𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑁄

𑀇𑀫𑁂 𑀔𑁄 𑀧𑀦𑀸𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀁 𑀅𑀪𑀺𑀫𑀼𑀔𑀻𑀓𑀭𑀡𑀁. 𑀆𑀬𑀲𑁆𑀫𑀦𑁆𑀢𑁄𑀢𑀺 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀧𑀺𑀬𑀯𑀘𑀦𑁂𑀦 𑀆𑀮𑀧𑀦𑀁. 𑀢𑁂𑀭𑀲𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀲𑀗𑁆𑀖𑀸𑀤𑀺𑀲𑁂𑀲𑀸𑀢𑀺 𑀏𑀯𑀁𑀦𑀸𑀫𑀓𑀸. 𑀥𑀫𑁆𑀫𑀸𑀢𑀺 𑀆𑀧𑀢𑁆𑀢𑀺𑀬𑁄. 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀲𑀭𑀽𑀧𑁂𑀦 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑀁 𑀆𑀕𑀘𑁆𑀙𑀦𑁆𑀢𑀺, 𑀦 𑀦𑀺𑀤𑀸𑀦𑁂 𑀯𑀺𑀬 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺 𑀲𑀸𑀥𑀸𑀭𑀡𑀯𑀘𑀦𑀫𑀢𑁆𑀢𑁂𑀦.

𑁧. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀁𑀯𑀺𑀚𑁆𑀚𑀢𑀺 𑀘𑁂𑀢𑀦𑀸 𑀅𑀲𑁆𑀲𑀸𑀢𑀺 𑀲𑀜𑁆𑀘𑁂𑀢𑀦𑀸, 𑀲𑀜𑁆𑀘𑁂𑀢𑀦𑀸𑀯 𑀲𑀜𑁆𑀘𑁂𑀢𑀦𑀺𑀓𑀸, 𑀲𑀜𑁆𑀘𑁂𑀢𑀦𑀸 𑀯𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀜𑁆𑀘𑁂𑀢𑀦𑀺𑀓𑀸. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀻𑀢𑀺 𑀲𑀼𑀓𑁆𑀓𑀲𑁆𑀲 𑀯𑀺𑀲𑁆𑀲𑀝𑁆𑀞𑀺, 𑀭𑀸𑀕𑀽𑀧𑀢𑁆𑀣𑀫𑁆𑀪𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑀚𑀸𑀢𑁂 𑀓𑀫𑁆𑀫𑀜𑁆𑀜𑀢𑀁 𑀧𑀢𑁆𑀢𑁂 𑀆𑀭𑁄𑀕𑁆𑀬𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀅𑀧𑀤𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀬 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀆𑀲𑀬𑀥𑀸𑀢𑀼𑀦𑀸𑀦𑀢𑁆𑀢𑀢𑁄 𑀦𑀻𑀮𑀸𑀤𑀺𑀯𑀲𑁂𑀦 (𑀧𑀸𑀭𑀸. 𑁨𑁩𑁯-𑁨𑁪𑁦) 𑀤𑀲𑀯𑀺𑀥𑁂𑀲𑀼 𑀲𑀼𑀓𑁆𑀓𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀼𑀓𑁆𑀓𑀲𑁆𑀲 𑀞𑀸𑀦𑀸 𑀘𑀸𑀯𑀦𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸𑀢𑀺 𑀬𑀸 𑀲𑀼𑀧𑀺𑀦𑁂 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀳𑁄𑀢𑀺, 𑀢𑀁 𑀞𑀧𑁂𑀢𑁆𑀯𑀸. 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀬𑀸 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸 𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺, 𑀅𑀬𑀁 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫 𑀆𑀧𑀢𑁆𑀢𑀺𑀦𑀺𑀓𑀸𑀬𑁄𑀢𑀺 𑀅𑀢𑁆𑀣𑁄. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀲𑀗𑁆𑀖𑁄 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀼𑀓𑀸𑀫𑀲𑁆𑀲 𑀬𑀁 𑀢𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁, 𑀢𑀲𑁆𑀲 𑀆𑀤𑀺𑀫𑁆𑀳𑀺 𑀘𑁂𑀯 𑀧𑀭𑀺𑀯𑀸𑀲𑀤𑀸𑀦𑀢𑁆𑀣𑀸𑀬, 𑀆𑀤𑀺𑀢𑁄 𑀲𑁂𑀲𑁂 𑀫𑀚𑁆𑀛𑁂 𑀫𑀸𑀦𑀢𑁆𑀢𑀤𑀸𑀦𑀢𑁆𑀣𑀸𑀬 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁂𑀦 𑀯𑀸 𑀲𑀳 𑀫𑀸𑀦𑀢𑁆𑀢𑀤𑀸𑀦𑀢𑁆𑀣𑀸𑀬, 𑀅𑀯𑀲𑀸𑀦𑁂 𑀅𑀩𑁆𑀪𑀸𑀦𑀢𑁆𑀣𑀸𑀬 𑀘 𑀲𑀗𑁆𑀖𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀦 𑀳𑁂𑀢𑁆𑀣 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀯𑀺𑀦𑀸 𑀲𑀗𑁆𑀖𑁂𑀦 𑀲𑀓𑁆𑀓𑀸 𑀓𑀸𑀢𑀼𑀁. 𑀇𑀢𑀺 𑀲𑀗𑁆𑀖𑁄 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀲𑁂𑀬𑁆𑀬𑀲𑀓𑀁 𑀆𑀭𑀩𑁆𑀪 𑀉𑀧𑀓𑁆𑀓𑀫𑀺𑀢𑁆𑀯𑀸 𑀅𑀲𑀼𑀘𑀺𑀫𑁄𑀘𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁. 𑀲𑀘𑁂 𑀧𑀦 𑀧𑀭𑁂𑀦 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑁂 𑀉𑀧𑀓𑁆𑀓𑀫𑀁 𑀓𑀸𑀭𑁂𑀢𑁆𑀯𑀸 𑀫𑁄𑀘𑀸𑀧𑁂𑀢𑀺, 𑀆𑀧𑀚𑁆𑀚𑀢𑀺𑀬𑁂𑀯. 𑀘𑁂𑀢𑁂𑀢𑁆𑀯𑀸 𑀅𑀦𑁆𑀢𑀫𑀲𑁄 𑀆𑀓𑀸𑀲𑁂 𑀓𑀝𑀺𑀓𑀫𑁆𑀧𑀦𑁂𑀦𑀧𑀺 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀲𑀘𑁂 𑀦 𑀫𑀼𑀘𑁆𑀘𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀲𑀘𑁂 𑀧𑀦 𑀅𑀦𑁆𑀢𑀫𑀲𑁄 𑀬𑀁 𑀏𑀓𑀸 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸 𑀧𑀺𑀯𑁂𑀬𑁆𑀬, 𑀢𑀢𑁆𑀢𑀓𑀫𑁆𑀧𑀺 𑀞𑀸𑀦𑀢𑁄 𑀫𑀼𑀘𑁆𑀘𑀢𑀺, 𑀤𑀓𑀲𑁄𑀢𑀁 𑀅𑀦𑁄𑀢𑀺𑀡𑁆𑀡𑁂𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀞𑀸𑀦𑀢𑁄 𑀧𑀦 𑀘𑀼𑀢𑀁 𑀅𑀯𑀲𑁆𑀲𑀫𑁂𑀯 𑀤𑀓𑀲𑁄𑀢𑀁 𑀑𑀢𑀭𑀢𑀺, 𑀢𑀲𑁆𑀫𑀸 ‘‘𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀯𑀸 𑀅𑀦𑀺𑀓𑁆𑀔𑀦𑁆𑀢𑁂 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁭) 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀅𑀦𑀼𑀧𑀓𑁆𑀓𑀫𑀦𑁆𑀢𑀲𑁆𑀲 𑀘, 𑀅𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀘, 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀘, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀲𑀻𑀮𑀯𑀺𑀧𑀢𑁆𑀢𑀺, 𑀘𑁂𑀢𑀦𑀸, 𑀉𑀧𑀓𑁆𑀓𑀫𑁄, 𑀫𑀼𑀘𑁆𑀘𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀧𑀸𑀭𑀸𑀚𑀺𑀓𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯𑀸𑀢𑀺.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀑𑀢𑀺𑀡𑁆𑀡𑁄𑀢𑀺 𑀬𑀓𑁆𑀔𑀸𑀤𑀻𑀳𑀺 𑀯𑀺𑀬 𑀲𑀢𑁆𑀢𑀸 𑀅𑀦𑁆𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑁂𑀦 𑀭𑀸𑀕𑁂𑀦 𑀯𑀸 𑀑𑀢𑀺𑀡𑁆𑀡𑁄, 𑀓𑀽𑀧𑀸𑀤𑀻𑀦𑀺 𑀯𑀺𑀬 𑀲𑀢𑁆𑀢𑀸 𑀅𑀲𑀫𑀧𑁂𑀓𑁆𑀔𑀺𑀢𑁆𑀯𑀸 𑀭𑀚𑁆𑀚𑀦𑀻𑀬𑁂 𑀞𑀸𑀦𑁂 𑀭𑀚𑁆𑀚𑀦𑁆𑀢𑁄 𑀲𑀬𑀁 𑀯𑀸 𑀭𑀸𑀕𑀁 𑀑𑀢𑀺𑀡𑁆𑀡𑁄, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀲𑀫𑀗𑁆𑀕𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀧𑀭𑀺𑀲𑀼𑀤𑁆𑀥𑀪𑀯𑀗𑁆𑀕𑀲𑀦𑁆𑀢𑀢𑀺𑀲𑀗𑁆𑀔𑀸𑀢𑀁 𑀧𑀓𑀢𑀺𑀁 𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑀣𑀸 𑀧𑀯𑀢𑁆𑀢𑁂𑀦, 𑀯𑀺𑀭𑀽𑀧𑀁 𑀯𑀸 𑀧𑀭𑀺𑀡𑀢𑁂𑀦 𑀬𑀣𑀸 𑀧𑀭𑀺𑀯𑀢𑁆𑀢𑀫𑀸𑀦𑀁 𑀯𑀺𑀭𑀽𑀧𑀁 𑀳𑁄𑀢𑀺, 𑀏𑀯𑀁 𑀯𑀼𑀢𑁆𑀢𑀭𑀸𑀕𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀺𑀢𑁂𑀦 𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀦𑁆𑀢𑀺 𑀢𑀤𑀳𑀼𑀚𑀸𑀢𑀸𑀬𑀧𑀺 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀲𑀤𑁆𑀥𑀺𑀁. 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀳𑀢𑁆𑀣𑀕𑁆𑀕𑀳𑀡𑀸𑀤𑀺𑀓𑀆𑀬𑀲𑀫𑁆𑀧𑀬𑁄𑀕𑀁 𑀓𑀸𑀬𑀫𑀺𑀲𑁆𑀲𑀻𑀪𑀸𑀯𑀁 𑀲𑀫𑀸𑀧𑀚𑁆𑀚𑁂𑀬𑁆𑀬. 𑀳𑀢𑁆𑀣𑀕𑁆𑀕𑀸𑀳𑀁 𑀯𑀸𑀢𑀺𑀆𑀤𑀺 𑀧𑀦𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀤𑀲𑁆𑀲𑀦𑀁. 𑀢𑀢𑁆𑀣 𑀳𑀢𑁆𑀣𑁄 𑀦𑀸𑀫 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸. 𑀯𑁂𑀡𑀻 𑀦𑀸𑀫 𑀯𑀺𑀦𑀦𑁆𑀥𑀺𑀢𑁆𑀯𑀸 𑀯𑀸 𑀅𑀯𑀺𑀦𑀦𑁆𑀥𑀺𑀢𑁆𑀯𑀸 𑀯𑀸 𑀲𑀼𑀤𑁆𑀥𑀓𑁂𑀲𑁂𑀳𑀺 𑀯𑀸 𑀦𑀻𑀮𑀸𑀤𑀺𑀯𑀡𑁆𑀡𑀲𑀼𑀢𑁆𑀢𑀓𑀼𑀲𑀼𑀫𑀓𑀳𑀸𑀧𑀡𑀫𑀸𑀮𑀸𑀲𑀼𑀯𑀡𑁆𑀡𑀘𑀻𑀭𑀓𑀫𑀼𑀢𑁆𑀢𑀸𑀯𑀴𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀫𑀺𑀲𑁆𑀲𑁂𑀳𑀺 𑀯𑀸 𑀓𑀢𑀓𑁂𑀲𑀓𑀮𑀸𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑁂𑀡𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀓𑁂𑀲𑀸𑀧𑀺 𑀕𑀳𑀺𑀢𑀸𑀬𑁂𑀯 𑀲𑀤𑁆𑀥𑀺𑀁 𑀮𑁄𑀫𑁂𑀳𑀺. 𑀇𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑀲𑁆𑀲 𑀳𑀢𑁆𑀣𑀲𑁆𑀲 𑀕𑀳𑀡𑀁 𑀳𑀢𑁆𑀣𑀕𑁆𑀕𑀸𑀳𑁄, 𑀯𑁂𑀡𑀺𑀬𑀸 𑀕𑀳𑀡𑀁 𑀯𑁂𑀡𑀺𑀕𑁆𑀕𑀸𑀳𑁄. 𑀅𑀯𑀲𑁂𑀲𑀲𑁆𑀲 𑀲𑀭𑀻𑀭𑀲𑁆𑀲 𑀧𑀭𑀸𑀫𑀲𑀦𑀁 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦𑀁 𑀦𑀸𑀫. 𑀬𑁄 𑀢𑀁 𑀳𑀢𑁆𑀣𑀕𑁆𑀕𑀸𑀳𑀁 𑀯𑀸 𑀯𑁂𑀡𑀺𑀕𑁆𑀕𑀸𑀳𑀁 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦𑀁 𑀲𑀫𑀸𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫 𑀆𑀧𑀢𑁆𑀢𑀺𑀦𑀺𑀓𑀸𑀬𑁄 𑀳𑁄𑀢𑀻𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀉𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀸𑀬𑀲𑀁𑀲𑀕𑁆𑀕𑀲𑀫𑀸𑀧𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀅𑀦𑁆𑀢𑀫𑀲𑁄 𑀮𑁄𑀫𑁂𑀦 𑀮𑁄𑀫𑀁 𑀨𑀼𑀲𑀦𑁆𑀢𑀲𑁆𑀲𑀸𑀧𑀺, 𑀇𑀢𑁆𑀣𑀺𑀬𑀸 𑀯𑀸 𑀨𑀼𑀲𑀺𑀬𑀫𑀸𑀦𑀲𑁆𑀲 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀸𑀬𑀫𑀺𑀢𑁆𑀯𑀸 𑀨𑀲𑁆𑀲𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀏𑀓𑁂𑀦 𑀧𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑁂𑀦 𑀳𑀢𑁆𑀣𑁂𑀦 𑀤𑀺𑀯𑀲𑀫𑁆𑀧𑀺 𑀢𑀢𑁆𑀣 𑀢𑀢𑁆𑀣 𑀨𑀼𑀲𑀦𑁆𑀢𑀲𑁆𑀲 𑀏𑀓𑀸𑀯 𑀆𑀧𑀢𑁆𑀢𑀺, 𑀅𑀕𑁆𑀕𑀳𑁂𑀢𑁆𑀯𑀸 𑀨𑀼𑀲𑀦𑁆𑀢𑁄 𑀧𑀦 𑀲𑀘𑁂 𑀲𑀻𑀲𑀢𑁄 𑀬𑀸𑀯 𑀧𑀸𑀤𑀸, 𑀢𑀸𑀯 𑀓𑀸𑀬𑀢𑁄 𑀳𑀢𑁆𑀣𑀁 𑀅𑀫𑁄𑀘𑁂𑀦𑁆𑀢𑁄𑀬𑁂𑀯 𑀨𑀼𑀲𑀢𑀺, 𑀏𑀓𑀸𑀯 𑀆𑀧𑀢𑁆𑀢𑀺, 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀼𑀮𑀻𑀦𑀁 𑀏𑀓𑀢𑁄 𑀕𑀳𑀡𑁂𑀧𑀺 𑀏𑀓𑀸𑀬𑁂𑀯. 𑀲𑀘𑁂 𑀧𑀦 𑀦𑀸𑀦𑀺𑀢𑁆𑀣𑀻𑀦𑀁 𑀧𑀜𑁆𑀘𑀗𑁆𑀕𑀼𑀮𑀺𑀬𑁄 𑀏𑀓𑀢𑁄 𑀕𑀡𑁆𑀳𑀸𑀢𑀺, 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄. 𑀇𑀢𑁆𑀣𑀺𑀬𑀸 𑀯𑁂𑀫𑀢𑀺𑀓𑀲𑁆𑀲, 𑀧𑀡𑁆𑀟𑀓𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀺𑀲𑁆𑀲 𑀘 𑀣𑀼𑀮𑁆𑀮𑀘𑁆𑀘𑀬𑀁, 𑀢𑀣𑀸 𑀓𑀸𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦, 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀧𑀡𑁆𑀟𑀓𑁂𑀳𑀺 𑀘 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑁂𑀧𑀺. 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀧𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀤𑀻𑀲𑀼, 𑀧𑀼𑀭𑀺𑀲𑀓𑀸𑀬𑀨𑀼𑀲𑀦𑀸𑀤𑀻𑀲𑀼 𑀘 𑀤𑀼𑀓𑁆𑀓𑀝𑀁. 𑀇𑀢𑁆𑀣𑀺𑀬𑀸 𑀨𑀼𑀲𑀺𑀬𑀫𑀸𑀦𑀲𑁆𑀲 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀧𑀺 𑀓𑀸𑀬𑁂𑀦 𑀅𑀯𑀸𑀬𑀫𑀺𑀢𑁆𑀯𑀸 𑀨𑀲𑁆𑀲𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑁂𑀦 𑀇𑀢𑁆𑀣𑀺𑀁 𑀨𑀼𑀲𑀦𑁆𑀢𑀲𑁆𑀲, 𑀅𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀲𑁆𑀲, 𑀅𑀲𑀸𑀤𑀺𑀬𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑀻𑀮𑀯𑀺𑀧𑀢𑁆𑀢𑀺, 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀇𑀢𑁆𑀣𑀺𑀲𑀜𑁆𑀜𑀺𑀢𑀸, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄, 𑀢𑁂𑀦 𑀭𑀸𑀕𑁂𑀦 𑀯𑀸𑀬𑀸𑀫𑁄, 𑀳𑀢𑁆𑀣𑀕𑁆𑀕𑀸𑀳𑀸𑀤𑀺𑀲𑀫𑀸𑀧𑀚𑁆𑀚𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀧𑀸𑀭𑀸𑀚𑀺𑀓𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯𑀸𑀢𑀺.

𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀑𑀢𑀺𑀡𑁆𑀡𑀢𑀸 𑀘 𑀯𑀺𑀧𑀭𑀺𑀡𑀢𑀘𑀺𑀢𑁆𑀢𑀢𑀸 𑀘 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀢𑀼𑀕𑀸𑀫𑀦𑁆𑀢𑀺 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀲𑀁𑀮𑀓𑁆𑀔𑀡𑀲𑀫𑀢𑁆𑀣𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀁. 𑀤𑀼𑀝𑁆𑀞𑀼𑀮𑁆𑀮𑀸𑀳𑀺𑀯𑀸𑀘𑀸𑀳𑀻𑀢𑀺 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑁂𑀫𑁂𑀣𑀼𑀦𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀳𑀺 𑀯𑀸𑀘𑀸𑀳𑀺. 𑀑𑀪𑀸𑀲𑁂𑀬𑁆𑀬𑀸𑀢𑀺 𑀅𑀯𑀪𑀸𑀲𑁂𑀬𑁆𑀬, 𑀯𑀡𑁆𑀡𑀸𑀯𑀡𑁆𑀡𑀬𑀸𑀘𑀦𑀆𑀬𑀸𑀘𑀦𑀧𑀼𑀘𑁆𑀙𑀦𑀧𑀝𑀺𑀧𑀼𑀘𑁆𑀙𑀦𑀆𑀘𑀺𑀓𑁆𑀔𑀡𑀸𑀦𑀼𑀲𑀸𑀲𑀦𑀅𑀓𑁆𑀓𑁄𑀲𑀦𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀁 𑀅𑀲𑀤𑁆𑀥𑀫𑁆𑀫𑀯𑀘𑀦𑀁 𑀯𑀤𑁂𑀬𑁆𑀬. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸 𑀬𑀼𑀯𑀸 𑀬𑀼𑀯𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀑𑀪𑀸𑀲𑀦𑁂 𑀦𑀺𑀭𑀸𑀲𑀗𑁆𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀸𑀳𑀻𑀢𑀺𑀇𑀤𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀬 𑀲𑀺𑀔𑀸𑀧𑀢𑁆𑀢𑀮𑀓𑁆𑀔𑀡𑀤𑀲𑁆𑀲𑀦𑀁. 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀯𑀡𑁆𑀡𑀸𑀯𑀡𑁆𑀡𑁂𑀳𑀺 𑀯𑀸 𑀫𑁂𑀣𑀼𑀦𑀬𑀸𑀘𑀦𑀸𑀤𑀻𑀳𑀺 𑀯𑀸 ‘‘𑀲𑀺𑀔𑀭𑀡𑀻𑀲𑀺, 𑀲𑀁𑀪𑀺𑀦𑁆𑀦𑀸𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀲𑀻’’𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀅𑀜𑁆𑀜𑀢𑀭𑁂𑀦 𑀅𑀓𑁆𑀓𑁄𑀲𑀯𑀘𑀦𑁂𑀦 𑀯𑀸 𑀫𑀸𑀢𑀼𑀕𑀸𑀫𑀁 𑀑𑀪𑀸𑀲𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦𑀸𑀫 𑀆𑀧𑀢𑁆𑀢𑀺𑀦𑀺𑀓𑀸𑀬𑁄 𑀳𑁄𑀢𑀻𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀉𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀳𑀺 𑀑𑀪𑀸𑀲𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀅𑀦𑁆𑀢𑀫𑀲𑁄 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀯𑀼𑀢𑁆𑀢𑀦𑀬𑁂𑀦 𑀑𑀪𑀸𑀲𑀦𑁆𑀢𑀲𑁆𑀲 𑀲𑀘𑁂 𑀲𑀸 𑀢𑀫𑀢𑁆𑀣𑀁 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀚𑀸𑀦𑀸𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀧𑀡𑁆𑀟𑀓𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀲𑁆𑀫𑀺𑀁𑀬𑁂𑀯 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀤𑀼𑀓𑁆𑀓𑀝𑀁. 𑀧𑀼𑀦𑀧𑁆𑀧𑀼𑀦𑀁 𑀑𑀪𑀸𑀲𑀦𑁆𑀢𑀲𑁆𑀲, 𑀲𑀫𑁆𑀩𑀳𑀼𑀮𑀸 𑀘 𑀇𑀢𑁆𑀣𑀺𑀬𑁄 𑀏𑀓𑀯𑀸𑀘𑀸𑀬 𑀑𑀪𑀸𑀲𑀦𑁆𑀢𑀲𑁆𑀲 𑀯𑀸𑀘𑀸𑀕𑀡𑀦𑀸𑀬 𑀘𑁂𑀯 𑀇𑀢𑁆𑀣𑀺𑀕𑀡𑀦𑀸𑀬 𑀘 𑀆𑀧𑀢𑁆𑀢𑀺𑀬𑁄. 𑀲𑀘𑁂 𑀬𑀁 𑀇𑀢𑁆𑀣𑀺𑀁 𑀑𑀪𑀸𑀲𑀢𑀺, 𑀲𑀸 𑀦 𑀚𑀸𑀦𑀸𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀆𑀤𑀺𑀲𑁆𑀲 𑀯𑀡𑁆𑀡𑀸𑀤𑀺𑀪𑀡𑀦𑁂𑀧𑀺 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀡𑁆𑀟𑀓𑁂 𑀤𑀼𑀓𑁆𑀓𑀝𑀁, 𑀉𑀩𑁆𑀪𑀓𑁆𑀔𑀓𑀁 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀁 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀜𑁆𑀘 𑀆𑀤𑀺𑀲𑁆𑀲 𑀯𑀡𑁆𑀡𑀸𑀤𑀺𑀪𑀡𑀦𑁂 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁. 𑀅𑀢𑁆𑀣𑀥𑀫𑁆𑀫𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀦𑀁 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑀻𑀮𑀯𑀺𑀧𑀢𑁆𑀢𑀺, 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀇𑀢𑁆𑀣𑀺𑀲𑀜𑁆𑀜𑀺𑀢𑀸, 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑁄, 𑀢𑁂𑀦 𑀭𑀸𑀕𑁂𑀦 𑀑𑀪𑀸𑀲𑀦𑀁, 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀅𑀤𑀺𑀦𑁆𑀦𑀸𑀤𑀸𑀦𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀢𑁆𑀢𑀓𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀑𑀢𑀺𑀡𑁆𑀡𑀢𑀸 𑀘 𑀯𑀺𑀧𑀭𑀺𑀡𑀢𑀘𑀺𑀢𑁆𑀢𑀢𑀸 𑀘 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀦𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀇𑀢𑁆𑀣𑀺𑀬𑀸 𑀲𑀫𑀻𑀧𑁂. 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸 𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀅𑀢𑁆𑀢𑀦𑀸 𑀯𑀸 𑀓𑀸𑀫𑀺𑀢𑀸 𑀇𑀘𑁆𑀙𑀺𑀢𑀸𑀢𑀺 𑀅𑀢𑁆𑀢𑀓𑀸𑀫𑀸, 𑀲𑀬𑀁 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀧𑀢𑁆𑀣𑀺𑀢𑀸𑀢𑀺 𑀅𑀢𑁆𑀣𑁄, 𑀅𑀢𑁆𑀢𑀓𑀸𑀫𑀸 𑀘 𑀲𑀸 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀢𑀲𑁆𑀲𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬. 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀸𑀢𑀺 𑀕𑀼𑀡𑀁 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀬𑁆𑀬. 𑀏𑀢𑀤𑀕𑁆𑀕𑀦𑁆𑀢𑀺𑀆𑀤𑀺 𑀢𑀲𑁆𑀲𑀸 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀪𑀸𑀲𑀦𑀸𑀓𑀸𑀭𑀦𑀺𑀤𑀲𑁆𑀲𑀦𑀁. 𑀢𑀢𑁆𑀭𑀸𑀬𑀁 𑀧𑀤𑀲𑀫𑁆𑀩𑀦𑁆𑀥𑀯𑀲𑁂𑀦𑁂𑀯 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀸 𑀫𑀸𑀤𑀺𑀲𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀳𑀺𑀢𑀢𑁆𑀢𑀸 𑀲𑀻𑀮𑀯𑀦𑁆𑀢𑀁 𑀫𑁂𑀣𑀼𑀦𑀥𑀫𑁆𑀫𑀸 𑀯𑀺𑀭𑀳𑀺𑀢𑀢𑁆𑀢𑀸 𑀩𑁆𑀭𑀳𑁆𑀫𑀘𑀸𑀭𑀺𑀁 𑀢𑀤𑀼𑀪𑀬𑁂𑀦𑀸𑀧𑀺 𑀓𑀮𑁆𑀬𑀸𑀡𑀥𑀫𑁆𑀫𑀁 𑀏𑀢𑁂𑀦 𑀥𑀫𑁆𑀫𑁂𑀦 𑀧𑀭𑀺𑀘𑀭𑁂𑀬𑁆𑀬 𑀅𑀪𑀺𑀭𑀫𑁂𑀬𑁆𑀬, 𑀢𑀲𑁆𑀲𑀸 𑀏𑀯𑀁 𑀫𑀸𑀤𑀺𑀲𑀁 𑀧𑀭𑀺𑀘𑀭𑀦𑁆𑀢𑀺𑀬𑀸 𑀬𑀸 𑀅𑀬𑀁 𑀧𑀸𑀭𑀺𑀘𑀭𑀺𑀬𑀸 𑀦𑀸𑀫, 𑀏𑀢𑀤𑀕𑁆𑀕𑀁 𑀧𑀸𑀭𑀺𑀘𑀭𑀺𑀬𑀸𑀦𑀦𑁆𑀢𑀺. 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀏𑀯𑀁 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀦𑁆𑀢𑁄 𑀘 ‘‘𑀅𑀭𑀳𑀲𑀺 𑀢𑁆𑀯𑀁 𑀫𑀬𑁆𑀳𑀁 𑀫𑁂𑀣𑀼𑀦𑀥𑀫𑁆𑀫𑀁 𑀤𑀸𑀢𑀼’’𑀦𑁆𑀢𑀺𑀆𑀤𑀺𑀦𑀸 𑀫𑁂𑀣𑀼𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀦𑁂𑀯 𑀯𑀘𑀦𑁂𑀦 𑀬𑁄 𑀪𑀸𑀲𑁂𑀬𑁆𑀬, 𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀲𑀸𑀯𑀢𑁆𑀣𑀺𑀬𑀁 𑀉𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀪𑀸𑀲𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀅𑀦𑁆𑀢𑀫𑀲𑁄 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀦𑁆𑀢𑀲𑁆𑀲 𑀲𑀘𑁂 𑀲𑀸 𑀢𑀫𑀢𑁆𑀣𑀁 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀚𑀸𑀦𑀸𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀦𑁄 𑀘𑁂 𑀚𑀸𑀦𑀸𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀡𑁆𑀟𑀓𑁂 𑀧𑀡𑁆𑀟𑀓𑀲𑀜𑁆𑀜𑀺𑀦𑁄𑀧𑀺 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀲𑁆𑀫𑀺𑀁𑀬𑁂𑀯 𑀇𑀢𑁆𑀣𑀺𑀲𑀜𑁆𑀜𑀺𑀦𑁄 𑀤𑀼𑀓𑁆𑀓𑀝𑀁. 𑀘𑀻𑀯𑀭𑀸𑀤𑀻𑀳𑀺 𑀯𑀢𑁆𑀣𑀼𑀓𑀸𑀫𑁂𑀳𑀺 𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀦𑁆𑀢𑀲𑁆𑀲 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑀻𑀮𑀯𑀺𑀧𑀢𑁆𑀢𑀺, 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀇𑀢𑁆𑀣𑀺𑀲𑀜𑁆𑀜𑀺𑀢𑀸, 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑁄, 𑀢𑁂𑀦 𑀭𑀸𑀕𑁂𑀦 𑀯𑀡𑁆𑀡𑀪𑀡𑀦𑀁, 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀦𑁂 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯𑀸𑀢𑀺.

𑀅𑀢𑁆𑀢𑀓𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀲𑀜𑁆𑀘𑀭𑀺𑀢𑁆𑀢𑀦𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑀭𑁂 𑀲𑀁𑀘𑀭𑀡𑀪𑀸𑀯𑀁. 𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀲𑀫𑁆𑀫𑀸 𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀦𑀧𑀘𑁆𑀘𑀸𑀳𑀭𑀡𑀸𑀦𑀺 𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑁂𑀬𑁆𑀬. 𑀇𑀢𑁆𑀣𑀺𑀬𑀸 𑀯𑀸𑀢𑀺𑀆𑀤𑀺 𑀲𑀫𑀸𑀧𑀚𑁆𑀚𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺𑀦𑁆𑀢𑀺 𑀧𑀼𑀭𑀺𑀲𑁂𑀦 𑀯𑀸 𑀢𑀲𑁆𑀲 𑀫𑀸𑀢𑀸𑀧𑀺𑀢𑀸𑀤𑀻𑀳𑀺 𑀯𑀸 𑀧𑁂𑀲𑀺𑀢𑁄 𑀧𑀼𑀭𑀺𑀲𑀲𑁆𑀲 𑀫𑀢𑀺𑀁 𑀅𑀥𑀺𑀧𑁆𑀧𑀸𑀬𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀲𑀲𑁆𑀲 𑀯𑀸 𑀇𑀢𑁆𑀣𑀺𑀫𑀢𑀺𑀦𑁆𑀢𑀺 𑀇𑀢𑁆𑀣𑀺𑀬𑀸 𑀯𑀸 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀸𑀤𑀻𑀳𑀺 𑀯𑀸 𑀧𑁂𑀲𑀺𑀢𑁄 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀅𑀥𑀺𑀧𑁆𑀧𑀸𑀬𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀚𑀸𑀬𑀢𑁆𑀢𑀦𑁂 𑀯𑀸 𑀚𑀸𑀭𑀢𑁆𑀢𑀦𑁂 𑀯𑀸𑀢𑀺 𑀚𑀸𑀬𑀪𑀸𑀯𑁂 𑀯𑀸 𑀚𑀸𑀭𑀪𑀸𑀯𑁂 𑀯𑀸. 𑀧𑀼𑀭𑀺𑀲𑀲𑁆𑀲 𑀳𑀺 𑀫𑀢𑀺𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀦𑁆𑀢𑁄 𑀚𑀸𑀬𑀢𑁆𑀢𑀦𑁂 𑀆𑀭𑁄𑀘𑁂𑀢𑀺, 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀦𑁆𑀢𑁄 𑀚𑀸𑀭𑀢𑁆𑀢𑀦𑁂 𑀆𑀭𑁄𑀘𑁂𑀢𑀺. 𑀅𑀧𑀺𑀘 𑀧𑀼𑀭𑀺𑀲𑀲𑁆𑀲𑁂𑀯 𑀫𑀢𑀺𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀦𑁆𑀢𑁄 𑀚𑀸𑀬𑀢𑁆𑀢𑀦𑁂 𑀯𑀸 𑀆𑀭𑁄𑀘𑁂𑀢𑀺 𑀦𑀺𑀩𑀤𑁆𑀥𑀪𑀭𑀺𑀬𑀪𑀸𑀯𑁂, 𑀚𑀸𑀭𑀢𑁆𑀢𑀦𑁂 𑀯𑀸 𑀫𑀺𑀘𑁆𑀙𑀸𑀘𑀸𑀭𑀪𑀸𑀯𑁂, 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁩𑁦𑁨) ‘‘𑀚𑀸𑀬𑀢𑁆𑀢𑀦𑁂 𑀯𑀸𑀢𑀺 𑀚𑀸𑀬𑀸 𑀪𑀯𑀺𑀲𑁆𑀲𑀲𑀺, 𑀚𑀸𑀭𑀢𑁆𑀢𑀦𑁂 𑀯𑀸𑀢𑀺 𑀚𑀸𑀭𑀻 𑀪𑀯𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑀦𑁂𑀧𑀺 ‘‘𑀧𑀢𑀺 𑀪𑀯𑀺𑀲𑁆𑀲𑀲𑀺, 𑀚𑀸𑀭𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀬𑀸 𑀅𑀬𑀁 𑀢𑀗𑁆𑀔𑀡𑁂 𑀫𑀼𑀳𑀼𑀢𑁆𑀢𑀫𑀢𑁆𑀢𑁂 𑀲𑀁𑀯𑀲𑀺𑀢𑀩𑁆𑀩𑀢𑁄 ‘‘𑀢𑀗𑁆𑀔𑀡𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺, 𑀫𑀼𑀳𑀼𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀧𑀺 ‘‘𑀫𑀼𑀳𑀼𑀢𑁆𑀢𑀺𑀓𑀸 𑀪𑀯𑀺𑀲𑁆𑀲𑀲𑀻’’𑀢𑀺 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀫𑀢𑀺𑀁 𑀆𑀭𑁄𑀘𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 ‘‘𑀫𑀼𑀳𑀼𑀢𑁆𑀢𑀺𑀓𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀺𑀫𑀢𑀺𑀁 𑀆𑀭𑁄𑀘𑁂𑀦𑁆𑀢𑁄𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀯𑀢𑁆𑀣𑀺𑀬𑀁 𑀉𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀲𑀜𑁆𑀘𑀭𑀺𑀢𑁆𑀢𑀲𑀫𑀸𑀧𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀯𑀻𑀫𑀁𑀲𑀢𑀺, 𑀅𑀦𑁆𑀢𑁂𑀯𑀸𑀲𑀺𑀁 𑀧𑀘𑁆𑀘𑀸𑀳𑀭𑀸𑀧𑁂𑀢𑀻’’𑀢𑀺𑀇𑀫𑀺𑀦𑀸 (𑀧𑀸𑀭𑀸. 𑁩𑁩𑁮) 𑀦𑀬𑁂𑀦 𑀲𑀸𑀡𑀢𑁆𑀢𑀺𑀓𑀁, 𑀅𑀜𑁆𑀜𑀢𑁆𑀭 𑀦𑀸𑀮𑀁𑀯𑀘𑀦𑀻𑀬𑀸𑀬 𑀬𑀸𑀬 𑀓𑀸𑀬𑀘𑀺 𑀇𑀢𑁆𑀣𑀺𑀬𑀸 𑀅𑀦𑁆𑀢𑀫𑀲𑁄 𑀫𑀸𑀢𑀼𑀬𑀸𑀧𑀺 𑀧𑀼𑀭𑀺𑀲𑀫𑀢𑀺𑀁 𑀆𑀭𑁄𑀘𑁂𑀦𑁆𑀢𑁄 ‘‘𑀳𑁄𑀳𑀺 𑀓𑀺𑀭 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀲𑀘𑁂𑀧𑀺 𑀙𑀦𑁆𑀤𑀯𑀸𑀲𑀺𑀦𑀻𑀆𑀤𑀻𑀲𑀼 𑀅𑀜𑁆𑀜𑀢𑀭𑀸𑀓𑀸𑀭𑁂𑀦 𑀆𑀭𑁄𑀘𑁂𑀢𑁆𑀯𑀸 𑀢𑀸𑀬 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁂𑀧𑀺 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁂𑀧𑀺 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀬𑁂𑀦 𑀧𑀳𑀺𑀢𑁄, 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺. 𑀲𑀸 𑀧𑀦 𑀢𑀲𑁆𑀲 𑀪𑀭𑀺𑀬𑀸 𑀳𑁄𑀢𑀼 𑀯𑀸, 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁. 𑀲𑀘𑁂𑀧𑀺 𑀬𑀲𑁆𑀲𑀸 𑀲𑀦𑁆𑀢𑀺𑀓𑀁 𑀧𑁂𑀲𑀺𑀢𑁄, 𑀢𑀁 𑀅𑀤𑀺𑀲𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀅𑀯𑀲𑁆𑀲𑀸𑀭𑁄𑀘𑀦𑀓𑀲𑁆𑀲 ‘‘𑀆𑀭𑁄𑀘𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀚𑁆𑀚𑀢𑀺𑀬𑁂𑀯. ‘‘𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀻’’𑀢𑀺 𑀧𑁂𑀲𑀺𑀢𑀲𑁆𑀲 𑀧𑀦 𑀕𑀦𑁆𑀢𑁆𑀯𑀸 𑀅𑀜𑁆𑀜𑀁 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀤𑀦𑁆𑀢𑀲𑁆𑀲 𑀯𑀺𑀲𑀗𑁆𑀓𑁂𑀢𑀁 𑀳𑁄𑀢𑀺, 𑀧𑀼𑀭𑀺𑀲𑀲𑁆𑀲 𑀯𑀸 𑀇𑀢𑁆𑀣𑀺𑀬𑀸 𑀯𑀸 𑀯𑀘𑀦𑀁 ‘‘𑀲𑀸𑀥𑀽’’𑀢𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀉𑀪𑀬𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀆𑀭𑁄𑀘𑁂𑀢𑁆𑀯𑀸 𑀯𑀸 𑀆𑀭𑁄𑀘𑀸𑀧𑁂𑀢𑁆𑀯𑀸 𑀯𑀸 𑀧𑀼𑀦 𑀬𑁂𑀦 𑀧𑁂𑀲𑀺𑀢𑁄, 𑀢𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀲𑀬𑀁 𑀆𑀭𑁄𑀘𑁂𑀦𑁆𑀢𑀲𑁆𑀲 𑀯𑀸 𑀅𑀜𑁆𑀜𑁂𑀦 𑀆𑀭𑁄𑀘𑀸𑀧𑁂𑀦𑁆𑀢𑀲𑁆𑀲 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀏𑀢𑁆𑀢𑀸𑀯𑀢𑀸 𑀳𑀺 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀯𑀻𑀫𑀁𑀲𑀢𑀺, 𑀧𑀘𑁆𑀘𑀸𑀳𑀭𑀢𑀻’’𑀢𑀺𑀇𑀤𑀁 𑀅𑀗𑁆𑀕𑀢𑁆𑀢𑀬𑀁 𑀲𑀫𑁆𑀧𑀸𑀤𑀺𑀢𑀫𑁂𑀯 𑀳𑁄𑀢𑀺, 𑀇𑀢𑁄 𑀧𑀦 𑀬𑁂𑀳𑀺 𑀓𑁂𑀳𑀺𑀘𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺, 𑀧𑀡𑁆𑀟𑀓𑁂 𑀘 𑀅𑀗𑁆𑀕𑀢𑁆𑀢𑀬𑁂𑀦𑀸𑀧𑀺 𑀣𑀼𑀮𑁆𑀮𑀘𑁆𑀘𑀬𑀁. 𑀏𑀓𑁂𑀦 𑀤𑀼𑀓𑁆𑀓𑀝𑀁. 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀕𑀺𑀮𑀸𑀦𑀲𑁆𑀲 𑀯𑀸 𑀓𑀺𑀘𑁆𑀘𑁂𑀦 𑀕𑀘𑁆𑀙𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺.

𑀲𑀻𑀮𑀯𑀺𑀧𑀢𑁆𑀢𑀺, 𑀬𑁂𑀲𑀼 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀢𑁂𑀲𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀢𑀸, 𑀦 𑀦𑀸𑀮𑀁𑀯𑀘𑀦𑀻𑀬𑀢𑀸,

𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀦𑀧𑀘𑁆𑀘𑀸𑀳𑀭𑀡𑀸𑀦𑀻𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀙𑀲𑀫𑀼𑀝𑁆𑀞𑀸𑀦𑀁, 𑀧𑀡𑁆𑀡𑀢𑁆𑀢𑀺𑀁 𑀯𑀸 𑀅𑀮𑀁𑀯𑀘𑀦𑀻𑀬𑀪𑀸𑀯𑀁 𑀯𑀸 𑀅𑀚𑀸𑀦𑀦𑁆𑀢𑀲𑁆𑀲 𑀓𑀸𑀬𑀯𑀺𑀓𑀸𑀭𑁂𑀦 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀢𑀣𑁂𑀯 𑀯𑀻𑀫𑀁𑀲𑀺𑀢𑁆𑀯𑀸 𑀢𑀣𑁂𑀯 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲 𑀓𑀸𑀬𑀢𑁄 𑀲𑀫𑀼𑀝𑁆𑀞𑀸𑀢𑀺. ‘‘𑀇𑀢𑁆𑀣𑀦𑁆𑀦𑀸𑀫𑀸 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀲𑀸 𑀘𑀺𑀢𑁆𑀢𑀁 𑀚𑀸𑀦𑁂𑀬𑁆𑀬𑀸𑀣𑀸’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀁 𑀆𑀕𑀢𑀁 𑀯𑀢𑁆𑀯𑀸 𑀧𑀼𑀦 𑀢𑀲𑁆𑀫𑀺𑀁 𑀧𑀼𑀭𑀺𑀲𑁂 𑀆𑀕𑀢𑁂 𑀆𑀭𑁄𑀘𑁂𑀦𑁆𑀢𑀲𑁆𑀲 𑀓𑀸𑀬𑁂𑀦 𑀓𑀺𑀜𑁆𑀘𑀺 𑀅𑀓𑀢𑀢𑁆𑀢𑀸 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀯𑀸𑀘𑀸𑀬 ‘‘𑀲𑀸𑀥𑀽’’𑀢𑀺 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀦 𑀓𑀭𑀡𑀻𑀬𑁂𑀦 𑀢𑀲𑁆𑀲𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀣 𑀯𑀸 𑀕𑀫𑀦𑀓𑀸𑀮𑁂 𑀢𑀁 𑀤𑀺𑀲𑁆𑀯𑀸 𑀯𑀘𑀻𑀪𑁂𑀤𑁂𑀦 𑀯𑀻𑀫𑀁𑀲𑀺𑀢𑁆𑀯𑀸 𑀧𑀼𑀦𑀧𑀺 𑀅𑀜𑁆𑀜𑁂𑀦𑁂𑀯 𑀓𑀸𑀭𑀡𑁂𑀦 𑀢𑀢𑁄 𑀅𑀧𑀓𑁆𑀓𑀫𑁆𑀫 𑀓𑀤𑀸𑀘𑀺𑀤𑁂𑀯 𑀢𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲𑀸𑀧𑀺 𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀲𑁆𑀲 𑀧𑀦 𑀔𑀻𑀡𑀸𑀲𑀯𑀲𑁆𑀲𑀸𑀧𑀺 𑀧𑀺𑀢𑀼𑀯𑀘𑀦𑁂𑀦 𑀕𑀦𑁆𑀢𑁆𑀯𑀸 𑀅𑀮𑀁𑀯𑀘𑀦𑀻𑀬𑀁 𑀫𑀸𑀢𑀭𑀫𑁆𑀧𑀺 ‘‘𑀏𑀳𑀺 𑀫𑁂 𑀧𑀺𑀢𑀭𑀁 𑀉𑀧𑀝𑁆𑀞𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀘𑁆𑀘𑀸𑀳𑀭𑀦𑁆𑀢𑀲𑁆𑀲 𑀓𑀸𑀬𑀯𑀸𑀘𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀇𑀫𑀸𑀦𑀺 𑀢𑀻𑀡𑀺 𑀅𑀘𑀺𑀢𑁆𑀢𑀓𑀲𑀫𑀼𑀝𑁆𑀞𑀸𑀦𑀸𑀦𑀺. 𑀢𑀤𑀼𑀪𑀬𑀁 𑀧𑀦 𑀚𑀸𑀦𑀺𑀢𑁆𑀯𑀸 𑀏𑀢𑁂𑀳𑁂𑀯 𑀢𑀻𑀳𑀺 𑀦𑀬𑁂𑀳𑀺 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀢𑀸𑀦𑁂𑀯 𑀢𑀻𑀡𑀺 𑀢𑀤𑀼𑀪𑀬𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀸𑀦𑀺 𑀳𑁄𑀦𑁆𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀓𑀼𑀲𑀮𑀸𑀤𑀺𑀯𑀲𑁂𑀦 𑀘𑁂𑀢𑁆𑀣 𑀢𑀻𑀡𑀺 𑀘𑀺𑀢𑁆𑀢𑀸𑀦𑀺, 𑀲𑀼𑀔𑀸𑀤𑀺𑀯𑀲𑁂𑀦 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺.

𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀲𑀜𑁆𑀜𑀸𑀘𑀺𑀓𑀸𑀬 𑀧𑀦𑀸𑀢𑀺 𑀏𑀢𑁆𑀣 𑀲𑀜𑁆𑀜𑀸𑀘𑀺𑀓𑀸 𑀦𑀸𑀫 𑀲𑀬𑀁 𑀧𑀯𑀢𑁆𑀢𑀺𑀢𑀬𑀸𑀘𑀦𑀸 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀜𑁆𑀜𑀸𑀘𑀺𑀓𑀸𑀬𑀸𑀢𑀺 𑀅𑀢𑁆𑀢𑀦𑁄 𑀬𑀸𑀘𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑀬𑀁 𑀬𑀸𑀘𑀺𑀢𑀓𑁂𑀳𑀺 𑀉𑀧𑀓𑀭𑀡𑁂𑀳𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀬𑀁𑀓𑀺𑀜𑁆𑀘𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀓𑀁 𑀫𑀽𑀮𑀘𑁆𑀙𑁂𑀤𑀯𑀲𑁂𑀦 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀧𑀦 𑀯𑀝𑁆𑀝𑀢𑀺. 𑀲𑀳𑀸𑀬𑀢𑁆𑀣𑀸𑀬 𑀓𑀫𑁆𑀫𑀓𑀭𑀡𑀢𑁆𑀣𑀸𑀬 ‘‘𑀧𑀼𑀭𑀺𑀲𑀁 𑀤𑁂𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀧𑀼𑀭𑀺𑀲𑀢𑁆𑀢𑀓𑀭𑀫𑁆𑀧𑀺 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀼𑀭𑀺𑀲𑀢𑁆𑀢𑀓𑀭𑁄 𑀦𑀸𑀫 𑀯𑀟𑁆𑀠𑀓𑀺𑀆𑀤𑀺𑀦𑀸 𑀧𑀼𑀭𑀺𑀲𑁂𑀦 𑀓𑀸𑀢𑀩𑁆𑀩𑀁 𑀳𑀢𑁆𑀣𑀓𑀫𑁆𑀫𑀁. 𑀢𑀁 ‘‘𑀧𑀼𑀭𑀺𑀲𑀢𑁆𑀢𑀓𑀭𑀁 𑀤𑁂𑀳𑀻’’𑀢𑀺 𑀯𑀸 ‘‘𑀳𑀢𑁆𑀣𑀓𑀫𑁆𑀫𑀁 𑀤𑁂𑀳𑀻’’𑀢𑀺 𑀯𑀸 𑀯𑀢𑁆𑀯𑀸 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀳𑀢𑁆𑀣𑀓𑀫𑁆𑀫𑀁 𑀦𑀸𑀫 𑀓𑀺𑀜𑁆𑀘𑀺 𑀯𑀢𑁆𑀣𑀼 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀺𑀁, 𑀪𑀦𑁆𑀢𑁂, 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁂 𑀯𑀸 𑀅𑀧𑀼𑀘𑁆𑀙𑀺𑀢𑁂 𑀯𑀸 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀯𑀺𑀜𑁆𑀜𑀢𑁆𑀢𑀺𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀺, 𑀫𑀺𑀕𑀮𑀼𑀤𑁆𑀤𑀓𑀸𑀤𑀬𑁄 𑀧𑀦 𑀲𑀓𑀓𑀫𑁆𑀫𑀁 𑀦 𑀬𑀸𑀘𑀺𑀢𑀩𑁆𑀩𑀸. 𑀓𑀼𑀝𑀺𑀦𑁆𑀢𑀺 𑀉𑀮𑁆𑀮𑀺𑀢𑁆𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁. 𑀢𑀢𑁆𑀣 𑀉𑀮𑁆𑀮𑀺𑀢𑁆𑀢𑀸 𑀦𑀸𑀫 𑀞𑀧𑁂𑀢𑁆𑀯𑀸 𑀣𑀫𑁆𑀪𑀢𑀼𑀮𑀸𑀧𑀺𑀝𑁆𑀞𑀲𑀗𑁆𑀖𑀸𑀝𑀯𑀸𑀢𑀧𑀸𑀦𑀥𑀽𑀫𑀘𑁆𑀙𑀺𑀤𑁆𑀤𑀸𑀤𑀺𑀪𑁂𑀤𑀁 𑀅𑀮𑁂𑀧𑁄𑀓𑀸𑀲𑀁 𑀅𑀯𑀲𑁂𑀲𑁂 𑀮𑁂𑀧𑁄𑀓𑀸𑀲𑁂 𑀓𑀼𑀝𑁆𑀝𑁂𑀳𑀺 𑀲𑀤𑁆𑀥𑀺𑀁 𑀖𑀝𑁂𑀢𑁆𑀯𑀸 𑀙𑀤𑀦𑀲𑁆𑀲 𑀅𑀦𑁆𑀢𑁄 𑀲𑀼𑀥𑀸𑀬 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀮𑀺𑀢𑁆𑀢𑀸. 𑀅𑀯𑀮𑀺𑀢𑁆𑀢𑀸 𑀦𑀸𑀫 𑀢𑀣𑁂𑀯 𑀯𑀼𑀢𑁆𑀢𑀦𑀬𑁂𑀦𑁂𑀯 𑀙𑀤𑀦𑀲𑁆𑀲 𑀩𑀳𑀺 𑀮𑀺𑀢𑁆𑀢𑀸. 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸 𑀦𑀸𑀫 𑀢𑀣𑁂𑀯 𑀙𑀤𑀦𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀮𑀺𑀢𑁆𑀢𑀸. 𑀓𑀸𑀭𑀬𑀫𑀸𑀦𑁂𑀦𑀸𑀢𑀺 𑀲𑀬𑀁 𑀯𑀸 𑀓𑀭𑁄𑀦𑁆𑀢𑁂𑀦, 𑀆𑀡𑀢𑁆𑀢𑀺𑀬𑀸 𑀯𑀸 𑀓𑀸𑀭𑀸𑀧𑁂𑀦𑁆𑀢𑁂𑀦. 𑀅𑀲𑀸𑀫𑀺𑀓𑀦𑁆𑀢𑀺 𑀓𑀸𑀭𑁂𑀢𑀸 𑀤𑀸𑀬𑀓𑁂𑀦 𑀯𑀺𑀭𑀳𑀺𑀢𑀁. 𑀅𑀢𑁆𑀢𑀼𑀤𑁆𑀤𑁂𑀲𑀦𑁆𑀢𑀺 ‘‘𑀫𑀬𑁆𑀳𑀁 𑀯𑀸𑀲𑀸𑀕𑀸𑀭𑀁 𑀏𑀲𑀸’’𑀢𑀺 𑀏𑀯𑀁 𑀅𑀢𑁆𑀢𑀸 𑀉𑀤𑁆𑀤𑁂𑀲𑁄 𑀏𑀢𑀺𑀲𑁆𑀲𑀸𑀢𑀺 𑀅𑀢𑁆𑀢𑀼𑀤𑁆𑀤𑁂𑀲𑀸, 𑀢𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. 𑀧𑀫𑀸𑀡𑀺𑀓𑀸 𑀓𑀸𑀭𑁂𑀢𑀩𑁆𑀩𑀸𑀢𑀺 𑀧𑀫𑀸𑀡𑀬𑀼𑀢𑁆𑀢𑀸 𑀓𑀸𑀭𑁂𑀢𑀩𑁆𑀩𑀸. 𑀢𑀢𑁆𑀭𑀺𑀤𑀁 𑀧𑀫𑀸𑀡𑀦𑁆𑀢𑀺 𑀢𑀲𑁆𑀲𑀸 𑀓𑀼𑀝𑀺𑀬𑀸 𑀇𑀤𑀁 𑀧𑀫𑀸𑀡𑀁. 𑀤𑀻𑀖𑀲𑁄𑀢𑀺 𑀤𑀻𑀖𑀢𑁄. 𑀤𑁆𑀯𑀸𑀤𑀲 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸𑀢𑀺𑀏𑀢𑁆𑀣 𑀲𑀼𑀕𑀢𑀯𑀺𑀤𑀢𑁆𑀣𑀺 𑀦𑀸𑀫 𑀇𑀤𑀸𑀦𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄, 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄 𑀳𑁄𑀢𑀺. 𑀫𑀺𑀦𑀦𑁆𑀢𑁂𑀦 𑀧𑀦 𑀓𑀼𑀝𑀺𑀬𑀸 𑀩𑀳𑀺𑀓𑀼𑀝𑁆𑀝𑁂 𑀧𑀞𑀫𑀁 𑀤𑀺𑀦𑁆𑀦𑀁 𑀫𑀳𑀸𑀫𑀢𑁆𑀢𑀺𑀓𑀧𑀭𑀺𑀬𑀦𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀣𑀼𑀲𑀧𑀺𑀡𑁆𑀟𑀧𑀭𑀺𑀬𑀦𑁆𑀢𑁂𑀦 𑀤𑁆𑀯𑀸𑀤𑀲 𑀯𑀺𑀤𑀢𑁆𑀣𑀺𑀬𑁄 𑀫𑀺𑀦𑁂𑀢𑀩𑁆𑀩𑀸, 𑀲𑀘𑁂 𑀣𑀼𑀲𑀧𑀺𑀡𑁆𑀟𑀓𑁂𑀦 𑀅𑀦𑀢𑁆𑀣𑀺𑀓𑁄 𑀳𑁄𑀢𑀺, 𑀫𑀳𑀸𑀫𑀢𑁆𑀢𑀺𑀓𑀮𑁂𑀧𑁂𑀦𑁂𑀯 𑀦𑀺𑀝𑁆𑀞𑀸𑀧𑁂𑀢𑀺, 𑀲𑁆𑀯𑁂𑀯 𑀧𑀭𑀺𑀘𑁆𑀙𑁂𑀤𑁄. 𑀢𑀺𑀭𑀺𑀬𑀦𑁆𑀢𑀺 𑀯𑀺𑀢𑁆𑀣𑀸𑀭𑀢𑁄. 𑀲𑀢𑁆𑀢𑀦𑁆𑀢𑀭𑀸𑀢𑀺 𑀓𑀼𑀝𑁆𑀝𑀲𑁆𑀲 𑀩𑀳𑀺𑀅𑀦𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀺𑀫𑁂𑀦 𑀅𑀦𑁆𑀢𑁂𑀦 𑀲𑀢𑁆𑀢 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑁄 𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑀻𑀖𑀢𑁄 𑀳𑀸𑀧𑁂𑀢𑁆𑀯𑀸 𑀢𑀺𑀭𑀺𑀬𑀁, 𑀢𑀺𑀭𑀺𑀬𑀢𑁄 𑀯𑀸 𑀳𑀸𑀧𑁂𑀢𑁆𑀯𑀸 𑀤𑀻𑀖𑀁 𑀯𑀟𑁆𑀠𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑁄 𑀧𑀦 𑀯𑀸𑀤𑁄 𑀉𑀪𑀢𑁄𑀯𑀟𑁆𑀠𑀦𑁂. 𑀬𑀸 𑀧𑀦 𑀤𑀻𑀖𑀢𑁄 𑀲𑀝𑁆𑀞𑀺𑀳𑀢𑁆𑀣𑀸𑀧𑀺 𑀳𑁄𑀢𑀺, 𑀢𑀺𑀭𑀺𑀬𑀢𑁄 𑀢𑀺𑀳𑀢𑁆𑀣𑀸 𑀯𑀸 𑀊𑀦𑀓𑀘𑀢𑀼𑀳𑀢𑁆𑀣𑀸 𑀯𑀸, 𑀬𑀢𑁆𑀣 𑀧𑀫𑀸𑀡𑀬𑀼𑀢𑁆𑀢𑁄 𑀫𑀜𑁆𑀘𑁄 𑀇𑀢𑁄 𑀘𑀺𑀢𑁄 𑀘 𑀦 𑀧𑀭𑀺𑀯𑀝𑁆𑀝𑀢𑀺, 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑀼𑀳𑀢𑁆𑀣𑀯𑀺𑀢𑁆𑀣𑀸𑀭𑀸 𑀦 𑀳𑁄𑀢𑀺, 𑀅𑀬𑀁 𑀓𑀼𑀝𑀺𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀽 𑀅𑀪𑀺𑀦𑁂𑀢𑀩𑁆𑀩𑀸 𑀯𑀢𑁆𑀣𑀼𑀤𑁂𑀲𑀦𑀸𑀬𑀸𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀓𑀼𑀝𑀺𑀁 𑀓𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀲𑁄𑀥𑁂𑀢𑁆𑀯𑀸 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁩𑁪𑁯) 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑀁 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀺𑀢𑁆𑀯𑀸 𑀲𑀩𑁆𑀩𑁂 𑀯𑀸 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀸 𑀲𑀗𑁆𑀖𑁂𑀦 𑀯𑀸 𑀲𑀫𑁆𑀫𑀢𑀸 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 𑀢𑀢𑁆𑀣 𑀯𑀢𑁆𑀣𑀼𑀤𑁂𑀲𑀦𑀢𑁆𑀣𑀸𑀬 𑀦𑁂𑀢𑀩𑁆𑀩𑀸. 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀣𑀼 𑀤𑁂𑀲𑁂𑀢𑀩𑁆𑀩𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀦𑁆𑀢𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀦𑀁 𑀆𑀲𑀬𑀸𑀤𑀻𑀳𑀺 𑀢𑁂𑀭𑀲𑀳𑀺, 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀦𑀺𑀲𑁆𑀲𑀺𑀢𑀸𑀤𑀻𑀳𑀺 𑀲𑁄𑀴𑀲𑀳𑀺 𑀉𑀧𑀤𑁆𑀤𑀯𑁂𑀳𑀺 𑀯𑀺𑀭𑀳𑀺𑀢𑀢𑁆𑀢𑀸 𑀅𑀦𑀸𑀭𑀫𑁆𑀪𑀁, 𑀤𑁆𑀯𑀻𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀩𑀮𑀺𑀩𑀤𑁆𑀥𑁂𑀳𑀺 𑀬𑀼𑀢𑁆𑀢𑁂𑀦 𑀲𑀓𑀝𑁂𑀦 𑀏𑀓𑀁 𑀘𑀓𑁆𑀓𑀁 𑀦𑀺𑀩𑁆𑀩𑁄𑀤𑀓𑀧𑀢𑀦𑀝𑁆𑀞𑀸𑀦𑁂 𑀏𑀓𑀁 𑀩𑀳𑀺 𑀓𑀢𑁆𑀯𑀸 𑀆𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀲𑀧𑀭𑀺𑀓𑁆𑀓𑀫𑀦𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂 𑀲𑀗𑁆𑀖𑀧𑀳𑁄𑀦𑀓𑀸 𑀳𑁄𑀦𑁆𑀢𑀺, 𑀢𑀢𑁆𑀣𑁂𑀯, 𑀦𑁄 𑀘𑁂, 𑀲𑀗𑁆𑀖𑀫𑀚𑁆𑀛𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀬𑀸𑀘𑀺𑀢𑁂𑀳𑀺 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀯𑀢𑁆𑀣𑀼 𑀤𑁂𑀲𑁂𑀢𑀩𑁆𑀩𑀁. 𑀲𑀸𑀭𑀫𑁆𑀪𑁂 𑀘𑁂𑀢𑀺𑀆𑀤𑀺 𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀆𑀴𑀯𑀺𑀬𑀁 𑀆𑀴𑀯𑀺𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀓𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀲𑀸𑀡𑀢𑁆𑀢𑀺𑀓𑀁, ‘‘𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀼𑀝𑀺𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀓𑀭𑀡𑀢𑁆𑀣𑀁 𑀅𑀭𑀜𑁆𑀜𑀁 𑀕𑀫𑀦𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁, ‘‘𑀇𑀤𑀸𑀦𑀺 𑀤𑁆𑀯𑀻𑀳𑀺 𑀧𑀺𑀡𑁆𑀟𑁂𑀳𑀺 𑀦𑀺𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀢𑁂𑀲𑀼 𑀧𑀞𑀫𑀧𑀺𑀡𑁆𑀟𑀤𑀸𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑀤𑀸𑀦𑁂𑀦 𑀮𑁂𑀧𑁂 𑀖𑀝𑀺𑀢𑁂 𑀲𑀘𑁂 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀏𑀯 𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸 𑀏𑀯 𑀯𑀸 𑀳𑁄𑀢𑀺, 𑀏𑀓𑁄 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀤𑁆𑀯𑁂 𑀘 𑀤𑀼𑀓𑁆𑀓𑀝𑀸𑀦𑀺. 𑀉𑀪𑀬𑀯𑀺𑀧𑁆𑀧𑀦𑁆𑀦𑀸, 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸, 𑀤𑁆𑀯𑁂 𑀘 𑀤𑀼𑀓𑁆𑀓𑀝𑀸𑀦𑀺. 𑀲𑀘𑁂 𑀧𑀦 𑀤𑁆𑀯𑀸𑀭𑀩𑀦𑁆𑀥𑀁 𑀯𑀸 𑀯𑀸𑀢𑀧𑀸𑀦𑀁 𑀯𑀸 𑀅𑀝𑁆𑀞𑀧𑁂𑀢𑁆𑀯𑀸𑀯 𑀫𑀢𑁆𑀢𑀺𑀓𑀸𑀬 𑀮𑀺𑀫𑁆𑀧𑀢𑀺, 𑀞𑀧𑀺𑀢𑁂 𑀘 𑀢𑀲𑁆𑀫𑀺𑀁 𑀮𑁂𑀧𑁄 𑀦 𑀖𑀝𑀺𑀬𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀧𑀼𑀦 𑀮𑀺𑀫𑁆𑀧𑀦𑁆𑀢𑀲𑁆𑀲 𑀧𑀦 𑀖𑀝𑀺𑀢𑀫𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀢𑀁 𑀞𑀧𑀺𑀬𑀫𑀸𑀦𑀁 𑀧𑀞𑀫𑀤𑀺𑀦𑁆𑀦𑀮𑁂𑀧𑁂𑀦 𑀲𑀤𑁆𑀥𑀺𑀁 𑀦𑀺𑀭𑀦𑁆𑀢𑀭𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀧𑀞𑀫𑀫𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀓𑁂𑀯𑀮𑀁 𑀲𑀸𑀭𑀫𑁆𑀪𑀸𑀬 𑀤𑀼𑀓𑁆𑀓𑀝𑀁, 𑀢𑀣𑀸 𑀅𑀧𑀭𑀺𑀓𑁆𑀓𑀫𑀦𑀸𑀬. 𑀯𑀺𑀧𑁆𑀧𑀓𑀢𑀁 𑀓𑀼𑀝𑀺𑀁 𑀅𑀜𑁆𑀜𑀲𑁆𑀲 𑀤𑀤𑀢𑁄 𑀘, 𑀪𑀽𑀫𑀺𑀁 𑀲𑀫𑀁 𑀓𑀢𑁆𑀯𑀸 𑀪𑀺𑀦𑁆𑀤𑀦𑁆𑀢𑀲𑁆𑀲 𑀘, 𑀮𑁂𑀡𑀕𑀼𑀳𑀸𑀢𑀺𑀡𑀓𑀼𑀝𑀺𑀧𑀡𑁆𑀡𑀘𑁆𑀙𑀤𑀦𑀕𑁂𑀳𑁂𑀲𑀼 𑀅𑀜𑁆𑀜𑀢𑀭𑀁 𑀓𑀸𑀭𑁂𑀦𑁆𑀢𑀲𑁆𑀲, 𑀓𑀼𑀝𑀺𑀫𑁆𑀧𑀺 𑀅𑀜𑁆𑀜𑀲𑁆𑀲 𑀯𑀸𑀲𑀢𑁆𑀣𑀸𑀬, 𑀯𑀸𑀲𑀸𑀕𑀸𑀭𑀁 𑀞𑀧𑁂𑀢𑁆𑀯𑀸 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀲𑀼 𑀅𑀜𑁆𑀜𑀢𑀭𑀢𑁆𑀣𑀸𑀬 𑀓𑀸𑀭𑁂𑀦𑁆𑀢𑀲𑁆𑀲 𑀘 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑀻𑀮𑀯𑀺𑀧𑀢𑁆𑀢𑀺, 𑀉𑀮𑁆𑀮𑀺𑀢𑁆𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀢𑀸, 𑀳𑁂𑀝𑁆𑀞𑀺𑀫𑀧𑀫𑀸𑀡𑀲𑀫𑁆𑀪𑀯𑁄, 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀢𑀸, 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀢𑀸, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀯𑀸𑀲𑀸𑀕𑀸𑀭𑀢𑀸, 𑀮𑁂𑀧𑀖𑀝𑀦𑀸𑀢𑀺 𑀇𑀫𑀸𑀦𑁂𑀢𑁆𑀣 𑀙 𑀯𑀸 𑀲𑀢𑁆𑀢 𑀯𑀸 𑀅𑀗𑁆𑀕𑀸𑀦𑀺. 𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀜𑁆𑀘, 𑀓𑀺𑀭𑀺𑀬𑀸𑀓𑀺𑀭𑀺𑀬𑀜𑁆𑀘. 𑀇𑀤𑀜𑁆𑀳𑀺 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀯𑀸 𑀓𑀭𑁄𑀢𑁄 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀅𑀤𑁂𑀲𑀸𑀧𑁂𑀢𑁆𑀯𑀸 𑀓𑀭𑁄𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀜𑁆𑀘𑀭𑀺𑀢𑁆𑀢𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀫𑀳𑀮𑁆𑀮𑀓𑀦𑁆𑀢𑀺 𑀲𑀲𑀸𑀫𑀺𑀓𑀪𑀸𑀯𑁂𑀦 𑀲𑀜𑁆𑀜𑀸𑀘𑀺𑀢𑀓𑀼𑀝𑀺𑀢𑁄 𑀫𑀳𑀦𑁆𑀢𑀪𑀸𑀯𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀳𑀮𑁆𑀮𑀓𑁄, 𑀬𑀲𑁆𑀫𑀸 𑀯𑀸 𑀯𑀢𑁆𑀣𑀼𑀁 𑀤𑁂𑀲𑀸𑀧𑁂𑀢𑁆𑀯𑀸 𑀧𑀫𑀸𑀡𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀧𑀫𑀸𑀡𑀫𑀳𑀦𑁆𑀢𑀢𑀸𑀬𑀧𑀺 𑀫𑀳𑀮𑁆𑀮𑀓𑁄, 𑀢𑀁 𑀫𑀳𑀮𑁆𑀮𑀓𑀁. 𑀬𑀲𑁆𑀫𑀸 𑀧𑀦𑀲𑁆𑀲 𑀢𑀁 𑀧𑀫𑀸𑀡𑀫𑀳𑀦𑁆𑀢𑀢𑁆𑀢𑀁 𑀲𑀲𑀸𑀫𑀺𑀓𑀢𑁆𑀢𑀸𑀯 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 ‘‘𑀫𑀳𑀮𑁆𑀮𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀲𑀲𑀸𑀫𑀺𑀓𑁄 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁩𑁬𑁭) 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀁 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀲𑀤𑀺𑀲𑀁, 𑀲𑀲𑀸𑀫𑀺𑀓𑀪𑀸𑀯𑀫𑀢𑁆𑀢𑀫𑁂𑀯 𑀳𑀺 𑀯𑀺𑀲𑁂𑀲𑁄.

𑀓𑁄𑀲𑀫𑁆𑀩𑀺𑀬𑀁 𑀙𑀦𑁆𑀦𑀢𑁆𑀣𑁂𑀭𑀁 𑀆𑀭𑀩𑁆𑀪 𑀘𑁂𑀢𑀺𑀬𑀭𑀼𑀓𑁆𑀔𑀁 𑀙𑁂𑀤𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀪𑀸𑀯𑁄, 𑀅𑀓𑀺𑀭𑀺𑀬𑀫𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀦𑀪𑀸𑀯𑁄, 𑀏𑀓𑀲𑀗𑁆𑀖𑀸𑀤𑀺𑀲𑁂𑀲𑀢𑀸 𑀘 𑀏𑀢𑁆𑀣 𑀯𑀺𑀲𑁂𑀲𑁄.

𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀤𑀼𑀝𑁆𑀞𑁄 𑀤𑁄𑀲𑁄𑀢𑀺 𑀤𑀽𑀲𑀺𑀢𑁄 𑀘𑁂𑀯 𑀤𑀽𑀲𑀓𑁄 𑀘. 𑀉𑀧𑁆𑀧𑀦𑁆𑀦𑁂 𑀳𑀺 𑀤𑁄𑀲𑁂 𑀧𑀼𑀕𑁆𑀕𑀮𑁄 𑀢𑁂𑀦 𑀤𑁄𑀲𑁂𑀦 𑀤𑀽𑀲𑀺𑀢𑁄 𑀳𑁄𑀢𑀺, 𑀧𑀓𑀢𑀺𑀪𑀸𑀯𑀁 𑀚𑀳𑀸𑀧𑀺𑀢𑁄, 𑀢𑀲𑁆𑀫𑀸 ‘‘𑀤𑀼𑀝𑁆𑀞𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀜𑁆𑀘 𑀤𑀽𑀲𑁂𑀢𑀺 𑀯𑀺𑀦𑀸𑀲𑁂𑀢𑀺, 𑀢𑀲𑁆𑀫𑀸 ‘‘𑀤𑁄𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 ‘‘𑀤𑀼𑀝𑁆𑀞𑁄 𑀤𑁄𑀲𑁄’’𑀢𑀺 𑀏𑀓𑀲𑁆𑀲𑁂𑀯𑁂𑀢𑀁 𑀧𑀼𑀕𑁆𑀕𑀮𑀲𑁆𑀲 𑀆𑀓𑀸𑀭𑀦𑀸𑀦𑀢𑁆𑀢𑁂𑀦 𑀦𑀺𑀤𑀲𑁆𑀲𑀦𑀁. 𑀅𑀧𑁆𑀧𑀢𑀻𑀢𑁄𑀢𑀺 𑀦𑀧𑁆𑀧𑀢𑀻𑀢𑁄, 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀯𑀺𑀯𑀚𑁆𑀚𑀺𑀢𑁄, 𑀦 𑀅𑀪𑀺𑀲𑀝𑁄𑀢𑀺 𑀅𑀢𑁆𑀣𑁄. 𑀅𑀫𑀽𑀮𑀓𑁂𑀦𑀸𑀢𑀺 𑀬𑀁 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑀫𑁆𑀳𑀺 𑀧𑀼𑀕𑁆𑀕𑀮𑁂 𑀅𑀤𑀺𑀝𑁆𑀞𑀁 𑀅𑀲𑁆𑀲𑀼𑀢𑀁 𑀅𑀧𑀭𑀺𑀲𑀗𑁆𑀓𑀺𑀢𑀁, 𑀇𑀤𑀁 𑀏𑀢𑁂𑀲𑀁 𑀤𑀲𑁆𑀲𑀦𑀲𑀯𑀦𑀧𑀭𑀺𑀲𑀗𑁆𑀓𑀸𑀲𑀗𑁆𑀔𑀸𑀢𑀸𑀦𑀁 𑀫𑀽𑀮𑀸𑀦𑀁 𑀅𑀪𑀸𑀯𑀢𑁄 𑀅𑀫𑀽𑀮𑀓𑀁 𑀦𑀸𑀫. 𑀢𑀁 𑀧𑀦 𑀲𑁄 𑀆𑀧𑀦𑁆𑀦𑁄 𑀯𑀸 𑀳𑁄𑀢𑀼, 𑀅𑀦𑀸𑀧𑀦𑁆𑀦𑁄 𑀯𑀸, 𑀏𑀢𑀁 𑀇𑀥 𑀅𑀧𑁆𑀧𑀫𑀸𑀡𑀁. 𑀏𑀢𑁆𑀣 𑀘 𑀅𑀤𑀺𑀝𑁆𑀞𑀁 𑀦𑀸𑀫 𑀅𑀢𑁆𑀢𑀦𑁄 𑀧𑀲𑀸𑀤𑀘𑀓𑁆𑀔𑀼𑀦𑀸 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀅𑀤𑀺𑀝𑁆𑀞𑀁, 𑀅𑀲𑁆𑀲𑀼𑀢𑀁 𑀦𑀸𑀫 𑀢𑀣𑁂𑀯 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑀁 𑀦 𑀲𑀼𑀢𑀁, 𑀅𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀲𑁂𑀦 𑀘𑁂𑀢𑀲𑀸 𑀅𑀧𑀭𑀺𑀲𑀗𑁆𑀓𑀺𑀢𑀁, 𑀇𑀢𑀺 𑀏𑀯𑀭𑀽𑀧𑁂𑀦 𑀅𑀫𑀽𑀮𑀓𑁂𑀦. 𑀧𑀸𑀭𑀸𑀚𑀺𑀓𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀅𑀜𑁆𑀜𑀢𑀭𑁂𑀦, 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁩𑁮𑁬) 𑀧𑀦 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑁂 𑀆𑀕𑀢𑀸𑀦𑁂𑀯 𑀕𑀳𑁂𑀢𑁆𑀯𑀸 ‘‘𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀥𑀁𑀲𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬 𑀧𑀥𑀁𑀲𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬. 𑀢𑀁 𑀧𑀦 𑀅𑀦𑀼𑀤𑁆𑀥𑀁𑀲𑀦𑀁 𑀬𑀲𑁆𑀫𑀸 𑀅𑀢𑁆𑀢𑀦𑀸 𑀘𑁄𑀤𑁂𑀦𑁆𑀢𑁄𑀧𑀺 𑀧𑀭𑁂𑀦 𑀘𑁄𑀤𑀸𑀧𑁂𑀦𑁆𑀢𑁄𑀧𑀺 𑀓𑀭𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸 𑀲𑀁𑀯𑀸𑀲𑀧𑁆𑀧𑀝𑀺𑀓𑁆𑀔𑁂𑀧𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀓𑁆𑀔𑁂𑀧𑁄𑀢𑀺 𑀲𑀗𑁆𑀔𑁂𑀧𑀢𑁄 𑀘𑀢𑀲𑁆𑀲𑁄 𑀘𑁄𑀤𑀦𑀸. 𑀢𑀸𑀲𑀼 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸 𑀦𑀸𑀫 ‘‘𑀢𑁆𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸. 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸 𑀦𑀸𑀫 ‘‘𑀢𑁆𑀯𑀁 𑀫𑁂𑀣𑀼𑀦𑀥𑀫𑁆𑀫𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸. 𑀲𑀁𑀯𑀸𑀲𑀧𑁆𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 ‘‘𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑁄. 𑀏𑀢𑁆𑀢𑀸𑀯𑀢𑀸 𑀧𑀦 𑀲𑀻𑀲𑀁 𑀦 𑀏𑀢𑀺, ‘‘𑀅𑀲𑁆𑀲𑀫𑀡𑁄𑀲𑀻’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀲𑀤𑁆𑀥𑀺𑀁 𑀖𑀝𑀺𑀢𑁂𑀬𑁂𑀯 𑀲𑀻𑀲𑀁 𑀏𑀢𑀺. 𑀲𑀸𑀫𑀻𑀘𑀺𑀧𑁆𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀩𑀻𑀚𑀦𑀺𑀓𑀫𑁆𑀫𑀸𑀤𑀻𑀦𑀁 𑀅𑀓𑀭𑀡𑀁, 𑀢𑀁 𑀧𑀝𑀺𑀧𑀸𑀢𑀺𑀬𑀸 𑀯𑀦𑁆𑀤𑀦𑀸𑀤𑀻𑀦𑀺 𑀓𑀭𑁄𑀢𑁄 𑀏𑀓𑀲𑁆𑀲 𑀅𑀓𑀢𑁆𑀯𑀸 𑀲𑁂𑀲𑀸𑀦𑀁 𑀓𑀭𑀡𑀓𑀸𑀮𑁂 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀘 𑀘𑁄𑀤𑀦𑀸 𑀦𑀸𑀫 𑀳𑁄𑀢𑀺, 𑀆𑀧𑀢𑁆𑀢𑀺 𑀧𑀦 𑀲𑀻𑀲𑀁 𑀦 𑀏𑀢𑀺. ‘‘𑀓𑀲𑁆𑀫𑀸 𑀫𑀫 𑀯𑀦𑁆𑀤𑀦𑀸𑀤𑀻𑀦𑀺 𑀦 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀧𑀦 ‘‘𑀅𑀲𑁆𑀲𑀫𑀡𑁄𑀲𑀻’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀲𑀤𑁆𑀥𑀺𑀁 𑀖𑀝𑀺𑀢𑁂𑀬𑁂𑀯 𑀲𑀻𑀲𑀁 𑀏𑀢𑀺, 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀲𑀫𑀻𑀧𑁂 𑀞𑀢𑁆𑀯𑀸 ‘‘𑀢𑁆𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀻’’𑀢𑀺 𑀯𑀸 ‘‘𑀅𑀲𑁆𑀲𑀫𑀡𑁄𑀲𑀻’’𑀢𑀺 𑀯𑀸 𑀆𑀤𑀻𑀳𑀺 𑀯𑀘𑀦𑁂𑀳𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀏𑀯 𑀯𑀸 𑀏𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀲𑀬𑀁 𑀯𑀸 𑀘𑁄𑀤𑁂𑀢𑀺, 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀲𑀼 𑀯𑀸 𑀅𑀜𑁆𑀜𑀢𑀭𑁂𑀦 𑀘𑁄𑀤𑀸𑀧𑁂𑀢𑀺, 𑀅𑀬𑀁 𑀅𑀦𑀼𑀤𑁆𑀥𑀁𑀲𑁂𑀢𑀺 𑀦𑀸𑀫. 𑀅𑀧𑁆𑀧𑁂𑀯 𑀦𑀸𑀫 𑀦𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬𑀦𑁆𑀢𑀺 𑀅𑀧𑀺 𑀏𑀯 𑀦𑀸𑀫 𑀦𑀁 𑀧𑀼𑀕𑁆𑀕𑀮𑀁 𑀇𑀫𑀫𑁆𑀳𑀸 𑀲𑁂𑀝𑁆𑀞𑀘𑀭𑀺𑀬𑀸 𑀅𑀧𑀦𑁂𑀬𑁆𑀬𑀁. ‘‘𑀲𑀸𑀥𑀼 𑀯𑀢𑀲𑁆𑀲 𑀲𑀘𑀸𑀳𑀁 𑀇𑀫𑀁 𑀧𑀼𑀕𑁆𑀕𑀮𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’’𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀏𑀓𑀁 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑀁 𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑀸 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄 𑀓𑀫𑁆𑀫𑀸𑀥𑀺𑀧𑁆𑀧𑀸𑀬𑁄 𑀯𑀼𑀝𑁆𑀞𑀸𑀦𑀸𑀥𑀺𑀧𑁆𑀧𑀸𑀬𑁄 𑀉𑀧𑁄𑀲𑀣𑀝𑁆𑀞𑀧𑀦𑀸𑀥𑀺𑀧𑁆𑀧𑀸𑀬𑁄 𑀧𑀯𑀸𑀭𑀡𑀝𑁆𑀞𑀧𑀦𑀸𑀥𑀺𑀧𑁆𑀧𑀸𑀬𑁄 𑀅𑀦𑀼𑀯𑀺𑀚𑁆𑀚𑀦𑀸𑀥𑀺𑀧𑁆𑀧𑀸𑀬𑁄 𑀥𑀫𑁆𑀫𑀓𑀣𑀸𑀥𑀺𑀧𑁆𑀧𑀸𑀬𑁄𑀢𑀺 𑀲𑀢𑁆𑀢 𑀅𑀥𑀺𑀧𑁆𑀧𑀸𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀦𑀼𑀤𑁆𑀥𑀁𑀲𑀺𑀢𑁄 𑀳𑁄𑀢𑀺, 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀲𑀫𑀬𑁂. 𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸𑀢𑀺 𑀅𑀦𑀼𑀯𑀺𑀚𑁆𑀚𑀓𑁂𑀦 𑀓𑀺𑀁 𑀢𑁂 𑀤𑀺𑀝𑁆𑀞𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀯𑀺𑀚𑁆𑀚𑀺𑀬𑀫𑀸𑀦𑁄 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁄. 𑀅𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸𑀢𑀺 𑀤𑀺𑀝𑁆𑀞𑀸𑀤𑀻𑀲𑀼 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸𑀯𑀸 𑀅𑀦𑀼𑀯𑀺𑀚𑁆𑀚𑀓𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀯𑀸 𑀅𑀯𑀼𑀘𑁆𑀘𑀫𑀸𑀦𑁄. 𑀇𑀫𑁂𑀲𑀁 𑀧𑀦 𑀧𑀤𑀸𑀦𑀁 𑀧𑀭𑀢𑁄 ‘‘𑀪𑀺𑀓𑁆𑀔𑀼 𑀘 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀯𑀁 𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸 𑀅𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸 𑀪𑀺𑀓𑁆𑀔𑀼 𑀘 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀺 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺. 𑀇𑀤𑀜𑁆𑀘 𑀅𑀫𑀽𑀮𑀓𑀪𑀸𑀯𑀲𑁆𑀲 𑀧𑀸𑀓𑀝𑀓𑀸𑀮𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀆𑀧𑀢𑁆𑀢𑀺𑀁 𑀧𑀦 𑀅𑀦𑀼𑀤𑁆𑀥𑀁𑀲𑀺𑀢𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀢𑀺. 𑀅𑀫𑀽𑀮𑀓𑀜𑁆𑀘𑁂𑀯 𑀢𑀁 𑀅𑀥𑀺𑀓𑀭𑀡𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀦 𑀤𑀺𑀝𑁆𑀞𑀫𑀽𑀮𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀫𑀽𑀮𑀓𑀁, 𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀪𑀸𑀯𑁂𑀦 𑀅𑀥𑀺𑀓𑀭𑀡𑀁. 𑀬𑀜𑁆𑀳𑀺 𑀅𑀥𑀺𑀓𑀺𑀘𑁆𑀘 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀲𑀦𑁆𑀥𑀸𑀬 𑀲𑀫𑀣𑀸 𑀧𑀯𑀢𑁆𑀢𑀦𑁆𑀢𑀺, 𑀢𑀁 𑀅𑀥𑀺𑀓𑀭𑀡𑀁. 𑀇𑀥 𑀧𑀦 𑀧𑀸𑀭𑀸𑀚𑀺𑀓𑀲𑀗𑁆𑀔𑀸𑀢𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀬𑀤𑀺 𑀳𑀺 𑀢𑀁 𑀅𑀥𑀺𑀓𑀭𑀡𑀁 𑀤𑀺𑀝𑁆𑀞𑀸𑀤𑀻𑀳𑀺 𑀫𑀽𑀮𑁂𑀳𑀺 𑀅𑀫𑀽𑀮𑀓𑀜𑁆𑀘𑁂𑀯 𑀳𑁄𑀢𑀺, 𑀅𑀬𑀁 𑀘𑁄𑀤𑁂𑀢𑀼𑀁 𑀆𑀕𑀢𑁄 𑀪𑀺𑀓𑁆𑀔𑀼 𑀘 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀺 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺, ‘‘𑀢𑀼𑀘𑁆𑀙𑀓𑀁 𑀫𑀬𑀸 𑀪𑀡𑀺𑀢’’𑀦𑁆𑀢𑀺𑀆𑀤𑀻𑀦𑀺 (𑀧𑀸𑀭𑀸. 𑁩𑁮𑁬) 𑀯𑀤𑀦𑁆𑀢𑁄 𑀧𑀝𑀺𑀚𑀸𑀦𑀸𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑁆𑀥𑀁𑀲𑀺𑀢𑀓𑁆𑀔𑀡𑁂𑀬𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺, 𑀅𑀬𑀁 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀤𑀸𑀦𑀼𑀓𑁆𑀓𑀫𑁂𑀦 𑀅𑀢𑁆𑀣𑁄.

𑀭𑀸𑀚𑀕𑀳𑁂 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀅𑀦𑀼𑀤𑁆𑀥𑀁𑀲𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀲𑀸𑀡𑀢𑁆𑀢𑀺𑀓𑀁, 𑀓𑀢𑀽𑀧𑀲𑀫𑁆𑀧𑀤𑀁 𑀲𑀼𑀤𑁆𑀥𑀁 𑀯𑀸 𑀅𑀲𑀼𑀤𑁆𑀥𑀁 𑀯𑀸 𑀧𑀼𑀕𑁆𑀕𑀮𑀁 𑀬𑁂𑀦 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀢𑀁 ‘‘𑀅𑀬𑀁 𑀅𑀦𑀚𑁆𑀛𑀸𑀧𑀦𑁆𑀦𑁄’’𑀢𑀺 𑀜𑀢𑁆𑀯𑀸 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀓𑀭𑁄𑀢𑀼 𑀫𑁂 𑀆𑀬𑀲𑁆𑀫𑀸 𑀑𑀓𑀸𑀲𑀁, 𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀑𑀓𑀸𑀲𑀁 𑀅𑀓𑀸𑀭𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀲𑀘𑁂 𑀲𑁄 𑀢𑀗𑁆𑀔𑀡𑁂𑀬𑁂𑀯 𑀚𑀸𑀦𑀸𑀢𑀺 ‘‘𑀫𑀁 𑀘𑁄𑀤𑁂𑀢𑀻’’𑀢𑀺, 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄 𑀘𑁂𑀯 𑀤𑀼𑀓𑁆𑀓𑀝𑀜𑁆𑀘. 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀬𑁂𑀯. 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀫𑁆𑀫𑀼𑀔𑀸 𑀘𑁄𑀤𑁂𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀫𑁆𑀫𑀼𑀔𑀸 𑀘𑁄𑀤𑁂𑀦𑁆𑀢𑀲𑁆𑀲 𑀧𑀦 𑀲𑀻𑀲𑀁 𑀦 𑀏𑀢𑀺. 𑀅𑀢𑁆𑀢𑀦𑀸 𑀲𑀫𑀻𑀧𑁂 𑀞𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺, 𑀲𑁄 𑀢𑀲𑁆𑀲 𑀯𑀘𑀦𑁂𑀦 𑀢𑀁 𑀘𑁄𑀤𑁂𑀢𑀺, 𑀘𑁄𑀤𑀸𑀧𑀓𑀲𑁆𑀲𑁂𑀯 𑀯𑀼𑀢𑁆𑀢𑀦𑀬𑁂𑀦 𑀆𑀧𑀢𑁆𑀢𑀺𑀬𑁄. 𑀅𑀣 𑀲𑁄𑀧𑀺 ‘‘𑀫𑀬𑀸 𑀤𑀺𑀝𑁆𑀞𑀁 𑀲𑀼𑀢𑀁 𑀅𑀢𑁆𑀣𑀻’’𑀢𑀺 𑀘𑁄𑀤𑁂𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀚𑀸𑀦𑀸𑀦𑀁 𑀢𑀣𑁂𑀯 𑀆𑀧𑀢𑁆𑀢𑀺𑀬𑁄. 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀧𑀦 𑀑𑀓𑀸𑀲𑀁 𑀅𑀓𑀸𑀭𑁂𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑁂𑀯 𑀤𑀼𑀓𑁆𑀓𑀝𑀜𑁆𑀘. 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀓𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦 𑀅𑀲𑀫𑁆𑀫𑀼𑀔𑀸 𑀲𑀢𑁆𑀢𑀯𑀺𑀥𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯. 𑀯𑀼𑀝𑁆𑀞𑀸𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀢𑁆𑀯𑀁 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀁 𑀧𑀝𑀺𑀓𑀭𑁄𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲, 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀞𑀧𑁂𑀦𑁆𑀢𑀲𑁆𑀲 𑀘 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀺, 𑀞𑀧𑀦𑀓𑁆𑀔𑁂𑀢𑁆𑀢𑀁 𑀧𑀦 𑀚𑀸𑀦𑀺𑀢𑀩𑁆𑀩𑀁, 𑀅𑀦𑀼𑀯𑀺𑀚𑁆𑀚𑀓𑀲𑁆𑀲𑀸𑀧𑀺 𑀑𑀲𑀝𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀢𑁆𑀣𑁂𑀢𑀁 𑀢𑀯𑀸’’𑀢𑀺 𑀅𑀦𑀼𑀯𑀺𑀚𑁆𑀚𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀦𑁆𑀢𑀲𑁆𑀲 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀺, 𑀥𑀫𑁆𑀫𑀓𑀣𑀺𑀓𑀲𑁆𑀲𑀸𑀧𑀺 ‘‘𑀬𑁄 𑀇𑀤𑀜𑁆𑀘 𑀇𑀤𑀜𑁆𑀘 𑀓𑀭𑁄𑀢𑀺, 𑀅𑀬𑀁 𑀅𑀲𑁆𑀲𑀫𑀡𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑁄𑀤𑀺𑀲𑀓𑀁 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲 𑀑𑀓𑀸𑀲𑀓𑀫𑁆𑀫𑀁 𑀦𑀢𑁆𑀣𑀺. 𑀲𑀘𑁂 𑀧𑀦 𑀑𑀤𑀺𑀲𑁆𑀲 𑀦𑀺𑀬𑀫𑁂𑀢𑁆𑀯𑀸 ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀅𑀲𑁆𑀲𑀫𑀡𑁄 𑀅𑀦𑀼𑀧𑀸𑀲𑀓𑁄’’𑀢𑀺 𑀓𑀣𑁂𑀢𑀺, 𑀆𑀲𑀦𑀢𑁄 𑀑𑀭𑀼𑀬𑁆𑀳 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺, 𑀲𑀻𑀮𑀯𑀺𑀧𑀢𑁆𑀢𑀺, 𑀬𑀁 𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸, 𑀢𑀲𑁆𑀲 ‘‘𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀲𑀗𑁆𑀔𑁆𑀬𑀼𑀧𑀕𑀫𑀦𑀁, 𑀢𑀲𑁆𑀫𑀺𑀁 𑀲𑀼𑀤𑁆𑀥𑀲𑀜𑁆𑀜𑀺𑀢𑀸, 𑀬𑁂𑀦 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀅𑀫𑀽𑀮𑀓𑀢𑀸, 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀲𑀫𑁆𑀫𑀼𑀔𑀸𑀘𑁄𑀤𑀦𑀸, 𑀢𑀲𑁆𑀲 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀺. 𑀯𑁂𑀤𑀦𑀸 𑀧𑀦𑁂𑀢𑁆𑀣 𑀤𑀼𑀓𑁆𑀔𑀸𑀬𑁂𑀯𑀸𑀢𑀺.

𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀅𑀜𑁆𑀜𑀪𑀸𑀕𑀺𑀬𑀲𑁆𑀲𑀸𑀢𑀺𑀆𑀤𑀻𑀲𑀼 𑀅𑀜𑁆𑀜𑀪𑀸𑀕𑀲𑁆𑀲 𑀇𑀤𑀁, 𑀅𑀜𑁆𑀜𑀪𑀸𑀕𑁄 𑀯𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀜𑁆𑀜𑀪𑀸𑀕𑀺𑀬𑀁. 𑀅𑀥𑀺𑀓𑀭𑀡𑀦𑁆𑀢𑀺 𑀆𑀥𑀸𑀭𑁄 𑀯𑁂𑀤𑀺𑀢𑀩𑁆𑀩𑁄, 𑀯𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀳𑀺 𑀲𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 ‘‘𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀦𑀸𑀫𑀸’’𑀢𑀺 𑀙𑀕𑀮𑀓𑁄 𑀯𑀼𑀢𑁆𑀢𑁄. 𑀲𑁄 𑀬𑁆𑀯𑀸𑀬𑀁 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀪𑀸𑀕𑁄 𑀓𑁄𑀝𑁆𑀞𑀸𑀲𑁄 𑀧𑀓𑁆𑀔𑁄 𑀫𑀦𑀼𑀲𑁆𑀲𑀚𑀸𑀢𑀺 𑀘𑁂𑀯 𑀪𑀺𑀓𑁆𑀔𑀼𑀪𑀸𑀯𑁄 𑀘, 𑀢𑀢𑁄 𑀅𑀜𑁆𑀜𑀲𑁆𑀲 𑀪𑀸𑀕𑀲𑁆𑀲 𑀓𑁄𑀝𑁆𑀞𑀸𑀲𑀲𑁆𑀲 𑀧𑀓𑁆𑀔𑀲𑁆𑀲 𑀳𑁄𑀢𑀺 𑀢𑀺𑀭𑀘𑁆𑀙𑀸𑀦𑀚𑀸𑀢𑀺𑀬𑀸 𑀘𑁂𑀯 𑀙𑀕𑀮𑀓𑀪𑀸𑀯𑀲𑁆𑀲 𑀘, 𑀲𑁄 𑀯𑀸 𑀅𑀜𑁆𑀜𑀪𑀸𑀕𑁄 𑀅𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀜𑁆𑀜𑀪𑀸𑀕𑀺𑀬𑀲𑀗𑁆𑀔𑁆𑀬𑀁 𑀮𑀪𑀢𑀺. 𑀬𑀲𑁆𑀫𑀸 𑀘 𑀢𑁂𑀲𑀁 ‘‘𑀇𑀫𑀁 𑀫𑀬𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀦𑀸𑀫 𑀓𑀭𑁄𑀫𑀸’’𑀢𑀺 𑀯𑀤𑀦𑁆𑀢𑀸𑀦𑀁 𑀢𑀲𑁆𑀲 𑀦𑀸𑀫𑀓𑀭𑀡𑀲𑀜𑁆𑀜𑀸𑀬 𑀆𑀥𑀸𑀭𑁄 𑀯𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀁, 𑀢𑀲𑁆𑀫𑀸 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀜𑁆𑀳𑀺 𑀲𑀦𑁆𑀥𑀸𑀬 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸’’𑀢𑀺𑀆𑀤𑀺 (𑀧𑀸𑀭𑀸. 𑁩𑁯𑁧) 𑀯𑀼𑀢𑁆𑀢𑀁. 𑀦 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀁, 𑀓𑀲𑁆𑀫𑀸? 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀲𑁆𑀲𑀘𑀺 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑁆𑀧𑀸𑀤𑀺𑀬𑀺𑀁𑀲𑀼, 𑀦 𑀘 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀮𑁂𑀲𑁄 𑀦𑀸𑀫 𑀅𑀢𑁆𑀣𑀺. 𑀚𑀸𑀢𑀺𑀮𑁂𑀲𑀸𑀤𑀬𑁄 𑀳𑀺 𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀮𑁂𑀲𑀸 𑀯𑀼𑀢𑁆𑀢𑀸, 𑀦 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀦𑀁. 𑀢𑀜𑁆𑀘 ‘‘𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄’’𑀢𑀺 𑀦𑀸𑀫𑀁 𑀢𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀸𑀥𑀺𑀓𑀭𑀡𑀪𑀸𑀯𑁂 𑀞𑀺𑀢𑀲𑁆𑀲 𑀙𑀕𑀮𑀓𑀲𑁆𑀲 𑀓𑁄𑀘𑀺 𑀤𑁂𑀲𑁄 𑀳𑁄𑀢𑀺 𑀣𑁂𑀭𑀁 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀼𑀁 𑀮𑁂𑀲𑀫𑀢𑁆𑀢𑁄, 𑀏𑀢𑁆𑀣 𑀘 𑀤𑀺𑀲𑁆𑀲𑀢𑀺 𑀅𑀧𑀤𑀺𑀲𑁆𑀲𑀢𑀺 ‘‘𑀅𑀲𑁆𑀲 𑀅𑀬’’𑀦𑁆𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀤𑁂𑀲𑁄, 𑀚𑀸𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀁 𑀮𑀺𑀲𑁆𑀲𑀢𑀺 𑀲𑀺𑀮𑀺𑀲𑁆𑀲𑀢𑀺 𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯 𑀈𑀲𑀓𑀁 𑀅𑀮𑁆𑀮𑀻𑀬𑀢𑀻𑀢𑀺 𑀮𑁂𑀲𑁄, 𑀚𑀸𑀢𑀺𑀆𑀤𑀻𑀦𑀁𑀬𑁂𑀯 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁩𑁯𑁩) 𑀧𑀦 𑀬𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬, 𑀢𑀁 𑀬𑀲𑁆𑀫𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯 𑀆𑀯𑀺𑀪𑀽𑀢𑀁, 𑀢𑀲𑁆𑀫𑀸 𑀢𑀁 𑀅𑀯𑀺𑀪𑀚𑀺𑀢𑁆𑀯𑀸 𑀬𑀸𑀦𑀺 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺, 𑀢𑁂𑀲𑀁 𑀅𑀜𑁆𑀜𑀪𑀸𑀕𑀺𑀬𑀢𑀸 𑀘 𑀢𑀩𑁆𑀪𑀸𑀕𑀺𑀬𑀢𑀸 𑀘 𑀬𑀲𑁆𑀫𑀸 𑀅𑀧𑀸𑀓𑀝𑀸, 𑀚𑀸𑀦𑀺𑀢𑀩𑁆𑀩𑀸 𑀘 𑀯𑀺𑀦𑀬𑀥𑀭𑁂𑀳𑀺, 𑀢𑀲𑁆𑀫𑀸 𑀢𑀜𑁆𑀘 𑀅𑀯𑀲𑀸𑀦𑁂 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑁂𑀦 𑀘𑁄𑀤𑀦𑀜𑁆𑀘 𑀆𑀯𑀺𑀓𑀸𑀢𑀼𑀁 ‘‘𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸𑀢𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀯𑀸 𑀳𑁄𑀢𑀺 𑀅𑀥𑀺𑀓𑀭𑀡𑀜𑁆𑀜𑀪𑀸𑀕𑀺𑀬𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀲𑁂𑀲𑀸 𑀯𑀺𑀦𑀺𑀘𑁆𑀙𑀬𑀓𑀣𑀸 𑀅𑀝𑁆𑀞𑀫𑁂 𑀯𑀼𑀢𑁆𑀢𑀲𑀤𑀺𑀲𑀸𑀬𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀇𑀤𑀁 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀇𑀥 𑀘 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀘𑁄𑀤𑀦𑀸𑀬 𑀢𑀣𑀸𑀲𑀜𑁆𑀜𑀺𑀦𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀅𑀗𑁆𑀕𑁂𑀲𑀼 𑀘 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀺𑀬𑀦𑀢𑀸 𑀅𑀥𑀺𑀓𑀸𑀢𑀺.

𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲𑀸𑀢𑀺 𑀲𑀳𑀺𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀘𑀺𑀢𑁆𑀢𑁂𑀦 𑀘 𑀲𑀭𑀻𑀭𑁂𑀦 𑀘 𑀅𑀯𑀺𑀬𑀼𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁪𑁧𑁨) ‘‘𑀲𑀫𑀕𑁆𑀕𑁄 𑀦𑀸𑀫 𑀲𑀗𑁆𑀖𑁄 𑀲𑀫𑀸𑀦𑀲𑀁𑀯𑀸𑀲𑀓𑁄 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀫𑀸𑀦𑀲𑀁𑀯𑀸𑀲𑀓𑁄 𑀳𑀺 𑀲𑀫𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑁂𑀦 𑀅𑀯𑀺𑀬𑀼𑀢𑁆𑀢𑁄 𑀳𑁄𑀢𑀺, 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄 𑀓𑀸𑀬𑀲𑀸𑀫𑀕𑁆𑀕𑀺𑀤𑀸𑀦𑀢𑁄 𑀲𑀭𑀻𑀭𑁂𑀦 𑀅𑀯𑀺𑀬𑀼𑀢𑁆𑀢𑁄. 𑀪𑁂𑀤𑀸𑀬 𑀧𑀭𑀓𑁆𑀓𑀫𑁂𑀬𑁆𑀬𑀸𑀢𑀺 ‘‘𑀓𑀣𑀁 𑀦𑀸𑀫𑀸𑀬𑀁 𑀪𑀺𑀚𑁆𑀚𑁂𑀬𑁆𑀬𑀸’’𑀢𑀺 𑀪𑁂𑀤𑀦𑀢𑁆𑀣𑀸𑀬 𑀯𑀸𑀬𑀸𑀫𑁂𑀬𑁆𑀬. 𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀁 𑀯𑀸 𑀅𑀥𑀺𑀓𑀭𑀡𑀦𑁆𑀢𑀺 𑀪𑁂𑀤𑀦𑀲𑁆𑀲 𑀲𑀗𑁆𑀖𑀪𑁂𑀤𑀲𑁆𑀲 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀺𑀓𑀁 𑀓𑀸𑀭𑀡𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀑𑀓𑀸𑀲𑁂 ‘‘𑀓𑀸𑀫𑀳𑁂𑀢𑀼 𑀓𑀸𑀫𑀦𑀺𑀤𑀸𑀦𑀁 𑀓𑀸𑀫𑀸𑀥𑀺𑀓𑀭𑀡’’𑀦𑁆𑀢𑀺 𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁬𑁮, 𑁧𑁭𑁮) 𑀯𑀺𑀬 𑀓𑀸𑀭𑀡𑀁 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀪𑁂𑀤𑀓𑀭𑀯𑀢𑁆𑀣𑀼𑀯𑀲𑁂𑀦 𑀅𑀝𑁆𑀞𑀸𑀭𑀲𑀯𑀺𑀥𑀁. 𑀲𑀫𑀸𑀤𑀸𑀬𑀸𑀢𑀺 𑀕𑀳𑁂𑀢𑁆𑀯𑀸. 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀢𑀁 𑀲𑀗𑁆𑀖𑀪𑁂𑀤𑀲𑁆𑀲 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀺𑀓𑀁 𑀲𑀗𑁆𑀖𑀪𑁂𑀤𑀦𑀺𑀩𑁆𑀩𑀢𑁆𑀢𑀺𑀲𑀫𑀢𑁆𑀣𑀁 𑀓𑀸𑀭𑀡𑀁 𑀕𑀳𑁂𑀢𑁆𑀯𑀸 𑀤𑀻𑀧𑁂𑀬𑁆𑀬 𑀘𑁂𑀯 𑀦𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬 𑀘. 𑀪𑀺𑀓𑁆𑀔𑀽𑀳𑀺 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄𑀢𑀺 𑀬𑁂 𑀢𑀁 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀦𑁆𑀢𑀁 𑀲𑀫𑁆𑀫𑀼𑀔𑀸 𑀧𑀲𑁆𑀲𑀦𑁆𑀢𑀺, 𑀬𑁂 𑀯𑀸 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀺𑀳𑀸𑀭𑁂’’𑀢𑀺 𑀲𑀼𑀡𑀦𑁆𑀢𑀺, 𑀢𑁂𑀳𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀅𑀟𑁆𑀠𑀬𑁄𑀚𑀦𑀫𑀢𑁆𑀢𑀁 𑀕𑀦𑁆𑀢𑁆𑀯𑀸𑀧𑀺 𑀬𑁆𑀯𑀸𑀬𑀁 𑀅𑀦𑀦𑁆𑀢𑀭𑁂 ‘‘𑀫𑀸𑀬𑀲𑁆𑀫𑀸’’𑀢𑀺𑀆𑀤𑀺𑀯𑀘𑀦𑀓𑁆𑀓𑀫𑁄 𑀯𑀼𑀢𑁆𑀢𑁄, 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄. 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀅𑀯𑀤𑀦𑁆𑀢𑀸𑀦𑀁 𑀤𑀼𑀓𑁆𑀓𑀝𑀁. 𑀏𑀢𑁆𑀣 𑀘 𑀫𑀸𑀇𑀢𑀺 𑀧𑀤𑀁 ‘‘𑀧𑀭𑀓𑁆𑀓𑀫𑀻’’𑀢𑀺𑀧𑀤𑁂𑀦 ‘‘𑀅𑀝𑁆𑀞𑀸𑀲𑀻’’𑀢𑀺𑀧𑀤𑁂𑀦 𑀘 𑀲𑀤𑁆𑀥𑀺𑀁 ‘‘𑀫𑀸 𑀧𑀭𑀓𑁆𑀓𑀫𑀺, 𑀫𑀸 𑀅𑀝𑁆𑀞𑀸𑀲𑀻’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀫𑁂𑀢𑀸𑀬𑀲𑁆𑀫𑀸 𑀲𑀗𑁆𑀖𑁂𑀦𑀸𑀢𑀺 𑀆𑀬𑀲𑁆𑀫𑀸 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀲𑀫𑁂𑀢𑀼 𑀲𑀫𑀸𑀕𑀘𑁆𑀙𑀢𑀼, 𑀏𑀓𑀮𑀤𑁆𑀥𑀺𑀓𑁄 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀸𑀭𑀡𑀸? 𑀲𑀫𑀕𑁆𑀕𑁄 𑀳𑀺 𑀲𑀗𑁆𑀖𑁄…𑀧𑁂… 𑀯𑀺𑀳𑀭𑀢𑀻𑀢𑀺. 𑀢𑀢𑁆𑀣 𑀲𑀫𑁆𑀫𑁄𑀤𑀫𑀸𑀦𑁄𑀢𑀺 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀫𑁄𑀤𑀫𑀸𑀦𑁄. 𑀅𑀯𑀺𑀯𑀤𑀫𑀸𑀦𑁄𑀢𑀺 ‘‘𑀅𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄’’𑀢𑀺 𑀏𑀯𑀁 𑀦 𑀯𑀺𑀯𑀤𑀫𑀸𑀦𑁄. 𑀏𑀓𑁄 𑀉𑀤𑁆𑀤𑁂𑀲𑁄 𑀅𑀲𑁆𑀲𑀸𑀢𑀺 𑀏𑀓𑀼𑀤𑁆𑀤𑁂𑀲𑁄, 𑀏𑀓𑀢𑁄 𑀧𑀯𑀢𑁆𑀢𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄𑀢𑀺 𑀅𑀢𑁆𑀣𑁄. 𑀨𑀸𑀲𑀼 𑀯𑀺𑀳𑀭𑀢𑀻𑀢𑀺 𑀲𑀼𑀔𑀁 𑀯𑀺𑀳𑀭𑀢𑀺. 𑀏𑀯𑀁 𑀯𑀺𑀲𑀼𑀫𑁆𑀧𑀺 𑀲𑀗𑁆𑀖𑀫𑀚𑁆𑀛𑁂𑀧𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄 𑀤𑀼𑀓𑁆𑀓𑀝𑀁. 𑀏𑀯𑀜𑁆𑀘 𑀲𑁄𑀢𑀺𑀆𑀤𑀺𑀫𑁆𑀳𑀺 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄𑀢𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀇𑀘𑁆𑀘𑁂𑀢𑀁 𑀓𑀼𑀲𑀮𑀦𑁆𑀢𑀺 𑀇𑀢𑀺 𑀏𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀁 𑀓𑀼𑀲𑀮𑀁 𑀔𑁂𑀫𑀁 𑀲𑁄𑀢𑁆𑀣𑀺𑀪𑀸𑀯𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬, 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀏𑀢𑁆𑀣 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀧𑀤𑀢𑁆𑀣𑀫𑁂𑀯.

𑀭𑀸𑀚𑀕𑀳𑁂 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀜𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑁆𑀯𑁂 𑀣𑀼𑀮𑁆𑀮𑀘𑁆𑀘𑀬𑀸, ‘‘𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬𑀸’’𑀢𑀺 𑀏𑀯𑀁 𑀬𑁆𑀬-𑀓𑀸𑀭𑀧𑀢𑁆𑀢𑀸𑀬 𑀢𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀢𑀜𑁆𑀘 𑀤𑀼𑀓𑁆𑀓𑀝𑀁 𑀢𑁂 𑀘 𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄𑀬𑁂𑀯 𑀢𑀺𑀝𑁆𑀞𑀢𑀺. 𑀅𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀲𑁆𑀲 𑀘 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀘 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑀻𑀮𑀯𑀺𑀧𑀢𑁆𑀢𑀺, 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀁, 𑀥𑀫𑁆𑀫𑀓𑀫𑁆𑀫𑁂𑀦 𑀲𑀫𑀦𑀼𑀪𑀸𑀲𑀦𑀁, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑀁, 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀁, 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀪𑁂𑀤𑀸𑀦𑀼𑀯𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀸𑀤𑀲𑀫𑁂 𑀢𑀲𑁆𑀲𑁂𑀯 𑀔𑁄 𑀧𑀦𑀸𑀢𑀺 𑀬𑁄 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀢𑀺, 𑀢𑀲𑁆𑀲𑁂𑀯. 𑀅𑀦𑀼𑀯𑀢𑁆𑀢𑀓𑀸𑀢𑀺 𑀢𑀲𑁆𑀲 𑀤𑀺𑀝𑁆𑀞𑀺𑀁 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀕𑀳𑀡𑁂𑀦 𑀅𑀦𑀼𑀧𑀝𑀺𑀧𑀚𑁆𑀚𑀦𑀓𑀸. 𑀯𑀕𑁆𑀕𑀁 𑀅𑀲𑀸𑀫𑀕𑁆𑀕𑀺𑀧𑀓𑁆𑀔𑀺𑀬𑀯𑀘𑀦𑀁 𑀯𑀤𑀦𑁆𑀢𑀻𑀢𑀺 𑀯𑀕𑁆𑀕𑀯𑀸𑀤𑀓𑀸. 𑀬𑀲𑁆𑀫𑀸 𑀧𑀦 𑀢𑀺𑀡𑁆𑀡𑀁 𑀉𑀤𑁆𑀥𑀁 𑀓𑀫𑁆𑀫𑀸𑀭𑀳𑀸 𑀦 𑀳𑁄𑀦𑁆𑀢𑀺. 𑀦 𑀳𑀺 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀚𑀸𑀦𑀸𑀢𑀺 𑀦𑁄𑀢𑀺 𑀅𑀫𑁆𑀳𑀸𑀓𑀁 𑀙𑀦𑁆𑀤𑀸𑀤𑀻𑀦𑀺 𑀚𑀸𑀦𑀸𑀢𑀺. 𑀪𑀸𑀲𑀢𑀻𑀢𑀺 ‘‘𑀏𑀯𑀁 𑀓𑀭𑁄𑀫𑀸’’𑀢𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀪𑀸𑀲𑀢𑀺. 𑀅𑀫𑁆𑀳𑀸𑀓𑀫𑁆𑀧𑁂𑀢𑀁 𑀔𑀫𑀢𑀻𑀢𑀺 𑀬𑀁 𑀲𑁄 𑀓𑀭𑁄𑀢𑀺, 𑀏𑀢𑀁 𑀅𑀫𑁆𑀳𑀸𑀓𑀫𑁆𑀧𑀺 𑀭𑀼𑀘𑁆𑀘𑀢𑀺. 𑀲𑀫𑁂𑀢𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀗𑁆𑀖𑁂𑀦𑀸𑀢𑀺 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀁 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀲𑀫𑁂𑀢𑀼 𑀲𑀫𑀸𑀕𑀘𑁆𑀙𑀢𑀼, 𑀏𑀓𑀻𑀪𑀸𑀯𑀁 𑀕𑀘𑁆𑀙𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀧𑀤𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯. 𑀯𑀺𑀦𑀺𑀘𑁆𑀙𑀬𑀓𑀣𑀸𑀧𑁂𑀢𑁆𑀣 𑀤𑀲𑀫𑁂 𑀯𑀼𑀢𑁆𑀢𑀲𑀤𑀺𑀲𑀸𑀬𑁂𑀯.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀇𑀤𑀁 𑀭𑀸𑀚𑀕𑀳𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀤𑁂𑀯𑀤𑀢𑁆𑀢𑀲𑁆𑀲 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀲𑁆𑀲 𑀅𑀦𑀼𑀯𑀢𑁆𑀢𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀗𑁆𑀕𑁂𑀲𑀼 𑀘 𑀬𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑀦𑀁, 𑀏𑀯𑀁 𑀇𑀥 𑀅𑀦𑀼𑀯𑀢𑁆𑀢𑀦𑀁 𑀤𑀝𑁆𑀞𑀩𑁆𑀩𑀦𑁆𑀢𑀺.

𑀪𑁂𑀤𑀸𑀦𑀼𑀯𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑀸𑀤𑀲𑀫𑁂 𑀤𑀼𑀩𑁆𑀩𑀘𑀚𑀸𑀢𑀺𑀓𑁄𑀢𑀺 𑀤𑀼𑀩𑁆𑀩𑀘𑀲𑀪𑀸𑀯𑁄, 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀉𑀤𑁆𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑁂𑀲𑀽𑀢𑀺 𑀉𑀤𑁆𑀤𑁂𑀲𑁂 𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀅𑀦𑁆𑀢𑁄𑀕𑀥𑁂𑀲𑀼, ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀺, 𑀲𑁄 𑀆𑀯𑀺𑀓𑀭𑁂𑀬𑁆𑀬𑀸’’𑀢𑀺 𑀏𑀯𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀅𑀦𑁆𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀯𑀢𑁆𑀢𑀫𑀸𑀦𑁂𑀲𑀽𑀢𑀺 𑀅𑀢𑁆𑀣𑁄. 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄𑀢𑀺 𑀲𑀳𑀥𑀫𑁆𑀫𑀺𑀓𑁂𑀦 𑀯𑀼𑀘𑁆𑀘𑀫𑀸𑀦𑁄, 𑀓𑀸𑀭𑀡𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀢𑁆𑀢𑀸, 𑀢𑁂𑀲𑀁 𑀯𑀸 𑀲𑀦𑁆𑀢𑀓𑀢𑁆𑀢𑀸 ‘‘𑀲𑀳𑀥𑀫𑁆𑀫𑀺𑀓’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀩𑀼𑀤𑁆𑀥𑀧𑀜𑁆𑀜𑀢𑁆𑀢𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀯𑀼𑀘𑁆𑀘𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀯𑀺𑀭𑀫𑀣𑀸𑀬𑀲𑁆𑀫𑀦𑁆𑀢𑁄 𑀫𑀫 𑀯𑀘𑀦𑀸𑀬𑀸𑀢𑀺 𑀬𑁂𑀦 𑀯𑀘𑀦𑁂𑀦 𑀫𑀁 𑀯𑀤𑀣, 𑀢𑀢𑁄 𑀫𑀫 𑀯𑀘𑀦𑀢𑁄 𑀯𑀺𑀭𑀫𑀣, 𑀫𑀸 𑀫𑀁 𑀢𑀁 𑀯𑀘𑀦𑀁 𑀯𑀤𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀤𑀢𑀼 𑀲𑀳 𑀥𑀫𑁆𑀫𑁂𑀦𑀸𑀢𑀺 𑀲𑀳𑀥𑀫𑁆𑀫𑀺𑀓𑁂𑀦 𑀲𑀺𑀓𑁆𑀔𑀸𑀧𑀤𑁂𑀦, 𑀲𑀳𑀥𑀫𑁆𑀫𑁂𑀦 𑀯𑀸 𑀅𑀜𑁆𑀜𑁂𑀦𑀧𑀺 𑀧𑀸𑀲𑀸𑀤𑀺𑀓𑀪𑀸𑀯𑀲𑀁𑀯𑀢𑁆𑀢𑀦𑀺𑀓𑁂𑀦 𑀯𑀘𑀦𑁂𑀦 𑀯𑀤𑁂𑀢𑀼. 𑀬𑀤𑀺𑀤𑀦𑁆𑀢𑀺 𑀯𑀼𑀤𑁆𑀥𑀺𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 𑀬𑀁 𑀇𑀤𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺𑀢𑀯𑀘𑀦𑀁, 𑀆𑀧𑀢𑁆𑀢𑀺𑀢𑁄 𑀘 𑀯𑀼𑀝𑁆𑀞𑀸𑀧𑀦𑀁, 𑀢𑁂𑀦 𑀅𑀜𑁆𑀜𑀫𑀜𑁆𑀜𑀯𑀘𑀦𑁂𑀦 𑀅𑀜𑁆𑀜𑀫𑀜𑁆𑀜𑀯𑀼𑀝𑁆𑀞𑀸𑀧𑀦𑁂𑀦. 𑀏𑀯𑀁 𑀲𑀁𑀯𑀤𑁆𑀥𑀸𑀳𑀺 𑀢𑀲𑁆𑀲 𑀪𑀕𑀯𑀢𑁄 𑀧𑀭𑀺𑀲𑀸𑀢𑀺 𑀏𑀯𑀁 𑀧𑀭𑀺𑀲𑀸𑀬 𑀯𑀼𑀤𑁆𑀥𑀺𑀓𑀸𑀭𑀡𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀯𑀺𑀦𑀺𑀘𑁆𑀙𑀬𑀓𑀣𑀸𑀧𑀺 𑀤𑀲𑀫𑁂 𑀯𑀼𑀢𑁆𑀢𑀲𑀤𑀺𑀲𑀸𑀬𑁂𑀯.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀇𑀤𑀁 𑀓𑁄𑀲𑀫𑁆𑀩𑀺𑀬𑀁 𑀙𑀦𑁆𑀦𑀢𑁆𑀣𑁂𑀭𑀁 𑀆𑀭𑀩𑁆𑀪 𑀅𑀢𑁆𑀢𑀸𑀦𑀁 𑀅𑀯𑀘𑀦𑀻𑀬𑀓𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀗𑁆𑀕𑁂𑀲𑀼 𑀘 𑀬𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑀦𑀁, 𑀏𑀯𑀁 𑀇𑀥 𑀅𑀯𑀘𑀦𑀻𑀬𑀓𑀭𑀡𑀢𑀸 𑀤𑀝𑁆𑀞𑀩𑁆𑀩𑀸𑀢𑀺.

𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑁂𑀭𑀲𑀫𑁂 𑀕𑀸𑀫𑀁 𑀯𑀸 𑀦𑀺𑀕𑀫𑀁𑀯𑀸𑀢𑀺 𑀏𑀢𑁆𑀣 𑀦𑀕𑀭𑀫𑁆𑀧𑀺 𑀕𑀸𑀫𑁂 𑀅𑀦𑁆𑀢𑁄𑀕𑀥𑀫𑁂𑀯. 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀻𑀢𑀺𑀢𑀢𑁆𑀣 𑀧𑀝𑀺𑀩𑀤𑁆𑀥𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀢𑀸𑀬 𑀢𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺. 𑀧𑀼𑀧𑁆𑀨𑀤𑀸𑀦𑀸𑀤𑀻𑀳𑀺 𑀫𑀦𑀼𑀲𑁆𑀲𑀸𑀦𑀁 𑀲𑀤𑁆𑀥𑀁 𑀯𑀺𑀦𑀸𑀲𑁂𑀦𑁆𑀢𑁄 𑀓𑀼𑀮𑀸𑀦𑀺 𑀤𑀽𑀲𑁂𑀢𑀻𑀢𑀺 𑀓𑀼𑀮𑀤𑀽𑀲𑀓𑁄. 𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀸𑀤𑀬𑁄 𑀧𑀸𑀧𑀓𑀸 𑀲𑀫𑀸𑀘𑀸𑀭𑀸 𑀅𑀲𑁆𑀲𑀸𑀢𑀺 𑀧𑀸𑀧𑀲𑀫𑀸𑀘𑀸𑀭𑁄. 𑀲𑁄 𑀪𑀺𑀓𑁆𑀔𑀽𑀢𑀺 𑀲𑁄 𑀓𑀼𑀮𑀤𑀽𑀲𑀓𑁄 𑀪𑀺𑀓𑁆𑀔𑀼. 𑀆𑀬𑀲𑁆𑀫𑀸 𑀔𑁄 𑀓𑀼𑀮𑀤𑀽𑀲𑀓𑁄…𑀧𑁂… 𑀅𑀮𑀁 𑀢𑁂 𑀇𑀥 𑀯𑀸𑀲𑁂𑀦𑀸𑀢𑀺 𑀇𑀫𑀺𑀦𑀸𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀢𑀁 𑀤𑀲𑁆𑀲𑁂𑀢𑀺. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀧𑀦𑁂𑀲 𑀬𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑀁, 𑀬𑀲𑁆𑀫𑀺𑀜𑁆𑀘 𑀯𑀺𑀳𑀸𑀭𑁂 𑀯𑀲𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀘𑀭𑀺𑀢𑀼𑀁 𑀮𑀪𑀢𑀺, 𑀦 𑀯𑀺𑀳𑀸𑀭𑁂 𑀯𑀲𑀺𑀢𑀼𑀁. 𑀏𑀯𑀜𑁆𑀘 𑀲𑁄 𑀪𑀺𑀓𑁆𑀔𑀽𑀢𑀺𑀏𑀢𑁆𑀣 𑀲𑁄𑀢𑀺 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀙𑀦𑁆𑀤𑁂𑀦 𑀕𑀘𑁆𑀙𑀦𑁆𑀢𑀻𑀢𑀺 𑀙𑀦𑁆𑀤𑀕𑀸𑀫𑀺𑀦𑁄, 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀲𑁄 𑀪𑀺𑀓𑁆𑀔𑀽𑀢𑀺 𑀲𑁄 ‘‘𑀙𑀦𑁆𑀤𑀕𑀸𑀫𑀺𑀦𑁄’’𑀢𑀺𑀆𑀤𑀻𑀦𑀺 𑀯𑀤𑀫𑀸𑀦𑁄. 𑀢𑀲𑁆𑀲 𑀯𑀘𑀦𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀏𑀯𑀁 𑀯𑀘𑀦𑀻𑀬𑁄, 𑀦 𑀓𑀼𑀮𑀤𑀽𑀲𑀦𑀦𑀺𑀯𑀸𑀭𑀡𑀢𑁆𑀣𑀸𑀬. 𑀓𑀼𑀮𑀤𑀽𑀲𑀦𑀓𑀫𑁆𑀫𑁂𑀦 𑀳𑀺 𑀲𑁄 𑀆𑀧𑀚𑁆𑀚𑀺𑀢𑀩𑁆𑀩𑀸 𑀆𑀧𑀢𑁆𑀢𑀺𑀬𑁄 𑀧𑀼𑀩𑁆𑀩𑁂𑀯 𑀆𑀧𑀦𑁆𑀦𑁄, 𑀏𑀯𑀁 𑀧𑀦𑀲𑁆𑀲 𑀯𑀺𑀲𑀼𑀫𑁆𑀧𑀺 𑀲𑀗𑁆𑀖𑀫𑀚𑁆𑀛𑁂𑀧𑀺 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄 𑀅𑀧𑀭𑀁 𑀤𑀼𑀓𑁆𑀓𑀝𑀁. 𑀏𑀯𑀜𑁆𑀘 𑀲𑁄𑀢𑀺𑀆𑀤𑀺 𑀇𑀢𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀜𑁆𑀘 𑀅𑀯𑀼𑀢𑁆𑀢𑀜𑁆𑀘 𑀲𑀩𑁆𑀩𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀯𑀺𑀦𑀺𑀘𑁆𑀙𑀬𑀓𑀣𑀸𑀧𑀺 𑀤𑀲𑀫𑁂 𑀯𑀼𑀢𑁆𑀢𑀲𑀤𑀺𑀲𑀸𑀬𑁂𑀯.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀇𑀤𑀁 𑀲𑀸𑀯𑀢𑁆𑀣𑀺𑀬𑀁 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀙𑀦𑁆𑀤𑀕𑀸𑀫𑀺𑀢𑀸𑀤𑀻𑀳𑀺 𑀧𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀗𑁆𑀕𑁂𑀲𑀼 𑀘 𑀬𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑀦𑀁, 𑀏𑀯𑀁 𑀇𑀥 𑀙𑀦𑁆𑀤𑀸𑀤𑀻𑀳𑀺 𑀧𑀸𑀧𑀦𑀁 𑀤𑀝𑁆𑀞𑀩𑁆𑀩𑀦𑁆𑀢𑀺.

𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀯𑀡𑁆𑀡𑀦𑀸

𑀉𑀤𑁆𑀤𑀺𑀝𑁆𑀞𑀸 𑀔𑁄…𑀧𑁂… 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺𑀏𑀢𑁆𑀣 𑀧𑀞𑀫𑀁 𑀆𑀧𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀧𑀞𑀫𑀸𑀧𑀢𑁆𑀢𑀺𑀓𑀸, 𑀧𑀞𑀫𑀁 𑀯𑀻𑀢𑀺𑀓𑁆𑀓𑀫𑀦𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀇𑀢𑀭𑁂 𑀧𑀦 𑀬𑀣𑀸 𑀢𑀢𑀺𑀬𑁂 𑀘 𑀘𑀢𑀼𑀢𑁆𑀣𑁂 𑀘 𑀤𑀺𑀯𑀲𑁂 𑀳𑁄𑀢𑀻𑀢𑀺 𑀏𑀢𑁆𑀣 ‘‘𑀢𑀢𑀺𑀬𑀓𑁄, 𑀘𑀢𑀼𑀢𑁆𑀣𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀬𑀸𑀯𑀢𑀢𑀺𑀬𑁂 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑁂 𑀳𑁄𑀦𑁆𑀢𑀻𑀢𑀺 𑀬𑀸𑀯𑀢𑀢𑀺𑀬𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀸𑀯𑀢𑀻𑀳𑀦𑁆𑀢𑀺 𑀬𑀢𑁆𑀢𑀓𑀸𑀦𑀺 𑀅𑀳𑀸𑀦𑀺. 𑀚𑀸𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀚𑀸𑀦𑀦𑁆𑀢𑁄 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀢𑀢𑁆𑀣𑀸𑀬𑀁 𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀲𑁆𑀲 𑀫𑀸𑀢𑀺𑀓𑀸 𑁋 𑀆𑀧𑀢𑁆𑀢𑀺 𑀘 𑀳𑁄𑀢𑀺, 𑀆𑀧𑀢𑁆𑀢𑀺𑀲𑀜𑁆𑀜𑀻 𑀘, 𑀧𑀓𑀢𑀢𑁆𑀢𑁄 𑀘 𑀳𑁄𑀢𑀺, 𑀧𑀓𑀢𑀢𑁆𑀢𑀲𑀜𑁆𑀜𑀻 𑀘, 𑀅𑀦𑀦𑁆𑀢𑀭𑀸𑀬𑀺𑀓𑁄 𑀘 𑀳𑁄𑀢𑀺, 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻 𑀘, 𑀧𑀳𑀼 𑀘 𑀳𑁄𑀢𑀺, 𑀧𑀳𑀼𑀲𑀜𑁆𑀜𑀻 𑀘, 𑀙𑀸𑀤𑁂𑀢𑀼𑀓𑀸𑀫𑁄 𑀘 𑀳𑁄𑀢𑀺, 𑀙𑀸𑀤𑁂𑀢𑀺 𑀘𑀸𑀢𑀺. 𑀢𑀢𑁆𑀣 𑀆𑀧𑀢𑁆𑀢𑀺 𑀘 𑀳𑁄𑀢𑀺, 𑀆𑀧𑀢𑁆𑀢𑀺𑀲𑀜𑁆𑀜𑀻 𑀘𑀸𑀢𑀺 𑀬𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀲𑀸 𑀢𑁂𑀭𑀲𑀦𑁆𑀦𑀁 𑀅𑀜𑁆𑀜𑀢𑀭𑀸 𑀳𑁄𑀢𑀺, 𑀲𑁄𑀧𑀺 𑀘 𑀢𑀢𑁆𑀣 𑀯𑀢𑁆𑀣𑀼𑀯𑀲𑁂𑀦 𑀯𑀸 ‘‘𑀇𑀤𑀁 𑀪𑀺𑀓𑁆𑀔𑀽𑀦𑀁 𑀦 𑀯𑀝𑁆𑀝𑀢𑀻’’𑀢𑀺 𑀦𑀸𑀫𑀫𑀢𑁆𑀢𑀯𑀲𑁂𑀦 𑀯𑀸 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀆𑀧𑀢𑁆𑀢𑀻’’𑀢𑀺 𑀆𑀧𑀢𑁆𑀢𑀺𑀲𑀜𑁆𑀜𑀻𑀬𑁂𑀯 𑀳𑀼𑀢𑁆𑀯𑀸 ‘‘𑀦 𑀤𑀸𑀦𑀺 𑀦𑀁 𑀓𑀲𑁆𑀲𑀘𑀺 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀙𑀸𑀤𑁂𑀢𑀼𑀓𑀸𑀫𑁄𑀯 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺 𑀆𑀧𑀢𑁆𑀢𑀺. 𑀲𑀘𑁂 𑀧𑀦𑁂𑀢𑁆𑀣 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻 𑀯𑀸 𑀳𑁄𑀢𑀺, 𑀅𑀜𑁆𑀜𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀲𑀜𑁆𑀜𑀻 𑀯𑀸, 𑀯𑁂𑀫𑀢𑀺𑀓𑁄 𑀯𑀸, 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀺. 𑀧𑀓𑀢𑀢𑁆𑀢𑁄𑀢𑀺 𑀅𑀦𑀼𑀓𑁆𑀔𑀺𑀢𑁆𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑁄. 𑀲𑁄 𑀘𑁂 𑀧𑀓𑀢𑀢𑁆𑀢𑀲𑀜𑁆𑀜𑀻 𑀳𑀼𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀅𑀦𑀦𑁆𑀢𑀭𑀸𑀬𑀺𑀓𑁄𑀢𑀺 𑀬𑀲𑁆𑀲 𑀤𑀲𑀲𑀼 𑀭𑀸𑀚𑀘𑁄𑀭𑀅𑀕𑁆𑀕𑀺𑀉𑀤𑀓𑀫𑀦𑀼𑀲𑁆𑀲𑀅𑀫𑀦𑀼𑀲𑁆𑀲𑀯𑀸𑀴𑀲𑀭𑀻𑀲𑀧𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀲𑀼 𑀏𑀓𑁄𑀧𑀺 𑀦𑀢𑁆𑀣𑀺, 𑀲𑁄 𑀘𑁂 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀻 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀧𑀳𑀽𑀢𑀺 𑀬𑁄 𑀲𑀓𑁆𑀓𑁄𑀢𑀺 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀜𑁆𑀘𑁂𑀯 𑀆𑀭𑁄𑀘𑁂𑀢𑀼𑀜𑁆𑀘, 𑀲𑁄 𑀘𑁂 𑀧𑀳𑀼𑀲𑀜𑁆𑀜𑀻 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀙𑀦𑁆𑀦𑀸 𑀳𑁄𑀢𑀺. 𑀙𑀸𑀤𑁂𑀢𑀼𑀓𑀸𑀫𑁄 𑀘 𑀳𑁄𑀢𑀺, 𑀙𑀸𑀤𑁂𑀢𑀺 𑀘𑀸𑀢𑀺𑀇𑀤𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀘𑁂𑀧𑀺 𑀳𑀺 𑀲𑁄 𑀲𑀪𑀸𑀕𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑁂 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸’’𑀢𑀺 𑀮𑀚𑁆𑀚𑀸𑀬 𑀦𑀸𑀭𑁄𑀘𑁂𑀢𑀺, 𑀙𑀦𑁆𑀦𑀸𑀯 𑀳𑁄𑀢𑀺. 𑀉𑀧𑀚𑁆𑀛𑀸𑀬𑀸𑀤𑀺𑀪𑀸𑀯𑁄 𑀳𑀺 𑀇𑀥 𑀅𑀧𑁆𑀧𑀫𑀸𑀡𑀁, 𑀲𑀪𑀸𑀕𑀫𑀢𑁆𑀢𑀫𑁂𑀯 𑀧𑀫𑀸𑀡𑀁. 𑀅𑀬𑀁 ‘‘𑀚𑀸𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑀻’’𑀢𑀺𑀧𑀤𑀲𑁆𑀲 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄.

𑀢𑀸𑀯𑀢𑀻𑀳𑀦𑁆𑀢𑀺 𑀢𑀢𑁆𑀢𑀓𑀸𑀦𑀺 𑀅𑀳𑀸𑀦𑀺, 𑀧𑀝𑀺𑀘𑁆𑀙𑀸𑀤𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀭𑁄𑀘𑀺𑀢𑀤𑀺𑀯𑀲𑁄, 𑀢𑀸𑀯 𑀤𑀺𑀯𑀲𑀧𑀓𑁆𑀔𑀫𑀸𑀲𑀲𑀁𑀯𑀘𑁆𑀙𑀭𑀯𑀲𑁂𑀦 𑀬𑀢𑁆𑀢𑀓𑁄 𑀓𑀸𑀮𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀢𑀢𑁆𑀢𑀓𑀁 𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀸𑀫𑀸 𑀧𑀭𑀺𑀯𑀢𑁆𑀣𑀩𑁆𑀩𑀦𑁆𑀢𑀺 𑀦 𑀓𑀸𑀫𑁂𑀦 𑀦 𑀯𑀲𑁂𑀦, 𑀅𑀣 𑀔𑁄 𑀅𑀓𑀸𑀫𑁂𑀦 𑀅𑀯𑀲𑁂𑀦 𑀧𑀭𑀺𑀯𑀸𑀲𑀁 𑀲𑀫𑀸𑀤𑀸𑀬 𑀯𑀢𑁆𑀣𑀩𑁆𑀩𑀁. 𑀢𑀢𑁆𑀣 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀘𑀸𑀢𑀺 𑀢𑀺𑀯𑀺𑀥𑁄 𑀧𑀭𑀺𑀯𑀸𑀲𑁄. 𑀢𑀢𑁆𑀣 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄 𑀢𑀸𑀯 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀤𑀸𑀢𑀩𑁆𑀩𑁄. 𑀓𑀲𑁆𑀲𑀘𑀺 𑀳𑀺 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀆𑀧𑀢𑁆𑀢𑀺 𑀳𑁄𑀢𑀺, 𑀓𑀲𑁆𑀲𑀘𑀺 𑀤𑁆𑀯𑀻𑀳𑀸𑀤𑀺𑀧𑁆𑀧𑀝𑀺𑀘𑁆𑀙𑀦𑁆𑀦𑀸. 𑀓𑀲𑁆𑀲𑀘𑀺 𑀏𑀓𑀸 𑀆𑀧𑀢𑁆𑀢𑀺 𑀳𑁄𑀢𑀺, 𑀓𑀲𑁆𑀲𑀘𑀺 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀢𑀤𑀼𑀢𑁆𑀢𑀭𑀺 𑀯𑀸. 𑀢𑀲𑁆𑀫𑀸 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀁 𑀤𑁂𑀦𑁆𑀢𑁂𑀦 𑀧𑀞𑀫𑀫𑁂𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀢𑀢𑁄 𑀧𑀝𑀺𑀘𑁆𑀙𑀦𑁆𑀦𑀤𑀺𑀯𑀲𑁂 𑀘 𑀆𑀧𑀢𑁆𑀢𑀺𑀬𑁄 𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂 𑀏𑀓𑀸 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺 𑀏𑀯𑀁 𑀧𑀭𑀺𑀯𑀸𑀲𑀁 𑀬𑀸𑀘𑀸𑀧𑁂𑀢𑁆𑀯𑀸 𑀔𑀦𑁆𑀥𑀓𑁂 (𑀘𑀽𑀴𑀯. 𑁯𑁮) 𑀆𑀕𑀢𑀦𑀬𑁂𑀦 𑀓𑀫𑁆𑀫𑀯𑀸𑀘𑀁 𑀯𑀢𑁆𑀯𑀸 𑀧𑀭𑀺𑀯𑀸𑀲𑁄 𑀤𑀸𑀢𑀩𑁆𑀩𑁄. 𑀅𑀣 𑀤𑁆𑀯𑀻𑀳𑀢𑀻𑀳𑀸𑀤𑀺𑀧𑁆𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀤𑁆𑀯𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀢𑀻𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀘𑀢𑀽𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀧𑀜𑁆𑀘𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀘𑀼𑀤𑁆𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺𑀏𑀯𑀁 𑀬𑀸𑀯 𑀘𑀼𑀤𑁆𑀤𑀲𑀤𑀺𑀯𑀲𑀸𑀦𑀺 𑀤𑀺𑀯𑀲𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸, 𑀧𑀜𑁆𑀘𑀤𑀲𑀤𑀺𑀯𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑀁 ‘‘𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀢𑁄 𑀬𑀸𑀯 𑀏𑀓𑀽𑀦𑀢𑀺𑀁𑀲𑀢𑀺𑀫𑁄 𑀤𑀺𑀯𑀲𑁄, 𑀢𑀸𑀯 ‘‘𑀅𑀢𑀺𑀭𑁂𑀓𑀧𑀓𑁆𑀔𑀧𑁆𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺, 𑀢𑀢𑁄 𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀅𑀢𑀺𑀭𑁂𑀓𑀤𑁆𑀯𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀢𑁂𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀁…𑀧𑁂… 𑀅𑀢𑀺𑀭𑁂𑀓𑀏𑀓𑀸𑀤𑀲𑀫𑀸𑀲𑀧𑁆𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀏𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀲𑀁𑀯𑀘𑁆𑀙𑀭𑁂 𑀧𑀼𑀡𑁆𑀡𑁂 ‘‘𑀏𑀓𑀲𑀁𑀯𑀘𑁆𑀙𑀭𑀧𑁆𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺, 𑀢𑀢𑁄 𑀧𑀭𑀁 𑀅𑀢𑀺𑀭𑁂𑀓𑀲𑀁𑀯𑀘𑁆𑀙𑀭𑀁 𑀤𑁆𑀯𑁂𑀲𑀁𑀯𑀘𑁆𑀙𑀭𑀁 𑀏𑀯𑀁 𑀬𑀸𑀯 𑀲𑀝𑁆𑀞𑀺𑀲𑀁𑀯𑀘𑁆𑀙𑀭𑀅𑀢𑀺𑀭𑁂𑀓𑀲𑀝𑁆𑀞𑀺𑀲𑀁𑀯𑀘𑁆𑀙𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺, 𑀢𑀢𑁄 𑀯𑀸 𑀪𑀺𑀬𑁆𑀬𑁄𑀧𑀺 𑀯𑀢𑁆𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀲𑀘𑁂 𑀧𑀦 𑀤𑁆𑀯𑁂 𑀢𑀺𑀲𑁆𑀲𑁄 𑀢𑀤𑀼𑀢𑁆𑀢𑀭𑀺 𑀯𑀸 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺, 𑀬𑀣𑀸 ‘‘𑀏𑀓𑀁 𑀆𑀧𑀢𑁆𑀢𑀺’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀤𑁆𑀯𑁂 𑀆𑀧𑀢𑁆𑀢𑀺𑀬𑁄, 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀢𑁄 𑀧𑀭𑀁 𑀧𑀦 𑀲𑀢𑀁 𑀯𑀸 𑀳𑁄𑀢𑀼, 𑀲𑀳𑀲𑁆𑀲𑀁 𑀯𑀸, ‘‘𑀲𑀫𑁆𑀩𑀳𑀼𑀮𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀦𑀸𑀦𑀸𑀯𑀢𑁆𑀣𑀼𑀓𑀸𑀲𑀼𑀧𑀺 ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀏𑀓𑀁 𑀓𑀸𑀬𑀲𑀁𑀲𑀕𑁆𑀕𑀁 𑀏𑀓𑀁 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀁 𑀏𑀓𑀁 𑀅𑀢𑁆𑀢𑀓𑀸𑀫𑀁 𑀏𑀓𑀁 𑀲𑀜𑁆𑀘𑀭𑀺𑀢𑁆𑀢𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀏𑀯𑀁 𑀕𑀡𑀦𑀯𑀲𑁂𑀦 𑀯𑀸, ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀏𑀯𑀁 𑀯𑀢𑁆𑀣𑀼𑀓𑀺𑀢𑁆𑀢𑀦𑀯𑀲𑁂𑀦 𑀯𑀸, ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀏𑀯𑀁 𑀦𑀸𑀫𑀫𑀢𑁆𑀢𑀯𑀲𑁂𑀦 𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀢𑁆𑀣 𑀦𑀸𑀫𑀁 𑀤𑀼𑀯𑀺𑀥𑀁 𑀲𑀚𑀸𑀢𑀺𑀲𑀸𑀥𑀸𑀭𑀡𑀁 𑀲𑀩𑁆𑀩𑀲𑀸𑀥𑀸𑀭𑀡𑀜𑁆𑀘, 𑀢𑀢𑁆𑀣 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀲𑀚𑀸𑀢𑀺𑀲𑀸𑀥𑀸𑀭𑀡𑀁, 𑀆𑀧𑀢𑁆𑀢𑀻𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀁, 𑀢𑀲𑁆𑀫𑀸 ‘‘𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀏𑀯𑀁 𑀲𑀩𑁆𑀩𑀲𑀸𑀥𑀸𑀭𑀡𑀦𑀸𑀫𑀯𑀲𑁂𑀦𑀸𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀜𑁆𑀳𑀺 𑀧𑀭𑀺𑀯𑀸𑀲𑀸𑀤𑀺𑀯𑀺𑀦𑀬𑀓𑀫𑁆𑀫𑀁 𑀯𑀢𑁆𑀣𑀼𑀯𑀲𑁂𑀦 𑀕𑁄𑀢𑁆𑀢𑀯𑀲𑁂𑀦 𑀦𑀸𑀫𑀯𑀲𑁂𑀦 𑀆𑀧𑀢𑁆𑀢𑀺𑀯𑀲𑁂𑀦 𑀘 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀢𑀢𑁆𑀣 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀻𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘, 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘, 𑀢𑀢𑁆𑀣 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀓𑀸𑀬𑀲𑀁𑀲𑀕𑁆𑀕’’𑀦𑁆𑀢𑀺𑀆𑀤𑀺𑀯𑀘𑀦𑁂𑀦𑀸𑀧𑀺 ‘‘𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄’’𑀢𑀺𑀯𑀘𑀦𑁂𑀦𑀸𑀧𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑀕𑀳𑀺𑀢𑀁 𑀳𑁄𑀢𑀺, ‘‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺𑀯𑀘𑀦𑁂𑀦𑀸𑀧𑀺 ‘‘𑀆𑀧𑀢𑁆𑀢𑀺𑀬𑁄’’𑀢𑀺𑀯𑀘𑀦𑁂𑀦𑀸𑀧𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘 𑀕𑀳𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀏𑀢𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀲𑁂𑀦 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸.

𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀘 𑀲𑀘𑁂 𑀅𑀧𑁆𑀧𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀳𑁄𑀢𑀺, 𑀲𑀓𑁆𑀓𑀸 𑀭𑀢𑁆𑀢𑀺𑀘𑁆𑀙𑁂𑀤𑀁 𑀅𑀦𑀸𑀧𑀚𑁆𑀚𑀦𑁆𑀢𑁂𑀦 𑀯𑀲𑀺𑀢𑀼𑀁, 𑀢𑀢𑁆𑀣𑁂𑀯 ‘‘𑀧𑀭𑀺𑀯𑀸𑀲𑀁 𑀲𑀫𑀸𑀤𑀺𑀬𑀸𑀫𑀺, 𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀲𑀫𑀸𑀤𑀺𑀬𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀧𑀼𑀦 𑀆𑀕𑀢𑀸𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀦𑁆𑀢𑁂𑀦 𑀯𑀢𑁆𑀢𑀪𑁂𑀤𑀜𑁆𑀘 𑀭𑀢𑁆𑀢𑀺𑀘𑁆𑀙𑁂𑀤𑀜𑁆𑀘 𑀅𑀓𑀢𑁆𑀯𑀸 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀭𑀺𑀯𑀸𑀲𑀁 𑀲𑁄𑀥𑁂𑀢𑀼𑀁, 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁂𑀦 𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁆𑀣𑁂𑀯 𑀲𑀗𑁆𑀖𑀫𑀚𑁆𑀛𑁂, 𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂 ‘‘𑀧𑀭𑀺𑀯𑀸𑀲𑀁 𑀦𑀺𑀓𑁆𑀔𑀺𑀧𑀸𑀫𑀺, 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀧𑀭𑀺𑀯𑀸𑀲𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄, 𑀏𑀓𑀧𑀤𑁂𑀦𑀸𑀧𑀺 𑀘𑁂𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺 𑀧𑀭𑀺𑀯𑀸𑀲𑁄, 𑀤𑁆𑀯𑀻𑀳𑀺 𑀧𑀦 𑀲𑀼𑀦𑀺𑀓𑁆𑀔𑀺𑀢𑁆𑀢𑁄𑀬𑁂𑀯, 𑀲𑀫𑀸𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀅𑀣𑀸𑀦𑁂𑀦 𑀧𑀘𑁆𑀘𑀽𑀲𑀲𑀫𑀬𑁂 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀢𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀳𑀸𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫 𑀕𑀼𑀫𑁆𑀩𑁂𑀦 𑀯𑀸 𑀯𑀢𑀺𑀬𑀸 𑀯𑀸 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀬𑀫𑁆𑀧𑀺 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺, 𑀢𑀲𑁆𑀲𑀸𑀧𑀺 𑀆𑀭𑁄𑀘𑁂𑀢𑀩𑁆𑀩𑀫𑁂𑀯. 𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀲𑁄 𑀧𑀼𑀭𑁂 𑀅𑀭𑀼𑀡𑁂𑀬𑁂𑀯 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀕𑀢𑁄, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀬𑀁 𑀲𑀩𑁆𑀩𑀧𑀞𑀫𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀸𑀯 𑀭𑀢𑁆𑀢𑀺𑀬𑁄 𑀧𑀽𑀭𑁂𑀦𑁆𑀢𑀺, 𑀢𑀸𑀯 𑀧𑀭𑀺𑀯𑀢𑁆𑀣𑀩𑁆𑀩𑀁, 𑀅𑀬𑀁 𑀲𑀗𑁆𑀔𑁂𑀧𑀢𑁄 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀯𑀺𑀦𑀺𑀘𑁆𑀙𑀬𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 (𑀘𑀽𑀴𑀯. 𑀅𑀝𑁆𑀞. 𑁯𑁭) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀭𑁂𑀲𑀼 𑀧𑀦 𑀤𑁆𑀯𑀻𑀲𑀼 ‘‘𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀦 𑀚𑀸𑀦𑀸𑀢𑀻’’𑀢𑀺 (𑀘𑀽𑀴𑀯. 𑁧𑁫𑁭) 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀔𑀦𑁆𑀥𑀓𑁂 𑀅𑀦𑀼𑀜𑁆𑀜𑀸𑀢𑁄 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀦𑀸𑀫, 𑀲𑁄 𑀤𑀼𑀯𑀺𑀥𑁄 𑀘𑀽𑀴𑀲𑀼𑀤𑁆𑀥𑀦𑁆𑀢𑁄 𑀫𑀳𑀸𑀲𑀼𑀤𑁆𑀥𑀦𑁆𑀢𑁄𑀢𑀺, 𑀤𑀼𑀯𑀺𑀥𑁄𑀧𑀺 𑀘𑁂𑀲 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀁 𑀲𑀓𑀮𑀁 𑀯𑀸 𑀏𑀓𑀘𑁆𑀘𑀁 𑀯𑀸 𑀅𑀚𑀸𑀦𑀦𑁆𑀢𑀲𑁆𑀲 𑀘 𑀅𑀲𑁆𑀲𑀭𑀦𑁆𑀢𑀲𑁆𑀲 𑀘 𑀢𑀢𑁆𑀣 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀸𑀢𑀩𑁆𑀩𑁄. 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑀁 𑀧𑀦 ‘‘𑀏𑀢𑁆𑀢𑀺𑀓𑀸 𑀅𑀳𑀁 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄’’𑀢𑀺 𑀚𑀸𑀦𑀸𑀢𑀼 𑀯𑀸, 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁. 𑀢𑀲𑁆𑀲 𑀤𑀸𑀦𑀯𑀺𑀥𑀺 𑀔𑀦𑁆𑀥𑀓𑁂 𑀆𑀕𑀢𑁄, 𑀯𑀺𑀦𑀺𑀘𑁆𑀙𑀬𑀓𑀣𑀸 𑀧𑀦 𑀯𑀺𑀢𑁆𑀣𑀸𑀭𑀢𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀯𑀼𑀢𑁆𑀢𑀸. 𑀇𑀢𑀭𑁄 𑀧𑀦 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄 𑀦𑀸𑀫, 𑀲𑁄 𑀢𑀺𑀯𑀺𑀥𑁄 𑀳𑁄𑀢𑀺 𑀑𑀥𑀸𑀦𑀲𑀫𑁄𑀥𑀸𑀦𑁄 𑀅𑀕𑁆𑀖𑀲𑀫𑁄𑀥𑀸𑀦𑁄 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄𑀢𑀺. 𑀢𑀢𑁆𑀣 𑀑𑀥𑀸𑀦𑀲𑀫𑁄𑀥𑀸𑀦𑁄 𑀦𑀸𑀫 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑁂 𑀑𑀥𑀼𑀦𑀺𑀢𑁆𑀯𑀸 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸 𑀫𑀽𑀮𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁂 𑀧𑀘𑁆𑀙𑀸 𑀆𑀧𑀦𑁆𑀦𑀁 𑀆𑀧𑀢𑁆𑀢𑀺𑀁 𑀲𑀫𑁄𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄 𑀯𑀼𑀘𑁆𑀘𑀢𑀺. 𑀅𑀕𑁆𑀖𑀲𑀫𑁄𑀥𑀸𑀦𑁄 𑀦𑀸𑀫 𑀲𑀫𑁆𑀩𑀳𑀼𑀮𑀸𑀲𑀼 𑀆𑀧𑀢𑁆𑀢𑀻𑀲𑀼 𑀬𑀸 𑀏𑀓𑀸 𑀯𑀸 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀆𑀧𑀢𑁆𑀢𑀺𑀬𑁄 𑀲𑀩𑁆𑀩𑀘𑀺𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄, 𑀢𑀸𑀲𑀁 𑀅𑀕𑁆𑀖𑁂𑀦 𑀲𑀫𑁄𑀥𑀸𑀬 𑀢𑀸𑀲𑀁 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀅𑀯𑀲𑁂𑀲𑀸𑀦𑀁 𑀊𑀦𑀢𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀆𑀧𑀢𑁆𑀢𑀻𑀦𑀁 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄 𑀯𑀼𑀘𑁆𑀘𑀢𑀺. 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄 𑀦𑀸𑀫 𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄 𑀆𑀧𑀢𑁆𑀢𑀺𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄 𑀯𑀼𑀘𑁆𑀘𑀢𑀺, 𑀅𑀬𑀁 𑀢𑀺𑀯𑀺𑀥𑁂𑀧𑀺 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁂 𑀲𑀗𑁆𑀔𑁂𑀧𑀓𑀣𑀸, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀯𑀼𑀢𑁆𑀢𑁄, 𑀇𑀤𑀁 ‘‘𑀧𑀭𑀺𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀧𑀤𑀲𑁆𑀲 𑀯𑀺𑀦𑀺𑀘𑁆𑀙𑀬𑀓𑀣𑀸𑀫𑀼𑀔𑀁.

𑀉𑀢𑁆𑀢𑀭𑀺 𑀙𑀸𑀭𑀢𑁆𑀢𑀦𑁆𑀢𑀺 𑀧𑀭𑀺𑀯𑀸𑀲𑀢𑁄 𑀉𑀢𑁆𑀢𑀭𑀺 𑀙 𑀭𑀢𑁆𑀢𑀺𑀬𑁄. 𑀪𑀺𑀓𑁆𑀔𑀼𑀫𑀸𑀦𑀢𑁆𑀢𑀸𑀬𑀸𑀢𑀺 𑀪𑀺𑀓𑁆𑀔𑀽𑀦𑀁 𑀫𑀸𑀦𑀪𑀸𑀯𑀸𑀬, 𑀆𑀭𑀸𑀥𑀦𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀢𑁆𑀢𑀺𑀢𑀩𑁆𑀩𑀁. 𑀪𑀺𑀓𑁆𑀔𑀼𑀫𑀸𑀦𑀢𑁆𑀢𑀜𑁆𑀘 𑀧𑀦𑁂𑀢𑀁 𑀧𑀝𑀺𑀘𑁆𑀙𑀦𑁆𑀦𑀸𑀧𑀝𑀺𑀘𑁆𑀙𑀦𑁆𑀦𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀬𑀲𑁆𑀲 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀧𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀲 𑀧𑀭𑀺𑀯𑀸𑀲𑀁 𑀅𑀤𑀢𑁆𑀯𑀸 𑀫𑀸𑀦𑀢𑁆𑀢𑀫𑁂𑀯 𑀤𑀸𑀢𑀩𑁆𑀩𑀁, 𑀇𑀤𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁. 𑀬𑀲𑁆𑀲 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺, 𑀢𑀲𑁆𑀲 𑀧𑀭𑀺𑀯𑀸𑀲𑀧𑀭𑀺𑀬𑁄𑀲𑀸𑀦𑁂 𑀤𑀸𑀢𑀩𑁆𑀩𑀁 𑀫𑀸𑀦𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀦𑁂𑀢𑁂𑀲𑀁 𑀤𑀸𑀦𑀯𑀺𑀥𑀺 𑀯𑀺𑀦𑀺𑀘𑁆𑀙𑀬𑀓𑀣𑀸 𑀘 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀲𑀘𑁂 𑀅𑀬𑀁 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑀫𑀸𑀤𑀸𑀢𑀼𑀁 𑀕𑀘𑁆𑀙𑀢𑀺, 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀭𑀺𑀯𑀸𑀲𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 ‘‘𑀫𑀸𑀦𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀺, 𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀦𑁂𑀲𑀁 𑀆𑀭𑁄𑀘𑁂𑀢𑁆𑀯𑀸 𑀢𑀢𑁄 𑀢𑁂𑀲𑀼 𑀕𑀢𑁂𑀲𑀼 𑀯𑀸 𑀅𑀕𑀢𑁂𑀲𑀼 𑀯𑀸 𑀧𑀼𑀭𑀺𑀫𑀦𑀬𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀬𑀢𑁆𑀣 𑀲𑀺𑀬𑀸 𑀯𑀻𑀲𑀢𑀺𑀕𑀡𑁄𑀢𑀺 𑀏𑀢𑁆𑀣 𑀯𑀻𑀲𑀢𑀺𑀲𑀗𑁆𑀖𑁄 𑀕𑀡𑁄 𑀅𑀲𑁆𑀲𑀸𑀢𑀺 𑀯𑀻𑀲𑀢𑀺𑀕𑀡𑁄. 𑀢𑀢𑁆𑀭𑀸𑀢𑀺 𑀬𑀢𑁆𑀭 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀯𑀻𑀲𑀢𑀺𑀕𑀡𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀢𑁆𑀣𑀺, 𑀢𑀢𑁆𑀣. 𑀅𑀩𑁆𑀪𑁂𑀢𑀩𑁆𑀩𑁄𑀢𑀺 𑀅𑀪𑀺𑀏𑀢𑀩𑁆𑀩𑁄, 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄, 𑀅𑀩𑁆𑀪𑀸𑀦𑀓𑀫𑁆𑀫𑀯𑀲𑁂𑀦 𑀑𑀲𑀸𑀭𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑁆𑀳𑀸𑀢𑀩𑁆𑀩𑁄𑀢𑀺 𑀯𑀸 𑀅𑀢𑁆𑀣𑁄. 𑀅𑀩𑁆𑀪𑀸𑀦𑀓𑀫𑁆𑀫𑀁 𑀧𑀦 𑀧𑀸𑀴𑀺𑀯𑀲𑁂𑀦 𑀔𑀦𑁆𑀥𑀓𑁂 (𑀘𑀽𑀴𑀯. 𑁧𑁦𑁦 𑀆𑀤𑀬𑁄) 𑀯𑀺𑀦𑀺𑀘𑁆𑀙𑀬𑀯𑀲𑁂𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑀁. 𑀅𑀦𑀩𑁆𑀪𑀺𑀢𑁄𑀢𑀺 𑀦 𑀅𑀩𑁆𑀪𑀺𑀢𑁄 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁄, 𑀅𑀓𑀢𑀩𑁆𑀪𑀸𑀦𑀓𑀫𑁆𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀯𑁆𑀳𑀸𑀢𑁄𑀢𑀺 𑀯𑀸 𑀅𑀢𑁆𑀣𑁄. 𑀢𑁂 𑀘 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸𑀢𑀺 𑀬𑁂 𑀊𑀦𑀪𑀸𑀯𑀁 𑀜𑀢𑁆𑀯𑀸 𑀅𑀩𑁆𑀪𑁂𑀦𑁆𑀢𑀺, 𑀢𑁂 𑀪𑀺𑀓𑁆𑀔𑀽 𑀘 𑀕𑀭𑀳𑀺𑀢𑀩𑁆𑀩𑀸, 𑀲𑀸𑀢𑀺𑀲𑀸𑀭𑀸 𑀲𑀤𑁄𑀲𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀻𑀢𑀺 𑀅𑀬𑀁 𑀢𑀢𑁆𑀣 𑀅𑀦𑀼𑀥𑀫𑁆𑀫𑀢𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀦𑀼𑀕𑀢𑀸 𑀑𑀯𑀸𑀤𑀸𑀦𑀼𑀲𑀸𑀲𑀦𑀻 𑀲𑀸𑀫𑀻𑀘𑀺 𑀥𑀫𑁆𑀫𑀢𑀸. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀲𑀗𑁆𑀖𑀸𑀤𑀺𑀲𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.