𑁬. 𑀧𑀞𑀫𑀲𑀗𑁆𑀖𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀅𑀜𑁆𑀜𑀤𑀢𑁆𑀣𑀺𑀓𑁂𑀦𑀸𑀢𑀺 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀤𑀺𑀦𑁆𑀦𑁂𑀦. 𑀅𑀜𑁆𑀜𑀼𑀤𑁆𑀤𑀺𑀲𑀺𑀓𑁂𑀦𑀸𑀢𑀺 𑀅𑀜𑁆𑀜𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀺𑀦𑁆𑀦𑁂𑀦. 𑀲𑀗𑁆𑀖𑀺𑀓𑁂𑀦𑀸𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁂𑀦. 𑀧𑀭𑀺𑀓𑁆𑀔𑀸𑀭𑁂𑀦𑀸𑀢𑀺 𑀓𑀧𑁆𑀧𑀺𑀬𑀪𑀡𑁆𑀟𑁂𑀦. 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬𑀸𑀢𑀺 ‘‘𑀇𑀤𑀁 𑀦𑀸𑀫 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀣𑀸’’𑀢𑀺 𑀬𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀦𑀺𑀬𑀫𑁂𑀢𑁆𑀯𑀸 𑀬𑁄 𑀧𑀭𑀺𑀓𑁆𑀔𑀸𑀭𑁄 𑀤𑀺𑀦𑁆𑀦𑁄, 𑀢𑀢𑁄 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑀸𑀧𑁂𑀬𑁆𑀬, 𑀢𑀲𑁆𑀲𑀸 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀢𑀸𑀤𑀺𑀲𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀅𑀜𑁆𑀜𑀁 𑀘𑁂𑀢𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀦𑀜𑁆𑀜𑀤𑀢𑁆𑀣𑀺𑀓𑁂 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. 𑀢𑀲𑁆𑀫𑀺𑀁 𑀧𑀦 𑀅𑀦𑀜𑁆𑀜𑀤𑀢𑁆𑀣𑀺𑀓𑀲𑀜𑁆𑀜𑀸𑀬, 𑀲𑁂𑀲𑀓𑀁 𑀉𑀧𑀦𑁂𑀦𑁆𑀢𑀺𑀬𑀸, ‘‘𑀢𑀼𑀫𑁆𑀳𑁂𑀳𑀺 𑀏𑀢𑀤𑀢𑁆𑀣𑀸𑀬 𑀤𑀺𑀦𑁆𑀦𑁄, 𑀅𑀫𑁆𑀳𑀸𑀓𑀜𑁆𑀘 𑀇𑀫𑀺𑀦𑀸 𑀦𑀸𑀫 𑀅𑀢𑁆𑀣𑁄’’𑀢𑀺 𑀲𑀸𑀫𑀺𑀓𑁂 𑀅𑀧𑀮𑁄𑀓𑁂𑀢𑁆𑀯𑀸 𑀉𑀧𑀦𑁂𑀦𑁆𑀢𑀺𑀬𑀸, 𑀬𑀤𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀺𑀳𑀸𑀭𑀫𑁆𑀧𑀺 𑀙𑀟𑁆𑀟𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀉𑀧𑀦𑁂𑀦𑁆𑀢𑀻𑀦𑀁, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀘𑀢𑀼𑀢𑁆𑀣𑀲𑀤𑀺𑀲𑀫𑁂𑀯𑀸𑀢𑀺.

𑀧𑀞𑀫𑀲𑀗𑁆𑀖𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.