𑀲𑁂𑀔𑀺𑀬𑀓𑀡𑁆𑀟𑁄

𑁧. 𑀧𑀭𑀺𑀫𑀡𑁆𑀟𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑁂𑀔𑀺𑀬𑁂𑀲𑀼 𑀧𑀞𑀫𑁂 𑀧𑀭𑀺𑀫𑀡𑁆𑀟𑀮𑀦𑁆𑀢𑀺 𑀲𑀫𑀦𑁆𑀢𑀢𑁄 𑀫𑀡𑁆𑀟𑀮𑀁. 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸𑀢𑀺 ‘‘𑀏𑀯𑀁 𑀦𑀺𑀯𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀆𑀭𑀸𑀫𑁂𑀧𑀺 𑀅𑀦𑁆𑀢𑀭𑀖𑀭𑁂𑀧𑀺 𑀲𑀩𑁆𑀩𑀢𑁆𑀣 𑀲𑀺𑀓𑁆𑀔𑀸 𑀓𑀸𑀢𑀩𑁆𑀩𑀸, 𑀏𑀢𑁆𑀣 𑀘 𑀬𑀲𑁆𑀫𑀸 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀯𑀢𑁆𑀢𑀸𑀦𑀺𑀧𑀺 𑀲𑀺𑀓𑁆𑀔𑀺𑀢𑀩𑁆𑀩𑀢𑁆𑀢𑀸 𑀲𑁂𑀔𑀺𑀬𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀯𑀺𑀬 𑀧𑀭𑀺𑀘𑁆𑀙𑁂𑀤𑁄 𑀦 𑀓𑀢𑁄. 𑀘𑀸𑀭𑀺𑀢𑁆𑀢𑀯𑀺𑀦𑀬𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀑𑀮𑀫𑁆𑀩𑁂𑀦𑁆𑀢𑁄 𑀦𑀺𑀯𑀸𑀲𑁂𑀬𑁆𑀬, 𑀤𑀼𑀓𑁆𑀓𑀝’’𑀦𑁆𑀢𑀺 𑀏𑀯𑀁 𑀆𑀧𑀢𑁆𑀢𑀺𑀦𑀸𑀫𑁂𑀦 𑀅𑀯𑀢𑁆𑀯𑀸 ‘‘𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺 𑀏𑀯𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀸𑀴𑀺 𑀆𑀭𑁄𑀧𑀺𑀢𑀸, 𑀧𑀤𑀪𑀸𑀚𑀦𑁂 (𑀧𑀸𑀘𑀺. 𑁫𑁭𑁬) 𑀧𑀦 ‘‘𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀢𑁆𑀣 𑀅𑀦𑀸𑀤𑀭𑀺𑀬𑀓𑀭𑀡𑁂 𑀤𑀼𑀓𑁆𑀓𑀝𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀧𑀭𑀺𑀫𑀡𑁆𑀟𑀮𑀦𑁆𑀢𑀺 𑀏𑀢𑁆𑀣 𑀦𑀸𑀪𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀸𑀡𑀼𑀫𑀡𑁆𑀟𑀮𑀲𑁆𑀲 𑀳𑁂𑀝𑁆𑀞𑀸 𑀚𑀗𑁆𑀖𑀝𑁆𑀞𑀺𑀓𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁 𑀦𑀺𑀯𑀸𑀲𑀦𑀁 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀢𑁆𑀣𑀁 𑀦𑀸𑀫 𑀳𑁄𑀢𑀺, 𑀏𑀯𑀁 𑀅𑀦𑀺𑀯𑀸𑀲𑁂𑀢𑁆𑀯𑀸 𑀅𑀦𑀸𑀤𑀭𑀺𑀬𑁂𑀦 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀦 𑀓𑁂𑀯𑀮𑀜𑁆𑀘 𑀢𑀲𑁆𑀲𑁂𑀯, 𑀬𑁂 𑀘𑀜𑁆𑀜𑁂 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀕𑀺𑀳𑀺𑀦𑀺𑀯𑀢𑁆𑀣𑀁 𑀦𑀺𑀯𑀸𑀲𑁂𑀦𑁆𑀢𑀺, 𑀳𑀢𑁆𑀣𑀺𑀲𑁄𑀡𑁆𑀟𑀓𑀁 𑀫𑀘𑁆𑀙𑀯𑀸𑀮𑀓𑀁 𑀘𑀢𑀼𑀓𑁆𑀓𑀡𑁆𑀡𑀓𑀁 𑀢𑀸𑀮𑀯𑀡𑁆𑀝𑀓𑀁 𑀲𑀢𑀯𑀮𑀺𑀓𑀁 𑀦𑀺𑀯𑀸𑀲𑁂𑀦𑁆𑀢𑀺, 𑀲𑀁𑀯𑀮𑁆𑀮𑀺𑀬𑀁 𑀦𑀺𑀯𑀸𑀲𑁂𑀦𑁆𑀢𑀻’’𑀢𑀺 𑀔𑀦𑁆𑀥𑀓𑁂 (𑀘𑀽𑀴𑀯. 𑁨𑁮𑁦) 𑀦𑀺𑀯𑀸𑀲𑀦𑀤𑁄𑀲𑀸 𑀯𑀼𑀢𑁆𑀢𑀸, 𑀢𑀣𑀸 𑀦𑀺𑀯𑀸𑀲𑁂𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀫𑁂𑀯.

𑀢𑀢𑁆𑀣 𑀳𑀢𑁆𑀣𑀺𑀲𑁄𑀡𑁆𑀟𑀓𑀁 𑀦𑀸𑀫 𑀦𑀸𑀪𑀺𑀫𑀽𑀮𑀢𑁄 𑀳𑀢𑁆𑀣𑀺𑀲𑁄𑀡𑁆𑀟𑀲𑀡𑁆𑀞𑀸𑀦𑀁 𑀑𑀮𑀫𑁆𑀩𑀓𑀁 𑀓𑀢𑁆𑀯𑀸 𑀦𑀺𑀯𑀢𑁆𑀣𑀁 𑀘𑁄𑀴𑀺𑀓𑀇𑀢𑁆𑀣𑀻𑀦𑀁 𑀦𑀺𑀯𑀸𑀲𑀦𑀁 𑀯𑀺𑀬. 𑀫𑀘𑁆𑀙𑀯𑀸𑀮𑀓𑀁 𑀦𑀸𑀫 𑀏𑀓𑀢𑁄𑀤𑀲𑀦𑁆𑀢𑀁 𑀏𑀓𑀢𑁄 𑀧𑀸𑀲𑀦𑁆𑀢𑀁 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀘𑀢𑀼𑀓𑁆𑀓𑀡𑁆𑀡𑀓𑀁 𑀦𑀸𑀫 𑀉𑀧𑀭𑀺 𑀤𑁆𑀯𑁂, 𑀳𑁂𑀝𑁆𑀞𑀢𑁄 𑀤𑁆𑀯𑁂𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀓𑀡𑁆𑀡𑁂 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀢𑀸𑀮𑀯𑀡𑁆𑀝𑀓𑀁 𑀦𑀸𑀫 𑀢𑀸𑀮𑀯𑀡𑁆𑀝𑀸𑀓𑀸𑀭𑁂𑀦 𑀲𑀸𑀝𑀓𑀁 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀲𑀢𑀯𑀮𑀺𑀓𑀁 𑀦𑀸𑀫 𑀤𑀻𑀖𑀲𑀸𑀝𑀓𑀁 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀑𑀪𑀼𑀚𑀺𑀢𑁆𑀯𑀸 𑀑𑀯𑀝𑁆𑀝𑀺𑀓𑀁 𑀓𑀭𑁄𑀦𑁆𑀢𑁂𑀦 𑀦𑀺𑀯𑀢𑁆𑀣𑀁, 𑀯𑀸𑀫𑀤𑀓𑁆𑀔𑀺𑀡𑀧𑀲𑁆𑀲𑁂𑀲𑀼 𑀯𑀸 𑀦𑀺𑀭𑀦𑁆𑀢𑀭𑀁 𑀯𑀮𑀺𑀬𑁄 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀲𑀘𑁂 𑀧𑀦 𑀚𑀸𑀡𑀼𑀢𑁄 𑀧𑀝𑁆𑀞𑀸𑀬 𑀏𑀓𑀸 𑀯𑀸 𑀤𑁆𑀯𑁂 𑀯𑀸 𑀯𑀮𑀺𑀬𑁄 𑀧𑀜𑁆𑀜𑀸𑀬𑀦𑁆𑀢𑀺, 𑀯𑀝𑁆𑀝𑀢𑀺. 𑀲𑀁𑀯𑀮𑁆𑀮𑀺𑀬𑀦𑁆𑀢𑀺 𑀫𑀮𑁆𑀮𑀓𑀫𑁆𑀫𑀓𑀸𑀭𑀸𑀤𑀻𑀳𑀺 𑀯𑀺𑀬 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀯𑀢𑁆𑀣𑀁. 𑀏𑀯𑀁 𑀦𑀺𑀯𑀸𑀲𑁂𑀢𑀼𑀁 𑀕𑀺𑀮𑀸𑀦𑀲𑁆𑀲𑀸𑀧𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀦 𑀯𑀝𑁆𑀝𑀢𑀺. 𑀬𑀫𑁆𑀧𑀺 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀓𑀡𑁆𑀡𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀉𑀧𑀭𑀺 𑀮𑀕𑁆𑀕𑀦𑁆𑀢𑀺, 𑀅𑀦𑁆𑀢𑁄 𑀯𑀸 𑀏𑀓𑀁 𑀓𑀸𑀲𑀸𑀯𑀁 𑀢𑀣𑀸 𑀦𑀺𑀯𑀸𑀲𑁂𑀢𑁆𑀯𑀸 𑀩𑀳𑀺 𑀅𑀧𑀭𑀁 𑀦𑀺𑀯𑀸𑀲𑁂𑀦𑁆𑀢𑀺, 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺.

𑀕𑀺𑀮𑀸𑀦𑁄 𑀧𑀦 𑀅𑀦𑁆𑀢𑁄𑀓𑀸𑀲𑀸𑀯𑀲𑁆𑀲 𑀑𑀯𑀝𑁆𑀝𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀅𑀧𑀭𑀁 𑀉𑀧𑀭𑀺 𑀦𑀺𑀯𑀸𑀲𑁂𑀢𑀼𑀁 𑀮𑀪𑀢𑀺, 𑀅𑀕𑀺𑀮𑀸𑀦𑁂𑀦 𑀤𑁆𑀯𑁂 𑀦𑀺𑀯𑀸𑀲𑁂𑀦𑁆𑀢𑁂𑀦 𑀲𑀕𑀼𑀡𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀸𑀦𑀺. 𑀇𑀢𑀺 𑀇𑀫𑀁 𑀔𑀦𑁆𑀥𑀓𑁂 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘 𑀑𑀮𑀫𑁆𑀩𑀓𑀜𑁆𑀘 𑀲𑀩𑁆𑀩𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀯𑀼𑀢𑁆𑀢𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀦𑀺𑀩𑁆𑀩𑀺𑀓𑀸𑀭𑀁 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀢𑀣𑀸 𑀅𑀦𑀺𑀯𑀸𑀲𑁂𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

‘‘𑀦𑀺𑀤𑀸𑀦𑀁 𑀧𑀼𑀕𑁆𑀕𑀮𑀁 𑀯𑀢𑁆𑀣𑀼’’𑀦𑁆𑀢𑀺𑀆𑀤𑀺𑀓𑁂 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 ) 𑀧𑀦 𑀯𑀺𑀦𑀺𑀘𑁆𑀙𑀬𑁂 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀁 𑀓𑁄𑀲𑀫𑁆𑀩𑀺𑀬𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀲𑀲𑀺𑀢𑁆𑀣𑀓𑀧𑀢𑁆𑀢𑀥𑁄𑀯𑀦𑀧𑀝𑀺𑀲𑀁𑀬𑀼𑀢𑁆𑀢𑀤𑁆𑀯𑀬𑀁 𑀪𑀕𑁆𑀕𑁂𑀲𑀼 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪, 𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑁂𑀯 𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑀦𑀸𑀤𑀺𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀸𑀦𑀺. 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀬𑀁 𑀥𑀫𑁆𑀫𑀤𑁂𑀲𑀦𑀸𑀤𑀻𑀲𑀼 𑀘 𑀕𑀺𑀮𑀸𑀦𑀯𑀲𑁂𑀦 𑀏𑀓𑀸 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀲𑀩𑁆𑀩𑀸𑀦𑀺 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀬𑁄, 𑀅𑀦𑀸𑀡𑀢𑁆𑀢𑀺𑀓𑀸𑀦𑀺, 𑀲𑀩𑁆𑀩𑁂𑀲𑀼 𑀤𑀼𑀓𑁆𑀓𑀝𑀫𑁂𑀯, 𑀅𑀜𑁆𑀜𑁄 𑀆𑀧𑀢𑁆𑀢𑀺𑀪𑁂𑀤𑁄 𑀦𑀢𑁆𑀣𑀺, 𑀯𑀺𑀧𑀢𑁆𑀢𑀺𑀯𑀺𑀘𑀸𑀭𑀡𑀸 𑀯𑀼𑀢𑁆𑀢𑀸𑀬𑁂𑀯, 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀩𑁆𑀩𑁂𑀲𑀁 𑀅𑀯𑀲𑀸𑀦𑁂 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀅𑀦𑀸𑀧𑀢𑁆𑀢𑀺𑀫𑀢𑁆𑀢𑀁 𑀧𑀦 𑀅𑀗𑁆𑀕𑀜𑁆𑀘 𑀲𑀩𑁆𑀩𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀬𑀺𑀤𑀁 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀢𑀸𑀯 𑀲𑀺𑀓𑁆𑀔𑀸𑀧𑀤𑁂 𑀅𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀲𑁆𑀲, 𑀕𑀺𑀮𑀸𑀦𑀲𑁆𑀲, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺.

𑀢𑀢𑁆𑀣 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 ‘‘𑀅𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀲𑀜𑁆𑀘𑀺𑀘𑁆𑀘, 𑀅𑀣 𑀔𑁄 ‘‘𑀧𑀭𑀺𑀫𑀡𑁆𑀟𑀮𑀁𑀬𑁂𑀯 𑀦𑀺𑀯𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀺𑀭𑀚𑁆𑀛𑀺𑀢𑁆𑀯𑀸 𑀅𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀲𑁆𑀲𑀢𑀺𑀬𑀸𑀢𑀺 𑀅𑀜𑁆𑀜𑀸𑀯𑀺𑀳𑀺𑀢𑀲𑁆𑀲𑀸𑀧𑀺 𑀢𑀣𑀸 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑀼𑀁 𑀅𑀚𑀸𑀦𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀅𑀧𑀺𑀘 𑀦𑀺𑀯𑀸𑀲𑀦𑀯𑀢𑁆𑀢𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀬𑁄 𑀧𑀦 𑀲𑀼𑀓𑁆𑀔𑀚𑀗𑁆𑀖𑁄 𑀯𑀸 𑀳𑁄𑀢𑀺 𑀫𑀳𑀸𑀧𑀺𑀡𑁆𑀟𑀺𑀓𑀫𑀁𑀲𑁄 𑀯𑀸, 𑀢𑀲𑁆𑀲 𑀲𑀸𑀭𑀼𑀧𑁆𑀧𑀢𑁆𑀣𑀸𑀬 𑀅𑀝𑁆𑀞𑀗𑁆𑀕𑀼𑀮𑀸𑀥𑀺𑀓𑀫𑁆𑀧𑀺 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀕𑀺𑀮𑀸𑀦𑀲𑁆𑀲𑀸𑀢𑀺 𑀬𑀲𑁆𑀲 𑀚𑀗𑁆𑀖𑀸𑀬 𑀯𑀸 𑀧𑀸𑀤𑁂 𑀯𑀸 𑀯𑀡𑁄 𑀳𑁄𑀢𑀺, 𑀢𑀲𑁆𑀲 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀑𑀢𑀸𑀭𑁂𑀢𑁆𑀯𑀸 𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀆𑀧𑀤𑀸𑀲𑀽𑀢𑀺 𑀯𑀸𑀴𑀸 𑀯𑀸 𑀘𑁄𑀭𑀸 𑀯𑀸 𑀅𑀦𑀼𑀩𑀦𑁆𑀥𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺. 𑀉𑀫𑁆𑀫𑀢𑁆𑀢𑀓𑀸𑀤𑀬𑁄 𑀯𑀼𑀢𑁆𑀢𑀦𑀬𑀸 𑀏𑀯. 𑀅𑀦𑀸𑀤𑀭𑀺𑀬𑀁, 𑀅𑀦𑀸𑀧𑀢𑁆𑀢𑀺𑀓𑀸𑀭𑀡𑀸𑀪𑀸𑀯𑁄, 𑀅𑀧𑀭𑀺𑀫𑀡𑁆𑀟𑀮𑀦𑀺𑀯𑀸𑀲𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀧𑁆𑀧𑀝𑀺𑀧𑀓𑁆𑀔𑀓𑀭𑀡𑀜𑁆𑀘𑀸𑀢𑀺 𑀢𑀻𑀡𑀺𑀬𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀇𑀢𑁄 𑀧𑀭𑀁 𑀢𑀸𑀦𑀺𑀧𑀺 𑀅𑀯𑀢𑁆𑀯𑀸 𑀅𑀦𑀸𑀧𑀢𑁆𑀢𑀺𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫𑀸𑀢𑀺.

𑁨. 𑀤𑀼𑀢𑀺𑀬𑀧𑀭𑀺𑀫𑀡𑁆𑀟𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 ‘‘𑀦, 𑀪𑀺𑀓𑁆𑀔𑀯𑁂, 𑀕𑀺𑀳𑀺𑀧𑀸𑀭𑀼𑀢𑀁 𑀧𑀸𑀭𑀼𑀧𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁨𑁮𑁦) 𑀏𑀯𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀕𑀺𑀳𑀺𑀧𑀸𑀭𑀼𑀢𑀁 𑀅𑀧𑀸𑀭𑀼𑀧𑀺𑀢𑁆𑀯𑀸 𑀉𑀪𑁄 𑀓𑀡𑁆𑀡𑁂 𑀲𑀫𑀁 𑀓𑀢𑁆𑀯𑀸 𑀧𑀸𑀭𑀼𑀧𑀦𑀁 𑀧𑀭𑀺𑀫𑀡𑁆𑀟𑀮𑀧𑀸𑀭𑀼𑀧𑀦𑀁 𑀦𑀸𑀫, 𑀢𑀢𑁆𑀣 𑀬𑀁𑀓𑀺𑀜𑁆𑀘𑀺 𑀲𑁂𑀢𑀧𑀝𑀧𑀸𑀭𑀼𑀢𑀁 𑀧𑀭𑀺𑀩𑁆𑀩𑀸𑀚𑀓𑀧𑀸𑀭𑀼𑀢𑀁 𑀏𑀓𑀲𑀸𑀝𑀓𑀧𑀸𑀭𑀼𑀢𑀁 𑀲𑀼𑀭𑀸𑀲𑁄𑀡𑁆𑀟𑀧𑀸𑀭𑀼𑀢𑀁 𑀅𑀦𑁆𑀢𑁂𑀧𑀼𑀭𑀺𑀓𑀧𑀸𑀭𑀼𑀢𑀁 𑀫𑀳𑀸𑀚𑁂𑀝𑁆𑀞𑀧𑀸𑀭𑀼𑀢𑀁 𑀓𑀼𑀝𑀺𑀧𑁆𑀧𑀯𑁂𑀲𑀓𑀧𑀸𑀭𑀼𑀢𑀁 𑀩𑁆𑀭𑀸𑀳𑁆𑀫𑀡𑀧𑀸𑀭𑀼𑀢𑀁 𑀧𑀸𑀴𑀺𑀓𑀸𑀭𑀓𑀧𑀸𑀭𑀼𑀢𑀦𑁆𑀢𑀺 𑀏𑀯𑀫𑀸𑀤𑀺 𑀧𑀭𑀺𑀫𑀡𑁆𑀟𑀮𑀮𑀓𑁆𑀔𑀡𑀢𑁄 𑀅𑀜𑁆𑀜𑀣𑀸 𑀧𑀸𑀭𑀼𑀢𑀁, 𑀲𑀩𑁆𑀩𑀫𑁂𑀢𑀁 𑀕𑀺𑀳𑀺𑀧𑀸𑀭𑀼𑀢𑀁 𑀦𑀸𑀫. 𑀢𑀲𑁆𑀫𑀸 𑀬𑀣𑀸 𑀲𑁂𑀢𑀧𑀝𑀸 𑀅𑀟𑁆𑀠𑀧𑀸𑀮𑀓𑀦𑀺𑀕𑀡𑁆𑀞𑀸 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀏𑀓𑀘𑁆𑀘𑁂 𑀧𑀭𑀺𑀩𑁆𑀩𑀸𑀚𑀓𑀸 𑀉𑀭𑀁 𑀯𑀺𑀯𑀭𑀺𑀢𑁆𑀯𑀸 𑀤𑁆𑀯𑀻𑀲𑀼 𑀅𑀁𑀲𑀓𑀽𑀝𑁂𑀲𑀼 𑀧𑀸𑀯𑀼𑀭𑀡𑀁 𑀞𑀧𑁂𑀦𑁆𑀢𑀺, 𑀬𑀣𑀸 𑀘 𑀏𑀓𑀲𑀸𑀝𑀓𑀸 𑀫𑀦𑀼𑀲𑁆𑀲𑀸 𑀦𑀺𑀯𑀢𑁆𑀣𑀲𑀸𑀝𑀓𑀲𑁆𑀲 𑀏𑀓𑁂𑀦 𑀅𑀦𑁆𑀢𑁂𑀦 𑀧𑀺𑀝𑁆𑀞𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀉𑀪𑁄 𑀓𑀡𑁆𑀡𑁂 𑀉𑀪𑁄𑀲𑀼 𑀅𑀁𑀲𑀓𑀽𑀝𑁂𑀲𑀼 𑀞𑀧𑁂𑀦𑁆𑀢𑀺, 𑀬𑀣𑀸 𑀘 𑀲𑀼𑀭𑀸𑀲𑁄𑀡𑁆𑀟𑀸𑀤𑀬𑁄 𑀲𑀸𑀝𑀓𑁂𑀦 𑀕𑀻𑀯𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀪𑁄 𑀅𑀦𑁆𑀢𑁂 𑀉𑀭𑁂 𑀯𑀸 𑀑𑀮𑀫𑁆𑀩𑁂𑀦𑁆𑀢𑀺, 𑀧𑀺𑀝𑁆𑀞𑀺𑀬𑀁 𑀯𑀸 𑀔𑀺𑀧𑀦𑁆𑀢𑀺, 𑀬𑀣𑀸 𑀘 𑀅𑀦𑁆𑀢𑁂𑀧𑀼𑀭𑀺𑀓𑀸𑀬𑁄 𑀅𑀓𑁆𑀔𑀺𑀢𑀸𑀭𑀓𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀑𑀕𑀼𑀡𑁆𑀞𑀺𑀢𑀁 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀫𑀳𑀸𑀚𑁂𑀝𑁆𑀞𑀸 𑀤𑀻𑀖𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑁂𑀯 𑀏𑀓𑁂𑀦𑀦𑁆𑀢𑁂𑀦 𑀲𑀓𑀮𑀲𑀭𑀻𑀭𑀁 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀓𑀲𑁆𑀲𑀓𑀸 𑀔𑁂𑀢𑁆𑀢𑀓𑀼𑀝𑀺𑀁 𑀧𑀯𑀺𑀲𑀦𑁆𑀢𑀸 𑀲𑀸𑀝𑀓𑀁 𑀧𑀮𑀺𑀯𑁂𑀞𑁂𑀢𑁆𑀯𑀸 𑀉𑀧𑀓𑀘𑁆𑀙𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲𑁂𑀯 𑀏𑀓𑁂𑀦𑀦𑁆𑀢𑁂𑀦 𑀲𑀭𑀻𑀭𑀁 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀉𑀪𑀺𑀦𑁆𑀦𑀁 𑀉𑀧𑀓𑀘𑁆𑀙𑀓𑀸𑀦𑀁 𑀅𑀦𑁆𑀢𑀭𑁂 𑀲𑀸𑀝𑀓𑀁 𑀧𑀯𑁂𑀲𑁂𑀢𑁆𑀯𑀸 𑀅𑀁𑀲𑀓𑀽𑀝𑁂𑀲𑀼 𑀧𑀓𑁆𑀔𑀺𑀧𑀦𑁆𑀢𑀺, 𑀬𑀣𑀸 𑀘 𑀧𑀸𑀴𑀺𑀓𑀸𑀭𑀓𑁄 𑀪𑀺𑀓𑁆𑀔𑀼 𑀏𑀓𑀁𑀲𑀧𑀸𑀭𑀼𑀧𑀦𑁂𑀦 𑀧𑀸𑀭𑀼𑀢𑀁 𑀯𑀸𑀫𑀩𑀸𑀳𑀼𑀁 𑀯𑀺𑀯𑀭𑀺𑀢𑁆𑀯𑀸 𑀘𑀻𑀯𑀭𑀁 𑀅𑀁𑀲𑀓𑀽𑀝𑁂 𑀆𑀭𑁄𑀧𑁂𑀢𑀺, 𑀏𑀯𑀁 𑀅𑀧𑀸𑀭𑀼𑀧𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀏𑀢𑁂, 𑀅𑀜𑁆𑀜𑁂 𑀘 𑀏𑀯𑀭𑀽𑀧𑁂 𑀧𑀸𑀭𑀼𑀧𑀦𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀦𑀺𑀩𑁆𑀩𑀺𑀓𑀸𑀭𑀁 𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀧𑀺𑀢𑀩𑁆𑀩𑀁. 𑀢𑀣𑀸 𑀅𑀧𑀸𑀭𑀼𑀧𑀺𑀢𑁆𑀯𑀸 𑀆𑀭𑀸𑀫𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀅𑀦𑀸𑀤𑀭𑁂𑀦 𑀬𑀁𑀓𑀺𑀜𑁆𑀘𑀺 𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀅𑀦𑀸𑀧𑀢𑁆𑀢𑀺 𑀧𑀼𑀭𑀺𑀫𑀲𑀤𑀺𑀲𑀸𑀬𑁂𑀯, 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀩𑁆𑀩𑀢𑁆𑀣. 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣 𑀯𑀓𑁆𑀔𑀸𑀫𑀸𑀢𑀺.

𑁩-𑁪. 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁄𑀢𑀺 𑀲𑀼𑀝𑁆𑀞𑀼 𑀧𑀝𑀺𑀘𑁆𑀙𑀦𑁆𑀦𑁄, 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀯𑀸𑀢𑀦𑁆𑀢𑁂𑀦 𑀕𑀻𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀉𑀪𑁄 𑀓𑀡𑁆𑀡𑁂 𑀲𑀫𑀁 𑀓𑀢𑁆𑀯𑀸 𑀧𑀝𑀺𑀲𑀗𑁆𑀖𑀭𑀺𑀢𑁆𑀯𑀸 𑀬𑀸𑀯 𑀫𑀡𑀺𑀩𑀦𑁆𑀥𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀦𑁆𑀢𑀭𑀖𑀭𑁂 𑀕𑀫𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄, 𑀢𑀣𑀸 𑀅𑀓𑀢𑁆𑀯𑀸 𑀧𑀦 𑀚𑀸𑀡𑀼𑀁 𑀯𑀸 𑀉𑀭𑀁 𑀯𑀸 𑀯𑀺𑀯𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀘𑀢𑀼𑀢𑁆𑀣𑁂 𑀕𑀮𑀯𑀸𑀝𑀓𑀢𑁄 𑀧𑀝𑁆𑀞𑀸𑀬 𑀲𑀻𑀲𑀁, 𑀫𑀡𑀺𑀩𑀦𑁆𑀥𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑁂, 𑀧𑀺𑀡𑁆𑀟𑀺𑀓𑀫𑀁𑀲𑀢𑁄 𑀧𑀝𑁆𑀞𑀸𑀬 𑀧𑀸𑀤𑁂 𑀯𑀺𑀯𑀭𑀺𑀢𑁆𑀯𑀸 𑀲𑁂𑀲𑀁 𑀙𑀸𑀤𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀏𑀢𑁆𑀣 𑀧𑀦 𑀯𑀸𑀲𑀽𑀧𑀕𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑁫-𑁬. 𑀲𑀼𑀲𑀁𑀯𑀼𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀲𑀼𑀲𑀁𑀯𑀼𑀢𑁄𑀢𑀺 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀅𑀓𑀻𑀴𑀸𑀧𑁂𑀦𑁆𑀢𑁄 𑀲𑀼𑀯𑀺𑀦𑀻𑀢𑁄𑀢𑀺 𑀅𑀢𑁆𑀣𑁄. 𑀙𑀝𑁆𑀞𑁂𑀧𑀺 𑀏𑀲𑁂𑀯 𑀦𑀬𑁄.

𑁭-𑁮. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀳𑁂𑀝𑁆𑀞𑀸 𑀔𑀺𑀢𑁆𑀢𑀘𑀓𑁆𑀔𑀼 𑀳𑀼𑀢𑁆𑀯𑀸 𑀧𑀼𑀭𑀢𑁄 𑀬𑀼𑀕𑀫𑀢𑁆𑀢𑀁 𑀪𑀽𑀫𑀺𑀪𑀸𑀕𑀁 𑀧𑁂𑀓𑁆𑀔𑀫𑀸𑀦𑁄, 𑀏𑀓𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀧𑀭𑀺𑀲𑁆𑀲𑀬𑀸𑀪𑀸𑀯𑀁 𑀑𑀮𑁄𑀓𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀝𑁆𑀞𑀫𑁂𑀧𑀺 𑀏𑀲𑁂𑀯 𑀦𑀬𑁄.

𑁯-𑁧𑁦. 𑀉𑀓𑁆𑀔𑀺𑀢𑁆𑀢𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀉𑀓𑁆𑀔𑀺𑀢𑁆𑀢𑀓𑀸𑀬𑀸𑀢𑀺 𑀉𑀓𑁆𑀔𑁂𑀧𑁂𑀦, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁, 𑀏𑀓𑀢𑁄 𑀯𑀸 𑀉𑀪𑀢𑁄 𑀯𑀸 𑀉𑀓𑁆𑀔𑀺𑀢𑁆𑀢𑀘𑀻𑀯𑀭𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀅𑀦𑁆𑀢𑁄 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀦 𑀕𑀦𑁆𑀢𑀩𑁆𑀩𑀁.

𑀤𑀲𑀫𑁂 𑀦𑀺𑀲𑀺𑀦𑁆𑀦𑀓𑀸𑀮𑁂 𑀥𑀫𑀓𑀭𑀡𑀁 𑀦𑀻𑀳𑀭𑀦𑁆𑀢𑁂𑀦𑀸𑀧𑀺 𑀘𑀻𑀯𑀭𑀁 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸𑀯 𑀦𑀻𑀳𑀭𑀺𑀢𑀩𑁆𑀩𑀁, 𑀯𑀸𑀲𑀽𑀧𑀕𑀢𑀲𑁆𑀲 𑀧𑀦 𑀅𑀦𑀸𑀧𑀢𑁆𑀢𑀺.

𑁧𑁧-𑁧𑁨. 𑀉𑀚𑁆𑀚𑀕𑁆𑀖𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀸𑀤𑀲𑀫𑁂 𑀉𑀚𑁆𑀚𑀕𑁆𑀖𑀺𑀓𑀸𑀬𑀸𑀢𑀺 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀺 𑀳𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂𑀬𑁂𑀯 𑀓𑀭𑀡𑀯𑀘𑀦𑀁.

𑀤𑁆𑀯𑀸𑀤𑀲𑀫𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀪𑀬𑀢𑁆𑀣 𑀳𑀲𑀦𑀻𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑀺𑀳𑀺𑀢𑀫𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑁧𑁩-𑁧𑁪. 𑀉𑀘𑁆𑀘𑀲𑀤𑁆𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑁂𑀭𑀲𑀫𑁂 𑀅𑀧𑁆𑀧𑀲𑀤𑁆𑀤𑁄𑀢𑀺 𑀦 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑁄 𑀳𑀼𑀢𑁆𑀯𑀸. 𑀘𑀼𑀤𑁆𑀤𑀲𑀫𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀧𑁆𑀧𑀲𑀤𑁆𑀤𑀢𑀸𑀧𑀭𑀺𑀘𑁆𑀙𑁂𑀤𑁄 𑁋 𑀲𑀘𑁂 𑀤𑁆𑀯𑀸𑀤𑀲𑀳𑀢𑁆𑀣𑁂 𑀕𑁂𑀳𑁂 𑀆𑀤𑀺𑀫𑁆𑀳𑀺 𑀲𑀗𑁆𑀖𑀢𑁆𑀣𑁂𑀭𑁄, 𑀫𑀚𑁆𑀛𑁂 𑀤𑀼𑀢𑀺𑀬𑀢𑁆𑀣𑁂𑀭𑁄, 𑀅𑀦𑁆𑀢𑁂 𑀢𑀢𑀺𑀬𑀢𑁆𑀣𑁂𑀭𑁄𑀢𑀺 𑀏𑀯𑀁 𑀦𑀺𑀲𑀺𑀦𑁆𑀦𑁂𑀲𑀼 𑀬𑀁 𑀲𑀗𑁆𑀖𑀢𑁆𑀣𑁂𑀭𑁄 𑀤𑀼𑀢𑀺𑀬𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑀺, 𑀤𑀼𑀢𑀺𑀬𑀢𑁆𑀣𑁂𑀭𑁄 𑀘 𑀢𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀓𑀣𑀜𑁆𑀘 𑀯𑀯𑀢𑁆𑀣𑀧𑁂𑀢𑀺. 𑀢𑀢𑀺𑀬𑀢𑁆𑀣𑁂𑀭𑁄 𑀧𑀦 𑀲𑀤𑁆𑀤𑀫𑁂𑀯 𑀲𑀼𑀡𑀸𑀢𑀺, 𑀓𑀣𑀁 𑀦 𑀯𑀯𑀢𑁆𑀣𑀧𑁂𑀢𑀺, 𑀏𑀢𑁆𑀢𑀸𑀯𑀢𑀸 𑀅𑀧𑁆𑀧𑀲𑀤𑁆𑀤𑁄 𑀳𑁄𑀢𑀺. 𑀲𑀘𑁂 𑀧𑀦 𑀢𑀢𑀺𑀬𑀢𑁆𑀣𑁂𑀭𑁄 𑀓𑀣𑀜𑁆𑀘 𑀯𑀯𑀢𑁆𑀣𑀧𑁂𑀢𑀺, 𑀫𑀳𑀸𑀲𑀤𑁆𑀤𑁄 𑀦𑀸𑀫 𑀳𑁄𑀢𑀺.

𑁧𑁫…𑀧𑁂…𑁨𑁦. 𑀓𑀸𑀬𑀧𑁆𑀧𑀘𑀸𑀮𑀓𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀇𑀢𑁄 𑀧𑀭𑁂𑀲𑀼 𑀙𑀲𑀼 𑀓𑀸𑀬𑀧𑁆𑀧𑀘𑀸𑀮𑀓𑀦𑁆𑀢𑀺 𑀓𑀸𑀬𑀁 𑀘𑀸𑀮𑁂𑀢𑁆𑀯𑀸 𑀘𑀸𑀮𑁂𑀢𑁆𑀯𑀸, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀢𑀲𑁆𑀫𑀸 𑀓𑀸𑀬𑀸𑀤𑀻𑀦𑀺 𑀧𑀕𑁆𑀕𑀳𑁂𑀢𑁆𑀯𑀸 𑀦𑀺𑀘𑁆𑀘𑀮𑀸𑀦𑀺 𑀉𑀚𑀼𑀓𑀸𑀦𑀺 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀜𑁆𑀘𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀜𑁆𑀘, 𑀦𑀺𑀲𑀻𑀤𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀢𑀻𑀲𑀼 𑀯𑀸𑀲𑀽𑀧𑀕𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑁨𑁧-𑁨𑁨. 𑀔𑀫𑁆𑀪𑀓𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀯𑀻𑀲𑀤𑁆𑀯𑀸𑀯𑀻𑀲𑁂𑀲𑀼 𑀔𑀫𑁆𑀪𑀓𑀢𑁄𑀢𑀺 𑀓𑀝𑀺𑀬𑀁 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀓𑀢𑀔𑀫𑁆𑀪𑁄.

𑁨𑁩-𑁨𑁪. 𑀑𑀕𑀼𑀡𑁆𑀞𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑁂𑀯𑀻𑀲𑀘𑀢𑀼𑀯𑀻𑀲𑁂𑀲𑀼 𑀑𑀕𑀼𑀡𑁆𑀞𑀺𑀢𑁄𑀢𑀺 𑀲𑀲𑀻𑀲𑀁 𑀧𑀸𑀭𑀼𑀢𑁄.

𑁨𑁫. 𑀉𑀓𑁆𑀓𑀼𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀯𑀻𑀲𑁂 𑀉𑀓𑁆𑀓𑀼𑀝𑀺𑀓𑀸 𑀯𑀼𑀘𑁆𑀘𑀢𑀺 𑀧𑀡𑁆𑀳𑀺𑀬𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀧𑀸𑀤𑁂𑀳𑁂𑀯, 𑀅𑀕𑁆𑀕𑀧𑀸𑀤𑁂 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀡𑁆𑀳𑀻𑀳𑀺𑀬𑁂𑀯 𑀪𑀽𑀫𑀺𑀬𑀁 𑀨𑀼𑀲𑀦𑁆𑀢𑀲𑁆𑀲 𑀕𑀫𑀦𑀁, 𑀓𑀭𑀡𑀯𑀘𑀦𑀁 𑀧𑀦𑁂𑀢𑁆𑀣 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯.

𑁨𑁬. 𑀧𑀮𑁆𑀮𑀢𑁆𑀣𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀩𑁆𑀩𑀻𑀲𑁂 𑀦 𑀧𑀮𑁆𑀮𑀢𑁆𑀣𑀺𑀓𑀸𑀬𑀸𑀢𑀺 𑀳𑀢𑁆𑀣𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀦 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀅𑀦𑀸𑀤𑀭𑁂𑀦 𑀦𑀺𑀲𑀻𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀯𑀸𑀲𑀽𑀧𑀕𑀢𑀲𑁆𑀲 𑀧𑀦 𑀇𑀥𑀸𑀧𑀺 𑀧𑀼𑀭𑀺𑀫𑁂𑀲𑀼 𑀘 𑀤𑁆𑀯𑀸𑀯𑀻𑀲𑀘𑀢𑀼𑀯𑀻𑀲𑁂𑀲𑀼 𑀅𑀦𑀸𑀧𑀢𑁆𑀢𑀺.

𑀙𑀩𑁆𑀩𑀻𑀲𑀢𑀺𑀲𑀸𑀭𑀼𑀧𑁆𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁭. 𑀲𑀓𑁆𑀓𑀘𑁆𑀘𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀪𑁄𑀚𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀧𑀞𑀫𑁂 𑀲𑀓𑁆𑀓𑀘𑁆𑀘𑀦𑁆𑀢𑀺 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸.

𑁨𑁮. 𑀧𑀢𑁆𑀢𑀲𑀜𑁆𑀜𑀻𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀧𑀢𑁆𑀢𑁂 𑀲𑀜𑁆𑀜𑀸 𑀧𑀢𑁆𑀢𑀲𑀜𑁆𑀜𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀢𑁆𑀢𑀲𑀜𑁆𑀜𑀻, 𑀅𑀢𑁆𑀢𑀦𑁄 𑀪𑀸𑀚𑀦𑁂 𑀉𑀧𑀦𑀺𑀩𑀤𑁆𑀥𑀲𑀜𑁆𑀜𑀻 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁨𑁯. 𑀲𑀫𑀲𑀽𑀧𑀓𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀲𑀫𑀲𑀽𑀧𑀓𑁄 𑀦𑀸𑀫 𑀬𑀢𑁆𑀣 𑀫𑀼𑀕𑁆𑀕𑀫𑀸𑀲𑁂𑀳𑀺 𑀯𑀸 𑀓𑀼𑀮𑀢𑁆𑀣𑀸𑀤𑀻𑀳𑀺 𑀯𑀸 𑀓𑀢𑁄 𑀳𑀢𑁆𑀣𑀳𑀸𑀭𑀺𑀬𑁄 𑀲𑀽𑀧𑁄 𑀪𑀢𑁆𑀢𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑁄 𑀳𑁄𑀢𑀺, 𑀢𑀢𑁄 𑀳𑀺 𑀅𑀥𑀺𑀓𑀁 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀞𑀧𑁂𑀢𑁆𑀯𑀸 𑀧𑀦 𑀲𑀽𑀧𑀁 𑀅𑀯𑀲𑁂𑀲𑀸 𑀲𑀩𑁆𑀩𑀸𑀧𑀺 𑀲𑀽𑀧𑁂𑀬𑁆𑀬𑀩𑁆𑀬𑀜𑁆𑀚𑀦𑀯𑀺𑀓𑀢𑀺 𑀭𑀲𑀭𑀲𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀺𑀁 𑀭𑀲𑀭𑀲𑁂, 𑀜𑀸𑀢𑀓𑀸𑀦𑀁 𑀯𑀸 𑀧𑀯𑀸𑀭𑀺𑀢𑀸𑀦𑀁 𑀯𑀸 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀸 𑀅𑀢𑁆𑀢𑀦𑁄 𑀥𑀦𑁂𑀦 𑀯𑀸 𑀇𑀥 𑀅𑀦𑀸𑀧𑀢𑁆𑀢𑀺.

𑁩𑁦…𑀧𑁂…𑁩𑁨. 𑀲𑀫𑀢𑀺𑀢𑁆𑀢𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀲𑀫𑀢𑀺𑀢𑁆𑀢𑀺𑀓𑀦𑁆𑀢𑀺 𑀲𑀫𑀧𑀼𑀡𑁆𑀡𑀁 𑀲𑀫𑀪𑀭𑀺𑀢𑀁 𑀅𑀥𑀺𑀝𑁆𑀞𑀸𑀦𑀼𑀧𑀕𑀧𑀢𑁆𑀢𑀲𑁆𑀲 𑀅𑀦𑁆𑀢𑁄𑀫𑀼𑀔𑀯𑀝𑁆𑀝𑀺𑀮𑁂𑀔𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀘𑀺𑀢𑀁. 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀬𑀸𑀯𑀓𑀸𑀮𑀺𑀓𑀁. 𑀅𑀦𑀥𑀺𑀝𑁆𑀞𑀸𑀦𑀼𑀧𑀕𑁂 𑀧𑀦 𑀬𑀸𑀯𑀓𑀸𑀮𑀺𑀓𑀁 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀺 𑀘 𑀬𑀢𑁆𑀣𑀓𑀢𑁆𑀣𑀘𑀺 𑀣𑀽𑀧𑀻𑀓𑀢𑀸𑀦𑀺𑀧𑀺 𑀯𑀝𑁆𑀝𑀦𑁆𑀢𑀺, 𑀬𑀁 𑀧𑀦 𑀤𑁆𑀯𑀻𑀲𑀼 𑀧𑀢𑁆𑀢𑁂𑀲𑀼 𑀕𑀳𑁂𑀢𑁆𑀯𑀸 𑀏𑀓𑀁 𑀧𑀽𑀭𑁂𑀢𑁆𑀯𑀸 𑀯𑀺𑀳𑀸𑀭𑀁 𑀳𑀭𑀢𑀺, 𑀬𑀁 𑀯𑀸 𑀧𑀓𑁆𑀔𑀺𑀧𑀺𑀬𑀫𑀸𑀦𑀁 𑀧𑀽𑀯𑀉𑀘𑁆𑀙𑀼𑀓𑁆𑀔𑀡𑁆𑀟𑀨𑀮𑀸𑀨𑀮𑀸𑀤𑀺 𑀳𑁂𑀝𑁆𑀞𑀸 𑀑𑀭𑁄𑀳𑀢𑀺, 𑀢𑀓𑁆𑀓𑁄𑀮𑀯𑀝𑀁𑀲𑀓𑀸𑀤𑀬𑁄 𑀯𑀸 𑀉𑀧𑀭𑀺 𑀞𑀧𑁂𑀢𑁆𑀯𑀸 𑀤𑀺𑀬𑁆𑀬𑀦𑁆𑀢𑀺, 𑀬𑀜𑁆𑀘 𑀧𑀡𑁆𑀡𑁂 𑀯𑀸 𑀣𑀸𑀮𑀓𑁂 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑁆𑀢𑀫𑀢𑁆𑀣𑀓𑁂 𑀞𑀧𑀺𑀢𑀁 𑀳𑁄𑀢𑀺, 𑀦 𑀢𑀁 𑀣𑀽𑀧𑀻𑀓𑀢𑀁 𑀦𑀸𑀫, 𑀢𑀲𑁆𑀫𑀸 𑀢𑀁 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀇𑀥 𑀧𑀦 𑀕𑀺𑀮𑀸𑀦𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂𑀦𑀧𑀺 𑀲𑀫𑀢𑀺𑀢𑁆𑀢𑀺𑀓𑁄𑀬𑁂𑀯 𑀕𑀳𑁂𑀢𑀩𑁆𑀩𑁄. 𑀲𑀩𑁆𑀩𑀢𑁆𑀣 𑀧𑀦 𑀧𑀝𑀺𑀕𑁆𑀕𑀳𑁂𑀢𑀼𑀫𑁂𑀯 𑀦 𑀯𑀝𑁆𑀝𑀢𑀺, 𑀧𑀝𑀺𑀕𑁆𑀕𑀳𑀺𑀢𑀁 𑀧𑀦 𑀲𑀼𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀜𑁆𑀘𑀫𑀙𑀝𑁆𑀞𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯.

𑁩𑁩-𑁩𑁪. 𑀲𑀧𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀲𑀧𑀤𑀸𑀦𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀑𑀥𑀺𑀁 𑀅𑀓𑀢𑁆𑀯𑀸 𑀅𑀦𑀼𑀧𑀝𑀺𑀧𑀸𑀝𑀺𑀬𑀸. 𑀬𑁄 𑀧𑀦 𑀅𑀜𑁆𑀜𑁂𑀲𑀁 𑀯𑀸 𑀤𑁂𑀦𑁆𑀢𑁄, 𑀅𑀜𑁆𑀜𑀪𑀸𑀚𑀦𑁂 𑀯𑀸 𑀆𑀓𑀺𑀭𑀦𑁆𑀢𑁄 𑀢𑀢𑁄 𑀢𑀢𑁄 𑀑𑀫𑀲𑀢𑀺, 𑀢𑀲𑁆𑀲, 𑀉𑀢𑁆𑀢𑀭𑀺𑀪𑀗𑁆𑀕𑀜𑁆𑀘 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀇𑀥 𑀅𑀦𑀸𑀧𑀢𑁆𑀢𑀺. 𑀅𑀝𑁆𑀞𑀫𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁩𑁫. 𑀣𑀽𑀧𑀓𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀣𑀽𑀧𑀓𑀢𑁄𑀢𑀺 𑀫𑀢𑁆𑀣𑀓𑀢𑁄 𑀯𑁂𑀫𑀚𑁆𑀛𑀢𑁄𑀢𑀺 𑀅𑀢𑁆𑀣𑁄. 𑀬𑁄 𑀧𑀦 𑀧𑀭𑀺𑀢𑁆𑀢𑀓𑁂 𑀲𑁂𑀲𑁂 𑀏𑀓𑀢𑁄 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀑𑀫𑀤𑁆𑀤𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺.

𑁩𑁬. 𑀑𑀤𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀬𑀲𑁆𑀲 𑀪𑀢𑁆𑀢𑀲𑀸𑀫𑀺𑀓𑀸 𑀫𑀸𑀖𑀸𑀢𑀲𑀫𑀬𑀸𑀤𑀻𑀲𑀼 𑀩𑁆𑀬𑀜𑁆𑀚𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀬𑁄 𑀘 𑀦 𑀪𑀺𑀬𑁆𑀬𑁄𑀓𑀫𑁆𑀬𑀢𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀢𑁂𑀲𑀁 𑀅𑀦𑀸𑀧𑀢𑁆𑀢𑀺, 𑀕𑀺𑀮𑀸𑀦𑀲𑁆𑀲 𑀧𑀦 𑀅𑀦𑀸𑀕𑀢𑀢𑁆𑀢𑀸 𑀆𑀧𑀢𑁆𑀢𑀺𑀬𑁂𑀯.

𑁩𑁭. 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀸𑀤𑀲𑀫𑁂 𑀜𑀸𑀢𑀓𑀸𑀦𑀁 𑀯𑀸 𑀧𑀯𑀸𑀭𑀺𑀢𑀸𑀦𑀁 𑀯𑀸 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀅𑀢𑁆𑀢𑀦𑁄 𑀥𑀦𑁂𑀦𑀸𑀢𑀺 𑀇𑀤𑀁 𑀅𑀦𑀸𑀧𑀢𑁆𑀢𑀺𑀬𑀁 𑀅𑀥𑀺𑀓𑀁.

𑁩𑁮. 𑀉𑀚𑁆𑀛𑀸𑀦𑀲𑀜𑁆𑀜𑀻𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑀸𑀤𑀲𑀫𑁂 𑀉𑀚𑁆𑀛𑀸𑀦𑁂 𑀲𑀜𑁆𑀜𑀸 𑀉𑀚𑁆𑀛𑀸𑀦𑀲𑀜𑁆𑀜𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀉𑀚𑁆𑀛𑀸𑀦𑀲𑀜𑁆𑀜𑀻. 𑀇𑀥𑀸𑀧𑀺 𑀕𑀺𑀮𑀸𑀦𑁄 𑀦 𑀫𑀼𑀘𑁆𑀘𑀢𑀺, ‘‘𑀤𑀲𑁆𑀲𑀸𑀫𑀻’’𑀢𑀺 𑀯𑀸, ‘‘𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑀦, 𑀦 𑀉𑀚𑁆𑀛𑀸𑀦𑀲𑀜𑁆𑀜𑀺𑀲𑁆𑀲 𑀘 𑀅𑀦𑀸𑀧𑀢𑁆𑀢𑀺.

𑁩𑁯. 𑀓𑀩𑀴𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑁂𑀭𑀲𑀫𑁂 𑀦𑀸𑀢𑀺𑀫𑀳𑀦𑁆𑀢𑀦𑁆𑀢𑀺 𑀫𑀬𑀽𑀭𑀡𑁆𑀟𑀁 𑀅𑀢𑀺𑀫𑀳𑀦𑁆𑀢𑀁, 𑀓𑀼𑀓𑁆𑀓𑀼𑀝𑀡𑁆𑀟𑀁 𑀅𑀢𑀺𑀔𑀼𑀤𑁆𑀤𑀓𑀁, 𑀢𑁂𑀲𑀁 𑀯𑁂𑀫𑀚𑁆𑀛𑀧𑁆𑀧𑀫𑀸𑀡𑀁. 𑀫𑀽𑀮𑀔𑀸𑀤𑀦𑀻𑀬𑀸𑀤𑀺𑀪𑁂𑀤𑁂 𑀧𑀦 𑀲𑀩𑁆𑀩𑀔𑀚𑁆𑀚𑀓𑁂 𑀨𑀮𑀸𑀨𑀮𑁂 𑀘 𑀅𑀦𑀸𑀧𑀢𑁆𑀢𑀺.

𑁪𑁦. 𑀆𑀮𑁄𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀼𑀤𑁆𑀤𑀲𑀫𑁂 𑀧𑀭𑀺𑀫𑀡𑁆𑀟𑀮𑀦𑁆𑀢𑀺 𑀅𑀤𑀻𑀖𑀁. 𑀇𑀥 𑀧𑀦 𑀔𑀚𑁆𑀚𑀓𑀨𑀮𑀸𑀨𑀮𑁂𑀳𑀺 𑀲𑀤𑁆𑀥𑀺𑀁 𑀉𑀢𑁆𑀢𑀭𑀺𑀪𑀗𑁆𑀕𑁂𑀧𑀺 𑀅𑀦𑀸𑀧𑀢𑁆𑀢𑀺.

𑁪𑁧-𑁪𑁨. 𑀅𑀦𑀸𑀳𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀦𑁆𑀦𑀭𑀲𑀫𑁂 𑀅𑀦𑀸𑀳𑀝𑁂𑀢𑀺 𑀅𑀦𑀸𑀳𑀭𑀺𑀢𑁂, 𑀫𑀼𑀔𑀤𑁆𑀯𑀸𑀭𑀁 𑀅𑀲𑀫𑁆𑀧𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀲𑁄𑀴𑀲𑀫𑁂 𑀲𑀩𑁆𑀩𑀳𑀢𑁆𑀣𑀦𑁆𑀢𑀺 𑀲𑀓𑀮𑀁 𑀳𑀢𑁆𑀣𑀁.

𑁪𑁩. 𑀲𑀓𑀩𑀴𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀭𑀲𑀫𑁂 𑀲𑀓𑀩𑀴𑁂𑀦𑀸𑀢𑀺 𑀏𑀢𑁆𑀣 𑀬𑀢𑁆𑀢𑀓𑁂𑀦 𑀯𑀘𑀦𑀁 𑀅𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀢𑁆𑀢𑀓𑁂 𑀲𑀢𑀺 𑀓𑀣𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺. 𑀬𑁄 𑀧𑀦 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀳𑀭𑀺𑀝𑀓𑀸𑀤𑀻𑀦𑀺 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀢𑀺, 𑀬𑀢𑁆𑀢𑀓𑁂𑀦 𑀯𑀘𑀦𑀁 𑀅𑀧𑀭𑀺𑀧𑀼𑀡𑁆𑀡𑀁 𑀦 𑀳𑁄𑀢𑀺, 𑀢𑀢𑁆𑀢𑀓𑁂 𑀫𑀼𑀔𑀫𑁆𑀳𑀺 𑀲𑀢𑀺 𑀯𑀝𑁆𑀝𑀢𑀺.

𑁪𑁪. 𑀧𑀺𑀡𑁆𑀟𑀼𑀓𑁆𑀔𑁂𑀧𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀸𑀭𑀲𑀫𑁂 𑀧𑀺𑀡𑁆𑀟𑀼𑀓𑁆𑀔𑁂𑀧𑀓𑀦𑁆𑀢𑀺 𑀧𑀺𑀡𑁆𑀟𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀇𑀥𑀸𑀧𑀺 𑀔𑀚𑁆𑀚𑀓𑀨𑀮𑀸𑀨𑀮𑁂𑀲𑀼 𑀅𑀦𑀸𑀧𑀢𑁆𑀢𑀺.

𑁪𑁫. 𑀓𑀩𑀴𑀸𑀯𑀘𑁆𑀙𑁂𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀽𑀦𑀯𑀻𑀲𑀢𑀺𑀫𑁂 𑀓𑀩𑀴𑀸𑀯𑀘𑁆𑀙𑁂𑀤𑀓𑀦𑁆𑀢𑀺 𑀓𑀩𑀴𑀁 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸, 𑀇𑀥 𑀔𑀚𑁆𑀚𑀓𑀨𑀮𑀸𑀨𑀮𑁂𑀳𑀺 𑀲𑀤𑁆𑀥𑀺𑀁 𑀉𑀢𑁆𑀢𑀭𑀺𑀪𑀗𑁆𑀕𑁂𑀧𑀺 𑀅𑀦𑀸𑀧𑀢𑁆𑀢𑀺.

𑁪𑁬. 𑀅𑀯𑀕𑀡𑁆𑀟𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀯𑀻𑀲𑀢𑀺𑀫𑁂 𑀅𑀯𑀕𑀡𑁆𑀟𑀓𑀸𑀭𑀓𑀦𑁆𑀢𑀺 𑀫𑀓𑁆𑀓𑀝𑁄 𑀯𑀺𑀬 𑀕𑀡𑁆𑀟𑁂 𑀓𑀢𑁆𑀯𑀸 𑀓𑀢𑁆𑀯𑀸, 𑀇𑀥 𑀨𑀮𑀸𑀨𑀮𑀫𑀢𑁆𑀢𑀓𑁂 𑀅𑀦𑀸𑀧𑀢𑁆𑀢𑀺.

𑁪𑁭. 𑀳𑀢𑁆𑀣𑀦𑀺𑀤𑁆𑀥𑀼𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀯𑀻𑀲𑀢𑀺𑀫𑁂 𑀳𑀢𑁆𑀣𑀦𑀺𑀤𑁆𑀥𑀼𑀦𑀓𑀦𑁆𑀢𑀺 𑀳𑀢𑁆𑀣𑀁 𑀦𑀺𑀤𑁆𑀥𑀼𑀦𑀺𑀢𑁆𑀯𑀸 𑀦𑀺𑀤𑁆𑀥𑀼𑀦𑀺𑀢𑁆𑀯𑀸, 𑀅𑀦𑀸𑀧𑀢𑁆𑀢𑀺𑀬𑀁 𑀧𑀦𑁂𑀢𑁆𑀣 ‘‘𑀓𑀘𑀯𑀭𑀁 𑀙𑀟𑁆𑀟𑁂𑀦𑁆𑀢𑁄 𑀳𑀢𑁆𑀣𑀁 𑀦𑀺𑀤𑁆𑀥𑀼𑀦𑀸𑀢𑀻’’𑀢𑀺 (𑀧𑀸𑀘𑀺. 𑁬𑁨𑁩) 𑀇𑀤𑀁 𑀅𑀥𑀺𑀓𑀁.

𑁪𑁮. 𑀲𑀺𑀢𑁆𑀣𑀸𑀯𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑀸𑀯𑀻𑀲𑀢𑀺𑀫𑁂 𑀲𑀺𑀢𑁆𑀣𑀸𑀯𑀓𑀸𑀭𑀓𑀦𑁆𑀢𑀺 𑀲𑀺𑀢𑁆𑀣𑀸𑀦𑀺 𑀅𑀯𑀓𑀺𑀭𑀺𑀢𑁆𑀯𑀸 𑀅𑀯𑀓𑀺𑀭𑀺𑀢𑁆𑀯𑀸, 𑀇𑀥𑀸𑀧𑀺 ‘‘𑀓𑀘𑀯𑀭𑀁 𑀙𑀟𑁆𑀟𑁂𑀦𑁆𑀢𑁄 𑀲𑀺𑀢𑁆𑀣𑀁 𑀙𑀟𑁆𑀟𑀬𑀢𑀻’’𑀢𑀺 (𑀧𑀸𑀘𑀺. 𑁬𑁨𑁩) 𑀇𑀤𑀁 𑀅𑀦𑀸𑀧𑀢𑁆𑀢𑀺𑀬𑀁 𑀅𑀥𑀺𑀓𑀁.

𑁪𑁯. 𑀚𑀺𑀯𑁆𑀳𑀸𑀦𑀺𑀘𑁆𑀙𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑁂𑀯𑀻𑀲𑀢𑀺𑀫𑁂 𑀚𑀺𑀯𑁆𑀳𑀸𑀦𑀺𑀘𑁆𑀙𑀸𑀭𑀓𑀦𑁆𑀢𑀺 𑀚𑀺𑀯𑁆𑀳𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀦𑀺𑀘𑁆𑀙𑀸𑀭𑁂𑀢𑁆𑀯𑀸.

𑁫𑁦-𑁫𑁧. 𑀘𑀧𑀼𑀘𑀧𑀼𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀯𑀻𑀲𑀢𑀺𑀫𑁂 𑀘𑀧𑀼𑀘𑀧𑀼𑀓𑀸𑀭𑀓𑀦𑁆𑀢𑀺 𑀘𑀧𑀼 𑀘𑀧𑀽𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀓𑀢𑁆𑀯𑀸. 𑀧𑀜𑁆𑀘𑀯𑀻𑀲𑀢𑀺𑀫𑁂𑀧𑀺 𑀏𑀲𑁂𑀯 𑀦𑀬𑁄.

𑁫𑁨…𑀧𑁂…𑁫𑁪. 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀩𑁆𑀩𑀻𑀲𑀢𑀺𑀫𑁂 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀦𑁆𑀢𑀺 𑀳𑀢𑁆𑀣𑀁 𑀦𑀺𑀮𑁆𑀮𑁂𑀳𑀺𑀢𑁆𑀯𑀸 𑀦𑀺𑀮𑁆𑀮𑁂𑀳𑀺𑀢𑁆𑀯𑀸. 𑀪𑀼𑀜𑁆𑀚𑀦𑁆𑀢𑁂𑀦 𑀳𑀺 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀦𑀺𑀮𑁆𑀮𑁂𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀖𑀦𑀬𑀸𑀕𑀼𑀨𑀸𑀡𑀺𑀢𑀧𑀸𑀬𑀸𑀲𑀸𑀤𑀺𑀓𑁂 𑀧𑀦 𑀅𑀗𑁆𑀕𑀼𑀮𑀻𑀳𑀺 𑀕𑀳𑁂𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑁄 𑀫𑀼𑀔𑁂 𑀧𑀯𑁂𑀲𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀲𑀢𑁆𑀢𑀯𑀻𑀲𑀢𑀺𑀫𑀅𑀝𑁆𑀞𑀯𑀻𑀲𑀢𑀺𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀏𑀓𑀗𑁆𑀕𑀼𑀮𑀺𑀬𑀸𑀧𑀺 𑀧𑀢𑁆𑀢𑁄 𑀦 𑀦𑀺𑀮𑁆𑀮𑁂𑀳𑀺𑀢𑀩𑁆𑀩𑁄, 𑀏𑀓𑀑𑀝𑁆𑀞𑁄𑀧𑀺 𑀘 𑀚𑀺𑀯𑁆𑀳𑀸𑀬 𑀦 𑀦𑀺𑀮𑁆𑀮𑁂𑀳𑀺𑀢𑀩𑁆𑀩𑁄, 𑀑𑀝𑁆𑀞𑀫𑀁𑀲𑁂𑀳𑀺 𑀏𑀯 𑀧𑀦 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄 𑀧𑀯𑁂𑀲𑁂𑀢𑀼𑀁 𑀯𑀝𑁆𑀝𑀢𑀺.

𑁫𑁫. 𑀲𑀸𑀫𑀺𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀽𑀦𑀢𑀺𑀁𑀲𑀢𑀺𑀫𑁂 𑀦 𑀲𑀸𑀫𑀺𑀲𑁂𑀦𑀸𑀢𑀺 𑀏𑀢𑀁 𑀧𑀝𑀺𑀓𑀽𑀮𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀸 𑀲𑀗𑁆𑀖𑀺𑀓𑀫𑁆𑀧𑀺 𑀧𑀼𑀕𑁆𑀕𑀮𑀺𑀓𑀫𑁆𑀧𑀺 𑀕𑀺𑀳𑀺𑀲𑀦𑁆𑀢𑀓𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀲𑀗𑁆𑀔𑁄𑀧𑀺 𑀲𑀭𑀸𑀯𑀓𑀫𑁆𑀧𑀺 𑀣𑀸𑀮𑀓𑀫𑁆𑀧𑀺 𑀦 𑀕𑀳𑁂𑀢𑀩𑁆𑀩𑀫𑁂𑀯, 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀳𑀢𑁆𑀣𑀲𑁆𑀲 𑀏𑀓𑀤𑁂𑀲𑁄 𑀆𑀫𑀺𑀲𑀫𑀓𑁆𑀔𑀺𑀢𑁄 𑀦 𑀳𑁄𑀢𑀺, 𑀢𑁂𑀦 𑀧𑀤𑁂𑀲𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀇𑀥 ‘‘𑀥𑁄𑀯𑀺𑀲𑁆𑀲𑀸𑀫𑀻𑀢𑀺 𑀯𑀸, 𑀥𑁄𑀯𑀸𑀧𑁂𑀲𑁆𑀲𑀸𑀫𑀻𑀢𑀺 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 (𑀧𑀸𑀘𑀺. 𑁬𑁩𑁧) 𑀇𑀤𑀁 𑀅𑀦𑀸𑀧𑀢𑁆𑀢𑀺𑀬𑀁 𑀅𑀥𑀺𑀓𑀁.

𑁫𑁬. 𑀲𑀲𑀺𑀢𑁆𑀣𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀺𑀁𑀲𑀢𑀺𑀫𑁂 ‘‘𑀉𑀤𑁆𑀥𑀭𑀺𑀢𑁆𑀯𑀸 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀝𑀺𑀕𑁆𑀕𑀳𑁂 𑀯𑀸 𑀦𑀻𑀳𑀭𑀺𑀢𑁆𑀯𑀸 𑀯𑀸 𑀙𑀟𑁆𑀟𑁂𑀢𑀻’’𑀢𑀺 𑀇𑀤𑀁 𑀅𑀦𑀸𑀧𑀢𑁆𑀢𑀺𑀬𑀁 𑀅𑀥𑀺𑀓𑀁. 𑀢𑀢𑁆𑀣 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸𑀢𑀺 𑀲𑀺𑀢𑁆𑀣𑀸𑀦𑀺 𑀉𑀤𑀓𑀢𑁄 𑀉𑀤𑁆𑀥𑀭𑀺𑀢𑁆𑀯𑀸, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀉𑀤𑀓𑀁 𑀙𑀟𑁆𑀟𑁂𑀢𑀺. 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸𑀢𑀺 𑀲𑀺𑀢𑁆𑀣𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀤𑀓𑀕𑀢𑀺𑀓𑀸𑀦𑀺 𑀓𑀢𑁆𑀯𑀸 𑀙𑀟𑁆𑀟𑁂𑀢𑀺. 𑀧𑀝𑀺𑀕𑁆𑀕𑀳𑁂 𑀯𑀸𑀢𑀺 𑀧𑀝𑀺𑀕𑁆𑀕𑀳𑁂𑀦 𑀧𑀝𑀺𑀘𑁆𑀙𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑁂 𑀙𑀟𑁆𑀟𑁂𑀢𑀺. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀙𑀟𑁆𑀟𑁂𑀢𑀺, 𑀏𑀯𑀁 𑀙𑀟𑁆𑀟𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀢𑀺𑀁𑀲𑀪𑁄𑀚𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁭. 𑀙𑀢𑁆𑀢𑀧𑀸𑀡𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀥𑀫𑁆𑀫𑀤𑁂𑀲𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀧𑀞𑀫𑁂 𑀬𑀁𑀓𑀺𑀜𑁆𑀘𑀺 𑀙𑀢𑁆𑀢𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀙𑀢𑁆𑀢𑀧𑀸𑀡𑀺. 𑀲𑁄 𑀢𑀁 𑀙𑀢𑁆𑀢𑀁 𑀬𑀢𑁆𑀣𑀓𑀢𑁆𑀣𑀘𑀺 𑀲𑀭𑀻𑀭𑀸𑀯𑀬𑀯𑁂 𑀞𑀧𑁂𑀢𑁆𑀯𑀸𑀧𑀺 𑀬𑀸𑀯 𑀳𑀢𑁆𑀣𑁂𑀦 𑀦 𑀫𑀼𑀜𑁆𑀘𑀢𑀺, 𑀢𑀸𑀯𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑀲𑁆𑀲 𑀅𑀜𑁆𑀜𑁄 𑀙𑀢𑁆𑀢𑀁 𑀥𑀸𑀭𑁂𑀢𑀺, 𑀧𑀲𑁆𑀲𑁂 𑀯𑀸 𑀞𑀺𑀢𑀁 𑀳𑁄𑀢𑀺, 𑀳𑀢𑁆𑀣𑀢𑁄 𑀅𑀧𑀕𑀢𑀫𑀢𑁆𑀢𑁂 𑀙𑀢𑁆𑀢𑀧𑀸𑀡𑀺 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀲 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀘𑁂𑀢𑁆𑀣 𑀧𑀤𑀲𑁄𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁫𑁮-𑁫𑁯. 𑀤𑀡𑁆𑀟𑀧𑀸𑀡𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀤𑀡𑁆𑀟𑁄 𑀦𑀸𑀫 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑁄, 𑀤𑀡𑁆𑀟𑀧𑀸𑀡𑀺𑀪𑀸𑀯𑁄 𑀧𑀦𑀲𑁆𑀲 𑀙𑀢𑁆𑀢𑀧𑀸𑀡𑀺𑀫𑁆𑀳𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀢𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑀺𑀁 𑀲𑀦𑁆𑀦𑀳𑀺𑀢𑁆𑀯𑀸 𑀞𑀺𑀢𑁄𑀧𑀺 𑀳𑀺 𑀲𑀢𑁆𑀣𑀧𑀸𑀡𑀺𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺.

𑁬𑁦. 𑀆𑀯𑀼𑀥𑀧𑀸𑀡𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀲𑀩𑁆𑀩𑀸𑀧𑀺 𑀥𑀦𑀼𑀯𑀺𑀓𑀢𑀺 𑀲𑀤𑁆𑀥𑀺𑀁 𑀲𑀭𑀯𑀺𑀓𑀢𑀺𑀬𑀸 𑀆𑀯𑀼𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀲𑀤𑁆𑀥𑀺𑀁 𑀯𑀸 𑀲𑀭𑁂𑀦 𑀥𑀦𑀼𑀁 𑀕𑀳𑁂𑀢𑁆𑀯𑀸, 𑀲𑀼𑀤𑁆𑀥𑀥𑀦𑀼𑀁 𑀯𑀸 𑀲𑀼𑀤𑁆𑀥𑀲𑀭𑀁 𑀯𑀸 𑀲𑀚𑀺𑀬𑀥𑀦𑀼𑀁 𑀯𑀸 𑀦𑀺𑀚𑁆𑀚𑀺𑀬𑀥𑀦𑀼𑀁 𑀯𑀸 𑀕𑀳𑁂𑀢𑁆𑀯𑀸 𑀞𑀺𑀢𑀲𑁆𑀲 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑀲𑁆𑀲 𑀥𑀦𑀼 𑀔𑀦𑁆𑀥𑁂𑀧𑀺 𑀧𑀝𑀺𑀫𑀼𑀓𑁆𑀓𑀁 𑀳𑁄𑀢𑀺, 𑀬𑀸𑀯 𑀦 𑀕𑀡𑁆𑀳𑀸𑀢𑀺, 𑀢𑀸𑀯 𑀯𑀝𑁆𑀝𑀢𑀺.

𑁬𑁧-𑁬𑁨. 𑀧𑀸𑀤𑀼𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀧𑀸𑀤𑀼𑀓𑀸𑀭𑀼𑀴𑁆𑀳𑀲𑁆𑀲𑀸𑀢𑀺 𑀙𑀢𑁆𑀢𑀤𑀡𑁆𑀟𑀓𑁂 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀁 𑀅𑀧𑁆𑀧𑀯𑁂𑀲𑁂𑀢𑁆𑀯𑀸 𑀓𑁂𑀯𑀮𑀁 𑀅𑀓𑁆𑀓𑀦𑁆𑀢𑀲𑁆𑀲 𑀯𑀸, 𑀧𑀯𑁂𑀲𑁂𑀢𑁆𑀯𑀸 𑀞𑀸𑀦𑀯𑀲𑁂𑀦 𑀧𑀝𑀺𑀫𑀼𑀓𑁆𑀓𑀲𑁆𑀲 𑀯𑀸. 𑀙𑀝𑁆𑀞𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀧𑀦 𑀬𑁆𑀯𑀸𑀬𑀁 𑀧𑀡𑁆𑀳𑀺𑀓𑀩𑀦𑁆𑀥𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀞𑀸𑀦𑀯𑀲𑁂𑀦 ‘‘𑀑𑀫𑀼𑀓𑁆𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸𑀧𑀺 𑀦 𑀯𑀝𑁆𑀝𑀢𑀺.

𑁬𑁩. 𑀬𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀲𑀘𑁂𑀧𑀺 𑀤𑁆𑀯𑀻𑀳𑀺 𑀚𑀦𑁂𑀳𑀺 𑀳𑀢𑁆𑀣𑀲𑀗𑁆𑀖𑀸𑀝𑁂𑀦 𑀕𑀳𑀺𑀢𑁄, 𑀲𑀸𑀝𑀓𑁂 𑀯𑀸 𑀞𑀧𑁂𑀢𑁆𑀯𑀸 𑀯𑀁𑀲𑁂𑀦 𑀯𑀬𑁆𑀳𑀢𑀺, 𑀅𑀬𑀼𑀢𑁆𑀢𑁂 𑀯𑀸 𑀯𑀬𑁆𑀳𑀸𑀤𑀺𑀓𑁂 𑀬𑀸𑀦𑁂 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀯𑀸 𑀞𑀧𑀺𑀢𑁂 𑀘𑀓𑁆𑀓𑀫𑀢𑁆𑀢𑁂𑀧𑀺 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀬𑀸𑀦𑀕𑀢𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀲𑀘𑁂 𑀧𑀦 𑀤𑁆𑀯𑁂𑀧𑀺 𑀏𑀓𑀬𑀸𑀦𑁂 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀯𑀝𑁆𑀝𑀢𑀺. 𑀯𑀺𑀲𑀼𑀁 𑀦𑀺𑀲𑀺𑀦𑁆𑀦𑁂𑀲𑀼𑀧𑀺 𑀉𑀘𑁆𑀘𑁂 𑀬𑀸𑀦𑁂 𑀦𑀺𑀲𑀺𑀦𑁆𑀦𑁂𑀦 𑀦𑀻𑀘𑁂 𑀦𑀺𑀲𑀺𑀦𑁆𑀦𑀲𑁆𑀲 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺, 𑀲𑀫𑀧𑁆𑀧𑀫𑀸𑀡𑁂𑀧𑀺 𑀯𑀝𑁆𑀝𑀢𑀺, 𑀢𑀣𑀸 𑀧𑀼𑀭𑀺𑀫𑁂 𑀦𑀺𑀲𑀺𑀦𑁆𑀦𑁂𑀦 𑀧𑀘𑁆𑀙𑀺𑀫𑁂 𑀦𑀺𑀲𑀺𑀦𑁆𑀦𑀲𑁆𑀲. 𑀧𑀘𑁆𑀙𑀺𑀫𑁂 𑀧𑀦 𑀉𑀘𑁆𑀘𑀢𑀭𑁂𑀧𑀺 𑀦𑀺𑀲𑀺𑀦𑁆𑀦𑁂𑀦 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑁬𑁪. 𑀲𑀬𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀲𑀬𑀦𑀕𑀢𑀲𑁆𑀲𑀸𑀢𑀺 𑀅𑀦𑁆𑀢𑀫𑀲𑁄 𑀓𑀝𑀲𑀸𑀭𑀓𑁂𑀧𑀺 𑀧𑀓𑀢𑀺𑀪𑀽𑀫𑀺𑀬𑀫𑁆𑀧𑀺 𑀦𑀺𑀧𑀦𑁆𑀦𑀲𑁆𑀲 𑀉𑀘𑁆𑀘𑁂𑀧𑀺 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀪𑀽𑀫𑀺𑀧𑁆𑀧𑀤𑁂𑀲𑁂 𑀯𑀸 𑀞𑀺𑀢𑁂𑀦 𑀦𑀺𑀲𑀺𑀦𑁆𑀦𑁂𑀦 𑀯𑀸 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀬𑀦𑀕𑀢𑁂𑀦 𑀧𑀦 𑀲𑀬𑀦𑀕𑀢𑀲𑁆𑀲 𑀉𑀘𑁆𑀘𑀢𑀭𑁂 𑀯𑀸 𑀲𑀫𑀧𑁆𑀧𑀫𑀸𑀡𑁂 𑀯𑀸 𑀦𑀺𑀧𑀦𑁆𑀦𑁂𑀦 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀧𑀦𑁆𑀦𑁂𑀦 𑀧𑀦 𑀞𑀺𑀢𑀲𑁆𑀲 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀦𑀺𑀧𑀦𑁆𑀦𑀲𑁆𑀲 𑀯𑀸, 𑀦𑀺𑀲𑀺𑀦𑁆𑀦𑁂𑀦 𑀘 𑀞𑀺𑀢𑀲𑁆𑀲 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸, 𑀞𑀺𑀢𑁂𑀦 𑀞𑀺𑀢𑀲𑁆𑀲𑁂𑀯 𑀯𑀝𑁆𑀝𑀢𑀺.

𑁬𑁫. 𑀧𑀮𑁆𑀮𑀢𑁆𑀣𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀳𑀢𑁆𑀣𑀧𑀮𑁆𑀮𑀢𑁆𑀣𑀺𑀓𑀸𑀤𑀻𑀲𑀼 𑀬𑀸𑀬 𑀓𑀸𑀬𑀘𑀺 𑀦𑀺𑀲𑀺𑀦𑁆𑀦𑀲𑁆𑀲 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑁬𑁬. 𑀯𑁂𑀞𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀯𑁂𑀞𑀺𑀢𑀲𑀻𑀲𑀲𑁆𑀲𑀸𑀢𑀺 𑀤𑀼𑀲𑁆𑀲𑀯𑁂𑀞𑁂𑀦 𑀯𑀸 𑀫𑁄𑀴𑀺𑀆𑀤𑀻𑀳𑀺 𑀯𑀸 𑀬𑀣𑀸 𑀓𑁂𑀲𑀦𑁆𑀢𑁄 𑀦 𑀤𑀺𑀲𑁆𑀲𑀢𑀺, 𑀏𑀯𑀁 𑀯𑁂𑀞𑀺𑀢𑀲𑀻𑀲𑀲𑁆𑀲, 𑀢𑁂𑀦𑁂𑀯𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑀁 ‘‘𑀓𑁂𑀲𑀦𑁆𑀢𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀤𑁂𑀲𑁂𑀢𑀻’’𑀢𑀺 (𑀧𑀸𑀘𑀺. 𑁬𑁪𑁩) 𑀯𑀼𑀢𑁆𑀢𑀁.

𑁬𑁭. 𑀑𑀕𑀼𑀡𑁆𑀞𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀸𑀤𑀲𑀫𑁂 𑀑𑀕𑀼𑀡𑁆𑀞𑀺𑀢𑀲𑀻𑀲𑀲𑁆𑀲𑀸𑀢𑀺 𑀲𑀲𑀻𑀲𑀁 𑀧𑀸𑀭𑀼𑀢𑀲𑁆𑀲, 𑀅𑀦𑀸𑀧𑀢𑁆𑀢𑀺𑀬𑀁 𑀧𑀦𑁂𑀢𑁆𑀣 ‘‘𑀲𑀻𑀲𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀤𑁂𑀲𑁂𑀢𑀻’’𑀢𑀺 (𑀧𑀸𑀘𑀺. 𑁬𑁪𑁪) 𑀅𑀥𑀺𑀓𑀁.

𑁬𑁮. 𑀙𑀫𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑀸𑀤𑀲𑀫𑁂 𑀙𑀫𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀪𑀽𑀫𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸. 𑀆𑀲𑀦𑁂𑀢𑀺 𑀅𑀦𑁆𑀢𑀫𑀲𑁄 𑀯𑀢𑁆𑀣𑀫𑁆𑀧𑀺 𑀢𑀺𑀡𑀸𑀦𑀺𑀧𑀺 𑀲𑀦𑁆𑀣𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲.

𑁬𑁯. 𑀦𑀻𑀘𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑁂𑀭𑀲𑀫𑁂 𑀉𑀘𑁆𑀘𑁂 𑀆𑀲𑀦𑁂𑀢𑀺 𑀅𑀦𑁆𑀢𑀫𑀲𑁄 𑀪𑀽𑀫𑀺𑀧𑁆𑀧𑀤𑁂𑀲𑁂𑀧𑀺 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑀲𑁆𑀲.

𑁭𑁦. 𑀞𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀼𑀤𑁆𑀤𑀲𑀫𑁂 𑀦 𑀞𑀺𑀢𑁄 𑀦𑀺𑀲𑀺𑀦𑁆𑀦𑀲𑁆𑀲𑀸𑀢𑀺 𑀲𑀘𑁂 𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀞𑀺𑀢𑀁 𑀤𑀳𑀭𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀫𑀳𑀸𑀣𑁂𑀭𑁄 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀦 𑀓𑀣𑁂𑀢𑀩𑁆𑀩𑀁. 𑀕𑀸𑀭𑀯𑁂𑀦 𑀧𑀦 𑀣𑁂𑀭𑀁 ‘‘𑀉𑀝𑁆𑀞𑀳𑀺𑀢𑁆𑀯𑀸 𑀧𑀼𑀘𑁆𑀙𑀸’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 ‘‘𑀧𑀲𑁆𑀲𑁂 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑁭𑁧. 𑀧𑀘𑁆𑀙𑀢𑁄𑀕𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀦𑁆𑀦𑀭𑀲𑀫𑁂 𑀲𑀘𑁂 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀢𑀲𑁆𑀲 𑀢𑀁 𑀅𑀓𑀣𑁂𑀢𑁆𑀯𑀸 ‘‘𑀧𑀘𑁆𑀙𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀓𑀣𑁂𑀢𑀩𑁆𑀩𑀁. 𑀲𑀤𑁆𑀥𑀺𑀁 𑀉𑀕𑁆𑀕𑀳𑀺𑀢𑀥𑀫𑁆𑀫𑀁 𑀧𑀦 𑀲𑀚𑁆𑀛𑀸𑀬𑀺𑀢𑀼𑀁, 𑀲𑀫𑀥𑀼𑀭𑁂𑀦 𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑁭𑁨. 𑀉𑀧𑁆𑀧𑀣𑁂𑀦𑀕𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑁄𑀴𑀲𑀫𑁂 𑀦 𑀉𑀧𑁆𑀧𑀣𑁂𑀦𑀸𑀢𑀺 𑀏𑀢𑁆𑀣 𑀲𑀘𑁂 𑀤𑁆𑀯𑁂𑀧𑀺 𑀲𑀓𑀝𑀫𑀕𑁆𑀕𑀲𑁆𑀫𑀺𑀁 𑀏𑀓𑁂𑀓𑀘𑀓𑁆𑀓𑀧𑀣𑁂𑀦 𑀯𑀸 𑀉𑀧𑁆𑀧𑀣𑁂𑀦 𑀯𑀸 𑀲𑀫𑀥𑀼𑀭𑀁 𑀕𑀘𑁆𑀙𑀦𑁆𑀢𑀺, 𑀯𑀝𑁆𑀝𑀢𑀺.

𑁭𑁩. 𑀞𑀺𑀢𑁄𑀉𑀘𑁆𑀘𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀭𑀲𑀫𑁂 ‘‘𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺 𑀅𑀦𑀸𑀧𑀢𑁆𑀢𑀺𑀬𑀁 𑀲𑀘𑁂 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑀳𑀲𑀸 𑀉𑀘𑁆𑀘𑀸𑀭𑁄 𑀯𑀸 𑀧𑀲𑁆𑀲𑀸𑀯𑁄 𑀯𑀸 𑀦𑀺𑀓𑁆𑀔𑀫𑀢𑀺, 𑀅𑀲𑀜𑁆𑀘𑀺𑀘𑁆𑀘 𑀓𑀢𑁄 𑀦𑀸𑀫 𑀳𑁄𑀢𑀺.

𑁭𑁪. 𑀳𑀭𑀺𑀢𑁂𑀉𑀘𑁆𑀘𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀸𑀭𑀲𑀫𑁂 𑀬𑀫𑁆𑀧𑀺 𑀚𑀻𑀯𑀫𑀸𑀦𑀭𑀼𑀓𑁆𑀔𑀲𑁆𑀲 𑀫𑀽𑀮𑀁 𑀧𑀣𑀯𑀺𑀬𑀁 𑀤𑀺𑀲𑁆𑀲𑀫𑀸𑀦𑀁 𑀕𑀘𑁆𑀙𑀢𑀺, 𑀲𑀸𑀔𑀸 𑀯𑀸 𑀪𑀽𑀫𑀺𑀮𑀕𑁆𑀕𑀸 𑀕𑀘𑁆𑀙𑀢𑀺, 𑀲𑀩𑁆𑀩𑀁 𑀳𑀭𑀺𑀢𑀲𑀗𑁆𑀔𑀸𑀢𑀫𑁂𑀯. 𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀦 𑀅𑀧𑁆𑀧𑀳𑀭𑀺𑀢𑀝𑁆𑀞𑀸𑀦𑁂 𑀧𑀸𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀅𑀧𑁆𑀧𑀳𑀭𑀺𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀲𑀳𑀲𑀸 𑀦𑀺𑀓𑁆𑀔𑀫𑀢𑀺, 𑀕𑀺𑀮𑀸𑀦𑀝𑁆𑀞𑀸𑀦𑁂 𑀞𑀺𑀢𑁄 𑀳𑁄𑀢𑀺, ‘‘𑀅𑀧𑁆𑀧𑀳𑀭𑀺𑀢𑁂 𑀓𑀢𑁄 𑀳𑀭𑀺𑀢𑀁 𑀑𑀢𑁆𑀣𑀭𑀢𑀻’’𑀢𑀺 (𑀧𑀸𑀘𑀺. 𑁬𑁫𑁨) 𑀇𑀤𑀫𑁂𑀢𑁆𑀣 𑀅𑀦𑀸𑀧𑀢𑁆𑀢𑀺𑀬𑀁 𑀅𑀥𑀺𑀓𑀁. 𑀢𑀢𑁆𑀣 𑀲𑀘𑁂𑀧𑀺 𑀅𑀧𑁆𑀧𑀳𑀭𑀺𑀢𑀁 𑀅𑀮𑀪𑀦𑁆𑀢𑁂𑀦 𑀢𑀺𑀡𑀡𑁆𑀟𑀼𑀧𑀓𑀁 𑀯𑀸 𑀧𑀮𑀮𑀡𑁆𑀟𑀼𑀧𑀓𑀁 𑀯𑀸 𑀞𑀧𑁂𑀢𑁆𑀯𑀸 𑀓𑀢𑁄 𑀧𑀘𑁆𑀙𑀸 𑀳𑀭𑀺𑀢𑀁 𑀑𑀢𑁆𑀣𑀭𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀔𑁂𑀴𑁂𑀦 𑀘𑁂𑀢𑁆𑀣 𑀲𑀺𑀗𑁆𑀖𑀸𑀡𑀺𑀓𑀸𑀧𑀺 𑀲𑀗𑁆𑀕𑀳𑀺𑀢𑀸.

𑁭𑁫. 𑀉𑀤𑀓𑁂𑀉𑀘𑁆𑀘𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀽𑀦𑀯𑀻𑀲𑀢𑀺𑀫𑁂 𑀦 𑀉𑀤𑀓𑁂𑀢𑀺 𑀏𑀢𑀁 𑀧𑀭𑀺𑀪𑁄𑀕𑀉𑀤𑀓𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀘𑁆𑀘𑀓𑀼𑀝𑀺𑀲𑀫𑀼𑀤𑁆𑀤𑀸𑀤𑀺𑀉𑀤𑀓𑁂𑀲𑀼 𑀧𑀦 𑀅𑀧𑀭𑀺𑀪𑁄𑀕𑁂𑀲𑀼 𑀅𑀦𑀸𑀧𑀢𑁆𑀢𑀺. 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀲𑀫𑀦𑁆𑀢𑀢𑁄 𑀉𑀤𑀓𑁄𑀖𑁂 𑀚𑀸𑀢𑁂 𑀅𑀦𑀼𑀤𑀓𑀝𑁆𑀞𑀸𑀦𑀁 𑀅𑀮𑀪𑀦𑁆𑀢𑁂𑀦 𑀉𑀤𑀓𑁂 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀥𑀸𑀧𑀺 ‘‘𑀣𑀮𑁂 𑀓𑀢𑁄 𑀉𑀤𑀓𑀁 𑀑𑀢𑁆𑀣𑀭𑀢𑀻’’𑀢𑀺 (𑀧𑀸𑀘𑀺. 𑁬𑁫𑁪) 𑀇𑀤𑀁 𑀅𑀦𑀸𑀧𑀢𑁆𑀢𑀺𑀬𑀁 𑀅𑀥𑀺𑀓𑀁, 𑀲𑁂𑀲𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀉𑀢𑁆𑀢𑀸𑀦𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀺𑀤𑀻𑀧𑀦𑀢𑁆𑀣𑀸𑀬 𑀧𑀦𑁂𑀢𑁆𑀣 𑀇𑀤𑀁 𑀧𑀓𑀺𑀡𑁆𑀡𑀓𑀁 𑁋 𑀉𑀚𑁆𑀚𑀕𑁆𑀖𑀺𑀓𑀉𑀘𑁆𑀘𑀸𑀲𑀤𑁆𑀤𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺, 𑀲𑀓𑀩𑀴𑁂𑀦 𑀫𑀼𑀔𑁂𑀦 𑀩𑁆𑀬𑀸𑀳𑀭𑀡𑀁 𑀏𑀓𑀁, 𑀙𑀫𑀸𑀦𑀻𑀘𑀸𑀲𑀦𑀦𑀺𑀲𑀺𑀦𑁆𑀦𑀞𑀺𑀢𑀧𑀘𑁆𑀙𑀢𑁄𑀕𑀫𑀦𑀉𑀧𑁆𑀧𑀣𑀕𑀫𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀧𑀜𑁆𑀘𑀸𑀢𑀺 𑀇𑀫𑀸𑀦𑀺 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀸𑀦𑀺, 𑀏𑀓𑁂𑀓𑀫𑁂𑀢𑁆𑀣 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀁. 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀁. 𑀙𑀢𑁆𑀢𑀧𑀸𑀡𑀺𑀤𑀡𑁆𑀟𑀧𑀸𑀡𑀺𑀲𑀢𑁆𑀣𑀧𑀸𑀡𑀺𑀆𑀯𑀼𑀥𑀧𑀸𑀡𑀺𑀧𑀸𑀤𑀼𑀓𑀸𑀉𑀧𑀸𑀳𑀦𑀬𑀸𑀦𑀲𑀬𑀦𑀧𑀮𑁆𑀮𑀢𑁆𑀣𑀺𑀓𑀯𑁂𑀞𑀺𑀢𑀑𑀕𑀼𑀡𑁆𑀞𑀺𑀢𑀦𑀸𑀫𑀓𑀸𑀦𑀺 𑀏𑀓𑀸𑀤𑀲 𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀸𑀦𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀸𑀦𑀺, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸𑀦𑀺, 𑀲𑀘𑀺𑀢𑁆𑀢𑀓𑀸𑀦𑀺, 𑀮𑁄𑀓𑀯𑀚𑁆𑀚𑀸𑀦𑀺, 𑀯𑀘𑀻𑀓𑀫𑁆𑀫𑀸𑀦𑀺, 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀤𑀼𑀓𑁆𑀔𑀯𑁂𑀤𑀦𑀸𑀦𑀺. 𑀲𑁂𑀲𑀸𑀦𑀺 𑀢𑁂𑀧𑀡𑁆𑀡𑀸𑀲 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀉𑀝𑁆𑀞𑀸𑀦𑀸𑀤𑀺𑀪𑁂𑀤𑀸𑀦𑀻𑀢𑀺.

𑀏𑀓𑀽𑀦𑀯𑀻𑀲𑀢𑀺𑀥𑀫𑁆𑀫𑀤𑁂𑀲𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀲𑁂𑀔𑀺𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀓𑀭𑀡𑀲𑀫𑀣𑀯𑀡𑁆𑀡𑀦𑀸

𑀅𑀥𑀺𑀓𑀭𑀡𑀲𑀫𑀣𑁂𑀲𑀼 𑀲𑀢𑁆𑀢𑀸𑀢𑀺 𑀢𑁂𑀲𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀥𑀺𑀓𑀭𑀡𑀸𑀦𑀺 𑀲𑀫𑁂𑀦𑁆𑀢𑀺 𑀯𑀽𑀧𑀲𑀫𑁂𑀦𑁆𑀢𑀻𑀢𑀺 𑀅𑀥𑀺𑀓𑀭𑀡𑀲𑀫𑀣𑀸. 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑀗𑁆𑀔𑀸𑀢𑀸𑀲𑀼 𑀘 𑀅𑀯𑀲𑁂𑀲𑀸𑀥𑀺𑀓𑀭𑀡𑀢𑁆𑀢𑀬𑀧𑀘𑁆𑀘𑀬𑀸𑀲𑀼 𑀘 𑀆𑀧𑀢𑁆𑀢𑀻𑀲𑀼 𑀧𑀭𑀺𑀲𑀼𑀤𑁆𑀥𑀪𑀸𑀯𑀁 𑀧𑀼𑀘𑁆𑀙𑀦𑀢𑁆𑀣𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀉𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀁. 𑀅𑀥𑀺𑀓𑀭𑀡𑀸𑀦𑀦𑁆𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀦𑁆𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁. 𑀲𑀫𑀣𑀸𑀬 𑀯𑀽𑀧𑀲𑀫𑀸𑀬𑀸𑀢𑀺 𑀲𑀫𑀦𑀢𑁆𑀣𑀜𑁆𑀘𑁂𑀯 𑀯𑀽𑀧𑀲𑀫𑀦𑀢𑁆𑀣𑀜𑁆𑀘 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀤𑀸𑀢𑀩𑁆𑀩𑁄…𑀧𑁂… 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑀇𑀫𑁂 𑀲𑀢𑁆𑀢 𑀲𑀫𑀣𑀸 𑀤𑀸𑀢𑀩𑁆𑀩𑀸. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀅𑀥𑀺𑀓𑀭𑀡𑁂𑀲𑀼 𑀢𑀸𑀯 ‘‘𑀥𑀫𑁆𑀫𑁄’’𑀢𑀺 𑀯𑀸, ‘‘𑀅𑀥𑀫𑁆𑀫𑁄’’𑀢𑀺 𑀯𑀸 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀯𑀺𑀯𑀤𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑁄 𑀯𑀺𑀯𑀸𑀤𑁄, 𑀇𑀤𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀦𑀸𑀫. 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀤𑀺𑀝𑁆𑀞𑀺𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸 𑀅𑀦𑀼𑀯𑀤𑀦𑁆𑀢𑀸𑀦𑀁 𑀬𑁄 𑀅𑀦𑀼𑀯𑀸𑀤𑁄 𑀉𑀧𑀯𑀤𑀦𑀸 𑀘𑁂𑀯 𑀘𑁄𑀤𑀦𑀸 𑀘, 𑀇𑀤𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀦𑀸𑀫. 𑀫𑀸𑀢𑀺𑀓𑀸𑀬 𑀆𑀕𑀢𑀸 𑀧𑀜𑁆𑀘, 𑀯𑀺𑀪𑀗𑁆𑀕𑁂 𑀤𑁆𑀯𑁂𑀢𑀺 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀦𑀸𑀫. 𑀬𑀁 𑀲𑀗𑁆𑀖𑀲𑁆𑀲 𑀅𑀧𑀮𑁄𑀓𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀓𑀭𑀡𑀁, 𑀇𑀤𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀦𑀸𑀫.

𑀢𑀢𑁆𑀣 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 (𑀘𑀽𑀴𑀯. 𑁨𑁨𑁮) 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘, 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀲𑀫𑁆𑀫𑀫𑀸𑀦𑀁 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀁𑀬𑁂𑀯 𑀯𑀸, 𑀅𑀜𑁆𑀜𑀢𑁆𑀣 𑀯𑀽𑀧𑀲𑀫𑁂𑀢𑀼𑀁 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀸, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑀺𑀢𑀁, 𑀢𑀢𑁆𑀣 𑀲𑀗𑁆𑀖𑁂𑀦 𑀯𑀸 𑀯𑀽𑀧𑀲𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀢𑀢𑁆𑀣𑁂𑀯 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀢𑀧𑀼𑀕𑁆𑀕𑀮𑁂𑀳𑀺 𑀯𑀸 𑀯𑀺𑀦𑀺𑀘𑁆𑀙𑀺𑀢𑀁 𑀲𑀫𑁆𑀫𑀢𑀺, 𑀏𑀯𑀁 𑀲𑀫𑁆𑀫𑀫𑀸𑀦𑁂 𑀘 𑀧𑀦 𑀢𑀲𑁆𑀫𑀺𑀁 𑀬𑀸 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀥𑀫𑁆𑀫𑀲𑀫𑁆𑀫𑀼𑀔𑀢𑀸 𑀯𑀺𑀦𑀬𑀲𑀫𑁆𑀫𑀼𑀔𑀢𑀸 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸 𑀅𑀬𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀦𑀸𑀫. 𑀢𑀢𑁆𑀣 𑀘 𑀓𑀸𑀭𑀓𑀲𑀗𑁆𑀖𑀲𑁆𑀲 𑀲𑀗𑁆𑀖𑀲𑀸𑀫𑀕𑁆𑀕𑀺𑀯𑀲𑁂𑀦 𑀲𑀫𑁆𑀫𑀼𑀔𑀻𑀪𑀸𑀯𑁄 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀲𑀫𑁂𑀢𑀩𑁆𑀩𑀲𑁆𑀲 𑀯𑀢𑁆𑀣𑀼𑀦𑁄 𑀪𑀽𑀢𑀢𑀸 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀬𑀣𑀸 𑀢𑀁 𑀲𑀫𑁂𑀢𑀩𑁆𑀩𑀁, 𑀢𑀣𑁂𑀯𑀲𑁆𑀲 𑀲𑀫𑀦𑀁 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀬𑁄 𑀘 𑀯𑀺𑀯𑀤𑀢𑀺, 𑀬𑁂𑀦 𑀘 𑀯𑀺𑀯𑀤𑀢𑀺, 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁄 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀉𑀩𑁆𑀩𑀸𑀳𑀺𑀓𑀸𑀬 𑀯𑀽𑀧𑀲𑀫𑀦𑁂 𑀧𑀦𑁂𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀧𑀭𑀺𑀳𑀸𑀬𑀢𑀺, 𑀏𑀯𑀁 𑀢𑀸𑀯 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀲𑀫𑁆𑀫𑀢𑀺.

𑀲𑀘𑁂 𑀧𑀦𑁂𑀯𑀫𑁆𑀧𑀺 𑀦 𑀲𑀫𑁆𑀫𑀢𑀺, 𑀅𑀣 𑀦𑀁 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀢𑀸 𑀪𑀺𑀓𑁆𑀔𑀽 ‘‘𑀦 𑀫𑀬𑀁 𑀲𑀓𑁆𑀓𑁄𑀫 𑀯𑀽𑀧𑀲𑀫𑁂𑀢𑀼’’𑀦𑁆𑀢𑀺 𑀲𑀗𑁆𑀖𑀲𑁆𑀲𑁂𑀯 𑀦𑀺𑀬𑁆𑀬𑀸𑀢𑁂𑀦𑁆𑀢𑀺, 𑀢𑀢𑁄 𑀲𑀗𑁆𑀖𑁄 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀢𑁂𑀦 𑀕𑀼𑀴𑁆𑀳𑀓𑀯𑀺𑀯𑀝𑁆𑀝𑀓𑀲𑀓𑀡𑁆𑀡𑀚𑀧𑁆𑀧𑀓𑁂𑀲𑀼 𑀢𑀻𑀲𑀼 𑀲𑀮𑀸𑀓𑀕𑁆𑀕𑀸𑀳𑁂𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 𑀥𑀫𑁆𑀫𑀯𑀸𑀤𑀻𑀦𑀁 𑀬𑁂𑀪𑀼𑀬𑁆𑀬𑀢𑀸𑀬 𑀬𑀣𑀸 𑀢𑁂 𑀥𑀫𑁆𑀫𑀯𑀸𑀤𑀺𑀦𑁄 𑀯𑀤𑀦𑁆𑀢𑀺, 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀅𑀥𑀺𑀓𑀭𑀡𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀯𑀼𑀢𑁆𑀢𑀦𑀬𑁄 𑀏𑀯, 𑀬𑀁 𑀧𑀦 𑀬𑁂𑀪𑀼𑀬𑁆𑀬𑀲𑀺𑀓𑀓𑀫𑁆𑀫𑀲𑁆𑀲 𑀓𑀭𑀡𑀁. 𑀅𑀬𑀁 𑀬𑁂𑀪𑀼𑀬𑁆𑀬𑀲𑀺𑀓𑀸 𑀦𑀸𑀫, 𑀏𑀯𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺.

𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 (𑀘𑀽𑀴𑀯. 𑁨𑁩𑁬) 𑀘𑀢𑀽𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀲𑀢𑀺𑀯𑀺𑀦𑀬𑁂𑀦 𑀘 𑀅𑀫𑀽𑀴𑁆𑀳𑀯𑀺𑀦𑀬𑁂𑀦 𑀘 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀘. 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀲𑀫𑁆𑀫𑀫𑀸𑀦𑀁 𑀬𑁄 𑀘 𑀅𑀦𑀼𑀯𑀤𑀢𑀺, 𑀬𑀜𑁆𑀘 𑀅𑀦𑀼𑀯𑀤𑀢𑀺, 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀘𑁂 𑀓𑀸𑀘𑀺 𑀆𑀧𑀢𑁆𑀢𑀺 𑀦𑀢𑁆𑀣𑀺, 𑀉𑀪𑁄 𑀔𑀫𑀸𑀧𑁂𑀢𑁆𑀯𑀸, 𑀲𑀘𑁂 𑀅𑀢𑁆𑀣𑀺, ‘‘𑀅𑀬𑀁 𑀦𑀸𑀫𑁂𑀢𑁆𑀣 𑀆𑀧𑀢𑁆𑀢𑀻’’𑀢𑀺 𑀏𑀯𑀁 𑀯𑀺𑀦𑀺𑀘𑁆𑀙𑀺𑀢𑀁 𑀯𑀽𑀧𑀲𑀫𑁆𑀫𑀢𑀺, 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀬𑀤𑀸 𑀧𑀦 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑀺𑀢𑀲𑁆𑀲 𑀲𑀢𑀺𑀯𑀺𑀦𑀬𑀁 𑀬𑀸𑀘𑀫𑀸𑀦𑀲𑁆𑀲 𑀲𑀗𑁆𑀖𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺, 𑀢𑀤𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀲𑀢𑀺𑀯𑀺𑀦𑀬𑁂𑀦 𑀘 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺, 𑀤𑀺𑀦𑁆𑀦𑁂 𑀧𑀦 𑀲𑀢𑀺𑀯𑀺𑀦𑀬𑁂 𑀧𑀼𑀦 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀓𑀲𑁆𑀲𑀘𑀺 𑀅𑀦𑀼𑀯𑀸𑀤𑁄 𑀦 𑀭𑀼𑀳𑀢𑀺. 𑀬𑀤𑀸 𑀉𑀫𑁆𑀫𑀢𑁆𑀢𑀓𑁄 𑀪𑀺𑀓𑁆𑀔𑀼 𑀉𑀫𑁆𑀫𑀸𑀤𑀯𑀲𑁂𑀦 𑀕𑀢𑁂 𑀅𑀲𑁆𑀲𑀸𑀫𑀡𑀓𑁂 𑀅𑀚𑁆𑀛𑀸𑀘𑀸𑀭𑁂 ‘‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺’’𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀘𑁄𑀤𑀺𑀬𑀫𑀸𑀦𑁄 ‘‘𑀉𑀫𑁆𑀫𑀢𑁆𑀢𑀓𑁂𑀦 𑀫𑁂, 𑀆𑀯𑀼𑀲𑁄, 𑀏𑀢𑀁 𑀓𑀢𑀁, 𑀦𑀸𑀳𑀁 𑀢𑀁 𑀲𑀭𑀸𑀫𑀻’’𑀢𑀺 𑀪𑀡𑀦𑁆𑀢𑁄𑀧𑀺 𑀪𑀺𑀓𑁆𑀔𑀽𑀳𑀺 𑀘𑁄𑀤𑀺𑀬𑀫𑀸𑀦𑁄𑀯 𑀧𑀼𑀦 𑀅𑀘𑁄𑀤𑀦𑀢𑁆𑀣𑀸𑀬 𑀅𑀫𑀽𑀴𑁆𑀳𑀯𑀺𑀦𑀬𑀁 𑀬𑀸𑀘𑀢𑀺, 𑀲𑀗𑁆𑀖𑁄 𑀘𑀲𑁆𑀲 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺. 𑀢𑀤𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀅𑀫𑀽𑀴𑁆𑀳𑀯𑀺𑀦𑀬𑁂𑀦 𑀘 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺, 𑀤𑀺𑀦𑁆𑀦𑁂 𑀧𑀦 𑀅𑀫𑀽𑀴𑁆𑀳𑀯𑀺𑀦𑀬𑁂 𑀧𑀼𑀦 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀓𑀲𑁆𑀲𑀘𑀺 𑀢𑀧𑁆𑀧𑀘𑁆𑀘𑀬𑀸 𑀅𑀦𑀼𑀯𑀸𑀤𑁄 𑀦 𑀭𑀼𑀳𑀢𑀺.

𑀬𑀤𑀸 𑀧𑀦 𑀧𑀸𑀭𑀸𑀚𑀺𑀓𑁂𑀦 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑁂𑀦 𑀯𑀸 𑀘𑁄𑀤𑀺𑀬𑀫𑀸𑀦𑀲𑁆𑀲 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑁄 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬 𑀧𑀸𑀧𑀺𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 ‘‘𑀲𑀘𑀸𑀬𑀁 𑀅𑀘𑁆𑀙𑀺𑀦𑁆𑀦𑀫𑀽𑀮𑁄 𑀪𑀯𑀺𑀲𑁆𑀲𑀢𑀺, 𑀲𑀫𑁆𑀫𑀸 𑀯𑀢𑁆𑀢𑀺𑀢𑁆𑀯𑀸 𑀑𑀲𑀸𑀭𑀡𑀁 𑀮𑀪𑀺𑀲𑁆𑀲𑀢𑀺, 𑀲𑀘𑁂 𑀙𑀺𑀦𑁆𑀦𑀫𑀽𑀮𑁄, 𑀲𑀬𑀫𑁂𑀯𑀲𑁆𑀲 𑀦𑀸𑀲𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀲𑀗𑁆𑀖𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀤𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀘 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺, 𑀏𑀯𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀘𑀢𑀽𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺.

𑀆𑀧𑀢𑁆𑀢𑀸𑀥𑀺𑀓𑀭𑀡𑀁 (𑀘𑀽𑀴𑀯. 𑁨𑁩𑁯) 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘. 𑀢𑀲𑁆𑀲 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀯𑀽𑀧𑀲𑀫𑁄 𑀦𑀢𑁆𑀣𑀺, 𑀬𑀤𑀸 𑀧𑀦 𑀏𑀓𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄, 𑀦𑀺𑀲𑁆𑀲𑀕𑁆𑀕𑀺𑀬𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑀕𑀡𑀫𑀚𑁆𑀛𑁂𑀲𑀼 𑀯𑀸 𑀪𑀺𑀓𑁆𑀔𑀼 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑀺, 𑀢𑀤𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘 𑀯𑀽𑀧𑀲𑀫𑁆𑀫𑀢𑀺. 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁂 𑀢𑀸𑀯 𑀬𑁄 𑀘 𑀤𑁂𑀲𑁂𑀢𑀺, 𑀬𑀲𑁆𑀲 𑀘 𑀤𑁂𑀲𑁂𑀢𑀺, 𑀢𑁂𑀲𑀁 𑀲𑀫𑁆𑀫𑀼𑀔𑀻𑀪𑀸𑀯𑁄 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸, 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀧𑀼𑀕𑁆𑀕𑀮𑀲𑁆𑀲 𑀘 𑀕𑀡𑀲𑁆𑀲 𑀘 𑀤𑁂𑀲𑀦𑀸𑀓𑀸𑀮𑁂 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀧𑀭𑀺𑀳𑀸𑀬𑀢𑀺.

𑀬𑀸 𑀧𑀦𑁂𑀢𑁆𑀣 ‘‘𑀅𑀳𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺 𑀘, ‘‘𑀧𑀲𑁆𑀲𑀲𑀻’’𑀢𑀺, ‘‘𑀆𑀫 𑀧𑀲𑁆𑀲𑀸𑀫𑀻’’𑀢𑀺 𑀘 𑀧𑀝𑀺𑀜𑁆𑀜𑀸, 𑀢𑀸𑀬 ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 𑀓𑀭𑀡𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀦𑀸𑀫. 𑀲𑀗𑁆𑀖𑀸𑀤𑀺𑀲𑁂𑀲𑁂 𑀧𑀭𑀺𑀯𑀸𑀲𑀸𑀤𑀺𑀬𑀸𑀘𑀦𑀸 𑀧𑀝𑀺𑀜𑁆𑀜𑀸, 𑀧𑀭𑀺𑀯𑀸𑀲𑀸𑀤𑀻𑀦𑀁 𑀤𑀸𑀦𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀦𑀸𑀫. 𑀤𑁆𑀯𑁂𑀧𑀓𑁆𑀔𑀚𑀸𑀢𑀸 𑀧𑀦 𑀪𑀡𑁆𑀟𑀦𑀓𑀸𑀭𑀓𑀸 𑀪𑀺𑀓𑁆𑀔𑀽 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀸𑀭𑀁 𑀘𑀭𑀺𑀢𑁆𑀯𑀸 𑀧𑀼𑀦 𑀮𑀚𑁆𑀚𑀺𑀥𑀫𑁆𑀫𑁂 𑀉𑀧𑁆𑀧𑀦𑁆𑀦𑁂 ‘‘𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀭𑀺𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀣𑀸𑀬 𑀯𑀸𑀴𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀆𑀧𑀢𑁆𑀢𑀺𑀬𑀸 𑀓𑀸𑀭𑀸𑀧𑀦𑁂 𑀤𑁄𑀲𑀁 𑀤𑀺𑀲𑁆𑀯𑀸 𑀬𑀤𑀸 𑀢𑀺𑀡𑀯𑀢𑁆𑀣𑀸𑀭𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀤𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘 𑀲𑀫𑁆𑀫𑀢𑀺. 𑀢𑀢𑁆𑀭 𑀳𑀺 𑀬𑀢𑁆𑀢𑀓𑀸 𑀳𑀢𑁆𑀣𑀧𑀸𑀲𑀽𑀧𑀕𑀢𑀸 ‘‘𑀦 𑀫𑁂𑀢𑀁 𑀔𑀫𑀢𑀻’’𑀢𑀺 𑀏𑀯𑀁 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀅𑀓𑀢𑁆𑀯𑀸 𑀦𑀺𑀤𑁆𑀤𑀫𑁆𑀧𑀺 𑀑𑀓𑁆𑀓𑀫𑀦𑁆𑀢𑀸 𑀳𑁄𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀜𑁆𑀘 𑀕𑀺𑀳𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀘 𑀲𑀩𑁆𑀩𑀸𑀧𑀢𑁆𑀢𑀺𑀬𑁄 𑀯𑀼𑀝𑁆𑀞𑀳𑀦𑁆𑀢𑀺, 𑀏𑀯𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺.

𑀓𑀺𑀘𑁆𑀘𑀸𑀥𑀺𑀓𑀭𑀡𑀁 (𑀘𑀽𑀴𑀯. 𑁨𑁪𑁨) 𑀏𑀓𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯. 𑀇𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀬𑀣𑀸𑀦𑀼𑀭𑀽𑀧𑀁 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀥𑀺𑀓𑀭𑀡𑀸𑀦𑀁 𑀲𑀫𑀣𑀸𑀬 𑀯𑀽𑀧𑀲𑀫𑀸𑀬 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀤𑀸𑀢𑀩𑁆𑀩𑁄…𑀧𑁂… 𑀢𑀺𑀡𑀯𑀢𑁆𑀣𑀸𑀭𑀓𑁄’’𑀢𑀺. 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑀦𑀬𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀣𑀓𑁆𑀔𑀦𑁆𑀥𑀓𑁂 𑀆𑀕𑀢𑁄𑀬𑁂𑀯, 𑀯𑀺𑀦𑀺𑀘𑁆𑀙𑀬𑁄𑀧𑀺𑀲𑁆𑀲 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑁄.

𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂 𑀧𑀼𑀘𑁆𑀙𑀸𑀫𑀺, 𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸𑀢𑀺 𑀢𑁂𑀲𑀼 𑀲𑀢𑁆𑀢𑀲𑀼 𑀅𑀥𑀺𑀓𑀭𑀡𑀲𑀫𑀣𑁂𑀲𑀼 𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸, 𑀦𑀢𑁆𑀣𑀺 𑀯𑁄 𑀓𑀺𑀜𑁆𑀘𑀺 𑀲𑀫𑀣𑁂𑀳𑀺 𑀯𑀽𑀧𑀲𑀫𑁂𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀸𑀫𑀺, 𑀏𑀢𑁂𑀦 𑀲𑀩𑁆𑀩𑀸𑀧𑀢𑁆𑀢𑀻𑀳𑀺 𑀧𑀭𑀺𑀲𑀼𑀤𑁆𑀥𑀪𑀸𑀯𑁄 𑀧𑀼𑀘𑁆𑀙𑀺𑀢𑁄 𑀳𑁄𑀢𑀺.

𑀉𑀤𑁆𑀤𑀺𑀝𑁆𑀞𑀁 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀦𑀺𑀤𑀸𑀦𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀯𑀘𑀦𑀁. 𑀢𑀢𑁆𑀣 𑀏𑀢𑁆𑀢𑀓𑀦𑁆𑀢𑀺 𑀏𑀢𑁆𑀢𑀓𑀁 𑀲𑀺𑀓𑁆𑀔𑀸𑀧𑀤𑀁. 𑀲𑀼𑀢𑁆𑀢𑀸𑀕𑀢𑀦𑁆𑀢𑀺 𑀲𑀼𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀢𑀁. 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀢𑀢𑁆𑀣𑁂𑀯 𑀅𑀦𑁆𑀢𑁄𑀕𑀥𑀁. 𑀅𑀦𑁆𑀯𑀤𑁆𑀥𑀫𑀸𑀲𑀁 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀢𑀻𑀢𑀺 𑀅𑀤𑁆𑀥𑀫𑀸𑀲𑁂 𑀅𑀤𑁆𑀥𑀫𑀸𑀲𑁂 𑀉𑀧𑁄𑀲𑀣𑀯𑀲𑁂𑀦 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑀁 𑀆𑀕𑀘𑁆𑀙𑀢𑀺. 𑀲𑀫𑀕𑁆𑀕𑁂𑀳𑀻𑀢𑀺 𑀓𑀸𑀬𑀲𑀸𑀫𑀕𑁆𑀕𑀺𑀯𑀲𑁂𑀦 𑀲𑀫𑀕𑁆𑀕𑁂𑀳𑀺. 𑀲𑀫𑁆𑀫𑁄𑀤𑀫𑀸𑀦𑁂𑀳𑀻𑀢𑀺 𑀘𑀺𑀢𑁆𑀢𑀲𑀸𑀫𑀕𑁆𑀕𑀺𑀯𑀲𑁂𑀦 𑀏𑀓𑀚𑁆𑀛𑀸𑀲𑀬𑀢𑀸𑀬 𑀲𑀼𑀝𑁆𑀞𑀼 𑀫𑁄𑀤𑀫𑀸𑀦𑁂𑀳𑀺. 𑀅𑀯𑀺𑀯𑀤𑀫𑀸𑀦𑁂𑀳𑀻𑀢𑀺 𑀅𑀝𑁆𑀞𑀸𑀭𑀲𑀲𑀼 𑀯𑀺𑀯𑀸𑀤𑀯𑀢𑁆𑀣𑀽𑀲𑀼 𑀅𑀜𑁆𑀜𑀢𑀭𑀯𑀲𑁂𑀦𑀸𑀧𑀺 𑀅𑀯𑀺𑀯𑀤𑀫𑀸𑀦𑁂𑀳𑀺. 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁂𑀳𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀲𑀫𑁆𑀧𑀸𑀤𑁂𑀢𑀩𑁆𑀩𑀸. 𑀅𑀦𑁆𑀢𑀭𑀦𑁆𑀢𑀭𑀸 𑀧𑀦 𑀬𑀁 𑀦 𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀧𑀼𑀭𑀺𑀫𑁂 𑀧𑀼𑀭𑀺𑀫𑁂 𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀢𑁆𑀢𑀸 𑀘𑁂𑀯 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘𑀸𑀢𑀺.

𑀅𑀥𑀺𑀓𑀭𑀡𑀲𑀫𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀲𑀫𑁆𑀩𑀼𑀤𑁆𑀥𑀲𑁆𑀲