𑁪. 𑀭𑀸𑀚𑀯𑀕𑁆𑀕𑁄

𑁧. 𑀖𑀝𑀺𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮𑁨. 𑀘𑀭𑀺𑀬𑀦𑁆𑀢𑀺 𑀩𑁄𑀥𑀺𑀘𑀭𑀺𑀬𑀁, 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀢𑀁 𑀩𑁄𑀥𑀺𑀲𑀢𑁆𑀢𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀓𑀸𑀭𑀡𑀦𑁆𑀢𑀺 𑀩𑁄𑀥𑀺𑀧𑀭𑀺𑀧𑀸𑀘𑀦𑀲𑁆𑀲 𑀏𑀓𑀦𑁆𑀢𑀺𑀓𑀁 𑀲𑀼𑀦𑁆𑀤𑀭𑀁 𑀓𑀸𑀭𑀡𑀁, 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀧𑀬𑀺𑀭𑀼𑀧𑀸𑀲𑀦𑀸𑀤𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀜𑁆𑀳𑀺 𑀢𑁂𑀦 𑀲𑀤𑁆𑀥𑀺𑀁 𑀫𑀬𑀸 𑀇𑀥 𑀓𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀫𑀦𑁆𑀤𑀳𑀲𑀺𑀢𑀦𑁆𑀢𑀺 𑀈𑀲𑀓𑀁 𑀳𑀲𑀺𑀢𑀁. 𑀓𑀼𑀳𑀁 𑀓𑀼𑀳𑀦𑁆𑀢𑀺 𑀳𑀸𑀲-𑀲𑀤𑁆𑀤𑀲𑁆𑀲 𑀅𑀦𑀼𑀓𑀭𑀡𑀫𑁂𑀢𑀁. 𑀳𑀝𑁆𑀞𑀧𑀳𑀝𑁆𑀞𑀸𑀓𑀸𑀭𑀫𑀢𑁆𑀢𑀦𑁆𑀢𑀺 𑀳𑀝𑁆𑀞𑀧𑀳𑀝𑁆𑀞𑀫𑀢𑁆𑀢𑀁. 𑀬𑀣𑀸 𑀕𑀳𑀺𑀢𑀲𑀗𑁆𑀓𑁂𑀢𑀸 ‘‘𑀧𑀳𑀝𑁆𑀞𑁄 𑀪𑀕𑀯𑀸’’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, 𑀏𑀯𑀁 𑀆𑀓𑀸𑀭𑀤𑀲𑁆𑀲𑀦𑀫𑀢𑁆𑀢𑀁.

𑀇𑀤𑀸𑀦𑀺 𑀇𑀫𑀺𑀦𑀸 𑀧𑀲𑀗𑁆𑀕𑁂𑀦 𑀢𑀸𑀲𑀁 𑀲𑀫𑀼𑀝𑁆𑀞𑀸𑀦𑀁 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀳𑀲𑀺𑀢𑀜𑁆𑀘 𑀦𑀸𑀫𑁂𑀢’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦𑀧𑀺 𑀳𑀸𑀲𑁄 𑀦 𑀲𑀫𑁆𑀪𑀯𑀢𑀺, 𑀧𑀕𑁂𑀯 𑀤𑁄𑀫𑀦𑀲𑁆𑀲𑀯𑀲𑁂𑀦𑀸𑀢𑀺 𑀆𑀳 ‘‘𑀢𑁂𑀭𑀲𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀳𑀻’’𑀢𑀺. 𑀦𑀦𑀼 𑀘 𑀓𑁂𑀘𑀺 𑀓𑁄𑀥𑀯𑀲𑁂𑀦𑀧𑀺 𑀳𑀲𑀦𑁆𑀢𑀻𑀢𑀺? 𑀦, 𑀢𑁂𑀲𑀫𑁆𑀧𑀺 𑀬𑀁 𑀢𑀁 𑀓𑁄𑀥𑀯𑀢𑁆𑀣𑀼, 𑀢𑀲𑁆𑀲 𑀫𑀬𑀁 𑀤𑀸𑀦𑀺 𑀬𑀣𑀸𑀓𑀸𑀫𑀓𑀸𑀭𑀺𑀢𑀁 𑀆𑀧𑀚𑁆𑀚𑀺𑀲𑁆𑀲𑀸𑀫𑀸𑀢𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀭𑁂𑀦 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦𑁂𑀯 𑀳𑀸𑀲𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄. 𑀢𑁂𑀲𑀽𑀢𑀺 𑀧𑀜𑁆𑀘𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀲𑀼. 𑀩𑀮𑀯𑀸𑀭𑀫𑁆𑀫𑀡𑁂𑀢𑀺 𑀉𑀴𑀸𑀭𑀆𑀭𑀫𑁆𑀫𑀡𑁂 𑀬𑀫𑀓𑀫𑀳𑀸𑀧𑀸𑀝𑀺𑀳𑀸𑀭𑀺𑀬𑀲𑀤𑀺𑀲𑁂. 𑀤𑀼𑀩𑁆𑀩𑀮𑀸𑀭𑀫𑁆𑀫𑀡𑁂𑀢𑀺 𑀅𑀦𑀼𑀴𑀸𑀭𑁂 𑀆𑀭𑀫𑁆𑀫𑀡𑁂. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂…𑀧𑁂… 𑀉𑀧𑁆𑀧𑀸𑀤𑁂𑀲𑀻𑀢𑀺 𑀇𑀤𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀢𑀣𑀸 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀅𑀳𑁂𑀢𑀼𑀓𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀦 𑀪𑀕𑀯𑀢𑁄 𑀲𑀺𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁.

𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 (𑀥. 𑀲. 𑀫𑀽𑀮𑀝𑀻. 𑁫𑁬𑁮) 𑀧𑀦 ‘‘𑀅𑀢𑀻𑀢𑀁𑀲𑀸𑀤𑀻𑀲𑀼 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁 𑀯𑀢𑁆𑀯𑀸 ‘𑀇𑀫𑁂𑀳𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀦𑀺. 𑁬𑁯, 𑁧𑁫𑁬; 𑀘𑀽𑀴𑀦𑀺. 𑀫𑀸𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑀫. 𑁩.𑁫; 𑀦𑁂𑀢𑁆𑀢𑀺. 𑁧𑁫; 𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫; 𑀯𑀺𑀪. 𑀫𑀽𑀮𑀝𑀻. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸; 𑀤𑀻. 𑀦𑀺. 𑀝𑀻. 𑁩.𑁧𑁪𑁧, 𑁩𑁦𑁫) ‘𑀪𑀕𑀯𑀢𑁄 𑀇𑀤𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀯𑀺𑀘𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀺𑀦𑀸 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀫𑁆𑀧𑀺 𑀪𑀕𑀯𑀢𑁄 𑀲𑀺𑀢𑀓𑀭𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲-𑀅𑀦𑀸𑀕𑀢𑀁𑀲-𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀁 𑀅𑀦𑀼𑀯𑀢𑁆𑀢𑀓𑀢𑁆𑀢𑀸 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀬𑁂𑀯𑀸𑀢𑀺, 𑀏𑀯𑀁 𑀧𑀦 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂 𑀲𑀢𑀺 𑀦 𑀓𑁄𑀘𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀦𑀁 𑀯𑀺𑀭𑁄𑀥𑁄. 𑀢𑀣𑀸 𑀳𑀺 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁫𑁬𑁮) ‘‘𑀢𑁂𑀲𑀁 𑀜𑀸𑀡𑀸𑀦𑀁 𑀘𑀺𑀡𑁆𑀡𑀧𑀭𑀺𑀬𑀦𑁆𑀢𑁂 𑀇𑀤𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁆𑀲𑀜𑁆𑀘 𑀏𑀢𑀁 𑀏𑀯𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀆𑀯𑀚𑁆𑀚𑀦𑀲𑁆𑀲𑀧𑀺 𑀪𑀕𑀯𑀢𑁄 𑀧𑀯𑀢𑁆𑀢𑀺 𑀢𑀣𑀸𑀭𑀽𑀧𑁂 𑀓𑀸𑀮𑁂 𑀦 𑀲𑀁𑀬𑀼𑀚𑁆𑀚𑁂𑀬𑁆𑀬, 𑀢𑀲𑁆𑀲𑀧𑀺 𑀳𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸, 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀏𑀯𑀜𑁆𑀘 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀁 𑀉𑀧𑀧𑀦𑁆𑀦𑀁 𑀳𑁄𑀢𑀻’’𑀢𑀺, 𑀦 𑀘 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑁂 𑀢𑀁𑀲𑀫𑀼𑀝𑁆𑀞𑀺𑀢𑀸𑀬 𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀁 𑀆𑀧𑀚𑁆𑀚𑀦𑀪𑀸𑀯𑁄 𑀯𑀺𑀩𑀦𑁆𑀥𑀢𑀻𑀢𑀺 𑀢𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑀸𑀳 ‘‘𑀏𑀯𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀻’’𑀢𑀺. 𑀲𑀢𑁂𑀭𑀺𑀢𑀸 𑀯𑀺𑀚𑁆𑀚𑀼𑀮𑀢𑀸 𑀦𑀸𑀫 𑀲𑀢𑁂𑀭𑀢𑀸𑀯𑀺𑀚𑁆𑀚𑀼𑀮𑀢𑀸. 𑀲𑀸 𑀳𑀺 𑀇𑀢𑀭𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀔𑀡𑀝𑁆𑀞𑀺𑀢𑀺𑀓𑀸 𑀲𑀻𑀖𑀦𑀺𑀭𑁄𑀥𑀸 𑀘 𑀦 𑀳𑁄𑀢𑀺, 𑀅𑀧𑀺𑀘 𑀔𑁄 𑀤𑀦𑁆𑀥𑀦𑀺𑀭𑁄𑀥𑀸, 𑀢𑀜𑁆𑀘 𑀲𑀩𑁆𑀩𑀓𑀸𑀮𑀁 𑀘𑀢𑀼𑀤𑀻𑀧𑀺𑀓𑀫𑀳𑀸𑀫𑁂𑀖𑀢𑁄𑀯 𑀦𑀺𑀘𑁆𑀙𑀭𑀢𑀺 𑀢𑁂𑀦𑀸𑀳 ‘‘𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀫𑀼𑀔𑀢𑁄’’𑀢𑀺. 𑀅𑀬𑀁 𑀓𑀺𑀭 𑀢𑀸𑀲𑀁 𑀭𑀲𑁆𑀫𑀺𑀯𑀝𑁆𑀝𑀻𑀦𑀁 𑀥𑀫𑁆𑀫𑀢𑀸, 𑀬𑀤𑀺𑀤𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀺𑀭𑀯𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀸𑀞𑀕𑁆𑀕𑁂𑀲𑀼𑀬𑁂𑀯 𑀅𑀦𑁆𑀢𑀭𑀥𑀸𑀦𑀁.

𑁨𑁮𑁩. 𑀬𑀤𑀺𑀧𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀜𑁆𑀘 𑀧𑀜𑁆𑀜𑀸𑀧𑀸𑀭𑀫𑀺𑀢𑀸 𑀧𑀭𑀺𑀪𑀸𑀯𑀺𑀢𑀸, 𑀢𑀣𑀸𑀧𑀺 𑀇𑀤𑀸𑀦𑀺 𑀢𑀁 𑀩𑀼𑀤𑁆𑀥𑀦𑁆𑀢𑀭𑀁 𑀢𑀲𑁆𑀲𑀸 𑀧𑀝𑀺𑀧𑀸𑀤𑁂𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀧𑀭𑀺𑀧𑀓𑁆𑀓𑀜𑀸𑀡𑀢𑁆𑀢𑀸’’𑀢𑀺. 𑀓𑀸𑀫𑀜𑁆𑀘𑀲𑁆𑀲 𑀜𑀸𑀡𑀸𑀬 𑀇𑀤𑀸𑀦𑀺𑀧𑀺 𑀧𑀝𑀺𑀧𑀸𑀤𑁂𑀢𑀩𑁆𑀩𑀢𑀸 𑀅𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀦𑀦𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀧𑀲𑀸𑀤𑁂𑀦 𑀲𑀫𑁆𑀪𑀸𑀯𑀦𑀸𑀬 𑀪𑀯𑀺𑀢𑀩𑁆𑀩𑀁 𑀢𑀣𑀸 𑀘𑀺𑀭𑀓𑀸𑀮𑀁 𑀧𑀭𑀺𑀪𑀸𑀯𑀺𑀢𑀢𑁆𑀢𑀸, 𑀓𑀣𑀁 𑀢𑀢𑁆𑀣 𑀳𑀻𑀴𑀦𑀸𑀢𑀺 𑀆𑀳 ‘‘𑀩𑁆𑀭𑀸𑀳𑁆𑀫𑀡𑀓𑀼𑀮𑁂’’𑀢𑀺𑀆𑀤𑀺. 𑀘𑀺𑀭𑀓𑀸𑀮𑀧𑀭𑀺𑀘𑀺𑀢𑀸𑀧𑀺 𑀳𑀺 𑀕𑀼𑀡𑀪𑀸𑀯𑀦𑀸 𑀅𑀧𑁆𑀧𑀓𑁂𑀦𑀧𑀺 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑁂𑀦 𑀯𑀺𑀧𑀭𑀺𑀯𑀢𑁆𑀢𑀢𑀺 𑀅𑀜𑁆𑀜𑀣𑀢𑁆𑀢𑀁 𑀕𑀘𑁆𑀙𑀢𑀺. 𑀢𑁂𑀦 𑀫𑀳𑀸𑀲𑀢𑁆𑀢𑁄𑀧𑀺 𑀚𑀸𑀢𑀺𑀲𑀺𑀤𑁆𑀥𑀸𑀬𑀁 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀚𑀸𑀢𑀺𑀲𑀺𑀤𑁆𑀥𑁂𑀦 𑀫𑀸𑀦𑁂𑀦 𑀏𑀯𑀫𑀸𑀳 𑁋 ‘‘𑀓𑀺𑀁 𑀧𑀦 𑀢𑁂𑀦 𑀫𑀼𑀡𑁆𑀟𑀓𑁂𑀦 𑀲𑀫𑀡𑀓𑁂𑀦 𑀤𑀺𑀝𑁆𑀞𑁂𑀦𑀸’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀢𑀲𑁆𑀫𑀸 𑀅𑀓𑀮𑁆𑀬𑀸𑀡𑀚𑀦𑀁, 𑀆𑀲𑀻𑀯𑀺𑀲𑀫𑀺𑀯𑁄𑀭𑀕𑀁,

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀪𑀽𑀢𑀺𑀓𑀸𑀫𑁄 𑀯𑀺𑀘𑀓𑁆𑀔𑀡𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁭𑁦-𑁧𑁭𑁨);

𑀦𑁆𑀳𑀸𑀦𑀘𑀼𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀓𑀢𑀸 𑀲𑁄𑀢𑁆𑀢𑀺, 𑀓𑀼𑀭𑀼𑀯𑀺𑀦𑁆𑀤𑀕𑀼𑀴𑀺𑀓𑀸, 𑀲𑀸 𑀏𑀯 𑀲𑀺𑀦𑀸𑀬𑀦𑁆𑀢𑀺 𑀓𑀸𑀬𑀁 𑀯𑀺𑀲𑁄𑀥𑁂𑀦𑁆𑀢𑀺 𑀏𑀢𑀸𑀬𑀸𑀢𑀺 𑀲𑀺𑀦𑀸𑀦𑀁. 𑀢𑁂𑀦𑀸𑀳 𑁋 ‘‘𑀲𑁄𑀢𑁆𑀢𑀺 𑀲𑀺𑀦𑀸𑀦𑀦𑁆𑀢𑀺 𑀲𑀺𑀦𑀸𑀦𑀢𑁆𑀣𑀸𑀬 𑀓𑀢𑀲𑁄𑀢𑁆𑀢𑀺’’𑀦𑁆𑀢𑀺.

𑁨𑁮𑁪. 𑀅𑀭𑀺𑀬𑀧𑀭𑀺𑀳𑀸𑀭𑁂𑀦𑀸𑀢𑀺 𑀅𑀭𑀺𑀬𑀸𑀦𑀁 𑀧𑀭𑀺𑀳𑀸𑀭𑁂𑀦, 𑀅𑀦𑀸𑀕𑀸𑀫𑀻𑀦𑀁 𑀦𑁆𑀳𑀸𑀦𑀓𑀸𑀮𑁂 𑀅𑀢𑁆𑀢𑀦𑁄 𑀓𑀸𑀬𑀲𑁆𑀲 𑀧𑀭𑀺𑀳𑀸𑀭𑀦𑀺𑀬𑀸𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀜𑀸𑀡𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀦𑁆𑀦𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀏𑀢𑀤𑀢𑁆𑀣𑀦𑁆𑀢𑀺 ‘‘𑀅𑀳𑀺𑀢𑀦𑀺𑀯𑀸𑀭𑀡𑀁, 𑀳𑀺𑀢𑁂 𑀦𑀺𑀬𑁄𑀚𑀦𑀁 𑀩𑁆𑀬𑀲𑀦𑁂 𑀧𑀭𑀺𑀯𑀚𑁆𑀚𑀦’’𑀦𑁆𑀢𑀺 𑀬𑀤𑀺𑀤𑀁, 𑀏𑀢𑀤𑀢𑁆𑀣𑀁 𑀫𑀺𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀓𑁂𑀘𑀺 ‘‘𑀬𑀸𑀯𑁂𑀢𑁆𑀣 𑀅𑀳𑀼𑀧𑀻’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀬𑀸𑀯 𑀏𑀢𑁆𑀣 𑀓𑁂𑀲𑀕𑁆𑀕𑀕𑀳𑀡𑀁 𑀢𑀸𑀯 𑀅𑀬𑀁 𑀦𑀺𑀩𑀦𑁆𑀥𑁄 𑀅𑀳𑀼𑀧𑀻𑀢𑀺 𑀅𑀢𑁆𑀣𑁄.

𑁨𑁮𑁫. 𑀲𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬𑀸𑀢𑀺 𑀩𑁄𑀥𑀺𑀬𑀸 𑀫𑀳𑀸𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑀧𑀝𑀺𑀧𑀤𑀸𑀬 𑀧𑀽𑀭𑀡𑀪𑀸𑀯𑁂 𑀲𑀢𑀺𑀬𑀸 𑀧𑀝𑀺𑀮𑀸𑀪𑀢𑁆𑀣𑀸𑀬. 𑀇𑀤𑀸𑀦𑀺 𑀢𑀲𑁆𑀲 𑀲𑀢𑀼𑀧𑁆𑀧𑀸𑀤𑀦𑀻𑀬𑀓𑀣𑀸𑀬 𑀧𑀯𑀢𑁆𑀢𑀺𑀢𑀸𑀓𑀸𑀭𑀁 𑀲𑀗𑁆𑀔𑁂𑀧𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦 𑀮𑀸𑀫𑀓𑀝𑁆𑀞𑀸𑀦𑀁 𑀑𑀢𑀺𑀡𑁆𑀡𑀲𑀢𑁆𑀢𑁄𑀢𑀺 𑀇𑀫𑀺𑀦𑀸 𑀫𑀳𑀸𑀲𑀢𑁆𑀢𑀲𑁆𑀲 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑁆𑀯𑀸 𑀏𑀯𑀁 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀲𑁆𑀲 𑀧𑀫𑀸𑀤𑀓𑀺𑀭𑀺𑀬𑀸 𑀦 𑀬𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀸𑀤𑀺𑀲𑀲𑁆𑀲 𑀦𑀸𑀫 𑀧𑀫𑀸𑀤𑀯𑀺𑀳𑀸𑀭𑁄 𑀦 𑀬𑀼𑀢𑁆𑀢𑁄’’𑀢𑀺 𑀆𑀳. 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑁄 𑀢𑁂𑀮𑀧𑁆𑀧𑀤𑀻𑀧𑁄 𑀯𑀺𑀬 𑀯𑀺𑀲𑁂𑀲𑀢𑁄 𑀦𑀺𑀩𑁆𑀩𑀢𑁆𑀢𑀺, 𑀢𑀁 𑀤𑀺𑀲𑁆𑀯𑀸 𑀪𑀕𑀯𑀸 𑀢𑀤𑀦𑀼𑀭𑀽𑀧𑀁 𑀥𑀫𑁆𑀫𑀓𑀣𑀁 𑀓𑀭𑁄𑀦𑁆𑀢𑁄 ‘‘𑀢𑀸𑀤𑀺𑀲𑀲𑁆𑀲…𑀧𑁂… 𑀓𑀣𑁂𑀲𑀻’’𑀢𑀺. 𑀧𑀭𑀲𑀫𑀼𑀤𑁆𑀤𑀯𑀸𑀲𑀻 𑀣𑁂𑀭𑀸 𑀅𑀜𑁆𑀜𑀣𑀸 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑀸𑀬𑀁 𑀩𑀼𑀤𑁆𑀥𑀸𑀦𑀁 𑀪𑀸𑀭𑁄, 𑀬𑀤𑀺𑀤𑀁 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀢𑀣𑀸 𑀥𑀫𑁆𑀫𑀤𑁂𑀲𑀦𑀸 𑀢𑁂𑀲𑀁 𑀫𑀳𑀸𑀪𑀺𑀦𑀻𑀳𑀸𑀭𑀲𑀫𑀦𑀦𑁆𑀢𑀭𑀫𑁆𑀧𑀺 𑀩𑁄𑀥𑀺𑀲𑀫𑁆𑀪𑀸𑀭𑀲𑁆𑀲 𑀲𑀬𑀫𑁆𑀪𑀼𑀜𑀸𑀡𑁂𑀦𑁂𑀯 𑀧𑀝𑀺𑀯𑀺𑀤𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀪𑀸𑀯𑀧𑀯𑁂𑀤𑀦𑀫𑁂𑀯 𑀢𑀲𑁆𑀲 𑀪𑀕𑀯𑀸 𑀅𑀓𑀸𑀲𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀉𑀚𑁆𑀚𑀮𑀦𑁂 𑀧𑀸𑀓𑀝𑀓𑀭𑀲𑀢𑀺𑀧𑀝𑀺𑀮𑀸𑀪𑀸𑀬.

𑁨𑁮𑁬. 𑀜𑀸𑀡𑀜𑁆𑀳𑀺 𑀓𑀺𑀮𑁂𑀲𑀥𑀫𑁆𑀫𑀯𑀺𑀤𑀸𑀮𑀦𑀧𑀤𑀸𑀮𑀦𑁂𑀳𑀺 𑀲𑀺𑀗𑁆𑀕𑀁 𑀯𑀺𑀬𑀸𑀢𑀺 𑀲𑀺𑀗𑁆𑀕𑀁. 𑀢𑀜𑁆𑀳𑀺 𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀢𑁆𑀣𑀫𑁆𑀪𑀺𑀢𑀁 𑀉𑀲𑁆𑀲𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀤𑀪𑀸𑀯𑁂 𑀧𑀢𑀺𑀢𑀁 𑀦𑀸𑀫. 𑀓𑁂𑀘𑀺 𑀧𑀦 𑀯𑀻𑀭𑀺𑀬𑀁 𑀲𑀺𑀗𑁆𑀕𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀺𑀁 𑀲𑀫𑁆𑀫𑀧𑁆𑀧𑀥𑀸𑀦𑀯𑀲𑁂𑀦 𑀧𑀯𑀢𑁆𑀢𑁂 𑀩𑀸𑀳𑀺𑀭𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸𑀧𑀺 𑀫𑀳𑀸𑀲𑀢𑁆𑀢𑀸 𑀯𑀺𑀲𑀼𑀤𑁆𑀥𑀸𑀲𑀬𑀸 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀲𑀫𑀗𑁆𑀕𑀺𑀦𑁄 𑀬𑀣𑀸𑀭𑀳𑀁 𑀕𑀦𑁆𑀣𑀥𑀼𑀭𑀁 𑀯𑀸𑀲𑀥𑀼𑀭𑀜𑁆𑀘 𑀧𑀭𑀺𑀩𑁆𑀭𑀽𑀳𑀬𑀦𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀧𑀕𑁂𑀯 𑀩𑀼𑀤𑁆𑀥𑀲𑀸𑀲𑀦𑁂 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀳𑀻𑀢𑀺 𑀆𑀳 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀧𑀦𑀸’’𑀢𑀺𑀆𑀤𑀺. 𑀯𑀺𑀧𑀲𑁆𑀲𑀦𑀁 𑀩𑁆𑀭𑀽𑀳𑁂𑀦𑁆𑀢𑀸 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀬𑀸𑀯 𑀅𑀦𑀼𑀮𑁄𑀫𑀜𑀸𑀡𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀻’’𑀢𑀺, 𑀅𑀦𑀼𑀮𑁄𑀫𑀜𑀸𑀡𑀢𑁄 𑀑𑀭𑀫𑁂𑀯 𑀯𑀺𑀧𑀲𑁆𑀲𑀦𑀁 𑀞𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀨𑀮𑀢𑁆𑀣𑀁 𑀯𑀸𑀬𑀸𑀫𑀁 𑀦 𑀓𑀭𑁄𑀦𑁆𑀢𑀺 𑀧𑀜𑁆𑀜𑀸𑀧𑀸𑀭𑀫𑀺𑀢𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀩𑁆𑀪𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀅𑀧𑀭𑀺𑀧𑀓𑁆𑀓𑀢𑁆𑀢𑀸 𑀘.

𑁨𑁮𑁭. 𑀣𑁂𑀭𑁂𑀳𑀻𑀢𑀺 𑀯𑀼𑀤𑁆𑀥𑀢𑀭𑁂𑀳𑀺. 𑀦𑀺𑀯𑀸𑀲𑁂 𑀲𑀢𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀩𑁆𑀩𑀚𑀺𑀢𑁄, 𑀢𑀢𑁆𑀣𑁂𑀯 𑀦𑀺𑀯𑀸𑀲𑁂. 𑀯𑀧𑁆𑀧𑀓𑀸𑀮𑀢𑁄𑀢𑀺 𑀲𑀲𑁆𑀲𑀸𑀦𑀁 𑀯𑀧𑁆𑀧𑀓𑀸𑀮𑀢𑁄. 𑀧𑀼𑀩𑁆𑀩𑁂 𑀯𑀺𑀬 𑀢𑀢𑁄 𑀧𑀭𑀁 𑀢𑀺𑀔𑀺𑀡𑁂𑀦 𑀲𑀽𑀭𑀺𑀬𑀲𑀦𑁆𑀢𑀸𑀧𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀯𑀧𑁆𑀧𑀓𑀸𑀮𑁂 𑀯𑀺𑀢𑀸𑀦𑀁 𑀯𑀺𑀬 𑀉𑀧𑀭𑀺 𑀯𑀢𑁆𑀣𑀓𑀺𑀮𑀜𑁆𑀚𑀁 𑀩𑀦𑁆𑀥𑀺𑀢𑁆𑀯𑀸’’𑀢𑀺. 𑀧𑀼𑀝𑀓𑁂𑀢𑀺 𑀓𑀮𑀸𑀧𑁂.

𑁨𑁮𑁮. 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀳𑁂𑀢𑀼𑀓𑀢𑁆𑀢𑀸 𑀥𑀫𑁆𑀫𑀧𑁆𑀧𑀢𑁆𑀢𑀺𑀬𑀸 𑀧𑀤𑁂𑀲𑀢𑁄 𑀧𑀭𑀺𑀜𑁆𑀜𑀸𑀯𑀢𑁆𑀣𑀼𑀓𑀸𑀧𑀺 𑀅𑀭𑀺𑀬𑀸 𑀉𑀧𑀝𑁆𑀞𑀺𑀢𑁂 𑀘𑀺𑀢𑁆𑀢𑀯𑀺𑀖𑀸𑀢𑀧𑀘𑁆𑀘𑀬𑁂 𑀬𑀤𑁂𑀢𑀁 𑀦𑀸𑀢𑀺𑀲𑀸𑀯𑀚𑁆𑀚𑀁, 𑀢𑀤𑁂𑀯𑀁 𑀕𑀡𑁆𑀳𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸𑀢𑀺 𑀆𑀳 𑁋 ‘‘𑀅𑀮𑀸𑀪𑀁 𑀆𑀭𑀩𑁆𑀪 𑀘𑀺𑀢𑁆𑀢𑀜𑁆𑀜𑀣𑀢𑁆𑀢’’𑀦𑁆𑀢𑀺𑀆𑀤𑀺. 𑀲𑁄𑀢𑀺 𑀓𑀺𑀓𑀻 𑀓𑀸𑀲𑀺𑀭𑀸𑀚𑀸. 𑀩𑁆𑀭𑀸𑀳𑁆𑀫𑀡𑀪𑀢𑁆𑀢𑁄𑀢𑀺 𑀩𑁆𑀭𑀸𑀳𑁆𑀫𑀡𑁂𑀲𑀼 𑀪𑀢𑁆𑀢𑁄. 𑀤𑁂𑀯𑁂𑀢𑀺 𑀩𑁆𑀭𑀸𑀳𑁆𑀫𑀡𑁂 𑀲𑀦𑁆𑀥𑀸𑀬𑀸𑀳. 𑀪𑀽𑀫𑀺𑀤𑁂𑀯𑀸𑀢𑀺 𑀢𑁂𑀲𑀁 𑀲𑀫𑀜𑁆𑀜𑀸, 𑀢𑀤𑀸 𑀩𑁆𑀭𑀸𑀳𑁆𑀫𑀡𑀕𑀭𑀼𑀓𑁄 𑀮𑁄𑀓𑁄. 𑀢𑀤𑀸 𑀳𑀺 𑀓𑀲𑁆𑀲𑀧𑁄𑀧𑀺 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀥𑀻𑀢𑀼 𑀅𑀯𑀡𑁆𑀡𑀁 𑀯𑀢𑁆𑀯𑀸𑀢𑀺, ‘‘𑀫𑀳𑀸𑀭𑀸𑀚, 𑀢𑀯 𑀥𑀻𑀢𑀸 𑀩𑁆𑀭𑀸𑀳𑁆𑀫𑀡𑀲𑀫𑀬𑀁 𑀧𑀳𑀸𑀬 𑀫𑀼𑀡𑁆𑀟𑀧𑀸𑀲𑀡𑁆𑀟𑀺𑀓𑀲𑀫𑀬𑀁 𑀕𑀡𑁆𑀳𑀻’’𑀢𑀺𑀆𑀤𑀺𑀦𑀸 𑀭𑀸𑀚𑀧𑀼𑀢𑁆𑀢𑀺𑀬𑀸 𑀅𑀕𑀼𑀡𑀁 𑀯𑀢𑁆𑀯𑀸. 𑀯𑀭𑀁 𑀕𑀡𑁆𑀳𑀺𑀁𑀲𑀼 𑀜𑀸𑀢𑀓𑀸. 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀲𑀺 ‘‘𑀫𑀸 𑀫𑁂 𑀯𑀘𑀦𑀁 𑀫𑀼𑀲𑀸 𑀅𑀳𑁄𑀲𑀺, 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺.

𑀧𑀸𑀯𑀦𑀅𑀲𑁆𑀫𑀦𑀬𑀦𑀯𑀲𑁂𑀦 𑀲𑀫𑁆𑀫𑀸 𑀧𑀸𑀯𑀻𑀓𑀢𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀢𑀡𑁆𑀟𑀼𑀮𑀸𑀦𑀺. 𑀧𑀸𑀴𑀺𑀬𑀁 𑀢𑀡𑁆𑀟𑀼𑀮𑀧𑀝𑀺𑀪𑀲𑁆𑀢𑀸𑀦𑀻𑀢𑀺 𑀢𑀡𑁆𑀟𑀼𑀮𑀔𑀡𑁆𑀟𑀸𑀦𑀺. 𑀫𑀼𑀕𑁆𑀕𑀧𑀝𑀺𑀪𑀲𑁆𑀢𑀓𑀴𑀸𑀬𑀧𑀝𑀺𑀪𑀲𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨𑁮𑁯. 𑀓𑁄 𑀦𑀼 𑀔𑁄𑀢𑀺 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 𑁋 ‘‘𑀓𑀼𑀳𑀺𑀁 𑀦𑀼 𑀔𑁄’’𑀢𑀺 𑀧𑀸𑀭𑀺𑀧𑀽𑀭𑀺𑀁 𑀬𑁄𑀚𑀻𑀬𑀦𑁆𑀢𑀺 𑀩𑁆𑀬𑀜𑁆𑀚𑀦𑀪𑁄𑀚𑀦𑀸𑀦𑀺 𑀏𑀢𑁆𑀣𑀸𑀢𑀺 𑀧𑀭𑀺𑀬𑁄𑀕𑁄, 𑀢𑀢𑁄 𑀧𑀭𑀺𑀬𑁄𑀕𑀸. 𑀢𑁂𑀦𑀸𑀳 ‘‘𑀲𑀽𑀧𑀪𑀸𑀚𑀦𑀢𑁄’’𑀢𑀺. 𑀲𑀜𑁆𑀜𑀁 𑀤𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀲𑀫𑁆𑀧𑀸𑀤𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑁄 𑀉𑀧𑀝𑁆𑀞𑀸𑀓𑁄𑀢𑀺 𑀪𑀕𑀯𑀢𑁄 𑀆𑀭𑁄𑀘𑁂𑀣𑀸𑀢𑀺 𑀲𑀜𑁆𑀜𑀁 𑀤𑀢𑁆𑀯𑀸. 𑀅𑀢𑀺𑀯𑀺𑀲𑁆𑀲𑀢𑁆𑀣𑁄𑀢𑀺 𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑁄. 𑀧𑀜𑁆𑀘𑀯𑀡𑁆𑀡𑀸𑀢𑀺 𑀔𑀼𑀤𑁆𑀤𑀺𑀓𑀸𑀤𑀺𑀯𑀲𑁂𑀦 𑀧𑀜𑁆𑀘𑀧𑁆𑀧𑀓𑀸𑀭𑀸.

𑁨𑁯𑁦. 𑀓𑀺𑀦𑁆𑀢𑀺 𑀦𑀺𑀲𑁆𑀲𑀓𑁆𑀓𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀓𑀲𑁆𑀫𑀸𑀢𑀺 𑀅𑀢𑁆𑀣𑁄? 𑀥𑀫𑁆𑀫𑀺𑀓𑁄𑀢𑀺 𑀇𑀫𑀺𑀦𑀸 𑀆𑀕𑀫𑀦𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺. 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑁂 𑀪𑀢𑁆𑀢𑀲𑀤𑀺𑀲𑁄𑀢𑀺 𑀇𑀫𑀺𑀦𑀸 𑀉𑀧𑀸𑀲𑀓𑁂𑀦 𑀲𑀢𑁆𑀣𑀼 𑀧𑀭𑀺𑀘𑁆𑀘𑀢𑁆𑀢𑀪𑀸𑀯𑀁 𑀢𑀢𑁆𑀣 𑀲𑀢𑁆𑀣𑀼𑀦𑁄 𑀘 𑀅𑀧𑀭𑀺𑀲𑀗𑁆𑀓𑀢𑀁 𑀤𑀲𑁆𑀲𑁂𑀢𑀺. 𑀲𑀺𑀓𑁆𑀔𑀸𑀧𑀤𑀯𑁂𑀮𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀥𑀫𑁆𑀫𑀲𑁆𑀲𑀸𑀫𑀺𑀪𑀸𑀯𑀢𑁄 𑀲𑀺𑀓𑁆𑀔𑀸𑀧𑀤𑀫𑀭𑀺𑀬𑀸𑀤𑀸 𑀦𑀸𑀫 𑀦𑀢𑁆𑀣𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂, 𑀧𑀓𑀢𑀺𑀯𑀚𑁆𑀚𑁂 𑀧𑀦 𑀲𑁂𑀢𑀼𑀖𑀸𑀢𑁄 𑀏𑀯.

𑁨𑁯𑁧. 𑀙𑀤𑀦𑀝𑁆𑀞𑀸𑀦𑁂 𑀬𑀤𑀸𑀓𑀸𑀲𑀁, 𑀢𑀤𑁂𑀯 𑀢𑀲𑁆𑀲 𑀕𑁂𑀳𑀲𑁆𑀲 𑀙𑀤𑀦𑀦𑁆𑀢𑀺 𑀆𑀓𑀸𑀲𑀘𑁆𑀙𑀤𑀦𑀁. 𑀧𑀓𑀢𑀺𑀬𑀸 𑀉𑀢𑀼𑀨𑀭𑀡𑀫𑁂𑀯𑀸𑀢𑀺 𑀙𑀸𑀤𑀺𑀢𑁂 𑀬𑀸𑀤𑀺𑀲𑀁 𑀉𑀢𑀼, 𑀙𑀤𑀦𑁂 𑀉𑀢𑁆𑀢𑀺𑀡𑀪𑀸𑀯𑁂𑀧𑀺 𑀢𑀫𑁆𑀳𑀺 𑀕𑁂𑀳𑁂 𑀢𑀸𑀤𑀺𑀲𑀫𑁂𑀯 𑀉𑀢𑀼𑀨𑀭𑀡𑀁 𑀅𑀳𑁄𑀲𑀺. 𑀢𑁂𑀲𑀁𑀬𑁂𑀯𑀸𑀢𑀺 𑀢𑁂𑀲𑀁 𑀖𑀝𑀺𑀓𑀸𑀭𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀏𑀯.

𑁨𑁯𑁨. ‘‘𑀘𑀢𑀲𑁆𑀲𑁄 𑀫𑀼𑀝𑁆𑀞𑀺𑀬𑁄 𑀏𑀓𑁄 𑀓𑀼𑀟𑀼𑀯𑁄, 𑀘𑀢𑁆𑀢𑀸𑀭𑁄 𑀓𑀼𑀟𑀼𑀯𑀸 𑀏𑀓𑁄 𑀧𑀢𑁆𑀣𑁄, 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀏𑀓𑁄 𑀆𑀴𑁆𑀳𑀓𑁄, 𑀘𑀢𑁆𑀢𑀸𑀭𑁄 𑀆𑀴𑁆𑀳𑀓𑀸 𑀏𑀓𑀁 𑀤𑁄𑀡𑀁, 𑀘𑀢𑁆𑀢𑀸𑀭𑀺 𑀤𑁄𑀡𑀸𑀦𑀺 𑀏𑀓𑀸 𑀫𑀸𑀦𑀺𑀓𑀸, 𑀘𑀢𑀲𑁆𑀲𑁄 𑀫𑀸𑀦𑀺𑀓𑀸 𑀏𑀓𑀸 𑀔𑀸𑀭𑀻, 𑀯𑀻𑀲𑀢𑀺 𑀔𑀸𑀭𑀺𑀓𑀸 𑀏𑀓𑁄 𑀯𑀸𑀳𑁄𑀢𑀺 𑀢𑀤𑁂𑀯 𑀏𑀓𑀲𑀓𑀝’’𑀦𑁆𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀤𑀻𑀲𑀼 (𑀲𑀼. 𑀦𑀺. 𑀅𑀝𑁆𑀞. 𑁨.𑁬𑁬𑁨) 𑀯𑀼𑀢𑁆𑀢𑀁, 𑀇𑀥 𑀧𑀦 ‘‘𑀤𑁆𑀯𑁂 𑀲𑀓𑀝𑀸𑀦𑀺 𑀏𑀓𑁄 𑀯𑀸𑀳𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀮𑀨𑀸𑀡𑀺𑀢𑀸𑀤𑀺𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀧𑁆𑀧𑀺𑀆𑀤𑀺𑀁 𑀫𑀭𑀺𑀘𑀸𑀤𑀺𑀓𑀝𑀼𑀓𑀪𑀡𑁆𑀟𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀸𑀳𑀁 𑀭𑀜𑁆𑀜𑀸 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀓𑀼𑀢𑁄 𑀧𑀭𑀺𑀧𑁆𑀨𑀲𑁆𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀘𑁆𑀘𑀺𑀢𑁆𑀯𑀸𑀢𑀺 𑀦𑀘𑁆𑀘𑀁 𑀤𑀢𑁆𑀯𑀸.

𑀖𑀝𑀺𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯𑁩. 𑀣𑀽𑀮𑀫𑁂𑀯 𑀣𑀼𑀮𑁆𑀮𑀁, 𑀣𑀼𑀮𑁆𑀮𑀸 𑀯𑀺𑀧𑀼𑀮𑀸 𑀫𑀳𑀦𑁆𑀢𑀸 𑀓𑁄𑀝𑁆𑀞𑀸 𑀚𑀸𑀢𑀸 𑀇𑀫𑀲𑁆𑀲𑀸𑀢𑀺 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀦𑁆𑀢𑀺 𑀑𑀤𑀦𑀧𑀽𑀧𑀧𑀳𑀽𑀢𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀦𑀺𑀕𑀫𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀣𑀼𑀮𑁆𑀮𑀓𑁄𑀝𑁆𑀞𑀦𑁆𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑁂𑀦 𑀧𑀸𑀴𑀺𑀬𑀁 𑀇𑀓-𑀲𑀤𑁆𑀤𑁂𑀦 𑀧𑀤𑀯𑀟𑁆𑀠𑀦𑀁 𑀓𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁨𑁯𑁪. 𑀭𑀝𑁆𑀞𑀧𑀸𑀮𑁄𑀢𑀺 𑀇𑀤𑀁 𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀦𑀸𑀫𑀁. 𑀧𑀯𑁂𑀡𑀺𑀯𑀲𑁂𑀦 𑀆𑀕𑀢𑀓𑀼𑀮𑀯𑀁𑀲𑀸𑀦𑀼𑀕𑀢𑀦𑁆𑀢𑀺 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸 𑀭𑀝𑁆𑀞𑀧𑀸𑀮𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀦𑁆𑀥𑀸𑀭𑁂𑀢𑀼𑀦𑁆𑀢𑀺 𑀯𑀺𑀦𑀸𑀲𑀦𑀢𑁄 𑀧𑀼𑀩𑁆𑀩𑁂 𑀬𑀸𑀤𑀺𑀲𑀁, 𑀢𑀣𑁂𑀯 𑀲𑀫𑁆𑀫𑀤𑁂𑀯 𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑁄. 𑀲𑀤𑁆𑀥𑀸𑀢𑀺 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀲𑀫𑁆𑀧𑀦𑁆𑀦𑀸. 𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸𑀢𑀺 𑀲𑀺𑀓𑁆𑀔𑀸𑀓𑀸𑀫𑀢𑀸𑀬 𑀏𑀢𑀤𑀕𑁆𑀕𑁂 𑀞𑀧𑀺𑀬𑀫𑀸𑀦𑀁 𑀤𑀺𑀲𑁆𑀯𑀸.

𑀲𑀳 𑀭𑀜𑁆𑀜𑀸𑀢𑀺 𑀲𑀭𑀸𑀚𑀺𑀓𑀁, 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀭𑀸𑀚𑀧𑀭𑀺𑀲𑀁. 𑀘𑀸𑀢𑀼𑀯𑀡𑁆𑀡𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸𑀤𑀺𑀘𑀢𑀼𑀯𑀡𑁆𑀡𑀲𑀫𑀼𑀤𑀸𑀬𑀁. 𑀧𑁄𑀲𑁂𑀢𑀼𑀦𑁆𑀢𑀺 𑀯𑀤𑁆𑀥𑁂𑀢𑀼𑀁 𑀤𑀸𑀦𑀸𑀤𑀻𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀡𑁆𑀳𑀺𑀢𑀼𑀁. 𑀬𑀁 𑀓𑀼𑀮𑀁. 𑀧𑀳𑁄𑀲𑁆𑀲𑀢𑀻𑀢𑀺 𑀲𑀓𑁆𑀔𑀺𑀲𑁆𑀲𑀢𑀺.

𑀢𑁂𑀦 𑀢𑁂𑀦 𑀫𑁂 𑀉𑀧𑀧𑀭𑀺𑀓𑁆𑀔𑀢𑁄𑀢𑀺 ‘‘𑀓𑀸𑀫𑀸 𑀦𑀸𑀫𑁂𑀢𑁂 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸’’𑀢𑀺 (𑀫. 𑀦𑀺. 𑁧.𑁨𑁩𑁪; 𑀧𑀸𑀘𑀺. 𑁪𑁧𑁭; 𑀫𑀳𑀸𑀦𑀺. 𑁩, 𑁬) 𑀘 𑀆𑀤𑀺𑀦𑀸 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀉𑀧𑀧𑀭𑀺𑀓𑁆𑀔𑀢𑁄 𑀯𑀻𑀫𑀁𑀲𑀦𑁆𑀢𑀲𑁆𑀲 𑀫𑀬𑁆𑀳𑀁 𑀏𑀯𑀁 𑀳𑁄𑀢𑀺 𑀏𑀯𑀁 𑀉𑀧𑀝𑁆𑀞𑀸𑀢𑀺. 𑀲𑀺𑀓𑁆𑀔𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀥𑀺𑀲𑀻𑀮𑀸𑀤𑀺𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑁂𑀝𑁆𑀞𑀘𑀭𑀺𑀬𑀁. 𑀅𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀸𑀤𑀦𑁂𑀦 𑀅𑀔𑀡𑁆𑀟𑀁 𑀮𑀓𑁆𑀔𑀡𑀯𑀘𑀦𑀜𑁆𑀳𑁂𑀢𑀁. 𑀓𑀜𑁆𑀘𑀺𑀧𑀺 𑀲𑀺𑀓𑁆𑀔𑁂𑀓𑀤𑁂𑀲𑀁 𑀅𑀲𑁂𑀲𑁂𑀢𑁆𑀯𑀸 𑀏𑀓𑀦𑁆𑀢𑁂𑀦𑁂𑀯 𑀧𑀭𑀺𑀧𑀽𑀭𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁. 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀫𑁆𑀧𑀺 𑀲𑀁𑀓𑀺𑀮𑁂𑀲𑀫𑀮𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀘𑁆𑀘𑀦𑁆𑀢𑀫𑁂𑀯 𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀧𑀭𑀺𑀳𑀭𑀺𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁. 𑀢𑀢𑁄 𑀏𑀯 𑀲𑀗𑁆𑀔𑀁 𑀯𑀺𑀬 𑀮𑀺𑀔𑀺𑀢𑀦𑁆𑀢𑀺 𑀲𑀗𑁆𑀔𑀮𑀺𑀔𑀺𑀢𑀁. 𑀢𑁂𑀦𑀸𑀳 ‘‘𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲’’𑀦𑁆𑀢𑀺. 𑀤𑀸𑀞𑀺𑀓𑀸𑀧𑀺 𑀫𑀲𑁆𑀲𑀼𑀕𑁆𑀕𑀳𑀡𑁂𑀦𑁂𑀯 𑀕𑀳𑁂𑀢𑁆𑀯𑀸 ‘‘𑀫𑀲𑁆𑀲𑀼’’𑀢𑁆𑀯𑁂𑀯 𑀯𑀼𑀢𑁆𑀢𑀁, 𑀉𑀢𑁆𑀢𑀭𑀸𑀥𑀭𑀫𑀲𑁆𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀲𑀸𑀬𑁂𑀦 𑀭𑀢𑁆𑀢𑀸𑀦𑀺 𑀓𑀸𑀲𑀸𑀬𑀸𑀦𑀺. 𑀅𑀦𑀦𑀼𑀜𑁆𑀜𑀸𑀢𑀁 𑀧𑀼𑀢𑁆𑀢𑀁 𑀦 𑀧𑀩𑁆𑀩𑀸𑀚𑁂𑀢𑀺 ‘‘𑀫𑀸𑀢𑀸𑀧𑀺𑀢𑀽𑀦𑀁 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀜𑁆𑀜𑀣𑀢𑁆𑀢𑀁 𑀫𑀸 𑀳𑁄𑀢𑀽’’𑀢𑀺. 𑀢𑀣𑀸 𑀳𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀢𑀣𑀸 𑀯𑀭𑁄 𑀤𑀺𑀦𑁆𑀦𑁄.

𑁨𑁯𑁫. 𑀧𑀺𑀬𑀸𑀬𑀺𑀢𑀩𑁆𑀩𑀢𑁄 𑀧𑀺𑀬𑁄𑀢𑀺 𑀆𑀳 ‘‘𑀧𑀻𑀢𑀺𑀚𑀦𑀓𑁄’’𑀢𑀺. 𑀫𑀦𑀲𑁆𑀲 𑀅𑀧𑁆𑀧𑀸𑀬𑀦𑀢𑁄 𑀫𑀦𑀸𑀧𑁄𑀢𑀺 𑀆𑀳 ‘‘𑀫𑀦𑀯𑀟𑁆𑀠𑀦𑀓𑁄’’𑀢𑀺. 𑀲𑀼𑀔𑁂𑀥𑀺𑀢𑁄 𑀢𑀭𑀼𑀡𑀤𑀸𑀭𑀓𑀓𑀸𑀮𑁂. 𑀢𑀢𑁄 𑀧𑀭𑀜𑁆𑀘 𑀲𑀧𑁆𑀧𑀺𑀔𑀻𑀭𑀸𑀤𑀺𑀲𑀸𑀤𑀼𑀭𑀲𑀫𑀦𑀼𑀜𑁆𑀜𑀪𑁄𑀚𑀦𑀸𑀤𑀺𑀆𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀔𑀧𑀭𑀺𑀪𑀢𑁄. 𑀅𑀣 𑀯𑀸 𑀤𑀴𑁆𑀳𑀪𑀢𑁆𑀢𑀺𑀓𑀥𑀸𑀢𑀺𑀚𑀦𑀸𑀤𑀺𑀧𑀭𑀺𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀧𑀭𑀺𑀘𑁆𑀙𑀤𑀲𑀫𑁆𑀧𑀢𑁆𑀢𑀺𑀬𑀸 𑀘 𑀉𑀴𑀸𑀭𑀧𑀡𑀻𑀢𑀲𑀼𑀔𑀧𑀘𑁆𑀘𑀬𑀽𑀧𑀳𑀸𑀭𑁂𑀳𑀺 𑀘 𑀲𑀼𑀔𑁂𑀥𑀺𑀢𑁄, 𑀅𑀓𑀺𑀘𑁆𑀙𑁂𑀦𑁂𑀯 𑀤𑀼𑀓𑁆𑀔𑀧𑁆𑀧𑀘𑁆𑀘𑀬𑀯𑀺𑀦𑁄𑀤𑀦𑁂𑀦 𑀲𑀼𑀔𑀧𑀭𑀺𑀪𑀢𑁄. 𑀅𑀚𑁆𑀛𑀢𑁆𑀢𑀺𑀓𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀯𑀸 𑀲𑀼𑀔𑁂𑀥𑀺𑀢𑁄, 𑀩𑀸𑀳𑀺𑀭𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀔𑀧𑀭𑀺𑀪𑀢𑁄. 𑀓𑀲𑁆𑀲𑀘𑀻𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀓𑀺𑀜𑁆𑀘𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀣𑀸 𑀳𑀺 ‘‘𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀮𑀪𑀸𑀕𑀁 𑀤𑀼𑀓𑁆𑀔𑀲𑁆𑀲 𑀦 𑀚𑀸𑀦𑀸𑀲𑀻’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀯𑀁 𑀲𑀦𑁆𑀢𑁂𑀢𑀺 𑀦𑀦𑀼 𑀫𑀬𑀁 𑀭𑀝𑁆𑀞𑀧𑀸𑀮 𑀫𑀭𑀡𑀸𑀤𑀻𑀲𑀼 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀅𑀧𑁆𑀧𑀢𑀻𑀓𑀸𑀭𑁂𑀦 𑀫𑀭𑀡𑁂𑀦𑀧𑀺 𑀢𑀬𑀸 𑀅𑀓𑀸𑀫𑀓𑀸𑀧𑀺 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫, 𑀏𑀯𑀁 𑀲𑀢𑀺. 𑀬𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀓𑀺𑀁 𑀧𑀦𑀸𑀢𑀺 𑀏𑀢𑁆𑀣 𑀓𑀺𑀦𑁆𑀢𑀺 𑀓𑀸𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑁂𑀦 𑀧𑀦 𑀓𑀸𑀭𑀡𑁂𑀦𑀸’’𑀢𑀺.

𑁨𑁯𑁬. 𑀧𑀭𑀺𑀘𑀸𑀭𑁂𑀳𑀻𑀢𑀺 𑀧𑀭𑀺𑀢𑁄 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀲𑀓𑀁 𑀯𑀺𑀲𑀬𑁂𑀲𑀼 𑀘𑀸𑀭𑁂𑀳𑀺. 𑀢𑁂𑀦𑀸𑀳 ‘‘𑀇𑀢𑁄 𑀘𑀺𑀢𑁄 𑀘 𑀉𑀧𑀦𑁂𑀳𑀻’’𑀢𑀺. 𑀧𑀭𑀺𑀘𑀸𑀭𑁂𑀳𑀻𑀢𑀺 𑀯𑀸 𑀲𑀼𑀔𑀽𑀧𑀓𑀭𑀡𑁂𑀳𑀺 𑀅𑀢𑁆𑀢𑀸𑀦𑀁 𑀧𑀭𑀺𑀘𑀸𑀭𑁂𑀳𑀺, 𑀅𑀢𑁆𑀢𑀦𑁄 𑀧𑀭𑀺𑀘𑀭𑀡𑀁 𑀓𑀸𑀭𑁂𑀳𑀺. 𑀢𑀣𑀸𑀪𑀽𑀢𑁄 𑀘 𑀬𑀲𑁆𑀫𑀸 𑀮𑀴𑀦𑁆𑀢𑁄 𑀓𑀻𑀴𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀮𑀴𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀘𑁆𑀘𑀤𑀸𑀦𑀁 𑀤𑀸𑀦𑀁 𑀦𑀸𑀫, 𑀉𑀧𑁄𑀲𑀣𑀤𑀺𑀯𑀲𑀸𑀤𑀻𑀲𑀼 𑀤𑀸𑀢𑀩𑁆𑀩𑀁 𑀅𑀢𑀺𑀭𑁂𑀓𑀤𑀸𑀦𑀁 𑀧𑀤𑀸𑀦𑀁 𑀦𑀸𑀫. 𑀧𑀯𑁂𑀡𑀻𑀭𑀓𑁆𑀔𑀡𑀯𑀲𑁂𑀦 𑀯𑀸 𑀤𑀻𑀬𑀫𑀸𑀦𑀁 𑀤𑀸𑀦𑀁 𑀦𑀸𑀫, 𑀅𑀢𑁆𑀢𑀦𑀸𑀯 𑀧𑀝𑁆𑀞𑀧𑁂𑀢𑁆𑀯𑀸 𑀤𑀻𑀬𑀫𑀸𑀦𑀁 𑀧𑀤𑀸𑀦𑀁 𑀦𑀸𑀫. 𑀧𑀘𑀼𑀭𑀚𑀦𑀲𑀸𑀥𑀸𑀭𑀡𑀁 𑀯𑀸 𑀦𑀸𑀢𑀺𑀉𑀴𑀸𑀭𑀁 𑀤𑀸𑀦𑀁 𑀦𑀸𑀫, 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀅𑀢𑀺𑀉𑀴𑀸𑀭𑀁 𑀧𑀤𑀸𑀦𑀁 𑀦𑀸𑀫. 𑀉𑀤𑁆𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀉𑀤𑁆𑀥𑀁 𑀤𑀲𑁆𑀲𑁂𑀢𑀩𑁆𑀩𑀸. 𑀓𑀼𑀢𑁄 𑀉𑀤𑁆𑀥𑀁 𑀢𑁂 𑀤𑀲𑁆𑀲𑁂𑀢𑀩𑁆𑀩𑀸? 𑀧𑀩𑁆𑀩𑀚𑀺𑀢𑀢𑁄 𑀉𑀤𑁆𑀥𑀁 𑀅𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀤𑀲𑁆𑀲𑁂𑀢𑀩𑁆𑀩𑀸, 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺.

𑁨𑁯𑁯. 𑀩𑀮𑀁 𑀕𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 𑀩𑀮𑀕𑁆𑀕𑀳𑀡𑀁 𑀦𑀸𑀫 𑀓𑀸𑀬𑀩𑀮𑀲𑁆𑀲 𑀉𑀧𑁆𑀧𑀸𑀤𑀦𑀫𑁂𑀯𑀸𑀢𑀺 𑀆𑀳 ‘‘𑀓𑀸𑀬𑀩𑀮𑀁 𑀚𑀦𑁂𑀢𑁆𑀯𑀸’’𑀢𑀺. 𑀏𑀯𑀁 𑀯𑀺𑀳𑀭𑀦𑁆𑀢𑁄𑀢𑀺 𑀬𑀣𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀏𑀯𑀁 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦𑁂𑀬𑁆𑀬𑁄, 𑀦 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀦 𑀘 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀢𑀲𑁆𑀫𑀸. 𑀘𑀺𑀭𑁂𑀦 𑀧𑀩𑁆𑀩𑀚𑀺𑀢𑁄 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀬𑀁 𑀧𑀦 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀦 𑀘𑀺𑀭𑀲𑁆𑀲𑁂𑀯𑀸’’𑀢𑀺, 𑀢𑀁 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺 𑀢𑀢𑁄 𑀅𑀥𑀺𑀓𑀫𑁆𑀧𑀺 𑀯𑀺𑀧𑀲𑁆𑀲𑀦𑀸𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑁂 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁.

𑀲𑀢𑁆𑀢𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲𑀸𑀢𑀺 𑀲𑀢𑁆𑀢𑀕𑀩𑁆𑀪𑀦𑁆𑀢𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀻𑀲𑁂𑀦 𑀕𑀩𑁆𑀪𑀦𑁆𑀢𑀭𑀸𑀦𑀺 𑀯𑀤𑀢𑀺. 𑀧𑀳𑀭𑀸𑀧𑁂𑀢𑀻𑀢𑀺 𑀯𑀬𑁄𑀯𑀼𑀟𑁆𑀠𑀸𑀦𑀼𑀭𑀽𑀧𑀁 𑀓𑀧𑁆𑀧𑀸𑀧𑀦𑀸𑀤𑀺𑀦𑀸 𑀅𑀮𑀗𑁆𑀓𑀸𑀭𑀸𑀧𑁂𑀢𑀺. 𑀅𑀦𑁆𑀢𑁄𑀚𑀸𑀢𑀢𑀸𑀬 𑀜𑀸𑀢𑀺𑀲𑀤𑀺𑀲𑀻 𑀤𑀸𑀲𑀻 𑀜𑀸𑀢𑀺𑀤𑀸𑀲𑀻. 𑀧𑀽𑀢𑀺𑀪𑀸𑀯𑁂𑀦𑁂𑀯 𑀮𑀓𑁆𑀔𑀺𑀢𑀩𑁆𑀩𑁄 𑀤𑁄𑀲𑁄 𑀯𑀸 𑀅𑀪𑀺𑀤𑁄𑀲𑁄, 𑀲𑁄𑀯 𑀆𑀪𑀺𑀤𑁄𑀲𑀺𑀓𑁄, 𑀅𑀪𑀺𑀤𑁄𑀲𑀁 𑀯𑀸 𑀧𑀘𑁆𑀘𑀽𑀲𑀓𑀸𑀮𑀁 𑀕𑀢𑁄 𑀧𑀢𑁆𑀢𑁄 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀆𑀪𑀺𑀤𑁄𑀲𑀺𑀓𑁄. 𑀢𑁂𑀦𑀸𑀳 ‘‘𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀅𑀧𑀭𑀺𑀪𑁄𑀕𑀸𑀭𑀳𑁄 𑀧𑀽𑀢𑀺𑀪𑀽𑀢𑀪𑀸𑀯𑁂𑀦. 𑀅𑀭𑀺𑀬𑀯𑁄𑀳𑀸𑀭𑁂𑀦𑀸𑀢𑀺 𑀅𑀭𑀺𑀬𑀲𑀫𑀼𑀤𑀸𑀘𑀸𑀭𑁂𑀦. 𑀅𑀭𑀺𑀬𑀸 𑀳𑀺 𑀫𑀸𑀢𑀼𑀕𑀸𑀫𑀁 𑀪𑀕𑀺𑀦𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀦𑁆𑀢𑀺 𑀧𑀭𑀺𑀘𑁆𑀘𑀢𑁆𑀢𑀸𑀮𑀬𑀁. 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀦𑀺𑀭𑀧𑁂𑀓𑁆𑀔𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀇𑀥 𑀧𑀦 𑀯𑀺𑀲𑁂𑀲𑀢𑁄 𑀅𑀧𑀭𑀺𑀪𑁄𑀕𑀸𑀭𑀳𑀢𑁆𑀢𑀸𑀯 𑀯𑀢𑁆𑀣𑀼𑀦𑁄. 𑀦𑀺𑀫𑀻𑀬𑀢𑀺 𑀲𑀜𑁆𑀜𑀸𑀬𑀢𑀻𑀢𑀺 𑀦𑀺𑀫𑀺𑀢𑁆𑀢𑀁, 𑀢𑀣𑀸𑀲𑀮𑁆𑀮𑀓𑁆𑀔𑀺𑀢𑁄 𑀆𑀓𑀸𑀭𑁄𑀢𑀺 𑀆𑀳 ‘‘𑀆𑀓𑀸𑀭𑀁 𑀅𑀕𑁆𑀕𑀳𑁂𑀲𑀻’’𑀢𑀺.

𑁩𑁦𑁦. 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸𑀢𑀺 𑀕𑁂𑀳𑀲𑀸𑀫𑀺𑀦𑀺𑀬𑀸 𑀦𑀺𑀲𑀻𑀤𑀺𑀢𑀩𑁆𑀩𑀝𑁆𑀞𑀸𑀦𑀪𑀽𑀢𑀁 𑀅𑀦𑁆𑀢𑁄𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸. 𑀆𑀮𑀧𑀦𑁂𑀢𑀺 𑀤𑀸𑀲𑀺𑀚𑀦𑀲𑁆𑀲 𑀆𑀮𑀧𑀦𑁂. 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀅𑀦𑁆𑀢𑁄𑀕𑁂𑀳𑀢𑁄 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀺𑀬𑁄. 𑀖𑀭𑁂𑀲𑀼 𑀲𑀸𑀮𑀸 𑀳𑁄𑀦𑁆𑀢𑀻𑀢𑀺 𑀖𑀭𑁂𑀲𑀼 𑀏𑀓𑀫𑀦𑁆𑀢𑁂 𑀪𑁄𑀚𑀦𑀲𑀸𑀮𑀸 𑀳𑁄𑀦𑁆𑀢𑀺 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀸 𑀲𑀼𑀲𑀁𑀯𑀺𑀳𑀺𑀢𑀤𑁆𑀯𑀸𑀭𑀩𑀦𑁆𑀥𑀸 𑀲𑀼𑀲𑀫𑁆𑀫𑀝𑁆𑀞𑀯𑀸𑀮𑀺𑀓𑀗𑁆𑀕𑀡𑀸.

𑀅𑀦𑁄𑀓𑀧𑁆𑀧𑀦𑀁 𑀅𑀲𑀤𑁆𑀤𑀳𑀦𑀁. 𑀅𑀫𑀭𑀺𑀲𑀦𑀁 𑀅𑀲𑀳𑀦𑀁. 𑀅𑀦𑀸𑀕𑀢𑀯𑀘𑀦𑀁 𑀅𑀦𑀸𑀕𑀢𑀲𑀤𑁆𑀤𑀧𑁆𑀧𑀬𑁄𑀕𑁄, 𑀅𑀢𑁆𑀣𑁄 𑀧𑀦 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑁄𑀯. 𑀢𑁂𑀦𑀸𑀳 ‘‘𑀧𑀘𑁆𑀘𑀓𑁆𑀔𑀫𑁆𑀧𑀻’’𑀢𑀺. 𑀅𑀭𑀺𑀬𑀺𑀤𑁆𑀥𑀺𑀬𑀦𑁆𑀢𑀺 ‘‘𑀧𑀝𑀺𑀓𑀽𑀮𑁂 𑀅𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁫.𑁧𑁪𑁪) 𑀏𑀯𑀁 𑀯𑀼𑀢𑁆𑀢𑀅𑀭𑀺𑀬𑀺𑀤𑁆𑀥𑀺𑀬𑀁.

𑀧𑀽𑀢𑀺𑀓𑀼𑀫𑁆𑀫𑀸𑀲𑁄 𑀙𑀟𑁆𑀟𑀦𑀻𑀬𑀥𑀫𑁆𑀫𑁄 𑀢𑀲𑁆𑀲 𑀕𑁂𑀳𑀢𑁄 𑀮𑀤𑁆𑀥𑁄𑀧𑀺 𑀦 𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑁄 𑀤𑀸𑀲𑀺𑀚𑀦𑁂𑀦 𑀤𑀺𑀦𑁆𑀦𑁄𑀢𑀺 𑀆𑀳 ‘‘𑀤𑁂𑀬𑁆𑀬𑀥𑀫𑁆𑀫𑀯𑀲𑁂𑀦 𑀦𑁂𑀯 𑀤𑀸𑀦𑀁 𑀅𑀮𑀢𑁆𑀣𑀫𑁆𑀳𑀸’’𑀢𑀺. ‘‘𑀇𑀫𑁂𑀳𑀺 𑀫𑀼𑀡𑁆𑀟𑀓𑁂𑀳𑀻’’𑀢𑀺𑀆𑀤𑀺𑀦𑀸 𑀦𑀺𑀢𑁆𑀣𑀼𑀦𑀦𑀯𑀘𑀦𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀅𑀢𑁆𑀣𑀢𑁄 𑀮𑀤𑁆𑀥𑀫𑁂𑀯, 𑀢𑀲𑁆𑀲 𑀧𑀦 𑀉𑀚𑀼𑀓𑀨𑀸𑀲𑀼𑀲𑀫𑀸𑀘𑀸𑀭𑀯𑀲𑁂𑀦 𑀅𑀮𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀦 𑀧𑀘𑁆𑀘𑀓𑁆𑀔𑀸𑀦’’𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀧𑀝𑀺𑀲𑀦𑁆𑀣𑀸𑀭𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀫𑁆𑀧𑀺 𑀦 𑀅𑀮𑀢𑁆𑀣𑀫𑁆𑀳𑀸’’𑀢𑀺. ‘‘𑀦𑁂𑀯 𑀤𑀸𑀦’’𑀦𑁆𑀢𑀺𑀆𑀤𑀺 𑀧𑀘𑁆𑀘𑀸𑀲𑀻𑀲𑀸𑀬 𑀅𑀓𑁆𑀔𑀦𑁆𑀢𑀺𑀬𑀸 𑀘 𑀯𑀼𑀢𑁆𑀢𑀁 𑀯𑀺𑀬 𑀧𑀘𑀼𑀭𑀚𑀦𑁄 𑀫𑀜𑁆𑀜𑁂𑀬𑁆𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 𑀅𑀥𑀺𑀧𑁆𑀧𑀸𑀬𑀫𑀲𑁆𑀲 𑀯𑀺𑀯𑀭𑀺𑀢𑀼𑀁 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀺𑀓𑀸𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀲𑀺𑀧𑁆𑀧𑀺𑀓𑀸𑀙𑀤𑀸𑀳𑀺 𑀙𑀦𑁆𑀦𑀁.

𑀉𑀓𑁆𑀓𑀝𑁆𑀞𑀏𑀓𑀸𑀲𑀦𑀺𑀓𑀢𑀸𑀬𑀸𑀢𑀺 𑀇𑀤𑀁 𑀪𑀽𑀢𑀓𑀣𑀦𑀫𑀢𑁆𑀢𑀁 𑀣𑁂𑀭𑀲𑁆𑀲 𑀢𑀣𑀸𑀪𑀸𑀯𑀤𑀻𑀧𑀦𑀢𑁄. 𑀫𑀼𑀤𑀼𑀓𑀲𑁆𑀲𑀧𑀺 𑀳𑀺 𑀏𑀓𑀸𑀲𑀦𑀺𑀓𑀲𑁆𑀲 𑀬𑀸𑀬 𑀦𑀺𑀲𑀚𑁆𑀚𑀸𑀬 𑀓𑀺𑀜𑁆𑀘𑀺𑀫𑀢𑁆𑀢𑀁 𑀪𑁄𑀚𑀦𑀁 𑀪𑀼𑀢𑁆𑀢𑀁, 𑀯𑀢𑁆𑀢𑀲𑀻𑀲𑁂𑀦𑀧𑀺 𑀢𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀧𑀼𑀦 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀦𑀸𑀳 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 ‘‘𑀆𑀲𑀦𑀁 𑀯𑀸 𑀭𑀓𑁆𑀔𑁂𑀬𑁆𑀬 𑀪𑁄𑀚𑀦𑀁 𑀯𑀸’’𑀢𑀺. 𑀉𑀓𑁆𑀓𑀝𑁆𑀞𑀲𑀧𑀤𑀸𑀦𑀘𑀸𑀭𑀺𑀓𑁄𑀢𑀺 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀘 𑀆𑀳𑀝𑀪𑀺𑀓𑁆𑀔𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑁂 𑀞𑀢𑁆𑀯𑀸 𑀧𑀢𑁆𑀢𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀓𑀭𑁄𑀢𑀺. 𑀏𑀢𑁂𑀦𑁂𑀯 𑀣𑁂𑀭𑀲𑁆𑀲 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑀪𑀸𑀯𑁄 𑀤𑀻𑀧𑀺𑀢𑁄. 𑀢𑁂𑀦𑀸𑀳 𑁋 ‘‘𑀲𑁆𑀯𑀸𑀢𑀦𑀸𑀬 𑀪𑀺𑀓𑁆𑀔𑀁 𑀦𑀸𑀫 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺. 𑀅𑀣 𑀓𑀲𑁆𑀫𑀸 𑀅𑀥𑀺𑀯𑀸𑀲𑁂𑀲𑀻𑀢𑀺 𑀆𑀳 ‘‘𑀫𑀸𑀢𑀼 𑀅𑀦𑀼𑀕𑁆𑀕𑀳𑁂𑀦𑀸’’𑀢𑀺𑀆𑀤𑀺. 𑀧𑀡𑁆𑀟𑀺𑀢𑀸 𑀳𑀺 𑀫𑀸𑀢𑀸𑀧𑀺𑀢𑀽𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀸 𑀓𑀸𑀢𑀩𑁆𑀩𑀁 𑀅𑀦𑀼𑀕𑁆𑀕𑀳𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀥𑀼𑀢𑀗𑁆𑀕𑀲𑀼𑀤𑁆𑀥𑀺𑀓𑀸 𑀦 𑀪𑀯𑀦𑁆𑀢𑀺.

𑁩𑁦𑁧. 𑀧𑀬𑀼𑀢𑁆𑀢𑀦𑁆𑀢𑀺 𑀯𑀤𑁆𑀥𑀺𑀯𑀲𑁂𑀦 𑀧𑀬𑁄𑀚𑀺𑀢𑀁, 𑀢𑀤𑁆𑀥𑀺𑀢𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀧𑀺𑀢𑀸𑀫𑀳𑀁 𑀥𑀦𑀁 𑀮𑀤𑁆𑀥𑀸, 𑀲𑀼𑀔𑀁 𑀚𑀻𑀯𑀢𑀺 𑀲𑀜𑁆𑀘𑀬𑁄’’𑀢𑀺. 𑀚𑁂𑀝𑁆𑀞𑀓𑀺𑀢𑁆𑀣𑀺𑀬𑁄𑀢𑀺 𑀧𑀥𑀸𑀦𑀺𑀢𑁆𑀣𑀺𑀬𑁄. 𑀇𑀢𑁄𑀢𑀺 𑀇𑀫𑀲𑁆𑀫𑀺𑀁 𑀓𑀼𑀮𑁂 𑀅𑀦𑀼𑀪𑀯𑀺𑀢𑀩𑁆𑀩𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀢𑁄. 𑀅𑀜𑁆𑀜𑀢𑁄𑀢𑀺 𑀇𑀫𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀅𑀜𑁆𑀜𑀲𑁆𑀫𑀺𑀁 𑀓𑀼𑀮𑁂 𑀅𑀦𑀼𑀪𑀯𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺𑀢𑁄.

𑁩𑁦𑁨. 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀦𑁆𑀢𑀺 𑀓𑀧𑁆𑀧𑀦𑀸𑀬 𑀘𑁂𑀯 𑀅𑀭𑀳𑀭𑀽𑀧𑁂𑀦 𑀅𑀮𑀗𑁆𑀓𑀸𑀭𑀸𑀤𑀺𑀦𑀸 𑀘 𑀘𑀺𑀢𑁆𑀢𑀺𑀢𑀜𑁆𑀘𑁂𑀯 𑀯𑀺𑀘𑀺𑀢𑁆𑀢𑀺𑀢𑀜𑁆𑀘. 𑀯𑀡𑀓𑀸𑀬𑀦𑁆𑀢𑀺 𑀯𑀡𑀪𑀽𑀢𑀁 𑀓𑀸𑀬𑀁. 𑀲𑀫𑀦𑁆𑀢𑀢𑁄 𑀉𑀲𑁆𑀲𑀺𑀢𑀦𑁆𑀢𑀺 𑀳𑁂𑀝𑁆𑀞𑀺𑀫𑀓𑀸𑀬𑀯𑀲𑁂𑀦 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀲𑀦𑁆𑀦𑀺𑀲𑁆𑀲𑀺𑀢𑀁. 𑀦𑀺𑀘𑁆𑀘𑀸𑀢𑀼𑀭𑀦𑁆𑀢𑀺 𑀅𑀪𑀺𑀡𑁆𑀳𑀧𑁆𑀧𑀝𑀺𑀧𑀻𑀴𑀺𑀢𑀁, 𑀲𑀤𑀸 𑀤𑀼𑀓𑁆𑀔𑀺𑀢𑀁 𑀯𑀸. 𑀩𑀳𑀼𑀲𑀗𑁆𑀓𑀧𑁆𑀧𑀦𑁆𑀢𑀺 𑀭𑀸𑀕𑀯𑀢𑁆𑀣𑀼𑀪𑀸𑀯𑁂𑀦 𑀅𑀪𑀺𑀚𑀦𑁂𑀳𑀺 𑀳𑀸𑀯𑀪𑀸𑀯𑀯𑀺𑀮𑀸𑀲𑀯𑀲𑁂𑀦, 𑀆𑀫𑀺𑀲𑀯𑀲𑁂𑀦 𑀘 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀩𑀳𑀽𑀳𑀺 𑀲𑀗𑁆𑀓𑀧𑁆𑀧𑁂𑀢𑀩𑁆𑀩𑀁. 𑀞𑀺𑀢𑀻𑀢𑀺 𑀅𑀯𑀝𑁆𑀞𑀸𑀦𑀁 𑀅𑀯𑀺𑀧𑀭𑀺𑀡𑀸𑀫𑁄 𑀦𑀢𑁆𑀣𑀺. 𑀢𑁂𑀦𑀸𑀳 𑁋 ‘‘𑀪𑀺𑀚𑁆𑀚𑀦𑀥𑀫𑁆𑀫𑀢𑀸𑀯 𑀦𑀺𑀬𑀢𑀸’’𑀢𑀺, 𑀧𑀭𑀺𑀲𑁆𑀲𑀯𑀪𑀸𑀯𑀸𑀧𑀢𑁆𑀢𑀺 𑀘𑁂𑀯 𑀯𑀺𑀦𑀸𑀲𑀧𑀢𑁆𑀢𑀺 𑀘 𑀏𑀓𑀦𑁆𑀢𑀺𑀓𑀸𑀢𑀺 𑀅𑀢𑁆𑀣𑁄.

𑀘𑀺𑀢𑁆𑀢𑀓𑀢𑀫𑁆𑀧𑀻𑀢𑀺 𑀕𑀦𑁆𑀥𑀸𑀤𑀻𑀳𑀺 𑀘𑀺𑀢𑁆𑀢𑀓𑀢𑀫𑁆𑀧𑀺. 𑀭𑀽𑀧𑀦𑁆𑀢𑀺 𑀲𑀭𑀻𑀭𑀁.

𑀅𑀮𑀢𑁆𑀢𑀓𑀓𑀢𑀸𑀢𑀺 𑀧𑀺𑀡𑁆𑀟𑀺𑀅𑀮𑀢𑁆𑀢𑀓𑁂𑀦 𑀲𑀼𑀯𑀡𑁆𑀡𑀓𑀢𑀸. 𑀢𑁂𑀦𑀸𑀳 ‘‘𑀅𑀮𑀢𑁆𑀢𑀓𑁂𑀦 𑀭𑀜𑁆𑀚𑀺𑀢𑀸’’𑀢𑀺. 𑀘𑀼𑀡𑁆𑀡𑀓𑀫𑀓𑁆𑀔𑀺𑀢𑀦𑁆𑀢𑀺 𑀤𑁄𑀲𑀦𑀻𑀳𑀭𑀡𑁂𑀳𑀺 𑀢𑀸𑀧𑀤𑀳𑀦𑀸𑀤𑀻𑀳𑀺 𑀓𑀢𑀸𑀪𑀺𑀲𑀗𑁆𑀔𑀸𑀭𑀫𑀼𑀔𑀁 𑀕𑁄𑀭𑁄𑀘𑀦𑀸𑀤𑀻𑀳𑀺 𑀑𑀪𑀸𑀲𑀦𑀓𑀘𑀼𑀡𑁆𑀡𑁂𑀳𑀺 𑀫𑀓𑁆𑀔𑀺𑀢𑀁, 𑀢𑁂𑀦𑀸𑀳 ‘‘𑀲𑀸𑀲𑀧𑀓𑀓𑁆𑀓𑁂𑀦𑀸’’𑀢𑀺𑀆𑀤𑀺.

𑀭𑀲𑁄𑀤𑀓𑁂𑀦𑀸𑀢𑀺 𑀲𑀭𑀮𑀦𑀺𑀬𑁆𑀬𑀸𑀲𑀭𑀲𑀫𑀺𑀲𑁆𑀲𑁂𑀦 𑀉𑀤𑀓𑁂𑀦. 𑀆𑀯𑀢𑁆𑀢𑀦𑀧𑀭𑀺𑀯𑀢𑁆𑀢𑁂 𑀓𑀢𑁆𑀯𑀸𑀢𑀺 𑀆𑀯𑀢𑁆𑀢𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀦𑀢𑁂 𑀓𑀢𑁆𑀯𑀸. 𑀅𑀝𑁆𑀞𑀧𑀤𑀓𑀭𑀘𑀦𑀸𑀬𑀸𑀢𑀺 𑀪𑀺𑀢𑁆𑀢𑀺𑀓𑀽𑀝𑀤𑁆𑀥𑀘𑀦𑁆𑀤𑀸𑀤𑀺𑀯𑀺𑀪𑀸𑀕𑀸𑀬 𑀅𑀝𑁆𑀞𑀧𑀤𑀓𑀭𑀘𑀦𑀸𑀬.

𑀯𑀺𑀭𑀯𑀫𑀸𑀦𑁂𑀢𑀺 ‘‘𑀅𑀬𑀁 𑀧𑀮𑀸𑀬𑀢𑀺, 𑀕𑀡𑁆𑀳 𑀕𑀡𑁆𑀳𑀸’’𑀢𑀺 𑀯𑀺𑀭𑀯𑀫𑀸𑀦𑁂. 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀑𑀭𑁄𑀥𑁂𑀢𑀺 𑀯𑀢𑁆𑀢𑀩𑁆𑀩𑀁.

𑁩𑁦𑁩. 𑀉𑀲𑁆𑀲𑀺𑀢𑀸𑀬 𑀉𑀲𑁆𑀲𑀺𑀢𑀸𑀬𑀸𑀢𑀺 𑀓𑀼𑀮𑀯𑀺𑀪𑀯𑀩𑀸𑀳𑀼𑀲𑀘𑁆𑀘𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀉𑀕𑁆𑀕𑀢𑀸𑀬 𑀉𑀕𑁆𑀕𑀢𑀸𑀬. 𑀅𑀪𑀺𑀮𑀓𑁆𑀔𑀺𑀢𑁄 𑀉𑀴𑀸𑀭𑀪𑀸𑀯𑁂𑀦.

𑁩𑁦𑁪. 𑀧𑀭𑀺𑀚𑀼𑀜𑁆𑀜𑀸𑀦𑀻𑀢𑀺 𑀧𑀭𑀺𑀳𑀸𑀦𑀸𑀦𑀺. 𑀬𑁂 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸 𑀲𑀢𑁆𑀢𑀸 𑀚𑀺𑀡𑁆𑀡𑀓𑀧𑁆𑀧𑀸 𑀯𑀬𑁄𑀳𑀸𑀦𑀺𑀲𑀢𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑀢𑁄 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀚𑀭𑀸𑀚𑀺𑀡𑁆𑀡𑁄’’𑀢𑀺 𑀆𑀳. 𑀯𑀬𑁄𑀯𑀼𑀟𑁆𑀠𑁄, 𑀦 𑀲𑀻𑀮𑀸𑀤𑀺𑀯𑀼𑀟𑁆𑀠𑁄. 𑀫𑀳𑀢𑁆𑀢𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀫𑀳𑀮𑁆𑀮𑀓𑁄, 𑀚𑀸𑀢𑀺𑀬𑀸 𑀫𑀳𑀮𑁆𑀮𑀓𑁄, 𑀦 𑀯𑀺𑀪𑀯𑀸𑀤𑀺𑀦𑀸𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑁄. 𑀤𑁆𑀯𑀢𑁆𑀢𑀺𑀭𑀸𑀚𑀧𑀭𑀺𑀯𑀢𑁆𑀢𑀲𑀗𑁆𑀔𑀸𑀢𑀁 𑀅𑀤𑁆𑀥𑀸𑀦𑀁 𑀓𑀸𑀮𑀁 𑀕𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑀅𑀤𑁆𑀥𑀕𑀢𑁄. 𑀢𑀣𑀸 𑀘 𑀧𑀞𑀫𑀯𑀬𑀁 𑀫𑀚𑁆𑀛𑀺𑀫𑀯𑀬𑀜𑁆𑀘 𑀅𑀢𑀻𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀤𑁆𑀥𑀸𑀦𑀁 𑀅𑀢𑀺𑀓𑁆𑀓𑀦𑁆𑀢𑁄’’𑀢𑀺. 𑀚𑀺𑀡𑁆𑀡𑀸𑀤𑀺𑀧𑀤𑁂𑀳𑀺 𑀧𑀞𑀫𑀯𑀬𑀫𑀚𑁆𑀛𑀺𑀫𑀯𑀬𑀲𑁆𑀲 𑀩𑁄𑀥𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀢𑁆𑀢𑀢𑀸𑀯𑀺𑀲𑀺𑀝𑁆𑀞𑁄 𑀯𑀬-𑀲𑀤𑁆𑀤𑁄 𑀑𑀲𑀸𑀦𑀯𑀬𑀯𑀺𑀲𑀬𑁄𑀢𑀺 𑀆𑀳 ‘‘𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

‘‘𑀅𑀧𑁆𑀧𑀺𑀘𑁆𑀙𑁄, 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁄’’𑀢𑀺 (𑀅. 𑀦𑀺. 𑁧𑁦.𑁧𑁧) 𑀏𑀯𑀫𑀸𑀤𑀻𑀲𑀼 𑀯𑀺𑀬 𑀅𑀧𑁆𑀧-𑀲𑀤𑁆𑀤𑁄 𑀅𑀪𑀸𑀯𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀧𑁆𑀧𑀸𑀩𑀸𑀥𑁄𑀢𑀺 𑀅𑀭𑁄𑀕𑁄, 𑀅𑀧𑁆𑀧𑀸𑀢𑀗𑁆𑀓𑁄𑀢𑀺 𑀦𑀺𑀤𑁆𑀤𑀼𑀓𑁆𑀔𑁄’’𑀢𑀺. 𑀅𑀧𑁆𑀧𑀢𑁆𑀣𑁄 𑀯𑀸 𑀇𑀥, 𑀢𑀢𑁆𑀣𑀸𑀧𑀺 𑀅𑀧𑁆𑀧-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 ‘‘𑀬𑁄 𑀳𑀺, 𑀕𑀳𑀧𑀢𑀺, 𑀇𑀫𑀁 𑀧𑀽𑀢𑀺𑀓𑀸𑀬𑀁 𑀧𑀭𑀺𑀳𑀭𑀦𑁆𑀢𑁄 𑀫𑀼𑀳𑀼𑀢𑁆𑀢𑀫𑁆𑀧𑀺 𑀆𑀭𑁄𑀕𑁆𑀬𑀁 𑀧𑀝𑀺𑀚𑀸𑀦𑁂𑀬𑁆𑀬 𑀓𑀺𑀫𑀜𑁆𑀜𑀢𑁆𑀭 𑀩𑀸𑀮𑁆𑀬𑀸’’𑀢𑀺 (𑀲𑀁. 𑀦𑀺. 𑁩.𑁧) 𑀲𑀼𑀢𑁆𑀢𑀧𑀤𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀯𑀺𑀧𑀘𑁆𑀘𑀦𑀁 𑀯𑀺𑀧𑀸𑀓𑁄, 𑀲𑁄 𑀏𑀯 𑀯𑁂𑀧𑀸𑀓𑁄. 𑀲𑀫𑁄 𑀯𑁂𑀧𑀸𑀓𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀲𑀫𑀯𑁂𑀧𑀸𑀓𑀺𑀦𑀻, 𑀢𑀸𑀬. 𑀢𑁂𑀦𑁂𑀯 𑀲𑀫𑀯𑁂𑀧𑀸𑀓𑀺𑀦𑀺𑀪𑀸𑀯𑁂𑀦 𑀲𑀩𑁆𑀩𑀫𑁆𑀧𑀺 𑀲𑀫𑁆𑀫𑀤𑁂𑀯 𑀕𑀡𑁆𑀳𑀸𑀢𑀺 𑀥𑀸𑀭𑁂𑀢𑀻𑀢𑀺 𑀕𑀳𑀡𑀻. 𑀕𑀳𑀡𑀺𑀲𑀫𑁆𑀧𑀢𑁆𑀢𑀺𑀬𑀸 𑀳𑀺 𑀬𑀣𑀸𑀪𑀼𑀢𑁆𑀢𑀆𑀳𑀸𑀭𑁄 𑀲𑀫𑁆𑀫𑀤𑁂𑀯 𑀚𑀻𑀭𑀦𑁆𑀢𑁄 𑀲𑀭𑀻𑀭𑁂 𑀢𑀺𑀝𑁆𑀞𑀢𑀺, 𑀦𑁄 𑀅𑀜𑁆𑀜𑀣𑀸 𑀪𑀼𑀢𑁆𑀢𑀪𑀼𑀢𑁆𑀢𑁄 𑀆𑀳𑀸𑀭𑁄 𑀚𑀻𑀭𑀢𑀺 𑀕𑀳𑀡𑀺𑀬𑀸 𑀢𑀺𑀓𑁆𑀔𑀪𑀸𑀯𑁂𑀦. 𑀢𑀣𑁂𑀯 𑀢𑀺𑀝𑁆𑀞𑀢𑀻𑀢𑀺 𑀪𑀼𑀢𑁆𑀢𑀸𑀓𑀸𑀭𑁂𑀦𑁂𑀯 𑀢𑀺𑀝𑁆𑀞𑀢𑀺 𑀕𑀳𑀡𑀺𑀬𑀸 𑀫𑀦𑁆𑀤𑀪𑀸𑀯𑀢𑁄. 𑀪𑀢𑁆𑀢𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑁂𑀯 𑀪𑀼𑀢𑁆𑀢𑀆𑀳𑀸𑀭𑀲𑁆𑀲 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀢𑀢𑁆𑀢𑀸. 𑀢𑁂𑀦𑁂𑀯𑀸𑀢𑀺 𑀲𑀫𑀯𑁂𑀧𑀸𑀓𑀺𑀦𑀺𑀪𑀸𑀯𑁂𑀦𑁂𑀯. 𑀧𑀢𑁆𑀢𑀸𑀦𑀁 𑀪𑁄𑀕𑀸𑀦𑀁 𑀧𑀭𑀺𑀓𑁆𑀔𑀺𑀬𑀫𑀸𑀦𑀁 𑀦 𑀲𑀳𑀲𑀸 𑀏𑀓𑀚𑁆𑀛𑀁𑀬𑁂𑀯 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀅𑀣 𑀔𑁄 𑀅𑀦𑀼𑀓𑁆𑀓𑀫𑁂𑀦, 𑀢𑀣𑀸 𑀜𑀸𑀢𑀬𑁄𑀧𑀻𑀢𑀺 𑀆𑀳 ‘‘𑀅𑀦𑀼𑀧𑀼𑀩𑁆𑀩𑁂𑀦𑀸’’𑀢𑀺. 𑀙𑀸𑀢𑀓𑀪𑀬𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀩𑁆𑀬𑀸𑀥𑀺𑀪𑀬𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁩𑁦𑁫. 𑀉𑀤𑁆𑀤𑁂𑀲𑀲𑀻𑀲𑁂𑀦 𑀦𑀺𑀤𑁆𑀤𑁂𑀲𑁄 𑀕𑀳𑀺𑀢𑁄𑀢𑀺 𑀆𑀳 ‘‘𑀥𑀫𑁆𑀫𑀦𑀺𑀤𑁆𑀤𑁂𑀲𑀸 𑀉𑀤𑁆𑀤𑀺𑀝𑁆𑀞𑀸’’𑀢𑀺. 𑀬𑀲𑁆𑀫𑀸 𑀯𑀸 𑀬𑁂 𑀥𑀫𑁆𑀫𑀸 𑀉𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑁂𑀦 ‘‘𑀉𑀤𑁆𑀤𑁂𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀯 𑀥𑀫𑁆𑀫𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑁂𑀦 𑀦𑀺𑀤𑁆𑀤𑁂𑀲𑀸𑀢𑀺 ‘‘𑀥𑀫𑁆𑀫𑀦𑀺𑀤𑁆𑀤𑁂𑀲𑀸 𑀉𑀤𑁆𑀤𑀺𑀝𑁆𑀞𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀣 𑀯𑀸 𑀬𑁂 𑀥𑀫𑁆𑀫𑀸 𑀅𑀦𑀺𑀘𑁆𑀘𑀢𑀸𑀤𑀺𑀯𑀺𑀪𑀸𑀯𑀦𑀯𑀲𑁂𑀦 𑀉𑀤𑁆𑀥𑀁 𑀉𑀤𑁆𑀥𑀁 𑀤𑁂𑀲𑁂𑀲𑁆𑀲𑀦𑁆𑀢𑀺, 𑀢𑁂 𑀥𑀫𑁆𑀫𑀸 𑀢𑀣𑁂𑀯 𑀦𑀺𑀲𑁆𑀲𑁂𑀲𑀢𑁄 𑀤𑁂𑀲𑁂𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀧𑀤𑀸𑀦𑀁 𑀅𑀦𑀢𑁆𑀣𑀦𑁆𑀢𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣𑀸𑀢𑀺 𑀚𑀭𑀸𑀫𑀭𑀡𑀲𑀦𑁆𑀢𑀺𑀓𑁂. 𑀅𑀤𑁆𑀥𑀼𑀯𑁄𑀢𑀺 𑀦𑀺𑀤𑁆𑀥𑀼𑀯𑁄 𑀦 𑀣𑀺𑀭𑁄, 𑀅𑀦𑀺𑀘𑁆𑀘𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀥𑀼𑀯𑀝𑁆𑀞𑀸𑀦𑀯𑀺𑀭𑀳𑀺𑀢𑁄’’𑀢𑀺, 𑀅𑀚𑀸𑀢𑀸𑀪𑀽𑀢𑀸𑀲𑀗𑁆𑀔𑀢𑀥𑀼𑀯𑀪𑀸𑀯𑀓𑀸𑀭𑀡𑀯𑀺𑀯𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀦𑀻𑀬𑁆𑀬𑀢𑀻𑀢𑀺 𑀯𑀸 𑀚𑀭𑀸𑀫𑀭𑀡𑁂𑀦 𑀮𑁄𑀓𑁄 𑀲𑀫𑁆𑀫𑀸 𑀦𑀻𑀬𑀢𑀺, 𑀢𑀲𑁆𑀫𑀸 𑀅𑀤𑁆𑀥𑀼𑀯𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀸𑀬𑀺𑀢𑀼𑀦𑁆𑀢𑀺 𑀚𑀸𑀢𑀺𑀆𑀤𑀺𑀩𑁆𑀬𑀲𑀦𑀢𑁄 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁂𑀦 𑀇𑀲𑁆𑀲𑀭𑁂𑀦 𑀅𑀢𑁆𑀢𑀦𑀸 𑀯𑀺𑀭𑀳𑀺𑀢𑁄𑀢𑀺. ‘‘𑀇𑀫𑀁 𑀮𑁄𑀓𑀁 𑀇𑀢𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑁄𑀘𑁂𑀲𑁆𑀲𑀸𑀫𑀺, 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀁 𑀢𑀁 𑀅𑀥𑀺𑀪𑀯𑀺𑀢𑀼𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀪𑀺𑀲𑀭𑀢𑀻𑀢𑀺 𑀅𑀪𑀺𑀲𑁆𑀲𑀭𑀡𑀁, 𑀮𑁄𑀓𑀲𑁆𑀲 𑀲𑀼𑀔𑀲𑁆𑀲 𑀤𑀸𑀢𑀸 𑀳𑀺𑀢𑀲𑁆𑀲 𑀯𑀺𑀥𑀸𑀢𑀸 𑀓𑁄𑀘𑀺 𑀇𑀲𑁆𑀲𑀭𑁄, 𑀢𑀤𑀪𑀸𑀯𑀢𑁄 𑀆𑀳 ‘‘𑀅𑀦𑀪𑀺𑀲𑁆𑀲𑀭𑁄𑀢𑀺 𑀅𑀲𑀭𑀡𑁄’’𑀢𑀺. 𑀦𑀺𑀲𑁆𑀲𑀓𑁄 𑀫𑀫𑀸𑀬𑀺𑀢𑀩𑁆𑀩𑀯𑀢𑁆𑀣𑀼𑀅𑀪𑀸𑀯𑀢𑁄, 𑀢𑁂𑀦𑀸𑀳 ‘‘𑀲𑀓𑀪𑀡𑁆𑀟𑀯𑀺𑀭𑀳𑀺𑀢𑁄’’𑀢𑀺𑀆𑀤𑀺. 𑀢𑀡𑁆𑀳𑀸𑀬 𑀯𑀲𑁂 𑀚𑀸𑀢𑁄 𑀢𑀡𑁆𑀳𑀸𑀬 𑀯𑀺𑀚𑀺𑀢𑁄𑀢𑀺 𑀓𑀢𑁆𑀯𑀸 ‘‘𑀢𑀡𑁆𑀳𑀸𑀬 𑀤𑀸𑀲𑁄’’𑀢𑀺 𑀯𑀼𑀢𑁆𑀢𑀁.

𑁩𑁦𑁬. 𑀳𑀢𑁆𑀣𑀺𑀯𑀺𑀲𑀬𑀢𑁆𑀢𑀸 𑀳𑀢𑁆𑀣𑀺𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀸 𑀳𑀢𑁆𑀣𑀺𑀲𑀺𑀧𑁆𑀧𑀁 ‘‘𑀳𑀢𑁆𑀣𑀻’’𑀢𑀺 𑀕𑀳𑀺𑀢𑀦𑁆𑀢𑀺 𑀆𑀳 𑁋 ‘‘𑀳𑀢𑁆𑀣𑀺𑀲𑁆𑀫𑀺𑀦𑁆𑀢𑀺 𑀳𑀢𑁆𑀣𑀺𑀲𑀺𑀧𑁆𑀧𑁂’’𑀢𑀺, 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀢𑀺𑀲𑀬𑀁 𑀊𑀭𑀼𑀩𑀮𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀊𑀭𑀼𑀩𑀮𑀻𑀢𑀺 𑀆𑀳 𑁋 ‘‘𑀊𑀭𑀼𑀩𑀮𑀲𑀫𑁆𑀧𑀦𑁆𑀦𑁄’’𑀢𑀺, 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀪𑀺𑀦𑁆𑀦𑀁 𑀧𑀭𑀲𑁂𑀦𑀁 𑀪𑀺𑀦𑁆𑀤𑀢𑁄 𑀪𑀺𑀦𑁆𑀦𑀁 𑀲𑀓𑀲𑁂𑀦𑀁 𑀲𑀦𑁆𑀥𑀸𑀭𑀬𑀢𑁄 𑀉𑀧𑀢𑁆𑀣𑀫𑁆𑀪𑀬𑀢𑁄. 𑀩𑀸𑀳𑀼𑀩𑀮𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀬𑀲𑁆𑀲 𑀳𑀺 𑀨𑀮𑀓𑀜𑁆𑀘 𑀆𑀯𑀼𑀥𑀜𑁆𑀘 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄, 𑀇𑀥 𑀧𑀦 𑀧𑀭𑀳𑀢𑁆𑀣𑀕𑀢𑀁 𑀭𑀚𑁆𑀚𑀁 𑀆𑀳𑀭𑀺𑀢𑀼𑀁 𑀩𑀸𑀳𑀼𑀩𑀮𑀦𑁆𑀢𑀺 𑀬𑁄𑀚𑀦𑀸. 𑀬𑀣𑀸 𑀳𑀺 ‘‘𑀊𑀭𑀼𑀩𑀮𑀻’’𑀢𑀺 𑀏𑀢𑁆𑀣𑀸𑀧𑀺 𑀩𑀸𑀳𑀼𑀩𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀢𑁆𑀣𑁄, 𑀏𑀯𑀁 ‘‘𑀩𑀸𑀳𑀼𑀩𑀮𑀻’’𑀢𑀺 𑀏𑀢𑁆𑀣 𑀊𑀭𑀼𑀩𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄. 𑀅𑀮𑀁 𑀲𑀫𑀢𑁆𑀣𑁄 𑀅𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 𑀅𑀮𑀫𑀢𑁆𑀣𑁄𑀢𑀺 𑀆𑀳 ‘‘𑀲𑀫𑀢𑁆𑀣𑀅𑀢𑁆𑀢𑀪𑀸𑀯𑁄’’𑀢𑀺.

𑀧𑀭𑀺𑀬𑁄𑀥𑀸𑀬𑀸𑀢𑀺 𑀯𑀸 𑀧𑀭𑀺𑀢𑁄 𑀆𑀭𑀓𑁆𑀔𑀁 𑀑𑀤𑀳𑀺𑀢𑁆𑀯𑀸. ‘‘𑀲𑀁𑀯𑀺𑀚𑁆𑀚𑀦𑁆𑀢𑁂 𑀔𑁄, 𑀪𑁄 𑀭𑀝𑁆𑀞𑀧𑀸𑀮, 𑀇𑀫𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀳𑀢𑁆𑀣𑀺𑀓𑀸𑀬𑀸𑀧𑀺…𑀧𑁂… 𑀯𑀢𑁆𑀢𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀤𑀫𑁆𑀧𑀺 𑀲𑁄 𑀭𑀸𑀚𑀸 𑀉𑀧𑀭𑀺 𑀥𑀫𑁆𑀫𑀼𑀤𑁆𑀤𑁂𑀲𑀲𑁆𑀲 𑀓𑀸𑀭𑀡𑀁 𑀆𑀳𑀭𑀦𑁆𑀢𑁄 𑀆𑀳.

𑀯𑀼𑀢𑁆𑀢𑀲𑁆𑀲𑁂𑀯 𑀅𑀦𑀼 𑀧𑀘𑁆𑀙𑀸 𑀕𑀸𑀬𑀦𑀯𑀲𑁂𑀦 𑀓𑀣𑀦𑀁 𑀅𑀦𑀼𑀕𑀻𑀢𑀺. 𑀢𑀸 𑀧𑀦 𑀕𑀸𑀣𑀸 𑀥𑀫𑁆𑀫𑀼𑀤𑁆𑀤𑁂𑀲𑀸𑀦𑀁 𑀤𑁂𑀲𑀦𑀸𑀦𑀼𑀧𑀼𑀩𑁆𑀩𑀺𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀧𑀺 𑀬𑀣𑀸𑀭𑀳𑀁 𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀅𑀦𑀼𑀕𑀻𑀢𑀸𑀢𑀺 𑀆𑀳 ‘‘𑀘𑀢𑀼𑀦𑁆𑀦𑀁 𑀥𑀫𑁆𑀫𑀼𑀤𑁆𑀤𑁂𑀲𑀸𑀦𑀁 𑀅𑀦𑀼𑀕𑀻𑀢𑀺’’𑀦𑁆𑀢𑀺.

𑁩𑁦𑁭. 𑀏𑀓𑀦𑁆𑀢𑀺 𑀏𑀓𑀚𑀸𑀢𑀺𑀬𑀁. 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀸 𑀯𑀺𑀲𑀬𑀪𑁂𑀤𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑁄.

𑀲𑀸𑀕𑀭𑀦𑁆𑀢𑁂𑀦𑀸𑀢𑀺 𑀲𑀸𑀕𑀭𑀧𑀭𑀺𑀬𑀦𑁆𑀢𑁂𑀦.

𑀅𑀳𑁄 𑀯𑀢𑀸𑀢𑀺 𑀲𑁄𑀘𑀦𑁂 𑀦𑀺𑀧𑀸𑀢𑁄, ‘‘𑀅𑀳𑁄 𑀯𑀢 𑀧𑀸𑀧𑀁 𑀓𑀢𑀁 𑀫𑀬𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀫𑀭𑀸𑀢𑀺𑀆𑀤𑀻𑀲𑀼 𑀆𑀳𑀽𑀢𑀺 𑀓𑀣𑁂𑀦𑁆𑀢𑀺. 𑀫𑀢𑀁 𑀉𑀤𑁆𑀤𑀺𑀲𑁆𑀲 ‘‘𑀅𑀫𑁆𑀳’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀲𑁄𑀓𑀯𑀲𑁂𑀦 ‘‘𑀅𑀫𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀯𑁄𑀲𑀸𑀦𑀦𑁆𑀢𑀺 𑀦𑀺𑀝𑁆𑀞𑀁, 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀸𑀯𑀸𑀢𑀺 𑀧𑀜𑁆𑀜𑀸 𑀏𑀯. 𑀥𑀦𑀢𑁄𑀢𑀺 𑀲𑀩𑁆𑀩𑀥𑀦𑀢𑁄. 𑀉𑀢𑁆𑀢𑀫𑀢𑀭𑀸 𑀲𑁂𑀝𑁆𑀞𑀸, 𑀢𑁂𑀦𑁂𑀯𑀸𑀳 ‘‘𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁪).

𑀢𑁂𑀲𑀼 𑀧𑀸𑀧𑀁 𑀓𑀭𑁄𑀦𑁆𑀢𑁂𑀲𑀼 𑀲𑀢𑁆𑀢𑁂𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀧𑀭𑀫𑁆𑀧𑀭𑀸𑀬𑀸𑀢𑀺 𑀅𑀢𑁆𑀢𑀪𑀸𑀯𑀧𑀭𑀫𑁆𑀧𑀭𑀸𑀬. 𑀲𑀁𑀲𑀸𑀭𑀁 𑀆𑀧𑀚𑁆𑀚𑀺𑀢𑁆𑀯𑀸𑀢𑀺 𑀪𑀯𑀸𑀤𑀻𑀲𑀼 𑀲𑀁𑀲𑀸𑀭𑀲𑁆𑀲 𑀆𑀧𑀚𑁆𑀚𑀦𑀳𑁂𑀢𑀼𑀁 𑀆𑀧𑀚𑁆𑀚𑀦𑁆𑀢𑁄 𑀧𑀭𑀮𑁄𑀓𑀁 𑀉𑀧𑁂𑀢𑀺, 𑀧𑀭𑀮𑁄𑀓𑀁 𑀉𑀧𑁂𑀦𑁆𑀢𑁄𑀯 𑀩𑀳𑀼𑀯𑀺𑀥𑀤𑀼𑀓𑁆𑀔𑀲𑀗𑁆𑀔𑀸𑀢𑀁 𑀕𑀩𑁆𑀪𑀜𑁆𑀘 𑀉𑀧𑁂𑀢𑀺. 𑀢𑀸𑀤𑀺𑀲𑀲𑁆𑀲𑀸𑀢𑀺 𑀢𑀣𑀸𑀭𑀽𑀧𑀲𑁆𑀲 𑀕𑀩𑁆𑀪𑀯𑀸𑀲𑀤𑀼𑀓𑁆𑀔𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀪𑀽𑀢𑀲𑁆𑀲 𑀅𑀧𑁆𑀧𑀧𑀜𑁆𑀜𑀲𑁆𑀲 𑀅𑀜𑁆𑀜𑁄 𑀅𑀧𑁆𑀧𑀧𑀜𑁆𑀜𑁄 𑀘 𑀅𑀪𑀺𑀲𑀤𑁆𑀤𑀳𑀦𑁆𑀢𑁄 𑀳𑀺𑀢𑀲𑀼𑀔𑀸𑀯𑀳𑀦𑁆𑀢𑀺 𑀧𑀢𑁆𑀢𑀺𑀬𑀸𑀬𑀦𑁆𑀢𑁄.

‘‘𑀧𑀸𑀧𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀧𑀭𑀮𑁄𑀓𑁄 𑀦𑀸𑀫 𑀤𑀼𑀕𑁆𑀕𑀢𑀺 𑀏𑀯𑀸𑀢𑀺 𑀆𑀳 ‘‘𑀧𑀭𑀫𑁆𑀳𑀺 𑀅𑀧𑀸𑀬𑀮𑁄𑀓𑁂’’𑀢𑀺.

𑀯𑀺𑀯𑀺𑀥𑀭𑀽𑀧𑁂𑀦𑀸𑀢𑀺 𑀭𑀽𑀧𑀲𑀤𑁆𑀤𑀸𑀤𑀺𑀯𑀲𑁂𑀦 𑀢𑀢𑁆𑀣𑀧𑀺 𑀧𑀡𑀻𑀢𑀢𑀭𑀸𑀤𑀺𑀯𑀲𑁂𑀦 𑀩𑀳𑀼𑀯𑀺𑀥𑀭𑀽𑀧𑁂𑀦.

𑀲𑀸𑀫𑀜𑁆𑀜𑀫𑁂𑀯𑀸𑀢𑀺 𑀲𑀫𑀡𑀪𑀸𑀯𑁄 𑀏𑀯 𑀲𑁂𑀬𑁆𑀬𑁄. 𑀏𑀢𑁆𑀣 𑀘 𑀆𑀤𑀺𑀢𑁄 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀘𑀢𑀼𑀢𑁆𑀣𑁄 𑀥𑀫𑁆𑀫𑀼𑀤𑁆𑀤𑁂𑀲𑁄 𑀅𑀦𑀼𑀕𑀻𑀢𑁄. 𑀘𑀢𑀼𑀢𑁆𑀣𑀕𑀸𑀣𑀸𑀬 𑀢𑀢𑀺𑀬𑁄. 𑀧𑀜𑁆𑀘𑀫𑀕𑀸𑀣𑀸𑀬 𑀤𑀼𑀢𑀺𑀬𑁄. 𑀙𑀝𑁆𑀞𑀕𑀸𑀣𑀸𑀬 𑀤𑀼𑀢𑀺𑀬𑀢𑀢𑀺𑀬𑀸. 𑀲𑀢𑁆𑀢𑀫𑀕𑀸𑀣𑀸𑀬 𑀧𑀞𑀫𑁄 𑀥𑀫𑁆𑀫𑀼𑀤𑁆𑀤𑁂𑀲𑁄 𑀅𑀦𑀼𑀕𑀻𑀢𑁄, 𑀅𑀝𑁆𑀞𑀫𑀸𑀤𑀻𑀳𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀲𑀼 𑀓𑀸𑀫𑁂𑀲𑀼 𑀦𑁂𑀓𑁆𑀔𑀫𑁆𑀫𑁂 𑀘 𑀬𑀣𑀸𑀭𑀳𑀁 𑀆𑀤𑀻𑀦𑀯𑀸𑀦𑀺𑀲𑀁𑀲𑀁 𑀯𑀺𑀪𑀸𑀯𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀓𑀸𑀭𑀡𑀁 𑀧𑀭𑀫𑀢𑁄 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀼𑀤𑁆𑀤𑁂𑀲𑀁 𑀦𑀺𑀕𑀫𑁂𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀸 𑀧𑀦 𑀕𑀸𑀣𑀸 𑀥𑀫𑁆𑀫𑀼𑀤𑁆𑀤𑁂𑀲𑀸𑀦𑀁 𑀤𑁂𑀲𑀦𑀸𑀦𑀼𑀧𑀼𑀩𑁆𑀩𑀺𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀧𑀺 𑀬𑀣𑀸𑀭𑀳𑀁 𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀅𑀦𑀼𑀕𑀻𑀢𑀸’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀫𑀖𑀤𑁂𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁮. 𑀧𑀼𑀩𑁆𑀩𑁂 𑀫𑀖𑀤𑁂𑀯𑁄 𑀦𑀸𑀫 𑀭𑀸𑀚𑀸𑀢𑀺 𑀅𑀢𑀻𑀢𑀓𑀸𑀮𑁂 𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀅𑀦𑁂𑀓𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀉𑀧𑁆𑀧𑀦𑁆𑀦𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀽𑀦𑀁 𑀆𑀤𑀺𑀧𑀼𑀭𑀺𑀲𑁄 𑀫𑀖𑀤𑁂𑀯𑁄𑀢𑀺 𑀏𑀯𑀁𑀦𑀸𑀫𑁄 𑀭𑀸𑀚𑀸.

𑀥𑀫𑁆𑀫𑁄𑀢𑀺 𑀭𑀸𑀚𑀥𑀫𑁆𑀫𑁄𑀢𑀺 𑀮𑁄𑀓𑀺𑀓𑀸 𑀯𑀤𑀦𑁆𑀢𑀺. 𑀫𑀳𑀸𑀩𑁄𑀥𑀺𑀦𑀺𑀥𑀸𑀦𑀧𑀸𑀭𑀫𑀺𑀢𑀸𑀲𑀗𑁆𑀔𑀸𑀢𑁄 𑀧𑀦 𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀥𑀫𑁆𑀫𑀺𑀓𑁄. 𑀥𑀫𑁆𑀫𑁂𑀦𑀸𑀢𑀺 𑀜𑀸𑀬𑁂𑀦. 𑀢𑀤𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀤𑀺𑀪𑀸𑀯𑀦𑀸𑀥𑀫𑁆𑀫𑀲𑁆𑀲 𑀭𑀜𑁆𑀜𑁄 𑀅𑀦𑀥𑀺𑀕𑀢𑀢𑁆𑀢𑀸 𑀢𑀲𑁆𑀲𑀧𑀺 𑀯𑀸 𑀅𑀦𑀪𑀺𑀚𑁆𑀛𑀸𑀤𑀻𑀳𑀺 𑀲𑀫𑀸𑀦𑀬𑁄𑀕𑀓𑁆𑀔𑀫𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂 𑀞𑀺𑀢𑁄’’𑀢𑀺. 𑀥𑀫𑁆𑀫𑀦𑁆𑀢𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑀁. 𑀢𑀣𑀸 𑀳𑀺 𑀘 𑀲𑁄 𑀧𑀓𑁆𑀔𑀧𑀸𑀢𑀸𑀪𑀸𑀯𑀢𑁄 ‘‘𑀲𑀫𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀲𑀫𑀁 𑀘𑀭𑀢𑀻’’𑀢𑀺. 𑀧𑀓𑀢𑀺𑀦𑀺𑀬𑀸𑀫𑁂𑀦𑁂𑀯𑀸𑀢𑀺 𑀧𑀯𑁂𑀡𑀺𑀬𑀸 𑀆𑀕𑀢𑀦𑀺𑀬𑀸𑀫𑁂𑀦𑁂𑀯. 𑀬𑀲𑁆𑀫𑀸 𑀦𑀺𑀕𑀫𑀚𑀦𑀧𑀤𑁂𑀲𑀼 𑀬𑁂𑀪𑀼𑀬𑁆𑀬𑁂𑀦 𑀕𑀳𑀧𑀢𑀻𑀦𑀁 𑀲𑀗𑁆𑀕𑀳𑁄, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀕𑀳𑀧𑀢𑀺𑀓𑀸𑀦’’𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 𑀅𑀜𑁆𑀜𑀫𑁂𑀯 𑀦𑀸𑀕𑀭𑀘𑀸𑀭𑀺𑀢𑁆𑀢𑀁, 𑀅𑀜𑁆𑀜𑀁 𑀦𑁂𑀕𑀫𑀚𑀦𑀧𑀤𑀘𑀸𑀭𑀺𑀢𑁆𑀢𑀦𑁆𑀢𑀺 𑀢𑁂 𑀯𑀺𑀲𑀼𑀁 𑀕𑀳𑀺𑀢𑀸 ‘‘𑀦𑁂𑀕𑀫𑁂𑀲𑀼 𑀘𑁂𑀯 𑀚𑀦𑀧𑀤𑁂𑀲𑀼 𑀘𑀸’’𑀢𑀺. 𑀧𑀘𑁆𑀘𑀼𑀕𑁆𑀕𑀫𑀦𑀦𑀺𑀕𑁆𑀕𑀫𑀦𑀯𑀲𑁂𑀦 𑀉𑀧𑁄𑀲𑀣𑀲𑁆𑀲 𑀧𑀝𑀺𑀳𑀭𑀡𑀁 𑀧𑀸𑀝𑀺𑀳𑀸𑀭𑀺𑀬𑁄, 𑀲𑁄 𑀏𑀯 𑀧𑀸𑀝𑀺𑀳𑀸𑀭𑀺𑀓𑁄, 𑀧𑀓𑁆𑀔𑁄. 𑀇𑀫𑁂 𑀤𑀺𑀯𑀲𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀤𑀺𑀯𑀲𑀸.

𑁩𑁦𑁯. 𑀤𑁂𑀯𑁄𑀢𑀺 𑀫𑀘𑁆𑀘𑀼 𑀅𑀪𑀺𑀪𑀯𑀦𑀝𑁆𑀞𑁂𑀦. 𑀬𑀣𑀸 𑀳𑀺 𑀤𑁂𑀯𑁄 𑀧𑀓𑀢𑀺𑀲𑀢𑁆𑀢𑁂 𑀅𑀪𑀺𑀪𑀯𑀢𑀺, 𑀏𑀯𑀁 𑀫𑀘𑁆𑀘𑀼 𑀲𑀢𑁆𑀢𑁂 𑀅𑀪𑀺𑀪𑀯𑀢𑀺. ‘‘𑀅𑀳𑀁 𑀅𑀲𑀼𑀓𑀁 𑀫𑀤𑁆𑀤𑀺𑀢𑀼𑀁 𑀆𑀕𑀫𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀢𑀲𑁆𑀲 𑀓𑁂𑀲𑁂 𑀕𑀳𑁂𑀢𑁆𑀯𑀸 𑀫𑀸 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀫𑀘𑁆𑀘𑀼𑀤𑁂𑀯𑀲𑁆𑀲 𑀆𑀡𑀸𑀓𑀭𑀸 𑀤𑀽𑀢𑀸 𑀯𑀺𑀬𑀸𑀢𑀺 𑀤𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸𑀬𑀸𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀤𑀺𑀩𑁆𑀩𑀸𑀦𑀼𑀪𑀸𑀯𑀁 𑀆𑀯𑀺𑀓𑀢𑁆𑀯𑀸 𑀞𑀺𑀢𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀤𑁂𑀯𑀢𑀸𑀩𑁆𑀬𑀸𑀓𑀭𑀡𑀲𑀤𑀺𑀲𑀫𑁂𑀯 𑀳𑁄𑀢𑀺 𑀦 𑀘𑀺𑀭𑁂𑀦𑁂𑀯 𑀫𑀭𑀡𑀲𑀫𑁆𑀪𑀯𑀢𑁄. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀦𑁆𑀢𑀺 𑀔𑀻𑀡𑀸𑀲𑀯𑀩𑁆𑀭𑀳𑁆𑀫𑀸𑀦𑀁. 𑀢𑁂 𑀳𑀺 𑀘𑀭𑀺𑀫𑀪𑀯𑁂 𑀩𑁄𑀥𑀺𑀲𑀢𑁆𑀢𑀸𑀦𑀁 𑀚𑀺𑀡𑁆𑀡𑀸𑀤𑀺𑀓𑁂 𑀤𑀲𑁆𑀲𑁂𑀦𑁆𑀢𑀺.

𑀤𑀼𑀔𑀺𑀢𑀜𑁆𑀘 𑀩𑁆𑀬𑀸𑀥𑀺𑀢𑀦𑁆𑀢𑀺 𑀩𑁆𑀬𑀸𑀥𑀺𑀪𑀸𑀯𑁂𑀦 𑀲𑀜𑁆𑀚𑀸𑀢𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀤𑁂𑀯𑁂𑀳𑀺 𑀉𑀧𑀝𑁆𑀞𑀸𑀧𑀺𑀢𑀪𑀸𑀯𑀁 𑀉𑀧𑀸𑀤𑀸𑀬 𑀢𑀤𑀜𑁆𑀜𑁂𑀲𑀁 𑀢𑁂𑀳𑀺 𑀅𑀦𑀼𑀧𑀝𑁆𑀞𑀸𑀧𑀺𑀢𑀸𑀦𑀫𑁆𑀧𑀺 𑀧𑀡𑁆𑀟𑀺𑀢𑀸𑀦𑀁 𑀢𑀣𑀸 𑀯𑁄𑀳𑀭𑀺𑀢𑀩𑁆𑀩𑀢𑀸 𑀧𑀭𑀺𑀬𑀸𑀬𑀲𑀺𑀤𑁆𑀥𑀸𑀢𑀺 𑀆𑀳 ‘‘𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦𑀸’’𑀢𑀺.

𑀤𑀺𑀲𑀫𑁆𑀧𑀢𑀻𑀢𑀺 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄, 𑀤𑀺𑀲𑀸𑀲𑀻𑀲𑁂𑀦 𑀤𑁂𑀲𑀸 𑀯𑀼𑀢𑁆𑀢𑀸𑀢𑀺 𑀤𑁂𑀲𑀸𑀦𑀁 𑀅𑀥𑀺𑀧𑀢𑀺𑀭𑀸𑀚𑀸𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑀺 𑀭𑀼𑀳𑀦𑁆𑀢𑀻𑀢𑀺 𑀉𑀢𑁆𑀢𑀫𑀗𑁆𑀕𑀭𑀼𑀳𑀸, 𑀓𑁂𑀲𑀸. 𑀢𑁂 𑀧𑀦𑁂𑀢𑁆𑀣 𑀬𑀲𑁆𑀫𑀸 𑀧𑀮𑀺𑀢𑀢𑁆𑀢𑀸 𑀅𑀯𑀺𑀲𑁂𑀲𑀢𑁄 𑀲𑀩𑁆𑀩𑀧𑀘𑁆𑀙𑀺𑀫𑀯𑀬𑀲𑀦𑁆𑀤𑀲𑁆𑀲𑀓𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀯𑀬𑁄𑀳𑀭𑀸’’𑀢𑀺 𑀯𑀼𑀢𑁆𑀢𑀸.

𑀧𑀼𑀭𑀺𑀲𑀬𑀼𑀕𑁄 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀯𑀁𑀲𑁂 𑀲𑀜𑁆𑀚𑀸𑀢𑀧𑀼𑀭𑀺𑀲𑀝𑁆𑀞𑀺𑀢𑀺𑀬𑀸 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀢𑀲𑁆𑀫𑀸 𑀆𑀳 ‘‘𑀯𑀁𑀲𑀲𑀫𑁆𑀪𑀯𑁂 𑀧𑀼𑀭𑀺𑀲𑁂’’𑀢𑀺. 𑀭𑀸𑀚𑀕𑁂𑀳𑀢𑁄 𑀆𑀳𑀝𑀪𑀺𑀓𑁆𑀔𑀸𑀬 𑀬𑀸𑀧𑁂𑀦𑁆𑀢𑁄𑀢𑀺 𑀇𑀫𑀺𑀦𑀸 𑀓𑀼𑀫𑀸𑀭𑀓𑀧𑀩𑁆𑀩𑀚𑁆𑀚𑀸𑀬 𑀉𑀧𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀧𑀭𑀺𑀳𑀭𑀺𑀬𑀫𑀸𑀦𑁄𑀯𑀸𑀢𑀺 𑀅𑀜𑁆𑀜𑁂𑀦 𑀅𑀜𑁆𑀜𑁂𑀦 𑀧𑀭𑀺𑀳𑀭𑀺𑀬𑀫𑀸𑀦𑁄 𑀯𑀺𑀬 𑀯𑁂𑀮𑀸𑀬 𑀯𑁂𑀮𑀸𑀬 𑀢𑁂𑀦 𑀫𑀳𑀢𑀸 𑀧𑀭𑀺𑀚𑀦𑁂𑀦 𑀉𑀧𑀝𑁆𑀞𑀺𑀬𑀫𑀸𑀦𑁄 𑀓𑀼𑀫𑀸𑀭𑀓𑀻𑀴𑀁 𑀓𑀻𑀴𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀧𑀭𑀺𑀳𑀭𑀺𑀬𑀫𑀸𑀦𑁄 𑀏𑀯𑀸’’𑀢𑀺 𑀅𑀯𑀥𑀸𑀭𑀡𑀯𑀲𑁂𑀦 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀣𑀸 𑀲𑀢𑀺 𑀘𑀢𑀼𑀭𑀸𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀣𑀜𑁆𑀜𑀧𑀸𑀬𑀻 𑀢𑀭𑀼𑀡𑀤𑀸𑀭𑀓𑁄 𑀅𑀳𑁄𑀲𑀻𑀢𑀺 𑀆𑀧𑀚𑁆𑀚𑀢𑀻𑀢𑀺 𑀢𑀤𑀬𑀼𑀢𑁆𑀢𑀁. 𑀓𑀼𑀫𑀸𑀭𑀓𑀸𑀮𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀑𑀧𑀭𑀚𑁆𑀚𑀯𑀘𑀦𑀢𑁄 𑀯𑀺𑀭𑀼𑀤𑁆𑀥𑀜𑁆𑀘𑁂𑀢𑀁. (𑀧𑀜𑁆𑀘𑀫𑀗𑁆𑀕𑀮𑀯𑀘𑀦𑁂𑀦 𑀉𑀦𑁆𑀦𑀗𑁆𑀕𑀮𑀫𑀗𑁆𑀕𑀮𑀉𑀓𑁆𑀓𑀦𑁆𑀢𑀦𑀫𑀗𑁆𑀕𑀮𑀓𑀫𑁆𑀫𑀳𑀸𑀬𑀫𑀗𑁆𑀕𑀮𑀤𑀼𑀲𑁆𑀲𑀫𑀗𑁆𑀕𑀮𑀸𑀦𑀺 𑀲𑀫𑀼𑀧𑀕𑀢𑀸𑀦𑀺 𑀏𑀯 𑀅𑀳𑁂𑀲𑀼𑀦𑁆𑀢𑀺 𑀤𑀝𑁆𑀞𑀩𑁆𑀩𑀁).

𑁩𑁧𑁧. 𑀲𑀯𑀁𑀲𑀯𑀲𑁂𑀦 𑀆𑀕𑀢𑀸 𑀧𑀼𑀢𑁆𑀢𑀦𑀢𑁆𑀢𑀼𑀆𑀤𑀬𑁄 𑀧𑀼𑀢𑁆𑀢𑀸 𑀘 𑀧𑀧𑀼𑀢𑁆𑀢𑀸 𑀘 𑀏𑀢𑀺𑀲𑁆𑀲𑀸𑀢𑀺 𑀧𑀼𑀢𑁆𑀢𑀧𑀧𑀼𑀢𑁆𑀢𑀓𑀸 𑀧𑀭𑀫𑁆𑀧𑀭𑀸. 𑀦𑀺𑀳𑀢𑀦𑁆𑀢𑀺 𑀦𑀺𑀳𑀺𑀢𑀁 𑀞𑀧𑀺𑀢𑀁, 𑀧𑀯𑀢𑁆𑀢𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀳𑀢𑀦𑁆𑀢𑀺 𑀯𑀸 𑀲𑀢𑀢𑀁 𑀧𑀢𑀺𑀝𑁆𑀞𑀺𑀢𑀪𑀸𑀯𑁂𑀦 𑀯𑀴𑀜𑁆𑀚𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀮𑁆𑀬𑀸𑀡𑀯𑀢𑁆𑀢’’𑀦𑁆𑀢𑀺. 𑀅𑀢𑀺𑀭𑁂𑀓𑀢𑀭𑀸 𑀤𑁆𑀯𑁂 𑀕𑀼𑀡𑀸𑀢𑀺 𑀫𑀳𑀸𑀲𑀢𑁆𑀢𑀲𑁆𑀲 𑀫𑀖𑀤𑁂𑀯𑀓𑀸𑀮𑀢𑁄 𑀅𑀢𑀺𑀭𑁂𑀓𑀢𑀭𑀸 𑀤𑁆𑀯𑁂 𑀕𑀼𑀡𑀸 𑀇𑀢𑀭𑀭𑀸𑀚𑀽𑀳𑀺 𑀧𑀦 𑀅𑀢𑀺𑀭𑁂𑀓𑀢𑀭𑀸 𑀅𑀦𑁂𑀓𑀲𑀢𑀲𑀳𑀲𑁆𑀲𑀧𑁆𑀧𑀪𑁂𑀤𑀸 𑀏𑀯 𑀕𑀼𑀡𑀸 𑀅𑀳𑁂𑀲𑀼𑀦𑁆𑀢𑀺.

𑁩𑁧𑁨. 𑀢𑁂𑀢𑁆𑀢𑀺𑀁𑀲 𑀲𑀳𑀧𑀼𑀜𑁆𑀜𑀓𑀸𑀭𑀺𑀦𑁄 𑀏𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑀁𑀲𑀳𑀘𑀭𑀺𑀢𑀝𑁆𑀞𑀸𑀦𑀁 𑀢𑁂𑀢𑁆𑀢𑀺𑀁𑀲𑀁, 𑀢𑀤𑁂𑀯 𑀢𑀸𑀯𑀢𑀺𑀁𑀲𑀁, 𑀢𑀁𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀢𑀸𑀯𑀢𑀺𑀁𑀲𑀸. 𑀦𑀺𑀯𑀸𑀲𑀪𑀸𑀯𑁄 𑀘 𑀢𑁂𑀲𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀧𑀼𑀩𑁆𑀩𑀓𑁄𑀢𑀺 𑀆𑀳 𑁋 ‘‘𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀦𑁆𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀸𑀦’’𑀦𑁆𑀢𑀺. 𑀭𑀜𑁆𑀜𑁄𑀢𑀺 𑀦𑀺𑀫𑀺𑀫𑀳𑀸𑀭𑀸𑀚𑀲𑁆𑀲. 𑀑𑀯𑀸𑀤𑁂 𑀞𑀢𑁆𑀯𑀸𑀢𑀺 ‘‘𑀲𑀻𑀮𑀁 𑀅𑀭𑀓𑁆𑀔𑀦𑁆𑀢𑁄 𑀫𑀫 𑀲𑀦𑁆𑀢𑀺𑀓𑀁 𑀫𑀸 𑀆𑀕𑀘𑁆𑀙𑀢𑀽’’𑀢𑀺 𑀦𑀺𑀕𑁆𑀕𑀡𑁆𑀳𑀦𑀯𑀲𑁂𑀦𑀧𑀺, ‘‘𑀏𑀓𑀦𑁆𑀢𑀢𑁄 𑀫𑀫 𑀯𑀺𑀚𑀺𑀢𑁂 𑀯𑀲𑀦𑁆𑀢𑁂𑀦 𑀲𑀻𑀮𑀁 𑀭𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀺𑀢𑀑𑀯𑀸𑀤𑀯𑀲𑁂𑀦𑀧𑀺 𑀑𑀯𑀸𑀤𑁂 𑀞𑀢𑁆𑀯𑀸.

𑀅𑀣 𑀦𑀦𑁆𑀢𑀺 𑀫𑀳𑀸𑀚𑀼𑀢𑀺𑀓𑀁 𑀫𑀳𑀸𑀯𑀺𑀧𑁆𑀨𑀸𑀭𑀁 𑀫𑀳𑀸𑀦𑀼𑀪𑀸𑀯𑀁 𑀦𑀺𑀫𑀺𑀭𑀸𑀚𑀸𑀦𑀁. ‘‘𑀲𑀓𑁆𑀓𑁄𑀳𑀫𑀲𑁆𑀫𑀺 𑀤𑁂𑀯𑀺𑀦𑁆𑀤𑁄, 𑀢𑀯 𑀲𑀦𑁆𑀢𑀺𑀓𑀫𑀸𑀕𑀢𑁄’’𑀢𑀺 𑀅𑀢𑁆𑀢𑀦𑁄 𑀲𑀓𑁆𑀓𑀪𑀸𑀯𑀁 𑀧𑀯𑁂𑀤𑁂𑀢𑁆𑀯𑀸 ‘‘𑀓𑀗𑁆𑀔𑀁 𑀢𑁂 𑀧𑀝𑀺𑀯𑀺𑀦𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑁂𑀦𑀸𑀳 ‘‘𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭𑀸’’𑀢𑀺𑀆𑀤𑀺.

𑀲𑀻𑀮𑀁 𑀉𑀧𑀸𑀤𑀸𑀬 𑀑𑀫𑀓𑀢𑀸𑀬 ‘‘𑀓𑀺’’𑀦𑁆𑀢𑀺 𑀳𑀻𑀴𑁂𑀦𑁆𑀢𑁄 𑀯𑀤𑀢𑀺. 𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬𑀸𑀢𑀺 𑀮𑀸𑀪𑀬𑀲𑀸𑀤𑀻𑀦𑀜𑁆𑀘𑁂𑀯 𑀧𑀺𑀬𑀫𑀦𑀸𑀧𑀢𑀸𑀤𑀻𑀦𑀜𑁆𑀘 𑀆𑀲𑀯𑀓𑁆𑀔𑀬𑀧𑀭𑀺𑀬𑁄𑀲𑀸𑀦𑀸𑀦𑀁 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀉𑀢𑁆𑀢𑀫𑀕𑀼𑀡𑀢𑀸𑀬. 𑀢𑀤𑀸 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄, 𑀲𑁄 𑀅𑀢𑁆𑀢𑀦𑁄 𑀧𑀼𑀭𑀺𑀫𑀚𑀸𑀢𑀺𑀬𑀁 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀁𑀯 𑀤𑀸𑀦𑀢𑁄 𑀲𑀻𑀮𑀁 𑀫𑀳𑀦𑁆𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀳𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀢𑀦𑀸 𑀯𑀲𑀺𑀬𑀫𑀸𑀦𑀁 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀁 𑀲𑀦𑁆𑀥𑀸𑀬 ‘‘𑀧𑁂𑀢𑁆𑀢𑀺𑀯𑀺𑀲𑀬𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀳𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀯𑀺𑀯𑀝𑁆𑀝𑀚𑁆𑀛𑀸𑀲𑀬𑀲𑁆𑀲 𑀧𑀽𑀭𑀺𑀢𑀧𑀸𑀭𑀫𑀺𑀲𑁆𑀲 𑀤𑁂𑀯𑀮𑁄𑀓𑁄 𑀧𑁂𑀢𑀮𑁄𑀓𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀢𑁂𑀦𑁂𑀯𑀸𑀳 ‘‘𑀅𑀘𑁆𑀙𑀭𑀸𑀕𑀡𑀲𑀗𑁆𑀖𑀼𑀝𑁆𑀞𑀁, 𑀧𑀺𑀲𑀸𑀘𑀕𑀡𑀲𑁂𑀯𑀺𑀢’’𑀦𑁆𑀢𑀺 (𑀲𑀁. 𑀦𑀺. 𑁧.𑁪𑁬).

𑀔𑀢𑁆𑀢𑀺𑀬𑁂𑀢𑀺 𑀔𑀢𑁆𑀢𑀺𑀬𑀚𑀸𑀢𑀺𑀬𑀁. 𑀯𑀺𑀲𑀼𑀚𑁆𑀛𑀢𑀻𑀢𑀺 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺 𑀓𑀸𑀫𑀲𑀁𑀓𑀺𑀮𑁂𑀲𑀯𑀺𑀲𑀼𑀚𑁆𑀛𑀦𑀢𑁄. 𑀓𑀸𑀬𑀸𑀢𑀺 𑀘 𑀩𑁆𑀭𑀳𑁆𑀫𑀓𑀸𑀬𑀫𑀸𑀳.

𑀇𑀫𑀲𑁆𑀲 𑀫𑀫 𑀅𑀤𑀺𑀝𑁆𑀞𑀧𑀼𑀩𑁆𑀩𑀭𑀽𑀧𑀁 𑀤𑀺𑀲𑁆𑀯𑀸 ‘‘𑀅𑀳𑀼𑀤𑁂𑀯 𑀪𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 ‘‘𑀅𑀯𑀺𑀓𑀫𑁆𑀧𑀫𑀸𑀦𑁄’’𑀢𑀺. 𑀪𑀸𑀬𑀦𑁆𑀢𑁄 𑀳𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑁂𑀦 𑀓𑀸𑀬𑀲𑁆𑀲 𑀘 𑀙𑀫𑁆𑀪𑀺𑀢𑀢𑁆𑀢𑁂𑀦 𑀯𑀺𑀓𑀫𑁆𑀧𑀢𑀺 𑀦𑀸𑀫. 𑀢𑁂𑀦𑀸𑀳 ‘‘𑀅𑀪𑀸𑀬𑀫𑀸𑀦𑁄’’𑀢𑀺. 𑀲𑀼𑀔𑀁 𑀓𑀣𑁂𑀢𑀼𑀁 𑀳𑁄𑀢𑀻𑀢𑀺 𑀧𑀼𑀜𑁆𑀜𑀨𑀮𑀁 𑀓𑀣𑁂𑀢𑀼𑀁 𑀲𑀼𑀔𑀁 𑀳𑁄𑀢𑀺.

𑁩𑁧𑁩. 𑀫𑀦𑀁 𑀆𑀕𑀫𑁆𑀫 𑀬𑀼𑀢𑁆𑀢𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀫𑀸𑀢𑀮𑀺𑀲𑁆𑀲 𑀲𑀓𑁆𑀓𑀲𑁆𑀲𑁂𑀯 𑀘𑀺𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀬𑀼𑀢𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀭𑀣𑁂 𑀬𑀼𑀢𑁆𑀢𑀆𑀚𑀸𑀦𑀻𑀬𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺 𑀤𑁂𑀯𑀧𑀼𑀢𑁆𑀢𑀸. 𑀏𑀯𑀁 𑀢𑀸𑀤𑀺𑀲𑁂 𑀓𑀸𑀮𑁂 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀬𑀣𑀸 𑀏𑀭𑀸𑀯𑀡𑁄 𑀤𑁂𑀯𑀧𑀼𑀢𑁆𑀢𑁄 𑀳𑀢𑁆𑀣𑀺𑀓𑀺𑀘𑁆𑀘𑀁. 𑀦𑀤𑁆𑀥𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀭𑀣𑀧𑀜𑁆𑀚𑀭𑀧𑀭𑀺𑀬𑀦𑁆𑀢𑁂𑀦 𑀅𑀓𑁆𑀔𑀲𑁆𑀲 𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑀁 𑀦𑀤𑁆𑀥𑀻, 𑀢𑀢𑁄 𑀧𑀝𑁆𑀞𑀸𑀬. 𑀅𑀓𑁆𑀔𑁄 𑀩𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀅𑀓𑁆𑀔𑀩𑀤𑁆𑀥𑁄, 𑀅𑀓𑁆𑀔𑁂𑀦 𑀭𑀣𑀲𑁆𑀲 𑀩𑀤𑁆𑀥𑀝𑁆𑀞𑀸𑀦𑀁. 𑀬𑀣𑀸 𑀤𑁂𑀯𑀮𑁄𑀓𑀢𑁄 𑀬𑀸𑀯 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀕𑀫𑀦𑀯𑀻𑀣𑀺, 𑀢𑀸𑀯 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀳𑁂𑀝𑁆𑀞𑀸𑀫𑀼𑀔𑀫𑁂𑀯 𑀭𑀣𑀁 𑀧𑁂𑀲𑁂𑀲𑀺, 𑀏𑀯𑀁 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀕𑀫𑀦𑀯𑀻𑀣𑀺𑀢𑁄 𑀬𑀸𑀯 𑀭𑀜𑁆𑀜𑁄 𑀧𑀸𑀲𑀸𑀤𑁄, 𑀢𑀸𑀯 𑀢𑀣𑁂𑀯 𑀧𑁂𑀲𑁂𑀲𑀺. 𑀤𑁆𑀯𑁂 𑀫𑀕𑁆𑀕𑁂 𑀤𑀲𑁆𑀲𑁂𑀢𑁆𑀯𑀸𑀢𑀺 𑀧𑀢𑁄𑀤𑀮𑀝𑁆𑀞𑀺𑀬𑀸 𑀆𑀓𑀸𑀲𑀁 𑀯𑀺𑀮𑀺𑀔𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀺𑀭𑀬𑀕𑀸𑀫𑀻 𑀤𑁂𑀯𑀮𑁄𑀓𑀕𑀸𑀫𑀻 𑀘𑀸𑀢𑀺 𑀤𑁆𑀯𑁂 𑀫𑀕𑁆𑀕𑁂 𑀤𑀲𑁆𑀲𑁂𑀢𑁆𑀯𑀸. 𑀓𑀢𑀫𑁂𑀦𑀸𑀢𑀺𑀆𑀤𑀺 𑀤𑁂𑀲𑀦𑀸𑀫𑀢𑁆𑀢𑀁, 𑀬𑀣𑀸 𑀢𑁂𑀦 𑀭𑀣𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀦𑀺𑀭𑀬𑁄 𑀤𑁂𑀯𑀮𑁄𑀓𑁄 𑀘 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀢𑀣𑀸 𑀓𑀭𑀡𑀁 𑀅𑀥𑀺𑀧𑁆𑀧𑁂𑀢𑀁.

𑀯𑀼𑀢𑁆𑀢𑀓𑀸𑀭𑀡𑀫𑁂𑀯 𑀲𑀦𑁆𑀥𑀸𑀬𑀸𑀳 𑀫𑀳𑀸𑀲𑀢𑁆𑀢𑁄 ‘‘𑀉𑀪𑀬𑁂𑀦𑁂𑀯 𑀫𑀁 𑀫𑀸𑀢𑀮𑀺 𑀦𑁂𑀳𑀻’’𑀢𑀺. 𑀤𑀼𑀕𑁆𑀕𑀦𑁆𑀢𑀺 𑀤𑀼𑀕𑁆𑀕𑀫𑀁. 𑀯𑁂𑀢𑁆𑀢𑀭𑀡𑀺𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀦𑀺𑀭𑀬𑀁. 𑀓𑀼𑀣𑀺𑀢𑀦𑁆𑀢𑀺 𑀧𑀓𑁆𑀓𑀼𑀣𑀺𑀢𑀁 𑀦𑀺𑀧𑀓𑁆𑀓𑀢𑁂𑀮𑀲𑀤𑀺𑀲𑀚𑀸𑀮𑀁. 𑀔𑀸𑀭𑀲𑀁𑀬𑀼𑀢𑁆𑀢𑀦𑁆𑀢𑀺 𑀔𑀸𑀭𑁄𑀤𑀓𑀲𑀤𑀺𑀲𑀁.

𑀭𑀣𑀁 𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀦𑀺𑀭𑀬𑀸𑀪𑀺𑀫𑀼𑀔𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸. 𑀩𑀻𑀭𑀡𑀻𑀤𑁂𑀯𑀥𑀻𑀢𑀸𑀬𑀸𑀢𑀺 ‘‘𑀩𑀻𑀭𑀡𑀻’’𑀢𑀺 𑀏𑀯𑀁𑀦𑀸𑀫𑀺𑀓𑀸𑀬 𑀅𑀘𑁆𑀙𑀭𑀸𑀬. 𑀲𑁄𑀡𑀤𑀺𑀦𑁆𑀦𑀤𑁂𑀯𑀧𑀼𑀢𑁆𑀢𑀲𑁆𑀲𑀸𑀢𑀺 ‘‘𑀲𑁄𑀡𑀤𑀺𑀦𑁆𑀦𑁄’’𑀢𑀺 𑀏𑀯𑀁𑀦𑀸𑀫𑀓𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲. 𑀕𑀡𑀤𑁂𑀯𑀧𑀼𑀢𑁆𑀢𑀸𑀦𑀦𑁆𑀢𑀺 𑀕𑀡𑀯𑀲𑁂𑀦 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀕𑀡𑀯𑀲𑁂𑀦𑁂𑀯 𑀦𑀺𑀩𑁆𑀩𑀢𑁆𑀢𑀤𑁂𑀯𑀧𑀼𑀢𑁆𑀢𑀸𑀦𑀁.

𑀧𑀢𑁆𑀢𑀓𑀸𑀮𑁂𑀢𑀺 𑀉𑀧𑀓𑀝𑁆𑀞𑀸𑀬 𑀯𑁂𑀮𑀸𑀬. 𑀅𑀢𑀺𑀣𑀺𑀦𑁆𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁. 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀏𑀓𑀁 𑀔𑀻𑀡𑀸𑀲𑀯𑀢𑁆𑀣𑁂𑀭𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀫𑀸𑀢𑀸𑀯 𑀧𑀼𑀢𑁆𑀢𑀁 𑀲𑀓𑀺𑀫𑀸𑀪𑀺𑀦𑀦𑁆𑀤𑀻𑀢𑀺 𑀬𑀣𑀸 𑀧𑀯𑀸𑀲𑀢𑁄 𑀆𑀕𑀢𑀁 𑀧𑀼𑀢𑁆𑀢𑀁 𑀫𑀸𑀢𑀸 𑀲𑀓𑀺𑀁 𑀏𑀓𑀯𑀸𑀭𑀁 𑀆𑀕𑀢𑀓𑀸𑀮𑁂 𑀅𑀪𑀺𑀦𑀦𑁆𑀤𑀢𑀺, 𑀢𑀣𑀸 𑀦𑀺𑀘𑁆𑀘𑀓𑀸𑀮𑁂 𑀅𑀪𑀺𑀦𑀦𑁆𑀤𑀺 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺. 𑀲𑀁𑀬𑀫𑀸 𑀲𑀁𑀯𑀺𑀪𑀸𑀕𑀸𑀢𑀺 𑀲𑀻𑀮𑀲𑀁𑀬𑀫𑀸 𑀲𑀁𑀯𑀺𑀪𑀸𑀕𑀲𑀻𑀮𑀸. 𑀚𑀸𑀢𑀓𑁂𑀢𑀺 𑀦𑀺𑀫𑀺𑀚𑀸𑀢𑀓𑁂.

𑀘𑀺𑀢𑁆𑀢𑀓𑀽𑀝𑀦𑁆𑀢𑀺 𑀤𑁂𑀯𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀬 𑀤𑁆𑀯𑀸𑀭𑀓𑁄𑀝𑁆𑀞𑀓𑀁. 𑀲𑀓𑁆𑀓𑁄 𑀘𑀺𑀢𑁆𑀢𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀫𑀳𑀸𑀲𑀢𑁆𑀢𑁂 𑀧𑀯𑀢𑁆𑀢𑀁 𑀤𑁂𑀯𑀢𑀸𑀦𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀅𑀢𑁆𑀢𑀦𑁄 𑀉𑀲𑀽𑀬𑀘𑀺𑀢𑁆𑀢𑀁 𑀩𑀳𑀺 𑀅𑀦𑀸𑀯𑀺𑀓𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀘 𑀦𑀁 𑀞𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄. 𑀅𑀜𑁆𑀜𑁂𑀲𑀁 𑀧𑀼𑀜𑁆𑀜𑁂𑀦 𑀯𑀲𑀸𑀳𑀻𑀢𑀺 𑀲𑀓𑁆𑀓𑀲𑁆𑀲 𑀫𑀳𑀸𑀲𑀢𑁆𑀢𑀁 𑀭𑁄𑀲𑁂𑀢𑀼𑀓𑀸𑀫𑀢𑀸𑀬 𑀆𑀭𑀸𑀥𑀦𑀁 𑀦𑀺𑀤𑀲𑁆𑀲𑁂𑀢𑀺. 𑀧𑀼𑀭𑀸𑀡𑀲𑀓𑁆𑀓𑁄 𑀤𑀻𑀖𑀸𑀬𑀼𑀓𑁄, 𑀢𑀁 𑀉𑀧𑀸𑀤𑀸𑀬 𑀚𑀭𑀸𑀚𑀺𑀡𑁆𑀡𑀁 𑀯𑀺𑀬 𑀓𑀢𑁆𑀯𑀸 ‘‘𑀚𑀭𑀲𑀓𑁆𑀓𑁄’’𑀢𑀺 𑀯𑀼𑀢𑁆𑀢𑀁.

𑁩𑁧𑁫. 𑀲𑁂𑀲𑀁 𑀲𑀩𑁆𑀩𑀦𑁆𑀢𑀺 𑀧𑀩𑁆𑀩𑀚𑁆𑀚𑀼𑀧𑀕𑀫𑀦𑀸 𑀲𑁂𑀲𑀁 𑀅𑀢𑁆𑀢𑀦𑁄 𑀯𑀁𑀲𑁂 𑀧𑁄𑀭𑀸𑀡𑀭𑀸𑀚𑀽𑀦𑀁 𑀭𑀸𑀚𑀘𑀸𑀭𑀺𑀢𑁆𑀢𑀁. 𑀧𑀸𑀓𑀢𑀺𑀓𑀦𑁆𑀢𑀺 𑀧𑀼𑀦 𑀲𑀪𑀸𑀯𑀢𑁆𑀢𑀫𑁂𑀯 𑀕𑀢𑁄 𑀅𑀳𑁄𑀲𑀺, 𑀅𑀧𑀩𑁆𑀩𑀚𑀺𑀢𑀪𑀸𑀯𑀯𑀘𑀦𑁂𑀦𑁂𑀯𑀲𑁆𑀲 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀤𑀻𑀦𑀁 𑀧𑀩𑁆𑀩𑀚𑁆𑀚𑀸𑀕𑀼𑀡𑀸𑀦𑀁 𑀅𑀪𑀸𑀯𑁄 𑀤𑀻𑀧𑀺𑀢𑁄 𑀳𑁄𑀢𑀺.

𑁩𑁧𑁬. 𑀯𑀻𑀭𑀺𑀬𑀁 𑀅𑀓𑀭𑁄𑀦𑁆𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀦 𑀢𑀸𑀯 𑀲𑀫𑀼𑀘𑁆𑀙𑀺𑀦𑁆𑀦𑀁, 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀁𑀲𑀕𑁆𑀕𑀸𑀤𑀺𑀧𑀘𑁆𑀘𑀬𑀲𑀫𑀯𑀸𑀬𑁂 𑀲𑀢𑀺 𑀲𑀻𑀮𑀯𑀢𑀁 𑀓𑀮𑁆𑀬𑀸𑀡𑀯𑀢𑁆𑀢𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀤𑀼𑀲𑁆𑀲𑀻𑀮𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺 𑀢𑀲𑁆𑀲 𑀢𑀢𑁆𑀣 𑀦𑀺𑀭𑀸𑀲𑀪𑀸𑀯𑁂𑀦 𑀧𑀝𑀺𑀧𑀢𑁆𑀢𑀺𑀬𑀸 𑀏𑀯 𑀅𑀲𑀫𑁆𑀪𑀯𑀢𑁄. 𑀲𑀢𑁆𑀢 𑀲𑁂𑀔𑀸 𑀧𑀯𑀢𑁆𑀢𑁂𑀦𑁆𑀢𑀺 𑀓𑀮𑁆𑀬𑀸𑀡𑀯𑀢𑁆𑀢𑀲𑁆𑀲 𑀅𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑁆𑀢𑀸. 𑀔𑀻𑀡𑀸𑀲𑀯𑁂𑀦 𑀧𑀯𑀢𑁆𑀢𑀺𑀢𑀁 𑀦𑀸𑀫 𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑁆𑀢𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀖𑀤𑁂𑀯𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀫𑀥𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁭. 𑀫𑀥𑀼𑀭𑀸𑀬𑀦𑁆𑀢𑀺 𑀉𑀢𑁆𑀢𑀭𑀫𑀥𑀼𑀭𑀸𑀬𑀁. 𑀕𑀼𑀦𑁆𑀤𑀸𑀯𑀦𑁂𑀢𑀺 𑀓𑀸𑀴𑀲𑀺𑀧𑁆𑀧𑀮𑀺𑀯𑀦𑁂. 𑀅𑀢𑀺𑀫𑀼𑀢𑁆𑀢𑀓𑀯𑀦𑁂𑀢𑀺 𑀘 𑀯𑀤𑀦𑁆𑀢𑀺. 𑀘𑀢𑀽𑀲𑀼 𑀯𑀡𑁆𑀡𑁂𑀲𑀼 𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄. 𑀧𑀡𑁆𑀟𑀭𑁄𑀢𑀺 𑀧𑀭𑀺𑀲𑀼𑀤𑁆𑀥𑁄. 𑀓𑀸𑀴𑀓𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑁄. 𑀚𑀸𑀢𑀺𑀕𑁄𑀢𑁆𑀢𑀸𑀤𑀺𑀧𑀜𑁆𑀜𑀸𑀧𑀦𑀝𑁆𑀞𑀸𑀦𑁂𑀲𑀽𑀢𑀺 𑀚𑀸𑀢𑀺𑀕𑁄𑀢𑁆𑀢𑀸𑀤𑀺𑀯𑀲𑁂𑀦 𑀲𑀼𑀤𑁆𑀥𑀘𑀺𑀦𑁆𑀢𑀸𑀬𑀁 𑀩𑁆𑀭𑀸𑀳𑁆𑀫𑀡𑀸 𑀏𑀯 𑀲𑀼𑀤𑁆𑀥𑀚𑀸𑀢𑀺𑀓𑀸, 𑀦 𑀇𑀢𑀭𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀁𑀲𑀸𑀭𑀢𑁄 𑀯𑀸 𑀲𑀼𑀤𑁆𑀥𑀘𑀺𑀦𑁆𑀢𑀸𑀬𑀁 𑀩𑁆𑀭𑀸𑀳𑁆𑀫𑀡𑀸𑀯 𑀲𑀼𑀚𑁆𑀛𑀦𑁆𑀢𑀺 𑀯𑁂𑀤𑀯𑀺𑀳𑀺𑀢𑀲𑁆𑀲 𑀲𑀼𑀤𑁆𑀥𑀯𑀺𑀥𑀺𑀦𑁄 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀧𑀦𑁂𑀢𑀁 𑀢𑁂𑀲𑀁 𑀯𑀺𑀭𑀼𑀚𑁆𑀛𑀢𑀺 𑀔𑀢𑁆𑀢𑀺𑀬𑀯𑁂𑀲𑁆𑀲𑀸𑀦𑀫𑁆𑀧𑀺 𑀫𑀦𑁆𑀢𑀚𑁆𑀛𑁂𑀦𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸, 𑀫𑀦𑁆𑀢𑀚𑁆𑀛𑁂𑀦𑀯𑀺𑀥𑀺𑀦𑀸 𑀘 𑀲𑀁𑀲𑀸𑀭𑀲𑀼𑀤𑁆𑀥𑀺𑀬𑀸𑀪𑀸𑀯𑀢𑁄. 𑀧𑀼𑀢𑁆𑀢𑀸 𑀦𑀸𑀫 𑀅𑀦𑁄𑀭𑀲𑀸𑀧𑀺 𑀳𑁄𑀦𑁆𑀢𑀺, 𑀦 𑀢𑀣𑀸 𑀇𑀫𑁂𑀢𑀺 𑀆𑀳 ‘‘𑀑𑀭𑀲𑀸’’𑀢𑀺. 𑀉𑀭𑁂 𑀲𑀁𑀯𑀟𑁆𑀠𑀺𑀢𑀧𑀼𑀢𑁆𑀢𑁄𑀧𑀺 ‘‘𑀑𑀭𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑁂 𑀧𑀦 𑀫𑀼𑀔𑀢𑁄 𑀦𑀺𑀕𑁆𑀕𑀢𑁄 𑀳𑀼𑀢𑁆𑀯𑀸 𑀉𑀭𑁂 𑀲𑀁𑀯𑀟𑁆𑀠𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀏𑀯 𑀩𑁆𑀭𑀳𑁆𑀫𑀢𑁄 𑀚𑀸𑀢𑀸𑀢𑀺 𑀩𑁆𑀭𑀳𑁆𑀫𑀚𑀸, 𑀩𑁆𑀭𑀳𑁆𑀫𑀲𑀫𑁆𑀪𑀽𑀢𑀸𑀧𑀺 ‘‘𑀩𑁆𑀭𑀳𑁆𑀫𑀚𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀦 𑀢𑀣𑀸 𑀇𑀫𑁂. 𑀇𑀫𑁂 𑀧𑀦 𑀧𑀘𑁆𑀘𑀓𑁆𑀔𑀢𑁄 𑀩𑁆𑀭𑀳𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀸𑀢𑀺 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑀸, 𑀢𑀢𑁄 𑀏𑀯 𑀩𑁆𑀭𑀳𑁆𑀫𑀢𑁄 𑀮𑀤𑁆𑀥𑀩𑁆𑀩𑀯𑀺𑀚𑁆𑀚𑀸𑀤𑀺𑀤𑀸𑀬𑀚𑁆𑀚𑀤𑀸𑀬𑀸𑀤𑀸𑀢𑀺 𑀩𑁆𑀭𑀳𑁆𑀫𑀤𑀸𑀬𑀸𑀤𑀸𑀢𑀺 𑀲𑀩𑁆𑀩𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀢𑁆𑀣𑀦𑀸𑀧𑀮𑀸𑀧𑀲𑀤𑀺𑀲𑀁 𑀯𑀺𑀜𑁆𑀜𑀽𑀦𑀁 𑀅𑀧𑁆𑀧𑀫𑀸𑀡𑀁 𑀅𑀯𑀺𑀫𑀤𑁆𑀤𑀓𑁆𑀔𑀫𑀁 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀁 𑀩𑁆𑀭𑀳𑁆𑀫𑀓𑀼𑀢𑁆𑀢𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀢𑁂𑀦𑀸𑀳 ‘‘𑀖𑁄𑀲𑁄𑀬𑁂𑀯𑀸’’𑀢𑀺𑀆𑀤𑀺. 𑀯𑁄𑀳𑀸𑀭𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺 𑀏𑀢𑀁 ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄’’𑀢𑀺𑀆𑀤𑀺 𑀯𑀘𑀦𑀫𑀢𑁆𑀢𑀫𑁂𑀯, 𑀦 𑀢𑀲𑁆𑀲 𑀅𑀢𑁆𑀣𑁄 𑀢𑁂𑀳𑀺 𑀅𑀥𑀺𑀧𑁆𑀧𑁂𑀢𑀧𑁆𑀧𑀓𑀸𑀭𑁄 𑀅𑀢𑁆𑀣𑀺.

𑁩𑁧𑁮. 𑀲𑀫𑀺𑀚𑁆𑀛𑁂𑀬𑁆𑀬𑀸𑀢𑀺 𑀤𑀺𑀝𑁆𑀞𑀺𑀤𑀻𑀧𑀦𑀯𑀲𑁂𑀦 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀦𑀺𑀧𑁆𑀨𑀚𑁆𑀚𑁂𑀬𑁆𑀬. 𑀢𑁂𑀦𑀸𑀳 ‘‘𑀫𑀦𑁄𑀭𑀣𑁄 𑀧𑀽𑀭𑁂𑀬𑁆𑀬𑀸’’𑀢𑀺. 𑀔𑀢𑁆𑀢𑀺𑀬𑁄𑀧𑀻𑀢𑀺 𑀧𑀭𑀔𑀢𑁆𑀢𑀺𑀬𑁄𑀧𑀺. 𑀅𑀲𑁆𑀲𑀸𑀢𑀺 𑀲𑀫𑀺𑀤𑁆𑀥𑀥𑀦𑀸𑀤𑀺𑀁 𑀧𑀢𑁆𑀢𑀲𑁆𑀲. 𑀢𑁂𑀦𑀸𑀳 𑁋 ‘‘𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀲𑁆𑀲𑀸’’𑀢𑀺 𑀦𑁂𑀲𑀦𑁆𑀢𑀺 𑀏𑀢𑁂𑀲𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀏𑀢𑁆𑀣 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀪𑀸𑀯𑀸𑀤𑀺𑀦𑀸 𑀇𑀢𑀭𑁂𑀳𑀺 𑀉𑀧𑀘𑀭𑀺𑀢𑀩𑁆𑀩𑀢𑀸𑀬 𑀦 𑀓𑀺𑀜𑁆𑀘𑀺 𑀦𑀸𑀦𑀸𑀓𑀭𑀡𑀦𑁆𑀢𑀺 𑀬𑁄𑀚𑀦𑀸.

𑁩𑁨𑁨. 𑀅𑀳𑀁 𑀘𑀻𑀯𑀭𑀸𑀤𑀻𑀳𑀺 𑀉𑀧𑀝𑁆𑀞𑀸𑀓𑁄, 𑀢𑀼𑀫𑁆𑀳𑀸𑀓𑀁 𑀇𑀘𑁆𑀙𑀺𑀢𑀘𑁆𑀙𑀺𑀢𑀓𑁆𑀔𑀡𑁂 𑀯𑀤𑁂𑀬𑁆𑀬𑀸𑀣 𑀬𑁂𑀦𑀢𑁆𑀣𑁄𑀢𑀺 𑀬𑁄𑀚𑀦𑀸. 𑀘𑁄𑀭𑀸𑀤𑀺𑀉𑀧𑀤𑁆𑀤𑀯𑀦𑀺𑀲𑁂𑀥𑀦𑁂𑀦 𑀭𑀓𑁆𑀔𑀸𑀕𑀼𑀢𑁆𑀢𑀺, 𑀤𑀸𑀦𑀸𑀤𑀺𑀦𑀺𑀫𑀺𑀢𑁆𑀢𑀉𑀧𑀤𑁆𑀤𑀯𑀦𑀺𑀲𑁂𑀥𑀦𑁂𑀦 𑀆𑀯𑀭𑀡𑀕𑀼𑀢𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀢𑁆𑀣𑀦𑀺𑀲𑁂𑀥𑀦𑁂𑀦 𑀯𑀸 𑀭𑀓𑁆𑀔𑀸𑀕𑀼𑀢𑁆𑀢𑀺, 𑀆𑀕𑀸𑀫𑀺𑀅𑀦𑀢𑁆𑀣𑀦𑀺𑀲𑁂𑀥𑀦𑁂𑀦 𑀆𑀯𑀭𑀡𑀕𑀼𑀢𑁆𑀢𑀺. 𑀏𑀢𑁆𑀣 𑀘 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑁄 𑀬𑁄 𑀇𑀲𑁆𑀲𑀭𑁄, 𑀢𑀲𑁆𑀲 𑀇𑀢𑀭𑁂𑀦 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑀪𑀸𑀯𑁂, 𑀓𑀼𑀲𑀮𑀸𑀓𑀼𑀲𑀮𑀓𑀭𑀡𑁂𑀦 𑀦𑁂𑀲𑀁 𑀯𑀲𑁂𑀦 𑀮𑀤𑁆𑀥𑀩𑁆𑀩𑀅𑀪𑀺𑀲𑀫𑁆𑀧𑀭𑀸𑀬𑁂, 𑀧𑀩𑁆𑀩𑀚𑀺𑀢𑁂𑀳𑀺 𑀮𑀤𑁆𑀥𑀩𑁆𑀩𑀲𑀸𑀫𑀻𑀘𑀺𑀓𑀺𑀭𑀺𑀬𑀸𑀬 𑀘 𑀅𑀡𑀼𑀫𑀢𑁆𑀢𑁄𑀧𑀺 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄 𑀯𑀺𑀲𑁂𑀲𑀸𑀪𑀸𑀯𑁄 𑀧𑀸𑀴𑀺𑀬𑀁 𑀢𑀢𑁆𑀣 𑀢𑀢𑁆𑀣 𑀯𑀸𑀭𑁂 ‘‘𑀏𑀯𑀁 𑀲𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑀺𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀥𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁪. 𑀑𑀮𑁄𑀓𑀦𑀓𑀧𑀤𑀼𑀫𑀦𑁆𑀢𑀺 𑀮𑀻𑀮𑀸𑀅𑀭𑀯𑀺𑀦𑁆𑀤𑀁. 𑀢𑀲𑁆𑀫𑀸𑀢𑀺 𑀓𑁄𑀓𑀦𑀤𑀲𑀡𑁆𑀞𑀸𑀦𑀢𑁆𑀢𑀸 𑀓𑁄𑀓𑀦𑀤𑁄𑀢𑀺 𑀲𑀗𑁆𑀔𑀁 𑀮𑀪𑀺.

𑁩𑁨𑁫. 𑀬𑀸𑀯 𑀧𑀘𑁆𑀙𑀺𑀫…𑀧𑁂… 𑀨𑀮𑀓𑀁 𑀯𑀼𑀢𑁆𑀢𑀁 𑀢𑀲𑁆𑀲 𑀲𑀩𑁆𑀩𑀧𑀘𑁆𑀙𑀸 𑀲𑀦𑁆𑀣𑀢𑀢𑁆𑀢𑀸. 𑀉𑀧𑀭𑀺𑀫𑀨𑀮𑀕𑀢𑀜𑁆𑀳𑀺 𑀲𑁄𑀧𑀸𑀦𑀫𑀢𑁆𑀣𑀓𑀁. 𑀑𑀮𑁄𑀓𑀦𑀢𑁆𑀣𑀁𑀬𑁂𑀯𑀸𑀢𑀺 𑀦 𑀓𑁂𑀯𑀮𑀁 𑀪𑀕𑀯𑀢𑁄 𑀆𑀕𑀫𑀦𑀜𑁆𑀜𑁂𑀯 𑀑𑀮𑁄𑀓𑀦𑀢𑁆𑀣𑀁, 𑀅𑀣 𑀔𑁄 𑀅𑀢𑁆𑀢𑀦𑁄 𑀧𑀢𑁆𑀣𑀦𑀸𑀬 𑀲𑀦𑁆𑀣𑀭𑀸𑀧𑀺𑀢𑀸𑀬 𑀘𑁂𑀮𑀧𑀝𑀺𑀓𑀸𑀬 𑀅𑀓𑁆𑀓𑀫𑀦𑀲𑁆𑀲𑀧𑀺.

𑀲𑀓𑀼𑀡𑀧𑁄𑀢𑀓𑁂𑀢𑀺 𑀓𑀸𑀤𑀫𑁆𑀩𑀝𑀺𑀝𑁆𑀝𑀺𑀪𑀧𑀼𑀢𑁆𑀢𑀓𑁂. 𑀅𑀜𑁆𑀜𑁄𑀯 𑀪𑀯𑁂𑀬𑁆𑀬𑀸𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀸𑀢𑀼𑀕𑀸𑀫𑀢𑁄 𑀅𑀜𑁆𑀜𑁄 𑀇𑀤𑀸𑀦𑀺 𑀪𑀭𑀺𑀬𑀸𑀪𑀽𑀢𑁄 𑀫𑀸𑀢𑀼𑀕𑀸𑀫𑁄 𑀪𑀯𑁂𑀬𑁆𑀬. 𑀧𑀼𑀢𑁆𑀢𑀁 𑀮𑀪𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑁄 𑀓𑀫𑁆𑀫𑀯𑀲𑁂𑀦 𑀧𑀼𑀢𑁆𑀢𑀁, 𑀦𑁄 𑀢𑀲𑁆𑀲. 𑀉𑀪𑁄𑀳𑀻𑀢𑀺 𑀇𑀫𑁂𑀳𑀺 𑀏𑀯 𑀉𑀪𑁄𑀳𑀺. 𑀇𑀫𑁂𑀳𑀺 𑀓𑀸𑀭𑀡𑁂𑀳𑀻𑀢𑀺 𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀩𑀼𑀤𑁆𑀥𑀁 𑀧𑀝𑀺𑀘𑁆𑀘 𑀫𑀺𑀘𑁆𑀙𑀸𑀕𑀳𑀡𑀁, 𑀢𑀺𑀢𑁆𑀣𑀺𑀬𑀸𑀦𑀁 𑀉𑀚𑁆𑀛𑀸𑀬𑀦𑀁, 𑀅𑀦𑀸𑀕𑀢𑁂 𑀫𑀦𑀼𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀤𑁆𑀤𑀺𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀦𑁆𑀣𑀢𑀁 𑀘𑁂𑀮𑀧𑀝𑀺𑀓𑀁. 𑀫𑀗𑁆𑀕𑀮𑀁 𑀇𑀘𑁆𑀙𑀦𑁆𑀢𑀻𑀢𑀺 𑀫𑀗𑁆𑀕𑀮𑀺𑀓𑀸.

𑁩𑁨𑁬. 𑀢𑀢𑀺𑀬𑀁 𑀓𑀸𑀭𑀡𑀦𑁆𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀽𑀲𑀼 𑀯𑀺𑀧𑁆𑀧𑀝𑀺𑀲𑀸𑀭𑀸𑀦𑀼𑀧𑁆𑀧𑀸𑀤𑀦𑀫𑀸𑀳. 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀪𑀼𑀜𑁆𑀚𑀦-𑀲𑀼𑀔𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀲𑀜𑁆𑀜𑀻 𑀳𑀼𑀢𑁆𑀯𑀸…𑀧𑁂… 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳.

𑁩𑁨𑁭. 𑀅𑀣 𑀦𑀁 𑀪𑀕𑀯𑀸 𑀢𑀢𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀢𑁄 𑀯𑀺𑀯𑁂𑀘𑁂𑀢𑀼𑀓𑀸𑀫𑁄 ‘‘𑀲𑁄 𑀔𑁄 𑀅𑀳’’𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀤𑀼𑀓𑁆𑀓𑀭𑀘𑀭𑀺𑀬𑀁 𑀤𑀲𑁆𑀲𑁂𑀢𑀼𑀁 𑀆𑀭𑀪𑀺. 𑀫𑀳𑀸𑀲𑀘𑁆𑀘𑀓𑁂(𑀫. 𑀦𑀺. 𑁧.𑁩𑁬𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 ‘‘𑀲𑁄 𑀔𑁄 𑀅𑀳’’𑀦𑁆𑀢𑀺𑀆𑀤𑀺𑀧𑀸𑀞𑀲𑁆𑀲 𑀢𑀢𑁆𑀣 𑀆𑀕𑀢𑀦𑀺𑀬𑀸𑀫𑁂𑀦𑁂𑀯 𑀆𑀕𑀢𑀢𑁆𑀢𑀸. 𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁭𑁨 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑁩𑁪𑁩. 𑀅𑀗𑁆𑀓𑀼𑀲𑀁 𑀕𑀡𑁆𑀳𑀦𑁆𑀢𑀺 𑀏𑀢𑁂𑀦 𑀢𑀲𑁆𑀲 𑀕𑀳𑀡𑁂 𑀙𑁂𑀓𑁄 𑀳𑁄𑀢𑀻𑀢𑀺 𑀅𑀗𑁆𑀓𑀼𑀲𑀕𑀳𑀡𑀲𑀺𑀧𑁆𑀧𑀁. 𑀫𑁂𑀖𑀉𑀢𑀼𑀦𑁆𑀢𑀺 𑀫𑁂𑀖𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀲𑀻𑀢𑀉𑀢𑀼𑀁. 𑀧𑀩𑁆𑀩𑀢𑀉𑀢𑀼𑀦𑁆𑀢𑀺 𑀧𑀩𑁆𑀩𑀢𑀁 𑀧𑀝𑀺𑀘𑁆𑀘 𑀉𑀡𑁆𑀳𑀉𑀢𑀼𑀁. 𑀉𑀪𑀬𑀯𑀲𑁂𑀦 𑀘 𑀢𑀲𑁆𑀲 𑀢𑀣𑀸 𑀲𑀻𑀢𑀼𑀡𑁆𑀳𑀉𑀢𑀼𑀢𑁄 𑀏𑀦𑁄 𑀆𑀕𑀢𑁄𑀢𑀺 𑀢-𑀓𑀸𑀭𑀲𑁆𑀲 𑀤-𑀓𑀸𑀭𑀁 𑀓𑀢𑁆𑀯𑀸 𑀉𑀤𑁂𑀦𑁄𑀢𑀺 𑀦𑀸𑀫𑀁 𑀅𑀓𑀸𑀲𑀺.

𑀢𑀸𑀧𑀲𑁄 𑀑𑀕𑀸𑀴𑁆𑀳𑀜𑀸𑀡𑀯𑀲𑁂𑀦 𑀭𑀜𑁆𑀜𑁄 𑀫𑀢𑀪𑀸𑀯𑀁 𑀜𑀢𑁆𑀯𑀸. 𑀆𑀤𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀓𑁄𑀲𑀫𑁆𑀩𑀺𑀦𑀕𑀭𑁂 𑀧𑀭𑀦𑁆𑀢𑀧𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀪𑀸𑀯𑀢𑁄 𑀧𑀝𑁆𑀞𑀸𑀬. 𑀧𑀼𑀩𑁆𑀩𑁂𑀢𑀺 𑀲𑀻𑀮𑀯𑀦𑁆𑀢𑀓𑀸𑀮𑁂. 𑀳𑀢𑁆𑀣𑀺𑀕𑀦𑁆𑀣𑀦𑁆𑀢𑀺 𑀳𑀢𑁆𑀣𑀻𑀦𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑀦𑀲𑀢𑁆𑀣𑀁. 𑀢𑁂𑀦𑁂𑀯𑀲𑁆𑀲 𑀢𑀁 𑀲𑀺𑀓𑁆𑀔𑀸𑀧𑁂𑀢𑀺, 𑀓𑀺𑀘𑁆𑀘𑀜𑁆𑀘 𑀇𑀚𑁆𑀛𑀢𑀺.

𑁩𑁪𑁪. 𑀧𑀤𑀳𑀦𑀪𑀸𑀯𑁄𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑁄. 𑀧𑀥𑀸𑀦𑁂 𑀯𑀸 𑀦𑀺𑀬𑀼𑀢𑁆𑀢𑁄 𑀧𑀥𑀸𑀦𑀺𑀬𑁄, 𑀧𑀥𑀸𑀦𑀺𑀬𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀢𑀲𑁆𑀲𑁂𑀯 𑀧𑀥𑀸𑀦𑀺𑀬𑀪𑀸𑀯𑀲𑁆𑀲 𑀅𑀗𑁆𑀕𑀸𑀦𑀺 𑀓𑀸𑀭𑀡𑀸𑀦𑀺 𑀧𑀥𑀸𑀦𑀺𑀬𑀗𑁆𑀕𑀸𑀦𑀺. 𑀲𑀤𑁆𑀥𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀤𑁆𑀥𑁄. 𑀓𑀺𑀜𑁆𑀘𑀸𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀫𑁆𑀧𑀺 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀆𑀕𑀢𑀸 𑀆𑀕𑀫𑀦𑀲𑀤𑁆𑀥𑀸 𑀏𑀯, 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀲𑀤𑁆𑀥𑀸 𑀕𑀭𑀼𑀢𑀭𑀸𑀢𑀺 𑀲𑀸 𑀏𑀯 𑀕𑀳𑀺𑀢𑀸. 𑀅𑀘𑀮𑀪𑀸𑀯𑁂𑀦 𑀑𑀓𑀧𑁆𑀧𑀦𑀁 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀔𑁆𑀬𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀓𑁂𑀦𑀘𑀺 𑀅𑀓𑀫𑁆𑀧𑀺𑀬𑀪𑀸𑀯𑁂𑀦 𑀭𑀢𑀦𑀢𑁆𑀢𑀬𑀕𑀼𑀡𑁂 𑀑𑀕𑀸𑀳𑀺𑀢𑁆𑀯𑀸 𑀓𑀧𑁆𑀧𑀦𑀁. 𑀧𑀲𑀸𑀤𑀼𑀧𑁆𑀧𑀢𑁆𑀢𑀺 𑀭𑀢𑀦𑀢𑁆𑀢𑀬𑁂 𑀧𑀲𑀻𑀤𑀦𑀫𑁂𑀯. 𑀩𑁄𑀥𑀺𑀦𑁆𑀢𑀺 𑀘𑀢𑀼𑀫𑀕𑁆𑀕𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀢𑀁𑀦𑀺𑀫𑀺𑀢𑁆𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲, 𑀩𑁄𑀥𑀻𑀢𑀺 𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 ‘‘𑀲𑀫𑁆𑀫𑀸𑀲𑀫𑁆𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀘𑁆𑀙𑀺𑀢𑀲𑀼𑀩𑀼𑀤𑁆𑀥𑀢𑀸𑀬 𑀥𑀫𑁆𑀫𑀲𑁆𑀲 𑀲𑀼𑀥𑀫𑁆𑀫𑀢𑀸 𑀲𑀗𑁆𑀖𑀲𑁆𑀲 𑀲𑀼𑀧𑁆𑀧𑀝𑀺𑀧𑀢𑁆𑀢𑀺 𑀯𑀺𑀦𑀺𑀘𑁆𑀙𑀺𑀢𑀸 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀤𑁂𑀲𑀦𑀸𑀲𑀻𑀲𑀫𑁂𑀯 𑀘𑁂𑀢’’𑀦𑁆𑀢𑀺𑀆𑀤𑀺. 𑀢𑀲𑁆𑀲 𑀧𑀥𑀸𑀦𑀁 𑀯𑀻𑀭𑀺𑀬𑀁 𑀇𑀚𑁆𑀛𑀢𑀺 𑀭𑀢𑀦𑀢𑁆𑀢𑀬𑀲𑀤𑁆𑀥𑀸𑀬 ‘‘𑀇𑀫𑀸𑀬 𑀧𑀝𑀺𑀧𑀤𑀸𑀬 𑀚𑀭𑀸𑀫𑀭𑀡𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀧𑀥𑀸𑀦𑀸𑀦𑀼𑀬𑁄𑀕𑁂 𑀅𑀯𑀁𑀫𑀼𑀔𑀲𑀫𑁆𑀪𑀯𑀢𑁄.

𑀅𑀧𑁆𑀧𑀸𑀩𑀸𑀥𑁄𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀕𑀼𑀡𑀁 𑀧𑀓𑀸𑀲𑁂𑀢𑀸 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀺𑀢𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀲𑁄𑀥𑀦𑀢𑁆𑀣𑀁. 𑀉𑀤𑀬𑀜𑁆𑀘 𑀅𑀢𑁆𑀣𑀜𑁆𑀘 𑀕𑀦𑁆𑀢𑀼𑀦𑁆𑀢𑀺 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀚𑀸𑀦𑀺𑀢𑀼𑀁. 𑀢𑁂𑀦𑀸𑀳 ‘‘𑀏𑀢𑁂𑀦𑀸’’𑀢𑀺𑀆𑀤𑀺. 𑀧𑀭𑀺𑀲𑀼𑀤𑁆𑀥𑀸𑀬 𑀉𑀧𑀓𑁆𑀓𑀺𑀮𑁂𑀲𑀯𑀺𑀦𑀺𑀫𑀼𑀢𑁆𑀢𑀸𑀬. 𑀦𑀺𑀩𑁆𑀩𑀺𑀚𑁆𑀛𑀺𑀢𑀼𑀦𑁆𑀢𑀺 𑀢𑀤𑀗𑁆𑀕𑀯𑀲𑁂𑀦 𑀧𑀚𑀳𑀺𑀢𑀼𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁. 𑀬𑀁 𑀤𑀼𑀓𑁆𑀔𑀁 𑀔𑀻𑀬𑀢𑀻𑀢𑀺 𑀓𑀺𑀮𑁂𑀲𑁂𑀲𑀼 𑀅𑀧𑁆𑀧𑀳𑀻𑀦𑁂𑀲𑀼 𑀢𑁂𑀦 𑀢𑀤𑀼𑀧𑀦𑀺𑀲𑁆𑀲𑀬𑀓𑀫𑁆𑀫𑀁 𑀧𑀝𑀺𑀘𑁆𑀘 𑀬𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁩𑁪𑁫. 𑀲𑁂𑀲𑀤𑀺𑀯𑀲𑁂𑀢𑀺 𑀲𑀢𑁆𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁆𑀯𑁂 𑀭𑀢𑁆𑀢𑀺𑀦𑁆𑀤𑀺𑀯𑀸.

𑁩𑁪𑁬. 𑀓𑀼𑀘𑁆𑀙𑀺𑀲𑀦𑁆𑀦𑀺𑀲𑁆𑀲𑀺𑀢𑁄 𑀕𑀩𑁆𑀪𑁄 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 ‘‘𑀓𑀼𑀘𑁆𑀙𑀻’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀓𑀼𑀘𑁆𑀙𑀺𑀫𑀢𑀻. 𑀢𑁂𑀦𑀸𑀳 ‘‘𑀆𑀧𑀦𑁆𑀦𑀲𑀢𑁆𑀢𑀸’’𑀢𑀺. 𑀆𑀭𑀓𑁆𑀔𑁄 𑀧𑀦𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀻𑀢𑀺 𑀫𑀸𑀢𑀭𑀸 𑀕𑀳𑀺𑀢𑀲𑀭𑀡𑀁 𑀕𑀩𑁆𑀪𑀯𑀼𑀝𑁆𑀞𑀺𑀢𑀲𑁆𑀲 𑀢𑀲𑁆𑀲 𑀲𑀭𑀡𑀕𑀫𑀦𑀁 𑀧𑀯𑁂𑀤𑀬𑀺𑀢𑀲𑁆𑀲 𑀓𑀼𑀲𑀮𑀁 𑀲𑀭𑀡𑀁 𑀦𑀸𑀫, 𑀫𑀸𑀢𑀼 𑀓𑀢𑀭𑀓𑁆𑀔𑁄 𑀧𑀼𑀢𑁆𑀢𑀲𑁆𑀲𑀧𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑁄𑀢𑀺. 𑀫𑀳𑀮𑁆𑀮𑀓𑀓𑀸𑀮𑁂𑀢𑀺 𑀯𑀘𑀦𑀢𑁆𑀣𑀁 𑀚𑀸𑀦𑀦𑀓𑀸𑀮𑁂. 𑀲𑀸𑀭𑁂𑀦𑁆𑀢𑀻𑀢𑀺 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀩𑀮𑀁 𑀭𑀢𑀦𑀢𑁆𑀢𑀬𑀕𑀼𑀡𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 𑀅𑀲𑁆𑀲 𑀲𑀸𑀭𑁂𑀦𑁆𑀢𑀺. 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀥𑀸𑀭𑁂𑀢𑁆𑀯𑀸. 𑀲𑀭𑀡𑀁 𑀕𑀳𑀺𑀢𑀁 𑀦𑀸𑀫 𑀳𑁄𑀢𑀺 𑀭𑀢𑀦𑀢𑁆𑀢𑀬𑀲𑁆𑀲 𑀲𑀭𑀡𑀪𑀸𑀯𑀲𑀮𑁆𑀮𑀓𑁆𑀔𑀡𑀧𑀼𑀩𑁆𑀩𑀓𑀢𑀦𑁆𑀦𑀺𑀦𑁆𑀦𑀘𑀺𑀢𑁆𑀢𑀪𑀸𑀯𑀢𑁄𑀯. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀅𑀗𑁆𑀕𑀼𑀮𑀺𑀫𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁭. 𑀅𑀗𑁆𑀕𑀼𑀮𑀻𑀦𑀁 𑀫𑀸𑀮𑀁 𑀥𑀸𑀭𑁂𑀢𑀻𑀢𑀺 𑀇𑀫𑀺𑀦𑀸 𑀅𑀦𑁆𑀯𑀢𑁆𑀣𑀸 𑀢𑀲𑁆𑀲 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀆𑀘𑀭𑀺𑀬𑀯𑀘𑀦𑁂𑀦 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲 𑀥𑀸𑀭𑀡𑁂. 𑀓𑀭𑀻𑀲𑀲𑀳𑀲𑁆𑀲𑀔𑁂𑀢𑁆𑀢𑁂 𑀏𑀓𑀲𑀸𑀮𑀺𑀲𑀻𑀲𑀁 𑀯𑀺𑀬 𑀅𑀧𑀜𑁆𑀜𑀸𑀬𑀫𑀸𑀦𑀲𑀓𑀓𑀺𑀘𑁆𑀘𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀓𑁆𑀓𑀲𑀻𑀮𑀁 𑀧𑁂𑀲𑀬𑀺𑀁𑀲𑀼 ‘‘𑀢𑀸𑀤𑀺𑀲𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀼𑀕𑁆𑀕𑀳𑀲𑀫𑁆𑀫𑀸𑀧𑀬𑁄𑀕𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀲𑀫𑁆𑀧𑀭𑀸𑀬𑀺𑀓𑁂 𑀘 𑀅𑀢𑁆𑀣𑁂 𑀚𑀸𑀦𑀦𑁆𑀢𑁄 𑀪𑀸𑀭𑀺𑀬𑀁 𑀦 𑀓𑀭𑁂𑀬𑁆𑀬𑀸’’𑀢𑀺. 𑀩𑀸𑀳𑀺𑀭𑀓𑀸 𑀅𑀳𑁂𑀲𑀼𑀁 𑀅𑀳𑀺𑀁𑀲𑀓𑀲𑁆𑀲 𑀯𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀆𑀘𑀭𑀺𑀬𑀲𑁆𑀲 𑀘𑀺𑀢𑁆𑀢𑀲𑀪𑀸𑀯𑀢𑁄 𑀦𑀺𑀩𑁆𑀩𑀢𑁆𑀢𑀦𑀢𑀺𑀪𑀸𑀯𑁂𑀦. 𑀲𑀺𑀦𑁂𑀳𑁂𑀦𑁂𑀯 𑀯𑀤𑀦𑁆𑀢𑁂𑀢𑀺 𑀲𑀺𑀦𑁂𑀳𑁂𑀦 𑀯𑀺𑀬 𑀯𑀤𑀦𑁆𑀢𑁂.

𑀕𑀡𑀦𑀫𑁆𑀧𑀺 𑀦 𑀉𑀕𑁆𑀕𑀡𑁆𑀳𑀸𑀢𑀻𑀢𑀺 𑀕𑀡𑀦𑀯𑀺𑀥𑀺𑀫𑁆𑀧𑀺 𑀦 𑀲𑀮𑁆𑀮𑀓𑁆𑀔𑁂𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀧𑀓𑀢𑀺𑀬𑀸’’𑀢𑀺𑀆𑀤𑀺𑀦𑀸. 𑀞𑀧𑀺𑀢𑀝𑁆𑀞𑀸𑀦𑁂𑀢𑀺 𑀭𑀼𑀓𑁆𑀔𑀕𑀘𑁆𑀙𑀦𑁆𑀢𑀭𑀸𑀤𑀺𑀓𑁂 𑀞𑀧𑀺𑀢𑀝𑁆𑀞𑀸𑀦𑁂 𑀲𑀓𑀼𑀦𑁆𑀢𑀲𑀺𑀗𑁆𑀕𑀸𑀮𑀸𑀦𑀁 𑀯𑀲𑁂𑀦 𑀅𑀗𑁆𑀕𑀼𑀮𑀺𑀬𑁄 𑀯𑀺𑀦𑀲𑁆𑀲𑀦𑁆𑀢𑀺. 𑀪𑀕𑁆𑀕𑀯𑁄𑀢𑀺 𑀓𑁄𑀲𑀮𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀁 𑀕𑁄𑀢𑁆𑀢𑁂𑀦 𑀯𑀤𑀢𑀺. 𑀘𑁄𑀭𑁄 𑀅𑀯𑀺𑀲𑁆𑀲𑀸𑀲𑀦𑀻𑀬𑁄 𑀲𑀸𑀳𑀲𑀺𑀓𑀪𑀸𑀯𑀢𑁄. 𑀧𑀼𑀭𑀸𑀡𑀲𑀦𑁆𑀣𑀢𑀸 𑀲𑀸𑀔𑀸 𑀅𑀯𑀺𑀲𑁆𑀲𑀸𑀲𑀦𑀻𑀬𑀸 𑀯𑀺𑀘𑁆𑀙𑀺𑀓𑀸𑀤𑀻𑀦𑀁 𑀧𑀯𑁂𑀲𑀦𑀬𑁄𑀕𑁆𑀬𑀢𑁆𑀢𑀸. 𑀭𑀸𑀚𑀸 𑀅𑀯𑀺𑀲𑁆𑀲𑀸𑀲𑀦𑀻𑀬𑁄 𑀇𑀲𑁆𑀲𑀭𑀺𑀬𑀫𑀤𑁂𑀦 𑀥𑀦𑀮𑁄𑀪𑁂𑀦 𑀘 𑀓𑀤𑀸𑀘𑀺 𑀚𑀻𑀯𑀺𑀢𑁂 𑀲𑀗𑁆𑀓𑀸𑀪𑀸𑀯𑀢𑁄. 𑀇𑀢𑁆𑀣𑀻 𑀅𑀯𑀺𑀲𑁆𑀲𑀸𑀲𑀦𑀻𑀬𑀸 𑀮𑁄𑀮𑀲𑀻𑀮𑀘𑀺𑀢𑁆𑀢𑀪𑀸𑀯𑀢𑁄. 𑀅𑀦𑀼𑀤𑁆𑀥𑀭𑀡𑀻𑀬𑁄 𑀪𑀯𑀺𑀲𑁆𑀲𑀢𑀺 𑀲𑀁𑀲𑀸𑀭𑀧𑀗𑁆𑀓𑀢𑁄.

𑁩𑁪𑁮. 𑀲𑀗𑁆𑀓𑀭𑀺𑀢𑁆𑀯𑀸𑀢𑀺 ‘‘𑀫𑀬𑀁 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀘𑁄𑀭𑀁 𑀫𑀸𑀭𑁂𑀢𑁆𑀯𑀸 𑀯𑀸 𑀧𑀮𑀸𑀧𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀗𑁆𑀓𑀭𑀁 𑀓𑀢𑁆𑀯𑀸. 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀦𑁆𑀢𑀺 𑀅𑀪𑀺𑀲𑀗𑁆𑀔𑀭𑀡𑀁 𑀅𑀥𑀺𑀝𑁆𑀞𑀸𑀦𑀁. 𑀅𑀪𑀺𑀲𑀗𑁆𑀔𑀸𑀲𑀻𑀢𑀺 𑀅𑀥𑀺𑀝𑁆𑀞𑀳𑀺. 𑀲𑀁𑀳𑀭𑀺𑀢𑁆𑀯𑀸𑀢𑀺 𑀲𑀁𑀔𑀺𑀧𑀺𑀢𑁆𑀯𑀸. 𑀑𑀭𑀪𑀸𑀕𑁂𑀢𑀺 𑀘𑁄𑀭𑀲𑁆𑀲 𑀑𑀭𑀪𑀸𑀕𑁂.

𑁩𑁪𑁯. 𑀤𑀡𑁆𑀟𑁄𑀢𑀺 𑀧𑀳𑀭𑀡𑀳𑀢𑁆𑀣𑀘𑁆𑀙𑁂𑀤𑀦𑀸𑀤𑀺𑀓𑁄 𑀤𑀡𑁆𑀟𑀦𑀲𑀗𑁆𑀔𑀸𑀢𑁄 𑀤𑀡𑁆𑀟𑁄. 𑀧𑀯𑀢𑁆𑀢𑀬𑀺𑀢𑀩𑁆𑀩𑁄𑀢𑀺 𑀆𑀦𑁂𑀢𑀩𑁆𑀩𑁄. 𑀅𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀢𑁄 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀬. 𑀧𑀝𑀺𑀲𑀗𑁆𑀔𑀸𑀬𑀸𑀢𑀺 𑀧𑀝𑀺𑀲𑀗𑁆𑀔𑀸𑀦𑁂𑀦. 𑀅𑀯𑀺𑀳𑀺𑀁𑀲𑀸𑀬𑀸𑀢𑀺 𑀓𑀭𑀼𑀡𑀸𑀬. 𑀲𑀸𑀭𑀡𑀻𑀬𑀥𑀫𑁆𑀫𑁂𑀲𑀽𑀢𑀺 𑀙𑀲𑀼𑀧𑀺 𑀲𑀸𑀭𑀡𑀻𑀬𑀥𑀫𑁆𑀫𑁂𑀲𑀼, 𑀞𑀺𑀢𑁄 𑀅𑀝𑁆𑀞𑀺𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀩𑁄𑀥𑀺𑀫𑀽𑀮𑁂 𑀏𑀯 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀬𑀣𑀸 𑀅𑀢𑀻𑀢𑁂 𑀅𑀧𑀭𑀺𑀫𑀺𑀢𑀁 𑀓𑀸𑀮𑀁 𑀲𑀦𑁆𑀥𑀸𑀯𑀺𑀢𑀁, 𑀏𑀯𑀁 𑀇𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀸𑀕𑀢𑁂𑀧𑀺 𑀲𑀦𑁆𑀥𑀸𑀯𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀸𑀦𑀻’’𑀢𑀺𑀆𑀤𑀺𑀫𑀸𑀳.

𑀇𑀢𑁆𑀯𑁂𑀯𑀸𑀢𑀺 𑀇𑀢𑀺 𑀏𑀯, 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀯𑀁 𑀯𑀢𑁆𑀯𑀸 𑀬𑁂𑀯𑀸’’𑀢𑀺. 𑀅𑀓𑀺𑀭𑀻𑀢𑀺 𑀆𑀓𑀺𑀭𑀺, 𑀧𑀜𑁆𑀘𑀧𑀺 𑀆𑀯𑀼𑀥𑀸𑀦𑀺 𑀯𑀺𑀓𑀺𑀭𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀔𑀺𑀧𑀺 𑀙𑀟𑁆𑀟𑁂𑀲𑀻’’𑀢𑀺.

𑁩𑁫𑁦. 𑀏𑀢𑁆𑀢𑁄𑀯𑀸𑀢𑀺 𑀅𑀢𑁄 𑀏𑀯 𑀆𑀕𑀢𑀫𑀕𑁆𑀕𑁂𑀦𑁂𑀯 𑀲𑀸𑀯𑀢𑁆𑀣𑀺𑀁 𑀕𑀢𑀸. 𑀅𑀥𑀺𑀯𑀸𑀲𑁂𑀲𑁆𑀲𑀢𑀻𑀢𑀺 ‘‘𑀘𑁄𑀭𑀁 𑀧𑀝𑀺𑀲𑁂𑀥𑁂𑀢𑀼𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀢𑀺. 𑀤𑀸𑀭𑀼𑀡𑀓𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀦𑀸𑀫𑀦𑁆𑀢𑀺 ‘‘𑀅𑀗𑁆𑀕𑀼𑀮𑀺𑀫𑀸𑀮𑁄’’𑀢𑀺 𑀇𑀫𑀁 𑀦𑀸𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁩𑁫𑁧. 𑀳𑀢𑁆𑀣𑀻 𑀅𑀭𑀜𑁆𑀜𑀳𑀢𑁆𑀣𑀻 𑀳𑁄𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀢𑀢𑁆𑀣 𑀕𑀦𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀏𑀯𑀁 𑀅𑀲𑁆𑀲𑀸𑀧𑀺. 𑀓𑀽𑀝𑀲𑀳𑀲𑁆𑀲𑀸𑀦𑀁 𑀪𑀺𑀚𑁆𑀚𑀦𑀓𑀸𑀭𑀡𑀁 𑀳𑁄𑀢𑀺 𑀣𑁂𑀭𑀲𑁆𑀲 𑀆𑀕𑀫𑀦𑀪𑀬𑁂𑀦 𑀖𑀝𑁂 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀦𑁂𑀦. 𑀕𑀩𑁆𑀪𑀫𑀽𑀴𑁆𑀳𑀸𑀬𑀸𑀢𑀺 𑀩𑁆𑀬𑀸𑀓𑀼𑀮𑀕𑀩𑁆𑀪𑀸𑀬. 𑀧𑀩𑁆𑀩𑀚𑁆𑀚𑀸𑀩𑀮𑁂𑀦𑀸𑀢𑀺 𑀯𑀼𑀢𑁆𑀢𑀁, 𑀲𑀢𑁆𑀣𑀼 𑀤𑁂𑀲𑀦𑀸𑀦𑀼𑀪𑀸𑀯𑁂𑀦𑀸𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀲𑁄 𑀳𑀺 𑀢𑀲𑁆𑀲𑀸𑀧𑀺 𑀓𑀸𑀭𑀡𑀦𑁆𑀢𑀺. 𑀅𑀭𑀺𑀬𑀸 𑀦𑀸𑀫 𑀚𑀸𑀢𑀺 𑀧𑀩𑁆𑀩𑀚𑁆𑀚𑀸 𑀅𑀭𑀺𑀬𑀪𑀸𑀯𑀢𑁆𑀣𑀸𑀬 𑀚𑀸𑀢𑀻𑀢𑀺 𑀓𑀢𑁆𑀯𑀸.

𑀫𑀳𑀸𑀧𑀭𑀺𑀢𑁆𑀢𑀁 𑀦𑀸𑀫𑁂𑀢𑀦𑁆𑀢𑀺 𑀫𑀳𑀸𑀦𑀼𑀪𑀸𑀯𑀁 𑀧𑀭𑀺𑀢𑁆𑀢𑀁 𑀦𑀸𑀫𑁂𑀢𑀁. 𑀢𑀣𑀸 𑀳𑀺 𑀦𑀁 𑀣𑁂𑀭𑁄 𑀲𑀩𑁆𑀩𑀪𑀸𑀯𑁂𑀦 𑀅𑀭𑀺𑀬𑀸𑀬 𑀚𑀸𑀢𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦 𑀅𑀓𑀸𑀲𑀺. 𑀢𑁂𑀦𑀸𑀳 ‘‘𑀲𑀘𑁆𑀘𑀓𑀺𑀭𑀺𑀬𑀓𑀢𑀝𑁆𑀞𑀸𑀦𑁂’’𑀢𑀺. 𑀕𑀩𑁆𑀪𑀫𑀽𑀴𑁆𑀳𑀦𑁆𑀢𑀺 𑀫𑀽𑀴𑁆𑀳𑀕𑀩𑁆𑀪𑀁. 𑀕𑀩𑁆𑀪𑁄 𑀳𑀺 𑀧𑀭𑀺𑀧𑀓𑁆𑀓𑁄 𑀲𑀫𑁆𑀧𑀚𑁆𑀚𑀫𑀸𑀦𑁄 𑀯𑀺𑀚𑀸𑀬𑀦𑀓𑀸𑀮𑁂 𑀓𑀫𑁆𑀫𑀚𑀯𑀸𑀢𑁂𑀳𑀺 𑀲𑀜𑁆𑀘𑀸𑀮𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁄 𑀉𑀤𑁆𑀥𑀁𑀧𑀸𑀤𑁄 𑀅𑀥𑁄𑀲𑀻𑀲𑁄 𑀳𑀼𑀢𑁆𑀯𑀸 𑀬𑁄𑀦𑀺𑀫𑀼𑀔𑀸𑀪𑀺𑀫𑀼𑀔𑁄 𑀳𑁄𑀢𑀺, 𑀏𑀯𑀁 𑀲𑁄 𑀓𑀲𑁆𑀲𑀘𑀺 𑀅𑀮𑀕𑁆𑀕𑁄 𑀲𑁄𑀢𑁆𑀣𑀺𑀦𑀸 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀯𑀺𑀧𑀚𑁆𑀚𑀫𑀸𑀦𑁄 𑀧𑀦 𑀯𑀺𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀬𑁄𑀦𑀺𑀫𑀕𑁆𑀕𑀁 𑀧𑀺𑀤𑀳𑀺𑀢𑁆𑀯𑀸 𑀢𑀺𑀭𑀺𑀬𑀁 𑀦𑀺𑀧𑀚𑁆𑀚𑀢𑀺, 𑀢𑀣𑀸 𑀬𑀲𑁆𑀲𑀸 𑀬𑁄𑀦𑀺𑀫𑀕𑁆𑀕𑁄 𑀧𑀺𑀤𑀳𑀢𑀺, 𑀲𑀸 𑀢𑀢𑁆𑀣 𑀓𑀫𑁆𑀫𑀚𑀯𑀸𑀢𑁂𑀳𑀺 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀫𑀸𑀦𑀸 𑀩𑁆𑀬𑀸𑀓𑀼𑀮𑀸 𑀫𑀽𑀴𑁆𑀳𑀕𑀩𑁆𑀪𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀕𑀩𑁆𑀪𑀫𑀽𑀴𑁆𑀳’’𑀦𑁆𑀢𑀺.

𑀲𑀘𑁆𑀘𑀓𑀺𑀭𑀺𑀬𑀸 𑀦𑀸𑀫 𑀩𑀼𑀤𑁆𑀥𑀸𑀲𑀬𑀁 𑀅𑀢𑁆𑀢𑀦𑁄 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀢𑀸, 𑀢𑀲𑁆𑀫𑀸 𑀲𑀘𑁆𑀘𑀓𑀺𑀭𑀺𑀬𑀸 𑀯𑁂𑀚𑁆𑀚𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀣𑁂𑀭𑀲𑁆𑀲𑀧𑀺 𑀘𑀸𑀢𑀺𑀆𑀤𑀺𑀦𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀓𑀸𑀭𑀡𑀁 𑀯𑀤𑀢𑀺. 𑀇𑀫𑁂 𑀤𑁆𑀯𑁂 𑀳𑁂𑀢𑀽 𑀧𑀝𑀺𑀘𑁆𑀘 𑀪𑀕𑀯𑀸 𑀣𑁂𑀭𑀁 𑀲𑀘𑁆𑀘𑀓𑀺𑀭𑀺𑀬𑀁 𑀓𑀸𑀭𑁂𑀲𑀺. 𑀚𑀸𑀢𑀺𑀦𑁆𑀢𑀺 𑀫𑀽𑀮𑀚𑀸𑀢𑀺𑀁.

𑁩𑁫𑁨. 𑀧𑀭𑀺𑀬𑀸𑀤𑀸𑀬 𑀆𑀳𑀘𑁆𑀘 𑀪𑀺𑀦𑁆𑀦𑁂𑀦 𑀲𑀻𑀲𑁂𑀦. 𑀲𑀪𑀸𑀕𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀦𑁆𑀢𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀲𑀓𑀓𑀫𑁆𑀫𑀲𑀪𑀸𑀕𑀪𑀽𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁. 𑀲𑀪𑀸𑀕𑀢𑀸 𑀘 𑀲𑀫𑀸𑀦𑀯𑀢𑁆𑀣𑀼𑀓𑀢𑀸 𑀲𑀫𑀸𑀦𑀸𑀭𑀫𑁆𑀫𑀡𑀢𑀸𑀏𑀓𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀤𑀺𑀯𑀲𑁂𑀦 𑀲𑀩𑁆𑀩𑀣𑀸 𑀲𑀭𑀺𑀓𑁆𑀔𑀢𑀸, 𑀲𑀤𑀺𑀲𑀫𑁆𑀧𑀺 𑀘 𑀦𑀸𑀫 𑀢𑀤𑁂𑀯𑀸𑀳𑀭𑀻𑀬𑀢𑀺 𑀬𑀣𑀸 ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄’’𑀢𑀺 𑀘 ‘‘𑀲𑀸 𑀏𑀯 𑀢𑀺𑀢𑁆𑀢𑀺𑀭𑀻 𑀢𑀸𑀦𑁂𑀯 𑀑𑀲𑀥𑀸𑀦𑀻’’𑀢𑀺 𑀘. 𑀇𑀤𑀸𑀦𑀺 𑀢𑀫𑁂𑀯 𑀲𑀪𑀸𑀕𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀁 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑀭𑀺𑀬𑀫𑀸𑀦𑀫𑁂𑀯𑀸𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑁂𑀦 𑀧𑀝𑀺𑀧𑀸𑀝𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀫𑁂𑀯. 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀧𑀽𑀭𑁂𑀢𑀺, 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀅𑀧𑀭𑀸𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀲𑀗𑁆𑀔𑀸𑀢𑁂 𑀢𑀬𑁄 𑀪𑀸𑀕𑁂 𑀧𑀽𑀭𑁂𑀢𑀺, 𑀢𑁂𑀲𑀁 𑀢𑀺𑀡𑁆𑀡𑀁 𑀪𑀸𑀕𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀢𑀺.

𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀢𑁄 𑀅𑀦𑀦𑁆𑀢𑀭𑀁 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁. 𑀤𑀺𑀝𑁆𑀞𑀥𑀫𑁆𑀫𑀸𑀦𑀦𑁆𑀢𑀭𑀪𑀯𑀢𑁄 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀬𑁂 𑀅𑀢𑁆𑀢𑀪𑀸𑀯𑀧𑀭𑀺𑀯𑀢𑁆𑀢𑁂 𑀯𑁂𑀤𑀺𑀢𑀩𑁆𑀩𑀨𑀮𑀁 𑀓𑀫𑁆𑀫𑀁 𑀅𑀧𑀭𑀸𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁. 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀽𑀢𑀢𑀸𑀬, 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀢𑀸𑀬 𑀘 𑀩𑀮𑀯𑀪𑀸𑀯𑀧𑁆𑀧𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀲𑁂𑀦 𑀲𑀸𑀢𑀺𑀲𑀬𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀨𑀮𑀤𑀸𑀬𑀺𑀦𑀻 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸 𑀦𑀸𑀫. 𑀲𑀸 𑀳𑀺 𑀯𑀼𑀢𑁆𑀢𑀸𑀓𑀸𑀭𑁂𑀦 𑀩𑀮𑀯𑀢𑀺 𑀚𑀯𑀦𑀲𑀦𑁆𑀢𑀸𑀦𑁂 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁂𑀲𑀼 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀯𑀲𑀧𑁆𑀧𑀯𑀢𑁆𑀢𑀺𑀬𑀸 𑀆𑀲𑁂𑀯𑀦𑀸𑀮𑀸𑀪𑁂𑀦 𑀅𑀧𑁆𑀧𑀯𑀺𑀧𑀸𑀓𑀢𑀸𑀬 𑀘 𑀇𑀢𑀭𑀤𑁆𑀯𑀬𑀁 𑀯𑀺𑀬 𑀧𑀯𑀢𑁆𑀢𑀲𑀦𑁆𑀢𑀸𑀦𑀼𑀧𑀭𑀫𑀸𑀧𑁂𑀓𑁆𑀔𑀁 𑀑𑀓𑀸𑀲𑀮𑀸𑀪𑀸𑀧𑁂𑀓𑁆𑀔𑀜𑁆𑀘 𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀇𑀥𑁂𑀯 𑀧𑀼𑀧𑁆𑀨𑀫𑀢𑁆𑀢𑀁 𑀯𑀺𑀬 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀁 𑀨𑀮𑀁 𑀤𑁂𑀢𑀺.

𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀦𑁆𑀢𑀺 𑀓𑀫𑁆𑀫𑀲𑁆𑀲 𑀨𑀮𑀤𑀸𑀦𑀁 𑀦𑀸𑀫 𑀉𑀧𑀥𑀺𑀧𑀬𑁄𑀕𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂𑀦𑁂𑀯 𑀳𑁄𑀢𑀻𑀢𑀺 𑀢𑀤𑀪𑀸𑀯𑀢𑁄 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁. 𑀅𑀳𑁄𑀲𑀺𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀁𑀬𑁂𑀯 𑀅𑀳𑁄𑀲𑀺, 𑀦 𑀢𑀲𑁆𑀲 𑀯𑀺𑀧𑀸𑀓𑁄 𑀅𑀳𑁄𑀲𑀺, 𑀅𑀢𑁆𑀣𑀺 𑀪𑀯𑀺𑀲𑁆𑀲𑀢𑀺 𑀯𑀸𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀅𑀢𑁆𑀣𑀲𑀸𑀥𑀺𑀓𑀸𑀢𑀺 𑀤𑀸𑀦𑀸𑀤𑀺𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀢𑁆𑀣𑀲𑁆𑀲 𑀦𑀺𑀧𑁆𑀨𑀸𑀤𑀺𑀓𑀸. 𑀓𑀸 𑀧𑀦 𑀲𑀸𑀢𑀺 𑀆𑀳 ‘‘𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸’’𑀢𑀺. 𑀲𑀸 𑀳𑀺 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀸 𑀧𑀼𑀭𑀺𑀫𑀚𑀯𑀦𑀘𑁂𑀢𑀦𑀸𑀳𑀺 𑀮𑀤𑁆𑀥𑀸𑀲𑁂𑀯𑀦𑀸 𑀘 𑀲𑀫𑀸𑀦𑀸 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀤𑀸𑀬𑀺𑀦𑀻 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑁂𑀦𑀸𑀳 ‘‘𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀻’’𑀢𑀺. 𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀇𑀫𑀺𑀦𑀸 𑀅𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀅𑀳𑁄𑀲𑀺𑀓𑀫𑁆𑀫𑀧𑀓𑁆𑀔𑁂 𑀢𑀺𑀝𑁆𑀞𑀢𑀺 𑀯𑀺𑀧𑀘𑁆𑀘𑀦𑁄𑀓𑀸𑀲𑀲𑁆𑀲 𑀅𑀪𑀸𑀯𑀢𑁄𑀢𑀺.

𑀲𑀫𑀼𑀕𑁆𑀖𑀸𑀝𑀺𑀢𑀸𑀦𑀺 𑀯𑀺𑀧𑀘𑁆𑀘𑀦𑁄𑀓𑀸𑀲𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀅𑀢𑁆𑀣𑀺 𑀯𑀺𑀧𑀸𑀓𑀸𑀭𑀳𑀸𑀪𑀸𑀯𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸 𑀯𑀺𑀧𑀘𑁆𑀘𑀦𑁄𑀓𑀸𑀲𑀲𑁆𑀲 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑁆𑀢𑀸. 𑀓𑀢𑀽𑀧𑀘𑀺𑀢𑀜𑁆𑀳𑀺 𑀓𑀫𑁆𑀫𑀁 𑀲𑀢𑀺 𑀯𑀺𑀧𑀘𑁆𑀘𑀦𑁄𑀓𑀸𑀲𑁂 𑀬𑀸𑀯 𑀦 𑀨𑀮𑀁 𑀤𑁂𑀢𑀺, 𑀢𑀸𑀯 𑀅𑀢𑁆𑀣𑁂𑀯 𑀦𑀸𑀫 𑀯𑀺𑀧𑀸𑀓𑀸𑀭𑀳𑀪𑀸𑀯𑀢𑁄. ‘‘𑀬𑀲𑁆𑀲 𑀔𑁄’’𑀢𑀺 𑀇𑀤𑀁 𑀅𑀦𑀺𑀬𑀫𑀸𑀓𑀸𑀭𑀯𑀘𑀦𑀁 𑀪𑀕𑀯𑀢𑀸 𑀓𑀫𑁆𑀫𑀲𑀭𑀺𑀓𑁆𑀔𑀢𑀸𑀯𑀲𑁂𑀦 𑀲𑀸𑀥𑀸𑀭𑀡𑀢𑁄 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀸𑀤𑀺𑀲𑀲𑁆𑀲 𑀔𑁄’’𑀢𑀺.

𑀧𑀫𑀸𑀤𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑁄𑀢𑀺 𑀧𑀫𑀸𑀤𑀳𑁂𑀢𑀼𑀓𑁂𑀳𑀺 𑀲𑀩𑁆𑀩𑁂𑀳𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄.

𑀧𑀸𑀧𑀲𑁆𑀲 𑀧𑀺𑀥𑀸𑀦𑀁 𑀦𑀸𑀫 𑀅𑀯𑀺𑀧𑀸𑀓𑀥𑀫𑁆𑀫𑀢𑀸𑀧𑀸𑀤𑀦𑀦𑁆𑀢𑀺 𑀆𑀳 ‘‘𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀓𑀭𑀻𑀬𑀢𑀻’’𑀢𑀺. 𑀩𑀼𑀤𑁆𑀥𑀲𑀸𑀲𑀦𑁂𑀢𑀺 𑀲𑀺𑀓𑁆𑀔𑀸𑀢𑁆𑀢𑀬𑀲𑀗𑁆𑀕𑀳𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂. 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀯𑀺𑀳𑀭𑀢𑀻𑀢𑀺 𑀅𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑀯𑀲𑁂𑀦, 𑀓𑀢𑁆𑀢𑀩𑁆𑀩𑀲𑁆𑀲 𑀘 𑀧𑀭𑀺𑀧𑀽𑀭𑀡𑀯𑀲𑁂𑀦 𑀧𑀯𑀢𑁆𑀢𑀢𑀺.

𑀤𑀺𑀲𑁆𑀲𑀦𑁆𑀢𑀺 𑀓𑀼𑀚𑁆𑀛𑀦𑁆𑀢𑀻𑀢𑀺 𑀤𑀺𑀲𑀸, 𑀧𑀝𑀺𑀧𑀓𑁆𑀔𑀸𑀢𑀺 𑀆𑀳 ‘‘𑀲𑀧𑀢𑁆𑀢𑀸’’𑀢𑀺. 𑀢𑀧𑁆𑀧𑀲𑀁𑀲𑀧𑀓𑀸𑀭𑀦𑁆𑀢𑀺 𑀫𑁂𑀢𑁆𑀢𑀸𑀦𑀺𑀲𑀁𑀲𑀓𑀺𑀢𑁆𑀢𑀦𑀸𑀓𑀸𑀭𑀁. 𑀓𑀸𑀮𑁂𑀦𑀸𑀢𑀺 𑀆𑀫𑁂𑀟𑀺𑀢𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀔𑀡𑁂 𑀔𑀡𑁂’’𑀢𑀺. 𑀅𑀦𑀼𑀓𑀭𑁄𑀦𑁆𑀢𑀽𑀢𑀺 𑀬𑁂𑀲𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀡𑀦𑁆𑀢𑀺, 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀢𑁂𑀲𑀁 𑀅𑀦𑀼𑀓𑀭𑁄𑀦𑁆𑀢𑀼 𑀤𑀺𑀝𑁆𑀞𑀸𑀦𑀼𑀕𑀢𑀺𑀓𑀭𑀡𑀁 𑀆𑀧𑀚𑁆𑀚𑀦𑁆𑀢𑀼, 𑀅𑀢𑁆𑀢𑀦𑁄 𑀯𑁂𑀭𑀺𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲𑀯𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀜𑁆𑀘 𑀧𑀘𑁆𑀘𑀸𑀲𑀻𑀲𑀢𑀺.

𑀢𑀲𑀦𑁆𑀢𑀺 𑀕𑀢𑀺𑀁 𑀧𑀢𑁆𑀣𑀬𑀦𑁆𑀢𑀻𑀢𑀺 𑀢𑀲𑀸 𑀪𑀯𑀦𑁆𑀢𑀭𑀸𑀤𑀻𑀲𑀼 𑀲𑀁𑀲𑀭𑀡𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀢𑀲𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑀡𑁆𑀳𑀸’’𑀢𑀺.

𑀦𑁂𑀢𑀩𑁆𑀩𑀝𑁆𑀞𑀸𑀦𑀁 𑀉𑀤𑀓𑀁 𑀦𑀬𑀦𑁆𑀢𑀻𑀢𑀺 𑀦𑁂𑀢𑁆𑀢𑀺𑀓𑀸. 𑀩𑀦𑁆𑀥𑀺𑀢𑁆𑀯𑀸𑀢𑀺 𑀤𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸. 𑀢𑁂𑀮𑀓𑀜𑁆𑀚𑀺𑀓𑁂𑀦𑀸𑀢𑀺 𑀢𑁂𑀮𑀫𑀺𑀲𑁆𑀲𑀺𑀢𑁂𑀦 𑀓𑀜𑁆𑀚𑀺𑀓𑁂𑀦.

𑀬𑀸𑀤𑀺𑀲𑁄𑀯 𑀅𑀦𑀺𑀝𑁆𑀞𑁂, 𑀢𑀸𑀤𑀺𑀲𑁄𑀯 𑀇𑀝𑁆𑀞𑁂𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑁂 𑀦𑀺𑀩𑁆𑀩𑀺𑀓𑀸𑀭𑁂𑀦 𑀢𑀸𑀤𑀻. 𑀬𑁂𑀲𑀁 𑀧𑀦 𑀓𑀸𑀫𑀸𑀫𑀺𑀲𑀸𑀤𑀻𑀦𑀁 𑀯𑀦𑁆𑀢𑀢𑁆𑀢𑀸 𑀭𑀸𑀕𑀸𑀤𑀻𑀦𑀁 𑀘𑀢𑁆𑀢𑀢𑁆𑀢𑀸 𑀓𑀸𑀫𑁄𑀖𑀸𑀤𑀻𑀦𑀁 𑀢𑀺𑀡𑁆𑀡𑀢𑁆𑀢𑀸 𑀢𑀸𑀤𑀺𑀪𑀸𑀯𑁄 𑀪𑀯𑁂𑀬𑁆𑀬, 𑀢𑁂𑀲𑀁 𑀪𑀕𑀯𑀢𑀸 𑀲𑀩𑁆𑀩𑀲𑁄 𑀯𑀦𑁆𑀢𑀸 𑀘𑀢𑁆𑀢𑀸 𑀢𑀺𑀡𑁆𑀡𑀸, 𑀢𑀲𑁆𑀫𑀸 𑀪𑀕𑀯𑀸 𑀯𑀦𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻, 𑀬𑁂𑀳𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀪𑀕𑀯𑀸 𑀢𑀸𑀤𑀺𑀪𑀸𑀯𑁂𑀦 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀢𑀁𑀦𑀺𑀤𑁆𑀤𑁂𑀲𑁄, 𑀢𑁂𑀳𑀺 𑀕𑀼𑀡𑁂𑀳𑀺 𑀬𑀸𑀣𑀸𑀯𑀢𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁄𑀧𑀺 𑀢𑀸𑀤𑀻. 𑀬𑀣𑀸 𑀬𑀦𑁆𑀢𑀭𑀚𑁆𑀚𑀼𑀬𑀸 𑀬𑀦𑁆𑀢𑀁 𑀦𑀻𑀬𑀢𑀺, 𑀏𑀯𑀁 𑀬𑀸𑀬 𑀢𑀡𑁆𑀳𑀸𑀬 𑀪𑀯𑁄 𑀦𑀻𑀬𑀢𑀺, 𑀲𑀸 ‘‘𑀪𑀯𑀦𑁂𑀢𑁆𑀢𑀺 𑀪𑀯𑀭𑀚𑁆𑀚𑀽’’𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀸𑀬 𑀳𑀻’’𑀢𑀺𑀆𑀤𑀺, 𑀓𑀫𑁆𑀫𑀸𑀦𑀺 𑀓𑀼𑀲𑀮𑀸𑀤𑀻𑀦𑀺 𑀯𑀺𑀧𑀘𑁆𑀘𑀬𑀦𑁆𑀢𑀺 𑀅𑀧𑀘𑁆𑀘𑀬𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀫𑁆𑀫𑀯𑀺𑀧𑀸𑀓𑁄. 𑀅𑀧𑀘𑁆𑀘𑀬𑀪𑀸𑀯𑁄 𑀦𑀸𑀫 𑀅𑀭𑀺𑀬𑀫𑀕𑁆𑀕𑀘𑁂𑀢𑀦𑀸𑀬𑀸𑀢𑀺 𑀆𑀳 ‘‘𑀫𑀕𑁆𑀕𑀘𑁂𑀢𑀦𑀸𑀬𑀸’’𑀢𑀺. 𑀬𑀸𑀯 𑀦 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀢𑀸𑀯 𑀇𑀫𑁂 𑀲𑀢𑁆𑀢𑀸 𑀲𑀇𑀡𑀸 𑀏𑀯 𑀅𑀲𑁂𑀭𑀺𑀯𑀺𑀳𑀸𑀭𑀪𑀸𑀯𑀢𑁄𑀢𑀺 𑀆𑀳 ‘‘𑀅𑀡𑀡𑁄 𑀦𑀺𑀓𑁆𑀓𑀺𑀮𑁂𑀲𑁄 𑀚𑀸𑀢𑁄’’𑀢𑀺.

𑀣𑁂𑀬𑁆𑀬𑀧𑀭𑀺𑀪𑁄𑀕𑁄 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁯𑁧) 𑀦𑀸𑀫 𑀲𑀸𑀫𑀺𑀧𑀭𑀺𑀪𑁄𑀕𑀸𑀪𑀸𑀯𑀢𑁄. 𑀪𑀕𑀯𑀢𑀸𑀧𑀺 𑀳𑀺 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀲𑀻𑀮𑀯𑀢𑁄 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸, 𑀦 𑀤𑀼𑀲𑁆𑀲𑀻𑀮𑀲𑁆𑀲, 𑀤𑀸𑀬𑀓𑀸𑀦𑀁 𑀲𑀻𑀮𑀯𑀢𑁄𑀬𑁂𑀯 𑀧𑀭𑀺𑀘𑁆𑀘𑀸𑀕𑁄, 𑀦 𑀤𑀼𑀲𑁆𑀲𑀻𑀮𑀲𑁆𑀲 𑀅𑀢𑁆𑀢𑀦𑁄 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀪𑀸𑀯𑀲𑁆𑀲 𑀧𑀘𑁆𑀘𑀸𑀲𑀻𑀲𑀦𑀢𑁄. 𑀇𑀢𑀺 𑀲𑀢𑁆𑀣𑀸𑀭𑀸 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀤𑀸𑀬𑀓𑁂𑀳𑀺 𑀘 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 ‘‘𑀤𑀼𑀲𑁆𑀲𑀻𑀮𑀲𑁆𑀲 𑀧𑀭𑀺𑀪𑁄𑀕𑁄 𑀣𑁂𑀬𑁆𑀬𑀧𑀭𑀺𑀪𑁄𑀕𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀇𑀡𑀯𑀲𑁂𑀦 𑀧𑀭𑀺𑀪𑁄𑀕𑁄 𑀇𑀡𑀧𑀭𑀺𑀪𑁄𑀕𑁄. 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀬𑀸 𑀅𑀪𑀸𑀯𑀢𑁄 𑀇𑀡𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀲𑁂𑀓𑁆𑀔𑀸 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸, 𑀢𑀲𑁆𑀫𑀸 𑀢𑁂 𑀧𑀺𑀢𑀼𑀲𑀦𑁆𑀢𑀓𑀸𑀦𑀁 𑀧𑀘𑁆𑀘𑀬𑀸𑀦𑀁 𑀤𑀸𑀬𑀸𑀤𑀸 𑀳𑀼𑀢𑁆𑀯𑀸 𑀢𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀢𑁂𑀲𑀁 𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀦𑀸𑀫. 𑀓𑀺𑀁 𑀧𑀦 𑀢𑁂 𑀪𑀕𑀯𑀢𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀉𑀤𑀸𑀳𑀼 𑀕𑀺𑀳𑀻𑀳𑀺 𑀤𑀺𑀦𑁆𑀦𑀦𑁆𑀢𑀺? 𑀕𑀺𑀳𑀻𑀳𑀺 𑀤𑀺𑀦𑁆𑀦𑀸𑀧𑀺 𑀢𑁂 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀪𑀕𑀯𑀢𑁄 𑀲𑀦𑁆𑀢𑀓𑀸 𑀳𑁄𑀦𑁆𑀢𑀺 𑀅𑀦𑀦𑀼𑀜𑁆𑀜𑀸𑀢𑁂𑀲𑀼 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀭𑀺𑀪𑁄𑀕𑀸𑀪𑀸𑀯𑀢𑁄 𑀅𑀦𑀼𑀜𑁆𑀜𑀸𑀢𑁂𑀲𑀼𑀬𑁂𑀯 𑀧𑀭𑀺𑀪𑁄𑀕𑀲𑀫𑁆𑀪𑀯𑀢𑁄. 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀜𑁆𑀘𑁂𑀢𑁆𑀣 (𑀫. 𑀦𑀺. 𑁧.𑁨𑁯 𑀆𑀤𑀬𑁄) 𑀲𑀸𑀥𑀓𑀁.

𑀅𑀯𑀻𑀢𑀭𑀸𑀕𑀸𑀦𑀁 𑀢𑀡𑁆𑀳𑀸𑀧𑀭𑀯𑀲𑀢𑀸𑀬 𑀧𑀘𑁆𑀘𑀬𑀧𑀭𑀺𑀪𑁄𑀕𑁂 𑀲𑀸𑀫𑀺𑀪𑀸𑀯𑁄 𑀦𑀢𑁆𑀣𑀺, 𑀢𑀤𑀪𑀸𑀯𑁂𑀦 𑀯𑀻𑀢𑀭𑀸𑀕𑀸𑀦𑀁 𑀢𑀢𑁆𑀣 𑀲𑀸𑀫𑀺𑀪𑀸𑀯𑁄 𑀬𑀣𑀸𑀭𑀼𑀘𑀺 𑀧𑀭𑀺𑀪𑁄𑀕𑀲𑀫𑁆𑀪𑀯𑀢𑁄. 𑀢𑀣𑀸 𑀳𑀺 𑀢𑁂 𑀧𑀝𑀺𑀓𑀽𑀮𑀫𑁆𑀧𑀺 𑀅𑀧𑁆𑀧𑀝𑀺𑀓𑀽𑀮𑀸𑀓𑀸𑀭𑁂𑀦, 𑀅𑀧𑁆𑀧𑀝𑀺𑀓𑀽𑀮𑀫𑁆𑀧𑀺 𑀧𑀝𑀺𑀓𑀽𑀮𑀸𑀓𑀸𑀭𑁂𑀦 𑀢𑀤𑀼𑀪𑀬𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀸𑀓𑀸𑀭𑁂𑀦 𑀘 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀤𑀸𑀬𑀓𑀸𑀦𑀜𑁆𑀘 𑀫𑀦𑁄𑀭𑀣𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂, 𑀢𑀁𑀲𑀁𑀯𑀡𑁆𑀡𑀦𑀸𑀲𑀼 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀮𑁂𑀲𑀇𑀡𑀸𑀦𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀅𑀡𑀡𑁄’’𑀢𑀺 𑀯𑀼𑀢𑁆𑀢𑀁, 𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑀫𑀢𑁆𑀢𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀘 𑀩𑀸𑀓𑀼𑀮𑁄 𑁋 ‘‘𑀲𑀢𑁆𑀢𑀸𑀳𑀫𑁂𑀯 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀭𑀡𑁄 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑀺’’𑀦𑁆𑀢𑀺 (𑀫. 𑀦𑀺. 𑁩.𑁨𑁧𑁧).

𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀳𑀺 𑀢𑀡𑁆𑀳𑀸𑀬 𑀧𑀯𑀢𑁆𑀢𑀺𑀆𑀓𑀸𑀭𑀁 𑀧𑀝𑀺𑀘𑁆𑀘 𑀅𑀢𑁆𑀣𑀺 𑀭𑀫𑀡𑀯𑁄𑀳𑀸𑀭𑁄𑀢𑀺 𑀆𑀳 𑁋 ‘‘𑀤𑀼𑀯𑀺𑀥𑁂𑀲𑀼𑀧𑀺 𑀓𑀸𑀫𑁂𑀲𑀼 𑀢𑀡𑁆𑀳𑀸𑀭𑀢𑀺𑀲𑀦𑁆𑀣𑀯’’𑀦𑁆𑀢𑀺. 𑀫𑀦𑁆𑀢𑀺𑀢𑀦𑁆𑀢𑀺 𑀓𑀣𑀺𑀢𑀁. 𑀉𑀧𑁆𑀧𑀦𑁆𑀦𑁂𑀳𑀺 𑀲𑀢𑁆𑀣𑀼𑀧𑀝𑀺𑀜𑁆𑀜𑁂𑀳𑀺. 𑀲𑀁𑀯𑀺𑀪𑀢𑁆𑀢𑀸𑀢𑀺 𑀓𑀼𑀲𑀮𑀸𑀤𑀺𑀯𑀲𑁂𑀦 𑀔𑀦𑁆𑀥𑀸𑀤𑀻𑀳𑀺 𑀆𑀓𑀸𑀭𑁂𑀳𑀺 𑀯𑀺𑀪𑀢𑁆𑀢𑀸. 𑀲𑀼𑀦𑁆𑀤𑀭𑀁 𑀆𑀕𑀫𑀦𑀦𑁆𑀢𑀺 𑀲𑁆𑀯𑀸𑀕𑀢𑀁. 𑀢𑀢𑁄 𑀏𑀯 𑀦 𑀓𑀼𑀘𑁆𑀙𑀺𑀢𑀁 𑀆𑀕𑀢𑀁. 𑀲𑁄𑀴𑀲𑀯𑀺𑀥𑀓𑀺𑀘𑁆𑀘𑀲𑁆𑀲 𑀧𑀭𑀺𑀬𑁄𑀲𑀺𑀢𑀢𑁆𑀢𑀸 𑀆𑀳 ‘‘𑀢𑀁 𑀲𑀩𑁆𑀩𑀁 𑀫𑀬𑀸 𑀓𑀢’’𑀦𑁆𑀢𑀺. 𑀫𑀕𑁆𑀕𑀧𑀜𑁆𑀜𑀸𑀬𑀫𑁂𑀯 𑀢𑀢𑀺𑀬𑀯𑀺𑀚𑁆𑀚𑀸𑀲𑀫𑀜𑁆𑀜𑀸𑀢𑀺 𑀆𑀳 𑁋 ‘‘𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀦𑀯𑀳𑀺 𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀻’’𑀢𑀺.

𑀅𑀗𑁆𑀕𑀼𑀮𑀺𑀫𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁭. 𑀧𑀺𑀬𑀚𑀸𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁩. 𑀧𑀓𑀢𑀺𑀦𑀺𑀬𑀸𑀫𑁂𑀦𑀸𑀢𑀺 𑀬𑀣𑀸 𑀲𑁄𑀓𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀇𑀢𑀺 𑀓𑀢𑁆𑀢𑀩𑁆𑀩𑁂𑀲𑀼 𑀅𑀲𑀫𑁆𑀫𑁄𑀳𑀯𑀲𑁂𑀦 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺, 𑀢𑀸𑀦𑀺 𑀘𑀲𑁆𑀲 𑀉𑀧𑀝𑁆𑀞𑀳𑀦𑁆𑀢𑀺, 𑀦 𑀏𑀯𑀁 𑀲𑁄𑀓𑀲𑁆𑀲 𑀘𑀺𑀢𑁆𑀢𑀲𑀗𑁆𑀓𑁄𑀘𑀲𑀪𑀸𑀯𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀓𑀢𑀺𑀦𑀺𑀬𑀸𑀫𑁂𑀦 𑀧𑀦 𑀦 𑀧𑀝𑀺𑀪𑀦𑁆𑀢𑀻’’𑀢𑀺. 𑀓𑁂𑀘𑀺 𑀧𑀦 ‘‘𑀲𑀸𑀫𑀦𑁆𑀢𑀸 𑀓𑀢𑀺𑀧𑀬𑁂 𑀦 𑀓𑀼𑀝𑀼𑀫𑁆𑀩𑀁 𑀲𑀦𑁆𑀥𑀸𑀭𑁂𑀢𑀺. 𑀢𑁂𑀦𑀸𑀳 ‘𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀝𑀺𑀪𑀦𑁆𑀢𑀻’𑀢𑀺’’ 𑀯𑀤𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀤𑀼𑀢𑀺𑀬𑀧𑀤𑁂. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 ‘‘𑀦 𑀧𑀝𑀺𑀪𑀸𑀢𑀻’’𑀢𑀺 𑀧𑀤𑀲𑁆𑀲 ‘‘𑀦 𑀭𑀼𑀘𑁆𑀘𑀢𑀻’’𑀢𑀺 𑀅𑀢𑁆𑀣𑀫𑀸𑀳. 𑀦 𑀧𑀝𑀺𑀪𑀸𑀢𑀻𑀢𑀺 𑀯𑀸 𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁 𑀦 𑀉𑀧𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀯𑀺𑀝𑁆𑀞𑀝𑁆𑀞𑀸𑀦𑀁 𑀯𑀤𑀢𑀺. 𑀧𑀺𑀬𑀸𑀬𑀺𑀢𑀩𑁆𑀩𑀢𑁄 𑀧𑀺𑀬𑁄 𑀚𑀸𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀧𑀺𑀬𑀚𑀸𑀢𑀺𑀓𑀸. 𑀧𑀺𑀬𑁄 𑀧𑀪𑀼𑀢𑀺 𑀏𑀢𑁂𑀲𑀦𑁆𑀢𑀺 𑀧𑀺𑀬𑀧𑁆𑀧𑀪𑀼𑀢𑀺𑀓𑀸𑀢𑀺 𑀯𑀢𑁆𑀢𑀩𑁆𑀩𑁂, 𑀉-𑀓𑀸𑀭𑀲𑁆𑀲 𑀯-𑀓𑀸𑀭𑀁, 𑀢-𑀓𑀸𑀭𑀲𑁆𑀲 𑀘 𑀮𑁄𑀧𑀁 𑀓𑀢𑁆𑀯𑀸 ‘‘𑀧𑀺𑀬𑀧𑁆𑀧𑀪𑀸𑀯𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀧𑀺𑀬𑀢𑁄 𑀧𑀪𑀯𑀦𑁆𑀢𑀻’’𑀢𑀺.

𑁩𑁫𑁫. 𑀧𑀭-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑀦𑀺𑀲𑁂𑀥𑀦𑀢𑁆𑀣𑀁 ‘‘𑀧𑀺𑀭𑁂’’𑀢𑀺 𑀧𑀤𑀦𑁆𑀢𑀺 𑀆𑀳 ‘‘𑀅𑀫𑁆𑀳𑀸𑀓𑀁 𑀧𑀭𑁂’’𑀢𑀺. 𑀧𑀺𑀭𑁂𑀢𑀺 𑀯𑀸 ‘‘𑀧𑀭𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀦𑀺𑀧𑀸𑀢𑀧𑀤𑀦𑁆𑀢𑀺 𑀆𑀳 ‘‘𑀘𑀭 𑀧𑀺𑀭𑁂𑀢𑀺 𑀧𑀭𑀢𑁄 𑀕𑀘𑁆𑀙𑀸’’𑀢𑀺.

𑁩𑁫𑁬. 𑀤𑁆𑀯𑀺𑀥𑀸 𑀙𑁂𑀢𑁆𑀯𑀸𑀢𑀺 𑀏𑀢𑁆𑀣 𑀬𑀤𑀺 𑀇𑀢𑁆𑀣𑀻 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀺𑀬𑀸, 𑀓𑀣𑀁 𑀤𑁆𑀯𑀺𑀥𑀸 𑀙𑀺𑀦𑁆𑀤𑀢𑀻𑀢𑀺 𑀆𑀳 ‘‘𑀬𑀤𑀺 𑀳𑀻’’𑀢𑀺𑀆𑀤𑀺.

𑁩𑁫𑁭. 𑀓𑀣𑀁 𑀓𑀣𑁂𑀬𑁆𑀬𑀦𑁆𑀢𑀺 𑀬𑀣𑀸 𑀪𑀕𑀯𑀸 𑀏𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀣𑁂𑀲𑀺, 𑀲𑁄 𑀘 𑀫𑁂 𑀓𑀣𑁂𑀲𑀺, 𑀢𑀣𑀸 𑀘𑀸𑀳𑀁 𑀓𑀣𑁂𑀬𑁆𑀬𑀁. 𑀫𑀭𑀡𑀯𑀲𑁂𑀦 𑀯𑀺𑀧𑀭𑀺𑀡𑀸𑀫𑁄 𑀅𑀢𑁆𑀢𑀪𑀸𑀯𑀲𑁆𑀲 𑀧𑀭𑀺𑀯𑀢𑁆𑀢𑀢𑁆𑀢𑀸. 𑀧𑀮𑀸𑀬𑀺𑀢𑁆𑀯𑀸 𑀕𑀫𑀦𑀯𑀲𑁂𑀦 𑀅𑀜𑁆𑀜𑀣𑀸𑀪𑀸𑀯𑁄 𑀫𑀺𑀢𑁆𑀢𑀲𑀦𑁆𑀣𑀯𑀲𑁆𑀲 𑀲𑀫𑀸𑀕𑀫𑀲𑁆𑀲 𑀘 𑀅𑀜𑁆𑀜𑀣𑀸𑀪𑀽𑀢𑀢𑁆𑀢𑀸.

𑀙𑀟𑁆𑀟𑀺𑀢𑀪𑀸𑀯𑁂𑀦𑀸𑀢𑀺 𑀧𑀭𑀺𑀯𑀢𑁆𑀢𑀺𑀢𑀪𑀸𑀯𑁂𑀦. 𑀳𑀢𑁆𑀣𑀕𑀫𑀦𑀯𑀲𑁂𑀦 𑀅𑀜𑁆𑀜𑀣𑀸𑀪𑀸𑀯𑁄 𑀧𑀼𑀩𑁆𑀩𑁂 𑀲𑀯𑀲𑁂 𑀯𑀢𑁆𑀢𑀺𑀢𑀸𑀦𑀁 𑀇𑀤𑀸𑀦𑀺 𑀯𑀲𑁂 𑀅𑀯𑀢𑁆𑀢𑀦𑀪𑀸𑀯𑁂𑀦.

𑀆𑀘𑀫𑁂𑀳𑀻𑀢𑀺 𑀆𑀘𑀫𑀦𑀁 𑀫𑀼𑀔𑀯𑀺𑀓𑁆𑀔𑀸𑀮𑀦𑀁 𑀓𑀸𑀭𑁂𑀳𑀺. 𑀬𑀲𑁆𑀫𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀦𑁆𑀢𑀸 𑀳𑀺 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀯𑀺𑀓𑁆𑀔𑀸𑀮𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀘𑀫𑀺𑀢𑁆𑀯𑀸’’𑀢𑀺 𑀯𑀢𑁆𑀯𑀸 𑀧𑀘𑁆𑀙𑀸𑀧𑀺 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸’’𑀢𑀺 𑀆𑀳. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀺𑀬𑀚𑀸𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁮. 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁯. 𑀲𑀸𑀯𑀚𑁆𑀚𑀢𑀸𑀬 𑀉𑀧𑀸𑀭𑀫𑁆𑀪𑀁 𑀅𑀭𑀳𑀢𑀻𑀢𑀺 𑀑𑀧𑀸𑀭𑀫𑁆𑀪𑁄. 𑀢𑁂𑀦𑀸𑀳 ‘‘𑀤𑁄𑀲𑀁 𑀆𑀭𑁄𑀧𑀦𑀸𑀭𑀳𑁄’’𑀢𑀺. 𑀩𑀸𑀮𑀸 𑀉𑀧𑀸𑀭𑀫𑁆𑀪𑀯𑀢𑁆𑀣𑀼𑀫𑀜𑁆𑀜𑀁 𑀅𑀫𑀽𑀮𑀓𑀫𑁆𑀧𑀺 𑀦𑀁 𑀆𑀭𑁄𑀧𑁂𑀦𑁆𑀢𑀸 𑀉𑀕𑁆𑀖𑁄𑀲𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀯𑀺𑀜𑁆𑀜𑀽𑀳𑀻’’𑀢𑀺 𑀇𑀤𑀁 𑀧𑀤𑀁 𑀕𑀳𑁂𑀢𑁆𑀯𑀸 𑀧𑀜𑁆𑀳𑁂𑀦 𑀜𑀸𑀢𑀼𑀁 𑀇𑀘𑁆𑀙𑀺𑀢𑁂𑀦 𑀅𑀢𑁆𑀣𑁂𑀦 𑀉𑀧𑀸𑀭𑀫𑁆𑀪𑀸𑀤𑀻𑀦𑀁 𑀉𑀧𑀭𑀺 𑀉𑀢𑁆𑀢𑀭𑀁 𑀧𑀭𑀺𑀧𑀽𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀫𑁆𑀳𑀸. 𑀢𑀁 𑀓𑀸𑀭𑀡𑀦𑁆𑀢𑀺 𑀢𑀁 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀬𑀤𑀺 𑀳𑀺 𑀫𑀬𑀸 ‘‘𑀯𑀺𑀜𑁆𑀜𑀽𑀳𑀻’’𑀢𑀺 𑀧𑀤𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬, 𑀧𑀜𑁆𑀳𑀸 𑀫𑁂 𑀧𑀭𑀺𑀧𑀼𑀡𑁆𑀡𑀸 𑀪𑀯𑁂𑀬𑁆𑀬, 𑀦 𑀧𑀦 𑀯𑀼𑀢𑁆𑀢𑀸. 𑀇𑀤𑀸𑀦𑀺 𑀧𑀦 𑀢𑀁 𑀓𑀸𑀭𑀡𑀁 𑀉𑀢𑁆𑀢𑀭𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 ‘‘𑀯𑀺𑀜𑁆𑀜𑀽𑀳𑀻’’𑀢𑀺 𑀏𑀯𑀁 𑀯𑀤𑀦𑁆𑀢𑁂𑀦 𑀧𑀭𑀺𑀧𑀽𑀭𑀺𑀢𑀁.

𑁩𑁬𑁦. 𑀓𑁄𑀲𑀮𑁆𑀮𑀧𑀝𑀺𑀧𑀓𑁆𑀔𑀢𑁄 𑀅𑀓𑁄𑀲𑀮𑁆𑀮𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸, 𑀢𑀁𑀲𑀫𑀼𑀝𑁆𑀞𑀸𑀦𑀢𑁄 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁄. 𑀅𑀯𑀚𑁆𑀚𑀁 𑀯𑀼𑀘𑁆𑀘𑀢𑀺 𑀕𑀭𑀳𑀺𑀢𑀩𑁆𑀩𑀁, 𑀲𑀳 𑀅𑀯𑀚𑁆𑀚𑁂𑀳𑀻𑀢𑀺 𑀲𑀸𑀯𑀚𑁆𑀚𑁄, 𑀕𑀸𑀭𑀬𑁆𑀳𑁄. 𑀭𑀸𑀕𑀸𑀤𑀺𑀤𑁄𑀲𑁂𑀳𑀺 𑀲𑀤𑁄𑀲𑁄. 𑀢𑁂𑀳𑀺 𑀏𑀯 𑀲𑀩𑁆𑀬𑀸𑀩𑀚𑁆𑀛𑁄, 𑀢𑀢𑁄 𑀏𑀯 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀲𑀤𑀼𑀓𑁆𑀔𑁄. 𑀲𑀩𑁆𑀬𑀸𑀩𑀚𑁆𑀛𑀸𑀤𑀺𑀓𑁄 𑀦𑀺𑀲𑁆𑀲𑀦𑁆𑀤𑀯𑀺𑀧𑀸𑀓𑁄.

𑀢𑀣𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀢𑀺 𑀧𑀼𑀘𑁆𑀙𑀸𑀲𑀪𑀸𑀕𑁂𑀦𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬, 𑀧𑀼𑀘𑁆𑀙𑀦𑁆𑀢𑀲𑁆𑀲 𑀧𑀦 𑀦 𑀢𑀸𑀯 𑀘𑀺𑀢𑁆𑀢𑀸𑀭𑀸𑀥𑀦𑀁. 𑀢𑁂𑀦𑀸𑀳 𑁋 ‘‘𑀏𑀯𑀁 𑀩𑁆𑀬𑀸𑀓𑀭𑀡𑀁 𑀧𑀦 𑀦 𑀪𑀸𑀭𑀺𑀬’’𑀦𑁆𑀢𑀺, 𑀕𑀭𑀼𑀓𑀭𑀡𑀁 𑀦 𑀳𑁄𑀢𑀺 𑀯𑀺𑀲𑀸𑀭𑀚𑁆𑀚𑀁 𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 𑁋 ‘‘𑀅𑀧𑁆𑀧𑀳𑀻𑀦𑀅𑀓𑀼𑀲𑀮𑁄𑀧𑀺 𑀳𑀺 𑀧𑀳𑀸𑀦𑀁 𑀯𑀡𑁆𑀡𑁂𑀬𑁆𑀬𑀸’’𑀢𑀺. 𑀏𑀯𑀭𑀽𑀧𑁄 𑀧𑀦 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻 𑀦 𑀳𑁄𑀢𑀺, 𑀦 𑀏𑀯𑀁 𑀪𑀕𑀯𑀸𑀢𑀺 𑀆𑀳 ‘‘𑀪𑀕𑀯𑀸’’𑀢𑀺𑀆𑀤𑀺. 𑀏𑀯𑀁 𑀩𑁆𑀬𑀸𑀓𑀸𑀲𑀻𑀢𑀺 ‘‘𑀲𑀩𑁆𑀩𑀸𑀓𑀼𑀲𑀮𑀥𑀫𑁆𑀫𑀧𑀳𑀻𑀦𑁄 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄’’𑀢𑀺 𑀏𑀯𑀁 𑀩𑁆𑀬𑀸𑀓𑀸𑀲𑀺. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 ‘‘𑀲𑀩𑁆𑀩𑁂𑀲𑀁𑀬𑁂𑀯 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀁 𑀯𑀡𑁆𑀡𑁂𑀢𑀻’’𑀢𑀺 𑀯𑀼𑀢𑁆𑀢𑁂 𑀬𑀣𑀸 𑀧𑀼𑀘𑁆𑀙𑀸, 𑀢𑀣𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬, 𑀏𑀯𑀁 𑀩𑁆𑀬𑀸𑀓𑀭𑀡𑀁 𑀧𑀦 𑀦 𑀪𑀸𑀭𑀺𑀬𑀁, 𑀅𑀲𑀫𑁆𑀧𑀸𑀤𑀺𑀢𑀓𑀼𑀲𑀮𑀥𑀫𑁆𑀫𑁄𑀧𑀺 𑀉𑀧𑀲𑀫𑁆𑀧𑀤𑀁 𑀯𑀡𑁆𑀡𑁂𑀬𑁆𑀬. 𑀪𑀕𑀯𑀸 𑀧𑀦 𑀲𑀫𑁆𑀫𑀤𑁂𑀯 𑀲𑀫𑁆𑀧𑀸𑀤𑀺𑀢𑀓𑀼𑀲𑀮𑀢𑁆𑀢𑀸 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀩𑁆𑀬𑀸𑀓𑀸𑀲𑀻’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁯. 𑀥𑀫𑁆𑀫𑀘𑁂𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁪. 𑀫𑁂𑀤𑀯𑀡𑁆𑀡𑀸 𑀉𑀴𑀼𑀧𑀯𑀡𑁆𑀡𑀸 𑀘 𑀢𑀢𑁆𑀣 𑀢𑀢𑁆𑀣 𑀧𑀸𑀲𑀸𑀡𑀸 𑀉𑀲𑁆𑀲𑀦𑁆𑀦𑀸 𑀅𑀳𑁂𑀲𑀼𑀦𑁆𑀢𑀺 𑀫𑁂𑀤𑀸𑀴𑀼𑀧𑀦𑁆𑀢𑀺 𑀕𑀸𑀫𑀲𑁆𑀲 𑀲𑀫𑀜𑁆𑀜𑀸 𑀚𑀸𑀢𑀸. 𑀉𑀴𑀼𑀧𑀯𑀡𑁆𑀡𑀸𑀢𑀺 𑀘𑀦𑁆𑀤𑀲𑀫𑀸𑀦𑀯𑀡𑁆𑀡𑀢𑀸𑀬 𑀫𑁂𑀤𑀧𑀸𑀲𑀸𑀡𑀸 𑀯𑀼𑀢𑁆𑀢𑀸𑀢𑀺 𑀓𑁂𑀘𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀫𑁂𑀤𑀯𑀡𑁆𑀡𑀸 𑀧𑀸𑀲𑀸𑀡𑀸 𑀓𑀺𑀭𑁂𑀢𑁆𑀣 𑀉𑀲𑁆𑀲𑀦𑁆𑀦𑀸 𑀅𑀳𑁂𑀲𑀼’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀲𑁂𑀦𑀸𑀧𑀢𑀺𑀲𑁆𑀲. 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀦𑁆𑀢𑀺 𑀫𑀮𑁆𑀮𑀺𑀓𑀸𑀬 𑀲𑁄𑀓𑀯𑀺𑀦𑁄𑀤𑀦𑀥𑀫𑁆𑀫𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁.

𑀭𑀜𑁆𑀜𑀸𑀢𑀺 𑀧𑀲𑁂𑀦𑀤𑀻𑀓𑁄𑀲𑀮𑀭𑀜𑁆𑀜𑀸. 𑀫𑀳𑀘𑁆𑀘𑀸𑀢𑀺 𑀫𑀳𑀢𑀺𑀬𑀸. 𑀧𑀤𑀯𑀺𑀧𑀮𑁆𑀮𑀸𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀧𑀲𑀸𑀤𑀫𑀭𑀳𑀦𑁆𑀢𑀻𑀢𑀺 𑀧𑀸𑀲𑀸𑀤𑀺𑀓𑀸𑀦𑀺. 𑀢𑁂𑀦𑀸𑀳 ‘‘𑀲𑀳 𑀭𑀜𑁆𑀚𑀦𑀓𑀸𑀦𑀻’’𑀢𑀺. 𑀬𑀸𑀦𑀺 𑀧𑀦 𑀧𑀸𑀲𑀸𑀤𑀺𑀓𑀸𑀦𑀺, 𑀢𑀸𑀦𑀺 𑀧𑀲𑁆𑀲𑀺𑀢𑀼𑀁 𑀬𑀼𑀢𑁆𑀢𑀸𑀦𑀺. 𑀧𑀸𑀲𑀸𑀤𑀺𑀓𑀸𑀦𑀻𑀢𑀺 𑀯𑀸 𑀲𑀤𑁆𑀤𑀳𑀦𑀲𑀳𑀺𑀢𑀸𑀦𑀺. 𑀢𑁂𑀦𑀸𑀳 ‘‘𑀧𑀲𑀸𑀤𑀚𑀦𑀓𑀸𑀦𑀻’’𑀢𑀺. ‘‘𑀅𑀧𑁆𑀧𑀸𑀩𑀸𑀥’’𑀦𑁆𑀢𑀺 𑀆𑀤𑀻𑀲𑀼 𑀯𑀺𑀬 𑀅𑀧𑁆𑀧𑀲𑀤𑁆𑀤𑁄 𑀅𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀦𑀺𑀲𑁆𑀲𑀤𑁆𑀤𑀸𑀦𑀻’’𑀢𑀺. 𑀅𑀦𑀺𑀬𑀫𑀢𑁆𑀣𑀯𑀸𑀘𑀻 𑀬-𑀲𑀤𑁆𑀤𑁄 𑀅𑀦𑀺𑀬𑀫𑀸𑀓𑀸𑀭𑀯𑀸𑀘𑀓𑁄𑀧𑀺 𑀳𑁄𑀢𑀻𑀢𑀺 ‘‘𑀬𑀢𑁆𑀣𑀸’’𑀢𑀺 𑀧𑀤𑀲𑁆𑀲 ‘‘𑀬𑀸𑀤𑀺𑀲𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀳𑀺 𑀅𑀗𑁆𑀕𑀼𑀮𑀺𑀫𑀸𑀮𑀲𑀼𑀢𑁆𑀢𑁂 (𑀫. 𑀦𑀺. 𑀅𑀝𑁆𑀞. 𑁨.𑁩𑁪𑁭 𑀆𑀤𑀬𑁄) ‘‘𑀬𑀲𑁆𑀲 𑀔𑁄’’𑀢𑀺 𑀧𑀤𑀲𑁆𑀲 ‘‘𑀬𑀸𑀤𑀺𑀲𑀲𑁆𑀲 𑀔𑁄’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑁩𑁬𑁬. 𑀧𑀝𑀺𑀘𑁆𑀙𑀤𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀓𑀁. 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀻𑀢𑀺 𑀭𑀸𑀚𑀪𑀡𑁆𑀟𑀪𑀽𑀢𑀸𑀦𑀺. 𑀭𑀳𑀸𑀬𑀢𑀻𑀢𑀺 𑀭𑀳𑁄 𑀓𑀭𑁄𑀢𑀺, 𑀫𑀁 𑀅𑀚𑁆𑀛𑁂𑀲𑀢𑀻𑀢𑀺 𑀅𑀢𑁆𑀣𑁄.

𑁩𑁬𑁭. 𑀬𑀣𑀸𑀲𑀪𑀸𑀯𑀢𑁄 𑀜𑁂𑀬𑁆𑀬𑀁 𑀥𑀸𑀭𑁂𑀢𑀺 𑀅𑀯𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀜𑀸𑀡𑀦𑁆𑀢𑀺 𑀆𑀳 ‘‘𑀧𑀘𑁆𑀘𑀓𑁆𑀔𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺. 𑀅𑀦𑀼𑀦𑀬𑁄𑀢𑀺 𑀅𑀦𑀼𑀕𑀘𑁆𑀙𑀦𑀓𑁄. 𑀤𑀺𑀝𑁆𑀞𑁂𑀦 𑀳𑀺 𑀅𑀤𑀺𑀝𑁆𑀞𑀲𑁆𑀲 𑀅𑀦𑀼𑀫𑀸𑀦𑀁. 𑀢𑁂𑀦𑀸𑀳 ‘‘𑀅𑀦𑀼𑀫𑀸𑀦𑀁 𑀅𑀦𑀼𑀩𑀼𑀤𑁆𑀥𑀻’’𑀢𑀺. 𑀆𑀧𑀸𑀡𑀓𑁄𑀝𑀺𑀓𑀦𑁆𑀢𑀺 𑀬𑀸𑀯 𑀧𑀸𑀡𑀓𑁄𑀝𑀺, 𑀢𑀸𑀯 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑀁. 𑀏𑀢𑀦𑁆𑀢𑀺 𑀥𑀫𑁆𑀫𑀦𑁆𑀯𑀬𑀲𑀗𑁆𑀔𑀸𑀢𑀁 𑀅𑀦𑀼𑀫𑀸𑀦𑀁. 𑀏𑀯𑀦𑁆𑀢𑀺 ‘‘𑀇𑀥 𑀧𑀦𑀸𑀳’’𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦.

𑁩𑁬𑁯. 𑀘𑀓𑁆𑀔𑀼𑀁 𑀅𑀩𑀦𑁆𑀥𑀦𑁆𑀢𑁂 𑀯𑀺𑀬𑀸𑀢𑀺 𑀅𑀧𑀸𑀲𑀸𑀤𑀺𑀓𑀢𑀸𑀬 𑀧𑀲𑁆𑀲𑀦𑁆𑀢𑀸𑀦𑀁 𑀘𑀓𑁆𑀔𑀼𑀁 𑀅𑀢𑁆𑀢𑀦𑀺 𑀅𑀩𑀦𑁆𑀥𑀦𑁆𑀢𑁂 𑀯𑀺𑀬. 𑀓𑀼𑀮𑀲𑀦𑁆𑀢𑀸𑀦𑀸𑀦𑀼𑀩𑀦𑁆𑀥𑁄 𑀭𑁄𑀕𑁄 𑀓𑀼𑀮𑀭𑁄𑀕𑁄. 𑀉𑀴𑀸𑀭𑀦𑁆𑀢𑀺 𑀲𑀸𑀦𑀼𑀪𑀸𑀯𑀁. 𑀬𑁄 𑀳𑀺 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄, 𑀢𑀁 ‘‘𑀫𑀳𑁂𑀲𑀓𑁆𑀔’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀭𑀳𑀢𑁆𑀢𑀁 𑀕𑀡𑁆𑀳𑀦𑁆𑀢𑁄𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄𑀬𑀁, 𑀳𑁂𑀝𑁆𑀞𑀺𑀫𑀨𑀮𑀸𑀦𑀺 𑀕𑀡𑁆𑀳𑀦𑁆𑀢𑁄𑀧𑀺.

𑁩𑁭𑁩. 𑀚𑀻𑀯𑀺𑀓𑀸 𑀚𑀻𑀯𑀺𑀢𑀯𑀼𑀢𑁆𑀢𑀺.

𑁩𑁭𑁪. 𑀥𑀫𑁆𑀫𑀁 𑀘𑁂𑀢𑁂𑀢𑀺 𑀲𑀁𑀯𑁂𑀤𑁂𑀢𑀺 𑀏𑀢𑁂𑀳𑀻𑀢𑀺 𑀥𑀫𑁆𑀫𑀘𑁂𑀢𑀺𑀬𑀸𑀦𑀺, 𑀥𑀫𑁆𑀫𑀲𑁆𑀲 𑀧𑀽𑀚𑀸𑀯𑀘𑀦𑀸𑀦𑀺. 𑀦𑀦𑀼 𑀘𑁂𑀢𑀸𑀦𑀺 𑀩𑀼𑀤𑁆𑀥𑀲𑀗𑁆𑀖𑀕𑀼𑀡𑀤𑀻𑀧𑀦𑀸𑀦𑀺𑀧𑀺 𑀲𑀦𑁆𑀢𑀺? 𑀓𑀣𑀁 ‘‘𑀥𑀫𑁆𑀫𑀘𑁂𑀢𑀺𑀬𑀸𑀦𑀻𑀢𑀺 𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀻𑀓𑀸𑀭𑀯𑀘𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀻𑀲𑀼 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀫𑀸 𑀩𑀼𑀤𑁆𑀥𑀭𑀢𑀦𑀫𑀽𑀮𑀓𑀸𑀦𑀺 𑀲𑁂𑀲𑀭𑀢𑀦𑀸𑀦𑀺 𑀢𑀲𑁆𑀲 𑀯𑀲𑁂𑀦 𑀮𑀤𑁆𑀥𑀩𑁆𑀩𑀢𑁄. 𑀓𑁄𑀲𑀮𑀭𑀜𑁆𑀜𑀸 𑀘𑁂𑀢𑁆𑀣 𑀩𑀼𑀤𑁆𑀥𑀕𑀸𑀭𑀯𑁂𑀦 𑀥𑀫𑁆𑀫𑀲𑀗𑁆𑀖𑀕𑀸𑀭𑀯𑀁 𑀧𑀯𑁂𑀤𑀺𑀢𑀁, 𑀢𑀲𑁆𑀫𑀸 ‘‘𑀪𑀕𑀯𑀢𑀺 𑀘𑀺𑀢𑁆𑀢𑀻𑀓𑀸𑀭𑁂 𑀓𑀢𑁂 𑀥𑀫𑁆𑀫𑁄𑀧𑀺 𑀓𑀢𑁄𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘 𑀭𑀢𑀦𑀢𑁆𑀢𑀬𑀧𑀲𑀸𑀤𑀧𑀼𑀩𑁆𑀩𑀺𑀓𑀸 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀦𑀻𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸𑀦𑀻’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀥𑀫𑁆𑀫𑀘𑁂𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁧𑁦. 𑀓𑀡𑁆𑀡𑀓𑀢𑁆𑀣𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁫. 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀓𑀭𑀡𑀻𑀬𑁂𑀦𑁂𑀯𑀸𑀢𑀺 ‘‘𑀧𑀸𑀲𑀸𑀤𑁂 𑀯𑀸 𑀦𑀸𑀝𑀓𑁂𑀲𑀼 𑀯𑀸 𑀘𑀺𑀢𑁆𑀢𑀲𑁆𑀲𑀸𑀤𑀁 𑀅𑀮𑀪𑀫𑀸𑀦𑁄 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀺𑀢𑀼𑀁 𑀆𑀭𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀓𑀭𑀡𑀻𑀬𑁂𑀦. 𑀅𑀧𑁆𑀧𑀤𑀼𑀝𑁆𑀞𑀧𑀤𑁄𑀲𑀻𑀦𑀜𑁆𑀳𑀺 𑀏𑀯𑀁 𑀳𑁄𑀢𑀻𑀢𑀺.

𑁩𑁭𑁬. 𑀧𑀼𑀘𑁆𑀙𑀺𑀢𑁄𑀢𑀺 ‘‘𑀅𑀜𑁆𑀜𑀁 𑀤𑀽𑀢𑀁 𑀦𑀸𑀮𑀢𑁆𑀣𑀼’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁄. 𑀲𑁄𑀢𑀺 𑀭𑀸𑀚𑀸. 𑀢𑀸𑀲𑀁 𑀯𑀦𑁆𑀤𑀦𑀸 𑀲𑀘𑁂 𑀉𑀢𑁆𑀢𑀭𑀓𑀸𑀮𑀁, 𑀅𑀢𑁆𑀢𑀦𑁄 𑀆𑀕𑀫𑀦𑀓𑀸𑀭𑀡𑀁 𑀓𑀣𑁂𑀲𑁆𑀲𑀢𑀺.

𑁩𑁭𑁮. 𑀏𑀓𑀸𑀯𑀚𑁆𑀚𑀦𑁂𑀦𑀸𑀢𑀺 𑀏𑀓𑀯𑀻𑀣𑀺𑀚𑀯𑀦𑁂𑀦. 𑀢𑁂𑀦 𑀏𑀓𑀘𑀺𑀢𑁆𑀢𑀁 𑀢𑀸𑀯 𑀢𑀺𑀝𑁆𑀞𑀢𑀼, 𑀏𑀓𑀘𑀺𑀢𑁆𑀢𑀯𑀻𑀣𑀺𑀬𑀸𑀧𑀺 𑀲𑀩𑁆𑀩𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀇𑀤𑀁 𑀦𑀸𑀫 𑀅𑀢𑀻𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀆𑀯𑀚𑁆𑀚𑀢𑁄 𑀬𑀁 𑀓𑀺𑀜𑁆𑀘𑀺 𑀅𑀢𑀻𑀢𑀁 𑀚𑀸𑀦𑀸𑀢𑀺, 𑀦𑀺𑀬𑀫𑀺𑀢𑁂 𑀧𑀦 𑀦𑀺𑀬𑀫𑀺𑀢𑀫𑁂𑀯𑀸𑀢𑀺 𑀆𑀳 𑁋 ‘‘𑀏𑀓𑁂𑀦 𑀳𑀺…𑀧𑁂… 𑀏𑀓𑀤𑁂𑀲𑀫𑁂𑀯 𑀚𑀸𑀦𑀸𑀢𑀻’’𑀢𑀺. 𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 ‘‘𑀅𑀢𑀻𑀢𑀁 𑀲𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀘𑀺𑀢𑁆𑀢𑁂𑀦. 𑀇𑀢𑀭𑁂𑀲𑀽𑀢𑀺 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼. 𑀓𑀸𑀭𑀡𑀚𑀸𑀢𑀺𑀓𑀦𑁆𑀢𑀺 𑀬𑀼𑀢𑁆𑀢𑀺𑀲𑀪𑀸𑀯𑀁, 𑀬𑀼𑀢𑁆𑀢𑀺𑀬𑀸 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀭𑀸𑀬𑀕𑀼𑀡𑀦𑁆𑀢𑀺 𑀲𑀫𑁆𑀧𑀭𑀸𑀬𑁂 𑀓𑀢𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀁.

𑁩𑁭𑁯. 𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀺 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑁂 𑀯𑀺𑀬 𑀮𑁄𑀓𑀺𑀬𑀸 𑀘𑁂𑀯 𑀮𑁄𑀓𑀼𑀢𑁆𑀢𑀭𑀸 𑀘. 𑀬𑀣𑀸𑀮𑀸𑀪𑀯𑀲𑁂𑀦 𑀘𑁂𑀢𑁆𑀣 𑀧𑀥𑀸𑀦𑀺𑀬𑀗𑁆𑀕𑀸𑀦𑀁 𑀮𑁄𑀓𑀼𑀢𑁆𑀢𑀭𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀘𑁆𑀘𑁂𑀓𑀁 𑀏𑀯 𑀦𑁂𑀲𑀜𑁆𑀘 𑀧𑀥𑀸𑀦𑀺𑀬𑀗𑁆𑀕𑀢𑀸 𑀤𑀝𑁆𑀞𑀩𑁆𑀩𑀸 𑀬𑀣𑀸 ‘‘𑀅𑀝𑁆𑀞𑀯𑀺𑀫𑁄𑀓𑁆𑀔𑀸 𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸’’𑀢𑀺. 𑀮𑁄𑀓𑀼𑀢𑁆𑀢𑀭𑀸𑀦𑁂𑀯𑀸𑀢𑀺 𑀘𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀧𑀥𑀸𑀦𑀦𑀸𑀦𑀢𑁆𑀢𑀦𑁆𑀢𑀺 𑀧𑀤𑀳𑀦𑀦𑀸𑀦𑀢𑁆𑀢𑀁, 𑀪𑀸𑀯𑀦𑀸𑀦𑀼𑀬𑁄𑀕𑀯𑀺𑀲𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀭𑁂 𑀧𑀭𑀺𑀫𑀤𑁆𑀤𑀺𑀢𑁆𑀯𑀸 𑀧𑀝𑀺𑀧𑀓𑁆𑀔𑀥𑀫𑁆𑀫𑁂 𑀏𑀓𑀤𑁂𑀲𑀢𑁄 𑀧𑀚𑀳𑀺𑀢𑁆𑀯𑀸 𑀞𑀺𑀢𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑀲𑁆𑀲 𑀅𑀧𑁆𑀧𑀳𑀻𑀦𑀧𑀝𑀺𑀧𑀓𑁆𑀔𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑀢𑁄 𑀲𑀼𑀔𑀼𑀫𑁄 𑀯𑀺𑀲𑀤𑁄𑀯 𑀳𑁄𑀢𑀺, 𑀲𑀘𑁆𑀘𑀸𑀪𑀺𑀲𑀫𑀬𑁂𑀦 𑀲𑀦𑁆𑀢𑀸𑀦𑀲𑁆𑀲 𑀆𑀳𑀺𑀢𑀯𑀺𑀲𑁂𑀲𑀢𑁆𑀢𑀸𑀢𑀺 𑀆𑀳 𑁋 ‘‘𑀅𑀜𑁆𑀜𑀸𑀤𑀺𑀲𑀫𑁂𑀯 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀥𑀸𑀦𑀁, 𑀅𑀜𑁆𑀜𑀸𑀤𑀺𑀲𑀁 𑀲𑁄𑀢𑀸𑀧𑀦𑁆𑀦𑀲𑁆𑀲𑀸’’𑀢𑀺𑀆𑀤𑀺. 𑀅𑀬𑀜𑁆𑀘 𑀯𑀺𑀲𑁂𑀲𑁄 𑀦 𑀓𑁂𑀯𑀮𑀁 𑀅𑀦𑀭𑀺𑀬𑀅𑀭𑀺𑀬𑀧𑀼𑀕𑁆𑀕𑀮𑀢𑁄 𑀏𑀯, 𑀅𑀣 𑀔𑁄 𑀅𑀭𑀺𑀬𑁂𑀲𑀼𑀧𑀺 𑀲𑁂𑀓𑁆𑀔𑀸𑀤𑀺𑀯𑀺𑀲𑁂𑀲𑀢𑁄𑀧𑀺 𑀮𑀩𑁆𑀪𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀲𑁂𑀲𑀢𑁄 𑀅𑀪𑀺𑀦𑀻𑀳𑀸𑀭𑀢𑁄 𑀘 𑀇𑀚𑁆𑀛𑀦𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀜𑁆𑀜𑀸𑀤𑀺𑀲𑀁 𑀲𑀓𑀤𑀸𑀕𑀸𑀫𑀺𑀦𑁄’’𑀢𑀺𑀆𑀤𑀺𑀫𑀸𑀳. 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀬𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄 𑀲𑀩𑁆𑀩𑀣𑀸𑀯 𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀅𑀥𑀺𑀕𑀘𑁆𑀙𑀢𑀺, 𑀲𑁄𑀢𑀸𑀧𑀦𑁆𑀦𑁄 𑀘 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀦𑁆𑀢𑀺 𑀳𑁂𑀝𑁆𑀞𑀺𑀫𑀁 𑀉𑀧𑀭𑀺𑀫𑀢𑁄 𑀑𑀴𑀸𑀭𑀺𑀓𑀁, 𑀉𑀧𑀭𑀺𑀫𑀜𑁆𑀘 𑀇𑀢𑀭𑀢𑁄 𑀲𑀼𑀔𑀼𑀫𑀁 𑀢𑁂𑀦 𑀧𑀳𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀧𑀚𑀳𑀦𑀢𑁄, 𑀇𑀢𑀺 𑀅𑀥𑀺𑀕𑀦𑁆𑀢𑀩𑁆𑀩𑀯𑀺𑀲𑁂𑀲𑁂𑀦 𑀘 𑀅𑀥𑀺𑀕𑀫𑀧𑀝𑀺𑀧𑀤𑀸𑀬 𑀲𑀡𑁆𑀳𑀲𑀼𑀔𑀼𑀫𑀢𑀸 𑀢𑀺𑀓𑁆𑀔𑀯𑀺𑀲𑀤𑀢𑀸 𑀘 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 𑁋 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀥𑀸𑀦𑀁 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀥𑀸𑀦𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺𑀆𑀤𑀺.

𑀅𑀓𑀽𑀝𑀓𑀭𑀡𑀦𑁆𑀢𑀺 𑀅𑀯𑀜𑁆𑀘𑀦𑀓𑀺𑀭𑀺𑀬𑀁. 𑀅𑀦𑀯𑀘𑁆𑀙𑀺𑀦𑁆𑀤𑀦𑀦𑁆𑀢𑀺 𑀅𑀢𑀺𑀬𑀸𑀦𑀁. 𑀅𑀯𑀺𑀜𑁆𑀙𑀦𑀁 𑀦 𑀆𑀓𑀟𑁆𑀠𑀦𑀁, 𑀦𑀺𑀬𑀼𑀢𑁆𑀢𑀢𑀁 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀲𑀫𑀦𑁆𑀢𑀸 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀲𑀫𑀥𑀸𑀭𑀸𑀬 𑀙𑀟𑁆𑀟𑀦𑀁 𑀯𑀸. 𑀢𑀲𑁆𑀲 𑀓𑀸𑀭𑀡𑀁 𑀢𑀁𑀓𑀸𑀭𑀡𑀁, 𑀢𑀁 𑀓𑀸𑀭𑀡𑀦𑁆𑀢𑀺 𑀯𑀸 𑀢𑀁 𑀓𑀺𑀭𑀺𑀬𑀁 𑀢𑀁 𑀅𑀥𑀺𑀓𑀸𑀭𑀁. 𑀤𑀦𑁆𑀢𑁂𑀳𑀺 𑀕𑀦𑁆𑀢𑀩𑁆𑀩𑀪𑀽𑀫𑀺𑀦𑁆𑀢𑀺 𑀤𑀦𑁆𑀢𑁂𑀳𑀺 𑀧𑀢𑁆𑀢𑀩𑁆𑀩𑀝𑁆𑀞𑀸𑀦𑀁, 𑀧𑀢𑁆𑀢𑀩𑁆𑀩𑀯𑀢𑁆𑀣𑀼𑀁 𑀯𑀸. 𑀘𑀢𑁆𑀢𑀸𑀭𑁄𑀧𑀺 𑀅𑀲𑁆𑀲𑀤𑁆𑀥𑀸 𑀦𑀸𑀫 𑀉𑀧𑀭𑀺𑀫𑀉𑀧𑀭𑀺𑀫𑀲𑀤𑁆𑀥𑀸𑀬 𑀅𑀪𑀸𑀯𑀢𑁄. 𑀬𑁂𑀦 𑀳𑀺 𑀬𑀁 𑀅𑀧𑁆𑀧𑀢𑁆𑀢𑀁, 𑀢𑀲𑁆𑀲 𑀢𑀁 𑀦𑀢𑁆𑀣𑀺. 𑀅𑀭𑀺𑀬𑀲𑀸𑀯𑀓𑀲𑁆𑀲…𑀧𑁂… 𑀦𑀢𑁆𑀣𑀺 𑀧𑀞𑀫𑀫𑀕𑁆𑀕𑁂𑀦𑁂𑀯 𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀦𑀁 𑀧𑀳𑀸𑀢𑀩𑁆𑀩𑀢𑁆𑀢𑀸. 𑀢𑁂𑀦𑁂𑀯𑀸𑀢𑀺 𑀲𑀫𑁆𑀫𑀤𑁂𑀯 𑀯𑀺𑀭𑀼𑀤𑁆𑀥𑀧𑀓𑁆𑀔𑀸𑀦𑀁 𑀲𑀤𑁆𑀥𑀸𑀤𑀻𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀣𑀁 𑀫𑀺𑀲𑁆𑀲𑀓𑀓𑀣𑀸𑀢𑀺 𑀆𑀳 ‘‘𑀅𑀲𑁆𑀲𑀔𑀴𑀼𑀗𑁆𑀓𑀲𑀼𑀢𑁆𑀢𑀦𑁆𑀢𑁂 𑀧𑀦𑀸’’𑀢𑀺𑀆𑀤𑀺. 𑀘𑀢𑁆𑀢𑀸𑀭𑁄𑀯 𑀳𑁄𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸𑀤𑀺𑀯𑀲𑁂𑀦.

𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑁂 𑀅𑀤𑀦𑁆𑀢𑀳𑀢𑁆𑀣𑀺𑀆𑀤𑀬𑁄 𑀯𑀺𑀬𑀸𑀢𑀺𑀆𑀤𑀺𑀦𑀸 𑀓𑀡𑁆𑀳𑀧𑀓𑁆𑀔𑁂, 𑀬𑀣𑀸 𑀧𑀦 𑀤𑀦𑁆𑀢𑀳𑀢𑁆𑀣𑀺𑀆𑀤𑀬𑁄𑀢𑀺𑀆𑀤𑀺𑀦𑀸 𑀲𑀼𑀓𑁆𑀓𑀧𑀓𑁆𑀔𑁂 𑀘 𑀲𑀸𑀥𑀸𑀭𑀡𑀢𑁄 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀅𑀲𑀸𑀥𑀸𑀭𑀡𑀢𑁄 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁮𑁦. 𑀲𑀫𑁆𑀫𑀧𑁆𑀧𑀥𑀸𑀦𑀸 𑀦𑀺𑀩𑁆𑀩𑀺𑀲𑀺𑀝𑁆𑀞𑀯𑀻𑀭𑀺𑀬𑀸. 𑀢𑁂𑀦𑀸𑀳 𑁋 ‘‘𑀦 𑀓𑀺𑀜𑁆𑀘𑀺 𑀦𑀸𑀦𑀸𑀓𑀭𑀡𑀁 𑀯𑀤𑀸𑀫𑀺, 𑀬𑀤𑀺𑀤𑀁 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺’’𑀦𑁆𑀢𑀺. 𑀦 𑀳𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀢𑁂𑀯𑀺𑀚𑁆𑀚𑀙𑀴𑀪𑀺𑀜𑁆𑀜𑀸𑀦𑀁 𑀯𑀺𑀫𑀼𑀢𑁆𑀢𑀺𑀬𑀸 𑀦𑀸𑀦𑀸𑀓𑀭𑀡𑀁 𑀅𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀏𑀓𑀲𑁆𑀲𑀸’’𑀢𑀺𑀆𑀤𑀺. 𑀓𑀺𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀕𑀘𑁆𑀙𑀦𑁆𑀢𑀻𑀢𑀺 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀆𑀕𑀘𑁆𑀙𑀦𑁆𑀢𑀺. 𑀦𑀸𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 𑀇𑀤𑀁 𑀧𑀼𑀘𑁆𑀙𑀸𑀫𑀻𑀢𑀺 𑀤𑀲𑁆𑀲𑁂𑀦𑁆𑀢𑁄. 𑀅𑀧𑁆𑀧𑀳𑀻𑀦𑀘𑁂𑀢𑀲𑀺𑀓𑀤𑀼𑀓𑁆𑀔𑀸 𑀅𑀦𑀥𑀺𑀕𑀢𑀅𑀦𑀸𑀕𑀸𑀫𑀺𑀢𑀸. 𑀢𑁂𑀦𑀸𑀳 ‘‘𑀉𑀧𑀧𑀢𑁆𑀢𑀺𑀯𑀲𑁂𑀦 𑀆𑀕𑀦𑁆𑀢𑀸𑀭𑁄’’𑀢𑀺. 𑀲𑀫𑀼𑀘𑁆𑀙𑀺𑀦𑁆𑀦𑀤𑀼𑀓𑁆𑀔𑀸𑀢𑀺 𑀲𑀫𑀼𑀕𑁆𑀖𑀸𑀝𑀺𑀢𑀘𑁂𑀢𑀲𑀺𑀓𑀤𑀼𑀓𑁆𑀔𑀸.

𑁩𑁮𑁧. 𑀢𑀫𑁆𑀳𑀸 𑀞𑀸𑀦𑀸𑀢𑀺 𑀢𑀢𑁄 𑀬𑀣𑀸𑀥𑀺𑀕𑀢𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀢𑁄. 𑀧𑀼𑀦 𑀢𑀫𑁆𑀳𑀸 𑀞𑀸𑀦𑀸𑀢𑀺 𑀢𑀢𑁄 𑀤𑀼𑀕𑁆𑀕𑀢𑀸. 𑀲𑀫𑁆𑀧𑀦𑁆𑀦𑀓𑀸𑀫𑀕𑀼𑀡𑀦𑁆𑀢𑀺 𑀉𑀴𑀸𑀭𑀓𑀸𑀫𑀕𑀼𑀡𑀲𑀫𑀦𑁆𑀦𑀸𑀕𑀢𑀁.