𑁧𑁦. 𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑀲𑀼𑀪𑀫𑀸𑀡𑀯𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁪𑁪. ‘‘𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂’’𑀢𑀺 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀲𑁆𑀲 𑀘𑀺𑀭𑀓𑀸𑀮𑀢𑀸𑀧𑀝𑀺𑀓𑁆𑀔𑁂𑀧𑁂𑀦 𑀆𑀲𑀦𑁆𑀦𑀢𑀸 𑀤𑀲𑁆𑀲𑀺𑀢𑀸, 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀦 𑀤𑀲𑁆𑀲𑀺𑀢𑁄𑀢𑀺 𑀢𑀁 𑀧𑀭𑀺𑀘𑁆𑀙𑁂𑀤𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀉𑀤𑁆𑀥𑀁 𑀫𑀸𑀲𑀫𑀢𑁆𑀢𑁂 𑀓𑀸𑀮𑁂’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀢𑁆𑀢-𑀕𑁆𑀕𑀳𑀡𑁂𑀦 𑀓𑀸𑀮𑀲𑁆𑀲 𑀅𑀲𑀫𑁆𑀧𑀼𑀡𑁆𑀡𑀢𑀁 𑀚𑁄𑀢𑁂𑀢𑀺. 𑀢𑀼𑀤𑀺𑀲𑀜𑁆𑀜𑀺𑀢𑁄 𑀕𑀸𑀫𑁄 𑀦𑀺𑀯𑀸𑀲𑁄 𑀏𑀢𑀲𑁆𑀲𑀸𑀢𑀺 𑀢𑁄𑀤𑁂𑀬𑁆𑀬𑁄. 𑀢𑀁 𑀧𑀦𑁂𑀲 𑀬𑀲𑁆𑀫𑀸 𑀲𑁄𑀡𑀤𑀡𑁆𑀟𑁄 𑀯𑀺𑀬 𑀘𑀫𑁆𑀧𑀁, 𑀓𑀽𑀝𑀤𑀦𑁆𑀢𑁄 𑀯𑀺𑀬 𑀘 𑀔𑀸𑀡𑀼𑀫𑀢𑀁 𑀅𑀚𑁆𑀛𑀸𑀯𑀲𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀲𑁆𑀲 𑀅𑀥𑀺𑀧𑀢𑀺𑀢𑁆𑀢𑀸’’𑀢𑀺 𑀇𑀲𑁆𑀲𑀭𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀲𑀫𑀸𑀳𑀸𑀭𑀦𑁆𑀢𑀺 𑀲𑀦𑁆𑀦𑀺𑀘𑀬𑀁. 𑀧𑀡𑁆𑀟𑀺𑀢𑁄 𑀖𑀭𑀫𑀸𑀯𑀲𑁂𑀢𑀺 𑀬𑀲𑁆𑀫𑀸 𑀅𑀧𑁆𑀧𑀢𑀭𑀧𑁆𑀧𑀢𑀭𑁂𑀧𑀺 𑀯𑀬𑀫𑀸𑀦𑁂 𑀪𑁄𑀕𑀸 𑀔𑀺𑀬𑀦𑁆𑀢𑀺, 𑀅𑀧𑁆𑀧𑀢𑀭𑀧𑁆𑀧𑀢𑀭𑁂𑀧𑀺 𑀲𑀜𑁆𑀘𑀺𑀬𑀫𑀸𑀦𑁂 𑀯𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀜𑁆𑀜𑀼𑀚𑀸𑀢𑀺𑀓𑁄 𑀓𑀺𑀜𑁆𑀘𑀺 𑀯𑀬𑀁 𑀅𑀓𑀢𑁆𑀯𑀸 𑀆𑀬𑀫𑁂𑀯 𑀉𑀧𑁆𑀧𑀸𑀤𑁂𑀦𑁆𑀢𑁄 𑀖𑀭𑀸𑀯𑀸𑀲𑀁 𑀅𑀦𑀼𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀮𑁄𑀪𑀸𑀤𑁂𑀲𑀺𑀢𑀁 𑀧𑀝𑀺𑀧𑀢𑁆𑀢𑀺𑀁 𑀉𑀧𑀤𑀺𑀲𑀢𑀺.

𑀅𑀤𑀸𑀦𑀫𑁂𑀯 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀮𑁄𑀪𑀸𑀪𑀺𑀪𑀽𑀢𑀢𑀸𑀬 𑀢𑀲𑁆𑀫𑀺𑀁𑀬𑁂𑀯 𑀖𑀭𑁂 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀮𑁄𑀪𑀯𑀲𑀺𑀓𑀲𑁆𑀲 𑀳𑀺 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸. 𑀅𑀢𑀺𑀯𑀺𑀬 𑀧𑀺𑀬𑀸𑀬𑀢𑀺 𑀧𑀼𑀩𑁆𑀩𑀧𑀭𑀺𑀘𑀬𑁂𑀦. 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺 𑀲𑀼𑀪𑀁 𑀫𑀸𑀡𑀯𑀁 𑀅𑀦𑀼𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑁄. 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀲𑀺 𑀓𑀢𑁄𑀓𑀸𑀲𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀢𑁄.

𑀩𑁆𑀭𑀸𑀳𑁆𑀫𑀡𑀘𑀸𑀭𑀺𑀢𑁆𑀢𑀲𑁆𑀲 𑀪𑀸𑀯𑀺𑀢𑀢𑀁 𑀲𑀦𑁆𑀥𑀸𑀬, 𑀢𑀣𑀸 𑀧𑀺𑀢𑀭𑀁 𑀉𑀓𑁆𑀓𑀁𑀲𑁂𑀦𑁆𑀢𑁄 𑀘 ‘‘𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀳. 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀻𑀢𑀺 𑀲𑀼𑀢𑀫𑁂𑀢𑀁 𑀫𑀬𑀸 ‘‘𑀫𑀬𑁆𑀳𑀁 𑀧𑀺𑀢𑀸 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀓𑀺𑀫𑀺𑀤𑀁 𑀲𑀘𑁆𑀘𑀦𑁆𑀢𑀺 𑀧𑀼𑀘𑁆𑀙𑀺. 𑀢𑀣𑁂𑀯 𑀯𑀢𑁆𑀯𑀸𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀲𑀼𑀦𑀔𑀲𑁆𑀲 𑀯𑀼𑀢𑁆𑀢𑀁, 𑀢𑀣𑁂𑀯 𑀯𑀢𑁆𑀯𑀸. 𑀅𑀯𑀺𑀲𑀁𑀯𑀸𑀤𑀦𑀢𑁆𑀣𑀦𑁆𑀢𑀺 𑀲𑀘𑁆𑀘𑀸𑀧𑀦𑀢𑁆𑀣𑀁 ‘‘𑀢𑁄𑀤𑁂𑀬𑁆𑀬𑀩𑁆𑀭𑀸𑀳𑁆𑀫𑀡𑁄 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀅𑀢𑁆𑀢𑀦𑁄 𑀯𑀘𑀦𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑀢𑁆𑀣𑀁 𑀅𑀯𑀺𑀲𑀁𑀯𑀸𑀤𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀁 𑀤𑀲𑁆𑀲𑁂𑀲𑀻𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑁄 𑀲𑀼𑀦𑀔𑁄 𑀢𑀁 𑀲𑀩𑁆𑀩𑀁 𑀦𑁂𑀢𑁆𑀯𑀸 𑀤𑀲𑁆𑀲𑁂𑀲𑀺, 𑀦 𑀚𑀸𑀢𑀺𑀲𑁆𑀲𑀭𑀢𑀸𑀬. 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀪𑀼𑀓𑁆𑀓𑀭𑀡𑀁 𑀧𑀦 𑀧𑀼𑀭𑀺𑀫𑀚𑀸𑀢𑀺𑀲𑀺𑀤𑁆𑀥𑀯𑀸𑀲𑀦𑀸𑀯𑀲𑁂𑀦. 𑀘𑀼𑀤𑁆𑀤𑀲 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 ‘‘𑀤𑀺𑀲𑁆𑀲𑀦𑁆𑀢𑀺 𑀳𑀺 𑀪𑁄 𑀕𑁄𑀢𑀫 𑀫𑀦𑀼𑀲𑁆𑀲𑀸 𑀅𑀧𑁆𑀧𑀸𑀬𑀼𑀓𑀸, 𑀤𑀺𑀲𑁆𑀲𑀦𑁆𑀢𑀺 𑀤𑀻𑀖𑀸𑀬𑀼𑀓𑀸. 𑀤𑀺𑀲𑁆𑀲𑀦𑁆𑀢𑀺 𑀩𑀯𑁆𑀳𑀸𑀩𑀸𑀥𑀸, 𑀤𑀺𑀲𑁆𑀲𑀦𑁆𑀢𑀺 𑀅𑀧𑁆𑀧𑀸𑀩𑀸𑀥𑀸. 𑀤𑀺𑀲𑁆𑀲𑀦𑁆𑀢𑀺 𑀤𑀼𑀩𑁆𑀩𑀡𑁆𑀡𑀸, 𑀤𑀺𑀲𑁆𑀲𑀦𑁆𑀢𑀺 𑀯𑀡𑁆𑀡𑀯𑀦𑁆𑀢𑁄. 𑀤𑀺𑀲𑁆𑀲𑀦𑁆𑀢𑀺 𑀅𑀧𑁆𑀧𑁂𑀲𑀓𑁆𑀔𑀸, 𑀤𑀺𑀲𑁆𑀲𑀦𑁆𑀢𑀺 𑀫𑀳𑁂𑀲𑀓𑁆𑀔𑀸. 𑀤𑀺𑀲𑁆𑀲𑀦𑁆𑀢𑀺 𑀅𑀧𑁆𑀧𑀪𑁄𑀕𑀸, 𑀤𑀺𑀲𑁆𑀲𑀦𑁆𑀢𑀺 𑀫𑀳𑀸𑀪𑁄𑀕𑀸. 𑀤𑀺𑀲𑁆𑀲𑀦𑁆𑀢𑀺 𑀦𑀻𑀘𑀓𑀼𑀮𑀻𑀦𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀘𑁆𑀘𑀸𑀓𑀼𑀮𑀻𑀦𑀸. 𑀤𑀺𑀲𑁆𑀲𑀦𑁆𑀢𑀺 𑀤𑀼𑀧𑁆𑀧𑀜𑁆𑀜𑀸, 𑀤𑀺𑀲𑁆𑀲𑀦𑁆𑀢𑀺 𑀧𑀜𑁆𑀜𑀸𑀯𑀦𑁆𑀢𑁄’’𑀢𑀺 (𑀫. 𑀦𑀺. 𑁩.𑁨𑁮𑁯). 𑀇𑀫𑁂 𑀘𑀼𑀤𑁆𑀤𑀲 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁆𑀯𑀸, 𑀅𑀗𑁆𑀕𑀲𑀼𑀪𑀢𑀸𑀬 𑀓𑀺𑀭𑁂𑀲 ‘‘𑀲𑀼𑀪𑁄’’𑀢𑀺 𑀦𑀸𑀫𑀁 𑀮𑀪𑀺.

𑁪𑁪𑁫. ‘‘𑀏𑀓𑀸 𑀘 𑀫𑁂 𑀓𑀗𑁆𑀔𑀸 𑀅𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀉𑀧𑀭𑀺 𑀧𑀼𑀘𑁆𑀙𑀺𑀬𑀫𑀸𑀦𑀲𑁆𑀲 𑀧𑀜𑁆𑀳𑀲𑁆𑀲 𑀧𑀕𑁂𑀯 𑀢𑁂𑀦 𑀅𑀪𑀺𑀲𑀗𑁆𑀔𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀪𑀸𑀕𑀯𑁂𑀤𑀦𑀸𑀢𑀺 𑀤𑀼𑀓𑁆𑀔𑀯𑁂𑀤𑀦𑀸. 𑀲𑀸 𑀳𑀺 𑀓𑀼𑀲𑀮𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁂 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀯𑁂𑀤𑀦𑀸𑀧𑀝𑀺𑀧𑀓𑁆𑀔𑀪𑀸𑀯𑀢𑁄 ‘‘𑀯𑀺𑀲𑀪𑀸𑀕𑀯𑁂𑀤𑀦𑀸’’𑀢𑀺. 𑀓𑀸𑀬𑀁 𑀕𑀸𑀴𑁆𑀳𑀸 𑀳𑀼𑀢𑁆𑀯𑀸 𑀩𑀸𑀥𑀢𑀺 𑀧𑀻𑀴𑁂𑀢𑀻𑀢𑀺 ‘‘𑀆𑀩𑀸𑀥𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀏𑀓𑀤𑁂𑀲𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀲𑀭𑀻𑀭𑀲𑁆𑀲 𑀏𑀓𑀤𑁂𑀲𑁂 𑀉𑀝𑁆𑀞𑀺𑀢𑀸𑀧𑀺 𑀅𑀬𑀧𑀝𑁆𑀝𑁂𑀦 𑀆𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀕𑀡𑁆𑀳𑀸𑀢𑀺 𑀅𑀧𑀭𑀺𑀯𑀢𑁆𑀢𑀪𑀸𑀯𑀓𑀭𑀡𑀢𑁄, 𑀏𑀢𑁂𑀦 𑀩𑀮𑀯𑀭𑁄𑀕𑁄 𑀆𑀩𑀸𑀥𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀘𑁆𑀙𑀚𑀻𑀯𑀺𑀢𑀓𑀭𑁄𑀢𑀺 𑀅𑀲𑀼𑀔𑀚𑀻𑀯𑀺𑀢𑀸𑀯𑀳𑁄, 𑀏𑀢𑁂𑀦 𑀤𑀼𑀩𑁆𑀩𑀮𑁄 𑀅𑀧𑁆𑀧𑀫𑀢𑁆𑀢𑀓𑁄 𑀭𑁄𑀕𑁄 𑀆𑀢𑀗𑁆𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀝𑁆𑀞𑀸𑀦𑀦𑁆𑀢𑀺 𑀲𑀬𑀦𑀦𑀺𑀲𑀚𑁆𑀚𑀸𑀤𑀺𑀢𑁄 𑀉𑀝𑁆𑀞𑀳𑀦𑀁, 𑀢𑁂𑀦 𑀬𑀣𑀸 𑀢𑀣𑀸 𑀅𑀧𑀭𑀸𑀧𑀭𑀁 𑀲𑀭𑀻𑀭𑀲𑁆𑀲 𑀧𑀭𑀺𑀯𑀢𑁆𑀢𑀦𑀁 𑀯𑀤𑀢𑀺. 𑀕𑀭𑀼𑀓𑀦𑁆𑀢𑀺 𑀪𑀸𑀭𑀺𑀬𑀁 𑀓𑀺𑀘𑁆𑀙𑀲𑀺𑀤𑁆𑀥𑀺𑀓𑀁. 𑀓𑀸𑀬𑁂 𑀩𑀮𑀁 𑀦 𑀳𑁄𑀢𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀕𑀺𑀮𑀸𑀦𑀲𑁆𑀲𑁂𑀯𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀳𑁂𑀝𑁆𑀞𑀸 𑀘𑀢𑀽𑀳𑀺 𑀧𑀤𑁂𑀳𑀺 𑀅𑀨𑀸𑀲𑀼𑀯𑀺𑀳𑀸𑀭𑀸𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 𑀇𑀤𑀸𑀦𑀺 𑀨𑀸𑀲𑀼𑀯𑀺𑀳𑀸𑀭𑀲𑀩𑁆𑀪𑀸𑀯𑀁 𑀧𑀼𑀘𑁆𑀙𑀢𑀺, 𑀢𑁂𑀦 𑀲𑀯𑀺𑀲𑁂𑀲𑁄 𑀨𑀸𑀲𑀼𑀯𑀺𑀳𑀸𑀭𑁄 𑀧𑀼𑀘𑁆𑀙𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄, 𑀅𑀲𑀢𑀺𑀧𑀺 𑀅𑀢𑀺𑀲𑀬𑀢𑁆𑀣𑀚𑁄𑀢𑀦𑁂 𑀲𑀤𑁆𑀤𑁂 𑀅𑀢𑀺𑀲𑀬𑀢𑁆𑀣𑀲𑁆𑀲 𑀮𑀩𑁆𑀪𑀦𑀢𑁄 𑀬𑀣𑀸 ‘‘𑀅𑀪𑀺𑀭𑀽𑀧𑀸𑀬 𑀤𑁂𑀬𑁆𑀬𑀁 𑀤𑀸𑀢𑀩𑁆𑀩’’𑀦𑁆𑀢𑀺.

𑁪𑁪𑁭. 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸𑀢𑀺. 𑀏𑀢𑁆𑀣 𑀓𑀸𑀮𑁄 𑀦𑀸𑀫 𑀉𑀧𑀲𑀗𑁆𑀓𑀫𑀦𑀲𑁆𑀲 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁄. 𑀲𑀫𑀬𑁄 𑀦𑀸𑀫 𑀢𑀲𑁆𑀲𑁂𑀯 𑀧𑀘𑁆𑀘𑀬𑀲𑀸𑀫𑀕𑁆𑀕𑀻, 𑀅𑀢𑁆𑀣𑀢𑁄 𑀢𑀚𑁆𑀚𑀁 𑀲𑀭𑀻𑀭𑀩𑀮𑀜𑁆𑀘𑁂𑀯 𑀢𑀧𑁆𑀧𑀘𑁆𑀘𑀬𑀧𑀭𑀺𑀲𑁆𑀲𑀬𑀸𑀪𑀸𑀯𑁄 𑀘. 𑀉𑀧𑀸𑀤𑀸𑀦𑀁 𑀦𑀸𑀫 𑀜𑀸𑀡𑁂𑀦 𑀢𑁂𑀲𑀁 𑀕𑀳𑀡𑀁 𑀲𑀮𑁆𑀮𑀓𑁆𑀔𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀮𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀨𑀭𑀺𑀲𑁆𑀲𑀢𑀻𑀢𑀺 𑀯𑀟𑁆𑀠𑀺𑀲𑁆𑀲𑀢𑀺.

𑁪𑁪𑁮. 𑀘𑁂𑀢𑀺𑀬𑀭𑀝𑁆𑀞𑁂𑀢𑀺 𑀘𑁂𑀢𑀺𑀭𑀝𑁆𑀞𑁂. 𑀬-𑀓𑀸𑀭𑁂𑀦 𑀳𑀺 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀘𑁂𑀢𑀺𑀭𑀝𑁆𑀞𑀢𑁄 𑀅𑀜𑁆𑀜𑀁 𑀯𑀺𑀲𑀼𑀁𑀬𑁂𑀯𑁂𑀓𑀁 𑀭𑀝𑁆𑀞𑀦𑁆𑀢𑀺 𑀘 𑀯𑀤𑀦𑁆𑀢𑀺. 𑀫𑀭𑀡𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀫𑀭𑀡𑀁 𑀦𑀸𑀫 𑀢𑀸𑀤𑀺𑀲𑀸𑀦𑀁 𑀭𑁄𑀕 𑀯𑀲𑁂𑀦𑁂𑀯 𑀳𑁄𑀢𑀻𑀢𑀺 𑀬𑁂𑀦 𑀭𑁄𑀕𑁂𑀦 𑀢𑀁 𑀚𑀸𑀢𑀁, 𑀢𑀲𑁆𑀲 𑀲𑀭𑀽𑀧𑀧𑀼𑀘𑁆𑀙𑀸, 𑀓𑀸𑀭𑀡𑀧𑀼𑀘𑁆𑀙𑀸, 𑀫𑀭𑀡𑀳𑁂𑀢𑀼𑀓𑀘𑀺𑀢𑁆𑀢𑀲𑀦𑁆𑀢𑀸𑀧𑀧𑀼𑀘𑁆𑀙𑀸, 𑀢𑀲𑁆𑀲 𑀘 𑀲𑀦𑁆𑀢𑀸𑀧𑀲𑁆𑀲 𑀲𑀩𑁆𑀩𑀮𑁄𑀓𑀲𑀸𑀥𑀸𑀭𑀡𑀢𑀸, 𑀢𑀣𑀸 𑀫𑀭𑀡𑀲𑁆𑀲 𑀘 𑀅𑀧𑁆𑀧𑀢𑀺𑀓𑀸𑀭𑀢𑀸𑀢𑀺 𑀏𑀯𑀁 𑀆𑀤𑀺𑀦𑀸 𑀫𑀭𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑁂𑀲𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑁄 𑀆𑀦𑀦𑁆𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀭𑀦𑁆𑀥𑀕𑀯𑁂𑀲𑀻 𑀫𑀸𑀭𑁄 𑀯𑀺𑀬, 𑀦 𑀯𑀻𑀫𑀁𑀲𑀦𑀸𑀥𑀺𑀧𑁆𑀧𑀸𑀬𑁄 𑀉𑀢𑁆𑀢𑀭𑀫𑀸𑀡𑀯𑁄 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀯𑀺𑀫𑁄𑀓𑁆𑀔𑀼𑀧𑀸𑀬𑁂𑀲𑀼 𑀦𑀺𑀬𑁆𑀬𑀸𑀦𑀥𑀫𑁆𑀫𑁂𑀲𑀼. 𑀥𑀭𑀦𑁆𑀢𑀻𑀢𑀺 𑀢𑀺𑀝𑁆𑀞𑀦𑁆𑀢𑀺, 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁪𑁪𑁯. 𑀅𑀢𑁆𑀣𑀧𑁆𑀧𑀬𑀼𑀢𑁆𑀢𑀢𑀸𑀬 𑀲𑀤𑁆𑀤𑀧𑀬𑁄𑀕𑀲𑁆𑀲 𑀲𑀤𑁆𑀤𑀧𑁆𑀧𑀩𑀦𑁆𑀥𑀮𑀓𑁆𑀔𑀡𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀢𑀤𑀢𑁆𑀣𑀪𑀽𑀢𑁂𑀳𑀺 𑀲𑀻𑀮𑀸𑀤𑀻𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀻𑀡𑀺 𑀧𑀺𑀝𑀓𑀸𑀦𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸’’𑀢𑀺. 𑀲𑀗𑁆𑀔𑀺𑀢𑁆𑀢𑁂𑀦 𑀓𑀣𑀺𑀢𑀦𑁆𑀢𑀺 ‘‘𑀢𑀺𑀡𑁆𑀡𑀁 𑀔𑀦𑁆𑀥𑀸𑀦’’𑀦𑁆𑀢𑀺 𑀏𑀯𑀁 𑀕𑀳𑀡𑀢𑁄 𑀲𑀸𑀫𑀜𑁆𑀜𑀢𑁄 𑀘𑀸𑀢𑀺 𑀲𑀗𑁆𑀔𑁂𑀧𑁂𑀦𑁂𑀯 𑀓𑀣𑀺𑀢𑀁. ‘‘𑀓𑀢𑀫𑁂𑀲𑀁 𑀢𑀺𑀡𑁆𑀡’’𑀦𑁆𑀢𑀺 𑀅𑀬𑀁 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸, 𑀦 𑀓𑀣𑁂𑀢𑀼𑀓𑀫𑁆𑀬𑀢𑀸 𑀧𑀼𑀘𑁆𑀙𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀢𑁆𑀣𑀸𑀭𑀢𑁄 𑀧𑀼𑀘𑁆𑀙𑀺𑀲𑁆𑀲𑀸𑀫𑀻 ‘𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘𑀓𑀢𑀫𑁂𑀲𑀁 𑀢𑀺𑀡𑁆𑀡’𑀦𑁆𑀢𑀺 𑀆𑀳𑀸’’𑀢𑀺. 𑀓𑀣𑁂𑀢𑀼𑀓𑀫𑁆𑀬𑀢𑀸𑀪𑀸𑀯𑁂 𑀧𑀦𑀲𑁆𑀲 𑀣𑁂𑀭𑀲𑁆𑀲 𑀯𑀘𑀦𑀢𑀸 𑀲𑀺𑀬𑀸.

𑀲𑀻𑀮𑀓𑁆𑀔𑀦𑁆𑀥𑀯𑀡𑁆𑀡𑀦𑀸

𑁪𑁫𑁦-𑁪𑁫𑁩. 𑀲𑀻𑀮𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 ‘‘𑀅𑀭𑀺𑀬𑀲𑁆𑀲 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲…𑀧𑁂… 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺 𑀅𑀬𑀁 𑀏𑀢𑁆𑀢𑀓𑁄 𑀧𑀸𑀞𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁 𑀢𑁂𑀦𑀸𑀳 ‘‘𑀢𑁂𑀲𑀼 𑀤𑀲𑁆𑀲𑀺𑀢𑁂𑀲𑀽’’𑀢𑀺, 𑀉𑀤𑁆𑀤𑁂𑀲𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀕𑀯𑀢𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀲𑀸𑀫𑀜𑁆𑀜𑀨𑀮𑀤𑁂𑀲𑀦𑀸𑀤𑀻𑀲𑀼 𑀪𑀕𑀯𑀢𑀸 𑀤𑁂𑀲𑀺𑀢𑀦𑀬𑁂𑀦𑁂𑀯, 𑀢𑁂𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀢𑁆𑀣𑀼𑀪𑀸𑀲𑀺𑀢𑀪𑀸𑀯𑀁 𑀚𑀺𑀦𑀯𑀘𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀸𑀲𑀦𑁂 𑀦 𑀲𑀻𑀮𑀫𑁂𑀯 𑀲𑀸𑀭𑁄𑀢𑀺 𑀅𑀭𑀺𑀬𑀫𑀕𑁆𑀕𑀲𑀸𑀭𑁂 𑀪𑀕𑀯𑀢𑁄 𑀲𑀸𑀲𑀦𑁂 𑀬𑀣𑀸 𑀤𑀲𑁆𑀲𑀺𑀢𑀁 𑀲𑀻𑀮𑀁 𑀲𑀸𑀭𑁄 𑀏𑀯 𑀦 𑀳𑁄𑀢𑀺 𑀲𑀸𑀭𑀯𑀢𑁄 𑀫𑀳𑀢𑁄 𑀭𑀼𑀓𑁆𑀔𑀲𑁆𑀲 𑀧𑀧𑀝𑀺𑀓𑀝𑁆𑀞𑀸𑀦𑀺𑀬𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀇𑀥 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀓𑁂𑀯𑀮𑀜𑁆𑀳𑁂𑀢𑀁 𑀧𑀢𑀺𑀝𑁆𑀞𑀸𑀫𑀢𑁆𑀢𑀓𑀫𑁂𑀯𑀸’’𑀢𑀺. 𑀛𑀸𑀦𑀸𑀤𑀺𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀥𑀺𑀕𑀦𑁆𑀢𑀼𑀓𑀸𑀫𑀲𑁆𑀲 𑀅𑀥𑀺𑀝𑁆𑀞𑀸𑀦𑀫𑀢𑁆𑀢𑀁 𑀢𑀢𑁆𑀣 𑀅𑀧𑁆𑀧𑀢𑀺𑀝𑁆𑀞𑀺𑀢𑀲𑁆𑀲 𑀢𑁂𑀲𑀁 𑀅𑀲𑀫𑁆𑀪𑀯𑀢𑁄. 𑀅𑀣 𑀯𑀸 𑀦 𑀲𑀻𑀮𑀫𑁂𑀯 𑀲𑀸𑀭𑁄𑀢𑀺 𑀓𑀸𑀫𑀜𑁆𑀘𑁂𑀢𑁆𑀣 𑀲𑀸𑀲𑀦𑁂 ‘‘𑀫𑀕𑁆𑀕𑀲𑀻𑀮𑀁, 𑀨𑀮𑀲𑀻𑀮’’𑀦𑁆𑀢𑀺 𑀇𑀤𑀁 𑀮𑁄𑀓𑀼𑀢𑁆𑀢𑀭𑀲𑀻𑀮𑀫𑁆𑀧𑀺 𑀲𑀸𑀭𑀫𑁂𑀯, 𑀢𑀣𑀸𑀧𑀺 𑀦 𑀲𑀻𑀮𑀓𑁆𑀔𑀦𑁆𑀥𑁄 𑀏𑀯 𑀲𑀸𑀭𑁄 𑀅𑀣 𑀔𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄𑀧𑀺 𑀧𑀜𑁆𑀜𑀸𑀓𑁆𑀔𑀦𑁆𑀥𑁄𑀧𑀺 𑀲𑀸𑀭𑁄 𑀏𑀯𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀼𑀭𑀺𑀫𑁄 𑀏𑀯 𑀲𑀸𑀭𑁄, 𑀢𑁂𑀦𑀸𑀳 ‘‘𑀇𑀢𑁄 𑀉𑀢𑁆𑀢𑀭𑀻’’𑀢𑀺𑀆𑀤𑀺.

𑀲𑀫𑀸𑀥𑀺𑀓𑁆𑀔𑀦𑁆𑀥𑀯𑀡𑁆𑀡𑀦𑀸

𑁪𑁫𑁪. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀣𑁂𑀭𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀼𑀝𑁆𑀞𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀺𑀓𑁂 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀅𑀜𑁆𑀜𑀁 𑀧𑀼𑀝𑁆𑀞𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀅𑀫𑁆𑀩𑀁 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀈𑀤𑀺𑀲𑀻 𑀘𑁄𑀤𑀦𑀸 𑀇𑀥 𑀅𑀦𑁄𑀓𑀸𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀣𑀜𑁆𑀘 𑀫𑀸𑀡𑀯 𑀪𑀺𑀓𑁆𑀔𑀼…𑀧𑁂… 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀆𑀭𑀪𑀻’’𑀢𑀺 𑀆𑀳, 𑀢𑁂𑀦𑁂𑀢𑁆𑀣 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀬𑁄𑀧𑀺 𑀲𑀫𑀸𑀥𑀺𑀉𑀧𑀓𑀸𑀭𑀢𑀁 𑀉𑀧𑀸𑀤𑀸𑀬 𑀲𑀫𑀸𑀥𑀺𑀓𑁆𑀔𑀦𑁆𑀥𑀧𑀓𑁆𑀔𑀺𑀓𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀻𑀢𑀺 𑀤𑀲𑁆𑀲𑁂𑀢𑀺 𑀭𑀽𑀧𑀚𑁆𑀛𑀸𑀦𑀸𑀦𑁂𑀯 𑀆𑀕𑀢𑀸𑀦𑀺, 𑀦 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀤𑁂𑀲𑀦𑀸𑀦𑀦𑁆𑀢𑀭𑀁 𑀅𑀪𑀺𑀜𑁆𑀜𑀸𑀤𑁂𑀲𑀦𑀸𑀬 𑀅𑀯𑀲𑀭𑁄𑀢𑀺 𑀓𑀢𑁆𑀯𑀸. 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀺𑀓𑀸 𑀳𑀺 𑀲𑀧𑀭𑀺𑀪𑀡𑁆𑀟𑀸 𑀙𑀧𑀺 𑀅𑀪𑀺𑀜𑁆𑀜𑀸𑀬𑁄. 𑀮𑁄𑀓𑀺𑀬𑀸 𑀅𑀪𑀺𑀜𑁆𑀜𑀸 𑀧𑀦 𑀲𑀺𑀚𑁆𑀛𑀫𑀸𑀦𑀸 𑀬𑀲𑁆𑀫𑀸 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀘𑀼𑀤𑁆𑀤𑀲𑀯𑀺𑀥𑁂𑀦 𑀘𑀺𑀢𑁆𑀢𑀧𑀭𑀺𑀤𑀫𑀦𑁂𑀦 𑀯𑀺𑀦𑀸 𑀦 𑀇𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀪𑀺𑀜𑁆𑀜𑀸𑀲𑀼 𑀤𑁂𑀲𑀺𑀬𑀫𑀸𑀦𑀸𑀲𑀼 𑀅𑀭𑀽𑀧𑀚𑁆𑀛𑀸𑀦𑀸𑀦𑀺𑀧𑀺 𑀤𑁂𑀲𑀺𑀢𑀸𑀦𑁂𑀯 𑀳𑁄𑀦𑁆𑀢𑀺 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑀢𑁄, 𑀢𑁂𑀦𑀸𑀳 ‘‘𑀆𑀦𑁂𑀢𑁆𑀯𑀸 𑀧𑀦 𑀤𑀻𑀧𑁂𑀢𑀩𑁆𑀩𑀸𑀦𑀻’’𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀤𑁂𑀲𑀺𑀢𑀸𑀦𑁂𑀯 𑀓𑀢𑁆𑀯𑀸 𑀲𑀁𑀯𑀡𑁆𑀡𑀓𑁂𑀳𑀺 𑀧𑀓𑀸𑀲𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑀇𑀫𑀺𑀦𑀸𑀯 𑀅𑀭𑀽𑀧𑀚𑁆𑀛𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀚𑁆𑀛𑀸𑀦𑀜𑁆𑀳𑀺 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 ‘‘𑀅𑀭𑀽𑀧𑀚𑁆𑀛𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑁪𑁭𑁧-𑁪𑁮𑁦. 𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀫𑀢𑁆𑀢𑀓𑁂𑀦𑁂𑀯𑀸𑀢𑀺 𑀏𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀓𑀺𑀬𑀲𑁆𑀲 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀦 𑀘𑀺𑀢𑁆𑀢𑁂…𑀧𑁂… 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀅𑀭𑀺𑀬-𑀲𑀤𑁆𑀤𑁄 𑀘𑁂𑀢𑁆𑀣 𑀲𑀼𑀤𑁆𑀥𑀧𑀭𑀺𑀬𑀸𑀬𑁄, 𑀦 𑀮𑁄𑀓𑀼𑀢𑁆𑀢𑀭𑀧𑀭𑀺𑀬𑀸𑀬𑁄. 𑀢𑀣𑀸 𑀳𑁂𑀝𑁆𑀞𑀸𑀧𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀯𑀺𑀦𑀸𑀯 𑀅𑀭𑀳𑀢𑁆𑀢𑁂 𑀅𑀥𑀺𑀕𑀢𑁂 𑀦𑀢𑁆𑀣𑁂𑀯 𑀉𑀢𑁆𑀢𑀭𑀺𑀁𑀓𑀭𑀡𑀻𑀬𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀬𑀤𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀢𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀇𑀥 𑀧𑀦 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀧𑀺 𑀆𑀕𑀢𑀸 𑀏𑀯. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.