𑁫. 𑀧𑀢𑁆𑀢𑀦𑀺𑀤𑁆𑀤𑁂𑀲𑁄

𑀧𑀢𑁆𑀢𑁄 𑀘𑀸𑀢𑀺 𑁋

𑁬𑁦. 𑀅𑀬𑁄𑀧𑀢𑁆𑀢𑁄 𑀪𑀽𑀫𑀺𑀧𑀢𑁆𑀢𑁄, 𑀚𑀸𑀢𑀺𑀬𑀸 𑀓𑀧𑁆𑀧𑀺𑀬𑀸 𑀤𑀼𑀯𑁂;

𑀉𑀓𑁆𑀓𑀝𑁆𑀞𑁄 𑀫𑀚𑁆𑀛𑀺𑀫𑁄 𑀘𑁂𑀯, 𑀑𑀫𑀓𑁄 𑀘 𑀧𑀫𑀸𑀡𑀢𑁄.

𑁬𑁧. 𑀉𑀓𑁆𑀓𑀝𑁆𑀞𑁄 𑀫𑀕𑀥𑁂 𑀦𑀸𑀴𑀺-𑀤𑁆𑀯𑀬𑀢𑀡𑁆𑀟𑀼𑀮𑀲𑀸𑀥𑀺𑀢𑀁;

𑀕𑀡𑁆𑀳𑀸𑀢𑀺 𑀑𑀤𑀦𑀁 𑀲𑀽𑀧𑀁, 𑀩𑁆𑀬𑀜𑁆𑀚𑀦𑀜𑁆𑀘 𑀢𑀤𑀽𑀧𑀺𑀬𑀁.

𑁬𑁨. 𑀫𑀚𑁆𑀛𑀺𑀫𑁄 𑀢𑀲𑁆𑀲𑀼𑀧𑀟𑁆𑀠𑁄𑀯, 𑀢𑀢𑁄𑀧𑀟𑁆𑀠𑁄𑀯 𑀑𑀫𑀓𑁄;

𑀉𑀓𑁆𑀓𑀝𑁆𑀞𑀢𑁄 𑀘 𑀉𑀓𑁆𑀓𑀝𑁆𑀞𑁄, 𑀅𑀧𑀢𑁆𑀢𑁄 𑀑𑀫𑀓𑁄𑀫𑀓𑁄.

𑁬𑁩. 𑀅𑀢𑀺𑀭𑁂𑀓𑀧𑀢𑁆𑀢𑁄 𑀥𑀸𑀭𑁂𑀬𑁆𑀬𑁄, 𑀤𑀲𑀸𑀳𑀧𑀭𑀫𑀁 𑀲𑀓𑁄;

𑀓𑀧𑁆𑀧𑁄 𑀦𑀺𑀲𑁆𑀲𑀕𑁆𑀕𑀺𑀬𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺𑀦𑀸𑀫𑀺𑀢𑁂.

𑁬𑁪. 𑀅𑀘𑁆𑀙𑁂𑀤𑀤𑀸𑀦𑀕𑀸𑀳𑁂𑀳𑀺, 𑀯𑀺𑀩𑁆𑀪𑀫𑀸 𑀫𑀭𑀡𑀼𑀤𑁆𑀥𑀝𑀸;

𑀮𑀺𑀗𑁆𑀕𑀲𑀺𑀓𑁆𑀔𑀸𑀳𑀺 𑀙𑀺𑀤𑁆𑀤𑁂𑀦, 𑀧𑀢𑁆𑀢𑀸𑀥𑀺𑀝𑁆𑀞𑀸𑀦𑀫𑀼𑀚𑁆𑀛𑀢𑀺.

𑁬𑁫. 𑀧𑀢𑁆𑀢𑀁 𑀦 𑀧𑀝𑀺𑀲𑀸𑀫𑁂𑀬𑁆𑀬, 𑀲𑁄𑀤𑀓𑀁 𑀦 𑀘 𑀑𑀢𑀧𑁂;

𑀉𑀡𑁆𑀳𑁂 𑀦 𑀦𑀺𑀤𑀳𑁂 𑀪𑀼𑀫𑁆𑀬𑀸, 𑀦 𑀞𑀧𑁂 𑀦𑁄 𑀘 𑀮𑀕𑁆𑀕𑀬𑁂.

𑁬𑁬. 𑀫𑀺𑀟𑁆𑀠𑀦𑁆𑀢𑁂 𑀧𑀭𑀺𑀪𑀡𑁆𑀟𑀦𑁆𑀢𑁂, 𑀅𑀗𑁆𑀓𑁂 𑀯𑀸 𑀆𑀢𑀧𑀢𑁆𑀢𑀓𑁂;

𑀧𑀸𑀤𑁂𑀲𑀼 𑀫𑀜𑁆𑀘𑀧𑀻𑀞𑁂 𑀯𑀸, 𑀞𑀧𑁂𑀢𑀼𑀁 𑀦 𑀘 𑀓𑀧𑁆𑀧𑀢𑀺.

𑁬𑁭. 𑀦 𑀦𑀻𑀳𑀭𑁂𑀬𑁆𑀬 𑀉𑀘𑁆𑀙𑀺𑀝𑁆𑀞𑁄-𑀤𑀓𑀜𑁆𑀘 𑀘𑀮𑀓𑀝𑁆𑀞𑀺𑀓𑀁;

𑀧𑀢𑁆𑀢𑁂𑀦 𑀧𑀢𑁆𑀢𑀳𑀢𑁆𑀣𑁄 𑀯𑀸, 𑀓𑀯𑀸𑀝𑀁 𑀦 𑀧𑀡𑀸𑀫𑀬𑁂.

𑁬𑁮. 𑀪𑀽𑀫𑀺𑀆𑀥𑀸𑀭𑀓𑁂 𑀤𑀸𑀭𑀼𑀤𑀡𑁆𑀟𑀸𑀥𑀸𑀭𑁂 𑀲𑀼𑀲𑀚𑁆𑀚𑀺𑀢𑁂;

𑀤𑀼𑀯𑁂 𑀧𑀢𑁆𑀢𑁂 𑀞𑀧𑁂𑀬𑁆𑀬𑁂𑀓𑀁, 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸𑀦 𑀪𑀽𑀫𑀺𑀬𑀁.

𑁬𑁯. 𑀤𑀸𑀭𑀼𑀭𑀽𑀧𑀺𑀬𑀲𑁄𑀯𑀡𑁆𑀡-𑀫𑀡𑀺𑀯𑁂𑀴𑀼𑀭𑀺𑀬𑀸𑀫𑀬𑀸;

𑀓𑀁𑀲𑀓𑀸𑀘𑀢𑀺𑀧𑀼𑀲𑀻𑀲𑀨𑀮𑀺𑀓𑀸𑀢𑀫𑁆𑀩𑀮𑁄𑀳𑀚𑀸.

𑁭𑁦. 𑀙𑀯𑀲𑀻𑀲𑀫𑀬𑁄 𑀘𑀸𑀧𑀺, 𑀖𑀝𑀻𑀢𑀼𑀫𑁆𑀩𑀓𑀝𑀸𑀳𑀚𑀸;

𑀧𑀢𑁆𑀢𑀸 𑀅𑀓𑀧𑁆𑀧𑀺𑀬𑀸 𑀲𑀩𑁆𑀩𑁂, 𑀯𑀼𑀢𑁆𑀢𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸𑀢𑀺.