𑁭. 𑀧𑀝𑀺𑀩𑀸𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀥𑀫𑁆𑀫𑀺𑀓𑀁 𑀘𑀻𑀯𑀭𑀯𑀺𑀪𑀗𑁆𑀕𑀦𑁆𑀢𑀺 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀭𑀻𑀬𑀫𑀸𑀦𑀁 𑀘𑀻𑀯𑀭𑀯𑀺𑀪𑀗𑁆𑀕. 𑀧𑀝𑀺𑀩𑀸𑀳𑁂𑀬𑁆𑀬𑀸𑀢𑀺 𑀧𑀝𑀺𑀲𑁂𑀥𑁂𑀬𑁆𑀬, 𑀏𑀯𑀁 𑀧𑀝𑀺𑀲𑁂𑀥𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀥𑀫𑁆𑀫𑀺𑀓𑀁 𑀘𑀻𑀯𑀭𑀯𑀺𑀪𑀗𑁆𑀕𑀁 𑀧𑀝𑀺𑀩𑀸𑀳𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀥𑀫𑁆𑀫𑀺𑀓𑁂 𑀯𑁂𑀫𑀢𑀺𑀓𑀸𑀬, 𑀅𑀥𑀫𑁆𑀫𑀺𑀓𑁂 𑀥𑀫𑁆𑀫𑀺𑀓𑀲𑀜𑁆𑀜𑀸𑀬 𑀘𑁂𑀯 𑀯𑁂𑀫𑀢𑀺𑀓𑀸𑀬 𑀘 𑀤𑀼𑀓𑁆𑀓𑀝𑀁. 𑀉𑀪𑀬𑀢𑁆𑀣 𑀅𑀥𑀫𑁆𑀫𑀺𑀓𑀲𑀜𑁆𑀜𑀸𑀬, 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀩𑀸𑀳𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀘𑀻𑀯𑀭𑀯𑀺𑀪𑀗𑁆𑀕𑀲𑁆𑀲 𑀥𑀫𑁆𑀫𑀺𑀓𑀢𑀸, 𑀥𑀫𑁆𑀫𑀺𑀓𑀲𑀜𑁆𑀜𑀺𑀢𑀸, 𑀯𑀺𑀦𑀸 𑀆𑀦𑀺𑀲𑀁𑀲𑁂𑀦 𑀧𑀝𑀺𑀩𑀸𑀳𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑁂𑀯𑀸𑀢𑀺.

𑀧𑀝𑀺𑀩𑀸𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.