𑁧𑁭. 𑀆𑀧𑀼𑀘𑁆𑀙𑀓𑀭𑀡𑀦𑀺𑀤𑁆𑀤𑁂𑀲𑁄

𑀆𑀧𑀼𑀘𑁆𑀙𑀓𑀭𑀡𑀦𑁆𑀢𑀺 𑁋

𑁧𑁬𑁧. 𑀅𑀦𑀚𑁆𑀛𑀺𑀝𑁆𑀞𑁄𑀯 𑀣𑁂𑀭𑁂𑀦, 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀉𑀤𑁆𑀤𑀺𑀲𑁂;

𑀥𑀫𑁆𑀫𑀁 𑀦 𑀓𑀣𑀬𑁂 𑀧𑀜𑁆𑀳𑀁, 𑀦 𑀧𑀼𑀘𑁆𑀙𑁂 𑀦 𑀘 𑀯𑀺𑀲𑁆𑀲𑀚𑁂.

𑁧𑁬𑁨. 𑀆𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑁂𑀦𑁆𑀢𑀲𑁆𑀲, 𑀧𑀼𑀦 𑀯𑀼𑀟𑁆𑀠𑀢𑀭𑀸𑀕𑀫𑁂;

𑀧𑀼𑀦 𑀆𑀧𑀼𑀘𑁆𑀙𑀦𑀁 𑀦𑀢𑁆𑀣𑀺, 𑀪𑀢𑁆𑀢𑀕𑁆𑀕𑁂 𑀘𑀸𑀦𑀼𑀫𑁄𑀤𑀢𑁄.

𑁧𑁬𑁩. 𑀯𑀲𑀦𑁆𑀢𑁄 𑀘 𑀅𑀦𑀸𑀧𑀼𑀘𑁆𑀙𑀸, 𑀯𑀼𑀟𑁆𑀠𑁂𑀦𑁂𑀓𑀯𑀺𑀳𑀸𑀭𑀓𑁂;

𑀦 𑀲𑀚𑁆𑀛𑀸𑀬𑁂𑀬𑁆𑀬 𑀉𑀤𑁆𑀤𑁂𑀲𑀁, 𑀧𑀭𑀺𑀧𑀼𑀘𑁆𑀙𑀜𑁆𑀘 𑀦𑁄 𑀤𑀤𑁂.

𑁧𑁬𑁪. 𑀥𑀫𑁆𑀫𑀁 𑀦 𑀪𑀸𑀲𑀬𑁂 𑀤𑀻𑀧𑀁, 𑀦 𑀓𑀭𑁂 𑀦 𑀘 𑀯𑀺𑀚𑁆𑀛𑀧𑁂;

𑀯𑀸𑀢𑀧𑀸𑀦𑀁 𑀓𑀯𑀸𑀝𑀁 𑀯𑀸, 𑀯𑀺𑀯𑀭𑁂𑀬𑁆𑀬 𑀣𑀓𑁂𑀬𑁆𑀬 𑀘.

𑁧𑁬𑁫. 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄𑀧𑀺, 𑀯𑀼𑀟𑁆𑀠𑁂𑀦 𑀧𑀭𑀺𑀯𑀢𑁆𑀢𑀬𑁂;

𑀬𑁂𑀦 𑀯𑀼𑀟𑁆𑀠𑁄 𑀲 𑀲𑀗𑁆𑀖𑀸𑀝𑀺-𑀓𑀡𑁆𑀡𑁂𑀦𑁂𑀦𑀁 𑀦 𑀖𑀝𑁆𑀝𑀬𑁂𑀢𑀺.