𑁧𑁧. 𑀦𑀺𑀲𑁆𑀲𑀕𑁆𑀕𑀺𑀬𑀦𑀺𑀤𑁆𑀤𑁂𑀲𑁄

𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀻𑀢𑀺 𑁋

𑁧𑁧𑁬. 𑀅𑀭𑀽𑀧𑀺𑀬𑀁 𑀭𑀽𑀧𑀺𑀬𑁂𑀦, 𑀭𑀽𑀧𑀺𑀬𑀁 𑀇𑀢𑀭𑁂𑀦 𑀘;

𑀭𑀽𑀧𑀺𑀬𑀁 𑀧𑀭𑀺𑀯𑀢𑁆𑀢𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺 𑀇𑀥 𑀭𑀽𑀧𑀺𑀬𑀁.

𑁧𑁧𑁭. 𑀓𑀳𑀸𑀧𑀡𑁄 𑀲𑀚𑁆𑀛𑀼 𑀲𑀺𑀗𑁆𑀕𑀻, 𑀯𑁄𑀳𑀸𑀭𑀽𑀧𑀕𑀫𑀸𑀲𑀓𑀁;

𑀯𑀢𑁆𑀣𑀫𑀼𑀢𑁆𑀢𑀸𑀤𑀺 𑀇𑀢𑀭𑀁, 𑀓𑀧𑁆𑀧𑀁 𑀤𑀼𑀓𑁆𑀓𑀝𑀯𑀢𑁆𑀣𑀼 𑀘.

𑁧𑁧𑁮. ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀪𑀼𑀢𑁆𑀯𑀸 𑀯𑀸, 𑀇𑀫𑀁 𑀤𑁂𑀳𑀺 𑀓𑀭𑀸𑀦𑀬;

𑀤𑁂𑀫𑀺 𑀯𑀸’’𑀢𑀺 𑀲𑀫𑀸𑀧𑀦𑁆𑀦𑁂, 𑀦𑀺𑀲𑁆𑀲𑀕𑁆𑀕𑀺 𑀓𑀬𑀯𑀺𑀓𑁆𑀓𑀬𑁂.

𑁧𑁧𑁯. 𑀅𑀢𑁆𑀢𑀦𑁄 𑀅𑀜𑁆𑀜𑀢𑁄 𑀮𑀸𑀪𑀁, 𑀲𑀗𑁆𑀖𑀲𑁆𑀲𑀜𑁆𑀜𑀲𑁆𑀲 𑀯𑀸 𑀦𑀢𑀁;

𑀧𑀭𑀺𑀡𑀸𑀫𑁂𑀬𑁆𑀬 𑀦𑀺𑀲𑁆𑀲𑀕𑁆𑀕𑀺, 𑀧𑀸𑀘𑀺𑀢𑁆𑀢𑀺 𑀘𑀸𑀧𑀺 𑀤𑀼𑀓𑁆𑀓𑀝𑀁.

𑁧𑁨𑁦. 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀦𑀺𑀲𑁆𑀲𑀕𑁆𑀕𑀺𑀁, 𑀧𑀭𑀺𑀪𑀼𑀜𑁆𑀚𑁂 𑀦 𑀤𑁂𑀬𑁆𑀬 𑀯𑀸;

𑀦𑀺𑀲𑁆𑀲𑀝𑁆𑀞𑀁 𑀲𑀓𑀲𑀜𑁆𑀜𑀸𑀬, 𑀤𑀼𑀓𑁆𑀓𑀝𑀁 𑀅𑀜𑁆𑀜𑀣𑁂𑀢𑀭𑀦𑁆𑀢𑀺.