𑁮. 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁩𑁩. 𑀥𑀫𑁆𑀫𑁂𑀲𑀽𑀢𑀺 𑀧𑀼𑀜𑁆𑀜𑀸𑀤𑀺𑀤𑀸𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀲𑀪𑀸𑀯𑀥𑀫𑁆𑀫𑁂𑀲𑀼. 𑀢𑀢𑁆𑀣 𑀮𑀩𑁆𑀪𑀫𑀸𑀦𑁄𑀢𑀺 𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀮𑀩𑁆𑀪𑀫𑀸𑀦𑁄. 𑀪𑀽𑀫𑀺𑀯𑀺𑀪𑀸𑀕𑁄𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀤𑀲𑁆𑀲𑀦𑀸𑀤𑀺𑀪𑀽𑀫𑀺𑀧𑁆𑀧𑀪𑁂𑀤𑁄. 𑀧𑀤𑀝𑁆𑀞𑀸𑀦𑀯𑀺𑀪𑀸𑀕𑁄𑀢𑀺 𑀢𑁂 𑀧𑀼𑀜𑁆𑀜𑀸𑀤𑀺𑀥𑀫𑁆𑀫𑀸 𑀬𑁂𑀲𑀁 𑀧𑀤𑀝𑁆𑀞𑀸𑀦𑀁, 𑀢𑁂𑀲𑀁 𑀯𑀸 𑀬𑁂 𑀥𑀫𑁆𑀫𑀸 𑀧𑀤𑀝𑁆𑀞𑀸𑀦𑀁, 𑀢𑀩𑁆𑀩𑀺𑀪𑀸𑀕𑁄. 𑀬𑁂𑀲𑀁 𑀲𑀼𑀢𑁆𑀢𑀸𑀦𑀦𑁆𑀢𑀺 𑀫𑀽𑀮𑀧𑀤𑀝𑁆𑀞𑀸𑀦𑀪𑀽𑀢𑀸𑀦𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀯𑀲𑁂𑀦. 𑀅𑀲𑀗𑁆𑀓𑀭𑀯𑀯𑀢𑁆𑀣𑀸𑀦𑁂𑀦 𑀳𑀺 𑀏𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀲𑀸𑀢𑀺𑀲𑀬𑀁 𑀥𑀫𑁆𑀫𑀸 𑀯𑀺𑀪𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀯𑀺𑀲𑁂𑀲𑀢𑁄’’𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀸𑀲𑀦𑀸𑀪𑀸𑀕𑀺𑀬𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀸𑀦𑀺 𑀏𑀯𑁂𑀢𑁆𑀣 𑀕𑀳𑀺𑀢𑀸𑀦𑀻𑀢𑀺? 𑀦𑀬𑀺𑀤𑀫𑁂𑀯𑀁 𑀦𑀺𑀓𑁆𑀔𑀫𑀦𑀧𑀭𑀺𑀬𑁄𑀲𑀸𑀦𑀪𑀸𑀯𑁂𑀦 𑀇𑀢𑀭𑁂𑀲𑀫𑁆𑀧𑀺 𑀕𑀳𑀺𑀢𑀢𑁆𑀢𑀸. 𑀬𑀢𑁄 𑀳𑀺 𑀦𑀺𑀲𑁆𑀲𑀝𑀸 𑀯𑀸𑀲𑀦𑀸𑀪𑀸𑀕𑀺𑀬𑀸 𑀥𑀫𑁆𑀫𑀸, 𑀢𑁂 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸. 𑀬𑀁𑀧𑀭𑀺𑀬𑁄𑀲𑀸𑀦𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀥𑀫𑁆𑀫𑀸, 𑀢𑁂 𑀅𑀲𑁂𑀓𑁆𑀔𑀪𑀸𑀕𑀺𑀬𑀸𑀢𑀺 𑀤𑁆𑀯𑀬𑀕𑁆𑀕𑀳𑀡𑁂𑀦𑁂𑀯 𑀇𑀢𑀭𑀫𑁆𑀧𑀺 𑀤𑁆𑀯𑀬𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀤𑁂𑀲𑀦𑀸𑀬𑀸’’𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀻𑀢𑀺 𑀧𑀸𑀴𑀺𑀬𑀸, 𑀯𑀓𑁆𑀔𑀫𑀸𑀦𑀸𑀬 𑀤𑁂𑀲𑀦𑀸𑀬 𑀯𑀸 𑀇𑀢𑀭𑀤𑁆𑀯𑀬𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄, 𑀦 𑀧𑀝𑀺𑀓𑁆𑀔𑁂𑀧𑁄.

𑀢𑁂𑀦𑁂𑀯𑀸𑀢𑀺 𑀦𑀺𑀬𑀫𑀲𑁆𑀲 𑀅𑀓𑀢𑀢𑁆𑀢𑀸, 𑀢𑀢𑁄 𑀘 𑀢𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑁂𑀦 𑀘 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀏𑀯-𑀲𑀤𑁆𑀤𑁄 𑀯𑀸 𑀲𑀫𑀼𑀘𑁆𑀘𑀬𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀺𑀬𑀸 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁄𑀢𑀺 𑀢𑀲𑁆𑀲 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀲𑀺𑀬𑀸 𑀧𑀝𑀺𑀓𑁆𑀔𑁂𑀧𑁄. 𑀏𑀯𑀁 𑀲𑀢𑀺 𑀲𑀸𑀯𑀲𑁂𑀲𑀸 𑀤𑁂𑀲𑀦𑀸 𑀲𑀺𑀬𑀸.

𑀢𑀤𑀗𑁆𑀕𑀸𑀤𑀺𑀧𑁆𑀧𑀳𑀸𑀦𑀤𑁆𑀯𑀬𑀁 𑀧𑀤𑀝𑁆𑀞𑀸𑀦𑀪𑀽𑀢𑀁 𑀇𑀥 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 ‘‘𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀸𑀦𑀁 𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑁂𑀢𑁆𑀣 𑀓𑁂𑀘𑀺 ‘‘𑀢𑁂𑀦𑁂𑀯𑀸’’𑀢𑀺 𑀧𑀞𑀦𑁆𑀢𑀺. ‘‘𑀢𑁂𑀦𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸𑀢𑀺 𑀧𑀞𑀦𑁆𑀢𑀻’’𑀢𑀺 𑀇𑀤𑀁 ‘‘𑀲𑀁𑀯𑀭𑀲𑀻𑀮𑁂 𑀞𑀺𑀢𑁄’’𑀢𑀺 (𑀦𑁂𑀢𑁆𑀢𑀺. 𑁩𑁩) 𑀏𑀢𑁆𑀣 𑀯𑀼𑀢𑁆𑀢𑀁 𑀧𑀸𑀴𑀺𑀯𑀺𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀤𑀢𑀺. ‘‘𑀬𑀲𑁆𑀫𑀸…𑀧𑁂… 𑀯𑀓𑁆𑀔𑀢𑀻’’𑀢𑀺 𑀇𑀤𑀁 𑀧𑀘𑁆𑀙𑀺𑀫𑀧𑀸𑀞𑀲𑁆𑀲𑁂𑀯 𑀬𑀼𑀢𑁆𑀢𑀢𑀸𑀬 𑀓𑀸𑀭𑀡𑀯𑀘𑀦𑀁.

𑀓𑀣𑀁 𑀫𑀦𑁆𑀢𑀸𑀢𑀺? 𑀅𑀦𑀺𑀩𑁆𑀩𑁂𑀥𑀲𑀪𑀸𑀯𑀢𑁆𑀢𑀸 𑀫𑀳𑀕𑁆𑀕𑀢𑀧𑀼𑀜𑁆𑀜𑀸𑀦𑀁 𑀦 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑁄, 𑀯𑀸𑀲𑀦𑀸𑀪𑀸𑀕𑀺𑀬𑀢𑁆𑀢𑀸 𑀧𑀦 𑀯𑀸𑀲𑀦𑀸𑀪𑀸𑀕𑀺𑀬𑀲𑀼𑀢𑁆𑀢𑁂𑀦𑁂𑀯 𑀲𑀗𑁆𑀕𑀳𑁄𑀢𑀺. 𑀢𑀤𑀼𑀧𑀲𑀗𑁆𑀕𑀸 𑀳𑀺 𑀧𑀘𑁆𑀙𑀺𑀫𑁄 𑀏𑀯 𑀧𑀸𑀞𑁄 𑀬𑀼𑀢𑁆𑀢𑀢𑀭𑁄. 𑀇𑀢𑀭𑀣𑀸 𑀲𑀸𑀯𑀲𑁂𑀲𑀸 𑀤𑁂𑀲𑀦𑀸 𑀪𑀯𑁂𑀬𑁆𑀬. 𑀢𑁂𑀦𑀸𑀳 ‘‘𑀦 𑀳𑀺…𑀧𑁂… 𑀤𑁂𑀲𑁂𑀢𑀻’’𑀢𑀺.

𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀸𑀦𑀁 𑀧𑀭𑀢𑁄 𑀯𑀓𑁆𑀔𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀓𑁆𑀔𑀫𑀸𑀦𑀸𑀦𑀁…𑀧𑁂… 𑀯𑀲𑁂𑀦𑀸’’𑀢𑀺. ‘‘𑀲𑀩𑁆𑀩𑀢𑁄’’𑀢𑀺 𑀇𑀤𑀁 𑀧𑀼𑀩𑁆𑀩𑀧𑀭𑀸𑀧𑁂𑀓𑁆𑀔𑀁. 𑀢𑀲𑁆𑀲 𑀧𑀭𑀸𑀧𑁂𑀓𑁆𑀔𑀢𑀸𑀬 ‘‘𑀲𑀩𑁆𑀩𑀢𑁄𑀪𑀸𑀕𑁂𑀦 𑀏𑀓𑀸𑀤𑀲𑀲𑀼 𑀞𑀸𑀦𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀬𑁄𑀚𑀺𑀢𑀁. 𑀢𑀢𑁆𑀣 𑀧𑀤𑀸𑀤𑀺𑀓𑁂 𑀯𑀺𑀘𑀬𑀳𑀸𑀭𑀧𑀤𑀢𑁆𑀣𑁂 𑀲𑀦𑁆𑀥𑀸𑀬 ‘‘𑀏𑀓𑀸𑀤𑀲𑀲𑀼 𑀞𑀸𑀦𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀧𑁂𑀓𑁆𑀔𑀢𑀸𑀬 𑀧𑀦 ‘‘𑀲𑀩𑁆𑀩𑀢𑁄𑀪𑀸𑀕𑁂𑀦 𑀤𑁂𑀲𑀦𑀸𑀬 𑀨𑀮𑁂𑀦𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀦𑀁 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀦𑀸 𑀤𑁂𑀲𑀦𑀸𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀨𑀮𑀁 𑀅𑀧𑀸𑀬𑀤𑀼𑀓𑁆𑀔𑁂𑀦 𑀫𑀦𑀼𑀲𑁆𑀲𑁂𑀲𑀼 𑀤𑁄𑀪𑀕𑁆𑀕𑀺𑀬𑁂𑀦. 𑀅𑀲𑁂𑀓𑁆𑀔𑀪𑀸𑀕𑀺𑀬𑀸𑀦𑀁 𑀅𑀲𑁂𑀓𑁆𑀔𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀤𑁂𑀲𑀦𑀸𑀦𑀬𑁄. 𑀨𑀮𑀁 𑀅𑀕𑁆𑀕𑀨𑀮𑁂𑀦 𑀘 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀭𑁂𑀲𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀫𑁂𑀯. 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀕𑁆𑀕𑀳𑀡𑁂𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀦𑀁, 𑀯𑀺𑀭𑀸𑀕𑀕𑁆𑀕𑀳𑀡𑁂𑀦 𑀅𑀲𑁂𑀓𑁆𑀔𑀕𑁆𑀕𑀳𑀡𑁂𑀦𑁂𑀯 𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀸𑀦𑀁 𑀯𑀓𑁆𑀔𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀓𑁆𑀔𑀫𑀸𑀦𑀸𑀦𑀁…𑀧𑁂… 𑀯𑀲𑁂𑀦𑀸’’𑀢𑀺. 𑀧𑀤𑀧𑀤𑀢𑁆𑀣𑀯𑀺𑀘𑀸𑀭𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑀫𑀼𑀔𑁂𑀦 𑀥𑀫𑁆𑀫𑀯𑀺𑀪𑀢𑁆𑀢𑀺𑀆𑀤𑀺𑀯𑀺𑀘𑀸𑀭𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀯𑀺𑀘𑀬𑁂𑀦…𑀧𑁂… 𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀺𑀘𑀬𑁂𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑁩𑁪. 𑀏𑀯𑀦𑁆𑀢𑀺 𑀇𑀢𑀺. 𑀥𑀫𑁆𑀫𑁂𑀢𑀺 𑀯𑀼𑀢𑁆𑀢𑀲𑀪𑀸𑀕𑀥𑀫𑁆𑀫𑁂. 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀪𑀸𑀯𑁂𑀳𑀻𑀢𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑁂𑀦 𑀯𑀺𑀲𑀺𑀝𑁆𑀞𑁂𑀳𑀺. 𑀤𑁆𑀯𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸𑀢𑀺 𑀤𑁆𑀯𑁂 𑀇𑀫𑁂 𑀥𑀫𑁆𑀫𑀸 𑀬𑁂𑀳𑀺 𑀲𑀪𑀸𑀕𑀥𑀫𑁆𑀫𑀸 𑀲𑀸𑀥𑀸𑀭𑀡𑀸 𑀦𑀸𑀫 𑀳𑁄𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀦𑀸𑀫𑀁, 𑀯𑀢𑁆𑀣𑀼 𑀘. 𑀢𑀢𑁆𑀣 𑀦𑀸𑀫𑀁 𑀦𑀸𑀫𑀧𑀜𑁆𑀜𑀢𑁆𑀢𑀺, 𑀢𑀁𑀫𑀼𑀔𑁂𑀦𑁂𑀯 𑀲𑀤𑁆𑀤𑀢𑁄 𑀢𑀤𑀢𑁆𑀣𑀸𑀯𑀕𑀫𑁄. 𑀲𑀤𑁆𑀤𑁂𑀦 𑀘 𑀲𑀸𑀫𑀜𑁆𑀜𑀭𑀽𑀧𑁂𑀦𑁂𑀯 𑀢𑀣𑀸𑀭𑀽𑀧𑀲𑁆𑀲 𑀅𑀢𑁆𑀣𑀲𑁆𑀲 𑀕𑀳𑀡𑀁, 𑀦 𑀯𑀺𑀲𑁂𑀲𑀭𑀽𑀧𑁂𑀦, 𑀢𑀲𑁆𑀫𑀸 𑀲𑀤𑁆𑀤𑀯𑀘𑀦𑀻𑀬𑀸 𑀅𑀢𑁆𑀣𑀸 𑀲𑀸𑀥𑀸𑀭𑀡𑀭𑀽𑀧𑀦𑀸𑀫𑀸𑀬𑀢𑁆𑀢𑀕𑀳𑀡𑀻𑀬𑀢𑀸𑀬 𑀦𑀸𑀫𑀲𑀸𑀥𑀸𑀭𑀡𑀸 𑀯𑀼𑀢𑁆𑀢𑀸. 𑀯𑀢𑁆𑀣𑀽𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀬𑀢𑁆𑀣 𑀳𑀺 𑀬𑁂 𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀢𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑀸𑀦𑀁 𑀯𑀢𑁆𑀣𑀽𑀦𑀁 𑀲𑀸𑀥𑀸𑀭𑀡𑀸. 𑀬𑀲𑁆𑀫𑀸 𑀧𑀦𑀺𑀤𑀁 𑀤𑁆𑀯𑀬𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑁂 𑀧𑀓𑀢𑀺𑀪𑀽𑀢𑀁 𑀲𑀪𑀸𑀯𑀪𑀽𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀥𑀫𑁆𑀫𑀸𑀢𑀺 𑀤𑀼𑀯𑁂 𑀧𑀓𑀢𑀺𑀬𑁄’’𑀢𑀺. 𑀏𑀓𑀲𑀦𑁆𑀢𑀢𑀺𑀧𑀢𑀺𑀢𑀢𑀸𑀬𑀸𑀢𑀺 𑀲𑀫𑀸𑀦𑀲𑀦𑁆𑀢𑀢𑀺𑀧𑀯𑀢𑁆𑀢𑀺𑀬𑀸. 𑀢𑁂𑀦𑀸𑀳 ‘‘𑀲𑀫𑀸𑀦𑀯𑀢𑁆𑀣𑀼𑀓𑀸’’𑀢𑀺. 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀦𑀜𑁆𑀳𑀺 𑀬𑀣𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀲𑀢𑁆𑀢𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀁, 𑀏𑀯𑀁 𑀅𑀦𑀺𑀬𑀢𑀸𑀧𑀻𑀢𑀺 𑀉𑀪𑀬𑁂 𑀳𑀺 𑀢𑁂 𑀲𑀫𑀸𑀦𑀯𑀢𑁆𑀣𑀼𑀓𑀸. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 𑀳𑀺 𑀪𑀺𑀦𑁆𑀦𑀲𑀪𑀸𑀯𑀸𑀧𑁂𑀢𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀢𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀢𑁂 𑀦𑀸𑀫𑀲𑀸𑀫𑀜𑁆𑀜𑀢𑀁 𑀧𑀢𑁆𑀢𑀸, 𑀭𑀽𑀧𑀭𑀸𑀕𑀸𑀤𑀬𑁄 𑀘 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀢𑀦𑁆𑀢𑀺 𑀆𑀳 ‘‘𑀧𑀳𑀸𑀦𑁂𑀓𑀝𑁆𑀞𑀸 𑀦𑀸𑀫𑀲𑀸𑀥𑀸𑀭𑀡𑀸’’𑀢𑀺. 𑀬𑀣𑀸 𑀧𑀦 ‘‘𑀯𑀢𑁆𑀣𑀽𑀦𑀁 𑀲𑀸𑀥𑀸𑀭𑀡𑀸 𑀯𑀢𑁆𑀣𑀼𑀲𑀸𑀥𑀸𑀭𑀡𑀸’’𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺, 𑀏𑀯𑀁 ‘‘𑀯𑀢𑁆𑀣𑀼𑀦𑀸 𑀲𑀸𑀥𑀸𑀭𑀡𑀸 𑀯𑀢𑁆𑀣𑀼𑀲𑀸𑀥𑀸𑀭𑀡𑀸’’𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀳𑀚𑁂𑀓𑀝𑁆𑀞𑀸 𑀯𑀢𑁆𑀣𑀼𑀲𑀸𑀥𑀸𑀭𑀡𑀸’’𑀢𑀺 𑀆𑀳. 𑀢𑁂 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀨𑀼𑀲𑀦𑀸𑀤𑀺𑀲𑀪𑀸𑀯𑀢𑁄 𑀪𑀺𑀦𑁆𑀦𑀸𑀧𑀺 𑀬𑀲𑁆𑀫𑀺𑀁 𑀧𑀯𑀢𑁆𑀢𑀦𑁆𑀢𑀺, 𑀢𑁂𑀦 𑀯𑀢𑁆𑀣𑀼𑀦𑀸 𑀲𑀸𑀥𑀸𑀭𑀡𑀸 𑀦𑀸𑀫 𑀳𑁄𑀦𑁆𑀢𑀺. 𑀏𑀢𑁆𑀣 𑀘 𑀮𑀩𑁆𑀪𑀫𑀸𑀦𑀫𑁆𑀧𑀺 𑀓𑀼𑀲𑀮𑀸𑀤𑀺𑀦𑀸𑀫𑀲𑀸𑀥𑀸𑀭𑀡𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀢𑁆𑀣𑀼𑀲𑀸𑀥𑀸𑀭𑀡𑀸 𑀢𑀸𑀯 𑀬𑁄𑀚𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀧𑀓𑁆𑀔𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀲𑀫𑀸𑀦𑀨𑀮𑀢𑀸𑀲𑀳𑀩𑁆𑀬𑀢𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺𑀯𑀸𑀓𑁆𑀬𑁂𑀲𑀼. 𑀓𑀣𑀁? 𑀢𑀢𑁆𑀣 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀲𑀫𑁆𑀪𑀯𑀢𑁄 𑀅𑀦𑀸𑀕𑀸𑀫𑀺𑀦𑁄, 𑀅𑀭𑀳𑀢𑁄 𑀘 𑀅𑀲𑀫𑁆𑀪𑀯𑀢𑁄𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑀓𑀣𑀁 𑀢𑁂 𑀑𑀥𑀺𑀲𑁄 𑀕𑀳𑀺𑀢𑀸𑀢𑀺 𑀓𑁂𑀦𑀸𑀓𑀸𑀭𑁂𑀦 𑀢𑁂 ‘‘𑀲𑀸𑀥𑀸𑀭𑀡𑀸’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀸 𑀪𑀸𑀕𑀲𑁄 𑀕𑀳𑀺𑀢𑀸. ‘‘𑀅𑀫𑀼𑀓𑀲𑁆𑀲, 𑀅𑀫𑀼𑀓𑀲𑁆𑀲 𑀘𑀸’’𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀲𑀸𑀫𑀜𑁆𑀜𑀪𑀽𑀢𑀸 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸 𑀦𑀸𑀫, 𑀏𑀯𑀁 𑀲𑀦𑁆𑀢𑁂 𑀓𑀣𑀁 𑀢𑁂𑀲𑀁 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀺𑀬𑀢𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸 𑀯𑀼𑀘𑁆𑀘𑀢𑀺, 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀺𑀪𑀸𑀕𑁂𑀦 𑀢𑀁 𑀯𑀢𑁆𑀢𑀩𑁆𑀩𑀁, 𑀦𑀦𑀼 𑀢𑁂 𑀲𑀸𑀥𑀸𑀭𑀡𑀸𑀢𑀺 𑀦 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺? 𑀏𑀯𑀁 𑀲𑀸𑀥𑀸𑀭𑀡𑀸𑀢𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁, 𑀅𑀦𑀺𑀬𑀢𑀸𑀦𑀦𑁆𑀢𑀺 𑀇𑀫𑁂𑀲𑀁 𑀉𑀪𑀬𑁂𑀲𑀁𑀬𑁂𑀯 𑀢𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸. 𑀢𑁂𑀦𑀸𑀳 𑁋 ‘‘𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀢𑀸𑀬 𑀲𑀸𑀥𑀸𑀭𑀡𑀸’’𑀢𑀺. ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳, 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀓𑁂𑀘𑀺 𑀥𑀫𑁆𑀫𑀸 𑀓𑁂𑀲𑀜𑁆𑀘𑀺𑀤𑁂𑀯 𑀥𑀫𑁆𑀫𑀸𑀦𑀁 𑀲𑀸𑀥𑀸𑀭𑀡𑀸 𑀳𑁄𑀦𑁆𑀢𑀺, 𑀅𑀜𑁆𑀜𑁂𑀲𑀁 𑀅𑀲𑀸𑀥𑀸𑀭𑀡𑀸’’𑀢𑀺. 𑀢𑁂𑀦𑀸𑀳 ‘‘𑀧𑀝𑀺𑀦𑀺𑀬𑀢𑀜𑁆𑀳𑀺 𑀢𑁂𑀲𑀁 𑀧𑀯𑀢𑁆𑀢𑀺𑀝𑁆𑀞𑀸𑀦’’𑀦𑁆𑀢𑀺.

𑀇𑀢𑀭𑀣𑀸𑀢𑀺 𑀅𑀦𑀺𑀬𑀢𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀸, 𑀅𑀲𑀸𑀥𑀸𑀭𑀡𑀸 𑀯𑀸 𑀲𑀺𑀬𑀼𑀁, 𑀢𑀣𑀸 𑀲𑀢𑀺. 𑀢𑀣𑀸 𑀯𑁄𑀳𑀸𑀭𑁄𑀢𑀺 ‘‘𑀲𑀸𑀥𑀸𑀭𑀡𑀸, 𑀅𑀲𑀸𑀥𑀸𑀭𑀡𑀸’’𑀢𑀺 𑀘 𑀅𑀬𑀁 𑀯𑁄𑀳𑀸𑀭𑁄 𑀲𑀸𑀫𑀜𑁆𑀜𑀸 𑀏𑀯 𑀦 𑀪𑀯𑁂𑀬𑁆𑀬. 𑀏𑀢𑁂 𑀏𑀯 𑀥𑀫𑁆𑀫𑀸𑀢𑀺 ‘‘𑀲𑀸𑀥𑀸𑀭𑀡𑀸’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀸 𑀏𑀯. 𑀏𑀯𑀦𑁆𑀢𑀺 ‘‘𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀦𑀺𑀬𑀢𑀯𑀺𑀲𑀬𑀸 𑀧𑀭𑀺𑀘𑁆𑀙𑀺𑀦𑁆𑀦𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑀸. ‘‘𑀬𑁄𑀧𑀻’’𑀢𑀺𑀆𑀤𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁. ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀲𑁂𑀲𑁂𑀧𑀻𑀢𑀺 ‘‘𑀪𑀸𑀯𑀦𑀸𑀧𑀳𑀸𑀢𑀩𑁆𑀩𑀸’’𑀢𑀺 𑀏𑀯𑀫𑀸𑀤𑀺𑀫𑁆𑀳𑀺𑀧𑀺.

𑀧𑀘𑁆𑀘𑀢𑁆𑀢𑀦𑀺𑀬𑀢𑁄𑀢𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑁄. 𑀇𑀢𑀭𑀲𑁆𑀲𑀸𑀢𑀺 𑀅𑀧𑀘𑁆𑀘𑀢𑁆𑀢𑀦𑀺𑀬𑀢𑀲𑁆𑀲. 𑀢𑀣𑀸𑀢𑀺 𑀅𑀲𑀸𑀥𑀸𑀭𑀡𑀪𑀸𑀯𑁂𑀦. 𑀓𑁄𑀘𑀺 𑀥𑀫𑁆𑀫𑁄 𑀓𑀜𑁆𑀘𑀺 𑀥𑀫𑁆𑀫𑀁 𑀉𑀧𑀸𑀤𑀸𑀬 𑀲𑀸𑀥𑀸𑀭𑀡𑁄𑀧𑀺 𑀲𑀫𑀸𑀦𑁄 𑀢𑀤𑀜𑁆𑀜𑀁 𑀉𑀧𑀸𑀤𑀸𑀬 𑀅𑀲𑀸𑀥𑀸𑀭𑀡𑁄𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀲𑀸𑀥𑀸𑀭𑀡𑀸𑀯𑀺𑀥𑀼𑀭𑀢𑀸𑀬𑀸’’𑀢𑀺. 𑀢𑁂𑀦𑀸𑀳 ‘‘𑀢𑀁 𑀢𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺. 𑀢𑀣𑀸 𑀳𑀺 ‘‘𑀥𑀫𑁆𑀫𑀢𑀸’’𑀢𑀺 𑀯𑀼𑀢𑁆𑀢𑀧𑀞𑀫𑀫𑀕𑁆𑀕𑀝𑁆𑀞𑀢𑀸 𑀤𑀻𑀧𑀺𑀢𑀸, 𑀢𑀸𑀤𑀺𑀲𑀸𑀦𑀁 𑀏𑀯 𑀅𑀦𑁂𑀓𑁂𑀲𑀁 𑀅𑀭𑀺𑀬𑀸𑀦𑀁 𑀯𑀲𑁂𑀦 𑀲𑀸𑀥𑀸𑀭𑀡𑀸𑀢𑀺. 𑀧𑀞𑀫𑀲𑁆𑀲𑀸𑀢𑀺 𑀅𑀝𑁆𑀞𑀫𑀓𑀲𑁆𑀲. 𑀤𑀼𑀢𑀺𑀬𑀲𑁆𑀲𑀸𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲. 𑀧𑀼𑀦 𑀅𑀝𑁆𑀞𑀫𑀓𑀲𑁆𑀲𑀸𑀢𑀺 ‘‘𑀅𑀝𑁆𑀞𑀫𑀓𑀲𑁆𑀲, 𑀅𑀦𑀸𑀕𑀸𑀫𑀺𑀲𑁆𑀲 𑀘𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀅𑀝𑁆𑀞𑀫𑀓𑀲𑁆𑀲. 𑀢𑁂𑀦𑀸𑀳 ‘‘𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑀲𑁆𑀲𑀸’’𑀢𑀺. 𑀅𑀕𑁆𑀕𑀨𑀮𑀝𑁆𑀞𑀢𑁄 𑀧𑀝𑁆𑀞𑀸𑀬 𑀧𑀝𑀺𑀮𑁄𑀫𑀢𑁄 𑀕𑀡𑀺𑀬𑀫𑀸𑀦𑁄 𑀧𑀞𑀫𑀫𑀕𑁆𑀕𑀝𑁆𑀞𑁄 𑀅𑀝𑁆𑀞𑀫𑀓𑁄, 𑀫𑀕𑁆𑀕𑀝𑁆𑀞𑀢𑀸𑀬, 𑀧𑀳𑀻𑀬𑀫𑀸𑀦𑀓𑀺𑀮𑁂𑀲𑀢𑀸𑀬 𑀘 𑀲𑀩𑁆𑀩𑁂𑀧𑀺 𑀫𑀕𑁆𑀕𑀝𑁆𑀞𑀸 𑀅𑀝𑁆𑀞𑀫𑀓𑀸 𑀯𑀺𑀬𑀸𑀢𑀺 𑀅𑀝𑁆𑀞𑀫𑀓𑀸, ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀢𑁄 𑀉𑀤𑁆𑀥𑀁 𑀦 𑀢𑀺𑀝𑁆𑀞𑀢𑀻𑀢𑀺 𑀅𑀝𑁆𑀞𑀫𑀓𑁄’’𑀢𑀺 𑀅𑀧𑀭𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. ‘‘𑀲𑁂𑀓𑁆𑀔𑀸’’𑀢𑀺 𑀦𑀸𑀫𑀁 𑀲𑀸𑀥𑀸𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁂𑀲𑀽𑀢𑀺 ‘‘𑀪𑀩𑁆𑀩𑀸𑀪𑀩𑁆𑀩𑀸’’𑀢𑀺 𑀯𑀼𑀢𑁆𑀢𑁂𑀲𑀼 𑀅𑀦𑀭𑀺𑀬𑁂𑀲𑀼. 𑀢𑁂𑀦𑀸𑀳 𑀧𑀸𑀴𑀺𑀬𑀁 ‘‘𑀳𑀻𑀦𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀁 𑀉𑀧𑀸𑀤𑀸𑀬𑀸’’𑀢𑀺.

𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀬𑀸𑀢𑀺 𑀅𑀯𑀓𑁆𑀓𑀦𑁆𑀢𑀦𑀺𑀬𑀸𑀫𑀢𑀸𑀬. 𑀜𑀸𑀡𑀼𑀢𑁆𑀣𑀭𑀲𑁆𑀲𑀸𑀢𑀺 𑀜𑀸𑀡𑀸𑀥𑀺𑀓𑀲𑁆𑀲. 𑀢𑀣𑀸𑀯𑀺𑀥𑀧𑀘𑁆𑀘𑀬𑀲𑀫𑀸𑀬𑁄𑀕𑁂𑀢𑀺 𑀜𑀸𑀡𑀯𑀺𑀲𑁂𑀲𑀧𑀘𑁆𑀘𑀬𑀲𑀫𑀯𑀸𑀬𑁂. 𑀬𑀣𑀸 𑀳𑀺 𑀜𑀸𑀡𑀩𑀮𑁂𑀦 𑀤𑀦𑁆𑀥𑀸𑀪𑀺𑀜𑁆𑀜𑀢𑀸 𑀦 𑀳𑁄𑀢𑀺, 𑀏𑀯𑀁 𑀧𑀝𑀺𑀧𑀤𑀸𑀧𑀝𑀺𑀧𑀦𑁆𑀦𑁄𑀧𑀺 𑀲𑀼𑀔𑁂𑀦 𑀯𑀺𑀲𑁄𑀲𑀻𑀬𑀢𑀻𑀢𑀺. 𑀲𑀸 𑀳𑀺 𑀲𑀼𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀢𑀁𑀲𑀫𑀗𑁆𑀕𑀺𑀦𑁄 𑀜𑀸𑀡𑀼𑀢𑁆𑀢𑀭𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸.

𑀥𑀫𑁆𑀫𑀢𑁄 𑀅𑀦𑀧𑁂𑀢𑀸 𑀘𑀺𑀦𑁆𑀢𑀸 𑀥𑀫𑁆𑀫𑀘𑀺𑀦𑁆𑀢𑀸, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑀢𑁆𑀢𑀸 𑀥𑀫𑁆𑀫𑁂𑀲𑀼 𑀘𑀺𑀦𑁆𑀢𑀸, 𑀥𑀫𑁆𑀫𑁄 𑀯𑀸 𑀜𑀸𑀡𑀁, 𑀢𑀲𑁆𑀫𑀸 𑀥𑀫𑁆𑀫𑀸𑀯𑀳𑀸 𑀘𑀺𑀦𑁆𑀢𑀸 𑀥𑀫𑁆𑀫𑀘𑀺𑀦𑁆𑀢𑀸, 𑀘𑀺𑀦𑁆𑀢𑀸𑀫𑀬𑀜𑀸𑀡𑀲𑁆𑀲 𑀳𑁂𑀢𑀼𑀪𑀽𑀢𑀸 𑀘𑀺𑀦𑁆𑀢𑀸𑀢𑀺 𑀅𑀢𑁆𑀣𑁄.

𑀧𑀸𑀴𑀺𑀬𑀁 𑀲𑀼𑀢𑀫𑀬𑀧𑀜𑁆𑀜𑀸𑀕𑁆𑀕𑀳𑀡𑁂𑀦 ‘‘𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸…𑀧𑁂… 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁮.𑁨) 𑀲𑀼𑀢𑁆𑀢𑀧𑀤𑀲𑀗𑁆𑀕𑀳𑁄 𑀅𑀢𑁆𑀣𑁄 𑀧𑀭𑀺𑀕𑁆𑀕𑀳𑀺𑀢𑁄, 𑀢𑀣𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀕𑁆𑀕𑀳𑀡𑁂𑀦 ‘‘𑀲𑁄 ‘𑀅𑀦𑀺𑀘𑁆𑀘’𑀦𑁆𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀉𑀧𑀸𑀬𑀫𑀦𑀲𑀺𑀓𑀸𑀭𑁄 𑀧𑀭𑀺𑀕𑁆𑀕𑀳𑀺𑀢𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀭𑀺𑀕𑁆𑀕𑀳𑀺𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀔𑁄…𑀧𑁂… 𑀤𑀲𑁆𑀲𑁂𑀢𑀼’’𑀦𑁆𑀢𑀺. 𑀲𑁂𑀲𑀦𑁆𑀢𑀺 ‘‘𑀥𑀫𑁆𑀫𑀲𑁆𑀯𑀸𑀓𑁆𑀔𑀸𑀢𑀢𑀸’’𑀢𑀺 𑀏𑀯𑀫𑀸𑀤𑀺.

𑀬𑀲𑁆𑀲 𑀘 𑀧𑀼𑀩𑁆𑀩𑁂 𑀅𑀢𑁆𑀣𑁄 𑀦 𑀲𑀁𑀯𑀡𑁆𑀡𑀺𑀢𑁄, 𑀢𑀢𑁆𑀣 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀬 𑀆𑀬𑀢𑀦𑀕𑀢𑁄 𑀧𑀲𑀸𑀤𑁄, 𑀘𑀺𑀢𑁆𑀢𑀯𑀽𑀧𑀲𑀫𑁄 𑀘 𑀨𑀮𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀧𑁆𑀧𑀼𑀭𑀺𑀲…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀆𑀳. 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀳𑀺𑀢𑀢𑁆𑀢𑀸 𑀧𑀸𑀧𑀚𑁂𑀕𑀼𑀘𑁆𑀙𑀺𑀦𑀺𑀩𑁆𑀩𑀺𑀤𑀸𑀤𑀺𑀩𑀳𑀼𑀮𑁄𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀣…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀧𑀸𑀭𑀺𑀧𑀽𑀭𑀺𑀳𑁂𑀢𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀲𑁆𑀯𑀸𑀓𑁆𑀔𑀸𑀢𑀢𑀸…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀆𑀳. 𑀓𑀼𑀲𑀮𑀫𑀽𑀮𑀭𑁄𑀧𑀦𑀸 𑀳𑀺 𑀲𑀫𑀸𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀸𑀢𑀺. 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀲𑀗𑁆𑀖𑀲𑁆𑀲 𑀲𑀼𑀝𑁆𑀞𑀼𑀪𑀸𑀯𑀸𑀬 𑀲𑀗𑁆𑀖𑀲𑁆𑀲 𑀲𑀧𑁆𑀧𑀢𑀺𑀲𑁆𑀲𑀢𑀸𑀬 ‘‘𑀲𑀼𑀝𑁆𑀞𑀼, 𑀪𑀦𑁆𑀢𑁂’’𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀪𑀸𑀯𑀸𑀬. 𑀇𑀢𑀭𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.