𑁧𑁩. 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁮. 𑀉𑀢𑁆𑀢𑀭𑁂𑀦𑀸𑀢𑀺 𑀏𑀢𑁆𑀣 𑀏𑀦-𑀲𑀤𑁆𑀤𑁄 𑀤𑀺𑀲𑀸𑀯𑀸𑀘𑀻𑀲𑀤𑁆𑀤𑀢𑁄 𑀧𑀜𑁆𑀘𑀫𑀻𑀅𑀦𑁆𑀢𑀢𑁄 𑀅𑀤𑀽𑀭𑀢𑁆𑀣𑁄 𑀇𑀘𑁆𑀙𑀺𑀢𑁄, 𑀢𑀲𑁆𑀫𑀸 𑀉𑀢𑁆𑀢𑀭𑁂𑀦-𑀲𑀤𑁆𑀤𑁂𑀦 𑀅𑀤𑀽𑀭𑀢𑁆𑀣𑀚𑁄𑀢𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀤𑀽𑀭𑁂 𑀉𑀢𑁆𑀢𑀭𑀧𑀲𑁆𑀲𑁂’’𑀢𑀺 𑀆𑀳. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 𑀏𑀦-𑀲𑀤𑁆𑀤𑀬𑁄𑀕𑁂 𑀅𑀯𑀥𑀺𑀯𑀸𑀘𑀺𑀦𑀺 𑀧𑀤𑁂 𑀉𑀧𑀬𑁄𑀕𑀯𑀘𑀦𑀁 𑀇𑀘𑁆𑀙𑀦𑁆𑀢𑀺. 𑀅𑀢𑁆𑀣𑁄 𑀧𑀦 𑀲𑀸𑀫𑀺𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑁄𑀢𑀺 𑀇𑀥 𑀲𑀸𑀫𑀺𑀯𑀘𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀁.

𑁫𑁧𑁯. 𑀓𑀼𑀮𑀘𑀸𑀭𑀺𑀢𑁆𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀦𑁆𑀢𑀚𑁆𑀛𑁂𑀦𑀸𑀪𑀺𑀭𑀽𑀧𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀦𑁆𑀢𑀲𑀚𑁆𑀛𑀸𑀬𑀓𑀭𑀡𑀢𑁆𑀣𑀦𑁆𑀢𑀺 𑀆𑀣𑀩𑁆𑀩𑀡𑀫𑀦𑁆𑀢𑀸𑀦𑀁 𑀲𑀚𑁆𑀛𑀸𑀬𑀓𑀭𑀡𑀢𑁆𑀣𑀁, 𑀢𑁂𑀦𑀸𑀳 ‘‘𑀅𑀜𑁆𑀜𑁂𑀲𑀁 𑀩𑀳𑀽𑀦𑀁 𑀧𑀯𑁂𑀲𑀦𑀁 𑀦𑀺𑀯𑀸𑀭𑁂𑀢𑁆𑀯𑀸’’𑀢𑀺.

𑀫𑀕𑁆𑀕𑀸𑀫𑀕𑁆𑀕𑀓𑀣𑀸𑀯𑀡𑁆𑀡𑀦𑀸

𑁫𑁨𑁦. ‘‘𑀚𑀗𑁆𑀖𑀘𑀸𑀭’’𑀦𑁆𑀢𑀺 𑀘𑀗𑁆𑀓𑀫𑀢𑁄 𑀇𑀢𑁄 𑀘𑀺𑀢𑁄 𑀘 𑀘𑀭𑀡𑀫𑀸𑀳. 𑀲𑁄 𑀳𑀺 𑀚𑀗𑁆𑀖𑀸𑀲𑀼 𑀓𑀺𑀮𑀫𑀣𑀯𑀺𑀦𑁄𑀤𑀦𑀢𑁆𑀣𑁄 𑀘𑀸𑀭𑁄𑀢𑀺 𑀢𑀣𑀸 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀦𑀼𑀘𑀗𑁆𑀓𑀫𑀦𑁆𑀢𑀸𑀦𑀁 𑀅𑀦𑀼𑀯𑀺𑀘𑀭𑀦𑁆𑀢𑀸𑀦’’𑀦𑁆𑀢𑀺. 𑀢𑁂𑀦𑀸𑀢𑀺 𑀉𑀪𑁄𑀲𑀼𑀧𑀺 𑀅𑀦𑀼𑀘𑀗𑁆𑀓𑀫𑀦𑀸𑀦𑀼𑀯𑀺𑀘𑀸𑀭𑀡𑀸𑀦𑀁 𑀮𑀩𑁆𑀪𑀦𑀢𑁄. 𑀲𑀳𑀸𑀬𑀸 𑀳𑀺 𑀢𑁂 𑀅𑀜𑁆𑀜𑀫𑀜𑁆𑀜 𑀲𑀪𑀸𑀕𑀯𑀼𑀢𑁆𑀢𑀺𑀓𑀸. ‘‘𑀫𑀕𑁆𑀕𑁄’’𑀢𑀺 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀉𑀚𑀼𑀓𑀁 𑀫𑀕𑁆𑀕𑀢𑀺 𑀉𑀧𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀫𑀕𑁆𑀕𑁄, 𑀉𑀚𑀼𑀫𑀕𑁆𑀕𑁄. 𑀢𑀤𑀜𑁆𑀜𑁄 𑀅𑀫𑀕𑁆𑀕𑁄, 𑀢𑀲𑁆𑀫𑀺𑀁 𑀫𑀕𑁆𑀕𑁂 𑀘 𑀅𑀫𑀕𑁆𑀕𑁂 𑀘. 𑀧𑀝𑀺𑀧𑀤𑀦𑁆𑀢𑀺 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁.

𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀻𑀬𑁄, 𑀲𑁄 𑀏𑀯 ‘‘𑀦𑀺𑀬𑁆𑀬𑀸𑀦𑀺𑀓𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀦𑀺𑀬𑁆𑀬𑀸𑀬𑀦𑁆𑀢𑁄’’𑀢𑀺. 𑀬𑀲𑁆𑀫𑀸 𑀦𑀺𑀬𑁆𑀬𑀸𑀢𑀧𑀼𑀕𑁆𑀕𑀮𑀯𑀲𑁂𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁄, 𑀢𑀲𑁆𑀫𑀸 ‘‘𑀦𑀺𑀬𑁆𑀬𑀸𑀬𑀦𑁆𑀢𑁄’’𑀢𑀺 𑀧𑀼𑀕𑁆𑀕𑀮𑀲𑁆𑀲 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀦𑀯𑀲𑁂𑀦 𑀦𑀺𑀬𑁆𑀬𑀸𑀬𑀦𑁆𑀢𑁄 𑀫𑀕𑁆𑀕𑁄 ‘‘𑀦𑀺𑀬𑁆𑀬𑀸𑀢𑀻’’𑀢𑀺 𑀯𑀼𑀢𑁆𑀢𑁄. 𑀓𑀭𑁄𑀢𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑁂𑀢𑀺. 𑀉𑀧𑁆𑀧𑀸𑀤𑁂𑀦𑁆𑀢𑁄𑀬𑁂𑀯 𑀳𑀺 𑀢𑀢𑁆𑀣 𑀧𑀝𑀺𑀧𑀚𑁆𑀚𑀢𑀺 𑀦𑀸𑀫. 𑀲𑀳 𑀩𑁆𑀬𑁂𑀢𑀺 𑀯𑀢𑁆𑀢𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀯𑀢𑁆𑀢𑀦𑀓𑁄. 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀢𑀸𑀢𑀺 𑀆𑀳 ‘‘𑀲𑀳𑀪𑀸𑀯𑀸𑀬𑀸’’𑀢𑀺𑀆𑀤𑀺. 𑀲𑀳𑀪𑀸𑀯𑁄𑀢𑀺 𑀘 𑀲𑀮𑁄𑀓𑀢𑀸, 𑀲𑀫𑀻𑀧𑀢𑀸 𑀯𑀸 𑀯𑁂𑀤𑀺𑀢𑀩𑁆𑀩𑀸, 𑀢𑁂𑀦𑀸𑀳 ‘‘𑀏𑀓𑀝𑁆𑀞𑀸𑀦𑁂 𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺. 𑀲𑀓𑀫𑁂𑀯 𑀆𑀘𑀭𑀺𑀬𑀯𑀸𑀤𑀦𑁆𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑁂𑀦 𑀧𑁄𑀓𑁆𑀔𑀭𑀲𑀸𑀢𑀺𑀦𑀸 𑀓𑀣𑀺𑀢𑀫𑁂𑀯 𑀆𑀘𑀭𑀺𑀬𑀯𑀸𑀤𑀁. 𑀣𑁄𑀫𑁂𑀢𑁆𑀯𑀸 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 ‘‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄 𑀅𑀬𑀫𑀜𑁆𑀚𑀲𑀸𑀬𑀦𑁄’’𑀢𑀺 𑀧𑀲𑀁𑀲𑀺𑀢𑁆𑀯𑀸 𑀉𑀓𑁆𑀓𑀁𑀲𑀺𑀢𑁆𑀯𑀸. 𑀪𑀸𑀭𑀤𑁆𑀯𑀸𑀚𑁄𑀧𑀺 𑀲𑀓𑀫𑁂𑀯𑀸𑀢𑀺 𑀪𑀸𑀭𑀤𑁆𑀯𑀸𑀚𑁄𑀧𑀺 𑀫𑀸𑀡𑀯𑁄 𑀅𑀢𑁆𑀢𑀦𑁄 𑀆𑀘𑀭𑀺𑀬𑁂𑀦 𑀢𑀸𑀭𑀼𑀓𑁆𑀔𑁂𑀦 𑀓𑀣𑀺𑀢𑀫𑁂𑀯 𑀆𑀘𑀭𑀺𑀬𑀯𑀸𑀤𑀁 𑀣𑁄𑀫𑁂𑀢𑁆𑀯𑀸 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀘𑀭𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀢𑁂𑀦 𑀬𑀣𑀸 𑀢𑀣𑀸 𑀯𑀸 𑀅𑀪𑀺𑀦𑀺𑀯𑀺𑀝𑁆𑀞𑀪𑀸𑀯𑁂𑀦 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁.

𑁫𑁨𑁧-𑁨. 𑀅𑀦𑀺𑀬𑁆𑀬𑀸𑀦𑀺𑀓𑀸 𑀯𑀸𑀢𑀺 𑀅𑀧𑁆𑀧𑀸𑀝𑀺𑀳𑀸𑀭𑀺𑀬𑀸𑀯 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀅𑀯𑀺𑀧𑀭𑀻𑀢𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀉𑀢𑁆𑀢𑀭𑀭𑀳𑀺𑀢𑀸 𑀏𑀯. 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀸𑀤𑀲𑁆𑀲 𑀆𑀤𑀺𑀢𑁄 𑀯𑀺𑀭𑀼𑀤𑁆𑀥𑀕𑁆𑀕𑀳𑀡𑀁 𑀯𑀺𑀕𑁆𑀕𑀳𑁄, 𑀲𑁆𑀯𑁂𑀯 𑀯𑀺𑀯𑀤𑀦𑀯𑀲𑁂𑀦 𑀅𑀧𑀭𑀸𑀧𑀭𑀁 𑀉𑀧𑁆𑀧𑀦𑁆𑀦𑁄 𑀯𑀺𑀯𑀸𑀤𑁄𑀢𑀺 𑀆𑀳 ‘‘𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀯𑀺𑀕𑁆𑀕𑀳𑁄 𑀅𑀧𑀭𑀪𑀸𑀕𑁂 𑀯𑀺𑀯𑀸𑀤𑁄’’𑀢𑀺. 𑀤𑀼𑀯𑀺𑀥𑁄𑀧𑀺 𑀏𑀲𑁄 𑀯𑀺𑀕𑁆𑀕𑀳𑁄, 𑀯𑀺𑀯𑀸𑀤𑁄𑀢𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄𑀧𑀺 𑀯𑀺𑀭𑁄𑀥𑁄. 𑀦𑀸𑀦𑀸𑀆𑀘𑀭𑀺𑀬𑀸𑀦𑀁 𑀯𑀸𑀤𑀢𑁄𑀢𑀺 𑀦𑀸𑀦𑀸𑀭𑀼𑀘𑀺𑀓𑀸𑀦𑀁 𑀆𑀘𑀭𑀺𑀬𑀸𑀦𑀁 𑀯𑀸𑀤𑀪𑀸𑀯𑀢𑁄. 𑀦𑀸𑀦𑀸𑀯𑀸𑀤𑁄 𑀦𑀸𑀦𑀸𑀯𑀺𑀥𑁄 𑀯𑀸𑀤𑁄𑀢𑀺 𑀓𑀢𑁆𑀯𑀸.

𑁫𑁨𑁩. 𑀏𑀓𑀲𑁆𑀲𑀸𑀧𑀻𑀢𑀺 𑀢𑀼𑀫𑁆𑀳𑁂𑀲𑀼 𑀤𑁆𑀯𑀻𑀲𑀼 𑀏𑀓𑀲𑁆𑀲𑀸𑀧𑀺. 𑀏𑀓𑀲𑁆𑀫𑀺𑀦𑁆𑀢𑀺 𑀲𑀓𑀯𑀸𑀤𑀧𑀭𑀯𑀸𑀤𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺. 𑀲𑀁𑀲𑀬𑁄 𑀦𑀢𑁆𑀣𑀻𑀢𑀺 ‘‘𑀫𑀕𑁆𑀕𑁄 𑀦𑀼 𑀔𑁄, 𑀦 𑀫𑀕𑁆𑀕𑁄 𑀦𑀼 𑀔𑁄’’𑀢𑀺 𑀲𑀁𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸 𑀦𑀢𑁆𑀣𑀺. 𑀅𑀜𑁆𑀚𑀲𑀸𑀬𑀦𑀪𑀸𑀯𑁂 𑀧𑀦 𑀲𑀁𑀲𑀬𑁄. 𑀢𑁂𑀦𑀸𑀳 ‘‘𑀏𑀲 𑀓𑀺𑀭𑀸’’𑀢𑀺𑀆𑀤𑀺. 𑀪𑀕𑀯𑀸 𑀧𑀦 𑀬𑀤𑀺 𑀲𑀩𑁆𑀩𑀢𑁆𑀣 𑀫𑀕𑁆𑀕𑀲𑀜𑁆𑀜𑀺𑀦𑁄, 𑀏𑀯𑀁 𑀲𑀢𑀺 ‘‘𑀓𑀺𑀲𑁆𑀫𑀺𑀁 𑀯𑁄 𑀯𑀺𑀕𑁆𑀕𑀳𑁄’’𑀢𑀺 𑀧𑀼𑀘𑁆𑀙𑀢𑀺.

𑁫𑁨𑁪. ‘‘𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀉𑀚𑀼𑀓𑀁 𑀫𑀕𑁆𑀕𑀢𑀺 𑀉𑀧𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀫𑀕𑁆𑀕𑁄, 𑀉𑀚𑀼𑀫𑀕𑁆𑀕𑁄. 𑀢𑀤𑀜𑁆𑀜𑁄 𑀅𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄 𑀯𑀸𑀬𑀫𑀢𑁆𑀣𑁄. 𑀲𑀩𑁆𑀩𑁂 𑀢𑁂𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀦𑀸𑀦𑀸𑀆𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀫𑀕𑁆𑀕𑀸.

𑀬𑁂 𑀧𑀸𑀴𑀺𑀬𑀁 ‘‘𑀅𑀤𑁆𑀥𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸. 𑀅𑀤𑁆𑀥𑀭𑁄 𑀦𑀸𑀫 𑀬𑀜𑁆𑀜𑀯𑀺𑀲𑁂𑀲𑁄, 𑀢𑀤𑀼𑀧𑀬𑁄𑀕𑀺𑀪𑀸𑀯𑀢𑁄 ‘‘𑀅𑀤𑁆𑀥𑀭𑀺𑀬𑀸’’ 𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺 𑀬𑀚𑀽𑀦𑀺, 𑀢𑀸𑀦𑀺 𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀅𑀤𑁆𑀥𑀭𑀺𑀬𑀸, 𑀬𑀚𑀼𑀩𑁆𑀩𑁂𑀤𑀺𑀦𑁄. 𑀬𑁂 𑀘 𑀢𑀺𑀢𑁆𑀢𑀺𑀭𑀺𑀇𑀲𑀺𑀦𑀸 𑀓𑀢𑁂 𑀫𑀦𑁆𑀢𑁂 𑀲𑀚𑁆𑀛𑀸𑀬𑀦𑁆𑀢𑀺, 𑀢𑁂 𑀢𑀺𑀢𑁆𑀢𑀺𑀭𑀺𑀬𑀸, 𑀬𑀚𑀼𑀩𑁆𑀩𑁂𑀤𑀺𑀦𑁄 𑀏𑀯. 𑀬𑀚𑀼𑀩𑁆𑀩𑁂𑀤𑀲𑀸𑀔𑀸 𑀳𑁂𑀲𑀸, 𑀬𑀤𑀺𑀤𑀁 𑀢𑀺𑀢𑁆𑀢𑀺𑀭𑀁. 𑀙𑀦𑁆𑀤𑁄 𑀯𑀼𑀘𑁆𑀘𑀢𑀺 𑀯𑀺𑀲𑁂𑀲𑀢𑁄 𑀲𑀸𑀫𑀯𑁂𑀤𑁄, 𑀢𑀁 𑀲𑀭𑁂𑀦 𑀓𑀸𑀬𑀦𑁆𑀢𑀻𑀢𑀺 𑀙𑀦𑁆𑀤𑁄𑀓𑀸, 𑀲𑀸𑀫𑀯𑁂𑀤𑀺𑀦𑁄. ‘‘𑀙𑀦𑁆𑀤𑁄𑀕𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀲𑁄 𑀏𑀯𑀢𑁆𑀣𑁄. 𑀩𑀳𑀯𑁄 𑀇𑀭𑀬𑁄 𑀏𑀢𑁆𑀣𑀸𑀢𑀺 𑀩𑀯𑁆𑀳𑀸𑀭𑀺, 𑀇𑀭𑀼𑀩𑁆𑀩𑁂𑀤𑁄. 𑀢𑀁 𑀅𑀥𑀻𑀬𑀦𑁆𑀢𑀻𑀢𑀺 𑀩𑀯𑁆𑀳𑀸𑀭𑀺𑀚𑁆𑀛𑀸.

‘‘𑀩𑀳𑀽𑀦𑀻’’𑀢𑀺 𑀏𑀢𑁆𑀣𑀸𑀬𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀸 𑁋 𑀬𑀣𑀸 𑀢𑁂 𑀦𑀸𑀦𑀸𑀫𑀕𑁆𑀕𑀸 𑀏𑀓𑀁𑀲𑀢𑁄 𑀢𑀲𑁆𑀲 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀧𑀯𑁂𑀲𑀸𑀬 𑀳𑁄𑀦𑁆𑀢𑀺, 𑀏𑀯𑀁 𑀩𑁆𑀭𑀸𑀳𑁆𑀫𑀡𑁂𑀳𑀺 𑀧𑀜𑁆𑀜𑀸𑀧𑀺𑀬𑀫𑀸𑀦𑀸𑀧𑀺 𑀦𑀸𑀦𑀸𑀫𑀕𑁆𑀕𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀫𑀦𑀸𑀬 𑀩𑁆𑀭𑀳𑁆𑀫𑀼𑀦𑀸 𑀲𑀳𑀩𑁆𑀬𑀢𑀸𑀬 𑀏𑀓𑀁𑀲𑁂𑀦𑁂𑀯 𑀳𑁄𑀦𑁆𑀢𑀻𑀢𑀺.

𑁫𑁨𑁭-𑁫𑁨𑁯. 𑀯-𑀓𑀸𑀭𑁄 𑀆𑀕𑀫𑀲𑀦𑁆𑀥𑀺𑀫𑀢𑁆𑀢𑀦𑁆𑀢𑀺 𑀅𑀦𑀢𑁆𑀣𑀓𑁄 𑀯-𑀓𑀸𑀭𑁄, 𑀢𑁂𑀦 𑀯𑀡𑁆𑀡𑀸𑀕𑀫𑁂𑀦 𑀧𑀤𑀦𑁆𑀢𑀭𑀲𑀦𑁆𑀥𑀺𑀫𑀢𑁆𑀢𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁆𑀥𑀧𑀯𑁂𑀡𑀻𑀢𑀺 𑀅𑀦𑁆𑀥𑀧𑀦𑁆𑀢𑀺. ‘‘𑀧𑀜𑁆𑀜𑀸𑀲𑀲𑀝𑁆𑀞𑀺 𑀅𑀦𑁆𑀥𑀸’’𑀢𑀺 𑀇𑀤𑀁 𑀢𑀲𑁆𑀲𑀸 𑀅𑀦𑁆𑀥𑀧𑀯𑁂𑀡𑀺𑀬𑀸 𑀫𑀳𑀢𑁄 𑀕𑀘𑁆𑀙𑀕𑀼𑀫𑁆𑀩𑀲𑁆𑀲 𑀅𑀦𑀼𑀧𑀭𑀺𑀕𑀫𑀦𑀬𑁄𑀕𑁆𑀬𑀢𑀸𑀤𑀲𑁆𑀲𑀦𑀁. 𑀏𑀯𑀜𑁆𑀳𑀺 𑀢𑁂 ‘‘𑀲𑀼𑀘𑀺𑀭𑀁 𑀯𑁂𑀮𑀁 𑀫𑀕𑁆𑀕𑀁 𑀕𑀘𑁆𑀙𑀸𑀫𑀸’’𑀢𑀺 𑀏𑀯𑀁 𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺. 𑀦𑀸𑀫𑀓𑀁𑀬𑁂𑀯𑀸𑀢𑀺 𑀅𑀢𑁆𑀣𑀸𑀪𑀸𑀯𑀢𑁄 𑀦𑀸𑀫𑀫𑀢𑁆𑀢𑀁𑀬𑁂𑀯, 𑀢𑀁 𑀧𑀦 𑀪𑀸𑀲𑀺𑀢𑀁 𑀢𑁂𑀳𑀺 𑀲𑀸𑀭𑀲𑀜𑁆𑀜𑀺𑀢𑀫𑁆𑀧𑀺 𑀦𑀸𑀫𑀫𑀢𑁆𑀢𑀢𑀸𑀬 𑀅𑀲𑀸𑀭𑀪𑀸𑀯𑀢𑁄 𑀦𑀺𑀳𑀻𑀦𑀫𑁂𑀯𑀸𑀢𑀺 𑀆𑀳 ‘‘𑀮𑀸𑀫𑀓𑀁𑀬𑁂𑀯𑀸’’𑀢𑀺.

𑁫𑁩𑁦. 𑀬𑀢𑁄𑀢𑀺 𑀪𑀼𑀫𑁆𑀫𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀲𑀸𑀫𑀜𑁆𑀜𑀚𑁄𑀢𑀦𑀸 𑀘 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀓𑀸𑀮𑁂’’𑀢𑀺. 𑀆𑀬𑀸𑀘𑀦𑁆𑀢𑀻𑀢𑀺 𑀧𑀢𑁆𑀣𑁂𑀦𑁆𑀢𑀺. 𑀉𑀕𑁆𑀕𑀫𑀦𑀁 𑀮𑁄𑀓𑀲𑁆𑀲 𑀩𑀳𑀼𑀓𑀸𑀭𑀪𑀸𑀯𑀢𑁄 𑀢𑀣𑀸 𑀣𑁄𑀫𑀦𑀸𑀢𑀺. 𑀅𑀬𑀁 𑀓𑀺𑀭 𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺 ‘‘𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀬𑀸𑀘𑀦𑀸𑀬 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀕𑀦𑁆𑀢𑁆𑀯𑀸 𑀮𑁄𑀓𑁂 𑀑𑀪𑀸𑀲𑀁 𑀓𑀭𑁄𑀦𑁆𑀢𑀻’’𑀢𑀺.

𑁫𑁩𑁨. 𑀇𑀥 𑀧𑀦 𑀓𑀺𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀅𑀧𑁆𑀧𑀘𑁆𑀘𑀓𑁆𑀔𑀪𑀽𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀤𑁂𑀲𑀦𑁂 𑀢𑁂𑀯𑀺𑀚𑁆𑀚𑀸𑀦𑀁 𑀓𑀺𑀁 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀬𑁂 𑀧𑀘𑁆𑀘𑀓𑁆𑀔𑀪𑀽𑀢𑀸𑀦𑀫𑁆𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀢𑁆𑀣𑀸’’𑀢𑀺 ‘‘𑀇𑀥 𑀧𑀦𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀘𑁆𑀘𑀸𑀫𑀲𑀢𑀺.

𑀅𑀘𑀺𑀭𑀯𑀢𑀻𑀦𑀤𑀻𑀉𑀧𑀫𑀸𑀓𑀣𑀸𑀯𑀡𑁆𑀡𑀦𑀸

𑁫𑁪𑁨. 𑀲𑀫𑀪𑀭𑀺𑀢𑀸𑀢𑀺 𑀲𑀫𑁆𑀧𑀼𑀡𑁆𑀡𑀸. 𑀢𑀢𑁄 𑀏𑀯 𑀓𑀸𑀓𑀧𑁂𑀬𑁆𑀬𑀸. 𑀧𑀸𑀭𑀸𑀢𑀺 𑀧𑀭𑀢𑀻𑀭𑀁. 𑀅𑀧𑀸𑀭𑀦𑁆𑀢𑀺 𑀑𑀭𑀺𑀫𑀢𑀻𑀭𑀁. 𑀏𑀳𑀻𑀢𑀺 𑀆𑀕𑀘𑁆𑀙.

𑁫𑁪𑁪. 𑀧𑀜𑁆𑀘𑀲𑀻𑀮…𑀧𑁂… 𑀯𑁂𑀤𑀺𑀢𑀩𑁆𑀩𑀸 𑀬𑀫𑀦𑀺𑀬𑀫𑀸𑀤𑀺𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀸𑀦𑀁 𑀢𑀤𑀦𑁆𑀢𑁄𑀕𑀥𑀪𑀸𑀯𑀢𑁄. 𑀢𑀩𑁆𑀩𑀺𑀧𑀭𑀻𑀢𑀸𑀢𑀺 𑀧𑀜𑁆𑀘𑀲𑀻𑀮𑀸𑀤𑀺𑀯𑀺𑀧𑀭𑀻𑀢𑀸 𑀧𑀜𑁆𑀘 𑀯𑁂𑀭𑀸𑀤𑀬𑁄. ‘‘𑀧𑀼𑀦𑀧𑀻’’𑀢𑀺 𑀯𑀢𑁆𑀯𑀸 ‘‘𑀅𑀧𑀭𑀫𑁆𑀧𑀻’’𑀢𑀺 𑀯𑀘𑀦𑀁 𑀇𑀢𑀭𑀸𑀬𑀧𑀺 𑀦𑀤𑀺 𑀉𑀧𑀫𑀸𑀬 𑀲𑀗𑁆𑀕𑀡𑁆𑀳𑀦𑀢𑁆𑀣𑀁.

𑁫𑁪𑁬. 𑀓𑀸𑀫𑀬𑀺𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀓𑀸𑀫𑀦𑀻𑀬𑀪𑀸𑀯𑁂𑀦. 𑀩𑀦𑁆𑀥𑀦𑀝𑁆𑀞𑁂𑀦𑀸𑀢𑀺 𑀢𑁂𑀦𑁂𑀯 𑀓𑀸𑀫𑁂𑀢𑀩𑁆𑀩𑀪𑀸𑀯𑁂𑀦 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀆𑀩𑀦𑁆𑀥𑀦𑀪𑀸𑀯𑁂𑀦. 𑀓𑀸𑀫𑀜𑁆𑀘𑀸𑀬𑀁 𑀕𑀼𑀡-𑀲𑀤𑁆𑀤𑁄 𑀅𑀢𑁆𑀣𑀦𑁆𑀢𑀭𑁂𑀲𑀼𑀧𑀺 𑀤𑀺𑀝𑁆𑀞𑀧𑁆𑀧𑀬𑁄𑀕𑁄, 𑀢𑁂𑀲𑀁 𑀧𑀦𑁂𑀢𑁆𑀣 𑀅𑀲𑀫𑁆𑀪𑀯𑀢𑁄 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀩𑀦𑁆𑀥𑀦𑀝𑁆𑀞𑁂𑀬𑁂𑀯 𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀚𑀸𑀦𑀸𑀫𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀼𑀤𑁆𑀥𑀸𑀭𑁄 𑀆𑀭𑀤𑁆𑀥𑁄, 𑀏𑀲𑁂𑀯𑀸𑀢𑀺 𑀩𑀦𑁆𑀥𑀦𑀝𑁆𑀞𑁄 𑀏𑀯. 𑀦 𑀳𑀺 𑀭𑀽𑀧𑀸𑀤𑀻𑀦𑀁 𑀓𑀸𑀫𑁂𑀢𑀩𑁆𑀩𑀪𑀸𑀯𑁂 𑀯𑀼𑀘𑁆𑀘𑀫𑀸𑀦𑁂 𑀧𑀝𑀮𑀝𑁆𑀞𑁄 𑀬𑀼𑀚𑁆𑀚𑀢𑀺 𑀢𑀣𑀸 𑀓𑀸𑀫𑁂𑀢𑀩𑁆𑀩𑀢𑀸𑀬 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀭𑀸𑀲𑀝𑁆𑀞𑀆𑀦𑀺𑀲𑀁𑀲𑀝𑁆𑀞𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄 𑀢𑀣𑀸𑀧𑀺 𑀓𑀸𑀫𑁂𑀢𑀩𑁆𑀩𑀢𑀸𑀬 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀧𑀸𑀭𑀺𑀲𑁂𑀲𑀢𑁄 𑀧𑀦 𑀩𑀦𑁆𑀥𑀦𑀝𑁆𑀞𑁄 𑀕𑀳𑀺𑀢𑁄. 𑀬𑀤𑀕𑁆𑀕𑁂𑀦 𑀳𑀺 𑀦𑁂𑀲𑀁 𑀓𑀸𑀫𑁂𑀢𑀩𑁆𑀩𑀢𑀸, 𑀢𑀤𑀕𑁆𑀕𑁂𑀦 𑀩𑀦𑁆𑀥𑀦𑀪𑀸𑀯𑁄 𑀘𑀸𑀢𑀺.

𑀓𑁄𑀝𑁆𑀞𑀸𑀲𑀝𑁆𑀞𑁄𑀧𑀺 𑀢𑁂𑀲𑀼 𑀬𑀼𑀚𑁆𑀚𑀢𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀤𑀺𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀦𑁂𑀲𑀁 𑀓𑀸𑀫𑁂𑀢𑀩𑁆𑀩𑀢𑁄. 𑀓𑁄𑀝𑁆𑀞𑀸𑀲𑁂 𑀘 𑀕𑀼𑀡-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀤𑀺𑀕𑀼𑀡𑀁 𑀯𑀟𑁆𑀠𑁂𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼, 𑀲𑀫𑁆𑀧𑀤𑀸𑀝𑁆𑀞𑁄𑀧𑀺 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺. (𑀥. 𑀲. 𑀅𑀝𑁆𑀞. 𑁧𑁩𑁧𑁩; 𑀉𑀤𑀸. 𑀅𑀝𑁆𑀞. 𑁫𑁩; 𑀧𑀝𑀺. 𑀫. 𑀅𑀝𑁆𑀞. 𑁭𑁬);

𑀆𑀤𑀻𑀲𑀼 𑀲𑁄𑀧𑀺 𑀇𑀥 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀦𑀼𑀤𑁆𑀥𑀝𑁄.

𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑀸, 𑀢𑁂𑀦 𑀧𑀦 𑀯𑀺𑀚𑀸𑀦𑀦𑀁 𑀤𑀲𑁆𑀲𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀲𑁆𑀲𑀺𑀢𑀩𑁆𑀩𑀸’’𑀢𑀺. ‘‘𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀲𑁄𑀢𑀩𑁆𑀩𑀸’’𑀢𑀺 𑀏𑀯𑀫𑀸𑀤𑀺 𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀅𑀢𑀺𑀤𑀺𑀲𑀢𑀺. 𑀕𑀯𑁂𑀲𑀺𑀢𑀫𑁆𑀧𑀺 ‘‘𑀇𑀝𑁆𑀞’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀧𑀭𑀺𑀬𑀺𑀝𑁆𑀞𑀸 𑀯𑀸 𑀳𑁄𑀦𑁆𑀢𑀼 𑀫𑀸 𑀯𑀸’’𑀢𑀺. 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸𑀢𑀺 𑀲𑀼𑀔𑀸𑀭𑀫𑁆𑀫𑀡𑀪𑀽𑀢𑀸. 𑀓𑀸𑀫𑀦𑀻𑀬𑀸𑀢𑀺 𑀓𑀸𑀫𑁂𑀢𑀩𑁆𑀩𑀸. 𑀇𑀝𑁆𑀞𑀪𑀸𑀯𑁂𑀦 𑀫𑀦𑀁 𑀅𑀧𑁆𑀧𑀸𑀬𑀦𑁆𑀢𑀻𑀢𑀺 𑀫𑀦𑀸𑀧𑀸. 𑀧𑀺𑀬𑀚𑀸𑀢𑀺𑀓𑀸𑀢𑀺 𑀧𑀺𑀬𑀲𑀪𑀸𑀯𑀸.

𑀕𑁂𑀥𑁂𑀦𑀸𑀢𑀺 𑀮𑁄𑀪𑁂𑀦 𑀅𑀪𑀺𑀪𑀽𑀢𑀸 𑀳𑀼𑀢𑁆𑀯𑀸 𑀧𑀜𑁆𑀘𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀫𑀼𑀘𑁆𑀙𑀸𑀓𑀸𑀭𑀦𑁆𑀢𑀺 𑀫𑁄𑀳𑀦𑀸𑀓𑀸𑀭𑀁. 𑀅𑀥𑀺𑀑𑀲𑀦𑁆𑀦𑀸𑀢𑀺 𑀅𑀥𑀺𑀕𑁆𑀕𑀬𑁆𑀳 𑀅𑀚𑁆𑀛𑁄𑀲𑀸𑀬 𑀅𑀯𑀲𑀦𑁆𑀦𑀸, 𑀢𑁂𑀦𑀸𑀳 ‘‘𑀑𑀕𑀸𑀴𑁆𑀳𑀸’’𑀢𑀺. 𑀧𑀭𑀺𑀦𑀺𑀝𑁆𑀞𑀸𑀦𑀧𑁆𑀧𑀢𑁆𑀢𑀸𑀢𑀺 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑀦𑀯𑀲𑁂𑀦 𑀧𑀭𑀺𑀦𑀺𑀝𑁆𑀞𑀸𑀦𑀁 𑀉𑀧𑀕𑀢𑀸. 𑀆𑀤𑀻𑀦𑀯𑀦𑁆𑀢𑀺 𑀓𑀸𑀫𑀧𑀭𑀺𑀪𑁄𑀕𑁂 𑀲𑀫𑁆𑀧𑀢𑀺, 𑀆𑀬𑀢𑀺𑀜𑁆𑀘 𑀤𑁄𑀲𑀁 𑀅𑀧𑀲𑁆𑀲𑀦𑁆𑀢𑀸. 𑀖𑀸𑀲𑀘𑁆𑀙𑀸𑀤𑀦𑀸𑀤𑀺𑀲𑀫𑁆𑀪𑁄𑀕𑀦𑀺𑀫𑀺𑀢𑁆𑀢𑀲𑀁𑀓𑀺𑀮𑁂𑀲𑀢𑁄 𑀦𑀺𑀲𑁆𑀲𑀭𑀦𑁆𑀢𑀺 𑀅𑀧𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁, 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀢𑁂𑀲𑀁 𑀧𑀭𑀺𑀪𑁄𑀕𑀧𑀜𑁆𑀜𑀸. 𑀢𑀤𑀪𑀸𑀯𑀢𑁄 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀫𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳.

𑁫𑁪𑁮-𑁯. 𑀆𑀯𑀭𑀦𑁆𑀢𑀻𑀢𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀆𑀤𑀺𑀢𑁄𑀯 𑀦𑀺𑀯𑀸𑀭𑁂𑀦𑁆𑀢𑀺. 𑀦𑀺𑀯𑀸𑀭𑁂𑀦𑁆𑀢𑀻𑀢𑀺 𑀦𑀺𑀭𑀯𑀲𑁂𑀲𑀢𑁄 𑀯𑀸𑀭𑀬𑀦𑁆𑀢𑀺. 𑀑𑀦𑀦𑁆𑀥𑀦𑁆𑀢𑀻𑀢𑀺 𑀑𑀕𑀸𑀳𑀦𑁆𑀢𑀸 𑀯𑀺𑀬 𑀙𑀸𑀤𑁂𑀦𑁆𑀢𑀺. 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀻𑀢𑀺 𑀲𑀩𑁆𑀩𑀲𑁄 𑀙𑀸𑀤𑁂𑀦𑁆𑀢𑀺. 𑀆𑀯𑀭𑀡𑀸𑀤𑀻𑀦𑀁 𑀯𑀲𑁂𑀦𑀸𑀢𑀺 𑀆𑀯𑀭𑀡𑀸𑀤𑀺𑀅𑀢𑁆𑀣𑀸𑀦𑀁 𑀯𑀲𑁂𑀦. 𑀢𑁂 𑀳𑀺 𑀆𑀲𑁂𑀯𑀦𑀩𑀮𑀯𑀢𑀸𑀬 𑀧𑀼𑀭𑀺𑀫𑀧𑀼𑀭𑀺𑀫𑁂𑀳𑀺 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀸 𑀤𑀴𑁆𑀳𑀢𑀭𑀢𑀫𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀸 𑀯𑀼𑀢𑁆𑀢𑀸.

𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸

𑁫𑁫𑁦. 𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁂 𑀲𑀢𑀺 𑀧𑀼𑀭𑀺𑀲𑀲𑁆𑀲 𑀧𑀜𑁆𑀘𑀓𑀸𑀫𑀕𑀼𑀡𑀧𑀭𑀺𑀕𑁆𑀕𑀳𑁄 𑀧𑀭𑀺𑀧𑀼𑀡𑁆𑀡𑁄 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀧𑀭𑀺𑀕𑁆𑀕𑀳𑁄𑀢𑀺 𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁂𑀦 𑀲𑀧𑀭𑀺𑀕𑁆𑀕𑀳𑁄’’𑀢𑀺. ‘‘𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁂𑀦 𑀅𑀧𑀭𑀺𑀕𑁆𑀕𑀳𑁄’’𑀢𑀺 𑀘 𑀇𑀤𑀁 𑀢𑁂𑀯𑀺𑀚𑁆𑀚𑀩𑁆𑀭𑀸𑀳𑁆𑀫𑀡𑁂𑀲𑀼 𑀤𑀺𑀲𑁆𑀲𑀫𑀸𑀦𑀧𑀭𑀺𑀕𑁆𑀕𑀳𑀸𑀦𑀁 𑀤𑀼𑀝𑁆𑀞𑀼𑀮𑁆𑀮𑀢𑀫𑀧𑀭𑀺𑀕𑁆𑀕𑀳𑀸𑀪𑀸𑀯𑀤𑀲𑁆𑀲𑀦𑀁. 𑀏𑀯𑀁𑀪𑀽𑀢𑀸𑀦𑀁 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀸 𑀩𑁆𑀭𑀳𑁆𑀫𑀼𑀦𑀸 𑀲𑀁𑀲𑀦𑁆𑀤𑀦𑀸, 𑀩𑁆𑀭𑀳𑁆𑀫𑀸 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀧𑀭𑀺𑀕𑁆𑀕𑀳𑁄𑀢𑀺. 𑀯𑁂𑀭𑀘𑀺𑀢𑁆𑀢𑁂𑀦 𑀅𑀯𑁂𑀭𑁄, 𑀓𑀼𑀢𑁄 𑀏𑀢𑀲𑁆𑀲 𑀯𑁂𑀭𑀧𑁆𑀧𑀬𑁄𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀢𑁆𑀢𑀕𑁂𑀮𑀜𑁆𑀜𑀲𑀗𑁆𑀔𑀸𑀢𑁂𑀦𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑁂𑀮𑀜𑁆𑀜𑀲𑀜𑁆𑀜𑀺𑀢𑁂𑀦, 𑀢𑁂𑀦𑀲𑁆𑀲 𑀲𑀩𑁆𑀩𑀭𑀽𑀧𑀓𑀸𑀬𑀕𑁂𑀮𑀜𑁆𑀜𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀩𑁆𑀬𑀸𑀧𑀚𑁆𑀛𑁂𑀦𑀸𑀢𑀺 𑀤𑀼𑀓𑁆𑀔𑁂𑀦. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀤𑁂𑀓𑀝𑁆𑀞𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀅𑀧𑁆𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀢𑀺 𑀦 𑀓𑀤𑀸𑀘𑀺 𑀘𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀯𑀲𑁂 𑀯𑀢𑁆𑀢𑀢𑀺, 𑀧𑀳𑀻𑀦𑀸𑀬 𑀧𑀦 𑀲𑀺𑀬𑀸 𑀯𑀲𑀯𑀢𑁆𑀢𑀦𑀦𑁆𑀢𑀺 𑀆𑀳 ‘‘𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀪𑀸𑀯𑀢𑁄 𑀘𑀺𑀢𑁆𑀢𑀁 𑀯𑀲𑁂 𑀯𑀢𑁆𑀢𑁂𑀢𑀻’’𑀢𑀺. 𑀘𑀺𑀢𑁆𑀢𑀕𑀢𑀺𑀓𑀸𑀢𑀺 𑀘𑀺𑀢𑁆𑀢𑀯𑀲𑀺𑀓𑀸, 𑀢𑁂𑀦𑀸𑀳 𑀘𑀺𑀢𑁆𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀻’’𑀢𑀺. 𑀦 𑀢𑀸𑀤𑀺𑀲𑁄𑀢𑀺 𑀩𑁆𑀭𑀸𑀳𑁆𑀫𑀡𑀸 𑀯𑀺𑀬 𑀘𑀺𑀢𑁆𑀢𑀯𑀲𑀺𑀓𑁄 𑀦 𑀳𑁄𑀢𑀺, 𑀅𑀣 𑀔𑁄 𑀯𑀲𑀻𑀪𑀽𑀢𑀚𑁆𑀛𑀸𑀦𑀸𑀪𑀺𑀜𑁆𑀜𑀢𑀸𑀬 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺 𑀯𑀲𑀯𑀢𑁆𑀢𑀻.

𑁫𑁫𑁨. 𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑁂𑀢𑀺 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀫𑀕𑁆𑀕𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁂, 𑀧𑀜𑁆𑀜𑀧𑁂𑀢𑀩𑁆𑀩𑁂 𑀯𑀸, 𑀢𑀁 𑀧𑀜𑁆𑀜𑀧𑁂𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀕𑀦𑁆𑀢𑁆𑀯𑀸𑀢𑀺 𑀅𑀫𑀕𑁆𑀕𑀫𑁂𑀯 ‘‘𑀫𑀕𑁆𑀕𑁄’’𑀢𑀺 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀦𑁂𑀦 𑀉𑀧𑀕𑀦𑁆𑀢𑁆𑀯𑀸, 𑀧𑀝𑀺𑀚𑀸𑀦𑀺𑀢𑁆𑀯𑀸 𑀯𑀸. 𑀧𑀗𑁆𑀓𑀁 𑀑𑀢𑀺𑀡𑁆𑀡𑀸 𑀯𑀺𑀬𑀸𑀢𑀺 𑀫𑀢𑁆𑀣𑀓𑁂 𑀏𑀓𑀗𑁆𑀕𑀼𑀮𑀁 𑀯𑀸 𑀉𑀧𑀟𑁆𑀠𑀗𑁆𑀕𑀼𑀮𑀁 𑀯𑀸 𑀲𑀼𑀓𑁆𑀔𑀢𑀸𑀬 ‘‘𑀲𑀫𑀢𑀮’’𑀦𑁆𑀢𑀺 𑀲𑀜𑁆𑀜𑀸𑀬 𑀅𑀦𑁂𑀓𑀧𑁄𑀭𑀺𑀲𑀁 𑀫𑀳𑀸𑀧𑀗𑁆𑀓𑀁 𑀑𑀢𑀺𑀡𑁆𑀡𑀸 𑀯𑀺𑀬. 𑀅𑀦𑀼𑀧𑁆𑀧𑀯𑀺𑀲𑀦𑁆𑀢𑀻𑀢𑀺 𑀅𑀧𑀸𑀬𑀫𑀕𑁆𑀕𑀁 𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑀲𑀜𑁆𑀜𑀸𑀬 𑀑𑀕𑀸𑀳𑀬𑀦𑁆𑀢𑀺. 𑀢𑀢𑁄 𑀏𑀯 𑀲𑀁𑀲𑀻𑀤𑀺𑀢𑁆𑀯𑀸 𑀯𑀺𑀲𑀸𑀤𑀁 𑀧𑀸𑀧𑀼𑀡𑀦𑁆𑀢𑀺. 𑀏𑀯𑀦𑁆𑀢𑀺 ‘‘𑀲𑀫𑀢𑀮’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀲𑀁𑀲𑀻𑀤𑀺𑀢𑁆𑀯𑀸𑀢𑀺 𑀦𑀺𑀫𑁆𑀫𑀼𑀚𑁆𑀚𑀺𑀢𑁆𑀯𑀸. 𑀲𑀼𑀓𑁆𑀔𑀢𑀭𑀡𑀁 𑀫𑀜𑁆𑀜𑁂 𑀢𑀭𑀦𑁆𑀢𑀻𑀢𑀺 𑀲𑀼𑀓𑁆𑀔𑀦𑀤𑀺𑀢𑀭𑀡𑀁 𑀢𑀭𑀦𑁆𑀢𑀺 𑀫𑀜𑁆𑀜𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑁂𑀯𑀺𑀚𑁆𑀚𑀸 𑀅𑀫𑀕𑁆𑀕𑀫𑁂𑀯 ‘‘𑀫𑀕𑁆𑀕𑁄’’𑀢𑀺 𑀉𑀧𑀕𑀦𑁆𑀢𑁆𑀯𑀸 𑀲𑀁𑀲𑀻𑀤𑀦𑁆𑀢𑀺, 𑀢𑀲𑁆𑀫𑀸. 𑀬𑀣𑀸 𑀢𑁂𑀢𑀺 𑀬𑀣𑀸 𑀢𑁂 ‘‘𑀲𑀫𑀢𑀮’’𑀦𑁆𑀢𑀺 𑀲𑀜𑁆𑀜𑀸𑀬 𑀧𑀗𑁆𑀓𑀁 𑀑𑀢𑀺𑀡𑁆𑀡𑀸. 𑀇𑀥𑁂𑀯 𑀘𑀸𑀢𑀺 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀢𑀪𑀸𑀯𑁂. 𑀲𑀼𑀔𑀁 𑀯𑀸 𑀲𑀸𑀢𑀁 𑀯𑀸 𑀦 𑀮𑀪𑀦𑁆𑀢𑀻𑀢𑀺 𑀛𑀸𑀦𑀲𑀼𑀔𑀁 𑀯𑀸 𑀯𑀺𑀧𑀲𑁆𑀲𑀦𑀸𑀲𑀸𑀢𑀁 𑀯𑀸 𑀦 𑀮𑀪𑀦𑁆𑀢𑀺, 𑀓𑀼𑀢𑁄 𑀫𑀕𑁆𑀕𑀲𑀼𑀔𑀁 𑀯𑀸 𑀦𑀺𑀩𑁆𑀩𑀸𑀦𑀲𑀸𑀢𑀁 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀕𑁆𑀕𑀤𑀻𑀧𑀓𑀦𑁆𑀢𑀺 𑀫𑀕𑁆𑀕𑀤𑀻𑀧𑀓𑀸𑀪𑀺𑀫𑀢𑀁. ‘‘𑀇𑀭𑀺𑀡’’𑀦𑁆𑀢𑀺 𑀅𑀭𑀜𑁆𑀜𑀸𑀦𑀺𑀬𑀸 𑀇𑀤𑀁 𑀅𑀥𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀕𑀸𑀫𑀓𑀁 𑀫𑀳𑀸𑀭𑀜𑁆𑀜’’𑀦𑁆𑀢𑀺. 𑀫𑀺𑀕𑀭𑀼𑀭𑀼𑀆𑀤𑀻𑀦𑀫𑁆𑀧𑀺 𑀅𑀦𑀼𑀧𑀪𑁄𑀕𑀭𑀼𑀓𑁆𑀔𑁂𑀳𑀺. 𑀧𑀭𑀺𑀯𑀢𑁆𑀢𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀫𑀳𑀸𑀓𑀡𑁆𑀝𑀓𑀢𑀸𑀬. 𑀜𑀸𑀢𑀻𑀦𑀁 𑀩𑁆𑀬𑀲𑀦𑀁 𑀯𑀺𑀦𑀸𑀲𑁄 𑀜𑀸𑀢𑀺𑀩𑁆𑀬𑀲𑀦𑀁. 𑀏𑀯𑀁 𑀪𑁄𑀕𑀲𑀻𑀮𑀩𑁆𑀬𑀲𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀭𑁄𑀕𑁄 𑀏𑀯 𑀩𑁆𑀬𑀲𑀢𑀺 𑀯𑀺𑀩𑀸𑀥𑀢𑀻𑀢𑀺 𑀭𑁄𑀕𑀩𑁆𑀬𑀲𑀦𑀁. 𑀏𑀯𑀁 𑀤𑀺𑀝𑁆𑀞𑀺𑀩𑁆𑀬𑀲𑀦𑀫𑁆𑀧𑀺 𑀤𑀝𑁆𑀞𑀩𑁆𑀩𑀁.

𑁫𑁫𑁪. 𑀚𑀸𑀢𑀲𑀁𑀯𑀟𑁆𑀠𑁄𑀢𑀺 𑀚𑀸𑀢𑁄 𑀳𑀼𑀢𑁆𑀯𑀸 𑀲𑀁𑀯𑀟𑁆𑀠𑀺𑀢𑁄. 𑀦 𑀲𑀩𑁆𑀩𑀲𑁄 𑀧𑀘𑁆𑀘𑀓𑁆𑀔𑀸 𑀳𑁄𑀦𑁆𑀢𑀺 𑀧𑀭𑀺𑀘𑀬𑀸𑀪𑀸𑀯𑀢𑁄. 𑀘𑀺𑀭𑀦𑀺𑀓𑁆𑀔𑀦𑁆𑀢𑁄𑀢𑀺 𑀦𑀺𑀓𑁆𑀔𑀦𑁆𑀢𑁄 𑀳𑀼𑀢𑁆𑀯𑀸 𑀘𑀺𑀭𑀓𑀸𑀮𑁄. 𑀤𑀦𑁆𑀥𑀸𑀬𑀺𑀢𑀢𑁆𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑁂 𑀫𑀦𑁆𑀤𑀢𑁆𑀢𑀁 𑀲𑀡𑀺𑀓𑀯𑀼𑀢𑁆𑀢𑀺, 𑀢𑀁 𑀧𑀦 𑀲𑀁𑀲𑀬𑀯𑀲𑁂𑀦 𑀘𑀺𑀭𑀸𑀬𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀓𑀗𑁆𑀔𑀸𑀯𑀲𑁂𑀦 𑀘𑀺𑀭𑀸𑀬𑀺𑀢𑀢𑁆𑀢’’𑀦𑁆𑀢𑀺. 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀦𑁆𑀢𑀺 𑀲𑀸𑀭𑀚𑁆𑀚𑀺𑀢𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀁 𑀦𑀸𑀫 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀣𑀤𑁆𑀥𑀪𑀸𑀯𑀕𑁆𑀕𑀳𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑁫𑁫𑁫. 𑀉-𑀇𑀢𑀺 𑀉𑀧𑀲𑀕𑁆𑀕𑀬𑁄𑀕𑁂 𑀮𑀼𑀫𑁆𑀧-𑀲𑀤𑁆𑀤𑁄 𑀉𑀤𑁆𑀥𑀭𑀡𑀢𑁆𑀣𑁄 𑀳𑁄𑀢𑀻𑀢𑀺 ‘‘𑀉𑀮𑁆𑀮𑀼𑀫𑁆𑀧𑀢𑀽’’𑀢𑀺 𑀧𑀤𑀲𑁆𑀲 𑀉𑀤𑁆𑀥𑀭𑀢𑀽𑀢𑀺 𑀅𑀢𑁆𑀣𑀫𑀸𑀳. 𑀉𑀧𑀲𑀕𑁆𑀕𑀯𑀲𑁂𑀦 𑀳𑀺 𑀥𑀸𑀢𑀼-𑀲𑀤𑁆𑀤𑀸 𑀅𑀢𑁆𑀣𑀯𑀺𑀲𑁂𑀲𑀯𑀼𑀢𑁆𑀢𑀺𑀦𑁄 𑀳𑁄𑀦𑁆𑀢𑀺 𑀬𑀣𑀸 ‘‘𑀉𑀤𑁆𑀥𑀭𑀢𑀽’’𑀢𑀺.

𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑀤𑁂𑀲𑀦𑀸𑀯𑀡𑁆𑀡𑀦𑀸

𑁫𑁫𑁬. 𑀬𑀲𑁆𑀲 𑀅𑀢𑀺𑀲𑀬𑁂𑀦 𑀩𑀮𑀁 𑀅𑀢𑁆𑀣𑀺, 𑀲𑁄 ‘‘𑀩𑀮𑀯𑀸’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀩𑀮𑀲𑀫𑁆𑀧𑀦𑁆𑀦𑁄’’𑀢𑀺. 𑀲𑀗𑁆𑀔𑀁 𑀥𑀫𑀬𑀢𑀻𑀢𑀺 𑀲𑀗𑁆𑀔𑀥𑀫𑀓𑁄, 𑀢𑀁 𑀥𑀫𑀬𑀺𑀢𑁆𑀯𑀸 𑀢𑀢𑁄 𑀲𑀤𑁆𑀤𑀧𑀯𑀢𑁆𑀢𑀓𑁄. 𑀅𑀧𑁆𑀧𑀦𑀸𑀯 𑀯𑀝𑁆𑀝𑀢𑀺 𑀧𑀝𑀺𑀧𑀓𑁆𑀔𑀢𑁄 𑀲𑀫𑁆𑀫𑀤𑁂𑀯 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀺𑀪𑀸𑀯𑀢𑁄.

𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀓𑀸𑀫𑀸𑀯𑀘𑀭𑀁 𑀧𑀫𑀸𑀡𑀓𑀭𑀸𑀦𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀅𑀯𑀺𑀓𑁆𑀔𑀫𑁆𑀪𑀦𑀢𑁄. 𑀢𑀣𑀸 𑀳𑀺 𑀢𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀼𑀩𑁆𑀩𑀪𑀸𑀕𑀪𑀽𑀢𑀁 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀑𑀤𑀺𑀲𑁆𑀲𑀓𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀯𑀲𑁂𑀦 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑀸. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀧𑀦 𑀅𑀧𑁆𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀭𑀽𑀧𑀸𑀭𑀽𑀧𑀸𑀯𑀘𑀭𑀁, 𑀢𑁂𑀦𑀸𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀭𑀽𑀧𑀸𑀯𑀘𑀭𑁂 𑀑𑀤𑀺𑀲𑁆𑀲𑀓𑀸𑀦𑁄𑀤𑀺𑀲𑁆𑀲𑀓𑀯𑀲𑁂𑀦 𑀨𑀭𑀡𑀁 𑀦 𑀮𑀩𑁆𑀪𑀢𑀺, 𑀢𑀣𑀸 𑀤𑀺𑀲𑀸𑀨𑀭𑀡𑀁.

𑀓𑁂𑀘𑀺 𑀧𑀦 𑀢𑀁 𑀆𑀕𑀫𑀦𑀯𑀲𑁂𑀦 𑀮𑀩𑁆𑀪𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁. 𑀦 𑀳𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀦𑀺𑀲𑁆𑀲𑀦𑁆𑀤𑁄 𑀆𑀭𑀼𑀧𑁆𑀧𑀁, 𑀅𑀣 𑀔𑁄 𑀓𑀲𑀺𑀡𑀦𑀺𑀲𑁆𑀲𑀦𑁆𑀤𑁄, 𑀢𑀲𑁆𑀫𑀸 𑀬𑀁 𑀲𑀼𑀯𑀺𑀪𑀸𑀯𑀺𑀢𑀁 𑀯𑀲𑀻𑀪𑀸𑀯𑀁 𑀧𑀸𑀧𑀺𑀢𑀁 𑀆𑀭𑀼𑀧𑁆𑀧𑀁, 𑀢𑀁 ‘‘𑀅𑀧𑁆𑀧𑀫𑀸𑀡𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀯𑀸 𑀲𑀸𑀢𑀺𑀲𑀬𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀬 𑀅𑀪𑀺𑀲𑀗𑁆𑀔𑀢𑁂𑀦 𑀲𑀦𑁆𑀢𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀬𑀜𑁆𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀫𑀸𑀧𑀦𑁆𑀦𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁, 𑀢𑀁 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀨𑀭𑀡𑀧𑁆𑀧𑀫𑀸𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀓𑀢𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀧𑀭𑁂. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑁂𑀢𑀺 𑀭𑀽𑀧𑀸𑀯𑀘𑀭𑀓𑀫𑁆𑀫𑁂, 𑀅𑀭𑀽𑀧𑀸𑀯𑀘𑀭𑀓𑀫𑁆𑀫𑁂 𑀘 𑀲𑀢𑀺. 𑀦 𑀑𑀳𑀻𑀬𑀢𑀺 𑀦 𑀢𑀺𑀝𑁆𑀞𑀢𑀻𑀢𑀺 𑀓𑀢𑀽𑀧𑀘𑀺𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀬𑀣𑀸𑀥𑀺𑀕𑀢𑁂 𑀫𑀳𑀕𑁆𑀕𑀢𑀚𑁆𑀛𑀸𑀦𑁂 𑀅𑀧𑀭𑀺𑀳𑀻𑀦𑁂 𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀬𑀁 𑀑𑀳𑀻𑀬𑀓𑀁 𑀳𑀼𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀤𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑁂 𑀦 𑀢𑀺𑀝𑁆𑀞𑀢𑀺. 𑀮𑀕𑁆𑀕𑀺𑀢𑀼𑀦𑁆𑀢𑀺 𑀆𑀯𑀭𑀺𑀢𑀼𑀁 𑀦𑀺𑀲𑁂𑀥𑁂𑀢𑀼𑀁. 𑀞𑀸𑀢𑀼𑀦𑁆𑀢𑀺 𑀧𑀝𑀺𑀩𑀮𑁄 𑀳𑀼𑀢𑁆𑀯𑀸 𑀞𑀸𑀢𑀼𑀁. 𑀨𑀭𑀺𑀢𑁆𑀯𑀸𑀢𑀺 𑀧𑀝𑀺𑀧𑁆𑀨𑀭𑀺𑀢𑁆𑀯𑀸. 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀢𑀲𑁆𑀲 𑀲𑀸𑀫𑀢𑁆𑀣𑀺𑀬𑀁 𑀔𑁂𑀧𑁂𑀢𑁆𑀯𑀸. 𑀓𑀫𑁆𑀫𑀲𑁆𑀲 𑀧𑀭𑀺𑀬𑀸𑀤𑀺𑀬𑀦𑀁 𑀦𑀸𑀫 𑀢𑀲𑁆𑀲 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁 𑀦𑀺𑀲𑁂𑀥𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀦𑁆𑀢𑀺 𑀆𑀳 ‘‘𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸’’𑀢𑀺𑀆𑀤𑀺. 𑀏𑀯𑀁 𑀫𑁂𑀢𑁆𑀢𑀸𑀤𑀺𑀯𑀺𑀳𑀸𑀭𑀻𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀫𑁂𑀢𑁆𑀢𑀸𑀤𑀻𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀯𑀲𑁂𑀦 𑀫𑁂𑀢𑁆𑀢𑀸𑀤𑀺𑀯𑀺𑀳𑀸𑀭𑀻.

𑁫𑁫𑁯. 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂…𑀧𑁂… 𑀅𑀮𑀢𑁆𑀣𑀼𑀦𑁆𑀢𑀺 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦 𑀉𑀧𑀲𑀫𑁆𑀧𑀤𑀜𑁆𑀘𑁂𑀯 𑀅𑀭𑀳𑀢𑁆𑀢𑀜𑁆𑀘 𑀅𑀮𑀢𑁆𑀣𑀼𑀁 𑀧𑀝𑀺𑀮𑀪𑀺𑀁𑀲𑀼. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.