𑁫. 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁩. 𑀧𑀼𑀭𑀺𑀫𑀲𑀼𑀢𑁆𑀢𑀤𑁆𑀯𑀬𑁂𑀢𑀺 𑀅𑀫𑁆𑀩𑀝𑁆𑀞𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀤𑁆𑀯𑀬𑁂. 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀬𑀁 𑀢𑀢𑁆𑀣 𑀆𑀕𑀢𑀲𑀤𑀺𑀲𑀁 𑀇𑀥𑀸𑀕𑀢𑀁 𑀢𑀁 𑀅𑀢𑁆𑀣𑀯𑀡𑁆𑀡𑀦𑀢𑁄 𑀯𑀼𑀢𑁆𑀢𑀦𑀬𑀫𑁂𑀯, 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. ‘‘𑀢𑀭𑀼𑀡𑁄 𑀅𑀫𑁆𑀩𑀭𑀼𑀓𑁆𑀔𑁄 𑀅𑀫𑁆𑀩𑀮𑀝𑁆𑀞𑀺𑀓𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁨) 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀲𑀤𑀺𑀲𑀸𑀯𑀸’’𑀢𑀺.

𑀬𑀜𑁆𑀜𑀸𑀯𑀸𑀝𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀫𑀳𑀸𑀬𑀜𑁆𑀜𑀁 𑀉𑀤𑁆𑀤𑀺𑀲𑁆𑀲 𑀲𑀯𑀺𑀜𑁆𑀜𑀸𑀡𑀓𑀸𑀦𑀺, 𑀅𑀯𑀺𑀜𑁆𑀜𑀸𑀡𑀓𑀸𑀦𑀺 𑀘 𑀬𑀜𑁆𑀜𑀽𑀧𑀓𑀭𑀡𑀸𑀦𑀺 𑀉𑀧𑀝𑁆𑀞𑀧𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀫𑀳𑀸𑀬𑀜𑁆𑀜𑁄 𑀉𑀧𑀓𑁆𑀔𑀝𑁄’’𑀢𑀺, 𑀢𑀁 𑀉𑀧𑀓𑁆𑀔𑀭𑀡𑀁 𑀢𑁂𑀲𑀁 𑀢𑀣𑀸𑀲𑀚𑁆𑀚𑀦𑀦𑁆𑀢𑀺 𑀆𑀳 ‘‘𑀉𑀧𑀓𑁆𑀔𑀝𑁄𑀢𑀺 𑀲𑀚𑁆𑀚𑀺𑀢𑁄’’𑀢𑀺. 𑀯𑀘𑁆𑀙𑀢𑀭𑀲𑀢𑀸𑀦𑀻𑀢𑀺 𑀬𑀼𑀯𑀪𑀸𑀯𑀧𑁆𑀧𑀢𑁆𑀢𑀸𑀦𑀺 𑀩𑀮𑀯𑀯𑀘𑁆𑀙𑀲𑀢𑀸𑀦𑀺, 𑀢𑁂 𑀧𑀦 𑀯𑀘𑁆𑀙𑀸 𑀏𑀯 𑀳𑁄𑀦𑁆𑀢𑀺, 𑀦 𑀤𑀫𑁆𑀫𑀸 𑀩𑀮𑀺𑀩𑀤𑁆𑀤𑀸 𑀘𑀸𑀢𑀺 𑀆𑀳 ‘‘𑀯𑀘𑁆𑀙𑀲𑀢𑀸𑀦𑀻’’𑀢𑀺. 𑀏𑀢𑁂𑀢𑀺 𑀉𑀲𑀪𑀸𑀤𑀬𑁄 𑀉𑀭𑀩𑁆𑀪𑀧𑀭𑀺𑀬𑁄𑀲𑀸𑀦𑀸. 𑀅𑀦𑁂𑀓𑁂𑀲𑀦𑁆𑀢𑀺 𑀅𑀦𑁂𑀓𑀚𑀸𑀢𑀺𑀓𑀸𑀦𑀁. 𑀲𑀗𑁆𑀔𑁆𑀬𑀸𑀯𑀲𑁂𑀦 𑀅𑀦𑁂𑀓𑀢𑀸 𑀲𑀢𑁆𑀢𑀲𑀢𑀕𑁆𑀕𑀳𑀡𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀫𑀺𑀕𑀧𑀓𑁆𑀔𑀻𑀦𑀦𑁆𑀢𑀺 𑀫𑀳𑀺𑀁𑀲𑀭𑀼𑀭𑀼𑀧𑀲𑀤𑀓𑀼𑀭𑀼𑀗𑁆𑀕𑀕𑁄𑀓𑀡𑁆𑀡𑀫𑀺𑀕𑀸𑀦𑀜𑁆𑀘𑁂𑀯 𑀫𑁄𑀭𑀓𑀧𑀺𑀜𑁆𑀚𑀭𑀢𑀺𑀢𑁆𑀢𑀺𑀭𑀓𑀧𑁄𑀢𑀸𑀤𑀺𑀧𑀓𑁆𑀔𑀻𑀦𑀜𑁆𑀘.

𑁩𑁨𑁮. 𑀬𑀜𑁆𑀜𑀲𑀗𑁆𑀔𑀸𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀬𑁄 𑀲𑀁𑀓𑀺𑀮𑁂𑀲𑁄, 𑀢𑀲𑁆𑀲 𑀦𑀺𑀯𑀸𑀭𑀡𑀢𑁄 𑀦𑀺𑀲𑁂𑀥𑀦𑀢𑁄 𑀯𑀺𑀥𑀸 𑀯𑀼𑀘𑁆𑀘𑀦𑁆𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀦𑁄𑀤𑀦𑀸. 𑀢𑀢𑁄 𑀏𑀯 𑀢𑀸 𑀢𑀁 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑁂𑀦𑁆𑀢𑀻𑀢𑀺 ‘‘𑀞𑀧𑀦𑀸’’𑀢𑀺 𑀯𑀼𑀢𑁆𑀢𑀸. 𑀢𑀸𑀲𑀁 𑀧𑀦 𑀬𑀜𑁆𑀜𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀧𑀯𑀢𑁆𑀢𑀺𑀬𑀸 𑀬𑀜𑁆𑀜𑁄 𑀢𑀺𑀝𑁆𑀞𑀧𑀦𑁄𑀢𑀺 𑀆𑀳 ‘‘𑀢𑀺𑀝𑁆𑀞𑀧𑀦𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀧𑀭𑀺𑀓𑁆𑀔𑀭𑁄𑀦𑁆𑀢𑀺 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑀸, 𑀧𑀭𑀺𑀯𑀸𑀭𑀸𑀢𑀺 𑀯𑀼𑀢𑁆𑀢𑀁. ‘‘𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀲𑁄𑀴𑀲𑀧𑀭𑀺𑀯𑀸𑀭’’𑀦𑁆𑀢𑀺.

𑀫𑀳𑀸𑀯𑀺𑀚𑀺𑀢𑀭𑀸𑀚𑀬𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁩𑁩𑁬. 𑀧𑀼𑀩𑁆𑀩𑀘𑀭𑀺𑀢𑀦𑁆𑀢𑀺 𑀅𑀢𑁆𑀢𑀦𑁄 𑀧𑀼𑀭𑀺𑀫𑀚𑀸𑀢𑀺𑀲𑀫𑁆𑀪𑀽𑀢𑀁 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑀁 𑀧𑀼𑀜𑁆𑀜𑀘𑀭𑀺𑀬𑀁. 𑀢𑀣𑀸 𑀳𑀺𑀲𑁆𑀲 𑀅𑀦𑀼𑀕𑀸𑀫𑀺𑀦𑁄𑀯 𑀦𑀺𑀥𑀺𑀲𑁆𑀲 𑀣𑀸𑀯𑀭𑁄 𑀦𑀺𑀥𑀺 𑀦𑀺𑀤𑀲𑁆𑀲𑀺𑀢𑁄. 𑀅𑀟𑁆𑀠𑀢𑀸 𑀦𑀸𑀫 𑀯𑀺𑀪𑀯𑀲𑀫𑁆𑀧𑀦𑁆𑀦𑀢𑀸, 𑀲𑀸 𑀢𑀁 𑀢𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀬𑁄 𑀓𑁄𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀯𑀺𑀪𑀯𑁂𑀦 𑀅𑀟𑁆𑀠𑁄 𑀳𑁄𑀢𑀻’’𑀢𑀺. 𑀢𑀣𑀸 𑀫𑀳𑀤𑁆𑀥𑀦𑀢𑀸𑀧𑀻𑀢𑀺 𑀢𑀁 𑀉𑀓𑁆𑀓𑀁𑀲𑀕𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀢𑀸 𑀅𑀧𑀭𑀺𑀫𑀸𑀡𑀲𑀗𑁆𑀔𑁆𑀬𑁂𑀦 𑀥𑀦𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀯𑀺𑀲𑁂𑀲𑀢𑁄 𑀓𑀸𑀫𑀸 𑀪𑁄𑀕𑁄 𑀦𑀸𑀫𑀸𑀢𑀺 𑀆𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦𑀸’’𑀢𑀺. 𑀧𑀺𑀡𑁆𑀟𑀧𑀺𑀡𑁆𑀟𑀯𑀲𑁂𑀦𑀸𑀢𑀺 𑀪𑀸𑀚𑀦𑀸𑀮𑀗𑁆𑀓𑀸𑀭𑀸𑀤𑀺𑀯𑀺𑀪𑀸𑀕𑀁 𑀅𑀳𑀼𑀢𑁆𑀯𑀸 𑀓𑁂𑀯𑀮𑀁 𑀔𑀡𑁆𑀟𑀔𑀡𑁆𑀟𑀯𑀲𑁂𑀦.

𑀫𑀸𑀲𑀓𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀣𑀸𑀮𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀸𑀚𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀢𑁆𑀣𑀲𑁂𑀬𑁆𑀬𑀸𑀯𑀲𑀣𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀯𑀚𑀺𑀭𑀧𑀯𑀸𑀴𑀸𑀦𑀺 ‘‘𑀲𑀢𑁆𑀢𑀭𑀢𑀦𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀲𑀸𑀮𑀺𑀯𑀻𑀳𑀺𑀆𑀤𑀺 𑀧𑀼𑀩𑁆𑀩𑀡𑁆𑀡𑀁 𑀧𑀼𑀭𑀓𑁆𑀔𑀢𑀁𑀲𑀲𑁆𑀲𑀨𑀮𑀦𑁆𑀢𑀺 𑀓𑀢𑁆𑀯𑀸. 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀫𑀼𑀕𑁆𑀕𑀫𑀸𑀲𑀸𑀤𑀺 𑀅𑀧𑀭𑀡𑁆𑀡𑀁. 𑀤𑁂𑀯𑀲𑀺𑀓𑀁…𑀧𑁂… 𑀯𑀲𑁂𑀦𑀸𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀤𑀸𑀢𑀩𑁆𑀩𑀯𑀟𑁆𑀠𑁂𑀢𑀩𑁆𑀩𑀸𑀤𑀺𑀯𑀺𑀥𑀺𑀦𑀸 𑀧𑀭𑀺𑀯𑀢𑁆𑀢𑀦𑀓𑀥𑀦𑀥𑀜𑁆𑀜𑀯𑀲𑁂𑀦.

𑀓𑁄𑀝𑁆𑀞𑀁 𑀯𑀼𑀘𑁆𑀘𑀢𑀺 𑀥𑀜𑁆𑀜𑀲𑁆𑀲 𑀆𑀞𑀧𑀦𑀝𑁆𑀞𑀸𑀦𑀁, 𑀓𑁄𑀝𑁆𑀞𑀪𑀽𑀢𑀁 𑀅𑀕𑀸𑀭𑀁 𑀓𑁄𑀝𑁆𑀞𑀸𑀕𑀸𑀭𑀁 𑀢𑁂𑀦𑀸𑀳 ‘‘𑀥𑀜𑁆𑀜𑁂𑀦…𑀧𑁂… 𑀕𑀸𑀭𑁄 𑀘𑀸’’𑀢𑀺. 𑀏𑀯𑀁 𑀲𑀸𑀭𑀕𑀩𑁆𑀪𑀁 ‘‘𑀓𑁄𑀲𑁄’’𑀢𑀺, 𑀥𑀜𑁆𑀜𑀲𑁆𑀲 𑀆𑀞𑀧𑀦𑀝𑁆𑀞𑀸𑀦𑀜𑁆𑀘 ‘‘𑀓𑁄𑀝𑁆𑀞𑀸𑀕𑀸𑀭’’𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁄 𑀅𑀜𑁆𑀜𑀣𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀅𑀲𑀺𑀦𑁄 𑀢𑀺𑀓𑁆𑀔𑀪𑀸𑀯𑀧𑀭𑀺𑀳𑀸𑀭𑀢𑁄 𑀧𑀭𑀺𑀘𑁆𑀙𑀤𑁄 ‘‘𑀓𑁄𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀭𑀜𑁆𑀜𑁄 𑀢𑀺𑀓𑁆𑀔𑀪𑀸𑀯𑀧𑀭𑀺𑀳𑀭𑀡𑀢𑁆𑀢𑀸 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸 ‘‘𑀓𑁄𑀲𑁄’’𑀢𑀺 𑀆𑀳 ‘‘𑀘𑀢𑀼𑀩𑁆𑀩𑀺𑀥𑁄 𑀓𑁄𑀲𑁄 𑀳𑀢𑁆𑀣𑀻 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻’’𑀢𑀺. ‘‘𑀯𑀢𑁆𑀣𑀓𑁄𑀝𑁆𑀞𑀸𑀕𑀸𑀭𑀕𑁆𑀕𑀳𑀡𑁂𑀦𑁂𑀯 𑀲𑀩𑁆𑀩𑀲𑁆𑀲𑀸𑀧𑀺 𑀪𑀡𑁆𑀟𑀝𑁆𑀞𑀧𑀦𑀝𑁆𑀞𑀸𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 𑀢𑀺𑀯𑀺𑀥𑀁 𑀓𑁄𑀝𑁆𑀞𑀸𑀕𑀸𑀭𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀇𑀤𑀁 𑀏𑀯𑀁 𑀩𑀳𑀼’’𑀦𑁆𑀢𑀺𑀆𑀤𑀺 𑀭𑀸𑀚𑀸 𑀢𑀫𑀢𑁆𑀣𑀁 𑀚𑀸𑀦𑀦𑁆𑀢𑁄𑀯 𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀓𑀣𑀸𑀧𑁂𑀢𑁆𑀯𑀸 𑀧𑀭𑀺𑀲𑀸𑀬 𑀦𑀺𑀲𑁆𑀲𑀤𑁆𑀤𑀪𑀸𑀯𑀸𑀧𑀸𑀤𑀦𑀢𑁆𑀣𑀜𑁆𑀘 𑀆𑀳 𑀏𑀯𑀁 𑀫𑁂 𑀧𑀓𑀢𑀺𑀓𑁆𑀔𑁄𑀪𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺.

𑁩𑁩𑁭-𑁮. 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑀚𑀦𑀧𑀤𑀲𑁆𑀲 𑀅𑀦𑀼𑀧𑀤𑁆𑀤𑀯𑀢𑁆𑀣𑀜𑁆𑀘𑁂𑀯 𑀬𑀜𑁆𑀜𑀲𑁆𑀲 𑀘 𑀘𑀺𑀭𑀸𑀦𑀼𑀧𑀯𑀢𑁆𑀢𑀦𑀢𑁆𑀣𑀜𑁆𑀘, 𑀢𑁂𑀦𑀸𑀳 ‘‘𑀅𑀬𑀁 𑀭𑀸𑀚𑀸’’𑀢𑀺𑀆𑀤𑀺.

𑀲𑀢𑁆𑀢𑀸𑀦𑀁 𑀳𑀺𑀢𑀲𑁆𑀲 𑀲𑀼𑀔𑀲𑁆𑀲 𑀘 𑀯𑀺𑀤𑀽𑀲𑀦𑀢𑁄 𑀅𑀳𑀺𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀘 𑀆𑀯𑀳𑀦𑀢𑁄 𑀘𑁄𑀭𑀸 𑀏𑀯 𑀓𑀡𑁆𑀝𑀓𑀸, 𑀢𑁂𑀳𑀺 𑀘𑁄𑀭𑀓𑀡𑁆𑀝𑀓𑁂𑀳𑀺. 𑀬𑀣𑀸 𑀕𑀸𑀫𑀯𑀸𑀲𑀻𑀦𑀁 𑀖𑀸𑀢𑀸 𑀕𑀸𑀫𑀖𑀸𑀢𑀸, 𑀏𑀯𑀁 𑀧𑀦𑁆𑀣𑀺𑀓𑀸𑀦𑀁 𑀤𑀼𑀳𑀦𑀸 𑀯𑀺𑀩𑀸𑀥𑀦𑀸 𑀧𑀦𑁆𑀣𑀤𑀼𑀳𑀦𑀸. 𑀅𑀥𑀫𑁆𑀫𑀓𑀸𑀭𑀻𑀢𑀺 𑀥𑀫𑁆𑀫𑀢𑁄 𑀅𑀧𑁂𑀢𑀲𑁆𑀲 𑀅𑀬𑀼𑀢𑁆𑀢𑀲𑁆𑀲 𑀓𑀭𑀡𑀲𑀻𑀮𑁄, 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀚𑀦𑀧𑀤𑀸𑀤𑀻𑀦𑀁 𑀢𑀢𑁄 𑀅𑀦𑀢𑁆𑀣𑀢𑁄 𑀢𑀸𑀬𑀦𑁂𑀦 𑀔𑀢𑁆𑀢𑀺𑀬𑁄 𑀬𑁄 𑀔𑀢𑁆𑀢𑀥𑀫𑁆𑀫𑁄, 𑀢𑀲𑁆𑀲 𑀯𑀸 𑀅𑀓𑀭𑀡𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀤𑀲𑁆𑀲𑀯𑁄 𑀏𑀯 𑀔𑀻𑀮𑀲𑀤𑀺𑀲𑀢𑁆𑀢𑀸 𑀤𑀲𑁆𑀲𑀼𑀔𑀻𑀮𑀁. 𑀬𑀣𑀸 𑀳𑀺 𑀔𑁂𑀢𑁆𑀢𑁂 𑀔𑀻𑀮𑀁 𑀓𑀲𑀦𑀸𑀤𑀻𑀦𑀁 𑀲𑀼𑀔𑀧𑁆𑀧𑀯𑀢𑁆𑀢𑀺𑀁, 𑀫𑀽𑀮𑀲𑀦𑁆𑀢𑀸𑀦𑁂𑀦 𑀲𑀲𑁆𑀲𑀲𑁆𑀲 𑀩𑀼𑀤𑁆𑀥𑀺𑀜𑁆𑀘 𑀯𑀺𑀩𑀦𑁆𑀥𑀢𑀺, 𑀏𑀯𑀁 𑀤𑀲𑁆𑀲𑀯𑁄 𑀭𑀚𑁆𑀚𑁂 𑀭𑀸𑀚𑀸𑀡𑀸𑀬 𑀲𑀼𑀔𑀧𑁆𑀧𑀯𑀢𑁆𑀢𑀺𑀁, 𑀫𑀽𑀮𑀯𑀺𑀭𑀼𑀴𑁆𑀳𑀺𑀬𑀸 𑀚𑀦𑀧𑀤𑀸𑀦𑀁 𑀧𑀭𑀺𑀩𑀼𑀤𑁆𑀥𑀺𑀜𑁆𑀘 𑀯𑀺𑀩𑀦𑁆𑀥𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀲𑁆𑀲𑀯𑁄 𑀏𑀯 𑀔𑀻𑀮𑀲𑀤𑀺𑀲𑀢𑁆𑀢𑀸 𑀤𑀲𑁆𑀲𑀼𑀔𑀻𑀮’’𑀦𑁆𑀢𑀺. 𑀯𑀥-𑀲𑀤𑁆𑀤𑁄 𑀳𑀺𑀁𑀲𑀦𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀸𑀭𑀡𑁂𑀦 𑀯𑀸 𑀓𑁄𑀝𑁆𑀝𑀦𑁂𑀦 𑀯𑀸’’𑀢𑀺. 𑀅𑀤𑁆𑀤𑀼𑀩𑀦𑁆𑀥𑀦𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀭𑀚𑁆𑀚𑀼𑀩𑀦𑁆𑀥𑀦𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀚𑀸𑀦𑀺𑀬𑀸𑀢𑀺 𑀥𑀦𑀚𑀸𑀦𑀺𑀬𑀸, 𑀢𑁂𑀦𑀸𑀳 ‘‘𑀲𑀢𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺. 𑀧𑀜𑁆𑀘𑀲𑀺𑀔𑀫𑀼𑀡𑁆𑀟𑀓𑀭𑀡𑀦𑁆𑀢𑀺 𑀓𑀸𑀓𑀧𑀓𑁆𑀔𑀓𑀭𑀡𑀁. 𑀕𑁄𑀫𑀬𑀲𑀺𑀜𑁆𑀘𑀦𑀦𑁆𑀢𑀺 𑀲𑀻𑀲𑁂 𑀙𑀓𑀡𑁄𑀤𑀓𑀸𑀯𑀲𑁂𑀘𑀦𑀁. 𑀓𑀼𑀤𑀡𑁆𑀟𑀓𑀩𑀦𑁆𑀥𑀦𑀦𑁆𑀢𑀺 𑀕𑀤𑁆𑀤𑀼𑀮𑀩𑀦𑁆𑀥𑀦𑀁. 𑀏𑀯𑀫𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀪𑀲𑁆𑀫𑀧𑀼𑀝𑀧𑁄𑀣𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀊𑀳𑀦𑀺𑀲𑁆𑀲𑀸𑀫𑀻𑀢𑀺 𑀉𑀤𑁆𑀥𑀭𑀺𑀲𑁆𑀲𑀸𑀫𑀺, 𑀅𑀧𑀦𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀉𑀲𑁆𑀲𑀳𑀦𑁆𑀢𑀻𑀢𑀺 𑀧𑀼𑀩𑁆𑀩𑁂 𑀢𑀢𑁆𑀣 𑀓𑀢𑀧𑀭𑀺𑀘𑀬𑀢𑀸𑀬 𑀉𑀲𑁆𑀲𑀸𑀳𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀅𑀦𑀼𑀧𑁆𑀧𑀤𑁂𑀢𑀽𑀢𑀺 𑀅𑀦𑀼 𑀅𑀦𑀼 𑀧𑀤𑁂𑀢𑀼, 𑀢𑁂𑀦𑀸𑀳 ‘‘𑀤𑀺𑀦𑁆𑀦𑁂 𑀅𑀧𑁆𑀧𑀳𑁄𑀦𑁆𑀢𑁂’’𑀢𑀺𑀆𑀤𑀺. 𑀲𑀓𑁆𑀔𑀺𑀓𑀭𑀡𑀧𑀡𑁆𑀡𑀸𑀭𑁄𑀧𑀦𑀸𑀦𑀺 𑀯𑀟𑁆𑀠𑀺𑀬𑀸 𑀲𑀳 𑀯𑀸 𑀯𑀺𑀦𑀸 𑀯𑀸 𑀧𑀼𑀦 𑀕𑀳𑁂𑀢𑀼𑀓𑀸𑀫𑀲𑁆𑀲, 𑀇𑀥 𑀧𑀦 𑀢𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀓𑁆𑀔𑀺𑀁 𑀅𑀓𑀢𑁆𑀯𑀸’’𑀢𑀺𑀆𑀤𑀺, 𑀢𑁂𑀦𑀸𑀳 ‘‘𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦𑀸’’𑀢𑀺. 𑀧𑀓𑀸𑀭𑀢𑁄 𑀪𑀡𑁆𑀟𑀸𑀦𑀺 𑀆𑀪𑀭𑀢𑀺 𑀲𑀫𑁆𑀪𑀭𑀢𑀺 𑀧𑀭𑀺𑀘𑀬𑀢𑀺 𑀏𑀢𑁂𑀦𑀸𑀢𑀺 𑀧𑀸𑀪𑀢𑀁, 𑀪𑀡𑁆𑀟𑀫𑀽𑀮𑀁.

𑀤𑀺𑀯𑀲𑁂 𑀤𑀺𑀯𑀲𑁂 𑀤𑀸𑀢𑀩𑁆𑀩𑀪𑀢𑁆𑀢𑀁 𑀤𑁂𑀯𑀲𑀺𑀓𑀪𑀢𑁆𑀢𑀁. ‘‘𑀅𑀦𑀼𑀫𑀸𑀲𑀁, 𑀅𑀦𑀼𑀧𑁄𑀲𑀣’’𑀦𑁆𑀢𑀺𑀆𑀤𑀺𑀦𑀸 𑀤𑀸𑀢𑀩𑁆𑀩𑀁 𑀯𑁂𑀢𑀦𑀁 𑀫𑀸𑀲𑀺𑀓𑀸𑀤𑀺𑀧𑀭𑀺𑀩𑁆𑀩𑀬𑀁. 𑀢𑀲𑁆𑀲 𑀢𑀲𑁆𑀲 𑀓𑀼𑀮𑀸𑀦𑀼𑀭𑀽𑀧𑁂𑀦 𑀓𑀫𑁆𑀫𑀸𑀦𑀼𑀭𑀽𑀧𑁂𑀦 𑀲𑀽𑀭𑀪𑀸𑀯𑀸𑀦𑀼𑀭𑀽𑀧𑁂𑀦𑀸𑀢𑀺 𑀧𑀘𑁆𑀘𑁂𑀓𑀁 𑀅𑀦𑀼𑀭𑀽𑀧-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀲𑁂𑀦𑀸𑀧𑀘𑁆𑀘𑀸𑀤𑀺 𑀞𑀸𑀦𑀦𑁆𑀢𑀭𑀁. 𑀲𑀓𑀓𑀫𑁆𑀫𑀧𑀲𑀼𑀢𑀢𑁆𑀢𑀸, 𑀅𑀦𑀼𑀧𑀤𑁆𑀤𑀯𑀢𑁆𑀢𑀸 𑀘 𑀥𑀦𑀥𑀜𑁆𑀜𑀸𑀦𑀁 𑀭𑀸𑀲𑀺𑀓𑁄 𑀭𑀸𑀲𑀺𑀓𑀸𑀭𑀪𑀽𑀢𑁄. 𑀔𑁂𑀫𑁂𑀦 𑀞𑀺𑀢𑀸𑀢𑀺 𑀅𑀦𑀼𑀧𑀤𑁆𑀤𑀯𑁂𑀦 𑀧𑀯𑀢𑁆𑀢𑀸, 𑀢𑁂𑀦𑀸𑀳 ‘‘𑀅𑀪𑀬𑀸’’𑀢𑀺, 𑀓𑀼𑀢𑁄𑀘𑀺𑀧𑀺 𑀪𑀬𑀭𑀳𑀺𑀢𑀸𑀢𑀺 𑀅𑀢𑁆𑀣𑁄.

𑀘𑀢𑀼𑀧𑀭𑀺𑀓𑁆𑀔𑀸𑀭𑀯𑀡𑁆𑀡𑀦𑀸

𑁩𑁩𑁯. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀺𑀘𑁆𑀘𑁂 𑀅𑀦𑀼𑀬𑀦𑁆𑀢𑀺 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀬𑀦𑁆𑀢𑀸, 𑀅𑀦𑀼𑀬𑀦𑁆𑀢𑀸 𑀏𑀯 𑀆𑀦𑀼𑀬𑀦𑁆𑀢𑀸 𑀬𑀣𑀸 ‘‘𑀅𑀦𑀼𑀪𑀸𑀯𑁄 𑀏𑀯 𑀆𑀦𑀼𑀪𑀸𑀯𑁄’’𑀢𑀺. 𑀅𑀲𑁆𑀲𑀸𑀢𑀺 𑀭𑀜𑁆𑀜𑁄. 𑀢𑁂𑀢𑀺 𑀆𑀦𑀼𑀬𑀦𑁆𑀢𑀔𑀢𑁆𑀢𑀺𑀬𑀸𑀤𑀬𑁄. 𑀅𑀢𑁆𑀢𑀫𑀦𑀸 𑀦 𑀪𑀯𑀺𑀲𑁆𑀲𑀦𑁆𑀢𑀺 ‘‘𑀅𑀫𑁆𑀳𑁂 𑀏𑀢𑁆𑀣 𑀩𑀳𑀺 𑀓𑀭𑁄𑀢𑀻’’𑀢𑀺. 𑀦𑀺𑀩𑀦𑁆𑀥𑀯𑀺𑀧𑀼𑀮𑀸𑀕𑀫𑁄 𑀕𑀸𑀫𑁄 𑀦𑀺𑀕𑀫𑁄, 𑀯𑀺𑀯𑀟𑁆𑀠𑀺𑀢𑀫𑀳𑀸𑀆𑀬𑁄 𑀫𑀳𑀸𑀕𑀸𑀫𑁄𑀢𑀺 𑀅𑀢𑁆𑀣𑁄. 𑀚𑀦𑀧𑀤-𑀲𑀤𑁆𑀤𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑁄 𑀏𑀯. 𑀙𑀦𑁆𑀦𑀁 𑀧𑀓𑀢𑀻𑀦𑀁 𑀯𑀲𑁂𑀦 𑀭𑀜𑁆𑀜𑁄 𑀳𑀺𑀢𑀲𑀼𑀔𑀸𑀪𑀺𑀩𑀼𑀤𑁆𑀥𑀺, 𑀢𑀤𑁂𑀓𑀤𑁂𑀲𑀸 𑀘 𑀆𑀦𑀼𑀬𑀦𑁆𑀢𑀸𑀤𑀬𑁄𑀢𑀺 𑀯𑀼𑀢𑁆𑀢𑀁 ‘‘𑀬𑀁 𑀢𑀼𑀫𑁆𑀳𑀸𑀓𑀁 𑀅𑀦𑀼𑀚𑀸𑀦𑀦𑀁 𑀫𑀫 𑀪𑀯𑁂𑀬𑁆𑀬 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

𑀅𑀫𑀸 𑀲𑀳 𑀪𑀯𑀦𑁆𑀢𑀺 𑀓𑀺𑀘𑁆𑀘𑁂𑀲𑀽𑀢𑀺 𑀅𑀫𑀘𑁆𑀘𑀸, 𑀭𑀚𑁆𑀚𑀓𑀺𑀘𑁆𑀘𑀯𑁄𑀲𑀸𑀲𑀦𑀓𑀸. 𑀢𑁂 𑀧𑀦 𑀭𑀜𑁆𑀜𑁄 𑀧𑀺𑀬𑀸, 𑀲𑀳𑀧𑀯𑀢𑁆𑀢𑀦𑀓𑀸 𑀘 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀺𑀬𑀲𑀳𑀸𑀬𑀓𑀸’’𑀢𑀺. 𑀭𑀜𑁆𑀜𑁄 𑀧𑀭𑀺𑀲𑀢𑀺 𑀪𑀯𑀸𑀢𑀺 𑀧𑀸𑀭𑀺𑀲𑀚𑁆𑀚𑀸, 𑀢𑁂 𑀧𑀦 𑀓𑁂𑀢𑀺 𑀆𑀳 ‘‘𑀲𑁂𑀲𑀸 𑀆𑀡𑀢𑁆𑀢𑀺𑀓𑀭𑀸’’𑀢𑀺, 𑀬𑀣𑀸𑀯𑀼𑀢𑁆𑀢𑀆𑀦𑀼𑀬𑀦𑁆𑀢𑀔𑀢𑁆𑀢𑀺𑀬𑀸𑀤𑀻 𑀳𑀺 𑀅𑀯𑀲𑁂𑀲𑀸 𑀭𑀜𑁆𑀜𑁄 𑀆𑀡𑀸𑀓𑀭𑀸𑀢𑀺 𑀅𑀢𑁆𑀣𑁄. 𑀲𑀢𑀺𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀆𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸, 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀪𑀸𑀯𑁂 𑀢𑀸𑀤𑀺𑀲𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀯𑀼𑀟𑁆𑀠𑀓𑀸𑀮𑁂 𑀘 𑀢𑀸𑀤𑀺𑀲𑀸𑀦𑀫𑁆𑀧𑀺 𑀭𑀸𑀚𑀽𑀦𑀁 𑀢𑀤𑀼𑀪𑀬𑀁 𑀳𑀸𑀬𑀢𑁂𑀯𑀸𑀢𑀺 𑀆𑀳 ‘‘𑀫𑀳𑀮𑁆𑀮𑀓𑀓𑀸𑀮𑁂…𑀧𑁂… 𑀦 𑀲𑀓𑁆𑀓𑀸’’𑀢𑀺. 𑀅𑀦𑀼𑀫𑀢𑀺𑀬𑀸𑀢𑀺 𑀅𑀦𑀼𑀚𑀸𑀦𑀦𑁂𑀦, 𑀧𑀓𑁆𑀔𑀸𑀢𑀺 𑀲𑀧𑀓𑁆𑀔𑀸 𑀬𑀜𑁆𑀜𑀲𑁆𑀲 𑀅𑀗𑁆𑀕𑀪𑀽𑀢𑀸. 𑀧𑀭𑀺𑀓𑁆𑀔𑀭𑁄𑀦𑁆𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑀸, 𑀲𑀫𑁆𑀪𑀸𑀭𑀸. 𑀇𑀫𑁂 𑀢𑀲𑁆𑀲 𑀬𑀜𑁆𑀜𑀲𑁆𑀲 𑀅𑀗𑁆𑀕𑀪𑀽𑀢𑀸 𑀧𑀭𑀺𑀯𑀸𑀭𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀭𑀺𑀯𑀸𑀭𑀸 𑀪𑀯𑀦𑁆𑀢𑀻’’𑀢𑀺.

𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀯𑀡𑁆𑀡𑀦𑀸

𑁩𑁪𑁦. 𑀬𑀲𑀲𑀸𑀢𑀺 𑀆𑀦𑀼𑀪𑀸𑀯𑁂𑀦, 𑀢𑁂𑀦𑀸𑀳 ‘‘𑀆𑀡𑀸𑀞𑀧𑀦𑀲𑀫𑀢𑁆𑀣𑀢𑀸𑀬𑀸’’𑀢𑀺. 𑀲𑀤𑁆𑀤𑀳𑀢𑀻𑀢𑀺 ‘‘𑀤𑀸𑀢𑀸 𑀤𑀸𑀦𑀲𑁆𑀲 𑀨𑀮𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺 𑀧𑀢𑁆𑀢𑀺𑀬𑀸𑀬𑀢𑀺. 𑀤𑀸𑀦𑁂 𑀲𑀽𑀭𑁄𑀢𑀺 𑀤𑀸𑀦𑀲𑀽𑀭𑁄 𑀤𑁂𑀬𑁆𑀬𑀥𑀫𑁆𑀫𑁂 𑀈𑀲𑀓𑀫𑁆𑀧𑀺 𑀲𑀗𑁆𑀕𑀁 𑀅𑀓𑀢𑁆𑀯𑀸 𑀫𑀼𑀢𑁆𑀢𑀘𑀸𑀕𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦𑀸𑀳 ‘‘𑀦 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯𑀸’’𑀢𑀺𑀆𑀤𑀺. 𑀬𑀲𑁆𑀲 𑀳𑀺 𑀓𑀫𑁆𑀫𑀲𑁆𑀲𑀓𑀢𑀸 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀲𑁄 𑀏𑀯𑀁 𑀯𑀼𑀢𑁆𑀢𑁄. 𑀬𑀁 𑀤𑀸𑀦𑀁 𑀤𑁂𑀢𑀻𑀢𑀺 𑀬𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑀲𑁆𑀲 𑀤𑁂𑀢𑀺. 𑀢𑀲𑁆𑀲 𑀧𑀢𑀺 𑀳𑀼𑀢𑁆𑀯𑀸𑀢𑀺 𑀢𑀩𑁆𑀩𑀺𑀲𑀬𑀁 𑀮𑁄𑀪𑀁 𑀲𑀼𑀝𑁆𑀞𑀼 𑀅𑀪𑀺𑀪𑀯𑀦𑁆𑀢𑁄 𑀢𑀲𑁆𑀲 𑀅𑀥𑀺𑀧𑀢𑀺 𑀳𑀼𑀢𑁆𑀯𑀸 𑀤𑁂𑀢𑀺 𑀅𑀦𑀥𑀺𑀪𑀯𑀦𑀻𑀬𑀢𑁆𑀢𑀸. ‘‘𑀦 𑀤𑀸𑀲𑁄, 𑀦 𑀲𑀳𑀸𑀬𑁄’’𑀢𑀺 𑀯𑀢𑁆𑀯𑀸 𑀢𑀤𑀼𑀪𑀬𑀁 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀲𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀡𑁆𑀳𑀸𑀬 𑀤𑀸𑀦𑀲𑁆𑀲 𑀤𑀸𑀲𑀩𑁆𑀬𑀢𑀁 𑀉𑀧𑀕𑀢𑀢𑁆𑀢𑀸. 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀲𑁆𑀲 𑀧𑀺𑀬𑀪𑀸𑀯𑀸𑀦𑀺𑀲𑁆𑀲𑀚𑁆𑀚𑀦𑀢𑁄. 𑀲𑀸𑀫𑀻 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀢𑁆𑀣 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑁆𑀯𑀸 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀦𑀢𑁄. 𑀲𑀸𑀫𑀺𑀧𑀭𑀺𑀪𑁄𑀕𑀲𑀤𑀺𑀲𑀸 𑀳𑁂𑀢𑀲𑁆𑀲𑀸𑀬𑀁 𑀧𑀯𑀢𑁆𑀢𑀢𑀻𑀢𑀺.

𑀲𑀫𑀺𑀢𑀧𑀸𑀧𑀸 𑀲𑀫𑀡𑀸, 𑀩𑀸𑀳𑀺𑀢𑀧𑀸𑀧𑀸 𑀩𑁆𑀭𑀸𑀳𑁆𑀫𑀡𑀸 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦, 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀲𑀫𑀡𑀸 𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑀸 𑀧𑀦 𑀓𑀧𑀡𑀸𑀤𑀺𑀕𑁆𑀕𑀳𑀡𑁂𑀦𑁂𑀯𑁂𑀢𑁆𑀣 𑀕𑀳𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀕𑁆𑀕𑀢𑀸𑀢𑀺 𑀤𑀼𑀓𑁆𑀓𑀭𑀚𑀻𑀯𑀺𑀓𑀁 𑀉𑀧𑀕𑀢𑀸 𑀓𑀲𑀺𑀭𑀯𑀼𑀢𑁆𑀢𑀺𑀓𑀸, 𑀢𑁂𑀦𑀸𑀳 ‘‘𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸’’𑀢𑀺. 𑀅𑀤𑁆𑀥𑀺𑀓𑀸𑀢𑀺 𑀅𑀤𑁆𑀥𑀸𑀦𑀫𑀕𑁆𑀕𑀕𑀸𑀫𑀺𑀦𑁄. 𑀯𑀡𑀺𑀩𑁆𑀩𑀓𑀸𑀢𑀺 𑀤𑀸𑀬𑀓𑀸𑀦𑀁 𑀕𑀼𑀡𑀓𑀺𑀢𑁆𑀢𑀦𑀯𑀲𑁂𑀦, 𑀓𑀫𑁆𑀫𑀨𑀮𑀓𑀺𑀢𑁆𑀢𑀦𑀫𑀼𑀔𑁂𑀦 𑀘 𑀬𑀸𑀘𑀦𑀓𑀸 𑀲𑁂𑀬𑁆𑀬𑀣𑀸𑀧𑀺 𑀦𑀕𑁆𑀕𑀘𑀭𑀺𑀬𑀸𑀤𑀬𑁄, 𑀢𑁂𑀦𑀸𑀳 ‘‘𑀇𑀝𑁆𑀞𑀁 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺. ‘‘𑀧𑀲𑀢𑀫𑀢𑁆𑀢’’𑀦𑁆𑀢𑀺 𑀯𑀻𑀳𑀺𑀢𑀡𑁆𑀟𑀼𑀮𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀲𑀭𑀸𑀯𑀫𑀢𑁆𑀢’’𑀦𑁆𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀺𑀯𑀲𑁂𑀦. 𑀑𑀧𑀸𑀦𑀁 𑀯𑀼𑀘𑁆𑀘𑀢𑀺 𑀑𑀕𑀸𑀳𑁂𑀢𑁆𑀯𑀸 𑀧𑀸𑀢𑀩𑁆𑀩𑀢𑁄 𑀦𑀤𑀺𑀢𑀴𑀸𑀓𑀸𑀤𑀻𑀦𑀁 𑀲𑀩𑁆𑀩𑀲𑀸𑀥𑀸𑀭𑀡𑀢𑀺𑀢𑁆𑀣𑀁 𑀑𑀧𑀸𑀦𑀁 𑀯𑀺𑀬 𑀪𑀽𑀢𑁄𑀢𑀺 𑀑𑀧𑀸𑀦𑀪𑀽𑀢𑁄, 𑀢𑁂𑀦𑀸𑀳 ‘‘𑀉𑀤𑀧𑀸𑀦𑀪𑀽𑀢𑁄’’𑀢𑀺𑀆𑀤𑀺. 𑀲𑀼𑀢𑀫𑁂𑀯 𑀲𑀼𑀢𑀚𑀸𑀢𑀦𑁆𑀢𑀺 𑀚𑀸𑀢-𑀲𑀤𑁆𑀤𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀯𑀸𑀘𑀓𑀢𑀫𑀸𑀳 𑀬𑀣𑀸 ‘‘𑀓𑁄𑀲𑀚𑀸𑀢’’𑀦𑁆𑀢𑀺.

𑀅𑀢𑀻𑀢𑀸𑀤𑀺𑀅𑀢𑁆𑀣𑀘𑀺𑀦𑁆𑀢𑀦𑀲𑀫𑀢𑁆𑀣𑀢𑀸 𑀦𑀸𑀫𑀲𑁆𑀲 𑀭𑀜𑁆𑀜𑁄 𑀅𑀦𑀼𑀫𑀸𑀦𑀯𑀲𑁂𑀦, 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀸, 𑀦 𑀩𑀼𑀤𑁆𑀥𑀸𑀦𑀁 𑀯𑀺𑀬 𑀢𑀢𑁆𑀣 𑀧𑀘𑁆𑀘𑀓𑁆𑀔𑀤𑀲𑁆𑀲𑀺𑀢𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑀻𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀟𑁆𑀠𑀢𑀸𑀤𑀬𑁄 𑀢𑀸𑀯 𑀬𑀜𑁆𑀜𑀲𑁆𑀲 𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀼 𑀢𑁂𑀳𑀺 𑀯𑀺𑀦𑀸 𑀢𑀲𑁆𑀲 𑀅𑀲𑀺𑀚𑁆𑀛𑀦𑀢𑁄, 𑀲𑀼𑀚𑀸𑀢𑀢𑀸 𑀲𑀼𑀭𑀽𑀧𑀢𑀸 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀏𑀢𑁂𑀳𑀺 𑀓𑀺𑀭𑀸’’𑀢𑀺𑀆𑀤𑀺. 𑀏𑀢𑁆𑀣 𑀘 𑀓𑁂𑀘𑀺 ‘‘𑀬𑀣𑀸 𑀅𑀟𑁆𑀠𑀢𑀸𑀤𑀬𑁄 𑀬𑀜𑁆𑀜𑀲𑁆𑀲 𑀏𑀓𑀁𑀲𑀢𑁄 𑀅𑀗𑁆𑀕𑀸𑀦𑀺, 𑀦 𑀏𑀯𑀫𑀪𑀺𑀚𑀸𑀢𑀢𑀸, 𑀅𑀪𑀺𑀭𑀽𑀧𑀢𑀸 𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 𑀓𑀺𑀭𑀲𑀤𑁆𑀤𑀕𑁆𑀕𑀳𑀡’’𑀦𑁆𑀢𑀺 𑀯𑀤𑀦𑁆𑀢𑀺 ‘‘𑀅𑀬𑀁 𑀤𑀼𑀚𑁆𑀚𑀸𑀢𑁄’’𑀢𑀺𑀆𑀤𑀺 𑀯𑀘𑀦𑀲𑁆𑀲 𑀅𑀦𑁂𑀓𑀦𑁆𑀢𑀺𑀓𑀢𑀁 𑀫𑀜𑁆𑀜𑀫𑀸𑀦𑀸, 𑀢𑀬𑀺𑀤𑀁 𑀅𑀲𑀸𑀭𑀁, 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦 𑀳𑁂𑀲 𑀬𑀜𑁆𑀜𑀸𑀭𑀫𑁆𑀪𑁄 𑀢𑀢𑁆𑀣 𑀲𑀺𑀬𑀸 𑀓𑁂𑀲𑀜𑁆𑀘𑀺 𑀢𑀣𑀸𑀧𑀭𑀺𑀯𑀺𑀢𑀓𑁆𑀓𑁄𑀢𑀺 𑀢𑀲𑁆𑀲𑀸𑀧𑀺 𑀅𑀯𑀓𑀸𑀲𑀸𑀪𑀸𑀯𑀸𑀤𑀲𑁆𑀲𑀦𑀢𑁆𑀣𑀁 𑀢𑀣𑀸 𑀯𑀼𑀢𑁆𑀢𑀢𑁆𑀢𑀸. 𑀓𑀺𑀭-𑀲𑀤𑁆𑀤𑁄 𑀧𑀦 𑀢𑀤𑀸 𑀩𑁆𑀭𑀸𑀳𑁆𑀫𑀡𑁂𑀦 𑀘𑀺𑀦𑁆𑀢𑀺𑀢𑀸𑀓𑀸𑀭𑀲𑀽𑀘𑀦𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀫𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀬𑀁 𑀯𑀺𑀭𑀽𑀧𑁄 𑀤𑀮𑀺𑀤𑁆𑀤𑁄 𑀅𑀧𑁆𑀧𑁂𑀲𑀓𑁆𑀔𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑁆𑀲𑀼𑀢𑁄 𑀅𑀦𑀢𑁆𑀣𑀜𑁆𑀜𑀽 𑀦 𑀫𑁂𑀥𑀸𑀯𑀻’’𑀢𑀺 𑀏𑀢𑁂𑀲𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀘𑀢𑀼𑀧𑀭𑀺𑀓𑁆𑀔𑀸𑀭𑀸𑀤𑀺𑀯𑀡𑁆𑀡𑀦𑀸

𑁩𑁪𑁧. ‘‘𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦’’𑀦𑁆𑀢𑀺 𑀧𑀼𑀭𑁄𑀳𑀺𑀢𑀲𑁆𑀲 𑀲𑀬𑀫𑁂𑀯 𑀓𑀝𑀘𑁆𑀙𑀼𑀕𑁆𑀕𑀳𑀡𑀚𑁄𑀢𑀦𑁂𑀦 𑀏𑀯𑀁 𑀲𑀳𑀢𑁆𑀣𑀸, 𑀲𑀓𑁆𑀓𑀘𑁆𑀘𑀜𑁆𑀘 𑀤𑀸𑀦𑁂 𑀬𑀼𑀢𑁆𑀢𑀢𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀤𑀼𑀚𑁆𑀚𑀸𑀢𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁪𑁨. 𑀢𑀺𑀡𑁆𑀡𑀁 𑀞𑀸𑀦𑀸𑀦𑀦𑁆𑀢𑀺 𑀤𑀸𑀦𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀪𑀽𑀢𑀸𑀲𑀼 𑀢𑀻𑀲𑀼 𑀪𑀽𑀫𑀻𑀲𑀼, 𑀅𑀯𑀢𑁆𑀣𑀸𑀲𑀽𑀢𑀺 𑀅𑀢𑁆𑀣𑁄. 𑀘𑀮𑀦𑁆𑀢𑀻𑀢𑀺 𑀓𑀫𑁆𑀧𑀦𑁆𑀢𑀺 𑀧𑀼𑀭𑀺𑀫𑀸𑀓𑀸𑀭𑁂𑀦 𑀦 𑀢𑀺𑀝𑁆𑀞𑀦𑁆𑀢𑀺. 𑀓𑀭𑀡𑀢𑁆𑀣𑁂𑀢𑀺 𑀢𑀢𑀺𑀬𑀸𑀯𑀺𑀪𑀢𑁆𑀢𑀺𑀅𑀢𑁆𑀣𑁂. 𑀓𑀢𑁆𑀢𑀭𑀺 𑀳𑁂𑀢𑀁 𑀲𑀸𑀫𑀺𑀯𑀘𑀦𑀁 𑀓𑀭𑀡𑀻𑀬𑀲𑀤𑁆𑀤𑀸𑀧𑁂𑀓𑁆𑀔𑀸𑀬. ‘‘𑀧𑀘𑁆𑀘𑀸𑀦𑀼𑀢𑀸𑀧𑁄 𑀦 𑀓𑀢𑁆𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀓𑀭𑀡𑀽𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑀘𑁂𑀢𑀦𑀸 𑀧𑀦 𑀅𑀘𑀮𑀸 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀘𑀮𑀸𑀢𑀺 𑀤𑀴𑁆𑀳𑀸 𑀓𑁂𑀦𑀘𑀺 𑀅𑀲𑀁𑀳𑀻𑀭𑀸. 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀸𑀢𑀺 𑀲𑀼𑀧𑀢𑀺𑀝𑁆𑀞𑀺𑀢𑀸 𑀓𑀸𑀢𑀩𑁆𑀩𑀸. 𑀏𑀯𑀁 𑀓𑀭𑀡𑁂𑀦 𑀳𑀺 𑀬𑀣𑀸 𑀢𑀁 𑀤𑀸𑀦𑀁 𑀲𑀫𑁆𑀧𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦𑀺𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀆𑀬𑀢𑀺𑀫𑁆𑀧𑀺 𑀯𑀺𑀧𑀼𑀮𑀨𑀮𑀢𑀸𑀬𑀸𑀢𑀺 𑀆𑀳 ‘‘𑀏𑀯𑀜𑁆𑀳𑀺 𑀤𑀸𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀢𑁄. 𑀫𑀼𑀜𑁆𑀘𑀘𑁂𑀢𑀦𑀸𑀢𑀺 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸. 𑀢𑀲𑁆𑀲𑀸 𑀦𑀺𑀘𑁆𑀘𑀮𑀪𑀸𑀯𑁄 𑀦𑀸𑀫 𑀫𑀼𑀢𑁆𑀢𑀘𑀸𑀕𑀢𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀉𑀴𑀸𑀭𑀪𑀸𑀯𑁄, 𑀲𑀫𑀦𑀼𑀲𑁆𑀲𑀭𑀡𑀘𑁂𑀢𑀦𑀸𑀬 𑀧𑀦 𑀦𑀺𑀘𑁆𑀘𑀮𑀪𑀸𑀯𑁄 ‘‘𑀅𑀳𑁄 𑀫𑀬𑀸 𑀤𑀸𑀦𑀁 𑀤𑀺𑀦𑁆𑀦𑀁 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀢𑀲𑁆𑀲 𑀲𑀓𑁆𑀓𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀅𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀫𑀼𑀜𑁆𑀘𑀘𑁂𑀢𑀦𑀁, 𑀢𑀢𑁆𑀣 𑀧𑀘𑁆𑀘𑀸𑀲𑀫𑀦𑀼𑀲𑁆𑀲𑀭𑀡𑀘𑁂𑀢𑀦𑀜𑁆𑀘 𑀯𑀼𑀢𑁆𑀢𑀦𑀬𑁂𑀦 𑀦𑀺𑀘𑁆𑀘𑀮𑀁 𑀅𑀓𑀭𑁄𑀦𑁆𑀢𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀔𑁂𑀢𑁆𑀢𑀯𑀺𑀲𑁂𑀲𑁂 𑀧𑀭𑀺𑀘𑁆𑀘𑀸𑀕𑀲𑁆𑀲 𑀓𑀢𑀢𑁆𑀢𑀸 𑀮𑀤𑁆𑀥𑁂𑀲𑀼𑀧𑀺 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀼 𑀘𑀺𑀢𑁆𑀢𑀁 𑀦𑀸𑀧𑀺 𑀦𑀫𑀢𑀺. 𑀬𑀣𑀸 𑀓𑀣𑀦𑁆𑀢𑀺 𑀆𑀳 ‘‘𑀫𑀳𑀸𑀭𑁄𑀭𑀼𑀯𑀁 𑀉𑀧𑀧𑀦𑁆𑀦𑀲𑁆𑀲 𑀲𑁂𑀝𑁆𑀞𑀺𑀕𑀳𑀧𑀢𑀺𑀦𑁄 𑀯𑀺𑀬𑀸’’𑀢𑀺.

𑀲𑁄 𑀓𑀺𑀭 𑀢𑀕𑀭𑀲𑀺𑀔𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀅𑀢𑁆𑀢𑀦𑁄 𑀕𑁂𑀳𑀤𑁆𑀯𑀸𑀭𑁂 𑀧𑀺𑀡𑁆𑀟𑀸𑀬 𑀞𑀺𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀲𑀫𑀡𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑁂𑀳𑀻’’𑀢𑀺 𑀪𑀭𑀺𑀬𑀁 𑀆𑀡𑀸𑀧𑁂𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀦𑀢𑁆𑀣𑀁 𑀧𑀓𑁆𑀓𑀸𑀫𑀺. 𑀲𑁂𑀝𑁆𑀞𑀺𑀪𑀭𑀺𑀬𑀸 𑀲𑀧𑁆𑀧𑀜𑁆𑀜𑀚𑀸𑀢𑀺𑀓𑀸, 𑀲𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀸 𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 ‘𑀇𑀫𑀲𑁆𑀲 𑀤𑁂𑀣𑀸’𑀢𑀺 𑀯𑀘𑀦𑀫𑀢𑁆𑀢𑀁 𑀧𑀺𑀲𑁆𑀲 𑀦 𑀲𑀼𑀢𑀧𑀼𑀩𑁆𑀩𑀁, 𑀅𑀬𑀜𑁆𑀘 𑀫𑀜𑁆𑀜𑁂 𑀅𑀳𑁄𑀲𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄, 𑀬𑀣𑀸 𑀢𑀣𑀸 𑀅𑀤𑀢𑁆𑀯𑀸 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀉𑀧𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑁂𑀳𑀺 𑀲𑀸𑀮𑀺𑀢𑀡𑁆𑀟𑀼𑀮𑁂𑀳𑀺 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀔𑀸𑀤𑀦𑀻𑀬𑀁, 𑀩𑁆𑀬𑀜𑁆𑀚𑀦𑀁, 𑀲𑀽𑀧𑁂𑀬𑁆𑀬𑀜𑁆𑀘 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀩𑀳𑀺 𑀕𑀦𑁆𑀥𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂𑀲𑀼 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀯𑀦𑁆𑀤𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀅𑀜𑁆𑀜𑁂𑀲𑀫𑁆𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸𑀯 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄𑀧𑀺 𑀔𑁄 𑀲𑁂𑀝𑁆𑀞𑀺 𑀭𑀸𑀚𑀼𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀅𑀳𑀁 ‘‘𑀢𑀼𑀫𑁆𑀳𑀸𑀓𑀁 𑀧𑀺𑀡𑁆𑀟𑀧𑀸𑀢𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑁄, 𑀅𑀧𑀺 𑀯𑁄 𑀮𑀤𑁆𑀥𑁄 𑀧𑀺𑀡𑁆𑀟𑀧𑀸𑀢𑁄𑀢𑀺. 𑀆𑀫 𑀲𑁂𑀝𑁆𑀞𑀺 𑀮𑀤𑁆𑀥𑁄𑀢𑀺. ‘‘𑀧𑀲𑁆𑀲𑀸𑀫𑀸’’𑀢𑀺 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀅𑀣𑀲𑁆𑀲 𑀧𑀺𑀡𑁆𑀟𑀧𑀸𑀢𑀕𑀦𑁆𑀥𑁄 𑀉𑀝𑁆𑀞𑀳𑀺𑀢𑁆𑀯𑀸 𑀦𑀸𑀲𑀧𑀼𑀝𑀁 𑀧𑀽𑀭𑁂𑀲𑀺. 𑀲𑁄 ‘‘𑀫𑀳𑀸 𑀯𑀢 𑀫𑁂 𑀥𑀦𑀩𑁆𑀬𑀬𑁄 𑀚𑀸𑀢𑁄’’𑀢𑀺 𑀘𑀺𑀢𑁆𑀢𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺. 𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀧𑀦 𑀉𑀧𑁆𑀧𑀦𑁆𑀦𑀸𑀓𑀸𑀭𑁄 ‘‘𑀯𑀭𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁧𑁩𑁧) 𑀧𑀸𑀴𑀺𑀬𑀁 𑀆𑀕𑀢𑁄𑀬𑁂𑀯. 𑀪𑀸𑀢𑀼 𑀧𑀦𑀸𑀬𑀁 𑀏𑀓𑀁 𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀓𑀸𑀭𑀡𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀢𑁂𑀦 𑀫𑀳𑀸𑀭𑁄𑀭𑀼𑀯𑀁 𑀉𑀧𑀧𑀦𑁆𑀦𑁄. 𑀧𑀺𑀡𑁆𑀟𑀧𑀸𑀢𑀤𑀸𑀦𑁂𑀦 𑀧𑀦𑁂𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀼𑀕𑁆𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑁄, 𑀲𑀢𑁆𑀢𑀓𑁆𑀔𑀢𑁆𑀢𑀼𑀫𑁂𑀯 𑀘 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀦 𑀘𑀸𑀲𑁆𑀲 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀼 𑀘𑀺𑀢𑁆𑀢𑀁 𑀦𑀫𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀧𑀺 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀼 𑀘𑀺𑀢𑁆𑀢𑀁 𑀦𑀫𑀢𑀻’’𑀢𑀺.

𑁩𑁪𑁩. 𑀆𑀓𑀭𑁄𑀢𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀢𑀸𑀬 𑀲𑀫𑀭𑀺𑀬𑀸𑀤𑀁 𑀲𑀧𑀭𑀺𑀘𑁆𑀙𑁂𑀤𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀆𑀓𑀸𑀭𑁄, 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀤𑀲𑀳𑀺 𑀆𑀓𑀸𑀭𑁂𑀳𑀻𑀢𑀺 𑀤𑀲𑀳𑀺 𑀓𑀸𑀭𑀡𑁂𑀳𑀻’’𑀢𑀺. 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀸𑀢𑀺 𑀩𑀮𑀯𑀢𑀭𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄𑀯 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀭𑁄 𑀧𑀦 𑀤𑁂𑀬𑁆𑀬𑀥𑀫𑁆𑀫𑀢𑁄, 𑀧𑀭𑀺𑀯𑀸𑀭𑀚𑀦𑀢𑁄𑀧𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑁂𑀯. 𑀉𑀧𑁆𑀧𑀚𑁆𑀚𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀁. 𑀢𑁂𑀲𑀁𑀬𑁂𑀯 𑀧𑀸𑀡𑀸𑀢𑀺𑀧𑀸𑀢𑀻𑀦𑀁. 𑀬𑀚𑀦𑀁 𑀦𑀸𑀫𑁂𑀢𑁆𑀣 𑀤𑀸𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀅𑀕𑁆𑀕𑀺𑀚𑀼𑀳𑀦𑀦𑁆𑀢𑀺 𑀆𑀳 ‘‘𑀬𑀚𑀢𑀁 𑀪𑀯𑀦𑁆𑀢𑀺 𑀤𑁂𑀢𑀼 𑀪𑀯’’𑀦𑁆𑀢𑀺. 𑀯𑀺𑀲𑁆𑀲𑀚𑁆𑀚𑀢𑀽𑀢𑀺 𑀫𑀼𑀢𑁆𑀢𑀘𑀸𑀕𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀢𑀼. 𑀅𑀩𑁆𑀪𑀦𑁆𑀢𑀭𑀦𑁆𑀢𑀺 𑀅𑀚𑁆𑀛𑀢𑁆𑀢𑀁, 𑀲𑀓𑀲𑀦𑁆𑀢𑀸𑀦𑁂𑀢𑀺 𑀅𑀢𑁆𑀣𑁄.

𑁩𑁪𑁪. 𑀳𑁂𑀝𑁆𑀞𑀸 𑀲𑁄𑀴𑀲 𑀧𑀭𑀺𑀓𑁆𑀔𑀸𑀭𑀸 𑀯𑀼𑀢𑁆𑀢𑀸 𑀬𑀜𑁆𑀜𑀲𑁆𑀲 𑀢𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸, 𑀇𑀥 𑀧𑀦 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀅𑀦𑀼𑀫𑁄𑀤𑀦𑀸𑀬 𑀆𑀭𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀻’’𑀢𑀺. 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀨𑀮𑀁 𑀤𑀲𑁆𑀲𑁂𑀢𑁆𑀯𑀸, 𑀅𑀦𑁂𑀓𑀯𑀸𑀭𑀁 𑀧𑀦 𑀓𑀣𑀦𑀢𑁄 𑀘 𑀆𑀫𑁂𑀟𑀺𑀢𑀯𑀘𑀦𑀁. 𑀢𑀫𑀢𑁆𑀣𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀤𑀸𑀦𑀨𑀮𑀯𑀲𑁂𑀦 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀁. 𑀲𑀫𑀸𑀤𑀧𑁂𑀢𑁆𑀯𑀸𑀢𑀺 𑀲𑀼𑀢𑀫𑀢𑁆𑀢𑀫𑁂𑀯 𑀅𑀓𑀢𑁆𑀯𑀸 𑀬𑀣𑀸 𑀭𑀸𑀚𑀸 𑀢𑀫𑀢𑁆𑀣𑀁 𑀲𑀫𑁆𑀫𑀤𑁂𑀯 𑀆𑀤𑀺𑀬𑀢𑀺 𑀘𑀺𑀢𑁆𑀢𑁂 𑀓𑀭𑁄𑀦𑁆𑀢𑁄 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀣𑀸 𑀲𑀓𑁆𑀓𑀘𑁆𑀘𑀁 𑀆𑀤𑀸𑀧𑁂𑀢𑁆𑀯𑀸. 𑀆𑀫𑁂𑀟𑀺𑀢𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

‘‘𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀦𑁄𑀤𑀦𑁂𑀦𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀮𑁄𑀪𑀤𑁄𑀲𑀫𑁄𑀳𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀫𑀸𑀦𑀸𑀤𑀬𑁄𑀧𑀺 𑀳𑀺 𑀤𑀸𑀦𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀢𑁂𑀲𑀁 𑀯𑀺𑀦𑁄𑀤𑀦𑁂𑀦𑀧𑀺 𑀢𑀁 𑀲𑀫𑀼𑀢𑁆𑀢𑁂𑀚𑀺𑀢𑀁 𑀦𑀸𑀫 𑀳𑁄𑀢𑀺 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀺𑀢𑁄. 𑀆𑀲𑀦𑁆𑀦𑀢𑀭𑀪𑀸𑀯𑀢𑁄 𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀢𑀩𑁆𑀩𑀺𑀦𑁄𑀤𑀦𑀫𑁂𑀯 𑀕𑀳𑀺𑀢𑀁, 𑀧𑀯𑀢𑁆𑀢𑀺𑀢𑁂𑀧𑀺 𑀳𑀺 𑀤𑀸𑀦𑁂 𑀢𑀲𑁆𑀲 𑀲𑀫𑁆𑀪𑀯𑀢𑁄. 𑀬𑀸𑀣𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑁂𑀳𑀺 𑀕𑀼𑀡𑁂𑀳𑀺 𑀢𑀼𑀝𑁆𑀞𑀧𑀳𑀝𑁆𑀞𑀪𑀸𑀯𑀸𑀧𑀸𑀤𑀦𑀁 𑀲𑀫𑁆𑀧𑀳𑀁𑀲𑀦𑀦𑁆𑀢𑀺 𑀆𑀳 ‘‘𑀲𑀼𑀦𑁆𑀤𑀭𑀁 𑀢𑁂…𑀧𑁂… 𑀣𑀼𑀢𑀺𑀁 𑀓𑀢𑁆𑀯𑀸 𑀓𑀣𑁂𑀲𑀻’’𑀢𑀺. 𑀥𑀫𑁆𑀫𑀢𑁄𑀢𑀺 𑀲𑀘𑁆𑀘𑀢𑁄. 𑀲𑀘𑁆𑀘𑀜𑁆𑀳𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀁, 𑀉𑀧𑀲𑀫𑀘𑀭𑀺𑀬𑀸𑀪𑀸𑀯𑀢𑁄 𑀲𑀫𑀁, 𑀬𑀼𑀢𑁆𑀢𑀪𑀸𑀯𑁂𑀦 𑀓𑀸𑀭𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺.

𑁩𑁪𑁫. 𑀢𑀲𑁆𑀫𑀺𑀁 𑀬𑀜𑁆𑀜𑁂 𑀭𑀼𑀓𑁆𑀔𑀢𑀺𑀡𑀘𑁆𑀙𑁂𑀤𑁄𑀧𑀺 𑀦𑀸𑀫 𑀦𑀸𑀳𑁄𑀲𑀺, 𑀓𑀼𑀢𑁄 𑀧𑀸𑀡𑀯𑀥𑁄𑀢𑀺 𑀧𑀸𑀡𑀯𑀥𑀸𑀪𑀸𑀯𑀲𑁆𑀲𑁂𑀯 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑀲𑀩𑁆𑀩𑀲𑁄 𑀯𑀺𑀧𑀭𑀻𑀢𑀕𑀸𑀳𑀸𑀯𑀺𑀤𑀽𑀲𑀺𑀢𑀜𑁆𑀘𑀲𑁆𑀲 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀦𑁂𑀯 𑀕𑀸𑀯𑁄 𑀳𑀜𑁆𑀜𑀺𑀁𑀲𑀽’’𑀢𑀺 𑀆𑀤𑀺𑀁 𑀯𑀢𑁆𑀯𑀸𑀧𑀺 ‘‘𑀦 𑀭𑀼𑀓𑁆𑀔𑀸 𑀙𑀺𑀚𑁆𑀚𑀺𑀁𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦𑀸𑀳 ‘‘𑀓𑀺𑀁 𑀧𑀦 𑀕𑀸𑀯𑁄’’𑀢𑀺𑀆𑀤𑀺. 𑀩𑀭𑀺𑀳𑀺𑀲𑀢𑁆𑀣𑀸𑀬𑀸𑀢𑀺 𑀧𑀭𑀺𑀘𑁆𑀙𑁂𑀤𑀦𑀢𑁆𑀣𑀸𑀬. 𑀯𑀦𑀫𑀸𑀮𑀸𑀲𑀗𑁆𑀔𑁂𑀧𑁂𑀦𑀸𑀢𑀺 𑀯𑀦𑀧𑀼𑀧𑁆𑀨𑁂𑀳𑀺 𑀕𑀦𑁆𑀣𑀺𑀢𑀫𑀸𑀮𑀸𑀦𑀺𑀬𑀸𑀫𑁂𑀦. 𑀪𑀽𑀫𑀺𑀬𑀁 𑀯𑀸 𑀧𑀢𑁆𑀣𑀭𑀦𑁆𑀢𑀻𑀢𑀺 𑀯𑁂𑀤𑀺𑀪𑀽𑀫𑀺𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀸 𑀢𑀢𑁆𑀣 𑀧𑀦𑁆𑀣𑀭𑀦𑁆𑀢𑀺. 𑀅𑀦𑁆𑀢𑁄𑀕𑁂𑀳𑀤𑀸𑀲𑀸𑀤𑀬𑁄𑀢𑀺 𑀅𑀦𑁆𑀢𑁄𑀚𑀸𑀢𑀥𑀦𑀓𑁆𑀓𑀻𑀢𑀓𑀭𑀫𑀭𑀸𑀦𑀻𑀢𑀲𑀬𑀁𑀤𑀸𑀲𑀸. 𑀧𑀼𑀩𑁆𑀩𑀫𑁂𑀯𑀸𑀢𑀺 𑀪𑀢𑀺𑀓𑀭𑀡𑀢𑁄 𑀧𑀕𑁂𑀯. 𑀕𑀳𑁂𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀕𑀳𑁂𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀢𑀚𑁆𑀚𑀺𑀢𑀸𑀢𑀺 𑀕𑀚𑁆𑀚𑀺𑀢𑀸. 𑀧𑀺𑀬𑀲𑀫𑀼𑀤𑀸𑀘𑀸𑀭𑁂𑀦𑁂𑀯𑀸𑀢𑀺 𑀇𑀝𑁆𑀞𑀯𑀘𑀦𑁂𑀦𑁂𑀯. 𑀨𑀸𑀡𑀺𑀢𑁂𑀦 𑀘𑁂𑀯𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀧𑀡𑀻𑀢𑀧𑀡𑀻𑀢𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀜𑁆𑀘𑁂𑀯 𑀯𑀢𑁆𑀣𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀬𑀸𑀦𑀲𑁂𑀬𑁆𑀬𑀸𑀤𑀻𑀦𑀜𑁆𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄, 𑀢𑁂𑀦𑀸𑀳 ‘‘𑀧𑀡𑀻𑀢𑁂𑀳𑀺 𑀲𑀧𑁆𑀧𑀺𑀢𑁂𑀮𑀸𑀤𑀺𑀲𑀫𑁆𑀫𑀺𑀲𑁆𑀲𑁂𑀳𑁂𑀯𑀸’’𑀢𑀺𑀆𑀤𑀺.

𑁩𑁪𑁬. 𑀲𑀁 𑀦𑀸𑀫 𑀥𑀦𑀁, 𑀢𑀲𑁆𑀲 𑀧𑀢𑀻𑀢𑀺 𑀲𑀧𑀢𑀺, 𑀥𑀦𑀯𑀸. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀳𑀺𑀢𑀸𑀯𑀳𑀢𑁆𑀢𑀸 𑀢𑀲𑁆𑀲 𑀳𑀺𑀢𑀦𑁆𑀢𑀺 𑀲𑀸𑀧𑀢𑁂𑀬𑁆𑀬𑀁, 𑀢𑀤𑁂𑀯 𑀥𑀦𑀁. 𑀢𑁂𑀦𑀸𑀳 ‘‘𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀆𑀤𑀸𑀬𑀸𑀢𑀺 𑀩𑀳𑀼𑀁 𑀥𑀦𑀁 𑀕𑀳𑁂𑀢𑁆𑀯𑀸’’𑀢𑀺. 𑀕𑀸𑀫𑀪𑀸𑀕𑁂𑀦𑀸𑀢𑀺 𑀲𑀗𑁆𑀓𑀺𑀢𑁆𑀢𑀦𑀯𑀲𑁂𑀦 𑀕𑀸𑀫𑁂 𑀯𑀸 𑀕𑀳𑁂𑀢𑀩𑁆𑀩𑀪𑀸𑀕𑁂𑀦.

𑁩𑁪𑁭. ‘‘𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸’’𑀢𑀺 𑀬𑀸𑀕𑀼𑀲𑀻𑀲𑁂𑀦 𑀧𑀸𑀢𑀭𑀸𑀲𑀪𑁄𑀚𑀦𑀫𑀸𑀳. 𑀧𑀼𑀭𑀢𑁆𑀣𑀺𑀫𑁂𑀦 𑀬𑀜𑁆𑀜𑀯𑀸𑀝𑀲𑁆𑀲𑀸𑀢𑀺 𑀭𑀜𑁆𑀜𑁄 𑀤𑀸𑀦𑀲𑀸𑀮𑀸𑀬 𑀦𑀸𑀢𑀺𑀤𑀽𑀭𑁂 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂𑀢𑀺 𑀅𑀢𑁆𑀣𑁄, 𑀬𑀢𑁄 𑀢𑀢𑁆𑀣 𑀧𑀸𑀢𑀭𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀓𑀺𑀮𑀦𑁆𑀢𑀭𑀽𑀧𑀸𑀬𑁂𑀯 𑀲𑀸𑀬𑀦𑁆𑀳𑁂 𑀲𑀸𑀮𑀁 𑀧𑀸𑀧𑀼𑀡𑀦𑁆𑀢𑀺 ‘‘𑀤𑀓𑁆𑀔𑀺𑀡𑁂𑀦 𑀬𑀜𑁆𑀜𑀯𑀸𑀝𑀲𑁆𑀲𑀸’’𑀢𑀺 𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁪𑁮. 𑀧𑀭𑀺𑀳𑀸𑀭𑁂𑀦𑀸𑀢𑀺 𑀪𑀕𑀯𑀦𑁆𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀕𑀸𑀭𑀯𑀧𑀭𑀺𑀳𑀸𑀭𑁂𑀦.

𑀦𑀺𑀘𑁆𑀘𑀤𑀸𑀦𑀅𑀦𑀼𑀓𑀼𑀮𑀬𑀜𑁆𑀜𑀯𑀡𑁆𑀡𑀦𑀸

𑁩𑁪𑁯. 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬𑀸𑀢𑀺 𑀤𑀸𑀦𑁂 𑀉𑀝𑁆𑀞𑀸𑀦𑀯𑀻𑀭𑀺𑀬𑀁 𑀲𑀓𑁆𑀓𑀘𑁆𑀘𑀁 𑀓𑀢𑁆𑀯𑀸. 𑀅𑀧𑁆𑀧𑀲𑀫𑁆𑀪𑀸𑀭𑀢𑀭𑁄𑀢𑀺 𑀅𑀢𑀺𑀯𑀺𑀬 𑀧𑀭𑀺𑀢𑁆𑀢𑀲𑀫𑁆𑀪𑀸𑀭𑁄. 𑀲𑀫𑀸𑀭𑀪𑀻𑀬𑀢𑀺 𑀬𑀜𑁆𑀜𑁄 𑀏𑀢𑁂𑀳𑀻𑀢𑀺 𑀲𑀫𑀸𑀭𑀫𑁆𑀪𑀸, 𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀯𑀲𑁂𑀦 𑀧𑀯𑀢𑁆𑀢𑀲𑀢𑁆𑀢𑀧𑀻𑀴𑀸. 𑀅𑀧𑁆𑀧𑀝𑁆𑀞𑀢𑀭𑁄𑀢𑀺 𑀧𑀦 𑀅𑀢𑀺𑀯𑀺𑀬 𑀅𑀧𑁆𑀧𑀓𑀺𑀘𑁆𑀘𑁄𑀢𑀺 𑀅𑀢𑁆𑀣𑁄. 𑀯𑀺𑀧𑀸𑀓𑀲𑀜𑁆𑀜𑀺𑀢𑀁 𑀅𑀢𑀺𑀲𑀬𑁂𑀦 𑀫𑀳𑀦𑁆𑀢𑀁 𑀲𑀤𑀺𑀲𑀨𑀮𑀁 𑀏𑀢𑀲𑁆𑀲𑀸𑀢𑀺 𑀫𑀳𑀧𑁆𑀨𑀮𑀢𑀭𑁄. 𑀉𑀤𑀬𑀲𑀜𑁆𑀜𑀺𑀢𑀁 𑀅𑀢𑀺𑀲𑀬𑁂𑀦 𑀫𑀳𑀦𑁆𑀢𑀁 𑀦𑀺𑀲𑁆𑀲𑀦𑁆𑀤𑀸𑀤𑀺𑀨𑀮𑀁 𑀏𑀢𑀲𑁆𑀲𑀸𑀢𑀺 𑀫𑀳𑀸𑀦𑀺𑀲𑀁𑀲𑀢𑀭𑁄. 𑀥𑀼𑀯𑀤𑀸𑀦𑀸𑀦𑀻𑀢𑀺 𑀥𑀼𑀯𑀸𑀦𑀺 𑀣𑀺𑀭𑀸𑀦𑀺 𑀅𑀘𑁆𑀙𑀺𑀦𑁆𑀦𑀸𑀦𑀺 𑀓𑀢𑁆𑀯𑀸 𑀤𑀸𑀢𑀩𑁆𑀩𑀤𑀸𑀦𑀸𑀦𑀺. 𑀅𑀦𑀼𑀓𑀼𑀮𑀬𑀜𑁆𑀜𑀸𑀦𑀻𑀢𑀺 𑀅𑀦𑀼𑀓𑀼𑀮𑀁 𑀓𑀼𑀮𑀸𑀦𑀼𑀓𑁆𑀓𑀫𑀁 𑀉𑀧𑀸𑀤𑀸𑀬 𑀤𑀸𑀢𑀩𑁆𑀩𑀤𑀸𑀦𑀸𑀦𑀺, 𑀢𑁂𑀦𑀸𑀳 ‘‘𑀅𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺. 𑀦𑀺𑀩𑀤𑁆𑀥𑀤𑀸𑀦𑀸𑀦𑀻𑀢𑀺 𑀦𑀺𑀩𑀦𑁆𑀥𑁂𑀢𑁆𑀯𑀸 𑀦𑀺𑀬𑀫𑁂𑀢𑁆𑀯𑀸 𑀧𑀯𑁂𑀡𑀻𑀯𑀲𑁂𑀦 𑀧𑀯𑀢𑁆𑀢𑀺𑀢𑀤𑀸𑀦𑀸𑀦𑀺.

𑀳𑀢𑁆𑀣𑀺𑀤𑀦𑁆𑀢𑁂𑀦 𑀧𑀯𑀢𑁆𑀢𑀺𑀢𑀸 𑀤𑀦𑁆𑀢𑀫𑀬𑀲𑀮𑀸𑀓𑀸, 𑀬𑀢𑁆𑀣 𑀤𑀸𑀬𑀓𑀸𑀦𑀁 𑀦𑀸𑀫𑀁 𑀅𑀗𑁆𑀓𑀦𑁆𑀢𑀺. 𑀭𑀜𑁆𑀜𑁄𑀢𑀺 𑀲𑁂𑀢𑀯𑀸𑀳𑀦𑀭𑀜𑁆𑀜𑁄.

𑀆𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀲𑁂𑀦𑁄 𑀯𑀺𑀬 𑀫𑀁𑀲𑀧𑁂𑀲𑀺𑀁 𑀓𑀲𑁆𑀫𑀸 𑀑𑀓𑁆𑀔𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀸𑀲𑀻’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀧𑀼𑀩𑁆𑀩𑀘𑁂𑀢𑀦𑀸𑀫𑀼𑀜𑁆𑀘𑀘𑁂𑀢𑀦𑀸𑀅𑀧𑀭𑀘𑁂𑀢𑀦𑀸𑀲𑀫𑁆𑀧𑀢𑁆𑀢𑀺𑀬𑀸 𑀤𑀸𑀬𑀓𑀲𑁆𑀲 𑀯𑀲𑁂𑀦 𑀢𑀻𑀡𑀺 𑀅𑀗𑁆𑀕𑀸𑀦𑀺, 𑀯𑀻𑀢𑀭𑀸𑀕𑀢𑀸𑀯𑀻𑀢𑀤𑁄𑀲𑀢𑀸𑀯𑀻𑀢𑀫𑁄𑀳𑀢𑀸𑀧𑀝𑀺𑀧𑀢𑁆𑀢𑀺𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀯𑀲𑁂𑀦 𑀢𑀻𑀡𑀻𑀢𑀺 𑀏𑀯𑀁 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀸𑀬 𑀤𑀓𑁆𑀔𑀺𑀡𑀸𑀬. 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀓𑀘𑁂𑀢𑀦𑀸𑀯𑀲𑁂𑀦 𑀫𑀳𑀸𑀦𑀤𑀻 𑀯𑀺𑀬, 𑀫𑀳𑁄𑀖𑁄 𑀯𑀺𑀬 𑀘 𑀇𑀢𑁄 𑀘𑀺𑀢𑁄 𑀘 𑀅𑀪𑀺𑀲𑀦𑁆𑀤𑀺𑀢𑁆𑀯𑀸 𑀑𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀧𑀼𑀜𑁆𑀜𑀫𑁂𑀯 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄.

𑁩𑁫𑁦. 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀦𑀢𑁆𑀣𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀸𑀬𑀓𑀲𑁆𑀲 𑀩𑁆𑀬𑀸𑀧𑀸𑀭𑀸𑀧𑀚𑁆𑀚𑀦𑀢𑁄, 𑀢𑁂𑀦𑀸𑀳 ‘‘𑀏𑀓𑁂𑀦𑀸’’𑀢𑀺𑀆𑀤𑀺. 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀅𑀢𑁆𑀣𑀺 𑀬𑀣𑀸𑀭𑀤𑁆𑀥𑀲𑁆𑀲 𑀆𑀯𑀸𑀲𑀲𑁆𑀲 𑀓𑀢𑀺𑀧𑀬𑁂𑀦𑀸𑀧𑀺 𑀓𑀸𑀮𑁂𑀦 𑀧𑀭𑀺𑀲𑀫𑀸𑀧𑁂𑀢𑀩𑁆𑀩𑀢𑁄, 𑀢𑁂𑀦𑀸𑀳 ‘‘𑀧𑀡𑁆𑀡𑀲𑀸𑀮’’𑀦𑁆𑀢𑀺𑀆𑀤𑀺. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀦𑀬𑁂𑀦. (𑀫. 𑀦𑀺. 𑁧.𑁧𑁨, 𑁧𑁩; 𑀅. 𑀦𑀺. 𑁨.𑁫𑁮) 𑀦𑀯 𑀆𑀦𑀺𑀲𑀁𑀲𑀸𑀢𑀺 𑀲𑀻𑀢𑀧𑀝𑀺𑀖𑀸𑀢𑀸𑀤𑀬𑁄 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀧𑀭𑀺𑀬𑁄𑀲𑀸𑀦𑀸 𑀦𑀯 𑀉𑀤𑀬𑀸. 𑀅𑀧𑁆𑀧𑀫𑀢𑁆𑀢𑀢𑀸𑀬 𑀘𑁂𑀢𑁂 𑀯𑀼𑀢𑁆𑀢𑀸.

𑀬𑀲𑁆𑀫𑀸 𑀆𑀯𑀸𑀲𑀁 𑀤𑁂𑀦𑁆𑀢𑁂𑀦 𑀦𑀸𑀫 𑀲𑀩𑁆𑀩𑀫𑁆𑀧𑀺 𑀧𑀘𑁆𑀘𑀬𑀚𑀸𑀢𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀤𑁆𑀯𑁂 𑀢𑀬𑁄 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀆𑀕𑀢𑀲𑁆𑀲𑀧𑀺 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀆𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀧𑀢𑀺𑀲𑁆𑀲𑀬𑁂 𑀫𑀼𑀳𑀼𑀢𑁆𑀢𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑁂 𑀩𑀮𑀁 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀯𑀡𑁆𑀡𑀥𑀸𑀢𑀼 𑀯𑀸𑀢𑀸𑀢𑀧𑁂𑀳𑀺 𑀓𑀺𑀮𑀫𑀢𑀺, 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀫𑀼𑀳𑀼𑀢𑁆𑀢𑀁 𑀦𑀺𑀧𑀦𑁆𑀦𑀲𑁆𑀲 𑀯𑀺𑀲𑀪𑀸𑀕𑀲𑀦𑁆𑀢𑀢𑀺 𑀯𑀽𑀧𑀲𑀫𑁆𑀫𑀢𑀺, 𑀲𑀪𑀸𑀕𑀲𑀦𑁆𑀢𑀢𑀺 𑀧𑀢𑀺𑀝𑁆𑀞𑀸𑀢𑀺, 𑀯𑀡𑁆𑀡𑀥𑀸𑀢𑀼 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀸 𑀯𑀺𑀬 𑀳𑁄𑀢𑀺. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀧𑀸𑀤𑁂 𑀓𑀡𑁆𑀝𑀓𑁄 𑀯𑀺𑀚𑁆𑀛𑀢𑀺, 𑀔𑀸𑀡𑀼 𑀧𑀳𑀭𑀢𑀺, 𑀲𑀭𑀻𑀲𑀧𑀸𑀤𑀺𑀧𑀭𑀺𑀲𑁆𑀲𑀬𑀸 𑀘𑁂𑀯 𑀘𑁄𑀭𑀪𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀧𑀦𑁆𑀦𑀲𑁆𑀲 𑀲𑀩𑁆𑀩𑁂 𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺, 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀥𑀫𑁆𑀫𑀧𑀻𑀢𑀺𑀲𑀼𑀔𑀁, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀉𑀧𑀲𑀫𑀲𑀼𑀔𑀜𑁆𑀘 𑀉𑀧𑁆𑀧𑀚𑁆𑀚𑀢𑀺 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀅𑀓𑁆𑀔𑀻𑀦𑀺 𑀨𑀦𑁆𑀤𑀦𑁆𑀢𑀺, 𑀲𑁂𑀦𑀸𑀲𑀦𑀁 𑀧𑀯𑀺𑀲𑀦𑀓𑁆𑀔𑀡𑁂 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀼𑀳𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀧𑀦 𑀅𑀓𑁆𑀔𑀻𑀦𑀁 𑀧𑀲𑀸𑀤𑁄 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑁄 𑀯𑀺𑀬 𑀳𑁄𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀏𑀢𑀲𑁆𑀫𑀺𑀜𑁆𑀘 𑀆𑀯𑀸𑀲𑁂 𑀯𑀲𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀯𑀸𑀲𑀁 𑀤𑁂𑀦𑁆𑀢𑁂𑀦 𑀦𑀸𑀫 𑀲𑀩𑁆𑀩𑀫𑁆𑀧𑀺 𑀧𑀘𑁆𑀘𑀬𑀚𑀸𑀢𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀻’’𑀢𑀺, 𑀢𑀲𑁆𑀫𑀸 𑀏𑀢𑁂 𑀬𑀣𑀸𑀯𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀆𑀦𑀺𑀲𑀁𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀫𑀢𑁆𑀢𑀢𑀸𑀬 𑀘𑁂𑀢𑁂 𑀯𑀼𑀢𑁆𑀢𑀸’’𑀢𑀺.

𑀲𑀻𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀁 𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀩𑀳𑀺𑀤𑁆𑀥𑀸 𑀉𑀢𑀼𑀯𑀺𑀧𑀭𑀺𑀡𑀸𑀫𑀯𑀲𑁂𑀦 𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀻𑀢𑀁. 𑀉𑀡𑁆𑀳𑀦𑁆𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀁, 𑀢𑀲𑁆𑀲 𑀯𑀦𑀟𑀸𑀳𑀸𑀤𑀻𑀲𑀼 (𑀯𑀦𑀤𑀸𑀳𑀸𑀤𑀻𑀲𑀼 𑀯𑀸 𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁯𑁫) 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀳𑀦𑁆𑀢𑀻𑀢𑀺 𑀧𑀝𑀺𑀩𑀸𑀳𑀢𑀺, 𑀬𑀣𑀸 𑀢𑀤𑀼𑀪𑀬𑀯𑀲𑁂𑀦 𑀓𑀸𑀬𑀘𑀺𑀢𑁆𑀢𑀸𑀦𑀁 𑀩𑀸𑀥𑀦𑀁 𑀦 𑀳𑁄𑀢𑀺, 𑀏𑀯𑀁 𑀓𑀭𑁄𑀢𑀺. 𑀲𑀻𑀢𑀼𑀡𑁆𑀳𑀩𑁆𑀪𑀸𑀳𑀢𑁂 𑀳𑀺 𑀲𑀭𑀻𑀭𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄 𑀧𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀸𑀴𑀫𑀺𑀕𑀸𑀦𑀻𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀘𑀡𑁆𑀟𑀫𑀺𑀕𑁂. 𑀕𑀼𑀢𑁆𑀢𑀲𑁂𑀦𑀸𑀲𑀦𑀜𑁆𑀳𑀺 𑀆𑀭𑀜𑁆𑀜𑀓𑀫𑁆𑀧𑀺 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀻𑀢𑀺. 𑀲𑀭𑀻𑀲𑀧𑁂𑀢𑀺 𑀬𑁂 𑀓𑁂𑀘𑀺 𑀲𑀭𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀤𑀻𑀖𑀚𑀸𑀢𑀺𑀓𑁂 𑀲𑀧𑁆𑀧𑀸𑀤𑀺𑀓𑁂. 𑀫𑀓𑀲𑁂𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀟𑀁𑀲𑀸𑀤𑀻𑀦𑀫𑁆𑀧𑀺 𑀏𑀢𑁂𑀲𑁆𑀯𑁂𑀯 (𑀏𑀢𑀦𑁂𑀯 𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁯𑁫) 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀺𑀲𑀺𑀭𑁂𑀢𑀺 𑀲𑀺𑀲𑀺𑀭𑀓𑀸𑀮𑀯𑀲𑁂𑀦, 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀤𑀺𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑁂 𑀲𑀺𑀲𑀺𑀭𑀲𑀫𑁆𑀨𑀲𑁆𑀲𑁂. 𑀯𑀼𑀝𑁆𑀞𑀺𑀬𑁄𑀢𑀺 𑀬𑀤𑀸 𑀢𑀤𑀸 𑀉𑀧𑁆𑀧𑀦𑁆𑀦𑀸 𑀯𑀲𑁆𑀲𑀯𑀼𑀝𑁆𑀞𑀺𑀬𑁄 𑀧𑀝𑀺𑀳𑀦𑀢𑀻𑀢𑀺 𑀬𑁄𑀚𑀦𑀸.

𑀯𑀸𑀢𑀸𑀢𑀧𑁄 𑀖𑁄𑀭𑁄𑀢𑀺 𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀦𑀁 𑀉𑀫𑁆𑀫𑀽𑀮𑀪𑀜𑁆𑀚𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀖𑁄𑀭𑁄 𑀲𑀭𑀚𑀅𑀭𑀚𑀸𑀤𑀺𑀪𑁂𑀤𑁄 𑀯𑀸𑀢𑁄 𑀘𑁂𑀯 𑀕𑀺𑀫𑁆𑀳𑀧𑀭𑀺𑀴𑀸𑀳𑀲𑀫𑀬𑁂𑀲𑀼 𑀉𑀧𑁆𑀧𑀢𑁆𑀢𑀺𑀬𑀸 𑀖𑁄𑀭𑁄 𑀲𑀽𑀭𑀺𑀬𑀸𑀢𑀧𑁄 𑀘. 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀩𑀸𑀳𑀻𑀬𑀢𑀺. 𑀮𑁂𑀡𑀢𑁆𑀣𑀦𑁆𑀢𑀺 𑀦𑀸𑀦𑀸𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀁. 𑀲𑀼𑀔𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀧𑀭𑀺𑀲𑁆𑀲𑀬𑀸𑀪𑀸𑀯𑁂𑀦 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀁. 𑀛𑀸𑀬𑀺𑀢𑀼𑀦𑁆𑀢𑀺 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀉𑀧𑀦𑀺𑀚𑁆𑀛𑀸𑀬𑀺𑀢𑀼𑀁. 𑀯𑀺𑀧𑀲𑁆𑀲𑀺𑀢𑀼𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑀼𑀁.

𑀯𑀺𑀳𑀸𑀭𑁂𑀢𑀺 𑀧𑀢𑀺𑀲𑁆𑀲𑀬𑁂. 𑀓𑀸𑀭𑀬𑁂𑀢𑀺 𑀓𑀸𑀭𑀸𑀧𑁂𑀬𑁆𑀬. 𑀭𑀫𑁆𑀫𑁂𑀢𑀺 𑀫𑀦𑁄𑀭𑀫𑁂 𑀦𑀺𑀯𑀸𑀲𑀲𑀼𑀔𑁂. 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂𑀢𑀺 𑀓𑀸𑀭𑁂𑀢𑁆𑀯𑀸 𑀧𑀦 𑀏𑀢𑁆𑀣 𑀯𑀺𑀳𑀸𑀭𑁂𑀲𑀼 𑀩𑀳𑀼𑀲𑁆𑀲𑀼𑀢𑁂 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀦𑀺𑀯𑀸𑀲𑁂𑀬𑁆𑀬, 𑀢𑁂 𑀦𑀺𑀯𑀸𑀲𑁂𑀦𑁆𑀢𑁄 𑀧𑀦 𑀢𑁂𑀲𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀣𑀸 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀣𑁄 𑀦 𑀳𑁄𑀢𑀺, 𑀏𑀯𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘 𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁂𑀲𑀼 𑀓𑀫𑁆𑀫𑀓𑀫𑁆𑀫𑀨𑀮𑀸𑀦𑀁, 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀜𑁆𑀘 𑀲𑀤𑁆𑀤𑀳𑀦𑁂𑀦 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑀇𑀤𑀸𑀦𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀽𑀧𑀓𑀸𑀭𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀢𑁂𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀢𑀲𑁆𑀲𑀸𑀢𑀺 𑀉𑀧𑀸𑀲𑀓𑀲𑁆𑀲. 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀧𑀦𑀽𑀤𑀦𑀁 𑀲𑀤𑁆𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬𑀸𑀢𑀺 𑀲𑁄 𑀉𑀧𑀸𑀲𑀓𑁄 𑀬𑀁 𑀲𑀤𑁆𑀥𑀫𑁆𑀫𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁂𑀦 𑀚𑀸𑀦𑀺𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺 𑀏𑀓𑀸𑀤𑀲𑀕𑁆𑀕𑀺𑀯𑀽𑀧𑀲𑀫𑁂𑀦 𑀲𑀻𑀢𑀺 𑀪𑀯𑀢𑀺.

𑀲𑀻𑀢𑀧𑀝𑀺𑀖𑀸𑀢𑀸𑀤𑀬𑁄 𑀯𑀺𑀧𑀲𑁆𑀲𑀦𑀸𑀯𑀲𑀸𑀦𑀸 𑀢𑁂𑀭𑀲, 𑀅𑀦𑁆𑀦𑀸𑀤𑀺𑀮𑀸𑀪𑁄, 𑀥𑀫𑁆𑀫𑀲𑁆𑀲𑀯𑀦𑀁, 𑀥𑀫𑁆𑀫𑀸𑀯𑀩𑁄𑀥𑁄, 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀯𑀁 𑀲𑀢𑁆𑀢𑀭𑀲.

𑁩𑁫𑁧. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀢𑀺 𑀅𑀢𑁆𑀢𑀦𑀺𑀬𑀸. 𑀤𑀼𑀧𑁆𑀧𑀭𑀺𑀘𑁆𑀘𑀚𑀦𑀁 𑀮𑁄𑀪𑀁 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲. 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀬𑀣𑀸𑀕𑀳𑀺𑀢𑁂 𑀲𑀭𑀡𑁂. 𑀦𑀢𑁆𑀣𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑁆𑀢𑀩𑁆𑀩𑀢𑀸 𑀯𑀺𑀜𑁆𑀜𑀽𑀚𑀸𑀢𑀺𑀓𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀫𑀬𑀁 𑀧𑀼𑀜𑁆𑀜’’𑀦𑁆𑀢𑀺 ‘‘𑀲𑀘𑁂 𑀢𑁆𑀯𑀁 𑀦 𑀬𑀣𑀸𑀕𑀳𑀺𑀢𑀁 𑀲𑀭𑀡𑀁 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀏𑀯𑀸𑀳𑀁 𑀢𑀁 𑀫𑀸𑀭𑁂𑀫𑀻’’𑀢𑀺 𑀬𑀤𑀺𑀧𑀺 𑀓𑁄𑀘𑀺 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀢𑀣𑀸𑀧𑀺 ‘‘𑀦𑁂𑀯𑀸𑀳𑀁 𑀩𑀼𑀤𑁆𑀥𑀁 𑀦 𑀩𑀼𑀤𑁆𑀥𑁄𑀢𑀺, 𑀥𑀫𑁆𑀫𑀁 𑀦 𑀥𑀫𑁆𑀫𑁄𑀢𑀺, 𑀲𑀗𑁆𑀖𑀁 𑀦 𑀲𑀗𑁆𑀖𑁄𑀢𑀺 𑀯𑀤𑀸𑀫𑀻’’𑀢𑀺 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀕𑀳𑀺𑀢𑀲𑀭𑀡𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁.

𑁩𑁫𑁨. 𑀲𑀭𑀡𑀁 𑀉𑀧𑀕𑀢𑁂𑀦 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀓𑁆𑀓𑀘𑁆𑀘𑀁 𑀯𑀢𑁆𑀣𑀼𑀢𑁆𑀢𑀬𑀧𑀽𑀚𑀸 𑀓𑀸𑀢𑀩𑁆𑀩𑀸, 𑀢𑀢𑁆𑀣 𑀘 𑀲𑀁𑀓𑀺𑀮𑁂𑀲𑁄 𑀧𑀭𑀺𑀳𑀦𑀺𑀢𑀩𑁆𑀩𑁄, 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀦 𑀲𑀫𑀸𑀤𑀸𑀦𑀫𑀢𑁆𑀢𑀁, 𑀲𑀫𑁆𑀧𑀢𑁆𑀢𑀯𑀢𑁆𑀣𑀼𑀢𑁄 𑀯𑀺𑀭𑀫𑀡𑀫𑀢𑁆𑀢𑀜𑁆𑀘𑀸𑀢𑀺 𑀲𑀭𑀡𑀕𑀫𑀦𑀢𑁄 𑀲𑀻𑀮𑀲𑁆𑀲 𑀅𑀧𑁆𑀧𑀝𑁆𑀞𑀢𑀭𑀢𑀸, 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀤𑀸𑀦𑀸𑀤𑀺𑀦𑀸 𑀤𑀡𑁆𑀟𑀦𑀺𑀥𑀸𑀦𑀢𑁄, 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀥𑀺𑀝𑁆𑀞𑀸𑀦𑀢𑁄 𑀘𑀲𑁆𑀲 𑀫𑀳𑀧𑁆𑀨𑀮𑀫𑀳𑀸𑀦𑀺𑀲𑀁𑀲𑀢𑀭𑀢𑀸 𑀤𑀝𑁆𑀞𑀩𑁆𑀩𑀸.

𑀯𑀓𑁆𑀔𑀫𑀸𑀦𑀦𑀬𑁂𑀦 𑀘 𑀯𑁂𑀭𑀳𑁂𑀢𑀼𑀢𑀸𑀬 𑀯𑁂𑀭𑀁 𑀯𑀼𑀘𑁆𑀘𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀥𑀫𑁆𑀫𑁄, 𑀢𑀁 𑀫𑀡𑀢𑀺 ‘‘𑀫𑀬𑀺 𑀇𑀥 𑀞𑀺𑀢𑀸𑀬 𑀓𑀣𑀁 𑀆𑀕𑀘𑁆𑀙𑀲𑀻’’𑀢𑀺 𑀢𑀚𑁆𑀚𑁂𑀦𑁆𑀢𑀻 𑀯𑀺𑀬 𑀦𑀻𑀳𑀭𑀢𑀻𑀢𑀺 𑀯𑁂𑀭𑀫𑀡𑀻, 𑀢𑀢𑁄 𑀯𑀸 𑀧𑀸𑀧𑀥𑀫𑁆𑀫𑀢𑁄 𑀯𑀺𑀭𑀫𑀢𑀺 𑀏𑀢𑀸𑀬𑀸𑀢𑀺 ‘‘𑀯𑀺𑀭𑀫𑀡𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀇𑀓𑀸𑀭𑀲𑁆𑀲 𑀏𑀓𑀸𑀭𑀁 𑀓𑀢𑁆𑀯𑀸 ‘‘𑀯𑁂𑀭𑀫𑀡𑀻’’𑀢𑀺 𑀯𑀼𑀢𑁆𑀢𑀸. 𑀅𑀲𑀫𑀸𑀤𑀺𑀦𑁆𑀦𑀲𑀻𑀮𑀲𑁆𑀲 𑀲𑀫𑁆𑀧𑀢𑁆𑀢𑀢𑁄 𑀬𑀣𑀸𑀉𑀧𑀝𑁆𑀞𑀺𑀢𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀢𑁄 𑀯𑀺𑀭𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀺. 𑀲𑀫𑀸𑀤𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺. 𑀲𑁂𑀢𑀼 𑀯𑀼𑀘𑁆𑀘𑀢𑀺 𑀅𑀭𑀺𑀬𑀫𑀕𑁆𑀕𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀧𑀸𑀧𑀥𑀫𑁆𑀫𑀸𑀦𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀖𑀸𑀢𑀦𑀯𑀺𑀭𑀢𑀺 𑀲𑁂𑀢𑀼𑀖𑀸𑀢𑀯𑀺𑀭𑀢𑀺. 𑀇𑀤𑀸𑀦𑀺 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀳𑀭𑀢𑀻𑀢𑀺 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀭𑀺𑀯𑀚𑁆𑀚𑁂𑀢𑀺. 𑀦 𑀳𑀦𑀸𑀫𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 ‘‘𑀅𑀤𑀺𑀦𑁆𑀦𑀁 𑀦𑀸𑀤𑀺𑀬𑀸𑀫𑀻’’𑀢𑀺 𑀏𑀯𑀁 𑀆𑀤𑀻𑀦𑀁 𑀲𑀗𑁆𑀕𑀳𑁄, 𑀯𑀸-𑀲𑀤𑁆𑀤𑁂𑀦 𑀯𑀸, 𑀢𑁂𑀦𑀸𑀳 ‘‘𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀡𑁆𑀳𑀦𑁆𑀢𑀲𑁆𑀲𑀸’’𑀢𑀺.

𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀤𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸. 𑀇𑀤𑀸𑀦𑀺 𑀢𑀸𑀲𑀁 𑀯𑀺𑀭𑀢𑀻𑀦𑀁 𑀆𑀭𑀫𑁆𑀫𑀡𑀢𑁄 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀸 𑀤𑁆𑀯𑁂𑀢𑀺 𑀲𑀫𑁆𑀧𑀢𑁆𑀢𑀲𑀫𑀸𑀤𑀸𑀦𑀯𑀺𑀭𑀢𑀺𑀬𑁄. 𑀧𑀘𑁆𑀙𑀺𑀫𑀸𑀢𑀺 𑀲𑁂𑀢𑀼𑀖𑀸𑀢𑀯𑀺𑀭𑀢𑀺. 𑀲𑀩𑁆𑀩𑀸𑀦𑀺𑀧𑀺 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺 𑀏𑀓𑀚𑁆𑀛𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸. 𑀢𑀤𑁂𑀯 𑀪𑀺𑀚𑁆𑀚𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸. 𑀕𑀳𑀝𑁆𑀞𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀪𑁂𑀤𑁄 𑀦𑀸𑀫 𑀦𑀢𑁆𑀣𑀺 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀅𑀓𑀼𑀧𑁆𑀧𑀲𑀪𑀸𑀯𑀢𑁆𑀢𑀸, 𑀢𑁂𑀦𑀸𑀳 ‘‘𑀪𑀯𑀦𑁆𑀢𑀭𑁂𑀧𑀻’’𑀢𑀺. 𑀬𑁄𑀦𑀺𑀲𑀺𑀤𑁆𑀥𑀦𑁆𑀢𑀺 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀦𑀁 𑀉𑀤𑁆𑀥𑀁 𑀢𑀺𑀭𑀺𑀬𑀫𑁂𑀯 𑀤𑀻𑀖𑀢𑀸 𑀯𑀺𑀬 𑀚𑀸𑀢𑀺𑀲𑀺𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀩𑁄𑀥𑀺𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀲𑀻𑀮𑀁 𑀯𑀺𑀬 𑀥𑀫𑁆𑀫𑀢𑀸𑀬 𑀲𑀪𑀸𑀯𑁂𑀦𑁂𑀯 𑀲𑀺𑀤𑁆𑀥𑀁 𑀥𑀫𑁆𑀫𑀢𑀸𑀲𑀺𑀤𑁆𑀥𑀁, 𑀫𑀕𑁆𑀕𑀥𑀫𑁆𑀫𑀢𑀸𑀬 𑀯𑀸 𑀅𑀭𑀺𑀬𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀲𑀺𑀤𑁆𑀥𑀁 𑀥𑀫𑁆𑀫𑀢𑀸𑀲𑀺𑀤𑁆𑀥𑀁. 𑀤𑀺𑀝𑁆𑀞𑀺𑀉𑀚𑀼𑀓𑀭𑀡𑀁 𑀦𑀸𑀫 𑀪𑀸𑀭𑀺𑀬𑀁 𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀲𑀭𑀡𑀕𑀫𑀦𑀁 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑀢𑁄 𑀫𑀳𑀝𑁆𑀞𑀢𑀭𑀫𑁂𑀯, 𑀦 𑀅𑀧𑁆𑀧𑀝𑁆𑀞𑀢𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀢𑀣𑀸 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀻𑀢𑀺 𑀆𑀤𑀭𑀕𑀸𑀭𑀯𑀁 𑀅𑀓𑀢𑁆𑀯𑀸 𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀸𑀧𑀺. 𑀲𑀸𑀥𑀼𑀓𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀻𑀢𑀺 𑀲𑀓𑁆𑀓𑀘𑁆𑀘𑀁 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀸𑀧𑀺, 𑀦 𑀤𑀺𑀕𑀼𑀡𑀁, 𑀢𑀺𑀕𑀼𑀡𑀁 𑀯𑀸 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄.

𑀅𑀪𑀬𑀤𑀸𑀦𑀢𑀸𑀬 𑀲𑀻𑀮𑀲𑁆𑀲 𑀤𑀸𑀦𑀪𑀸𑀯𑁄, 𑀅𑀦𑀯𑀲𑁂𑀲𑀁 𑀯𑀸 𑀲𑀢𑁆𑀢𑀦𑀺𑀓𑀸𑀬𑀁 𑀤𑀬𑀢𑀺 𑀢𑁂𑀦 𑀭𑀓𑁆𑀔𑀢𑀻𑀢𑀺 𑀤𑀸𑀦𑀁, 𑀲𑀻𑀮𑀁. ‘‘𑀅𑀕𑁆𑀕𑀸𑀦𑀻’’𑀢𑀺 𑀜𑀸𑀢𑀢𑁆𑀢𑀸 𑀅𑀕𑁆𑀕𑀜𑁆𑀜𑀸𑀦𑀺. 𑀘𑀺𑀭𑀭𑀢𑁆𑀢𑀢𑀸𑀬 𑀜𑀸𑀢𑀢𑁆𑀢𑀸 𑀭𑀢𑁆𑀢𑀜𑁆𑀜𑀸𑀦𑀺. ‘‘𑀅𑀭𑀺𑀬𑀸𑀦𑀁 𑀲𑀸𑀥𑀽𑀦𑀁 𑀯𑀁𑀲𑀸𑀦𑀻’’𑀢𑀺 𑀜𑀸𑀢𑀢𑁆𑀢𑀸 𑀯𑀁𑀲𑀜𑁆𑀜𑀸𑀦𑀺.‘‘𑀧𑁄𑀭𑀸𑀡𑀸𑀦𑀻’’𑀢𑀺𑀆𑀤𑀻𑀲𑀼 𑀧𑀼𑀭𑀺𑀫𑀸𑀦𑀁 𑀏𑀢𑀸𑀦𑀺 𑀧𑁄𑀭𑀸𑀡𑀸𑀦𑀺. 𑀲𑀩𑁆𑀩𑀲𑁄 𑀓𑁂𑀦𑀘𑀺𑀧𑀺 𑀧𑀓𑀸𑀭𑁂𑀦 𑀲𑀸𑀥𑀽𑀳𑀺 𑀦 𑀓𑀺𑀡𑁆𑀡𑀸𑀦𑀺 𑀦 𑀔𑀺𑀢𑁆𑀢𑀸𑀦𑀺 𑀦 𑀙𑀟𑁆𑀟𑀺𑀢𑀸𑀦𑀻𑀢𑀺 𑀅𑀲𑀗𑁆𑀓𑀺𑀡𑁆𑀡𑀸𑀦𑀺. 𑀅𑀬𑀜𑁆𑀘 𑀦𑀬𑁄 𑀦𑁂𑀲𑀁 𑀬𑀣𑀸 𑀅𑀢𑀻𑀢𑁂, 𑀏𑀯𑀁 𑀏𑀢𑀭𑀳𑀺, 𑀅𑀦𑀸𑀕𑀢𑁂 𑀘𑀸𑀢𑀺 𑀆𑀳 ‘‘𑀅𑀲𑀗𑁆𑀓𑀺𑀡𑁆𑀡𑀧𑀼𑀩𑁆𑀩𑀸𑀦𑀺 𑀦 𑀲𑀗𑁆𑀓𑀺𑀬𑀦𑁆𑀢𑀺 𑀦 𑀲𑀗𑁆𑀓𑀺𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀢𑁄 𑀏𑀯 𑀅𑀧𑁆𑀧𑀧𑀺𑀓𑀼𑀝𑁆𑀞𑀸𑀦𑀺 𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺. 𑀦 𑀳𑀺 𑀓𑀤𑀸𑀘𑀺𑀧𑀺 𑀯𑀺𑀜𑁆𑀜𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀳𑀺𑀁𑀲𑀸𑀤𑀺𑀧𑀸𑀧𑀥𑀫𑁆𑀫𑀁 𑀅𑀦𑀼𑀚𑀸𑀦𑀦𑁆𑀢𑀺. 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑁂𑀢𑀻𑀢𑀺 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀳𑀺𑀢𑀤𑀡𑁆𑀟𑀢𑁆𑀢𑀸 𑀲𑀓𑀮𑀲𑁆𑀲𑀧𑀺 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀪𑀬𑀸𑀪𑀸𑀯𑀁 𑀤𑁂𑀢𑀺. 𑀦 𑀳𑀺 𑀅𑀭𑀺𑀬𑀲𑀸𑀯𑀓𑀢𑁄 𑀓𑀲𑁆𑀲𑀘𑀺 𑀪𑀬𑀁 𑀳𑁄𑀢𑀺. 𑀅𑀯𑁂𑀭𑀦𑁆𑀢𑀺 𑀯𑁂𑀭𑀸𑀪𑀸𑀯𑀁. 𑀅𑀩𑁆𑀬𑀸𑀧𑀚𑁆𑀛𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀢𑀁.

𑀦𑀦𑀼 𑀘 𑀧𑀜𑁆𑀘𑀲𑀻𑀮𑀁 𑀲𑀩𑁆𑀩𑀓𑀸𑀮𑀺𑀓𑀁, 𑀦 𑀘 𑀏𑀓𑀦𑁆𑀢𑀢𑁄 𑀯𑀺𑀫𑀼𑀢𑁆𑀢𑀸𑀬𑀢𑀦𑀁, 𑀲𑀭𑀡𑀕𑀫𑀦𑀁 𑀧𑀦 𑀩𑀼𑀤𑁆𑀥𑀼𑀧𑁆𑀧𑀸𑀤𑀳𑁂𑀢𑀼𑀓𑀁, 𑀏𑀓𑀦𑁆𑀢𑀯𑀺𑀫𑀼𑀢𑁆𑀢𑀸𑀬𑀢𑀦𑀜𑁆𑀘, 𑀢𑀢𑁆𑀣 𑀓𑀣𑀁 𑀲𑀭𑀡𑀸𑀕𑀫𑀦𑀢𑁄 𑀧𑀜𑁆𑀘𑀲𑀻𑀮𑀲𑁆𑀲 𑀫𑀳𑀧𑁆𑀨𑀮𑀢𑀸𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀚𑁂𑀝𑁆𑀞𑀓𑀦𑁆𑀢𑀺 𑀉𑀢𑁆𑀢𑀫𑀁. ‘‘𑀲𑀭𑀡𑀕𑀫𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀬𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀻𑀮𑀲𑁆𑀲 𑀲𑀭𑀡𑀕𑀫𑀦𑁂𑀦 𑀅𑀪𑀺𑀲𑀗𑁆𑀔𑀢𑀢𑀫𑀸𑀳.

𑁩𑁫𑁩. 𑀈𑀤𑀺𑀲𑀫𑁂𑀯𑀸𑀢𑀺 𑀏𑀯𑀁 𑀲𑀁𑀓𑀺𑀮𑁂𑀲𑀁 𑀧𑀝𑀺𑀧𑀓𑁆𑀔𑀫𑁂𑀯 𑀳𑀼𑀢𑁆𑀯𑀸. 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀕𑀼𑀡𑁂𑀳𑀻𑀢𑀺 𑀏𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀕𑀼𑀡𑀸 𑀦𑀸𑀫 𑀲𑀭𑀡𑀕𑀫𑀦𑀁, 𑀲𑀻𑀮𑀲𑀫𑁆𑀧𑀤𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀢𑀺 𑀏𑀯𑀁 𑀆𑀤𑀬𑁄. 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀦 𑀓𑀺𑀮𑀫𑀢𑀻𑀢𑀺 𑀬𑁄𑀚𑀦𑀸. 𑀢𑀸𑀦𑀻𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺. ‘‘𑀧𑀞𑀫𑀚𑁆𑀛𑀸𑀦’’𑀦𑁆𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀅𑀬𑀦𑁆𑀢𑀺 𑀆𑀳 ‘‘𑀏𑀓𑀁 𑀓𑀧𑁆𑀧’’𑀦𑁆𑀢𑀺, 𑀏𑀓𑀁 𑀫𑀳𑀸𑀓𑀧𑁆𑀧𑀦𑁆𑀢𑀺 𑀅𑀢𑁆𑀣𑁄. 𑀳𑀻𑀦𑀁 𑀧𑀦 𑀧𑀞𑀫𑀚𑁆𑀛𑀸𑀦𑀁, 𑀫𑀚𑁆𑀛𑀺𑀫𑀜𑁆𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑁆𑀲 𑀢𑀢𑀺𑀬𑀁 𑀪𑀸𑀕𑀁, 𑀉𑀧𑀟𑁆𑀠𑀓𑀧𑁆𑀧𑀜𑁆𑀘 𑀆𑀬𑀼𑀁 𑀤𑁂𑀢𑀺. ‘‘𑀤𑀼𑀢𑀺𑀬𑀁 𑀅𑀝𑁆𑀞𑀓𑀧𑁆𑀧𑁂’’𑀢𑀺 𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀫𑀳𑀸𑀓𑀧𑁆𑀧𑀯𑀲𑁂𑀦𑁂𑀯 𑀘 𑀕𑀳𑁂𑀢𑀩𑁆𑀩𑀁. 𑀬𑀲𑁆𑀫𑀸 𑀯𑀸 𑀧𑀡𑀻𑀢𑀸𑀦𑀺𑀬𑁂𑀯𑁂𑀢𑁆𑀣 𑀛𑀸𑀦𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺 𑀫𑀳𑀧𑁆𑀨𑀮𑀢𑀭𑀪𑀸𑀯𑀤𑀲𑁆𑀲𑀦𑀧𑀭𑀢𑁆𑀢𑀸 𑀤𑁂𑀲𑀦𑀸𑀬, 𑀢𑀲𑁆𑀫𑀸 ‘‘𑀧𑀞𑀫𑀚𑁆𑀛𑀸𑀦𑀁 𑀏𑀓𑀁 𑀓𑀧𑁆𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀤𑁂𑀯𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯. 𑀬𑀤𑀺 𑀏𑀯𑀁 𑀓𑀣𑀁 𑀆𑀭𑀼𑀧𑁆𑀧𑀢𑀸𑀢𑀺 𑀆𑀳 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻’’𑀢𑀺𑀆𑀤𑀺.

𑀲𑀫𑁆𑀫𑀤𑁂𑀯 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀼𑀩𑁆𑀩𑀪𑀸𑀕𑀺𑀬𑁂 𑀏𑀯 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀲𑀫𑁆𑀫𑀸𑀦𑁂𑀦𑁆𑀢𑀻 𑀯𑀺𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀓𑀲𑁆𑀲 𑀅𑀦𑀧𑁆𑀧𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀲𑀫𑀸𑀯𑀳𑀢𑀻𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸…𑀧𑁂… 𑀅𑀪𑀸𑀯𑀸’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪);

𑀬𑀲𑁆𑀫𑀸 𑀅𑀬𑀁 𑀤𑁂𑀲𑀦𑀸 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲 𑀯𑀲𑁂𑀦 𑀧𑀯𑀢𑁆𑀢𑀺𑀢𑀸, 𑀢𑀲𑁆𑀫𑀸 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀧𑀢𑀺𑀝𑁆𑀞𑀸𑀬 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄’’𑀢𑀺 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀢𑀺𑀝𑁆𑀞𑀸𑀪𑀽𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀫𑀸𑀦𑀭𑀽𑀧𑀦𑀺𑀫𑁆𑀫𑀸𑀦𑀁 𑀦𑀸𑀫 𑀫𑀦𑁄𑀫𑀬𑀺𑀤𑁆𑀥𑀺𑀬𑀸 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀦𑁄…𑀧𑁂… 𑀫𑀳𑀧𑁆𑀨𑀮𑀸’’𑀢𑀺. 𑀯𑀺𑀓𑀼𑀩𑁆𑀩𑀦𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀬𑀸𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀯𑀺𑀯𑀺𑀥𑀭𑀽𑀧𑀓𑀭𑀡𑀁 𑀯𑀺𑀓𑀼𑀩𑁆𑀩𑀦𑀁, 𑀢𑀲𑁆𑀲 𑀤𑀲𑁆𑀲𑀦𑀲𑀫𑀢𑁆𑀣𑀪𑀸𑀯𑁂𑀦. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀦𑀸𑀫 𑀧𑀼𑀭𑀺𑀫𑀚𑀸𑀢𑀻𑀲𑀼 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑁄 𑀔𑀦𑁆𑀥𑀧𑁆𑀧𑀤𑁂𑀲𑁄. 𑀲𑀫𑀸𑀧𑁂𑀦𑁆𑀢𑁄𑀢𑀺 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑁄.

𑀓𑀽𑀝𑀤𑀦𑁆𑀢𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁩𑁫𑁪-𑁮. 𑀲𑀩𑁆𑀩𑁂 𑀢𑁂 𑀧𑀸𑀡𑀬𑁄𑀢𑀺 ‘‘𑀲𑀢𑁆𑀢 𑀘 𑀉𑀲𑀪𑀲𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀲𑀩𑁆𑀩𑁂 𑀧𑀸𑀡𑀺𑀦𑁄. 𑀆𑀓𑀼𑀮𑀪𑀸𑀯𑁄𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲 𑀲𑀼𑀢𑀢𑁆𑀢𑀸 𑀧𑀸𑀡𑀻𑀲𑀼 𑀅𑀦𑀼𑀤𑁆𑀤𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀞𑀺𑀢𑀲𑁆𑀲 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀬𑀸 𑀢𑀸𑀯 𑀩𑀳𑀽 𑀧𑀸𑀡𑀺𑀦𑁄 𑀫𑀸𑀭𑀡𑀢𑁆𑀣𑀸𑀬 𑀩𑀦𑁆𑀥𑀸𑀧𑀺𑀢𑀸’’𑀢𑀺 𑀘𑀺𑀢𑁆𑀢𑁂 𑀧𑀭𑀺𑀩𑁆𑀬𑀸𑀓𑀼𑀮𑀪𑀸𑀯𑁄 𑀉𑀤𑀧𑀸𑀤𑀺. 𑀲𑀼𑀢𑁆𑀯𑀸𑀢𑀺 ‘‘𑀩𑀦𑁆𑀥𑀦𑀢𑁄 𑀫𑁄𑀘𑀺𑀢𑀸’’𑀢𑀺 𑀲𑀼𑀢𑁆𑀯𑀸. 𑀓𑀸𑀫𑀘𑁆𑀙𑀦𑁆𑀤𑀯𑀺𑀕𑀫𑁂𑀦 𑀓𑀮𑁆𑀮𑀘𑀺𑀢𑁆𑀢𑀢𑀸 𑀅𑀭𑁄𑀕𑀘𑀺𑀢𑁆𑀢𑀢𑀸, 𑀩𑁆𑀬𑀸𑀧𑀸𑀤𑀯𑀺𑀕𑀫𑁂𑀦 𑀫𑁂𑀢𑁆𑀢𑀸𑀯𑀲𑁂𑀦 𑀫𑀼𑀤𑀼𑀘𑀺𑀢𑁆𑀢𑀢𑀸 𑀅𑀓𑀣𑀺𑀦𑀘𑀺𑀢𑁆𑀢𑀢𑀸, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀳𑀸𑀦𑁂𑀦 𑀯𑀺𑀓𑁆𑀔𑁂𑀧𑀯𑀺𑀕𑀫𑀦𑀢𑁄 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀢𑀸 𑀢𑁂𑀳𑀺 𑀦 𑀧𑀺𑀳𑀺𑀢𑀘𑀺𑀢𑁆𑀢𑀢𑀸, 𑀣𑀺𑀦𑀫𑀺𑀤𑁆𑀥𑀯𑀺𑀕𑀫𑁂𑀦 𑀉𑀤𑀕𑁆𑀕𑀘𑀺𑀢𑁆𑀢𑀢𑀸 𑀲𑀁𑀧𑀕𑁆𑀕𑀡𑁆𑀳𑀦𑀯𑀲𑁂𑀦 𑀅𑀮𑀻𑀦𑀘𑀺𑀢𑁆𑀢𑀢𑀸, 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀕𑀫𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀫𑀼𑀢𑁆𑀢𑀢𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑀢𑀸 𑀘 𑀳𑁄𑀢𑀻𑀢𑀺 𑀆𑀳 ‘‘𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺𑀆𑀤𑀺 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀦𑀼𑀪𑀸𑀯𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.