𑁧𑁨. 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑀮𑁄𑀳𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀯𑀡𑁆𑀡𑀦𑀸

𑁫𑁦𑁧. 𑀲𑀸𑀮𑀯𑀢𑀺𑀓𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀢𑀲𑁆𑀲 𑀕𑀸𑀫𑀲𑁆𑀲 𑀦𑀸𑀫𑀁. 𑀕𑀸𑀫𑀡𑀺𑀓𑀸𑀪𑀸𑀯𑁂𑀦𑀸𑀢𑀺 𑀓𑁂𑀘𑀺. 𑀮𑁄𑀳𑀺𑀢𑁄 𑀦𑀸𑀫 𑀢𑀲𑁆𑀲 𑀓𑀼𑀮𑁂 𑀧𑀼𑀩𑁆𑀩𑀧𑀼𑀭𑀺𑀲𑁄, 𑀢𑀲𑁆𑀲 𑀯𑀲𑁂𑀦 𑀮𑁄𑀳𑀺𑀘𑁆𑀘𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁄𑀢𑁆𑀢𑀢𑁄 𑀆𑀕𑀢𑀁 𑀦𑀸𑀫𑀁.

𑁫𑁦𑁨. ‘‘𑀤𑀺𑀝𑁆𑀞𑀺𑀕𑀢’’𑀦𑁆𑀢𑀺 𑀮𑀤𑁆𑀥𑀺𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀦 𑀧𑀦 𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀦𑀁 𑀅𑀜𑁆𑀜𑀢𑀭’’𑀦𑁆𑀢𑀺. 𑀦 𑀳𑀺 𑀉𑀘𑁆𑀙𑁂𑀤𑀲𑀲𑁆𑀲𑀢𑀕𑀸𑀳𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀤𑀺𑀝𑁆𑀞𑀺𑀕𑀸𑀳𑁄 𑀅𑀢𑁆𑀣𑀺. ‘‘𑀪𑀸𑀲𑀢𑀺 𑀬𑁂𑀯𑀸’’𑀢𑀺 𑀢𑀲𑁆𑀲𑀸 𑀮𑀤𑁆𑀥𑀺𑀬𑀸 𑀮𑁄𑀓𑁂 𑀧𑀸𑀓𑀝𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀢𑁄 𑀅𑀜𑁆𑀜𑁄 𑀧𑀭𑁄𑀢𑀺 𑀬𑀣𑀸 𑀅𑀦𑀼𑀲𑀸𑀲𑀓𑀢𑁄 𑀅𑀦𑀼𑀲𑀸𑀲𑀺𑀢𑀩𑁆𑀩𑁄 𑀧𑀭𑁄, 𑀏𑀯𑀁 𑀅𑀦𑀼𑀲𑀸𑀲𑀺𑀢𑀩𑁆𑀩𑀢𑁄𑀧𑀺 𑀅𑀦𑀼𑀲𑀸𑀲𑀓𑁄 𑀧𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀭𑁄 𑀧𑀭𑀲𑁆𑀲𑀸𑀢𑀺 𑀧𑀭𑁄 𑀬𑁄’’𑀢𑀺𑀆𑀤𑀺. 𑀓𑀺𑀁-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀘𑁂𑀢𑁆𑀣 ‘‘𑀓𑀭𑀺𑀲𑁆𑀲𑀢𑀻’’𑀢𑀺 𑀅𑀦𑀸𑀕𑀢𑀓𑀸𑀮𑀯𑀘𑀦𑀁, 𑀅𑀦𑀸𑀕𑀢𑁂𑀧𑀺 𑀯𑀸 𑀢𑁂𑀦 𑀢𑀲𑁆𑀲 𑀓𑀸𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀓𑀼𑀲𑀮𑀁 𑀥𑀫𑁆𑀫𑀦𑁆𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀁 𑀦𑀺𑀓𑁆𑀓𑀺𑀮𑁂𑀲𑀥𑀫𑁆𑀫𑀁 𑀯𑀺𑀫𑁄𑀓𑁆𑀔𑀥𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀭𑁂𑀲𑀁 𑀥𑀫𑁆𑀫𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀢𑁂𑀳𑀺 𑀅𑀢𑁆𑀢𑀸𑀦𑀁 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀯𑀺𑀘𑀭𑀡𑀁 𑀓𑀺𑀁 𑀅𑀢𑁆𑀣𑀺𑀬𑀁 𑀆𑀲𑀬𑀩𑀼𑀤𑁆𑀥𑀲𑁆𑀲𑀸𑀧𑀺 𑀅𑀦𑀼𑀭𑁄𑀥𑁂𑀦 𑀯𑀺𑀦𑀸 𑀢𑀁 𑀦 𑀳𑁄𑀢𑀻𑀢𑀺 𑀢𑀲𑁆𑀫𑀸 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀁…𑀧𑁂… 𑀯𑀺𑀳𑀸𑀢𑀩𑁆𑀩𑀦𑁆𑀢𑀺 𑀯𑀤𑀢𑀺. 𑀢𑁂𑀦𑀸𑀳 ‘‘𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀧𑀸𑀧𑀓𑀁 𑀮𑁄𑀪𑀥𑀫𑁆𑀫𑀁 𑀯𑀤𑀸𑀫𑀻’’𑀢𑀺.

𑁫𑁦𑁪. 𑀲𑁄𑀢𑀺 𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄.

𑁫𑁦𑁮. 𑀓𑀣𑀸𑀨𑀸𑀲𑀼𑀓𑀢𑁆𑀣𑀦𑁆𑀢𑀺 𑀓𑀣𑀸𑀲𑀼𑀔𑀢𑁆𑀣𑀁, 𑀲𑀼𑀔𑁂𑀦 𑀓𑀣𑀁 𑀓𑀣𑁂𑀢𑀼𑀜𑁆𑀘𑁂𑀯 𑀲𑁄𑀢𑀼𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑁂𑀯 𑀦𑀸𑀫 𑀲𑀺𑀬𑀸𑀢𑀺 𑀏𑀢𑁆𑀣 𑀧𑀻𑀢𑀺𑀯𑀲𑁂𑀦 𑀆𑀫𑁂𑀟𑀺𑀢𑀁 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀢𑀁 ‘‘𑀩𑀼𑀤𑁆𑀥𑀕𑀚𑁆𑀚𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀯𑀺𑀲𑁂𑀲𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀬𑀁 𑀓𑀺𑀭𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄’’𑀢𑀺𑀆𑀤𑀺.

𑀮𑁄𑀳𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁫𑁦𑁯. 𑀲𑀫𑀼𑀤𑀬𑀲𑀜𑁆𑀚𑀸𑀢𑀻𑀢𑀺 𑀆𑀬𑀼𑀧𑁆𑀧𑀸𑀤𑁄. 𑀅𑀦𑀼𑀧𑀼𑀩𑁆𑀩𑁄 𑀓𑀫𑁆𑀧𑀻-𑀲𑀤𑁆𑀤𑁄 𑀆𑀓𑀗𑁆𑀔𑀦𑀢𑁆𑀣𑁄 𑀳𑁄𑀢𑀻𑀢𑀺 ‘‘𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀲𑀸𑀢𑀺𑀲𑀬𑁂𑀦 𑀯𑀸 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀓𑁄 𑀅𑀦𑀼𑀕𑁆𑀕𑀡𑁆𑀳𑀦𑀓𑁄 𑀳𑀺𑀢𑀸𑀦𑀼𑀓𑀫𑁆𑀧𑀻. 𑀲𑀫𑁆𑀧𑀚𑁆𑀚𑀢𑀻𑀢𑀺 𑀆𑀲𑁂𑀯𑀦𑀮𑀸𑀪𑁂𑀦 𑀦𑀺𑀧𑁆𑀧𑀚𑁆𑀚𑀢𑀺 𑀩𑀮𑀯𑀢𑀻 𑀳𑁄𑀢𑀺, 𑀅𑀯𑀕𑁆𑀕𑀳𑀸𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀦𑀺𑀬𑀢𑀸 𑀳𑁄𑀢𑀻’’𑀢𑀺. 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄.

𑁫𑁧𑁦-𑁧𑁧. 𑀤𑀼𑀢𑀺𑀬𑀁 𑀉𑀧𑀧𑀢𑁆𑀢𑀺𑀦𑁆𑀢𑀺 ‘‘𑀦𑀦𑀼 𑀭𑀸𑀚𑀸 𑀧𑀲𑁂𑀦𑀤𑀻 𑀓𑁄𑀲𑀮𑁄’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑀁 𑀉𑀧𑀧𑀢𑁆𑀢𑀺𑀁 𑀲𑀸𑀥𑀦𑀬𑀼𑀢𑁆𑀢𑀺𑀁. 𑀓𑀸𑀭𑀡𑀜𑁆𑀳𑀺 𑀪𑀕𑀯𑀸 𑀉𑀧𑀫𑀸𑀫𑀼𑀔𑁂𑀦 𑀤𑀲𑁆𑀲𑁂𑀢𑀺. 𑀬𑁂 𑀘𑀺𑀫𑁂𑀢𑀺 𑀬𑁂 𑀘 𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀤𑀺𑀩𑁆𑀩𑀸 𑀕𑀩𑁆𑀪𑀸 𑀧𑀭𑀺𑀧𑀸𑀘𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀲𑀓𑁆𑀓𑀼𑀡𑀦𑁆𑀢𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸, 𑀜𑀸𑀡𑀧𑀭𑀺𑀧𑀸𑀓𑀲𑁆𑀲 𑀯𑀸 𑀅𑀪𑀸𑀯𑁂𑀦. 𑀬𑁂 𑀧𑀦 ‘‘𑀧𑀭𑀺𑀧𑀘𑁆𑀘𑀦𑁆𑀢𑀻’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 ‘‘𑀤𑀺𑀩𑁆𑀩𑁂 𑀕𑀩𑁆𑀪𑁂’’𑀢𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀅𑀢𑁆𑀣𑁄 𑀘 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀳𑀺𑀢𑀸𑀦𑀼𑀓𑀫𑁆𑀧𑀺𑀢𑀸 𑀘 𑀢𑀁𑀲𑀫𑀗𑁆𑀕𑀺𑀲𑀢𑁆𑀢𑀯𑀲𑁂𑀦. 𑀤𑀺𑀯𑀺 𑀪𑀯𑀸𑀢𑀺 𑀤𑀺𑀩𑁆𑀩𑀸. 𑀕𑀩𑁆𑀪𑁂𑀦𑁆𑀢𑀺 𑀧𑀭𑀺𑀧𑀘𑁆𑀘𑀦𑀯𑀲𑁂𑀦 𑀲𑀦𑁆𑀢𑀸𑀦𑀁 𑀧𑀩𑀦𑁆𑀥𑁂𑀦𑁆𑀢𑀻𑀢𑀺 𑀕𑀩𑁆𑀪𑀸. ‘‘𑀙𑀦𑁆𑀦𑀁 𑀤𑁂𑀯𑀮𑁄𑀓𑀸𑀦’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀯𑀘𑀦𑀫𑁂𑀢𑀁. 𑀩𑁆𑀭𑀳𑁆𑀫𑀮𑁄𑀓𑀲𑁆𑀲𑀸𑀧𑀺 𑀳𑀺 𑀤𑀺𑀩𑁆𑀩𑀕𑀩𑁆𑀪𑀪𑀸𑀯𑁄 𑀮𑀩𑁆𑀪𑀢𑁂𑀯 𑀤𑀺𑀩𑁆𑀩𑀯𑀺𑀳𑀸𑀭𑀳𑁂𑀢𑀼𑀓𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀪𑀸𑀯𑀦𑀁 𑀪𑀸𑀯𑀬𑀫𑀸𑀦𑀸’’𑀢𑀺 𑀇𑀤𑀫𑁆𑀧𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀪𑀯𑀦𑁆𑀢𑀺 𑀏𑀢𑁆𑀣 𑀬𑀣𑀸𑀭𑀼𑀘𑀺 𑀲𑀼𑀔𑀲𑀫𑀧𑁆𑀧𑀺𑀢𑀸𑀢𑀺 𑀪𑀯𑀸, 𑀯𑀺𑀫𑀸𑀦𑀸𑀦𑀺. 𑀤𑁂𑀯𑀪𑀸𑀯𑀸𑀯𑀳𑀢𑁆𑀢𑀸 𑀤𑀺𑀩𑁆𑀩𑀸. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀩𑁆𑀪𑀸. 𑀤𑀸𑀦𑀸𑀤𑀬𑁄 𑀤𑁂𑀯𑀮𑁄𑀓𑀲𑀁𑀯𑀢𑁆𑀢𑀦𑀺𑀬𑀧𑀼𑀜𑁆𑀜𑀯𑀺𑀲𑁂𑀲𑀸.𑀤𑀺𑀩𑁆𑀩𑀸 𑀪𑀯𑀸𑀢𑀺 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀸 𑀉𑀧𑀧𑀢𑁆𑀢𑀺𑀪𑀯𑀸. 𑀢𑀤𑀸𑀯𑀳𑁄 𑀳𑀺 𑀓𑀫𑁆𑀫𑀪𑀯𑁄 𑀧𑀼𑀩𑁆𑀩𑁂 𑀕𑀳𑀺𑀢𑁄.

𑀢𑀬𑁄𑀘𑁄𑀤𑀦𑀸𑀭𑀳𑀯𑀡𑁆𑀡𑀦𑀸

𑁫𑁧𑁩. 𑀅𑀦𑀺𑀬𑀫𑀺𑀢𑁂𑀦𑁂𑀯𑀸𑀢𑀺 𑀅𑀦𑀺𑀬𑀫𑁂𑀦𑁂𑀯 ‘‘𑀢𑁆𑀯𑀁 𑀏𑀯𑀁𑀤𑀺𑀝𑁆𑀞𑀺𑀓𑁄 𑀏𑀯𑀁 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄’’𑀢𑀺 𑀏𑀯𑀁 𑀅𑀦𑀼𑀤𑁆𑀤𑁂𑀲𑀺𑀓𑁂𑀦𑁂𑀯. 𑀫𑀸𑀦𑀦𑁆𑀢𑀺 ‘‘𑀅𑀳𑀫𑁂𑀢𑀁 𑀚𑀸𑀦𑀸𑀫𑀺, 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀡𑁆𑀟𑀺𑀢𑀫𑀸𑀦𑀁. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀯𑀺𑀥𑀫𑁂𑀢𑁆𑀯𑀸, 𑀚𑀳𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀬𑁄 𑀲𑀢𑁆𑀣𑀸𑀭𑁂𑀢𑀺 𑀅𑀲𑀫𑁆𑀧𑀸𑀤𑀺𑀢𑀅𑀢𑁆𑀢𑀳𑀺𑀢𑁄 𑀅𑀦𑁄𑀯𑀸𑀤𑀓𑀭𑀲𑀸𑀯𑀓𑁄, 𑀅𑀲𑀫𑁆𑀧𑀸𑀤𑀺𑀢𑀅𑀢𑁆𑀢𑀳𑀺𑀢𑁄 𑀑𑀯𑀸𑀤𑀓𑀭𑀲𑀸𑀯𑀓𑁄, 𑀲𑀫𑁆𑀧𑀸𑀤𑀺𑀢𑀅𑀢𑁆𑀢𑀳𑀺𑀢𑁄 𑀅𑀦𑁄𑀯𑀸𑀤𑀓𑀭𑀲𑀸𑀯𑀓𑁄𑀢𑀺 𑀇𑀫𑁂 𑀢𑀬𑁄 𑀲𑀢𑁆𑀣𑀸𑀭𑁂. 𑀘𑀢𑀼𑀢𑁆𑀣𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦 𑀘𑁄𑀤𑀦𑀸𑀭𑀳𑁄 𑀳𑁄𑀢𑀻𑀢𑀺 ‘‘𑀢𑁂𑀦 𑀧𑀼𑀘𑁆𑀙𑀺𑀢𑁂 𑀏𑀯 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑁄𑀤𑀦𑀸𑀭𑀳𑁂 𑀢𑀬𑁄 𑀲𑀢𑁆𑀣𑀸𑀭𑁂 𑀧𑀞𑀫𑀁 𑀤𑀲𑁆𑀲𑁂𑀲𑀺, 𑀧𑀘𑁆𑀙𑀸 𑀘𑀢𑀼𑀢𑁆𑀣𑀁𑀲𑀢𑁆𑀣𑀸𑀭𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀘𑀢𑀼𑀢𑁆𑀣𑁄 𑀲𑀢𑁆𑀣𑀸 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑁄, 𑀢𑀣𑀸𑀧𑀺 𑀲𑁄 𑀬𑁂𑀲𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁 𑀯𑀲𑁂𑀦 ‘‘𑀥𑀫𑁆𑀫𑀫𑀬𑁄 𑀓𑀸𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀲𑀁 𑀲𑀫𑀼𑀤𑀸𑀬𑀪𑀽𑀢𑁄𑀧𑀺 𑀢𑁂 𑀕𑀼𑀡𑀸𑀯𑀬𑀯𑁂 𑀲𑀢𑁆𑀣𑀼𑀝𑁆𑀞𑀸𑀦𑀺𑀬𑁂 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀬𑀫𑁆𑀧𑀺 𑀔𑁄, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀸’’𑀢𑀺 𑀅𑀪𑀸𑀲𑀺.

𑀅𑀜𑁆𑀜𑀸𑀢𑀺 𑀬-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺 𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮, 𑁩𑁭, 𑁫𑁨; 𑀫. 𑀦𑀺. 𑁧.𑁨𑁮𑁪; 𑁨.𑁩𑁪𑁧; 𑀅. 𑀦𑀺. 𑁨.𑁫; 𑁧𑁦.𑁧𑁧; 𑀫𑀳𑀸𑀯. 𑁧𑁧; 𑀥. 𑀧. 𑁩𑁫𑁩; 𑀓𑀣𑀸. 𑁪𑁦𑁫) 𑀯𑀺𑀬. 𑀅𑀜𑁆𑀜𑀸𑀬𑀸𑀢𑀺 𑀘 𑀢𑀤𑀢𑁆𑀣𑀺𑀬𑁂 𑀲𑀫𑁆𑀧𑀤𑀸𑀦𑀯𑀘𑀦𑀦𑁆𑀢𑀺 𑀆𑀳 ‘‘𑀆𑀚𑀸𑀦𑀦𑀢𑁆𑀣𑀸𑀬𑀸’’𑀢𑀺. 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀏𑀓𑀤𑁂𑀲𑁂𑀦𑀲𑁆𑀲 𑀲𑀸𑀲𑀦𑀁 𑀓𑀭𑁄𑀦𑁆𑀢𑀻𑀢𑀺 𑀆𑀳 ‘‘𑀦𑀺𑀭𑀦𑁆𑀢𑀭𑀁 𑀢𑀲𑁆𑀲 𑀲𑀸𑀲𑀦𑀁 𑀅𑀓𑀢𑁆𑀯𑀸’’𑀢𑀺. 𑀉𑀓𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀦𑁆𑀢𑀻𑀢𑀺 𑀬𑀣𑀺𑀘𑁆𑀙𑀺𑀢𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀓𑁆𑀓𑀫𑀦𑁆𑀢𑀺𑀬𑀸𑀢𑀺 𑀅𑀦𑀪𑀺𑀭𑀢𑀺𑀬𑀸 𑀅𑀕𑀸𑀭𑀯𑁂𑀦 𑀅𑀧𑀕𑀘𑁆𑀙𑀦𑁆𑀢𑀺𑀬𑀸, 𑀢𑁂𑀦𑀸𑀳 ‘‘𑀅𑀦𑀺𑀘𑁆𑀙𑀦𑁆𑀢𑀺𑀬𑀸’’𑀢𑀺𑀆𑀤𑀺. 𑀏𑀓𑀸𑀬𑀸𑀢𑀺 𑀏𑀓𑀸𑀬 𑀇𑀢𑁆𑀣𑀺𑀬𑀸. 𑀏𑀓𑁄 𑀇𑀘𑁆𑀙𑁂𑀬𑁆𑀬𑀸𑀢𑀺 𑀏𑀓𑁄 𑀧𑀼𑀭𑀺𑀲𑁄 𑀢𑀸𑀬 𑀅𑀦𑀺𑀘𑁆𑀙𑀦𑁆𑀢𑀺𑀬𑀸 𑀲𑀫𑁆𑀧𑀬𑁄𑀕𑀁 𑀓𑀸𑀫𑁂𑀬𑁆𑀬. 𑀑𑀲𑀓𑁆𑀓𑀦𑀸𑀤𑀺𑀫𑀼𑀔𑁂𑀦 𑀇𑀢𑁆𑀣𑀺𑀧𑀼𑀭𑀺𑀲𑀲𑀫𑁆𑀩𑀦𑁆𑀥𑀦𑀺𑀤𑀲𑁆𑀲𑀦𑀁 𑀕𑁂𑀳𑀲𑀺𑀢𑀅𑀧𑁂𑀓𑁆𑀔𑀸𑀯𑀲𑁂𑀦 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀯𑀓𑁂𑀲𑀼 𑀧𑀝𑀺𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀢𑀺𑀯𑀺𑀬 𑀯𑀺𑀭𑀢𑁆𑀢𑀪𑀸𑀯𑀢𑁄 𑀤𑀝𑁆𑀞𑀼𑀫𑁆𑀧𑀺 𑀅𑀦𑀺𑀘𑁆𑀙𑀫𑀸𑀦𑀁. 𑀮𑁄𑀪𑁂𑀦𑀸𑀢𑀺 𑀧𑀭𑀺𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀮𑀸𑀪𑀲𑀓𑁆𑀓𑀸𑀭𑀮𑁄𑀪𑁂𑀦. 𑀢𑀢𑁆𑀣 𑀲𑀫𑁆𑀧𑀸𑀤𑁂𑀳𑀻𑀢𑀺 𑀢𑀲𑁆𑀫𑀺𑀁 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀁 𑀓𑀢𑁆𑀯𑀸 𑀲𑀫𑁆𑀧𑀸𑀤𑁂𑀳𑀺. 𑀉𑀚𑀼𑀁 𑀓𑀭𑁄𑀳𑀺 𑀓𑀸𑀬𑀯𑀗𑁆𑀓𑀸𑀤𑀺𑀯𑀺𑀕𑀫𑁂𑀦.

𑁫𑁧𑁫. 𑀏𑀯𑀁 𑀘𑁄𑀤𑀦𑀁 𑀅𑀭𑀳𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀲𑀸𑀯𑀓𑁂𑀲𑀼 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀪𑀸𑀯𑀸𑀧𑀸𑀤𑀦𑁂 𑀦𑀺𑀬𑁄𑀚𑀦𑀯𑀲𑁂𑀦 𑀘𑁄𑀤𑀦𑀁 𑀅𑀭𑀳𑀢𑀺, 𑀦 𑀧𑀞𑀫𑁄 𑀯𑀺𑀬 ‘‘𑀏𑀯𑀭𑀽𑀧𑁄 𑀢𑀯 𑀮𑁄𑀪𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸, 𑀦 𑀘 𑀤𑀼𑀢𑀺𑀬𑁄 𑀯𑀺𑀬 ‘‘𑀅𑀢𑁆𑀢𑀸𑀦𑀫𑁂𑀯 𑀢𑀸𑀯 𑀢𑀢𑁆𑀣 𑀲𑀫𑁆𑀧𑀸𑀤𑁂𑀳𑀻’’𑀢𑀺𑀆𑀤𑀺𑀦𑀸. 𑀓𑀲𑁆𑀫𑀸? 𑀲𑀫𑁆𑀧𑀸𑀤𑀺𑀢𑀅𑀢𑁆𑀢𑀳𑀺𑀢𑀢𑀸𑀬 𑀢𑀢𑀺𑀬𑀲𑁆𑀲.

𑀦𑀘𑁄𑀤𑀦𑀸𑀭𑀳𑀲𑀢𑁆𑀣𑀼𑀯𑀡𑁆𑀡𑀦𑀸

𑁫𑁧𑁬. ‘‘𑀦 𑀘𑁄𑀤𑀦𑀸𑀭𑀳𑁄’’𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀘𑁄𑀤𑀦𑀸𑀭𑀳𑀢𑀸 𑀦𑀸𑀫 𑀲𑀢𑁆𑀣𑀼𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀲𑀸𑀯𑀓𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀉𑀪𑀬𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀸, 𑀢𑀬𑀺𑀤𑀁 𑀲𑀩𑁆𑀩𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀢𑁆𑀣𑀭𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀘𑁄𑀤𑀦𑀸𑀭𑀳𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁫𑁧𑁭. 𑀫𑀬𑀸 𑀕𑀳𑀺𑀢𑀸𑀬 𑀤𑀺𑀝𑁆𑀞𑀺𑀬𑀸𑀢𑀺 𑀲𑀩𑁆𑀩𑀲𑁄 𑀅𑀦𑀯𑀚𑁆𑀚𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂 𑀧𑀭𑁂𑀲𑀁 𑀲𑀫𑁆𑀫𑀤𑁂𑀯 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑁂𑀲𑁆𑀲𑁂𑀦𑁆𑀢𑁂 𑀲𑀢𑁆𑀣𑀭𑀺 𑀅𑀪𑀽𑀢𑀤𑁄𑀲𑀸𑀭𑁄𑀧𑀦𑀯𑀲𑁂𑀦 𑀫𑀺𑀘𑁆𑀙𑀸𑀕𑀳𑀺𑀢𑀸𑀬 𑀦𑀺𑀭𑀬𑀕𑀸𑀫𑀺𑀦𑀺𑀬𑀸 𑀧𑀸𑀧𑀤𑀺𑀝𑁆𑀞𑀺𑀬𑀸. 𑀦𑀭𑀓𑀧𑀧𑀸𑀢𑀦𑁆𑀢𑀺 𑀦𑀭𑀓𑀲𑀗𑁆𑀔𑀸𑀢𑀁 𑀫𑀳𑀸𑀧𑀧𑀸𑀢𑀁. 𑀧𑀧𑀢𑀦𑁆𑀢𑀺 𑀢𑀢𑁆𑀣𑀸𑀢𑀺 𑀳𑀺 𑀧𑀧𑀸𑀢𑁄. 𑀲𑀕𑁆𑀕𑀫𑀕𑁆𑀕𑀣𑀮𑁂𑀢𑀺 𑀲𑀕𑁆𑀕𑀕𑀸𑀫𑀺𑀫𑀕𑁆𑀕𑀪𑀽𑀢𑁂 𑀧𑀼𑀜𑁆𑀜𑀥𑀫𑁆𑀫𑀣𑀮𑁂. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.