𑁧𑁦. 𑀯𑁂𑀔𑀦𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮𑁦. 𑀲𑀳 𑀯𑀢𑁆𑀣𑀼𑀓𑀸𑀫𑁂𑀦 𑀓𑀺𑀮𑁂𑀲𑀓𑀸𑀫𑁄 𑀕𑀭𑀼 𑀕𑀭𑀼𑀓𑀸𑀢𑀩𑁆𑀩𑁄 𑀏𑀢𑀲𑁆𑀲𑀸𑀢𑀺 𑀓𑀸𑀫𑀕𑀭𑀼. 𑀢𑁂𑀲𑁆𑀯𑁂𑀯 𑀓𑀸𑀫𑁂𑀲𑀼 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀚𑁆𑀛𑀸𑀲𑀬𑁄𑀢𑀺 𑀓𑀸𑀫𑀸𑀥𑀺𑀫𑀼𑀢𑁆𑀢𑁄. 𑀧𑀩𑁆𑀩𑀚𑁆𑀚𑀸𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑀁 𑀦𑁂𑀓𑁆𑀔𑀫𑁆𑀫𑀁 𑀕𑀭𑀼 𑀕𑀭𑀼𑀓𑀸𑀢𑀩𑁆𑀩𑀁 𑀏𑀢𑀲𑁆𑀲𑀸𑀢𑀺 𑀦𑁂𑀓𑁆𑀔𑀫𑁆𑀫𑀕𑀭𑀼. 𑀢𑀢𑁆𑀣 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀚𑁆𑀛𑀸𑀲𑀬𑁄 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄 𑀲𑁆𑀯𑀸𑀬𑀫𑀢𑁆𑀣𑁄 𑀬𑀣𑀸 𑀏𑀓𑀘𑁆𑀘𑁂 𑀕𑀳𑀝𑁆𑀞𑁂 𑀮𑀩𑁆𑀪𑀢𑀺, 𑀏𑀯𑀁 𑀏𑀓𑀘𑁆𑀘𑁂 𑀅𑀦𑀕𑀸𑀭𑁂𑀧𑀻𑀢𑀺 𑀆𑀳 ‘‘𑀧𑀩𑁆𑀩𑀚𑀺𑀢𑁄𑀧𑀻’’𑀢𑀺𑀆𑀤𑀺. 𑀅𑀬𑀁 𑀧𑀦 𑀯𑁂𑀔𑀦𑀲𑁄 𑀧𑀭𑀺𑀩𑁆𑀩𑀸𑀚𑀓𑁄. 𑀲𑁄 𑀳𑀺 𑀯𑁂𑀔𑀦𑀲𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀉𑀧𑀕𑀦𑁆𑀢𑁆𑀯𑀸 𑀯𑁂𑀔𑀦𑀲𑁂𑀦 𑀇𑀫𑀺𑀦𑀸 𑀤𑀺𑀝𑁆𑀞𑀺𑀫𑀸𑀤𑀸𑀬 𑀲𑀫𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 ‘‘𑀯𑁂𑀔𑀦𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀮𑁄𑀓𑁄 𑀲𑀬𑀁 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑁄𑀧𑀺 𑀲𑀫𑀸𑀦𑁄 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀪𑀯𑀺𑀬𑀫𑀸𑀦𑀁 𑀲𑀸𑀮𑀸𑀓𑀺𑀓𑀁 𑀅𑀕𑁆𑀕𑀺𑀲𑀦𑁆𑀢𑀸𑀧𑀁 𑀯𑀺𑀬 𑀅𑀦𑀸𑀤𑀺𑀓𑀸𑀮𑀸𑀦𑀼𑀕𑀢𑀲𑀫𑁆𑀫𑀸𑀓𑀯𑀘𑀭𑀲𑀦𑁆𑀢𑀸𑀧𑀁 𑀆𑀤𑀺𑀢𑁆𑀢𑀢𑀸𑀬 𑀦 𑀲𑀮𑁆𑀮𑀓𑁆𑀔𑁂𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀦 𑀫𑀳𑀸𑀓𑀭𑀼𑀡𑀸𑀲𑀫𑀼𑀲𑁆𑀲𑀸𑀳𑀺𑀢𑀫𑀸𑀦𑀲𑁂𑀦 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢’’𑀦𑁆𑀢𑀺 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑁂 (𑀲𑀁. 𑀦𑀺. 𑁪.𑁨𑁮; 𑀫𑀳𑀸𑀯. 𑁫𑁪) 𑀤𑁂𑀲𑀺𑀬𑀫𑀸𑀦𑁂 𑀲𑀮𑁆𑀮𑀓𑁆𑀔𑁂𑀢𑀺, 𑀏𑀯𑀁 𑀅𑀬𑀫𑁆𑀧𑀺 𑀅𑀦𑀸𑀤𑀺𑀓𑀸𑀮𑀧𑀭𑀺𑀪𑀸𑀯𑀺𑀢𑀁 𑀅𑀢𑁆𑀢𑀅𑀚𑁆𑀛𑀸𑀲𑀬𑁂 𑀅𑀯𑀝𑁆𑀞𑀺𑀢𑀁 𑀓𑀸𑀫𑀸𑀥𑀺𑀫𑀼𑀢𑁆𑀢𑀁 𑀲𑀭𑀲𑁂𑀦 𑀅𑀦𑀼𑀧𑀥𑀸𑀭𑁂𑀦𑁆𑀢𑁄 𑀲𑀢𑁆𑀣𑀸𑀭𑀸 𑁋 ‘‘𑀧𑀜𑁆𑀘 𑀔𑁄 𑀇𑀫𑁂, 𑀓𑀘𑁆𑀘𑀸𑀦, 𑀓𑀸𑀫𑀕𑀼𑀡𑀸’’𑀢𑀺𑀆𑀤𑀺𑀦𑀸 𑀓𑀸𑀫𑀕𑀼𑀡𑁂𑀲𑀼 𑀓𑀸𑀫𑀲𑀼𑀔𑁂 𑀪𑀸𑀲𑀺𑀬𑀫𑀸𑀦𑁂 ‘‘𑀓𑀸𑀫𑀸𑀥𑀺𑀫𑀼𑀢𑁆𑀢𑀁 𑀯𑀢 𑀧𑀩𑁆𑀩𑀚𑀺𑀢𑀲𑁆𑀲 𑀘𑀺𑀢𑁆𑀢’’𑀦𑁆𑀢𑀺 𑀉𑀧𑀥𑀸𑀭𑁂𑀲𑁆𑀲𑀢𑀻𑀢𑀺 𑀆𑀳 𑁋 ‘‘𑀇𑀫𑀸𑀬 𑀓𑀣𑀸𑀬 𑀓𑀣𑀺𑀬𑀫𑀸𑀦𑀸𑀬 𑀅𑀢𑁆𑀢𑀦𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑀢𑀁 𑀲𑀮𑁆𑀮𑀓𑁆𑀔𑁂𑀲𑁆𑀲𑀢𑀻’’𑀢𑀺. 𑀓𑀸𑀫𑀕𑁆𑀕𑀲𑀼𑀔𑀦𑁆𑀢𑀺 𑀓𑀸𑀫𑁂𑀢𑀩𑁆𑀩𑀯𑀢𑁆𑀣𑀽𑀳𑀺 𑀅𑀕𑁆𑀕𑀪𑀽𑀢𑀁 𑀲𑀼𑀔𑀁. 𑀲𑀩𑁆𑀩𑁂 𑀳𑀺 𑀢𑁂𑀪𑀽𑀫𑀓𑀥𑀫𑁆𑀫𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸, 𑀢𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀲𑀼𑀔𑀢𑁄 𑀦𑀺𑀩𑁆𑀩𑀸𑀦𑀲𑀼𑀔𑀫𑁂𑀯 𑀅𑀕𑁆𑀕𑀪𑀽𑀢𑀁 𑀲𑀼𑀔𑀁. 𑀬𑀣𑀸𑀳 𑁋 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪) 𑁋 ‘‘𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺 (𑀫. 𑀦𑀺. 𑁨.𑁨𑁧𑁫, 𑁨𑁧𑁭; 𑀥. 𑀧. 𑁨𑁦𑁩) 𑀘. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺.

𑁨𑁮𑁧. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀮𑀸𑀪𑀺𑀦𑁄 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪 𑀯𑀼𑀘𑁆𑀘𑀫𑀸𑀦𑀓𑀣𑀸 𑀅𑀦𑀼𑀘𑁆𑀙𑀯𑀺𑀓𑀸 𑀢𑀤𑀢𑁆𑀣𑀲𑁆𑀲 𑀧𑀘𑁆𑀘𑀓𑁆𑀔𑀪𑀸𑀯𑀢𑁄, 𑀢𑀤𑀪𑀸𑀯𑀢𑁄 𑀯𑁂𑀔𑀦𑀲𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑀸𑀢𑀺 𑀆𑀳 ‘‘𑀬𑀲𑁆𑀫𑀸…𑀧𑁂… 𑀦𑀢𑁆𑀣𑀻’’𑀢𑀺. 𑀅𑀦𑀸𑀕𑀢𑀓𑀣𑀸𑀬…𑀧𑁂… 𑀦𑀢𑁆𑀣𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀆𑀭𑀓𑁆𑀔𑀢𑁆𑀣𑀸𑀬𑀸𑀢𑀺 𑀤𑁂𑀯𑀢𑀸𑀳𑀺 𑀫𑀦𑁆𑀢𑀧𑀤𑁂𑀳𑀺 𑀲𑀳 𑀞𑀺𑀢𑀸 𑀢𑀢𑁆𑀣 𑀆𑀭𑀓𑁆𑀔𑀢𑁆𑀣𑀸𑀬. 𑀅𑀯𑀺𑀚𑁆𑀚𑀸𑀬𑀸𑀢𑀺 𑀇𑀤𑀁 𑀮𑀓𑁆𑀔𑀡𑀯𑀘𑀦𑀁, 𑀢𑀁𑀫𑀽𑀮𑀓𑀢𑁆𑀢𑀸 𑀯𑀸 𑀲𑀩𑁆𑀩𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀅𑀯𑀺𑀚𑁆𑀚𑀸𑀯 𑀕𑀳𑀺𑀢𑀸. 𑀚𑀸𑀦𑀦𑀁 𑀧𑀳𑀻𑀦𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑁂𑀔𑀦𑀲𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀧𑀭𑀺𑀩𑁆𑀩𑀸𑀚𑀓𑀯𑀕𑁆𑀕𑀯𑀡𑁆𑀡𑀦𑀸.