𑁫. 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁭. 𑀤𑁆𑀯𑁂 𑀫𑀸𑀕𑀡𑁆𑀟𑀺𑀬𑀸𑀢𑀺 𑀤𑁆𑀯𑁂 𑀫𑀸𑀕𑀡𑁆𑀟𑀺𑀬𑀦𑀸𑀫𑀓𑀸. 𑀤𑁂𑀯𑀕𑀩𑁆𑀪𑀲𑀤𑀺𑀲𑀦𑁆𑀢𑀺 𑀤𑁂𑀯𑀸𑀦𑀁 𑀯𑀲𑀦𑀑𑀯𑀭𑀓𑀲𑀤𑀺𑀲𑀁. 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀕𑁆𑀬𑀸𑀕𑀸𑀭𑁂 𑀢𑀺𑀡𑀲𑀦𑁆𑀣𑀸𑀭𑀓𑁂’’𑀢𑀺 𑀏𑀢𑀁 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀁 𑀢𑀁 𑀤𑀺𑀯𑀲𑀫𑁂𑀯𑀸𑀢𑀺 𑀬𑀁 𑀤𑀺𑀯𑀲𑀁 𑀫𑀸𑀕𑀡𑁆𑀟𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀺𑀡𑀲𑀦𑁆𑀣𑀸𑀭𑀓𑀁 𑀧𑀜𑁆𑀜𑀢𑁆𑀢𑀁, 𑀦 𑀓𑁂𑀯𑀮𑀁 𑀢𑀁 𑀤𑀺𑀯𑀲𑀫𑁂𑀯 𑀪𑀕𑀯𑀸 𑀬𑁂𑀦𑀜𑁆𑀜𑀢𑀭𑁄 𑀯𑀦𑀲𑀡𑁆𑀟𑁄, 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀬𑁄𑀚𑀦𑀸. 𑀕𑀸𑀫𑀽𑀧𑀘𑀸𑀭𑁂𑀢𑀺 𑀕𑀸𑀫𑀲𑀫𑀻𑀧𑁂. 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸𑀢𑀺 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀯𑀺𑀬. 𑀦 𑀳𑀺 𑀪𑀕𑀯𑀢𑁄 𑀢𑀲𑁆𑀲 𑀲𑀜𑁆𑀜𑀸𑀡𑀓𑀭𑀡𑁂 𑀧𑀬𑁄𑀚𑀦𑀁 𑀅𑀢𑁆𑀣𑀺.

𑀲𑀫𑀡𑀲𑁂𑀬𑁆𑀬𑀸𑀦𑀼𑀭𑀽𑀧𑀦𑁆𑀢𑀺 𑀲𑀫𑀡𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀲𑁂𑀬𑁆𑀬𑀸. 𑀧𑀸𑀲𑀁𑀲𑀢𑁆𑀣𑁄 𑀳𑀺 𑀅𑀬𑀁 𑀭𑀽𑀧-𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀇𑀫𑀁 𑀢𑀺𑀡𑀲𑀦𑁆𑀣𑀸𑀭𑀓’’𑀦𑁆𑀢𑀺𑀆𑀤𑀺. 𑀅𑀦𑀸𑀓𑀺𑀡𑁆𑀡𑁄𑀢𑀺 𑀯𑀺𑀮𑀼𑀴𑀺𑀢𑁄 𑀅𑀖𑀝𑁆𑀝𑀺𑀢𑁄. 𑀳𑀢𑁆𑀣𑀧𑀸𑀤𑀲𑀻𑀲𑁂𑀳𑀺 𑀢𑀢𑁆𑀣 𑀢𑀢𑁆𑀣 𑀧𑀳𑀝𑁂𑀦 𑀦 𑀘𑀮𑀺𑀢𑁄 𑀅𑀪𑀺𑀦𑁆𑀦𑁄, 𑀅𑀘𑀮𑀺𑀢𑀢𑁆𑀢𑀸 𑀏𑀯 𑀅𑀪𑀺𑀦𑁆𑀦𑀁 𑀅𑀢𑁆𑀣𑀭𑀡𑀁. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁄 𑀯𑀺𑀬𑀸𑀢𑀺 𑀅𑀬𑀁 𑀙𑁂𑀓𑁂𑀦 𑀘𑀺𑀢𑁆𑀢𑀓𑀸𑀭𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀢𑀼𑀮𑀺𑀓𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀮𑁂𑀔𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀮𑀺𑀔𑀺𑀢𑀸 𑀘𑀺𑀢𑁆𑀢𑀓𑀢𑀲𑁂𑀬𑁆𑀬𑀸 𑀯𑀺𑀬. 𑀪𑀽𑀦𑀁 𑀯𑀼𑀘𑁆𑀘𑀢𑀺 𑀯𑀟𑁆𑀠𑀺𑀢𑀁, 𑀢𑀁 𑀳𑀦𑁆𑀢𑀻𑀢𑀺 𑀪𑀽𑀦𑀳𑀼𑀦𑁄. 𑀢𑁂𑀦𑀸𑀳 ‘‘𑀳𑀢𑀯𑀟𑁆𑀠𑀺𑀦𑁄’’𑀢𑀺. 𑀢𑀁 𑀧𑀦𑀸𑀬𑀁 𑀘𑀓𑁆𑀔𑀸𑀤𑀻𑀲𑀼 𑀲𑀁𑀯𑀭𑀯𑀺𑀥𑀸𑀦𑀁 𑀯𑀟𑁆𑀠𑀺𑀳𑀦𑀦𑀁 𑀫𑀜𑁆𑀜𑀢𑀺. 𑀢𑁂𑀦𑀸𑀳 ‘‘𑀫𑀭𑀺𑀬𑀸𑀤𑀓𑀸𑀭𑀓𑀲𑁆𑀲𑀸’’𑀢𑀺. 𑀩𑁆𑀭𑀽𑀳𑁂𑀢𑀩𑁆𑀩𑀦𑁆𑀢𑀺 𑀉𑀴𑀸𑀭𑀯𑀺𑀲𑀬𑀽𑀧𑀳𑀸𑀭𑁂𑀦 𑀯𑀟𑁆𑀠𑁂𑀢𑀩𑁆𑀩𑀁 𑀧𑀻𑀡𑁂𑀢𑀩𑁆𑀩𑀁. 𑀢𑀁 𑀧𑀦 𑀅𑀦𑀦𑀼𑀪𑀽𑀢𑀸𑀦𑀼𑀪𑀯𑀦𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀤𑀺𑀝𑁆𑀞𑀁 𑀤𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀅𑀦𑀼𑀪𑀽𑀢𑀁 𑀧𑀦 𑀅𑀧𑀡𑀻𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀻 𑀓𑀺𑀭𑁂𑀲 𑀧𑀭𑀺𑀩𑁆𑀩𑀸𑀚𑀓𑁄, 𑀢𑀲𑁆𑀫𑀸 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀯𑀟𑁆𑀠𑀺𑀁 𑀧𑀜𑁆𑀜𑀧𑁂𑀢𑀺. 𑀬𑀲𑁆𑀫𑀸 𑀬𑀁 𑀙𑀦𑁆𑀦𑀫𑁆𑀧𑀺 𑀘𑀓𑁆𑀔𑀸𑀤𑀻𑀦𑀁 𑀬𑀣𑀸𑀲𑀓𑀁 𑀯𑀺𑀲𑀬𑀕𑁆𑀕𑀳𑀡𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀮𑁄𑀓𑀲𑁆𑀲 𑀅𑀯𑀟𑁆𑀠𑀺𑀢𑀁 𑀯𑀺𑀦𑀸𑀲𑀫𑁂𑀯 𑀧𑀜𑁆𑀜𑀧𑁂𑀢𑀺, 𑀢𑀲𑁆𑀫𑀸 𑀲𑁄 𑀲𑀬𑀫𑁆𑀧𑀺 𑀯𑀟𑁆𑀠𑀺𑀳𑀢𑁄 𑀳𑀢𑀯𑀟𑁆𑀠𑀺𑀢𑁄.

𑀲𑀁𑀓𑀺𑀮𑁂𑀲𑀢𑁄 𑀆𑀭𑀓𑀢𑁆𑀢𑀸 𑀅𑀭𑀺𑀬𑁄 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀪𑀸𑀯𑀢𑁄 𑀜𑀸𑀬𑁄 𑀥𑀫𑁆𑀫𑁄. 𑀯𑀚𑁆𑀚𑀮𑁂𑀲𑀲𑁆𑀲𑀧𑀺 𑀅𑀪𑀸𑀯𑀢𑁄 𑀓𑀼𑀲𑀮𑁄. 𑀢𑁂𑀦𑀸𑀳 ‘‘𑀧𑀭𑀺𑀲𑀼𑀤𑁆𑀥𑁂 𑀓𑀸𑀭𑀡𑀥𑀫𑁆𑀫𑁂 𑀅𑀦𑀯𑀚𑁆𑀚𑁂’’𑀢𑀺. 𑀉𑀕𑁆𑀕𑀢𑀲𑁆𑀲𑀸𑀢𑀺 𑀉𑀘𑁆𑀘𑀓𑀼𑀮𑀻𑀦𑀢𑀸𑀤𑀺𑀦𑀸 𑀉𑀴𑀸𑀭𑀲𑁆𑀲. 𑀫𑀼𑀔𑁂 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸𑀢𑀺 𑀫𑀼𑀔𑁂𑀦 𑀲𑀁𑀬𑀢𑁄 𑀳𑀼𑀢𑁆𑀯𑀸. 𑀅𑀫𑁆𑀩𑀚𑀫𑁆𑀩𑀽𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀬 𑀅𑀧𑀽𑀭𑀬𑀫𑀸𑀦𑁄𑀢𑀺 𑀅𑀫𑁆𑀩𑀚𑀫𑁆𑀩𑀽𑀆𑀤𑀻𑀦𑀺 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑀸𑀦𑀺 𑀯𑀺𑀬 𑀧𑀽𑀭𑀡𑀓𑀣𑀸𑀦𑀬𑁂𑀦 𑀬𑀁 𑀓𑀺𑀜𑁆𑀘𑀺 𑀅𑀓𑀣𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀫𑀬𑀸 𑀓𑀣𑀺𑀢𑀦𑀺𑀬𑀸𑀫𑁂𑀦𑀸’’𑀢𑀺.

𑁨𑁦𑁮. 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑁄𑀢𑀺 𑀤𑀺𑀯𑀸𑀯𑀺𑀳𑀸𑀭𑀢𑁄 𑀯𑀼𑀝𑁆𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀤𑀺𑀯𑀸𑀯𑀺𑀳𑀸𑀭𑁄𑀧𑀺 𑀳𑀺 ‘‘𑀧𑀝𑀺𑀲𑀮𑁆𑀮𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁮). 𑀪𑀕𑀯𑀸 𑀳𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀼𑀢𑁆𑀢𑀭𑀓𑀸𑀮𑀁 𑀢𑁂𑀲𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀢𑁄 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀕𑀢𑁄. 𑀲𑀁𑀯𑁂𑀕𑁄 𑀦𑀸𑀫 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁, 𑀢𑀁 𑀦𑀺𑀩𑁆𑀩𑀺𑀦𑁆𑀤𑀦𑀯𑀲𑁂𑀦𑀧𑀺 𑀳𑁄𑀢𑀺, 𑀲𑀁𑀯𑁂𑀕𑀦𑀺𑀲𑁆𑀲𑀺𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀻𑀢𑀺𑀲𑀁𑀯𑁂𑀕𑁂𑀦 𑀲𑀁𑀯𑀺𑀕𑁆𑀕𑁄’’𑀢𑀺. 𑀲𑁄 𑀧𑀦 𑀬𑀲𑁆𑀫𑀸 𑀧𑀼𑀭𑀺𑀫𑀸𑀯𑀢𑁆𑀣𑀸𑀬 𑀘𑀮𑀦𑀁 𑀳𑁄𑀢𑀺 𑀘𑀺𑀢𑁆𑀢𑀲𑁆𑀲, 𑀢𑀲𑁆𑀫𑀸 𑀆𑀳 ‘‘𑀘𑀮𑀺𑀢𑁄 𑀓𑀫𑁆𑀧𑀺𑀢𑁄’’𑀢𑀺. 𑀢𑀺𑀔𑀺𑀡𑀲𑁄𑀢𑁂𑀦 𑀧𑀼𑀭𑀺𑀲𑁂𑀦𑀸𑀢𑀺 𑀪𑀕𑀯𑀦𑁆𑀢𑀁 𑀲𑀦𑁆𑀥𑀸𑀬𑀸𑀳.

𑁨𑁦𑁯. 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺 𑀬𑀣𑀸 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁄 𑀯𑀲𑀦𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀇𑀤𑀁 𑀆𑀭𑀫𑀺𑀢𑀩𑁆𑀩𑀪𑀸𑀯𑀲𑁆𑀲 𑀪𑀸𑀯𑀮𑀓𑁆𑀔𑀡𑀯𑀘𑀦𑀁. 𑀆𑀭𑀫𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑁄, 𑀭𑀽𑀧𑀁 𑀆𑀭𑀸𑀫𑁄 𑀏𑀢𑀲𑁆𑀲𑀸𑀢𑀺 𑀭𑀽𑀧𑀸𑀭𑀸𑀫𑀁, 𑀢𑀢𑁄 𑀏𑀯 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦 𑀭𑀽𑀧𑁂 𑀭𑀢𑀦𑁆𑀢𑀺 𑀭𑀽𑀧𑀭𑀢𑀁, 𑀢𑁂𑀦 𑀲𑀫𑁆𑀫𑁄 𑀤𑀼𑀧𑁆𑀧𑀢𑁆𑀢𑀺𑀬𑀸 𑀭𑀽𑀧𑁂𑀦 𑀲𑀫𑁆𑀫𑀼𑀤𑀺𑀢𑀦𑁆𑀢𑀺 𑀭𑀽𑀧𑀲𑀫𑁆𑀫𑀼𑀤𑀺𑀢𑀁, 𑀢𑀤𑁂𑀢𑀁 𑀢𑀤𑀪𑀺𑀳𑀢𑀚𑀯𑀦𑀓𑀺𑀘𑁆𑀘𑀁 𑀢𑀢𑁆𑀣 𑀆𑀭𑁄𑀧𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀤𑀦𑁆𑀢𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀦𑁆𑀢𑀁 𑀤𑀫𑀺𑀢𑀁. 𑀦𑀺𑀩𑁆𑀩𑀺𑀲𑁂𑀯𑀦𑀦𑁆𑀢𑀺 𑀯𑀺𑀕𑀢𑀯𑀺𑀲𑀼𑀓𑀸𑀬𑀺𑀓𑀁. 𑀕𑀼𑀢𑁆𑀢𑀦𑁆𑀢𑀺 𑀲𑀢𑀺𑀬𑀸 𑀕𑀼𑀢𑁆𑀢𑀁. 𑀭𑀓𑁆𑀔𑀺𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀁𑀯𑀼𑀢𑀦𑁆𑀢𑀺 𑀅𑀧𑀦𑀻𑀢𑀁 𑀧𑀯𑁂𑀲𑀦𑀺𑀯𑀸𑀭𑀡𑁂𑀦. 𑀢𑁂𑀦𑀸𑀳 ‘‘𑀧𑀺𑀳𑀺𑀢’’𑀦𑁆𑀢𑀺.

𑁨𑁧𑁦. 𑀉𑀧𑁆𑀧𑀚𑁆𑀚𑀦𑀧𑀭𑀺𑀴𑀸𑀳𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀓𑀺𑀮𑁂𑀲𑀧𑀭𑀺𑀴𑀸𑀳𑀁. 𑀓𑀺𑀁 𑀯𑀘𑀦𑀁 𑀯𑀢𑁆𑀢𑀩𑁆𑀩𑀁 𑀅𑀲𑁆𑀲𑀸𑀢𑀺 𑀭𑀽𑀧𑀸𑀭𑀫𑁆𑀫𑀡𑀁 𑀅𑀦𑀼𑀪𑀯𑀺𑀢𑁆𑀯𑀸 𑀲𑀫𑀼𑀤𑀬𑀸𑀤𑀺𑀧𑀳𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀯𑀺𑀭𑀚𑁆𑀚𑀺𑀢𑁆𑀯𑀸 𑀬𑁄 𑀯𑀺𑀫𑀼𑀢𑁆𑀢𑁄, 𑀢𑀢𑁆𑀣 𑀓𑀺𑀁 𑀯𑀼𑀤𑁆𑀥𑀺𑀳𑀢𑀧𑀭𑀺𑀬𑀸𑀬𑁄 𑀅𑀯𑀲𑁆𑀲𑀁 𑀮𑀪𑀢𑀺 𑀦 𑀮𑀪𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀧𑀭𑀺𑀩𑁆𑀩𑀸𑀚𑀓𑁄 𑀢𑀸𑀤𑀺𑀲𑁂 𑀲𑀸𑀭𑀩𑀤𑁆𑀥𑀯𑀺𑀫𑀼𑀢𑁆𑀢𑀺𑀓𑁂 𑀯𑀼𑀤𑁆𑀥𑀺𑀳𑀢𑁄𑀢𑀺 𑀦 𑀯𑀤𑁂𑀬𑁆𑀬𑀸𑀢𑀺 𑀆𑀳 ‘‘𑀦 𑀓𑀺𑀜𑁆𑀘𑀺, 𑀪𑁄, 𑀕𑁄𑀢𑀫𑀸’’𑀢𑀺.

𑁨𑁧𑁧. 𑀢𑁂𑀢𑀺 𑀢𑀬𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀯𑀲𑁆𑀲𑀁 𑀯𑀸𑀲𑁄 𑀯𑀲𑁆𑀲𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀯𑀲𑁆𑀲𑀺𑀢𑀼𑀁 𑀅𑀭𑀳𑀢𑀻𑀢𑀺 𑀯𑀲𑁆𑀲𑀺𑀓𑁄, 𑀯𑀲𑁆𑀲𑀓𑀸𑀮𑁂 𑀦𑀺𑀯𑀸𑀲𑀸𑀦𑀼𑀘𑁆𑀙𑀯𑀺𑀓𑁄𑀢𑀺 𑀅𑀢𑁆𑀣𑁄.

𑀦𑀸𑀢𑀺𑀉𑀘𑁆𑀘𑁄 𑀳𑁄𑀢𑀺 𑀦𑀸𑀢𑀺𑀦𑀻𑀘𑁄𑀢𑀺 𑀕𑀺𑀫𑁆𑀳𑀺𑀓𑁄 𑀯𑀺𑀬 𑀉𑀘𑁆𑀘𑁄, 𑀳𑁂𑀫𑀦𑁆𑀢𑀺𑀓𑁄 𑀯𑀺𑀬 𑀦𑀻𑀘𑁄 𑀦 𑀳𑁄𑀢𑀺, 𑀅𑀣 𑀔𑁄 𑀢𑀤𑀼𑀪𑀬𑀯𑁂𑀫𑀚𑁆𑀛𑀮𑀓𑁆𑀔𑀡𑀢𑀸𑀬 𑀦𑀸𑀢𑀺𑀉𑀘𑁆𑀘𑁄 𑀳𑁄𑀢𑀺 𑀦𑀸𑀢𑀺𑀦𑀻𑀘𑁄. 𑀦𑀸𑀢𑀺𑀢𑀦𑀽𑀦𑀻𑀢𑀺 𑀳𑁂𑀫𑀦𑁆𑀢𑀺𑀓𑀲𑁆𑀲 𑀯𑀺𑀬 𑀦 𑀔𑀼𑀤𑁆𑀤𑀓𑀸𑀦𑀺. 𑀦𑀸𑀢𑀺𑀩𑀳𑀽𑀦𑀻𑀢𑀺 𑀕𑀺𑀫𑁆𑀳𑀺𑀓𑀲𑁆𑀲 𑀯𑀺𑀬 𑀦 𑀅𑀢𑀺𑀩𑀳𑀽𑀦𑀺. 𑀫𑀺𑀲𑁆𑀲𑀓𑀸𑀦𑁂𑀯𑀸𑀢𑀺 𑀳𑁂𑀫𑀦𑁆𑀢𑀺𑀓𑀕𑀺𑀫𑁆𑀳𑀺𑀓𑁂𑀲𑀼 𑀯𑀼𑀢𑁆𑀢𑀮𑀓𑁆𑀔𑀡𑀯𑁄𑀫𑀺𑀲𑁆𑀲𑀓𑀸𑀦𑀺. 𑀉𑀡𑁆𑀳𑀧𑀯𑁂𑀲𑀦𑀢𑁆𑀣𑀸𑀬𑀸𑀢𑀺 𑀦𑀺𑀬𑀽𑀳𑁂𑀲𑀼 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀜𑁆𑀘 𑀧𑀢𑀺𑀢𑀲𑀽𑀭𑀺𑀬𑁄𑀪𑀸𑀲𑀯𑀲𑁂𑀦 𑀉𑀡𑁆𑀳𑀲𑁆𑀲 𑀅𑀩𑁆𑀪𑀦𑁆𑀢𑀭𑀧𑀯𑁂𑀲𑀦𑀢𑁆𑀣𑀸𑀬. 𑀪𑀺𑀢𑁆𑀢𑀺𑀦𑀺𑀬𑀽𑀳𑀸𑀦𑀺 𑀦𑀻𑀳𑀭𑀻𑀬𑀦𑁆𑀢𑀻𑀢𑀺 𑀤𑀓𑁆𑀔𑀺𑀡𑀧𑀲𑁆𑀲𑁂 𑀪𑀺𑀢𑁆𑀢𑀻𑀲𑀼 𑀦𑀺𑀬𑀽𑀳𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀓𑀭𑀻𑀬𑀦𑁆𑀢𑀺. 𑀯𑀺𑀧𑀼𑀮𑀚𑀸𑀮𑀸𑀦𑀻𑀢𑀺 𑀧𑀼𑀣𑀼𑀮𑀙𑀺𑀤𑁆𑀤𑀸𑀦𑀺. 𑀉𑀤𑀓𑀬𑀦𑁆𑀢𑀸𑀦𑀻𑀢𑀺 𑀉𑀤𑀓𑀯𑀸𑀳𑀓𑀬𑀦𑁆𑀢𑀸𑀦𑀺.

𑀦𑀻𑀮𑀼𑀧𑁆𑀧𑀮𑀕𑀘𑁆𑀙𑀓𑁂 𑀓𑀢𑁆𑀯𑀸𑀢𑀺 𑀯𑀺𑀓𑀲𑀺𑀢𑁂𑀳𑀺 𑀦𑀻𑀮𑀼𑀧𑁆𑀧𑀮𑁂𑀳𑀺 𑀕𑀘𑁆𑀙𑀓𑁂 𑀦𑀴𑀺𑀦𑀺𑀓𑁂 𑀓𑀢𑁆𑀯𑀸. 𑀕𑀦𑁆𑀥𑀓𑀮𑀮𑀦𑁆𑀢𑀺 𑀕𑀦𑁆𑀥𑀫𑀺𑀲𑁆𑀲𑀓𑀓𑀤𑁆𑀤𑀫𑀁. 𑀬𑀫𑀓𑀪𑀺𑀢𑁆𑀢𑀻𑀢𑀺 𑀬𑀼𑀕𑀴𑀪𑀺𑀢𑁆𑀢𑀺, 𑀢𑀲𑁆𑀲𑀸 𑀅𑀦𑁆𑀢𑀭𑁂 𑀦𑀸𑀴𑀺, 𑀬𑀢𑁄 𑀉𑀤𑀓𑀁 𑀅𑀪𑀺𑀭𑀼𑀳𑀢𑀺. 𑀮𑁄𑀳𑀦𑀸𑀴𑀺𑀦𑁆𑀢𑀺 𑀮𑁄𑀳𑀫𑀬𑀬𑀦𑁆𑀢𑀦𑀸𑀴𑀺𑀁. 𑀚𑀸𑀮𑀦𑁆𑀢𑀺 𑀢𑀫𑁆𑀩𑀮𑁄𑀳𑀫𑀬𑀁 𑀚𑀸𑀮𑀁. 𑀳𑁂𑀝𑁆𑀞𑀸 𑀬𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀻𑀢𑀺 𑀳𑁂𑀝𑁆𑀞𑀸𑀪𑀸𑀕𑁂 𑀉𑀤𑀓𑀬𑀦𑁆𑀢𑀁 𑀕𑀫𑁂𑀦𑁆𑀢𑀺. 𑀉𑀤𑀓𑀨𑀼𑀲𑀺𑀢𑁂 𑀢𑁂𑀫𑁂𑀦𑁆𑀢𑁂 𑀯𑀺𑀯𑀡𑁆𑀡𑀢𑀸 𑀫𑀸𑀳𑁄𑀲𑀻𑀢𑀺 𑀦𑀻𑀮𑀧𑀝𑀁 𑀦𑀺𑀯𑀸𑀲𑁂𑀢𑀺. 𑀤𑀺𑀯𑀸𑀓𑀸𑀮𑁂𑀢𑀺 𑀤𑀺𑀯𑀲𑀯𑁂𑀮𑀸𑀬. 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄 𑀯𑀺𑀳𑀭𑀸𑀫𑀻𑀢𑀺 𑀏𑀢𑁂𑀦 𑀅𑀢𑁆𑀢𑀦𑁄 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁄 𑀪𑀕𑀯𑀢𑀸 𑀤𑀲𑁆𑀲𑀺𑀢𑁄𑀢𑀺 𑀆𑀳 𑁋 ‘‘𑀢𑀸𑀬 𑀭𑀢𑀺𑀬𑀸 𑀭𑀫𑀫𑀸𑀦𑁄𑀢𑀺 𑀇𑀤𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺𑀭𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺.

𑁨𑁧𑁨. 𑀫𑀳𑀸𑀘 𑀦𑁂𑀲𑀁 𑀧𑀧𑀜𑁆𑀘𑁄𑀢𑀺 𑀦𑁂𑀲𑀁 𑀭𑀸𑀚𑀽𑀦𑀁 𑀫𑀳𑀸𑀧𑀧𑀜𑁆𑀘𑁄 𑀭𑀸𑀚𑀺𑀤𑁆𑀥𑀺𑀯𑀲𑁂𑀦 𑀲𑀩𑁆𑀩𑀤𑀸 𑀲𑀫𑁆𑀧𑀢𑁆𑀢𑀺𑀯𑀺𑀲𑀬𑁄 𑀘, 𑀅𑀦𑀼𑀪𑀯𑀺𑀢𑀼𑀁 𑀦 𑀮𑀪𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑁆𑀢𑁂 𑀕𑀯𑁂𑀲𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀦 𑀪𑁄𑀕𑀲𑀼𑀔𑀁. 𑀕𑀡𑀦𑀸 𑀦𑀸𑀫 𑀅𑀘𑁆𑀙𑀺𑀦𑁆𑀦𑀕𑀡𑀦𑀸, 𑀦 𑀯𑀺𑀕𑀡𑀕𑀡𑀦𑀸 𑀦 𑀧𑀡𑀕𑀡𑀦𑀸. 𑀆𑀯𑀝𑁆𑀝𑁄𑀢𑀺 𑀬𑀣𑀸𑀥𑀺𑀕𑀢𑁂 𑀤𑀺𑀩𑁆𑀩𑁂 𑀓𑀸𑀫𑁂 𑀧𑀳𑀸𑀬 𑀓𑀸𑀫𑀳𑁂𑀢𑀼 𑀆𑀯𑀝𑁆𑀝𑁄 𑀦𑀺𑀯𑀢𑁆𑀢𑁄 𑀧𑀭𑀺𑀯𑀢𑁆𑀢𑀺𑀢𑁄 𑀪𑀯𑁂𑀬𑁆𑀬. 𑀏𑀯𑀁 𑀫𑀸𑀦𑀼𑀲𑀓𑀸 𑀓𑀸𑀫𑀸𑀢𑀺 𑀬𑀣𑀸 𑀓𑁄𑀘𑀺 𑀓𑀼𑀲𑀕𑁆𑀕𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀫𑀺𑀦𑁂𑀬𑁆𑀬. 𑀢𑀢𑁆𑀣 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀫𑁂𑀯 𑀫𑀳𑀦𑁆𑀢𑀁 𑀯𑀺𑀧𑀼𑀮𑀁 𑀧𑀡𑀻𑀢𑀜𑁆𑀘, 𑀏𑀯𑀁 𑀤𑀺𑀩𑁆𑀩𑀸𑀦𑀁 𑀓𑀸𑀫𑀸𑀦𑀁 𑀲𑀫𑀻𑀧𑁂 𑀉𑀧𑀦𑀺𑀥𑀸𑀬 𑀫𑀸𑀦𑀼𑀲𑀓𑀸 𑀓𑀸𑀫𑀸 𑀅𑀧𑁆𑀧𑀫𑀢𑁆𑀢𑀓𑀸 𑀑𑀭𑀫𑀢𑁆𑀢𑀓𑀸 𑀦𑀺𑀳𑀻𑀦𑀸, 𑀤𑀺𑀩𑁆𑀩𑀸𑀯 𑀓𑀸𑀫𑀸 𑀫𑀳𑀦𑁆𑀢𑀸 𑀯𑀺𑀧𑀼𑀮𑀸 𑀉𑀴𑀸𑀭𑀸 𑀧𑀡𑀻𑀢𑀸. 𑀲𑀫𑀥𑀺𑀕𑀬𑁆𑀳𑀸𑀢𑀺 𑀲𑀫𑁆𑀫𑀸 𑀅𑀥𑀺𑀕𑀫𑀦𑀯𑀲𑁂𑀦 𑀦𑀺𑀕𑁆𑀕𑀬𑁆𑀳 𑀤𑀺𑀩𑁆𑀩𑀫𑁆𑀧𑀺 𑀲𑀼𑀔𑀁 𑀳𑀻𑀦𑀁 𑀓𑀢𑁆𑀯𑀸 𑀢𑀺𑀝𑁆𑀞𑀢𑀺.

𑁨𑁧𑁩. 𑀆𑀭𑁄𑀕𑁆𑀬𑀳𑁂𑀢𑀼𑀓𑀁 𑀲𑀼𑀔𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀔𑀻, 𑀢𑀁 𑀧𑀦𑀲𑁆𑀲 𑀭𑁄𑀕𑀯𑀺𑀕𑀫𑀢𑁄𑀯𑀸𑀢𑀺 𑀆𑀳 ‘‘𑀧𑀞𑀫𑀁 𑀤𑀼𑀓𑁆𑀔𑀺𑀢𑁄 𑀧𑀘𑁆𑀙𑀸 𑀲𑀼𑀔𑀺𑀢𑁄’’𑀢𑀺. 𑀲𑁂𑀭𑀻 𑀦𑀸𑀫 𑀅𑀢𑁆𑀢𑀸𑀥𑀻𑀦𑀯𑀼𑀢𑁆𑀢𑀻𑀢𑀺 𑀆𑀳 ‘‘𑀲𑁂𑀭𑀻 𑀏𑀓𑀓𑁄 𑀪𑀯𑁂𑀬𑁆𑀬𑀸’’𑀢𑀺. 𑀅𑀢𑁆𑀢𑀦𑁄 𑀯𑀲𑁄 𑀲𑀬𑀁𑀯𑀲𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀬𑀁𑀯𑀲𑀻. 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀯𑀺𑀬 𑀓𑀸𑀫𑀯𑀢𑁆𑀣𑀼𑀧𑀭𑀺𑀴𑀸𑀳𑀳𑁂𑀢𑀼𑀢𑁄. 𑀢𑀘𑁆𑀙𑁂𑀢𑁆𑀯𑀸𑀢𑀺 𑀖𑀝𑁆𑀝𑁂𑀢𑁆𑀯𑀸, 𑀓𑀡𑁆𑀟𑀽𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁨𑁧𑁪. 𑀬𑁂𑀦 𑀓𑀸𑀬𑁄 𑀫𑀥𑀼𑀭𑀓𑀚𑀸𑀢𑁄 𑀳𑁄𑀢𑀺, 𑀢𑀁 𑀓𑀺𑀭 𑀓𑀼𑀝𑁆𑀞𑀁 𑀙𑀯𑀺𑀁 𑀯𑀺𑀦𑀸𑀲𑁂𑀢𑀺, 𑀘𑀫𑁆𑀫𑀁 𑀙𑀺𑀤𑁆𑀤𑀚𑀸𑀢𑀁 𑀯𑀺𑀬 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀉𑀧𑀳𑀢𑀓𑀸𑀬𑀧𑁆𑀧𑀲𑀸𑀤𑁄’’𑀢𑀺. 𑀧𑀘𑁆𑀘𑀮𑀢𑁆𑀣𑀸𑀢𑀺 𑀧𑀝𑀺𑀮𑀪𑀺. 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀢𑀸𑀬 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀸𑀬𑁄𑀕𑁂𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀳𑀢𑀢𑁆𑀢𑀸. 𑀆𑀬𑀢𑀺𑀁 𑀤𑀼𑀓𑁆𑀔𑀨𑀮𑀢𑀸𑀬 𑀏𑀢𑀭𑀳𑀺 𑀘 𑀓𑀺𑀮𑁂𑀲𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀓𑀸𑀫𑀸𑀦𑀁 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀢𑀸, 𑀢𑀤𑀼𑀪𑀬𑀲𑀁𑀬𑀼𑀢𑁆𑀢𑁂𑀲𑀼 𑀢𑁂𑀲𑀼 𑀘 𑀢𑀁 𑀅𑀲𑀮𑁆𑀮𑀓𑁆𑀔𑀺𑀢𑁆𑀯𑀸 𑀏𑀓𑀦𑁆𑀢𑀲𑀼𑀔𑀸𑀪𑀺𑀦𑀺𑀯𑁂𑀲𑁄 𑀯𑀺𑀧𑀭𑀻𑀢𑀲𑀜𑁆𑀜𑀸𑀬, 𑀦 𑀓𑁂𑀯𑀮𑀸𑀬 𑀲𑀼𑀔𑀯𑁂𑀤𑀦𑀸𑀬 𑀲𑀼𑀔𑀸𑀢𑀺 𑀧𑀯𑀢𑁆𑀢𑀲𑀜𑁆𑀜𑀻.

𑁨𑁧𑁫. 𑀢𑀸𑀦𑀻𑀢𑀺 𑀓𑀼𑀝𑁆𑀞𑀲𑀭𑀻𑀭𑁂 𑀯𑀡𑀫𑀼𑀔𑀸𑀦𑀺. 𑀅𑀲𑀼𑀘𑀻𑀦𑀻𑀢𑀺 𑀅𑀲𑀼𑀪𑀸𑀦𑀺. 𑀤𑀼𑀕𑁆𑀕𑀦𑁆𑀥𑀸𑀦𑀻𑀢𑀺 𑀯𑀺𑀲𑁆𑀲𑀕𑀦𑁆𑀥𑀸𑀦𑀺. 𑀧𑀽𑀢𑀻𑀦𑀻𑀢𑀺 𑀓𑀼𑀡𑀧𑀪𑀽𑀢𑀸𑀦𑀺. 𑀇𑀤𑀸𑀦𑀻𑀢𑀺 𑀏𑀢𑀭𑀳𑀺. 𑀦𑀔𑁂𑀳𑀺 𑀯𑀺𑀧𑁆𑀧𑀢𑀘𑁆𑀙𑀦𑀅𑀕𑁆𑀕𑀺𑀧𑀭𑀺𑀢𑀸𑀧𑀦𑁂𑀳𑀺 𑀅𑀢𑀺𑀦𑀺𑀧𑁆𑀧𑀻𑀴𑀦𑀓𑀸𑀮𑁂 𑀧𑀸𑀡𑀓𑀸…𑀧𑁂… 𑀧𑀕𑁆𑀖𑀭𑀦𑁆𑀢𑀺, 𑀢𑁂𑀦 𑀯𑁂𑀤𑀦𑀸 𑀢𑀦𑀼𑀓𑀸 𑀳𑁄𑀢𑀺. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀦𑀸𑀬 𑀢𑀦𑀼𑀓𑀪𑀸𑀯𑀢𑁄.

𑀆𑀭𑁄𑀕𑁆𑀬𑀪𑀸𑀯𑁂 𑀥𑀦𑀮𑀸𑀪𑀸𑀤𑀺𑀮𑀸𑀪𑀼𑀧𑁆𑀧𑀢𑁆𑀢𑀺𑀢𑁄, 𑀅𑀲𑀢𑀺 𑀘 𑀆𑀭𑁄𑀕𑁆𑀬𑁂 𑀮𑀸𑀪𑀲𑁆𑀲 𑀦𑀺𑀭𑀢𑁆𑀣𑀓𑀪𑀸𑀯𑀢𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀮𑀸𑀪𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀘 𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸. 𑀦𑀺𑀩𑁆𑀩𑀸𑀦𑁂 𑀲𑀼𑀔𑀼𑀧𑁆𑀧𑀢𑁆𑀢𑀺𑀢𑁄, 𑀅𑀲𑀢𑀺 𑀘 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁂 𑀢𑀸𑀤𑀺𑀲𑀲𑁆𑀲 𑀲𑀼𑀔𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄, 𑀲𑀩𑁆𑀩𑀲𑀗𑁆𑀔𑀢𑀯𑀺𑀯𑀺𑀢𑁆𑀢𑀢𑁆𑀢𑀸 𑀘 𑀲𑀩𑁆𑀩𑀲𑁄 𑀘 𑀲𑀁𑀲𑀸𑀭𑀤𑀼𑀓𑁆𑀔𑀸𑀪𑀸𑀯𑀢𑁄, 𑀅𑀥𑀺𑀕𑀢𑁂 𑀘 𑀢𑀲𑁆𑀫𑀺𑀁 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀸𑀪𑀸𑀯𑀢𑁄 𑀘 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔𑀁. 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀸𑀦𑀦𑁆𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀺𑀬𑀸𑀦𑀁 𑀫𑀕𑁆𑀕𑀸𑀦𑀁. 𑀢𑁂𑀲𑀜𑁆𑀘 𑀅𑀫𑀢𑀕𑀸𑀫𑀺𑀢𑀸 𑀦𑀸𑀫 𑀢𑀦𑁆𑀦𑀺𑀦𑁆𑀦𑀢𑀸𑀯𑀲𑁂𑀦𑁂𑀯 𑀲𑀘𑁆𑀙𑀺𑀓𑀺𑀭𑀺𑀬𑀸𑀯𑀲𑁂𑀦𑀸𑀢𑀺 𑀆𑀳 ‘‘𑀧𑀼𑀩𑁆𑀩𑀪𑀸𑀕𑀕𑀫𑀦𑁂𑀦𑁂𑀯 𑀅𑀫𑀢𑀕𑀸𑀫𑀺𑀦’’𑀦𑁆𑀢𑀺. 𑀅𑀝𑁆𑀞𑀗𑁆𑀕𑀺𑀓𑁄 𑀅𑀭𑀺𑀬𑀫𑀕𑁆𑀕𑁄 𑀔𑁂𑀫𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑀲𑀫𑀼𑀕𑁆𑀖𑀸𑀢𑀦𑁂𑀦 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸, 𑀢𑀁𑀲𑀫𑀗𑁆𑀕𑀻𑀦𑀁 𑀲𑀩𑁆𑀩𑀲𑁄 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸 𑀢𑀁𑀲𑀫𑀗𑁆𑀕𑀻𑀦𑀁 𑀲𑀩𑁆𑀩𑀲𑁄 𑀅𑀦𑀼𑀧𑀤𑁆𑀤𑀯𑀳𑁂𑀢𑀼𑀢𑁄 𑀘. 𑀮𑀤𑁆𑀥𑀺𑀯𑀲𑁂𑀦 𑀕𑀳𑀺𑀢𑀸𑀢𑀺 𑀲𑀲𑁆𑀲𑀢𑀯𑀸𑀤𑀸𑀤𑀻𑀳𑀺 𑀓𑁂𑀯𑀮𑀁 𑀢𑁂𑀲𑀁 𑀮𑀤𑁆𑀥𑀺𑀯𑀲𑁂𑀦 𑀢𑀣𑀸 𑀕𑀳𑀺𑀢𑀸. 𑀔𑁂𑀫𑀅𑀫𑀢𑀕𑀸𑀫𑀺𑀦𑀦𑁆𑀢𑀺 𑀇𑀫𑀺𑀦𑀸 𑀳𑀺 ‘‘𑀔𑁂𑀫𑀁𑀅𑀫𑀢𑀕𑀸𑀫𑀺𑀦’’𑀦𑁆𑀢𑀺 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄, 𑀅𑀢𑁆𑀣𑁄 𑀧𑀦 𑀯𑀺𑀪𑀢𑁆𑀢𑀺𑀮𑁄𑀧𑁂𑀦 𑀤𑀝𑁆𑀞𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑁨𑁧𑁬. 𑀅𑀦𑁄𑀫𑀚𑁆𑀚𑀢𑀻𑀢𑀺 𑀅𑀦𑀼 𑀅𑀦𑀼 𑀑𑀫𑀚𑁆𑀚𑀢𑀺. 𑀅𑀧𑀭𑀸𑀧𑀭𑀁 𑀳𑀢𑁆𑀣𑀁 𑀳𑁂𑀝𑁆𑀞𑀸 𑀑𑀢𑀸𑀭𑁂𑀦𑁆𑀢𑁄 𑀫𑀚𑁆𑀚𑀢𑀺.

𑁨𑁧𑁭. 𑀙𑁂𑀓𑀦𑁆𑀢𑀺 𑀖𑀦𑀪𑀸𑀯𑁂𑀦 𑀯𑀻𑀢𑀁. 𑀖𑀦𑀫𑀝𑁆𑀞𑀪𑀸𑀯𑁂𑀦 𑀲𑀼𑀦𑁆𑀤𑀭𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀦𑁆𑀦’’𑀦𑁆𑀢𑀺. 𑀲𑀸𑀥𑀽𑀳𑀺 𑀧𑀭𑀫𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑁂𑀳𑀺 𑀮𑀸𑀢𑁄 𑀕𑀳𑀺𑀢𑁄𑀢𑀺 𑀲𑀸𑀳𑀼𑀴𑀺. 𑀲𑀗𑁆𑀓𑀸𑀭𑀘𑁄𑀴𑀓𑀁 𑀦𑀺𑀘𑁆𑀘𑀓𑀸𑀴𑀓𑀁.

𑁨𑁧𑁮. 𑀢𑀢𑁆𑀣 𑀢𑀢𑁆𑀣 𑀭𑀼𑀚𑀦𑀝𑁆𑀞𑁂𑀦 𑀯𑀺𑀩𑀸𑀥𑀦𑀝𑁆𑀞𑁂𑀦 𑀭𑁄𑀕𑁄𑀯 𑀪𑀽𑀢𑁄. 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦𑀧𑀺 𑀲𑀺𑀔𑀸𑀧𑁆𑀧𑀢𑁆𑀢𑁂𑀦 𑀆𑀭𑁄𑀕𑁆𑀬𑀁 𑀏𑀓𑀤𑁂𑀲𑁂𑀦 𑀧𑀲𑁆𑀲𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀯𑀝𑁆𑀝𑀧𑀝𑀺𑀧𑀓𑁆𑀔𑀢𑁄𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘𑁂𑀯𑀸’’𑀢𑀺.

𑁨𑁧𑁯. 𑀅𑀦𑁆𑀢𑀭𑀸𑀢𑀺 𑀧𑀞𑀫𑀼𑀧𑁆𑀧𑀢𑁆𑀢𑀺 𑀚𑀭𑀸𑀫𑀭𑀡𑀸𑀦𑀁 𑀯𑁂𑀫𑀚𑁆𑀛𑁂. 𑀉𑀧𑀳𑀢𑁄𑀢𑀺 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀤𑁄𑀲𑁂𑀳𑀺 𑀤𑀽𑀲𑀺𑀢𑀪𑀸𑀯𑁂𑀦 𑀓𑀣𑀺𑀢𑁄. 𑀧𑀺𑀢𑁆𑀢𑀸𑀤𑀺𑀤𑁄𑀲𑁂 𑀧𑀦 𑀪𑁂𑀲𑀚𑁆𑀚𑀲𑁂𑀯𑀦𑀸𑀬 𑀦𑀺𑀯𑀢𑁆𑀢𑁂𑀦𑁆𑀢𑁄 𑀉𑀧𑀳𑀢𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀦𑁆𑀢𑁄 𑀘𑀓𑁆𑀔𑀽𑀦𑀺 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫. 𑀯𑀺𑀦𑀝𑁆𑀞𑀸𑀦𑀻𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀦𑁆𑀦𑀸𑀦𑀺.

𑁨𑁨𑁦. 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂 𑀲𑀸𑀳𑀼𑀴𑀺𑀬𑀘𑀻𑀭𑁂. 𑀯𑀝𑁆𑀝𑁂 𑀅𑀦𑀼𑀕𑀢𑀘𑀺𑀢𑁆𑀢𑁂𑀦𑀸𑀢𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀸𑀬 𑀅𑀦𑀼𑀕𑀸𑀫𑀺𑀘𑀺𑀢𑁆𑀢𑁂𑀦.

𑁨𑁨𑁧. 𑀥𑀫𑁆𑀫𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲. 𑀅𑀦𑀼𑀥𑀫𑁆𑀫𑀦𑁆𑀢𑀺 𑀅𑀦𑀼𑀭𑀽𑀧𑀁 𑀦𑀺𑀬𑁆𑀬𑀸𑀦𑀥𑀫𑁆𑀫𑀁. 𑀢𑁂𑀦𑀸𑀳 ‘‘𑀅𑀦𑀼𑀘𑁆𑀙𑀯𑀺𑀓𑀁 𑀧𑀝𑀺𑀧𑀤’’𑀦𑁆𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀤𑀲𑁆𑀲𑁂𑀢𑀺. ‘‘𑀤𑀻𑀖𑀭𑀢𑁆𑀢𑀁 𑀯𑀢, 𑀪𑁄’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 𑀯𑀺𑀯𑀝𑁆𑀝𑀁 𑀤𑀲𑁆𑀲𑀺𑀢𑀁. 𑀢𑁂𑀦𑀸𑀳 ‘‘𑀉𑀧𑀸𑀤𑀸𑀦𑀦𑀺𑀭𑁄𑀥𑀸𑀢𑀺 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.