𑁧. 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

‘‘𑀏𑀯’’𑀦𑁆𑀢𑀺𑀆𑀤𑀺 𑀳𑀸𑀭𑀲𑀫𑁆𑀧𑀸𑀢𑀤𑁂𑀲𑀦𑀸𑀬 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀁. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀉𑀧𑀫𑀸𑀤𑁆𑀯𑀬𑁂𑀦 𑀲𑀼𑀧𑀭𑀺𑀓𑀫𑁆𑀫𑀓𑀢𑀫𑀡𑀺𑀓𑁄𑀝𑁆𑀝𑀺𑀫𑀲𑀤𑀺𑀲𑀻, 𑀲𑀼𑀯𑀺𑀭𑀘𑀺𑀢𑀚𑀫𑁆𑀩𑀼𑀦𑀤𑀸𑀪𑀭𑀡𑀲𑀤𑀺𑀲𑀻 𑀘 𑀧𑀸𑀴𑀺. 𑀢𑀢𑁆𑀣 𑀓𑀢𑀦𑀸𑀦𑀸𑀯𑀡𑁆𑀡𑀧𑀼𑀧𑁆𑀨𑀽𑀧𑀳𑀸𑀭𑀲𑀤𑀺𑀲𑀻, 𑀯𑀺𑀯𑀺𑀥𑀭𑀁𑀲𑀺𑀚𑀸𑀮𑀸𑀲𑀫𑀼𑀚𑁆𑀚𑀮𑀩𑀤𑁆𑀥𑀦𑀸𑀦𑀸𑀭𑀢𑀦𑀸𑀯𑀮𑀺𑀲𑀤𑀺𑀲𑀻 𑀘 𑀳𑀸𑀭𑀯𑀺𑀪𑀗𑁆𑀕𑀤𑁂𑀲𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀺𑀫𑁂𑀦 𑀢𑀲𑁆𑀲 𑀧𑀡𑀻𑀢𑀫𑀳𑀸𑀭𑀳𑁂 𑀚𑀝𑀸𑀳𑀺 𑀲𑀤𑁆𑀥𑀺𑀁 𑀤𑀼𑀓𑁆𑀓𑀭𑀢𑀭𑀢𑀁 𑀤𑀻𑀧𑁂𑀢𑀺. 𑀬𑀸𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑁫𑁨. 𑀬𑀲𑁆𑀫𑀸𑀬𑀁 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑁄 𑀦𑀧𑁆𑀧𑀬𑁄𑀚𑁂𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀓𑀸𑀭𑀡𑁂𑀦, 𑀢𑀲𑁆𑀫𑀸 𑀲𑀸 𑀳𑀸𑀭𑀯𑀺𑀪𑀗𑁆𑀕𑀯𑀸𑀭𑀲𑁆𑀲 𑀆𑀤𑀺𑀫𑁆𑀳𑀺 𑀦 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁄 𑀧𑀦 𑀢𑀁 𑀧𑀬𑁄𑀚𑁂𑀢𑀻𑀢𑀺 𑀬𑀲𑁆𑀫𑀸 𑀧𑀦 𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑁄 𑀢𑀁 𑀕𑀸𑀣𑀁 𑀧𑀬𑁄𑀚𑁂𑀢𑀺 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀓𑀸𑀭𑀡𑁂𑀦, 𑀢𑀲𑁆𑀫𑀸 ‘‘𑀲𑁄𑀴𑀲…𑀧𑁂… 𑀆𑀳𑀸’’𑀢𑀺 𑀆𑀳. 𑀬𑁄𑀚𑀦𑀸𑀦𑀬𑀤𑀲𑁆𑀲𑀦𑀦𑁆𑀢𑀺 𑀬𑁄𑀚𑀦𑀸𑀬 𑀦𑀬𑀤𑀲𑁆𑀲𑀦𑀁.

𑀢𑁂𑀦𑀸𑀢𑀺 ‘‘𑀢𑀁 𑀫𑀘𑁆𑀘𑀼𑀦𑁄 𑀧𑀤’’𑀦𑁆𑀢𑀺 𑀯𑀘𑀦𑁂𑀦. 𑀲𑀩𑁆𑀩𑀁 𑀯𑀺𑀧𑀮𑁆𑀮𑀸𑀲𑀦𑁆𑀢𑀺 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺 𑀯𑀺𑀧𑀮𑁆𑀮𑀸𑀲𑀁. 𑀲𑀸𑀫𑀜𑁆𑀜𑀲𑁆𑀲…𑀧𑁂… 𑀯𑁄𑀳𑀭𑀻𑀬𑀢𑀺 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀲𑀸𑀫𑀜𑁆𑀜𑀁, 𑀲𑁄 𑀯𑀺𑀲𑁂𑀲𑁄. 𑀅𑀢𑁆𑀣𑀢𑁄 𑀧𑀦 𑀲𑀜𑁆𑀜𑀸𑀤𑀬𑁄 𑀏𑀯 𑀭𑀽𑀧𑀸𑀤𑀺𑀯𑀺𑀲𑀬𑀁 𑀯𑀺𑀧𑀭𑀻𑀢𑀸𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑁂 𑀯𑀺𑀧𑀮𑁆𑀮𑀸𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄’’𑀢𑀺𑀆𑀤𑀺𑀫𑀸𑀳.

𑀇𑀦𑁆𑀤𑀚𑀸𑀮𑀸𑀤𑀺𑀯𑀲𑁂𑀦 𑀫𑀡𑀺𑀆𑀤𑀺𑀆𑀓𑀸𑀭𑁂𑀦 𑀉𑀧𑀝𑁆𑀞𑀳𑀦𑁆𑀢𑁂 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑁂 𑀅𑀳𑀁𑀫𑀫𑀸𑀤𑀺𑀓𑀸𑀭𑀡𑀢𑀸𑀬 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀅𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀢𑀁𑀩𑀼𑀤𑁆𑀥𑀺𑀯𑁄𑀳𑀸𑀭𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀅𑀢𑁆𑀢𑀪𑀸𑀯𑁄 𑀲𑀼𑀔𑀸𑀤𑀻𑀦𑀁 𑀯𑀢𑁆𑀣𑀼𑀢𑀸𑀬 ‘‘𑀅𑀢𑁆𑀢𑀪𑀸𑀯𑀯𑀢𑁆𑀣𑀽’’𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀢𑁂𑀳𑀻’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁. 𑀯𑀺𑀧𑀮𑁆𑀮𑀸𑀲𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑁄 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺𑀆𑀤𑀺. 𑀯𑀺𑀲𑀬𑁄 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀸. 𑀅𑀯𑀺𑀚𑁆𑀚𑀸 𑀘…𑀧𑁂… 𑀏𑀯 𑀲𑀫𑁆𑀫𑁄𑀳𑀧𑀼𑀩𑁆𑀩𑀓𑀢𑁆𑀢𑀸 𑀲𑀩𑁆𑀩𑀯𑀺𑀧𑀮𑁆𑀮𑀸𑀲𑀸𑀦𑀁. 𑀘-𑀲𑀤𑁆𑀤𑁄 𑀲𑀼𑀪𑀲𑀼𑀔𑀲𑀜𑁆𑀜𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄.

𑀢𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 ‘‘𑀅𑀯𑀺𑀚𑁆𑀚𑀸 𑀘 𑀲𑀼𑀪𑀲𑀼𑀔𑀲𑀜𑁆𑀜𑀸𑀦𑀁 𑀧𑀘𑁆𑀘𑀬𑁄 𑀏𑀯, 𑀦 𑀢𑀡𑁆𑀳𑀸 𑀏𑀯, 𑀅𑀯𑀺𑀚𑁆𑀚𑀸 𑀲𑀼𑀪𑀲𑀼𑀔𑀲𑀜𑁆𑀜𑀸𑀦𑀜𑁆𑀘 𑀧𑀘𑁆𑀘𑀬𑁄, 𑀦 𑀦𑀺𑀘𑁆𑀘𑀅𑀢𑁆𑀢𑀲𑀜𑁆𑀜𑀸𑀦𑀁 𑀏𑀯𑀸’’𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀺𑀧𑀭𑀻𑀢𑀲𑀜𑁆𑀜𑀸𑀦𑀁 𑀢𑀡𑁆𑀳𑀸, 𑀧𑀘𑁆𑀙𑀺𑀫𑀸𑀦𑀁 𑀅𑀯𑀺𑀚𑁆𑀚𑀸 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀣𑀸𑀧𑀻’’𑀢𑀺𑀆𑀤𑀺. 𑀅𑀯𑀺𑀚𑁆𑀚𑀸𑀲𑀻𑀲𑁂𑀦 𑀘𑁂𑀢𑁆𑀣 𑀤𑀺𑀝𑁆𑀞𑀺𑀬𑀸 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀺𑀦𑀺𑀯𑀼𑀢𑀁 𑀘𑀺𑀢𑁆𑀢’’𑀦𑁆𑀢𑀺, ‘‘𑀬𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄’’𑀢𑀺 𑀘 𑀆𑀤𑀺, 𑀬𑀣𑀸 𑀘 𑀅𑀯𑀺𑀚𑁆𑀚𑀸𑀲𑀻𑀲𑁂𑀦 𑀤𑀺𑀝𑁆𑀞𑀺𑀬𑀸 𑀕𑀳𑀡𑀁, 𑀏𑀯𑀁 𑀤𑀺𑀝𑁆𑀞𑀺𑀲𑀻𑀲𑁂𑀦 𑀅𑀯𑀺𑀚𑁆𑀚𑀸𑀬𑀧𑀺 𑀕𑀳𑀡𑀁 𑀲𑀺𑀬𑀸𑀢𑀺 𑀆𑀳 ‘‘𑀤𑀺𑀝𑁆𑀞𑀺𑀲𑀻𑀲𑁂𑀦 𑀅𑀯𑀺𑀚𑁆𑀚𑀸 𑀯𑀼𑀢𑁆𑀢𑀸’’𑀢𑀺. 𑀢𑀡𑁆𑀳𑀸𑀯𑀺𑀚𑁆𑀚𑀸𑀲𑀼 𑀲𑀼𑀪𑀲𑀼𑀔𑀲𑀜𑁆𑀜𑀸𑀦𑀁 𑀬𑀣𑀸 𑀢𑀡𑁆𑀳𑀸 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀦 𑀏𑀯𑀁 𑀅𑀯𑀺𑀚𑁆𑀚𑀸. 𑀦𑀺𑀘𑁆𑀘𑀅𑀢𑁆𑀢𑀲𑀜𑁆𑀜𑀸𑀦𑀁 𑀧𑀦 𑀬𑀣𑀸 𑀅𑀯𑀺𑀚𑁆𑀚𑀸 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀦 𑀢𑀣𑀸 𑀢𑀡𑁆𑀳𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑁄𑀳𑁄 𑀯𑀺𑀲𑁂𑀲𑀧𑀘𑁆𑀘𑀬𑁄’’𑀢𑀺 𑀆𑀳.

𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁…𑀧𑁂… 𑀳𑁄𑀢𑀻𑀢𑀺 𑀅𑀢𑀻𑀢𑀁𑀲𑁂 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀲𑁆𑀲 𑀩𑀮𑀯𑀪𑀸𑀯𑀸𑀪𑀸𑀯𑀢𑁄. 𑀢𑁂𑀦𑁂𑀯 𑀳𑀺 ‘‘𑀲𑁄 𑀅𑀢𑀻𑀢𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 ‘‘𑀅𑀪𑀺𑀦𑀦𑁆𑀤𑀢𑀻’’𑀢𑀺. 𑀢𑀡𑁆𑀳𑀸𑀯𑀺𑀧𑀮𑁆𑀮𑀸𑀲𑁄𑀢𑀺 𑀢𑀡𑁆𑀳𑀁 𑀉𑀧𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀯𑀺𑀧𑀮𑁆𑀮𑀸𑀲𑁄, 𑀦 𑀳𑀺 𑀢𑀡𑁆𑀳𑀸 𑀲𑀬𑀁 𑀯𑀺𑀧𑀮𑁆𑀮𑀸𑀲𑁄. 𑀢𑁂𑀦𑀸𑀳 ‘‘𑀢𑀡𑁆𑀳𑀸𑀫𑀽𑀮𑀓𑁄 𑀯𑀺𑀧𑀮𑁆𑀮𑀸𑀲𑁄’’𑀢𑀺. 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀯𑀲𑁂𑀦𑀸𑀢𑀺 𑀢𑀡𑁆𑀳𑀼𑀧𑀦𑀺𑀲𑁆𑀲𑀬𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀯𑀲𑁂𑀦, 𑀬𑀢𑁄 𑀲𑁄 ‘‘𑀢𑀡𑁆𑀳𑀸𑀯𑀺𑀧𑀮𑁆𑀮𑀸𑀲𑁄’’𑀢𑀺 𑀯𑀼𑀢𑁆𑀢𑁄. 𑀏𑀢𑁂𑀦𑀸𑀢𑀺 ‘‘𑀬𑁄 𑀢𑀡𑁆𑀳𑀸𑀯𑀺𑀧𑀮𑁆𑀮𑀸𑀲𑁄’’𑀢𑀺𑀆𑀤𑀺𑀧𑀸𑀞𑁂𑀦. 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀧𑀜𑁆𑀘 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀘, 𑀬𑀣𑀸 𑀅𑀢𑁆𑀢𑀦𑁄 𑀕𑀢𑀸𑀬, 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀘 𑀧𑀭𑀺𑀓𑀧𑁆𑀧𑀯𑀲𑁂𑀦 𑀲𑀼𑀪𑀲𑀼𑀔𑀸𑀓𑀸𑀭𑀕𑁆𑀕𑀸𑀳𑀺𑀦𑁄, 𑀦 𑀏𑀯𑀁 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺. 𑀧𑀝𑀺𑀧𑀓𑁆𑀔𑀯𑀲𑁂𑀦𑀧𑀻𑀢𑀺 𑀯𑀺𑀲𑀼𑀤𑁆𑀥𑀺𑀯𑀲𑁂𑀦𑀧𑀺. 𑀬𑀸𑀯 𑀳𑀺 𑀉𑀧𑀓𑁆𑀓𑀺𑀮𑁂𑀲𑀸, 𑀢𑀸𑀯 𑀘𑀺𑀢𑁆𑀢𑀁 𑀦 𑀯𑀺𑀲𑀼𑀚𑁆𑀛𑀢𑁂𑀯. 𑀬𑀤𑀸 𑀘 𑀢𑁂 𑀧𑀳𑀻𑀦𑀸, 𑀢𑀤𑀸 𑀯𑀺𑀲𑀼𑀤𑁆𑀥𑀫𑁂𑀯. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀧𑀸𑀴𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀧𑀮𑁆𑀮𑀸𑀲𑀫𑀼𑀔𑁂𑀦𑁂𑀯 𑀤𑁂𑀲𑀦𑀸𑀬 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀕𑀸𑀣𑀁 𑀦𑀺𑀝𑁆𑀞𑀧𑁂𑀢𑀼’’𑀦𑁆𑀢𑀺.

𑀫𑀸𑀭𑀲𑁆𑀲𑀸𑀢𑀺 𑀓𑀺𑀮𑁂𑀲𑀫𑀸𑀭𑀲𑁆𑀲. 𑀢𑀲𑁆𑀲 𑀳𑀺 𑀯𑀲𑁂 𑀞𑀺𑀢𑁄 𑀲𑁂𑀲𑀫𑀸𑀭𑀸𑀦𑀁 𑀳𑀢𑁆𑀣𑀕𑀢𑁄 𑀏𑀯𑀸𑀢𑀺. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀫𑀸𑀭𑀕𑁆𑀕𑀳𑀡𑁂𑀦𑁂𑀯𑀸’’𑀢𑀺𑀆𑀤𑀺.

𑀫𑀸𑀭𑀩𑀦𑁆𑀥𑀦𑀦𑁆𑀢𑀺 𑀲𑀢𑁆𑀢𑀫𑀸𑀭𑀧𑀓𑁆𑀔𑁂 𑀫𑀸𑀭𑀲𑁆𑀲 𑀩𑀦𑁆𑀥𑀦𑀦𑁆𑀢𑀺 𑀫𑀸𑀭𑀩𑀦𑁆𑀥𑀦𑀁. 𑀲𑁄 𑀳𑀺 𑀓𑀺𑀮𑁂𑀲𑀩𑀦𑁆𑀥𑀦𑀪𑀽𑀢𑁂 𑀅𑀢𑁆𑀢𑀦𑁄 𑀲𑀫𑀸𑀭𑀓𑀧𑀭𑀺𑀲𑁂 𑀫𑀜𑁆𑀜𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑁆𑀢𑀮𑀺…𑀧𑁂… 𑀫𑁄𑀓𑁆𑀔𑀲𑀻’’𑀢𑀺 (𑀫𑀳𑀸𑀯. 𑁩𑁩). 𑀇𑀢𑀭𑀫𑀸𑀭𑀧𑀓𑁆𑀔𑁂 𑀫𑀸𑀭𑁄𑀯 𑀩𑀦𑁆𑀥𑀦𑀦𑁆𑀢𑀺 𑀫𑀸𑀭𑀩𑀦𑁆𑀥𑀦𑀁. 𑀯𑀺𑀲𑀗𑁆𑀔𑀸𑀭𑁄 𑀦𑀺𑀩𑁆𑀩𑀸𑀦𑀁.

𑀫𑁄𑀳𑀲𑀫𑁆𑀧𑀬𑁄𑀕𑀢𑁄 𑀘𑀺𑀢𑁆𑀢𑀁 ‘‘𑀫𑀽𑀴𑁆𑀳’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀭𑀢𑁆𑀢𑀤𑀼𑀝𑁆𑀞𑀸𑀦𑀫𑁆𑀧𑀺 𑀫𑀽𑀴𑁆𑀳𑀢𑀸𑀬 𑀲𑀩𑁆𑀪𑀸𑀯𑁂 ‘‘𑀫𑀽𑀴𑁆𑀳’’𑀦𑁆𑀢𑀺 𑀯𑀺𑀲𑀼𑀁 𑀯𑀘𑀦𑀁 𑀆𑀯𑁂𑀡𑀺𑀓𑀫𑁄𑀳𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀺𑀦𑁆𑀦𑀁 𑀫𑁄𑀫𑀽𑀳𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀲𑁂𑀦𑀸’’𑀢𑀺 𑀆𑀳. 𑀏𑀯𑀦𑁆𑀢𑀺 𑀏𑀯𑀁 𑀭𑀸𑀕𑀸𑀤𑀺𑀅𑀓𑀼𑀲𑀮𑀧𑁆𑀧𑀢𑁆𑀢𑀺𑀬𑀸 𑀓𑀼𑀲𑀮𑀪𑀡𑁆𑀟𑀘𑁆𑀙𑁂𑀤𑀦𑀢𑁄 𑀅𑀭𑀓𑁆𑀔𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀲𑀩𑁆𑀩𑁄𑀧𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺 …𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀲𑀩𑁆𑀩𑁂𑀧𑀻𑀢𑀺 ‘‘𑀅𑀭𑀓𑁆𑀔𑀺𑀢𑀁, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀳𑀢𑀁, 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢’’𑀦𑁆𑀢𑀺 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀯𑀼𑀢𑁆𑀢𑀥𑀫𑁆𑀫𑀸.

𑀘𑀓𑁆𑀔𑀼𑀦𑀸𑀢𑀺 𑀤𑁆𑀯𑀸𑀭𑁂𑀦. 𑀭𑀽𑀧𑀦𑁆𑀢𑀺 𑀯𑀺𑀲𑀪𑀸𑀕𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀭𑀽𑀧𑀸𑀬𑀢𑀦𑀁. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻𑀢𑀺 ‘‘𑀇𑀢𑁆𑀣𑀻’’𑀢𑀺 𑀯𑀸 𑀧𑀼𑀭𑀺𑀲𑁄’’𑀢𑀺 𑀯𑀸 ‘‘𑀲𑀼𑀪’’𑀦𑁆𑀢𑀺 𑀯𑀸 ‘‘𑀅𑀲𑀼𑀪’’𑀦𑁆𑀢𑀺 𑀯𑀸 𑀧𑀭𑀺𑀓𑀧𑁆𑀧𑀺𑀢𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀯𑀸 𑀕𑀳𑀡𑀲𑀻𑀮𑁄. 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻𑀢𑀺 𑀳𑀢𑁆𑀣𑀧𑀸𑀤𑀳𑀲𑀺𑀢𑀓𑀣𑀺𑀢𑀸𑀤𑀺𑀧𑁆𑀧𑀪𑁂𑀤𑁂 𑀓𑀺𑀮𑁂𑀲𑀸𑀦𑀁 𑀅𑀦𑀼 𑀅𑀦𑀼 𑀩𑁆𑀬𑀜𑁆𑀚𑀦𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑀜𑁆𑀜𑀺𑀢𑁂 𑀆𑀓𑀸𑀭𑁂 𑀕𑀡𑁆𑀳𑀸𑀢𑀺, 𑀢𑁂𑀲𑀁 𑀯𑀸 𑀕𑀳𑀡𑀲𑀻𑀮𑁄. 𑀬𑀢𑁆𑀯𑀸𑀥𑀺𑀓𑀭𑀡𑀦𑁆𑀢𑀺 𑀬𑀁 𑀦𑀺𑀫𑀺𑀢𑁆𑀢𑀁, 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢’’𑀦𑁆𑀢𑀺, 𑀬𑁄 ‘‘𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻, 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻’’𑀢𑀺 𑀘 𑀯𑀼𑀢𑁆𑀢𑁄 𑀧𑀼𑀕𑁆𑀕𑀮𑁄, 𑀢𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀤𑁆𑀯𑀸𑀭𑀁 𑀅𑀲𑀁𑀯𑀼𑀢𑀁 𑀲𑀢𑀺𑀓𑀯𑀸𑀝𑁂𑀦 𑀅𑀧𑀺𑀳𑀺𑀢𑀁 𑀓𑀢𑁆𑀯𑀸 𑀯𑀢𑁆𑀢𑀦𑁆𑀢𑀁, 𑀢𑀲𑁆𑀲 𑀘 𑀭𑀽𑀧𑀲𑁆𑀲 𑀇𑀝𑁆𑀞𑀸𑀓𑀸𑀭𑀕𑁆𑀕𑀳𑀡𑁂 𑀅𑀪𑀺𑀚𑁆𑀛𑀸, 𑀅𑀦𑀺𑀝𑁆𑀞𑀸𑀓𑀸𑀭𑀕𑁆𑀕𑀳𑀡𑁂 𑀤𑁄𑀫𑀦𑀲𑁆𑀲𑀁, 𑀅𑀲𑀫𑀧𑁂𑀓𑁆𑀔𑀦𑁂 𑀫𑁄𑀳𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀏𑀯𑀁 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸, 𑀅𑀜𑁆𑀜𑁂 𑀘 𑀮𑀸𑀫𑀓𑀝𑁆𑀞𑁂𑀦 𑀧𑀸𑀧𑀓𑀸 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀅𑀦𑀼 𑀅𑀦𑀼 𑀧𑀯𑀢𑁆𑀢𑁂𑀬𑁆𑀬𑀼𑀁.

𑀢𑀲𑁆𑀲 𑀲𑀁𑀯𑀭𑀸𑀬 𑀦 𑀧𑀝𑀺𑀧𑀚𑁆𑀚𑀢𑀻𑀢𑀺 𑀢𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀲 𑀲𑀁𑀯𑀭𑀸𑀬 𑀲𑀢𑀺𑀓𑀯𑀸𑀝𑁂𑀦 𑀧𑀺𑀤𑀳𑀦𑀢𑁆𑀣𑀁 𑀦 𑀧𑀝𑀺𑀧𑀚𑁆𑀚𑀢𑀺. 𑀲𑀸 𑀧𑀦 𑀅𑀧𑁆𑀧𑀝𑀺𑀧𑀢𑁆𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑀸𑀭𑀓𑁆𑀔𑀸𑀲𑀁𑀯𑀭𑀲𑁆𑀲 𑀅𑀦𑀼𑀧𑁆𑀧𑀸𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀭𑀓𑁆𑀔𑀢𑀺…𑀧𑁂… 𑀆𑀧𑀚𑁆𑀚𑀢𑀻’’𑀢𑀺 𑀆𑀳. 𑀚𑀯𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀳𑀺 𑀅𑀲𑀁𑀯𑀭𑁄 𑀢𑁂𑀦 𑀤𑁆𑀯𑀸𑀭𑁂𑀦 𑀧𑀯𑀢𑁆𑀢𑀦𑀢𑁄 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀦𑀯𑀲𑁂𑀦 𑀘𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀔𑁂𑀧𑀢𑁄 𑀘 𑀯𑀺𑀢𑁆𑀣𑀸𑀭𑁄 𑀅𑀜𑁆𑀜𑁄’’𑀢𑀺 𑀓𑀢𑁆𑀯𑀸 𑀢𑀁 𑀲𑀫𑀼𑀘𑁆𑀘𑀺𑀦𑀦𑁆𑀢𑁄 ‘‘𑀬𑀸 𑀘 𑀔𑁄 𑀇𑀫𑀸’’𑀢𑀺𑀆𑀤𑀺𑀫𑀸𑀳.

𑀬𑀣𑀸𑀯𑀼𑀢𑁆𑀢𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀥𑀫𑁆𑀫𑀸, 𑀢𑁂𑀲𑀁 𑀯𑀢𑁆𑀣𑀽𑀦𑀺 𑀯𑀸. 𑀢𑁂 𑀳𑀺 𑀲𑀫𑀼𑀤𑀬𑀯𑀚𑁆𑀚𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. ‘‘𑀏𑀯’’𑀦𑁆𑀢𑀺 𑀇𑀫𑀺𑀦𑀸 𑀦𑁂𑀢𑁆𑀢𑀺𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀦𑀺𑀤𑁆𑀥𑀸𑀭𑀺𑀢𑀧𑁆𑀧𑀓𑀸𑀭𑁂𑀦. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀁 ‘‘𑀅𑀭𑀓𑁆𑀔𑀺𑀢𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀕𑀸𑀣𑀸𑀬𑀁.

𑀬𑀤𑀺𑀧𑀺 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀧𑀸𑀴𑀺𑀬𑀁 ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀕𑀸𑀣𑀸 𑀲𑀭𑀽𑀧𑀢𑁄 𑀦 𑀕𑀳𑀺𑀢𑀸, 𑀅𑀢𑁆𑀣𑀢𑁄 𑀧𑀦 ‘‘𑀢𑁂𑀲𑀁 𑀪𑀕𑀯𑀸 𑀧𑀭𑀺𑀜𑁆𑀜𑀸𑀬𑀸’’𑀢𑀺𑀆𑀤𑀺𑀦𑀸 𑀕𑀳𑀺𑀢𑀸 𑀏𑀯𑀸𑀢𑀺 𑀢𑀲𑁆𑀲𑀸 𑀕𑀳𑀺𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀣𑀁 𑀤𑁂𑀲𑁂𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀕𑀸𑀣𑀁 𑀉𑀤𑁆𑀥𑀭𑀺.

𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀢𑀺 ‘‘𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀪𑀸𑀯𑀦𑀸𑀓𑀫𑁆𑀫𑀁 𑀓𑀭𑁄𑀦𑁆𑀢𑁄, 𑀪𑀸𑀯𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀬 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁫𑁦) 𑀲𑀫𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺. 𑀦𑀺𑀭𑀬𑀕𑀢𑀺𑀬𑀁 𑀤𑀼𑀓𑁆𑀔𑀤𑀼𑀓𑁆𑀔𑀢𑀸, 𑀲𑀼𑀕𑀢𑀺𑀯𑀺𑀲𑁂𑀲𑁂 𑀩𑁆𑀭𑀳𑁆𑀫𑀮𑁄𑀓𑁂𑀓𑀤𑁂𑀲𑁂 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸, 𑀇𑀢𑀭𑀢𑁆𑀣 𑀤𑁆𑀯𑁂 𑀢𑀺𑀲𑁆𑀲𑁄𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸𑀲𑀫𑁆𑀪𑀯𑀁 𑀢𑀺𑀯𑀺𑀥𑀤𑀼𑀓𑁆𑀔𑀢𑀸𑀬𑁄𑀕𑁂𑀦𑀸’’𑀢𑀺.

𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.