𑁩𑁪. 𑀧𑀣𑀯𑀻𑀦𑀺𑀤𑁆𑀤𑁂𑀲𑁄

𑀧𑀣𑀯𑀻 𑀘𑀸𑀢𑀺 𑁋

𑁨𑁪𑁨. 𑀚𑀸𑀢𑀸𑀚𑀸𑀢𑀸𑀢𑀺 𑀤𑀼𑀯𑀺𑀥𑀸, 𑀲𑀼𑀤𑁆𑀥𑀫𑀢𑁆𑀢𑀺𑀓𑀧𑀁𑀲𑀼𑀓𑀸;

𑀚𑀸𑀢𑀸𑀤𑀟𑁆𑀠𑀸 𑀘 𑀧𑀣𑀯𑀻, 𑀩𑀳𑀼𑀫𑀢𑁆𑀢𑀺𑀓𑀧𑀁𑀲𑀼𑀓𑀸;

𑀘𑀸𑀢𑀼𑀫𑀸𑀲𑀸𑀥𑀺𑀓𑁄𑀯𑀝𑁆𑀞𑀧𑀁𑀲𑀼𑀫𑀢𑁆𑀢𑀺𑀓𑀭𑀸𑀲𑀺 𑀘.

𑁨𑁪𑁩. 𑀲𑀼𑀤𑁆𑀥𑀲𑀓𑁆𑀔𑀭𑀧𑀸𑀲𑀸𑀡𑀫𑀭𑀼𑀫𑁆𑀩𑀓𑀣𑀮𑀯𑀸𑀮𑀼𑀓𑀸;

𑀤𑀟𑁆𑀠𑀸 𑀘 𑀪𑀽𑀫𑀺 𑀬𑁂𑀪𑀼𑀬𑁆𑀬𑀲𑀓𑁆𑀔𑀭𑀸𑀤𑀺𑀫𑀳𑀻𑀧𑀺 𑀘;

𑀤𑀼𑀢𑀺𑀬𑀸 𑀯𑀼𑀢𑁆𑀢𑀭𑀸𑀲𑀺 𑀘, 𑀘𑀸𑀢𑀼𑀫𑀸𑀲𑁄𑀫𑀯𑀝𑁆𑀞𑀓𑁄.

𑁨𑁪𑁪. 𑀤𑁆𑀯𑁂 𑀪𑀸𑀕𑀸 𑀢𑀻𑀲𑀼 𑀪𑀸𑀕𑁂𑀲𑀼, 𑀫𑀢𑁆𑀢𑀺𑀓𑀸 𑀬𑀲𑁆𑀲 𑀪𑀽𑀫𑀺𑀬𑀸;

𑀬𑁂𑀪𑀼𑀬𑁆𑀬𑀫𑀢𑁆𑀢𑀺𑀓𑀸 𑀏𑀲𑀸, 𑀲𑁂𑀲𑁂𑀲𑀼𑀧𑀺 𑀅𑀬𑀁 𑀦𑀬𑁄.

𑁨𑁪𑁫. 𑀧𑀸𑀘𑀺𑀢𑁆𑀢𑀺 𑀔𑀡𑀦𑁂 𑀚𑀸𑀢𑁂, 𑀚𑀸𑀢𑀲𑀜𑁆𑀜𑀺𑀲𑁆𑀲 𑀤𑀼𑀓𑁆𑀓𑀝𑀁;

𑀤𑁆𑀯𑁂𑀴𑁆𑀳𑀲𑁆𑀲𑀸𑀚𑀸𑀢𑀲𑀜𑁆𑀜𑀺𑀲𑁆𑀲, 𑀦𑀸𑀧𑀢𑁆𑀢𑀸𑀡𑀸𑀧𑀦𑁂 𑀢𑀣𑀸.

𑁨𑁪𑁬. 𑀧𑀳𑀸𑀭𑁂 𑀧𑀳𑀸𑀭𑀸𑀧𑀢𑁆𑀢𑀺, 𑀔𑀡𑀫𑀸𑀦𑀲𑁆𑀲 𑀅𑀢𑁆𑀢𑀦𑀸;

𑀏𑀓𑀸𑀬𑀸𑀡𑀢𑁆𑀢𑀺𑀬𑀸 𑀏𑀓𑀸, 𑀦𑀸𑀦𑀸𑀡𑀢𑁆𑀢𑀻𑀲𑀼 𑀯𑀸𑀘𑀲𑁄.

𑁨𑁪𑁭. ‘‘𑀇𑀫𑀁 𑀞𑀸𑀦𑀫𑀺𑀫𑀁 𑀓𑀦𑁆𑀤𑀫𑀺𑀥 𑀯𑀸𑀧𑀺𑀁 𑀔𑀡𑁂𑀢𑁆𑀣 𑀘;

𑀚𑀸𑀮𑁂𑀳𑀕𑁆𑀕𑀺’’𑀦𑁆𑀢𑀺 𑀯𑀸 𑀯𑀢𑁆𑀢𑀼𑀁, 𑀦𑀺𑀬𑀫𑁂𑀢𑁆𑀯𑀸 𑀦 𑀯𑀝𑁆𑀝𑀢𑀺.

𑁨𑁪𑁮. ‘‘𑀣𑀫𑁆𑀪𑀲𑁆𑀲𑀺𑀫𑀲𑁆𑀲𑀸𑀯𑀸𑀝𑀁 𑀯𑀸, 𑀫𑀢𑁆𑀢𑀺𑀓𑀁 𑀚𑀸𑀦 𑀫𑀸𑀳𑀭;

𑀓𑀭𑁄𑀳𑀺 𑀓𑀧𑁆𑀧𑀺𑀬𑀜𑁆𑀘𑁂’’𑀢𑀺, 𑀯𑀘𑀦𑀁 𑀯𑀝𑁆𑀝𑀢𑁂𑀤𑀺𑀲𑀁.

𑁨𑁪𑁯. 𑀅𑀲𑀫𑁆𑀩𑀤𑁆𑀥𑀁 𑀧𑀣𑀯𑀺𑀬𑀸, 𑀲𑀼𑀓𑁆𑀔𑀓𑀤𑁆𑀤𑀫𑀆𑀤𑀺𑀓𑀁;

𑀓𑁄𑀧𑁂𑀢𑀼𑀁 𑀢𑀦𑀼𑀓𑀁 𑀮𑀩𑁆𑀪𑀫𑀼𑀲𑁆𑀲𑀺𑀜𑁆𑀘𑀦𑀻𑀬𑀓𑀤𑁆𑀤𑀫𑀁.

𑁨𑁫𑁦. 𑀕𑀡𑁆𑀟𑀼𑀧𑁆𑀧𑀸𑀤𑀁 𑀉𑀧𑀘𑀺𑀓𑀸𑀫𑀢𑁆𑀢𑀺𑀓𑀁 𑀫𑀽𑀲𑀺𑀓𑀼𑀓𑁆𑀓𑀺𑀭𑀁;

𑀘𑀸𑀢𑀼𑀫𑀸𑀲𑀸𑀥𑀺𑀓𑁄𑀯𑀝𑁆𑀞𑀁, 𑀮𑁂𑀟𑁆𑀟𑀸𑀤𑀺𑀜𑁆𑀘 𑀦 𑀓𑁄𑀧𑀬𑁂.

𑁨𑁫𑁧. 𑀧𑀢𑀺𑀢𑁂 𑀯𑀸𑀧𑀺𑀆𑀤𑀻𑀦𑀁, 𑀓𑀽𑀮𑁂 𑀉𑀤𑀓𑀲𑀦𑁆𑀢𑀺𑀓𑁂;

𑀧𑀸𑀲𑀸𑀡𑁂 𑀘 𑀭𑀚𑁂 𑀮𑀕𑁆𑀕𑁂, 𑀧𑀢𑀺𑀢𑁂 𑀦𑀯𑀲𑁄𑀡𑁆𑀟𑀺𑀬𑀸.

𑁨𑁫𑁨. 𑀯𑀫𑁆𑀫𑀺𑀓𑁂 𑀫𑀢𑁆𑀢𑀺𑀓𑀸𑀓𑀼𑀝𑁆𑀝𑁂, 𑀅𑀩𑁆𑀪𑁄𑀓𑀸𑀲𑀼𑀝𑁆𑀞𑀺𑀢𑁂 𑀢𑀣𑀸;

𑀬𑁂𑀪𑀼𑀬𑁆𑀬𑀓𑀣𑀮𑀝𑁆𑀞𑀸𑀦𑁂, 𑀢𑀺𑀝𑁆𑀞𑀢𑀺𑀝𑁆𑀞𑀓𑀓𑀼𑀝𑁆𑀝𑀓𑁄.

𑁨𑁫𑁩. 𑀣𑀫𑁆𑀪𑀸𑀤𑀺𑀁 𑀕𑀡𑁆𑀳𑀺𑀢𑀼𑀁 𑀪𑀽𑀫𑀺𑀁, 𑀲𑀜𑁆𑀘𑀸𑀮𑁂𑀢𑁆𑀯𑀸 𑀯𑀺𑀓𑁄𑀧𑀬𑀁;

𑀥𑀸𑀭𑀸𑀬 𑀪𑀺𑀦𑁆𑀤𑀺𑀢𑀼𑀁 𑀪𑀽𑀫𑀺𑀁, 𑀓𑀸𑀢𑀼𑀁 𑀯𑀸 𑀯𑀺𑀲𑀫𑀁 𑀲𑀫𑀁.

𑁨𑁫𑁪. 𑀲𑀫𑁆𑀫𑀼𑀜𑁆𑀚𑀦𑀻𑀳𑀺 𑀖𑀁𑀲𑀺𑀢𑀼𑀁, 𑀓𑀡𑁆𑀝𑀓𑀸𑀤𑀺𑀁 𑀧𑀯𑁂𑀲𑀺𑀢𑀼𑀁;

𑀤𑀲𑁆𑀲𑁂𑀲𑁆𑀲𑀸𑀫𑀻𑀢𑀺 𑀪𑀺𑀦𑁆𑀤𑀦𑁆𑀢𑁄, 𑀪𑀽𑀫𑀺𑀁 𑀘𑀗𑁆𑀓𑀫𑀺𑀢𑀼𑀁 𑀧𑀤𑀁.

𑁨𑁫𑁫. 𑀖𑀁𑀲𑀺𑀢𑀼𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀁, 𑀓𑀡𑁆𑀟𑀼𑀭𑁄𑀕𑀻 𑀢𑀝𑀸𑀤𑀺𑀲𑀼;

𑀳𑀢𑁆𑀣𑀁 𑀯𑀸 𑀥𑁄𑀯𑀺𑀢𑀼𑀁 𑀪𑀽𑀫𑀺𑀁, 𑀖𑀁𑀲𑀺𑀢𑀼𑀁 𑀦 𑀘 𑀓𑀧𑁆𑀧𑀢𑀺.

𑁨𑁫𑁬. 𑀣𑀫𑁆𑀪𑀸𑀤𑀺𑀉𑀚𑀼𑀓𑀼𑀤𑁆𑀥𑀸𑀭𑁄, 𑀧𑀸𑀲𑀸𑀡𑀸𑀤𑀺𑀧𑀯𑀝𑁆𑀝𑀦𑀁;

𑀲𑀸𑀔𑀸𑀤𑀺𑀓𑀟𑁆𑀠𑀦𑀁 𑀭𑀼𑀓𑁆𑀔𑀮𑀢𑀸𑀘𑁆𑀙𑁂𑀤𑀦𑀨𑀸𑀮𑀦𑀁.

𑁨𑁫𑁭. 𑀲𑁂𑀓𑁄 𑀧𑀲𑁆𑀲𑀸𑀯𑀆𑀤𑀻𑀦𑀁, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀯𑀝𑁆𑀝𑀢𑀺;

𑀅𑀮𑁆𑀮𑀳𑀢𑁆𑀣𑀁 𑀞𑀧𑁂𑀢𑁆𑀯𑀸𑀦, 𑀭𑀚𑀕𑁆𑀕𑀸𑀳𑁄 𑀘 𑀪𑀽𑀫𑀺𑀬𑀸.

𑁨𑁫𑁮. 𑀅𑀕𑁆𑀕𑀺𑀲𑁆𑀲 𑀅𑀦𑀼𑀧𑀸𑀤𑀸𑀦𑁂, 𑀓𑀧𑀸𑀮𑁂 𑀇𑀝𑁆𑀞𑀓𑀸𑀬 𑀯𑀸;

𑀧𑀸𑀢𑁂𑀢𑀼𑀁 𑀮𑀩𑁆𑀪𑀢𑁂 𑀅𑀕𑁆𑀕𑀺𑀁, 𑀪𑀽𑀫𑀺𑀬𑀁 𑀯𑀸𑀯𑀲𑁂 𑀲𑀢𑀻𑀢𑀺.