𑁧𑁨. 𑀑𑀢𑀭𑀡𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁪𑁨. 𑀇𑀦𑁆𑀤𑁆𑀭𑀺𑀬𑁂𑀳𑀻𑀢𑀺 𑀓𑀭𑀡𑁂 𑀓𑀭𑀡𑀯𑀘𑀦𑀁 ‘‘𑀫𑀕𑁆𑀕𑁂𑀦 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬, ‘‘𑀨𑀭𑀲𑀼𑀦𑀸 𑀙𑀺𑀦𑁆𑀤𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀯𑀺𑀬 𑀘. 𑀑𑀢𑀭𑀡𑀸𑀢𑀺 𑀅𑀦𑀼𑀧𑁆𑀧𑀯𑁂𑀲𑀦𑀸.

𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀅𑀥𑀺𑀘𑀺𑀢𑁆𑀢𑀅𑀦𑀼𑀬𑀼𑀢𑁆𑀢𑀸𑀦𑀁 𑀲𑀤𑁆𑀤𑀳𑀦𑀼𑀲𑁆𑀲𑀳𑀦𑀼𑀧𑀝𑁆𑀞𑀸𑀦𑀲𑀫𑀸𑀤𑀳𑀦𑁂𑀳𑀺 𑀲𑀤𑁆𑀥𑀸𑀤𑀻𑀲𑀼 𑀉𑀧𑀓𑀭𑁄𑀦𑁆𑀢𑁂𑀲𑀼 𑀏𑀯 𑀧𑀜𑁆𑀜𑀸 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀤𑁆𑀥𑀸..𑀧𑁂… 𑀯𑀼𑀢𑁆𑀢𑀸𑀦𑀻’’𑀢𑀺 𑀆𑀳. 𑀦𑁄 𑀘 𑀪𑀯𑀗𑁆𑀕𑀸𑀢𑀺 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀺𑀓𑀸𑀭𑀡𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺.

𑁪𑁩. 𑀢𑀣𑀸 𑀯𑀼𑀢𑁆𑀢𑁄𑀢𑀺 ‘‘𑀦𑀺𑀲𑁆𑀲𑀬𑁄’’𑀢𑀺 𑀯𑀼𑀢𑁆𑀢𑁄. 𑀘𑁂𑀢𑀦𑀸𑀲𑀻𑀲𑁂𑀦 𑀢𑀡𑁆𑀳𑀁 𑀏𑀯 𑀯𑀤𑀢𑀺 𑀘𑁂𑀢𑀦𑀸𑀲𑀳𑀘𑀭𑀡𑀢𑁄.

𑀭𑀢𑁆𑀢𑀲𑁆𑀲𑀸𑀢𑀺 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀲𑁆𑀲. 𑀬𑁂𑀦 𑀧𑀼𑀕𑁆𑀕𑀮𑁄 ‘‘𑀭𑀢𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀭𑀸𑀕𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑀻 𑀲𑀼𑀔𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀢𑀢𑁆𑀣 𑀢𑀲𑁆𑀲 𑀅𑀦𑀼𑀲𑀬𑀦𑀢𑁄. 𑀢𑁂𑀦𑀸𑀳 ‘‘𑀲𑀼𑀔𑀸𑀬…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑁂𑀦𑀸𑀳 ‘‘𑀢𑀣𑀸’’𑀢𑀺𑀆𑀤𑀺.

𑀢𑀸𑀦𑀺 𑀏𑀯 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀲𑀼𑀔𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀦𑀺. ‘‘𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀻’’𑀢𑀺 𑀯𑀘𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀥 𑀯𑁂𑀤𑀦𑀸𑀲𑀻𑀲𑁂𑀦 𑀘𑁂𑀢𑀦𑀸 𑀯𑀼𑀢𑁆𑀢𑀸’’𑀢𑀺. 𑀦 𑀳𑀺 𑀯𑁂𑀤𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀳𑁄𑀢𑀺. 𑀢𑀡𑁆𑀳𑀸𑀬, 𑀤𑀺𑀝𑁆𑀞𑀺𑀬𑀸𑀢𑀺 𑀘 𑀉𑀧𑀬𑁄𑀕𑁂 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀡𑁆𑀳𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀇𑀤𑀸𑀦𑀺 𑀉𑀧𑀬𑁄𑀕𑀯𑀲𑁂𑀦𑁂𑀯 ‘‘𑀢𑀡𑁆𑀳𑀸𑀬𑀸’’𑀢𑀺𑀆𑀤𑀻𑀦𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂𑀲𑀥𑀫𑁆𑀫𑀸𑀦𑀦𑁆𑀢𑀺 𑀢𑀡𑁆𑀳𑀸𑀯𑀚𑁆𑀚𑀺𑀢𑀅𑀯𑀺𑀲𑀺𑀝𑁆𑀞𑀥𑀫𑁆𑀫𑀸𑀦𑀁. 𑀢𑀡𑁆𑀳𑀸𑀬 𑀦𑀺𑀲𑁆𑀲𑀬𑀪𑀸𑀯𑁂𑀢𑀺 𑀬𑀤𑀸 𑀢𑀡𑁆𑀳𑀸 𑀢𑁂𑀲𑀁 𑀦𑀺𑀲𑁆𑀲𑀬𑁄 𑀳𑁄𑀢𑀺.

𑀢𑀡𑁆𑀳𑀸𑀬 𑀲𑁂𑀲𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀢𑀺 𑀬𑀤𑀸 𑀲𑁂𑀲𑀥𑀫𑁆𑀫𑀸 𑀢𑀡𑁆𑀳𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. ‘‘𑀓𑀭𑀚𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀸’’𑀢𑀺 𑀇𑀫𑀺𑀦𑀸 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀦𑀺𑀲𑁆𑀲𑀺𑀢𑀸𑀧𑀺 𑀕𑀳𑀺𑀢𑀸 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑀢𑁄. 𑀓𑀸𑀭𑀡𑀪𑀸𑀯𑀦𑁆𑀢𑀺 𑀧𑀭𑀫𑁆𑀧𑀭𑀳𑁂𑀢𑀼𑀪𑀸𑀯𑀁. 𑀢𑀡𑁆𑀳𑀸𑀤𑀺𑀝𑁆𑀞𑀺𑀉𑀧𑀬𑁂𑀦𑀸𑀢𑀺 𑀤𑀺𑀝𑁆𑀞𑀺𑀉𑀧𑀬𑁂𑀦 𑀘 𑀤𑀺𑀝𑁆𑀞𑀺𑀲𑀳𑀕𑀢𑀢𑀡𑁆𑀳𑀸𑀉𑀧𑀬𑁂𑀦 𑀘.

‘‘𑀆𑀕𑀢𑀻𑀢𑀺 𑀇𑀥𑀸𑀕𑀢𑀺, 𑀕𑀢𑀻𑀢𑀺 𑀧𑁂𑀘𑁆𑀘𑀪𑀯𑁄’’𑀢𑀺 𑀧𑀤𑀤𑁆𑀯𑀬𑁂𑀦 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 𑀧𑀸𑀴𑀺𑀬𑀁 ‘‘𑀆𑀕𑀢𑀺𑀕𑀢𑀻𑀧𑀺 𑀦 𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀥 𑀳𑀼𑀭𑀦𑁆𑀢𑀺 𑀤𑁆𑀯𑀸𑀭𑀸𑀭𑀫𑁆𑀫𑀡𑀥𑀫𑁆𑀫𑀸 𑀤𑀲𑁆𑀲𑀺𑀢𑀸 𑀆𑀲𑀦𑁆𑀦𑀤𑀽𑀭𑀪𑀸𑀯𑁂𑀳𑀺 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀳𑀺𑀢𑀢𑁆𑀢𑀸. 𑀇𑀥 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑀸 ‘‘𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀘𑀢𑀼𑀩𑁆𑀬𑀽𑀳𑀳𑀸𑀭𑁂 𑀧𑀦 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀥𑀫𑁆𑀫𑀸 𑀢𑀣𑀸 𑀯𑀼𑀢𑁆𑀢𑀸. 𑀓𑀸𑀭𑀡𑀪𑀽𑀢𑁂𑀦 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑁂𑀦, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑁂𑀦 𑀘. 𑀬𑁂 𑀥𑀫𑁆𑀫𑀸 𑀉𑀧𑀸𑀤𑀸𑀬 ‘‘𑀅𑀢𑁆𑀢𑀸’’𑀢𑀺 𑀲𑀫𑀜𑁆𑀜𑀸, 𑀢𑁂𑀲𑀁 𑀯𑀺𑀜𑁆𑀜𑀸𑀡𑀸𑀤𑀺𑀥𑀫𑁆𑀫𑀸𑀦𑀁 𑀅𑀪𑀸𑀯𑁂𑀦 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀮𑁄𑀫𑀢𑁄 𑀧𑀘𑁆𑀘𑀬𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀸𑀴𑀺𑀬𑀁 ‘‘𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀯𑀢𑁆𑀯𑀸 𑀦𑀦𑀼 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀤𑀼𑀯𑀺𑀥𑁄’’𑀢𑀺𑀆𑀤𑀺𑀦𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀯𑀺𑀪𑀢𑁆𑀢𑁄. 𑀢𑀤𑀢𑁆𑀣𑀢𑀸𑀬𑀸𑀢𑀺 𑀯𑀻𑀢𑀭𑀸𑀕𑀯𑀺𑀫𑀼𑀢𑁆𑀢𑀺𑀅𑀢𑁆𑀣𑀢𑀸𑀬. 𑀢𑀩𑁆𑀪𑀸𑀯𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀪𑀸𑀯𑀁.

𑀑𑀢𑀭𑀡𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.