𑁭. 𑀚𑀸𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀤𑁆𑀯𑁂𑀧𑀩𑁆𑀩𑀚𑀺𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁭𑁮. ‘‘𑀖𑁄𑀲𑀺𑀢𑁂𑀦 𑀲𑁂𑀝𑁆𑀞𑀺𑀦𑀸 𑀓𑀢𑁂 𑀆𑀭𑀸𑀫𑁂’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑁄𑀬𑀁 𑀖𑁄𑀲𑀺𑀢𑀲𑁂𑀝𑁆𑀞𑀺 𑀦𑀸𑀫, 𑀓𑀣𑀜𑁆𑀘𑀸𑀦𑁂𑀦 𑀆𑀭𑀸𑀫𑁄 𑀓𑀸𑀭𑀺𑀢𑁄, 𑀓𑀣𑀁 𑀯𑀸 𑀢𑀢𑁆𑀣 𑀪𑀕𑀯𑀸 𑀯𑀺𑀳𑀸𑀲𑀻𑀢𑀺 𑀢𑀁 𑀲𑀩𑁆𑀩𑀁 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑀢𑁄𑀯 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁄𑀢𑀺 𑀅𑀮𑁆𑀮𑀓𑀧𑁆𑀧𑀭𑀝𑁆𑀞𑀢𑁄. 𑀢𑀤𑀸𑀢𑀺 𑀢𑁂𑀲𑀁 𑀢𑀁 𑀕𑀸𑀫𑀁 𑀧𑀯𑀺𑀝𑁆𑀞𑀤𑀺𑀯𑀲𑁂. 𑀩𑀮𑀯𑀧𑀸𑀬𑀸𑀲𑀦𑁆𑀢𑀺 𑀕𑀭𑀼𑀢𑀭𑀁 𑀩𑀳𑀼𑀧𑀸𑀬𑀸𑀲𑀁. 𑀅𑀲𑀦𑁆𑀦𑀺𑀳𑀺𑀢𑁂𑀢𑀺 𑀕𑁂𑀳𑀢𑁄 𑀩𑀳𑀺 𑀕𑀢𑁂. 𑀪𑀼𑀲𑁆𑀲𑀢𑀻𑀢𑀺 𑀭𑀯𑀢𑀺. 𑀖𑁄𑀲𑀓𑀤𑁂𑀯𑀧𑀼𑀢𑁆𑀢𑁄𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺 𑀲𑀭𑀖𑁄𑀲𑀲𑀫𑁆𑀧𑀢𑁆𑀢𑀺𑀬𑀸. 𑀯𑁂𑀬𑁆𑀬𑀢𑁆𑀢𑀺𑀬𑁂𑀦𑀸𑀢𑀺 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦. 𑀖𑁄𑀲𑀺𑀢𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄 𑀢𑀸𑀬 𑀏𑀯 𑀘𑀲𑁆𑀲 𑀲𑀭𑀲𑀫𑁆𑀧𑀢𑁆𑀢𑀺𑀬𑀸 𑀖𑁄𑀲𑀺𑀢𑀦𑀸𑀫𑀢𑀸.

𑀲𑀭𑀻𑀭𑀲𑀦𑁆𑀢𑀧𑁆𑀧𑀦𑀢𑁆𑀣𑀦𑁆𑀢𑀺 𑀳𑀺𑀫𑀯𑀦𑁆𑀢𑁂 𑀨𑀮𑀫𑀽𑀮𑀸𑀳𑀸𑀭𑀢𑀸𑀬 𑀓𑀺𑀮𑀦𑁆𑀢𑀲𑀭𑀻𑀭𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑁂𑀦 𑀢𑀲𑁆𑀲 𑀲𑀦𑁆𑀢𑀧𑁆𑀧𑀦𑀢𑁆𑀣𑀁 𑀧𑀻𑀦𑀦𑀢𑁆𑀣𑀁. 𑀢𑀲𑀺𑀢𑀸𑀢𑀺 𑀧𑀺𑀧𑀸𑀲𑀺𑀢𑀸. 𑀓𑀺𑀮𑀦𑁆𑀢𑀸𑀢𑀺 𑀧𑀭𑀺𑀲𑁆𑀲𑀦𑁆𑀢𑀓𑀸𑀬𑀸. 𑀢𑁂 𑀓𑀺𑀭 𑀢𑀁 𑀯𑀝𑀭𑀼𑀓𑁆𑀔𑀁 𑀧𑀢𑁆𑀯𑀸 𑀢𑀲𑁆𑀲 𑀲𑁄𑀪𑀸𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀫𑀳𑀸𑀦𑀼𑀪𑀸𑀯𑀸 𑀫𑀜𑁆𑀜𑁂 𑀏𑀢𑁆𑀣 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸, ‘‘𑀲𑀸𑀥𑀼 𑀯𑀢𑀸𑀬𑀁 𑀤𑁂𑀯𑀢𑀸 𑀅𑀫𑁆𑀳𑀸𑀓𑀁 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀼𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀅𑀥𑀺𑀯𑀢𑁆𑀣𑀸…𑀧𑁂… 𑀦𑀺𑀲𑀻𑀤𑀺𑀁𑀲𑀽’’𑀢𑀺. 𑀲𑁄𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺. 𑀪𑀢𑀓𑀸𑀦𑀦𑁆𑀢𑀺 𑀪𑀢𑀺𑀬𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀸𑀦𑀁 𑀤𑀸𑀲𑀧𑁂𑀲𑀓𑀫𑁆𑀫𑀓𑀭𑀸𑀦𑀁. 𑀧𑀓𑀢𑀺𑀪𑀢𑁆𑀢𑀯𑁂𑀢𑀦𑀦𑁆𑀢𑀺 𑀧𑀓𑀢𑀺𑀬𑀸 𑀤𑀸𑀢𑀩𑁆𑀩𑀪𑀢𑁆𑀢𑀯𑁂𑀢𑀦𑀁, 𑀢𑀤𑀸 𑀉𑀧𑁄𑀲𑀣𑀺𑀓𑀢𑁆𑀢𑀸 𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀓𑀫𑁆𑀫𑀓𑀭𑀡𑀤𑀺𑀯𑀲𑁂𑀦 𑀤𑀸𑀢𑀩𑁆𑀩𑀪𑀢𑁆𑀢𑀯𑁂𑀢𑀦𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀻𑀢𑀺 𑀓𑀜𑁆𑀘𑀺𑀧𑀺 𑀪𑀢𑀓𑀁.

𑀉𑀧𑁂𑀘𑁆𑀘 𑀧𑀭𑀲𑁆𑀲 𑀯𑀸𑀘𑀸𑀬 𑀆𑀭𑀫𑁆𑀪𑀦𑀁 𑀩𑀸𑀥𑀦𑀁 𑀉𑀧𑀸𑀭𑀫𑁆𑀪𑁄, 𑀤𑁄𑀲𑀤𑀲𑁆𑀲𑀦𑀯𑀲𑁂𑀦 𑀖𑀝𑁆𑀝𑀦𑀦𑁆𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀉𑀧𑀸𑀭𑀫𑁆𑀪𑀸𑀥𑀺𑀧𑁆𑀧𑀸𑀬𑁂𑀦 𑀯𑀸𑀤𑀁 𑀆𑀭𑁄𑀧𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸’’𑀢𑀺. 𑀯𑀤𑀦𑁆𑀢𑀺 𑀦𑀺𑀦𑁆𑀤𑀦𑀯𑀲𑁂𑀦 𑀓𑀣𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀳𑀺 𑀯𑀸𑀤𑁄, 𑀤𑁄𑀲𑁄. 𑀢𑀁 𑀆𑀭𑁄𑀧𑁂𑀢𑀼𑀓𑀸𑀫𑀸, 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺, 𑀇𑀥 𑀬𑀁 𑀯𑀢𑁆𑀣𑀼𑀁 𑀚𑀻𑀯𑀲𑀜𑁆𑀜𑀺𑀢𑀁, 𑀢𑀤𑁂𑀯 𑀲𑀭𑀻𑀭𑀲𑀜𑁆𑀜𑀺𑀢𑀦𑁆𑀢𑀺 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀯𑀸𑀤𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀭𑀽𑀧𑀜𑁆𑀘 𑀅𑀢𑁆𑀢𑀸𑀦𑀜𑁆𑀘 𑀅𑀤𑁆𑀯𑀬𑀁 𑀓𑀢𑁆𑀯𑀸 𑀲𑀫𑀦𑀼𑀧𑀲𑁆𑀲𑀦𑀯𑀲𑁂𑀦 ‘‘𑀲𑀢𑁆𑀢𑁄’’𑀢𑀺 𑀯𑀸 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑀁 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀪𑀺𑀚𑁆𑀚𑀢𑀻𑀢𑀺 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀯𑀺𑀦𑀲𑁆𑀲𑀢𑀺. 𑀢𑁂𑀦 𑀚𑀻𑀯𑀲𑀭𑀻𑀭𑀸𑀦𑀁 𑀅𑀦𑀜𑁆𑀜𑀢𑁆𑀢𑀸𑀦𑀼𑀚𑀸𑀦𑀦𑀢𑁄, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀤𑀲𑁆𑀲𑀦𑀢𑁄. 𑀦 𑀳𑁂𑀢𑁆𑀣 𑀬𑀣𑀸 𑀪𑁂𑀤𑀯𑀢𑀸 𑀲𑀭𑀻𑀭𑀢𑁄 𑀅𑀦𑀜𑁆𑀜𑀢𑁆𑀢𑀸 𑀅𑀤𑀺𑀝𑁆𑀞𑁄𑀧𑀺 𑀚𑀻𑀯𑀲𑁆𑀲 𑀪𑁂𑀤𑁄 𑀯𑀼𑀢𑁆𑀢𑁄, 𑀏𑀯𑀁 𑀅𑀤𑀺𑀝𑁆𑀞𑀪𑁂𑀤𑀢𑁄 𑀅𑀦𑀜𑁆𑀜𑀢𑁆𑀢𑀸 𑀲𑀭𑀻𑀭𑀲𑁆𑀲𑀸𑀧𑀺 𑀅𑀪𑁂𑀤𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀢𑀲𑁆𑀲 𑀪𑁂𑀤𑀲𑁆𑀲 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀢𑁆𑀢𑀸, 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀲𑀭𑀻𑀭𑀲𑁆𑀲 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀉𑀘𑁆𑀙𑁂𑀤𑀯𑀸𑀤𑁄 𑀳𑁄𑀢𑀻’’𑀢𑀺.

‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀅𑀜𑁆𑀜𑀤𑁂𑀯 𑀯𑀢𑁆𑀣𑀼𑀁 𑀚𑀻𑀯𑀲𑀜𑁆𑀜𑀺𑀢𑀁, 𑀅𑀜𑁆𑀜𑀁 𑀯𑀢𑁆𑀣𑀼𑀁 𑀲𑀭𑀻𑀭𑀲𑀜𑁆𑀜𑀺𑀢𑀦𑁆𑀢𑀺 ‘‘𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀯𑀸𑀤𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀭𑀽𑀧𑁂 𑀪𑁂𑀤𑀲𑁆𑀲 𑀤𑀺𑀝𑁆𑀞𑀢𑁆𑀢𑀸, 𑀅𑀢𑁆𑀢𑀦𑀺 𑀘 𑀢𑀤𑀪𑀸𑀯𑀢𑁄 𑀅𑀢𑁆𑀢𑀸 𑀦𑀺𑀘𑁆𑀘𑁄𑀢𑀺 𑀆𑀧𑀦𑁆𑀦𑀫𑁂𑀯𑀸𑀢𑀺 𑀆𑀳 ‘‘𑀢𑀼𑀫𑁆𑀳𑀸𑀓𑀁…𑀧𑁂… 𑀆𑀧𑀚𑁆𑀚𑀢𑀻’’𑀢𑀺.

𑁩𑁭𑁯-𑁩𑁮𑁦. 𑀢𑀬𑀺𑀤𑀁 𑀦𑁂𑀲𑀁 𑀯𑀜𑁆𑀛𑀸𑀲𑀼𑀢𑀲𑁆𑀲 𑀤𑀻𑀖𑀭𑀲𑁆𑀲𑀢𑀸𑀧𑀭𑀺𑀓𑀧𑁆𑀧𑀦𑀲𑀤𑀺𑀲𑀦𑁆𑀢𑀺 𑀓𑀢𑁆𑀯𑀸 𑀞𑀧𑀦𑀻𑀬𑁄𑀬𑀁 𑀧𑀜𑁆𑀳𑁄𑀢𑀺 𑀢𑀢𑁆𑀣 𑀭𑀸𑀚𑀦𑀺𑀫𑀻𑀮𑀦𑀁 𑀓𑀢𑁆𑀯𑀸 𑀲𑀢𑁆𑀣𑀸 𑀉𑀧𑀭𑀺 𑀦𑁂𑀲𑀁 ‘‘𑀢𑁂𑀦 𑀳𑀸𑀯𑀼𑀲𑁄 𑀲𑀼𑀡𑀸𑀣𑀸’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀻𑀢𑀺 𑀆𑀳 ‘‘𑀅𑀣 𑀪𑀕𑀯𑀸’’𑀢𑀺𑀆𑀤𑀺. 𑀢𑀲𑁆𑀲𑀸 𑀬𑁂𑀯𑀸𑀢𑀺 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬.

𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑀲𑁆𑀲 ‘‘𑀏𑀯𑀫𑀳𑀁 𑀇𑀢𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀲𑁆𑀲 𑀢𑀤𑀦𑀼𑀭𑀽𑀧𑀜𑁆𑀘 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲. 𑀏𑀢𑀁 𑀯𑀢𑁆𑀢𑀼𑀦𑁆𑀢𑀺 𑀏𑀢𑀁 𑀓𑀺𑀮𑁂𑀲𑀯𑀝𑁆𑀝𑀧𑀭𑀺𑀩𑀼𑀤𑁆𑀥𑀺𑀤𑀻𑀧𑀦𑀁 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺𑀆𑀤𑀺𑀓𑀁 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀦𑀺𑀲𑁆𑀲𑀺𑀢𑀁 𑀯𑀘𑀦𑀁 𑀯𑀢𑁆𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄 𑀦 𑀳𑁄𑀢𑀻𑀢𑀺 𑀥𑀫𑁆𑀫𑁂𑀲𑀼 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀦 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀆𑀲𑀧𑁆𑀧𑀦𑀧𑀭𑀺𑀲𑀧𑁆𑀧𑀦𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀏𑀢𑀫𑁂𑀯𑀁 𑀚𑀸𑀦𑀸𑀫𑀻𑀢𑀺 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑀁 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀘𑀺𑀢𑁆𑀢𑀦𑁆𑀢𑀺 𑀏𑀯𑀁 𑀚𑀸𑀦𑀸𑀫𑀺. 𑀦𑁄 𑀘 𑀏𑀯𑀁 𑀯𑀤𑀸𑀫𑀻𑀢𑀺 𑀬𑀣𑀸 𑀤𑀺𑀝𑁆𑀞𑀺𑀕𑀢𑀺𑀓𑀸 𑀢𑀁 𑀥𑀫𑁆𑀫𑀚𑀸𑀢𑀁 𑀲𑀦𑀺𑀲𑁆𑀲𑀬𑀁 𑀅𑀪𑁂𑀤𑀢𑁄 𑀕𑀡𑁆𑀳𑀦𑁆𑀢𑀸 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀯𑀸 𑀢𑀤𑀼𑀪𑀬𑀁 𑀪𑁂𑀤𑀢𑁄 𑀕𑀡𑁆𑀳𑀦𑁆𑀢𑀸 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀯𑀸 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀕𑀸𑀳𑀁 𑀧𑀯𑁂𑀤𑁂𑀦𑁆𑀢𑀺, 𑀅𑀳𑀁 𑀧𑀦 𑀦 𑀏𑀯𑀁 𑀯𑀤𑀸𑀫𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀼𑀧𑀭𑀺𑀜𑁆𑀜𑀸𑀢𑀢𑁆𑀢𑀸, 𑀢𑁂𑀦𑀸𑀳 ‘‘𑀅𑀣 𑀔𑁄’’𑀢𑀺𑀆𑀤𑀺. 𑀩𑀸𑀳𑀺𑀭𑀓𑀸 𑀬𑁂𑀪𑀼𑀬𑁆𑀬𑁂𑀦 𑀓𑀲𑀺𑀡𑀚𑁆𑀛𑀸𑀦𑀸𑀦𑀺 𑀏𑀯 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀆𑀳 ‘‘𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀪𑀸𑀯𑀦𑁆𑀢𑁂𑀲𑁆𑀲𑀸’’𑀢𑀺. 𑀬𑀲𑁆𑀫𑀸 𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀛𑀸𑀦𑀸𑀥𑀺𑀕𑀫𑁄, 𑀪𑀸𑀯𑀦𑀸 𑀘 𑀧𑀣𑀯𑀻𑀓𑀲𑀺𑀡𑀸𑀤𑀺𑀲𑀜𑁆𑀚𑀸𑀦𑀦𑀫𑀼𑀔𑁂𑀦 𑀳𑁄𑀢𑀻𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀦𑀺𑀤𑁆𑀤𑀺𑀲𑀻𑀬𑀢𑀺, 𑀢𑀲𑁆𑀫𑀸 𑀆𑀳 ‘‘𑀲𑀜𑁆𑀜𑀸𑀩𑀮𑁂𑀦 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺. ‘‘𑀦 𑀓𑀮𑁆𑀮𑀁 𑀢𑀲𑁆𑀲𑁂𑀢’’𑀦𑁆𑀢𑀺 𑀇𑀤𑀁 𑀬𑀲𑁆𑀫𑀸 𑀪𑀕𑀯𑀢𑀸 𑀢𑀢𑁆𑀣 𑀢𑀢𑁆𑀣 ‘‘𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀓𑀺𑀭𑁂𑀢𑀁 𑀓𑁂𑀯𑀮𑀺𑀦𑀸 𑀉𑀢𑁆𑀢𑀫𑀧𑀼𑀭𑀺𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳, 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀜𑁆𑀜𑀫𑀸𑀦𑀸 𑀯𑀤𑀦𑁆𑀢𑀻’’𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀚𑀸𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.