𑁮. 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀘𑁂𑀮𑀓𑀲𑁆𑀲𑀧𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁮𑁧. 𑀬𑀲𑁆𑀫𑀺𑀁 𑀭𑀝𑁆𑀞𑁂 𑀢𑀁 𑀦𑀕𑀭𑀁, 𑀢𑀲𑁆𑀲 𑀭𑀝𑁆𑀞𑀲𑁆𑀲𑀧𑀺 𑀬𑀲𑁆𑀫𑀺𑀁 𑀦𑀕𑀭𑁂 𑀢𑀤𑀸 𑀪𑀕𑀯𑀸 𑀯𑀺𑀳𑀸𑀲𑀺, 𑀢𑀲𑁆𑀲 𑀦𑀕𑀭𑀲𑁆𑀲𑀧𑀺 𑀏𑀢𑀤𑁂𑀯 𑀦𑀸𑀫𑀁, 𑀢𑀲𑁆𑀫𑀸 𑀉𑀭𑀼𑀜𑁆𑀜𑀸𑀬𑀦𑁆𑀢𑀺 𑀉𑀭𑀼𑀜𑁆𑀜𑀸𑀚𑀦𑀧𑀤𑁂 𑀉𑀭𑀼𑀜𑁆𑀜𑀸𑀲𑀗𑁆𑀔𑀸𑀢𑁂 𑀦𑀕𑀭𑁂𑀢𑀺 𑀅𑀢𑁆𑀣𑁄. 𑀭𑀫𑀡𑀻𑀬𑁄𑀢𑀺 𑀫𑀦𑁄𑀳𑀭𑀪𑀽𑀫𑀺𑀪𑀸𑀕𑀢𑀸𑀬 𑀙𑀸𑀬𑀽𑀤𑀓𑀲𑀫𑁆𑀧𑀢𑁆𑀢𑀺𑀬𑀸, 𑀚𑀦𑀯𑀺𑀯𑀺𑀢𑁆𑀢𑀢𑀸𑀬 𑀘 𑀫𑀦𑁄𑀭𑀫𑁄. 𑀦𑀸𑀫𑀦𑁆𑀢𑀺 𑀕𑁄𑀢𑁆𑀢𑀦𑀸𑀫𑀁. 𑀢𑀧𑀦𑀁 𑀲𑀦𑁆𑀢𑀧𑀦𑀁 𑀓𑀸𑀬𑀲𑁆𑀲 𑀔𑁂𑀤𑀦𑀁 𑀢𑀧𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀧𑀲𑁆𑀲𑀻, 𑀢𑀁 𑀢𑀧𑀲𑁆𑀲𑀺𑀁. 𑀬𑀲𑁆𑀫𑀸 𑀢𑀣𑀸𑀪𑀽𑀢𑁄 𑀢𑀧𑀁 𑀦𑀺𑀲𑁆𑀲𑀺𑀢𑁄, 𑀢𑀧𑁄 𑀯𑀸 𑀢𑀁 𑀦𑀺𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀆𑀳 ‘‘𑀢𑀧𑀦𑀺𑀲𑁆𑀲𑀺𑀢𑀓’’𑀦𑁆𑀢𑀺. 𑀮𑀽𑀔𑀁 𑀯𑀸 𑀨𑀭𑀼𑀲𑀁 𑀲𑀸𑀥𑀼𑀲𑀫𑁆𑀫𑀢𑀸𑀘𑀸𑀭𑀯𑀺𑀭𑀳𑀢𑁄 𑀦𑀧𑀲𑀸𑀤𑀦𑀻𑀬𑀁 𑀆𑀚𑀻𑀯𑀢𑀺 𑀯𑀢𑁆𑀢𑀢𑀻𑀢𑀺 𑀮𑀽𑀔𑀸𑀚𑀻𑀯𑀻, 𑀢𑀁 𑀮𑀽𑀔𑀸𑀚𑀻𑀯𑀺𑀁. 𑀫𑀼𑀢𑁆𑀢𑀸𑀘𑀸𑀭𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀢𑁄 𑀧𑀸𑀴𑀺𑀬𑀁 (𑀤𑀻. 𑀦𑀺. 𑁧.𑁩𑁯𑁭) 𑀆𑀕𑀢𑀸 𑀳𑀢𑁆𑀣𑀸𑀧𑀮𑁂𑀔𑀦𑀸𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀉𑀧𑁆𑀧𑀡𑁆𑀟𑁂𑀢𑀻𑀢𑀺 𑀉𑀳𑀲𑀦𑀯𑀲𑁂𑀦 𑀧𑀭𑀺𑀪𑀸𑀲𑀢𑀺. 𑀉𑀧𑀯𑀤𑀢𑀻𑀢𑀺 𑀅𑀯𑀜𑁆𑀜𑀸𑀧𑀼𑀩𑁆𑀩𑀓𑀁 𑀅𑀧𑀯𑀤𑀢𑀺, 𑀢𑁂𑀦𑀸𑀳 ‘‘𑀳𑀻𑀴𑁂𑀢𑀺 𑀯𑀫𑁆𑀪𑁂𑀢𑀻’’𑀢𑀺. 𑀥𑀫𑁆𑀫𑀲𑁆𑀲 𑀘 𑀅𑀦𑀼𑀥𑀫𑁆𑀫𑀁𑀢𑀺 𑀏𑀢𑁆𑀣 𑀥𑀫𑁆𑀫𑁄 𑀦𑀸𑀫 𑀳𑁂𑀢𑀼 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁦) 𑀯𑀺𑀬𑀸𑀢𑀺 𑀆𑀳 ‘‘𑀓𑀸𑀭𑀡𑀲𑁆𑀲 𑀅𑀦𑀼𑀓𑀸𑀭𑀡’’𑀦𑁆𑀢𑀺. 𑀓𑀸𑀭𑀡𑀦𑁆𑀢𑀺 𑀘𑁂𑀢𑁆𑀣 𑀢𑀣𑀸𑀧𑀯𑀢𑁆𑀢𑀲𑁆𑀲 𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀢𑀲𑁆𑀲 𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀅𑀢𑁆𑀣𑀧𑁆𑀧𑀬𑀼𑀢𑁆𑀢𑁄 𑀳𑀺 𑀲𑀤𑁆𑀤𑀧𑁆𑀧𑀬𑁄𑀕𑁄. 𑀅𑀦𑀼𑀓𑀸𑀭𑀡𑀦𑁆𑀢𑀺 𑀘 𑀲𑁄 𑀏𑀯 𑀧𑀭𑁂𑀳𑀺 𑀢𑀣𑀸 𑀯𑀼𑀘𑁆𑀘𑀫𑀸𑀦𑁄. 𑀧𑀭𑁂𑀳𑀻𑀢𑀺 ‘‘𑀬𑁂 𑀢𑁂’’𑀢𑀺 𑀯𑀼𑀢𑁆𑀢𑀲𑀢𑁆𑀢𑁂𑀳𑀺 𑀧𑀭𑁂𑀳𑀺. 𑀯𑀼𑀢𑁆𑀢𑀓𑀸𑀭𑀡𑁂𑀦𑀸𑀢𑀺 𑀬𑀣𑀸 𑀢𑁂𑀳𑀺 𑀯𑀼𑀢𑁆𑀢𑀁, 𑀢𑀣𑀸 𑀘𑁂 𑀢𑀼𑀫𑁆𑀳𑁂𑀳𑀺 𑀦 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀢𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀓𑀸𑀭𑀡𑁄 𑀳𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀸𑀤𑁄 𑀯𑀸 𑀢𑀢𑁄 𑀧𑀭𑀁 𑀢𑀲𑁆𑀲 𑀅𑀦𑀼𑀯𑀸𑀤𑁄 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀁 𑀞𑀸𑀦𑀁 𑀓𑀸𑀭𑀡𑀁 𑀦𑀸𑀕𑀘𑁆𑀙𑁂𑀬𑁆𑀬, 𑀓𑀺𑀫𑁂𑀯𑀁 𑀦𑀸𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀺.

𑁩𑁮𑁨. 𑀇𑀤𑀸𑀦𑀺 𑀬𑀁 𑀯𑀺𑀪𑀚𑁆𑀚𑀯𑀸𑀤𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 ‘‘𑀦 𑀫𑁂 𑀢𑁂 𑀯𑀼𑀢𑁆𑀢𑀯𑀸𑀤𑀺𑀦𑁄’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀢𑁆𑀯𑀸 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀇𑀥𑀸𑀳𑀁 𑀓𑀲𑁆𑀲𑀧𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥𑁂𑀓𑀘𑁆𑀘𑁄’’𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸 𑀳𑀺 𑀦𑀺𑀭𑀢𑁆𑀣𑀓𑀁 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑀁 𑀓𑀸𑀬𑀓𑀺𑀮𑀫𑀣𑀁 ‘‘𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀤𑀼𑀓𑁆𑀔𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁨.𑁩𑁦) 𑀕𑀭𑀳𑀢𑀺. 𑀲𑀸𑀢𑁆𑀣𑀓𑀁 𑀧𑀦 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑀁 ‘‘𑀆𑀭𑀜𑁆𑀜𑀺𑀓𑁄 𑀳𑁄𑀢𑀺, 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀡𑁆𑀡𑁂𑀢𑀺. 𑀅𑀧𑁆𑀧𑀧𑀼𑀜𑁆𑀜𑀢𑀸𑀬𑀸𑀢𑀺 𑀅𑀧𑀼𑀜𑁆𑀜𑀢𑀸𑀬. 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀸𑀯𑀢𑁄 𑀓𑀫𑁆𑀫𑀨𑀮𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁭𑁧; 𑀫. 𑀦𑀺. 𑁧.𑁪𑁪𑁫; 𑁨.𑁯𑁪, 𑁯𑁫, 𑁨𑁨𑁫; 𑁩.𑁯𑁧, 𑁧𑁧𑁫; 𑀲𑀁. 𑀦𑀺. 𑁩.𑁨𑁧𑁦; 𑀥. 𑀲. 𑁧𑁨𑁨𑁧; 𑀯𑀺𑀪. 𑁯𑁩𑁮) 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀢𑀣𑀸 𑀢𑀣𑀸 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸. 𑀅𑀦𑁂𑀲𑀦𑀯𑀲𑁂𑀦𑀸𑀢𑀺 𑀓𑁄𑀳𑀜𑁆𑀜𑁂 𑀞𑀢𑁆𑀯𑀸 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦. 𑀇𑀫𑁂 𑀤𑁆𑀯𑁂𑀢𑀺 ‘‘𑀅𑀧𑁆𑀧𑀧𑀼𑀜𑁆𑀜𑁄 𑀧𑀼𑀜𑁆𑀜𑀯𑀸’’𑀢𑀺 𑀘 𑀯𑀼𑀢𑁆𑀢𑁂 𑀤𑀼𑀘𑁆𑀘𑀭𑀺𑀢𑀓𑀸𑀭𑀺𑀦𑁄 𑀤𑁆𑀯𑁂 𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬.

‘‘𑀇𑀫𑁂 𑀤𑁆𑀯𑁂 𑀲𑀦𑁆𑀥𑀸𑀬𑀸’’𑀢𑀺 𑀏𑀢𑁆𑀣 𑀧𑀦 𑀤𑀼𑀢𑀺𑀬𑀦𑀬𑁂 ‘‘𑀅𑀧𑁆𑀧𑀧𑀼𑀜𑁆𑀜𑁄, 𑀧𑀼𑀜𑁆𑀜𑀯𑀸’’𑀢𑀺 𑀘 𑀯𑀼𑀢𑁆𑀢𑁂 𑀲𑀼𑀘𑀭𑀺𑀢𑀓𑀸𑀭𑀺𑀦𑁄𑀢𑀺 𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀺𑀦𑁄 𑀳𑀺 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸. 𑀇𑀢𑀺 𑀧𑀞𑀫𑀤𑀼𑀢𑀺𑀬𑀦𑀬𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀢𑀺𑀬𑀘𑀢𑀼𑀢𑁆𑀣𑀦𑀬𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀩𑀸𑀳𑀺𑀭𑀓𑀸𑀘𑀸𑀭𑀬𑀼𑀢𑁆𑀢𑁄 𑀢𑀺𑀢𑁆𑀣𑀺𑀬𑀸𑀘𑀸𑀭𑀬𑀼𑀢𑁆𑀢𑁄, 𑀦 𑀯𑀺𑀫𑀼𑀢𑁆𑀢𑀸𑀘𑀸𑀭𑁄. 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑁆𑀯𑀸𑀢𑀺 𑀅𑀥𑀫𑁆𑀫𑀺𑀓𑁂𑀦 𑀲𑀼𑀔𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑁆𑀯𑀸, 𑀢𑁂𑀦𑀸𑀳 ‘‘𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸’’𑀢𑀺. ‘‘𑀦 𑀤𑀸𑀦𑀺 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑀦𑁆𑀦𑀁 𑀫𑀜𑁆𑀜𑀦𑀸𑀦𑀁 𑀯𑀲𑁂𑀦 𑀤𑀼𑀘𑁆𑀘𑀭𑀺𑀢𑀧𑀽𑀭𑀡𑀫𑀸𑀳. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦. 𑀧𑀭𑀺𑀩𑁆𑀩𑀸𑀚𑀺𑀓𑀸𑀬𑀸𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸𑀬 𑀢𑀸𑀧𑀲𑀤𑀸𑀭𑀺𑀓𑀸𑀬. 𑀤𑀳𑀭𑀸𑀬𑀸𑀢𑀺 𑀢𑀭𑀼𑀡𑀸𑀬. 𑀫𑀼𑀤𑀼𑀓𑀸𑀬𑀸𑀢𑀺 𑀲𑀼𑀔𑀼𑀫𑀸𑀮𑀸𑀬. 𑀮𑁄𑀫𑀲𑀸𑀬𑀸𑀢𑀺 𑀢𑀦𑀼𑀢𑀫𑁆𑀩𑀮𑁄𑀫𑀢𑀸𑀬 𑀅𑀧𑁆𑀧𑀮𑁄𑀫𑀸𑀬. 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼. 𑀧𑀸𑀢𑀩𑁆𑀬𑀢𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀧𑀸𑀢𑀩𑁆𑀬𑀢𑀦𑁆𑀢𑀺 𑀯𑀸 𑀧𑀭𑀺𑀪𑀼𑀜𑁆𑀚𑀦𑀓𑀢𑀁. 𑀆𑀧𑀚𑁆𑀚𑀦𑁆𑀢𑁄𑀢𑀺 𑀉𑀧𑀕𑀘𑁆𑀙𑀦𑁆𑀢𑁄. 𑀧𑀭𑀺𑀪𑁄𑀕𑀢𑁆𑀣𑁄 𑀳𑀺 𑀅𑀬𑀁 𑀧𑀸-𑀲𑀤𑁆𑀤𑁄, 𑀓𑀢𑁆𑀢𑀼𑀲𑀸𑀥𑀦𑁄 𑀘 𑀢𑀩𑁆𑀩-𑀲𑀤𑁆𑀤𑁄, 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑀓𑀸𑀫𑁄𑀧𑀺 𑀳𑀺 𑀅𑀲𑁆𑀲𑀸𑀤𑀺𑀬𑀫𑀸𑀦𑁄 𑀯𑀢𑁆𑀣𑀼𑀓𑀸𑀫𑀦𑁆𑀢𑁄𑀕𑀥𑁄𑀬𑁂𑀯.

𑀇𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀅𑀢𑁆𑀣𑀧𑁆𑀧𑀪𑁂𑀤𑀁 𑀯𑀺𑀪𑀚𑁆𑀚𑀦𑀁. 𑀢𑀺𑀢𑁆𑀣𑀺𑀬𑀯𑀲𑁂𑀦 𑀆𑀕𑀢𑀁 𑀅𑀝𑁆𑀞𑀓𑀣𑀸𑀬𑀁 𑀢𑀣𑀸 𑀯𑀺𑀪𑀢𑁆𑀢𑀢𑁆𑀢𑀸. 𑀲𑀸𑀲𑀦𑁂𑀧𑀻𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂𑀧𑀺.

𑀅𑀭𑀳𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺 𑀅𑀲𑀦𑁆𑀢𑀁 ‘‘𑀅𑀢𑁆𑀣𑀻’’𑀢𑀺 𑀯𑀺𑀧𑁆𑀧𑀝𑀺𑀚𑀸𑀦𑀺𑀢𑁆𑀯𑀸. 𑀲𑀸𑀫𑀦𑁆𑀢𑀚𑀧𑁆𑀧𑀦𑀁, 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀁, 𑀇𑀭𑀺𑀬𑀸𑀧𑀣𑀦𑀺𑀲𑁆𑀲𑀺𑀢𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀯𑀸 𑀓𑀼𑀳𑀦𑀯𑀢𑁆𑀣𑀽𑀦𑀺. 𑀢𑀸𑀤𑀺𑀲𑁄 𑀯𑀸𑀢𑀺 𑀥𑀼𑀢𑀗𑁆𑀕- (𑀫𑀺. 𑀧. 𑁪.𑁨; 𑀯𑀺𑀲𑀼𑀤𑁆𑀥𑀺. 𑁧.𑁨𑁨) 𑀲𑀫𑀸𑀤𑀸𑀦𑀯𑀲𑁂𑀦 𑀮𑀽𑀔𑀸𑀚𑀻𑀯𑀻 𑀏𑀯. 𑀤𑀼𑀮𑁆𑀮𑀪𑀲𑀼𑀔𑁄 𑀪𑀯𑀺𑀲𑁆𑀲𑀸𑀫𑀺 𑀤𑀼𑀕𑁆𑀕𑀢𑀻𑀲𑀼 𑀉𑀧𑀧𑀢𑁆𑀢𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁮𑁩. 𑀅𑀲𑀼𑀓𑀝𑁆𑀞𑀸𑀦𑀢𑁄𑀢𑀺 𑀅𑀲𑀼𑀓𑀪𑀯𑀢𑁄. 𑀆𑀕𑀢𑀸𑀢𑀺 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀇𑀥𑀸𑀕𑀢𑀸. 𑀇𑀤𑀸𑀦𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀦𑁆𑀢𑀺 𑀆𑀬𑀢𑀺𑀁 𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑀸𑀦𑀁. 𑀧𑀼𑀦 𑀉𑀧𑀧𑀢𑁆𑀢𑀺𑀦𑁆𑀢𑀺 𑀆𑀬𑀢𑀺𑀁 𑀅𑀦𑀦𑁆𑀢𑀭𑀪𑀯𑀢𑁄 𑀢𑀢𑀺𑀬𑀁 𑀉𑀧𑀧𑀢𑁆𑀢𑀺𑀁, 𑀧𑀼𑀦 𑀉𑀧𑀧𑀢𑁆𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑁄 𑀳𑀺 𑀇𑀘𑁆𑀙𑀸𑀤𑁄𑀲𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀕𑀭𑀳𑁂𑀬𑁆𑀬, 𑀅𑀳𑀁 𑀧𑀦 𑀬𑀣𑀸𑀪𑀽𑀢𑀁 𑀚𑀸𑀦𑀦𑁆𑀢𑁄 𑀲𑀩𑁆𑀩𑀁 𑀢𑀁 𑀓𑁂𑀦 𑀓𑀸𑀭𑀡𑁂𑀦 𑀕𑀭𑀳𑀺𑀲𑁆𑀲𑀸𑀫𑀺, 𑀢𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑀸𑀳 ‘‘𑀕𑀭𑀳𑀺𑀢𑀩𑁆𑀩𑀫𑁂𑀯𑀸’’𑀢𑀺𑀆𑀤𑀺. 𑀢𑀫𑀢𑁆𑀣𑀦𑁆𑀢𑀺 𑀕𑀭𑀳𑀺𑀢𑀩𑁆𑀩𑀲𑁆𑀲𑁂𑀯 𑀕𑀭𑀳𑀡𑀁, 𑀧𑀲𑀁𑀲𑀺𑀢𑀩𑁆𑀩𑀲𑁆𑀲 𑀘 𑀧𑀲𑀁𑀲𑀦𑀁.

𑀦 𑀓𑁄𑀘𑀺 ‘‘𑀦 𑀲𑀸𑀥𑀽’’𑀢𑀺 𑀯𑀤𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲, 𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀲𑀸𑀥𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀺𑀬𑀸 𑀪𑀤𑁆𑀤𑀓𑀢𑁆𑀢𑀸. 𑀧𑀜𑁆𑀘𑀯𑀺𑀥𑀁 𑀯𑁂𑀭𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀯𑀺𑀥𑀁 𑀯𑁂𑀭𑀁. 𑀢𑀜𑁆𑀳𑀺 𑀧𑀜𑁆𑀘𑀯𑀺𑀥𑀲𑁆𑀲 𑀲𑀻𑀮𑀲𑁆𑀲 𑀧𑀝𑀺𑀲𑀢𑁆𑀢𑀼𑀪𑀸𑀯𑀢𑁄, 𑀲𑀢𑁆𑀢𑀸𑀦𑀁 𑀯𑁂𑀭𑀳𑁂𑀢𑀼𑀢𑀸𑀬 𑀘 ‘‘𑀯𑁂𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀏𑀯 𑀢𑀁 𑀦 𑀓𑁄𑀘𑀺 ‘‘𑀲𑀸𑀥𑀽’’𑀢𑀺 𑀯𑀤𑀢𑀺, 𑀢𑀣𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀸𑀦𑀁 𑀅𑀲𑀸𑀥𑀦𑀢𑁄, 𑀲𑀢𑁆𑀢𑀸𑀦𑀁 𑀲𑀸𑀥𑀼𑀪𑀸𑀯𑀲𑁆𑀲 𑀘 𑀤𑀽𑀲𑀦𑀢𑁄. 𑀦 𑀦𑀺𑀭𑀼𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀭𑀽𑀧𑀕𑁆𑀕𑀳𑀡𑁂 𑀦 𑀦𑀺𑀯𑀸𑀭𑁂𑀢𑀩𑁆𑀩𑀁. 𑀤𑀲𑁆𑀲𑀦𑀻𑀬𑀤𑀲𑁆𑀲𑀦𑀢𑁆𑀣𑁄 𑀳𑀺 𑀘𑀓𑁆𑀔𑀼𑀧𑀝𑀺𑀮𑀸𑀪𑁄𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀕𑁆𑀕𑁂𑀦 𑀢𑁂𑀲𑀁 𑀧𑀜𑁆𑀘𑀤𑁆𑀯𑀸𑀭𑁂 𑀅𑀲𑀁𑀯𑀭𑁄 𑀲𑀸𑀥𑀼, 𑀢𑀤𑀕𑁆𑀕𑁂𑀦 𑀢𑀢𑁆𑀣 𑀲𑀁𑀯𑀭𑁄 𑀦 𑀲𑀸𑀥𑀽𑀢𑀺 𑀆𑀳 ‘‘𑀧𑀼𑀦 𑀬𑀁 𑀢𑁂 𑀏𑀓𑀘𑁆𑀘𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀲𑀁𑀯𑀭’’𑀦𑁆𑀢𑀺.

𑀅𑀣 𑀯𑀸 𑀬𑀁 𑀢𑁂 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘‘𑀲𑀸𑀥𑀽’’𑀢𑀺 𑀢𑁂 ‘‘𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀢𑁆𑀢𑀸 𑀢𑀺𑀢𑁆𑀣𑀺𑀬𑀸 𑀬𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀸𑀤𑀺𑀁 ‘‘𑀲𑀸𑀥𑀽’’𑀢𑀺 𑀯𑀤𑀦𑁆𑀢𑀺, 𑀫𑀬𑀁 𑀢𑀁 𑀦 ‘‘𑀲𑀸𑀥𑀽’’𑀢𑀺 𑀯𑀤𑀸𑀫. 𑀬𑀁 𑀢𑁂 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘‘𑀦 𑀲𑀸𑀥𑀽’’𑀢𑀺 𑀬𑀁 𑀧𑀦 𑀢𑁂 𑀅𑀦𑀯𑀚𑁆𑀚𑀧𑀘𑁆𑀘𑀬𑀧𑀭𑀺𑀪𑁄𑀕𑀁, 𑀲𑀼𑀦𑀺𑀯𑀢𑁆𑀣𑀲𑀼𑀧𑀸𑀭𑀼𑀧𑀦𑀸𑀤𑀺𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀜𑁆𑀘 ‘‘𑀦 𑀲𑀸𑀥𑀽’’𑀢𑀺 𑀯𑀤𑀦𑁆𑀢𑀺, 𑀢𑀁 𑀫𑀬𑀁 ‘‘𑀲𑀸𑀥𑀽’’𑀢𑀺 𑀯𑀤𑀸𑀫𑀸𑀢𑀺 𑀏𑀯𑀁 𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀬𑀁 𑀧𑀭𑀯𑀸𑀤𑀫𑀽𑀮𑀓𑀁 𑀘𑀢𑀼𑀓𑁆𑀓𑀁 𑀤𑀲𑁆𑀲𑀺𑀢𑀁, 𑀢𑀤𑁂𑀯 𑀧𑀼𑀦 𑀲𑀓𑀯𑀸𑀤𑀫𑀽𑀮𑀓𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑁄 ‘‘𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀓𑁂𑀦𑀘𑀺 𑀲𑀫𑀸𑀦𑀁, 𑀢𑁂𑀦𑀧𑀺 𑀢𑀁 𑀲𑀫𑀸𑀦𑀫𑁂𑀯, 𑀢𑀣𑀸 𑀅𑀲𑀫𑀸𑀦𑀁 𑀧𑀻𑀢𑀺. 𑀲𑀫𑀸𑀦𑀸𑀲𑀫𑀸𑀦𑀢𑀦𑁆𑀢𑀺 𑀲𑀫𑀸𑀦𑀸𑀲𑀫𑀸𑀦𑀢𑀸𑀫𑀢𑁆𑀢𑀁. 𑀅𑀦𑀯𑀲𑁂𑀲𑀢𑁄 𑀳𑀺 𑀧𑀳𑀸𑀢𑀩𑁆𑀩𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀲𑀓𑀯𑀸𑀤𑁂 𑀤𑀺𑀲𑁆𑀲𑀢𑀺, 𑀦 𑀧𑀭𑀯𑀸𑀤𑁂. 𑀢𑀣𑀸 𑀧𑀭𑀺𑀧𑀼𑀡𑁆𑀡𑀫𑁂𑀯 𑀘 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀸𑀤𑀦𑀁 𑀲𑀓𑀯𑀸𑀤𑁂, 𑀦 𑀧𑀭𑀯𑀸𑀤𑁂. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁆𑀬𑀸𑀳’’𑀦𑁆𑀢𑀺𑀆𑀤𑀺.

𑀲𑀫𑀦𑀼𑀬𑀼𑀜𑁆𑀚𑀸𑀧𑀦𑀓𑀣𑀸𑀯𑀡𑁆𑀡𑀦𑀸

𑁩𑁮𑁫. 𑀮𑀤𑁆𑀥𑀺𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 ‘‘𑀓𑀺𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀺, 𑀉𑀤𑀸𑀳𑀼 𑀧𑀭𑁂 𑀕𑀡𑀸𑀘𑀭𑀺𑀬𑀸. 𑀏𑀢𑁆𑀣 𑀢𑀸𑀯 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀯𑀤𑀸’’𑀢𑀺 𑀮𑀤𑁆𑀥𑀺𑀁 𑀧𑀼𑀘𑁆𑀙𑀦𑁆𑀢𑁄. 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 ‘‘𑀲𑀫𑀡𑁄 𑀕𑁄𑀢𑀫𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 𑀓𑀸𑀭𑀡𑁂𑀦 𑀏𑀯𑀫𑀢𑁆𑀣𑀁 𑀕𑀸𑀳𑀬𑀸’’𑀢𑀺 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄. 𑀉𑀪𑀬𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 ‘‘𑀇𑀤𑀁 𑀦𑀸𑀫𑁂𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸 𑀧𑀝𑀺𑀜𑁆𑀜𑀸𑀢𑁂 𑀅𑀢𑁆𑀣𑁂 𑀲𑀸𑀥𑀺𑀬𑀫𑀸𑀦𑁂 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀓𑀸𑀭𑀡𑀁 𑀲𑀫𑀢𑁆𑀣𑁂𑀢𑀼𑀁 𑀲𑀤𑀺𑀲𑀸𑀲𑀤𑀺𑀲𑀪𑁂𑀤𑀁 𑀉𑀧𑀫𑁄𑀤𑀸𑀳𑀭𑀡𑀤𑁆𑀯𑀬𑀁 𑀧𑀼𑀘𑁆𑀙𑀦𑁆𑀢𑁄, 𑀉𑀪𑀬𑀁 𑀧𑀼𑀘𑁆𑀙𑀦𑁆𑀢𑁄 𑀓𑀸𑀭𑀡𑀲𑁆𑀲 𑀘 𑀢𑀺𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀬𑀣𑀸𑀧𑀝𑀺𑀜𑁆𑀜𑀸𑀢𑁂 𑀅𑀢𑁆𑀣𑁂 𑀲𑀸𑀥𑀺𑀢𑁂 𑀲𑀫𑁆𑀫𑀤𑁂𑀯 𑀅𑀦𑀼𑀧𑀘𑁆𑀙𑀸 𑀪𑀸𑀲𑀦𑁆𑀢𑁄 𑀦𑀺𑀕𑀫𑁂𑀦𑁆𑀢𑁄 𑀲𑀫𑀦𑀼𑀪𑀸𑀲𑀢𑀺 𑀦𑀸𑀫. 𑀉𑀧𑀲𑀁𑀳𑀭𑀺𑀢𑁆𑀯𑀸𑀢𑀺 𑀉𑀧𑀦𑁂𑀢𑁆𑀯𑀸. ‘‘𑀓𑀺𑀁 𑀢𑁂’’𑀢𑀺𑀆𑀤𑀺 𑀉𑀧𑀲𑀁𑀳𑀭𑀡𑀸𑀓𑀸𑀭𑀤𑀲𑁆𑀲𑀦𑀁. 𑀤𑀼𑀢𑀺𑀬𑀧𑀤𑁂𑀢𑀺 ‘‘𑀲𑀗𑁆𑀖𑁂𑀦 𑀯𑀸 𑀲𑀗𑁆𑀖’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂.

𑀢𑀫𑀢𑁆𑀣𑀦𑁆𑀢𑀺 𑀢𑀁 𑀧𑀳𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀦𑀲𑀗𑁆𑀔𑀸𑀢𑀜𑁆𑀘 𑀲𑀫𑀸𑀤𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀅𑀦𑀯𑀲𑁂𑀲𑀁 𑀲𑀫𑀸𑀤𑀸𑀬 𑀯𑀢𑁆𑀢𑀦𑀲𑀗𑁆𑀔𑀸𑀢𑀜𑁆𑀘 𑀅𑀢𑁆𑀣𑀁. 𑀬𑁄𑀚𑁂𑀢𑁆𑀯𑀸𑀢𑀺 𑀅𑀓𑀼𑀲𑀮𑀸𑀤𑀺𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸. 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑀸 𑀘𑁂𑀯 𑀢𑀢𑁄𑀬𑁂𑀯 𑀅𑀓𑀼𑀲𑀮𑀸𑀢𑀺 𑀘 𑀲𑀗𑁆𑀔𑀁 𑀕𑀢𑀸𑀢𑀺 𑀲𑀗𑁆𑀔𑀸𑀢𑀸 𑀢𑀢𑁆𑀣 𑀧𑀼𑀭𑀺𑀫𑀧𑀤𑁂𑀦 𑀏𑀓𑀦𑁆𑀢𑀸𑀓𑀼𑀲𑀮𑁂 𑀯𑀤𑀢𑀺, 𑀤𑀼𑀢𑀺𑀬𑀧𑀤𑁂𑀦 𑀢𑀁𑀲𑀳𑀕𑀢𑁂, 𑀢𑀁𑀧𑀓𑁆𑀔𑀺𑀬𑁂 𑀘, 𑀢𑁂𑀦𑀸𑀳 ‘‘𑀓𑁄𑀝𑁆𑀞𑀸𑀲𑀁 𑀯𑀸 𑀓𑀢𑁆𑀯𑀸 𑀞𑀧𑀺𑀢𑀸’’𑀢𑀺, 𑀅𑀓𑀼𑀲𑀮𑀧𑀓𑁆𑀔𑀺𑀬𑀪𑀸𑀯𑁂𑀦 𑀯𑀯𑀢𑁆𑀣𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀯𑀚𑁆𑀚𑀝𑁆𑀞𑁄 𑀤𑁄𑀲𑀝𑁆𑀞𑁄 𑀕𑀸𑀭𑀬𑁆𑀳𑀧𑀭𑀺𑀬𑀸𑀬𑀢𑁆𑀢𑀸𑀢𑀺 𑀆𑀳 ‘‘𑀲𑀸𑀯𑀚𑁆𑀚𑀸𑀢𑀺 𑀲𑀤𑁄𑀲𑀸’’𑀢𑀺. 𑀅𑀭𑀺𑀬𑀸 𑀦𑀸𑀫 𑀦𑀺𑀤𑁆𑀤𑁄𑀲𑀸, 𑀇𑀫𑁂 𑀧𑀦 𑀓𑀢𑁆𑀣𑀘𑀺𑀧𑀺 𑀦𑀺𑀤𑁆𑀤𑁄𑀲𑀸 𑀦 𑀳𑁄𑀦𑁆𑀢𑀻𑀢𑀺 𑀦𑀺𑀤𑁆𑀤𑁄𑀲𑀝𑁆𑀞𑁂𑀦 𑀅𑀭𑀺𑀬𑀸 𑀪𑀯𑀺𑀢𑀼𑀁 𑀦𑀸𑀮𑀁 𑀅𑀲𑀫𑀢𑁆𑀣𑀸.

𑁩𑁮𑁬-𑁩𑁯𑁨. 𑀬𑀦𑁆𑀢𑀺 𑀓𑀸𑀭𑀡𑁂 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀬𑁂𑀦 𑀯𑀺𑀜𑁆𑀜𑀽’’𑀢𑀺. 𑀬𑀁 𑀯𑀸 𑀧𑀦𑀸𑀢𑀺 ‘‘𑀬𑀁 𑀧𑀦 𑀓𑀺𑀜𑁆𑀘𑀻’’𑀢𑀺 𑀅𑀲𑀫𑁆𑀪𑀸𑀯𑀦𑀯𑀘𑀦𑀫𑁂𑀢𑀦𑁆𑀢𑀺 𑀆𑀳 ‘‘𑀬𑀁 𑀯𑀸 𑀢𑀁 𑀯𑀸 𑀅𑀧𑁆𑀧𑀫𑀢𑁆𑀢𑀓’’𑀦𑁆𑀢𑀺. 𑀕𑀡𑀸𑀘𑀭𑀺𑀬𑀸 𑀧𑀽𑀭𑀡𑀸𑀤𑀬𑁄. 𑀲𑀢𑁆𑀣𑀼𑀧𑁆𑀧𑀪𑀯𑀢𑁆𑀢𑀸 𑀲𑀗𑁆𑀖𑀲𑁆𑀲 𑀲𑀗𑁆𑀖𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺 𑀯𑀺𑀪𑀸𑀯𑀻𑀬𑀢𑀻𑀢𑀺 𑀆𑀳 ‘‘𑀲𑀗𑁆𑀖𑀧𑀲𑀁𑀲𑀸𑀬𑀧𑀺 𑀲𑀢𑁆𑀣𑀼𑀬𑁂𑀯 𑀧𑀲𑀁𑀲𑀸𑀲𑀺𑀤𑁆𑀥𑀺𑀢𑁄’’𑀢𑀺. 𑀲𑀸 𑀧𑀦 𑀧𑀲𑀁𑀲𑀸 𑀧𑀲𑀸𑀤𑀳𑁂𑀢𑀼𑀓𑀸𑀢𑀺 𑀧𑀲𑀸𑀤𑀫𑀼𑀔𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀲𑀻𑀤𑀫𑀸𑀦𑀸𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀬𑀣𑀸 𑀅𑀦𑁆𑀯𑀬𑀢𑁄 𑀧𑀲𑀁𑀲𑀸 𑀲𑀫𑀼𑀘𑁆𑀘𑀻𑀬𑀢𑀺, 𑀏𑀯𑀁 𑀲𑀢𑁆𑀣𑀼𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀸𑀯𑀓𑁂𑀲𑀼, 𑀲𑀸𑀯𑀓𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀘 𑀲𑀢𑁆𑀣𑀭𑀺 𑀅𑀧𑁆𑀧𑀲𑀸𑀤𑁄 𑀲𑀫𑀼𑀘𑁆𑀘𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀁, 𑀭𑀽𑀧𑀓𑀸𑀬𑀧𑀸𑀭𑀺𑀧𑀽𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑀭𑀽𑀧𑀧𑁆𑀧𑀫𑀸𑀡𑀸, 𑀖𑁄𑀲𑀥𑀫𑁆𑀫𑀧𑁆𑀧𑀫𑀸𑀡𑀸 𑀘. 𑀧𑀼𑀦 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄𑀢𑀺 𑀥𑀫𑁆𑀫𑀧𑁆𑀧𑀫𑀸𑀡𑀯𑀲𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀬𑀸 𑀲𑀗𑁆𑀖𑀲𑁆𑀲 𑀧𑀲𑀁𑀲𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣 𑀬𑀸 𑀩𑀼𑀤𑁆𑀥𑀸𑀦𑀁, 𑀩𑀼𑀤𑁆𑀥𑀲𑀸𑀯𑀓𑀸𑀦𑀁𑀬𑁂𑀯 𑀘 𑀧𑀸𑀲𑀁𑀲𑀢𑀸, 𑀅𑀜𑁆𑀜𑁂𑀲𑀜𑁆𑀘 𑀢𑀤𑀪𑀸𑀯𑁄 𑀚𑁄𑀢𑀺𑀢𑁄, 𑀢𑀁 𑀯𑀺𑀭𑀢𑀺𑀧𑁆𑀧𑀳𑀸𑀦𑀲𑀁𑀯𑀭𑀼𑀤𑁆𑀤𑁂𑀲𑀯𑀲𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀫𑀥𑀺𑀧𑁆𑀧𑀸𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁂𑀢𑀼𑀖𑀸𑀢𑀯𑀺𑀭𑀢𑀺 𑀦𑀸𑀫 𑀅𑀭𑀺𑀬𑀫𑀕𑁆𑀕𑀯𑀺𑀭𑀢𑀺. 𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑀯𑀲𑁂𑀦𑀸𑀢𑀺 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀸 ‘‘𑀤𑀼𑀓𑁆𑀔’’𑀦𑁆𑀢𑀺 𑀯𑀸 𑀯𑀺𑀯𑀺𑀥𑀁 𑀤𑀲𑁆𑀲𑀦𑀫𑀢𑁆𑀢𑀯𑀲𑁂𑀦, 𑀦 𑀧𑀦 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀧𑀘𑁆𑀘𑀬𑀧𑀭𑀺𑀕𑁆𑀕𑀡𑁆𑀳𑀦𑀧𑀼𑀩𑁆𑀩𑀓𑀁 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑀸𑀦𑀁 𑀲𑀫𑁆𑀫𑀲𑀦𑀯𑀲𑁂𑀦. 𑀇𑀢𑀭𑀸𑀦𑀻𑀢𑀺 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀸𑀦𑀺. ‘‘𑀲𑁂𑀲’’𑀦𑁆𑀢𑀺 𑀧𑀜𑁆𑀘𑀲𑀻𑀮𑀢𑁄 𑀅𑀜𑁆𑀜𑁄 𑀲𑀩𑁆𑀩𑁄 𑀲𑀻𑀮𑀲𑀁𑀯𑀭𑁄, ‘‘𑀔𑀫𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁪; 𑁩.𑁧𑁫𑁯; 𑀅. 𑀦𑀺. 𑁪.𑁧𑁧𑁪) 𑀯𑀼𑀢𑁆𑀢𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀔𑀦𑁆𑀢𑀺𑀲𑀁𑀯𑀭𑁄, ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂’’𑀢𑀺 (𑀲𑀼. 𑀦𑀺. 𑁧𑁦𑁪𑁧; 𑀘𑀽𑀴𑀦𑀺. 𑁬𑁦) 𑀏𑀯𑀁 𑀯𑀼𑀢𑁆𑀢𑁄 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀓𑁄 𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑁄 𑀜𑀸𑀡𑀲𑀁𑀯𑀭𑁄, 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀺𑀤𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 𑀧𑀭𑀺𑀲𑀼𑀤𑁆𑀥𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁪𑁦𑁨; 𑀫. 𑀦𑀺. 𑁧.𑁧𑁩𑁫; 𑀲𑀁. 𑀦𑀺. 𑁫.𑁮; 𑀯𑀺𑀪. 𑁨𑁦𑁫) 𑀯𑀼𑀢𑁆𑀢𑁄 𑀲𑀫𑁆𑀫𑀧𑁆𑀧𑀥𑀸𑀦𑀲𑀗𑁆𑀔𑀸𑀢𑁄 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀇𑀫𑀁 𑀲𑀁𑀯𑀭𑀧𑀜𑁆𑀘𑀓𑀁 𑀲𑀦𑁆𑀥𑀸𑀬𑀸𑀳. 𑀧𑀜𑁆𑀘 𑀔𑁄 𑀧𑀦𑀺𑀫𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀢𑀺𑀆𑀤𑀺 𑀲𑀸𑀲𑀦𑁂 𑀲𑀻𑀮𑀲𑁆𑀲 𑀩𑀳𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑁂𑀓𑀤𑁂𑀲𑁂 𑀏𑀯 𑀧𑀭𑁂𑀲𑀁 𑀅𑀯𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 𑀬𑀣𑀸𑀯𑀼𑀢𑁆𑀢𑀲𑀻𑀮𑀲𑀁𑀯𑀭𑀲𑁆𑀲𑁂𑀯 𑀧𑀼𑀦 𑀕𑀳𑀡𑀁.

𑀅𑀭𑀺𑀬𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀡𑁆𑀡𑀦𑀸

𑁩𑁯𑁩. 𑀲𑀻𑀳𑀦𑀸𑀤𑀦𑁆𑀢𑀺 𑀲𑁂𑀝𑁆𑀞𑀦𑀸𑀤𑀁, 𑀅𑀪𑀻𑀢𑀦𑀸𑀤𑀁 𑀓𑁂𑀦𑀘𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑀸𑀤𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀬𑀁 𑀬𑀣𑀸𑀯𑀼𑀢𑁆𑀢𑁄 𑀫𑀫 𑀯𑀸𑀤𑁄 𑀅𑀯𑀺𑀧𑀭𑀻𑀢𑁄, 𑀢𑀲𑁆𑀲 𑀅𑀯𑀺𑀧𑀭𑀻𑀢𑀪𑀸𑀯𑁄 𑀇𑀫𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀧𑀭𑀧𑁆𑀧𑀘𑁆𑀘𑀬𑀢𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀏𑀯𑀁 𑀅𑀯𑀺𑀧𑀭𑀻𑀢𑀪𑀸𑀯𑀸𑀯𑀩𑁄𑀥𑀦𑀢𑁆𑀣𑀁. ‘‘𑀅𑀢𑁆𑀣𑀺 𑀓𑀲𑁆𑀲𑀧𑀸’’𑀢𑀺𑀆𑀤𑀻𑀲𑀼 𑀬𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀲𑀫𑀡𑁄 𑀕𑁄𑀢𑀫𑁄 𑀯𑀤𑀦𑁆𑀢𑁄 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂, 𑀢𑀣𑀪𑀸𑀯𑀢𑁄 𑀪𑀽𑀢𑀁, 𑀏𑀓𑀁𑀲𑀢𑁄 𑀳𑀺𑀢𑀸𑀯𑀺𑀳𑀪𑀸𑀯𑁂𑀦 𑀅𑀢𑁆𑀣𑀁, 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀁, 𑀯𑀺𑀦𑀬𑀬𑁄𑀕𑀢𑁄 𑀧𑀭𑁂𑀲𑀁 𑀯𑀺𑀦𑀬𑀦𑀢𑁄 𑀘 𑀯𑀺𑀦𑀬𑀁 𑀯𑀤𑀢𑀻𑀢𑀺 𑀲𑀸𑀫𑀁𑀬𑁂𑀯 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑁄𑀯 𑀚𑀸𑀦𑀺𑀲𑁆𑀲𑀢𑀺, 𑀲𑁄 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑁄 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀪𑀽𑀢𑁄 𑀅𑀢𑁆𑀣𑀺 𑀓𑀲𑁆𑀲𑀧 𑀫𑀕𑁆𑀕𑁄, 𑀢𑀲𑁆𑀲 𑀘 𑀅𑀥𑀺𑀕𑀫𑀽𑀧𑀸𑀬𑀪𑀽𑀢𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀢𑀺 𑀅𑀬𑀫𑁂𑀢𑁆𑀣 𑀬𑁄𑀚𑀦𑀸. 𑀢𑁂𑀦 ‘‘𑀲𑀫𑀡𑁄 𑀕𑁄𑀢𑀫𑁄 𑀇𑀫𑁂 𑀥𑀫𑁆𑀫𑁂’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀯𑀸𑀤𑁄 𑀓𑁂𑀦𑀘𑀺 𑀅𑀲𑀁𑀓𑀫𑁆𑀧𑀺𑀬𑁄 𑀬𑀣𑀸𑀪𑀽𑀢𑀲𑀻𑀳𑀦𑀸𑀤𑁄𑀢𑀺 𑀤𑀲𑁆𑀲𑁂𑀢𑀺.

‘‘𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁩𑁪) 𑀯𑀺𑀬 𑀫𑀕𑁆𑀕𑀜𑁆𑀘 𑀧𑀝𑀺𑀧𑀤𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄. ‘‘𑀅𑀬𑀫𑁂𑀯𑀸’’𑀢𑀺 𑀯𑀘𑀦𑀁 𑀫𑀕𑁆𑀕𑀲𑁆𑀲 𑀧𑀼𑀣𑀼𑀪𑀸𑀯𑀧𑀝𑀺𑀓𑁆𑀔𑁂𑀧𑀦𑀢𑁆𑀣𑀁, 𑀲𑀩𑁆𑀩𑀅𑀭𑀺𑀬𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀲𑀸𑀲𑀦𑁂 𑀧𑀸𑀓𑀝𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘. 𑀢𑁂𑀦𑀸𑀳 ‘‘𑀏𑀓𑀸𑀬𑀦𑁄 𑀅𑀬𑀁 𑀪𑀺𑀓𑁆𑀔𑀯𑁂 𑀫𑀕𑁆𑀕𑁄’’𑀢𑀺, (𑀤𑀻. 𑀦𑀺. 𑁨.𑁩𑁭𑁩; 𑀫. 𑀦𑀺. 𑁧.𑁧𑁦𑁬; 𑀲𑀁. 𑀦𑀺. 𑁫.𑁩𑁬𑁭, 𑁩𑁮𑁪, 𑁪𑁦𑁯)‘‘𑀏𑀲𑁂𑀯 𑀫𑀕𑁆𑀕𑁄 𑀦𑀢𑁆𑀣𑀜𑁆𑀜𑁄 𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 (𑀥. 𑀧. 𑁨𑁭𑁪),

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻,

𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂,

𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺. (𑀲𑀁. 𑀦𑀺. 𑁫.𑁩𑁮𑁪, 𑁪𑁦𑁯; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑁧𑁦𑁭, 𑁧𑁨𑁧; 𑀦𑁂𑀢𑁆𑀢𑀺. 𑁧𑁭𑁦);

𑀲𑀩𑁆𑀩𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑁂𑀲𑀼 𑀅𑀪𑀺𑀥𑀫𑁆𑀫𑀧𑀤𑁂𑀲𑁂𑀲𑀼 𑀘 𑀏𑀓𑁄𑀯𑀸𑀬𑀁 𑀫𑀕𑁆𑀕𑁄 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄 𑀆𑀕𑀢𑁄 𑀘𑀸𑀢𑀺.

𑀢𑀧𑁄𑀧𑀓𑁆𑀓𑀫𑀓𑀣𑀸𑀯𑀡𑁆𑀡𑀦𑀸

𑁩𑁯𑁪. 𑀢𑀧𑁄𑀬𑁂𑀯 𑀉𑀧𑀓𑁆𑀓𑀫𑀺𑀢𑀩𑁆𑀩𑀢𑁄 𑀆𑀭𑀪𑀺𑀢𑀩𑁆𑀩𑀢𑁄 𑀢𑀧𑁄𑀧𑀓𑁆𑀓𑀫𑁄𑀢𑀺 𑀆𑀳 ‘‘𑀢𑀧𑀸𑀭𑀫𑁆𑀪𑀸’’𑀢𑀺. 𑀆𑀭𑀫𑁆𑀪𑀦𑀜𑁆𑀘𑁂𑀢𑁆𑀣 𑀓𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀢𑀧𑁄𑀓𑀫𑁆𑀫𑀸𑀦𑀻𑀢𑀺 𑀅𑀢𑁆𑀣𑁄’’𑀢𑀺. 𑀲𑀫𑀡𑀓𑀫𑁆𑀫𑀲𑀗𑁆𑀔𑀸𑀢𑀸𑀢𑀺 𑀲𑀫𑀡𑁂𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑀲𑀜𑁆𑀜𑀺𑀢𑀸. 𑀦𑀺𑀘𑁆𑀘𑁄𑀮𑁄𑀢𑀺 𑀦𑀺𑀲𑁆𑀲𑀝𑁆𑀞𑀘𑁂𑀮𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀢𑁆𑀢𑀘𑁂𑀮𑁄. 𑀦𑀕𑁆𑀕𑀺𑀬𑀯𑀢𑀲𑀫𑀸𑀤𑀸𑀦𑁂𑀦 𑀦𑀕𑁆𑀕𑁄. ‘‘𑀞𑀺𑀢𑀓𑁄𑀯 𑀉𑀘𑁆𑀘𑀸𑀭𑀁 𑀓𑀭𑁄𑀢𑀻’’𑀢𑀺𑀆𑀤𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀯𑀫𑀺𑀢𑁆𑀯𑀸 𑀫𑀼𑀔𑀯𑀺𑀓𑁆𑀔𑀸𑀮𑀦𑀸𑀤𑀺𑀆𑀘𑀸𑀭𑀲𑁆𑀲𑀧𑀺 𑀢𑁂𑀦 𑀯𑀺𑀲𑁆𑀲𑀝𑁆𑀞𑀢𑁆𑀢𑀸. 𑀚𑀺𑀯𑁆𑀳𑀸𑀬 𑀳𑀢𑁆𑀣𑀁 𑀅𑀧𑀮𑀺𑀔𑀢𑀺 𑀅𑀧𑀮𑀺𑀳𑀢𑀺 𑀉𑀤𑀓𑁂𑀦 𑀅𑀥𑁄𑀯𑀦𑀢𑁄. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀏𑀳𑀺 𑀪𑀤𑁆𑀤𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀉𑀧𑀕𑀫𑀦𑀲𑀗𑁆𑀔𑀸𑀢𑁄 𑀯𑀺𑀥𑀺 𑀏𑀳𑀺𑀪𑀤𑁆𑀤𑀦𑁆𑀢𑁄, 𑀢𑀁 𑀘𑀭𑀢𑀻𑀢𑀺 𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀦 𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄. 𑀦 𑀓𑀭𑁄𑀢𑀺 𑀲𑀫𑀡𑁂𑀦 𑀦𑀸𑀫 𑀧𑀭𑀲𑁆𑀲 𑀯𑀘𑀦𑀓𑀭𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦. 𑀧𑀼𑀭𑁂𑀢𑀭𑀦𑁆𑀢𑀺 𑀢𑀁 𑀞𑀸𑀦𑀁 𑀅𑀢𑁆𑀢𑀦𑁄 𑀉𑀧𑀕𑀫𑀦𑀢𑁄 𑀧𑀼𑀭𑁂𑀢𑀭𑀁. 𑀢𑀁 𑀓𑀺𑀭 𑀲𑁄 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀬𑀸𑀤𑀺𑀘𑁆𑀙𑀓𑀻 𑀏𑀯 𑀪𑀺𑀓𑁆𑀔𑀸 𑀕𑀳𑁂𑀢𑀩𑁆𑀩𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀦 𑀕𑀡𑁆𑀳𑀸𑀢𑀺. 𑀉𑀤𑁆𑀤𑀺𑀲𑁆𑀲𑀓𑀢𑀁 ‘‘𑀫𑀫 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀩𑀳𑀽 𑀔𑀼𑀤𑁆𑀤𑀓𑀸 𑀧𑀸𑀡𑀸 𑀲𑀗𑁆𑀖𑀸𑀢𑀁 𑀆𑀧𑀸𑀤𑀺𑀢𑀸’’𑀢𑀺 𑀦 𑀕𑀡𑁆𑀳𑀸𑀢𑀺. 𑀦𑀺𑀫𑀦𑁆𑀢𑀦𑀁 𑀦 𑀲𑀸𑀤𑀺𑀬𑀢𑀺 ‘‘𑀏𑀯𑀁 𑀢𑁂𑀲𑀁 𑀯𑀘𑀦𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀓𑀼𑀫𑁆𑀪𑀻𑀆𑀤𑀻𑀲𑀼𑀧𑀺 𑀲𑁄 𑀲𑀢𑁆𑀢𑀲𑀜𑁆𑀜𑀻𑀢𑀺 𑀆𑀳 ‘‘𑀓𑀼𑀫𑁆𑀪𑀻𑀓𑀴𑁄𑀧𑀺𑀬𑁄’’𑀢𑀺𑀆𑀤𑀺.

𑀓𑀩𑀴𑀦𑁆𑀢𑀭𑀸𑀬𑁄𑀢𑀺 𑀓𑀩𑀴𑀲𑁆𑀲 𑀅𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺. 𑀕𑀸𑀫𑀲𑀪𑀸𑀕𑀸𑀤𑀺𑀯𑀲𑁂𑀦 𑀲𑀗𑁆𑀕𑀫𑁆𑀫 𑀓𑀺𑀢𑁆𑀢𑁂𑀦𑁆𑀢𑀺 𑀏𑀢𑀺𑀲𑁆𑀲𑀸𑀢𑀺 𑀲𑀗𑁆𑀓𑀺𑀢𑁆𑀢𑀺, 𑀢𑀣𑀸 𑀲𑀁𑀳𑀝𑀢𑀡𑁆𑀟𑀼𑀮𑀸𑀤𑀺𑀲𑀜𑁆𑀘𑀬𑁄. 𑀫𑀦𑀼𑀲𑁆𑀲𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀫𑀦𑀼𑀲𑁆𑀲𑀸.

𑀲𑀼𑀭𑀸𑀧𑀸𑀦𑀫𑁂𑀯𑀸𑀢𑀺 𑀫𑀚𑁆𑀚𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀬 𑀲𑀼𑀭𑀸𑀬 𑀧𑀸𑀦𑀫𑁂𑀯 𑀲𑀼𑀭𑀸𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀫𑁂𑀭𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀁. 𑀏𑀓𑀸𑀕𑀸𑀭𑀫𑁂𑀯 𑀉𑀜𑁆𑀙𑀢𑀻𑀢𑀺 𑀏𑀓𑀸𑀕𑀸𑀭𑀺𑀓𑁄. 𑀏𑀓𑀸𑀮𑁄𑀧𑁂𑀦𑁂𑀯 𑀯𑀢𑁆𑀢𑀢𑀻𑀢𑀺 𑀏𑀓𑀸𑀮𑁄𑀧𑀺𑀓𑁄. 𑀤𑀻𑀬𑀢𑀺 𑀏𑀢𑀸𑀬𑀸𑀢𑀺 𑀤𑀢𑁆𑀢𑀺, 𑀤𑁆𑀯𑀢𑁆𑀢𑀺𑀆𑀮𑁄𑀧𑀫𑀢𑁆𑀢𑀕𑀸𑀳𑀺 𑀔𑀼𑀤𑁆𑀤𑀓𑀁 𑀪𑀺𑀓𑁆𑀔𑀸𑀤𑀸𑀦𑀪𑀸𑀚𑀦𑀁, 𑀢𑁂𑀦𑀸𑀳 ‘‘𑀔𑀼𑀤𑁆𑀤𑀓𑀧𑀸𑀢𑀻’’𑀢𑀺. 𑀅𑀪𑀼𑀜𑁆𑀚𑀦𑀯𑀲𑁂𑀦 𑀏𑀓𑁄 𑀅𑀳𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀸𑀳𑀺𑀓𑁄, 𑀆𑀳𑀸𑀭𑁄. 𑀢𑀁 𑀏𑀓𑀸𑀳𑀺𑀓𑀁, 𑀲𑁄 𑀧𑀦 𑀅𑀢𑁆𑀣𑀢𑁄 𑀏𑀓𑀤𑀺𑀯𑀲𑀮𑀗𑁆𑀖𑀓𑁄𑀢𑀺 𑀆𑀳 ‘‘𑀏𑀓𑀤𑀺𑀯𑀲𑀦𑁆𑀢𑀭𑀺𑀓’’𑀦𑁆𑀢𑀺. ‘‘𑀤𑁆𑀯𑀻𑀳𑀺𑀓’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀸𑀳𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀸𑀳𑀁 𑀪𑀼𑀜𑁆𑀚𑀦𑀁 𑀏𑀓𑀸𑀳𑀯𑀸𑀭𑁄, 𑀢𑀁 𑀏𑀓𑀸𑀳𑀺𑀓𑀫𑁂𑀯 𑀅𑀢𑁆𑀣𑀢𑁄. 𑀤𑁆𑀯𑀻𑀳𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀤𑁆𑀯𑀻𑀳𑀁 𑀪𑀼𑀜𑁆𑀚𑀦𑀁 𑀤𑁆𑀯𑀻𑀳𑀯𑀸𑀭𑁄. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀓𑁆𑀓𑀝𑁆𑀞𑁄 𑀧𑀦 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀺𑀓𑁄 𑀤𑁆𑀯𑀻𑀳𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀸𑀳𑀫𑁂𑀯 𑀪𑀼𑀜𑁆𑀚𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁩𑁯𑁫. 𑀓𑀼𑀡𑁆𑀟𑀓𑀦𑁆𑀢𑀺 𑀢𑀦𑀼𑀢𑀭𑀁 𑀢𑀡𑁆𑀟𑀼𑀮𑀲𑀓𑀮𑀁.

𑁩𑁯𑁬. 𑀲𑀡𑁂𑀳𑀺 𑀲𑀡𑀯𑀸𑀓𑁂𑀳𑀺 𑀦𑀺𑀩𑁆𑀩𑀢𑁆𑀢𑀯𑀢𑁆𑀣𑀸𑀦𑀺 𑀲𑀸𑀡𑀸𑀦𑀺. 𑀫𑀺𑀲𑁆𑀲𑀲𑀸𑀡𑀸𑀦𑀺 𑀫𑀲𑀸𑀡𑀸𑀦𑀺, 𑀦 𑀪𑀗𑁆𑀕𑀸𑀦𑀺. 𑀏𑀭𑀓𑀢𑀺𑀡𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀓𑁆𑀓𑀫𑀓𑀘𑀺𑀓𑀤𑀮𑀻𑀯𑀸𑀓𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀏𑀭𑀓𑀸𑀤𑀻𑀳𑀺 𑀓𑀢𑀸𑀦𑀺 𑀳𑀺 𑀙𑀯𑀸𑀦𑀺 𑀮𑀸𑀫𑀓𑀸𑀦𑀺 𑀤𑀼𑀲𑁆𑀲𑀸𑀦𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀦𑁆𑀢𑀺.

𑀫𑀺𑀘𑁆𑀙𑀸𑀯𑀸𑀬𑀸𑀫𑀯𑀲𑁂𑀦𑁂𑀯 𑀉𑀓𑁆𑀓𑀼𑀝𑀺𑀓𑀯𑀢𑀸𑀦𑀼𑀬𑁄𑀕𑁄𑀢𑀺 𑀆𑀳 ‘‘𑀉𑀓𑁆𑀓𑀼𑀝𑀺𑀓𑀯𑀻𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄’’𑀢𑀺. 𑀣𑀡𑁆𑀟𑀺𑀮𑀦𑁆𑀢𑀺 𑀯𑀸 𑀲𑀫𑀸 𑀧𑀓𑀢𑀺𑀪𑀽𑀫𑀺 𑀯𑀼𑀘𑁆𑀘𑀢𑀺 ‘‘𑀧𑀢𑁆𑀣𑀡𑁆𑀟𑀺𑀮𑁂 𑀧𑀸𑀢𑀼𑀭𑀳𑁄𑀲𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁪.𑁧𑁦) 𑀯𑀺𑀬, 𑀢𑀲𑁆𑀫𑀸 𑀣𑀡𑁆𑀟𑀺𑀮𑀲𑁂𑀬𑁆𑀬𑀦𑁆𑀢𑀺 𑀅𑀦𑀦𑁆𑀢𑀭𑀳𑀺𑀢𑀸𑀬 𑀧𑀓𑀢𑀺𑀪𑀽𑀫𑀺𑀬𑀁 𑀲𑁂𑀬𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀤𑁆𑀥𑀁 𑀆𑀲𑀦𑀦𑁆𑀢𑀺 𑀦𑀺𑀲𑀻𑀤𑀺𑀢𑀼𑀁 𑀬𑀣𑀸𑀮𑀤𑁆𑀥𑀁 𑀆𑀲𑀦𑀁. 𑀅𑀓𑁄𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑀢𑁆𑀣 𑀅𑀦𑀼𑀧𑀕𑀦𑁆𑀢𑁆𑀯𑀸, 𑀢𑁂𑀦𑀸𑀳 ‘‘𑀢𑀢𑁆𑀣𑁂𑀯 𑀦𑀺𑀲𑀻𑀤𑀦𑀲𑀻𑀮𑁄’’𑀢𑀺. 𑀲𑁄 𑀳𑀺 𑀢𑀁 𑀅𑀙𑀟𑁆𑀟𑁂𑀦𑁆𑀢𑁄 𑀅𑀧𑀭𑀺𑀘𑁆𑀘𑀚𑀦𑁆𑀢𑁄 𑀅𑀓𑁄𑀧𑁂𑀦𑁆𑀢𑁄 𑀦𑀸𑀫 𑀳𑁄𑀢𑀺. 𑀯𑀺𑀓𑀝𑀦𑁆𑀢𑀺 𑀕𑀽𑀣𑀁 𑀯𑀼𑀘𑁆𑀘𑀢𑀺 𑀆𑀲𑀬𑀯𑀲𑁂𑀦 𑀯𑀺𑀭𑀽𑀧𑀁 𑀚𑀸𑀢𑀦𑁆𑀢𑀺 𑀓𑀢𑁆𑀯𑀸.

𑀏𑀢𑁆𑀣 𑀘 ‘‘𑀅𑀘𑁂𑀮𑀓𑁄 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀯𑀢𑀧𑀤𑀸𑀦𑀺 𑀬𑀸𑀯 ‘‘𑀦 𑀣𑀼𑀲𑁄𑀤𑀓𑀁 𑀧𑀺𑀯𑀢𑀻’’𑀢𑀺 𑀏𑀢𑀸𑀦𑀺 𑀏𑀓𑀯𑀸𑀭𑀸𑀦𑀺. ‘‘𑀏𑀓𑀸𑀕𑀸𑀭𑀺𑀓𑁄 𑀯𑀸’’𑀢𑀺𑀆𑀤𑀻𑀦𑀺 𑀦𑀸𑀦𑀸𑀯𑀸𑀭𑀸𑀦𑀺, 𑀦𑀸𑀦𑀸𑀓𑀸𑀮𑀺𑀓𑀸𑀦𑀺 𑀯𑀸. 𑀢𑀣𑀸 ‘‘𑀲𑀸𑀓𑀪𑀓𑁆𑀔𑁄 𑀯𑀸’’𑀢𑀺𑀆𑀤𑀻𑀦𑀺, ‘‘𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀻’’𑀢𑀺𑀆𑀤𑀻𑀦𑀺 𑀘. 𑀢𑀣𑀸 𑀳𑁂𑀢𑁆𑀣 𑀯𑀸-𑀲𑀤𑁆𑀤𑀕𑁆𑀕𑀳𑀡𑀁, 𑀧𑀺-𑀲𑀤𑁆𑀤𑀕𑁆𑀕𑀳𑀡𑀜𑁆𑀘 𑀓𑀢𑀁. 𑀧𑀺-𑀲𑀤𑁆𑀤𑁄𑀧𑀺 𑀯𑀺𑀓𑀧𑁆𑀧𑀢𑁆𑀣𑁄 𑀏𑀯 𑀤𑀝𑁆𑀞𑀩𑁆𑀩𑁄. 𑀧𑀼𑀭𑀺𑀫𑁂𑀲𑀼 𑀧𑀦 𑀦 𑀓𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀘𑁂𑀮𑀓𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀻’’𑀢𑀺𑀆𑀤𑀺 𑀯𑀘𑀦𑀲𑁆𑀲, ‘‘𑀭𑀚𑁄𑀚𑀮𑁆𑀮𑀥𑀭𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑁄’’𑀢𑀺 𑀯𑀘𑀦𑀲𑁆𑀲 𑀘 𑀅𑀯𑀺𑀭𑁄𑀥𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀅𑀣 𑀯𑀸 𑀓𑀺𑀫𑁂𑀢𑁆𑀣 𑀅𑀯𑀺𑀭𑁄𑀥𑀘𑀺𑀦𑁆𑀢𑀸𑀬. 𑀉𑀫𑁆𑀫𑀢𑁆𑀢𑀓𑀧𑀘𑁆𑀙𑀺𑀲𑀤𑀺𑀲𑁄 𑀳𑀺 𑀢𑀺𑀢𑁆𑀣𑀺𑀬𑀯𑀸𑀤𑁄. 𑀅𑀣 𑀯𑀸 ‘‘𑀅𑀘𑁂𑀮𑀓𑁄 𑀳𑁄𑀢𑀻’’𑀢𑀺 𑀆𑀭𑀪𑀺𑀢𑁆𑀯𑀸 𑀢𑀧𑁆𑀧𑀲𑀗𑁆𑀕𑁂𑀦 𑀲𑀩𑁆𑀩𑀫𑁆𑀧𑀺 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀧𑁄𑀧𑀓𑁆𑀓𑀫𑀦𑀺𑀭𑀢𑁆𑀣𑀓𑀣𑀸𑀯𑀡𑁆𑀡𑀦𑀸

𑁩𑁯𑁭. 𑀲𑀻𑀮𑀲𑀫𑁆𑀧𑀤𑀸𑀤𑀻𑀳𑀺 𑀯𑀺𑀦𑀸𑀢𑀺 𑀲𑀻𑀮𑀲𑀫𑁆𑀧𑀤𑀸, 𑀲𑀫𑀸𑀥𑀺𑀲𑀫𑁆𑀧𑀤𑀸, 𑀧𑀜𑁆𑀜𑀸𑀲𑀫𑁆𑀧𑀤𑀸𑀢𑀺 𑀇𑀫𑀸𑀳𑀺 𑀮𑁄𑀓𑀼𑀢𑁆𑀢𑀭𑀸𑀳𑀺 𑀲𑀫𑁆𑀧𑀤𑀸𑀳𑀺 𑀯𑀺𑀦𑀸 𑀦 𑀓𑀤𑀸𑀘𑀺 𑀲𑀸𑀫𑀜𑁆𑀜𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀲𑀫𑁆𑀪𑀯𑀢𑀺, 𑀬𑀲𑁆𑀫𑀸 𑀘 𑀢𑀤𑁂𑀯𑀁, 𑀢𑀲𑁆𑀫𑀸 𑀢𑁂𑀲𑀁 𑀢𑀧𑁄𑀧𑀓𑁆𑀓𑀫𑀸𑀦𑀁 𑀦𑀺𑀭𑀢𑁆𑀣𑀓𑀢𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀬𑁄𑀚𑀦𑀸. ‘‘𑀤𑁄𑀲𑀯𑁂𑀭𑀯𑀺𑀭𑀳𑀺𑀢’’𑀦𑁆𑀢𑀺 𑀇𑀤𑀁 𑀤𑁄𑀲𑀲𑁆𑀲 𑀫𑁂𑀢𑁆𑀢𑀸𑀬 𑀉𑀚𑀼𑀧𑀝𑀺𑀧𑀓𑁆𑀔𑀢𑀸𑀬 𑀯𑀼𑀢𑁆𑀢𑀁. 𑀤𑁄𑀲-𑀕𑁆𑀕𑀳𑀡𑁂𑀦 𑀯𑀸 𑀲𑀩𑁆𑀩𑁂𑀧𑀺 𑀛𑀸𑀦𑀧𑀝𑀺𑀧𑀓𑁆𑀔𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀕𑀳𑀺𑀢𑀸, 𑀯𑁂𑀭-𑀕𑁆𑀕𑀳𑀡𑁂𑀦 𑀧𑀘𑁆𑀘𑀢𑁆𑀣𑀺𑀓𑀪𑀽𑀢𑀸 𑀲𑀢𑁆𑀢𑀸. 𑀬𑀤𑀕𑁆𑀕𑁂𑀦 𑀳𑀺 𑀤𑁄𑀲𑀭𑀳𑀺𑀢𑀁, 𑀢𑀤𑀕𑁆𑀕𑁂𑀦 𑀯𑁂𑀭𑀭𑀳𑀺𑀢𑀦𑁆𑀢𑀺.

𑁩𑁯𑁮. 𑀧𑀸𑀓𑀝𑀪𑀸𑀯𑁂𑀦 𑀓𑀸𑀬𑀢𑀺 𑀕𑀫𑁂𑀢𑀻𑀢𑀺 𑀧𑀓𑀢𑀺, 𑀮𑁄𑀓𑀲𑀺𑀤𑁆𑀥𑀯𑀸𑀤𑁄, 𑀢𑁂𑀦𑀸𑀳 ‘‘𑀧𑀓𑀢𑀺 𑀔𑁄 𑀏𑀲𑀸𑀢𑀺 𑀧𑀓𑀢𑀺𑀓𑀣𑀸 𑀏𑀲𑀸’’𑀢𑀺. 𑀫𑀢𑁆𑀢𑀸𑀬𑀸𑀢𑀺 𑀫𑀢𑁆𑀢𑀸-𑀲𑀤𑁆𑀤𑁄 ‘‘𑀫𑀢𑁆𑀢𑀸 𑀲𑀼𑀔𑀧𑀭𑀺𑀘𑁆𑀘𑀸𑀕𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁯𑁦) 𑀯𑀺𑀬 𑀅𑀧𑁆𑀧𑀢𑁆𑀣𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀫𑀸𑀡𑀯𑀸𑀘𑀓𑁄𑀢𑀺 𑀆𑀳 ‘‘𑀇𑀫𑀺𑀦𑀸 𑀧𑀫𑀸𑀡𑁂𑀦 𑀏𑀯𑀁 𑀧𑀭𑀺𑀢𑁆𑀢𑀓𑁂𑀦𑀸’’𑀢𑀺. 𑀢𑁂𑀦 𑀧𑀦 𑀧𑀫𑀸𑀡𑁂𑀦 𑀧𑀳𑀸𑀢𑀩𑁆𑀩𑁄 𑀧𑀓𑀭𑀡𑀧𑁆𑀧𑀢𑁆𑀢𑁄 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄𑀢𑀺 𑀆𑀳 ‘‘𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁂𑀦𑀸’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀯𑀸𑀭𑁂𑀲𑀼.

𑁩𑁯𑁯. 𑀅𑀜𑁆𑀜𑀣𑀸 𑀯𑀤𑀣𑀸𑀢𑀺 𑀬𑀤𑀺 𑀅𑀘𑁂𑀮𑀓𑀪𑀸𑀯𑀸𑀤𑀺𑀦𑀸 𑀲𑀸𑀫𑀜𑁆𑀜𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀅𑀪𑀯𑀺𑀲𑁆𑀲, 𑀲𑀼𑀯𑀺𑀚𑀸𑀦𑁄𑀯 𑀲𑀫𑀡𑁄 𑀲𑀼𑀯𑀺𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄. 𑀬𑀲𑁆𑀫𑀸 𑀧𑀦 𑀢𑀼𑀫𑁆𑀳𑁂 𑀇𑀢𑁄 𑀅𑀜𑁆𑀜𑀣𑀸𑀯 𑀲𑀸𑀫𑀜𑁆𑀜𑀁 𑀩𑁆𑀭𑀳𑁆𑀫𑀜𑁆𑀜𑀜𑁆𑀘 𑀯𑀤𑀣, 𑀢𑀲𑁆𑀫𑀸 𑀤𑀼𑀚𑁆𑀚𑀸𑀦𑁄𑀯 𑀲𑀫𑀡𑁄 𑀤𑀼𑀚𑁆𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄, 𑀢𑁂𑀦𑀸𑀳 ‘‘𑀇𑀤𑀁 𑀲𑀦𑁆𑀥𑀸𑀬𑀸𑀳𑀸’’𑀢𑀺. 𑀢𑀁 𑀧𑀓𑀢𑀺𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀬𑀁 𑀧𑀸𑀓𑀢𑀺𑀓𑀁 𑀲𑀸𑀫𑀜𑁆𑀜𑀁 𑀩𑁆𑀭𑀳𑁆𑀫𑀜𑁆𑀜𑀜𑁆𑀘 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀢𑁂𑀦 ‘‘𑀤𑀼𑀓𑁆𑀓𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀫𑁂𑀯 𑀲𑀦𑁆𑀥𑀸𑀬 𑀪𑀕𑀯𑀢𑀸𑀧𑀺 ‘‘𑀧𑀓𑀢𑀺 𑀔𑁄 𑀏𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀢𑀁 𑀧𑀓𑀢𑀺𑀯𑀸𑀤𑀁 𑀧𑀸𑀓𑀢𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀯𑀺𑀲𑀬𑀁 𑀓𑀣𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀲𑀪𑀸𑀯𑀢𑁄𑀯 𑀧𑀭𑀫𑀢𑁆𑀣𑀢𑁄𑀯 𑀲𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀤𑀼𑀚𑁆𑀚𑀸𑀦𑀪𑀸𑀯𑀁 𑀆𑀯𑀺𑀓𑀭𑁄𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑁄. 𑀢𑀢𑁆𑀭𑀸𑀧𑀻𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀯𑀸𑀤𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯.

𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀫𑁆𑀧𑀤𑀸𑀯𑀡𑁆𑀡𑀦𑀸

𑁪𑁦𑁦-𑁧. 𑀧𑀡𑁆𑀟𑀺𑀢𑁄𑀢𑀺 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑁂𑀦 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀓𑀣𑀁 𑀉𑀕𑁆𑀕𑀳𑁂𑀲𑀺 𑀧𑀭𑀺𑀧𑀓𑁆𑀓𑀜𑀸𑀡𑀢𑁆𑀢𑀸 𑀖𑀝𑁂 𑀧𑀤𑀻𑀧𑁂𑀦 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀲𑀫𑀼𑀚𑁆𑀚𑀮𑀦𑁆𑀢𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀪𑀕𑀯𑀢𑀸 𑀤𑁂𑀲𑀺𑀢𑀫𑀢𑁆𑀣𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀫𑁆𑀧𑀺 𑀤𑁂𑀲𑀦𑀁 𑀉𑀧𑀥𑀸𑀭𑁂𑀲𑀺. 𑀢𑀲𑁆𑀲 𑀘𑀸𑀢𑀺 𑀬𑁄 𑀅𑀘𑁂𑀮𑀓𑁄 𑀳𑁄𑀢𑀺 𑀬𑀸𑀯 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀢𑀲𑁆𑀲 𑀘. 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀼𑀘𑁆𑀙𑀸𑀫𑀺, 𑀬𑀸𑀳𑀺 𑀲𑀫𑀡𑁄 𑀘 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀻𑀮𑀲𑀫𑁆𑀧𑀤𑀸𑀬𑀸𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 ‘‘𑀘𑀺𑀢𑁆𑀢𑀲𑀫𑁆𑀧𑀤𑀸𑀬 𑀧𑀜𑁆𑀜𑀸𑀲𑀫𑁆𑀧𑀤𑀸𑀬𑀸’’𑀢𑀺 𑀧𑀤𑀤𑁆𑀯𑀬𑀁 𑀲𑀗𑁆𑀕𑀡𑁆𑀳𑀸𑀢𑀺 𑀅𑀲𑁂𑀓𑁆𑀔𑀲𑀻𑀮𑀸𑀤𑀺𑀔𑀦𑁆𑀥𑀢𑁆𑀢𑀬𑀲𑀗𑁆𑀕𑀳𑀺𑀢𑀜𑁆𑀳𑀺 𑀅𑀭𑀳𑀢𑁆𑀢𑀁, 𑀢𑁂𑀦𑀸𑀳 ‘‘𑀅𑀭𑀳𑀢𑁆𑀢𑀨𑀮𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀇𑀤𑀦𑁆𑀢𑀺 𑀇𑀤𑀁 𑀯𑀘𑀦𑀁.

𑀲𑀻𑀳𑀦𑀸𑀤𑀓𑀣𑀸𑀯𑀡𑁆𑀡𑀦𑀸

𑁪𑁦𑁨. 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬, 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀣𑀯𑀺𑀲𑀬𑀢𑀸𑀬 𑀘 𑀅𑀦𑀼𑀢𑁆𑀢𑀭𑀁 𑀩𑀼𑀤𑁆𑀥𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄. 𑀅𑀢𑀺𑀯𑀺𑀬 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀢𑀸𑀬 𑀧𑀭𑀫𑀯𑀺𑀲𑀼𑀤𑁆𑀥𑀁. 𑀧𑀭𑀫𑀦𑁆𑀢𑀺 𑀉𑀓𑁆𑀓𑀝𑁆𑀞𑀁, 𑀢𑁂𑀦𑀸𑀳 ‘‘𑀉𑀢𑁆𑀢𑀫’’𑀦𑁆𑀢𑀺. 𑀲𑀻𑀮𑀫𑁂𑀯 𑀮𑁄𑀓𑀺𑀬𑀲𑀻𑀮𑀢𑁆𑀢𑀸. 𑀬𑀣𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀪𑀕𑀯𑀢𑁄 𑀮𑁄𑀓𑀼𑀢𑁆𑀢𑀭𑀲𑀻𑀮𑀁 𑀲𑀯𑀸𑀲𑀦𑀁 𑀧𑀝𑀺𑀧𑀓𑁆𑀔𑀯𑀺𑀤𑁆𑀥𑀁𑀲𑀦𑀢𑁄, 𑀏𑀯𑀁 𑀮𑁄𑀓𑀺𑀬𑀲𑀻𑀮𑀫𑁆𑀧𑀺 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀪𑀸𑀯𑁂𑀦 𑀲𑀫𑁆𑀪𑀽𑀢𑀢𑁆𑀢𑀸, 𑀲𑀫𑁂𑀦 𑀲𑀫𑀦𑁆𑀢𑀺 𑀲𑀫𑀲𑀫𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀫𑀫 𑀲𑀻𑀮𑀲𑀫𑁂𑀦 𑀲𑀻𑀮𑁂𑀦 𑀫𑀬𑀸 𑀲𑀫’’𑀦𑁆𑀢𑀺. ‘‘𑀬𑀤𑀺𑀤𑀁 𑀅𑀥𑀺𑀲𑀻𑀮’’𑀦𑁆𑀢𑀺 𑀮𑁄𑀓𑀺𑀬𑀁, 𑀮𑁄𑀓𑀼𑀢𑁆𑀢𑀭𑀜𑁆𑀘𑀸𑀢𑀺 𑀤𑀼𑀯𑀺𑀥𑀫𑁆𑀧𑀺 𑀩𑀼𑀤𑁆𑀥𑀲𑀻𑀮𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀻𑀮𑁂𑀧𑀻’’𑀢𑀺. 𑀇𑀢𑀺 𑀇𑀫𑀦𑁆𑀢𑀺 𑀏𑀯𑀁 𑀇𑀫𑀁 𑀲𑀻𑀮𑀯𑀺𑀲𑀬𑀁. 𑀧𑀞𑀫𑀁 𑀧𑀯𑀢𑁆𑀢𑀢𑁆𑀢𑀸 𑀧𑀞𑀫𑀁.

𑀢𑀧𑀢𑀻𑀢𑀺 𑀲𑀦𑁆𑀢𑀧𑁆𑀧𑀢𑀺, 𑀯𑀺𑀥𑀫𑀢𑀻𑀢𑀺 𑀅𑀢𑁆𑀣𑁄. 𑀚𑀺𑀕𑀼𑀘𑁆𑀙𑀢𑀻𑀢𑀺 𑀳𑀻𑀴𑁂𑀢𑀺 𑀮𑀸𑀫𑀓𑀢𑁄 𑀞𑀧𑁂𑀢𑀺. 𑀦𑀺𑀤𑁆𑀤𑁄𑀲𑀢𑁆𑀢𑀸 𑀅𑀭𑀺𑀬𑀸 𑀆𑀭𑀓𑀸 𑀓𑀺𑀮𑁂𑀲𑁂𑀳𑀻𑀢𑀺. 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀯𑀻𑀭𑀺𑀬𑀲𑀗𑁆𑀔𑀸𑀢𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀭𑀫𑀸 𑀦𑀸𑀫 𑀲𑀩𑁆𑀩𑀼𑀓𑁆𑀓𑀝𑁆𑀞𑀪𑀸𑀯𑀢𑁄. 𑀬𑀣𑀸 𑀬𑀼𑀯𑀺𑀦𑁄 𑀪𑀸𑀯𑁄 𑀬𑁄𑀩𑁆𑀩𑀦𑀁, 𑀏𑀯𑀁 𑀚𑀺𑀕𑀼𑀘𑁆𑀙𑀺𑀦𑁄 𑀪𑀸𑀯𑁄 𑀚𑁂𑀕𑀼𑀘𑁆𑀙𑀁. 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀸𑀦𑀺 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺𑀬𑁄. 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀣 𑀯𑀸 𑀲𑀫𑁆𑀫𑀸𑀯𑀸𑀘𑀸𑀤𑀻𑀦𑀁 𑀅𑀥𑀺𑀲𑀻𑀮𑀕𑁆𑀕𑀳𑀡𑁂𑀦, 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀅𑀥𑀺𑀚𑁂𑀕𑀼𑀘𑁆𑀙𑀕𑁆𑀕𑀳𑀡𑁂𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀥𑀺𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑀢𑀺𑀲𑀫𑀸𑀥𑀬𑁄 𑀫𑀕𑁆𑀕𑀨𑀮𑀧𑀭𑀺𑀬𑀸𑀧𑀦𑁆𑀦𑀸 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺𑀬𑁄 𑀤𑀝𑁆𑀞𑀩𑁆𑀩𑀸. 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺 𑀧𑀦 𑀦𑀺𑀩𑁆𑀩𑀸𑀦𑀫𑁂𑀯.

𑁪𑁦𑁩. 𑀬𑀁 𑀓𑀺𑀜𑁆𑀘𑀺 𑀚𑀦𑀯𑀺𑀯𑀺𑀢𑁆𑀢𑀁 𑀞𑀸𑀦𑀁 𑀇𑀥 ‘‘𑀲𑀼𑀜𑁆𑀜𑀸𑀕𑀸𑀭’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣 𑀦𑀤𑀦𑁆𑀢𑁂𑀦 𑀯𑀺𑀦𑀸 𑀦𑀸𑀤𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀏𑀓𑀢𑁄𑀯 𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺. 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀽𑀢𑀺 𑀔𑀢𑁆𑀢𑀺𑀬𑀧𑀭𑀺𑀲𑀸, 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸, 𑀕𑀳𑀧𑀢𑀺𑀧𑀭𑀺𑀲𑀸, 𑀲𑀫𑀡𑀧𑀭𑀺𑀲𑀸, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀧𑀭𑀺𑀲𑀸, 𑀢𑀸𑀯𑀢𑀺𑀁𑀲𑀧𑀭𑀺𑀲𑀸, 𑀫𑀸𑀭𑀧𑀭𑀺𑀲𑀸, 𑀩𑁆𑀭𑀳𑁆𑀫𑀧𑀭𑀺𑀲𑀸𑀢𑀺 𑀇𑀫𑀸𑀲𑀼 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼.

𑀯𑁂𑀲𑀸𑀭𑀚𑁆𑀚𑀸𑀦𑀻𑀢𑀺 𑀯𑀺𑀲𑀸𑀭𑀤𑀪𑀸𑀯𑀸 𑀜𑀸𑀡𑀧𑁆𑀧𑀳𑀸𑀦𑀲𑀫𑁆𑀧𑀤𑀸𑀦𑀺𑀫𑀺𑀢𑁆𑀢𑀁 𑀓𑀼𑀢𑁄𑀘𑀺 𑀅𑀲𑀦𑁆𑀢𑀲𑁆𑀲𑀦𑀪𑀸𑀯𑀸 𑀦𑀺𑀩𑁆𑀪𑀬𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀁 𑀞𑀸𑀦𑀁, 𑀉𑀢𑁆𑀢𑀫𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀆𑀲𑀪𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸, 𑀢𑁂𑀲𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀧𑀺𑀘 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁, 𑀆𑀲𑀪𑀁 𑀯𑀺𑀬𑀸𑀢𑀺 𑀆𑀲𑀪𑀁. 𑀬𑀣𑀸 𑀳𑀺 𑀦𑀺𑀲𑀪𑀲𑀗𑁆𑀔𑀸𑀢𑁄 𑀉𑀲𑀪𑁄 𑀅𑀢𑁆𑀢𑀦𑁄 𑀉𑀲𑀪𑀩𑀮𑁂𑀦 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀤𑀲𑀳𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀧𑀸𑀤𑁂𑀳𑀺 𑀅𑀝𑁆𑀞𑀧𑀭𑀺𑀲𑀸𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀧𑀘𑁆𑀘𑀢𑁆𑀣𑀺𑀓𑁂𑀦 𑀅𑀓𑀫𑁆𑀧𑀺𑀬𑁄 𑀅𑀘𑀮𑁂𑀦 𑀞𑀸𑀦𑁂𑀦 𑀢𑀺𑀝𑁆𑀞𑀢𑀺. 𑀏𑀯𑀁 𑀢𑀺𑀝𑁆𑀞𑀫𑀸𑀦𑁄𑀯 𑀢𑀁 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺 𑀉𑀧𑀕𑀘𑁆𑀙𑀢𑀺 𑀦 𑀧𑀘𑁆𑀘𑀓𑁆𑀔𑀸𑀢𑀺 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺.

𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 𑀬𑀣𑀸 𑀫𑀺𑀕𑀭𑀸𑀚𑀸 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀦𑀢𑁄, 𑀯𑀦𑀫𑀳𑀺𑀁𑀲𑀫𑀢𑁆𑀢𑀯𑀸𑀭𑀡𑀸𑀤𑀻𑀦𑀁 𑀳𑀦𑀦𑀢𑁄 𑀘 ‘‘𑀲𑀻𑀳𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀣𑀸𑀕𑀢𑁄 𑀮𑁄𑀓𑀥𑀫𑁆𑀫𑀸𑀦𑀁 𑀲𑀳𑀦𑀢𑁄, 𑀧𑀭𑀧𑁆𑀧𑀯𑀸𑀤𑀸𑀦𑀁 𑀳𑀦𑀦𑀢𑁄 𑀘 ‘‘𑀲𑀻𑀳𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀻𑀳𑀲𑁆𑀲 𑀦𑀸𑀤𑀁 𑀲𑀻𑀳𑀦𑀸𑀤𑀁. 𑀢𑀢𑁆𑀣 𑀬𑀣𑀸 𑀲𑀻𑀳𑁄 𑀲𑀻𑀳𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀢𑁆𑀣 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀏𑀯𑀁 𑀢𑀣𑀸𑀕𑀢𑀲𑀻𑀳𑁄𑀧𑀺 𑀤𑀲𑀳𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 ‘‘𑀇𑀢𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁭𑁮; 𑀅. 𑀦𑀺. 𑁮.𑁨) 𑀦𑀬𑁂𑀦 𑀦𑀸𑀦𑀸𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺.

𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑀫𑀢𑁆𑀣𑀁 𑀅𑀢𑁆𑀢𑀦𑁄 𑀜𑀸𑀡𑀩𑀮𑀸𑀦𑀼𑀭𑀽𑀧𑀁 𑀅𑀪𑀺𑀭𑀘𑀺𑀢𑁆𑀯𑀸 𑀢𑀗𑁆𑀔𑀡𑀁𑀬𑁂𑀯𑀸𑀢𑀺 𑀧𑀼𑀘𑁆𑀙𑀺𑀢𑀓𑁆𑀔𑀡𑁂𑀬𑁂𑀯 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀘𑀺𑀢𑁆𑀢𑀁 𑀧𑀭𑀺𑀢𑁄𑀲𑁂𑀢𑀺𑀬𑁂𑀯 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀲𑁆𑀲𑀚𑁆𑀚𑀦𑀢𑁄. 𑀲𑁄𑀢𑀩𑁆𑀩𑀜𑁆𑀘𑀲𑁆𑀲 𑀫𑀜𑁆𑀜𑀦𑁆𑀢𑀺 𑀅𑀝𑁆𑀞𑀓𑁆𑀔𑀡𑀯𑀚𑁆𑀚𑀺𑀢𑁂𑀦 𑀦𑀯𑀫𑁂𑀦 𑀔𑀡𑁂𑀦 𑀮𑀩𑁆𑀪𑀫𑀸𑀦𑀢𑁆𑀢𑀸. ‘‘𑀬𑀁 𑀦𑁄 𑀲𑀢𑁆𑀣𑀸 𑀪𑀸𑀲𑀢𑀺, 𑀢𑀁 𑀦𑁄 𑀲𑁄𑀲𑁆𑀲𑀸𑀫𑀸’’𑀢𑀺 𑀆𑀤𑀭𑀕𑀸𑀭𑀯𑀚𑀸𑀢𑀸 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀲𑁄𑀢𑀩𑁆𑀩𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀲𑀼𑀧𑁆𑀧𑀲𑀦𑁆𑀦𑀸 𑀧𑀲𑀸𑀤𑀸𑀪𑀺𑀩𑀼𑀤𑁆𑀥𑀺𑀬𑀸 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀓𑀮𑁆𑀮𑀘𑀺𑀢𑁆𑀢𑀸 𑀫𑀼𑀤𑀼𑀘𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀧𑀲𑀦𑁆𑀦𑀓𑀸𑀭𑀦𑁆𑀢𑀺 𑀧𑀲𑀦𑁆𑀦𑁂𑀳𑀺 𑀓𑀸𑀢𑀩𑁆𑀩𑀲𑀓𑁆𑀓𑀸𑀭𑀁, 𑀥𑀫𑁆𑀫𑀸𑀫𑀺𑀲𑀧𑀽𑀚𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀆𑀫𑀺𑀲𑀧𑀽𑀚𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀡𑀻𑀢𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀥𑀫𑁆𑀫𑀧𑀽𑀚𑀸 𑀧𑀦 ‘‘𑀢𑀣𑀢𑁆𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀤𑀲𑁆𑀲𑀺𑀢𑀸. 𑀢𑀣𑀸𑀪𑀸𑀯𑀸𑀬𑀸𑀢𑀺 𑀬𑀣𑀢𑁆𑀢𑀸𑀬 𑀬𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑀣𑀸𑀪𑀸𑀯𑀸𑀬, 𑀢𑁂𑀦𑀸𑀳 ‘‘𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀢𑁆𑀣𑀸𑀬𑀸’’𑀢𑀺. 𑀲𑀸 𑀘 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺 𑀬𑀸𑀬 𑀅𑀦𑀼𑀧𑀼𑀩𑁆𑀩𑀺𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸, 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀜𑁆𑀘 𑀲𑀢𑀺 𑀅𑀚𑁆𑀛𑀢𑁆𑀢𑀺𑀓𑀗𑁆𑀕𑀲𑀫𑀯𑀸𑀬𑁂 𑀏𑀓𑀁𑀲𑀺𑀓𑀸 𑀢𑀲𑁆𑀲𑀸 𑀧𑀸𑀭𑀺𑀧𑀽𑀭𑀻𑀢𑀺 𑀢𑀁 𑀅𑀦𑀼𑀧𑀼𑀩𑁆𑀩𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀘𑀺 𑀲𑀭𑀡𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀇𑀫𑀲𑁆𑀫𑀺𑀁 𑀧𑀦𑁄𑀓𑀸𑀲𑁂 𑀞𑀢𑁆𑀯𑀸𑀢𑀺 ‘‘𑀧𑀝𑀺𑀧𑀦𑁆𑀦𑀸 𑀘 𑀆𑀭𑀸𑀥𑁂𑀦𑁆𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀲𑀻𑀳𑀦𑀸𑀤𑀓𑀺𑀘𑁆𑀘𑀧𑀸𑀭𑀺𑀧𑀽𑀭𑀺𑀤𑀻𑀧𑀦𑁂 𑀧𑀸𑀴𑀺𑀧𑀤𑁂𑀲𑁂 𑀞𑀢𑁆𑀯𑀸. 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀢𑀺 𑀲𑀗𑁆𑀓𑀮𑀺𑀢𑀩𑁆𑀩𑀸. 𑀏𑀓𑁄 𑀲𑀻𑀳𑀦𑀸𑀤𑁄 𑀅𑀲𑀸𑀥𑀸𑀭𑀡𑁄 𑀅𑀜𑁆𑀜𑁂𑀳𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑁄 𑀲𑁂𑀝𑁆𑀞𑀦𑀸𑀤𑁄 𑀅𑀪𑀻𑀢𑀦𑀸𑀤𑁄𑀢𑀺 𑀓𑀢𑁆𑀯𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀼𑀭𑀺𑀫𑀸𑀦𑀁 𑀤𑀲𑀦𑁆𑀦𑀦𑁆𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀯𑀺𑀫𑀼𑀢𑁆𑀢𑀺𑀬𑀸 𑀫𑀬𑁆𑀳𑀁 𑀲𑀤𑀺𑀲𑁄 𑀦𑀢𑁆𑀣𑀻’’𑀢𑀺 𑀏𑀢𑁂𑀲𑀁 𑀧𑀼𑀭𑀺𑀫𑀸𑀦𑀁 𑀤𑀲𑀦𑁆𑀦𑀁 𑀲𑀻𑀳𑀦𑀸𑀤𑀸𑀦𑀁, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑁆𑀣 𑀲𑀸𑀫𑀺𑀯𑀘𑀦𑀁, 𑀢𑁂𑀦𑀸𑀳 ‘‘𑀏𑀓𑁂𑀓𑀲𑁆𑀲𑀸’’𑀢𑀺. ‘‘𑀧𑀭𑀺𑀲𑀸𑀲𑀼 𑀘 𑀦𑀤𑀢𑀻’’𑀢𑀺 𑀆𑀤𑀬𑁄 𑀧𑀭𑀺𑀯𑀸𑀭𑀸 ‘‘𑀏𑀓𑀘𑁆𑀘𑀁 𑀢𑀧𑀲𑁆𑀲𑀺𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀁 𑀧𑀲𑁆𑀲𑀸𑀫𑀻’’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀪𑀕𑀯𑀸 𑀧𑀭𑀺𑀲𑀸𑀬𑀁 𑀦𑀤𑀢𑀺 𑀯𑀺𑀲𑀸𑀭𑀤𑁄 𑀦𑀤𑀢𑀺 𑀬𑀸𑀯 ‘‘𑀧𑀝𑀺𑀧𑀦𑁆𑀦𑀸 𑀆𑀭𑀸𑀥𑁂𑀦𑁆𑀢𑀻’’𑀢𑀺 𑀅𑀢𑁆𑀣𑀬𑁄𑀚𑀦𑀸𑀬 𑀲𑀫𑁆𑀪𑀯𑀢𑁄. 𑀢𑀣𑀸 𑀲𑁂𑀲𑁂𑀲𑀼𑀧𑀺 𑀦𑀯𑀲𑀼.

‘‘𑀏𑀯’’𑀦𑁆𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀲𑀗𑁆𑀓𑀮𑁂𑀢𑁆𑀯𑀸 𑀤𑀲𑁆𑀲𑀦𑀁. 𑀢𑁂 𑀤𑀲𑀸𑀢𑀺 𑀢𑁂 ‘‘𑀧𑀭𑀺𑀲𑀸𑀲𑀼 𑀘 𑀦𑀤𑀢𑀻’’𑀢𑀺 𑀆𑀤𑀬𑁄 𑀲𑀻𑀳𑀦𑀸𑀤𑀸. 𑀧𑀼𑀭𑀺𑀫𑀸𑀦𑀁 𑀤𑀲𑀦𑁆𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀼𑀭𑀺𑀫𑀸𑀦𑀁 𑀤𑀲𑀦𑁆𑀦𑀁. 𑀧𑀭𑀺𑀯𑀸𑀭𑀯𑀲𑁂𑀦𑀸𑀢𑀺 𑀧𑀘𑁆𑀘𑁂𑀓𑀁 𑀧𑀭𑀺𑀯𑀸𑀭𑀯𑀲𑁂𑀦 𑀬𑁄𑀚𑀺𑀬𑀫𑀸𑀦𑀸 𑀲𑀢𑀁 𑀲𑀻𑀳𑀦𑀸𑀤𑀸. 𑀧𑀼𑀭𑀺𑀫𑀸 𑀘 𑀤𑀲𑀸𑀢𑀺 𑀢𑀣𑀸 𑀅𑀬𑁄𑀚𑀺𑀬𑀫𑀸𑀦𑀸 𑀧𑀼𑀭𑀺𑀫𑀸 𑀘 𑀤𑀲𑀸𑀢𑀺 𑀏𑀯𑀁 𑀤𑀲𑀸𑀥𑀺𑀓𑀁 𑀲𑀻𑀳𑀦𑀸𑀤𑀲𑀢𑀁 𑀳𑁄𑀢𑀺. 𑀏𑀯𑀁 𑀯𑀸𑀤𑀻𑀦𑀁 𑀯𑀸𑀤𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀤𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸𑀤𑀁. 𑀧𑀝𑀺𑀲𑁂𑀥𑁂𑀢𑁆𑀯𑀸𑀢𑀺 𑀢𑀣𑀸𑀪𑀸𑀯𑀸𑀪𑀸𑀯𑀤𑀲𑁆𑀲𑀦𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀬𑀁 𑀪𑀕𑀯𑀸 𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑁂 ‘‘𑀇𑀥 𑀦𑀺𑀕𑁆𑀭𑁄𑀥 𑀢𑀧𑀲𑁆𑀲𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁩) 𑀉𑀧𑀓𑁆𑀓𑀺𑀮𑁂𑀲𑀯𑀺𑀪𑀸𑀕𑀁, 𑀧𑀸𑀭𑀺𑀲𑀼𑀤𑁆𑀥𑀺𑀯𑀺𑀪𑀸𑀕𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀲𑀧𑀭𑀺𑀲𑀲𑁆𑀲 𑀦𑀺𑀕𑁆𑀭𑁄𑀥𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀧𑀼𑀭𑀢𑁄 𑀲𑀻𑀳𑀦𑀸𑀤𑀁 𑀦𑀤𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀸𑀦𑀺 𑀧𑀭𑀺𑀲𑀢𑀺 𑀦𑀤𑀺𑀢𑀧𑀼𑀩𑁆𑀩𑀁 𑀲𑀻𑀳𑀦𑀸𑀤𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁪𑁦𑁪. 𑀇𑀤𑀦𑁆𑀢𑀺 ‘‘𑀭𑀸𑀚𑀕𑀳𑁂 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀯𑀺𑀳𑀭𑀦𑁆𑀢𑀁 𑀫𑀁…𑀧𑁂… 𑀧𑀜𑁆𑀳𑀁 𑀧𑀼𑀘𑁆𑀙𑀻’’𑀢𑀺 𑀇𑀤𑀁 𑀯𑀘𑀦𑀁. 𑀓𑀸𑀫𑀁 𑀬𑀤𑀸 𑀦𑀺𑀕𑁆𑀭𑁄𑀥𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀪𑀕𑀯𑀸 𑀘𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀦 𑀢𑀤𑀸 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀯𑀺𑀳𑀭𑀢𑀺, 𑀭𑀸𑀚𑀕𑀳𑀲𑀫𑀻𑀧𑁂 𑀧𑀦 𑀯𑀺𑀳𑀭𑀢𑀻𑀢𑀺 𑀓𑀢𑁆𑀯𑀸 ‘‘𑀭𑀸𑀚𑀕𑀳𑁂 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀯𑀺𑀳𑀭𑀦𑁆𑀢𑀁 𑀫’’𑀦𑁆𑀢𑀺 𑀯𑀼𑀢𑁆𑀢𑀁, 𑀕𑀺𑀚𑁆𑀛𑀓𑀽𑀝𑁂 𑀯𑀺𑀳𑀭𑀡𑀜𑁆𑀘𑀲𑁆𑀲 𑀢𑀤𑀸 𑀅𑀯𑀺𑀘𑁆𑀙𑀺𑀦𑁆𑀦𑀦𑁆𑀢𑀺, 𑀢𑁂𑀦𑀸𑀳 ‘‘𑀬𑀁 𑀢𑀁 𑀪𑀕𑀯𑀸’’𑀢𑀺𑀆𑀤𑀺. 𑀬𑁄𑀕𑁂𑀢𑀺 𑀦𑀬𑁂, 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀽𑀧𑀸𑀬𑁂𑀢𑀺 𑀅𑀢𑁆𑀣𑁄.

𑁪𑁦𑁫. 𑀬𑀁 𑀧𑀭𑀺𑀯𑀸𑀲𑀁 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁄 𑀧𑀭𑀺𑀯𑀲𑀢𑀻𑀢𑀺 𑀬𑁄𑀚𑀦𑀸. 𑀬𑀲𑁆𑀫𑀸 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁂𑀦 𑀧𑀭𑀺𑀯𑀲𑀺𑀢𑀩𑁆𑀩𑀁, 𑀦 𑀕𑀺𑀳𑀺𑀪𑀽𑀢𑁂𑀦, 𑀢𑀲𑁆𑀫𑀸 𑀅𑀧𑀭𑀺𑀯𑀲𑀺𑀢𑁆𑀯𑀸𑀬𑁂𑀯 𑀧𑀩𑁆𑀩𑀚𑁆𑀚𑀁 𑀮𑀪𑀢𑀺. 𑀆𑀓𑀗𑁆𑀔𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀦𑁆𑀢𑀺 𑀏𑀢𑁆𑀣 𑀧𑀦 𑀧𑀩𑁆𑀩𑀚𑁆𑀚𑀸-𑀕𑁆𑀕𑀳𑀡𑀁 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦𑁂𑀯 ‘‘𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬’’𑀦𑁆𑀢𑀺 (𑀧𑀸𑀘𑀺. 𑁫𑁦) 𑀏𑀢𑁆𑀣 𑀤𑀺𑀭𑀢𑁆𑀢𑀕𑁆𑀕𑀳𑀡𑀁 𑀯𑀺𑀬. 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀲𑀺𑀬𑀸𑀯𑀺𑀥𑀯𑀸𑀣𑀼𑀮𑁆𑀮𑀓𑀼𑀫𑀸𑀭𑀺𑀧𑀡𑁆𑀟𑀓𑀪𑀺𑀓𑁆𑀔𑀼𑀦𑀺𑀕𑁄𑀘𑀭𑀢𑀸, 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀘𑁆𑀘𑀸𑀯𑀘𑁂𑀲𑀼 𑀓𑀺𑀁𑀓𑀭𑀡𑀻𑀬𑁂𑀲𑀼 𑀤𑀓𑁆𑀔𑀸𑀦𑀮𑀲𑀸𑀤𑀺𑀢𑀸, 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀲𑀼 𑀢𑀺𑀩𑁆𑀩𑀙𑀦𑁆𑀤𑀢𑀸, 𑀬𑀲𑁆𑀲 𑀢𑀺𑀢𑁆𑀣𑀸𑀬𑀢𑀦𑀢𑁄 𑀇𑀥𑀸𑀕𑀢𑁄, 𑀢𑀲𑁆𑀲 𑀅𑀯𑀡𑁆𑀡𑁂, 𑀭𑀢𑀦𑀢𑁆𑀢𑀬𑀲𑁆𑀲 𑀘 𑀯𑀡𑁆𑀡𑁂 𑀅𑀦𑀢𑁆𑀢𑀫𑀦𑀢𑀸, 𑀢𑀤𑀼𑀪𑀬𑀁 𑀬𑀣𑀸𑀓𑁆𑀓𑀫𑀁 𑀯𑀡𑁆𑀡𑁂 𑀘 𑀅𑀯𑀡𑁆𑀡𑁂 𑀘 𑀅𑀢𑁆𑀢𑀫𑀦𑀢𑀸𑀢𑀺 𑀇𑀫𑁂𑀲𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦𑀸𑀳 ‘‘𑀅𑀝𑁆𑀞 𑀯𑀢𑁆𑀢𑀸𑀦𑀺 𑀧𑀽𑀭𑁂𑀦𑁆𑀢𑁂𑀦𑀸’’𑀢𑀺. 𑀖𑀁𑀲𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸𑀢𑀺 𑀅𑀚𑁆𑀛𑀸𑀲𑀬𑀲𑁆𑀲 𑀯𑀻𑀫𑀁𑀲𑀦𑀯𑀲𑁂𑀦 𑀲𑀼𑀯𑀡𑁆𑀡𑀁 𑀯𑀺𑀬 𑀖𑀁𑀲𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸.

𑀕𑀡𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀲𑁆𑀲 𑀕𑀡𑀧𑁆𑀧𑀳𑁄𑀦𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀲𑀗𑁆𑀖𑀢𑁆𑀣𑁂𑀭𑁄 𑀯𑀺𑀬 𑀢𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀁 𑀦𑀺𑀲𑀻𑀤𑀺𑀢𑁆𑀯𑀸. 𑀯𑀽𑀧𑀓𑀝𑁆𑀞𑁄𑀢𑀺 𑀯𑀺𑀯𑀺𑀢𑁆𑀢𑁄. 𑀢𑀸𑀤𑀺𑀲𑀲𑁆𑀲 𑀲𑀻𑀮𑀯𑀺𑀲𑁄𑀥𑀦𑁂 𑀅𑀧𑁆𑀧𑀫𑀸𑀤𑁄 𑀅𑀯𑀼𑀢𑁆𑀢𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑁂 𑀲𑀢𑀺𑀁 𑀅𑀯𑀺𑀚𑀳𑀦𑁆𑀢𑁄’’𑀢𑀺. 𑀧𑁂𑀲𑀺𑀢𑀘𑀺𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑁄 𑀢𑀁𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄. 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸𑀧𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀏𑀯 𑀅𑀭𑀳𑀢𑁆𑀢𑀸𑀥𑀺𑀕𑀫𑀸𑀬 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸 𑀳𑁄𑀦𑁆𑀢𑀻𑀢𑀺 𑀢𑁂𑀧𑀺 𑀢𑁂𑀳𑀺 𑀏𑀓𑀲𑀗𑁆𑀕𑀳𑁂 𑀓𑀭𑁄𑀦𑁆𑀢𑁄 𑀆𑀳 ‘‘𑀓𑀼𑀮𑀧𑀼𑀢𑁆𑀢𑀸𑀢𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸’’𑀢𑀺, 𑀢𑁂𑀦𑀸𑀳 ‘‘𑀲𑀫𑁆𑀫𑀤𑁂𑀯𑀸𑀢𑀺 𑀳𑁂𑀢𑀼𑀦𑀸𑀯 𑀓𑀸𑀭𑀡𑁂𑀦𑁂𑀯𑀸’’𑀢𑀺. ‘‘𑀑𑀢𑀺𑀡𑁆𑀡𑁄𑀫𑁆𑀳𑀺 𑀚𑀸𑀢𑀺𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀺 𑀲𑀁𑀯𑁂𑀕𑀧𑀼𑀩𑁆𑀩𑀺𑀓𑀁 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀩𑁆𑀩𑀚𑁆𑀚𑀁 𑀲𑀦𑁆𑀥𑀸𑀬 𑀇𑀥 ‘‘𑀲𑀫𑁆𑀫𑀤𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀳𑁂𑀢𑀼𑀦𑀸𑀢𑀺 𑀜𑀸𑀬𑁂𑀦. 𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀧𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸. 𑀲𑀫𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸 𑀦𑀺𑀧𑁆𑀨𑀸𑀤𑁂𑀢𑁆𑀯𑀸, 𑀧𑀭𑀺𑀧𑀽𑀭𑁂𑀢𑁆𑀯𑀸 𑀯𑀸𑀢𑀺 𑀅𑀢𑁆𑀣𑁄.

𑀦𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀦𑀺𑀕𑀫𑀦𑀯𑀲𑁂𑀦 𑀧𑀭𑀺𑀬𑁄𑀲𑀸𑀧𑁂𑀢𑀼𑀁. ‘‘𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀯𑀺𑀳𑀸𑀲𑀻’’𑀢𑀺 𑀇𑀫𑀺𑀦𑀸 𑀏𑀯 𑀳𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀸 𑀧𑀭𑀺𑀬𑁄𑀲𑀸𑀧𑀺𑀢𑀸. 𑀢𑀁 𑀧𑀦 𑀦𑀺𑀕𑀫𑁂𑀦𑁆𑀢𑁄 ‘‘𑀅𑀜𑁆𑀜𑀢𑀭𑁄 𑀔𑁄 𑀧𑀦𑀸…𑀧𑁂… 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.