𑁪. 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁦. 𑀲𑀼𑀦𑁆𑀤𑀭𑀪𑀸𑀯𑁂𑀦 𑀲𑀸𑀢𑀺𑀲𑀬𑀸𑀦𑀺 𑀅𑀗𑁆𑀕𑀸𑀦𑀺 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀗𑁆𑀕𑀸, 𑀭𑀸𑀚𑀓𑀼𑀫𑀸𑀭𑀸𑀢𑀺 𑀆𑀳 ‘‘𑀅𑀗𑁆𑀕𑀸 𑀦𑀸𑀫 𑀅𑀗𑁆𑀕𑀧𑀸𑀲𑀸𑀤𑀺𑀓𑀢𑀸𑀬𑀸’’𑀢𑀺𑀆𑀤𑀺. 𑀇𑀥𑀸𑀧𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 𑀏𑀯. 𑀆𑀕𑀦𑁆𑀢𑀼𑀁 𑀦 𑀤𑀲𑁆𑀲𑀦𑁆𑀢𑀻𑀢𑀺 𑀆𑀕𑀫𑀦𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀦𑀯𑀲𑁂𑀦 𑀆𑀕𑀦𑁆𑀢𑀼𑀁 𑀦 𑀤𑀲𑁆𑀲𑀦𑁆𑀢𑀺, 𑀦𑀸𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀻𑀮𑀸𑀲𑁄𑀓𑀓𑀡𑀺𑀓𑀸𑀭𑀓𑁄𑀯𑀺𑀴𑀸𑀭𑀓𑀼𑀦𑁆𑀤𑀭𑀸𑀚𑀭𑀼𑀓𑁆𑀔𑁂𑀳𑀺 𑀲𑀫𑁆𑀫𑀺𑀲𑁆𑀲𑀢𑀸𑀬 𑀢𑀁 𑀘𑀫𑁆𑀧𑀓𑀯𑀦𑀁 ‘‘𑀦𑀻𑀮𑀸𑀤𑀺𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀧𑀝𑀺𑀫𑀡𑁆𑀟𑀺𑀢’’𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀘𑀫𑁆𑀧𑀓𑀭𑀼𑀓𑁆𑀔𑀸𑀦𑀁𑀬𑁂𑀯 𑀦𑀻𑀮𑀸𑀤𑀺𑀧𑀜𑁆𑀘𑀓𑀼𑀲𑀼𑀫𑀢𑀸𑀬𑀸𑀢𑀺 𑀯𑀤𑀦𑁆𑀢𑀺. ‘‘𑀪𑀕𑀯𑀸 𑀓𑀼𑀲𑀼𑀫𑀕𑀦𑁆𑀥𑀲𑀼𑀕𑀦𑁆𑀥𑁂 𑀘𑀫𑁆𑀧𑀓𑀯𑀦𑁂 𑀯𑀺𑀳𑀭𑀢𑀻’’𑀢𑀺 𑀇𑀫𑀺𑀦𑀸 𑀦 𑀫𑀸𑀧𑀦𑀓𑀸𑀮𑁂 𑀏𑀯 𑀢𑀲𑁆𑀫𑀺𑀁 𑀦𑀕𑀭𑁂 𑀘𑀫𑁆𑀧𑀓𑀭𑀼𑀓𑁆𑀔𑀸 𑀉𑀲𑁆𑀲𑀦𑁆𑀦𑀸, 𑀅𑀣 𑀔𑁄 𑀅𑀧𑀭𑀪𑀸𑀕𑁂 𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀸𑀧𑀦𑀓𑀸𑀮𑁂 𑀳𑀺 𑀘𑀫𑁆𑀧𑀓𑀸𑀦𑀁 𑀉𑀲𑁆𑀲𑀦𑁆𑀦𑀢𑀸𑀬 𑀲𑀸 𑀦𑀕𑀭𑀻 ‘‘𑀘𑀫𑁆𑀧𑀸’’𑀢𑀺 𑀦𑀸𑀫𑀁 𑀮𑀪𑀺. 𑀇𑀲𑁆𑀲𑀭𑀢𑁆𑀢𑀸𑀢𑀺 𑀅𑀥𑀺𑀧𑀢𑀺𑀪𑀸𑀯𑀢𑁄. 𑀲𑁂𑀦𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑁂𑀦𑀺𑀓𑁄, 𑀲𑁂𑀦𑀺𑀓𑁄 𑀏𑀯 𑀲𑁂𑀦𑀺𑀬𑁄, 𑀅𑀢𑁆𑀣𑀺𑀢𑀸 𑀘𑁂𑀢𑁆𑀣 𑀩𑀳𑀼𑀪𑀸𑀯𑀯𑀺𑀲𑀺𑀝𑁆𑀞𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀳𑀢𑀺𑀬𑀸 𑀲𑁂𑀦𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸’’𑀢𑀺.

𑁩𑁦𑁧-𑁨. 𑀲𑀁𑀳𑀢𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑀸, ‘‘𑀲𑀗𑁆𑀖𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀗𑁆𑀖𑀻’’𑀢𑀺 𑀧𑀼𑀣𑀼𑀢𑁆𑀣𑁂 𑀏𑀓𑀯𑀘𑀦𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀢𑁂𑀦𑀸𑀳 ‘‘𑀏𑀢𑁂𑀲’’𑀦𑁆𑀢𑀺. 𑀭𑀸𑀚𑀭𑀸𑀚𑀜𑁆𑀜𑀸𑀤𑀻𑀦𑀁 𑀪𑀡𑁆𑀟𑀥𑀭𑀸 𑀧𑀼𑀭𑀺𑀲𑀸 𑀔𑀢𑀸, 𑀦𑁂𑀲𑀁 𑀢𑀸𑀬𑀦𑀢𑁄 𑀔𑀢𑁆𑀢𑀸. 𑀲𑁄 𑀳𑀺 𑀬𑁂𑀳𑀺 𑀬𑀢𑁆𑀣 𑀧𑁂𑀲𑀺𑀢𑁄, 𑀢𑀢𑁆𑀣 𑀢𑁂𑀲𑀁 𑀤𑁄𑀲𑀁 𑀧𑀭𑀺𑀳𑀭𑀦𑁆𑀢𑁄 𑀬𑀼𑀢𑁆𑀢𑀧𑀢𑁆𑀢𑀯𑀲𑁂𑀦 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀓𑀣𑁂𑀢𑀺, 𑀢𑁂𑀦𑀸𑀳 ‘‘𑀧𑀼𑀘𑁆𑀙𑀺𑀢𑀧𑀜𑁆𑀳𑁂 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑁄’’𑀢𑀺. 𑀓𑀼𑀮𑀸𑀧𑀤𑁂𑀲𑀸𑀤𑀺𑀦𑀸 𑀫𑀳𑀢𑀻 𑀫𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 𑀫𑀳𑀸𑀫𑀢𑁆𑀢𑁄.

𑀲𑁄𑀡𑀤𑀡𑁆𑀟𑀕𑀼𑀡𑀓𑀣𑀸𑀯𑀡𑁆𑀡𑀦𑀸

𑁩𑁦𑁩. 𑀯𑀺𑀲𑀺𑀝𑁆𑀞𑀁 𑀭𑀚𑁆𑀚𑀁 𑀯𑀺𑀭𑀚𑁆𑀚𑀁, 𑀯𑀺𑀭𑀚𑁆𑀚𑀫𑁂𑀯 𑀯𑁂𑀭𑀚𑁆𑀚𑀁 𑀬𑀣𑀸 ‘‘𑀯𑁂𑀓𑀢𑀁 𑀯𑁂𑀲𑀬’’𑀦𑁆𑀢𑀺, 𑀦𑀸𑀦𑀸𑀯𑀺𑀥𑀁 𑀯𑁂𑀭𑀚𑁆𑀚𑀁 𑀦𑀸𑀦𑀸𑀯𑁂𑀭𑀚𑁆𑀚𑀁, 𑀢𑀢𑁆𑀣 𑀚𑀸𑀢𑀸𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀉𑀢𑁆𑀢𑀫𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀪𑀺𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀬𑀸 𑀉𑀕𑁆𑀕𑀢𑀢𑀭𑁄, 𑀉𑀴𑀸𑀭𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄. 𑀅𑀲𑀦𑁆𑀦𑀺𑀧𑀸𑀢𑁄𑀢𑀺 𑀮𑀸𑀪𑀫𑀘𑁆𑀙𑀭𑁂𑀦 𑀦𑀺𑀧𑁆𑀧𑀻𑀴𑀺𑀢𑀢𑀸𑀬 𑀅𑀲𑀦𑁆𑀦𑀺𑀧𑀸𑀢𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺.

‘‘𑀅𑀗𑁆𑀕𑁂𑀢𑀺 𑀕𑀫𑁂𑀢𑀺 𑀜𑀸𑀧𑁂𑀢𑀻𑀢𑀺 𑀅𑀗𑁆𑀕𑀁, 𑀳𑁂𑀢𑀽𑀢𑀺 𑀆𑀳 ‘‘𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦𑀸’’𑀢𑀺. ‘‘𑀉𑀪𑀢𑁄 𑀲𑀼𑀚𑀸𑀢𑁄’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀬𑁂𑀳𑀺 𑀓𑁂𑀳𑀺𑀘𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀲𑀼𑀚𑀸𑀢𑀢𑀸 𑀯𑀺𑀜𑁆𑀜𑀸𑀬𑁂𑀬𑁆𑀬. 𑀲𑀼𑀚𑀸𑀢-𑀲𑀤𑁆𑀤𑁄 𑀘 ‘‘𑀲𑀼𑀚𑀸𑀢𑁄 𑀘𑀸𑀭𑀼𑀤𑀲𑁆𑀲𑀦𑁄’’𑀢𑀺𑀆𑀤𑀻𑀲𑀼 (𑀣𑁂𑀭𑀕𑀸. 𑁮𑁧𑁮) 𑀆𑀭𑁄𑀳𑀲𑀫𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑁄𑀢𑀺 𑀚𑀸𑀢𑀺𑀯𑀲𑁂𑀦𑁂𑀯 𑀲𑀼𑀚𑀸𑀢𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑁄𑀭𑀲𑀧𑀼𑀢𑁆𑀢𑀯𑀲𑁂𑀦𑀸𑀧𑀺 𑀮𑁄𑀓𑁂 𑀫𑀸𑀢𑀼𑀧𑀺𑀢𑀼𑀲𑀫𑀜𑁆𑀜𑀸 𑀤𑀺𑀲𑁆𑀲𑀢𑀺, 𑀇𑀥 𑀧𑀦𑀲𑁆𑀲 𑀑𑀭𑀲𑀧𑀼𑀢𑁆𑀢𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺 𑀥𑀸𑀭𑁂𑀢𑀻𑀢𑀺 𑀕𑀳𑀡𑀻, 𑀕𑀩𑁆𑀪𑀸𑀲𑀬𑀲𑀜𑁆𑀜𑀺𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀧𑁆𑀧𑀤𑁂𑀲𑁄. 𑀬𑀣𑀸𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀺𑀧𑀸𑀘𑀦𑀯𑀲𑁂𑀦 𑀕𑀡𑁆𑀳𑀦𑀢𑁄 𑀅𑀙𑀟𑁆𑀟𑀦𑀢𑁄 𑀕𑀳𑀡𑀻, 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼.

𑀧𑀺𑀢𑀸 𑀘 𑀫𑀸𑀢𑀸 𑀘 𑀧𑀺𑀢𑀭𑁄, 𑀧𑀺𑀢𑀽𑀦𑀁 𑀧𑀺𑀢𑀭𑁄 𑀧𑀺𑀢𑀸𑀫𑀳𑀸, 𑀢𑁂𑀲𑀁 𑀬𑀼𑀕𑁄 𑀤𑁆𑀯𑀦𑁆𑀤𑁄 𑀧𑀺𑀢𑀸𑀫𑀳𑀬𑀼𑀕𑁄, 𑀢𑀲𑁆𑀫𑀸, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀧𑀺𑀢𑀸𑀫𑀳𑀤𑁆𑀯𑀦𑁆𑀤𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀫𑀸𑀢𑀸𑀫𑀳𑁄𑀧𑀺 𑀕𑀳𑀺𑀢𑁄𑀢𑀺. 𑀲𑁄 𑀅𑀝𑁆𑀞𑀓𑀣𑀸𑀬𑀁 𑀯𑀺𑀲𑀼𑀁 𑀦 𑀉𑀤𑁆𑀥𑀝𑁄. 𑀬𑀼𑀕-𑀲𑀤𑁆𑀤𑁄 𑀘𑁂𑀢𑁆𑀣 𑀏𑀓𑀲𑁂𑀲𑀦𑀬𑁂𑀦 𑀤𑀝𑁆𑀞𑀩𑁆𑀩𑁄 ‘‘𑀬𑀼𑀕𑁄 𑀘 𑀬𑀼𑀕𑁄 𑀘 𑀬𑀼𑀕𑀸’’𑀢𑀺. 𑀏𑀯𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 𑀤𑁆𑀯𑀦𑁆𑀤𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺, 𑀢𑁂𑀦𑀸𑀳 ‘‘𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸’’𑀢𑀺. 𑀧𑀼𑀭𑀺𑀲𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 ‘‘𑀫𑀸𑀢𑀺𑀢𑁄’’𑀢𑀺 𑀧𑀸𑀴𑀺𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀅𑀓𑁆𑀔𑀺𑀢𑁆𑀢𑁄𑀢𑀺 𑀅𑀧𑁆𑀧𑀢𑁆𑀢𑀔𑁂𑀧𑁄. 𑀅𑀦𑀯𑀓𑁆𑀔𑀺𑀢𑁆𑀢𑁄𑀢𑀺 𑀲𑀤𑁆𑀥𑀣𑀸𑀮𑀺𑀧𑀸𑀓𑀸𑀤𑀻𑀲𑀼 𑀦 𑀅𑀯𑀓𑁆𑀔𑀺𑀢𑁆𑀢𑁄 𑀦 𑀙𑀟𑁆𑀟𑀺𑀢𑁄. 𑀚𑀸𑀢𑀺𑀯𑀸𑀤𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀉𑀪𑀢𑁄…𑀧𑁂… 𑀧𑀺𑀢𑀸𑀫𑀳𑀬𑀼𑀕𑀸’’𑀢𑀺 𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑁄𑀦𑀺𑀤𑁄𑀲𑀸𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑀪𑀸𑀯𑀓𑀺𑀢𑁆𑀢𑀦𑀢𑁄, ‘‘𑀅𑀓𑁆𑀔𑀺𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀓𑀺𑀭𑀺𑀬𑀸𑀧𑀭𑀸𑀥𑀸𑀪𑀸𑀯𑁄. 𑀓𑀺𑀭𑀺𑀬𑀸𑀧𑀭𑀸𑀥𑁂𑀦 𑀳𑀺 𑀲𑀢𑁆𑀢𑀸 𑀔𑁂𑀧𑀁 𑀧𑀸𑀧𑀼𑀡𑀦𑁆𑀢𑀺. ‘‘𑀅𑀦𑀼𑀧𑀓𑁆𑀓𑀼𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀸𑀪𑀸𑀯𑁄. 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀫𑁆𑀧𑀺 𑀳𑀺 𑀧𑀝𑀺𑀘𑁆𑀘 𑀲𑀢𑁆𑀢𑀸 𑀅𑀓𑁆𑀓𑁄𑀲𑀁 𑀮𑀪𑀦𑁆𑀢𑀺.

𑀇𑀲𑁆𑀲𑀭𑁄𑀢𑀺 𑀆𑀥𑀺𑀧𑀢𑁂𑀬𑁆𑀬𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀩𑀮𑁂𑀦 𑀈𑀲𑀦𑀲𑀻𑀮𑁄, 𑀲𑀸 𑀧𑀦𑀲𑁆𑀲 𑀇𑀲𑁆𑀲𑀭𑀢𑀸 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀬𑀸 𑀧𑀸𑀓𑀝𑀸 𑀚𑀸𑀢𑀸𑀢𑀺 𑀅𑀟𑁆𑀠𑀢𑀸𑀧𑀭𑀺𑀬𑀸𑀬𑀪𑀸𑀯𑁂𑀦𑁂𑀯 𑀯𑀤𑀦𑁆𑀢𑁄 ‘‘𑀅𑀟𑁆𑀠𑁄𑀢𑀺 𑀇𑀲𑁆𑀲𑀭𑁄’’𑀢𑀺 𑀆𑀳. 𑀫𑀳𑀦𑁆𑀢𑀁 𑀥𑀦𑀁 𑀅𑀲𑁆𑀲 𑀪𑀽𑀫𑀺𑀕𑀢𑀜𑁆𑀘𑁂𑀯 𑀯𑁂𑀳𑀸𑀲𑀝𑁆𑀞𑀜𑁆𑀘𑀸𑀢𑀺 𑀫𑀳𑀤𑁆𑀥𑀦𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀢𑀲𑁆𑀲. 𑀯𑀤𑀦𑁆𑀢𑀺 ‘‘𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀅𑀦𑀼𑀧𑀲𑀗𑁆𑀓𑀫𑀦𑀓𑀸𑀭𑀡𑀁 𑀓𑀺𑀢𑁆𑀢𑁂𑀫𑀸’’𑀢𑀺.

𑀅𑀥𑀺𑀓𑀭𑀽𑀧𑁄𑀢𑀺 𑀯𑀺𑀲𑀺𑀝𑁆𑀞𑀭𑀽𑀧𑁄 𑀉𑀢𑁆𑀢𑀫𑀲𑀭𑀻𑀭𑁄. 𑀤𑀲𑁆𑀲𑀦𑀁 𑀅𑀭𑀳𑀢𑀻𑀢𑀺 𑀤𑀲𑁆𑀲𑀦𑀻𑀬𑁄, 𑀢𑁂𑀦𑀸𑀳 ‘‘𑀤𑀲𑁆𑀲𑀦𑀬𑁄𑀕𑁆𑀕𑁄’’𑀢𑀺. 𑀧𑀲𑀸𑀤𑀁 𑀆𑀯𑀳𑀢𑀻𑀢𑀺 𑀧𑀸𑀲𑀸𑀤𑀺𑀓𑁄, 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀧𑁆𑀧𑀲𑀸𑀤𑀚𑀦𑀦𑀢𑁄’’𑀢𑀺. 𑀯𑀡𑁆𑀡𑀲𑁆𑀲𑀸𑀢𑀺 𑀯𑀡𑁆𑀡𑀥𑀸𑀢𑀼𑀬𑀸. 𑀲𑀭𑀻𑀭𑀦𑁆𑀢𑀺 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑀁 𑀓𑀭𑀘𑀭𑀡𑀕𑀻𑀯𑀸𑀲𑀻𑀲𑀸𑀤𑀺𑀅𑀯𑀬𑀯𑀲𑀫𑀼𑀤𑀸𑀬𑀁, 𑀲𑁄 𑀘 𑀲𑀡𑁆𑀞𑀸𑀦𑀫𑀼𑀔𑁂𑀦 𑀕𑀬𑁆𑀳𑀢𑀻𑀢𑀺 ‘‘𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺…𑀧𑁂… 𑀲𑀫𑁆𑀧𑀢𑁆𑀢𑀺𑀬𑀸 𑀘𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀯𑀡𑁆𑀡𑁂𑀲𑀼 𑀲𑀼𑀯𑀡𑁆𑀡𑀯𑀡𑁆𑀡𑁄𑀯 𑀉𑀢𑁆𑀢𑀫𑁄𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀝𑁆𑀞𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀢𑀣𑀸 𑀳𑀺 𑀩𑀼𑀤𑁆𑀥𑀸, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀲𑀼𑀯𑀡𑁆𑀡𑀯𑀡𑁆𑀡𑀸𑀯 𑀳𑁄𑀦𑁆𑀢𑀺. 𑀩𑁆𑀭𑀳𑁆𑀫𑀯𑀘𑁆𑀙𑀲𑀻𑀢𑀺 𑀉𑀢𑁆𑀢𑀫𑀲𑀭𑀻𑀭𑀸𑀪𑁄, 𑀲𑀼𑀯𑀡𑁆𑀡𑀸𑀪𑁄 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀭𑀻𑀭𑀲𑀤𑀺𑀲𑁂𑀦𑁂𑀯 𑀲𑀭𑀻𑀭𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁, 𑀦 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑀢𑀁. 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬𑀸𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸, 𑀅𑀯𑀬𑀯𑀧𑀸𑀭𑀺𑀧𑀽𑀭𑀺𑀬𑀸 𑀘 𑀤𑀲𑁆𑀲𑀦𑀸𑀬 𑀑𑀓𑀸𑀲𑁄 𑀦 𑀔𑀼𑀤𑁆𑀤𑀓𑁄, 𑀢𑁂𑀦𑀸𑀳 ‘‘𑀲𑀩𑁆𑀩𑀸𑀦𑁂𑀯𑀸’’𑀢𑀺𑀆𑀤𑀺.

𑀬𑀫𑀦𑀺𑀬𑀫𑀮𑀓𑁆𑀔𑀡𑀁 𑀲𑀻𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸. 𑀢𑀁 𑀧𑀦𑀲𑁆𑀲 𑀭𑀢𑁆𑀢𑀜𑁆𑀜𑀼𑀢𑀸𑀬 𑀯𑀼𑀤𑁆𑀥𑀁 𑀯𑀟𑁆𑀠𑀺𑀢𑀁 𑀅𑀢𑁆𑀣𑀻𑀢𑀺 𑀯𑀼𑀤𑁆𑀥𑀲𑀻𑀮𑀻. 𑀢𑁂𑀦 𑀘 𑀲𑀩𑁆𑀩𑀤𑀸 𑀲𑀫𑁆𑀫𑀸𑀬𑁄𑀕𑀢𑁄 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀩𑁆𑀩𑀫𑁂𑀢𑀁 𑀧𑀜𑁆𑀘𑀲𑀻𑀮𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺 𑀢𑀢𑁄 𑀧𑀭𑀁 𑀲𑀻𑀮𑀲𑁆𑀲 𑀢𑀢𑁆𑀣 𑀅𑀪𑀸𑀯𑀢𑁄, 𑀢𑁂𑀲𑀜𑁆𑀘 𑀅𑀚𑀸𑀦𑀦𑀢𑁄.

𑀞𑀸𑀦𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸, 𑀲𑀺𑀓𑁆𑀔𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀓𑀢𑁆𑀣𑀘𑀺𑀧𑀺 𑀅𑀦𑀽𑀦𑀢𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀓𑁆𑀔𑀭𑀸𑀦𑀺 𑀏𑀢𑀺𑀲𑁆𑀲𑀸𑀢𑀺 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸. 𑀅𑀣 𑀯𑀸 𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀧𑀤𑀁, 𑀦𑀸𑀫𑀸𑀤𑀺. 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀯𑀸𑀓𑁆𑀬𑀁. 𑀢𑁂𑀲𑀁 𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸. 𑀅𑀢𑁆𑀣𑀜𑀸𑀧𑀦𑁂 𑀲𑀸𑀥𑀦𑀢𑀸𑀬 𑀯𑀸𑀘𑀸𑀯 𑀓𑀭𑀡𑀦𑁆𑀢𑀺 𑀯𑀸𑀓𑁆𑀓𑀭𑀡𑀁, 𑀉𑀤𑀸𑀳𑀸𑀭𑀖𑁄𑀲𑁄. 𑀕𑀼𑀡𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀢𑁂𑀦 𑀯𑀸 𑀪𑀸𑀲𑀺𑀢𑀩𑁆𑀩𑀅𑀢𑁆𑀣𑀲𑁆𑀲. 𑀧𑀽𑀭𑁂 𑀧𑀼𑀡𑁆𑀡𑀪𑀸𑀯𑁂. 𑀧𑀽𑀭𑁂𑀢𑀺 𑀘 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑁂 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀤𑀼𑀢𑀺𑀬𑀲𑁆𑀫𑀺𑀁 𑀯𑀺𑀲𑀬𑁂. ‘‘𑀲𑀼𑀔𑀼𑀫𑀸𑀮𑀢𑁆𑀢𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀯𑀸𑀘𑀸𑀬 𑀫𑀼𑀤𑀼𑀲𑀡𑁆𑀳𑀪𑀸𑀯𑀫𑀸𑀳. 𑀅𑀧𑀮𑀺𑀩𑀼𑀤𑁆𑀥𑀸𑀬 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺. 𑀲𑀦𑁆𑀤𑀺𑀝𑁆𑀞𑀁 𑀲𑀩𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀬 𑀏𑀓𑀤𑁂𑀲𑀁 𑀓𑀣𑀦𑀁. 𑀯𑀺𑀮𑀫𑁆𑀩𑀺𑀢𑀁 𑀲𑀡𑀺𑀓𑀁 𑀘𑀺𑀭𑀸𑀬𑀺𑀢𑁆𑀯𑀸 𑀓𑀣𑀦𑀁. ‘‘𑀲𑀦𑁆𑀤𑀺𑀤𑁆𑀥𑀯𑀺𑀮𑀫𑁆𑀩𑀺𑀢𑀸𑀤𑀻’’𑀢𑀺 𑀯𑀸 𑀧𑀸𑀞𑁄. 𑀢𑀢𑁆𑀣 𑀲𑀦𑁆𑀤𑀺𑀤𑁆𑀥𑀁 𑀲𑀦𑁆𑀤𑁂𑀳𑀚𑀦𑀓𑀁. 𑀆𑀤𑀺-𑀲𑀤𑁆𑀤𑁂𑀦 𑀤𑀼𑀓𑁆𑀔𑀮𑀺𑀢𑀸𑀦𑀼𑀓𑀟𑁆𑀠𑀺𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀧𑀸𑀓𑀝𑀁 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀯𑀸𑀘𑀸𑀬 𑀅𑀢𑁆𑀣𑀧𑀸𑀭𑀺𑀧𑀽𑀭𑀺𑀁 𑀯𑀤𑀦𑁆𑀢𑀺.

‘‘𑀚𑀺𑀡𑁆𑀡𑁄’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑀺 𑀘. 𑀤𑀼𑀢𑀺𑀬𑀦𑀬𑁂 𑀧𑀦 𑀚𑀺𑀡𑁆𑀡𑁄𑀢𑀺 𑀦𑀸𑀬𑀁 𑀚𑀺𑀡𑁆𑀡𑀢𑀸 𑀯𑀬𑁄𑀫𑀢𑁆𑀢𑁂𑀦, 𑀅𑀣 𑀔𑁄 𑀓𑀼𑀮𑀧𑀭𑀺𑀯𑀝𑁆𑀝𑁂𑀦 𑀧𑀼𑀭𑀸𑀡𑀢𑀸𑀢𑀺 𑀆𑀳 ‘‘𑀚𑀺𑀡𑁆𑀡𑁄𑀢𑀺 𑀧𑁄𑀭𑀸𑀡𑁄’’𑀢𑀺𑀆𑀤𑀺, 𑀢𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀼𑀮𑀯𑀲𑁂𑀦 𑀉𑀤𑀺𑀢𑁄𑀤𑀺𑀢𑀪𑀸𑀯𑀫𑀸𑀳. 𑀚𑀸𑀢𑀺𑀯𑀼𑀤𑁆𑀥𑀺𑀬𑀸 ‘‘𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸, 𑀕𑀼𑀡𑀯𑀼𑀤𑁆𑀥𑀺𑀬𑀸 𑀢𑀢𑁄 𑀲𑀸𑀢𑀺𑀲𑀬𑀢𑁆𑀢𑀸 𑀘 ‘‘𑀯𑀼𑀤𑁆𑀥𑁄𑀢𑀺 𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑀯𑀼𑀤𑁆𑀥𑀺𑀬𑀸 𑀬𑀼𑀢𑁆𑀢𑁄’’𑀢𑀺 𑀆𑀳. 𑀢𑀣𑀸 𑀚𑀸𑀢𑀺𑀫𑀳𑀮𑁆𑀮𑀓𑀢𑀸𑀬 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀫𑀳𑀮𑁆𑀮𑀓𑁄’’𑀢𑀺 𑀧𑀤𑁂𑀦 𑀯𑀺𑀪𑀯𑀫𑀳𑀢𑁆𑀢𑀢𑀸 𑀬𑁄𑀚𑀺𑀢𑀸. 𑀫𑀕𑁆𑀕𑀧𑀝𑀺𑀧𑀦𑁆𑀦𑁄𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀝𑀺𑀧𑀢𑁆𑀢𑀺𑀯𑀻𑀣𑀺𑀁 𑀉𑀧𑀕𑀢𑁄 𑀢𑀁 𑀅𑀯𑁄𑀓𑁆𑀓𑀫𑁆𑀫 𑀘𑀭𑀡𑀢𑁄. 𑀅𑀦𑁆𑀢𑀺𑀫𑀯𑀬𑀦𑁆𑀢𑀺 𑀧𑀘𑁆𑀙𑀺𑀫𑀯𑀬𑀁.

𑀩𑀼𑀤𑁆𑀥𑀕𑀼𑀡𑀓𑀣𑀸𑀯𑀡𑁆𑀡𑀦𑀸

𑁩𑁦𑁪. 𑀢𑀸𑀤𑀺𑀲𑁂𑀳𑀺 𑀫𑀳𑀸𑀦𑀼𑀪𑀸𑀯𑁂𑀳𑀺 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑀯𑀲𑁂𑀦𑀧𑀺 𑀤𑀳𑀦𑀁 𑀦 𑀫𑀸𑀤𑀺𑀲𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀓𑀼𑀢𑁄 𑀧𑀦 𑀉𑀓𑁆𑀓𑀁𑀲𑀦𑀦𑁆𑀢𑀺 𑀇𑀤𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦 𑀬𑀼𑀢𑁆𑀢𑀭𑀽𑀧𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀔𑁄 𑀧𑀦 𑀫𑁂𑀢𑀁 𑀬𑀼𑀢𑁆𑀢’’𑀦𑁆𑀢𑀺𑀆𑀤𑀺. 𑀲𑀤𑀺𑀲𑀸𑀢𑀺 𑀏𑀓𑀤𑁂𑀲𑁂𑀦 𑀲𑀤𑀺𑀲𑀸. 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀕𑀼𑀡𑁂𑀳𑀺 𑀲𑀩𑁆𑀩𑀣𑀸 𑀲𑀤𑀺𑀲𑀸 𑀓𑁂𑀘𑀺𑀧𑀺 𑀕𑀼𑀡𑀸 𑀅𑀜𑁆𑀜𑁂𑀲𑀼 𑀮𑀩𑁆𑀪𑀦𑁆𑀢𑀺. 𑀇𑀢𑀭𑁂𑀢𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀅𑀲𑀤𑀺𑀲𑀕𑀼𑀡𑁂. 𑀇𑀤𑀦𑁆𑀢𑀺 𑀇𑀤𑀁 𑀅𑀢𑁆𑀣𑀚𑀸𑀢𑀁. 𑀕𑁄𑀧𑀤𑀓𑀦𑁆𑀢𑀺 𑀕𑀸𑀯𑀺𑀬𑀸 𑀧𑀤𑁂 𑀞𑀺𑀢𑀉𑀤𑀓𑀁.

𑀲𑀝𑁆𑀞𑀺𑀓𑀼𑀮𑀲𑀢𑀲𑀳𑀲𑁆𑀲𑀦𑁆𑀢𑀺 𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀁 𑀓𑀼𑀮𑀲𑀢𑀲𑀳𑀲𑁆𑀲𑀁 𑀓𑀼𑀮𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀓𑀼𑀮𑀸𑀦𑀼𑀓𑁆𑀓𑀫𑁂𑀦 𑀆𑀕𑀢𑀁. 𑀢𑁂𑀲𑀼𑀧𑀻𑀢𑀺 𑀢𑁂𑀲𑀼𑀧𑀺 𑀘𑀢𑀽𑀲𑀼 𑀦𑀺𑀥𑀻𑀲𑀼. 𑀕𑀳𑀺𑀢𑀕𑀳𑀺𑀢𑀦𑁆𑀢𑀺 𑀕𑀳𑀺𑀢𑀁 𑀕𑀳𑀺𑀢𑀁 𑀞𑀸𑀦𑀁 𑀧𑀽𑀭𑀢𑀺𑀬𑁂𑀯 𑀥𑀦𑁂𑀦 𑀧𑀝𑀺𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺. 𑀅𑀧𑀭𑀺𑀫𑀸𑀡𑁄𑀬𑁂𑀯𑀸𑀢𑀺 ‘‘𑀏𑀢𑁆𑀢𑀓𑁄 𑀏𑀲𑁄’’𑀢𑀺 𑀓𑁂𑀦𑀘𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀧𑀭𑀺𑀘𑁆𑀙𑀺𑀦𑁆𑀦𑁄 𑀏𑀯.

𑀢𑀢𑁆𑀣𑀸𑀢𑀺 𑀫𑀜𑁆𑀘𑀓𑁂. 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀻𑀢𑀺 𑀬𑀣𑀸 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀆𑀬𑀸𑀫𑀢𑁄, 𑀯𑀺𑀢𑁆𑀣𑀸𑀭𑀢𑁄 𑀉𑀩𑁆𑀩𑁂𑀥𑀢𑁄 𑀘 𑀪𑀕𑀯𑀢𑁄 𑀭𑀽𑀧𑀓𑀸𑀬𑀲𑁆𑀲 𑀧𑀭𑀺𑀘𑁆𑀙𑁂𑀤𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺.

𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀅𑀭𑀺𑀬𑀦𑁆𑀢𑀺 𑀆𑀳 ‘‘𑀅𑀭𑀺𑀬𑀁 𑀉𑀢𑁆𑀢𑀫𑀁 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁, 𑀦 𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦. 𑀓𑀢𑁆𑀣𑀘𑀺 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺, 𑀓𑀢𑁆𑀣𑀘𑀺 𑀅𑀧𑀭𑀺𑀫𑀸𑀡𑀸𑀧𑀺 𑀤𑁂𑀯𑀫𑀦𑀼𑀲𑁆𑀲𑀸 𑀬𑀲𑁆𑀫𑀸 𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀅𑀧𑀭𑀺𑀫𑁂𑀬𑁆𑀬𑀸 𑀤𑁂𑀯𑀫𑀦𑀼𑀲𑁆𑀲𑀸 𑀫𑀕𑁆𑀕𑀨𑀮𑀸𑀫𑀢𑀁 𑀧𑀺𑀯𑀺𑀁𑀲𑀼, 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀤𑀺𑀧𑀭𑀺𑀫𑀸𑀡𑁂𑀦𑀧𑀺 𑀩𑀳𑀽 𑀏𑀯, 𑀢𑀲𑁆𑀫𑀸 𑀅𑀦𑀼𑀢𑁆𑀢𑀭𑀸𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦 𑀪𑀕𑀯𑀸 𑀩𑀳𑀽𑀦𑀁 𑀆𑀘𑀭𑀺𑀬𑁄. 𑀢𑁂𑀢𑀺 𑀓𑀸𑀫𑀭𑀸𑀕𑀢𑁄 𑀅𑀜𑁆𑀜𑁂 𑀪𑀕𑀯𑀢𑁄 𑀧𑀳𑀻𑀦𑀓𑀺𑀮𑁂𑀲𑁂. 𑀓𑁂𑀴𑀦𑀸𑀢𑀺 𑀓𑁂𑀴𑀸𑀬𑀦𑀸 𑀥𑀦𑀸𑀬𑀦𑀸.

𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀅𑀧𑀸𑀧𑁂 𑀧𑀼𑀭𑁂 𑀓𑀭𑁄𑀢𑀺, 𑀦 𑀯𑀸 𑀧𑀸𑀧𑀁 𑀧𑀼𑀭𑀢𑁄 𑀓𑀭𑁄𑀢𑀻𑀢𑀺𑀧𑀺 𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀸𑀧𑁂 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀧𑀸𑀧𑁂𑀢𑀺 𑀧𑀸𑀧𑀧𑀝𑀺𑀧𑀓𑁆𑀔𑁂, 𑀧𑀸𑀧𑀭𑀳𑀺𑀢𑁂 𑀘. 𑀩𑁆𑀭𑀳𑁆𑀫𑀦𑀺 𑀲𑁂𑀝𑁆𑀞𑁂 𑀩𑀼𑀤𑁆𑀥𑁂 𑀪𑀕𑀯𑀢𑀺 𑀪𑀯𑀸 𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸, 𑀩𑁆𑀭𑀳𑁆𑀫𑀼𑀦𑁄 𑀯𑀸 𑀪𑀕𑀯𑀢𑁄 𑀳𑀺𑀢𑀸 𑀕𑀭𑀼𑀓𑀭𑀡𑀸𑀤𑀺𑀦𑀸, 𑀬𑀣𑀸𑀦𑀼𑀲𑀺𑀝𑁆𑀞𑀧𑀝𑀺𑀧𑀢𑁆𑀢𑀺𑀬𑀸 𑀘, 𑀩𑁆𑀭𑀳𑁆𑀫𑀁 𑀯𑀸 𑀲𑁂𑀝𑁆𑀞𑀁 𑀅𑀭𑀺𑀬𑀫𑀕𑁆𑀕𑀁 𑀚𑀸𑀦𑀸𑀢𑀻𑀢𑀺 𑀩𑁆𑀭𑀳𑁆𑀫𑀜𑁆𑀜𑀸, 𑀅𑀭𑀺𑀬𑀲𑀸𑀯𑀓𑀲𑀗𑁆𑀔𑀸𑀢𑀸 𑀧𑀚𑀸, 𑀢𑁂𑀦𑀸𑀳 ‘‘𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺. 𑀧𑀓𑀢𑀺𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀯𑀲𑁂𑀦𑀸𑀧𑀺 ‘‘𑀩𑁆𑀭𑀳𑁆𑀫𑀜𑁆𑀜𑀸𑀬 𑀧𑀚𑀸𑀬𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀺𑀭𑁄𑀭𑀝𑁆𑀞𑀸 𑀢𑀺𑀭𑁄𑀚𑀦𑀧𑀤𑀸𑀢𑀺 𑀏𑀢𑁆𑀣 𑀭𑀚𑁆𑀚𑀁 𑀭𑀝𑁆𑀞𑀁, 𑀭𑀸𑀚𑀦𑁆𑀢𑀺 𑀭𑀸𑀚𑀸𑀦𑁄 𑀏𑀢𑁂𑀦𑀸𑀢𑀺, 𑀢𑀤𑁂𑀓𑀤𑁂𑀲𑀪𑀽𑀢𑀸 𑀧𑀤𑁂𑀲𑀸 𑀧𑀦 𑀚𑀦𑀧𑀤𑁄,𑀚𑀦𑀸 𑀧𑀚𑁆𑀚𑀦𑁆𑀢𑀺 𑀏𑀢𑁆𑀣 𑀲𑀼𑀔𑀚𑀻𑀯𑀺𑀓𑀁 𑀧𑀸𑀧𑀼𑀡𑀦𑁆𑀢𑀻𑀢𑀺. 𑀧𑀼𑀘𑁆𑀙𑀸𑀬 𑀯𑀸 𑀤𑁄𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀫𑀢𑁆𑀣𑀢𑀦𑁆𑀢𑀺 𑀅𑀢𑁆𑀢𑀦𑁄 𑀅𑀲𑀫𑀢𑁆𑀣𑀢𑀁. 𑀪𑀕𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀺 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁, 𑀜𑀸𑀡𑀧𑀭𑀺𑀧𑀸𑀓𑀁, 𑀘𑀺𑀢𑁆𑀢𑀸𑀘𑀸𑀭𑀜𑁆𑀘 𑀜𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀏𑀳𑀺 𑀲𑁆𑀯𑀸𑀕𑀢𑀯𑀸𑀤𑀻’’𑀢𑀺 𑀇𑀫𑀺𑀦𑀸 𑀲𑀼𑀔𑀲𑀫𑁆𑀪𑀸𑀲𑀧𑀼𑀩𑁆𑀩𑀓𑀁 𑀧𑀺𑀬𑀯𑀸𑀤𑀺𑀢𑀁 𑀤𑀲𑁆𑀲𑁂𑀢𑀺, ‘‘𑀲𑀔𑀺𑀮𑁄’’𑀢𑀺 𑀇𑀫𑀺𑀦𑀸 𑀲𑀡𑁆𑀳𑀯𑀸𑀘𑀢𑀁, ‘‘𑀲𑀫𑁆𑀫𑁄𑀤𑀓𑁄’’𑀢𑀺 𑀇𑀫𑀺𑀦𑀸 𑀧𑀝𑀺𑀲𑀦𑁆𑀥𑀸𑀭𑀓𑀼𑀲𑀮𑀢𑀁, ‘‘𑀅𑀪𑀸𑀓𑀼𑀝𑀺𑀓𑁄’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀢𑁆𑀣𑁂𑀯 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀢𑀁, ‘‘𑀉𑀢𑁆𑀢𑀸𑀦𑀫𑀼𑀔𑁄’’𑀢𑀺 𑀇𑀫𑀺𑀦𑀸 𑀲𑀼𑀔𑀸𑀮𑀸𑀧𑀢𑀁, ‘‘𑀧𑀼𑀩𑁆𑀩𑀪𑀸𑀲𑀻’’𑀢𑀺 𑀇𑀫𑀺𑀦𑀸 𑀥𑀫𑁆𑀫𑀸𑀦𑀼𑀕𑁆𑀕𑀳𑀲𑁆𑀲 𑀑𑀓𑀸𑀲𑀓𑀭𑀡𑀢𑁄 𑀳𑀺𑀢𑀚𑁆𑀛𑀸𑀲𑀬𑀢𑀁 𑀪𑀕𑀯𑀢𑁄 𑀯𑀺𑀪𑀸𑀯𑁂𑀢𑀺.

𑀬𑀢𑁆𑀣 𑀓𑀺𑀭𑀸𑀢𑀺 𑀓𑀺𑀭-𑀲𑀤𑁆𑀤𑁄 𑀅𑀭𑀼𑀘𑀺𑀲𑀽𑀘𑀦𑀢𑁆𑀣𑁄, 𑀢𑁂𑀦 𑀪𑀕𑀯𑀢𑀸 𑀅𑀥𑀺𑀯𑀼𑀢𑁆𑀣𑀧𑀤𑁂𑀲𑁂 𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀤𑁆𑀤𑀯𑀢𑀸, 𑀅𑀣 𑀔𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺.

𑀅𑀦𑀼𑀲𑀸𑀲𑀺𑀢𑀩𑁆𑀩𑁄𑀢𑀺 𑀯𑀺𑀦𑁂𑀬𑁆𑀬𑀚𑀦𑀲𑀫𑀽𑀳𑁄 𑀕𑀬𑁆𑀳𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀁 𑀅𑀭𑀺𑀬𑀲𑀗𑁆𑀖𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀬𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀅𑀦𑀦𑁆𑀢𑀭𑀲𑁆𑀲 𑀯𑀺𑀥𑀺 𑀧𑀝𑀺𑀲𑁂𑀥𑁄 𑀯𑀸𑀢𑀺 𑀓𑀢𑁆𑀯𑀸. ‘‘𑀢𑀸𑀤𑀺𑀲𑁄𑀯𑀸’’𑀢𑀺 𑀇𑀫𑀺𑀦𑀸 ‘‘𑀲𑀬𑀁 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀓𑀧𑁆𑀧𑁄 𑀏𑀯 𑀧𑀘𑁆𑀘𑀸𑀫𑀝𑁆𑀞𑁄𑀢𑀺. ‘‘𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑀸’’𑀢𑀺 𑀯𑀺𑀓𑀧𑁆𑀧𑀦𑁆𑀢𑀭𑀕𑁆𑀕𑀳𑀡𑀁. 𑀩𑀳𑀽𑀦𑀁 𑀢𑀺𑀢𑁆𑀣𑀓𑀭𑀸𑀦𑀦𑁆𑀢𑀺 𑀧𑀽𑀭𑀡𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀢𑀺𑀢𑁆𑀣𑀓𑀭𑀸𑀦𑀁, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀓𑀸𑀭𑀡𑁂𑀦𑀸𑀢𑀺 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀢𑀸𑀤𑀺𑀲𑀫𑀸𑀭𑁄𑀧𑀦𑀮𑀓𑁆𑀔𑀡𑁂𑀦 𑀓𑀸𑀭𑀡𑁂𑀦. 𑀆𑀕𑀦𑁆𑀢𑀼𑀓𑀸 𑀦𑀯𑀓𑀸𑀢𑀺 𑀅𑀪𑀺𑀦𑀯𑀸 𑀆𑀕𑀦𑁆𑀢𑀼𑀓𑀸 𑀅𑀩𑁆𑀪𑀸𑀕𑀢𑀸. 𑀧𑀭𑀺𑀬𑀸𑀧𑀼𑀡𑀸𑀫𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀚𑀸𑀦𑀸𑀫𑀺 𑀲𑀓𑁆𑀓𑁄𑀫𑀺, 𑀢𑁂𑀦𑀸𑀳 ‘‘𑀚𑀸𑀦𑀸𑀫𑀻’’𑀢𑀺. ‘‘𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄’’𑀢𑀺 𑀅𑀪𑀽𑀢𑀧𑀭𑀺𑀓𑀧𑁆𑀧𑀦𑀯𑀘𑀦𑀫𑁂𑀢𑀁 𑀢𑀣𑀸 𑀪𑀸𑀲𑀫𑀸𑀦𑀲𑁆𑀲 𑀅𑀪𑀸𑀯𑀢𑁄.

𑁩𑁦𑁫. 𑀅𑀮𑀁-𑀲𑀤𑁆𑀤𑁄 𑀅𑀭𑀳𑀢𑁆𑀢𑁄𑀧𑀺 𑀳𑁄𑀢𑀺 ‘‘𑀅𑀮𑀫𑁂𑀯 𑀦𑀺𑀩𑁆𑀩𑀺𑀦𑁆𑀤𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁨𑁪) 𑀯𑀺𑀬𑀸𑀢𑀺 𑀆𑀳 ‘‘𑀅𑀮𑀫𑁂𑀯𑀸𑀢𑀺 𑀬𑀼𑀢𑁆𑀢𑀫𑁂𑀯𑀸’’𑀢𑀺. 𑀧𑀼𑀝𑁂𑀦 𑀦𑁂𑀢𑁆𑀯𑀸 𑀅𑀲𑀺𑀢𑀩𑁆𑀩𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀼𑀝𑁄𑀲𑀁 𑀯𑀼𑀘𑁆𑀘𑀢𑀺 𑀧𑀸𑀣𑁂𑀬𑁆𑀬𑀁. 𑀧𑀼𑀝𑀁𑀲𑁂𑀦 𑀧𑀼𑀭𑀺𑀲𑁂𑀦.

𑀲𑁄𑀡𑀤𑀡𑁆𑀟𑀧𑀭𑀺𑀯𑀺𑀢𑀓𑁆𑀓𑀯𑀡𑁆𑀡𑀦𑀸

𑁩𑁦𑁭. 𑀉𑀪𑀢𑁄𑀧𑀓𑁆𑀔𑀺𑀓𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀉𑀪𑀬𑀧𑀓𑁆𑀔𑀺𑀓𑀸. 𑀓𑁂𑀭𑀸𑀝𑀺𑀓𑀸𑀢𑀺 𑀲𑀞𑀸.

𑀩𑁆𑀭𑀸𑀳𑁆𑀫𑀡𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑁩𑁦𑁯. 𑀯𑀺𑀖𑀸𑀢𑀦𑁆𑀢𑀺 𑀘𑀺𑀢𑁆𑀢𑀤𑀼𑀓𑁆𑀔𑀁.

𑁩𑁧𑁧-𑁩. 𑀲𑀼𑀚𑀦𑁆𑀢𑀺 𑀳𑁄𑀫𑀤𑀩𑁆𑀩𑀺𑀁 𑀧𑀕𑁆𑀕𑀡𑁆𑀳𑀦𑁆𑀢𑁂𑀲𑀽𑀢𑀺 𑀚𑀼𑀳𑀦𑀢𑁆𑀣𑀁 𑀕𑀡𑁆𑀳𑀦𑀓𑁂𑀲𑀼, 𑀇𑀭𑀼𑀩𑁆𑀩𑀺𑀚𑁆𑀚𑁂𑀲𑀽𑀢𑀺 𑀅𑀢𑁆𑀣𑁄. 𑀧𑀞𑀫𑁄 𑀯𑀸𑀢𑀺 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀬𑀚𑀦𑀓𑀺𑀭𑀺𑀬𑀸𑀬𑀁 𑀲𑀩𑁆𑀩𑀧𑀥𑀸𑀦𑁄 𑀯𑀸. 𑀤𑀼𑀢𑀺𑀬𑁄 𑀯𑀸𑀢𑀺 𑀢𑀤𑀦𑀦𑁆𑀢𑀭𑁄 𑀯𑀸. ‘‘𑀲𑀼𑀚’’𑀦𑁆𑀢𑀺 𑀓𑀭𑀡𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀼𑀚𑀸𑀬𑀸’’𑀢𑀺. 𑀅𑀕𑁆𑀕𑀺𑀳𑀼𑀢𑁆𑀢𑀧𑀫𑀼𑀔𑀢𑀸𑀬 𑀬𑀜𑁆𑀜𑀲𑁆𑀲 𑀬𑀜𑁆𑀜𑁂 𑀤𑀺𑀬𑁆𑀬𑀫𑀸𑀦𑀁 𑀲𑀼𑀚𑀸𑀫𑀼𑀔𑁂𑀦 𑀤𑀻𑀬𑀢𑀻𑀢𑀺 𑀆𑀳 ‘‘𑀲𑀼𑀚𑀸𑀬 𑀤𑀺𑀬𑁆𑀬𑀫𑀸𑀦’’𑀦𑁆𑀢𑀺. 𑀧𑁄𑀭𑀸𑀡𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀯𑀺𑀲𑁂𑀲𑀢𑁄𑀢𑀺 𑀯𑀺𑀚𑁆𑀚𑀸𑀘𑀭𑀡𑀯𑀺𑀲𑁂𑀲𑀢𑁄, 𑀦 𑀩𑁆𑀭𑀸𑀳𑁆𑀫𑀡𑁂𑀳𑀺 𑀇𑀘𑁆𑀙𑀺𑀢𑀯𑀺𑀚𑁆𑀚𑀸𑀘𑀭𑀡𑀫𑀢𑁆𑀢𑀢𑁄. 𑀉𑀢𑁆𑀢𑀫𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀬 𑀉𑀓𑁆𑀓𑀝𑁆𑀞𑀩𑁆𑀭𑀸𑀳𑁆𑀫𑀡𑀲𑁆𑀲. 𑀩𑁆𑀭𑀸𑀳𑁆𑀫𑀡𑀲𑀫𑀬𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀲𑀺𑀤𑁆𑀥𑀦𑁆𑀢𑀁. 𑀫𑀸 𑀪𑀺𑀦𑁆𑀤𑀺 𑀫𑀸 𑀯𑀺𑀦𑀸𑀲𑁂𑀲𑀺.

𑁩𑁧𑁬. 𑀲𑀫𑀲𑀫𑁄𑀢𑀺 𑀲𑀫𑁄𑀬𑁂𑀯 𑀳𑀼𑀢𑁆𑀯𑀸 𑀲𑀫𑁄. 𑀳𑀻𑀦𑁄𑀧𑀫𑀯𑀲𑁂𑀦𑀧𑀺 𑀲𑀫𑀢𑀸 𑀯𑀼𑀘𑁆𑀘𑀢𑀻𑀢𑀺 𑀢𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀞𑀧𑁂𑀢𑁆𑀯𑀸 𑀏𑀓𑀤𑁂𑀲𑀲𑀫𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀓𑀼𑀮𑀓𑁄𑀝𑀺𑀧𑀭𑀺𑀤𑀻𑀧𑀦𑀦𑁆𑀢𑀺 𑀓𑀼𑀮𑀆𑀤𑀺𑀧𑀭𑀺𑀤𑀻𑀧𑀦𑀁 𑀅𑀣𑀸𑀧𑀺 𑀲𑀺𑀬𑀸𑀢𑀺 𑀅𑀣𑀸𑀧𑀺 𑀢𑀼𑀫𑁆𑀳𑀸𑀓𑀁 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁄 𑀲𑀺𑀬𑀸. 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀲𑀸𑀥𑁂𑀢𑀺 𑀯𑀡𑁆𑀡𑁄. 𑀫𑀦𑁆𑀢𑀚𑀸𑀢𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀻𑀮𑀫𑁂𑀯 𑀲𑀸𑀥𑁂𑀲𑁆𑀲𑀢𑀺 𑀩𑁆𑀭𑀸𑀳𑁆𑀫𑀡𑀪𑀸𑀯𑀁. 𑀓𑀲𑁆𑀫𑀸𑀢𑀺 𑀘𑁂? 𑀆𑀳 ‘‘𑀢𑀲𑁆𑀫𑀺𑀜𑁆𑀳𑀺𑀲𑁆𑀲𑀸’’𑀢𑀺𑀆𑀤𑀺. 𑀲𑀫𑁆𑀫𑁄𑀳𑀫𑀢𑁆𑀢𑀁 𑀯𑀡𑁆𑀡𑀸𑀤𑀬𑁄𑀢𑀺 𑀯𑀡𑁆𑀡𑀫𑀦𑁆𑀢𑀚𑀸𑀢𑀺𑀬𑁄 𑀳𑀺 𑀩𑁆𑀭𑀸𑀳𑁆𑀫𑀡𑀪𑀸𑀯𑀲𑁆𑀲 𑀅𑀗𑁆𑀕𑀦𑁆𑀢𑀺 𑀲𑀫𑁆𑀫𑁄𑀳𑀫𑀢𑁆𑀢𑀫𑁂𑀢𑀁 𑀅𑀲𑀫𑀯𑁂𑀓𑁆𑀔𑀺𑀢𑀸𑀪𑀺𑀫𑀸𑀦𑀪𑀸𑀯𑀢𑁄.

𑀲𑀻𑀮𑀧𑀜𑁆𑀜𑀸𑀓𑀣𑀸𑀯𑀡𑁆𑀡𑀦𑀸

𑁩𑁧𑁭. 𑀓𑀣𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀧𑀜𑁆𑀳𑁄𑀢𑀺 ‘‘𑀲𑀻𑀮𑀯𑀸 𑀘 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀤𑁆𑀯𑀺𑀦𑁆𑀦𑀫𑁂𑀯 𑀅𑀗𑁆𑀕𑀸𑀦𑀁 𑀯𑀲𑁂𑀦 𑀬𑀣𑀸𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑁄 𑀬𑀸𑀣𑀸𑀯𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀬𑀣𑀸𑀯𑀺𑀲𑁆𑀲𑀚𑁆𑀚𑀺𑀢𑁂 𑀅𑀢𑁆𑀣𑁂. 𑀢𑀲𑁆𑀲𑀸𑀢𑀺 𑀲𑁄𑀡𑀤𑀡𑁆𑀟𑀲𑁆𑀲. 𑀲𑀻𑀮𑀧𑀭𑀺𑀲𑀼𑀤𑁆𑀥𑀸𑀢𑀺 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀲𑁄 𑀲𑀼𑀤𑁆𑀥𑀸 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀸. 𑀓𑀼𑀢𑁄 𑀤𑀼𑀲𑁆𑀲𑀻𑀮𑁂 𑀧𑀜𑁆𑀜𑀸 𑀅𑀲𑀫𑀸𑀳𑀺𑀢𑀢𑁆𑀢𑀸 𑀢𑀲𑁆𑀲. 𑀚𑀴𑁂 𑀏𑀴𑀫𑀽𑀕𑁂 𑀓𑀼𑀢𑁄 𑀲𑀻𑀮𑀦𑁆𑀢𑀺 𑀚𑀴𑁂 𑀏𑀴𑀫𑀽𑀕𑁂 𑀤𑀼𑀧𑁆𑀧𑀜𑁆𑀜𑁂 𑀓𑀼𑀢𑁄 𑀲𑀻𑀮𑀁 𑀲𑀻𑀮𑀯𑀺𑀪𑀸𑀕𑀲𑁆𑀲, 𑀲𑀻𑀮𑀧𑀭𑀺𑀲𑁄𑀥𑀦𑀽𑀧𑀸𑀬𑀲𑁆𑀲 𑀘 𑀅𑀚𑀸𑀦𑀦𑀢𑁄. 𑀧𑀓𑀝𑁆𑀞𑀁 𑀉𑀓𑁆𑀓𑀝𑁆𑀞𑀁 𑀜𑀸𑀡𑀁 𑀧𑀜𑁆𑀜𑀸𑀡𑀦𑁆𑀢𑀺, 𑀧𑀸𑀓𑀢𑀺𑀓𑀁 𑀜𑀸𑀡𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀧𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀬𑀺𑀤𑀁 𑀧𑀓𑀸𑀭𑁂𑀳𑀺 𑀚𑀸𑀦𑀦𑀢𑁄 𑀧𑀜𑁆𑀜𑀸𑀯𑀸𑀢𑀺 𑀆𑀳 ‘‘𑀧𑀜𑁆𑀜𑀸𑀡𑀦𑁆𑀢𑀺 𑀧𑀜𑁆𑀜𑀸 𑀬𑁂𑀯𑀸’’𑀢𑀺.

𑀲𑀻𑀮𑁂𑀦𑀥𑁄𑀢𑀸𑀢𑀺 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑁂𑀦 𑀲𑀻𑀮𑁂𑀦 𑀲𑀓𑀮𑀲𑀁𑀓𑀺𑀮𑁂𑀲𑀫𑀮𑀯𑀺𑀲𑀼𑀤𑁆𑀥𑀺𑀬𑀸 𑀥𑁄𑀢𑀸 𑀯𑀺𑀲𑀼𑀤𑁆𑀥𑀸, 𑀢𑁂𑀦𑀸𑀳 ‘‘𑀓𑀣𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀥𑁄𑀯𑀢𑀻𑀢𑀺 𑀲𑀼𑀚𑁆𑀛𑀢𑀺. 𑀫𑀳𑀸𑀲𑀝𑁆𑀞𑀺𑀯𑀲𑁆𑀲𑀢𑁆𑀣𑁂𑀭𑁄 𑀯𑀺𑀬𑀸𑀢𑀺 𑀲𑀝𑁆𑀞𑀺𑀯𑀲𑁆𑀲𑀫𑀳𑀸𑀣𑁂𑀭𑁄 𑀯𑀺𑀬. 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀫𑀢𑁆𑀢𑀫𑁆𑀧𑀻𑀢𑀺 𑀏𑀢𑁆𑀣 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑁄 𑀦𑀸𑀫 𑀬𑀣𑀸𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀲𑀪𑀸𑀯𑀭𑀲𑀢𑁄 𑀉𑀧𑀥𑀸𑀭𑁂𑀢𑁆𑀯𑀸 ‘‘𑀅𑀬𑀁 𑀯𑁂𑀤𑀦𑀸 𑀨𑀲𑁆𑀲𑀁 𑀧𑀝𑀺𑀘𑁆𑀘, 𑀲𑁄 𑀨𑀲𑁆𑀲𑁄 𑀅𑀦𑀺𑀘𑁆𑀘𑁄 𑀤𑀼𑀓𑁆𑀔𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’’𑀢𑀺 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀺𑀧𑀲𑁆𑀲𑀦𑀸. 𑀏𑀯𑀁 𑀯𑀺𑀧𑀲𑁆𑀲𑀦𑁆𑀢𑁂𑀦 ‘‘𑀲𑀼𑀔𑁂𑀦 𑀲𑀓𑁆𑀓𑀸 𑀲𑀸 𑀯𑁂𑀤𑀦𑀸 𑀅𑀥𑀺𑀯𑀸𑀲𑁂𑀢𑀼𑀁 ‘‘𑀯𑁂𑀤𑀦𑀸 𑀏𑀯 𑀯𑁂𑀤𑀺𑀬𑀢𑀻’’𑀢𑀺. 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀬𑀣𑀸𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀅𑀦𑀦𑀼𑀯𑀢𑁆𑀢𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑀁 𑀯𑀺𑀦𑁄𑀤𑁂𑀢𑁆𑀯𑀸. 𑀲𑀁𑀲𑀼𑀫𑀸𑀭𑀧𑀢𑀺𑀢𑁂𑀦𑀸𑀢𑀺 𑀓𑀼𑀫𑁆𑀪𑀻𑀮𑁂𑀦 𑀯𑀺𑀬 𑀪𑀽𑀫𑀺𑀬𑀁 𑀉𑀭𑁂𑀦 𑀦𑀺𑀧𑀚𑁆𑀚𑀦𑁂𑀦. 𑀧𑀜𑁆𑀜𑀸𑀬 𑀲𑀻𑀮𑀁 𑀥𑁄𑀯𑀺𑀢𑁆𑀯𑀸𑀢𑀺 𑀅𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀸𑀤𑀦𑁂𑀦 𑀲𑀻𑀮𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀜𑁆𑀜𑀸𑀬 𑀲𑀼𑀯𑀺𑀲𑁄𑀥𑀺𑀢𑀁 𑀓𑀢𑁆𑀯𑀸.

𑁩𑁧𑁮. ‘‘𑀓𑀲𑁆𑀫𑀸 𑀆𑀳𑀸’’𑀢𑀺 𑀉𑀧𑀭𑀺𑀤𑁂𑀲𑀦𑀸𑀬 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀮𑀚𑁆𑀚𑀸 𑀦𑀸𑀫 ‘‘𑀲𑀻𑀮𑀲𑁆𑀲 𑀚𑀸𑀢𑀺𑀬𑀸 𑀘 𑀕𑀼𑀡𑀤𑁄𑀲𑀧𑀓𑀸𑀲𑀦𑁂𑀦 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀧𑀭𑀺𑀲𑀸𑀬 𑀧𑀜𑁆𑀜𑀸𑀢𑀢𑀸. 𑀏𑀢𑁆𑀢𑀓𑀧𑀭𑀫𑀸𑀢𑀺 𑀏𑀢𑁆𑀢𑀓𑀉𑀓𑁆𑀓𑀁𑀲𑀓𑁄𑀝𑀺𑀓𑀸 𑀧𑀜𑁆𑀘 𑀲𑀻𑀮𑀸𑀦𑀺, 𑀯𑁂𑀤𑀢𑁆𑀢𑀬𑀯𑀺𑀪𑀸𑀯𑀦𑀁 𑀧𑀜𑁆𑀜𑀜𑁆𑀘 𑀮𑀓𑁆𑀔𑀡𑀸𑀤𑀺𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀚𑀸𑀦𑀦𑀁 𑀦𑀢𑁆𑀣𑀺, 𑀓𑁂𑀯𑀮𑀁 𑀢𑀢𑁆𑀣 𑀯𑀘𑀻𑀧𑀭𑀫𑀸 𑀫𑀬𑀦𑁆𑀢𑀺 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀲𑀻𑀮𑀧𑀜𑁆𑀜𑀸𑀡𑀦𑁆𑀢𑀺 𑀯𑀘𑀦𑀫𑁂𑀯 𑀧𑀭𑀫𑀁 𑀅𑀫𑁆𑀳𑀸𑀓’’𑀦𑁆𑀢𑀺. ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺 𑀇𑀤𑀁 𑀦𑀺𑀬𑁆𑀬𑀸𑀢𑀦𑀸𑀧𑁂𑀓𑁆𑀔𑀁 𑀲𑀻𑀮𑀦𑀺𑀤𑁆𑀤𑁂𑀲𑁂, 𑀢𑁂𑀦𑀸𑀳 ‘‘𑀲𑀻𑀮𑀫𑀺𑀘𑁆𑀘𑁂𑀯 𑀦𑀺𑀬𑁆𑀬𑀸𑀢𑀺𑀢’’𑀦𑁆𑀢𑀺. 𑀲𑀸𑀫𑀜𑁆𑀜𑀨𑀮𑁂 𑀧𑀦 ‘‘𑀲𑀸𑀫𑀜𑁆𑀜𑀨𑀮’’ 𑀫𑀺𑀘𑁆𑀘𑁂𑀯 𑀦𑀺𑀬𑁆𑀬𑀸𑀢𑀺𑀢𑀁, 𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁂 𑀧𑀦 𑀛𑀸𑀦𑀧𑀜𑁆𑀜𑀁 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀯𑀲𑁂𑀦𑁂𑀯 𑀧𑀜𑁆𑀜𑀸𑀦𑀺𑀬𑁆𑀬𑀸𑀢𑀦𑀁 𑀓𑀢𑀁, 𑀢𑁂𑀦𑀸𑀳 ‘‘𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀻’’𑀢𑀺.

𑀲𑁄𑀡𑀤𑀡𑁆𑀟𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁩𑁨𑁧-𑁨. 𑀦𑀢𑁆𑀢𑀸𑀢𑀺 𑀧𑀼𑀢𑁆𑀢𑀧𑀼𑀢𑁆𑀢𑁄. 𑀅𑀕𑀸𑀭𑀯𑀁 𑀦𑀸𑀫 𑀦𑀢𑁆𑀣𑀺, 𑀦 𑀘𑀸𑀬𑀁 𑀪𑀕𑀯𑀢𑀺 𑀅𑀕𑀸𑀭𑀯𑁂𑀦 ‘‘𑀅𑀳𑀜𑁆𑀘𑁂𑀯 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳, 𑀅𑀣 𑀔𑁄 𑀅𑀢𑁆𑀢𑀮𑀸𑀪𑀧𑀭𑀺𑀳𑀸𑀦𑀺𑀪𑀬𑁂𑀦. 𑀅𑀬𑀜𑁆𑀳𑀺 𑀬𑀣𑀸 𑀢𑀣𑀸 𑀅𑀢𑁆𑀢𑀦𑁄 𑀫𑀳𑀸𑀚𑀦𑀲𑁆𑀲 𑀲𑀫𑁆𑀪𑀸𑀯𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑁄𑀳𑀜𑁆𑀜𑁂𑀦 𑀧𑀭𑁂 𑀯𑀺𑀫𑁆𑀳𑀸𑀧𑁂𑀢𑁆𑀯𑀸 𑀮𑀸𑀪𑀼𑀧𑁆𑀧𑀸𑀤𑀁 𑀦𑀺𑀚𑀺𑀕𑀺𑀲𑀦𑁆𑀢𑁄 𑀯𑀺𑀘𑀭𑀢𑀺, 𑀢𑀲𑁆𑀫𑀸 𑀢𑀣𑀸 𑀅𑀯𑁄𑀘, 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀓𑀺𑀭𑀸’’𑀢𑀺𑀆𑀤𑀺.

𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬𑀸𑀢𑀺 𑀬𑀸𑀤𑀺𑀲𑀻 𑀢𑀤𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀧𑁆𑀧𑀯𑀢𑁆𑀢𑀺, 𑀢𑀤𑀦𑀼𑀭𑀽𑀧𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑀤𑀸 𑀢𑀸𑀤𑀺𑀲𑀲𑁆𑀲 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀲𑁆𑀲 𑀅𑀪𑀸𑀯𑀢𑁄 𑀓𑁂𑀯𑀮𑀁 𑀅𑀩𑁆𑀪𑀼𑀤𑀬𑀦𑀺𑀲𑁆𑀲𑀺𑀢𑁄 𑀏𑀯 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀫𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑁆𑀯𑀸’’𑀢𑀺, 𑀧𑀘𑁆𑀘𑀓𑁆𑀔𑀢𑁄 𑀯𑀺𑀪𑀸𑀯𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀢𑁂𑀪𑀽𑀫𑀓𑁂 𑀓𑀼𑀲𑀮𑁂 𑀥𑀫𑁆𑀫𑁂, ‘‘𑀘𑀢𑀼𑀪𑀽𑀫𑀓𑁂’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯, 𑀢𑁂𑀦𑁂𑀯𑀸𑀳 ‘‘𑀆𑀬𑀢𑀺𑀁 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀯𑀸𑀲𑀦𑀸𑀪𑀸𑀕𑀺𑀬𑀸 𑀯𑀸’’𑀢𑀺. 𑀢𑀢𑁆𑀣𑀸𑀢𑀺 𑀓𑀼𑀲𑀮𑀥𑀫𑁆𑀫𑁂 𑀬𑀣𑀸 𑀲𑀫𑀸𑀤𑀧𑀺𑀢𑁂. 𑀦𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀁 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸𑀢𑀺 𑀲𑀫𑁆𑀫𑀤𑁂𑀯 𑀉𑀧𑀭𑀽𑀧𑀭𑀺 𑀦𑀺𑀲𑀸𑀦𑁂𑀢𑁆𑀯𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀁 𑀆𑀧𑀸𑀤𑁂𑀢𑁆𑀯𑀸. 𑀢𑀁 𑀧𑀦 𑀅𑀢𑁆𑀣𑀢𑁄 𑀢𑀢𑁆𑀣 𑀉𑀲𑁆𑀲𑀸𑀳𑀚𑀦𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀉𑀲𑁆𑀲𑀸𑀳𑀁 𑀓𑀢𑁆𑀯𑀸’’𑀢𑀺. 𑀏𑀯𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀉𑀲𑁆𑀲𑀸𑀳𑀢𑀸, 𑀏𑀯𑀭𑀽𑀧𑀁 𑀕𑀼𑀡𑀲𑀫𑀗𑁆𑀕𑀺𑀢𑀸 𑀘 𑀦𑀺𑀬𑀫𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀅𑀢𑁆𑀣𑀲𑀫𑁆𑀧𑀸𑀤𑀦𑀻𑀢𑀺 𑀏𑀯𑀁 𑀲𑀉𑀲𑁆𑀲𑀸𑀳𑀢𑀸𑀬, 𑀅𑀜𑁆𑀜𑁂𑀳𑀺 𑀘 𑀢𑀲𑁆𑀫𑀺𑀁 𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀳𑀺 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀲𑀫𑁆𑀫𑀤𑁂𑀯 𑀳𑀝𑁆𑀞𑀢𑀼𑀝𑁆𑀞𑀪𑀸𑀯𑀁 𑀆𑀧𑀸𑀤𑁂𑀢𑁆𑀯𑀸.

𑀬𑀤𑀺 𑀪𑀕𑀯𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀺, 𑀅𑀣 𑀓𑀲𑁆𑀫𑀸 𑀲𑁄 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀩𑁆𑀭𑀸𑀳𑁆𑀫𑀡𑁄 𑀧𑀦𑀸’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀪𑀕𑀯𑀸 𑀢𑀲𑁆𑀲 𑀢𑀣𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀻𑀢𑀺 𑀆𑀳 ‘‘𑀓𑁂𑀯𑀮𑀫𑀲𑁆𑀲𑀸’’𑀢𑀺𑀆𑀤𑀺. 𑀦 𑀳𑀺 𑀪𑀕𑀯𑀢𑁄 𑀦𑀺𑀭𑀢𑁆𑀣𑀓𑀸 𑀤𑁂𑀲𑀦𑀸 𑀳𑁄𑀢𑀻𑀢𑀺.

𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.