𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁

𑁧. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸𑀢𑀺 𑀲𑁆𑀯𑀸𑀬𑀁 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸 𑀘𑁂𑀢𑀦𑀸𑀬 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀅𑀲𑀫𑀢𑁆𑀣𑀸, 𑀲𑀼𑀧𑀺𑀦𑁂 𑀉𑀧𑀝𑁆𑀞𑀺𑀢𑀁 𑀦𑀺𑀫𑀺𑀢𑁆𑀢𑀜𑁆𑀳𑀺 𑀤𑀼𑀩𑁆𑀩𑀮𑀁. 𑀧𑀯𑀢𑁆𑀢𑁂 𑀧𑀦 𑀅𑀜𑁆𑀜𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀢𑀸 𑀯𑀺𑀧𑀸𑀓𑀁 𑀤𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀯𑀺𑀧𑀸𑀓𑀁 𑀤𑁂𑀢𑀺, 𑀅𑀣 𑀔𑁄 𑀅𑀯𑀺𑀲𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀸𑀯 𑀲𑀼𑀧𑀺𑀦𑀦𑁆𑀢𑀘𑁂𑀢𑀦𑀸𑀢𑀺 𑀮𑀺𑀔𑀺𑀢𑀁. 𑀬𑀁 𑀧𑀦𑁂𑀢𑁆𑀣 ‘‘𑀲𑀼𑀧𑀺𑀦𑁂 𑀉𑀧𑀝𑁆𑀞𑀺𑀢𑀁 𑀦𑀺𑀫𑀺𑀢𑁆𑀢𑀜𑁆𑀳𑀺 𑀤𑀼𑀩𑁆𑀩𑀮’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀦𑁂𑀓𑀦𑁆𑀢𑀁, 𑀦 𑀘 𑀆𑀭𑀫𑁆𑀫𑀡𑀤𑀼𑀩𑁆𑀩𑀮𑀢𑀸𑀬 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀤𑀼𑀩𑁆𑀩𑀮𑀸 𑀅𑀢𑀻𑀢𑀸𑀦𑀸𑀕𑀢𑀸𑀭𑀫𑁆𑀫𑀡𑀸𑀬, 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸𑀬 𑀯𑀸 𑀅𑀤𑀼𑀩𑁆𑀩𑀮𑀢𑁆𑀢𑀸. 𑀢𑀲𑁆𑀫𑀸 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸𑀢𑀺 𑀤𑀼𑀩𑁆𑀩𑀮𑀳𑀤𑀬𑀯𑀢𑁆𑀣𑀼𑀓𑀢𑁆𑀢𑀸𑀢𑀺 𑀦𑁄 𑀢𑀓𑁆𑀓𑁄𑀢𑀺 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁨𑁩𑁬-𑁨𑁩𑁭) 𑀆𑀘𑀭𑀺𑀬𑁄. 𑀅𑀯𑀢𑁆𑀣𑀼𑀓𑀢𑀸𑀬 𑀤𑀼𑀩𑁆𑀩𑀮𑀪𑀸𑀯𑁄 𑀬𑀼𑀚𑁆𑀚𑀢𑀻𑀢𑀺 𑀘𑁂? 𑀦, 𑀅𑀯𑀢𑁆𑀣𑀼𑀓𑀸𑀬 𑀪𑀸𑀯𑀦𑀸𑀧𑀪𑀯𑀸𑀬 𑀅𑀢𑀺𑀭𑁂𑀓𑀩𑀮𑀯𑀲𑀫𑁆𑀪𑀯𑀢𑁄. 𑀪𑀸𑀯𑀦𑀸𑀩𑀮𑀲𑀫𑀧𑁆𑀧𑀺𑀢𑀜𑁆𑀳𑀺 𑀘𑀺𑀢𑁆𑀢𑀁 𑀅𑀭𑀽𑀧𑀫𑁆𑀧𑀺 𑀲𑀫𑀸𑀦𑀁 𑀅𑀢𑀺𑀪𑀸𑀭𑀫𑁆𑀧𑀺 𑀓𑀭𑀚𑀓𑀸𑀬𑀁 𑀕𑀳𑁂𑀢𑁆𑀯𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦𑁂𑀯 𑀩𑁆𑀭𑀳𑁆𑀫𑀮𑁄𑀓𑀫𑁆𑀧𑀺 𑀧𑀸𑀧𑁂𑀢𑁆𑀯𑀸 𑀞𑀧𑁂𑀢𑀺, 𑀢𑀧𑁆𑀧𑀝𑀺𑀪𑀸𑀕𑀁 𑀅𑀦𑀧𑁆𑀧𑀺𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁 𑀓𑀭𑀚𑀓𑀸𑀬𑀁 𑀆𑀓𑀸𑀲𑁂 𑀮𑀗𑁆𑀖𑀦𑀲𑀫𑀢𑁆𑀣𑀁 𑀓𑀭𑁄𑀢𑀺. 𑀓𑀺𑀁 𑀧𑀦𑁂𑀢𑁆𑀣 𑀢𑀁 𑀅𑀦𑀼𑀫𑀸𑀦𑀓𑀭𑀡𑀁? 𑀬𑁂𑀦 𑀘𑀺𑀢𑁆𑀢𑀲𑁆𑀲𑁂𑀯 𑀆𑀦𑀼𑀪𑀸𑀯𑁄𑀢𑀺 𑀧𑀜𑁆𑀜𑀸𑀬𑁂𑀬𑁆𑀬 𑀘𑀺𑀢𑁆𑀢𑀸𑀦𑀼𑀪𑀸𑀯𑁂𑀦 𑀞𑀧𑀦𑀮𑀗𑁆𑀖𑀦𑀸𑀤𑀺𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀺𑀩𑁆𑀩𑀢𑁆𑀢𑀺𑀤𑀲𑁆𑀲𑀦𑀢𑁄. 𑀧𑀓𑀢𑀺𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀯𑀺𑀬 𑀅𑀲𑀁𑀲𑀝𑁆𑀞𑀢𑁆𑀢𑀸, 𑀦𑀺𑀓𑁆𑀔𑀫𑀦𑀢𑁆𑀢𑀸 𑀘 𑀯𑀢𑁆𑀣𑀺𑀲𑀻𑀲𑀁, 𑀓𑀝𑀺, 𑀓𑀸𑀬𑁄𑀢𑀺 𑀢𑀺𑀥𑀸 𑀲𑀼𑀓𑁆𑀓𑀲𑁆𑀲 𑀞𑀸𑀦𑀁 𑀧𑀓𑀧𑁆𑀧𑁂𑀦𑁆𑀢𑀺 𑀆𑀘𑀭𑀺𑀬𑀸. 𑀲𑀧𑁆𑀧𑀯𑀺𑀲𑀁 𑀯𑀺𑀬 𑀢𑀁 𑀤𑀝𑁆𑀞𑀩𑁆𑀩𑀁, 𑀦 𑀘 𑀯𑀺𑀲𑁂 𑀞𑀸𑀦𑀦𑀺𑀬𑀫𑁄, 𑀓𑁄𑀥𑀯𑀲𑁂𑀦 𑀧𑀲𑁆𑀲𑀦𑁆𑀢𑀲𑁆𑀲 𑀳𑁄𑀢𑀺. 𑀏𑀯𑀫𑀲𑁆𑀲 𑀦 𑀞𑀸𑀦𑀦𑀺𑀬𑀫𑁄, 𑀭𑀸𑀕𑀯𑀲𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀳𑁄𑀢𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄.

‘‘𑀤𑀓𑀲𑁄𑀢𑀁 𑀅𑀦𑁄𑀢𑀺𑀡𑁆𑀡𑁂𑀧𑀻’’𑀢𑀺 𑀇𑀤𑀁 ‘‘𑀑𑀢𑀺𑀡𑁆𑀡𑀫𑀢𑁆𑀢𑁂’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀞𑀸𑀦𑀢𑁄 𑀧𑀦 𑀘𑀼𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀁 𑀓𑀢𑁆𑀯𑀸 𑀲𑀼𑀓𑁆𑀓𑀁 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀤𑀓𑀲𑁄𑀢𑁄𑀭𑁄𑀳𑀡𑀁 𑀦𑀺𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀣𑀸𑀧𑀺 𑀅𑀥𑀺𑀯𑀸𑀲𑀸𑀥𑀺𑀧𑁆𑀧𑀸𑀬𑁂𑀦 𑀅𑀥𑀺𑀯𑀸𑀲𑁂𑀢𑁆𑀯𑀸 𑀅𑀦𑁆𑀢𑀭𑀸 𑀤𑀓𑀲𑁄𑀢𑀢𑁄 𑀉𑀤𑁆𑀥𑀁 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 ‘‘𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀞𑀸𑀦𑀸 𑀘𑀼𑀢𑀜𑁆𑀳𑀺 𑀅𑀯𑀲𑁆𑀲𑀁 𑀤𑀓𑀲𑁄𑀢𑀁 𑀑𑀢𑀭𑀢𑀻𑀢𑀺 𑀅𑀝𑁆𑀞𑀓𑀣𑀸𑀬 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸 𑀉𑀪𑀬𑀁 𑀲𑀫𑁂𑀢𑀻𑀢𑀺 𑀕𑀳𑁂𑀢𑀩𑁆𑀩𑁄.

𑀏𑀢𑁆𑀣𑀸𑀳 𑁋 𑀓𑀲𑁆𑀫𑀸 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀓𑀸𑀭𑀓𑁄 𑀦 𑀦𑀺𑀤𑁆𑀤𑀺𑀝𑁆𑀞𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀥𑀺𑀧𑁆𑀧𑀸𑀬𑀸𑀧𑁂𑀓𑁆𑀔𑀸𑀬 𑀪𑀸𑀯𑀢𑁄 𑀓𑀸𑀭𑀓𑁄 𑀦 𑀦𑀺𑀤𑁆𑀤𑀺𑀝𑁆𑀞𑁄 𑀢𑀲𑁆𑀲 𑀲𑀸𑀧𑁂𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀓𑀣𑀁? 𑀓𑀡𑁆𑀟𑀼𑀯𑀦𑀸𑀤𑀺𑀅𑀥𑀺𑀧𑁆𑀧𑀸𑀬𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁂𑀦𑁆𑀢𑀲𑁆𑀲 𑀓𑀡𑁆𑀟𑀼𑀯𑀦𑀸𑀤𑀺𑀉𑀧𑀓𑁆𑀓𑀫𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀊𑀭𑀼𑀆𑀤𑀻𑀲𑀼 𑀤𑀼𑀓𑁆𑀓𑀝𑀯𑀢𑁆𑀣𑀽𑀲𑀼, 𑀯𑀡𑀸𑀤𑀻𑀲𑀼 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀽𑀲𑀼 𑀘 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀬𑀸 𑀲𑀢𑀺𑀧𑀺 𑀦 𑀲𑀗𑁆𑀖𑀸𑀤𑀺𑀲𑁂𑀲𑁄 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀦 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁬𑁩) 𑀯𑀘𑀦𑀢𑁄. 𑀢𑀲𑁆𑀫𑀸 𑀢𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀇𑀥 𑀓𑀸𑀭𑀓𑁄 𑀦 𑀦𑀺𑀤𑁆𑀤𑀺𑀝𑁆𑀞𑁄. 𑀅𑀜𑁆𑀜𑀣𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀁 𑀆𑀧𑀚𑁆𑀚𑁂𑀬𑁆𑀬, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁂 𑀓𑀸𑀭𑀓𑁂 ‘‘𑀘𑁂𑀢𑁂𑀢𑀺 𑀦 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁨𑁬𑁨) 𑀯𑀼𑀢𑁆𑀢𑀯𑀘𑀦𑀯𑀺𑀭𑁄𑀥𑁄. 𑀢𑀣𑀸 ‘‘𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀬𑀸 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀪𑀼𑀫𑁆𑀫𑁂 𑀦𑀺𑀤𑁆𑀤𑀺𑀝𑁆𑀞𑁂𑀧𑀺 𑀲𑁄 𑀏𑀯 𑀯𑀺𑀭𑁄𑀥𑁄 𑀳𑁂𑀢𑁆𑀯𑀢𑁆𑀣𑀦𑀺𑀬𑀫𑀲𑀺𑀤𑁆𑀥𑀺𑀢𑁄. 𑀢𑀲𑁆𑀫𑀸 𑀢𑀤𑀼𑀪𑀬𑀫𑁆𑀧𑀺 𑀯𑀘𑀦𑀓𑁆𑀓𑀫𑀁 𑀅𑀯𑀢𑁆𑀯𑀸 ‘‘𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀓𑁆𑀓𑀯𑀺𑀲𑀝𑁆𑀞𑀺 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀸𑀪𑀸𑀯𑀢𑁄 𑀳𑁂𑀢𑁆𑀯𑀢𑁆𑀣𑀦𑀺𑀬𑀫𑁄 𑀦 𑀓𑀢𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀅𑀓𑀢𑁂 𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀓𑁆𑀓𑀯𑀺𑀲𑀝𑁆𑀞𑀺 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺, 𑀉𑀧𑀓𑁆𑀓𑀫𑁂 𑀅𑀲𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀤𑁆𑀯𑁂 𑀆𑀧𑀢𑁆𑀢𑀺𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀓𑀣𑀁? 𑀅𑀢𑁆𑀢𑀦𑁄 𑀳𑀢𑁆𑀣𑀸𑀤𑀺𑀪𑁂𑀤𑁂 𑀅𑀚𑁆𑀛𑀢𑁆𑀢𑀭𑀽𑀧𑁂 𑀭𑀸𑀕𑀽𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀅𑀗𑁆𑀕𑀚𑀸𑀢𑁂 𑀓𑀫𑁆𑀫𑀦𑀺𑀬𑀧𑁆𑀧𑀢𑁆𑀢𑁂 𑀆𑀭𑁄𑀕𑁆𑀬𑀢𑁆𑀣𑀸𑀬 𑀦𑀻𑀮𑀁 𑀫𑁄𑀘𑁂𑀦𑁆𑀢𑀲𑁆𑀲 𑀏𑀓𑀸 𑀆𑀧𑀢𑁆𑀢𑀺, 𑀅𑀚𑁆𑀛𑀢𑁆𑀢𑀭𑀽𑀧𑁂 𑀏𑀯 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀧𑀻𑀢𑀓𑀸𑀤𑀻𑀦𑀁 𑀫𑁄𑀘𑀦𑀯𑀲𑁂𑀦 𑀦𑀯𑀸𑀢𑀺 𑀤𑀲. 𑀏𑀯𑀁 ‘‘𑀲𑀼𑀔𑀢𑁆𑀣𑀸𑀬𑀸’’𑀢𑀺𑀆𑀤𑀻𑀦𑀁 𑀦𑀯𑀦𑁆𑀦𑀁 𑀯𑀲𑁂𑀦𑀸𑀢𑀺 𑀭𑀸𑀕𑀽𑀧𑀢𑁆𑀣𑀫𑁆𑀪𑁂 𑀅𑀚𑁆𑀛𑀢𑁆𑀢𑀭𑀽𑀧𑀯𑀲𑁂𑀦 𑀲𑀢𑀁. 𑀏𑀯𑀫𑁂𑀯𑀁 𑀯𑀘𑁆𑀘𑀧𑁆𑀧𑀲𑁆𑀲𑀸𑀯𑀯𑀸𑀢𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀤𑀝𑁆𑀞𑀽𑀧𑀢𑁆𑀣𑀫𑁆𑀪𑁂𑀲𑀼 𑀘 𑀲𑀢𑀁 𑀲𑀢𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀧𑀜𑁆𑀘𑀲𑀢𑀁. 𑀬𑀣𑀸 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀜𑁆𑀘𑀲𑀢𑀁, 𑀏𑀯𑀁 𑀩𑀳𑀺𑀤𑁆𑀥𑀸𑀭𑀽𑀧𑁂 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀽𑀧𑁂 𑀯𑀸 𑀆𑀓𑀸𑀲𑁂 𑀯𑀸 𑀓𑀝𑀺𑀁 𑀓𑀫𑁆𑀧𑁂𑀦𑁆𑀢𑁄𑀢𑀺 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀑𑀢𑀺𑀡𑁆𑀡𑁄’’𑀢𑀺 𑀇𑀫𑀺𑀦𑀸𑀲𑁆𑀲 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑀢𑀸 𑀤𑀲𑁆𑀲𑀺𑀢𑀸. 𑀢𑁂𑀦𑁂𑀯 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀲𑀫𑀗𑁆𑀕𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀯𑀺𑀧𑀭𑀺𑀡𑀢𑁂𑀦…𑀧𑁂… 𑀲𑀤𑁆𑀥𑀺’’𑀦𑁆𑀢𑀺 𑀇𑀫𑀺𑀦𑀸𑀲𑁆𑀲 𑀯𑀸𑀬𑀸𑀫𑁄 𑀤𑀲𑁆𑀲𑀺𑀢𑁄. ‘‘𑀲𑀤𑁆𑀥𑀺’’𑀦𑁆𑀢𑀺 𑀳𑀺 𑀧𑀤𑀁 𑀲𑀁𑀬𑁄𑀕𑀁 𑀤𑀻𑀧𑁂𑀢𑀺, 𑀲𑁄 𑀘 𑀲𑀁𑀬𑁄𑀕𑁄 𑀲𑀫𑀸𑀕𑀫𑁄. 𑀓𑁂𑀦 𑀘𑀺𑀢𑁆𑀢𑁂𑀦? 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦, 𑀦 𑀧𑀢𑁆𑀢𑀧𑁆𑀧𑀝𑀺𑀕𑁆𑀕𑀳𑀡𑀸𑀥𑀺𑀧𑁆𑀧𑀸𑀬𑀸𑀤𑀺𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸𑀲𑁆𑀲 𑀯𑀸𑀬𑀫𑀢𑁄 𑀨𑀲𑁆𑀲𑀧𑁆𑀧𑀝𑀺𑀯𑀺𑀚𑀸𑀦𑀦𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀯𑀸𑀬𑀫𑀺𑀢𑁆𑀯𑀸 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀳𑀺 𑀲𑀫𑀸𑀧𑀚𑁆𑀚𑀢𑀺 𑀦𑀸𑀫. 𑀏𑀯𑀫𑀲𑁆𑀲 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀅𑀣 𑀯𑀸 𑀑𑀢𑀺𑀡𑁆𑀡𑁄 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀬𑀓𑁆𑀔𑀸𑀤𑀺𑀦𑀸 𑀲𑀢𑁆𑀢𑁄 𑀯𑀺𑀬. 𑀉𑀧𑀬𑁄𑀕𑀢𑁆𑀣𑁂 𑀯𑀸 𑀏𑀢𑀁 𑀓𑀭𑀡𑀯𑀘𑀦𑀁, 𑀑𑀢𑀺𑀡𑁆𑀡𑁄 𑀯𑀺𑀧𑀭𑀺𑀡𑀢𑀁 𑀘𑀺𑀢𑁆𑀢𑀁 𑀓𑀽𑀧𑀸𑀤𑀺𑀁 𑀯𑀺𑀬 𑀲𑀢𑁆𑀢𑁄. 𑀅𑀣 𑀯𑀸 ‘‘𑀭𑀸𑀕𑀢𑁄 𑀉𑀢𑁆𑀢𑀺𑀡𑁆𑀡𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀼𑀪𑀸𑀯𑀁 𑀉𑀧𑀕𑀢𑁄𑀧𑀺 𑀬𑁄 𑀧𑀦 𑀪𑀺𑀓𑁆𑀔𑀼 𑀢𑀢𑁄 𑀉𑀢𑁆𑀢𑀺𑀡𑁆𑀡𑀸𑀥𑀺𑀧𑁆𑀧𑀸𑀬𑀢𑁄 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀳𑁂𑀢𑀼𑀪𑀽𑀢𑁂𑀦 𑀢𑀫𑁂𑀯 𑀭𑀸𑀕𑀁 𑀑𑀢𑀺𑀡𑁆𑀡𑁄. 𑀫𑀸𑀢𑀼𑀕𑀸𑀫𑁂𑀦 𑀅𑀢𑁆𑀢𑀦𑁄 𑀲𑀫𑀻𑀧𑀁 𑀯𑀸 𑀆𑀕𑀢𑁂𑀦, 𑀅𑀢𑁆𑀢𑀦𑀸 𑀉𑀧𑀕𑀢𑁂𑀦 𑀯𑀸. 𑀏𑀢𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀲𑀸𑀭𑀢𑁆𑀢𑀢𑀸 𑀯𑀸 𑀳𑁄𑀢𑀼, 𑀯𑀺𑀭𑀢𑁆𑀢𑀢𑀸 𑀯𑀸, 𑀲𑀸 𑀇𑀥 𑀅𑀧𑁆𑀧𑀫𑀸𑀡𑀁.

𑀳𑀢𑁆𑀣𑀕𑁆𑀕𑀸𑀳𑀁 𑀯𑀸𑀢𑀺 𑀏𑀢𑁆𑀣 𑀳𑀢𑁆𑀣𑁂𑀦 𑀲𑀩𑁆𑀩𑁄𑀧𑀺 𑀉𑀧𑀸𑀤𑀺𑀦𑁆𑀦𑀓𑁄 𑀓𑀸𑀬𑁄 𑀲𑀗𑁆𑀕𑀳𑀺𑀢𑁄, 𑀦 𑀪𑀺𑀦𑁆𑀦𑀲𑀦𑁆𑀢𑀸𑀦𑁄 𑀢𑀧𑁆𑀧𑀝𑀺𑀩𑀤𑁆𑀥𑁄 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺. 𑀯𑁂𑀡𑀺𑀕𑁆𑀕𑀳𑀡𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀓𑁄 𑀅𑀪𑀺𑀦𑁆𑀦𑀲𑀦𑁆𑀢𑀸𑀦𑁄 𑀓𑁂𑀲𑀮𑁄𑀫𑀦𑀔𑀕𑁆𑀕𑀤𑀦𑁆𑀢𑀕𑁆𑀕𑀸𑀤𑀺𑀓𑁄 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀅𑀦𑁆𑀢𑀫𑀲𑁄 𑀮𑁄𑀫𑁂𑀦 𑀮𑁄𑀫𑀁 𑀨𑀼𑀲𑀦𑁆𑀢𑀲𑁆𑀲𑀸𑀧𑀻’’𑀢𑀺. 𑀢𑁂𑀦 𑀅𑀜𑁆𑀜𑀢𑀭𑀲𑁆𑀲 𑀯𑀸…𑀧𑁂… 𑀧𑀭𑀸𑀫𑀲𑀦𑀦𑁆𑀢𑀺 𑀏𑀢𑁆𑀣 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀦𑀫𑁆𑀧𑀺 𑀲𑁂𑀲𑀮𑁄𑀫𑀸𑀤𑀻𑀦𑀁 𑀅𑀗𑁆𑀕𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀦𑁆𑀢𑁂 ‘‘𑀨𑀲𑁆𑀲𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦, 𑀢𑀤𑀢𑁆𑀣𑀚𑀸𑀦𑀦𑀢𑁄. 𑀨𑀼𑀝𑁆𑀞𑀪𑀸𑀯𑀁 𑀧𑀝𑀺𑀯𑀺𑀚𑀸𑀦𑀦𑁆𑀢𑁄𑀧𑀺 𑀨𑀲𑁆𑀲𑀁 𑀧𑀝𑀺𑀚𑀸𑀦𑀸𑀢𑀺 𑀦𑀸𑀫, 𑀦 𑀓𑀸𑀬𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀏𑀯. 𑀅𑀦𑁂𑀓𑀦𑁆𑀢𑀺𑀓𑀜𑁆𑀳𑁂𑀢𑁆𑀣 𑀓𑀸𑀬𑀯𑀺𑀜𑁆𑀜𑀸𑀡𑀁. 𑀢𑀲𑁆𑀫𑀸 𑀏𑀯 𑀇𑀥 𑀨𑀲𑁆𑀲𑀧𑁆𑀧𑀝𑀺𑀯𑀺𑀚𑀸𑀦𑀦𑀁 𑀅𑀗𑁆𑀕𑀦𑁆𑀢𑁆𑀯𑁂𑀯 𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀯𑀼𑀢𑁆𑀢𑁂 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺 ‘‘𑀦 𑀘 𑀫𑁂 𑀮𑁄𑀫𑀖𑀝𑁆𑀝𑀦𑁂𑀦 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀁 ‘𑀦 𑀨𑀲𑁆𑀲𑀁 𑀧𑀝𑀺𑀚𑀸𑀦𑀸𑀫𑀻’𑀢𑀺 𑀅𑀦𑀸𑀧𑀦𑁆𑀦𑀲𑀜𑁆𑀜𑀻 𑀲𑀺𑀬𑀸’’𑀢𑀺. ‘‘𑀯𑁂𑀡𑀻 𑀦𑀸𑀫 𑀓𑀳𑀸𑀧𑀡𑀫𑀸𑀮𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀁, 𑀢𑀢𑁆𑀣 ‘𑀯𑁂𑀡𑀺𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀓𑀳𑀸𑀧𑀡𑀫𑀸𑀮𑀸𑀤𑀺𑀁 𑀏𑀯 𑀕𑀡𑁆𑀳𑀸𑀢𑀺, 𑀦 𑀮𑁄𑀫𑀁, 𑀦𑀢𑁆𑀣𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀯𑀤𑀦𑁆𑀢𑀺. 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀻’’𑀢𑀺 𑀆𑀬𑀸𑀘𑀦𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀬 𑀲𑀺𑀔𑀸𑀧𑀢𑁆𑀢𑀮𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀬𑁂𑀯 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. ‘‘𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀲𑀻’’𑀢𑀺 𑀯𑀘𑀦𑀁 𑀧𑀦 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂𑀦 𑀅𑀲𑀗𑁆𑀖𑀸𑀤𑀺𑀲𑁂𑀲𑀯𑀢𑁆𑀣𑀼𑀦𑀸 𑀫𑀺𑀲𑁆𑀲𑀯𑀘𑀦𑀁, 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀘 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁, 𑀇𑀢𑀭𑀁 𑀧𑀸𑀓𑀝𑀁. 𑀬𑀤𑀺 𑀢𑀫𑁆𑀧𑀺 𑀚𑀦𑁂𑀢𑀺, 𑀓𑀣𑀁 ‘𑀅𑀦𑀺𑀫𑀺𑀢𑁆𑀢𑀸𑀲𑀻’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀦 𑀲𑀗𑁆𑀖𑀸𑀤𑀺𑀲𑁂𑀲𑀁 𑀚𑀦𑁂𑀦𑁆𑀢𑀻’’𑀢𑀺 𑀏𑀓𑁂, 𑀢𑀁 𑀦 𑀬𑀼𑀢𑁆𑀢𑀁 𑀧𑀼𑀭𑀺𑀲𑀲𑁆𑀲𑀸𑀧𑀺 𑀦𑀺𑀫𑀺𑀢𑁆𑀢𑀸𑀥𑀺𑀯𑀘𑀦𑀢𑁆𑀢𑀸. ‘‘𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀸𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 (𑀧𑀸𑀭𑀸. 𑁨𑁪𑁮) 𑀫𑀸𑀢𑀺𑀓𑀸𑀬𑀁 𑀮𑀓𑁆𑀔𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀘 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀸𑀳𑀺 𑀑𑀪𑀸𑀲𑀦𑁂 𑀧𑀝𑀺𑀯𑀺𑀚𑀸𑀦𑀦𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀇𑀢𑀭𑁂𑀳𑀺 𑀑𑀪𑀸𑀲𑀦𑁂 𑀧𑀝𑀺𑀯𑀺𑀚𑀸𑀦𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺 𑀏𑀓𑁂, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀏𑀢𑁆𑀣𑀸𑀳 𑁋 ‘‘𑀲𑀺𑀔𑀭𑀡𑀻’’𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀧𑀝𑀺𑀖𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀓𑀲𑁆𑀫𑀸 ‘‘𑀢𑀺𑀯𑁂𑀤𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀤𑁆𑀯𑀺𑀯𑁂𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀭𑀸𑀕𑀯𑀲𑁂𑀦 𑀅𑀬𑀁 𑀆𑀧𑀢𑁆𑀢𑀺, 𑀦 𑀧𑀝𑀺𑀖𑀯𑀲𑁂𑀦. 𑀢𑀲𑁆𑀫𑀸 𑀭𑀸𑀕𑀯𑀲𑁂𑀦𑁂𑀯 𑀧𑀯𑀢𑁆𑀢𑁄 𑀅𑀓𑁆𑀓𑁄𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 ‘‘𑀤𑁆𑀯𑀺𑀯𑁂𑀤𑀦’’𑀦𑁆𑀢𑀺 𑀯𑀘𑀦𑀁 𑀲𑀼𑀯𑀼𑀢𑁆𑀢𑀫𑁂𑀯.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀢𑁆𑀢𑀓𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀦𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀚𑀸𑀦𑀦𑀲𑀫𑀢𑁆𑀣𑀸𑀬. 𑀧𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀪𑀡𑀦𑁂 𑀤𑀼𑀓𑁆𑀓𑀝𑀁, ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀢𑀲𑁆𑀲 𑀅𑀕𑁆𑀕𑀤𑀸𑀦𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀤𑁂𑀳𑀻’’𑀢𑀺 𑀧𑀭𑀺𑀬𑀸𑀬𑀯𑀘𑀦𑁂𑀧𑀺 𑀤𑀼𑀓𑁆𑀓𑀝𑀁, ‘‘𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬, 𑀬𑀸 𑀫𑀸𑀤𑀺𑀲𑀁 𑀲𑀻𑀮𑀯𑀦𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸𑀢𑀺 𑀏𑀓𑁂. 𑀧𑀜𑁆𑀘𑀲𑀼 𑀅𑀗𑁆𑀕𑁂𑀲𑀼 𑀲𑀩𑁆𑀪𑀸𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄𑀯𑀸𑀢𑀺 𑀏𑀓𑁂, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. ‘‘𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑁂 𑀓𑀸𑀬𑀲𑀁𑀲𑀕𑁆𑀕𑁂 𑀯𑀺𑀬 𑀬𑀓𑁆𑀔𑀺𑀧𑁂𑀢𑀻𑀲𑀼𑀧𑀺 𑀤𑀼𑀝𑁆𑀞𑀼𑀮𑁆𑀮𑀢𑁆𑀢𑀓𑀆𑀫𑀯𑀘𑀦𑁂 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀦𑀸𑀕𑀢’’𑀦𑁆𑀢𑀺 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁨𑁯𑁫) 𑀮𑀺𑀔𑀺𑀢𑀁. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀦 𑀧𑀡𑁆𑀟𑀓𑀕𑀢𑀺𑀓𑁄𑀯.

𑀅𑀢𑁆𑀢𑀓𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀮𑀁𑀯𑀘𑀦𑀻𑀬𑀸𑀢𑀺 𑀦 𑀯𑀘𑀦𑀻𑀬𑀸, 𑀦𑀺𑀯𑀸𑀭𑀡𑁂 𑀅𑀮𑀁-𑀲𑀤𑁆𑀤𑁄, 𑀦 𑀅𑀮𑀁𑀯𑀘𑀦𑀻𑀬𑀸 𑀦𑀸𑀮𑀁𑀯𑀘𑀦𑀻𑀬𑀸. ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁦𑁫) 𑀯𑀼𑀢𑁆𑀢𑀢𑁆𑀢𑀸 𑀬𑀲𑁆𑀲 𑀏𑀓𑀦𑁆𑀢𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀺, 𑀢𑀲𑁆𑀲 𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀦𑀧𑀬𑁄𑀕𑀸 𑀏𑀢𑁂 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀻𑀢𑀺 𑀮𑀺𑀔𑀺𑀢𑀁. 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 ‘‘𑀇𑀢𑁆𑀣𑀻 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻 𑀦 𑀧𑁂𑀢𑀻 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸. 𑀧𑀼𑀭𑀺𑀲𑁄 𑀦𑀸𑀫 𑀫𑀦𑀼𑀲𑁆𑀲𑀧𑀼𑀭𑀺𑀲𑁄, 𑀦 𑀬𑀓𑁆𑀔𑁄 𑀦 𑀧𑁂𑀢𑁄 𑀦 𑀢𑀺𑀭𑀘𑁆𑀙𑀸𑀦𑀕𑀢𑁄’’𑀢𑀺 𑀧𑀸𑀴𑀺 𑀦𑀢𑁆𑀣𑀺, 𑀢𑀣𑀸𑀧𑀺 𑀓𑀸𑀬𑀲𑀁𑀲𑀕𑁆𑀕𑀸𑀤𑀻𑀲𑀼 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻’’𑀢𑀺 (𑀧𑀸𑀭𑀸. 𑁨𑁮𑁫) 𑀇𑀢𑁆𑀣𑀺𑀯𑀯𑀢𑁆𑀣𑀸𑀦𑀲𑁆𑀲 𑀓𑀢𑀢𑁆𑀢𑀸 𑀇𑀥𑀸𑀧𑀺 𑀫𑀦𑀼𑀲𑁆𑀲𑀺𑀢𑁆𑀣𑀻 𑀏𑀯𑀸𑀢𑀺 𑀧𑀜𑁆𑀜𑀸𑀬𑀢𑀺. 𑀫𑁂𑀣𑀼𑀦𑀧𑀼𑀩𑁆𑀩𑀪𑀸𑀕𑀲𑀸𑀫𑀜𑁆𑀜𑀢𑁄 𑀇𑀢𑁆𑀣𑀺𑀯𑀯𑀢𑁆𑀣𑀸𑀦𑁂𑀦 𑀧𑀼𑀭𑀺𑀲𑀯𑀯𑀢𑁆𑀣𑀸𑀦𑀁 𑀓𑀢𑀫𑁂𑀯 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀬𑁂𑀲𑀼 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀢𑁂𑀲𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀢𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸). 𑀓𑀸𑀬𑀲𑀁𑀲𑀕𑁆𑀕𑀸𑀤𑀻𑀲𑀼 𑀘 𑀧𑀡𑁆𑀟𑀓𑀬𑀓𑁆𑀔𑀺𑀧𑁂𑀢𑀺𑀬𑁄 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀓𑀸𑀯 𑀯𑀼𑀢𑁆𑀢𑀸, 𑀢𑀣𑀸 𑀇𑀥𑀸𑀧𑀺, 𑀧𑀡𑁆𑀟𑀓𑀲𑀪𑀸𑀯𑀢𑁆𑀢𑀸 𑀫𑀦𑀼𑀲𑁆𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀘 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀓𑁄𑀯 𑀳𑁄𑀢𑀺. 𑀲𑁂𑀲𑀸 𑀫𑀦𑀼𑀲𑁆𑀲𑀧𑀼𑀭𑀺𑀲𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀸𑀤𑀬𑁄 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸𑀯 𑀫𑀺𑀘𑁆𑀙𑀸𑀘𑀸𑀭𑀤𑀲𑁆𑀲𑀦𑀲𑀪𑀸𑀯𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀺𑀁 𑀪𑀦𑁆𑀢𑁂𑀢𑀺 𑀏𑀢𑁆𑀢𑀓𑁂𑀧𑀺 𑀯𑀼𑀢𑁆𑀢𑁂. 𑀧𑀼𑀘𑁆𑀙𑀺𑀢𑁄 𑀬𑀤𑀢𑁆𑀣𑀸𑀬 𑀧𑀯𑀺𑀝𑁆𑀞𑁄, 𑀢𑀁 𑀓𑀣𑁂𑀢𑀼𑀁 𑀮𑀪𑀢𑀺 𑀧𑀼𑀘𑁆𑀙𑀺𑀢𑀧𑀜𑁆𑀜𑀢𑁆𑀢𑀸 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀢𑀺 𑀮𑀺𑀔𑀺𑀢𑀁. 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑁄 ‘‘𑀉𑀧𑀓𑀭𑀡𑀁, 𑀫𑀽𑀮𑀁 𑀯𑀸 𑀤𑀲𑁆𑀲𑀢𑀻’’𑀢𑀺 𑀬𑀸𑀘𑀢𑀺, 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻𑀢𑀺? 𑀯𑀝𑁆𑀝𑀢𑀺 𑀲𑁂𑀦𑀸𑀲𑀦𑁂 𑀑𑀪𑀸𑀲𑀧𑀭𑀺𑀓𑀣𑀸𑀤𑀻𑀦𑀁 𑀮𑀤𑁆𑀥𑀢𑁆𑀢𑀸𑀢𑀺 𑀏𑀓𑁂. 𑀢𑀺𑀳𑀢𑁆𑀣𑀸 𑀯𑀸𑀢𑀺 𑀏𑀢𑁆𑀣 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀢𑀺𑀳𑀢𑁆𑀣𑀸. ‘‘𑀧𑀫𑀸𑀡𑀬𑀼𑀢𑁆𑀢𑁄 𑀫𑀜𑁆𑀘𑁄𑀢𑀺 𑀧𑀓𑀢𑀺𑀯𑀺𑀤𑀢𑁆𑀣𑀺𑀬𑀸 𑀦𑀯𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀫𑀜𑁆𑀘𑁄, 𑀲𑁄 𑀢𑀢𑁆𑀣 𑀇𑀢𑁄 𑀘 𑀦 𑀲𑀜𑁆𑀘𑀭𑀢𑀺, 𑀢𑀲𑁆𑀫𑀸 𑀘𑀢𑀼𑀳𑀢𑁆𑀣𑀯𑀺𑀢𑁆𑀣𑀸𑀭𑀸 𑀦 𑀳𑁄𑀢𑀻’’𑀢𑀺𑀆𑀤𑀺 𑀮𑀺𑀔𑀺𑀢𑀁. 𑀅𑀓𑀼𑀝𑀺𑀬𑀸 𑀧𑀦 𑀯𑀢𑁆𑀣𑀼𑀤𑁂𑀲𑀦𑀸𑀓𑀺𑀘𑁆𑀘𑀁 𑀦𑀢𑁆𑀣𑀺 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼𑀁 𑀯𑀼𑀢𑁆𑀢𑀢𑁆𑀢𑀸. ‘‘𑀉𑀮𑁆𑀮𑀺𑀢𑁆𑀢𑀸𑀤𑀺𑀪𑀸𑀯𑁄…𑀧𑁂… ‘𑀙𑀤𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄’𑀢𑀺 𑀬𑀼𑀢𑁆𑀢𑀫𑀺𑀤𑀁. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 𑀫𑀢𑁆𑀢𑀺𑀓𑀸𑀫𑀬𑀪𑀺𑀢𑁆𑀢𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀉𑀧𑀭𑀺 𑀉𑀮𑁆𑀮𑀺𑀢𑁆𑀢𑀁 𑀯𑀸 𑀅𑀯𑀮𑀺𑀢𑁆𑀢𑀁 𑀯𑀸 𑀉𑀪𑀬𑀁 𑀯𑀸 𑀪𑀺𑀢𑁆𑀢𑀺𑀬𑀸 𑀖𑀝𑀺𑀢𑀁 𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀏𑀯 𑀯𑀺𑀦𑀸𑀧𑀺 𑀪𑀺𑀢𑁆𑀢𑀺𑀮𑁂𑀧𑁂𑀦𑀸’’𑀢𑀺 𑀮𑀺𑀔𑀺𑀢𑀁. 𑀏𑀯𑀫𑁂𑀢𑁆𑀣 𑀣𑀫𑁆𑀪𑀢𑀼𑀮𑀸𑀧𑀺𑀝𑁆𑀞𑀲𑀗𑁆𑀖𑀸𑀝𑀸𑀤𑀺 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸. 𑀢𑀲𑁆𑀫𑀸 𑀯𑀺𑀘𑀸𑀭𑁂𑀢𑁆𑀯𑀸𑀯 𑀕𑀳𑁂𑀢𑀩𑁆𑀩𑀁. ‘‘𑀉𑀧𑁄𑀲𑀣𑀸𑀕𑀸𑀭𑀫𑁆𑀧𑀺 𑀪𑀯𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀪𑀺𑀓𑁆𑀔𑀽𑀳𑀺 𑀯𑀸 𑀲𑀸𑀫𑀡𑁂𑀭𑁂𑀳𑀺 𑀯𑀸 𑀏𑀓𑀢𑁄 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀯𑀝𑁆𑀝𑀢𑀺 𑀏𑀯. 𑀓𑀲𑁆𑀫𑀸? ‘‘𑀅𑀢𑁆𑀢𑀼𑀤𑁆𑀤𑁂𑀲’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀮𑀺𑀔𑀺𑀢𑀁.

𑀇𑀤𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁 𑀯𑀺𑀬 𑀦𑀺𑀤𑀸𑀦𑀸𑀧𑁂𑀓𑁆𑀔𑀁. 𑀦 𑀳𑀺 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸 𑀪𑀺𑀓𑁆𑀔𑀽 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀅𑀲𑀦𑁆𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀫𑀼𑀲𑀸𑀯𑀸𑀤𑀮𑀓𑁆𑀔𑀡𑀁 𑀧𑀸𑀧𑁂𑀢𑁆𑀯𑀸 𑀪𑀸𑀲𑀺𑀁𑀲𑀼. 𑀅𑀜𑁆𑀜𑀫𑀜𑁆𑀜𑀜𑁆𑀳𑀺 𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀡𑁆𑀡𑀁 𑀪𑀸𑀲𑀺𑀁𑀲𑀼. 𑀦 𑀘 𑀢𑀸𑀯𑀢𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀳𑁄𑀢𑀺, 𑀢𑀢𑁆𑀢𑀓𑁂𑀦 𑀧𑀦 𑀮𑁂𑀲𑁂𑀦 𑀪𑀕𑀯𑀸 𑀢𑀁 𑀯𑀢𑁆𑀣𑀼𑀁 𑀦𑀺𑀤𑀸𑀦𑀁 𑀓𑀢𑁆𑀯𑀸 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑀺, 𑀢𑀣𑀸 𑀇𑀥𑀸𑀧𑀺. 𑀦 𑀳𑀺 𑀦𑀺𑀤𑀸𑀦𑁂 ‘‘𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸𑀬𑁄 𑀲𑀸𑀭𑀫𑁆𑀪𑀸𑀬𑁄 𑀅𑀧𑀭𑀺𑀓𑁆𑀓𑀫𑀦𑀸𑀬𑁄’’𑀢𑀺 𑀯𑀼𑀢𑁆𑀢𑀁. ‘‘𑀅𑀧𑁆𑀧𑀫𑀸𑀡𑀺𑀓𑀸𑀬𑁄’’𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀧𑀫𑀸𑀡𑀫𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀦𑀺𑀤𑀸𑀦𑀸𑀧𑁂𑀓𑁆𑀔𑁄. 𑀢𑀢𑁆𑀣 𑀲𑀸𑀭𑀫𑁆𑀪𑁂 𑀅𑀧𑀭𑀺𑀓𑁆𑀓𑀫𑀦𑁂 𑀲𑀗𑁆𑀖𑀸𑀤𑀺𑀲𑁂𑀲𑀧𑁆𑀧𑀲𑀗𑁆𑀕𑀁 𑀯𑀺𑀬 𑀤𑀺𑀲𑁆𑀲𑀫𑀸𑀦𑀁 ‘‘𑀯𑀺𑀪𑀗𑁆𑀕𑁄 𑀢𑀁𑀦𑀺𑀬𑀫𑀓𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀪𑀗𑁆𑀕𑁂 𑀦 𑀦𑀺𑀯𑀸𑀭𑁂𑀢𑀺. 𑀢𑀣𑀸 𑀫𑀳𑀮𑁆𑀮𑀓𑁂.

𑀏𑀢𑁆𑀣𑀸𑀳 𑁋 𑀓𑀺𑀫𑀢𑁆𑀣𑀁 𑀫𑀸𑀢𑀺𑀓𑀸𑀬𑀁 𑀤𑀼𑀓𑁆𑀓𑀝𑀯𑀢𑁆𑀣𑀼 𑀯𑀼𑀢𑁆𑀢𑀁, 𑀦𑀦𑀼 𑀯𑀺𑀪𑀗𑁆𑀕𑁂 𑀏𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺? 𑀏𑀯𑀫𑁂𑀢𑀁. 𑀓𑀺𑀁 𑀦𑀼 𑀪𑀺𑀓𑁆𑀔𑀽 𑀅𑀪𑀺𑀦𑁂𑀢𑀩𑁆𑀩𑀸 𑀯𑀢𑁆𑀣𑀼𑀤𑁂𑀲𑀦𑀸𑀬, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀣𑀼 𑀤𑁂𑀲𑁂𑀢𑀩𑁆𑀩𑀁, 𑀓𑀻𑀤𑀺𑀲𑀁? 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀦𑁆𑀢𑀺. 𑀇𑀢𑀭𑀜𑁆𑀳𑀺 ‘‘𑀲𑀸𑀭𑀫𑁆𑀪𑁂 𑀘𑁂 𑀪𑀺𑀓𑁆𑀔𑀼 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑀭𑀺𑀓𑁆𑀓𑀫𑀦𑁂’’𑀢𑀺 𑀏𑀯𑀁 𑀅𑀦𑀼𑀧𑁆𑀧𑀲𑀗𑁆𑀕𑀯𑀲𑁂𑀦 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀢𑁆𑀣𑀼 𑀦𑀸𑀫 𑀅𑀢𑁆𑀣𑀺 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀅𑀢𑁆𑀣𑀺 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀢𑁆𑀣𑀺 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀢𑁆𑀣𑀺 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀦𑁆𑀢𑀺 𑀩𑀳𑀼𑀯𑀺𑀥𑀁, 𑀢𑀲𑁆𑀫𑀸 𑀩𑀳𑀼𑀯𑀺𑀥𑀢𑁆𑀢𑀸 𑀯𑀢𑁆𑀣𑀼 𑀤𑁂𑀲𑁂𑀢𑀩𑁆𑀩𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀦𑁂𑀢𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀫𑀢𑁆𑀣𑀺𑀓𑀸 𑀧𑀦𑁂𑀢𑁆𑀣 𑀯𑀢𑁆𑀣𑀼𑀤𑁂𑀲𑀦𑀸𑀢𑀺 𑀘𑁂? 𑀕𑀭𑀼𑀓𑀸𑀧𑀢𑁆𑀢𑀺𑀧𑀜𑁆𑀜𑀸𑀧𑀦𑀳𑁂𑀢𑀼𑀧𑀭𑀺𑀯𑀚𑁆𑀚𑀦𑀼𑀧𑀸𑀬𑀢𑁆𑀢𑀸. 𑀯𑀢𑁆𑀣𑀼𑀅𑀤𑁂𑀲𑀦𑀸 𑀳𑀺 𑀕𑀭𑀼𑀓𑀸𑀧𑀢𑁆𑀢𑀺𑀧𑀜𑁆𑀜𑀸𑀧𑀦𑀳𑁂𑀢𑀼𑀪𑀽𑀢𑀸. 𑀕𑀭𑀼𑀓𑀸𑀧𑀢𑁆𑀢𑀺𑀧𑀜𑁆𑀜𑀸𑀧𑀦𑀁 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀕𑀺𑀳𑀺𑀧𑀻𑀴𑀸𑀚𑀦𑀦𑀁, 𑀅𑀢𑁆𑀢𑀤𑀼𑀓𑁆𑀔𑀧𑀭𑀤𑀼𑀓𑁆𑀔𑀳𑁂𑀢𑀼𑀪𑀽𑀢𑁄 𑀘 𑀲𑀸𑀭𑀫𑁆𑀪𑀪𑀸𑀯𑁄𑀢𑀺 𑀏𑀢𑁂 𑀯𑀢𑁆𑀣𑀼𑀤𑁂𑀲𑀦𑀸𑀧𑀤𑁂𑀲𑁂𑀦 𑀉𑀧𑀸𑀬𑁂𑀦 𑀧𑀭𑀺𑀯𑀚𑁆𑀚𑀺𑀢𑀸 𑀳𑁄𑀦𑁆𑀢𑀺. 𑀦 𑀳𑀺 𑀪𑀺𑀓𑁆𑀔𑀽 𑀅𑀓𑀧𑁆𑀧𑀺𑀬𑀓𑀼𑀝𑀺𑀓𑀭𑀡𑀢𑁆𑀣𑀁 𑀕𑀺𑀳𑀻𑀦𑀁 𑀯𑀸 𑀧𑀻𑀴𑀸𑀦𑀺𑀫𑀺𑀢𑁆𑀢𑀁, 𑀲𑀸𑀭𑀫𑁆𑀪𑀯𑀢𑁆𑀣𑀼𑀓𑀼𑀝𑀺𑀓𑀭𑀡𑀢𑁆𑀣𑀁 𑀯𑀸 𑀯𑀢𑁆𑀣𑀼𑀁 𑀤𑁂𑀲𑁂𑀦𑁆𑀢𑀻𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀤𑀼𑀓𑁆𑀓𑀝𑀲𑁆𑀲 𑀳𑀺 𑀯𑀢𑁆𑀣𑀽𑀦𑀁, 𑀫𑀸𑀢𑀺𑀓𑀸𑀬 𑀧𑀓𑀸𑀲𑀦𑀸;

𑀕𑀭𑀼𑀓𑀸𑀧𑀢𑁆𑀢𑀺𑀳𑁂𑀢𑀽𑀦𑀁, 𑀢𑁂𑀲𑀁 𑀏𑀯𑀁 𑀧𑀓𑀸𑀲𑀺𑀢𑀸.

‘‘𑀯𑀢𑁆𑀣𑀼𑀲𑁆𑀲 𑀤𑁂𑀲𑀦𑀼𑀧𑀸𑀬𑁂𑀦, 𑀕𑀭𑀼𑀓𑀸𑀧𑀢𑁆𑀢𑀺𑀳𑁂𑀢𑀼𑀬𑁄;

𑀯𑀚𑁆𑀚𑀺𑀢𑀸 𑀳𑁄𑀦𑁆𑀢𑀺 𑀬𑀁 𑀢𑀲𑁆𑀫𑀸, 𑀲𑀸𑀭𑀫𑁆𑀪𑀸𑀤𑀺 𑀚𑀳𑀸𑀧𑀺𑀢’’𑀦𑁆𑀢𑀺.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀺𑀭𑀺𑀬𑀸𑀫𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀦𑀪𑀸𑀯𑀢𑁄 𑀅𑀓𑀺𑀭𑀺𑀬𑀫𑁂𑀯𑁂𑀢𑀁. 𑀢𑀁 𑀤𑁂𑀲𑀦𑀸𑀅𑀓𑀭𑀡𑀯𑀲𑁂𑀦. 𑀪𑀺𑀓𑁆𑀔𑀽 𑀯𑀸 𑀅𑀦𑀪𑀺𑀦𑁂𑀬𑁆𑀬𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀆𑀬𑀲𑁆𑀫𑀸 𑀙𑀦𑁆𑀦𑁄 𑀘𑁂𑀢𑀺𑀬𑀭𑀼𑀓𑁆𑀔𑀁 𑀙𑁂𑀤𑀸𑀧𑁂𑀲𑀻’’𑀢𑀺 (𑀧𑀸𑀭𑀸. 𑁩𑁬𑁫) 𑀆𑀕𑀢𑀢𑁆𑀢𑀸 𑀇𑀤𑀫𑁆𑀧𑀺 𑀦𑀺𑀤𑀸𑀦𑀸𑀧𑁂𑀓𑁆𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀓𑀲𑁆𑀫𑀸 𑀫𑀫 𑀯𑀦𑁆𑀤𑀦𑀸𑀤𑀻𑀦𑀺…𑀧𑁂… ‘𑀖𑀝𑀺𑀢𑁂𑀬𑁂𑀯 𑀲𑀻𑀲𑀁 𑀏𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀓𑀁 𑀯𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀉𑀧𑀸𑀮𑀺𑀧𑀜𑁆𑀘𑀓𑁂 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀅𑀯𑀦𑁆𑀤𑀺𑀬𑀸’’𑀢𑀺𑀆𑀤𑀺𑀦𑀸 (𑀧𑀭𑀺. 𑁪𑁬𑁭) 𑀯𑀼𑀢𑁆𑀢𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀢𑁆𑀢𑀸, ‘‘𑀧𑀘𑁆𑀙𑀸 𑀉𑀧𑀲𑀫𑁆𑀧𑀦𑁆𑀦𑁂𑀦 𑀧𑀼𑀭𑁂 𑀉𑀧𑀲𑀫𑁆𑀧𑀦𑁆𑀦𑁄 𑀯𑀦𑁆𑀤𑀺𑀬𑁄’’𑀢𑀺 (𑀧𑀭𑀺. 𑁪𑁬𑁮) 𑀯𑀼𑀢𑁆𑀢𑀢𑁆𑀢𑀸 𑀘, 𑀢𑀲𑁆𑀫𑀸 𑀏𑀯 𑀇𑀫𑀺𑀲𑁆𑀲𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 ‘‘𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀲𑀗𑁆𑀔𑁆𑀬𑀼𑀧𑀕𑀫𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑁄 𑀧𑀦 𑀏𑀯𑀁 𑀕𑀳𑁂𑀢𑀩𑁆𑀩𑁄 𑁋 𑀅𑀯𑀦𑁆𑀤𑀦𑁆𑀢𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀸𑀬 𑀘𑁄𑀤𑀦𑀸𑀬 𑀘𑁄𑀤𑁂𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀏𑀯 ‘‘𑀏𑀢𑁆𑀢𑀸𑀯𑀢𑀸 𑀘 𑀘𑁄𑀤𑀦𑀸 𑀦𑀸𑀫 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀥 𑀅𑀥𑀺𑀧𑁆𑀧𑁂𑀢𑀁 𑀆𑀧𑀢𑁆𑀢𑀺𑀆𑀧𑀚𑁆𑀚𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘‘𑀓𑀲𑁆𑀫𑀸 𑀫𑀫 𑀯𑀦𑁆𑀤𑀦𑀸𑀤𑀻𑀦𑀺 𑀦 𑀓𑀭𑁄𑀲𑀻’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀮𑀺𑀔𑀺𑀢𑀁.

𑀓𑀢𑀽𑀧𑀲𑀫𑁆𑀧𑀤𑀦𑁆𑀢𑀺 𑀬𑀲𑁆𑀲 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀺, 𑀢𑀁, 𑀧𑀡𑁆𑀟𑀓𑀸𑀤𑀬𑁄. 𑀞𑀧𑀦𑀓𑁆𑀔𑁂𑀢𑁆𑀢𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀁, 𑀧𑀼𑀕𑁆𑀕𑀮𑀺𑀓𑀜𑁆𑀘𑀸𑀢𑀺 𑀤𑀼𑀯𑀺𑀥𑀁 𑀧𑀯𑀸𑀭𑀡𑀸𑀞𑀧𑀦𑀁. 𑀢𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄…𑀧𑁂… 𑀢𑁂𑀯𑀸𑀘𑀺𑀓𑀁 𑀧𑀯𑀸𑀭𑁂’’𑀢𑀺 𑀲𑀼-𑀓𑀸𑀭𑀢𑁄 𑀬𑀸𑀯 𑀭𑁂-𑀓𑀸𑀭𑁄. 𑀧𑀼𑀕𑁆𑀕𑀮𑀺𑀓𑀞𑀧𑀦𑁂 𑀧𑀦 ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀯𑀸𑀭𑁂𑀫𑀺…𑀧𑁂… 𑀧𑀲𑁆𑀲𑀦𑁆𑀢𑁄 𑀧𑀝𑀻’’𑀢𑀺 𑀲𑀁-𑀓𑀸𑀭𑀢𑁄 𑀬𑀸𑀯 𑀅𑀬𑀁 𑀲𑀩𑁆𑀩𑀧𑀘𑁆𑀙𑀺𑀫𑁄 𑀝𑀺-𑀓𑀸𑀭𑁄, 𑀏𑀢𑁆𑀣𑀦𑁆𑀢𑀭𑁂 𑀏𑀓𑀧𑀤𑁂𑀧𑀺 𑀞𑀧𑁂𑀦𑁆𑀢𑁂𑀦 𑀞𑀧𑀺𑀢𑀸 𑀳𑁄𑀢𑀺. 𑀉𑀧𑁄𑀲𑀣𑁂 𑀧𑀦 𑀇𑀫𑀺𑀦𑀸𑀦𑀼𑀲𑀸𑀭𑁂𑀦 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀓𑀭𑁂𑀬𑁆𑀬𑀸’’𑀢𑀺 𑀭𑁂-𑀓𑀸𑀭𑁂 𑀅𑀦𑀢𑀺𑀓𑁆𑀓𑀫𑀦𑁆𑀢𑁂.

𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀜𑁆𑀜𑀪𑀸𑀕𑁄 𑀯𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀬𑀣𑀸 𑀲𑀼𑀯𑀡𑁆𑀡𑀲𑁆𑀲𑁂𑀤𑀁 𑀲𑁄𑀯𑀡𑁆𑀡𑀫𑀺𑀢𑁆𑀬𑀢𑁆𑀭 𑀲𑀼𑀯𑀡𑁆𑀡𑀯𑀸 𑀅𑀦𑁂𑀦 𑀲𑀼𑀯𑀡𑁆𑀡𑁄 𑀇𑀢𑁆𑀬𑀼𑀘𑁆𑀘𑀢𑁂. 𑀢𑀁 𑀧𑀝𑀺𑀫𑀸𑀬 𑀲𑀭𑀻𑀭𑀁, 𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭𑀦𑁆𑀢𑀺 𑀘 𑀦𑀺𑀤𑀲𑁆𑀲𑀦𑀁. 𑀙𑀕𑀮𑀓𑀲𑁆𑀲 ‘‘𑀤𑀩𑁆𑀩𑁄’’𑀢𑀺 𑀤𑀺𑀦𑁆𑀦𑀁 𑀦𑀸𑀫𑀁 ‘‘𑀤𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸? 𑀣𑁂𑀭𑀁 𑀅𑀦𑀼𑀤𑁆𑀥𑀁𑀲𑁂𑀢𑀼𑀁 𑀣𑁂𑀭𑀲𑁆𑀲𑀸𑀧𑀺 𑀅𑀧𑀤𑀺𑀲𑀺𑀢𑀩𑁆𑀩𑀢𑁆𑀢𑀸. 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀁 𑀦 𑀣𑁂𑀭𑀁𑀬𑁂𑀯. 𑀮𑀺𑀲𑁆𑀲𑀢𑀺 𑀲𑀺𑀮𑀺𑀲𑁆𑀲𑀢𑀺 𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯𑀦 𑀅𑀢𑁆𑀣𑀢𑁄. 𑀈𑀲𑀓𑀁 𑀅𑀮𑁆𑀮𑀻𑀬𑀢𑀻𑀢𑀺 𑀮𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑀺𑀲𑀲𑁂𑀮𑀙𑀓𑁄𑀮𑀅𑀮𑁆𑀮𑀻𑀪𑀸𑀯𑁂. 𑀢𑁂𑀦 𑀯𑀼𑀢𑁆𑀢𑀁 ‘‘𑀈𑀲𑀓𑀁 𑀅𑀮𑁆𑀮𑀻𑀬𑀢𑀻𑀢𑀺 𑀮𑁂𑀲𑁄’’𑀢𑀺. 𑀬𑀲𑁆𑀫𑀸 𑀤𑁂𑀲𑀮𑁂𑀲𑀸 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑀁, 𑀢𑀲𑁆𑀫𑀸 ‘‘𑀓𑀺𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬𑀸’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀤𑀲 𑀮𑁂𑀲𑀸 𑀚𑀸𑀢𑀺𑀮𑁂𑀲𑁄’’𑀢𑀺𑀆𑀤𑀺 (𑀧𑀸𑀭𑀸. 𑁩𑁯𑁪) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁.

𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯 𑀆𑀯𑀺𑀪𑀽𑀢𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀅𑀦𑀺𑀬𑀫𑀢𑁆𑀢𑀸. 𑀦 𑀳𑀺 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀯𑀺𑀬 𑀅𑀜𑁆𑀜𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 ‘‘𑀙𑀕𑀮𑀓𑀫𑁂𑀯𑁂𑀢𑁆𑀣 𑀅𑀜𑁆𑀜𑀪𑀸𑀕𑀺𑀬𑀁 𑀅𑀥𑀺𑀓𑀭𑀡𑀁 𑀳𑁄𑀢𑀺, 𑀅𑀜𑁆𑀜𑀁 𑀕𑁄𑀫𑀳𑀺𑀁𑀲𑀸𑀤𑀺𑀓𑀫𑁆𑀧𑀺 𑀳𑁄𑀢𑀺, 𑀦 𑀘 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀯𑀺𑀬 𑀲𑀩𑁆𑀩𑁂𑀧𑀺 𑀦𑀸𑀫𑀮𑁂𑀲𑀫𑀢𑁆𑀢𑀫𑁂𑀯 𑀉𑀧𑀸𑀤𑀺𑀬𑀦𑁆𑀢𑀺, 𑀅𑀜𑁆𑀜𑀫𑁆𑀧𑀺 𑀚𑀸𑀢𑀺𑀮𑁂𑀲𑀸𑀤𑀺𑀁 𑀉𑀧𑀸𑀤𑀺𑀬𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀺𑀬𑀫𑀢𑁆𑀢𑀸 𑀦 𑀯𑀺𑀪𑀢𑁆𑀢𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀢𑀣𑀸𑀯𑀼𑀢𑁆𑀢𑁂 𑀙𑀕𑀮𑀓𑀲𑁆𑀲𑁂𑀯 𑀅𑀜𑁆𑀜𑀪𑀸𑀕𑀺𑀬𑀢𑀸 𑀲𑀫𑁆𑀪𑀯𑀢𑀺, 𑀦 𑀅𑀜𑁆𑀜𑀲𑁆𑀲, 𑀬𑁂𑀦 𑀲𑁄𑀯 𑀤𑀲𑁆𑀲𑀺𑀢𑁄. 𑀮𑁂𑀲𑁄 𑀘 𑀦𑀸𑀫 𑀮𑁂𑀲𑁄𑀯, 𑀦 𑀚𑀸𑀢𑀺𑀆𑀤𑀺, 𑀬𑁂𑀦 𑀲𑁄𑀯 𑀤𑀲𑁆𑀲𑀺𑀢𑁄𑀢𑀺 𑀏𑀯𑀁 𑀫𑀺𑀘𑁆𑀙𑀸𑀕𑀸𑀳𑀧𑁆𑀧𑀲𑀗𑁆𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀘…𑀧𑁂… 𑀲𑀜𑁆𑀜𑀺𑀦𑁄𑀧𑀻𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀘 𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑁂 𑀘𑀸𑀢𑀺 𑀅𑀢𑁆𑀣𑁄.

𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀁 𑀬𑁄, 𑀦𑁂𑀯 𑀲𑀺𑀓𑁆𑀔𑀢𑀺 𑀬𑀼𑀢𑁆𑀢𑀺𑀢𑁄;

𑀕𑀘𑁆𑀙𑁂 𑀯𑀺𑀦𑀬𑀯𑀺𑀜𑁆𑀜𑀽𑀳𑀺, 𑀅𑀜𑁆𑀜𑀪𑀸𑀕𑀺𑀬𑀢𑀁𑀯 𑀲𑁄. (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁪𑁦𑁮);

𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀪𑁂𑀤𑀸𑀦𑀼𑀯𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀺𑀡𑁆𑀡𑀁 𑀉𑀤𑁆𑀥𑀁 𑀓𑀫𑁆𑀫𑀸𑀭𑀳𑀸…𑀧𑁂… 𑀓𑀭𑁄𑀢𑀻𑀢𑀺 𑀏𑀢𑁆𑀣 ‘‘𑀇𑀫𑁂 𑀘𑀢𑁆𑀢𑀸𑀭𑁄’’𑀢𑀺 𑀯𑀸 ‘‘𑀇𑀫𑀜𑁆𑀘 𑀇𑀫𑀜𑁆𑀘𑀸’’𑀢𑀺 𑀯𑀸 𑀯𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀮𑀺𑀔𑀺𑀢𑀁.

𑀪𑁂𑀤𑀸𑀦𑀼𑀯𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀓𑁆𑀔𑁂𑀦 𑀯𑀢𑁆𑀢𑀩𑁆𑀩𑁄 𑀤𑀼𑀩𑁆𑀩𑀘𑁄. 𑀯𑀼𑀘𑁆𑀘𑀫𑀸𑀦𑁄 𑀦 𑀲𑀳𑀢𑀺.

𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀯𑀡𑁆𑀡𑀦𑀸

‘‘𑀦𑀸𑀫𑀫𑀢𑁆𑀢𑀯𑀲𑁂𑀦𑀸’’𑀢𑀺 𑀧𑀸𑀞𑁄. ‘‘𑀦𑀸𑀫𑀕𑁄𑀢𑁆𑀢𑀯𑀲𑁂𑀦𑀸’’𑀢𑀺 𑀮𑀺𑀔𑀺𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀅𑀬𑀁 𑀓𑀺𑀭𑀺𑀬𑀸 𑀪𑀺𑀓𑁆𑀔𑀽𑀦𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀚𑀸𑀦𑀺𑀢𑁆𑀯𑀸 𑀲𑀘𑁂 𑀙𑀸𑀤𑁂𑀢𑀺, 𑀙𑀦𑁆𑀦𑀸𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀪𑀸𑀕𑀫𑀢𑁆𑀢𑀫𑁂𑀯𑀸𑀢𑀺 𑀅𑀯𑁂𑀭𑀺𑀲𑀪𑀸𑀕𑀫𑀢𑁆𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘𑀸𑀢𑀺 𑀏𑀢𑁆𑀣 𑀯𑀢𑁆𑀣𑀽𑀢𑀺 𑀯𑀻𑀢𑀺𑀓𑁆𑀓𑀫𑀦𑀁 𑀅𑀲𑀼𑀘𑀺𑀫𑀼𑀘𑁆𑀘𑀦𑀁. 𑀕𑁄𑀢𑁆𑀢𑀦𑁆𑀢𑀺 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁, 𑀲𑀚𑀸𑀢𑀺𑀢𑁄 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀕𑀁 𑀩𑀼𑀤𑁆𑀥𑀺𑀁, 𑀯𑀘𑀦𑀜𑁆𑀘 𑀢𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼 𑀘 𑀲𑀚𑀸𑀢𑀺𑀫𑁂𑀯 𑀕𑀘𑁆𑀙𑀢𑀺. 𑀲𑀚𑀸𑀢𑀺 𑀦𑀸𑀫𑁂𑀢𑁆𑀣 𑀅𑀜𑁆𑀜𑁂𑀳𑀺 𑀯𑀺𑀲𑀺𑀝𑁆𑀞𑀸𑀯𑀺𑀲𑀺𑀝𑁆𑀞𑀪𑀽𑀢𑀸 𑀓𑀺𑀭𑀺𑀬𑀸, 𑀦 𑀓𑀸𑀬𑀲𑀁𑀲𑀕𑁆𑀕𑀸𑀤𑀺. 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘𑀸𑀢𑀺 𑀏𑀢𑁆𑀣 𑀆𑀧𑀢𑁆𑀢𑀻𑀢𑀺 𑀯𑀻𑀢𑀺𑀓𑁆𑀓𑀫𑁂𑀦𑀸𑀧𑀦𑁆𑀦𑀸𑀧𑀢𑁆𑀢𑀺𑀬𑀸 𑀦𑀸𑀫𑀁.

𑀧𑀼𑀦 𑀆𑀕𑀢𑀸𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀦𑁆𑀢𑁂𑀦𑀸𑀢𑀺 𑀏𑀢𑁆𑀣 𑀤𑁆𑀯𑀺𑀦𑁆𑀦𑀁 𑀆𑀭𑁄𑀘𑁂𑀦𑁆𑀢𑁂𑀦 ‘‘𑀆𑀬𑀲𑁆𑀫𑀦𑁆𑀢𑀸 𑀥𑀸𑀭𑁂𑀦𑁆𑀢𑀼’’𑀢𑀺𑀡𑁆𑀡𑀁 𑀯𑀸 𑀅𑀢𑀺𑀭𑁂𑀓𑀸𑀦𑀁 𑀯𑀸 𑀆𑀭𑁄𑀘𑁂𑀦𑁆𑀢𑁂𑀦 ‘‘𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’’𑀢𑀺 𑀏𑀯𑀁 𑀆𑀭𑁄𑀘𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀢𑁆𑀢𑀪𑁂𑀤𑀜𑁆𑀘 𑀭𑀢𑁆𑀢𑀺𑀘𑁆𑀙𑁂𑀤𑀜𑁆𑀘 𑀅𑀓𑀢𑁆𑀯𑀸𑀢𑀺 𑀏𑀢𑁆𑀣 𑀞𑀧𑁂𑀢𑁆𑀯𑀸 𑀦𑀯𑀓𑀢𑀭𑀁 𑀧𑀸𑀭𑀺𑀯𑀸𑀲𑀺𑀓𑀁 𑀅𑀯𑀲𑁂𑀲𑀸𑀦𑀁 𑀅𑀦𑁆𑀢𑀫𑀲𑁄 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀤𑀻𑀦𑀫𑁆𑀧𑀺 𑀅𑀪𑀺𑀯𑀸𑀤𑀦𑀸𑀤𑀺𑀲𑀸𑀤𑀺𑀬𑀦𑁂, 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀻𑀤𑀦𑁂, 𑀑𑀯𑀤𑀦𑁂, 𑀓𑀫𑁆𑀫𑀺𑀓𑀸𑀦𑀁 𑀕𑀭𑀳𑀡𑁂 𑀘𑀸𑀢𑀺𑀆𑀤𑀻𑀲𑀼 𑀯𑀢𑁆𑀢𑀪𑁂𑀤𑁄 𑀳𑁄𑀢𑀺. 𑀤𑀲𑁆𑀲𑀦𑀲𑀯𑀦𑀯𑀺𑀲𑀬𑁂𑀲𑀼 𑀅𑀦𑀸𑀭𑁄𑀘𑀦𑁂 𑀘 𑀪𑀺𑀓𑁆𑀔𑀽𑀳𑀺 𑀏𑀓𑀘𑁆𑀙𑀦𑁆𑀦𑁂 𑀯𑀲𑀦𑁂 𑀘 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑁆𑀯𑀸 𑀕𑀫𑀦𑁂 𑀘𑀸𑀢𑀺𑀆𑀤𑀻𑀲𑀼 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀺. 𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀺 𑀯𑀺𑀦𑀬𑀓𑀫𑁆𑀫𑀸𑀪𑀸𑀯𑀢𑁄 𑀢𑁂𑀲𑀁 𑀅𑀦𑀸𑀭𑁄𑀘𑀦𑁂 𑀭𑀢𑁆𑀢𑀺𑀘𑁆𑀙𑁂𑀤𑁄 𑀦 𑀳𑁄𑀢𑀺. ‘‘𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀯𑀘𑀦𑀢𑁄 𑀅𑀦𑁆𑀢𑁄 𑀦 𑀯𑀝𑁆𑀝𑀢𑀺. 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁂𑀦𑁂𑀯 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑁂𑀦 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀼𑀩𑁆𑀩𑁂 𑀲𑀫𑀸𑀤𑀺𑀬𑀺𑀢𑁆𑀯𑀸 𑀆𑀭𑁄𑀘𑀺𑀢𑀁, 𑀢𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂 𑀧𑀘𑁆𑀙𑀸 𑀦𑀺𑀓𑁆𑀔𑀺𑀧𑀦𑀓𑀸𑀮𑁂 𑀆𑀭𑁄𑀘𑁂𑀢𑁆𑀯𑀸𑀯 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀧𑀼𑀦 𑀲𑀫𑀸𑀤𑀸𑀦𑀓𑀸𑀮𑁂𑀧𑀺 𑀲𑁄 𑀘𑁂 𑀢𑀢𑁄 𑀕𑀘𑁆𑀙𑀢𑀺, 𑀢𑀁 𑀤𑀺𑀯𑀲𑀁 𑀅𑀕𑀦𑁆𑀢𑁆𑀯𑀸 𑀤𑀺𑀯𑀸 𑀆𑀭𑁄𑀘𑁂𑀢𑁆𑀯𑀸𑀧𑀺 𑀬𑀤𑀺 𑀏𑀯𑀁 𑀅𑀢𑀻𑀢𑀤𑀺𑀯𑀲𑀁 𑀳𑁄𑀢𑀺, ‘‘𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑁆𑀯𑀸 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑀩𑁆𑀩𑀦𑁆𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑁆𑀯𑀸 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑀺𑀘 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀬𑀁 𑀲𑀩𑁆𑀩𑀧𑀞𑀫𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀺, 𑀯𑀺𑀳𑀸𑀭𑀲𑀻𑀫𑀸𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀩𑁆𑀩𑁂𑀲𑀁 𑀆𑀭𑁄𑀘𑁂𑀢𑀩𑁆𑀩𑀁 𑀲𑀺𑀬𑀸. ‘‘𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸’’𑀢𑀺 𑀇𑀤𑀁 𑀧𑀦 𑀧𑀼𑀩𑁆𑀩𑁂 𑀅𑀦𑀸𑀭𑁄𑀘𑀺𑀢𑀁 𑀲𑀦𑁆𑀥𑀸𑀬 𑀯𑀢𑁆𑀢𑀪𑁂𑀤𑀭𑀓𑁆𑀔𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀯 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁯𑁭) 𑀏𑀯𑀁 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀁 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀁 𑀯𑀸 𑀆𑀕𑀦𑁆𑀢𑀼𑀓𑀁 𑀯𑀸’’𑀢𑀺.

𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁂 𑀧𑀦 𑀲𑀘𑁂 ‘‘𑀫𑀸𑀲𑀫𑀢𑁆𑀢𑀁 𑀅𑀲𑀼𑀤𑁆𑀥𑁄𑀫𑁆𑀳𑀻’’𑀢𑀺 𑀅𑀕𑁆𑀕𑀳𑁂𑀲𑀺, 𑀧𑀭𑀺𑀯𑀲𑀦𑁆𑀢𑁄 𑀧𑀼𑀦 𑀊𑀦𑀁 𑀯𑀸 𑀅𑀥𑀺𑀓𑀁 𑀯𑀸 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑁄𑀢𑀺, 𑀢𑀢𑁆𑀢𑀓𑀫𑁆𑀧𑀺 𑀧𑀭𑀺𑀯𑀲𑀺𑀢𑀩𑁆𑀩𑀫𑁂𑀯, 𑀧𑀭𑀺𑀯𑀸𑀲𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀬𑀜𑁆𑀳𑀺 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀦𑀸𑀫 𑀉𑀤𑁆𑀥𑀫𑁆𑀧𑀺 𑀆𑀭𑁄𑀳𑀢𑀺, 𑀳𑁂𑀝𑁆𑀞𑀸𑀧𑀺 𑀑𑀭𑁄𑀳𑀢𑀺. 𑀇𑀤𑀫𑀲𑁆𑀲 𑀮𑀓𑁆𑀔𑀡𑀁.

𑀲𑀫𑁄𑀤𑀳𑀺𑀢𑁆𑀯𑀸𑀢𑀺 𑀫𑀽𑀮𑀸𑀧𑀢𑁆𑀢𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸, 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀘𑁂 𑀅𑀦𑁆𑀢𑀭𑀸𑀧𑀢𑁆𑀢𑀺, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀁 𑀅𑀓𑀢𑁆𑀯𑀸 𑀧𑀼𑀩𑁆𑀩𑁂 𑀕𑀳𑀺𑀢𑀧𑀭𑀺𑀯𑀸𑀲𑁂𑀦𑁂𑀯 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀬𑁄 𑀧𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀺𑀩𑁆𑀪𑀫𑀺𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸𑀧𑀺 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀬𑁄 𑀘 𑀧𑀼𑀩𑁆𑀩𑁂 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀘𑁆𑀙𑀸 𑀦 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀬𑁄 𑀘 𑀉𑀪𑀬𑀢𑁆𑀣 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀲𑀩𑁆𑀩𑁂𑀲𑀁 𑀧𑀝𑀺𑀘𑁆𑀙𑀦𑁆𑀦𑀤𑀺𑀯𑀲𑀯𑀲𑁂𑀦 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. ‘‘𑀧𑀼𑀭𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀯𑀸’’𑀢𑀺 𑀘 ‘‘𑀧𑀘𑁆𑀙𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀯𑀸’’𑀢𑀺 (𑀘𑀽𑀴𑀯. 𑁧𑁬𑁬 𑀆𑀤𑀬𑁄) 𑀘 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 𑀤𑁆𑀯𑁂 𑀪𑀺𑀓𑁆𑀔𑀽 𑀯𑀺𑀲𑀼𑀤𑁆𑀥𑀺𑀓𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂 𑀲𑀼𑀤𑁆𑀥𑀺𑀓𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀏𑀓𑁄 𑀙𑀸𑀤𑁂𑀢𑀺, 𑀏𑀓𑁄 𑀦 𑀙𑀸𑀤𑁂𑀢𑀺. 𑀬𑁄 𑀙𑀸𑀤𑁂𑀢𑀺, 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. ‘‘𑀉𑀪𑁄𑀧𑀺 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀸’’𑀢𑀺 (𑀘𑀽𑀴𑀯. 𑁧𑁮𑁧) 𑀯𑀘𑀦𑀢𑁄 𑀬𑀁 𑀓𑀜𑁆𑀘𑀺 𑀆𑀧𑀢𑁆𑀢𑀺𑀁 𑀙𑀸𑀤𑁂𑀢𑁆𑀯𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀲𑀼 𑀕𑀢𑁂𑀲𑀼 𑀯𑀸 𑀅𑀕𑀢𑁂𑀲𑀼 𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀊𑀦𑁂 𑀕𑀡𑁂 𑀘𑀭𑀡𑀁, 𑀅𑀦𑀼𑀝𑁆𑀞𑀳𑀦𑀁 𑀏𑀓𑀭𑀢𑁆𑀢𑀫𑁆𑀧𑀺 𑀕𑀡𑁂𑀦 𑀯𑀺𑀧𑁆𑀧𑀯𑀸𑀲𑀁, 𑀲𑀘𑁂 𑀭𑀢𑁆𑀢𑀺𑀬𑀸 𑀏𑀓𑀓𑁆𑀔𑀡𑁂𑀦 𑀲𑀗𑁆𑀖𑁄 𑀯𑀲𑀢𑀺, 𑀲𑀘𑁂 𑀲𑁄 𑀧𑀼𑀭𑁂 𑀅𑀭𑀼𑀡𑀫𑁂𑀯 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀕𑀢𑁄𑀢𑀺 𑀏𑀢𑁆𑀣𑀧𑀺 𑀫𑀸𑀦𑀢𑁆𑀢𑁂𑀧𑀺 𑀏𑀯𑀁 𑀚𑀸𑀢𑁂. ‘‘𑀅𑀬𑀜𑁆𑀘 𑀬𑀲𑁆𑀫𑀸 𑀕𑀡𑀲𑁆𑀲 𑀆𑀭𑁄𑀘𑁂𑀢𑁆𑀯𑀸, 𑀪𑀺𑀓𑁆𑀔𑀽𑀦𑀜𑁆𑀘 𑀅𑀢𑁆𑀣𑀺𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀯 𑀯𑀲𑀺, 𑀢𑁂𑀦𑀲𑁆𑀲 𑀊𑀦𑁂 𑀕𑀡𑁂 𑀘𑀭𑀡𑀤𑁄𑀲𑁄 𑀯𑀸 𑀯𑀺𑀧𑁆𑀧𑀯𑀸𑀲𑁄 𑀯𑀸 𑀦 𑀳𑁄𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁯𑁭) 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑁂𑀦 𑀆𑀭𑁄𑀘𑀺𑀢𑁂 𑀫𑀼𑀳𑀼𑀢𑁆𑀢𑀫𑁆𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀕𑀢𑁂𑀧𑀺 𑀯𑀺𑀧𑁆𑀧𑀯𑀸𑀲𑁄 𑀦𑀢𑁆𑀣𑀺. 𑀧𑀸𑀭𑀺𑀯𑀸𑀲𑀺𑀓𑀲𑁆𑀲, 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀘 𑀧𑀓𑀢𑀢𑁆𑀢𑁂𑀦 𑀢𑀲𑁆𑀫𑀺𑀁 𑀯𑀲𑀦𑀁 𑀉𑀤𑀓𑀧𑀸𑀢𑁂𑀦 𑀯𑀸𑀭𑀺𑀢𑀁, 𑀢𑀲𑁆𑀫𑀸 𑀦𑀸𑀦𑀽𑀧𑀘𑀸𑀭𑁂𑀧𑀺 𑀏𑀓𑀘𑁆𑀙𑀦𑁆𑀦𑁂 𑀦 𑀯𑀝𑁆𑀝𑀢𑀺.

𑀇𑀤𑀸𑀦𑀺 𑀧𑀸𑀞𑀯𑀺𑀘𑀸𑀭𑀡𑀸 𑀯𑁂𑀤𑀺𑀢𑀩𑁆𑀩𑀸 𑁋 ‘‘𑀦𑀯 𑀧𑀞𑀫𑀸𑀧𑀢𑁆𑀢𑀺𑀓𑀸 𑀘𑀢𑁆𑀢𑀸𑀭𑁄 𑀬𑀸𑀯𑀢𑀢𑀺𑀬𑀓𑀸’’𑀢𑀺 𑀇𑀤𑀁 𑀲𑀪𑀸𑀯𑀦𑀺𑀬𑀫𑀯𑀘𑀦𑀁. 𑀢𑁂𑀦 𑀯𑀼𑀝𑁆𑀞𑀸𑀦𑀁 𑀅𑀦𑀺𑀬𑀫𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀘𑁆𑀘𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀜𑁆𑀳𑀺 𑀓𑀫𑁆𑀫𑀢𑁄𑀧𑀺 𑀳𑁄𑀢𑀺 𑀅𑀓𑀫𑁆𑀫𑀢𑁄𑀧𑀺, 𑀦 𑀏𑀯𑀁 𑀆𑀧𑀚𑁆𑀚𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀢𑀭𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸𑀢𑀺 𑀢𑁂𑀲𑀁 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀓𑁆𑀓𑀫𑀪𑁂𑀤𑀸𑀪𑀸𑀯𑀤𑀻𑀧𑀓𑀯𑀘𑀦𑀁. 𑀬𑀸𑀯𑀢𑀻𑀳𑀁, 𑀢𑀸𑀯𑀢𑀻𑀳𑀦𑁆𑀢𑀺 𑀏𑀢𑁆𑀣 𑀅𑀳𑀧𑀭𑀺𑀘𑁆𑀙𑁂𑀤𑁄 𑀅𑀭𑀼𑀡𑀯𑀲𑁂𑀦. ‘‘𑀚𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀚𑀸𑀦𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑀲𑁆𑀲 𑀅𑀓𑀸𑀫𑀸 𑀧𑀭𑀺𑀯𑀢𑁆𑀣𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀓𑀸𑀫𑀸 𑀧𑀭𑀺𑀯𑀢𑁆𑀣𑀩𑁆𑀩𑀦𑁆𑀢𑀺 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀲𑀢𑀸 𑀅𑀓𑀸𑀫𑀸 𑀧𑀭𑀺𑀯𑀢𑁆𑀣𑀩𑁆𑀩𑀁, 𑀦 𑀧𑀭𑀺𑀯𑀢𑁆𑀢𑀺𑀢𑀮𑀺𑀗𑁆𑀕𑁂𑀦𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁂𑀦𑀸𑀢𑀺 𑀆𑀤𑀺𑀫𑁆𑀳𑀺 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁂𑀦𑁂𑀯 𑀧𑀭𑀺𑀯𑀸𑀲𑀢𑁄 𑀉𑀢𑁆𑀢𑀭𑀺 𑀇𑀢𑀺𑀯𑀸𑀭𑁂𑀦 𑀆𑀤𑀺𑀢𑁄 𑀪𑀺𑀓𑁆𑀔𑀼𑀦𑀸𑀯 𑀙𑀸𑀭𑀢𑁆𑀢𑀁, 𑀧𑀭𑀺𑀯𑀢𑁆𑀢𑀺𑀢𑀮𑀺𑀗𑁆𑀕𑁂𑀦 𑀉𑀤𑁆𑀥𑀫𑁆𑀧𑀺 𑀪𑀺𑀓𑁆𑀔𑀼𑀫𑀸𑀦𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀦 𑀧𑀭𑀺𑀯𑀸𑀲𑁂 𑀯𑀺𑀬 𑀢𑀧𑁆𑀧𑀘𑁆𑀘𑀬𑀸 𑀅𑀘𑀺𑀡𑁆𑀡𑀫𑀸𑀦𑀢𑁆𑀢𑁄. 𑀘𑀺𑀡𑁆𑀡𑀫𑀸𑀦𑀢𑁆𑀢𑁄𑀯 𑀅𑀩𑁆𑀪𑁂𑀢𑀩𑁆𑀩𑁄, 𑀦 𑀇𑀢𑀭𑁄, 𑀦 𑀧𑀭𑀺𑀯𑀸𑀲𑁂 𑀯𑀺𑀬 𑀫𑀸𑀦𑀢𑁆𑀢𑀸𑀭𑀳𑁂, 𑀧𑀓𑁆𑀔𑀫𑀸𑀦𑀢𑁆𑀢𑀜𑁆𑀘 𑀘𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀸𑀢𑀺𑀓𑁆𑀓𑀫𑁂 𑀲𑀢𑀺 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀧𑀼𑀦 𑀪𑀺𑀓𑁆𑀔𑀼𑀫𑀸𑀦𑀢𑁆𑀢𑀁 𑀕𑀳𑁂𑀢𑁆𑀯𑀸 𑀘𑀺𑀡𑁆𑀡𑀫𑀸𑀦𑀢𑁆𑀢𑁄𑀯 𑀪𑀺𑀓𑁆𑀔𑀼 𑀅𑀩𑁆𑀪𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑀬𑀢𑁆𑀣 𑀲𑀺𑀬𑀸𑀢𑀺 𑀬𑀲𑁆𑀲𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬𑀫𑁆𑀧𑀺 𑀯𑀻𑀲𑀢𑀺𑀕𑀡𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀢𑁆𑀣𑀺. 𑀏𑀓𑁂𑀦𑀧𑀺 𑀘𑁂 𑀊𑀦𑁄 𑀯𑀻𑀲𑀢𑀺𑀕𑀡𑁄𑀢𑀺 𑀦 𑀬𑀼𑀚𑁆𑀚𑀢𑀺, 𑀊𑀦𑁄 𑀘𑁂. 𑀦 𑀳𑀺 𑀯𑀻𑀲𑀢𑀺𑀕𑀡𑁄, 𑀲𑀗𑁆𑀖𑁄 𑀘𑁂 𑀊𑀦𑁄. 𑀢𑀲𑁆𑀫𑀸 ‘‘𑀏𑀓𑁂𑀦𑀧𑀺 𑀘𑁂 𑀊𑀦𑁄 𑀲𑀗𑁆𑀖𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀘𑀢𑀼𑀯𑀕𑁆𑀕𑀧𑀜𑁆𑀘𑀯𑀕𑁆𑀕𑀤𑀲𑀯𑀕𑁆𑀕𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀧𑁆𑀧𑀬𑁄𑀚𑀦𑀢𑁄. 𑀢𑀲𑁆𑀫𑀸 𑀯𑀻𑀲𑀢𑀺𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘𑁂 𑀪𑀺𑀓𑁆𑀔𑀼𑀦𑀸 𑀏𑀓𑁂𑀦𑀧𑀺 𑀊𑀦𑁄, 𑀦𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀘𑀺 𑀧𑀦 𑀯𑀺𑀦𑀬𑁂 𑀅𑀧𑁆𑀧𑀓𑀢𑀜𑁆𑀜𑀼𑀦𑁄 ‘‘𑀬𑀣𑀸 𑀅𑀢𑀺𑀭𑁂𑀓𑀘𑀢𑀼𑀯𑀕𑁆𑀕𑁄𑀧𑀺 𑀲𑀗𑁆𑀖𑁄 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑁂 𑀓𑀫𑁆𑀫𑁂 ‘𑀘𑀢𑀼𑀯𑀕𑁆𑀕𑁄’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀧𑀜𑁆𑀘𑀯𑀕𑁆𑀕𑀤𑀲𑀯𑀕𑁆𑀕𑀓𑀭𑀡𑀻𑀬𑁂 𑀓𑀫𑁆𑀫𑁂 𑀅𑀢𑀺𑀭𑁂𑀓𑀧𑀜𑁆𑀘𑀯𑀕𑁆𑀕𑀤𑀲𑀯𑀕𑁆𑀕𑁄𑀧𑀺 ‘𑀧𑀜𑁆𑀘𑀯𑀕𑁆𑀕𑀤𑀲𑀯𑀕𑁆𑀕𑁄’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀊𑀦𑁄𑀧𑀺 𑀘𑀢𑀼𑀯𑀕𑁆𑀕𑀧𑀜𑁆𑀘𑀯𑀕𑁆𑀕𑀤𑀲𑀯𑀕𑁆𑀕𑀯𑀻𑀲𑀢𑀺𑀯𑀕𑁆𑀕𑁄𑀯𑀸’’𑀢𑀺 𑀫𑀜𑁆𑀜𑁂𑀬𑁆𑀬𑀼𑀁, 𑀢𑁂𑀲𑀁 𑀫𑀜𑁆𑀜𑀦𑀸𑀦𑀺𑀯𑀸𑀭𑀡𑀢𑁆𑀣𑀁 ‘‘𑀏𑀓𑁂𑀦𑀧𑀺 𑀘𑁂 𑀊𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀻𑀲𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘𑁂, 𑀞𑀧𑁂𑀢𑁆𑀯𑀸 𑀏𑀓𑁂𑀦𑀧𑀺 𑀘𑁂 𑀊𑀦𑁄 𑀅𑀧𑁆𑀧𑀓𑀢𑀢𑁆𑀢𑁄, 𑀢𑀁 𑀞𑀧𑁂𑀢𑁆𑀯𑀸 𑀏𑀓𑁂𑀦𑀧𑀺 𑀘𑁂𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀻𑀢𑀺 𑀯𑀘𑀦𑀁 𑀬𑀁 𑀯𑀼𑀢𑁆𑀢𑀁 𑀲𑀩𑁆𑀩𑀢𑁆𑀣 ‘‘𑀢𑀲𑁆𑀲 𑀆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀲𑀁 𑀤𑁂𑀢𑀺, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺, 𑀫𑀸𑀦𑀢𑁆𑀢𑀁 𑀤𑁂𑀢𑀺, 𑀅𑀩𑁆𑀪𑁂𑀢𑀻’’𑀢𑀺, 𑀢𑀲𑁆𑀲 𑀆𑀯𑀺𑀪𑀸𑀯𑀓𑀭𑀡𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀢𑁂𑀲𑀼 𑀅𑀬𑀁 𑀬𑀣𑀸𑀯𑀼𑀢𑁆𑀢𑀸 𑀲𑀸𑀫𑀻𑀘𑀺 𑀦𑀺𑀬𑀢𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀦 𑀭𑀸𑀚𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀯𑀺𑀬 𑀅𑀦𑀺𑀬𑀢𑀸. 𑀢𑀢𑁆𑀣 𑀳𑀺 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀢𑀁 𑀲𑀸𑀫𑀻𑀘𑀺𑀫𑀓𑀭𑁄𑀦𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.