𑀧𑀸𑀭𑀸𑀚𑀺𑀓𑀓𑀡𑁆𑀟𑁄

𑀪𑀺𑀓𑁆𑀔𑀼𑀦𑀻𑀦𑀁 𑀳𑀺𑀢𑀢𑁆𑀣𑀸𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀧𑀓𑀸𑀲𑀬𑀺;

𑀬𑀁 𑀦𑀸𑀣𑁄, 𑀢𑀲𑁆𑀲 𑀤𑀸𑀦𑁂𑀲𑁄, 𑀲𑀫𑁆𑀧𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁄.

𑀲𑀸𑀥𑀸𑀭𑀡𑀧𑀸𑀭𑀸𑀚𑀺𑀓𑀁

𑁧…𑀧𑁂…𑁪. 𑀫𑁂𑀣𑀼𑀦𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑁆𑀣 𑀲𑀼𑀡𑀸𑀢𑀼 𑀫𑁂𑀢𑀺𑀆𑀤𑀻𑀦𑀁 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺, 𑀪𑀦𑁆𑀢𑁂, 𑀅𑀬𑁆𑀬𑁂𑀢𑀺𑀆𑀤𑀺𑀯𑀲𑁂𑀦 𑀢𑀲𑁆𑀫𑀺𑀜𑁆𑀘 𑀇𑀥 𑀘 𑀅𑀪𑀺𑀮𑀸𑀧𑀫𑀢𑁆𑀢𑀫𑁂𑀯 𑀮𑀺𑀗𑁆𑀕𑀪𑁂𑀤𑀫𑀢𑁆𑀢𑀜𑁆𑀘 𑀯𑀺𑀲𑁂𑀲𑁄. 𑀬𑀲𑁆𑀫𑀸 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀪𑀺𑀓𑁆𑀔𑀼𑀦𑀻𑀦𑀁 ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑀸 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸’’𑀢𑀺 𑀅𑀯𑀢𑁆𑀯𑀸 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀙𑀦𑁆𑀤𑀲𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀙𑀦𑁆𑀤𑀲𑁄𑀢𑀺 𑀫𑁂𑀣𑀼𑀦𑀭𑀸𑀕𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀦 𑀙𑀦𑁆𑀤𑁂𑀦 𑀘𑁂𑀯 𑀭𑀼𑀘𑀺𑀬𑀸 𑀘. 𑀙𑀦𑁆𑀤𑁂 𑀧𑀦 𑀅𑀲𑀢𑀺 𑀩𑀮𑀓𑁆𑀓𑀸𑀭𑁂𑀦 𑀧𑀥𑀁𑀲𑀺𑀢𑀸𑀬 𑀅𑀦𑀸𑀧𑀢𑁆𑀢𑀺, 𑀢𑀲𑁆𑀫𑀸 𑀬𑀸 𑀧𑀭𑀺𑀧𑀼𑀡𑁆𑀡𑀽𑀧𑀲𑀫𑁆𑀧𑀤𑀸 𑀪𑀺𑀓𑁆𑀔𑀼𑀦𑀻 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀚𑀸𑀢𑀻𑀲𑀼 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀧𑀡𑁆𑀟𑀓𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀚𑀻𑀯𑀲𑁆𑀲 𑀯𑀸 𑀦𑀺𑀚𑁆𑀚𑀻𑀯𑀲𑁆𑀲 𑀯𑀸 𑀲𑀦𑁆𑀣𑀢𑀲𑁆𑀲 𑀯𑀸 𑀅𑀲𑀦𑁆𑀣𑀢𑀲𑁆𑀲 𑀯𑀸 𑀅𑀓𑁆𑀔𑀸𑀬𑀺𑀢𑀲𑁆𑀲 𑀯𑀸 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀲𑁆𑀲 𑀯𑀸 𑀅𑀗𑁆𑀕𑀚𑀸𑀢𑀲𑁆𑀲 𑀅𑀢𑁆𑀢𑀦𑁄 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑀼𑀔𑁂𑀲𑀼 𑀢𑀻𑀲𑀼 𑀬𑀢𑁆𑀣𑀓𑀢𑁆𑀣𑀘𑀺 𑀲𑀦𑁆𑀣𑀢𑁂 𑀯𑀸 𑀅𑀲𑀦𑁆𑀣𑀢𑁂 𑀯𑀸 𑀧𑀓𑀢𑀺𑀯𑀸𑀢𑁂𑀦 𑀅𑀲𑀁𑀨𑀼𑀝𑁆𑀞𑁂 𑀅𑀮𑁆𑀮𑁄𑀓𑀸𑀲𑁂 𑀅𑀦𑁆𑀢𑀫𑀲𑁄 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀤𑁂𑀲𑀁 𑀙𑀦𑁆𑀤𑀲𑁄 𑀧𑀯𑁂𑀲𑁂𑀢𑀺, 𑀧𑀭𑁂𑀦 𑀯𑀸 𑀧𑀯𑁂𑀲𑀺𑀬𑀫𑀸𑀦𑀸 𑀧𑀯𑁂𑀲𑀦𑀧𑀯𑀺𑀝𑁆𑀞𑀝𑁆𑀞𑀺𑀢𑀉𑀤𑁆𑀥𑀭𑀡𑁂𑀲𑀼 𑀬𑀁𑀓𑀺𑀜𑁆𑀘𑀺 𑀲𑀸𑀤𑀺𑀬𑀢𑀺, 𑀅𑀬𑀁 𑀧𑀸𑀭𑀸𑀚𑀺𑀓𑀸 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀇𑀢𑁄 𑀧𑀭𑁂𑀲𑀼 𑀘 𑀲𑀸𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑁂𑀲𑀼 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀲𑀸𑀥𑀸𑀭𑀡𑀧𑀸𑀭𑀸𑀚𑀺𑀓𑀁

𑁫. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀲𑀸𑀥𑀸𑀭𑀡𑁂𑀲𑀼 𑀧𑀦 𑀘𑀢𑀼𑀦𑁆𑀦𑀁 𑀢𑀸𑀯 𑀧𑀸𑀭𑀸𑀚𑀺𑀓𑀸𑀦𑀁 𑀧𑀞𑀫𑁂 𑀅𑀯𑀲𑁆𑀲𑀼𑀢𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀢𑀺𑀦𑁆𑀢𑀸, 𑀓𑀺𑀮𑀺𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀯𑀺𑀜𑁆𑀜𑀼𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲 𑀧𑀼𑀭𑀺𑀲𑀲𑀗𑁆𑀔𑀸𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀅𑀥𑀓𑁆𑀔𑀓𑀦𑁆𑀢𑀺 𑀅𑀢𑁆𑀢𑀦𑁄 𑀅𑀓𑁆𑀔𑀓𑀸𑀦𑀁 𑀅𑀥𑁄. 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀉𑀧𑀭𑀺, 𑀏𑀢𑁆𑀣 𑀘 𑀉𑀩𑁆𑀪𑀓𑀧𑁆𑀧𑀭𑀫𑁆𑀧𑀺 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑁂𑀦𑁂𑀯 𑀲𑀗𑁆𑀕𑀳𑀺𑀢𑀁. 𑀆𑀫𑀲𑀦𑀦𑁆𑀢𑀺 𑀆𑀫𑀚𑁆𑀚𑀦𑀁 𑀨𑀼𑀝𑁆𑀞𑁄𑀓𑀸𑀲𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑀗𑁆𑀖𑀝𑁆𑀝𑀦𑀁. 𑀧𑀭𑀸𑀫𑀲𑀦𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀡𑀁. 𑀕𑀳𑀡𑀦𑁆𑀢𑀺 𑀕𑀳𑀺𑀢𑀫𑀢𑁆𑀢𑀁. 𑀙𑀼𑀧𑀦𑀦𑁆𑀢𑀺 𑀅𑀲𑀗𑁆𑀖𑀝𑁆𑀝𑁂𑀢𑁆𑀯𑀸 𑀨𑀼𑀝𑁆𑀞𑀫𑀢𑁆𑀢𑀁. 𑀧𑀝𑀺𑀧𑀻𑀴𑀦𑀦𑁆𑀢𑀺 𑀅𑀗𑁆𑀕𑁂 𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀻𑀴𑀦𑀁. 𑀲𑀸𑀤𑀺𑀬𑁂𑀬𑁆𑀬𑀸𑀢𑀺 𑀬𑀸 𑀪𑀺𑀓𑁆𑀔𑀼𑀦𑀻 𑀅𑀢𑁆𑀢𑀦𑁄 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀓𑀸𑀬𑁂 𑀧𑀼𑀭𑀺𑀲𑀲𑁆𑀲 𑀏𑀢𑀁 𑀆𑀫𑀲𑀦𑀸𑀤𑀺𑀁 𑀲𑀸𑀤𑀺𑀬𑀢𑀺, 𑀲𑀬𑀁 𑀯𑀸 𑀧𑀦 𑀢𑁂𑀦 𑀓𑀸𑀬𑁂𑀦 𑀧𑀼𑀭𑀺𑀲𑀲𑁆𑀲 𑀬𑀁𑀓𑀺𑀜𑁆𑀘𑀺 𑀓𑀸𑀬𑀧𑁆𑀧𑀤𑁂𑀲𑀁 𑀲𑀸𑀤𑀬𑀫𑀸𑀦𑀸 𑀙𑀼𑀧𑀢𑀺, 𑀅𑀬𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸 𑀦𑀸𑀫 𑀧𑀸𑀭𑀸𑀚𑀺𑀓𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

‘‘𑀦𑀺𑀤𑀸𑀦𑀁 𑀧𑀼𑀕𑁆𑀕𑀮𑀁 𑀯𑀢𑁆𑀣𑀼’’𑀦𑁆𑀢𑀺𑀆𑀤𑀺𑀓𑁂 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀢𑁂𑀦 𑀯𑀺𑀢𑁆𑀣𑀸𑀭𑀯𑀺𑀦𑀺𑀘𑁆𑀙𑀬𑁂 𑀬𑀲𑁆𑀫𑀸 𑀲𑀩𑁆𑀩𑀸𑀦𑁂𑀯 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀬𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀲𑀦𑁆𑀢𑀺𑀁 𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀯𑀢𑁆𑀯𑀸 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀻𑀢𑀺 𑀯𑀸 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀻𑀢𑀺 𑀯𑀸 𑀦 𑀯𑀓𑁆𑀔𑀸𑀫, 𑀆𑀡𑀢𑁆𑀢𑀺𑀬𑀁 𑀬𑀢𑁆𑀣 𑀆𑀡𑀢𑁆𑀢𑀺 𑀦𑀢𑁆𑀣𑀺, 𑀢𑀢𑁆𑀣 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀬𑀢𑁆𑀣 𑀅𑀢𑁆𑀣𑀺, 𑀢𑀢𑁆𑀣𑁂𑀯 𑀯𑀓𑁆𑀔𑀸𑀫, 𑀯𑀺𑀧𑀢𑁆𑀢𑀺𑀯𑀺𑀘𑀸𑀭𑀡𑀸 𑀯𑀼𑀢𑁆𑀢𑀸𑀬𑁂𑀯.

𑀅𑀯𑀲𑁂𑀲𑀁 𑀧𑀦 𑀲𑀩𑁆𑀩𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀬𑀺𑀤𑀁 𑀯𑀼𑀘𑁆𑀘𑀢𑀺, 𑀇𑀤𑀁 𑀢𑀸𑀯 𑀲𑀺𑀓𑁆𑀔𑀸𑀧𑀤𑀁 𑀲𑀸𑀯𑀢𑁆𑀣𑀺𑀬𑀁 𑀲𑀼𑀦𑁆𑀤𑀭𑀻𑀦𑀦𑁆𑀤𑀁 𑀆𑀭𑀩𑁆𑀪 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀏𑀓𑀢𑁄𑀅𑀯𑀲𑁆𑀲𑀼𑀢𑁂 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀓𑀸𑀬𑁂𑀦 𑀧𑀼𑀭𑀺𑀲𑀲𑁆𑀲 𑀓𑀸𑀬𑀁, 𑀉𑀪𑀢𑁄𑀅𑀯𑀲𑁆𑀲𑀼𑀢𑁂𑀧𑀺 𑀓𑀸𑀬𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀅𑀯𑀲𑁂𑀲𑀓𑀸𑀬𑁂𑀦 𑀯𑀸 𑀢𑀲𑁆𑀲 𑀓𑀸𑀬𑀁 𑀆𑀫𑀲𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀬𑀓𑁆𑀔𑀧𑁂𑀢𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸𑀦𑀁 𑀉𑀪𑀢𑁄𑀅𑀯𑀲𑁆𑀲𑀼𑀢𑁂 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀓𑀸𑀬𑁂𑀦 𑀓𑀸𑀬𑀁 𑀆𑀫𑀲𑀦𑁆𑀢𑀺𑀬𑀸𑀧𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀲𑀘𑁂 𑀧𑀦 𑀧𑀼𑀭𑀺𑀲𑀲𑁆𑀲 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄 𑀦𑀢𑁆𑀣𑀺, 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂𑀧𑀺 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀅𑀯𑀲𑁂𑀲𑁂 𑀧𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀤𑀺𑀪𑁂𑀤𑁂, 𑀫𑁂𑀣𑀼𑀦𑀭𑀸𑀕𑀕𑁂𑀳𑀲𑀺𑀢𑀧𑁂𑀫𑁂𑀲𑀼 𑀘 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁. 𑀅𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀺𑀬𑀸, 𑀅𑀲𑀸𑀤𑀺𑀬𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀗𑁆𑀕𑀸𑀦𑀺 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀘 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂 𑀓𑀸𑀬𑀲𑀁𑀲𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀕𑀡𑀲𑁆𑀲𑀸𑀢𑀺 𑀅𑀜𑁆𑀜𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁. 𑀞𑀺𑀢𑀸𑀢𑀺 𑀲𑀮𑀺𑀗𑁆𑀕𑁂 𑀞𑀺𑀢𑀸. 𑀘𑀼𑀢𑀸𑀢𑀺 𑀓𑀸𑀮𑀗𑁆𑀓𑀢𑀸. 𑀦𑀸𑀲𑀺𑀢𑀸𑀢𑀺 𑀮𑀺𑀗𑁆𑀕𑀦𑀸𑀲𑀦𑀸𑀬 𑀲𑀬𑀁 𑀯𑀸 𑀦𑀝𑁆𑀞𑀸, 𑀅𑀜𑁆𑀜𑁂𑀳𑀺 𑀯𑀸 𑀦𑀸𑀲𑀺𑀢𑀸. 𑀅𑀯𑀲𑁆𑀲𑀝𑀸𑀢𑀺 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀦𑁆𑀢𑀸. 𑀧𑀼𑀩𑁆𑀩𑁂𑀯𑀸𑀳𑀁 𑀅𑀬𑁆𑀬𑁂 𑀅𑀜𑁆𑀜𑀸𑀲𑀺𑀦𑁆𑀢𑀺 𑀇𑀤𑀁 𑀢𑀲𑁆𑀲𑀸 𑀯𑀘𑀦𑀓𑀸𑀮𑀤𑀲𑁆𑀲𑀦𑀁, 𑀲𑀮𑀺𑀗𑁆𑀕𑁂 𑀞𑀺𑀢𑀸𑀬 𑀧𑀦 𑀧𑀸𑀭𑀸𑀚𑀺𑀓𑀪𑀸𑀯𑀁 𑀜𑀢𑁆𑀯𑀸 ‘‘𑀦 𑀤𑀸𑀦𑀺 𑀦𑀁 𑀓𑀲𑁆𑀲𑀘𑀺 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀬𑁂𑀯 𑀅𑀬𑀁 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀦𑀸𑀫 𑀧𑀸𑀭𑀸𑀚𑀺𑀓𑀸 𑀳𑁄𑀢𑀻𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀦𑁂𑀯𑀅𑀢𑁆𑀢𑀦𑀸𑀧𑀝𑀺𑀘𑁄𑀤𑀦𑀸 𑀦𑀕𑀡𑀲𑁆𑀲 𑀆𑀭𑁄𑀘𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣 𑀲𑀧𑁆𑀧𑀸𑀡𑀓𑀯𑀕𑁆𑀕𑀫𑁆𑀳𑀺 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀧𑁆𑀧𑀝𑀺𑀘𑁆𑀙𑀸𑀤𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭 𑀳𑀺 𑀧𑀸𑀘𑀺𑀢𑁆𑀢𑀺𑀬𑀁, 𑀇𑀥 𑀧𑀸𑀭𑀸𑀚𑀺𑀓𑀦𑁆𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀉𑀓𑁆𑀔𑀺𑀢𑁆𑀢𑀦𑁆𑀢𑀺 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑀸𑀤𑀻𑀲𑀼 𑀉𑀓𑁆𑀔𑀺𑀢𑁆𑀢𑀁. 𑀥𑀫𑁆𑀫𑁂𑀦𑀸𑀢𑀺 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸. 𑀯𑀺𑀦𑀬𑁂𑀦𑀸𑀢𑀺 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸. 𑀲𑀢𑁆𑀣𑀼𑀲𑀸𑀲𑀦𑁂𑀦𑀸𑀢𑀺 𑀇𑀥𑀸𑀧𑀺 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀓𑀭𑀡𑀫𑁂𑀯 𑀲𑀢𑁆𑀣𑀼𑀲𑀸𑀲𑀦𑀁 𑀦𑀸𑀫. 𑀅𑀦𑀸𑀤𑀭𑀦𑁆𑀢𑀺 𑀬𑁂𑀦 𑀲𑀗𑁆𑀖𑁂𑀦 𑀉𑀓𑁆𑀔𑁂𑀧𑀦𑀺𑀬𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀫𑀺𑀁 𑀯𑀸, 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀕𑀡𑁂 𑀯𑀸 𑀏𑀓𑀧𑀼𑀕𑁆𑀕𑀮𑁂 𑀯𑀸 𑀢𑀲𑁆𑀫𑀺𑀁 𑀯𑀸 𑀓𑀫𑁆𑀫𑁂 𑀆𑀤𑀭𑀯𑀺𑀭𑀳𑀺𑀢𑀁, 𑀲𑀫𑁆𑀫𑀸𑀯𑀢𑁆𑀢𑀦𑀸𑀬 𑀅𑀯𑀢𑁆𑀢𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀓𑀸𑀭𑀦𑁆𑀢𑀺 𑀧𑀝𑀺𑀓𑀸𑀭𑀭𑀳𑀺𑀢𑀁, 𑀅𑀦𑁄𑀲𑀸𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀢𑀲𑀳𑀸𑀬𑀦𑁆𑀢𑀺 𑀏𑀓𑀓𑀫𑁆𑀫𑀸𑀤𑀺𑀓𑁂 𑀲𑀁𑀯𑀸𑀲𑁂 𑀲𑀳 𑀅𑀬𑀦𑀪𑀸𑀯𑁂𑀦 𑀲𑀫𑀸𑀦𑀲𑀁𑀯𑀸𑀲𑀓𑀸 𑀪𑀺𑀓𑁆𑀔𑀽 𑀲𑀳𑀸𑀬𑀸 𑀦𑀸𑀫, 𑀬𑀲𑁆𑀲 𑀧𑀦 𑀲𑁄 𑀲𑀁𑀯𑀸𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀢𑁆𑀣𑀺 𑀦 𑀢𑁂𑀦 𑀢𑁂 𑀲𑀳𑀸𑀬𑀸 𑀓𑀢𑀸 𑀳𑁄𑀦𑁆𑀢𑀺, 𑀇𑀢𑀺 𑀲𑁄 𑀅𑀓𑀢𑀲𑀳𑀸𑀬𑁄 𑀦𑀸𑀫, 𑀢𑀁 𑀅𑀓𑀢𑀲𑀳𑀸𑀬𑀁, 𑀲𑀫𑀸𑀦𑀲𑀁𑀯𑀸𑀲𑀓𑀪𑀸𑀯𑀁 𑀅𑀦𑀼𑀧𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀫𑀦𑀼𑀯𑀢𑁆𑀢𑁂𑀬𑁆𑀬𑀸𑀢𑀺 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀉𑀓𑁆𑀔𑀺𑀢𑁆𑀢𑀓𑀪𑀸𑀯𑁂𑀬𑁂𑀯 𑀞𑀺𑀢𑀁 𑀪𑀺𑀓𑁆𑀔𑀼𑀁 𑀬𑀸 𑀪𑀺𑀓𑁆𑀔𑀼𑀦𑀻 𑀬𑀁𑀤𑀺𑀝𑁆𑀞𑀺𑀓𑁄 𑀲𑁄 𑀳𑁄𑀢𑀺, 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀕𑀳𑀡𑀪𑀸𑀯𑁂𑀦 𑀅𑀦𑀼𑀯𑀢𑁆𑀢𑁂𑀬𑁆𑀬. 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑀺𑀲𑀼𑀁 𑀲𑀗𑁆𑀖𑀫𑀚𑁆𑀛𑁂 𑀘 𑀯𑀼𑀘𑁆𑀘𑀫𑀸𑀦𑀸 𑀢𑀁 𑀯𑀢𑁆𑀣𑀼𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀻 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀦𑀸𑀫 𑀧𑀸𑀭𑀸𑀚𑀺𑀓𑀸 𑀳𑁄𑀢𑀻𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑁆𑀯𑁂 𑀣𑀼𑀮𑁆𑀮𑀘𑁆𑀘𑀬𑀸, ‘‘𑀬𑀲𑁆𑀲𑀸 𑀦𑀓𑁆𑀔𑀫𑀢𑀺, 𑀲𑀸 𑀪𑀸𑀲𑁂𑀬𑁆𑀬𑀸’’𑀢𑀺 𑀏𑀯𑀁 𑀬𑁆𑀬-𑀓𑀸𑀭𑀧𑁆𑀧𑀢𑁆𑀢𑀸𑀬 𑀢𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀧𑀸𑀭𑀸𑀚𑀺𑀓𑀁, 𑀅𑀥𑀫𑁆𑀫𑀓𑀫𑁆𑀫𑁂 𑀢𑀺𑀓𑀤𑀼𑀓𑁆𑀓𑀝𑀁, 𑀲𑁂𑀲𑀁 𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀯𑀢𑁆𑀣𑀼𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀅𑀯𑀲𑁆𑀲𑀼𑀢𑀸𑀢𑀺 𑀮𑁄𑀓𑀲𑁆𑀲𑀸𑀤𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀢𑀺𑀦𑁆𑀢𑀸. 𑀅𑀬𑀫𑁂𑀯 𑀳𑀺 𑀅𑀢𑁆𑀣𑁄 𑀲𑀻𑀳𑀴𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁬𑁭𑁫) 𑀧𑀦𑀲𑁆𑀲 𑀯𑀺𑀘𑀸𑀭𑀡𑀸 𑀓𑀢𑀸, 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀳𑀢𑁆𑀣𑀕𑁆𑀕𑀳𑀡𑀁 𑀯𑀸𑀢𑀺𑀆𑀤𑀻𑀲𑀼 𑀧𑀦 𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁂𑀦 𑀳𑀢𑁆𑀣𑁂 𑀕𑀳𑀡𑀁 𑀓𑀢𑀁, 𑀢𑀁 ‘‘𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀳𑀢𑁆𑀣𑀕𑁆𑀕𑀳𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀲𑁂𑀯 𑀦𑀬𑁄 𑀲𑀗𑁆𑀖𑀸𑀝𑀺𑀓𑀡𑁆𑀡𑀕𑁆𑀕𑀳𑀡𑁂𑀧𑀺. 𑀳𑀢𑁆𑀣𑀕𑁆𑀕𑀳𑀡𑀦𑁆𑀢𑀺 𑀏𑀢𑁆𑀣 𑀘 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀪𑀽𑀢𑀲𑁆𑀲 𑀅𑀗𑁆𑀕𑀲𑁆𑀲 𑀕𑀳𑀡𑀁 𑀳𑀢𑁆𑀣𑀕𑁆𑀕𑀳𑀡𑀁, 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀺𑀯𑀢𑁆𑀣𑀲𑁆𑀲 𑀯𑀸 𑀧𑀸𑀭𑀼𑀢𑀲𑁆𑀲 𑀯𑀸 𑀕𑀳𑀡𑀁 𑀲𑀗𑁆𑀖𑀸𑀝𑀺𑀓𑀡𑁆𑀡𑀕𑁆𑀕𑀳𑀡𑀁. 𑀲𑀦𑁆𑀢𑀺𑀝𑁆𑀞𑁂𑀬𑁆𑀬 𑀯𑀸𑀢𑀺𑀆𑀤𑀻𑀲𑀼 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀲𑁂𑀯𑀦𑀢𑁆𑀣𑀸𑀬 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀲𑀦𑁆𑀢𑀺𑀝𑁆𑀞𑁂𑀬𑁆𑀬 𑀯𑀸, 𑀢𑀢𑁆𑀣 𑀞𑀺𑀢𑀸 𑀲𑀮𑁆𑀮𑀧𑁂𑀬𑁆𑀬 𑀯𑀸, 𑀧𑀼𑀭𑀺𑀲𑁂𑀦 𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀞𑀸𑀦𑀁 𑀆𑀕𑀘𑁆𑀙𑀸’’𑀢𑀺 𑀯𑀼𑀢𑁆𑀢𑀸 𑀢𑀁 𑀲𑀗𑁆𑀓𑁂𑀢𑀁 𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲 𑀯𑀸 𑀧𑀼𑀭𑀺𑀲𑀲𑁆𑀲 𑀅𑀩𑁆𑀪𑀸𑀕𑀫𑀦𑀁 𑀲𑀸𑀤𑀺𑀬𑁂𑀬𑁆𑀬, 𑀬𑁂𑀦 𑀓𑁂𑀦𑀘𑀺 𑀯𑀸 𑀧𑀝𑀺𑀘𑁆𑀙𑀦𑁆𑀦𑀁 𑀑𑀓𑀸𑀲𑀁 𑀧𑀯𑀺𑀲𑁂𑀬𑁆𑀬, 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀢𑁆𑀯𑀸 𑀓𑀸𑀬𑀁 𑀉𑀧𑀲𑀁𑀳𑀭𑁂𑀬𑁆𑀬𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑀸𑀢𑀺 𑀬𑀣𑀸 𑀧𑀼𑀭𑀺𑀫𑀸𑀬𑁄, 𑀏𑀯𑀁 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀏𑀢𑀲𑁆𑀲 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀲𑁂𑀯𑀦𑀢𑁆𑀣𑀸𑀬 𑀏𑀢𑀸𑀦𑀺 𑀅𑀝𑁆𑀞 𑀯𑀢𑁆𑀣𑀽𑀦𑀺 𑀧𑀝𑀺𑀧𑀸𑀝𑀺𑀬𑀸 𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀸 𑀧𑀽𑀭𑁂𑀢𑁆𑀯𑀸 𑀅𑀝𑁆𑀞𑀯𑀢𑁆𑀣𑀼𑀓𑀸 𑀦𑀸𑀫 𑀧𑀸𑀭𑀸𑀚𑀺𑀓𑀸 𑀳𑁄𑀢𑀻𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀅𑀝𑁆𑀞𑀫𑀁 𑀯𑀢𑁆𑀣𑀼𑀁 𑀧𑀭𑀺𑀧𑀽𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀗𑁆𑀓𑁂𑀢𑀕𑀫𑀦𑁂 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁, 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑀁 𑀑𑀓𑁆𑀓𑀦𑁆𑀢𑀫𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀼𑀭𑀺𑀲𑀲𑁆𑀲 𑀅𑀩𑁆𑀪𑀸𑀕𑀫𑀦𑀲𑀸𑀤𑀬𑀫𑀸𑀦𑁂𑀧𑀺 𑀤𑀼𑀓𑁆𑀓𑀝𑀁. 𑀳𑀢𑁆𑀣𑀧𑀸𑀲𑁄𑀓𑁆𑀓𑀫𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀲𑁂𑀲𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀣𑀼𑀮𑁆𑀮𑀘𑁆𑀘𑀬𑀫𑁂𑀯, 𑀅𑀝𑁆𑀞𑀫𑁂 𑀧𑀭𑀺𑀧𑀼𑀡𑁆𑀡𑁂 𑀧𑀸𑀭𑀸𑀚𑀺𑀓𑀁. 𑀏𑀓𑁂𑀓𑀲𑁆𑀫𑀺𑀁 𑀧𑀦 𑀯𑀢𑁆𑀣𑀼𑀲𑁆𑀫𑀺𑀁 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀻𑀢𑀺𑀓𑁆𑀓𑀦𑁆𑀢𑁂 𑀢𑀸 𑀆𑀧𑀢𑁆𑀢𑀺𑀬𑁄 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺, 𑀅𑀧𑀺𑀘𑁂𑀢𑁆𑀣 𑀕𑀡𑀦𑀽𑀧𑀺𑀓𑀸 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, ‘‘𑀇𑀤𑀸𑀦𑀺 𑀦𑀸𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀳𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀤𑁂𑀲𑀺𑀢𑀸 𑀕𑀡𑀦𑀽𑀧𑀺𑀓𑀸, 𑀤𑁂𑀲𑀺𑀢𑀕𑀡𑀦𑀁 𑀉𑀧𑁂𑀢𑀺, 𑀧𑀸𑀭𑀸𑀚𑀺𑀓𑀲𑁆𑀲 𑀅𑀗𑁆𑀕𑀁 𑀦 𑀳𑁄𑀢𑀺. 𑀢𑀲𑁆𑀫𑀸 𑀬𑀸 𑀏𑀓𑀁 𑀆𑀧𑀦𑁆𑀦𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀤𑁂𑀲𑁂𑀢𑁆𑀯𑀸 𑀧𑀼𑀦 𑀓𑀺𑀮𑁂𑀲𑀯𑀲𑁂𑀦 𑀆𑀧𑀚𑁆𑀚𑀢𑀺, 𑀧𑀼𑀦𑀧𑀺 𑀤𑁂𑀲𑁂𑀢𑀺, 𑀏𑀯𑀁 𑀅𑀝𑁆𑀞𑀫𑀁 𑀧𑀭𑀺𑀧𑀽𑀭𑁂𑀦𑁆𑀢𑀻𑀧𑀺 𑀧𑀸𑀭𑀸𑀚𑀺𑀓𑀸 𑀦 𑀳𑁄𑀢𑀺. 𑀬𑀸 𑀧𑀦 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀧𑀼𑀦𑀧𑀺 𑀅𑀜𑁆𑀜𑀁 𑀯𑀢𑁆𑀣𑀼𑀁 𑀆𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀲𑀉𑀲𑁆𑀲𑀸𑀳𑀸𑀯 𑀤𑁂𑀲𑁂𑀢𑀺, 𑀢𑀲𑁆𑀲𑀸 𑀲𑀸 𑀆𑀧𑀢𑁆𑀢𑀺 𑀅𑀕𑀡𑀦𑀽𑀧𑀺𑀓𑀸, 𑀤𑁂𑀲𑀺𑀢𑀸𑀧𑀺 𑀅𑀤𑁂𑀲𑀺𑀢𑀸 𑀳𑁄𑀢𑀺, 𑀧𑀸𑀭𑀸𑀚𑀺𑀓𑀲𑁆𑀲 𑀅𑀗𑁆𑀕𑀁 𑀳𑁄𑀢𑀺. 𑀅𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀺𑀬𑀸 𑀅𑀲𑀸𑀤𑀺𑀬𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄, 𑀲𑀉𑀲𑁆𑀲𑀸𑀳𑀢𑀸, 𑀅𑀝𑁆𑀞𑀫𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀽𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑁆𑀯𑀺𑀯𑁂𑀤𑀦𑀦𑁆𑀢𑀺.

𑀅𑀝𑁆𑀞𑀯𑀢𑁆𑀣𑀼𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄 𑀅𑀝𑁆𑀞 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸𑀢𑀺 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀸 𑀲𑀸𑀥𑀸𑀭𑀡𑀸 𑀘𑀢𑁆𑀢𑀸𑀭𑁄, 𑀇𑀫𑁂 𑀘𑀢𑁆𑀢𑀸𑀭𑁄𑀢𑀺 𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀫𑀕𑁆𑀕𑁂𑀦 𑀅𑀝𑁆𑀞 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸 𑀉𑀤𑁆𑀤𑀺𑀝𑁆𑀞𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁂𑀲𑀁 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂

𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.