𑀧𑀸𑀭𑀸𑀚𑀺𑀓𑀓𑀡𑁆𑀟𑀁

𑀦𑀸𑀣𑁄 𑀪𑀺𑀓𑁆𑀔𑀼𑀦𑀻𑀦𑀁 𑀳𑀺𑀢𑀢𑁆𑀣𑀸𑀬 𑀬𑀁 𑀧𑀸𑀢𑀺𑀫𑁄𑀓𑁆𑀔𑀁 𑀧𑀓𑀸𑀲𑀬𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀧𑀓𑀸𑀲𑀬𑀻𑀢𑀺 𑀤𑁂𑀲𑀬𑀺, 𑀧𑀜𑁆𑀜𑀸𑀧𑀬𑀻𑀢𑀺 𑀅𑀢𑁆𑀣𑁄.

𑀲𑀸𑀥𑀸𑀭𑀡𑀧𑀸𑀭𑀸𑀚𑀺𑀓𑀁

𑁧. 𑀫𑁂𑀣𑀼𑀦𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀪𑀺𑀮𑀸𑀧𑀫𑀢𑁆𑀢𑀦𑁆𑀢𑀺 𑀯𑀘𑀦𑀫𑀢𑁆𑀢𑀁, 𑀦 𑀅𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑀺𑀗𑁆𑀕𑀪𑁂𑀤𑀫𑀢𑁆𑀢𑀦𑁆𑀢𑀺 𑀧𑀼𑀭𑀺𑀲𑀮𑀺𑀗𑁆𑀕𑀁 𑀇𑀢𑁆𑀣𑀺𑀮𑀺𑀗𑁆𑀕𑀦𑁆𑀢𑀺 𑀯𑀺𑀲𑁂𑀲𑀫𑀢𑁆𑀢𑀁. 𑀯𑀺𑀲𑁂𑀲𑁄𑀢𑀺 𑀦𑀸𑀦𑀸𑀢𑁆𑀢𑀁. 𑀙𑀦𑁆𑀤𑁂𑀦 𑀘𑁂𑀯𑀸𑀢𑀺 𑀧𑁂𑀫𑁂𑀦 𑀘𑁂𑀯, 𑀲𑀺𑀦𑁂𑀳𑁂𑀦 𑀘𑁂𑀯𑀸𑀢𑀺 𑀅𑀢𑁆𑀣𑁄. 𑀭𑀼𑀘𑀺𑀬𑀸 𑀘𑀸𑀢𑀺 𑀇𑀘𑁆𑀙𑀸𑀬 𑀘. 𑀧𑀥𑀁𑀲𑀺𑀢𑀸𑀬𑀸𑀢𑀺 𑀤𑀽𑀲𑀺𑀢𑀸𑀬. 𑀧𑀭𑀺𑀧𑀼𑀡𑁆𑀡𑀸 𑀉𑀧𑀲𑀫𑁆𑀧𑀤𑀸 𑀬𑀲𑁆𑀲𑀸 𑀲𑀸 𑀧𑀭𑀺𑀧𑀼𑀡𑁆𑀡𑀽𑀧𑀲𑀫𑁆𑀧𑀤𑀸, 𑀉𑀪𑀢𑁄𑀲𑀗𑁆𑀖𑁂𑀦 𑀉𑀧𑀲𑀫𑁆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄.

𑀫𑁂𑀣𑀼𑀦𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀲𑀸𑀥𑀸𑀭𑀡𑀧𑀸𑀭𑀸𑀚𑀺𑀓𑀁

𑁫. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀉𑀩𑁆𑀪𑀓𑀧𑁆𑀧𑀭𑀦𑁆𑀢𑀺 𑀤𑀼𑀢𑀺𑀬𑀫𑀳𑀸𑀲𑀦𑁆𑀥𑀺𑀢𑁄 𑀉𑀤𑁆𑀥𑀁. 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀡𑀦𑁆𑀢𑀺 𑀳𑀢𑁆𑀣𑀲𑁆𑀲 𑀯𑀸 𑀓𑀸𑀬𑀲𑁆𑀲 𑀯𑀸 𑀢𑀺𑀭𑀺𑀬𑀁 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀡𑀁.

𑀏𑀓𑀢𑁄𑀅𑀯𑀲𑁆𑀲𑀼𑀢𑁂𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁬𑁨) 𑀪𑀺𑀓𑁆𑀔𑀼𑀦𑀺𑀬𑀸 𑀅𑀯𑀲𑁆𑀲𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀪𑀸𑀯𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀦𑀺𑀬𑀸 𑀯𑀲𑁂𑀦𑁂𑀯 𑀘 𑀏𑀓𑀢𑁄𑀅𑀯𑀲𑁆𑀲𑀼𑀢𑀪𑀸𑀯𑁄 𑀕𑀳𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁬𑁬𑁨) 𑁋

‘‘𑀏𑀓𑀢𑁄𑀅𑀯𑀲𑁆𑀲𑀼𑀢𑁂𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘𑀏𑀓𑀢𑁄’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑀸 𑀏𑀯 𑀅𑀯𑀲𑁆𑀲𑀼𑀢𑁂 𑀲𑀢𑀺 𑀅𑀬𑀁 𑀆𑀧𑀢𑁆𑀢𑀺𑀪𑁂𑀤𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀧𑀼𑀭𑀺𑀲𑀲𑁆𑀲 𑀓𑀸𑀬𑀦𑁆𑀢𑀺 𑀧𑀼𑀭𑀺𑀲𑀲𑁆𑀲 𑀬𑀁 𑀓𑀜𑁆𑀘𑀺 𑀓𑀸𑀬𑀁. 𑀉𑀪𑀢𑁄𑀅𑀯𑀲𑁆𑀲𑀼𑀢𑁂𑀧𑀻𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀘𑁂𑀯 𑀧𑀼𑀭𑀺𑀲𑀲𑁆𑀲 𑀘 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀅𑀯𑀲𑁆𑀲𑀼𑀢𑀪𑀸𑀯𑁂 𑀲𑀢𑀺𑀧𑀺. 𑀓𑀸𑀬𑁂𑀦𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀅𑀢𑁆𑀢𑀦𑁄 𑀓𑀸𑀬𑁂𑀦. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀦𑁆𑀢𑀺 𑀧𑀼𑀭𑀺𑀲𑀲𑁆𑀲 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁. 𑀅𑀯𑀲𑁂𑀲𑀓𑀸𑀬𑁂𑀦 𑀯𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀬𑀢𑁄 𑀅𑀯𑀲𑁂𑀲𑁂𑀦 𑀓𑀸𑀬𑁂𑀦, 𑀉𑀩𑁆𑀪𑀓𑁆𑀔𑀓𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀅𑀥𑁄𑀓𑀧𑁆𑀧𑀭𑀲𑀗𑁆𑀔𑀸𑀢𑁂𑀦 𑀓𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀓𑀸𑀬𑀦𑁆𑀢𑀺 𑀅𑀯𑀲𑁆𑀲𑀼𑀢𑀲𑁆𑀲 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀬𑀁 𑀓𑀜𑁆𑀘𑀺 𑀓𑀸𑀬𑀁. 𑀬𑀣𑀸 𑀘𑁂𑀢𑁆𑀣 𑀲𑀬𑀁 𑀆𑀫𑀲𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀏𑀯𑀁 𑀢𑀲𑁆𑀲 𑀆𑀫𑀲𑀦𑀁 𑀲𑀸𑀤𑀺𑀬𑀦𑁆𑀢𑀺𑀬𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀲𑀲𑁆𑀲 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄 𑀦𑀢𑁆𑀣𑀻𑀢𑀺 𑀧𑀼𑀭𑀺𑀲𑀲𑁆𑀲 𑀫𑁂𑀣𑀼𑀦𑀭𑀸𑀕𑁄, 𑀕𑁂𑀳𑀲𑀺𑀢𑀧𑁂𑀫𑀁, 𑀲𑀼𑀤𑁆𑀥𑀘𑀺𑀢𑁆𑀢𑀁 𑀯𑀸. 𑀅𑀯𑀲𑁂𑀲𑁂𑀢𑀺 𑀧𑀸𑀭𑀸𑀚𑀺𑀓𑀔𑁂𑀢𑁆𑀢𑀢𑁄 𑀅𑀯𑀲𑁂𑀲𑁂. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀤𑀺𑀪𑁂𑀤𑁂𑀢𑀺 ‘‘𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺𑀓𑁂 (𑀧𑀸𑀘𑀺. 𑁬𑁫𑁯, 𑁬𑁬𑁨) 𑀲𑀩𑁆𑀩𑀯𑀸𑀭𑁂. ‘‘𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺𑀆𑀤𑀻𑀲𑀼 𑀯𑀺𑀭𑀚𑁆𑀛𑀺𑀢𑁆𑀯𑀸 𑀯𑀸 𑀆𑀫𑀲𑀦𑁆𑀢𑀺𑀬𑀸, 𑀅𑀜𑁆𑀜𑀯𑀺𑀳𑀺𑀢𑀸𑀬 𑀯𑀸, ‘‘𑀅𑀬𑀁 𑀧𑀼𑀭𑀺𑀲𑁄’’𑀢𑀺 𑀯𑀸 ‘‘𑀇𑀢𑁆𑀣𑀻’’𑀢𑀺 𑀯𑀸 𑀅𑀚𑀸𑀦𑀦𑁆𑀢𑀺𑀬𑀸 𑀯𑀸, 𑀢𑁂𑀦 𑀨𑀼𑀝𑁆𑀞𑀸𑀬𑀧𑀺 𑀢𑀁 𑀨𑀲𑁆𑀲𑀁 𑀅𑀲𑁆𑀲𑀸𑀤𑀬𑀦𑁆𑀢𑀺𑀬𑀸 𑀯𑀸 𑀆𑀫𑀲𑀦𑁂𑀧𑀺 𑀲𑀢𑀺 𑀅𑀦𑀸𑀧𑀢𑁆𑀢𑀺.

𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀲𑀸𑀥𑀸𑀭𑀡𑀸𑀦𑀁 𑀘𑀢𑀼𑀦𑁆𑀦𑀁, 𑀅𑀲𑀸𑀥𑀸𑀭𑀡𑀸𑀦𑀁 𑀘𑀢𑀼𑀦𑁆𑀦𑀜𑁆𑀘𑀸𑀢𑀺 𑀅𑀝𑁆𑀞𑀦𑁆𑀦𑀫𑀜𑁆𑀜𑀢𑀭𑀁 𑀅𑀚𑁆𑀛𑀸𑀧𑀦𑁆𑀦𑀁. 𑀇𑀤𑀜𑁆𑀘 𑀧𑀸𑀭𑀸𑀚𑀺𑀓𑀁 (𑀧𑀸𑀘𑀺. 𑀅𑀝𑁆𑀞. 𑁬𑁬𑁬) 𑀧𑀘𑁆𑀙𑀸 𑀧𑀜𑁆𑀜𑀢𑁆𑀢𑀁, 𑀲𑀗𑁆𑀕𑀻𑀢𑀺𑀓𑀸𑀭𑀓𑀸𑀘𑀭𑀺𑀬𑁂𑀳𑀺 𑀧𑀦 𑀧𑀼𑀭𑀺𑀫𑁂𑀦 𑀲𑀤𑁆𑀥𑀺𑀁 𑀬𑀼𑀕𑀴𑀁 𑀓𑀢𑁆𑀯𑀸 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀞𑀧𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀝𑁆𑀞𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀅𑀜𑁆𑀜𑀢𑀭’’𑀦𑁆𑀢𑀺 (𑀧𑀸𑀘𑀺. 𑁬𑁬𑁬) 𑀯𑀘𑀦𑀢𑁄 𑀧𑀦 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀁 𑀬𑀸 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀲𑀸𑀧𑀺 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀦𑀁 𑀧𑁂𑀫𑀯𑀲𑁂𑀦 𑀳𑁄𑀢𑀺, 𑀢𑀣𑀸𑀧𑀺 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀘𑀺𑀢𑁆𑀢𑀁 𑀤𑁄𑀫𑀦𑀲𑁆𑀲𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀤𑀼𑀓𑁆𑀔𑀯𑁂𑀤𑀦𑀁 𑀳𑁄𑀢𑀻𑀢𑀺 ‘‘𑀢𑀢𑁆𑀭 𑀳𑀺 𑀧𑀸𑀘𑀺𑀢𑁆𑀢𑀺𑀬𑀁…𑀧𑁂… 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀣𑀼𑀲𑀸𑀲𑀦𑁂𑀦𑀸𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸𑀬 𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸𑀬 𑀘. 𑀇𑀥 𑀧𑀦 𑀘𑁄𑀤𑀦𑀸𑀲𑀸𑀭𑀡𑀸𑀧𑀼𑀩𑁆𑀩𑀓𑀫𑁂𑀯 𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀁 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀆𑀳 ‘‘𑀇𑀥𑀸𑀧𑀻’’𑀢𑀺𑀆𑀤𑀺. 𑀓𑀭𑀡𑀦𑁆𑀢𑀺 𑀜𑀢𑁆𑀢𑀺𑀝𑁆𑀞𑀧𑀦𑀜𑁆𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀸𑀯𑀘𑀦𑀜𑁆𑀘. 𑀅𑀦𑀸𑀤𑀭𑀦𑁆𑀢𑀺 𑀧𑀼𑀕𑁆𑀕𑀮𑁂 𑀘𑁂𑀯 𑀥𑀫𑁆𑀫𑁂 𑀘 𑀆𑀤𑀭𑀯𑀺𑀭𑀳𑀺𑀢𑀁. 𑀢𑁂𑀦𑀸𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀕𑀡𑁂 𑀯𑀸𑀢𑀺 𑀢𑀲𑁆𑀫𑀺𑀁 𑀲𑀗𑁆𑀖𑁂 𑀧𑀭𑀺𑀬𑀸𑀧𑀦𑁆𑀦𑁂 𑀲𑀫𑁆𑀩𑀳𑀼𑀮𑀧𑀼𑀕𑁆𑀕𑀮𑀲𑀗𑁆𑀔𑀸𑀢𑁂 𑀕𑀡𑁂 𑀯𑀸. ‘‘𑀲𑀫𑁆𑀫𑀸𑀯𑀢𑁆𑀢𑀦𑀸𑀬 𑀅𑀯𑀢𑁆𑀢𑀫𑀸𑀦𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀓𑀓𑀫𑁆𑀫𑀸𑀤𑀺𑀓𑁂𑀢𑀺 𑀏𑀓𑀓𑀫𑁆𑀫𑀏𑀓𑀼𑀤𑁆𑀤𑁂𑀲𑀲𑀫𑀲𑀺𑀓𑁆𑀔𑀸𑀢𑀸𑀬. 𑀲𑀳 𑀅𑀬𑀦𑀪𑀸𑀯𑁂𑀦𑀸𑀢𑀺 𑀲𑀳 𑀯𑀢𑁆𑀢𑀦𑀪𑀸𑀯𑁂𑀦. 𑀲𑀫𑀸𑀦𑁄 𑀲𑀁𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀸.

𑀇𑀤𑀸𑀦𑀺 𑀬𑁂𑀦 𑀲𑀁𑀯𑀸𑀲𑁂𑀦 𑀢𑁂 ‘‘𑀲𑀫𑀸𑀦𑀲𑀁𑀯𑀸𑀲𑀓𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁬𑁬𑁯) 𑀯𑀼𑀢𑁆𑀢𑀸, 𑀲𑁄 𑀲𑀁𑀯𑀸𑀲𑁄 𑀢𑀲𑁆𑀲 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀢𑁆𑀣𑀺, 𑀬𑁂𑀳𑀺 𑀘 𑀲𑀤𑁆𑀥𑀺𑀁 𑀢𑀲𑁆𑀲 𑀲𑁄 𑀲𑀁𑀯𑀸𑀲𑁄 𑀦𑀢𑁆𑀣𑀺, 𑀦 𑀢𑁂𑀦 𑀢𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀲𑀳𑀸𑀬𑀸 𑀓𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀅𑀓𑀢𑀲𑀳𑀸𑀬𑁄 𑀦𑀸𑀫𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀤𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀸𑀦𑀲𑀁𑀯𑀸𑀲𑀓𑀪𑀸𑀯𑀁 𑀅𑀦𑀼𑀧𑀕𑀢𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀓𑀺𑀁 𑀢𑀁 𑀅𑀦𑀼𑀯𑀢𑁆𑀢𑀦𑀦𑁆𑀢𑀺 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸 𑀲𑀺𑀬𑀸𑀢𑀺 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁𑀤𑀺𑀝𑁆𑀞𑀺𑀓𑁄 𑀲𑁄 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄𑀢𑀺 𑀬𑁄 𑀉𑀓𑁆𑀔𑀺𑀢𑁆𑀢𑀓𑁄, 𑀲𑁄.

𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀯𑀢𑁆𑀣𑀼𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀮𑁄𑀓𑀲𑁆𑀲𑀸𑀤𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦𑀸𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁬𑁭𑁫) 𑀮𑁄𑀓𑀲𑁆𑀲𑀸𑀤𑀲𑀗𑁆𑀔𑀸𑀢𑀲𑁆𑀲 𑀫𑀺𑀢𑁆𑀢𑀲𑀦𑁆𑀣𑀯𑀲𑁆𑀲 𑀯𑀲𑁂𑀦. 𑀓𑀺𑀁 𑀢𑀦𑁆𑀢𑀺 𑀆𑀳 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑁂𑀯 𑀢𑀺𑀦𑁆𑀢𑀸 𑀇𑀥 𑀅𑀯𑀲𑁆𑀲𑀼𑀢𑀸 𑀦𑀸𑀫, 𑀦 𑀫𑁂𑀣𑀼𑀦𑀭𑀸𑀕𑁂𑀦𑀸𑀢𑀺. 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀅𑀬𑀫𑁂𑀯 𑀳𑀻’’𑀢𑀺𑀆𑀤𑀺. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀧𑀦𑀲𑁆𑀲 𑀯𑀺𑀘𑀸𑀭𑀡𑀸 𑀓𑀢𑀸’’𑀢𑀺. 𑀢𑀢𑁆𑀣𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀏𑀢𑁆𑀣 𑀘 𑀅𑀲𑀤𑁆𑀥𑀫𑁆𑀫𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑁄𑀯 𑀯𑁂𑀤𑀺𑀢𑀩𑁆𑀩𑁄, 𑀦 𑀫𑁂𑀣𑀼𑀦𑀥𑀫𑁆𑀫𑁄. 𑀦 𑀳𑀺 𑀫𑁂𑀣𑀼𑀦𑀲𑁆𑀲 𑀲𑀸𑀫𑀦𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺. ‘‘𑀯𑀺𑀜𑁆𑀜𑀽 𑀧𑀝𑀺𑀩𑀮𑁄 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀢𑀼’’𑀦𑁆𑀢𑀺 (𑀧𑀸𑀘𑀺. 𑁬𑁭𑁬) 𑀯𑀘𑀦𑀫𑁆𑀧𑀺 𑀘𑁂𑀢𑁆𑀣 𑀲𑀸𑀥𑀓𑀦𑁆𑀢𑀺. 𑀬𑀁 𑀬𑁂𑀦 𑀓𑀢𑀁, 𑀢𑀁 𑀢𑀲𑁆𑀲𑁂𑀯 𑀳𑁄𑀢𑀻𑀢𑀺. 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀲𑀸𑀫𑀺𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀢𑁆𑀣𑁄𑀢𑀺 𑀅𑀢𑁆𑀢𑀦𑁄 𑀳𑀢𑁆𑀣𑁄. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀳𑀢𑁆𑀣𑀕𑁆𑀕𑀳𑀡𑀦𑁆𑀢𑀺 ‘‘𑀳𑀢𑁆𑀣𑁄 𑀦𑀸𑀫 𑀓𑀧𑁆𑀧𑀭𑀁 𑀉𑀧𑀸𑀤𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸’’𑀢𑀺 (𑀧𑀸𑀘𑀺. 𑁬𑁭𑁬) 𑀯𑀼𑀢𑁆𑀢𑀲𑁆𑀲 𑀳𑀢𑁆𑀣𑀲𑁆𑀲𑁂𑀯 𑀕𑀳𑀡𑀁, 𑀅𑀣 𑀔𑁄 𑀢𑀲𑁆𑀲 𑀘 𑀅𑀜𑁆𑀜𑀲𑁆𑀲𑀧𑀺 𑀅𑀧𑀸𑀭𑀸𑀚𑀺𑀓𑀔𑁂𑀢𑁆𑀢𑀲𑁆𑀲 𑀕𑀳𑀡𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀳𑀢𑁆𑀣𑀕𑁆𑀕𑀳𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀲𑀗𑁆𑀖𑀸𑀝𑀺𑀓𑀡𑁆𑀡𑀕𑁆𑀕𑀳𑀡𑀦𑁆𑀢𑀺 𑀦 𑀓𑁂𑀯𑀮𑀁 𑀲𑀗𑁆𑀖𑀸𑀝𑀺𑀓𑀡𑁆𑀡𑀲𑁆𑀲𑁂𑀯 𑀕𑀳𑀡𑀁, 𑀅𑀣 𑀔𑁄 𑀢𑀲𑁆𑀲 𑀘 𑀅𑀜𑁆𑀜𑀲𑁆𑀲𑀧𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀘𑀻𑀯𑀭𑀧𑁆𑀧𑀤𑁂𑀲𑀲𑁆𑀲 𑀕𑀳𑀡𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘 𑀬𑀲𑁆𑀲 𑀓𑀲𑁆𑀲𑀘𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑁆𑀣𑀦𑁆𑀦𑀸𑀫𑀁 𑀞𑀸𑀦𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀞𑀸𑀦𑀁. ‘‘𑀧𑀝𑀺𑀧𑀸𑀝𑀺𑀬𑀸 𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀸 𑀧𑀽𑀭𑁂𑀢𑁆𑀯𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀢𑀲𑁆𑀫𑀸 𑀧𑀝𑀺𑀧𑀸𑀝𑀺𑀬𑀸 𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀸 𑀏𑀓𑀦𑁆𑀢𑀭𑀺𑀓𑀸𑀬 𑀯𑀸 𑀬𑁂𑀦 𑀢𑁂𑀦 𑀦𑀬𑁂𑀦 𑀧𑀽𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀢𑀸 𑀆𑀧𑀢𑁆𑀢𑀺𑀬𑁄𑀢𑀺 𑀢𑀸 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺𑀬𑁄. 𑀬𑀣𑀸 𑀘𑁂𑀓𑁂𑀓𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀢𑁆𑀢𑀲𑀼 𑀯𑀢𑁆𑀣𑀽𑀲𑀼 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀻𑀢𑀺𑀓𑁆𑀓𑀦𑁆𑀢𑁂𑀲𑀼 𑀢𑀸 𑀆𑀧𑀢𑁆𑀢𑀺𑀬𑁄 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀕𑀡𑀦𑀽𑀧𑀺𑀓𑀸𑀢𑀺 𑀤𑁂𑀲𑀺𑀢𑀕𑀡𑀦𑀁 𑀉𑀧𑀕𑀘𑁆𑀙𑀢𑀺. 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸𑀢𑀺 ‘‘𑀅𑀜𑁆𑀜𑀁 𑀯𑀢𑁆𑀣𑀼𑀁 𑀆𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀁 𑀞𑀧𑁂𑀢𑁆𑀯𑀸.

𑀅𑀝𑁆𑀞𑀯𑀢𑁆𑀣𑀼𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁

𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂 𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.