𑀧𑀸𑀭𑀸𑀚𑀺𑀓𑀓𑀡𑁆𑀟𑁄

𑀇𑀤𑀸𑀦𑀺 𑀬𑀤𑁂𑀢𑀁 𑀦𑀺𑀤𑀸𑀦𑀸𑀦𑀦𑁆𑀢𑀭𑀁 𑀢𑀢𑁆𑀭𑀺𑀫𑁂 𑀘𑀢𑁆𑀢𑀸𑀭𑁄𑀢𑀺𑀆𑀤𑀺 𑀧𑀸𑀭𑀸𑀚𑀺𑀓𑀓𑀡𑁆𑀟𑀁, 𑀢𑀢𑁆𑀣 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 ‘‘𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂. 𑀇𑀫𑁂𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀁 𑀅𑀪𑀺𑀫𑀼𑀔𑀻𑀓𑀭𑀡𑀁. 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀧𑀸𑀭𑀸𑀚𑀺𑀓𑀸𑀢𑀺 𑀏𑀯𑀁𑀦𑀸𑀫𑀓𑀸. 𑀥𑀫𑁆𑀫𑀸𑀢𑀺 𑀆𑀧𑀢𑁆𑀢𑀺𑀬𑁄. 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀲𑀭𑀽𑀧𑁂𑀦 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑀁 𑀆𑀕𑀘𑁆𑀙𑀦𑁆𑀢𑀺, 𑀦 𑀦𑀺𑀤𑀸𑀦𑁂 𑀯𑀺𑀬 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺 𑀲𑀸𑀥𑀸𑀭𑀡𑀯𑀘𑀦𑀫𑀢𑁆𑀢𑁂𑀦.

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀬𑁄 𑀧𑀦𑀸𑀢𑀺 𑀭𑀲𑁆𑀲𑀤𑀻𑀖𑀸𑀤𑀺𑀦𑀸 𑀮𑀺𑀗𑁆𑀕𑀸𑀤𑀺𑀪𑁂𑀤𑁂𑀦 𑀬𑁄 𑀓𑁄𑀘𑀺. 𑀪𑀺𑀓𑁆𑀔𑀽𑀢𑀺 𑀏𑀳𑀺𑀪𑀺𑀓𑁆𑀔𑀼𑀉𑀧𑀲𑀫𑁆𑀧𑀤𑀸, 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸, 𑀑𑀯𑀸𑀤𑀧𑁆𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸, 𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸, 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸, 𑀤𑀽𑀢𑁂𑀦𑀽𑀧𑀲𑀫𑁆𑀧𑀤𑀸, 𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀽𑀧𑀲𑀫𑁆𑀧𑀤𑀸𑀢𑀺 𑀇𑀫𑀸𑀲𑀼 𑀅𑀝𑁆𑀞𑀲𑀼 𑀉𑀧𑀲𑀫𑁆𑀧𑀤𑀸𑀲𑀼 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀲𑀫𑁆𑀧𑀦𑁆𑀦𑁄. 𑀢𑀲𑁆𑀲 𑀧𑀦 𑀓𑀫𑁆𑀫𑀲𑁆𑀲 𑀯𑀢𑁆𑀣𑀼𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦 𑀲𑀻𑀫𑀸 𑀧𑀭𑀺𑀲𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀓𑀼𑀧𑁆𑀧𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀯𑀢𑁆𑀣𑀽𑀢𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀧𑀼𑀕𑁆𑀕𑀮𑁄, 𑀲𑁄 𑀞𑀧𑁂𑀢𑁆𑀯𑀸 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑀁, 𑀧𑀡𑁆𑀟𑀓𑀸𑀤𑀬𑁄 𑀘 𑀏𑀓𑀸𑀤𑀲 𑀅𑀪𑀩𑁆𑀩𑀧𑀼𑀕𑁆𑀕𑀮𑁂 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀦𑀸𑀫 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄. 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑁄 𑀦𑀸𑀫 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀅𑀜𑁆𑀜𑀢𑀭𑀁 𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑁄. 𑀧𑀡𑁆𑀟𑀓𑀸𑀤𑀬𑁄 𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀓𑀣𑀸𑀬𑀁 𑀯𑀼𑀢𑁆𑀢𑀸. 𑀢𑁂𑀲𑀼 𑀆𑀲𑀺𑀢𑁆𑀢𑀧𑀡𑁆𑀟𑀓𑀜𑁆𑀘 𑀉𑀲𑀽𑀬𑀧𑀡𑁆𑀟𑀓𑀜𑁆𑀘 𑀞𑀧𑁂𑀢𑁆𑀯𑀸 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑁄 𑀦𑀧𑀼𑀁𑀲𑀓𑀧𑀡𑁆𑀟𑀓𑁄 𑀧𑀡𑁆𑀟𑀓𑀪𑀸𑀯𑀧𑀓𑁆𑀔𑁂 𑀞𑀺𑀢𑁄 𑀧𑀓𑁆𑀔𑀧𑀡𑁆𑀟𑀓𑁄 𑀘 𑀇𑀥 𑀅𑀥𑀺𑀧𑁆𑀧𑁂𑀢𑁄.

𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀦 𑀢𑀺𑀯𑀺𑀥𑁄 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀉𑀪𑀬𑀢𑁆𑀣𑁂𑀦𑀓𑁄𑀢𑀺. 𑀢𑀢𑁆𑀣 𑀬𑁄 𑀲𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁂𑀢𑀺, 𑀦 𑀬𑀣𑀸𑀯𑀼𑀟𑁆𑀠𑀁 𑀪𑀺𑀓𑁆𑀔𑀽𑀦𑀁 𑀯𑀸 𑀲𑀸𑀫𑀡𑁂𑀭𑀸𑀦𑀁 𑀯𑀸 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺, 𑀦 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀦 𑀉𑀧𑁄𑀲𑀣𑀸𑀤𑀻𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀅𑀬𑀁 𑀅𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀮𑀺𑀗𑁆𑀕𑀫𑀢𑁆𑀢𑀲𑁆𑀲𑁂𑀯 𑀣𑁂𑀦𑀺𑀢𑀢𑁆𑀢𑀸 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀦𑀸𑀫. 𑀬𑁄 𑀧𑀦 𑀪𑀺𑀓𑁆𑀔𑀽𑀳𑀺 𑀧𑀩𑁆𑀩𑀚𑀺𑀢𑁄 𑀲𑀸𑀫𑀡𑁂𑀭𑁄 𑀲𑀫𑀸𑀦𑁄 𑀓𑀸𑀲𑀸𑀬𑀸𑀦𑀺 𑀅𑀧𑀦𑁂𑀢𑁆𑀯𑀸 𑀢𑁂𑀲𑀼 𑀲𑀉𑀲𑁆𑀲𑀸𑀳𑁄𑀯 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀼𑀦 𑀦𑀺𑀯𑀸𑀲𑁂𑀢𑁆𑀯𑀸 𑀲𑀸𑀫𑀡𑁂𑀭𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺, 𑀅𑀬𑀁 𑀪𑀺𑀓𑁆𑀔𑀽𑀳𑀺 𑀤𑀺𑀦𑁆𑀦𑀮𑀺𑀗𑁆𑀕𑀲𑁆𑀲 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀦 𑀮𑀺𑀗𑁆𑀕𑀢𑁆𑀣𑁂𑀦𑀓𑁄, 𑀦 𑀮𑀺𑀗𑁆𑀕𑀸𑀦𑀼𑀭𑀽𑀧𑀲𑁆𑀲 𑀲𑀁𑀯𑀸𑀲𑀲𑁆𑀲 𑀲𑀸𑀤𑀺𑀢𑀢𑁆𑀢𑀸 𑀦𑀸𑀧𑀺 𑀲𑀁𑀯𑀸𑀲𑀢𑁆𑀣𑁂𑀦𑀓𑁄. 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀘 𑀔𑁄 𑀲𑀸𑀫𑀡𑁂𑀭𑁄 𑀲𑀫𑀸𑀦𑁄 𑀯𑀺𑀤𑁂𑀲𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁂𑀢𑀺, 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺, 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀉𑀧𑁄𑀲𑀣𑀸𑀤𑀻𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀅𑀬𑀁 𑀲𑀁𑀯𑀸𑀲𑀫𑀢𑁆𑀢𑀲𑁆𑀲𑁂𑀯 𑀣𑁂𑀦𑀺𑀢𑀢𑁆𑀢𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀦𑀸𑀫. 𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀺𑀓𑁄 𑀳𑀺 𑀲𑀩𑁆𑀩𑁄𑀧𑀺 𑀓𑀺𑀭𑀺𑀬𑀪𑁂𑀤𑁄 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀲𑀁𑀯𑀸𑀲𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 ‘‘𑀦 𑀫𑀁 𑀓𑁄𑀘𑀺 𑀚𑀸𑀦𑀸𑀢𑀻’’𑀢𑀺 𑀧𑀼𑀦 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀧𑀦 𑀲𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺, 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁂𑀢𑀺, 𑀉𑀧𑁄𑀲𑀣𑀸𑀤𑀻𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀅𑀬𑀁 𑀮𑀺𑀗𑁆𑀕𑀲𑁆𑀲 𑀘𑁂𑀯 𑀲𑀁𑀯𑀸𑀲𑀲𑁆𑀲 𑀘 𑀣𑁂𑀦𑀺𑀢𑀢𑁆𑀢𑀸 𑀉𑀪𑀬𑀢𑁆𑀣𑁂𑀦𑀓𑁄 𑀦𑀸𑀫. 𑀥𑀼𑀭𑀦𑀺𑀓𑁆𑀔𑁂𑀧𑀯𑀲𑁂𑀦 𑀓𑀸𑀲𑀸𑀬𑀸𑀦𑀺 𑀅𑀧𑀦𑁂𑀢𑁆𑀯𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀢𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄, 𑀅𑀬𑀁 𑀢𑀺𑀯𑀺𑀥𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀞𑀧𑁂𑀢𑁆𑀯𑀸 𑀧𑀦 𑀇𑀫𑀁 𑀢𑀺𑀯𑀺𑀥𑀁.

‘‘𑀭𑀸𑀚 𑀤𑀼𑀩𑁆𑀪𑀺𑀓𑁆𑀔 𑀓𑀦𑁆𑀢𑀸𑀭-𑀭𑁄𑀕 𑀯𑁂𑀭𑀻 𑀪𑀬𑁂𑀦 𑀯𑀸;

𑀘𑀻𑀯𑀭𑀸𑀳𑀭𑀡𑀢𑁆𑀣𑀁 𑀯𑀸, 𑀮𑀺𑀗𑁆𑀕𑀁 𑀆𑀤𑀺𑀬𑀢𑀻𑀥 𑀬𑁄.

‘‘𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀬𑀸𑀯 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄;

𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫, 𑀢𑀸𑀯 𑀏𑀲 𑀦 𑀯𑀼𑀘𑁆𑀘𑀢𑀻’’𑀢𑀺. (𑀫𑀳𑀸𑀯. 𑀅𑀝𑁆𑀞. 𑁧𑁧𑁦);

𑀬𑁄 𑀧𑀦 𑀉𑀧𑀲𑀫𑁆𑀧𑀦𑁆𑀦𑁄 𑀢𑀺𑀢𑁆𑀣𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀲𑀬𑀁 𑀯𑀸 𑀓𑀼𑀲𑀘𑀻𑀭𑀸𑀤𑀺𑀓𑀁 𑀢𑀺𑀢𑁆𑀣𑀺𑀬𑀮𑀺𑀗𑁆𑀕𑀁 𑀆𑀤𑀺𑀬𑀢𑀺, 𑀢𑁂𑀲𑀁 𑀯𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀢𑀺, 𑀦𑀕𑁆𑀕𑁄 𑀯𑀸 𑀳𑀼𑀢𑁆𑀯𑀸 𑀆𑀚𑀻𑀯𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀯𑀢𑀸𑀦𑀺 𑀆𑀤𑀺𑀬𑀢𑀺, 𑀅𑀬𑀁 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀦𑀸𑀫. 𑀞𑀧𑁂𑀢𑁆𑀯𑀸 𑀧𑀦 𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀅𑀯𑀲𑁂𑀲𑁄 𑀲𑀩𑁆𑀩𑁄𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑁄 𑀦𑀸𑀫. 𑀬𑁂𑀦 𑀫𑀦𑀼𑀲𑁆𑀲𑀚𑀸𑀢𑀺𑀓𑀸 𑀚𑀦𑁂𑀢𑁆𑀢𑀺 𑀲𑀬𑀫𑁆𑀧𑀺 𑀫𑀦𑀼𑀲𑁆𑀲𑀪𑀽𑀢𑁂𑀦𑁂𑀯 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸, 𑀅𑀬𑀁 𑀫𑀸𑀢𑀼𑀖𑀸𑀢𑀓𑁄 𑀦𑀸𑀫. 𑀧𑀺𑀢𑀼𑀖𑀸𑀢𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 𑀅𑀦𑁆𑀢𑀫𑀲𑁄 𑀕𑀺𑀳𑀺𑀮𑀺𑀗𑁆𑀕𑁂 𑀞𑀺𑀢𑁄𑀧𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀔𑀻𑀡𑀸𑀲𑀯𑁄 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄, 𑀅𑀬𑀁 𑀅𑀭𑀳𑀦𑁆𑀢𑀖𑀸𑀢𑀓𑁄 𑀦𑀸𑀫. 𑀬𑁄 𑀧𑀦 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀁 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀫𑀕𑁆𑀕𑁂 𑀤𑀽𑀲𑁂𑀢𑀺, 𑀅𑀬𑀁 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀦𑀸𑀫. 𑀬𑁄 𑀤𑁂𑀯𑀤𑀢𑁆𑀢𑁄 𑀯𑀺𑀬 𑀲𑀸𑀲𑀦𑀁 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀓𑀢𑁆𑀯𑀸 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀅𑀬𑀁 𑀲𑀗𑁆𑀖𑀪𑁂𑀤𑀓𑁄 𑀦𑀸𑀫. 𑀬𑁄 𑀤𑁂𑀯𑀤𑀢𑁆𑀢𑁄 𑀯𑀺𑀬 𑀤𑀼𑀝𑁆𑀞𑀘𑀺𑀢𑁆𑀢𑁂𑀦 𑀯𑀥𑀓𑀘𑀺𑀢𑁆𑀢𑁂𑀦 𑀢𑀣𑀸𑀕𑀢𑀲𑁆𑀲 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀬𑀁 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀦𑀸𑀫. 𑀬𑀲𑁆𑀲 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀓𑀫𑁆𑀫𑀢𑁄 𑀘 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀓𑀫𑁆𑀫𑀢𑁄 𑀘 𑀉𑀪𑀢𑁄 𑀤𑀼𑀯𑀺𑀥𑀫𑁆𑀧𑀺 𑀩𑁆𑀬𑀜𑁆𑀚𑀦𑀁 𑀅𑀢𑁆𑀣𑀺, 𑀅𑀬𑀁 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀦𑀸𑀫. 𑀇𑀢𑀺 𑀇𑀫𑁂 𑀢𑁂𑀭𑀲 𑀧𑀼𑀕𑁆𑀕𑀮𑀸 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀽, 𑀇𑀫𑁂 𑀧𑀦 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁂 𑀲𑀢𑀺 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀓𑀼𑀧𑁆𑀧𑀁 𑀳𑁄𑀢𑀺.

𑀓𑀣𑀁 𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀓𑀼𑀧𑁆𑀧𑀁 𑀳𑁄𑀢𑀺? 𑀯𑀢𑁆𑀣𑀼𑀲𑀗𑁆𑀖𑀧𑀼𑀕𑁆𑀕𑀮𑀜𑀢𑁆𑀢𑀻𑀦𑀁 𑀅𑀧𑀭𑀸𑀫𑀲𑀦𑀸𑀦𑀺, 𑀧𑀘𑁆𑀙𑀸 𑀜𑀢𑁆𑀢𑀺𑀝𑁆𑀞𑀧𑀦𑀜𑁆𑀘𑀸𑀢𑀺 𑀇𑀫𑁂 𑀢𑀸𑀯 𑀧𑀜𑁆𑀘 𑀜𑀢𑁆𑀢𑀺𑀤𑁄𑀲𑀸. 𑀢𑀢𑁆𑀣 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀅𑀓𑀺𑀢𑁆𑀢𑀦𑀁 𑀯𑀢𑁆𑀣𑀼𑀅𑀧𑀭𑀸𑀫𑀲𑀦𑀁 𑀦𑀸𑀫. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’𑀢𑀺𑀏𑀢𑁆𑀣 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀲𑀗𑁆𑀖𑁄’’𑀢𑀺 𑀅𑀪𑀡𑀦𑀁 𑀲𑀗𑁆𑀖𑀅𑀧𑀭𑀸𑀫𑀲𑀦𑀁 𑀦𑀸𑀫. ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀅𑀓𑀺𑀢𑁆𑀢𑀦𑀁 𑀧𑀼𑀕𑁆𑀕𑀮𑀅𑀧𑀭𑀸𑀫𑀲𑀦𑀁 𑀦𑀸𑀫. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀜𑀢𑁆𑀢𑀺𑀬𑀸 𑀅𑀦𑀼𑀘𑁆𑀘𑀸𑀭𑀡𑀁 𑀜𑀢𑁆𑀢𑀺𑀅𑀧𑀭𑀸𑀫𑀲𑀦𑀁 𑀦𑀸𑀫. 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀔𑀫𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀏𑀯𑀁 𑀜𑀢𑁆𑀢𑀺𑀓𑀺𑀢𑁆𑀢𑀦𑀁 𑀧𑀘𑁆𑀙𑀸 𑀜𑀢𑁆𑀢𑀺𑀝𑁆𑀞𑀧𑀦𑀁 𑀦𑀸𑀫. 𑀇𑀢𑀺 𑀇𑀫𑁂𑀳𑀺 𑀤𑁄𑀲𑁂𑀳𑀺 𑀯𑀺𑀫𑀼𑀢𑁆𑀢𑀸𑀬 𑀜𑀢𑁆𑀢𑀺𑀬𑀸 𑀲𑀫𑁆𑀧𑀦𑁆𑀦𑀁 𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀓𑀼𑀧𑁆𑀧𑀁 𑀳𑁄𑀢𑀺.

𑀅𑀦𑀼𑀲𑁆𑀲𑀸𑀯𑀦𑀯𑀲𑁂𑀦 𑀅𑀓𑀼𑀧𑁆𑀧𑀢𑀸𑀬𑀧𑀺 𑀯𑀢𑁆𑀣𑀼𑀲𑀗𑁆𑀖𑀧𑀼𑀕𑁆𑀕𑀮𑀸𑀦𑀁 𑀅𑀧𑀭𑀸𑀫𑀲𑀦𑀸𑀦𑀺, 𑀲𑀸𑀯𑀦𑀸𑀬 𑀳𑀸𑀧𑀦𑀁, 𑀅𑀓𑀸𑀮𑁂 𑀲𑀸𑀯𑀦𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀅𑀦𑀼𑀲𑁆𑀲𑀸𑀯𑀦𑀤𑁄𑀲𑀸. 𑀢𑀢𑁆𑀣 𑀯𑀢𑁆𑀣𑀸𑀤𑀻𑀦𑀁 𑀅𑀧𑀭𑀸𑀫𑀲𑀦𑀸𑀦𑀺 𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯. 𑀢𑀻𑀲𑀼 𑀧𑀦 𑀅𑀦𑀼𑀲𑁆𑀲𑀸𑀯𑀦𑀸𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀢𑁂𑀲𑀁 𑀅𑀧𑀭𑀸𑀫𑀲𑀦𑀁 𑀅𑀧𑀭𑀸𑀫𑀲𑀦𑀫𑁂𑀯. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀦 𑀓𑀫𑁆𑀫𑀯𑀸𑀘𑀁 𑀅𑀯𑀢𑁆𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀜𑀢𑁆𑀢𑀺𑀓𑀺𑀢𑁆𑀢𑀦𑀫𑁂𑀯, 𑀅𑀣 𑀯𑀸 𑀧𑀦 𑀓𑀫𑁆𑀫𑀯𑀸𑀘𑀸𑀩𑁆𑀪𑀦𑁆𑀢𑀭𑁂 𑀅𑀓𑁆𑀔𑀭𑀲𑁆𑀲 𑀯𑀸 𑀧𑀤𑀲𑁆𑀲 𑀯𑀸 𑀅𑀦𑀼𑀘𑁆𑀘𑀸𑀭𑀡𑀁 𑀯𑀸 𑀤𑀼𑀭𑀼𑀘𑁆𑀘𑀸𑀭𑀡𑀁 𑀯𑀸 𑀲𑀸𑀯𑀦𑀸𑀬 𑀳𑀸𑀧𑀦𑀁 𑀦𑀸𑀫. 𑀲𑀸𑀯𑀦𑀸𑀬 𑀅𑀦𑁄𑀓𑀸𑀲𑁂 𑀧𑀞𑀫𑀁 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑀓𑀭𑀡𑀁 𑀅𑀓𑀸𑀮𑁂 𑀲𑀸𑀯𑀦𑀁 𑀦𑀸𑀫. 𑀇𑀢𑀺 𑀇𑀫𑁂𑀳𑀺 𑀤𑁄𑀲𑁂𑀳𑀺 𑀯𑀺𑀫𑀼𑀢𑁆𑀢𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀬 𑀲𑀫𑁆𑀧𑀦𑁆𑀦𑀁 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀓𑀼𑀧𑁆𑀧𑀁 𑀳𑁄𑀢𑀺.

𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀯𑀺𑀧𑀢𑁆𑀢𑀺𑀲𑀻𑀫𑀸𑀮𑀓𑁆𑀔𑀡𑀁 𑀲𑀫𑀢𑀺𑀓𑁆𑀓𑀦𑁆𑀢𑀸𑀬 𑀧𑀦 𑀲𑀻𑀫𑀸𑀬 𑀓𑀢𑀁 𑀲𑀻𑀫𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀓𑀼𑀧𑁆𑀧𑀁 𑀳𑁄𑀢𑀺. 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂𑀲𑀁 𑀅𑀦𑀸𑀕𑀫𑀦𑀁, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀲𑁆𑀲 𑀅𑀦𑀸𑀳𑀭𑀡𑀁, 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀧𑀝𑀺𑀓𑁆𑀓𑁄𑀲𑀦𑀦𑁆𑀢𑀺 𑀇𑀫𑁂 𑀧𑀦 𑀢𑀬𑁄 𑀧𑀭𑀺𑀲𑀸𑀤𑁄𑀲𑀸, 𑀢𑁂𑀳𑀺 𑀯𑀺𑀫𑀼𑀢𑁆𑀢𑀸𑀬 𑀧𑀭𑀺𑀲𑀸𑀬 𑀓𑀢𑀁 𑀧𑀭𑀺𑀲𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀓𑀼𑀧𑁆𑀧𑀁 𑀳𑁄𑀢𑀺. 𑀓𑀸𑀭𑀡𑀸𑀭𑀳𑀢𑁆𑀢𑀸 𑀧𑀦 𑀲𑀢𑁆𑀣𑀼 𑀲𑀸𑀲𑀦𑀸𑀭𑀳𑀢𑁆𑀢𑀸 𑀞𑀸𑀦𑀸𑀭𑀳𑀁 𑀦𑀸𑀫 𑀳𑁄𑀢𑀺. 𑀇𑀢𑀺 𑀬𑁄 𑀇𑀫𑀺𑀦𑀸 𑀏𑀯𑀁 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑁄, 𑀅𑀬𑀁 𑀇𑀥 ‘‘𑀪𑀺𑀓𑁆𑀔𑀽’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼 𑀧𑀦 𑀅𑀜𑁆𑀜𑁂𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺.

𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀢𑀺 𑀬𑀸 𑀪𑀺𑀓𑁆𑀔𑀽𑀦𑀁 𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀸 𑀲𑀺𑀓𑁆𑀔𑀸, 𑀢𑀜𑁆𑀘, 𑀬𑀢𑁆𑀣 𑀘𑁂𑀢𑁂 𑀲𑀳 𑀚𑀻𑀯𑀦𑁆𑀢𑀺, 𑀏𑀓𑀚𑀻𑀯𑀺𑀓𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀳𑁄𑀦𑁆𑀢𑀺, 𑀢𑀁 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀁 𑀲𑀸𑀚𑀻𑀯𑀜𑁆𑀘, 𑀢𑀢𑁆𑀣 𑀲𑀺𑀓𑁆𑀔𑀦𑀪𑀸𑀯𑁂𑀦 𑀲𑀫𑀸𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀆𑀧𑀦𑁆𑀦𑁄. 𑀲𑀫𑀸𑀧𑀦𑁆𑀦𑁄𑀢𑀺 𑀲𑀺𑀓𑁆𑀔𑀜𑁆𑀘 𑀧𑀭𑀺𑀧𑀽𑀭𑁂𑀦𑁆𑀢𑁄 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸 𑀢𑀤𑀼𑀪𑀬𑀁 𑀉𑀧𑀕𑀢𑁄𑀢𑀺 𑀅𑀢𑁆𑀣𑁄. 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸𑀢𑀺 𑀬𑀁 𑀲𑀺𑀓𑁆𑀔𑀁 𑀲𑀫𑀸𑀧𑀦𑁆𑀦𑁄, 𑀢𑀁 𑀅𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, 𑀬𑀜𑁆𑀘 𑀲𑀸𑀚𑀻𑀯𑀁 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀫𑀺𑀁 𑀤𑀼𑀩𑁆𑀩𑀮𑀪𑀸𑀯𑀁 𑀅𑀧𑁆𑀧𑀓𑀸𑀲𑁂𑀢𑁆𑀯𑀸. 𑀢𑀢𑁆𑀣 𑀘𑀺𑀢𑁆𑀢𑀔𑁂𑀢𑁆𑀢𑀓𑀸𑀮𑀧𑀬𑁄𑀕𑀧𑀼𑀕𑁆𑀕𑀮𑀯𑀺𑀚𑀸𑀦𑀦𑀯𑀲𑁂𑀦 𑀲𑀺𑀓𑁆𑀔𑀸𑀬 𑀧𑀘𑁆𑀘𑀓𑁆𑀔𑀸𑀦𑀁 𑀜𑀢𑁆𑀯𑀸 𑀢𑀤𑀪𑀸𑀯𑁂𑀦 𑀅𑀧𑀘𑁆𑀘𑀓𑁆𑀔𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀉𑀧𑀲𑀫𑁆𑀧𑀦𑁆𑀦𑀪𑀸𑀯𑀢𑁄 𑀘𑀯𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦𑁂𑀯 𑀳𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀤𑀯𑀸 𑀯𑀸 𑀭𑀯𑀸 𑀯𑀸 𑀪𑀡𑀦𑁆𑀢𑀲𑁆𑀲. 𑀏𑀯𑀁 𑀘𑀺𑀢𑁆𑀢𑀯𑀲𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦. 𑀢𑀣𑀸 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀲𑀗𑁆𑀖𑀁 𑀧𑀘𑁆𑀘𑀓𑁆𑀔𑀸𑀫𑀺, 𑀲𑀺𑀓𑁆𑀔𑀁, 𑀯𑀺𑀦𑀬𑀁, 𑀧𑀸𑀢𑀺𑀫𑁄𑀓𑁆𑀔𑀁, 𑀉𑀤𑁆𑀤𑁂𑀲𑀁, 𑀉𑀧𑀚𑁆𑀛𑀸𑀬𑀁, 𑀆𑀘𑀭𑀺𑀬𑀁, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀅𑀦𑁆𑀢𑁂𑀯𑀸𑀲𑀺𑀓𑀁, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀁, 𑀲𑀫𑀸𑀦𑀸𑀘𑀭𑀺𑀬𑀓𑀁, 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀘𑀼𑀤𑁆𑀤𑀲𑀦𑁆𑀦𑀁, ‘‘𑀕𑀺𑀳𑀻𑀢𑀺 𑀫𑀁 𑀥𑀸𑀭𑁂𑀳𑀺, 𑀉𑀧𑀸𑀲𑀓𑁄, 𑀆𑀭𑀸𑀫𑀺𑀓𑁄, 𑀲𑀸𑀫𑀡𑁂𑀭𑁄, 𑀢𑀺𑀢𑁆𑀣𑀺𑀬𑁄, 𑀢𑀺𑀢𑁆𑀣𑀺𑀬𑀲𑀸𑀯𑀓𑁄, 𑀅𑀲𑀫𑀡𑁄, ‘𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄’𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀕𑀺𑀳𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀜𑁆𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀔𑁂𑀢𑁆𑀢𑀧𑀤𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀯𑁂𑀯𑀘𑀦𑀲𑁆𑀲 𑀯𑀲𑁂𑀦 𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀯𑀢𑁆𑀢𑀼𑀓𑀸𑀫𑀲𑁆𑀲 𑀬𑀁𑀓𑀺𑀜𑁆𑀘𑀺 𑀯𑀤𑀢𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀭𑀼𑀓𑁆𑀔𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑀸𑀘𑀺𑀓𑁆𑀔𑀦𑁆𑀢𑀲𑁆𑀲. 𑀏𑀯𑀁 𑀔𑁂𑀢𑁆𑀢𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀢𑀢𑁆𑀣 𑀬𑀤𑁂𑀢𑀁 ‘‘𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀘, ‘‘𑀫𑀁 𑀥𑀸𑀭𑁂𑀳𑀻’’𑀢𑀺 (𑀧𑀸𑀭𑀸. 𑁫𑁧) 𑀘 𑀯𑀼𑀢𑁆𑀢𑀁 𑀯𑀢𑁆𑀢𑀫𑀸𑀦𑀓𑀸𑀮𑀯𑀘𑀦𑀁, 𑀬𑀸𑀦𑀺 𑀘 ‘‘𑀅𑀮𑀁 𑀫𑁂 𑀩𑀼𑀤𑁆𑀥𑁂𑀦, 𑀓𑀺𑀁 𑀦𑀼 𑀫𑁂 𑀩𑀼𑀤𑁆𑀥𑁂𑀦, 𑀦 𑀫𑀫𑀢𑁆𑀣𑁄 𑀩𑀼𑀤𑁆𑀥𑁂𑀦, 𑀲𑀼𑀫𑀼𑀢𑁆𑀢𑀸𑀳𑀁 𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁨) 𑀦𑀬𑁂𑀦 𑀆𑀔𑁆𑀬𑀸𑀢𑀯𑀲𑁂𑀦 𑀓𑀸𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀧𑀼𑀭𑀺𑀫𑁂𑀳𑀺 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 ‘‘𑀅𑀮𑀁 𑀫𑁂’’𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺, 𑀢𑁂𑀲𑀁𑀬𑁂𑀯 𑀘 𑀲𑀯𑁂𑀯𑀘𑀦𑀸𑀦𑀁 𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 ‘‘𑀧𑀘𑁆𑀘𑀓𑁆𑀔𑀸𑀲𑀺’’𑀦𑁆𑀢𑀺 𑀯𑀸 ‘‘𑀧𑀘𑁆𑀘𑀓𑁆𑀔𑀺𑀲𑁆𑀲’’𑀦𑁆𑀢𑀺 𑀯𑀸 ‘‘𑀫𑀁 𑀥𑀸𑀭𑁂𑀲𑀻’’𑀢𑀺 𑀯𑀸 ‘‘𑀫𑀁 𑀥𑀸𑀭𑁂𑀲𑁆𑀲𑀢𑀻’’𑀢𑀺 𑀯𑀸 ‘‘𑀬𑀁𑀦𑀽𑀦𑀸𑀳𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’’𑀦𑁆𑀢𑀺 (𑀧𑀸𑀭𑀸. 𑁪𑁫) 𑀯𑀸𑀢𑀺𑀆𑀤𑀻𑀦𑀺 𑀅𑀢𑀻𑀢𑀸𑀦𑀸𑀕𑀢𑀧𑀭𑀺𑀓𑀧𑁆𑀧𑀯𑀘𑀦𑀸𑀦𑀺 𑀪𑀡𑀦𑁆𑀢𑀲𑁆𑀲. 𑀏𑀯𑀁 𑀯𑀢𑁆𑀢𑀫𑀸𑀦 𑀓𑀸𑀮𑀯𑀲𑁂𑀦 𑀘𑁂𑀯 𑀅𑀦𑀸𑀫𑀝𑁆𑀞𑀓𑀸𑀮𑀯𑀲𑁂𑀦 𑀘 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀧𑀬𑁄𑀕𑁄 𑀧𑀦 𑀤𑀼𑀯𑀺𑀥𑁄 𑀓𑀸𑀬𑀺𑀓𑁄 𑀘 𑀯𑀸𑀘𑀲𑀺𑀓𑁄 𑀘. 𑀢𑀢𑁆𑀣 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁧) 𑀦𑀬𑁂𑀦 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸𑀘𑀲𑀺𑀓𑀧𑁆𑀧𑀬𑁄𑀕𑁂𑀦𑁂𑀯 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀅𑀓𑁆𑀔𑀭𑀮𑀺𑀔𑀦𑀁 𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀤𑀲𑁆𑀲𑀦𑀁 𑀯𑀸 𑀓𑀸𑀬𑀧𑁆𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲. 𑀏𑀯𑀁 𑀯𑀸𑀘𑀲𑀺𑀓𑀧𑁆𑀧𑀬𑁄𑀕𑁂𑀦𑁂𑀯 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀧𑀼𑀕𑁆𑀕𑀮𑁄 𑀧𑀦 𑀤𑀼𑀯𑀺𑀥𑁄 𑁋 𑀬𑁄 𑀘 𑀧𑀘𑁆𑀘𑀓𑁆𑀔𑀸𑀢𑀺, 𑀬𑀲𑁆𑀲 𑀘 𑀧𑀘𑁆𑀘𑀓𑁆𑀔𑀸𑀢𑀺. 𑀢𑀢𑁆𑀣 𑀬𑁄 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀲𑀘𑁂 𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀸𑀝𑁆𑀝𑀸𑀦𑀁 𑀅𑀜𑁆𑀜𑀢𑀭𑁄 𑀦 𑀳𑁄𑀢𑀺. 𑀬𑀲𑁆𑀲 𑀧𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀲𑀘𑁂 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀳𑁄𑀢𑀺, 𑀦 𑀘 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑁄, 𑀲𑀫𑁆𑀫𑀼𑀔𑀻𑀪𑀽𑀢𑁄 𑀘 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺. 𑀦 𑀳𑀺 𑀅𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀤𑀽𑀢𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀆𑀭𑁄𑀘𑀦𑀁 𑀭𑀼𑀳𑀢𑀺. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦.

𑀯𑀺𑀚𑀸𑀦𑀦𑀫𑁆𑀧𑀺 𑀦𑀺𑀬𑀫𑀺𑀢𑀸𑀦𑀺𑀬𑀫𑀺𑀢𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀬𑀲𑁆𑀲 𑀬𑁂𑀲𑀁 𑀯𑀸 𑀦𑀺𑀬𑀫𑁂𑀢𑁆𑀯𑀸 ‘‘𑀇𑀫𑀲𑁆𑀲, 𑀇𑀫𑁂𑀲𑀁 𑀯𑀸 𑀆𑀭𑁄𑀘𑁂𑀫𑀻’’𑀢𑀺 𑀯𑀤𑀢𑀺, 𑀲𑀘𑁂 𑀢𑁂 𑀬𑀣𑀸 𑀧𑀓𑀢𑀺𑀬𑀸 𑀮𑁄𑀓𑁂 𑀫𑀦𑀼𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀆𑀯𑀚𑁆𑀚𑀦𑀲𑀫𑀬𑁂 𑀚𑀸𑀦𑀦𑁆𑀢𑀺, 𑀏𑀯𑀁 𑀢𑀲𑁆𑀲 𑀯𑀘𑀦𑀸𑀦𑀦𑁆𑀢𑀭𑀫𑁂𑀯 𑀢𑀲𑁆𑀲 ‘‘𑀅𑀬𑀁 𑀉𑀓𑁆𑀓𑀡𑁆𑀞𑀺𑀢𑁄’’𑀢𑀺 𑀯𑀸 ‘‘𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀢𑀻’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀪𑀸𑀯𑀁 𑀚𑀸𑀦𑀦𑁆𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀣 𑀅𑀧𑀭𑀪𑀸𑀕𑁂 ‘‘𑀓𑀺𑀁 𑀇𑀫𑀺𑀦𑀸 𑀯𑀼𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀚𑀸𑀦𑀦𑁆𑀢𑀺, 𑀅𑀜𑁆𑀜𑁂 𑀯𑀸 𑀚𑀸𑀦𑀦𑁆𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀦𑀺𑀬𑀫𑁂𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀧𑀦 𑀲𑀘𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄 𑀓𑁄𑀘𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀯𑀘𑀦𑀢𑁆𑀣𑀁 𑀚𑀸𑀦𑀸𑀢𑀺, 𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀏𑀯𑀁 𑀯𑀺𑀚𑀸𑀦𑀦𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀁 𑀳𑁄𑀢𑀺, 𑀦 𑀢𑀤𑀪𑀸𑀯𑁂𑀦. 𑀬𑁄 𑀧𑀦 𑀅𑀦𑁆𑀢𑀫𑀲𑁄 𑀤𑀯𑀸𑀬𑀧𑀺 𑀧𑀘𑁆𑀘𑀓𑁆𑀔𑀸𑀢𑀺, 𑀢𑁂𑀦 𑀅𑀧𑀘𑁆𑀘𑀓𑁆𑀔𑀸𑀢𑀸𑀯 𑀳𑁄𑀢𑀺 𑀲𑀺𑀓𑁆𑀔𑀸. 𑀇𑀢𑀺 𑀇𑀫𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀘𑀺𑀢𑁆𑀢𑀸𑀤𑀻𑀦𑀁 𑀯𑀸 𑀯𑀲𑁂𑀦, 𑀲𑀩𑁆𑀩𑀲𑁄 𑀯𑀸 𑀧𑀦 𑀅𑀧𑀘𑁆𑀘𑀓𑁆𑀔𑀸𑀦𑁂𑀦 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀲𑁆𑀲𑁂𑀯 𑀘 𑀅𑀢𑁆𑀣𑀪𑀽𑀢𑀁 𑀏𑀓𑀘𑁆𑀘𑀁 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸.

𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀏𑀢𑁆𑀣 𑀫𑁂𑀣𑀼𑀦𑀁 𑀥𑀫𑁆𑀫𑀦𑁆𑀢𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀤𑀺𑀲𑀸𑀦𑀁 𑀉𑀪𑀺𑀦𑁆𑀦𑀁 𑀥𑀫𑁆𑀫𑀁. 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀧𑀝𑀺𑀲𑁂𑀯𑁂𑀬𑁆𑀬 𑀅𑀚𑁆𑀛𑀸𑀧𑀚𑁆𑀚𑁂𑀬𑁆𑀬. 𑀅𑀦𑁆𑀢𑀫𑀲𑁄𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦. 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀢𑀺𑀭𑀘𑁆𑀙𑀸𑀦𑁂𑀲𑀼 𑀕𑀢𑀸𑀬𑀧𑀺, 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺. 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀧𑀭𑀸𑀚𑀺𑀢𑁄 𑀳𑁄𑀢𑀺, 𑀧𑀭𑀸𑀚𑀬𑀁 𑀆𑀧𑀦𑁆𑀦𑁄. 𑀅𑀲𑀁𑀯𑀸𑀲𑁄𑀢𑀺 𑀧𑀓𑀢𑀢𑁆𑀢𑀸 𑀪𑀺𑀓𑁆𑀔𑀽 𑀲𑀳 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀏𑀓𑀓𑀫𑁆𑀫𑀸𑀤𑀺𑀓𑁄𑀯 𑀢𑀺𑀯𑀺𑀥𑁄𑀧𑀺 𑀯𑀺𑀥𑀺 𑀲𑀁𑀯𑀸𑀲𑁄 𑀦𑀸𑀫, 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀦𑀢𑁆𑀣𑀻𑀢𑀺 𑀅𑀲𑀁𑀯𑀸𑀲𑁄. 𑀲𑀗𑁆𑀖𑀓𑀫𑁆𑀫𑁂𑀲𑀼 𑀳𑀺 𑀏𑀲 𑀕𑀡𑀧𑀽𑀭𑀓𑁄𑀧𑀺 𑀦 𑀳𑁄𑀢𑀺, 𑀅𑀬𑀁 𑀢𑀸𑀯 𑀧𑀤𑀯𑀡𑁆𑀡𑀦𑀸.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀯𑀲𑁂𑀦 𑀳𑀺 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄, 𑀢𑀸𑀲𑀁 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑀼𑀔𑀫𑀕𑁆𑀕𑀯𑀲𑁂𑀦 𑀢𑀬𑁄 𑀢𑀬𑁄 𑀓𑀢𑁆𑀯𑀸 𑀦𑀯 𑀫𑀕𑁆𑀕𑀸, 𑀢𑀣𑀸 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁. 𑀧𑀼𑀭𑀺𑀲𑀸𑀦𑀁 𑀧𑀦 𑀯𑀘𑁆𑀘𑀫𑀕𑁆𑀕𑀫𑀼𑀔𑀫𑀕𑁆𑀕𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀙 𑀫𑀕𑁆𑀕𑀸, 𑀢𑀣𑀸 𑀧𑀡𑁆𑀟𑀓𑀸𑀦𑀦𑁆𑀢𑀺 𑀏𑀯𑀁 𑀢𑀺𑀁𑀲 𑀫𑀕𑁆𑀕𑀸. 𑀢𑁂𑀲𑀼 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀫𑀕𑁆𑀕𑀲𑁆𑀲 𑀲𑀦𑁆𑀣𑀢𑀲𑁆𑀲 𑀯𑀸 𑀅𑀲𑀦𑁆𑀣𑀢𑀲𑁆𑀲 𑀯𑀸, 𑀧𑀭𑁂𑀲𑀁 𑀧𑀦 𑀫𑀢𑀸𑀦𑀫𑁆𑀧𑀺 𑀅𑀓𑁆𑀔𑀸𑀬𑀺𑀢𑀲𑁆𑀲 𑀯𑀸 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀲𑁆𑀲 𑀯𑀸 𑀧𑀓𑀢𑀺𑀯𑀸𑀢𑁂𑀦 𑀅𑀲𑀁𑀨𑀼𑀝𑁆𑀞𑁂 𑀅𑀮𑁆𑀮𑁄𑀓𑀸𑀲𑁂 𑀬𑁄 𑀪𑀺𑀓𑁆𑀔𑀼 𑀏𑀓𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀺 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀲𑀦𑁆𑀣𑀢𑀁 𑀯𑀸 𑀅𑀲𑀦𑁆𑀣𑀢𑀁 𑀯𑀸 𑀲𑁂𑀯𑀦𑀘𑀺𑀢𑁆𑀢𑁂𑀦 𑀧𑀯𑁂𑀲𑁂𑀢𑀺, 𑀧𑀭𑁂𑀦 𑀯𑀸 𑀧𑀯𑁂𑀲𑀺𑀬𑀫𑀸𑀦𑁂 𑀧𑀯𑁂𑀲𑀦𑀧𑀯𑀺𑀝𑁆𑀞𑀝𑁆𑀞𑀺𑀢𑀉𑀤𑁆𑀥𑀭𑀡𑁂𑀲𑀼 𑀬𑀁𑀓𑀺𑀜𑁆𑀘𑀺 𑀲𑀸𑀤𑀺𑀬𑀢𑀺, 𑀅𑀬𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑁄. 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀦 𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀢𑁆𑀣𑀁 𑀅𑀬𑀁 𑀫𑀸𑀢𑀺𑀓𑀸 𑁋

𑀦𑀺𑀤𑀸𑀦𑀁 𑀧𑀼𑀕𑁆𑀕𑀮𑀁 𑀯𑀢𑁆𑀣𑀼𑀁, 𑀧𑀜𑁆𑀜𑀢𑁆𑀢𑀺𑀯𑀺𑀥𑀺𑀫𑁂𑀯 𑀘;

𑀆𑀡𑀢𑁆𑀢𑀸𑀧𑀢𑁆𑀢𑀺𑀦𑀸𑀧𑀢𑁆𑀢𑀺-𑀯𑀺𑀧𑀢𑁆𑀢𑀺𑀁 𑀅𑀗𑁆𑀕𑀫𑁂𑀯 𑀘.

𑀲𑀫𑀼𑀝𑁆𑀞𑀸𑀦𑀯𑀺𑀥𑀺𑀁 𑀓𑀺𑀭𑀺𑀬𑀸-𑀲𑀜𑁆𑀜𑀸𑀘𑀺𑀢𑁆𑀢𑁂𑀳𑀺 𑀦𑀸𑀦𑀢𑁆𑀢𑀁;

𑀯𑀚𑁆𑀚𑀓𑀫𑁆𑀫𑀧𑁆𑀧𑀪𑁂𑀤𑀜𑁆𑀘, 𑀢𑀺𑀓𑀤𑁆𑀯𑀬𑀯𑀺𑀥𑀺𑀁 𑀢𑀣𑀸.

𑀮𑀓𑁆𑀔𑀡𑀁 𑀲𑀢𑁆𑀢𑀭𑀲𑀥𑀸, 𑀞𑀺𑀢𑀁 𑀲𑀸𑀥𑀸𑀭𑀡𑀁 𑀇𑀤𑀁;

𑀜𑀢𑁆𑀯𑀸 𑀬𑁄𑀚𑁂𑀬𑁆𑀬 𑀫𑁂𑀥𑀸𑀯𑀻, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀦𑁆𑀢𑀺.

𑀢𑀢𑁆𑀣 𑀦𑀺𑀤𑀸𑀦𑀁 𑀦𑀸𑀫 𑀯𑁂𑀲𑀸𑀮𑀺-𑀭𑀸𑀚𑀕𑀳-𑀲𑀸𑀯𑀢𑁆𑀣𑀺-𑀆𑀴𑀯𑀺-𑀓𑁄𑀲𑀫𑁆𑀩𑀺-𑀲𑀕𑁆𑀕-𑀪𑀕𑁆𑀕𑀸𑀦𑀁 𑀯𑀲𑁂𑀦 𑀲𑀢𑁆𑀢𑀯𑀺𑀥𑀁 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀁, 𑀇𑀤𑀜𑁆𑀳𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀦𑀺𑀤𑀸𑀦𑀁. 𑀧𑀼𑀕𑁆𑀕𑀮𑁄 𑀦𑀸𑀫 𑀬𑀁 𑀬𑀁 𑀆𑀭𑀩𑁆𑀪 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀯𑀢𑁆𑀣𑀼 𑀦𑀸𑀫 𑀢𑀲𑁆𑀲 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀚𑁆𑀛𑀸𑀘𑀸𑀭𑁄 𑀯𑀼𑀘𑁆𑀘𑀢𑀺. 𑀧𑀜𑁆𑀜𑀢𑁆𑀢𑀺𑀯𑀺𑀥𑀺𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀧𑀤𑁂𑀲𑀧𑀜𑁆𑀜𑀢𑁆𑀢𑀺𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀏𑀓𑀢𑁄𑀧𑀜𑁆𑀜𑀢𑁆𑀢𑀺𑀉𑀪𑀢𑁄𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀦𑀯𑀯𑀺𑀥𑀸 𑀧𑀜𑁆𑀜𑀢𑁆𑀢𑀺. 𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀦𑀸𑀫 𑀅𑀦𑀼𑀧𑁆𑀧𑀦𑁆𑀦𑁂 𑀤𑁄𑀲𑁂 𑀧𑀜𑁆𑀜𑀢𑁆𑀢𑀸, 𑀲𑀸 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀳𑀡𑀯𑀲𑁂𑀦 (𑀘𑀽𑀴𑀯. 𑁪𑁦𑁩) 𑀪𑀺𑀓𑁆𑀔𑀼𑀦𑀻𑀦𑀁𑀬𑁂𑀯 𑀆𑀕𑀢𑀸, 𑀅𑀜𑁆𑀜𑀢𑁆𑀭 𑀦𑀢𑁆𑀣𑀺. 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 (𑀫𑀳𑀸𑀯. 𑁨𑁫𑁯) 𑀕𑀡𑁂𑀦 𑀉𑀧𑀲𑀫𑁆𑀧𑀤𑀸, 𑀕𑀡𑀗𑁆𑀕𑀡𑀽𑀧𑀸𑀳𑀦𑀸 (𑀫𑀳𑀸𑀯. 𑁨𑁫𑁯) 𑀥𑀼𑀯𑀦𑁆𑀳𑀸𑀦𑀁 𑀘𑀫𑁆𑀫𑀢𑁆𑀣𑀭𑀡𑀦𑁆𑀢𑀺 𑀏𑀢𑁂𑀲𑀁 𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸 𑀧𑀤𑁂𑀲𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯 𑀳𑀺 𑀏𑀢𑁂𑀳𑀺 𑀆𑀧𑀢𑁆𑀢𑀺 𑀳𑁄𑀢𑀺, 𑀢𑁂𑀲𑀼𑀧𑀺 𑀥𑀼𑀯𑀦𑁆𑀳𑀸𑀦𑀁 𑀧𑀝𑀺𑀓𑁆𑀔𑁂𑀧𑀫𑀢𑁆𑀢𑀫𑁂𑀯 𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀢𑀁, 𑀢𑀢𑁄 𑀅𑀜𑁆𑀜𑀸 𑀧𑀤𑁂𑀲𑀧𑀜𑁆𑀜𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀲𑀩𑁆𑀩𑀸𑀦𑀺 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀬𑁂𑀯 𑀳𑁄𑀦𑁆𑀢𑀺, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀤𑀼𑀓𑀜𑁆𑀘 𑀏𑀓𑀢𑁄𑀧𑀜𑁆𑀜𑀢𑁆𑀢𑀺𑀤𑀼𑀓𑀜𑁆𑀘 𑀅𑀢𑁆𑀣𑀢𑁄 𑀏𑀓𑀁, 𑀢𑀲𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺𑀜𑁆𑀘 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀤𑀼𑀓𑀜𑁆𑀘 𑀏𑀓𑀢𑁄𑀧𑀜𑁆𑀜𑀢𑁆𑀢𑀺𑀤𑀼𑀓𑀜𑁆𑀘 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀘𑀢𑀲𑁆𑀲𑀦𑁆𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀯𑀲𑁂𑀦 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀡𑀢𑁆𑀢𑀸𑀧𑀢𑁆𑀢𑀺𑀦𑀸𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀦𑁆𑀢𑀺𑀏𑀢𑁆𑀣 𑀆𑀡𑀢𑁆𑀢𑀻𑀢𑀺𑀆𑀡𑀸𑀧𑀦𑀸 𑀯𑀼𑀘𑁆𑀘𑀢𑀺. 𑀆𑀧𑀢𑁆𑀢𑀻𑀢𑀺 𑀧𑀼𑀩𑁆𑀩𑀧𑁆𑀧𑀬𑁄𑀕𑀸𑀤𑀺𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑁄. 𑀅𑀦𑀸𑀧𑀢𑁆𑀢𑀻𑀢𑀺 𑀅𑀚𑀸𑀦𑀦𑀸𑀤𑀺𑀯𑀲𑁂𑀦 𑀅𑀦𑀸𑀧𑀢𑁆𑀢𑀺. 𑀯𑀺𑀧𑀢𑁆𑀢𑀻𑀢𑀺 𑀲𑀻𑀮𑀆𑀘𑀸𑀭𑀤𑀺𑀝𑁆𑀞𑀺𑀆𑀚𑀻𑀯𑀯𑀺𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀸. 𑀇𑀢𑀺 𑀇𑀫𑀸𑀲𑀁 𑀆𑀡𑀢𑁆𑀢𑀸𑀤𑀻𑀦𑀫𑁆𑀧𑀺 𑀯𑀲𑁂𑀦 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀗𑁆𑀕𑀦𑁆𑀢𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀆𑀧𑀢𑁆𑀢𑀻𑀦𑀁 𑀅𑀗𑁆𑀕𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀫𑀼𑀝𑁆𑀞𑀸𑀦𑀯𑀺𑀥𑀺𑀦𑁆𑀢𑀺 𑀲𑀩𑁆𑀩𑀸𑀧𑀢𑁆𑀢𑀻𑀦𑀁 𑀓𑀸𑀬𑁄 𑀯𑀸𑀘𑀸 𑀓𑀸𑀬𑀯𑀸𑀘𑀸 𑀓𑀸𑀬𑀘𑀺𑀢𑁆𑀢𑀁 𑀯𑀸𑀘𑀸𑀘𑀺𑀢𑁆𑀢𑀁 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀏𑀓𑀗𑁆𑀕𑀺𑀓𑀤𑁆𑀯𑀗𑁆𑀕𑀺𑀓𑀢𑀺𑀯𑀗𑁆𑀕𑀺𑀓𑀸𑀦𑀺. 𑀙 𑀲𑀫𑀼𑀝𑁆𑀞𑀸𑀦𑀸𑀦𑀺 𑀦𑀸𑀫 𑀬𑀸𑀦𑀺 ‘‘𑀲𑀺𑀓𑁆𑀔𑀸𑀧𑀤𑀲𑀫𑀉𑀝𑁆𑀞𑀸𑀦𑀸𑀦𑀻’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀅𑀘𑀺𑀢𑁆𑀢𑀓𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀲𑀘𑀺𑀢𑁆𑀢𑀓𑀸𑀦𑀺. 𑀢𑁂𑀲𑀼 𑀏𑀓𑁂𑀦 𑀯𑀸 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀙𑀳𑀺 𑀯𑀸 𑀲𑀫𑀼𑀝𑁆𑀞𑀸𑀦𑁂𑀳𑀺 𑀆𑀧𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀧𑀜𑁆𑀘𑀲𑀫𑀼𑀝𑁆𑀞𑀸𑀦𑀸 𑀦𑀸𑀫 𑀦𑀢𑁆𑀣𑀺. 𑀢𑀢𑁆𑀣 𑀏𑀓𑀲𑀫𑀼𑀝𑁆𑀞𑀸𑀦𑀸 𑀦𑀸𑀫 𑀘𑀢𑀼𑀢𑁆𑀣𑁂𑀦 𑀘 𑀧𑀜𑁆𑀘𑀫𑁂𑀦 𑀘 𑀙𑀝𑁆𑀞𑁂𑀦 𑀘 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀢𑀺, 𑀦 𑀅𑀜𑁆𑀜𑁂𑀦. 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀸 𑀦𑀸𑀫 𑀧𑀞𑀫𑀘𑀢𑀼𑀢𑁆𑀣𑁂𑀳𑀺 𑀘 𑀤𑀼𑀢𑀺𑀬𑀧𑀜𑁆𑀘𑀫𑁂𑀳𑀺 𑀘 𑀢𑀢𑀺𑀬𑀙𑀝𑁆𑀞𑁂𑀳𑀺 𑀘 𑀘𑀢𑀼𑀢𑁆𑀣𑀙𑀝𑁆𑀞𑁂𑀳𑀺 𑀘 𑀧𑀜𑁆𑀘𑀫𑀙𑀝𑁆𑀞𑁂𑀳𑀺 𑀘 𑀲𑀫𑀼𑀝𑁆𑀞𑀸𑀦𑁂𑀳𑀺, 𑀲𑀫𑀼𑀝𑁆𑀞𑀸𑀢𑀺, 𑀦 𑀅𑀜𑁆𑀜𑁂𑀳𑀺. 𑀢𑀺𑀲𑀫𑀼𑀝𑁆𑀞𑀸𑀦𑀸 𑀦𑀸𑀫 𑀧𑀞𑀫𑁂𑀳𑀺 𑀘 𑀢𑀻𑀳𑀺, 𑀧𑀘𑁆𑀙𑀺𑀫𑁂𑀳𑀺 𑀘 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀦 𑀅𑀜𑁆𑀜𑁂𑀳𑀺. 𑀘𑀢𑀼𑀲𑀫𑀼𑀝𑁆𑀞𑀸𑀦𑀸 𑀦𑀸𑀫 𑀧𑀞𑀫𑀢𑀢𑀺𑀬𑀘𑀢𑀼𑀢𑁆𑀣𑀙𑀝𑁆𑀞𑁂𑀳𑀺 𑀘 𑀤𑀼𑀢𑀺𑀬𑀢𑀢𑀺𑀬𑀧𑀜𑁆𑀘𑀫𑀙𑀝𑁆𑀞𑁂𑀳𑀺 𑀘 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀦 𑀅𑀜𑁆𑀜𑁂𑀳𑀺. 𑀙 𑀲𑀫𑀼𑀝𑁆𑀞𑀸𑀦𑀸 𑀦𑀸𑀫 𑀙𑀳𑀺𑀧𑀺 𑀲𑀫𑀼𑀝𑁆𑀞𑀸𑀢𑀺.

𑀏𑀯𑀁 𑁋

𑀢𑀺𑀥𑀸 𑀏𑀓𑀲𑀫𑀼𑀝𑁆𑀞𑀸𑀦𑀸, 𑀧𑀜𑁆𑀘𑀥𑀸 𑀤𑁆𑀯𑀺𑀲𑀫𑀼𑀝𑁆𑀞𑀺𑀢𑀸;

𑀤𑁆𑀯𑀺𑀥𑀸 𑀢𑀺𑀘𑀢𑀼𑀭𑁄 𑀞𑀸𑀦𑀸, 𑀏𑀓𑀥𑀸 𑀙𑀲𑀫𑀼𑀝𑁆𑀞𑀺𑀢𑀸𑀢𑀺.

𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀲𑀩𑁆𑀩𑀸𑀯 𑀢𑁂𑀭𑀲 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺 (𑀘𑀽𑀴𑀯. 𑁧𑁬𑁫 𑀆𑀤𑀬𑁄), 𑀢𑀸 𑀧𑀞𑀫𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀲𑀫𑀼𑀝𑁆𑀞𑀸𑀦𑀢𑁄 𑀢𑁂𑀭𑀲 𑀦𑀸𑀫𑀸𑀦𑀺 𑀮𑀪𑀦𑁆𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀸, 𑀅𑀤𑀺𑀦𑁆𑀦𑀸𑀤𑀸𑀦-𑀲𑀜𑁆𑀘𑀭𑀺𑀢𑁆𑀢-𑀲𑀫𑀦𑀼𑀪𑀸𑀲𑀦-𑀓𑀣𑀺𑀦-𑀏𑀴𑀓𑀮𑁄𑀫-𑀧𑀤𑀲𑁄𑀥𑀫𑁆𑀫-𑀅𑀤𑁆𑀥𑀸𑀦-𑀣𑁂𑀬𑁆𑀬𑀲𑀢𑁆𑀣-𑀥𑀫𑁆𑀫𑀤𑁂𑀲𑀦𑀸𑀪𑀽𑀢𑀸𑀭𑁄𑀘𑀦-𑀘𑁄𑀭𑀺𑀯𑀼𑀝𑁆𑀞𑀸𑀧𑀦-𑀅𑀦𑀦𑀼𑀜𑁆𑀜𑀸𑀢𑀲𑀫𑀼𑀝𑁆𑀞𑀸𑀦𑀸𑀢𑀺. 𑀢𑀢𑁆𑀣 𑀬𑀸 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀲𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀙𑀳𑀺𑀧𑀺 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀙𑀝𑁆𑀞𑁂𑀦𑁂𑀯 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀢𑀢𑀺𑀬𑀙𑀝𑁆𑀞𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀧𑀞𑀫𑀘𑀢𑀼𑀢𑁆𑀣𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀤𑀼𑀢𑀺𑀬𑀧𑀜𑁆𑀘𑀫𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀧𑀞𑀫𑀢𑀢𑀺𑀬𑀘𑀢𑀼𑀢𑁆𑀣𑀙𑀝𑁆𑀞𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀅𑀤𑁆𑀥𑀸𑀦𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀘𑀢𑀼𑀢𑁆𑀣𑀙𑀝𑁆𑀞𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀧𑀜𑁆𑀘𑀫𑁂𑀦𑁂𑀯 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀅𑀘𑀺𑀢𑁆𑀢𑀓𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀪𑀽𑀢𑀸𑀭𑁄𑀘𑀦𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀧𑀜𑁆𑀘𑀫𑀙𑀝𑁆𑀞𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑀸 𑀦𑀸𑀫. 𑀬𑀸 𑀤𑀼𑀢𑀺𑀬𑀢𑀢𑀺𑀬𑀧𑀜𑁆𑀘𑀫𑀙𑀝𑁆𑀞𑁂𑀳𑀺 𑀲𑀫𑀼𑀝𑁆𑀞𑀸𑀢𑀺, 𑀅𑀬𑀁 𑀅𑀦𑀦𑀼𑀜𑁆𑀜𑀸𑀢𑀲𑀫𑀼𑀝𑁆𑀞𑀸𑀦𑀸 𑀦𑀸𑀫𑀸𑀢𑀺. 𑀇𑀢𑀺 𑀇𑀫𑀲𑁆𑀲 𑀲𑀫𑀼𑀝𑁆𑀞𑀸𑀦𑀯𑀺𑀥𑀺𑀦𑁄𑀧𑀺 𑀯𑀲𑁂𑀦 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀺𑀭𑀺𑀬𑀸𑀲𑀜𑁆𑀜𑀸𑀘𑀺𑀢𑁆𑀢𑁂𑀳𑀺 𑀦𑀸𑀦𑀢𑁆𑀢𑀦𑁆𑀢𑀺 𑀏𑀢𑁂𑀳𑀺 𑀓𑀺𑀭𑀺𑀬𑀸𑀤𑀻𑀳𑀺 𑀲𑀩𑁆𑀩𑀸𑀧𑀢𑁆𑀢𑀻𑀦𑀁 𑀦𑀸𑀦𑀸𑀪𑀸𑀯𑀁 𑀜𑀢𑁆𑀯𑀸 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀸𑀧𑀢𑁆𑀢𑀺𑀬𑁄 𑀳𑀺 𑀓𑀺𑀭𑀺𑀬𑀸𑀯𑀲𑁂𑀦 𑀧𑀜𑁆𑀘𑀯𑀺𑀥𑀸 𑀳𑁄𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀢𑁆𑀣𑀸𑀧𑀢𑁆𑀢𑀺 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀅𑀢𑁆𑀣𑀺 𑀅𑀓𑀺𑀭𑀺𑀬𑀢𑁄, 𑀅𑀢𑁆𑀣𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄, 𑀅𑀢𑁆𑀣𑀺 𑀲𑀺𑀬𑀸 𑀓𑀺𑀭𑀺𑀬𑀢𑁄 𑀲𑀺𑀬𑀸 𑀅𑀓𑀺𑀭𑀺𑀬𑀢𑁄, 𑀅𑀢𑁆𑀣𑀺 𑀲𑀺𑀬𑀸 𑀓𑀺𑀭𑀺𑀬𑀢𑁄 𑀲𑀺𑀬𑀸 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄𑀢𑀺. 𑀢𑀢𑁆𑀣 𑀬𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀣𑀯𑀺𑀔𑀡𑀦𑀸𑀤𑀻𑀲𑀼 (𑀧𑀘𑀺. 𑁮𑁪) 𑀯𑀺𑀬 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀲𑁆𑀲 𑀳𑁄𑀢𑀺, 𑀅𑀬𑀁 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀦𑀸𑀫. 𑀬𑀸 𑀓𑀸𑀬𑀯𑀸𑀘𑀸𑀳𑀺 𑀓𑀢𑁆𑀢𑀩𑁆𑀩𑀁 𑀅𑀓𑀭𑁄𑀦𑁆𑀢𑀲𑁆𑀲 𑀳𑁄𑀢𑀺 𑀧𑀞𑀫𑀓𑀣𑀺𑀦𑀸𑀧𑀢𑁆𑀢𑀺 (𑀧𑀸𑀭𑀸. 𑁪𑁫𑁯 𑀆𑀤𑀬𑁄) 𑀯𑀺𑀬, 𑀅𑀬𑀁 𑀅𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀦𑀸𑀫. 𑀬𑀸 𑀓𑀭𑁄𑀦𑁆𑀢𑀲𑁆𑀲 𑀘 𑀅𑀓𑀭𑁄𑀦𑁆𑀢𑀲𑁆𑀲 𑀘 𑀳𑁄𑀢𑀺 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀸𑀧𑀢𑁆𑀢𑀺 (𑀧𑀸𑀭𑀸. 𑁫𑁦𑁮-𑁫𑁧𑁧) 𑀯𑀺𑀬, 𑀅𑀬𑀁 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀦𑀸𑀫. 𑀬𑀸 𑀲𑀺𑀬𑀸 𑀓𑀭𑁄𑀦𑁆𑀢𑀲𑁆𑀲 𑀘, 𑀲𑀺𑀬𑀸 𑀅𑀓𑀭𑁄𑀦𑁆𑀢𑀲𑁆𑀲 𑀘 𑀳𑁄𑀢𑀺 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀳𑀡𑀸𑀧𑀢𑁆𑀢𑀺 (𑀧𑀸𑀭𑀸. 𑁫𑁮𑁨) 𑀯𑀺𑀬, 𑀅𑀬𑀁 𑀲𑀺𑀬𑀸 𑀓𑀺𑀭𑀺𑀬𑀢𑁄 𑀲𑀺𑀬𑀸 𑀅𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀦𑀸𑀫. 𑀬𑀸 𑀲𑀺𑀬𑀸 𑀓𑀭𑁄𑀦𑁆𑀢𑀲𑁆𑀲 𑀘 𑀲𑀺𑀬𑀸 𑀓𑀭𑁄𑀦𑁆𑀢𑀸𑀓𑀭𑁄𑀦𑁆𑀢𑀲𑁆𑀲 𑀘 𑀳𑁄𑀢𑀺 𑀓𑀼𑀝𑀺𑀓𑀸𑀭𑀸𑀧𑀢𑁆𑀢𑀺 (𑀧𑀸𑀭𑀸. 𑁩𑁪𑁨 𑀆𑀤𑀬𑁄) 𑀯𑀺𑀬, 𑀅𑀬𑀁 𑀲𑀺𑀬𑀸 𑀓𑀺𑀭𑀺𑀬𑀢𑁄 𑀲𑀺𑀬𑀸 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺 𑀦𑀸𑀫.

𑀲𑀩𑁆𑀩𑀸𑀧𑀢𑁆𑀢𑀺𑀬𑁄 𑀘 𑀲𑀜𑁆𑀜𑀸𑀯𑀲𑁂𑀦 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸𑀢𑀺. 𑀢𑀢𑁆𑀣 𑀬𑀢𑁄 𑀯𑀻𑀢𑀺𑀓𑁆𑀓𑀫𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀫𑀼𑀘𑁆𑀘𑀢𑀺, 𑀅𑀬𑀁 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸, 𑀇𑀢𑀭𑀸 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸. 𑀧𑀼𑀦 𑀘 𑀲𑀩𑁆𑀩𑀸𑀧𑀺 𑀘𑀺𑀢𑁆𑀢𑀯𑀲𑁂𑀦 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 𑀲𑀘𑀺𑀢𑁆𑀢𑀓𑀸 𑀅𑀘𑀺𑀢𑁆𑀢𑀓𑀸 𑀘𑀸𑀢𑀺. 𑀢𑀢𑁆𑀣 𑀬𑀸 𑀲𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀯𑀲𑁂𑀦𑁂𑀯 𑀲𑀫𑀼𑀝𑁆𑀞𑀸𑀢𑀺 𑀅𑀬𑀁 𑀲𑀘𑀺𑀢𑁆𑀢𑀓𑀸. 𑀬𑀸 𑀅𑀘𑀺𑀢𑁆𑀢𑀓𑁂𑀦 𑀯𑀸 𑀲𑀘𑀺𑀢𑁆𑀢𑀓𑀫𑀺𑀲𑁆𑀲𑀓𑁂𑀦 𑀯𑀸 𑀲𑀫𑀼𑀝𑁆𑀞𑀸𑀢𑀺 𑀅𑀬𑀁 𑀅𑀘𑀺𑀢𑁆𑀢𑀓𑀸.

𑀯𑀚𑁆𑀚𑀓𑀫𑁆𑀫𑀧𑁆𑀧𑀪𑁂𑀤𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀸𑀧𑀢𑁆𑀢𑀺𑀬𑁄 𑀯𑀚𑁆𑀚𑀯𑀲𑁂𑀦 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺 𑀮𑁄𑀓𑀯𑀚𑁆𑀚𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸 𑀘𑀸𑀢𑀺. 𑀢𑀢𑁆𑀣 𑀬𑀲𑁆𑀲𑀸 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀅𑀬𑀁 𑀮𑁄𑀓𑀯𑀚𑁆𑀚𑀸, 𑀲𑁂𑀲𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸. 𑀲𑀩𑁆𑀩𑀸 𑀘 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀢𑀤𑀼𑀪𑀬𑀯𑀲𑁂𑀦 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀓𑀸𑀬𑀤𑁆𑀯𑀸𑀭𑁂 𑀆𑀧𑀚𑁆𑀚𑀺𑀢𑀩𑁆𑀩𑀸 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀯𑀘𑀻𑀤𑁆𑀯𑀸𑀭𑁂 𑀆𑀧𑀚𑁆𑀚𑀺𑀢𑀩𑁆𑀩𑀸 𑀯𑀘𑀻𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀉𑀪𑀬𑀢𑁆𑀣 𑀆𑀧𑀚𑁆𑀚𑀺𑀢𑀩𑁆𑀩𑀸 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀜𑁆𑀘𑀸𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀇𑀢𑀺 𑀇𑀫𑀺𑀦𑀸 𑀯𑀚𑁆𑀚𑀓𑀫𑁆𑀫𑀧𑁆𑀧𑀪𑁂𑀤𑁂𑀦𑀸𑀧𑀺 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀺𑀓𑀤𑁆𑀯𑀬𑀯𑀺𑀥𑀺𑀦𑁆𑀢𑀺 𑀓𑀼𑀲𑀮𑀢𑁆𑀢𑀺𑀓𑀯𑁂𑀤𑀦𑀸𑀢𑁆𑀢𑀺𑀓𑀯𑀺𑀥𑀺𑀁. 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑁄 𑀳𑀺 𑀅𑀓𑀼𑀲𑀮𑀘𑀺𑀢𑁆𑀢𑁄 𑀯𑀸 𑀆𑀧𑀚𑁆𑀚𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀯𑀸, 𑀢𑀣𑀸 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀯𑀸 𑀇𑀢𑀭𑀯𑁂𑀤𑀦𑀸𑀤𑁆𑀯𑀬𑀲𑀫𑀗𑁆𑀕𑀻 𑀯𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑀯𑀲𑁂𑀦 𑀏𑀓𑀁 𑀘𑀺𑀢𑁆𑀢𑀁, 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀯𑀲𑁂𑀦 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺, 𑀲𑀩𑁆𑀩𑁂𑀲𑀁 𑀯𑀲𑁂𑀦 𑀢𑀻𑀡𑀺 𑀘𑀺𑀢𑁆𑀢𑀸𑀦𑀺. 𑀤𑀼𑀓𑁆𑀔𑀯𑁂𑀤𑀦𑀸𑀯𑀲𑁂𑀦 𑀏𑀓𑀸 𑀯𑁂𑀤𑀦𑀸, 𑀲𑀼𑀔𑀉𑀧𑁂𑀓𑁆𑀔𑀸𑀯𑀲𑁂𑀦 𑀤𑁆𑀯𑁂, 𑀲𑀩𑁆𑀩𑀸𑀲𑀁 𑀯𑀲𑁂𑀦 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺. 𑀅𑀬𑀫𑁂𑀯 𑀧𑀪𑁂𑀤𑁄 𑀮𑀩𑁆𑀪𑀢𑀺, 𑀦 𑀅𑀜𑁆𑀜𑁄.

𑀮𑀓𑁆𑀔𑀡𑀁 𑀲𑀢𑁆𑀢𑀭𑀲𑀥𑀸, 𑀞𑀺𑀢𑀁 𑀲𑀸𑀥𑀸𑀭𑀡𑀁 𑀇𑀤𑀁, 𑀜𑀢𑁆𑀯𑀸𑀢𑀺 𑀇𑀤𑀁 𑀦𑀺𑀤𑀸𑀦𑀸𑀤𑀺𑀯𑁂𑀤𑀦𑀸𑀢𑁆𑀢𑀺𑀓𑀧𑀭𑀺𑀬𑁄𑀲𑀸𑀦𑀁 𑀲𑀢𑁆𑀢𑀭𑀲𑀧𑁆𑀧𑀓𑀸𑀭𑀁 𑀮𑀓𑁆𑀔𑀡𑀁 𑀚𑀸𑀦𑀺𑀢𑁆𑀯𑀸 𑀬𑁄𑀚𑁂𑀬𑁆𑀬 𑀫𑁂𑀥𑀸𑀯𑀻. 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀦𑁆𑀢𑀺 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀇𑀤𑀁 𑀮𑀓𑁆𑀔𑀡𑀁 𑀬𑀣𑀸𑀦𑀼𑀭𑀽𑀧𑀁 𑀬𑁄𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀅𑀬𑁄𑀚𑀺𑀢𑀁 𑀤𑀼𑀩𑁆𑀩𑀺𑀚𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀦𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀲𑀸𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀧𑀭𑀺𑀬𑁄𑀲𑀸𑀦𑁂 𑀇𑀫𑀁 𑀫𑀸𑀢𑀺𑀓𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀬𑀺𑀲𑁆𑀲𑀸𑀫.

𑀇𑀥 𑀧𑀦𑀲𑁆𑀲 𑀅𑀬𑀁 𑀬𑁄𑀚𑀦𑀸 𑁋 𑀇𑀤𑀁 𑀯𑁂𑀲𑀸𑀮𑀺𑀬𑀁 𑀲𑀼𑀤𑀺𑀦𑁆𑀦𑀢𑁆𑀣𑁂𑀭𑀁 𑀆𑀭𑀩𑁆𑀪 𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁. ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺 𑀅𑀬𑀫𑁂𑀢𑁆𑀣 𑀧𑀜𑁆𑀜𑀢𑁆𑀢𑀺, ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀘 ‘‘𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻’’𑀢𑀺 𑀘 𑀤𑁆𑀯𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄. 𑀅𑀦𑀼𑀧𑀜𑁆𑀜𑀢𑁆𑀢𑀺 𑀘 𑀦𑀸𑀫𑁂𑀲𑀸 𑀆𑀧𑀢𑁆𑀢𑀺𑀓𑀭𑀸 𑀘 𑀳𑁄𑀢𑀺 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 (𑀧𑀸𑀘𑀺. 𑁯𑁫 𑀆𑀤𑀬𑁄) 𑀯𑀺𑀬, 𑀅𑀦𑀸𑀧𑀢𑁆𑀢𑀺𑀓𑀭𑀸 𑀘 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁩𑁬-𑁨𑁩𑁭) 𑀯𑀺𑀬, 𑀆𑀧𑀢𑁆𑀢𑀺𑀉𑀧𑀢𑁆𑀣𑀫𑁆𑀪𑀓𑀭𑀸 𑀘 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 (𑀧𑀸𑀭𑀸. 𑁯𑁧) 𑀯𑀺𑀬, 𑀇𑀥 𑀧𑀦 𑀉𑀧𑀢𑁆𑀣𑀫𑁆𑀪𑀓𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑁄 𑀧𑀭𑀁 𑀧𑀦 𑀬𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺 𑀅𑀢𑁆𑀣𑀺, 𑀢𑀢𑁆𑀣 ‘‘𑀅𑀬𑀁 𑀅𑀦𑀼𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀞𑀧𑁂𑀢𑁆𑀯𑀸 𑀧𑀦 𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀅𑀯𑀲𑁂𑀲𑀸 𑀧𑀜𑁆𑀜𑀢𑁆𑀢𑀺𑀬𑁂𑀯𑀸𑀢𑀺 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀙𑀦𑁆𑀤𑀲𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺 𑀏𑀯𑀁 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀧𑀜𑁆𑀜𑀢𑁆𑀢𑀺𑀢𑁄 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺. 𑀆𑀡𑀢𑁆𑀢𑀺𑀬𑀸 𑀅𑀦𑀸𑀧𑀚𑁆𑀚𑀦𑀢𑁄 𑀅𑀦𑀸𑀡𑀢𑁆𑀢𑀺𑀓𑀁. 𑀪𑀺𑀓𑁆𑀔𑀼𑀁 𑀧𑀦 𑀆𑀡𑀸𑀧𑁂𑀦𑁆𑀢𑁄 𑀅𑀓𑀧𑁆𑀧𑀺𑀬𑀲𑀫𑀸𑀤𑀸𑀦𑀸𑀧𑀢𑁆𑀢𑀺𑀢𑁄 𑀦 𑀫𑀼𑀘𑁆𑀘𑀢𑀺, 𑀫𑁂𑀣𑀼𑀦𑀭𑀸𑀕𑁂𑀦 𑀓𑀸𑀬𑀲𑀁𑀲𑀕𑁆𑀕𑁂 𑀤𑀼𑀓𑁆𑀓𑀝𑀁, 𑀚𑀻𑀯𑀫𑀸𑀦𑀓𑀲𑀭𑀻𑀭𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀫𑀕𑁆𑀕𑁂 𑀲𑀘𑁂𑀧𑀺 𑀢𑀘𑀸𑀤𑀻𑀦𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀲𑁄 𑀙𑀺𑀦𑁆𑀦𑁂 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀫𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀢𑀢𑁆𑀣 𑀅𑀦𑁆𑀢𑀫𑀲𑁄 𑀅𑀗𑁆𑀕𑀚𑀸𑀢𑁂 𑀉𑀝𑁆𑀞𑀺𑀢𑀁 𑀅𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀧𑀻𑀴𑀓𑀁 𑀯𑀸 𑀘𑀫𑁆𑀫𑀔𑀺𑀮𑀁 𑀯𑀸 𑀧𑀯𑁂𑀲𑁂𑀦𑁆𑀢𑀲𑁆𑀲𑀸𑀧𑀺 𑀲𑁂𑀯𑀦𑀘𑀺𑀢𑁆𑀢𑁂 𑀲𑀢𑀺 𑀧𑀸𑀭𑀸𑀚𑀺𑀓𑀁, 𑀦𑀝𑁆𑀞𑀓𑀸𑀬𑀧𑁆𑀧𑀲𑀸𑀤𑀁 𑀲𑀼𑀓𑁆𑀔𑀧𑀻𑀴𑀓𑀁 𑀯𑀸 𑀫𑀢𑀘𑀫𑁆𑀫𑀁 𑀯𑀸 𑀮𑁄𑀫𑀁 𑀯𑀸 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀲𑀘𑁂 𑀦𑀺𑀫𑀺𑀢𑁆𑀢𑀲𑀡𑁆𑀞𑀸𑀦𑀫𑀢𑁆𑀢𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀲𑁄 𑀫𑀕𑁆𑀕𑁄 𑀉𑀧𑁆𑀧𑀸𑀝𑀺𑀢𑁄, 𑀢𑀢𑁆𑀣 𑀉𑀧𑀓𑁆𑀓𑀫𑀢𑁄 𑀯𑀡𑀲𑀗𑁆𑀔𑁂𑀧𑀯𑀲𑁂𑀦 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀣𑀸 𑀫𑀦𑀼𑀲𑁆𑀲𑀸𑀦𑀁 𑀅𑀓𑁆𑀔𑀺𑀦𑀸𑀲𑀸𑀓𑀡𑁆𑀡𑀘𑁆𑀙𑀺𑀤𑁆𑀤𑀯𑀢𑁆𑀣𑀺𑀓𑁄𑀲𑁂𑀲𑀼 𑀲𑀢𑁆𑀣𑀓𑁂𑀦 𑀓𑀢𑀯𑀡𑁂 𑀯𑀸, 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀜𑁆𑀘 𑀢𑀺𑀭𑀘𑁆𑀙𑀸𑀦𑀸𑀦𑀁 𑀯𑀢𑁆𑀣𑀺𑀓𑁄𑀲𑀦𑀸𑀲𑀸𑀧𑀼𑀝𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀺𑀭𑀘𑁆𑀙𑀸𑀦𑀸𑀦𑀁 𑀧𑀦 𑀅𑀓𑁆𑀔𑀺𑀓𑀡𑁆𑀡𑀦𑀸𑀲𑀸𑀯𑀡𑁂𑀲𑀼 𑀅𑀳𑀺𑀫𑀘𑁆𑀙𑀸𑀤𑀻𑀦𑀁 𑀧𑀯𑁂𑀲𑀦𑀧𑁆𑀧𑀫𑀸𑀡𑀯𑀺𑀭𑀳𑀺𑀢𑁂 𑀅𑀡𑀼𑀦𑀺𑀫𑀺𑀢𑁆𑀢𑁂 𑀲𑀩𑁆𑀩𑁂𑀲𑀜𑁆𑀘 𑀉𑀧𑀓𑀘𑁆𑀙𑀓𑀸𑀤𑀻𑀲𑀼 𑀲𑁂𑀲𑀲𑀭𑀻𑀭𑁂𑀲𑀼 𑀤𑀼𑀓𑁆𑀓𑀝𑀁. 𑀫𑀢𑀲𑀭𑀻𑀭𑁂 𑀦𑀺𑀫𑀺𑀢𑁆𑀢𑁂 𑀉𑀧𑀟𑁆𑀠𑀓𑁆𑀔𑀸𑀬𑀺𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦 𑀓𑀼𑀣𑀺𑀢𑀁 𑀳𑁄𑀢𑀺, 𑀢𑀸𑀯 𑀣𑀼𑀮𑁆𑀮𑀘𑁆𑀘𑀬𑀁. 𑀓𑀼𑀣𑀺𑀢𑁂 𑀤𑀼𑀓𑁆𑀓𑀝𑀁, 𑀢𑀣𑀸 𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀘𑁆𑀙𑀼𑀧𑀦𑁆𑀢𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀑𑀝𑁆𑀞𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑀚𑀺𑀯𑁆𑀳𑀸𑀬 𑀯𑀸 𑀤𑀦𑁆𑀢𑁂𑀲𑀼 𑀯𑀸 𑀣𑀼𑀮𑁆𑀮𑀘𑁆𑀘𑀬𑀁. 𑀦𑀺𑀫𑀺𑀢𑁆𑀢𑀢𑁄 𑀩𑀳𑀺 𑀧𑀢𑀺𑀢𑀫𑀁𑀲𑀧𑁂𑀲𑀺𑀬𑀁 𑀤𑀼𑀓𑁆𑀓𑀝𑀦𑁆𑀢𑀺 𑀅𑀬𑀫𑁂𑀢𑁆𑀣 𑀆𑀧𑀢𑁆𑀢𑀺𑀪𑁂𑀤𑁄.

𑀅𑀚𑀸𑀦𑀦𑁆𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀯𑁂𑀤𑀦𑀸𑀝𑁆𑀝𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀸𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀏𑀢𑁆𑀣 𑀧𑀦 𑀬𑁄 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀢𑁆𑀢𑀸 𑀧𑀭𑁂𑀦 𑀓𑀢𑀫𑁆𑀧𑀺 𑀉𑀧𑀓𑁆𑀓𑀫𑀁 𑀦 𑀚𑀸𑀦𑀸𑀢𑀺, 𑀲𑁄 𑀅𑀚𑀸𑀦𑀦𑁆𑀢𑁄. 𑀬𑁄 𑀚𑀸𑀦𑀺𑀢𑁆𑀯𑀸𑀧𑀺 𑀦 𑀲𑀸𑀤𑀺𑀬𑀢𑀺, 𑀲𑁄 𑀅𑀲𑀸𑀤𑀺𑀬𑀦𑁆𑀢𑁄. 𑀬𑁄 𑀧𑀺𑀢𑁆𑀢𑀯𑀲𑁂𑀦 𑀅𑀢𑁂𑀓𑀺𑀘𑁆𑀙𑀁 𑀉𑀫𑁆𑀫𑀸𑀤𑀁 𑀧𑀢𑁆𑀢𑁄, 𑀲𑁄 𑀉𑀫𑁆𑀫𑀢𑁆𑀢𑀓𑁄. 𑀬𑀓𑁆𑀔𑁂𑀳𑀺 𑀓𑀢𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄 𑀔𑀺𑀢𑁆𑀢𑀘𑀺𑀢𑁆𑀢𑁄. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀘 𑀏𑀢𑁂𑀲𑀁 𑀅𑀕𑁆𑀕𑀺𑀲𑀼𑀯𑀡𑁆𑀡𑀕𑀽𑀣𑀘𑀦𑁆𑀤𑀦𑀸𑀤𑀻𑀲𑀼 𑀲𑀫𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀅𑀚𑀸𑀦𑀦𑀪𑀸𑀯𑁄𑀯 𑀧𑀫𑀸𑀡𑀁. 𑀬𑁄 𑀅𑀥𑀺𑀫𑀢𑁆𑀢𑀯𑁂𑀤𑀦𑀸𑀬 𑀆𑀢𑀼𑀭𑀢𑁆𑀢𑀸 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀢𑀺, 𑀲𑁄 𑀯𑁂𑀤𑀦𑀸𑀝𑁆𑀝𑁄. 𑀬𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀆𑀤𑀺𑀪𑀽𑀢𑁄, 𑀲𑁄 𑀆𑀤𑀺𑀓𑀫𑁆𑀫𑀺𑀓𑁄. 𑀅𑀬𑀁 𑀧𑀦 𑀅𑀦𑀸𑀧𑀢𑁆𑀢𑀺. 𑀘𑀢𑀽𑀲𑀼 𑀯𑀺𑀧𑀢𑁆𑀢𑀻𑀲𑀼 𑀲𑀻𑀮𑀯𑀺𑀧𑀢𑁆𑀢𑀺. 𑀢𑀲𑁆𑀲𑀸 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀲𑁂𑀯𑀦𑀘𑀺𑀢𑁆𑀢𑀜𑁆𑀘 𑀫𑀕𑁆𑀕𑁂𑀦 𑀫𑀕𑁆𑀕𑀧𑀝𑀺𑀧𑀸𑀤𑀦𑀜𑁆𑀘𑀸𑀢𑀺. 𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑁄 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺, 𑀇𑀫𑀸𑀦𑀺 𑀘 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀦𑀸𑀫 𑀆𑀧𑀢𑁆𑀢𑀺𑀬𑀸 𑀳𑁄𑀦𑁆𑀢𑀺, 𑀦 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀯𑁄𑀳𑀸𑀭𑀲𑀼𑀔𑀢𑁆𑀣𑀁 𑀧𑀦 𑀲𑀩𑁆𑀩𑀝𑁆𑀞𑀓𑀣𑀸𑀲𑀼 𑀲𑀺𑀓𑁆𑀔𑀸𑀧𑀤𑀲𑀻𑀲𑁂𑀦 𑀤𑁂𑀲𑀦𑀸 𑀆𑀕𑀢𑀸, 𑀢𑀲𑁆𑀫𑀸 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀩𑁆𑀬𑀜𑁆𑀚𑀦𑁂 𑀆𑀤𑀭𑀁 𑀅𑀓𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀫𑁂𑀯 𑀕𑀳𑁂𑀢𑀩𑁆𑀩𑀁.

𑀅𑀢𑁆𑀣𑀜𑁆𑀳𑀺 𑀦𑀸𑀣𑁄 𑀲𑀭𑀡𑀁 𑀅𑀯𑁄𑀘;

𑀦 𑀩𑁆𑀬𑀜𑁆𑀚𑀦𑀁 𑀮𑁄𑀓𑀳𑀺𑀢𑁄 𑀫𑀳𑁂𑀲𑀻.

𑀢𑀲𑁆𑀫𑀸 𑀅𑀓𑀢𑁆𑀯𑀸 𑀭𑀢𑀺𑀫𑀓𑁆𑀔𑀭𑁂𑀲𑀼;

𑀅𑀢𑁆𑀣𑁂 𑀦𑀺𑀯𑁂𑀲𑁂𑀬𑁆𑀬 𑀫𑀢𑀺𑀁 𑀫𑀼𑀢𑀻𑀫𑀸𑀢𑀺.

𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸𑀯𑀸𑀢𑀺 𑀏𑀢𑁆𑀣 𑀲𑀩𑁆𑀩𑁄𑀧𑀺 𑀏𑀓𑀓𑀼𑀝𑀺𑀓𑀸𑀤𑀺𑀪𑁂𑀤𑁄 𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸 𑀲𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀅𑀦𑁆𑀢𑀫𑀲𑁄 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀦𑀺𑀯𑀺𑀝𑁆𑀞𑁄 𑀬𑁄 𑀓𑁄𑀘𑀺 𑀲𑀢𑁆𑀣𑁄𑀧𑀺 ‘‘𑀕𑀸𑀫𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀅𑀯𑀲𑁂𑀲𑀁 𑀅𑀭𑀜𑁆𑀜𑀁 𑀦𑀸𑀫. 𑀢𑀢𑁆𑀣 𑀅𑀲𑀫𑁆𑀫𑁄𑀳𑀢𑁆𑀣𑀁 𑀖𑀭𑀁 𑀖𑀭𑀽𑀧𑀘𑀸𑀭𑁄 𑀕𑀸𑀫𑁄 𑀕𑀸𑀫𑀽𑀧𑀘𑀸𑀭𑁄𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀩𑁆𑀩𑀓𑁄𑀲𑀲𑁆𑀲 𑀳𑀺 𑀉𑀤𑀓𑀧𑀢𑀦𑀝𑁆𑀞𑀸𑀦𑀩𑁆𑀪𑀦𑁆𑀢𑀭𑀁 𑀖𑀭𑀁 𑀦𑀸𑀫. 𑀬𑀁 𑀧𑀦 𑀤𑁆𑀯𑀸𑀭𑁂 𑀞𑀺𑀢𑁄 𑀫𑀸𑀢𑀼𑀕𑀸𑀫𑁄 𑀪𑀸𑀚𑀦𑀥𑁄𑀯𑀦𑀉𑀤𑀓𑀁 𑀙𑀟𑁆𑀟𑁂𑀢𑀺, 𑀢𑀲𑁆𑀲 𑀧𑀢𑀦𑀝𑁆𑀞𑀸𑀦𑀜𑁆𑀘 𑀫𑀸𑀢𑀼𑀕𑀸𑀫𑁂𑀦𑁂𑀯 𑀅𑀦𑁆𑀢𑁄𑀕𑁂𑀳𑁂 𑀞𑀺𑀢𑁂𑀦 𑀧𑀓𑀢𑀺𑀬𑀸 𑀩𑀳𑀺 𑀔𑀺𑀢𑁆𑀢𑀲𑁆𑀲 𑀲𑀼𑀧𑁆𑀧𑀲𑁆𑀲 𑀯𑀸 𑀲𑀁𑀫𑀼𑀜𑁆𑀚𑀦𑀺𑀬𑀸 𑀯𑀸 𑀧𑀢𑀦𑀝𑁆𑀞𑀸𑀦𑀜𑁆𑀘 𑀖𑀭𑀲𑁆𑀲 𑀧𑀼𑀭𑀢𑁄 𑀤𑁆𑀯𑀻𑀲𑀼 𑀓𑁄𑀡𑁂𑀲𑀼 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀫𑀚𑁆𑀛𑁂 𑀭𑀼𑀓𑁆𑀔𑀲𑀽𑀘𑀺𑀤𑁆𑀯𑀸𑀭𑀁 𑀞𑀧𑁂𑀢𑁆𑀯𑀸 𑀕𑁄𑀭𑀽𑀧𑀸𑀦𑀁 𑀧𑀯𑁂𑀲𑀦𑀦𑀺𑀯𑀸𑀭𑀡𑀢𑁆𑀣𑀁 𑀓𑀢𑀧𑀭𑀺𑀓𑁆𑀔𑁂𑀧𑁄 𑀘 𑀅𑀬𑀁 𑀲𑀩𑁆𑀩𑁄𑀧𑀺 𑀖𑀭𑀽𑀧𑀘𑀸𑀭𑁄 𑀦𑀸𑀫. 𑀬𑀁 𑀧𑀦 𑀲𑀩𑁆𑀩𑀦𑁆𑀢𑀺𑀫𑀁 𑀖𑀭𑀁 𑀳𑁄𑀢𑀺, 𑀢𑀲𑁆𑀲 𑀖𑀭𑀲𑁆𑀲 𑀢𑀸𑀤𑀺𑀲𑁂 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀬𑀣𑀸 𑀢𑀭𑀼𑀡𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀩𑀸𑀳𑀼𑀁 𑀧𑀲𑀸𑀭𑁂𑀢𑁆𑀯𑀸 𑀮𑁂𑀟𑁆𑀟𑀼𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀔𑀺𑀢𑁆𑀢𑀲𑁆𑀲 𑀮𑁂𑀟𑁆𑀟𑀼𑀲𑁆𑀲 𑀧𑀢𑀦𑀝𑁆𑀞𑀸𑀦𑀩𑁆𑀪𑀦𑁆𑀢𑀭𑀁 𑀕𑀸𑀫𑁄 𑀦𑀸𑀫. 𑀢𑀢𑁄 𑀅𑀜𑁆𑀜𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫. 𑀧𑀢𑀺𑀢𑀲𑁆𑀲 𑀧𑀦 𑀮𑁂𑀟𑁆𑀟𑀼𑀦𑁄 𑀧𑀯𑀢𑁆𑀢𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑀁 𑀦 𑀕𑀳𑁂𑀢𑀩𑁆𑀩𑀁. 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀬𑁂𑀯 𑀕𑀸𑀫𑀲𑁆𑀲 𑀧𑀭𑀺𑀘𑁆𑀙𑁂𑀤𑁄, 𑀢𑀲𑁆𑀲 𑀲𑀘𑁂 𑀤𑁆𑀯𑁂 𑀇𑀦𑁆𑀤𑀔𑀺𑀮𑀸 𑀳𑁄𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀺𑀫𑁂 𑀇𑀦𑁆𑀤𑀔𑀺𑀮𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀩𑁆𑀪𑀦𑁆𑀢𑀭𑀁 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫. 𑀧𑀤𑀪𑀸𑀚𑀦𑁂𑀧𑀺 (𑀧𑀸𑀭𑀸. 𑁯𑁨) 𑀳𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑁆𑀯𑀸𑀬𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑁄 𑀤𑀲𑁆𑀲𑀺𑀢𑁄, 𑀢𑀲𑁆𑀲 𑀯𑀲𑁂𑀦 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀼 𑀆𑀧𑀢𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸. 𑀇𑀢𑀺 𑀇𑀫𑀁 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀅𑀯𑀲𑁂𑀲𑀁 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀅𑀭𑀜𑁆𑀜𑀁 𑀦𑀸𑀫. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯 𑀘𑁂𑀢𑀁 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸𑀯𑀸’’𑀢𑀺. 𑀬𑁂 𑀧𑀦 𑀇𑀫𑁂𑀲𑀁 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀖𑀭𑀖𑀭𑀽𑀧𑀘𑀸𑀭𑀕𑀸𑀫𑀽𑀧𑀘𑀸𑀭𑀸 𑀯𑀼𑀢𑁆𑀢𑀸, 𑀢𑀢𑁄𑀧𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀁 𑀅𑀯𑀳𑀭𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺𑀬𑁂𑀯.

𑀅𑀤𑀺𑀦𑁆𑀦𑀦𑁆𑀢𑀺 𑀅𑀜𑁆𑀜𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲 𑀲𑀦𑁆𑀢𑀓𑀁. 𑀣𑁂𑀬𑁆𑀬𑀲𑀗𑁆𑀔𑀸𑀢𑀦𑁆𑀢𑀺 𑀏𑀢𑁆𑀣 𑀣𑁂𑀦𑁄𑀢𑀺 𑀘𑁄𑀭𑁄, 𑀣𑁂𑀦𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁, 𑀅𑀯𑀳𑀭𑀡𑀘𑀺𑀢𑁆𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀗𑁆𑀔𑀸 𑀲𑀗𑁆𑀔𑀸𑀢𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁, 𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀦𑀸𑀫𑀁 ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁮𑁦; 𑀫𑀳𑀸𑀦𑀺. 𑁧𑁦𑁯) 𑀯𑀺𑀬. 𑀣𑁂𑀬𑁆𑀬𑀜𑁆𑀘 𑀢𑀁 𑀲𑀗𑁆𑀔𑀸𑀢𑀜𑁆𑀘𑀸𑀢𑀺 𑀣𑁂𑀬𑁆𑀬𑀲𑀗𑁆𑀔𑀸𑀢𑀁, 𑀣𑁂𑀬𑁆𑀬𑀘𑀺𑀢𑁆𑀢𑀲𑀗𑁆𑀔𑀸𑀢𑁄 𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀲𑁆𑀫𑀸 𑀣𑁂𑀬𑁆𑀬𑀲𑀗𑁆𑀔𑀸𑀢𑁂𑀦𑀸𑀢𑀺 𑀅𑀢𑁆𑀣𑀢𑁄 𑀤𑀝𑁆𑀞𑀩𑁆𑀩𑀁. 𑀬𑁄 𑀘 𑀣𑁂𑀬𑁆𑀬𑀲𑀗𑁆𑀔𑀸𑀢𑁂𑀦 𑀆𑀤𑀺𑀬𑀢𑀺, 𑀲𑁄 𑀬𑀲𑁆𑀫𑀸 𑀣𑁂𑀬𑁆𑀬𑀘𑀺𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀅𑀯𑀳𑀭𑀡𑀘𑀺𑀢𑁆𑀢𑁄’’𑀢𑀺 (𑀧𑀸𑀭𑀸. 𑁯𑁨) 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀤𑀺𑀬𑁂𑀬𑁆𑀬𑀸𑀢𑀺 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀳𑀭𑁂𑀬𑁆𑀬. 𑀢𑁂 𑀧𑀦 𑀅𑀯𑀳𑀸𑀭𑀸 𑀧𑀜𑁆𑀘 𑀧𑀜𑁆𑀘𑀓𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀧𑀜𑁆𑀘 𑀧𑀜𑁆𑀘𑀓𑀸𑀦𑀺 𑀦𑀸𑀫 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁 𑀏𑀓𑀪𑀡𑁆𑀟𑀧𑀜𑁆𑀘𑀓𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 𑀏𑀢𑀲𑁆𑀲𑁂𑀯 𑀧𑀤𑀲𑁆𑀲 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸𑀦𑀁 ‘‘𑀆𑀤𑀺𑀬𑁂𑀬𑁆𑀬 𑀳𑀭𑁂𑀬𑁆𑀬 𑀅𑀯𑀳𑀭𑁂𑀬𑁆𑀬 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀬𑁆𑀬 𑀞𑀸𑀦𑀸 𑀘𑀸𑀯𑁂𑀬𑁆𑀬𑀸’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀣 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀯𑀲𑁂𑀦 𑀤𑀝𑁆𑀞𑀩𑁆𑀩𑀁, 𑀇𑀢𑀭𑀁 𑀲𑀯𑀺𑀜𑁆𑀜𑀸𑀡𑀓𑀯𑀲𑁂𑀦𑁂𑀯. 𑀓𑀣𑀁? 𑀆𑀤𑀺𑀬𑁂𑀬𑁆𑀬𑀸𑀢𑀺 𑀆𑀭𑀸𑀫𑀁 𑀅𑀪𑀺𑀬𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀳𑀭𑁂𑀬𑁆𑀬𑀸𑀢𑀺 𑀅𑀜𑁆𑀜𑀲𑁆𑀲 𑀪𑀡𑁆𑀟𑀁 𑀳𑀭𑀦𑁆𑀢𑁄 𑀲𑀻𑀲𑁂 𑀪𑀸𑀭𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀁. 𑀨𑀦𑁆𑀤𑀸𑀧𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀔𑀦𑁆𑀥𑀁 𑀑𑀭𑁄𑀧𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀯𑀳𑀭𑁂𑀬𑁆𑀬𑀸𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀪𑀡𑁆𑀟𑀁 ‘‘𑀤𑁂𑀳𑀺 𑀫𑁂 𑀪𑀡𑁆𑀟’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀦𑀸𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀪𑀡𑀢𑀺, 𑀤𑀼𑀓𑁆𑀓𑀝𑀁. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀧𑀸𑀭𑀸𑀚𑀺𑀓𑀁. 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀬𑁆𑀬𑀸𑀢𑀺 ‘‘𑀲𑀳 𑀪𑀡𑁆𑀟𑀳𑀸𑀭𑀓𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀞𑀸𑀦𑀸 𑀘𑀸𑀯𑁂𑀬𑁆𑀬𑀸𑀢𑀺 𑀣𑀮𑀝𑁆𑀞𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀁. 𑀨𑀦𑁆𑀤𑀸𑀧𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀏𑀯𑀁 𑀢𑀸𑀯 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀲𑀸𑀫𑀺𑀓𑀲𑁆𑀲 𑀧𑀦 𑀤𑀸𑀲𑀲𑁆𑀲 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀅𑀪𑀺𑀬𑁄𑀕𑀸𑀤𑀺𑀦𑀸 𑀦𑀬𑁂𑀦 𑀆𑀤𑀺𑀬𑀦𑀳𑀭𑀡𑀅𑀯𑀳𑀭𑀡𑀇𑀭𑀺𑀬𑀸𑀧𑀣𑀯𑀺𑀓𑁄𑀧𑀦𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀏𑀓𑀪𑀡𑁆𑀟𑀧𑀜𑁆𑀘𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀓𑀢𑀫𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁? 𑀲𑀸𑀳𑀢𑁆𑀣𑀺𑀓𑁄 𑀆𑀡𑀢𑁆𑀢𑀺𑀓𑁄 𑀦𑀺𑀲𑁆𑀲𑀕𑁆𑀕𑀺𑀬𑁄 𑀅𑀢𑁆𑀣𑀲𑀸𑀥𑀓𑁄 𑀥𑀼𑀭𑀦𑀺𑀓𑁆𑀔𑁂𑀧𑁄𑀢𑀺. 𑀢𑀢𑁆𑀣 𑀲𑀸𑀳𑀢𑁆𑀣𑀺𑀓𑁄 𑀦𑀸𑀫 𑀧𑀭𑀲𑁆𑀲 𑀪𑀡𑁆𑀟𑀁 𑀲𑀳𑀢𑁆𑀣𑀸 𑀅𑀯𑀳𑀭𑀢𑀺. 𑀆𑀡𑀢𑁆𑀢𑀺𑀓𑁄 𑀦𑀸𑀫 ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁄 𑀦𑀸𑀫 𑀲𑀼𑀗𑁆𑀓𑀖𑀸𑀢𑀓𑀧𑀭𑀺𑀓𑀧𑁆𑀧𑀺𑀢𑁄𑀓𑀸𑀲𑀸𑀦𑀁 𑀅𑀦𑁆𑀢𑁄 𑀞𑀢𑁆𑀯𑀸 𑀩𑀳𑀺 𑀧𑀸𑀢𑀦𑀁. 𑀅𑀢𑁆𑀣𑀲𑀸𑀥𑀓𑁄 𑀦𑀸𑀫 ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀢𑀺, 𑀢𑀤𑀸 𑀢𑀁 𑀅𑀯𑀳𑀭𑀸’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺. 𑀢𑀢𑁆𑀣 𑀲𑀘𑁂 𑀧𑀭𑁄 𑀅𑀦𑀦𑁆𑀢𑀭𑀸𑀬𑀺𑀓𑁄 𑀳𑀼𑀢𑁆𑀯𑀸 𑀢𑀁 𑀅𑀯𑀳𑀭𑀢𑀺, 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀧𑀭𑀲𑁆𑀲 𑀯𑀸 𑀧𑀦 𑀢𑁂𑀮𑀓𑀼𑀫𑁆𑀪𑀺𑀬𑀸 𑀧𑀸𑀤𑀕𑁆𑀖𑀦𑀓𑀢𑁂𑀮𑀁 𑀅𑀯𑀲𑁆𑀲𑀁 𑀧𑀺𑀯𑀦𑀓𑀸𑀦𑀺 𑀉𑀧𑀸𑀳𑀦𑀸𑀤𑀻𑀦𑀺 𑀧𑀓𑁆𑀔𑀺𑀧𑀢𑀺, 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀥𑀼𑀭𑀦𑀺𑀓𑁆𑀔𑁂𑀧𑁄 𑀧𑀦 𑀆𑀭𑀸𑀫𑀸𑀪𑀺𑀬𑁄𑀕𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀸𑀯𑀓𑀸𑀮𑀺𑀓𑀪𑀡𑁆𑀟𑀤𑁂𑀬𑁆𑀬𑀸𑀦𑀺 𑀅𑀤𑁂𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯𑀦𑀬𑁄𑀢𑀺 𑀇𑀤𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁.

𑀓𑀢𑀫𑀁 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁? 𑀧𑀼𑀩𑁆𑀩𑀧𑀬𑁄𑀕𑁄 𑀲𑀳𑀧𑀬𑁄𑀕𑁄 𑀲𑀁𑀯𑀺𑀥𑀸𑀯𑀳𑀸𑀭𑁄 𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺. 𑀢𑀢𑁆𑀣 𑀆𑀡𑀢𑁆𑀢𑀺𑀯𑀲𑁂𑀦 𑀧𑀼𑀩𑁆𑀩𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀞𑀸𑀦𑀸 𑀘𑀸𑀯𑀦𑀯𑀲𑁂𑀦, 𑀔𑀺𑀮𑀸𑀤𑀻𑀦𑀺 𑀲𑀗𑁆𑀓𑀸𑀫𑁂𑀢𑁆𑀯𑀸 𑀔𑁂𑀢𑁆𑀢𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀘 𑀲𑀳𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀁𑀯𑀺𑀥𑀸𑀯𑀳𑀸𑀭𑁄 𑀦𑀸𑀫 ‘‘𑀅𑀲𑀼𑀓𑀁 𑀦𑀸𑀫 𑀪𑀡𑁆𑀟𑀁 𑀅𑀯𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀲𑀁𑀫𑀦𑁆𑀢𑀬𑀺𑀢𑁆𑀯𑀸 𑀅𑀯𑀳𑀭𑀡𑀁. 𑀏𑀯𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀕𑀢𑁂𑀲𑀼 𑀳𑀺 𑀏𑀓𑁂𑀦𑀸𑀧𑀺 𑀢𑀲𑁆𑀫𑀺𑀁 𑀪𑀡𑁆𑀟𑁂 𑀞𑀸𑀦𑀸 𑀘𑀸𑀯𑀺𑀢𑁂 𑀲𑀩𑁆𑀩𑁂𑀲𑀁 𑀅𑀯𑀳𑀸𑀭𑀸 𑀳𑁄𑀦𑁆𑀢𑀺. 𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀸𑀫 𑀲𑀜𑁆𑀚𑀸𑀦𑀦𑀓𑀫𑁆𑀫𑀁. 𑀲𑀘𑁂 𑀳𑀺 𑀧𑀼𑀭𑁂𑀪𑀢𑁆𑀢𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀓𑀸𑀮𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀅𑀲𑀼𑀓𑀲𑁆𑀫𑀺𑀁 𑀓𑀸𑀮𑁂 𑀇𑀢𑁆𑀣𑀦𑁆𑀦𑀸𑀫𑀁 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁄 𑀲𑀗𑁆𑀓𑁂𑀢𑀢𑁄 𑀅𑀧𑀘𑁆𑀙𑀸 𑀅𑀧𑀼𑀭𑁂 𑀢𑀁 𑀅𑀯𑀳𑀭𑀢𑀺, 𑀲𑀗𑁆𑀓𑁂𑀢𑀓𑀸𑀭𑀓𑀲𑁆𑀲 𑀲𑀗𑁆𑀓𑁂𑀢𑀓𑀭𑀡𑀓𑁆𑀔𑀡𑁂𑀬𑁂𑀯 𑀅𑀯𑀳𑀸𑀭𑁄. 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀲𑀜𑁆𑀜𑀼𑀧𑁆𑀧𑀸𑀤𑀦𑀢𑁆𑀣𑀁 𑀅𑀓𑁆𑀔𑀺𑀦𑀺𑀓𑁆𑀔𑀡𑀸𑀤𑀺𑀦𑀺𑀫𑀺𑀢𑁆𑀢𑀓𑀭𑀡𑀁. 𑀲𑀘𑁂 𑀳𑀺 𑀏𑀯𑀁 𑀓𑀢𑀦𑀺𑀫𑀺𑀢𑁆𑀢𑀢𑁄 𑀅𑀧𑀘𑁆𑀙𑀸 𑀅𑀧𑀼𑀭𑁂 ‘‘𑀬𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁄, 𑀢𑀁 𑀅𑀯𑀳𑀭𑀢𑀺, 𑀦𑀺𑀫𑀺𑀢𑁆𑀢𑀓𑀸𑀭𑀓𑀲𑁆𑀲 𑀦𑀺𑀫𑀺𑀢𑁆𑀢𑀓𑀭𑀡𑀓𑁆𑀔𑀡𑁂𑀬𑁂𑀯 𑀅𑀯𑀳𑀸𑀭𑁄𑀢𑀺 𑀇𑀤𑀁 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁.

𑀓𑀢𑀫𑀁 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀁? 𑀣𑁂𑀬𑁆𑀬𑀸𑀯𑀳𑀸𑀭𑁄 𑀧𑀲𑀬𑁆𑀳𑀸𑀯𑀳𑀸𑀭𑁄 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄 𑀓𑀼𑀲𑀸𑀯𑀳𑀸𑀭𑁄𑀢𑀺. 𑀢𑀢𑁆𑀣 𑀬𑁄 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀦𑀺 𑀓𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁄 𑀅𑀯𑀳𑀭𑀢𑀺, 𑀓𑀽𑀝𑀫𑀸𑀦𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺 𑀯𑀸 𑀯𑀜𑁆𑀘𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀣𑁂𑀬𑁆𑀬𑀸𑀯𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀧𑀦 𑀧𑀲𑀬𑁆𑀳 𑀩𑀮𑀓𑁆𑀓𑀸𑀭𑁂𑀦 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀕𑀡𑁆𑀳𑀸𑀢𑀺 𑀕𑀸𑀫𑀖𑀸𑀢𑀓𑀸𑀤𑀬𑁄 𑀯𑀺𑀬, 𑀅𑀢𑁆𑀢𑀦𑁄 𑀧𑀢𑁆𑀢𑀩𑀮𑀺𑀢𑁄 𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀺𑀓𑀁 𑀕𑀡𑁆𑀳𑀸𑀢𑀺 𑀭𑀸𑀚𑀪𑀝𑀸𑀤𑀬𑁄 𑀯𑀺𑀬, 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀧𑀲𑀬𑁆𑀳𑀸𑀯𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀕𑀳𑀡𑀁 𑀧𑀦 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀦𑀸𑀫. 𑀲𑁄 𑀪𑀡𑁆𑀟𑁄𑀓𑀸𑀲𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀭𑀸𑀬𑀁 𑀪𑀡𑁆𑀟𑀧𑀭𑀺𑀓𑀧𑁆𑀧𑁄 𑁋 𑀲𑀸𑀝𑀓𑀢𑁆𑀣𑀺𑀓𑁄 𑀅𑀦𑁆𑀢𑁄𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀲𑀘𑁂 𑀲𑀸𑀝𑀓𑁄 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀲𑀘𑁂 𑀲𑀼𑀢𑁆𑀢𑀁, 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀅𑀦𑁆𑀥𑀓𑀸𑀭𑁂 𑀧𑀲𑀺𑀩𑁆𑀩𑀓𑀁 𑀕𑀡𑁆𑀳𑀸𑀢𑀺, 𑀢𑀢𑁆𑀭 𑀘𑁂 𑀲𑀸𑀝𑀓𑁄 𑀳𑁄𑀢𑀺, 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀲𑀼𑀢𑁆𑀢𑀁 𑀘𑁂 𑀳𑁄𑀢𑀺, 𑀭𑀓𑁆𑀔𑀢𑀺. 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 ‘‘𑀲𑀼𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸 𑀧𑀼𑀦 𑀆𑀳𑀭𑀺𑀢𑁆𑀯𑀸 𑀞𑀧𑁂𑀢𑀺, 𑀭𑀓𑁆𑀔𑀢𑀺𑀬𑁂𑀯. ‘‘𑀲𑀼𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸𑀧𑀺 ‘‘𑀬𑀁 𑀮𑀤𑁆𑀥𑀁, 𑀢𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀕𑀘𑁆𑀙𑀢𑀺, 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. ‘‘𑀘𑁄𑀭𑁄 𑀘𑁄𑀭𑁄’’𑀢𑀺 𑀅𑀦𑀼𑀩𑀦𑁆𑀥𑁄 𑀙𑀝𑁆𑀝𑁂𑀢𑁆𑀯𑀸 𑀧𑀮𑀸𑀬𑀢𑀺, 𑀭𑀓𑁆𑀔𑀢𑀺. 𑀲𑀸𑀫𑀺𑀓𑀸 𑀤𑀺𑀲𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀭𑀓𑁆𑀔𑀢𑀺 𑀬𑁂𑀯. 𑀅𑀜𑁆𑀜𑁄 𑀘𑁂 𑀓𑁄𑀘𑀺 𑀕𑀡𑁆𑀳𑀸𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀲𑀸𑀫𑀺𑀓𑁂𑀲𑀼 𑀦𑀺𑀯𑀢𑁆𑀢𑁂𑀲𑀼 𑀲𑀬𑀁 𑀤𑀺𑀲𑁆𑀯𑀸 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 ‘‘𑀧𑀕𑁂𑀯𑁂𑀢𑀁 𑀫𑀬𑀸 𑀕𑀳𑀺𑀢𑀁, 𑀫𑀫 𑀤𑀸𑀦𑀺 𑀲𑀦𑁆𑀢𑀓’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀢𑀢𑁆𑀣 𑀬𑁆𑀯𑀸𑀬𑀁 ‘‘𑀲𑀘𑁂 𑀲𑀸𑀝𑀓𑁄 𑀪𑀯𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑁄 𑀧𑀭𑀺𑀓𑀧𑁆𑀧𑁄, 𑀅𑀬𑀁 𑀪𑀡𑁆𑀟𑀧𑀭𑀺𑀓𑀧𑁆𑀧𑁄 𑀦𑀸𑀫.

𑀑𑀓𑀸𑀲𑀧𑀭𑀺𑀓𑀧𑁆𑀧𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀏𑀓𑀘𑁆𑀘𑁄 𑀧𑀦 𑀧𑀭𑀧𑀭𑀺𑀯𑁂𑀡𑀸𑀤𑀻𑀦𑀺 𑀧𑀯𑀺𑀝𑁆𑀞𑁄 𑀓𑀺𑀜𑁆𑀘𑀺 𑀮𑁄𑀪𑀦𑁂𑀬𑁆𑀬𑀁 𑀪𑀡𑁆𑀟𑀁 𑀤𑀺𑀲𑁆𑀯𑀸 𑀕𑀩𑁆𑀪𑀤𑁆𑀯𑀸𑀭𑀧𑀫𑀼𑀔𑀳𑁂𑀝𑁆𑀞𑀸𑀧𑀸𑀲𑀸𑀤𑀤𑁆𑀯𑀸𑀭𑀓𑁄𑀝𑁆𑀞𑀓𑀭𑀼𑀓𑁆𑀔𑀫𑀽𑀮𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 ‘‘𑀲𑀘𑁂 𑀫𑀁 𑀏𑀢𑁆𑀣𑀦𑁆𑀢𑀭𑁂 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀤𑀝𑁆𑀞𑀼𑀓𑀸𑀫𑀢𑀸𑀬 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀯𑀺𑀬 𑀤𑀲𑁆𑀲𑀸𑀫𑀺, 𑀦𑁄 𑀘𑁂 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀢𑀁 𑀆𑀤𑀸𑀬 𑀧𑀭𑀺𑀓𑀧𑁆𑀧𑀺𑀢𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀅𑀯𑀳𑀸𑀭𑁄 𑀳𑁄𑀢𑀺. 𑀇𑀢𑀺 𑀬𑁆𑀯𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀯𑀢𑁆𑀢𑁄 𑀧𑀭𑀺𑀓𑀧𑁆𑀧𑁄, 𑀅𑀬𑀁 𑀑𑀓𑀸𑀲𑀧𑀭𑀺𑀓𑀧𑁆𑀧𑁄 𑀦𑀸𑀫. 𑀏𑀯𑀫𑀺𑀫𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀭𑀺𑀓𑀧𑁆𑀧𑀸𑀦𑀁 𑀯𑀲𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 ‘‘𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀦 𑀅𑀯𑀳𑀭𑀡𑀁 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄 𑀦𑀸𑀫. 𑀲𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁄 𑀪𑀺𑀓𑁆𑀔𑀼 𑀉𑀬𑁆𑀬𑀸𑀦𑀸𑀤𑀻𑀲𑀼 𑀧𑀭𑁂𑀲𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀞𑀧𑀺𑀢𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸𑀤𑀻𑀦𑀺 𑀤𑀺𑀲𑁆𑀯𑀸 ‘‘𑀧𑀘𑁆𑀙𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀁𑀲𑀼𑀦𑀸 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑀲𑁆𑀲 𑀏𑀢𑁆𑀢𑀸𑀯𑀢𑀸 𑀉𑀤𑁆𑀥𑀸𑀭𑁄 𑀦𑀢𑁆𑀣𑀻𑀢𑀺 𑀦 𑀢𑀸𑀯 𑀅𑀯𑀳𑀸𑀭𑁄 𑀳𑁄𑀢𑀺. 𑀬𑀤𑀸 𑀧𑀦 𑀲𑀸𑀫𑀺𑀓𑀸 𑀯𑀺𑀘𑀺𑀦𑀦𑁆𑀢𑀸 𑀅𑀧𑀲𑁆𑀲𑀺𑀢𑁆𑀯𑀸 ‘‘𑀲𑁆𑀯𑁂 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀮𑀬𑀸𑀯 𑀕𑀢𑀸 𑀳𑁄𑀦𑁆𑀢𑀺, 𑀅𑀣𑀲𑁆𑀲 𑀢𑀁 𑀉𑀤𑁆𑀥𑀭𑀢𑁄 𑀉𑀤𑁆𑀥𑀸𑀭𑁂 𑀅𑀯𑀳𑀸𑀭𑁄. 𑀧𑀝𑀺𑀘𑁆𑀙𑀦𑁆𑀦𑀓𑀸𑀮𑁂𑀬𑁂𑀯 ‘‘𑀏𑀢𑀁 𑀫𑀫 𑀲𑀦𑁆𑀢𑀓’’𑀦𑁆𑀢𑀺 𑀲𑀓𑀲𑀜𑁆𑀜𑀸𑀬 𑀯𑀸 ‘‘𑀕𑀢𑀸 𑀤𑀸𑀦𑀺 𑀢𑁂, 𑀙𑀝𑁆𑀝𑀺𑀢𑀪𑀡𑁆𑀟𑀁 𑀇𑀤’’𑀦𑁆𑀢𑀺 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀪𑀡𑁆𑀟𑀤𑁂𑀬𑁆𑀬𑀁. 𑀢𑁂𑀲𑀼 𑀤𑀼𑀢𑀺𑀬𑀢𑀢𑀺𑀬𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀅𑀤𑀺𑀲𑁆𑀯𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀕𑀢𑁂𑀲𑀼𑀧𑀺 𑀕𑀳𑀺𑀢𑀁 𑀪𑀡𑁆𑀟𑀤𑁂𑀬𑁆𑀬𑀫𑁂𑀯. 𑀧𑀘𑁆𑀙𑀸 𑀜𑀢𑁆𑀯𑀸 𑀘𑁄𑀤𑀺𑀬𑀫𑀸𑀦𑀲𑁆𑀲 𑀅𑀤𑀤𑀢𑁄 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂 𑀅𑀯𑀳𑀸𑀭𑁄 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀲𑁆𑀲 𑀧𑀬𑁄𑀕𑁂𑀦 𑀢𑁂𑀳𑀺 𑀦 𑀤𑀺𑀝𑁆𑀞𑀁. 𑀬𑁄 𑀧𑀦 𑀢𑀣𑀸𑀭𑀽𑀧𑀁 𑀪𑀡𑁆𑀟𑀁 𑀬𑀣𑀸𑀞𑀸𑀦𑁂 𑀞𑀺𑀢𑀁𑀬𑁂𑀯 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁄 𑀧𑀸𑀤𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 𑀓𑀤𑁆𑀤𑀫𑁂 𑀯𑀸 𑀯𑀸𑀮𑀼𑀓𑀸𑀬 𑀯𑀸 𑀧𑀯𑁂𑀲𑁂𑀢𑀺, 𑀢𑀲𑁆𑀲 𑀧𑀯𑁂𑀲𑀺𑀢𑀫𑀢𑁆𑀢𑁂𑀬𑁂𑀯 𑀅𑀯𑀳𑀸𑀭𑁄.

𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀧𑀦 𑀅𑀯𑀳𑀭𑀡𑀁 𑀓𑀼𑀲𑀸𑀯𑀳𑀸𑀭𑁄 𑀦𑀸𑀫. 𑀲𑁄𑀧𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁄 𑀪𑀺𑀓𑁆𑀔𑀼 𑀯𑀺𑀮𑀻𑀯𑀫𑀬𑀁 𑀯𑀸 𑀢𑀸𑀮𑀧𑀡𑁆𑀡𑀫𑀬𑀁 𑀯𑀸 𑀓𑀢𑀲𑀜𑁆𑀜𑀸𑀡𑀁 𑀬𑀁𑀓𑀺𑀜𑁆𑀘𑀺 𑀓𑀼𑀲𑀁 𑀧𑀸𑀢𑁂𑀢𑁆𑀯𑀸 𑀘𑀻𑀯𑀭𑁂 𑀪𑀸𑀚𑀻𑀬𑀫𑀸𑀦𑁂 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀲𑁆𑀲 𑀲𑀫𑀻𑀧𑁂 𑀞𑀺𑀢𑀁 𑀅𑀧𑁆𑀧𑀕𑁆𑀖𑀢𑀭𑀁 𑀯𑀸 𑀫𑀳𑀕𑁆𑀖𑀢𑀭𑀁 𑀯𑀸 𑀲𑀫𑀲𑀫𑀁 𑀯𑀸 𑀅𑀕𑁆𑀖𑁂𑀦 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑀁 𑀳𑀭𑀺𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀧𑀢𑀺𑀢𑀁 𑀓𑀼𑀲𑀁 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀢𑀼𑀓𑀸𑀫𑀢𑀸𑀬 𑀉𑀤𑁆𑀥𑀭𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑁂 𑀧𑀸𑀢𑀺𑀢𑁂 𑀭𑀓𑁆𑀔𑀢𑁂𑀯. 𑀬𑀤𑀸 𑀧𑀦 𑀢𑀲𑁆𑀫𑀺𑀁 𑀧𑀢𑀺𑀢𑁂 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑀢𑁄 𑀧𑀭𑀲𑁆𑀲 𑀓𑀼𑀲𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀢𑀫𑀢𑁆𑀢𑁂 𑀅𑀯𑀳𑀸𑀭𑁄. 𑀲𑀘𑁂 𑀧𑀞𑀫𑀢𑀭𑀁 𑀧𑀭𑀓𑁄𑀝𑁆𑀞𑀸𑀲𑀢𑁄 𑀧𑀭𑀲𑁆𑀲 𑀓𑀼𑀲𑀁 𑀉𑀤𑁆𑀥𑀭𑀢𑀺, 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀢𑀼𑀓𑀸𑀫𑀢𑀸𑀬 𑀉𑀤𑁆𑀥𑀸𑀭𑁂 𑀭𑀓𑁆𑀔𑀢𑀺, 𑀧𑀸𑀢𑀦𑁂𑀧𑀺 𑀭𑀓𑁆𑀔𑀢𑀺, 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀢𑁄 𑀧𑀦 𑀅𑀢𑁆𑀢𑀦𑁄 𑀓𑀼𑀲𑀁 𑀉𑀤𑁆𑀥𑀭𑀢𑁄 𑀉𑀤𑁆𑀥𑀸𑀭𑁂𑀬𑁂𑀯 𑀭𑀓𑁆𑀔𑀢𑀺, 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀭𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀦𑁆𑀢𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀅𑀯𑀳𑀸𑀭𑁄. 𑀅𑀬𑀁 𑀓𑀼𑀲𑀸𑀯𑀳𑀸𑀭𑁄. 𑀇𑀢𑀺 𑀬𑀁 𑀯𑀼𑀢𑁆𑀢𑀁 ‘‘𑀆𑀤𑀺𑀬𑁂𑀬𑁆𑀬𑀸𑀢𑀺 𑀧𑀜𑁆𑀘𑀯𑀻𑀲𑀢𑀺𑀬𑀸 𑀅𑀯𑀳𑀸𑀭𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀳𑀭𑁂𑀬𑁆𑀬𑀸’’𑀢𑀺, 𑀢𑀲𑁆𑀲𑀢𑁆𑀣𑁄 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀬𑀣𑀸𑀭𑀽𑀧𑁂𑀢𑀺 𑀬𑀸𑀤𑀺𑀲𑁂. 𑀅𑀤𑀺𑀦𑁆𑀦𑀸𑀤𑀸𑀦𑁂𑀢𑀺 𑀅𑀤𑀺𑀦𑁆𑀦𑀲𑁆𑀲 𑀧𑀭𑀲𑀦𑁆𑀢𑀓𑀲𑁆𑀲 𑀕𑀳𑀡𑁂. 𑀭𑀸𑀚𑀸𑀦𑁄𑀢𑀺𑀇𑀤𑀁 𑀩𑀺𑀫𑁆𑀩𑀺𑀲𑀸𑀭𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀜𑁆𑀜𑁂 𑀧𑀦 𑀢𑀣𑀸 𑀓𑀭𑁂𑀬𑁆𑀬𑀼𑀁 𑀯𑀸 𑀦 𑀓𑀭𑁂𑀬𑁆𑀬𑀼𑀁 𑀯𑀸𑀢𑀺 𑀢𑁂 𑀦𑀧𑁆𑀧𑀫𑀸𑀡𑀁. 𑀳𑀦𑁂𑀬𑁆𑀬𑀼𑀁 𑀯𑀸𑀢𑀺 𑀳𑀢𑁆𑀣𑀸𑀤𑀻𑀳𑀺 𑀯𑀸 𑀧𑁄𑀣𑁂𑀬𑁆𑀬𑀼𑀁, 𑀲𑀢𑁆𑀣𑁂𑀦 𑀯𑀸 𑀙𑀺𑀦𑁆𑀤𑁂𑀬𑁆𑀬𑀼𑀁. 𑀩𑀦𑁆𑀥𑁂𑀬𑁆𑀬𑀼𑀁 𑀯𑀸𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀦𑁆𑀥𑁂𑀬𑁆𑀬𑀼𑀁 𑀯𑀸. 𑀧𑀩𑁆𑀩𑀸𑀚𑁂𑀬𑁆𑀬𑀼𑀁 𑀯𑀸𑀢𑀺 𑀦𑀻𑀳𑀭𑁂𑀬𑁆𑀬𑀼𑀁 𑀯𑀸. 𑀘𑁄𑀭𑁄𑀲𑀺 𑀩𑀸𑀮𑁄𑀲𑀺 𑀫𑀽𑀴𑁆𑀳𑁄𑀲𑀺 𑀣𑁂𑀦𑁄𑀲𑀻𑀢𑀺 𑀇𑀫𑁂𑀳𑀺 𑀯𑀘𑀦𑁂𑀳𑀺 𑀧𑀭𑀺𑀪𑀸𑀲𑁂𑀬𑁆𑀬𑀼𑀁. 𑀓𑀻𑀤𑀺𑀲𑀲𑁆𑀲 𑀧𑀦 𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑁂 𑀭𑀸𑀚𑀸𑀦𑁄 𑀏𑀯𑀁 𑀓𑀭𑁄𑀦𑁆𑀢𑀺? 𑀧𑀸𑀤𑀲𑁆𑀲 𑀯𑀸 𑀧𑀸𑀤𑀸𑀭𑀳𑀲𑁆𑀲 𑀯𑀸. 𑀢𑀣𑀸𑀭𑀽𑀧𑀁 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀆𑀤𑀺𑀬𑀫𑀸𑀦𑁄𑀢𑀺 𑀢𑀸𑀤𑀺𑀲𑀁 𑀪𑀺𑀓𑁆𑀔𑀼 𑀧𑁄𑀭𑀸𑀡𑀓𑀲𑁆𑀲 𑀓𑀳𑀸𑀧𑀡𑀲𑁆𑀲 𑀧𑀸𑀤𑀁 𑀯𑀸 𑀧𑀸𑀤𑀸𑀭𑀳𑀁 𑀯𑀸 𑀪𑀡𑁆𑀟𑀁 𑀅𑀤𑀺𑀦𑁆𑀦𑀁 𑀪𑀽𑀫𑀺𑀆𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀁 𑀬𑀁𑀓𑀺𑀜𑁆𑀘𑀺 𑀲𑀚𑀻𑀯𑀦𑀺𑀚𑁆𑀚𑀻𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀅𑀯𑀳𑀸𑀭𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀅𑀯𑀳𑀸𑀭𑁂𑀦 𑀅𑀯𑀳𑀭𑀦𑁆𑀢𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀢𑀢𑁄 𑀅𑀢𑀺𑀭𑁂𑀓𑀢𑀭𑀲𑁆𑀫𑀺𑀦𑁆𑀢𑀺.

𑀭𑀸𑀚𑀕𑀳𑁂 𑀥𑀦𑀺𑀬𑀢𑁆𑀣𑁂𑀭𑀁 𑀆𑀭𑀩𑁆𑀪 𑀭𑀜𑁆𑀜𑁄 𑀤𑀸𑀭𑀽𑀦𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀲𑀸𑀡𑀢𑁆𑀢𑀺𑀓𑀁, 𑀳𑀭𑀡𑀢𑁆𑀣𑀸𑀬 𑀕𑀫𑀦𑀸𑀤𑀺𑀓𑁂 𑀧𑀼𑀩𑁆𑀩𑀧𑁆𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀆𑀫𑀲𑀦𑁂 𑀤𑀼𑀓𑁆𑀓𑀝𑀁, 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀦𑁄 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀆𑀤𑀺𑀬𑀦𑁆𑀢𑀲𑁆𑀲 𑀫𑀸𑀲𑀓𑁂 𑀯𑀸 𑀊𑀦𑀫𑀸𑀲𑀓𑁂 𑀯𑀸 𑀤𑀼𑀓𑁆𑀓𑀝𑀁, 𑀅𑀢𑀺𑀭𑁂𑀓𑀫𑀸𑀲𑀓𑁂 𑀯𑀸 𑀊𑀦𑀧𑀜𑁆𑀘𑀫𑀸𑀲𑀓𑁂 𑀯𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀜𑁆𑀘𑀫𑀸𑀲𑀓𑁂 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑁂 𑀯𑀸 𑀧𑀸𑀭𑀸𑀚𑀺𑀓𑀁. 𑀲𑀩𑁆𑀩𑀢𑁆𑀣 𑀕𑀳𑀡𑀓𑀸𑀮𑀯𑀲𑁂𑀦 𑀘 𑀕𑀳𑀡𑀤𑁂𑀲𑀯𑀲𑁂𑀦 𑀘 𑀧𑀭𑀺𑀪𑁄𑀕𑀪𑀸𑀚𑀦𑀧𑀭𑀺𑀯𑀢𑁆𑀢𑀦𑀸𑀤𑀻𑀳𑀺 𑀘 𑀧𑀭𑀺𑀳𑀻𑀦𑀸𑀧𑀭𑀺𑀳𑀻𑀦𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀓𑀲𑀜𑁆𑀜𑀺𑀲𑁆𑀲, 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂, 𑀢𑀸𑀯𑀓𑀸𑀮𑀺𑀓𑁂, 𑀧𑁂𑀢𑀧𑀭𑀺𑀕𑁆𑀕𑀳𑁂, 𑀢𑀺𑀭𑀘𑁆𑀙𑀸𑀦𑀕𑀢𑀧𑀭𑀺𑀕𑁆𑀕𑀳𑁂, 𑀧𑀁𑀲𑀼𑀓𑀽𑀮𑀲𑀜𑁆𑀜𑀺𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑀻𑀮𑀯𑀺𑀧𑀢𑁆𑀢𑀺, 𑀅𑀜𑁆𑀜𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲 𑀯𑀲𑁂𑀦 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀢𑀸, 𑀕𑀭𑀼𑀧𑀭𑀺𑀓𑁆𑀔𑀸𑀭𑁄, 𑀣𑁂𑀬𑁆𑀬𑀘𑀺𑀢𑁆𑀢𑀁, 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀅𑀯𑀳𑀸𑀭𑀸𑀦𑀁 𑀯𑀲𑁂𑀦 𑀅𑀯𑀳𑀭𑀡𑀜𑁆𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀢𑀢𑀺𑀬𑁂 𑀲𑀜𑁆𑀘𑀺𑀘𑁆𑀘𑀸𑀢𑀺 𑀲𑀁𑀘𑁂𑀢𑁂𑀢𑁆𑀯𑀸 𑀲𑀤𑁆𑀥𑀺𑀁 𑀘𑁂𑀢𑁂𑀢𑁆𑀯𑀸. ‘‘𑀧𑀸𑀡𑁄’’𑀢𑀺𑀲𑀜𑁆𑀜𑀸𑀬 𑀲𑀤𑁆𑀥𑀺𑀁𑀬𑁂𑀯 ‘‘𑀯𑀥𑀸𑀫𑀺 𑀦’’𑀦𑁆𑀢𑀺 𑀯𑀥𑀓𑀘𑁂𑀢𑀦𑀸𑀬 𑀘𑁂𑀢𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀦𑁆𑀢𑀺 𑀓𑀮𑀮𑀢𑁄 𑀧𑀝𑁆𑀞𑀸𑀬 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑀭𑀻𑀭𑀁. 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺 𑀓𑀮𑀮𑀓𑀸𑀮𑁂𑀧𑀺 𑀢𑀸𑀧𑀦𑀫𑀤𑁆𑀤𑀦𑁂𑀳𑀺 𑀯𑀸 𑀪𑁂𑀲𑀚𑁆𑀚𑀲𑀫𑁆𑀧𑀤𑀸𑀦𑁂𑀦 𑀯𑀸 𑀢𑀢𑁄 𑀯𑀸 𑀉𑀤𑁆𑀥𑀫𑁆𑀧𑀺 𑀢𑀤𑀦𑀼𑀭𑀽𑀧𑁂𑀦 𑀉𑀧𑀓𑁆𑀓𑀫𑁂𑀦 𑀚𑀻𑀯𑀺𑀢𑀸 𑀯𑀺𑀬𑁄𑀚𑁂𑀬𑁆𑀬. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀧𑀸𑀡𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀸𑀡𑀸𑀢𑀺𑀧𑀸𑀢𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀸𑀡𑀸𑀢𑀺𑀧𑀸𑀢𑀻 𑀯𑁂𑀤𑀺𑀢𑀩𑁆𑀩𑁄, 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀸𑀡𑁄𑀢𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀬𑀸𑀬 𑀘𑁂𑀢𑀦𑀸𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀸 𑀘𑁂𑀢𑀦𑀸. 𑀧𑀸𑀡𑀸𑀢𑀺𑀧𑀸𑀢𑀻𑀢𑀺 𑀯𑀼𑀢𑁆𑀢𑀘𑁂𑀢𑀦𑀸𑀬 𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄. 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀬𑁄𑀕𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀙 𑀧𑀬𑁄𑀕𑀸 𑀲𑀸𑀳𑀢𑁆𑀣𑀺𑀓𑁄 𑀦𑀺𑀲𑁆𑀲𑀕𑁆𑀕𑀺𑀬𑁄 𑀆𑀡𑀢𑁆𑀢𑀺𑀓𑁄 𑀣𑀸𑀯𑀭𑁄 𑀯𑀺𑀚𑁆𑀚𑀸𑀫𑀬𑁄 𑀇𑀤𑁆𑀥𑀺𑀫𑀬𑁄𑀢𑀺. 𑀢𑀢𑁆𑀣 𑀲𑀸𑀳𑀢𑁆𑀣𑀺𑀓𑁄𑀢𑀺 𑀲𑀬𑀁 𑀫𑀸𑀭𑁂𑀦𑁆𑀢𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀳𑀭𑀡𑀁. 𑀦𑀺𑀲𑁆𑀲𑀕𑁆𑀕𑀺𑀬𑁄𑀢𑀺 𑀤𑀽𑀭𑁂 𑀞𑀺𑀢𑀁 𑀫𑀸𑀭𑁂𑀢𑀼𑀓𑀸𑀫𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀉𑀲𑀼𑀲𑀢𑁆𑀢𑀺𑀬𑀦𑁆𑀢𑀧𑀸𑀲𑀸𑀡𑀸𑀤𑀻𑀦𑀁 𑀦𑀺𑀲𑁆𑀲𑀚𑁆𑀚𑀦𑀁. 𑀢𑀢𑁆𑀣 𑀏𑀓𑁂𑀓𑁄 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀉𑀤𑁆𑀤𑀺𑀲𑁆𑀲𑀓𑁂 𑀬𑀁 𑀉𑀤𑁆𑀤𑀺𑀲𑁆𑀲 𑀧𑀳𑀭𑀢𑀺, 𑀢𑀲𑁆𑀲𑁂𑀯 𑀫𑀭𑀡𑁂𑀦 𑀓𑀫𑁆𑀫𑀩𑀤𑁆𑀥𑁄. ‘‘𑀬𑁄 𑀓𑁄𑀘𑀺 𑀫𑀭𑀢𑀽’’𑀢𑀺 𑀏𑀯𑀁 𑀅𑀦𑀼𑀤𑁆𑀤𑀺𑀲𑁆𑀲𑀓𑁂 𑀧𑀳𑀸𑀭𑀧𑁆𑀧𑀘𑁆𑀘𑀬𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀫𑀭𑀡𑁂𑀦 𑀓𑀫𑁆𑀫𑀩𑀤𑁆𑀥𑁄. 𑀉𑀪𑀬𑀢𑁆𑀣𑀸𑀧𑀺 𑀘 𑀧𑀳𑀭𑀺𑀢𑀫𑀢𑁆𑀢𑁂 𑀯𑀸 𑀫𑀭𑀢𑀼, 𑀧𑀘𑁆𑀙𑀸 𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦, 𑀧𑀳𑀭𑀺𑀢𑀓𑁆𑀔𑀡𑁂𑀬𑁂𑀯 𑀓𑀫𑁆𑀫𑀩𑀤𑁆𑀥𑁄. 𑀆𑀡𑀢𑁆𑀢𑀺𑀓𑁄𑀢𑀺 ‘‘𑀅𑀲𑀼𑀓𑀁 𑀦𑀸𑀫 𑀫𑀸𑀭𑁂𑀳𑀻’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 𑀆𑀡𑀸𑀧𑀦𑀁.

𑀢𑀢𑁆𑀣 𑁋

𑀯𑀢𑁆𑀣𑀼 𑀓𑀸𑀮𑁄 𑀘 𑀑𑀓𑀸𑀲𑁄, 𑀆𑀯𑀼𑀥𑀁 𑀇𑀭𑀺𑀬𑀸𑀧𑀣𑁄;

𑀓𑁆𑀭𑀺𑀬𑀸𑀯𑀺𑀲𑁂𑀲𑁄𑀢𑀺 𑀇𑀫𑁂, 𑀙 𑀆𑀡𑀢𑁆𑀢𑀺 𑀦𑀺𑀬𑀸𑀫𑀓𑀸.

𑀢𑀢𑁆𑀣 𑀯𑀢𑁆𑀣𑀽𑀢𑀺 𑀧𑀼𑀕𑁆𑀕𑀮𑁄. 𑀬𑀜𑁆𑀳𑀺 𑀧𑀼𑀕𑁆𑀕𑀮𑀁 ‘‘𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁄 𑀲𑀘𑁂 𑀢𑀫𑁂𑀯 𑀫𑀸𑀭𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀆𑀧𑀢𑁆𑀢𑀺. 𑀅𑀣 𑀅𑀜𑁆𑀜𑀁 𑀫𑀸𑀭𑁂𑀢𑀺, 𑀢𑀁𑀫𑀜𑁆𑀜𑀫𑀸𑀦𑁄 𑀯𑀸 𑀅𑀜𑁆𑀜𑀁 𑀫𑀸𑀭𑁂𑀢𑀺, 𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀺. ‘‘𑀇𑀫𑀁 𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁂 𑀧𑀦 𑀆𑀡𑀸𑀧𑀓𑀲𑁆𑀲 𑀤𑀼𑀓𑁆𑀓𑀝𑀁. 𑀓𑀸𑀮𑁄𑀢𑀺 𑀧𑀼𑀭𑁂𑀪𑀢𑁆𑀢𑀸𑀤𑀺𑀓𑀸𑀮𑁄. 𑀲𑀘𑁂 𑀳𑀺 ‘‘𑀧𑀼𑀭𑁂𑀪𑀢𑁆𑀢𑀁 𑀫𑀸𑀭𑁂𑀳𑀻’’𑀢𑀺 𑀆𑀡𑀢𑁆𑀢𑁄 𑀧𑀼𑀭𑁂𑀪𑀢𑁆𑀢𑀫𑁂𑀯 𑀫𑀸𑀭𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀆𑀧𑀢𑁆𑀢𑀺. 𑀅𑀣 𑀬𑀁 𑀧𑀼𑀭𑁂𑀪𑀢𑁆𑀢𑀁 𑀦𑀺𑀬𑀸𑀫𑀺𑀢𑀁, 𑀢𑀢𑁄 𑀧𑀘𑁆𑀙𑀸 𑀯𑀸 𑀧𑀼𑀭𑁂 𑀯𑀸 𑀫𑀸𑀭𑁂𑀢𑀺, 𑀆𑀡𑀸𑀧𑀓𑁄 𑀫𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀣𑀸𑀯𑀭𑁄𑀢𑀺 𑀅𑀲𑀁𑀳𑀸𑀭𑀺𑀫𑁂𑀦 𑀉𑀧𑀓𑀭𑀡𑁂𑀦 𑀫𑀸𑀭𑁂𑀢𑀼𑀓𑀸𑀫𑀲𑁆𑀲 𑀑𑀧𑀸𑀢𑀓𑁆𑀔𑀡𑀦𑀁 𑀅𑀧𑀲𑁆𑀲𑁂𑀦𑀲𑀁𑀯𑀺𑀥𑀸𑀦𑀁 𑀅𑀲𑀺𑀆𑀤𑀻𑀦𑀁 𑀉𑀧𑀦𑀺𑀓𑁆𑀔𑀺𑀧𑀦𑀁 𑀢𑀴𑀸𑀓𑀸𑀤𑀻𑀲𑀼 𑀯𑀺𑀲𑀲𑀫𑁆𑀧𑀬𑁄𑀚𑀦𑀁 𑀭𑀽𑀧𑀽𑀧𑀳𑀸𑀭𑁄𑀢𑀺𑀏𑀯𑀫𑀸𑀤𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑁂𑀢𑁆𑀣𑀸𑀧𑀺 𑀉𑀤𑁆𑀤𑀺𑀲𑁆𑀲𑀸𑀦𑀼𑀤𑁆𑀤𑀺𑀲𑁆𑀲𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀚𑁆𑀚𑀸𑀫𑀬𑁄𑀢𑀺 𑀫𑀸𑀭𑀡𑀢𑁆𑀣𑀁 𑀯𑀺𑀚𑁆𑀚𑀸𑀧𑀭𑀺𑀚𑀧𑁆𑀧𑀦𑀁. 𑀇𑀤𑁆𑀥𑀺𑀫𑀬𑁄𑀢𑀺 𑀓𑀫𑁆𑀫𑀯𑀺𑀧𑀸𑀓𑀚𑀸𑀬 𑀇𑀤𑁆𑀥𑀺𑀬𑀸 𑀧𑀬𑁄𑀚𑀦𑀁.

𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀏𑀢𑁆𑀣 𑀳𑀭𑀢𑀻𑀢𑀺 𑀳𑀸𑀭𑀓𑀁, 𑀓𑀺𑀁 𑀳𑀭𑀢𑀺? 𑀚𑀻𑀯𑀺𑀢𑀁. 𑀅𑀣 𑀯𑀸 𑀳𑀭𑀺𑀢𑀩𑁆𑀩𑀦𑁆𑀢𑀺 𑀳𑀸𑀭𑀓𑀁, 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀜𑁆𑀘 𑀢𑀁 𑀳𑀸𑀭𑀓𑀜𑁆𑀘𑀸𑀢𑀺 𑀲𑀢𑁆𑀣𑀳𑀸𑀭𑀓𑀁. 𑀅𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲. 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀬𑀣𑀸 𑀮𑀪𑀢𑀺, 𑀢𑀣𑀸 𑀓𑀭𑁂𑀬𑁆𑀬, 𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀣𑀸𑀯𑀭𑀧𑀬𑁄𑀕𑀁 𑀤𑀲𑁆𑀲𑁂𑀢𑀺. 𑀇𑀢𑀭𑀣𑀸 𑀳𑀺 𑀧𑀭𑀺𑀬𑀺𑀝𑁆𑀞𑀺𑀫𑀢𑁆𑀢𑁂𑀬𑁂𑀯 𑀧𑀸𑀭𑀸𑀚𑀺𑀓𑁄 𑀪𑀯𑁂𑀬𑁆𑀬, 𑀦 𑀘𑁂𑀢𑀁 𑀬𑀼𑀢𑁆𑀢𑀁. 𑀧𑀤𑀪𑀸𑀚𑀦𑁂 𑀧𑀦𑀲𑁆𑀲 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀬𑀁 𑀏𑀢𑁆𑀣 𑀣𑀸𑀯𑀭𑀧𑀬𑁄𑀕𑀲𑀗𑁆𑀕𑀳𑀺𑀢𑀁 𑀲𑀢𑁆𑀣𑀁, 𑀢𑀤𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀺𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸𑀢𑀺 𑀯𑀸𑀘𑀸𑀬 𑀯𑀸 𑀢𑀸𑀮𑀧𑀡𑁆𑀡𑀸𑀤𑀻𑀲𑀼 𑀮𑀺𑀔𑀺𑀢𑁆𑀯𑀸 𑀯𑀸 ‘‘𑀬𑁄 𑀏𑀯𑀁 𑀫𑀭𑀢𑀺, 𑀲𑁄 𑀥𑀦𑀁 𑀯𑀸 𑀮𑀪𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀭𑀡𑁂 𑀕𑀼𑀡𑀁 𑀧𑀓𑀸𑀲𑁂𑀬𑁆𑀬. 𑀏𑀢𑁂𑀦 𑀬𑀣𑀸 ‘‘𑀅𑀤𑀺𑀦𑁆𑀦𑀸𑀤𑀸𑀦𑁂 𑀆𑀤𑀺𑀬𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀸𑀬𑀓𑀣𑀸𑀬 𑀫𑀼𑀘𑁆𑀘𑀢𑀺, 𑀦𑀬𑀺𑀥, 𑀏𑀯𑀁 ‘‘𑀲𑀁𑀯𑀡𑁆𑀡𑁂𑀬𑁆𑀬𑀸’’𑀢𑀺 𑀯𑀘𑀦𑀢𑁄 𑀧𑀦 𑀇𑀥 𑀧𑀭𑀺𑀬𑀸𑀬𑀓𑀣𑀸𑀬𑀧𑀺 𑀦 𑀫𑀼𑀘𑁆𑀘𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀭𑀡𑀸𑀬 𑀯𑀸 𑀲𑀫𑀸𑀤𑀧𑁂𑀬𑁆𑀬𑀸𑀢𑀺 ‘‘𑀲𑀢𑁆𑀣𑀁 𑀯𑀸 𑀆𑀳𑀭𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁧𑁭𑁨) 𑀦𑀬𑁂𑀦 𑀫𑀭𑀡𑀢𑁆𑀣𑀸𑀬 𑀉𑀧𑀸𑀬𑀁 𑀕𑀸𑀳𑀸𑀧𑁂𑀬𑁆𑀬. 𑀏𑀢𑁂𑀦 𑀆𑀡𑀢𑁆𑀢𑀺𑀓𑀧𑁆𑀧𑀬𑁄𑀕𑀁 𑀤𑀲𑁆𑀲𑁂𑀢𑀺. 𑀅𑀫𑁆𑀪𑁄 𑀧𑀼𑀭𑀺𑀲𑀸𑀢𑀺 𑀆𑀮𑀧𑀦𑀫𑁂𑀢𑀁. 𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸𑀢𑀺𑀆𑀤𑀺 𑀲𑀁𑀯𑀡𑁆𑀡𑀦𑀸𑀓𑀸𑀭𑀦𑀺𑀤𑀲𑁆𑀲𑀦𑀁. 𑀇𑀢𑀺 𑀘𑀺𑀢𑁆𑀢𑀫𑀦𑁄𑀢𑀺 𑀇𑀢𑀺 𑀘𑀺𑀢𑁆𑀢𑁄 𑀇𑀢𑀺 𑀫𑀦𑁄. ‘‘𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄’’𑀢𑀺𑀏𑀢𑁆𑀣 𑀯𑀼𑀢𑁆𑀢𑀫𑀭𑀡𑀘𑀺𑀢𑁆𑀢𑁄 𑀫𑀭𑀡𑀫𑀦𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀫𑀦𑁄’’𑀢𑀺𑀇𑀤𑀁 𑀘𑀺𑀢𑁆𑀢𑀲𑁆𑀲 𑀅𑀢𑁆𑀣𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀬𑀁 𑀘𑀺𑀢𑁆𑀢𑀁 𑀢𑀁 𑀫𑀦𑁄’’𑀢𑀺 (𑀧𑀸𑀭𑀸. 𑁧𑁭𑁨) 𑀆𑀳. 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄𑀢𑀺 𑀯𑀺𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄. 𑀏𑀢𑁆𑀣𑀸𑀧𑀺 𑀇𑀢𑀺-𑀲𑀤𑁆𑀤𑁄 𑀆𑀳𑀭𑀺𑀢𑀩𑁆𑀩𑁄. ‘‘𑀲𑀗𑁆𑀓𑀧𑁆𑀧𑁄’’𑀢𑀺 𑀘 𑀲𑀁𑀯𑀺𑀤𑀳𑀦𑀫𑀢𑁆𑀢𑀲𑁆𑀲𑁂𑀢𑀁 𑀦𑀸𑀫𑀁, 𑀦 𑀯𑀺𑀢𑀓𑁆𑀓𑀲𑁆𑀲𑁂𑀯. 𑀢𑀜𑁆𑀘 𑀲𑀁𑀯𑀺𑀤𑀳𑀦𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀲𑀜𑁆𑀜𑀸𑀘𑁂𑀢𑀦𑀸𑀥𑀺𑀧𑁆𑀧𑀸𑀬𑁂𑀳𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 ‘‘𑀇𑀢𑀺 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄’’𑀢𑀺 ‘‘𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄’’𑀢𑀺𑀏𑀢𑁆𑀣 𑀯𑀼𑀢𑁆𑀢𑀫𑀭𑀡𑀲𑀜𑁆𑀜𑀻 𑀫𑀭𑀡𑀘𑁂𑀢𑀦𑁄 𑀫𑀭𑀡𑀸𑀥𑀺𑀧𑁆𑀧𑀸𑀬𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀤𑀪𑀸𑀚𑀦𑁂𑀧𑀺 𑀳𑀺 𑀅𑀬𑀫𑁂𑀯 𑀦𑀬𑁄 𑀤𑀲𑁆𑀲𑀺𑀢𑁄. 𑀏𑀢𑁂𑀦 𑀫𑀭𑀡𑀘𑀺𑀢𑁆𑀢𑀸𑀤𑀻𑀳𑀺 𑀯𑀺𑀦𑀸 ‘‘𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀯𑀻𑀭𑀺𑀬𑀫𑀸𑀭𑀪𑀢𑁄 𑀤𑀴𑁆𑀳’’𑀦𑁆𑀢𑀺𑀆𑀤𑀺𑀦𑀸 (𑀥. 𑀧. 𑁧𑁧𑁨) 𑀦𑀬𑁂𑀦 𑀥𑀫𑁆𑀫𑀁 𑀪𑀸𑀲𑀦𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀉𑀘𑁆𑀘𑀸𑀯𑀘𑁂𑀦 𑀓𑀸𑀭𑀡𑁂𑀦. 𑀧𑀼𑀦 𑀫𑀭𑀡𑀯𑀡𑁆𑀡𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀯𑀘𑀦𑀁. 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀢𑀗𑁆𑀔𑀡𑀽𑀧𑀧𑀦𑁆𑀦𑀫𑁆𑀧𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀯𑀼𑀢𑁆𑀢𑀦𑀬𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺.

𑀯𑁂𑀲𑀸𑀮𑀺𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀅𑀜𑁆𑀜𑀫𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀫𑀭𑀡𑀯𑀡𑁆𑀡𑀁 𑀯𑀸’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀲𑀸𑀡𑀢𑁆𑀢𑀺𑀓𑀁, 𑀫𑀸𑀭𑀡𑀢𑁆𑀣𑀸𑀬 𑀑𑀧𑀸𑀢𑀓𑁆𑀔𑀡𑀦𑀸𑀤𑀻𑀲𑀼 𑀤𑀼𑀓𑁆𑀓𑀝𑀁, 𑀅𑀦𑁄𑀤𑀺𑀲𑁆𑀲 𑀔𑀢𑁂 𑀑𑀧𑀸𑀢𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀢𑀦𑁂𑀧𑀺 𑀤𑀼𑀓𑁆𑀓𑀝𑀁, 𑀬𑀓𑁆𑀔𑀧𑁂𑀢𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀘 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀁 𑀤𑀼𑀓𑁆𑀓𑀝𑀫𑁂𑀯, 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀁 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀣𑀸 𑀬𑀓𑁆𑀔𑀸𑀤𑀻𑀦𑀁 𑀫𑀭𑀡𑁂, 𑀢𑀺𑀭𑀘𑁆𑀙𑀸𑀦𑀕𑀢𑀫𑀭𑀡𑁂 𑀧𑀦 𑀧𑀸𑀘𑀺𑀢𑁆𑀢𑀺𑀬𑀁, 𑀫𑀦𑀼𑀲𑁆𑀲𑀫𑀭𑀡𑁂 𑀧𑀸𑀭𑀸𑀚𑀺𑀓𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀧𑀬𑁄𑀕𑀪𑁂𑀤𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀜𑁆𑀘𑀺𑀘𑁆𑀘 𑀫𑀸𑀭𑁂𑀦𑁆𑀢𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀢𑀢𑁆𑀣 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 ‘‘𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀇𑀫𑀁 𑀫𑀸𑀭𑁂𑀫𑀻’’𑀢𑀺 𑀅𑀘𑁂𑀢𑁂𑀢𑁆𑀯𑀸 𑀓𑀢𑁂𑀦 𑀉𑀧𑀓𑁆𑀓𑀫𑁂𑀦 𑀫𑀼𑀲𑀮𑀼𑀲𑁆𑀲𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 (𑀧𑀸𑀭𑀸. 𑁧𑁮𑁦 𑀆𑀤𑀬𑁄) 𑀯𑀺𑀬 𑀧𑀭𑁂 𑀫𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 ‘‘𑀇𑀫𑀺𑀦𑀸 𑀅𑀬𑀁 𑀫𑀭𑀺𑀲𑁆𑀲𑀢𑀻’’𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀯𑀺𑀲𑀕𑀢𑀧𑀺𑀡𑁆𑀟𑀧𑀸𑀢𑀯𑀢𑁆𑀣𑀼𑀲𑁆𑀫𑀺𑀁 (𑀧𑀸𑀭𑀸. 𑁧𑁮𑁧) 𑀯𑀺𑀬 𑀧𑀭𑁂 𑀫𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀫𑀭𑀡𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀉𑀧𑀓𑁆𑀓𑀫𑁂𑀦 𑀪𑁂𑀲𑀚𑁆𑀚𑀯𑀢𑁆𑀣𑀼𑀲𑁆𑀫𑀺𑀁 (𑀧𑀸𑀭𑀸. 𑁧𑁮𑁭) 𑀯𑀺𑀬 𑀧𑀭𑁂 𑀫𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀏𑀯𑀁 𑀅𑀲𑀜𑁆𑀘𑀺𑀘𑁆𑀘𑀸𑀢𑀺𑀆𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀻𑀮𑀯𑀺𑀧𑀢𑁆𑀢𑀺, 𑀫𑀦𑀼𑀲𑁆𑀲𑀚𑀸𑀢𑀺𑀓𑀧𑀸𑀡𑁄, 𑀧𑀸𑀡𑀲𑀜𑁆𑀜𑀺𑀢𑀸, 𑀯𑀥𑀓𑀘𑀺𑀢𑁆𑀢𑀁, 𑀉𑀧𑀓𑁆𑀓𑀫𑁄, 𑀢𑁂𑀦 𑀫𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀉𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀅𑀦𑀪𑀺𑀚𑀸𑀦𑀦𑁆𑀢𑀺 𑀲𑀓𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀢𑁆𑀢𑀦𑀺 𑀅𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑁄. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀦𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀛𑀸𑀬𑀻𑀦𑀜𑁆𑀘𑁂𑀯 𑀅𑀭𑀺𑀬𑀸𑀦𑀜𑁆𑀘 𑀥𑀫𑁆𑀫𑀁. 𑀅𑀢𑁆𑀢𑀼𑀧𑀦𑀸𑀬𑀺𑀓𑀦𑁆𑀢𑀺 𑀅𑀢𑁆𑀢𑀦𑀺 𑀢𑀁 𑀉𑀧𑀦𑁂𑀢𑀺 ‘‘𑀫𑀬𑀺 𑀅𑀢𑁆𑀣𑀻’’𑀢𑀺 𑀲𑀫𑀼𑀤𑀸𑀘𑀭𑀦𑁆𑀢𑁄, 𑀅𑀢𑁆𑀢𑀸𑀦𑀁 𑀯𑀸 𑀢𑀢𑁆𑀣 𑀉𑀧𑀦𑁂𑀢𑀺 ‘‘𑀅𑀳𑀁 𑀏𑀢𑁆𑀣 𑀲𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀫𑀼𑀤𑀸𑀘𑀭𑀦𑁆𑀢𑁄𑀢𑀺 𑀅𑀢𑁆𑀢𑀼𑀧𑀦𑀸𑀬𑀺𑀓𑁄, 𑀢𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁. 𑀏𑀯𑀁 𑀓𑀢𑁆𑀯𑀸 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀦𑁆𑀢𑀺𑀏𑀢𑁆𑀣 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸 𑀚𑀸𑀦𑀦𑀝𑁆𑀞𑁂𑀦 𑀜𑀸𑀡𑀁, 𑀘𑀓𑁆𑀔𑀼𑀦𑀸 𑀘 𑀤𑀺𑀝𑁆𑀞𑀫𑀺𑀯 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀓𑀭𑀡𑀢𑁄 𑀤𑀲𑁆𑀲𑀦𑀢𑁆𑀣𑁂𑀦 𑀤𑀲𑁆𑀲𑀦𑀦𑁆𑀢𑀺 𑀜𑀸𑀡𑀤𑀲𑁆𑀲𑀦𑀁, 𑀅𑀭𑀺𑀬𑀁 𑀯𑀺𑀲𑀼𑀤𑁆𑀥𑀁 𑀉𑀢𑁆𑀢𑀫𑀁 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀁, 𑀅𑀮𑀁 𑀧𑀭𑀺𑀬𑀢𑁆𑀢𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀁 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀫𑁂𑀢𑁆𑀣 𑀛𑀸𑀦𑀸𑀤𑀺𑀪𑁂𑀤𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂, 𑀅𑀮𑀁 𑀯𑀸 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀫𑀲𑁆𑀲𑀸𑀢𑀺 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑁄, 𑀢𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀁. 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀓𑀢𑁆𑀯𑀸 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀢𑀤𑀼𑀪𑀬𑁂𑀦 𑀯𑀸 𑀯𑀺𑀜𑁆𑀜𑀼𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲 𑀆𑀭𑁄𑀘𑁂𑀬𑁆𑀬. 𑀇𑀢𑀺 𑀚𑀸𑀦𑀸𑀫𑀺 𑀇𑀢𑀺 𑀧𑀲𑁆𑀲𑀸𑀫𑀻𑀢𑀺 𑀲𑀫𑀼𑀤𑀸𑀘𑀭𑀡𑀸𑀓𑀸𑀭𑀤𑀲𑁆𑀲𑀦𑀫𑁂𑀢𑀁, 𑀅𑀢𑁆𑀢𑀼𑀧𑀦𑀸𑀬𑀺𑀓𑀜𑁆𑀳𑀺 𑀓𑀢𑁆𑀯𑀸 𑀯𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑁄 𑀏𑀯𑀁 𑀲𑀫𑀼𑀤𑀸𑀘𑀭𑀢𑀺, 𑀢𑀲𑁆𑀫𑀸 𑀬𑁆𑀯𑀸𑀬𑀁 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁨𑁦𑁯) ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁, 𑀲𑀫𑀸𑀧𑀚𑁆𑀚𑀸𑀫𑀺, 𑀲𑀫𑀸𑀧𑀦𑁆𑀦𑁄’’𑀢𑀺𑀆𑀤𑀺𑀪𑁂𑀤𑁄 𑀯𑀼𑀢𑁆𑀢𑁄, 𑀲𑁄 𑀲𑀩𑁆𑀩𑁄 𑀇𑀥𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀇𑀢𑀺 𑀚𑀸𑀦𑀸𑀫𑀺 𑀇𑀢𑀺 𑀧𑀲𑁆𑀲𑀸𑀫𑀻’’𑀢𑀺 𑀳𑀺 𑀯𑀤𑀦𑁆𑀢𑁄 𑀦 𑀬𑀺𑀤𑀁 𑀯𑀘𑀦𑀫𑀢𑁆𑀢𑀫𑁂𑀯 𑀯𑀤𑀢𑀺, 𑀅𑀣 𑀔𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦 𑀅𑀬𑀁 𑀥𑀫𑁆𑀫𑁄 𑀫𑀬𑀺 𑀅𑀢𑁆𑀣𑀻’’𑀢𑀺 𑀤𑀻𑀧𑁂𑀢𑀺, ‘‘𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀆𑀤𑀻𑀦𑀺 𑀘 𑀯𑀤𑀦𑁆𑀢𑁂𑀦 𑀳𑀺 𑀲𑀫𑀸𑀧𑀚𑁆𑀚𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀅𑀢𑁆𑀣𑀺𑀢𑀸 𑀤𑀻𑀧𑀺𑀢𑀸 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁆𑀯𑀸𑀬𑀁 𑀧𑀤𑀪𑀸𑀚𑀦𑁂 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁, 𑀲𑀫𑀸𑀧𑀚𑁆𑀚𑀸𑀫𑀺, 𑀲𑀫𑀸𑀧𑀦𑁆𑀦𑁄𑀢𑀺𑀆𑀤𑀺𑀪𑁂𑀤𑁄 𑀯𑀼𑀢𑁆𑀢𑁄, 𑀲𑁄 𑀲𑀩𑁆𑀩𑁄 𑀇𑀥𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺. 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀢𑀢𑁄 𑀆𑀭𑁄𑀘𑀺𑀢𑀓𑀸𑀮𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀮𑁂. 𑀇𑀢𑀺 𑀆𑀧𑀢𑁆𑀢𑀺𑀧𑀝𑀺𑀚𑀸𑀦𑀦𑀓𑀸𑀮𑀤𑀲𑁆𑀲𑀦𑀫𑁂𑀢𑀁, 𑀅𑀬𑀁 𑀧𑀦 𑀆𑀭𑁄𑀘𑀺𑀢𑀓𑁆𑀔𑀡𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀆𑀧𑀢𑁆𑀢𑀺𑀁 𑀧𑀦 𑀆𑀧𑀦𑁆𑀦𑁄 𑀬𑀲𑁆𑀫𑀸 𑀧𑀭𑁂𑀦 𑀘𑁄𑀤𑀺𑀢𑁄 𑀯𑀸 𑀅𑀘𑁄𑀤𑀺𑀢𑁄 𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀢𑀲𑁆𑀫𑀸 ‘‘𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸 𑀅𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀆𑀧𑀦𑁆𑀦𑁄𑀢𑀺 𑀆𑀭𑁄𑀘𑀺𑀢𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄. 𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁄𑀢𑀺 𑀅𑀢𑁆𑀢𑀦𑁄 𑀕𑀺𑀳𑀺𑀪𑀸𑀯𑀸𑀤𑀺𑀓𑀁 𑀯𑀺𑀲𑀼𑀤𑁆𑀥𑀺𑀁 𑀅𑀧𑁂𑀓𑁆𑀔𑀫𑀸𑀦𑁄 𑀇𑀘𑁆𑀙𑀫𑀸𑀦𑁄. 𑀅𑀬𑀜𑁆𑀳𑀺 𑀬𑀲𑁆𑀫𑀸 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄, 𑀢𑀲𑁆𑀫𑀸 𑀪𑀺𑀓𑁆𑀔𑀼𑀪𑀸𑀯𑁂 𑀞𑀢𑁆𑀯𑀸 𑀅𑀪𑀩𑁆𑀩𑁄 𑀛𑀸𑀦𑀸𑀤𑀻𑀦𑀺 𑀅𑀥𑀺𑀕𑀦𑁆𑀢𑀼𑀁, 𑀇𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑁄 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀦 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀕𑀺𑀳𑀺 𑀯𑀸 𑀉𑀧𑀸𑀲𑀓𑀸𑀭𑀸𑀫𑀺𑀓𑀲𑀸𑀫𑀡𑁂𑀭𑀸𑀦𑀁 𑀯𑀸 𑀅𑀜𑁆𑀜𑀢𑀭𑁄 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀳𑀺 𑀲𑀕𑁆𑀕𑀫𑀕𑁆𑀕𑀁 𑀯𑀸 𑀛𑀸𑀦𑀸𑀤𑀻𑀳𑀺 𑀫𑁄𑀓𑁆𑀔𑀫𑀕𑁆𑀕𑀁 𑀯𑀸 𑀆𑀭𑀸𑀥𑁂𑀢𑀼𑀁 𑀪𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀕𑀺𑀳𑀺𑀆𑀤𑀺𑀪𑀸𑀯𑁄 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀺𑀳𑀺𑀪𑀸𑀯𑀸𑀤𑀺𑀓𑀁 𑀯𑀺𑀲𑀼𑀤𑁆𑀥𑀺𑀁 𑀅𑀧𑁂𑀓𑁆𑀔𑀫𑀸𑀦𑁄’’𑀢𑀺. 𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑀏𑀯𑀁 𑀪𑀡𑁂𑀬𑁆𑀬, 𑀓𑀣𑀁? ‘‘𑀅𑀚𑀸𑀦𑀫𑁂𑀯𑀁, 𑀆𑀯𑀼𑀲𑁄’’𑀢𑀺𑀆𑀤𑀺𑀁. 𑀢𑀢𑁆𑀣 𑀅𑀚𑀸𑀦𑀦𑁆𑀢𑀺 𑀅𑀚𑀸𑀦𑀦𑁆𑀢𑁄. 𑀅𑀧𑀲𑁆𑀲𑀦𑁆𑀢𑀺 𑀅𑀧𑀲𑁆𑀲𑀦𑁆𑀢𑁄. 𑀢𑀼𑀘𑁆𑀙𑀁 𑀫𑀼𑀲𑀸 𑀯𑀺𑀮𑀧𑀺𑀦𑁆𑀢𑀺 𑀅𑀳𑀁 𑀯𑀘𑀦𑀢𑁆𑀣𑀯𑀺𑀭𑀳𑀢𑁄 𑀢𑀼𑀘𑁆𑀙𑀁, 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀢𑁄 𑀫𑀼𑀲𑀸 𑀯𑀺𑀮𑀧𑀺𑀁 𑀅𑀪𑀡𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸𑀢𑀺 𑀬𑁆𑀯𑀸𑀬𑀁 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀅𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀢𑀸𑀲𑀗𑁆𑀔𑀸𑀢𑁄 𑀅𑀥𑀺𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀅𑀥𑀺𑀫𑀸𑀦𑀁 𑀞𑀧𑁂𑀢𑁆𑀯𑀸 𑀓𑁂𑀯𑀮𑀁 𑀧𑀸𑀧𑀺𑀘𑁆𑀙𑀢𑀸𑀬 𑀬𑁄 𑀲𑀫𑀼𑀤𑀸𑀘𑀭𑁂𑀬𑁆𑀬, 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀯𑁂𑀲𑀸𑀮𑀺𑀬𑀁 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀢𑁂𑀲𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀲𑀦𑁆𑀢𑀁 𑀛𑀸𑀦𑀸𑀤𑀺𑀥𑀫𑁆𑀫𑀁 𑀆𑀭𑁄𑀘𑁂𑀦𑁆𑀢𑀲𑁆𑀲 𑀲𑀘𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀆𑀭𑁄𑀘𑁂𑀢𑀺, 𑀲𑁄 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀳𑁄𑀢𑀺, 𑀅𑀦𑀦𑁆𑀢𑀭𑀫𑁂𑀯 ‘‘𑀅𑀬𑀁 𑀛𑀸𑀦𑀮𑀸𑀪𑀻’’𑀢𑀺 𑀯𑀸 ‘‘𑀅𑀭𑀺𑀬𑁄’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀢𑀫𑀢𑁆𑀣𑀁 𑀚𑀸𑀦𑀸𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀦 𑀚𑀸𑀦𑀸𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀲𑀘𑁂 𑀧𑀦 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀺, 𑀲𑁄 𑀪𑀺𑀓𑁆𑀔𑀼 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁨𑁦) 𑀦𑀬𑁂𑀦 𑀅𑀜𑁆𑀜𑀸𑀧𑀤𑁂𑀲𑁂𑀦 𑀆𑀭𑁄𑀘𑁂𑀦𑁆𑀢𑀲𑁆𑀲 𑀚𑀸𑀦𑀸𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀲𑀘𑁂 𑀦 𑀚𑀸𑀦𑀸𑀢𑀺, 𑀤𑀼𑀓𑁆𑀓𑀝𑀁. 𑀅𑀥𑀺𑀫𑀸𑀦𑁂𑀦 𑀆𑀭𑁄𑀘𑁂𑀦𑁆𑀢𑀲𑁆𑀲, 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑀻𑀮𑀯𑀺𑀧𑀢𑁆𑀢𑀺, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀅𑀢𑁆𑀢𑀦𑀺 𑀅𑀲𑀦𑁆𑀢𑀢𑀸, 𑀧𑀸𑀧𑀺𑀘𑁆𑀙𑀢𑀸𑀬 𑀢𑀲𑁆𑀲 𑀆𑀭𑁄𑀘𑀦𑀁, 𑀅𑀦𑀜𑁆𑀜𑀸𑀧𑀤𑁂𑀲𑁄, 𑀬𑀲𑁆𑀲 𑀆𑀭𑁄𑀘𑁂𑀢𑀺, 𑀢𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀓𑀢𑀸, 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯𑀸𑀢𑀺.

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀤𑁆𑀤𑀺𑀝𑁆𑀞𑀸 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸𑀢𑀺𑀇𑀤𑀁 𑀇𑀥 𑀉𑀤𑁆𑀤𑀺𑀝𑁆𑀞𑀧𑀸𑀭𑀸𑀚𑀺𑀓𑀧𑀭𑀺𑀤𑀻𑀧𑀦𑀫𑁂𑀯. 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀦 𑀲𑀩𑁆𑀩𑀸𑀦𑁂𑀯 𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀘𑀢𑀼𑀯𑀻𑀲𑀢𑀺? 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀢𑀸𑀯 𑀪𑀺𑀓𑁆𑀔𑀽𑀦𑀁 𑀘𑀢𑁆𑀢𑀸𑀭𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀅𑀝𑁆𑀞, 𑀢𑀸𑀦𑀺 𑀏𑀓𑀸𑀤𑀲𑀦𑁆𑀦𑀁 𑀧𑀡𑁆𑀟𑀓𑀸𑀤𑀻𑀦𑀁 𑀅𑀪𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑁂𑀳𑀺 𑀏𑀓𑀸𑀤𑀲𑀳𑀺 𑀧𑀸𑀭𑀸𑀚𑀺𑀓𑁂𑀳𑀺 𑀲𑀤𑁆𑀥𑀺𑀁 𑀏𑀓𑀽𑀦𑀯𑀻𑀲𑀢𑀺, 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀺𑀩𑁆𑀪𑀦𑁆𑀢𑀪𑀸𑀯𑀧𑀸𑀭𑀸𑀚𑀺𑀓𑁂𑀦 𑀲𑀤𑁆𑀥𑀺𑀁 𑀯𑀻𑀲𑀢𑀺, 𑀅𑀧𑀭𑀸𑀦𑀺𑀧𑀺 𑀮𑀫𑁆𑀩𑀻, 𑀫𑀼𑀤𑀼𑀧𑀺𑀝𑁆𑀞𑀺𑀓𑁄, 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀸𑀢𑀺, 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀢𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀯𑀲𑁂𑀦 ‘‘𑀘𑀢𑁆𑀢𑀸𑀭𑀺 𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀇𑀢𑀺 𑀇𑀫𑀸𑀦𑀺 𑀘 𑀘𑀢𑁆𑀢𑀸𑀭𑀺, 𑀧𑀼𑀭𑀺𑀫𑀸𑀦𑀺 𑀘 𑀯𑀻𑀲𑀢𑀻𑀢𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀩𑁆𑀩𑀸𑀦𑁂𑀯 𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀦 𑀮𑀪𑀢𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀦𑁆𑀢𑀺 𑀉𑀧𑁄𑀲𑀣𑀸𑀤𑀺𑀪𑁂𑀤𑀁 𑀲𑀁𑀯𑀸𑀲𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀦 𑀮𑀪𑀢𑀺. 𑀬𑀣𑀸 𑀧𑀼𑀭𑁂, 𑀢𑀣𑀸 𑀧𑀘𑁆𑀙𑀸𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀕𑀺𑀳𑀺𑀓𑀸𑀮𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀘, 𑀧𑀘𑁆𑀙𑀸 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄𑀧𑀺 𑀢𑀣𑁂𑀯 𑀅𑀲𑀁𑀯𑀸𑀲𑁄 𑀳𑁄𑀢𑀺, 𑀦𑀢𑁆𑀣𑀺 𑀢𑀲𑁆𑀲 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀸𑀤𑀺𑀪𑁂𑀤𑁄 𑀲𑀁𑀯𑀸𑀲𑁄𑀢𑀺. 𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂 𑀧𑀼𑀘𑁆𑀙𑀸𑀫𑀻𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀆𑀬𑀲𑁆𑀫𑀦𑁆𑀢𑁂 ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸’’𑀢𑀺 𑀧𑀼𑀘𑁆𑀙𑀸𑀫𑀺. 𑀓𑀘𑁆𑀘𑀺𑀢𑁆𑀣𑀸𑀢𑀺 𑀓𑀘𑁆𑀘𑀺 𑀏𑀢𑁆𑀣, 𑀏𑀢𑁂𑀲𑀼 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀓𑀘𑁆𑀘𑀺 𑀧𑀭𑀺𑀲𑀼𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸𑀢𑀺 𑀓𑀘𑁆𑀘𑀺 𑀧𑀭𑀺𑀲𑀼𑀤𑁆𑀥𑀸 𑀅𑀢𑁆𑀣, 𑀪𑀯𑀣𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.