𑁨. 𑀭𑀢𑁆𑀢𑀦𑁆𑀥𑀓𑀸𑀭𑀯𑀕𑁆𑀕𑁄

𑁧. 𑀭𑀢𑁆𑀢𑀦𑁆𑀥𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀦𑁆𑀥𑀓𑀸𑀭𑀯𑀕𑁆𑀕𑀲𑁆𑀲 𑀧𑀞𑀫𑁂 𑀭𑀢𑁆𑀢𑀦𑁆𑀥𑀓𑀸𑀭𑁂𑀢𑀺 𑀭𑀢𑁆𑀢𑀺𑀅𑀦𑁆𑀥𑀓𑀸𑀭𑁂. 𑀅𑀧𑁆𑀧𑀤𑀻𑀧𑁂𑀢𑀺 𑀧𑀚𑁆𑀚𑁄𑀢𑀘𑀦𑁆𑀤𑀲𑀽𑀭𑀺𑀬𑀅𑀕𑁆𑀕𑀻𑀲𑀼 𑀏𑀓𑁂𑀓𑁂𑀦𑀸𑀧𑀺 𑀅𑀦𑁄𑀪𑀸𑀲𑀺𑀢𑁂. 𑀧𑀼𑀭𑀺𑀲𑁂𑀦𑀸𑀢𑀺 𑀲𑀦𑁆𑀢𑀺𑀝𑁆𑀞𑀺𑀢𑀼𑀁 𑀲𑀮𑁆𑀮𑀧𑀺𑀢𑀼𑀜𑁆𑀘 𑀯𑀺𑀜𑁆𑀜𑀼𑀦𑀸 𑀫𑀦𑀼𑀲𑁆𑀲𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁. 𑀲𑀦𑁆𑀢𑀺𑀝𑁆𑀞𑁂𑀬𑁆𑀬 𑀯𑀸𑀢𑀺 𑀳𑀢𑁆𑀣𑀧𑀸𑀲𑁂 𑀞𑀺𑀢𑀫𑀢𑁆𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀮𑁆𑀮𑀧𑁂𑀬𑁆𑀬𑀸𑀢𑀺 𑀢𑀢𑁆𑀣 𑀞𑀢𑁆𑀯𑀸 𑀕𑁂𑀳𑀲𑀺𑀢𑀓𑀣𑀁 𑀓𑀣𑁂𑀦𑁆𑀢𑀺𑀬𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀏𑀯𑀁 𑀲𑀦𑁆𑀢𑀺𑀝𑁆𑀞𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸, 𑀬𑀓𑁆𑀔𑀸𑀤𑀻𑀦𑀁 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸𑀧𑀺 𑀲𑀦𑁆𑀢𑀺𑀝𑁆𑀞𑀦𑁆𑀢𑀺𑀬𑀸, 𑀲𑀮𑁆𑀮𑀧𑁂𑀦𑁆𑀢𑀺𑀬𑀸 𑀯𑀸 𑀤𑀼𑀓𑁆𑀓𑀝𑀁, 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀼𑀁 𑀤𑀼𑀢𑀺𑀬𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀓𑀭𑁄𑀦𑁆𑀢𑀺𑀬𑀸, 𑀅𑀭𑀳𑁄𑀧𑁂𑀓𑁆𑀔𑀸𑀬, 𑀅𑀜𑁆𑀜𑀯𑀺𑀳𑀺𑀢𑀸𑀬, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀭𑀢𑁆𑀢𑀦𑁆𑀥𑀓𑀸𑀭𑀢𑀸, 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀸𑀦𑀁 𑀯𑀸 𑀲𑀮𑁆𑀮𑀧𑀦𑀁 𑀯𑀸, 𑀲𑀳𑀸𑀬𑀸𑀪𑀸𑀯𑁄, 𑀭𑀳𑁄𑀧𑁂𑀓𑁆𑀔𑀢𑀸𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀭𑀢𑁆𑀢𑀦𑁆𑀥𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂𑀢𑀺 𑀓𑀼𑀝𑁆𑀝𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑁂, 𑀇𑀤𑀫𑁂𑀯𑁂𑀢𑁆𑀣 𑀦𑀸𑀦𑀢𑁆𑀢𑀁.

𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀚𑁆𑀛𑁄𑀓𑀸𑀲𑀲𑀮𑁆𑀮𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀅𑀚𑁆𑀛𑁄𑀓𑀸𑀲𑁂𑀢𑀺 𑀦𑀸𑀦𑀁, 𑀲𑁂𑀲𑀁 𑀉𑀪𑀬𑀢𑁆𑀣𑀸𑀧𑀺 𑀧𑀞𑀫𑀲𑀤𑀺𑀲𑀫𑁂𑀯𑀸𑀢𑀺.

𑀅𑀚𑁆𑀛𑁄𑀓𑀸𑀲𑀲𑀮𑁆𑀮𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀢𑀺𑀬𑀺𑀓𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀭𑀣𑀺𑀓𑀸𑀬𑀸𑀢𑀺 𑀭𑀘𑁆𑀙𑀸𑀬𑀁. 𑀩𑁆𑀬𑀽𑀳𑁂𑀢𑀺 𑀅𑀦𑀺𑀯𑀺𑀤𑁆𑀥𑀭𑀘𑁆𑀙𑀸𑀬𑀁. 𑀲𑀺𑀗𑁆𑀖𑀸𑀝𑀓𑁂𑀢𑀺 𑀘𑀘𑁆𑀘𑀭𑁂. 𑀦𑀺𑀓𑀡𑁆𑀡𑀺𑀓𑀁 𑀯𑀸 𑀚𑀧𑁆𑀧𑁂𑀬𑁆𑀬𑀸𑀢𑀺 𑀓𑀡𑁆𑀡𑀫𑀽𑀮𑁂 𑀓𑀺𑀜𑁆𑀘𑀺 𑀚𑀧𑁆𑀧𑁂𑀬𑁆𑀬. 𑀉𑀬𑁆𑀬𑁄𑀚𑁂𑀬𑁆𑀬𑀸𑀢𑀺 𑀅𑀦𑀸𑀘𑀸𑀭𑀁 𑀘𑀭𑀺𑀢𑀼𑀓𑀸𑀫𑀢𑀸𑀬 ‘‘𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀤𑀼𑀢𑀺𑀬𑀺𑀓𑀁 𑀉𑀬𑁆𑀬𑁄𑀚𑁂𑀬𑁆𑀬. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀸𑀯 𑀲𑀦𑁆𑀢𑀺𑀝𑁆𑀞𑀦𑀸𑀤𑀻𑀲𑀼 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀉𑀬𑁆𑀬𑁄𑀚𑁂𑀦𑁆𑀢𑀺𑀬𑀸 𑀧𑀦 𑀉𑀬𑁆𑀬𑁄𑀚𑀦𑁂 𑀘 𑀳𑀢𑁆𑀣𑀧𑀸𑀲𑀯𑀺𑀚𑀳𑀦𑁂 𑀘 𑀤𑀼𑀓𑁆𑀓𑀝𑀁, 𑀯𑀺𑀚𑀳𑀺𑀢𑁂 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀏𑀯𑀁 𑀲𑀦𑁆𑀢𑀺𑀝𑁆𑀞𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀁 𑀧𑀼𑀭𑀺𑀫𑀢𑁆𑀢𑀬𑀲𑀤𑀺𑀲𑀫𑁂𑀯. 𑀅𑀦𑀸𑀧𑀢𑁆𑀢𑀺𑀬𑀁 𑀧𑀦 ‘‘𑀦 𑀅𑀦𑀸𑀘𑀸𑀭𑀁 𑀆𑀘𑀭𑀺𑀢𑀼𑀓𑀸𑀫𑀸, 𑀲𑀢𑀺 𑀓𑀭𑀡𑀻𑀬𑁂 𑀤𑀼𑀢𑀺𑀬𑀺𑀓𑀁 𑀪𑀺𑀓𑁆𑀔𑀼𑀦𑀺𑀁 𑀉𑀬𑁆𑀬𑁄𑀚𑁂𑀢𑀻’’𑀢𑀺 (𑀧𑀸𑀘𑀺. 𑁮𑁫𑁨) 𑀏𑀢𑁆𑀢𑀓𑀁 𑀅𑀥𑀺𑀓𑀦𑁆𑀢𑀺.

𑀤𑀼𑀢𑀺𑀬𑀺𑀓𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀦𑀸𑀧𑀼𑀘𑁆𑀙𑀸𑀧𑀓𑁆𑀓𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀧𑀼𑀭𑁂𑀪𑀢𑁆𑀢𑀦𑁆𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀁 𑀉𑀧𑀸𑀤𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀁. 𑀆𑀲𑀦𑁂𑀢𑀺 𑀧𑀮𑁆𑀮𑀗𑁆𑀓𑀲𑁆𑀲𑁄𑀓𑀸𑀲𑀪𑀽𑀢𑁂. 𑀲𑀸𑀫𑀺𑀓𑁂 𑀅𑀦𑀸𑀧𑀼𑀘𑁆𑀙𑀸𑀢𑀺 𑀢𑀲𑁆𑀫𑀺𑀁 𑀓𑀼𑀮𑁂 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀼𑀁 𑀫𑀦𑀼𑀲𑁆𑀲𑀁 𑀅𑀦𑀸𑀧𑀼𑀘𑁆𑀙𑀸. 𑀧𑀓𑁆𑀓𑀫𑁂𑀬𑁆𑀬𑀸𑀢𑀺 𑀏𑀢𑁆𑀣 𑀙𑀦𑁆𑀦𑀲𑁆𑀲 𑀅𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑁄𑀯𑀲𑁆𑀲𑀓𑀁 𑀅𑀚𑁆𑀛𑁄𑀓𑀸𑀲𑁂 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀧𑀞𑀫𑀧𑀸𑀤𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀧𑀮𑁆𑀮𑀗𑁆𑀓𑀲𑁆𑀲 𑀅𑀦𑁄𑀓𑀸𑀲𑁂 𑀤𑀼𑀓𑁆𑀓𑀝𑀁, 𑀢𑀣𑀸 𑀆𑀧𑀼𑀘𑁆𑀙𑀺𑀢𑁂 𑀅𑀦𑀸𑀧𑀼𑀘𑁆𑀙𑀺𑀢𑀲𑀜𑁆𑀜𑀸𑀬 𑀘𑁂𑀯 𑀯𑁂𑀫𑀢𑀺𑀓𑀸𑀬 𑀘. 𑀆𑀧𑀼𑀘𑁆𑀙𑀺𑀢𑀲𑀜𑁆𑀜𑀸𑀬 𑀧𑀦, 𑀅𑀲𑀁𑀳𑀸𑀭𑀺𑀫𑁂, 𑀕𑀺𑀮𑀸𑀦𑀸𑀬, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀧𑀼𑀭𑁂𑀪𑀢𑁆𑀢𑀢𑀸, 𑀅𑀦𑁆𑀢𑀭𑀖𑀭𑁂 𑀦𑀺𑀲𑀚𑁆𑀚𑀸, 𑀆𑀲𑀦𑀲𑁆𑀲 𑀧𑀮𑁆𑀮𑀗𑁆𑀓𑁄𑀓𑀸𑀲𑀢𑀸, 𑀅𑀜𑁆𑀜𑀢𑁆𑀭 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀅𑀦𑀸𑀧𑀼𑀘𑁆𑀙𑀦𑀁, 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀫𑁄𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑀣𑀺𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺.

𑀅𑀦𑀸𑀧𑀼𑀘𑁆𑀙𑀸𑀧𑀓𑁆𑀓𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀦𑀸𑀧𑀼𑀘𑁆𑀙𑀸𑀅𑀪𑀺𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀧𑀘𑁆𑀙𑀸𑀪𑀢𑁆𑀢𑀦𑁆𑀢𑀺 𑀫𑀚𑁆𑀛𑀦𑁆𑀳𑀺𑀓𑁂 𑀯𑀻𑀢𑀺𑀯𑀢𑁆𑀢𑁂 𑀬𑀸𑀯 𑀲𑀽𑀭𑀺𑀬𑀲𑁆𑀲 𑀅𑀢𑁆𑀣𑀗𑁆𑀕𑀫𑀸. 𑀅𑀪𑀺𑀦𑀺𑀲𑀻𑀤𑁂𑀬𑁆𑀬 𑀯𑀸𑀢𑀺 𑀆𑀤𑀺𑀫𑁆𑀳𑀺 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀏𑀓𑀸 𑀆𑀧𑀢𑁆𑀢𑀺, 𑀅𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸𑀯 𑀕𑀘𑁆𑀙𑀦𑁆𑀢𑀺𑀬𑀸𑀧𑀺 𑀏𑀓𑀸, 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺𑀬𑀸 𑀤𑁆𑀯𑁂.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀆𑀲𑀦𑁂 𑀅𑀪𑀺𑀦𑀺𑀲𑀻𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀁 𑀧𑀜𑁆𑀘𑀫𑀲𑀤𑀺𑀲𑀫𑁂𑀯. 𑀬𑀣𑀸 𑀧𑀦 𑀢𑀢𑁆𑀣 𑀅𑀲𑀁𑀳𑀸𑀭𑀺𑀫𑁂, 𑀏𑀯𑀫𑀺𑀥 𑀥𑀼𑀯𑀧𑀜𑁆𑀜𑀢𑁆𑀢𑁂 𑀅𑀦𑀸𑀧𑀢𑁆𑀢𑀻𑀢𑀺.

𑀅𑀦𑀸𑀧𑀼𑀘𑁆𑀙𑀸𑀅𑀪𑀺𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀦𑀸𑀧𑀼𑀘𑁆𑀙𑀸𑀲𑀦𑁆𑀣𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀯𑀺𑀓𑀸𑀮𑁂𑀢𑀺 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂. 𑀲𑁂𑀬𑁆𑀬𑀦𑁆𑀢𑀺 𑀅𑀦𑁆𑀢𑀫𑀲𑁄 𑀧𑀡𑁆𑀡𑀲𑀦𑁆𑀣𑀸𑀭𑀫𑁆𑀧𑀺, 𑀲𑁂𑀲𑀁 𑀙𑀝𑁆𑀞𑀲𑀤𑀺𑀲𑀫𑁂𑀯.

𑀇𑀤𑀁 𑀧𑀦 𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀯𑀺𑀓𑀸𑀮𑁂 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀸𑀫𑀺𑀓𑁂 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀲𑁂𑀬𑁆𑀬𑀁 𑀲𑀦𑁆𑀣𑀭𑀺𑀢𑁆𑀯𑀸 𑀅𑀪𑀺𑀦𑀺𑀲𑀻𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀦𑀸𑀧𑀢𑁆𑀢𑀺𑀬𑀜𑁆𑀘𑁂𑀢𑁆𑀣 𑀥𑀼𑀯𑀧𑀜𑁆𑀜𑀢𑁆𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺.

𑀅𑀦𑀸𑀧𑀼𑀘𑁆𑀙𑀸𑀲𑀦𑁆𑀣𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀭𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀤𑀼𑀕𑁆𑀕𑀳𑀺𑀢𑁂𑀦 𑀤𑀽𑀧𑀥𑀸𑀭𑀺𑀢𑁂𑀦𑀸𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀢𑁄 𑀅𑀜𑁆𑀜𑀣𑀸 𑀕𑀳𑀺𑀢𑁂𑀦 𑀘 𑀉𑀧𑀥𑀸𑀭𑀺𑀢𑁂𑀦 𑀘. 𑀧𑀭𑀦𑁆𑀢𑀺 ‘‘𑀅𑀳𑀁 𑀓𑀺𑀭𑀬𑁆𑀬𑁂 𑀅𑀬𑁆𑀬𑀁 𑀦 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀸𑀫𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁮𑁬𑁯) 𑀦𑀬𑁂𑀦 𑀉𑀧𑀲𑀫𑁆𑀧𑀦𑁆𑀦𑀁 𑀉𑀚𑁆𑀛𑀸𑀧𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀏𑀯𑀁 𑀧𑀭𑀁 𑀉𑀚𑁆𑀛𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬 𑀢𑀺𑀓𑀤𑀼𑀓𑁆𑀓𑀝𑀁, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀁𑀬𑁂𑀯 𑀅𑀦𑀸𑀧𑀢𑁆𑀢𑀺. 𑀤𑀼𑀕𑁆𑀕𑀳𑀺𑀢𑀢𑀸, 𑀉𑀚𑁆𑀛𑀸𑀧𑀦𑀁, 𑀬𑀁 𑀉𑀚𑁆𑀛𑀸𑀧𑁂𑀢𑀺, 𑀢𑀲𑁆𑀲𑀸 𑀉𑀧𑀲𑀫𑁆𑀧𑀦𑁆𑀦𑀢𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀧𑀭𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀭𑀅𑀪𑀺𑀲𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀅𑀪𑀺𑀲𑀧𑁂𑀬𑁆𑀬𑀸𑀢𑀺 𑀲𑀧𑀣𑀁 𑀓𑀭𑁂𑀬𑁆𑀬. 𑀢𑀢𑁆𑀣 ‘‘𑀦𑀺𑀭𑀬𑁂 𑀉𑀧𑀧𑀚𑁆𑀚𑀸𑀫𑀺, 𑀦𑀺𑀭𑀬𑁂 𑀉𑀧𑀧𑀚𑁆𑀚𑀢𑀽’’𑀢𑀺𑀏𑀯𑀫𑀸𑀤𑀻𑀦𑀺 𑀯𑀤𑀫𑀸𑀦𑀸 𑀦𑀺𑀭𑀬𑁂𑀦 𑀅𑀪𑀺𑀲𑀧𑀢𑀺 𑀦𑀸𑀫, 𑀅𑀓𑁆𑀓𑁄𑀲𑀢𑀻𑀢𑀺 𑀅𑀢𑁆𑀣𑁄. ‘‘𑀕𑀺𑀳𑀺𑀦𑀻 𑀳𑁄𑀫𑀺, 𑀕𑀺𑀳𑀺𑀦𑀻 𑀳𑁄𑀢𑀽’’𑀢𑀺𑀏𑀯𑀫𑀸𑀤𑀻𑀦𑀺 𑀯𑀤𑀫𑀸𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦. 𑀢𑀲𑁆𑀲𑀸 𑀯𑀸𑀘𑀸𑀬 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀘𑀡𑁆𑀟𑀓𑀸𑀴𑀺𑀁 𑀆𑀭𑀩𑁆𑀪 𑀏𑀯𑀁 𑀅𑀪𑀺𑀲𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬 𑀢𑀺𑀓𑀤𑀼𑀓𑁆𑀓𑀝𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑁂𑀦 𑀯𑀸 𑀫𑀦𑀼𑀲𑁆𑀲𑀤𑁄𑀪𑀕𑁆𑀕𑁂𑀦 𑀯𑀸 𑀅𑀪𑀺𑀲𑀧𑀦𑁂 𑀤𑀼𑀓𑁆𑀓𑀝𑀁. 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀦𑀁 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀦𑀺𑀭𑀬𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀅𑀪𑀺𑀲𑀧𑀦𑀁, 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀅𑀢𑁆𑀣𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀸𑀤𑀻𑀦𑀁 𑀅𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀝𑁆𑀞𑀫𑀲𑀤𑀺𑀲𑀸𑀦𑁂𑀯𑀸𑀢𑀺.

𑀧𑀭𑀅𑀪𑀺𑀲𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑁄𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀯𑀥𑀺𑀢𑁆𑀯𑀸𑀢𑀺 𑀳𑀢𑁆𑀣𑀸𑀤𑀻𑀳𑀺 𑀧𑀳𑀭𑀺𑀢𑁆𑀯𑀸, 𑀉𑀪𑀬𑀁 𑀓𑀭𑁄𑀦𑁆𑀢𑀺𑀬𑀸𑀯 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀘𑀡𑁆𑀟𑀓𑀸𑀴𑀺𑀁 𑀆𑀭𑀩𑁆𑀪 𑀅𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸 𑀭𑁄𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀓𑁂𑀯𑀮𑀁 𑀯𑀥𑀦𑁆𑀢𑀺𑀬𑀸 𑀯𑀸 𑀭𑁄𑀤𑀦𑁆𑀢𑀺𑀬𑀸 𑀯𑀸 𑀤𑀼𑀓𑁆𑀓𑀝𑀫𑁂𑀯. 𑀜𑀸𑀢𑀺𑀭𑁄𑀕𑀪𑁄𑀕𑀩𑁆𑀬𑀲𑀦𑁂𑀳𑀺 𑀨𑀼𑀝𑁆𑀞𑀸𑀬 𑀓𑁂𑀯𑀮𑀁 𑀭𑁄𑀤𑀦𑁆𑀢𑀺𑀬𑀸 𑀏𑀯 𑀦 𑀯𑀥𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀢𑁆𑀢𑀸𑀦𑀁 𑀯𑀥𑀦𑀜𑁆𑀘𑁂𑀯, 𑀭𑁄𑀤𑀦𑀜𑁆𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀫𑀦𑀼𑀪𑀸𑀲𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀓𑀺𑀭𑀺𑀬𑀫𑁂𑀯𑀸𑀢𑀺.

𑀭𑁄𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀢𑁆𑀢𑀦𑁆𑀥𑀓𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.