𑀧𑀸𑀝𑀺𑀤𑁂𑀲𑀦𑀻𑀬𑀓𑀡𑁆𑀟𑁄

𑁧. 𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀸𑀝𑀺𑀤𑁂𑀲𑀦𑀻𑀬𑁂𑀲𑀼 𑀧𑀞𑀫𑁂 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀸𑀬𑀸𑀢𑀺 𑀯𑀘𑀦𑀢𑁄 𑀲𑀘𑁂 𑀢𑀲𑁆𑀲𑀸 𑀅𑀦𑁆𑀢𑀭𑀸𑀭𑀸𑀫𑀸𑀤𑀻𑀲𑀼 𑀞𑀢𑁆𑀯𑀸𑀧𑀺 𑀤𑀤𑀫𑀸𑀦𑀸𑀬 𑀳𑀢𑁆𑀣𑀢𑁄 𑀲𑀬𑀁 𑀭𑀣𑀺𑀬𑀸𑀩𑁆𑀬𑀽𑀳𑀲𑀺𑀗𑁆𑀖𑀸𑀝𑀓𑀖𑀭𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀞𑀺𑀢𑁄𑀧𑀺 𑀕𑀡𑁆𑀳𑀸𑀢𑀺, 𑀤𑁄𑀲𑁄 𑀦𑀢𑁆𑀣𑀺. 𑀢𑀲𑁆𑀲𑀸 𑀧𑀦 𑀭𑀣𑀺𑀬𑀸𑀤𑀻𑀲𑀼 𑀞𑀢𑁆𑀯𑀸 𑀤𑀤𑀫𑀸𑀦𑀸𑀬, 𑀭𑀣𑀺𑀬𑀸𑀤𑀻𑀲𑀼 𑀯𑀸, 𑀅𑀦𑁆𑀢𑀭𑀸𑀭𑀸𑀫𑀸𑀤𑀻𑀲𑀼 𑀯𑀸 𑀞𑀢𑁆𑀯𑀸𑀧𑀺 𑀬𑀁𑀓𑀺𑀜𑁆𑀘𑀺 𑀆𑀫𑀺𑀲𑀁 𑀅𑀚𑁆𑀛𑁄𑀳𑀭𑀡𑀢𑁆𑀣𑀸𑀬 𑀕𑀡𑁆𑀳𑀢𑁄 𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀧𑀸𑀝𑀺𑀤𑁂𑀲𑀦𑀻𑀬𑀁. 𑀢𑀲𑁆𑀲 𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑁄 𑀕𑀸𑀭𑀬𑁆𑀳𑀁 𑀆𑀯𑀼𑀲𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀺𑀓𑁆𑀔𑀸𑀧𑀤𑁂 𑀤𑀲𑁆𑀲𑀺𑀢𑁄𑀬𑁂𑀯.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀸𑀬 𑀳𑀢𑁆𑀣𑀢𑁄 𑀆𑀫𑀺𑀲𑀁 𑀧𑀝𑀺𑀕𑁆𑀕𑀳𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀬𑀣𑀸 𑀘𑁂𑀢𑀁, 𑀢𑀣𑀸 𑀲𑁂𑀲𑀸𑀦𑀺𑀧𑀺, 𑀢𑀺𑀓𑀧𑀸𑀝𑀺𑀤𑁂𑀲𑀦𑀻𑀬𑀁, 𑀬𑀸𑀫𑀓𑀸𑀮𑀺𑀓𑀸𑀤𑀻𑀲𑀼 𑀧𑀝𑀺𑀕𑁆𑀕𑀳𑀡𑁂𑀧𑀺 𑀅𑀚𑁆𑀛𑁄𑀳𑀭𑀡𑁂𑀧𑀺 𑀤𑀼𑀓𑁆𑀓𑀝𑀁, 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀬𑀸𑀯𑀓𑀸𑀮𑀺𑀓𑁂𑀧𑀺 𑀢𑀣𑁂𑀯, 𑀜𑀸𑀢𑀺𑀓𑀸𑀬 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀺𑀯𑁂𑀫𑀢𑀺𑀓𑀸𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀜𑀸𑀢𑀺𑀓𑀲𑀜𑁆𑀜𑀺𑀦𑁄 𑀧𑀦, 𑀜𑀸𑀢𑀺𑀓𑀸𑀬 𑀯𑀸 𑀤𑀸𑀧𑁂𑀦𑁆𑀢𑀺𑀬𑀸, 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀤𑀤𑀫𑀸𑀦𑀸𑀬, 𑀬𑀸 𑀘 𑀅𑀦𑁆𑀢𑀭𑀸𑀭𑀸𑀫𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀢𑀺𑀢𑁆𑀣𑀺𑀬𑀲𑁂𑀬𑁆𑀬𑀧𑀝𑀺𑀓𑁆𑀓𑀫𑀦𑁂𑀲𑀼 𑀞𑀢𑁆𑀯𑀸 𑀕𑀸𑀫𑀢𑁄 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸, 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀺 𑀯𑀸 ‘‘𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀸’’𑀢𑀺 𑀤𑁂𑀢𑀺, 𑀢𑀲𑁆𑀲, 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀦𑀜𑁆𑀘 𑀳𑀢𑁆𑀣𑀢𑁄 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀧𑀭𑀺𑀧𑀼𑀡𑁆𑀡𑀽𑀧𑀲𑀫𑁆𑀧𑀦𑁆𑀦𑀢𑀸, 𑀅𑀜𑁆𑀜𑀸𑀢𑀺𑀓𑀢𑀸, 𑀅𑀦𑁆𑀢𑀭𑀖𑀭𑁂 𑀞𑀺𑀢𑀸𑀬 𑀳𑀢𑁆𑀣𑀢𑁄 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑀡𑀁, 𑀬𑀸𑀯𑀓𑀸𑀮𑀺𑀓𑀢𑀸, 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀏𑀴𑀓𑀮𑁄𑀫𑀲𑀤𑀺𑀲𑀸𑀦𑀻𑀢𑀺.

𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀇𑀥 𑀲𑀽𑀧𑀦𑁆𑀢𑀺𑀆𑀤𑀺 𑀯𑁄𑀲𑀸𑀲𑀦𑀸𑀓𑀸𑀭𑀤𑀲𑁆𑀲𑀦𑀁. 𑀅𑀧𑀲𑀓𑁆𑀓 𑀢𑀸𑀯 𑀪𑀕𑀺𑀦𑀻𑀢𑀺𑀆𑀤𑀺 𑀅𑀧𑀲𑀸𑀤𑁂𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀁. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀏𑀓𑁂𑀦𑀸𑀧𑀺 𑀪𑀺𑀓𑁆𑀔𑀼𑀦𑀸 𑀅𑀦𑀧𑀲𑀸𑀤𑀺𑀢𑁂 𑀅𑀚𑁆𑀛𑁄𑀳𑀭𑀡𑀢𑁆𑀣𑀸𑀬 𑀆𑀫𑀺𑀲𑀁 𑀕𑀡𑁆𑀳𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀧𑀸𑀝𑀺𑀤𑁂𑀲𑀦𑀻𑀬𑀦𑁆𑀢𑀺.

𑀭𑀸𑀚𑀕𑀳𑁂 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀪𑀺𑀓𑁆𑀔𑀼𑀦𑀺𑀬𑀸 𑀯𑁄𑀲𑀸𑀲𑀦𑁆𑀢𑀺𑀬𑀸 𑀦𑀦𑀺𑀯𑀸𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀝𑀺𑀤𑁂𑀲𑀦𑀻𑀬𑀁, 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀯𑁄𑀲𑀸𑀲𑀦𑁆𑀢𑀺𑀬𑀸 𑀦𑀦𑀺𑀯𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀢𑀣𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀘. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀦𑁄, 𑀧𑀦 𑀬𑁄 𑀘 𑀅𑀢𑁆𑀢𑀦𑁄 𑀯𑀸 𑀪𑀢𑁆𑀢𑀁 𑀤𑀸𑀧𑁂𑀦𑁆𑀢𑀺𑀬𑀸, 𑀅𑀜𑁆𑀜𑁂𑀲𑀁 𑀯𑀸 𑀪𑀢𑁆𑀢𑀁 𑀤𑁂𑀦𑁆𑀢𑀺𑀬𑀸, 𑀬𑀁 𑀯𑀸 𑀦 𑀤𑀺𑀦𑁆𑀦𑀁, 𑀢𑀁 𑀤𑀸𑀧𑁂𑀦𑁆𑀢𑀺𑀬𑀸, 𑀬𑀢𑁆𑀣 𑀯𑀸 𑀦 𑀤𑀺𑀦𑁆𑀦𑀁, 𑀢𑀢𑁆𑀣, 𑀲𑀩𑁆𑀩𑁂𑀲𑀁 𑀯𑀸 𑀲𑀫𑀓𑀁 𑀤𑀸𑀧𑁂𑀦𑁆𑀢𑀺𑀬𑀸, 𑀲𑀺𑀓𑁆𑀔𑀫𑀸𑀦𑀸𑀬 𑀯𑀸 𑀲𑀸𑀫𑀡𑁂𑀭𑀺𑀬𑀸 𑀯𑀸 𑀯𑁄𑀲𑀸𑀲𑀦𑁆𑀢𑀺𑀬𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀢𑀲𑁆𑀲, 𑀧𑀜𑁆𑀘 𑀪𑁄𑀚𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀧𑀭𑀺𑀧𑀼𑀡𑁆𑀡𑀽𑀧𑀲𑀫𑁆𑀧𑀦𑁆𑀦𑀢𑀸, 𑀧𑀜𑁆𑀘𑀪𑁄𑀚𑀦𑀢𑀸, 𑀅𑀦𑁆𑀢𑀭𑀖𑀭𑁂 𑀅𑀦𑀼𑀜𑁆𑀜𑀸𑀢𑀧𑀓𑀸𑀭𑀢𑁄 𑀅𑀜𑁆𑀜𑀣𑀸 𑀯𑁄𑀲𑀸𑀲𑀦𑀸, 𑀅𑀦𑀺𑀯𑀸𑀭𑀡𑀸, 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑀣𑀺𑀦𑀲𑀤𑀺𑀲𑀸𑀦𑀻𑀢𑀺.

𑀤𑀼𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀲𑁂𑀓𑁆𑀔𑀲𑀫𑁆𑀫𑀢𑀸𑀦𑀻𑀢𑀺 𑀮𑀤𑁆𑀥𑀲𑁂𑀓𑁆𑀔𑀲𑀫𑁆𑀫𑀼𑀢𑀺𑀓𑀸𑀦𑀺. 𑀧𑀼𑀩𑁆𑀩𑁂 𑀅𑀦𑀺𑀫𑀦𑁆𑀢𑀺𑀢𑁄𑀢𑀺 𑀖𑀭𑀽𑀧𑀘𑀸𑀭𑁄𑀓𑁆𑀓𑀫𑀦𑀢𑁄 𑀧𑀞𑀫𑀢𑀭𑀁 𑀉𑀧𑀘𑀸𑀭𑀁 𑀅𑀦𑁄𑀓𑁆𑀓𑀫𑀦𑁆𑀢𑁂𑀬𑁂𑀯 𑀧𑀼𑀩𑁆𑀩𑁂 𑀅𑀦𑀺𑀫𑀦𑁆𑀢𑀺𑀢𑁄. 𑀅𑀕𑀺𑀮𑀸𑀦𑁄 𑀦𑀸𑀫 𑀬𑁄 𑀲𑀓𑁆𑀓𑁄𑀢𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁. 𑀧𑀸𑀝𑀺𑀤𑁂𑀲𑀦𑀻𑀬𑀦𑁆𑀢𑀺 𑀖𑀭𑀽𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀆𑀫𑀺𑀲𑀁 𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂 𑀢𑀸𑀯 𑀤𑀼𑀓𑁆𑀓𑀝𑀁, 𑀢𑀁 𑀕𑀳𑁂𑀢𑁆𑀯𑀸 𑀬𑀢𑁆𑀣𑀓𑀢𑁆𑀣𑀘𑀺 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀧𑀸𑀝𑀺𑀤𑁂𑀲𑀦𑀻𑀬𑀦𑁆𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀧𑀼𑀩𑁆𑀩𑁂 𑀅𑀦𑀺𑀫𑀦𑁆𑀢𑀺𑀢𑁄, 𑀅𑀕𑀺𑀮𑀸𑀦𑁄’’𑀢𑀺 𑀇𑀫𑀸 𑀧𑀦𑁂𑀢𑁆𑀣 𑀤𑁆𑀯𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄, 𑀢𑀺𑀓𑀧𑀸𑀝𑀺𑀤𑁂𑀲𑀦𑀻𑀬𑀁, 𑀬𑀸𑀫𑀓𑀸𑀮𑀺𑀓𑀸𑀤𑀻𑀲𑀼 𑀧𑀝𑀺𑀕𑁆𑀕𑀳𑀡𑁂𑀧𑀺 𑀅𑀚𑁆𑀛𑁄𑀳𑀸𑀭𑁂𑀧𑀺 𑀤𑀼𑀓𑁆𑀓𑀝𑀁, 𑀢𑀣𑀸 𑀅𑀲𑁂𑀓𑁆𑀔𑀲𑀫𑁆𑀫𑀢𑁂 𑀲𑁂𑀓𑁆𑀔𑀲𑀫𑁆𑀫𑀢𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀘. 𑀅𑀲𑁂𑀓𑁆𑀔𑀲𑀫𑁆𑀫𑀢𑀲𑀜𑁆𑀜𑀺𑀦𑁄, 𑀧𑀦 𑀬𑁄 𑀘 𑀧𑀼𑀩𑁆𑀩𑁂 𑀦𑀺𑀫𑀦𑁆𑀢𑀺𑀢𑁄 𑀯𑀸 𑀕𑀺𑀮𑀸𑀦𑁄 𑀯𑀸 𑀅𑀜𑁆𑀜𑀲𑁆𑀲 𑀯𑀸 𑀢𑁂𑀲𑀁 𑀖𑀭𑁂 𑀧𑀜𑁆𑀜𑀢𑁆𑀢𑀁 𑀪𑀺𑀓𑁆𑀔𑀁 𑀕𑀡𑁆𑀳𑀸𑀢𑀺, 𑀬𑀲𑁆𑀲 𑀘 𑀖𑀭𑀢𑁄 𑀦𑀻𑀳𑀭𑀺𑀢𑁆𑀯𑀸, 𑀆𑀲𑀦𑀲𑀸𑀮𑀸𑀤𑀻𑀲𑀼 𑀯𑀸 𑀪𑀺𑀓𑁆𑀔𑀼𑀁 𑀅𑀤𑀺𑀲𑁆𑀯𑀸 𑀧𑀞𑀫𑀁𑀬𑁂𑀯 𑀦𑀻𑀳𑀭𑀺𑀢𑁆𑀯𑀸, 𑀤𑁆𑀯𑀸𑀭𑀫𑀽𑀮𑁂 𑀯𑀸 𑀞𑀧𑀺𑀢𑀁 𑀤𑁂𑀦𑁆𑀢𑀺, 𑀢𑀲𑁆𑀲 𑀢𑀁 𑀪𑀼𑀜𑁆𑀚𑀦𑁆𑀢𑀲𑁆𑀲, 𑀦𑀺𑀘𑁆𑀘𑀪𑀢𑁆𑀢𑀓𑁂, 𑀲𑀮𑀸𑀓𑀪𑀢𑁆𑀢𑁂, 𑀧𑀓𑁆𑀔𑀺𑀓𑁂, 𑀉𑀧𑁄𑀲𑀣𑀺𑀓𑁂, 𑀧𑀸𑀝𑀺𑀧𑀤𑀺𑀓𑁂, 𑀬𑀸𑀫𑀓𑀸𑀮𑀺𑀓𑀸𑀤𑀺𑀁 ‘‘𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀸’’𑀢𑀺 𑀤𑀺𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑁂𑀓𑁆𑀔𑀲𑀫𑁆𑀫𑀢𑀢𑀸, 𑀧𑀼𑀩𑁆𑀩𑁂 𑀅𑀦𑀺𑀫𑀦𑁆𑀢𑀺𑀢𑀢𑀸, 𑀅𑀕𑀺𑀮𑀸𑀦𑀢𑀸, 𑀖𑀭𑀽𑀧𑀘𑀸𑀭𑁄𑀓𑁆𑀓𑀫𑀦𑀁, 𑀞𑀧𑁂𑀢𑁆𑀯𑀸 𑀦𑀺𑀘𑁆𑀘𑀪𑀢𑁆𑀢𑀓𑀸𑀤𑀻𑀦𑀺 𑀅𑀜𑁆𑀜𑀁 𑀆𑀫𑀺𑀲𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀏𑀴𑀓𑀮𑁄𑀫𑀲𑀤𑀺𑀲𑀸𑀦𑀻𑀢𑀺.

𑀢𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀆𑀭𑀜𑁆𑀜𑀓𑀸𑀦𑀻𑀢𑀺𑀆𑀤𑀺 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀦𑁆𑀢𑀺 𑀏𑀢𑁆𑀣 𑀬𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸 𑀆𑀭𑀸𑀫𑀁 𑀯𑀸 𑀆𑀭𑀸𑀫𑀽𑀧𑀘𑀸𑀭𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲, 𑀪𑀦𑁆𑀢𑁂, 𑀓𑀼𑀮𑀲𑁆𑀲 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀆𑀳𑀭𑀺𑀬𑀺𑀲𑁆𑀲𑀢𑀻’’𑀢𑀺 (𑀧𑀸𑀘𑀺. 𑁫𑁭𑁩) 𑀆𑀭𑁄𑀘𑀺𑀢𑀁, 𑀢𑀁 𑀧𑀘𑁆𑀙𑀸 𑀬𑀣𑀸𑀆𑀭𑁄𑀘𑀺𑀢𑀫𑁂𑀯 𑀯𑀸 𑀆𑀳𑀭𑀺𑀬𑀢𑀼, 𑀢𑀲𑁆𑀲 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀅𑀜𑁆𑀜𑀁 𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀩𑀳𑀼𑀓𑀫𑁆𑀧𑀺, ‘‘𑀇𑀢𑁆𑀣𑀦𑁆𑀦𑀸𑀫𑀁 𑀓𑀼𑀮𑀁 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀅𑀜𑁆𑀜𑀸𑀦𑀺 𑀯𑀸 𑀓𑀼𑀮𑀸𑀦𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀆𑀳𑀭𑀦𑁆𑀢𑀼, 𑀢𑀁 𑀲𑀩𑁆𑀩𑀁 𑀧𑀝𑀺𑀲𑀁𑀯𑀺𑀤𑀺𑀢𑀁 𑀦𑀸𑀫. 𑀬𑀁 𑀧𑀦 𑀏𑀯𑀁 𑀅𑀦𑀸𑀭𑁄𑀘𑀺𑀢𑀁 𑀅𑀦𑀸𑀳𑀝𑀜𑁆𑀘, 𑀢𑀁 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀁 𑀦𑀸𑀫. 𑀅𑀕𑀺𑀮𑀸𑀦𑁄 𑀦𑀸𑀫 𑀬𑁄 𑀲𑀓𑁆𑀓𑁄𑀢𑀺 𑀧𑀺𑀡𑁆𑀟𑀸𑀬 𑀕𑀦𑁆𑀢𑀼𑀁. 𑀧𑀸𑀝𑀺𑀤𑁂𑀲𑀦𑀻𑀬𑀦𑁆𑀢𑀺 𑀏𑀯𑀭𑀽𑀧𑀁 𑀅𑀦𑁆𑀢𑀫𑀲𑁄 𑀆𑀭𑀸𑀫𑀫𑀚𑁆𑀛𑁂𑀦 𑀕𑀘𑁆𑀙𑀦𑁆𑀢𑁂𑀳𑀺 𑀅𑀤𑁆𑀥𑀺𑀓𑁂𑀳𑀺 𑀤𑀺𑀦𑁆𑀦𑀫𑁆𑀧𑀺 𑀆𑀭𑀸𑀫𑁂 𑀯𑀸 𑀆𑀭𑀸𑀫𑀽𑀧𑀘𑀸𑀭𑁂 𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀧𑀸𑀝𑀺𑀤𑁂𑀲𑀦𑀻𑀬𑀦𑁆𑀢𑀺.

𑀲𑀓𑁆𑀓𑁂𑀲𑀼 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀆𑀭𑀸𑀫𑁂 𑀘𑁄𑀭𑁂 𑀧𑀝𑀺𑀯𑀲𑀦𑁆𑀢𑁂 𑀅𑀦𑀸𑀭𑁄𑀘𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀅𑀕𑀺𑀮𑀸𑀦𑁄’’𑀢𑀺 𑀅𑀬𑀫𑁂𑀢𑁆𑀣 𑀏𑀓𑀸 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀢𑀺𑀓𑀧𑀸𑀝𑀺𑀤𑁂𑀲𑀦𑀻𑀬𑀁, 𑀬𑀸𑀫𑀓𑀸𑀮𑀺𑀓𑀸𑀤𑀻𑀲𑀼 𑀆𑀳𑀸𑀭𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀡𑁂𑀧𑀺 𑀅𑀚𑁆𑀛𑁄𑀳𑀸𑀭𑁂𑀧𑀺 𑀤𑀼𑀓𑁆𑀓𑀝𑀫𑁂𑀯, 𑀢𑀣𑀸 𑀧𑀝𑀺𑀲𑀁𑀯𑀺𑀤𑀺𑀢𑁂 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀘, 𑀧𑀝𑀺𑀲𑀁𑀯𑀺𑀤𑀺𑀢𑀲𑀜𑁆𑀜𑀺𑀦𑁄, 𑀧𑀦 𑀕𑀺𑀮𑀸𑀦𑀲𑁆𑀲, 𑀬𑁄 𑀘 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸 𑀆𑀳𑀝𑀁 𑀯𑀸 𑀕𑀺𑀮𑀸𑀦𑀸𑀯𑀲𑁂𑀲𑀓𑀁 𑀯𑀸 𑀩𑀳𑀸𑀭𑀸𑀫𑁂 𑀯𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀢𑀢𑁆𑀣𑀚𑀸𑀢𑀓𑀫𑁂𑀯 𑀯𑀸 𑀫𑀽𑀮𑀨𑀮𑀸𑀤𑀺𑀁, 𑀬𑀸𑀫𑀓𑀸𑀮𑀺𑀓𑀸𑀤𑀻𑀲𑀼 𑀯𑀸 𑀬𑀁𑀓𑀺𑀜𑁆𑀘𑀺 ‘‘𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀸’’𑀢𑀺 𑀮𑀤𑁆𑀥𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀬𑀣𑀸𑀯𑀼𑀢𑁆𑀢𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀢𑀸, 𑀬𑀸𑀯𑀓𑀸𑀮𑀺𑀓𑀲𑁆𑀲 𑀅𑀢𑀢𑁆𑀣𑀚𑀸𑀢𑀓𑀢𑀸, 𑀅𑀕𑀺𑀮𑀸𑀦𑀢𑀸, 𑀅𑀕𑀺𑀮𑀸𑀦𑀸𑀯𑀲𑁂𑀲𑀓𑀢𑀸, 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀢𑀸, 𑀅𑀚𑁆𑀛𑀸𑀭𑀸𑀫𑁂 𑀧𑀝𑀺𑀕𑁆𑀕𑀳𑀡𑀁, 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀲𑀢𑁆𑀢 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑀣𑀺𑀦𑀲𑀤𑀺𑀲𑀸𑀦𑁂𑀯, 𑀇𑀤𑀁 𑀧𑀦 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺.

𑀘𑀢𑀼𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀧𑀸𑀝𑀺𑀤𑁂𑀲𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.