𑁩. 𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁪. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀲𑀸𑀫𑀜𑁆𑀜𑀢𑁄𑀢𑀺 𑀲𑀸𑀥𑀸𑀭𑀡𑀢𑁄. 𑀯𑀺𑀲𑁂𑀲𑁂𑀦𑀸𑀢𑀺 𑀅𑀲𑀸𑀥𑀸𑀭𑀡𑀢𑁄. 𑀧𑀤𑀢𑁆𑀣𑁄𑀢𑀺 𑀲𑀤𑁆𑀤𑀢𑁆𑀣𑁄. 𑀮𑀓𑁆𑀔𑀡𑀦𑁆𑀢𑀺 𑀲𑀪𑀸𑀯𑁄. 𑀓𑀫𑁄𑀢𑀺 𑀅𑀦𑀼𑀧𑀼𑀩𑁆𑀩𑀻. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑀧𑁆𑀧𑀫𑀸𑀡𑀪𑀸𑀯𑁄. 𑀳𑁂𑀢𑁆𑀯𑀸𑀤𑀻𑀢𑀺 𑀳𑁂𑀢𑀼𑀨𑀮𑀪𑀽𑀫𑀺𑀉𑀧𑀦𑀺𑀲𑀸𑀲𑀪𑀸𑀕𑀯𑀺𑀲𑀪𑀸𑀕𑀮𑀓𑁆𑀔𑀡𑀦𑀬𑀸. 𑀯𑀺𑀲𑁂𑀲𑀢𑁄 𑀧𑀦 𑀮𑀓𑁆𑀔𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀳𑀸𑀭𑀲𑀗𑁆𑀔𑁂𑀧𑀯𑀡𑁆𑀡𑀦𑀸

𑁧. 𑀬𑀁, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀜𑁆𑀘 𑀲𑀼𑀔𑀁, 𑀲𑁄𑀫𑀦𑀲𑁆𑀲𑀦𑁆𑀢𑀺 𑀤𑁆𑀯𑀬𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀦𑁆𑀢𑀺 𑀓𑀢𑁆𑀯𑀸 ‘‘𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀅𑀲𑁆𑀲𑀸𑀤𑁄, 𑀲𑀼𑀔𑀁, 𑀲𑁄𑀫𑀦𑀲𑁆𑀲𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀸𑀤𑀺𑀯𑁂𑀤𑀦𑀸 𑀯𑀺𑀬 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀧𑀺 𑀅𑀯𑀻𑀢𑀭𑀸𑀕𑀲𑁆𑀲 𑀅𑀲𑁆𑀲𑀸𑀤𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀏𑀯𑀁 𑀇𑀝𑁆𑀞𑀸𑀭𑀫𑁆𑀫𑀡𑀫𑁆𑀧𑀻’’𑀢𑀺. ‘‘𑀅𑀲𑁆𑀲𑀸𑀤𑁂𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀅𑀲𑁆𑀲𑀸𑀤𑁄, 𑀢𑀡𑁆𑀳𑀸’’𑀢𑀺 𑀏𑀢𑁂𑀦 ‘‘𑀬’’𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀭𑀸𑀬𑀫𑀢𑁆𑀣𑁄 𑁋 𑀬𑁂𑀦 𑀳𑁂𑀢𑀼𑀦𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀧𑀝𑀺𑀘𑁆𑀘 𑀅𑀲𑁆𑀲𑀸𑀤𑀦𑀻𑀬𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀢𑀡𑁆𑀳𑀸𑀲𑀗𑁆𑀔𑀸𑀢𑁄 𑀅𑀲𑁆𑀲𑀸𑀤𑁄 𑀅𑀲𑁆𑀲𑀸𑀤𑀦𑀓𑀺𑀭𑀺𑀬𑀸𑀬 𑀓𑀸𑀭𑀡𑀦𑁆𑀢𑀺. 𑀇𑀢𑀺 𑀓𑀢𑁆𑀯𑀸 𑀅𑀬𑀫𑀢𑁆𑀣𑁄 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀤𑀺𑀪𑀸𑀯𑀢𑁄 𑀯𑀺𑀧𑀮𑁆𑀮𑀸𑀲𑁂𑀲𑀼𑀧𑀺 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀏𑀯𑀁 𑀯𑀺𑀧𑀮𑁆𑀮𑀸𑀲𑀸𑀧𑀻’’𑀢𑀺. 𑀅𑀦𑀺𑀝𑁆𑀞𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀇𑀝𑁆𑀞𑀫𑁆𑀧𑀻𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀅𑀦𑀯𑀲𑁂𑀲𑀸 𑀲𑀸𑀲𑀯𑀸 𑀥𑀫𑁆𑀫𑀸 𑀇𑀥 𑀆𑀭𑀫𑁆𑀫𑀡𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀆𑀳 ‘‘𑀲𑀩𑁆𑀩𑁂𑀲𑀁 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀸𑀦’’𑀦𑁆𑀢𑀺.

𑀤𑀼𑀓𑁆𑀔𑀸𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀦𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀔𑀲𑀪𑀸𑀯𑀸 𑀏𑀯 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀕𑀳𑀺𑀢𑀸 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀦 𑀲𑀼𑀔𑀲𑀪𑀸𑀯𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀸𑀬𑀁, 𑀪𑀦𑁆𑀢𑁂, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀲𑀦𑁆𑀢𑀲𑁆𑀫𑀺𑀁 𑀏𑀲𑀸 𑀧𑀡𑀻𑀢𑁂 𑀲𑀼𑀔𑁂 𑀯𑀼𑀢𑁆𑀢𑀸 𑀪𑀕𑀯𑀢𑀸’’𑀢𑀺 (𑀫. 𑀦𑀺. 𑁨.𑁮𑁮; 𑀲𑀁. 𑀦𑀺. 𑁪.𑁨𑁬𑁭). ‘‘𑀲𑀼𑀔𑀧𑀭𑀺𑀬𑀸𑀬𑀲𑀩𑁆𑀪𑀸𑀯𑀢𑁄’’𑀢𑀺 𑀇𑀫𑀺𑀦𑀸 𑀇𑀝𑁆𑀞𑀢𑀸𑀫𑀢𑁆𑀢𑀢𑁄𑀧𑀺 𑀮𑁂𑀲𑁂𑀦 𑀲𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀲𑁆𑀲 𑀅𑀲𑁆𑀲𑀸𑀤𑀦𑀻𑀬𑀢𑀸 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀆𑀤𑀻𑀦𑀯𑁄 𑀤𑁄𑀲𑀦𑀺𑀲𑁆𑀲𑀦𑁆𑀤𑀦𑀢𑀸𑀬 𑀤𑁄𑀲𑁄, 𑀲𑁆𑀯𑀸𑀬𑀁 𑀧𑀻𑀴𑀦𑀯𑀼𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀆𑀤𑀻𑀦𑀯𑁄 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀢𑀺𑀲𑁆𑀲𑁄𑀧𑀺 𑀯𑀸 𑀤𑀼𑀓𑁆𑀔𑀢𑀸’’𑀢𑀺. 𑀏𑀯𑀁 𑀤𑁄𑀲𑀢𑁆𑀣𑀢𑀁 𑀆𑀤𑀻𑀦𑀯𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀧𑀡𑀢𑁆𑀣𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀢𑁄𑀢𑀺 𑀬𑀲𑁆𑀫𑀸 𑀤𑁄𑀲𑀓𑀧𑀡𑀲𑀪𑀸𑀯𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀦𑀺𑀲𑁆𑀲𑀭𑀢𑀻𑀢𑀺 𑀯𑀺𑀯𑀺𑀢𑁆𑀢𑀺, 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀯𑁂𑀓𑁄𑀢𑀺 𑀅𑀢𑁆𑀣𑁄. 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀲𑀤𑁆𑀤𑀯𑀘𑀦𑀻𑀬𑀢𑀸𑀲𑀸𑀫𑀜𑁆𑀜𑁂𑀦. 𑀧𑀼𑀭𑀺𑀫𑀸𑀦𑀦𑁆𑀢𑀺 𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸𑀦𑀁. 𑀉𑀧𑀸𑀬𑁄 𑀘𑀸𑀢𑀺𑀆𑀤𑀻𑀲𑀼 𑀘-𑀲𑀤𑁆𑀤𑁄 𑀧𑀤𑀧𑀽𑀭𑀡𑀫𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀆𑀳 ‘‘𑀧𑀘𑁆𑀙𑀺𑀫𑀸𑀦𑀜𑁆𑀘𑀸’’𑀢𑀺, 𑀨𑀮𑀸𑀤𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀦𑁆𑀢𑁄𑀕𑀥𑀪𑁂𑀤𑀸𑀦𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀯𑀺𑀲𑁂𑀲𑀸𑀦𑀁.

𑀓𑀸𑀫𑀪𑀯𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦 𑀭𑀽𑀧𑀸𑀭𑀽𑀧𑀪𑀯𑀸 𑀏𑀯 𑀕𑀳𑀺𑀢𑀸, 𑀅𑀣 𑀔𑁄 𑀢𑁂 𑀘 𑀲𑀜𑁆𑀜𑀻𑀪𑀯𑀸𑀤𑀬𑁄 𑀘 𑀏𑀓𑀯𑁄𑀓𑀸𑀭𑀪𑀯𑀸𑀤𑀬𑁄 𑀘 𑀕𑀳𑀺𑀢𑀸. 𑀢𑁂𑀦𑀸𑀳 ‘‘𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀪𑀯𑀸𑀦’’𑀦𑁆𑀢𑀺.

𑀬𑀸𑀯𑀤𑁂𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸 𑀪𑀕𑀯𑀢𑁄 𑀤𑁂𑀲𑀦𑀸𑀢𑀺 𑀆𑀳 ‘‘𑀦𑀦𑀼 𑀘…𑀧𑁂… 𑀦𑀺𑀧𑁆𑀨𑀸𑀤𑀻𑀬𑀢𑀻’’𑀢𑀺. ‘‘𑀯𑀼𑀢𑁆𑀢𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑀁 𑀘𑁄𑀤𑁂𑀢𑀺. 𑀇𑀢𑀭𑁄 ‘‘𑀲𑀘𑁆𑀘𑀫𑁂𑀢’’𑀦𑁆𑀢𑀺 𑀅𑀦𑀼𑀚𑀸𑀦𑀺𑀢𑁆𑀯𑀸 ‘‘𑀢𑀜𑁆𑀘 𑀔𑁄’’𑀢𑀺𑀆𑀤𑀺𑀦𑀸 𑀧𑀭𑀺𑀳𑀭𑀢𑀺. ‘‘𑀧𑀭𑀫𑁆𑀧𑀭𑀸𑀬𑀸’’𑀢𑀺 𑀏𑀢𑁂𑀦 𑀅𑀚𑁆𑀛𑀢𑁆𑀢𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀺𑀬 𑀦 𑀧𑀭𑀢𑁄𑀖𑁄𑀲𑁄 𑀆𑀲𑀦𑁆𑀦𑀓𑀸𑀭𑀡𑀁 𑀥𑀫𑁆𑀫𑀸𑀥𑀺𑀕𑀫𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀢𑁆𑀢𑀁 𑀯𑁂𑀤𑀦𑀻𑀬𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 ‘‘𑀅𑀓𑁆𑀔𑀸𑀢𑀸𑀭𑁄 𑀢𑀣𑀸𑀕𑀢𑀸, 𑀧𑀝𑀺𑀧𑀦𑁆𑀦𑀸 𑀧𑀫𑁄𑀓𑁆𑀔𑀦𑁆𑀢𑀺, 𑀛𑀸𑀬𑀺𑀦𑁄 𑀫𑀸𑀭𑀩𑀦𑁆𑀥𑀦𑀸’’𑀢𑀺 (𑀥. 𑀧. 𑁨𑁭𑁬) 𑀯𑀼𑀢𑁆𑀢𑀁. 𑀢𑀤𑀥𑀺𑀕𑀫𑀓𑀸𑀭𑀡𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀓𑀸𑀭𑀡𑀁 𑀲𑀺𑀬𑀸. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀲𑀫𑁆𑀧𑀢𑁆𑀢𑀺𑀪𑀯𑀳𑁂𑀢𑀽’’𑀢𑀺, 𑀢𑁂𑀦 𑀘𑀭𑀺𑀫𑀢𑁆𑀢𑀪𑀸𑀯𑀳𑁂𑀢𑀼𑀪𑀽𑀢𑀁 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀁 𑀯𑀤𑀢𑀺.

‘‘𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸’’𑀢𑀺 𑀇𑀤𑀁 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀨𑀮𑀪𑀸𑀯𑀲𑀸𑀥𑀦𑀁. 𑀬𑁂𑀦 𑀳𑀺 𑀯𑀺𑀥𑀺𑀦𑀸 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀢𑁄, 𑀫𑀘𑁆𑀘𑀼𑀢𑀭𑀡𑀜𑁆𑀘 𑀲𑀺𑀬𑀸, 𑀲𑁄 ‘‘𑀏𑀯’’𑀦𑁆𑀢𑀺 𑀇𑀫𑀺𑀦𑀸 𑀧𑀓𑀸𑀲𑀺𑀢𑁄𑀢𑀺. 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀲𑀫𑀼𑀕𑁆𑀖𑀸𑀢𑀫𑀘𑁆𑀘𑀼𑀢𑀭𑀡𑀸𑀦𑀁 𑀨𑀮𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

‘‘𑀥𑀫𑁆𑀫𑁄 𑀳𑀯𑁂’’𑀢𑀺 𑀧𑀦 𑀕𑀸𑀣𑀸𑀬𑀁 𑀮𑁄𑀓𑀺𑀬𑀲𑁆𑀲 𑀧𑀼𑀜𑁆𑀜𑀨𑀮𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀇𑀤𑀁 𑀨𑀮’’𑀦𑁆𑀢𑀺. 𑀬𑀁 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀁, 𑀢𑀁 𑀨𑀮𑀁. 𑀬𑀁 𑀦𑀺𑀩𑁆𑀩𑀢𑁆𑀢𑀓𑀁, 𑀲𑁄 𑀉𑀧𑀸𑀬𑁄. 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀢𑁂𑀦𑀸𑀳 ‘‘𑀏𑀢𑁂𑀦 𑀦𑀬𑁂𑀦𑀸’’𑀢𑀺𑀆𑀤𑀺. 𑀉𑀧𑀥𑀺𑀲𑀫𑁆𑀧𑀢𑁆𑀢𑀻𑀢𑀺 𑀅𑀢𑁆𑀢𑀪𑀸𑀯𑀲𑁄𑀪𑀸.

𑀯𑀺𑀲𑀼𑀤𑁆𑀥𑀻𑀢𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 𑁋 ‘‘𑀏𑀢𑁆𑀣𑀸𑀧𑀺…𑀧𑁂… 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺. ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀦𑀸𑀧𑀺 𑀢𑀫𑁂𑀯𑀢𑁆𑀣𑀁 𑀯𑀘𑀦𑀦𑁆𑀢𑀭𑁂 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺.

𑀲𑀭𑀽𑀧𑀢𑁄 𑀆𑀕𑀢𑀸𑀦𑀺 ‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁨𑁬-𑁨𑁮). 𑀏𑀓𑀤𑁂𑀲𑁂𑀦 𑀆𑀕𑀢𑀸𑀦𑀺 ‘‘𑀲𑀁𑀬𑁄𑀚𑀦𑀺𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 (𑀲𑀁. 𑀦𑀺. 𑁨.𑁫𑁩), 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄 (𑀫. 𑀦𑀺. 𑁧.𑁧𑁧𑁭), 𑀲𑀗𑁆𑀔𑀸𑀭𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁨𑁪; 𑁩.𑁪𑁧). 𑀦 𑀲𑀭𑀽𑀧𑁂𑀦 𑀆𑀕𑀢𑀸𑀦𑀺 𑀬𑀣𑀸 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀸𑀤𑀻𑀲𑀼. 𑀅𑀢𑁆𑀣𑀯𑀲𑁂𑀦𑀸𑀢𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑀸𑀤𑀺𑀅𑀢𑁆𑀣𑀯𑀲𑁂𑀦. 𑀦 𑀧𑀧𑀜𑁆𑀘𑀺𑀢𑁄𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑁄.

𑁨. 𑀏𑀲𑁂𑀯 𑀦𑀬𑁄𑀢𑀺 𑀅𑀢𑀺𑀤𑁂𑀲𑁂𑀦 𑀯𑀺𑀘𑀺𑀬𑀫𑀸𑀦𑀯𑀘𑀦𑀲𑁂𑀲𑁄 𑀅𑀢𑀺𑀤𑀺𑀝𑁆𑀞𑁄. 𑀪𑀸𑀯𑀢𑁆𑀣𑁂 𑀢𑁄𑀳𑀺 𑀆𑀳 ‘‘𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀸’’𑀢𑀺. 𑀲𑀼𑀢𑁆𑀢𑁂 𑀆𑀕𑀢𑀁 𑀦 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀘𑁆𑀙𑀸𑀦𑀼𑀭𑀽𑀧𑀢𑀸 𑀇𑀥 𑀧𑀼𑀩𑁆𑀩𑀸𑀧𑀭𑀦𑁆𑀢𑀺 𑀘𑀢𑀼𑀩𑁆𑀬𑀽𑀳𑀧𑀼𑀩𑁆𑀩𑀸𑀧𑀭𑀢𑁄 𑀇𑀫𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀻𑀢𑀺 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂𑀦 𑀅𑀦𑀼𑀲𑀦𑁆𑀥𑀸𑀦𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀳𑁂𑀝𑁆𑀞𑀺𑀫𑀤𑁂𑀲𑀦𑀸𑀬 𑀧𑀼𑀘𑁆𑀙𑀸𑀦𑀺𑀫𑀺𑀢𑁆𑀢𑀧𑀯𑀢𑁆𑀢𑀉𑀧𑀭𑀺𑀤𑁂𑀲𑀦𑀸𑀬 𑀲𑀫𑁆𑀩𑀦𑁆𑀥𑁄 ‘‘𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀻’’𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀸𑀧𑁂𑀓𑁆𑀔𑀦𑁆𑀢𑀺 𑀧𑀼𑀘𑁆𑀙𑀺𑀢𑀯𑀺𑀲𑁆𑀲𑀚𑁆𑀚𑀺𑀢𑀧𑀤𑀸𑀧𑁂𑀓𑁆𑀔𑀁. ‘‘𑀲𑀼𑀢𑁆𑀢𑀲𑁆𑀲𑀸’’𑀢𑀺 𑀯𑀸 𑀇𑀫𑀺𑀦𑀸 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀅𑀦𑀼𑀕𑀻𑀢𑀺𑀬𑁄 𑀞𑀧𑁂𑀢𑁆𑀯𑀸 𑀲𑁂𑀲𑁄 𑀯𑀺𑀘𑀬𑀳𑀸𑀭𑀧𑀤𑀢𑁆𑀣𑁄 𑀲𑀗𑁆𑀕𑀳𑀺𑀢𑁄𑀢𑀺 𑀧𑀤𑀲𑁆𑀲𑀸𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀕𑀸𑀣𑀸𑀬𑀁 𑀘-𑀲𑀤𑁆𑀤𑁄 𑀧𑀤𑀧𑀽𑀭𑀡𑀫𑀢𑁆𑀢𑁂 𑀤𑀝𑁆𑀞𑀩𑁆𑀩𑁄.

‘‘𑀘𑀓𑁆𑀔𑀼 𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀼𑀝𑁆𑀞𑁂 ‘‘𑀆𑀫, 𑀘𑀓𑁆𑀔𑀼 𑀅𑀦𑀺𑀘𑁆𑀘𑀫𑁂𑀯𑀸’’𑀢𑀺 𑀏𑀓𑀦𑁆𑀢𑀢𑁄 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑀁𑀲𑀩𑁆𑀬𑀸𑀓𑀭𑀡𑀁. ‘‘𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀩𑁆𑀩𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀜𑁆𑀘𑀸’’𑀢𑀺 𑀧𑀼𑀝𑁆𑀞𑁂 ‘‘𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑀪𑀸𑀯𑁂𑀢𑀩𑁆𑀩𑀁, 𑀨𑀮𑀧𑀭𑀺𑀬𑀸𑀧𑀦𑁆𑀦𑀁 𑀲𑀘𑁆𑀙𑀺𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀺𑀪𑀚𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀁. ‘‘𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀓𑀼𑀲𑀮’’𑀦𑁆𑀢𑀺 𑀧𑀼𑀝𑁆𑀞𑁂 ‘‘𑀓𑀺𑀁 𑀅𑀦𑀯𑀚𑁆𑀚𑀝𑁆𑀞𑁄 𑀓𑀼𑀲𑀮𑀝𑁆𑀞𑁄, 𑀉𑀤𑀸𑀳𑀼 𑀲𑀼𑀔𑀯𑀺𑀧𑀸𑀓𑀝𑁆𑀞𑁄’’𑀢𑀺 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀁. ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸, 𑀅𑀲𑀲𑁆𑀲𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀩𑁆𑀬𑀸𑀓𑀢𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀯𑀺𑀲𑁆𑀲𑀚𑁆𑀚𑀦𑀁 𑀞𑀧𑀦𑀁. ‘‘𑀓𑀺𑀁 𑀧𑀦𑁂𑀢𑁂 𑀓𑀼𑀲𑀮𑀸𑀢𑀺 𑀯𑀸 𑀥𑀫𑁆𑀫𑀸𑀢𑀺 𑀯𑀸 𑀏𑀓𑀢𑁆𑀣𑀸, 𑀉𑀤𑀸𑀳𑀼 𑀦𑀸𑀦𑀢𑁆𑀣𑀸’’𑀢𑀺 𑀇𑀤𑀁 𑀧𑀼𑀘𑁆𑀙𑀦𑀁 𑀲𑀸𑀯𑀲𑁂𑀲𑀁. 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀧𑀦 𑀲𑀸𑀯𑀲𑁂𑀲𑀢𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀤𑁂𑀲𑀦𑀸𑀬𑀁 𑀯𑁂𑀤𑀺𑀢𑀩𑁆𑀩𑀸. 𑀅𑀧𑁆𑀧𑀸𑀝𑀺𑀳𑀻𑀭𑀓𑀁 𑀲𑀉𑀢𑁆𑀢𑀭𑀁. 𑀲𑀧𑁆𑀧𑀸𑀝𑀺𑀳𑀻𑀭𑀓𑀁 𑀦𑀺𑀭𑀼𑀢𑁆𑀢𑀭𑀁. 𑀲𑁂𑀲𑀁 𑀯𑀺𑀘𑀬𑀳𑀸𑀭𑀦𑀺𑀤𑁆𑀤𑁂𑀲𑁂 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀢𑁆𑀣 𑀘 𑀅𑀲𑁆𑀲𑀸𑀤𑁄 𑀅𑀲𑁆𑀲𑀸𑀤𑀳𑁂𑀢𑀼 𑀬𑀸𑀯 𑀆𑀡𑀢𑁆𑀢𑀺𑀳𑁂𑀢𑀽𑀢𑀺 𑀏𑀯𑀁 𑀳𑁂𑀢𑀽𑀦𑀫𑁆𑀧𑀺 𑀅𑀲𑁆𑀲𑀸𑀤𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀲𑀼𑀔𑀲𑀼𑀔𑀧𑀘𑁆𑀘𑀬𑀮𑀓𑁆𑀔𑀡𑁄 𑀅𑀲𑁆𑀲𑀸𑀤𑁄, 𑀲𑁄 𑀯𑀺𑀲𑁂𑀲𑀢𑁄 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀻𑀧𑁂𑀢𑀩𑁆𑀩𑁄. 𑀲𑀸 𑀳𑀺 𑀢𑀲𑁆𑀲 𑀉𑀓𑁆𑀓𑀁𑀲𑁄, 𑀲𑁂𑀲𑀸 𑀧𑀦𑁂𑀢𑁆𑀣 𑀪𑀯𑀲𑀫𑁆𑀧𑀢𑁆𑀢𑀺 𑀢𑀤𑀦𑁆𑀯𑀸𑀬𑀺𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀲 𑀳𑁂𑀢𑀼 𑀤𑀸𑀦𑀫𑀬𑀁, 𑀲𑀻𑀮𑀫𑀬𑀜𑁆𑀘 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼. 𑀤𑀼𑀓𑁆𑀔𑀤𑀼𑀓𑁆𑀔𑀧𑀘𑁆𑀘𑀬𑀮𑀓𑁆𑀔𑀡𑁄 𑀆𑀤𑀻𑀦𑀯𑁄. 𑀯𑀺𑀧𑀭𑀺𑀡𑀸𑀫𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀦𑀁 𑀢𑀤𑀯𑀭𑁄𑀥𑀢𑁄 𑀯𑀝𑁆𑀝𑀤𑀼𑀓𑁆𑀔𑀲𑁆𑀲𑀸𑀧𑀺 𑀏𑀢𑁆𑀣 𑀲𑀗𑁆𑀕𑀳𑁄. 𑀯𑀺𑀲𑁂𑀲𑀢𑁄 𑀧𑀦 𑀓𑀸𑀫𑀸𑀦𑀁 𑀑𑀓𑀸𑀭𑁄𑀢𑀺 𑀤𑀝𑁆𑀞𑀩𑁆𑀩𑁄, 𑀲𑁆𑀯𑀸𑀬𑀁 𑀲𑀁𑀓𑀺𑀮𑁂𑀲𑀯𑀢𑁆𑀣𑀼𑀦𑀸, 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸𑀤𑀻𑀳𑀺 𑀘 𑀯𑀺𑀪𑀸𑀯𑁂𑀢𑀩𑁆𑀩𑁄, 𑀢𑀲𑁆𑀲 𑀳𑁂𑀢𑀼 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀦𑁂𑀓𑁆𑀔𑀫𑁆𑀫𑀁 𑀦𑀺𑀲𑁆𑀲𑀭𑀡𑀁, 𑀢𑀲𑁆𑀲 𑀳𑁂𑀢𑀼 𑀬𑀣𑀸𑀭𑀳𑀁 𑀢𑀤𑀦𑀼𑀘𑁆𑀙𑀯𑀺𑀓𑀸 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸. 𑀨𑀮𑀁 𑀤𑁂𑀲𑀦𑀸𑀨𑀮𑀫𑁂𑀯, 𑀢𑀲𑁆𑀲 𑀳𑁂𑀢𑀼 𑀤𑁂𑀲𑀦𑀸. 𑀉𑀧𑀸𑀬𑁄 𑀬𑀣𑀸𑀯𑀼𑀢𑁆𑀢𑀉𑀧𑀸𑀬𑁄𑀯, 𑀢𑀲𑁆𑀲 𑀳𑁂𑀢𑀼 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺. 𑀆𑀡𑀢𑁆𑀢𑀺 𑀉𑀧𑀤𑁂𑀲𑁄, 𑀢𑀲𑁆𑀲 𑀭𑀸𑀕𑀕𑁆𑀕𑀺𑀆𑀤𑀻𑀳𑀺 𑀮𑁄𑀓𑀲𑁆𑀲 𑀆𑀤𑀺𑀢𑁆𑀢𑀢𑀸, 𑀲𑀢𑁆𑀣𑀼 𑀫𑀳𑀸𑀓𑀭𑀼𑀡𑀸𑀬𑁄𑀕𑁄 𑀘 𑀳𑁂𑀢𑀼.

𑀢𑀣𑀸 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀲𑀫𑀼𑀤𑀬𑁂𑀦 𑀅𑀲𑁆𑀲𑀸𑀤𑁄, 𑀤𑀼𑀓𑁆𑀔𑁂𑀦 𑀆𑀤𑀻𑀦𑀯𑁄, 𑀫𑀕𑁆𑀕𑀦𑀺𑀭𑁄𑀥𑁂𑀳𑀺 𑀦𑀺𑀲𑁆𑀲𑀭𑀡𑀁, 𑀫𑀕𑁆𑀕𑁄 𑀯𑀸 𑀉𑀧𑀸𑀬𑁄, 𑀢𑀤𑀼𑀧𑀤𑁂𑀲𑁄 𑀆𑀡𑀢𑁆𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀨𑀮𑀁. 𑀇𑀢𑀺 𑀅𑀦𑀼𑀧𑀼𑀩𑁆𑀩𑀓𑀣𑀸𑀬 𑀲𑀤𑁆𑀥𑀺𑀁 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀦𑀺𑀤𑁆𑀥𑀸𑀭𑀡𑀪𑀸𑀯𑁂𑀦 𑀯𑀺𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀲𑁆𑀲 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑁄 𑀳𑁂𑀢𑀼. 𑀲𑁄 𑀳𑀺 𑀢𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀧𑀜𑁆𑀳𑀲𑁆𑀲 𑀜𑀸𑀢𑀼𑀓𑀸𑀫𑀢𑀸, 𑀓𑀣𑁂𑀓𑀼𑀓𑀸𑀫𑀢𑀸 𑀘. 𑀅𑀤𑀺𑀝𑁆𑀞𑀚𑁄𑀢𑀦𑀸𑀤𑀻𑀦𑀜𑁆𑀳𑀺 𑀘𑀢𑀼𑀦𑁆𑀦𑀁 𑀜𑀸𑀢𑀼𑀓𑀸𑀫𑀢𑀸, 𑀇𑀢𑀭𑀲𑁆𑀲 𑀇𑀢𑀭𑀸. 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀧𑀜𑁆𑀳𑁄 𑀳𑁂𑀢𑀼. 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁.

𑁩. 𑀩𑁆𑀬𑀜𑁆𑀚𑀦𑀢𑁆𑀣𑀸𑀦𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀧𑀭𑀺𑀓𑁆𑀔𑀸𑀢𑀺 𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑁂𑀦 𑀧𑀤𑀁 𑀕𑀳𑀺𑀢𑀁, 𑀅𑀢𑁆𑀣𑀕𑁆𑀕𑀳𑀡𑁂𑀦 𑀧𑀜𑁆𑀳𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀲𑁆𑀲𑀸𑀤𑀸𑀤𑀬𑁄 𑀕𑀳𑀺𑀢𑀸. 𑀯𑀺𑀘𑀬𑀳𑀸𑀭𑀧𑀤𑀢𑁆𑀣𑀸 𑀏𑀯 𑀳𑀺 𑀬𑀼𑀢𑁆𑀢𑀸𑀬𑀼𑀢𑁆𑀢𑀸𑀤𑀺𑀯𑀺𑀲𑁂𑀲𑀲𑀳𑀺𑀢𑀸 𑀬𑀼𑀢𑁆𑀢𑀺𑀳𑀸𑀭𑀸𑀤𑀻𑀦𑀁 𑀧𑀤𑀢𑁆𑀣𑀸. 𑀢𑀣𑀸 𑀳𑀺 𑀧𑀤𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀺𑀓𑀪𑀸𑀯𑀯𑀺𑀲𑀺𑀝𑁆𑀞𑀸 𑀢𑁂𑀬𑁂𑀯 𑀧𑀤𑀝𑁆𑀞𑀸𑀦𑀳𑀸𑀭𑀲𑁆𑀲 𑀧𑀤𑀢𑁆𑀣𑀸. 𑀮𑀓𑁆𑀔𑀡𑀮𑀓𑁆𑀔𑀺𑀢𑀩𑁆𑀩𑀢𑀸𑀯𑀺𑀲𑀺𑀝𑁆𑀞𑀸, 𑀦𑀺𑀤𑁆𑀥𑀸𑀭𑀺𑀢𑀸 𑀘 𑀮𑀓𑁆𑀔𑀡𑀳𑀸𑀭𑀲𑁆𑀲, 𑀦𑀺𑀩𑁆𑀩𑀘𑀦𑀸𑀤𑀺𑀯𑀺𑀪𑀸𑀯𑀦𑀸𑀯𑀺𑀲𑀺𑀝𑁆𑀞𑀸 𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑁆𑀲, 𑀲𑀪𑀸𑀕𑀥𑀫𑁆𑀫𑀯𑀲𑁂𑀦, 𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀘 𑀆𑀯𑀝𑁆𑀝𑀦𑀯𑀺𑀲𑀺𑀝𑁆𑀞𑀸 𑀆𑀯𑀝𑁆𑀝𑀳𑀸𑀭𑀲𑁆𑀲, 𑀪𑀽𑀫𑀺𑀯𑀺𑀪𑀸𑀕𑀸𑀤𑀺𑀯𑀺𑀲𑀺𑀝𑁆𑀞𑀸 𑀯𑀺𑀪𑀢𑁆𑀢𑀺𑀳𑀸𑀭𑀲𑁆𑀲, 𑀧𑀝𑀺𑀧𑀓𑁆𑀔𑀢𑁄 𑀧𑀭𑀺𑀯𑀢𑁆𑀢𑀦𑀯𑀺𑀲𑀺𑀝𑁆𑀞𑀸 𑀧𑀭𑀺𑀯𑀢𑁆𑀢𑀦𑀳𑀸𑀭𑀲𑁆𑀲, 𑀧𑀭𑀺𑀬𑀸𑀬𑀯𑁂𑀯𑀘𑀦𑀯𑀺𑀲𑀺𑀝𑁆𑀞𑀸 𑀯𑁂𑀯𑀘𑀦𑀳𑀸𑀭𑀲𑁆𑀲, 𑀧𑀪𑀯𑀸𑀤𑀺𑀧𑀜𑁆𑀜𑀸𑀧𑀦𑀯𑀺𑀲𑀺𑀝𑁆𑀞𑀸 𑀧𑀜𑁆𑀜𑀢𑁆𑀢𑀺𑀳𑀸𑀭𑀲𑁆𑀲, 𑀔𑀦𑁆𑀥𑀸𑀤𑀺𑀫𑀼𑀔𑁂𑀳𑀺 𑀑𑀢𑀭𑀡𑀯𑀺𑀲𑀺𑀝𑁆𑀞𑀸 𑀑𑀢𑀭𑀡𑀳𑀸𑀭𑀲𑁆𑀲, 𑀧𑀤𑀧𑀤𑀢𑁆𑀣𑀧𑀜𑁆𑀳𑀸𑀭𑀫𑁆𑀪𑀲𑁄𑀥𑀦𑀯𑀺𑀲𑀺𑀝𑁆𑀞𑀸 𑀲𑁄𑀥𑀦𑀳𑀸𑀭𑀲𑁆𑀲, 𑀲𑀸𑀫𑀜𑁆𑀜𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀺𑀲𑀺𑀝𑁆𑀞𑀸 𑀅𑀥𑀺𑀝𑁆𑀞𑀸𑀦𑀳𑀸𑀭𑀲𑁆𑀲, 𑀧𑀘𑁆𑀘𑀬𑀥𑀫𑁆𑀫𑁂𑀳𑀺 𑀧𑀭𑀺𑀓𑁆𑀔𑀭𑀡𑀯𑀺𑀲𑀺𑀝𑁆𑀞𑀸 𑀧𑀭𑀺𑀓𑁆𑀔𑀸𑀭𑀳𑀸𑀭𑀲𑁆𑀲, 𑀧𑀳𑀸𑀢𑀩𑁆𑀩𑀪𑀸𑀯𑁂𑀢𑀩𑁆𑀩𑀢𑀸𑀦𑀺𑀤𑁆𑀥𑀸𑀭𑀡𑀯𑀺𑀲𑀺𑀝𑁆𑀞𑀸 𑀲𑀫𑀸𑀭𑁄𑀧𑀦𑀳𑀸𑀭𑀲𑁆𑀲 𑀧𑀤𑀢𑁆𑀣𑀸. ‘‘𑀩𑁆𑀬𑀜𑁆𑀚𑀦𑀲𑁆𑀲 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀢𑀸, 𑀅𑀢𑁆𑀣𑀲𑁆𑀲 𑀲𑀼𑀢𑁆𑀢𑀸𑀤𑀻𑀳𑀺 𑀅𑀯𑀺𑀮𑁄𑀫𑀦𑀁 𑀬𑀼𑀢𑁆𑀢𑀪𑀸𑀯𑁄’’𑀢𑀺 𑀇𑀫𑀺𑀦𑀸 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀢𑀸, 𑀲𑀼𑀢𑁆𑀢𑀸𑀤𑀻𑀳𑀺 𑀯𑀺𑀮𑁄𑀫𑀦𑀜𑁆𑀘 𑀅𑀬𑀼𑀢𑁆𑀢𑀪𑀸𑀯𑁄𑀢𑀺 𑀤𑀻𑀧𑁂𑀢𑀺, 𑀢𑁂𑀦 𑀬𑀼𑀢𑁆𑀢𑀸𑀬𑀼𑀢𑁆𑀢𑀻𑀦𑀁 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺.

𑁪. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀲𑀸𑀥𑀸𑀭𑀡𑀁, 𑀅𑀲𑀸𑀥𑀸𑀭𑀡𑀜𑁆𑀘 𑀤𑁂𑀬𑁆𑀬𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀫𑁆𑀪𑀯𑀢𑁄𑀢𑀺 𑀬𑀣𑀸𑀭𑀳𑀁 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀁. 𑀬𑀸𑀯 𑀲𑀩𑁆𑀩𑀥𑀫𑁆𑀫𑀸𑀢𑀺 𑀏𑀢𑁆𑀣 𑀲𑀩𑁆𑀩𑀁 𑀦𑀸𑀫 𑀧𑀤𑁂𑀲𑀲𑀩𑁆𑀩𑀁, 𑀦 𑀲𑀩𑁆𑀩𑀲𑀩𑁆𑀩𑀦𑁆𑀢𑀺. 𑀅𑀬𑀜𑁆𑀳𑀺 𑀲𑀩𑁆𑀩𑀲𑀤𑁆𑀤𑁄 𑀬𑀣𑀸 𑀧𑀞𑀫𑀯𑀺𑀓𑀧𑁆𑀧𑁂 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀯𑀲𑁂𑀦 𑀧𑀤𑁂𑀲𑀯𑀺𑀲𑀬𑁄, 𑀏𑀯𑀁 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀤𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀺𑀓𑀦𑀺𑀤𑁆𑀥𑀸𑀭𑀡𑁂𑀦 𑀢𑀁𑀢𑀁𑀧𑀓𑀭𑀡𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀕𑁆𑀕𑀳𑀡𑀢𑁄 𑀧𑀤𑁂𑀲𑀯𑀺𑀲𑀬𑁄 𑀏𑀯, 𑀦 𑀅𑀦𑀯𑀲𑁂𑀲𑀥𑀫𑁆𑀫𑀯𑀺𑀲𑀬𑁄𑀢𑀺. 𑀲𑀼𑀢𑁆𑀢𑀸𑀕𑀢𑀥𑀫𑁆𑀫𑀸𑀦𑀁 𑀬𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺, 𑀢𑁂𑀲𑀜𑁆𑀘 𑀬𑀸𑀦𑀻𑀢𑀺 𑀏𑀯𑀁 𑀓𑀸𑀭𑀡𑀧𑀭𑀫𑁆𑀧𑀭𑀸𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑁄 𑀧𑀤𑀝𑁆𑀞𑀸𑀦𑀳𑀸𑀭𑁄, 𑀧𑀭𑀺𑀓𑁆𑀔𑀸𑀭𑀳𑀸𑀭𑁄 𑀧𑀦 𑀲𑀼𑀢𑁆𑀢𑀸𑀕𑀢𑀥𑀫𑁆𑀫𑀸𑀦𑀁 𑀢𑀁𑀢𑀁𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀝𑀺𑀳𑁂𑀢𑀼𑀧𑀘𑁆𑀘𑀬𑀢𑀸𑀯𑀺𑀲𑁂𑀲𑀯𑀺𑀪𑀸𑀯𑀦𑀮𑀓𑁆𑀔𑀡𑁄𑀢𑀺 𑀲𑀢𑀺𑀧𑀺 𑀓𑀸𑀭𑀡𑀯𑀺𑀘𑀸𑀭𑀡𑀪𑀸𑀯𑁂 𑀅𑀬𑀁 𑀧𑀤𑀝𑁆𑀞𑀸𑀦𑀳𑀸𑀭𑀧𑀭𑀺𑀓𑁆𑀔𑀸𑀭𑀳𑀸𑀭𑀸𑀦𑀁 𑀯𑀺𑀲𑁂𑀲𑁄.

𑁫. 𑀬𑀣𑀸 ‘‘𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀦𑀧𑀤𑁂’’𑀢𑀺𑀆𑀤𑀻𑀲𑀼 𑀏𑀓𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀲𑀫𑀸𑀦𑀲𑀤𑁆𑀤𑁄, 𑀏𑀯𑀁 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸 ‘‘𑀏𑀓𑀼𑀧𑁆𑀧𑀸𑀤𑀸’’𑀢𑀺𑀆𑀤𑀻𑀲𑀼 (𑀓𑀣𑀸. 𑁪𑁭𑁩) 𑀯𑀺𑀬 𑀏𑀓𑀮𑀓𑁆𑀔𑀡𑀸𑀢𑀺 𑀏𑀢𑁆𑀣 𑀏𑀓𑀲𑀤𑁆𑀤𑁄 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀲𑀫𑀸𑀦𑀮𑀓𑁆𑀔𑀡𑀸’’𑀢𑀺. 𑀲𑀁𑀯𑀡𑁆𑀡𑀦𑀸𑀯𑀲𑁂𑀦𑀸𑀢𑀺 𑀏𑀢𑁆𑀣 𑀓𑀫𑁆𑀫𑀢𑁆𑀣𑁂 𑀅𑀦-𑀲𑀤𑁆𑀤𑁄, 𑀲𑀁𑀯𑀡𑁆𑀡𑁂𑀢𑀩𑁆𑀩𑀢𑀸𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀮𑀓𑁆𑀔𑀡𑀸𑀢𑀺 𑀉𑀧𑀮𑀓𑁆𑀔𑀡𑀸. ‘‘𑀦𑀸𑀦𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄 (𑀤𑀻. 𑀦𑀺. 𑁩.𑁩𑁪𑁧, 𑁩𑁫𑁭, 𑁩𑁫𑁯; 𑀅. 𑀦𑀺. 𑁯.𑁨𑁪), 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸’’𑀢𑀺𑀆𑀤𑀻𑀲𑀼 𑀲𑀳𑀘𑀸𑀭𑀺𑀢𑀸 𑀤𑀝𑁆𑀞𑀩𑁆𑀩𑀸. 𑀲𑀜𑁆𑀜𑀸𑀲𑀳𑀕𑀢𑀸 𑀳𑀺 𑀥𑀫𑁆𑀫𑀸 𑀢𑀢𑁆𑀣 𑀲𑀜𑁆𑀜𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑀸. ‘‘𑀤𑀤𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁯) 𑀲𑀫𑀸𑀦𑀓𑀺𑀘𑁆𑀘𑀢𑀸. 𑀧𑀺𑀬𑀯𑀘𑀦𑀢𑁆𑀣𑀘𑀭𑀺𑀬𑀸 𑀲𑀫𑀸𑀦𑀢𑁆𑀢𑀢𑀸𑀧𑀺 𑀳𑀺 𑀢𑀢𑁆𑀣 𑀫𑀺𑀢𑁆𑀢𑀕𑀦𑁆𑀣𑀦𑀓𑀺𑀘𑁆𑀘𑁂𑀦 𑀲𑀫𑀸𑀦𑀓𑀺𑀘𑁆𑀘𑀸 𑀕𑀬𑁆𑀳𑀦𑁆𑀢𑀺 𑀲𑀗𑁆𑀕𑀳𑀯𑀢𑁆𑀣𑀼𑀪𑀸𑀯𑀢𑁄. ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧, 𑁩𑁯; 𑀫𑀳𑀸𑀯. 𑁧; 𑀯𑀺𑀪. 𑁨𑁨𑁫; 𑀉𑀤𑀸. 𑁧; 𑀦𑁂𑀢𑁆𑀢𑀺. 𑁨𑁪) 𑀲𑀫𑀸𑀦𑀳𑁂𑀢𑀼𑀢𑀸. 𑀬𑀣𑀸 𑀳𑀺 𑀨𑀲𑁆𑀲𑁄 𑀯𑁂𑀤𑀦𑀸𑀬, 𑀏𑀯𑀁 𑀲𑀜𑁆𑀜𑀸𑀤𑀻𑀦𑀫𑁆𑀧𑀺 𑀲𑀳𑀚𑀸𑀢𑀸𑀤𑀺𑀦𑀸 𑀧𑀘𑁆𑀘𑀬𑁄 𑀳𑁄𑀢𑀺 𑀏𑀯𑀸𑀢𑀺 𑀢𑁂𑀧𑀺 𑀲𑀫𑀸𑀦𑀳𑁂𑀢𑀼𑀢𑀸𑀬 𑀯𑀼𑀢𑁆𑀢𑀸 𑀏𑀯 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺 (𑀥. 𑀲. 𑁫), ‘‘𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁪.𑁯𑁩). 𑀏𑀯𑀁 ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧, 𑁩𑁯; 𑀫𑀳𑀸𑀯. 𑁧; 𑀯𑀺𑀪. 𑁨𑁨𑁫; 𑀉𑀤𑀸. 𑁧; 𑀦𑁂𑀢𑁆𑀢𑀺. 𑁨𑁪) 𑀏𑀯𑀫𑀸𑀤𑀺𑀧𑀺 𑀉𑀤𑀸𑀳𑀭𑀺𑀢𑀩𑁆𑀩𑀁. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧, 𑁩𑁯; 𑀫𑀳𑀸𑀯. 𑁧; 𑀯𑀺𑀪. 𑁨𑁨𑁫; 𑀉𑀤𑀸. 𑁧; 𑀦𑁂𑀢𑁆𑀢𑀺. 𑁨𑁪) 𑀲𑀫𑀸𑀦𑀨𑀮𑀢𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀳𑀺 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀬 𑀨𑀮𑀁, 𑀏𑀯𑀁 𑀢𑀡𑁆𑀳𑀼𑀧𑀸𑀤𑀸𑀤𑀻𑀦𑀫𑁆𑀧𑀻𑀢𑀺 𑀢𑁂𑀧𑀺 𑀢𑀢𑁆𑀣 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦’’𑀦𑁆𑀢𑀺. ‘‘𑀭𑀽𑀧𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁪) 𑀯𑀼𑀢𑁆𑀢𑁂 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀤𑀬𑁄 𑀯𑀼𑀢𑁆𑀢𑀸 𑀏𑀯 𑀳𑁄𑀦𑁆𑀢𑀺 𑀲𑀫𑀸𑀦𑀸𑀭𑀫𑁆𑀫𑀡𑀪𑀸𑀯𑀢𑁄. 𑀦 𑀳𑀺 𑀢𑁂𑀳𑀺 𑀯𑀺𑀦𑀸 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺. 𑀏𑀯𑀫𑀸𑀤𑀻𑀳𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀅𑀢𑁆𑀣𑀧𑁆𑀧𑀓𑀭𑀡𑀮𑀺𑀗𑁆𑀕𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀢𑁆𑀣𑀸𑀤𑀺𑀯𑀲𑁂𑀦𑀧𑀺 𑀳𑀺 𑀲𑀼𑀢𑁆𑀢𑁂 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀯𑀼𑀢𑁆𑀢𑀸𑀦𑀁 𑀯𑀺𑀬 𑀦𑀺𑀤𑁆𑀥𑀸𑀭𑀡𑀁 𑀲𑀫𑁆𑀪𑀯𑀢𑀻𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀸𑀢𑀺 ‘‘𑀯𑀥𑀓𑀝𑁆𑀞𑁂𑀦 𑀏𑀓𑀮𑀓𑁆𑀔𑀡𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁, ‘‘𑀲𑀳𑀘𑀸𑀭𑀺𑀢𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦.

𑁬. ‘‘𑀨𑀼𑀲𑀦𑀝𑁆𑀞𑁂𑀦 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀘𑀦𑀁 𑀦𑀺𑀩𑁆𑀩𑀘𑀦𑀁, 𑀢𑀁 𑀧𑀦 𑀧𑀤𑀲𑁆𑀲𑁂𑀯, 𑀦 𑀯𑀸𑀓𑁆𑀬𑀲𑁆𑀲𑀸𑀢𑀺 𑀆𑀳 ‘‘𑀧𑀤𑀦𑀺𑀩𑁆𑀩𑀘𑀦’’𑀦𑁆𑀢𑀺. 𑀅𑀥𑀺𑀧𑁆𑀧𑀸𑀬𑀦𑀺𑀤𑀸𑀦𑀸𑀦𑀺𑀧𑁂𑀢𑁆𑀣 𑀩𑁆𑀬𑀜𑁆𑀚𑀦𑀫𑀼𑀔𑁂𑀦𑁂𑀯 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀦𑀺. 𑀦𑀺𑀩𑁆𑀩𑀘𑀦𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀻𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀯𑀺𑀲𑁂𑀲𑀢𑁄 𑀩𑁆𑀬𑀜𑁆𑀚𑀦𑀤𑁆𑀯𑀸𑀭𑁂𑀦𑁂𑀯 𑀅𑀢𑁆𑀣𑀧𑀭𑀺𑀬𑁂𑀲𑀦𑀸’’𑀢𑀺. 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀅𑀚𑁆𑀛𑀸𑀲𑀬𑀸𑀤𑀺.

𑁭. ‘‘𑀧𑀤𑀝𑁆𑀞𑀸𑀦𑁂’’𑀢𑀺 𑀇𑀤𑀁 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀓𑀸𑀭𑀡𑀪𑀽𑀢𑁂𑀧𑀺 𑀥𑀫𑁆𑀫𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀪𑀸𑀕𑀢𑁄, 𑀯𑀺𑀲𑀪𑀸𑀕𑀢𑁄 𑀘 𑀆𑀯𑀝𑁆𑀝𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀢𑀦𑁆𑀢𑀺𑀯𑀲𑁂𑀦. 𑀢𑀲𑁆𑀫𑀸 𑀧𑀤𑀝𑁆𑀞𑀸𑀦𑀦𑀺𑀤𑁆𑀥𑀸𑀭𑀡𑀸𑀬 𑀯𑀺𑀦𑀸𑀧𑀺 𑀆𑀯𑀝𑁆𑀝𑀦𑀁 𑀬𑀼𑀢𑁆𑀢𑀫𑁂𑀯𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀧𑀤𑀲𑁆𑀲 𑀯𑀸 𑀲𑀤𑁆𑀤𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀧𑀤𑀝𑁆𑀞𑀸𑀦𑀁 𑀧𑀤𑀢𑁆𑀣𑁄. 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸𑀢𑀺 (𑀲𑀁. 𑀦𑀺. 𑁧.𑁧𑁮𑁫; 𑀦𑁂𑀢𑁆𑀢𑀺. 𑁨𑁯; 𑀧𑁂𑀝𑀓𑁄. 𑁩𑁮; 𑀫𑀺. 𑀧. 𑁫.𑁧.𑁪) 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺 (𑀦𑁂𑀢𑁆𑀢𑀺. 𑁨𑁯) 𑀏𑀢𑁆𑀣 𑀬𑁆𑀯𑀸𑀬𑀫𑀸𑀭𑀫𑁆𑀪𑀥𑀸𑀢𑀼𑀆𑀤𑀺𑀓𑁄 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀁 𑀯𑀻𑀭𑀺𑀬𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀯𑀻𑀭𑀺𑀬𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑁄𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀓𑀁 𑀦𑀸𑀫𑀕𑀳𑀺𑀢𑀢𑁄 𑀇𑀢𑀭𑀁, 𑀢𑀁 𑀧𑀦 𑀢𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀯𑀸 𑀲𑀺𑀬𑀸, 𑀅𑀜𑁆𑀜𑀁 𑀯𑀸𑀢𑀺 𑀆𑀳 ‘‘𑀯𑀺𑀲𑀪𑀸𑀕𑀢𑀸𑀬 𑀅𑀕𑁆𑀕𑀳𑀡𑁂𑀦 𑀯𑀸’’𑀢𑀺. 𑀲𑀁𑀯𑀡𑁆𑀡𑀦𑀸𑀬 𑀬𑁄𑀚𑁂𑀦𑁆𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀲𑀪𑀸𑀕𑀥𑀫𑁆𑀫𑀦𑀺𑀤𑁆𑀥𑀸𑀭𑀡𑀪𑀽𑀢𑁂𑀦 𑀅𑀢𑁆𑀣𑀓𑀣𑀦𑁂𑀦 𑀧𑀸𑀴𑀺𑀬𑀁 𑀬𑁄𑀚𑁂𑀦𑁆𑀢𑁄. 𑀢𑁂𑀦𑀸𑀳 ‘‘𑀤𑁂𑀲𑀦’’𑀦𑁆𑀢𑀺. ‘‘𑀧𑀝𑀺𑀧𑀓𑁆𑀔𑁂’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑀧𑀺 𑀆𑀯𑀝𑁆𑀝𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸.

𑁮. 𑀦𑀸𑀫𑀯𑀲𑁂𑀦𑀸𑀢𑀺 𑀲𑀸𑀥𑀸𑀭𑀡𑀦𑀸𑀫𑀯𑀲𑁂𑀦. 𑀧𑀸𑀴𑀺𑀬𑀁 𑀧𑀦 ‘‘𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀲𑀢𑁆𑀢𑀸𑀦𑀁, 𑀅𑀦𑀺𑀬𑀢𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸 𑀓𑀺𑀮𑁂𑀲𑀸 𑀲𑀸𑀥𑀸𑀭𑀡𑀸’’𑀢𑀺𑀆𑀕𑀢𑀢𑁆𑀢𑀸 (𑀦𑁂𑀢𑁆𑀢𑀺. 𑁩𑁪) ‘‘𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀤𑀺𑀦𑀸𑀫𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀯𑀲𑁂𑀦. 𑀲𑁄 𑀳𑀺 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀇𑀥 ‘‘𑀯𑀢𑁆𑀣𑀽’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 𑁋 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀲𑀸𑀥𑀸𑀭𑀡𑀸’’𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑁩𑁪). 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦𑀸𑀢𑀺 𑀦𑀸𑀫𑀢𑁄, 𑀯𑀢𑁆𑀣𑀼𑀢𑁄 𑀘 𑀆𑀯𑁂𑀡𑀺𑀓𑀢𑀸𑀬. 𑀢𑀁𑀢𑀁𑀫𑀕𑁆𑀕𑀨𑀮𑀝𑁆𑀞𑀸𑀦𑀜𑁆𑀳𑀺 𑀢𑀁𑀢𑀁𑀫𑀕𑁆𑀕𑀨𑀮𑀝𑁆𑀞𑀢𑀸, 𑀪𑀩𑁆𑀩𑀸𑀦𑀁 𑀪𑀩𑁆𑀩𑀢𑀸, 𑀅𑀪𑀩𑁆𑀩𑀸𑀦𑀁 𑀅𑀪𑀩𑁆𑀩𑀢𑀸 𑀅𑀲𑀸𑀥𑀸𑀭𑀡𑀸.

𑁯. ‘‘𑀪𑀸𑀯𑀺𑀢𑁂’’𑀢𑀺 𑀇𑀤𑀁 𑀪𑀸𑀯𑀦𑀸𑀓𑀺𑀭𑀺𑀬𑀸𑀬 𑀉𑀧𑀮𑀓𑁆𑀔𑀡𑀁, 𑀦 𑀏𑀢𑁆𑀣 𑀓𑀸𑀮𑀯𑀘𑀦𑀺𑀘𑁆𑀙𑀸𑀢𑀺 𑀆𑀳 ‘‘𑀪𑀸𑀯𑁂𑀢𑀩𑁆𑀩𑁂𑀢𑀺 𑀅𑀢𑁆𑀣𑁄’’𑀢𑀺. 𑀪𑀸𑀯𑀦𑀸 𑀘𑁂𑀢𑁆𑀣 𑀆𑀲𑁂𑀯𑀦𑀸𑀢𑀺, 𑀓𑀼𑀲𑀮𑀲𑀤𑁆𑀤𑁄𑀧𑀺 𑀅𑀦𑀯𑀚𑁆𑀚𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀧𑀓𑁆𑀔𑀢𑁄𑀢𑀺 𑀯𑀺𑀧𑀓𑁆𑀔𑀢𑁄. 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑁂𑀦 𑀩𑁆𑀬𑀢𑀺𑀭𑁂𑀓𑀢𑁄 𑀬𑀣𑀸𑀥𑀺𑀧𑁆𑀧𑁂𑀢𑀥𑀫𑁆𑀫𑀧𑁆𑀧𑀢𑀺𑀝𑁆𑀞𑀸𑀦𑀸 𑀳𑁂𑀲𑀸.

𑁧𑁦. 𑀧𑀤𑀢𑁆𑀣𑀲𑁆𑀲𑀸𑀢𑀺 𑀧𑀤𑀸𑀪𑀺𑀥𑁂𑀬𑁆𑀬𑀲𑁆𑀲 𑀅𑀢𑁆𑀣𑀲𑁆𑀲, 𑀲𑀪𑀸𑀯𑀥𑀫𑁆𑀫𑀲𑁆𑀲 𑀯𑀸.

𑁧𑁧. 𑀦𑀺𑀓𑁆𑀔𑁂𑀧𑁄 𑀤𑁂𑀲𑀦𑀸. 𑀧𑀪𑀯𑁄 𑀲𑀫𑀼𑀤𑀬𑁄.

𑁧𑁨. ‘‘𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀲𑀗𑁆𑀕𑀳𑁄’’𑀢𑀺 𑀇𑀫𑀺𑀦𑀸 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄 𑀘-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺.

𑁧𑁩. ‘‘𑀕𑀸𑀣𑀸𑀭𑀼𑀴𑁆𑀳𑁂’’𑀢𑀺 𑀇𑀫𑀺𑀦𑀸 𑀧𑀸𑀴𑀺𑀆𑀕𑀢𑁄𑀯 𑀧𑀜𑁆𑀳𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀇𑀢𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀸𑀤𑀻𑀳𑀺 𑀩𑁆𑀬𑀸𑀓𑀢𑁂’’𑀢𑀺. 𑀢𑀲𑁆𑀲 𑀅𑀢𑁆𑀣𑀲𑁆𑀲𑀸𑀢𑀺 𑀆𑀭𑀤𑁆𑀥𑀲𑁆𑀲 𑀅𑀢𑁆𑀣𑀲𑁆𑀲, 𑀢𑁂𑀦 𑀆𑀭𑀫𑁆𑀪𑀲𑁄𑀥𑀦𑀲𑁆𑀲 𑀯𑀺𑀲𑀬𑀫𑀸𑀳. 𑀏𑀢𑁆𑀣 𑀘 𑀅𑀢𑁆𑀣𑀤𑁆𑀯𑀸𑀭𑁂𑀦𑁂𑀯 𑀧𑀤𑀧𑀼𑀘𑁆𑀙𑀸𑀲𑁄𑀥𑀦𑀫𑁆𑀧𑀺 𑀓𑀭𑀻𑀬𑀢𑀻𑀢𑀺 𑀧𑀼𑀦 ‘‘𑀢𑀲𑁆𑀲 𑀅𑀢𑁆𑀣𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀻𑀢𑀺 𑀯𑀺𑀲𑁆𑀲𑀚𑁆𑀚𑀦𑁂. 𑀯𑀺𑀲𑁆𑀲𑀚𑁆𑀚𑀦𑀲𑁄𑀥𑀦𑁂𑀦 𑀳𑀺 𑀧𑀜𑁆𑀳𑀸𑀲𑁄𑀥𑀦𑀁. 𑀧𑀜𑁆𑀳𑁂𑀢𑀺 𑀧𑀼𑀘𑁆𑀙𑀸𑀬𑀁. 𑀕𑀸𑀣𑀸𑀬𑀦𑁆𑀢𑀺 𑀉𑀧𑀮𑀓𑁆𑀔𑀡𑀁, 𑀢𑁂𑀦 𑀕𑀸𑀣𑀸𑀬𑀁, 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀻𑀲𑀼 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀫𑀸𑀭𑀩𑁆𑀪𑀸𑀢𑀺 𑀬𑀁 𑀲𑀻𑀮𑀸𑀤𑀺𑀫𑀸𑀭𑀩𑁆𑀪 𑀕𑀸𑀣𑀸𑀤𑀻𑀲𑀼 𑀤𑁂𑀲𑀺𑀢𑀁, 𑀢𑀲𑁆𑀫𑀺𑀁 𑀆𑀭𑀫𑁆𑀪𑁂𑀢𑀺 𑀅𑀢𑁆𑀣𑁄. 𑀧𑀼𑀘𑁆𑀙𑀺𑀢𑀸𑀢𑀺 𑀧𑀼𑀘𑁆𑀙𑀸𑀓𑀸𑀭𑀺𑀦𑀻, ‘‘𑀓𑀸 𑀏𑀢𑁆𑀣 𑀧𑀤𑀲𑀼𑀤𑁆𑀥𑀺, 𑀓𑀸 𑀧𑀜𑁆𑀳𑀸𑀲𑀼𑀤𑁆𑀥𑀺, 𑀓𑀸 𑀆𑀭𑀫𑁆𑀪𑀲𑀼𑀤𑁆𑀥𑀻’’𑀢𑀺 𑀏𑀯𑀁 𑀧𑀼𑀘𑁆𑀙𑀸𑀓𑀸𑀭𑀺𑀦𑀻 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑀸 𑀲𑀼𑀤𑁆𑀥𑀸𑀲𑀼𑀤𑁆𑀥𑀧𑀭𑀺𑀓𑁆𑀔𑀸𑀢𑀺 𑀬𑁄𑀚𑀦𑀸.

𑁧𑁪. 𑀦 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸𑀢𑀺 𑀬𑀣𑀸 𑀮𑁄𑀓𑁂 ‘‘𑀚𑀸𑀢𑀺 𑀲𑀸𑀫𑀜𑁆𑀜𑀁, 𑀪𑁂𑀤𑁄 𑀲𑀸𑀫𑀜𑁆𑀜𑀁, 𑀲𑀫𑁆𑀩𑀦𑁆𑀥𑁄 𑀲𑀸𑀫𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 𑀲𑀸𑀫𑀜𑁆𑀜𑀁 𑀚𑀸𑀢𑀺𑀆𑀤𑀺𑀁, 𑀢𑀩𑁆𑀩𑀺𑀥𑀼𑀭𑀜𑁆𑀘 𑀯𑀺𑀲𑁂𑀲𑀁 𑀯𑀺𑀓𑀧𑁆𑀧𑁂𑀦𑁆𑀢𑀺 𑀧𑀭𑀺𑀓𑀧𑁆𑀧𑁂𑀦𑁆𑀢𑀺, 𑀏𑀯𑀁 𑀦 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀬𑀤𑀸 𑀬𑁄 𑀓𑀸𑀮𑀯𑀺𑀲𑁂𑀲𑁄 ‘‘𑀲𑁆𑀯𑁂’’𑀢𑀺 𑀮𑀤𑁆𑀥𑀯𑁄𑀳𑀸𑀭𑁄, 𑀢𑀤𑀸 𑀲𑁄 𑀢𑀁𑀤𑀺𑀯𑀲𑀸𑀢𑀺𑀓𑁆𑀓𑀫𑁂 ‘‘𑀅𑀚𑁆𑀚𑀸’’𑀢𑀺, 𑀧𑀼𑀦 𑀢𑀁𑀤𑀺𑀯𑀲𑀸𑀢𑀺𑀓𑁆𑀓𑀫𑁂 ‘‘𑀳𑀺𑀬𑁆𑀬𑁄’’𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑀸 𑀏𑀢𑁂 𑀓𑀸𑀮𑀯𑀺𑀲𑁂𑀲𑀸. 𑀤𑀺𑀲𑀸𑀬𑀧𑀺 ‘‘𑀏𑀓𑀁 𑀅𑀯𑀥𑀺𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸, 𑀢𑀢𑁄 𑀅𑀜𑁆𑀜𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀙𑀺𑀫𑀸 𑀦𑀸𑀫 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀚𑀸𑀢𑀺𑀆𑀤𑀺𑀅𑀧𑁂𑀓𑁆𑀔𑀸𑀬𑀸𑀢𑀺 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬. 𑀲𑀘𑁆𑀘𑀸𑀧𑁂𑀓𑁆𑀔𑀸𑀬𑀸𑀢𑀺 𑀲𑀘𑁆𑀘𑀲𑀸𑀫𑀜𑁆𑀜𑀸𑀧𑁂𑀓𑁆𑀔𑀸𑀬. ‘‘𑀢𑀡𑁆𑀳𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀁 𑀓𑀸𑀫𑀢𑀡𑁆𑀳𑀸𑀤𑀺𑀅𑀧𑁂𑀓𑁆𑀔𑀸𑀬 𑀲𑀸𑀫𑀜𑁆𑀜𑀫𑁆𑀧𑀺 𑀲𑀫𑀸𑀦𑀁 𑀲𑀘𑁆𑀘𑀸𑀧𑁂𑀓𑁆𑀔𑀸𑀬 𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀲 𑀦𑀬𑁄 𑀲𑀫𑀼𑀤𑀬𑀸𑀤𑀻𑀲𑀼𑀧𑀻’’𑀢𑀺.

𑁧𑁬. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀩𑀼𑀤𑁆𑀥𑀯𑀘𑀦𑁂. 𑀢𑁂𑀦𑀸𑀳 ‘‘𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀔𑀸𑀢𑀲𑁆𑀲𑀸’’𑀢𑀺𑀆𑀤𑀺. 𑀬𑀣𑀸𑀭𑀼𑀢𑀁 𑀬𑀣𑀸𑀓𑀣𑀺𑀢𑀁 𑀲𑀤𑁆𑀤𑀢𑁄 𑀅𑀥𑀺𑀕𑀢𑀁 𑀦𑀺𑀤𑁆𑀥𑀸𑀭𑀺𑀢𑀁, 𑀦 𑀅𑀢𑁆𑀣𑀧𑁆𑀧𑀓𑀭𑀡𑀮𑀺𑀗𑁆𑀕𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀸𑀤𑀺𑀧𑁆𑀧𑀫𑀸𑀡𑀦𑁆𑀢𑀭𑀸𑀥𑀺𑀕𑀢𑀁. ‘‘𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀸’’𑀢𑀺 𑀇𑀤𑀁 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀪𑀸𑀯𑀦𑀸𑀯 𑀓𑀣𑀺𑀢𑀸, 𑀦 𑀧𑀳𑀸𑀦𑀁, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀦𑀬𑀲𑀗𑁆𑀔𑁂𑀧𑀯𑀡𑁆𑀡𑀦𑀸

𑁧𑁭. 𑀢𑀡𑁆𑀳𑀸𑀯𑀺𑀚𑁆𑀚𑀸𑀳𑀺 𑀓𑀭𑀡𑀪𑀽𑀢𑀸𑀳𑀺. 𑀲𑀁𑀓𑀺𑀮𑁂𑀲𑁄 𑀧𑀓𑁆𑀔𑁄 𑀏𑀢𑀲𑁆𑀲𑀸𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁄, 𑀲𑀁𑀓𑀺𑀮𑁂𑀲𑀧𑀓𑁆𑀔𑀺𑀓𑁄 𑀲𑀼𑀢𑁆𑀢𑀢𑁆𑀣𑁄, 𑀢𑀲𑁆𑀲 𑀦𑀬𑀦𑀮𑀓𑁆𑀔𑀡𑁄𑀢𑀺 𑀬𑁄𑀚𑀦𑀸. 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸, 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀘 𑀤𑀼𑀓𑁆𑀔𑀸𑀤𑀻𑀲𑀼 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀤𑀻𑀦𑀺 𑀫𑀕𑁆𑀕𑀸𑀦𑀼𑀕𑀼𑀡𑁄 𑀕𑀳𑀡𑀸𑀓𑀸𑀭𑁄 𑀅𑀦𑀼𑀕𑀸𑀳𑀡𑀦𑀬𑁄. 𑀬𑀤𑀺 𑀏𑀯𑀁 𑀓𑀣𑀁 𑀦𑀬𑁄𑀢𑀺 𑀆𑀳 ‘‘𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀦𑀬𑀯𑁄𑀳𑀸𑀭𑁄’’𑀢𑀺 𑀇𑀫𑀺𑀦𑀸 𑀦𑀬𑀸𑀥𑀺𑀝𑁆𑀞𑀸𑀦𑀁 𑀦𑀬𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁧𑁮. 𑀩𑀸𑀥𑀓𑀸𑀤𑀺𑀪𑀸𑀯𑀢𑁄𑀢𑀺 𑀩𑀸𑀥𑀓𑀧𑀪𑀯𑀲𑀦𑁆𑀢𑀺𑀦𑀺𑀬𑁆𑀬𑀸𑀦𑀪𑀸𑀯𑀢𑁄. 𑀅𑀜𑁆𑀜𑀣𑀸𑀪𑀸𑀯𑀸𑀪𑀸𑀯𑁂𑀦𑀸𑀢𑀺 𑀅𑀩𑀸𑀥𑀓𑀅𑀧𑁆𑀧𑀪𑀯𑀅𑀲𑀦𑁆𑀢𑀺 𑀅𑀦𑀺𑀬𑁆𑀬𑀸𑀦𑀪𑀸𑀯𑀸𑀪𑀸𑀯𑁂𑀦. 𑀲𑀘𑁆𑀘𑀲𑀪𑀸𑀯𑀢𑁆𑀢𑀸𑀢𑀺 𑀅𑀫𑀼𑀲𑀸𑀲𑀪𑀸𑀯𑀢𑁆𑀢𑀸. 𑀅𑀯𑀺𑀲𑀁𑀯𑀸𑀤𑀦𑀢𑁄𑀢𑀺 𑀅𑀭𑀺𑀬𑀲𑀪𑀸𑀯𑀸𑀤𑀺𑀪𑀸𑀯𑀲𑁆𑀲 𑀦 𑀯𑀺𑀲𑀁𑀯𑀸𑀤𑀦𑀢𑁄 𑀏𑀓𑀦𑁆𑀢𑀺𑀓𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁧𑁯. 𑀲𑀁𑀓𑀺𑀮𑀺𑀝𑁆𑀞𑀥𑀫𑁆𑀫𑀸𑀢𑀺 𑀲𑀁𑀓𑀺𑀮𑁂𑀲𑀲𑀫𑀦𑁆𑀦𑀸𑀕𑀢𑀸 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀦𑀬𑀓𑁄𑀯𑀺𑀤𑀸𑀢𑀺 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀥𑀫𑁆𑀫𑀦𑀬𑀓𑀼𑀲𑀮𑀸, 𑀏𑀓𑀢𑁆𑀢𑀸𑀤𑀺𑀦𑀬𑀓𑀼𑀲𑀮𑀸 𑀯𑀸.

𑁨𑁦. 𑀅𑀢𑁆𑀣𑀯𑀺𑀲𑁆𑀲𑀚𑁆𑀚𑀦𑁂𑀲𑀽𑀢𑀺 ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧) 𑀲𑀼𑀢𑁆𑀢𑁂 𑀓𑀢𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀘𑁂𑀯 𑀅𑀝𑁆𑀞𑀓𑀣𑀸𑀬 𑀓𑀢𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀲𑀼 𑀘. ‘‘𑀯𑁄𑀤𑀸𑀦𑀺𑀬𑀸’’𑀢𑀺 𑀇𑀫𑀺𑀦𑀸 𑀅𑀦𑀯𑀚𑁆𑀚𑀥𑀫𑁆𑀫𑀸 𑀇𑀥 𑀓𑀼𑀲𑀮𑀸𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀲𑀼𑀔𑀯𑀺𑀧𑀸𑀓𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀦𑀬𑀲𑁆𑀲 𑀬𑁄𑀚𑀦𑀢𑁆𑀣𑀁 𑀫𑀦𑀲𑀸 𑀯𑁄𑀮𑁄𑀓𑀬𑀢𑁂𑀢𑀺 𑀬𑁄𑀚𑀦𑀸.

𑁨𑁧. 𑀬𑀤𑀺 𑀓𑀭𑀡𑀪𑀽𑀢𑀁, 𑀓𑀣𑀁 𑀢𑀲𑁆𑀲 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑁄𑀢𑀺 𑀆𑀳 ‘‘𑀬𑁂𑀦 𑀳𑀻’’𑀢𑀺𑀆𑀤𑀺. 𑀤𑀺𑀲𑀸𑀪𑀽𑀢𑀥𑀫𑁆𑀫𑀸𑀦𑀁 𑀯𑁄𑀮𑁄𑀓𑀬𑀦𑀲𑀫𑀸𑀦𑀬𑀦𑀪𑀸𑀯𑀢𑁄 𑀯𑁄𑀳𑀸𑀭𑀪𑀽𑀢𑁄, 𑀓𑀫𑁆𑀫𑀪𑀽𑀢𑁄 𑀘 𑀦𑀬𑁄, 𑀦 𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀬𑁄 𑀯𑀺𑀬 𑀅𑀢𑁆𑀣𑀪𑀽𑀢𑁄𑀢𑀺 ‘‘𑀯𑁄𑀳𑀸𑀭𑀦𑀬𑁄, 𑀓𑀫𑁆𑀫𑀦𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀺.

𑀤𑁆𑀯𑀸𑀤𑀲𑀧𑀤𑀯𑀡𑁆𑀡𑀦𑀸

𑁨𑁩. 𑀅𑀧𑀭𑀺𑀬𑁄𑀲𑀺𑀢𑁂 𑀧𑀤𑁂𑀢𑀺 𑀉𑀘𑁆𑀘𑀸𑀭𑀡𑀯𑁂𑀮𑀸𑀬𑀁 𑀧𑀤𑁂 𑀅𑀲𑀫𑀢𑁆𑀢𑁂, 𑀯𑀺𑀧𑁆𑀧𑀓𑀢𑁂𑀢𑀺 𑀅𑀢𑁆𑀣𑁄. 𑀧𑀭𑀺𑀬𑁄𑀲𑀺𑀢𑁂 𑀳𑀺 ‘‘𑀧𑀤’’𑀦𑁆𑀢𑁆𑀯𑁂 𑀲𑀫𑀜𑁆𑀜𑀸 𑀲𑀺𑀬𑀸, 𑀦 ‘‘𑀅𑀓𑁆𑀔𑀭’’𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀤𑀲𑁆𑀲 𑀯𑁂𑀯𑀘𑀦𑀢𑀸𑀬 𑀅𑀢𑁆𑀣𑀯𑀲𑁂𑀦 𑀧𑀭𑀺𑀬𑀸𑀬𑀁 𑀔𑀭𑀦𑁆𑀢𑀁 𑀲𑀜𑁆𑀘𑀭𑀦𑁆𑀢𑀁 𑀯𑀺𑀬 𑀳𑁄𑀢𑀺, 𑀦 𑀏𑀯𑀁 𑀯𑀡𑁆𑀡𑁄 𑀅𑀯𑁂𑀯𑀘𑀦𑀢𑁆𑀢𑀸𑀢𑀺 𑀆𑀳 𑀧𑀭𑀺𑀬𑀸𑀬𑀯𑀲𑁂𑀦 𑀅𑀓𑁆𑀔𑀭𑀡𑀢𑁄’’𑀢𑀺. 𑀦 𑀳𑀺 𑀯𑀡𑁆𑀡𑀲𑁆𑀲 𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑀻’’𑀢𑀺 𑀇𑀤𑀁 𑀅𑀓𑀸𑀭𑀸𑀤𑀺𑀯𑀡𑁆𑀡𑀯𑀺𑀲𑁂𑀲𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀦 𑀯𑀡𑁆𑀡𑀲𑀸𑀫𑀜𑁆𑀜𑀁. 𑀢𑀲𑁆𑀲 𑀳𑀺 𑀯𑀡𑁆𑀡𑁄 𑀅𑀓𑁆𑀔𑀭𑀦𑁆𑀢𑀺 𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄 𑀏𑀯𑀸𑀢𑀺.

𑀅𑀓𑁆𑀔𑀭𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀢𑀧𑁆𑀧𑀲𑀗𑁆𑀕𑁂𑀦 𑀯𑀡𑁆𑀡𑀲𑀤𑁆𑀤𑀲𑁆𑀲𑀧𑀺 𑀯𑀢𑁆𑀢𑀼𑀁 ‘‘𑀓𑁂𑀦𑀝𑁆𑀞𑁂𑀦 𑀯𑀡𑁆𑀡𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀦𑀼 𑀧𑀤𑁂𑀦, 𑀯𑀸𑀓𑁆𑀬𑁂𑀦 𑀯𑀸 𑀅𑀢𑁆𑀣𑁄 𑀲𑀁𑀯𑀡𑁆𑀡𑀻𑀬𑀢𑀺, 𑀦 𑀅𑀓𑁆𑀔𑀭𑁂𑀦𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀯𑀡𑁆𑀡𑁄 𑀏𑀯 𑀳𑀻’’𑀢𑀺𑀆𑀤𑀺. 𑀧𑀤𑀸𑀤𑀺𑀪𑀸𑀯𑁂𑀦𑀸𑀢𑀺 𑀧𑀤𑀯𑀸𑀓𑁆𑀬𑀪𑀸𑀯𑁂𑀦. 𑀬𑀣𑀸𑀲𑀫𑁆𑀩𑀦𑁆𑀥𑀦𑁆𑀢𑀺 𑀬𑀣𑀸𑀲𑀗𑁆𑀓𑁂𑀢𑀁. 𑀅𑀬𑀁-𑀲𑀤𑁆𑀤𑁄 𑀇𑀫𑀲𑁆𑀲𑀢𑁆𑀣𑀲𑁆𑀲 𑀯𑀸𑀘𑀓𑁄, 𑀅𑀬𑀁 𑀅𑀢𑁆𑀣𑁄 𑀇𑀫𑀲𑁆𑀲 𑀲𑀤𑁆𑀤𑀲𑁆𑀲 𑀯𑀘𑀦𑀻𑀬𑁄𑀢𑀺 𑀬𑀣𑀸𑀕𑀳𑀺𑀢𑀲𑀗𑁆𑀓𑁂𑀢𑀸𑀦𑀼𑀭𑀽𑀧𑀁 𑀲𑀤𑁆𑀤𑀢𑁆𑀣𑀸𑀦𑀁 𑀯𑀸𑀘𑀓𑀯𑀘𑀦𑀻𑀬𑀪𑀸𑀯𑁄. 𑀅𑀣 𑀯𑀸 𑀬𑁆𑀯𑀸𑀬𑀁 𑀲𑀤𑁆𑀤𑀢𑁆𑀣𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀦𑀸𑀪𑀸𑀯𑁄, 𑀲𑁄 𑀲𑀫𑁆𑀩𑀦𑁆𑀥𑁄. 𑀢𑀤𑀦𑀼𑀭𑀽𑀧𑀁 𑀏𑀓𑀓𑁆𑀔𑀭𑀁 𑀦𑀸𑀫𑀧𑀤𑀁 ‘‘𑀫𑀸 𑀏𑀯𑀁 𑀫𑀜𑁆𑀜𑀲𑀻’’𑀢𑀺𑀆𑀤𑀻𑀲𑀼 𑀫𑀸-𑀓𑀸𑀭𑀸𑀤𑀺. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀢𑁂 𑀳𑀺 𑀅𑀪𑀺𑀥𑀫𑁆𑀫𑀤𑁂𑀲𑀦𑀁 ‘‘𑀫𑀦𑀲𑀸𑀤𑁂𑀲𑀦𑀸’’𑀢𑀺 𑀯𑀤𑀦𑁆𑀢𑀺, 𑀬𑀢𑁄 𑀭𑀸𑀳𑀼𑀮𑀸𑀘𑀭𑀺𑀬𑁄 ‘‘𑀯𑀺𑀲𑀼𑀤𑁆𑀥𑀓𑀭𑀼𑀡𑀸𑀦𑀁 𑀫𑀦𑀲𑀸𑀤𑁂𑀲𑀦𑀸 𑀯𑀸𑀘𑀸𑀬 𑀅𑀓𑁆𑀔𑀭𑀡𑀢𑁄 𑀅𑀓𑁆𑀔𑀭𑀲𑀜𑁆𑀜𑀺𑀢𑀸’’𑀢𑀺 𑀆𑀳.

𑀲𑀢𑁆𑀯𑀧𑁆𑀧𑀥𑀸𑀦𑀦𑁆𑀢𑀺 𑀤𑁆𑀭𑀩𑁆𑀬𑀧𑁆𑀧𑀥𑀸𑀦𑀁. 𑀦𑀸𑀫𑀧𑀤𑁂 𑀳𑀺 𑀤𑁆𑀭𑀩𑁆𑀬𑀫𑀸𑀯𑀺𑀪𑀽𑀢𑀭𑀽𑀧𑀁, 𑀓𑀺𑀭𑀺𑀬𑀸 𑀅𑀦𑀸𑀯𑀺𑀪𑀽𑀢𑀭𑀽𑀧𑀸 𑀬𑀣𑀸 ‘‘𑀨𑀲𑁆𑀲𑁄’’𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧, 𑁩𑁯; 𑀫𑀳𑀸𑀯. 𑁧; 𑀯𑀺𑀪. 𑁨𑁨𑁫; 𑀉𑀤𑀸. 𑁧; 𑀦𑁂𑀢𑁆𑀢𑀺. 𑁨𑁪). 𑀆𑀔𑁆𑀬𑀸𑀢𑀧𑀤𑁂 𑀧𑀦 𑀓𑀺𑀭𑀺𑀬𑀸 𑀆𑀯𑀺𑀪𑀽𑀢𑀭𑀽𑀧𑀸, 𑀤𑁆𑀭𑀩𑁆𑀬𑀫𑀦𑀸𑀯𑀺𑀪𑀽𑀢𑀭𑀽𑀧𑀁 𑀬𑀣𑀸 ‘‘𑀨𑀼𑀲𑀢𑀻’’𑀢𑀺. 𑀢𑁂𑀦 𑀦𑁂𑀲𑀁 𑀲𑀢𑁆𑀯𑀓𑀺𑀭𑀺𑀬𑀸𑀧𑁆𑀧𑀥𑀸𑀦𑀢𑀸 𑀯𑀼𑀢𑁆𑀢𑀸. 𑀓𑀺𑀭𑀺𑀬𑀸𑀯𑀺𑀲𑁂𑀲𑀕𑁆𑀕𑀳𑀡𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀸𑀯𑀩𑁄𑀥𑀳𑁂𑀢𑀼 𑀓𑀺𑀭𑀺𑀬𑀸𑀯𑀺𑀲𑁂𑀲𑀤𑀻𑀧𑀦𑀢𑁄, 𑀬𑀣𑀸 ‘‘𑀘𑀺𑀭𑀧𑁆𑀧𑀯𑀸𑀲𑀺’’𑀦𑁆𑀢𑀺 (𑀥. 𑀧. 𑁨𑁧𑁯) 𑀏𑀢𑁆𑀣 𑀧-𑀲𑀤𑁆𑀤𑁄 𑀯𑀲𑀦𑀓𑀺𑀭𑀺𑀬𑀸𑀬 𑀯𑀺𑀬𑁄𑀕𑀯𑀺𑀲𑀺𑀝𑁆𑀞𑀢𑀁 𑀤𑀻𑀧𑁂𑀢𑀺. ‘‘𑀏𑀯𑀁 𑀫𑀦𑀲𑀺 𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀸𑀓𑀢𑁆𑀣𑀸’’𑀢𑀺𑀆𑀤𑀻𑀲𑀼 𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀚𑁄𑀢𑀓𑁄 𑀏𑀯𑀁-𑀲𑀤𑁆𑀤𑁄. ‘‘𑀏𑀯𑀁𑀲𑀻𑀮𑀸 (𑀤𑀻. 𑀦𑀺. 𑁩.𑁧𑁪𑁨) 𑀏𑀯𑀁𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁩; 𑀫. 𑀦𑀺. 𑁩. 𑁧𑁯𑁮; 𑀲𑀁. 𑀦𑀺. 𑁫.𑁩𑁭𑁮) 𑀲𑀢𑁆𑀯𑀯𑀺𑀲𑁂𑀲𑀲𑁆𑀲. 𑀏𑀯𑀁 𑀲𑁂𑀲𑀦𑀺𑀧𑀸𑀢𑀧𑀤𑀸𑀦𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀓𑀺𑀭𑀺𑀬𑀸𑀬…𑀧𑁂… 𑀦𑀺𑀧𑀸𑀢𑀧𑀤’’𑀦𑁆𑀢𑀺.

𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁, 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀧𑀤𑀸𑀪𑀺𑀳𑀺𑀢’’𑀦𑁆𑀢𑀺. 𑀅𑀣 𑀯𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁, 𑀬𑁄 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀤𑀸𑀪𑀺𑀳𑀺𑀢𑀁 𑀧𑀤𑁂𑀳𑀺 𑀓𑀣𑀺𑀢𑀁, 𑀬𑁄 𑀧𑀤𑁂𑀳𑀺 𑀧𑀓𑀸𑀲𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀼𑀪𑀬𑀁, 𑀬𑀤𑀺 𑀧𑀤𑀲𑀫𑀼𑀤𑀸𑀬𑁄 𑀯𑀸𑀓𑁆𑀬𑀁, 𑀢𑀲𑁆𑀲 𑀓𑁄 𑀧𑀭𑀺𑀘𑁆𑀙𑁂𑀤𑁄. 𑀬𑀸𑀯𑀢𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀧𑀭𑀺𑀬𑁄𑀲𑀸𑀦𑀁, 𑀢𑀸𑀯𑀢𑀸 𑀏𑀓𑀯𑀸𑀓𑁆𑀬𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀩𑀳𑀽𑀧𑁂𑀢𑁆𑀣 𑀧𑀓𑀸𑀭𑁂 𑀯𑀡𑁆𑀡𑁂𑀦𑁆𑀢𑀺. 𑀓𑀺𑀁 𑀢𑁂𑀳𑀺, 𑀲𑀸𑀔𑁆𑀬𑀸𑀢𑀁 𑀲𑀸𑀩𑁆𑀬𑀬𑀁 𑀲𑀓𑀸𑀭𑀓𑀁 𑀲𑀯𑀺𑀲𑁂𑀲𑀦𑀁 ‘‘𑀯𑀸𑀓𑁆𑀬’’𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀘 𑀧𑀤𑁂𑀦𑀧𑀺 𑀅𑀢𑁆𑀣𑁄 𑀩𑁆𑀬𑀜𑁆𑀚𑀻𑀬𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀧𑀤𑀫𑀢𑁆𑀢𑀲𑀯𑀦𑁂𑀧𑀺 𑀳𑀻’’𑀢𑀺𑀆𑀤𑀺. 𑀆𑀓𑀸𑀭𑁂𑀲𑀼 𑀯𑀸𑀓𑁆𑀬𑀯𑀺𑀪𑀸𑀕𑁂𑀲𑀼 𑀅𑀪𑀺𑀳𑀺𑀢𑀁 𑀓𑀣𑀺𑀢𑀁 𑀦𑀺𑀩𑁆𑀩𑀘𑀦𑀁 𑀆𑀓𑀸𑀭𑀸𑀪𑀺𑀳𑀺𑀢𑀁 𑀦𑀺𑀩𑁆𑀩𑀘𑀦𑀁. ‘‘𑀅𑀪𑀺𑀳𑀺𑀢𑀦𑁆𑀢𑀺 𑀘 𑀧𑀸𑀴𑀺𑀆𑀕𑀢’’𑀦𑁆𑀢𑀺 𑀯𑀤𑀦𑁆𑀢𑀺.

‘‘𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀢𑀺, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀯𑀸 𑀫𑀕𑁆𑀕𑀻𑀬𑀢𑀺, 𑀓𑀺𑀮𑁂𑀲𑁂 𑀯𑀸 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑀅𑀝𑁆𑀞. 𑁧𑁬) 𑀦𑀺𑀩𑁆𑀩𑀘𑀦𑀸𑀦𑀁 𑀯𑀺𑀢𑁆𑀣𑀸𑀭𑁄. 𑀢𑀁𑀦𑀺𑀤𑁆𑀤𑁂𑀲𑀓𑀣𑀦𑀢𑁆𑀢𑀸 𑀦𑀺𑀤𑁆𑀤𑁂𑀲𑁄𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀦𑀺𑀩𑁆𑀩𑀘𑀦𑀯𑀺𑀢𑁆𑀣𑀸𑀭𑁄 𑀦𑀺𑀭𑀯𑀲𑁂𑀲𑀤𑁂𑀲𑀦𑀢𑁆𑀢𑀸 𑀦𑀺𑀤𑁆𑀤𑁂𑀲𑁄’’𑀢𑀺. 𑀧𑀤𑁂𑀳𑀻𑀢𑀺 𑀯𑀸𑀓𑁆𑀬𑀸𑀯𑀬𑀯𑀪𑀽𑀢𑁂𑀳𑀺, 𑀯𑀸𑀓𑁆𑀬𑀢𑁄 𑀯𑀺𑀪𑀚𑁆𑀚𑀫𑀸𑀦𑁂𑀳𑀺 𑀯𑀸 𑀆𑀔𑁆𑀬𑀸𑀢𑀸𑀤𑀺𑀧𑀤𑁂𑀳𑀺. 𑀢𑁂𑀦𑀸𑀳 ‘‘𑀯𑀸𑀓𑁆𑀬𑀲𑁆𑀲 𑀯𑀺𑀪𑀸𑀕𑁄’’𑀢𑀺, 𑀢𑀣𑀸 𑀘𑀸𑀳 ‘‘𑀅𑀧𑀭𑀺𑀬𑁄𑀲𑀺𑀢𑁂’’𑀢𑀺𑀆𑀤𑀺. 𑀅𑀧𑀭𑁂 𑀧𑀦 ‘‘𑀧𑀓𑀢𑀺𑀧𑀘𑁆𑀘𑀬𑀮𑁄𑀧𑀸𑀤𑁂𑀲𑀸𑀤𑀺𑀯𑀲𑁂𑀦 𑀅𑀓𑁆𑀔𑀭𑀯𑀺𑀪𑀸𑀕𑁄 𑀆𑀓𑀸𑀭𑁄, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀯𑀺𑀪𑀸𑀕𑁄 𑀦𑀺𑀩𑁆𑀩𑀘𑀦𑀁, 𑀯𑀸𑀓𑁆𑀬𑀯𑀺𑀪𑀸𑀕𑁄 𑀦𑀺𑀤𑁆𑀤𑁂𑀲𑁄. 𑀯𑀡𑁆𑀡𑀧𑀤𑀯𑀸𑀓𑁆𑀬𑀸𑀦𑀺 𑀳𑀺 𑀅𑀯𑀺𑀪𑀢𑁆𑀢𑀸𑀦𑀺, 𑀯𑀺𑀪𑀢𑁆𑀢𑀸𑀦𑀺 𑀘 𑀙 𑀩𑁆𑀬𑀜𑁆𑀚𑀦𑀧𑀤𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀙𑀝𑁆𑀞𑀁 𑀯𑀘𑀦𑀦𑁆𑀢𑀺 𑀙𑀝𑁆𑀞𑀁 𑀧𑀤𑀁. 𑀓𑀸𑀢𑀩𑁆𑀩𑀦𑁆𑀢𑀺 ‘‘𑀅𑀓𑁆𑀔𑀭𑀁 𑀧𑀤𑀁 𑀩𑁆𑀬𑀜𑁆𑀚𑀦𑀁 𑀆𑀓𑀸𑀭𑁄 𑀢𑀣𑁂𑀯 𑀦𑀺𑀭𑀼𑀢𑁆𑀢𑀺 𑀦𑀺𑀤𑁆𑀤𑁂𑀲𑁄 𑀙𑀝𑁆𑀞𑀯𑀘𑀦’’𑀦𑁆𑀢𑀺 𑀕𑀸𑀣𑀸𑀬𑀁 𑀏𑀯𑀁 𑀓𑀢𑁆𑀢𑀩𑁆𑀩𑀁, 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀯𑀸 𑀆𑀓𑀸𑀭𑀧𑀤𑀁 𑀘𑀢𑀼𑀢𑁆𑀣𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁄 𑀲𑀤𑁆𑀤𑀯𑁄𑀳𑀸𑀭𑁄 𑀯𑀺𑀪𑀢𑁆𑀢𑁂𑀳𑀺, 𑀅𑀯𑀺𑀪𑀢𑁆𑀢𑁂𑀳𑀺 𑀘 𑀅𑀓𑁆𑀔𑀭𑀧𑀤𑀯𑀸𑀓𑁆𑀬𑁂𑀳𑁂𑀯, 𑀢𑀤𑀜𑁆𑀜𑀧𑁆𑀧𑀓𑀸𑀭𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀬𑀸𑀦𑀺𑀫𑀸𑀦𑀻’’𑀢𑀺𑀆𑀤𑀺.

𑁨𑁪. 𑀓𑀸𑀲𑀦𑀸𑀲𑀤𑁆𑀤𑁄 𑀓𑀫𑁆𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀲𑀻𑀬𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀤𑁂𑀳𑀺 𑀢𑀸𑀯 𑀅𑀢𑁆𑀣𑀲𑁆𑀲 𑀲𑀗𑁆𑀓𑀸𑀲𑀦𑀸, 𑀧𑀓𑀸𑀲𑀦𑀸 𑀘 𑀳𑁄𑀢𑀼, 𑀧𑀤𑀸𑀯𑀥𑀺𑀓𑀸𑀧𑀺 𑀲𑀁𑀯𑀡𑁆𑀡𑀦𑀸 𑀇𑀘𑁆𑀙𑀺𑀢𑀸𑀢𑀺 𑀅𑀓𑁆𑀔𑀭𑁂𑀳𑀺 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀅𑀓𑁆𑀔𑀭𑁂𑀳𑀺 𑀲𑀼𑀬𑁆𑀬𑀫𑀸𑀦𑁂𑀳𑀻’’𑀢𑀺𑀆𑀤𑀺. 𑀧𑀤𑀢𑁆𑀣𑀲𑀫𑁆𑀧𑀝𑀺𑀧𑀢𑁆𑀢𑀻𑀢𑀺 𑀧𑀤𑀸𑀪𑀺𑀥𑁂𑀬𑁆𑀬𑀅𑀢𑁆𑀣𑀸𑀯𑀩𑁄𑀥𑁄. ‘‘𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀅𑀓𑁆𑀔𑀭𑀓𑀭𑀡𑀁 𑀲𑀗𑁆𑀓𑀸𑀲𑀦𑀪𑀽𑀢𑀁 𑀉𑀕𑁆𑀖𑀝𑀦𑀓𑀺𑀭𑀺𑀬𑀁 𑀯𑀤𑀦𑁆𑀢𑁂𑀦 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑁄 𑀲𑀸𑀥𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀺𑀪𑀚𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀧𑀜𑁆𑀜𑀢𑁆𑀢𑀻𑀢𑀺 𑀏𑀓𑀢𑁆𑀢𑀦𑀺𑀤𑁆𑀤𑁂𑀲𑁄 𑀲𑀫𑀸𑀳𑀸𑀭𑁄𑀢𑀺 𑀅𑀬𑀁 𑀤𑁆𑀯𑀦𑁆𑀤𑀲𑀫𑀸𑀲𑁄. 𑀉𑀪𑀬𑁂𑀦𑀸𑀢𑀺 ‘‘𑀯𑀺𑀯𑀭𑀡𑀸, 𑀯𑀺𑀪𑀚𑀦𑀸’’𑀢𑀺 𑀇𑀫𑀺𑀦𑀸 𑀤𑁆𑀯𑀬𑁂𑀦. 𑀏𑀢𑁂𑀳𑀻𑀢𑀺 𑀏𑀢𑁆𑀣 𑀏𑀯-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀏𑀢𑁂𑀳𑀺 𑀏𑀯𑀸’’𑀢𑀺. ‘‘𑀲𑀗𑁆𑀓𑀸𑀲𑀦𑀸…𑀧𑁂… 𑀅𑀪𑀸𑀯𑀢𑁄’’𑀢𑀺 𑀇𑀫𑀺𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀅𑀦𑀽𑀦𑀸𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀺. 𑀉𑀕𑁆𑀖𑀝𑀦𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀯𑀺𑀧𑀜𑁆𑀘𑀦𑀦𑀬𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁫. 𑀲𑀫𑁆𑀫𑀸 𑀬𑀼𑀢𑁆𑀢𑁄𑀢𑀺 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁, 𑀅𑀦𑀯𑀲𑁂𑀲𑀢𑁄 𑀘 𑀬𑀼𑀢𑁆𑀢𑁄 𑀲𑀳𑀺𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀦𑀽𑀦𑀸’’𑀢𑀺. 𑀲𑀩𑁆𑀩𑁄 𑀳𑀺 𑀧𑀸𑀴𑀺𑀅𑀢𑁆𑀣𑁄 𑀅𑀢𑁆𑀣𑀧𑀤𑀅𑀢𑁆𑀣𑀦𑀬𑁂𑀳𑀺 𑀅𑀦𑀯𑀲𑁂𑀲𑀢𑁄 𑀲𑀗𑁆𑀕𑀳𑀺𑀢𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑀲𑁆𑀲 𑀳𑀻’’𑀢𑀺𑀆𑀤𑀺.

𑁨𑁬. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑀽𑀮𑀧𑀤𑀧𑀤𑀝𑁆𑀞𑀸𑀦𑀸𑀦𑀺 𑀅𑀲𑀗𑁆𑀕𑀳𑀺𑀢𑀸𑀦𑀻𑀢𑀺? 𑀧𑀤𑀢𑁆𑀣𑀦𑁆𑀢𑀭𑀸𑀪𑀸𑀯𑀢𑁄. 𑀫𑀽𑀮𑀧𑀤𑀸𑀦𑀺 𑀳𑀺 𑀦𑀬𑀸𑀦𑀁 𑀲𑀫𑀼𑀝𑁆𑀞𑀸𑀦𑀫𑀢𑁆𑀢𑀢𑁆𑀢𑀸 𑀧𑀤𑀝𑁆𑀞𑀸𑀦𑀸𑀦𑀻𑀢𑀺 𑀤𑀲𑁆𑀲𑀺𑀢𑁄𑀬𑀁 𑀦𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀢𑁄 𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀦𑁂𑀢𑁆𑀢𑀺𑀧𑀤𑀢𑁆𑀣𑁄 𑀦𑀢𑁆𑀣𑀻’’𑀢𑀺.

𑀦𑁂𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸𑀬. 𑀳𑀸𑀭𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀸𑀢𑀺 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀳𑀸𑀭𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸. 𑀲𑁆𑀯𑀸𑀬𑀦𑁆𑀢𑀺 𑀲𑁄 𑀅𑀬𑀁 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄. 𑀬𑁂𑀦 𑀅𑀦𑀼𑀓𑁆𑀓𑀫𑁂𑀦 𑀦𑁂𑀢𑁆𑀢𑀺𑀬𑀁 𑀤𑁂𑀲𑀺𑀢𑀸, 𑀢𑁂𑀦𑁂𑀯 𑀲𑀼𑀢𑁆𑀢𑁂 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀢𑀺. 𑀏𑀯𑀁 𑀲𑀺𑀤𑁆𑀥𑁂𑀢𑀺 𑀤𑁂𑀲𑀦𑀸𑀓𑁆𑀓𑀫𑁂𑀦𑁂𑀯 𑀲𑀺𑀤𑁆𑀥𑁂. 𑀅𑀬𑀁 𑀆𑀭𑀫𑁆𑀪𑁄𑀢𑀺 ‘‘𑀲𑁄𑀴𑀲 𑀳𑀸𑀭𑀸 𑀧𑀞𑀫’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀆𑀭𑀫𑁆𑀪𑁄. 𑀇𑀫𑀫𑀢𑁆𑀣𑀦𑁆𑀢𑀺 𑀇𑀫𑀁 𑀯𑀼𑀘𑁆𑀘𑀫𑀸𑀦𑀦𑀺𑀬𑀫𑀲𑀗𑁆𑀔𑀸𑀢𑀁 𑀅𑀢𑁆𑀣𑀁.

𑀬𑀤𑀺 𑀤𑁂𑀲𑀺𑀢𑀓𑁆𑀓𑀫𑁂𑀦𑁂𑀯 𑀳𑀸𑀭𑀦𑀬𑀸 𑀲𑀼𑀢𑁆𑀢𑁂 𑀬𑁄𑀚𑁂𑀢𑀩𑁆𑀩𑀸 𑀲𑀺𑀬𑀼𑀁, 𑀓𑀺𑀁 𑀲𑁄 𑀓𑀫𑁄 𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑁄, 𑀉𑀤𑀸𑀳𑀼 𑀓𑀸𑀭𑀡𑀲𑀸𑀧𑁂𑀓𑁆𑀔𑁄𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑁄 𑀳𑀸𑀭𑀦𑀬𑀸𑀦𑀁 𑀅𑀦𑀼𑀓𑁆𑀓𑀫𑁄, 𑀅𑀦𑁂𑀓𑁂 𑀅𑀢𑁆𑀣𑀸 𑀯𑀼𑀘𑁆𑀘𑀫𑀸𑀦𑀸 𑀅𑀯𑀲𑁆𑀲𑀁 𑀏𑀓𑁂𑀦 𑀓𑀫𑁂𑀦 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀬𑁂𑀦 𑀓𑁂𑀦𑀘𑀺 𑀓𑀫𑁂𑀦 𑀲𑀼𑀢𑁆𑀢𑁂 𑀬𑁄𑀚𑁂𑀢𑀩𑁆𑀩𑀸 𑀲𑀺𑀬𑀼𑀁, 𑀢𑀣𑀸 𑀲𑀢𑀺 𑀦𑀺𑀬𑀫𑁄 𑀦𑀺𑀭𑀢𑁆𑀣𑀓𑁄 𑀲𑀺𑀬𑀸. 𑀅𑀣 𑀓𑀸𑀭𑀡𑀲𑀸𑀧𑁂𑀓𑁆𑀔𑁄, 𑀓𑀺𑀁 𑀢𑀁 𑀓𑀸𑀭𑀡𑀦𑁆𑀢𑀺? 𑀇𑀢𑀭𑁄 𑀓𑀸𑀭𑀡𑀕𑀯𑁂𑀲𑀦𑀁 𑀅𑀓𑀢𑁆𑀯𑀸 𑀅𑀢𑁆𑀣𑁄 𑀏𑀯𑁂𑀢𑁆𑀣 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀦𑀸𑀬𑀫𑀦𑀼𑀬𑁄𑀕𑁄 𑀦 𑀓𑀢𑁆𑀣𑀘𑀺 𑀅𑀦𑀼𑀓𑁆𑀓𑀫𑁂 𑀦𑀺𑀯𑀺𑀲𑀢𑀻’’𑀢𑀺 𑀯𑀢𑁆𑀯𑀸 ‘‘𑀦 𑀧𑀦 𑀫𑀬𑀁 𑀤𑁂𑀯𑀸𑀦𑀁𑀧𑀺𑀬𑀲𑁆𑀲 𑀫𑀦𑁄𑀭𑀣𑀯𑀺𑀖𑀸𑀢𑀸𑀬 𑀘𑁂𑀢𑁂𑀫𑀸’’𑀢𑀺 𑀓𑀫𑀓𑀸𑀭𑀡𑀁 𑀯𑀺𑀘𑀸𑀭𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸𑀳𑀸𑀭𑀲𑁆𑀲 𑀢𑀸𑀯 𑀆𑀤𑀺𑀢𑁄 𑀤𑁂𑀲𑀦𑀸𑀬 𑀓𑀸𑀭𑀡𑀁 𑀧𑀢𑀺𑀝𑁆𑀞𑀧𑁂𑀢𑀺. 𑀢𑀢𑁆𑀣 𑀥𑀫𑁆𑀫𑀤𑁂𑀲𑀦𑀸𑀬 𑀦𑀺𑀲𑁆𑀲𑀬𑁄 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀦𑀺, 𑀲𑀭𑀻𑀭𑀁 𑀆𑀡𑀢𑁆𑀢𑀺. 𑀧𑀓𑀢𑀺𑀬𑀸 𑀲𑀪𑀸𑀯𑁂𑀦. 𑀦𑀺𑀤𑁆𑀥𑀸𑀭𑀡𑁂𑀦 𑀯𑀺𑀦𑀸𑀧𑀺 𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀦𑀺𑀲𑁆𑀲𑀬𑀪𑀸𑀯𑀢𑁄.

‘‘𑀢𑀣𑀸 𑀳𑀺 𑀯𑀓𑁆𑀔𑀢𑀻’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀅𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺.

𑀯𑀺𑀘𑀬𑀸𑀦𑀦𑁆𑀢𑀭𑀦𑁆𑀢𑀺 𑀯𑀺𑀘𑀬𑀳𑀸𑀭𑀸𑀦𑀦𑁆𑀢𑀭𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 𑀳𑀻𑀢𑀺 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑁂 𑀬𑀼𑀢𑁆𑀢𑀸𑀬𑀼𑀢𑁆𑀢𑀸𑀦𑀁 𑀓𑀸𑀭𑀡𑀧𑀭𑀫𑁆𑀧𑀭𑀸𑀬 𑀧𑀭𑀺𑀕𑁆𑀕𑀳𑀺𑀢𑀲𑀪𑀸𑀯𑀸𑀦𑀁 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀏𑀓𑀮𑀓𑁆𑀔𑀡𑀢𑀸𑀬 𑀕𑀳𑀡𑀁 𑀯𑀼𑀢𑁆𑀢𑀁.

𑀅𑀢𑁆𑀣𑀢𑁄 𑀦𑀺𑀤𑁆𑀥𑀸𑀭𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑀼𑀤𑁆𑀥𑀸𑀭𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺𑀆𑀤𑀺𑀅𑀢𑁆𑀣𑀢𑁄 𑀲𑀼𑀢𑁆𑀢𑀦𑁆𑀢𑀭𑀢𑁄 𑀉𑀤𑁆𑀥𑀝𑀸𑀦𑀁 𑀲𑀁𑀯𑀡𑁆𑀡𑀺𑀬𑀫𑀸𑀦𑀲𑀼𑀢𑁆𑀢𑁂 𑀆𑀦𑀻𑀢𑀸𑀦𑀁 𑀧𑀸𑀴𑀺𑀥𑀫𑁆𑀫𑀸𑀦𑀁. 𑀲𑀤𑁆𑀤𑀢𑁄, 𑀧𑀫𑀸𑀡𑀦𑁆𑀢𑀭𑀢𑁄 𑀘 𑀮𑀤𑁆𑀥𑀸𑀦𑀁 𑀇𑀥 𑀯𑀺𑀘𑀸𑀭𑁂𑀢𑀩𑁆𑀩𑀢𑁆𑀢𑀸 𑀆𑀳 ‘‘𑀦𑀺𑀭𑀯𑀲𑁂𑀲𑀢𑁄’’𑀢𑀺. 𑀅𑀢𑁆𑀣𑀲𑁆𑀲𑀸𑀢𑀺 𑀅𑀪𑀺𑀥𑁂𑀬𑁆𑀬𑀢𑁆𑀣𑀲𑁆𑀲. 𑀥𑀫𑁆𑀫𑀲𑁆𑀲𑀸𑀢𑀺 𑀲𑀪𑀸𑀯𑀥𑀫𑁆𑀫𑀲𑁆𑀲. 𑀢𑀢𑁆𑀣 𑀢𑀢𑁆𑀣 𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀻𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂, 𑀥𑀫𑁆𑀫𑁂 𑀘 𑀢𑀁 𑀦𑀸𑀫𑀁 𑀅𑀪𑀺𑀦𑀺𑀭𑁄𑀧𑁂𑀢𑀺, ‘‘𑀅𑀬𑀫𑁂𑀯𑀁𑀦𑀸𑀫𑁄’’𑀢𑀺 𑀯𑁄𑀳𑀭𑀢𑀺. ‘‘𑀅𑀢𑁆𑀣𑀲𑁆𑀲, 𑀥𑀫𑁆𑀫𑀲𑁆𑀲𑀸’’𑀢𑀺 𑀧𑀤𑀤𑁆𑀯𑀬𑁂𑀦 𑀲𑀸𑀫𑀜𑁆𑀜𑀢𑁄 𑀅𑀢𑁆𑀣𑁄, 𑀥𑀫𑁆𑀫𑁄 𑀘 𑀅𑀦𑀯𑀲𑁂𑀲𑁂𑀢𑁆𑀯𑀸 𑀕𑀳𑀺𑀢𑁄𑀢𑀺 𑀆𑀳 ‘‘𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦’’𑀦𑁆𑀢𑀺, 𑀬𑀢𑁄 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀢𑀢𑁆𑀣𑀸’’𑀢𑀺. 𑀢𑀣𑀸𑀢𑀺 𑀬𑀣𑀸 𑀅𑀦𑀯𑀲𑁂𑀲𑀢𑁆𑀣𑀸𑀯𑀩𑁄𑀥𑀤𑀻𑀧𑀓𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀓𑀢𑀁 𑀘𑀢𑀼𑀩𑁆𑀬𑀽𑀳𑀧𑀸𑀴𑀺𑀬𑀁, 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀻𑀢𑀺 𑀏𑀢𑁆𑀣 𑀅𑀲𑀤𑁆𑀤𑀯𑀢𑀻 𑀅𑀢𑁆𑀣𑀸 𑀧𑀯𑀢𑁆𑀢𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀉𑀤𑁆𑀥𑀝𑀸𑀢𑀺 𑀉𑀧𑀲𑀁𑀳𑀸𑀭𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄.

𑀢𑁂𑀦𑁂𑀯𑀸𑀢𑀺 𑀲𑀼𑀢𑁆𑀢𑀦𑁆𑀢𑀭𑀲𑀁𑀲𑀦𑁆𑀤𑀦𑀲𑁆𑀲 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀦𑁆𑀢𑀭𑀸𑀯𑀝𑁆𑀝𑀦𑀽𑀧𑀸𑀬𑀪𑀸𑀯𑀢𑁄 𑀏𑀯. 𑀬𑀢𑁄𑀢𑀺 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀲𑁆𑀲 𑀲𑀸𑀥𑀸𑀭𑀡𑀸𑀤𑀺𑀥𑀫𑁆𑀫𑀯𑀺𑀪𑀚𑀦𑀽𑀧𑀸𑀬𑀢𑁆𑀢𑀸. 𑀧𑀝𑀺𑀯𑀺𑀪𑀢𑁆𑀢𑀲𑀪𑀸𑀯𑁂𑀢𑀺 𑀧𑀝𑀺𑀪𑀸𑀕𑀪𑀸𑀯𑁂𑀦 𑀯𑀺𑀪𑀢𑁆𑀢𑀲𑀪𑀸𑀯𑁂.

𑀢𑁂 𑀥𑀫𑁆𑀫𑀸𑀢𑀺 𑀧𑀝𑀺𑀧𑀓𑁆𑀔𑀢𑁄 𑀧𑀭𑀺𑀯𑀢𑁆𑀢𑀺𑀢𑀥𑀫𑁆𑀫𑀸. 𑀦 𑀧𑀭𑀺𑀬𑀸𑀬𑀯𑀺𑀪𑀸𑀯𑀦𑀸 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑀧𑀭𑀺𑀕𑁆𑀕𑀸𑀳𑀺𑀓𑀸𑀢𑀺 𑀆𑀳 ‘‘𑀧𑀭𑀺𑀬𑀸…𑀧𑁂… 𑀲𑀼𑀩𑁄𑀥𑀦𑀜𑁆𑀘𑀸’’𑀢𑀺.

𑀧𑀼𑀘𑁆𑀙𑀸𑀯𑀺𑀲𑁄𑀥𑀦𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀆𑀭𑀫𑁆𑀪𑀯𑀺𑀲𑁄𑀥𑀦𑀁 𑀤𑁂𑀲𑀦𑀸𑀬 𑀅𑀢𑁆𑀣𑀓𑀣𑀦𑀁. 𑀢𑀤𑀼𑀪𑀬𑀯𑀺𑀘𑀸𑀭𑁄 𑀥𑀸𑀢𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑀲𑁆𑀲𑁂𑀯 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀥𑀸𑀢𑀸𑀬𑀢𑀦𑀸…𑀧𑁂… 𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺. 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄𑀢𑀺𑀆𑀤𑀺𑀧𑀸𑀴𑀺𑀦𑀺𑀤𑀲𑁆𑀲𑀦𑁂𑀦𑀧𑀺 𑀅𑀬𑀫𑁂𑀯𑀢𑁆𑀣𑁄 𑀉𑀤𑀸𑀳𑀝𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀓𑀸𑀭𑀡𑀸𑀓𑀸𑀭𑁄’’𑀢𑀺 𑀧𑀤𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀪𑁂𑀤𑀢𑁄 𑀤𑁂𑀲𑀦𑀸𑀓𑀸𑀭𑁄𑀢𑀺 𑀯𑁂𑀯𑀘𑀦𑀁. 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸𑀦𑀻𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀲𑀫𑀸𑀭𑁄𑀧𑀺𑀬𑀫𑀸𑀦𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀁 𑀢𑀣𑀢𑁆𑀢𑀸𑀯𑀩𑁄𑀥𑀸𑀬𑀸𑀢𑀺 𑀲𑀼𑀢𑁆𑀢𑀲𑁆𑀲 𑀧𑀤𑀢𑁆𑀣𑀸𑀯𑀕𑀫𑀫𑀼𑀔𑁂𑀦 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑀸𑀬.

𑀯𑁂𑀦𑁂𑀬𑁆𑀬𑀢𑁆𑀢𑀬𑀬𑀼𑀢𑁆𑀢𑁄 𑀅𑀢𑁆𑀣𑀦𑀬𑀢𑁆𑀢𑀬𑀽𑀧𑀤𑁂𑀲𑁄 ‘‘𑀯𑁂𑀦𑁂𑀬𑁆𑀬𑀢𑁆𑀢𑀬𑀧𑁆𑀧𑀬𑁄𑀚𑀺𑀢𑁄’’𑀢𑀺 𑀯𑀼𑀢𑁆𑀢𑁄. 𑀯𑁂𑀦𑁂𑀬𑁆𑀬𑀢𑁆𑀢𑀬𑀜𑁆𑀳𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀢𑀤𑀼𑀧𑀤𑁂𑀲𑀨𑀮𑀁 𑀅𑀥𑀺𑀕𑀘𑁆𑀙𑀦𑁆𑀢𑀁 𑀅𑀢𑁆𑀣𑀁 𑀧𑀬𑁄𑀚𑁂𑀢𑀺 𑀦𑀸𑀫𑀸𑀢𑀺. 𑀢𑀤𑀦𑀼𑀓𑁆𑀓𑀫𑁂𑀦𑁂𑀯𑀸𑀢𑀺 𑀢𑁂𑀲𑀁 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀦𑀁 𑀤𑁂𑀲𑀦𑀸𑀦𑀼𑀓𑁆𑀓𑀫𑁂𑀦𑁂𑀯. 𑀢𑁂𑀢𑀺 𑀢𑀬𑁄 𑀅𑀢𑁆𑀣𑀦𑀬𑀸. 𑀢𑁂𑀲𑀦𑁆𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀻𑀦𑀁. 𑀬𑀣𑀸 𑀉𑀤𑁆𑀤𑁂𑀲𑀸𑀤𑀻𑀦𑀁 𑀲𑀗𑁆𑀔𑁂𑀧𑀫𑀚𑁆𑀛𑀺𑀫𑀯𑀺𑀢𑁆𑀣𑀸𑀭𑀯𑀼𑀢𑁆𑀢𑀺𑀬𑀸 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀉𑀧𑀓𑀸𑀭𑀢𑀸, 𑀏𑀯𑀁 𑀢𑁂𑀲𑀁 𑀅𑀢𑁆𑀣𑀦𑀬𑀸𑀦𑀁. 𑀢𑀲𑁆𑀲𑀸𑀢𑀺 𑀅𑀢𑁆𑀣𑀦𑀬𑀢𑁆𑀣𑀲𑁆𑀲. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀢𑀲𑁆𑀲𑀁 𑀪𑀽𑀫𑀺𑀬𑀁.

𑀲𑀫𑀼𑀝𑁆𑀞𑀸𑀦𑀁 𑀦𑀺𑀤𑀸𑀦𑀁. 𑀅𑀦𑁂𑀓𑀥𑀸 𑀲𑀤𑁆𑀤𑀦𑀬𑀢𑁄, 𑀦𑀺𑀭𑀼𑀢𑁆𑀢𑀺𑀦𑀬𑀢𑁄 𑀘𑀸𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀁. 𑀧𑀤𑀢𑁆𑀣𑁄 𑀲𑀤𑁆𑀤𑀢𑁆𑀣𑁄. 𑀯𑀺𑀥𑀺 𑀅𑀦𑀼𑀯𑀸𑀤𑁄𑀢𑀺 𑀇𑀤𑀫𑁂𑀢𑁆𑀣 𑀯𑀺𑀥𑀺𑀯𑀘𑀦𑀁, 𑀅𑀬𑀫𑀦𑀼𑀯𑀸𑀤𑁄𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀸𑀥𑀸𑀢𑀩𑁆𑀩𑁄𑀢𑀺 𑀧𑀭𑀺𑀳𑀭𑀺𑀢𑀩𑁆𑀩𑁄. 𑀅𑀦𑀼𑀲𑀦𑁆𑀥𑀻𑀬𑀸 𑀅𑀦𑀼𑀭𑀽𑀧𑀁 𑀦𑀺𑀕𑀫𑁂𑀢𑀩𑁆𑀩𑀦𑁆𑀢𑀺 𑀬𑀸𑀬 𑀅𑀦𑀼𑀲𑀦𑁆𑀥𑀺𑀬𑀸 𑀲𑀼𑀢𑁆𑀢𑁂 𑀉𑀧𑀭𑀺 𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀢𑀤𑀦𑀼𑀭𑀽𑀧𑀁 𑀲𑀁𑀯𑀡𑁆𑀡𑀦𑀸 𑀦𑀺𑀕𑀫𑁂𑀢𑀩𑁆𑀩𑀸. 𑀧𑀬𑁄𑀚𑀦𑀦𑁆𑀢𑀺 𑀨𑀮𑀁. 𑀧𑀺𑀡𑁆𑀟𑀢𑁆𑀣𑁄𑀢𑀺 𑀲𑀗𑁆𑀔𑁂𑀧𑀢𑁆𑀣𑁄. 𑀅𑀦𑀼𑀲𑀦𑁆𑀥𑀻𑀢𑀺 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀆𑀤𑀺𑀅𑀦𑀼𑀲𑀦𑁆𑀥𑀺. 𑀉𑀧𑁄𑀕𑁆𑀖𑀸𑀝𑁄𑀢𑀺 𑀦𑀺𑀤𑀲𑁆𑀲𑀦𑀁. 𑀘𑀸𑀮𑀦𑀸𑀢𑀺 𑀘𑁄𑀤𑀦𑀸. 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀧𑀭𑀺𑀳𑀸𑀭𑁄.

𑀧𑀓𑀢𑀺𑀆𑀤𑀺𑀧𑀤𑀸𑀯𑀬𑀯𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀣𑀦𑀁 𑀪𑁂𑀤𑀓𑀣𑀸 𑀬𑀣𑀸 ‘‘𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁫𑁩). 𑀧𑀤𑀲𑁆𑀲 𑀅𑀢𑁆𑀣𑀓𑀣𑀦𑀁 𑀢𑀢𑁆𑀯𑀓𑀣𑀸 𑀬𑀣𑀸 ‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄’’𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁧). 𑀧𑀭𑀺𑀬𑀸𑀬𑀯𑀘𑀦𑀁 𑀯𑁂𑀯𑀘𑀦𑀕𑁆𑀕𑀳𑀡𑀁 𑀬𑀣𑀸 ‘‘𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁬). 𑀯𑀺𑀘𑀬𑀬𑀼𑀢𑁆𑀢𑀺𑀘𑀢𑀼𑀩𑁆𑀬𑀽𑀳𑀧𑀭𑀺𑀯𑀢𑁆𑀢𑀦𑀳𑀸𑀭𑁂𑀓𑀤𑁂𑀲𑀲𑀗𑁆𑀕𑀳𑀺𑀢𑀸, 𑀯𑁂𑀯𑀘𑀦𑀳𑀸𑀭𑀲𑀗𑁆𑀕𑀳𑀺𑀢𑀸 𑀘𑀸𑀢𑀺 𑀆𑀳 ‘‘𑀢𑁂 𑀇𑀥 𑀓𑀢𑀺𑀧𑀬𑀳𑀸𑀭𑀲𑀗𑁆𑀕𑀳𑀺𑀢𑀸’’𑀢𑀺.

𑀅𑀢𑁆𑀢𑀦𑁄 𑀨𑀮𑀁 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄𑀢𑀺 𑀳𑁂𑀢𑀼𑀦𑁄 𑀥𑀫𑁆𑀫𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀜𑀸𑀧𑀓𑀳𑁂𑀢𑀽𑀧𑀺 𑀜𑀸𑀡𑀓𑀭𑀡𑀝𑁆𑀞𑁂𑀦 𑀓𑀸𑀭𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀳 ‘‘𑀓𑀸𑀭𑀓𑁄 𑀲𑀫𑁆𑀧𑀸𑀧𑀓𑁄𑀢𑀺 𑀤𑀼𑀯𑀺𑀥𑁄’’𑀢𑀺. 𑀧𑀼𑀦 𑀘𑀓𑁆𑀔𑀼𑀩𑀻𑀚𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀫𑁂𑀯 𑀓𑀸𑀭𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀦…𑀧𑁂… 𑀢𑀺𑀯𑀺𑀥𑁄’’𑀢𑀺𑀆𑀤𑀺𑀫𑀸𑀳. ‘‘𑀢𑀬𑁄 𑀓𑀼𑀲𑀮𑀳𑁂𑀢𑀽’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁦𑁫𑁯-𑁧𑁦𑁬𑁦) 𑀆𑀕𑀢𑀸 𑀅𑀮𑁄𑀪𑀸𑀤𑀬𑁄, 𑀮𑁄𑀪𑀸𑀤𑀬𑁄 𑀘 𑀳𑁂𑀢𑀼𑀳𑁂𑀢𑀼 𑀦𑀸𑀫. ‘‘𑀘𑀢𑁆𑀢𑀸𑀭𑁄 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀪𑀽𑀢𑀸 𑀳𑁂𑀢𑀼, 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀧𑀘𑁆𑀘𑀬𑁄 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁮𑁬) 𑀆𑀕𑀢𑁄 𑀧𑀘𑁆𑀘𑀬𑀳𑁂𑀢𑀼 𑀦𑀸𑀫. 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀧𑀢𑀺 𑀉𑀢𑁆𑀢𑀫𑀳𑁂𑀢𑀼 𑀦𑀸𑀫. 𑀘𑀓𑁆𑀔𑀸𑀤𑀺𑀩𑀻𑀚𑀸𑀤𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀅𑀗𑁆𑀓𑀼𑀭𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀳𑁂𑀢𑀼 𑀦𑀸𑀫. 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀢𑀺𑀧𑀺 𑀧𑀘𑁆𑀘𑀬𑀥𑀫𑁆𑀫𑀪𑀸𑀯𑁂 𑀇𑀝𑁆𑀞𑀸𑀦𑀺𑀝𑁆𑀞𑀨𑀮𑀯𑀺𑀲𑁂𑀲𑀳𑁂𑀢𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀕𑀳𑀡𑀁, 𑀲𑀤𑁆𑀤𑀫𑀕𑁆𑀕𑀸𑀦𑀁 𑀧𑀦 𑀜𑀸𑀧𑀓𑀲𑀫𑁆𑀧𑀸𑀧𑀓𑀳𑁂𑀢𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀗𑁆𑀓𑀼𑀭𑀸𑀤𑀺𑀓𑀲𑁆𑀲 𑀅𑀲𑀸𑀥𑀸𑀭𑀡𑀳𑁂𑀢𑀼 𑀩𑀻𑀚𑀸𑀤𑀺𑀲𑀫𑀸𑀦𑀚𑀸𑀢𑀺𑀬𑀳𑁂𑀢𑀼𑀢𑀸𑀬 𑀲𑀪𑀸𑀕𑀳𑁂𑀢𑀼. 𑀲𑀸𑀥𑀸𑀭𑀡𑀳𑁂𑀢𑀼 𑀪𑀼𑀲𑀲𑀮𑀺𑀮𑀸𑀤𑀺𑀅𑀲𑀫𑀸𑀦𑀚𑀸𑀢𑀺𑀬𑀢𑀸𑀬 𑀅𑀲𑀪𑀸𑀕𑀳𑁂𑀢𑀼. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀦𑁆𑀢𑀸𑀦𑀺𑀓𑁄 𑀅𑀚𑁆𑀛𑀢𑁆𑀢𑀺𑀓𑀳𑁂𑀢𑀼, 𑀇𑀢𑀭𑁄 𑀩𑀸𑀳𑀺𑀭𑀳𑁂𑀢𑀼. 𑀓𑁂𑀘𑀺 𑀧𑀦 ‘‘𑀲𑀲𑀦𑁆𑀢𑀸𑀦𑀺𑀓𑁄 𑀅𑀚𑁆𑀛𑀢𑁆𑀢𑀺𑀓𑀳𑁂𑀢𑀼, 𑀇𑀢𑀭𑁄 𑀩𑀸𑀳𑀺𑀭𑀳𑁂𑀢𑀽’’𑀢𑀺 𑀯𑀤𑀦𑁆𑀢𑀺. 𑀧𑀭𑀺𑀕𑁆𑀕𑀸𑀳𑀓𑁄 𑀉𑀧𑀢𑁆𑀣𑀫𑁆𑀪𑀓𑁄. 𑀧𑀭𑀫𑁆𑀧𑀭𑀳𑁂𑀢𑀼 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄.

𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀦𑀺𑀬𑁂𑀧𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑀲𑀫𑀼𑀤𑀬𑀦𑀺𑀭𑁄𑀥𑀸𑀦𑀁 𑀅𑀥𑀺𑀕𑀫𑀸𑀥𑀺𑀕𑀦𑁆𑀢𑀩𑁆𑀩𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀫𑀕𑁆𑀕𑀲𑁆𑀲 𑀳𑁂𑀢𑀼𑀪𑀸𑀯𑁄 𑀯𑀺𑀬 𑀫𑀕𑁆𑀕𑀁 𑀧𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀨𑀮𑀪𑀸𑀯𑁄 𑀉𑀧𑀘𑀸𑀭𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀨𑀮𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻’’𑀢𑀺.

𑀧𑀝𑀺𑀧𑀚𑁆𑀚𑀫𑀸𑀦𑀪𑀽𑀫𑀺 𑀫𑀕𑁆𑀕𑀥𑀫𑁆𑀫𑀸. 𑀧𑀝𑀺𑀧𑀦𑁆𑀦𑀪𑀽𑀫𑀺 𑀨𑀮𑀥𑀫𑁆𑀫𑀸.

𑀓𑀺𑀘𑁆𑀘𑀢𑁄𑀢𑀺 𑀲𑀭𑀲𑀢𑁄. 𑀮𑀓𑁆𑀔𑀡𑀢𑁄𑀢𑀺 𑀉𑀧𑀮𑀓𑁆𑀔𑀡𑀢𑁄. 𑀲𑀸𑀫𑀜𑁆𑀜𑀢𑁄𑀢𑀺 𑀲𑀫𑀸𑀦𑀪𑀸𑀯𑀢𑁄. 𑀢𑁂𑀦 𑀲𑀫𑀸𑀦𑀳𑁂𑀢𑀼𑀢𑀸, 𑀲𑀫𑀸𑀦𑀨𑀮𑀢𑀸, 𑀲𑀫𑀸𑀦𑀸𑀭𑀫𑁆𑀫𑀡𑀢𑀸 𑀘 𑀕𑀳𑀺𑀢𑀸 𑀳𑁄𑀢𑀻𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀮𑀓𑁆𑀔𑀡𑀳𑀸𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀅𑀧𑀺𑀘𑁂𑀢𑁆𑀣 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀯𑀺𑀭𑁄𑀥𑀧𑀓𑀭𑀡𑀮𑀺𑀗𑁆𑀕𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀸𑀤𑀻𑀦𑀫𑁆𑀧𑀺 𑀯𑀲𑁂𑀦 𑀦𑀬𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀫𑁆𑀧𑀬𑁄𑀕𑀢𑁄 𑀢𑀸𑀯𑀦𑀬𑀯𑀺𑀪𑀸𑀕𑁄 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀬𑀣𑀬𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁮) 𑀘𑀺𑀢𑁆𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸 𑀕𑀳𑀺𑀢𑀸, 𑀢𑀁𑀲𑀫𑁆𑀧𑀬𑁄𑀕𑀢𑁄 𑀘𑁂𑀢𑀲𑀺𑀓𑀸𑀦𑀫𑁆𑀧𑀺 𑀕𑀳𑀺𑀢𑀸𑀯 𑀳𑁄𑀢𑀺 𑀅𑀜𑁆𑀜𑀢𑁆𑀣 𑀦𑁂𑀲𑀁 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑁄𑀕𑀤𑀻𑀧𑀦𑀢𑁄. 𑀅𑀣 𑀯𑀸 ‘‘𑀲𑀜𑁆𑀜𑀺𑀦𑁄’’𑀢𑀺. 𑀲𑀜𑁆𑀜𑀸𑀲𑀳𑀺𑀢𑀢𑀸𑀯𑀘𑀦𑁂𑀦 𑀳𑀺 𑀦𑁂𑀲𑀁 𑀯𑁂𑀤𑀦𑀸𑀘𑁂𑀢𑀦𑀸𑀤𑀺𑀯𑀦𑁆𑀢𑀢𑀸𑀧𑀺 𑀲𑀫𑁆𑀧𑀬𑁄𑀕𑀢𑁄 𑀤𑀻𑀧𑀺𑀢𑀸 𑀳𑁄𑀢𑀺.

𑀯𑀺𑀧𑁆𑀧𑀬𑁄𑀕𑀢𑁄 𑁋 ‘‘𑀅𑀳𑁂𑀢𑀼𑀓𑀸’’𑀢𑀺. 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀳𑀺 𑀥𑀫𑁆𑀫𑀸 ‘‘𑀲𑀳𑁂𑀢𑀼𑀓𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀢𑀩𑁆𑀩𑀺𑀥𑀼𑀭𑀸 𑀥𑀫𑁆𑀫𑀸 𑀯𑀺𑀧𑁆𑀧𑀬𑁄𑀕𑀢𑁄 ‘‘𑀅𑀳𑁂𑀢𑀼𑀓𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀣 𑀯𑀸 ‘‘𑀅𑀲𑀜𑁆𑀜𑀺𑀦𑁄’’𑀢𑀺. 𑀲𑀜𑁆𑀜𑀸𑀯𑀺𑀧𑁆𑀧𑀬𑀼𑀢𑁆𑀢𑀸 𑀳𑀺 𑀥𑀫𑁆𑀫𑀧𑀯𑀢𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀦 𑀲𑀜𑁆𑀜𑀸𑀬 𑀅𑀪𑀸𑀯𑀫𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀯𑀺𑀭𑁄𑀥𑀢𑁄 𑁋 ‘‘𑀅𑀝𑁆𑀞𑀫𑀓𑁄 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓𑀧𑀸𑀴𑀺.𑁪𑁩𑁯), 𑀲𑀤𑁆𑀥𑀸𑀦𑀼𑀲𑀸𑀭𑀻’’𑀢𑀺 (𑀧𑀼. 𑀧. 𑀫𑀸𑀢𑀺𑀓𑀸 𑁭.𑁩𑁬) 𑀘 𑀯𑀼𑀢𑁆𑀢𑁂 𑀢𑀁 𑀲𑀦𑁆𑀢𑀢𑀺𑀬𑀁 𑀲𑀁𑀬𑁄𑀚𑀦𑀢𑁆𑀢𑀬𑀧𑁆𑀧𑀳𑀸𑀦𑀁 𑀯𑀺𑀜𑁆𑀜𑀸𑀬𑀢𑀺, 𑀢𑀣𑀸 ‘‘𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸’’𑀢𑀺 (𑀤𑀻. 𑀦𑀺. 𑁨.𑁪𑁦𑁪; 𑀫. 𑀦𑀺. 𑁧.𑁧𑁩𑁭) 𑀯𑀼𑀢𑁆𑀢𑁂 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀁, ‘‘𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸’’𑀢𑀺 (𑀤𑀻. 𑀦𑀺. 𑁨.𑁪𑁦𑁪; 𑀫. 𑀦𑀺. 𑁧.𑁧𑁩𑁭) 𑀯𑀼𑀢𑁆𑀢𑁂 𑀅𑀦𑀯𑀲𑁂𑀲𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀁 𑀯𑀺𑀜𑁆𑀜𑀸𑀬𑀢𑀺.

𑀧𑀓𑀭𑀡𑀢𑁄 𑁋 ‘‘𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀫𑀸𑀢𑀺𑀓𑀸). 𑀅𑀥𑀺𑀓𑀸𑀭𑀢𑁄 𑀳𑀺 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀦 𑀓𑀣𑀺𑀢𑀸𑀢𑀺 𑀜𑀸𑀬𑀢𑀺. ‘‘𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸’’𑀢𑀺 (𑀲𑀁. 𑀦𑀺. 𑁧.𑁧𑁨, 𑁧𑁪𑁪) 𑀘. 𑀩𑀸𑀳𑀺𑀭𑀸 𑀳𑀺 𑀥𑀫𑁆𑀫𑀸 𑀇𑀥 ‘‘𑀉𑀧𑀥𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀮𑀺𑀗𑁆𑀕𑀢𑁄 𑁋 ‘‘𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁭𑁯). 𑀲𑀻𑀢𑀸𑀤𑀺𑀕𑁆𑀕𑀳𑀡𑁂𑀦 𑀳𑀺 𑀮𑀺𑀗𑁆𑀕𑁂𑀦 𑀪𑀽𑀢𑀼𑀧𑀸𑀤𑀸𑀬𑀧𑁆𑀧𑀓𑀸𑀭𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀭𑀽𑀧𑀪𑀸𑀯𑁄, 𑀦 𑀇𑀢𑀭𑀲𑁆𑀲.

𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀢𑁄 𑁋 ‘‘𑀓𑀸𑀬𑀧𑀲𑁆𑀲𑀤𑁆𑀥𑀺, 𑀓𑀸𑀬𑀸𑀬𑀢𑀦’’𑀦𑁆𑀢𑀺. ‘‘𑀬𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀳𑀺 𑀧𑀼𑀭𑀺𑀫𑁄 𑀓𑀸𑀬𑀲𑀤𑁆𑀤𑁄 𑀲𑀫𑀽𑀳𑀯𑀸𑀘𑀻, 𑀇𑀢𑀭𑁄 𑀆𑀬𑀢𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀧𑀲𑀸𑀤𑀯𑀸𑀘𑀻.

𑀲𑀸𑀫𑀢𑁆𑀣𑀺𑀬𑀢𑁄 𑁋 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁 (𑀲𑀁. 𑀦𑀺. 𑁪.𑁨𑁮; 𑀫𑀳𑀸𑀯. 𑁫𑁪), 𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲𑀸’’𑀢𑀺 (𑀥. 𑀧. 𑁧𑁨𑁯) 𑀘, 𑀢𑀣𑀸 ‘‘𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁫𑁫𑁬; 𑁩.𑁩𑁦𑁮; 𑀫. 𑀦𑀺. 𑁧.𑁭𑁭, 𑁨𑁩𑁨, 𑁪𑁫𑁯, 𑁫𑁦𑁯; 𑁨.𑁩𑁦𑁯; 𑁩.𑁨𑁩𑁦; 𑀯𑀺𑀪. 𑁬𑁪𑁨). 𑀏𑀢𑁆𑀣 𑀳𑀺 𑀲𑀢𑀺𑀧𑀺 𑀲𑀩𑁆𑀩𑀲𑀤𑁆𑀤𑀲𑁆𑀲 𑀅𑀦𑀯𑀲𑁂𑀲𑀲𑀢𑁆𑀢𑀯𑀸𑀘𑀓𑀢𑁆𑀢𑁂 𑀆𑀤𑀺𑀢𑁆𑀢𑀢𑀸 𑀲𑀸𑀧𑁂𑀓𑁆𑀔𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀯𑀸𑀘𑀓𑀢𑁆𑀢𑀸 𑀧𑀤𑁂𑀲𑀯𑀸𑀘𑀻 𑀲𑀩𑁆𑀩𑀲𑀤𑁆𑀤𑁄, 𑀮𑁄𑀓𑀲𑀤𑁆𑀤𑁄𑀧𑀺 𑀲𑀢𑁆𑀢𑀯𑀸𑀘𑀻. 𑀲𑀢𑁆𑀢𑀸𑀭𑀫𑁆𑀫𑀡𑀸 𑀳𑀺 𑀅𑀧𑁆𑀧𑀫𑀜𑁆𑀜𑀸𑀢𑀺. 𑀢𑀣𑀸 ‘‘𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸’’𑀢𑀺 (𑀥. 𑀧. 𑁨𑁯𑁪-𑁨𑁯𑁫) 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀳𑀺 𑀲𑀧𑀝𑀺𑀓𑁆𑀔𑁂𑀧𑀢𑁄, 𑀫𑀸𑀢𑀼𑀧𑀺𑀢𑀼𑀖𑀸𑀢𑀓𑀫𑁆𑀫𑀲𑁆𑀲 𑀘 𑀫𑀳𑀸𑀲𑀸𑀯𑀚𑁆𑀚𑀢𑀸𑀧𑀯𑁂𑀤𑀦𑀢𑁄, 𑀇𑀥 𑀘 𑀢𑀤𑀦𑀼𑀜𑁆𑀜𑀸𑀬 𑀓𑀢𑀸𑀬 𑀫𑀸𑀢𑀼𑀧𑀺𑀢𑀼𑀝𑁆𑀞𑀸𑀦𑀺𑀬𑀸 𑀢𑀸𑀤𑀺𑀲𑀸 𑀓𑁂𑀘𑀺 𑀧𑀸𑀧𑀥𑀫𑁆𑀫𑀸 𑀯𑁂𑀦𑁂𑀬𑁆𑀬𑀯𑀲𑁂𑀦 𑀕𑀳𑀺𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀓𑁂 𑀧𑀦 𑀢𑁂𑀢𑀺? 𑀢𑀡𑁆𑀳𑀸𑀫𑀸𑀦𑀸. 𑀢𑀡𑁆𑀳𑀸 𑀳𑀺 𑀚𑀦𑀦𑀻 𑀲𑀢𑁆𑀢𑀸𑀦𑀁. ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲’’𑀦𑁆𑀢𑀺 (𑀲𑀁. 𑀦𑀺. 𑁧.𑁫𑁫-𑁫𑁭) 𑀳𑀺 𑀯𑀼𑀢𑁆𑀢𑀁. 𑀧𑀺𑀢𑀼𑀝𑁆𑀞𑀸𑀦𑀺𑀬𑁄 𑀫𑀸𑀦𑁄 𑀢𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀲𑀫𑁆𑀧𑀕𑁆𑀕𑀡𑁆𑀳𑀢𑁄 ‘‘𑀅𑀳𑀁 𑀅𑀲𑀼𑀓𑀲𑁆𑀲 𑀭𑀼𑀜𑁆𑀜𑁄, 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀧𑀼𑀢𑁆𑀢𑁄’’𑀢𑀺 𑀬𑀣𑀸. 𑀲𑀸𑀫𑀢𑁆𑀣𑀺𑀬𑀸𑀤𑀻𑀦𑀦𑁆𑀢𑀺 𑀆𑀤𑀺𑀲𑀤𑁆𑀤𑁂𑀦 𑀤𑁂𑀲𑀧𑀓𑀢𑀺𑀆𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺.

𑀮𑀩𑁆𑀪𑀫𑀸𑀦𑀧𑀤𑀢𑁆𑀣𑀦𑀺𑀤𑁆𑀥𑀸𑀭𑀡𑀫𑀼𑀔𑁂𑀦𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀮𑀩𑁆𑀪𑀫𑀸𑀦𑀅𑀲𑁆𑀲𑀸𑀤𑀸𑀤𑀺𑀳𑀸𑀭𑀧𑀤𑀢𑁆𑀣𑀦𑀺𑀤𑁆𑀥𑀸𑀭𑀡𑀤𑁆𑀯𑀸𑀭𑁂𑀦. 𑀬𑀣𑀸𑀮𑀓𑁆𑀔𑀡𑀦𑁆𑀢𑀺 𑀬𑀁 𑀬𑀁 𑀮𑀓𑁆𑀔𑀡𑀁, 𑀮𑀓𑁆𑀔𑀡𑀸𑀦𑀼𑀭𑀽𑀧𑀁 𑀯𑀸 𑀬𑀣𑀸𑀮𑀓𑁆𑀔𑀡𑀁. 𑀳𑁂𑀢𑀼𑀨𑀮𑀸𑀤𑀻𑀦𑀺 𑀉𑀧𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸𑀦𑀺 𑀢𑁂𑀲𑀁 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀳𑁂𑀢𑀼𑀨𑀮𑀸𑀤𑀬𑁄 𑀬𑁂 𑀬𑀲𑁆𑀫𑀺𑀁 𑀳𑀸𑀭𑁂 𑀲𑀯𑀺𑀲𑁂𑀲𑀁 𑀇𑀘𑁆𑀙𑀺𑀢𑀩𑁆𑀩𑀸, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑀢𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.