𑁩. 𑀦𑀕𑁆𑀕𑀯𑀕𑁆𑀕𑁄

𑁧. 𑀦𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀕𑁆𑀕𑀯𑀕𑁆𑀕𑀲𑁆𑀲 𑀧𑀞𑀫𑁂 𑀦𑀕𑁆𑀕𑀸𑀢𑀺 𑀅𑀦𑀺𑀯𑀢𑁆𑀣𑀸 𑀯𑀸 𑀅𑀧𑀸𑀭𑀼𑀢𑀸 𑀯𑀸. 𑀏𑀯𑀜𑁆𑀳𑀺 𑀦𑀳𑀸𑀬𑀦𑁆𑀢𑀺𑀬𑀸 𑀲𑀩𑁆𑀩𑀧𑁆𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁, 𑀦𑀳𑀸𑀦𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀏𑀯𑀁 𑀦𑀳𑀸𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀉𑀤𑀓𑀲𑀸𑀝𑀺𑀓𑀘𑀻𑀯𑀭𑁂 𑀅𑀘𑁆𑀙𑀺𑀦𑁆𑀦𑁂 𑀯𑀸 𑀦𑀝𑁆𑀞𑁂 𑀯𑀸, ‘‘𑀫𑀳𑀕𑁆𑀖𑀁 𑀇𑀤𑀁 𑀤𑀺𑀲𑁆𑀯𑀸 𑀘𑁄𑀭𑀸𑀧𑀺 𑀳𑀭𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀯𑀸 𑀦𑀳𑀸𑀬𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀦𑀕𑁆𑀕𑀢𑀸, 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀪𑀸𑀯𑁄, 𑀦𑀳𑀸𑀦𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀏𑀴𑀓𑀮𑁄𑀫𑀲𑀤𑀺𑀲𑀸𑀦𑀻𑀢𑀺.

𑀦𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀅𑀧𑁆𑀧𑀫𑀸𑀡𑀺𑀓𑀸𑀬𑁄 𑀉𑀤𑀓𑀲𑀸𑀝𑀺𑀓𑀸𑀬𑁄 𑀥𑀸𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣 𑀲𑀩𑁆𑀩𑀁 𑀭𑀢𑀦𑀯𑀕𑁆𑀕𑁂 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀉𑀤𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀯𑀺𑀲𑀺𑀩𑁆𑀩𑁂𑀢𑁆𑀯𑀸𑀢𑀺 𑀤𑀼𑀲𑁆𑀲𑀺𑀩𑁆𑀩𑀺𑀢𑀁 𑀧𑀼𑀦𑀲𑀺𑀩𑁆𑀩𑀦𑀢𑁆𑀣𑀸𑀬 𑀯𑀺𑀲𑀺𑀩𑁆𑀩𑁂𑀢𑁆𑀯𑀸. 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻𑀢𑀺 𑀤𑀲𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀏𑀓𑁂𑀓𑀲𑁆𑀫𑀺𑀫𑁆𑀧𑀺 𑀅𑀲𑀢𑀺. 𑀅𑀜𑁆𑀜𑀢𑁆𑀭 𑀘𑀢𑀽𑀳𑀧𑀜𑁆𑀘𑀸𑀳𑀸𑀢𑀺 𑀯𑀺𑀲𑀺𑀩𑁆𑀩𑀺𑀢𑀤𑀺𑀯𑀲𑀢𑁄 𑀧𑀜𑁆𑀘 𑀤𑀺𑀯𑀲𑁂 𑀅𑀢𑀺𑀓𑁆𑀓𑀸𑀫𑁂𑀢𑁆𑀯𑀸 ‘‘𑀦𑁂𑀯 𑀲𑀺𑀩𑁆𑀩𑀺𑀲𑁆𑀲𑀸𑀫𑀺, 𑀦 𑀲𑀺𑀩𑁆𑀩𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀘𑀻𑀯𑀭𑀁 𑀯𑀺𑀲𑀺𑀩𑁆𑀩𑁂𑀢𑁆𑀯𑀸 𑀦 𑀲𑀺𑀩𑁆𑀩𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬 𑀢𑀺𑀓𑀤𑀼𑀓𑁆𑀓𑀝𑀁, 𑀢𑀣𑀸 𑀉𑀪𑀺𑀦𑁆𑀦𑀫𑁆𑀧𑀺 𑀅𑀜𑁆𑀜𑀲𑁆𑀫𑀺𑀁 𑀧𑀭𑀺𑀓𑁆𑀔𑀸𑀭𑁂. 𑀬𑀸 𑀧𑀦 𑀅𑀦𑁆𑀢𑀭𑀸𑀬𑀺𑀓𑀺𑀦𑀻 𑀯𑀸 𑀳𑁄𑀢𑀺, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀓𑀺𑀜𑁆𑀘𑀺 𑀦 𑀮𑀪𑀢𑀺, 𑀓𑀭𑁄𑀦𑁆𑀢𑀻 𑀯𑀸 𑀧𑀜𑁆𑀘𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀢𑀲𑁆𑀲𑀸 𑀘, 𑀕𑀺𑀮𑀸𑀦𑀸𑀬 𑀘, 𑀆𑀧𑀤𑀸𑀲𑀼 𑀘, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀼𑀧𑀕𑀘𑀻𑀯𑀭𑀢𑀸, 𑀉𑀧𑀲𑀫𑁆𑀧𑀦𑁆𑀦𑀸𑀬 𑀲𑀦𑁆𑀢𑀓𑀢𑀸, 𑀲𑀺𑀩𑁆𑀩𑀦𑀢𑁆𑀣𑀸𑀬 𑀯𑀺𑀲𑀺𑀩𑁆𑀩𑀦𑀁 𑀯𑀸 𑀯𑀺𑀲𑀺𑀩𑁆𑀩𑀸𑀧𑀦𑀁 𑀯𑀸, 𑀅𑀜𑁆𑀜𑀢𑁆𑀭 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀧𑀜𑁆𑀘𑀸𑀳𑀸𑀢𑀺𑀓𑁆𑀓𑀫𑁄, 𑀥𑀼𑀭𑀦𑀺𑀓𑁆𑀔𑁂𑀧𑁄𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀫𑀦𑀼𑀪𑀸𑀲𑀦𑀲𑀤𑀺𑀲𑀸𑀦𑀻𑀢𑀺.

𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀗𑁆𑀖𑀸𑀝𑀺𑀘𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀧𑀜𑁆𑀘 𑀅𑀳𑀸𑀦𑀺 𑀧𑀜𑁆𑀘𑀸𑀳𑀁, 𑀧𑀜𑁆𑀘𑀸𑀳𑀫𑁂𑀯 𑀧𑀜𑁆𑀘𑀸𑀳𑀺𑀓𑀁. 𑀲𑀗𑁆𑀖𑀸𑀝𑀻𑀦𑀁 𑀘𑀸𑀭𑁄 𑀲𑀗𑁆𑀖𑀸𑀝𑀺𑀘𑀸𑀭𑁄, 𑀧𑀭𑀺𑀪𑁄𑀕𑀯𑀲𑁂𑀦 𑀯𑀸 𑀑𑀢𑀸𑀧𑀦𑀯𑀲𑁂𑀦 𑀯𑀸 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 ‘𑀲𑀗𑁆𑀖𑀸𑀝𑀻’𑀢𑀺 𑀮𑀤𑁆𑀥𑀦𑀸𑀫𑀁 𑀢𑀺𑀘𑀻𑀯𑀭𑀁, 𑀉𑀤𑀓𑀲𑀸𑀝𑀺𑀓𑀸, 𑀲𑀁𑀓𑀘𑁆𑀘𑀺𑀓𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀘𑀻𑀯𑀭𑀸𑀦𑀁 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀓𑁆𑀓𑀸𑀫𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀙𑀝𑁆𑀞𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀏𑀓𑀲𑁆𑀫𑀺𑀁 𑀘𑀻𑀯𑀭𑁂 𑀯𑀼𑀢𑁆𑀢𑀦𑀬𑁂𑀦 𑀅𑀧𑀭𑀺𑀯𑀢𑁆𑀢𑀺𑀢𑁂 𑀏𑀓𑀸 𑀆𑀧𑀢𑁆𑀢𑀺, 𑀧𑀜𑁆𑀘𑀲𑀼 𑀧𑀜𑁆𑀘.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀧𑀜𑁆𑀘𑀸𑀳𑀸𑀦𑀢𑀺𑀓𑁆𑀓𑀦𑁆𑀢𑁂 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. 𑀢𑀲𑁆𑀫𑀺𑀁 𑀧𑀦 𑀅𑀦𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀸𑀬, 𑀧𑀜𑁆𑀘𑀫𑀁 𑀤𑀺𑀯𑀲𑀁 𑀧𑀜𑁆𑀘 𑀘𑀻𑀯𑀭𑀸𑀦𑀺 𑀦𑀺𑀯𑀸𑀲𑁂𑀦𑁆𑀢𑀺𑀬𑀸 𑀯𑀸 𑀧𑀸𑀭𑀼𑀧𑀦𑁆𑀢𑀺𑀬𑀸 𑀯𑀸 𑀑𑀢𑀸𑀧𑁂𑀦𑁆𑀢𑀺𑀬𑀸 𑀯𑀸, 𑀕𑀺𑀮𑀸𑀦𑀸𑀬, ‘‘𑀇𑀤𑀁 𑀫𑁂 𑀘𑀻𑀯𑀭𑀁 𑀫𑀳𑀕𑁆𑀖𑀁 𑀈𑀤𑀺𑀲𑁂 𑀘𑁄𑀭𑀪𑀬𑁂 𑀦 𑀲𑀓𑁆𑀓𑀸 𑀥𑀸𑀭𑁂𑀢𑀼’’𑀦𑁆𑀢𑀺 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀧𑀜𑁆𑀘𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀢𑀸, 𑀧𑀜𑁆𑀘𑀸𑀳𑀸𑀢𑀺𑀓𑁆𑀓𑀫𑁄, 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀪𑀸𑀯𑁄, 𑀅𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑀣𑀺𑀦𑀲𑀤𑀺𑀲𑀸𑀦𑀻𑀢𑀺.

𑀲𑀗𑁆𑀖𑀸𑀝𑀺𑀘𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀦𑁆𑀢𑀺 𑀲𑀗𑁆𑀓𑀫𑁂𑀢𑀩𑁆𑀩𑀁 𑀘𑀻𑀯𑀭𑀁, 𑀅𑀜𑁆𑀜𑀺𑀲𑁆𑀲𑀸 𑀲𑀦𑁆𑀢𑀓𑀁 𑀅𑀦𑀸𑀧𑀼𑀘𑁆𑀙𑀸 𑀕𑀳𑀺𑀢𑀁 𑀧𑀼𑀦 𑀧𑀝𑀺𑀤𑀸𑀢𑀩𑁆𑀩𑀁 𑀧𑀜𑁆𑀘𑀦𑁆𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄. 𑀥𑀸𑀭𑁂𑀬𑁆𑀬𑀸𑀢𑀺 𑀲𑀘𑁂 𑀢𑀁 𑀦𑀺𑀯𑀸𑀲𑁂𑀢𑀺 𑀯𑀸 𑀧𑀸𑀭𑀼𑀧𑀢𑀺 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀆𑀤𑀸𑀬 𑀅𑀦𑀸𑀧𑀼𑀘𑁆𑀙𑀸 𑀧𑀸𑀭𑀼𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬 𑀢𑀺𑀓𑀤𑀼𑀓𑁆𑀓𑀝𑀁. 𑀬𑀸 𑀧𑀦 𑀢𑀸𑀬 𑀯𑀸 𑀤𑀺𑀦𑁆𑀦𑀁, 𑀢𑀁 𑀯𑀸 𑀆𑀧𑀼𑀘𑁆𑀙𑀸, 𑀅𑀘𑁆𑀙𑀺𑀦𑁆𑀦𑀦𑀝𑁆𑀞𑀘𑀻𑀯𑀭𑀺𑀓𑀸 𑀯𑀸 𑀳𑀼𑀢𑁆𑀯𑀸, ‘‘𑀇𑀤𑀁 𑀫𑁂 𑀘𑀻𑀯𑀭𑀁 𑀫𑀳𑀕𑁆𑀖𑀁 𑀈𑀤𑀺𑀲𑁂 𑀘𑁄𑀭𑀪𑀬𑁂 𑀦 𑀲𑀓𑁆𑀓𑀸 𑀥𑀸𑀭𑁂𑀢𑀼’’𑀦𑁆𑀢𑀺 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀯𑀸 𑀥𑀸𑀭𑁂𑀢𑀺, 𑀢𑀲𑁆𑀲𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀢𑀸, 𑀉𑀧𑀲𑀫𑁆𑀧𑀦𑁆𑀦𑀸𑀬 𑀲𑀦𑁆𑀢𑀓𑀢𑀸, 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀪𑀸𑀯𑁄, 𑀥𑀸𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀓𑀣𑀺𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺.

𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀕𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀕𑀡𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲. 𑀘𑀻𑀯𑀭𑀮𑀸𑀪𑀦𑁆𑀢𑀺 𑀯𑀺𑀓𑀧𑁆𑀧𑀦𑀼𑀧𑀕𑀫𑁆𑀧𑀺 𑀧𑀘𑁆𑀙𑀺𑀫𑀁 𑀮𑀪𑀺𑀢𑀩𑁆𑀩𑀁 𑀘𑀻𑀯𑀭𑀁. 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬𑀸𑀢𑀺 𑀬𑀣𑀸 𑀢𑁂 𑀤𑀸𑀢𑀼𑀓𑀸𑀫𑀸 𑀦 𑀤𑁂𑀦𑁆𑀢𑀺, 𑀏𑀯𑀁 𑀧𑀭𑀓𑁆𑀓𑀫𑁂𑀬𑁆𑀬. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀘𑁂 𑀢𑀲𑁆𑀲𑀸 𑀯𑀘𑀦𑁂𑀦 𑀢𑁂 𑀦 𑀤𑁂𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀕𑀡𑀲𑁆𑀲 𑀘𑀻𑀯𑀭𑀮𑀸𑀪𑀦𑁆𑀢𑀭𑀸𑀬𑀓𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀜𑁆𑀜𑀲𑁆𑀫𑀺𑀁 𑀧𑀭𑀺𑀓𑁆𑀔𑀸𑀭𑁂 𑀤𑀼𑀓𑁆𑀓𑀝𑀁, 𑀲𑀫𑁆𑀩𑀳𑀼𑀮𑀸𑀦𑀁 𑀧𑀦 𑀏𑀓𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀘𑀻𑀯𑀭𑀮𑀸𑀪𑁂𑀧𑀺 𑀤𑀼𑀓𑁆𑀓𑀝𑀫𑁂𑀯. ‘‘𑀲𑀫𑀕𑁆𑀖𑀓𑀸𑀮𑁂 𑀤𑀲𑁆𑀲𑀣𑀸’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀭𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀢𑀸, 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀪𑀸𑀯𑁄, 𑀯𑀺𑀦𑀸 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦 𑀅𑀦𑁆𑀢𑀭𑀸𑀬𑀓𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀻𑀢𑀺.

𑀕𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀝𑀺𑀩𑀸𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀥𑀫𑁆𑀫𑀺𑀓𑀁 𑀘𑀻𑀯𑀭𑀯𑀺𑀪𑀗𑁆𑀕𑀦𑁆𑀢𑀺 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀭𑀻𑀬𑀫𑀸𑀦𑀁 𑀘𑀻𑀯𑀭𑀯𑀺𑀪𑀗𑁆𑀕. 𑀧𑀝𑀺𑀩𑀸𑀳𑁂𑀬𑁆𑀬𑀸𑀢𑀺 𑀧𑀝𑀺𑀲𑁂𑀥𑁂𑀬𑁆𑀬, 𑀏𑀯𑀁 𑀧𑀝𑀺𑀲𑁂𑀥𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀥𑀫𑁆𑀫𑀺𑀓𑀁 𑀘𑀻𑀯𑀭𑀯𑀺𑀪𑀗𑁆𑀕𑀁 𑀧𑀝𑀺𑀩𑀸𑀳𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀥𑀫𑁆𑀫𑀺𑀓𑁂 𑀯𑁂𑀫𑀢𑀺𑀓𑀸𑀬, 𑀅𑀥𑀫𑁆𑀫𑀺𑀓𑁂 𑀥𑀫𑁆𑀫𑀺𑀓𑀲𑀜𑁆𑀜𑀸𑀬 𑀘𑁂𑀯 𑀯𑁂𑀫𑀢𑀺𑀓𑀸𑀬 𑀘 𑀤𑀼𑀓𑁆𑀓𑀝𑀁. 𑀉𑀪𑀬𑀢𑁆𑀣 𑀅𑀥𑀫𑁆𑀫𑀺𑀓𑀲𑀜𑁆𑀜𑀸𑀬, 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀩𑀸𑀳𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀘𑀻𑀯𑀭𑀯𑀺𑀪𑀗𑁆𑀕𑀲𑁆𑀲 𑀥𑀫𑁆𑀫𑀺𑀓𑀢𑀸, 𑀥𑀫𑁆𑀫𑀺𑀓𑀲𑀜𑁆𑀜𑀺𑀢𑀸, 𑀯𑀺𑀦𑀸 𑀆𑀦𑀺𑀲𑀁𑀲𑁂𑀦 𑀧𑀝𑀺𑀩𑀸𑀳𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑁂𑀯𑀸𑀢𑀺.

𑀧𑀝𑀺𑀩𑀸𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀲𑀫𑀡𑀘𑀻𑀯𑀭𑀦𑁆𑀢𑀺 𑀓𑀧𑁆𑀧𑀓𑀢𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀼𑀧𑀕𑀁, 𑀏𑀯𑀭𑀽𑀧𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀫𑀸𑀢𑀸𑀧𑀺𑀢𑀭𑁄 𑀘 𑀬𑀲𑁆𑀲 𑀓𑀲𑁆𑀲𑀘𑀺 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀅𑀕𑀸𑀭𑀺𑀓𑀲𑁆𑀲 𑀲𑀫𑀡𑀘𑀻𑀯𑀭𑀤𑀸𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁. 𑀫𑀸𑀢𑀸𑀧𑀺𑀢𑀽𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸𑀧𑀺, 𑀅𑀜𑁆𑀜𑁂𑀲𑀁 𑀢𑀸𑀯𑀓𑀸𑀮𑀺𑀓𑀫𑁂𑀯 𑀤𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑀫𑀡𑀘𑀻𑀯𑀭𑀢𑀸, 𑀞𑀧𑁂𑀢𑁆𑀯𑀸 𑀲𑀳𑀥𑀫𑁆𑀫𑀺𑀓𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀘 𑀅𑀜𑁆𑀜𑁂𑀲𑀁 𑀤𑀸𑀦𑀁, 𑀅𑀢𑀸𑀯𑀓𑀸𑀮𑀺𑀓𑀢𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀜𑁆𑀘𑀭𑀺𑀢𑁆𑀢𑀲𑀤𑀺𑀲𑀸𑀦𑀻𑀢𑀺.

𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀸𑀮𑀅𑀢𑀺𑀓𑁆𑀓𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀤𑀼𑀩𑁆𑀩𑀮𑀘𑀻𑀯𑀭𑀧𑀘𑁆𑀘𑀸𑀲𑀸𑀬𑀸𑀢𑀺 𑀤𑀼𑀩𑁆𑀩𑀮𑀸𑀬 𑀘𑀻𑀯𑀭𑀧𑀘𑁆𑀘𑀸𑀲𑀸𑀬, ‘‘𑀲𑀘𑁂 𑀲𑀓𑁆𑀓𑁄𑀫 𑀤𑀲𑁆𑀲𑀸𑀫𑀸’’𑀢𑀺 𑀏𑀢𑁆𑀢𑀓𑀫𑀢𑁆𑀢𑀁 𑀲𑀼𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀸𑀬 𑀆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑁂𑀬𑁆𑀬𑀸𑀢𑀺 𑀯𑀲𑁆𑀲𑀁𑀯𑀼𑀝𑁆𑀞𑀪𑀺𑀓𑁆𑀔𑀼𑀦𑀻𑀳𑀺 𑀓𑀸𑀮𑀘𑀻𑀯𑀭𑁂 𑀪𑀸𑀚𑀺𑀬𑀫𑀸𑀦𑁂 ‘‘𑀆𑀕𑀫𑁂𑀬𑁆𑀬𑀸𑀣, 𑀅𑀬𑁆𑀬𑁂, 𑀅𑀢𑁆𑀣𑀺 𑀲𑀗𑁆𑀖𑀲𑁆𑀲 𑀘𑀻𑀯𑀭𑀧𑀘𑁆𑀘𑀸𑀲𑀸’’𑀢𑀺 𑀯𑀢𑁆𑀯𑀸 𑀢𑀁 𑀘𑀻𑀯𑀭𑀯𑀺𑀪𑀗𑁆𑀕𑀁 𑀘𑀻𑀯𑀭𑀓𑀸𑀮𑀁 𑀅𑀢𑀺𑀓𑁆𑀓𑀸𑀫𑁂𑀬𑁆𑀬, 𑀢𑀲𑁆𑀲𑀸 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑀫𑀸𑀲𑀁, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀓𑀣𑀺𑀦𑀼𑀩𑁆𑀪𑀸𑀭𑀤𑀺𑀯𑀲𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀤𑀼𑀩𑁆𑀩𑀮𑀘𑀻𑀯𑀭𑀧𑀘𑁆𑀘𑀸𑀲𑀸𑀬 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀤𑀼𑀩𑁆𑀩𑀮𑀘𑀻𑀯𑀭𑁂 𑀯𑁂𑀫𑀢𑀺𑀓𑀸𑀬, 𑀅𑀤𑀼𑀩𑁆𑀩𑀮𑀘𑀻𑀯𑀭𑁂 𑀤𑀼𑀩𑁆𑀩𑀮𑀘𑀻𑀯𑀭𑀲𑀜𑁆𑀜𑀸𑀬 𑀘𑁂𑀯 𑀯𑁂𑀫𑀢𑀺𑀓𑀸𑀬 𑀘 𑀤𑀼𑀓𑁆𑀓𑀝𑀁. 𑀉𑀪𑀬𑀢𑁆𑀣 𑀅𑀤𑀼𑀩𑁆𑀩𑀮𑀘𑀻𑀯𑀭𑀲𑀜𑁆𑀜𑀸𑀬, 𑀓𑀺𑀜𑁆𑀘𑀸𑀧𑀺 ‘𑀦 𑀲𑀓𑁆𑀓𑁄𑀫𑀸’𑀢𑀺 𑀯𑀤𑀦𑁆𑀢𑀺, ‘‘𑀇𑀤𑀸𑀦𑀺 𑀧𑀦 𑀢𑁂𑀲𑀁 𑀓𑀧𑁆𑀧𑀸𑀲𑁄 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀲𑀤𑁆𑀥𑁄 𑀯𑀸 𑀧𑀼𑀭𑀺𑀲𑁄 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀆𑀕𑀢𑁂 𑀅𑀤𑁆𑀥𑀸 𑀤𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀭𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀤𑀼𑀩𑁆𑀩𑀮𑀘𑀻𑀯𑀭𑀢𑀸, 𑀤𑀼𑀩𑁆𑀩𑀮𑀲𑀜𑁆𑀜𑀺𑀢𑀸, 𑀯𑀺𑀦𑀸 𑀆𑀦𑀺𑀲𑀁𑀲𑁂𑀦 𑀦𑀺𑀯𑀸𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀻𑀢𑀺.

𑀓𑀸𑀮𑀅𑀢𑀺𑀓𑁆𑀓𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀣𑀺𑀦𑀼𑀤𑁆𑀥𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀥𑀫𑁆𑀫𑀺𑀓𑀁 𑀓𑀣𑀺𑀦𑀼𑀤𑁆𑀥𑀸𑀭𑀦𑁆𑀢𑀺 𑀲𑀩𑁆𑀩𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀓𑀸𑀮𑀘𑀻𑀯𑀭𑀁 𑀤𑀸𑀢𑀼𑀓𑀸𑀫𑁂𑀦 𑀉𑀧𑀸𑀲𑀓𑁂𑀦 𑀬𑀢𑁆𑀢𑀓𑁄 𑀅𑀢𑁆𑀣𑀸𑀭𑀫𑀽𑀮𑀺𑀓𑁄 𑀆𑀦𑀺𑀲𑀁𑀲𑁄, 𑀢𑀢𑁄 𑀅𑀥𑀺𑀓𑀁 𑀯𑀸 𑀲𑀫𑀓𑀁 𑀯𑀸 𑀤𑀢𑁆𑀯𑀸 𑀬𑀸𑀘𑀺𑀢𑁂𑀦 𑀲𑀫𑀕𑁆𑀕𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀬𑀁 𑀓𑀣𑀺𑀦𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀦 𑀅𑀦𑁆𑀢𑀭𑀸 𑀉𑀤𑁆𑀥𑀭𑀻𑀬𑀢𑀺, 𑀢𑀲𑁆𑀲 𑀲𑁄 𑀉𑀤𑁆𑀥𑀸𑀭𑁄 ‘𑀥𑀫𑁆𑀫𑀺𑀓𑁄’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀭𑀽𑀧𑀁 𑀓𑀣𑀺𑀦𑀼𑀤𑁆𑀥𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀩𑀸𑀳𑁂𑀬𑁆𑀬𑀸𑀢𑀺 𑀦𑀺𑀯𑀸𑀭𑁂𑀬𑁆𑀬, 𑀢𑀲𑁆𑀲 𑀏𑀯𑀭𑀽𑀧𑀁 𑀓𑀣𑀺𑀦𑀼𑀤𑁆𑀥𑀸𑀭𑀁 𑀦𑀺𑀯𑀸𑀭𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀓𑀣𑀺𑀦𑀼𑀤𑁆𑀥𑀸𑀭𑀁 𑀧𑀝𑀺𑀩𑀸𑀳𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀁 𑀲𑀢𑁆𑀢𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀓𑀣𑀺𑀦𑀼𑀤𑁆𑀥𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀕𑁆𑀕𑀯𑀕𑁆𑀕𑁄 𑀢𑀢𑀺𑀬𑁄.