𑁧𑁦. 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁩𑁭. 𑀅𑀜𑁆𑀜𑀫𑀜𑁆𑀜𑁂𑀳𑀻𑀢𑀺 𑀅𑀜𑁆𑀜𑁂𑀳𑀺 𑀅𑀜𑁆𑀜𑁂𑀳𑀺. 𑀆𑀬𑀢𑀺𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂. 𑀓𑀣𑀜𑁆𑀘𑀻𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦, 𑀧𑀞𑀫𑀁 𑀯𑀼𑀢𑁆𑀢𑁂𑀦 𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀬𑀸𑀬𑀯𑀘𑀦𑀁 𑀦𑀺𑀤𑁆𑀤𑀺𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀢𑁆𑀣. 𑀢𑀲𑁆𑀫𑀺𑀁 𑀔𑀡𑁂𑀢𑀺 𑀧𑀭𑀺𑀬𑀸𑀬𑀯𑀘𑀦𑀲𑁆𑀲 𑀯𑀼𑀢𑁆𑀢𑀓𑁆𑀔𑀡𑁂. 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀦𑁆𑀢𑀺 𑀆𑀭𑀫𑁆𑀫𑀡𑀦𑁆𑀢𑀭𑁂𑀳𑀺 𑀯𑀺𑀯𑀺𑀥𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁. 𑀅𑀜𑁆𑀜𑀯𑀺𑀳𑀺𑀢𑀸𑀦𑀦𑁆𑀢𑀺 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀸𑀦𑀁. 𑀓𑀲𑁆𑀫𑀸 𑀧𑀦 𑀅𑀜𑁆𑀜𑁂𑀦 𑀧𑀭𑀺𑀬𑀸𑀬𑁂𑀦 𑀢𑀤𑀢𑁆𑀣𑀸𑀯𑀩𑁄𑀥𑀦𑀁, 𑀦𑀦𑀼 𑀢𑁂𑀦 𑀯𑀼𑀢𑁆𑀢𑁂 𑀤𑀴𑁆𑀳𑀻𑀓𑀭𑀡𑀁 𑀳𑁄𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑁂𑀦𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀤𑀜𑁆𑀜𑁂𑀲𑀦𑁆𑀢𑀺 𑀢𑁂𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀤𑀻𑀳𑀺 𑀅𑀜𑁆𑀜𑁂𑀲𑀁, 𑀬𑁂𑀳𑀺 𑀧𑀞𑀫𑀁 𑀯𑀘𑀦𑀁 𑀲𑀫𑁆𑀫𑀤𑁂𑀯 𑀕𑀳𑀺𑀢𑀁. 𑀢𑀢𑁆𑀣𑀸𑀢𑀺 𑀯𑀼𑀢𑁆𑀢𑀯𑀘𑀦𑁂𑀦𑁂𑀯 𑀧𑀼𑀦𑀧𑁆𑀧𑀼𑀦𑀁 𑀯𑀘𑀦𑁂. 𑀅𑀥𑀺𑀕𑀢𑀅𑀦𑁆𑀯𑀢𑁆𑀣𑀢𑀸𑀬 𑀧𑀼𑀦𑀭𑀼𑀢𑁆𑀢𑀺 𑀧𑀭𑀺𑀯𑀚𑁆𑀚𑀦𑀢𑁆𑀣𑀁 𑀯𑀺𑀲𑁂𑀲𑀦𑀪𑀸𑀯𑁂𑀦 𑀢𑀸𑀳𑀺 𑀢𑀸𑀳𑀺 𑀲𑀜𑁆𑀜𑀸𑀳𑀺𑀧𑀺 𑀅𑀬𑀫𑁆𑀧𑀺 𑀲𑀤𑁆𑀤𑁄 𑀇𑀫𑀲𑁆𑀲𑀢𑁆𑀣𑀲𑁆𑀲 𑀯𑀸𑀘𑀓𑁄, 𑀅𑀬𑀫𑁆𑀧𑀺 𑀲𑀤𑁆𑀤𑁄 𑀇𑀫𑀲𑁆𑀲𑀢𑁆𑀣𑀲𑁆𑀲 𑀯𑀸𑀘𑀓𑁄𑀢𑀺 𑀧𑀜𑁆𑀜𑀸𑀧𑀦𑁂𑀳𑀺. 𑀤𑁂𑀲𑁂𑀢𑀩𑁆𑀩𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑀦𑀺𑀩𑀦𑁆𑀥𑀦𑀁 𑀞𑀧𑀦𑀁. 𑀢𑀢𑁆𑀣𑀸𑀢𑀺 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀬𑀁. 𑀩𑀻𑀚𑀸𑀯𑀸𑀧𑀦𑀁 𑀳𑁂𑀢𑀼𑀲𑀫𑁆𑀧𑀸𑀤𑀦𑀁.

𑀏𑀯𑀁 𑀪𑀕𑀯𑀢𑁄 𑀧𑀭𑀺𑀬𑀸𑀬𑀤𑁂𑀲𑀦𑀸𑀬𑀁 𑀅𑀦𑁂𑀓𑀸𑀦𑀺 𑀧𑀬𑁄𑀚𑀦𑀸𑀦𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸𑀬 𑀏𑀯𑀁 𑀢𑀣𑀸𑀕𑀢𑀸 𑀩𑀼𑀤𑁆𑀥𑀮𑀻𑀮𑀸𑀬 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀩𑀳𑀼𑀦𑀸’’𑀢𑀺𑀆𑀤𑀺𑀫𑀸𑀳.

𑀧𑀸𑀴𑀺𑀬𑀁 ‘‘𑀧𑀺𑀳𑀸 𑀦𑀸𑀫 𑀬𑀸 𑀯𑀢𑁆𑀢𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀧𑀢𑁆𑀣𑀦𑀸’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀦𑀸𑀕𑀢𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀬𑁆𑀬𑀢𑀭𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀣𑀯𑀺𑀲𑀬𑀸 𑀢𑀡𑁆𑀳𑀸 𑀧𑀺𑀳𑀸’’𑀢𑀺 𑀆𑀳.

𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀧𑀝𑀺𑀧𑀸𑀮𑀦𑀸𑀢𑀺 𑀇𑀫𑀲𑁆𑀫𑀺𑀁 𑀯𑀸 𑀧𑀤𑁂 𑀧𑀺𑀳𑀸𑀬 𑀏𑀯𑀢𑁆𑀣𑀯𑀲𑁂𑀦 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀣𑀯𑀺𑀲𑀬𑀪𑀸𑀯𑀤𑀻𑀧𑀦𑀢𑁄.

𑀥𑀫𑁆𑀫𑀸𑀭𑀫𑁆𑀫𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸 ‘‘𑀥𑀫𑁆𑀫𑀸𑀭𑀫𑁆𑀫𑀡’’𑀦𑁆𑀢𑁆𑀯𑁂𑀯 𑀕𑀳𑀡𑀁 𑀕𑀢𑀸. 𑀘𑀢𑀼𑀯𑀻𑀲𑀢𑀺 𑀧𑀤𑀸𑀦𑀻𑀢𑀺 𑀏𑀢𑁆𑀣 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀙𑀓𑁆𑀓𑀸𑀦𑀁 𑀯𑀲𑁂𑀦 𑀘𑀢𑀼𑀯𑀻𑀲 𑀓𑁄𑀝𑁆𑀞𑀸𑀲𑀸.

𑁩𑁮. 𑀲𑀸𑀬𑁂𑀯 𑀧𑀢𑁆𑀣𑀦𑀸𑀓𑀸𑀭𑁂𑀦 𑀥𑀫𑁆𑀫𑀦𑀦𑁆𑀤𑀻𑀢𑀺𑀆𑀤𑀺𑀫𑀸𑀳𑀸𑀢𑀺 𑀏𑀢𑁆𑀣 𑀅𑀬𑀫𑀢𑁆𑀣𑁄 𑁋 𑀲𑀸 𑀏𑀯 𑀧𑀢𑁆𑀣𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀸 𑀆𑀲𑀸𑀤𑀺𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸 𑀢𑀡𑁆𑀳𑀸 𑀭𑀽𑀧𑀸𑀤𑀺𑀥𑀫𑁆𑀫𑁂𑀲𑀼 𑀦𑀦𑁆𑀤𑀦𑀝𑁆𑀞𑁂𑀦 𑀥𑀫𑁆𑀫𑀦𑀦𑁆𑀤𑀻. 𑀢𑁂𑀲𑀁 𑀏𑀯 𑀧𑀺𑀬𑀸𑀬𑀦𑀝𑁆𑀞𑁂𑀦 𑀥𑀫𑁆𑀫𑀧𑁂𑀫𑀁. 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀞𑀸𑀦𑀢𑁄 𑀥𑀫𑁆𑀫𑀚𑁆𑀛𑁄𑀲𑀸𑀦𑀦𑁆𑀢𑀺.

𑀇𑀫𑀺𑀦𑀸𑀧𑀻𑀢𑀺 𑀦 𑀓𑁂𑀯𑀮𑀁 ‘‘𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺𑀆𑀤𑀺𑀆𑀯𑁂𑀡𑀺𑀓𑀧𑀭𑀺𑀬𑀸𑀬𑁂𑀦𑁂𑀯 𑀯𑁂𑀯𑀘𑀦𑀁 𑀯𑀢𑁆𑀢𑀩𑁆𑀩𑀁, 𑀅𑀣 𑀔𑁄 𑀇𑀫𑀺𑀦𑀸 𑀆𑀥𑀺𑀧𑀢𑁂𑀬𑁆𑀬𑀸𑀤𑀺𑀲𑀸𑀥𑀸𑀭𑀡𑀧𑀭𑀺𑀬𑀸𑀬𑁂𑀦𑀧𑀺 𑀯𑁂𑀯𑀘𑀦𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸𑀯 𑀦𑀬𑁂𑀦𑀸𑀢𑀺 𑀏𑀢𑁂𑀦 𑀧𑀭𑀺𑀬𑀸𑀬𑀯𑀘𑀦𑁂𑀦. 𑀦 𑀳𑀺 𑀤𑁂𑀲𑀦𑀢𑁆𑀣𑀲𑀸𑀥𑀦𑀁 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀧𑀸𑀴𑀺𑀦𑀬𑀤𑀲𑁆𑀲𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀩𑀮𑀦𑀺𑀧𑁆𑀨𑀢𑁆𑀢𑀺𑀕𑀢𑁄𑀢𑀺𑀆𑀤𑀻𑀲𑀼 𑀤𑀲𑀲𑀼 𑀢𑀣𑀸𑀕𑀢𑀩𑀮𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀭𑀺𑀧𑀽𑀭𑀺𑀁 𑀕𑀢𑁄. 𑀲𑀫𑁆𑀩𑁄𑀥𑀺𑀧𑀳𑀸𑀦𑀦𑁆𑀢𑀭𑀸𑀬𑀤𑁂𑀲𑀦𑀸 𑀯𑀺𑀲𑁂𑀲𑀘𑁄𑀤𑀦𑀸𑀲𑀼 𑀯𑀺𑀲𑀸𑀭𑀤𑀪𑀸𑀯𑀲𑀗𑁆𑀔𑀸𑀢𑀸𑀦𑀺 𑀘𑀢𑁆𑀢𑀸𑀭𑀺 𑀜𑀸𑀡𑀸𑀦𑀺 𑀧𑀢𑁆𑀢𑁄 𑀅𑀥𑀺𑀕𑀢𑁄𑀢𑀺 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄.

𑀮𑁄𑀪𑀚𑁆𑀛𑀸𑀲𑀬𑀸𑀤𑀺𑀅𑀚𑁆𑀛𑀸𑀲𑀬𑀁 𑀯𑀺𑀲𑁂𑀲𑁂𑀦 𑀅𑀢𑀺𑀯𑀢𑁆𑀢𑁄𑀢𑀺 𑀅𑀚𑁆𑀛𑀸𑀲𑀬𑀯𑀻𑀢𑀺𑀯𑀢𑁆𑀢𑁄. 𑀅𑀢𑀻𑀢𑀳𑁂𑀢𑀼𑀲𑀗𑁆𑀔𑁂𑀧𑀸𑀤𑀺𑀲𑀗𑁆𑀔𑁂𑀧𑀯𑀺𑀭𑀳𑀺𑀢𑀢𑀸𑀬 𑀅𑀲𑀗𑁆𑀔𑁂𑀧𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁, 𑀅𑀓𑀼𑀧𑁆𑀧𑀥𑀫𑁆𑀫𑀢𑀸𑀬 𑀕𑀼𑀡𑁂𑀳𑀺 𑀯𑀸 𑀅𑀲𑀗𑁆𑀔𑁂𑀧𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀕𑀢𑁄 𑀉𑀧𑀕𑀢𑁄𑀢𑀺 𑀅𑀲𑀗𑁆𑀔𑁂𑀧𑀕𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀉𑀤𑁆𑀥𑁂𑀬𑁆𑀬𑀦𑁆𑀢𑀺 𑀉𑀤𑁆𑀥𑀭𑀺𑀢𑀩𑁆𑀩𑀁.

𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀁 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀧𑀸𑀢𑀺, 𑀲𑀦𑁆𑀢𑁂𑀦 𑀲𑀼𑀔𑁂𑀦 𑀭𑀫𑁂𑀢𑀺 𑀘𑀸𑀢𑀺 𑀯𑀸 𑀧𑀸𑀭𑀁.

𑀅𑀪𑀽𑀢𑀧𑀼𑀩𑁆𑀩𑀢𑁆𑀢𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸, 𑀢𑁂𑀦𑀲𑁆𑀲 𑀦𑀺𑀘𑁆𑀘𑀢𑀁𑀯 𑀯𑀺𑀪𑀸𑀯𑁂𑀢𑀺 𑀓𑁂𑀦𑀘𑀺 𑀤𑁂𑀯𑀢𑁄𑀧𑀲𑀕𑁆𑀕𑀸𑀤𑀺𑀦𑀸 𑀅𑀦𑀼𑀧𑀲𑀚𑁆𑀚𑀦𑀻𑀬𑀢𑁆𑀢𑀸 𑀅𑀦𑀼𑀧𑀲𑀝𑁆𑀞𑀢𑁆𑀢𑀸.

‘‘𑀤𑀼𑀧𑁆𑀧𑀲𑁆𑀲’’𑀦𑁆𑀢𑀺𑀧𑀺 𑀧𑀸𑀴𑀺, 𑀤𑀼𑀭𑀥𑀺𑀕𑀫𑀦𑁆𑀢𑀺 𑀅𑀢𑁆𑀣𑁄. 𑀕𑀼𑀡𑀲𑁄𑀪𑀸𑀲𑀼𑀭𑀪𑀺𑀪𑀸𑀯𑁂𑀦𑀸𑀢𑀺 𑀕𑀼𑀡𑁂𑀳𑀺 𑀲𑁄𑀪𑀸𑀬, 𑀲𑀼𑀕𑀦𑁆𑀥𑀺𑀪𑀸𑀯𑁂𑀦 𑀘.

𑀬𑀣𑀸 𑀅𑀓𑁆𑀔𑀡𑀯𑁂𑀥𑀻 𑀧𑀼𑀕𑁆𑀕𑀮𑁄 𑀲𑀺𑀧𑁆𑀧𑀦𑀺𑀧𑁆𑀨𑀢𑁆𑀢𑀺𑀬𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬 𑀅𑀘𑀺𑀭𑀓𑁆𑀔𑀡𑀸𑀮𑁄𑀓𑁂𑀦 𑀅𑀢𑀺𑀲𑀼𑀔𑀼𑀫𑀫𑁆𑀧𑀺 𑀤𑀽𑀭𑀕𑀢𑀁 𑀮𑀓𑁆𑀔𑀁 𑀯𑀺𑀚𑁆𑀛𑀢𑀺, 𑀏𑀯𑀁 𑀅𑀭𑀺𑀬𑀲𑀸𑀯𑀓𑁄 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑀺𑀲𑀼𑀔𑀼𑀫𑀁 𑀦𑀺𑀩𑁆𑀩𑀸𑀦𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀏𑀓𑀧𑀝𑀺𑀯𑁂𑀥𑁂𑀦𑁂𑀯 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀆𑀳 ‘‘𑀲𑀺𑀧𑁆𑀧𑀜𑁆𑀘 𑀲𑀻𑀮𑀁 𑀅𑀓𑁆𑀔𑀡𑀯𑁂𑀥𑀺𑀢𑀸𑀬𑀸’’𑀢𑀺. 𑀮𑁄𑀓𑀺𑀓𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀑𑀮𑁄𑀓𑀦𑀲𑁆𑀲𑀸𑀧𑀺 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄.

𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.