𑀧𑀸𑀭𑀸𑀚𑀺𑀓𑀓𑀡𑁆𑀟𑀁

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀇𑀥 𑀧𑀦 𑀞𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀁 𑀓𑀫𑀪𑁂𑀤𑁄 𑀧𑀓𑀸𑀲𑁂𑀢𑀩𑁆𑀩𑁄. 𑀓𑀣𑀁 𑁋 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀤𑁂𑀲𑀦𑀸𑀓𑁆𑀓𑀫𑁄, 𑀧𑀳𑀸𑀦𑀓𑁆𑀓𑀫𑁄, 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄, 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀓𑀫𑁄 𑀮𑀩𑁆𑀪𑀢𑀺. 𑀢𑀢𑁆𑀣 𑀪𑀕𑀯𑀢𑀸 𑀭𑀸𑀚𑀕𑀳𑁂 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑁆𑀲 𑀬𑁄 𑀤𑁂𑀲𑀦𑀸𑀓𑁆𑀓𑀫𑁄 𑀅𑀦𑀼𑀜𑁆𑀜𑀸𑀢𑁄, 𑀢𑀁 𑀤𑁂𑀲𑀦𑀸𑀓𑁆𑀓𑀫𑀁 𑀅𑀦𑀼𑀓𑁆𑀓𑀫𑀦𑁆𑀢𑁄𑀯 𑀫𑀳𑀸𑀓𑀲𑁆𑀲𑀧𑁄 𑀧𑀞𑀫𑀁 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀁 𑀧𑀼𑀘𑁆𑀙𑀺, 𑀢𑀤𑀦𑀦𑁆𑀢𑀭𑀁 𑀲𑀗𑁆𑀖𑀸𑀤𑀺𑀲𑁂𑀲𑀼𑀤𑁆𑀤𑁂𑀲𑀁, 𑀢𑀤𑀦𑀦𑁆𑀢𑀭𑀁 𑀅𑀦𑀺𑀬𑀢𑀼𑀤𑁆𑀤𑁂𑀲𑀁, 𑀢𑀤𑀦𑀦𑁆𑀢𑀭𑀁 𑀯𑀺𑀢𑁆𑀣𑀸𑀭𑀼𑀤𑁆𑀤𑁂𑀲𑀁. 𑀢𑀤𑀦𑀦𑁆𑀢𑀭𑀁 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑀜𑁆𑀘 𑀢𑁂𑀦𑁂𑀯 𑀅𑀦𑀼𑀓𑁆𑀓𑀫𑁂𑀦 𑀧𑀼𑀘𑁆𑀙𑀺. 𑀢𑀢𑁄 𑀧𑀭𑀁 𑀢𑀬𑁄 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑁂𑀢𑀼𑀁 𑀯𑀺𑀦𑀸 𑀕𑀡𑀦𑀧𑀭𑀺𑀘𑁆𑀙𑁂𑀤𑁂𑀦 𑀲𑁂𑀔𑀺𑀬𑀥𑀫𑁆𑀫𑁂 𑀧𑀼𑀘𑁆𑀙𑀺. 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀲𑀪𑀸𑀕𑀢𑁄 𑀧𑀝𑁆𑀞𑀸𑀬 𑀧𑀼𑀘𑁆𑀙𑀦𑁆𑀢𑁄 𑀯𑀻𑀲𑀢𑀺𑀔𑀦𑁆𑀥𑀓𑁂 𑀧𑀼𑀘𑁆𑀙𑀺. 𑀦𑀺𑀤𑀸𑀦𑀼𑀤𑁆𑀤𑁂𑀲𑀦𑁆𑀢𑁄𑀕𑀥𑀸𑀦𑀁 𑀯𑀸 𑀲𑀭𑀽𑀧𑁂𑀦 𑀅𑀦𑀼𑀤𑁆𑀤𑀺𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑀢𑁆𑀣𑀁 𑀔𑀦𑁆𑀥𑀓𑁂 𑀧𑀼𑀘𑁆𑀙𑀺. 𑀏𑀢𑁂𑀦 𑀔𑀦𑁆𑀥𑀓𑁂 𑀧𑀜𑁆𑀜𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀺 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀧𑀼𑀘𑁆𑀙𑀺𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀆𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀩𑁆𑀬𑀸𑀓𑀸𑀲𑀺. 𑀅𑀬𑀫𑁂𑀢𑁆𑀣 𑀤𑁂𑀲𑀦𑀸𑀓𑁆𑀓𑀫𑁄. 𑀉𑀪𑀢𑁄𑀯𑀺𑀪𑀗𑁆𑀕𑀔𑀦𑁆𑀥𑀓𑀢𑁄 𑀧𑀦 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀤𑀸 𑀧𑀭𑀺𑀯𑀸𑀭𑁄 𑀯𑀺𑀲𑀼𑀁 𑀧𑀸𑀴𑀺 𑀓𑀢𑁄, 𑀇𑀫𑀫𑁂𑀯 𑀯𑀘𑀦𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀔𑀦𑁆𑀥𑀓𑀁 𑀧𑀭𑀺𑀯𑀸𑀭𑁂𑀧𑀺 𑀆𑀭𑁄𑀧𑀬𑀺𑀁𑀲𑀽’’𑀢𑀺𑀆𑀤𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀈𑀢𑀺𑀓𑀣𑀸). 𑀅𑀧𑀺𑀘 𑀧𑀸𑀴𑀺𑀬𑀁 ‘‘𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀉𑀪𑀢𑁄𑀯𑀺𑀪𑀗𑁆𑀕𑁂 𑀧𑀼𑀘𑁆𑀙𑀺. 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 (𑀘𑀽𑀴𑀯. 𑁪𑁩𑁯) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀣𑁂𑀭𑁄 𑀉𑀪𑀢𑁄𑀯𑀺𑀪𑀗𑁆𑀕𑁂 𑀏𑀯 𑀧𑀼𑀘𑁆𑀙𑀺. 𑀯𑀺𑀲𑁆𑀲𑀚𑁆𑀚𑀦𑁆𑀢𑁄 𑀧𑀦 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀦𑀺𑀭𑀯𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀔𑀦𑁆𑀥𑀓𑀧𑀭𑀺𑀯𑀸𑀭𑁂 𑀅𑀦𑁆𑀢𑁄 𑀓𑀢𑁆𑀯𑀸 𑀤𑁂𑀲𑁂𑀲𑀺. 𑀕𑀡𑀲𑀚𑁆𑀛𑀸𑀬𑀓𑀸𑀮𑁂 𑀧𑀦 𑀢𑀤𑀸 𑀔𑀦𑁆𑀥𑀓𑀧𑀭𑀺𑀯𑀸𑀭𑀸 𑀯𑀺𑀲𑀼𑀁 𑀧𑀸𑀴𑀺 𑀓𑀢𑀸𑀢𑀺 𑀅𑀬𑀫𑁂𑀢𑁆𑀣 𑀤𑁂𑀲𑀦𑀸𑀓𑁆𑀓𑀫𑁄.

𑀬𑀤𑀺 𑀏𑀯𑀁 𑀦𑀺𑀤𑀸𑀦𑀼𑀤𑁆𑀤𑁂𑀲𑁄 𑀧𑀞𑀫𑀤𑁂𑀲𑀦𑀸𑀢𑀺 𑀘𑁂? 𑀦, 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁩𑁩) ‘‘𑀬𑀸𑀦𑀺 𑀫𑀬𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺, 𑀢𑀸𑀦𑀺 𑀦𑁂𑀲𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑁂𑀬𑁆𑀬’’𑀦𑁆𑀢𑀺 𑀯𑀘𑀦𑀢𑁄, ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑁧𑁩𑁪) 𑀯𑀘𑀦𑀢𑁄 𑀘. 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀆𑀧𑀢𑁆𑀢𑀻𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀫𑁆𑀧𑀭𑀸𑀬𑀺𑀓𑀸𑀲𑀯𑀝𑁆𑀞𑀸𑀦𑀺𑀬𑀢𑁆𑀢𑀸 𑀬𑀣𑀸𑀪𑀽𑀢𑀁 𑀲𑀻𑀮𑀲𑀁𑀯𑀭𑀓𑁂𑀦 𑀧𑀭𑀺𑀯𑀚𑁆𑀚𑀦𑁂𑀦 𑀧𑀳𑀸𑀢𑀩𑁆𑀩𑀢𑁆𑀢𑀸 𑀧𑀳𑀸𑀦𑀓𑁆𑀓𑀫𑁄𑀧𑁂𑀢𑁆𑀣 𑀲𑀫𑁆𑀪𑀯𑀢𑀺 ‘‘𑀢𑀸𑀯𑀤𑁂𑀯 𑀘𑀢𑁆𑀢𑀸𑀭𑀺 𑀅𑀓𑀭𑀡𑀻𑀬𑀸𑀦𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀸𑀦𑀻’’𑀢𑀺 𑀯𑀘𑀦𑀢𑁄. 𑀢𑀣𑀸 ‘‘𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽’’𑀢𑀺 (𑀫. 𑀦𑀺. 𑁩.𑁭𑁫; 𑀯𑀺𑀪. 𑁫𑁦𑁮) 𑀯𑀘𑀦𑀢𑁄 𑀬𑀣𑀸𑀪𑀽𑀢𑀁 𑀆𑀘𑀺𑀓𑁆𑀔𑀦𑀲𑀺𑀓𑁆𑀔𑀦𑁂𑀦 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄𑀧𑀺 𑀲𑀫𑁆𑀪𑀯𑀢𑀺. 𑀬𑀣𑀼𑀤𑁆𑀤𑁂𑀲𑀓𑁆𑀓𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑁂𑀦𑀸𑀧𑀺 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄, 𑀏𑀯𑀫𑀺𑀫𑁂𑀳𑀺 𑀢𑀻𑀳𑀺 𑀓𑀫𑁂𑀳𑀺 𑀤𑁂𑀲𑁂𑀢𑀩𑁆𑀩𑀸𑀦𑀫𑁂𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀲𑀫𑁆𑀪𑀯𑀢𑀺. 𑀢𑀣𑀸 𑀳𑀺 𑀬𑀁 𑀬𑀁 𑀲𑀸𑀥𑀸𑀭𑀡𑀁, 𑀢𑀁 𑀢𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑁂 𑀏𑀯 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀙𑀦𑁆𑀤𑀲𑁄 𑀫𑁂𑀣𑀼𑀦𑀁 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀧𑀜𑁆𑀜𑀢𑁆𑀢𑀁. 𑀬𑀢𑁄 𑀪𑀺𑀓𑁆𑀔𑀼𑀦𑀻𑀦𑀁 𑀢𑀁 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀦 𑀲𑀺𑀬𑀸, 𑀢𑀢𑁄 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀢𑀲𑁆𑀫𑀺𑀁 𑀦𑀢𑁆𑀣𑀻𑀢𑀺 (𑀧𑀭𑀺. 𑁨𑁦𑁧-𑁨𑁦𑁨) 𑀧𑀭𑀺𑀯𑀸𑀭𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀼𑀭𑀺𑀫𑁂𑀦 𑀓𑀫𑀢𑁆𑀢𑀬𑁂𑀦 𑀬𑀁 𑀧𑀞𑀫𑀁 𑀤𑁂𑀲𑁂𑀢𑀩𑁆𑀩𑀁, 𑀢𑀁 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑁂 𑀧𑀞𑀫𑀼𑀧𑁆𑀧𑀦𑁆𑀦𑀢𑁆𑀢𑀸 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀁 𑀲𑀩𑁆𑀩𑀧𑀞𑀫𑀁 𑀤𑁂𑀲𑁂𑀢𑀼𑀓𑀸𑀫𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 ‘‘𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀻’’𑀢𑀺 (𑀧𑀸𑀭𑀸. 𑁨𑁩) 𑀯𑁂𑀲𑀸𑀮𑀺𑀬𑀫𑁂𑀯 𑀧𑀸𑀧𑁂𑀢𑁆𑀯𑀸 𑀞𑀧𑁂𑀲𑀺.

𑀇𑀤𑀸𑀦𑀺 𑀲𑀩𑁆𑀩𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀸𑀧𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 (𑀧𑀸𑀭𑀸. 𑁩𑁯, 𑁪𑁩) 𑀏𑀯𑀁 𑀲𑀉𑀤𑁆𑀤𑁂𑀲𑀅𑀦𑀼𑀤𑁆𑀤𑁂𑀲𑀪𑁂𑀤𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑁂 𑀲𑀭𑀽𑀧𑀢𑁄 𑀆𑀕𑀢𑀸 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀲𑀉𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀲𑀸𑀧𑀺 𑀤𑁆𑀯𑀺𑀥𑀸 𑀲𑀧𑀼𑀕𑁆𑀕𑀮𑀸𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀪𑁂𑀤𑀢𑁄. 𑀢𑀢𑁆𑀣 𑀬𑀲𑁆𑀲𑀸 𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑁆𑀢𑁄 𑀆𑀧𑀢𑁆𑀢𑀺𑀬𑀸 𑀲𑀳, 𑀯𑀺𑀦𑀸 𑀯𑀸 𑀧𑀼𑀕𑁆𑀕𑀮𑁄 𑀤𑀲𑁆𑀲𑀺𑀢𑁄, 𑀲𑀸 𑀲𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸. 𑀇𑀢𑀭𑀸 𑀅𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸.

𑀢𑀢𑁆𑀣 𑀲𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸 𑀤𑁆𑀯𑀺𑀥𑀸 𑀅𑀤𑀲𑁆𑀲𑀺𑀢𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀪𑁂𑀤𑀢𑁄. 𑀢𑀢𑁆𑀣 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸 𑀦𑀸𑀫 𑀅𑀝𑁆𑀞 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 (𑀧𑀸𑀭𑀸. 𑁩𑁯, 𑁪𑁪, 𑁮𑁯, 𑁯𑁧, 𑁧𑁬𑁭, 𑁧𑁭𑁧, 𑁧𑁯𑁫, 𑁧𑁯𑁭) 𑀳𑀺 𑀧𑀼𑀕𑁆𑀕𑀮𑁄𑀯 𑀢𑀢𑁆𑀣 𑀤𑀲𑁆𑀲𑀺𑀢𑁄, 𑀦𑀸𑀧𑀢𑁆𑀢𑀺. 𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸 𑀦𑀸𑀫 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀢𑀸 𑀲𑀢𑁆𑀢𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑀥𑀫𑁆𑀫𑀸. ‘‘𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺 (𑀧𑀸𑀘𑀺. 𑁬𑁮𑁩, 𑁬𑁮𑁭) 𑀳𑀺 𑀢𑀢𑁆𑀣 𑀆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑁂𑀦.

𑀢𑀣𑀸 𑀅𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸𑀧𑀺 𑀅𑀤𑀲𑁆𑀲𑀺𑀢𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀪𑁂𑀤𑀢𑁄 𑀤𑁆𑀯𑀺𑀥𑀸. 𑀢𑀢𑁆𑀣 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸 𑀦𑀸𑀫 𑀲𑁂𑀔𑀺𑀬𑀸 𑀥𑀫𑁆𑀫𑀸. 𑀯𑀼𑀢𑁆𑀢𑀸𑀯𑀲𑁂𑀲𑀸 𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀸𑀧𑀺 𑀤𑁆𑀯𑀺𑀥𑀸 𑀅𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀪𑁂𑀤𑀢𑁄. 𑀢𑀢𑁆𑀣 𑀅𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀸 𑀦𑀸𑀫 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀫𑀼𑀲𑀸𑀯𑀸𑀤𑁄𑀫𑀲𑀯𑀸𑀤𑀧𑁂𑀲𑀼𑀜𑁆𑀜𑀪𑀽𑀢𑀕𑀸𑀫𑀅𑀜𑁆𑀜𑀯𑀸𑀤𑀓𑀉𑀚𑁆𑀛𑀸𑀧𑀦𑀓𑀕𑀡𑀪𑁄𑀚𑀦𑀧𑀭𑀫𑁆𑀧𑀭𑀪𑁄𑀚𑀦𑀲𑀼𑀭𑀸𑀫𑁂𑀭𑀬𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀳𑀲𑀥𑀫𑁆𑀫𑀅𑀦𑀸𑀤𑀭𑀺𑀬𑀢𑀮𑀖𑀸𑀢𑀓𑀚𑀢𑀼𑀫𑀝𑁆𑀞𑀓𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀧𑀜𑁆𑀘𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑁂 𑀫𑀺𑀲𑁆𑀲𑀸𑀫𑀺𑀲𑁆𑀲𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀢𑀢𑁆𑀣 𑀉𑀧𑀬𑁄𑀕𑀪𑀼𑀫𑁆𑀫𑀯𑀺𑀪𑀢𑁆𑀢𑀺𑀬𑁄 𑀏𑀓𑀁𑀲𑁂𑀦 𑀫𑀺𑀲𑁆𑀲𑀸. 𑀅𑀯𑀲𑁂𑀲𑀸 𑀫𑀺𑀲𑁆𑀲𑀸 𑀘 𑀅𑀫𑀺𑀲𑁆𑀲𑀸 𑀘. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀘𑁆𑀘𑀢𑁆𑀢𑀁 𑀢𑀸𑀯 𑀤𑁆𑀯𑀻𑀲𑀼 𑀅𑀦𑀺𑀬𑀢𑁂𑀲𑀼 𑀉𑀧𑀬𑁄𑀕𑁂𑀦 𑀫𑀺𑀲𑁆𑀲𑀁, 𑀤𑁆𑀯𑀸𑀤𑀲𑀲𑀼 𑀧𑀸𑀝𑀺𑀤𑁂𑀲𑀦𑀻𑀬𑁂𑀲𑀼 𑀓𑀭𑀡𑁂𑀦 𑀫𑀺𑀲𑁆𑀲𑀁, 𑀊𑀦𑀧𑀜𑁆𑀘𑀩𑀦𑁆𑀥𑀦𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀸𑀫𑀺𑀓𑀭𑀡𑁂𑀳𑀺, 𑀊𑀦𑀯𑀻𑀲𑀢𑀺𑀯𑀲𑁆𑀲𑁂 𑀪𑀼𑀫𑁆𑀫𑁂𑀦, 𑀫𑁄𑀳𑀦𑀓𑁂 𑀉𑀧𑀬𑁄𑀕𑀲𑀸𑀫𑀺𑀪𑀼𑀫𑁆𑀫𑁂𑀳𑀺. 𑀬𑀲𑁆𑀫𑀸 ‘‘𑀯𑀺𑀯𑀡𑁆𑀡𑀓’’𑀦𑁆𑀢𑀺 𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀓𑀢𑁆𑀢𑀸, 𑀢𑀲𑁆𑀫𑀸 𑀯𑀺𑀯𑀡𑁆𑀡𑀓𑀲𑀺𑀓𑁆𑀔𑀸𑀧𑀤𑀁 𑀬𑀤𑀸 𑀦 𑀲𑀫𑁆𑀪𑀯𑀢𑀺, 𑀏𑀯𑀁 𑀧𑀘𑁆𑀘𑀢𑁆𑀢𑀁 𑀧𑀜𑁆𑀘𑀯𑀺𑀥𑀁 𑀫𑀺𑀲𑁆𑀲𑀁 𑀳𑁄𑀢𑀺. 𑀲𑁂𑀲𑁂𑀲𑀼 𑀧𑀞𑀫𑀸𑀦𑀺𑀬𑀢𑀁 𑀞𑀧𑁂𑀢𑁆𑀯𑀸 𑀆𑀤𑀺𑀫𑁆𑀳𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺 𑀏𑀯𑀫𑀸𑀕𑀢𑀁 𑀧𑀘𑁆𑀘𑀢𑁆𑀢𑀁 𑀯𑀸, 𑀤𑀼𑀢𑀺𑀬𑀸𑀦𑀺𑀬𑀢𑀁 𑀞𑀧𑁂𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀲𑀫𑀡𑀼𑀤𑁆𑀤𑁂𑀲𑀢𑀢𑀺𑀬𑀘𑀢𑀼𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑁂𑀲𑀼 𑀫𑀚𑁆𑀛𑁂 ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺 𑀏𑀯𑀫𑀸𑀕𑀢𑀁 𑀧𑀘𑁆𑀘𑀢𑁆𑀢𑀁 𑀯𑀸, 𑀤𑀼𑀩𑁆𑀩𑀘𑀓𑀼𑀮𑀤𑀽𑀲𑀓𑀲𑀁𑀲𑀝𑁆𑀞𑀲𑀺𑀓𑁆𑀔𑀸𑀧𑀤𑁂𑀲𑀼 𑀆𑀤𑀺𑀫𑁆𑀳𑀺 𑀓𑁂𑀯𑀮𑀁 ‘‘𑀪𑀺𑀓𑁆𑀔𑀽’’𑀢𑀺 𑀆𑀕𑀢𑀁 𑀧𑀘𑁆𑀘𑀢𑁆𑀢𑀁 𑀯𑀸, 𑀪𑁂𑀤𑀸𑀦𑀼𑀯𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑁂 𑀫𑀚𑁆𑀛𑁂 𑀆𑀕𑀢𑀁 𑀧𑀘𑁆𑀘𑀢𑁆𑀢𑀁 𑀯𑀸 𑀅𑀜𑁆𑀜𑀸𑀬 𑀯𑀺𑀪𑀢𑁆𑀢𑀺𑀬𑀸 𑀅𑀫𑀺𑀲𑁆𑀲𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀪𑁂𑀤𑀸𑀦𑀼𑀯𑀢𑁆𑀢𑀓𑀢𑀼𑀯𑀝𑁆𑀝𑀦𑀤𑁆𑀯𑀬𑀲𑀁𑀲𑀝𑁆𑀞𑀤𑀼𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑁂𑀲𑀼 𑀩𑀳𑀼𑀯𑀘𑀦𑀁, 𑀇𑀢𑀭𑀢𑁆𑀣 𑀲𑀩𑁆𑀩𑀢𑁆𑀣 𑀏𑀓𑀯𑀘𑀦𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀣𑀸 𑀉𑀧𑀬𑁄𑀕𑁄 𑀤𑁆𑀯𑀻𑀲𑀼 𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑁂𑀲𑀼, 𑀢𑀦𑁆𑀢𑀯𑀸𑀬𑀲𑀺𑀓𑁆𑀔𑀸𑀧𑀤𑁂 𑀘 𑀧𑀘𑁆𑀘𑀢𑁆𑀢𑁂𑀦 𑀫𑀺𑀲𑁆𑀲𑁄, 𑀅𑀪𑀺𑀳𑀝𑀲𑀺𑀓𑁆𑀔𑀸𑀧𑀤𑁂 𑀓𑀭𑀡𑁂𑀦, 𑀭𑀸𑀚𑀲𑀺𑀓𑁆𑀔𑀸𑀧𑀤𑁂 𑀓𑀭𑀡𑀲𑀸𑀫𑀺𑀧𑀘𑁆𑀘𑀢𑁆𑀢𑁂𑀳𑀻𑀢𑀺 𑀉𑀧𑀬𑁄𑀕𑁄 𑀢𑀺𑀥𑀸 𑀫𑀺𑀲𑁆𑀲𑁄 𑀳𑁄𑀢𑀺. 𑀓𑀭𑀡𑀜𑁆𑀘 𑀓𑀼𑀝𑀺𑀓𑀸𑀭𑀫𑀳𑀮𑁆𑀮𑀓𑀤𑀼𑀢𑀺𑀬𑀓𑀣𑀺𑀦𑀤𑁆𑀯𑁂𑀪𑀸𑀕𑀦𑀺𑀲𑀻𑀤𑀦𑀲𑀦𑁆𑀣𑀢𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑁂𑀲𑀼 𑀙𑀲𑀼 𑀧𑀘𑁆𑀘𑀢𑁆𑀢𑁂𑀦 𑀫𑀺𑀲𑁆𑀲𑀁, 𑀧𑀞𑀫𑀢𑀢𑀺𑀬𑀓𑀣𑀺𑀦𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀦𑀺𑀲𑀻𑀤𑀦𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀯𑀲𑁆𑀲𑀺𑀓𑀲𑀸𑀝𑀺𑀓𑀉𑀤𑀓𑀲𑀸𑀝𑀺𑀓𑀤𑁆𑀯𑁂𑀥𑀫𑁆𑀫𑀧𑀘𑁆𑀘𑀸𑀲𑀻𑀲𑀦𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀝𑁆𑀞𑀲𑀼 𑀲𑀸𑀫𑀺𑀦𑀸 𑀫𑀺𑀲𑁆𑀲𑀦𑁆𑀢𑀺 𑀓𑀭𑀡𑀁 𑀤𑁆𑀯𑀺𑀥𑀸 𑀫𑀺𑀲𑁆𑀲𑀁 𑀳𑁄𑀢𑀺. 𑀅𑀯𑀲𑁂𑀲𑁂𑀲𑀼 𑀙𑀩𑁆𑀩𑀲𑁆𑀲𑀯𑀲𑁆𑀲𑀺𑀓𑀲𑀸𑀝𑀺𑀓𑀤𑁆𑀯𑀢𑁆𑀢𑀺𑀘𑁆𑀙𑀤𑀦𑀸𑀯𑀲𑀣𑀧𑀺𑀡𑁆𑀟𑀫𑀳𑀸𑀦𑀸𑀫𑀕𑀭𑀼𑀮𑀳𑀼𑀧𑀸𑀯𑀼𑀭𑀡𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀢𑁆𑀢𑀲𑀼 𑀓𑀭𑀡𑀯𑀺𑀪𑀢𑁆𑀢𑀺 𑀅𑀜𑁆𑀜𑀯𑀺𑀪𑀢𑁆𑀢𑀺𑀬𑀸 𑀅𑀫𑀺𑀲𑁆𑀲𑀸, 𑀅𑀘𑁆𑀘𑁂𑀓𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀸𑀫𑀺𑀯𑀺𑀪𑀢𑁆𑀢𑀺 𑀓𑀭𑀡𑀯𑀺𑀪𑀢𑁆𑀢𑀺𑀬𑀸 𑀫𑀺𑀲𑁆𑀲𑀸. 𑀅𑀢𑀺𑀭𑁂𑀓𑀧𑀢𑁆𑀢𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀲𑀸𑀫𑀺𑀯𑀺𑀪𑀢𑁆𑀢𑀺 𑀅𑀫𑀺𑀲𑁆𑀲𑀸𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀢𑀸𑀯 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑁋

𑀧𑀜𑁆𑀘𑀥𑀸 𑀘 𑀢𑀺𑀥𑀸 𑀘𑁂𑀯, 𑀤𑁆𑀯𑀺𑀥𑀸 𑀘𑁂𑀧𑀺 𑀢𑀣𑁂𑀓𑀥𑀸;

𑀪𑀺𑀦𑁆𑀦𑀸 𑀯𑀺𑀪𑀢𑁆𑀢𑀺𑀬𑁄 𑀧𑀜𑁆𑀘, 𑀲𑀩𑁆𑀩𑁂𑀓𑀸𑀤𑀲𑀥𑀸 𑀲𑀺𑀬𑀼𑀁.

𑀏𑀯𑀁 𑀢𑀸𑀯 𑀬𑀣𑀸𑀯𑀼𑀢𑁆𑀢𑁂𑀲𑀼 𑀲𑀉𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀜𑁆𑀜𑀸𑀲𑀼𑀢𑁆𑀢𑀭𑁂𑀲𑀼 𑀢𑀺𑀲𑀢𑁂𑀲𑀼 𑀦𑀯𑀼𑀢𑀺𑀅𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀸𑀦𑀺 𑀅𑀢𑀺𑀭𑁂𑀓𑀲𑀝𑁆𑀞𑀺𑀤𑁆𑀯𑀺𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀘𑁆𑀘𑀢𑁆𑀢𑀓𑀭𑀡𑀸𑀦𑀺 𑀢𑀺𑀁𑀲𑀼𑀢𑁆𑀢𑀭𑀸𑀦𑀺 𑀤𑁆𑀯𑀺𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀅𑀫𑀺𑀲𑁆𑀲𑀧𑀘𑁆𑀘𑀢𑁆𑀢𑀓𑀭𑀡𑀸𑀦𑀺 𑀤𑁆𑀯𑀸𑀤𑀲𑀼𑀢𑁆𑀢𑀭𑀸𑀦𑀺 𑀤𑁆𑀯𑀺𑀲𑀢𑀸𑀦𑀺, 𑀫𑀺𑀲𑁆𑀲𑀧𑀘𑁆𑀘𑀢𑁆𑀢𑀓𑀭𑀡𑀸𑀦𑀺 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺. 𑀅𑀯𑀲𑁂𑀲𑁂𑀲𑀼 𑀢𑀺𑀁𑀲𑀢𑀺𑀬𑀸 𑀲𑀺𑀓𑁆𑀔𑀸𑀧𑀤𑁂𑀲𑀼 𑀫𑀺𑀲𑁆𑀲𑁄𑀧𑀬𑁄𑀕𑀓𑀭𑀡𑀸𑀦𑀺 𑀧𑀜𑁆𑀘 𑀳𑁄𑀦𑁆𑀢𑀺, 𑀫𑀺𑀲𑁆𑀲𑀓𑀭𑀡𑀸𑀦𑀺 𑀘𑀼𑀤𑁆𑀤𑀲, 𑀅𑀫𑀺𑀲𑁆𑀲𑀸𑀦𑀺 𑀲𑀢𑁆𑀢, 𑀫𑀺𑀲𑁆𑀲𑀸𑀫𑀺𑀲𑁆𑀲𑀓𑀭𑀡𑀸𑀦𑀺 𑀤𑁆𑀯𑁂, 𑀅𑀫𑀺𑀲𑁆𑀲𑀸𑀦𑀺 𑀤𑁆𑀯𑁂𑀢𑀺 𑀲𑀩𑁆𑀩𑁂𑀲𑀼𑀧𑀺 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑁂𑀲𑀼 𑀪𑁂𑀤𑀸𑀦𑀼𑀯𑀢𑁆𑀢𑀓𑀤𑀼𑀩𑁆𑀩𑀘𑀓𑀼𑀮𑀤𑀽𑀲𑀓𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀓𑀣𑀺𑀦𑀅𑀪𑀺𑀳𑀝𑀓𑀼𑀝𑀺𑀓𑀸𑀭𑀫𑀳𑀮𑁆𑀮𑀓𑀯𑀺𑀓𑀧𑁆𑀧𑀦𑀤𑁆𑀯𑀬𑀤𑁆𑀯𑁂𑀪𑀸𑀕𑀙𑀩𑁆𑀩𑀲𑁆𑀲𑀦𑀺𑀲𑀻𑀤𑀦𑀲𑀦𑁆𑀣𑀢𑀏𑀴𑀓𑀮𑁄𑀫𑀸𑀢𑀺𑀭𑁂𑀓𑀧𑀢𑁆𑀢𑀪𑁂𑀲𑀚𑁆𑀚𑀯𑀲𑁆𑀲𑀺𑀓𑀲𑀸𑀝𑀺𑀓𑀢𑀦𑁆𑀢𑀯𑀸𑀬𑀅𑀘𑁆𑀘𑁂𑀓𑀙𑀸𑀭𑀢𑁆𑀢𑀤𑁆𑀯 𑀧𑀜𑁆𑀘𑀢𑁆𑀢𑀺𑀁𑀲𑁂𑀲𑀼 ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺 𑀦𑀢𑁆𑀣𑀺. 𑀤𑀼𑀢𑀺𑀬𑀸𑀦𑀺𑀬𑀢𑀧𑀡𑀻𑀢𑀪𑁄𑀚𑀦𑀲𑀫𑀡𑀼𑀤𑁆𑀤𑁂𑀲𑀢𑀢𑀺𑀬𑀘𑀢𑀼𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑁂𑀲𑀼 𑀫𑀚𑁆𑀛𑁂 𑀅𑀢𑁆𑀣𑀺.

𑀏𑀢𑁆𑀢𑀸𑀯𑀢𑀸 𑀲𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀤𑀼𑀓𑀁, 𑀲𑀧𑀼𑀕𑁆𑀕𑀮𑀸𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀤𑀼𑀓𑀁, 𑀧𑀘𑁆𑀘𑁂𑀓𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀤𑀼𑀓𑀤𑁆𑀯𑀬𑀁, 𑀅𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀤𑀼𑀓𑀁, 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑁂𑀲𑀼 𑀧𑀘𑁆𑀘𑀢𑁆𑀢𑀪𑀼𑀫𑁆𑀫𑀤𑀼𑀓𑀁, 𑀲𑀬𑁄𑀧𑀦𑀸𑀬𑁄𑀧𑀦𑀤𑀼𑀓𑀁, 𑀅𑀬𑁄𑀧𑀦𑀫𑀚𑁆𑀛𑁂𑀬𑁄𑀧𑀦𑀤𑀼𑀓𑀁, 𑀏𑀓𑀸𑀦𑁂𑀓𑀯𑀘𑀦𑀤𑀼𑀓𑀦𑁆𑀢𑀺 𑀦𑀯 𑀤𑀼𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀯𑀺𑀲𑁂𑀲𑀓𑀸𑀭𑀡𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀲𑀫𑁆𑀧𑀢𑁆𑀢𑁂 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀢𑀸𑀯 𑀲𑀉𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀺𑀁 𑀜𑀢𑁆𑀯𑀸 𑀲𑁂𑀲𑀯𑀺𑀦𑀬𑀧𑀺𑀝𑀓𑁂 𑀬𑀸 𑀓𑀸𑀘𑀺 𑀧𑀜𑁆𑀜𑀢𑁆𑀢𑀺 𑀅𑀦𑀼𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀧𑀤𑀪𑀸𑀚𑀦𑀦𑁆𑀢𑀭𑀸𑀧𑀢𑁆𑀢𑀺𑀯𑀺𑀦𑀻𑀢𑀯𑀢𑁆𑀣𑀼𑀧𑀝𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺𑀅𑀯𑀼𑀢𑁆𑀢𑀲𑀺𑀤𑁆𑀥𑀺𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀙𑀩𑁆𑀩𑀺𑀥𑀸 𑀳𑁄𑀢𑀺.

𑀢𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦 𑀔𑀬𑀺𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 (𑀧𑀭𑀺. 𑁧𑁫𑁭-𑁧𑁫𑁮), 𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀘𑁆𑀙𑀼𑀧𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁭𑁩) 𑀏𑀯𑀫𑀸𑀤𑀺𑀓𑀸 𑀧𑀤𑀪𑀸𑀚𑀦𑁂 𑀲𑀦𑁆𑀤𑀺𑀲𑁆𑀲𑀫𑀸𑀦𑀸𑀧𑀢𑁆𑀢𑀺 𑀧𑀤𑀪𑀸𑀚𑀦𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀦 𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸 𑀓𑀼𑀝𑀺 𑀓𑀸𑀢𑀩𑁆𑀩𑀸, 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺 (𑀧𑀸𑀭𑀸. 𑁮𑁫) 𑀅𑀦𑁆𑀢𑀭𑀸𑀧𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀸𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑁂𑀦 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁭𑁭) 𑀏𑀯𑀫𑀸𑀤𑀺 𑀯𑀺𑀦𑀻𑀢𑀯𑀢𑁆𑀣𑀼𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀲𑀗𑁆𑀖𑀪𑁂𑀤𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁧𑁫) 𑀏𑀯𑀫𑀸𑀤𑀺 𑀧𑀝𑀺𑀓𑁆𑀔𑁂𑀧𑀲𑀺𑀓𑁆𑀔𑀸𑀧𑀤𑀁 𑀦𑀸𑀫.

𑀬𑀲𑁆𑀫𑀸 𑀧𑀦 𑀢𑁂𑀦 𑀢𑁂𑀦 𑀧𑀝𑀺𑀓𑁆𑀔𑁂𑀧𑁂𑀦 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀫𑀕𑁆𑀕𑀁 𑀲𑀗𑁆𑀖𑀁 𑀅𑀥𑀫𑁆𑀫𑀲𑀜𑁆𑀜𑀻 𑀪𑀺𑀦𑁆𑀤𑁂𑀬𑁆𑀬, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄. 𑀬𑁄 𑀧𑀦 𑀪𑀺𑀓𑁆𑀔𑀼 𑀤𑀼𑀝𑁆𑀞𑀘𑀺𑀢𑁆𑀢𑁄 𑀪𑀕𑀯𑀢𑁄 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀬𑀸𑀦𑀺 𑀲𑀦𑁆𑀥𑀸𑀬 ‘‘𑀏𑀓𑀲𑁆𑀲 𑀙𑁂𑀚𑁆𑀚𑀓𑀸 𑀳𑁄𑀢𑀺, 𑀘𑀢𑀼𑀦𑁆𑀦𑀁 𑀣𑀼𑀮𑁆𑀮𑀘𑁆𑀘𑀬𑀁, 𑀘𑀢𑀼𑀦𑁆𑀦𑀜𑁆𑀘𑁂𑀯 𑀅𑀦𑀸𑀧𑀢𑁆𑀢𑀺, 𑀲𑀩𑁆𑀩𑁂𑀲𑀁 𑀏𑀓𑀯𑀢𑁆𑀣𑀼𑀓𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀣𑀸𑀧𑀢𑁆𑀢𑀺 𑀢𑀺𑀝𑁆𑀞𑀦𑁆𑀢𑁂 𑀪𑀕𑀯𑀢𑀺 𑀆𑀧𑀚𑁆𑀚𑀢𑀺, 𑀦𑁄 𑀧𑀭𑀺𑀦𑀺𑀩𑁆𑀩𑀼𑀢𑁂’’𑀢𑀺 (𑀧𑀭𑀺. 𑁩𑁨𑁩) 𑀘 𑀯𑀼𑀢𑁆𑀢𑀁. 𑀢𑁂𑀦 𑀦 𑀓𑁂𑀯𑀮𑀁 ‘‘𑀦, 𑀪𑀺𑀓𑁆𑀔𑀯𑁂, 𑀚𑀸𑀦𑀁 𑀲𑀗𑁆𑀖𑀪𑁂𑀤𑀓𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄…𑀧𑁂… 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀤𑀫𑁂𑀯 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺 𑀲𑀸𑀥𑀓𑀁 𑀳𑁄𑀢𑀺. ‘‘𑀧𑀡𑁆𑀟𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁦𑁯) 𑀏𑀯𑀫𑀸𑀤𑀻𑀲𑀼 𑀧𑀦 𑀉𑀧𑀚𑁆𑀛𑀸𑀬𑀸𑀤𑀻𑀦𑀁 𑀤𑀼𑀓𑁆𑀓𑀝𑀫𑁂𑀯 𑀧𑀜𑁆𑀜𑀢𑁆𑀢𑀁, 𑀦 𑀧𑀡𑁆𑀟𑀓𑀸𑀤𑀻𑀦𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀦 𑀳𑀺 𑀢𑁂𑀲𑀁 𑀪𑀺𑀓𑁆𑀔𑀼𑀪𑀸𑀯𑁄 𑀅𑀢𑁆𑀣𑀺. 𑀬𑀢𑁄 𑀲𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀢𑀣𑀸 ‘‘𑀦 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁬𑁬, 𑁬𑁭, 𑁭𑁮, 𑁭𑁯) 𑀏𑀯𑀫𑀸𑀤𑀺𑀓𑀜𑁆𑀘 𑀧𑀝𑀺𑀓𑁆𑀔𑁂𑀧𑀲𑀺𑀓𑁆𑀔𑀸𑀧𑀤𑀫𑁂𑀯 𑀦𑀸𑀫.

𑀔𑀦𑁆𑀥𑀓𑁂𑀲𑀼 𑀧𑀜𑁆𑀜𑀢𑁆𑀢𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀦𑀺 𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀢𑁂𑀦 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀪𑁂𑀤𑀸𑀦𑀼𑀯𑀢𑁆𑀢𑀓𑁂 𑀣𑀼𑀮𑁆𑀮𑀘𑁆𑀘𑀬𑀁 𑀤𑁂𑀲𑀸𑀧𑁂𑀳𑀻’’𑀢𑀺 (𑀘𑀽𑀴𑀯. 𑁩𑁪𑁫) 𑀯𑀼𑀢𑁆𑀢𑀁, 𑀣𑀼𑀮𑁆𑀮𑀘𑁆𑀘𑀬𑀫𑁆𑀧𑀺 𑀢𑀢𑁆𑀣𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. 𑀇𑀤𑀁 𑀢𑁂𑀲𑀁 𑀯𑀺𑀪𑀢𑁆𑀢𑀺𑀓𑀫𑁆𑀫𑀓𑁆𑀔𑀡𑁂 𑀅𑀧𑀜𑁆𑀜𑀢𑁆𑀢𑀢𑁆𑀢𑀸 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀪𑀕𑀯𑀢𑁄 𑀯𑀘𑀦𑁂𑀦 𑀯𑀺𑀲𑀼𑀤𑁆𑀥𑀓𑁆𑀔𑀡𑁂𑀧𑀺 𑀯𑀺𑀚𑁆𑀚𑀫𑀸𑀦𑀁 𑀚𑀸𑀢𑀦𑁆𑀢𑀺 𑀏𑀓𑁂. ‘‘𑀪𑁂𑀤𑀸𑀦𑀼𑀯𑀢𑁆𑀢𑀓𑁂 𑀤𑁂𑀲𑀸𑀧𑁂𑀳𑀻’’𑀢𑀺 𑀯𑀘𑀦𑀢𑁄 𑀲𑁂𑀲𑀪𑁂𑀤𑀸𑀦𑀼𑀯𑀢𑁆𑀢𑀓𑀸𑀦𑀁 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀚𑀸𑀦𑀁 𑀲𑀗𑁆𑀖𑀪𑁂𑀤𑀓𑀸𑀦𑀁 𑀅𑀦𑀼𑀯𑀢𑁆𑀢𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀲𑀩𑁆𑀩𑀸𑀦𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺, 𑀯𑀺𑀦𑀬𑀓𑀫𑁆𑀫𑀸𑀦𑀺 𑀘 𑀢𑀢𑁆𑀣𑁂𑀯 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀬𑀣𑀸𑀳 ‘‘𑀧𑀜𑁆𑀜𑀢𑁆𑀢𑁂 𑀢𑀁 𑀉𑀧𑀸𑀮𑀺 𑀫𑀬𑀸 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑀼𑀓𑀯𑀢𑁆𑀢𑀁…𑀧𑁂… 𑀏𑀯𑀁 𑀲𑀼𑀧𑀜𑁆𑀜𑀢𑁆𑀢𑁂 𑀔𑁄 𑀫𑀬𑀸 𑀉𑀧𑀸𑀮𑀺 𑀲𑀺𑀓𑁆𑀔𑀸𑀧𑀤𑁂’’𑀢𑀺𑀆𑀤𑀺. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸 𑀯𑀸𑀤𑀺𑀢𑀁 𑀯𑀸 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁮𑁩𑁪) 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀻 𑀦𑀘𑁆𑀘𑁂𑀬𑁆𑀬 𑀯𑀸 𑀕𑀸𑀬𑁂𑀬𑁆𑀬 𑀯𑀸 𑀯𑀸𑀤𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺 𑀅𑀝𑁆𑀞𑀓𑀣𑀸𑀬 𑀤𑀺𑀲𑁆𑀲𑀫𑀸𑀦𑀁 𑀆𑀧𑀢𑁆𑀢𑀺𑀚𑀸𑀢𑀁 𑀯𑀺𑀦𑀬𑀓𑀫𑁆𑀫𑀁 𑀯𑀸 𑀅𑀯𑀼𑀢𑁆𑀢𑀲𑀺𑀤𑁆𑀥𑀺𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. 𑀙𑀩𑁆𑀩𑀺𑀥𑀫𑁆𑀧𑁂𑀢𑀁 𑀙𑀳𑀺 𑀆𑀓𑀸𑀭𑁂𑀳𑀺 𑀉𑀤𑁆𑀤𑁂𑀲𑀸𑀭𑀳𑀁 𑀦 𑀳𑁄𑀢𑀻𑀢𑀺 𑀅𑀦𑀼𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀜𑁆𑀘𑀳𑀺 𑀉𑀤𑁆𑀤𑁂𑀲𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀲𑀪𑀸𑀕𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀤𑀼𑀩𑁆𑀪𑀸𑀲𑀺𑀢𑀸𑀦𑀁 𑀲𑀪𑀸𑀕𑀯𑀢𑁆𑀣𑀼𑀓𑀫𑁆𑀧𑀺 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀤𑁆𑀯𑀬𑀁 𑀅𑀲𑀪𑀸𑀕𑀸𑀧𑀢𑁆𑀢𑀺𑀓𑀢𑁆𑀢𑀸 𑀅𑀦𑁆𑀢𑀭𑀸𑀧𑀢𑁆𑀢𑀺𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀸𑀦𑀁, 𑀦𑀸𑀦𑀸𑀯𑀢𑁆𑀣𑀼𑀓𑀸𑀧𑀢𑁆𑀢𑀺𑀓𑀢𑁆𑀢𑀸 𑀧𑀝𑀺𑀓𑁆𑀔𑁂𑀧𑀲𑀺𑀓𑁆𑀔𑀸𑀧𑀤𑀸𑀦𑀁, 𑀓𑁂𑀲𑀜𑁆𑀘𑀺 𑀯𑀺𑀦𑀻𑀢𑀯𑀢𑁆𑀣𑀼𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀸𑀦𑀜𑁆𑀘 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀢𑁆𑀢𑀸, 𑀅𑀤𑀲𑁆𑀲𑀺𑀢𑀯𑀢𑁆𑀣𑀼𑀓𑀢𑁆𑀢𑀸 𑀪𑁂𑀤𑀸𑀦𑀼𑀯𑀢𑁆𑀢𑀓𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀯𑀢𑁆𑀣𑀼𑀓𑀢𑁆𑀢𑀸 𑀅𑀯𑀼𑀢𑁆𑀢𑀲𑀺𑀤𑁆𑀥𑀺𑀲𑀺𑀓𑁆𑀔𑀸𑀧𑀤𑀸𑀦𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 ‘‘𑀤𑀼𑀯𑀺𑀥𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀲𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀪𑁂𑀤𑀢𑁄’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀫𑀸𑀲𑀢𑁄 𑀧𑀓𑀸𑀲𑀺𑀢𑀁 𑀳𑁄𑀢𑀺.

𑀧𑀜𑁆𑀜𑀢𑁆𑀢𑀺𑀬𑀁 𑀢𑀸𑀯 𑁋

‘‘𑀓𑀸𑀭𑀓𑁄 𑀇𑀥 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀧𑁂𑀓𑁆𑀔𑀸𑀬 𑀅𑀪𑀸𑀯𑀢𑁄;

𑀧𑀼𑀩𑁆𑀩𑁂 𑀯𑀢𑁆𑀢𑀩𑁆𑀩𑀯𑀺𑀥𑀸𑀦𑀸-𑀪𑀸𑀯𑀢𑁄 𑀘 𑀆𑀤𑀺𑀢𑁄 𑀬𑁄𑀧𑀦𑁂𑀦 𑀲𑀳𑀸’’𑀢𑀺. 𑁋

𑀅𑀬𑀁 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲𑀢𑁆𑀣𑁄 𑁋 𑀬𑁂 𑀢𑁂 𑀅𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀪𑁂𑀤𑀸 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀆𑀤𑀬𑁄 𑀲𑀺𑀓𑁆𑀔𑀸𑀧𑀤𑀯𑀺𑀲𑁂𑀲𑀸, 𑀢𑁂𑀲𑀼 𑀅𑀥𑀺𑀧𑁆𑀧𑀸𑀬𑀓𑀫𑁆𑀫𑀯𑀢𑁆𑀣𑀼𑀧𑀼𑀕𑁆𑀕𑀮𑀧𑀬𑁄𑀕𑁂 𑀅𑀧𑁂𑀓𑁆𑀔𑀸𑀬 𑀪𑀸𑀯𑀢𑁄 𑀓𑀸𑀭𑀓𑁄 𑀦 𑀦𑀺𑀤𑁆𑀤𑀺𑀝𑁆𑀞𑁄 𑀢𑁂𑀲𑀁 𑀲𑀸𑀧𑁂𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀁 𑀲𑀩𑁆𑀩𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀆𑀯𑀺𑀪𑀯𑀺𑀲𑁆𑀲𑀢𑀺, 𑀇𑀥 𑀧𑀦 𑀧𑀸𑀭𑀸𑀚𑀺𑀓𑀧𑀜𑁆𑀜𑀢𑁆𑀢𑀺𑀬𑀁 𑀅𑀧𑁂𑀓𑁆𑀔𑀸𑀬 𑀅𑀪𑀸𑀯𑀢𑁄 𑀓𑀸𑀭𑀓𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀬𑁄 𑀧𑀦 𑀓𑀸𑀭𑀓𑁄 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁪𑁬𑁨, 𑁪𑁭𑁨, 𑁪𑁭𑁫) 𑀯𑀺𑀬 𑀧𑀼𑀩𑁆𑀩𑁂 𑀯𑀢𑁆𑀢𑀩𑁆𑀩𑀯𑀺𑀥𑀸𑀦𑀸𑀪𑀸𑀯𑀢𑁄 𑀓𑀭𑀡𑀸𑀤𑀺𑀯𑀲𑁂𑀦 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀧𑀘𑁆𑀘𑀢𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑁄 𑀅𑀧𑁂𑀓𑁆𑀔𑀸𑀬 𑀅𑀪𑀸𑀯𑀢𑁄. 𑀢𑀢𑁆𑀣 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄 𑀲𑁂𑀲𑀤𑀼𑀢𑀺𑀬𑀸𑀦𑀺𑀬𑀢𑀧𑀡𑀻𑀢𑀪𑁄𑀚𑀦𑀁 𑀲𑀫𑀡𑀼𑀤𑁆𑀤𑁂𑀲𑀢𑀢𑀺𑀬𑀘𑀢𑀉𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑁂𑀲𑀼 𑀯𑀺𑀬 𑀫𑀚𑁆𑀛𑁂 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 ‘‘𑀦 𑀳𑁂𑀯 𑀔𑁄 𑀧𑀦…𑀧𑁂… 𑀑𑀪𑀸𑀲𑀺𑀢𑀼’’𑀦𑁆𑀢𑀺𑀆𑀤𑀺 (𑀧𑀸𑀭𑀸. 𑁪𑁫𑁩) 𑀯𑀺𑀬 𑀧𑀼𑀩𑁆𑀩𑁂 𑀯𑀢𑁆𑀢𑀩𑁆𑀩𑀯𑀺𑀥𑀸𑀦𑀸𑀪𑀸𑀯𑀢𑁄 𑀏𑀯 𑀆𑀤𑀺𑀫𑁆𑀳𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀆𑀤𑀺𑀫𑁆𑀳𑀺 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼 𑀪𑁂𑀤𑀸𑀦𑀼𑀯𑀢𑁆𑀢𑀓𑀸𑀤𑀻𑀲𑀼 𑀧𑀜𑁆𑀘𑀢𑁆𑀢𑀺𑀁𑀲𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀯𑀺𑀬 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀧𑀼𑀩𑁆𑀩𑁂 𑀯𑀢𑁆𑀢𑀩𑁆𑀩𑀯𑀺𑀥𑀸𑀦𑀸𑀪𑀸𑀯𑀢𑁄 𑀏𑀯 ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀢𑁄𑀯 𑀬𑁄𑀧𑀦-𑀲𑀤𑁆𑀤𑁂𑀦 𑀲𑀳 𑀦𑀺𑀤𑁆𑀤𑀺𑀝𑁆𑀞𑁄. 𑀏𑀯𑀁 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄𑀧𑀺 𑀲𑁄 𑀬𑀲𑁆𑀫𑀸 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀏𑀓𑀫𑀜𑁆𑀘𑁂 𑀢𑀼𑀯𑀝𑁆𑀝𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺 (𑀧𑀸𑀘𑀺. 𑁯𑁩𑁩) 𑀆𑀧𑀢𑁆𑀢𑀺 𑀯𑀺𑀬 𑀧𑀭𑀧𑁆𑀧𑀪𑀯𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺 𑀏𑀓𑀯𑀘𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑁄. 𑀫𑁂𑀣𑀼𑀦𑀥𑀫𑁆𑀫𑀸𑀧𑀢𑁆𑀢𑀺𑀧𑀺 𑀧𑀭𑀧𑁆𑀧𑀪𑀯𑀸 ‘‘𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁩𑁯) 𑀯𑀘𑀦𑀢𑁄𑀢𑀺 𑀘𑁂? 𑀢𑀁 𑀦, 𑀅𑀥𑀺𑀧𑁆𑀧𑀸𑀬𑀚𑀸𑀦𑀦𑀢𑁄. 𑀅𑀦𑁂𑀓𑀺𑀲𑁆𑀲𑀸 𑀏𑀯 𑀪𑀺𑀓𑁆𑀔𑀼𑀦𑀺𑀬𑀸 𑀆𑀧𑀢𑁆𑀢𑀺, 𑀦 𑀏𑀓𑀺𑀲𑁆𑀲𑀸𑀢𑀺 𑀦𑀺𑀬𑀫𑁄 𑀢𑀢𑁆𑀣 𑀅𑀢𑁆𑀣𑀺, 𑀦 𑀏𑀯𑀁 𑀇𑀥 𑀦𑀺𑀬𑀫𑁄𑀢𑀺 𑀅𑀦𑀺𑀬𑀫𑀺𑀢𑀸𑀥𑀺𑀧𑁆𑀧𑀸𑀬𑁄. 𑀮𑀫𑁆𑀩𑀻𑀫𑀼𑀤𑀼𑀧𑀺𑀝𑁆𑀞𑀻𑀦𑀁 𑀓𑀼𑀢𑁄 ‘‘𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁫𑁫) 𑀯𑀘𑀦𑀢𑁄 𑀢𑁂𑀲𑀁 𑀫𑁂𑀣𑀼𑀦𑀥𑀫𑁆𑀫𑀸𑀧𑀢𑁆𑀢𑀺. 𑀅𑀬𑀫𑀢𑁆𑀣𑁄 𑀘𑀢𑀲𑁆𑀲𑁄 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸𑀢𑀺 𑀅𑀝𑁆𑀞𑀯𑀢𑁆𑀣𑀼𑀓𑀁 𑀲𑀦𑁆𑀥𑀸𑀬 ‘‘𑀙𑁂𑀚𑁆𑀚𑀁 𑀲𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸’’𑀢𑀺 (𑀧𑀭𑀺. 𑁪𑁮𑁧) 𑀘 𑀧𑀭𑀺𑀯𑀸𑀭𑁂 𑀯𑀼𑀢𑁆𑀢𑀯𑀘𑀦𑁂𑀦 𑀲𑀸𑀥𑁂𑀢𑀩𑁆𑀩𑁄.

𑀪𑁂𑀤𑀸𑀦𑀼𑀯𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑁂 𑀢𑀺𑀡𑁆𑀡𑀁 𑀉𑀤𑁆𑀥𑀁 𑀦 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸, 𑀦 𑀲𑀗𑁆𑀖𑁂𑀦 𑀲𑀗𑁆𑀖𑀁 𑀏𑀓𑀢𑁄 𑀓𑀸𑀢𑀩𑁆𑀩𑀦𑁆𑀢𑀺. 𑀦𑀬𑀤𑀲𑁆𑀲𑀦𑀢𑁆𑀣𑀁 𑀆𑀤𑀺𑀢𑁄𑀯 ‘‘𑀪𑀺𑀓𑁆𑀔𑀽 𑀳𑁄𑀦𑁆𑀢𑀻’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀁 𑀓𑀢𑁆𑀯𑀸 𑀧𑀼𑀦 ‘‘𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸’’𑀢𑀺 (𑀧𑀸𑀭𑀸. 𑁪𑁧𑁮) 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀦 𑀢𑀢𑁄 𑀉𑀤𑁆𑀥𑀁 ‘‘𑀅𑀦𑀼𑀯𑀢𑁆𑀢𑀓𑀸 𑀳𑁄𑀦𑁆𑀢𑀻’’𑀢𑀺 𑀆𑀧𑀚𑁆𑀚𑀢𑀺. 𑀢𑀢𑁄 𑀦𑀺𑀤𑀸𑀦𑀯𑀺𑀭𑁄𑀥𑁄. 𑀧𑀜𑁆𑀘𑀲𑀢𑀫𑀢𑁆𑀢𑀸 𑀳𑀺 𑀢𑀤𑀦𑀼𑀯𑀢𑁆𑀢𑀓𑀸 𑀅𑀳𑁂𑀲𑀼𑀁. 𑀬𑀁 𑀧𑀦 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 ‘‘𑀲𑀗𑁆𑀖𑁄 𑀘𑀢𑁆𑀢𑀸𑀭𑁄 𑀧𑀸𑀘𑀻𑀦𑀓𑁂 𑀪𑀺𑀓𑁆𑀔𑀽, 𑀘𑀢𑁆𑀢𑀸𑀭𑁄 𑀧𑀸𑀯𑁂𑀬𑁆𑀬𑀓𑁂 𑀪𑀺𑀓𑁆𑀔𑀽 𑀲𑀫𑁆𑀫𑀦𑁆𑀦𑁂𑀬𑁆𑀬 …𑀧𑁂… 𑀲𑀫𑁆𑀫𑀢𑀸’’𑀢𑀺𑀆𑀤𑀺 (𑀘𑀽𑀴𑀯. 𑁪𑁫𑁬) 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀯𑀼𑀢𑁆𑀢𑀁, 𑀢𑀁 ‘‘𑀉𑀩𑁆𑀩𑀸𑀳𑀺𑀓𑀸𑀬 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑁂𑀳𑀺 𑀓𑀢𑁆𑀢𑀩𑁆𑀩𑀯𑀺𑀥𑀸𑀦𑀁. 𑀲𑀫𑁆𑀫𑀼𑀢𑀺𑀓𑀭𑀡𑀫𑁂𑀯 𑀯𑀸 𑀢𑀢𑀺𑀬𑀁 𑀓𑀢𑁆𑀯𑀸 𑀓𑀧𑁆𑀧𑀢𑀺. 𑀦 𑀳𑀺 𑀢𑁂 𑀢𑁂𑀦 𑀓𑀫𑁆𑀫𑁂𑀦 𑀓𑀫𑁆𑀫𑀸𑀭𑀳𑀸 𑀓𑀫𑁆𑀫𑀓𑀢𑀸 𑀳𑁄𑀦𑁆𑀢𑀺. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑁄 𑀓𑀫𑁆𑀫𑀸𑀭𑀳𑁄𑀢𑀺 𑀮𑀓𑁆𑀔𑀡𑀁. 𑀦 𑀘 𑀢𑀤𑀸 𑀲𑀗𑁆𑀖𑁄 𑀢𑁂𑀲𑀁 𑀅𑀝𑁆𑀞𑀦𑁆𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀁 𑀅𑀓𑀸𑀲𑀺. 𑀪𑀚𑀸𑀧𑀺𑀬𑀫𑀸𑀦𑀸 𑀢𑁂 𑀓𑀫𑁆𑀫𑀧𑀢𑁆𑀢𑀪𑀸𑀯𑀁 𑀪𑀚𑀦𑁆𑀢𑀺. 𑀅𑀥𑀺𑀓𑀭𑀡𑀯𑀽𑀧𑀲𑀫𑀓𑀫𑁆𑀫𑀲𑁆𑀲 𑀧𑀢𑁆𑀢𑀸 𑀬𑀼𑀢𑁆𑀢𑀸 𑀲𑀗𑁆𑀖𑁂𑀦 𑀓𑀢𑀸𑀢𑀺 𑀓𑀢𑁆𑀯𑀸 𑀓𑀫𑁆𑀫𑀧𑀢𑁆𑀢𑀸 𑀏𑀯 𑀳𑀺 𑀢𑁂 𑀳𑁄𑀦𑁆𑀢𑀺. ‘‘𑀢𑁂 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬𑀸’’𑀢𑀺 (𑀧𑀸𑀭𑀸. 𑁪𑁧𑁮) 𑀯𑀘𑀦𑀢𑁄 𑀢𑁂𑀳𑀺 𑀓𑀢𑁆𑀢𑀩𑁆𑀩𑀯𑀺𑀥𑀸𑀦𑀁. 𑀲𑀫𑁆𑀫𑀼𑀢𑀺𑀓𑀭𑀡𑀫𑁂𑀯 𑀓𑀫𑁆𑀫𑀁 𑀳𑁄𑀢𑀻𑀢𑀺 𑀘𑁂? 𑀢𑀁 𑀦, 𑀅𑀥𑀺𑀧𑁆𑀧𑀸𑀬𑀚𑀸𑀦𑀦𑀢𑁄, 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀏𑀯 𑀢𑁂 𑀪𑀺𑀓𑁆𑀔𑀽 𑀓𑀫𑁆𑀫𑀸𑀭𑀳𑀸 𑀓𑀸𑀢𑀩𑁆𑀩𑀸, 𑀦 𑀤𑁄𑀲𑀸𑀕𑀢𑀺𑀯𑀲𑁂𑀦𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀧𑀸𑀘𑀻𑀦𑀓𑀸𑀤𑀻𑀦𑀁 𑀲𑀫𑁆𑀫𑀼𑀢𑀺𑀬𑀸 𑀅𑀥𑀺𑀓𑀭𑀡𑀯𑀽𑀧𑀲𑀫𑀲𑀺𑀤𑁆𑀥𑀺 𑀯𑀺𑀬 𑀢𑁂𑀲𑀁 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂𑀦 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀲𑀺𑀤𑁆𑀥𑀺 𑀳𑁄𑀢𑀺, 𑀲𑀫𑁆𑀫𑀼𑀢𑀺 𑀦𑀸𑀫𑁂𑀲𑀸 𑀧𑀞𑀫𑀁 𑀅𑀦𑀼𑀫𑀢𑀺𑀁 𑀕𑀳𑁂𑀢𑁆𑀯𑀸 𑀬𑀸𑀘𑀺𑀢𑁆𑀯𑀸𑀯 𑀓𑀭𑀻𑀬𑀢𑀺, 𑀦 𑀢𑀣𑀸 𑀓𑀫𑁆𑀫𑀦𑁆𑀢𑀺. 𑀓𑀫𑁆𑀫𑀓𑀭𑀡𑁂 𑀧𑀦 𑀢𑀤𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀺𑀬𑁂𑀯. 𑀧𑀭𑀲𑀫𑁆𑀫𑀼𑀢𑀺𑀬𑀸 𑀩𑀳𑀼𑀢𑀭𑀸𑀯 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺 𑀏𑀯𑀁 𑀩𑀸𑀳𑀼𑀮𑁆𑀮𑀦𑀬𑁂𑀦 𑀮𑀤𑁆𑀥𑀦𑀸𑀫𑀓𑀁 𑀲𑀓𑀧𑀬𑁄𑀕𑁂𑀦 𑀯𑀸 𑀧𑀭𑀧𑀬𑁄𑀕𑁂𑀦 𑀯𑀸 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀲𑁆𑀲 𑀲𑀓𑀫𑀕𑁆𑀕𑁂 𑀯𑀸 𑀧𑀭𑀫𑀕𑁆𑀕𑁂 𑀯𑀸 𑀧𑀭𑀦𑀺𑀫𑀺𑀢𑁆𑀢𑀲𑁆𑀲 𑀯𑀸 𑀲𑀓𑀫𑀕𑁆𑀕𑁂 𑀏𑀯 𑀧𑀯𑁂𑀲𑀦𑀧𑀯𑀺𑀝𑁆𑀞𑀝𑁆𑀞𑀺𑀢𑀉𑀤𑁆𑀥𑀭𑀡𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀏𑀓𑀁 𑀧𑀝𑀺𑀲𑀸𑀤𑀺𑀬𑀦𑀯𑀲𑁂𑀦 𑀲𑁂𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄𑀢𑀺. 𑀓𑁂𑀘𑀺 𑀧𑀦 ‘‘𑀧𑀯𑁂𑀲𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀯𑀸 𑀢𑀻𑀡𑀺 𑀯𑀸 𑀤𑁆𑀯𑁂 𑀯𑀸 𑀏𑀓𑀁 𑀯𑀸 𑀧𑀝𑀺𑀲𑁂𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’𑀢𑀺𑀆𑀤𑀻’’𑀢𑀺 (𑀧𑀸𑀭𑀸. 𑁫𑁮) 𑀯𑀤𑀦𑁆𑀢𑀺. 𑀢𑁂𑀲𑀁 𑀫𑀢𑁂𑀦 𑀘𑀢𑀽𑀲𑀼𑀧𑀺 𑀘𑀢𑀲𑁆𑀲𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀢𑁂𑀬𑁂𑀯 𑀏𑀯𑀁 𑀯𑀤𑀦𑁆𑀢𑀺 𑁋 𑀆𑀧𑀚𑁆𑀚𑀢𑀼 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺, 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀢𑀁𑀪𑀸𑀕𑀺𑀬𑀸𑀢𑀺 𑀅𑀢𑁆𑀢𑀦𑁄 𑀯𑀻𑀢𑀺𑀓𑁆𑀓𑀫𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁄, 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀜𑁆𑀘 𑀆𑀧𑀚𑁆𑀚𑀺𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀕𑀳𑀝𑁆𑀞𑀓𑀸𑀮𑁂 𑀫𑁂𑀣𑀼𑀦𑀸𑀤𑀺𑀓𑀁 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀏𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀏𑀓𑀫𑀦𑁂𑀓𑀁 𑀯𑀸 𑀧𑀝𑀺𑀓𑀭𑀺𑀢𑁆𑀯𑀸𑀯 𑀲𑁄 𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 𑀦𑀺𑀭𑀸𑀧𑀢𑁆𑀢𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀕𑀳𑀝𑁆𑀞𑀓𑀸𑀮𑁂 𑀲𑀸𑀧𑀢𑁆𑀢𑀺𑀓𑁄𑀯𑀸𑀢𑀺. 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀲𑁆𑀲𑀸𑀧𑀺 𑀅𑀢𑁆𑀣𑁂𑀯 𑀆𑀧𑀢𑁆𑀢𑀺. 𑀯𑀼𑀝𑁆𑀞𑀸𑀦𑀤𑁂𑀲𑀦𑀸𑀳𑀺 𑀧𑀦 𑀅𑀲𑀼𑀚𑁆𑀛𑀦𑀢𑁄 ‘‘𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀦 𑀯𑀼𑀢𑁆𑀢𑀁. 𑀕𑀡𑀦𑀧𑀬𑁄𑀚𑀦𑀸𑀪𑀸𑀯𑀢𑁄 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀁, 𑀅𑀣 𑀔𑁄 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁫𑁮) ‘‘𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀯𑀘𑀦𑁂𑀦𑀸𑀬𑀫𑀢𑁆𑀣𑁄 𑀲𑀺𑀤𑁆𑀥𑁄𑀢𑀺 𑀬𑀼𑀢𑁆𑀢𑀺𑀜𑁆𑀘 𑀯𑀤𑀦𑁆𑀢𑀺.

𑀬𑀤𑀺 𑀏𑀯𑀁 𑀫𑀸𑀢𑀺𑀓𑀸𑀬𑀫𑁆𑀧𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓𑀲𑁆𑀲 𑀅𑀦𑀯𑀲𑁂𑀲𑀯𑀘𑀦𑀫𑁆𑀧𑀺 𑀦 𑀬𑀼𑀚𑁆𑀚𑁂𑀬𑁆𑀬. 𑀲𑀩𑁆𑀩𑁂𑀧𑀺 𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂, 𑀪𑀺𑀓𑁆𑀔𑀼𑀕𑀡𑀦𑀜𑁆𑀘 𑀅𑀦𑀯𑀲𑁂𑀲𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀅𑀦𑀯𑀲𑁂𑀲𑀯𑀘𑀦𑀦𑁆𑀢𑀺 𑀓𑀢𑁆𑀯𑀸 𑀧𑀯𑁂𑀲𑁂𑀯 𑀆𑀧𑀢𑁆𑀢𑀺, 𑀦 𑀧𑀯𑀺𑀝𑁆𑀞𑀸𑀤𑀻𑀲𑀼. 𑀢𑀫𑁂𑀯𑁂𑀓𑀁 𑀲𑀦𑁆𑀥𑀸𑀬 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑁧𑁩𑁪) 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀫𑁆𑀧𑀺 𑀅𑀦𑁆𑀢𑁄 𑀓𑀢𑁆𑀯𑀸 𑀦𑀺𑀤𑀸𑀦𑀼𑀤𑁆𑀤𑁂𑀲𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀫𑀸𑀢𑀺𑀓𑀸𑀬𑀁 ‘‘𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁪𑁨, 𑁪𑁪) 𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀯𑀘𑀦𑀁 𑀢𑁂𑀦 𑀲𑀭𑀻𑀭𑀩𑀦𑁆𑀥𑀦𑁂𑀦 𑀉𑀧𑀲𑀫𑁆𑀧𑀤𑀸𑀬 𑀅𑀪𑀩𑁆𑀩𑀪𑀸𑀯𑀤𑀻𑀧𑀦𑀢𑁆𑀣𑀁. ‘‘𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀧𑀤𑀪𑀸𑀚𑀦𑁂 𑀯𑀘𑀦𑀁 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀲𑁆𑀲 𑀅𑀲𑀁𑀯𑀸𑀲𑀲𑁆𑀲 𑀲𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀣𑁂𑀬𑁆𑀬𑀲𑀁𑀯𑀸𑀲𑀓𑀪𑀸𑀯𑀤𑀻𑀧𑀦𑀢𑁆𑀣𑀁. 𑀦 𑀳𑀺 𑀲𑁄 𑀲𑀁𑀯𑀸𑀲𑀁 𑀲𑀸𑀤𑀺𑀬𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀉𑀧𑀲𑀫𑁆𑀧𑀦𑁆𑀦𑁄 ‘‘𑀪𑀺𑀓𑁆𑀔𑀽’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀲𑀼𑀤𑁆𑀥𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀢𑀜𑁆𑀘𑁂 𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀅𑀦𑁄𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄 𑀯𑀤𑀢𑀺, 𑀆𑀧𑀢𑁆𑀢𑀺 𑀑𑀫𑀲𑀯𑀸𑀤𑁂𑀦 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁮𑁯) 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀢𑀤𑀪𑀸𑀯𑀢𑁄 𑀲𑀺𑀤𑁆𑀥𑁄 𑀲𑁄 𑀉𑀧𑀲𑀫𑁆𑀧𑀦𑁆𑀦𑁄 ‘‘𑀪𑀺𑀓𑁆𑀔𑀽’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺, 𑀢𑁂𑀦 𑀧𑀤𑀲𑁄𑀥𑀫𑁆𑀫𑀁, 𑀲𑀳𑀲𑁂𑀬𑁆𑀬𑀜𑁆𑀘 𑀚𑀦𑁂𑀢𑀺, 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑀸𑀤𑀺𑀜𑁆𑀘 𑀚𑀦𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁩𑁯).

𑀦𑀺𑀤𑀸𑀦𑀸 𑀫𑀸𑀢𑀺𑀓𑀸𑀪𑁂𑀤𑁄, 𑀯𑀺𑀪𑀗𑁆𑀕𑁄 𑀢𑀦𑁆𑀦𑀺𑀬𑀸𑀫𑀓𑁄;

𑀢𑀢𑁄 𑀆𑀧𑀢𑁆𑀢𑀺𑀬𑀸 𑀪𑁂𑀤𑁄, 𑀅𑀦𑀸𑀧𑀢𑁆𑀢𑀺 𑀢𑀤𑀜𑁆𑀜𑀣𑀸𑀢𑀺. (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁪𑁩-𑁪𑁪) 𑁋

𑀅𑀬𑀁 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀼𑀤𑀺𑀦𑁆𑀦𑀯𑀢𑁆𑀣𑀼 (𑀧𑀸𑀭𑀸. 𑁨𑁪 𑀆𑀤𑀬𑁄)-𑀫𑀓𑁆𑀓𑀝𑀺𑀯𑀢𑁆𑀣𑀼 (𑀧𑀸𑀭𑀸. 𑁪𑁦 𑀆𑀤𑀬𑁄)-𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼 (𑀧𑀸𑀭𑀸. 𑁪𑁩) 𑀘𑀸𑀢𑀺 𑀢𑀺𑀧𑁆𑀧𑀪𑁂𑀤𑀯𑀢𑁆𑀣𑀼 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀦𑀺𑀤𑀸𑀦𑀁 𑀦𑀸𑀫. 𑀢𑀢𑁄 𑀦𑀺𑀤𑀸𑀦𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁…𑀧𑁂… 𑀅𑀲𑀁𑀯𑀸𑀲𑁄’’𑀢𑀺 (𑀧𑀸𑀭𑀸. 𑁪𑁪) 𑀇𑀫𑀺𑀲𑁆𑀲𑀸 𑀫𑀸𑀢𑀺𑀓𑀸𑀬 𑀪𑁂𑀤𑁄 𑀚𑀸𑀢𑁄. 𑀢𑀢𑁆𑀣 𑀳𑀺 ‘‘𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀸’’𑀢𑀺 (𑀧𑀸𑀭𑀸. 𑁪𑁪) 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 ‘‘𑀲𑀘𑁆𑀘𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀜𑁆𑀘 𑀔𑁄 𑀇𑀢𑁆𑀣𑀺𑀬𑀸, 𑀦𑁄 𑀧𑀼𑀭𑀺𑀲𑁂, 𑀦𑁄 𑀧𑀡𑁆𑀟𑀓𑁂, 𑀦𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁂 𑀘𑀸’’𑀢𑀺 𑀫𑀓𑁆𑀓𑀝𑀺𑀧𑀸𑀭𑀸𑀚𑀺𑀓𑁄 𑀯𑀺𑀬 𑀅𑀜𑁆𑀜𑁄𑀧𑀺 𑀮𑁂𑀲𑀁 𑀑𑀟𑁆𑀟𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀲𑁆𑀲 𑀅𑀮𑁂𑀲𑁄𑀓𑀸𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀇𑀤𑀁 𑀯𑀼𑀘𑁆𑀘𑀢𑀺, 𑀫𑀓𑁆𑀓𑀝𑀺𑀲𑀗𑁆𑀔𑀸𑀢𑀸 𑀦𑀺𑀤𑀸𑀦𑀸 ‘‘𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻’’𑀢𑀺 𑀫𑀸𑀢𑀺𑀓𑀸𑀬 𑀯𑀘𑀦𑀪𑁂𑀤𑁄, 𑀦 𑀇𑀢𑁆𑀣𑀺𑀬𑀸 𑀏𑀯 𑀫𑁂𑀣𑀼𑀦𑀲𑀺𑀤𑁆𑀥𑀺𑀤𑀲𑁆𑀲𑀦𑀢𑁄. 𑀢𑀲𑁆𑀫𑀸 𑀯𑀺𑀪𑀗𑁆𑀕𑁄 𑀢𑀦𑁆𑀦𑀺𑀬𑀸𑀫𑀓𑁄 𑀢𑀲𑁆𑀲𑀸 𑀫𑀸𑀢𑀺𑀓𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀣𑀦𑀺𑀬𑀸𑀫𑀓𑁄 𑀯𑀺𑀪𑀗𑁆𑀕𑁄𑀢𑀺. 𑀯𑀺𑀪𑀗𑁆𑀕𑁂 𑀳𑀺 ‘‘𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄, 𑀢𑀬𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸, 𑀢𑀬𑁄 𑀧𑀡𑁆𑀟𑀓𑀸, 𑀢𑀬𑁄 𑀧𑀼𑀭𑀺𑀲𑀸. 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄 𑀫𑀕𑁆𑀕𑁂, 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀲𑁆𑀲 𑀤𑁆𑀯𑁂 𑀫𑀕𑁆𑀕𑁂’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁬) 𑀦𑀬𑁂𑀦 𑀲𑀩𑁆𑀩𑀮𑁂𑀲𑁄𑀓𑀸𑀲𑀁 𑀧𑀺𑀤𑀳𑀺𑀢𑁆𑀯𑀸 𑀦𑀺𑀬𑀫𑁄 𑀓𑀢𑁄. 𑀏𑀢𑁆𑀣𑀸𑀳 𑁋 𑀬𑀤𑀺 𑀏𑀯𑀁 𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀯𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀯𑀸 𑀦 𑀓𑁂𑀯𑀮𑀁 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀺𑀪𑀗𑁆𑀕𑁂 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀤𑀯𑀘𑀦𑁂𑀦 𑀳𑀺 𑀪𑀺𑀓𑁆𑀔𑀼𑀦𑀻 𑀧𑀼𑀭𑀺𑀲𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀪𑀺𑀓𑁆𑀔𑀼𑀪𑀸𑀯𑁂 𑀞𑀺𑀢𑀸 𑀏𑀯𑀁 𑀯𑀤𑁂𑀬𑁆𑀬 ‘‘𑀦𑀸𑀳𑀁 𑀉𑀧𑀲𑀫𑁆𑀧𑀤𑀸𑀓𑀭𑀡𑀓𑀸𑀮𑁂 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑀸, 𑀢𑀲𑁆𑀫𑀸 𑀦 𑀅𑀧𑀘𑁆𑀘𑀓𑁆𑀔𑀸𑀢𑀲𑀺𑀓𑁆𑀔𑀸𑀧𑀺 𑀫𑁂𑀣𑀼𑀦𑀥𑀫𑁆𑀫𑁂𑀦 𑀧𑀸𑀭𑀸𑀚𑀺𑀓𑀸 𑀳𑁄𑀫𑀻’’𑀢𑀺. 𑀯𑀼𑀘𑁆𑀘𑀢𑁂 𑁋 𑀬𑀣𑀸 𑀯𑀼𑀢𑁆𑀢𑀁, 𑀢𑀣𑀸 𑀦 𑀯𑀢𑁆𑀢𑀩𑁆𑀩𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. 𑀢𑀣𑀸 𑀯𑀼𑀢𑁆𑀢𑁂 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀅𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀺. 𑀢𑀜𑁆𑀘𑀸𑀦𑀺𑀝𑁆𑀞𑀁. 𑀇𑀤𑀫𑀧𑀭𑀫𑀦𑀺𑀝𑁆𑀞𑀁 ‘‘𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀸𑀥𑀸𑀭𑀡𑀸𑀦𑁂𑀯 𑀦𑀸𑀲𑀸𑀥𑀸𑀭𑀡𑀸𑀦𑀻’’𑀢𑀺. 𑀅𑀧𑀺𑀘𑀸𑀬𑀁 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑀸𑀯 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀁𑀬𑁂𑀯 𑀉𑀧𑀚𑁆𑀛𑀁 𑀢𑀫𑁂𑀯 𑀉𑀧𑀲𑀫𑁆𑀧𑀤𑀁 𑀢𑀸𑀦𑀺 𑀯𑀲𑁆𑀲𑀸𑀦𑀺 𑀪𑀺𑀓𑁆𑀔𑀽𑀳𑀺 𑀲𑀗𑁆𑀕𑀫𑀺𑀢𑀼’’𑀦𑁆𑀢𑀺𑀆𑀤𑀺 (𑀧𑀸𑀭𑀸. 𑁬𑁯) 𑀯𑀼𑀢𑁆𑀢𑀁. 𑀢𑀢𑁄 𑀆𑀧𑀢𑁆𑀢𑀺𑀬𑀸 𑀪𑁂𑀤𑁄𑀢𑀺 𑀢𑀢𑁄 𑀯𑀺𑀪𑀗𑁆𑀕𑀢𑁄 ‘‘𑀅𑀓𑁆𑀔𑀬𑀺𑀢𑁂 𑀲𑀭𑀻𑀭𑁂 𑀧𑀸𑀭𑀸𑀚𑀺𑀓𑀁, 𑀬𑁂𑀪𑀼𑀬𑁆𑀬𑁂𑀦 𑀔𑀬𑀺𑀢𑁂 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺𑀆𑀤𑀺 (𑀧𑀸𑀭𑀸. 𑁭𑁩, 𑀧𑀭𑀺. 𑁧𑁫𑁭) 𑀆𑀧𑀢𑁆𑀢𑀺𑀬𑀸 𑀪𑁂𑀤𑁄 𑀳𑁄𑀢𑀺. 𑀅𑀦𑀸𑀧𑀢𑁆𑀢𑀺 𑀢𑀤𑀜𑁆𑀜𑀣𑀸𑀢𑀺 𑀢𑀢𑁄 𑀏𑀯 𑀯𑀺𑀪𑀗𑁆𑀕𑀢𑁄 𑀬𑁂𑀦 𑀆𑀓𑀸𑀭𑁂𑀦 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑀢𑁄 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀅𑀦𑀸𑀧𑀢𑁆𑀢𑀺𑀪𑁂𑀤𑁄𑀯 𑀳𑁄𑀢𑀺. ‘‘𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀳𑀺 𑀯𑀺𑀪𑀗𑁆𑀕𑁂 𑀅𑀲𑀢𑀺 𑀦 𑀧𑀜𑁆𑀜𑀸𑀬𑀢𑀺. 𑀏𑀢𑁆𑀢𑀸𑀯𑀢𑀸 ‘‘𑀦𑀺𑀤𑀸𑀦𑀸 𑀫𑀸𑀢𑀺𑀓𑀸𑀪𑁂𑀤𑁄’’𑀢𑀺 𑀅𑀬𑀁 𑀕𑀸𑀣𑀸 𑀲𑀫𑀸𑀲𑀢𑁄 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺. 𑀯𑀺𑀲𑁂𑀲𑀓𑀸𑀭𑀡𑀁 𑀧𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀧𑀞𑀫𑀧𑀜𑁆𑀜𑀢𑁆𑀢𑀺 𑀢𑀸𑀯 𑀧𑀞𑀫𑀩𑁄𑀥𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀢𑁆𑀢𑀸, 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀅𑀝𑁆𑀞𑀯𑀲𑁆𑀲𑀺𑀓𑀓𑀸𑀮𑁂 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑁂 𑀧𑀜𑁆𑀜𑀢𑁆𑀢𑀸, 𑀤𑀼𑀢𑀺𑀬𑀧𑀜𑁆𑀜𑀢𑁆𑀢𑀺 𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑁂. 𑀲𑁄 𑀳𑀺 𑀆𑀬𑀲𑁆𑀫𑀸 𑀫𑀓𑁆𑀓𑀝𑀺𑀧𑀸𑀭𑀸𑀚𑀺𑀓𑁄 𑀬𑀣𑀸 𑀫𑀸𑀢𑀼𑀕𑀸𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻 𑀦 𑀅𑀥𑀺𑀧𑁆𑀧𑁂𑀢𑀸, 𑀢𑀣𑀸 𑀇𑀥𑀸𑀧𑀻𑀢𑀺 𑀲𑀜𑁆𑀜𑀸𑀬 ‘‘𑀲𑀘𑁆𑀘𑀁, 𑀆𑀯𑀼𑀲𑁄…𑀧𑁂… 𑀢𑀜𑁆𑀘 𑀔𑁄 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸, 𑀦𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀸’’𑀢𑀺 (𑀧𑀸𑀭𑀸. 𑁪𑁧) 𑀆𑀳. 𑀢𑀢𑀺𑀬𑀧𑀜𑁆𑀜𑀢𑁆𑀢𑀺 𑀮𑀸𑀪𑀕𑁆𑀕𑀫𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑁂 𑀉𑀧𑁆𑀧𑀦𑁆𑀦𑀸 ‘‘𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺 (𑀧𑀸𑀭𑀸. 𑁪𑁩) 𑀯𑀘𑀦𑀢𑁄, 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀫𑁆𑀧𑀺 𑀏𑀢𑁆𑀣𑁂𑀯 𑀮𑀩𑁆𑀪𑀢𑀻𑀢𑀺 𑀇𑀫𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀁 𑀢𑀺𑀯𑀺𑀥𑀫𑁆𑀧𑀺 𑀯𑀢𑁆𑀣𑀼𑀁 𑀉𑀧𑀸𑀤𑀸𑀬 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀢𑀁 𑀓𑀸𑀮𑀁 𑀧𑀢𑁆𑀯𑀸 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀬𑁄 𑀧𑀦𑀸𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀧𑀤𑀁. 𑀪𑀺𑀓𑁆𑀔𑀽𑀢𑀺 𑀢𑀲𑁆𑀲 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀬𑀫𑀧𑀤𑀁. 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀢𑀺 𑀢𑀲𑁆𑀲 𑀯𑀺𑀲𑁂𑀲𑀦𑀯𑀘𑀦𑀁. 𑀦 𑀳𑀺 𑀲𑀩𑁆𑀩𑁄𑀧𑀺 𑀪𑀺𑀓𑁆𑀔𑀼𑀦𑀸𑀫𑀓𑁄, 𑀬𑀸 𑀪𑀕𑀯𑀢𑀸 𑀬𑀸𑀬 𑀓𑀸𑀬𑀘𑀺 𑀉𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀽𑀦𑀁 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸 𑀲𑀺𑀓𑁆𑀔𑀸 𑀯𑀺𑀳𑀺𑀢𑀸, ‘‘𑀏𑀢𑁆𑀣 𑀲𑀳 𑀚𑀻𑀯𑀦𑁆𑀢𑀻’’𑀢𑀺 𑀬𑁄 𑀘 𑀲𑀸𑀚𑀻𑀯𑁄 𑀯𑀼𑀢𑁆𑀢𑁄, 𑀢𑀁 𑀉𑀪𑀬𑀁 𑀲𑀫𑀸𑀧𑀦𑁆𑀦𑁄𑀯 𑀳𑁄𑀢𑀺. 𑀓𑀤𑀸 𑀧𑀦 𑀲𑀫𑀸𑀧𑀦𑁆𑀦𑁄 𑀳𑁄𑀢𑀺? 𑀬𑀸𑀬 𑀓𑀸𑀬𑀘𑀺 𑀉𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀫𑁂𑀯 𑀢𑀤𑀼𑀪𑀬𑀁 𑀚𑀸𑀦𑀦𑁆𑀢𑁄𑀧𑀺 𑀅𑀚𑀸𑀦𑀦𑁆𑀢𑁄𑀧𑀺 𑀢𑀤𑀚𑁆𑀛𑀼𑀧𑀕𑀢𑀢𑁆𑀢𑀸 𑀲𑀫𑀸𑀧𑀦𑁆𑀦𑁄𑀯 𑀦𑀸𑀫 𑀳𑁄𑀢𑀺. 𑀲𑀳 𑀚𑀻𑀯𑀦𑁆𑀢𑀻𑀢𑀺 𑀬𑀸𑀯 𑀲𑀺𑀓𑁆𑀔𑀁 𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀧𑀸𑀭𑀸𑀚𑀺𑀓𑀪𑀸𑀯𑀁 𑀯𑀸 𑀦 𑀧𑀸𑀧𑀼𑀡𑀸𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄 𑀲𑀸𑀚𑀻𑀯𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺, 𑀢𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀲𑀺𑀓𑁆𑀔𑀁 𑀅𑀧𑀭𑀺𑀧𑀽𑀭𑁂𑀦𑁆𑀢𑁄, 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀩𑀳𑀼𑀮𑁄 𑀯𑀸 𑀏𑀓𑀘𑁆𑀘𑀁 𑀲𑀸𑀯𑀲𑁂𑀲𑀁 𑀲𑀸𑀚𑀻𑀯𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀯𑀸 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀦𑀸𑀫 𑀦 𑀳𑁄𑀢𑀺.

𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀧𑀦 𑀘𑀢𑀼𑀓𑁆𑀓𑀁 𑀮𑀩𑁆𑀪𑀢𑀺 𑁋 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄 𑀲𑀻𑀮𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀦 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀅𑀘𑀺𑀢𑁆𑀢𑀓𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁄, 𑀅𑀢𑁆𑀣𑀺 𑀦 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀩𑀳𑀼𑀮𑁄 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀦𑀺𑀭𑀸𑀧𑀢𑁆𑀢𑀺𑀓𑁄, 𑀅𑀢𑁆𑀣𑀺 𑀦 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄 𑀦 𑀘 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀅𑀢𑁆𑀣𑀺 𑀉𑀪𑀬𑀲𑀫𑀸𑀧𑀦𑁆𑀦𑁄 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄’’𑀢𑀺. 𑀅𑀬𑀫𑁂𑀢𑁆𑀣 𑀘𑀢𑀼𑀢𑁆𑀣𑁄 𑀪𑀺𑀓𑁆𑀔𑀼 𑀉𑀓𑁆𑀓𑀝𑁆𑀞𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄 𑀲𑀺𑀬𑀸. 𑀦 𑀳𑀺 𑀪𑀕𑀯𑀸 𑀅𑀦𑀼𑀓𑁆𑀓𑀝𑁆𑀞𑀁 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄𑀢𑀺 𑀘𑁂? 𑀦, ‘‘𑀢𑀢𑁆𑀭 𑀬𑀸𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀺𑀓𑁆𑀔𑀸’’𑀢𑀺 𑀯𑀘𑀦𑀯𑀺𑀭𑁄𑀥𑀢𑁄, 𑀉𑀓𑁆𑀓𑀝𑁆𑀞𑀕𑁆𑀕𑀳𑀡𑀸𑀥𑀺𑀧𑁆𑀧𑀸𑀬𑁂 𑀲𑀢𑀺 ‘‘𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀺𑀓𑁆𑀔𑀢𑁆𑀢𑀬𑀲𑀫𑀸𑀧𑀦𑁆𑀦𑁄 𑀳𑀺 𑀲𑀩𑁆𑀩𑀼𑀓𑁆𑀓𑀝𑁆𑀞𑁄. ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺 𑀧𑀭𑀢𑁄 𑀯𑀘𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀯𑀼𑀢𑁆𑀢𑀸𑀢𑀺 𑀘𑁂? 𑀦, 𑀢𑀲𑁆𑀲𑀸𑀧𑀺 𑀅𑀪𑀩𑁆𑀩𑀢𑁆𑀢𑀸. 𑀦 𑀳𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀫𑁂𑀣𑀼𑀦𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼𑀁 𑀪𑀩𑁆𑀩𑁄, 𑀢𑀁 𑀲𑀺𑀓𑁆𑀔𑀁 𑀅𑀧𑀭𑀺𑀧𑀽𑀭𑁂𑀦𑁆𑀢𑁄, 𑀲𑀸𑀚𑀻𑀯𑀜𑁆𑀘 𑀯𑀻𑀢𑀺𑀓𑁆𑀓𑀫𑀦𑁆𑀢𑁄𑀬𑁂𑀯 𑀳𑀺 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑀸. 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀬𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑁄 𑀲𑀸𑀚𑀻𑀯𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀫𑁂𑀯 𑀲𑀗𑁆𑀕𑀡𑁆𑀳𑀸𑀢𑀺, 𑀦 𑀇𑀢𑀭𑀲𑀺𑀓𑁆𑀔𑀸𑀤𑁆𑀯𑀬𑀁, 𑀢𑀲𑁆𑀫𑀸 ‘‘𑀢𑀢𑁆𑀭 𑀬𑀸𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀺𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑀗𑁆𑀕𑀸𑀳𑀓𑁄 𑀲𑀸𑀚𑀻𑀯𑁄 𑀲𑀺𑀓𑁆𑀔𑀸𑀲𑀸𑀚𑀻𑀯𑁄𑀢𑀺 𑀯𑀼𑀢𑁆𑀢𑁄. 𑀇𑀢𑀺 𑀲𑀸𑀚𑀻𑀯𑀯𑀺𑀲𑁂𑀲𑀦𑀢𑁆𑀣𑀁 𑀲𑀺𑀓𑁆𑀔𑀸𑀕𑁆𑀕𑀳𑀡𑀁 𑀓𑀢𑀁. 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀫𑁂𑀯 𑀯𑀺𑀪𑀗𑁆𑀕𑁂 𑀲𑀺𑀓𑁆𑀔𑀁 𑀅𑀧𑀭𑀸𑀫𑀲𑀺𑀢𑁆𑀯𑀸 ‘‘𑀢𑀲𑁆𑀫𑀺𑀁 𑀲𑀺𑀓𑁆𑀔𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 (𑀧𑀸𑀭𑀸. 𑁪𑁫) 𑀯𑀼𑀢𑁆𑀢𑀁. 𑀢𑁂𑀦 𑀏𑀓𑀫𑁂𑀯𑀺𑀤𑀁 𑀅𑀢𑁆𑀣𑀧𑀤𑀦𑁆𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀢𑀜𑁆𑀘 𑀉𑀧𑀲𑀫𑁆𑀧𑀤𑀽𑀧𑀕𑀫𑀦𑀦𑁆𑀢𑀭𑀢𑁄 𑀧𑀝𑁆𑀞𑀸𑀬 𑀲𑀺𑀓𑁆𑀔𑀦𑀸𑀥𑀺𑀓𑀸𑀭𑀢𑁆𑀢𑀸 ‘‘𑀲𑀺𑀓𑁆𑀔𑀢𑀻’’𑀢𑀺 𑀘 ‘‘𑀲𑀫𑀸𑀧𑀦𑁆𑀦𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑁄 𑀏𑀯𑀁 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀲𑀗𑁆𑀔𑀁 𑀕𑀢𑁄, 𑀢𑀸𑀤𑀺𑀲𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀅𑀧𑀭𑀪𑀸𑀕𑁂 𑀲𑀸𑀚𑀻𑀯𑀲𑀗𑁆𑀔𑀸𑀢𑀫𑁂𑀯 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀢𑀲𑁆𑀫𑀺𑀁𑀬𑁂𑀯 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀅𑀬𑀫𑀢𑁆𑀣𑁄 𑀬𑀼𑀚𑁆𑀚𑀢𑀺.

𑀓𑀺𑀦𑁆𑀢𑀼 𑀅𑀝𑁆𑀞𑀓𑀣𑀸𑀦𑀬𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀲𑁄 𑀘 𑀦 𑀧𑀝𑀺𑀓𑁆𑀔𑁂𑀧𑀸𑀭𑀳𑁄 𑀳𑁄𑀢𑀺, 𑀅𑀥𑀺𑀧𑁆𑀧𑀸𑀬𑁄 𑀧𑀦𑁂𑀢𑁆𑀣 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀲𑀩𑁆𑀩𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀇𑀤𑀫𑁂𑀯 𑀪𑀺𑀓𑁆𑀔𑀼𑀮𑀓𑁆𑀔𑀡𑀁 𑀲𑀸𑀥𑀸𑀭𑀡𑀁 𑀬𑀤𑀺𑀤𑀁 ‘‘𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺. 𑀔𑀻𑀡𑀸𑀲𑀯𑁄𑀧𑀺 𑀲𑀸𑀯𑀓𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀅𑀘𑀺𑀢𑁆𑀢𑀓𑀁, 𑀢𑀣𑀸 𑀲𑁂𑀓𑁆𑀔𑁄, 𑀧𑀼𑀣𑀼𑀚𑁆𑀚𑀦𑁄 𑀧𑀦 𑀲𑀘𑀺𑀢𑁆𑀢𑀓𑀫𑁆𑀧𑀺, 𑀢𑀲𑁆𑀫𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀸𑀫𑀜𑁆𑀜𑀫𑀺𑀤𑀁 𑀪𑀺𑀓𑁆𑀔𑀼𑀮𑀓𑁆𑀔𑀡𑀦𑁆𑀢𑀺 𑀓𑀢𑁆𑀯𑀸 𑀓𑁂𑀯𑀮𑀁 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄, 𑀓𑁂𑀯𑀮𑀁 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄, 𑀉𑀪𑀬𑀲𑀫𑀸𑀧𑀦𑁆𑀦𑁄 𑀘𑀸𑀢𑀺 𑀲𑀭𑀽𑀧𑁂𑀓𑀤𑁂𑀲𑀏𑀓𑀲𑁂𑀲𑀦𑀬𑁂𑀦 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑁆𑀯𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀉𑀓𑁆𑀓𑀝𑁆𑀞𑀕𑁆𑀕𑀳𑀡𑁂𑀦 𑀅𑀦𑀼𑀓𑁆𑀓𑀝𑁆𑀞𑀸𑀦𑀁 𑀕𑀳𑀡𑀲𑀺𑀤𑁆𑀥𑀺𑀢𑁄 𑀅𑀝𑁆𑀞𑀓𑀣𑀸𑀬𑀁 𑀉𑀓𑁆𑀓𑀝𑁆𑀞𑁄𑀯 𑀯𑀼𑀢𑁆𑀢𑁄. 𑀢𑀫𑁂𑀯 𑀲𑀫𑁆𑀧𑀸𑀤𑁂𑀢𑀼𑀁 ‘‘𑀢𑀲𑁆𑀫𑀺𑀁 𑀲𑀺𑀓𑁆𑀔𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀏𑀢𑁆𑀣 𑀲𑀺𑀓𑁆𑀔𑀸𑀲𑀤𑁆𑀤𑀲𑁆𑀲 𑀅𑀯𑀘𑀦𑁂 𑀧𑀭𑀺𑀳𑀸𑀭𑀁 𑀯𑀢𑁆𑀯𑀸 𑀬𑀲𑁆𑀫𑀸 𑀧𑀦 𑀲𑁄 𑀲𑀺𑀓𑁆𑀔𑀫𑁆𑀧𑀺 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀲𑀫𑀸𑀧𑀦𑁆𑀦𑁄𑀢𑀺𑀧𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀘 𑀯𑀢𑁆𑀯𑀸 ‘‘𑀬𑀁 𑀲𑀺𑀓𑁆𑀔𑀁 𑀲𑀫𑀸𑀧𑀦𑁆𑀦𑁄, 𑀢𑀁 𑀅𑀧𑀘𑁆𑀘𑀓𑁆𑀔𑀸𑀬, 𑀬𑀜𑁆𑀘 𑀲𑀸𑀚𑀻𑀯𑀁 𑀲𑀫𑀸𑀧𑀦𑁆𑀦𑁄, 𑀢𑀢𑁆𑀣 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀬𑀫𑀝𑁆𑀞𑀓𑀣𑀸𑀬 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀲𑁆𑀫𑀺𑀁 𑀧𑀦 𑀅𑀥𑀺𑀧𑁆𑀧𑀸𑀬𑁂 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀏𑀯 𑀕𑀳𑀡𑀁 𑀲𑀩𑁆𑀩𑀢𑁆𑀣𑀺𑀓𑀢𑁆𑀢𑀸, 𑀲𑀻𑀮𑀸𑀥𑀺𑀓𑀸𑀭𑀢𑁄 𑀘 𑀯𑀺𑀦𑀬𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀦𑁆𑀢𑁄 𑀲𑀻𑀮𑀁 𑀲𑀫𑀸𑀤𑀺𑀬𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀺𑀓𑁆𑀔𑀸𑀧𑀤𑀁 𑀧𑀘𑁆𑀘𑀓𑁆𑀔𑀦𑁆𑀢𑁄 𑀲𑀻𑀮𑀁 𑀧𑀘𑁆𑀘𑀓𑁆𑀔𑀸𑀢𑀻𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀬𑀁 𑀲𑀺𑀓𑁆𑀔𑀁 𑀲𑀫𑀸𑀧𑀦𑁆𑀦𑁄, 𑀢𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸). 𑀏𑀢𑁆𑀢𑀸𑀯𑀢𑀸 𑀲𑀫𑀸𑀲𑀢𑁄 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀏𑀢𑁆𑀣 𑀯𑀢𑁆𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑁄 𑀦𑀺𑀝𑁆𑀞𑀺𑀢𑁄 𑀳𑁄𑀢𑀺.

𑀓𑀺𑀁 𑀇𑀫𑀺𑀦𑀸 𑀯𑀺𑀲𑁂𑀲𑀯𑀘𑀦𑁂𑀦 𑀧𑀬𑁄𑀚𑀦𑀁, 𑀦𑀦𑀼 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸…𑀧𑁂… 𑀅𑀲𑀁𑀯𑀸𑀲𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦 𑀯𑀢𑁆𑀢𑀩𑁆𑀩𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. ‘‘𑀬𑁄 𑀧𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀣𑁂𑀬𑁆𑀬𑀲𑀁𑀯𑀸𑀲𑀸𑀤𑀺𑀓𑁄 𑀓𑁂𑀯𑀮𑁂𑀦 𑀲𑀫𑀜𑁆𑀜𑀸𑀫𑀢𑁆𑀢𑁂𑀦, 𑀧𑀝𑀺𑀜𑁆𑀜𑀸𑀫𑀢𑁆𑀢𑁂𑀦 𑀯𑀸 𑀪𑀺𑀓𑁆𑀔𑀼, 𑀢𑀲𑁆𑀲𑀸𑀧𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀅𑀢𑁆𑀣𑀺, 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀘 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀬𑁄 𑀯𑀸 𑀧𑀘𑁆𑀙𑀸 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄, 𑀢𑀲𑁆𑀲 𑀘, 𑀬𑁄 𑀯𑀸 𑀧𑀓𑁆𑀔𑀧𑀡𑁆𑀟𑀓𑀢𑁆𑀢𑀸 𑀧𑀡𑁆𑀟𑀓𑀪𑀸𑀯𑀽𑀧𑀕𑀫𑀦𑁂𑀦 𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄, 𑀢𑀲𑁆𑀲 𑀘 𑀢𑀤𑀼𑀪𑀬𑀁 𑀅𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀺. 𑀧𑀡𑁆𑀟𑀓𑀪𑀸𑀯𑀧𑀓𑁆𑀔𑁂 𑀘 𑀧𑀡𑁆𑀟𑀓𑁄 𑀉𑀧𑀲𑀫𑁆𑀧𑀤𑀸𑀬 𑀦 𑀯𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀇𑀢𑀭𑀲𑁆𑀫𑀺𑀁 𑀧𑀓𑁆𑀔𑁂 𑀯𑀢𑁆𑀣𑀽𑀢𑀺 𑀲𑀺𑀤𑁆𑀥𑀁. 𑀢𑀲𑁆𑀫𑀺𑀁 𑀧𑀓𑁆𑀔𑁂 𑀉𑀧𑀲𑀫𑁆𑀧𑀦𑁆𑀦𑁄 𑀧𑀡𑁆𑀟𑀓𑀪𑀸𑀯𑀧𑀓𑁆𑀔𑁂 𑀧𑀡𑁆𑀟𑀓𑀢𑁆𑀢𑀸 𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄, 𑀲𑁄 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸𑀬 𑀲𑀺𑀓𑁆𑀔𑀸𑀬 𑀅𑀪𑀸𑀯𑁂𑀦 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀫𑀼𑀔𑁂𑀦 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀕𑁆𑀕𑀳𑀡𑀦𑀬𑁂𑀦 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀢𑀲𑁆𑀲 𑀓𑀼𑀢𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀦𑀬𑁄 𑀅𑀧𑀡𑁆𑀟𑀓𑀧𑀓𑁆𑀔𑀁 𑀅𑀮𑀪𑀫𑀸𑀦𑀲𑁆𑀲𑁂𑀯 𑀧𑀭𑀢𑁄 𑀬𑀼𑀚𑁆𑀚𑀢𑀺, 𑀮𑀪𑀦𑁆𑀢𑀲𑁆𑀲 𑀧𑀦 𑀅𑀭𑀽𑀧𑀲𑀢𑁆𑀢𑀸𑀦𑀁 𑀓𑀼𑀲𑀮𑀸𑀤𑀺𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀪𑀯𑀗𑁆𑀕𑀯𑀺𑀘𑁆𑀙𑁂𑀤𑁂 𑀲𑀢𑀺𑀧𑀺 𑀅𑀫𑀭𑀡𑀁 𑀯𑀺𑀬 𑀧𑀡𑁆𑀟𑀓𑀪𑀸𑀯𑀧𑀓𑁆𑀔𑁂𑀧𑀺 𑀪𑀺𑀓𑁆𑀔𑀼𑀪𑀸𑀯𑁄 𑀅𑀢𑁆𑀣𑀺. 𑀲𑀁𑀯𑀸𑀲𑀁 𑀯𑀸 𑀲𑀸𑀤𑀺𑀬𑀦𑁆𑀢𑀲𑁆𑀲 𑀦 𑀣𑁂𑀬𑁆𑀬𑀲𑀁𑀯𑀸𑀲𑀓𑀪𑀸𑀯𑁄 𑀅𑀢𑁆𑀣𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀯𑀺𑀬. 𑀦 𑀘 𑀲𑀳𑀲𑁂𑀬𑁆𑀬𑀸𑀤𑀺𑀁 𑀚𑀦𑁂𑀢𑀺. 𑀕𑀡𑀧𑀽𑀭𑀓𑁄 𑀧𑀦 𑀦 𑀳𑁄𑀢𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄 𑀯𑀺𑀬. 𑀦 𑀲𑁄 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄. 𑀇𑀢𑀭𑀲𑁆𑀫𑀺𑀁 𑀧𑀦 𑀧𑀓𑁆𑀔𑁂 𑀳𑁄𑀢𑀺, 𑀅𑀬𑀁 𑀇𑀫𑀲𑁆𑀲 𑀢𑀢𑁄 𑀯𑀺𑀲𑁂𑀲𑁄. 𑀓𑀺𑀫𑀬𑀁 𑀲𑀳𑁂𑀢𑀼𑀓𑁄, 𑀉𑀤𑀸𑀳𑀼 𑀅𑀳𑁂𑀢𑀼𑀓𑁄𑀢𑀺? 𑀦 𑀅𑀳𑁂𑀢𑀼𑀓𑁄. 𑀬𑀢𑁄 𑀉𑀧𑀲𑀫𑁆𑀧𑀤𑀸 𑀢𑀲𑁆𑀲 𑀅𑀧𑀡𑁆𑀟𑀓𑀧𑀓𑁆𑀔𑁂 𑀅𑀦𑀼𑀜𑁆𑀜𑀸𑀢𑀸 𑀲𑀳𑁂𑀢𑀼𑀓𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸. 𑀧𑀡𑁆𑀟𑀓𑀪𑀸𑀯𑀧𑀓𑁆𑀔𑁂𑀧𑀺 𑀓𑀺𑀲𑁆𑀲 𑀦𑀸𑀦𑀼𑀜𑁆𑀜𑀸𑀢𑀸𑀢𑀺 𑀘𑁂? 𑀧𑀡𑁆𑀟𑀓𑀪𑀽𑀢𑀢𑁆𑀢𑀸 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑀲𑁆𑀲 𑀯𑀺𑀬.

𑀅𑀧𑀺𑀘 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁 𑀤𑀻𑀧𑁂𑀢𑁆𑀯𑀸 𑀢𑀁 𑀲𑀫𑀸𑀤𑀺𑀦𑁆𑀦𑀁 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬, 𑀢𑀢𑁆𑀣 𑀘 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀬𑀣𑀸𑀯𑀼𑀢𑁆𑀢𑀸𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸 𑀅𑀤𑀺𑀦𑁆𑀦𑀁…𑀧𑁂… 𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡𑀁 𑀘𑀻𑀯𑀭𑀁 𑀓𑀸𑀭𑀸𑀧𑁂𑀬𑁆𑀬𑀸’’𑀢𑀺 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁.

‘‘𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻’’𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀧𑀕𑁂𑀯 𑀧𑀡𑁆𑀟𑀓𑁂, 𑀧𑀼𑀭𑀺𑀲𑁂 𑀯𑀸𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀢𑀸𑀯 𑀫𑀸𑀢𑀺𑀓𑀸𑀬 𑀯𑀺𑀦𑀺𑀘𑁆𑀙𑀬𑁄 𑀅𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑁄.

𑀲𑀸𑀭𑀺𑀧𑀼𑀢𑁆𑀢𑀩𑁂𑀮𑀝𑁆𑀞𑀲𑀻𑀲𑀸𑀦𑀦𑁆𑀤𑀸𑀤𑀬𑁄𑀧𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀘 𑀆𑀧𑀢𑁆𑀢𑀺𑀆𑀧𑀚𑁆𑀚𑀦𑀢𑁄 𑀘 𑀓𑀲𑁆𑀫𑀸 𑀫𑀳𑀸𑀯𑀺𑀪𑀗𑁆𑀕𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑀉𑀧𑀲𑀫𑁆𑀧𑀤𑀸𑀬𑁂𑀯 𑀆𑀕𑀢𑀸𑀢𑀺? 𑀧𑀝𑀺𑀓𑁆𑀔𑀺𑀢𑁆𑀢𑀸𑀬 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸𑀬 𑀅𑀦𑀼𑀜𑁆𑀜𑀸𑀢𑀧𑁆𑀧𑀲𑀗𑁆𑀕𑀪𑀬𑀸𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀆𑀧𑀢𑁆𑀢𑀺𑀬𑀸 𑀪𑀩𑁆𑀩𑀢𑀁 𑀲𑀦𑁆𑀥𑀸𑀬 𑀢𑀲𑁆𑀫𑀺𑀫𑁆𑀧𑀺 𑀯𑀼𑀢𑁆𑀢𑁂 𑀧𑀼𑀩𑁆𑀩𑁂 𑀧𑀝𑀺𑀓𑁆𑀔𑀺𑀢𑁆𑀢𑀸𑀧𑀺 𑀪𑀕𑀯𑀢𑀸 𑀧𑀼𑀦 𑀅𑀦𑀼𑀜𑁆𑀜𑀸𑀢𑀸𑀢𑀺 𑀪𑀺𑀓𑁆𑀔𑀽𑀦𑀁 𑀫𑀺𑀘𑁆𑀙𑀸𑀕𑀸𑀳𑁄 𑀯𑀸 𑀯𑀺𑀫𑀢𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀦 𑀯𑀼𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀅𑀥𑀫𑁆𑀫𑀓𑀫𑁆𑀫𑀁 𑀯𑀕𑁆𑀕𑀓𑀫𑁆𑀫’’𑀢𑀺 (𑀫𑀳𑀸𑀯. 𑁩𑁮𑁭) 𑀯𑀘𑀦𑀢𑁄 𑀓𑀼𑀧𑁆𑀧𑀓𑀫𑁆𑀫𑀫𑁆𑀧𑀺 𑀓𑀢𑁆𑀣𑀘𑀺 ‘‘𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀅𑀓𑀼𑀧𑁆𑀧𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀅𑀓𑀼𑀧𑁆𑀧𑀓𑀫𑁆𑀫𑀫𑁆𑀧𑀺 𑀏𑀓𑀘𑁆𑀘𑀁 𑀦 𑀞𑀸𑀦𑀸𑀭𑀳𑀁, 𑀬𑁂𑀦 𑀅𑀧𑀢𑁆𑀢𑁄 𑀑𑀲𑀸𑀭𑀡𑀁 𑀲𑀼𑀑𑀲𑀸𑀭𑀺𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀞𑀸𑀦𑀸𑀭𑀳𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 ‘‘𑀞𑀸𑀦𑀸𑀭𑀳𑁂𑀦𑀸’’𑀢𑀺 𑀇𑀤𑀫𑁂𑀯 𑀯𑀢𑁆𑀢𑀩𑁆𑀩𑀁 𑀇𑀫𑀺𑀦𑀸 𑀅𑀓𑀼𑀧𑁆𑀧𑀲𑀺𑀤𑁆𑀥𑀺𑀢𑁄𑀢𑀺 𑀘𑁂? 𑀦, 𑀅𑀝𑁆𑀞𑀸𑀦𑀸𑀭𑀳𑁂𑀦 𑀅𑀓𑀼𑀧𑁆𑀧𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀦 𑀅𑀥𑀺𑀧𑁆𑀧𑁂𑀢𑁄 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄. 𑀤𑁆𑀯𑀻𑀳𑀺 𑀧𑀦𑁂𑀢𑁂𑀳𑀺 𑀏𑀓𑀢𑁄 𑀯𑀼𑀢𑁆𑀢𑁂𑀳𑀺 𑀅𑀬𑀫𑀢𑁆𑀣𑁄 𑀧𑀜𑁆𑀜𑀸𑀬𑀢𑀺 𑁋 𑀓𑁂𑀯𑀮𑀁 𑀢𑁂𑀦 𑀅𑀓𑀼𑀧𑁆𑀧𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀅𑀬𑀫𑁆𑀧𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺, 𑀞𑀸𑀦𑀸𑀭𑀳𑁂𑀦 𑀘 𑀅𑀓𑀼𑀧𑁆𑀧𑁂𑀦 𑀘 𑀉𑀧𑀲𑀫𑁆𑀧𑀦𑁆𑀦𑁄 𑀅𑀬𑀫𑁆𑀧𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺, 𑀓𑀼𑀧𑁆𑀧𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀥𑀺𑀧𑁆𑀧𑁂𑀢𑁄𑀢𑀺.

‘‘𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀑𑀧𑀧𑀸𑀢𑀺𑀓𑀜𑁆𑀘𑀸𑀢𑀺 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀑𑀧𑀧𑀸𑀢𑀺𑀓𑀸 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀢𑀺 𑀯𑀤𑀦𑁆𑀢𑀺. ‘𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀳𑁄𑀦𑁆𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀦 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺, ‘𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬𑀸’𑀢𑀺 𑀇𑀤𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀏𑀓𑁂. ‘‘𑀓𑁂𑀘𑀺 𑀯𑀤𑀦𑁆𑀢𑀻’’𑀢𑀺 𑀬𑀢𑁆𑀣 𑀬𑀢𑁆𑀣 𑀮𑀺𑀔𑀻𑀬𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀸𑀭𑁂𑀢𑁆𑀯𑀸 𑀅𑀢𑁆𑀣𑀁 𑀲𑀼𑀝𑁆𑀞𑀼 𑀉𑀧𑀮𑀓𑁆𑀔𑀬𑁂. 𑀑𑀧𑀓𑁆𑀓𑀫𑀺𑀓𑁂 𑀧𑀡𑁆𑀟𑀓𑀪𑀸𑀯𑁄 𑀆𑀭𑀼𑀴𑁆𑀳𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀓𑁆𑀔𑀧𑀡𑁆𑀟𑀓𑁄 𑀅𑀧𑀡𑁆𑀟𑀓𑀧𑀓𑁆𑀔𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀡𑁆𑀟𑀓𑀧𑀓𑁆𑀔𑁂 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁦𑁯) 𑀮𑀺𑀔𑀺𑀢𑀁.

‘‘𑀩𑀺𑀦𑁆𑀤𑀼𑀁 𑀅𑀤𑀢𑁆𑀯𑀸 𑀘𑁂 𑀦𑀺𑀯𑀸𑀲𑁂𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀮𑀺𑀗𑁆𑀕𑀸𑀦𑀼𑀭𑀽𑀧𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀸𑀭𑀳𑀲𑁆𑀲 𑀲𑀁𑀯𑀸𑀲𑀲𑁆𑀲 𑀲𑀸𑀤𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀭𑀸𑀚𑀪𑀬𑀸𑀤𑀻𑀳𑀺 𑀕𑀳𑀺𑀢𑀮𑀺𑀗𑁆𑀕𑀸𑀦𑀁 ‘‘𑀕𑀺𑀳𑀻 𑀫𑀁 ‘𑀲𑀫𑀡𑁄’𑀢𑀺 𑀚𑀸𑀦𑀦𑁆𑀢𑀽’’𑀢𑀺 𑀯𑀜𑁆𑀘𑀦𑀘𑀺𑀢𑁆𑀢𑁂 𑀲𑀢𑀺𑀧𑀺 𑀪𑀺𑀓𑁆𑀔𑀽𑀦𑀁 𑀯𑀜𑁆𑀘𑁂𑀢𑀼𑀓𑀸𑀫𑀢𑀸𑀬 𑀘 𑀢𑁂𑀳𑀺 𑀲𑀁𑀯𑀲𑀺𑀢𑀼𑀓𑀸𑀫𑀢𑀸𑀬 𑀘 𑀅𑀪𑀸𑀯𑀸 𑀤𑁄𑀲𑁄 𑀦 𑀚𑀸𑀢𑁄𑀢𑀺. ‘‘𑀬𑁄 𑀏𑀯𑀁 𑀧𑀩𑁆𑀩𑀚𑀢𑀺, 𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀸 ‘‘𑀏𑀯𑀁 𑀓𑀸𑀢𑀼𑀁 𑀦 𑀮𑀩𑁆𑀪𑀢𑀻’’𑀢𑀺 𑀯𑀸 ‘‘𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀸𑀫𑀡𑁂𑀭𑁄 𑀦 𑀳𑁄𑀢𑀻’’𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀯𑀝𑁆𑀝𑀢𑀺. ‘‘𑀚𑀸𑀦𑀸𑀢𑀺, 𑀦 𑀯𑀝𑁆𑀝𑀢𑀻’’𑀢𑀺 𑀘 𑀮𑀺𑀔𑀺𑀢𑀁. ‘‘𑀭𑀸𑀚𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀅𑀢𑁆𑀣𑀸𑀬 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀁𑀯𑀸𑀲𑀁 𑀲𑀸𑀤𑀺𑀬𑀦𑁆𑀢𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺. 𑀓𑀲𑁆𑀫𑀸? 𑀅𑀲𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀸. 𑀧𑀼𑀦 𑀲𑁄 ‘𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀺𑀁 𑀏𑀢𑁂𑀦𑀸𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀯𑀸 𑀧𑀘𑁆𑀘𑀬𑀸𑀤𑀺𑀲𑀼𑀮𑀪𑀢𑀸𑀬 𑀯𑀸 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀲𑀼𑀤𑁆𑀥𑀫𑀸𑀦𑀲𑁄 𑀳𑀼𑀢𑁆𑀯𑀸 𑀬𑀸𑀯 𑀲𑁄 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀢𑀸𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺. 𑀏𑀯𑀁 𑀲𑀼𑀤𑁆𑀥𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀲𑀁𑀯𑀸𑀲𑀁 𑀲𑀸𑀤𑀺𑀬𑀢𑀺 𑀘𑁂, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀇𑀢𑀭𑀣𑀸 𑀲𑀩𑁆𑀩𑀁 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀓𑁂.

‘‘𑀦𑀸𑀪𑀺𑀧𑀭𑀸𑀫𑀸𑀲𑀸𑀤𑀺𑀦𑀸 𑀚𑀸𑀢𑁄 𑀢𑀣𑀸𑀭𑀽𑀧𑀁 𑀧𑀺𑀢𑀭𑀁 𑀖𑀸𑀢𑁂𑀢𑀺 𑀘𑁂, 𑀧𑀺𑀢𑀼𑀖𑀸𑀢𑀓𑁄 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑀬𑁄 𑀧𑀦 𑀓𑀸𑀬𑀲𑀁𑀲𑀕𑁆𑀕𑁂𑀦 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑁂𑀢𑀺, 𑀦 𑀲𑁄 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 ‘‘𑀢𑀺𑀡𑁆𑀡𑀁 𑀫𑀕𑁆𑀕𑀸𑀦’’𑀦𑁆𑀢𑀺 𑀯𑀘𑀦𑀢𑁄. 𑀪𑀺𑀓𑁆𑀔𑀼𑀦𑀺𑀁 𑀧𑀦 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀁 𑀤𑀽𑀲𑁂𑀢𑁆𑀯𑀸𑀧𑀺 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀳𑁄𑀢𑀺, 𑀲𑁄𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄. 𑀪𑀺𑀓𑁆𑀔𑀼𑀦𑀻 𑀧𑀦 𑀣𑁂𑀬𑁆𑀬𑀲𑀁𑀯𑀸𑀲𑀺𑀓𑀸, 𑀫𑀸𑀢𑀼𑀧𑀺𑀢𑀼𑀅𑀭𑀳𑀦𑁆𑀢𑀖𑀸𑀢𑀺𑀓𑀸, 𑀮𑁄𑀳𑀺𑀢𑀼𑀧𑁆𑀧𑀸𑀤𑀺𑀓𑀸, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀺𑀓𑀸 𑀘 𑀳𑁄𑀢𑀺, 𑀅𑀝𑁆𑀞𑀓𑀣𑀸𑀲𑀼 𑀅𑀦𑀸𑀕𑀢𑀁 𑀯𑀺𑀦𑀬𑀥𑀭𑀸 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺.

‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨) 𑀯𑀼𑀢𑁆𑀢𑀁 𑀫𑀭𑀺𑀬𑀸𑀤𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀢𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀲𑀺𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀅𑀲𑀪𑀸𑀯𑀥𑀫𑁆𑀫𑁄 𑀲𑀗𑁆𑀓𑁂𑀢𑁄𑀯, 𑀇𑀥 𑀧𑀜𑁆𑀜𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. ‘‘𑀫𑁂𑀣𑀼𑀦𑀲𑀁𑀯𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀧𑀦𑀢𑁆𑀣𑀁 𑀲𑀦𑁆𑀥𑀸𑀬𑀸𑀢𑀺 𑀮𑀺𑀔𑀺𑀢𑀁. 𑀲𑀺𑀓𑁆𑀔𑀸𑀢𑀺 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁, 𑀲𑀺𑀓𑁆𑀔𑀦𑀪𑀸𑀯𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀲𑀸𑀚𑀻𑀯𑀦𑁆𑀢𑀺 𑀧𑀜𑁆𑀜𑀢𑁆𑀢𑀺. 𑀢𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀧𑀼𑀩𑁆𑀩𑁂 ‘‘𑀫𑁂𑀣𑀼𑀦𑀲𑀁𑀯𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀲𑀺𑀓𑁆𑀔𑀸𑀬 𑀕𑀼𑀡𑀲𑀫𑁆𑀫𑀢𑀸𑀬 𑀧𑀼𑀜𑁆𑀜𑀲𑀫𑁆𑀫𑀢𑀸𑀬 𑀢𑀦𑁆𑀢𑀺𑀬𑀸 𑀅𑀪𑀸𑀯𑀢𑁄 𑀮𑁄𑀓𑀲𑁆𑀲 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀢𑀢𑁆𑀣 𑀦 𑀲𑀫𑁆𑀪𑀯𑀢𑀺. 𑀧𑀢𑁆𑀣𑀦𑀻𑀬𑀸 𑀳𑀺 𑀲𑀸, 𑀢𑀲𑁆𑀫𑀸 ‘‘𑀬𑀜𑁆𑀘 𑀲𑀸𑀚𑀻𑀯𑀁 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀫𑀺𑀁 𑀤𑀼𑀩𑁆𑀩𑀮𑀪𑀸𑀯𑀁 𑀅𑀧𑁆𑀧𑀓𑀸𑀲𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀆𑀡𑀸𑀬 𑀳𑀺 𑀤𑀼𑀩𑁆𑀩𑀮𑁆𑀬𑀁 𑀲𑀫𑁆𑀪𑀯𑀢𑀻𑀢𑀺 𑀉𑀧𑀢𑀺𑀲𑁆𑀲𑁄. 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀧𑀤𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀧𑀤𑀲𑁆𑀲 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬 𑀯𑀸 𑀧𑀭𑀺𑀯𑀸𑀭𑀓𑀪𑀸𑀯𑁂𑀦 𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀬𑀲𑁆𑀫𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲 𑀏𑀓𑀘𑁆𑀘𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀅𑀓𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬 ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀆𑀳. 𑀢𑀢𑁆𑀣 𑀲𑀺𑀬𑀸 𑀬𑀲𑁆𑀫𑀸 𑀦 𑀲𑀩𑁆𑀩𑀁 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀁 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁, 𑀢𑀲𑁆𑀫𑀸 ‘‘𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀧𑀞𑀫𑀁 𑀯𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀦𑀺𑀬𑀫𑀢𑁆𑀣𑀁 ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀢𑀁 𑀦, 𑀓𑀲𑁆𑀫𑀸? 𑀅𑀢𑁆𑀣𑀸𑀦𑀼𑀓𑁆𑀓𑀫𑀸𑀪𑀸𑀯𑀢𑁄. ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺 𑀳𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀬𑀁 𑀲𑀺𑀓𑁆𑀔𑀁 𑀲𑀫𑀸𑀧𑀦𑁆𑀦𑁄, 𑀢𑀁 𑀅𑀧𑀘𑁆𑀘𑀓𑁆𑀔𑀸𑀬, 𑀬𑀜𑁆𑀘 𑀲𑀸𑀚𑀻𑀯𑀁 𑀲𑀫𑀸𑀧𑀦𑁆𑀦𑁄, 𑀢𑀢𑁆𑀣 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁂 𑀅𑀦𑀼𑀓𑁆𑀓𑀫𑁂𑀦𑁂𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺, 𑀦 𑀅𑀜𑁆𑀜𑀣𑀸, 𑀢𑀲𑁆𑀫𑀸 𑀇𑀤𑀫𑁂𑀯 𑀧𑀞𑀫𑀁 𑀯𑀼𑀢𑁆𑀢𑀦𑁆𑀢𑀺. 𑀢𑁂𑀲𑀁𑀬𑁂𑀯𑀸𑀢𑀺 𑀘𑀼𑀤𑁆𑀤𑀲𑀦𑁆𑀦𑀁.

‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀸𑀥𑀸𑀭𑀡𑀢𑁆𑀣𑀁 ‘‘𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀧𑀯𑁂𑀲𑀦𑀁 𑀦𑀸𑀫 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀅𑀗𑁆𑀕𑀚𑀸𑀢𑁂𑀦 𑀲𑀫𑁆𑀨𑀼𑀲𑀦𑀁. 𑀧𑀯𑀺𑀝𑁆𑀞𑀁 𑀦𑀸𑀫 𑀬𑀸𑀯 𑀫𑀽𑀮𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀯𑀺𑀧𑁆𑀧𑀓𑀢𑀓𑀸𑀮𑁄 𑀯𑀸𑀬𑀸𑀫𑀓𑀸𑀮𑁄. 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀲𑀫𑀬𑁂 𑀅𑀗𑁆𑀕𑀚𑀸𑀢𑀁 𑀞𑀺𑀢𑀁 𑀦𑀸𑀫. 𑀉𑀤𑁆𑀥𑀭𑀡𑀁 𑀦𑀸𑀫 𑀦𑀻𑀳𑀭𑀡𑀓𑀸𑀮𑁄. 𑀯𑀺𑀦𑀬𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀯𑀸𑀬𑀸𑀫𑀢𑁄 𑀑𑀭𑀫𑀺𑀢𑁆𑀯𑀸 𑀞𑀸𑀦𑀁 𑀞𑀺𑀢𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀯𑁂𑀲𑀦𑀧𑀯𑀺𑀝𑁆𑀞𑀉𑀤𑁆𑀥𑀭𑀡𑀓𑀸𑀮𑁂𑀲𑀼𑀧𑀺 𑀲𑀼𑀓𑁆𑀓𑀯𑀺𑀲𑀝𑁆𑀞𑀺 𑀳𑁄𑀢𑀺𑀬𑁂𑀯. 𑀲𑀸𑀤𑀺𑀬𑀦𑀁 𑀦𑀸𑀫 𑀲𑁂𑀯𑀦𑀘𑀺𑀢𑁆𑀢𑀲𑁆𑀲 𑀅𑀥𑀺𑀯𑀸𑀲𑀦𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀦𑀁.

𑀉𑀪𑀢𑁄𑀯𑀺𑀪𑀗𑁆𑀕𑁂 𑀏𑀯 𑀧𑀜𑁆𑀜𑀢𑁆𑀢𑀸𑀦𑀺 𑀲𑀦𑁆𑀥𑀸𑀬 ‘‘𑀇𑀤𑀜𑁆𑀳𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀦𑀺𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀸’’𑀢𑀺 (𑀫𑀳𑀸𑀯. 𑁨𑁫𑁯) 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀢𑀢𑀺𑀬𑀸 𑀲𑀳𑀬𑁄𑀕𑁂𑀦 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀯𑀻𑀲𑀢𑀺𑀧𑀺 𑀪𑀺𑀓𑁆𑀔𑀽 𑀘𑁂 𑀦𑀺𑀲𑀺𑀦𑁆𑀦𑀸, 𑀧𑀜𑁆𑀘𑀫𑁄 𑀯𑀺𑀦𑀬𑀥𑀭𑁄𑀯 𑀇𑀘𑁆𑀙𑀺𑀢𑀩𑁆𑀩𑁄, 𑀏𑀯𑀁 𑀲𑀢𑀺 𑀧𑀸𑀭𑀸𑀚𑀺𑀓𑁄 𑀘𑁂 𑀯𑀺𑀦𑀬𑀥𑀭𑁄, 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀘𑁂? 𑀦, 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀓𑀫𑁆𑀫𑀯𑀕𑁆𑀕𑁂 (𑀧𑀭𑀺. 𑁪𑁮𑁨 𑀆𑀤𑀬𑁄) 𑀬𑀁 𑀓𑀫𑁆𑀫𑀯𑀺𑀧𑀢𑁆𑀢𑀺𑀮𑀓𑁆𑀔𑀡𑀁 𑀯𑀼𑀢𑁆𑀢𑀁, 𑀢𑀲𑁆𑀲 𑀢𑀲𑁆𑀫𑀺𑀁 𑀦𑀢𑁆𑀣𑀺𑀢𑀸𑀬. ‘‘𑀓𑀣𑀁 𑀯𑀢𑁆𑀣𑀼𑀢𑁄 𑀯𑀸 𑀜𑀢𑁆𑀢𑀺𑀢𑁄 𑀯𑀸 𑀅𑀦𑀼𑀲𑁆𑀲𑀸𑀯𑀦𑀢𑁄 𑀯𑀸 𑀲𑀻𑀫𑀢𑁄 𑀯𑀸 𑀧𑀭𑀺𑀲𑀢𑁄 𑀯𑀸’’𑀢𑀺 𑀏𑀢𑁆𑀢𑀓𑀁 𑀯𑀼𑀢𑁆𑀢𑀁, 𑀦𑀦𑀼 𑀅𑀬𑀁 ‘‘𑀧𑀭𑀺𑀲𑀢𑁄 𑀯𑀸’’𑀢𑀺 𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀘𑁂? 𑀦, ‘‘𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀲𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀻’’𑀢𑀺 (𑀧𑀭𑀺. 𑁪𑁮𑁭) 𑀲𑀼𑀢𑁆𑀢𑀲𑁆𑀲 𑀳𑀺 𑀯𑀺𑀪𑀗𑁆𑀕𑁂 𑀢𑀲𑁆𑀲 𑀅𑀦𑀸𑀫𑀝𑁆𑀞𑀢𑁆𑀢𑀸𑀢𑀺 𑀅𑀬𑀫𑀢𑁆𑀣𑁄 𑀬𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣 𑀲𑀭𑀽𑀧𑁂𑀦 𑀯𑀼𑀢𑁆𑀢𑀧𑀸𑀴𑀺𑀯𑀲𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀢𑀲𑁆𑀫𑀸 𑀦𑀬𑀫𑀼𑀔𑀁 𑀤𑀲𑁆𑀲𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑁄𑀢𑀺 𑀮𑀺𑀔𑀺𑀢𑀁. ‘‘𑀅𑀗𑁆𑀕’’𑀦𑁆𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀆𑀧𑀢𑁆𑀢𑀻𑀦𑀁 𑀅𑀗𑁆𑀕𑀸𑀦𑀗𑁆𑀕𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀥 𑀧𑀦 ‘‘𑀅𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀲𑁆𑀫𑀸? 𑀲𑀫𑀼𑀝𑁆𑀞𑀦𑀸𑀤𑀻𑀦𑀁 𑀧𑀭𑀺𑀯𑀸𑀭𑀸𑀤𑀻𑀲𑀼 𑀲𑀗𑁆𑀔𑁂𑀧𑁂𑀦 𑀆𑀕𑀢𑀢𑁆𑀢𑀸 𑀢𑀢𑁆𑀣 𑀕𑀳𑁂𑀢𑁆𑀯𑀸 𑀇𑀥𑀸𑀧𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀅𑀦𑀗𑁆𑀕𑀸𑀦𑀁 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄, 𑀲𑀩𑁆𑀩𑀢𑁆𑀣 𑀲𑀗𑁆𑀔𑁂𑀧𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀅𑀦𑀗𑁆𑀕𑀢𑁆𑀢𑁂 𑀯𑀼𑀘𑁆𑀘𑀫𑀸𑀦𑁂 𑀅𑀢𑀺𑀯𑀺𑀢𑁆𑀣𑀸𑀭𑀢𑀸𑀬 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀅𑀦𑀽𑀦𑀁 𑀯𑀢𑁆𑀢𑀩𑁆𑀩𑀢𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀲𑀩𑁆𑀩𑀸𑀧𑀢𑁆𑀢𑀻𑀦𑀁 𑀲𑀗𑁆𑀕𑀸𑀳𑀓𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀬𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀓𑀺𑀭𑀺𑀬𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀓𑀸𑀬𑀯𑀸𑀘𑀸 𑀲𑀳 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀓𑀺𑀭𑀺𑀬𑀸𑀦𑀁 𑀯𑀲𑁂𑀦 𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀘𑀺𑀢𑁆𑀢𑀁 𑀧𑀦𑁂𑀢𑁆𑀣 𑀅𑀧𑁆𑀧𑀫𑀸𑀡𑀁 𑀪𑀽𑀢𑀸𑀭𑁄𑀘𑀦𑀲𑀫𑀼𑀝𑁆𑀞𑀸𑀦𑀲𑁆𑀲 𑀓𑀺𑀭𑀺𑀬𑀢𑁆𑀢𑀸, 𑀅𑀘𑀺𑀢𑁆𑀢𑀓𑀢𑁆𑀢𑀸 𑀘. 𑀢𑀢𑁆𑀣 𑀓𑀺𑀭𑀺𑀬𑀸 𑀆𑀧𑀢𑁆𑀢𑀺𑀬𑀸 𑀅𑀦𑀗𑁆𑀕𑀦𑁆𑀢𑀭𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀫𑁆𑀧𑀺 𑀏𑀓𑀘𑁆𑀘𑀁 𑀩𑀸𑀳𑀼𑀮𑁆𑀮𑀦𑀬𑁂𑀦 ‘‘𑀓𑀺𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀬𑀣𑁂𑀯 𑀧𑀞𑀫𑀧𑀸𑀭𑀸𑀚𑀺𑀓𑀁. 𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑁂𑀧𑀺 ‘‘𑀲𑁄 𑀘𑁂 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁, 𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸𑀧𑀺 𑀓𑀺𑀭𑀺𑀬𑀸 𑀯𑀺𑀦𑀸 𑀲𑁂𑀯𑀦𑀘𑀺𑀢𑁆𑀢𑁂𑀦 𑀦 𑀳𑁄𑀢𑀺 𑀯𑀼𑀢𑁆𑀢𑀘𑀺𑀢𑁆𑀢𑀚𑀢𑁆𑀢𑀸, 𑀯𑀺𑀓𑀸𑀭𑀭𑀽𑀧𑀢𑁆𑀢𑀸, 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀓𑀢𑁆𑀢𑀸 𑀘. 𑀢𑀲𑁆𑀫𑀸 𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑀫𑀺𑀤𑀁 𑀯𑀺𑀜𑁆𑀜𑀢𑁆𑀢𑀺𑀭𑀽𑀧𑀁, 𑀇𑀢𑀭𑀁 𑀘𑀺𑀢𑁆𑀢𑀚𑀭𑀽𑀧𑀁 𑀯𑀺𑀬 𑀚𑀦𑀓𑀘𑀺𑀢𑁆𑀢𑁂𑀦 𑀯𑀺𑀦𑀸 𑀦 𑀢𑀺𑀝𑁆𑀞𑀢𑀺, 𑀇𑀢𑀭𑀁 𑀲𑀤𑁆𑀤𑀸𑀬𑀢𑀦𑀁 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀓𑀺𑀭𑀺𑀬𑀸𑀬 𑀲𑀢𑀺 𑀏𑀓𑀦𑁆𑀢𑀢𑁄 𑀢𑀚𑁆𑀚𑀦𑀓𑀁 𑀲𑁂𑀯𑀦𑀘𑀺𑀢𑁆𑀢𑀁 𑀅𑀢𑁆𑀣𑀺 𑀏𑀯𑀸𑀢𑀺 𑀓𑀢𑁆𑀯𑀸 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺. 𑀬𑀲𑁆𑀫𑀸 𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀫𑁆𑀧𑀺 𑀲𑀫𑀸𑀦𑀁 𑀲𑁂𑀯𑀦𑀘𑀺𑀢𑁆𑀢𑀁 𑀦 𑀲𑀩𑁆𑀩𑀓𑀸𑀮𑀁 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀢𑀺, 𑀢𑀲𑁆𑀫𑀸 𑀯𑀺𑀦𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 ‘‘𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀦𑀼𑀧𑁆𑀧𑀚𑁆𑀚𑀢𑀺 𑀘𑁂, 𑀦 𑀲𑀸𑀤𑀺𑀬𑀢𑀺 𑀦𑀸𑀫, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀢𑁂𑀦𑁂𑀯 𑀪𑀕𑀯𑀸 ‘‘𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺 (𑀧𑀸𑀭𑀸. 𑁧𑁩𑁫) 𑀘𑀺𑀢𑁆𑀢𑁂𑀦𑁂𑀯 𑀆𑀧𑀢𑁆𑀢𑀺𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀦 𑀓𑀺𑀭𑀺𑀬𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑀁 𑀓𑀢𑁆𑀢𑀩𑁆𑀩𑀢𑁄 𑀯𑀸 𑀅𑀓𑀢𑁆𑀢𑀩𑁆𑀩𑀢𑁄 𑀯𑀸 𑀓𑀸𑀬𑀸𑀤𑀺𑀪𑁂𑀤𑀸𑀧𑁂𑀓𑁆𑀔𑀫𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑀦𑀧𑁆𑀧𑀬𑁄𑀚𑀦𑀁. 𑀢𑁂𑀲𑀼 𑀓𑀺𑀭𑀺𑀬𑀸𑀕𑁆𑀕𑀳𑀡𑀁 𑀓𑀸𑀬𑀸𑀤𑀻𑀦𑀁 𑀲𑀯𑀺𑀜𑁆𑀜𑀢𑁆𑀢𑀺𑀓𑀸𑀯𑀺𑀜𑁆𑀜𑀢𑁆𑀢𑀺𑀓𑀪𑁂𑀤𑀤𑀲𑁆𑀲𑀦𑀧𑁆𑀧𑀬𑁄𑀚𑀦𑀁. 𑀲𑀜𑁆𑀜𑀸𑀕𑁆𑀕𑀳𑀡𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀸𑀦𑀗𑁆𑀕𑀘𑀺𑀢𑁆𑀢𑀯𑀺𑀲𑁂𑀲𑀤𑀲𑁆𑀲𑀦𑀧𑁆𑀧𑀬𑁄𑀚𑀦𑀁. 𑀢𑁂𑀦 𑀬𑀁 𑀘𑀺𑀢𑁆𑀢𑀁 𑀓𑀺𑀭𑀺𑀬𑀮𑀓𑁆𑀔𑀡𑁂 𑀯𑀸 𑀅𑀓𑀺𑀭𑀺𑀬𑀮𑀓𑁆𑀔𑀡𑁂 𑀯𑀸 𑀲𑀦𑁆𑀦𑀺𑀳𑀺𑀢𑀁, 𑀬𑀢𑁄 𑀯𑀸 𑀓𑀺𑀭𑀺𑀬𑀸 𑀯𑀸 𑀅𑀓𑀺𑀭𑀺𑀬𑀸 𑀯𑀸 𑀳𑁄𑀢𑀺, 𑀦 𑀢𑀁 𑀅𑀯𑀺𑀲𑁂𑀲𑁂𑀦 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀯𑀸 𑀅𑀦𑀗𑁆𑀕𑀁 𑀯𑀸 𑀳𑁄𑀢𑀺. 𑀓𑀺𑀦𑁆𑀢𑀼 𑀬𑀸𑀬 𑀲𑀜𑁆𑀜𑀸𑀬 ‘‘𑀲𑀜𑁆𑀜𑀸𑀯𑀺𑀫𑁄𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀅𑀗𑁆𑀕𑀁, 𑀇𑀢𑀭𑀁 𑀅𑀦𑀗𑁆𑀕𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀤𑀸𑀦𑀺 𑀬𑁂𑀦 𑀘𑀺𑀢𑁆𑀢𑁂𑀦 𑀲𑀺𑀓𑁆𑀔𑀸𑀧𑀤𑀁 𑀲𑀘𑀺𑀢𑁆𑀢𑀓𑀁 𑀳𑁄𑀢𑀺, 𑀢𑀤𑀪𑀸𑀯𑀸 𑀅𑀘𑀺𑀢𑁆𑀢𑀓𑀁, 𑀢𑁂𑀦 𑀢𑀲𑁆𑀲 𑀅𑀯𑀺𑀲𑁂𑀲𑁂𑀦 𑀲𑀸𑀯𑀚𑁆𑀚𑀢𑀸𑀬 ‘‘𑀮𑁄𑀓𑀯𑀚𑁆𑀚𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀓𑀺𑀦𑁆𑀢𑀼 𑀲𑀸𑀯𑀚𑁆𑀚𑀁𑀬𑁂𑀯 𑀲𑀫𑀸𑀦𑀁 𑀏𑀓𑀘𑁆𑀘𑀁 𑀮𑁄𑀓𑀯𑀚𑁆𑀚𑀁, 𑀏𑀓𑀘𑁆𑀘𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀦𑁆𑀢𑀺 𑀤𑀲𑁆𑀲𑀦𑀧𑁆𑀧𑀬𑁄𑀚𑀦𑀁 𑀘𑀺𑀢𑁆𑀢𑀮𑁄𑀓𑀯𑀚𑁆𑀚𑀕𑁆𑀕𑀳𑀡𑀁. 𑀘𑀺𑀢𑁆𑀢𑀫𑁂𑀯 𑀬𑀲𑁆𑀫𑀸 ‘‘𑀮𑁄𑀓𑀯𑀚𑁆𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀫𑀦𑁄𑀓𑀫𑁆𑀫𑀫𑁆𑀧𑀺 𑀲𑀺𑀬𑀸 𑀆𑀧𑀢𑁆𑀢𑀻𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀧𑁆𑀧𑀬𑁄𑀚𑀦𑀁 𑀓𑀫𑁆𑀫𑀕𑁆𑀕𑀳𑀡𑀁.

𑀬𑀁 𑀧𑀦𑁂𑀢𑁆𑀣 𑀅𑀓𑀺𑀭𑀺𑀬𑀮𑀓𑁆𑀔𑀡𑀁 𑀓𑀫𑁆𑀫𑀁, 𑀢𑀁 𑀓𑀼𑀲𑀮𑀢𑁆𑀢𑀺𑀓𑀯𑀺𑀦𑀺𑀫𑀼𑀢𑁆𑀢𑀁 𑀲𑀺𑀬𑀸𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀧𑁆𑀧𑀬𑁄𑀚𑀦𑀁 𑀓𑀼𑀲𑀮𑀢𑁆𑀢𑀺𑀓𑀕𑁆𑀕𑀳𑀡𑀁. 𑀬𑀸 𑀧𑀦𑁂𑀢𑁆𑀣 𑀅𑀩𑁆𑀬𑀸𑀓𑀢𑀸𑀧𑀢𑁆𑀢𑀺, 𑀢𑀁 𑀏𑀓𑀘𑁆𑀘𑀁 𑀅𑀯𑁂𑀤𑀦𑀫𑁆𑀧𑀺 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀦𑀸𑀢𑁆𑀢𑀺𑀓𑀁 𑀏𑀢𑁆𑀣 𑀦 𑀮𑀩𑁆𑀪𑀢𑀻𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁 𑀯𑁂𑀤𑀦𑀸𑀢𑁆𑀢𑀺𑀓𑀕𑁆𑀕𑀳𑀡𑀁. 𑀲𑀺𑀓𑁆𑀔𑀸𑀧𑀤𑀜𑁆𑀳𑀺 𑀲𑀘𑀺𑀢𑁆𑀢𑀓𑀧𑀼𑀕𑁆𑀕𑀮𑀯𑀲𑁂𑀦 ‘‘𑀢𑀺𑀘𑀺𑀢𑁆𑀢𑀁 𑀢𑀺𑀯𑁂𑀤𑀦’’𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀅𑀘𑀺𑀢𑁆𑀢𑀓𑁂𑀦𑀸𑀧𑀦𑁆𑀦𑀫𑁆𑀧𑀺 ‘‘𑀢𑀺𑀘𑀺𑀢𑁆𑀢𑀁 𑀢𑀺𑀯𑁂𑀤𑀦’’𑀫𑀺𑀘𑁂𑀯 𑀯𑀼𑀘𑁆𑀘𑀢𑀺. 𑀢𑀢𑁆𑀭𑀺𑀤𑀁 𑀲𑀸𑀥𑀓𑀲𑀼𑀢𑁆𑀢𑀁 𑁋 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀅𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺 𑀅𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀺 (𑀧𑀭𑀺. 𑁩𑁨𑁪), 𑀅𑀢𑁆𑀣𑀸𑀧𑀢𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺 𑀓𑀼𑀲𑀮𑀘𑀺𑀢𑁆𑀢𑁄 𑀯𑀼𑀝𑁆𑀞𑀸𑀢𑀻’’𑀢𑀺𑀆𑀤𑀺 (𑀧𑀭𑀺. 𑁪𑁭𑁦). ‘‘𑀲𑀘𑀺𑀢𑁆𑀢𑀓𑀁 𑀆𑀧𑀢𑁆𑀢𑀺𑀤𑀻𑀧𑀦𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀅𑀦𑀸𑀧𑀢𑁆𑀢𑀺𑀤𑀻𑀧𑀦𑀁, 𑀅𑀘𑀺𑀢𑁆𑀢𑀓𑀁 𑀯𑀢𑁆𑀣𑀼𑀅𑀚𑀸𑀦𑀦𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀯𑀻𑀢𑀺𑀓𑁆𑀓𑀫𑀦𑀸𑀚𑀸𑀦𑀦𑀁. 𑀇𑀤𑀫𑁂𑀯 𑀢𑁂𑀲𑀁 𑀦𑀸𑀦𑀸𑀢𑁆𑀢’’𑀦𑁆𑀢𑀺 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁬𑁧-𑁬𑁬 𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸) 𑀮𑀺𑀔𑀺𑀢𑀁.

𑀲𑀘𑀺𑀢𑁆𑀢𑀓𑀧𑀓𑁆𑀔𑁂𑀢𑀺 𑀏𑀢𑁆𑀣 𑀅𑀬𑀁 𑀢𑀸𑀯 𑀕𑀡𑁆𑀞𑀺𑀧𑀤𑀦𑀬𑁄 𑁋 𑀲𑀘𑀺𑀢𑁆𑀢𑀓𑀧𑀓𑁆𑀔𑁂𑀢𑀺 𑀲𑀼𑀭𑀸𑀧𑀸𑀦𑀸𑀤𑀺𑀅𑀘𑀺𑀢𑁆𑀢𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑀺𑀢𑁆𑀢𑀓𑁂𑀲𑀼 𑀧𑀦 𑀬𑀁 𑀏𑀓𑀦𑁆𑀢𑀫𑀓𑀼𑀲𑀮𑁂𑀦𑁂𑀯 𑀲𑀫𑀼𑀝𑁆𑀞𑀸𑀢𑀺, 𑀢𑀜𑁆𑀘 𑀉𑀪𑀬𑀁 𑀮𑁄𑀓𑀯𑀚𑁆𑀚𑀁 𑀦𑀸𑀫. 𑀲𑀼𑀭𑀸𑀧𑀸𑀦𑀲𑁆𑀫𑀺𑀜𑁆𑀳𑀺 ‘‘𑀲𑀼𑀭𑀸’’𑀢𑀺 𑀯𑀸 ‘‘𑀧𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀸 𑀚𑀸𑀦𑀺𑀢𑁆𑀯𑀸 𑀧𑀺𑀯𑀦𑁂 𑀅𑀓𑀼𑀲𑀮𑀫𑁂𑀯𑀸𑀢𑀺. 𑀢𑀢𑁆𑀣 ‘‘𑀦 𑀯𑀝𑁆𑀝𑀢𑀻𑀢𑀺 𑀚𑀸𑀦𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀦 𑀬𑀼𑀚𑁆𑀚𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑁆𑀲𑀧𑀺 𑀮𑁄𑀓𑀯𑀚𑁆𑀚𑀢𑀸𑀧𑀲𑀗𑁆𑀕𑀢𑁄. 𑀇𑀫𑀁 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀁 𑀧𑀭𑀺𑀳𑀭𑀺𑀢𑀼𑀓𑀸𑀫𑀢𑀸𑀬 𑀘 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁂𑀦 𑀮𑀺𑀔𑀺𑀢𑀁 𑁋 ‘‘𑀇𑀥 ‘𑀲𑀘𑀺𑀢𑁆𑀢𑀓’𑀦𑁆𑀢𑀺 𑀘 ‘𑀅𑀘𑀺𑀢𑁆𑀢𑀓’𑀦𑁆𑀢𑀺 𑀘 𑀯𑀺𑀘𑀸𑀭𑀡𑀸 𑀯𑀢𑁆𑀣𑀼𑀯𑀺𑀚𑀸𑀦𑀦𑁂 𑀏𑀯 𑀳𑁄𑀢𑀺, 𑀦 𑀧𑀜𑁆𑀜𑀢𑁆𑀢𑀺𑀯𑀺𑀚𑀸𑀦𑀦𑁂. 𑀬𑀤𑀺 𑀧𑀜𑁆𑀜𑀢𑁆𑀢𑀺𑀯𑀺𑀚𑀸𑀦𑀦𑁂 𑀳𑁄𑀢𑀺, 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀮𑁄𑀓𑀯𑀚𑁆𑀚𑀸𑀦𑁂𑀯 𑀲𑀺𑀬𑀼𑀁, 𑀦 𑀘 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀮𑁄𑀓𑀯𑀚𑁆𑀚𑀸𑀦𑀺. 𑀢𑀲𑁆𑀫𑀸 𑀯𑀢𑁆𑀣𑀼𑀯𑀺𑀚𑀸𑀦𑀦𑁂 𑀏𑀯 𑀳𑁄𑀢𑀻𑀢𑀺 𑀇𑀤𑀁 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑁂𑀔𑀺𑀬𑁂𑀲𑀼 𑀧𑀜𑁆𑀜𑀢𑁆𑀢𑀺𑀯𑀺𑀚𑀸𑀦𑀦𑀫𑁂𑀯 𑀧𑀫𑀸𑀡𑀁, 𑀦 𑀯𑀢𑁆𑀣𑀼𑀫𑀢𑁆𑀢𑀯𑀺𑀚𑀸𑀦𑀦’’𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀲𑀺𑀓𑁆𑀔𑀸𑀧𑀤𑀲𑀻𑀲𑁂𑀦 𑀆𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀬𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀲𑀘𑀺𑀢𑁆𑀢𑀓𑀲𑁆𑀲 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀁 𑀮𑁄𑀓𑀯𑀚𑁆𑀚𑀁, 𑀲𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑀲𑀗𑁆𑀔𑀸𑀢𑀲𑁆𑀲 𑀅𑀘𑀺𑀢𑁆𑀢𑀓𑀲𑁆𑀲 𑀘 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀫𑁆𑀧𑀺 𑀲𑀼𑀭𑀸𑀧𑀸𑀦𑀸𑀤𑀺𑀮𑁄𑀓𑀯𑀚𑁆𑀚𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀬𑀲𑁆𑀲𑀸 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀅𑀬𑀁 𑀮𑁄𑀓𑀯𑀚𑁆𑀚𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺 𑀳𑀺 𑀇𑀤𑀁 𑀯𑀘𑀦𑀁 𑀅𑀘𑀺𑀢𑁆𑀢𑀓𑀁 𑀲𑀦𑁆𑀥𑀸𑀬𑀸𑀳. 𑀦 𑀳𑀺 𑀏𑀓𑀁𑀲𑀢𑁄 𑀲𑀘𑀺𑀢𑁆𑀢𑀓𑀸𑀬 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺 𑀯𑀺𑀲𑁂𑀲𑀦𑁂 𑀧𑀬𑁄𑀚𑀦𑀁 𑀅𑀢𑁆𑀣𑀻𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀦𑀺𑀬𑀫𑁂𑀦 𑀯𑀼𑀢𑁆𑀢𑀜𑁆𑀘 𑀦𑀺𑀬𑀫𑀯𑀲𑁂𑀦 𑀏𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀢𑀺𑀭𑀘𑁆𑀙𑀸𑀦𑀸𑀦𑀁 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁂𑀦 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀓𑀸𑀭𑀁 𑀦𑀺𑀯𑀢𑁆𑀢𑁂𑀢𑀺. 𑀓𑀺𑀭𑀺𑀬𑀸𑀢𑀺 𑀏𑀢𑁆𑀣 ‘‘𑀞𑀺𑀢𑀁 𑀲𑀸𑀤𑀺𑀬𑀢𑀻’’𑀢𑀺 (𑀧𑀸𑀭𑀸. 𑁫𑁮) 𑀯𑀼𑀢𑁆𑀢𑀢𑁆𑀢𑀸 𑀢𑀁 𑀓𑀣𑀦𑁆𑀢𑀺 𑀘𑁂? ‘‘𑀲𑀸𑀤𑀺𑀬𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀺𑀭𑀺𑀬𑀸 𑀏𑀯. 𑀏𑀯𑀁 𑀲𑀦𑁆𑀢𑁂 ‘‘𑀓𑀸𑀬𑀓𑀫𑁆𑀫𑀁 𑀫𑀦𑁄𑀓𑀫𑁆𑀫’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀧𑀘𑀼𑀭𑀯𑁄𑀳𑀸𑀭𑀯𑀲𑁂𑀦 ‘‘𑀓𑀸𑀬𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸𑀬 𑀮𑀩𑁆𑀪𑀢𑀺 𑀏𑀯𑀸𑀢𑀺 𑀮𑀺𑀔𑀺𑀢𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀲𑀁𑀲𑀦𑁆𑀤𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. ‘‘𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀅𑀢𑁆𑀣𑁄𑀧𑀺 𑀤𑀼𑀦𑁆𑀦𑀬𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁨.𑁨𑁦) 𑀯𑀤𑀦𑁆𑀢𑁂𑀦𑀸𑀧𑀺 𑀅𑀢𑁆𑀣𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀫𑁂𑀯 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀲𑀼𑀦𑀺𑀓𑁆𑀔𑀺𑀢𑁆𑀢𑀪𑀸𑀯𑁄 𑀇𑀘𑁆𑀙𑀺𑀢𑁄, 𑀦 𑀅𑀓𑁆𑀔𑀭𑀯𑀘𑀦𑀸𑀬, 𑀢𑀲𑁆𑀫𑀸 𑀆𑀳 ‘‘𑀅𑀢𑁆𑀣𑀜𑁆𑀳𑀺 𑀦𑀸𑀣𑁄 𑀲𑀭𑀡𑀁 𑀅𑀯𑁄𑀘𑀸’’𑀢𑀺𑀆𑀤𑀺.

𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸𑀢𑀺 𑀮𑀓𑁆𑀔𑀡𑀸𑀦𑀼𑀧𑀜𑁆𑀜𑀢𑁆𑀢𑀺𑀓𑀢𑁆𑀢𑀸 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀲𑁆𑀫𑀺𑀜𑁆𑀳𑀺 𑀯𑀺𑀦𑀬𑀧𑀺𑀝𑀓𑁂 𑀕𑀸𑀫𑁄, 𑀕𑀸𑀫𑀽𑀧𑀘𑀸𑀭𑁄, 𑀕𑀸𑀫𑀓𑁆𑀔𑁂𑀢𑁆𑀢𑀁, 𑀕𑀸𑀫𑀲𑀻𑀫𑀸, 𑀕𑀸𑀫𑀲𑀻𑀫𑀽𑀧𑀘𑀸𑀭𑁄𑀢𑀺 𑀧𑀜𑁆𑀘𑀯𑀺𑀥𑁄 𑀕𑀸𑀫𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀆𑀭𑀜𑁆𑀜𑀓𑀲𑀻𑀫𑀸𑀬 𑀏𑀓𑀁 𑀅𑀕𑀸𑀫𑀓𑀁 𑀅𑀭𑀜𑁆𑀜𑀁, 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀸𑀦𑀁 (𑀧𑀸𑀘𑀺. 𑁧𑁮𑁦 𑀆𑀤𑀬𑁄) 𑀏𑀓𑀁, 𑀲𑀕𑀸𑀫𑀓𑀁 𑀏𑀓𑀁, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀏𑀓𑀁, 𑀕𑀡𑀫𑁆𑀳𑀸𑀑𑀳𑀻𑀬𑀦𑀓𑀲𑁆𑀲 (𑀧𑀸𑀘𑀺. 𑁬𑁯𑁧) 𑀏𑀓𑀦𑁆𑀢𑀺 𑀧𑀜𑁆𑀘𑀯𑀺𑀥𑁄 𑀅𑀭𑀜𑁆𑀜𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀢𑁆𑀣𑀺 𑀕𑀸𑀫𑁄 𑀦 𑀕𑀸𑀫𑀧𑀭𑀺𑀳𑀸𑀭𑀁 𑀓𑀢𑁆𑀣𑀘𑀺 𑀮𑀪𑀢𑀺, 𑀅𑀢𑁆𑀣𑀺 𑀕𑀸𑀫𑁄 𑀦 𑀕𑀸𑀫𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀢𑀣𑀸 𑀅𑀢𑁆𑀣𑀺 𑀅𑀭𑀜𑁆𑀜𑀁 𑀦 𑀅𑀭𑀜𑁆𑀜𑀧𑀭𑀺𑀳𑀸𑀭𑀁 𑀓𑀢𑁆𑀣𑀘𑀺 𑀮𑀪𑀢𑀺, 𑀅𑀢𑁆𑀣𑀺 𑀅𑀭𑀜𑁆𑀜𑀁 𑀦 𑀅𑀭𑀜𑁆𑀜𑀓𑀺𑀘𑁆𑀘𑀁 𑀓𑀭𑁄𑀢𑀻𑀢𑀺 𑀅𑀬𑀫𑁆𑀧𑀺 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀓𑀫𑁆𑀫𑀯𑀸𑀘𑀸𑀬 𑀞𑀧𑁂𑀢𑁆𑀯𑀸 ‘‘𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀏𑀢𑁆𑀣 𑀕𑀸𑀫𑁄 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘𑁂, 𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀘𑁂, 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑀢𑁄 𑀅𑀦𑁆𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 ‘‘𑀅𑀦𑁆𑀢𑁄𑀕𑀸𑀫𑁄’’𑀢𑀺 (𑀧𑀸𑀭𑀸. 𑁪𑁭𑁮) 𑀆𑀕𑀢𑁄. 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑁂 ‘‘𑀅𑀦𑁆𑀢𑀭𑀖𑀭’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪) 𑀆𑀕𑀢𑁄 𑀅𑀦𑀸𑀲𑀗𑁆𑀓𑀢𑁄. 𑀬𑀣𑀸𑀳 ‘‘𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀲𑀫𑀦𑁆𑀢𑀸 𑀕𑁄𑀘𑀭𑀕𑀸𑀫𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁬𑁫𑁪). 𑀢𑀣𑀸 𑀅𑀦𑁆𑀢𑀭𑀖𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀲𑁂𑀔𑀺𑀬𑀸𑀦𑀁 𑀅𑀬𑀫𑁂𑀯 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁬𑁮𑁭) 𑀏𑀢𑁆𑀣𑀸𑀧𑀺 𑀅𑀬𑀫𑁂𑀯 𑀧𑀭𑀺𑀘𑁆𑀙𑁂𑀤𑁄 𑀅𑀥𑀺𑀧𑁆𑀧𑁂𑀢𑁄 ‘‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑀦𑁆𑀢𑀺𑀬𑀸, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑀬𑁂𑀲𑀼 𑀧𑀼𑀭𑀸𑀡𑀧𑁄𑀢𑁆𑀣𑀓𑁂𑀲𑀼 ‘‘𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀺𑀬𑀸’’𑀢𑀺 𑀮𑀺𑀔𑀺𑀢𑀁, 𑀢𑀁 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑁂𑀲𑀼 𑀆𑀘𑀺𑀡𑁆𑀡𑀁 𑀦𑀬𑀁 𑀕𑀳𑁂𑀢𑁆𑀯𑀸 𑀧𑀫𑀸𑀤𑁂𑀦 𑀮𑀺𑀔𑀻𑀬𑀢𑀺, 𑀦 𑀧𑀫𑀸𑀡𑀁. 𑀬𑁂𑀲𑀼 𑀘 𑀧𑁄𑀢𑁆𑀣𑀓𑁂𑀲𑀼 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀺𑀪𑀗𑁆𑀕𑁂 (𑀧𑀸𑀘𑀺. 𑁫𑁧𑁩) ‘‘𑀕𑀸𑀫𑀁 𑀧𑀯𑀺𑀲𑁂𑀬𑁆𑀬𑀸𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀮𑀺𑀔𑀻𑀬𑀢𑀺, 𑀲𑀸 𑀧𑀫𑀸𑀤𑀮𑁂𑀔𑀸. 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀢𑀢𑁆𑀣 𑀧𑀸𑀞𑁄. 𑀯𑀼𑀢𑁆𑀢𑀜𑁆𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑁄 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁫𑁧𑁨). 𑀇𑀥 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀢𑀺…𑀧𑁂… 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺 (𑀓𑀗𑁆𑀔𑀸. 𑀅𑀝𑁆𑀞. 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸).

𑀬𑀁 𑀧𑀦 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀕𑀸𑀫𑀦𑁆𑀢𑀭𑀸𑀥𑀺𑀓𑀸𑀭𑁂 𑀏𑀓𑁂𑀦 𑀧𑀸𑀤𑁂𑀦 𑀇𑀢𑀭𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀯𑀸 𑀅𑀢𑀺𑀓𑁆𑀓𑀫𑀦𑁆𑀢𑁂, 𑀉𑀧𑀘𑀸𑀭𑀁 𑀯𑀸 𑀑𑀓𑁆𑀓𑀦𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂, 𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀘 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀑𑀓𑁆𑀓𑀦𑁆𑀢𑁂, 𑀑𑀓𑁆𑀓𑀦𑁆𑀢𑀫𑀢𑁆𑀢𑁂’’𑀢𑀺 𑀏𑀢𑀸𑀦𑀺 𑀧𑀤𑀸𑀦𑀺 𑀅𑀥𑀺𑀓𑀸𑀦𑀺, 𑀓𑁂𑀯𑀮𑀁 𑀮𑀺𑀔𑀺𑀢𑀓𑁂𑀳𑀺 𑀅𑀜𑁆𑀜𑁂𑀳𑀺 𑀮𑀺𑀔𑀺𑀢𑀸𑀦𑀺. 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 ‘‘𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀘𑀸’’𑀢𑀺 𑀧𑀤𑀁 𑀦 𑀤𑀺𑀲𑁆𑀲𑀢𑀺, 𑀇𑀢𑀭𑀁 𑀤𑀺𑀲𑁆𑀲𑀢𑀺. 𑀢𑀸𑀦𑀺 𑀤𑁆𑀯𑁂 𑀧𑀤𑀸𑀦𑀺 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀦𑁆𑀢𑀺. ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸’’𑀢𑀺 (𑀧𑀸𑀘𑀺. 𑁬𑁯𑁨) 𑀳𑀺 𑀧𑀸𑀴𑀺. 𑀢𑀣𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 (𑀧𑀸𑀘𑀺. 𑀅𑀝𑁆𑀞. 𑁬𑁯𑁨) 𑀯𑀺𑀭𑀼𑀚𑁆𑀛𑀦𑁆𑀢𑀺. ‘‘𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀏𑀓𑁂𑀦 𑀧𑀸𑀤𑁂𑀦 𑀅𑀢𑀺𑀓𑁆𑀓𑀫𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑁂𑀦 𑀅𑀢𑀺𑀓𑁆𑀓𑀫𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀧𑀺𑀘𑁂𑀢𑁆𑀣 𑀲𑀓𑀕𑀸𑀫𑀢𑁄…𑀧𑁂… 𑀏𑀓𑁂𑀦 𑀧𑀸𑀤𑁂𑀦 𑀇𑀢𑀭𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁂 𑀯𑀸 𑀉𑀧𑀘𑀸𑀭𑁂 𑀯𑀸 𑀅𑀢𑀺𑀓𑁆𑀓𑀦𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁯𑁨) 𑀳𑀺 𑀯𑀼𑀢𑁆𑀢𑀁.

𑀕𑀡𑁆𑀞𑀺𑀧𑀤𑁂 𑀘𑀲𑁆𑀲 ‘‘𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸’’𑀢𑀺 𑀯𑀢𑁆𑀯𑀸 ‘‘𑀉𑀧𑀘𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀘 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 ‘𑀑𑀓𑁆𑀓𑀫𑀦𑁆𑀢𑀺𑀬𑀸’𑀢𑀺𑀧𑀺 𑀧𑁄𑀢𑁆𑀣𑀓𑁂𑀲𑀼 𑀏𑀓𑀘𑁆𑀘𑁂𑀲𑀼 𑀤𑀺𑀲𑁆𑀲𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 ‘𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸’𑀢𑀺 𑀯𑀘𑀦𑁂𑀦𑀸𑀧𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑁂 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀏𑀯 𑀯𑀲𑁂𑀦 𑀉𑀧𑀘𑀸𑀭𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄, 𑀇𑀢𑀭𑀣𑀸 𑀬𑀣𑀸 𑀏𑀢𑁆𑀣 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀧𑀭𑀺𑀓𑁆𑀔𑁂𑀧𑀁 𑀯𑀺𑀬 𑀓𑀢𑁆𑀯𑀸 ‘𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀢𑀢𑁆𑀣𑀸𑀧𑀺 ‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲𑀸’𑀢𑀺 𑀯𑀤𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀢𑀢𑁆𑀣 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀉𑀢𑁆𑀢𑀭𑀺𑀫𑁂𑀓𑁄 𑀮𑁂𑀟𑁆𑀟𑀼𑀧𑀸𑀢𑁄 𑀉𑀧𑀘𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 ‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲𑀸’𑀢𑀺 𑀯𑀼𑀢𑁆𑀢’’𑀦𑁆𑀢𑀺.

𑀬𑀁 𑀧𑀦 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁𑀬𑁂𑀯 𑀉𑀧𑀘𑀸𑀭𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀧𑀭𑀺𑀓𑁆𑀔𑁂𑀧𑀧𑀅𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀸𑀦𑀁 𑀦𑀺𑀦𑁆𑀦𑀸𑀦𑀸𑀓𑀭𑀡𑀤𑀻𑀧𑀦𑀢𑁆𑀣𑀁 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀧𑀸𑀴𑀺𑀯𑀺𑀲𑁂𑀲𑀫𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀇𑀥 𑀉𑀧𑀘𑀸𑀭𑁄 𑀧𑀭𑀺𑀓𑁆𑀔𑁂𑀧𑁄 𑀬𑀣𑀸 𑀪𑀯𑁂𑀬𑁆𑀬, 𑀢𑀁 𑀉𑀧𑀘𑀸𑀭𑀁 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲, 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀫𑁂𑀯 𑀧𑀸𑀴𑀺𑀬𑀸 𑀯𑀺𑀲𑁂𑀲𑀲𑀫𑁆𑀪𑀯𑀢𑁄𑀢𑀺. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 ‘‘𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀇𑀥 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 ‘‘𑀏𑀓𑁂𑀦 𑀧𑀸𑀤𑁂𑀦 𑀇𑀢𑀭𑀲𑁆𑀲…𑀧𑁂… 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀅𑀬𑀫𑁂𑀯 𑀧𑀸𑀞𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀇𑀫𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀞𑀸𑀦𑁂𑀲𑀼 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁄𑀯 𑀕𑀸𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 ‘‘𑀕𑀸𑀫𑁄 𑀦𑀸𑀫 𑀏𑀓𑀓𑀼𑀝𑀺𑀓𑁄𑀧𑀻’’𑀢𑀺𑀆𑀤𑀺 (𑀧𑀸𑀭𑀸. 𑁯𑁨) 𑀯𑀼𑀢𑁆𑀢𑀁. 𑀇𑀫𑀲𑁆𑀲 𑀯𑀲𑁂𑀦 𑀅𑀲𑀢𑀺𑀧𑀺 𑀧𑀭𑀺𑀓𑁆𑀔𑁂𑀧𑀸𑀢𑀺𑀓𑁆𑀓𑀫𑁂, 𑀉𑀧𑀘𑀸𑀭𑁄𑀓𑁆𑀓𑀫𑀦𑁂 𑀯𑀸 𑀅𑀦𑁆𑀢𑀭𑀸𑀭𑀸𑀫𑀢𑁄 𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀢𑁄 𑀯𑀸 𑀢𑀺𑀢𑁆𑀣𑀺𑀬𑀲𑁂𑀬𑁆𑀬𑀢𑁄 𑀯𑀸 𑀧𑀝𑀺𑀓𑁆𑀓𑀫𑀦𑀢𑁄 𑀯𑀸 𑀢𑀁 𑀕𑀸𑀫𑀁 𑀧𑀯𑀺𑀲𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀭𑀸𑀫𑀧𑀭𑀺𑀓𑁆𑀔𑁂𑀧𑀲𑁆𑀲, 𑀉𑀧𑀘𑀸𑀭𑀲𑁆𑀲 𑀯𑀸 𑀅𑀢𑀺𑀓𑁆𑀓𑀫𑀦𑀯𑀲𑁂𑀦 𑀕𑀸𑀫𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀕𑀸𑀫𑀽𑀧𑀘𑀸𑀭𑁄 𑀧𑀦 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀏𑀢𑁆𑀣 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀯, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑁄𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀕𑀸𑀫𑀽𑀧𑀘𑀸𑀭𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑁄. 𑀢𑁂𑀲𑀼 𑀅𑀥𑀺𑀝𑁆𑀞𑀺𑀢𑀢𑁂𑀘𑀻𑀯𑀭𑀺𑀓𑁄 𑀪𑀺𑀓𑁆𑀔𑀼 𑀧𑀭𑀺𑀳𑀸𑀭𑀁 𑀦 𑀮𑀪𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁪). 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁, 𑀬𑁂𑀦 𑀅𑀬𑀁 𑀕𑀸𑀫𑁄, 𑀕𑀸𑀫𑀽𑀧𑀘𑀸𑀭𑁄 𑀘 𑀇𑀥 𑀅𑀜𑁆𑀜𑀣𑀸, 𑀅𑀜𑁆𑀜𑀢𑁆𑀣 𑀢𑀣𑀸𑀢𑀺? 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀢𑁄 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 ‘𑀪𑀕𑀯𑀢𑀸 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺 𑀅𑀦𑀼𑀜𑁆𑀜𑀸𑀢𑀸’𑀢𑀺 𑀅𑀦𑁆𑀢𑀭𑀖𑀭𑁂 𑀘𑀻𑀯𑀭𑀸𑀦𑀺 𑀦𑀺𑀓𑁆𑀔𑀺𑀧𑀦𑁆𑀢𑀻’’𑀢𑀺 (𑀫𑀳𑀸𑀯. 𑁧𑁪𑁩) 𑀇𑀫𑀺𑀲𑁆𑀲𑀸 𑀳𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀢𑁆𑀣 𑀅𑀦𑁆𑀢𑀭𑀖𑀭𑀲𑀜𑁆𑀜𑀸, 𑀢𑀢𑁆𑀣 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀦 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦 𑀘 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 ‘‘𑀅𑀦𑁆𑀢𑁄𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁪𑁭𑁮) 𑀘 ‘‘𑀲𑀪𑀸𑀬𑁂 𑀯𑀸 𑀤𑁆𑀯𑀸𑀭𑀫𑀽𑀮𑁂 𑀯𑀸, 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀯𑀲𑀦𑁆𑀢𑁄𑀬𑁂𑀯 𑀳𑀺 𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑀁 𑀭𑀓𑁆𑀔𑀢𑀺. 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑁂 𑀧𑀦 ‘‘𑀬𑀲𑁆𑀫𑀸 𑀬𑀢𑁆𑀣 𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑁂𑀦 𑀕𑀸𑀫𑁂𑀦 𑀯𑀺𑀧𑁆𑀧𑀯𑀲𑀦𑁆𑀢𑁄 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀧𑀼𑀦 𑀕𑀸𑀫𑀲𑀻𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀲𑀺𑀓𑁆𑀔𑀸𑀧𑀤𑁂 𑀕𑀸𑀫𑀲𑀻𑀫𑀸 𑀕𑀸𑀫𑁄 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀢𑁆𑀣 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 ‘‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁫𑁧𑁩) 𑀯𑀘𑀦𑀢𑁄 𑀧𑀭𑀺𑀓𑁆𑀔𑁂𑀧𑁄 𑀦 𑀕𑀸𑀫𑁄. 𑀓𑀺𑀦𑁆𑀢𑀼 𑀕𑀸𑀫𑀽𑀧𑀘𑀸𑀭𑁄𑀢𑀺 𑀮𑁂𑀲𑁂𑀦 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 ‘‘𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸’’𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀇𑀫𑀺𑀦𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑁄 𑀕𑀸𑀫𑀽𑀧𑀘𑀸𑀭𑁄𑀢𑀺 𑀲𑀺𑀤𑁆𑀥𑀁. 𑀢𑀤𑀢𑁆𑀣𑀲𑀫𑁆𑀪𑀯𑀢𑁄 𑀢𑀲𑁆𑀫𑀺𑀁 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄 𑀕𑀸𑀫𑀽𑀧𑀘𑀸𑀭𑁄𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁, 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀯𑀼𑀢𑁆𑀢𑀁. 𑀉𑀧𑀘𑀸𑀭𑁄 𑀳𑀺 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀦𑀽𑀧𑀘𑀸𑀭𑁄’’𑀢𑀺𑀆𑀤𑀻𑀲𑀼 𑀤𑁆𑀯𑀸𑀭𑀁, ‘‘𑀅𑀚𑁆𑀛𑁄𑀓𑀸𑀲𑁄 𑀏𑀓𑀽𑀧𑀘𑀸𑀭𑁄’’𑀢𑀺 𑀏𑀢𑁆𑀣 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀗𑁆𑀔𑀸𑀢𑀁 𑀧𑀫𑀸𑀡𑀁, 𑀢𑀲𑁆𑀫𑀸 ‘‘𑀕𑀸𑀫𑀽𑀧𑀘𑀸𑀭𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑁄’’𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀓𑀼𑀭𑀼𑀦𑁆𑀤𑀺𑀬𑀁, 𑀫𑀳𑀸𑀧𑀘𑁆𑀘𑀭𑀺𑀬𑀜𑁆𑀘. 𑀢𑀣𑀸 𑀧𑀸𑀴𑀺𑀬𑀫𑁆𑀧𑀺 ‘‘𑀅𑀚𑁆𑀛𑀸𑀭𑀸𑀫𑁄 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀆𑀭𑀸𑀫𑀲𑁆𑀲 𑀅𑀦𑁆𑀢𑁄 𑀆𑀭𑀸𑀫𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑁄. 𑀅𑀚𑁆𑀛𑀸𑀯𑀲𑀣𑁄 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀆𑀯𑀲𑀣𑀲𑁆𑀲 𑀅𑀦𑁆𑀢𑁄 𑀆𑀯𑀲𑀣𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑁄’’𑀢𑀺𑀆𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀕𑀸𑀫𑀽𑀧𑀘𑀸𑀭𑁄’’𑀢𑀺𑀆𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀤𑀼𑀢𑀺𑀬𑁄 𑀮𑁂𑀟𑁆𑀟𑀼𑀧𑀸𑀢𑁄 𑀉𑀧𑀘𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄.

‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀧𑀸𑀴𑀺𑀯𑀺𑀲𑁂𑀲𑀲𑀫𑁆𑀪𑀯𑀢𑁄 𑀘 𑀧𑀞𑀫𑁄 𑀮𑁂𑀟𑁆𑀟𑀼𑀧𑀸𑀢𑁄 𑀕𑀸𑀫𑁄 𑀏𑀯, 𑀤𑀼𑀢𑀺𑀬𑁄 𑀕𑀸𑀫𑀽𑀧𑀘𑀸𑀭𑁄𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄 𑀕𑀸𑀫𑀽𑀧𑀘𑀸𑀭𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀪𑁂𑀤𑁄 𑀦𑀢𑁆𑀣𑀺. 𑀏𑀢𑁆𑀢𑀸𑀯𑀢𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀤𑀼𑀯𑀺𑀥𑁄 𑀉𑀧𑀘𑀸𑀭𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀘𑀢𑀼𑀩𑁆𑀩𑀺𑀥𑁄 𑀉𑀧𑀘𑀸𑀭𑁄 𑀬𑀢𑁆𑀣 𑀲𑀫𑁆𑀪𑀯𑀢𑀺, 𑀬𑀢𑁆𑀣 𑀘 𑀦 𑀲𑀫𑁆𑀪𑀯𑀢𑀺, 𑀢𑀁 𑀲𑀩𑁆𑀩𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀕𑀸𑀫𑀔𑁂𑀢𑁆𑀢𑀲𑁆𑀲 𑀘 𑀕𑀸𑀫𑀲𑀻𑀫𑀸𑀬 𑀘 𑀮𑀓𑁆𑀔𑀡𑀁 𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀁. 𑀉𑀪𑀬𑀜𑁆𑀳𑀺 𑀅𑀢𑁆𑀣𑀢𑁄 𑀏𑀓𑀁. 𑀢𑀢𑁆𑀣 𑀕𑀸𑀫𑀲𑀻𑀫𑀸𑀬 𑀕𑀸𑀫𑀪𑀸𑀯𑁄 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀕𑀸𑀫𑀲𑀻𑀫𑀽𑀧𑀘𑀸𑀭𑁄 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀓𑀝𑁆𑀞𑀢𑀺𑀡𑀧𑀼𑀧𑁆𑀨𑀨𑀮𑀸𑀤𑀺𑀅𑀢𑁆𑀣𑀺𑀓𑀸𑀦𑀁 𑀯𑀦𑀘𑀭𑀓𑀸𑀦𑀁 𑀯𑀮𑀜𑁆𑀚𑀦𑀝𑁆𑀞𑀸𑀦𑀁. 𑀇𑀫𑀲𑁆𑀲 𑀕𑀸𑀫𑀲𑀻𑀫𑀽𑀧𑀘𑀸𑀭𑀪𑀸𑀯𑁄 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂, ‘‘𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸’’𑀢𑀺 (𑀧𑀸𑀭𑀸. 𑁪𑁯𑁪) 𑀆𑀕𑀢𑀝𑁆𑀞𑀸𑀦𑁂 𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁪𑁭) 𑀘 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀳𑀺 𑀪𑀕𑀯𑀸 𑀕𑀸𑀫𑀦𑁆𑀢𑀯𑀸𑀲𑀻𑀦𑀁 𑀪𑀺𑀓𑁆𑀔𑀽𑀦𑀁 𑀲𑀻𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀻’’𑀢𑀺 (𑀫𑀳𑀸𑀯. 𑁧𑁪𑁭) 𑀯𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑀤𑀦𑀦𑁆𑀢𑀭𑀫𑁂𑀯 ‘‘𑀅𑀕𑀸𑀫𑀓𑁂’’𑀢𑀺𑀆𑀤𑀺𑀦𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀦 𑀯𑀺𑀳𑀭𑀢𑀺, 𑀓𑁂𑀯𑀮𑀁 𑀦𑀸𑀯𑀸𑀬𑀁 𑀯𑀸 𑀣𑀮𑀫𑀕𑁆𑀕𑁂𑀦 𑀯𑀸 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀏𑀓𑀓𑀼𑀮𑀲𑁆𑀲 𑀲𑀢𑁆𑀣𑁄 𑀳𑁄𑀢𑀺, 𑀲𑀢𑁆𑀣𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀦 𑀯𑀺𑀚𑀳𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺 (𑀧𑀸𑀭𑀸. 𑁪𑁮𑁯). 𑀇𑀤𑀫𑁂𑀯 𑀅𑀭𑀜𑁆𑀜𑀁 𑀲𑀦𑁆𑀥𑀸𑀬 ‘‘𑀆𑀭𑀜𑁆𑀜𑀓𑀲𑀻𑀫𑀸𑀬 𑀏𑀓𑀁 𑀅𑀕𑀸𑀫𑀓𑀁 𑀅𑀭𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁.

𑀬𑀁 𑀲𑀦𑁆𑀥𑀸𑀬 ‘‘𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀅𑀤𑁆𑀥𑀬𑁄𑀚𑀦𑁂 𑀅𑀤𑁆𑀥𑀬𑁄𑀚𑀦𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁪𑁧𑁪) 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀇𑀤𑀁 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀸𑀦𑀁 𑀏𑀓𑀁 𑀅𑀕𑀸𑀫𑀓𑀁 𑀅𑀭𑀜𑁆𑀜𑀁 𑀦𑀸𑀫.

𑀧𑀼𑀭𑀺𑀫𑁂𑀦 𑀧𑀦 𑀲𑀖𑀭𑀁 𑀲𑀗𑁆𑀕𑀳𑀺𑀢𑀁, 𑀇𑀫𑀺𑀦𑀸 𑀢𑀫𑀲𑀗𑁆𑀕𑀳𑀺𑀢𑀦𑁆𑀢𑀺. 𑀬𑀁 𑀲𑀦𑁆𑀥𑀸𑀬 𑀕𑀡𑀫𑁆𑀳𑀸 𑀑𑀳𑀻𑀬𑀦𑀸𑀥𑀺𑀓𑀸𑀭𑁂 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁬𑁯𑁨) ‘‘𑀅𑀕𑀸𑀫𑀓𑁂 𑀅𑀭𑀜𑁆𑀜𑁂𑀢𑀺 𑀏𑀢𑁆𑀣 ‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀮𑀓𑁆𑀔𑀡𑀁 𑀅𑀭𑀜𑁆𑀜𑀁. 𑀢𑀁 𑀧𑀦𑁂𑀢 𑀓𑁂𑀯𑀮𑀁 𑀕𑀸𑀫𑀸𑀪𑀸𑀯𑁂𑀦 ‘𑀅𑀕𑀸𑀫𑀓’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀯𑀺𑀜𑁆𑀛𑀸𑀝𑀯𑀺𑀲𑀤𑀺𑀲𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀬𑀁 𑀲𑀦𑁆𑀥𑀸𑀬 ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪; 𑀧𑀸𑀘𑀺. 𑁫𑁭𑁩) 𑀯𑀼𑀢𑁆𑀢𑀁. 𑀇𑀤𑀁 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀁 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀢𑁄 𑀩𑀳𑀺, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑀢𑁄 𑀩𑀳𑀺 𑀲𑀭𑀼𑀓𑁆𑀔𑀁 𑀯𑀸 𑀅𑀭𑀼𑀓𑁆𑀔𑀁 𑀯𑀸 𑀯𑀺𑀳𑀸𑀭𑁂 𑀓𑀼𑀦𑁆𑀦𑀤𑀺𑀲𑀫𑀸𑀓𑀺𑀡𑁆𑀡𑀫𑁆𑀧𑀺 𑀅𑀭𑀜𑁆𑀜𑀁 𑀦𑀸𑀫. 𑀢𑀣𑀸 ‘‘𑀕𑀡𑀫𑁆𑀳𑀸 𑀑𑀳𑀻𑀬𑀦𑀓𑀲𑁆𑀲 𑀏𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀅𑀭𑀜𑁆𑀜𑀁𑀯. 𑀇𑀤𑀁 𑀧𑀦 𑀧𑀼𑀩𑁆𑀩𑁂 𑀅𑀕𑀸𑀫𑀓𑀪𑀸𑀯𑁂𑀦 𑀆𑀕𑀢𑀝𑁆𑀞𑀸𑀦𑁂 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀤𑀲𑁆𑀲𑀦𑀽𑀧𑀘𑀸𑀭𑀯𑀺𑀚𑀳𑀦𑁂 𑀏𑀓𑀫𑁂𑀯 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀢𑀢𑁄 𑀉𑀤𑁆𑀥𑀁 𑀅𑀦𑀸𑀧𑀢𑁆𑀢𑀺. ‘‘𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀸𑀦𑀁 𑀏𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀧𑀦 𑀅𑀤𑁆𑀥𑀬𑁄𑀚𑀦𑁂 𑀅𑀤𑁆𑀥𑀬𑁄𑀚𑀦𑁂 𑀏𑀓𑁂𑀓𑀁 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀦 𑀢𑀢𑁄 𑀑𑀭𑀁. 𑀇𑀢𑀭𑀸𑀦𑀺 𑀢𑀻𑀡𑀺 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀢𑁄 𑀑𑀭𑀫𑁂𑀯 𑀢𑀢𑁆𑀣 𑀯𑀼𑀢𑁆𑀢𑀯𑀺𑀥𑀺𑀁 𑀦 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀧𑀭𑀁 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀏𑀯𑀫𑁂𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀧𑀜𑁆𑀘𑀯𑀺𑀥𑁂 𑀕𑀸𑀫𑁂 𑀬𑁄 ‘‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 (𑀧𑀸𑀭𑀸. 𑁯𑁨) 𑀯𑀼𑀢𑁆𑀢𑁄, 𑀲𑁄 𑀦 𑀓𑀢𑁆𑀣𑀘𑀺 𑀯𑀺𑀦𑀬𑀧𑀺𑀝𑀓𑁂 𑀉𑀧𑀬𑁄𑀕𑀁 𑀕𑀢𑁄, 𑀓𑁂𑀯𑀮𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑀢𑁄 𑀅𑀧𑀭𑁄 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸𑀢𑀺 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀧𑀺 𑀘𑁂 𑀕𑀸𑀫𑀲𑁆𑀲 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄 𑀓𑀧𑁆𑀧𑀺𑀬𑀪𑀽𑀫𑀺𑀲𑀫𑀸𑀦𑁄 𑀉𑀧𑀘𑀸𑀭𑁄𑀢𑀺 𑀯𑀼𑀢𑁆𑀢𑁄, 𑀧𑀕𑁂𑀯 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑀢𑁄 𑀏𑀓𑁄. 𑀲𑁄 𑀧𑀦 𑀧𑀸𑀓𑀝𑀢𑁆𑀢𑀸 𑀘 𑀅𑀚𑁆𑀛𑁄𑀓𑀸𑀲𑀢𑁆𑀢𑀸 𑀘 𑀑𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀺𑀁. 𑀪𑀺𑀓𑁆𑀔𑀼𑀦𑀺𑀬𑁄 𑀳𑀺 𑀢𑀲𑁆𑀫𑀺𑀁 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀲𑀗𑁆𑀔𑀸𑀢𑁂 𑀕𑀸𑀫𑀽𑀧𑀘𑀸𑀭𑁂 𑀯𑀲𑀦𑁆𑀢𑀻 𑀆𑀧𑀢𑁆𑀢𑀺𑀜𑁆𑀘 𑀆𑀧𑀚𑁆𑀚𑀦𑁆𑀢𑀺, 𑀕𑀸𑀫𑀁 𑀧𑀯𑀺𑀲𑀦𑁆𑀢𑀻 𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀺𑀜𑁆𑀘. 𑀢𑀸𑀲𑀜𑁆𑀳𑀺 𑀞𑀺𑀢𑀝𑁆𑀞𑀸𑀦𑀁 𑀅𑀭𑀜𑁆𑀜𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺 ‘‘𑀢𑀸𑀯𑀤𑁂𑀯 𑀙𑀸𑀬𑀸 𑀫𑁂𑀢𑀩𑁆𑀩𑀸…𑀧𑁂… 𑀢𑀲𑁆𑀲𑀸 𑀢𑀬𑁄 𑀘 𑀦𑀺𑀲𑁆𑀲𑀬𑁂, 𑀅𑀝𑁆𑀞 𑀘 𑀅𑀓𑀭𑀡𑀻𑀬𑀸𑀦𑀺 𑀆𑀘𑀺𑀓𑁆𑀔𑁂𑀬𑁆𑀬𑀸𑀣𑀸’’𑀢𑀺 (𑀘𑀽𑀴𑀯. 𑁪𑁩𑁦) 𑀯𑀘𑀦𑀢𑁄. 𑀅𑀭𑀜𑁆𑀜𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁, 𑀯𑀺𑀓𑀸𑀮𑁂𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑀲𑁆𑀲 (𑀧𑀸𑀘𑀺. 𑁫𑁦𑁮) 𑀘 𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀢𑁆𑀢𑀸 𑀘 𑀅𑀦𑁆𑀢𑀭𑀸𑀭𑀸𑀫𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀧𑁆𑀧𑀝𑀺𑀓𑁆𑀓𑀫𑀦𑀸𑀤𑀻𑀦𑀁 𑀓𑀧𑁆𑀧𑀺𑀬𑀪𑀽𑀫𑀺𑀪𑀸𑀯𑀯𑀘𑀦𑀢𑁄 𑀘 ‘‘𑀏𑀓𑀸 𑀕𑀡𑀫𑁆𑀳𑀸 𑀑𑀳𑀻𑀬𑁂𑀬𑁆𑀬𑀸𑀢𑀺 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀤𑀼𑀢𑀺𑀬𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀸 𑀲𑀯𑀦𑀽𑀧𑀘𑀸𑀭𑀁 𑀯𑀸 𑀯𑀺𑀚𑀳𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺𑀆𑀤𑀺𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀢𑁄 (𑀧𑀸𑀘𑀺. 𑁬𑁯𑁨) 𑀘 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀦𑀬𑀏𑀦 𑀯𑀸 𑀬𑀲𑁆𑀫𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑀢𑁄 𑀧𑀝𑁆𑀞𑀸𑀬 𑀦𑀻𑀬𑀢𑀺, 𑀢𑀢𑁆𑀣 𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑁂 𑀲𑀢𑀺 𑀘𑀢𑀼𑀭𑀗𑁆𑀕𑀲𑀫𑁄𑀥𑀸𑀦𑁂𑀦 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑀲𑁆𑀫𑀸 𑀲𑀕𑀸𑀫𑀓𑀁 𑀦𑀸𑀫 𑀳𑁄𑀢𑀺.

𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀏𑀓𑀁 𑀦𑀸𑀫 ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀅𑀭𑀜𑁆𑀜𑁂 𑀯𑀢𑁆𑀣𑀩𑁆𑀩𑀁, 𑀬𑀸 𑀯𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁪𑁩𑁧) 𑀯𑀘𑀦𑀢𑁄 𑀪𑀺𑀓𑁆𑀔𑀼𑀦𑀻𑀦𑀁 𑀅𑀭𑀜𑁆𑀜𑀯𑀸𑀲𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀺𑀤𑁆𑀥𑀁. 𑀢𑀸𑀬 𑀳𑀺 𑀅𑀭𑀜𑁆𑀜𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀲𑀢𑀺 𑀅𑀦𑁆𑀢𑁄𑀆𑀯𑀸𑀲𑁂𑀧𑀺 𑀤𑀼𑀢𑀺𑀬𑀺𑀓𑀸𑀬 𑀤𑀲𑁆𑀲𑀦𑀲𑀯𑀦𑀽𑀧𑀘𑀸𑀭𑀁 𑀯𑀺𑀚𑀳𑀦𑁆𑀢𑀺𑀬𑀸 𑀆𑀧𑀢𑁆𑀢𑀺. 𑀢𑀲𑁆𑀫𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀥𑀺𑀓𑀸𑀭𑁂 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀏𑀢𑁆𑀣 𑀬𑀁 𑀞𑀸𑀦𑀁 𑀞𑀧𑀺𑀢𑀁, 𑀢𑀢𑁆𑀣𑁂𑀯 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄𑀧𑀺 𑀓𑀧𑁆𑀧𑀢𑀺, 𑀦 𑀢𑀢𑁄 𑀧𑀭𑀁.

𑀢𑀸𑀲𑀜𑁆𑀘 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀓𑀫𑁆𑀫𑀯𑀸𑀘𑀸𑀬𑀁 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 𑀯𑀘𑀦𑀁 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀢𑁂𑀲𑁆𑀯𑁂𑀯 𑀕𑀸𑀫𑀕𑀸𑀫𑀽𑀧𑀘𑀸𑀭𑁂𑀲𑀼 𑀨𑀭𑀢𑀺. 𑀢𑀢𑁄 𑀧𑀭𑀁 𑀤𑀼𑀢𑀺𑀬𑁂𑀲𑀼 𑀮𑁂𑀟𑁆𑀟𑀼𑀧𑀸𑀢𑀸𑀤𑀻𑀲𑀼 𑀢𑀸𑀲𑀁 𑀅𑀓𑀧𑁆𑀧𑀺𑀬𑀪𑀽𑀫𑀺𑀓𑀢𑁆𑀢𑀸 𑀦 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀅𑀭𑀜𑁆𑀜𑁂 𑀨𑀭𑀢𑀺 𑀪𑀺𑀓𑁆𑀔𑀽𑀦𑀁 𑀕𑀸𑀫𑀕𑀸𑀫𑀽𑀧𑀘𑀸𑀭𑀁 𑀯𑀺𑀬. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀞𑀧𑁂𑀢𑁆𑀯𑀸 𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀺’’𑀦𑁆𑀢𑀺.

𑀏𑀯𑀁 𑀢𑀸𑀯 𑀧𑀜𑁆𑀘𑀯𑀺𑀥𑀁 𑀕𑀸𑀫𑀪𑁂𑀤𑀁, 𑀅𑀭𑀜𑁆𑀜𑀪𑁂𑀤𑀜𑁆𑀘 𑀜𑀢𑁆𑀯𑀸 𑀇𑀤𑀸𑀦𑀺 ‘‘𑀅𑀢𑁆𑀣𑀺 𑀕𑀸𑀫𑁄 𑀦 𑀕𑀸𑀫𑀧𑀭𑀺𑀳𑀸𑀭𑀁 𑀓𑀢𑁆𑀣𑀘𑀺 𑀮𑀪𑀢𑀻’’𑀢𑀺𑀆𑀤𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑁄 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀫𑀦𑀼𑀲𑁆𑀲𑁄 𑀦𑀸𑀫 𑀬𑁄 𑀲𑀩𑁆𑀩𑀲𑁄 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀪𑀸𑀯𑁂𑀦 𑀬𑀓𑁆𑀔𑀧𑀭𑀺𑀕𑁆𑀕𑀳𑀪𑀽𑀢𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀕𑀸𑀫𑁄 𑀦 𑀕𑀸𑀫𑀧𑀭𑀺𑀳𑀸𑀭𑀁 𑀓𑀢𑁆𑀣𑀘𑀺 𑀲𑀺𑀓𑁆𑀔𑀸𑀧𑀤𑁂 𑀮𑀪𑀢𑀺. 𑀬𑀜𑁆𑀳𑀺 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀁 𑀧𑀦𑁂𑀢𑀁 𑀩𑀼𑀤𑁆𑀥𑀓𑀸𑀮𑁂, 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘 𑀦𑀕𑀭𑀁 𑀳𑁄𑀢𑀺, 𑀲𑁂𑀲𑀓𑀸𑀮𑁂 𑀲𑀼𑀜𑁆𑀜𑀁 𑀳𑁄𑀢𑀺 𑀬𑀓𑁆𑀔𑀧𑀭𑀺𑀕𑁆𑀕𑀳𑀺𑀢’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁪; 𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫𑁦) 𑀯𑀼𑀢𑁆𑀢𑀁. 𑀬𑁄 𑀧𑀦 𑀧𑀝𑀺𑀭𑀸𑀚𑀘𑁄𑀭𑀸𑀤𑀻𑀳𑀺 𑀯𑀺𑀮𑀼𑀢𑁆𑀢𑀢𑁆𑀢𑀸, 𑀓𑁂𑀯𑀮𑀁 𑀪𑀬𑁂𑀦 𑀯𑀸 𑀙𑀟𑁆𑀟𑀺𑀢𑁄 𑀲𑀖𑀭𑁄𑀯 𑀅𑀦𑁆𑀢𑀭𑀳𑀺𑀢𑀕𑀸𑀫𑀪𑀽𑀢𑁄, 𑀲𑁄 ‘‘𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁧𑁮𑁩) 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀁 𑀚𑀦𑁂𑀢𑀺, 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀁, 𑀲𑁂𑀔𑀺𑀬𑁂 𑀘𑀢𑁆𑀢𑀸𑀭𑀺 𑀚𑀦𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁄 𑀧𑀦 𑀕𑀸𑀫𑁄 𑀬𑀢𑁄 𑀯𑀸 𑀫𑀦𑀼𑀲𑁆𑀲𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀼𑀦𑀧𑀺 𑀆𑀕𑀦𑁆𑀢𑀼𑀓𑀸𑀫𑀸 𑀏𑀯 𑀅𑀧𑀓𑁆𑀓𑀦𑁆𑀢𑀸𑀢𑀺 𑀯𑀼𑀢𑁆𑀢𑁄, 𑀅𑀫𑀦𑀼𑀲𑁆𑀲𑁄 𑀲𑁄 𑀧𑀓𑀢𑀺𑀕𑀸𑀫𑀲𑀤𑀺𑀲𑁄𑀯.

𑀅𑀢𑁆𑀣𑀺 𑀅𑀭𑀜𑁆𑀜𑀁 𑀦 𑀅𑀭𑀜𑁆𑀜𑀧𑀭𑀺𑀳𑀸𑀭𑀁 𑀓𑀢𑁆𑀣𑀘𑀺 𑀮𑀪𑀢𑀻𑀢𑀺 𑀏𑀢𑁆𑀣 ‘‘𑀅𑀚𑁆𑀛𑁄𑀓𑀸𑀲𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀏𑀓𑀽𑀧𑀘𑀸𑀭𑁄, 𑀢𑀢𑁄 𑀧𑀭𑀁 𑀦𑀸𑀦𑀽𑀧𑀘𑀸𑀭𑁄’’𑀢𑀺 (𑀧𑀸𑀭𑀸. 𑁪𑁯𑁪) 𑀏𑀢𑁆𑀣 𑀬𑁆𑀯𑀸𑀬𑀁 𑀦𑀸𑀦𑀽𑀧𑀘𑀸𑀭𑁄𑀢𑀺 𑀯𑀼𑀢𑁆𑀢𑁄, 𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀧𑀦 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀏𑀓𑀮𑁂𑀟𑁆𑀟𑀼𑀧𑀸𑀢𑀲𑀗𑁆𑀔𑀸𑀢𑁄 𑀕𑀸𑀫𑀽𑀧𑀘𑀸𑀭𑀦𑀸𑀫𑀓𑁄 𑀕𑀸𑀫𑁄, 𑀬𑁄 𑀯𑀸 𑀲𑀢𑁆𑀣𑁄 𑀦𑀸𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀦𑀺𑀯𑀺𑀝𑁆𑀞𑁄, 𑀲𑁄 𑀅𑀢𑁆𑀣𑀺 𑀕𑀸𑀫𑁄 𑀦 𑀕𑀸𑀫𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀦 𑀳𑀺 𑀢𑀁 𑀞𑀸𑀦𑀁 𑀑𑀓𑁆𑀓𑀫𑀦𑁆𑀢𑁄 𑀕𑀸𑀫𑀧𑁆𑀧𑀯𑁂𑀲𑀦𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀬𑀁 𑀧𑀦 𑀕𑀸𑀫𑀲𑀻𑀫𑀸𑀬 𑀧𑀭𑀺𑀬𑀸𑀧𑀦𑁆𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀮𑀜𑁆𑀚𑀦𑀝𑁆𑀞𑀸𑀦𑀪𑀽𑀢𑀁 𑀅𑀭𑀜𑁆𑀜𑀁, 𑀢𑀁 𑀅𑀢𑁆𑀣𑀺 𑀅𑀭𑀜𑁆𑀜𑀁 𑀦 𑀅𑀭𑀜𑁆𑀜𑀓𑀺𑀘𑁆𑀘𑀁 𑀓𑀭𑁄𑀢𑀺 𑀦𑀸𑀫. 𑀦 𑀳𑀺 𑀢𑀢𑁆𑀣 𑀆𑀭𑀜𑁆𑀜𑀓𑀲𑀻𑀫𑀸 𑀮𑀩𑁆𑀪𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 𑀇𑀫𑀺𑀲𑁆𑀲𑀸 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸 𑀮𑀓𑁆𑀔𑀡𑀸𑀦𑀼𑀧𑀜𑁆𑀜𑀢𑁆𑀢𑀺𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.

‘‘𑀕𑁄𑀦𑀺𑀲𑀸𑀤𑀺𑀦𑀺𑀯𑀺𑀝𑁆𑀞𑁄𑀧𑀺 𑀕𑀸𑀫𑁄’’𑀢𑀺 𑀏𑀢𑁆𑀣 𑀲𑀘𑁂 𑀢𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀔𑁂𑀢𑁆𑀢𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺, 𑀲𑀩𑁆𑀩𑁄𑀧𑀺 𑀏𑀓𑁄 𑀕𑀸𑀫𑁄. 𑀦𑁄 𑀘𑁂, 𑀉𑀧𑀘𑀸𑀭𑁂𑀦 𑀯𑀸 𑀧𑀭𑀺𑀓𑁆𑀔𑁂𑀧𑁂𑀦 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀲𑀘𑁂 𑀕𑀸𑀫𑀔𑁂𑀢𑁆𑀢𑁂 𑀲𑀢𑀺 𑀓𑀸𑀦𑀺𑀘𑀺 𑀢𑀸𑀦𑀺 𑀖𑀭𑀸𑀦𑀺 𑀅𑀜𑁆𑀜𑀫𑀜𑁆𑀜𑀉𑀧𑀘𑀸𑀭𑀧𑁆𑀧𑀳𑁄𑀦𑀓𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑀽𑀭𑁂 𑀤𑀽𑀭𑁂 𑀓𑀢𑀸𑀦𑀺 𑀳𑁄𑀦𑁆𑀢𑀺, 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑁂 𑀉𑀧𑀘𑀸𑀭𑁄𑀯 𑀧𑀫𑀸𑀡𑀁. 𑀅𑀦𑁆𑀢𑀭𑀖𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀲𑁂𑀔𑀺𑀬𑁂𑀲𑀼, 𑀪𑀺𑀓𑁆𑀔𑀼𑀦𑀺𑀬𑀸 𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀻𑀲𑀼 𑀘 𑀖𑀭𑀸𑀦𑀁 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀧𑀫𑀸𑀡𑀁, 𑀉𑀧𑁄𑀲𑀣𑀸𑀤𑀺𑀓𑀫𑁆𑀫𑀸𑀦𑀁 𑀕𑀸𑀫𑀔𑁂𑀢𑁆𑀢𑀁 𑀧𑀫𑀸𑀡𑀁, 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀲𑁆𑀲 𑀆𑀲𑀦𑁆𑀦𑀖𑀭𑀲𑁆𑀲 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘𑀥𑀦𑀼𑀲𑀢𑀦𑁆𑀢𑀭𑀢𑀸 𑀧𑀫𑀸𑀡𑀦𑁆𑀢𑀺 𑀏𑀯𑀁 𑀦𑁄 𑀧𑀝𑀺𑀪𑀸𑀦𑀦𑁆𑀢𑀺 𑀆𑀘𑀭𑀺𑀬𑀸.

‘‘𑀬𑀫𑁆𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀕𑀸𑀫𑀔𑁂𑀢𑁆𑀢𑁂 𑀏𑀓𑀁 𑀧𑀤𑁂𑀲𑀁 ‘𑀅𑀬𑀫𑁆𑀧𑀺 𑀯𑀺𑀲𑀼𑀁𑀕𑀸𑀫𑁄 𑀳𑁄𑀢𑀽’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀺, 𑀲𑁄𑀧𑀺 𑀯𑀺𑀲𑀼𑀁𑀕𑀸𑀫𑀲𑀻𑀫𑀸 𑀳𑁄𑀢𑀺𑀬𑁂𑀯𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀢𑀁 𑀧𑀯𑀺𑀲𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀺 𑀳𑁄𑀢𑀺 𑀏𑀯. 𑀲𑀘𑁂 𑀢𑀢𑁆𑀣 𑀯𑀺𑀳𑀸𑀭𑁄 𑀯𑀸 𑀤𑁂𑀯𑀓𑀼𑀮𑀁 𑀯𑀸 𑀲𑀪𑀸 𑀯𑀸 𑀕𑁂𑀳𑀁 𑀯𑀸 𑀦𑀢𑁆𑀣𑀺, 𑀓𑁂𑀯𑀮𑀁 𑀯𑀢𑁆𑀣𑀼𑀫𑀢𑁆𑀢𑀓𑀫𑁂𑀯 𑀳𑁄𑀢𑀺, 𑀕𑀸𑀫𑁄𑀢𑀺 𑀯𑀺𑀦𑀬𑀓𑀫𑁆𑀫𑀁 𑀲𑀩𑁆𑀩𑀁 𑀢𑀢𑁆𑀣 𑀓𑀧𑁆𑀧𑀢𑀺. ‘‘𑀅𑀫𑀦𑀼𑀲𑁆𑀲𑁄 𑀕𑀸𑀫𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀜𑁆𑀘 𑀞𑀸𑀦𑀁 𑀇𑀢𑀭𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀩𑁆𑀪𑀦𑁆𑀢𑀭𑁂 𑀯𑀸 𑀉𑀧𑀘𑀸𑀭𑀩𑁆𑀪𑀦𑁆𑀢𑀭𑁂 𑀯𑀸 𑀳𑁄𑀢𑀺, 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁. 𑀦𑁄 𑀘𑁂, 𑀅𑀭𑀜𑁆𑀜𑀁 𑀯𑀺𑀬 𑀬𑀣𑀸𑀲𑀼𑀔𑀁 𑀕𑀦𑁆𑀢𑀩𑁆𑀩𑀁. 𑀢𑀢𑁆𑀣 𑀘𑁂 𑀆𑀭𑀸𑀫𑁄 𑀯𑀸 𑀢𑀺𑀢𑁆𑀣𑀺𑀬𑀲𑁂𑀬𑁆𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑁄𑀯𑀸 𑀳𑁄𑀢𑀺, 𑀮𑀤𑁆𑀥𑀓𑀧𑁆𑀧𑀫𑁂𑀯. 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄 𑀘𑁂 𑀳𑁄𑀢𑀺, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀺 𑀧𑀭𑀺𑀳𑀭𑀺𑀢𑀩𑁆𑀩𑀸. ‘‘𑀅𑀭𑀜𑁆𑀜𑀁 𑀦𑀸𑀫 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀅𑀯𑀲𑁂𑀲𑀁 𑀅𑀭𑀜𑁆𑀜𑀁 𑀦𑀸𑀫𑀸’’𑀢𑀺 (𑀧𑀸𑀭𑀸. 𑁯𑁨) 𑀏𑀢𑁆𑀣 𑀧𑀭𑀺𑀓𑁆𑀔𑁂𑀧𑁂 𑀲𑀢𑀺 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀁 𑀕𑀸𑀫𑀫𑁂𑀯 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀢𑀲𑁆𑀲 𑀉𑀧𑀘𑀸𑀭𑀁, 𑀢𑀢𑁄 𑀧𑀭𑀜𑁆𑀘 𑀅𑀭𑀜𑁆𑀜𑀁 𑀦𑀸𑀫, 𑀧𑀭𑀺𑀓𑁆𑀔𑁂𑀧𑁂 𑀅𑀲𑀢𑀺 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀁 𑀕𑀸𑀫𑀽𑀧𑀘𑀸𑀭𑀫𑁂𑀯 𑀞𑀧𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀅𑀯𑀲𑁂𑀲𑀁 𑀅𑀭𑀜𑁆𑀜𑀁 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀲𑀢𑀺 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀯𑀼𑀢𑁆𑀢𑀮𑀓𑁆𑀔𑀡𑁂 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀕𑀡𑀫𑁆𑀳𑀸𑀑𑀳𑀻𑀬𑀦𑀸𑀧𑀢𑁆𑀢𑀺, 𑀢𑀢𑁆𑀣 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀨𑀭𑀡𑀁 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀻𑀢𑀺 𑀏𑀯𑀫𑀸𑀤𑀺𑀯𑀺𑀦𑀬𑀯𑀺𑀥𑀺 𑀲𑀫𑁂𑀢𑀺, 𑀅𑀜𑁆𑀜𑀣𑀸 𑀦 𑀲𑀫𑁂𑀢𑀺.

‘‘𑀞𑀧𑁂𑀢𑁆𑀯𑀸 𑀕𑀸𑀫𑀽𑀧𑀘𑀸𑀭𑀁 𑀅𑀯𑀲𑁂𑀲𑀁 𑀅𑀭𑀜𑁆𑀜𑀁 𑀦𑀸𑀫𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀯𑀼𑀢𑁆𑀢𑁂 𑀕𑀸𑀫𑀽𑀧𑀘𑀸𑀭𑀢𑁄 𑀧𑀭𑁄 𑀅𑀭𑀜𑁆𑀜𑀦𑁆𑀢𑀺 𑀲𑀺𑀤𑁆𑀥𑁂 ‘‘𑀞𑀧𑁂𑀢𑁆𑀯𑀸 𑀕𑀸𑀫’’𑀦𑁆𑀢𑀺 𑀯𑀺𑀲𑁂𑀲𑀢𑁆𑀣𑁄 𑀦 𑀤𑀺𑀲𑁆𑀲𑀢𑀺, 𑀕𑀸𑀫𑀲𑁆𑀲 𑀧𑀦 𑀅𑀭𑀜𑁆𑀜𑀪𑀸𑀯𑀧𑁆𑀧𑀲𑀗𑁆𑀕𑀪𑀬𑀸 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀕𑀸𑀫𑀽𑀧𑀘𑀸𑀭𑀲𑁆𑀲 𑀅𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀲𑀢𑀺 𑀳𑀺 𑀕𑀸𑀫𑁂 𑀕𑀸𑀫𑀽𑀧𑀘𑀸𑀭𑁄 𑀳𑁄𑀢𑀺, 𑀲𑁄 𑀘 𑀢𑀯 𑀫𑀢𑁂𑀦 𑀅𑀭𑀜𑁆𑀜𑀪𑀽𑀢𑁄. 𑀓𑀼𑀢𑁄 𑀤𑀸𑀦𑀺 𑀕𑀸𑀫𑀽𑀧𑀘𑀸𑀭𑁄. 𑀕𑀸𑀫𑀽𑀧𑀘𑀸𑀭𑁄𑀧𑀺 𑀘𑁂 𑀅𑀭𑀜𑁆𑀜𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀧𑀭𑁄𑀯 𑀕𑀸𑀫𑁄𑀢𑀺 𑀓𑀢𑁆𑀯𑀸 𑀦 𑀬𑀼𑀢𑁆𑀢𑀁 𑀕𑀸𑀫𑀲𑁆𑀲 𑀅𑀭𑀜𑁆𑀜𑀪𑀸𑀯𑀧𑁆𑀧𑀲𑀗𑁆𑀕𑀢𑁄 𑀘. 𑀢𑀲𑁆𑀫𑀸 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 𑀏𑀢𑁆𑀣 𑀕𑀸𑀫𑀽𑀧𑀘𑀸𑀭𑁄𑀧𑀺 ‘‘𑀕𑀸𑀫𑁄’’ 𑀢𑁆𑀯𑁂𑀯 𑀲𑀗𑁆𑀕𑀳𑀺𑀢𑁄. 𑀢𑀲𑁆𑀫𑀸 𑀕𑀸𑀫𑀲𑁆𑀲 𑀅𑀭𑀜𑁆𑀜𑀪𑀸𑀯𑀧𑁆𑀧𑀲𑀗𑁆𑀕𑁄 𑀦 𑀬𑀼𑀚𑁆𑀚𑀢𑀺. 𑀬𑀤𑀺 𑀏𑀯𑀁 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀁 𑀅𑀯𑀲𑁂𑀲𑀁 𑀅𑀭𑀜𑁆𑀜𑀁 𑀦𑀸𑀫𑀸’’𑀢𑀺 𑀏𑀢𑁆𑀢𑀓𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀅𑀭𑀜𑁆𑀜𑀲𑁆𑀲 𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀧𑁆𑀧𑀲𑀗𑁆𑀕𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑁄 ‘‘𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑁄 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀦𑁄 𑀮𑀤𑁆𑀥𑀺. 𑀕𑀸𑀫𑀽𑀧𑀘𑀸𑀭𑀧𑀭𑀺𑀬𑀦𑁆𑀢𑁄 𑀳𑀺 𑀇𑀥 𑀕𑀸𑀫𑁄 𑀦𑀸𑀫. 𑀬𑀤𑀺 𑀏𑀯𑀁 ‘‘𑀕𑀸𑀫𑀲𑁆𑀲 𑀘 𑀅𑀭𑀜𑁆𑀜𑀲𑁆𑀲 𑀘 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀢𑁆𑀢𑀩𑁆𑀩𑀁, ‘‘𑀅𑀭𑀜𑁆𑀜𑀲𑁆𑀲 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀓𑀺𑀫𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀯𑀼𑀘𑁆𑀘𑀢𑁂 𑁋 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 𑀧𑀞𑀫𑀕𑀸𑀫𑀽𑀧𑀘𑀸𑀭𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂 𑀳𑀺 𑀩𑀸𑀳𑀺𑀭𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀕𑀸𑀫𑀽𑀧𑀘𑀸𑀭𑀁 𑀅𑀭𑀜𑁆𑀜𑀁 𑀦𑀸𑀫. 𑀕𑀸𑀫𑀧𑀭𑀺𑀘𑁆𑀙𑁂𑀤𑀯𑀘𑀦𑁂 𑀧𑀬𑁄𑀚𑀦𑀁 𑀧𑀦𑁂𑀢𑁆𑀣 𑀦𑀢𑁆𑀣𑀺 𑀧𑀭𑀺𑀓𑁆𑀔𑁂𑀧𑁂𑀦𑁂𑀯 𑀧𑀸𑀓𑀝𑀪𑀽𑀢𑀢𑁆𑀢𑀸. 𑀤𑀼𑀢𑀺𑀬𑀕𑀸𑀫𑀽𑀧𑀘𑀸𑀭𑁄𑀯 𑀕𑀸𑀫𑀲𑁆𑀲 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄 𑀧𑀭𑀺𑀓𑁆𑀔𑁂𑀧𑀪𑀸𑀯𑁂𑀦 𑀅𑀧𑀸𑀓𑀝𑀢𑁆𑀢𑀸. 𑀢𑀢𑁆𑀣 𑀧𑀞𑀫𑀕𑀸𑀫𑀽𑀧𑀘𑀸𑀭𑁄 𑀘𑁂 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄, 𑀢𑀢𑁆𑀣 𑀦 𑀯𑀢𑁆𑀢𑀩𑁆𑀩𑁄. ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀲𑀦𑁆𑀢𑁂 𑀲𑀼𑀩𑁆𑀬𑀢𑁆𑀢𑀢𑀭𑀁 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀕𑀸𑀳𑁄 𑀘 𑀦 𑀳𑁄𑀢𑀺.

‘‘𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀳𑀺 𑀯𑀼𑀢𑁆𑀢𑁂 𑀅𑀬𑀁 𑀕𑀸𑀫𑀽𑀧𑀘𑀸𑀭𑁄𑀯 𑀅𑀭𑀜𑁆𑀜𑀁 𑀕𑀸𑀫𑀽𑀧𑀘𑀸𑀭𑀲𑁆𑀲 𑀯𑀺𑀪𑀗𑁆𑀕𑀢𑁆𑀢𑀸. 𑀬𑀤𑀺 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀅𑀯𑀼𑀢𑁆𑀢𑀓𑀫𑁂𑀯, 𑀅𑀭𑀜𑁆𑀜𑀢𑁄 𑀧𑀭𑀦𑁆𑀢𑀺 𑀘 𑀫𑀺𑀘𑁆𑀙𑀸𑀕𑀸𑀳𑁄 𑀳𑁄𑀢𑀻𑀢𑀺 𑀘𑁂, 𑀦𑀦𑀼 𑀯𑀼𑀢𑁆𑀢𑀁 ‘‘𑀧𑀞𑀫𑀫𑁂𑀯 𑀇𑀤𑀁 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀦𑀺𑀬𑀫𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺? 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀓𑀺𑀜𑁆𑀘𑀸𑀧𑀺 ‘‘𑀕𑀸𑀫𑀽𑀧𑀘𑀸𑀭𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁, 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄𑀢𑀺 𑀧𑀦 𑀏𑀯𑀁 𑀯𑀘𑀦𑀧𑁆𑀧𑀬𑁄𑀚𑀦𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀘 𑀕𑀸𑀫𑀲𑁆𑀲 𑀬𑁆𑀯𑀸𑀬𑀁 𑀮𑁂𑀟𑁆𑀟𑀼𑀧𑀸𑀢𑁄 𑀉𑀧𑀘𑀸𑀭𑁄’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄, 𑀢𑀲𑁆𑀲 𑀦𑀺𑀬𑀫𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀅𑀭𑀜𑁆𑀜𑀁 𑀦𑀸𑀫𑀸’’𑀢𑀺 𑀧𑀤𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 ‘‘𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸’’𑀢𑀺 𑀉𑀤𑁆𑀥𑀭𑀡𑀲𑁆𑀲 𑀓𑀢𑀢𑁆𑀢𑀸. 𑀢𑀢𑁆𑀣 ‘‘𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸’’𑀢𑀺 𑀫𑀸𑀢𑀺𑀓𑀸𑀬𑀁 𑀅𑀯𑀺𑀚𑁆𑀚𑀫𑀸𑀦𑀁 𑀧𑀤𑀁 𑀉𑀤𑁆𑀥𑀭𑀦𑁆𑀢𑁄 𑀢𑀬𑁄 𑀅𑀢𑁆𑀣𑀯𑀲𑁂 𑀤𑀲𑁆𑀲𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀫𑁂𑀓𑁄 𑀅𑀢𑁆𑀣𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑁂𑀦 𑀲𑀤𑁆𑀥𑀺𑀁 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀫𑁂𑀓𑁄, 𑀦 𑀓𑁂𑀯𑀮𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀬𑁂𑀯 𑀉𑀧𑀘𑀸𑀭𑁄 𑀯𑀺𑀦𑀬𑀸𑀥𑀺𑀓𑀸𑀭𑁂 𑀲𑀧𑁆𑀧𑀬𑁄𑀚𑀦𑁄 𑀤𑀲𑁆𑀲𑀺𑀢𑀩𑁆𑀩𑁄, 𑀦𑀺𑀧𑁆𑀧𑀬𑁄𑀚𑀦𑁄𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑁄 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀮𑀩𑁆𑀪𑀢𑀻𑀢𑀺 𑀅𑀦𑀼𑀲𑀗𑁆𑀕𑀧𑁆𑀧𑀬𑁄𑀚𑀦𑀫𑁂𑀓𑁄 𑀅𑀢𑁆𑀣𑁄𑀧𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀇𑀤𑀁 𑀪𑀕𑀯𑀸 𑀢𑀬𑁄 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀅𑀪𑀸𑀲𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀫𑁂𑀓𑁄, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀥𑀺𑀓𑀸𑀭𑁂 𑀅𑀬𑀫𑁂𑀯 𑀕𑀸𑀫𑀽𑀧𑀘𑀸𑀭𑁄𑀢𑀺 𑀤𑀲𑁆𑀲𑀦𑀫𑁂𑀓𑁄, 𑀢𑀢𑁆𑀣 𑀞𑀺𑀢𑀲𑁆𑀲 𑀤𑀼𑀢𑀺𑀬𑁄 𑀮𑁂𑀟𑁆𑀟𑀼𑀧𑀸𑀢𑁄 𑀲𑀩𑁆𑀩𑀢𑁆𑀣 𑀕𑀸𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀓𑀺𑀘𑁆𑀘𑀓𑁄 𑀉𑀧𑀘𑀸𑀭𑁄𑀢𑀺 𑀤𑀲𑁆𑀲𑀦𑀫𑁂𑀓𑁄𑀢𑀺 𑀏𑀯𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀺𑀬𑀸 𑀏𑀓𑁂𑀓𑀧𑀤𑀼𑀤𑁆𑀥𑀸𑀭𑀡𑁂𑀦 𑀢𑀬𑁄 𑀅𑀢𑁆𑀣𑀯𑀲𑁂 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀣𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀓𑀫𑁆𑀫𑀯𑀸𑀘𑀸𑀬 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀏𑀢𑁆𑀣𑀸𑀧𑀺 𑀧𑀭𑀺𑀓𑁆𑀔𑁂𑀧𑁂 𑀲𑀢𑀺 𑀕𑀸𑀫𑀁 𑀞𑀧𑁂𑀢𑁆𑀯𑀸, 𑀅𑀲𑀢𑀺 𑀕𑀸𑀫𑀽𑀧𑀘𑀸𑀭𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀘 𑀫𑀚𑁆𑀛𑁂 𑀆𑀭𑀸𑀫𑁂 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀅𑀬𑀁 𑀦𑀬𑁄 𑀅𑀢𑀺𑀯𑀺𑀬 𑀬𑀼𑀚𑁆𑀚𑀢𑀺. 𑀉𑀪𑀬𑀧𑀭𑀺𑀯𑀚𑁆𑀚𑀦𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀯𑀸 𑀉𑀪𑀬𑀢𑁆𑀣 𑀉𑀪𑀬𑀁 𑀮𑀩𑁆𑀪𑀢𑁂𑀯. ‘‘𑀅𑀦𑁆𑀢𑀭𑀸𑀭𑀸𑀫𑁂𑀲𑀼 𑀧𑀦 𑀆𑀘𑀺𑀡𑁆𑀡𑀓𑀧𑁆𑀧𑀸 𑀪𑀺𑀓𑁆𑀔𑀽 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀅𑀦𑁆𑀢𑀭𑀖𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀲𑁂𑀔𑀺𑀬𑀸𑀦𑀁 𑀅𑀦𑁆𑀢𑀭𑀸𑀭𑀸𑀫𑁂𑀲𑀼 𑀅𑀲𑀫𑁆𑀪𑀯𑀢𑁄 𑀅𑀦𑁆𑀢𑀭𑀸𑀭𑀸𑀫𑁄 𑀦 𑀕𑀸𑀫𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀢𑀢𑁆𑀣𑀧𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀭𑀼𑀳𑀢𑁂𑀯𑀸’’𑀢𑀺 𑀏𑀓𑁂. 𑀢𑁂 𑀪𑀺𑀓𑁆𑀔𑀽 𑀤𑀼𑀢𑀺𑀬𑀲𑁆𑀲 𑀕𑀸𑀫𑀽𑀧𑀘𑀸𑀭𑀲𑁆𑀲 𑀕𑀸𑀫𑀲𑀗𑁆𑀔𑀸𑀲𑀪𑀸𑀯𑀢𑁄 𑀢𑀸𑀲𑀁 𑀇𑀫𑀸𑀬 𑀤𑀼𑀢𑀺𑀬𑀸𑀬 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸𑀬 𑀅𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀅𑀚𑁆𑀛𑀸𑀭𑀸𑀫𑁄 𑀧𑀦 𑀕𑀸𑀫𑁄𑀧𑀺 𑀲𑀫𑀸𑀦𑁄 𑀢𑀺𑀢𑁆𑀣𑀺𑀬𑀲𑁂𑀬𑁆𑀬𑀸𑀤𑀺 𑀯𑀺𑀬 𑀓𑀧𑁆𑀧𑀺𑀬𑀪𑀽𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀆𑀧𑀢𑁆𑀢𑀺𑀬𑀸 𑀧𑀭𑀺𑀘𑁆𑀙𑁂𑀤𑀁, 𑀢𑀣𑀸𑀦𑀸𑀧𑀢𑁆𑀢𑀺𑀬𑀸𑀧𑀺 𑀘;

𑀤𑀲𑁆𑀲𑁂𑀢𑀼𑀁 𑀕𑀸𑀫𑀲𑀫𑁆𑀩𑀦𑁆𑀥-𑀲𑀺𑀓𑁆𑀔𑀸𑀧𑀤𑀯𑀺𑀪𑀸𑀯𑀦𑁂.

𑀕𑀸𑀫𑀕𑀸𑀫𑀽𑀧𑀘𑀸𑀭𑀸 𑀤𑁆𑀯𑁂, 𑀤𑀲𑁆𑀲𑀺𑀢𑀸 𑀇𑀥 𑀢𑀸𑀤𑀺𑀦𑀸;

𑀲𑀻𑀫𑀸 𑀲𑀻𑀫𑀽𑀧𑀘𑀸𑀭𑀸 𑀢𑀼, 𑀅𑀦𑁂𑀓𑀦𑁆𑀢𑀸𑀢𑀺 𑀦𑀼𑀤𑁆𑀥𑀝𑀸.

𑀉𑀧𑀘𑀸𑀭𑀸 𑀘 𑀤𑁆𑀯𑁂 𑀳𑁄𑀦𑁆𑀢𑀺, 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀩𑁆𑀩𑀲𑀸;

𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀭𑀺𑀓𑁆𑀔𑀺𑀢𑁆𑀢-𑀪𑁂𑀤𑀸 𑀘𑁂 𑀘𑀢𑀼𑀭𑁄 𑀲𑀺𑀬𑀼𑀁.

𑀅𑀬𑀜𑁆𑀳𑀺 𑀉𑀧𑀘𑀸𑀭𑀲𑀤𑁆𑀤𑁄 𑀯𑀺𑀦𑀬𑀧𑀺𑀝𑀓𑁂 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀕𑀺𑀮𑀸𑀦𑁂𑀦𑀧𑀺 𑀆𑀭𑀸𑀫𑁂 𑀆𑀭𑀸𑀫𑀽𑀧𑀘𑀸𑀭𑁂 𑀙𑀢𑁆𑀢𑀁 𑀥𑀸𑀭𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁦) 𑀏𑀯𑀫𑀸𑀤𑀻𑀲𑀼 𑀩𑀸𑀳𑀺𑀭𑁂 𑀉𑀧𑀘𑀸𑀭𑁂 𑀤𑀺𑀲𑁆𑀲𑀢𑀺. 𑀩𑀸𑀳𑀺𑀭𑁄 𑀉𑀧𑀘𑀸𑀭𑁄 𑀦𑀸𑀫 𑀧𑀭𑀺𑀓𑁆𑀔𑁂𑀧𑀢𑁄, 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀯𑀸 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄. ‘‘𑀅𑀚𑁆𑀛𑀸𑀭𑀸𑀫𑁄 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀆𑀭𑀸𑀫𑀲𑁆𑀲 𑀅𑀦𑁆𑀢𑁄𑀆𑀭𑀸𑀫𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑁄. 𑀅𑀚𑁆𑀛𑀸𑀯𑀲𑀣𑁄 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀆𑀯𑀲𑀣𑀲𑁆𑀲 𑀅𑀦𑁆𑀢𑁄𑀆𑀯𑀲𑀣𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁫𑁦𑁬) 𑀧𑀦 𑀉𑀧𑀘𑀸𑀭𑀲𑀤𑁆𑀤𑁄 𑀅𑀩𑁆𑀪𑀦𑁆𑀢𑀭𑁂 𑀉𑀧𑀘𑀸𑀭𑁂 𑀤𑀺𑀲𑁆𑀲𑀢𑀺. 𑀅𑀩𑁆𑀪𑀦𑁆𑀢𑀭𑁄 𑀉𑀧𑀘𑀸𑀭𑁄 𑀘 𑀦𑀸𑀫 𑀧𑀭𑀺𑀓𑁆𑀔𑁂𑀧𑁄, 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀜𑁆𑀘 𑀳𑁄𑀢𑀺. 𑀇𑀥 𑀧𑀦 𑀧𑀭𑀺𑀓𑁆𑀔𑁂𑀧𑁄 ‘‘𑀅𑀚𑁆𑀛𑀸𑀭𑀸𑀫𑁄, 𑀅𑀚𑁆𑀛𑀸𑀯𑀲𑀣𑁄’’𑀢𑀺 𑀯𑀸 𑀦 𑀯𑀼𑀘𑁆𑀘𑀢𑀺, 𑀅𑀦𑁆𑀢𑁄 𑀏𑀯 𑀆𑀭𑀸𑀫𑁄, 𑀆𑀯𑀲𑀣𑁄𑀢𑀺 𑀯𑀸. 𑀢𑁂𑀲𑀼 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀪𑁂𑀤𑀪𑀺𑀦𑁆𑀦𑁂𑀲𑀼 𑀤𑁆𑀯𑀻𑀲𑀼 𑀉𑀧𑀘𑀸𑀭𑁂𑀲𑀼 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀥𑀺𑀓𑀸𑀭𑁂 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀏𑀢𑁆𑀣 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫 𑀅𑀩𑁆𑀪𑀦𑁆𑀢𑀭𑀽𑀧𑀘𑀸𑀭𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀩𑀸𑀳𑀺𑀭𑁄. 𑀪𑀺𑀓𑁆𑀔𑀼𑀦𑀺𑀬𑀸 𑀅𑀭𑀜𑁆𑀜𑀲𑀜𑁆𑀜𑀺𑀢𑀢𑀸𑀬 𑀢𑀲𑁆𑀲 𑀩𑀸𑀳𑀺𑀭𑀲𑁆𑀲, 𑀢𑀲𑁆𑀲𑀸 𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀺𑀬𑀸 𑀞𑀸𑀦𑀪𑀽𑀢𑀢𑁆𑀢𑀸 𑀘 𑀅𑀩𑁆𑀪𑀦𑁆𑀢𑀭𑀉𑀧𑀘𑀸𑀭𑀲𑁆𑀲𑀸𑀢𑀺 𑀇𑀤𑀫𑁂𑀢𑁆𑀣 𑀓𑀸𑀭𑀡𑀤𑁆𑀯𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀇𑀥 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀯𑀺𑀪𑀗𑁆𑀕𑁂𑀬𑁂𑀯 𑀧𑀞𑀫𑁄 𑀕𑀸𑀫𑀽𑀧𑀘𑀸𑀭𑁄 𑀤𑀲𑁆𑀲𑀺𑀢𑁄, 𑀲𑁄 𑀩𑀸𑀳𑀺𑀭𑁄, 𑀤𑀼𑀢𑀺𑀬𑁄 𑀅𑀩𑁆𑀪𑀦𑁆𑀢𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑁂𑀦 𑀘 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀲𑀗𑁆𑀔𑀸𑀢𑁄 𑀩𑀸𑀳𑀺𑀭𑁄 𑀉𑀧𑀘𑀸𑀭𑁄, 𑀤𑀼𑀢𑀺𑀬𑁂𑀦 𑀘 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀢𑁄 𑀩𑀸𑀳𑀺𑀭𑀲𑀗𑁆𑀔𑀸𑀢𑁄 𑀅𑀩𑁆𑀪𑀦𑁆𑀢𑀭𑁄 𑀉𑀧𑀘𑀸𑀭𑁄 𑀮𑁂𑀲𑁂𑀦 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀘𑀢𑁆𑀢𑀸𑀭𑁄𑀧𑀺 𑀉𑀧𑀘𑀸𑀭𑀸 𑀇𑀥 𑀪𑀕𑀯𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁂𑀦 𑀤𑁂𑀲𑀦𑀸𑀮𑀻𑀮𑀸𑀬 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀬𑀁 𑀦𑀬𑁄 𑀲𑀼𑀝𑁆𑀞𑀼 𑀮𑀓𑁆𑀔𑁂𑀢𑁆𑀯𑀸 𑀆𑀘𑀭𑀺𑀬𑁂𑀳𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀬𑀣𑀸𑀦𑀼𑀭𑀽𑀧𑀁 𑀢𑀢𑁆𑀣 𑀬𑁄𑀚𑁂𑀢𑀩𑁆𑀩𑁄. 𑀇𑀢𑀭𑀣𑀸 𑁋

𑀅𑀲𑀫𑁆𑀩𑀼𑀥𑀁 𑀩𑀼𑀤𑁆𑀥𑀫𑀳𑀸𑀦𑀼𑀪𑀸𑀯𑀁;

𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀦𑀬𑀢𑁆𑀢𑀢𑀜𑁆𑀘;

𑀬𑁄 𑀯𑀡𑁆𑀡𑀬𑁂 𑀦𑀁 𑀯𑀺𑀦𑀬𑀁 𑀅𑀯𑀺𑀜𑁆𑀜𑀽;

𑀲𑁄 𑀤𑀼𑀤𑁆𑀤𑀲𑁄 𑀲𑀸𑀲𑀦𑀦𑀸𑀲𑀳𑁂𑀢𑀼.

𑀧𑀸𑀴𑀺𑀁 𑀢𑀤𑀢𑁆𑀣𑀜𑁆𑀘 𑀅𑀲𑀫𑁆𑀩𑀼𑀥𑀜𑁆𑀳𑀺;

𑀦𑀸𑀲𑁂𑀢𑀺 𑀬𑁄 𑀅𑀝𑁆𑀞𑀓𑀣𑀸𑀦𑀬𑀜𑁆𑀘;

𑀅𑀦𑀺𑀘𑁆𑀙𑀬𑀁 𑀦𑀺𑀘𑁆𑀙𑀬𑀢𑁄 𑀧𑀭𑁂𑀳𑀺;

𑀕𑀸𑀫𑁄𑀢𑀺 𑀢𑁂𑀬𑁂𑀯 𑀧𑀼𑀭𑀓𑁆𑀔𑀢𑁄 𑀲𑁄.

𑀅𑀦𑀼𑀓𑁆𑀓𑀫𑁂𑀦𑁂𑀯 𑀫𑀳𑀸𑀚𑀦𑁂𑀦;

𑀧𑀼𑀭𑀓𑁆𑀔𑀢𑁄 𑀧𑀡𑁆𑀟𑀺𑀢𑀫𑀸𑀦𑀺 𑀪𑀺𑀓𑁆𑀔𑀼;

𑀅𑀧𑀡𑁆𑀟𑀺𑀢𑀸𑀦𑀁 𑀯𑀺𑀫𑀢𑀺𑀁 𑀅𑀓𑀢𑁆𑀯𑀸;

𑀆𑀘𑀭𑀺𑀬𑀮𑀻𑀮𑀁 𑀧𑀼𑀭𑀢𑁄 𑀓𑀭𑁄𑀢𑀺.

𑀢𑀢𑁆𑀣 𑀳𑀺 𑀧𑀸𑀴𑀺𑀬𑀁 ‘‘𑀕𑀸𑀫𑀲𑁆𑀲 𑀉𑀧𑀘𑀸𑀭𑁄 𑀕𑀸𑀫𑀽𑀧𑀘𑀸𑀭𑁄, 𑀕𑀸𑀫𑀲𑀗𑁆𑀔𑀸𑀢𑁄 𑀉𑀧𑀘𑀸𑀭𑁄 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸’’𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 (𑀧𑀸𑀭𑀸. 𑁯𑁨) 𑀯𑀢𑁆𑀯𑀸 𑀧𑀼𑀦 𑀕𑀸𑀫𑀲𑀗𑁆𑀔𑀸𑀢𑀁 𑀉𑀧𑀘𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀕𑀸𑀫𑀦𑁆𑀢𑀭𑀅𑀅𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀆𑀤𑀻𑀲𑀼 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀫𑁂𑀯 𑀕𑀸𑀫𑀽𑀧𑀘𑀸𑀭𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀮𑀺𑀔𑀺𑀢𑀁.

𑀅𑀢𑁆𑀣𑀢𑁄 𑀏𑀓𑀦𑁆𑀢𑀺 𑀏𑀢𑁆𑀣 𑀲𑀗𑁆𑀔𑀸𑀲𑀤𑁆𑀤𑀁 𑀲𑀗𑁆𑀔𑀸𑀢𑀲𑀤𑁆𑀤𑁂𑀦 𑀲𑀫𑀸𑀦𑀬𑀢𑀺. ‘‘𑀆𑀤𑀺𑀬𑁂𑀬𑁆𑀬𑀸’’𑀢𑀺 𑀇𑀤𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑀸𑀦𑀁 𑀲𑀸𑀥𑀸𑀭𑀡𑀧𑀤𑀁. 𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀘 𑀔𑀻𑀮𑀸𑀤𑀻𑀦𑀺 𑀲𑀗𑁆𑀓𑀸𑀫𑁂𑀢𑁆𑀯𑀸 𑀔𑁂𑀢𑁆𑀢𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀞𑀸𑀦𑀸𑀘𑀸𑀯𑀦𑁂 𑀬𑀣𑀸 𑀲𑀸𑀫𑀺𑀓𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑀸𑀤𑀺𑀁 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀆𑀧𑀢𑁆𑀢𑀺, 𑀢𑀣𑀸 𑀇𑀳𑀸𑀧𑀻𑀢𑀺 𑀕𑀳𑁂𑀢𑀩𑁆𑀩𑀸.

‘‘𑀅𑀲𑀼𑀓𑀁 𑀦𑀸𑀫 𑀪𑀡𑁆𑀟𑀁 𑀅𑀯𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑁂𑀲𑀁 𑀏𑀓𑀸𑀲𑀬𑀢𑁆𑀢𑀸 ‘‘𑀏𑀓𑁂𑀦𑀸𑀧𑀻’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀆𑀡𑀢𑁆𑀢𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀁𑀯𑀺𑀥𑀸𑀯𑀳𑀸𑀭𑁄 𑀦𑀸𑀫 𑀏𑀓𑁄 𑀅𑀯𑀳𑀸𑀭𑁄 𑀧𑀭𑀺𑀳𑀸𑀬𑀺𑀢𑀩𑁆𑀩𑁄.

𑀑𑀓𑀸𑀲𑀧𑀭𑀺𑀓𑀧𑁆𑀧𑁂 𑀞𑀸𑀦𑀸𑀘𑀸𑀯𑀦𑀸𑀬 𑀕𑀳𑀺𑀢𑀫𑁆𑀧𑀺 𑀑𑀓𑀸𑀲𑀧𑀭𑀺𑀓𑀧𑁆𑀧𑀺𑀢𑀢𑁆𑀢𑀸 𑀭𑀓𑁆𑀔𑀢𑀺. 𑀑𑀓𑀸𑀲𑀸𑀢𑀺𑀓𑁆𑀓𑀫𑁄𑀯 𑀧𑀫𑀸𑀡𑀁 𑀧𑀼𑀩𑁆𑀩𑁂 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀢𑁆𑀢𑀸. 𑀇𑀤𑀸𑀦𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑁂𑀧𑀺 𑀳𑁄𑀢𑀺 𑀏𑀯𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀏𑀢𑁆𑀣 𑀧𑀦 𑀯𑀺𑀦𑀺𑀘𑁆𑀙𑀬𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀉𑀤𑁆𑀥𑀸𑀭𑁄 𑀦𑀢𑁆𑀣𑀻𑀢𑀺 𑀞𑀸𑀦𑀸𑀘𑀸𑀯𑀦𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀉𑀤𑁆𑀥𑀢𑀫𑀢𑁆𑀢𑁂 𑀅𑀯𑀳𑀸𑀭𑁄 𑀲𑀓𑀮𑀲𑁆𑀲 𑀧𑀬𑁄𑀕𑀲𑁆𑀲 𑀦𑀺𑀝𑁆𑀞𑀸𑀧𑀺𑀢𑀢𑁆𑀢𑀸, 𑀦 𑀅𑀢𑁆𑀣𑀲𑀸𑀥𑀓𑀯𑀲𑁂𑀦. 𑀉𑀤𑁆𑀥𑀸𑀭𑁂𑀬𑁂𑀯 𑀭𑀓𑁆𑀔𑀢𑀻𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁂𑀦 𑀧𑀸𑀢𑀦𑁂 𑀦 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁂 𑀲𑀺𑀤𑁆𑀥𑁂𑀧𑀺 𑀅𑀢𑁆𑀣𑀲𑀸𑀥𑀓𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀉𑀤𑁆𑀥𑀭𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀧𑀣𑀩𑁆𑀬𑀸𑀭𑀸𑀚𑀧𑀤𑁂𑀲𑀭𑀸𑀚𑀸𑀤𑀬𑁄 𑀩𑀳𑀽, 𑀢𑁂𑀲𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘𑀭𑀸𑀚𑀸𑀦𑁄’𑀢𑀺 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢’’𑀦𑁆𑀢𑀺 𑀮𑀺𑀔𑀺𑀢𑀁. 𑀓𑀺𑀜𑁆𑀘𑀸𑀧𑀺 𑀩𑀳𑀼𑀯𑀘𑀦𑀁 𑀓𑀢𑀁, 𑀇𑀤𑀁 𑀧𑀦 𑀏𑀓𑀁 𑀩𑀺𑀫𑁆𑀩𑀺𑀲𑀸𑀭𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀭𑀸𑀚𑀸𑀦𑁄𑀢𑀺 𑀓𑀺𑀜𑁆𑀘𑀺 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀲𑀸𑀥𑀸𑀭𑀡𑀯𑀲𑁂𑀦 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁, 𑀇𑀤𑀁 𑀧𑀦 𑀩𑀺𑀫𑁆𑀩𑀺𑀲𑀸𑀭𑀫𑁂𑀯𑀸𑀢𑀺.

𑀧𑀼𑀩𑁆𑀩𑀧𑁆𑀧𑀬𑁄𑀕𑁂𑀢𑀺 𑀏𑀢𑁆𑀣 𑀕𑀫𑀦𑀓𑀸𑀮𑁂 𑀫𑀕𑁆𑀕𑀲𑁄𑀥𑀦𑀸𑀥𑀺𑀓𑀭𑀡𑁂 𑀅𑀧𑀸𑀘𑀺𑀢𑁆𑀢𑀺𑀬𑀔𑁂𑀢𑁆𑀢𑁂 𑀤𑀼𑀓𑁆𑀓𑀝𑀁, 𑀮𑀢𑀸𑀘𑁆𑀙𑁂𑀤𑀦𑀸𑀤𑀻𑀲𑀼 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀕𑀦𑁆𑀢𑁆𑀯𑀸 𑀧𑀦 𑀓𑀼𑀫𑁆𑀪𑀺𑀫𑀢𑁆𑀣𑀓𑁂 𑀚𑀸𑀢𑀮𑀢𑀸𑀤𑀺𑀘𑁆𑀙𑁂𑀤𑀦𑁂 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀁. ‘‘𑀏𑀓𑀪𑀡𑁆𑀟𑁂 𑀏𑀯𑀁 𑀪𑀸𑀭𑀺𑀬𑀫𑀺𑀤𑀁, ‘𑀢𑁆𑀯𑀫𑁆𑀧𑀺 𑀏𑀓𑀧𑀲𑁆𑀲𑀁 𑀕𑀡𑁆𑀳, 𑀅𑀳𑀫𑁆𑀧𑀺 𑀏𑀓𑀧𑀲𑁆𑀲𑀁 𑀕𑀡𑁆𑀳𑀸𑀫𑀻’𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀉𑀪𑀬𑁂𑀲𑀁 𑀧𑀬𑁄𑀕𑁂𑀦 𑀞𑀸𑀦𑀸𑀘𑀸𑀯𑀦𑁂 𑀓𑀢𑁂 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀫𑀼𑀝𑁆𑀞𑀸𑀢𑀺. 𑀅𑀜𑁆𑀜𑀣𑀸 𑀲𑀸𑀳𑀢𑁆𑀣𑀺𑀓𑀁 𑀯𑀸 𑀆𑀡𑀢𑁆𑀢𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀺, 𑀆𑀡𑀢𑁆𑀢𑀺𑀓𑀁 𑀯𑀸 𑀲𑀸𑀳𑀢𑁆𑀣𑀺𑀓𑀲𑁆𑀲𑀸𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀺𑀦𑀬𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁. 𑀧𑀺-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀢𑀢𑁆𑀣𑁂𑀯 𑀮𑀺𑀔𑀺𑀢𑁄.

𑀓𑀸𑀬𑀯𑀸𑀘𑀸𑀲𑀫𑀼𑀝𑁆𑀞𑀸𑀦𑀁, 𑀬𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀲𑀺𑀬𑀸;

𑀢𑀢𑁆𑀭 𑀯𑀸𑀘𑀗𑁆𑀕𑀁 𑀘𑀺𑀢𑁆𑀢𑀁𑀯, 𑀓𑀫𑁆𑀫𑀁 𑀦𑀲𑁆𑀲𑀸 𑀯𑀺𑀥𑀻𑀬𑀢𑀺.

𑀓𑀺𑀭𑀺𑀬𑀸𑀓𑀺𑀭𑀺𑀬𑀸𑀤𑀺𑀓𑀁 𑀬𑀜𑁆𑀘𑁂, 𑀬𑀫𑁆𑀧𑀺 𑀓𑀫𑁆𑀫𑀢𑁆𑀢𑀬𑀁 𑀪𑀯𑁂;

𑀦 𑀬𑀼𑀢𑁆𑀢𑀁 𑀢𑀁 𑀯𑀺𑀭𑀼𑀤𑁆𑀥𑀢𑁆𑀢𑀸, 𑀓𑀫𑁆𑀫𑀫𑁂𑀓𑀁𑀯 𑀬𑀼𑀚𑁆𑀚𑀢𑀻𑀢𑀺. (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁩𑁧 𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸);

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀬𑀣𑀸 𑀜𑀸𑀢𑀧𑀭𑀺𑀜𑁆𑀜𑀸 𑀥𑀫𑁆𑀫𑀸𑀦𑀁 𑀲𑀪𑀸𑀯𑀚𑀸𑀦𑀦𑀫𑁂𑀯 ‘‘𑀇𑀤𑀁 𑀭𑀽𑀧𑀁, 𑀅𑀬𑀁 𑀯𑁂𑀤𑀦𑀸’’𑀢𑀺, 𑀢𑀻𑀭𑀡𑀧𑀭𑀺𑀜𑁆𑀜𑀸 𑀧𑀦 𑀥𑀫𑁆𑀫𑀲𑀪𑀸𑀯𑁂𑀦 𑀲𑀤𑁆𑀥𑀺𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 ‘‘𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸’’𑀢𑀺𑀆𑀤𑀺, 𑀏𑀯𑀫𑀺𑀥 𑀲𑀤𑁆𑀥𑀺𑀁 𑀘𑁂𑀢𑁂𑀢𑁆𑀯𑀸 𑀏𑀓𑀢𑁆𑀢𑁂𑀦𑀸𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀪𑀸𑀯𑀸 ‘‘𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀯𑀲𑁂𑀦 𑀲𑀩𑁆𑀩𑀲𑀼𑀔𑀼𑀫𑀅𑀢𑁆𑀢𑀪𑀸𑀯𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀓𑀮𑀮𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀆𑀳. 𑀏𑀢𑁆𑀣 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁄 𑀯𑀺𑀬𑁄𑀚𑁂𑀢𑀺. 𑀢𑀢𑁆𑀣 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦 𑀲𑀓𑁆𑀓𑀸 𑀯𑁄𑀭𑁄𑀧𑁂𑀢𑀼𑀁, 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀲𑀓𑁆𑀓𑀸. 𑀓𑀣𑀁? 𑀢𑀲𑁆𑀫𑀺𑀜𑁆𑀳𑀺 𑀉𑀧𑀓𑁆𑀓𑀫𑁂 𑀓𑀢𑁂 𑀮𑀤𑁆𑀥𑀽𑀧𑀓𑁆𑀓𑀫𑀁 𑀚𑀻𑀯𑀺𑀢𑀤𑀲𑀓𑀁 𑀦𑀺𑀭𑀼𑀚𑁆𑀛𑀫𑀸𑀦𑀁 𑀤𑀼𑀩𑁆𑀩𑀮𑀲𑁆𑀲 𑀧𑀭𑀺𑀳𑀻𑀦𑀯𑁂𑀕𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀬𑀣𑀸 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑁂 𑀚𑀯𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀢𑀤𑀦𑀼𑀭𑀽𑀧𑀁 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀢𑁄 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀅𑀧𑀢𑁆𑀯𑀸 𑀅𑀦𑁆𑀢𑀭𑀸𑀯 𑀦𑀺𑀭𑀼𑀚𑁆𑀛𑀢𑀺. 𑀏𑀯𑀁 𑀢𑀤𑀼𑀪𑀬𑀫𑁆𑀧𑀺 𑀯𑁄𑀭𑁄𑀧𑁂𑀢𑀼𑀁 𑀲𑀓𑁆𑀓𑀸. 𑀢𑀲𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀬𑁄𑀚𑁂𑀢𑀺.

‘‘𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲𑀸’’𑀢𑀺 𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀧𑀭𑀫𑀢𑁆𑀣𑀯𑀲𑁂𑀦 𑀆𑀯𑀺𑀪𑀸𑀯𑀢𑁆𑀣𑀁 ‘‘𑀧𑀸𑀡𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀬 𑀘𑁂𑀢𑀦𑀸𑀬 𑀧𑀬𑀼𑀚𑁆𑀚𑀢𑀻𑀢𑀺 𑀧𑀬𑁄𑀕𑁄, 𑀓𑁄 𑀲𑁄? 𑀲𑀭𑀻𑀭𑁂 𑀲𑀢𑁆𑀣𑀸𑀤𑀻𑀦𑀁 𑀕𑀫𑀦𑀁 𑀧𑀳𑀭𑀡𑀦𑁆𑀢𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀬 𑀘𑁂𑀢𑀦𑀸𑀬 𑀧𑀭𑀲𑀭𑀻𑀭𑁂 𑀲𑀢𑁆𑀣𑀧𑀸𑀢𑀦𑀁. 𑀤𑀽𑀭𑁂 𑀞𑀺𑀢𑀦𑁆𑀢𑀺 𑀤𑀽𑀭𑁂 𑀯𑀸 𑀢𑀺𑀝𑁆𑀞𑀢𑀼, 𑀲𑀫𑀻𑀧𑁂 𑀯𑀸. 𑀳𑀢𑁆𑀣𑀢𑁄 𑀫𑀼𑀢𑁆𑀢𑁂𑀦 𑀧𑀳𑀸𑀭𑁄 𑀦𑀺𑀲𑁆𑀲𑀕𑁆𑀕𑀺𑀬𑁄. 𑀢𑀢𑁆𑀣𑀸𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀧𑁆𑀧𑀬𑁄𑀕𑁂. 𑀬𑁄 𑀓𑁄𑀘𑀺 𑀫𑀭𑀢𑀽𑀢𑀺 𑀏𑀢𑁆𑀣 𑀫𑀳𑀸𑀚𑀦𑀲𑀫𑀽𑀳𑁂 𑀦 𑀲𑀓𑁆𑀓𑀸. 𑀬𑀲𑁆𑀲𑀽𑀧𑀭𑀺 𑀲𑀭𑁄 𑀧𑀢𑀢𑀺, 𑀢𑀲𑁆𑀲𑁂𑀯 𑀚𑀻𑀯𑀺𑀢𑀫𑀭𑀡𑀁 𑀓𑀸𑀢𑀼𑀁, 𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀚𑀻𑀯𑀺𑀢𑀫𑀭𑀡𑀁. 𑀆𑀡𑀸𑀧𑀦𑀦𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀬 𑀘𑁂𑀢𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑀁. 𑀢𑁂𑀦𑁂𑀯 ‘‘𑀲𑀸𑀯𑁂𑀢𑀼𑀓𑀸𑀫𑁄 𑀦 𑀲𑀸𑀯𑁂𑀢𑀻’’𑀢𑀺 (𑀧𑀸𑀭𑀸. 𑁫𑁪) 𑀯𑀼𑀢𑁆𑀢𑀁. 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀸𑀢𑀺 𑀆𑀡𑀢𑁆𑀢𑀺𑀓𑀧𑁆𑀧𑀬𑁄𑀕𑀲𑀸𑀥𑀺𑀓𑀸. 𑀏𑀢𑁂𑀲𑀼 𑀳𑀺 𑀅𑀯𑀺𑀭𑀚𑁆𑀛𑀺𑀢𑁂𑀲𑀼 𑀏𑀯 𑀆𑀡𑀢𑁆𑀢𑀺𑀧𑀬𑁄𑀕𑁄 𑀳𑁄𑀢𑀺, 𑀦 𑀅𑀜𑁆𑀜𑀣𑀸.

𑀭𑀽𑀧𑀽𑀧𑀳𑀸𑀭𑁄𑀢𑀺 𑀏𑀢𑁆𑀣 𑁋

‘‘𑀫𑀫𑀸𑀮𑀸𑀪𑁂𑀦 𑀏𑀲𑀺𑀢𑁆𑀣𑀻, 𑀫𑀭𑀢𑀽’’𑀢𑀺 𑀲𑀫𑀻𑀧𑀕𑁄;

𑀤𑀼𑀝𑁆𑀞𑀘𑀺𑀢𑁆𑀢𑁄 𑀲𑀘𑁂 𑀬𑀸𑀢𑀺, 𑀳𑁄𑀢𑀺 𑀲𑁄 𑀇𑀢𑁆𑀣𑀺𑀫𑀸𑀭𑀓𑁄.

𑀪𑀺𑀓𑁆𑀔𑀢𑁆𑀣𑀸𑀬 𑀲𑀘𑁂 𑀬𑀸𑀢𑀺, 𑀚𑀸𑀦𑀦𑁆𑀢𑁄𑀧𑀺 𑀦 𑀫𑀸𑀭𑀓𑁄;

𑀅𑀦𑀢𑁆𑀣𑀺𑀓𑁄 𑀳𑀺 𑀲𑁄 𑀢𑀲𑁆𑀲𑀸, 𑀫𑀭𑀡𑁂𑀦 𑀉𑀧𑁂𑀓𑁆𑀔𑀓𑁄.

𑀯𑀺𑀬𑁄𑀕𑁂𑀦 𑀘 𑀫𑁂 𑀚𑀸𑀬𑀸, 𑀚𑀦𑀦𑀻 𑀘 𑀦 𑀚𑀻𑀯𑀢𑀺;

𑀇𑀢𑀺 𑀚𑀸𑀦𑀁 𑀯𑀺𑀬𑀼𑀜𑁆𑀚𑀦𑁆𑀢𑁄, 𑀢𑀤𑀢𑁆𑀣𑀺𑀓𑁄 𑀳𑁄𑀢𑀺 𑀫𑀸𑀭𑀓𑁄.

𑀧𑀩𑁆𑀩𑀚𑁆𑀚𑀸𑀤𑀺𑀦𑀺𑀫𑀺𑀢𑁆𑀢𑀜𑁆𑀘𑁂, 𑀬𑀸𑀢𑀺 𑀚𑀸𑀦𑀁 𑀦 𑀫𑀸𑀭𑀓𑁄;

𑀅𑀦𑀢𑁆𑀣𑀺𑀓𑁄 𑀳𑀺 𑀲𑁄 𑀢𑀲𑁆𑀲𑀸, 𑀫𑀭𑀡𑁂𑀦 𑀉𑀧𑁂𑀓𑁆𑀔𑀓𑁄.

𑀳𑀸𑀭𑀓𑀲𑀤𑁆𑀤𑀲𑁆𑀲 𑀪𑁂𑀤𑀢𑁄 𑀅𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀉𑀪𑀬𑀫𑁆𑀧𑀺 𑀏𑀓𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀣𑀜𑁆𑀘 𑀢𑀁 𑀳𑀸𑀭𑀓𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀣𑀸𑀯𑀭𑀧𑁆𑀧𑀬𑁄𑀕𑀁 𑀤𑀲𑁆𑀲𑁂𑀢𑀺 𑀲𑀸𑀳𑀢𑁆𑀣𑀺𑀓𑀸𑀤𑀻𑀲𑀼 𑀧𑀬𑁄𑀕𑁂𑀲𑀼. ‘‘𑀇𑀢𑀺 𑀘𑀺𑀢𑁆𑀢𑀫𑀦𑁄’’𑀢𑀺 𑀉𑀤𑁆𑀥𑀭𑀺𑀢𑁆𑀯𑀸𑀧𑀺 𑀇𑀢𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀦 𑀢𑀸𑀯 𑀯𑀼𑀢𑁆𑀢𑁄. 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑁄, 𑀅𑀥𑀺𑀓𑀸𑀭𑀯𑀲𑁂𑀦 𑀧𑀦 𑀆𑀕𑀢𑀁 𑀇𑀢𑀺𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀇𑀢𑀺 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄𑀢𑀺 𑀏𑀢𑁆𑀣 ‘‘𑀫𑀭𑀡𑀲𑀜𑁆𑀜𑀻 𑀫𑀭𑀡𑀘𑁂𑀢𑀦𑁄 𑀫𑀭𑀡𑀸𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀭𑀡𑀁𑀬𑁂𑀯 𑀯𑀓𑁆𑀔𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀙𑀧𑁆𑀧𑀬𑁄𑀕𑀯𑀲𑁂𑀦. 𑀲𑀸𑀳𑀢𑁆𑀣𑀺𑀓𑀦𑀺𑀲𑁆𑀲𑀕𑁆𑀕𑀺𑀬𑀧𑁆𑀧𑀬𑁄𑀕𑁂𑀲𑀼 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀲𑀢𑁆𑀢𑀫𑀸𑀬 𑀲𑀳 𑀉𑀧𑁆𑀧𑀦𑁆𑀦𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀸𑀳𑀢𑁆𑀣𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀡𑀢𑁆𑀢𑀺𑀓𑁂 𑀧𑀦 𑀲𑀢𑁆𑀢𑀳𑀺𑀧𑀺 𑀘𑁂𑀢𑀦𑀸𑀳𑀺 𑀲𑀳 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀫𑁆𑀪𑀯𑀢𑁄 𑀲𑀢𑁆𑀢 𑀲𑀢𑁆𑀢 𑀲𑀤𑁆𑀤𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀏𑀓𑁂𑀓𑀓𑁆𑀔𑀭𑀪𑀸𑀯𑀁 𑀕𑀦𑁆𑀢𑁆𑀯𑀸 𑀬𑀢𑁆𑀢𑀓𑁂𑀳𑀺 𑀅𑀓𑁆𑀔𑀭𑁂𑀳𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀺, 𑀢𑀤𑀯𑀲𑀸𑀦𑀓𑁆𑀔𑀭𑀲𑀫𑀼𑀝𑁆𑀞𑀸𑀧𑀺𑀓𑀸𑀬 𑀲𑀢𑁆𑀢𑀫𑀘𑁂𑀢𑀦𑀸𑀬 𑀲𑀳𑀚𑀸𑀢𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀆𑀡𑀢𑁆𑀢𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀇𑀥𑁂𑀯 𑀲𑀗𑁆𑀕𑀳𑀦𑁆𑀢𑀺 ‘‘𑀇𑀢𑀺 𑀚𑀸𑀦𑀸𑀫𑀺, 𑀇𑀢𑀺 𑀧𑀲𑁆𑀲𑀸𑀫𑀻’’𑀢𑀺 𑀧𑀤𑁂 𑀓𑀣𑀦𑁆𑀢𑀺 𑀘𑁂, ‘‘𑀇𑀢𑀺 𑀚𑀸𑀦𑀸𑀫𑀻’’𑀢𑀺𑀆𑀤𑀺𑀫𑀸𑀳. 𑀓𑁂𑀯𑀮𑀁 ‘‘𑀧𑀸𑀧𑀺𑀘𑁆𑀙𑀢𑀸𑀬𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀘𑀦𑀢𑁄 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀲𑀫𑀼𑀤𑀸𑀘𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁. ‘‘𑀅𑀢𑀻𑀢𑀓𑀸𑀮𑁂 𑀲𑁄𑀢𑀸𑀧𑀦𑁆𑀦𑁄𑀫𑁆𑀳𑀻’’𑀢𑀺 𑀯𑀤𑀦𑁆𑀢𑁄 𑀧𑀭𑀺𑀬𑀸𑀬𑁂𑀦 𑀯𑀤𑀢𑀺, ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸’’𑀢𑀺𑀆𑀤𑀻𑀲𑀼 (𑀧𑀭𑀺. 𑁧𑁬𑁫) 𑀯𑀺𑀬 𑀲𑀺𑀓𑁆𑀔𑀸𑀧𑀤𑁂𑀧𑀺 ‘‘𑀇𑀢𑀺 𑀚𑀸𑀦𑀸𑀫𑀻’’𑀢𑀺 (𑀧𑀸𑀭𑀸. 𑁧𑁯𑁫, 𑁧𑁯𑁭) 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀯𑀼𑀢𑁆𑀢𑀁.

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀸𑀢𑀼𑀖𑀸𑀢𑀓𑀧𑀺𑀢𑀼𑀖𑀸𑀢𑀓𑀅𑀭𑀳𑀦𑁆𑀢𑀖𑀸𑀢𑀓𑀸 𑀢𑀢𑀺𑀬𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀮𑀫𑁆𑀩𑀻𑀆𑀤𑀬𑁄 𑀘 𑀘𑀢𑁆𑀢𑀸𑀭𑁄 𑀧𑀞𑀫𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸 𑀏𑀯𑀸𑀢𑀺 𑀓𑀢𑁆𑀯𑀸 𑀓𑀼𑀢𑁄 𑀘𑀢𑀼𑀯𑀻𑀲𑀢𑀻𑀢𑀺 𑀘𑁂? 𑀦, 𑀅𑀥𑀺𑀧𑁆𑀧𑀸𑀬𑀸𑀚𑀸𑀦𑀦𑀢𑁄. 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀳𑀺 𑀘𑀢𑁆𑀢𑀸𑀭𑁄 𑀇𑀥𑀸𑀦𑀼𑀧𑀲𑀫𑁆𑀧𑀦𑁆𑀦𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸, 𑀮𑀫𑁆𑀩𑀻𑀆𑀤𑀬𑁄 𑀘𑀢𑁆𑀢𑀸𑀭𑁄 𑀓𑀺𑀜𑁆𑀘𑀸𑀧𑀺 𑀧𑀞𑀫𑀧𑀸𑀭𑀸𑀚𑀺𑀓𑁂𑀦 𑀲𑀗𑁆𑀕𑀳𑀺𑀢𑀸, 𑀬𑀲𑁆𑀫𑀸 𑀧𑀦 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀦𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸. 𑀦 𑀮𑀪𑀢𑀺 𑀪𑀺𑀓𑁆𑀔𑀽𑀳𑀻𑀢𑀺 𑀏𑀢𑁆𑀣 ‘‘𑀉𑀧𑁄𑀲𑀣𑀸𑀤𑀺𑀪𑁂𑀤𑀁 𑀲𑀁𑀯𑀸𑀲’’𑀦𑁆𑀢𑀺 𑀏𑀢𑁆𑀢𑀓𑀁 𑀯𑀼𑀢𑁆𑀢𑀁. 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 ‘‘𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑀗𑁆𑀖𑀓𑀫𑁆𑀫𑀧𑁆𑀧𑀪𑁂𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 ‘‘𑀲𑀁𑀯𑀸𑀲𑁄 𑀦𑀸𑀫 𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸’’𑀢𑀺 (𑀧𑀸𑀭𑀸. 𑁫𑁫, 𑁯𑁨, 𑁧𑁭𑁨, 𑁧𑁯𑁮) 𑀯𑀼𑀢𑁆𑀢𑀁. 𑀢𑀺𑀯𑀺𑀥𑁂𑀦𑀸𑀧𑀺 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁. ‘‘𑀦, 𑀪𑀺𑀓𑁆𑀔𑀯𑁂, 𑀕𑀳𑀝𑁆𑀞𑁂𑀦 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺 (𑀫𑀳𑀸𑀯. 𑁧𑁫𑁪) 𑀧𑀸𑀢𑀺𑀫𑁄𑀓𑁆𑀔𑀧𑁆𑀧𑀯𑀸𑀭𑀡𑀸𑀲𑀼 𑀏𑀯 𑀆𑀕𑀢𑀁, 𑀅𑀜𑁆𑀜𑁂𑀲𑀼 𑀘 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀲𑁂𑀲𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀦𑀢𑁆𑀣𑀺 𑀧𑀝𑀺𑀓𑁆𑀔𑁂𑀧𑁄. 𑀆𑀘𑀭𑀺𑀬𑀸𑀧𑀺 ‘‘𑀲𑁂𑀲𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀦𑀢𑁆𑀣𑀺 𑀆𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀅𑀦𑁆𑀢𑀺𑀫𑀯𑀢𑁆𑀣𑀼 𑀅𑀚𑁆𑀛𑀸𑀧𑀦𑁆𑀦𑀁 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀪𑀺𑀓𑁆𑀔𑀼𑀦𑁄 𑀯𑀺𑀬 𑀯𑀼𑀢𑁆𑀢𑀁, 𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀯𑀺𑀬 𑀤𑀼𑀓𑁆𑀓𑀝𑀁. 𑀢𑀲𑁆𑀫𑀸 𑀢𑁂𑀦 𑀲𑀳𑀲𑁂𑀬𑁆𑀬𑀸, 𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀜𑁆𑀘 𑀪𑀺𑀓𑁆𑀔𑀼𑀲𑁆𑀲 𑀯𑀝𑁆𑀝𑀢𑀻𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀻’’𑀢𑀺 𑀮𑀺𑀔𑀺𑀢𑀁. ‘‘𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸𑀢𑀺 ‘𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀁𑀯𑀸𑀲𑀲𑁆𑀲 𑀅𑀪𑀩𑁆𑀩𑀢𑀸𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀘𑀢𑀼𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀁 𑀧𑀓𑀺𑀡𑁆𑀡𑀓𑀁 𑁋 𑀫𑁂𑀣𑀼𑀦𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀅𑀢𑁆𑀣𑀺 𑀓𑁄𑀘𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄, 𑀅𑀢𑁆𑀣𑀺 𑀓𑁄𑀘𑀺 𑀦 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄, 𑀅𑀢𑁆𑀣𑀺 𑀓𑁄𑀘𑀺 𑀦 𑀧𑀸𑀭𑀸𑀚𑀺𑀓𑁄 𑀲𑀁𑀯𑀸𑀲𑁄 𑀤𑀼𑀓𑁆𑀓𑀝𑀯𑀢𑁆𑀣𑀼𑀲𑁆𑀫𑀺𑀁 𑀯𑀸 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀲𑁆𑀫𑀺𑀁 𑀯𑀸 𑀧𑀝𑀺𑀲𑁂𑀯𑀦𑁆𑀢𑁄, 𑀅𑀢𑁆𑀣𑀺 𑀓𑁄𑀘𑀺 𑀦 𑀧𑀸𑀭𑀸𑀚𑀺𑀓𑁄 𑀧𑀓𑁆𑀔𑀧𑀡𑁆𑀟𑀓𑁄 𑀅𑀧𑀡𑁆𑀟𑀓𑀧𑀓𑁆𑀔𑁂 𑀉𑀧𑀲𑀫𑁆𑀧𑀦𑁆𑀦𑁄 𑀧𑀡𑁆𑀟𑀓𑀧𑀓𑁆𑀔𑁂 𑀫𑁂𑀣𑀼𑀦𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄. 𑀲𑁄 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀻𑀢𑀺 𑀦 𑀧𑀸𑀭𑀸𑀚𑀺𑀓𑁄 𑀦𑀸𑀫. 𑀦 𑀳𑀺 𑀅𑀪𑀺𑀓𑁆𑀔𑀼𑀲𑁆𑀲 𑀆𑀧𑀢𑁆𑀢𑀺 𑀦𑀸𑀫 𑀅𑀢𑁆𑀣𑀺. 𑀲𑁄 𑀅𑀦𑀸𑀧𑀢𑁆𑀢𑀺𑀓𑀢𑁆𑀢𑀸 𑀅𑀧𑀡𑁆𑀟𑀓𑀧𑀓𑁆𑀔𑁂 𑀆𑀕𑀢𑁄 𑀓𑀺𑀁 𑀅𑀲𑀁𑀯𑀸𑀲𑁄 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀳𑁄𑀢𑀺. ‘‘𑀅𑀪𑀩𑁆𑀩𑁄 𑀢𑁂𑀦 𑀲𑀭𑀻𑀭𑀩𑀦𑁆𑀥𑀦𑁂𑀦𑀸’’𑀢𑀺 (𑀫𑀳𑀸𑀯. 𑁧𑁨𑁯) 𑀳𑀺 𑀯𑀼𑀢𑁆𑀢𑀁. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄…𑀧𑁂… 𑀅𑀲𑀁𑀯𑀸𑀲𑁄’’𑀢𑀺 (𑀧𑀸𑀭𑀸. 𑁪𑁪) 𑀯𑀼𑀢𑁆𑀢𑀢𑁆𑀢𑀸 𑀬𑁄 𑀪𑀺𑀓𑁆𑀔𑀼𑀪𑀸𑀯𑁂𑀦 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀲𑁄 𑀏𑀯 𑀅𑀪𑀩𑁆𑀩𑁄. 𑀦𑀸𑀬𑀁 𑀅𑀧𑀸𑀭𑀸𑀚𑀺𑀓𑀢𑁆𑀢𑀸𑀢𑀺 𑀘𑁂? 𑀦, ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁨𑁬) 𑀯𑀼𑀢𑁆𑀢𑀝𑁆𑀞𑀸𑀦𑁂 𑀬𑀣𑀸 𑀅𑀪𑀺𑀓𑁆𑀔𑀼𑀦𑀸 𑀓𑀫𑁆𑀫𑀯𑀸𑀘𑀸𑀬 𑀲𑀸𑀯𑀺𑀢𑀸𑀬𑀧𑀺 𑀓𑀫𑁆𑀫𑀁 𑀭𑀼𑀳𑀢𑀺 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀯𑀺𑀲𑁂𑀲𑁄 𑁋 𑀉𑀧𑀲𑀫𑁆𑀧𑀦𑁆𑀦𑀧𑀼𑀩𑁆𑀩𑁄 𑀏𑀯𑀁 𑀘𑁂 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀺, 𑀲𑀗𑁆𑀖𑁄 𑀘 𑀢𑀲𑁆𑀫𑀺𑀁 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻 𑀏𑀯 𑀘𑁂, 𑀓𑀫𑁆𑀫𑀁 𑀭𑀼𑀳𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀦𑁄 𑀔𑀦𑁆𑀢𑀻𑀢𑀺 𑀆𑀘𑀭𑀺𑀬𑁄.

𑀕𑀳𑀝𑁆𑀞𑁄 𑀯𑀸 𑀢𑀺𑀢𑁆𑀣𑀺𑀬𑁄 𑀯𑀸 𑀧𑀡𑁆𑀟𑀓𑁄 𑀯𑀸 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀺, 𑀲𑀗𑁆𑀖𑁂𑀦 𑀓𑀫𑁆𑀫𑀯𑀸𑀘𑀸 𑀦 𑀯𑀼𑀢𑁆𑀢𑀸 𑀳𑁄𑀢𑀺. ‘‘𑀲𑀗𑁆𑀖𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬 𑀲𑀗𑁆𑀖𑁄 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀉𑀧𑀲𑀫𑁆𑀧𑀦𑁆𑀦𑁄 𑀲𑀗𑁆𑀖𑁂𑀦𑀸’’𑀢𑀺 (𑀫𑀳𑀸𑀯. 𑁧𑁨𑁭) 𑀳𑀺 𑀯𑀘𑀦𑀢𑁄 𑀲𑀗𑁆𑀖𑁂𑀦 𑀓𑀫𑁆𑀫𑀯𑀸𑀘𑀸𑀬 𑀯𑀢𑁆𑀢𑀩𑁆𑀩𑀢𑀸𑀬 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑁂𑀦, 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀲𑀜𑁆𑀜𑀺𑀢𑁂𑀦 𑀯𑀸 𑀏𑀓𑁂𑀦 𑀯𑀼𑀢𑁆𑀢𑀸𑀬 𑀲𑀗𑁆𑀖𑁂𑀦 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀦 𑀕𑀳𑀝𑁆𑀞𑀢𑀺𑀢𑁆𑀣𑀺𑀬𑀧𑀡𑁆𑀟𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀦. 𑀅𑀬𑀫𑁂𑀯 𑀲𑀩𑁆𑀩𑀓𑀫𑁆𑀫𑁂𑀲𑀼 𑀬𑀼𑀢𑁆𑀢𑀺 𑀤𑀝𑁆𑀞𑀩𑁆𑀩𑀸.

𑀢𑀣𑀸 𑀅𑀢𑁆𑀣𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀓𑁄𑀘𑀺 𑀦𑀸𑀲𑁂𑀢𑀩𑁆𑀩𑁄, ‘‘𑀬𑁄 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀅𑀬𑀁 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁧𑁪-𑁧𑁧𑁫 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀢𑁆𑀢𑀸 𑀢𑁂𑀦 𑀏𑀯 𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀁 𑀯𑀸 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀁 𑀚𑀦𑁂𑀢𑀺, 𑀢𑀲𑁆𑀲 𑀑𑀫𑀲𑀦𑁂 𑀘 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀅𑀪𑀺𑀓𑁆𑀔𑀼𑀦𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀦 𑀦𑀸𑀲𑁂𑀢𑀩𑁆𑀩𑁄, ‘‘𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺 𑀧𑀸𑀴𑀺𑀬𑀸 𑀅𑀪𑀸𑀯𑀢𑁄, 𑀢𑁂𑀦𑁂𑀯 𑀲𑁄 𑀉𑀧𑀲𑀫𑁆𑀧𑀦𑁆𑀦𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀆𑀤𑀺𑀁 𑀦 𑀚𑀦𑁂𑀢𑀺, 𑀓𑁂𑀯𑀮𑀁 𑀅𑀲𑀁𑀯𑀸𑀲𑁄𑀢𑀺 𑀓𑀢𑁆𑀯𑀸 𑀕𑀡𑀧𑀽𑀭𑀓𑁄 𑀦 𑀳𑁄𑀢𑀺. 𑀏𑀓𑀓𑀫𑁆𑀫𑀏𑀓𑀼𑀤𑁆𑀤𑁂𑀲𑁄 𑀳𑀺 𑀲𑀁𑀯𑀸𑀲𑁄𑀢𑀺 𑀯𑀼𑀢𑁆𑀢𑁄, 𑀲𑀫𑀲𑀺𑀓𑁆𑀔𑀢𑀸𑀧𑀺 𑀲𑀁𑀯𑀸𑀲𑁄𑀢𑀺 𑀓𑀢𑁆𑀯𑀸 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀦𑀢𑁆𑀣𑀻𑀢𑀺. 𑀧𑀤𑀲𑁄𑀥𑀫𑁆𑀫𑀸𑀧𑀢𑁆𑀢𑀺𑀁 𑀧𑀦 𑀚𑀦𑁂𑀢𑀻𑀢𑀺 𑀓𑀸𑀭𑀡𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀻𑀢𑀺. 𑀬𑀣𑀸 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀏𑀓𑀓𑀫𑁆𑀫𑀸𑀤𑀺𑀦𑁄 𑀲𑀁𑀯𑀸𑀲𑀲𑁆𑀲 𑀅𑀪𑀸𑀯𑀸 𑀪𑀺𑀓𑁆𑀔𑀼𑀦𑀻 𑀅𑀲𑀁𑀯𑀸𑀲𑀸 𑀪𑀺𑀓𑁆𑀔𑀼𑀲𑁆𑀲, 𑀢𑀣𑀸 𑀪𑀺𑀓𑁆𑀔𑀼 𑀘 𑀪𑀺𑀓𑁆𑀔𑀼𑀦𑀺𑀬𑀸, 𑀧𑀤𑀲𑁄𑀥𑀫𑁆𑀫𑀸𑀧𑀢𑁆𑀢𑀺𑀁 𑀧𑀦 𑀦 𑀚𑀦𑁂𑀢𑀺. 𑀢𑀣𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑁄𑀧𑀺 𑀏𑀓𑁂𑀘𑁆𑀘𑁄 ‘‘𑀬𑁄 𑀦𑀸𑀲𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀦𑀺𑀤𑀲𑁆𑀲𑀦𑁂𑀦 𑀲𑀓𑀸𑀭𑀡𑀘𑁆𑀙𑀸𑀬𑀸 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀦 𑀕𑀳𑀡𑀁 𑀕𑀘𑁆𑀙𑀢𑀺. 𑀅𑀧𑀺𑀘 ‘‘𑀉𑀪𑁄 𑀦𑀸𑀲𑁂𑀢𑀩𑁆𑀩𑀸, 𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀧𑀸𑀭𑀸. 𑁬𑁬) 𑀯𑀘𑀦𑀢𑁄, ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺 (𑀧𑀸𑀭𑀸. 𑁩𑁮𑁪) 𑀯𑀘𑀦𑀢𑁄 𑀘 𑀬𑁄 𑀲𑀗𑁆𑀖𑀫𑀚𑁆𑀛𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑀼𑀯𑀺𑀚𑁆𑀚𑀓𑁂𑀦 𑀅𑀦𑀼𑀯𑀺𑀚𑁆𑀚𑀺𑀬𑀫𑀸𑀦𑁄 𑀧𑀭𑀸𑀚𑀺𑀢𑁄, 𑀲𑁄𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯, 𑀦 𑀑𑀫𑀲𑀯𑀸𑀤𑀧𑀸𑀘𑀺𑀢𑁆𑀢𑀺𑀬𑀁 𑀚𑀦𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘𑁂𑀢𑁆𑀣 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀳𑀺 𑀧𑀼𑀕𑁆𑀕𑀮𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀘𑁂𑀯 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀘, 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀦𑁂𑀯 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀦 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄. 𑀢𑀢𑁆𑀣 𑀢𑀢𑀺𑀬𑁄 𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀳𑀺 𑀬𑀸𑀯 𑀦 𑀮𑀺𑀗𑁆𑀕𑀁 𑀧𑀭𑀺𑀘𑁆𑀘𑀚𑀢𑀺, 𑀓𑀸𑀲𑀸𑀯𑁂𑀲𑀼 𑀲𑀉𑀲𑁆𑀲𑀸𑀳𑀸𑀯 𑀲𑀫𑀸𑀦𑀸 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑀻𑀧𑀺 𑀪𑀺𑀓𑁆𑀔𑀼𑀦𑀻 𑀏𑀯 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑀸𑀯. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀦𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦’’𑀦𑁆𑀢𑀺. 𑀓𑀤𑀸 𑀧𑀦 𑀲𑀸 𑀅𑀪𑀺𑀓𑁆𑀔𑀼𑀦𑀻 𑀳𑁄𑀢𑀻𑀢𑀺? 𑀬𑀤𑀸 𑀲𑀸 𑀯𑀺𑀩𑁆𑀪𑀦𑁆𑀢𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀬𑀤𑁂𑀯 𑀲𑀸 𑀯𑀺𑀩𑁆𑀪𑀦𑁆𑀢𑀸, 𑀢𑀤𑁂𑀯 𑀲𑀸 𑀅𑀪𑀺𑀓𑁆𑀔𑀼𑀦𑀻’’𑀢𑀺 (𑀘𑀽𑀴𑀯. 𑁪𑁩𑁪). 𑀓𑀺𑀢𑁆𑀢𑀸𑀯𑀢𑀸 𑀧𑀦 𑀯𑀺𑀩𑁆𑀪𑀦𑁆𑀢𑀸 𑀳𑁄𑀢𑀻𑀢𑀺? 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑀸 𑀓𑀸𑀲𑀸𑀯𑁂𑀲𑀼 𑀅𑀦𑀸𑀮𑀬𑀸 𑀓𑀸𑀲𑀸𑀯𑀁 𑀯𑀸 𑀅𑀧𑀦𑁂𑀢𑀺, 𑀦𑀕𑁆𑀕𑀸 𑀯𑀸 𑀕𑀘𑁆𑀙𑀢𑀺, 𑀢𑀺𑀡𑀧𑀡𑁆𑀡𑀸𑀤𑀺𑀦𑀸 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀓𑀸𑀲𑀸𑀯𑀁𑀬𑁂𑀯 𑀯𑀸 𑀕𑀺𑀳𑀺𑀦𑀺𑀯𑀸𑀲𑀦𑀸𑀓𑀸𑀭𑁂𑀦 𑀦𑀺𑀯𑀸𑀲𑁂𑀢𑀺, 𑀑𑀤𑀸𑀢𑀁 𑀯𑀸 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑀺, 𑀮𑀺𑀗𑁆𑀕𑁂𑀦𑁂𑀯 𑀯𑀸 𑀲𑀤𑁆𑀥𑀺𑀁 𑀢𑀺𑀢𑁆𑀣𑀺𑀬𑁂𑀲𑀼 𑀧𑀯𑀺𑀲𑀺𑀢𑁆𑀯𑀸 𑀓𑁂𑀲𑀮𑀼𑀜𑁆𑀘𑀦𑀸𑀤𑀺𑀯𑀢𑀁 𑀲𑀫𑀸𑀤𑀺𑀬𑀢𑀺, 𑀢𑀺𑀢𑁆𑀣𑀺𑀬𑀮𑀺𑀗𑁆𑀕𑀁 𑀯𑀸 𑀲𑀫𑀸𑀤𑀺𑀬𑀢𑀺, 𑀢𑀤𑀸 𑀯𑀺𑀩𑁆𑀪𑀦𑁆𑀢𑀸 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀸 𑀲𑀮𑀺𑀗𑁆𑀕𑁂 𑀞𑀺𑀢𑀸𑀯 𑀢𑀺𑀢𑁆𑀣𑀺𑀬𑀯𑀢𑀁 𑀲𑀫𑀸𑀤𑀺𑀬𑀢𑀺, 𑀲𑀸 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀪𑀺𑀓𑁆𑀔𑀼 𑀯𑀺𑀬 𑀧𑀘𑁆𑀙𑀸 𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀺. 𑀲𑁂𑀲𑀸 𑀧𑀩𑁆𑀩𑀚𑁆𑀚𑀫𑁂𑀯 𑀮𑀪𑀢𑀺, 𑀦 𑀉𑀧𑀲𑀫𑁆𑀧𑀤𑀁. 𑀧𑀸𑀴𑀺𑀬𑀁 𑀓𑀺𑀜𑁆𑀘𑀸𑀧𑀺 ‘‘𑀬𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀲𑀓𑀸𑀯𑀸𑀲𑀸 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀦𑁆𑀢𑀸, 𑀲𑀸 𑀆𑀕𑀢𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺 (𑀘𑀽𑀴𑀯. 𑁪𑁩𑁪) 𑀯𑀘𑀦𑀢𑁄 𑀬𑀸 𑀧𑀞𑀫𑀁 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀘𑁆𑀙𑀸 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀦𑁆𑀢𑀸, 𑀲𑀸 𑀆𑀕𑀢𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀅𑀦𑀼𑀜𑁆𑀜𑀸𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀲𑀗𑁆𑀕𑀻𑀢𑀺𑀆𑀘𑀭𑀺𑀬𑁂𑀳𑀺 𑀧𑀦 ‘‘𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀦𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁩) 𑀯𑀼𑀢𑁆𑀢𑀢𑁆𑀢𑀸 𑀦 𑀧𑀼𑀦 𑀲𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸. 𑀢𑀲𑁆𑀫𑀸 𑀏𑀯 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀦𑀸𑀦𑀼𑀜𑁆𑀜𑀸𑀢𑀁 𑀪𑀕𑀯𑀢𑀸. 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀯. 𑀧𑀓𑁆𑀔𑀧𑀡𑁆𑀟𑀓𑀻𑀧𑀺 𑀪𑀺𑀓𑁆𑀔𑀼𑀦𑀻 𑀏𑀯. 𑀇𑀫𑀁 𑀦𑀬𑀁 𑀘𑀢𑀽𑀲𑀼𑀧𑀺 𑀬𑁄𑀚𑁂𑀢𑁆𑀯𑀸 𑀬𑀣𑀸𑀭𑀳𑀁 𑀓𑀣𑁂𑀢𑀩𑁆𑀩𑀁.

𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.