𑁯. 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑀧𑁄𑀝𑁆𑀞𑀧𑀸𑀤𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁦𑁬. 𑀲𑀸𑀯𑀢𑁆𑀣𑀺𑀬𑀦𑁆𑀢𑀺 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬𑀸’’𑀢𑀺. 𑀚𑁂𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀯𑀦𑁂𑀢𑀺 𑀚𑁂𑀢𑁂𑀦 𑀦𑀸𑀫 𑀭𑀸𑀚𑀓𑀼𑀫𑀸𑀭𑁂𑀦 𑀭𑁄𑀧𑀺𑀢𑁂 𑀉𑀧𑀯𑀦𑁂. 𑀦𑀺𑀯𑀸𑀲𑀨𑀸𑀲𑀼𑀢𑀸𑀤𑀺𑀦𑀸 𑀧𑀩𑁆𑀩𑀚𑀺𑀢𑀸 𑀆𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑁄, 𑀯𑀺𑀳𑀸𑀭𑁄. 𑀨𑁄𑀝𑁄 𑀧𑀸𑀤𑁂𑀲𑀼 𑀚𑀸𑀢𑁄𑀢𑀺 𑀧𑁄𑀝𑁆𑀞𑀧𑀸𑀤𑁄. 𑀯𑀢𑁆𑀣𑀘𑁆𑀙𑀸𑀬𑀸𑀙𑀸𑀤𑀦𑀧𑀩𑁆𑀩𑀚𑀽𑀧𑀕𑀢𑀢𑁆𑀢𑀸 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄𑀢𑀺 𑀫𑀳𑀸𑀯𑀺𑀪𑀯𑀢𑀸𑀬 𑀫𑀳𑀸𑀲𑀸𑀭𑀢𑀸𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄. 𑀲𑀫𑀬𑀦𑁆𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁄, 𑀢𑀁 𑀢𑀁 𑀲𑀫𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀯𑀤𑀦𑁆𑀢𑀻𑀢𑀺 𑀧𑀓𑀸𑀭𑀢𑁄 𑀯𑀤𑀦𑁆𑀢𑀺, 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦 𑀬𑀣𑀸 𑀢𑀣𑀸 𑀲𑀫𑀬𑀁 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀧𑀪𑀼𑀢𑀬𑁄’’𑀢𑀺 𑀇𑀫𑀺𑀦𑀸 𑀢𑁄𑀤𑁂𑀬𑁆𑀬𑀚𑀸𑀡𑀼𑀲𑁄𑀡𑀻𑀲𑁄𑀡𑀤𑀡𑁆𑀟𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺, 𑀧𑀭𑀺𑀩𑁆𑀩𑀸𑀚𑀓𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑀸𑀤𑀺𑀓𑁂. 𑀢𑀺𑀦𑁆𑀤𑀼𑀓𑀸𑀘𑀻𑀭𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀢𑀺𑀦𑁆𑀤𑀼𑀓𑀸𑀘𑀻𑀭𑁄, 𑀆𑀭𑀸𑀫𑁄. 𑀢𑀣𑀸 𑀏𑀓𑀸 𑀲𑀸𑀮𑀸 𑀏𑀢𑁆𑀣𑀸𑀢𑀺 𑀏𑀓𑀲𑀸𑀮𑀓𑁄, 𑀢𑀲𑁆𑀫𑀺𑀁 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂.

𑀅𑀦𑁂𑀓𑀸𑀓𑀸𑀭𑀸𑀦𑀯𑀲𑁂𑀲𑀜𑁂𑀬𑁆𑀬𑀢𑁆𑀣𑀯𑀺𑀪𑀸𑀯𑀦𑀢𑁄, 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀢𑁄 𑀘 𑀪𑀕𑀯𑀢𑁄 𑀜𑀸𑀡𑀁 𑀢𑀢𑁆𑀣 𑀧𑀢𑁆𑀣𑀝𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀢𑁆𑀣𑀭𑀺𑀢𑁆𑀯𑀸’’𑀢𑀺, 𑀬𑀢𑁄 𑀢𑀲𑁆𑀲 𑀜𑀸𑀡𑀚𑀸𑀮𑀢𑀸 𑀯𑀼𑀘𑁆𑀘𑀢𑀺, 𑀯𑁂𑀦𑁂𑀬𑁆𑀬𑀸𑀦𑀁 𑀢𑀤𑀦𑁆𑀢𑁄𑀕𑀥𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬𑁂𑀯. 𑀯𑁂𑀦𑁂𑀬𑁆𑀬𑀲𑀢𑁆𑀢𑀧𑀭𑀺𑀕𑁆𑀕𑀡𑁆𑀳𑀦𑀢𑁆𑀣𑀁 𑀲𑀫𑀦𑁆𑀦𑀸𑀳𑀸𑀭𑁂 𑀓𑀢𑁂 𑀧𑀞𑀫𑀁 𑀦𑁂𑀲𑀁 𑀯𑁂𑀦𑁂𑀬𑁆𑀬𑀪𑀸𑀯𑁂𑀦𑁂𑀯 𑀉𑀧𑀝𑁆𑀞𑀸𑀦𑀁 𑀳𑁄𑀢𑀺, 𑀅𑀣 𑀲𑀭𑀡𑀕𑀫𑀦𑀸𑀤𑀺𑀯𑀲𑁂𑀦 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀯𑀻𑀫𑀁𑀲𑀻𑀬𑀢𑀻𑀢𑀺 𑀆𑀳 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄’’𑀢𑀺. 𑀦𑀺𑀭𑁄𑀥𑀦𑁆𑀢𑀺 𑀲𑀜𑁆𑀜𑀸𑀦𑀺𑀭𑁄𑀥𑀁. 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀢𑀢𑁄 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀁 𑀲𑀜𑁆𑀜𑀼𑀧𑁆𑀧𑀢𑁆𑀢𑀺𑀁. 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀜𑀸𑀡𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀬𑀣𑀸 𑀢𑁂 𑀦𑀺𑀭𑁄𑀥𑀁, 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀜𑁆𑀘 𑀩𑁆𑀬𑀸𑀓𑀭𑀺𑀁𑀲𑀼, 𑀩𑁆𑀬𑀸𑀓𑀭𑀺𑀲𑁆𑀲𑀦𑁆𑀢𑀺 𑀘, 𑀢𑀣𑀸 𑀩𑁆𑀬𑀸𑀓𑀭𑀡𑀯𑀲𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸. 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀳𑀢𑁆𑀣𑀺𑀲𑀸𑀭𑀺𑀦𑁄 𑀧𑀼𑀢𑁆𑀢𑁄. ‘‘𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀇𑀤𑀁 𑀧𑀭𑀺𑀓𑀧𑁆𑀧𑀯𑀘𑀦𑀁 ‘‘𑀢𑀸𑀤𑀺𑀲𑀁 𑀅𑀢𑁆𑀣𑀺 𑀘𑁂, 𑀢𑀁 𑀯𑀺𑀬𑀸’’𑀢𑀺. 𑀫𑁂𑀖𑀯𑀡𑁆𑀡𑀦𑁆𑀢𑀺 𑀭𑀢𑁆𑀢𑀫𑁂𑀖𑀯𑀡𑁆𑀡𑀁, 𑀲𑀜𑁆𑀛𑀸𑀧𑁆𑀧𑀪𑀸𑀦𑀼𑀭𑀜𑁆𑀚𑀺𑀢𑀫𑁂𑀖𑀲𑀗𑁆𑀓𑀸𑀲𑀦𑁆𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀕𑁆𑀖𑀦𑁆𑀢𑀺 𑀅𑀪𑀺𑀦𑀯𑀁 𑀆𑀤𑀺𑀢𑁄 𑀢𑀣𑀸𑀮𑀤𑁆𑀥𑀯𑁄𑀳𑀸𑀭𑁂𑀦, 𑀅𑀦𑀜𑁆𑀜𑀧𑀭𑀺𑀪𑁄𑀕𑀢𑀸𑀬, 𑀢𑀣𑀸 𑀯𑀸 𑀲𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑁂𑀦 𑀲𑁄 𑀧𑀢𑁆𑀢𑁄 𑀲𑀩𑁆𑀩𑀓𑀸𑀮𑀁 ‘‘𑀧𑀘𑁆𑀘𑀕𑁆𑀖𑀁’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀲𑀺𑀮𑀸𑀤𑀺𑀯𑀼𑀢𑁆𑀢𑀭𑀢𑀦𑀮𑀓𑁆𑀔𑀡𑀽𑀧𑀧𑀢𑁆𑀢𑀺𑀬𑀸 𑀯𑀸 𑀲𑁄 𑀧𑀢𑁆𑀢𑁄 ‘‘𑀧𑀘𑁆𑀘𑀕𑁆𑀖’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁪𑁦𑁭. 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀚𑁆𑀛𑀸𑀲𑀬𑀯𑀲𑁂𑀦, 𑀦 𑀧𑀭𑁂𑀦 𑀉𑀲𑁆𑀲𑀸𑀳𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀢𑀺𑀧𑁆𑀧𑀕𑀪𑀸𑀯𑀫𑁂𑀯 𑀤𑀺𑀲𑁆𑀯𑀸’’𑀢𑀺 𑀇𑀤𑀁 𑀪𑀽𑀢𑀓𑀣𑀦𑀁 𑀦 𑀢𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀲𑀫𑁆𑀧𑀢𑁆𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀪𑀕𑀯𑀸 𑀳𑀺 𑀢𑀤𑀸 𑀓𑀸𑀮𑀲𑁆𑀲𑁂𑀯 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 ‘‘𑀯𑀸𑀲𑀦𑀸𑀪𑀸𑀕𑀺𑀬𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀧𑁄𑀝𑁆𑀞𑀧𑀸𑀤𑀁 𑀅𑀦𑀼𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀬𑀦𑁆𑀦𑀽𑀦𑀸𑀳𑀦𑁆𑀢𑀺 𑀅𑀜𑁆𑀜𑀢𑁆𑀣 𑀲𑀁𑀲𑀬𑀧𑀭𑀺𑀤𑀻𑀧𑀦𑁄, 𑀇𑀥 𑀧𑀦 𑀲𑀁𑀲𑀬𑀧𑀭𑀺𑀤𑀻𑀧𑀦𑁄 𑀯𑀺𑀬. 𑀓𑀲𑁆𑀫𑀸𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺. 𑀲𑀁𑀲𑀬𑁄 𑀦𑀸𑀫 𑀦𑀢𑁆𑀣𑀺 𑀩𑁄𑀥𑀺𑀫𑀽𑀮𑁂 𑀏𑀯 𑀲𑀫𑀼𑀕𑁆𑀖𑀸𑀝𑀺𑀢𑀢𑁆𑀢𑀸. 𑀧𑀭𑀺𑀯𑀺𑀢𑀓𑁆𑀓𑀧𑀼𑀩𑁆𑀩𑀪𑀸𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑀓𑀺𑀘𑁆𑀘𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀭𑀺𑀯𑀺𑀢𑀓𑁆𑀓𑁄 𑀏𑀯. 𑀩𑀼𑀤𑁆𑀥𑀸𑀦𑀁 𑀮𑀩𑁆𑀪𑀢𑀻𑀢𑀺 ‘‘𑀓𑀭𑀺𑀲𑁆𑀲𑀸𑀫, 𑀦 𑀓𑀭𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀓𑁄 𑀏𑀲 𑀘𑀺𑀢𑁆𑀢𑀘𑀸𑀭𑁄 𑀩𑀼𑀤𑁆𑀥𑀸𑀦𑀁 𑀮𑀩𑁆𑀪𑀢𑀺 𑀲𑀫𑁆𑀪𑀯𑀢𑀺 𑀯𑀺𑀘𑀸𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄, 𑀦 𑀧𑀦 𑀲𑀁𑀲𑀬𑀯𑀲𑁂𑀦. 𑀢𑁂𑀦𑀸𑀳𑀸𑀢𑀺 𑀬𑁂𑀦 𑀩𑀼𑀤𑁆𑀥𑀸𑀦𑀫𑁆𑀧𑀺 𑀮𑀩𑁆𑀪𑀢𑀺, 𑀢𑁂𑀦𑁂𑀯𑀸𑀳 𑀪𑀕𑀯𑀸 ‘‘𑀬𑀦𑁆𑀦𑀽𑀦𑀸𑀳’’𑀦𑁆𑀢𑀺. 𑀧𑀭𑀺𑀓𑀧𑁆𑀧𑀦𑁂 𑀯𑀸𑀬𑀁 𑀦𑀺𑀧𑀸𑀢𑁄. ‘‘𑀉𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺 𑀓𑀺𑀭𑀺𑀬𑀸𑀧𑀤𑁂𑀦 𑀯𑀼𑀘𑁆𑀘𑀫𑀸𑀦𑁄 𑀏𑀯 𑀳𑀺 𑀅𑀢𑁆𑀣𑁄 ‘‘𑀬𑀦𑁆𑀦𑀽𑀦𑀸’’𑀢𑀺 𑀦𑀺𑀧𑀸𑀢𑀧𑀤𑁂𑀦 𑀚𑁄𑀢𑀻𑀬𑀢𑀺. 𑀅𑀳𑀁 𑀬𑀦𑁆𑀦𑀽𑀦 𑀉𑀧𑀲𑀗𑁆𑀓𑀫𑁂𑀬𑁆𑀬𑀦𑁆𑀢𑀺 𑀬𑁄𑀚𑀦𑀸. 𑀬𑀤𑀺 𑀧𑀦𑀸𑀢𑀺 𑀇𑀤𑀫𑁆𑀧𑀺 𑀢𑁂𑀦 𑀲𑀫𑀸𑀦𑀢𑁆𑀣𑀦𑁆𑀢𑀺 𑀆𑀳 ‘‘𑀬𑀤𑀺 𑀧𑀦𑀸𑀳𑀦𑁆𑀢𑀺 𑀅𑀢𑁆𑀣𑁄’’𑀢𑀺.

𑁪𑁦𑁮. 𑀬𑀣𑀸 𑀉𑀦𑁆𑀦𑀢𑀧𑁆𑀧𑀸𑀬𑁄 𑀲𑀤𑁆𑀤𑁄 𑀉𑀦𑁆𑀦𑀸𑀤𑁄, 𑀏𑀯𑀁 𑀯𑀺𑀧𑀼𑀮𑀪𑀸𑀯𑁂𑀦 𑀉𑀧𑀭𑀽𑀧𑀭𑀺 𑀧𑀯𑀢𑁆𑀢𑁄𑀧𑀺 𑀉𑀦𑁆𑀦𑀸𑀤𑁄𑀢𑀺 𑀢𑀤𑀼𑀪𑀬𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀧𑀸𑀴𑀺𑀬𑀁 ‘‘𑀉𑀦𑁆𑀦𑀸𑀤𑀺𑀦𑀺𑀬𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀉𑀘𑁆𑀘𑀁 𑀦𑀤𑀫𑀸𑀦𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑁆𑀲𑀸𑀢𑀺 𑀧𑀭𑀺𑀲𑀸𑀬. 𑀉𑀤𑁆𑀥𑀁𑀕𑀫𑀦𑀯𑀲𑁂𑀦𑀸𑀢𑀺 𑀉𑀦𑁆𑀦𑀢𑀩𑀳𑀼𑀮𑀢𑀸𑀬 𑀉𑀕𑁆𑀕𑀦𑁆𑀢𑁆𑀯𑀸 𑀉𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀦𑀯𑀲𑁂𑀦. 𑀤𑀺𑀲𑀸𑀲𑀼 𑀧𑀢𑁆𑀣𑀝𑀯𑀲𑁂𑀦𑀸𑀢𑀺 𑀯𑀺𑀧𑀼𑀮𑀪𑀸𑀯𑁂𑀦 𑀪𑀽𑀢𑀧𑀭𑀫𑁆𑀧𑀭𑀸𑀬 𑀲𑀩𑁆𑀩𑀤𑀺𑀲𑀸𑀲𑀼 𑀧𑀢𑁆𑀣𑀭𑀡𑀯𑀲𑁂𑀦. 𑀇𑀤𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀢𑀸𑀬 𑀓𑀸𑀭𑀡𑀁, 𑀢𑀲𑁆𑀲 𑀘 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀲𑁆𑀲𑀸𑀤𑁄 𑀦𑀸𑀫 𑀓𑀸𑀫𑀕𑀼𑀡𑀲𑁆𑀲𑀸𑀤𑁄. 𑀓𑀸𑀫𑀪𑀯𑀸𑀤𑀺𑀕𑀢𑁄 𑀅𑀲𑁆𑀲𑀸𑀤𑁄 𑀪𑀯𑀲𑁆𑀲𑀸𑀤𑁄.

𑁪𑁦𑁯. 𑀲𑀡𑁆𑀞𑀧𑁂𑀲𑀻𑀢𑀺 𑀲𑀁𑀬𑀫𑀦𑀯𑀲𑁂𑀦 𑀲𑀫𑁆𑀫𑀤𑁂𑀯 𑀞𑀧𑁂𑀲𑀺, 𑀲𑀡𑁆𑀞𑀧𑀦𑀜𑁆𑀘𑁂𑀢𑁆𑀣 𑀢𑀺𑀭𑀘𑁆𑀙𑀸𑀦𑀓𑀣𑀸𑀬 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀅𑀕𑀸𑀭𑀯𑀲𑁆𑀲 𑀚𑀳𑀸𑀧𑀦𑀯𑀲𑁂𑀦 𑀆𑀘𑀸𑀭𑀲𑁆𑀲 𑀲𑀺𑀓𑁆𑀔𑀸𑀧𑀦𑀁, 𑀬𑀣𑀸𑀯𑀼𑀢𑁆𑀢𑀤𑁄𑀲𑀲𑁆𑀲 𑀦𑀺𑀕𑀽𑀳𑀦𑀜𑁆𑀘 𑀳𑁄𑀢𑀻𑀢𑀺 𑀆𑀳 ‘‘𑀲𑀺𑀓𑁆𑀔𑀸𑀧𑁂𑀲𑀻’’𑀢𑀺𑀆𑀤𑀺. 𑀅𑀧𑁆𑀧𑀲𑀤𑁆𑀤𑀦𑁆𑀢𑀺 𑀦𑀺𑀲𑁆𑀲𑀤𑁆𑀤𑀁, 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀪𑀸𑀯𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀧𑁆𑀧𑀫𑀚𑁆𑀚𑀦𑁆𑀢𑀻𑀢𑀺 𑀦 𑀅𑀕𑀸𑀭𑀯𑀁 𑀓𑀭𑁄𑀦𑁆𑀢𑀺.

𑁪𑁧𑁦. 𑀦𑁄 𑀆𑀕𑀢𑁂 𑀆𑀦𑀦𑁆𑀤𑁄𑀢𑀺 𑀪𑀕𑀯𑀢𑀺 𑀆𑀕𑀢𑁂 𑀦𑁄 𑀅𑀫𑁆𑀳𑀸𑀓𑀁 𑀆𑀦𑀦𑁆𑀤𑁄 𑀧𑀻𑀢𑀺 𑀳𑁄𑀢𑀺. 𑀧𑀺𑀬𑀲𑀫𑀼𑀤𑀸𑀘𑀸𑀭𑀸𑀢𑀺 𑀧𑀺𑀬𑀸𑀮𑀸𑀧𑀸. ‘‘𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀻’’𑀢𑀺 𑀯𑀢𑁆𑀯𑀸 𑀦 𑀓𑁂𑀯𑀮𑀫𑀬𑀫𑁂𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀧𑀩𑁆𑀩𑀚𑀺𑀢𑀸 𑀬𑁂𑀪𑀼𑀬𑁆𑀬𑁂𑀦 𑀪𑀕𑀯𑀢𑁄 𑀅𑀧𑀘𑀺𑀢𑀺𑀁 𑀓𑀭𑁄𑀦𑁆𑀢𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀦𑁆𑀢𑀜𑁆𑀳𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸, 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀉𑀘𑁆𑀘𑀸𑀓𑀼𑀮𑀻𑀦𑀢𑀸𑀬𑀸’’𑀢𑀺, 𑀢𑁂𑀦 𑀲𑀸𑀲𑀦𑁂 𑀅𑀧𑁆𑀧𑀲𑀦𑁆𑀦𑀸𑀧𑀺 𑀓𑀼𑀮𑀕𑀸𑀭𑀯𑁂𑀦 𑀪𑀕𑀯𑀢𑀺 𑀅𑀧𑀘𑀺𑀢𑀺𑀁 𑀓𑀭𑁄𑀦𑁆𑀢𑁂 𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀏𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀓𑀣𑀸 𑀓𑀸 𑀦𑀸𑀫. 𑀯𑀺𑀧𑁆𑀧𑀓𑀢𑀸 𑀆𑀭𑀤𑁆𑀥𑀸 𑀳𑀼𑀢𑁆𑀯𑀸 𑀅𑀧𑀭𑀺𑀬𑁄𑀲𑀺𑀢𑀸. ‘‘𑀓𑀸 𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺 𑀯𑀤𑀦𑁆𑀢𑁄 𑀅𑀢𑁆𑀣𑀢𑁄 𑀢𑀲𑁆𑀲𑀸 𑀧𑀭𑀺𑀬𑁄𑀲𑀸𑀧𑀦𑀁 𑀧𑀝𑀺𑀚𑀸𑀦𑀸𑀢𑀺 𑀦𑀸𑀫. ‘‘𑀓𑀸 𑀓𑀣𑀸’’𑀢𑀺 𑀘 𑀅𑀯𑀺𑀲𑁂𑀲𑀘𑁄𑀤𑀦𑀸𑀢𑀺 𑀬𑀲𑁆𑀲𑀸 𑀢𑀲𑁆𑀲𑀸 𑀲𑀩𑁆𑀩𑀲𑁆𑀲𑀸𑀧𑀺 𑀓𑀣𑀸𑀬 𑀧𑀭𑀺𑀬𑁄𑀲𑀸𑀧𑀦𑀁 𑀧𑀝𑀺𑀜𑁆𑀜𑀸𑀢𑀜𑁆𑀘 𑀳𑁄𑀢𑀺, 𑀢𑀜𑁆𑀘 𑀧𑀭𑁂𑀲𑀁 𑀅𑀲𑀩𑁆𑀩𑀜𑁆𑀜𑀽𑀦𑀁 𑀅𑀯𑀺𑀲𑀬𑀦𑁆𑀢𑀺 𑀆𑀳 ‘‘𑀧𑀭𑀺𑀬𑀦𑁆𑀢𑀁 𑀦𑁂𑀢𑁆𑀯𑀸 𑀤𑁂𑀫𑀻𑀢𑀺 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀻’’𑀢𑀺.

𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁪𑁧𑁧. 𑀲𑀼𑀓𑀸𑀭𑀡𑀦𑁆𑀢𑀺 𑀲𑀼𑀦𑁆𑀤𑀭𑀁 𑀅𑀢𑁆𑀣𑀸𑀯𑀳𑀁 𑀳𑀺𑀢𑀸𑀯𑀳𑀁 𑀓𑀸𑀭𑀡𑀁. 𑀦𑀸𑀦𑀸𑀢𑀺𑀢𑁆𑀣𑁂𑀲𑀼 𑀦𑀸𑀦𑀸𑀮𑀤𑁆𑀥𑀻𑀲𑀼 𑀦𑀺𑀬𑀼𑀢𑁆𑀢𑀸𑀢𑀺 𑀦𑀸𑀦𑀸𑀢𑀺𑀢𑁆𑀣𑀺𑀓𑀸, 𑀢𑁂 𑀏𑀯 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸. 𑀓𑀼𑀢𑀽𑀳𑀮𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀓𑁄𑀢𑀽𑀳𑀮𑀸, 𑀲𑀸 𑀏𑀯 𑀲𑀸𑀮𑀸𑀢𑀺 𑀓𑁄𑀢𑀽𑀳𑀮𑀲𑀸𑀮𑀸, 𑀢𑁂𑀦𑀸𑀳 ‘‘𑀓𑁄𑀢𑀽𑀳𑀮𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄’’𑀢𑀺. 𑀲𑀜𑁆𑀜𑀸𑀦𑀺𑀭𑁄𑀥𑁂𑀢𑀺 𑀲𑀜𑁆𑀜𑀸𑀲𑀻𑀲𑁂𑀦𑀸𑀬𑀁 𑀤𑁂𑀲𑀦𑀸, 𑀢𑀲𑁆𑀫𑀸 𑀲𑀜𑁆𑀜𑀸𑀲𑀳𑀕𑀢𑀸 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀢𑀢𑁆𑀣 𑀧𑀦 𑀘𑀺𑀢𑁆𑀢𑀁 𑀧𑀥𑀸𑀦𑀦𑁆𑀢𑀺 𑀆𑀳 ‘‘𑀘𑀺𑀢𑁆𑀢𑀦𑀺𑀭𑁄𑀥𑁂’’𑀢𑀺. 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑀲𑁆𑀲 𑀧𑀦 𑀢𑁂𑀳𑀺 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸, 𑀅𑀯𑀺𑀲𑀬𑀢𑁆𑀢𑀸 𑀘 ‘‘𑀔𑀡𑀺𑀓𑀦𑀺𑀭𑁄𑀥𑁂’’𑀢𑀺 𑀆𑀳. 𑀓𑀸𑀫𑀁 𑀲𑁄𑀧𑀺 𑀢𑁂𑀲𑀁 𑀅𑀯𑀺𑀲𑀬𑁄𑀯, 𑀅𑀢𑁆𑀣𑀢𑁄 𑀧𑀦 𑀦𑀺𑀭𑁄𑀥𑀓𑀣𑀸 𑀯𑀼𑀘𑁆𑀘𑀫𑀸𑀦𑀸 𑀢𑀢𑁆𑀣𑁂𑀯 𑀢𑀺𑀝𑁆𑀞𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀓𑀺𑀢𑁆𑀢𑀺𑀖𑁄𑀲𑁄𑀢𑀺 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑁄 𑀪𑀯𑀦𑁆𑀢𑀭𑀧𑀝𑀺𑀘𑁆𑀙𑀦𑁆𑀦𑀁 𑀓𑀸𑀭𑀡𑀁 𑀏𑀯𑀁 𑀳𑀢𑁆𑀣𑀸𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀢𑀺, 𑀲𑀸𑀯𑀓𑁂 𑀘 𑀏𑀤𑀺𑀲𑁂 𑀲𑀁𑀯𑀭𑀲𑀫𑀸𑀤𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀢𑀻’’𑀢𑀺 𑀣𑀼𑀢𑀺𑀖𑁄𑀲𑁄 𑀬𑀸𑀯 𑀪𑀯𑀕𑁆𑀕𑀸 𑀧𑀢𑁆𑀣𑀭𑀢𑀺. 𑀧𑀝𑀺𑀪𑀸𑀕𑀓𑀺𑀭𑀺𑀬𑀦𑁆𑀢𑀺 𑀧𑀴𑀸𑀲𑀯𑀲𑁂𑀦 𑀧𑀝𑀺𑀪𑀸𑀕𑀪𑀽𑀢𑀁 𑀧𑀬𑁄𑀕𑀁 𑀓𑀭𑁄𑀦𑁆𑀢𑁄. 𑀪𑀯𑀦𑁆𑀢𑀭𑀲𑀫𑀬𑀦𑁆𑀢𑀺 𑀢𑀢𑁆𑀭 𑀢𑀢𑁆𑀭 𑀯𑀼𑀝𑁆𑀞𑀦𑀲𑀫𑀬𑀁 𑀅𑀪𑀽𑀢𑀧𑀭𑀺𑀓𑀧𑁆𑀧𑀺𑀢𑀁 𑀓𑀺𑀜𑁆𑀘𑀺 𑀉𑀧𑁆𑀧𑀸𑀤𑀺𑀬𑀁 𑀯𑀢𑁆𑀣𑀼𑀁 𑀅𑀢𑁆𑀢𑀦𑁄 𑀲𑀫𑀬𑀁 𑀓𑀢𑁆𑀯𑀸. 𑀓𑀺𑀜𑁆𑀘𑀺𑀤𑁂𑀯 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 ‘‘𑀏𑀮𑀫𑀽𑀕𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀢𑁆𑀢𑀓𑀁, 𑀯𑁂𑀮𑀁 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀓𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑀁 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀦𑁆𑀢𑀺. 𑀦𑀺𑀭𑁄𑀥𑀓𑀣𑀦𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀣𑀁.

𑀢𑁂𑀲𑀽𑀢𑀺 𑀓𑁄𑀢𑀽𑀳𑀮𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀢𑀺𑀢𑁆𑀣𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼. 𑀏𑀓𑀘𑁆𑀘𑁂𑀢𑀺 𑀏𑀓𑁂. 𑀧𑀼𑀭𑀺𑀫𑁄𑀢𑀺 ‘‘𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸’’𑀢𑀺 𑀏𑀯𑀁𑀯𑀸𑀤𑀻. 𑀬𑁆𑀯𑀸𑀬𑀁 𑀇𑀥 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀅𑀲𑀜𑁆𑀜𑀪𑀸𑀯𑀸𑀯𑀳𑀁 𑀲𑀫𑀸𑀧𑀢𑁆𑀢𑀺𑀁. 𑀦𑀺𑀭𑁄𑀥𑁂𑀢𑀺 𑀲𑀜𑁆𑀜𑀸𑀦𑀺𑀭𑁄𑀥𑁂. 𑀳𑁂𑀢𑀼𑀁 𑀅𑀧𑀲𑁆𑀲𑀦𑁆𑀢𑁄𑀢𑀺 𑀬𑁂𑀦 𑀳𑁂𑀢𑀼𑀦𑀸 𑀅𑀲𑀜𑁆𑀜𑀪𑀯𑁂 𑀲𑀜𑁆𑀜𑀸𑀬 𑀦𑀺𑀭𑁄𑀥𑁄 𑀲𑀩𑁆𑀩𑀲𑁄 𑀅𑀦𑀼𑀧𑁆𑀧𑀸𑀤𑁄, 𑀬𑁂𑀦 𑀘 𑀢𑀢𑁄 𑀘𑀼𑀢𑀲𑁆𑀲 𑀇𑀥 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀢𑀲𑁆𑀲𑀸 𑀉𑀧𑁆𑀧𑀸𑀤𑁄, 𑀢𑀁 𑀅𑀯𑀺𑀲𑀬𑀢𑀸𑀬 𑀅𑀧𑀲𑁆𑀲𑀦𑁆𑀢𑁄.

𑀦𑀦𑁆𑀢𑀺 𑀧𑀞𑀫𑀯𑀸𑀤𑀺𑀁. 𑀦𑀺𑀲𑁂𑀥𑁂𑀢𑁆𑀯𑀸𑀢𑀺 ‘‘𑀦 𑀔𑁄 𑀦𑀸𑀫𑁂𑀢𑀁 𑀪𑁄 𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀅𑀲𑀜𑁆𑀜𑀺𑀓𑀪𑀸𑀯𑀦𑁆𑀢𑀺 𑀫𑀼𑀜𑁆𑀙𑀸𑀧𑀢𑁆𑀢𑀺𑀬𑀸 𑀓𑀺𑀭𑀺𑀬𑀫𑀬𑀲𑀜𑁆𑀜𑀸𑀯𑀲𑁂𑀦 𑀯𑀺𑀕𑀢𑀲𑀜𑁆𑀜𑀺𑀪𑀸𑀯𑀁. 𑀯𑀓𑁆𑀔𑀢𑀺 𑀳𑀺 ‘‘𑀯𑀺𑀲𑀜𑁆𑀜𑀻 𑀳𑀼𑀢𑁆𑀯𑀸’’𑀢𑀺. 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀲𑀦𑁆𑀢𑀸𑀧𑀦𑁂𑀦 𑀅𑀢𑁆𑀢𑀦𑁆𑀢𑀧𑁄. 𑀖𑁄𑀭𑀢𑀧𑁄𑀢𑀺 𑀤𑀼𑀓𑁆𑀓𑀭𑀢𑀸𑀬 𑀪𑀻𑀫𑀢𑀧𑁄. 𑀧𑀭𑀺𑀫𑀸𑀭𑀺𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀸𑀧𑀸𑀤𑀦𑁂𑀦 𑀲𑀩𑁆𑀩𑀲𑁄 𑀫𑀺𑀮𑀸𑀧𑀺𑀢𑀘𑀓𑁆𑀔𑀸𑀤𑀺𑀦𑁆𑀤𑁆𑀭𑀺𑀬𑁄. 𑀪𑀕𑁆𑀕𑁄𑀢𑀺 𑀪𑀜𑁆𑀚𑀺𑀢𑀓𑀼𑀲𑀮𑀚𑁆𑀛𑀸𑀲𑀬𑁄. 𑀏𑀯𑀫𑀸𑀳𑀸𑀢𑀺 ‘‘𑀏𑀯𑀁 𑀲𑀜𑁆𑀜𑀸 𑀳𑀺 𑀪𑁄 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸’’𑀢𑀺𑀆𑀤𑀺𑀆𑀓𑀸𑀭𑁂𑀦 𑀲𑀜𑁆𑀜𑀸𑀦𑀺𑀭𑁄𑀥𑀫𑀸𑀳. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑁄 𑀧𑀭𑁂𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀬𑀣𑀸𑀭𑀳𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀆𑀣𑀩𑁆𑀩𑀡𑀧𑀬𑁄𑀕𑀦𑁆𑀢𑀺 𑀆𑀣𑀩𑁆𑀩𑀡𑀯𑁂𑀤𑀯𑀺𑀳𑀺𑀢𑀁 𑀆𑀣𑀩𑁆𑀩𑀡𑀺𑀓𑀸𑀦𑀁 𑀯𑀺𑀲𑀜𑁆𑀜𑀺𑀪𑀸𑀯𑀸𑀧𑀸𑀤𑀦𑀧𑀬𑁄𑀕𑀁. 𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀢𑁆𑀯𑀸𑀢𑀺 𑀆𑀣𑀩𑁆𑀩𑀡𑀯𑁂𑀤𑁂 𑀆𑀕𑀢𑀅𑀕𑁆𑀕𑀺𑀚𑀼𑀳𑀦𑀧𑀼𑀩𑁆𑀩𑀓𑀁 𑀫𑀦𑁆𑀢𑀚𑀧𑁆𑀧𑀦𑀁 𑀧𑀬𑁄𑀚𑁂𑀢𑁆𑀯𑀸 𑀲𑀻𑀲𑀘𑁆𑀙𑀺𑀦𑁆𑀦𑀢𑀸𑀤𑀺𑀤𑀲𑁆𑀲𑀦𑁂𑀦 𑀲𑀜𑁆𑀜𑀸𑀦𑀺𑀭𑁄𑀥𑀫𑀸𑀳. 𑀢𑀲𑁆𑀲𑀸𑀢𑀺 𑀬𑀲𑁆𑀲 𑀲𑀻𑀲𑀘𑁆𑀙𑀺𑀦𑁆𑀦𑀢𑀸𑀤𑀺 𑀤𑀲𑁆𑀲𑀺𑀢𑀁, 𑀢𑀲𑁆𑀲.

𑀬𑀓𑁆𑀔𑀤𑀸𑀲𑀻𑀦𑀦𑁆𑀢𑀺 𑀤𑁂𑀯𑀤𑀸𑀲𑀻𑀦𑀁, 𑀬𑀸 ‘‘𑀤𑁂𑀯𑀢𑀸𑀪𑀢𑀺𑀬𑁄𑀢𑀺𑀧𑀺’’ 𑀯𑀼𑀘𑁆𑀘𑀦𑁆𑀢𑀺. 𑀫𑀤𑀦𑀺𑀤𑁆𑀤𑀦𑁆𑀢𑀺 𑀲𑀼𑀭𑀸𑀫𑀤𑀦𑀺𑀫𑀺𑀢𑁆𑀢𑀓𑀁 𑀲𑀼𑀧𑀦𑀁 𑀤𑁂𑀯𑀢𑀽𑀧𑀳𑀸𑀭𑀦𑁆𑀢𑀺 𑀦𑀘𑁆𑀘𑀦𑀕𑀸𑀬𑀦𑀸𑀤𑀺𑀦𑀸 𑀤𑁂𑀯𑀢𑀸𑀦𑀁 𑀧𑀽𑀚𑀁. 𑀲𑀼𑀭𑀸𑀧𑀸𑀢𑀺𑀦𑁆𑀢𑀺 𑀧𑀸𑀢𑀺𑀧𑀼𑀡𑁆𑀡𑀁 𑀲𑀼𑀭𑀁. 𑀤𑀺𑀯𑀸𑀢𑀺 𑀅𑀢𑀺𑀤𑀺𑀯𑀸 𑀉𑀲𑁆𑀲𑀽𑀭𑁂.

𑀏𑀮𑀫𑀽𑀕𑀓𑀣𑀸 𑀯𑀺𑀬𑀸𑀢𑀺 𑀇𑀫𑁂𑀲𑀁 𑀧𑀡𑁆𑀟𑀺𑀢𑀫𑀸𑀦𑀻𑀦𑀁 𑀓𑀣𑀸 𑀅𑀦𑁆𑀥𑀩𑀸𑀮𑀓𑀣𑀸𑀲𑀤𑀺𑀲𑀻. 𑀘𑀢𑁆𑀢𑀸𑀭𑁄 𑀦𑀺𑀭𑁄𑀥𑁂𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀥𑀼𑀭𑁂 𑀘𑀢𑁆𑀢𑀸𑀭𑁄 𑀦𑀺𑀭𑁄𑀥𑁂 𑀏𑀢𑁂 𑀧𑀜𑁆𑀜𑀧𑁂𑀦𑁆𑀢𑀺. 𑀦 𑀘 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀦𑀸𑀦𑀸𑀲𑀪𑀸𑀯𑁂𑀦 𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀣 𑀔𑁄 𑀏𑀓𑀲𑀪𑀸𑀯𑁂𑀦, 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀘𑀸’’𑀢𑀺𑀆𑀤𑀺. 𑀅𑀜𑁆𑀜𑁂𑀦𑁂𑀯𑀸𑀢𑀺 𑀇𑀫𑁂𑀳𑀺 𑀯𑀼𑀢𑁆𑀢𑀸𑀓𑀸𑀭𑀢𑁄 𑀅𑀜𑁆𑀜𑀸𑀓𑀸𑀭𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. ‘‘𑀅𑀬𑀁 𑀦𑀺𑀭𑁄𑀥𑁄, 𑀅𑀬𑀁 𑀦𑀺𑀭𑁄𑀥𑁄’’𑀢𑀺 𑀆𑀫𑁂𑀟𑀺𑀢𑀯𑀘𑀦𑀁 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀦𑀺𑀭𑁄𑀥𑀁 𑀯𑀺𑀪𑀸𑀯𑁂𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀢𑀁 𑀅𑀳𑁄 𑀦𑀽𑀦𑀸𑀢𑀺 𑀏𑀢𑁆𑀣 𑀅𑀳𑁄𑀢𑀺 𑀅𑀘𑁆𑀙𑀭𑀺𑀬𑁂, 𑀦𑀽𑀦𑀸𑀢𑀺 𑀅𑀦𑀼𑀲𑁆𑀲𑀭𑀡𑁂 𑀦𑀺𑀧𑀸𑀢𑁄. 𑀢𑀲𑁆𑀫𑀸 𑀅𑀳𑁄 𑀦𑀽𑀦 𑀪𑀕𑀯𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀤𑁂𑀲𑀦𑀢𑁆𑀢𑀸 𑀦𑀺𑀭𑁄𑀥𑀫𑁆𑀧𑀺 𑀅𑀳𑁄 𑀅𑀘𑁆𑀙𑀭𑀺𑀬𑀁 𑀓𑀢𑁆𑀯𑀸 𑀓𑀣𑁂𑀬𑁆𑀬 𑀫𑀜𑁆𑀜𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀳𑁄 𑀦𑀽𑀦 𑀲𑀼𑀕𑀢𑁄’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀘𑁆𑀙𑀭𑀺𑀬𑀯𑀺𑀪𑀸𑀯𑀦𑀢𑁄 𑀏𑀯 𑀘𑁂𑀢𑁆𑀣 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀘𑀦𑀁, 𑀅𑀘𑁆𑀙𑀭𑀺𑀬𑀢𑁆𑀣𑁄𑀧𑀺 𑀘𑁂𑀢𑁆𑀣 𑀅𑀳𑁄-𑀲𑀤𑁆𑀤𑁄. 𑀲𑁄 𑀬𑀲𑁆𑀫𑀸 𑀅𑀦𑀼𑀲𑁆𑀲𑀭𑀡𑀫𑀼𑀔𑁂𑀦𑁂𑀯 𑀢𑁂𑀦 𑀕𑀳𑀺𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀳𑁄 𑀦𑀽𑀦𑀸𑀢𑀺 𑀅𑀦𑀼𑀲𑁆𑀲𑀭𑀡𑀢𑁆𑀣𑁂’’𑀢𑀺. 𑀓𑀸𑀮𑀧𑀼𑀕𑁆𑀕𑀮𑀸𑀤𑀺𑀯𑀺𑀪𑀸𑀕𑁂𑀦 𑀩𑀳𑀼𑀪𑁂𑀤𑀢𑁆𑀢𑀸 𑀇𑀫𑁂𑀲𑀁 𑀦𑀺𑀭𑁄𑀥𑀥𑀫𑁆𑀫𑀸𑀦𑀦𑁆𑀢𑀺 𑀩𑀳𑀼𑀯𑀘𑀦𑀁, 𑀓𑀼𑀲𑀮-𑀲𑀤𑁆𑀤𑀬𑁄𑀕𑁂𑀦 𑀲𑀸𑀫𑀺𑀯𑀘𑀦𑀁 𑀪𑀼𑀫𑁆𑀫𑀢𑁆𑀣𑁂 𑀤𑀝𑁆𑀞𑀩𑁆𑀩𑀁. 𑀘𑀺𑀡𑁆𑀡𑀯𑀲𑀺𑀢𑀸𑀬𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀁 𑀯𑀲𑀻𑀪𑀸𑀯𑀲𑁆𑀲 𑀘𑀺𑀡𑁆𑀡𑀢𑁆𑀢𑀸. 𑀲𑀪𑀸𑀯𑀁 𑀚𑀸𑀦𑀸𑀢𑀻𑀢𑀺 𑀦𑀺𑀭𑁄𑀥𑀲𑁆𑀲 𑀲𑀪𑀸𑀯𑀁 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺.

𑀅𑀳𑁂𑀢𑀼𑀓𑀲𑀜𑁆𑀜𑀼𑀧𑁆𑀧𑀸𑀤𑀦𑀺𑀭𑁄𑀥𑀓𑀣𑀸𑀯𑀡𑁆𑀡𑀦𑀸

𑁪𑁧𑁨. 𑀖𑀭𑀫𑀚𑁆𑀛𑁂𑀬𑁂𑀯 𑀧𑀓𑁆𑀔𑀮𑀺𑀢𑀸𑀢𑀺 𑀖𑀭𑀢𑁄 𑀩𑀳𑀺 𑀕𑀦𑁆𑀢𑀼𑀓𑀸𑀫𑀸 𑀧𑀼𑀭𑀺𑀲𑀸 𑀫𑀕𑁆𑀕𑀁 𑀅𑀦𑁄𑀢𑀭𑀺𑀢𑁆𑀯𑀸 𑀖𑀭𑀸𑀚𑀺𑀭𑁂𑀦 𑀲𑀫𑀢𑀮𑁂 𑀯𑀺𑀯𑀝𑀗𑁆𑀕𑀡𑁂 𑀏𑀯 𑀧𑀓𑁆𑀔𑀮𑀦𑀁 𑀧𑀢𑁆𑀢𑀸, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼, 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄𑀢𑀺 𑀏𑀯𑀫𑀸𑀤𑀺 𑀯𑀺𑀪𑀸𑀕𑁂𑀦 𑀇𑀥 𑀧𑀬𑁄𑀚𑀦𑀁 𑀦𑀢𑁆𑀣𑀺 𑀲𑀜𑁆𑀜𑀸𑀬 𑀅𑀓𑀸𑀭𑀡𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁆𑀢𑀸 𑀘𑁄𑀤𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀭𑀡𑀲𑁆𑀲𑁂𑀯 𑀦𑀸𑀫’’𑀦𑁆𑀢𑀺.

𑀧𑀸𑀴𑀺𑀬𑀁 ‘‘𑀉𑀧𑁆𑀧𑀚𑁆𑀚𑀦𑁆𑀢𑀺𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺𑀧𑀻’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 ‘‘𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀧𑀦 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯, 𑀦 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀘𑀦𑀁, 𑀦 𑀦𑀺𑀭𑁄𑀥𑀲𑁆𑀲 𑀲𑀳𑁂𑀢𑀼𑀲𑀧𑁆𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀉𑀧𑁆𑀧𑀸𑀤𑁄 𑀳𑀺 𑀲𑀳𑁂𑀢𑀼𑀓𑁄, 𑀦 𑀦𑀺𑀭𑁄𑀥𑁄. 𑀬𑀤𑀺 𑀳𑀺 𑀦𑀺𑀭𑁄𑀥𑁄𑀧𑀺 𑀲𑀳𑁂𑀢𑀼𑀓𑁄 𑀲𑀺𑀬𑀸, 𑀢𑀲𑁆𑀲 𑀦𑀺𑀭𑁄𑀥𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀁 𑀅𑀗𑁆𑀓𑀼𑀭𑀸𑀤𑀻𑀦𑀁 𑀯𑀺𑀬, 𑀦 𑀘 𑀢𑀲𑁆𑀲 𑀦𑀺𑀭𑁄𑀥𑁄 𑀅𑀢𑁆𑀣𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀴𑀺𑀬𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀘 𑀦𑀬𑁄 𑀔𑀡𑀦𑀺𑀭𑁄𑀥𑀯𑀲𑁂𑀦 𑀯𑀼𑀢𑁆𑀢𑁄. 𑀬𑁄 𑀧𑀦 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀲𑀩𑁆𑀩𑀲𑁄𑀯 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄, 𑀲𑁄 ‘‘𑀲𑀳𑁂𑀢𑀼𑀓𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄 𑀢𑀣𑀸𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀦𑀸 𑀅𑀪𑀸𑀯𑀢𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺. (𑀤𑀻. 𑀦𑀺. 𑁧.𑁪𑁧𑁨) 𑀢𑀢𑁄 𑀏𑀯 𑀘 𑀇𑀥𑀸𑀧𑀺 𑀯𑀼𑀢𑁆𑀢𑀁 ‘‘𑀲𑀜𑁆𑀜𑀸𑀬 𑀲𑀳𑁂𑀢𑀼𑀓𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀁 𑀤𑀻𑀧𑁂𑀢𑀼’’𑀦𑁆𑀢𑀺.

𑀲𑀺𑀓𑁆𑀔𑀸 𑀏𑀓𑀸𑀢𑀺 𑀏𑀢𑁆𑀣 𑀲𑀺𑀓𑁆𑀔𑀸𑀢𑀺 𑀓𑀭𑀡𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀏𑀓-𑀲𑀤𑁆𑀤𑁄 𑀅𑀜𑁆𑀜𑀧𑀭𑀺𑀬𑀸𑀬𑁄 ‘‘𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀺 𑀲𑀢𑁄 𑀯𑀸 𑀧𑀦 𑀲𑀢𑁆𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁮𑁫 𑀆𑀤𑀬𑁄; 𑀫. 𑀦𑀺. 𑁩.𑁨𑁧) 𑀯𑀺𑀬, 𑀦 𑀲𑀗𑁆𑀔𑁆𑀬𑀸𑀯𑀸𑀘𑀻𑀢𑀺 𑀆𑀳 ‘‘𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀺𑀓𑁆𑀔𑀸𑀬 𑀏𑀓𑀘𑁆𑀘𑀸 𑀲𑀜𑁆𑀜𑀸 𑀚𑀸𑀬𑀦𑁆𑀢𑀻’’𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁪𑁧𑁩. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀉𑀧𑀭𑀺𑀤𑁂𑀲𑀦𑀸𑀬𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀯𑀲𑁂𑀦 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀆𑀕𑀢𑀸𑀢𑀺 𑀲𑀪𑀸𑀯𑀢𑁄 𑀉𑀧𑀓𑀸𑀭𑀢𑁄 𑀘 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀢𑀺𑀬𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀯𑀲𑁂𑀦 𑀆𑀕𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀓𑀸𑀫𑀜𑁆𑀘𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀸 𑀆𑀕𑀢𑀸 𑀏𑀯, 𑀢𑀣𑀸𑀧𑀺 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬 𑀏𑀯 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑁄 𑀤𑀲𑁆𑀲𑀺𑀢𑁄, 𑀇𑀢𑀭𑀸 𑀢𑀲𑁆𑀲 𑀲𑀫𑁆𑀪𑀸𑀭𑀪𑀸𑀯𑁂𑀦 𑀆𑀦𑀻𑀢𑀸.

𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄𑀢𑀺 𑀧𑀜𑁆𑀘𑀓𑀸𑀫𑀓𑁄𑀝𑁆𑀞𑀸𑀲𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀓𑀭𑀸𑀕𑁄. 𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀘𑀸𑀭𑁄𑀢𑀺 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀢𑀸𑀯𑀲𑁂𑀦 𑀅𑀲𑀫𑀼𑀧𑁆𑀧𑀦𑁆𑀦𑁄 𑀬𑁄 𑀓𑁄𑀘𑀺 𑀓𑀸𑀫𑀘𑀸𑀭𑁄 𑀬𑀸 𑀓𑀸𑀘𑀺 𑀮𑁄𑀪𑀼𑀧𑁆𑀧𑀢𑁆𑀢𑀺. 𑀧𑀼𑀭𑀺𑀫𑁄 𑀯𑀺𑀲𑀬𑀯𑀲𑁂𑀦 𑀦𑀺𑀬𑀫𑀺𑀢𑀢𑁆𑀢𑀸 𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑁄𑀯 𑀮𑁄𑀪𑁄 𑀤𑀝𑁆𑀞𑀩𑁆𑀩𑁄, 𑀇𑀢𑀭𑁄 𑀧𑀦 𑀛𑀸𑀦𑀦𑀺𑀓𑀦𑁆𑀢𑀺𑀪𑀯𑀭𑀸𑀕𑀸𑀤𑀺𑀧𑁆𑀧𑀪𑁂𑀤𑁄 𑀲𑀩𑁆𑀩𑁄𑀧𑀺 𑀮𑁄𑀪𑀘𑀸𑀭𑁄 𑀓𑀸𑀫𑀦𑀝𑁆𑀞𑁂𑀦 𑀓𑀸𑀫𑁂𑀲𑀼 𑀧𑀯𑀢𑁆𑀢𑀦𑀢𑁄. 𑀲𑀩𑁆𑀩𑁂𑀧𑀺 𑀳𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸𑀢𑀺. 𑀉𑀪𑀬𑁂𑀲𑀫𑁆𑀧𑀺 𑀓𑀸𑀫𑀲𑀜𑁆𑀜𑀸𑀢𑀺𑀦𑀸𑀫𑀢𑀸 𑀲𑀳𑀘𑀭𑀡𑀜𑀸𑀬𑁂𑀦𑀸𑀢𑀺 ‘‘𑀓𑀸𑀫𑀲𑀜𑁆𑀜𑀸’’𑀢𑀺 𑀧𑀤𑀼𑀤𑁆𑀥𑀸𑀭𑀁 𑀓𑀢𑁆𑀯𑀸 𑀢𑀤𑀼𑀪𑀬𑀁 𑀦𑀺𑀤𑁆𑀤𑀺𑀝𑁆𑀞𑀁.

‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀘𑀸𑀭𑀢𑁄 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲 𑀯𑀺𑀲𑁂𑀲𑀤𑀲𑁆𑀲𑀦𑀁. 𑀓𑀸𑀫𑀁 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄𑀧𑀺 𑀅𑀲𑀫𑀼𑀧𑁆𑀧𑀦𑁆𑀦𑁄 𑀏𑀯 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑀻𑀬𑀢𑀺, 𑀢𑀲𑁆𑀫𑀺𑀁 𑀧𑀦 𑀲𑀫𑀼𑀕𑁆𑀖𑀸𑀝𑀺𑀢𑁂𑀧𑀺 𑀦 𑀲𑀩𑁆𑀩𑁄 𑀭𑀸𑀕𑁄 𑀲𑀫𑀼𑀕𑁆𑀖𑀸𑀝𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀕𑁆𑀕𑀳𑀡𑁂𑀦 𑀦 𑀇𑀢𑀭𑀲𑁆𑀲 𑀲𑀩𑁆𑀩𑀲𑁆𑀲 𑀭𑀸𑀕𑀲𑁆𑀲 𑀕𑀳𑀡𑀁 𑀳𑁄𑀢𑀻𑀢𑀺 𑀉𑀪𑀬𑀲𑀸𑀥𑀸𑀭𑀡𑁂𑀦 𑀧𑀭𑀺𑀬𑀸𑀬𑁂𑀦 𑀉𑀪𑀬𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 𑀓𑀸𑀫𑀲𑀜𑁆𑀜𑀸𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀢𑀤𑀼𑀪𑀬𑀁 𑀲𑀭𑀽𑀧𑀢𑁄 𑀯𑀺𑀲𑁂𑀲𑀢𑁄 𑀘 𑀤𑀲𑁆𑀲𑁂𑀢𑁆𑀯𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀪𑀸𑀯𑀢𑁄 ‘‘𑀅𑀲𑀫𑀼𑀧𑁆𑀧𑀦𑁆𑀦𑀓𑀸𑀫𑀘𑀸𑀭𑁄 𑀧𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑀤𑀺𑀲𑀢𑁆𑀢𑀸𑀢𑀺 𑀓𑀸𑀫𑀲𑀜𑁆𑀜𑀸𑀤𑀺𑀪𑀸𑀯𑁂𑀦 𑀲𑀫𑀸𑀦𑀢𑁆𑀢𑀸, 𑀏𑀢𑁂𑀦 𑀧𑀸𑀴𑀺𑀬𑀁 ‘‘𑀧𑀼𑀭𑀺𑀫𑀸’’𑀢𑀺 𑀲𑀤𑀺𑀲𑀓𑀧𑁆𑀧𑀦𑀸𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀸𑀕𑀢𑀸 𑀳𑀺 𑀇𑀥 ‘‘𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀢𑁂𑀦𑀸𑀳 ‘‘𑀅𑀦𑀼𑀧𑁆𑀧𑀦𑁆𑀦𑀸𑀯 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺.

𑀦𑀻𑀯𑀭𑀡𑀯𑀺𑀯𑁂𑀓𑀢𑁄 𑀚𑀸𑀢𑀢𑁆𑀢𑀸 𑀯𑀺𑀯𑁂𑀓𑀚𑁂𑀳𑀺 𑀧𑀞𑀫𑀚𑁆𑀛𑀸𑀦𑀧𑀻𑀢𑀺𑀲𑀼𑀔𑁂𑀳𑀺 𑀲𑀳 𑀅𑀓𑁆𑀔𑀸𑀢𑀩𑁆𑀩𑀸, 𑀢𑀁𑀓𑁄𑀝𑁆𑀞𑀸𑀲𑀺𑀓𑀸 𑀯𑀸𑀢𑀺 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀲𑀗𑁆𑀔𑀸𑀢𑀸. 𑀦𑀸𑀦𑀢𑁆𑀢𑀲𑀜𑁆𑀜𑀸𑀧𑀝𑀺𑀖𑀲𑀜𑁆𑀜𑀸𑀳𑀺 𑀦𑀺𑀧𑀼𑀡𑀢𑀸𑀬 𑀲𑀼𑀔𑀼𑀫𑀪𑀽𑀢𑀢𑀸𑀬 𑀲𑀼𑀔𑀼𑀫𑀲𑀜𑁆𑀜𑀸 𑀪𑀽𑀢𑀸 𑀲𑀼𑀔𑀼𑀫𑀪𑀸𑀯𑁂𑀦, 𑀧𑀭𑀫𑀢𑁆𑀣𑀪𑀸𑀯𑁂𑀦 𑀅𑀯𑀺𑀧𑀭𑀻𑀢𑀲𑀪𑀸𑀯𑀸. 𑀛𑀸𑀦𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀲𑀺𑀤𑁆𑀥𑀸 𑀲𑀡𑁆𑀳𑀲𑀼𑀔𑀼𑀫𑀢𑀸 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀑𑀴𑀸𑀭𑀺𑀓𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀲𑀼𑀔𑀼𑀫𑀸’’𑀢𑀺. 𑀪𑀽𑀢𑀢𑀸𑀬𑀸𑀢𑀺 𑀯𑀺𑀚𑁆𑀚𑀫𑀸𑀦𑀢𑀸𑀬. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀯𑀸𑀭𑁂𑀲𑀼.

𑀲𑀫𑀸𑀧𑀚𑁆𑀚𑀦𑀸𑀥𑀺𑀝𑁆𑀞𑀸𑀦𑀸𑀦𑀺 𑀯𑀺𑀬 𑀯𑀼𑀝𑁆𑀞𑀸𑀦𑀁 𑀛𑀸𑀦𑁂 𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀳𑁄𑀢𑀺 𑀬𑀣𑀸 𑀢𑀁 𑀥𑀫𑁆𑀫𑀸𑀦𑀁 𑀪𑀗𑁆𑀕𑀓𑁆𑀔𑀡𑁄 𑀥𑀫𑁆𑀫𑁂𑀲𑀼, 𑀦 𑀆𑀯𑀚𑁆𑀚𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀻𑀢𑀺 ‘‘𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀅𑀥𑀺𑀝𑁆𑀞𑀳𑀦𑁆𑀢𑁄 𑀯𑀼𑀝𑁆𑀞𑀳𑀦𑁆𑀢𑁄 𑀘 𑀲𑀺𑀓𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 ‘‘𑀆𑀯𑀚𑁆𑀚𑀦𑁆𑀢𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄’’𑀢𑀺. 𑀢𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀁. 𑀢𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁, 𑀢𑀲𑁆𑀫𑀸 𑀧𑀞𑀫𑀚𑁆𑀛𑀸𑀦𑁂𑀦 𑀳𑁂𑀢𑀼𑀪𑀽𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀪𑀸𑀯𑁄 𑀘𑁂𑀢𑁆𑀣 𑀛𑀸𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑀜𑁆𑀜𑀸𑀬 𑀉𑀧𑁆𑀧𑀢𑁆𑀢𑀺𑀬𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁄 𑀓𑀸𑀫𑀲𑀜𑁆𑀜𑀸𑀬 𑀦𑀺𑀭𑁄𑀥𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑀸𑀯, 𑀢𑀜𑁆𑀘 𑀔𑁄 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦. 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀁 ‘‘𑀢𑀣𑀸𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀦𑀸 𑀅𑀪𑀸𑀯𑀢𑁄’’𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀬𑁆𑀯𑀸𑀬𑀁 𑀧𑀞𑀫𑀚𑁆𑀛𑀸𑀦𑀢𑀧𑁆𑀧𑀝𑀺𑀧𑀓𑁆𑀔𑀲𑀜𑁆𑀜𑀸𑀯𑀲𑁂𑀦 ‘‘𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀏𑀢𑁂𑀦 𑀦𑀬𑁂𑀦. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀯𑀸𑀭𑁂𑀲𑀼.

𑁪𑁧𑁪. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀢𑀁𑀢𑀁𑀲𑀜𑁆𑀜𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑁂 𑀯𑀼𑀘𑁆𑀘𑀫𑀸𑀦𑁂 𑀅𑀗𑁆𑀕𑀯𑀲𑁂𑀦 𑀲𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. ‘‘𑀅𑀗𑁆𑀕𑀢𑁄 𑀲𑀫𑁆𑀫𑀲𑀦’’𑀦𑁆𑀢𑀺 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬 𑀮𑀓𑁆𑀔𑀡𑀯𑀘𑀦𑀁. 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀜𑁆𑀳𑀺 𑀓𑀭𑁄𑀦𑁆𑀢𑁄 𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀅𑀗𑁆𑀕𑀢𑁄 𑀲𑀫𑁆𑀫𑀲𑀦𑀁 𑀓𑀭𑁄𑀢𑀺, 𑀦 𑀘 𑀲𑀜𑁆𑀜𑀸 𑀲𑀫𑀸𑀧𑀢𑁆𑀢𑀺𑀬𑀸 𑀓𑀺𑀜𑁆𑀘𑀺 𑀅𑀗𑁆𑀕𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀘 ‘‘𑀇𑀤𑀜𑁆𑀘 𑀲𑀜𑁆𑀜𑀸 𑀲𑀜𑁆𑀜𑀸𑀢𑀺 𑀏𑀯𑀁 𑀅𑀗𑁆𑀕𑀢𑁄 𑀲𑀫𑁆𑀫𑀲𑀦𑀁 𑀉𑀤𑁆𑀥𑀝’’𑀦𑁆𑀢𑀺. 𑀅𑀗𑁆𑀕𑀢𑁄𑀢𑀺 𑀯𑀸 𑀅𑀯𑀬𑀯𑀢𑁄𑀢𑀺 𑀅𑀢𑁆𑀣𑁄, 𑀅𑀦𑀼𑀧𑀤𑀥𑀫𑁆𑀫𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀤𑁂𑀯𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑁂𑀯.

𑀬𑀢𑁄 𑀔𑁄𑀢𑀺 𑀧𑀘𑁆𑀘𑀢𑁆𑀢𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀬𑁄 𑀦𑀸𑀫𑀸’’𑀢𑀺 𑀬𑀣𑀸 ‘‘𑀆𑀤𑀺𑀫𑁆𑀳𑀻’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀆𑀤𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺 𑀇𑀢𑀭𑀯𑀺𑀪𑀢𑁆𑀢𑀺𑀢𑁄𑀧𑀺 𑀢𑁄-𑀲𑀤𑁆𑀤𑀲𑁆𑀲 𑀮𑀩𑁆𑀪𑀦𑀢𑁄. 𑀲𑀓𑀲𑁆𑀫𑀺𑀁 𑀅𑀢𑁆𑀢𑀦𑀸 𑀅𑀥𑀺𑀕𑀢𑁂 𑀲𑀜𑁆𑀜𑀸 𑀲𑀓𑀲𑀜𑁆𑀜𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀓𑀲𑀜𑁆𑀜𑀻, 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀧𑀞𑀫𑀚𑁆𑀛𑀸𑀦𑀲𑀜𑁆𑀜𑀸𑀬 𑀲𑀜𑁆𑀜𑀯𑀸’’𑀢𑀺. 𑀲𑀓𑀲𑀜𑁆𑀜𑀻𑀢𑀺 𑀘𑁂𑀢𑁆𑀣 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀦𑀺𑀭𑁄𑀥𑀧𑀸𑀤𑀓𑀢𑀸𑀬 𑀲𑀸𑀢𑀺𑀲𑀬𑀸𑀬 𑀛𑀸𑀦𑀲𑀜𑁆𑀜𑀸𑀬 𑀅𑀢𑁆𑀣𑀺𑀪𑀸𑀯𑀚𑁄𑀢𑀓𑁄 𑀈-𑀓𑀸𑀭𑁄 𑀤𑀝𑁆𑀞𑀩𑁆𑀩𑁄, 𑀢𑁂𑀦𑁂𑀯𑀸𑀳 ‘‘𑀅𑀦𑀼𑀧𑀼𑀩𑁆𑀩𑁂𑀦 𑀲𑀜𑁆𑀜𑀕𑁆𑀕𑀁 𑀨𑀼𑀲𑀢𑀻’’𑀢𑀺𑀆𑀤𑀺. 𑀢𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣 𑀲𑀓𑀲𑀜𑁆𑀜𑀺𑀢𑀸𑀕𑁆𑀕𑀳𑀡𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀛𑀸𑀦𑁂 𑀲𑀩𑁆𑀩𑀲𑁄 𑀲𑀼𑀘𑀺𑀡𑁆𑀡𑀯𑀲𑀻𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀮𑁄𑀓𑀺𑀬𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁, 𑀲𑀸𑀫𑀺𑀅𑀢𑁆𑀣𑁂 𑀏𑀯 𑀯𑀸. 𑀬𑀤𑀕𑁆𑀕𑁂𑀦 𑀳𑀺 𑀢𑀁 𑀢𑁂𑀲𑀼 𑀲𑁂𑀝𑁆𑀞𑀁, 𑀢𑀤𑀕𑁆𑀕𑁂𑀦 𑀢𑁂𑀲𑀫𑁆𑀧𑀺 𑀲𑁂𑀝𑁆𑀞𑀦𑁆𑀢𑀺. ‘‘𑀮𑁄𑀓𑀺𑀬𑀸𑀦’’𑀦𑁆𑀢𑀺 𑀯𑀺𑀲𑁂𑀲𑀦𑀁 𑀮𑁄𑀓𑀼𑀢𑁆𑀢𑀭𑀲𑀫𑀸𑀧𑀢𑁆𑀢𑀻𑀳𑀺 𑀢𑀲𑁆𑀲 𑀅𑀲𑁂𑀝𑁆𑀞𑀪𑀸𑀯𑀢𑁄. ‘‘𑀓𑀺𑀘𑁆𑀘𑀓𑀸𑀭𑀓𑀲𑀫𑀸𑀧𑀢𑁆𑀢𑀻𑀦’’𑀦𑁆𑀢𑀺 𑀯𑀺𑀲𑁂𑀲𑀦𑀁 𑀅𑀓𑀺𑀘𑁆𑀘𑀓𑀸𑀭𑀓𑀲𑀫𑀸𑀧𑀢𑁆𑀢𑀺𑀢𑁄 𑀢𑀲𑁆𑀲 𑀅𑀲𑁂𑀝𑁆𑀞𑀪𑀸𑀯𑀢𑁄. 𑀅𑀓𑀺𑀘𑁆𑀘𑀓𑀸𑀭𑀓𑀢𑀸 𑀘𑀲𑁆𑀲𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀸𑀪𑀸𑀯𑀯𑀘𑀦𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀣𑁂𑀯 𑀳𑀺 𑀢𑀢𑁆𑀣 𑀲𑀜𑁆𑀜𑀸, 𑀏𑀯𑀁 𑀨𑀲𑁆𑀲𑀸𑀤𑀬𑁄 𑀧𑀻𑀢𑀺. 𑀬𑀤𑀕𑁆𑀕𑁂𑀦 𑀳𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀧𑀓𑀢𑀺𑀯𑀺𑀧𑀲𑁆𑀲𑀓𑀸𑀦𑀁 𑀲𑀫𑁆𑀫𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀭𑀽𑀧𑁂𑀦 𑀞𑀺𑀢𑀸, 𑀢𑀤𑀕𑁆𑀕𑁂𑀦 𑀳𑁂𑀝𑁆𑀞𑀺𑀫𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀸 𑀯𑀺𑀬 𑀧𑀝𑀼𑀓𑀺𑀘𑁆𑀘𑀓𑀭𑀡𑀲𑀫𑀢𑁆𑀣𑀸𑀧𑀺 𑀦 𑀳𑁄𑀦𑁆𑀢𑀻𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀭𑀫𑀢𑁆𑀣𑀫𑀜𑁆𑀚𑀼𑀲𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 𑀆𑀭𑀼𑀧𑁆𑀧𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁨𑁮𑁬) 𑀲𑀯𑀺𑀲𑁂𑀲𑀁 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀬𑀣𑀸 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀲𑀫𑀸𑀧𑀢𑁆𑀢𑀺𑀬𑁄 𑀉𑀧𑀭𑀺𑀫𑀸𑀦𑀁 𑀉𑀧𑀭𑀺𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺, 𑀦 𑀏𑀯𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀓𑀲𑁆𑀲𑀘𑀺𑀧𑀺 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀢𑀲𑁆𑀫𑀸 𑀲𑀸 𑀅𑀓𑀺𑀘𑁆𑀘𑀓𑀸𑀭𑀺𑀓𑀸, 𑀇𑀢𑀭𑀸 𑀓𑀺𑀘𑁆𑀘𑀓𑀸𑀭𑀺𑀓𑀸 𑀯𑀼𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 𑀢𑀲𑁆𑀲𑀸𑀧𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀧𑀭𑀺𑀤𑀫𑀦𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀲𑀸𑀥𑀦𑀢𑁄. 𑀢𑀲𑁆𑀫𑀸 𑀧𑀼𑀭𑀺𑀫𑁄𑀬𑁂𑀯 𑀅𑀢𑁆𑀣𑁄 𑀬𑀼𑀢𑁆𑀢𑁄.

𑀧𑀓𑀧𑁆𑀧𑁂𑀢𑀻𑀢𑀺 𑀲𑀁𑀯𑀺𑀤𑀳𑀢𑀺. 𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀳𑀺 𑀛𑀸𑀦𑀲𑀼𑀔𑀁 𑀅𑀢𑁆𑀢𑀦𑀺 𑀲𑀁𑀯𑀺𑀤𑀳𑀢𑀺 𑀦𑀸𑀫. 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀆𑀬𑀽𑀳𑀢𑀺, 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀳𑀺 𑀲𑀫𑀼𑀤𑀬𑀝𑁆𑀞𑁄. 𑀬𑀲𑁆𑀫𑀸 𑀦𑀺𑀓𑀦𑁆𑀢𑀺𑀯𑀲𑁂𑀦 𑀘𑁂𑀢𑀦𑀸𑀓𑀺𑀘𑁆𑀘𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀺, 𑀢𑀲𑁆𑀫𑀸 𑀨𑀮𑀽𑀧𑀘𑀸𑀭𑁂𑀦 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀓𑀦𑁆𑀢𑀺𑀁 𑀓𑀼𑀭𑀼𑀫𑀸𑀦𑁄 𑀅𑀪𑀺𑀲𑀗𑁆𑀔𑀭𑁄𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀸 𑀇𑀤𑀸𑀦𑀺 𑀫𑁂 𑀮𑀩𑁆𑀪𑀫𑀸𑀦𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀁 𑀢𑀁𑀲𑀫𑀢𑀺𑀓𑁆𑀓𑀫𑁂𑀦𑁂𑀯 𑀉𑀧𑀭𑀺𑀛𑀸𑀦𑀢𑁆𑀣𑀸𑀬 𑀘𑁂𑀢𑀦𑀸𑀪𑀺𑀲𑀗𑁆𑀔𑀭𑀡𑀲𑀫𑁆𑀪𑀯𑀢𑁄. 𑀅𑀜𑁆𑀜𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀳𑀺 𑀅𑀜𑁆𑀜𑀸. 𑀢𑀢𑁄 𑀣𑀽𑀮𑀢𑀭𑀪𑀸𑀯𑀢𑁄 𑀑𑀴𑀸𑀭𑀺𑀓𑀸. 𑀓𑀸 𑀧𑀦 𑀢𑀸𑀢𑀺 𑀆𑀳 ‘‘𑀪𑀯𑀗𑁆𑀕𑀲𑀜𑁆𑀜𑀸’’𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀯𑀼𑀝𑁆𑀞𑀸𑀬 𑀏𑀯 𑀳𑀺 𑀉𑀧𑀭𑀺𑀛𑀸𑀦𑀢𑁆𑀣𑀸𑀬 𑀘𑁂𑀢𑀦𑀸𑀪𑀺𑀲𑀗𑁆𑀔𑀭𑀡𑀸𑀦𑀺 𑀪𑀯𑁂𑀬𑁆𑀬𑀼𑀁, 𑀯𑀼𑀝𑁆𑀞𑀸𑀦𑀜𑁆𑀘 𑀪𑀯𑀗𑁆𑀕𑀯𑀲𑁂𑀦 𑀳𑁄𑀢𑀺. 𑀬𑀸𑀯 𑀘 𑀉𑀧𑀭𑀺 𑀛𑀸𑀦𑀲𑀫𑀸𑀧𑀚𑁆𑀚𑀦𑀁, 𑀢𑀸𑀯 𑀅𑀦𑁆𑀢𑀭𑀦𑁆𑀢𑀭𑀸 𑀪𑀯𑀗𑁆𑀕𑀧𑁆𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀪𑀯𑀗𑁆𑀕𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺.

𑀘𑁂𑀢𑁂𑀦𑁆𑀢𑁄𑀯𑀸𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀁 𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂 𑀲𑀫𑀸𑀧𑀚𑁆𑀚𑀦𑁆𑀢𑁄 𑀏𑀯. 𑀦 𑀘𑁂𑀢𑁂𑀢𑀺 𑀢𑀣𑀸 𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑁂𑀲𑀼 𑀯𑀺𑀬 𑀯𑀸 𑀧𑀼𑀩𑁆𑀩𑀸𑀪𑁄𑀕𑀸𑀪𑀸𑀯𑀢𑁄 𑀧𑀼𑀩𑁆𑀩𑀸𑀪𑁄𑀕𑀯𑀲𑁂𑀦 𑀳𑀺 𑀛𑀸𑀦𑀁 𑀧𑀓𑀧𑁆𑀧𑁂𑀦𑁆𑀢𑁄 𑀇𑀥 ‘‘𑀘𑁂𑀢𑁂𑀢𑀻’’𑀢𑀺 𑀯𑀼𑀢𑁆𑀢𑁄. 𑀬𑀲𑁆𑀫𑀸 ‘‘𑀅𑀳𑀫𑁂𑀢𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀫𑀺 𑀉𑀧𑀲𑀫𑁆𑀧𑀸𑀤𑁂𑀫𑀺 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀏𑀯𑀁 𑀅𑀪𑀺𑀲𑀗𑁆𑀔𑀭𑀡𑀁 𑀢𑀢𑁆𑀣 𑀲𑀸𑀮𑀬𑀲𑁆𑀲𑁂𑀯 𑀳𑁄𑀢𑀺, 𑀦 𑀅𑀦𑀸𑀮𑀬𑀲𑁆𑀲, 𑀢𑀲𑁆𑀫𑀸 𑀏𑀓𑀁 𑀘𑀺𑀢𑁆𑀢𑀓𑁆𑀔𑀡𑀺𑀓𑀫𑁆𑀧𑀺 𑀛𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑁄 𑀢𑀢𑁆𑀣 𑀅𑀧𑁆𑀧𑀳𑀻𑀦𑀦𑀺𑀓𑀦𑁆𑀢𑀺𑀓𑀢𑀸𑀬 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦𑀲𑁆𑀲 𑀢𑀣𑀸 𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑁂𑀲𑀼 𑀯𑀺𑀬 𑀯𑀸 𑀢𑀢𑁆𑀣 𑀧𑀼𑀩𑁆𑀩𑀸𑀪𑁄𑀕𑁄 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀦 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀯𑀺𑀯𑀭𑀡𑀁. ‘‘𑀲𑁆𑀯𑀸𑀬𑀫𑀢𑁆𑀣𑁄’’𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀬 𑀧𑀝𑀺𑀧𑀸𑀤𑁂𑀢𑀺.

𑀧𑀘𑁆𑀙𑀸𑀪𑀸𑀕𑁂𑀢𑀺 𑀧𑀺𑀢𑀼𑀖𑀭𑀲𑁆𑀲 𑀧𑀘𑁆𑀙𑀸𑀪𑀸𑀕𑁂. 𑀢𑀢𑁄 𑀧𑀼𑀢𑁆𑀢𑀖𑀭𑀢𑁄. 𑀮𑀤𑁆𑀥𑀖𑀭𑀫𑁂𑀯𑀸𑀢𑀺 𑀬𑀢𑁄 𑀅𑀦𑁂𑀦 𑀪𑀺𑀓𑁆𑀔𑀸 𑀮𑀤𑁆𑀥𑀸, 𑀢𑀫𑁂𑀯 𑀖𑀭𑀁 𑀧𑀼𑀢𑁆𑀢𑀕𑁂𑀳𑀫𑁂𑀯. 𑀆𑀲𑀦𑀲𑀸𑀮𑀸 𑀯𑀺𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀢𑀢𑁄 𑀧𑀺𑀢𑀼𑀖𑀭𑀧𑀼𑀢𑁆𑀢𑀖𑀭𑀝𑁆𑀞𑀸𑀦𑀺𑀬𑀸𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀦𑀁 𑀉𑀧𑀕𑀦𑁆𑀢𑀩𑁆𑀩𑀢𑁄. 𑀧𑀺𑀢𑀼𑀖𑀭𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸𑀢𑀺 𑀧𑀯𑀺𑀲𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀧𑀺𑀢𑀼𑀖𑀭𑀁 𑀦 𑀫𑀦𑀲𑀺 𑀓𑀢𑁆𑀯𑀸. 𑀧𑀼𑀢𑁆𑀢𑀖𑀭𑀲𑁆𑀲𑁂𑀯 𑀆𑀘𑀺𑀓𑁆𑀔𑀦𑀁 𑀯𑀺𑀬 𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀫𑁆𑀧𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦 𑀫𑀦𑀲𑀺 𑀓𑀢𑁆𑀯𑀸 𑀧𑀭𑀢𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀅𑀢𑁆𑀣𑀸𑀬 𑀏𑀯 𑀫𑀦𑀲𑀺𑀓𑀸𑀭𑁄. 𑀏𑀯𑀁 𑀅𑀫𑀦𑀲𑀺𑀓𑀸𑀭𑀲𑀸𑀫𑀜𑁆𑀜𑁂𑀦, 𑀫𑀦𑀲𑀺𑀓𑀸𑀭𑀲𑀸𑀫𑀜𑁆𑀜𑁂𑀦 𑀘 𑀉𑀧𑀫𑀼𑀧𑀫𑁂𑀬𑁆𑀬𑀢𑀸 𑀯𑁂𑀤𑀺𑀢𑀩𑁆𑀩𑀸 𑀆𑀘𑀺𑀓𑁆𑀔𑀦𑁂𑀦𑀧𑀺 𑀫𑀦𑀲𑀺𑀓𑀸𑀭𑀲𑁆𑀲𑁂𑀯 𑀚𑁄𑀢𑀺𑀢𑀢𑁆𑀢𑀸. 𑀦 𑀳𑀺 𑀫𑀦𑀲𑀺𑀓𑀸𑀭𑁂𑀦 𑀯𑀺𑀦𑀸 𑀆𑀘𑀺𑀓𑁆𑀔𑀦𑀁 𑀲𑀫𑁆𑀪𑀯𑀢𑀺.

𑀢𑀸 𑀛𑀸𑀦𑀲𑀜𑁆𑀜𑀸𑀢𑀺 𑀢𑀸 𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑁂 𑀧𑀯𑀢𑁆𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸. 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀧𑀤𑁂𑀲𑁂𑀦𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀦 𑀉𑀧𑀭𑀺 𑀅𑀦𑀼𑀧𑁆𑀧𑀸𑀤𑁄. 𑀬𑀣𑀸 𑀘 𑀛𑀸𑀦𑀲𑀜𑁆𑀜𑀸𑀦𑀁, 𑀏𑀯𑀁 𑀇𑀢𑀭𑀲𑀜𑁆𑀜𑀸𑀦𑀁 𑀧𑀻𑀢𑀺 𑀆𑀳 ‘‘𑀅𑀜𑁆𑀜𑀸 𑀘 𑀑𑀴𑀸𑀭𑀺𑀓𑀸 𑀪𑀯𑀗𑁆𑀕𑀲𑀜𑁆𑀜𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀽𑀢𑀺 𑀲𑁄 𑀏𑀯𑀁 𑀬𑀣𑀸𑀯𑀼𑀢𑁆𑀢𑁂 𑀲𑀜𑁆𑀜𑀸𑀕𑁆𑀕𑁂 𑀞𑀺𑀢𑁄 𑀅𑀭𑀳𑀢𑁆𑀢𑁂, 𑀅𑀦𑀸𑀕𑀸𑀫𑀺𑀨𑀮𑁂 𑀯𑀸 𑀧𑀢𑀺𑀝𑁆𑀞𑀺𑀢𑁄 𑀪𑀺𑀓𑁆𑀔𑀼 𑀤𑁆𑀯𑀻𑀳𑀺 𑀨𑀮𑁂𑀳𑀺 𑀲𑀫𑀦𑁆𑀦𑀸𑀕𑀫𑁄, 𑀢𑀺𑀡𑁆𑀡𑀁 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄𑀴𑀲𑀯𑀺𑀥𑀸 𑀜𑀸𑀡𑀘𑀭𑀺𑀬𑀸, 𑀦𑀯𑀯𑀺𑀥𑀸 𑀲𑀫𑀸𑀥𑀺𑀘𑀭𑀺𑀬𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀦𑀺𑀭𑁄𑀥𑀧𑀝𑀺𑀧𑀸𑀤𑀦𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀦𑁆𑀦𑁄. 𑀨𑀼𑀲𑀢𑀻𑀢𑀺 𑀏𑀢𑁆𑀣 𑀨𑀼𑀲𑀦𑀁 𑀦𑀸𑀫 𑀯𑀺𑀦𑁆𑀤𑀦𑀁 𑀧𑀝𑀺𑀮𑀤𑁆𑀥𑀻𑀢𑀺 𑀆𑀳 ‘‘𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀻’’𑀢𑀺. 𑀅𑀢𑁆𑀣𑀢𑁄 𑀧𑀦 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀩𑁆𑀩𑀲𑁄 𑀅𑀧𑁆𑀧𑀯𑀢𑁆𑀢𑀺 𑀏𑀯.

𑀅𑀪𑀻𑀢𑀺 𑀉𑀧𑀲𑀕𑁆𑀕𑀫𑀢𑁆𑀢𑀁 𑀦𑀺𑀭𑀢𑁆𑀣𑀓𑀁, 𑀢𑀲𑁆𑀫𑀸 ‘‘𑀲𑀜𑁆𑀜𑀸’’ 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀦𑀺𑀭𑁄𑀥𑀧𑀤𑁂𑀦 𑀅𑀦𑀦𑁆𑀢𑀭𑀺𑀓𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀧𑀤𑁂 𑀯𑀢𑁆𑀢𑀩𑁆𑀩𑁂 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑁂 𑀲𑀫𑁆𑀧𑀚𑀸𑀦𑀧𑀤𑀁 𑀞𑀧𑀺𑀢𑀦𑁆𑀢𑀺 𑀆𑀳 ‘‘𑀦𑀺𑀭𑁄𑀥𑀧𑀤𑁂𑀦 𑀅𑀦𑀦𑁆𑀢𑀭𑀺𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺, 𑀢𑁂𑀦𑀸𑀳 ‘‘𑀅𑀦𑀼𑀧𑀝𑀺…𑀧𑁂… 𑀅𑀢𑁆𑀣𑁄’’𑀢𑀺. 𑀢𑀢𑁆𑀭𑀸𑀧𑀻𑀢𑀺 𑀢𑀲𑁆𑀫𑀺𑀫𑁆𑀧𑀺 𑀢𑀣𑀸 𑀧𑀤𑀸𑀦𑀼𑀧𑀼𑀩𑁆𑀩𑀺𑀞𑀧𑀦𑁂𑀧𑀺 𑀅𑀬𑀁 𑀯𑀺𑀲𑁂𑀲𑀢𑁆𑀣𑁄𑀢𑀺 𑀬𑁄𑀚𑀦𑀸. 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀢𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀲𑀫𑁆𑀫𑀲𑀦𑀯𑀲𑁂𑀦 𑀧𑀚𑀸𑀦𑀦𑁆𑀢𑀲𑁆𑀲. 𑀅𑀦𑁆𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀦𑀺𑀭𑁄𑀥𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑁂. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀲𑀫𑁆𑀧𑀚𑀸𑀦𑀓𑀸𑀭𑀺𑀦𑁄𑀢𑀺 𑀅𑀢𑁆𑀣𑁄, 𑀢𑁂𑀦 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀧𑀸𑀝𑀺𑀳𑀸𑀭𑀺𑀓𑀧𑀜𑁆𑀜𑀸𑀬 𑀲𑀤𑁆𑀥𑀺𑀁 𑀅𑀢𑁆𑀣𑀲𑀸𑀥𑀺𑀓𑀸 𑀧𑀜𑁆𑀜𑀸 𑀓𑀺𑀘𑁆𑀘𑀢𑁄 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀢𑁂𑀦𑀸𑀳 ‘‘𑀧𑀡𑁆𑀟𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺.

𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 ‘‘𑀲𑀫𑀸𑀧𑀢𑁆𑀢𑀺𑀬𑀸 𑀲𑀭𑀽𑀧𑀯𑀺𑀲𑁂𑀲𑁄, 𑀲𑀫𑀸𑀧𑀚𑁆𑀚𑀦𑀓𑁄, 𑀲𑀫𑀸𑀧𑀚𑁆𑀚𑀦𑀲𑁆𑀲 𑀞𑀸𑀦𑀁, 𑀓𑀸𑀭𑀡𑀁, 𑀲𑀫𑀸𑀧𑀚𑁆𑀚𑀦𑀸𑀓𑀸𑀭𑁄’’𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀢𑀢𑁆𑀣𑀸𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂. (𑀯𑀺𑀲𑀼𑀤𑁆𑀥𑀻. 𑁨.𑁮𑁬𑁭) 𑀓𑀣𑀺𑀢𑀢𑁄𑀯𑀸𑀢𑀺 𑀓𑀣𑀺𑀢𑀝𑁆𑀞𑀸𑀦𑀢𑁄 𑀏𑀯 𑀕𑀳𑁂𑀢𑀩𑁆𑀩𑀸, 𑀦 𑀇𑀥 𑀢𑀁 𑀯𑀤𑀸𑀫 𑀧𑀼𑀦𑀭𑀼𑀢𑁆𑀢𑀺𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀔𑁄 𑀅𑀳𑀦𑁆𑀢𑀺 𑀏𑀢𑁆𑀣 𑀆𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄 𑀉𑀕𑁆𑀕𑀳𑀺𑀢𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀓𑀢𑁆𑀯𑀸. 𑀏𑀯𑀁 𑀧𑁄𑀝𑁆𑀞𑀧𑀸𑀤𑀸𑀢𑀺 𑀏𑀢𑁆𑀣 𑀧𑀦 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁄, 𑀢𑁂𑀦𑀸𑀳 ‘‘𑀲𑀼𑀉𑀕𑁆𑀕𑀳𑀺𑀢𑀁 𑀢𑀬𑀸𑀢𑀺 𑀅𑀦𑀼𑀚𑀸𑀦𑀦𑁆𑀢𑁄’’𑀢𑀺.

𑁪𑁧𑁫. 𑀲𑀜𑁆𑀜𑀸 𑀅𑀕𑁆𑀕𑀸 𑀏𑀢𑁆𑀣𑀸𑀢𑀺 𑀲𑀜𑁆𑀜𑀸𑀕𑁆𑀕𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼𑀧𑀺 𑀲𑀜𑁆𑀜𑀸𑀕𑁆𑀕𑀁 𑀅𑀢𑁆𑀣𑀺 𑀉𑀧𑀮𑀩𑁆𑀪𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸. ‘‘𑀧𑀼𑀣𑀽’’𑀢𑀺 𑀧𑀸𑀴𑀺𑀬𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀳𑀽𑀦𑀺𑀧𑀻’’𑀢𑀺. ‘‘𑀬𑀣𑀸’’𑀢𑀺 𑀇𑀫𑀺𑀦𑀸 𑀧𑀓𑀸𑀭𑀯𑀺𑀲𑁂𑀲𑁄 𑀓𑀭𑀡𑀧𑁆𑀧𑀓𑀸𑀭𑁄 𑀕𑀳𑀺𑀢𑁄, 𑀦 𑀧𑀓𑀸𑀭𑀲𑀸𑀫𑀜𑁆𑀜𑀦𑁆𑀢𑀺 𑀆𑀳 ‘‘𑀬𑁂𑀦 𑀬𑁂𑀦 𑀓𑀲𑀺𑀡𑁂𑀦𑀸’’𑀢𑀺, 𑀧𑀣𑀯𑀻𑀓𑀲𑀺𑀡𑁂𑀦 𑀓𑀭𑀡𑀪𑀽𑀢𑁂𑀦𑀸’’𑀢𑀺 𑀘. 𑀛𑀸𑀦𑀁 𑀢𑀸𑀯 𑀬𑀼𑀢𑁆𑀢𑁄 𑀓𑀭𑀡𑀪𑀸𑀯𑁄 𑀲𑀜𑁆𑀜𑀸𑀦𑀺𑀭𑁄𑀥𑀨𑀼𑀲𑀦𑀲𑁆𑀲 𑀲𑀸𑀥𑀓𑀢𑀫𑀪𑀸𑀯𑀢𑁄, 𑀓𑀣𑀁 𑀓𑀲𑀺𑀡𑀸𑀦𑀦𑁆𑀢𑀺? 𑀢𑁂𑀲𑀫𑁆𑀧𑀺 𑀲𑁄 𑀬𑀼𑀢𑁆𑀢𑁄 𑀏𑀯. 𑀬𑀤𑀕𑁆𑀕𑁂𑀦 𑀳𑀺 𑀛𑀸𑀦𑀸𑀦𑀁 𑀦𑀺𑀭𑁄𑀥𑀨𑀼𑀲𑀦𑀲𑁆𑀲 𑀲𑀸𑀥𑀓𑀢𑀁 𑀅𑀪𑀸𑀯𑁄, 𑀢𑀤𑀕𑁆𑀕𑁂𑀦 𑀓𑀲𑀺𑀡𑀸𑀦𑀫𑁆𑀧𑀺 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀅𑀦𑁂𑀓𑀓𑀭𑀡𑀸𑀧𑀺 𑀓𑀺𑀭𑀺𑀬𑀸 𑀳𑁄𑀢𑀺𑀬𑁂𑀯 𑀬𑀣𑀸 ‘‘𑀅𑀲𑁆𑀲𑁂𑀦 𑀬𑀸𑀦𑁂𑀦 𑀤𑀻𑀧𑀺𑀓𑀸𑀬 𑀕𑀘𑁆𑀙𑀢𑀻’’𑀢𑀺.

𑀏𑀓𑀯𑀸𑀭𑀦𑁆𑀢𑀺 𑀲𑀓𑀺𑀁. 𑀧𑀼𑀭𑀺𑀫𑀲𑀜𑁆𑀜𑀸𑀦𑀺𑀭𑁄𑀥𑀦𑁆𑀢𑀺 𑀓𑀸𑀫𑀲𑀜𑁆𑀜𑀸𑀤𑀺𑀧𑀼𑀭𑀺𑀫𑀲𑀜𑁆𑀜𑀸𑀬 𑀦𑀺𑀭𑁄𑀥𑀁, 𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀜𑁆𑀜𑀺𑀢𑀁 𑀲𑀜𑁆𑀜𑀸𑀦𑀺𑀭𑁄𑀥𑀁. 𑀏𑀓𑀁 𑀲𑀜𑁆𑀜𑀸𑀕𑁆𑀕𑀦𑁆𑀢𑀺 𑀏𑀓𑀁 𑀲𑀜𑁆𑀜𑀸𑀪𑀽𑀢𑀁 𑀅𑀕𑁆𑀕𑀁 𑀲𑁂𑀝𑁆𑀞𑀦𑁆𑀢𑀺 𑀅𑀢𑁆𑀣𑁄 𑀳𑁂𑀝𑁆𑀞𑀺𑀫𑀲𑀜𑁆𑀜𑀸𑀬 𑀉𑀓𑁆𑀓𑀝𑁆𑀞𑀪𑀸𑀯𑀢𑁄. 𑀲𑀜𑁆𑀜𑀸 𑀘 𑀲𑀸 𑀅𑀕𑁆𑀕𑀜𑁆𑀘𑀸𑀢𑀺 𑀲𑀜𑁆𑀜𑀸𑀕𑁆𑀕𑀁, 𑀦 𑀲𑀜𑁆𑀜𑀸𑀲𑀼 𑀅𑀕𑁆𑀕𑀦𑁆𑀢𑀺. 𑀤𑁆𑀯𑁂 𑀯𑀸𑀭𑁂𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁. 𑀲𑁂𑀲𑀓𑀲𑀺𑀡𑁂𑀲𑀽𑀢𑀺 𑀓𑀲𑀺𑀡𑀸𑀦𑀁𑀬𑁂𑀯 𑀕𑀳𑀡𑀁 𑀦𑀺𑀭𑁄𑀥𑀓𑀣𑀸𑀬 𑀅𑀥𑀺𑀓𑀢𑀢𑁆𑀢𑀸. 𑀢𑀢𑁄 𑀏𑀯 𑀘𑁂𑀢𑁆𑀣 𑀛𑀸𑀦𑀕𑁆𑀕𑀳𑀡𑁂𑀦 𑀓𑀲𑀺𑀡𑀚𑁆𑀛𑀸𑀦𑀸𑀦𑀺 𑀏𑀯 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀞𑀫𑀚𑁆𑀛𑀸𑀦𑁂𑀦 𑀓𑀭𑀡𑀪𑀽𑀢𑁂𑀦𑀸’’𑀢𑀺 𑀆𑀭𑀫𑁆𑀫𑀡𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀤𑀢𑀺 𑀬𑀣𑀸 ‘‘𑀬𑁂𑀦 𑀬𑁂𑀦 𑀓𑀲𑀺𑀡𑁂𑀦𑀸’’𑀢𑀺 𑀏𑀢𑁆𑀣 𑀛𑀸𑀦𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀇𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀗𑁆𑀕𑀳𑁂𑀢𑁆𑀯𑀸 𑀦𑀺𑀕𑀫𑀦𑀯𑀲𑁂𑀦 𑀯𑀤𑀢𑀺. 𑀲𑀩𑁆𑀩𑀫𑁆𑀧𑀻𑀢𑀺 𑀲𑀩𑁆𑀩𑀁 𑀏𑀓𑀯𑀸𑀭𑀁 𑀲𑀫𑀸𑀧𑀦𑁆𑀦𑀛𑀸𑀦𑀁. 𑀲𑀗𑁆𑀕𑀳𑁂𑀢𑁆𑀯𑀸𑀢𑀺 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑁂𑀦 𑀢𑀁𑀲𑀪𑀸𑀯𑀸𑀯𑀺𑀲𑁂𑀲𑀢𑁄 𑀏𑀓𑀚𑁆𑀛𑀁 𑀲𑀗𑁆𑀕𑀳𑁂𑀢𑁆𑀯𑀸. 𑀅𑀧𑀭𑀸𑀧𑀭𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁.

𑁪𑁧𑁬. 𑀛𑀸𑀦𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀲𑀜𑁆𑀜𑀸𑀜𑀸𑀡𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀧𑀞𑀫𑀦𑀬𑁂. 𑀤𑀼𑀢𑀺𑀬𑀦𑀬𑁂 𑀧𑀦 𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑁂𑀦 𑀖𑀝𑁂𑀦𑁆𑀢𑀲𑁆𑀲 𑀫𑀕𑁆𑀕𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀯𑀲𑁂𑀦 𑀲𑀜𑁆𑀜𑀸𑀜𑀸𑀡𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀬𑀲𑁆𑀫𑀸 𑀧𑀦 𑀧𑀞𑀫𑀦𑀬𑁄 𑀮𑁄𑀓𑀺𑀬𑀢𑁆𑀢𑀸 𑀑𑀴𑀸𑀭𑀺𑀓𑁄, 𑀤𑀼𑀢𑀺𑀬𑀦𑀬𑁄 𑀫𑀺𑀲𑁆𑀲𑀓𑁄 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀅𑀲𑀫𑁆𑀪𑀸𑀯𑁂𑀢𑁆𑀯𑀸 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀁 𑀲𑀼𑀪𑀁 𑀣𑀺𑀭𑀁 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀫𑁂𑀯 𑀤𑀲𑁆𑀲𑁂𑀢𑀼𑀁 𑀫𑀕𑁆𑀕𑀨𑀮𑀯𑀲𑁂𑀦 𑀲𑀜𑁆𑀜𑀸𑀜𑀸𑀡𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀢𑀢𑀺𑀬𑀦𑀬𑁂. 𑀢𑀬𑁄𑀧𑁂𑀢𑁂 𑀦𑀬𑀸 𑀫𑀕𑁆𑀕𑀲𑁄𑀥𑀦𑀯𑀲𑁂𑀦 𑀤𑀲𑁆𑀲𑀺𑀢𑀸.

‘‘𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄’’𑀢𑀺 𑀯𑀺𑀪𑀸𑀯𑁂𑀢𑀼𑀁 𑀢𑀺𑀧𑀺𑀝𑀓𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀸𑀤𑁄 𑀆𑀪𑀢𑁄. 𑀦𑀺𑀭𑁄𑀥𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀫𑀺𑀁 𑀓𑀣𑀺𑀢𑁂 𑀢𑀤𑀦𑀦𑁆𑀢𑀭𑀁 𑀲𑀜𑁆𑀜𑀸𑀜𑀸𑀡𑀼𑀧𑁆𑀧𑀢𑁆𑀢𑀺𑀁 𑀧𑀼𑀘𑁆𑀙𑀦𑁆𑀢𑁄 𑀅𑀢𑁆𑀣𑀢𑁄 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺 𑀦𑀸𑀫, 𑀦𑀺𑀭𑁄𑀥𑀢𑁄 𑀘 𑀯𑀼𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀲𑀺𑀬𑀸 𑀅𑀦𑀸𑀕𑀸𑀫𑀺𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀸, 𑀢𑀢𑁆𑀣 𑀲𑀜𑁆𑀜𑀸 𑀧𑀥𑀸𑀦𑀸, 𑀢𑀤𑀦𑀦𑁆𑀢𑀭𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑁆𑀢𑀺 𑀢𑀤𑀼𑀪𑀬𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 𑀣𑁂𑀭𑁄 ‘‘𑀓𑀺𑀁 𑀇𑀫𑁂 𑀪𑀺𑀓𑁆𑀔𑀽 𑀪𑀡𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀓𑀺𑀁 𑀇𑀫𑁂 𑀪𑀺𑀓𑁆𑀔𑀽 𑀪𑀡𑀦𑁆𑀢𑀻’’𑀢𑀺 𑀢𑀤𑀸 𑀤𑀻𑀖𑀦𑀺𑀓𑀸𑀬𑀢𑀦𑁆𑀢𑀺𑀁 𑀧𑀭𑀺𑀯𑀢𑁆𑀢𑀦𑁆𑀢𑁂 𑀇𑀫𑀁 𑀞𑀸𑀦𑀁 𑀧𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀝𑀺𑀧𑀸𑀝𑀺𑀬𑀸 𑀢𑀬𑁄 𑀦𑀬𑁂 𑀓𑀣𑁂𑀦𑁆𑀢𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀯𑀤𑀢𑀺.

𑀬𑀲𑁆𑀲 𑀬𑀣𑀸 𑀫𑀕𑁆𑀕𑀯𑀻𑀣𑀺𑀬𑀁 𑀫𑀕𑁆𑀕𑀨𑀮𑀜𑀸𑀡𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀦𑀺𑀬𑀫𑀢𑁄 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑁆𑀢𑀺 𑀆𑀳 ‘‘𑀧𑀘𑁆𑀙𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡’’𑀦𑁆𑀢𑀺. ‘‘𑀇𑀤𑀁 𑀅𑀭𑀳𑀢𑁆𑀢𑀨𑀮’’𑀦𑁆𑀢𑀺 𑀇𑀤𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁. 𑀨𑀮𑀲𑀫𑀸𑀥𑀺𑀲𑀜𑁆𑀜𑀸𑀧𑀘𑁆𑀘𑀬𑀸𑀢𑀺 𑀨𑀮𑀲𑀫𑀸𑀥𑀺𑀲𑀳𑀕𑀢𑀲𑀜𑁆𑀜𑀸𑀧𑀘𑁆𑀘𑀬𑀸. 𑀓𑀺𑀭-𑀲𑀤𑁆𑀤𑁄 𑀅𑀦𑀼𑀲𑁆𑀲𑀭𑀡𑀢𑁆𑀣𑁄. 𑀬𑀣𑀸𑀥𑀺𑀕𑀢𑀥𑀫𑁆𑀫𑀸𑀦𑀼𑀲𑁆𑀲𑀭𑀡𑀧𑀓𑁆𑀔𑀺𑀬𑀸 𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀲𑀫𑀸𑀥𑀺𑀲𑀻𑀲𑁂𑀦 𑀘𑁂𑀢𑁆𑀣 𑀲𑀩𑁆𑀩𑀁 𑀅𑀭𑀳𑀢𑁆𑀢𑀨𑀮𑀁 𑀕𑀳𑀺𑀢𑀁 𑀲𑀳𑀘𑀭𑀡𑀜𑀸𑀬𑁂𑀦, 𑀢𑀲𑁆𑀫𑀺𑀁 𑀅𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀆𑀳 ‘‘𑀇𑀤𑀧𑁆𑀧𑀘𑁆𑀘𑀬𑀸’’𑀢𑀺.

𑀲𑀜𑁆𑀜𑀸𑀅𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁪𑁧𑁭. 𑀤𑁂𑀲𑀦𑀸𑀬 𑀲𑀡𑁆𑀳𑀪𑀸𑀯𑁂𑀦 𑀲𑀸𑀭𑀫𑁆𑀪𑀫𑀓𑁆𑀔𑀺𑀲𑁆𑀲𑀸𑀤𑀺𑀫𑀮𑀯𑀺𑀲𑁄𑀥𑀦𑀢𑁄 𑀲𑀼𑀢𑀫𑀬𑀜𑀸𑀡𑀁 𑀦𑁆𑀳𑀸𑀧𑀺𑀢𑀁 𑀯𑀺𑀬, 𑀲𑀼𑀔𑀼𑀫𑀪𑀸𑀯𑁂𑀦 𑀢𑀦𑀼𑀮𑁂𑀧𑀦𑀯𑀺𑀮𑀺𑀢𑁆𑀢𑀁 𑀯𑀺𑀬, 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀢𑀸𑀬 𑀓𑀼𑀡𑁆𑀟𑀮𑀸𑀤𑀺𑀅𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀯𑀺𑀬 𑀘 𑀳𑁄𑀢𑀺, 𑀢𑀤𑀦𑀼𑀧𑀲𑁂𑀯𑀢𑁄 𑀜𑀸𑀡𑀲𑁆𑀲 𑀘 𑀢𑀣𑀸𑀪𑀸𑀯𑁄 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀢𑀣𑀸𑀪𑀸𑀯𑀸𑀧𑀢𑁆𑀢𑀺, 𑀦𑀺𑀭𑁄𑀥𑀓𑀣𑀸𑀬 𑀦𑀺𑀯𑁂𑀲𑀦𑀜𑁆𑀘𑀲𑁆𑀲 𑀲𑀺𑀭𑀺𑀲𑀬𑀦𑀧𑁆𑀧𑀯𑁂𑀲𑀦𑀲𑀤𑀺𑀲𑀦𑁆𑀢𑀺 𑀆𑀳 ‘‘𑀲𑀡𑁆𑀳𑀲𑀼𑀔𑀼𑀫…𑀧𑁂… 𑀆𑀭𑁄𑀧𑀺𑀢𑁄𑀧𑀻’’𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀦𑀺𑀭𑁄𑀥𑀓𑀣𑀸𑀬𑀁. 𑀲𑀼𑀔𑀁 𑀅𑀯𑀺𑀦𑁆𑀤𑀦𑁆𑀢𑁄 𑀫𑀦𑁆𑀤𑀩𑀼𑀤𑁆𑀥𑀺𑀢𑀸𑀬 𑀅𑀮𑀪𑀦𑁆𑀢𑁄. 𑀫𑀮𑀯𑀺𑀤𑀽𑀲𑀺𑀢𑀢𑀸𑀬 𑀕𑀽𑀣𑀝𑁆𑀞𑀸𑀦𑀲𑀤𑀺𑀲𑀁. 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀅𑀢𑁆𑀢𑀤𑀺𑀝𑁆𑀞𑀺𑀁. 𑀅𑀦𑀼𑀫𑀢𑀺𑀁 𑀕𑀳𑁂𑀢𑁆𑀯𑀸𑀢𑀺 𑀅𑀦𑀼𑀜𑁆𑀜𑀁 𑀕𑀳𑁂𑀢𑁆𑀯𑀸 ‘‘𑀏𑀤𑀺𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀁 𑀧𑀦𑀸𑀢𑀺 𑀑𑀴𑀸𑀭𑀺𑀓𑁄, 𑀫𑀦𑁄𑀫𑀬𑁄, 𑀅𑀭𑀽𑀧𑀻𑀢𑀺 𑀢𑀺𑀡𑁆𑀡𑀁 𑀅𑀢𑁆𑀢𑀯𑀸𑀤𑀸𑀦𑀁 𑀯𑀲𑁂𑀦 𑀢𑀺𑀯𑀺𑀥𑁂𑀲𑀼 𑀓𑀢𑀫𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀳𑀭𑀦𑁆𑀢𑁄𑀢𑀺 𑀯𑀺𑀤𑁆𑀥𑀁𑀲𑀦𑀢𑁄 𑀧𑀭𑀺𑀳𑀭𑀦𑁆𑀢𑁄, 𑀦𑀺𑀕𑀽𑀳𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀧𑁆𑀧𑀩𑀦𑁆𑀥𑀁 𑀏𑀓𑀢𑁆𑀢𑀯𑀲𑁂𑀦 𑀕𑀳𑁂𑀢𑁆𑀯𑀸 𑀭𑀽𑀧𑀻𑀪𑀸𑀯𑀢𑁄 ‘‘𑀑𑀴𑀸𑀭𑀺𑀓𑁄 𑀅𑀢𑁆𑀢𑀸’’𑀢𑀺 𑀧𑀘𑁆𑀘𑁂𑀢𑀺 𑀅𑀢𑁆𑀢𑀯𑀸𑀤𑀻, 𑀅𑀦𑁆𑀦𑀧𑀸𑀦𑁄𑀧𑀥𑀸𑀦𑀢𑀜𑁆𑀘𑀲𑁆𑀲 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 ‘‘𑀲𑀲𑁆𑀲𑀢𑁄’’𑀢𑀺 𑀫𑀜𑁆𑀜𑀢𑀺, 𑀭𑀽𑀧𑀻𑀪𑀸𑀯𑀢𑁄 𑀏𑀯 𑀘 𑀲𑀜𑁆𑀜𑀸𑀬 𑀅𑀜𑁆𑀜𑀢𑁆𑀢𑀁 𑀜𑀸𑀬𑀸𑀕𑀢𑀫𑁂𑀯, 𑀬𑀁 𑀯𑁂𑀤𑀯𑀸𑀤𑀺𑀦𑁄 ‘‘𑀅𑀦𑁆𑀦𑀫𑀬𑁄, 𑀧𑀸𑀦𑀫𑀬𑁄’’𑀢𑀺 𑀘 𑀤𑁆𑀯𑀺𑀥𑀸 𑀯𑁄𑀳𑀭𑀦𑁆𑀢𑀺, 𑀢𑀲𑁆𑀫𑀸 𑀧𑀭𑀺𑀩𑁆𑀩𑀸𑀚𑀓𑁄 𑀢𑀁 𑀲𑀦𑁆𑀥𑀸𑀬𑀸 ‘‘𑀑𑀴𑀸𑀭𑀺𑀓𑀁 𑀔𑁄’’𑀢𑀺 𑀆𑀳.

𑀢𑀢𑁆𑀣 𑀬𑀤𑀺 𑀅𑀢𑁆𑀢𑀸 𑀭𑀽𑀧𑀻, 𑀦 𑀲𑀜𑁆𑀜𑀻, 𑀲𑀜𑁆𑀜𑀸𑀬 𑀅𑀭𑀽𑀧𑀪𑀸𑀯𑀢𑁆𑀢𑀸, 𑀭𑀽𑀧𑀥𑀫𑁆𑀫𑀸𑀦𑀜𑁆𑀘 𑀅𑀲𑀜𑁆𑀚𑀸𑀦𑀦𑀲𑀪𑀸𑀯𑀢𑁆𑀢𑀸, 𑀭𑀽𑀧𑀻 𑀘 𑀲𑀫𑀸𑀦𑁄 𑀬𑀤𑀺 𑀢𑀯 𑀫𑀢𑁂𑀦 𑀦𑀺𑀘𑁆𑀘𑁄, 𑀲𑀜𑁆𑀜𑀸 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀦𑀢𑁄 𑀢𑀢𑁆𑀣 𑀢𑀢𑁆𑀣 𑀪𑀺𑀚𑁆𑀚𑀢𑀻𑀢𑀺 𑀪𑁂𑀤𑀲𑀩𑁆𑀪𑀸𑀯𑀢𑁄 𑀅𑀦𑀺𑀘𑁆𑀘𑀸, 𑀏𑀯𑀫𑁆𑀧𑀺 ‘‘𑀅𑀜𑁆𑀜𑀸 𑀲𑀜𑁆𑀜𑀸, 𑀅𑀜𑁆𑀜𑁄 𑀅𑀢𑁆𑀢𑀸’’𑀢𑀺 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀅𑀘𑁂𑀢𑀦𑁄𑀢𑀺 𑀦 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄, 𑀨𑀮𑀲𑁆𑀲 𑀘 𑀦 𑀉𑀧𑀪𑀼𑀜𑁆𑀚𑀓𑁄𑀢𑀺 𑀆𑀧𑀦𑁆𑀦𑀫𑁂𑀯, 𑀢𑁂𑀦𑀸𑀳 ‘‘𑀑𑀴𑀸𑀭𑀺𑀓𑁄 𑀘 𑀳𑀺 𑀢𑁂’’𑀢𑀺𑀆𑀤𑀺. 𑀧𑀘𑁆𑀘𑀸𑀕𑀘𑁆𑀙𑀢𑁄𑀢𑀺 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑀲𑁆𑀲, 𑀚𑀸𑀦𑀢𑁄𑀢𑀺 𑀅𑀢𑁆𑀣𑁄. ‘‘𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀉𑀧𑁆𑀧𑀸𑀤𑀧𑀼𑀩𑁆𑀩𑀓𑁄 𑀦𑀺𑀭𑁄𑀥𑁄, 𑀦 𑀘 𑀉𑀧𑁆𑀧𑀦𑁆𑀦𑀁 𑀅𑀦𑀺𑀭𑀼𑀚𑁆𑀛𑀓𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀘𑀢𑀼𑀦𑁆𑀦𑀜𑁆𑀘 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺.

𑁪𑁧𑁮-𑁪𑁨𑁦. 𑀫𑀦𑁄𑀫𑀬𑀦𑁆𑀢𑀺 𑀛𑀸𑀦𑀫𑀦𑀲𑁄 𑀯𑀲𑁂𑀦 𑀫𑀦𑁄𑀫𑀬𑀁. 𑀬𑁄 𑀳𑀺 𑀩𑀸𑀳𑀺𑀭𑀧𑀘𑁆𑀘𑀬𑀦𑀺𑀭𑀧𑁂𑀓𑁆𑀔𑁄, 𑀲𑁄 𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑁄𑀢𑀺 𑀫𑀦𑁄𑀫𑀬𑁄. 𑀭𑀽𑀧𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀲𑀭𑀻𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀬𑀁 𑀯𑁂𑀤𑀯𑀸𑀤𑀺𑀦𑁄 𑀆𑀦𑀦𑁆𑀤𑀫𑀬𑁄, 𑀯𑀺𑀜𑁆𑀜𑀸𑀡𑀫𑀬𑁄𑀢𑀺 𑀘 𑀤𑁆𑀯𑀺𑀥𑀸 𑀯𑁄𑀳𑀭𑀦𑁆𑀢𑀺. 𑀢𑀢𑁆𑀭𑀸𑀧𑀻𑀢𑀺 ‘‘𑀫𑀦𑁄𑀫𑀬𑁄 𑀅𑀢𑁆𑀢𑀸’’𑀢𑀺 𑀇𑀫𑀲𑁆𑀫𑀺𑀫𑁆𑀧𑀺 𑀧𑀓𑁆𑀔𑁂. 𑀤𑁄𑀲𑁂 𑀤𑀺𑀦𑁆𑀦𑁂𑀢𑀺 ‘‘𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀤𑁄𑀲𑁂 𑀤𑀺𑀦𑁆𑀦𑁂. 𑀇𑀥𑀸𑀧𑀺 𑀧𑀼𑀭𑀺𑀫𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁄𑀲𑀤𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀤𑀺 𑀅𑀢𑁆𑀢𑀸 𑀫𑀦𑁄𑀫𑀬𑁄, 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻, 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄 𑀘 𑀪𑀯𑁂𑀬𑁆𑀬, 𑀏𑀯𑀁 𑀲𑀢𑀺 ‘‘𑀭𑀽𑀧𑀁 𑀅𑀢𑁆𑀢𑀸 𑀲𑀺𑀬𑀸, 𑀦 𑀘 𑀲𑀜𑁆𑀜𑀻’’𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀯𑀢𑁆𑀢𑀩𑁆𑀩𑀁. 𑀢𑁂𑀦𑀸𑀳 𑁋 ‘‘𑀫𑀦𑁄𑀫𑀬𑁄 𑀘 𑀳𑀺 𑀢𑁂’’𑀢𑀺𑀆𑀤𑀺. 𑀓𑀲𑁆𑀫𑀸 𑀧𑀦𑀸𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀧𑀞𑀫𑀁 𑀑𑀴𑀸𑀭𑀺𑀓𑀁 𑀅𑀢𑁆𑀢𑀸𑀦𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀢𑀁 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀦 𑀫𑀦𑁄𑀫𑀬𑀁 𑀅𑀢𑁆𑀢𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀭𑀽𑀧𑀺𑀁 𑀅𑀢𑁆𑀢𑀸𑀦𑀁 𑀧𑀝𑀺𑀚𑀸𑀦𑀸𑀢𑀻𑀢𑀺? 𑀓𑀸𑀫𑀜𑁆𑀘𑁂𑀢𑁆𑀣 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯, 𑀢𑀣𑀸𑀧𑀺 𑀇𑀫𑁂 𑀢𑀺𑀢𑁆𑀣𑀺𑀬𑀸 𑀦𑀸𑀫 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀸 𑀣𑀼𑀲𑀭𑀸𑀲𑀺𑀫𑁆𑀳𑀺 𑀦𑀺𑀔𑀸𑀢𑀔𑀸𑀡𑀼𑀓𑁄 𑀯𑀺𑀬 𑀘𑀜𑁆𑀘𑀮𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀦𑀸𑀫 𑀉𑀫𑁆𑀫𑀢𑁆𑀢𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀜𑁆𑀜𑀸𑀬𑀸𑀢𑀺 𑀧𑀓𑀢𑀺𑀲𑀜𑁆𑀜𑀸𑀬. 𑀉𑀧𑁆𑀧𑀸𑀤𑀦𑀺𑀭𑁄𑀥𑀁 𑀇𑀘𑁆𑀙𑀢𑀺 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀸𑀬 𑀲𑀜𑁆𑀜𑀸𑀬 𑀉𑀤𑀬𑀯𑀬𑀤𑀲𑁆𑀲𑀦𑀢𑁄. 𑀢𑀣𑀸𑀧𑀺 ‘‘𑀲𑀜𑁆𑀜𑀸 𑀲𑀜𑁆𑀜𑀸’’𑀢𑀺 𑀧𑀯𑀢𑁆𑀢𑀲𑀫𑀜𑁆𑀜𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀘 𑀅𑀯𑀺𑀘𑁆𑀙𑁂𑀤𑀁 𑀧𑀭𑀺𑀓𑀧𑁆𑀧𑁂𑀦𑁆𑀢𑁄 𑀲𑀲𑁆𑀲𑀢𑀁 𑀫𑀜𑁆𑀜𑀢𑀺, 𑀢𑁂𑀦𑀸𑀳 ‘‘𑀅𑀢𑁆𑀢𑀸𑀦𑀁 𑀧𑀦 𑀲𑀲𑁆𑀲𑀢𑀁 𑀫𑀜𑁆𑀜𑀢𑀻’’𑀢𑀺.

𑀢𑀣𑁂𑀯𑀸𑀢𑀺 𑀬𑀣𑀸 ‘‘𑀭𑀽𑀧𑀻 𑀅𑀢𑁆𑀢𑀸’’𑀢𑀺, ‘‘𑀫𑀦𑁄𑀫𑀬𑁄 𑀅𑀢𑁆𑀢𑀸’’𑀢𑀺 𑀘 𑀯𑀸𑀤𑀤𑁆𑀯𑀬𑁂 𑀲𑀜𑁆𑀜𑀸𑀬 𑀅𑀢𑁆𑀢𑀢𑁄 𑀅𑀜𑁆𑀜𑀢𑀸, 𑀢𑀣𑀸 𑀘𑀲𑁆𑀲 𑀅𑀘𑁂𑀢𑀦𑀢𑀸𑀤𑀺𑀤𑁄𑀲𑀧𑁆𑀧𑀲𑀗𑁆𑀕𑁄 𑀤𑀼𑀦𑁆𑀦𑀺𑀯𑀸𑀭𑁄, 𑀢𑀣𑁂𑀯 𑀇𑀫𑀲𑁆𑀫𑀺𑀁 𑀯𑀸𑀤𑁂 𑀤𑁄𑀲𑁄. 𑀢𑁂𑀦𑀸𑀳 ‘‘𑀢𑀣𑁂𑀯𑀲𑁆𑀲 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺. 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦𑀸𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂𑀦. 𑀅𑀪𑀺𑀪𑀽𑀢𑀢𑁆𑀢𑀸𑀢𑀺 𑀅𑀦𑀸𑀤𑀺𑀓𑀸𑀮𑀪𑀸𑀯𑀺𑀢𑀪𑀸𑀯𑁂𑀦 𑀅𑀚𑁆𑀛𑁄𑀢𑁆𑀣𑀝𑀢𑁆𑀢𑀸 𑀦𑀺𑀯𑀸𑀭𑀺𑀢𑀜𑀸𑀡𑀘𑀸𑀭𑀢𑁆𑀢𑀸. 𑀢𑀁 𑀦𑀸𑀦𑀢𑁆𑀢𑀁 𑀅𑀚𑀸𑀦𑀦𑁆𑀢𑁄𑀢𑀺 𑀬𑁂𑀦 𑀲𑀦𑁆𑀢𑀢𑀺𑀖𑀦𑁂𑀦, 𑀲𑀫𑀽𑀳𑀖𑀦𑁂𑀦 𑀘 𑀯𑀜𑁆𑀘𑀺𑀢𑁄 𑀩𑀸𑀮𑁄 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀥𑀫𑁆𑀫𑀲𑀫𑀽𑀳𑀁 𑀫𑀺𑀘𑁆𑀙𑀸𑀕𑀸𑀳𑀯𑀲𑁂𑀦 ‘‘𑀅𑀢𑁆𑀢𑀸’’𑀢𑀺, ‘‘𑀦𑀺𑀘𑁆𑀘𑁄’’𑀢𑀺 𑀘 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀺, 𑀢𑀁 𑀏𑀓𑀢𑁆𑀢𑀲𑀜𑁆𑀜𑀺𑀢𑀁 𑀖𑀦𑀕𑁆𑀕𑀳𑀡𑀁 𑀯𑀺𑀦𑀺𑀪𑀼𑀚𑁆𑀚 𑀬𑀸𑀣𑀸𑀯𑀢𑁄 𑀚𑀸𑀦𑀦𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑁄, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀢𑀺𑀢𑁆𑀣𑀺𑀬𑀸𑀦𑀁 𑀲𑁄 𑀦𑀢𑁆𑀣𑀻𑀢𑀺 𑀅𑀬𑀫𑁆𑀧𑀺 𑀧𑀭𑀺𑀩𑁆𑀩𑀸𑀚𑀓𑁄 𑀢𑀸𑀤𑀺𑀲𑀲𑁆𑀲 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀲𑁆𑀲 𑀅𑀪𑀸𑀯𑀢𑁄 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀦𑀸𑀜𑁆𑀜𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀕𑀯𑀢𑀸 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀢𑀁 𑀦𑀸𑀦𑀢𑁆𑀢𑀁 𑀅𑀚𑀸𑀦𑀦𑁆𑀢𑁄’’𑀢𑀺. 𑀲𑀜𑁆𑀜𑀸 𑀦𑀸𑀫𑀸𑀬𑀁 𑀦𑀸𑀦𑀸𑀭𑀫𑁆𑀫𑀡𑀸 𑀦𑀸𑀦𑀸𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀺, 𑀯𑁂𑀢𑀺 𑀘𑀸𑀢𑀺 𑀲𑀜𑁆𑀜𑀸𑀬 𑀉𑀧𑁆𑀧𑀸𑀤𑀦𑀺𑀭𑁄𑀥𑀁 𑀧𑀲𑁆𑀲𑀦𑁆𑀢𑁄𑀧𑀺 𑀲𑀜𑁆𑀜𑀸𑀫𑀬𑀁 𑀲𑀜𑁆𑀜𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑀢𑁄 𑀦𑀺𑀘𑁆𑀘𑀫𑁂𑀯 𑀓𑀢𑁆𑀯𑀸 𑀫𑀜𑁆𑀜𑀢𑀺 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬. 𑀢𑀣𑀸𑀪𑀽𑀢𑀲𑁆𑀲 𑀘 𑀢𑀲𑁆𑀲 𑀲𑀡𑁆𑀳𑀲𑀼𑀔𑀼𑀫𑀧𑀭𑀫𑀕𑀫𑁆𑀪𑀻𑀭𑀥𑀫𑁆𑀫𑀢𑀸 𑀦 𑀜𑀸𑀬𑀢𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀤𑀼𑀚𑁆𑀚𑀸𑀦𑀁 𑀔𑁄’’𑀢𑀺𑀆𑀤𑀺.

𑀤𑀺𑀝𑁆𑀞𑀺𑀆𑀤𑀻𑀲𑀼 ‘‘𑀏𑀯𑀫𑁂𑀢’’𑀦𑁆𑀢𑀺 𑀤𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀦𑀁 𑀤𑀺𑀝𑁆𑀞𑀺. 𑀢𑀲𑁆𑀲𑀸 𑀏𑀯 𑀧𑀼𑀩𑁆𑀩𑀪𑀸𑀕𑀪𑀽𑀢𑀁 ‘‘𑀏𑀯𑀫𑁂𑀢’’𑀦𑁆𑀢𑀺 𑀦𑀺𑀚𑁆𑀛𑀸𑀦𑀯𑀲𑁂𑀦 𑀔𑀫𑀦𑀁 𑀔𑀦𑁆𑀢𑀺. 𑀢𑀣𑀸 𑀭𑁄𑀘𑀦𑀁 𑀭𑀼𑀘𑀺. ‘‘𑀅𑀜𑁆𑀜𑀣𑀸’’𑀢𑀺𑀆𑀤𑀺 𑀢𑁂𑀲𑀁 𑀤𑀺𑀝𑁆𑀞𑀺𑀆𑀤𑀻𑀦𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀜𑁆𑀜𑀣𑀸𑀢𑀺 𑀬𑀣𑀸 𑀅𑀭𑀺𑀬𑀯𑀺𑀦𑀬𑁂 𑀅𑀦𑁆𑀢𑀤𑁆𑀯𑀬𑀁 𑀅𑀦𑀼𑀧𑀕𑁆𑀕𑀫𑁆𑀫 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸𑀯𑀲𑁂𑀦 𑀤𑀲𑁆𑀲𑀦𑀁 𑀳𑁄𑀢𑀺, 𑀢𑀢𑁄 𑀅𑀜𑁆𑀜𑀣𑀸𑀬𑁂𑀯. 𑀅𑀜𑁆𑀜𑀤𑁂𑀯𑀸𑀢𑀺 𑀬𑀁 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀺, 𑀢𑀲𑁆𑀲 𑀘 𑀅𑀦𑀺𑀘𑁆𑀘𑀢𑀸𑀤𑀺, 𑀢𑀢𑁄 𑀅𑀜𑁆𑀜𑀤𑁂𑀯 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀁 𑀅𑀢𑁆𑀢𑀸𑀦𑀁 𑀲𑀲𑁆𑀲𑀢𑀸𑀤𑀺 𑀢𑁂 𑀔𑀫𑀢𑀺 𑀘𑁂𑀯 𑀭𑀼𑀘𑁆𑀘𑀢𑀺 𑀘. 𑀆𑀬𑀼𑀜𑁆𑀚𑀦𑀁 𑀅𑀦𑀼𑀬𑀼𑀜𑁆𑀚𑀦𑀁 𑀆𑀬𑁄𑀕𑁄, 𑀢𑁂𑀦𑀸𑀳 ‘‘𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸’’𑀢𑀺. 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀧𑀭𑀫𑀢𑁆𑀢𑀘𑀺𑀦𑁆𑀢𑀦𑀸𑀤𑀺𑀧𑀭𑀺𑀩𑁆𑀩𑀸𑀚𑀓𑀧𑀝𑀺𑀧𑀢𑁆𑀢𑀺𑀬𑀸. 𑀤𑀼𑀚𑁆𑀚𑀸𑀦𑀫𑁂𑀢𑀁 𑀥𑀫𑁆𑀫𑀢𑀁 𑀢𑁆𑀯𑀁 ‘‘𑀅𑀬𑀁 𑀧𑀭𑀫𑀢𑁆𑀣𑁄, 𑀅𑀬𑀁 𑀲𑀫𑁆𑀫𑀼𑀢𑀻’’𑀢𑀺 𑀇𑀫𑀲𑁆𑀲 𑀯𑀺𑀪𑀸𑀕𑀲𑁆𑀲 𑀤𑀼𑀩𑁆𑀩𑀺𑀪𑀸𑀕𑀢𑁆𑀢𑀸. ‘‘𑀬𑀤𑀺 𑀏𑀢𑀁 𑀤𑀼𑀚𑁆𑀚𑀸𑀦𑀁, 𑀢𑀁 𑀢𑀸𑀯 𑀢𑀺𑀝𑁆𑀞𑀢𑀼, 𑀇𑀫𑀁 𑀧𑀦𑀢𑁆𑀣𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸 𑀧𑀝𑀺𑀧𑀚𑁆𑀚𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀧𑀭𑀺𑀩𑁆𑀩𑀸𑀚𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁄 𑀯𑀸 𑀲𑀜𑁆𑀜𑀢𑁄𑀢𑀺 𑀲𑀜𑁆𑀜𑀸𑀲𑀪𑀸𑀯𑀢𑁄 𑀅𑀜𑁆𑀜𑁄 𑀲𑀪𑀸𑀯𑁄 𑀯𑀸 𑀅𑀢𑁆𑀢𑀸 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀅𑀢𑁆𑀢𑀦𑁄.

𑀮𑁄𑀓𑀻𑀬𑀢𑀺 𑀤𑀺𑀲𑁆𑀲𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀁, 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄, 𑀅𑀢𑁆𑀢𑀸. 𑀲𑁄 𑀳𑀺𑀲𑁆𑀲 𑀓𑀸𑀭𑀓𑁄, 𑀯𑁂𑀤𑀓𑁄 𑀘𑀸𑀢𑀺 𑀇𑀘𑁆𑀙𑀺𑀢𑁄. 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁩𑁧; 𑀉𑀤𑀸. 𑁫𑁫) 𑀦𑀬𑀧𑁆𑀧𑀯𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀁. 𑀦 𑀳𑁂𑀲 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀦𑀺𑀲𑁆𑀲𑀺𑀢𑁄 𑀢𑀤𑀲𑀁𑀯𑀢𑁆𑀢𑀦𑀢𑁄. 𑀬𑁄 𑀳𑀺 𑀢𑀤𑀸𑀯𑀳𑁄, 𑀲𑁄 𑀢𑀁𑀦𑀺𑀲𑁆𑀲𑀺𑀢𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑁂𑀬𑁆𑀬 𑀬𑀣𑀸 𑀢𑀁 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁄. 𑀏𑀢𑁂𑀦𑁂𑀯 𑀢𑀲𑁆𑀲 𑀦 𑀥𑀫𑁆𑀫𑀦𑀺𑀲𑁆𑀲𑀺𑀢𑀢𑀸𑀧𑀺 𑀲𑀁𑀯𑀡𑁆𑀡𑀺𑀢𑀸 𑀤𑀝𑁆𑀞𑀩𑁆𑀩𑀸. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀢𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀤𑁂𑀯 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁 𑀬𑀣𑀸 ‘‘𑀯𑀺𑀦𑀬𑁄 𑀏𑀯 𑀯𑁂𑀦𑀬𑀺𑀓𑁄’’𑀢𑀺, (𑀧𑀸𑀭𑀸. 𑀅𑀝𑁆𑀞. 𑁨𑁧) 𑀢𑁂𑀦𑀸𑀳 ‘‘𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀔𑀸𑀢𑀲𑁆𑀲𑀸’’𑀢𑀺𑀆𑀤𑀺. 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀲𑁆𑀲 𑀲𑀁𑀲𑀸𑀭𑀯𑀝𑁆𑀝𑁂 𑀦𑀺𑀩𑁆𑀩𑀺𑀤𑀸𑀯𑀺𑀭𑀸𑀕𑀦𑀺𑀭𑁄𑀥𑀼𑀧𑀲𑀫𑀸𑀲𑀁𑀯𑀢𑁆𑀢𑀦𑀁 𑀯𑀝𑁆𑀝𑀦𑁆𑀢𑁄𑀕𑀥𑀢𑁆𑀢𑀸, 𑀢𑀲𑁆𑀲 𑀯𑀝𑁆𑀝𑀲𑀫𑁆𑀩𑀦𑁆𑀥𑀦𑀢𑁄 𑀘. 𑀢𑀣𑀸 𑀅𑀪𑀺𑀜𑁆𑀜𑀸𑀲𑀫𑁆𑀩𑁄𑀥𑀦𑀺𑀩𑁆𑀩𑀸𑀦𑀸𑀲𑀁𑀯𑀢𑁆𑀢𑀦𑀜𑁆𑀘 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀚𑀸𑀦𑀦𑀸𑀬𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀯𑀲𑁂𑀦 𑀅𑀪𑀺𑀚𑀸𑀦𑀦𑀢𑁆𑀣𑀸𑀬. 𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬𑀸𑀢𑀺 𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀲𑀫𑁆𑀩𑁄𑀥𑀦𑀢𑁆𑀣𑀸𑀬𑀸𑀢𑀺 𑀯𑀤𑀦𑁆𑀢𑀺. 𑀅𑀪𑀺𑀚𑀸𑀦𑀦𑀸𑀬𑀸𑀢𑀺 𑀅𑀪𑀺𑀜𑁆𑀜𑀸𑀧𑀜𑁆𑀜𑀸𑀯𑀲𑁂𑀦 𑀚𑀸𑀦𑀦𑀸𑀬, 𑀢𑀁 𑀧𑀦 𑀯𑀝𑁆𑀝𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬𑀸𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑁂𑀥𑀸𑀬.

𑀓𑀸𑀫𑀁 𑀢𑀡𑁆𑀳𑀸𑀧𑀺 𑀤𑀼𑀓𑁆𑀔𑀲𑀪𑀸𑀯𑀸, 𑀢𑀲𑁆𑀲𑀸 𑀧𑀦 𑀲𑀫𑀼𑀤𑀬𑀪𑀸𑀯𑁂𑀦 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 ‘‘𑀢𑀡𑁆𑀳𑀁 𑀞𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀪𑀸𑀯𑀦𑀢𑁄 𑀉𑀧𑁆𑀧𑀸𑀤𑀦𑀢𑁄. 𑀤𑀼𑀓𑁆𑀔𑀁 𑀧𑀪𑀸𑀯𑁂𑀦𑁆𑀢𑀻𑀧𑀺 𑀢𑀡𑁆𑀳𑀸 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑀸 𑀏𑀯 𑀧𑀪𑀸𑀯𑁂𑀢𑀺, 𑀦 𑀓𑁂𑀯𑀮𑀸𑀢𑀺 𑀆𑀳 ‘‘𑀲𑀧𑁆𑀧𑀘𑁆𑀘𑀬𑀸’’𑀢𑀺. 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀻𑀢𑀺 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀦𑀧𑁆𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀔𑀲𑀫𑀼𑀤𑀬𑀸 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂𑀢𑀺 𑀅𑀧𑁆𑀧𑀯𑀢𑁆𑀢𑀺. 𑀤𑀼𑀓𑁆𑀔𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺 𑀅𑀥𑀺𑀕𑀘𑁆𑀙𑀢𑀺, 𑀢𑀤𑀢𑁆𑀣𑀁 𑀧𑀝𑀺𑀧𑀤𑀸 𑀘𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻𑀧𑀝𑀺𑀧𑀤𑀸. 𑀫𑀕𑁆𑀕𑀧𑀸𑀢𑀼𑀪𑀸𑀯𑁄𑀢𑀺 𑀅𑀕𑁆𑀕𑀫𑀕𑁆𑀕𑀲𑀫𑀼𑀧𑁆𑀧𑀸𑀤𑁄. 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀅𑀲𑁂𑀓𑁆𑀔𑀨𑀮𑀸𑀥𑀺𑀕𑀫𑁄. 𑀆𑀓𑀸𑀭𑀦𑁆𑀢𑀺 𑀢𑀁 𑀕𑀫𑀦𑀮𑀺𑀗𑁆𑀕𑀁.

𑁪𑁨𑁧. 𑀲𑀫𑀦𑁆𑀢𑀢𑁄 𑀦𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀢𑁄𑀤𑀦𑀁 𑀯𑀺𑀚𑁆𑀛𑀦𑀁 𑀲𑀦𑁆𑀦𑀺𑀢𑁄𑀤𑀓𑀁, 𑀯𑀸𑀘𑀸𑀬𑀸𑀢𑀺 𑀘 𑀧𑀘𑁆𑀘𑀢𑁆𑀢𑁂 𑀓𑀭𑀡𑀯𑀘𑀦𑀦𑁆𑀢𑀺 𑀆𑀳 ‘‘𑀯𑀘𑀦𑀧𑀢𑁄𑀤𑁂𑀦𑀸’’𑀢𑀺. 𑀲𑀚𑁆𑀛𑀩𑁆𑀪𑀭𑀺𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀪𑀼𑀲𑀁 𑀅𑀭𑀺𑀢𑀁 𑀅𑀓𑀁𑀲𑀽𑀢𑀺 𑀲𑀢𑀫𑀢𑁆𑀢𑁂𑀳𑀺 𑀢𑀼𑀢𑁆𑀢𑀓𑁂𑀳𑀺 𑀯𑀺𑀬 𑀢𑀺𑀁𑀲𑀲𑀢𑀫𑀢𑁆𑀢𑀸 𑀧𑀭𑀺𑀩𑁆𑀩𑀸𑀚𑀓𑀸 𑀯𑀸𑀘𑀸𑀧𑀢𑁄𑀤𑀦𑁂𑀳𑀺 𑀢𑀼𑀤𑀺𑀁𑀲𑀼 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀧𑀭𑀫𑀢𑁆𑀣𑀲𑀪𑀸𑀯𑀢𑁄 𑀉𑀧𑀮𑀩𑁆𑀪𑀫𑀸𑀦𑀁, 𑀦𑀧𑀓𑀢𑀺𑀆𑀤𑀺 𑀯𑀺𑀬 𑀅𑀦𑀼𑀧𑀮𑀩𑁆𑀪𑀫𑀸𑀦𑀁. 𑀢𑀘𑁆𑀙𑀦𑁆𑀢𑀺 𑀲𑀘𑁆𑀘𑀁. 𑀢𑀣𑀦𑁆𑀢𑀺 𑀅𑀯𑀺𑀧𑀭𑀻𑀢𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀽𑀢𑀺 𑀯𑀺𑀲𑀬𑁂 𑀪𑀼𑀫𑁆𑀫𑀁 𑀢𑁂 𑀥𑀫𑁆𑀫𑁂 𑀯𑀺𑀲𑀬𑀁 𑀓𑀢𑁆𑀯𑀸. 𑀞𑀺𑀢𑀲𑀪𑀸𑀯𑀦𑁆𑀢𑀺 𑀅𑀯𑀝𑁆𑀞𑀺𑀢𑀲𑀪𑀸𑀯𑀁, 𑀢𑀤𑀼𑀧𑁆𑀧𑀸𑀤𑀓𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀬𑀸𑀫𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀫𑁆𑀧𑀸𑀧𑀦𑀦𑀺𑀬𑀸𑀫𑁂𑀦 𑀦𑀺𑀬𑀢𑀁, 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀸𑀦𑀜𑁆𑀳𑀻’’𑀢𑀺𑀆𑀤𑀺. 𑀏𑀤𑀺𑀲𑀸𑀢𑀺 ‘‘𑀥𑀫𑁆𑀫𑀝𑁆𑀞𑀺𑀢𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸.

𑀘𑀺𑀢𑁆𑀢𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀧𑁄𑀝𑁆𑀞𑀧𑀸𑀤𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁨𑁨. 𑀲𑀼𑀔𑀼𑀫𑁂𑀲𑀼 𑀅𑀢𑁆𑀣𑀦𑁆𑀢𑀭𑁂𑀲𑀽𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀲𑀼𑀔𑀼𑀫𑀜𑀸𑀡𑀕𑁄𑀘𑀭𑁂𑀲𑀼 𑀥𑀫𑁆𑀫𑁂𑀲𑀼. 𑀓𑀼𑀲𑀮𑁄𑀢𑀺 𑀧𑀼𑀩𑁆𑀩𑁂 𑀩𑀼𑀤𑁆𑀥𑀲𑀸𑀲𑀦𑁂 𑀓𑀢𑀧𑀭𑀺𑀘𑀬𑀢𑀸𑀬 𑀙𑁂𑀓𑁄 𑀅𑀳𑁄𑀲𑀺. 𑀕𑀺𑀳𑀺𑀪𑀸𑀯𑁂 𑀆𑀦𑀺𑀲𑀁𑀲𑀓𑀣𑀸𑀬𑀓𑀣𑀺𑀢𑀢𑁆𑀢𑀸 𑀲𑀻𑀮𑀯𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀣𑀸 𑀓𑀣𑀦𑁂𑀦 𑀯𑀺𑀩𑁆𑀪𑀫𑀦𑁂 𑀦𑀺𑀬𑁄𑀚𑀺𑀢𑀢𑁆𑀢𑀸 𑀇𑀤𑀸𑀦𑀺 𑀲𑀬𑀫𑁆𑀧𑀺 𑀲𑀻𑀮𑀯𑀸 𑀏𑀯 𑀳𑀼𑀢𑁆𑀯𑀸 𑀙 𑀯𑀸𑀭𑁂 (𑀥. 𑀧. 𑀅𑀝𑁆𑀞. 𑁩𑁭; 𑀚𑀸. 𑀅𑀝𑁆𑀞. 𑁧.𑁧.𑁬𑁯) 𑀯𑀺𑀩𑁆𑀪𑀫𑀺. 𑀓𑀫𑁆𑀫𑀲𑀭𑀺𑀓𑁆𑀔𑀓𑁂𑀦 𑀳𑀺 𑀨𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀫𑀳𑀸𑀲𑀸𑀯𑀓𑀲𑁆𑀲 𑀓𑀣𑀺𑀢𑁂𑀢𑀺 𑀫𑀳𑀸𑀲𑀸𑀯𑀓𑀲𑁆𑀲 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑀲𑁆𑀲 𑀅𑀧𑀲𑀸𑀤𑀦𑀓𑀣𑀺𑀢𑀦𑀺𑀫𑀺𑀢𑁆𑀢𑀁. 𑀧𑀢𑀺𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀲𑀸𑀲𑀦𑁂 𑀧𑀢𑀺𑀝𑁆𑀞𑀁 𑀮𑀤𑁆𑀥𑀼𑀁 𑀅𑀲𑀓𑁆𑀓𑁄𑀦𑁆𑀢𑁄.

𑁪𑁨𑁩. 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀦𑀢𑁆𑀣𑀺𑀢𑀸𑀬𑀸𑀢𑀺 𑀲𑀼𑀯𑀼𑀢𑁆𑀢𑀤𑀼𑀭𑀼𑀢𑁆𑀢𑀲𑀫𑀯𑀺𑀲𑀫𑀤𑀲𑁆𑀲𑀦𑀲𑀫𑀢𑁆𑀣𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀅𑀪𑀸𑀯𑁂𑀦. 𑀘𑀓𑁆𑀔𑀼𑀫𑀸𑀢𑀺 𑀏𑀢𑁆𑀣 𑀬𑀸𑀤𑀺𑀲𑁂𑀦 𑀘𑀓𑁆𑀔𑀼𑀦𑀸 𑀧𑀼𑀭𑀺𑀲𑁄 ‘‘𑀘𑀓𑁆𑀔𑀼𑀫𑀸’’𑀢𑀺 𑀯𑀼𑀢𑁆𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀪𑀸𑀲𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀓𑁄𑀝𑁆𑀞𑀸𑀲𑀸𑀢𑀺 𑀏𑀓𑀦𑁆𑀢𑀺𑀓𑀸, 𑀦𑀺𑀩𑁆𑀩𑀸𑀦𑀸𑀯𑀳𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀞𑀧𑀺𑀢𑀸𑀢𑀺 𑀯𑀯𑀢𑁆𑀣𑀸𑀧𑀺𑀢𑀸. 𑀦 𑀏𑀓𑀓𑁄𑀝𑁆𑀞𑀸𑀲𑀸 𑀦 𑀏𑀓𑀦𑁆𑀢𑀺𑀓𑀸, 𑀦 𑀦𑀺𑀩𑁆𑀩𑀸𑀦𑀸𑀯𑀳𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑀸 𑀯𑀝𑁆𑀝𑀦𑁆𑀢𑁄𑀕𑀥𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑀁𑀲𑀺𑀓𑀥𑀫𑁆𑀫𑀯𑀡𑁆𑀡𑀦𑀸

𑁪𑁨𑁫. ‘‘𑀓𑀲𑁆𑀫𑀸 𑀆𑀭𑀪𑀻’’𑀢𑀺 𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀧𑀬𑁄𑀚𑀦𑀁 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀲𑀢𑀺 𑀳𑀺 𑀨𑀮𑀲𑀺𑀤𑁆𑀥𑀺𑀬𑀁 𑀳𑁂𑀢𑀼𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀻𑀢𑀺. 𑀧𑀜𑁆𑀜𑀸𑀧𑀺𑀢𑀦𑀺𑀝𑁆𑀞𑀸𑀬𑀸𑀢𑀺 𑀧𑀯𑁂𑀤𑀺𑀢𑀯𑀺𑀫𑀼𑀢𑁆𑀢𑀺𑀫𑀕𑁆𑀕𑀲𑁆𑀲, 𑀯𑀝𑁆𑀝𑀤𑀼𑀓𑁆𑀔𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑀢𑀺 𑀏𑀢𑀸𑀬𑀸𑀢𑀺 ‘‘𑀦𑀺𑀝𑁆𑀞𑀸’’𑀢𑀺 𑀯𑀺𑀫𑀼𑀢𑁆𑀢𑀺 𑀯𑀼𑀢𑁆𑀢𑀸. 𑀦𑀺𑀝𑁆𑀞𑀸𑀫𑀕𑁆𑀕𑁄 𑀳𑀺 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀦𑀺𑀝𑁆𑀞𑀸’’𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀲 𑀳𑀺 𑀅𑀦𑀺𑀬𑁆𑀬𑀸𑀦𑀺𑀓𑀢𑀸, 𑀦𑀺𑀬𑁆𑀬𑀸𑀦𑀺𑀓𑀢𑀸 𑀘 𑀯𑀼𑀘𑁆𑀘𑀢𑀺, 𑀦 𑀦𑀺𑀝𑁆𑀞𑀸𑀬. 𑀦𑀺𑀬𑁆𑀬𑀸𑀦𑀁 𑀯𑀸 𑀦𑀺𑀕𑁆𑀕𑀫𑀦𑀁 𑀦𑀺𑀲𑁆𑀲𑀭𑀡𑀁, 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀯𑀼𑀧𑀲𑀫𑁄𑀢𑀺 𑀅𑀢𑁆𑀣𑁄. 𑀦𑀺𑀬𑁆𑀬𑀸𑀦𑀫𑁂𑀯 𑀦𑀺𑀬𑁆𑀬𑀸𑀦𑀺𑀓𑀁, 𑀦 𑀦𑀺𑀬𑁆𑀬𑀸𑀦𑀺𑀓𑀁 𑀅𑀦𑀺𑀬𑁆𑀬𑀸𑀦𑀺𑀓𑀁, 𑀲𑁄 𑀏𑀯 𑀪𑀸𑀯𑁄 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁄, 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀏𑀯’’𑀦𑁆𑀢𑀺 ‘‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀯𑀘𑀦𑀫𑀢𑁆𑀢𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀯𑀤𑀢𑀺, 𑀦 𑀧𑀦 𑀧𑀭𑀫𑀢𑁆𑀣𑀢𑁄 𑀢𑁂𑀲𑀁 𑀲𑀫𑀬𑁂 𑀦𑀺𑀩𑁆𑀩𑀸𑀦𑀧𑀜𑁆𑀜𑀸𑀧𑀦𑀲𑁆𑀲 𑀮𑀩𑁆𑀪𑀦𑀢𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸 𑀘 𑀦 𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺𑀆𑀤𑀺. 𑀮𑁄𑀓𑀣𑀽𑀧𑀺𑀓𑀸𑀤𑀺𑀯𑀲𑁂𑀦𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀜𑁆𑀜𑁄 𑀧𑀼𑀭𑀺𑀲𑁄, 𑀅𑀜𑁆𑀜𑀸 𑀧𑀓𑀢𑀻’’𑀢𑀺 𑀧𑀓𑀢𑀺𑀧𑀼𑀭𑀺𑀲𑀦𑁆𑀢𑀭𑀸𑀯𑀩𑁄𑀥𑁄 𑀫𑁄𑀓𑁆𑀔𑁄, 𑀩𑀼𑀤𑁆𑀥𑀺𑀆𑀤𑀺𑀕𑀼𑀡𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀲𑀓𑀢𑁆𑀢𑀦𑀺 𑀅𑀯𑀝𑁆𑀞𑀸𑀦𑀁 𑀫𑁄𑀓𑁆𑀔𑁄, 𑀓𑀸𑀬𑀧𑀯𑀢𑁆𑀢𑀺𑀕𑀢𑀺𑀚𑀸𑀢𑀺𑀩𑀦𑁆𑀥𑀸𑀦𑀁 𑀅𑀧𑁆𑀧𑀫𑀚𑁆𑀚𑀦𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑁄 𑀫𑁄𑀓𑁆𑀔𑁄, 𑀬𑀜𑁆𑀜𑁂𑀳𑀺 𑀚𑀼𑀢𑁂𑀦 𑀧𑀭𑁂𑀦 𑀧𑀼𑀭𑀺𑀲𑁂𑀦 𑀲𑀮𑁄𑀓𑀢𑀸 𑀫𑁄𑀓𑁆𑀔𑁄, 𑀲𑀫𑀻𑀧𑀢𑀸 𑀫𑁄𑀓𑁆𑀔𑁄, 𑀲𑀳𑀬𑁄𑀕𑁄 𑀫𑁄𑀓𑁆𑀔𑁄𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸𑀧𑀜𑁆𑀜𑀢𑁆𑀢𑀸𑀢𑀺 𑀧𑀜𑁆𑀜𑀢𑁆𑀢𑀧𑁆𑀧𑀓𑀸𑀭𑀸 𑀳𑀼𑀢𑁆𑀯𑀸 𑀦 𑀦𑀺𑀬𑁆𑀬𑀸𑀢𑀺, 𑀬𑁂𑀦𑀸𑀓𑀸𑀭𑁂𑀦 ‘‘𑀦𑀺𑀝𑁆𑀞𑀸 𑀧𑀸𑀧𑀼𑀡𑀻𑀬𑀢𑀻’’𑀢𑀺 𑀢𑁂𑀳𑀺 𑀧𑀯𑁂𑀤𑀺𑀢𑀸, 𑀢𑁂𑀦𑀸𑀓𑀸𑀭𑁂𑀦 𑀢𑀲𑁆𑀲𑀸 𑀅𑀧𑁆𑀧𑀢𑁆𑀢𑀩𑁆𑀩𑀢𑁄 𑀦 𑀦𑀺𑀬𑁆𑀬𑀸𑀢𑀺. 𑀧𑀡𑁆𑀟𑀺𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 ‘‘𑀦𑀸𑀬𑀁 𑀦𑀺𑀝𑁆𑀞𑀸 𑀧𑀝𑀺𑀧𑀤𑀸 𑀯𑀝𑁆𑀝𑀲𑁆𑀲 𑀅𑀦𑀢𑀺𑀓𑁆𑀓𑀫𑀦𑀢𑁄’’𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀧𑀡𑁆𑀟𑀺𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀦𑀺𑀯𑀢𑁆𑀢𑀢𑀻𑀢𑀺 𑀧𑀝𑀺𑀓𑁆𑀔𑁂𑀧𑀲𑁆𑀲 𑀓𑀸𑀭𑀡𑀯𑀘𑀦𑀁, 𑀢𑀲𑁆𑀫𑀸 𑀢𑁂𑀳𑀺 𑀧𑀜𑁆𑀜𑀢𑁆𑀢𑀸 𑀦𑀺𑀝𑁆𑀞𑀸 𑀧𑀝𑀺𑀧𑀤𑀸 𑀦 𑀦𑀺𑀬𑁆𑀬𑀸𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀢𑀁𑀲𑀫𑀗𑁆𑀕𑀺𑀦𑀁 𑀧𑀼𑀕𑁆𑀕𑀮𑀁 𑀲𑀁𑀲𑀸𑀭𑁂 𑀏𑀯 𑀧𑀭𑀺𑀩𑁆𑀪𑀫𑀸𑀧𑁂𑀦𑁆𑀢𑀻 𑀦𑀺𑀯𑀢𑁆𑀢𑀢𑀺.

𑀧𑀥𑀸𑀦𑀁 𑀚𑀸𑀦𑀦𑀁 𑀦𑀸𑀫 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀦𑀁 𑀢𑀲𑁆𑀲 𑀧𑀫𑀸𑀡𑀚𑁂𑀝𑁆𑀞𑀪𑀸𑀯𑀢𑁄, 𑀇𑀢𑀭𑀲𑁆𑀲 𑀲𑀁𑀲𑀬𑀸𑀦𑀼𑀩𑀤𑁆𑀥𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀚𑀸𑀦𑀁 𑀧𑀲𑁆𑀲’’𑀦𑁆𑀢𑀺. 𑀢𑁂𑀦𑁂𑀢𑁆𑀣 𑀤𑀲𑁆𑀲𑀦𑁂𑀦 𑀚𑀸𑀦𑀦𑀁 𑀯𑀺𑀲𑁂𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀼𑀫𑁆𑀳𑀸𑀓𑀁 𑀏𑀓𑀦𑁆𑀢𑀲𑀼𑀔𑁂 𑀮𑁄𑀓𑁂 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀤𑀲𑁆𑀲𑀦𑀁 𑀅𑀢𑁆𑀣𑀻𑀢𑀺. 𑀚𑀸𑀦𑀦𑁆𑀢𑀺 𑀯𑀸 𑀢𑀲𑁆𑀲 𑀮𑁄𑀓𑀲𑁆𑀲 𑀅𑀦𑀼𑀫𑀸𑀦𑀯𑀺𑀲𑀬𑀢𑀁 𑀧𑀼𑀘𑁆𑀙𑀢𑀺, 𑀧𑀲𑁆𑀲𑀦𑁆𑀢𑀺 𑀧𑀘𑁆𑀘𑀓𑁆𑀔𑀢𑁄 𑀕𑁄𑀘𑀭𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀧𑀺 𑀢𑀼𑀫𑁆𑀳𑀸𑀓𑀁 𑀮𑁄𑀓𑁄 𑀧𑀘𑁆𑀘𑀓𑁆𑀔𑀢𑁄 𑀜𑀸𑀢𑁄, 𑀉𑀤𑀸𑀳𑀼 𑀅𑀦𑀼𑀫𑀸𑀦𑀢𑁄𑀢𑀺.

𑀬𑀲𑁆𑀫𑀸 𑀮𑁄𑀓𑁂 𑀧𑀘𑁆𑀘𑀓𑁆𑀔𑀪𑀽𑀢𑁄 𑀅𑀢𑁆𑀣𑁄 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑀪𑀸𑀯𑁂𑀦 𑀧𑀸𑀓𑀝𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀻’’𑀢𑀺𑀆𑀤𑀺. 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀻𑀢𑀺 𑀤𑀺𑀝𑁆𑀞𑀯𑀸, 𑀤𑀲𑁆𑀲𑀦𑀪𑀽𑀢𑁂𑀦, 𑀢𑀤𑀦𑀼𑀕𑀢𑁂𑀦 𑀘 𑀜𑀸𑀡𑁂𑀦 𑀕𑀳𑀺𑀢𑀧𑀼𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀭𑀻𑀭𑀲𑀡𑁆𑀞𑀸𑀦𑀸𑀤𑀻𑀦𑀻’’𑀢𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. ‘‘𑀅𑀧𑁆𑀧𑀸𑀝𑀺𑀳𑀻𑀭𑀓 𑀢’’𑀦𑁆𑀢𑀺 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀧𑁆𑀧𑀸𑀝𑀺𑀳𑀻𑀭𑀓𑀁 𑀢’’𑀦𑁆𑀢𑀺 ‘‘𑀅𑀧𑁆𑀧𑀸𑀝𑀺𑀳𑀻𑀭𑀁 𑀓𑀢’’𑀦𑁆𑀢𑀺 𑀏𑀯𑀫𑁂𑀢𑁆𑀣 𑀯𑀡𑁆𑀡𑁂𑀦𑁆𑀢𑀺. 𑀧𑀝𑀺𑀧𑀓𑁆𑀔𑀳𑀭𑀡𑀢𑁄 𑀧𑀝𑀺𑀳𑀸𑀭𑀺𑀬𑀁, 𑀢𑀤𑁂𑀯 𑀧𑀸𑀝𑀺𑀳𑀸𑀭𑀺𑀬𑀁, 𑀉𑀢𑁆𑀢𑀭𑀯𑀺𑀭𑀳𑀺𑀢𑀁 𑀯𑀘𑀦𑀁. 𑀧𑀸𑀝𑀺𑀳𑀸𑀭𑀺𑀬𑀫𑁂𑀯𑁂𑀢𑁆𑀣 ‘‘𑀧𑀸𑀝𑀺𑀳𑀻𑀭𑀓’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑀁. 𑀦 𑀧𑀸𑀝𑀺𑀳𑀻𑀭𑀓𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀁 𑀧𑀭𑁂𑀳𑀺 𑀯𑀼𑀘𑁆𑀘𑀫𑀸𑀦𑀉𑀢𑁆𑀢𑀭𑁂𑀳𑀺 𑀲𑀉𑀢𑁆𑀢𑀭𑀢𑁆𑀢𑀸, 𑀢𑁂𑀦𑀸𑀳 ‘‘𑀧𑀝𑀺𑀳𑀭𑀡𑀯𑀺𑀭𑀳𑀺𑀢’’𑀦𑁆𑀢𑀺. 𑀲𑀉𑀢𑁆𑀢𑀭𑀜𑁆𑀳𑀺 𑀯𑀘𑀦𑀁 𑀢𑁂𑀦 𑀉𑀢𑁆𑀢𑀭𑁂𑀦 𑀧𑀝𑀺𑀳𑀸𑀭𑀻𑀬𑀢𑀺 𑀅𑀢𑀺𑀯𑀺𑀧𑀭𑀺𑀯𑀢𑁆𑀢𑀻𑀬𑀢𑀺. 𑀢𑀢𑁄 𑀏𑀯 𑀦𑀺𑀬𑁆𑀬𑀸𑀦𑀲𑁆𑀲 𑀧𑀝𑀺𑀳𑀭𑀡𑀫𑀕𑁆𑀕𑀲𑁆𑀲 𑀅𑀪𑀸𑀯𑀢𑁄 ‘‘𑀅𑀦𑀺𑀬𑁆𑀬𑀸𑀦𑀺𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺.

𑁪𑁨𑁬. 𑀯𑀺𑀮𑀸𑀲𑁄 𑀮𑀻𑀴𑀸. 𑀆𑀓𑀧𑁆𑀧𑁄 𑀓𑁂𑀲𑀩𑀦𑁆𑀥𑀯𑀢𑁆𑀣𑀕𑁆𑀕𑀳𑀡𑀁 𑀆𑀤𑀺𑀆𑀓𑀸𑀭𑀯𑀺𑀲𑁂𑀲𑁄, 𑀯𑁂𑀲𑀲𑀁𑀯𑀺𑀥𑀸𑀦𑀁 𑀯𑀸. 𑀆𑀤𑀺-𑀲𑀤𑁆𑀤𑁂𑀦 𑀪𑀸𑀯𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀪𑀸𑀯𑁄’’𑀢𑀺 𑀘 𑀘𑀸𑀢𑀼𑀭𑀺𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀬𑁄𑀅𑀢𑁆𑀢𑀧𑀝𑀺𑀮𑀸𑀪𑀯𑀡𑁆𑀡𑀦𑀸

𑁪𑁨𑁮. 𑀆𑀳𑀺𑀢𑁄 𑀅𑀳𑀁 𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄𑀢𑀺 𑀆𑀳 ‘‘𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄’’𑀢𑀺. 𑀓𑀸𑀫𑀪𑀯𑀁 𑀤𑀲𑁆𑀲𑁂𑀢𑀺 𑀢𑀲𑁆𑀲 𑀇𑀢𑀭𑀤𑁆𑀯𑀬𑀢𑁆𑀢𑀪𑀸𑀯𑀢𑁄 𑀑𑀴𑀸𑀭𑀺𑀓𑀢𑁆𑀢𑀸. 𑀭𑀽𑀧𑀪𑀯𑀁 𑀤𑀲𑁆𑀲𑁂𑀢𑀺 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀳𑀼𑀢𑁆𑀯𑀸 𑀭𑀽𑀧𑀻𑀪𑀸𑀯𑁂𑀦 𑀉𑀧𑀮𑀩𑁆𑀪𑀦𑀢𑁄. 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀦𑀸𑀫 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀢𑀤𑀪𑀸𑀯𑁂 𑀓𑀲𑁆𑀲𑀘𑀺 𑀲𑀁𑀓𑀺𑀮𑁂𑀲𑀲𑁆𑀲𑀸𑀧𑀺 𑀅𑀲𑀫𑁆𑀪𑀯𑀢𑁄. 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀸𑀲𑀁 𑀯𑀲𑁂𑀦 𑀲𑀩𑁆𑀩𑀲𑁄 𑀘𑀺𑀢𑁆𑀢𑀯𑁄𑀤𑀸𑀦𑀲𑁆𑀲 𑀲𑀺𑀚𑁆𑀛𑀦𑀢𑁄.

𑁪𑁨𑁯. 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀅𑀲𑀫𑀼𑀘𑁆𑀙𑁂𑀤𑁂 𑀧𑀦 𑀦 𑀓𑀤𑀸𑀘𑀺𑀧𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀧𑀸𑀭𑀺𑀧𑀽𑀭𑀻, 𑀯𑁂𑀧𑀼𑀮𑁆𑀮𑀁 𑀯𑀸 𑀲𑀫𑁆𑀪𑀯𑀢𑀺, 𑀲𑀫𑀼𑀘𑁆𑀙𑁂𑀤𑁂 𑀧𑀦 𑀲𑀢𑀺 𑀏𑀯 𑀲𑀫𑁆𑀪𑀯𑀢𑀻𑀢𑀺 𑀫𑀕𑁆𑀕𑀧𑀜𑁆𑀜𑀸𑀨𑀮𑀧𑀜𑁆𑀜𑀸-𑀕𑁆𑀕𑀳𑀡𑀁. 𑀢𑀸 𑀳𑀺 𑀲𑀓𑀺𑀁 𑀧𑀭𑀺𑀧𑀼𑀡𑁆𑀡𑀸 𑀧𑀭𑀺𑀧𑀼𑀡𑁆𑀡𑀸 𑀏𑀯 𑀅𑀧𑀭𑀺𑀳𑀸𑀦𑀥𑀫𑁆𑀫𑀢𑁆𑀢𑀸. 𑀢𑀭𑀼𑀡𑀧𑀻𑀢𑀻𑀢𑀺 𑀉𑀧𑁆𑀧𑀦𑁆𑀦𑀫𑀢𑁆𑀢𑀸 𑀅𑀮𑀤𑁆𑀥𑀸𑀲𑁂𑀯𑀦𑀸 𑀤𑀼𑀩𑁆𑀩𑀮𑀸 𑀧𑀻𑀢𑀺. 𑀩𑀮𑀯𑀢𑀼𑀝𑁆𑀞𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀮𑀤𑁆𑀥𑀸𑀲𑁂𑀯𑀦𑀸 𑀉𑀧𑀭𑀺𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀣𑀺𑀭𑀢𑀭𑀸 𑀧𑀻𑀢𑀺. ‘‘𑀬𑀁 𑀅𑀯𑁄𑀘𑀼𑀫𑁆𑀳𑀸’’𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀁 𑀯𑁄𑀳𑀸𑀭𑀁 ‘‘𑀲𑀁𑀓𑀺𑀮𑁂𑀲𑀺𑀓𑀯𑁄𑀤𑀸𑀦𑀺𑀬𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀪𑀺𑀯𑀼𑀤𑁆𑀥𑀺𑀦𑀺𑀝𑁆𑀞𑀁 𑀧𑀜𑁆𑀜𑀸𑀬 𑀧𑀸𑀭𑀺𑀧𑀽𑀭𑀺𑀯𑁂𑀧𑀼𑀮𑁆𑀮𑀪𑀽𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀧𑀭𑀧𑁆𑀧𑀘𑁆𑀘𑀬𑁂𑀦 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀢𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀢𑀻’’𑀢𑀺 𑀓𑀣𑀬𑀺𑀫𑁆𑀳. 𑀢𑀢𑁆𑀣 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀢𑀲𑁆𑀲 𑀫𑀫 𑀑𑀯𑀸𑀤𑀓𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑀺𑀳𑀭𑀡𑀦𑀺𑀫𑀺𑀢𑁆𑀢𑀁 𑀧𑀫𑁄𑀤𑀧𑁆𑀧𑀪𑀸𑀯𑀺𑀢𑀸 𑀧𑀻𑀢𑀺 𑀘 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑀸 𑀘 𑀧𑀘𑁆𑀘𑀬𑀪𑀽𑀢𑀁 𑀧𑀲𑁆𑀲𑀤𑁆𑀥𑀺𑀤𑁆𑀯𑀬𑀁 𑀲𑀫𑁆𑀫𑀤𑁂𑀯 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀘 𑀉𑀓𑁆𑀓𑀁𑀲𑀕𑀢𑀁 𑀜𑀸𑀡𑀜𑁆𑀘 𑀢𑀣𑀸𑀪𑀽𑀢𑁄 𑀘 𑀲𑁄 𑀯𑀺𑀳𑀸𑀭𑁄. 𑀲𑀦𑁆𑀢𑀧𑀡𑀻𑀢𑀢𑀸𑀬 𑀅𑀢𑀧𑁆𑀧𑀓𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀲𑀼𑀔𑀯𑀺𑀳𑀸𑀭𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺.

𑀧𑀞𑀫𑀚𑁆𑀛𑀸𑀦𑁂 𑀧𑀝𑀺𑀮𑀤𑁆𑀥𑀫𑀢𑁆𑀢𑁂 𑀳𑀻𑀦𑀪𑀸𑀯𑀢𑁄 𑀧𑀻𑀢𑀺 𑀤𑀼𑀩𑁆𑀩𑀮𑀸 𑀧𑀸𑀫𑁄𑀚𑁆𑀚𑀧𑀓𑁆𑀔𑀺𑀓𑀸, 𑀲𑀼𑀯𑀺𑀪𑀸𑀯𑀺𑀢𑁂 𑀧𑀦 𑀢𑀲𑁆𑀫𑀺𑀁 𑀧𑀕𑀼𑀡𑁂 𑀲𑀸 𑀧𑀡𑀻𑀢𑀸 𑀩𑀮𑀯𑀪𑀸𑀯𑀢𑁄 𑀧𑀭𑀺𑀧𑀼𑀡𑁆𑀡𑀓𑀺𑀘𑁆𑀘𑀸 𑀧𑀻𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀞𑀫𑀚𑁆𑀛𑀸𑀦𑁂 𑀧𑀸𑀫𑁄𑀚𑁆𑀚𑀸𑀤𑀬𑁄 𑀙𑀧𑀺 𑀥𑀫𑁆𑀫𑀸 𑀮𑀩𑁆𑀪𑀦𑁆𑀢𑀻’’𑀢𑀺. ‘‘𑀲𑀼𑀔𑁄 𑀯𑀺𑀳𑀸𑀭𑁄’’𑀢𑀺 𑀇𑀫𑀺𑀦𑀸 𑀲𑀫𑀸𑀥𑀺 𑀕𑀳𑀺𑀢𑁄. 𑀲𑀼𑀔𑀁 𑀕𑀳𑀺𑀢𑀦𑁆𑀢𑀺 𑀅𑀧𑀭𑁂, 𑀢𑁂𑀲𑀁 𑀫𑀢𑁂𑀦 𑀲𑀦𑁆𑀢𑀲𑀼𑀔𑀢𑀸𑀬 𑀉𑀧𑁂𑀓𑁆𑀔𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 ‘‘𑀲𑀼𑀔’’𑀦𑁆𑀢𑀺 𑀇𑀘𑁆𑀙𑀺𑀢𑀸, 𑀢𑁂𑀦𑀸𑀳 ‘‘𑀢𑀣𑀸 𑀘𑀢𑀼𑀢𑁆𑀣𑁂’’𑀢𑀺𑀆𑀤𑀺. 𑀧𑀸𑀫𑁄𑀚𑁆𑀚𑀁 𑀦𑀺𑀯𑀢𑁆𑀢𑀢𑀻𑀢𑀺 𑀤𑀼𑀩𑁆𑀩𑀮𑀧𑀻𑀢𑀺𑀲𑀗𑁆𑀔𑀸𑀢𑀁 𑀧𑀸𑀫𑁄𑀚𑁆𑀚𑀁 𑀙𑀲𑀼 𑀥𑀫𑁆𑀫𑁂𑀲𑀼 𑀦𑀺𑀯𑀢𑁆𑀢𑀢𑀺 𑀳𑀸𑀬𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑀯𑀺𑀭𑀳𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑁂 𑀲𑀩𑁆𑀩𑀤𑀸 𑀧𑀻𑀢𑀺 𑀩𑀮𑀯𑀢𑀻 𑀏𑀯 𑀳𑁄𑀢𑀺, 𑀦 𑀧𑀞𑀫𑀚𑁆𑀛𑀸𑀦𑁂 𑀯𑀺𑀬 𑀓𑀤𑀸𑀘𑀺 𑀤𑀼𑀩𑁆𑀩𑀮𑀸. 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸 𑀧𑀸𑀤𑀓𑀚𑁆𑀛𑀸𑀦𑀫𑁂𑀯𑀸𑀢𑀺 𑀉𑀧𑀭𑀺 𑀫𑀕𑁆𑀕𑀁 𑀅𑀓𑀣𑁂𑀢𑁆𑀯𑀸 𑀓𑁂𑀯𑀮𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀁 𑀓𑀣𑀺𑀢𑀁. 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀲𑀤𑁆𑀥𑀺𑀁 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀪𑀸𑀯𑁂𑀦 𑀛𑀸𑀦𑀸𑀦𑀺 𑀓𑀣𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀓𑀸 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀓𑀣𑀺𑀢𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺 𑀓𑀣𑀺𑀢𑀸𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑀸𑀤𑀺𑀓𑀸 𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀅𑀓𑀣𑁂𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀏𑀯 𑀨𑀮𑀲𑀫𑀸𑀧𑀢𑁆𑀢𑀺 𑀓𑀣𑀺𑀢𑀸. 𑀧𑀻𑀢𑀺𑀯𑁂𑀯𑀘𑀦𑀫𑁂𑀯 𑀓𑀢𑁆𑀯𑀸𑀢𑀺 𑀤𑁆𑀯𑀺𑀦𑁆𑀦𑀁 𑀧𑀻𑀢𑀻𑀦𑀁 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀧𑀸𑀫𑁄𑀚𑁆𑀚𑀁 𑀧𑀻𑀢𑀺𑀯𑁂𑀯𑀘𑀦𑀫𑁂𑀯 𑀓𑀢𑁆𑀯𑀸. 𑀧𑀻𑀢𑀺𑀲𑀼𑀔𑀸𑀦𑀁 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸, ‘‘𑀲𑀼𑀔𑁄 𑀘 𑀯𑀺𑀳𑀸𑀭𑁄’’𑀢𑀺 𑀲𑀸𑀢𑀺𑀲𑀬𑀲𑁆𑀲 𑀲𑀼𑀔𑀯𑀺𑀳𑀸𑀭𑀲𑁆𑀲 𑀕𑀳𑀺𑀢𑀢𑁆𑀢𑀸 𑀘 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺 𑀦𑀸𑀫 𑀓𑀣𑀺𑀢𑀸. 𑀓𑀸𑀫𑀁 𑀧𑀞𑀫𑀚𑁆𑀛𑀸𑀦𑁂𑀧𑀺 𑀧𑀻𑀢𑀺𑀲𑀼𑀔𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀢𑀸𑀦𑀺 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀓𑁆𑀔𑁄𑀪𑁂𑀦 𑀦 𑀲𑀦𑁆𑀢𑀧𑀡𑀻𑀢𑀸𑀦𑀺, 𑀲𑀦𑁆𑀢𑀧𑀡𑀻𑀢𑀸𑀦𑀺 𑀘 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀺.

𑁪𑁩𑁨-𑁪𑁩𑁭. 𑀯𑀺𑀪𑀸𑀯𑀦𑀢𑁆𑀣𑁄𑀢𑀺 𑀧𑀓𑀸𑀲𑀦𑀢𑁆𑀣𑁄 𑀲𑀭𑀽𑀧𑀢𑁄 𑀦𑀺𑀭𑀽𑀧𑀦𑀢𑁆𑀣𑁄, 𑀢𑁂𑀦𑀸𑀳 ‘‘𑀅𑀬𑀁 𑀲𑁄’’𑀢𑀺𑀆𑀤𑀺. 𑀦𑀦𑁆𑀢𑀺 𑀑𑀴𑀸𑀭𑀺𑀓𑀁 𑀅𑀢𑁆𑀢𑀧𑀝𑀺𑀮𑀸𑀪𑀁. 𑀲𑀧𑁆𑀧𑀝𑀺𑀳𑀭𑀡𑀦𑁆𑀢𑀺 𑀧𑀭𑁂𑀦 𑀘𑁄𑀤𑀺𑀢𑀯𑀘𑀦𑁂𑀦 𑀲𑀧𑀭𑀺𑀳𑀸𑀭𑀁 𑀲𑀉𑀢𑁆𑀢𑀭𑀁. 𑀢𑀼𑀘𑁆𑀙𑁄𑀢𑀺 𑀫𑀼𑀲𑀸 𑀅𑀪𑀽𑀢𑁄. 𑀲𑁆𑀯𑁂𑀯𑀸𑀢𑀺 𑀲𑁄 𑀏𑀯 𑀅𑀢𑁆𑀢𑀧𑀝𑀺𑀮𑀸𑀪𑁄. 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀬𑁂 𑀯𑀺𑀚𑁆𑀚𑀫𑀸𑀦𑁄 𑀳𑁄𑀢𑀺. 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑁆𑀯𑁂𑀯 𑀦𑀺𑀬𑁆𑀬𑀸𑀢𑁂𑀲𑀺, 𑀦 𑀦𑀁 𑀲𑀭𑀽𑀧𑀢𑁄 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀭𑀽𑀧𑀸𑀤𑀬𑁄 𑀘𑁂𑀢𑁆𑀣 𑀥𑀫𑁆𑀫𑀸𑀢𑀺 𑀭𑀽𑀧𑀯𑁂𑀤𑀦𑀸𑀤𑀬𑁄 𑀏𑀯 𑀏𑀢𑁆𑀣 𑀮𑁄𑀓𑁂 𑀲𑀪𑀸𑀯𑀥𑀫𑁆𑀫𑀸. 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀧𑀦 𑀢𑁂 𑀭𑀽𑀧𑀸𑀤𑀺𑀓𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀺, 𑀢𑁂𑀦𑀸𑀳 ‘‘𑀦𑀸𑀫𑀫𑀢𑁆𑀢𑀫𑁂𑀢’’𑀦𑁆𑀢𑀺. 𑀦𑀸𑀫𑀧𑀡𑁆𑀡𑀢𑁆𑀢𑀺𑀯𑀲𑁂𑀦𑀸𑀢𑀺 𑀦𑀸𑀫𑀪𑀽𑀢𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀢𑀸𑀯𑀲𑁂𑀦.

𑁪𑁩𑁮. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸𑀢𑀺 ‘‘𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀭𑀽𑀧𑀸𑀤𑀺𑀓𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀺𑀫𑀢𑁆𑀢’’𑀦𑁆𑀢𑀺 𑀇𑀫𑀫𑀢𑁆𑀣𑀁 ‘‘𑀬𑀲𑁆𑀫𑀺𑀁 𑀘𑀺𑀢𑁆𑀢 𑀲𑀫𑀬𑁂’’𑀢𑀺𑀆𑀤𑀺𑀦𑀸 𑀯𑀢𑁆𑀯𑀸. 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀦𑀬𑀦𑀢𑁆𑀣𑀦𑁆𑀢𑀺 𑀬𑀣𑀸 𑀧𑀭𑁂 𑀧𑀼𑀘𑁆𑀙𑁂𑀬𑁆𑀬𑀼𑀁, 𑀢𑁂𑀦𑀸𑀓𑀸𑀭𑁂𑀦 𑀓𑀸𑀮𑀯𑀺𑀪𑀸𑀕𑀢𑁄 𑀧𑀝𑀺𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀜𑀸𑀧𑀦𑀯𑀲𑁂𑀦 𑀯𑀺𑀦𑀬𑀦𑀢𑁆𑀣𑀁. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁄 𑀅𑀳𑁄𑀲𑀻𑀢𑀺 𑀢𑀲𑁆𑀫𑀺𑀁 𑀅𑀢𑀻𑀢𑀲𑀫𑀬𑁂 𑀉𑀧𑀸𑀤𑀸𑀦𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑀸𑀬 𑀲𑀘𑁆𑀘𑀪𑀽𑀢𑁄 𑀯𑀺𑀚𑁆𑀚𑀫𑀸𑀦𑁄 𑀯𑀺𑀬 𑀯𑀢𑁆𑀢𑀩𑁆𑀩𑁄 𑀅𑀳𑁄𑀲𑀺, 𑀦 𑀧𑀦 𑀅𑀦𑀸𑀕𑀢𑁄 𑀇𑀤𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀯𑀸 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀤𑀼𑀧𑀸𑀤𑀸𑀦𑀲𑁆𑀲 𑀢𑀤𑀸 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀬𑁂 𑀢𑁂 𑀅𑀢𑀻𑀢𑀸 𑀥𑀫𑁆𑀫𑀸 𑀅𑀢𑀻𑀢𑀲𑀫𑀬𑁂 𑀅𑀢𑀻𑀢𑀢𑁆𑀢𑀧𑀝𑀺𑀮𑀸𑀪𑀲𑁆𑀲 𑀉𑀧𑀸𑀤𑀸𑀦𑀪𑀽𑀢𑀸 𑀭𑀽𑀧𑀸𑀤𑀬𑁄. 𑀢𑁂 𑀏𑀢𑀭𑀳𑀺 𑀦𑀢𑁆𑀣𑀺 𑀦𑀺𑀭𑀼𑀤𑁆𑀥𑀢𑁆𑀢𑀸. 𑀢𑀢𑁄 𑀏𑀯 𑀅𑀳𑁂𑀲𑀼𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀮𑀩𑁆𑀪𑀦𑀢𑁄. 𑀲𑁄𑀧𑀺 𑀢𑀤𑀼𑀧𑀸𑀤𑀸𑀦𑁄 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁𑀬𑁂𑀯 𑀅𑀢𑀻𑀢𑀲𑀫𑀬𑁂 𑀲𑀘𑁆𑀘𑁄 𑀪𑀽𑀢𑁄 𑀯𑀺𑀚𑁆𑀚𑀫𑀸𑀦𑁄 𑀯𑀺𑀬 𑀅𑀳𑁄𑀲𑀺. 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀅𑀦𑀸𑀕𑀢𑀸𑀦𑀜𑁆𑀘𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀜𑁆𑀘 𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑀸𑀤𑀸𑀦𑀪𑀽𑀢𑀸𑀦𑀁 𑀢𑀤𑀸 𑀢𑀲𑁆𑀫𑀺𑀁 𑀅𑀢𑀻𑀢𑀲𑀫𑀬𑁂 𑀅𑀪𑀸𑀯𑀸 𑀢𑀤𑀼𑀧𑀸𑀤𑀸𑀦𑁄 𑀅𑀦𑀸𑀕𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀘 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁 𑀅𑀢𑀻𑀢𑀲𑀫𑀬𑁂 𑀫𑁄𑀖𑁄 𑀢𑀼𑀘𑁆𑀙𑁄 𑀫𑀼𑀲𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀦𑀸𑀫𑀫𑀢𑁆𑀢𑀫𑁂𑀯𑀸𑀢𑀺 𑀲𑀫𑀜𑁆𑀜𑀸𑀫𑀢𑁆𑀢𑀫𑁂𑀯. 𑀅𑀢𑁆𑀢𑀧𑀝𑀺𑀮𑀸𑀪𑀁 𑀧𑀝𑀺𑀚𑀸𑀦𑀸𑀢𑀺 𑀧𑀭𑀫𑀢𑁆𑀣𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸.

‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀬𑁂 𑀢𑁂 𑀅𑀦𑀸𑀕𑀢𑀸 𑀥𑀫𑁆𑀫𑀸, 𑀢𑁂 𑀏𑀢𑀭𑀳𑀺 𑀦𑀢𑁆𑀣𑀺, ‘‘𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀦 𑀲𑀗𑁆𑀔𑁆𑀬𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀲𑁄𑀧𑀺 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀲𑀘𑁆𑀘𑁄 𑀪𑀯𑀺𑀲𑁆𑀲𑀢𑀺. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀢𑀤𑀸 𑀅𑀪𑀸𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁄𑀖𑁄 𑀅𑀢𑀻𑀢𑁄 𑀫𑁄𑀖𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄. 𑀬𑁂 𑀇𑀫𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸, 𑀢𑁂 𑀏𑀢𑀭𑀳𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀬𑁄𑀬𑀁 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄 𑀇𑀤𑀸𑀦𑀺 𑀲𑀘𑁆𑀘𑁄. 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀇𑀤𑀸𑀦𑀺 𑀅𑀪𑀸𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑁄𑀖𑁄 𑀅𑀢𑀻𑀢𑁄 𑀫𑁄𑀖𑁄 𑀅𑀦𑀸𑀕𑀢𑁄𑀢𑀺 𑀏𑀯𑀁 𑀅𑀢𑁆𑀣𑀢𑁄 𑀦𑀸𑀫𑀫𑀢𑁆𑀢𑀫𑁂𑀯 𑀅𑀢𑁆𑀢𑀧𑀝𑀺𑀮𑀸𑀪𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑁪𑁩𑁯-𑁪𑁪𑁩. 𑀲𑀁𑀲𑀦𑁆𑀤𑀺𑀢𑀼𑀦𑁆𑀢𑀺 𑀲𑀫𑀸𑀦𑁂𑀢𑀼𑀁. 𑀬𑀲𑁆𑀫𑀺𑀁 𑀲𑀫𑀬𑁂 𑀔𑀻𑀭𑀁 𑀳𑁄𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀪𑀽𑀢𑀼𑀧𑀸𑀤𑀸𑀬𑀲𑀜𑁆𑀜𑀺𑀢𑀁 𑀉𑀧𑀸𑀤𑀸𑀦𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀔𑀻𑀭𑀧𑀜𑁆𑀜𑀢𑁆𑀢𑀺 𑀳𑁄𑀢𑀺. 𑀦 𑀢𑀲𑁆𑀫𑀺𑀁…𑀧𑁂… 𑀕𑀘𑁆𑀙𑀢𑀺 𑀔𑀻𑀭𑀧𑀜𑁆𑀜𑀢𑁆𑀢𑀺𑀉𑀧𑀸𑀤𑀸𑀦𑀲𑁆𑀲 𑀤𑀥𑀺𑀆𑀤𑀺𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀧𑀸𑀤𑀸𑀦𑀢𑁄. 𑀧𑀝𑀺𑀦𑀺𑀬𑀢𑀯𑀢𑁆𑀣𑀼𑀓𑀸 𑀳𑀺 𑀏𑀓𑀸 𑀮𑁄𑀓𑀲𑀫𑀜𑁆𑀜𑀸, 𑀢𑁂𑀦𑀸𑀳 ‘‘𑀬𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀗𑁆𑀔𑀸𑀬𑀢𑀺 𑀏𑀢𑀸𑀬𑀸𑀢𑀺 𑀲𑀗𑁆𑀔𑀸, 𑀧𑀜𑁆𑀜𑀢𑁆𑀢𑀺. 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀘𑀦𑁆𑀢𑀺 𑀯𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀦𑀺𑀭𑀼𑀢𑁆𑀢𑀺. 𑀦𑀫𑀦𑁆𑀢𑀺 𑀏𑀢𑁂𑀦𑀸𑀢𑀺 𑀦𑀸𑀫𑀁. 𑀯𑁄𑀳𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑁄𑀳𑀸𑀭𑁄, 𑀧𑀜𑁆𑀜𑀢𑁆𑀢𑀺𑀬𑁂𑀯. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺𑀆𑀤𑀺𑀦𑀸 𑀔𑀻𑀭𑁂 𑀯𑀼𑀢𑁆𑀢𑀦𑀬𑀁 𑀤𑀥𑀺𑀆𑀤𑀻𑀲𑀼 𑀅𑀢𑀺𑀤𑀺𑀲𑀢𑀺.

𑀲𑀫𑀦𑀼𑀚𑀸𑀦𑀦𑀫𑀢𑁆𑀢𑀓𑀸𑀦𑀻𑀢𑀺 ‘‘𑀇𑀤𑀁 𑀔𑀻𑀭𑀁, 𑀇𑀤𑀁 𑀤𑀥𑀻’’𑀢𑀺𑀆𑀤𑀺𑀦𑀸 𑀢𑀸𑀤𑀺𑀲𑁂 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀯𑀺𑀲𑁂𑀲𑁂 𑀮𑁄𑀓𑁂 𑀧𑀭𑀫𑁆𑀧𑀭𑀸𑀪𑀢𑀁 𑀧𑀜𑁆𑀜𑀢𑁆𑀢𑀺𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀦𑀼𑀚𑀸𑀦𑀦𑀁 𑀯𑀺𑀬 𑀧𑀘𑁆𑀘𑀬𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀁 𑀭𑀽𑀧𑀸𑀤𑀺𑀔𑀦𑁆𑀥𑀲𑀫𑀽𑀳𑀁 𑀉𑀧𑀸𑀤𑀸𑀬 ‘‘𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺 𑀘 ‘‘𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺 𑀘 ‘‘𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺 𑀘 𑀢𑀣𑀸 𑀢𑀣𑀸 𑀲𑀫𑀦𑀼𑀚𑀸𑀦𑀦𑀫𑀢𑁆𑀢𑀓𑀸𑀦𑀺, 𑀦 𑀘 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀉𑀧𑀸𑀤𑀸𑀦𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀦𑀺𑀭𑀼𑀢𑁆𑀢𑀺𑀫𑀢𑁆𑀢𑀓𑀸𑀦𑀻𑀢𑀺 𑀲𑀤𑁆𑀤𑀦𑀺𑀭𑀼𑀢𑁆𑀢𑀺𑀬𑀸 𑀕𑀳𑀡𑀽𑀧𑀸𑀬𑀫𑀢𑁆𑀢𑀓𑀸𑀦𑀺. ‘‘𑀲𑀢𑁆𑀢𑁄 𑀨𑀲𑁆𑀲𑁄𑀢𑀺 𑀳𑀺 𑀲𑀤𑁆𑀤𑀕𑁆𑀕𑀳𑀡𑀼𑀢𑁆𑀢𑀭𑀓𑀸𑀮𑀁 𑀢𑀤𑀦𑀼𑀯𑀺𑀤𑁆𑀥𑀧𑀡𑁆𑀡𑀢𑁆𑀢𑀺𑀕𑁆𑀕𑀳𑀡𑀫𑀼𑀔𑁂𑀦𑁂𑀯 𑀢𑀤𑀢𑁆𑀣𑀸𑀯𑀩𑁄𑀥𑁄. 𑀯𑀘𑀦𑀧𑀣𑀫𑀢𑁆𑀢𑀓𑀸𑀦𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀯𑁄𑀳𑀸𑀭𑀫𑀢𑁆𑀢𑀓𑀸𑀦𑀻𑀢𑀺 𑀢𑀣𑀸 𑀢𑀣𑀸 𑀯𑁄𑀳𑀸𑀭𑀫𑀢𑁆𑀢𑀓𑀸𑀦𑀺. 𑀦𑀸𑀫𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀓𑀸𑀦𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀢𑀁𑀢𑀁𑀦𑀸𑀫𑀧𑀜𑁆𑀜𑀸𑀧𑀦𑀫𑀢𑁆𑀢𑀓𑀸𑀦𑀺. 𑀲𑀩𑁆𑀩𑀫𑁂𑀢𑀦𑁆𑀢𑀺 ‘‘𑀅𑀢𑁆𑀢𑀧𑀝𑀺𑀮𑀸𑀪𑁄’’𑀢𑀺 𑀯𑀸 ‘‘𑀲𑀢𑁆𑀢𑁄’’𑀢𑀺 𑀯𑀸 ‘‘𑀧𑁄𑀲𑁄’’𑀢𑀺 𑀯𑀸 𑀲𑀩𑁆𑀩𑀫𑁂𑀢𑀁 𑀯𑁄𑀳𑀸𑀭𑀫𑀢𑁆𑀢𑀓𑀁 𑀧𑀭𑀫𑀢𑁆𑀣𑀢𑁄 𑀅𑀦𑀼𑀧𑀮𑀩𑁆𑀪𑀦𑀢𑁄, 𑀢𑁂𑀦𑀸𑀳 ‘‘𑀬𑀲𑁆𑀫𑀸 𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺𑀆𑀤𑀺.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀢𑀁 𑀩𑀼𑀤𑁆𑀥𑁂𑀳𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦𑀁 𑀧𑀦 𑀤𑁆𑀯𑁂 𑀓𑀣𑀸’’𑀢𑀺𑀆𑀤𑀺. 𑀲𑀫𑁆𑀫𑀼𑀢𑀺𑀬𑀸 𑀯𑁄𑀳𑀸𑀭𑀲𑁆𑀲 𑀓𑀣𑀦𑀁 𑀲𑀫𑁆𑀫𑀼𑀢𑀺𑀓𑀣𑀸. 𑀧𑀭𑀫𑀢𑁆𑀣𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀓𑀣𑀦𑀁 𑀧𑀭𑀫𑀢𑁆𑀣𑀓𑀣𑀸. 𑀅𑀦𑀺𑀘𑁆𑀘𑀸𑀤𑀺𑀓𑀣𑀸𑀧𑀺 𑀧𑀭𑀫𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀓𑀣𑀸 𑀧𑀭𑀫𑀢𑁆𑀣𑀓𑀣𑀸𑀢𑀺 𑀓𑀢𑁆𑀯𑀸 𑀧𑀭𑀫𑀢𑁆𑀣𑀓𑀣𑀸. 𑀧𑀭𑀫𑀢𑁆𑀣𑀥𑀫𑁆𑀫𑁄 𑀳𑀺 ‘‘𑀅𑀦𑀺𑀘𑁆𑀘𑁄, 𑀤𑀼𑀓𑁆𑀔𑁄, 𑀅𑀦𑀢𑁆𑀢𑀸’’𑀢𑀺 𑀘 𑀯𑀼𑀘𑁆𑀘𑀢𑀺, 𑀦 𑀲𑀫𑁆𑀫𑀼𑀢𑀺𑀥𑀫𑁆𑀫𑁄. 𑀓𑀲𑁆𑀫𑀸 𑀧𑀦𑁂𑀯𑀁 𑀤𑀼𑀯𑀺𑀥𑀸 𑀩𑀼𑀤𑁆𑀥𑀸𑀦𑀁 𑀓𑀣𑀸𑀧𑀯𑀢𑁆𑀢𑀻𑀢𑀺 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀢𑀢𑁆𑀣 𑀬𑁄’’𑀢𑀺𑀆𑀤𑀺𑀦𑀸. 𑀬𑀲𑁆𑀫𑀸 𑀧𑀭𑀫𑀢𑁆𑀣𑀓𑀣𑀸𑀬 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁄, 𑀅𑀭𑀺𑀬𑀲𑀘𑁆𑀘𑀓𑀣𑀸 𑀘 𑀲𑀺𑀔𑀸𑀧𑁆𑀧𑀢𑁆𑀢𑀸 𑀤𑁂𑀲𑀦𑀸, 𑀢𑀲𑁆𑀫𑀸 𑀯𑀺𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀦𑁆𑀢𑁄𑀧𑀺 𑀪𑀕𑀯𑀸 𑀧𑀭𑀫𑀢𑁆𑀣𑀓𑀣𑀁𑀬𑁂𑀯 𑀓𑀣𑁂𑀢𑀻𑀢𑀺 𑀆𑀳 ‘‘𑀢𑀲𑁆𑀲 𑀪𑀕𑀯𑀸 𑀆𑀤𑀺𑀢𑁄𑀯…𑀧𑁂… 𑀓𑀣𑁂𑀢𑀻’’𑀢𑀺, 𑀢𑁂𑀦𑀸𑀳 ‘‘𑀢𑀣𑀸’’𑀢𑀺𑀆𑀤𑀺, 𑀢𑁂𑀦𑀲𑁆𑀲 𑀓𑀢𑁆𑀣𑀘𑀺 𑀲𑀫𑁆𑀫𑀼𑀢𑀺𑀓𑀣𑀸𑀧𑀼𑀩𑁆𑀩𑀺𑀓𑀸 𑀧𑀭𑀫𑀢𑁆𑀣𑀓𑀣𑀸 𑀳𑁄𑀢𑀺 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦, 𑀓𑀢𑁆𑀣𑀘𑀺 𑀧𑀭𑀫𑀢𑁆𑀣𑀓𑀣𑀸𑀧𑀼𑀩𑁆𑀩𑀺𑀓𑀸 𑀲𑀫𑁆𑀫𑀼𑀢𑀺𑀓𑀣𑀸. 𑀇𑀢𑀺 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑀲𑁆𑀲 𑀲𑀢𑁆𑀣𑀼 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀢𑀣𑀸 𑀢𑀣𑀸 𑀤𑁂𑀲𑀦𑀸𑀧𑀯𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣 𑀧𑀦 𑀪𑀕𑀯𑀸 𑀥𑀫𑁆𑀫𑀢𑀁 𑀅𑀯𑀺𑀚𑀳𑀦𑁆𑀢𑁄 𑀏𑀯 𑀲𑀫𑁆𑀫𑀼𑀢𑀺𑀁 𑀅𑀦𑀼𑀯𑀢𑁆𑀢𑀢𑀺, 𑀲𑀫𑁆𑀫𑀼𑀢𑀺𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄𑀬𑁂𑀯 𑀥𑀫𑁆𑀫𑀢𑀁 𑀯𑀺𑀪𑀸𑀯𑁂𑀢𑀺, 𑀦 𑀢𑀢𑁆𑀣 𑀅𑀪𑀺𑀦𑀺𑀯𑁂𑀲𑀸𑀢𑀺𑀥𑀸𑀯𑀦𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀁 𑀦𑀸𑀪𑀺𑀦𑀺𑀯𑀺𑀲𑁂𑀬𑁆𑀬, 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑁂𑀬𑁆𑀬𑀸’’𑀢𑀺.

𑀧𑀞𑀫𑀁 𑀲𑀫𑁆𑀫𑀼𑀢𑀺𑀁 𑀓𑀢𑁆𑀯𑀸 𑀓𑀣𑀦𑀁 𑀧𑀦 𑀯𑁂𑀦𑁂𑀬𑁆𑀬𑀯𑀲𑁂𑀦 𑀬𑁂𑀪𑀼𑀬𑁆𑀬𑁂𑀦 𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀦𑁆𑀢𑀺 𑀢𑀁 𑀓𑀸𑀭𑀡𑁂𑀦 𑀲𑀤𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀓𑀢𑀺𑀬𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀦𑀦𑀼 𑀘 𑀲𑀫𑁆𑀫𑀼𑀢𑀺 𑀦𑀸𑀫 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀪𑀽𑀢𑀸, 𑀢𑀁 𑀓𑀣𑀁 𑀩𑀼𑀤𑁆𑀥𑀸 𑀓𑀣𑁂𑀦𑁆𑀢𑀻𑀢𑀺 𑀆𑀳 ‘‘𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀦𑁆𑀢𑀸𑀧𑀻’’𑀢𑀺𑀆𑀤𑀺. 𑀲𑀘𑁆𑀘𑀫𑁂𑀯𑀸𑀢𑀺 𑀢𑀣𑀫𑁂𑀯. 𑀲𑀪𑀸𑀯𑀫𑁂𑀯𑀸𑀢𑀺 𑀲𑀫𑁆𑀫𑀼𑀢𑀺𑀪𑀸𑀯𑁂𑀦 𑀢𑀁𑀲𑀪𑀸𑀯𑀫𑁂𑀯, 𑀢𑁂𑀦𑀸𑀳 ‘‘𑀅𑀫𑀼𑀲𑀸𑀯𑀸’’𑀢𑀺. 𑀧𑀭𑀫𑀢𑁆𑀣𑀲𑁆𑀲 𑀧𑀦 𑀲𑀘𑁆𑀘𑀸𑀤𑀺𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀇𑀫𑁂𑀲𑀁 𑀧𑀦 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀸𑀦𑀁 𑀓𑁄 𑀯𑀺𑀲𑁂𑀲𑁄? 𑀬𑀲𑁆𑀫𑀺𑀁 𑀪𑀺𑀦𑁆𑀦𑁂, 𑀩𑀼𑀤𑁆𑀥𑀺𑀬𑀸 𑀯𑀸 𑀅𑀯𑀬𑀯𑀯𑀺𑀦𑀺𑀩𑁆𑀪𑁄𑀕𑁂 𑀓𑀢𑁂 𑀦 𑀢𑀁𑀲𑀜𑁆𑀜𑀸, 𑀲𑁄 𑀖𑀝𑀧𑀝𑀸𑀤𑀺𑀧𑁆𑀧𑀪𑁂𑀤𑁄 𑀲𑀫𑁆𑀫𑀼𑀢𑀺, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀧𑀭𑀫𑀢𑁆𑀣𑁄. 𑀦 𑀳𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑁂 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀼𑀢𑀺𑀧𑀺 𑀲𑀘𑁆𑀘𑀲𑀪𑀸𑀯𑀸 𑀏𑀯𑀸𑀢𑀺 𑀆𑀳 ‘‘𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀻’’𑀢𑀺𑀆𑀤𑀺.

𑀇𑀤𑀸𑀦𑀺 𑀦𑁂𑀲𑀁 𑀲𑀘𑁆𑀘𑀲𑀪𑀸𑀯𑀁 𑀓𑀸𑀭𑀡𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁 𑀯𑀺𑀲𑀁𑀯𑀸𑀤𑀦𑀸𑀪𑀸𑀯𑀢𑁄. 𑀢𑀢𑁆𑀣 𑀳𑁂𑀢𑀼𑀫𑀸𑀳 ‘‘𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡’’𑀦𑁆𑀢𑀺. 𑀮𑁄𑀓𑀲𑀺𑀤𑁆𑀥𑀸 𑀳𑀺 𑀲𑀫𑁆𑀫𑀼𑀢𑀺 𑀲𑀗𑁆𑀓𑁂𑀢𑀯𑀘𑀦𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑀢𑀸𑀬 𑀓𑀸𑀭𑀡𑀁. 𑀧𑀭𑀫𑁄 𑀉𑀢𑁆𑀢𑀫𑁄 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄, 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑁄. 𑀢𑀲𑁆𑀲 𑀯𑀘𑀦𑀁 𑀲𑀘𑁆𑀘𑀁 𑀬𑀸𑀣𑀸𑀯𑀢𑁄 𑀅𑀯𑀺𑀲𑀁𑀯𑀸𑀤𑀦𑀯𑀲𑁂𑀦 𑀘 𑀧𑀯𑀢𑁆𑀢𑀦𑀢𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀥𑀫𑁆𑀫𑀸𑀦𑀁 𑀪𑀽𑀢𑀮𑀓𑁆𑀔𑀡’’𑀦𑁆𑀢𑀺, 𑀲𑀪𑀸𑀯𑀥𑀫𑁆𑀫𑀸𑀦𑀁 𑀬𑁄 𑀪𑀽𑀢𑁄 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄, 𑀢𑀲𑁆𑀲 𑀮𑀓𑁆𑀔𑀡𑀁 𑀅𑀗𑁆𑀕𑀦𑀁 𑀜𑀸𑀧𑀦𑀦𑁆𑀢𑀺 𑀓𑀢𑁆𑀯𑀸.

𑀬𑀤𑀺 𑀢𑀣𑀸𑀕𑀢𑁄 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀫𑁆𑀫𑀤𑁂𑀯 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀞𑀺𑀢𑁄𑀧𑀺 𑀮𑁄𑀓𑀲𑀫𑀜𑁆𑀜𑀁 𑀕𑀳𑁂𑀢𑁆𑀯𑀸𑀯 𑀯𑀤𑀢𑀺, 𑀓𑁄 𑀏𑀢𑁆𑀣 𑀮𑁄𑀓𑀺𑀬𑀫𑀳𑀸𑀚𑀦𑁂𑀳𑀺 𑀯𑀺𑀲𑁂𑀲𑁄𑀢𑀺 𑀆𑀳. ‘‘𑀬𑀸𑀳𑀺 𑀢𑀣𑀸𑀕𑀢𑁄 𑀯𑁄𑀳𑀭𑀢𑀺 𑀅𑀧𑀭𑀸𑀫𑀸𑀲’’𑀦𑁆𑀢𑀺𑀆𑀤𑀺. 𑀮𑁄𑀓𑀺𑀬𑀫𑀳𑀸𑀚𑀦𑁄 𑀅𑀧𑁆𑀧𑀳𑀻𑀦𑀧𑀭𑀸𑀫𑀸𑀲𑀢𑁆𑀢𑀸 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀧𑀭𑀸𑀫𑀲𑀦𑁆𑀢𑁄 𑀯𑁄𑀳𑀭𑀢𑀺, 𑀢𑀣𑀸𑀕𑀢𑁄 𑀧𑀦 𑀲𑀩𑁆𑀩𑀲𑁄 𑀧𑀳𑀻𑀦𑀧𑀭𑀸𑀫𑀸𑀲𑀢𑁆𑀢𑀸 𑀅𑀧𑀭𑀸𑀫𑀲𑀦𑁆𑀢𑁄 𑀬𑀲𑁆𑀫𑀸 𑀮𑁄𑀓𑀲𑀫𑀜𑁆𑀜𑀸𑀳𑀺 𑀯𑀺𑀦𑀸 𑀮𑁄𑀓𑀺𑀬𑁄 𑀅𑀢𑁆𑀣𑁄 𑀮𑁄𑀓𑁂 𑀓𑁂𑀦𑀘𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑁄, 𑀢𑀲𑁆𑀫𑀸 𑀢𑀸𑀳𑀺 𑀢𑀁 𑀯𑁄𑀳𑀭𑀢𑀺. 𑀢𑀣𑀸 𑀯𑁄𑀳𑀭𑀦𑁆𑀢𑁄 𑀏𑀯 𑀘 𑀅𑀢𑁆𑀢𑀦𑁄 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀧𑀭𑀫𑀢𑁆𑀣𑀲𑀘𑁆𑀘𑁂 𑀧𑀢𑀺𑀝𑁆𑀞𑀧𑁂𑀢𑀺. 𑀤𑁂𑀲𑀦𑀁 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸𑀢𑀺 𑀳𑁂𑀝𑁆𑀞𑀸 𑀧𑀯𑀢𑁆𑀢𑀺𑀢𑀓𑀣𑀸𑀬 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸 𑀯𑀺𑀯𑁂𑀘𑁂𑀢𑁆𑀯𑀸 𑀤𑁂𑀲𑀦𑀁 ‘‘𑀅𑀧𑀭𑀸𑀫𑀸𑀲’’𑀦𑁆𑀢𑀺 𑀢𑀡𑁆𑀳𑀸𑀫𑀸𑀦𑀧𑀭𑀸𑀫𑀸𑀲𑀧𑁆𑀧𑀳𑀸𑀦𑀓𑀺𑀢𑁆𑀢𑀦𑁂𑀦 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀦𑀺𑀝𑁆𑀞𑀸𑀧𑁂𑀲𑀺. 𑀬𑀁 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.