𑁧𑁧. 𑀓𑁂𑀯𑀝𑁆𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑀓𑁂𑀯𑀝𑁆𑀝𑀕𑀳𑀧𑀢𑀺𑀧𑀼𑀢𑁆𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁮𑁧. 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂𑀢𑀺 𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀺𑀦𑁄 𑀅𑀫𑁆𑀩𑀩𑀳𑀼𑀮𑁂 𑀉𑀧𑀯𑀦𑁂. 𑀢𑀁 𑀓𑀺𑀭 𑀲𑁄 𑀲𑁂𑀝𑁆𑀞𑀻 𑀪𑀕𑀯𑀢𑁄 𑀅𑀦𑀼𑀘𑁆𑀙𑀯𑀺𑀓𑀁 𑀕𑀦𑁆𑀥𑀓𑀼𑀝𑀺𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀓𑀼𑀝𑀺𑀫𑀡𑁆𑀟𑀧𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑁆𑀧𑀦𑁆𑀦𑀁 𑀓𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑁂𑀲𑀺, 𑀧𑀼𑀭𑀺𑀫𑀯𑁄𑀳𑀸𑀭𑁂𑀦 𑀧𑀦 ‘‘𑀧𑀸𑀯𑀸𑀭𑀺𑀓𑀫𑁆𑀩𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂. 𑀓𑁂𑀯𑀝𑁆𑀝𑁄𑀢𑀺 𑀇𑀤𑀁 𑀢𑀲𑁆𑀲 𑀦𑀸𑀫𑀁 𑀓𑁂𑀯𑀝𑁆𑀝𑁂𑀳𑀺 𑀲𑀁𑀭𑀓𑁆𑀔𑀺𑀢𑀢𑁆𑀢𑀸, 𑀢𑁂𑀲𑀁 𑀯𑀸 𑀲𑀦𑁆𑀢𑀺𑀓𑁂 𑀲𑀁𑀯𑀟𑁆𑀠𑀺𑀢𑀢𑁆𑀢𑀸𑀢𑀺 𑀓𑁂𑀘𑀺. ‘‘𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲𑀸’’𑀢𑀺 𑀏𑀢𑁆𑀣 𑀓𑀸𑀫𑀁 𑀢𑀤𑀸 𑀲𑁄 𑀕𑀳𑀧𑀢𑀺𑀝𑁆𑀞𑀸𑀦𑁂 𑀞𑀺𑀢𑁄, 𑀧𑀺𑀢𑀼 𑀧𑀦𑀲𑁆𑀲 𑀅𑀘𑀺𑀭𑀓𑀸𑀮𑀁𑀓𑀢𑀢𑀸𑀬 𑀧𑀼𑀭𑀺𑀫𑀲𑀫𑀜𑁆𑀜𑀸𑀬 ‘‘𑀕𑀳𑀧𑀢𑀺𑀧𑀼𑀢𑁆𑀢𑁄’’ 𑀢𑁆𑀯𑁂𑀯 𑀯𑁄𑀳𑀭𑀻𑀬𑀢𑀺, 𑀢𑁂𑀦𑀸𑀳 ‘‘𑀕𑀳𑀧𑀢𑀺 𑀫𑀳𑀸𑀲𑀸𑀮𑁄’’𑀢𑀺. 𑀫𑀳𑀸𑀯𑀺𑀪𑀯𑀢𑀸𑀬 𑀫𑀳𑀸𑀲𑀸𑀭𑁄, 𑀕𑀳𑀧𑀢𑀻𑀢𑀺 𑀅𑀢𑁆𑀣𑁄 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸 ‘‘𑀫𑀳𑀸𑀲𑀸𑀮𑁄 𑀲𑀼𑀔𑀼𑀫𑀸𑀮𑁄 𑀅𑀳’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁩𑁯) 𑀯𑀺𑀬. 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀸𑀬 𑀲𑀤𑁆𑀥𑀸𑀬 𑀯𑀲𑁂𑀦 𑀲𑀤𑁆𑀥𑀸 𑀲𑀫𑀦𑁆𑀦𑀸𑀕𑀢𑁄.

𑀲𑀫𑀺𑀤𑁆𑀥𑀸𑀢𑀺 𑀲𑀫𑁆𑀫𑀤𑁂𑀯 𑀇𑀤𑁆𑀥𑀸, 𑀇𑀤𑁆𑀥𑀺𑀬𑀸 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀬𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀏𑀳𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀅𑀦𑁆𑀯𑀤𑁆𑀥𑀫𑀸𑀲𑀁, 𑀅𑀦𑀼𑀫𑀸𑀲𑀁, 𑀅𑀦𑀼𑀲𑀁𑀯𑀘𑁆𑀙𑀭𑀁 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀧𑀲𑀸𑀤𑀸𑀬 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀳𑀻’’𑀢𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀡𑀸𑀧𑀦𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀢𑀲𑁆𑀲 𑀞𑀧𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀞𑀸𑀦𑀦𑁆𑀢𑀭𑁂 𑀞𑀧𑁂𑀢𑀽’’𑀢𑀺. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀢𑁄𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀥𑀺𑀕𑀫𑀥𑀫𑁆𑀫𑀢𑁄. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀦𑀺𑀲𑁆𑀲𑀓𑁆𑀓𑀁. 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀜𑁆𑀳𑀺 𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑀺. 𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀉𑀢𑁆𑀢𑀭𑀻𑀢𑀺 𑀧𑀓𑀢𑀺𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀉𑀧𑀭𑀺. 𑀧𑀚𑁆𑀚𑀮𑀺𑀢𑀧𑀤𑀻𑀧𑁄𑀢𑀺 𑀧𑀚𑁆𑀚𑀮𑀦𑁆𑀢𑁄 𑀧𑀤𑀻𑀧𑁄.

𑁪𑁮𑁨. 𑀦 𑀥𑀁𑀲𑁂𑀫𑀻𑀢𑀺 𑀕𑀼𑀡𑀲𑀫𑁆𑀧𑀢𑁆𑀢𑀺𑀢𑁄 𑀦 𑀘𑀸𑀯𑁂𑀫𑀺, 𑀢𑁂𑀦𑀸𑀳 ‘‘𑀲𑀻𑀮𑀪𑁂𑀤’’𑀦𑁆𑀢𑀺𑀆𑀤𑀺. 𑀯𑀺𑀲𑁆𑀲𑀸𑀲𑀁 𑀯𑀟𑁆𑀠𑁂𑀢𑁆𑀯𑀸 𑀪𑀕𑀯𑀢𑀺 𑀅𑀢𑁆𑀢𑀦𑁄 𑀯𑀺𑀲𑁆𑀲𑀢𑁆𑀣𑀪𑀸𑀯𑀁 𑀩𑁆𑀭𑀽𑀳𑁂𑀢𑁆𑀯𑀸 𑀯𑀺𑀪𑀽𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸.

𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀯𑀡𑁆𑀡𑀦𑀸

𑁪𑁮𑁩-𑁪. 𑀆𑀤𑀻𑀦𑀯𑀦𑁆𑀢𑀺 𑀤𑁄𑀲𑀁. 𑀕𑀦𑁆𑀥𑀸𑀭𑀻𑀢𑀺 𑀘𑀽𑀴𑀕𑀦𑁆𑀥𑀸𑀭𑀻, 𑀫𑀳𑀸𑀕𑀦𑁆𑀥𑀸𑀭𑀻𑀢𑀺 𑀤𑁆𑀯𑁂 𑀕𑀦𑁆𑀥𑀸𑀭𑀻𑀯𑀺𑀚𑁆𑀚𑀸. 𑀢𑀢𑁆𑀣 𑀘𑀽𑀴𑀕𑀦𑁆𑀥𑀸𑀭𑀻 𑀦𑀸𑀫 𑀢𑀺𑀯𑀲𑁆𑀲𑀢𑁄 𑀑𑀭𑀁 𑀫𑀢𑀸𑀦𑀁 𑀲𑀢𑁆𑀢𑀸𑀦𑀁 𑀉𑀧𑀧𑀦𑁆𑀦𑀝𑁆𑀞𑀸𑀦𑀚𑀸𑀦𑀦𑀯𑀺𑀚𑁆𑀚𑀸. 𑀫𑀳𑀸𑀕𑀦𑁆𑀥𑀸𑀭𑀻 𑀢𑀫𑁆𑀧𑀺 𑀚𑀸𑀦𑀸𑀢𑀺 𑀢𑀢𑁄 𑀉𑀢𑁆𑀢𑀭𑀺𑀧𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑀓𑀧𑁆𑀧𑀁 𑀬𑁂𑀪𑀼𑀬𑁆𑀬𑁂𑀦 𑀇𑀤𑁆𑀥𑀺𑀯𑀺𑀥𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀢𑀲𑁆𑀲𑀸 𑀓𑀺𑀭 𑀯𑀺𑀚𑁆𑀚𑀸𑀬 𑀲𑀸𑀥𑀓𑁄 𑀧𑀼𑀕𑁆𑀕𑀮𑁄 𑀢𑀸𑀤𑀺𑀲𑁂 𑀤𑁂𑀲𑀓𑀸𑀮𑁂 𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀩𑀳𑀼𑀥𑀸𑀧𑀺 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺, 𑀳𑀢𑁆𑀣𑀺𑀆𑀤𑀻𑀦𑀺𑀧𑀺 𑀤𑀲𑁆𑀲𑁂𑀢𑀺, 𑀤𑀲𑁆𑀲𑀦𑀻𑀬𑁄𑀧𑀺 𑀳𑁄𑀢𑀺, 𑀅𑀕𑁆𑀕𑀺𑀣𑀫𑁆𑀪𑀫𑁆𑀧𑀺 𑀓𑀭𑁄𑀢𑀺, 𑀚𑀮𑀣𑀫𑁆𑀪𑀫𑁆𑀧𑀺 𑀓𑀭𑁄𑀢𑀺, 𑀆𑀓𑀸𑀲𑁂𑀧𑀺 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀁 𑀇𑀦𑁆𑀤𑀚𑀸𑀮𑀲𑀤𑀺𑀲𑀁 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀝𑁄𑀢𑀺 𑀤𑀼𑀓𑁆𑀔𑀺𑀢𑁄 𑀩𑀸𑀥𑀺𑀢𑁄, 𑀢𑁂𑀦𑀸𑀳 ‘‘𑀧𑀻𑀴𑀺𑀢𑁄’’𑀢𑀺.

𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀯𑀡𑁆𑀡𑀦𑀸

𑁪𑁮𑁫. 𑀓𑀸𑀫𑀁 ‘‘𑀘𑁂𑀢𑀲𑀺𑀓’’𑀦𑁆𑀢𑀺 𑀧𑀤𑀁 𑀬𑁂 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀸 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀲𑀸𑀥𑀸𑀭𑀡𑀯𑀘𑀦𑀁, 𑀲𑀸𑀥𑀸𑀭𑀡𑁂 𑀧𑀦 𑀕𑀳𑀺𑀢𑁂 𑀘𑀺𑀢𑁆𑀢𑀯𑀺𑀲𑁂𑀲𑁄 𑀕𑀳𑀺𑀢𑁄𑀯 𑀳𑁄𑀢𑀺, 𑀲𑀸𑀫𑀜𑁆𑀜𑀚𑁄𑀢𑀦𑀸 𑀘 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺 𑀘𑁂𑀢𑀲𑀺𑀓𑀕𑁆𑀕𑀳𑀡𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀦𑁆𑀢𑁄 ‘‘𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀆𑀳. 𑀲𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀤𑁂𑀓𑀝𑁆𑀞𑀸 𑀭𑀸𑀕𑀸𑀤𑀬𑁄, 𑀲𑀤𑁆𑀥𑀸𑀤𑀬𑁄 𑀘 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦 𑀤𑁄𑀲𑀸𑀤𑀬𑁄. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀧𑀦 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑀸. 𑀏𑀯𑀁 𑀢𑀯 𑀫𑀦𑁄𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀢𑀯 𑀫𑀦𑁄 𑀧𑀯𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀓𑁂𑀦 𑀧𑀓𑀸𑀭𑁂𑀦 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀲𑁄𑀫𑀦𑀲𑁆𑀲𑀺𑀢𑁄 𑀯𑀸’’𑀢𑀺𑀆𑀤𑀺. ‘‘𑀏𑀯𑀁 𑀢𑀯 𑀫𑀦𑁄’’𑀢𑀺 𑀇𑀤𑀁 𑀧𑀦 𑀲𑁄𑀫𑀦𑀲𑁆𑀲𑀺𑀢𑀢𑀸𑀤𑀺𑀫𑀢𑁆𑀢𑀤𑀲𑁆𑀲𑀦𑀁, 𑀦 𑀧𑀦 𑀬𑁂𑀦 𑀬𑁂𑀦 𑀲𑁄𑀫𑀦𑀲𑁆𑀲𑀺𑀢𑁄 𑀯𑀸 𑀤𑁄𑀫𑀦𑀲𑁆𑀲𑀺𑀢𑁄 𑀯𑀸, 𑀢𑀁 𑀢𑀁 𑀤𑀲𑁆𑀲𑀦𑀁. 𑀤𑀼𑀢𑀺𑀬𑀦𑁆𑀢𑀺 ‘‘𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄’’𑀢𑀺 𑀇𑀤𑀁. 𑀇𑀢𑀺𑀧𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑀢𑁆𑀣𑁄 ‘‘𑀅𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑁩.𑁯𑁦) 𑀯𑀺𑀬, 𑀢𑁂𑀦𑀸𑀳 ‘‘𑀇𑀫𑀜𑁆𑀘 𑀇𑀫𑀜𑁆𑀘 𑀅𑀢𑁆𑀣𑀁 𑀘𑀺𑀦𑁆𑀢𑀬𑀫𑀸𑀦’’𑀦𑁆𑀢𑀺 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀢𑁆𑀣𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀧𑀭𑀲𑁆𑀲 𑀘𑀺𑀦𑁆𑀢𑀁 𑀫𑀦𑀢𑀺 𑀚𑀸𑀦𑀸𑀢𑀺 𑀏𑀢𑁂𑀦𑀸𑀢𑀺 𑀘𑀺𑀦𑁆𑀢𑀸𑀫𑀡𑀺. 𑀢𑀲𑁆𑀲𑀸 𑀓𑀺𑀭 𑀯𑀺𑀚𑁆𑀚𑀸𑀬 𑀲𑀸𑀥𑀓𑁄 𑀧𑀼𑀕𑁆𑀕𑀮𑁄 𑀢𑀸𑀤𑀺𑀲𑁂 𑀤𑁂𑀲𑀓𑀸𑀮𑁂 𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀬𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀤𑀺𑀝𑁆𑀞𑀲𑀼𑀢𑀸𑀤𑀺𑀯𑀺𑀲𑁂𑀲𑀲𑀜𑁆𑀚𑀸𑀦𑀦𑀫𑀼𑀔𑁂𑀦 𑀘𑀺𑀢𑁆𑀢𑀸𑀘𑀸𑀭𑀁 𑀅𑀦𑀼𑀫𑀺𑀦𑀦𑁆𑀢𑁄 𑀓𑀣𑁂𑀢𑀻𑀢𑀺 𑀓𑁂𑀘𑀺. 𑀅𑀧𑀭𑁂 ‘‘𑀯𑀸𑀘𑀁 𑀦𑀺𑀘𑁆𑀙𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀅𑀓𑁆𑀔𑀭𑀲𑀮𑁆𑀮𑀓𑁆𑀔𑀡𑀯𑀲𑁂𑀦𑀸’’𑀢𑀺 𑀯𑀤𑀦𑁆𑀢𑀺.

𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀯𑀡𑁆𑀡𑀦𑀸

𑁪𑁮𑁬. 𑀧𑀯𑀢𑁆𑀢𑁂𑀦𑁆𑀢𑀸𑀢𑀺 𑀧𑀯𑀢𑁆𑀢𑀦𑀓𑀸 𑀳𑀼𑀢𑁆𑀯𑀸, 𑀧𑀯𑀢𑁆𑀢𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀏𑀯’’𑀦𑁆𑀢𑀺 𑀳𑀺 𑀧𑀤𑀁 𑀬𑀣𑀸𑀦𑀼𑀲𑀺𑀝𑁆𑀞𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀯𑀺𑀥𑀺𑀯𑀲𑁂𑀦, 𑀧𑀝𑀺𑀲𑁂𑀥𑀯𑀲𑁂𑀦 𑀘 𑀧𑀯𑀢𑁆𑀢𑀺𑀆𑀓𑀸𑀭𑀧𑀭𑀸𑀫𑀲𑀦𑀁, 𑀲𑀸 𑀘 𑀲𑀫𑁆𑀫𑀸𑀯𑀺𑀢𑀓𑁆𑀓𑀸𑀦𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀜𑁆𑀘 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑀺 𑀢𑀢𑁆𑀣 𑀆𑀦𑀺𑀲𑀁𑀲𑀲𑁆𑀲 𑀆𑀤𑀻𑀦𑀯𑀲𑁆𑀲 𑀘 𑀯𑀺𑀪𑀸𑀯𑀦𑀢𑁆𑀣𑀁. 𑀅𑀦𑀺𑀘𑁆𑀘𑀲𑀜𑁆𑀜𑀫𑁂𑀯 𑀦 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀢𑁆𑀣𑀜𑁆𑀳𑀺 𑀏𑀯-𑀓𑀸𑀭𑀕𑁆𑀕𑀳𑀡𑀁. 𑀇𑀥𑀸𑀧𑀺 𑀏𑀯𑀁 𑀲𑀤𑁆𑀤𑀕𑁆𑀕𑀳𑀡𑀲𑁆𑀲 𑀅𑀢𑁆𑀣𑁄, 𑀧𑀬𑁄𑀚𑀦𑀜𑁆𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁𑀕𑀳𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁, 𑀢𑀤𑀜𑁆𑀜𑀭𑀸𑀕𑀲𑁆𑀲, 𑀤𑁄𑀲𑀸𑀤𑀻𑀦𑀜𑁆𑀘 𑀧𑀳𑀸𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸, 𑀢𑀧𑁆𑀧𑀳𑀸𑀦𑀲𑁆𑀲 𑀘 𑀢𑀤𑀜𑁆𑀜𑀭𑀸𑀕𑀸𑀤𑀺𑀔𑁂𑀧𑀦𑀲𑁆𑀲 𑀉𑀧𑀸𑀬𑀪𑀸𑀯𑀢𑁄 𑀢𑀣𑀸 𑀯𑀼𑀢𑁆𑀢𑀁 𑀤𑀼𑀝𑁆𑀞𑀮𑁄𑀳𑀺𑀢𑀯𑀺𑀫𑁄𑀘𑀦𑀲𑁆𑀲 𑀧𑀼𑀩𑁆𑀩𑀤𑀼𑀝𑁆𑀞𑀫𑀁𑀲𑀔𑁂𑀧𑀦𑀽𑀧𑀸𑀬𑀢𑀸 𑀯𑀺𑀬. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀲𑀸𑀯𑀚𑁆𑀚𑀥𑀫𑁆𑀫𑀦𑀺𑀯𑀢𑁆𑀢𑀦𑀧𑀭𑀁 𑀤𑀝𑁆𑀞𑀩𑁆𑀩𑀁 𑀢𑀲𑁆𑀲𑀸𑀥𑀺𑀕𑀫𑀽𑀧𑀸𑀬𑀸𑀦𑀺𑀲𑀁𑀲𑀪𑀽𑀢𑀸𑀦𑀁 𑀢𑀤𑀜𑁆𑀜𑁂𑀲𑀁 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑀢𑁄. 𑀇𑀤𑁆𑀥𑀺𑀯𑀺𑀥𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀤𑀲𑁆𑀲𑁂𑀢𑀺 𑀇𑀤𑁆𑀥𑀺𑀤𑀲𑁆𑀲𑀦𑁂𑀦 𑀧𑀭𑀲𑀦𑁆𑀢𑀸𑀦𑁂 𑀧𑀲𑀸𑀤𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀲𑁆𑀲 𑀳𑀭𑀡𑀢𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑀢𑀁 𑀥𑀫𑁆𑀫𑀤𑁂𑀲𑀦𑀸𑀢𑀺 𑀲𑀩𑁆𑀩𑀓𑀸𑀮𑀁 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀤𑁂𑀲𑀦𑀸.

𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦𑀸𑀢𑀺 𑀲𑀳𑀬𑁄𑀕𑁂 𑀓𑀭𑀡𑀯𑀘𑀦𑀁, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀆𑀘𑀺𑀡𑁆𑀡𑀦𑁆𑀢𑀺 𑀬𑁄𑀚𑀦𑀸. ‘‘𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀺. ‘‘𑀥𑀫𑁆𑀫𑀁 𑀤𑁂𑀲𑁂𑀲𑀻’’𑀢𑀺 𑀇𑀫𑀺𑀦𑀸 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 ‘‘𑀩𑀼𑀤𑁆𑀥𑀸𑀦𑀁 𑀲𑀢𑀢𑀁 𑀥𑀫𑁆𑀫𑀤𑁂𑀲𑀦𑀸’’𑀢𑀺 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀢𑀢𑁆𑀣 𑀲𑀸𑀢𑀺𑀲𑀬𑀢𑀸𑀬 𑀯𑀼𑀢𑁆𑀢𑀁. 𑀲𑀉𑀧𑀸𑀭𑀫𑁆𑀪𑀸𑀦𑀺 𑀧𑀢𑀺𑀭𑀽𑀧𑁂𑀦 𑀉𑀧𑀸𑀭𑀫𑁆𑀪𑀺𑀢𑀩𑁆𑀩𑀢𑁄. 𑀲𑀤𑁄𑀲𑀸𑀦𑀺 𑀤𑁄𑀲𑀲𑀫𑀼𑀘𑁆𑀙𑀺𑀦𑁆𑀤𑀦𑀲𑁆𑀲 𑀅𑀦𑀼𑀧𑀸𑀬𑀪𑀸𑀯𑀢𑁄. 𑀲𑀤𑁄𑀲𑀢𑁆𑀢𑀸 𑀏𑀯 𑀅𑀤𑁆𑀥𑀸𑀦𑀁 𑀦 𑀢𑀺𑀝𑁆𑀞𑀦𑁆𑀢𑀺 𑀘𑀺𑀭𑀓𑀸𑀮𑀝𑁆𑀞𑀸𑀬𑀻𑀦𑀺 𑀦 𑀳𑁄𑀦𑁆𑀢𑀺. 𑀅𑀤𑁆𑀥𑀸𑀦𑀁 𑀅𑀢𑀺𑀝𑁆𑀞𑀦𑀢𑁄 𑀦 𑀦𑀺𑀬𑁆𑀬𑀦𑁆𑀢𑀻𑀢𑀺 𑀨𑀮𑁂𑀦 𑀳𑁂𑀢𑀼𑀦𑁄 𑀅𑀦𑀼𑀫𑀸𑀦𑀁. 𑀅𑀦𑀺𑀬𑁆𑀬𑀸𑀦𑀺𑀓𑀢𑀸𑀬 𑀳𑀺 𑀢𑀸𑀦𑀺 𑀅𑀦𑀤𑁆𑀥𑀦𑀺𑀬𑀸𑀦𑀺. 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 𑀅𑀦𑀼𑀧𑀸𑀭𑀫𑁆𑀪𑀁 𑀯𑀺𑀲𑀼𑀤𑁆𑀥𑀺𑀧𑁆𑀧𑀪𑀯𑀢𑁄, 𑀯𑀺𑀲𑀼𑀤𑁆𑀥𑀺𑀦𑀺𑀲𑁆𑀲𑀬𑀢𑁄 𑀘. 𑀢𑀢𑁄 𑀏𑀯 𑀦𑀺𑀤𑁆𑀤𑁄𑀲𑀁. 𑀦 𑀳𑀺 𑀢𑀢𑁆𑀣 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀸𑀤𑀺𑀤𑁄𑀲𑀲𑀫𑁆𑀪𑀯𑁄. 𑀦𑀺𑀤𑁆𑀤𑁄𑀲𑀢𑁆𑀢𑀸 𑀏𑀯 𑀅𑀤𑁆𑀥𑀸𑀦𑀁 𑀢𑀺𑀝𑁆𑀞𑀢𑀺 𑀧𑀭𑀯𑀸𑀤𑀯𑀸𑀢𑁂𑀳𑀺, 𑀓𑀺𑀮𑁂𑀲𑀯𑀸𑀢𑁂𑀳𑀺 𑀘 𑀅𑀦𑀼𑀧𑀳𑀦𑁆𑀢𑀩𑁆𑀩𑀢𑁄. 𑀢𑀲𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄, 𑀢𑁂𑀦 𑀲𑀉𑀧𑀸𑀭𑀫𑁆𑀪𑀸𑀤𑀺𑀁, 𑀅𑀦𑀼𑀧𑀸𑀭𑀫𑁆𑀪𑀸𑀤𑀺𑀁 𑀘𑀸𑀢𑀺 𑀉𑀪𑀬𑀁 𑀉𑀪𑀬𑀢𑁆𑀣 𑀬𑀣𑀸𑀓𑁆𑀓𑀫𑀁 𑀕𑀸𑀭𑀬𑁆𑀳𑀧𑀸𑀲𑀁𑀲𑀪𑀸𑀯𑀸𑀦𑀁 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺.

𑀪𑀽𑀢𑀦𑀺𑀭𑁄𑀥𑁂𑀲𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁮𑁭. 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀬𑀲𑁆𑀫𑀸 𑀫𑀳𑀸𑀪𑀽𑀢𑀧𑀭𑀺𑀬𑁂𑀲𑀓𑁄 𑀪𑀺𑀓𑁆𑀔𑀼 𑀧𑀼𑀭𑀺𑀫𑁂𑀲𑀼 𑀤𑁆𑀯𑀻𑀲𑀼 𑀧𑀸𑀝𑀺𑀳𑀸𑀭𑀺𑀬𑁂𑀲𑀼 𑀯𑀲𑀺𑀧𑁆𑀧𑀢𑁆𑀢𑁄 𑀓𑀼𑀲𑀮𑁄𑀧𑀺 𑀲𑀫𑀸𑀦𑁄 𑀫𑀳𑀸𑀪𑀽𑀢𑀸𑀦𑀁 𑀅𑀧𑀭𑀺𑀲𑁂𑀲𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀦𑀸𑀯𑀩𑀼𑀚𑁆𑀛𑀺, 𑀢𑀲𑁆𑀫𑀸 𑀢𑀸𑀦𑀺 𑀦𑀺𑀬𑁆𑀬𑀸𑀦𑀸𑀯𑀳𑀢𑀸𑀪𑀸𑀯𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀸𑀦𑀻𑀢𑀺 𑀢𑁂𑀲𑀁 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀢𑀺𑀬𑀁 𑀧𑀦 𑀢𑀓𑁆𑀓𑀭𑀲𑁆𑀲 𑀏𑀓𑀦𑁆𑀢𑀢𑁄 𑀦𑀺𑀬𑁆𑀬𑀸𑀦𑀸𑀯𑀳𑀦𑁆𑀢𑀺 𑀢𑀲𑁆𑀲𑁂𑀯 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑀏𑀯𑀫𑁂𑀢𑀺𑀲𑁆𑀲𑀸 𑀤𑁂𑀲𑀦𑀸𑀬 𑀫𑀼𑀔𑁆𑀬𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀲𑀗𑁆𑀕𑀺𑀓𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀫𑀳𑀸𑀪𑀽𑀢𑁂 𑀧𑀭𑀺𑀬𑁂𑀲𑀦𑁆𑀢𑁄𑀢𑀺 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀦𑀯𑀲𑁂𑀦 𑀫𑀳𑀸𑀪𑀽𑀢𑁂 𑀕𑀯𑁂𑀲𑀦𑁆𑀢𑁄, 𑀢𑁂𑀲𑀁 𑀅𑀦𑀯𑀲𑁂𑀲𑀦𑀺𑀭𑁄𑀥𑀁 𑀯𑀻𑀫𑀁𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀘𑀭𑀺𑀢𑁆𑀯𑀸𑀢𑀺 𑀥𑀫𑁆𑀫𑀢𑀸𑀬 𑀘𑁄𑀤𑀺𑀬𑀫𑀸𑀦𑁄 𑀯𑀺𑀘𑀭𑀺𑀢𑁆𑀯𑀸. 𑀥𑀫𑁆𑀫𑀢𑀸𑀲𑀺𑀤𑁆𑀥𑀁 𑀓𑀺𑀭𑁂𑀢𑀁, 𑀬𑀤𑀺𑀤𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀣𑀸 𑀯𑀺𑀘𑀭𑀡𑀁, 𑀬𑀣𑀸 𑀅𑀪𑀺𑀚𑀸𑀢𑀺𑀬𑀁 𑀫𑀳𑀸𑀧𑀣𑀯𑀺𑀓𑀫𑁆𑀧𑀸𑀤𑀺. 𑀫𑀳𑀦𑁆𑀢𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀦𑁆𑀢𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑁆𑀲 𑀩𑀼𑀤𑁆𑀥𑀸𑀦𑀁 𑀫𑀳𑀦𑁆𑀢𑀪𑀸𑀯𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑀸𑀬 𑀤𑀻𑀧𑀦𑀢𑁆𑀣𑀁. 𑀇𑀤𑀜𑁆𑀘 𑀓𑀸𑀭𑀡𑀦𑁆𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀈𑀤𑀺𑀲𑁄 𑀏𑀓𑁄 𑀪𑀺𑀓𑁆𑀔𑀼 𑀢𑀤𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀦𑁄 𑀳𑁄𑀢𑀻𑀢𑀺 𑀇𑀤𑀫𑁆𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄.

𑀓𑀢𑁆𑀣𑀸𑀢𑀺 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫𑀁, 𑀢𑀲𑁆𑀫𑀸 𑀓𑀢𑁆𑀣𑀸𑀢𑀺 𑀓𑀺𑀲𑁆𑀫𑀺𑀁 𑀞𑀸𑀦𑁂 𑀓𑀸𑀭𑀡𑀪𑀽𑀢𑁂. 𑀓𑀺𑀁 𑀆𑀕𑀫𑁆𑀫𑀸𑀢𑀺 𑀓𑀺𑀁 𑀆𑀭𑀫𑁆𑀫𑀡𑀁 𑀧𑀘𑁆𑀘𑀬𑀪𑀽𑀢𑀁 𑀅𑀥𑀺𑀕𑀦𑁆𑀢𑁆𑀯𑀸, 𑀢𑁂𑀦𑀸𑀳 ‘‘𑀓𑀺𑀁 𑀧𑀢𑁆𑀢𑀲𑁆𑀲𑀸’’𑀢𑀺. 𑀢𑁂𑀢𑀺 𑀫𑀳𑀸𑀪𑀽𑀢𑀸. 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦𑀸𑀢𑀺 𑀅𑀦𑀼𑀧𑁆𑀧𑀚𑁆𑀚𑀦𑀯𑀲𑁂𑀦. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀺𑀲𑀫𑀼𑀝𑁆𑀞𑀸𑀦𑀓𑀮𑀸𑀧𑀘𑀼𑀡𑁆𑀡𑀦𑀸𑀦𑀢𑁆𑀢𑁂𑀓𑀢𑁆𑀢𑀯𑀺𑀦𑀺𑀩𑁆𑀪𑁄𑀕𑀸𑀯𑀺𑀦𑀺𑀩𑁆𑀪𑁄𑀕- 𑀲𑀪𑀸𑀕𑀯𑀺𑀲𑀪𑀸𑀕𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀲𑀗𑁆𑀕𑀳𑀧𑀘𑁆𑀘𑀬𑀲𑀫𑀦𑁆𑀦𑀸𑀳𑀸𑀭𑀧𑀘𑁆𑀘𑀬𑀯𑀺𑀪𑀸𑀕𑀸𑀓𑀸𑀭𑀢𑁄, 𑀲𑀲𑀫𑁆𑀪𑀸𑀭𑀲𑀗𑁆𑀔𑁂𑀧𑀲𑀲𑀫𑁆𑀪𑀸𑀭𑀯𑀺𑀪𑀢𑁆𑀢𑀺𑀲𑀮𑀓𑁆𑀔𑀡𑀲𑀗𑁆𑀔𑁂𑀧𑀲𑀮𑀓𑁆𑀔𑀡𑀯𑀺𑀪𑀢𑁆𑀢𑀺𑀆𑀓𑀸𑀭𑀢𑁄 𑀘𑀸𑀢𑀺 𑀲𑀩𑁆𑀩𑁂𑀦 𑀆𑀓𑀸𑀭𑁂𑀦.

𑁪𑁮𑁮. 𑀤𑀺𑀩𑁆𑀩𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀗𑁆𑀕𑀻𑀪𑀽𑀢𑀸 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀓𑀻𑀴𑀦𑁆𑀢𑀺, 𑀚𑁄𑀢𑀦𑁆𑀢𑀺 𑀘𑀸𑀢𑀺 𑀤𑁂𑀯𑁄, 𑀤𑁂𑀯𑀮𑁄𑀓𑁄. 𑀢𑀁 𑀬𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑁂𑀯𑀬𑀸𑀦𑀺𑀬𑁄. 𑀯𑀲𑀁 𑀯𑀢𑁆𑀢𑁂𑀦𑁆𑀢𑁄𑀢𑀺 𑀏𑀢𑁆𑀣 𑀯𑀲𑀯𑀢𑁆𑀢𑀦𑀁 𑀦𑀸𑀫 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀕𑀫𑀦𑀁. 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀏𑀢𑁂𑀲𑀁 𑀇𑀲𑁆𑀲𑀭𑀸𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀬𑀸 𑀤𑁂𑀯𑀢𑀸 𑀫𑀕𑁆𑀕𑀨𑀮𑀮𑀸𑀪𑀺𑀦𑁄 𑀢𑀸 𑀢𑀫𑀢𑁆𑀣𑀁 𑀏𑀓𑀤𑁂𑀲𑁂𑀦 𑀚𑀸𑀦𑁂𑀬𑁆𑀬𑀼𑀁 𑀩𑀼𑀤𑁆𑀥𑀯𑀺𑀲𑀬𑁄 𑀧𑀦𑀸𑀬𑀁 𑀧𑀜𑁆𑀳𑁄𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦 𑀚𑀸𑀦𑀸𑀫𑀸’’𑀢𑀺 𑀆𑀳𑀁𑀲𑀼, 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀯𑀺𑀲𑀬𑁂’’𑀢𑀺𑀆𑀤𑀺. 𑀅𑀚𑁆𑀛𑁄𑀢𑁆𑀣𑀭𑀡𑀁 𑀦𑀸𑀫𑁂𑀢𑁆𑀣 𑀦𑀺𑀧𑁆𑀧𑀻𑀴𑀦𑀦𑁆𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀢𑀻’’𑀢𑀺. 𑀅𑀪𑀺𑀓𑁆𑀓𑀦𑁆𑀢𑀢𑀭𑀸𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀧𑀜𑁆𑀜𑀸𑀧𑀝𑀺𑀪𑀸𑀦𑀸𑀤𑀺𑀕𑀼𑀡𑁂𑀳𑀺 𑀘 𑀅𑀫𑁆𑀳𑁂 𑀅𑀪𑀺𑀪𑀼𑀬𑁆𑀬 𑀧𑀭𑁂𑀲𑀁 𑀓𑀸𑀫𑀦𑀻𑀬𑀢𑀭𑀸. 𑀧𑀡𑀻𑀢𑀢𑀭𑀸𑀢𑀺 𑀉𑀴𑀸𑀭𑀢𑀭𑀸, 𑀢𑁂𑀦𑀸𑀳 ‘‘𑀉𑀢𑁆𑀢𑀫𑀢𑀭𑀸’’𑀢𑀺.

𑁪𑁯𑁧-𑁩. 𑀤𑁂𑀯𑀬𑀸𑀦𑀺𑀬𑀲𑀤𑀺𑀲𑁄 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. ‘‘𑀤𑁂𑀯𑀬𑀸𑀦𑀺𑀬𑀫𑀕𑁆𑀕𑁄𑀢𑀺 𑀯𑀸 …𑀧𑁂… 𑀲𑀩𑁆𑀩𑀫𑁂𑀢𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲𑁂𑀯 𑀦𑀸𑀫’’𑀦𑁆𑀢𑀺 𑀇𑀤𑀁 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀲𑀼 𑀘 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀭𑀼𑀴𑁆𑀳𑀺𑀯𑀲𑁂𑀦 𑀯𑀼𑀢𑁆𑀢𑀁.

𑁪𑁯𑁪. 𑀆𑀕𑀫𑀦𑀧𑀼𑀩𑁆𑀩𑀪𑀸𑀕𑁂 𑀦𑀺𑀫𑀺𑀢𑁆𑀢𑀦𑁆𑀢𑀺 𑀩𑁆𑀭𑀳𑁆𑀫𑀼𑀦𑁄 𑀆𑀕𑀫𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀉𑀧𑁆𑀧𑀚𑁆𑀚𑀦𑀦𑀺𑀫𑀺𑀢𑁆𑀢𑀁. 𑀧𑀸𑀢𑀼𑀭𑀳𑁄𑀲𑀻𑀢𑀺 𑀆𑀯𑀺 𑀪𑀯𑀺. 𑀧𑀸𑀓𑀝𑁄 𑀅𑀳𑁄𑀲𑀻𑀢𑀺 𑀧𑀓𑀸𑀲𑁄 𑀅𑀳𑁄𑀲𑀺.

𑁪𑁯𑁭. 𑀧𑀤𑁂𑀲𑁂𑀦𑀸𑀢𑀺 𑀏𑀓𑀤𑁂𑀲𑁂𑀦, 𑀉𑀧𑀸𑀤𑀺𑀦𑁆𑀦𑀓𑀯𑀲𑁂𑀦, 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀧𑀻𑀢𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀧𑀺. 𑀦𑀺𑀧𑁆𑀧𑀤𑁂𑀲𑀢𑁄 𑀅𑀦𑀯𑀲𑁂𑀲𑀢𑁄. 𑀧𑀼𑀘𑁆𑀙𑀸𑀫𑀽𑀴𑁆𑀳𑀲𑁆𑀲𑀸𑀢𑀺 𑀧𑀼𑀘𑁆𑀙𑀺𑀢𑀼𑀁 𑀅𑀚𑀸𑀦𑀦𑁆𑀢𑀲𑁆𑀲. 𑀧𑀼𑀘𑁆𑀙𑀸𑀬 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀢𑁂𑀦 𑀓𑀢𑀧𑀼𑀘𑁆𑀙𑀸𑀬 𑀧𑀼𑀘𑁆𑀙𑀺𑀢𑀸𑀓𑀸𑀭𑁂 𑀤𑁄𑀲𑀁 𑀯𑀺𑀪𑀸𑀯𑁂𑀢𑁆𑀯𑀸. 𑀬𑀲𑁆𑀫𑀸 𑀯𑀺𑀲𑁆𑀲𑀚𑁆𑀚𑀦𑀁 𑀦𑀸𑀫 𑀧𑀼𑀘𑁆𑀙𑀸𑀦𑀼𑀭𑀽𑀧𑀁 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑁄, 𑀦 𑀘 𑀢𑀣𑀸𑀕𑀢𑀸 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀢𑀧𑀼𑀘𑁆𑀙𑀸𑀦𑀼𑀭𑀽𑀧𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀅𑀢𑁆𑀣𑀲𑀪𑀸𑀕𑀢𑀸𑀬 𑀘 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀧𑀼𑀘𑁆𑀙𑀓𑀸 𑀢𑀤𑀢𑁆𑀣𑀁 𑀅𑀦𑀯𑀩𑀼𑀚𑁆𑀛𑀦𑁆𑀢𑀸 𑀲𑀫𑁆𑀫𑀼𑀬𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀧𑀼𑀘𑁆𑀙𑀸𑀬 𑀲𑀺𑀓𑁆𑀔𑀸𑀧𑀦𑀁 𑀩𑀼𑀤𑁆𑀥𑀸𑀘𑀺𑀡𑁆𑀡𑀁, 𑀢𑁂𑀦𑀸𑀳 ‘‘𑀧𑀼𑀘𑁆𑀙𑀁 𑀲𑀺𑀓𑁆𑀔𑀸𑀧𑁂𑀢𑁆𑀯𑀸’’𑀢𑀺𑀆𑀤𑀺.

𑁪𑁯𑁮. 𑀅𑀧𑁆𑀧𑀢𑀺𑀝𑁆𑀞𑀸𑀢𑀺 𑀅𑀧𑁆𑀧𑀘𑁆𑀘𑀬𑀸, 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀉𑀧𑀸𑀤𑀺𑀦𑁆𑀦𑀁 𑀬𑁂𑀯𑀸𑀢𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀫𑁂𑀯. 𑀬𑀲𑁆𑀫𑀸 𑀏𑀓𑀤𑀺𑀲𑀸𑀪𑀺𑀫𑀼𑀔𑀁 𑀲𑀦𑁆𑀢𑀸𑀦𑀯𑀲𑁂𑀦 𑀲𑀡𑁆𑀞𑀺𑀢𑁂 𑀭𑀽𑀧𑀧𑁆𑀧𑀩𑀦𑁆𑀥𑁂 𑀤𑀻𑀖𑀲𑀫𑀜𑁆𑀜𑀸 𑀢𑀁 𑀉𑀧𑀸𑀤𑀸𑀬 𑀢𑀢𑁄 𑀅𑀧𑁆𑀧𑀓𑁂 𑀭𑀲𑁆𑀲𑀲𑀫𑀜𑁆𑀜𑀸 𑀢𑀤𑀼𑀪𑀬𑀜𑁆𑀘 𑀯𑀺𑀲𑁂𑀲𑀢𑁄 𑀭𑀽𑀧𑀕𑁆𑀕𑀳𑀡𑀫𑀼𑀔𑁂𑀦 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀆𑀳 ‘‘𑀤𑀻𑀖𑀜𑁆𑀘 𑀭𑀲𑁆𑀲𑀜𑁆𑀘𑀸𑀢𑀺 𑀲𑀡𑁆𑀞𑀸𑀦𑀯𑀲𑁂𑀦 𑀉𑀧𑀸𑀤𑀸𑀭𑀽𑀧𑀁 𑀯𑀼𑀢𑁆𑀢’’𑀦𑁆𑀢𑀺. 𑀅𑀧𑁆𑀧𑀧𑀭𑀺𑀫𑀸𑀡𑁂 𑀭𑀽𑀧𑀲𑀗𑁆𑀖𑀸𑀢𑁂 𑀅𑀡𑀼𑀲𑀫𑀜𑁆𑀜𑀸, 𑀢𑀁 𑀉𑀧𑀸𑀤𑀸𑀬 𑀢𑀢𑁄 𑀫𑀳𑀢𑀺 𑀣𑀽𑀮𑀲𑀫𑀜𑁆𑀜𑀸. 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀯𑀺𑀲𑁂𑀲𑀢𑁄 𑀭𑀽𑀧𑀕𑁆𑀕𑀳𑀡𑀫𑀼𑀔𑁂𑀦 𑀕𑀬𑁆𑀳𑀢𑀺, 𑀢𑁂𑀦𑀸𑀳 ‘‘𑀇𑀫𑀺𑀦𑀸𑀧𑀻’’𑀢𑀺𑀆𑀤𑀺. 𑀧𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 ‘‘𑀲𑀡𑁆𑀞𑀸𑀦𑀯𑀲𑁂𑀦 𑀉𑀧𑀸𑀤𑀸𑀭𑀽𑀧𑀁 𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀯𑀡𑁆𑀡𑀫𑀢𑁆𑀢𑀫𑁂𑀯 𑀓𑀣𑀺𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀫𑀼𑀘𑁆𑀘𑀺𑀦𑀢𑀻𑀢𑀺 𑀯𑀤𑀦𑁆𑀢𑀺. 𑀲𑀼𑀪𑀦𑁆𑀢𑀺 𑀲𑀼𑀦𑁆𑀤𑀭𑀁, 𑀇𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀼𑀪𑀦𑁆𑀢𑀺 𑀅𑀲𑀼𑀦𑁆𑀤𑀭𑀁, 𑀅𑀦𑀺𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀧𑀦𑁂𑀯𑀁 𑀓𑀣𑀺𑀢’’𑀦𑁆𑀢𑀺. 𑀤𑀻𑀖𑀁 𑀭𑀲𑁆𑀲𑀁, 𑀅𑀡𑀼𑀁 𑀣𑀽𑀮𑀁, 𑀲𑀼𑀪𑀸𑀲𑀼𑀪𑀦𑁆𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀉𑀧𑀸𑀤𑀸𑀭𑀽𑀧𑀲𑁆𑀲𑁂𑀯 𑀕𑀳𑀡𑀁, 𑀪𑀽𑀢𑀭𑀽𑀧𑀸𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸. 𑀦𑀸𑀫𑀦𑁆𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀘𑀢𑀼𑀓𑁆𑀓𑀁 𑀢𑀜𑁆𑀳𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀢𑁄, 𑀦𑀸𑀫𑀓𑀭𑀡𑀢𑁄 𑀘 ‘‘𑀦𑀸𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀳𑁂𑀝𑁆𑀞𑀸 ‘‘𑀤𑀻𑀖𑀁 𑀭𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯 𑀇𑀥 𑀭𑀼𑀧𑁆𑀧𑀦𑀝𑁆𑀞𑁂𑀦 ‘‘𑀭𑀽𑀧’’𑀦𑁆𑀢𑀺 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀤𑀻𑀖𑀸𑀤𑀺𑀪𑁂𑀤𑀁 𑀭𑀽𑀧𑀜𑁆𑀘𑀸’’𑀢𑀺. 𑀤𑀻𑀖𑀸𑀤𑀻𑀢𑀺 𑀘 𑀆𑀤𑀺-𑀲𑀤𑁆𑀤𑁂𑀦 𑀆𑀧𑀸𑀤𑀻𑀦𑀜𑁆𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀯𑀸 𑀤𑀻𑀖𑀸𑀤𑀺𑀲𑀫𑀜𑁆𑀜𑀸 𑀦 𑀭𑀽𑀧𑀸𑀬𑀢𑀦𑀯𑀢𑁆𑀣𑀼𑀓𑀸𑀯, 𑀅𑀣 𑀔𑁄 𑀪𑀽𑀢𑀭𑀽𑀧𑀯𑀢𑁆𑀣𑀼𑀓𑀸𑀧𑀺. 𑀢𑀣𑀸 𑀳𑀺 𑀲𑀡𑁆𑀞𑀸𑀦𑀁 𑀨𑀼𑀲𑀦𑀫𑀼𑀔𑁂𑀦𑀧𑀺 𑀕𑀬𑁆𑀳𑀢𑀺, 𑀢𑀲𑁆𑀫𑀸 𑀤𑀻𑀖𑀭𑀲𑁆𑀲𑀸𑀤𑀺𑀕𑁆𑀕𑀳𑀡𑁂𑀦 𑀪𑀽𑀢𑀭𑀽𑀧𑀫𑁆𑀧𑀺 𑀕𑀬𑁆𑀳𑀢𑁂𑀯𑀸𑀢𑀺 ‘‘𑀤𑀻𑀖𑀸𑀤𑀺𑀪𑁂𑀤𑀁 𑀭𑀽𑀧’’𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀓𑀺𑀁 𑀆𑀕𑀫𑁆𑀫𑀸𑀢𑀺 𑀓𑀺𑀁 𑀅𑀥𑀺𑀕𑀦𑁆𑀢𑁆𑀯𑀸 𑀓𑀺𑀲𑁆𑀲 𑀅𑀥𑀺𑀕𑀫𑀳𑁂𑀢𑀼. ‘‘𑀉𑀧𑀭𑀼𑀚𑁆𑀛𑀢𑀻’’𑀢𑀺 𑀇𑀤𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀔𑀡𑀦𑀺𑀭𑁄𑀥𑀦𑁆𑀢𑀺 𑀆𑀳 ‘‘𑀅𑀲𑁂𑀲𑀫𑁂𑀢𑀁 𑀦𑀧𑁆𑀧𑀯𑀢𑁆𑀢𑀢𑀻’’𑀢𑀺.

𑁪𑁯𑁯. 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀯𑀺𑀲𑀺𑀝𑁆𑀞𑁂𑀦 𑀜𑀸𑀢𑀩𑁆𑀩𑀁, 𑀜𑀸𑀡𑀼𑀢𑁆𑀢𑀫𑁂𑀦 𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺. 𑀦𑀺𑀤𑀺𑀲𑁆𑀲𑀢𑀻𑀢𑀺 𑀦𑀺𑀤𑀲𑁆𑀲𑀦𑀁, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁. 𑀦 𑀦𑀺𑀤𑀲𑁆𑀲𑀦𑀁 𑀅𑀦𑀺𑀤𑀲𑁆𑀲𑀦𑀁, 𑀅𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀏𑀢𑀫𑀢𑁆𑀣𑀁 𑀯𑀤𑀦𑁆𑀢𑀺. 𑀦𑀺𑀤𑀲𑁆𑀲𑀦𑀁 𑀯𑀸 𑀉𑀧𑀫𑀸, 𑀢𑀁 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀦𑀺𑀤𑀲𑁆𑀲𑀦𑀁. 𑀦 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀦𑀺𑀘𑁆𑀘𑀲𑁆𑀲 𑀏𑀓𑀲𑁆𑀲 𑀅𑀘𑁆𑀘𑀦𑁆𑀢𑀲𑀦𑁆𑀢𑀧𑀡𑀻𑀢𑀲𑀪𑀸𑀯𑀲𑁆𑀲 𑀲𑀤𑀺𑀲𑀁 𑀦𑀺𑀤𑀲𑁆𑀲𑀦𑀁 𑀓𑀼𑀢𑁄𑀘𑀺 𑀮𑀩𑁆𑀪𑀢𑀻𑀢𑀺. 𑀬𑀁 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀢𑀺 𑀢𑀁 𑀲𑀗𑁆𑀔𑀢𑀁 𑀉𑀤𑀬𑀯𑀬𑀦𑁆𑀢𑁂𑀳𑀺 𑀲𑀅𑀦𑁆𑀢𑀁, 𑀅𑀲𑀗𑁆𑀔𑀢𑀲𑁆𑀲 𑀧𑀦 𑀦𑀺𑀩𑁆𑀩𑀸𑀦𑀲𑁆𑀲 𑀦𑀺𑀘𑁆𑀘𑀲𑁆𑀲 𑀢𑁂 𑀉𑀪𑁄𑀧𑀺 𑀅𑀦𑁆𑀢𑀸 𑀦 𑀲𑀦𑁆𑀢𑀺, 𑀢𑀢𑁄 𑀏𑀯 𑀦𑀯𑀪𑀸𑀯𑀸𑀧𑀕𑀫𑀲𑀗𑁆𑀔𑀸𑀢𑁄 𑀚𑀭𑀦𑁆𑀢𑁄𑀧𑀺 𑀢𑀲𑁆𑀲 𑀦𑀢𑁆𑀣𑀻𑀢𑀺 𑀆𑀳 ‘‘𑀉𑀧𑁆𑀧𑀸𑀤𑀦𑁆𑀢𑁄…𑀧𑁂… 𑀅𑀦𑀦𑁆𑀢’’𑀦𑁆𑀢𑀺. ‘‘𑀢𑀺𑀢𑁆𑀣𑀲𑁆𑀲 𑀦𑀸𑀫’’𑀦𑁆𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀧𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀧’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀧𑀧𑀦𑁆𑀢𑀺 𑀧𑀸𑀦𑀢𑀺𑀢𑁆𑀣𑀁. 𑀪-𑀓𑀸𑀭𑁄 𑀓𑀢𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀯𑀺𑀲𑀼𑀤𑁆𑀥𑀝𑁆𑀞𑁂𑀦 𑀯𑀸 𑀲𑀩𑁆𑀩𑀢𑁄𑀧𑀪𑀁, 𑀓𑁂𑀦𑀘𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬 𑀲𑀫𑀦𑁆𑀢𑀢𑁄 𑀧𑀪𑀲𑁆𑀲𑀭𑀦𑁆𑀢𑀺 𑀅𑀢𑁆𑀣𑁄. 𑀬𑁂𑀦 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀢𑀁, 𑀢𑀁 𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁𑀬𑁂𑀯 𑀇𑀥 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀸𑀤𑀺𑀦𑁆𑀦𑀓𑀥𑀫𑁆𑀫𑀚𑀸𑀢𑀁 𑀦𑀺𑀭𑀼𑀚𑁆𑀛𑀢𑀺 𑀅𑀧𑁆𑀧𑀯𑀢𑁆𑀢𑀁 𑀳𑁄𑀢𑀻’’𑀢𑀺.

𑀢𑀢𑁆𑀣𑀸𑀢𑀺 ‘‘𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦𑀸’’𑀢𑀺 𑀬𑀁 𑀧𑀤𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁. ‘‘𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀺𑀜𑁆𑀜𑀸𑀡𑀁 𑀉𑀤𑁆𑀥𑀭𑀢𑀺 𑀯𑀺𑀪𑀢𑁆𑀢𑀩𑁆𑀩𑀢𑁆𑀢𑀸 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻𑀢𑀺 𑀏𑀢𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂 𑀏𑀢𑀁 𑀦𑀸𑀫𑀭𑀽𑀧𑀁 𑀘𑀭𑀺𑀫𑀓𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀅𑀦𑀼𑀧𑁆𑀧𑀸𑀤𑀯𑀲𑁂𑀦 𑀦𑀺𑀭𑀼𑀚𑁆𑀛𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸, 𑀢𑁂𑀦𑀸𑀳 ‘‘𑀯𑀺𑀚𑁆𑀛𑀸𑀢𑀤𑀻𑀧𑀲𑀺𑀔𑀸 𑀯𑀺𑀬 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀬𑀸𑀢𑀻’’𑀢𑀺. ‘‘𑀘𑀭𑀺𑀫𑀓𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀳𑀺 𑀅𑀭𑀳𑀢𑁄 𑀘𑀼𑀢𑀺𑀘𑀺𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. ‘‘𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲𑀸𑀧𑀻’’𑀢𑀺𑀆𑀤𑀺𑀦𑀸𑀧𑀺 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀫𑀼𑀔𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀫𑁂𑀯 𑀯𑀤𑀢𑀺 𑀦𑀸𑀫𑀭𑀽𑀧𑀲𑁆𑀲 𑀅𑀦𑀯𑀲𑁂𑀲𑀢𑁄 𑀉𑀧𑀭𑀼𑀚𑁆𑀛𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀢𑁂𑀦𑀸𑀳 ‘‘𑀅𑀦𑀼𑀧𑁆𑀧𑀸𑀤𑀯𑀲𑁂𑀦 𑀉𑀧𑀭𑀼𑀚𑁆𑀛𑀢𑀻’’𑀢𑀺. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦𑀸𑀢𑀺 𑀓𑀢𑁆𑀢𑀭𑀺, 𑀓𑀭𑀡𑁂 𑀯𑀸 𑀓𑀭𑀡𑀯𑀘𑀦𑀁. 𑀦𑀺𑀭𑁄𑀥𑁂𑀦𑀸𑀢𑀺 𑀧𑀦 𑀳𑁂𑀢𑀼𑀫𑁆𑀳𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂. 𑀲𑁂𑀲𑀫𑁂𑀢𑁆𑀣 𑀬𑀁 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑁂𑀯𑀝𑁆𑀝𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.