𑁧𑁦. 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫. 𑀚𑀸𑀦𑀧𑀤𑀺𑀦𑁄𑀢𑀺 (𑀤𑀻. 𑀦𑀺. 𑀝𑀻. 𑁨.𑁯𑁫) 𑀚𑀦𑀧𑀤𑀯𑀦𑁆𑀢𑁄, 𑀚𑀦𑀧𑀤𑀲𑁆𑀲 𑀯𑀸 𑀇𑀲𑁆𑀲𑀭𑀸 𑀭𑀸𑀚𑀓𑀼𑀫𑀸𑀭𑀸. 𑀕𑁄𑀢𑁆𑀢𑀯𑀲𑁂𑀦 𑀓𑀼𑀭𑀽 𑀦𑀸𑀫. 𑀢𑁂𑀲𑀁 𑀦𑀺𑀯𑀸𑀲𑁄 𑀬𑀤𑀺 𑀏𑀓𑁄 𑀚𑀦𑀧𑀤𑁄, 𑀓𑀣𑀁 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀭𑀼𑀴𑁆𑀳𑀻𑀲𑀤𑁆𑀤𑁂𑀦𑀸’’𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀼𑀢𑁆𑀢𑁂 𑀯𑀺𑀬 𑀲𑀮𑀺𑀗𑁆𑀕𑀯𑀘𑀦𑀸𑀦𑀺 (𑀧𑀸𑀡𑀺𑀦𑀺 𑁧.𑁨𑁫𑁧) 𑀇𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀭𑀼𑀴𑁆𑀳𑀻 𑀬𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀅𑀗𑁆𑀕𑁂𑀲𑀼 𑀯𑀺𑀳𑀭𑀢𑀺, 𑀫𑀮𑁆𑀮𑁂𑀲𑀼 𑀯𑀺𑀳𑀭𑀢𑀻’’𑀢𑀺 𑀘. 𑀢𑀩𑁆𑀩𑀺𑀲𑁂𑀲𑀦𑁂 𑀧𑀦 𑀚𑀦𑀧𑀤-𑀲𑀤𑁆𑀤𑁂 𑀚𑀸𑀢𑀺-𑀲𑀤𑁆𑀤𑁂 𑀏𑀓𑀯𑀘𑀦𑀫𑁂𑀯. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀦𑁄. 𑀢𑁂𑀦 𑀧𑀼𑀣𑀼𑀅𑀢𑁆𑀣𑀯𑀺𑀲𑀬𑀢𑀸𑀬 𑀏𑀯𑀁 𑀢𑀁 𑀩𑀳𑀼𑀯𑀘𑀦𑀦𑁆𑀢𑀺 ‘‘𑀩𑀳𑀼𑀓𑁂 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀁 𑀯𑀺𑀲𑁂𑀲𑀁 𑀤𑀻𑀧𑁂𑀢𑀺. 𑀲𑀼𑀢𑁆𑀯𑀸𑀢𑀺 𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀲𑁆𑀲 𑀆𑀦𑀼𑀪𑀸𑀯𑀤𑀲𑁆𑀲𑀦𑀸𑀦𑀼𑀲𑀸𑀭𑁂𑀦 𑀧𑀭𑀫𑁆𑀧𑀭𑀸𑀕𑀢𑀁 𑀓𑀣𑀁 𑀲𑀼𑀢𑁆𑀯𑀸. 𑀅𑀦𑀼𑀲𑀁𑀬𑀸𑀬𑀦𑁆𑀢𑁂𑀦𑀸𑀢𑀺 𑀅𑀦𑀼𑀯𑀺𑀘𑀭𑀦𑁆𑀢𑁂𑀦. 𑀏𑀢𑁂𑀲𑀁 𑀞𑀸𑀦𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀫𑀼𑀔𑁂𑀦 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀫𑀸𑀳. 𑀢𑁂𑀦𑀸𑀳 ‘‘𑀢𑀢𑁆𑀣 𑀅𑀕𑀫𑀸𑀲𑀻’’𑀢𑀺𑀆𑀤𑀺. 𑀲𑁄𑀢𑀺 𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀸. 𑀢𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀭𑀚𑁆𑀚𑀁. 𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸. 𑀧𑀼𑀦 𑀧𑀼𑀘𑁆𑀙𑀺 𑀧𑀭𑀺𑀡𑀸𑀬𑀓𑀭𑀢𑀦𑀁. 𑀤𑁄𑀯𑀸𑀭𑀺𑀓𑀪𑀽𑀫𑀺𑀬𑀁 𑀢𑀺𑀝𑁆𑀞𑀦𑁆𑀢𑀺 𑀲𑀼𑀥𑀫𑁆𑀫𑀸𑀬 𑀤𑁂𑀯𑀲𑀪𑀸𑀬 𑀤𑁂𑀯𑀧𑀼𑀭𑀲𑁆𑀲 𑀘 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀆𑀭𑀓𑁆𑀔𑀸𑀬 𑀅𑀥𑀺𑀓𑀢𑀢𑁆𑀢𑀸. 𑀤𑀺𑀩𑁆𑀩𑀭𑀼𑀓𑁆𑀔𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀦𑁆𑀢𑀺 𑀇𑀤𑀁 ‘‘𑀘𑀺𑀢𑁆𑀢𑀮𑀢𑀸𑀯𑀦’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀻𑀢𑀺 𑀪𑀲𑁆𑀲𑀺𑀢𑁆𑀯𑀸 𑀧𑀣𑀯𑀺𑀬𑀸 𑀆𑀲𑀦𑁆𑀦𑁂 𑀞𑀸𑀦𑁂 𑀅𑀝𑁆𑀞𑀸𑀲𑀺, 𑀞𑀢𑁆𑀯𑀸 𑀘 𑀦𑀘𑀺𑀭𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀬𑀺 𑀢𑁂𑀦𑀢𑁆𑀢𑀪𑀸𑀯𑁂𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲𑀭𑀺𑀬𑀲𑁆𑀲 𑀅𑀪𑀸𑀯𑀢𑁄. ‘‘𑀘𑀺𑀭𑀢𑀭𑀁 𑀓𑀸𑀮𑀁 𑀞𑀢𑁆𑀯𑀸’’𑀢𑀺 𑀅𑀧𑀭𑁂. 𑀤𑁂𑀯𑀪𑀸𑀯𑁄 𑀧𑀸𑀢𑀼𑀭𑀳𑁄𑀲𑀺 𑀤𑁂𑀯𑀮𑁄𑀓𑁂 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀦𑁄 𑀅𑀧𑀭𑀸𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑁄𑀓𑀸𑀲𑀢𑁆𑀢𑀸. 𑀅𑀯𑀬𑀯𑁂 𑀲𑀺𑀤𑁆𑀥𑁄 𑀯𑀺𑀲𑁂𑀲𑁄 𑀲𑀫𑀼𑀤𑀸𑀬𑀲𑁆𑀲 𑀯𑀺𑀲𑁂𑀲𑀓𑁄 𑀳𑁄𑀢𑀻𑀢𑀺 𑀏𑀓𑀫𑁆𑀧𑀺 𑀭𑀝𑁆𑀞𑀁 𑀩𑀳𑀼𑀯𑀘𑀦𑁂𑀦 𑀯𑁄𑀳𑀭𑀻𑀬𑀢𑀺.

𑀤-𑀓𑀸𑀭𑁂𑀦 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀓𑀫𑁆𑀫𑀸𑀲𑁄𑀢𑀺 𑀓𑀫𑁆𑀫𑀸𑀲𑀧𑀸𑀤𑁄 𑀯𑀼𑀘𑁆𑀘𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀭𑀽𑀧𑀪𑀯𑁄 𑀭𑀽𑀧’’𑀦𑁆𑀢𑀺. 𑀓𑀣𑀁 𑀧𑀦 𑀲𑁄 𑀓𑀫𑁆𑀫𑀸𑀲𑀧𑀸𑀤𑁄𑀢𑀺 𑀆𑀳 ‘‘𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺. 𑀤𑀫𑀺𑀢𑁄𑀢𑀺 𑀏𑀢𑁆𑀣 𑀓𑀻𑀤𑀺𑀲𑀁 𑀤𑀫𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀧𑁄𑀭𑀺𑀲𑀸𑀤𑀪𑀸𑀯𑀢𑁄 𑀧𑀝𑀺𑀲𑁂𑀥𑀺𑀢𑁄’’𑀢𑀺. 𑀇𑀫𑁂 𑀧𑀦 𑀣𑁂𑀭𑀸𑀢𑀺 𑀫𑀚𑁆𑀛𑀺𑀫𑀪𑀸𑀡𑀓𑁂 𑀯𑀤𑀢𑀺, 𑀢𑁂 𑀧𑀦 𑀘𑀽𑀴𑀓𑀫𑁆𑀫𑀸𑀲𑀤𑀫𑁆𑀫𑀁 𑀲𑀦𑁆𑀥𑀸𑀬 𑀢𑀣𑀸 𑀯𑀤𑀦𑁆𑀢𑀺. 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑁄 𑀳𑀺 𑀓𑀫𑁆𑀫𑀸𑀲𑀧𑀸𑀤𑁄 𑀅𑀮𑀻𑀦𑀲𑀢𑁆𑀢𑀼𑀓𑀼𑀫𑀸𑀭𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁂𑀦 𑀢𑀢𑁆𑀣 𑀤𑀫𑀺𑀢𑁄, 𑀲𑀼𑀢𑀲𑁄𑀫𑀓𑀸𑀮𑁂 𑀧𑀦 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑁄𑀭𑀺𑀲𑀸𑀤𑀪𑀸𑀯𑀧𑀝𑀺𑀲𑁂𑀥𑀦𑁂𑀦 𑀬𑀢𑁆𑀣 𑀤𑀫𑀺𑀢𑁄, 𑀢𑀁 𑀫𑀳𑀸𑀓𑀫𑁆𑀫𑀸𑀲𑀤𑀫𑁆𑀫𑀁 𑀦𑀸𑀫. 𑀧𑀼𑀢𑁆𑀢𑁄𑀢𑀺 𑀯𑀢𑁆𑀯𑀸 𑀅𑀢𑁆𑀭𑀚𑁄𑀢𑀺 𑀯𑀘𑀦𑀁 𑀑𑀭𑀲𑀧𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑀬𑁂𑀳𑀺 𑀆𑀯𑀲𑀺𑀢𑀧𑀤𑁂𑀲𑁄 𑀓𑀼𑀭𑀼𑀭𑀝𑁆𑀞𑀦𑁆𑀢𑀺 𑀦𑀸𑀫𑀁 𑀮𑀪𑀺, 𑀢𑁂 𑀉𑀢𑁆𑀢𑀭𑀓𑀼𑀭𑀼𑀢𑁄 𑀆𑀕𑀢𑀸 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀭𑀓𑁆𑀔𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀁𑀲𑀼, 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀬𑀸 𑀧𑀘𑁆𑀙𑀺𑀫𑀸 𑀚𑀦𑀢𑀸𑀢𑀺, 𑀲𑁄 𑀤𑁂𑀲𑀥𑀫𑁆𑀫𑀯𑀲𑁂𑀦 𑀅𑀯𑀺𑀘𑁆𑀙𑁂𑀤𑀢𑁄 𑀯𑀢𑁆𑀢𑀫𑀸𑀦𑁄 𑀓𑀼𑀭𑀼𑀯𑀢𑁆𑀢𑀥𑀫𑁆𑀫𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀅𑀬𑀜𑁆𑀘 𑀅𑀢𑁆𑀣𑁄 𑀓𑀼𑀭𑀼𑀥𑀫𑁆𑀫𑀚𑀸𑀢𑀓𑁂𑀦 (𑀚𑀸. 𑁧.𑁩.𑁭𑁬-𑁭𑁮) 𑀤𑀻𑀧𑁂𑀢𑀩𑁆𑀩𑁄. 𑀲𑁄 𑀅𑀧𑀭𑀪𑀸𑀕𑁂 𑀬𑀢𑁆𑀣 𑀧𑀞𑀫𑀁 𑀲𑀁𑀓𑀺𑀮𑀺𑀝𑁆𑀞𑁄 𑀚𑀸𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀭𑀼𑀭𑀝𑁆𑀞𑀯𑀸𑀲𑀻𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀢𑁆𑀣 𑀪𑀕𑀯𑀢𑁄 𑀯𑀲𑀦𑁄𑀓𑀸𑀲𑁄 𑀓𑁄𑀘𑀺 𑀯𑀺𑀳𑀸𑀭𑁄 𑀦 𑀳𑁄𑀢𑀺, 𑀢𑀢𑁆𑀣 𑀓𑁂𑀯𑀮𑀁 𑀕𑁄𑀘𑀭𑀕𑀸𑀫𑀓𑀺𑀢𑁆𑀢𑀦𑀁 𑀦𑀺𑀤𑀸𑀦𑀓𑀣𑀸𑀬 𑀧𑀓𑀢𑀺, 𑀬𑀣𑀸 𑀢𑀁𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀤𑁂𑀯𑀤𑀳𑀁 𑀦𑀸𑀫 𑀲𑀓𑁆𑀓𑀸𑀦𑀁 𑀦𑀺𑀕𑀫𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀲𑀦𑁄𑀓𑀸𑀲𑀢𑁄’’𑀢𑀺𑀆𑀤𑀺𑀫𑀸𑀳.

𑀉𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁧𑁦𑁬. 𑀓𑀲𑁆𑀫𑀸 𑀪𑀕𑀯𑀸 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀻𑀢𑀺 𑀅𑀲𑀸𑀥𑀸𑀭𑀡𑀲𑀫𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺, 𑀲𑀸𑀥𑀸𑀭𑀡𑀁 𑀧𑀦 𑀧𑀸𑀓𑀝𑀦𑁆𑀢𑀺 𑀅𑀦𑀸𑀫𑀝𑁆𑀞𑀁, 𑀢𑁂𑀦 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄 𑀧𑀼𑀘𑁆𑀙𑀺𑀢𑁄𑀢𑀺 𑀓𑀢𑁆𑀯𑀸 𑀇𑀢𑀭𑁄 ‘‘𑀓𑀼𑀭𑀼𑀭𑀝𑁆𑀞𑀯𑀸𑀲𑀻𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀧𑀭𑀚𑁆𑀛𑀸𑀲𑀬𑁄𑀬𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦 𑀩𑀸𑀳𑀺𑀭𑀲𑀫𑀼𑀝𑁆𑀞𑀸𑀦𑀁 𑀯𑀺𑀪𑀸𑀯𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀚𑁆𑀛𑀢𑁆𑀢𑀺𑀓𑀁 𑀧𑀦 𑀅𑀲𑀸𑀥𑀸𑀭𑀡𑀜𑁆𑀘 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀸𑀤𑀺𑀝𑀻𑀓𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑀼𑀭𑀼𑀭𑀝𑁆𑀞𑀁 𑀓𑀺𑀭 (𑀤𑀻. 𑀦𑀺. 𑀝𑀻. 𑁨.𑁩𑁭𑁩) 𑀢𑀤𑀸 𑀢𑀦𑁆𑀦𑀺𑀯𑀸𑀲𑀻𑀦𑀁 𑀲𑀢𑁆𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀦𑁆𑀢𑀢𑀸𑀬 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸𑀩𑀮𑁂𑀦 𑀉𑀢𑀼𑀆𑀤𑀺𑀲𑀫𑁆𑀧𑀦𑁆𑀦𑀫𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀢𑀼𑀧𑀘𑁆𑀘𑀬𑀸𑀤𑀺𑀲𑀫𑁆𑀧𑀦𑁆𑀦𑀢𑁆𑀢𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀪𑁄𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑁂𑀘𑀺 𑀧𑀦 ‘‘𑀧𑀼𑀩𑁆𑀩𑁂 𑀓𑀼𑀭𑀼𑀯𑀢𑁆𑀢𑀥𑀫𑁆𑀫𑀸𑀦𑀼𑀝𑁆𑀞𑀸𑀦𑀯𑀸𑀲𑀦𑀸𑀬 𑀉𑀢𑁆𑀢𑀭𑀓𑀼𑀭𑀼 𑀯𑀺𑀬 𑀬𑁂𑀪𑀼𑀬𑁆𑀬𑁂𑀦 𑀉𑀢𑀼𑀆𑀤𑀺𑀲𑀫𑁆𑀧𑀦𑁆𑀦𑀫𑁂𑀯 𑀳𑁄𑀦𑁆𑀢𑀁 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀢𑀺𑀲𑀬𑀁 𑀉𑀢𑀼𑀲𑀧𑁆𑀧𑀸𑀬𑀸𑀤𑀺𑀬𑀼𑀢𑁆𑀢𑀁 𑀢𑀁 𑀭𑀝𑁆𑀞𑀁 𑀅𑀳𑁄𑀲𑀻’’𑀢𑀺 𑀯𑀤𑀦𑁆𑀢𑀺. 𑀘𑀺𑀢𑁆𑀢𑀲𑀭𑀻𑀭𑀓𑀮𑁆𑀮𑀢𑀸𑀬𑀸𑀢𑀺 𑀘𑀺𑀢𑁆𑀢𑀲𑁆𑀲 𑀲𑀭𑀻𑀭𑀲𑁆𑀲 𑀘 𑀅𑀭𑁄𑀕𑀢𑀸𑀬. 𑀅𑀦𑀼𑀕𑁆𑀕𑀳𑀺𑀢𑀧𑀜𑁆𑀜𑀸𑀩𑀮𑀸𑀢𑀺 𑀮𑀤𑁆𑀥𑀼𑀧𑀓𑀸𑀭𑀜𑀸𑀡𑀸𑀦𑀼𑀪𑀸𑀯𑀸, 𑀅𑀦𑀼 𑀅𑀦𑀼 𑀯𑀸 𑀆𑀘𑀺𑀡𑁆𑀡𑀧𑀜𑁆𑀜𑀸𑀢𑁂𑀚𑀸. 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀽𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀘𑀼𑀤𑁆𑀤𑀲𑀲𑀼𑀞𑀸𑀦𑁂𑀲𑀼, 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀏𑀓𑀲𑁆𑀫𑀺𑀁 𑀞𑀸𑀦𑁂, 𑀢𑀣𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦, 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀽𑀢𑀺 𑀏𑀯𑀁 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼. 𑀓𑀫𑁆𑀫𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀬𑀣𑀸 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑀺, 𑀏𑀯𑀁 𑀤𑁂𑀲𑀦𑀸𑀯𑀲𑁂𑀦 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀲𑀼𑀯𑀡𑁆𑀡𑀫𑀜𑁆𑀚𑀽𑀲𑀸𑀲𑀼 𑀧𑀓𑁆𑀔𑀺𑀢𑁆𑀢𑀸𑀦𑀺 𑀲𑀼𑀫𑀦𑀘𑀫𑁆𑀧𑀓𑀸𑀤𑀺𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀫𑀡𑀺𑀧𑀼𑀢𑁆𑀢𑀸𑀤𑀺𑀲𑀢𑁆𑀢𑀭𑀢𑀦𑀸𑀦𑀺 𑀘 𑀬𑀣𑀸 𑀪𑀸𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀯𑀺𑀲𑁂𑀲𑀁 𑀲𑁄𑀪𑀦𑁆𑀢𑀺, 𑀓𑀺𑀘𑁆𑀘𑀓𑀭𑀸𑀦𑀺 𑀘 𑀳𑁄𑀦𑁆𑀢𑀺 𑀫𑀦𑀼𑀜𑁆𑀜𑀸𑀪𑀸𑀯𑀢𑁄, 𑀏𑀯𑀁 𑀲𑀻𑀮𑀤𑀲𑁆𑀲𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀪𑀸𑀚𑀦𑀯𑀺𑀲𑁂𑀲𑀪𑀽𑀢𑀸𑀬 𑀓𑀼𑀭𑀼𑀭𑀝𑁆𑀞𑀯𑀸𑀲𑀺𑀧𑀭𑀺𑀲𑀸𑀬 𑀤𑁂𑀲𑀺𑀢𑀸 𑀘 𑀪𑀕𑀯𑀢𑁄 𑀅𑀬𑀁 𑀤𑁂𑀲𑀦𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑁄𑀪𑀢𑀺, 𑀓𑀺𑀘𑁆𑀘𑀓𑀸𑀭𑀻 𑀘 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀬𑀣𑀸 𑀳𑀺 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸. 𑀏𑀢𑁆𑀣𑀸𑀢𑀺 𑀓𑀼𑀭𑀼𑀭𑀝𑁆𑀞𑁂.

𑀧𑀓𑀢𑀺𑀬𑀸𑀢𑀺 𑀲𑀭𑀲𑀢𑁄, 𑀇𑀫𑀺𑀲𑁆𑀲𑀸 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀤𑁂𑀲𑀦𑀸𑀬 𑀧𑀼𑀩𑁆𑀩𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺 𑀲𑀢𑁆𑀣𑀼 𑀤𑁂𑀲𑀦𑀸𑀦𑀼𑀲𑀸𑀭𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀲𑁆𑀲𑀝𑁆𑀞𑀅𑀢𑁆𑀢𑀪𑀸𑀯𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀓𑀺𑀲𑁆𑀫𑀺𑀜𑁆𑀘𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀘𑀺𑀢𑁆𑀢𑀁 𑀅𑀦𑀺𑀬𑁄𑀚𑁂𑀢𑁆𑀯𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀅𑀪𑀺𑀭𑀢𑀺𑀯𑀲𑁂𑀦 𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑁂𑀦 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀫𑀸𑀤𑀯𑀺𑀳𑀸𑀭𑀁 𑀧𑀳𑀸𑀬 𑀅𑀧𑁆𑀧𑀫𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑀸𑀬𑀦𑁄𑀢𑀺 𑀏𑀢𑁆𑀣 𑀅𑀬𑀦-𑀲𑀤𑁆𑀤𑁄 𑀫𑀕𑁆𑀕𑀧𑀭𑀺𑀬𑀸𑀬𑁄. 𑀦 𑀓𑁂𑀯𑀮𑀫𑀬𑀦𑀫𑁂𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀩𑀳𑀽 𑀫𑀕𑁆𑀕𑀧𑀭𑀺𑀬𑀸𑀬𑀸𑀢𑀺 𑀧𑀤𑀼𑀤𑁆𑀥𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀫𑀕𑁆𑀕𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀢𑁆𑀯𑀸 𑀬𑀤𑀺 𑀫𑀕𑁆𑀕𑀧𑀭𑀺𑀬𑀸𑀬𑁄 𑀅𑀬𑀦-𑀲𑀤𑁆𑀤𑁄, 𑀓𑀲𑁆𑀫𑀸 𑀧𑀼𑀦 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀓𑀫𑀕𑁆𑀕𑁄𑀢𑀺 𑀏𑀓𑁄 𑀏𑀯 𑀫𑀕𑁆𑀕𑁄. 𑀦 𑀳𑀺 𑀦𑀺𑀩𑁆𑀩𑀸𑀦𑀕𑀸𑀫𑀻 𑀫𑀕𑁆𑀕𑁄 𑀅𑀜𑁆𑀜𑁄 𑀅𑀢𑁆𑀣𑀻𑀢𑀺. 𑀦𑀦𑀼 𑀲𑀢𑀺𑀧𑀝𑁆𑀞𑀸𑀦𑀁 𑀇𑀥 ‘‘𑀫𑀕𑁆𑀕𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀤𑀜𑁆𑀜𑁂 𑀘 𑀩𑀳𑀽 𑀫𑀕𑁆𑀕𑀥𑀫𑁆𑀫𑀸 𑀅𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀅𑀢𑁆𑀣𑀺, 𑀢𑁂 𑀧𑀦 𑀲𑀢𑀺𑀧𑀝𑁆𑀞𑀸𑀦𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀜𑀸𑀡𑀯𑀻𑀭𑀺𑀬𑀸𑀤𑀬𑁄 𑀦𑀺𑀤𑁆𑀤𑁂𑀲𑁂 𑀕𑀳𑀺𑀢𑀸. 𑀉𑀤𑁆𑀤𑁂𑀲𑁂 𑀧𑀦 𑀲𑀢𑀺𑀬𑀸 𑀏𑀯 𑀕𑀳𑀡𑀁 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀤𑁆𑀯𑁂𑀥𑀸𑀧𑀣𑀪𑀽𑀢𑁄𑀢𑀺 𑀇𑀫𑀺𑀦𑀸 𑀇𑀫𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑁂𑀓𑀫𑀕𑁆𑀕𑀢𑀸𑀪𑀸𑀯𑀁 𑀯𑀺𑀬 𑀅𑀦𑀺𑀩𑁆𑀩𑀸𑀦𑀕𑀸𑀫𑀺𑀪𑀸𑀯𑀸𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀺. 𑀏𑀓𑁂𑀦𑀸𑀢𑀺 𑀅𑀲𑀳𑀸𑀬𑁂𑀦. 𑀅𑀲𑀳𑀸𑀬𑀢𑀸 𑀘 𑀤𑀼𑀯𑀺𑀥𑀸 𑀅𑀢𑁆𑀢𑀤𑀼𑀢𑀺𑀬𑀢𑀸𑀪𑀸𑀯𑁂𑀦 𑀯𑀸, 𑀬𑀸 ‘‘𑀯𑀽𑀧𑀓𑀝𑁆𑀞𑀓𑀸𑀬𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀡𑁆𑀳𑀸𑀤𑀼𑀢𑀺𑀬𑀢𑀸𑀪𑀸𑀯𑁂𑀦 𑀯𑀸, 𑀬𑀸 ‘‘𑀧𑀯𑀺𑀯𑀺𑀢𑁆𑀢𑀘𑀺𑀢𑁆𑀢𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀯𑀽𑀧𑀓𑀝𑁆𑀞𑁂𑀦 𑀧𑀯𑀺𑀯𑀺𑀢𑁆𑀢𑀘𑀺𑀢𑁆𑀢𑁂𑀦𑀸’’𑀢𑀺. 𑀲𑁂𑀝𑁆𑀞𑁄𑀧𑀺 𑀮𑁄𑀓𑁂 ‘‘𑀏𑀓𑁄’’𑀢𑀺 𑀯𑀼𑀘𑁆𑀘𑀢𑀺 ‘‘𑀬𑀸𑀯 𑀧𑀭𑁂 𑀏𑀓𑀢𑁄 𑀓𑀭𑁄𑀲𑀻’’𑀢𑀺𑀆𑀤𑀻𑀲𑀽𑀢𑀺 𑀆𑀳 ‘‘𑀏𑀓𑀲𑁆𑀲𑀸𑀢𑀺 𑀲𑁂𑀝𑁆𑀞𑀲𑁆𑀲𑀸’’𑀢𑀺. 𑀬𑀤𑀺 𑀲𑀁𑀲𑀸𑀭𑀢𑁄 𑀦𑀺𑀲𑁆𑀲𑀭𑀡𑀝𑁆𑀞𑁄 𑀅𑀬𑀦𑀝𑁆𑀞𑁄 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸𑀦𑀁 𑀲𑀸𑀥𑀸𑀭𑀡𑁄 𑀓𑀣𑀁 𑀪𑀕𑀯𑀢𑁄𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁 𑀔𑁄𑀢𑀺 𑀏𑀢𑁆𑀣 𑀔𑁄-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀤𑁂𑀲𑀦𑀸𑀪𑁂𑀤𑁄𑀬𑁂𑀯 𑀳𑁂𑀲𑁄, 𑀬𑀤𑀺𑀤𑀁 𑀫𑀕𑁆𑀕𑁄𑀢𑀺 𑀯𑀸 𑀅𑀬𑀦𑁄𑀢𑀺 𑀯𑀸. 𑀢𑁂𑀦𑀸𑀳 ‘‘𑀅𑀢𑁆𑀣𑁄 𑀧𑀦𑁂𑀓𑁄’’𑀢𑀺.

𑀦𑀸𑀦𑀸𑀫𑀼𑀔𑀪𑀸𑀯𑀦𑀸𑀦𑀬𑀧𑁆𑀧𑀯𑀢𑁆𑀢𑁄𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀫𑀼𑀔𑁂𑀦 𑀢𑀢𑁆𑀣𑀸𑀧𑀺 𑀆𑀦𑀸𑀧𑀸𑀦𑀸𑀤𑀺𑀫𑀼𑀔𑁂𑀦 𑀪𑀸𑀯𑀦𑀸𑀦𑀬𑁂𑀦 𑀧𑀯𑀢𑁆𑀢𑁄. 𑀏𑀓𑀸𑀬𑀦𑀦𑁆𑀢𑀺 𑀏𑀓𑀕𑀸𑀫𑀺𑀦𑀁, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀅𑀤𑀼𑀢𑀺𑀬𑀢𑁆𑀢𑀸 𑀲𑁂𑀝𑁆𑀞𑀢𑁆𑀢𑀸 𑀘 ‘‘𑀏𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀻𑀬𑀫𑀢𑁆𑀣𑀻’’𑀢𑀺 (𑀲𑀼. 𑀦𑀺. 𑁮𑁯𑁦) ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀘. 𑀔𑀬𑁄 𑀏𑀯 𑀅𑀦𑁆𑀢𑁄𑀢𑀺 𑀔𑀬𑀦𑁆𑀢𑁄, 𑀚𑀸𑀢𑀺𑀬𑀸 𑀔𑀬𑀦𑁆𑀢𑀁 𑀤𑀺𑀝𑁆𑀞𑀯𑀸𑀢𑀺 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻. 𑀅𑀯𑀺𑀪𑀸𑀕𑁂𑀦 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀢𑀻𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻. 𑀅𑀢𑀭𑀺𑀁𑀲𑀽𑀢𑀺 𑀢𑀭𑀺𑀁𑀲𑀼. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀓𑀸 𑀩𑀼𑀤𑁆𑀥𑀸, 𑀧𑀼𑀩𑁆𑀩𑁂 𑀯𑀸 𑀅𑀢𑀻𑀢𑀓𑀸𑀮𑁂.

𑀢𑀦𑁆𑀢𑀺 𑀢𑀁 𑀢𑁂𑀲𑀁 𑀯𑀘𑀦𑀁, 𑀢𑀁 𑀯𑀸 𑀓𑀺𑀭𑀺𑀬𑀸𑀯𑀼𑀢𑁆𑀢𑀺𑀯𑀸𑀘𑀓𑀢𑁆𑀢𑀁 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀲𑀗𑁆𑀔𑁂𑀬𑁆𑀬𑀧𑁆𑀧𑀥𑀸𑀦𑀢𑀸𑀬 𑀲𑀢𑁆𑀢𑀯𑀸𑀘𑀺𑀦𑁄 𑀏𑀓-𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀯𑀼𑀢𑁆𑀢𑀺𑀯𑀸𑀘𑀓𑀢𑀸 𑀅𑀢𑁆𑀣𑀺. ‘‘𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁭.𑁭𑁨) 𑀯𑀺𑀬 ‘‘𑀲𑀓𑀺𑀁 𑀅𑀬𑀦𑁄’’𑀢𑀺 𑀇𑀫𑀺𑀦𑀸 𑀩𑁆𑀬𑀜𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀁 𑀅𑀢𑁆𑀣𑀁 𑀬𑁄𑀚𑁂𑀢𑁆𑀯𑀸𑀢𑀺 𑀏𑀯𑀁 𑀧𑀤𑀢𑁆𑀣𑀁 𑀬𑁄𑀚𑁂𑀢𑁆𑀯𑀸. 𑀉𑀪𑀬𑀣𑀸𑀧𑀻𑀢𑀺 𑀧𑀼𑀭𑀺𑀫𑀦𑀬𑁂𑀦 𑀧𑀘𑁆𑀙𑀺𑀫𑀦𑀬𑁂𑀦 𑀘. 𑀦 𑀬𑀼𑀚𑁆𑀚𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀫𑀕𑁆𑀕𑀲𑁆𑀲 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀓𑀲𑁆𑀫𑀸’’𑀢𑀺𑀆𑀤𑀺. 𑀅𑀦𑁂𑀓𑀯𑀸𑀭𑀫𑁆𑀧𑀺 𑀅𑀬𑀢𑀻𑀢𑀺 𑀧𑀼𑀭𑀺𑀫𑀦𑀬𑀲𑁆𑀲, 𑀅𑀦𑁂𑀓𑀜𑁆𑀘𑀲𑁆𑀲 𑀅𑀬𑀦𑀁 𑀳𑁄𑀢𑀻𑀢𑀺 𑀧𑀘𑁆𑀙𑀺𑀫𑀦𑀬𑀲𑁆𑀲 𑀘 𑀧𑀝𑀺𑀓𑁆𑀔𑁂𑀧𑁄.

𑀇𑀫𑀲𑁆𑀫𑀺𑀁 𑀧𑀤𑁂𑀢𑀺 ‘‘𑀏𑀓𑀸𑀬𑀦𑁄 𑀅𑀬𑀁 𑀪𑀺𑀓𑁆𑀔𑀯𑁂 𑀫𑀕𑁆𑀕𑁄’’𑀢𑀺 𑀇𑀫𑀲𑁆𑀫𑀺𑀁 𑀯𑀸𑀓𑁆𑀬𑁂, 𑀇𑀫𑀲𑁆𑀫𑀺𑀁 𑀯𑀸 ‘‘𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄’’𑀢𑀺 𑀲𑀁𑀲𑀬𑀝𑁆𑀞𑀸𑀦𑁂. 𑀫𑀺𑀲𑁆𑀲𑀓𑀫𑀕𑁆𑀕𑁄𑀢𑀺 𑀮𑁄𑀓𑀺𑀬𑁂𑀦 𑀫𑀺𑀲𑁆𑀲𑀓𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄. 𑀯𑀺𑀲𑀼𑀤𑁆𑀥𑀺𑀆𑀤𑀻𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑀳𑁂𑀢𑀼𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 𑀆𑀘𑀭𑀺𑀬𑀢𑁆𑀣𑁂𑀭𑁄 ‘‘𑀫𑀺𑀲𑁆𑀲𑀓𑀫𑀕𑁆𑀕𑁄’’𑀢𑀺 𑀆𑀳, 𑀇𑀢𑀭𑁄 𑀧𑀭𑀺𑀬𑀸𑀬𑀳𑁂𑀢𑀼 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 ‘‘𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄’’𑀢𑀺.

𑀲𑀤𑁆𑀤𑀁 𑀲𑀼𑀢𑁆𑀯𑀸𑀯𑀸𑀢𑀺 ‘‘𑀓𑀸𑀮𑁄, 𑀪𑀦𑁆𑀢𑁂, 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺 𑀓𑀸𑀮𑀸𑀭𑁄𑀘𑀦𑀲𑀤𑁆𑀤𑀁 𑀲𑀼𑀢𑁆𑀯𑀸. 𑀏𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀢𑀺. 𑀏𑀯𑀁 ‘‘𑀫𑀥𑀼𑀭𑀁 𑀇𑀫𑀁 𑀓𑀼𑀳𑀺𑀁 𑀙𑀟𑁆𑀟𑁂𑀫𑀸’’𑀢𑀺 𑀅𑀙𑀟𑁆𑀟𑁂𑀦𑁆𑀢𑀸 𑀉𑀘𑁆𑀙𑀼𑀪𑀸𑀭𑀁 𑀯𑀺𑀬 𑀧𑀕𑁆𑀕𑀳𑁂𑀢𑁆𑀯𑀸 𑀦 𑀯𑀺𑀘𑀭𑀦𑁆𑀢𑀺. 𑀆𑀮𑀼𑀴𑁂𑀢𑀻𑀢𑀺 𑀯𑀺𑀮𑀼𑀴𑀺𑀢𑁄 𑀆𑀓𑀼𑀮𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀸𑀬𑀦𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀧𑀼𑀩𑁆𑀩𑀪𑀸𑀕𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀣𑁂 𑀲𑀺𑀤𑁆𑀥𑁂 𑀢𑀲𑁆𑀲𑁂𑀯 𑀅𑀮𑀗𑁆𑀓𑀸𑀭𑀢𑁆𑀣𑀁 𑀲𑁄 𑀧𑀦 𑀬𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄’’𑀢𑀺𑀆𑀤𑀺𑀓𑀸 𑀕𑀸𑀣𑀸𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀢𑁄𑀯 𑀆𑀦𑁂𑀢𑁆𑀯𑀸 𑀞𑀧𑀺𑀢𑀸.

𑀦𑀺𑀩𑁆𑀩𑀸𑀦𑀕𑀫𑀦𑀝𑁆𑀞𑁂𑀦𑀸𑀢𑀺 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺 𑀅𑀥𑀺𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀦𑀺𑀩𑁆𑀩𑀸𑀦𑀕𑀫𑀦𑀁, 𑀲𑁄 𑀏𑀯 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑀸𑀬 𑀅𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀸𑀦𑀕𑀫𑀦𑀝𑁆𑀞𑁂𑀦, 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀼𑀧𑀸𑀬𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀦𑀻𑀬𑀝𑁆𑀞𑁂𑀦𑀸𑀢𑀺 𑀕𑀯𑁂𑀲𑀺𑀢𑀩𑁆𑀩𑀢𑀸𑀬, ‘‘𑀕𑀫𑀦𑀻𑀬𑀝𑁆𑀞𑁂𑀦𑀸’’𑀢𑀺 𑀯𑀸 𑀧𑀸𑀞𑁄, 𑀉𑀧𑀕𑀦𑁆𑀢𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀭𑀸𑀕𑀸𑀤𑀻𑀳𑀻𑀢𑀺. 𑀇𑀫𑀺𑀦𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁𑀬𑁂𑀯 𑀕𑀳𑀡𑀁 ‘‘𑀭𑀸𑀕𑁄 𑀫𑀮𑀁, 𑀤𑁄𑀲𑁄 𑀫𑀮𑀁, 𑀫𑁄𑀳𑁄 𑀫𑀮’’𑀦𑁆𑀢𑀺 (𑀯𑀺𑀪. 𑁯𑁨𑁪) 𑀯𑀘𑀦𑀢𑁄. ‘‘𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀸𑀤𑀻𑀳𑀻’’𑀢𑀺 𑀧𑀦 𑀇𑀫𑀺𑀦𑀸 𑀲𑀩𑁆𑀩𑁂𑀲𑀫𑁆𑀧𑀺 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀢𑁂 𑀯𑀺𑀲𑀼𑀁 𑀉𑀤𑁆𑀥𑀝𑀸. 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀏𑀓𑀦𑁆𑀢𑀺𑀓𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀁 ‘‘𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 𑀲𑀸𑀫𑀜𑁆𑀜𑀚𑁄𑀢𑀦𑀸, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀏𑀯 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀫𑀮𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀁 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯, 𑀅𑀣 𑀔𑁄 𑀇𑀤𑀫𑁂𑀢𑁆𑀣 𑀆𑀳𑀘𑁆𑀘𑀪𑀸𑀲𑀺𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳.

𑀲𑀸 𑀧𑀦𑀸𑀬𑀁 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀲𑀺𑀚𑁆𑀛𑀫𑀸𑀦𑀸 𑀬𑀲𑁆𑀫𑀸 𑀲𑁄𑀓𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑁄𑀘𑀦𑀁 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀺𑀫𑀺𑀢𑁆𑀢𑀁 𑀘𑁂𑀢𑀲𑁄 𑀲𑀦𑁆𑀢𑀸𑀧𑁄 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀁 𑀲𑁄𑀓𑁄. 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀺𑀫𑀺𑀢𑁆𑀢𑀫𑁂𑀯 𑀲𑁄𑀓𑀸𑀥𑀺𑀓𑀢𑀸𑀬 ‘‘𑀓𑀳𑀁, 𑀏𑀓𑀧𑀼𑀢𑁆𑀢𑀓, 𑀓𑀳𑀁, 𑀏𑀓𑀧𑀼𑀢𑁆𑀢𑀓𑀸’’𑀢𑀺 𑀧𑀭𑀺𑀤𑁂𑀯𑀯𑀲𑁂𑀦 𑀮𑀧𑀦𑀁 𑀧𑀭𑀺𑀤𑁂𑀯𑁄, 𑀆𑀬𑀢𑀺𑀁 𑀅𑀦𑀼𑀧𑁆𑀧𑀚𑁆𑀚𑀦𑀁 𑀇𑀥 𑀲𑀫𑀢𑀺𑀓𑁆𑀓𑀫𑁄𑀢𑀺 𑀆𑀳 ‘‘𑀧𑀳𑀸𑀦𑀸𑀬𑀸’’𑀢𑀺. 𑀢𑀁 𑀧𑀦𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀯𑀳𑀢𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀳𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀥𑁂𑀳𑀻𑀢𑀺 𑀅𑀢𑀻𑀢𑁂𑀲𑀼 𑀔𑀦𑁆𑀥𑁂𑀲𑀼 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀯𑀺𑀲𑁄𑀥𑀦𑀁 𑀯𑀼𑀢𑁆𑀢𑀁. 𑀧𑀘𑁆𑀙𑀸𑀢𑀺 𑀧𑀭𑀢𑁄. 𑀢𑁂𑀢𑀺 𑀢𑀼𑀬𑁆𑀳𑀁. 𑀫𑀸𑀳𑀽𑀢𑀺 𑀫𑀸 𑀅𑀳𑀼. 𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀁. 𑀏𑀢𑁂𑀦 𑀅𑀦𑀸𑀕𑀢𑁂𑀲𑀼 𑀔𑀦𑁆𑀥𑁂𑀲𑀼 𑀲𑀁𑀓𑀺𑀮𑁂𑀲𑀯𑀺𑀲𑁄𑀥𑀦𑀁 𑀯𑀼𑀢𑁆𑀢𑀁. 𑀫𑀚𑁆𑀛𑁂𑀢𑀺 𑀢𑀤𑀼𑀪𑀬𑀯𑁂𑀫𑀚𑁆𑀛𑁂. 𑀦𑁄 𑀘𑁂 𑀕𑀳𑁂𑀲𑁆𑀲𑀲𑀻𑀢𑀺 𑀦 𑀉𑀧𑀸𑀤𑀺𑀬𑀺𑀲𑁆𑀲𑀲𑀺 𑀘𑁂. 𑀏𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀔𑀦𑁆𑀥𑀧𑀩𑀦𑁆𑀥𑁂 𑀉𑀧𑀸𑀤𑀸𑀦𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸. 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻𑀢𑀺 𑀏𑀯𑀁 𑀅𑀤𑁆𑀥𑀢𑁆𑀢𑀬𑀕𑀢𑀲𑀁𑀓𑀺𑀮𑁂𑀲𑀯𑀺𑀲𑁄𑀥𑀦𑁂 𑀲𑀢𑀺 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑀢𑀸𑀬 𑀉𑀧𑀲𑀦𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀲𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀕𑀸𑀣𑀁 𑀦𑀺𑀝𑁆𑀞𑀧𑁂𑀲𑀺. 𑀢𑁂𑀦𑀸𑀳 ‘‘𑀇𑀫𑀁 𑀕𑀸𑀣’’𑀦𑁆𑀢𑀺𑀆𑀤𑀺.

𑀧𑀼𑀢𑁆𑀢𑀸𑀢𑀺 𑀑𑀭𑀲𑀸, 𑀅𑀜𑁆𑀜𑁂𑀧𑀺 𑀯𑀸 𑀬𑁂 𑀓𑁂𑀘𑀺. 𑀧𑀺𑀢𑀸𑀢𑀺 𑀚𑀦𑀓𑁄. 𑀩𑀦𑁆𑀥𑀯𑀸𑀢𑀺 𑀜𑀸𑀢𑀓𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀧𑀼𑀢𑁆𑀢𑀸 𑀯𑀸 𑀧𑀺𑀢𑀸 𑀯𑀸 𑀩𑀦𑁆𑀥𑀯𑀸 𑀯𑀸 𑀅𑀦𑁆𑀢𑀓𑁂𑀦 𑀫𑀘𑁆𑀘𑀼𑀦𑀸 𑀅𑀥𑀺𑀧𑀦𑁆𑀦𑀲𑁆𑀲 𑀅𑀪𑀺𑀪𑀽𑀢𑀲𑁆𑀲 𑀫𑀭𑀡𑀢𑁄 𑀢𑀸𑀡𑀸𑀬 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸𑀢𑀺. 𑀦 𑀳𑀺 𑀜𑀸𑀢𑀻𑀦𑀁 𑀯𑀲𑁂𑀦 𑀫𑀭𑀡𑀢𑁄 𑀆𑀭𑀓𑁆𑀔𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀧𑀝𑀸𑀘𑀸𑀭𑁂 ‘‘𑀉𑀪𑁄 𑀧𑀼𑀢𑁆𑀢𑀸 𑀓𑀸𑀮𑀓𑀢𑀸’’𑀢𑀺𑀆𑀤𑀺𑀦𑀸 (𑀅𑀧. 𑀣𑁂𑀭𑀻 𑁨.𑁨.𑁪𑁯𑁮) 𑀫𑀸 𑀦𑀺𑀭𑀢𑁆𑀣𑀓𑀁 𑀧𑀭𑀺𑀤𑁂𑀯𑀺, 𑀥𑀫𑁆𑀫𑀁𑀬𑁂𑀯 𑀧𑀦 𑀬𑀸𑀣𑀸𑀯𑀢𑁄 𑀧𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸𑀢𑀺 𑀬𑀣𑀸𑀦𑀼𑀮𑁄𑀫𑀁 𑀧𑀯𑀢𑁆𑀢𑀺𑀢𑀸𑀬 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑁂 𑀲𑀳𑀲𑁆𑀲𑀦𑀬𑀧𑀝𑀺𑀫𑀡𑁆𑀟𑀺𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀓𑀣𑀁 𑀧𑀦𑀸𑀬𑀁 𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀻𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀦 𑀳𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀓𑀣𑀸𑀬 𑀯𑀺𑀦𑀸 𑀲𑀸𑀯𑀓𑀸𑀦𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁄 𑀅𑀢𑁆𑀣𑀺. ‘‘𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸’’𑀢𑀺 𑀧𑀦 𑀇𑀤𑀁 𑀲𑁄𑀓𑀯𑀺𑀦𑁄𑀤𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀸𑀬 𑀕𑀸𑀣𑀸𑀬 𑀧𑀞𑀫𑀁 𑀲𑀼𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀇𑀢𑀭𑀕𑀸𑀣𑀸𑀬𑀧𑀺. 𑀪𑀸𑀯𑀦𑀸𑀢𑀺 𑀧𑀜𑁆𑀜𑀸𑀪𑀸𑀯𑀦𑀸. 𑀲𑀸 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀭𑀽𑀧𑀸𑀤𑀻𑀦𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀅𑀦𑀼𑀧𑀲𑁆𑀲𑀦𑀸𑀧𑀺 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸, 𑀢𑀲𑁆𑀫𑀸. 𑀢𑁂𑀧𑀻𑀢𑀺 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀧𑀝𑀸𑀘𑀸𑀭𑀸.

𑀧𑀜𑁆𑀘𑀲𑀢𑁂 𑀘𑁄𑀭𑁂𑀢𑀺 𑀲𑀢𑀲𑀢𑀘𑁄𑀭𑀧𑀭𑀺𑀯𑀸𑀭𑁂 𑀧𑀜𑁆𑀘 𑀘𑁄𑀭𑁂 𑀧𑀝𑀺𑀧𑀸𑀝𑀺𑀬𑀸 𑀧𑁂𑀲𑁂𑀲𑀺. 𑀢𑁂 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀣𑁂𑀭𑀁 𑀧𑀭𑀺𑀬𑁂𑀲𑀦𑁆𑀢𑀸 𑀅𑀦𑀼𑀓𑁆𑀓𑀫𑁂𑀦 𑀣𑁂𑀭𑀲𑁆𑀲 𑀲𑀫𑀻𑀧𑁂 𑀲𑀫𑀸𑀕𑀘𑁆𑀙𑀺𑀁𑀲𑀼. 𑀢𑁂𑀦𑀸𑀳 ‘‘𑀢𑁂 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀽’’𑀢𑀺. 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀣𑁂𑀭𑀲𑁆𑀲 𑀳𑀺 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀲𑀼𑀧𑀭𑀺𑀲𑀼𑀤𑁆𑀥𑀁 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀉𑀴𑀸𑀭𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀊𑀭𑀼𑀝𑁆𑀞𑀺𑀪𑁂𑀤𑀚𑀦𑀺𑀢𑀁 𑀤𑀼𑀓𑁆𑀔𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀲𑀺. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀲𑀜𑁆𑀜𑀧𑁂𑀲𑁆𑀲𑀸𑀫𑀻𑀢𑀺 𑀲𑀜𑁆𑀜𑀢𑁆𑀢𑀺𑀁 𑀓𑀭𑀺𑀲𑁆𑀲𑀸𑀫𑀺. 𑀅𑀟𑁆𑀟𑀺𑀬𑀸𑀫𑀻𑀢𑀺 𑀚𑀺𑀕𑀼𑀘𑁆𑀙𑀸𑀫𑀺. 𑀳𑀭𑀸𑀬𑀸𑀫𑀻𑀢𑀺 𑀮𑀚𑁆𑀚𑀸𑀫𑀺. 𑀯𑀺𑀧𑀲𑁆𑀲𑀺𑀲𑀦𑁆𑀢𑀺 𑀲𑀫𑁆𑀫𑀲𑀺𑀁.

𑀧𑀘𑀮𑀸𑀬𑀦𑁆𑀢𑀸𑀦𑀦𑁆𑀢𑀺 𑀧𑀘𑀮𑀸𑀬𑀦𑀁 𑀦𑀺𑀤𑁆𑀤𑀁 𑀉𑀧𑀕𑀢𑀸𑀦𑀁. 𑀯𑀢𑀲𑀫𑁆𑀧𑀦𑁆𑀦𑁄𑀢𑀺 𑀥𑀼𑀢𑀘𑀭𑀡𑀲𑀫𑁆𑀧𑀦𑁆𑀦𑁄. 𑀧𑀫𑀸𑀤𑀦𑁆𑀢𑀺 𑀧𑀘𑀮𑀸𑀬𑀦𑀁 𑀲𑀦𑁆𑀥𑀸𑀬𑀸𑀳. 𑀑𑀭𑀼𑀤𑁆𑀥𑀫𑀸𑀦𑀲𑁄𑀢𑀺 𑀉𑀧𑀭𑀼𑀤𑁆𑀥𑀅𑀥𑀺𑀘𑀺𑀢𑁆𑀢𑁄. 𑀧𑀜𑁆𑀚𑀭𑀲𑁆𑀫𑀺𑀦𑁆𑀢𑀺 𑀲𑀭𑀻𑀭𑁂. 𑀲𑀭𑀻𑀭𑀜𑁆𑀳𑀺 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀅𑀝𑁆𑀞𑀺𑀲𑀗𑁆𑀖𑀸𑀢𑀢𑀸𑀬 𑀇𑀥 ‘‘𑀧𑀜𑁆𑀚𑀭’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀻𑀢𑀯𑀡𑁆𑀡𑀸𑀬 𑀧𑀝𑀸𑀓𑀸𑀬 𑀧𑀭𑀺𑀳𑀭𑀡𑀢𑁄 𑀫𑀮𑁆𑀮𑀬𑀼𑀤𑁆𑀥𑀘𑀺𑀢𑁆𑀢𑀓𑀢𑀸𑀬 𑀘 𑀧𑀻𑀢𑀫𑀮𑁆𑀮𑁄. 𑀢𑀻𑀲𑀼 𑀭𑀚𑁆𑀚𑁂𑀲𑀽𑀢𑀺 𑀧𑀡𑁆𑀟𑀼𑀘𑁄𑀴𑀕𑁄𑀴𑀭𑀚𑁆𑀚𑁂𑀲𑀼. 𑀫𑀮𑁆𑀮𑀸 𑀲𑀻𑀳𑀴𑀤𑀻𑀧𑁂 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀮𑀪𑀦𑁆𑀢𑀻𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀆𑀕𑀫𑁆𑀫. 𑀢𑀁𑀬𑁂𑀯 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸𑀢𑀺 ‘‘𑀭𑀽𑀧𑀸𑀤𑀬𑁄 ‘𑀫𑀫𑀸’𑀢𑀺 𑀦 𑀕𑀳𑁂𑀢𑀩𑁆𑀩𑀸’’𑀢𑀺 𑀦 𑀢𑀼𑀫𑁆𑀳𑀸𑀓𑀯𑀕𑁆𑀕𑁂𑀦 (𑀲𑀁. 𑀦𑀺. 𑁩.𑁩𑁩-𑁩𑁪) 𑀧𑀓𑀸𑀲𑀺𑀢𑀫𑀢𑁆𑀣𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀫𑀢𑁆𑀢𑀳𑀢𑁆𑀣𑀺𑀦𑁄 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸. 𑀚𑀡𑁆𑀡𑀼𑀓𑁂𑀳𑀺 𑀘𑀗𑁆𑀓𑀫𑀢𑀺 ‘‘𑀦𑀺𑀲𑀺𑀦𑁆𑀦𑁂 𑀦𑀺𑀤𑁆𑀤𑀸𑀬 𑀅𑀯𑀲𑀭𑁄 𑀳𑁄𑀢𑀻’’𑀢𑀺. 𑀩𑁆𑀬𑀸𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀲𑀨𑀮𑀢𑀸𑀧𑀯𑁂𑀤𑀦𑀫𑀼𑀔𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀢𑁆𑀯𑀸. 𑀪𑀸𑀲𑀺𑀢𑀦𑁆𑀢𑀺 𑀯𑀘𑀦𑀁. 𑀓𑀲𑁆𑀲 𑀧𑀦 𑀢𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲,𑀲𑀩𑁆𑀩𑀮𑁄𑀓𑀕𑁆𑀕𑀯𑀸𑀤𑀺𑀦𑁄’’𑀢𑀺. 𑀦 𑀢𑀼𑀫𑁆𑀳𑀸𑀓𑀦𑁆𑀢𑀺𑀆𑀤𑀺 𑀢𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁. 𑀢𑀬𑀺𑀤𑀁 𑀫𑁂 𑀲𑀗𑁆𑀔𑀸𑀭𑀸𑀦𑀁 𑀅𑀘𑁆𑀘𑀦𑁆𑀢𑀯𑀽𑀧𑀲𑀫𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀺𑀘𑁆𑀘𑀸 𑀯𑀢𑀸’’𑀢𑀺 𑀕𑀸𑀣𑀁 𑀆𑀳𑀭𑀺. 𑀢𑁂𑀦 𑀇𑀤𑀸𑀦𑀸𑀳𑀁 𑀲𑀗𑁆𑀔𑀸𑀭𑀸𑀦𑀁 𑀔𑀡𑁂 𑀔𑀡𑁂 𑀪𑀗𑁆𑀕𑀲𑀗𑁆𑀔𑀸𑀢𑀲𑁆𑀲 𑀭𑁄𑀕𑀲𑁆𑀲 𑀅𑀪𑀸𑀯𑁂𑀦 𑀅𑀭𑁄𑀕𑁄 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀅𑀲𑁆𑀲𑀸𑀢𑀺 𑀲𑀓𑁆𑀓𑀲𑁆𑀲. 𑀉𑀧𑀧𑀢𑁆𑀢𑀻𑀢𑀺 𑀤𑁂𑀯𑀽𑀧𑀧𑀢𑁆𑀢𑀺. 𑀧𑀼𑀦𑀧𑀸𑀓𑀢𑀺𑀓𑀸𑀯 𑀅𑀳𑁄𑀲𑀺 𑀲𑀓𑁆𑀓𑀪𑀸𑀯𑁂𑀦𑁂𑀯 𑀉𑀧𑀧𑀦𑁆𑀦𑀢𑁆𑀢𑀸. 𑀲𑀼𑀩𑁆𑀭𑀳𑁆𑀫𑀸𑀢𑀺 𑀏𑀯𑀁 𑀦𑀸𑀫𑁄. 𑀅𑀘𑁆𑀙𑀭𑀸𑀦𑀁 𑀦𑀺𑀭𑀬𑀽𑀧𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀢𑁄 𑀧𑀪𑀼𑀢𑀺 𑀲𑀢𑀢𑀁 𑀧𑀯𑀢𑁆𑀢𑀫𑀸𑀦𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀼𑀢𑁆𑀭𑀸𑀲𑀁 𑀲𑀦𑁆𑀥𑀸𑀬𑀸𑀳 ‘‘𑀦𑀺𑀘𑁆𑀘𑀁 𑀉𑀢𑁆𑀭𑀲𑁆𑀢𑀫𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀉𑀢𑁆𑀭𑀲𑁆𑀢𑀦𑁆𑀢𑀺 𑀲𑀦𑁆𑀢𑀲𑁆𑀢𑀁 𑀪𑀻𑀢𑀁. 𑀉𑀩𑁆𑀩𑀺𑀕𑁆𑀕𑀦𑁆𑀢𑀺 𑀲𑀁𑀯𑀺𑀕𑁆𑀕𑀁. 𑀉𑀢𑁆𑀭𑀲𑁆𑀢𑀦𑁆𑀢𑀺 𑀯𑀸 𑀲𑀁𑀯𑀺𑀕𑁆𑀕𑀁. 𑀉𑀩𑁆𑀩𑀺𑀕𑁆𑀕𑀦𑁆𑀢𑀺 𑀪𑀬𑀯𑀲𑁂𑀦 𑀲𑀳 𑀓𑀸𑀬𑁂𑀦 𑀲𑀜𑁆𑀘𑀮𑀺𑀢𑀁. 𑀅𑀦𑀼𑀧𑁆𑀧𑀦𑁆𑀦𑁂𑀲𑀽𑀢𑀺 𑀅𑀦𑀸𑀕𑀢𑁂𑀲𑀼. 𑀓𑀺𑀘𑁆𑀙𑁂𑀲𑀽𑀢𑀺 𑀤𑀼𑀓𑁆𑀔𑁂𑀲𑀼. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀪𑀸𑀯𑀻𑀤𑀼𑀓𑁆𑀔𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀢𑀺𑀢𑁂𑀲𑀽𑀢𑀺 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀙𑁂𑀲𑀽𑀢𑀺 𑀬𑁄𑀚𑀦𑀸, 𑀢𑀤𑀸 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀲𑁆𑀲 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀩𑁄𑀚𑁆𑀛𑀸𑀢𑀺 𑀩𑁄𑀥𑀺𑀢𑁄, 𑀅𑀭𑀺𑀬𑀫𑀕𑁆𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭𑀸𑀢𑀺 𑀘 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀢𑀲𑁆𑀫𑀸 𑀩𑁄𑀥𑀺𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀧𑀲𑀸𑀢𑀺 𑀢𑀧𑁄𑀓𑀫𑁆𑀫𑀢𑁄. 𑀢𑁂𑀦 𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑀪𑀽𑀢𑀁 𑀥𑀼𑀢𑀗𑁆𑀕𑀲𑁂𑀯𑀦𑀸𑀤𑀺𑀲𑀮𑁆𑀮𑁂𑀔𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀺. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀁𑀯𑀭𑀡𑀢𑁄. 𑀏𑀢𑁂𑀦 𑀲𑀢𑀺𑀲𑀁𑀯𑀭𑀲𑀻𑀲𑁂𑀦 𑀲𑀩𑁆𑀩𑀫𑁆𑀧𑀺 𑀲𑀁𑀯𑀭𑀲𑀻𑀮𑀁, 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀯𑀸 𑀲𑀩𑁆𑀩𑀫𑁆𑀧𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸𑀢𑀺 𑀲𑀩𑁆𑀩𑀼𑀧𑀥𑀺𑀦𑀺𑀲𑁆𑀲𑀚𑁆𑀚𑀦𑀢𑁄 𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀢𑁄. 𑀓𑀺𑀮𑁂𑀲𑁂𑀲𑀼 𑀳𑀺 𑀦𑀺𑀲𑁆𑀲𑀝𑁆𑀞𑁂𑀲𑀼 𑀓𑀫𑁆𑀫𑀯𑀝𑁆𑀝𑀁 𑀯𑀺𑀧𑀸𑀓𑀯𑀝𑁆𑀝𑀜𑁆𑀘 𑀦𑀺𑀲𑁆𑀲𑀝𑁆𑀞𑀫𑁂𑀯 𑀳𑁄𑀢𑀻𑀢𑀺. 𑀲𑁄𑀢𑁆𑀣𑀺𑀦𑁆𑀢𑀺 𑀔𑁂𑀫𑀁 𑀅𑀦𑀼𑀧𑀤𑁆𑀤𑀯𑀢𑀁.

𑀜𑀸𑀬𑀢𑀺 𑀦𑀺𑀘𑁆𑀙𑀬𑁂𑀦 𑀓𑀫𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀯𑀸 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀏𑀢𑁂𑀦𑀸𑀢𑀺 𑀜𑀸𑀬𑁄, 𑀅𑀭𑀺𑀬𑀫𑀕𑁆𑀕𑁄𑀢𑀺 𑀆𑀳 ‘‘𑀜𑀸𑀬𑁄 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺. 𑀢𑀡𑁆𑀳𑀸𑀯𑀸𑀦𑀯𑀺𑀭𑀳𑀺𑀢𑀢𑁆𑀢𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑀯𑀸𑀦𑀯𑀺𑀯𑀺𑀢𑁆𑀢𑀢𑁆𑀢𑀸. 𑀢𑀡𑁆𑀳𑀸 𑀳𑀺 𑀔𑀦𑁆𑀥𑁂𑀳𑀺 𑀔𑀦𑁆𑀥𑀁, 𑀓𑀫𑁆𑀫𑀼𑀦𑀸 𑀯𑀸 𑀨𑀮𑀁, 𑀲𑀢𑁆𑀢𑁂𑀳𑀺 𑀯𑀸 𑀤𑀼𑀓𑁆𑀔𑀁 𑀯𑀺𑀦𑀢𑀺 𑀲𑀁𑀲𑀺𑀩𑁆𑀩𑀢𑀻𑀢𑀺 𑀯𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀬𑀺𑀤𑀁 𑀦𑀢𑁆𑀣𑀺 𑀏𑀢𑁆𑀣 𑀯𑀸𑀦𑀁, 𑀦 𑀯𑀸 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀧𑀼𑀕𑁆𑀕𑀮𑀲𑁆𑀲 𑀯𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀧𑀭𑀧𑀘𑁆𑀘𑀬𑁂𑀦 𑀯𑀺𑀦𑀸 𑀧𑀘𑁆𑀘𑀓𑁆𑀔𑀓𑀭𑀡𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀆𑀳 ‘‘𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬𑀸’’𑀢𑀺.

𑀦𑀦𑀼 ‘‘𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀺𑀲𑀼𑀤𑁆𑀥𑀺𑀕𑁆𑀕𑀳𑀡𑁂𑀦𑁂𑀯𑁂𑀢𑁆𑀣 𑀲𑁄𑀓𑀲𑀫𑀢𑀺𑀓𑁆𑀓𑀫𑀸𑀤𑀬𑁄𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺, 𑀢𑁂 𑀧𑀼𑀦 𑀓𑀲𑁆𑀫𑀸 𑀕𑀳𑀺𑀢𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀲𑀦𑀬𑀼𑀢𑁆𑀢𑀺𑀓𑁄𑀯𑀺𑀤𑁂𑀢𑀺 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀮𑀓𑁆𑀔𑀡𑀸𑀬𑀁 𑀥𑀫𑁆𑀫𑀦𑀻𑀢𑀺𑀬𑀁 𑀙𑁂𑀓𑁂. 𑀢𑀁 𑀢𑀁 𑀅𑀢𑁆𑀣𑀁 𑀜𑀸𑀧𑁂𑀢𑀻𑀢𑀺 𑀬𑁂 𑀬𑁂 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀸 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀤𑀺𑀯𑀲𑁂𑀦 𑀬𑀣𑀸 𑀬𑀣𑀸 𑀩𑁄𑀥𑁂𑀢𑀩𑁆𑀩𑀸, 𑀅𑀢𑁆𑀢𑀦𑁄 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀪𑀕𑀯𑀸 𑀢𑁂 𑀢𑁂 𑀢𑀣𑀸 𑀢𑀣𑀸 𑀩𑁄𑀥𑁂𑀦𑁆𑀢𑁄 𑀢𑀁 𑀢𑀫𑀢𑁆𑀣𑀁 𑀜𑀸𑀧𑁂𑀢𑀺. 𑀢𑀁 𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀢𑁆𑀣𑀸𑀧𑀢𑁆𑀢𑀺𑀁 𑀅𑀕𑀡𑁂𑀦𑁆𑀢𑁄 𑀢𑀁 𑀢𑀁 𑀅𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄. 𑀦 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀢𑁆𑀣𑀸𑀧𑀢𑁆𑀢𑀺𑀜𑀸𑀧𑀓𑀸𑀤𑀺𑀲𑀸𑀥𑀦𑀻𑀬𑀯𑀘𑀦𑀸𑀢𑀺. 𑀲𑀁𑀯𑀢𑁆𑀢𑀢𑀻𑀢𑀺 𑀚𑀸𑀬𑀢𑀺, 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀅𑀦𑀢𑀺𑀓𑁆𑀓𑀦𑁆𑀢𑀲𑁄𑀓𑀧𑀭𑀺𑀤𑁂𑀯𑀲𑁆𑀲 𑀦 𑀓𑀤𑀸𑀘𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀅𑀢𑁆𑀣𑀺 𑀲𑁄𑀓𑀧𑀭𑀺𑀤𑁂𑀯𑀲𑀫𑀢𑀺𑀓𑁆𑀓𑀫𑀫𑀼𑀔𑁂𑀦𑁂𑀯 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀇𑀚𑁆𑀛𑀦𑀢𑁄, 𑀢𑀲𑁆𑀫𑀸 𑀆𑀳 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑁂𑀦 𑀳𑁄𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 𑀤𑁄𑀫𑀦𑀲𑁆𑀲𑀧𑀘𑁆𑀘𑀬𑁂𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺 𑀧𑀼𑀝𑁆𑀞𑀁 𑀧𑀼𑀣𑀼𑀚𑁆𑀚𑀦𑀁 𑀲𑁄𑀓𑀸𑀤𑀬𑁄 𑀅𑀪𑀺𑀪𑀯𑀦𑁆𑀢𑀺, 𑀧𑀭𑀺𑀜𑁆𑀜𑀸𑀢𑁂𑀲𑀼 𑀘 𑀢𑁂𑀲𑀼 𑀢𑁂 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑁄 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑁂𑀦𑀸’’𑀢𑀺. 𑀜𑀸𑀬𑀲𑁆𑀲𑀸𑀢𑀺 𑀅𑀕𑁆𑀕𑀫𑀕𑁆𑀕𑀲𑁆𑀲 𑀢𑀢𑀺𑀬𑀫𑀕𑁆𑀕𑀲𑁆𑀲 𑀘. 𑀢𑀤𑀥𑀺𑀕𑀫𑁂𑀦 𑀳𑀺 𑀬𑀣𑀸𑀓𑁆𑀓𑀫𑀁 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀲𑀳𑀪𑀸𑀯𑀻𑀧𑀺 𑀇𑀢𑀭𑀸𑀪𑀺𑀲𑀫𑀬𑁄 𑀢𑀤𑀯𑀺𑀦𑀸𑀪𑀸𑀯𑀢𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀳𑁂𑀢𑀼𑀓𑁄 𑀯𑀺𑀬 𑀯𑀼𑀢𑁆𑀢𑁄 ‘‘𑀜𑀸𑀬𑀲𑁆𑀲𑀸𑀥𑀺𑀕𑀫𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺. 𑀨𑀮𑀜𑀸𑀡𑁂𑀦 𑀯𑀸 𑀧𑀘𑁆𑀘𑀓𑁆𑀔𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀫𑁆𑀧𑀤𑀸𑀦𑀯𑀘𑀦𑀜𑁆𑀘𑁂𑀢𑀁 𑀤𑀝𑁆𑀞𑀩𑁆𑀩𑀁.

𑀯𑀡𑁆𑀡𑀪𑀡𑀦𑀦𑁆𑀢𑀺 𑀧𑀲𑀁𑀲𑀸𑀯𑀘𑀦𑀁. 𑀢𑀬𑀺𑀤𑀁 𑀦 𑀇𑀥𑁂𑀯, 𑀅𑀣 𑀔𑁄 𑀅𑀜𑁆𑀜𑀢𑁆𑀣𑀸𑀧𑀺 𑀲𑀢𑁆𑀣𑀸 𑀅𑀓𑀸𑀲𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑁂𑀯 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀁, 𑀆𑀤𑀺 𑀯𑀸 𑀓𑀮𑁆𑀬𑀸𑀡𑀁 𑀏𑀢𑀲𑁆𑀲𑀸𑀢𑀺 𑀆𑀤𑀺𑀓𑀮𑁆𑀬𑀸𑀡𑀁. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁. 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀧𑀸𑀭𑀺𑀧𑀽𑀭𑀺𑀢𑁄 𑀉𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀘 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁. 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑁄 𑀅𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀘 𑀧𑀭𑀺𑀲𑀼𑀤𑁆𑀥𑀁. 𑀲𑁂𑀝𑁆𑀞𑀘𑀭𑀺𑀬𑀪𑀸𑀯𑀢𑁄 𑀲𑀸𑀲𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀯𑁄 𑀧𑀓𑀸𑀲𑁂𑀲𑁆𑀲𑀸𑀫𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁭) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀺𑀬𑀯𑀁𑀲𑀸𑀢𑀺 𑀅𑀭𑀺𑀬𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀯𑀁𑀲𑀸 𑀧𑀯𑁂𑀡𑀺𑀬𑁄. 𑀅𑀕𑁆𑀕𑀜𑁆𑀜𑀸𑀢𑀺 ‘‘𑀅𑀕𑁆𑀕𑀸’’𑀢𑀺 𑀚𑀸𑀦𑀺𑀢𑀩𑁆𑀩𑀸 𑀲𑀩𑁆𑀩𑀯𑀁𑀲𑁂𑀳𑀺 𑀲𑁂𑀝𑁆𑀞𑀪𑀸𑀯𑀢𑁄. 𑀭𑀢𑁆𑀢𑀜𑁆𑀜𑀸𑀢𑀺 ‘‘𑀘𑀺𑀭𑀭𑀢𑁆𑀢𑀸’’𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀯𑀁𑀲𑀜𑁆𑀜𑀸𑀢𑀺 ‘‘𑀩𑀼𑀤𑁆𑀥𑀸𑀤𑀻𑀦𑀁 𑀯𑀁𑀲𑀸’’𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀧𑁄𑀭𑀸𑀡𑀸𑀢𑀺 𑀧𑀼𑀭𑀸𑀢𑀦𑀸 𑀅𑀦𑀥𑀼𑀦𑀸𑀢𑀦𑀢𑁆𑀢𑀸. 𑀅𑀲𑀁𑀓𑀺𑀡𑁆𑀡𑀸𑀢𑀺 𑀅𑀯𑀺𑀓𑀺𑀡𑁆𑀡𑀸 𑀅𑀦𑀧𑀦𑀻𑀢𑀸. 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀢𑀺 ‘‘𑀓𑀺𑀁 𑀇𑀫𑁂𑀳𑀻’’𑀢𑀺 𑀅𑀭𑀺𑀬𑁂𑀳𑀺 𑀦 𑀅𑀧𑀦𑀻𑀢𑀧𑀼𑀩𑁆𑀩𑀸. 𑀦 𑀲𑀁𑀓𑀻𑀬𑀦𑁆𑀢𑀻𑀢𑀺 𑀇𑀤𑀸𑀦𑀺𑀧𑀺 𑀢𑁂𑀳𑀺 𑀦 𑀅𑀧𑀦𑀻𑀬𑀦𑁆𑀢𑀺. 𑀦 𑀲𑀁𑀓𑀻𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀸𑀕𑀢𑁂𑀧𑀺 𑀢𑁂𑀳𑀺 𑀦 𑀅𑀧𑀦𑀻𑀬𑀺𑀲𑁆𑀲𑀦𑁆𑀢𑀺. 𑀅𑀧𑁆𑀧𑀝𑀺𑀓𑀼𑀝𑁆𑀞𑀸…𑀧𑁂… 𑀯𑀺𑀜𑁆𑀜𑀽𑀳𑀻𑀢𑀺 𑀬𑁂 𑀮𑁄𑀓𑁂 𑀯𑀺𑀜𑁆𑀜𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀢𑁂𑀳𑀺 𑀅𑀧𑀘𑁆𑀘𑀓𑁆𑀔𑀢𑀸 𑀅𑀦𑀺𑀦𑁆𑀤𑀺𑀢𑀸, 𑀅𑀕𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀲𑀼𑀤𑁆𑀥𑀺𑀬𑀸𑀢𑀺𑀆𑀤𑀻𑀳𑀻𑀢𑀺 𑀯𑀺𑀲𑀼𑀤𑁆𑀥𑀺𑀆𑀤𑀺𑀤𑀻𑀧𑀦𑁂𑀳𑀺. 𑀧𑀤𑁂𑀳𑀻𑀢𑀺 𑀯𑀸𑀓𑁆𑀬𑁂𑀳𑀺, 𑀯𑀺𑀲𑀼𑀤𑁆𑀥𑀺𑀅𑀢𑁆𑀣𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀳𑀺 𑀯𑀸 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀳𑀺.

𑀉𑀧𑀤𑁆𑀤𑀯𑁂𑀢𑀺 𑀅𑀦𑀢𑁆𑀣𑁂. 𑀯𑀺𑀲𑀼𑀤𑁆𑀥𑀺𑀦𑁆𑀢𑀺 𑀯𑀺𑀲𑀼𑀚𑁆𑀛𑀦𑀁 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁. 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄. 𑀧𑀭𑀺𑀬𑀸𑀧𑀼𑀡𑀦𑀁 𑀧𑀭𑀺𑀘𑀬𑁄. 𑀅𑀢𑁆𑀣𑀲𑁆𑀲 𑀳𑀤𑀬𑁂 𑀞𑀧𑀦𑀁 𑀥𑀸𑀭𑀡𑀁. 𑀧𑀭𑀺𑀯𑀢𑁆𑀢𑀦𑀁 𑀯𑀸𑀘𑀦𑀁. 𑀕𑀦𑁆𑀥𑀸𑀭𑀓𑁄𑀢𑀺 𑀕𑀦𑁆𑀥𑀸𑀭𑀤𑁂𑀲𑁂 𑀉𑀧𑁆𑀧𑀦𑁆𑀦𑁄. 𑀧𑀳𑁄𑀦𑁆𑀢𑀻𑀢𑀺 𑀲𑀓𑁆𑀓𑁄𑀦𑁆𑀢𑀺 𑀅𑀦𑀺𑀬𑁆𑀬𑀸𑀦𑀫𑀕𑁆𑀕𑀸𑀢𑀺 𑀫𑀺𑀘𑁆𑀙𑀸𑀫𑀕𑁆𑀕𑀸, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀺𑀬𑀢𑀫𑀕𑁆𑀕𑀸𑀧𑀺 𑀯𑀸. 𑀲𑀼𑀯𑀡𑁆𑀡𑀦𑁆𑀢𑀺 𑀓𑀽𑀝𑀲𑀼𑀯𑀡𑁆𑀡𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀧𑀡𑀻𑀢𑀺 𑀓𑀸𑀘𑀫𑀡𑀺𑀧𑀺. 𑀫𑀼𑀢𑁆𑀢𑀸𑀢𑀺 𑀯𑁂𑀴𑀼𑀚𑀸𑀧𑀺. 𑀧𑀯𑀸𑀴𑀦𑁆𑀢𑀺 𑀧𑀮𑁆𑀮𑀯𑁄𑀧𑀺 𑀯𑀼𑀘𑁆𑀘𑀢𑀻𑀢𑀺 𑀭𑀢𑁆𑀢𑀚𑀫𑁆𑀩𑀼𑀦𑀤𑀸𑀤𑀺𑀧𑀤𑁂𑀳𑀺 𑀢𑁂 𑀯𑀺𑀲𑁂𑀲𑀺𑀢𑀸.

𑀦 𑀢𑀢𑁄 𑀳𑁂𑀝𑁆𑀞𑀸𑀢𑀺 (𑀲𑀁. 𑀦𑀺. 𑀝𑀻. 𑁨.𑁫.𑁩𑁬𑁭; 𑀤𑀻. 𑀦𑀺. 𑀝𑀻. 𑁨.𑁩𑁭𑁩) 𑀇𑀥𑀸𑀥𑀺𑀧𑁆𑀧𑁂𑀢𑀓𑀸𑀬𑀸𑀤𑀻𑀦𑀁 𑀯𑁂𑀤𑀦𑀸𑀤𑀺𑀲𑀪𑀸𑀯𑀢𑁆𑀢𑀸𑀪𑀸𑀯𑀸, 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀯𑀺𑀫𑀼𑀢𑁆𑀢𑀲𑁆𑀲 𑀢𑁂𑀪𑀽𑀫𑀓𑀥𑀫𑁆𑀫𑀲𑁆𑀲 𑀯𑀺𑀲𑀼𑀁 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀦𑁆𑀢𑀭𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀘 𑀳𑁂𑀝𑁆𑀞𑀸𑀕𑀳𑀡𑁂𑀲𑀼 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀁 𑀅𑀦𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀜𑁆𑀘𑀫𑀲𑁆𑀲 𑀧𑀦 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀼𑀦𑁄 𑀅𑀪𑀸𑀯𑀸 ‘‘𑀦 𑀉𑀤𑁆𑀥’’𑀦𑁆𑀢𑀺 𑀆𑀳. 𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀦 𑀳𑁂𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀸𑀕𑁄𑀢𑀺. 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀤𑀲𑁆𑀲𑀦𑀁, 𑀦 𑀇𑀥 𑀧𑀸𑀴𑀺𑀬𑀁 𑀯𑀼𑀢𑁆𑀢𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀦𑁆𑀢𑀺. 𑀆𑀤𑀻𑀲𑀼 𑀳𑀺 𑀲𑀢𑀺𑀕𑁄𑀘𑀭𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑁄, 𑀦𑀸𑀫𑀭𑀽𑀧𑀲𑀫𑀼𑀤𑀬𑀸 𑀘𑀺𑀢𑁆𑀢𑀲𑁆𑀲 𑀲𑀫𑀼𑀤𑀬𑁄, 𑀫𑀦𑀲𑀺𑀓𑀸𑀭𑀲𑀫𑀼𑀤𑀬𑀸 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑁄’’𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀼𑀢𑁆𑀢𑀸𑀦𑀁 𑀲𑀢𑀺𑀕𑁄𑀘𑀭𑀸𑀦𑀁 𑀧𑀓𑀸𑀲𑀓𑁂 𑀲𑀼𑀢𑁆𑀢𑀧𑀤𑁂𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀫𑁆𑀧𑀺 (𑀧𑀝𑀺. 𑀫. 𑁩.𑁩𑁪) 𑀅𑀯𑀲𑁂𑀲𑀧𑀸𑀴𑀺𑀧𑁆𑀧𑀤𑁂𑀲𑀤𑀲𑁆𑀲𑀦𑀢𑁆𑀣𑁄 𑀆𑀤𑀺-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺𑀬𑀸 𑀧𑀢𑀺𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑀁. 𑀤𑀸𑀦𑀸𑀤𑀻𑀦𑀺 𑀲𑀢𑀺𑀬𑀸 𑀓𑀭𑁄𑀦𑁆𑀢𑀲𑁆𑀲 𑀭𑀽𑀧𑀸𑀤𑀻𑀦𑀺 𑀓𑀲𑀺𑀡𑀸𑀤𑀻𑀦𑀺 𑀘 𑀲𑀢𑀺𑀬𑀸 𑀞𑀸𑀦𑀁 𑀳𑁄𑀦𑁆𑀢𑀻𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑀫𑀸𑀳 ‘‘𑀧𑀥𑀸𑀦𑀁 𑀞𑀸𑀦’’𑀦𑁆𑀢𑀺. 𑀧-𑀲𑀤𑁆𑀤𑁄 𑀳𑀺 𑀇𑀥 ‘‘𑀧𑀡𑀻𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁪 𑀢𑀺𑀓𑀫𑀸𑀢𑀺𑀓𑀸) 𑀯𑀺𑀬 𑀧𑀥𑀸𑀦𑀢𑁆𑀣𑀤𑀻𑀧𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀭𑀺𑀬𑁄𑀢𑀺 𑀅𑀭𑀺𑀬𑀁 𑀲𑀩𑁆𑀩𑀲𑀢𑁆𑀢𑀲𑁂𑀝𑁆𑀞𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁩𑁧𑁧). 𑀲𑀼𑀢𑁆𑀢𑁂𑀓𑀤𑁂𑀲𑁂𑀦 𑀳𑀺 𑀲𑀼𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑁋

‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄…𑀧𑁂… 𑀫𑀭𑀳𑀢𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀇𑀥, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 ‘‘𑀇𑀤𑀁 𑀯𑁄 𑀳𑀺𑀢𑀸𑀬 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀬𑀤𑀭𑀺𑀬𑁄…𑀧𑁂… 𑀅𑀭𑀳𑀢𑀺.

𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸…𑀧𑁂… 𑀇𑀤𑀁 𑀯𑁄 𑀲𑀼𑀔𑀸𑀬𑀸𑀢𑀺. 𑀢𑀲𑁆𑀲 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀯𑀢𑁆𑀢𑀦𑁆𑀢𑀺. 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀦 𑀘 𑀯𑁄𑀓𑁆𑀓𑀫𑁆𑀫 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀦 𑀘𑁂𑀯 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀅𑀦𑀢𑁆𑀢𑀫𑀦𑀢𑀜𑁆𑀘 𑀅𑀢𑁆𑀢𑀫𑀦𑀢𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀢𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁…𑀧𑁂… 𑀅𑀭𑀳𑀢𑀺.

𑀧𑀼𑀦 𑀘𑀧𑀭𑀁…𑀧𑁂… 𑀲𑀼𑀔𑀸𑀬𑀸𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀢𑁆𑀢𑀫𑀦𑁄 𑀘𑁂𑀯 𑀳𑁄𑀢𑀺, 𑀅𑀢𑁆𑀢𑀫𑀦𑀢𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁…𑀧𑁂… 𑀅𑀭𑀳𑀢𑀻’’𑀢𑀺 (𑀫. 𑀦𑀺. 𑁩.𑁩𑁧𑁧) 𑁋

𑀏𑀯𑀁 𑀧𑀝𑀺𑀖𑀸𑀦𑀼𑀦𑀬𑁂𑀳𑀺 𑀅𑀦𑀯𑀲𑁆𑀲𑀼𑀢𑀢𑀸, 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸𑀬 𑀢𑀤𑀼𑀪𑀬𑀯𑀻𑀢𑀺𑀯𑀢𑁆𑀢𑀢𑀸 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀸𑀦𑀁𑀬𑁂𑀯 𑀳𑀺 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸 𑀳𑁄𑀢𑀺 𑀆𑀯𑁂𑀡𑀺𑀓𑀥𑀫𑁆𑀫𑀪𑀸𑀯𑀢𑁄, 𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀦𑀁. 𑀧-𑀲𑀤𑁆𑀤𑁄 𑀆𑀭𑀫𑁆𑀪𑀁 𑀚𑁄𑀢𑁂𑀢𑀺, 𑀆𑀭𑀫𑁆𑀪𑁄 𑀘 𑀧𑀯𑀢𑁆𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀧𑀯𑀢𑁆𑀢𑀬𑀺𑀢𑀩𑁆𑀩𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀲𑀢𑀺𑀬𑀸 𑀓𑀭𑀡𑀪𑀽𑀢𑀸𑀬 𑀧𑀝𑁆𑀞𑀸𑀦𑀁 𑀧𑀝𑁆𑀞𑀧𑁂𑀢𑀩𑁆𑀩𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀅𑀦-𑀲𑀤𑁆𑀤𑁄 𑀳𑀺 𑀩𑀳𑀼𑀮𑀯𑀘𑀦𑁂𑀦 𑀓𑀫𑁆𑀫𑀢𑁆𑀣𑁄𑀧𑀺 𑀳𑁄𑀢𑀻𑀢𑀺.

𑀢𑀣𑀸𑀲𑁆𑀲 𑀓𑀢𑁆𑀢𑀼𑀅𑀢𑁆𑀣𑁄𑀧𑀺 𑀮𑀩𑁆𑀪𑀢𑀻𑀢𑀺 ‘‘𑀧𑀢𑀺𑀝𑁆𑀞𑀸𑀢𑀻𑀢𑀺 𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧-𑀲𑀤𑁆𑀤𑁄 𑀪𑀽𑀲𑀢𑁆𑀣𑀯𑀺𑀲𑀺𑀝𑁆𑀞𑀁 𑀧𑀓𑁆𑀔𑀦𑁆𑀥𑀦𑀁 𑀤𑀻𑀧𑁂𑀢𑀻𑀢𑀺 ‘‘𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀧𑀼𑀦 𑀪𑀸𑀯𑀢𑁆𑀣𑀁 𑀲𑀢𑀺-𑀲𑀤𑁆𑀤𑀁 𑀧𑀝𑁆𑀞𑀸𑀦-𑀲𑀤𑁆𑀤𑀜𑁆𑀘 𑀯𑀡𑁆𑀡𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀧𑀼𑀭𑀺𑀫𑀯𑀺𑀓𑀧𑁆𑀧𑁂 𑀲𑀢𑀺-𑀲𑀤𑁆𑀤𑁄 𑀧𑀝𑁆𑀞𑀸𑀦-𑀲𑀤𑁆𑀤𑁄 𑀘 𑀓𑀢𑁆𑀣𑀼𑀅𑀢𑁆𑀣𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀭𑀡𑀝𑁆𑀞𑁂𑀦𑀸𑀢𑀺 𑀘𑀺𑀭𑀓𑀢𑀲𑁆𑀲 𑀘𑀺𑀭𑀪𑀸𑀲𑀺𑀢𑀲𑁆𑀲 𑀘 𑀅𑀦𑀼𑀲𑁆𑀲𑀭𑀡𑀝𑁆𑀞𑁂𑀦. 𑀇𑀤𑀦𑁆𑀢𑀺 𑀬𑀁 ‘‘𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀤𑀁 𑀇𑀥 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀧𑀤𑁂𑀲𑁂 𑀅𑀥𑀺𑀧𑁆𑀧𑁂𑀢𑀁.

𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀲𑀢𑀺 𑀏𑀯 𑀲𑀢𑀺𑀧𑀝𑁆𑀞𑀸𑀦𑀁, 𑀲𑀢𑀺 𑀦𑀸𑀫 𑀏𑀓𑁄 𑀥𑀫𑁆𑀫𑁄, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀢𑀺𑀩𑀳𑀼𑀢𑁆𑀢𑀸’’𑀢𑀺𑀆𑀤𑀺. 𑀬𑀤𑀺 𑀩𑀳𑀼𑀓𑀸 𑀏𑀢𑀸 𑀲𑀢𑀺𑀬𑁄, 𑀅𑀣 𑀓𑀲𑁆𑀫𑀸 ‘‘𑀫𑀕𑁆𑀕𑁄’’𑀢𑀺 𑀏𑀓𑀯𑀘𑀦𑀦𑁆𑀢𑀺 𑀬𑁄𑀚𑀦𑀸. 𑀫𑀕𑁆𑀕𑀝𑁆𑀞𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁂𑀦. 𑀦𑀺𑀬𑁆𑀬𑀸𑀦𑀺𑀓𑁄 𑀳𑀺 𑀫𑀕𑁆𑀕𑀥𑀫𑁆𑀫𑁄, 𑀢𑁂𑀦𑁂𑀯 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦 𑀏𑀓𑀢𑁆𑀢𑀼𑀧𑀕𑀢𑁄 𑀏𑀓𑀦𑁆𑀢𑀢𑁄 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺, 𑀅𑀢𑁆𑀣𑀺𑀓𑁂𑀳𑀺 𑀘 𑀢𑀤𑀢𑁆𑀣𑀁 𑀫𑀕𑁆𑀕𑀻𑀬𑀢𑀻𑀢𑀺 𑀅𑀢𑁆𑀢𑀦𑀸𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀧𑀘𑁆𑀘𑀸𑀳𑀭𑀢𑀺 ‘‘𑀯𑀼𑀢𑁆𑀢𑀜𑁆𑀘𑁂𑀢’’𑀦𑁆𑀢𑀺. 𑀢𑀢𑁆𑀣 𑀘𑀢𑀲𑁆𑀲𑁄𑀧𑀺 𑀘𑁂𑀢𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀧𑀺 𑀘 𑀏𑀢𑀸 𑀲𑀢𑀺𑀬𑁄. 𑀅𑀧𑀭𑀪𑀸𑀕𑁂𑀢𑀺 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂. 𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀓𑀸𑀬𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀼𑀪𑀲𑀜𑁆𑀜𑀸𑀤𑀺𑀯𑀺𑀥𑀫𑀦𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀯𑀢𑁆𑀢𑀺𑀢𑁆𑀯𑀸 𑀫𑀕𑁆𑀕𑀓𑁆𑀔𑀡𑁂 𑀲𑀓𑀺𑀁𑀬𑁂𑀯 𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀯𑀺𑀧𑀮𑁆𑀮𑀸𑀲𑀲𑁆𑀲 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀘𑀢𑀼𑀩𑁆𑀩𑀺𑀥𑀓𑀺𑀘𑁆𑀘𑀲𑀸𑀥𑀦𑁂𑀦𑁂𑀯 𑀳𑁂𑀢𑁆𑀣 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. 𑀏𑀯𑀜𑁆𑀘 𑀲𑀢𑀻𑀢𑀺 𑀫𑀕𑁆𑀕𑀝𑁆𑀞𑁂𑀦 𑀏𑀓𑀢𑁆𑀢𑀁 𑀉𑀧𑀸𑀤𑀸𑀬 ‘‘𑀫𑀕𑁆𑀕𑁄’’𑀢𑀺 𑀏𑀓𑀯𑀘𑀦𑁂𑀦 𑀆𑀭𑀫𑁆𑀫𑀡𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀢𑀁 𑀉𑀧𑀸𑀤𑀸𑀬 ‘‘𑀘𑀢𑁆𑀢𑀸𑀭𑁄’’𑀢𑀺 𑀘 𑀯𑀢𑁆𑀢𑀩𑁆𑀩𑀢𑀸𑀬 𑀲𑀢𑀺𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀯𑀘𑀦𑀸𑀦𑀼𑀲𑀦𑁆𑀥𑀺𑀦𑀸 ‘‘𑀏𑀓𑀸𑀬𑀦𑁄 𑀅𑀬’’𑀦𑁆𑀢𑀺𑀆𑀤𑀺𑀓𑀸 𑀤𑁂𑀲𑀦𑀸 𑀲𑀸𑀦𑀼𑀲𑀦𑁆𑀥𑀺𑀓𑀸𑀯, 𑀦 𑀅𑀦𑀦𑀼𑀲𑀦𑁆𑀥𑀺𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀤𑀲𑁆𑀲𑀦𑁂𑀦 𑀧𑀝𑀺𑀧𑀸𑀤𑁂𑀢𑀼𑀁 ‘‘𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦’’𑀦𑁆𑀢𑀺 𑀲𑀼𑀢𑁆𑀢𑀧𑀤𑀁 (𑀲𑀁. 𑀦𑀺. 𑁫.𑁨𑁨𑁪) 𑀆𑀦𑁂𑀢𑁆𑀯𑀸 ‘‘𑀬𑀣𑀸’’𑀢𑀺𑀆𑀤𑀺𑀦𑀸 𑀦𑀺𑀤𑀲𑁆𑀲𑀦𑀁 𑀲𑀁𑀲𑀦𑁆𑀤𑁂𑀢𑀺. 𑀢𑀲𑁆𑀫𑀸𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀯𑀺𑀲𑁂𑀲𑀢𑁄 𑀓𑀸𑀬𑁄 𑀘 𑀯𑁂𑀤𑀦𑀸 𑀘 𑀅𑀲𑁆𑀲𑀸𑀤𑀲𑁆𑀲𑀓𑀸𑀭𑀡𑀦𑁆𑀢𑀺 𑀢𑀧𑁆𑀧𑀳𑀸𑀦𑀢𑁆𑀣𑀁 𑀢𑁂𑀲𑀼 𑀢𑀡𑁆𑀳𑀸𑀯𑀢𑁆𑀣𑀽𑀲𑀼 𑀑𑀴𑀸𑀭𑀺𑀓𑀲𑀼𑀔𑀼𑀫𑁂𑀲𑀼 𑀅𑀲𑀼𑀪𑀤𑀼𑀓𑁆𑀔𑀪𑀸𑀯𑀤𑀲𑁆𑀲𑀦𑀸𑀦𑀺 𑀫𑀦𑁆𑀤𑀢𑀺𑀓𑁆𑀔𑀧𑀜𑁆𑀜𑁂𑀳𑀺 𑀢𑀡𑁆𑀳𑀸𑀘𑀭𑀺𑀢𑁂𑀳𑀺 𑀲𑀼𑀓𑀭𑀸𑀦𑀻𑀢𑀺 𑀢𑀸𑀦𑀺 𑀢𑁂𑀲𑀁 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀸𑀦𑀺 𑀢𑀣𑀸 ‘‘𑀦𑀺𑀘𑁆𑀘𑀁 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑁂𑀲𑀯𑀢𑁆𑀣𑀼𑀢𑀸𑀬 𑀤𑀺𑀝𑁆𑀞𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑁂𑀲𑀼 𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀅𑀦𑀺𑀘𑁆𑀘𑀸𑀦𑀢𑁆𑀢𑀢𑀸𑀤𑀲𑁆𑀲𑀦𑀸𑀦𑀺 𑀲𑀭𑀸𑀕𑀸𑀤𑀺𑀯𑀲𑁂𑀦 𑀲𑀜𑁆𑀜𑀸𑀨𑀲𑁆𑀲𑀸𑀤𑀺𑀯𑀲𑁂𑀦 𑀦𑀻𑀯𑀭𑀡𑀸𑀤𑀺𑀯𑀲𑁂𑀦 𑀘 𑀦𑀸𑀢𑀺𑀧𑁆𑀧𑀪𑁂𑀤𑀅𑀢𑀺𑀧𑁆𑀧𑀪𑁂𑀤𑀕𑀢𑁂𑀲𑀼 𑀢𑁂𑀲𑀼 𑀢𑀧𑁆𑀧𑀳𑀸𑀦𑀢𑁆𑀣𑀁 𑀫𑀦𑁆𑀤𑀢𑀺𑀓𑁆𑀔𑀧𑀜𑁆𑀜𑀸𑀦𑀁 𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀲𑀼𑀓𑀭𑀸𑀦𑀻𑀢𑀺 𑀢𑁂𑀲𑀁 𑀢𑀸𑀦𑀺 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀸𑀦𑀺. 𑀏𑀢𑁆𑀣 𑀘 𑀬𑀣𑀸 𑀘𑀺𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀢𑀡𑁆𑀳𑀸𑀬 𑀯𑀢𑁆𑀣𑀼𑀪𑀸𑀯𑁄 𑀲𑀫𑁆𑀪𑀯𑀢𑀺, 𑀢𑀣𑀸 𑀓𑀸𑀬𑀯𑁂𑀤𑀦𑀸𑀦𑀫𑁆𑀧𑀺 𑀤𑀺𑀝𑁆𑀞𑀺𑀬𑀸𑀢𑀺 𑀲𑀢𑀺𑀧𑀺 𑀦𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑀸 𑀯𑀢𑁆𑀣𑀼𑀪𑀸𑀯𑁂 𑀬𑁄 𑀬𑀲𑁆𑀲 𑀲𑀸𑀢𑀺𑀲𑀬𑀧𑀘𑁆𑀘𑀬𑁄, 𑀢𑀁𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑁂𑀲𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀺𑀓𑁆𑀔𑀧𑀜𑁆𑀜𑀲𑀫𑀣𑀬𑀸𑀦𑀺𑀓𑁄 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀢𑁆𑀣 𑀅𑀝𑁆𑀞𑀢𑁆𑀯𑀸 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀯𑁂𑀤𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀯𑀼𑀢𑁆𑀢𑀁. ‘‘𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑁂 𑀅𑀲𑀡𑁆𑀞𑀳𑀦𑀢𑁄’’𑀢𑀺. 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲 𑀧𑀦 𑀲𑀼𑀔𑀼𑀫𑁂 𑀘𑀺𑀢𑁆𑀢𑁂 𑀥𑀫𑁆𑀫𑁂𑀲𑀼 𑀘 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀦𑀁 𑀫𑀦𑁆𑀤𑀢𑀺𑀓𑁆𑀔𑀧𑀜𑁆𑀜𑀸𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑀸 𑀯𑀼𑀢𑁆𑀢𑀸.

𑀢𑁂𑀲𑀁 𑀢𑀢𑁆𑀣𑀸𑀢𑀺 𑀏𑀢𑁆𑀣 𑀢𑀢𑁆𑀣-𑀲𑀤𑁆𑀤𑀲𑁆𑀲 ‘‘𑀧𑀳𑀸𑀦𑀢𑁆𑀣’’𑀦𑁆𑀢𑀺 𑀏𑀢𑁂𑀦 𑀬𑁄𑀚𑀦𑀸. 𑀧𑀭𑀢𑁄 𑀢𑁂𑀲𑀁 𑀢𑀢𑁆𑀣𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯𑀦𑀬𑁄. 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀲𑀯𑀺𑀲𑁂𑀲𑀸 𑀓𑀸𑀬𑁂 𑀮𑀩𑁆𑀪𑀦𑁆𑀢𑀻𑀢𑀺 𑀯𑀺𑀲𑁂𑀲𑁂𑀦 𑀓𑀸𑀬𑁄 𑀓𑀸𑀫𑁄𑀖𑀲𑁆𑀲 𑀯𑀢𑁆𑀣𑀼, 𑀪𑀯𑁂𑀲𑀼 𑀲𑀼𑀔𑀕𑁆𑀕𑀳𑀡𑀯𑀲𑁂𑀦 𑀪𑀯𑀲𑁆𑀲𑀸𑀤𑁄 𑀳𑁄𑀢𑀺 𑀪𑀯𑁄𑀖𑀲𑁆𑀲 𑀯𑁂𑀤𑀦𑀸 𑀯𑀢𑁆𑀣𑀼, 𑀲𑀦𑁆𑀢𑀢𑀺𑀖𑀦𑀕𑀳𑀡𑀯𑀲𑁂𑀦 𑀯𑀺𑀲𑁂𑀲𑀢𑁄 𑀘𑀺𑀢𑁆𑀢𑁂 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀤𑀺𑀝𑁆𑀞𑁄𑀖𑀲𑁆𑀲 𑀘𑀺𑀢𑁆𑀢𑀁 𑀯𑀢𑁆𑀣𑀼, 𑀥𑀫𑁆𑀫𑁂𑀲𑀼 𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸 𑀥𑀫𑁆𑀫𑀸𑀦𑀁 𑀥𑀫𑁆𑀫𑀫𑀢𑁆𑀢𑀢𑀸𑀬 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑁆𑀢𑀸 𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺 𑀅𑀯𑀺𑀚𑁆𑀚𑁄𑀖𑀲𑁆𑀲 𑀥𑀫𑁆𑀫𑀸 𑀯𑀢𑁆𑀣𑀼, 𑀢𑀲𑁆𑀫𑀸 𑀢𑁂𑀲𑀁 𑀧𑀳𑀸𑀦𑀢𑁆𑀣𑀁 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸.

𑀬𑀤𑀕𑁆𑀕𑁂𑀦 𑀘 𑀓𑀸𑀬𑁄 𑀓𑀸𑀫𑁄𑀖𑀲𑁆𑀲 𑀯𑀢𑁆𑀣𑀼, 𑀢𑀤𑀕𑁆𑀕𑁂𑀦 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀽𑀢𑀸 𑀯𑁂𑀤𑀦𑀸 𑀯𑀺𑀲𑁂𑀲𑁂𑀦 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼, 𑀘𑀺𑀢𑁆𑀢𑁂 𑀦𑀺𑀘𑁆𑀘𑀕𑁆𑀕𑀳𑀡𑀯𑀲𑁂𑀦 𑀲𑀲𑁆𑀲𑀢𑀲𑁆𑀲 𑀅𑀢𑁆𑀢𑀦𑁄 𑀲𑀻𑀮𑁂𑀦 𑀲𑀼𑀤𑁆𑀥𑀻𑀢𑀺𑀆𑀤𑀺 𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑁆𑀲 𑀘𑀺𑀢𑁆𑀢𑀁 𑀯𑀢𑁆𑀣𑀼, 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀦 𑀪𑀽𑀢𑀁 𑀪𑀽𑀢𑀢𑁄 𑀅𑀧𑀲𑁆𑀲𑀦𑁆𑀢𑀲𑁆𑀲 𑀪𑀯𑀯𑀺𑀪𑀯𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀢𑀲𑁆𑀲 𑀥𑀫𑁆𑀫𑀸 𑀯𑀢𑁆𑀣𑀼, 𑀲𑀼𑀔𑀯𑁂𑀤𑀦𑀸𑀲𑁆𑀲𑀸𑀤𑀯𑀲𑁂𑀦 𑀧𑀭𑀮𑁄𑀓𑀦𑀺𑀭𑀧𑁂𑀓𑁆𑀔𑁄 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀁 𑀧𑀭𑀸𑀫𑀸𑀲𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑁆𑀲 𑀯𑁂𑀤𑀦𑀸 𑀯𑀢𑁆𑀣𑀼 𑀲𑀦𑁆𑀢𑀢𑀺𑀖𑀦𑀕𑀳𑀡𑀯𑀲𑁂𑀦 𑀲𑀭𑀸𑀕𑀸𑀤𑀺𑀘𑀺𑀢𑁆𑀢𑁂 𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺 𑀫𑁄𑀳𑀸𑀕𑀢𑀺𑀬𑀸 𑀘𑀺𑀢𑁆𑀢𑀁 𑀯𑀢𑁆𑀣𑀼, 𑀥𑀫𑁆𑀫𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀪𑀬𑀁 𑀳𑁄𑀢𑀻𑀢𑀺 𑀪𑀬𑀸𑀕𑀢𑀺𑀬𑀸 𑀥𑀫𑁆𑀫𑀸 𑀯𑀢𑁆𑀣𑀼. 𑀬𑁂 𑀧𑀦𑁂𑀢𑁆𑀣 𑀅𑀯𑀼𑀢𑁆𑀢𑀸, 𑀢𑁂𑀲𑀁 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀣𑀼𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀑𑀖𑁂𑀲𑀼 𑀯𑀼𑀢𑁆𑀢𑀦𑀬𑀸 𑀏𑀯 𑀬𑁄𑀕𑀸𑀲𑀯𑁂𑀲𑀼𑀧𑀺 𑀬𑁄𑀚𑀦𑀸 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀢𑁆𑀢𑀸. 𑀢𑀣𑀸 𑀧𑀞𑀫𑁄𑀖𑀢𑀢𑀺𑀬𑀘𑀢𑀼𑀢𑁆𑀣𑀕𑀦𑁆𑀣𑀬𑁄𑀚𑀦𑀸𑀬 𑀯𑀼𑀢𑁆𑀢𑀦𑀬𑀸 𑀏𑀯 𑀓𑀸𑀬𑀘𑀺𑀢𑁆𑀢𑀥𑀫𑁆𑀫𑀸𑀦𑀁 𑀇𑀢𑀭𑀽𑀧𑀸𑀤𑀸𑀦𑀯𑀢𑁆𑀣𑀼𑀢𑀸 𑀬𑁄𑀚𑀦𑀸, 𑀢𑀣𑀸 𑀓𑀸𑀫𑁄𑀖𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀬𑁄𑀚𑀦𑀸𑀬 𑀯𑀼𑀢𑁆𑀢𑀦𑀬𑀸 𑀏𑀯 𑀓𑀸𑀬𑀯𑁂𑀤𑀦𑀸𑀦𑀁 𑀙𑀦𑁆𑀤𑀤𑁄𑀲𑀸𑀕𑀢𑀺 𑀯𑀢𑁆𑀣𑀼𑀢𑀸 𑀬𑁄𑀚𑀦𑀸 𑀯𑀸.

‘‘𑀆𑀳𑀸𑀭𑀲𑀫𑀼𑀤𑀬𑀸 𑀓𑀸𑀬𑀲𑀫𑀼𑀤𑀬𑁄, 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄, (𑀲𑀁. 𑀦𑀺. 𑁫.𑁪𑁦𑁮) 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀉𑀤𑀸. 𑁧; 𑀯𑀺𑀪. 𑁨𑁨𑁫) 𑀯𑀘𑀦𑀢𑁄 𑀓𑀸𑀬𑀸𑀤𑀻𑀦𑀁 𑀲𑀫𑀼𑀤𑀬𑀪𑀽𑀢𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀨𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸𑀯𑀺𑀜𑁆𑀜𑀸𑀡𑀸𑀳𑀸𑀭𑀸 𑀓𑀸𑀬𑀸𑀤𑀺𑀧𑀭𑀺𑀚𑀸𑀦𑀦𑁂𑀦 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀘𑀢𑀼𑀩𑁆𑀩𑀺𑀥𑀸𑀳𑀸𑀭𑀧𑀭𑀺𑀜𑁆𑀜𑀢𑁆𑀣’’𑀦𑁆𑀢𑀺 𑀧𑀓𑀭𑀡𑀦𑀬𑁄𑀢𑀺 𑀦𑁂𑀢𑁆𑀢𑀺𑀧𑀓𑀭𑀡𑀯𑀲𑁂𑀦 𑀲𑀼𑀢𑁆𑀢𑀦𑁆𑀢𑀲𑀁𑀯𑀡𑁆𑀡𑀦𑀸𑀦𑀬𑁄.

𑀲𑀭𑀡𑀯𑀲𑁂𑀦𑀸𑀢𑀺 𑀓𑀸𑀬𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀜𑁆𑀘 𑀉𑀧𑀥𑀸𑀭𑀡𑀯𑀲𑁂𑀦. 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀏𑀢𑀸𑀬𑀸𑀢𑀺 𑀲𑀢𑀻𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀏𑀓𑀢𑁆𑀢𑁂 𑀏𑀓𑀲𑀪𑀸𑀯𑁂 𑀦𑀺𑀩𑁆𑀩𑀸𑀦𑁂 𑀲𑀫𑁄𑀲𑀭𑀡𑀁 𑀲𑀫𑀸𑀕𑀫𑁄 𑀏𑀓𑀢𑁆𑀢𑀲𑀫𑁄𑀲𑀭𑀡𑀁. 𑀏𑀢𑀤𑁂𑀯 𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀦𑀺𑀩𑁆𑀩𑀸𑀦𑀧𑀯𑁂𑀲𑀳𑁂𑀢𑀼𑀪𑀽𑀢𑀸 𑀯𑀸 𑀲𑀫𑀸𑀦𑀢𑀸 𑀏𑀓𑁄 𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀪𑀸𑀯𑁄 𑀏𑀓𑀢𑁆𑀢𑀁, 𑀢𑀢𑁆𑀣 𑀲𑀫𑁄𑀲𑀭𑀡𑀁 𑀢𑀁𑀲𑀪𑀸𑀕𑀢𑀸 𑀏𑀓𑀢𑁆𑀢𑀲𑀫𑁄𑀲𑀭𑀡𑀁. 𑀏𑀓𑀦𑀺𑀩𑁆𑀩𑀸𑀦𑀧𑀯𑁂𑀲𑀳𑁂𑀢𑀼𑀪𑀸𑀯𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀭𑀡𑁂𑀓𑀢𑁆𑀢𑀲𑀫𑁄𑀲𑀭𑀡𑀸𑀦𑀺 𑀲𑀳𑁂𑀯 𑀲𑀢𑀺𑀧𑀝𑁆𑀞𑀸𑀦𑁂𑀓𑀪𑀸𑀯𑀲𑁆𑀲 𑀓𑀸𑀭𑀡𑀢𑁆𑀣𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺, 𑀧𑀼𑀭𑀺𑀫𑀲𑁆𑀫𑀺𑀁 𑀯𑀺𑀲𑀼𑀁. 𑀲𑀭𑀡𑀯𑀲𑁂𑀦𑀸𑀢𑀺 𑀯𑀸 ‘‘𑀕𑀫𑀦𑀯𑀲𑁂𑀦𑀸’’𑀢𑀺 𑀅𑀢𑁆𑀣𑁂 𑀲𑀢𑀺 𑀢𑀤𑁂𑀯 𑀕𑀫𑀦𑀁 𑀲𑀫𑁄𑀲𑀭𑀡𑀦𑁆𑀢𑀺, 𑀲𑀫𑁄𑀲𑀭𑀡𑁂 𑀯𑀸 𑀲𑀢𑀺𑀲𑀤𑁆𑀤𑀢𑁆𑀣𑀯𑀲𑁂𑀦 𑀅𑀯𑀼𑀘𑁆𑀘𑀫𑀸𑀦𑁂 𑀥𑀸𑀭𑀡𑀢𑀸𑀯 𑀲𑀢𑀻𑀢𑀺 𑀲𑀢𑀺𑀲𑀤𑁆𑀤𑀢𑁆𑀣𑀦𑁆𑀢𑀭𑀸𑀪𑀸𑀯𑀸 𑀧𑀼𑀭𑀺𑀫𑀁 𑀲𑀢𑀺𑀪𑀸𑀯𑀲𑁆𑀲 𑀓𑀸𑀭𑀡𑀁, 𑀧𑀘𑁆𑀙𑀺𑀫𑀁 𑀏𑀓𑀪𑀸𑀯𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀲𑀫𑁄𑀲𑀭𑀡𑁂𑀧𑀺 𑀲𑀳𑀺𑀢𑀸𑀦𑁂𑀯 𑀢𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑁂𑀓𑀪𑀸𑀯𑀲𑁆𑀲 𑀓𑀸𑀭𑀡𑀸𑀦𑀺 𑀯𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀘𑀼𑀤𑁆𑀤𑀲𑀯𑀺𑀥𑁂𑀦,𑀦𑀯𑀯𑀺𑀥𑁂𑀦, 𑀲𑁄𑀴𑀲𑀯𑀺𑀥𑁂𑀦, 𑀧𑀜𑁆𑀘𑀯𑀺𑀥𑁂𑀦𑀸𑀢𑀺 𑀇𑀤𑀁 𑀉𑀧𑀭𑀺 𑀧𑀸𑀴𑀺𑀬𑀁 (𑀫. 𑀦𑀺. 𑁧.𑁧𑁦𑁭) 𑀆𑀕𑀢𑀸𑀦𑀁 𑀆𑀦𑀸𑀧𑀸𑀦𑀧𑀩𑁆𑀩𑀸𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀢𑁂𑀲𑀁 𑀧𑀦 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀢𑀤𑀦𑀼𑀕𑀢𑀪𑁂𑀤𑀯𑀲𑁂𑀦 𑀘 𑀪𑀸𑀯𑀦𑀸𑀬 𑀅𑀦𑁂𑀓𑀯𑀺𑀥𑀢𑀸 𑀮𑀩𑁆𑀪𑀢𑀺𑀬𑁂𑀯. 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀉𑀝𑁆𑀞𑀸𑀦𑀓𑀪𑀡𑁆𑀟𑀲𑀤𑀺𑀲𑀢𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀢𑀁𑀢𑀁𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀪𑀸𑀯𑀲𑁆𑀲 𑀤𑀝𑁆𑀞𑀩𑁆𑀩𑀸.

‘‘𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀣 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂’’𑀢𑀺𑀆𑀤𑀺𑀯𑀘𑀦𑀢𑁄 (𑀤𑀻. 𑀦𑀺. 𑁩.𑁮𑁦; 𑀲𑀁. 𑀦𑀺. 𑁫.𑁩𑁭𑁨) 𑀪𑀺𑀓𑁆𑀔𑀼𑀕𑁄𑀘𑀭𑀸 𑀏𑀢𑁂 𑀥𑀫𑁆𑀫𑀸, 𑀬𑀤𑀺𑀤𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀬𑁄. 𑀢𑀢𑁆𑀣 𑀬𑀲𑁆𑀫𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑀺, 𑀪𑀺𑀓𑁆𑀔𑀼𑀫𑁆𑀳𑀺 𑀢𑀁 𑀦𑀺𑀬𑀫𑀢𑁄𑀢𑀺 𑀆𑀳 ‘‘𑀧𑀝𑀺𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀪𑀸𑀯𑀤𑀲𑁆𑀲𑀦𑀢𑁄’’𑀢𑀺. 𑀲𑀢𑁆𑀣𑀼 𑀘𑀭𑀺𑀬𑀸𑀦𑀼𑀯𑀺𑀥𑀸𑀬𑀓𑀢𑁆𑀢𑀸 𑀲𑀓𑀮𑀲𑀸𑀲𑀦𑀲𑀫𑁆𑀧𑀝𑀺𑀕𑁆𑀕𑀸𑀳𑀓𑀢𑁆𑀢𑀸 𑀘 𑀲𑀩𑁆𑀩𑀧𑁆𑀧𑀓𑀸𑀭𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀪𑀸𑀚𑀦𑀪𑀸𑀯𑁄.

𑀲𑀫𑀁 𑀘𑀭𑁂𑀬𑁆𑀬𑀸𑀢𑀺 𑀓𑀸𑀬𑀸𑀤𑀺𑀯𑀺𑀲𑀫𑀘𑀭𑀺𑀬𑀁 𑀧𑀳𑀸𑀬 𑀓𑀸𑀬𑀸𑀤𑀻𑀳𑀺 𑀲𑀫𑀁 𑀘𑀭𑁂𑀬𑁆𑀬. 𑀭𑀸𑀕𑀸𑀤𑀺𑀯𑀽𑀧𑀲𑀫𑁂𑀦 𑀲𑀦𑁆𑀢𑁄. 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀤𑀦𑁆𑀢𑁄. 𑀘𑀢𑀼𑀫𑀕𑁆𑀕𑀦𑀺𑀬𑀸𑀫𑁂𑀦 𑀦𑀺𑀬𑀢𑁄. 𑀲𑁂𑀝𑁆𑀞𑀘𑀭𑀺𑀢𑀸𑀬 𑀩𑁆𑀭𑀳𑁆𑀫𑀘𑀸𑀭𑀻. 𑀓𑀸𑀬𑀤𑀡𑁆𑀟𑀸𑀤𑀺𑀑𑀭𑁄𑀧𑀦𑁂𑀦 𑀦𑀺𑀥𑀸𑀬 𑀤𑀡𑁆𑀟𑀁. 𑀅𑀭𑀺𑀬𑀪𑀸𑀯𑁂 𑀞𑀺𑀢𑁄 𑀲𑁄 𑀏𑀯𑀭𑀽𑀧𑁄 𑀩𑀸𑀳𑀺𑀢𑀧𑀸𑀧𑀲𑀫𑀺𑀢𑀧𑀸𑀧𑀪𑀺𑀦𑁆𑀦𑀓𑀺𑀮𑁂𑀲𑀢𑀸𑀳𑀺 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑁄 𑀪𑀺𑀓𑁆𑀔𑀽𑀢𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀬𑀜𑁆𑀘𑁂𑀯 𑀓𑀸𑀬𑁄 𑀩𑀳𑀺𑀤𑁆𑀥𑁄 𑀘 𑀦𑀸𑀫𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀝𑀻. 𑁨.𑁩𑁭𑁩) 𑀔𑀦𑁆𑀥𑀧𑀜𑁆𑀘𑀓𑀁, ‘‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁭𑁧, 𑁨𑁮𑁭; 𑀧𑀸𑀭𑀸. 𑁧𑁧) 𑀦𑀸𑀫𑀓𑀸𑀬𑁄 𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀓𑀸𑀬𑁂𑀢𑀺 𑀭𑀽𑀧𑀓𑀸𑀬𑁂’’𑀢𑀺 𑀆𑀳.

𑀅𑀲𑀫𑁆𑀫𑀺𑀲𑁆𑀲𑀢𑁄𑀢𑀺 ‘‘𑀯𑁂𑀤𑀦𑀸𑀤𑀬𑁄𑀧𑀺 𑀏𑀢𑁆𑀣 𑀲𑀺𑀢𑀸 𑀏𑀢𑁆𑀣 𑀧𑀝𑀺𑀩𑀤𑁆𑀥𑀸’’𑀢𑀺 𑀓𑀸𑀬𑁂 𑀯𑁂𑀤𑀦𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀧𑀲𑀗𑁆𑀕𑁂𑀧𑀺 𑀆𑀧𑀦𑁆𑀦𑁂 𑀢𑀢𑁄 𑀅𑀲𑀫𑁆𑀫𑀺𑀲𑁆𑀲𑀢𑁄𑀢𑀺 𑀅𑀢𑁆𑀣𑁄. 𑀲𑀫𑀽𑀳𑀯𑀺𑀲𑀬𑀢𑀸𑀬 𑀘𑀲𑁆𑀲 𑀓𑀸𑀬-𑀲𑀤𑁆𑀤𑀲𑁆𑀲 𑀲𑀫𑀼𑀤𑀸𑀬𑀼𑀧𑀸𑀤𑀸𑀦𑀢𑀸𑀬 𑀘 𑀅𑀲𑀼𑀪𑀸𑀓𑀸𑀭𑀲𑁆𑀲 ‘‘𑀓𑀸𑀬𑁂’’𑀢𑀺 𑀏𑀓𑀯𑀘𑀦𑀁, 𑀢𑀣𑀸 𑀆𑀭𑀫𑁆𑀫𑀡𑀸𑀤𑀺𑀯𑀺𑀪𑀸𑀕𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀫𑁆𑀧𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ‘‘𑀘𑀺𑀢𑁆𑀢𑁂’’𑀢𑀺 𑀏𑀓𑀯𑀘𑀦𑀁, 𑀯𑁂𑀤𑀦𑀸 𑀧𑀦 𑀲𑀼𑀔𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀯𑁂𑀤𑀦𑀸𑀲𑀽’’𑀢𑀺 𑀩𑀳𑀼𑀯𑀘𑀦𑁂𑀦 𑀯𑀼𑀢𑁆𑀢𑀸, 𑀢𑀣𑁂𑀯 𑀘 𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑀺𑀢𑁄, 𑀥𑀫𑁆𑀫𑀸 𑀘 𑀧𑀭𑁄𑀧𑀡𑁆𑀡𑀸𑀲𑀪𑁂𑀤𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀓𑀸𑀭𑁂𑀦 𑀘 𑀅𑀦𑁂𑀓𑀪𑁂𑀤𑀸 𑀏𑀯𑀸𑀢𑀺 𑀢𑁂𑀧𑀺 𑀩𑀳𑀼𑀯𑀘𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀸. 𑀅𑀯𑀬𑀯𑀻𑀕𑀸𑀳-𑀲𑀫𑀜𑁆𑀜𑀸𑀢𑀺𑀥𑀸𑀯𑀦-𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀦𑀺𑀲𑁂𑀥𑀦𑀢𑁆𑀣𑀁 𑀓𑀸𑀬𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺, 𑀢𑀸𑀦𑀺 𑀘 𑀓𑁂𑀲𑀸𑀤𑀻𑀳𑀺, 𑀓𑁂𑀲𑀸𑀤𑀺𑀓𑁂 𑀘 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑁂𑀳𑀺 𑀯𑀺𑀦𑀺𑀩𑁆𑀪𑀼𑀚𑁆𑀚𑀦𑁆𑀢𑁄 ‘‘𑀢𑀣𑀸 𑀦 𑀓𑀸𑀬𑁂’’𑀢𑀺𑀆𑀤𑀺𑀫𑀸𑀳. 𑀧𑀸𑀲𑀸𑀤𑀸𑀤𑀺𑀦𑀕𑀭𑀸𑀯𑀬𑀯𑀲𑀫𑀽𑀳𑁂 𑀅𑀯𑀬𑀯𑀻𑀯𑀸𑀤𑀺𑀦𑁄𑀧𑀺 𑀅𑀯𑀬𑀯𑀻𑀕𑀸𑀳𑀁 𑀦 𑀓𑀭𑁄𑀦𑁆𑀢𑀺, 𑀦𑀕𑀭𑀁 𑀦𑀸𑀫 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺 𑀧𑀦 𑀓𑁂𑀲𑀜𑁆𑀘𑀺 𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑀁 𑀲𑀺𑀬𑀸𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑁂 𑀦𑀕𑀭𑀦𑀺𑀤𑀲𑁆𑀲𑀦𑀁 𑀯𑀼𑀢𑁆𑀢𑀁. 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑀽𑀳𑁄, 𑀓𑁂𑀲𑀮𑁄𑀫𑀸𑀤𑀺𑀲𑀫𑀽𑀳𑁄 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑁄 𑀘 𑀬𑀣𑀸𑀯𑀼𑀢𑁆𑀢𑀲𑀫𑀽𑀳𑁂 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀓𑀸𑀬𑁄𑀧𑀺 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺, 𑀧𑀕𑁂𑀯 𑀇𑀢𑁆𑀣𑀺𑀆𑀤𑀬𑁄𑀢𑀺 𑀆𑀳 ‘‘𑀓𑀸𑀬𑁄 𑀯𑀸…𑀧𑁂… 𑀤𑀺𑀲𑁆𑀲𑀢𑀻’’𑀢𑀺. 𑀓𑁄𑀘𑀺 𑀥𑀫𑁆𑀫𑁄𑀢𑀺 𑀇𑀫𑀺𑀦𑀸 𑀲𑀢𑁆𑀢𑀚𑀻𑀯𑀸𑀤𑀺𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀯𑀬𑀯𑀻 𑀧𑀦 𑀓𑀸𑀬𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀓𑀸𑀬𑀸𑀤𑀺𑀲𑀜𑁆𑀜𑀸𑀪𑀺𑀥𑀸𑀦𑀸𑀦𑀻𑀢𑀺𑀆𑀳 ‘‘𑀬𑀣𑀸𑀯𑀼𑀢𑁆𑀢…𑀧𑁂… 𑀓𑀭𑁄𑀦𑁆𑀢𑀻’’𑀢𑀺.

𑀬𑀁 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁 𑀧𑀼𑀭𑀺𑀲𑀁 𑀯𑀸. 𑀦𑀦𑀼 𑀘𑀓𑁆𑀔𑀼𑀦𑀸 𑀇𑀢𑁆𑀣𑀺𑀧𑀼𑀭𑀺𑀲𑀤𑀲𑁆𑀲𑀦𑀁 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀫𑁂𑀢𑀁, ‘‘𑀇𑀢𑁆𑀣𑀺𑀁 𑀧𑀲𑁆𑀲𑀸𑀫𑀺, 𑀧𑀼𑀭𑀺𑀲𑀁 𑀧𑀲𑁆𑀲𑀸𑀫𑀻’’𑀢𑀺 𑀧𑀦 𑀧𑀯𑀢𑁆𑀢𑀲𑀜𑁆𑀜𑀸𑀬 𑀯𑀲𑁂𑀦 ‘‘𑀬𑀁 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦 𑀯𑀸 𑀤𑀺𑀝𑁆𑀞𑀺𑀬𑀸 𑀬𑀁 𑀧𑀲𑁆𑀲𑀢𑀺, 𑀦 𑀢𑀁 𑀤𑀺𑀝𑁆𑀞𑀁, 𑀢𑀁 𑀭𑀽𑀧𑀸𑀬𑀢𑀦𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑀯𑀲𑁂𑀦 𑀫𑀺𑀘𑁆𑀙𑀸𑀧𑀭𑀺𑀓𑀧𑁆𑀧𑀺𑀢𑀭𑀽𑀧𑀢𑁆𑀢𑀸. 𑀅𑀣 𑀯𑀸 𑀢𑀁 𑀓𑁂𑀲𑀸𑀤𑀺𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑀁 𑀤𑀺𑀝𑁆𑀞𑀁 𑀦 𑀳𑁄𑀢𑀺 𑀅𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸, 𑀤𑀺𑀝𑁆𑀞𑀁 𑀯𑀸 𑀢𑀁 𑀦 𑀳𑁄𑀢𑀺. 𑀬𑀁 𑀤𑀺𑀝𑁆𑀞𑀁 𑀢𑀁 𑀦 𑀧𑀲𑁆𑀲𑀢𑀻𑀢𑀺 𑀬𑀁 𑀭𑀽𑀧𑀸𑀬𑀢𑀦𑀁 𑀓𑁂𑀲𑀸𑀤𑀺𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑀁 𑀤𑀺𑀝𑁆𑀞𑀁, 𑀢𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀪𑀽𑀢𑀢𑁄 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀲𑁆𑀲𑀁 𑀩𑀚𑁆𑀛𑀢𑁂𑀢𑀺 𑀇𑀫𑀁 𑀅𑀢𑁆𑀢𑀪𑀸𑀯𑀁 𑀬𑀣𑀸𑀪𑀽𑀢𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀧𑀲𑁆𑀲𑀦𑁆𑀢𑁄 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑁄’’𑀢𑀺 𑀓𑀺𑀮𑁂𑀲𑀩𑀦𑁆𑀥𑀦𑁂𑀦 𑀩𑀚𑁆𑀛𑀢𑀺.

𑀦 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀦 𑀅𑀜𑁆𑀜𑀲𑀪𑀸𑀯𑀸𑀦𑀼𑀧𑀲𑁆𑀲𑀻, 𑀅𑀲𑀼𑀪𑀸𑀤𑀺𑀢𑁄 𑀅𑀜𑁆𑀜𑀸𑀓𑀸𑀭𑀸𑀦𑀼𑀧𑀲𑁆𑀲𑀻 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀧𑀣𑀯𑀻𑀓𑀸𑀬𑀦𑁆𑀢𑀺 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑀧𑀣𑀯𑀺𑀁 𑀥𑀫𑁆𑀫𑀲𑀫𑀽𑀳𑀢𑁆𑀢𑀸 ‘‘𑀓𑀸𑀬𑁄’’𑀢𑀺 𑀯𑀤𑀢𑀺, 𑀮𑀓𑁆𑀔𑀡𑀧𑀣𑀯𑀺𑀫𑁂𑀯 𑀯𑀸 𑀅𑀦𑁂𑀓𑀧𑁆𑀧𑀪𑁂𑀤𑀁 𑀲𑀓𑀮𑀲𑀭𑀻𑀭𑀕𑀢𑀁 𑀧𑀼𑀩𑁆𑀩𑀸𑀧𑀭𑀺𑀬𑀪𑀸𑀯𑁂𑀦 𑀘 𑀧𑀯𑀢𑁆𑀢𑀫𑀸𑀦𑀁 𑀲𑀫𑀽𑀳𑀯𑀲𑁂𑀦 𑀕𑀳𑁂𑀢𑁆𑀯𑀸 ‘‘𑀓𑀸𑀬𑁄’’𑀢𑀺 𑀯𑀤𑀢𑀺. 𑀆𑀧𑁄𑀓𑀸𑀬𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀯𑀁 𑀕𑀳𑁂𑀢𑀩𑁆𑀩𑀲𑁆𑀲𑀸𑀢𑀺 ‘‘𑀅𑀳𑀁 𑀫𑀫’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀢𑁆𑀢𑀦𑀺𑀬𑀪𑀸𑀯𑁂𑀦 𑀅𑀦𑁆𑀥𑀩𑀸𑀮𑁂𑀳𑀺 𑀕𑀳𑁂𑀢𑀩𑁆𑀩𑀲𑁆𑀲. 𑀇𑀤𑀸𑀦𑀺 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀓𑀸𑀭𑀸𑀦𑀫𑁆𑀧𑀺 𑀯𑀲𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀁 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀅𑀦𑀼𑀧𑀲𑁆𑀲𑀢𑀺, 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀏𑀯𑀁 𑀘𑀲𑁆𑀲 𑀅𑀦𑀺𑀘𑁆𑀘𑀸𑀓𑀸𑀭𑀫𑁆𑀧𑀺 𑀅𑀦𑀼𑀧𑀲𑁆𑀲𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸𑀪𑀽𑀢𑀲𑁆𑀲 𑀘𑀲𑁆𑀲 𑀦𑀺𑀘𑁆𑀘𑀕𑁆𑀕𑀸𑀳𑀲𑁆𑀲 𑀮𑁂𑀲𑁄𑀧𑀺 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑁄 𑀦𑀺𑀘𑁆𑀘𑀢𑁄’’𑀢𑀺 𑀢𑀣𑀸𑀳𑁂𑀲 ‘‘𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺 (𑀧𑀝𑀺. 𑀫. 𑁩.𑁩𑁫) 𑀯𑀼𑀢𑁆𑀢𑁄. 𑀏𑀢𑁆𑀣 𑀘 ‘‘𑀅𑀦𑀺𑀘𑁆𑀘𑀢𑁄 𑀏𑀯 𑀅𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀯-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀢𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦𑁄 𑀦𑀺𑀘𑁆𑀘𑀢𑁄’’𑀢𑀺 𑀯𑀼𑀢𑁆𑀢𑀁. 𑀦 𑀘𑁂𑀢𑁆𑀣 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑀸𑀤𑀺𑀦𑀺𑀯𑀢𑁆𑀢𑀦𑀫𑀸𑀲𑀗𑁆𑀓𑀺𑀢𑀩𑁆𑀩𑀁 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀧𑀭𑀢𑁆𑀢𑀸 𑀏𑀯-𑀓𑀸𑀭𑀲𑁆𑀲, 𑀉𑀧𑀭𑀺𑀤𑁂𑀲𑀦𑀸𑀭𑀼𑀴𑁆𑀳𑀢𑁆𑀢𑀸 𑀘 𑀢𑀸𑀲𑀁.

𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀦𑀺𑀘𑁆𑀘𑀲𑁆𑀲 𑀤𑀼𑀓𑁆𑀔𑀢𑁆𑀢𑀸 𑀢𑀫𑁂𑀯 𑀓𑀸𑀬𑀁 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑁆𑀲 𑀅𑀦𑀢𑁆𑀢𑀢𑁆𑀢𑀸 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 𑀬𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸, 𑀢𑀁 𑀅𑀦𑀪𑀺𑀦𑀦𑁆𑀤𑀺𑀢𑀩𑁆𑀩𑀁, 𑀦 𑀢𑀢𑁆𑀣 𑀭𑀚𑁆𑀚𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀺𑀦𑁆𑀤𑀢𑀺 𑀦𑁄 𑀦𑀦𑁆𑀤𑀢𑀺,𑀯𑀺𑀭𑀚𑁆𑀚𑀢𑀺 𑀦𑁄 𑀭𑀚𑁆𑀚𑀢𑀻’’𑀢𑀺. 𑀲𑁄 𑀏𑀯𑀁 𑀅𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀦𑀺𑀭𑁄𑀥𑁂𑀢𑀺 𑀦𑁄 𑀲𑀫𑀼𑀤𑁂𑀢𑀺, 𑀲𑀫𑀼𑀤𑀬𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀘 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀦𑁄 𑀆𑀤𑀺𑀬𑀢𑀺. 𑀅𑀬𑀜𑁆𑀳𑀺 𑀅𑀦𑀺𑀘𑁆𑀘𑀸𑀤𑀺𑀅𑀦𑀼𑀧𑀲𑁆𑀲𑀦𑀸 𑀢𑀤𑀗𑁆𑀕𑀯𑀲𑁂𑀦 𑀲𑀤𑁆𑀥𑀺𑀁 𑀓𑀸𑀬𑀢𑀦𑁆𑀦𑀺𑀲𑁆𑀲𑀬𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀓𑀺𑀮𑁂𑀲𑀸𑀦𑀁 𑀧𑀭𑀺𑀘𑁆𑀘𑀚𑀦𑀢𑁄, 𑀲𑀗𑁆𑀔𑀢𑀤𑁄𑀲𑀤𑀲𑁆𑀲𑀦𑁂𑀦 𑀢𑀩𑁆𑀩𑀺𑀧𑀭𑀻𑀢𑁂 𑀦𑀺𑀩𑁆𑀩𑀸𑀦𑁂 𑀢𑀦𑁆𑀦𑀺𑀦𑁆𑀦𑀢𑀸𑀬 𑀧𑀓𑁆𑀔𑀦𑁆𑀤𑀦𑀢𑁄 ‘‘𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑁂𑀯 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀯𑀼𑀢𑁆𑀢𑀦𑀬𑁂𑀦 𑀓𑀺𑀮𑁂𑀲𑁂 𑀘 𑀧𑀭𑀺𑀘𑁆𑀘𑀚𑀢𑀺, 𑀦𑀺𑀩𑁆𑀩𑀸𑀦𑁂 𑀘 𑀧𑀓𑁆𑀔𑀦𑁆𑀤𑀢𑀺, 𑀢𑀣𑀸𑀪𑀽𑀢𑁄 𑀘 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀓𑀺𑀮𑁂𑀲𑁂 𑀦 𑀆𑀤𑀺𑀬𑀢𑀺, 𑀦𑀸𑀧𑀺 𑀅𑀤𑁄𑀲𑀤𑀲𑁆𑀲𑀺𑀢𑀸𑀯𑀲𑁂𑀦 𑀲𑀗𑁆𑀔𑀢𑀸𑀭𑀫𑁆𑀫𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀦𑁄 𑀆𑀤𑀺𑀬𑀢𑀻’’𑀢𑀺. 𑀇𑀤𑀸𑀦𑀺𑀲𑁆𑀲 𑀢𑀸𑀳𑀺 𑀅𑀦𑀼𑀧𑀲𑁆𑀲𑀦𑀸𑀳𑀺 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀢𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺. 𑀢𑀢𑁆𑀣 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 ‘‘𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀺𑀧𑀭𑀻𑀢𑀲𑀜𑁆𑀜𑀁. 𑀤𑀺𑀝𑁆𑀞𑀺𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀧𑀳𑀸𑀦𑀫𑀼𑀔𑁂𑀦𑁂𑀯 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀦𑁆𑀢𑀺 𑀲𑀜𑁆𑀜𑀸𑀕𑀳𑀡𑀁, 𑀲𑀜𑁆𑀜𑀸𑀲𑀻𑀲𑁂𑀦 𑀯𑀸 𑀢𑁂𑀲𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀫𑁂𑀯.

𑀯𑀺𑀳𑀭𑀢𑀻𑀢𑀺 𑀇𑀫𑀺𑀦𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀫𑀗𑁆𑀕𑀺𑀦𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀇𑀭𑀺𑀬𑀢𑀻’’𑀢𑀺 𑀇𑀭𑀺𑀬𑀸𑀧𑀣𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀪𑀺𑀩𑁆𑀬𑀸𑀧𑀦𑀢𑁄 ‘‘𑀢𑀻𑀲𑀼 𑀪𑀯𑁂𑀲𑀽’’𑀢𑀺 𑀯𑀼𑀢𑁆𑀢𑀁, 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀧𑀦 𑀓𑀺𑀮𑁂𑀲𑀸 𑀧𑀭𑀺𑀢𑁆𑀢𑀪𑀽𑀫𑀓𑀸 𑀏𑀯𑀸𑀢𑀺. 𑀬𑀤𑀺𑀧𑀺 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀆𑀢𑀸𑀧𑀦𑀦𑁆𑀢𑀺 𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀫𑁆𑀧𑀺 𑀅𑀢𑁆𑀣𑁂𑀯, 𑀆𑀢𑀸𑀧-𑀲𑀤𑁆𑀤𑁄 𑀧𑀦 𑀯𑀻𑀭𑀺𑀬𑁂𑀬𑁂𑀯 𑀦𑀺𑀭𑀼𑀴𑁆𑀳𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺. 𑀅𑀣 𑀯𑀸 𑀧𑀝𑀺𑀧𑀓𑁆𑀔𑀧𑀳𑀸𑀦𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀩𑁆𑀪𑀼𑀲𑁆𑀲𑀳𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀯𑀻𑀭𑀺𑀬𑀲𑁆𑀲 𑀲𑀸𑀢𑀺𑀲𑀬𑀁 𑀢𑀤𑀸𑀢𑀸𑀧𑀦𑀦𑁆𑀢𑀺 𑀯𑀻𑀭𑀺𑀬𑀫𑁂𑀯 𑀢𑀣𑀸 𑀯𑀼𑀘𑁆𑀘𑀢𑀺, 𑀦 𑀅𑀜𑁆𑀜𑁂 𑀥𑀫𑁆𑀫𑀸. 𑀆𑀢𑀸𑀧𑀻𑀢𑀺 𑀘𑀸𑀬𑀫𑀻𑀓𑀸𑀭𑁄 𑀧𑀲𑀁𑀲𑀸𑀬, 𑀅𑀢𑀺𑀲𑀬𑀲𑁆𑀲 𑀯𑀸 𑀤𑀻𑀧𑀓𑁄𑀢𑀺 𑀆𑀢𑀸𑀧𑀻𑀕𑀳𑀡𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀲𑀫𑀗𑁆𑀕𑀺𑀢𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀸, 𑀲𑀫𑀦𑁆𑀢𑀢𑁄, 𑀲𑀸𑀫𑀜𑁆𑀘 𑀧𑀚𑀸𑀦𑀦𑁆𑀢𑁄 𑀲𑀫𑁆𑀧𑀚𑀸𑀦𑁄, 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑁂 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀢𑀸𑀪𑀸𑀯𑁂𑀦 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁, 𑀲𑀩𑁆𑀩𑀸𑀓𑀸𑀭𑀧𑀚𑀸𑀦𑀦𑁂𑀦 𑀲𑀫𑀦𑁆𑀢𑀢𑁄, 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀯𑀳𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸 𑀲𑀬𑀁 𑀧𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀤𑀺 𑀧𑀜𑁆𑀜𑀸𑀬 𑀅𑀦𑀼𑀧𑀲𑁆𑀲𑀢𑀺, 𑀓𑀣𑀁 𑀲𑀢𑀺𑀧𑀝𑁆𑀞𑀸𑀦𑀢𑀸𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀲𑀩𑁆𑀩𑀢𑁆𑀣𑀺𑀓𑀦𑁆𑀢𑀺 𑀲𑀩𑁆𑀩𑀢𑁆𑀣 𑀪𑀯𑀁 𑀲𑀩𑁆𑀩𑀢𑁆𑀣 𑀮𑀻𑀦𑁂 𑀉𑀤𑁆𑀥𑀢𑁂 𑀘 𑀘𑀺𑀢𑁆𑀢𑁂 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀲𑀩𑁆𑀩𑁂 𑀯𑀸 𑀮𑀻𑀦𑁂 𑀉𑀤𑁆𑀥𑀢𑁂 𑀘 𑀪𑀸𑀯𑁂𑀢𑀩𑁆𑀩𑀸 𑀩𑁄𑀚𑁆𑀛𑀗𑁆𑀕𑀸 𑀅𑀢𑁆𑀣𑀺𑀓𑀸 𑀏𑀢𑀸𑀬𑀸𑀢𑀺 𑀲𑀩𑁆𑀩𑀢𑁆𑀣𑀺𑀓𑀸. 𑀲𑀢𑀺𑀬𑀸 𑀮𑀤𑁆𑀥𑀽𑀧𑀓𑀸𑀭𑀸𑀬 𑀏𑀯 𑀧𑀜𑁆𑀜𑀸𑀬 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑁂 𑀓𑀸𑀬𑁂 𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀪𑀺𑀓𑁆𑀔𑀼 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀅𑀦𑁆𑀢𑁄𑀲𑀗𑁆𑀔𑁂𑀧𑁄 𑀅𑀦𑁆𑀢𑁄 𑀑𑀮𑀻𑀬𑀦𑁄, 𑀓𑁄𑀲𑀚𑁆𑀚𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀸𑀬𑀧𑀭𑀺𑀕𑁆𑀕𑀳𑁂𑀢𑀺 𑀏𑀢𑁆𑀣 𑀲𑀻𑀮𑀯𑀺𑀲𑁄𑀥𑀦𑀸𑀤𑀺 𑀕𑀡𑀦𑀸𑀤𑀺 𑀉𑀕𑁆𑀕𑀳𑀓𑁄𑀲𑀮𑁆𑀮𑀸𑀤𑀺 𑀘 𑀉𑀧𑀸𑀬𑁄, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀅𑀦𑀼𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀬𑀣𑀸𑀯𑀼𑀢𑁆𑀢𑀉𑀧𑀸𑀬𑀁 𑀦 𑀧𑀭𑀺𑀘𑁆𑀘𑀚𑀢𑀺, 𑀅𑀦𑀼𑀧𑀸𑀬𑀜𑁆𑀘 𑀦 𑀉𑀧𑀸𑀤𑀺𑀬𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀼𑀝𑁆𑀞𑀲𑁆𑀲𑀢𑀺…𑀧𑁂… 𑀅𑀲𑀫𑀢𑁆𑀣𑁄 𑀳𑁄𑀢𑀻’’𑀢𑀺. 𑀢𑁂𑀦𑀸𑀢𑀺 𑀉𑀧𑀸𑀬𑀸𑀦𑀼𑀧𑀸𑀬𑀸𑀦𑀁 𑀧𑀭𑀺𑀕𑁆𑀕𑀳𑀧𑀭𑀺𑀯𑀚𑁆𑀚𑀦𑁂𑀲𑀼 𑀅𑀧𑀭𑀺𑀘𑁆𑀘𑀸𑀕𑀸𑀧𑀭𑀺𑀕𑁆𑀕𑀳𑁂𑀲𑀼 𑀘 𑀅𑀲𑀫𑀢𑁆𑀣𑀪𑀸𑀯𑁂𑀦 𑀅𑀲𑁆𑀲 𑀬𑁄𑀕𑀺𑀦𑁄.

𑀬𑀲𑁆𑀫𑀸 𑀲𑀢𑀺𑀬𑁂𑀯𑁂𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀸, 𑀢𑀲𑁆𑀫𑀸𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀯𑀻𑀭𑀺𑀬𑀸𑀤𑀬𑁄 𑀅𑀗𑁆𑀕𑀦𑁆𑀢𑀺 𑀆𑀳 ‘‘𑀲𑀫𑁆𑀧𑀬𑁄𑀕𑀗𑁆𑀕𑀜𑁆𑀘𑀲𑁆𑀲 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀅𑀗𑁆𑀕-𑀲𑀤𑁆𑀤𑁄 𑀘𑁂𑀢𑁆𑀣 𑀓𑀸𑀭𑀡𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄, 𑀲𑀢𑀺𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀲𑀫𑀸𑀥𑀺𑀲𑁆𑀲𑀢𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁 𑀢𑀲𑁆𑀲𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀬𑀲𑁆𑀫𑀸 𑀯𑀸 𑀲𑀢𑀺𑀲𑀻𑀲𑁂𑀦𑀸𑀬𑀁 𑀤𑁂𑀲𑀦𑀸. 𑀦 𑀳𑀺 𑀓𑁂𑀯𑀮𑀸𑀬 𑀲𑀢𑀺𑀬𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀳𑁄𑀢𑀺, 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁄 𑀯𑀸, 𑀦 𑀘 𑀓𑁂𑀯𑀮𑀸 𑀲𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸𑀲𑁆𑀲 𑀛𑀸𑀦𑀤𑁂𑀲𑀦𑀸𑀬𑀁 𑀲𑀯𑀺𑀢𑀓𑁆𑀓𑀸𑀤𑀺𑀯𑀘𑀦𑀲𑁆𑀲 𑀯𑀺𑀬 𑀲𑀫𑁆𑀧𑀬𑁄𑀕𑀗𑁆𑀕𑀤𑀲𑁆𑀲𑀦𑀢𑀸𑀢𑀺 𑀅𑀗𑁆𑀕-𑀲𑀤𑁆𑀤𑀲𑁆𑀲 𑀅𑀯𑀬𑀯𑀧𑀭𑀺𑀬𑀸𑀬𑀢𑀸 𑀤𑀝𑁆𑀞𑀩𑁆𑀩𑀸. 𑀧𑀳𑀸𑀦𑀗𑁆𑀕𑀦𑁆𑀢𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁨𑁬; 𑀫. 𑀦𑀺. 𑁧.𑁨𑁭𑁧, 𑁨𑁮𑁭; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩; 𑀧𑀸𑀭𑀸. 𑁧𑁧) 𑀯𑀺𑀬 𑀧𑀳𑀸𑀢𑀩𑁆𑀩𑀗𑁆𑀕𑀁 𑀤𑀲𑁆𑀲𑁂𑀢𑀼𑀁. 𑀬𑀲𑁆𑀫𑀸 𑀏𑀢𑁆𑀣 𑀮𑁄𑀓𑀺𑀬𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄, 𑀢𑀲𑁆𑀫𑀸 𑀧𑀼𑀩𑁆𑀩𑀪𑀸𑀕𑀺𑀬𑀫𑁂𑀯 𑀯𑀺𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀤𑀗𑁆𑀕𑀯𑀺𑀦𑀬𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀦𑀬𑁂𑀦 𑀯𑀸’’𑀢𑀺 𑀆𑀳. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀯𑁂𑀤𑀦𑀸𑀤𑀺𑀥𑀫𑁆𑀫𑀸𑀦𑀁. 𑀢𑁂𑀲𑀜𑁆𑀳𑀺 𑀢𑀢𑁆𑀣 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀯𑀺𑀲𑁂𑀲𑁂𑀦 𑀤𑁆𑀯𑀻𑀳𑀺𑀧𑀺 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀧𑀼𑀦 𑀏𑀓𑁂𑀓𑁂𑀦 𑀯𑀼𑀢𑁆𑀢𑀁 𑀧𑀳𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑁂𑀦𑀸’’𑀢𑀺 𑀆𑀳. 𑀅𑀣 𑀯𑀸 ‘‘𑀯𑀺𑀦𑁂𑀬𑁆𑀬 𑀦𑀻𑀯𑀭𑀡𑀸𑀦𑀻’’𑀢𑀺 𑀅𑀯𑀢𑁆𑀯𑀸 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀯𑀘𑀦𑀲𑁆𑀲 𑀧𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀲𑁂𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀳𑀺 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀸𑀦𑀁 𑀅𑀦𑀼𑀭𑁄𑀥𑀸𑀤𑀻𑀦𑀁 𑀧𑀳𑀸𑀦𑀁 𑀤𑀲𑁆𑀲𑀦𑀁 𑀏𑀢𑀲𑁆𑀲 𑀧𑀬𑁄𑀚𑀦𑀦𑁆𑀢𑀺. 𑀓𑀸𑀬𑀲𑀫𑁆𑀧𑀢𑁆𑀢𑀺𑀫𑀽𑀮𑀓𑀲𑁆𑀲𑀸𑀢𑀺 𑀭𑀽𑀧-𑀩𑀮-𑀬𑁄𑀩𑁆𑀩𑀦𑀸𑀭𑁄𑀕𑁆𑀬𑀸𑀤𑀺-𑀲𑀭𑀻𑀭𑀲𑀫𑁆𑀧𑀤𑀸-𑀦𑀺𑀫𑀺𑀢𑁆𑀢𑀲𑁆𑀲. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀓𑀸𑀬𑀯𑀺𑀧𑀢𑁆𑀢𑀺𑀫𑀽𑀮𑀓𑁄 𑀯𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀬𑀪𑀸𑀯𑀦𑀸𑀬𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀬. 𑀲𑀸 𑀳𑀺 𑀇𑀥 ‘‘𑀓𑀸𑀬𑀪𑀸𑀯𑀦𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀢𑀺 𑀅𑀦𑀼𑀭𑁄𑀥𑀸𑀤𑀺𑀧𑁆𑀧𑀳𑀸𑀦𑀯𑀘𑀦𑁂𑀦. 𑀬𑁄𑀕𑀸𑀦𑀼𑀪𑀸𑀯𑁄 𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁.

𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦𑀸𑀢𑀺 𑀅𑀢𑀺𑀲𑀫𑁆𑀧𑀚𑀜𑁆𑀜𑀕𑁆𑀕𑀳𑀡𑁂𑀦. 𑀲𑀩𑁆𑀩𑀢𑁆𑀣𑀺𑀓𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀫𑁂𑀢𑁆𑀢𑀸 𑀫𑀭𑀡𑀲𑁆𑀲𑀢𑀺 𑀅𑀲𑀼𑀪𑀪𑀸𑀯𑀦𑀸 𑀘. 𑀇𑀤𑀜𑁆𑀳𑀺 𑀘𑀢𑀼𑀓𑁆𑀓𑀁 𑀬𑁄𑀕𑀺𑀦𑀸 𑀧𑀭𑀺𑀳𑀭𑀺𑀬𑀫𑀸𑀦𑀁 ‘‘𑀲𑀩𑁆𑀩𑀢𑁆𑀣𑀺𑀓𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦 𑀅𑀯𑀺𑀘𑁆𑀙𑀺𑀦𑁆𑀦𑀲𑁆𑀲 𑀢𑀲𑁆𑀲 𑀧𑀭𑀺𑀳𑀭𑀺𑀢𑀩𑁆𑀩𑀢𑁆𑀢𑀸, 𑀲𑀢𑀺𑀬𑀸 𑀯𑀸 𑀲𑀫𑀣𑁄 𑀯𑀼𑀢𑁆𑀢𑁄 𑀢𑀲𑁆𑀲𑀸 𑀲𑀫𑀸𑀤𑁆𑀥𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸.

𑀢𑁂𑀦𑀸𑀢𑀺 𑀲𑀤𑁆𑀤𑀢𑁆𑀣𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀪𑀸𑀯𑀢𑁆𑀣𑀲𑁆𑀲𑁂𑀯 𑀯𑀺𑀪𑀚𑀦𑀯𑀲𑁂𑀦 𑀧𑀯𑀢𑁆𑀢𑁂𑀦 𑀯𑀺𑀪𑀗𑁆𑀕𑀧𑀸𑀞𑁂𑀦 𑀲𑀳. 𑀅𑀝𑁆𑀞𑀓𑀣𑀸𑀦𑀬𑁄𑀢𑀺 𑀲𑀤𑁆𑀤𑀢𑁆𑀣𑀲𑁆𑀲𑀧𑀺 𑀯𑀺𑀯𑀭𑀡𑀯𑀲𑁂𑀦 𑀬𑀣𑀸𑀭𑀳𑀁 𑀯𑀼𑀢𑁆𑀢𑁄 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄. 𑀬𑀣𑀸 𑀲𑀁𑀲𑀦𑁆𑀤𑀢𑀻𑀢𑀺 𑀬𑀣𑀸 𑀅𑀢𑁆𑀣𑀢𑁄 𑀅𑀥𑀺𑀧𑁆𑀧𑀸𑀬𑀢𑁄 𑀘 𑀅𑀯𑀺𑀮𑁄𑀫𑁂𑀦𑁆𑀢𑁄 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄.

𑀯𑁂𑀤𑀦𑀸𑀤𑀻𑀦𑀁 𑀧𑀼𑀦 𑀯𑀘𑀦𑁂𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀯𑀲𑁂𑀦 𑀘𑀺𑀢𑁆𑀢𑀥𑀫𑁆𑀫𑀸𑀦𑀁 𑀯𑁂𑀤𑀦𑀸𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀭𑀽𑀧𑀥𑀫𑁆𑀫𑀸𑀦𑀁 𑀭𑀽𑀧𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁄 𑀘 𑀯𑁂𑀤𑀦𑀸𑀬 𑀓𑀸𑀬𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀧𑀲𑀗𑁆𑀕𑁂𑀧𑀺 𑀆𑀧𑀦𑁆𑀦𑁂 𑀢𑀤𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀤𑀲𑁆𑀲𑀦𑀢𑁆𑀣𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀜𑁆𑀘 𑀤𑀼𑀢𑀺𑀬𑀯𑁂𑀤𑀦𑀸𑀕𑀳𑀡𑀁. 𑀢𑁂𑀦 𑀦 𑀯𑁂𑀤𑀦𑀸𑀬𑀁 𑀓𑀸𑀬𑀸𑀦𑀼𑀧𑀲𑁆𑀲𑀻, 𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸, 𑀅𑀣 𑀔𑁄 𑀯𑁂𑀤𑀦𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀯𑁂𑀤𑀦𑀸𑀲𑀗𑁆𑀔𑀸𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀓𑀸𑀭𑀲𑁆𑀲𑁂𑀯 𑀤𑀲𑁆𑀲𑀦𑁂𑀦 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀣𑀸 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀸 𑀯𑁂𑀤𑀦𑀸, 𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑀸 𑀯𑁂𑀤𑀦𑀸. 𑀬𑀲𑁆𑀫𑀺𑀁 𑀯𑀸 𑀧𑀦 𑀲𑀫𑀬𑁂 𑀤𑀼𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑀸 𑀯𑁂𑀤𑀦𑀸, 𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀇𑀢𑀭𑀸 𑀯𑁂𑀤𑀦𑀸’’𑀢𑀺 𑀯𑁂𑀤𑀦𑀸𑀪𑀸𑀯𑀲𑀸𑀫𑀜𑁆𑀜𑁂 𑀅𑀝𑁆𑀞𑀢𑁆𑀯𑀸 𑀢𑀁 𑀢𑀁 𑀯𑁂𑀤𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀤𑀲𑁆𑀲𑀦𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁄 𑀥𑀼𑀯𑀪𑀸𑀯𑀯𑀺𑀯𑁂𑀓𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑁂𑀦 𑀢𑀸𑀲𑀁 𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀦𑀤𑀲𑁆𑀲𑀦𑁂𑀦 𑀅𑀦𑀺𑀘𑁆𑀘𑀢𑀸𑀬 𑀢𑀢𑁄 𑀏𑀯 𑀤𑀼𑀓𑁆𑀔𑀢𑀸𑀬 𑀅𑀦𑀢𑁆𑀢𑀢𑀸𑀬 𑀘 𑀤𑀲𑁆𑀲𑀦𑀁 𑀯𑀺𑀪𑀸𑀯𑀺𑀢𑀁 𑀳𑁄𑀢𑀺. 𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀯𑁂𑀤𑀦𑀸𑀬𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀻𑀬𑁂𑀯, 𑀦 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀻. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀦𑀸𑀫 𑀩𑀸𑀮𑁄 𑀅𑀫𑀡𑀺𑀲𑀪𑀸𑀯𑁂𑀧𑀺 𑀉𑀤𑀓𑀩𑀼𑀩𑁆𑀩𑀼𑀴𑀓𑁂 𑀫𑀡𑀺𑀆𑀓𑀸𑀭𑀸𑀦𑀼𑀧𑀲𑁆𑀲𑀻 𑀳𑁄𑀢𑀺, 𑀦 𑀏𑀯𑀫𑀬𑀁 𑀞𑀺𑀢𑀺𑀭𑀫𑀡𑀻𑀬𑁂𑀧𑀺 𑀯𑁂𑀤𑀬𑀺𑀢𑁂, 𑀧𑀕𑁂𑀯 𑀇𑀢𑀭𑀲𑁆𑀫𑀺𑀁 𑀫𑀦𑀼𑀜𑁆𑀜𑀸𑀓𑀸𑀭𑀸𑀦𑀼𑀧𑀲𑁆𑀲𑀻, 𑀅𑀣 𑀔𑁄 𑀔𑀡𑀪𑀗𑁆𑀕𑀼𑀭𑀢𑀸𑀬 𑀅𑀯𑀲𑀯𑀢𑁆𑀢𑀺𑀢𑀸𑀬 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑀸𑀬 𑀘 𑀅𑀦𑀺𑀘𑁆𑀘𑀅𑀦𑀢𑁆𑀢𑀅𑀲𑀼𑀪𑀸𑀓𑀸𑀭𑀸𑀦𑀼𑀧𑀲𑁆𑀲𑀻, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀘 𑀯𑀺𑀲𑁂𑀲𑀢𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀘𑀺𑀢𑁆𑀢𑀥𑀫𑁆𑀫𑁂𑀲𑀼𑀧𑀺 𑀬𑀣𑀸𑀭𑀳𑀁 𑀧𑀼𑀦 𑀯𑀘𑀦𑁂 𑀧𑀬𑁄𑀚𑀦𑀁 𑀯𑀢𑁆𑀢𑀩𑁆𑀩𑀁. ‘‘𑀓𑁂𑀯𑀮𑀁 𑀧𑀦𑀺𑀥𑀸’’𑀢𑀺𑀆𑀤𑀺𑀦𑀸 𑀇𑀥 ‘𑀏𑀢𑁆𑀢𑀓𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄𑀢𑀺 𑀇𑀫𑀺𑀦𑀸 𑀬𑀣𑀸 𑀘𑀺𑀢𑁆𑀢𑀁 𑀥𑀫𑁆𑀫𑀸 𑀘 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸, 𑀢𑀣𑀸 𑀢𑀸𑀦𑀺 𑀅𑀦𑀼𑀧𑀲𑁆𑀲𑀦𑁆𑀢𑁄 ‘‘𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤𑀸𑀢𑀺 𑀬𑁄 𑀪𑀺𑀓𑁆𑀔𑀼 𑀲𑀼𑀔𑀯𑁂𑀤𑀦𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 ‘‘𑀤𑀼𑀓𑁆𑀔’’𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀤𑁆𑀤𑀓𑁆𑀔𑀺. 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄𑀢𑀺 𑀤𑀼𑀓𑁆𑀔𑀯𑁂𑀤𑀦𑀁 𑀧𑀻𑀴𑀸𑀚𑀦𑀦𑀢𑁄 𑀅𑀦𑁆𑀢𑁄𑀢𑀼𑀤𑀦𑀢𑁄 𑀤𑀼𑀦𑁆𑀦𑀻𑀳𑀭𑀡𑀢𑁄 𑀘 𑀲𑀮𑁆𑀮𑀦𑁆𑀢𑀺 𑀅𑀤𑁆𑀤𑀓𑁆𑀔𑀺 𑀧𑀲𑁆𑀲𑀺. 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀁. 𑀲𑀦𑁆𑀢𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀺𑀬 𑀅𑀦𑁄𑀴𑀸𑀭𑀺𑀓𑀢𑀸𑀬 𑀧𑀘𑁆𑀘𑀬𑀯𑀲𑁂𑀦 𑀯𑀽𑀧𑀲𑀦𑁆𑀢𑀲𑀪𑀸𑀯𑀢𑀸𑀬 𑀘 𑀲𑀦𑁆𑀢𑀁. 𑀅𑀦𑀺𑀘𑁆𑀘𑀢𑁄𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑁄 𑀢𑀸𑀯𑀓𑀸𑀮𑀺𑀓𑀢𑁄𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄 𑀘 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀬𑁄 𑀅𑀤𑁆𑀤𑀓𑁆𑀔𑀺. 𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀼 𑀏𑀓𑀁𑀲𑁂𑀦 𑀧𑀭𑀺𑀩𑁆𑀬𑀢𑁆𑀢𑀁 𑀯𑀸 𑀯𑁂𑀤𑀦𑀸𑀬 𑀲𑀫𑁆𑀫𑀸 𑀧𑀲𑁆𑀲𑀦𑀓𑁄𑀢𑀺 𑀅𑀢𑁆𑀣𑁄.

𑀤𑀼𑀓𑁆𑀔𑀸𑀢𑀺𑀧𑀻𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀸 𑀇𑀢𑀺𑀧𑀺. 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀯𑁂𑀤𑀬𑀺𑀢𑀁 𑀤𑀼𑀓𑁆𑀔𑀲𑁆𑀫𑀺𑀁 𑀅𑀦𑁆𑀢𑁄𑀕𑀥𑀁 𑀧𑀭𑀺𑀬𑀸𑀧𑀦𑁆𑀦𑀁 𑀯𑀤𑀸𑀫𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀦𑀢𑀺𑀯𑀢𑁆𑀢𑀦𑀢𑁄. 𑀲𑀼𑀔𑀤𑀼𑀓𑁆𑀔𑀢𑁄𑀧𑀺 𑀘𑀸𑀢𑀺 𑀲𑀼𑀔𑀸𑀤𑀻𑀦𑀁 𑀞𑀺𑀢𑀺𑀯𑀺𑀧𑀭𑀺𑀡𑀸𑀫𑀜𑁆𑀜𑀸𑀡𑀲𑀼𑀔𑀢𑀸𑀬 𑀯𑀺𑀧𑀭𑀺𑀡𑀸𑀫𑀞𑀺𑀢𑀺𑀅𑀜𑁆𑀜𑀸𑀡𑀤𑀼𑀓𑁆𑀔𑀢𑀸𑀬 𑀘 𑀯𑀼𑀢𑁆𑀢𑀢𑁆𑀢𑀸 𑀢𑀺𑀲𑁆𑀲𑁄𑀧𑀺 𑀲𑀼𑀔𑀢𑁄, 𑀢𑀺𑀲𑁆𑀲𑁄𑀧𑀺 𑀘 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀭𑀽𑀧𑀸𑀤𑀺-𑀆𑀭𑀫𑁆𑀫𑀡𑀙𑀦𑁆𑀤𑀸𑀤𑀺-𑀅𑀥𑀺𑀧𑀢𑀺-𑀜𑀸𑀡𑀸𑀤𑀺-𑀲𑀳𑀚𑀸𑀢- 𑀓𑀸𑀫𑀸𑀯𑀘𑀭𑀸𑀤𑀺-𑀪𑀽𑀫𑀺𑀦𑀸𑀦𑀢𑁆𑀢𑀪𑁂𑀤𑀸𑀦𑀁 𑀓𑀼𑀲𑀮𑀸𑀓𑀼𑀲𑀮-𑀢𑀁𑀯𑀺𑀧𑀸𑀓𑀓𑀺𑀭𑀺𑀬𑀸-𑀦𑀸𑀦𑀢𑁆𑀢𑀸𑀤𑀺𑀪𑁂𑀤𑀸𑀦𑀜𑁆𑀘, 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀔𑀸𑀭𑀺𑀓𑀸𑀲𑀗𑁆𑀔𑀸𑀭𑀺𑀓𑀲-𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀸𑀤𑀺-𑀦𑀸𑀦𑀢𑁆𑀢𑀪𑁂𑀤𑀸𑀦𑀜𑁆𑀘 𑀯𑀲𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀼𑀜𑁆𑀜𑀢𑀥𑀫𑁆𑀫𑀲𑁆𑀲𑀸𑀢𑀺 ‘‘𑀥𑀫𑁆𑀫𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁧) 𑀲𑀼𑀜𑁆𑀜𑀢𑀯𑀸𑀭𑁂 𑀆𑀕𑀢𑀲𑀼𑀜𑁆𑀜𑀢𑀲𑀪𑀸𑀯𑀲𑁆𑀲 𑀯𑀲𑁂𑀦. ‘‘𑀓𑀸𑀫𑀜𑁆𑀘𑁂𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀧𑀳𑀻𑀦𑀢𑁆𑀢𑀸 𑀧𑀼𑀦 𑀧𑀳𑀸𑀦𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀤𑀲𑁆𑀲𑁂𑀢𑀺, 𑀫𑀕𑁆𑀕𑀘𑀺𑀢𑁆𑀢𑀓𑁆𑀔𑀡𑁂 𑀯𑀸 𑀏𑀓𑀢𑁆𑀣 𑀧𑀳𑀻𑀦𑀁 𑀲𑀩𑁆𑀩𑀢𑁆𑀣 𑀧𑀳𑀻𑀦𑀫𑁂𑀯 𑀳𑁄𑀢𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀬 𑀘𑁄𑀤𑀦𑀸𑀬 𑀦𑀸𑀦𑀸𑀧𑀼𑀕𑁆𑀕𑀮𑀧𑀭𑀺𑀳𑀸𑀭𑁄, 𑀧𑀘𑁆𑀙𑀺𑀫𑀸𑀬 𑀦𑀸𑀦𑀸𑀘𑀺𑀢𑁆𑀢𑀓𑁆𑀔𑀡𑀺𑀓𑀧𑀭𑀺𑀳𑀸𑀭𑁄. 𑀮𑁄𑀓𑀺𑀬𑀪𑀸𑀯𑀦𑀸𑀬 𑀳𑀺 𑀓𑀸𑀬𑁂 𑀧𑀳𑀻𑀦𑀁 𑀦 𑀯𑁂𑀤𑀦𑀸𑀤𑀻𑀲𑀼 𑀧𑀳𑀻𑀦𑀁 𑀳𑁄𑀢𑀺 𑀬𑀤𑀺𑀧𑀺 𑀦 𑀧𑀯𑀢𑁆𑀢𑁂𑀬𑁆𑀬, 𑀦 𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀬 𑀢𑀢𑁆𑀣 𑀲𑀸 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀲𑁆𑀲 𑀅𑀧𑁆𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀧𑀼𑀦 𑀢𑀧𑁆𑀧𑀳𑀸𑀦𑀁 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺. 𑀏𑀓𑀢𑁆𑀣 𑀧𑀳𑀻𑀦𑀁 𑀲𑁂𑀲𑁂𑀲𑀼𑀧𑀺 𑀧𑀳𑀻𑀦𑀁 𑀳𑁄𑀢𑀻𑀢𑀺 𑀫𑀕𑁆𑀕𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁, 𑀮𑁄𑀓𑀺𑀬𑀪𑀸𑀯𑀦𑀸𑀬 𑀯𑀸 𑀲𑀩𑁆𑀩𑀢𑁆𑀣 𑀅𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀧𑀜𑁆𑀘𑀧𑀺 𑀔𑀦𑁆𑀥𑀸 𑀮𑁄𑀓𑁄’’𑀢𑀺 𑀳𑀺 𑀯𑀺𑀪𑀗𑁆𑀕𑁂 (𑀯𑀺𑀪. 𑁩𑁬𑁨, 𑁩𑁬𑁪, 𑁩𑁬𑁬, 𑁩𑁭𑁩) 𑀘𑀢𑀽𑀲𑀼𑀧𑀺 𑀞𑀸𑀦𑁂𑀲𑀼 𑀯𑀼𑀢𑁆𑀢𑀦𑁆𑀢𑀺.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸

𑀆𑀦𑀸𑀧𑀸𑀦𑀧𑀩𑁆𑀩𑀯𑀡𑁆𑀡𑀦𑀸

𑁧𑁦𑁭. 𑀩𑀸𑀳𑀺𑀭𑀓𑁂𑀲𑀼𑀧𑀺 𑀇𑀢𑁄 𑀏𑀓𑀤𑁂𑀲𑀲𑁆𑀲 𑀲𑀫𑁆𑀪𑀯𑀢𑁄 𑀲𑀩𑁆𑀩𑀧𑁆𑀧𑀓𑀸𑀭𑀕𑁆𑀕𑀳𑀡𑀁 𑀓𑀢𑀁 ‘‘𑀲𑀩𑁆𑀩𑀧𑁆𑀧𑀓𑀸𑀭𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀩𑁆𑀩𑀢𑁆𑀢𑀓𑀲𑁆𑀲𑀸’’𑀢𑀺. 𑀢𑁂𑀦 𑀬𑁂 𑀇𑀫𑁂 𑀆𑀦𑀸𑀧𑀸𑀦𑀧𑀩𑁆𑀩𑀸𑀤𑀺𑀯𑀲𑁂𑀦 𑀆𑀕𑀢𑀸 𑀘𑀼𑀤𑁆𑀤𑀲𑀧𑁆𑀧𑀓𑀸𑀭𑀸, 𑀢𑀤𑀦𑁆𑀢𑁄𑀕𑀥𑀸 𑀘 𑀅𑀚𑁆𑀛𑀢𑁆𑀢𑀸𑀤𑀺𑀅𑀦𑀼𑀧𑀲𑁆𑀲𑀦𑀸 𑀧𑀓𑀸𑀭𑀸, 𑀢𑀣𑀸 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁫𑁪) 𑀯𑀼𑀢𑁆𑀢𑀸 𑀓𑁂𑀲𑀸𑀤𑀺𑀯𑀡𑁆𑀡𑀲𑀡𑁆𑀞𑀸𑀦𑀓𑀲𑀺𑀡𑀸𑀭𑀫𑁆𑀫𑀡𑀘𑀢𑀼𑀓𑁆𑀓𑀚𑁆𑀛𑀸𑀦𑀧𑁆𑀧𑀓𑀸𑀭𑀸, 𑀮𑁄𑀓𑀺𑀬𑀸𑀤𑀺𑀧𑁆𑀧𑀓𑀸𑀭𑀸 𑀘, 𑀢𑁂 𑀲𑀩𑁆𑀩𑁂𑀧𑀺 𑀅𑀦𑀯𑀲𑁂𑀲𑀢𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀫𑁂 𑀘 𑀧𑀓𑀸𑀭𑀸 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂, 𑀦 𑀇𑀢𑁄 𑀩𑀳𑀺𑀤𑁆𑀥𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀧𑁆𑀧𑀓𑀸𑀭…𑀧𑁂… 𑀧𑀝𑀺𑀲𑁂𑀥𑀦𑁄 𑀘𑀸’’𑀢𑀺. 𑀢𑀢𑁆𑀣 𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑁄𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀜𑁆𑀜𑀲𑀸𑀲𑀦𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀧𑀝𑀺𑀲𑁂𑀥𑀦𑁄. 𑀏𑀢𑁂𑀦 ‘‘𑀇𑀥, 𑀪𑀺𑀓𑁆𑀔𑀯𑁂’’𑀢𑀺 𑀏𑀢𑁆𑀣 𑀇𑀥-𑀲𑀤𑁆𑀤𑁄 𑀅𑀦𑁆𑀢𑁄𑀕𑀥𑀏𑀯𑀲𑀤𑁆𑀤𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀦𑁆𑀢𑀺 𑀳𑀺 𑀏𑀓𑀧𑀤𑀸𑀦𑀺𑀧𑀺 𑀲𑀸𑀯𑀥𑀸𑀭𑀡𑀸𑀦𑀺 𑀬𑀣𑀸 ‘‘𑀯𑀸𑀬𑀼𑀪𑀓𑁆𑀔𑁄’’𑀢𑀺 (𑀤𑀻. 𑀦𑀺. 𑀝𑀻. 𑁨.𑁩𑁭𑁪). 𑀢𑁂𑀦𑀸𑀳 ‘‘𑀇𑀥𑁂𑀯 𑀲𑀫𑀡𑁄’’𑀢𑀺𑀆𑀤𑀺. 𑀧𑀭𑀺𑀧𑀼𑀡𑁆𑀡𑀲𑀫𑀡𑀓𑀭𑀡𑀥𑀫𑁆𑀫𑁄 𑀳𑀺 𑀲𑁄, 𑀬𑁄 𑀲𑀩𑁆𑀩𑀧𑁆𑀧𑀓𑀸𑀭𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀩𑁆𑀩𑀢𑁆𑀢𑀓𑁄. 𑀧𑀭𑀧𑁆𑀧𑀯𑀸𑀤𑀸𑀢𑀺 𑀧𑀭𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸 𑀯𑀸𑀤𑀸 𑀢𑀺𑀢𑁆𑀣𑀸𑀬𑀢𑀦𑀸𑀦𑀺.

𑀅𑀭𑀜𑁆𑀜𑀸𑀤𑀺𑀓𑀲𑁆𑀲𑁂𑀯 𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀤𑁆𑀤𑀫𑁄 𑀤𑀫𑀣𑀁 𑀅𑀦𑀼𑀧𑀕𑀢𑁄 𑀕𑁄𑀡𑁄 𑀓𑀽𑀝𑀕𑁄𑀡𑁄. 𑀤𑁄𑀳𑀦𑀓𑀸𑀮𑁂 𑀬𑀣𑀸 𑀣𑀦𑁂𑀳𑀺 𑀅𑀦𑀯𑀲𑁂𑀲𑀢𑁄 𑀔𑀻𑀭𑀁 𑀦 𑀧𑀕𑁆𑀖𑀭𑀢𑀺, 𑀏𑀯𑀁 𑀤𑁄𑀳𑀧𑀝𑀺𑀩𑀦𑁆𑀥𑀺𑀦𑀻 𑀓𑀽𑀝𑀥𑁂𑀦𑀼. 𑀭𑀽𑀧𑀲𑀤𑁆𑀤𑀸𑀤𑀺𑀓𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀅𑀲𑁆𑀲𑀸𑀤𑁄 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀭𑀲𑁄. 𑀧𑀼𑀩𑁆𑀩𑁂 𑀆𑀘𑀺𑀡𑁆𑀡𑀸𑀭𑀫𑁆𑀫𑀡𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀢𑁄 𑀧𑀼𑀩𑁆𑀩𑁂, 𑀅𑀦𑀸𑀤𑀺𑀫𑀢𑀺 𑀯𑀸 𑀲𑀁𑀲𑀸𑀭𑁂 𑀧𑀭𑀺𑀘𑀺𑀢𑀸𑀭𑀫𑁆𑀫𑀡𑀁.

𑀦𑀺𑀩𑀦𑁆𑀥𑁂𑀬𑁆𑀬𑀸𑀢𑀺 𑀩𑀦𑁆𑀥𑁂𑀬𑁆𑀬. 𑀲𑀢𑀺𑀬𑀸𑀢𑀺 𑀲𑀫𑁆𑀫𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀸𑀬 𑀲𑀢𑀺𑀬𑀸. 𑀆𑀭𑀫𑁆𑀫𑀡𑁂𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑁂. 𑀤𑀴𑁆𑀳𑀦𑁆𑀢𑀺 𑀣𑀺𑀭𑀁, 𑀬𑀣𑀸 𑀲𑀢𑁄𑀓𑀸𑀭𑀺𑀲𑁆𑀲 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁄 𑀲𑀫𑀸𑀥𑀺 𑀇𑀚𑁆𑀛𑀢𑀺, 𑀢𑀣𑀸 𑀣𑀸𑀫𑀕𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀯𑀺𑀲𑁂𑀲𑀸𑀥𑀺𑀕𑀫𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀧𑀤𑀝𑁆𑀞𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀸𑀦𑀁, 𑀏𑀓𑀘𑁆𑀘𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀩𑀼𑀤𑁆𑀥𑀲𑀸𑀯𑀓𑀸𑀦𑀜𑁆𑀘 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲, 𑀅𑀜𑁆𑀜𑁂𑀦 𑀓𑀫𑁆𑀫𑀝𑁆𑀞𑀸𑀦𑁂𑀦 𑀅𑀥𑀺𑀕𑀢𑀯𑀺𑀲𑁂𑀲𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑁆𑀲 𑀘 𑀧𑀤𑀝𑁆𑀞𑀸𑀦𑀪𑀽𑀢𑀁. 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄 𑀯𑀺𑀬 𑀪𑀕𑀯𑀸 𑀬𑁄𑀕𑀻𑀦𑀁 𑀅𑀦𑀼𑀭𑀽𑀧𑀦𑀺𑀯𑀸𑀲𑀝𑁆𑀞𑀸𑀦𑀼𑀧𑀤𑀺𑀲𑀦𑀢𑁄. 𑀪𑀺𑀓𑁆𑀔𑀼 𑀤𑀻𑀧𑀺𑀲𑀤𑀺𑀲𑁄 𑀅𑀭𑀜𑁆𑀜𑁂 𑀏𑀓𑀸𑀓𑀻 𑀯𑀺𑀳𑀭𑀺𑀢𑁆𑀯𑀸 𑀧𑀝𑀺𑀧𑀓𑁆𑀔𑀦𑀺𑀫𑁆𑀫𑀣𑀦𑁂𑀦 𑀇𑀘𑁆𑀙𑀺𑀢𑀢𑁆𑀣𑀲𑀸𑀥𑀦𑀢𑁄. 𑀨𑀮𑀫𑀼𑀢𑁆𑀢𑀫𑀦𑁆𑀢𑀺 𑀲𑀸𑀫𑀜𑁆𑀜𑀨𑀮𑀁 𑀲𑀦𑁆𑀥𑀸𑀬𑀸𑀳. 𑀧𑀭𑀓𑁆𑀓𑀫𑀚𑀯𑀬𑁄𑀕𑁆𑀕𑀪𑀽𑀫𑀺𑀦𑁆𑀢𑀺 𑀪𑀸𑀯𑀦𑀼𑀲𑁆𑀲𑀸𑀳𑀚𑀯𑀲𑁆𑀲 𑀬𑁄𑀕𑁆𑀕𑀓𑀭𑀡𑀪𑀽𑀫𑀺𑀪𑀽𑀢𑀁.

𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀯𑀲𑁂𑀦 𑀲𑀺𑀓𑁆𑀔𑀢𑁄𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀤𑀻𑀖𑀭𑀲𑁆𑀲𑀢𑀸𑀧𑀚𑀸𑀦𑀦-𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀦-𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀪𑀸𑀯𑀦𑀸𑀦𑀼𑀬𑁄𑀕𑀁 𑀲𑀺𑀓𑁆𑀔𑀢𑁄, 𑀢𑀣𑀸𑀪𑀽𑀢𑁄 𑀯𑀸 𑀳𑀼𑀢𑁆𑀯𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀯𑀢𑁆𑀢𑀬𑀢𑁄. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑁂𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀦𑁆𑀦𑀺𑀲𑁆𑀲𑀬𑁂𑀦 𑀉𑀧𑀝𑁆𑀞𑀺𑀢𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀦𑁆𑀢𑁄, 𑀬𑁄 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀫𑁆𑀫𑀺𑀓𑁄’’𑀢𑀺 𑀯𑀼𑀢𑁆𑀢𑁄. 𑀛𑀸𑀦𑀗𑁆𑀕𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀅𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀦𑁆𑀢𑁄. 𑀯𑀢𑁆𑀣𑀼 𑀦𑀸𑀫 𑀓𑀭𑀚𑀓𑀸𑀬𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀻𑀢𑀺 𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺 ‘‘𑀢𑀬𑀺𑀤𑀁 𑀥𑀫𑁆𑀫𑀫𑀢𑁆𑀢𑀁 𑀦 𑀅𑀳𑁂𑀢𑀼𑀓𑀁, 𑀦𑀸𑀧𑀺 𑀇𑀲𑁆𑀲𑀭𑀸𑀤𑀺𑀯𑀺𑀲𑀫𑀳𑁂𑀢𑀼𑀓𑀁, 𑀅𑀣 𑀔𑁄 𑀅𑀯𑀺𑀚𑁆𑀚𑀸𑀤𑀻𑀳𑀺 𑀏𑀯 𑀲𑀳𑁂𑀢𑀼𑀓’’𑀦𑁆𑀢𑀺 𑀅𑀤𑁆𑀥𑀢𑁆𑀢𑀬𑁂𑀧𑀺 𑀓𑀗𑁆𑀔𑀸𑀯𑀺𑀢𑀭𑀡𑁂𑀦 𑀯𑀺𑀢𑀺𑀡𑁆𑀡𑀓𑀗𑁆𑀔𑁄 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁬𑁧; 𑀫. 𑀦𑀺. 𑁨.𑁧𑁧𑁩; 𑀫. 𑀦𑀺. 𑁩.𑁮𑁬; 𑀅. 𑀦𑀺. 𑁪.𑁧𑁮𑁧; 𑀧𑀝𑀺. 𑀫. 𑁧.𑁪𑁮) 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸.

𑀧𑀭𑀲𑁆𑀲 𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁂𑀢𑀺 𑀇𑀤𑀁 𑀲𑀫𑁆𑀫𑀲𑀦𑀘𑀸𑀭𑀯𑀲𑁂𑀦𑀸𑀬𑀁 𑀧𑀸𑀴𑀺 𑀧𑀯𑀢𑁆𑀢𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀲𑀫𑀣𑀯𑀲𑁂𑀦 𑀧𑀦 𑀧𑀭𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁂 𑀅𑀧𑁆𑀧𑀦𑀸𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀏𑀯 𑀦𑀢𑁆𑀣𑀻𑀢𑀺. 𑀇𑀤𑀁 𑀉𑀪𑀬𑀁 𑀦 𑀮𑀩𑁆𑀪𑀢𑀻𑀢𑀺 ‘‘𑀅𑀚𑁆𑀛𑀢𑁆𑀢𑀁, 𑀩𑀳𑀺𑀤𑁆𑀥𑀸’’𑀢𑀺 𑀘 𑀯𑀼𑀢𑁆𑀢𑀁 𑀇𑀤𑀁 𑀥𑀫𑁆𑀫𑀤𑁆𑀯𑀬𑀖𑀝𑀺𑀢𑀁 𑀏𑀓𑀢𑁄 𑀆𑀭𑀫𑁆𑀫𑀡𑀪𑀸𑀯𑁂𑀦 𑀦 𑀮𑀩𑁆𑀪𑀢𑀺.

𑀲𑀫𑀼𑀤𑁂𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑀼𑀤𑀬𑁄, 𑀲𑁄 𑀏𑀯 𑀓𑀸𑀭𑀡𑀝𑁆𑀞𑁂𑀦 𑀥𑀫𑁆𑀫𑁄𑀢𑀺 𑀲𑀫𑀼𑀤𑀬𑀥𑀫𑁆𑀫𑁄, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀧𑀯𑀢𑁆𑀢𑀺𑀳𑁂𑀢𑀼𑀓𑀭𑀚𑀓𑀸𑀬𑀸𑀤𑀺. 𑀢𑀲𑁆𑀲 𑀅𑀦𑀼𑀧𑀲𑁆𑀲𑀦𑀲𑀻𑀮𑁄 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻. 𑀢𑀁 𑀧𑀦 𑀲𑀫𑀼𑀤𑀬𑀥𑀫𑁆𑀫𑀁 𑀉𑀧𑀫𑀸𑀫𑀼𑀔𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀲𑁆𑀢𑀦𑁆𑀢𑀺 𑀭𑀼𑀢𑁆𑀢𑀺𑀁. 𑀕𑀕𑁆𑀕𑀭𑀦𑀸𑀴𑀺𑀦𑁆𑀢𑀺 𑀉𑀓𑁆𑀓𑀸𑀧𑀦𑀸𑀴𑀺𑀁. 𑀢𑁂𑀢𑀺 𑀓𑀭𑀚𑀓𑀸𑀬𑀸𑀤𑀺𑀓𑁂. 𑀬𑀣𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁄 𑀓𑀭𑀚𑀓𑀸𑀬𑀸𑀤𑀺𑀲𑀫𑁆𑀩𑀦𑁆𑀥𑀻 𑀨𑀮𑀪𑀸𑀯𑁂𑀦, 𑀏𑀯𑀁 𑀢𑁂𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀲𑀫𑁆𑀩𑀦𑁆𑀥𑀺𑀦𑁄 𑀳𑁂𑀢𑀼𑀪𑀸𑀯𑁂𑀦𑀸𑀢𑀺 ‘‘𑀲𑀫𑀼𑀤𑀬𑀥𑀫𑁆𑀫𑀸 𑀓𑀸𑀬𑀲𑁆𑀫𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀼𑀤𑀬…𑀧𑁂… 𑀯𑀼𑀘𑁆𑀘𑀢𑀻’’𑀢𑀺. 𑀧𑀓𑀢𑀺𑀯𑀸𑀘𑀻 𑀯𑀸 𑀥𑀫𑁆𑀫-𑀲𑀤𑁆𑀤𑁄 ‘‘𑀚𑀸𑀢𑀺𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁩𑁧; 𑀫. 𑀦𑀺. 𑁩.𑁩𑁭𑁩; 𑀧𑀝𑀺. 𑀫. 𑁧.𑁩𑁩) 𑀯𑀺𑀬𑀸𑀢𑀺 𑀓𑀸𑀬𑀲𑁆𑀲 𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀧𑀓𑀢𑀺𑀓𑀸𑀦𑀼𑀧𑀲𑁆𑀲𑀻 ‘‘𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 𑁋 ‘‘𑀓𑀭𑀚𑀓𑀸𑀬𑀜𑁆𑀘𑀸’’𑀢𑀺𑀆𑀤𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀸𑀬𑀲𑁆𑀫𑀺𑀦𑁆𑀢𑀺 𑀪𑀼𑀫𑁆𑀫𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀅𑀳𑁂𑀢𑀼𑀓𑀢𑁆𑀢𑁂𑀧𑀺 𑀯𑀺𑀦𑀸𑀲𑀲𑁆𑀲 𑀬𑁂𑀲𑀁 𑀳𑁂𑀢𑀼𑀥𑀫𑁆𑀫𑀸𑀦𑀁 𑀅𑀪𑀸𑀯𑁂 𑀬𑀁 𑀦 𑀳𑁄𑀢𑀺, 𑀢𑀤𑀪𑀸𑀯𑁄 𑀢𑀲𑁆𑀲 𑀅𑀪𑀸𑀯𑀲𑁆𑀲 𑀳𑁄𑀢𑀼 𑀯𑀺𑀬 𑀯𑁄𑀳𑀭𑀻𑀬𑀢𑀻𑀢𑀺 𑀉𑀧𑀘𑀸𑀭𑀢𑁄 𑀓𑀭𑀚𑀓𑀸𑀬𑀸𑀤𑀺𑀅𑀪𑀸𑀯𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀲𑁆𑀲 𑀯𑀬𑀓𑀸𑀭𑀡𑀁 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀬𑀣𑀸 𑀪𑀲𑁆𑀢𑀸𑀬𑀸’’𑀢𑀺𑀆𑀤𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀞𑀫𑀯𑀺𑀓𑀧𑁆𑀧𑀯𑀲𑁂𑀦 𑀅𑀢𑁆𑀣𑀯𑀺𑀪𑀸𑀯𑀦𑀸. 𑀤𑀼𑀢𑀺𑀬𑀯𑀺𑀓𑀧𑁆𑀧𑀯𑀲𑁂𑀦 𑀧𑀦 𑀉𑀧𑀘𑀸𑀭𑁂𑀦 𑀯𑀺𑀦𑀸𑀬𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀦𑀼𑀧𑀲𑁆𑀲𑀦𑀸 𑀯𑀺𑀬 𑀪𑀺𑀦𑁆𑀦𑀯𑀢𑁆𑀣𑀼𑀯𑀺𑀲𑀬𑀢𑀸𑀬 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀧𑀺 𑀏𑀓𑀓𑀸𑀮𑁂 𑀦 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀓𑀸𑀮𑁂𑀦 𑀲𑀫𑀼𑀤𑀬𑀁 𑀓𑀸𑀮𑁂𑀦 𑀯𑀬𑀁 𑀅𑀦𑀼𑀧𑀲𑁆𑀲𑀦𑁆𑀢𑁄’’𑀢𑀺.

𑀅𑀢𑁆𑀣𑀺 𑀓𑀸𑀬𑁄𑀢𑀺 𑀏𑀯-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 ‘‘𑀓𑀸𑀬𑁄𑀯 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀣𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀲𑀢𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀧𑀭𑁂𑀲𑀜𑁆𑀘 𑀲𑀚𑁆𑀚𑀸𑀧𑀦𑀝𑁆𑀞𑁂𑀦, 𑀲𑀢𑁆𑀯𑀕𑀼𑀡𑀬𑁄𑀕𑀢𑁄 𑀯𑀸 ‘‘𑀲𑀢𑁆𑀢𑁄’’𑀢𑀺 𑀧𑀭𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑁄. 𑀢𑀲𑁆𑀲 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀧𑀽𑀭𑀡𑀢𑁄 𑀘 𑀘𑀯𑀦𑀼𑀧𑀧𑀚𑁆𑀚𑀦𑀥𑀫𑁆𑀫𑀢𑀸𑀬 𑀕𑀮𑀦𑀢𑁄 𑀘 ‘‘𑀧𑀼𑀕𑁆𑀕𑀮𑁄’’𑀢𑀺. 𑀣𑀻𑀬𑀢𑀺 𑀲𑀁𑀳𑀜𑁆𑀜𑀢𑀺 𑀏𑀢𑁆𑀣 𑀕𑀩𑁆𑀪𑁄𑀢𑀺 ‘‘𑀇𑀢𑁆𑀣𑀻’’𑀢𑀺. 𑀧𑀼𑀭𑀺 𑀧𑀼𑀭𑁂 𑀪𑀸𑀕𑁂 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 ‘‘𑀧𑀼𑀭𑀺𑀲𑁄’’𑀢𑀺. 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 ‘‘𑀅𑀢𑁆𑀢𑀸’’𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑁂𑀦 ‘‘𑀅𑀢𑁆𑀢𑀦𑀺𑀬’’𑀦𑁆𑀢𑀺. 𑀧𑀭𑁄 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀳’’𑀦𑁆𑀢𑀺, 𑀫𑀫 𑀲𑀦𑁆𑀢𑀓𑀦𑁆𑀢𑀺 𑀓𑀢𑁆𑀯𑀸 ‘‘𑀫𑀫’’𑀦𑁆𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀺𑀦𑀺𑀫𑀼𑀢𑁆𑀢𑁄 𑀅𑀜𑁆𑀜𑁄𑀢𑀺 𑀓𑀢𑁆𑀯𑀸 ‘‘𑀓𑁄𑀘𑀻’’𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑁂𑀦 ‘‘𑀓𑀲𑁆𑀲𑀘𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑀩𑁆𑀩𑁄 𑀓𑁄𑀘𑀺 𑀦𑀢𑁆𑀣𑀺, 𑀓𑁂𑀯𑀮𑀁 𑀓𑀸𑀬𑁄 𑀏𑀯 𑀅𑀢𑁆𑀣𑀻𑀢𑀺 𑀅𑀢𑁆𑀢𑀢𑁆𑀢𑀦𑀺𑀬𑀲𑀼𑀜𑁆𑀜𑀢𑀫𑁂𑀯 𑀓𑀸𑀬𑀲𑁆𑀲 𑀯𑀺𑀪𑀸𑀯𑁂𑀢𑀺. 𑀏𑀯𑀦𑁆𑀢𑀺 ‘‘𑀓𑀸𑀬𑁄𑀯 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀜𑀸𑀡𑀧𑀫𑀸𑀡𑀢𑁆𑀣𑀸𑀬𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀧𑀭𑀁 𑀧𑀫𑀸𑀡𑀁 𑀧𑀸𑀧𑀦𑀢𑁆𑀣𑀸𑀬. 𑀲𑀢𑀺𑀧𑀫𑀸𑀡𑀢𑁆𑀣𑀸𑀬𑀸𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀲𑀢𑀺𑀧𑀯𑀢𑁆𑀢𑀁 𑀲𑀢𑀺𑀧𑀭𑀁 𑀧𑀫𑀸𑀡𑀁 𑀧𑀸𑀧𑀦𑀢𑁆𑀣𑀸𑀬. 𑀇𑀫𑀲𑁆𑀲 𑀳𑀺 𑀯𑀼𑀢𑁆𑀢𑀦𑀬𑁂𑀦 ‘‘𑀅𑀢𑁆𑀣𑀺 𑀓𑀸𑀬𑁄’’𑀢𑀺 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀲𑀢𑀺 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀢𑀢𑁆𑀣 𑀜𑀸𑀡𑀲𑁆𑀲 𑀲𑀢𑀺𑀬𑀸 𑀘 𑀧𑀭𑀺𑀩𑁆𑀭𑀽𑀳𑀦𑀸𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀁 𑀯𑀟𑁆𑀠𑀢𑁆𑀣𑀸𑀬𑀸’’𑀢𑀺.

𑀇𑀫𑀺𑀲𑁆𑀲𑀸 𑀪𑀸𑀯𑀦𑀸𑀬 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑀸𑀳𑀸𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸…𑀧𑁂… 𑀯𑀺𑀳𑀭𑀢𑀻’’𑀢𑀺. 𑀢𑀣𑀸𑀪𑀽𑀢𑁄 𑀘 𑀮𑁄𑀓𑁂 𑀓𑀺𑀜𑁆𑀘𑀺 ‘‘𑀅𑀳’’𑀦𑁆𑀢𑀺 𑀯𑀸 ‘‘𑀫𑀫’’𑀦𑁆𑀢𑀺 𑀯𑀸 𑀕𑀳𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀺, 𑀓𑀼𑀢𑁄 𑀕𑀡𑁆𑀳𑁂𑀬𑁆𑀬. 𑀢𑁂𑀦𑀸𑀳 ‘‘𑀦 𑀘 𑀓𑀺𑀜𑁆𑀘𑀻’’𑀢𑀺𑀆𑀤𑀺. 𑀏𑀯𑀫𑁆𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀳𑁂𑀝𑁆𑀞𑀸 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀢𑁆𑀣𑀲𑁆𑀲 𑀅𑀪𑀸𑀯𑀢𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑀭𑀺 𑀅𑀢𑁆𑀣𑀁 𑀉𑀧𑀸𑀤𑀸𑀬𑀸’’𑀢𑀺 𑀆𑀳. ‘‘𑀏𑀯’’𑀦𑁆𑀢𑀺 𑀧𑀦 𑀦𑀺𑀤𑁆𑀤𑀺𑀝𑁆𑀞𑀸𑀓𑀸𑀭𑀲𑁆𑀲 𑀧𑀘𑁆𑀘𑀸𑀫𑀲𑀦𑀁 𑀦𑀺𑀕𑀫𑀦𑀯𑀲𑁂𑀦 𑀓𑀢𑀦𑁆𑀢𑀺 𑀆𑀳 ‘‘𑀇𑀫𑀺𑀦𑀸 𑀧𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀧𑀼𑀩𑁆𑀩𑀪𑀸𑀕𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀢𑀺 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺. 𑀲𑀸 𑀧𑀦 𑀲𑀢𑀺 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂, 𑀢𑀲𑁆𑀲 𑀲𑀫𑀼𑀝𑁆𑀞𑀸𑀧𑀺𑀓𑀸 𑀢𑀡𑁆𑀳𑀸 𑀢𑀲𑁆𑀲𑀸𑀧𑀺 𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀯 𑀦𑀸𑀫 𑀳𑁄𑀢𑀺 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀢𑀲𑁆𑀲𑀸 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸’’𑀢𑀺. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀦 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀅𑀧𑁆𑀧𑀯𑀢𑁆𑀢𑀺. 𑀘𑀢𑀼𑀲𑀘𑁆𑀘𑀯𑀲𑁂𑀦𑀸𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦. 𑀉𑀲𑁆𑀲𑀓𑁆𑀓𑀺𑀢𑁆𑀯𑀸𑀢𑀺 𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀬 𑀆𑀭𑀼𑀳𑀺𑀢𑁆𑀯𑀸, 𑀪𑀸𑀯𑀦𑀁 𑀉𑀧𑀭𑀺 𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀬𑁆𑀬𑀸𑀦𑀫𑀼𑀔𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀡𑀽𑀧𑀸𑀬𑁄.

𑀆𑀦𑀸𑀧𑀸𑀦𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀭𑀺𑀬𑀸𑀧𑀣𑀧𑀩𑁆𑀩𑀯𑀡𑁆𑀡𑀦𑀸

𑁧𑁦𑁮. 𑀇𑀭𑀺𑀬𑀸𑀧𑀣𑀯𑀲𑁂𑀦𑀸𑀢𑀺 𑀇𑀭𑀺𑀬𑀦𑀁 𑀇𑀭𑀺𑀬𑀸, 𑀓𑀺𑀭𑀺𑀬𑀸, 𑀇𑀥 𑀧𑀦 𑀓𑀸𑀬𑀺𑀓𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀭𑀺𑀬𑀸𑀦𑀁 𑀧𑀣𑁄 𑀧𑀯𑀢𑁆𑀢𑀺𑀫𑀕𑁆𑀕𑁄𑀢𑀺 𑀇𑀭𑀺𑀬𑀸𑀧𑀣𑁄, 𑀕𑀫𑀦𑀸𑀤𑀺𑀲𑀭𑀻𑀭𑀸𑀯𑀢𑁆𑀣𑀸. 𑀕𑀘𑁆𑀙𑀦𑁆𑀢𑁄 𑀯𑀸 𑀳𑀺 𑀲𑀢𑁆𑀢𑁄 𑀓𑀸𑀬𑁂𑀦 𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀁 𑀓𑀭𑁂𑀬𑁆𑀬 𑀞𑀺𑀢𑁄 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀦𑀺𑀧𑀦𑁆𑀦𑁄 𑀯𑀸𑀢𑀺. 𑀢𑁂𑀲𑀁 𑀯𑀲𑁂𑀦, 𑀇𑀭𑀺𑀬𑀸𑀧𑀣𑀯𑀺𑀪𑀸𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀦 𑀘𑀧𑀭𑀦𑁆𑀢𑀺 𑀧𑀼𑀦 𑀘 𑀅𑀧𑀭𑀁, 𑀬𑀣𑀸𑀯𑀼𑀢𑁆𑀢𑀆𑀦𑀸𑀧𑀸𑀦𑀓𑀫𑁆𑀫𑀝𑁆𑀞𑀸𑀦𑀢𑁄 𑀪𑀺𑀬𑁆𑀬𑁄𑀧𑀺 𑀅𑀜𑁆𑀜𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀫𑀺, 𑀲𑀼𑀡𑀸𑀣𑀸𑀢𑀺 𑀯𑀸 𑀅𑀥𑀺𑀧𑁆𑀧𑀸𑀬𑁄. 𑀕𑀘𑁆𑀙𑀦𑁆𑀢𑁄 𑀯𑀸𑀢𑀺𑀆𑀤𑀺 𑀕𑀫𑀦𑀸𑀤𑀺𑀫𑀢𑁆𑀢𑀚𑀸𑀦𑀦𑀲𑁆𑀲 𑀕𑀫𑀦𑀸𑀤𑀺𑀕𑀢𑀯𑀺𑀲𑁂𑀲𑀚𑀸𑀦𑀦𑀲𑁆𑀲 𑀘 𑀲𑀸𑀥𑀸𑀭𑀡𑀯𑀘𑀦𑀁. 𑀢𑀢𑁆𑀣 𑀕𑀫𑀦𑀸𑀤𑀺𑀫𑀢𑁆𑀢𑀚𑀸𑀦𑀦𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁, 𑀕𑀫𑀦𑀸𑀤𑀺𑀕𑀢𑀯𑀺𑀲𑁂𑀲𑀚𑀸𑀦𑀦𑀁 𑀧𑀦 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀸𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀽𑀧𑀮𑀤𑁆𑀥𑀺𑀦𑁆𑀢𑀺 𑀲𑀢𑁆𑀢𑁄 𑀅𑀢𑁆𑀣𑀻𑀢𑀺 𑀉𑀧𑀮𑀤𑁆𑀥𑀺𑀁 𑀲𑀢𑁆𑀢𑀕𑁆𑀕𑀸𑀳𑀁 𑀦 𑀚𑀳𑀢𑀺 𑀦 𑀧𑀭𑀺𑀘𑁆𑀘𑀚𑀢𑀺 ‘‘𑀅𑀳𑀁 𑀕𑀘𑁆𑀙𑀸𑀫𑀺, 𑀫𑀫 𑀕𑀫𑀦’’𑀦𑁆𑀢𑀺 𑀕𑀸𑀳𑀲𑀩𑁆𑀪𑀸𑀯𑀢𑁄. 𑀢𑀢𑁄 𑀏𑀯 𑀅𑀢𑁆𑀢𑀲𑀜𑁆𑀜𑀁 ‘‘𑀅𑀢𑁆𑀣𑀺 𑀅𑀢𑁆𑀢𑀸 𑀓𑀸𑀭𑀓𑁄 𑀯𑁂𑀤𑀓𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀯𑀺𑀧𑀭𑀻𑀢𑀲𑀜𑁆𑀜𑀁 𑀦 𑀉𑀕𑁆𑀖𑀸𑀝𑁂𑀢𑀺 𑀦𑀸𑀧𑀦𑁂𑀢𑀺 𑀅𑀧𑀝𑀺𑀧𑀓𑁆𑀔𑀪𑀸𑀯𑀢𑁄, 𑀅𑀦𑀦𑀩𑁆𑀭𑀽𑀳𑀦𑀢𑁄 𑀯𑀸. 𑀏𑀯𑀁 𑀪𑀽𑀢𑀲𑁆𑀲 𑀘𑀲𑁆𑀲 𑀓𑀼𑀢𑁄 𑀓𑀫𑁆𑀫𑀝𑁆𑀞𑀸𑀦𑀸𑀤𑀺𑀪𑀸𑀯𑁄𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀯𑀸 𑀦 𑀳𑁄𑀢𑀻’’𑀢𑀺. 𑀇𑀫𑀲𑁆𑀲 𑀧𑀦𑀸𑀢𑀺𑀆𑀤𑀺𑀲𑀼𑀓𑁆𑀓𑀧𑀓𑁆𑀔𑀲𑁆𑀲 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀫𑁂𑀯 𑀳𑀺 𑀅𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀤𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑁄 𑀕𑀘𑁆𑀙𑀢𑀻𑀢𑀺 𑀕𑀫𑀦𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀧𑀼𑀘𑁆𑀙𑀸, 𑀲𑀸 𑀓𑀢𑁆𑀢𑀼𑀪𑀸𑀯𑀯𑀺𑀲𑀺𑀝𑁆𑀞𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀢𑁆𑀣𑀸 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀕𑀫𑀦𑀲𑀺𑀤𑁆𑀥𑀺𑀤𑀲𑁆𑀲𑀦𑀢𑁄. 𑀓𑀲𑁆𑀲 𑀕𑀫𑀦𑀦𑁆𑀢𑀺 𑀅𑀓𑀢𑁆𑀢𑀼𑀢𑀸𑀯𑀺𑀲𑀺𑀝𑁆𑀞𑀅𑀢𑁆𑀢𑀕𑁆𑀕𑀸𑀳𑀧𑀝𑀺𑀓𑁆𑀔𑁂𑀧𑀢𑁆𑀣𑀸. 𑀓𑀺𑀁𑀓𑀸𑀭𑀡𑀸𑀢𑀺 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀓𑀢𑁆𑀢𑀼𑀓𑀸𑀬 𑀕𑀫𑀦𑀓𑀺𑀭𑀺𑀬𑀸𑀬 𑀅𑀯𑀺𑀧𑀭𑀻𑀢𑀓𑀸𑀭𑀡𑀧𑀼𑀘𑁆𑀙𑀸 ‘‘𑀕𑀫𑀦𑀦𑁆𑀢𑀺 𑀅𑀢𑁆𑀢𑀸 𑀫𑀦𑀲𑀸 𑀲𑀁𑀬𑀼𑀚𑁆𑀚𑀢𑀺, 𑀫𑀦𑁄 𑀇𑀦𑁆𑀤𑁆𑀭𑀺𑀬𑁂𑀳𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀢𑁆𑀢𑁂𑀳𑀻’’𑀢𑀺 𑀏𑀯𑀫𑀸𑀤𑀺𑀕𑀫𑀦𑀓𑀸𑀭𑀡𑀧𑀝𑀺𑀓𑁆𑀔𑁂𑀧𑀦𑀢𑁄. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺.

𑀦 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀕𑀘𑁆𑀙𑀢𑀺 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀕𑀫𑀦𑀲𑀺𑀤𑁆𑀥𑀺𑀢𑁄 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄. 𑀇𑀤𑀸𑀦𑀺 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀕𑀫𑀦𑀲𑀺𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀺𑀢𑁆𑀢𑀓𑀺𑀭𑀺𑀬𑀸 𑀘 𑀲𑀸 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀧𑁆𑀨𑀸𑀭𑁄 𑀯𑀺𑀧𑁆𑀨𑀦𑁆𑀤𑀦𑀜𑁆𑀘𑀸𑀢𑀺 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁄, 𑀢𑁂𑀦. 𑀏𑀢𑁆𑀣 𑀘 𑀘𑀺𑀢𑁆𑀢𑀓𑀺𑀭𑀺𑀬𑀕𑁆𑀕𑀳𑀡𑁂𑀦 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀁 𑀦𑀺𑀯𑀢𑁆𑀢𑁂𑀢𑀺, 𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀕𑁆𑀕𑀳𑀡𑁂𑀦 𑀘𑁂𑀢𑀦𑀸𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀪𑁂𑀤𑀁 𑀘𑀺𑀢𑁆𑀢𑀓𑀺𑀭𑀺𑀬𑀁 𑀦𑀺𑀯𑀢𑁆𑀢𑁂𑀢𑀺, 𑀉𑀪𑀬𑁂𑀦 𑀧𑀦 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁 𑀯𑀺𑀪𑀸𑀯𑁂𑀢𑀺. ‘‘𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀬𑀣𑀸 𑀧𑀯𑀢𑁆𑀢𑀫𑀸𑀦𑁂 𑀓𑀸𑀬𑁂 ‘‘𑀕𑀘𑁆𑀙𑀢𑀻’’𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀕𑀦𑁆𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀁. 𑀯𑀸𑀬𑀁 𑀚𑀦𑁂𑀢𑀻𑀢𑀺 𑀯𑀸𑀬𑁄𑀥𑀸𑀢𑀼𑀅𑀥𑀺𑀓𑀁 𑀭𑀽𑀧𑀓𑀮𑀸𑀧𑀁 𑀚𑀦𑁂𑀢𑀺, 𑀅𑀥𑀺𑀓𑀢𑀸 𑀘𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄, 𑀦 𑀧𑀫𑀸𑀡𑀢𑁄. 𑀕𑀫𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀁 𑀲𑀳𑀚𑀸𑀢𑀭𑀽𑀧𑀓𑀸𑀬𑀲𑁆𑀲 𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀘𑀮𑀦𑀸𑀦𑀁 𑀧𑀘𑁆𑀘𑀬𑀪𑀽𑀢𑁂𑀦 𑀆𑀓𑀸𑀭𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀯𑀸𑀬𑁄𑀥𑀸𑀢𑀼𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀸𑀬𑁄 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀢𑀻’’𑀢𑀺. 𑀅𑀥𑀺𑀧𑁆𑀧𑀸𑀬𑀲𑀳𑀪𑀸𑀯𑀻 𑀳𑀺 𑀯𑀺𑀓𑀸𑀭𑁄 𑀯𑀺𑀜𑁆𑀜𑀢𑁆𑀢𑀺, 𑀬𑀣𑀸𑀯𑀼𑀢𑁆𑀢𑀅𑀥𑀺𑀓𑀪𑀸𑀯𑁂𑀦𑁂𑀯 𑀘 𑀯𑀸𑀬𑁄𑀕𑀳𑀡𑀁, 𑀦 𑀯𑀸𑀬𑁄𑀥𑀸𑀢𑀼𑀬𑀸 𑀏𑀯 𑀚𑀦𑀓𑀪𑀸𑀯𑀢𑁄, 𑀅𑀜𑁆𑀜𑀣𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀬𑀭𑀽𑀧𑀪𑀸𑀯𑁄 𑀤𑀼𑀭𑀼𑀧𑀧𑀸𑀤𑁄 𑀲𑀺𑀬𑀸. 𑀧𑀼𑀭𑀢𑁄 𑀅𑀪𑀺𑀦𑀻𑀳𑀸𑀭𑁄 𑀧𑀼𑀭𑀢𑁄𑀪𑀸𑀕𑁂𑀦 𑀓𑀸𑀬𑀲𑁆𑀲 𑀧𑀯𑀢𑁆𑀢𑀦𑀁, 𑀬𑁄 ‘‘𑀅𑀪𑀺𑀓𑁆𑀓𑀫𑁄’’𑀢𑀺 𑀯𑀼𑀘𑁆𑀘𑀢𑀺.

‘‘𑀏𑀲𑁂𑀯 𑀦𑀬𑁄’’𑀢𑀺 𑀅𑀢𑀺𑀤𑁂𑀲𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀢𑀢𑁆𑀭𑀸𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀳𑁂𑀝𑁆𑀞𑀺𑀫𑀓𑁄𑀝𑀺𑀢𑁄 𑀧𑀝𑁆𑀞𑀸𑀬. 𑀉𑀲𑁆𑀲𑀺𑀢𑀪𑀸𑀯𑁄𑀢𑀺 𑀉𑀩𑁆𑀩𑀺𑀤𑁆𑀥𑀪𑀸𑀯𑁄.

𑀏𑀯𑀁 𑀧𑀚𑀸𑀦𑀢𑁄𑀢𑀺 𑀏𑀯𑀁 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀕𑀫𑀦𑀸𑀤𑀺𑀪𑀸𑀯𑁄 𑀳𑁄𑀢𑀻𑀢𑀺 𑀧𑀚𑀸𑀦𑀢𑁄 𑀢𑀲𑁆𑀲 𑀏𑀯𑀁 𑀧𑀚𑀸𑀦𑀦𑀸𑀬 𑀦𑀺𑀘𑁆𑀙𑀬𑀕𑀫𑀦𑀢𑁆𑀣𑀁 ‘‘𑀏𑀯𑀁 𑀳𑁄𑀢𑀻’’𑀢𑀺 𑀯𑀺𑀘𑀸𑀭𑀡𑀸 𑀯𑀼𑀘𑁆𑀘𑀢𑀺 𑀮𑁄𑀓𑁂 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑁂𑀳𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀲𑁂𑀦, 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀯𑀸. 𑀅𑀢𑁆𑀣𑀺 𑀧𑀦𑀸𑀢𑀺 𑀅𑀢𑁆𑀢𑀦𑁄 𑀏𑀯 𑀯𑀻𑀫𑀁𑀲𑀦𑀯𑀲𑁂𑀦 𑀧𑀼𑀘𑁆𑀙𑀸𑀯𑀘𑀦𑀁. 𑀦𑀢𑁆𑀣𑀻𑀢𑀺 𑀦𑀺𑀘𑁆𑀙𑀬𑀯𑀲𑁂𑀦 𑀲𑀢𑁆𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀬𑀣𑀸 𑀧𑀦𑀸𑀢𑀺𑀆𑀤𑀺 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀉𑀧𑀫𑀸𑀬 𑀯𑀺𑀪𑀸𑀯𑀦𑀁.

𑀦𑀸𑀯𑀸 𑀫𑀸𑀮𑀼𑀢𑀯𑁂𑀕𑁂𑀦𑀸𑀢𑀺 𑀬𑀣𑀸 𑀅𑀘𑁂𑀢𑀦𑀸 𑀦𑀸𑀯𑀸 𑀯𑀸𑀢𑀯𑁂𑀕𑁂𑀦 𑀤𑁂𑀲𑀦𑁆𑀢𑀭𑀁 𑀬𑀸𑀢𑀺, 𑀬𑀣𑀸 𑀘 𑀅𑀘𑁂𑀢𑀦𑁄 𑀢𑁂𑀚𑀦𑀁 𑀓𑀡𑁆𑀟𑁄 𑀚𑀺𑀬𑀸𑀯𑁂𑀕𑁂𑀦 𑀤𑁂𑀲𑀦𑁆𑀢𑀭𑀁 𑀬𑀸𑀢𑀺, 𑀢𑀣𑀸 𑀅𑀘𑁂𑀢𑀦𑁄 𑀓𑀸𑀬𑁄 𑀯𑀸𑀢𑀸𑀳𑀢𑁄 𑀬𑀣𑀸𑀯𑀼𑀢𑁆𑀢𑀯𑀸𑀬𑀼𑀦𑀸 𑀦𑀻𑀢𑁄 𑀤𑁂𑀲𑀦𑁆𑀢𑀭𑀁 𑀬𑀸𑀢𑀻𑀢𑀺 𑀏𑀯𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀓𑁄𑀘𑀺 𑀯𑀤𑁂𑀬𑁆𑀬 ‘‘𑀬𑀣𑀸 𑀦𑀸𑀯𑀸𑀬 𑀢𑁂𑀚𑀦𑀲𑁆𑀲 𑀘 𑀧𑁂𑀮𑁆𑀮𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀲𑁂𑀦 𑀤𑁂𑀲𑀦𑁆𑀢𑀭𑀕𑀫𑀦𑀁, 𑀏𑀯𑀁 𑀓𑀸𑀬𑀲𑁆𑀲𑀸𑀧𑀻’’𑀢𑀺, 𑀳𑁄𑀢𑀼, 𑀏𑀯𑀁 𑀇𑀘𑁆𑀙𑀺𑀢𑁄𑀯𑀸𑀬𑀫𑀢𑁆𑀣𑁄. 𑀬𑀣𑀸 𑀳𑀺 𑀦𑀸𑀯𑀸 𑀢𑁂𑀚𑀦𑀸𑀦𑀁 𑀲𑀁𑀳𑀢𑀮𑀓𑁆𑀔𑀡𑀲𑁆𑀲𑁂𑀯 𑀧𑀼𑀭𑀺𑀲𑀲𑁆𑀲 𑀯𑀲𑁂𑀦 𑀕𑀫𑀦𑀁, 𑀦 𑀅𑀲𑀁𑀳𑀢𑀮𑀓𑁆𑀔𑀡𑀲𑁆𑀲, 𑀏𑀯𑀁 𑀓𑀸𑀬𑀲𑁆𑀲𑀸𑀧𑀻𑀢𑀺 𑀓𑀸 𑀦𑁄 𑀳𑀸𑀦𑀺, 𑀪𑀺𑀬𑁆𑀬𑁄𑀧𑀺 𑀥𑀫𑁆𑀫𑀫𑀢𑁆𑀢𑀢𑀸𑀯 𑀧𑀢𑀺𑀝𑁆𑀞𑀁 𑀮𑀪𑀢𑀺, 𑀦 𑀧𑀼𑀭𑀺𑀲𑀯𑀸𑀤𑁄. 𑀢𑁂𑀦𑀸𑀳 ‘‘𑀬𑀦𑁆𑀢𑀁 𑀲𑀼𑀢𑁆𑀢𑀯𑀲𑁂𑀦𑀸’’𑀢𑀺𑀆𑀤𑀺.

𑀢𑀢𑁆𑀣 𑀧𑀬𑀼𑀢𑁆𑀢𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀕𑀫𑀦𑀸𑀤𑀺𑀓𑀺𑀭𑀺𑀬𑀸𑀯𑀲𑁂𑀦 𑀧𑀬𑁄𑀚𑀺𑀢𑀁. 𑀞𑀸𑀢𑀻𑀢𑀺 𑀢𑀺𑀝𑁆𑀞𑀢𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀯𑀺𑀦𑀸 𑀳𑁂𑀢𑀼𑀧𑀘𑁆𑀘𑀬𑁂𑀢𑀺 𑀕𑀦𑁆𑀢𑀼𑀓𑀸𑀫𑀢𑀸𑀘𑀺𑀢𑁆𑀢-𑀢𑀁𑀲𑀫𑀼𑀝𑁆𑀞𑀸𑀦-𑀯𑀸𑀬𑁄𑀥𑀸𑀢𑀼-𑀆𑀤𑀺𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀯𑀺𑀦𑀸. 𑀢𑀺𑀝𑁆𑀞𑁂𑀢𑀺 𑀢𑀺𑀝𑁆𑀞𑁂𑀬𑁆𑀬. 𑀯𑀚𑁂𑀢𑀺 𑀯𑀚𑁂𑀬𑁆𑀬 𑀕𑀘𑁆𑀙𑁂𑀬𑁆𑀬 𑀓𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀝𑀺𑀓𑁆𑀔𑁂𑀧𑀢𑁆𑀣𑁄 𑀘𑁂𑀢𑁆𑀣 𑀓𑀺𑀁-𑀲𑀤𑁆𑀤𑁄𑀢𑀺 𑀳𑁂𑀢𑀼𑀧𑀘𑁆𑀘𑀬𑀯𑀺𑀭𑀳𑁂𑀦 𑀞𑀸𑀦𑀕𑀫𑀦𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀲𑀩𑁆𑀩𑀸𑀬𑀧𑀺 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀯𑀺𑀪𑀸𑀯𑀦𑁂𑀦 𑀅𑀢𑁆𑀢𑀲𑀼𑀜𑁆𑀜𑀢𑀸 𑀯𑀺𑀬 𑀅𑀦𑀺𑀘𑁆𑀘𑀤𑀼𑀓𑁆𑀔𑀢𑀸𑀧𑀺 𑀯𑀺𑀪𑀸𑀯𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀧𑀡𑀺𑀳𑀺𑀢𑁄𑀢𑀺 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁂𑀳𑀺 𑀧𑀓𑀸𑀭𑀢𑁄 𑀦𑀺𑀳𑀺𑀢𑁄 𑀞𑀧𑀺𑀢𑁄. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀘𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀇𑀭𑀺𑀬𑀸𑀧𑀣𑀸𑀦𑀁 𑀲𑀗𑁆𑀕𑀡𑁆𑀳𑀦𑀯𑀘𑀦𑀁, 𑀧𑀼𑀩𑁆𑀩𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀇𑀭𑀺𑀬𑀸𑀧𑀣𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀢𑁂𑀲𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀦𑀬𑁄 𑀯𑀸 𑀇𑀭𑀺𑀬𑀸𑀧𑀣𑀧𑁆𑀧𑀥𑀸𑀦𑁄 𑀯𑀼𑀢𑁆𑀢𑁄𑀢𑀺 𑀢𑀢𑁆𑀣 𑀓𑀸𑀬𑁄 𑀅𑀧𑁆𑀧𑀥𑀸𑀦𑁄 𑀅𑀦𑀼𑀦𑀺𑀧𑁆𑀨𑀸𑀤𑀻𑀢𑀺 𑀇𑀥 𑀓𑀸𑀬𑀁 𑀧𑀥𑀸𑀦𑀁 𑀅𑀧𑁆𑀧𑀥𑀸𑀦𑀜𑁆𑀘 𑀇𑀭𑀺𑀬𑀸𑀧𑀣𑀁 𑀅𑀦𑀼𑀦𑀺𑀧𑁆𑀨𑀸𑀤𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀤𑁆𑀯𑀺𑀦𑁆𑀦𑀁 𑀦𑀬𑀸𑀦𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀞𑀺𑀢𑁄𑀢𑀺 𑀧𑀯𑀢𑁆𑀢𑁄.

𑀇𑀭𑀺𑀬𑀸𑀧𑀣𑀧𑀭𑀺𑀕𑁆𑀕𑀡𑁆𑀳𑀦𑀫𑁆𑀧𑀺 𑀇𑀭𑀺𑀬𑀸𑀧𑀣𑀯𑀢𑁄 𑀓𑀸𑀬𑀲𑁆𑀲𑁂𑀯 𑀧𑀭𑀺𑀕𑁆𑀕𑀡𑁆𑀳𑀦𑀁 𑀢𑀲𑁆𑀲 𑀅𑀯𑀢𑁆𑀣𑀸𑀯𑀺𑀲𑁂𑀲𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀇𑀭𑀺𑀬𑀸𑀧𑀣𑀧𑀭𑀺𑀕𑁆𑀕𑀳𑀡𑁂𑀦 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺. 𑀢𑁂𑀦𑁂𑀯𑁂𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑀯𑀲𑁂𑀦𑁂𑀯 𑀲𑀫𑀼𑀤𑀬𑀸𑀤𑀬𑁄 𑀉𑀤𑁆𑀥𑀝𑀸. 𑀏𑀲 𑀦𑀬𑁄 𑀲𑁂𑀲𑀯𑀸𑀭𑁂𑀲𑀼𑀧𑀺. 𑀆𑀤𑀺𑀦𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀬𑀣𑀸 ‘‘𑀢𑀡𑁆𑀳𑀸𑀲𑀫𑀼𑀤𑀬𑀸 𑀓𑀫𑁆𑀫𑀲𑀫𑀼𑀤𑀬𑀸 𑀆𑀳𑀸𑀭𑀲𑀫𑀼𑀤𑀬𑀸’’𑀢𑀺 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀼𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀻𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀏𑀯𑀁 ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑀸’’𑀢𑀺𑀆𑀤𑀬𑁄𑀧𑀺 𑀧𑀜𑁆𑀘 𑀆𑀓𑀸𑀭𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀭𑀺𑀬𑀸𑀧𑀣𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀯𑀡𑁆𑀡𑀦𑀸

𑁧𑁦𑁯. 𑀘𑀢𑀼𑀲𑀫𑁆𑀧𑀚𑀜𑁆𑀜𑀯𑀲𑁂𑀦𑀸𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁮𑁪; 𑀲𑀁. 𑀦𑀺. 𑁫.𑁩𑁬𑁮; 𑀤𑀻. 𑀦𑀺. 𑀅𑀪𑀺. 𑀝𑀻. 𑁨.𑁨𑁧𑁪) 𑀲𑀫𑀦𑁆𑀢𑀢𑁄 𑀧𑀓𑀸𑀭𑁂𑀳𑀺, 𑀧𑀓𑀝𑁆𑀞𑀁 𑀯𑀸 𑀲𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄, 𑀲𑀫𑁆𑀧𑀚𑀸𑀦𑀲𑁆𑀲 𑀪𑀸𑀯𑁄 𑀲𑀫𑁆𑀧𑀚𑀜𑁆𑀜𑀁, 𑀢𑀣𑀸𑀧𑀯𑀢𑁆𑀢𑀁 𑀜𑀸𑀡𑀁. 𑀘𑀢𑁆𑀢𑀸𑀭𑀺 𑀲𑀫𑁆𑀧𑀚𑀜𑁆𑀜𑀸𑀦𑀺 𑀲𑀫𑀸𑀳𑀝𑀸𑀦𑀺 𑀘𑀢𑀼𑀲𑀫𑁆𑀧𑀚𑀜𑁆𑀜𑀁, 𑀢𑀲𑁆𑀲 𑀯𑀲𑁂𑀦. 𑀅𑀪𑀺𑀓𑁆𑀓𑀫𑀦𑀁 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀆𑀳 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀯𑀼𑀘𑁆𑀘𑀢𑀺 𑀕𑀫𑀦’’𑀦𑁆𑀢𑀺. 𑀢𑀣𑀸 𑀧𑀝𑀺𑀓𑁆𑀓𑀫𑀦𑀁 𑀧𑀝𑀺𑀓𑁆𑀓𑀦𑁆𑀢𑀦𑁆𑀢𑀺 𑀆𑀳 ‘‘𑀧𑀝𑀺𑀓𑁆𑀓𑀦𑁆𑀢𑀁 𑀯𑀼𑀘𑁆𑀘𑀢𑀺 𑀦𑀺𑀯𑀢𑁆𑀢𑀦’’𑀦𑁆𑀢𑀺. 𑀦𑀺𑀯𑀢𑁆𑀢𑀦𑀦𑁆𑀢𑀺 𑀘 𑀦𑀺𑀯𑀢𑁆𑀢𑀺𑀫𑀢𑁆𑀢𑀁, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀦 𑀕𑀫𑀦𑀁 𑀕𑀫𑀦𑀫𑁂𑀯. 𑀅𑀪𑀺𑀳𑀭𑀦𑁆𑀢𑁄𑀢𑀺 𑀕𑀫𑀦𑀯𑀲𑁂𑀦 𑀓𑀸𑀬𑀁 𑀉𑀧𑀦𑁂𑀦𑁆𑀢𑁄.

𑀲𑀫𑁆𑀫𑀸 𑀧𑀚𑀸𑀦𑀦𑀁 𑀲𑀫𑁆𑀧𑀚𑀸𑀦𑀁, 𑀢𑁂𑀦 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀲𑁆𑀲 𑀓𑀭𑀡𑀲𑀻𑀮𑁄 𑀲𑀫𑁆𑀧𑀚𑀸𑀦𑀓𑀸𑀭𑀻𑀢𑀺 𑀆𑀳 ‘‘𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀻’’𑀢𑀺. 𑀲𑀫𑁆𑀧𑀚𑀸𑀦𑀲𑀤𑁆𑀤𑀲𑁆𑀲 𑀲𑀫𑁆𑀧𑀚𑀜𑁆𑀜𑀧𑀭𑀺𑀬𑀸𑀬𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀬𑁂𑀯. 𑀲𑀫𑁆𑀧𑀚𑀜𑁆𑀜𑀁 𑀓𑀭𑁄𑀢𑁂𑀯𑀸𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀅𑀲𑀫𑁆𑀫𑁄𑀳𑀁 𑀉𑀧𑁆𑀧𑀸𑀤𑁂𑀢𑀺 𑀏𑀯. 𑀲𑀫𑁆𑀧𑀚𑀸𑀦𑀲𑁆𑀲 𑀯𑀸 𑀓𑀸𑀭𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀫𑁆𑀧𑀚𑀸𑀦𑀓𑀸𑀭𑀻. 𑀥𑀫𑁆𑀫𑀢𑁄 𑀯𑀟𑁆𑀠𑀺𑀲𑀗𑁆𑀔𑀸𑀢𑁂𑀦 𑀲𑀳 𑀅𑀢𑁆𑀣𑁂𑀦 𑀧𑀯𑀢𑁆𑀢𑀢𑀻𑀢𑀺 𑀲𑀸𑀢𑁆𑀣𑀓𑀁, 𑀅𑀪𑀺𑀓𑁆𑀓𑀦𑁆𑀢𑀸𑀤𑀺. 𑀲𑀸𑀢𑁆𑀣𑀓𑀲𑁆𑀲 𑀲𑀫𑁆𑀧𑀚𑀸𑀦𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀲𑀧𑁆𑀧𑀸𑀬𑀲𑁆𑀲 𑀅𑀢𑁆𑀢𑀦𑁄 𑀉𑀧𑀓𑀸𑀭𑀸𑀯𑀳𑀲𑁆𑀲 𑀳𑀺𑀢𑀲𑁆𑀲 𑀲𑀫𑁆𑀧𑀚𑀸𑀦𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂, 𑀅𑀜𑁆𑀜𑀢𑁆𑀣𑀸𑀧𑀺 𑀘 𑀧𑀯𑀢𑁆𑀢𑁂𑀲𑀼 𑀅𑀯𑀺𑀚𑀳𑀺𑀢𑁂 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀕𑁄𑀘𑀭𑁂 𑀲𑀫𑁆𑀧𑀚𑀜𑁆𑀜𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀫𑁂𑀯 𑀲𑀫𑁆𑀧𑀚𑀜𑁆𑀜𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑀧𑀝𑀺𑀲𑀗𑁆𑀔𑀸𑀬.

𑀢𑀲𑁆𑀫𑀺𑀦𑁆𑀢𑀺 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀧𑀭𑀺𑀕𑁆𑀕𑀳𑀺𑀢𑀅𑀢𑁆𑀣𑁂. 𑀅𑀢𑁆𑀣𑁄 𑀦𑀸𑀫 𑀥𑀫𑁆𑀫𑀢𑁄 𑀯𑀟𑁆𑀠𑀻𑀢𑀺 𑀬𑀁 𑀲𑀸𑀢𑁆𑀣𑀓𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀕𑀫𑀦𑀁, 𑀢𑀁 𑀲𑀧𑁆𑀧𑀸𑀬𑀫𑁂𑀯𑀸𑀢𑀺 𑀲𑀺𑀬𑀸 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀘𑁂𑀢𑀺𑀬𑀤𑀲𑁆𑀲𑀦𑀁 𑀢𑀸𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀸𑀦𑀺 𑀯𑀺𑀬𑀸𑀢𑀺 𑀘𑀺𑀢𑁆𑀢𑀓𑀫𑁆𑀫𑀓𑀢𑀧𑀝𑀺𑀫𑀸𑀬𑁄 𑀯𑀺𑀬, 𑀬𑀦𑁆𑀢𑀧𑀬𑁄𑀕𑁂𑀦 𑀯𑀸 𑀯𑀺𑀘𑀺𑀢𑁆𑀢𑀓𑀫𑁆𑀫𑀧𑀝𑀺𑀫𑀸𑀬𑁄 𑀯𑀺𑀬. 𑀅𑀲𑀫𑀧𑁂𑀓𑁆𑀔𑀦𑀁 𑀕𑁂𑀳𑀲𑀺𑀢𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀅𑀬𑁄𑀦𑀺𑀲𑁄 𑀕𑀳𑀡𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺 (𑀫. 𑀦𑀺. 𑁩.𑁩𑁦𑁮). 𑀳𑀢𑁆𑀣𑀺𑀆𑀤𑀺𑀲𑀫𑁆𑀫𑀤𑁆𑀤𑁂𑀦 𑀚𑀻𑀯𑀺𑀢𑀦𑁆𑀢𑀭𑀸𑀬𑁄, 𑀯𑀺𑀲𑀪𑀸𑀕𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄.

𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀅𑀦𑀼𑀯𑀢𑁆𑀢𑀦𑀓𑀣𑀸 𑀆𑀘𑀺𑀡𑁆𑀡𑀸, 𑀅𑀦𑀦𑀼𑀯𑀢𑁆𑀢𑀦𑀓𑀣𑀸 𑀧𑀦 𑀢𑀲𑁆𑀲𑀸 𑀤𑀼𑀢𑀺𑀬𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀤𑁆𑀯𑁂 𑀓𑀣𑀸 𑀦𑀸𑀫 𑀦 𑀓𑀣𑀺𑀢𑀧𑀼𑀩𑁆𑀩𑀸’’𑀢𑀺.

𑀏𑀯𑀦𑁆𑀢𑀺 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀯𑀼𑀢𑁆𑀢𑀸𑀓𑀸𑀭𑀁 𑀧𑀘𑁆𑀘𑀸𑀫𑀲𑀢𑀺, 𑀦 ‘‘𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀕𑀸𑀫𑀸𑀲𑀼𑀪’’𑀦𑁆𑀢𑀺𑀆𑀤𑀺𑀓𑀁 𑀯𑀼𑀘𑁆𑀘𑀫𑀸𑀦𑀁. 𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀪𑀸𑀯𑀦𑀸𑀬 𑀆𑀭𑀫𑁆𑀫𑀡𑀁 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀕𑁄𑀘𑀭’’𑀦𑁆𑀢𑀺. 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀬𑀣𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀲𑁆𑀲 𑀲𑀫𑁆𑀧𑀸𑀤𑀦𑀯𑀲𑁂𑀦 𑀉𑀕𑁆𑀕𑀳𑁂𑀢𑁆𑀯𑀸. 𑀳𑀭𑀢𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀯𑀢𑁆𑀢𑁂𑀢𑀺, 𑀬𑀸𑀯 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀫𑀸 𑀅𑀦𑀼𑀬𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦𑀧𑀘𑁆𑀘𑀸𑀳𑀭𑀢𑀻𑀢𑀺 𑀆𑀳𑀸𑀭𑀽𑀧𑀪𑁄𑀕𑀢𑁄 𑀬𑀸𑀯 𑀤𑀺𑀯𑀸𑀝𑁆𑀞𑀸𑀦𑀼𑀧𑀲𑀗𑁆𑀓𑀫𑀦𑀸 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀝𑀺𑀦𑁂𑀢𑀺.

𑀲𑀭𑀻𑀭𑀧𑀭𑀺𑀓𑀫𑁆𑀫𑀦𑁆𑀢𑀺 𑀫𑀼𑀔𑀥𑁄𑀯𑀦𑀸𑀤𑀺𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁. 𑀤𑁆𑀯𑁂 𑀢𑀬𑁄 𑀧𑀮𑁆𑀮𑀗𑁆𑀓𑁂𑀢𑀺 𑀤𑁆𑀯𑁂 𑀢𑀬𑁄 𑀦𑀺𑀲𑀚𑁆𑀚𑀸𑀯𑀸𑀭𑁂, 𑀤𑁆𑀯𑁂 𑀢𑀻𑀡𑀺 𑀉𑀡𑁆𑀳𑀸𑀲𑀦𑀸𑀦𑀺. 𑀢𑁂𑀦𑀸𑀳 ‘‘𑀉𑀲𑀼𑀫𑀁 𑀕𑀸𑀳𑀸𑀧𑁂𑀦𑁆𑀢𑁄’’𑀢𑀺. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑁂𑀦𑁂𑀯, 𑀓𑀫𑁆𑀫𑀝𑁆𑀞𑀸𑀦𑀁 𑀧𑀥𑀸𑀦𑀁 𑀓𑀢𑁆𑀯𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀧𑀢𑁆𑀢𑁄𑀧𑀺 𑀅𑀘𑁂𑀢𑀦𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁯) 𑀯𑀓𑁆𑀔𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀬𑀣𑀸𑀧𑀭𑀺𑀳𑀭𑀺𑀬𑀫𑀸𑀦𑀁 𑀯𑀸 𑀅𑀯𑀺𑀚𑀳𑀺𑀢𑁆𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀭𑀺𑀪𑁄𑀕𑀘𑁂𑀢𑀺𑀬𑀢𑁄 𑀲𑀭𑀻𑀭𑀘𑁂𑀢𑀺𑀬𑀁 𑀕𑀭𑀼𑀢𑀭’’𑀦𑁆𑀢𑀺 𑀓𑀢𑁆𑀯𑀸 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁮𑁦𑁯; 𑀫. 𑀦𑀺. 𑀅𑀝𑁆𑀞. 𑁩.𑁧𑁨𑁮; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁭𑁫) ‘‘𑀘𑁂𑀢𑀺𑀬𑀁 𑀩𑀸𑀥𑀬𑀫𑀸𑀦𑀸 𑀩𑁄𑀥𑀺𑀲𑀸𑀔𑀸 𑀳𑀭𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀸.

𑀚𑀦𑀲𑀗𑁆𑀕𑀳𑀢𑁆𑀣𑀦𑁆𑀢𑀺 ‘‘𑀫𑀬𑀺 𑀅𑀓𑀣𑁂𑀦𑁆𑀢𑁂 𑀏𑀢𑁂𑀲𑀁 𑀓𑁄 𑀓𑀣𑁂𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀚𑀦𑀲𑀗𑁆𑀕𑀳𑀢𑁆𑀣𑀁. 𑀢𑀲𑁆𑀫𑀸𑀢𑀺. 𑀬𑀲𑁆𑀫𑀸 ‘‘𑀥𑀫𑁆𑀫𑀓𑀣𑀸 𑀦𑀸𑀫 𑀓𑀣𑁂𑀢𑀩𑁆𑀩𑀸𑀬𑁂𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑀤𑀦𑁆𑀢𑀺, 𑀬𑀲𑁆𑀫𑀸 𑀘 𑀥𑀫𑁆𑀫𑀓𑀣𑀸 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸. 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀧𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀦𑁂𑀯𑀸𑀢𑀺 ‘‘𑀧𑀭𑀺𑀘𑀺𑀢𑁄 𑀅𑀧𑀭𑀺𑀘𑀺𑀢𑁄’’𑀢𑀺𑀆𑀤𑀺𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀓𑁄𑀝𑀺𑀬𑀸𑀯. 𑀪𑀬𑁂𑀢𑀺 𑀧𑀭𑀘𑀓𑁆𑀓𑀸𑀤𑀺𑀪𑀬𑁂.

𑀓𑀫𑁆𑀫𑀚𑀢𑁂𑀚𑁄𑀢𑀺 𑀕𑀳𑀡𑀺𑀁 𑀲𑀦𑁆𑀥𑀸𑀬𑀸𑀳. 𑀓𑀫𑁆𑀫𑀝𑁆𑀞𑀸𑀦𑀯𑀻𑀣𑀺𑀁 𑀦𑀸𑀭𑁄𑀳𑀢𑀺 𑀔𑀼𑀤𑀸𑀧𑀭𑀺𑀲𑁆𑀲𑀫𑁂𑀦 𑀓𑀺𑀮𑀦𑁆𑀢𑀓𑀸𑀬𑀢𑁆𑀢𑀸 𑀲𑀫𑀸𑀥𑀸𑀦𑀸𑀪𑀸𑀯𑀢𑁄. 𑀅𑀯𑀲𑁂𑀲𑀝𑁆𑀞𑀸𑀦𑁂𑀢𑀺 𑀬𑀸𑀕𑀼𑀬𑀸 𑀅𑀕𑁆𑀕𑀳𑀺𑀢𑀝𑁆𑀞𑀸𑀦𑁂. 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀼𑀧𑀝𑁆𑀞𑀸𑀦𑀲𑁆𑀲 𑀅𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀘𑀦𑀫𑁂𑀢𑀁, 𑀬𑀣𑀸 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀧𑀯𑀢𑁆𑀢𑀸𑀬 𑀲𑀭𑀧𑀝𑀺𑀧𑀸𑀝𑀺𑀬𑀸 𑀅𑀯𑀺𑀘𑁆𑀙𑁂𑀤𑁄, 𑀏𑀯𑀫𑁂𑀢𑀲𑁆𑀲𑀸𑀧𑀻𑀢𑀺.

𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀪𑀸𑀯𑀦𑀸𑀦𑀼𑀬𑁄𑀕𑁂. 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑀽𑀭𑀡𑁂𑀦 𑀲𑀩𑁆𑀩𑀯𑀢𑁆𑀣𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸. ‘‘𑀓𑀸𑀫𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺, 𑀓𑀸𑀬𑁂 𑀅𑀯𑀻𑀢𑀭𑀸𑀕𑁄, 𑀭𑀽𑀧𑁂 𑀅𑀯𑀻𑀢𑀭𑀸𑀕𑁄, 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁦; 𑀫. 𑀦𑀺. 𑁧.𑁧𑁮𑁬) 𑀏𑀯𑀁 𑀯𑀼𑀢𑁆𑀢 𑀧𑀜𑁆𑀘𑀯𑀺𑀥𑀘𑁂𑀢𑁄𑀔𑀺𑀮𑀯𑀺𑀦𑀺𑀩𑀦𑁆𑀥𑀘𑀺𑀢𑁆𑀢𑁄. 𑀘𑀭𑀺𑀢𑁆𑀯𑀸𑀢𑀺 𑀧𑀯𑀢𑁆𑀢𑀺𑀢𑁆𑀯𑀸.

𑀅𑀢𑁆𑀢𑀓𑀸𑀫𑀸𑀢𑀺 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑀸, 𑀥𑀫𑁆𑀫𑀘𑁆𑀙𑀦𑁆𑀤𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄𑀢𑀺 𑀳𑀺 𑀳𑀺𑀢𑀁, 𑀢𑀦𑁆𑀦𑀺𑀫𑀺𑀢𑁆𑀢𑀓𑀜𑁆𑀘 𑀲𑀼𑀔𑀦𑁆𑀢𑀺. 𑀅𑀣 𑀯𑀸 𑀯𑀺𑀜𑁆𑀜𑀽𑀦𑀁 𑀦𑀺𑀩𑁆𑀩𑀺𑀲𑁂𑀲𑀢𑁆𑀢𑀸 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀘 𑀅𑀢𑁆𑀢𑀸 𑀦𑀸𑀫 𑀥𑀫𑁆𑀫𑁄, 𑀢𑀁 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀢𑀓𑀸𑀫𑀸. 𑀉𑀲𑀪𑀁 𑀦𑀸𑀫 𑀯𑀻𑀲𑀢𑀺 𑀬𑀝𑁆𑀞𑀺𑀬𑁄. 𑀢𑀸𑀬 𑀲𑀜𑁆𑀜𑀸𑀬𑀸𑀢𑀺 𑀢𑀸𑀬 𑀧𑀸𑀲𑀸𑀡𑀲𑀜𑁆𑀜𑀸𑀬, 𑀏𑀢𑁆𑀢𑀓𑀁 𑀞𑀸𑀦𑀁 𑀆𑀕𑀢𑀸𑀢𑀺 𑀚𑀸𑀦𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀬𑁂𑀯 𑀦𑀬𑁄𑀢𑀺 ‘‘𑀅𑀬𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀓𑁄 𑀬𑁄 𑀞𑀸𑀦𑁂 𑀯𑀼𑀢𑁆𑀢𑁄, 𑀲𑁄 𑀏𑀯 𑀦𑀺𑀲𑀚𑁆𑀚𑀸𑀬𑀧𑀺 𑀦𑀬𑁄. 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀸𑀦𑀁 𑀙𑀺𑀦𑁆𑀦𑀪𑀢𑁆𑀢𑀪𑀸𑀯𑀪𑀬𑁂𑀦𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀩𑁆𑀭𑀽𑀳𑁂𑀢𑀺.

𑀩𑀳𑀸𑀧𑀥𑀸𑀦𑀁 𑀧𑀽𑀚𑁂𑀲𑁆𑀲𑀸𑀫𑀻𑀢𑀺 𑀅𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀮𑁄𑀓𑀦𑀸𑀣𑁂𑀦 𑀙 𑀯𑀲𑁆𑀲𑀸𑀦𑀺 𑀓𑀢𑀁 𑀤𑀼𑀓𑁆𑀓𑀭𑀘𑀭𑀺𑀬𑀁 𑀏𑀯𑀸𑀳𑀁 𑀬𑀣𑀸𑀲𑀢𑁆𑀢𑀺 𑀧𑀽𑀚𑁂𑀲𑁆𑀲𑀸𑀫𑀻𑀢𑀺. 𑀧𑀝𑀺𑀧𑀢𑁆𑀢𑀺𑀧𑀽𑀚𑀸 𑀳𑀺 𑀲𑀢𑁆𑀣𑀼𑀧𑀽𑀚𑀸, 𑀦 𑀆𑀫𑀺𑀲𑀧𑀽𑀚𑀸. 𑀞𑀸𑀦𑀘𑀗𑁆𑀓𑀫𑀦𑀫𑁂𑀯𑀸𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀇𑀭𑀺𑀬𑀸𑀧𑀣𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀪𑁄𑀚𑀦𑀸𑀤𑀺𑀓𑀸𑀮𑁂𑀲𑀼 𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀦𑀺𑀲𑀚𑁆𑀚𑀸𑀬 𑀧𑀝𑀺𑀓𑁆𑀔𑁂𑀧𑀯𑀲𑁂𑀦.

𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀞𑀫𑀫𑁂𑀯 𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀘𑁆𑀘𑀢𑀺 ‘‘𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦𑀸’’𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀬𑀤𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀇𑀢𑁄 𑀧𑀭𑁂𑀲𑀼𑀧𑀺. 𑀢𑀢𑁆𑀣 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸 𑀓𑀧𑁆𑀧𑀸𑀦𑀁 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀢𑀲𑀳𑀲𑁆𑀲𑀜𑁆𑀘 𑀢𑀚𑁆𑀚𑀁 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀭𑀡𑀁, 𑀲𑀸𑀯𑀓𑀩𑁄𑀥𑀺𑀬𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀫𑀳𑀸𑀲𑀸𑀯𑀓𑀸𑀦𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁂𑀯, 𑀇𑀢𑀭𑁂𑀲𑀁 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀬𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀓𑀼𑀲𑀮𑀁. 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄𑀢𑀺 𑀩𑀳𑀺 𑀯𑀺𑀲𑀬𑁂 𑀲𑀜𑁆𑀚𑀸𑀢𑀲𑀁𑀯𑀟𑁆𑀠𑀢𑀸𑀬 𑀩𑀸𑀳𑀺𑀬𑁄, 𑀤𑀸𑀭𑀼𑀘𑀻𑀭𑀧𑀭𑀺𑀳𑀭𑀡𑁂𑀦 𑀤𑀸𑀭𑀼𑀘𑀻𑀭𑀺𑀬𑁄𑀢𑀺 𑀘 𑀲𑀫𑀜𑁆𑀜𑀸𑀢𑁄. 𑀲𑁄 𑀳𑀺 𑀆𑀬𑀲𑁆𑀫𑀸 𑁋

‘‘𑀢𑀲𑁆𑀫𑀸 𑀢𑀺𑀳 𑀢𑁂, 𑀩𑀸𑀳𑀺𑀬, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂… 𑀫𑀼𑀢𑁂… 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀬𑀢𑁄 𑀔𑁄 𑀢𑁂, 𑀩𑀸𑀳𑀺𑀬, 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂… 𑀫𑀼𑀢𑁂… 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑁂𑀦. 𑀬𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑁂𑀦, 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑀢𑁆𑀣. 𑀬𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑀢𑁆𑀣, 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦, 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺 (𑀉𑀤𑀸. 𑁧𑁦) 𑁋 𑀏𑀢𑁆𑀢𑀓𑀸𑀬 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺.

𑀢𑀦𑁆𑀢𑀺 𑀅𑀲𑀫𑁆𑀫𑀼𑀬𑁆𑀳𑀦𑀁. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀢𑀸 𑀅𑀪𑀺𑀓𑁆𑀓𑀫𑀢𑀻𑀢𑀺 𑀇𑀫𑀺𑀦𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀲𑁆𑀲 𑀤𑀺𑀝𑁆𑀞𑀺𑀕𑁆𑀕𑀸𑀳𑀯𑀲𑁂𑀦 𑀅𑀪𑀺𑀓𑁆𑀓𑀫𑁂 𑀲𑀫𑁆𑀫𑀼𑀬𑁆𑀳𑀦𑀁 𑀤𑀲𑁆𑀲𑁂𑀢𑀺, 𑀅𑀳𑀁 𑀅𑀪𑀺𑀓𑁆𑀓𑀫𑀸𑀫𑀻𑀢𑀺 𑀧𑀦 𑀇𑀫𑀺𑀦𑀸 𑀫𑀸𑀦𑀕𑁆𑀕𑀸𑀳𑀯𑀲𑁂𑀦, 𑀢𑀤𑀼𑀪𑀬𑀁 𑀧𑀦 𑀢𑀡𑁆𑀳𑀸𑀬 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀢𑀡𑁆𑀳𑀸𑀕𑁆𑀕𑀸𑀳𑀯𑀲𑁂𑀦𑀧𑀺 𑀲𑀫𑁆𑀫𑀼𑀬𑁆𑀳𑀦𑀁 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺. ‘‘𑀢𑀣𑀸 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀁 𑀅𑀲𑀫𑁆𑀫𑀼𑀬𑁆𑀳𑀦𑀁 𑀬𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁂𑀦 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀓𑁆𑀓𑀫𑀸𑀫𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀯𑀸𑀬𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀢𑁂𑀚𑁄𑀥𑀸𑀢𑀼 𑀉𑀤𑁆𑀥𑀭𑀡𑀲𑁆𑀲 𑀧𑀘𑁆𑀘𑀬𑁄. 𑀉𑀤𑁆𑀥𑀭𑀡𑀕𑀢𑀺𑀓𑀸 𑀳𑀺 𑀢𑁂𑀚𑁄𑀥𑀸𑀢𑀽𑀢𑀺 𑀉𑀤𑁆𑀥𑀭𑀡𑁂 𑀯𑀸𑀬𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑁂𑀓…𑀧𑁂… 𑀩𑀮𑀯𑀢𑀺𑀬𑁄’’𑀢𑀺 𑀆𑀳. 𑀬𑀲𑁆𑀫𑀸 𑀧𑀦 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀯𑀸𑀬𑁄𑀥𑀸𑀢𑀼 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑀸𑀦𑀁 𑀧𑀘𑁆𑀘𑀬𑁄. 𑀢𑀺𑀭𑀺𑀬𑀕𑀢𑀺𑀓𑀸𑀬 𑀳𑀺 𑀯𑀸𑀬𑁄𑀥𑀸𑀢𑀼𑀬𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀼 𑀲𑀸𑀢𑀺𑀲𑀬𑁄 𑀩𑁆𑀬𑀸𑀧𑀸𑀭𑁄𑀢𑀺 𑀢𑁂𑀚𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀽’’𑀢𑀺 𑀆𑀳. 𑀲𑀢𑀺𑀧𑀺 𑀅𑀦𑀼𑀕𑀫𑀦𑀸𑀦𑀼𑀕𑀦𑁆𑀢𑀩𑁆𑀩𑀢𑀸𑀯𑀺𑀲𑁂𑀲𑁂 𑀢𑁂𑀚𑁄𑀥𑀸𑀢𑀼-𑀯𑀸𑀬𑁄𑀥𑀸𑀢𑀼-𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀢𑀣𑀸-𑀲𑀤𑁆𑀤𑀕𑁆𑀕𑀳𑀡𑀁. 𑀢𑀢𑁆𑀣 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀢𑁄 𑀧𑀸𑀤𑀲𑁆𑀲 𑀉𑀓𑁆𑀔𑀺𑀧𑀦𑀁 𑀉𑀤𑁆𑀥𑀭𑀡𑀁, 𑀞𑀺𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀢𑁄 𑀳𑀭𑀡𑀁 𑀅𑀢𑀺𑀳𑀭𑀡𑀁 𑀔𑀸𑀡𑀼𑀆𑀤𑀺𑀧𑀭𑀺𑀳𑀭𑀡𑀢𑁆𑀣𑀁, 𑀧𑀢𑀺𑀝𑁆𑀞𑀺𑀢𑀧𑀸𑀤𑀖𑀝𑁆𑀝𑀦𑀧𑀭𑀺𑀳𑀭𑀡𑀢𑁆𑀣𑀁 𑀯𑀸 𑀧𑀲𑁆𑀲𑁂𑀦 𑀳𑀭𑀡𑀁 𑀯𑀻𑀢𑀺𑀳𑀭𑀡𑀁, 𑀬𑀸𑀯 𑀧𑀢𑀺𑀝𑁆𑀞𑀺𑀢𑀧𑀸𑀤𑁄, 𑀢𑀸𑀯 𑀆𑀳𑀭𑀡𑀁 𑀅𑀢𑀺𑀳𑀭𑀡𑀁, 𑀢𑀢𑁄 𑀧𑀭𑀁 𑀳𑀭𑀡𑀁 𑀯𑀻𑀢𑀺𑀳𑀭𑀡𑀦𑁆𑀢𑀺 𑀅𑀬𑀁 𑀯𑀸 𑀏𑀢𑁂𑀲𑀁 𑀯𑀺𑀲𑁂𑀲𑁄.

𑀬𑀲𑁆𑀫𑀸 𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀆𑀧𑁄𑀥𑀸𑀢𑀼 𑀯𑁄𑀲𑁆𑀲𑀚𑁆𑀚𑀦𑀲𑁆𑀲 𑀧𑀘𑁆𑀘𑀬𑁄. 𑀕𑀭𑀼𑀢𑀭𑀲𑀪𑀸𑀯𑀸 𑀳𑀺 𑀆𑀧𑁄𑀥𑀸𑀢𑀽𑀢𑀺 𑀯𑁄𑀲𑁆𑀲𑀚𑁆𑀚𑀦𑁂 𑀧𑀣𑀯𑀻𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀢𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑁄𑀲𑁆𑀲𑀚𑁆𑀚𑀦𑁂…𑀧𑁂… 𑀩𑀮𑀯𑀢𑀺𑀬𑁄’’𑀢𑀺. 𑀬𑀲𑁆𑀫𑀸 𑀧𑀦 𑀆𑀧𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀧𑀣𑀯𑀻𑀥𑀸𑀢𑀼 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑁆𑀲 𑀧𑀘𑁆𑀘𑀬𑁄, 𑀧𑀢𑀺𑀝𑁆𑀞𑀸𑀪𑀸𑀯𑁂 𑀯𑀺𑀬 𑀧𑀢𑀺𑀝𑁆𑀞𑀸𑀧𑀦𑁂𑀧𑀺 𑀢𑀲𑁆𑀲𑀸 𑀲𑀸𑀢𑀺𑀲𑀬𑀓𑀺𑀘𑁆𑀘𑀢𑁆𑀢𑀸 𑀆𑀧𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀣𑀸 𑀖𑀝𑁆𑀝𑀦𑀓𑀺𑀭𑀺𑀬𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀯𑀲𑁂𑀦 𑀲𑀦𑁆𑀦𑀺𑀭𑀼𑀫𑁆𑀪𑀦𑀲𑁆𑀲 𑀲𑀺𑀚𑁆𑀛𑀦𑀢𑁄 𑀢𑀢𑁆𑀣𑀸𑀧𑀺 𑀧𑀣𑀯𑀻𑀥𑀸𑀢𑀼𑀬𑀸 𑀆𑀧𑁄𑀥𑀸𑀢𑀼𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀣𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀫𑁆𑀪𑀦𑁂𑀲𑀽’’𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀪𑀺𑀓𑁆𑀓𑀫𑀦𑁂, 𑀢𑁂𑀲𑀼 𑀯𑀸 𑀯𑀼𑀢𑁆𑀢𑁂𑀲𑀼 𑀉𑀤𑁆𑀥𑀭𑀡𑀸𑀤𑀻𑀲𑀼 𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀉𑀤𑁆𑀥𑀭𑀡𑁂𑀢𑀺 𑀉𑀤𑁆𑀥𑀭𑀡𑀓𑁆𑀔𑀡𑁂. 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀢𑀺 𑀉𑀤𑁆𑀥𑀭𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀭𑀽𑀧𑀥𑀫𑁆𑀫𑀸, 𑀢𑀁𑀲𑀫𑀼𑀝𑁆𑀞𑀸𑀧𑀓𑀸 𑀅𑀭𑀽𑀧𑀥𑀫𑁆𑀫𑀸 𑀘 𑀅𑀢𑀺𑀳𑀭𑀡𑀁 𑀦 𑀧𑀸𑀧𑀼𑀡𑀦𑁆𑀢𑀺 𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀦𑀢𑁄. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀦𑁆𑀦𑀸, 𑀢𑀢𑁆𑀣 𑀢𑀢𑁆𑀣𑁂𑀯. 𑀦 𑀳𑀺 𑀥𑀫𑁆𑀫𑀸𑀦𑀁 𑀤𑁂𑀲𑀦𑁆𑀢𑀭𑀲𑀗𑁆𑀓𑀫𑀦𑀁 𑀅𑀢𑁆𑀣𑀺. 𑀧𑀩𑁆𑀩𑀁 𑀧𑀩𑁆𑀩𑀦𑁆𑀢𑀺𑀆𑀤𑀺 𑀉𑀤𑁆𑀥𑀭𑀡𑀸𑀤𑀺𑀓𑁄𑀝𑁆𑀞𑀸𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀁 𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑀺𑀇𑀢𑁆𑀢𑀭𑁄 𑀳𑀺 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀧𑀯𑀢𑁆𑀢𑀺𑀓𑁆𑀔𑀡𑁄 𑀕𑀫𑀦𑀲𑁆𑀲𑀸𑀤𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑁂𑀦 𑀧𑀝𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺 𑀧𑀸𑀤𑁂 𑀘 𑀩𑀤𑁆𑀥𑀥𑀼𑀭𑀥𑀸𑀭𑀸𑀲𑀫𑀸𑀕𑀫𑀢𑁄𑀧𑀺 𑀲𑀻𑀖𑀢𑀭𑁄. 𑀬𑀣𑀸 𑀢𑀺𑀮𑀸𑀦𑀁 𑀪𑀚𑁆𑀚𑀺𑀬𑀫𑀸𑀦𑀸𑀦𑀁 𑀧𑀝𑀧𑀝𑀸𑀬𑀦𑁂𑀦 𑀪𑁂𑀤𑁄 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑁂𑀦𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀧𑀝𑀸𑀬𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀦𑁆𑀦𑀸 𑀳𑀺 𑀏𑀓𑀦𑁆𑀢𑀢𑁄 𑀪𑀺𑀚𑁆𑀚𑀦𑁆𑀢𑀻𑀢𑀺.

𑀲𑀤𑁆𑀥𑀺𑀁 𑀭𑀽𑀧𑁂𑀦𑀸𑀢𑀺 𑀇𑀤𑀁 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀦𑀓𑀭𑀽𑀧𑀥𑀫𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀬𑀁 𑀢𑀢𑁄 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁. 𑀅𑀜𑁆𑀜𑀣𑀸 𑀬𑀤𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀲𑀫𑀸𑀦𑀓𑁆𑀔𑀡𑀸 𑀲𑀺𑀬𑀼𑀁, ‘‘𑀭𑀽𑀧𑀁 𑀕𑀭𑀼𑀧𑀭𑀺𑀡𑀸𑀫𑀁 𑀤𑀦𑁆𑀥𑀦𑀺𑀭𑁄𑀥’’𑀦𑁆𑀢𑀺𑀆𑀤𑀺𑀯𑀘𑀦𑁂𑀳𑀺 (𑀯𑀺𑀪. 𑀅𑀝𑁆𑀞. 𑁨𑁬) 𑀯𑀺𑀭𑁄𑀥𑁄 𑀲𑀺𑀬𑀸, 𑀢𑀣𑀸 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀬𑀣𑀬𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀧𑀸𑀴𑀺𑀬𑀸 (𑀅. 𑀦𑀺. 𑁧.𑁪𑁮). 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀳𑀺 𑀲𑀸𑀭𑀫𑁆𑀫𑀡𑀲𑀪𑀸𑀯𑀸 𑀬𑀣𑀸𑀩𑀮𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀢𑁂𑀲𑀁 𑀢𑀁𑀲𑀪𑀸𑀯𑀦𑀺𑀧𑁆𑀨𑀢𑁆𑀢𑀺𑀅𑀦𑀦𑁆𑀢𑀭𑀁 𑀦𑀺𑀭𑁄𑀥𑁄, 𑀭𑀽𑀧𑀥𑀫𑁆𑀫𑀸 𑀧𑀦 𑀅𑀦𑀸𑀭𑀫𑁆𑀫𑀡𑀸 𑀧𑀓𑀸𑀲𑁂𑀢𑀩𑁆𑀩𑀸, 𑀏𑀯𑀁 𑀢𑁂𑀲𑀁 𑀧𑀓𑀸𑀲𑁂𑀢𑀩𑁆𑀩𑀪𑀸𑀯𑀦𑀺𑀯𑀢𑁆𑀢𑀺 𑀲𑁄𑀴𑀲𑀳𑀺 𑀘𑀺𑀢𑁆𑀢𑁂𑀳𑀺 𑀳𑁄𑀢𑀻𑀢𑀺 𑀢𑀗𑁆𑀔𑀡𑀸𑀬𑀼𑀓𑀢𑀸 𑀢𑁂𑀲𑀁 𑀇𑀘𑁆𑀙𑀺𑀢𑀸, 𑀮𑀳𑀼𑀯𑀺𑀜𑁆𑀜𑀸𑀡𑀯𑀺𑀲𑀬𑀲𑀗𑁆𑀕𑀢𑀺𑀫𑀢𑁆𑀢𑀧𑀘𑁆𑀘𑀬𑀢𑀸𑀬 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀯𑀺𑀲𑀬𑀲𑀗𑁆𑀕𑀢𑀺𑀫𑀢𑁆𑀢𑀢𑀸𑀬 𑀘 𑀯𑀺𑀜𑁆𑀜𑀸𑀡𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸, 𑀤𑀦𑁆𑀥𑀫𑀳𑀸𑀪𑀽𑀢𑀧𑀘𑁆𑀘𑀬𑀢𑀸𑀬 𑀭𑀽𑀧𑀥𑀫𑁆𑀫𑀸𑀦𑀁 𑀤𑀦𑁆𑀥𑀧𑀭𑀺𑀯𑀢𑁆𑀢𑀺𑀢𑀸, 𑀦𑀸𑀦𑀸𑀥𑀸𑀢𑀼𑀬𑀸 𑀬𑀣𑀸𑀪𑀽𑀢𑀜𑀸𑀡𑀁 𑀔𑁄 𑀧𑀦 𑀢𑀣𑀸𑀕𑀢𑀲𑁆𑀲𑁂𑀯, 𑀢𑁂𑀦 𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀥𑀫𑁆𑀫𑁄𑀯 𑀯𑀼𑀢𑁆𑀢𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀘 𑀢𑀲𑁆𑀲𑁂𑀯𑀸𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀸𑀦𑀓𑁆𑀔𑀡𑀢𑀸 𑀦 𑀬𑀼𑀚𑁆𑀚𑀢𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁,𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑀁 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁, 𑀢𑀁 𑀅𑀜𑁆𑀜𑀁, 𑀢𑀁 𑀧𑀦 𑀦𑀺𑀭𑀼𑀚𑁆𑀛𑀦𑁆𑀢𑀁 𑀅𑀧𑀭𑀲𑁆𑀲 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀦𑀺𑀭𑀼𑀚𑁆𑀛𑀢𑀻𑀢𑀺 𑀢𑀢𑁄 𑀮𑀤𑁆𑀥𑀧𑀘𑁆𑀘𑀬𑀁 𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁. 𑀬𑀤𑀺 𑀏𑀯𑀁 𑀢𑁂𑀲𑀁 𑀅𑀦𑁆𑀢𑀭𑁄 𑀮𑀩𑁆𑀪𑁂𑀬𑁆𑀬𑀸𑀢𑀺 𑀦𑁄𑀢𑀺 𑀆𑀳 ‘‘𑀅𑀯𑀻𑀘𑀺𑀫𑀦𑀼𑀲𑀫𑁆𑀩𑀦𑁆𑀥𑁄’’𑀢𑀺, 𑀬𑀣𑀸 𑀯𑀻𑀘𑀺 𑀅𑀦𑁆𑀢𑀭𑁄 𑀦 𑀮𑀩𑁆𑀪𑀢𑀺, 𑀢𑀤𑁂𑀯𑁂𑀢𑀦𑁆𑀢𑀺 𑀅𑀯𑀺𑀲𑁂𑀲𑀯𑀺𑀤𑀼 𑀫𑀜𑁆𑀜𑀦𑁆𑀢𑀺, 𑀏𑀯𑀁 𑀅𑀦𑀼 𑀅𑀦𑀼 𑀲𑀫𑁆𑀩𑀦𑁆𑀥𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁄 𑀭𑀽𑀧𑀲𑀦𑁆𑀢𑀸𑀦𑁄 𑀘 𑀦𑀤𑀻𑀲𑁄𑀢𑁄𑀯 𑀦𑀤𑀺𑀬𑀁 𑀉𑀤𑀓𑀧𑁆𑀧𑀯𑀸𑀳𑁄 𑀯𑀺𑀬 𑀯𑀢𑁆𑀢𑀢𑀺.

𑀅𑀪𑀺𑀫𑀼𑀔𑀁 𑀮𑁄𑀓𑀺𑀢𑀁 𑀆𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀧𑀼𑀭𑀢𑁄𑀧𑁂𑀓𑁆𑀔𑀦’’𑀦𑁆𑀢𑀺. 𑀬𑀲𑁆𑀫𑀸 𑀬𑀁𑀤𑀺𑀲𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺 𑀢𑀺𑀝𑁆𑀞𑀢𑀺 𑀦𑀺𑀲𑀻𑀤𑀢𑀺 𑀯𑀸, 𑀢𑀤𑀪𑀺𑀫𑀼𑀔𑀁 𑀧𑁂𑀓𑁆𑀔𑀦𑀁 𑀆𑀮𑁄𑀓𑀺𑀢𑀁, 𑀢𑀲𑁆𑀫𑀸 𑀢𑀤𑀦𑀼𑀕𑀢𑀁 𑀯𑀺𑀤𑀺𑀲𑀸𑀮𑁄𑀓𑀦𑀁 𑀯𑀺𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀯𑀺𑀮𑁄𑀓𑀺𑀢𑀁 𑀦𑀸𑀫 𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦’’𑀦𑁆𑀢𑀺. 𑀲𑀫𑁆𑀫𑀚𑁆𑀚𑀦𑀧𑀭𑀺𑀪𑀡𑁆𑀟𑀸𑀤𑀺𑀓𑀭𑀡𑁂 𑀑𑀮𑁄𑀓𑀺𑀢𑀲𑁆𑀲, 𑀉𑀮𑁆𑀮𑁄𑀓𑀳𑀭𑀡𑀸𑀤𑀻𑀲𑀼 𑀉𑀮𑁆𑀮𑁄𑀓𑀺𑀢𑀲𑁆𑀲, 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀧𑀭𑀺𑀲𑁆𑀲𑀬𑀲𑁆𑀲 𑀧𑀭𑀺𑀯𑀚𑁆𑀚𑀦𑀸𑀤𑀻𑀲𑀼 𑀅𑀧𑀮𑁄𑀓𑀺𑀢𑀲𑁆𑀲 𑀲𑀺𑀬𑀸 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀇𑀫𑀺𑀦𑀸 𑀯𑀸 𑀫𑀼𑀔𑁂𑀦 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀕𑀳𑀺𑀢𑀸𑀦𑁂𑀯𑀸’’𑀢𑀺.

𑀓𑀸𑀬𑀲𑀓𑁆𑀔𑀺𑀦𑁆𑀢𑀺 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑀯𑀦𑁆𑀢𑀁, 𑀧𑀘𑁆𑀘𑀓𑁆𑀔𑀓𑀸𑀭𑀺𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀆𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀓𑀸𑀮𑁂 𑀏𑀯 ‘‘𑀬𑀫𑁂𑀯𑀸𑀳𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀦𑀺𑀲𑁆𑀲𑀸𑀬 𑀲𑀸𑀲𑀦𑁂 𑀅𑀦𑀪𑀺𑀭𑀢𑀺𑀆𑀤𑀺𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄, 𑀢𑀫𑁂𑀯 𑀲𑀼𑀝𑁆𑀞𑀼 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑁄, 𑀢𑀢𑁆𑀣 𑀘 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀢𑁂𑀦𑁂𑀯 𑀦𑀁 𑀲𑀢𑁆𑀣𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀬𑀤𑀺𑀤𑀁 𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁩𑁫) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑀲𑀸𑀢𑁆𑀣𑀓𑀢𑀸 𑀘 𑀲𑀧𑁆𑀧𑀸𑀬𑀢𑀸 𑀘 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀲𑁆𑀲 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀫𑀸𑀢𑀺 ‘‘𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀲𑁆𑀲𑁂𑀯 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀅𑀢𑁆𑀢𑀦𑁄 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑁂𑀯 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀓𑀸𑀢𑀩𑁆𑀩𑀁, 𑀔𑀦𑁆𑀥𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀸 𑀅𑀜𑁆𑀜𑁄 𑀉𑀧𑀸𑀬𑁄 𑀦 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀮𑁄𑀓𑀺𑀢𑀸𑀤𑀺𑀲𑀫𑀜𑁆𑀜𑀸𑀧𑀺 𑀬𑀲𑁆𑀫𑀸 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀯𑀺𑀲𑁂𑀲𑁄, 𑀢𑀲𑁆𑀫𑀸 𑀢𑀲𑁆𑀲 𑀬𑀸𑀣𑀸𑀯𑀢𑁄 𑀚𑀸𑀦𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀧𑀞𑀫𑀚𑀯𑀦𑁂𑀧𑀺 …𑀧𑁂… 𑀦 𑀳𑁄𑀢𑀻’’𑀢𑀺 𑀇𑀤𑀁 𑀧𑀜𑁆𑀘𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀁 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀻𑀦𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀸𑀦𑀁 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀇𑀝𑁆𑀞𑁂 𑀇𑀢𑁆𑀣𑀺𑀭𑀽𑀧𑀸𑀤𑀺𑀫𑁆𑀳𑀺 𑀮𑁄𑀪𑁄, 𑀅𑀦𑀺𑀝𑁆𑀞𑁂 𑀘 𑀧𑀝𑀺𑀖𑁄 𑀉𑀧𑁆𑀧𑀚𑁆𑀚𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀧𑀦 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀺 𑀳𑁄𑀢𑀺, 𑀢𑀲𑁆𑀲 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀁 𑀫𑀽𑀮𑀁, 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀲𑀩𑁆𑀩𑀁 𑀪𑀯𑀗𑁆𑀕𑀸𑀤𑀺, 𑀏𑀯𑀁 𑀫𑀦𑁄𑀤𑁆𑀯𑀸𑀭𑀚𑀯𑀦𑀲𑁆𑀲 𑀫𑀽𑀮𑀯𑀲𑁂𑀦 𑀫𑀽𑀮𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸. 𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀢𑀸 𑀧𑀦 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀲𑁆𑀲𑁂𑀯 𑀅𑀧𑀼𑀩𑁆𑀩𑀪𑀸𑀯𑀯𑀲𑁂𑀦 𑀇𑀢𑁆𑀢𑀭𑀪𑀸𑀯𑀯𑀲𑁂𑀦 𑀘 𑀯𑀼𑀢𑁆𑀢𑀸. 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀺𑀢𑁂𑀲𑀽𑀢𑀺 𑀳𑁂𑀝𑁆𑀞𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀘 𑀅𑀧𑀭𑀸𑀧𑀭𑀁 𑀪𑀗𑁆𑀕𑀧𑁆𑀧𑀢𑁆𑀢𑀺𑀫𑀸𑀳. 𑀢𑀦𑁆𑀢𑀺 𑀚𑀯𑀦𑀁. 𑀢𑀲𑁆𑀲 𑀦 𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀕𑀦𑁆𑀢𑀼𑀓𑁄 𑀅𑀩𑁆𑀪𑀸𑀕𑀢𑁄. 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀢𑀸𑀯𑀢𑀓𑁄 𑀓𑀸𑀮𑁄 𑀏𑀢𑁂𑀲𑀦𑁆𑀢𑀺 𑀢𑀸𑀯𑀓𑀸𑀮𑀺𑀓𑀸𑀦𑀺.

𑀏𑀢𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀢𑀢𑁆𑀣𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀆𑀮𑁄𑀓𑀦𑀯𑀺𑀮𑁄𑀓𑀦𑁂 𑀧𑀜𑁆𑀜𑀸𑀬𑀫𑀸𑀦𑁂 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺, 𑀓𑁄 𑀯𑀺𑀮𑁄𑀓𑁂𑀢𑀺. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁. 𑀲𑀳𑀚𑀸𑀢𑀧𑀘𑁆𑀘𑀬𑁄𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀅𑀜𑁆𑀜𑀫𑀜𑁆𑀜-𑀲𑀫𑁆𑀧𑀬𑀼𑀢𑁆𑀢-𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀸𑀦𑀫𑁆𑀧𑀺 𑀮𑀩𑁆𑀪𑀦𑀢𑁄.

𑀫𑀡𑀺𑀲𑀧𑁆𑀧𑁄 𑀦𑀸𑀫 𑀏𑀓𑀸 𑀲𑀧𑁆𑀧𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀮𑀴𑀦𑀦𑁆𑀢𑀺 𑀓𑀫𑁆𑀧𑀦𑀦𑁆𑀢𑀺 𑀯𑀤𑀦𑁆𑀢𑀺, 𑀮𑀻𑀴𑀸𑀓𑀭𑀡𑀁 𑀯𑀸 𑀮𑀴𑀦𑀁.

𑀉𑀡𑁆𑀳𑀧𑀓𑀢𑀺𑀓𑁄 𑀧𑀭𑀺𑀴𑀸𑀳𑀩𑀳𑀼𑀮𑁄. 𑀲𑀻𑀮𑀲𑁆𑀲 𑀯𑀺𑀤𑀽𑀲𑀦𑁂𑀦 𑀅𑀳𑀺𑀢𑀸𑀯𑀳𑀢𑁆𑀢𑀸 𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀅𑀲𑀧𑁆𑀧𑀸𑀬𑀁. 𑀘𑀻𑀯𑀭𑀫𑁆𑀧𑀺 𑀅𑀘𑁂𑀢𑀦𑀦𑁆𑀢𑀺𑀆𑀤𑀺𑀦𑀸 𑀘𑀻𑀯𑀭𑀲𑁆𑀲 𑀯𑀺𑀬 ‘‘𑀓𑀸𑀬𑁄𑀧𑀺 𑀅𑀘𑁂𑀢𑀦𑁄’’𑀢𑀺 𑀓𑀸𑀬𑀲𑁆𑀲 𑀅𑀢𑁆𑀢𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑁂𑀦 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀇𑀢𑀭𑀻𑀢𑀭𑀲𑀦𑁆𑀢𑁄𑀲𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀢𑁄𑀢𑀺 𑀆𑀳𑀢𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑁄, 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀺 𑀯𑀸 𑀳𑀢𑀲𑁄𑀪𑁄.

𑀅𑀝𑁆𑀞𑀯𑀺𑀥𑁄𑀧𑀺 𑀅𑀢𑁆𑀣𑁄𑀢𑀺 𑀅𑀝𑁆𑀞𑀯𑀺𑀥𑁄𑀧𑀺 𑀧𑀬𑁄𑀚𑀦𑀯𑀺𑀲𑁂𑀲𑁄. 𑀧𑀣𑀯𑀻𑀲𑀦𑁆𑀥𑀸𑀭𑀓𑀚𑀮𑀲𑁆𑀲 𑀢𑀁𑀲𑀦𑁆𑀥𑀸𑀭𑀓𑀯𑀸𑀬𑀼𑀦𑀸 𑀯𑀺𑀬 𑀧𑀭𑀺𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀸𑀬𑁄𑀥𑀸𑀢𑀼𑀦𑀸𑀯 𑀆𑀲𑀬𑁂 𑀅𑀯𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀯𑀸𑀬𑁄𑀥𑀸𑀢𑀼𑀯𑀲𑁂𑀦𑁂𑀯 𑀢𑀺𑀝𑁆𑀞𑀢𑀻’’𑀢𑀺. 𑀅𑀢𑀺𑀳𑀭𑀢𑀻𑀢𑀺 𑀬𑀸𑀯 𑀫𑀼𑀔𑀸 𑀅𑀪𑀺𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀢𑀢𑁄 𑀬𑀸𑀯 𑀓𑀼𑀘𑁆𑀙𑀺, 𑀢𑀸𑀯 𑀳𑀭𑀢𑀺. 𑀅𑀢𑀺𑀳𑀭𑀢𑀻𑀢𑀺 𑀯𑀸 𑀫𑀼𑀔𑀤𑁆𑀯𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑁄 𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑁄 𑀳𑀭𑀢𑀺. 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀅𑀧𑀭𑀸𑀧𑀭𑀁 𑀘𑀸𑀭𑁂𑀢𑀺. 𑀏𑀢𑁆𑀣 𑀘 𑀆𑀳𑀸𑀭𑀲𑁆𑀲 𑀥𑀸𑀭𑀡𑀧𑀭𑀺𑀯𑀢𑁆𑀢𑀦𑀲𑀁𑀘𑀼𑀡𑁆𑀡𑀦𑀯𑀺𑀲𑁄𑀲𑀦𑀸𑀦𑀺 𑀧𑀣𑀯𑀻𑀥𑀸𑀢𑀼𑀲𑀳𑀺𑀢𑀸 𑀏𑀯 𑀯𑀸𑀬𑁄𑀥𑀸𑀢𑀼 𑀓𑀭𑁄𑀢𑀺, 𑀦 𑀓𑁂𑀯𑀮𑀸𑀢𑀺 𑀢𑀸𑀦𑀺 𑀧𑀣𑀯𑀻𑀥𑀸𑀢𑀼𑀬𑀸𑀧𑀺 𑀓𑀺𑀘𑁆𑀘𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀮𑁆𑀮𑀢𑁆𑀢𑀜𑁆𑀘 𑀅𑀦𑀼𑀧𑀸𑀮𑁂𑀢𑀻𑀢𑀺 𑀯𑀸𑀬𑀼𑀆𑀤𑀻𑀳𑀺 𑀅𑀢𑀺𑀲𑁄𑀲𑀦𑀁 𑀬𑀣𑀸 𑀦 𑀳𑁄𑀢𑀺, 𑀢𑀣𑀸 𑀅𑀦𑀼𑀧𑀸𑀮𑁂𑀢𑀺 𑀅𑀮𑁆𑀮𑀆𑀤𑀻𑀳𑀺 𑀅𑀢𑀺𑀲𑁄𑀲𑀦𑀁 𑀬𑀣𑀸 𑀦 𑀳𑁄𑀢𑀺, 𑀢𑀣𑀸 𑀅𑀦𑀼𑀧𑀸𑀮𑁂𑀢𑀺 𑀅𑀮𑁆𑀮𑀪𑀸𑀯𑀁. 𑀢𑁂𑀚𑁄𑀥𑀸𑀢𑀽𑀢𑀺 𑀕𑀳𑀡𑀻𑀲𑀗𑁆𑀔𑀸𑀢𑀸 𑀢𑁂𑀚𑁄𑀥𑀸𑀢𑀼. 𑀲𑀸 𑀳𑀺 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀆𑀳𑀸𑀭𑀁 𑀧𑀭𑀺𑀧𑀸𑀘𑁂𑀢𑀺. 𑀅𑀜𑁆𑀚𑀲𑁄 𑀳𑁄𑀢𑀻𑀢𑀺 𑀆𑀳𑀸𑀭𑀲𑁆𑀲 𑀧𑀯𑁂𑀲𑀦𑀸𑀤𑀻𑀦𑀁 𑀫𑀕𑁆𑀕𑁄 𑀳𑁄𑀢𑀺. 𑀆𑀪𑀼𑀚𑀢𑀻𑀢𑀺 𑀧𑀭𑀺𑀬𑁂𑀲𑀦𑀚𑁆𑀛𑁄𑀳𑀭𑀡𑀚𑀺𑀡𑁆𑀡𑀸𑀚𑀺𑀡𑁆𑀡𑀢𑀸𑀤𑀺𑀁 𑀆𑀯𑀚𑁆𑀚𑁂𑀢𑀺, 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀁𑀢𑀁𑀯𑀺𑀚𑀸𑀦𑀦𑀦𑀺𑀧𑁆𑀨𑀸𑀤𑀓𑁄𑀬𑁂𑀯 𑀳𑀺 𑀧𑀬𑁄𑀕𑁄 ‘‘𑀲𑀫𑁆𑀫𑀸𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑁄. 𑀬𑁂𑀦 𑀳𑀺 𑀧𑀬𑁄𑀕𑁂𑀦 𑀧𑀭𑀺𑀬𑁂𑀲𑀦𑀸𑀤𑀺 𑀦𑀺𑀧𑁆𑀨𑀚𑁆𑀚𑀢𑀺, 𑀲𑁄 𑀢𑀩𑁆𑀩𑀺𑀲𑀬𑀯𑀺𑀚𑀸𑀦𑀦𑀫𑁆𑀧𑀺 𑀦𑀺𑀧𑁆𑀨𑀸𑀤𑁂𑀢𑀺 𑀦𑀸𑀫 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀅𑀣 𑀯𑀸 𑀲𑀫𑁆𑀫𑀸𑀧𑀬𑁄𑀕𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀅𑀦𑁆𑀯𑀸𑀬 𑀆𑀕𑀫𑁆𑀫 𑀆𑀪𑀼𑀚𑀢𑀺 𑀲𑀫𑀦𑁆𑀦𑀸𑀳𑀭𑀢𑀺. 𑀆𑀪𑁄𑀕𑀧𑀼𑀩𑁆𑀩𑀓𑁄 𑀳𑀺 𑀲𑀩𑁆𑀩𑁄𑀧𑀺 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀢𑀺 𑀢𑀣𑀸 𑀯𑀼𑀢𑁆𑀢𑀁.

𑀕𑀫𑀦𑀢𑁄𑀢𑀺 𑀪𑀺𑀓𑁆𑀔𑀸𑀘𑀸𑀭𑀯𑀲𑁂𑀦 𑀕𑁄𑀘𑀭𑀕𑀸𑀫𑀁 𑀉𑀤𑁆𑀤𑀺𑀲𑁆𑀲 𑀕𑀫𑀦𑀢𑁄. 𑀧𑀭𑀺𑀬𑁂𑀲𑀦𑀢𑁄𑀢𑀺 𑀕𑁄𑀘𑀭𑀕𑀸𑀫𑁂 𑀪𑀺𑀓𑁆𑀔𑀢𑁆𑀣𑀁 𑀆𑀳𑀺𑀡𑁆𑀟𑀦𑀢𑁄. 𑀧𑀭𑀺𑀪𑁄𑀕𑀢𑁄𑀢𑀺 𑀆𑀳𑀸𑀭𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑀢𑁄. 𑀆𑀲𑀬𑀢𑁄𑀢𑀺 𑀧𑀺𑀢𑁆𑀢𑀸𑀤𑀺𑀆𑀲𑀬𑀢𑁄. 𑀆𑀲𑀬𑀢𑀺 𑀏𑀢𑁆𑀣 𑀏𑀓𑀚𑁆𑀛𑀁 𑀧𑀯𑀢𑁆𑀢𑀫𑀸𑀦𑁄𑀧𑀺 𑀓𑀫𑁆𑀫𑀩𑀮𑀯𑀢𑁆𑀣𑀺𑀢𑁄 𑀳𑀼𑀢𑁆𑀯𑀸 𑀫𑀭𑀺𑀬𑀸𑀤𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀲𑀬𑀢𑀺 𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀲𑀬𑁄, 𑀆𑀫𑀸𑀲𑀬𑀲𑁆𑀲 𑀉𑀧𑀭𑀺 𑀢𑀺𑀝𑁆𑀞𑀦𑀓𑁄 𑀧𑀺𑀢𑁆𑀢𑀸𑀤𑀺𑀓𑁄. 𑀫𑀭𑀺𑀬𑀸𑀤𑀢𑁆𑀣𑁄 𑀳𑀺 𑀅𑀬𑀫𑀸𑀓𑀸𑀭𑁄. 𑀦𑀺𑀥𑁂𑀢𑀺 𑀬𑀣𑀸𑀪𑀼𑀢𑁆𑀢𑁄 𑀆𑀳𑀸𑀭𑁄 𑀦𑀺𑀘𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀦𑀺𑀥𑀸𑀦𑀁, 𑀆𑀫𑀸𑀲𑀬𑁄. 𑀢𑀢𑁄 𑀦𑀺𑀥𑀸𑀦𑀢𑁄. 𑀅𑀧𑀭𑀺𑀧𑀓𑁆𑀓𑀢𑁄𑀢𑀺 𑀕𑀳𑀡𑀻𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀚𑀢𑁂𑀚𑁂𑀦 𑀅𑀯𑀺𑀧𑀓𑁆𑀓𑀢𑁄. 𑀧𑀭𑀺𑀧𑀓𑁆𑀓𑀢𑁄𑀢𑀺 𑀬𑀣𑀸𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀺𑀧𑀓𑁆𑀓𑀪𑀸𑀯𑀢𑁄. 𑀨𑀮𑀢𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀢𑁄. 𑀦𑀺𑀲𑁆𑀲𑀦𑁆𑀤𑀢𑁄𑀢𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀲𑁆𑀲𑀦𑁆𑀤𑀦𑀢𑁄. 𑀲𑀫𑁆𑀫𑀓𑁆𑀔𑀦𑀢𑁄𑀢𑀺 𑀲𑀩𑁆𑀩𑀲𑁄 𑀫𑀓𑁆𑀔𑀦𑀢𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁨𑁯𑁪) 𑀕𑀳𑁂𑀢𑀩𑁆𑀩𑁄.

𑀅𑀜𑁆𑀜𑁂 𑀘 𑀭𑁄𑀕𑀸 𑀓𑀡𑁆𑀡𑀲𑀽𑀮𑀪𑀕𑀦𑁆𑀤𑀭𑀸𑀤𑀬𑁄. 𑀅𑀝𑁆𑀞𑀸𑀦𑁂𑀢𑀺 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑁂 𑀅𑀬𑀼𑀢𑁆𑀢𑁂 𑀞𑀸𑀦𑁂 𑀔𑁂𑀢𑁆𑀢𑀤𑁂𑀯𑀸𑀬𑀢𑀦𑀸𑀤𑀺𑀓𑁂. 𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦𑁂𑀯 𑀅𑀢𑁆𑀢𑀦𑁄 𑀓𑀲𑁆𑀲𑀘𑀺 𑀅𑀦𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀘 𑀦 𑀧𑀭𑀲𑁆𑀲. 𑀉𑀤𑀓𑀢𑀼𑀫𑁆𑀩𑀢𑁄𑀢𑀺 𑀯𑁂𑀴𑀼𑀦𑀸𑀴𑀺𑀆𑀤𑀺𑀉𑀤𑀓𑀪𑀸𑀚𑀦𑀢𑁄. 𑀢𑀦𑁆𑀢𑀺 𑀙𑀟𑁆𑀟𑀺𑀢𑀉𑀤𑀓𑀁.

𑀅𑀤𑁆𑀥𑀸𑀦𑀇𑀭𑀺𑀬𑀸𑀧𑀣𑀸 𑀘𑀺𑀭𑀧𑁆𑀧𑀯𑀢𑁆𑀢𑀺𑀓𑀸 𑀤𑀻𑀖𑀓𑀸𑀮𑀺𑀓𑀸 𑀇𑀭𑀺𑀬𑀸𑀧𑀣𑀸. 𑀫𑀚𑁆𑀛𑀺𑀫𑀸 𑀪𑀺𑀓𑁆𑀔𑀸𑀘𑀭𑀡𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸. 𑀘𑀼𑀡𑁆𑀡𑀺𑀓𑀇𑀭𑀺𑀬𑀸𑀧𑀣𑀸 𑀯𑀺𑀳𑀸𑀭𑁂 𑀅𑀜𑁆𑀜𑀢𑁆𑀣𑀸𑀧𑀺 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. ‘‘𑀕𑀢𑁂𑀢𑀺 𑀕𑀫𑀦𑁂’’𑀢𑀺 𑀧𑀼𑀩𑁆𑀩𑁂 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀕𑁆𑀕𑀳𑀡𑁂𑀦 𑀕𑀫𑀦𑁂𑀦𑀧𑀺 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀘 𑀓𑀸𑀬𑀲𑁆𑀲 𑀅𑀢𑀺𑀳𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀇𑀥 𑀕𑀫𑀦𑀫𑁂𑀯 𑀕𑀳𑀺𑀢𑀦𑁆𑀢𑀺 𑀓𑁂𑀘𑀺.

𑀬𑀲𑁆𑀫𑀸 𑀫𑀳𑀸𑀲𑀻𑀯𑀢𑁆𑀣𑁂𑀭𑀯𑀸𑀤𑁂 𑀅𑀦𑀦𑁆𑀢𑀭𑁂 𑀅𑀦𑀦𑁆𑀢𑀭𑁂 𑀇𑀭𑀺𑀬𑀸𑀧𑀣𑁂 𑀧𑀯𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀭𑁄𑀥𑀤𑀲𑁆𑀲𑀦𑀯𑀲𑁂𑀦 𑀲𑀫𑁆𑀧𑀚𑀸𑀦𑀓𑀸𑀭𑀺𑀢𑀸 𑀕𑀳𑀺𑀢𑀸, 𑀇𑀤𑀜𑁆𑀘𑁂𑀢𑁆𑀣 𑀲𑀫𑁆𑀧𑀚𑀜𑁆𑀜𑀯𑀺𑀧𑀲𑁆𑀲𑀦𑀸𑀘𑀸𑀭𑀯𑀲𑁂𑀦 𑀆𑀕𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀬𑀺𑀤𑀁 𑀫𑀳𑀸𑀲𑀻𑀯𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 𑀅𑀲𑀫𑁆𑀫𑁄𑀳𑀥𑀼𑀭𑀁 𑀇𑀫𑀲𑁆𑀫𑀺𑀁 𑀲𑀢𑀺𑀧𑀝𑁆𑀞𑀸𑀦𑀪𑀼𑀢𑁆𑀢𑁂 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀲𑀸𑀫𑀜𑁆𑀜𑀨𑀮𑁂 (𑀤𑀻. 𑀦𑀺. 𑁧.𑁨𑁧𑁪; 𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁪; 𑀤𑀻. 𑀦𑀺. 𑀝𑀻. 𑁧.𑁨𑁧𑁪) 𑀧𑀦 𑀲𑀩𑁆𑀩𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀧𑀚𑀜𑁆𑀜𑀁 𑀮𑀩𑁆𑀪𑀢𑀺 𑀬𑀸𑀯𑀤𑁂𑀯 𑀲𑀸𑀫𑀜𑁆𑀜𑀨𑀮𑀯𑀺𑀲𑁂𑀲𑀤𑀲𑁆𑀲𑀦𑀧𑀭𑀢𑁆𑀢𑀸 𑀢𑀲𑁆𑀲𑀸 𑀤𑁂𑀲𑀦𑀸𑀬. 𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑁂𑀯𑀸𑀢𑀺 𑀇𑀤𑀁 𑀬𑀣𑀸 𑀲𑀫𑁆𑀧𑀚𑀜𑁆𑀜𑀓𑀺𑀘𑁆𑀘𑀲𑁆𑀲 𑀧𑀥𑀸𑀦𑀢𑀸, 𑀏𑀯𑀁 𑀲𑀢𑀺𑀓𑀺𑀘𑁆𑀘𑀲𑁆𑀲𑀸𑀧𑀻𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀦 𑀲𑀢𑀺𑀬𑀸 𑀲𑀩𑁆𑀪𑀸𑀯𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁. 𑀦 𑀳𑀺 𑀓𑀤𑀸𑀘𑀺 𑀲𑀢𑀺𑀭𑀳𑀺𑀢𑀸 𑀜𑀸𑀡𑀧𑁆𑀧𑀯𑀢𑁆𑀢𑀺 𑀅𑀢𑁆𑀣𑀺. 𑀏𑀢𑀸𑀦𑀺 𑀧𑀤𑀸𑀦𑀻𑀢𑀺 𑀲𑀫𑁆𑀧𑀚𑀜𑁆𑀜𑀧𑀤𑀸𑀦𑀺. 𑀯𑀺𑀪𑀢𑁆𑀢𑀸𑀦𑁂𑀯𑀸𑀢𑀺 𑀯𑀺𑀲𑀼𑀁 𑀯𑀺𑀪𑀢𑁆𑀢𑀸𑀦𑁂𑀯. 𑀇𑀫𑀺𑀦𑀸𑀧𑀺 𑀲𑀫𑁆𑀧𑀚𑀜𑁆𑀜𑀲𑁆𑀲 𑀯𑀺𑀬 𑀲𑀢𑀺𑀬𑀸𑀧𑀺 𑀧𑀥𑀸𑀦𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺.

𑀅𑀧𑀭𑁄 𑀦𑀬𑁄 𑁋 𑀏𑀓𑁄 𑀪𑀺𑀓𑁆𑀔𑀼 𑀕𑀘𑁆𑀙𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀕𑀘𑁆𑀙𑀢𑀺, 𑀢𑀣𑀸 𑀏𑀓𑁄 𑀢𑀺𑀝𑁆𑀞𑀦𑁆𑀢𑁄 𑀦𑀺𑀲𑀻𑀤𑀦𑁆𑀢𑁄 𑀲𑀬𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀲𑀬𑀢𑀺, 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀲𑀬𑀢𑀺, 𑀏𑀢𑁆𑀣𑀓𑁂𑀦 𑀧𑀦 𑀦 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀘𑀗𑁆𑀓𑀫𑀦𑁂𑀦 𑀤𑀻𑀧𑁂𑀦𑁆𑀢𑀺. 𑀬𑁄 𑀳𑀺 𑀪𑀺𑀓𑁆𑀔𑀼 𑀘𑀗𑁆𑀓𑀫𑀦𑀁 𑀑𑀢𑀭𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀞𑀺𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 ‘‘𑀧𑀸𑀘𑀻𑀦𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀧𑀘𑁆𑀙𑀺𑀫𑀘𑀗𑁆𑀓𑀫𑀦𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀙𑀺𑀫𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀯𑀢𑁆𑀢𑀸𑀧𑀺 𑀧𑀸𑀘𑀻𑀦𑀘𑀗𑁆𑀓𑀫𑀦𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀤𑀸, 𑀘𑀗𑁆𑀓𑀫𑀦𑀫𑀚𑁆𑀛𑁂 𑀧𑀯𑀢𑁆𑀢𑀸 𑀉𑀪𑁄 𑀓𑁄𑀝𑀺𑀬𑁄 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀘𑀗𑁆𑀓𑀫𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀞𑀸𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀞𑀸𑀦𑁂 𑀧𑀯𑀢𑁆𑀢𑀸 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀧𑀯𑀢𑁆𑀢𑀸 𑀲𑀬𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯𑀦𑀺𑀭𑀼𑀤𑁆𑀥𑀸’’𑀢𑀺, 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀬𑁂𑀯 𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀑𑀢𑀸𑀭𑁂𑀢𑀺, 𑀉𑀝𑁆𑀞𑀳𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀉𑀝𑁆𑀞𑀳𑀢𑀺, 𑀅𑀬𑀁 𑀪𑀺𑀓𑁆𑀔𑀼 𑀕𑀢𑀸𑀤𑀻𑀲𑀼 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺, 𑀏𑀯𑀫𑁆𑀧𑀺 𑀲𑀼𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀬𑀸𑀯 𑀲𑀓𑁆𑀓𑁄𑀢𑀺, 𑀢𑀸𑀯 𑀘𑀗𑁆𑀓𑀫𑀺𑀢𑁆𑀯𑀸 𑀞𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀫𑀸𑀦𑁄 𑀏𑀯𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀬𑀢𑀺 ‘‘𑀓𑀸𑀬𑁄 𑀅𑀘𑁂𑀢𑀦𑁄, 𑀫𑀜𑁆𑀘𑁄 𑀅𑀘𑁂𑀢𑀦𑁄, 𑀓𑀸𑀬𑁄 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀫𑀜𑁆𑀘𑁂 𑀲𑀬𑀺𑀢𑁄’𑀢𑀺, 𑀫𑀜𑁆𑀘𑁄 𑀦 𑀚𑀸𑀦𑀸𑀢𑀺 ‘‘𑀫𑀬𑀺 𑀓𑀸𑀬𑁄 𑀲𑀬𑀺𑀢𑁄’’𑀢𑀺, 𑀅𑀘𑁂𑀢𑀦𑁄 𑀓𑀸𑀬𑁄 𑀅𑀘𑁂𑀢𑀦𑁂 𑀫𑀜𑁆𑀘𑁂 𑀲𑀬𑀺𑀢𑁄’’𑀢𑀺, 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀬𑁂𑀯 𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀑𑀢𑀸𑀭𑁂𑀢𑀺, 𑀧𑀩𑀼𑀚𑁆𑀛𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀧𑀩𑀼𑀚𑁆𑀛𑀢𑀺, 𑀅𑀬𑀁 𑀲𑀼𑀢𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀻𑀢𑀺.

𑀓𑀸𑀬𑀸𑀤𑀺𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀦𑁂𑀦 𑀢𑀫𑁆𑀫𑀬𑀢𑁆𑀢𑀸 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀘 𑀚𑀯𑀦𑀁, 𑀲𑀩𑁆𑀩𑀫𑁆𑀧𑀺 𑀯𑀸 𑀙𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀁 𑀓𑀺𑀭𑀺𑀬𑀸𑀫𑀬𑀧𑀯𑀢𑁆𑀢𑀁 𑀦𑀸𑀫, 𑀢𑀲𑁆𑀫𑀺𑀁 𑀲𑀢𑀺 𑀚𑀸𑀕𑀭𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀚𑀸𑀕𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀅𑀧𑀺𑀘 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀚𑀕𑁆𑀕𑀦𑁆𑀢𑁄𑀧𑀺 𑀚𑀸𑀕𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀧𑀺 𑀩𑀸𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀁 𑀧𑀳𑀸𑀬 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀲𑀧𑁆𑀧𑀸𑀬𑀓𑀣𑀁 𑀓𑀣𑁂𑀦𑁆𑀢𑁄𑀧𑀺 𑀪𑀸𑀲𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀭𑀼𑀘𑀺𑀬𑀁 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀧𑀺 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀤𑀼𑀢𑀺𑀬𑀜𑁆𑀳𑀺 𑀛𑀸𑀦𑀁 𑀯𑀘𑀻𑀲𑀗𑁆𑀔𑀸𑀭𑀯𑀺𑀭𑀳𑀢𑁄 𑀯𑀺𑀲𑁂𑀲𑀢𑁄 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀫. 𑀭𑀽𑀧𑀥𑀫𑁆𑀫𑀲𑁆𑀲𑁂𑀯 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀸 𑀅𑀪𑀺𑀓𑁆𑀓𑀫𑀸𑀤𑀬𑁄𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀓𑁆𑀔𑀦𑁆𑀥𑀲𑁆𑀲𑁂𑀯 𑀲𑀫𑀼𑀤𑀬𑁄 𑀘 𑀯𑀬𑁄 𑀘 𑀦𑀻𑀳𑀭𑀺𑀢𑀩𑁆𑀩𑁄’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀯𑀡𑁆𑀡𑀦𑀸

𑁧𑁧𑁦. 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦𑀸𑀢𑀺 (𑀤𑀻. 𑀦𑀺. 𑀝𑀻. 𑁨.𑁩𑁭𑁭) 𑀚𑀺𑀕𑀼𑀘𑁆𑀙𑀦𑀻𑀬𑀢𑀸𑀬. 𑀧𑀝𑀺𑀓𑀽𑀮𑀫𑁂𑀯 𑀧𑀝𑀺𑀓𑀽𑀮𑀁 𑀬𑁄 𑀧𑀝𑀺𑀓𑀽𑀮𑀲𑀪𑀸𑀯𑁄 𑀧𑀝𑀺𑀓𑀽𑀮𑀸𑀓𑀸𑀭𑁄, 𑀢𑀲𑁆𑀲 𑀫𑀦𑀲𑀺𑀓𑀭𑀡𑀯𑀲𑁂𑀦. 𑀅𑀦𑁆𑀢𑀭𑁂𑀦𑀧𑀺 𑀳𑀺 𑀪𑀸𑀯𑀯𑀸𑀘𑀺𑀦𑀁 𑀲𑀤𑁆𑀤𑀁 𑀪𑀸𑀯𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀧𑀝𑀲𑁆𑀲 𑀲𑀼𑀓𑁆𑀓’’𑀦𑁆𑀢𑀺. 𑀬𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁮𑁨-𑁧𑁮𑁩) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀢𑀁𑀲𑀁𑀯𑀡𑁆𑀡𑀦𑀸𑀬𑀜𑁆𑀘 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀢𑁆𑀣𑀸𑀤𑀻𑀳𑀺 𑀧𑀲𑀺𑀩𑁆𑀩𑀓𑀸𑀓𑀸𑀭𑁂𑀦 𑀩𑀦𑁆𑀥𑀺𑀢𑁆𑀯𑀸 𑀓𑀢𑀁 𑀆𑀯𑀝𑀦𑀁 𑀧𑀼𑀢𑁄𑀴𑀺. 𑀯𑀺𑀪𑀽𑀢𑀸𑀓𑀸𑀭𑁄𑀢𑀺 𑀧𑀡𑁆𑀡𑀢𑁆𑀢𑀺𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀲𑀼𑀪𑀪𑀸𑀯𑀲𑁆𑀲 𑀉𑀧𑀝𑁆𑀞𑀺𑀢𑀸𑀓𑀸𑀭𑁄. 𑀇𑀢𑀺-𑀲𑀤𑁆𑀤𑀲𑁆𑀲 𑀆𑀓𑀸𑀭𑀢𑁆𑀣𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁂𑀲𑀸𑀤𑀺𑀧𑀭𑀺𑀕𑁆𑀕𑀳𑀡𑁂𑀦𑀸’’𑀢𑀺 𑀆𑀳.

𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀯𑀡𑁆𑀡𑀦𑀸

𑁧𑁧𑁧. 𑀥𑀸𑀢𑀼𑀫𑀦𑀲𑀺𑀓𑀸𑀭𑀯𑀲𑁂𑀦𑀸𑀢𑀺 𑀧𑀣𑀯𑀻𑀥𑀸𑀢𑀼𑀆𑀤𑀺𑀓𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀆𑀭𑀩𑁆𑀪 𑀧𑀯𑀢𑁆𑀢𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀯𑀲𑁂𑀦, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀥𑀸𑀢𑀼𑀫𑀦𑀲𑀺𑀓𑀸𑀭𑁄 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁. 𑀕𑁄𑀖𑀸𑀢𑀓𑁄𑀢𑀺 𑀚𑀻𑀯𑀺𑀓𑀢𑁆𑀣𑀸𑀬 𑀕𑀼𑀦𑁆𑀦𑀁 𑀖𑀸𑀢𑀓𑁄. 𑀅𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀓𑀫𑁆𑀫𑀓𑀭𑀡𑀯𑀲𑁂𑀦 𑀢𑀲𑁆𑀲 𑀲𑀫𑀻𑀧𑀯𑀸𑀲𑀻. 𑀞𑀺𑀢-𑀲𑀤𑁆𑀤𑁄 ‘‘𑀞𑀺𑀢𑁄 𑀯𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁬𑁩; 𑀅. 𑀦𑀺. 𑁫.𑁨𑁮) 𑀞𑀸𑀦𑀲𑀗𑁆𑀔𑀸𑀢𑀇𑀭𑀺𑀬𑀸𑀧𑀣𑀲𑀫𑀗𑁆𑀕𑀺𑀢𑀸𑀬, 𑀞𑀸-𑀲𑀤𑁆𑀤𑀲𑁆𑀲 𑀯𑀸 𑀕𑀢𑀺𑀯𑀺𑀦𑀺𑀯𑀢𑁆𑀢𑀺𑀅𑀢𑁆𑀣𑀢𑀸𑀬 𑀅𑀜𑁆𑀜𑀢𑁆𑀣 𑀞𑀧𑁂𑀢𑁆𑀯𑀸 𑀕𑀫𑀦𑀁 𑀲𑁂𑀲𑀇𑀭𑀺𑀬𑀸𑀧𑀣𑀲𑀫𑀗𑁆𑀕𑀺𑀢𑀸𑀬 𑀩𑁄𑀥𑀓𑁄, 𑀇𑀥 𑀧𑀦 𑀬𑀣𑀸 𑀢𑀣𑀸 𑀭𑀽𑀧𑀓𑀸𑀬𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀩𑁄𑀥𑀓𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀞𑀺𑀢𑀢𑁆𑀢𑀸 𑀬𑀣𑀸𑀞𑀺𑀢’’𑀦𑁆𑀢𑀺. 𑀢𑀢𑁆𑀣 𑀆𑀓𑀸𑀭𑁂𑀦𑀸𑀢𑀺 𑀞𑀸𑀦𑀸𑀤𑀺𑀦𑀸 𑀭𑀽𑀧𑀓𑀸𑀬𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑁂𑀦. 𑀞𑀸𑀦𑀸𑀤𑀬𑁄 𑀳𑀺 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀸𑀬 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀧𑀣𑁄 𑀧𑀯𑀢𑁆𑀢𑀺𑀫𑀕𑁆𑀕𑁄𑀢𑀺 ‘‘𑀇𑀭𑀺𑀬𑀸𑀧𑀣𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀞𑀺𑀢𑀦𑁆𑀢𑀺 𑀬𑀣𑀸𑀧𑀯𑀢𑁆𑀢𑀁. 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀫𑁂𑀯𑁂𑀢𑁆𑀣 ‘‘𑀧𑀡𑀺𑀥𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀬𑀣𑀸𑀞𑀺𑀢𑀢𑁆𑀢𑀸 𑀘 𑀬𑀣𑀸𑀧𑀡𑀺𑀳𑀺𑀢’’𑀦𑁆𑀢𑀺. 𑀞𑀺𑀢𑀦𑁆𑀢𑀺 𑀯𑀸 𑀓𑀸𑀬𑀲𑁆𑀲 𑀞𑀸𑀦𑀲𑀗𑁆𑀔𑀸𑀢𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁. 𑀧𑀡𑀺𑀳𑀺𑀢𑀦𑁆𑀢𑀺 𑀢𑀤𑀜𑁆𑀜𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁. 𑀞𑀺𑀢𑀦𑁆𑀢𑀺 𑀯𑀸 𑀓𑀸𑀬𑀲𑀗𑁆𑀔𑀸𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑀡𑁂 𑀲𑀓𑀺𑀘𑁆𑀘𑀯𑀲𑁂𑀦 𑀅𑀯𑀝𑁆𑀞𑀸𑀦𑀧𑀭𑀺𑀤𑀻𑀧𑀦𑀁. 𑀧𑀡𑀺𑀳𑀺𑀢𑀦𑁆𑀢𑀺 𑀧𑀘𑁆𑀘𑀬𑀓𑀺𑀘𑁆𑀘𑀯𑀲𑁂𑀦 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀧𑀓𑀸𑀭𑀢𑁄 𑀦𑀺𑀳𑀺𑀢𑀁 𑀧𑀡𑀺𑀳𑀺𑀢𑀦𑁆𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀧𑀢𑀺 𑀧𑀢𑀺 𑀅𑀯𑁂𑀓𑁆𑀔𑀢𑀺, 𑀜𑀸𑀡𑀘𑀓𑁆𑀔𑀼𑀦𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀲𑁆𑀲𑀢𑀺.

𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀪𑀸𑀯𑀢𑁆𑀣𑀯𑀺𑀪𑀸𑀯𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀕𑁄𑀖𑀸𑀢𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑁄𑀲𑁂𑀦𑁆𑀢𑀲𑁆𑀲𑀸𑀢𑀺 𑀫𑀁𑀲𑀽𑀧𑀘𑀬𑀧𑀭𑀺𑀩𑁆𑀭𑀽𑀳𑀦𑀸𑀬 𑀓𑀼𑀡𑁆𑀟𑀓𑀪𑀢𑁆𑀢𑀓𑀧𑁆𑀧𑀸𑀲𑀝𑁆𑀞𑀺𑀆𑀤𑀻𑀳𑀺 𑀲𑀁𑀯𑀟𑁆𑀠𑁂𑀦𑁆𑀢𑀲𑁆𑀲. 𑀯𑀥𑀺𑀢𑀁 𑀫𑀢𑀦𑁆𑀢𑀺 𑀳𑀺𑀁𑀲𑀺𑀢𑀁 𑀳𑀼𑀢𑁆𑀯𑀸 𑀫𑀢𑀁. 𑀫𑀢𑀦𑁆𑀢𑀺 𑀘 𑀫𑀢𑀫𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀢𑀸𑀯𑀤𑁂𑀯𑀸’’𑀢𑀺. 𑀕𑀸𑀯𑀻𑀢𑀺 𑀲𑀜𑁆𑀜𑀸 𑀦 𑀅𑀦𑁆𑀢𑀭𑀥𑀸𑀬𑀢𑀺 𑀬𑀸𑀦𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀬𑀣𑀸𑀲𑀦𑁆𑀦𑀺𑀯𑀺𑀝𑁆𑀞𑀸𑀦𑀺 𑀉𑀧𑀸𑀤𑀸𑀬 𑀕𑀸𑀯𑀻𑀲𑀫𑀜𑁆𑀜𑀸 𑀫𑀢𑀫𑀢𑁆𑀢𑀸𑀬𑀧𑀺 𑀕𑀸𑀯𑀺𑀬𑀸, 𑀢𑁂𑀲𑀁 𑀢𑀁𑀲𑀦𑁆𑀦𑀺𑀯𑁂𑀲𑀲𑁆𑀲 𑀅𑀯𑀺𑀦𑀝𑁆𑀞𑀢𑁆𑀢𑀸. 𑀯𑀺𑀮𑀻𑀬𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀺 𑀯𑀺𑀪𑀼𑀚𑁆𑀚𑀦𑁆𑀢𑀻𑀢𑀺 𑀩𑀻𑀮𑀸 𑀪𑀸𑀕𑀸 𑀯-𑀓𑀸𑀭𑀲𑁆𑀲 𑀩-𑀓𑀸𑀭𑀁, 𑀇-𑀓𑀸𑀭𑀲𑁆𑀲 𑀈-𑀓𑀸𑀭𑀁 𑀓𑀢𑁆𑀯𑀸. 𑀩𑀻𑀮𑀲𑁄𑀢𑀺 𑀩𑀻𑀮𑀁 𑀩𑀻𑀮𑀁 𑀓𑀢𑁆𑀯𑀸. 𑀯𑀺𑀪𑀚𑀺𑀢𑁆𑀯𑀸𑀢𑀺 𑀅𑀝𑁆𑀞𑀺𑀲𑀗𑁆𑀖𑀸𑀝𑀢𑁄 𑀫𑀁𑀲𑀁 𑀯𑀺𑀯𑁂𑀘𑁂𑀢𑁆𑀯𑀸, 𑀢𑀢𑁄 𑀯𑀸 𑀯𑀺𑀯𑁂𑀘𑀺𑀢𑀫𑀁𑀲𑀁 𑀪𑀸𑀕𑀲𑁄 𑀓𑀢𑁆𑀯𑀸. 𑀢𑁂𑀦𑁂𑀯𑀸𑀳 ‘‘𑀫𑀁𑀲𑀲𑀜𑁆𑀜𑀸 𑀧𑀯𑀢𑁆𑀢𑀢𑀻’’𑀢𑀺. 𑀧𑀩𑁆𑀩𑀚𑀺𑀢𑀲𑁆𑀲𑀧𑀺 𑀅𑀧𑀭𑀺𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲. 𑀖𑀦𑀯𑀺𑀦𑀺𑀩𑁆𑀪𑁄𑀕𑀦𑁆𑀢𑀺 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀖𑀦𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀦𑀁 𑀯𑀺𑀯𑁂𑀘𑀦𑀁. 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑁄𑀢𑀺 𑀖𑀦𑀯𑀺𑀦𑀺𑀩𑁆𑀪𑁄𑀕𑀓𑀭𑀡𑁂𑀦 𑀥𑀸𑀢𑀼𑀁 𑀥𑀸𑀢𑀼𑀁 𑀧𑀣𑀯𑀻𑀆𑀤𑀺𑀥𑀸𑀢𑀼𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲. 𑀲𑀢𑁆𑀢𑀲𑀜𑁆𑀜𑀸𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀯𑀲𑁂𑀦 𑀧𑀯𑀢𑁆𑀢𑀸 𑀲𑀜𑁆𑀜𑀸𑀢𑀺 𑀯𑀤𑀦𑁆𑀢𑀺, 𑀯𑁄𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑀲𑀢𑁆𑀢𑀲𑀜𑁆𑀜𑀸𑀬𑀧𑀺 𑀢𑀤𑀸 𑀅𑀦𑁆𑀢𑀭𑀥𑀸𑀦𑀁 𑀬𑀼𑀢𑁆𑀢𑀫𑁂𑀯 𑀬𑀸𑀣𑀸𑀯𑀢𑁄 𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀲𑀫𑁆𑀧𑀸𑀤𑀦𑀢𑁄. 𑀏𑀯𑀜𑁆𑀳𑀺 𑀲𑀢𑀺 𑀬𑀣𑀸𑀯𑀼𑀢𑁆𑀢𑀑𑀧𑀫𑁆𑀫𑀢𑁆𑀣𑁂𑀦 𑀉𑀧𑀫𑁂𑀬𑁆𑀬𑀢𑁆𑀣𑁄 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀥𑀸𑀢𑀼𑀯𑀲𑁂𑀦𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀻’’𑀢𑀺. 𑀤𑀓𑁆𑀔𑁄𑀢𑀺 𑀙𑁂𑀓𑁄 𑀢𑀁𑀢𑀁𑀲𑀫𑀜𑁆𑀜𑀸𑀬 𑀓𑀼𑀲𑀮𑁄, 𑀬𑀣𑀸𑀚𑀸𑀢𑁂 𑀲𑀽𑀦𑀲𑁆𑀫𑀺𑀁 𑀦𑀗𑁆𑀕𑀼𑀝𑁆𑀞𑀔𑀼𑀭𑀯𑀺𑀲𑀸𑀡𑀸𑀤𑀺𑀯𑀦𑁆𑀢𑁂 𑀅𑀝𑁆𑀞𑀺𑀫𑀁𑀲𑀸𑀤𑀺𑀅𑀯𑀬𑀯𑀲𑀫𑀼𑀤𑀸𑀬𑁂 𑀅𑀯𑀺𑀪𑀢𑁆𑀢𑁂 𑀕𑀸𑀯𑀻𑀲𑀫𑀜𑁆𑀜𑀸, 𑀦 𑀯𑀺𑀪𑀢𑁆𑀢𑁂, 𑀯𑀺𑀪𑀢𑁆𑀢𑁂 𑀧𑀦 𑀅𑀝𑁆𑀝𑀺𑀁𑀫𑀁𑀲𑀸𑀤𑀺𑀅𑀯𑀬𑀯𑀲𑀫𑀜𑁆𑀜𑀸𑀢𑀺 𑀚𑀸𑀦𑀦𑀓𑁄. 𑀘𑀢𑀼𑀫𑀳𑀸𑀧𑀣𑁄 𑀯𑀺𑀬 𑀘𑀢𑀼𑀇𑀭𑀺𑀬𑀸𑀧𑀣𑁄𑀢𑀺 𑀕𑀸𑀯𑀺𑀬𑀸 𑀞𑀺𑀢𑀘𑀢𑀼𑀫𑀳𑀸𑀧𑀣𑁄 𑀯𑀺𑀬 𑀓𑀸𑀬𑀲𑁆𑀲 𑀧𑀯𑀢𑁆𑀢𑀺𑀫𑀕𑁆𑀕𑀪𑀽𑀢𑁄 𑀘𑀢𑀼𑀩𑁆𑀩𑀺𑀥𑁄 𑀇𑀭𑀺𑀬𑀸𑀧𑀣𑁄. 𑀬𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁬) 𑀯𑀺𑀢𑁆𑀣𑀸𑀭𑀺𑀢𑀸, 𑀢𑀲𑁆𑀫𑀸 𑀢𑀢𑁆𑀣 𑀢𑀁𑀲𑀁𑀯𑀡𑁆𑀡𑀦𑀸𑀬𑀜𑁆𑀘 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁩𑁦𑁬) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀯𑀡𑁆𑀡𑀦𑀸

𑁧𑁧𑁨. 𑀲𑀺𑀯𑀣𑀺𑀓𑀸𑀬 𑀅𑀧𑀯𑀺𑀤𑁆𑀥𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀑𑀥𑀺𑀲𑁄 𑀧𑀯𑀢𑁆𑀢𑀸𑀦𑀁 𑀓𑀣𑀸𑀦𑀁 𑀢𑀤𑀪𑀺𑀥𑁂𑀬𑁆𑀬𑀸𑀦𑀜𑁆𑀘 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀅𑀲𑀼𑀪𑀪𑀸𑀕𑀸𑀦𑀁 𑀲𑀺𑀯𑀣𑀺𑀓𑀧𑀩𑁆𑀩𑀸𑀦𑀻𑀢𑀺 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀕𑀳𑀺𑀢𑀲𑀫𑀜𑁆𑀜𑀸. 𑀢𑁂𑀦𑀸𑀳 ‘‘𑀲𑀺𑀯𑀣𑀺𑀓𑀧𑀩𑁆𑀩𑁂𑀳𑀺 𑀯𑀺𑀪𑀚𑀺𑀢𑀼’’𑀦𑁆𑀢𑀺. 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀢𑀺 𑀚𑀻𑀯𑀺𑀢𑀓𑁆𑀔𑀬𑀢𑁄 𑀉𑀧𑀭𑀺 𑀫𑀭𑀡𑀢𑁄 𑀧𑀭𑀁. 𑀲𑀫𑀼𑀕𑁆𑀕𑀢𑁂𑀦𑀸𑀢𑀺 𑀉𑀝𑁆𑀞𑀺𑀢𑁂𑀦. 𑀉𑀤𑁆𑀥𑀼𑀫𑀸𑀢𑀢𑁆𑀢𑀸𑀢𑀺 𑀉𑀤𑁆𑀥𑀁 𑀉𑀤𑁆𑀥𑀁 𑀥𑀼𑀫𑀸𑀢𑀢𑁆𑀢𑀸 𑀲𑀽𑀦𑀢𑁆𑀢𑀸. 𑀲𑁂𑀢𑀭𑀢𑁆𑀢𑁂𑀳𑀺 𑀯𑀺𑀧𑀭𑀺𑀪𑀺𑀦𑁆𑀦𑀁 𑀯𑀺𑀫𑀺𑀲𑁆𑀲𑀺𑀢𑀁 𑀦𑀻𑀮𑀁 𑀯𑀺𑀦𑀻𑀮𑀁, 𑀧𑀼𑀭𑀺𑀫𑀯𑀡𑁆𑀡𑀯𑀺𑀧𑀭𑀺𑀡𑀸𑀫𑀪𑀽𑀢𑀁 𑀯𑀸 𑀦𑀻𑀮𑀁𑀯𑀺𑀦𑀻𑀮𑀁, 𑀯𑀺𑀦𑀻𑀮𑀫𑁂𑀯 𑀯𑀺𑀦𑀻𑀮𑀓𑀦𑁆𑀢𑀺 𑀓-𑀓𑀸𑀭𑁂𑀦 𑀧𑀤𑀯𑀟𑁆𑀠𑀦𑀫𑀸𑀳 𑀅𑀦𑀢𑁆𑀣𑀦𑁆𑀢𑀭𑀢𑁄 𑀬𑀣𑀸 ‘‘𑀧𑀻𑀢𑀓𑀁 𑀮𑁄𑀳𑀺𑀢𑀓’’𑀦𑁆𑀢𑀺 (𑀥. 𑀲. 𑁬𑁧𑁬). 𑀧𑀝𑀺𑀓𑀽𑀮𑀓𑀢𑁆𑀢𑀸𑀢𑀺 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸. 𑀓𑀼𑀘𑁆𑀙𑀺𑀢𑀁 𑀯𑀺𑀦𑀻𑀮𑀁 𑀯𑀺𑀦𑀻𑀮𑀓𑀦𑁆𑀢𑀺 𑀓𑀼𑀘𑁆𑀙𑀦𑀢𑁆𑀣𑁄 𑀯𑀸 𑀅𑀬𑀁 𑀓-𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 𑀬𑀣𑀸 ‘‘𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁧𑁬; 𑀅. 𑀦𑀺. 𑁫.𑁨𑁧𑁩; 𑀫𑀳𑀸𑀯. 𑁨𑁮𑁫). 𑀧𑀭𑀺𑀪𑀺𑀦𑁆𑀦𑀝𑁆𑀞𑀸𑀦𑁂𑀳𑀺 𑀓𑀸𑀓𑀓𑀗𑁆𑀓𑀸𑀤𑀻𑀳𑀺. 𑀯𑀺𑀲𑁆𑀲𑀦𑁆𑀤𑀫𑀸𑀦𑀁 𑀧𑀼𑀩𑁆𑀩𑀦𑁆𑀢𑀺 𑀯𑀺𑀲𑁆𑀲𑀯𑀦𑁆𑀢𑀁 𑀧𑀼𑀩𑁆𑀩𑀁, 𑀢𑀳𑀁 𑀢𑀳𑀁 𑀧𑀕𑁆𑀖𑀭𑀦𑁆𑀢𑀧𑀼𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸𑀪𑀸𑀯𑀦𑁆𑀢𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀧𑀼𑀩𑁆𑀩𑀪𑀸𑀯𑀁.

𑀲𑁄 𑀪𑀺𑀓𑁆𑀔𑀽𑀢𑀺 𑀬𑁄 ‘‘𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁄, 𑀲𑁄 𑀪𑀺𑀓𑁆𑀔𑀼. 𑀉𑀧𑀲𑀁𑀳𑀭𑀢𑀺 𑀲𑀤𑀺𑀲𑀢𑀁. 𑀅𑀬𑀫𑁆𑀧𑀺 𑀔𑁄𑀢𑀺𑀆𑀤𑀺 𑀉𑀧𑀲𑀁𑀳𑀭𑀡𑀸𑀓𑀸𑀭𑀤𑀲𑁆𑀲𑀦𑀁. 𑀆𑀬𑀽𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀦𑁂𑀢𑁆𑀣 𑀯𑀺𑀜𑁆𑀜𑀸𑀡𑀕𑀢𑀺𑀓𑀫𑁂𑀯. 𑀉𑀲𑁆𑀫𑀸𑀢𑀺 𑀓𑀫𑁆𑀫𑀚𑀢𑁂𑀚𑁄. 𑀏𑀯𑀁𑀧𑀽𑀢𑀺𑀓𑀲𑀪𑀸𑀯𑁄𑀢𑀺 𑀏𑀯𑀁 𑀅𑀢𑀺𑀯𑀺𑀬 𑀧𑀽𑀢𑀺𑀓𑀲𑀪𑀸𑀯𑁄, 𑀦 𑀆𑀬𑀼𑀆𑀤𑀻𑀦𑀁 𑀅𑀯𑀺𑀕𑀫𑁂 𑀯𑀺𑀬 𑀫𑀢𑁆𑀢𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀤𑀺𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁𑀪𑀸𑀯𑀻𑀢𑀺 𑀆𑀳 ‘‘𑀏𑀯𑀁𑀉𑀤𑁆𑀥𑀼𑀫𑀸𑀢𑀸𑀤𑀺𑀪𑁂𑀤𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀮𑀼𑀜𑁆𑀘𑀺𑀢𑁆𑀯𑀸 𑀮𑀼𑀜𑁆𑀘𑀺𑀢𑁆𑀯𑀸𑀢𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀧𑁆𑀧𑀸𑀝𑁂𑀢𑁆𑀯𑀸. 𑀲𑁂𑀲𑀸𑀯𑀲𑁂𑀲𑀫𑀁𑀲𑀮𑁄𑀳𑀺𑀢𑀬𑀼𑀢𑁆𑀢𑀦𑁆𑀢𑀺 𑀲𑀩𑁆𑀩𑀲𑁄 𑀅𑀔𑀸𑀤𑀺𑀢𑀢𑁆𑀢𑀸 𑀢𑀳𑀁 𑀢𑀳𑀁 𑀲𑁂𑀲𑁂𑀦 𑀅𑀧𑁆𑀧𑀸𑀯𑀲𑁂𑀲𑁂𑀦 𑀫𑀁𑀲𑀮𑁄𑀳𑀺𑀢𑁂𑀦 𑀬𑀼𑀢𑁆𑀢𑀁. 𑀅𑀜𑁆𑀜𑁂𑀦 𑀳𑀢𑁆𑀣𑀝𑁆𑀞𑀺𑀓𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀳𑀢𑁆𑀣𑀝𑁆𑀞𑀺𑀓𑀸𑀦𑀁 𑀯𑀺𑀧𑁆𑀧𑀓𑀺𑀡𑁆𑀡𑀢𑀸 𑀚𑁄𑀢𑀺𑀢𑀸𑀢𑀺 𑀅𑀦𑀯𑀲𑁂𑀲𑀢𑁄 𑀢𑁂𑀲𑀁 𑀯𑀺𑀧𑁆𑀧𑀓𑀺𑀡𑁆𑀡𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀲𑀝𑁆𑀞𑀺𑀪𑁂𑀤𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀭𑁄𑀯𑀲𑁆𑀲𑀺𑀓𑀸𑀦𑀻𑀢𑀺 𑀢𑀺𑀭𑁄𑀯𑀲𑁆𑀲𑀁 𑀕𑀢𑀸𑀦𑀺. 𑀢𑀸𑀦𑀺 𑀧𑀦 𑀲𑀁𑀯𑀘𑁆𑀙𑀭𑀁 𑀯𑀻𑀢𑀺𑀯𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀢𑀺𑀓𑁆𑀓𑀦𑁆𑀢𑀲𑀁𑀯𑀘𑁆𑀙𑀭𑀸𑀦𑀻’’𑀢𑀺. 𑀧𑀼𑀭𑀸𑀡𑀢𑀸𑀬 𑀖𑀦𑀪𑀸𑀯𑀯𑀺𑀕𑀫𑁂𑀦 𑀯𑀺𑀘𑀼𑀡𑁆𑀡𑀢𑀸 𑀇𑀥 𑀧𑀽𑀢𑀺𑀪𑀸𑀯𑁄𑀢𑀺 𑀲𑁄 𑀬𑀣𑀸 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀩𑁆𑀪𑁄𑀓𑀸𑀲𑁂’’𑀢𑀺𑀆𑀤𑀺𑀫𑀸𑀳. 𑀔𑀚𑁆𑀚𑀫𑀸𑀦𑀢𑀸𑀤𑀺𑀯𑀲𑁂𑀦 𑀤𑀼𑀢𑀺𑀬𑀲𑀺𑀯𑀣𑀺𑀓𑀧𑀩𑁆𑀩𑀸𑀤𑀻𑀦𑀁 𑀯𑀯𑀢𑁆𑀣𑀺𑀢𑀢𑁆𑀣𑀸 𑀯𑀼𑀢𑁆𑀢𑀁 ‘‘𑀔𑀚𑁆𑀚𑀫𑀸𑀦𑀸𑀤𑀻𑀦𑀁 𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸’’𑀢𑀺.

𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀫𑀸𑀦𑁂𑀯 𑀤𑁆𑀯𑁂𑀢𑀺 𑀅𑀯𑀥𑀸𑀭𑀡𑁂𑀦 𑀅𑀧𑁆𑀧𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀢𑀢𑁆𑀣 𑀦𑀺𑀬𑀫𑁂𑀢𑀺 𑀅𑀜𑁆𑀜𑀧𑀩𑁆𑀩𑁂𑀲𑀼 𑀢𑀤𑀪𑀸𑀯𑀢𑁄. 𑀬𑀢𑁄 𑀳𑀺 𑀏𑀯-𑀓𑀸𑀭𑁄, 𑀢𑀢𑁄 𑀅𑀜𑁆𑀜𑀢𑁆𑀣 𑀦𑀺𑀬𑀫𑁂𑀢𑀺, 𑀢𑁂𑀦 𑀧𑀩𑁆𑀩𑀤𑁆𑀯𑀬𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀢𑀸𑀧𑀺 𑀅𑀧𑁆𑀧𑀝𑀺𑀲𑀺𑀤𑁆𑀥𑀸𑀢𑀺 𑀤𑀝𑁆𑀞𑀩𑁆𑀩𑀸 𑀅𑀦𑀺𑀘𑁆𑀘𑀸𑀤𑀺𑀤𑀲𑁆𑀲𑀦𑀢𑁄. 𑀲𑀗𑁆𑀔𑀸𑀭𑁂𑀲𑀼 𑀆𑀤𑀻𑀦𑀯𑀯𑀺𑀪𑀸𑀯𑀦𑀸𑀦𑀺 𑀲𑀺𑀯𑀣𑀺𑀓𑀧𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀲𑀺𑀯𑀣𑀺𑀓𑀸𑀦𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀇𑀭𑀺𑀬𑀸𑀧𑀣𑀧𑀩𑁆𑀩𑀸𑀤𑀻𑀦𑀁 𑀅𑀦𑀧𑁆𑀧𑀦𑀸𑀯𑀳𑀢𑀸 𑀧𑀸𑀓𑀝𑀸 𑀏𑀯𑀸𑀢𑀺 ‘‘𑀲𑁂𑀲𑀸𑀦𑀺 𑀤𑁆𑀯𑀸𑀤𑀲𑀸𑀧𑀻’’𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸

𑁧𑁧𑁩. 𑀲𑀼𑀔𑀁 𑀯𑁂𑀤𑀦𑀦𑁆𑀢𑀺 𑀏𑀢𑁆𑀣 𑀲𑀼𑀔𑀬𑀢𑀻𑀢𑀺 𑀲𑀼𑀔𑀸, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀓𑀸𑀬𑀜𑁆𑀘 𑀮𑀤𑁆𑀥𑀲𑁆𑀲𑀸𑀤𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺, 𑀔𑀦𑀢𑀺 𑀯𑀸 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀆𑀩𑀸𑀥𑀦𑁆𑀢𑀺 𑀲𑀼𑀔𑀸. 𑀲𑀼𑀓𑀭𑀁 𑀑𑀓𑀸𑀲𑀤𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀲𑀼𑀔𑀸𑀢𑀺 𑀅𑀧𑀭𑁂. 𑀯𑁂𑀤𑀬𑀢𑀺 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀻𑀢𑀺 𑀯𑁂𑀤𑀦𑀸. 𑀯𑁂𑀤𑀬𑀫𑀸𑀦𑁄𑀢𑀺 𑀅𑀦𑀼𑀪𑀯𑀫𑀸𑀦𑁄. 𑀓𑀸𑀫𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀇𑀭𑀺𑀬𑀸𑀧𑀣𑀧𑀩𑁆𑀩𑁂 𑀯𑀼𑀢𑁆𑀢𑀫𑁂𑀯. 𑀲𑀫𑁆𑀧𑀚𑀸𑀦𑀲𑁆𑀲 𑀯𑁂𑀤𑀺𑀬𑀦𑀁 𑀲𑀫𑁆𑀧𑀚𑀸𑀦𑀯𑁂𑀤𑀺𑀬𑀦𑀁.

‘‘𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀻’’𑀢𑀺 𑀏𑀢𑁂𑀦 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’’𑀢𑀺 𑀇𑀤𑀁 𑀯𑁄𑀳𑀸𑀭𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀢𑁆𑀣𑀼𑀆𑀭𑀫𑁆𑀫𑀡𑀸𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸. 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀜𑁆𑀳𑀺 𑀯𑁂𑀤𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 ‘‘𑀯𑀢𑁆𑀣𑀽’’𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀥𑀫𑁆𑀫𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀜𑁆𑀜𑀲𑁆𑀲 𑀓𑀢𑁆𑀢𑀼 𑀅𑀪𑀸𑀯𑀢𑁄 𑀥𑀫𑁆𑀫𑀲𑁆𑀲𑁂𑀯 𑀓𑀢𑁆𑀢𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑁂𑀤𑀦𑀸𑀯 𑀯𑁂𑀤𑀬𑀢𑀻’’𑀢𑀺 𑀆𑀳. 𑀦𑀺𑀢𑁆𑀣𑀼𑀦𑀦𑁆𑀢𑁄𑀢𑀺. 𑀩𑀮𑀯𑀢𑁄 𑀯𑁂𑀤𑀦𑀸𑀯𑁂𑀕𑀲𑁆𑀲 𑀦𑀺𑀭𑁄𑀥𑀦𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀯𑀲𑀭𑀤𑀸𑀦𑀯𑀲𑁂𑀦 𑀦𑀺𑀢𑁆𑀣𑀼𑀦𑀦𑁆𑀢𑁄. 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀢𑁆𑀯𑀸𑀢𑀺 𑀅𑀥𑀺𑀯𑀸𑀲𑀦𑀯𑀻𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀢𑀲𑁆𑀲 𑀳𑀸𑀧𑀦𑀯𑀲𑁂𑀦 𑀲𑀫𑀸𑀥𑀺𑀦𑀸 𑀲𑀫𑀭𑀲𑀢𑀸𑀧𑀸𑀤𑀦𑁂𑀦 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀢𑁆𑀯𑀸. 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀻𑀢𑀺 𑀮𑁄𑀓𑀼𑀢𑁆𑀢𑀭𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀲𑀳. 𑀮𑁄𑀓𑀺𑀬𑀸𑀦𑀫𑁆𑀧𑀺 𑀯𑀸 𑀲𑀢𑀺 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀢𑀢𑁆𑀣 𑀲𑀫𑀢𑁆𑀣𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀻’’𑀢𑀺. 𑀲𑀫𑀲𑀻𑀲𑀻𑀢𑀺 𑀯𑀸𑀭𑀲𑀫𑀲𑀻𑀲𑀻 𑀳𑀼𑀢𑁆𑀯𑀸, 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀲𑁆𑀲 𑀅𑀦𑀦𑁆𑀢𑀭𑀯𑀸𑀭𑁂 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀢𑁆𑀣𑁄.

𑀬𑀣𑀸 𑀘 𑀲𑀼𑀔𑀁, 𑀏𑀯𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸 ‘‘𑀲𑀼𑀔𑀁 𑀯𑁂𑀤𑀬𑀢𑀻’’𑀢𑀺𑀆𑀤𑀺𑀦𑀸 𑀲𑀫𑁆𑀧𑀚𑀸𑀦𑀯𑁂𑀤𑀺𑀬𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀏𑀯𑀁 𑀤𑀼𑀓𑁆𑀔𑀫𑁆𑀧𑀺. 𑀢𑀢𑁆𑀣 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀸, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀓𑀸𑀬𑀜𑁆𑀘 𑀧𑀻𑀴𑁂𑀢𑀺 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀝𑁆𑀞𑀼𑀁 𑀯𑀸 𑀔𑀸𑀤𑀢𑀺, 𑀔𑀦𑀢𑀺 𑀯𑀸 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀲𑀸𑀢𑀦𑁆𑀢𑀺 𑀤𑀼𑀓𑁆𑀔𑀸. 𑀤𑀼𑀓𑁆𑀓𑀭𑀁 𑀑𑀓𑀸𑀲𑀤𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀤𑀼𑀓𑁆𑀔𑀸𑀢𑀺 𑀅𑀧𑀭𑁂. 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀅𑀭𑀽𑀧𑀧𑀭𑀺𑀕𑁆𑀕𑀳𑀁, 𑀅𑀭𑀽𑀧𑀥𑀫𑁆𑀫𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁂𑀦 𑀧𑀦 𑀲𑀫𑀣𑀸𑀪𑀺𑀦𑀺𑀯𑁂𑀲𑁄𑀧𑀺 𑀲𑀗𑁆𑀕𑀬𑁆𑀳𑀢𑀺, 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳. ‘‘𑀭𑀽𑀧𑀧𑀭𑀺𑀕𑁆𑀕𑀳𑁄 𑀅𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺𑀧𑀺 𑀏𑀢𑀤𑁂𑀯 𑀯𑀼𑀘𑁆𑀘𑀢𑀻’’𑀢𑀺. 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀓𑀣𑁂𑀲𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀤𑀼𑀪𑀬𑀦𑁆𑀢𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀲𑁆𑀲 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀤𑁆𑀯𑀬𑀫𑀸𑀳. 𑀲𑀗𑁆𑀔𑁂𑀧𑀫𑀦𑀲𑀺𑀓𑀸𑀭𑀯𑀲𑁂𑀦 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂, 𑀯𑀺𑀢𑁆𑀣𑀸𑀭𑀫𑀦𑀲𑀺𑀓𑀸𑀭𑀯𑀲𑁂𑀦 𑀭𑀸𑀳𑀼𑀮𑁄𑀯𑀸𑀤- (𑀫. 𑀦𑀺. 𑁨.𑁧𑁧𑁫-𑁧𑁧𑁭) 𑀥𑀸𑀢𑀼𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁧𑁭𑁪-𑁧𑁭𑁫).

𑀬𑁂𑀪𑀼𑀬𑁆𑀬𑀕𑁆𑀕𑀳𑀡𑁂𑀦 𑀢𑀤𑀜𑁆𑀜𑀥𑀫𑁆𑀫𑀯𑀲𑁂𑀦𑀧𑀺 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀓𑀣𑀸𑀬 𑀅𑀢𑁆𑀣𑀺𑀢𑀸 𑀤𑀻𑀧𑀺𑀢𑀸𑀢𑀺 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀯𑀺𑀥𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀦𑀺𑀯𑁂𑀲𑁄𑀢𑀺 𑀅𑀦𑀼𑀧𑁆𑀧𑀯𑁂𑀲𑁄, 𑀆𑀭𑀫𑁆𑀪𑁄𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀪𑁂 𑀏𑀯 𑀳𑀺 𑀅𑀬𑀁 𑀯𑀺𑀪𑀸𑀕𑁄, 𑀲𑀫𑁆𑀫𑀲𑀦𑀁 𑀧𑀦 𑀅𑀦𑀯𑀲𑁂𑀲𑀢𑁄𑀯 𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀢𑀺. 𑀧𑀭𑀺𑀕𑁆𑀕𑀳𑀺𑀢𑁂 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁂𑀢𑀺 𑀇𑀤𑀁 𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀭𑀽𑀧𑀫𑀼𑀔𑁂𑀦 𑀧𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀬𑁂𑀪𑀽𑀬𑁆𑀬𑁂𑀦 𑀲𑀫𑀣𑀬𑀸𑀦𑀺𑀓𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑁄, 𑀲𑁄 𑀘 𑀧𑀞𑀫𑀁 𑀛𑀸𑀦𑀗𑁆𑀕𑀸𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀲𑁂𑀲𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀧𑀞𑀫𑀸𑀪𑀺𑀦𑀺𑀧𑀸𑀢𑁄𑀢𑀺 𑀲𑀩𑁆𑀩𑁂 𑀘𑁂𑀢𑀲𑀺𑀓𑀸 𑀘𑀺𑀢𑁆𑀢𑀸𑀬𑀢𑁆𑀢𑀸 𑀘𑀺𑀢𑁆𑀢𑀓𑀺𑀭𑀺𑀬𑀪𑀸𑀯𑁂𑀦 𑀯𑀼𑀘𑁆𑀘𑀦𑁆𑀢𑀻𑀢𑀺 𑀨𑀲𑁆𑀲𑁄 𑀘𑀺𑀢𑁆𑀢𑀲𑁆𑀲 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀼𑀢𑁆𑀢𑁄, 𑀉𑀧𑁆𑀧𑀦𑁆𑀦𑀨𑀲𑁆𑀲𑁄 𑀧𑀼𑀕𑁆𑀕𑀮𑁄, 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺 𑀯𑀸 𑀆𑀭𑀫𑁆𑀫𑀡𑁂𑀦 𑀨𑀼𑀝𑁆𑀞𑁄 𑀨𑀲𑁆𑀲𑀲𑀳𑀚𑀸𑀢𑀸𑀬 𑀯𑁂𑀤𑀦𑀸𑀬 𑀢𑀁𑀲𑀫𑀓𑀸𑀮𑀫𑁂𑀯 𑀯𑁂𑀤𑁂𑀢𑀺, 𑀨𑀲𑁆𑀲𑁄 𑀧𑀦 𑀑𑀪𑀸𑀲𑀲𑁆𑀲 𑀯𑀺𑀬 𑀧𑀤𑀻𑀧𑁄 𑀯𑁂𑀤𑀦𑀸𑀤𑀻𑀦𑀁 𑀧𑀘𑁆𑀘𑀬𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀧𑀼𑀭𑀺𑀫𑀓𑀸𑀮𑁄 𑀯𑀺𑀬 𑀯𑀼𑀘𑁆𑀘𑀢𑀺, 𑀬𑀸 𑀢𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑀢𑀸 𑀯𑀼𑀘𑁆𑀘𑀢𑀺. 𑀨𑀼𑀲𑀦𑁆𑀢𑁄𑀢𑀺 𑀆𑀭𑀫𑁆𑀫𑀡𑀲𑁆𑀲 𑀨𑀼𑀲𑀦𑀸𑀓𑀸𑀭𑁂𑀦. 𑀅𑀬𑀜𑁆𑀳𑀺 𑀅𑀭𑀽𑀧𑀥𑀫𑁆𑀫𑀢𑀸 𑀏𑀓𑀤𑁂𑀲𑁂𑀦 𑀅𑀦𑀮𑁆𑀮𑀻𑀬𑀫𑀸𑀦𑁄𑀧𑀺 𑀭𑀽𑀧𑀁 𑀯𑀺𑀬 𑀘𑀓𑁆𑀔𑀼, 𑀲𑀤𑁆𑀤𑁄 𑀯𑀺𑀬 𑀘 𑀲𑁄𑀢𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀜𑁆𑀘 𑀨𑀼𑀲𑀦𑁆𑀢𑁄 𑀯𑀺𑀬 𑀲𑀗𑁆𑀖𑀝𑁆𑀝𑁂𑀦𑁆𑀢𑁄 𑀯𑀺𑀬 𑀘 𑀧𑀯𑀢𑁆𑀢𑀢𑀺. 𑀢𑀣𑀸𑀳𑁂𑀲 ‘‘𑀲𑀗𑁆𑀖𑀝𑁆𑀝𑀦𑀭𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀦𑁆𑀢𑀻𑀢𑀺 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑀯𑀺𑀢𑀸𑀬 𑀲𑀸𑀫𑀺𑀪𑀸𑀯𑁂𑀦 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀦𑁆𑀢𑀻. 𑀨𑀲𑁆𑀲𑀸𑀤𑀻𑀦𑀜𑁆𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑁂 𑀏𑀓𑀤𑁂𑀲𑁂𑀦𑁂𑀯 𑀧𑀯𑀢𑁆𑀢𑀺 𑀨𑀼𑀲𑀦𑀸𑀤𑀺𑀫𑀢𑁆𑀢𑀪𑀸𑀯𑀢𑁄, 𑀯𑁂𑀤𑀦𑀸𑀬 𑀧𑀦 𑀇𑀝𑁆𑀞𑀸𑀓𑀸𑀭𑀲𑀫𑁆𑀪𑁄𑀕𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀆𑀭𑀫𑁆𑀫𑀡𑁂 𑀦𑀺𑀧𑁆𑀧𑀤𑁂𑀲𑀢𑁄 𑀧𑀯𑀢𑁆𑀢𑀺. 𑀨𑀼𑀲𑀦𑀸𑀤𑀺𑀪𑀸𑀯𑁂𑀦 𑀳𑀺 𑀆𑀭𑀫𑁆𑀫𑀡𑀕𑁆𑀕𑀳𑀡𑀁 𑀏𑀓𑀤𑁂𑀲𑀸𑀦𑀼𑀪𑀯𑀦𑀁, 𑀯𑁂𑀤𑀬𑀺𑀢𑀸𑀪𑀸𑀯𑁂𑀦 𑀕𑀳𑀡𑀁 𑀬𑀣𑀸𑀓𑀸𑀫𑀁 𑀲𑀩𑁆𑀩𑀸𑀦𑀼𑀪𑀯𑀦𑀁 𑀏𑀯𑀲𑀪𑀸𑀯𑀸𑀦𑁂𑀯 𑀢𑀸𑀦𑀺 𑀕𑀳𑀡𑀸𑀦𑀻𑀢𑀺 𑀦 𑀯𑁂𑀤𑀦𑀸𑀬 𑀯𑀺𑀬 𑀨𑀲𑁆𑀲𑀸𑀤𑀻𑀦𑀫𑁆𑀧𑀺 𑀬𑀣𑀸𑀲𑀓𑀁 𑀓𑀺𑀘𑁆𑀘𑀓𑀭𑀡𑁂𑀦 𑀲𑀸𑀫𑀺𑀪𑀸𑀯𑀸𑀦𑀼𑀪𑀯𑀦𑀁 𑀘𑁄𑀤𑁂𑀢𑀩𑁆𑀩𑀁. 𑀯𑀺𑀚𑀸𑀦𑀦𑁆𑀢𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀯𑀺𑀲𑁂𑀲𑀢𑁄 𑀚𑀸𑀦𑀦𑁆𑀢𑀁. 𑀯𑀺𑀜𑁆𑀜𑀸𑀡𑀜𑁆𑀳𑀺 𑀫𑀺𑀦𑀺𑀢𑀩𑁆𑀩𑀯𑀢𑁆𑀣𑀼𑀁 𑀦𑀸𑀴𑀺𑀬𑀸 𑀫𑀺𑀦𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀆𑀭𑀫𑁆𑀫𑀡𑀁 𑀧𑀭𑀺𑀘𑁆𑀙𑀺𑀚𑁆𑀚 𑀯𑀺𑀪𑀸𑀯𑁂𑀦𑁆𑀢𑀁 𑀧𑀯𑀢𑁆𑀢𑀢𑀺, 𑀦 𑀲𑀜𑁆𑀜𑀸 𑀯𑀺𑀬 𑀲𑀜𑁆𑀚𑀸𑀦𑀦𑀫𑀢𑁆𑀢𑀁 𑀳𑀼𑀢𑁆𑀯𑀸. 𑀢𑀣𑀸 𑀳𑀺 𑀅𑀦𑁂𑀦 𑀓𑀤𑀸𑀘𑀺 𑀮𑀓𑁆𑀔𑀡𑀢𑁆𑀢𑀬𑀯𑀺𑀪𑀸𑀯𑀦𑀸𑀧𑀺 𑀳𑁄𑀢𑀺. 𑀇𑀫𑁂𑀲𑀁 𑀧𑀦 𑀨𑀲𑁆𑀲𑀸𑀤𑀻𑀦𑀁 𑀢𑀲𑁆𑀲 𑀢𑀲𑁆𑀲 𑀧𑀸𑀓𑀝𑀪𑀸𑀯𑁄 𑀧𑀘𑁆𑀘𑀬𑀯𑀺𑀲𑁂𑀲𑀲𑀺𑀤𑁆𑀥𑀲𑁆𑀲 𑀧𑀼𑀩𑁆𑀩𑀸𑀪𑁄𑀕𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀢𑀲𑁆𑀲 𑀢𑀲𑁆𑀲𑁂𑀯 𑀧𑀸𑀓𑀝𑀪𑀸𑀯𑁂𑀧𑀺 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁪𑁬; 𑀧𑀝𑀺. 𑀫. 𑁧.𑁩) ‘‘𑀲𑀩𑁆𑀩𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀚𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁬) 𑀘 𑀏𑀯𑀫𑀸𑀤𑀺𑀯𑀘𑀦𑀢𑁄 𑀲𑀩𑁆𑀩𑁂 𑀲𑀫𑁆𑀫𑀲𑀦𑀼𑀧𑀕𑀸 𑀥𑀫𑁆𑀫𑀸 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀬𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁. 𑀨𑀲𑁆𑀲𑀧𑀜𑁆𑀘𑀫𑀓𑀕𑁆𑀕𑀳𑀡𑀜𑁆𑀳𑀺 𑀢𑀲𑁆𑀲 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀸𑀥𑀸𑀭𑀡𑀪𑀸𑀯𑀢𑁄, 𑀢𑀢𑁆𑀣 𑀘 𑀨𑀲𑁆𑀲𑀘𑁂𑀢𑀦𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀲𑀗𑁆𑀕𑀳𑁄 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀢𑁂𑀲𑀁. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀺𑀪𑀗𑁆𑀕𑁂 (𑀯𑀺𑀪. 𑁧𑁨) ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 𑀘𑁂𑀢𑀦𑀸𑀯 𑀯𑀺𑀪𑀢𑁆𑀢𑀸, 𑀇𑀢𑀭𑁂 𑀧𑀦 𑀔𑀦𑁆𑀥𑀸 𑀲𑀭𑀽𑀧𑁂𑀦𑁂𑀯 𑀕𑀳𑀺𑀢𑀸.

𑀯𑀢𑁆𑀣𑀼𑀁 𑀦𑀺𑀲𑁆𑀲𑀺𑀢𑀸𑀢𑀺 𑀏𑀢𑁆𑀣 𑀯𑀢𑁆𑀣𑀼-𑀲𑀤𑁆𑀤𑁄 𑀓𑀭𑀚𑀓𑀸𑀬𑀯𑀺𑀲𑀬𑁄𑀢𑀺 𑀓𑀣𑀫𑀺𑀤𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺. 𑀓𑀢𑁆𑀣 𑀧𑀦 𑀯𑀼𑀢𑁆𑀢𑀁? 𑀲𑀸𑀫𑀜𑁆𑀜𑀨𑀮𑁂. 𑀲𑁄𑀢𑀺 𑀓𑀭𑀚𑀓𑀸𑀬𑁄. 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀁 𑀦𑀸𑀫𑀭𑀽𑀧𑀁 𑀦𑀢𑁆𑀣𑀻𑀢𑀺 𑀇𑀤𑀁 𑀅𑀥𑀺𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀳𑀺 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀫𑁆𑀧𑀺 𑀦𑀸𑀫𑀁 𑀅𑀢𑁆𑀣𑁂𑀯𑀸𑀢𑀺. 𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀼𑀓𑀸𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀸𑀤𑀺𑀳𑁂𑀢𑀼𑀓𑀸. 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸…𑀧𑁂… 𑀯𑀺𑀘𑀭𑀢𑀻𑀢𑀺 𑀇𑀫𑀺𑀦𑀸 𑀩𑀮𑀯𑀯𑀺𑀧𑀲𑁆𑀲𑀦𑀁 𑀯𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀉𑀲𑁆𑀲𑀼𑀓𑁆𑀓𑀸𑀧𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑀦𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄’’𑀢𑀺𑀆𑀤𑀺𑀫𑀸𑀳.

𑀇𑀥𑀸𑀢𑀺 𑀇𑀫𑀺𑀲𑁆𑀲𑀁 𑀤𑀼𑀢𑀺𑀬𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸𑀬𑀁, 𑀢𑀲𑁆𑀲𑀸 𑀧𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀓𑀣𑁂𑀢𑀩𑁆𑀩𑀢𑁆𑀢𑀸 𑀪𑀕𑀯𑀸 𑀯𑁂𑀤𑀦𑀸𑀯𑀲𑁂𑀦 𑀓𑀣𑁂𑀲𑀺. 𑀬𑀣𑀸𑀯𑀼𑀢𑁆𑀢𑁂𑀲𑀼 𑀘 𑀢𑀻𑀲𑀼 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁂𑀲𑀼 𑀯𑁂𑀤𑀦𑀸𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁄 𑀲𑀼𑀓𑀭𑁄 𑀯𑁂𑀤𑀦𑀸𑀦𑀁 𑀯𑀺𑀪𑀽𑀢𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀨𑀲𑁆𑀲𑀯𑀲𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀇𑀤𑀁 𑀢𑀸𑀤𑀺𑀲𑁂 𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑁂𑀲𑀁 𑀆𑀤𑀺𑀢𑁄 𑀯𑁂𑀤𑀦𑀸𑀯 𑀯𑀺𑀪𑀽𑀢𑀢𑀭𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀏𑀯𑀜𑁆𑀳𑀺 𑀬𑀁 𑀯𑀼𑀢𑁆𑀢𑀁 ‘‘𑀨𑀲𑁆𑀲𑁄 𑀧𑀸𑀓𑀝𑁄 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀻’’𑀢𑀺, 𑀢𑀁 𑀅𑀯𑀺𑀭𑁄𑀥𑀺𑀢𑀁 𑀳𑁄𑀢𑀺. 𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀧𑀸𑀓𑀝𑀢𑀸𑀬𑀸𑀢𑀺 𑀘 𑀇𑀤𑀁 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀸𑀲𑀜𑁆𑀳𑀺 𑀧𑀯𑀢𑁆𑀢𑀺 𑀑𑀴𑀸𑀭𑀺𑀓𑀸, 𑀦 𑀇𑀢𑀭𑀸𑀬. 𑀢𑀤𑀼𑀪𑀬𑀕𑁆𑀕𑀳𑀡𑀫𑀼𑀔𑁂𑀦 𑀯𑀸 𑀕𑀳𑁂𑀢𑀩𑁆𑀩𑀢𑁆𑀢𑀸 𑀇𑀢𑀭𑀸𑀬𑀧𑀺 𑀧𑀯𑀢𑁆𑀢𑀺 𑀯𑀺𑀜𑁆𑀜𑀽𑀦𑀁 𑀧𑀸𑀓𑀝𑀸 𑀏𑀯𑀸𑀢𑀺 ‘‘𑀯𑁂𑀤𑀦𑀸𑀦’’𑀦𑁆𑀢𑀺 𑀅𑀯𑀺𑀲𑁂𑀲𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀬𑀤𑀸 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀻𑀢𑀺𑀆𑀤𑀺 𑀲𑀼𑀔𑀯𑁂𑀤𑀦𑀸𑀬 𑀧𑀸𑀓𑀝𑀪𑀸𑀯𑀯𑀺𑀪𑀸𑀯𑀦𑀁. 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀻𑀢𑀺 𑀢𑀲𑁆𑀫𑀺𑀁 𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀺𑀲𑀫𑀬𑁂 𑀦𑁂𑀯 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀦𑀺𑀭𑀼𑀤𑁆𑀥𑀢𑁆𑀢𑀸, 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀘 𑀬𑀣𑀸𑀓𑁆𑀓𑀫𑀁 𑀅𑀢𑀻𑀢𑀸𑀦𑀸𑀕𑀢𑀸𑀦𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀬 𑀧𑀦 𑀅𑀲𑀫𑁆𑀪𑀯𑁄 𑀯𑀼𑀢𑁆𑀢𑁄𑀬𑁂𑀯. 𑀲𑀓𑀺𑀘𑁆𑀘𑀓𑁆𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀦𑀢𑁄 𑀅𑀦𑀺𑀘𑁆𑀘𑀸. 𑀲𑀫𑁂𑀘𑁆𑀘𑀲𑀫𑁆𑀪𑀼𑀬𑁆𑀬 𑀧𑀘𑁆𑀘𑀬𑁂𑀳𑀺 𑀓𑀢𑀢𑁆𑀢𑀸 𑀲𑀗𑁆𑀔𑀢𑀸. 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀔𑀬𑀯𑀬𑀧𑀮𑀼𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑀧𑀓𑀢𑀺𑀢𑀸𑀬 𑀔𑀬𑀥𑀫𑁆𑀫𑀸…𑀧𑁂… 𑀦𑀺𑀭𑁄𑀥𑀥𑀫𑁆𑀫𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀓𑀺𑀮𑁂𑀲𑁂𑀳𑀺 𑀆𑀫𑀲𑀺𑀢𑀩𑁆𑀩𑀢𑁄 𑀆𑀫𑀺𑀲𑀁 𑀦𑀸𑀫 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀲𑀳 𑀆𑀫𑀺𑀲𑁂𑀳𑀻𑀢𑀺 𑀆𑀫𑀺𑀲𑀸. 𑀢𑁂𑀦𑀸𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀸𑀫𑀺𑀲𑀦𑀺𑀲𑁆𑀲𑀺𑀢𑀸’’𑀢𑀺. 𑀇𑀢𑁄 𑀧𑀭𑀦𑁆𑀢𑀺 ‘‘𑀅𑀢𑁆𑀣𑀺 𑀯𑁂𑀤𑀦𑀸’’𑀢𑀺 𑀏𑀯𑀫𑀸𑀤𑀺𑀧𑀸𑀴𑀺𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀁 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸

𑁧𑁧𑁪. 𑀲𑀫𑁆𑀧𑀬𑁄𑀕𑀯𑀲𑁂𑀦 (𑀤𑀻. 𑀦𑀺. 𑀝𑀻. 𑁨.𑁩𑁮𑁧) 𑀧𑀯𑀢𑁆𑀢𑀫𑀸𑀦𑁂𑀦 𑀲𑀳 𑀭𑀸𑀕𑁂𑀦𑀸𑀢𑀺 𑀲𑀭𑀸𑀕𑀁. 𑀢𑁂𑀦𑀸𑀳 ‘‘𑀮𑁄𑀪𑀲𑀳𑀕𑀢’’𑀦𑁆𑀢𑀺. 𑀯𑀻𑀢𑀭𑀸𑀕𑀦𑁆𑀢𑀺. 𑀏𑀢𑁆𑀣 𑀓𑀸𑀫𑀁 𑀲𑀭𑀸𑀕𑀧𑀤𑀧𑀝𑀺𑀬𑁄𑀕𑀺𑀦𑀸 𑀯𑀻𑀢𑀭𑀸𑀕𑀯𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀲𑀫𑁆𑀫𑀲𑀦𑀘𑀸𑀭𑀲𑁆𑀲 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑁂𑀪𑀽𑀫𑀓𑀲𑁆𑀲𑁂𑀯 𑀕𑀳𑀡𑀦𑁆𑀢𑀺 ‘‘𑀮𑁄𑀓𑀺𑀬𑀓𑀼𑀲𑀮𑀸𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀇𑀤𑀁 𑀧𑀦𑀸’’𑀢𑀺𑀆𑀤𑀺𑀦𑀸 𑀢𑀫𑁂𑀯 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺. 𑀲𑁂𑀲𑀸𑀦𑀺 𑀤𑁆𑀯𑁂 𑀤𑁄𑀲𑀫𑀽𑀮𑀸𑀦𑀺, 𑀤𑁆𑀯𑁂 𑀫𑁄𑀳𑀫𑀽𑀮𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺. 𑀢𑁂𑀲𑀜𑁆𑀳𑀺 𑀭𑀸𑀕𑁂𑀦 𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀦𑀢𑁆𑀣𑁂𑀯 𑀲𑀭𑀸𑀕𑀢𑀸, 𑀢𑀦𑁆𑀦𑀺𑀫𑀺𑀢𑁆𑀢𑀓𑀢𑀸𑀬 𑀧𑀦 𑀲𑀺𑀬𑀸 𑀢𑀁𑀲𑀳𑀺𑀢𑀢𑀸𑀮𑁂𑀲𑁄𑀢𑀺 𑀦𑀢𑁆𑀣𑁂𑀯 𑀯𑀻𑀢𑀭𑀸𑀕𑀢𑀸𑀧𑀻𑀢𑀺 𑀤𑀼𑀓𑀯𑀺𑀦𑀺𑀫𑀼𑀢𑁆𑀢𑀢𑀸 𑀏𑀯𑁂𑀢𑁆𑀣 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀦𑁂𑀯 𑀧𑀼𑀭𑀺𑀫𑀧𑀤𑀁, 𑀦 𑀧𑀘𑁆𑀙𑀺𑀫𑀧𑀤𑀁 𑀪𑀚𑀦𑁆𑀢𑀻’’𑀢𑀺. 𑀬𑀤𑀺 𑀏𑀯𑀁 𑀧𑀤𑁂𑀲𑀺𑀓𑀁 𑀧𑀚𑀸𑀦𑀦𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀤𑀼𑀓𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑁂𑀲𑀁. 𑀅𑀓𑀼𑀲𑀮𑀫𑀽𑀮𑁂𑀲𑀼 𑀲𑀳 𑀫𑁄𑀳𑁂𑀦𑁂𑀯 𑀯𑀢𑁆𑀢𑀢𑀻𑀢𑀺 𑀲𑀫𑁄𑀳𑀦𑁆𑀢𑀺 𑀆𑀳 ‘‘𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀜𑁆𑀘𑁂𑀯 𑀉𑀤𑁆𑀥𑀘𑁆𑀘𑀲𑀳𑀕𑀢𑀜𑁆𑀘𑀸’’𑀢𑀺. 𑀬𑀲𑁆𑀫𑀸 𑀘𑁂𑀢𑁆𑀣 𑀲𑀳𑁂𑀯 𑀫𑁄𑀳𑁂𑀦𑀸𑀢𑀺 𑀲𑀫𑁄𑀳𑀦𑁆𑀢𑀺 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑀫𑁆𑀧𑀺 𑀮𑀩𑁆𑀪𑀢𑀺𑀬𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀬𑀣𑀸 𑀧𑀦 𑀅𑀢𑀺𑀫𑀽𑀴𑁆𑀳𑀢𑀸𑀬 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀦𑀬𑁂𑀦 𑀲𑀯𑀺𑀲𑁂𑀲𑀁 𑀫𑁄𑀳𑀯𑀦𑁆𑀢𑀢𑀸𑀬 𑀫𑁄𑀫𑀽𑀳𑀘𑀺𑀢𑁆𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀤𑁆𑀯𑀬𑀁 𑀯𑀺𑀲𑁂𑀲𑀢𑁄 ‘‘𑀲𑀫𑁄𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀣𑀸 𑀲𑁂𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀻𑀢𑀺 ‘‘𑀯𑀝𑁆𑀝𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀧𑀬𑁄𑀕𑀯𑀲𑁂𑀦 𑀣𑀺𑀦𑀫𑀺𑀤𑁆𑀥𑁂𑀦 𑀅𑀦𑀼𑀧𑀢𑀺𑀢𑀁 𑀅𑀦𑀼𑀕𑀢𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀸𑀦𑀼𑀧𑀢𑀺𑀢𑀁 𑀧𑀜𑁆𑀘𑀯𑀺𑀥𑀁 𑀲𑀲𑀗𑁆𑀔𑀸𑀭𑀺𑀓𑀸𑀓𑀼𑀲𑀮𑀘𑀺𑀢𑁆𑀢𑀁 𑀲𑀗𑁆𑀓𑀼𑀝𑀺𑀢𑀘𑀺𑀢𑁆𑀢𑀁. 𑀲𑀗𑁆𑀓𑀼𑀝𑀺𑀢𑀘𑀺𑀢𑁆𑀢𑀁 𑀦𑀸𑀫 𑀆𑀭𑀫𑁆𑀫𑀡𑁂 𑀲𑀗𑁆𑀓𑁄𑀘𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀧𑀘𑁆𑀘𑀬𑀯𑀺𑀲𑁂𑀲𑀯𑀲𑁂𑀦 𑀣𑀸𑀫𑀚𑀸𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀲𑀳𑀕𑀢𑀁 𑀧𑀯𑀢𑁆𑀢𑀁 𑀲𑀁𑀲𑀝𑁆𑀞𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁, 𑀅𑀜𑁆𑀜𑀣𑀸 𑀲𑀩𑁆𑀩𑀫𑁆𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀫𑁂𑀯𑀸𑀢𑀺. 𑀧𑀲𑀝𑀘𑀺𑀢𑁆𑀢𑀁 𑀦𑀸𑀫 𑀲𑀸𑀢𑀺𑀲𑀬𑀁 𑀯𑀺𑀓𑁆𑀔𑁂𑀧𑀯𑀲𑁂𑀦 𑀧𑀯𑀢𑁆𑀢𑀦𑀢𑁄.

𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀬 𑀯𑀺𑀧𑀼𑀮𑀨𑀮𑀢𑀸𑀬 𑀤𑀻𑀖𑀲𑀦𑁆𑀢𑀸𑀦𑀢𑀸𑀬 𑀘 𑀫𑀳𑀦𑁆𑀢𑀪𑀸𑀯𑀁 𑀕𑀢𑀁, 𑀫𑀳𑀦𑁆𑀢𑁂𑀳𑀺 𑀯𑀸 𑀉𑀴𑀸𑀭𑀘𑁆𑀙𑀦𑁆𑀤𑀸𑀤𑀻𑀳𑀺 𑀕𑀢𑀁 𑀧𑀝𑀺𑀧𑀦𑁆𑀦𑀦𑁆𑀢𑀺 𑀫𑀳𑀕𑁆𑀕𑀢𑀁. 𑀢𑀁 𑀧𑀦 𑀭𑀽𑀧𑀸𑀭𑀽𑀧𑀪𑀽𑀫𑀺𑀓𑀁 𑀢𑀢𑁄 𑀫𑀳𑀦𑁆𑀢𑀲𑁆𑀲 𑀮𑁄𑀓𑁂 𑀅𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀭𑀽𑀧𑀸𑀭𑀽𑀧𑀸𑀯𑀘𑀭’’𑀦𑁆𑀢𑀺. 𑀢𑀲𑁆𑀲 𑀘𑁂𑀢𑁆𑀣 𑀧𑀝𑀺𑀬𑁄𑀕𑀻 𑀧𑀭𑀺𑀢𑁆𑀢𑀫𑁂𑀯𑀸𑀢𑀺 𑀆𑀳 ‘‘𑀅𑀫𑀳𑀕𑁆𑀕𑀢𑀦𑁆𑀢𑀺 𑀓𑀸𑀫𑀸𑀯𑀘𑀭’’𑀦𑁆𑀢𑀺. 𑀅𑀢𑁆𑀢𑀸𑀦𑀁 𑀉𑀢𑁆𑀢𑀭𑀺𑀢𑀼𑀁 𑀲𑀫𑀢𑁆𑀣𑁂𑀳𑀺 𑀲𑀳 𑀉𑀢𑁆𑀢𑀭𑁂𑀳𑀻𑀢𑀺 𑀲𑀉𑀢𑁆𑀢𑀭𑀁, 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀦𑀼𑀢𑁆𑀢𑀭𑀁, 𑀢𑀤𑀼𑀪𑀬𑀁 𑀉𑀧𑀸𑀤𑀸𑀬 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀉𑀢𑁆𑀢𑀭𑀦𑁆𑀢𑀺 𑀓𑀸𑀫𑀸𑀯𑀘𑀭’’𑀦𑁆𑀢𑀺𑀆𑀤𑀺. 𑀧𑀝𑀺𑀧𑀓𑁆𑀔𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑁂𑀦 𑀲𑀫𑀸𑀥𑀺𑀦𑀸 𑀲𑀫𑁆𑀫𑀤𑁂𑀯 𑀆𑀳𑀺𑀢𑀁 𑀲𑀫𑀸𑀳𑀺𑀢𑀁. 𑀢𑁂𑀦𑀸𑀳 ‘‘𑀬𑀲𑁆𑀲𑀸’’𑀢𑀺𑀆𑀤𑀺. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲. 𑀬𑀣𑀸𑀯𑀼𑀢𑁆𑀢𑁂𑀦 𑀲𑀫𑀸𑀥𑀺𑀦𑀸 𑀦 𑀲𑀫𑀸𑀳𑀺𑀢𑀦𑁆𑀢𑀺 𑀅𑀲𑀫𑀸𑀳𑀺𑀢𑀁. 𑀢𑁂𑀦𑀸𑀳 ‘‘𑀉𑀪𑀬𑀲𑀫𑀸𑀥𑀺𑀭𑀳𑀺𑀢’’𑀦𑁆𑀢𑀺. 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀁, 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁. 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀁, 𑀫𑀳𑀕𑁆𑀕𑀢𑀦𑁆𑀢𑀺 𑀢𑀤𑀼𑀪𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀬𑀢𑁆𑀣 𑀢𑀤𑀼𑀪𑀬𑀯𑀺𑀫𑀼𑀢𑁆𑀢𑀺 𑀦𑀢𑁆𑀣𑀺, 𑀢𑀁 𑀉𑀪𑀬𑀯𑀺𑀫𑀼𑀢𑁆𑀢𑀺𑀭𑀳𑀺𑀢𑀦𑁆𑀢𑀺 𑀕𑀬𑁆𑀳𑀫𑀸𑀦𑁂 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂𑀧𑀺 𑀲𑀺𑀬𑀸 𑀆𑀲𑀗𑁆𑀓𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀲𑀫𑀼𑀘𑁆𑀙𑁂𑀤…𑀧𑁂… 𑀑𑀓𑀸𑀲𑁄𑀯 𑀦𑀢𑁆𑀣𑀻’’𑀢𑀺 𑀆𑀳. 𑀑𑀓𑀸𑀲𑀸𑀪𑀸𑀯𑁄 𑀘 𑀲𑀫𑁆𑀫𑀲𑀦𑀘𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸

𑀦𑀻𑀯𑀭𑀡𑀧𑀩𑁆𑀩𑀯𑀡𑁆𑀡𑀦𑀸

𑁧𑁧𑁫. 𑀧𑀳𑀸𑀢𑀩𑁆𑀩𑀸𑀤𑀺𑀥𑀫𑁆𑀫𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦 𑀧𑀜𑁆𑀘𑀥𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀅𑀬𑀫𑀢𑁆𑀣𑁄 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑀫𑀢𑁆𑀣𑀁 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑁄 ‘‘𑀧𑀜𑁆𑀘𑀯𑀺𑀥𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀓𑀣𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀦𑀻𑀯𑀭𑀡𑀸𑀤𑀺𑀯𑀲𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺? 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄. 𑀬𑁂𑀲𑀜𑁆𑀳𑀺 𑀯𑁂𑀦𑁂𑀬𑁆𑀬𑀸𑀦𑀁 𑀧𑀳𑀸𑀢𑀩𑁆𑀩𑀥𑀫𑁆𑀫𑁂𑀲𑀼 𑀧𑀞𑀫𑀁 𑀦𑀻𑀯𑀭𑀡𑀸𑀦𑀺 𑀯𑀺𑀪𑀸𑀕𑁂𑀦 𑀯𑀢𑁆𑀢𑀩𑁆𑀩𑀸𑀦𑀺, 𑀢𑁂𑀲𑀁 𑀯𑀲𑁂𑀦𑁂𑀢𑁆𑀣 𑀪𑀕𑀯𑀢𑀸 𑀧𑀞𑀫𑀁 𑀦𑀻𑀯𑀭𑀡𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀢𑀣𑀸 𑀳𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀧𑀺 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸 𑀤𑁂𑀲𑀺𑀢𑀸, 𑀢𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑁂𑀲𑀼 𑀔𑀦𑁆𑀥𑁂𑀲𑀼 𑀆𑀬𑀢𑀦𑁂𑀲𑀼, 𑀪𑀸𑀯𑁂𑀢𑀩𑁆𑀩𑁂𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼 𑀧𑀭𑀺𑀜𑁆𑀜𑁂𑀬𑀸𑀤𑀺𑀯𑀺𑀪𑀸𑀕𑁂𑀲𑀼 𑀲𑀘𑁆𑀘𑁂𑀲𑀼 𑀘 𑀉𑀢𑁆𑀢𑀭𑀸 𑀤𑁂𑀲𑀦𑀸 𑀤𑁂𑀲𑀺𑀢𑀸, 𑀢𑀲𑁆𑀫𑀸 𑀘𑁂𑀢𑁆𑀣 𑀲𑀫𑀣𑀪𑀸𑀯𑀦𑀸𑀧𑀺 𑀬𑀸𑀯𑀤𑁂𑀯 𑀯𑀺𑀧𑀲𑁆𑀲𑀦𑀢𑁆𑀣𑀁 𑀇𑀘𑁆𑀙𑀺𑀢𑀸, 𑀯𑀺𑀧𑀲𑁆𑀲𑀦𑀸𑀧𑀥𑀸𑀦𑀸 𑀯𑀺𑀧𑀲𑁆𑀲𑀦𑀸𑀩𑀳𑀼𑀮𑀸 𑀘 𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸𑀢𑀺 𑀢𑀲𑁆𑀲𑀸 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀯𑀺𑀪𑀸𑀕𑁂𑀦 𑀤𑁂𑀲𑀺𑀢𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀦𑁆𑀥𑀸𑀬𑀢𑀦𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦 𑀫𑀺𑀲𑁆𑀲𑀓𑀧𑀭𑀺𑀕𑁆𑀕𑀳𑀓𑀣𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀓𑀮𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑀁 𑀲𑀫𑁆𑀧𑀺𑀡𑁆𑀟𑁂𑀢𑀺 𑀇𑀢𑀭𑁂𑀲𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸. ‘‘𑀓𑀡𑁆𑀳𑀲𑀼𑀓𑁆𑀓𑀸𑀦𑀁 𑀬𑀼𑀕𑀦𑁆𑀥𑀢𑀸 𑀦𑀢𑁆𑀣𑀻’’𑀢𑀺 𑀧𑀚𑀸𑀦𑀦𑀓𑀸𑀮𑁂 𑀅𑀪𑀸𑀯𑀸 ‘‘𑀅𑀪𑀺𑀡𑁆𑀳𑀲𑀫𑀼𑀤𑀸𑀘𑀸𑀭𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀲𑁄 𑀧𑀦 ‘‘𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀓𑀸𑀭𑀡𑀸𑀓𑀸𑀭𑁄𑀯, 𑀅𑀢𑁆𑀣𑀢𑁄 𑀓𑀸𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀬𑁂𑀦 𑀓𑀸𑀭𑀡𑁂𑀦𑀸’’𑀢𑀺. 𑀘-𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀢𑁆𑀣𑀲𑀫𑀼𑀘𑁆𑀘𑀬𑀢𑁆𑀣𑁄.

𑀢𑀢𑁆𑀣𑀸𑀢𑀺 ‘‘𑀬𑀣𑀸 𑀘𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀤𑁂. 𑀲𑀼𑀪𑀫𑁆𑀧𑀻𑀢𑀺 𑀓𑀸𑀫𑀘𑁆𑀙𑀦𑁆𑀤𑁄𑀧𑀺. 𑀲𑁄 𑀳𑀺 𑀅𑀢𑁆𑀢𑀦𑁄 𑀕𑀳𑀡𑀸𑀓𑀸𑀭𑁂𑀦 ‘‘𑀲𑀼𑀪’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀓𑀲𑁆𑀲 𑀅𑀜𑁆𑀜𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀦𑀺𑀫𑀺𑀢𑁆𑀢𑀢𑁆𑀢𑀸 ‘‘𑀲𑀼𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀘. 𑀇𑀝𑁆𑀞𑀁, 𑀇𑀝𑁆𑀞𑀸𑀓𑀸𑀭𑁂𑀦 𑀯𑀸 𑀕𑀬𑁆𑀳𑀫𑀸𑀦𑀁 𑀭𑀽𑀧𑀸𑀤𑀺 𑀲𑀼𑀪𑀸𑀭𑀫𑁆𑀫𑀡𑀁. 𑀆𑀓𑀗𑁆𑀔𑀺𑀢𑀲𑁆𑀲 𑀳𑀺𑀢𑀲𑀼𑀔𑀲𑁆𑀲 𑀅𑀦𑀼𑀧𑀸𑀬𑀪𑀽𑀢𑁄 𑀫𑀦𑀲𑀺𑀓𑀸𑀭𑁄 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄. 𑀢𑀦𑁆𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁. 𑀢𑀢𑁆𑀣𑀸𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀆𑀭𑀫𑁆𑀫𑀡𑀪𑀽𑀢𑁂 𑀘 𑀤𑀼𑀯𑀺𑀥𑁂𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑁂. 𑀆𑀳𑀸𑀭𑁄𑀢𑀺 𑀧𑀘𑁆𑀘𑀬𑁄.

𑀅𑀲𑀼𑀪𑀫𑁆𑀧𑀻𑀢𑀺 𑀅𑀲𑀼𑀪𑀚𑁆𑀛𑀸𑀦𑀫𑁆𑀧𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀢𑀁 𑀧𑀦 𑀤𑀲𑀲𑀼 𑀅𑀯𑀺𑀜𑁆𑀜𑀸𑀡𑀓𑀸𑀲𑀼𑀪𑁂𑀲𑀼, 𑀓𑁂𑀲𑀸𑀤𑀻𑀲𑀼 𑀘 𑀧𑀯𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀓𑁂𑀲𑀸𑀤𑀻𑀲𑀼 𑀳𑀺 𑀲𑀜𑁆𑀜𑀸 𑀅𑀲𑀼𑀪𑀲𑀜𑁆𑀜𑀸𑀢𑀺 𑀕𑀺𑀭𑀺𑀫𑀸𑀦𑀦𑁆𑀤𑀲𑀼𑀢𑁆𑀢𑁂 (𑀅. 𑀦𑀺. 𑁧𑁦.𑁬𑁦) 𑀯𑀼𑀢𑁆𑀢𑀸𑀢𑀺. 𑀏𑀢𑁆𑀣 𑀘 𑀘𑀢𑀼𑀩𑁆𑀩𑀺𑀥𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀘 𑀕𑀳𑀡𑀁 𑀦𑀺𑀭𑀯𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀲𑀼 𑀧𑀦 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺, ‘‘𑀅𑀲𑀼𑀪’’𑀦𑁆𑀢𑀺 𑀘 𑀫𑀦𑀲𑀺𑀓𑀸𑀭𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀢𑀤𑀦𑀼𑀓𑀽𑀮𑀢𑁆𑀢𑀸 𑀯𑀸 𑀇𑀢𑀭𑁂𑀧𑀻𑀢𑀺.

𑀏𑀓𑀸𑀤𑀲𑀲𑀼 (𑀅. 𑀦𑀺. 𑀝𑀻. 𑁧.𑁧.𑁧𑁬) 𑀅𑀲𑀼𑀪𑁂𑀲𑀼 𑀧𑀝𑀺𑀓𑀽𑀮𑀸𑀓𑀸𑀭𑀲𑁆𑀲 𑀉𑀕𑁆𑀕𑀡𑁆𑀳𑀦𑀁, 𑀬𑀣𑀸 𑀯𑀸 𑀢𑀢𑁆𑀣 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀧𑀝𑀺𑀧𑀢𑁆𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄. 𑀉𑀧𑀘𑀸𑀭𑀧𑁆𑀧𑀦𑀸𑀯𑀳𑀸𑀬 𑀅𑀲𑀼𑀪𑀪𑀸𑀯𑀦𑀸𑀬 𑀅𑀦𑀼𑀬𑀼𑀜𑁆𑀚𑀦𑀁 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑀸𑀪𑀸𑀯𑀸 𑀑𑀢𑀸𑀭𑀁 𑀅𑀮𑀪𑀫𑀸𑀦𑁄 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀻𑀢𑀺 𑀯𑀤𑀦𑁆𑀢𑀺. 𑀪𑁄𑀚𑀦𑀦𑀺𑀲𑁆𑀲𑀺𑀢𑀁 𑀧𑀦 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀁, 𑀢𑀩𑁆𑀩𑀺𑀧𑀭𑀺𑀡𑀸𑀫𑀲𑁆𑀲, 𑀢𑀤𑀸𑀥𑀸𑀭𑀲𑁆𑀲, 𑀢𑀲𑁆𑀲 𑀘 𑀉𑀤𑀭𑀺𑀬𑀪𑀽𑀢𑀲𑁆𑀲 𑀅𑀲𑀼𑀪𑀢𑀸𑀤𑀲𑁆𑀲𑀦𑀁, 𑀓𑀸𑀬𑀲𑁆𑀲 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑀸𑀤𑀲𑁆𑀲𑀦𑀜𑁆𑀘 𑀬𑁄 𑀲𑀫𑁆𑀫𑀤𑁂𑀯 𑀚𑀸𑀦𑀸𑀢𑀺, 𑀲𑁄 𑀯𑀺𑀲𑁂𑀲𑀢𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀦𑀸𑀫, 𑀢𑀲𑁆𑀲 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑁂𑀯. 𑀅𑀲𑀼𑀪𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀤𑀦𑁆𑀢𑀝𑁆𑀞𑀺𑀤𑀲𑁆𑀲𑀸𑀯𑀻. 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 (𑀥. 𑀲. 𑁧𑁧𑁫𑁯, 𑁧𑁫𑁦𑁩) 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀦𑁆𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑀸’’𑀢𑀺.

𑀧𑀝𑀺𑀖𑀫𑁆𑀧𑀺 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀁 𑀧𑀝𑀺𑀖𑀦𑀺𑀫𑀺𑀢𑁆𑀢𑀁 𑀧𑀭𑀢𑁄 𑀉𑀧𑁆𑀧𑀚𑁆𑀚𑀦𑀓𑀧𑀝𑀺𑀖𑀲𑁆𑀲 𑀓𑀸𑀭𑀡𑀦𑁆𑀢𑀺 𑀓𑀢𑁆𑀯𑀸. 𑀫𑁂𑀚𑁆𑀚𑀢𑀺 𑀳𑀺𑀢𑀨𑀭𑀡𑀯𑀲𑁂𑀦 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑀺𑀢𑁆𑀢𑁄, 𑀢𑀲𑁆𑀫𑀺𑀁 𑀫𑀺𑀢𑁆𑀢𑁂 𑀪𑀯𑀸, 𑀫𑀺𑀢𑁆𑀢𑀲𑁆𑀲 𑀯𑀸 𑀏𑀲𑀸𑀢𑀺 𑀫𑁂𑀢𑁆𑀢𑀸, 𑀢𑀲𑁆𑀲𑀸 𑀫𑁂𑀢𑁆𑀢𑀸𑀬.

𑀫𑁂𑀢𑁆𑀢𑀸𑀬𑀦𑀲𑁆𑀲 𑀲𑀢𑁆𑀢𑁂𑀲𑀼 𑀳𑀺𑀢𑀨𑀭𑀡𑀲𑁆𑀲 𑀉𑀧𑁆𑀧𑀸𑀤𑀦𑀁 𑀧𑀯𑀢𑁆𑀢𑀦𑀁 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄. 𑀑𑀥𑀺𑀲𑀓𑀅𑀦𑁄𑀥𑀺𑀲𑀓𑀤𑀺𑀲𑀸𑀨𑀭𑀡𑀸𑀦𑀦𑁆𑀢𑀺 𑀅𑀢𑁆𑀢𑀅𑀢𑀺𑀧𑀺𑀬𑀲𑀳𑀸𑀬𑀫𑀚𑁆𑀛𑀢𑁆𑀢𑀯𑁂𑀭𑀻𑀯𑀲𑁂𑀦 𑀑𑀥𑀺𑀲𑀓𑀢𑀸, 𑀲𑀻𑀫𑀸𑀲𑀫𑁆𑀪𑁂𑀤𑁂 𑀓𑀢𑁂 𑀅𑀦𑁄𑀥𑀺𑀲𑀓𑀢𑀸, 𑀏𑀓𑀸𑀤𑀺𑀤𑀺𑀲𑀸𑀨𑀭𑀡𑀯𑀲𑁂𑀦 𑀤𑀺𑀲𑀸𑀨𑀭𑀡𑀢𑀸 𑀫𑁂𑀢𑁆𑀢𑀸𑀬 𑀉𑀕𑁆𑀕𑀳𑀡𑁂 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀳𑀸𑀭𑀭𑀘𑁆𑀙𑀸𑀕𑀸𑀫𑀸𑀤𑀺𑀯𑀲𑁂𑀦 𑀯𑀸 𑀑𑀥𑀺𑀲𑀓𑀤𑀺𑀲𑀸𑀨𑀭𑀡𑀁, 𑀯𑀺𑀳𑀸𑀭𑀸𑀤𑀺𑀉𑀤𑁆𑀤𑁂𑀲𑀭𑀳𑀺𑀢𑀁 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀯𑀲𑁂𑀦 𑀅𑀦𑁄𑀥𑀺𑀲𑀓𑀤𑀺𑀲𑀸𑀨𑀭𑀡𑀦𑁆𑀢𑀺 𑀏𑀯𑀁 𑀯𑀸 𑀤𑁆𑀯𑀺𑀥𑀸 𑀉𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 ‘‘𑀑𑀥𑀺𑀲𑀓𑀅𑀦𑁄𑀥𑀺𑀲𑀓𑀤𑀺𑀲𑀸𑀨𑀭𑀡𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀕𑁆𑀕𑀳𑁄 𑀘 𑀬𑀸𑀯 𑀉𑀧𑀘𑀸𑀭𑀸 𑀤𑀝𑁆𑀞𑀩𑁆𑀩𑁄, 𑀉𑀕𑁆𑀕𑀳𑀺𑀢𑀸𑀬 𑀆𑀲𑁂𑀯𑀦𑀸 𑀪𑀸𑀯𑀦𑀸. 𑀢𑀢𑁆𑀣 ‘‘𑀲𑀩𑁆𑀩𑁂 𑀲𑀢𑁆𑀢𑀸, 𑀧𑀸𑀡𑀸, 𑀪𑀽𑀢𑀸, 𑀧𑀼𑀕𑁆𑀕𑀮𑀸, 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺 𑀏𑀢𑁂𑀲𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸, 𑀏𑀓𑁂𑀓𑀲𑁆𑀫𑀺𑀁 ‘‘𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀅𑀩𑁆𑀬𑀸𑀧𑀚𑁆𑀚𑀸, 𑀅𑀦𑀻𑀖𑀸, 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’’𑀢𑀺 𑀘𑀢𑀼𑀥𑀸 𑀧𑀯𑀢𑁆𑀢𑀺𑀢𑁄 𑀯𑀻𑀲𑀢𑀺𑀯𑀺𑀥𑀸 𑀅𑀦𑁄𑀥𑀺𑀲𑀓𑀨𑀭𑀡𑀸 𑀫𑁂𑀢𑁆𑀢𑀸, ‘‘𑀲𑀩𑁆𑀩𑀸 𑀇𑀢𑁆𑀣𑀺𑀬𑁄, 𑀧𑀼𑀭𑀺𑀲𑀸, 𑀅𑀭𑀺𑀬𑀸, 𑀅𑀦𑀭𑀺𑀬𑀸, 𑀤𑁂𑀯𑀸, 𑀫𑀦𑀼𑀲𑁆𑀲𑀸, 𑀯𑀺𑀦𑀺𑀧𑀸𑀢𑀺𑀓𑀸’’𑀢𑀺 𑀲𑀢𑁆𑀢𑁄𑀥𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀲𑀢𑁆𑀢𑀯𑀺𑀥𑀸 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀸 𑀯𑀸, 𑀤𑀲𑀳𑀺 𑀤𑀺𑀲𑀸𑀳𑀺 𑀤𑀺𑀲𑁄𑀥𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀤𑀲𑀯𑀺𑀥𑀸 𑀘, 𑀏𑀓𑁂𑀓𑀸𑀬 𑀯𑀸 𑀤𑀺𑀲𑀸𑀬 𑀲𑀢𑁆𑀢𑀸𑀤𑀺𑀇𑀢𑁆𑀣𑀸𑀤𑀺𑀅𑀯𑁂𑀭𑀸𑀤𑀺𑀪𑁂𑀤𑁂𑀦 𑀅𑀲𑀻𑀢𑀸𑀥𑀺𑀓𑀘𑀢𑀼𑀲𑀢𑀧𑁆𑀧𑀪𑁂𑀤𑀸 𑀘 𑀑𑀥𑀺𑀪𑁄𑀨𑀭𑀡𑀸 𑀯𑁂𑀤𑀺𑀢𑀩𑁆𑀩𑀸.