀓𑀁. 𑀯𑁂𑀫𑀸𑀦𑀺𑀓𑀧𑁂𑀢𑀸𑀢𑀺 𑀓𑀡𑁆𑀳𑀲𑀼𑀓𑁆𑀓𑀯𑀲𑁂𑀦 𑀫𑀺𑀲𑁆𑀲𑀓𑀓𑀫𑁆𑀫𑀁 𑀓𑀢𑁆𑀯𑀸 𑀯𑀺𑀦𑀺𑀧𑀸𑀢𑀺𑀓𑀤𑁂𑀯𑀢𑀸 𑀯𑀺𑀬 𑀲𑀼𑀓𑁆𑀓𑁂𑀦 𑀓𑀫𑁆𑀫𑀼𑀦𑀸 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀢𑀣𑀸 𑀳𑀺 𑀢𑁂 𑀫𑀕𑁆𑀕𑀨𑀮𑀪𑀸𑀕𑀺𑀦𑁄𑀧𑀺 𑀳𑁄𑀦𑁆𑀢𑀺, 𑀧𑀯𑀢𑁆𑀢𑀺𑀬𑀁 𑀧𑀦 𑀓𑀫𑁆𑀫𑀸𑀦𑀼𑀭𑀽𑀧𑀁 𑀓𑀤𑀸𑀘𑀺 𑀧𑀼𑀜𑁆𑀜𑀨𑀮𑀁, 𑀓𑀤𑀸𑀘𑀺 𑀅𑀧𑀼𑀜𑁆𑀜𑀨𑀮𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀺. 𑀬𑁂𑀲𑀁 𑀧𑀦 𑀅𑀭𑀺𑀬𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀲𑀁 𑀫𑀕𑁆𑀕𑀸𑀥𑀺𑀕𑀫𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀼𑀜𑁆𑀜𑀨𑀮𑀁 𑀧𑀼𑀩𑁆𑀩𑁂 𑀯𑀺𑀬 𑀓𑀝𑀼𑀓𑀁 𑀦 𑀳𑁄𑀢𑀺. 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀁 𑀫𑀼𑀤𑀼𑀓𑀫𑁂𑀯 𑀳𑁄𑀢𑀻𑀢𑀺 𑀅𑀧𑀭𑁂. 𑀥𑀫𑁆𑀫𑀺𑀓𑁄 𑀭𑀸𑀚𑀸𑀢𑀺 𑀏𑀢𑁆𑀣 𑀢𑀲𑁆𑀲 𑀥𑀫𑁆𑀫𑀺𑀓𑀪𑀸𑀯𑁄 𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀺𑀬 𑀉𑀧𑁆𑀧𑀢𑁆𑀢𑀺𑀦𑀺𑀬𑀫𑀺𑀢𑀥𑀫𑁆𑀫𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑀸𑀭𑁂𑀲𑀽𑀢𑀺 𑀅𑀯𑀻𑀘𑀺𑀫𑀳𑀸𑀦𑀭𑀓𑀲𑁆𑀲 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼.

𑀚𑀸𑀢𑀺𑀥𑀫𑁆𑀫𑁄𑀢𑀺 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀚𑀸𑀢𑀺𑀧𑀓𑀢𑀺𑀓𑁄. 𑀢𑁂𑀦𑀸𑀳 ‘‘𑀚𑀸𑀢𑀺𑀲𑀪𑀸𑀯𑁄’’𑀢𑀺. 𑀲𑀪𑀸𑀯𑁄 𑀘 𑀦𑀸𑀫 𑀢𑁂𑀚𑁄𑀥𑀸𑀢𑀼𑀬𑀸 𑀉𑀡𑁆𑀳𑀢𑀸 𑀯𑀺𑀬 𑀦 𑀓𑀤𑀸𑀘𑀺𑀧𑀺 𑀯𑀺𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀅𑀧𑀭𑀺𑀫𑀼𑀢𑁆𑀢𑁄 𑀚𑀸𑀢𑀺𑀬𑀸’’𑀢𑀺𑀆𑀤𑀺.

𑁨𑁬𑁩. 𑀇𑀤𑀸𑀦𑀺 𑀚𑀸𑀢𑀺𑀬𑀸 𑀤𑁂𑀯𑀤𑀽𑀢𑀪𑀸𑀯𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁, ‘‘𑀤𑀳𑀭𑀓𑀼𑀫𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫𑀸𑀢𑀺 𑀯𑀸𑀘𑀸𑀬 𑀅𑀯𑀤𑀦𑁆𑀢𑁄𑀧𑀺 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀏𑀯𑀁 𑀯𑀤𑀦𑁆𑀢𑁄 𑀯𑀺𑀬 𑀳𑁄𑀢𑀺 𑀯𑀺𑀜𑁆𑀜𑀽𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀚𑀸𑀢𑀺 𑀆𑀕𑀫𑀺𑀲𑁆𑀲𑀢𑀻𑀢𑀺 𑀏𑀯𑀁 𑀲𑀁𑀓𑀺𑀮𑀺𑀝𑁆𑀞𑀚𑁂𑀕𑀼𑀘𑁆𑀙𑀅𑀲𑀫𑀢𑁆𑀣𑀤𑀳𑀭𑀸𑀯𑀢𑁆𑀣𑀸 𑀚𑀸𑀢𑀺 𑀢𑀼𑀫𑁆𑀳𑀸𑀓𑀁 𑀆𑀕𑀫𑀺𑀲𑁆𑀲𑀢𑀺. 𑀓𑀸𑀫𑀜𑁆𑀘𑀸𑀬𑀁 𑀆𑀕𑀢𑀸 𑀏𑀯, 𑀲𑀸 𑀧𑀦 𑀅𑀢𑀻𑀢𑀸𑀦𑀸𑀕𑀢𑀸𑀬 𑀉𑀧𑀭𑀺𑀧𑀺 𑀆𑀕𑀫𑀦𑀸𑀬 𑀧𑀬𑁄𑀕𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀅𑀦𑀸𑀕𑀢𑀸𑀬 𑀦 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀚𑀸𑀢𑀺 𑀆𑀕𑀫𑀺𑀲𑁆𑀲𑀢𑀻’’𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀇𑀢𑀺 𑀢𑀲𑁆𑀲𑀸…𑀧𑁂… 𑀓𑀭𑁄𑀣𑀸’’𑀢𑀺. 𑀢𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀯𑀺𑀜𑁆𑀜𑀽𑀦𑀁 𑀯𑁂𑀤𑀯𑀢𑁆𑀣𑀼𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑀊𑀭𑀼𑀩𑀮𑀦𑁆𑀢𑀺 𑀊𑀭𑀼𑀩𑀮𑀻. 𑀢𑁂𑀦 𑀤𑀽𑀭𑁂𑀧𑀺 𑀕𑀫𑀦𑀸𑀕𑀫𑀦𑀮𑀗𑁆𑀖𑀦𑀸𑀤𑀺𑀲𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀺, 𑀩𑀸𑀳𑀼𑀩𑀮𑀦𑁆𑀢𑀺 𑀧𑀦 𑀇𑀫𑀺𑀦𑀸 𑀳𑀢𑁆𑀣𑁂𑀳𑀺 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑀫𑀢𑁆𑀣𑀢𑀁, 𑀚𑀯𑀕𑁆𑀕𑀳𑀡𑁂𑀦 𑀯𑁂𑀕𑀲𑁆𑀲 𑀧𑀯𑀢𑁆𑀢𑀺𑀲𑀫𑀢𑁆𑀣𑀢𑀁. 𑀅𑀦𑁆𑀢𑀭𑀳𑀺𑀢𑀸 𑀦𑀝𑁆𑀞𑀸. 𑀲𑁂𑀲𑀁 𑀧𑀞𑀫𑀤𑁂𑀯𑀤𑀽𑀢𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀯𑀺𑀯𑀺𑀥𑀁 𑀤𑀼𑀓𑁆𑀔𑀁 𑀆𑀤𑀳𑀢𑀻𑀢𑀺 𑀩𑁆𑀬𑀸𑀥𑀺, 𑀯𑀺𑀲𑁂𑀲𑁂𑀦 𑀯𑀸 𑀆𑀥𑀻𑀬𑀢𑀺 𑀏𑀢𑁂𑀦𑀸𑀢𑀺 𑀩𑁆𑀬𑀸𑀥𑀺, 𑀢𑁂𑀦 𑀩𑁆𑀬𑀸𑀥𑀺𑀦𑀸. 𑀅𑀪𑀺𑀳𑀢𑁄𑀢𑀺 𑀩𑀸𑀥𑀺𑀢𑁄, 𑀉𑀧𑀤𑁆𑀤𑀼𑀢𑁄𑀢𑀺 𑀅𑀢𑁆𑀣𑁄.

𑁨𑁬𑁫. 𑀓𑀸𑀭𑀡𑀸 𑀦𑀸𑀫 ‘‘𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀪𑁂𑀤𑀸 𑀅𑀥𑀺𑀓𑀧𑀻𑀴𑀸 𑀓𑀭𑀻𑀬𑀢𑀺 𑀏𑀢𑀸𑀬𑀸’’𑀢𑀺 𑀓𑀢𑁆𑀯𑀸 𑀬𑀸𑀢𑀦𑀸, 𑀲𑀸 𑀏𑀯 𑀓𑀸𑀭𑀡𑀺𑀓𑁂𑀳𑀺 𑀓𑀸𑀢𑀩𑁆𑀩𑀝𑁆𑀞𑁂𑀦 𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀓𑀸𑀭𑀡𑀸 𑀬𑀸𑀢𑀦𑀸𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁄.

𑁨𑁬𑁬. 𑀩𑀳𑀼𑀁 𑀧𑀸𑀧𑀁 𑀓𑀢𑀦𑁆𑀢𑀺 𑀩𑀳𑀼𑀲𑁄 𑀧𑀸𑀧𑀁 𑀓𑀢𑀁. 𑀢𑁂𑀦 𑀧𑀸𑀧𑀲𑁆𑀲 𑀩𑀳𑀼𑀮𑀻𑀓𑀭𑀡𑀫𑀸𑀳. 𑀩𑀳𑀽𑀢𑀺 𑀯𑀸 𑀫𑀳𑀦𑁆𑀢𑀁. 𑀫𑀳𑀢𑁆𑀣𑁄𑀧𑀺 𑀳𑀺 𑀩𑀳𑀼𑀲𑀤𑁆𑀤𑁄 𑀤𑀺𑀲𑁆𑀲𑀢𑀺, ‘‘𑀩𑀳𑀼 𑀯𑀢 𑀓𑀢𑀁 𑀅𑀲𑁆𑀲𑀸’’𑀢𑀺𑀆𑀤𑀻𑀲𑀼, 𑀕𑀭𑀼𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄𑀢𑀺 𑀕𑀭𑀼𑀓𑀁 𑀩𑀳𑀼𑀮𑀁 𑀯𑀸 𑀧𑀸𑀧𑀁 𑀓𑀢𑁆𑀯𑀸 𑀞𑀺𑀢𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯, 𑀦 𑀬𑀫𑀧𑀼𑀭𑀺𑀲𑁂𑀳𑀺 𑀬𑀫𑀲𑁆𑀲 𑀲𑀦𑁆𑀢𑀺𑀓𑀁 𑀦𑀻𑀬𑀢𑀺. 𑀧𑀭𑀺𑀢𑁆𑀢𑀦𑁆𑀢𑀺 𑀧𑀫𑀸𑀡𑀧𑀭𑀺𑀢𑁆𑀢𑀢𑀸𑀬 𑀓𑀸𑀮𑀧𑀭𑀺𑀢𑁆𑀢𑀢𑀸𑀬 𑀘 𑀧𑀭𑀺𑀢𑁆𑀢𑀁, 𑀧𑀼𑀭𑀺𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀕𑀭𑀼𑀦𑁆𑀢𑀺 𑀅𑀢𑁆𑀣𑁄, 𑀤𑀼𑀢𑀺𑀬𑀲𑁆𑀫𑀺𑀁 𑀅𑀩𑀳𑀼𑀮𑀦𑁆𑀢𑀺. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁, ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀤𑀡𑁆𑀟𑀫𑁂𑀯. 𑀅𑀦𑀼𑀯𑀺𑀚𑁆𑀚𑀺𑀢𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸. 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀦𑁆𑀢𑀺 𑀅𑀝𑁆𑀝𑀓𑀭𑀡𑀝𑁆𑀞𑀸𑀦𑀁. 𑀧𑀭𑀺𑀢𑁆𑀢𑀧𑀸𑀧𑀓𑀫𑁆𑀫𑀸𑀢𑀺 𑀤𑀼𑀩𑁆𑀩𑀮𑀧𑀸𑀧𑀓𑀫𑁆𑀫𑀸. 𑀢𑁂 𑀳𑀺 𑀧𑀸𑀧𑀓𑀫𑁆𑀫𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑀢𑁄 𑀓𑀢𑀽𑀧𑀘𑀺𑀢𑀲𑁆𑀲 𑀘 𑀑𑀓𑀸𑀲𑀸𑀭𑀳𑀓𑀼𑀲𑀮𑀓𑀫𑁆𑀫𑀲𑁆𑀲 𑀩𑀮𑀯𑀪𑀸𑀯𑀢𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀲𑀭𑀦𑁆𑀢𑀺.

𑀆𑀓𑀸𑀲𑀘𑁂𑀢𑀺𑀬𑀦𑁆𑀢𑀺 𑀕𑀺𑀭𑀺𑀲𑀺𑀔𑀭𑁂 𑀯𑀺𑀯𑀝𑀗𑁆𑀕𑀡𑁂 𑀓𑀢𑀘𑁂𑀢𑀺𑀬𑀁. 𑀅𑀕𑁆𑀕𑀺𑀚𑀸𑀮𑀲𑀤𑁆𑀤𑀦𑁆𑀢𑀺 ‘‘𑀧𑀝𑀧𑀝𑀸’’𑀢𑀺 𑀧𑀯𑀢𑁆𑀢𑀫𑀸𑀦𑀁 𑀅𑀕𑁆𑀕𑀺𑀚𑀸𑀮𑀸𑀬 𑀲𑀤𑁆𑀤𑀁 𑀲𑀼𑀢𑁆𑀯𑀸, ‘‘𑀫𑀬𑀸 𑀢𑀤𑀸 𑀆𑀓𑀸𑀲𑀘𑁂𑀢𑀺𑀬𑁂 𑀧𑀽𑀚𑀺𑀢𑀭𑀢𑁆𑀢𑀧𑀝𑀸 𑀯𑀺𑀬𑀸’’𑀢𑀺 𑀅𑀢𑁆𑀢𑀦𑁄 𑀧𑀽𑀚𑀺𑀢𑀧𑀝𑀁 𑀅𑀦𑀼𑀲𑁆𑀲𑀭𑀺. 𑀧𑀜𑁆𑀘𑀳𑀺𑀧𑀺 𑀦 𑀲𑀭𑀢𑀻𑀢𑀺 𑀩𑀮𑀯𑀢𑀸 𑀧𑀸𑀧𑀓𑀫𑁆𑀫𑁂𑀦 𑀩𑁆𑀬𑀸𑀫𑁄𑀳𑀺𑀢𑁄 𑀧𑀜𑁆𑀘 𑀲𑀜𑁆𑀜𑀸𑀡𑀸𑀦𑀺 𑀦 𑀕𑀡𑁆𑀳𑀸𑀢𑀺. 𑀢𑀼𑀡𑁆𑀳𑀻 𑀳𑁄𑀢𑀺 𑀓𑀫𑁆𑀫𑀸𑀭𑀳𑁄 𑀅𑀬𑀦𑁆𑀢𑀺 𑀢𑀢𑁆𑀣 𑀧𑀢𑀻𑀓𑀸𑀭𑀁 𑀅𑀧𑀲𑁆𑀲𑀦𑁆𑀢𑁄.

𑁨𑁬𑁭. 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀉𑀩𑁆𑀩𑁂𑀥𑁂𑀦𑀧𑀺 𑀬𑁄𑀚𑀦𑀲𑀢𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀦𑀯𑀦𑀯𑀬𑁄𑀚𑀦𑀺𑀓𑀸 𑀳𑁄𑀢𑀺 𑀧𑀼𑀣𑀼𑀮𑀢𑁄. 𑀫𑀳𑀸𑀦𑀺𑀭𑀬𑀲𑁆𑀲 𑀫𑀳𑀦𑁆𑀢𑀢𑁆𑀢𑀸 𑀢𑀣𑀸𑀧𑀺 𑀪𑀺𑀢𑁆𑀢𑀺𑀲𑀢𑀁 𑀬𑁄𑀚𑀦𑀲𑀳𑀲𑁆𑀲𑀁 𑀳𑁄𑀢𑀻𑀢𑀺 𑀉𑀲𑁆𑀲𑀤𑀲𑁆𑀲 𑀲𑀩𑁆𑀩𑀲𑁆𑀲 𑀧𑀭𑀺𑀓𑁆𑀔𑁂𑀧𑀢𑁄 ‘‘𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁨𑁬𑁮. 𑀛𑀸𑀬𑀢𑀻𑀢𑀺 𑀧𑀝𑀺𑀧𑀸𑀓𑀢𑀺𑀓𑀁 𑀳𑁄𑀢𑀺. 𑀢𑀸𑀤𑀺𑀲𑀫𑁂𑀯𑀸𑀢𑀺 𑀧𑀼𑀭𑀺𑀫𑀲𑀤𑀺𑀲𑀢𑁆𑀢𑀸 ‘‘𑀉𑀩𑁆𑀪𑀢𑀁 𑀲𑀤𑀺𑀲𑀫𑁂𑀯 𑀳𑁄𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀩𑀳𑀼𑀲𑀫𑁆𑀧𑀢𑁆𑀢𑁄𑀢𑀺 𑀯𑀸 𑀩𑀳𑀼𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄 𑀳𑁄𑀢𑀺.

𑀙𑀦𑁆𑀦𑀁 𑀚𑀸𑀮𑀸𑀦𑀦𑁆𑀢𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀉𑀩𑁆𑀪𑀢𑀸𑀦𑀁 𑀙𑀦𑁆𑀦𑀁 𑀚𑀸𑀮𑀸𑀦𑀁. 𑀲𑀢𑁆𑀢𑀸𑀦𑀁 𑀦𑀺𑀭𑀦𑁆𑀢𑀭𑀢𑀸 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀓𑀢𑀸𑀦𑀜𑁆𑀘 𑀩𑀳𑀼𑀪𑀸𑀯𑀢𑁄 𑀚𑀸𑀮𑀸𑀦𑀁 𑀢𑀸𑀯 𑀲𑀢𑁆𑀢𑀸𑀦𑀜𑁆𑀘 𑀦𑀺𑀭𑀦𑁆𑀢𑀭𑀢𑁆𑀢𑀸 𑀅𑀯𑀻𑀘𑀺 𑀳𑁄𑀢𑀼; 𑀤𑀼𑀓𑁆𑀔𑀲𑁆𑀲 𑀧𑀦 𑀓𑀣𑀁 𑀦𑀺𑀭𑀦𑁆𑀢𑀭𑀢𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀓𑀸𑀬𑀤𑁆𑀯𑀸𑀭𑁂…𑀧𑁂… 𑀏𑀓𑀁 𑀤𑀼𑀓𑁆𑀔𑀲𑀳𑀕𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀯𑀚𑁆𑀚𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁 𑀲𑀦𑁆𑀢𑀻𑀭𑀡𑀁 𑀯𑁄𑀝𑁆𑀞𑀩𑁆𑀩𑀦𑀁 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀻𑀢𑀺 𑀙 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀬𑀤𑀺𑀧𑀺 𑀢𑀢𑁆𑀣 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑀸𑀦𑀺𑀧𑀺 𑀧𑀯𑀢𑁆𑀢𑀦𑁆𑀢𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀧𑀺 𑀮𑀤𑁆𑀥𑀸𑀯𑀲𑀭𑀸; 𑀤𑀼𑀓𑁆𑀔𑀯𑁂𑀤𑀦𑀸 𑀧𑀦 𑀩𑀮𑀯𑀢𑀭𑀸 𑀦𑀺𑀲𑀺𑀢𑀦𑀺𑀲𑀺𑀢𑁂𑀦 𑀢𑀺𑀔𑀺𑀡𑁂𑀦 𑀲𑀢𑁆𑀣𑁂𑀦 𑀦𑀺𑀭𑀦𑁆𑀢𑀭𑀁 𑀲𑀭𑀻𑀭𑀁 𑀙𑀺𑀦𑁆𑀤𑀦𑁆𑀢𑀻 𑀯𑀺𑀬 𑀤𑀼𑀓𑁆𑀔𑀁 𑀉𑀧𑀦𑁂𑀦𑁆𑀢𑀻 𑀯𑀺𑀬 𑀢𑀸 𑀯𑁂𑀤𑀦𑀸 𑀅𑀪𑀺𑀪𑀯𑀦𑁆𑀢𑀻 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀻 𑀉𑀧𑁆𑀧𑀚𑁆𑀚𑀦𑁆𑀢𑀻 𑀦𑀺𑀭𑀦𑁆𑀢𑀭𑀸 𑀯𑀺𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀦𑀼𑀤𑀳𑀦𑀩𑀮𑀯𑀢𑀸𑀬𑀸’’𑀢𑀺𑀆𑀤𑀺. 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀢𑀺 𑀯𑀸 𑀢𑀢𑁆𑀣 𑀅𑀢𑀺𑀯𑀺𑀬 𑀅𑀦𑀺𑀝𑁆𑀞𑀨𑀮𑀢𑀸𑀬 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀤𑀼𑀓𑁆𑀔𑀸𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀇𑀝𑁆𑀞𑀨𑀮𑀩𑀳𑀼𑀢𑀸𑀬 𑀇𑀝𑁆𑀞𑀸𑀭𑀫𑁆𑀫𑀡𑀸 𑀛𑀸𑀦𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑁂 𑀘 𑀲𑀼𑀕𑀢𑀺𑀪𑀯𑁂 𑀘 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀲𑀼𑀔𑀸𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀤𑀼𑀓𑁆𑀔𑀲𑁆𑀲 𑀦𑀺𑀭𑀦𑁆𑀢𑀭𑀢𑀸𑀬 𑀅𑀯𑀻𑀘𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁬𑁯. 𑀏𑀓𑁄 𑀧𑀸𑀤𑁄 𑀫𑀳𑀸𑀦𑀺𑀭𑀬𑁂 𑀳𑁄𑀢𑀺, 𑀏𑀓𑁄 𑀕𑀽𑀣𑀦𑀺𑀭𑀬𑁂 𑀦𑀺𑀧𑀢𑀢𑀺, 𑀓𑀫𑁆𑀫𑀯𑁂𑀕𑀼𑀓𑁆𑀔𑀺𑀢𑁆𑀢𑁄 𑀅𑀦𑁆𑀢𑀭𑀸 𑀧𑀤𑀫𑀸𑀯𑀳𑀢𑀺 𑀲𑁂𑀲𑀸𑀭𑀫𑁆𑀪𑀢𑀸𑀬. 𑀳𑀢𑁆𑀣𑀺𑀕𑀻𑀯𑀧𑁆𑀧𑀫𑀸𑀡𑀸 𑀧𑀭𑀺𑀡𑀸𑀳𑁂𑀦. 𑀏𑀓𑀤𑁄𑀡𑀺𑀓𑀦𑀸𑀯𑀸𑀧𑁆𑀧𑀫𑀸𑀡𑀸 𑀆𑀬𑀸𑀫𑁂𑀦.

𑀧𑁄𑀓𑁆𑀔𑀭𑀧𑀢𑁆𑀢𑀸𑀦𑀻𑀢𑀺 𑀔𑀼𑀭𑀥𑀸𑀭𑀸𑀲𑀤𑀺𑀲𑀸𑀦𑀺 𑀢𑀺𑀔𑀺𑀡𑀕𑁆𑀕𑀸𑀦𑀺 𑀅𑀬𑁄𑀲𑀽𑀮𑀫𑀬𑀸𑀦𑁂𑀯 𑀧𑀤𑀼𑀫𑀧𑀢𑁆𑀢𑀸𑀦𑀺. 𑀳𑁂𑀝𑁆𑀞𑀸 𑀔𑀼𑀭𑀥𑀸𑀭𑀸𑀢𑀺 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸, 𑀯𑁂𑀢𑁆𑀢𑀮𑀢𑀸𑀬𑁄 𑀘 𑀢𑀺𑀔𑀺𑀡𑀥𑀸𑀭𑀓𑀡𑁆𑀝𑀓𑀸 𑀅𑀬𑁄𑀫𑀬𑀸 𑀏𑀯. 𑀢𑁂𑀦𑀸𑀳 𑁋 ‘‘𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸’’𑀢𑀺𑀆𑀤𑀺. 𑀓𑀼𑀲𑀢𑀺𑀡𑀸𑀦𑀻𑀢𑀺 𑀓𑀼𑀲𑀢𑀺𑀡𑀚𑀸𑀢𑀺𑀢𑀸𑀬 𑀢𑀣𑀸 𑀯𑀼𑀢𑁆𑀢𑀸𑀦𑀺. 𑀔𑀭𑀯𑀸𑀮𑀺𑀓𑀸𑀢𑀺 𑀔𑀭𑀸 𑀢𑀺𑀔𑀺𑀡𑀓𑁄𑀝𑀺𑀓𑀸 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸 𑀯𑀸𑀮𑀺𑀓𑀸.

𑁨𑁭𑁦. 𑀤𑀦𑁆𑀢𑁂 𑀲𑀫𑁆𑀨𑀼𑀲𑁂𑀢𑀻𑀢𑀺 𑀳𑁂𑀝𑁆𑀞𑀺𑀫𑀤𑀦𑁆𑀢𑁂 𑀬𑀣𑀸 𑀓𑀺𑀜𑁆𑀘𑀺 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀲𑀼𑀨𑀼𑀲𑀺𑀢𑁂 𑀓𑀭𑁄𑀢𑀺. 𑀢𑀫𑁆𑀩𑀮𑁄𑀳𑀧𑀸𑀦𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀼𑀢𑁆𑀢𑀓𑀸𑀭𑀡𑀢𑁄 𑀧𑀝𑀺𑀮𑁄𑀫𑀢𑁄𑀧𑀺 𑀏𑀯𑀁 𑀓𑀫𑁆𑀫𑀓𑀸𑀭𑀡𑀸𑀦𑀁 𑀓𑀸𑀭𑀡𑀫𑀸𑀳. 𑀤𑀼𑀢𑀺𑀬𑁂𑀦𑀸𑀢𑀺 𑀓𑀼𑀞𑀸𑀭𑀻𑀳𑀺 𑀢𑀘𑁆𑀙𑀦𑁂𑀦. 𑀢𑀢𑀺𑀬𑁂𑀦𑀸𑀢𑀺 𑀯𑀸𑀲𑀻𑀳𑀺 𑀢𑀘𑁆𑀙𑀦𑁂𑀦. 𑀅𑀯𑀺𑀚𑀳𑀺𑀢𑀫𑁂𑀯 𑀲𑀁𑀯𑁂𑀕𑀳𑁂𑀢𑀼𑀢𑀸𑀬 𑀮𑁄𑀓𑀲𑁆𑀲 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀲𑀁𑀯𑀢𑁆𑀢𑀦𑀢𑁄.

𑁨𑁭𑁧. 𑀳𑀻𑀦𑀓𑀸𑀬𑀁 𑀳𑀻𑀦𑀁 𑀯𑀸 𑀅𑀢𑁆𑀢𑀪𑀸𑀯𑀁 𑀉𑀧𑀕𑀢𑀸. 𑀉𑀧𑀸𑀤𑀸𑀦𑁂𑀢𑀺 𑀘𑀢𑀼𑀩𑁆𑀩𑀺𑀥𑁂𑀧𑀺 𑀉𑀧𑀸𑀤𑀸𑀦𑁂. 𑀢𑀁 𑀅𑀢𑁆𑀣𑀢𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑁆𑀕𑀸𑀳𑁄𑀢𑀺 𑀆𑀳 ‘‘𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑀳𑀡𑁂’’𑀢𑀺. 𑀲𑀫𑁆𑀪𑀯𑀢𑀺 𑀚𑀭𑀸𑀫𑀭𑀡𑀁 𑀏𑀢𑁂𑀦𑀸𑀢𑀺 𑀲𑀫𑁆𑀪𑀯𑁄, 𑀉𑀧𑀸𑀤𑀸𑀦𑀦𑁆𑀢𑀺 𑀆𑀳 𑁋 ‘‘𑀚𑀸𑀢𑀺𑀬𑀸 𑀫𑀭𑀡𑀲𑁆𑀲 𑀘 𑀓𑀸𑀭𑀡𑀪𑀽𑀢𑁂’’𑀢𑀺. 𑀅𑀦𑀼𑀧𑀸𑀤𑀸𑀢𑀺 𑀅𑀦𑀼𑀧𑀸𑀤𑀸𑀬. 𑀢𑁂𑀦𑀸𑀳 ‘‘𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸’’𑀢𑀺.

𑀲𑀩𑁆𑀩𑀤𑀼𑀓𑁆𑀔𑀸𑀢𑀺𑀓𑁆𑀓𑀦𑁆𑀢𑀸 𑀦𑀸𑀫𑀸𑀢𑀺 𑀲𑀓𑀮𑀫𑁆𑀧𑀺 𑀯𑀝𑁆𑀝𑀤𑀼𑀓𑁆𑀔𑀁 𑀅𑀢𑀺𑀓𑁆𑀓𑀦𑁆𑀢𑀸 𑀏𑀯 𑀳𑁄𑀦𑁆𑀢𑀺 𑀘𑀭𑀺𑀫𑀘𑀺𑀢𑁆𑀢𑀦𑀺𑀭𑁄𑀥𑁂𑀦 𑀯𑀝𑁆𑀝𑀤𑀼𑀓𑁆𑀔𑀮𑁂𑀲𑀲𑁆𑀲𑀧𑀺 𑀅𑀲𑀫𑁆𑀪𑀯𑀢𑁄.

𑀤𑁂𑀯𑀤𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀼𑀜𑁆𑀜𑀢𑀯𑀕𑁆𑀕𑀯𑀡𑁆𑀡𑀦𑀸.