𑁬. 𑀲𑀦𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁩. 𑀤𑁂𑀯𑁂𑀦 𑀯𑀲𑁆𑀲𑁂𑀦 𑀓𑀢𑁄 𑀲𑁄𑀩𑁆𑀪𑁄 𑀤𑁂𑀯𑀓𑀢𑀲𑁄𑀩𑁆𑀪𑁄. 𑀢𑁂𑀦𑀸𑀳 ‘‘𑀯𑀲𑁆𑀲𑁄…𑀧𑁂… 𑀭𑀳𑀤𑁄’’𑀢𑀺. 𑀕𑀼𑀳𑀸𑀢𑀺 𑀧𑀁𑀲𑀼𑀕𑀼𑀳𑀸 𑀧𑀸𑀲𑀸𑀡𑀕𑀼𑀳𑀸 𑀫𑀺𑀲𑁆𑀲𑀓𑀕𑀼𑀳𑀸𑀢𑀺 𑀢𑀺𑀲𑁆𑀲𑁄 𑀕𑀼𑀳𑀸. 𑀢𑀢𑁆𑀣 𑀧𑀁𑀲𑀼𑀕𑀼𑀳𑀸 𑀉𑀤𑀓𑀫𑀼𑀢𑁆𑀢𑀝𑁆𑀞𑀸𑀦𑁂 𑀅𑀳𑁄𑀲𑀺 𑀦𑀺𑀦𑁆𑀦𑀝𑁆𑀞𑀸𑀦𑀁 𑀧𑀦 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀢𑀁. 𑀉𑀫𑀗𑁆𑀕𑀁 𑀓𑀢𑁆𑀯𑀸𑀢𑀺 𑀳𑁂𑀝𑁆𑀞𑀸 𑀲𑀼𑀤𑀼𑀕𑁆𑀕𑀁 𑀓𑀢𑁆𑀯𑀸. 𑀅𑀦𑀫𑀢𑀕𑁆𑀕𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 ‘‘𑀦 𑀔𑁄 𑀲𑁄 𑀲𑀢𑁆𑀢𑀸𑀯𑀸𑀲𑁄 𑀲𑀼𑀮𑀪𑀭𑀽𑀧𑁄, 𑀬𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀅𑀦𑀸𑀯𑀼𑀝𑁆𑀞𑀧𑀼𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁬𑁦) 𑀇𑀤𑀜𑁆𑀘 𑀢𑀴𑀸𑀓𑀁 𑀫𑀬𑀸 𑀯𑀼𑀢𑁆𑀣𑀧𑀼𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀢𑀫𑁆𑀧𑀺 𑀞𑀸𑀦𑀁 𑀲𑁄 𑀘 𑀅𑀢𑁆𑀢𑀪𑀸𑀯𑁄 𑀅𑀧𑀜𑁆𑀜𑀢𑁆𑀢𑀺𑀓𑀪𑀸𑀯𑀁 𑀕𑀢𑁄𑀢𑀺 𑀏𑀯𑀁 𑀅𑀦𑀫𑀢𑀕𑁆𑀕𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀢𑀸𑀤𑀺𑀲𑀁 𑀞𑀸𑀦𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀫𑀼𑀤𑁆𑀤𑀧𑀩𑁆𑀩𑀢𑀤𑀲𑁆𑀲𑀦𑀸𑀤𑀻𑀲𑀼𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀺𑀥𑀺 𑀯𑁂𑀤𑀺𑀢𑀩𑁆𑀩𑁄.

𑀉𑀘𑁆𑀘𑀁 𑀦𑀤𑀫𑀸𑀦𑀸𑀬𑀸𑀢𑀺 𑀉𑀘𑁆𑀘𑀁 𑀓𑀢𑁆𑀯𑀸 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺𑀬𑀸 𑀓𑀸𑀫𑀲𑁆𑀲𑀸𑀤𑀪𑀯𑀲𑁆𑀲𑀸𑀤𑀸𑀤𑀺𑀯𑀢𑁆𑀣𑀼𑀦𑁆𑀢𑀺 ‘‘𑀅𑀬𑀜𑁆𑀘 𑀅𑀬𑀜𑁆𑀘 𑀓𑀸𑀫𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄, 𑀅𑀲𑀼𑀓𑁄 𑀪𑀯𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄, 𑀏𑀯𑀫𑀬𑀁 𑀮𑁄𑀓𑁄 𑀧𑀺𑀬𑁂𑀳𑀺 𑀧𑀺𑀬𑀢𑀭𑁄’’𑀢𑀺 𑀏𑀯𑀁 𑀓𑀸𑀫𑀲𑁆𑀲𑀸𑀤𑀪𑀯𑀲𑁆𑀲𑀸𑀤𑀮𑁄𑀓𑀲𑁆𑀲𑀸𑀤𑀸𑀤𑀺𑀲𑀗𑁆𑀔𑀸𑀢𑀁 𑀯𑀢𑁆𑀣𑀼𑀁. 𑀤𑀼𑀕𑁆𑀕𑀢𑀺𑀢𑁄 𑀲𑀁𑀲𑀸𑀭𑀢𑁄 𑀘 𑀦𑀺𑀬𑁆𑀬𑀸𑀢𑀺 𑀏𑀢𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀁, 𑀲𑀕𑁆𑀕𑀫𑀕𑁆𑀕𑁄 𑀫𑁄𑀓𑁆𑀔𑀫𑀕𑁆𑀕𑁄 𑀘, 𑀢𑀁 𑀦𑀺𑀬𑁆𑀬𑀸𑀦𑀁 𑀅𑀭𑀳𑀢𑀺, 𑀦𑀺𑀬𑁆𑀬𑀸𑀦𑁂 𑀯𑀸 𑀦𑀺𑀬𑀼𑀢𑁆𑀢𑀸𑀢𑀺 𑀦𑀺𑀬𑁆𑀬𑀸𑀦𑀺𑀓𑀸, 𑀦𑀺𑀬𑁆𑀬𑀸𑀦𑀁 𑀯𑀸 𑀨𑀮𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀤𑀺𑀲𑀁𑀓𑀺𑀮𑁂𑀲𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀯𑀸 𑀦𑀺𑀬𑁆𑀬𑀸𑀦𑀻𑀬𑀸, 𑀈-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀬-𑀓𑀸𑀭𑀲𑁆𑀲 𑀘 𑀓-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀦𑀺𑀓𑀸, 𑀘𑁂𑀢𑀦𑀸𑀬 𑀲𑀤𑁆𑀥𑀺𑀁 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀢𑀲𑁆𑀲𑀸 𑀪𑀸𑀯𑁄 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸. 𑀢𑀺𑀭𑀘𑁆𑀙𑀸𑀦𑀪𑀽𑀢𑀸𑀢𑀺 𑀢𑀺𑀭𑁄𑀓𑀭𑀡𑀪𑀽𑀢𑀸. 𑀕𑁂𑀳𑀲𑁆𑀲𑀺𑀢𑀓𑀣𑀸𑀢𑀺 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸. 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂𑀢𑀺 𑀅𑀦𑀺𑀘𑁆𑀘𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂. 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀸𑀢𑁆𑀣𑀓𑀁, 𑀳𑀺𑀢𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑀺𑀔𑀸𑀢𑀺 𑀖𑀭𑀲𑀦𑁆𑀦𑀺𑀯𑁂𑀲𑁄, 𑀯𑀺𑀲𑀺𑀔𑀸𑀕𑀳𑀡𑁂𑀦 𑀘 𑀢𑀦𑁆𑀦𑀺𑀯𑀸𑀲𑀺𑀦𑁄 𑀕𑀳𑀺𑀢𑀸 ‘‘𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 (𑀲𑀸𑀭𑀢𑁆𑀣. 𑀝𑀻. 𑁧.𑀆𑀘𑀭𑀺𑀬𑀧𑀭𑀫𑁆𑀧𑀭𑀓𑀣𑀸𑀯𑀡𑁆𑀡𑀦𑀸) 𑀯𑀺𑀬. 𑀢𑁂𑀦𑁂𑀯𑀸𑀳 ‘‘𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺 ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸’’𑀢𑀺 𑀘. 𑀓𑀼𑀫𑁆𑀪𑀝𑁆𑀞𑀸𑀦𑀧𑁆𑀧𑀤𑁂𑀲𑁂𑀦 𑀓𑀼𑀫𑁆𑀪𑀤𑀸𑀲𑀺𑀬𑁄 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀼𑀫𑁆𑀪𑀤𑀸𑀲𑀺𑀓𑀣𑀸 𑀯𑀸’’𑀢𑀺.

𑁨𑁨𑁮. 𑀯𑁄𑀳𑀸𑀭𑁄 𑀯𑀺𑀬 𑀢𑁂𑀲𑀁 𑀢𑀣𑀸 𑀯𑁄𑀳𑀸𑀭𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁂’’𑀢𑀺. 𑀅𑀓𑀢𑀸𑀢𑀺 𑀲𑀫𑁂𑀦, 𑀯𑀺𑀲𑀫𑁂𑀦 𑀯𑀸 𑀓𑁂𑀦𑀘𑀺 𑀳𑁂𑀢𑀼𑀦𑀸 𑀦 𑀓𑀢𑀸 𑀦 𑀯𑀺𑀳𑀺𑀢𑀸. 𑀓𑀢𑀯𑀺𑀥𑁄 𑀓𑀭𑀡𑀯𑀺𑀥𑀺 𑀦𑀢𑁆𑀣𑀺 𑀏𑀢𑁂𑀲𑀦𑁆𑀢𑀺 𑀅𑀓𑀝𑀯𑀺𑀥𑀸. 𑀧𑀤𑀤𑁆𑀯𑀬𑁂𑀦𑀧𑀺 𑀮𑁄𑀓𑁂 𑀓𑁂𑀦𑀘𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀦𑁂𑀲𑀁 𑀅𑀦𑀺𑀩𑁆𑀩𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸𑀢𑀺 𑀓𑀲𑁆𑀲𑀘𑀺 𑀇𑀤𑁆𑀥𑀺𑀫𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀲𑁆𑀲 𑀤𑁂𑀯𑀲𑁆𑀲, 𑀇𑀲𑁆𑀲𑀭𑀸𑀤𑀺𑀦𑁄 𑀯𑀸 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸. 𑀅𑀦𑀺𑀫𑁆𑀫𑀸𑀢𑀸𑀢𑀺 𑀓𑀲𑁆𑀲𑀘𑀺 𑀅𑀦𑀺𑀫𑁆𑀫𑀸𑀧𑀺𑀢𑀸. 𑀭𑀽𑀧𑀸𑀤𑀺𑀚𑀦𑀓𑀪𑀸𑀯𑀦𑁆𑀢𑀺 𑀭𑀽𑀧𑀲𑀤𑁆𑀤𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑀁, 𑀭𑀽𑀧𑀸𑀤𑀬𑁄𑀧𑀺 𑀧𑀣𑀯𑀺𑀬𑀸𑀤𑀻𑀳𑀺 𑀅𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀸𑀢𑀺 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀧𑀩𑁆𑀩𑀢𑀓𑀽𑀝𑀁 𑀓𑁂𑀦𑀘𑀺 𑀅𑀦𑀺𑀩𑁆𑀩𑀢𑁆𑀢𑀺𑀢𑀁 𑀓𑀲𑁆𑀲𑀘𑀺 𑀘 𑀅𑀦𑀺𑀩𑁆𑀩𑀢𑁆𑀢𑀦𑀓𑀁, 𑀏𑀯𑀫𑁂𑀢𑁂𑀧𑀻𑀢𑀺 𑀆𑀳 ‘‘𑀧𑀩𑁆𑀩𑀢𑀓𑀽𑀝𑀸 𑀯𑀺𑀬 𑀞𑀺𑀢𑀸𑀢𑀺 𑀓𑀽𑀝𑀝𑁆𑀞𑀸’’𑀢𑀺. 𑀬𑀫𑀺𑀤𑀁 𑀩𑀻𑀚𑀢𑁄 𑀅𑀗𑁆𑀓𑀼𑀭𑀸𑀤𑀺 𑀚𑀸𑀬𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀢𑀢𑁄 𑀦𑀺𑀓𑁆𑀔𑀫𑀢𑀺 𑀦𑀸𑀯𑀺𑀚𑁆𑀚𑀫𑀸𑀦𑀁, 𑀅𑀜𑁆𑀜𑀣𑀸 𑀅𑀜𑁆𑀜𑀢𑁄𑀧𑀺 𑀅𑀜𑁆𑀜𑀲𑁆𑀲 𑀉𑀧𑀮𑀤𑁆𑀥𑀺 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀞𑀺𑀢𑀸𑀢𑀺 𑀏𑀯𑀁 𑀦𑀺𑀩𑁆𑀩𑀺𑀓𑀸𑀭𑀸 𑀞𑀺𑀢𑀸. 𑀉𑀪𑀬𑁂𑀦𑀧𑀻𑀢𑀺 𑀅𑀢𑁆𑀣𑀤𑁆𑀯𑀬𑁂𑀦𑀧𑀻𑀢𑀺 𑀯𑀤𑀦𑁆𑀢𑀺. ‘‘𑀓𑀽𑀝𑀝𑁆𑀞𑀸 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀸’’𑀢𑀺 𑀧𑀤𑀤𑁆𑀯𑀬𑁂𑀦𑀧𑀺. 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁. 𑀞𑀺𑀢𑀢𑁆𑀢𑀸𑀢𑀺 𑀦𑀺𑀩𑁆𑀩𑀺𑀓𑀸𑀭𑀸𑀪𑀸𑀯𑁂𑀦 𑀞𑀺𑀢𑀢𑁆𑀢𑀸. 𑀦 𑀘𑀮𑀦𑁆𑀢𑀻𑀢𑀺 𑀯𑀺𑀓𑀸𑀭𑀁 𑀦𑀸𑀧𑀚𑁆𑀚𑀦𑁆𑀢𑀺. 𑀯𑀺𑀓𑀸𑀭𑀸𑀪𑀸𑀯𑀢𑁄 𑀳𑀺 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀢𑀸. 𑀅𑀦𑀺𑀜𑁆𑀚𑀦𑀜𑁆𑀘 𑀅𑀢𑁆𑀣𑀢𑁄 𑀧𑀓𑀢𑀺𑀬𑀸 𑀅𑀯𑀝𑁆𑀞𑀸𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀯𑀺𑀧𑀭𑀺𑀡𑀸𑀫𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁆𑀢𑀸 𑀏𑀯 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀦 𑀩𑁆𑀬𑀸𑀩𑀸𑀥𑁂𑀦𑁆𑀢𑀺. 𑀲𑀢𑀺 𑀳𑀺 𑀯𑀺𑀓𑀸𑀭𑀁 𑀆𑀧𑀸𑀤𑁂𑀢𑀩𑁆𑀩𑀢𑀸𑀬 𑀩𑁆𑀬𑀸𑀩𑀸𑀥𑀓𑀢𑀸𑀧𑀺 𑀲𑀺𑀬𑀸, 𑀢𑀣𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀢𑀸𑀬 𑀅𑀦𑀼𑀕𑁆𑀕𑀸𑀳𑀓𑀢𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀦𑀸𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀣𑀯𑀻 𑀏𑀯 𑀓𑀸𑀬𑁂𑀓𑀤𑁂𑀲𑀢𑁆𑀢𑀸 𑀧𑀣𑀯𑀻𑀓𑀸𑀬𑁄. 𑀳𑀦𑁆𑀢𑀼𑀁 𑀯𑀸 𑀖𑀸𑀢𑁂𑀢𑀼𑀁 𑀯𑀸 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺 𑀚𑀻𑀯𑀲𑀢𑁆𑀢𑀫𑀸𑀦𑀁 𑀓𑀸𑀬𑀸𑀦𑀁 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀪𑀸𑀯𑀢𑁄, 𑀏𑀢𑁂𑀦𑁂𑀯 𑀦𑁂𑀲𑀫𑀳𑀦𑁆𑀢𑀩𑁆𑀩𑀢𑀸 𑀅𑀖𑀸𑀢𑁂𑀢𑀩𑁆𑀩𑀢𑀸 𑀅𑀢𑁆𑀣𑀢𑁄 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀦𑁆𑀦𑀁𑀢𑁆𑀯𑁂𑀯 𑀓𑀸𑀬𑀸𑀦’’𑀦𑁆𑀢𑀺𑀆𑀤𑀺. 𑀲𑁄𑀢𑀼𑀁 𑀯𑀸 𑀲𑀸𑀯𑁂𑀢𑀼𑀁 𑀯𑀸 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀘𑁆𑀘𑁂𑀓𑀁 𑀦𑁂𑀲𑀁 𑀲𑀯𑀦𑁂𑀲𑀼 𑀅𑀲𑀫𑀢𑁆𑀣𑀢𑁆𑀢𑀸 𑀢𑀤𑁂𑀓𑀤𑁂𑀲𑀸𑀤𑀻𑀲𑀼𑀧𑀺 𑀅𑀲𑀫𑀢𑁆𑀣𑀢𑀁 𑀤𑀻𑀧𑁂𑀢𑀺. 𑀬𑀤𑀺 𑀓𑁄𑀘𑀺 𑀳𑀦𑁆𑀢𑀸 𑀦𑀢𑁆𑀣𑀺, 𑀓𑀣𑀁 𑀲𑀢𑁆𑀣𑀧𑁆𑀧𑀳𑀸𑀭𑁄𑀢𑀺 𑀆𑀳 ‘‘𑀬𑀣𑀸 𑀫𑀼𑀕𑁆𑀕𑀭𑀸𑀲𑀺𑀆𑀤𑀻𑀲𑀽’’𑀢𑀺𑀆𑀤𑀺. 𑀓𑁂𑀯𑀮𑀁 𑀲𑀜𑁆𑀜𑀸𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀳𑀦𑀦𑀖𑀸𑀢𑀦𑀸𑀤𑀺 𑀧𑀦 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑁂𑀯 𑀓𑀸𑀬𑀸𑀦𑀁 𑀅𑀯𑀺𑀓𑁄𑀧𑀦𑀻𑀬𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀯𑀮𑀁 𑀢𑀓𑁆𑀓𑀫𑀢𑁆𑀢𑁂𑀦 𑀦𑀺𑀭𑀢𑁆𑀣𑀓𑀁 𑀤𑀺𑀝𑁆𑀞𑀺𑀁 𑀤𑀻𑀧𑁂𑀢𑀻𑀢𑀺 𑀏𑀢𑁂𑀦 𑀬𑀲𑁆𑀫𑀸 𑀢𑀓𑁆𑀓𑀺𑀓𑀸 𑀦𑀺𑀭𑀗𑁆𑀓𑀼𑀲𑀢𑀸𑀬 𑀧𑀭𑀺𑀓𑀧𑁆𑀧𑀦𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑀸 𑀧𑀭𑀺𑀓𑀧𑁆𑀧𑀺𑀢𑀁 𑀲𑀸𑀭𑀢𑁄 𑀫𑀜𑁆𑀜𑀫𑀸𑀦𑀸 𑀢𑀣𑁂𑀯 𑀅𑀪𑀺𑀦𑀺𑀯𑀺𑀲𑁆𑀲 𑀢𑀓𑁆𑀓𑀤𑀺𑀝𑁆𑀞𑀺𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑁂𑀲𑀁 𑀤𑀺𑀝𑁆𑀞𑀺𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀜𑁆𑀜𑀽𑀳𑀺 𑀯𑀺𑀘𑀸𑀭𑀡𑀸 𑀓𑀢𑁆𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀻𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀢𑀺 𑀧𑀜𑁆𑀘𑀭𑀽𑀧𑀺𑀦𑁆𑀤𑁆𑀭𑀺𑀬𑀯𑀲𑁂𑀦. 𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀺 𑀓𑀫𑁆𑀫𑀪𑀸𑀯𑁂𑀦 𑀲𑀼𑀧𑀸𑀓𑀝𑀢𑁆𑀢𑀸. 𑀅𑀯𑀗𑁆𑀓𑀓𑀣𑀸𑀢𑀸𑀭𑀡𑀸𑀤𑀺𑀓𑀸 𑀤𑁆𑀯𑀸𑀲𑀝𑁆𑀞𑀺 𑀧𑀝𑀺𑀧𑀤𑀸. 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂𑀢𑀺 𑀏𑀓𑀲𑁆𑀫𑀺𑀁 𑀫𑀳𑀸𑀓𑀧𑁆𑀧𑁂.

𑀧𑀼𑀭𑀺𑀲𑀪𑀽𑀫𑀺𑀬𑁄𑀢𑀺 𑀧𑀥𑀸𑀦𑀧𑀼𑀕𑁆𑀕𑀮𑁂𑀦 𑀦𑀺𑀤𑁆𑀤𑁂𑀲𑁄, 𑀇𑀢𑁆𑀣𑀻𑀦𑀫𑁆𑀧𑁂𑀢𑀸 𑀪𑀽𑀫𑀺𑀬𑁄 𑀇𑀘𑁆𑀙𑀦𑁆𑀢𑁂𑀯. 𑀪𑀺𑀓𑁆𑀔𑀼 𑀘 𑀧𑀦𑁆𑀦𑀓𑁄𑀢𑀺𑀆𑀤𑀺 𑀢𑁂𑀲𑀁 𑀧𑀸𑀴𑀺𑀬𑁂𑀯. 𑀢𑀢𑁆𑀣 𑀧𑀦𑁆𑀦𑀓𑁄𑀢𑀺 𑀪𑀺𑀓𑁆𑀔𑀸𑀬 𑀯𑀺𑀘𑀭𑀡𑀓𑁄𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀸 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀦𑁆𑀦𑀓𑁄. 𑀚𑀺𑀦𑁄𑀢𑀺 𑀚𑀺𑀡𑁆𑀡𑁄, 𑀚𑀭𑀸𑀯𑀲𑁂𑀦 𑀦𑀺𑀳𑀻𑀦𑀥𑀸𑀢𑀼𑀓𑁄𑀢𑀺 𑀯𑀤𑀦𑁆𑀢𑀺, 𑀅𑀢𑁆𑀢𑀦𑁄 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑁄. 𑀲𑁄 𑀓𑀺𑀭 𑀢𑀣𑀸𑀪𑀽𑀢𑁄 𑀓𑀲𑁆𑀲𑀘𑀺𑀧𑀺 𑀥𑀫𑁆𑀫𑀁 𑀦 𑀓𑀣𑁂𑀢𑀺, 𑀢𑁂𑀦𑀸𑀳 ‘‘𑀦 𑀓𑀺𑀜𑁆𑀘𑀺 𑀆𑀳𑀸’’𑀢𑀺. 𑀅𑀮𑀸𑀪𑀺𑀦𑁆𑀢𑀺 ‘‘𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁩𑁯𑁪) 𑀦𑀬𑁂𑀦 𑀯𑀼𑀢𑁆𑀢𑀅𑀮𑀸𑀪𑀳𑁂𑀢𑀼𑀲𑀫𑀸𑀬𑁄𑀕𑁂𑀦 𑀅𑀮𑀸𑀪𑀺𑀁. 𑀢𑀢𑁄 𑀏𑀯 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑀧𑀭𑁂𑀢𑀢𑀸𑀬 𑀲𑀬𑀦𑀧𑀭𑀸𑀬𑀡𑀁 𑀲𑀫𑀡𑀁 𑀧𑀦𑁆𑀦𑀪𑀽𑀫𑀻𑀢𑀺 𑀯𑀤𑀢𑀺.

𑀆𑀚𑀻𑀯𑀯𑀼𑀢𑁆𑀢𑀺𑀲𑀢𑀸𑀦𑀻𑀢𑀺 𑀲𑀢𑁆𑀢𑀸𑀦𑀁 𑀆𑀚𑀻𑀯𑀪𑀽𑀢𑀸𑀦𑀺 𑀚𑀻𑀯𑀺𑀓𑀸𑀯𑀼𑀢𑁆𑀢𑀺𑀲𑀢𑀸𑀦𑀺. 𑀧𑀲𑀼𑀕𑁆𑀕𑀳𑀡𑁂𑀦 𑀏𑀴𑀓𑀚𑀸𑀢𑀺 𑀕𑀳𑀺𑀢𑀸, 𑀫𑀺𑀕𑀕𑁆𑀕𑀳𑀡𑁂𑀦 𑀭𑀼𑀭𑀼𑀕𑀯𑀬𑀸𑀤𑀺𑀲𑀩𑁆𑀩𑀫𑀺𑀕𑀚𑀸𑀢𑀺. 𑀩𑀳𑀽 𑀤𑁂𑀯𑀸𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀯𑀲𑁂𑀦 𑀦𑁂𑀲𑀁 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀩𑀳𑀽 𑀤𑁂𑀯𑀸. 𑀢𑀢𑁆𑀣 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀏𑀓𑀘𑁆𑀘𑁄 𑀅𑀦𑁆𑀢𑀭𑀪𑁂𑀤𑁄 ‘‘𑀫𑀳𑀸𑀲𑀫𑀬𑀲𑀼𑀢𑁆𑀢𑁂𑀦’’ (𑀤𑀻. 𑀦𑀺. 𑁨.𑁩𑁩𑁧 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄. 𑀫𑀸𑀦𑀼𑀲𑀸𑀧𑀺 𑀅𑀦𑀦𑁆𑀢𑀸𑀢𑀺 𑀤𑀻𑀧𑀤𑁂𑀲𑀓𑀼𑀮𑀯𑀁𑀲𑀸𑀚𑀻𑀯𑀸𑀤𑀺𑀯𑀺𑀪𑀸𑀕𑀯𑀲𑁂𑀦 𑀫𑀸𑀦𑀼𑀲𑀸𑀧𑀺 𑀅𑀦𑀦𑁆𑀢𑀪𑁂𑀤𑀸. 𑀧𑀺𑀲𑀸𑀘𑀸 𑀏𑀯 𑀧𑁂𑀲𑀸𑀘𑀸, 𑀢𑁂 𑀅𑀧𑀭𑀧𑁂𑀢𑀸𑀤𑀬𑁄 𑀫𑀳𑀦𑁆𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀙𑀤𑁆𑀤𑀦𑁆𑀢𑀤𑀳𑀫𑀦𑁆𑀤𑀸𑀓𑀺𑀦𑀺𑀬𑁄 𑀓𑀼𑀴𑀻𑀭𑀫𑀼𑀘𑀮𑀺𑀦𑁆𑀤𑀦𑀸𑀫𑁂𑀦 𑀯𑀤𑀢𑀺. 𑀕𑀡𑁆𑀞𑀺𑀓𑀸𑀢𑀺 𑀧𑀩𑁆𑀩𑀕𑀡𑁆𑀞𑀺𑀓𑀸. 𑀧𑀡𑁆𑀟𑀺𑀢𑁄𑀧𑀺…𑀧𑁂… 𑀉𑀤𑁆𑀥𑀁 𑀦 𑀕𑀘𑁆𑀙𑀢𑀺, 𑀓𑀲𑁆𑀫𑀸? 𑀲𑀢𑁆𑀢𑀸𑀦𑀁 𑀲𑀁𑀲𑀭𑀡𑀓𑀸𑀮𑀲𑁆𑀲 𑀦𑀺𑀬𑀢𑀪𑀸𑀯𑀢𑁄.

𑀅𑀧𑀭𑀺𑀧𑀓𑁆𑀓𑀁 𑀲𑀁𑀲𑀭𑀡𑀦𑀺𑀫𑀺𑀢𑁆𑀢𑀁 𑀲𑀻𑀮𑀸𑀤𑀺𑀦𑀸 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫 𑀲𑀻𑀖𑀁𑀬𑁂𑀯 𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸. 𑀧𑀭𑀺𑀧𑀓𑁆𑀓𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀧𑀢𑁆𑀯𑀸 𑀧𑀢𑁆𑀯𑀸 𑀧𑀭𑀺𑀧𑀓𑁆𑀓𑀪𑀸𑀯𑀸𑀧𑀸𑀤𑀦𑁂𑀦 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀦𑀸𑀫. 𑀲𑀼𑀢𑁆𑀢𑀕𑀼𑀴𑁂𑀢𑀺 𑀲𑀼𑀢𑁆𑀢𑀯𑀝𑁆𑀝𑀺𑀬𑀁. 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀫𑁂𑀯 𑀧𑀮𑁂𑀢𑀻𑀢𑀺 𑀉𑀧𑀫𑀸𑀬 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑁄 𑀅𑀦𑀼𑀓𑁆𑀓𑀫𑁂𑀦 𑀔𑀻𑀬𑀢𑁂𑀯, 𑀦 𑀢𑀲𑁆𑀲 𑀯𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀢𑁆𑀢𑀸.

𑁨𑁨𑁯. 𑀦𑀺𑀬𑀢𑀺𑀯𑀸𑀤𑁂 𑀧𑀓𑁆𑀔𑀺𑀧𑀦𑁆𑀢𑁄𑀢𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀚𑀸𑀦𑀺𑀢𑁆𑀯𑀸𑀧𑀺 𑀧𑀤𑁂𑀲𑀜𑁆𑀜𑀼𑀢𑀸𑀬 𑀅𑀲𑀫𑁆𑀧𑀸𑀬𑀫𑀸𑀦𑁄 𑀢𑀢𑁆𑀣 𑀅𑀢𑁆𑀢𑀦𑁄 𑀅𑀜𑁆𑀜𑀸𑀡𑀓𑀺𑀭𑀺𑀬𑀁 𑀧𑀭𑀺𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘 ‘‘𑀏𑀯𑀫𑁂𑀲𑀸 𑀦𑀺𑀬𑀢𑀻’’𑀢𑀺 𑀦𑀺𑀬𑀢𑀺𑀯𑀸𑀤𑁂 𑀧𑀓𑁆𑀔𑀺𑀧𑀦𑁆𑀢𑁄.

𑁨𑁩𑁦. 𑀥𑀫𑁆𑀫𑀓𑀣𑀸𑀬 𑀅𑀧𑀲𑁆𑀲𑀬𑀪𑀽𑀢𑁄 𑀅𑀦𑀼𑀲𑁆𑀲𑀯𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀦𑀼𑀲𑁆𑀲𑀯𑀻, 𑀢𑁂𑀦𑁂𑀯𑀲𑁆𑀲 𑀅𑀧𑀲𑁆𑀲𑀬𑀯𑀸𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀲𑁆𑀲𑀯𑀦𑀺𑀲𑁆𑀲𑀺𑀢𑁄’’𑀢𑀺 𑀆𑀳. 𑀲𑀯𑀦𑀁 𑀲𑀘𑁆𑀘𑀢𑁄𑀢𑀺 𑀬𑀁 𑀓𑀺𑀜𑁆𑀘𑀺 𑀅𑀦𑀼𑀲𑁆𑀲𑀯𑀁, 𑀢𑀁 𑀲𑀯𑀦𑀁 𑀲𑀘𑁆𑀘𑀦𑁆𑀢𑀺 𑀕𑀳𑁂𑀢𑁆𑀯𑀸 𑀞𑀺𑀢𑁄. 𑀧𑀺𑀝𑀓𑀲𑀫𑁆𑀧𑀤𑀸𑀬𑀸𑀢𑀺 𑀕𑀦𑁆𑀣𑀲𑀫𑁆𑀧𑀸𑀤𑀦𑁂𑀦, 𑀢𑀸𑀤𑀺𑀲𑀁 𑀕𑀦𑁆𑀣𑀁 𑀧𑀕𑀼𑀡𑀁 𑀯𑀸𑀘𑀼𑀕𑁆𑀕𑀢𑀁 𑀓𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀥𑀫𑁆𑀫𑀁 𑀓𑀣𑁂𑀢𑀺. 𑀢𑁂𑀦𑀸𑀳 ‘‘𑀯𑀕𑁆𑀕𑀧𑀡𑁆𑀡𑀸𑀲𑀓𑀸𑀬𑀸’’𑀢𑀺𑀆𑀤𑀺.

𑁨𑁩𑁨. 𑀫𑀦𑁆𑀤𑀧𑀜𑁆𑀜𑁄𑀢𑀺 𑀧𑀭𑀺𑀢𑁆𑀢𑀧𑀜𑁆𑀜𑁄. 𑀫𑁄𑀫𑀽𑀳𑁄𑀢𑀺 𑀲𑀫𑁆𑀫𑀼𑀬𑁆𑀳𑀓𑁄. ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀯𑀺𑀯𑀺𑀥𑁄 𑀦𑀸𑀦𑀧𑁆𑀧𑀓𑀸𑀭𑁄 𑀔𑁂𑀧𑁄 𑀯𑀸𑀘𑀸𑀬 𑀧𑀭𑀯𑀸𑀤𑀸𑀦𑀁 𑀔𑀻𑀧𑀦𑀁 𑀯𑀸𑀘𑀸𑀯𑀺𑀓𑁆𑀔𑁂𑀧𑁄, 𑀢𑀁 𑀯𑀸𑀘𑀸𑀯𑀺𑀓𑁆𑀔𑁂𑀧𑀁, 𑀦 𑀫𑀭𑀢𑀺 𑀦 𑀧𑀘𑁆𑀙𑀺𑀚𑁆𑀚𑀢𑀺 𑀬𑀣𑀸𑀯𑀼𑀢𑁆𑀢𑁄 𑀯𑀸𑀤𑀯𑀺𑀓𑁆𑀔𑁂𑀧𑁄 𑀏𑀢𑀸𑀬𑀸𑀢𑀺 𑀅𑀫𑀭𑀸, 𑀢𑀢𑁆𑀣 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑁄, 𑀢𑀁 𑀅𑀫𑀭𑀸𑀯𑀺𑀓𑁆𑀔𑁂𑀧𑀁. 𑀅𑀧𑀭𑀺𑀬𑀦𑁆𑀢𑀯𑀺𑀓𑁆𑀔𑁂𑀧𑀦𑁆𑀢𑀺 ‘‘𑀏𑀯𑀫𑁆𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀺𑀢𑀲𑁆𑀲 𑀅𑀧𑀭𑀺𑀬𑁄𑀲𑀸𑀧𑀦𑀯𑀲𑁂𑀦 𑀯𑀺𑀓𑁆𑀔𑁂𑀧𑀁. 𑀇𑀢𑁄 𑀘𑀺𑀢𑁄 𑀘 𑀲𑀦𑁆𑀥𑀸𑀯𑀢𑀺 𑀏𑀓𑀲𑁆𑀫𑀺𑀁 𑀲𑀪𑀸𑀯𑁂 𑀅𑀦𑀯𑀝𑁆𑀞𑀸𑀦𑀢𑁄. 𑀕𑀸𑀳𑀁 𑀦 𑀉𑀧𑀕𑀘𑁆𑀙𑀢𑀻𑀢𑀺 𑀫𑀺𑀘𑁆𑀙𑀸𑀕𑀸𑀳𑀢𑀸𑀬 𑀉𑀢𑁆𑀢𑀭𑀯𑀺𑀥𑀸𑀦𑀸𑀬 𑀧𑀼𑀭𑀺𑀫𑀧𑀓𑁆𑀔𑀁 𑀞𑀧𑁂𑀢𑁆𑀯𑀸 𑀕𑀸𑀳𑀁 𑀦 𑀉𑀧𑀕𑀘𑁆𑀙𑀢𑀺. 𑀅𑀫𑀭𑀸𑀲𑀤𑀺𑀲𑀸𑀬 𑀅𑀫𑀭𑀸𑀬 𑀯𑀺𑀓𑁆𑀔𑁂𑀧𑁄𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑁄.

𑀇𑀤𑀁 𑀓𑀼𑀲𑀮𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀇𑀫𑀺𑀦𑀸 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄 𑀬𑀣𑀸 𑀓𑀼𑀲𑀮𑁂, 𑀏𑀯𑀁 𑀅𑀜𑁆𑀜𑀲𑁆𑀫𑀺𑀁 𑀬𑀁 𑀓𑀺𑀜𑁆𑀘𑀺 𑀓𑁂𑀦𑀘𑀺 𑀧𑀼𑀘𑁆𑀙𑀺𑀢𑀁 𑀅𑀢𑁆𑀣𑀁 𑀅𑀢𑁆𑀢𑀦𑁄 𑀅𑀭𑀼𑀘𑁆𑀘𑀦𑀢𑀸𑀬 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀓𑁆𑀔𑁂𑀧𑀜𑁆𑀜𑁂𑀯 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺 𑀢𑀢𑁆𑀣 𑀢𑀢𑁆𑀣 𑀧𑀼𑀘𑁆𑀙𑀺𑀢𑀸𑀓𑀸𑀭𑀧𑀝𑀺𑀲𑁂𑀥𑀦𑀯𑀲𑁂𑀦 𑀯𑀺𑀓𑁆𑀔𑀺𑀧𑀦𑀸𑀓𑀸𑀭𑀤𑀲𑁆𑀲𑀦𑀁. 𑀦𑀦𑀼 𑀘𑁂𑀢𑁆𑀣 𑀯𑀺𑀓𑁆𑀔𑁂𑀧𑀯𑀸𑀤𑀺𑀦𑁄 𑀯𑀺𑀓𑁆𑀔𑁂𑀧𑀧𑀓𑁆𑀔𑀲𑁆𑀲 𑀅𑀦𑀦𑀼𑀚𑀸𑀦𑀦𑀁 𑀯𑀺𑀓𑁆𑀔𑁂𑀧𑀧𑀓𑁆𑀔𑁂 𑀅𑀯𑀝𑁆𑀞𑀸𑀦𑀁 𑀬𑀼𑀢𑁆𑀢𑀦𑁆𑀢𑀺? 𑀦, 𑀢𑀢𑁆𑀣𑀸𑀧𑀺 𑀢𑀲𑁆𑀲 𑀲𑀫𑁆𑀫𑀽𑀴𑁆𑀳𑀲𑁆𑀲 𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀯𑀺𑀓𑁆𑀔𑁂𑀧𑀯𑀸𑀤𑀲𑁆𑀲 𑀧𑀯𑀢𑁆𑀢𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑁄’’𑀢𑀺. 𑀢𑀣𑀸 𑀳𑀺 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀭𑀜𑁆𑀜𑀸 𑀅𑀚𑀸𑀢𑀲𑀢𑁆𑀢𑀼𑀦𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀧𑀭𑀮𑁄𑀓𑀢𑁆𑀢𑀺𑀓𑀸𑀤𑀻𑀦𑀁 𑀧𑀝𑀺𑀲𑁂𑀥𑀦𑀫𑀼𑀔𑁂𑀦 𑀯𑀺𑀓𑁆𑀔𑁂𑀧𑀁 𑀩𑁆𑀬𑀸𑀓𑀸𑀲𑀺.

𑀏𑀢𑁆𑀣𑀸𑀳 𑁋 ‘‘𑀦𑀦𑀼 𑀘𑀸𑀬𑀁 𑀲𑀩𑁆𑀩𑁄𑀧𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄 𑀓𑀼𑀲𑀮𑀸𑀤𑀬𑁄 𑀥𑀫𑁆𑀫𑁂 𑀧𑀭𑀮𑁄𑀓𑀢𑁆𑀢𑀺𑀓𑀸𑀤𑀻𑀦𑀺 𑀘 𑀬𑀣𑀸𑀪𑀽𑀢𑀁 𑀅𑀦𑀯𑀩𑀼𑀚𑁆𑀛𑀫𑀸𑀦𑁄 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀫𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀓𑀣𑀁 𑀤𑀺𑀝𑁆𑀞𑀺𑀕𑀢𑀪𑀸𑀯𑁄. 𑀦 𑀳𑀺 𑀅𑀯𑀢𑁆𑀢𑀼𑀓𑀸𑀫𑀲𑁆𑀲 𑀯𑀺𑀬 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀅𑀚𑀸𑀦𑀦𑁆𑀢𑀲𑁆𑀲 𑀯𑀺𑀓𑁆𑀔𑁂𑀧𑀓𑀭𑀡𑀫𑀢𑁆𑀢𑁂𑀦 𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀢𑀸 𑀬𑀼𑀢𑁆𑀢𑀸’’𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀳𑁂𑀯 𑀔𑁄 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀫𑀢𑁆𑀢𑁂𑀦 𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀢𑀸, 𑀅𑀣 𑀔𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀲𑁂𑀦. 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑁄𑀬𑁂𑀯 𑀳𑀺 𑀧𑀼𑀕𑁆𑀕𑀮𑁄 𑀫𑀦𑁆𑀤𑀩𑀼𑀤𑁆𑀥𑀺𑀢𑀸𑀬 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀧𑀭𑀮𑁄𑀓𑀢𑁆𑀢𑀺𑀓𑀸𑀤𑀻𑀦𑀺 𑀘 𑀬𑀸𑀣𑀸𑀯𑀢𑁄 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁄 𑀅𑀢𑁆𑀢𑀦𑀸 𑀅𑀯𑀺𑀜𑁆𑀜𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀫𑀼𑀲𑀸𑀯𑀸𑀤𑀪𑀬𑁂𑀦 𑀘 𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀻𑀢𑀺. 𑀅𑀣 𑀯𑀸 𑀧𑀼𑀜𑁆𑀜𑀧𑀸𑀧𑀸𑀦𑀁 𑀢𑀩𑁆𑀩𑀺𑀧𑀸𑀓𑀸𑀦𑀜𑁆𑀘 𑀅𑀦𑀯𑀩𑁄𑀥𑁂𑀦 𑀅𑀲𑀤𑁆𑀤𑀳𑀦𑁂𑀦 𑀘 𑀢𑀩𑁆𑀩𑀺𑀲𑀬𑀸𑀬 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀁𑀬𑁂𑀯 𑀲𑀼𑀦𑁆𑀤𑀭𑀦𑁆𑀢𑀺 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀯𑀺𑀲𑀼𑀁𑀬𑁂𑀯 𑀲𑀸 𑀏𑀓𑀸 𑀤𑀺𑀝𑁆𑀞𑀺 𑀲𑀢𑁆𑀢𑀪𑀗𑁆𑀕𑀤𑀺𑀝𑁆𑀞𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀸, 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀢𑁄 𑀘 𑀢𑀢𑀺𑀬𑀝𑁆𑀞𑀸𑀦𑀪𑀸𑀯𑁂 𑀤𑀲𑁆𑀲𑀺𑀢𑁄.

𑁨𑁩𑁪. 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀓𑀸𑀫𑁂𑀢𑀺 𑀏𑀢𑁆𑀣 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀻𑀢𑀺 𑀢𑀺𑀮𑀢𑀡𑁆𑀟𑀼𑀮𑀸𑀤𑀺𑀕𑁆𑀕𑀳𑀡𑀁, 𑀢𑀲𑁆𑀲 𑀮𑁄𑀓𑀲𑁆𑀲 𑀅𑀧𑁆𑀧𑀲𑀸𑀤𑀧𑀭𑀺𑀳𑀸𑀭𑀢𑁆𑀣𑀁 𑀓𑀤𑀸𑀘𑀺 𑀢𑀡𑁆𑀟𑀼𑀮𑀦𑀸𑀴𑀺𑀆𑀤𑀺𑀲𑀗𑁆𑀕𑀳𑀡𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀺𑀮𑀢𑀡𑁆𑀟𑀼𑀮𑀸𑀤𑀬𑁄 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺.

𑁨𑁩𑁬. 𑀆𑀚𑀻𑀯𑀓𑀸 𑀫𑀢𑀸 𑀦𑀸𑀫𑀸𑀢𑀺 𑀇𑀫𑁂 𑀆𑀚𑀻𑀯𑀓𑀸 𑀲𑀩𑁆𑀩𑀲𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀭𑀳𑀺𑀢𑀸 𑀫𑀺𑀘𑁆𑀙𑀸 𑀏𑀯 𑀘 𑀧𑀝𑀺𑀧𑀚𑁆𑀚𑀫𑀸𑀦𑀸 𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀲𑁆𑀲 𑀲𑀻𑀮𑀚𑀻𑀯𑀺𑀢𑀲𑁆𑀲 𑀅𑀪𑀸𑀯𑁂𑀦 𑀫𑀢𑀸 𑀦𑀸𑀫. 𑀧𑀼𑀢𑁆𑀢𑀫𑀢𑀸𑀢𑀺 𑀫𑀢𑀧𑀼𑀢𑁆𑀢𑀸. 𑀲𑀫𑀡𑁂 𑀕𑁄𑀢𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀅𑀢𑁆𑀣𑀻𑀢𑀺 𑀲𑀫𑀡𑀁 𑀏𑀯 𑀕𑁄𑀢𑀫𑀁 𑀧𑀭𑀺𑀲𑀼𑀤𑁆𑀥𑁄 𑀲𑀼𑀧𑀭𑀺𑀧𑀼𑀡𑁆𑀡𑁄 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀯𑀳𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀅𑀢𑁆𑀣𑀺. 𑀏𑀢𑁂𑀦𑁂𑀢𑁆𑀣 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀤𑀺𑀤𑀻𑀧𑀦𑁂𑀦 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀜𑁆𑀘 𑀤𑀻𑀧𑁂𑀢𑀺, 𑀅𑀜𑁆𑀜𑀢𑁆𑀣 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀩𑀸𑀳𑀺𑀭𑀓𑁂𑀲𑀼 𑀢𑀲𑁆𑀲 𑀅𑀪𑀸𑀯𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀦𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.