𑁩. 𑀫𑀳𑀸𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁩. 𑀲𑀳 𑀓𑀣𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀳𑀓𑀣𑀻, ‘‘𑀫𑀬𑀁 𑀧𑀼𑀘𑁆𑀙𑀸𑀯𑀲𑁂𑀦 𑀢𑀼𑀫𑁆𑀳𑁂 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦𑀸’’𑀢𑀺 𑀏𑀯𑀁 𑀲𑀳𑀧𑀯𑀢𑁆𑀢𑀓𑀣𑁄𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲𑁂𑀯 𑀓𑀣𑀺𑀢𑀸𑀦𑀺, 𑀢𑀢𑁆𑀣 𑀧𑀞𑀫𑁂 𑀯𑀺𑀚𑁆𑀚𑀸𑀢𑁆𑀢𑀬𑀁 𑀤𑁂𑀲𑀺𑀢𑀁, 𑀤𑀼𑀢𑀺𑀬𑁂 𑀅𑀕𑁆𑀕𑀺𑀦𑀸 𑀤𑀲𑁆𑀲𑀺𑀢𑀦𑁆𑀢𑀺 𑀢𑁂𑀯𑀺𑀚𑁆𑀚𑀯𑀘𑁆𑀙𑀲𑀼𑀢𑁆𑀢𑀁 𑀅𑀕𑁆𑀕𑀺𑀯𑀘𑁆𑀙𑀲𑀼𑀢𑁆𑀢𑀦𑁆𑀢𑀺 𑀦𑀸𑀫𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀻𑀖𑀁 𑀮𑀤𑁆𑀥𑀺𑀁 𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀬𑀲𑁆𑀫𑀸 𑀲𑀗𑁆𑀔𑀸𑀭𑀸𑀦𑀁 𑀦𑀺𑀬𑀢𑁄𑀬𑀁 𑀯𑀺𑀦𑀸𑀲𑁄 𑀅𑀦𑀜𑁆𑀜𑀲𑀫𑀼𑀧𑁆𑀧𑀸𑀤𑁄, 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀧𑀺 𑀦 𑀘𑀺𑀭𑁂𑀦 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, 𑀦 𑀮𑀳𑀼𑀁. 𑀢𑁂𑀦𑀸𑀳 ‘‘𑀯𑀲𑀸𑀢𑁂𑀮 …𑀧𑁂… 𑀲𑀼𑀚𑁆𑀛𑀦𑁆𑀢𑀻’’𑀢𑀺. 𑀧𑀘𑁆𑀙𑀺𑀫𑀕𑀫𑀦𑀁 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸. 𑀬𑀝𑁆𑀞𑀺𑀁 𑀆𑀮𑀫𑁆𑀩𑀺𑀢𑁆𑀯𑀸 𑀉𑀤𑀓𑀁 𑀢𑀭𑀺𑀢𑀼𑀁 𑀑𑀢𑀭𑀦𑁆𑀢𑁄 𑀧𑀼𑀭𑀺𑀲𑁄 ‘‘𑀬𑀝𑁆𑀞𑀺𑀁 𑀑𑀢𑀭𑀺𑀢𑁆𑀯𑀸 𑀉𑀤𑀓𑁂 𑀧𑀢𑀫𑀸𑀦𑁄’’𑀢𑀺 𑀯𑀼𑀢𑁆𑀢𑁄. 𑀓𑀫𑁆𑀫𑀧𑀣𑀯𑀲𑁂𑀦 𑀯𑀺𑀢𑁆𑀣𑀸𑀭𑀤𑁂𑀲𑀦𑀦𑁆𑀢𑀺 𑀲𑀁𑀔𑀺𑀢𑁆𑀢𑀤𑁂𑀲𑀦𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀫𑀽𑀮𑀯𑀲𑁂𑀦 𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀯𑀺𑀢𑁆𑀣𑀸𑀭𑀲𑀤𑀺𑀲𑀸𑀢𑀺 𑀓𑀫𑁆𑀫𑀧𑀣𑀯𑀲𑁂𑀦 𑀇𑀥 𑀤𑁂𑀲𑀺𑀢𑀤𑁂𑀲𑀦𑀸𑀯 𑀫𑀽𑀮𑀯𑀲𑁂𑀦 𑀤𑁂𑀲𑀺𑀢𑀤𑁂𑀲𑀦𑀁 𑀉𑀧𑀸𑀤𑀸𑀬 𑀯𑀺𑀢𑁆𑀣𑀸𑀭𑀲𑀤𑀺𑀲𑀸. 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀦 𑀓𑁂𑀯𑀮𑀁 𑀅𑀬𑀫𑁂𑀯, 𑀅𑀣 𑀔𑁄 𑀲𑀩𑁆𑀩𑀸𑀧𑀺 𑀩𑀼𑀤𑁆𑀥𑀸𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀉𑀚𑀼𑀓𑁂𑀦 𑀦𑀺𑀭𑀯𑀲𑁂𑀲𑀢𑁄 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀦𑀸𑀫 𑀦𑀢𑁆𑀣𑀺 𑀤𑁂𑀲𑀦𑀸𑀜𑀸𑀡𑀲𑁆𑀲 𑀫𑀳𑀸𑀯𑀺𑀲𑀬𑀢𑀸𑀬 𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀘 𑀢𑀚𑁆𑀚𑀸𑀬 𑀫𑀳𑀸𑀦𑀼𑀪𑀸𑀯𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀫𑀗𑁆𑀕𑀺𑀢𑀸𑀬 𑀳𑀺 𑀅𑀯𑀲𑁂𑀲𑀧𑀝𑀺𑀲𑀫𑁆𑀪𑀺𑀤𑀸𑀦𑀼𑀪𑀸𑀯𑀺𑀢𑀸𑀬 𑀅𑀧𑀭𑀺𑀫𑀺𑀢𑀓𑀸𑀮𑀲𑀫𑁆𑀪𑀢𑀜𑀸𑀡𑀲𑀫𑁆𑀪𑀸𑀭𑀲𑀫𑀼𑀤𑀸𑀕𑀢𑀸𑀬 𑀓𑀤𑀸𑀘𑀺𑀧𑀺 𑀧𑀭𑀺𑀓𑁆𑀔𑀬𑀸𑀦𑀭𑀳𑀸𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀬 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀧𑀳𑀽𑀢𑀚𑀺𑀯𑁆𑀳𑀸𑀤𑀺𑀢𑀤𑀦𑀼𑀭𑀽𑀧𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀤𑀸𑀬 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀸 𑀪𑀕𑀯𑀢𑁄 𑀤𑁂𑀲𑀦𑀸 𑀓𑀣𑀁 𑀧𑀭𑀺𑀫𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸 𑀪𑀯𑁂𑀬𑁆𑀬, 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀧𑀦 𑀪𑀕𑀯𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀫𑀺𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀁 𑀓𑀢𑁆𑀯𑀸 𑀦𑀺𑀝𑁆𑀞𑀧𑁂𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 (𑀫. 𑀦𑀺. 𑁧.𑁧𑁪𑁬 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄. 𑀲𑀩𑁆𑀩𑀁 𑀲𑀁𑀔𑀺𑀢𑁆𑀢𑀫𑁂𑀯 𑀅𑀢𑁆𑀢𑀚𑁆𑀛𑀸𑀲𑀬𑀯𑀲𑁂𑀦 𑀅𑀓𑀣𑁂𑀢𑁆𑀯𑀸 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀤𑁂𑀲𑀦𑀸𑀬 𑀦𑀺𑀝𑁆𑀞𑀸𑀧𑀺𑀢𑀢𑁆𑀢𑀸. 𑀦 𑀘𑁂𑀢𑁆𑀣 𑀥𑀫𑁆𑀫𑀲𑀸𑀲𑀦𑀯𑀺𑀭𑁄𑀥𑁄 𑀧𑀭𑀺𑀬𑀸𑀬𑀁 𑀅𑀦𑀺𑀲𑁆𑀲𑀸𑀬 𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀦𑀁 𑀩𑁄𑀥𑀺𑀢𑀢𑁆𑀢𑀸 𑀲𑀩𑁆𑀩𑀮𑀳𑀼𑀢𑁆𑀢𑀸 𑀘𑀸𑀢𑀺.

𑁧𑁯𑁪. 𑀲𑀢𑁆𑀢 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸 𑀲𑀫𑁆𑀧𑀢𑁆𑀢𑀲𑀫𑀸𑀤𑀸𑀦𑀯𑀺𑀭𑀢𑀻𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸.

𑀅𑀦𑀺𑀬𑀫𑁂𑀢𑁆𑀯𑀸𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀸𑀯𑀓𑁄’’𑀢𑀺 𑀯𑀸 𑀦𑀺𑀬𑀫𑀁 𑀯𑀺𑀲𑁂𑀲𑁂𑀦 𑀅𑀓𑀢𑁆𑀯𑀸. 𑀅𑀢𑁆𑀢𑀸𑀦𑀫𑁂𑀯…𑀧𑁂… 𑀯𑁂𑀤𑀺𑀢𑀩𑁆𑀩𑀁, 𑀢𑀣𑀸 𑀳𑀺 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀢𑀺𑀝𑁆𑀞𑀢𑀼 𑀪𑀯𑀁 𑀕𑁄𑀢𑀫𑁄’’𑀢𑀺 𑀆𑀳.

𑁧𑁯𑁫. 𑀲𑀢𑁆𑀣𑀸𑀯 𑀅𑀭𑀳𑀸 𑀳𑁄𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀧𑀸𑀭𑀺𑀧𑀽𑀭𑀺𑀪𑀸𑀯𑀢𑁄. 𑀢𑀲𑁆𑀫𑀺𑀁 𑀩𑁆𑀬𑀸𑀓𑀢𑁂𑀢𑀺 𑀢𑀲𑁆𑀫𑀺𑀁 ‘‘𑀏𑀓𑀪𑀺𑀓𑁆𑀔𑀼𑀧𑀺 𑀲𑀸𑀯𑀓𑁄’’𑀢𑀺𑀆𑀤𑀺𑀦𑀸 𑀲𑀼𑀝𑁆𑀞𑀼 𑀧𑀜𑁆𑀳𑁂 𑀓𑀣𑀺𑀢𑁂.

𑁧𑁯𑁬. 𑀲𑀫𑁆𑀧𑀸𑀤𑀓𑁄𑀢𑀺 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀸𑀤𑀓𑁄.

𑁧𑁯𑁭. 𑀲𑁂𑀔𑀸𑀬 𑀯𑀺𑀚𑁆𑀚𑀸𑀬𑀸𑀢𑀺 𑀲𑁂𑀔𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀲𑀸𑀢𑀺𑀲𑀬𑀁 𑀓𑀢𑁆𑀯𑀸 𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀸, 𑀨𑀮𑀧𑀜𑁆𑀜𑀸 𑀧𑀦 𑀢𑀸𑀬 𑀧𑀢𑁆𑀢𑀩𑁆𑀩𑀢𑁆𑀢𑀸 𑀓𑀫𑁆𑀫𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀁 𑀧𑀢𑁆𑀢𑀩𑁆𑀩’’𑀦𑁆𑀢𑀺. 𑀇𑀫𑀁 𑀧𑀦𑁂𑀢𑁆𑀣 𑀅𑀯𑀺𑀧𑀭𑀻𑀢𑀫𑀢𑁆𑀣𑀁 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀫𑀸𑀦𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑀢𑁄 𑀯𑀺𑀢𑀡𑁆𑀟𑀯𑀸𑀤𑀻 ‘‘𑀬𑀸𑀯𑀢𑀓𑀁 𑀲𑁂𑀔𑁂𑀦 𑀧𑀢𑁆𑀢𑀩𑁆𑀩𑀁, 𑀅𑀦𑀼𑀧𑁆𑀧𑀢𑁆𑀢𑀁 𑀢𑀁 𑀫𑀬𑀸’’𑀢𑀺 𑀯𑀘𑀦𑀮𑁂𑀲𑀁 𑀕𑀳𑁂𑀢𑁆𑀯𑀸 ‘‘𑀅𑀭𑀳𑀢𑁆𑀢𑀫𑀕𑁆𑀕𑁄𑀧𑀺 𑀅𑀦𑁂𑀦 𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀤𑀢𑀺. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀬 𑀕𑀸𑀣𑀸𑀬.

𑀓𑀺𑀮𑁂𑀲𑀸𑀦𑀺 𑀧𑀳𑀸𑀬 𑀧𑀜𑁆𑀘𑀸𑀢𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀲𑀗𑁆𑀔𑀸𑀢𑁂 𑀲𑀁𑀓𑀺𑀮𑁂𑀲𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸, 𑀧𑀳𑀸𑀦𑀳𑁂𑀢𑀼 𑀯𑀸. 𑀧𑀭𑀺𑀧𑀼𑀡𑁆𑀡𑀲𑁂𑀔𑁄𑀢𑀺 𑀲𑀩𑁆𑀩𑀲𑁄 𑀯𑀟𑁆𑀠𑀺𑀢𑀲𑁂𑀔𑀥𑀫𑁆𑀫𑁄. 𑀅𑀧𑀭𑀺𑀳𑀸𑀦𑀥𑀫𑁆𑀫𑁄𑀢𑀺 𑀅𑀧𑀭𑀺𑀳𑀸𑀦𑀲𑀪𑀸𑀯𑁄. 𑀦 𑀳𑀺 𑀬𑀲𑁆𑀲 𑀨𑀸𑀢𑀺𑀕𑀢𑁂𑀳𑀺 𑀲𑀻𑀮𑀸𑀤𑀺𑀥𑀫𑁆𑀫𑁂𑀳𑀺 𑀧𑀭𑀺𑀳𑀸𑀦𑀺 𑀅𑀢𑁆𑀣𑀺, 𑀲𑀫𑀸𑀥𑀺𑀫𑁆𑀳𑀺 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄. 𑀢𑁂𑀦𑀸𑀳 ‘‘𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑁄’’𑀢𑀺. 𑀅𑀧𑀭𑀺𑀳𑀸𑀦𑀥𑀫𑁆𑀫𑀢𑁆𑀢𑀸𑀯 𑀞𑀺𑀢𑀢𑁆𑀢𑁄.

𑀅𑀦𑀸𑀕𑀸𑀫𑀺𑀦𑀸 𑀳𑀺 𑀅𑀲𑁂𑀔𑀪𑀸𑀯𑀸𑀯𑀳𑀸 𑀥𑀫𑁆𑀫𑀸 𑀧𑀭𑀺𑀧𑀽𑀭𑁂𑀢𑀩𑁆𑀩𑀸, 𑀦 𑀲𑁂𑀔𑀪𑀸𑀯𑀸𑀯𑀳𑀸𑀢𑀺 𑀲𑁄 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑁂 𑀲𑁂𑀔𑁄 𑀯𑀼𑀢𑁆𑀢𑁄. 𑀏𑀢𑀁 𑀦 𑀩𑀼𑀤𑁆𑀥𑀯𑀘𑀦𑀦𑁆𑀢𑀺 ‘‘𑀫𑀕𑁆𑀕𑁄 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄’’𑀢𑀺 𑀏𑀢𑀁 𑀯𑀘𑀦𑀁 𑀦 𑀩𑀼𑀤𑁆𑀥𑀯𑀘𑀦𑀁 𑀅𑀦𑀦𑁆𑀢𑀭𑁂𑀓𑀦𑁆𑀢𑀯𑀺𑀧𑀸𑀓𑀤𑀸𑀦𑀢𑁄, 𑀩𑀳𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀦𑁂 𑀧𑀬𑁄𑀚𑀦𑀸𑀪𑀸𑀯𑀢𑁄 𑀘 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲, ‘‘𑀲𑀫𑀸𑀥𑀺𑀫𑀸𑀦𑀦𑁆𑀢𑀭𑀺𑀓𑀜𑁆𑀜𑀫𑀸𑀳𑀼 (𑀔𑀼. 𑀧𑀸. 𑁬.𑁫; 𑀲𑀼. 𑀦𑀺. 𑁨𑁨𑁮), 𑀦 𑀧𑀸𑀭𑀁 𑀤𑀺𑀕𑀼𑀡𑀁 𑀬𑀦𑁆𑀢𑀻’’𑀢𑀺 (𑀲𑀼. 𑀦𑀺. 𑁭𑁧𑁯) 𑀏𑀯𑀫𑀸𑀤𑀻𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀏𑀢𑀲𑁆𑀲𑀢𑁆𑀣𑀲𑀸𑀥𑀓𑀸𑀦𑀺. 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑁂𑀦 𑀲𑁂𑀓𑁆𑀔𑀥𑀫𑁆𑀫𑀧𑀭𑀺𑀧𑀽𑀭𑀺𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑀸𑀬 𑀅𑀢𑁆𑀣𑁄 𑀢𑀯 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀅𑀲𑁆𑀲 𑀆𑀬𑀲𑁆𑀫𑀢𑁄 𑀯𑀘𑁆𑀙𑀲𑁆𑀲.

𑁧𑁯𑁮. 𑀅𑀪𑀺𑀜𑁆𑀜𑀸 𑀯𑀸 𑀓𑀸𑀭𑀡𑀦𑁆𑀢𑀺 𑀬𑀜𑁆𑀳𑀺 𑀢𑀁 𑀢𑀢𑁆𑀭 𑀢𑀢𑁆𑀭 𑀲𑀓𑁆𑀔𑀺𑀪𑀩𑁆𑀩𑀢𑀸𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀯𑀺𑀥𑀧𑀘𑁆𑀘𑀦𑀼𑀪𑀯𑀦𑀸𑀤𑀺, 𑀢𑀲𑁆𑀲 𑀅𑀪𑀺𑀜𑁆𑀜𑀸 𑀓𑀸𑀭𑀡𑀁. 𑀅𑀣 𑀇𑀤𑁆𑀥𑀺𑀯𑀺𑀥𑀧𑀘𑁆𑀘𑀦𑀼𑀪𑀯𑀦𑀸𑀤𑀺 𑀅𑀪𑀺𑀜𑁆𑀜𑀸, 𑀏𑀯𑀁 𑀲𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀓𑀸𑀭𑀡𑀁. 𑀅𑀯𑀲𑀸𑀦𑁂 𑀙𑀝𑁆𑀞𑀸𑀪𑀺𑀜𑁆𑀜𑀸𑀬 𑀧𑀦 𑀅𑀭𑀳𑀢𑁆𑀢𑀁. 𑀏𑀢𑁆𑀣 𑀘 𑀬𑀲𑁆𑀫𑀸 𑀧𑀞𑀫𑀲𑀼𑀢𑁆𑀢𑁂 𑀆𑀲𑀯𑀓𑁆𑀔𑀬𑁄 𑀅𑀥𑀺𑀧𑁆𑀧𑁂𑀢𑁄, 𑀆𑀲𑀯𑀸 𑀔𑀻𑀡𑀸 𑀏𑀯, 𑀦 𑀧𑀼𑀦 𑀔𑁂𑀧𑁂𑀢𑀩𑁆𑀩𑀸, 𑀢𑀲𑁆𑀫𑀸 𑀢𑀢𑁆𑀣 ‘‘𑀬𑀸𑀯𑀤𑁂𑀯𑀸’’𑀢𑀺 𑀦 𑀯𑀼𑀢𑁆𑀢𑀁. 𑀇𑀥 𑀨𑀮𑀲𑀫𑀸𑀧𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀲𑀸 𑀘 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀻𑀬𑀢𑀺, 𑀢𑀲𑁆𑀫𑀸 ‘‘𑀬𑀸𑀯𑀤𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀏𑀯 𑀳𑀺 ‘‘𑀅𑀭𑀳𑀢𑁆𑀢𑀁 𑀯𑀸 𑀓𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀳𑀺 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀬𑀤𑀭𑀺𑀬𑀸 𑀏𑀢𑀭𑀳𑀺 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁫; 𑁩.𑁩𑁦𑁭) 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲 𑀓𑀸𑀭𑀡𑀁, 𑀢𑀬𑀺𑀤𑀁 𑀲𑀩𑁆𑀩𑀲𑀸𑀥𑀸𑀭𑀡𑀁 𑀦 𑀳𑁄𑀢𑀻𑀢𑀺 𑀲𑀸𑀥𑀸𑀭𑀡𑀯𑀲𑁂𑀦 𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀳𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀯𑀸’’𑀢𑀺 𑀆𑀳.

𑁨𑁦𑁦. 𑀧𑀭𑀺𑀘𑀭𑀦𑁆𑀢𑀺 𑀦𑀸𑀫 𑀯𑀺𑀧𑁆𑀧𑀓𑀢𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀢𑁆𑀢𑀸. 𑀧𑀭𑀺𑀘𑀺𑀡𑁆𑀡𑁄 𑀳𑁄𑀢𑀺 𑀲𑀸𑀯𑀓𑁂𑀦 𑀦𑀸𑀫 𑀲𑀢𑁆𑀣𑀼 𑀥𑀫𑁆𑀫𑁂 𑀓𑀢𑁆𑀢𑀩𑁆𑀩𑀸 𑀧𑀭𑀺𑀘𑀭𑀺𑀬𑀸 𑀲𑀫𑁆𑀫𑀤𑁂𑀯 𑀦𑀺𑀝𑁆𑀞𑀸𑀧𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀇𑀢𑀺…𑀧𑁂… 𑀣𑁂𑀭𑁄 𑀏𑀯𑀫𑀸𑀳𑀸’’𑀢𑀺. 𑀢𑁂𑀲𑀁 𑀕𑀼𑀡𑀸𑀦𑀦𑁆𑀢𑀺 𑀢𑁂𑀲𑀁 𑀅𑀲𑁂𑀓𑁆𑀔𑀕𑀼𑀡𑀸𑀦𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.