𑁪. 𑀤𑀻𑀖𑀦𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁧. 𑀔𑀦𑀦𑀁 𑀔𑀢𑀁, 𑀲𑀽𑀓𑀭𑀲𑁆𑀲 𑀔𑀢𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀲𑀽𑀓𑀭𑀔𑀢𑀸, 𑀲𑀽𑀓𑀭𑀲𑁆𑀲 𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀞𑀫𑀁 𑀔𑀢𑀁 𑀉𑀧𑀸𑀤𑀸𑀬 𑀲𑀽𑀓𑀭𑀔𑀢𑀸, 𑀢𑀸𑀬. 𑀏𑀯𑀁𑀦𑀸𑀫𑀓𑁂𑀢𑀺 𑀏𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑀓𑁂. 𑀧𑀁𑀲𑀼𑀥𑁄𑀢𑁂𑀢𑀺 𑀥𑁄𑀢𑀧𑀁𑀲𑀼𑀓𑁂. 𑀑𑀢𑀭𑀺𑀢𑁆𑀯𑀸 𑀅𑀪𑀺𑀭𑀼𑀳𑀺𑀢𑀩𑁆𑀩𑀦𑁆𑀢𑀺 𑀧𑀓𑀢𑀺𑀪𑀽𑀫𑀺𑀢𑁄 𑀅𑀦𑁂𑀓𑁂𑀳𑀺 𑀲𑁄𑀧𑀸𑀦𑀨𑀮𑀓𑁂𑀳𑀺 𑀑𑀢𑀭𑀺𑀢𑁆𑀯𑀸 𑀧𑀼𑀦 𑀮𑁂𑀡𑀤𑁆𑀯𑀸𑀭𑀁 𑀓𑀢𑀺𑀧𑀬𑁂𑀳𑀺 𑀅𑀪𑀺𑀭𑀼𑀳𑀺𑀢𑀩𑁆𑀩𑀁.

𑀞𑀺𑀢𑀓𑁄𑀯𑀸𑀢𑀺 𑀫𑀸𑀢𑀼𑀮𑀲𑁆𑀲 𑀞𑀺𑀢𑀢𑁆𑀢𑀸 𑀢𑀢𑁆𑀣 𑀲𑀕𑀸𑀭𑀯𑀲𑀧𑀢𑀺𑀲𑁆𑀲𑀯𑀲𑁂𑀦 𑀞𑀺𑀢𑀓𑁄𑀯. 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩-𑀲𑀤𑁆𑀤𑁄 𑀅𑀯𑀺𑀲𑁂𑀲𑀢𑁄 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀬𑀓𑁄, 𑀯𑀢𑁆𑀣𑀼𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑁄𑀥𑀻 𑀧𑀦 𑀲𑀤𑁆𑀤𑀧𑁆𑀧𑀬𑁄𑀕𑁄𑀢𑀺 𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀆𑀳. 𑀬𑀸 𑀮𑁄𑀓𑁂 𑀫𑀦𑀼𑀲𑁆𑀲𑀉𑀧𑀧𑀢𑁆𑀢𑀺𑀬𑁄𑀢𑀺𑀆𑀤𑀺𑀓𑀸 𑀉𑀧𑀧𑀢𑁆𑀢𑀺𑀬𑁄, 𑀢𑀸 𑀅𑀦𑀢𑁆𑀣𑀲𑀫𑀼𑀤𑀸𑀕𑀢𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀲𑀢𑁆𑀢𑀸𑀦𑀁 𑀉𑀘𑁆𑀙𑀺𑀚𑁆𑀚𑀦𑀢𑁄, 𑀢𑀲𑁆𑀫𑀸 𑀲𑀫𑀬𑀯𑀸𑀤𑀻𑀳𑀺 𑀯𑀼𑀘𑁆𑀘𑀫𑀸𑀦𑀸 𑀲𑀩𑁆𑀩𑀸 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀉𑀧𑀧𑀢𑁆𑀢𑀺 𑀦 𑀳𑁄𑀢𑀺. 𑀚𑀮𑀩𑀼𑀩𑁆𑀩𑀼𑀴𑀓𑀸 𑀯𑀺𑀬 𑀳𑀺 𑀇𑀫𑁂 𑀲𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀲𑀫𑀬𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀻𑀢𑀺 𑀅𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀧𑀝𑀺𑀲𑀦𑁆𑀥𑀺𑀬𑁄’’𑀢𑀺𑀆𑀤𑀺. 𑀅𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀆𑀳, 𑀢𑀁 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀚𑀸𑀦𑀦𑁆𑀢𑁄𑀧𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀲𑁆𑀲 𑀅𑀓𑁆𑀔𑀭𑁂 𑀢𑀸𑀯 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀧𑀤𑁂𑀲𑀲𑀩𑁆𑀩𑀁 𑀲𑀦𑁆𑀥𑀸𑀬 𑀢𑁂𑀦 𑀯𑀼𑀢𑁆𑀢𑀁, 𑀲𑀩𑁆𑀩𑀲𑀩𑁆𑀩𑀯𑀺𑀲𑀬𑀁 𑀓𑀢𑁆𑀯𑀸 𑀢𑀢𑁆𑀣 𑀤𑁄𑀲𑀁 𑀕𑀡𑁆𑀳𑀦𑁆𑀢𑁄. 𑀬𑀣𑀸 𑀮𑁄𑀓𑁂 𑀓𑁂𑀦𑀘𑀺 ‘‘𑀲𑀩𑁆𑀩𑀁 𑀯𑀼𑀢𑁆𑀢𑀁, 𑀢𑀁 𑀫𑀼𑀲𑀸’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲 𑀯𑀘𑀦𑀲𑁆𑀲 𑀲𑀩𑁆𑀩𑀦𑁆𑀢𑁄𑀕𑀥𑀢𑁆𑀢𑀸 𑀫𑀼𑀲𑀸𑀪𑀸𑀯𑁄 𑀆𑀧𑀚𑁆𑀚𑁂𑀬𑁆𑀬, 𑀏𑀯𑀁 𑀇𑀫𑀲𑁆𑀲𑀧𑀺 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀯𑀤𑀢𑁄 𑀢𑀣𑀸 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺𑀧𑀺 𑀦𑀓𑁆𑀔𑀫𑀢𑀻𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀏𑀲𑀸𑀧𑀺 𑀢𑁂 𑀤𑀺𑀝𑁆𑀞𑀺 𑀦𑀓𑁆𑀔𑀫𑀢𑀻’’𑀢𑀺. 𑀬𑀣𑀸 𑀧𑀦 𑀓𑁂𑀦𑀘𑀺 ‘‘𑀲𑀩𑁆𑀩𑀁 𑀯𑀼𑀢𑁆𑀢𑀁 𑀫𑀼𑀲𑀸’’𑀢𑀺 𑀯𑀼𑀢𑁆𑀢𑁂 𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑁄𑀥𑀺𑀦𑀻 𑀲𑀤𑁆𑀤𑀧𑁆𑀧𑀯𑀢𑁆𑀢𑀺, 𑀢𑀲𑁆𑀲 𑀯𑀘𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀤𑀜𑁆𑀜𑁂𑀲𑀫𑁂𑀯 𑀫𑀼𑀲𑀸𑀪𑀸𑀯𑁄 𑀜𑀸𑀬𑀸𑀕𑀢𑁄, 𑀏𑀯𑀫𑀺𑀥𑀸𑀧𑀺 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀯𑀘𑀦𑀢𑁄 𑀬𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀢𑁂𑀦 𑀯𑀼𑀢𑁆𑀢𑀁, 𑀢𑀁 𑀤𑀺𑀝𑁆𑀞𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀤𑀜𑁆𑀜𑀫𑁂𑀯 𑀬𑀣𑀸𑀥𑀺𑀧𑁆𑀧𑁂𑀢𑀁 𑀲𑀩𑁆𑀩𑀁 𑀦𑀓𑁆𑀔𑀫𑀢𑀻𑀢𑀺 𑀅𑀬𑀫𑀢𑁆𑀣𑁄 𑀜𑀸𑀬𑀸𑀕𑀢𑁄, 𑀪𑀕𑀯𑀸 𑀧𑀦 𑀯𑀸𑀤𑀻𑀯𑀭𑁄 𑀲𑀼𑀔𑀼𑀫𑀸𑀬 𑀆𑀡𑀺𑀬𑀸 𑀣𑀽𑀮𑀁 𑀆𑀡𑀺𑀁 𑀦𑀻𑀳𑀭𑀦𑁆𑀢𑁄 𑀯𑀺𑀬 𑀉𑀧𑀸𑀬𑁂𑀦 𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀦𑀻𑀳𑀭𑀺𑀢𑀼𑀁 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁂𑀦 𑀅𑀯𑀢𑁆𑀯𑀸 𑀲𑀤𑁆𑀤𑀯𑀲𑁂𑀦 𑀢𑀸𑀯 𑀮𑀩𑁆𑀪𑀫𑀸𑀦𑀁 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀧𑀺 𑀔𑁄 𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀓𑁆𑀔𑀭𑁂 𑀢𑀸𑀯 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺.

𑀧𑀭𑀺𑀩𑁆𑀩𑀸𑀚𑀓𑁄 𑀧𑀦 𑀬𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀫𑀬𑀸 𑀯𑀼𑀢𑁆𑀢𑀁, ‘‘𑀅𑀬𑀁 𑀲𑁄’’𑀢𑀺 𑀬𑀣𑀸𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀭𑀡𑀢𑁆𑀣𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀼𑀘𑁆𑀘𑀫𑀸𑀦𑁂 𑀏𑀲 𑀤𑁄𑀲𑁄 𑀲𑀩𑁆𑀩𑁄 𑀦 𑀳𑁄𑀢𑀺, 𑀏𑀯𑀫𑁆𑀧𑀺 𑀲𑀫𑀡𑁄 𑀕𑁄𑀢𑀫𑁄 𑀫𑀫 𑀯𑀸𑀤𑁂 𑀤𑁄𑀲𑀫𑁂𑀯 𑀆𑀭𑁄𑀧𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀦𑀺𑀕𑀼𑀳𑀺𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀤𑁄𑀲𑀁 𑀧𑀭𑀺𑀳𑀭𑀺𑀢𑀼𑀓𑀸𑀫𑁄 ‘‘𑀏𑀲𑀸 𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀫𑁆𑀧𑀲𑁆𑀲 𑀢𑀸𑀤𑀺𑀲𑀫𑁂𑀯𑀸𑀢𑀺 𑀬𑀁 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀕𑀳𑀺𑀢𑀁 𑀯𑀢𑁆𑀣𑀼, 𑀢𑀫𑁆𑀧𑀺 𑀢𑀸𑀤𑀺𑀲𑀫𑁂𑀯 𑀪𑀯𑁂𑀬𑁆𑀬𑀸𑀢𑀺. 𑀅𑀬𑀜𑁆𑀘 𑀲𑀩𑁆𑀩𑀦𑁆𑀢𑁄𑀕𑀥𑀤𑀺𑀝𑁆𑀞𑀺 𑀫𑀬𑁆𑀳𑀫𑁆𑀧𑀺 𑀤𑀺𑀝𑁆𑀞𑀺𑀯𑀢𑁆𑀣𑀼, 𑀢𑀁 𑀫𑁂 𑀔𑀫𑁂𑀬𑁆𑀬𑀯𑀸𑀢𑀺. 𑀬𑀲𑁆𑀫𑀸 𑀧𑀦 ‘‘𑀏𑀲𑀸𑀧𑀺 𑀤𑀺𑀝𑁆𑀞𑀺 𑀢𑀼𑀬𑁆𑀳𑀁 𑀦𑀓𑁆𑀔𑀫𑀢𑀻’’𑀢𑀺 𑀬𑀸𑀧𑀺 𑀤𑀺𑀝𑁆𑀞𑀺 𑀯𑀼𑀢𑁆𑀢𑀸 𑀪𑀯𑀢𑀸 𑀕𑁄𑀢𑀫𑁂𑀦, 𑀲𑀸𑀧𑀺 𑀫𑀬𑁆𑀳𑀁 𑀦𑀓𑁆𑀔𑀫𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑁂𑀯𑀸𑀢𑀺 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 𑁋 ‘‘𑀢𑀁 𑀧𑀭𑀺𑀳𑀭𑀸𑀫𑀻𑀢𑀺 𑀲𑀜𑁆𑀜𑀸𑀬 𑀯𑀤𑀢𑀻’’𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀢𑀲𑁆𑀫𑀸𑀧𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀫𑀬𑁆𑀳𑀁 𑀦𑀓𑁆𑀔𑀫𑀢𑀻’’𑀢𑀺. ‘‘𑀏𑀲𑀸 𑀫𑁂 𑀤𑀺𑀝𑁆𑀞𑀻’’𑀢𑀺 𑀬𑀸 𑀞𑀺𑀢𑀺𑀪𑀽𑀢𑀸 𑀤𑀺𑀝𑁆𑀞𑀺, 𑀢𑀸𑀬 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀧𑀦𑁂𑀢𑁆𑀣 𑀲𑀩𑁆𑀩𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸 𑀆𑀳 𑁋 ‘‘𑀅𑀢𑁆𑀣𑀢𑁄 𑀧𑀦𑀲𑁆𑀲 𑀏𑀲𑀸 𑀤𑀺𑀝𑁆𑀞𑀺 𑀦 𑀫𑁂 𑀔𑀫𑀢𑀻𑀢𑀺 𑀆𑀧𑀚𑁆𑀚𑀢𑀻’’𑀢𑀺. 𑀅𑀬𑀁 𑀤𑁄𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀏𑀲𑀸𑀢𑀺 𑀤𑀺𑀝𑁆𑀞𑀺. 𑀭𑀼𑀘𑀺𑀢𑀦𑁆𑀢𑀺 𑀤𑀺𑀝𑁆𑀞𑀺𑀤𑀲𑁆𑀲𑀦𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀭𑁄𑀘𑁂𑀢𑁆𑀯𑀸 𑀕𑀳𑀺𑀢𑀁. 𑀢𑁂𑀦 𑀳𑀺 𑀤𑀺𑀝𑁆𑀞𑀺𑀅𑀓𑁆𑀔𑀫𑁂𑀦 𑀅𑀭𑀼𑀘𑀺𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀢𑀺 𑀤𑀺𑀝𑁆𑀞𑀺𑀬𑀸 𑀅𑀓𑁆𑀔𑀫𑀪𑀸𑀯𑁂 𑀢𑀢𑁄 𑀢𑀸𑀬 𑀕𑀳𑀺𑀢𑀸𑀬 𑀔𑀫𑁂𑀬𑁆𑀬 𑀭𑀼𑀘𑁆𑀘𑁂𑀬𑁆𑀬 𑀬𑀣𑀸, 𑀏𑀯𑀁 𑀲𑀩𑁆𑀩𑀲𑁆𑀲 𑀅𑀓𑁆𑀔𑀫𑀪𑀸𑀯𑁂𑀢𑀺 𑀅𑀧𑀭𑀪𑀸𑀕𑁂 𑀲𑀩𑁆𑀩𑀁 𑀔𑀫𑀢𑀺 𑀭𑀼𑀘𑁆𑀘𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀦 𑀧𑀦𑁂𑀲 𑀢𑀁 𑀲𑀫𑁆𑀧𑀝𑀺𑀘𑁆𑀙𑀢𑀻𑀢𑀺 𑀏𑀲 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀏𑀯𑀁 𑀯𑀤𑀦𑁆𑀢𑁄 𑀉𑀘𑁆𑀙𑁂𑀤𑀯𑀸𑀤𑀻 𑀢𑀁 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑀲𑁆𑀲 𑀔𑀫𑀦𑀁 𑀭𑀼𑀘𑁆𑀘𑀦𑀁 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀜𑀸𑀬𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀓𑀣𑀁 𑀦 𑀲𑀫𑁆𑀧𑀝𑀺𑀘𑁆𑀙𑀢𑀻𑀢𑀺 𑀆𑀳 ‘‘𑀓𑁂𑀯𑀮𑀁 𑀢𑀲𑁆𑀲𑀸𑀧𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀉𑀘𑁆𑀙𑁂𑀤𑀫𑁂𑀯 𑀕𑀡𑁆𑀳𑀸𑀢𑀻’’𑀢𑀺. 𑀲𑀩𑁆𑀩𑁂𑀲𑀜𑁆𑀳𑀺 𑀥𑀫𑁆𑀫𑀸𑀦𑀁 𑀆𑀬𑀢𑀺𑀁 𑀉𑀧𑁆𑀧𑀸𑀤𑀁 𑀅𑀭𑀼𑀘𑁆𑀘𑀺𑀢𑁆𑀯𑀸 𑀢𑀁 𑀲𑀦𑁆𑀥𑀸𑀬 𑀅𑀬𑀁 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀯𑀤𑀢𑀺, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀓𑁂𑀲𑀼 𑀘 𑀉𑀘𑁆𑀙𑀺𑀦𑁆𑀦𑁂𑀲𑀼 𑀓𑀼𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀪𑀸𑀯𑁄𑀢𑀺.

𑀢𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦, 𑀬𑀲𑁆𑀫𑀸 𑀇𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀈𑀤𑀺𑀲𑀁 𑀤𑀺𑀝𑁆𑀞𑀺𑀁 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀦𑁆𑀢𑀺, 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀚𑀳𑀦𑀓𑁂𑀦 𑀯𑀸 𑀘𑀺𑀢𑁆𑀢𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀧𑀚𑀳𑀦𑀓𑁂𑀳𑀺 𑀅𑀧𑁆𑀧𑀚𑀳𑀦𑀓𑁂 𑀦𑀺𑀤𑁆𑀥𑀸𑀭𑁂𑀢𑀼𑀁 𑀪𑀕𑀯𑀸 ‘‘𑀅𑀢𑁄…𑀧𑁂… 𑀩𑀳𑀼𑀢𑀭𑀸’’𑀢𑀺 𑀅𑀯𑁄𑀘𑀸𑀢𑀺 𑀆𑀳 𑁋 ‘‘𑀧𑀚𑀳𑀦𑀓𑁂𑀲𑀼 𑀦𑀺𑀲𑁆𑀲𑀓𑁆𑀓’’𑀦𑁆𑀢𑀺 𑀬𑀣𑀸 ‘‘𑀧𑀜𑁆𑀘𑀲𑀻𑀮𑁂𑀳𑀺 𑀧𑀪𑀸𑀯𑀦𑀸 𑀧𑀜𑁆𑀜𑀯𑀦𑁆𑀢𑀢𑀭𑀸’’𑀢𑀺. ‘‘𑀩𑀳𑀽’’𑀢𑀺 𑀯𑀢𑁆𑀯𑀸 𑀦 𑀓𑁂𑀯𑀮𑀁 𑀩𑀳𑀽, 𑀅𑀣 𑀔𑁄 𑀅𑀢𑀺𑀯𑀺𑀬 𑀩𑀳𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀳𑀼𑀢𑀭𑀸’’𑀢𑀺 𑀆𑀳. ‘‘𑀩𑀳𑀽 𑀳𑀻’’𑀢𑀺 𑀦𑀬𑀺𑀤𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀅𑀣 𑀔𑁄 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀓𑀣𑀁 𑀳𑀺-𑀲𑀤𑁆𑀤𑁄𑀢𑀺 𑀆𑀳 ‘‘𑀳𑀺-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢’’𑀦𑁆𑀢𑀺. 𑀅𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀢𑀸𑀯 𑀢𑀲𑁆𑀲 𑀧𑀚𑀳𑀦𑀓𑀸𑀦𑀁 𑀩𑀳𑀼𑀪𑀸𑀯𑀢𑁄 𑀢𑁂𑀧𑀺 𑀧𑀭𑀢𑁄 ‘‘𑀩𑀳𑀼𑀢𑀭𑀸’’𑀢𑀺 𑀯𑀼𑀘𑁆𑀘𑀻𑀬𑀦𑁆𑀢𑀺. 𑀫𑀽𑀮𑀤𑀲𑁆𑀲𑀦𑀦𑁆𑀢𑀺 𑀬𑁂 𑀢𑀸𑀤𑀺𑀲𑀁 𑀤𑀲𑁆𑀲𑀦𑀁 𑀧𑀞𑀫𑀁 𑀉𑀧𑀸𑀤𑀺𑀬𑀦𑁆𑀢𑀺, 𑀢𑀚𑁆𑀚𑀸𑀢𑀺𑀓𑀫𑁂𑀯 𑀧𑀘𑁆𑀙𑀸 𑀕𑀳𑀺𑀢𑀤𑀲𑁆𑀲𑀦𑀁. 𑀯𑀺𑀚𑀸𑀢𑀺𑀬𑀜𑁆𑀳𑀺 𑀧𑀞𑀫𑀁 𑀕𑀳𑀺𑀢𑀤𑀲𑁆𑀲𑀦𑀁 𑀅𑀧𑁆𑀧𑀳𑀸𑀬 𑀯𑀺𑀚𑀸𑀢𑀺𑀬𑀲𑁆𑀲 𑀕𑀳𑀡𑀁 𑀦 𑀲𑀫𑁆𑀪𑀯𑀢𑀺 𑀯𑀺𑀭𑀼𑀤𑁆𑀥𑀲𑁆𑀲 𑀅𑀪𑀺𑀦𑀺𑀯𑁂𑀲𑀲𑁆𑀲 𑀲𑀳 𑀅𑀦𑀯𑀝𑁆𑀞𑀸𑀦𑀢𑁄. 𑀅𑀯𑀺𑀭𑀼𑀤𑁆𑀥𑀁 𑀧𑀦 𑀫𑀽𑀮𑀤𑀲𑁆𑀲𑀦𑀁 𑀅𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀯𑀺𑀲𑀬𑀸𑀤𑀺𑀪𑁂𑀤𑀪𑀺𑀦𑁆𑀦𑀁 𑀅𑀧𑀭𑀤𑀲𑁆𑀲𑀦𑀁 𑀕𑀳𑁂𑀢𑀼𑀁 𑀮𑀩𑁆𑀪𑀢𑀺. 𑀢𑁂𑀦𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀸𑀦𑀁 𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑁆𑀕𑀸𑀳𑀦𑀚𑀸𑀢𑀺𑀓𑁄, 𑀉𑀘𑁆𑀙𑁂𑀤𑀕𑁆𑀕𑀸𑀳𑁂𑀦 𑀧𑀦 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀢𑀁𑀕𑀸𑀳𑁂𑀦 𑀘 𑀅𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀯𑀺𑀭𑀼𑀚𑁆𑀛𑀦𑀢𑁄 𑀉𑀪𑀬𑀢𑁆𑀣𑀧𑀺 ‘‘𑀏𑀓𑀘𑁆𑀘𑀲𑀲𑁆𑀲𑀢𑀁 𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 ‘‘𑀲𑀲𑁆𑀲𑀢𑀁 𑀯𑀸 𑀉𑀘𑁆𑀙𑁂𑀤𑀁 𑀯𑀸 𑀦 𑀲𑀓𑁆𑀓𑀸 𑀕𑀳𑁂𑀢𑀼’’𑀦𑁆𑀢𑀺 𑀘. 𑀫𑀽𑀮𑀲𑀲𑁆𑀲𑀢𑀜𑁆𑀳𑀺 𑀧𑀞𑀫𑀁 𑀕𑀳𑀺𑀢𑀁. 𑀆𑀬𑀢𑀦𑁂𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀧𑀞𑀫𑀁 𑀘𑀓𑁆𑀔𑀸𑀬𑀢𑀦𑀁 𑀲𑀲𑁆𑀲𑀢𑀦𑁆𑀢𑀺 𑀕𑀳𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀦 𑀓𑁂𑀯𑀮𑀁 𑀘𑀓𑁆𑀔𑀸𑀬𑀢𑀦𑀫𑁂𑀯 𑀲𑀲𑁆𑀲𑀢𑀁, 𑀲𑁄𑀢𑀸𑀬𑀢𑀦𑀫𑁆𑀧𑀺 𑀲𑀲𑁆𑀲𑀢𑀁, 𑀖𑀸𑀦𑀸𑀬𑀢𑀦𑀸𑀤𑀺𑀧𑀺 𑀲𑀲𑁆𑀲𑀢𑀦𑁆𑀢𑀺 𑀕𑀡𑁆𑀳𑀸𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀆𑀬𑀢𑀦𑁂𑀲𑀼𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀥𑀸𑀢𑀽𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀫𑁆𑀧𑀺 𑀕𑀸𑀳𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀁 𑀲𑀦𑁆𑀥𑀸𑀬𑀸𑀢𑀺 ‘‘𑀫𑀽𑀮𑁂 𑀲𑀲𑁆𑀲𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀞𑀫𑀕𑁆𑀕𑀸𑀳𑀲𑁆𑀲 𑀲𑀫𑀸𑀦𑀚𑀸𑀢𑀺𑀬𑀁 𑀅𑀧𑀭𑀕𑁆𑀕𑀸𑀳𑀁 𑀲𑀦𑁆𑀥𑀸𑀬.

𑀤𑀼𑀢𑀺𑀬𑀯𑀸𑀭𑁂 𑀧𑀞𑀫𑀯𑀸𑀭𑁂 𑀯𑀼𑀢𑁆𑀢𑀲𑀤𑀺𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸𑀢𑀺 ‘‘𑀬𑀤𑀺 𑀭𑀽𑀧𑀁 𑀲𑀲𑁆𑀲𑀢𑀁 𑀲𑀺𑀬𑀸, 𑀦𑀬𑀺𑀤𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄 𑀇𑀤𑀁 𑀭𑀽𑀧𑀁 𑀅𑀲𑀲𑁆𑀲𑀢𑀁, 𑀢𑀲𑁆𑀫𑀸 𑀅𑀪𑀺𑀡𑁆𑀳𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀉𑀤𑀬𑀯𑀬𑀯𑀦𑁆𑀢𑀢𑀸𑀬 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁, 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑁄 𑀫𑀺𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀲𑀲𑁆𑀲𑀢𑀯𑀸𑀤𑁂 𑀆𑀤𑀻𑀦𑀯𑀁 𑀤𑁄𑀲𑀁 𑀤𑀺𑀲𑁆𑀯𑀸. 𑀑𑀴𑀸𑀭𑀺𑀓𑀦𑁆𑀢𑀺 𑀢𑀲𑁆𑀫𑀸 𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀅𑀬𑀸𑀣𑀸𑀯𑀕𑁆𑀕𑀸𑀳𑀢𑀸𑀬 𑀭𑀽𑀧𑀁 𑀦 𑀲𑀡𑁆𑀳𑀁 𑀑𑀴𑀸𑀭𑀺𑀓𑀫𑁂𑀯. 𑀯𑁂𑀤𑀦𑀸𑀤𑀻𑀦𑀫𑁆𑀧𑀺 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑀤𑀲𑁆𑀲𑀦𑀁 𑀭𑀽𑀧𑀯𑁂𑀤𑀦𑀸𑀆𑀤𑀻𑀦𑀁 𑀲𑀫𑀸𑀦𑀬𑁄𑀕𑀓𑁆𑀔𑀫𑀢𑁆𑀢𑀸. 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀧𑀚𑀳𑀢𑀺.

𑀢𑀺𑀲𑁆𑀲𑁄 𑀮𑀤𑁆𑀥𑀺𑀬𑁄𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀏𑀓𑀘𑁆𑀘𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄. 𑀬𑀲𑁆𑀫𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀓𑀸 𑀯𑀝𑁆𑀝𑁂 𑀭𑀚𑁆𑀚𑀦𑀲𑁆𑀲 𑀆𑀲𑀦𑁆𑀦𑀸. 𑀢𑀣𑀸 𑀳𑀺 𑀢𑁂 𑀑𑀮𑀻𑀬𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀪𑀯𑀸𑀪𑀯𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑀢𑁄 𑀲𑀻𑀲𑀼𑀓𑁆𑀔𑀺𑀧𑀦𑀁 𑀦𑀢𑁆𑀣𑀻𑀢𑀺 𑀏𑀢𑀸𑀯 𑀢𑀺𑀲𑁆𑀲𑁄 𑀯𑀺𑀲𑁂𑀲𑀢𑁄 𑀕𑀳𑁂𑀢𑀩𑁆𑀩𑀸.

𑀇𑀥𑀮𑁄𑀓𑀁 𑀧𑀭𑀮𑁄𑀓𑀜𑁆𑀘 𑀅𑀢𑁆𑀣𑀻𑀢𑀺 𑀚𑀸𑀦𑀸𑀢𑀻𑀢𑀺 𑀏𑀢𑁆𑀢𑀸𑀯𑀢𑀸 𑀲𑀲𑁆𑀲𑀢𑀤𑀲𑁆𑀲𑀦𑀲𑁆𑀲 𑀅𑀧𑁆𑀧𑀲𑀸𑀯𑀚𑁆𑀚𑀢𑀸𑀓𑀸𑀭𑀡𑀫𑀸𑀳, 𑀯𑀝𑁆𑀝𑀁 𑀅𑀲𑁆𑀲𑀸𑀤𑁂𑀢𑀺, 𑀅𑀪𑀺𑀦𑀦𑁆𑀤𑀢𑀻𑀢𑀺 𑀇𑀫𑀺𑀦𑀸 𑀤𑀦𑁆𑀥𑀯𑀺𑀭𑀸𑀕𑀢𑀸𑀬. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀇𑀥𑀮𑁄𑀓𑀁 𑀧𑀭𑀮𑁄𑀓𑀜𑁆𑀘 𑀅𑀢𑁆𑀣𑀻𑀢𑀺 𑀚𑀸𑀦𑀸𑀢𑀻𑀢𑀺 𑀇𑀫𑀺𑀦𑀸 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀲𑀢𑁆𑀢𑀸𑀦𑀁 𑀲𑀁𑀲𑀭𑀡𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀅𑀢𑁆𑀣𑀻𑀢𑀺 𑀚𑀸𑀦𑀸𑀢𑀻𑀢𑀺 𑀇𑀫𑀺𑀦𑀸 𑀓𑀫𑁆𑀫𑀨𑀮𑀁. 𑀓𑀼𑀲𑀮𑀁 𑀦 𑀓𑀭𑁄𑀢𑀻𑀢𑀺 𑀇𑀫𑀺𑀦𑀸 𑀓𑀫𑁆𑀫𑀁, 𑀅𑀓𑀼𑀲𑀮𑀁 𑀓𑀭𑁄𑀦𑁆𑀢𑁄 𑀦 𑀪𑀸𑀬𑀢𑀻𑀢𑀺 𑀇𑀫𑀺𑀦𑀸 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀲𑀪𑀸𑀯𑀢𑁄 𑀚𑀸𑀬𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀝𑁆𑀝𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺 𑀢𑀦𑁆𑀦𑀺𑀦𑁆𑀦𑀪𑀸𑀯𑀢𑁄. 𑀲𑀻𑀖𑀁 𑀮𑀤𑁆𑀥𑀺𑀁 𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀯𑀝𑁆𑀝𑀼𑀧𑀘𑁆𑀙𑁂𑀤𑀲𑁆𑀲 𑀅𑀭𑀼𑀘𑁆𑀘𑀦𑀢𑁄. 𑀉𑀘𑁆𑀙𑁂𑀤𑀯𑀸𑀤𑀻 𑀳𑀺 𑀢𑀲𑁆𑀫𑀺𑀁 𑀪𑀯𑁂 𑀉𑀘𑁆𑀙𑁂𑀤𑀁 𑀫𑀜𑁆𑀜𑀢𑀺. 𑀢𑀢𑁄 𑀧𑀭𑀁 𑀇𑀥𑀮𑁄𑀓𑀁 𑀧𑀭𑀮𑁄𑀓𑀜𑁆𑀘 𑀅𑀢𑁆𑀣𑀻𑀢𑀺 𑀚𑀸𑀦𑀸𑀢𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀨𑀮𑀁 𑀅𑀢𑁆𑀣𑀻𑀢𑀺 𑀚𑀸𑀦𑀸𑀢𑀺 𑀓𑀫𑁆𑀫𑀨𑀮𑀯𑀸𑀤𑀻𑀪𑀸𑀯𑀢𑁄. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀉𑀘𑁆𑀙𑁂𑀤𑀯𑀸𑀤𑀻 𑀲𑀪𑀸𑀯𑀦𑀺𑀬𑀢𑀺𑀬𑀤𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂𑀲𑀼 𑀅𑀜𑁆𑀜𑀢𑁆𑀭𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺. 𑀲𑀻𑀖𑀁 𑀤𑀲𑁆𑀲𑀦𑀁 𑀧𑀚𑀳𑀢𑀺 𑀯𑀝𑁆𑀝𑀸𑀪𑀺𑀭𑀢𑀺𑀬𑀸 𑀅𑀪𑀸𑀯𑀢𑁄. 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸, 𑀮𑁄𑀓𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯 𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀬𑁄𑀚𑀦𑀸. 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀩𑀼𑀤𑁆𑀥𑁄 𑀳𑁄𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄. 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀅𑀕𑁆𑀕𑀲𑀸𑀯𑀓𑀸𑀤𑀺𑀪𑀸𑀯𑀲𑁆𑀲 𑀅𑀪𑀺𑀦𑀻𑀳𑀸𑀭𑀁 𑀲𑀫𑁆𑀧𑀸𑀤𑁂𑀢𑁆𑀯𑀸. 𑀲𑀸𑀯𑀓𑁄 𑀳𑀼𑀢𑁆𑀯𑀸𑀢𑀺 𑀅𑀕𑁆𑀕𑀲𑀸𑀯𑀓𑁄 𑀫𑀳𑀸𑀲𑀸𑀯𑀓𑁄 𑀳𑀼𑀢𑁆𑀯𑀸, 𑀢𑀢𑁆𑀣𑀸𑀧𑀺 𑀢𑁂𑀯𑀺𑀚𑁆𑀚𑁄 𑀙𑀴𑀪𑀺𑀜𑁆𑀜𑁄 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀯𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀏𑀯 𑀯𑀸 𑀩𑀼𑀤𑁆𑀥𑀲𑀸𑀯𑀓𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀲𑀩𑁆𑀩𑀫𑀺𑀤𑀁 𑀉𑀘𑁆𑀙𑁂𑀤𑀯𑀸𑀤𑀺𑀦𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀦𑀺𑀲𑁆𑀲𑀬𑁂𑀦 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑁂 𑀔𑀺𑀧𑁆𑀧𑀯𑀺𑀭𑀸𑀕𑀢𑀸𑀤𑀲𑁆𑀲𑀦𑀢𑁆𑀣𑀁 𑀆𑀕𑀢𑀁. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑁨𑁦𑁨. 𑀓𑀜𑁆𑀚𑀺𑀬𑁂𑀦𑁂𑀯𑀸𑀢𑀺 𑀆𑀭𑀦𑀸𑀴𑁂𑀦. 𑀓𑀜𑁆𑀚𑀺𑀬𑀲𑀤𑀺𑀲𑁂𑀦 𑀉𑀘𑁆𑀙𑁂𑀤𑀤𑀲𑁆𑀲𑀦𑁂𑀦. 𑀧𑀽𑀭𑀺𑀢𑁄𑀢𑀺 𑀧𑀭𑀺𑀧𑀼𑀡𑁆𑀡𑀚𑁆𑀛𑀸𑀲𑀬𑁄. 𑀲𑁄𑀢𑀺 𑀧𑀭𑀺𑀩𑁆𑀩𑀸𑀚𑀓𑁄. 𑀅𑀧𑁆𑀧𑀳𑀸𑀬𑀸𑀢𑀺 𑀅𑀪𑀺𑀦𑁆𑀤𑀺𑀢𑁆𑀯𑀸. 𑀯𑀺𑀕𑁆𑀕𑀳𑁄𑀢𑀺 𑀓𑀮𑀳𑁄 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀕𑁆𑀕𑀸𑀳𑁄𑀢𑀺 𑀓𑀢𑁆𑀯𑀸. 𑀯𑀺𑀯𑀸𑀤𑀦𑁆𑀢𑀺 𑀯𑀺𑀭𑀼𑀤𑁆𑀥𑀯𑀸𑀤𑀁. 𑀯𑀺𑀖𑀸𑀢𑀦𑁆𑀢𑀺 𑀯𑀺𑀭𑁄𑀥𑀳𑁂𑀢𑀼𑀓𑀁 𑀘𑀺𑀢𑁆𑀢𑀯𑀺𑀖𑀸𑀢𑀁. 𑀯𑀺𑀳𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑀯𑀺𑀯𑀸𑀤𑀦𑀺𑀫𑀺𑀢𑁆𑀢𑀁 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀓𑀺𑀮𑀫𑀣𑀁. 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸𑀢𑀺 𑀏𑀢𑀸𑀲𑀁 𑀤𑀺𑀝𑁆𑀞𑀻𑀦𑀁 𑀏𑀯𑀭𑀽𑀧𑁄 𑀆𑀤𑀻𑀦𑀯𑁄, 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀢𑀸𑀬 𑀧𑀦 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀫𑀳𑀸𑀤𑀻𑀦𑀯𑁄𑀢𑀺 𑀏𑀯𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸.

𑁨𑁦𑁫. ‘‘𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁪𑁧; 𑀲𑀁. 𑀦𑀺. 𑁩.𑁮) 𑀓𑀸𑀬𑀁 𑀅𑀦𑁆𑀯𑁂𑀢𑀻𑀢𑀺 𑀓𑀸𑀬𑀦𑁆𑀯𑀬𑁄, 𑀲𑁄𑀬𑁂𑀯, 𑀢𑀲𑁆𑀲 𑀯𑀸 𑀲𑀫𑀽𑀳𑁄 𑀓𑀸𑀬𑀦𑁆𑀯𑀬𑀢𑀸, 𑀓𑀸𑀬𑀧𑀝𑀺𑀩𑀤𑁆𑀥𑁄 𑀓𑀺𑀮𑁂𑀲𑁄. 𑀢𑁂𑀦𑀸𑀳 ‘‘𑀓𑀸𑀬𑀁…𑀧𑁂… 𑀅𑀢𑁆𑀣𑁄’’𑀢𑀺.

𑀅𑀲𑀫𑁆𑀫𑀺𑀲𑁆𑀲𑀪𑀸𑀯𑀦𑁆𑀢𑀺 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀺𑀢𑀪𑀸𑀯𑀁. 𑀢𑁂𑀦 𑀢𑀸𑀲𑀁 𑀬𑀣𑀸𑀲𑀓𑀁 𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀕𑀫𑀁 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀳𑀺 𑀢𑀸𑀲𑀁 𑀓𑀤𑀸𑀘𑀺𑀧𑀺 𑀲𑀗𑁆𑀓𑀭𑁄 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄’’𑀢𑀺𑀆𑀤𑀺. 𑀲𑀭𑀽𑀧𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀅𑀜𑁆𑀜𑀸 𑀯𑁂𑀤𑀦𑀸’’𑀢𑀺 𑀅𑀦𑀺𑀬𑀫𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀫𑁂𑀯 𑀯𑀺𑀕𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀼𑀧𑁆𑀧𑀦𑁆𑀦𑀸𑀯 𑀳𑁄𑀦𑁆𑀢𑀺 𑀅𑀦𑁆𑀢𑀭𑀳𑀺𑀢𑀸 𑀯𑀸’’𑀢𑀺 𑀆𑀳. 𑀲𑀭𑀽𑀧𑀢𑁄 𑀦𑀺𑀬𑀫𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂 𑀓𑀸𑀘𑀺 𑀅𑀦𑀼𑀧𑁆𑀧𑀦𑁆𑀦𑀸 𑀯𑀸 𑀳𑁄𑀢𑀺, 𑀓𑀸𑀘𑀺 𑀅𑀦𑁆𑀢𑀭𑀳𑀺𑀢𑀸 𑀯𑀸𑀢𑀺. 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀫𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑀦 𑀓𑁂𑀦𑀘𑀺 𑀲𑀁𑀯𑀤𑀢𑀻𑀢𑀺 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀤𑀺𑀝𑁆𑀞𑀺𑀭𑀸𑀕𑀯𑀲𑁂𑀦 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀦 𑀯𑀤𑀢𑀺. 𑀢𑁂𑀦𑀸𑀳 ‘‘𑀲𑀲𑁆𑀲𑀢𑀁 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺. 𑀦 𑀯𑀺𑀯𑀤𑀢𑀻𑀢𑀺 𑀯𑀺𑀭𑀼𑀤𑁆𑀥𑀪𑀸𑀯𑁄 𑀳𑀼𑀢𑁆𑀯𑀸 𑀦 𑀯𑀺𑀯𑀤𑀢𑀺. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀉𑀘𑁆𑀙𑁂𑀤𑀁 𑀕𑀳𑁂𑀢𑁆𑀯𑀸 𑀏𑀓𑀘𑁆𑀘𑀲𑀲𑁆𑀲𑀢𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀢𑀬𑁄𑀧𑀺 𑀯𑀸𑀤𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸. 𑀢𑁂𑀦 𑀯𑁄𑀳𑀭𑀢𑀻𑀢𑀺 𑀢𑁂𑀦 𑀮𑁄𑀓𑀯𑁄𑀳𑀸𑀭𑁂𑀦 𑀮𑁄𑀓𑀲𑀫𑀜𑁆𑀜𑀁 𑀅𑀦𑀢𑀺𑀥𑀸𑀯𑀦𑁆𑀢𑁄 𑀲𑀢𑁆𑀢𑁄 𑀧𑀼𑀭𑀺𑀲𑁄 𑀧𑀼𑀕𑁆𑀕𑀮𑁄𑀢𑀺𑀆𑀤𑀺𑀦𑀸 𑀯𑁄𑀳𑀭𑀢𑀺, 𑀦 𑀧𑀦 𑀇𑀢𑁄 𑀩𑀸𑀳𑀺𑀭𑀓𑀸 𑀯𑀺𑀬 𑀅𑀪𑀺𑀦𑀺𑀯𑀺𑀲𑀢𑀺. 𑀢𑁂𑀦𑀸𑀳 ‘‘𑀅𑀧𑀭𑀸𑀫𑀲𑀦𑁆𑀢𑁄’’𑀢𑀺. 𑀓𑀜𑁆𑀘𑀺 𑀥𑀫𑁆𑀫𑀦𑁆𑀢𑀺 𑀭𑀽𑀧𑀸𑀤𑀻𑀲𑀼 𑀏𑀓𑀁 𑀥𑀫𑁆𑀫𑀫𑁆𑀧𑀺. 𑀧𑀭𑀸𑀫𑀸𑀲𑀕𑁆𑀕𑀸𑀳𑁂𑀦 𑀅𑀕𑁆𑀕𑀡𑁆𑀳𑀦𑁆𑀢𑁄𑀢𑀺 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸, ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀘 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑁄 𑀆𑀫𑀲𑀺𑀢𑁆𑀯𑀸 𑀕𑀳𑀡𑁂𑀦 𑀅𑀕𑁆𑀕𑀡𑁆𑀳𑀦𑁆𑀢𑁄.

𑀓𑀢𑀸𑀯𑀻𑀢𑀺 𑀓𑀢𑀓𑀺𑀘𑁆𑀘𑁄. 𑀲𑁄 𑀯𑀤𑁂𑀬𑁆𑀬𑀸𑀢𑀺 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑁂𑀲𑀼 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑁂𑀲𑀼𑀧𑀺 𑀅𑀳𑀁 𑀯𑀤𑀸𑀫𑀻𑀢𑀺 𑀯𑀤𑁂𑀬𑁆𑀬. 𑀢𑀢𑁆𑀣 𑀅𑀳𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂. 𑀫𑀫𑀦𑁆𑀢𑀺 𑀢𑀲𑁆𑀲 𑀲𑀦𑁆𑀢𑀓𑀪𑀽𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀮𑁄𑀓𑀦𑀺𑀭𑀼𑀴𑁆𑀳𑁂. 𑀲𑀫𑀜𑁆𑀜𑀦𑁆𑀢𑀺 𑀢𑀢𑁆𑀣 𑀲𑀼𑀓𑀼𑀲𑀮𑀢𑀸𑀬 𑀮𑁄𑀓𑁂 𑀲𑀫𑀜𑁆𑀜𑀸 𑀓𑀼𑀲𑀮𑁄 𑀯𑀺𑀤𑀺𑀢𑁆𑀯𑀸. 𑀯𑁄𑀳𑀸𑀭𑀫𑀢𑁆𑀢𑁂𑀦𑀸𑀢𑀺 𑀓𑁂𑀯𑀮𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀫𑀳𑀸𑀩𑁄𑀥𑀺𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀸𑀯𑀓𑁄 𑀳𑀼𑀢𑁆𑀯𑀸 𑀤𑁂𑀲𑀯𑁄𑀳𑀸𑀭𑀫𑀢𑁆𑀢𑁂𑀦 𑀦 𑀅𑀧𑁆𑀧𑀳𑀻𑀦𑀢𑀡𑁆𑀳𑁄 𑀯𑀺𑀬 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀅𑀪𑀺𑀦𑀺𑀯𑁂𑀲𑀦𑀯𑀲𑁂𑀦.

𑁨𑁦𑁬. 𑀲𑀲𑁆𑀲𑀢𑀸𑀤𑀻𑀲𑀽𑀢𑀺 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀸𑀤𑀻𑀲𑀼. 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀲𑀲𑁆𑀲𑀢𑀁 𑀅𑀪𑀺𑀜𑁆𑀜𑀸𑀬𑀸𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀅𑀲𑁆𑀲𑀸𑀤𑀢𑁄 𑀦𑀺𑀲𑁆𑀲𑀭𑀡𑀢𑁄 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀧𑀳𑀸𑀦𑀦𑁆𑀢𑀺 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀁. 𑀭𑀽𑀧𑀲𑁆𑀲 𑀧𑀳𑀸𑀦𑀦𑁆𑀢𑀺 𑀭𑀽𑀧𑀲𑁆𑀲 𑀢𑀧𑁆𑀧𑀝𑀺𑀩𑀤𑁆𑀥𑀲𑀜𑁆𑀜𑁄𑀚𑀦𑀧𑁆𑀧𑀳𑀸𑀦𑁂𑀦 𑀧𑀳𑀸𑀦𑀁. 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀤𑁆𑀥𑁂𑀳𑀺 𑀆𑀲𑀯𑁂𑀳𑀺 𑀅𑀕𑁆𑀕𑀳𑁂𑀢𑁆𑀯𑀸𑀯 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. ‘‘𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀻’’𑀢𑀺 𑀏𑀢𑁆𑀣 𑀓𑀺𑀜𑁆𑀘𑀺𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀅𑀲𑁂𑀲𑁂𑀢𑁆𑀯𑀸. 𑀲𑁄𑀴𑀲 𑀧𑀜𑁆𑀜𑀸𑀢𑀺 𑀫𑀳𑀸𑀧𑀜𑁆𑀜𑀸𑀤𑀺𑀓𑀸 𑀲𑁄𑀴𑀲 𑀧𑀜𑁆𑀜𑀸. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀼𑀡𑁆𑀡𑀉𑀧𑁄𑀲𑀣𑀤𑀺𑀯𑀲𑀢𑀸, 𑀓𑁂𑀦𑀘𑀺 𑀅𑀦𑀸𑀫𑀦𑁆𑀢𑀺𑀢𑀫𑁂𑀯 𑀅𑀦𑁂𑀓𑀲𑀢𑀸𑀦𑀁𑀬𑁂𑀯 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀧𑀢𑀺𑀢𑀢𑀸, 𑀲𑀩𑁆𑀩𑁂𑀲𑀁 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀙𑀴𑀪𑀺𑀜𑁆𑀜𑀢𑀸 𑀘𑀸𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀭𑀺𑀫𑀸𑀦𑀺 𑀅𑀗𑁆𑀕𑀸𑀦𑀻’’𑀢𑀺𑀆𑀤𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀻𑀖𑀦𑀔𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.