𑁬. 𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑀩𑁆𑀭𑀸𑀳𑁆𑀫𑀡𑀤𑀽𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁫𑁯. 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀻𑀪𑀸𑀯𑀽𑀧𑀕𑀫𑀦𑀢𑁄𑀢𑀺 𑀧𑀼𑀩𑁆𑀩𑁂 𑀓𑀺𑀭 𑀧𑀼𑀢𑁆𑀢𑀥𑀻𑀢𑀼𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀳𑀼𑀢𑁆𑀯𑀸 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀚𑀸𑀢𑀸𑀦𑀁 𑀮𑀺𑀘𑁆𑀙𑀯𑀻𑀭𑀸𑀚𑀓𑀼𑀫𑀸𑀭𑀸𑀦𑀁 𑀲𑀧𑀭𑀺𑀯𑀸𑀭𑀸𑀦𑀁 𑀅𑀦𑀼𑀓𑁆𑀓𑀫𑁂𑀦𑁂𑀯 𑀯𑀟𑁆𑀠𑀦𑁆𑀢𑀸𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀸𑀭𑀸𑀫𑀼𑀬𑁆𑀬𑀸𑀦𑀧𑁄𑀓𑁆𑀔𑀭𑀡𑀻𑀆𑀤𑀻𑀦𑀁 𑀧𑀢𑀺𑀝𑁆𑀞𑀸𑀦𑀲𑁆𑀲 𑀅𑀧𑁆𑀧𑀳𑁄𑀦𑀓𑀢𑀸𑀬 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀕𑀸𑀯𑀼𑀢𑀦𑁆𑀢𑀭𑁂𑀦 𑀕𑀸𑀯𑀼𑀢𑀦𑁆𑀢𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀁𑀲𑀼, 𑀢𑁂𑀦𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀻𑀪𑀸𑀯𑀁 𑀕𑀢𑀢𑁆𑀢𑀸 ‘‘𑀯𑁂𑀲𑀸𑀮𑀻’’ 𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀻𑀪𑀸𑀯𑀽𑀧𑀕𑀫𑀦𑀢𑁄 𑀯𑁂𑀲𑀸𑀮𑀻𑀢𑀺 𑀮𑀤𑁆𑀥𑀦𑀸𑀫𑀓𑁂 𑀦𑀕𑀭𑁂’’𑀢𑀺. 𑀲𑀬𑀁𑀚𑀸𑀢𑀦𑁆𑀢𑀺 𑀲𑀬𑀫𑁂𑀯 𑀚𑀸𑀢𑀁 𑀅𑀭𑁄𑀧𑀺𑀫𑀁. 𑀫𑀳𑀦𑁆𑀢𑀪𑀸𑀯𑁂𑀦𑁂𑀯𑀸𑀢𑀺 𑀭𑀼𑀓𑁆𑀔𑀕𑀘𑁆𑀙𑀸𑀦𑀁, 𑀞𑀺𑀢𑁄𑀓𑀸𑀲𑀲𑁆𑀲 𑀘 𑀫𑀳𑀦𑁆𑀢𑀪𑀸𑀯𑁂𑀦, 𑀢𑁂𑀦𑀸𑀳 ‘‘𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀳𑀼𑀢𑁆𑀯𑀸’’𑀢𑀺. 𑀓𑀽𑀝𑀸𑀕𑀸𑀭𑀲𑀸𑀮𑀸𑀲𑀗𑁆𑀔𑁂𑀧𑁂𑀦𑀸𑀢𑀺 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀓𑀽𑀝𑀸𑀕𑀸𑀭𑀲𑀸𑀮𑀸𑀦𑀺𑀬𑀸𑀫𑁂𑀦. 𑀓𑁄𑀲𑀮𑁂𑀲𑀼 𑀚𑀸𑀢𑀸, 𑀪𑀯𑀸 𑀯𑀸, 𑀢𑀁 𑀯𑀸 𑀭𑀝𑁆𑀞𑀁 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀓𑁄𑀲𑀮𑀓𑀸. 𑀏𑀯𑀁 𑀫𑀸𑀕𑀥𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀲 𑀅𑀓𑀭𑀡𑁂 𑀧𑀼𑀕𑁆𑀕𑀮𑁄 𑀫𑀳𑀸𑀚𑀸𑀦𑀺𑀬𑁄 𑀳𑁄𑀢𑀺, 𑀢𑀁 𑀓𑀭𑀡𑀁 𑀅𑀭𑀳𑀢𑀻𑀢𑀺 𑀓𑀭𑀡𑀻𑀬𑀁 𑀢𑁂𑀦 𑀓𑀭𑀡𑀻𑀬𑁂𑀦, 𑀢𑁂𑀦𑀸𑀳 ‘‘𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀓𑀫𑁆𑀫𑁂𑀦𑀸’’𑀢𑀺. 𑀢𑀁 𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺 𑀲𑀢𑀺 𑀲𑀫𑀯𑀸𑀬𑁂 𑀓𑀸𑀢𑀩𑁆𑀩𑀢𑁄.

𑁩𑁬𑁦. 𑀬𑀸 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀦𑀸𑀦𑀢𑁆𑀢𑀲𑀜𑁆𑀜𑀸, 𑀢𑀸𑀲𑀁 𑀯𑀲𑁂𑀦 𑀦𑀸𑀦𑀸𑀭𑀫𑁆𑀫𑀡𑀸𑀘𑀸𑀭𑀢𑁄. 𑀲𑀫𑁆𑀪𑀯𑀦𑁆𑀢𑀲𑁆𑀲𑁂𑀯 𑀧𑀝𑀺𑀲𑁂𑀥𑁄. 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀣𑀸 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸. 𑀲𑀮𑁆𑀮𑀻𑀦𑁄𑀢𑀺 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀏𑀓𑀢𑁆𑀢𑀸𑀭𑀫𑁆𑀫𑀡𑀁 𑀅𑀮𑁆𑀮𑀻𑀦𑁄.

𑀑𑀝𑁆𑀞𑀤𑁆𑀥𑀮𑀺𑀘𑁆𑀙𑀯𑀻𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁬𑁧. 𑀅𑀤𑁆𑀥𑁄𑀝𑁆𑀞𑀢𑀸𑀬𑀸𑀢𑀺 𑀢𑀲𑁆𑀲 𑀓𑀺𑀭 𑀉𑀢𑁆𑀢𑀭𑁄𑀝𑁆𑀞𑀁 𑀅𑀧𑁆𑀧𑀓𑀢𑀸𑀬 𑀢𑀺𑀭𑀺𑀬𑀁 𑀨𑀸𑀮𑁂𑀢𑁆𑀯𑀸 𑀅𑀧𑀦𑀻𑀢𑀤𑁆𑀥𑀁 𑀯𑀺𑀬 𑀔𑀸𑀬𑀢𑀺 𑀘𑀢𑁆𑀢𑀸𑀭𑁄 𑀤𑀦𑁆𑀢𑁂, 𑀤𑁆𑀯𑁂 𑀘 𑀤𑀸𑀞𑀸 𑀦 𑀙𑀸𑀤𑁂𑀢𑀺, 𑀢𑁂𑀦 𑀦𑀁 ‘‘𑀑𑀝𑁆𑀞𑀤𑁆𑀥𑁄’’𑀢𑀺 𑀯𑁄𑀳𑀭𑀦𑁆𑀢𑀺. 𑀅𑀬𑀁 𑀓𑀺𑀭 𑀉𑀧𑀸𑀲𑀓𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀫𑀸𑀫𑀓𑁄 𑀲𑀗𑁆𑀖𑀫𑀸𑀫𑀓𑁄, 𑀢𑁂𑀦𑀸𑀳 𑀧𑀼𑀭𑁂𑀪𑀢𑁆𑀢𑀦𑁆𑀢𑀺𑀆𑀤𑀺.

𑁩𑁬𑁨. 𑀲𑀸𑀲𑀦𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑁄𑀢𑀺 𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑁄. 𑀲𑀩𑁆𑀩𑀢𑁆𑀣 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀦𑁄𑀧𑀺 𑀪𑀕𑀯𑀢𑁄 𑀧𑀭𑀺𑀲𑀸𑀬 𑀫𑀳𑀦𑁆𑀢𑁂 𑀲𑀢𑀺 𑀢𑀤𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀺𑀬𑀫𑀸𑀦𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀆𑀳 ‘‘𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀻’’𑀢𑀺.

‘‘𑀯𑀺𑀲𑁆𑀲𑀸𑀲𑀺𑀓𑁄’’𑀢𑀺 𑀯𑀢𑁆𑀯𑀸 𑀢𑀫𑀲𑁆𑀲 𑀯𑀺𑀲𑁆𑀲𑀸𑀲𑀺𑀓𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀣𑁂𑀭𑀲𑁆𑀲 𑀔𑀻𑀡𑀸 𑀲𑀯𑀲𑁆𑀲𑀲𑀢𑁄 𑀆𑀮𑀲𑀺𑀬𑀪𑀸𑀯𑁄 ‘‘𑀅𑀧𑁆𑀧𑀳𑀻𑀦𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀯𑀸𑀲𑀦𑀸𑀮𑁂𑀲𑀁 𑀧𑀦 𑀉𑀧𑀸𑀤𑀸𑀬𑀸𑀳 ‘‘𑀈𑀲𑀓𑀁 𑀅𑀧𑁆𑀧𑀳𑀻𑀦𑁄 𑀯𑀺𑀬 𑀳𑁄𑀢𑀻’’𑀢𑀺. 𑀦 𑀳𑀺 𑀲𑀸𑀯𑀓𑀸𑀦𑀁 𑀲𑀯𑀸𑀲𑀦𑀸 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺.

𑁩𑁬𑁩. 𑀯𑀺𑀦𑁂𑀬𑁆𑀬𑀚𑀦𑀸𑀦𑀼𑀭𑁄𑀥𑁂𑀦 𑀩𑀼𑀤𑁆𑀥𑀸𑀦𑀁 𑀧𑀸𑀝𑀺𑀳𑀸𑀭𑀺𑀬𑀯𑀺𑀚𑀫𑁆𑀪𑀦𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺, 𑀢𑁂𑀦𑁂𑀯𑀸𑀳 ‘‘𑀲𑀁𑀲𑀽𑀘𑀺𑀢𑀦𑀺𑀓𑁆𑀔𑀫𑀦𑁄’’𑀢𑀺. 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀦𑀯𑁂𑀮𑀸𑀬𑀜𑁆𑀳𑀺 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀆𑀯𑁂𑀴𑀸𑀯𑁂𑀴𑀸𑀬𑀫𑀮𑀸𑀬𑀫𑀮𑀸 𑀳𑀼𑀢𑁆𑀯𑀸 𑀲𑀯𑀺𑀲𑁂𑀲𑀸 𑀧𑀪𑀲𑁆𑀲𑀭𑀸 𑀯𑀺𑀦𑀺𑀘𑁆𑀙𑀭𑀺𑀁𑀲𑀼.

𑁩𑁬𑁪. 𑀢𑀢𑁄 𑀧𑀭𑀦𑁆𑀢𑀺 ‘‘𑀳𑀺𑀬𑁆𑀬𑁄’’𑀢𑀺 𑀯𑀼𑀢𑁆𑀢𑀤𑀺𑀯𑀲𑀢𑁄 𑀅𑀦𑀦𑁆𑀢𑀭𑀁 𑀧𑀭𑀁 𑀧𑀼𑀭𑀺𑀫𑀢𑀭𑀁 𑀅𑀢𑀺𑀲𑀬𑁂𑀦 𑀧𑀼𑀭𑀺𑀫𑀢𑁆𑀢𑀸. 𑀇𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀯𑀯𑀢𑁆𑀣𑀺𑀢𑁄 𑀬𑀣𑀸𑀓𑁆𑀓𑀫𑀁 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀪𑀸𑀯𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀤𑁂𑀢𑁆𑀣 ‘‘𑀧𑀼𑀭𑀺𑀫𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀢𑁄 𑀧𑀪𑀼𑀢𑀺 𑀬𑀁 𑀬𑀁 𑀑𑀭𑀁, 𑀢𑀁 𑀢𑀁 𑀧𑀼𑀭𑀺𑀫𑀁, 𑀬𑀁 𑀬𑀁 𑀧𑀭𑀁, 𑀢𑀁 𑀢𑀁 𑀧𑀼𑀭𑀺𑀫𑀢𑀭𑀁, 𑀑𑀭𑀧𑀸𑀭𑀪𑀸𑀯𑀲𑁆𑀲 𑀯𑀺𑀬 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀪𑀸𑀯𑀲𑁆𑀲 𑀘 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀺𑀢𑁄, 𑀢𑁂𑀦𑀸𑀳 ‘‘𑀢𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺. 𑀫𑀽𑀮𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺𑀆𑀤𑀺𑀤𑀺𑀯𑀲𑀢𑁄 𑀧𑀝𑁆𑀞𑀸𑀬. 𑀅𑀕𑁆𑀕𑀦𑁆𑀢𑀺 𑀧𑀞𑀫𑀁. 𑀢𑀁 𑀧𑀦𑁂𑀢𑁆𑀣 𑀧𑀭𑀸 𑀅𑀢𑀻𑀢𑀸 𑀓𑁄𑀝𑀺 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀓𑁄𑀝𑀺𑀁 𑀓𑀢𑁆𑀯𑀸’’𑀢𑀺. 𑀬𑀁-𑀲𑀤𑁆𑀤𑀬𑁄𑀕𑁂𑀦 𑀘𑀸𑀬𑀁 ‘‘𑀯𑀺𑀳𑀭𑀸𑀫𑀻’’𑀢𑀺 𑀯𑀢𑁆𑀢𑀫𑀸𑀦𑀧𑁆𑀧𑀬𑁄𑀕𑁄, 𑀅𑀢𑁆𑀣𑁄 𑀧𑀦 𑀅𑀢𑀻𑀢𑀓𑀸𑀮𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦𑀸𑀳 ‘‘𑀯𑀺𑀳𑀸𑀲𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀞𑀫𑀯𑀺𑀓𑀧𑁆𑀧𑁂 ‘‘𑀯𑀺𑀳𑀭𑀸𑀫𑀻’’𑀢𑀺 𑀧𑀤𑀲𑁆𑀲 ‘‘𑀬𑀤𑀕𑁆𑀕𑁂’’𑀢𑀺 𑀇𑀫𑀺𑀦𑀸 𑀉𑀚𑀼𑀓𑀁 𑀲𑀫𑁆𑀩𑀦𑁆𑀥𑁄 𑀤𑀲𑁆𑀲𑀺𑀢𑁄, 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 ‘‘𑀢𑀻𑀡𑀺 𑀯𑀲𑁆𑀲𑀸𑀦𑀻’’𑀢𑀺 𑀇𑀫𑀺𑀦𑀸𑀧𑀺.

𑀧𑀺𑀬𑀚𑀸𑀢𑀺𑀓𑀸𑀦𑀻𑀢𑀺 𑀇𑀝𑁆𑀞𑀲𑀪𑀸𑀯𑀸𑀦𑀺. 𑀲𑀸𑀢𑀚𑀸𑀢𑀺𑀓𑀸𑀦𑀻𑀢𑀺 𑀫𑀥𑀼𑀭𑀲𑀪𑀸𑀯𑀸𑀦𑀺. 𑀫𑀥𑀼𑀭𑀁 𑀯𑀺𑀬𑀸𑀢𑀺 𑀳𑀺 ‘‘𑀫𑀥𑀼𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀫𑀦𑁄𑀭𑀫𑀁 𑀬𑀁 𑀓𑀺𑀜𑁆𑀘𑀺. 𑀓𑀸𑀫𑀽𑀧𑀲𑀜𑁆𑀳𑀺𑀢𑀸𑀦𑀻𑀢𑀺 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑁂𑀦 𑀓𑀸𑀫𑁂𑀦 𑀉𑀧𑀲𑀁𑀳𑀺𑀢𑀸𑀦𑀺, 𑀓𑀸𑀫𑀦𑀻𑀬𑀸𑀦𑀻𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀓𑀸𑀫𑀲𑁆𑀲𑀸𑀤𑀬𑀼𑀢𑁆𑀢𑀸𑀦𑀻’’𑀢𑀺, 𑀓𑀸𑀫𑀲𑁆𑀲𑀸𑀤𑀲𑁆𑀲 𑀬𑀼𑀢𑁆𑀢𑀸𑀦𑀺 𑀬𑁄𑀕𑁆𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀭𑀻𑀭𑀲𑀡𑁆𑀞𑀸𑀦𑁂𑀢𑀺 𑀲𑀭𑀻𑀭𑀩𑀺𑀫𑁆𑀩𑁂, 𑀆𑀥𑀸𑀭𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀢𑀲𑁆𑀫𑀸 𑀲𑀤𑁆𑀤𑁂𑀦𑀸𑀢𑀺 𑀢𑀁 𑀦𑀺𑀲𑁆𑀲𑀸𑀬 𑀢𑀢𑁄 𑀉𑀧𑁆𑀧𑀦𑁆𑀦𑁂𑀦 𑀲𑀤𑁆𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀥𑀼𑀭𑁂𑀦𑀸𑀢𑀺 𑀇𑀝𑁆𑀞𑁂𑀦. 𑀏𑀢𑁆𑀢𑀸𑀯𑀢𑀸𑀢𑀺 𑀤𑀺𑀩𑁆𑀩𑀲𑁄𑀢𑀜𑀸𑀡𑀲𑁆𑀲 𑀧𑀭𑀺𑀓𑀫𑁆𑀫𑀸𑀓𑀣𑀦𑀫𑀢𑁆𑀢𑁂𑀦. ‘‘𑀅𑀢𑁆𑀢𑀦𑀸 𑀜𑀸𑀢𑀫𑁆𑀧𑀺 𑀦 𑀓𑀣𑁂𑀢𑀺, 𑀓𑀺𑀫𑀲𑁆𑀲 𑀲𑀸𑀲𑀦𑁂 𑀅𑀥𑀺𑀝𑁆𑀞𑀸𑀦𑁂𑀦𑀸’’𑀢𑀺 𑀓𑀼𑀚𑁆𑀛𑀦𑁆𑀢𑁄 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀲𑀳 𑀓𑀼𑀚𑁆𑀛𑀦𑁂𑀦𑁂𑀯 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀧𑀭𑀺𑀳𑀸𑀬𑀺. 𑀘𑀺𑀦𑁆𑀢𑁂𑀲𑀻𑀢𑀺 ‘‘𑀓𑀲𑁆𑀫𑀸 𑀦𑀼 𑀔𑁄 𑀫𑀬𑁆𑀳𑀁 𑀢𑀁 𑀧𑀭𑀺𑀓𑀫𑁆𑀫𑀁 𑀦 𑀓𑀣𑁂𑀲𑀻’’𑀢𑀺 𑀧𑀭𑀺𑀯𑀺𑀢𑀓𑁆𑀓𑁂𑀦𑁆𑀢𑁄 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑀯𑀲𑁂𑀦 𑀘𑀺𑀦𑁆𑀢𑁂𑀲𑀺. 𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀧𑀸𑀣𑀺𑀓𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦 𑀢𑀁 𑀢𑀁 𑀅𑀬𑀼𑀢𑁆𑀢𑀫𑁂𑀯 𑀘𑀺𑀦𑁆𑀢𑁂𑀦𑁆𑀢𑁄, 𑀪𑀸𑀲𑀦𑁆𑀢𑁄, 𑀓𑀭𑁄𑀦𑁆𑀢𑁄 𑀘 𑀅𑀦𑀼𑀓𑁆𑀓𑀫𑁂𑀦. 𑀪𑀕𑀯𑀢𑀺 𑀩𑀤𑁆𑀥𑀸𑀖𑀸𑀢𑀢𑀸𑀬 𑀲𑀸𑀲𑀦𑁂 𑀧𑀢𑀺𑀝𑁆𑀞𑀁 𑀅𑀮𑀪𑀦𑁆𑀢𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀯𑀸.

𑀏𑀓𑀁𑀲𑀪𑀸𑀯𑀺𑀢𑀲𑀫𑀸𑀥𑀺𑀯𑀡𑁆𑀡𑀦𑀸

𑁩𑁬𑁬-𑁩𑁭𑁧. 𑀏𑀓𑀁𑀲𑀸𑀬𑀸𑀢𑀺 𑀢𑀤𑀢𑁆𑀣𑁂𑀬𑁂𑀯 𑀘𑀢𑀼𑀢𑁆𑀣𑀻, 𑀢𑀲𑁆𑀫𑀸 𑀏𑀓𑀁𑀲𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀅𑀁𑀲-𑀲𑀤𑁆𑀤𑁄 𑀘𑁂𑀢𑁆𑀣 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄, 𑀲𑁄 𑀘 𑀅𑀥𑀺𑀓𑀸𑀭𑀢𑁄 𑀤𑀺𑀩𑁆𑀩𑀭𑀽𑀧𑀤𑀲𑁆𑀲𑀦𑀤𑀺𑀩𑁆𑀩𑀲𑀤𑁆𑀤𑀲𑁆𑀲𑀯𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀓𑀓𑁄𑀝𑁆𑀞𑀸𑀲𑀸𑀬𑀸’’𑀢𑀺𑀆𑀤𑀺. 𑀅𑀦𑀼𑀤𑀺𑀲𑀸𑀬𑀸𑀢𑀺 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀤𑀺𑀪𑁂𑀤𑀸𑀬 𑀘𑀢𑀼𑀩𑁆𑀩𑀺𑀥𑀸𑀬 𑀅𑀦𑀼𑀤𑀺𑀲𑀸𑀬. 𑀉𑀪𑀬𑀓𑁄𑀝𑁆𑀞𑀸𑀲𑀸𑀬𑀸𑀢𑀺 𑀤𑀺𑀩𑁆𑀩𑀭𑀽𑀧𑀤𑀲𑁆𑀲𑀦𑀢𑁆𑀣𑀸𑀬, 𑀤𑀺𑀩𑁆𑀩𑀲𑀤𑁆𑀤𑀲𑁆𑀲𑀯𑀦𑀢𑁆𑀣𑀸𑀬 𑀘. 𑀪𑀸𑀯𑀺𑀢𑁄𑀢𑀺 𑀬𑀣𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁, 𑀤𑀺𑀩𑁆𑀩𑀲𑁄𑀢𑀜𑀸𑀡𑀜𑁆𑀘 𑀲𑀫𑀥𑀺𑀕𑀢𑀁 𑀳𑁄𑀢𑀺, 𑀏𑀯𑀁 𑀪𑀸𑀯𑀺𑀢𑁄. 𑀢𑀬𑀺𑀤𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀓𑀭𑀡𑁂𑀦 𑀇𑀚𑁆𑀛𑀦𑁆𑀢𑀻𑀲𑀼 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀏𑀓𑀚𑁆𑀛𑀁 𑀇𑀚𑁆𑀛𑀦𑁆𑀢𑀻𑀲𑀼𑀧𑀺 𑀓𑀫𑁂𑀦𑁂𑀯 𑀓𑀺𑀘𑁆𑀘𑀲𑀺𑀤𑁆𑀥𑀺 𑀏𑀓𑀚𑁆𑀛𑀁 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀧𑀸𑀴𑀺𑀬𑀫𑁆𑀧𑀺 𑀏𑀓𑀲𑁆𑀲 𑀉𑀪𑀬𑀲𑀫𑀢𑁆𑀣𑀢𑀸𑀲𑀦𑁆𑀤𑀲𑁆𑀲𑀦𑀢𑁆𑀣𑀫𑁂𑀯 ‘‘𑀤𑀺𑀩𑁆𑀩𑀸𑀦𑀜𑁆𑀘 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬, 𑀤𑀺𑀩𑁆𑀩𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀦 𑀏𑀓𑀚𑁆𑀛𑀁 𑀓𑀺𑀘𑁆𑀘𑀲𑀺𑀤𑁆𑀥𑀺𑀲𑀫𑁆𑀪𑀯𑀢𑁄. ‘‘𑀏𑀓𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺𑀳𑁂𑀢𑀽’’𑀢𑀺 𑀇𑀫𑀺𑀦𑀸 𑀲𑀼𑀦𑀓𑁆𑀔𑀢𑁆𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀬 𑀏𑀯 𑀧𑀭𑀺𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀤𑀺𑀩𑁆𑀩𑀲𑀤𑁆𑀤𑀁 𑀦𑀸𑀲𑁆𑀲𑁄𑀲𑁆𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀡𑁆𑀡𑀓𑀦𑁆𑀢𑀺 𑀅𑀯𑀺𑀭𑀚𑁆𑀛𑀦𑀓𑀁, 𑀅𑀦𑀯𑀚𑁆𑀚𑀦𑁆𑀢𑀺 𑀯𑀸 𑀅𑀢𑁆𑀣𑁄.

𑁩𑁭𑁨. ‘‘𑀲𑀫𑀸𑀥𑀺 𑀏𑀯’’ 𑀪𑀸𑀯𑁂𑀢𑀩𑁆𑀩𑀝𑁆𑀞𑁂𑀦 𑀲𑀫𑀸𑀥𑀺𑀪𑀸𑀯𑀦𑀸. ‘‘𑀤𑀺𑀩𑁆𑀩𑀲𑁄𑀢𑀜𑀸𑀡𑀁 𑀲𑁂𑀝𑁆𑀞’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁂𑀦𑀸𑀧𑀺 𑀫𑀳𑀸𑀮𑀺𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀫𑁆𑀧𑀺 𑀢𑁂𑀦 𑀲𑀳 𑀕𑀳𑁂𑀢𑁆𑀯𑀸 ‘‘𑀏𑀢𑀸𑀲𑀁 𑀦𑀽𑀦 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀺𑀢𑀦𑁆𑀢𑀺 ‘‘𑀉𑀪𑀬𑀁𑀲𑀪𑀸𑀯𑀺𑀢𑀸𑀦𑀁 𑀲𑀫𑀸𑀥𑀻𑀦𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀩𑀸𑀳𑀺𑀭𑀸 𑀏𑀢𑀸 𑀲𑀫𑀸𑀥𑀺𑀪𑀸𑀯𑀦𑀸 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸. 𑀢𑀸 𑀳𑀺 𑀇𑀢𑁄 𑀩𑀸𑀳𑀺𑀭𑀓𑀸𑀦𑀫𑁆𑀧𑀺 𑀇𑀚𑁆𑀛𑀦𑁆𑀢𑀺. 𑀦 𑀅𑀚𑁆𑀛𑀢𑁆𑀢𑀺𑀓𑀸 𑀪𑀕𑀯𑀢𑁄 𑀲𑀸𑀫𑀼𑀓𑁆𑀓𑀁𑀲𑀺𑀓𑀪𑀸𑀯𑁂𑀦 𑀅𑀧𑁆𑀧𑀯𑁂𑀤𑀺𑀢𑀢𑁆𑀢𑀸. 𑀬𑀤𑀢𑁆𑀣𑀦𑁆𑀢𑀺 𑀬𑁂𑀲𑀁 𑀅𑀢𑁆𑀣𑀸𑀬. 𑀢𑁂𑀢𑀺 𑀢𑁂 𑀅𑀭𑀺𑀬𑀨𑀮𑀥𑀫𑁆𑀫𑁂. 𑀢𑁂 𑀳𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀸𑀢𑀺.

𑀘𑀢𑀼𑀅𑀭𑀺𑀬𑀨𑀮𑀯𑀡𑁆𑀡𑀦𑀸

𑁩𑁭𑁩. 𑀢𑀲𑁆𑀫𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑁂 𑀲𑀁𑀬𑁄𑀚𑀦𑀢𑁄. ‘‘𑀫𑀕𑁆𑀕𑀲𑁄𑀢𑀁 𑀆𑀧𑀦𑁆𑀦𑁄’’𑀢𑀺 𑀨𑀮𑀝𑁆𑀞𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀕𑁆𑀕𑀝𑁆𑀞𑁄 𑀳𑀺 𑀫𑀕𑁆𑀕𑀲𑁄𑀢𑀁 𑀆𑀧𑀚𑁆𑀚𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑁄𑀢𑀸𑀧𑀦𑁆𑀦𑁂’’𑀢𑀺, ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀘. 𑀅𑀧𑀢𑀦𑀥𑀫𑁆𑀫𑁄𑀢𑀺 𑀅𑀦𑀼𑀧𑁆𑀧𑀚𑁆𑀚𑀦- (𑀫. 𑀦𑀺. 𑁩.𑁩𑁭𑁯) 𑀲𑀪𑀸𑀯𑁄. 𑀥𑀫𑁆𑀫𑀦𑀺𑀬𑀸𑀫𑁂𑀦𑀸𑀢𑀺 𑀫𑀕𑁆𑀕𑀥𑀫𑁆𑀫𑀦𑀺𑀬𑀸𑀫𑁂𑀦. 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀲𑀢𑁆𑀢𑀫𑀪𑀯𑀢𑁄 𑀉𑀧𑀭𑀺 𑀅𑀦𑀼𑀧𑁆𑀧𑀚𑁆𑀚𑀦𑀥𑀫𑁆𑀫𑀢𑀸𑀬 𑀯𑀸 𑀦𑀺𑀬𑀢𑁄. 𑀧𑀭𑀁 𑀅𑀬𑀦𑀁 𑀧𑀭𑀸𑀕𑀢𑀺.

𑀢𑀦𑀼𑀢𑁆𑀢𑀁 𑀦𑀸𑀫 𑀧𑀯𑀢𑁆𑀢𑀺𑀬𑀸 𑀫𑀦𑁆𑀤𑀢𑀸, 𑀯𑀺𑀭𑀴𑀢𑀸 𑀘𑀸𑀢𑀺 𑀆𑀳 ‘‘𑀢𑀦𑀼𑀢𑁆𑀢𑀸’’𑀢𑀺𑀆𑀤𑀺. 𑀳𑁂𑀝𑁆𑀞𑀸𑀪𑀸𑀕𑀺𑀬𑀸𑀦𑀦𑁆𑀢𑀺 𑀳𑁂𑀝𑁆𑀞𑀸𑀪𑀸𑀕𑀲𑁆𑀲 𑀓𑀸𑀫𑀪𑀯𑀲𑁆𑀲𑀧𑀘𑁆𑀘𑀬𑀪𑀸𑀯𑁂𑀦 𑀳𑀺𑀢𑀸𑀦𑀁. 𑀑𑀧𑀧𑀸𑀢𑀺𑀓𑁄𑀢𑀺 𑀉𑀧𑀧𑀸𑀢𑀺𑀓𑁄 𑀉𑀧𑀧𑀢𑀦𑁂 𑀲𑀸𑀥𑀼𑀓𑀸𑀭𑀻𑀢𑀺 𑀓𑀢𑁆𑀯𑀸. 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑀼𑀢𑁆𑀢𑀺, 𑀘𑀺𑀢𑁆𑀢𑀫𑁂𑀯 𑀯𑀺𑀫𑀼𑀢𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀓𑀺𑀮𑁂𑀲…𑀧𑁂… 𑀅𑀥𑀺𑀯𑀘𑀦’’𑀦𑁆𑀢𑀺. 𑀘𑀺𑀢𑁆𑀢𑀲𑀻𑀲𑁂𑀦 𑀘𑁂𑀢𑁆𑀣 𑀲𑀫𑀸𑀥𑀺 𑀕𑀳𑀺𑀢𑁄 ‘‘𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺. 𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁯) 𑀯𑀺𑀬. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄, 𑀢𑁂𑀦𑀸𑀳 ‘‘𑀧𑀜𑁆𑀜𑀸𑀯 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻’’𑀢𑀺. 𑀲𑀸𑀫𑀦𑁆𑀢𑀺 𑀅𑀢𑁆𑀢𑀦𑀸𑀯, 𑀅𑀧𑀭𑀧𑁆𑀧𑀘𑁆𑀘𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀜𑁆𑀜𑀸𑀢𑀺 𑀬-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀪𑀺𑀚𑀸𑀦𑀺𑀢𑁆𑀯𑀸’’𑀢𑀺.

𑀅𑀭𑀺𑀬𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀡𑁆𑀡𑀦𑀸

𑁩𑁭𑁪-𑁫. 𑀅𑀭𑀺𑀬𑀲𑀸𑀯𑀓𑁄 𑀦𑀺𑀩𑁆𑀩𑀸𑀦𑀁, 𑀅𑀭𑀺𑀬𑀨𑀮𑀜𑁆𑀘 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸, 𑀲𑀸 𑀘 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀏𑀯𑀸𑀢𑀺 𑀇𑀥 ‘‘𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬𑀸’’𑀢𑀺 𑀅𑀭𑀺𑀬𑀫𑀕𑁆𑀕𑀫𑀸𑀳. ‘‘𑀅𑀝𑁆𑀞 𑀅𑀗𑁆𑀕𑀸𑀦𑀺 𑀅𑀲𑁆𑀲𑀸’’𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀁 𑀅𑀓𑀢𑁆𑀯𑀸 𑀅𑀝𑁆𑀞𑀗𑁆𑀕𑀸𑀦𑀺 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑁄𑀢𑀺 𑀧𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸.

𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀬𑀸𑀣𑀸𑀯𑀢𑁄 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀲𑀪𑀸𑀯𑀸 𑀲𑀫𑁆𑀫𑀸 𑀤𑀲𑁆𑀲𑀦𑀮𑀓𑁆𑀔𑀡𑀸. 𑀲𑀫𑁆𑀫𑀤𑁂𑀯 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀲𑀪𑀸𑀯𑁄 𑀲𑀫𑁆𑀫𑀸 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀚𑀦𑀁 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀢𑀩𑁆𑀩𑀺𑀧𑀓𑁆𑀔𑀯𑀺𑀭𑀢𑀺𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸 𑀪𑁂𑀤𑀓𑀭𑀫𑀺𑀘𑁆𑀙𑀸𑀯𑀸𑀘𑀸𑀧𑀳𑀸𑀦𑁂𑀦 𑀚𑀦𑁂 𑀲𑀫𑁆𑀧𑀬𑀼𑀢𑁆𑀢𑁂 𑀘 𑀧𑀭𑀺𑀕𑁆𑀕𑀡𑁆𑀳𑀦𑀓𑀺𑀘𑁆𑀘𑀯𑀢𑀻 𑀳𑁄𑀢𑀻𑀢𑀺 𑀲𑀫𑁆𑀫𑀸 𑀧𑀭𑀺𑀕𑁆𑀕𑀳𑀡𑀮𑀓𑁆𑀔𑀡𑀸. 𑀬𑀣𑀸 𑀘𑀻𑀯𑀭𑀓𑀫𑁆𑀫𑀸𑀤𑀺𑀓𑁄 𑀓𑀫𑁆𑀫𑀦𑁆𑀢𑁄 𑀏𑀓𑀁 𑀓𑀸𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀁 𑀢𑀁 𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑁄 𑀯𑀸 𑀘𑁂𑀢𑀦𑀸𑀲𑀗𑁆𑀔𑀸𑀢𑁄 𑀓𑀫𑁆𑀫𑀦𑁆𑀢𑁄 𑀳𑀢𑁆𑀣𑀧𑀸𑀤𑀘𑀮𑀦𑀸𑀤𑀺𑀓𑀁 𑀓𑀺𑀭𑀺𑀬𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀏𑀯𑀁 𑀲𑀸𑀯𑀚𑁆𑀚𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀧𑀓𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀦𑀺𑀭𑀯𑀚𑁆𑀚𑀲𑀫𑀼𑀝𑁆𑀞𑀸𑀧𑀦𑀓𑀺𑀘𑁆𑀘𑀯𑀸 𑀳𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑁂 𑀘 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀏𑀯 𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀓𑀸𑀬𑀯𑀸𑀘𑀸𑀦𑀁, 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀘 𑀲𑀁𑀓𑀺𑀮𑁂𑀲𑀪𑀽𑀢𑀫𑀺𑀘𑁆𑀙𑀸𑀚𑀻𑀯𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸 𑀯𑁄𑀤𑀸𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀆𑀚𑀻𑀯𑁄. 𑀓𑁄𑀲𑀚𑁆𑀚𑀧𑀓𑁆𑀔𑀢𑁄 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀕𑁆𑀕𑀡𑁆𑀳𑀦𑀲𑀪𑀸𑀯𑁄𑀢𑀺 𑀲𑀫𑁆𑀫𑀸 𑀧𑀕𑁆𑀕𑀸𑀳𑀮𑀓𑁆𑀔𑀡𑁄 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑀫𑁆𑀫𑀤𑁂𑀯 𑀉𑀧𑀝𑁆𑀞𑀸𑀦𑀲𑀪𑀸𑀯𑀸𑀢𑀺 𑀲𑀫𑁆𑀫𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀲𑀢𑀺. 𑀯𑀺𑀓𑁆𑀔𑁂𑀧𑀯𑀺𑀤𑁆𑀥𑀁𑀲𑀦𑁂𑀦 𑀲𑀫𑁆𑀫𑀤𑁂𑀯 𑀘𑀺𑀢𑁆𑀢𑀲𑁆𑀲 𑀲𑀫𑀸𑀤𑀳𑀦𑀲𑀪𑀸𑀯𑁄𑀢𑀺 𑀲𑀫𑁆𑀫𑀸 𑀲𑀫𑀸𑀥𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀫𑀸𑀥𑀺.

𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀸 𑀤𑀺𑀝𑁆𑀞𑁂𑀓𑀝𑁆𑀞𑀸 𑀅𑀯𑀺𑀚𑁆𑀚𑀸𑀤𑀬𑁄. 𑀧𑀲𑁆𑀲𑀢𑀻𑀢𑀺 𑀧𑀓𑀸𑀲𑁂𑀢𑀺 𑀓𑀺𑀘𑁆𑀘𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀢𑁂𑀦𑀸𑀳 ‘‘𑀢𑀧𑁆𑀧𑀝𑀺𑀘𑁆𑀙𑀸𑀤𑀓…𑀧𑁂… 𑀅𑀲𑀫𑁆𑀫𑁄𑀳𑀢𑁄’’𑀢𑀺. 𑀢𑁂𑀦𑁂𑀯 𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀅𑀗𑁆𑀕𑁂𑀦 𑀢𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀯𑀢𑁆𑀢𑀢𑀻𑀢𑀺 𑀢𑀣𑁂𑀯𑀸𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄.

𑀓𑀺𑀘𑁆𑀘𑀢𑁄𑀢𑀺 𑀧𑀼𑀩𑁆𑀩𑀪𑀸𑀕𑁂𑀳𑀺 𑀤𑀼𑀓𑁆𑀔𑀸𑀤𑀺𑀜𑀸𑀡𑁂𑀳𑀺 𑀓𑀸𑀢𑀩𑁆𑀩𑀲𑁆𑀲 𑀓𑀺𑀘𑁆𑀘𑀲𑁆𑀲 𑀇𑀥 𑀲𑀸𑀢𑀺𑀲𑀬𑀁 𑀦𑀺𑀧𑁆𑀨𑀢𑁆𑀢𑀺𑀢𑁄 𑀇𑀫𑀲𑁆𑀲𑁂𑀯 𑀯𑀸 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀧𑁆𑀧𑀓𑀸𑀲𑀦𑀓𑀺𑀘𑁆𑀘𑀢𑁄. 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀓𑀸𑀢𑀩𑁆𑀩𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄. 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀧𑁆𑀧𑀳𑀸𑀦𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁦𑁩) ‘‘𑀯𑀺𑀭𑀢𑀺𑀘𑁂𑀢𑀦𑀸, 𑀲𑀩𑁆𑀩𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀢𑀢𑁆𑀣 𑀧𑀥𑀸𑀦𑀸𑀦𑀁 𑀯𑀺𑀭𑀢𑀺𑀘𑁂𑀢𑀦𑀸𑀦𑀁 𑀯𑀲𑁂𑀦 ‘‘𑀯𑀺𑀭𑀢𑀺𑀬𑁄𑀧𑀺 𑀳𑁄𑀦𑁆𑀢𑀺 𑀘𑁂𑀢𑀦𑀸𑀬𑁄𑀧𑀻’’𑀢𑀺 𑀆𑀳. 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀡𑀓𑀸𑀮𑁂 𑀯𑀸 𑀯𑀺𑀭𑀢𑀺𑀬𑁄, 𑀲𑀼𑀪𑀸𑀲𑀺𑀢𑀸𑀤𑀺𑀯𑀸𑀘𑀸𑀪𑀸𑀲𑀦𑀸𑀤𑀺𑀓𑀸𑀮𑁂 𑀘 𑀘𑁂𑀢𑀦𑀸𑀬𑁄 𑀬𑁄𑀚𑁂𑀢𑀩𑁆𑀩𑀸. 𑀫𑀕𑁆𑀕𑀓𑁆𑀔𑀡𑁂 𑀯𑀺𑀭𑀢𑀺𑀬𑁄𑀯 𑀘𑁂𑀢𑀦𑀸𑀦𑀁 𑀅𑀫𑀕𑁆𑀕𑀗𑁆𑀕𑀢𑁆𑀢𑀸 𑀏𑀓𑀲𑁆𑀲 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀜𑀸𑀡𑀢𑀸 𑀯𑀺𑀬, 𑀏𑀓𑀸𑀬 𑀯𑀺𑀭𑀢𑀺𑀬𑀸 𑀫𑀼𑀲𑀸𑀯𑀸𑀤𑀸𑀤𑀺𑀯𑀺𑀭𑀢𑀺𑀪𑀸𑀯𑁄 𑀯𑀺𑀬 𑀘 𑀏𑀓𑀸𑀬 𑀘𑁂𑀢𑀦𑀸𑀬 𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀘𑁆𑀘𑀢𑁆𑀢𑀬𑀲𑀸𑀥𑀦𑀲𑀪𑀸𑀯𑀸𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸𑀤𑀺𑀪𑀸𑀯𑀸𑀲𑀺𑀤𑁆𑀥𑀺𑀢𑁄, 𑀢𑀁𑀲𑀺𑀤𑁆𑀥𑀺𑀬𑀜𑁆𑀘 𑀅𑀗𑁆𑀕𑀢𑁆𑀢𑀬𑀢𑁆𑀢𑀸𑀲𑀺𑀤𑁆𑀥𑀺𑀢𑁄 𑀘. 𑀲𑀫𑁆𑀫𑀧𑁆𑀧𑀥𑀸𑀦𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀯𑀲𑁂𑀦.

𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀫𑁆𑀫𑀸𑀲𑀫𑀸𑀥𑀺𑀬𑁂𑀯𑀸𑀢𑀺. 𑀬𑀤𑀺𑀧𑀺 𑀲𑀫𑀸𑀥𑀺𑀉𑀧𑀓𑀸𑀭𑀓𑀸𑀦𑀁 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀫𑀚𑁆𑀚𑀦𑀲𑀫𑁆𑀧𑀺𑀬𑀸𑀬𑀦𑀩𑁆𑀭𑀽𑀳𑀦𑀲𑀦𑁆𑀢𑀲𑀼𑀔𑀸𑀦𑀁 𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀲𑁂𑀦 𑀘𑀢𑀽𑀳𑀺 𑀛𑀸𑀦𑁂𑀳𑀺 𑀲𑀫𑁆𑀫𑀸𑀲𑀫𑀸𑀥𑀺 𑀯𑀺𑀪𑀢𑁆𑀢𑁄, 𑀢𑀣𑀸𑀧𑀺 𑀯𑀸𑀬𑀸𑀫𑁄 𑀯𑀺𑀬 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀘𑀢𑀼𑀯𑀸𑀬𑀸𑀫𑀓𑀺𑀘𑁆𑀘𑀁, 𑀲𑀢𑀺 𑀯𑀺𑀬 𑀘 𑀅𑀲𑀼𑀪𑀸𑀲𑀼𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑁂𑀲𑀼 𑀓𑀸𑀬𑀸𑀤𑀻𑀲𑀼 𑀲𑀼𑀪𑀸𑀤𑀺𑀲𑀜𑁆𑀜𑀸𑀧𑀳𑀸𑀦𑀘𑀢𑀼𑀲𑀢𑀺𑀓𑀺𑀘𑁆𑀘𑀁 𑀏𑀓𑁄 𑀲𑀫𑀸𑀥𑀺 𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑀫𑀸𑀥𑀺𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀏𑀯 𑀫𑀕𑁆𑀕𑀓𑁆𑀔𑀡𑁂𑀧𑀺, 𑀢𑀣𑀸 𑀧𑀼𑀩𑁆𑀩𑀪𑀸𑀕𑁂𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀏𑀯 𑀫𑀕𑁆𑀕𑀓𑁆𑀔𑀡𑁂𑀧𑀻𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀸𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑀢𑁆𑀢𑀸 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀧𑀜𑁆𑀜𑀸𑀲𑀢𑁆𑀣𑀢𑁆𑀢𑀸 𑀓𑀺𑀮𑁂𑀲𑀘𑁄𑀭𑁂 𑀖𑀸𑀢𑁂𑀦𑁆𑀢𑁄. 𑀩𑀳𑀼𑀓𑀸𑀭𑀢𑁆𑀢𑀸𑀢𑀺 𑀬𑁆𑀯𑀸𑀬𑀁 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀇𑀫𑀺𑀦𑀸 𑀓𑀤𑀸𑀘𑀺𑀧𑀺 𑀅𑀲𑀫𑀼𑀕𑁆𑀖𑀸𑀝𑀺𑀢𑀧𑀼𑀩𑁆𑀩𑁄 𑀓𑀺𑀮𑁂𑀲𑀕𑀡𑁄 𑀢𑀲𑁆𑀲 𑀲𑀫𑀼𑀕𑁆𑀖𑀸𑀝𑀓𑁄 𑀅𑀭𑀺𑀬𑀫𑀕𑁆𑀕𑁄. 𑀢𑀢𑁆𑀣 𑀘𑀸𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀼𑀩𑁆𑀩𑀗𑁆𑀕𑀫𑀸 𑀳𑁄𑀢𑀻𑀢𑀺 𑀩𑀳𑀼𑀓𑀸𑀭𑀸, 𑀢𑀲𑁆𑀫𑀸 𑀩𑀳𑀼𑀓𑀸𑀭𑀢𑁆𑀢𑀸.

𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. ‘‘𑀩𑀳𑀼𑀓𑀸𑀭𑁄’’𑀢𑀺 𑀯𑀢𑁆𑀯𑀸 𑀢𑀁 𑀩𑀳𑀼𑀓𑀸𑀭𑀢𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀬𑀁’’ 𑀢𑀫𑁆𑀩𑀓𑀁𑀲𑀸𑀤𑀺𑀫𑀬𑀢𑁆𑀢𑀸 𑀓𑀽𑀝𑁄. 𑀅𑀬𑀁 𑀲𑀫𑀲𑀸𑀭𑀢𑀸𑀬 𑀫𑀳𑀸𑀲𑀸𑀭𑀢𑀸𑀬 𑀙𑁂𑀓𑁄. 𑀏𑀯𑀦𑁆𑀢𑀺 𑀬𑀣𑀸 𑀳𑁂𑀭𑀜𑁆𑀜𑀺𑀓𑀲𑁆𑀲 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀓𑀳𑀸𑀧𑀡𑀯𑀺𑀪𑀸𑀕𑀚𑀸𑀦𑀦𑁂 𑀓𑀭𑀡𑀦𑁆𑀢𑀭𑀁 𑀩𑀳𑀼𑀓𑀸𑀭𑀁 𑀬𑀤𑀺𑀤𑀁 𑀳𑀢𑁆𑀣𑁄, 𑀏𑀯𑀁 𑀬𑁄𑀕𑀸𑀯𑀘𑀭𑀲𑁆𑀲 𑀧𑀜𑁆𑀜𑀸𑀬 𑀑𑀮𑁄𑀓𑁂𑀢𑁆𑀯𑀸 𑀥𑀫𑁆𑀫𑀯𑀺𑀪𑀸𑀕𑀚𑀸𑀦𑀦𑁂 𑀥𑀫𑁆𑀫𑀦𑁆𑀢𑀭𑀁 𑀩𑀳𑀼𑀓𑀸𑀭𑀁 𑀬𑀤𑀺𑀤𑀁 𑀯𑀺𑀢𑀓𑁆𑀓𑁄 𑀯𑀺𑀢𑀓𑁆𑀓𑁂𑀢𑁆𑀯𑀸 𑀢𑀤𑀯𑀩𑁄𑀥𑀢𑁄, 𑀢𑀲𑁆𑀫𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀩𑀳𑀼𑀓𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀢𑀺𑀬𑀉𑀧𑀫𑀸𑀬𑀁 𑀏𑀯𑀦𑁆𑀢𑀺 𑀬𑀣𑀸 𑀢𑀘𑁆𑀙𑀓𑁄 𑀧𑀭𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀺𑀦𑁆𑀦𑀁 𑀤𑀩𑁆𑀩𑀲𑀫𑁆𑀪𑀸𑀭𑀁 𑀯𑀸𑀲𑀺𑀬𑀸 𑀢𑀘𑁆𑀙𑁂𑀢𑁆𑀯𑀸 𑀕𑁂𑀳𑀓𑀭𑀡𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀯𑀺𑀢𑀓𑁆𑀓𑁂𑀦 𑀮𑀓𑁆𑀔𑀡𑀸𑀤𑀺𑀢𑁄 𑀯𑀺𑀢𑀓𑁆𑀓𑁂𑀢𑁆𑀯𑀸 𑀤𑀺𑀦𑁆𑀦𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀓𑀫𑁆𑀫𑁂 𑀉𑀧𑀦𑁂𑀢𑀻𑀢𑀺 𑀬𑁄𑀚𑀦𑀸. 𑀯𑀘𑀻𑀪𑁂𑀤𑀲𑁆𑀲 𑀉𑀧𑀓𑀸𑀭𑀓𑁄 𑀯𑀺𑀢𑀓𑁆𑀓𑁄 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀯𑀘𑀻𑀪𑁂𑀤𑀦𑀺𑀯𑀢𑁆𑀢𑀦𑀧𑀯𑀢𑁆𑀢𑀦𑀓𑀭𑀸𑀬 𑀲𑀫𑁆𑀫𑀸𑀯𑀸𑀘𑀸𑀬𑀧𑀺 𑀉𑀧𑀓𑀸𑀭𑀓𑁄 𑀏𑀯𑀸𑀢𑀺 ‘‘𑀲𑁆𑀯𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀘𑀻𑀪𑁂𑀤𑀲𑁆𑀲 𑀦𑀺𑀬𑀸𑀫𑀺𑀓𑀸 𑀯𑀸𑀘𑀸 𑀓𑀸𑀬𑀺𑀓𑀓𑀺𑀭𑀺𑀬𑀸𑀦𑀺𑀬𑀸𑀫𑀓𑀲𑁆𑀲 𑀓𑀫𑁆𑀫𑀦𑁆𑀢𑀲𑁆𑀲 𑀉𑀧𑀓𑀸𑀭𑀺𑀓𑀸. 𑀢𑀤𑀼𑀪𑀬𑀸𑀦𑀦𑁆𑀢𑀭𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀤𑁆𑀯𑀬𑀧𑀳𑀸𑀬𑀓𑀲𑁆𑀲 𑀲𑀼𑀘𑀭𑀺𑀢𑀤𑁆𑀯𑀬𑀧𑀸𑀭𑀺𑀧𑀽𑀭𑀺𑀳𑁂𑀢𑀼𑀪𑀽𑀢𑀲𑁆𑀲 𑀲𑀫𑁆𑀫𑀸𑀯𑀸𑀘𑀸𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀤𑁆𑀯𑀬𑀲𑁆𑀲 𑀅𑀦𑀦𑁆𑀢𑀭𑀁. 𑀇𑀤𑀁 𑀯𑀻𑀭𑀺𑀬𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀁. 𑀇𑀦𑁆𑀤𑁆𑀭𑀺𑀬𑀲𑀫𑀢𑀸𑀤𑀬𑁄 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀥𑀫𑁆𑀫𑀸. 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀅𑀧𑀓𑀸𑀭𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀕𑀢𑀺𑀬𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑁄, 𑀓𑀺𑀘𑁆𑀘𑀸𑀤𑀺𑀲𑀪𑀸𑀯𑁂 𑀯𑀸. 𑀲𑀫𑀦𑁆𑀦𑁂𑀲𑀺𑀢𑁆𑀯𑀸𑀢𑀺 𑀉𑀧𑀥𑀸𑀭𑁂𑀢𑁆𑀯𑀸.

𑀤𑁆𑀯𑁂𑀧𑀩𑁆𑀩𑀚𑀺𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁭𑁬-𑁭. ‘‘𑀓𑀲𑁆𑀫𑀸 𑀆𑀭𑀤𑁆𑀥’’𑀦𑁆𑀢𑀺 𑀅𑀦𑀼𑀲𑀦𑁆𑀥𑀺𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀬𑀁 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀉𑀧𑀭𑀺 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀢𑀺 𑀢𑀣𑀸𑀮𑀤𑁆𑀥𑀺𑀓𑀢𑁆𑀢𑀸. 𑀅𑀲𑁆𑀲𑀸𑀢𑀺 𑀮𑀺𑀘𑁆𑀙𑀯𑀻𑀭𑀜𑁆𑀜𑁄. 𑀤𑁂𑀲𑀦𑀸𑀬𑀸𑀢𑀺 𑀲𑀡𑁆𑀳𑀲𑀼𑀔𑀼𑀫𑀸𑀬𑀁 𑀲𑀼𑀜𑁆𑀜𑀢𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀁 𑀬𑀣𑀸𑀤𑁂𑀲𑀺𑀢𑀤𑁂𑀲𑀦𑀸𑀬𑀁. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 𑀦 𑀲𑀤𑁆𑀤𑀳𑀢𑀺 𑀦 𑀧𑀲𑀻𑀤𑀢𑀺. 𑀢𑀦𑁆𑀢𑀺𑀥𑀫𑁆𑀫𑀁 𑀦𑀸𑀫 𑀓𑀣𑁂𑀦𑁆𑀢𑁄𑀢𑀺 𑀬𑁂𑀲𑀁 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀓𑀣𑀻𑀬𑀢𑀺, 𑀢𑀲𑁆𑀫𑀺𑀁 𑀢𑁂𑀲𑀁 𑀅𑀲𑀢𑀺𑀧𑀺 𑀫𑀕𑁆𑀕𑀧𑀝𑀺𑀯𑁂𑀥𑁂 𑀓𑁂𑀯𑀮𑀁 𑀲𑀸𑀲𑀦𑁂 𑀢𑀦𑁆𑀢𑀺𑀥𑀫𑁆𑀫𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄. 𑀏𑀯𑀭𑀽𑀧𑀲𑁆𑀲𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑀸𑀬 𑀏𑀯𑀁𑀧𑀸𑀓𑀝𑀥𑀫𑁆𑀫𑀓𑀸𑀬𑀲𑁆𑀲 𑀲𑀢𑁆𑀣𑀼. 𑀬𑀼𑀢𑁆𑀢𑀁 𑀦𑀼 𑀔𑁄 𑀏𑀢𑀁 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀥𑀺𑀕𑀫𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀢𑀁 ‘‘𑀢𑀁 𑀚𑀻𑀯’’𑀦𑁆𑀢𑀺𑀆𑀤𑀺𑀦𑀸 𑀉𑀘𑁆𑀙𑁂𑀤𑀸𑀤𑀺𑀕𑀸𑀳𑀕𑀳𑀡𑀁 𑀅𑀧𑀺 𑀦𑀼 𑀬𑀼𑀢𑁆𑀢𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀮𑀤𑁆𑀥𑀺𑀬𑀸 𑀧𑀦 𑀛𑀸𑀦𑀸𑀥𑀺𑀕𑀫𑀫𑀢𑁆𑀢𑁂𑀦 𑀦 𑀢𑀸𑀯 𑀯𑀺𑀯𑁂𑀘𑀺𑀢𑀢𑁆𑀢𑀸 ‘‘𑀢𑁂𑀳𑀺 𑀬𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀢𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀛𑀸𑀦𑀮𑀸𑀪𑀺𑀦𑁄𑀧𑀺 𑀢𑀁 𑀕𑀳𑀡𑀁 ‘‘𑀅𑀬𑀼𑀢𑁆𑀢𑀫𑁂𑀯𑀸’’𑀢𑀺 𑀢𑀁 𑀉𑀘𑁆𑀙𑁂𑀤𑀯𑀸𑀤𑀁 𑀲𑀲𑁆𑀲𑀢𑀯𑀸𑀤𑀁 𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀦𑁆𑀢𑀺 𑀬𑀲𑁆𑀫𑀸 𑀔𑀻𑀡𑀸𑀲𑀯𑁄 𑀯𑀺𑀕𑀢𑀲𑀫𑁆𑀫𑁄𑀳𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄, ‘‘𑀢𑀲𑁆𑀫𑀸 𑀢𑀲𑁆𑀲 𑀢𑀣𑀸 𑀯𑀢𑁆𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀦𑀺𑀘𑁆𑀙𑀬𑀢𑀸𑀬 𑀢𑀁 𑀫𑀫 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀧𑀺 𑀮𑀺𑀘𑁆𑀙𑀯𑀻 𑀭𑀸𑀚𑀸 𑀢𑁂 𑀯𑀺𑀬 𑀲𑀜𑁆𑀚𑀸𑀢𑀦𑀺𑀘𑁆𑀙𑀬𑀢𑁆𑀢𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.