𑁭𑁪. 𑀳𑀭𑀺𑀢𑁂𑀉𑀘𑁆𑀘𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀸𑀭𑀲𑀫𑁂 𑀬𑀫𑁆𑀧𑀺 𑀚𑀻𑀯𑀫𑀸𑀦𑀭𑀼𑀓𑁆𑀔𑀲𑁆𑀲 𑀫𑀽𑀮𑀁 𑀧𑀣𑀯𑀺𑀬𑀁 𑀤𑀺𑀲𑁆𑀲𑀫𑀸𑀦𑀁 𑀕𑀘𑁆𑀙𑀢𑀺, 𑀲𑀸𑀔𑀸 𑀯𑀸 𑀪𑀽𑀫𑀺𑀮𑀕𑁆𑀕𑀸 𑀕𑀘𑁆𑀙𑀢𑀺, 𑀲𑀩𑁆𑀩𑀁 𑀳𑀭𑀺𑀢𑀲𑀗𑁆𑀔𑀸𑀢𑀫𑁂𑀯. 𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀦 𑀅𑀧𑁆𑀧𑀳𑀭𑀺𑀢𑀝𑁆𑀞𑀸𑀦𑁂 𑀧𑀸𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀅𑀧𑁆𑀧𑀳𑀭𑀺𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀲𑀳𑀲𑀸 𑀦𑀺𑀓𑁆𑀔𑀫𑀢𑀺, 𑀕𑀺𑀮𑀸𑀦𑀝𑁆𑀞𑀸𑀦𑁂 𑀞𑀺𑀢𑁄 𑀳𑁄𑀢𑀺, ‘‘𑀅𑀧𑁆𑀧𑀳𑀭𑀺𑀢𑁂 𑀓𑀢𑁄 𑀳𑀭𑀺𑀢𑀁 𑀑𑀢𑁆𑀣𑀭𑀢𑀻’’𑀢𑀺 (𑀧𑀸𑀘𑀺. 𑁬𑁫𑁨) 𑀇𑀤𑀫𑁂𑀢𑁆𑀣 𑀅𑀦𑀸𑀧𑀢𑁆𑀢𑀺𑀬𑀁 𑀅𑀥𑀺𑀓𑀁. 𑀢𑀢𑁆𑀣 𑀲𑀘𑁂𑀧𑀺 𑀅𑀧𑁆𑀧𑀳𑀭𑀺𑀢𑀁 𑀅𑀮𑀪𑀦𑁆𑀢𑁂𑀦 𑀢𑀺𑀡𑀡𑁆𑀟𑀼𑀧𑀓𑀁 𑀯𑀸 𑀧𑀮𑀮𑀡𑁆𑀟𑀼𑀧𑀓𑀁 𑀯𑀸 𑀞𑀧𑁂𑀢𑁆𑀯𑀸 𑀓𑀢𑁄 𑀧𑀘𑁆𑀙𑀸 𑀳𑀭𑀺𑀢𑀁 𑀑𑀢𑁆𑀣𑀭𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀔𑁂𑀴𑁂𑀦 𑀘𑁂𑀢𑁆𑀣 𑀲𑀺𑀗𑁆𑀖𑀸𑀡𑀺𑀓𑀸𑀧𑀺 𑀲𑀗𑁆𑀕𑀳𑀺𑀢𑀸.