𑁩. 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀤𑁆𑀥𑀸𑀦𑀕𑀫𑀦𑀯𑀡𑁆𑀡𑀦𑀸

𑁨𑁫𑁪. 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸𑀢𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀳𑁂𑀝𑁆𑀞𑀸 𑀅𑀕𑁆𑀕𑀳𑀺𑀢𑀢𑀸𑀬 𑀅𑀧𑀼𑀩𑁆𑀩𑀲𑁆𑀲 𑀧𑀤𑀲𑁆𑀲 𑀯𑀡𑁆𑀡𑀦𑀸 𑀅𑀢𑁆𑀣𑀯𑀺𑀪𑀚𑀦𑀸. ‘‘𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀸𑀕𑀢𑀫𑀢𑁆𑀣’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀳𑀺 𑀯𑀼𑀢𑁆𑀢𑀁. 𑀚𑀦𑀧𑀤𑀺𑀦𑁄𑀢𑀺 𑀚𑀦𑀧𑀤𑀯𑀦𑁆𑀢𑁄, 𑀚𑀦𑀧𑀤𑀲𑁆𑀲 𑀯𑀸 𑀇𑀲𑁆𑀲𑀭𑀸 𑀭𑀸𑀚𑀓𑀼𑀫𑀸𑀭𑀸 𑀕𑁄𑀢𑁆𑀢𑀯𑀲𑁂𑀦 𑀓𑁄𑀲𑀮𑀸 𑀦𑀸𑀫. 𑀬𑀤𑀺 𑀏𑀓𑁄 𑀚𑀦𑀧𑀤𑁄, 𑀓𑀣𑀁 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀭𑀽𑀴𑁆𑀳𑀺𑀲𑀤𑁆𑀤𑁂𑀦𑀸’’𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀼𑀢𑁆𑀢𑁂 𑀯𑀺𑀬 𑀈𑀤𑀺𑀲𑀮𑀺𑀗𑁆𑀕𑀯𑀘𑀦𑀸𑀦𑀺 𑀇𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀭𑀽𑀴𑁆𑀳𑀺 𑀬𑀣𑀸 𑀅𑀜𑁆𑀜𑀢𑁆𑀣𑀧𑀺 ‘‘𑀓𑀼𑀭𑀽𑀲𑀼 𑀯𑀺𑀳𑀭𑀢𑀺, 𑀅𑀗𑁆𑀕𑁂𑀲𑀼 𑀯𑀺𑀳𑀭𑀢𑀻’’𑀢𑀺 𑀘. 𑀢𑀩𑁆𑀩𑀺𑀲𑁂𑀲𑀦𑁂𑀧𑀺 𑀚𑀦𑀧𑀤-𑀲𑀤𑁆𑀤𑁂 𑀚𑀸𑀢𑀺-𑀲𑀤𑁆𑀤𑁂 𑀏𑀓𑀯𑀘𑀦𑀫𑁂𑀯. 𑀧𑁄𑀭𑀸𑀡𑀸 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀦𑁄, 𑀢𑁂𑀦 𑀧𑀼𑀣𑀼𑀅𑀢𑁆𑀣𑀯𑀺𑀲𑀬𑀢𑀸𑀬 𑀏𑀯𑀜𑁆𑀘𑁂𑀢𑀁 𑀧𑀼𑀣𑀼𑀯𑀘𑀦𑀦𑁆𑀢𑀺 𑀯𑀓𑁆𑀔𑀫𑀸𑀦𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀩𑀳𑀼𑀧𑁆𑀧𑀪𑁂𑀤𑁄 𑀳𑀺 𑀲𑁄 𑀧𑀤𑁂𑀲𑁄 𑀢𑀺𑀬𑁄𑀚𑀦𑀲𑀢𑀧𑀭𑀺𑀫𑀸𑀡𑀢𑀸𑀬. 𑀦𑀗𑁆𑀕𑀮𑀸𑀦𑀺𑀧𑀺 𑀙𑀟𑁆𑀟𑁂𑀢𑁆𑀯𑀸𑀢𑀺 𑀓𑀫𑁆𑀫𑀧𑁆𑀧𑀳𑀸𑀦𑀯𑀲𑁂𑀦 𑀦𑀗𑁆𑀕𑀮𑀸𑀦𑀺𑀧𑀺 𑀧𑀳𑀸𑀬, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁. 𑀦 𑀓𑁂𑀯𑀮𑀁 𑀓𑀲𑁆𑀲𑀓𑀸 𑀏𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀧𑀳𑀸𑀬 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀁𑀲𑀼. ‘‘𑀲𑁄 𑀧𑀤𑁂𑀲𑁄’’𑀢𑀺 𑀧𑀤𑁂𑀲𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁, 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀸, 𑀢𑁂 𑀧𑀤𑁂𑀲𑀸𑀢𑀺 𑀅𑀢𑁆𑀣𑁄. 𑀓𑁄𑀲𑀮𑀸𑀢𑀺 𑀯𑀼𑀘𑁆𑀘𑀢𑀺 𑀓𑀼𑀲𑀮𑀸 𑀏𑀯 𑀓𑁄𑀲𑀮𑀸𑀢𑀺 𑀓𑀢𑁆𑀯𑀸.

𑀘𑀸𑀭𑀺𑀓𑀦𑁆𑀢𑀺 𑀘𑀭𑀡𑀁, 𑀘𑀭𑀡𑀁 𑀯𑀸 𑀘𑀸𑀭𑁄, 𑀲𑁄 𑀏𑀯 𑀘𑀸𑀭𑀺𑀓𑀸. 𑀢𑀬𑀺𑀤𑀁 𑀫𑀕𑁆𑀕𑀕𑀫𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀘𑀼𑀡𑁆𑀡𑀺𑀓𑀕𑀫𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀤𑁆𑀥𑀸𑀦𑀕𑀫𑀦𑀁 𑀕𑀘𑁆𑀙𑀦𑁆𑀢𑁄’’𑀢𑀺. 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀘𑀸𑀭𑀺𑀓𑀸 𑀘 𑀦𑀸𑀫𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀽𑀭𑁂𑀧𑀻𑀢𑀺 𑀦𑀸𑀢𑀺𑀤𑀽𑀭𑁂𑀧𑀺. 𑀲𑀳𑀲𑀸 𑀕𑀫𑀦𑀦𑁆𑀢𑀺 𑀲𑀻𑀖𑀕𑀫𑀦𑀁. 𑀫𑀳𑀸𑀓𑀲𑁆𑀲𑀧𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀺𑀁 𑀏𑀓𑀤𑁂𑀲𑁂𑀦 𑀯𑀢𑁆𑀯𑀸 𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀯𑀢𑁆𑀣𑀼𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀓𑀣𑁂𑀢𑀼𑀁 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀆𑀓𑀸𑀲𑀕𑀸𑀫𑀻𑀳𑀺 𑀏𑀯 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑁄 ‘‘𑀙𑀴𑀪𑀺𑀜𑁆𑀜𑀸𑀦𑀁 𑀆𑀭𑁄𑀘𑁂𑀳𑀻’’𑀢𑀺 𑀆𑀳.

𑀲𑀗𑁆𑀖𑀓𑀫𑁆𑀫𑀯𑀲𑁂𑀦 𑀲𑀺𑀚𑁆𑀛𑀫𑀸𑀦𑀸𑀧𑀺 𑀉𑀧𑀲𑀫𑁆𑀧𑀤𑀸 𑀲𑀢𑁆𑀣𑀼 𑀆𑀡𑀸𑀯𑀲𑁂𑀦𑁂𑀯 𑀲𑀺𑀚𑁆𑀛𑀦𑀢𑁄 ‘‘𑀩𑀼𑀤𑁆𑀥𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀲𑁆𑀲𑁂𑀯 𑀢𑀲𑁆𑀲 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀤𑀲𑁆𑀲𑀸𑀫𑀻’’𑀢𑀺 𑀅𑀯𑁄𑀘𑀸𑀢𑀺 𑀯𑀤𑀦𑁆𑀢𑀺. 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸.

𑀦𑀯𑀬𑁄𑀚𑀦𑀲𑀢𑀺𑀓𑀫𑁆𑀧𑀺 𑀞𑀸𑀦𑀁 𑀫𑀚𑁆𑀛𑀺𑀫𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑀫𑁂𑀯, 𑀢𑀢𑁄 𑀧𑀭𑀁 𑀦𑀸𑀥𑀺𑀧𑁆𑀧𑁂𑀢𑀁 𑀢𑀼𑀭𑀺𑀢𑀘𑀸𑀭𑀺𑀓𑀸𑀯𑀲𑁂𑀦 𑀅𑀕𑀫𑀦𑀢𑁄. 𑀲𑀫𑀦𑁆𑀢𑀸𑀢𑀺 𑀕𑀢𑀕𑀢𑀝𑁆𑀞𑀸𑀦𑀲𑁆𑀲 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀲𑀫𑀦𑁆𑀢𑀢𑁄. 𑀅𑀜𑁆𑀜𑁂𑀦𑀧𑀺 𑀓𑀸𑀭𑀡𑁂𑀦𑀸𑀢𑀺 𑀪𑀺𑀓𑁆𑀔𑀽𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀢𑀭𑀼𑀡𑀪𑀸𑀯𑀢𑁄 𑀅𑀜𑁆𑀜𑁂𑀦𑀧𑀺 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀯𑁂𑀦𑁂𑀬𑁆𑀬𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑁂𑀦 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀑𑀲𑀭𑀢𑀺.‘‘𑀲𑀢𑁆𑀢𑀳𑀺 𑀯𑀸’’𑀢𑀺𑀆𑀤𑀺 ‘‘𑀏𑀓𑀫𑀸𑀲𑀁 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀸𑀬𑀸𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀩𑀤𑁆𑀥𑀯𑀸𑀲𑀯𑀲𑁂𑀦 𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀲𑁆𑀲 𑀲𑀭𑀻𑀭𑀲𑁆𑀲 𑀯𑀺𑀘𑀭𑀡𑁂𑀦 𑀨𑀸𑀲𑀼𑀓𑀢𑁆𑀣𑀸𑀬. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑀸𑀪𑀺𑀓𑀗𑁆𑀔𑀦𑀢𑁆𑀣𑀸𑀬𑀸𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢 (𑀅. 𑀦𑀺. 𑁭.𑁭𑁨) 𑀫𑀖𑀤𑁂𑀯𑀚𑀸𑀢𑀓𑀸𑀤𑀺 (𑀚𑀸. 𑁧.𑁧.𑁯) 𑀤𑁂𑀲𑀦𑀸𑀦𑀁 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑀁 𑀆𑀓𑀗𑁆𑀔𑀫𑀸𑀦𑁂𑀦. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑁂 (𑀧𑀸𑀘𑀺. 𑁩𑁨𑁮) 𑀯𑀺𑀬 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀢𑁆𑀣𑀸𑀬. 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑁂 𑀅𑀗𑁆𑀕𑀼𑀮𑀺𑀫𑀸𑀮𑀸𑀤𑀺𑀓𑁂 (𑀫. 𑀦𑀺. 𑁨.𑁩𑁪𑁭) 𑀩𑁄𑀥𑀦𑀢𑁆𑀣𑀸𑀬. 𑀓𑀜𑁆𑀘𑀺, 𑀓𑀢𑀺𑀧𑀬𑁂 𑀯𑀸 𑀧𑀼𑀕𑁆𑀕𑀮𑁂 𑀉𑀤𑁆𑀤𑀺𑀲𑁆𑀲 𑀘𑀸𑀭𑀺𑀓𑀸 𑀦𑀺𑀩𑀤𑁆𑀥𑀘𑀸𑀭𑀺𑀓𑀸. 𑀢𑀤𑀜𑁆𑀜𑀸 𑀅𑀦𑀺𑀩𑀤𑁆𑀥𑀘𑀸𑀭𑀺𑀓𑀸.

𑀤𑀲𑀲𑀳𑀲𑁆𑀲𑀺 𑀮𑁄𑀓𑀥𑀸𑀢𑀼𑀬𑀸𑀢𑀺 𑀚𑀸𑀢𑀺𑀔𑁂𑀢𑁆𑀢𑀪𑀽𑀢𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂. 𑀢𑀢𑁆𑀣 𑀳𑀺 𑀲𑀢𑁆𑀢𑁂 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑁂 𑀧𑀲𑁆𑀲𑀺𑀢𑀼𑀁 𑀩𑀼𑀤𑁆𑀥𑀜𑀸𑀡𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 𑀞𑀺𑀢𑁄 𑀪𑀕𑀯𑀸 𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁄𑀢𑀺 𑀢𑀲𑁆𑀲 𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑀁 𑀉𑀧𑀕𑀢𑁄. 𑀪𑀕𑀯𑀸 𑀓𑀺𑀭 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 ‘‘𑀬𑁂 𑀲𑀢𑁆𑀢𑀸 𑀪𑀩𑁆𑀩𑀸 𑀧𑀭𑀺𑀧𑀸𑀓𑀜𑀸𑀡𑀸 𑀅𑀚𑁆𑀚 𑀫𑀬𑀸 𑀯𑀺𑀦𑁂𑀢𑀩𑁆𑀩𑀸, 𑀢𑁂 𑀫𑀬𑁆𑀳𑀁 𑀜𑀸𑀡𑀲𑁆𑀲 𑀉𑀧𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀬 𑀲𑀫𑀦𑁆𑀦𑀸𑀳𑀭𑀢𑀺. 𑀢𑀲𑁆𑀲 𑀲𑀳 𑀲𑀫𑀦𑁆𑀦𑀸𑀳𑀸𑀭𑀸 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀩𑀳𑀽 𑀯𑀸 𑀢𑀤𑀸 𑀯𑀺𑀦𑀬𑀽𑀧𑀕𑀸 𑀯𑁂𑀦𑁂𑀬𑁆𑀬𑀸 𑀜𑀸𑀡𑀲𑁆𑀲 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺 𑀅𑀬𑀫𑁂𑀢𑁆𑀣 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀏𑀯𑀫𑁆𑀧𑀺 𑀆𑀧𑀸𑀣𑀫𑀸𑀕𑀢𑀸𑀦𑀁 𑀧𑀦 𑀦𑁂𑀲𑀁 𑀉𑀧𑀦𑀺𑀲𑁆𑀲𑀬𑀁 𑀧𑀼𑀩𑁆𑀩𑀘𑀭𑀺𑀬𑀁 𑀧𑀼𑀩𑁆𑀩𑀳𑁂𑀢𑀼𑀁 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀜𑁆𑀘 𑀧𑀝𑀺𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑀺, 𑀢𑁂𑀦𑀸𑀳 ‘‘𑀅𑀣 𑀪𑀕𑀯𑀸’’𑀢𑀺𑀆𑀤𑀺. 𑀯𑀸𑀤𑀧𑀝𑀺𑀯𑀸𑀤𑀁 𑀓𑀢𑁆𑀯𑀸𑀢𑀺 ‘‘𑀏𑀯𑀁 𑀦𑀼 𑀢𑁂 𑀅𑀫𑁆𑀩𑀝𑁆𑀞𑀸’’𑀢𑀺𑀆𑀤𑀺𑀦𑀸 𑀫𑀬𑀸 𑀯𑀼𑀢𑁆𑀢𑀯𑀘𑀦𑀲𑁆𑀲 ‘‘𑀬𑁂 𑀘 𑀔𑁄 𑀢𑁂 𑀪𑁄 𑀕𑁄𑀢𑀫 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀯𑀘𑀦𑀁 𑀓𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀇𑀩𑁆𑀪𑀯𑀸𑀤𑀦𑀺𑀧𑀸𑀢𑀦𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀁 𑀅𑀲𑀫𑁆𑀪𑀺𑀯𑀸𑀓𑁆𑀬𑀁 𑀲𑀸𑀥𑀼𑀲𑀪𑀸𑀯𑀸𑀬 𑀯𑀸𑀘𑀸𑀬 𑀯𑀢𑁆𑀢𑀼𑀁 𑀅𑀬𑀼𑀢𑁆𑀢𑀯𑀘𑀦𑀁 𑀯𑀓𑁆𑀔𑀢𑀺. 𑀦𑀺𑀩𑁆𑀩𑀺𑀲𑁂𑀯𑀦𑀦𑁆𑀢𑀺 𑀯𑀺𑀕𑀢𑀢𑀼𑀤𑀦𑀁, 𑀫𑀸𑀦𑀤𑀩𑁆𑀩𑀯𑀲𑁂𑀦 𑀅𑀧𑀕𑀢𑀧𑀭𑀺𑀧𑁆𑀨𑀦𑁆𑀤𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀯𑀲𑀭𑀺𑀢𑀩𑁆𑀩𑀦𑁆𑀢𑀺 𑀉𑀧𑀕𑀦𑁆𑀢𑀩𑁆𑀩𑀁. 𑀇𑀘𑁆𑀙𑀸𑀦𑀗𑁆𑀕𑀮𑁂𑀢𑀺 𑀇𑀤𑀁 𑀢𑀤𑀸 𑀪𑀕𑀯𑀢𑁄 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀁 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀦𑁆𑀢𑀺 𑀓𑀢𑁆𑀯𑀸. ‘‘𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂’’𑀢𑀺 𑀦𑀺𑀯𑀸𑀲𑀦𑀝𑁆𑀞𑀸𑀦𑀤𑀲𑁆𑀲𑀦𑀁 𑀅𑀥𑀺𑀓𑀭𑀡𑁂 𑀪𑀼𑀫𑁆𑀫𑀦𑁆𑀢𑀺. 𑀢𑀤𑀼𑀪𑀬𑀁 𑀯𑀺𑀯𑀭𑀦𑁆𑀢𑁄 ‘‘𑀇𑀘𑁆𑀙𑀸𑀦𑀗𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀥𑀫𑁆𑀫𑀭𑀸𑀚𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀲𑁄 𑀅𑀥𑀫𑁆𑀫𑀦𑀺𑀕𑁆𑀕𑀡𑁆𑀳𑀦𑀧𑀭𑀸 𑀧𑀝𑀺𑀧𑀢𑁆𑀢𑀺, 𑀲𑀸 𑀘 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀲𑁂𑀦𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑀔𑀦𑁆𑀥𑀸𑀯𑀸𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸𑀪𑀺𑀭𑀼𑀘𑀺𑀢𑁂𑀦𑀸𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀻𑀲𑀼 𑀬𑁂𑀦 𑀬𑁂𑀦 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑁂𑀦 𑀯𑀺𑀳𑀸𑀭𑁂𑀦.

𑀧𑁄𑀓𑁆𑀔𑀭𑀲𑀸𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁫𑁫. 𑀫𑀦𑁆𑀢𑁂𑀢𑀺 𑀇𑀭𑀼𑀩𑁆𑀩𑁂𑀤𑀸𑀤𑀺𑀫𑀦𑁆𑀢𑀲𑀢𑁆𑀣𑁂. 𑀧𑁄𑀓𑁆𑀔𑀭𑁂 𑀓𑀫𑀮𑁂 𑀲𑀬𑀫𑀸𑀦𑁄 𑀦𑀺𑀲𑀻𑀤𑀻𑀢𑀺 𑀧𑁄𑀓𑁆𑀔𑀭𑀲𑀸𑀢𑀻. 𑀲𑀸𑀢𑀺 𑀯𑀼𑀘𑁆𑀘𑀢𑀺 𑀲𑀫𑀲𑀡𑁆𑀞𑀸𑀦𑀁, 𑀧𑁄𑀓𑁆𑀔𑀭𑁂 𑀲𑀡𑁆𑀞𑀸𑀦𑀸𑀯𑀬𑀯𑁂 𑀚𑀸𑀢𑁄𑀢𑀺 ‘‘𑀧𑁄𑀓𑁆𑀔𑀭𑀲𑀸𑀢𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑁂𑀢𑀧𑁄𑀓𑁆𑀔𑀭𑀲𑀤𑀺𑀲𑁄𑀢𑀺 𑀲𑁂𑀢𑀧𑀤𑀼𑀫𑀯𑀡𑁆𑀡𑁄. 𑀲𑀼𑀯𑀝𑁆𑀝𑀺𑀢𑀸𑀢𑀺 𑀯𑀝𑁆𑀝𑀪𑀸𑀯𑀲𑁆𑀲 𑀬𑀼𑀢𑁆𑀢𑀝𑁆𑀞𑀸𑀦𑁂 𑀲𑀼𑀝𑁆𑀞𑀼 𑀯𑀝𑁆𑀝𑀼𑀮𑀸. 𑀓𑀸𑀴𑀯𑀗𑁆𑀕𑀢𑀺𑀮𑀓𑀸𑀤𑀻𑀦𑀁 𑀅𑀪𑀸𑀯𑁂𑀦 𑀲𑀼𑀧𑀭𑀺𑀲𑀼𑀤𑁆𑀥𑀸.

𑀇𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀻𑀤𑀺𑀲𑁄 𑀧𑀼𑀩𑁆𑀩𑀬𑁄𑀕𑁄, 𑀬𑁂𑀦 𑀦𑀁 𑀪𑀕𑀯𑀸 𑀅𑀦𑀼𑀕𑁆𑀕𑀡𑁆𑀳𑀺𑀢𑀼𑀁 𑀢𑀁 𑀞𑀸𑀦𑀁 𑀉𑀧𑀕𑀢𑁄𑀢𑀺 𑀆𑀳 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺. 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀺 𑀢𑁂𑀦𑀸𑀬𑀁 𑀲𑀁𑀲𑁂𑀤𑀚𑁄 𑀚𑀸𑀢𑁄. 𑀦 𑀧𑀼𑀧𑁆𑀨𑀢𑀻𑀢𑀺 𑀦 𑀯𑀺𑀓𑀲𑀢𑀺. 𑀭𑀚𑀢𑀩𑀺𑀫𑁆𑀩𑀓𑀦𑁆𑀢𑀺 𑀭𑀽𑀧𑀺𑀬𑀫𑀬𑀁 𑀭𑀽𑀧𑀓𑀁.

𑀅𑀚𑁆𑀛𑀸𑀯𑀲𑀢𑀻𑀢𑀺 𑀏𑀢𑁆𑀣 𑀅𑀥𑀺-𑀲𑀤𑁆𑀤𑁄 𑀇𑀲𑁆𑀲𑀭𑀺𑀬𑀢𑁆𑀣𑀤𑀻𑀧𑀦𑁄, 𑀆𑀲𑀤𑁆𑀤𑁄 𑀫𑀭𑀺𑀬𑀸𑀤𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀪𑀯𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀳𑀺 𑀬𑀼𑀢𑁆𑀢𑀢𑁆𑀢𑀸 𑀳𑀺 𑀉𑀓𑁆𑀓𑀝𑁆𑀞𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁, 𑀢𑁂𑀦𑀸𑀳 ‘‘𑀉𑀧𑀲𑀕𑁆𑀕𑀯𑀲𑁂𑀦𑀸’’𑀢𑀺𑀆𑀤𑀺. 𑀬𑀸𑀬 𑀫𑀭𑀺𑀬𑀸𑀤𑀸𑀬𑀸𑀢𑀺 𑀬𑀸𑀬 𑀅𑀯𑀢𑁆𑀣𑀸𑀬.𑀦𑀕𑀭𑀲𑁆𑀲 𑀯𑀢𑁆𑀣𑀼𑀦𑁆𑀢𑀺 ‘‘𑀅𑀬𑀁 𑀔𑀡𑁄, 𑀲𑀼𑀫𑀼𑀳𑀼𑀢𑁆𑀢𑀁 𑀫𑀸 𑀅𑀢𑀺𑀓𑁆𑀓𑀫𑀻’’𑀢𑀺 𑀭𑀢𑁆𑀢𑀺𑀯𑀺𑀪𑀸𑀬𑀦𑀁 𑀅𑀦𑀼𑀭𑀓𑁆𑀔𑀦𑁆𑀢𑀸 𑀭𑀢𑁆𑀢𑀺𑀬𑀁 𑀉𑀓𑁆𑀓𑀸 𑀞𑀧𑁂𑀢𑁆𑀯𑀸 𑀉𑀓𑁆𑀓𑀸𑀲𑀼 𑀚𑀮𑀫𑀸𑀦𑀸𑀲𑀼 𑀦𑀕𑀭𑀲𑁆𑀲 𑀯𑀢𑁆𑀣𑀼𑀁 𑀅𑀕𑁆𑀕𑀳𑁂𑀲𑀼𑀁, 𑀢𑀲𑁆𑀫𑀸 𑀉𑀓𑁆𑀓𑀸𑀲𑀼 𑀞𑀺𑀢𑀸𑀢𑀺 𑀉𑀓𑁆𑀓𑀝𑁆𑀞𑀸, 𑀉𑀓𑁆𑀓𑀸𑀲𑀼 𑀯𑀺𑀚𑁆𑀚𑁄𑀢𑀬𑀦𑁆𑀢𑀻𑀲𑀼 𑀞𑀺𑀢𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀫𑀽𑀮𑀯𑀺𑀪𑀼𑀚𑀸𑀤𑀺𑀧𑀓𑁆𑀔𑁂𑀧𑁂𑀦 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀉𑀓𑁆𑀓𑀸𑀲𑀼 𑀞𑀺𑀢𑀸𑀲𑀼 𑀞𑀺𑀢𑀸 𑀆𑀲𑀻𑀢𑀺 𑀉𑀓𑁆𑀓𑀝𑁆𑀞𑀸. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸, 𑀉𑀧𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸, 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑀸 𑀘 𑀢𑀁 𑀦𑀕𑀭𑀁 𑀉𑀓𑁆𑀓𑀝𑁆𑀞𑀕𑀼𑀡𑀬𑁄𑀕𑀢𑁄 𑀉𑀓𑁆𑀓𑀝𑁆𑀞𑀸𑀢𑀺 𑀦𑀸𑀫𑀁 𑀮𑀪𑀻’’𑀢𑀺. 𑀢𑀲𑁆𑀲𑀸𑀢𑀺 ‘‘𑀉𑀓𑁆𑀓𑀝𑁆𑀞’’𑀦𑁆𑀢𑀺 𑀉𑀧𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑀧𑀤𑀲𑁆𑀲. 𑀅𑀦𑀼𑀧𑀬𑁄𑀕𑀢𑁆𑀢𑀸𑀢𑀺 𑀯𑀺𑀲𑁂𑀲𑀦𑀪𑀸𑀯𑁂𑀦 𑀅𑀦𑀼𑀧𑀬𑀼𑀢𑁆𑀢𑀢𑁆𑀢𑀸. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀲𑀢𑁆𑀢𑀼𑀲𑁆𑀲𑀤’’𑀦𑁆𑀢𑀺𑀆𑀤𑀺𑀧𑀤𑁂𑀲𑀼. 𑀬𑀣𑀸𑀯𑀺𑀥𑀺 𑀳𑀺 𑀅𑀦𑀼𑀧𑀬𑁄𑀕𑁄 𑀧𑀼𑀭𑀺𑀫𑀲𑁆𑀫𑀺𑀁. 𑀢𑀢𑁆𑀣𑀸𑀢𑀺 ‘‘𑀉𑀧𑀲𑀕𑁆𑀕𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀥𑀸𑀦𑁂. ‘‘𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁂𑀦 𑀲𑀤𑁆𑀤𑀮𑀓𑁆𑀔𑀡𑀸𑀦𑀼𑀕𑀢𑁄 𑀯𑀸𑀬𑀁 𑀲𑀤𑁆𑀤𑀧𑁆𑀧𑀬𑁄𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀅𑀦𑀼𑀅𑀥𑀺𑀆𑀇𑀢𑀺𑀏𑀯𑀁𑀧𑀼𑀩𑁆𑀩𑀓𑁂 𑀯𑀲𑀦𑀓𑀺𑀭𑀺𑀬𑀸𑀞𑀸𑀦𑁂 𑀉𑀧𑀬𑁄𑀕𑀯𑀘𑀦𑀫𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀲𑀤𑁆𑀤𑀯𑀺𑀤𑀽 𑀇𑀘𑁆𑀙𑀦𑁆𑀢𑀺.

𑀉𑀲𑁆𑀲𑀤𑀢𑀸 𑀦𑀸𑀫𑁂𑀢𑁆𑀣 𑀩𑀳𑀼𑀮𑀢𑀸𑀢𑀺, 𑀢𑀁 𑀩𑀳𑀼𑀮𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀳𑀼𑀚𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀳𑁂𑀢𑁆𑀯𑀸 𑀧𑁄𑀲𑁂𑀢𑀩𑁆𑀩𑀁 𑀧𑁄𑀲𑀸𑀯𑀦𑀺𑀬𑀁. 𑀆𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸.

𑀭𑀜𑁆𑀜𑀸 𑀯𑀺𑀬 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀸 𑀭𑀸𑀚𑀪𑁄𑀕𑁆𑀕𑀁. 𑀭𑀜𑁆𑀜𑁄 𑀤𑀸𑀬𑀪𑀽𑀢𑀦𑁆𑀢𑀺 𑀓𑀼𑀮𑀧𑀭𑀫𑁆𑀧𑀭𑀸𑀬 𑀬𑁄𑀕𑁆𑀬𑀪𑀸𑀯𑁂𑀦 𑀭𑀸𑀚𑀢𑁄 𑀮𑀤𑁆𑀥𑀤𑀸𑀬𑀪𑀽𑀢𑀁. 𑀢𑁂𑀦𑀸𑀳 ‘‘𑀤𑀸𑀬𑀚𑁆𑀚𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀭𑀸𑀚𑀦𑀻𑀳𑀸𑀭𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀉𑀤𑁆𑀥𑀁 𑀧𑀭𑀺𑀪𑁄𑀕𑀮𑀸𑀪𑀲𑁆𑀲 𑀲𑁂𑀝𑁆𑀞𑀤𑁂𑀬𑁆𑀬𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀳 ‘‘𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀸𑀚𑀲𑀗𑁆𑀔𑁂𑀧𑁂𑀦 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺. ‘‘𑀲𑀩𑁆𑀩𑀁 𑀙𑁂𑀚𑁆𑀚𑀪𑁂𑀚𑁆𑀚’’𑀦𑁆𑀢𑀺 𑀲𑀭𑀻𑀭𑀤𑀡𑁆𑀟𑀥𑀦𑀤𑀡𑁆𑀟𑀸𑀤𑀺 𑀪𑁂𑀤𑀁 𑀲𑀩𑁆𑀩𑀁 𑀤𑀡𑁆𑀟𑀫𑀸𑀳. 𑀦𑀤𑀻𑀢𑀺𑀢𑁆𑀣𑀧𑀩𑁆𑀩𑀢𑀸𑀤𑀻𑀲𑀽𑀢𑀺 𑀦𑀤𑀻𑀢𑀺𑀢𑁆𑀣𑀧𑀩𑁆𑀩𑀢𑀧𑀸𑀤𑀕𑀸𑀫𑀤𑁆𑀯𑀸𑀭𑀅𑀝𑀯𑀺𑀫𑀼𑀔𑀸𑀤𑀻𑀲𑀼. ‘‘𑀭𑀸𑀚𑀤𑀸𑀬’’𑀦𑁆𑀢𑀺 𑀇𑀫𑀺𑀦𑀸𑀯 𑀭𑀜𑁆𑀜𑁄 𑀤𑀺𑀦𑁆𑀦𑀪𑀸𑀯𑁂 𑀲𑀺𑀤𑁆𑀥𑁂 ‘‘𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦’’𑀦𑁆𑀢𑀺 𑀯𑀘𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀤𑀸𑀬𑀓𑀭𑀸𑀚𑀤𑀻𑀧𑀦𑀢𑁆𑀣’’𑀦𑁆𑀢𑀺𑀆𑀤𑀺. 𑀦𑀺𑀲𑁆𑀲𑀝𑁆𑀞𑀧𑀭𑀺𑀘𑁆𑀘𑀢𑁆𑀢𑀦𑁆𑀢𑀺 𑀫𑀼𑀢𑁆𑀢𑀘𑀸𑀕𑀯𑀲𑁂𑀦 𑀧𑀭𑀺𑀘𑁆𑀘𑀢𑁆𑀢𑀁 𑀓𑀢𑁆𑀯𑀸. 𑀏𑀯𑀜𑁆𑀳𑀺 𑀢𑀁 𑀲𑁂𑀝𑁆𑀞𑀤𑁂𑀬𑁆𑀬𑀁 𑀉𑀢𑁆𑀢𑀫𑀤𑁂𑀬𑁆𑀬𑀁 𑀚𑀸𑀢𑀁.

𑀉𑀧𑀮𑀪𑀻𑀢𑀺 𑀲𑀯𑀦𑀯𑀲𑁂𑀦 𑀉𑀧𑀮𑀪𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀢𑀤𑁆𑀯𑀸𑀭…𑀧𑁂… 𑀅𑀜𑁆𑀜𑀸𑀲𑀻’’𑀢𑀺 𑀆𑀳. 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀲𑀩𑁆𑀩𑀫𑁆𑀧𑀺 𑀯𑀸𑀓𑁆𑀬𑀁 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀦𑁆𑀢𑀺 𑀆𑀳 ‘‘𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄’’𑀢𑀺. ‘‘𑀅𑀯𑀥𑀸𑀭𑀡𑀢𑁆𑀣𑁂’’𑀢𑀺 𑀧𑀦 𑀇𑀫𑀺𑀦𑀸 𑀇𑀝𑁆𑀞𑀢𑁄𑀯𑀥𑀸𑀭𑀡𑀢𑁆𑀣𑀁 𑀔𑁄-𑀲𑀤𑁆𑀤𑀕𑁆𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀲𑁆𑀲𑁄𑀲𑀻’’𑀢𑀺 𑀧𑀤𑀁 𑀔𑁄-𑀲𑀤𑁆𑀤𑁂 𑀕𑀳𑀺𑀢𑁂 𑀢𑁂𑀦 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀁 𑀯𑀺𑀬 𑀳𑁄𑀦𑁆𑀢𑀁 𑀧𑀽𑀭𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑁂𑀦 𑀘 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑀸𑀦𑀺 𑀲𑀺𑀮𑀺𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀅𑀕𑁆𑀕𑀳𑀺𑀢𑁂𑀢𑀺 𑀆𑀳 ‘‘𑀧𑀤𑀧𑀽𑀭𑀡𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯𑀸’’𑀢𑀺. 𑀫𑀢𑁆𑀢-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄, 𑀢𑁂𑀦𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀤𑀻𑀧𑀦𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀏𑀯-𑀲𑀤𑁆𑀤𑁂𑀦 𑀧𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬 𑀏𑀓𑀦𑁆𑀢𑀺𑀓𑀢𑀸.

𑀲𑀫𑀺𑀢𑀧𑀸𑀧𑀢𑁆𑀢𑀸𑀢𑀺 𑀅𑀘𑁆𑀘𑀦𑁆𑀢𑀁 𑀅𑀦𑀯𑀲𑁂𑀲𑀢𑁄 𑀲𑀯𑀸𑀲𑀦𑀁 𑀲𑀫𑀺𑀢𑀧𑀸𑀧𑀢𑁆𑀢𑀸. 𑀏𑀯𑀜𑁆𑀳𑀺 𑀩𑀸𑀳𑀺𑀭𑀓𑀯𑀺𑀭𑀸𑀕𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀸𑀧𑀲𑀫𑀦𑀢𑁄 𑀪𑀕𑀯𑀢𑁄 𑀧𑀸𑀧𑀲𑀫𑀦𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺, 𑀢𑁂𑀦𑀸𑀳 𑀯𑀼𑀢𑁆𑀢𑀜𑁆𑀳𑁂𑀢𑀦𑁆𑀢𑀺𑀆𑀤𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀦𑀺𑀧𑀸𑀢𑀸𑀦𑀁 𑀇𑀥 𑀅𑀦𑀼𑀲𑁆𑀲𑀯𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺. 𑀆𑀮𑀧𑀦𑀫𑀢𑁆𑀢𑀦𑁆𑀢𑀺 𑀧𑀺𑀬𑀸𑀮𑀸𑀧𑀯𑀘𑀦𑀫𑀢𑁆𑀢𑀁. 𑀧𑀺𑀬𑀲𑀫𑀼𑀤𑀸𑀳𑀸𑀭𑁄 𑀳𑁂𑀢𑁂 ‘‘𑀪𑁄’’𑀢𑀺 𑀯𑀸 ‘‘𑀆𑀯𑀼𑀲𑁄’’𑀢𑀺 𑀯𑀸 ‘‘𑀤𑁂𑀯𑀸𑀦𑀁 𑀧𑀺𑀬𑀸’’𑀢𑀺 𑀯𑀸. 𑀕𑁄𑀢𑁆𑀢𑀯𑀲𑁂𑀦𑀸𑀢𑀺 𑀏𑀢𑁆𑀣 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. 𑀕𑁄𑀢𑀫𑁄𑀢𑀺 𑀳𑀺 𑀧𑀯𑀢𑁆𑀢𑀫𑀸𑀦𑀁 𑀯𑀘𑀦𑀁, 𑀩𑀼𑀤𑁆𑀥𑀺𑀜𑁆𑀘 𑀢𑀸𑀬𑀢𑀺 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀭𑀓𑁆𑀔𑀢𑀻𑀢𑀺 𑀕𑁄𑀢𑁆𑀢𑀁. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀏𑀯𑀁 𑀅𑀪𑀺𑀥𑀸𑀦𑀁 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦, 𑀢𑀲𑁆𑀫𑀸 𑀲𑁄 𑀕𑁄𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀢𑀸𑀦𑀺 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀓𑁄 𑀧𑀦 𑀲𑁄𑀢𑀺? 𑀅𑀜𑁆𑀜𑀓𑀼𑀮𑀧𑀭𑀫𑁆𑀧𑀭𑀸𑀲𑀸𑀥𑀸𑀭𑀡𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀆𑀤𑀺𑀧𑀼𑀭𑀺𑀲𑀲𑀫𑀼𑀤𑀸𑀕𑀢𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 ‘‘𑀲𑀫𑀡𑁄’’𑀢𑀺 𑀇𑀫𑀺𑀦𑀸 𑀲𑀭𑀺𑀓𑁆𑀔𑀓𑀚𑀦𑁂𑀳𑀺 𑀪𑀕𑀯𑀢𑁄 𑀩𑀳𑀼𑀫𑀢𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀫𑀺𑀢𑀧𑀸𑀧𑀢𑀸𑀓𑀺𑀢𑁆𑀢𑀦𑀢𑁄. ‘‘𑀕𑁄𑀢𑀫𑁄’’𑀢𑀺 𑀇𑀫𑀺𑀦𑀸 𑀮𑁄𑀓𑀺𑀬𑀚𑀦𑁂𑀳𑀺 𑀉𑀴𑀸𑀭𑀓𑀼𑀮𑀲𑀫𑁆𑀪𑀽𑀢𑀢𑀸𑀤𑀻𑀧𑀦𑀢𑁄.

𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁 𑀉𑀤𑀺𑀢𑁄𑀤𑀺𑀢𑀯𑀺𑀧𑀼𑀮𑀔𑀢𑁆𑀢𑀺𑀬𑀓𑀼𑀮𑀯𑀺𑀪𑀸𑀯𑀦𑀢𑁄. 𑀲𑀩𑁆𑀩𑀔𑀢𑁆𑀢𑀺𑀬𑀸𑀦𑀜𑁆𑀳𑀺 𑀆𑀤𑀺𑀪𑀽𑀢𑀫𑀳𑀸𑀲𑀫𑁆𑀫𑀢𑀫𑀳𑀸𑀭𑀸𑀚𑀢𑁄 𑀧𑀝𑁆𑀞𑀸𑀬 𑀅𑀲𑀫𑁆𑀪𑀺𑀦𑁆𑀦𑀁 𑀉𑀴𑀸𑀭𑀢𑀫𑀁 𑀲𑀓𑁆𑀬𑀭𑀸𑀚𑀓𑀼𑀮𑀁. 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦𑀸𑀢𑀺 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀸𑀤𑀺𑀦𑀸 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀧𑀸𑀭𑀺𑀳𑀸𑀦𑀺𑀬𑀸. 𑀅𑀦𑀪𑀺𑀪𑀽𑀢𑁄 𑀅𑀦𑀚𑁆𑀛𑁄𑀢𑁆𑀣𑀢𑁄. 𑀢𑀣𑀸 𑀳𑀺 𑀢𑀲𑁆𑀲 𑀓𑀼𑀮𑀲𑁆𑀲 𑀦 𑀓𑀺𑀜𑁆𑀘𑀺 𑀧𑀸𑀭𑀺𑀚𑀼𑀜𑁆𑀜𑀁 𑀮𑁄𑀓𑀦𑀸𑀣𑀲𑁆𑀲 𑀅𑀪𑀺𑀚𑀸𑀢𑀺𑀬𑀁, 𑀅𑀣 𑀔𑁄 𑀯𑀟𑁆𑀠𑀺𑀬𑁂𑀯. 𑀅𑀪𑀺𑀦𑀺𑀓𑁆𑀔𑀫𑀦𑁂 𑀘 𑀢𑀢𑁄𑀧𑀺 𑀲𑀫𑀺𑀤𑁆𑀥𑀢𑀫𑀪𑀸𑀯𑁄 𑀮𑁄𑀓𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄. 𑀇𑀢𑀺 ‘‘𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀇𑀤𑀁 𑀯𑀘𑀦𑀁 𑀪𑀕𑀯𑀢𑁄 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀤𑀻𑀧𑀦𑀁 𑀯𑀼𑀢𑁆𑀢𑀁 𑀫𑀳𑀦𑁆𑀢𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁, 𑀫𑀳𑀦𑁆𑀢𑀜𑁆𑀘 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀪𑀸𑀯𑀲𑀺𑀤𑁆𑀥𑀺𑀢𑁄. 𑀲𑀼𑀦𑁆𑀤𑀭𑀦𑁆𑀢𑀺 𑀪𑀤𑁆𑀤𑀓𑀁. 𑀪𑀤𑁆𑀤𑀓𑀢𑀸 𑀘 𑀧𑀲𑁆𑀲𑀦𑁆𑀢𑀲𑁆𑀲 𑀳𑀺𑀢𑀲𑀼𑀔𑀸𑀯𑀳𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀣𑀸𑀯𑀳𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀲𑀁𑀳𑀺𑀢𑀳𑀺𑀢𑀸𑀯𑀳𑀁. 𑀲𑀼𑀔𑀸𑀯𑀳𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀢𑀺𑀯𑀺𑀥𑀲𑀼𑀔𑀸𑀯𑀳𑀁. 𑀢𑀣𑀸𑀭𑀽𑀧𑀸𑀦𑀦𑁆𑀢𑀺 𑀢𑀸𑀤𑀺𑀲𑀸𑀦𑀁. 𑀬𑀸𑀤𑀺𑀲𑁂𑀳𑀺 𑀧𑀦 𑀕𑀼𑀡𑁂𑀳𑀺 𑀪𑀕𑀯𑀸 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀳𑀺 𑀘𑀢𑀼𑀧𑁆𑀧𑀫𑀸𑀡𑀺𑀓𑀲𑁆𑀲 𑀮𑁄𑀓𑀲𑁆𑀲 𑀲𑀩𑁆𑀩𑀣𑀸𑀧𑀺 𑀅𑀘𑁆𑀘𑀦𑁆𑀢𑀸𑀬 𑀲𑀤𑁆𑀥𑀸𑀬 𑀧𑀲𑀸𑀤𑀦𑀻𑀬𑁄 𑀢𑁂𑀲𑀁 𑀬𑀣𑀸𑀪𑀽𑀢𑀲𑀪𑀸𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸𑀭𑀽𑀧𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸𑀪𑀽𑀢𑀁…𑀧𑁂… 𑀅𑀭𑀳𑀢𑀦𑁆𑀢𑀺 𑀇𑀫𑀺𑀦𑀸 𑀥𑀫𑁆𑀫𑀧𑁆𑀧𑀫𑀸𑀡𑀸𑀦𑀁, 𑀮𑀽𑀔𑀧𑁆𑀧𑀫𑀸𑀡𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 𑀪𑀕𑀯𑀢𑁄 𑀧𑀲𑀸𑀤𑀸𑀯𑀳𑀢𑀁 𑀤𑀲𑁆𑀲𑁂𑀢𑀺. 𑀢𑀁 𑀤𑀲𑁆𑀲𑀦𑁂𑀦𑁂𑀯 𑀘 𑀇𑀢𑀭𑁂𑀲𑀫𑁆𑀧𑀺 𑀅𑀢𑁆𑀣𑀢𑁄 𑀧𑀲𑀸𑀤𑀸𑀯𑀳𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻𑀢𑀺 𑀏𑀢𑁆𑀣 𑀓𑁄𑀲𑀺𑀬𑀲𑀓𑀼𑀡𑀯𑀢𑁆𑀣𑀼𑀁 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁪; 𑀔𑀼. 𑀧𑀸. 𑀅𑀝𑁆𑀞. 𑁧𑁦) 𑀓𑀣𑁂𑀢𑀩𑁆𑀩𑀁.

𑀅𑀫𑁆𑀩𑀝𑁆𑀞𑀫𑀸𑀡𑀯𑀓𑀣𑀸𑀯𑀡𑁆𑀡𑀦𑀸

𑁨𑁫𑁬. 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀯𑁂𑀤𑁂 𑀲𑀚𑁆𑀛𑀸𑀬𑀢𑀺, 𑀧𑀭𑀺𑀬𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀫𑀦𑁆𑀢𑁂 𑀥𑀸𑀭𑁂𑀢𑀻𑀢𑀺 𑀬𑀣𑀸𑀅𑀥𑀻𑀢𑁂 𑀫𑀦𑁆𑀢𑁂 𑀅𑀲𑀫𑁆𑀫𑀼𑀝𑁆𑀞𑁂 𑀓𑀢𑁆𑀯𑀸 𑀳𑀤𑀬𑁂 𑀞𑀧𑁂𑀢𑀺 𑀑𑀝𑁆𑀞𑀧𑀳𑀢𑀓𑀭𑀡𑀯𑀲𑁂𑀦, 𑀦 𑀅𑀢𑁆𑀣𑀯𑀺𑀪𑀸𑀯𑀦𑀯𑀲𑁂𑀦.

𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀦𑁆𑀢𑀺 𑀏𑀢𑁆𑀣 𑀯𑀘𑀦𑀻𑀬𑀯𑀸𑀘𑀓𑀪𑀸𑀯𑁂𑀦 𑀅𑀢𑁆𑀣𑀁 𑀲𑀤𑁆𑀤𑀜𑁆𑀘 𑀦𑀺𑀔𑀟𑀢𑀺 𑀪𑀺𑀦𑁆𑀤𑀢𑀺 𑀯𑀺𑀪𑀚𑁆𑀚 𑀤𑀲𑁆𑀲𑁂𑀢𑀻𑀢𑀺 𑀦𑀺𑀔𑀡𑁆𑀟𑀼, 𑀲𑀸 𑀏𑀯 𑀇𑀥 𑀔-𑀓𑀸𑀭𑀲𑁆𑀲 𑀖-𑀓𑀸𑀭𑀁 𑀓𑀢𑁆𑀯𑀸 ‘‘𑀦𑀺𑀖𑀡𑁆𑀟𑀽’’𑀢𑀺 𑀯𑀼𑀢𑁆𑀢𑁄. 𑀓𑀺𑀝𑀬𑀢𑀺 𑀕𑀫𑁂𑀢𑀺 𑀜𑀸𑀧𑁂𑀢𑀺 𑀓𑀺𑀭𑀺𑀬𑀸𑀤𑀺𑀯𑀺𑀪𑀸𑀕𑀁, 𑀢𑀁 𑀯𑀸 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄 𑀕𑀫𑁂𑀦𑁆𑀢𑁄 𑀧𑀽𑀭𑁂𑀢𑀻𑀢𑀺 𑀓𑁂𑀝𑀼𑀪𑀁. 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀦𑁆𑀢𑀺 𑀧𑀭𑀺𑀬𑀸𑀬𑀲𑀤𑁆𑀤𑀤𑀻𑀧𑀓𑀁, 𑀏𑀓𑁂𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑁂𑀓𑀧𑀭𑀺𑀬𑀸𑀬𑀯𑀘𑀦𑀯𑀺𑀪𑀸𑀯𑀓𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀦𑁂𑀓𑁂𑀲𑀫𑁆𑀧𑀺 𑀅𑀢𑁆𑀣𑀸𑀦𑀁 𑀏𑀓𑀲𑀤𑁆𑀤𑀯𑀘𑀦𑀻𑀬𑀢𑀸𑀯𑀺𑀪𑀸𑀯𑀦𑀯𑀲𑁂𑀦𑀧𑀺 𑀢𑀲𑁆𑀲 𑀕𑀦𑁆𑀣𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀯𑀘𑀻𑀪𑁂𑀤𑀸𑀤𑀺𑀮𑀓𑁆𑀔𑀡𑀸 𑀓𑀺𑀭𑀺𑀬𑀸 𑀓𑀧𑁆𑀧𑀻𑀬𑀢𑀺 𑀏𑀢𑁂𑀦𑀸𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑁄, 𑀲𑁄 𑀧𑀦 𑀯𑀡𑁆𑀡𑀧𑀤𑀲𑀫𑁆𑀩𑀦𑁆𑀥𑀧𑀤𑀢𑁆𑀣𑀸𑀤𑀺𑀯𑀺𑀪𑀸𑀕𑀢𑁄 𑀩𑀳𑀼𑀯𑀺𑀓𑀧𑁆𑀧𑁄𑀢𑀺 𑀆𑀳 ‘‘𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄’’𑀢𑀺. 𑀇𑀤𑀜𑁆𑀘 𑀫𑀽𑀮𑀓𑀺𑀭𑀺𑀬𑀸𑀓𑀧𑁆𑀧𑀕𑀦𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑁄 𑀦𑀬𑀘𑀭𑀺𑀬𑀸𑀤𑀺𑀧𑀓𑀭𑀡𑀁. 𑀞𑀸𑀦𑀓𑀭𑀡𑀸𑀤𑀺𑀯𑀺𑀪𑀸𑀕𑀢𑁄, 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑀢𑁄 𑀘 𑀅𑀓𑁆𑀔𑀭𑀸 𑀧𑀪𑁂𑀤𑀻𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀅𑀓𑁆𑀔𑀭𑀧𑁆𑀧𑀪𑁂𑀤𑀸, 𑀲𑀺𑀓𑁆𑀔𑀸𑀦𑀺𑀭𑀼𑀢𑁆𑀢𑀺𑀬𑁄. 𑀏𑀢𑁂𑀲𑀦𑁆𑀢𑀺 𑀯𑁂𑀤𑀸𑀦𑀁.

𑀢𑁂 𑀏𑀯 𑀯𑁂𑀤𑁂 𑀧𑀤𑀲𑁄 𑀓𑀸𑀬𑀢𑀻𑀢𑀺 𑀧𑀤𑀓𑁄. 𑀢𑀁 𑀢𑀁 𑀲𑀤𑁆𑀤𑀁 𑀢𑀤𑀢𑁆𑀣𑀜𑁆𑀘 𑀩𑁆𑀬𑀸𑀓𑀭𑁄𑀢𑀺 𑀩𑁆𑀬𑀸𑀘𑀺𑀓𑁆𑀔𑀢𑀺 𑀏𑀢𑁂𑀦𑀸𑀢𑀺 𑀩𑁆𑀬𑀸𑀓𑀭𑀡𑀁, 𑀲𑀤𑁆𑀤𑀲𑀢𑁆𑀣𑀁. 𑀆𑀬𑀢𑀺𑀁 𑀳𑀺𑀢𑀁 𑀢𑁂𑀦 𑀮𑁄𑀓𑁄 𑀦 𑀬𑀢𑀢𑀺 𑀦 𑀈𑀳𑀢𑀻𑀢𑀺 𑀮𑁄𑀓𑀸𑀬𑀢𑀁. 𑀢𑀜𑁆𑀳𑀺 𑀕𑀦𑁆𑀣𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺.

𑀯𑀬𑀢𑀻𑀢𑀺 𑀯𑀬𑁄, 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀓𑀢𑁆𑀣𑀘𑀺 𑀅𑀧𑀭𑀺𑀓𑀺𑀮𑀫𑀦𑁆𑀢𑁄 𑀅𑀯𑀺𑀢𑁆𑀣𑀸𑀬𑀦𑁆𑀢𑁄 𑀢𑁂 𑀕𑀦𑁆𑀣𑁂 𑀲𑀦𑁆𑀥𑀸𑀭𑁂𑀢𑀺 𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀧𑀝𑀺𑀲𑁂𑀥𑀸 𑀧𑀓𑀢𑀺𑀁 𑀕𑀫𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀬𑁄 𑀦 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀅𑀯𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀬𑁄 𑀦𑀸𑀫…𑀧𑁂… 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀜𑁆𑀜𑀸𑀢𑁄’’𑀢𑀺 𑀧𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀯𑀲𑁂𑀦, ‘‘𑀧𑀝𑀺𑀜𑁆𑀜𑀸𑀢𑁄’’𑀢𑀺 𑀧𑀦 𑀧𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀘𑀭𑀺𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀪𑀢𑀁 𑀆𑀘𑀭𑀺𑀬𑀓𑀁. 𑀕𑀭𑀽𑀢𑀺 𑀪𑀸𑀭𑀺𑀬𑀁 𑀅𑀢𑁆𑀢𑀸𑀦𑀁 𑀢𑀢𑁄 𑀫𑁄𑀘𑁂𑀢𑁆𑀯𑀸 𑀕𑀫𑀦𑀁 𑀤𑀼𑀓𑁆𑀓𑀭𑀁 𑀳𑁄𑀢𑀺. 𑀅𑀦𑀢𑁆𑀣𑁄𑀧𑀺 𑀉𑀧𑁆𑀧𑀚𑁆𑀚𑀢𑀺 𑀦𑀺𑀦𑁆𑀤𑀸𑀩𑁆𑀬𑀸𑀭𑁄𑀲𑀉𑀧𑀸𑀭𑀫𑁆𑀪𑀸𑀤𑀺.

𑁨𑁫𑁭. ‘‘𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑀬𑁄𑀕𑁂𑀦 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀯𑀲𑁂𑀦𑁂𑀯 𑀉𑀧𑀬𑁄𑀕𑀯𑀘𑀦𑀁.

𑁨𑁫𑁮. 𑀮𑀓𑁆𑀔𑀡𑀸𑀦𑀻𑀢𑀺 𑀮𑀓𑁆𑀔𑀡𑀤𑀻𑀧𑀦𑀸𑀦𑀺 𑀫𑀦𑁆𑀢𑀧𑀤𑀸𑀦𑀺. 𑀅𑀦𑁆𑀢𑀭𑀥𑀸𑀬𑀦𑁆𑀢𑀻𑀢𑀺 𑀦 𑀓𑁂𑀯𑀮𑀁 𑀮𑀓𑁆𑀔𑀡𑀫𑀦𑁆𑀢𑀸𑀦𑀺𑀬𑁂𑀯, 𑀅𑀣 𑀔𑁄 𑀅𑀜𑁆𑀜𑀸𑀦𑀺𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀜𑀸𑀡𑀩𑀮𑀸𑀪𑀸𑀯𑁂𑀦 𑀅𑀦𑀼𑀓𑁆𑀓𑀫𑁂𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀢𑀣𑀸 𑀳𑀺 𑀯𑀤𑀦𑁆𑀢𑀺 ‘‘𑀏𑀓𑀲𑀢𑀁 𑀅𑀤𑁆𑀥𑀭𑀺𑀬𑀁 𑀲𑀸𑀔𑀸 𑀲𑀳𑀲𑁆𑀲𑀯𑀢𑁆𑀢𑀓𑁄 𑀲𑀸𑀫𑀸’’𑀢𑀺𑀆𑀤𑀺. 𑀧𑀡𑀺𑀥𑀺 …𑀧𑁂… 𑀫𑀳𑀢𑁄𑀢𑀺 𑀏𑀢𑁆𑀣 𑀧𑀡𑀺𑀥𑀺𑀫𑀳𑀢𑁄 𑀲𑀫𑀸𑀤𑀸𑀦𑀫𑀳𑀢𑁄𑀢𑀺 𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀫𑀳𑀦𑁆𑀢-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀧𑀡𑀺𑀥𑀺𑀫𑀳𑀦𑁆𑀢𑀢𑀸𑀤𑀺 𑀘𑀲𑁆𑀲 𑀩𑀼𑀤𑁆𑀥𑀯𑀁𑀲𑀘𑀭𑀺𑀬𑀸𑀧𑀺𑀝𑀓𑀯𑀡𑁆𑀡𑀦𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀝𑁆𑀞𑀸𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑁄. 𑀪𑀯𑀪𑁂𑀤𑁂𑀢𑀺 𑀪𑀯𑀯𑀺𑀲𑁂𑀲𑁂. 𑀇𑀢𑁄 𑀘 𑀏𑀢𑁆𑀢𑁄 𑀘 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀢𑀸 𑀯𑀺𑀲𑀝𑀪𑀸𑀯𑁄.

𑀚𑀸𑀢𑀺𑀲𑀸𑀫𑀜𑁆𑀜𑀢𑁄𑀢𑀺 𑀮𑀓𑁆𑀔𑀡𑀚𑀸𑀢𑀺𑀬𑀸 𑀮𑀓𑁆𑀔𑀡𑀪𑀸𑀯𑀫𑀢𑁆𑀢𑁂𑀦 𑀲𑀫𑀸𑀦𑀪𑀸𑀯𑀢𑁄. 𑀬𑀣𑀸 𑀳𑀺 𑀩𑀼𑀤𑁆𑀥𑀸𑀦𑀁 𑀮𑀓𑁆𑀔𑀡𑀸𑀦𑀺 𑀲𑀼𑀯𑀺𑀲𑀤𑀸𑀦𑀺, 𑀲𑀼𑀧𑀭𑀺𑀩𑁆𑀬𑀢𑁆𑀢𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀘 𑀳𑁄𑀦𑁆𑀢𑀺, 𑀦 𑀏𑀯𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀢𑁂𑀦𑀸𑀳 ‘‘𑀦 𑀢𑁂𑀳𑁂𑀯 𑀩𑀼𑀤𑁆𑀥𑁄 𑀳𑁄𑀢𑀻’’𑀢𑀺. 𑀅𑀪𑀺𑀭𑀽𑀧𑀢𑀸, 𑀤𑀻𑀖𑀸𑀬𑀼𑀓𑀢𑀸, 𑀅𑀧𑁆𑀧𑀸𑀢𑀗𑁆𑀓𑀢𑀸, 𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀧𑀺𑀬𑀫𑀦𑀸𑀧𑀢𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀲𑀪𑀸𑀯𑁂𑀳𑀺. 𑀤𑀸𑀦𑀁, 𑀧𑀺𑀬𑀯𑀘𑀦𑀁, 𑀅𑀢𑁆𑀣𑀘𑀭𑀺𑀬𑀸, 𑀲𑀫𑀸𑀦𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺. 𑀭𑀜𑁆𑀚𑀦𑀢𑁄𑀢𑀺 𑀧𑀻𑀢𑀺𑀚𑀦𑀦𑀢𑁄. 𑀘𑀓𑁆𑀓𑀁 𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀺 𑀲𑀬𑀁 𑀯𑀢𑁆𑀢𑀢𑀺, 𑀢𑁂𑀳𑀺 𑀘 𑀧𑀭𑀁 𑀲𑀢𑁆𑀢𑀦𑀺𑀓𑀸𑀬𑀁 𑀯𑀢𑁆𑀢𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀧𑀭𑀳𑀺𑀢𑀸𑀯𑀳𑁄 𑀇𑀭𑀺𑀬𑀸𑀧𑀣𑀘𑀓𑁆𑀓𑀸𑀦𑀁 𑀯𑀢𑁆𑀢𑁄 𑀯𑀢𑁆𑀢𑀦𑀁 𑀏𑀢𑀲𑁆𑀲, 𑀏𑀢𑁆𑀣𑀸𑀢𑀺 𑀯𑀸 𑀘𑀓𑁆𑀓𑀯𑀢𑁆𑀢𑀻. 𑀅𑀧𑁆𑀧𑀝𑀺𑀳𑀢𑀁 𑀯𑀸 𑀆𑀡𑀸𑀲𑀗𑁆𑀔𑀸𑀢𑀁 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀔𑀢𑁆𑀢𑀺𑀬𑀫𑀡𑁆𑀟𑀮𑀸𑀤𑀺𑀲𑀜𑁆𑀜𑀺𑀢𑀁 𑀘𑀓𑁆𑀓𑀁 𑀲𑀫𑀽𑀳𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀘𑀭𑀢𑀺, 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀯𑀸 𑀥𑀫𑁆𑀫𑀺𑀓𑁄. 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑁄 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀚𑀸𑀢𑀺 𑀥𑀫𑁆𑀫𑀭𑀸𑀚𑀸. ‘‘𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀘𑀸𑀢𑀼𑀭𑀦𑁆𑀢𑁄’’𑀢𑀺 𑀧𑀤𑀁 𑀘𑀢𑀼𑀤𑀻𑀧𑀺𑀲𑁆𑀲𑀭𑀢𑀁 𑀯𑀺𑀪𑀸𑀯𑁂𑀢𑀻𑀢𑀺 𑀆𑀳 ‘‘𑀘𑀢𑀼𑀲𑀫𑀼𑀤𑁆𑀤𑀅𑀦𑁆𑀢𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀘𑀢𑀼𑀤𑁆𑀤𑀻𑀧𑀯𑀺𑀪𑀽𑀲𑀺𑀢𑀸𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀘𑀢𑀼𑀩𑁆𑀩𑀺𑀥𑀸’’𑀢𑀺 𑀯𑀺𑀥𑀕𑁆𑀕𑀳𑀡𑀁 𑀢𑀁𑀢𑀁𑀧𑀭𑀺𑀢𑁆𑀢𑀤𑀻𑀧𑀸𑀦𑀫𑁆𑀧𑀺 𑀲𑀗𑁆𑀕𑀳𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁄𑀧𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀫𑀫𑁄𑀳𑀫𑀸𑀦𑀫𑀤𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀚𑀺𑀢𑀸𑀯𑀻𑀢𑀺 𑀯𑀺𑀚𑀺𑀢𑀯𑀸. 𑀓𑁂𑀦𑀘𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀚𑀦𑀧𑀤𑁂 𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄, 𑀤𑀴𑁆𑀳𑀪𑀢𑁆𑀢𑀺𑀪𑀸𑀯𑀢𑁄 𑀯𑀸, 𑀚𑀦𑀧𑀤𑁄 𑀣𑀸𑀯𑀭𑀺𑀬𑀁 𑀧𑀢𑁆𑀢𑁄 𑀏𑀢𑁆𑀣𑀸𑀢𑀺 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄.

𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀺𑀦𑀸𑀧𑀺 (𑀔𑀼. 𑀧𑀸. 𑀅𑀝𑁆𑀞. 𑁩; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦) 𑀘𑀓𑁆𑀓𑀲𑁆𑀲 𑀭𑀢𑀦𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀭𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀯𑀸 𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑀲𑁆𑀲 𑀭𑀢𑀺𑀚𑀦𑀦𑀝𑁆𑀞𑁂𑀦 𑀏𑀓𑀲𑀗𑁆𑀕𑀳𑀢𑀸𑀬 𑀯𑀺𑀲𑀼𑀁 𑀅𑀕𑁆𑀕𑀳𑀡𑀁. 𑀇𑀫𑁂𑀳𑀺 𑀧𑀦 𑀭𑀢𑀦𑁂𑀳𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀬𑀁 𑀬𑀫𑀢𑁆𑀣𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀢𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂𑀲𑀼 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀚𑀺𑀢𑀁 𑀚𑀺𑀦𑀸𑀢𑀺 𑀫𑀳𑁂𑀲𑀓𑁆𑀔𑀢𑀸𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑀪𑀸𑀯𑀢𑁄. 𑀯𑀺𑀚𑀺𑀢𑁂 𑀬𑀣𑀸𑀲𑀼𑀔𑀁 𑀅𑀦𑀼𑀯𑀺𑀘𑀭𑀢𑀺 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀜𑁆𑀘 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑁂𑀲𑀁 𑀆𑀦𑀼𑀪𑀸𑀯𑁂𑀦 𑀅𑀦𑁆𑀢𑁄𑀧𑀸𑀢𑀭𑀸𑀲𑁂𑀬𑁂𑀯 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀭𑀸𑀚𑀥𑀸𑀦𑀺𑀫𑁂𑀯 𑀧𑀘𑁆𑀘𑀸𑀕𑀫𑀦𑀢𑁄. 𑀧𑀭𑀺𑀡𑀸𑀬𑀓𑀭𑀢𑀦𑁂𑀦 𑀯𑀺𑀚𑀺𑀢𑀫𑀦𑀼𑀭𑀓𑁆𑀔𑀢𑀺 𑀢𑁂𑀦 𑀢𑀢𑁆𑀣 𑀢𑀢𑁆𑀣 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀲𑀁𑀯𑀺𑀥𑀸𑀦𑀢𑁄. 𑀅𑀯𑀲𑁂𑀲𑁂𑀳𑀻𑀢𑀺 𑀫𑀡𑀺𑀭𑀢𑀦𑀇𑀢𑁆𑀣𑀺𑀭𑀢𑀦𑀕𑀳𑀧𑀢𑀺𑀭𑀢𑀦𑁂𑀳𑀺. 𑀢𑀢𑁆𑀣 𑀫𑀡𑀺𑀭𑀢𑀦𑁂𑀦 𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀤𑀲𑁆𑀲𑀦𑀸𑀤𑀺𑀦𑀸 𑀲𑀼𑀔𑀫𑀦𑀼𑀪𑀯𑀢𑀺, 𑀇𑀢𑁆𑀣𑀺𑀭𑀢𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀭𑀽𑀧𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀸𑀤𑀺𑀯𑀲𑁂𑀦, 𑀕𑀳𑀧𑀢𑀺𑀭𑀢𑀦𑁂𑀦 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀫𑀡𑀺𑀓𑀦𑀓𑀭𑀚𑀢𑀸𑀤𑀺𑀥𑀦𑀧𑀝𑀺𑀮𑀸𑀪𑀯𑀲𑁂𑀦.

𑀉𑀲𑁆𑀲𑀸𑀳𑀲𑀢𑁆𑀢𑀺𑀬𑁄𑀕𑁄 𑀢𑁂𑀦 𑀓𑁂𑀦𑀘𑀺 𑀅𑀧𑁆𑀧𑀝𑀺𑀳𑀢𑀸𑀡𑀸𑀘𑀓𑁆𑀓𑀪𑀸𑀯𑀲𑀺𑀤𑁆𑀥𑀺𑀢𑁄 𑀧𑀘𑁆𑀙𑀺𑀫𑁂𑀦𑀸𑀢𑀺 𑀧𑀭𑀺𑀡𑀸𑀬𑀓𑀭𑀢𑀦𑁂𑀦. 𑀢𑀜𑁆𑀳𑀺 𑀲𑀩𑁆𑀩𑀭𑀸𑀚𑀓𑀺𑀘𑁆𑀘𑁂𑀲𑀼 𑀓𑀼𑀲𑀮𑀁 𑀅𑀯𑀺𑀭𑀚𑁆𑀛𑀦𑀬𑁄𑀕𑀁, 𑀢𑁂𑀦𑀸𑀳 ‘‘𑀫𑀦𑁆𑀢𑀲𑀢𑁆𑀢𑀺𑀬𑁄𑀕𑁄’’𑀢𑀺. 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑀸𑀦𑀁 𑀫𑀳𑀸𑀦𑀼𑀪𑀸𑀯𑀢𑀸𑀬 𑀓𑁄𑀲𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀧𑀪𑀸𑀯𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀢𑁄 ‘‘𑀳𑀢𑁆𑀣𑀺…𑀧𑁂… 𑀬𑁄𑀕𑁄’’𑀢𑀺 𑀯𑀼𑀢𑁆𑀢𑀁. (𑀓𑁄𑀲𑁄 𑀳𑀺 𑀦𑀸𑀫 𑀲𑀢𑀺 𑀉𑀲𑁆𑀲𑀸𑀳𑀲𑀫𑁆𑀧𑀢𑁆𑀢𑀺𑀬𑀁 𑀤𑀼𑀕𑁆𑀕𑀁 𑀢𑁂𑀚𑀁 𑀓𑀼𑀲𑀼𑀫𑁄𑀭𑀁 𑀧𑀭𑀓𑁆𑀓𑀫𑀁 𑀧𑀩𑁆𑀩𑀢𑁄𑀫𑀼𑀔𑀁 𑀅𑀫𑁄𑀲𑀧𑀳𑀭𑀡𑀁) 𑀢𑀺𑀯𑀺𑀥𑀲𑀢𑁆𑀢𑀺𑀬𑁄𑀕𑀨𑀮𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑁂𑀳𑀻𑀢𑀺 𑀲𑁂𑀲𑁂𑀳𑀺 𑀧𑀜𑁆𑀘𑀳𑀺 𑀭𑀢𑀦𑁂𑀳𑀺.

𑀅𑀤𑁄𑀲𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦𑀸𑀢𑀺 𑀅𑀤𑁄𑀲𑀲𑀗𑁆𑀔𑀸𑀢𑁂𑀦 𑀓𑀼𑀲𑀮𑀫𑀽𑀮𑁂𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺 𑀲𑁄𑀫𑁆𑀫𑀢𑀭𑀭𑀢𑀦𑀚𑀸𑀢𑀺𑀓𑀢𑁆𑀢𑀸. 𑀫𑀚𑁆𑀛𑀺𑀫𑀸𑀦𑀺 𑀫𑀡𑀺𑀇𑀢𑁆𑀣𑀺𑀕𑀳𑀧𑀢𑀺𑀭𑀢𑀦𑀸𑀦𑀺. 𑀅𑀮𑁄𑀪…𑀧𑁂… 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺 𑀉𑀴𑀸𑀭𑀲𑁆𑀲 𑀥𑀦𑀲𑁆𑀲, 𑀉𑀴𑀸𑀭𑀥𑀦𑀧𑀝𑀺𑀮𑀸𑀪𑀓𑀸𑀭𑀡𑀲𑁆𑀲 𑀘 𑀧𑀭𑀺𑀘𑁆𑀘𑀸𑀕𑀲𑀫𑁆𑀧𑀤𑀸𑀳𑁂𑀢𑀼𑀓𑀢𑁆𑀢𑀸. 𑀧𑀘𑁆𑀙𑀺𑀫𑀦𑁆𑀢𑀺 𑀧𑀭𑀺𑀡𑀸𑀬𑀓𑀭𑀢𑀦𑀁. 𑀢𑀜𑁆𑀳𑀺 𑀅𑀫𑁄𑀳…𑀧𑁂… 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀢𑀺 𑀫𑀳𑀸𑀧𑀜𑁆𑀜𑁂𑀦𑁂𑀯 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀺𑀘𑁆𑀘𑀲𑁆𑀲 𑀧𑀭𑀺𑀡𑁂𑀢𑀩𑁆𑀩𑀢𑁆𑀢𑀸. 𑀉𑀧𑀤𑁂𑀲𑁄 𑀦𑀸𑀫 𑀲𑀯𑀺𑀲𑁂𑀲𑀁 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀯𑀺𑀘𑀸𑀭𑀡𑀯𑀲𑁂𑀦 𑀧𑀯𑀢𑁆𑀢𑁄 𑀓𑀣𑀸𑀩𑀦𑁆𑀥𑁄.

𑀲𑀭𑀡𑀢𑁄 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀢𑁄 𑀲𑀽𑀭𑀸, 𑀢𑁂𑀦𑀸𑀳 ‘‘𑀅𑀪𑀻𑀭𑀼𑀓𑀚𑀸𑀢𑀺𑀓𑀸’’𑀢𑀺. 𑀅𑀲𑀼𑀭𑁂 𑀯𑀺𑀚𑀺𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀯𑀻𑀭𑁄, 𑀲𑀓𑁆𑀓𑁄 𑀤𑁂𑀯𑀸𑀦𑀁 𑀇𑀦𑁆𑀤𑁄. 𑀢𑀲𑁆𑀲 𑀅𑀗𑁆𑀕𑀁 𑀤𑁂𑀯𑀧𑀼𑀢𑁆𑀢𑁄 𑀲𑁂𑀦𑀗𑁆𑀕𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀻𑀭𑀗𑁆𑀕𑀭𑀽𑀧𑀸𑀢𑀺 𑀤𑁂𑀯𑀧𑀼𑀢𑁆𑀢𑀲𑀤𑀺𑀲𑀓𑀸𑀬𑀸’’𑀢𑀺. ‘‘𑀏𑀓𑁂’’𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀫𑀸𑀳. 𑀲𑀪𑀸𑀯𑁄𑀢𑀺 𑀲𑀪𑀸𑀯𑀪𑀽𑀢𑁄 𑀅𑀢𑁆𑀣𑁄. 𑀯𑀻𑀭𑀓𑀸𑀭𑀡𑀦𑁆𑀢𑀺 𑀯𑀻𑀭𑀪𑀸𑀯𑀓𑀸𑀭𑀡𑀁. 𑀯𑀻𑀭𑀺𑀬𑀫𑀬𑀲𑀭𑀻𑀭𑀸 𑀯𑀺𑀬𑀸𑀢𑀺 𑀲𑀯𑀺𑀕𑁆𑀕𑀳𑀯𑀻𑀭𑀺𑀬𑀲𑀤𑀺𑀲𑀸, 𑀲𑀯𑀺𑀕𑁆𑀕𑀳𑀁 𑀘𑁂 𑀯𑀻𑀭𑀺𑀬𑀁 𑀲𑀺𑀬𑀸 𑀢𑀁𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀝𑀺𑀲𑁂𑀦𑀸 𑀦𑀸𑀫 𑀦𑀢𑁆𑀣𑀺, 𑀬’𑀫𑀲𑁆𑀲 𑀧𑀼𑀢𑁆𑀢𑀸 𑀧𑀫𑀤𑁆𑀤𑁂𑀬𑁆𑀬𑀼𑀁, 𑀅𑀣 𑀓𑀲𑁆𑀫𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 𑀲𑀘𑁂𑀢𑀺𑀆𑀤𑀺, 𑀢𑁂𑀦 𑀧𑀭𑀲𑁂𑀦𑀸 𑀳𑁄𑀢𑀼 𑀯𑀸 𑀫𑀸 𑀯𑀸 𑀢𑁂 𑀧𑀦 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀥𑀫𑁆𑀫𑁂𑀦𑀸𑀢𑀺 𑀓𑀢𑀼𑀧𑀘𑀺𑀢𑁂𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀥𑀫𑁆𑀫𑁂𑀦. 𑀢𑁂𑀦 𑀳𑀺 𑀲𑀜𑁆𑀘𑁄𑀤𑀺𑀢𑀸 𑀧𑀣𑀯𑀺𑀬𑀁 𑀲𑀩𑁆𑀩𑀭𑀸𑀚𑀸𑀦𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 ‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚𑀸’’𑀢𑀺 𑀆𑀤𑀺𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀭𑀚𑁆𑀚𑀁 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀦𑀺𑀬𑁆𑀬𑀸𑀢𑁂𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄 𑀇𑀫𑀁…𑀧𑁂… 𑀅𑀚𑁆𑀛𑀸𑀯𑀲𑀢𑀻’’𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀘𑀺𑀭𑀢𑀭𑀁 𑀯𑀺𑀧𑀘𑁆𑀘𑀺𑀢𑀼𑀁 𑀧𑀘𑁆𑀘𑀬𑀪𑀽𑀢𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑀫𑀼𑀤𑀸𑀕𑀢𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄𑀢𑀺𑀆𑀤𑀺𑀦𑀸 𑀧𑀜𑁆𑀘𑀲𑀻𑀮𑀥𑀫𑁆𑀫𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 ‘‘𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦𑀸’’𑀢𑀺 𑀇𑀤𑀁 𑀯𑀘𑀦𑀁 𑀲𑀼𑀝𑁆𑀞𑀼𑀢𑀭𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀭𑀸𑀕𑀸𑀤𑀬𑁄 𑀧𑀸𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀢𑁆𑀢𑀲𑀦𑁆𑀢𑀸𑀦𑀁 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀸𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 ‘‘𑀙𑀤𑀦𑀸, 𑀙𑀤𑀸’’𑀢𑀺 𑀘 𑀯𑀼𑀢𑁆𑀢𑀸. 𑀯𑀺𑀯𑀝𑁂𑀢𑁆𑀯𑀸𑀢𑀺 𑀯𑀺𑀕𑀫𑁂𑀢𑁆𑀯𑀸. 𑀧𑀽𑀚𑀸𑀭𑀳𑀢𑀸 𑀯𑀼𑀢𑁆𑀢𑀸 ‘‘𑀅𑀭𑀳𑀢𑀻𑀢𑀺 𑀅𑀭𑀳’’𑀦𑁆𑀢𑀺. 𑀢𑀲𑁆𑀲𑀸 𑀧𑀽𑀚𑀸𑀭𑀳𑀢𑀸𑀬. 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀅𑀭𑀳𑀦𑁆𑀢𑀺. 𑀩𑀼𑀤𑁆𑀥𑀢𑁆𑀢𑀳𑁂𑀢𑀼𑀪𑀽𑀢𑀸 𑀯𑀺𑀯𑀝𑁆𑀝𑀘𑁆𑀙𑀤𑀢𑀸 𑀯𑀼𑀢𑁆𑀢𑀸 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀧𑀼𑀩𑁆𑀩𑀓𑀢𑁆𑀢𑀸 𑀩𑀼𑀤𑁆𑀥𑀪𑀸𑀯𑀲𑁆𑀲.

𑀅𑀭𑀳𑀁 𑀯𑀝𑁆𑀝𑀸𑀪𑀸𑀯𑁂𑀦𑀸𑀢𑀺 𑀨𑀮𑁂𑀦 𑀳𑁂𑀢𑀼𑀅𑀦𑀼𑀫𑀸𑀦𑀤𑀲𑁆𑀲𑀦𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀙𑀤𑀦𑀸𑀪𑀸𑀯𑁂𑀦𑀸𑀢𑀺 𑀳𑁂𑀢𑀼𑀦𑀸 𑀨𑀮𑀸𑀦𑀼𑀫𑀸𑀦𑀤𑀲𑁆𑀲𑀦𑀁. 𑀳𑁂𑀢𑀼𑀤𑁆𑀯𑀬𑀁 𑀯𑀼𑀢𑁆𑀢𑀁 ‘‘𑀯𑀺𑀯𑀝𑁆𑀝𑁄 𑀯𑀺𑀘𑁆𑀙𑀤𑁄 𑀘𑀸’’𑀢𑀺. 𑀤𑀼𑀢𑀺𑀬𑁂𑀦 𑀯𑁂𑀲𑀸𑀭𑀚𑁆𑀚𑁂𑀦𑀸𑀢𑀺 ‘‘𑀔𑀻𑀡𑀸𑀲𑀯𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀯𑁂𑀲𑀸𑀭𑀚𑁆𑀚𑁂𑀦. 𑀧𑀼𑀭𑀺𑀫𑀲𑀺𑀤𑁆𑀥𑀻𑀢𑀺 𑀧𑀼𑀭𑀺𑀫𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀢𑁆𑀣𑁄. 𑀧𑀞𑀫𑁂𑀦𑀸𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁫𑁦; 𑀅. 𑀦𑀺. 𑁪.𑁮) 𑀯𑀼𑀢𑁆𑀢𑁂𑀦 𑀯𑁂𑀲𑀸𑀭𑀚𑁆𑀚𑁂𑀦. 𑀤𑀼𑀢𑀺𑀬𑀲𑀺𑀤𑁆𑀥𑀻𑀢𑀺 𑀤𑀼𑀢𑀺𑀬𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺, 𑀩𑀼𑀤𑁆𑀥𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀻𑀢𑀺 ‘‘𑀬𑁂 𑀔𑁄 𑀧𑀦 𑀢𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸, (𑀫. 𑀦𑀺. 𑁧.𑁧𑁫𑁦; 𑀅. 𑀦𑀺. 𑁪.𑁮) ‘‘𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁫𑁦; 𑀅. 𑀦𑀺. 𑁪.𑁮) 𑀘 𑀯𑀼𑀢𑁆𑀢𑁂𑀳𑀺 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺. 𑀢𑀢𑀺𑀬𑀲𑀺𑀤𑁆𑀥𑀻𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑀦𑀢𑀸𑀲𑀺𑀤𑁆𑀥𑀺 𑀬𑀸𑀣𑀸𑀯𑀢𑁄 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀸𑀧𑀤𑁂𑀲𑁂𑀦 𑀳𑀺 𑀲𑀢𑁆𑀣𑀼 𑀯𑀺𑀯𑀝𑁆𑀝𑀘𑁆𑀙𑀤𑀦𑀪𑀸𑀯𑁄 𑀮𑁄𑀓𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀧𑀼𑀭𑀺𑀫𑀁 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀧𑀼𑀭𑀺𑀫𑀧𑀤𑀁 𑀪𑀕𑀯𑀢𑁄 𑀥𑀫𑁆𑀫𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀓𑀺𑀮𑁂𑀲𑀸𑀭𑀻𑀦𑀁, 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀘 𑀅𑀭𑀸𑀦𑀁 𑀳𑀢𑀪𑀸𑀯𑀤𑀻𑀧𑀦𑀢𑁄. 𑀤𑀼𑀢𑀺𑀬𑀁 𑀧𑀤𑀁 𑀩𑀼𑀤𑁆𑀥𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀢𑀁𑀲𑀩𑁆𑀪𑀸𑀯𑀢𑁄. 𑀢𑀢𑀺𑀬𑀁 𑀧𑀤𑀁 𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀻𑀧𑀦𑀢𑁄. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀳𑀺 𑀯𑀢𑁆𑀯𑀸 ‘‘𑀯𑀺𑀯𑀝𑁆𑀝𑀘𑁆𑀙𑀤𑁄’’𑀢𑀺 𑀯𑀘𑀦𑀁 𑀩𑀼𑀤𑁆𑀥𑀪𑀸𑀯𑀸𑀯𑀳𑀫𑁂𑀯 𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀺𑀪𑀸𑀯𑁂𑀢𑀺. ‘‘𑀲𑀽𑀭𑀪𑀸𑀯’’𑀦𑁆𑀢𑀺 𑀮𑀓𑁆𑀔𑀡𑀯𑀺𑀪𑀸𑀯𑀦𑁂 𑀯𑀺𑀲𑀤𑀜𑀸𑀡𑀢𑀁.

𑁨𑁫𑁯. 𑀏𑀯𑀁 𑀪𑁄𑀢𑀺 𑀏𑀢𑁆𑀣 𑀏𑀯𑀦𑁆𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑁂 𑀦𑀺𑀧𑀸𑀢𑁄. 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀜𑁆𑀘𑁂𑀢𑁆𑀣 ‘‘𑀢𑀣𑀸 𑀫𑀬𑀁 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀯𑁂𑀤𑀺𑀲𑁆𑀲𑀸𑀫, 𑀢𑁆𑀯𑀁 𑀫𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀸’’𑀢𑀺 𑀘 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀦𑁄 𑀯𑀘𑀦𑀲𑁆𑀲 𑀲𑀫𑁆𑀧𑀝𑀺𑀕𑁆𑀕𑀳𑁄𑀢𑀺 𑀆𑀳. ‘‘𑀲𑁄𑀧𑀺 𑀢𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀸𑀬𑀸𑀢𑀺 𑀢𑀸𑀬 𑀬𑀣𑀸𑀯𑀼𑀢𑁆𑀢𑀸𑀬 𑀲𑀫𑀼𑀢𑁆𑀢𑁂𑀚𑀦𑀸𑀬. 𑀅𑀬𑀸𑀦𑀪𑀽𑀫𑀺𑀦𑁆𑀢𑀺 𑀬𑀸𑀦𑀲𑁆𑀲 𑀅𑀪𑀽𑀫𑀺𑀁. 𑀤𑀺𑀯𑀸𑀧𑀥𑀸𑀦𑀺𑀓𑀸𑀢𑀺 𑀤𑀺𑀯𑀸𑀧𑀥𑀸𑀦𑀸𑀦𑀼𑀬𑀼𑀜𑁆𑀚𑀦𑀓𑀸.

𑁨𑁬𑁦. 𑀬𑀤𑀺𑀧𑀺 𑀧𑀼𑀩𑁆𑀩𑁂 𑀅𑀫𑁆𑀩𑀝𑁆𑀞𑀓𑀼𑀮𑀁 𑀅𑀧𑁆𑀧𑀜𑁆𑀜𑀸𑀢𑀁, 𑀢𑀤𑀸 𑀧𑀦 𑀧𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀤𑀸 𑀓𑀺𑀭𑀸’’𑀢𑀺𑀆𑀤𑀺. 𑀅𑀢𑀼𑀭𑀺𑀢𑁄𑀢𑀺 𑀅𑀯𑁂𑀕𑀸𑀬𑀦𑁆𑀢𑁄.

𑁨𑁬𑁧. 𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄𑀢𑀺 𑀬𑀣𑀸 𑀪𑀕𑀯𑀸 ‘‘𑀓𑀘𑁆𑀘𑀺 𑀯𑁄 𑀫𑀸𑀡𑀯𑀸 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀢𑁂𑀳𑀺 𑀫𑀸𑀡𑀯𑁂𑀳𑀺 𑀲𑀤𑁆𑀥𑀺𑀁 𑀧𑀞𑀫𑀁 𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺 𑀧𑀼𑀩𑁆𑀩𑀪𑀸𑀲𑀺𑀢𑀸𑀬 𑀢𑀤𑀦𑀼𑀓𑀭𑀡𑁂𑀦 𑀏𑀯𑀁 𑀢𑁂𑀧𑀺 𑀫𑀸𑀡𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀸 𑀅𑀳𑁂𑀲𑀼𑀦𑁆𑀢𑀺 𑀬𑁄𑀚𑀦𑀸. 𑀢𑀁 𑀧𑀦 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀢𑀁 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀢𑁄𑀤𑀓𑀁 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑁆𑀫𑁄𑀤𑀺𑀢𑀦𑁆𑀢𑀺 𑀲𑀁𑀲𑀦𑁆𑀤𑀺𑀢𑀁. 𑀏𑀓𑀻𑀪𑀸𑀯𑀦𑁆𑀢𑀺 𑀲𑀫𑁆𑀫𑁄𑀤𑀦𑀓𑀺𑀭𑀺𑀬𑀸𑀬 𑀲𑀫𑀸𑀦𑀢𑀁. 𑀔𑀫𑀦𑀻𑀬𑀦𑁆𑀢𑀺 ‘‘𑀇𑀤𑀁 𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁 𑀲𑀭𑀻𑀭𑀬𑀦𑁆𑀢𑀁 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀲𑀪𑀸𑀯𑀢𑁄 𑀤𑀼𑀲𑁆𑀲𑀳𑀁 𑀓𑀘𑁆𑀘𑀺 𑀔𑀫𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀺, 𑀬𑀸𑀧𑀦𑀻𑀬𑀦𑁆𑀢𑀺 𑀆𑀳𑀸𑀭𑀸𑀤𑀺𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀁 𑀘𑀺𑀭𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑀸𑀬 𑀬𑀸𑀧𑀦𑀸𑀬 𑀓𑀘𑁆𑀘𑀺 𑀬𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁. 𑀲𑀻𑀲𑀭𑁄𑀕𑀸𑀤𑀺𑀆𑀩𑀸𑀥𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀩𑀸𑀥𑀁, 𑀤𑀼𑀓𑁆𑀔𑀚𑀻𑀯𑀺𑀓𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀢𑀗𑁆𑀓𑀁, 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑁂 𑀉𑀝𑁆𑀞𑀸𑀦𑀲𑀼𑀔𑀢𑀸𑀬 𑀓𑀘𑁆𑀘𑀺 𑀮𑀳𑀼𑀝𑁆𑀞𑀸𑀦𑀁, 𑀢𑀤𑀦𑀼𑀭𑀽𑀧𑀩𑀮𑀬𑁄𑀕𑀢𑁄 𑀓𑀘𑁆𑀘𑀺 𑀩𑀮𑀁, 𑀲𑀼𑀔𑀯𑀺𑀳𑀸𑀭𑀲𑀩𑁆𑀪𑀸𑀯𑁂𑀦 𑀓𑀘𑁆𑀘𑀺 𑀨𑀸𑀲𑀼𑀯𑀺𑀳𑀸𑀭𑁄 𑀅𑀢𑁆𑀣𑀻𑀢𑀺 𑀲𑀩𑁆𑀩𑀢𑁆𑀣 𑀓𑀘𑁆𑀘𑀺-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀮𑀧𑁆𑀧𑀢𑁆𑀢𑀸 𑀧𑀻𑀢𑀺 𑀧𑀻𑀢𑀺𑀬𑁂𑀯. 𑀢𑀭𑀼𑀡𑀧𑀻𑀢𑀺 𑀧𑀸𑀫𑁄𑀚𑁆𑀚𑀁. 𑀲𑀫𑁆𑀫𑁄𑀤𑀦𑀁 𑀚𑀦𑁂𑀢𑀺 𑀓𑀭𑁄𑀢𑀻𑀢𑀺 𑀲𑀫𑁆𑀫𑁄𑀤𑀦𑀺𑀓𑀁 𑀢𑀤𑁂𑀯 𑀲𑀫𑁆𑀫𑁄𑀤𑀦𑀻𑀬𑀁. 𑀲𑀫𑁆𑀫𑁄𑀤𑀺𑀢𑀩𑁆𑀩𑀢𑁄 𑀲𑀫𑁆𑀫𑁄𑀤𑀦𑀻𑀬𑀦𑁆𑀢𑀺 𑀇𑀤𑀁 𑀧𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄’’𑀢𑀺. 𑀲𑀭𑀺𑀢𑀩𑁆𑀩𑀪𑀸𑀯𑀢𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀪𑀸𑀯𑀢𑁄 ‘‘𑀲𑀭𑀡𑀻𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀸𑀭𑀡𑀻𑀬’’𑀦𑁆𑀢𑀺 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄’’𑀢𑀺 𑀆𑀧𑀸𑀣𑀫𑀥𑀼𑀭𑀢𑀫𑀸𑀳, ‘‘𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄’’𑀢𑀺 𑀯𑀺𑀫𑀤𑁆𑀤𑀭𑀫𑀡𑀻𑀬𑀢𑀁. ‘‘𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬𑀸’’𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑁂𑀦 𑀢𑀲𑁆𑀲𑀸 𑀓𑀣𑀸𑀬 𑀯𑀘𑀦𑀘𑀸𑀢𑀼𑀭𑀺𑀬𑀫𑀸𑀳, ‘‘𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬𑀸’’𑀢𑀺 𑀅𑀢𑁆𑀣𑀲𑁆𑀲 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀁. 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺.

𑀅𑀧𑀲𑀸𑀤𑁂𑀲𑁆𑀲𑀸𑀫𑀻𑀢𑀺 𑀫𑀗𑁆𑀓𑀼𑀁 𑀓𑀭𑀺𑀲𑁆𑀲𑀸𑀫𑀺. 𑀓𑀡𑁆𑀞𑁂 𑀑𑀮𑀫𑁆𑀩𑁂𑀢𑁆𑀯𑀸𑀢𑀺 𑀉𑀪𑁄𑀲𑀼 𑀔𑀦𑁆𑀥𑁂𑀲𑀼 𑀲𑀸𑀝𑀓𑀁 𑀆𑀲𑀚𑁆𑀚𑁂𑀢𑁆𑀯𑀸 𑀓𑀡𑁆𑀞𑁂 𑀑𑀮𑀫𑁆𑀩𑀺𑀢𑁆𑀯𑀸. 𑀤𑀼𑀲𑁆𑀲𑀓𑀡𑁆𑀡𑀁 𑀕𑀳𑁂𑀢𑁆𑀯𑀸𑀢𑀺 𑀦𑀺𑀯𑀢𑁆𑀣𑀲𑀸𑀝𑀓𑀲𑁆𑀲 𑀤𑀲𑀸𑀓𑁄𑀝𑀺𑀁 𑀏𑀓𑁂𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸. 𑀘𑀗𑁆𑀓𑀫𑀁 𑀅𑀪𑀺𑀭𑀼𑀳𑀺𑀢𑁆𑀯𑀸𑀢𑀺 𑀘𑀗𑁆𑀓𑀫𑀺𑀢𑀼𑀁 𑀆𑀭𑀪𑀺𑀢𑁆𑀯𑀸. 𑀥𑀸𑀢𑀼𑀲𑀫𑀢𑀸𑀢𑀺 𑀭𑀲𑀸𑀤𑀺𑀥𑀸𑀢𑀽𑀦𑀁 𑀲𑀫𑀸𑀯𑀢𑁆𑀣𑀢𑀸, 𑀅𑀭𑁄𑀕𑀢𑀸𑀢𑀺 𑀅𑀢𑁆𑀣𑁄. 𑀅𑀦𑀸𑀘𑀸𑀭𑀪𑀸𑀯𑀲𑀸𑀭𑀡𑀻𑀬𑀦𑁆𑀢𑀺 𑀅𑀦𑀸𑀘𑀸𑀭𑀪𑀸𑀯𑁂𑀦 𑀲𑀭𑀡𑀻𑀬𑀁. ‘‘𑀅𑀦𑀸𑀘𑀸𑀭𑁄 𑀯𑀢𑀸𑀬’’𑀦𑁆𑀢𑀺 𑀲𑀭𑀺𑀢𑀩𑁆𑀩𑀓𑀁.

𑁨𑁬𑁨. ‘‘𑀪𑀯𑀕𑁆𑀕𑀁 𑀕𑀳𑁂𑀢𑀼𑀓𑀸𑀫𑁄 𑀯𑀺𑀬𑀸’’𑀢𑀺𑀆𑀤𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀼𑀓𑁆𑀓𑀭𑀁 𑀓𑀺𑀘𑁆𑀘𑀁 𑀆𑀭𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀅𑀲𑀓𑁆𑀓𑀼𑀡𑁂𑀬𑁆𑀬𑀜𑁆𑀳𑁂𑀢𑀁 𑀲𑀤𑁂𑀯𑀓𑁂𑀦𑀸𑀧𑀺 𑀮𑁄𑀓𑁂𑀦, 𑀬𑀤𑀺𑀤𑀁 𑀪𑀕𑀯𑀢𑁄 𑀅𑀧𑀲𑀸𑀤𑀦𑀁, 𑀢𑁂𑀦𑀸𑀳 ‘‘𑀅𑀝𑁆𑀞𑀸𑀦𑁂 𑀯𑀸𑀬𑀫𑀢𑀻’’𑀢𑀺. 𑀅𑀬𑀁 𑀩𑀸𑀮𑁄 ‘‘𑀫𑀬𑀺 𑀓𑀺𑀜𑁆𑀘𑀺 𑀅𑀓𑀣𑁂𑀦𑁆𑀢𑁂 𑀫𑀬𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀫𑁆𑀧𑀺 𑀦 𑀯𑀺𑀲𑀳𑀢𑀻’’𑀢𑀺 𑀫𑀸𑀦𑀫𑁂𑀯 𑀧𑀕𑁆𑀕𑀡𑁆𑀳𑀺𑀲𑁆𑀲𑀢𑀺, 𑀓𑀣𑁂𑀦𑁆𑀢𑁂 𑀧𑀦 𑀓𑀣𑀸𑀧𑀲𑀗𑁆𑀕𑁂𑀦𑀲𑁆𑀲 𑀚𑀸𑀢𑀺𑀕𑁄𑀢𑁆𑀢𑁂 𑀯𑀺𑀪𑀸𑀯𑀺𑀢𑁂 𑀫𑀸𑀦𑀦𑀺𑀕𑁆𑀕𑀳𑁄 𑀪𑀯𑀺𑀲𑁆𑀲𑀢𑀻𑀢𑀺 𑀪𑀕𑀯𑀸 ‘‘𑀏𑀯𑀁 𑀦𑀼 𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺. 𑀆𑀘𑀸𑀭𑀲𑀫𑀸𑀘𑀸𑀭𑀲𑀺𑀓𑁆𑀔𑀸𑀧𑀦𑁂𑀦 𑀆𑀘𑀭𑀺𑀬𑀸, 𑀢𑁂𑀲𑀁 𑀧𑀦 𑀆𑀘𑀭𑀺𑀬𑀸𑀦𑀁 𑀧𑀓𑀝𑁆𑀞𑀸 𑀆𑀘𑀭𑀺𑀬𑀸𑀢𑀺 𑀧𑀸𑀘𑀭𑀺𑀬𑀸 𑀬𑀣𑀸 𑀧𑀧𑀺𑀢𑀸𑀫𑀳𑁄𑀢𑀺, 𑀢𑁂𑀦𑀸𑀳 ‘‘𑀆𑀘𑀭𑀺𑀬𑁂𑀳𑀺 𑀘 𑀢𑁂𑀲𑀁 𑀧𑀸𑀘𑀭𑀺𑀬𑁂𑀳𑀺 𑀘𑀸’’𑀢𑀺.

𑀧𑀞𑀫𑀇𑀩𑁆𑀪𑀯𑀸𑀤𑀯𑀡𑁆𑀡𑀦𑀸

𑁨𑁬𑁩. 𑀢𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀽𑀢𑀺 𑀞𑀸𑀦𑀕𑀫𑀦𑀦𑀺𑀲𑀚𑁆𑀚𑀸𑀲𑀼. 𑀓𑀣𑀸𑀧𑀴𑀸𑀲𑀦𑁆𑀢𑀺 𑀓𑀣𑀸𑀯𑀲𑁂𑀦 𑀬𑀼𑀕𑀕𑁆𑀕𑀸𑀳𑀁. 𑀲𑀬𑀸𑀦𑁂𑀦 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀲𑀬𑀸𑀦𑀲𑁆𑀲 𑀓𑀣𑀸 𑀦𑀸𑀫 𑀆𑀘𑀸𑀭𑁄 𑀦 𑀳𑁄𑀢𑀺, 𑀢𑀁 𑀇𑀢𑀭𑁂𑀳𑀺 𑀲𑀤𑀺𑀲𑀁 𑀓𑀢𑁆𑀯𑀸 𑀓𑀣𑀦𑀁 𑀇𑀥 𑀓𑀣𑀸𑀧𑀴𑀸𑀲𑁄.

𑀢𑀲𑁆𑀲 𑀧𑀦 𑀬𑀁 𑀅𑀦𑀸𑀘𑀸𑀭𑀪𑀸𑀯𑀯𑀺𑀪𑀸𑀯𑀦𑀁 𑀲𑀢𑁆𑀣𑀸𑀭𑀸 𑀅𑀫𑁆𑀩𑀝𑁆𑀞𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀦 𑀓𑀢𑀁, 𑀢𑀁 𑀲𑀗𑁆𑀕𑀻𑀢𑀺𑀅𑀦𑀸𑀭𑀼𑀴𑁆𑀳𑀁 𑀧𑀭𑀫𑁆𑀧𑀭𑀸𑀪𑀢𑀦𑁆𑀢𑀺 𑀉𑀧𑀭𑀺 𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁄 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸𑀢𑀺 𑀘 𑀕𑀭𑀳𑀸𑀬𑀁 𑀓-𑀲𑀤𑁆𑀤𑁄, 𑀢𑁂𑀦𑀸𑀳 ‘‘𑀳𑀻𑀴𑁂𑀦𑁆𑀢𑁄’’𑀢𑀺. 𑀇𑀪𑀲𑁆𑀲 𑀧𑀬𑁄𑀕𑁄 𑀇𑀪𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀁 𑀇𑀪𑀁 𑀅𑀭𑀳𑀦𑁆𑀢𑀻𑀢𑀺 𑀇𑀩𑁆𑀪𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀇𑀪𑁄 𑀳𑀢𑁆𑀣𑀺𑀯𑀸𑀳𑀦𑀪𑀽𑀢𑁄 𑀧𑀭𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺, 𑀦 𑀅𑀢𑁆𑀢𑀦𑁄, 𑀏𑀯𑀁 𑀏𑀢𑁂𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀼𑀲𑁆𑀲𑀼𑀲𑀓𑀸 𑀲𑀼𑀤𑁆𑀤𑀸 𑀧𑀭𑀲𑁆𑀲 𑀯𑀲𑁂𑀦 𑀯𑀢𑁆𑀢𑀦𑁆𑀢𑀺, 𑀦 𑀅𑀢𑁆𑀢𑀦𑁄, 𑀢𑀲𑁆𑀫𑀸 𑀇𑀪𑀲𑀤𑀺𑀲𑀧𑀬𑁄𑀕𑀢𑀸𑀬 𑀇𑀩𑁆𑀪𑀸𑀢𑀺. 𑀢𑁂 𑀧𑀦 𑀓𑀼𑀝𑀼𑀫𑁆𑀩𑀺𑀓𑀢𑀸𑀬 𑀖𑀭𑀯𑀸𑀲𑀺𑀦𑁄 𑀖𑀭𑀲𑁆𑀲𑀸𑀫𑀺𑀓𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀕𑀳𑀧𑀢𑀺𑀓𑀸’’𑀢𑀺. 𑀓𑀡𑁆𑀳𑀸𑀢𑀺 𑀓𑀡𑁆𑀳𑀚𑀸𑀢𑀺𑀓𑀸. 𑀤𑀺𑀚𑀸 𑀏𑀯 𑀳𑀺 𑀲𑀼𑀤𑁆𑀥𑀚𑀸𑀢𑀺𑀓𑀸, 𑀦 𑀇𑀢𑀭𑁂𑀢𑀺 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑀸𑀳 ‘‘𑀓𑀸𑀴𑀓𑀸’’𑀢𑀺. 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀧𑀼𑀭𑀺𑀲𑀸 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸, 𑀅𑀬𑀁 𑀢𑁂𑀲𑀁 𑀧𑀞𑀫𑀼𑀧𑁆𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀲𑀫𑀡𑀸 𑀧𑀺𑀝𑁆𑀞𑀺𑀧𑀸𑀤𑀢𑁄’’𑀢𑀺 𑀇𑀤𑀁 𑀧𑀦𑀲𑁆𑀲 ‘‘𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄𑀧𑀺 𑀅𑀢𑀺𑀯𑀺𑀬 𑀅𑀲𑀫𑀯𑁂𑀓𑁆𑀔𑀺𑀢𑀯𑀘𑀦𑀁 𑀘𑀢𑀼𑀯𑀡𑁆𑀡𑀧𑀭𑀺𑀬𑀸𑀧𑀦𑁆𑀦𑀲𑁆𑀲𑁂𑀯 𑀲𑀫𑀡𑀪𑀸𑀯𑀲𑀫𑁆𑀪𑀯𑀢𑁄. 𑀅𑀦𑀺𑀬𑀫𑁂𑀢𑁆𑀯𑀸𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸, 𑀅𑀦𑀼𑀤𑁆𑀤𑁂𑀲𑀺𑀓𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑀫𑀸𑀦𑀼𑀲𑁆𑀲𑀬𑀯𑀲𑁂𑀦 𑀓𑀣𑁂𑀢𑀻𑀢𑀺 𑀫𑀸𑀦𑀼𑀲𑁆𑀲𑀬𑀁 𑀅𑀯𑀲𑁆𑀲𑀸𑀬 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀦𑁆𑀢𑁄, 𑀧𑀭𑁂 𑀘 𑀯𑀫𑁆𑀪𑁂𑀦𑁆𑀢𑁄 ‘‘𑀫𑀼𑀡𑁆𑀟𑀓𑀸’’𑀢𑀺 𑀆𑀤𑀺𑀁 𑀓𑀣𑁂𑀢𑀺. 𑀚𑀸𑀦𑀸𑀧𑁂𑀫𑀻𑀢𑀺 𑀚𑀸𑀢𑀺𑀕𑁄𑀢𑁆𑀢𑀲𑁆𑀲 𑀧𑀫𑀸𑀡𑀁 𑀬𑀸𑀣𑀸𑀯𑀢𑁄 𑀯𑀺𑀪𑀸𑀯𑀦𑁂𑀦 𑀧𑀫𑀸𑀡𑀁 𑀚𑀸𑀦𑀸𑀧𑁂𑀫𑀻𑀢𑀺. 𑀅𑀢𑁆𑀣𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑀺𑀓𑀁 𑀤𑀡𑁆𑀟𑀺𑀓𑀜𑀸𑀬𑁂𑀦.

‘‘𑀬𑀸𑀬𑁂𑀯 𑀔𑁄 𑀧𑀦𑀢𑁆𑀣𑀸𑀬𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀭𑀢𑁄 ‘‘𑀧𑀼𑀭𑀺𑀲𑀮𑀺𑀗𑁆𑀕𑀯𑀲𑁂𑀦𑁂𑀯𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀬𑀼𑀢𑁆𑀢𑀁. 𑀬𑀸𑀬 𑀅𑀢𑁆𑀣𑀸𑀬𑀸𑀢𑀺 𑀯𑀸 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦𑁂𑀯 𑀢𑀤𑀢𑁆𑀣𑁂 𑀲𑀫𑁆𑀧𑀤𑀸𑀦𑀯𑀘𑀦𑀁, 𑀬𑀲𑁆𑀲 𑀅𑀢𑁆𑀣𑀲𑁆𑀲 𑀅𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀅𑀫𑁆𑀩𑀝𑁆𑀞𑀲𑁆𑀲 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁂𑀲𑀦𑁆𑀢𑀺 𑀅𑀜𑁆𑀜𑁂𑀲𑀁 𑀲𑀸𑀥𑀼𑀭𑀽𑀧𑀸𑀦𑀁. 𑀲𑀦𑁆𑀢𑀺𑀓𑀁 𑀆𑀕𑀢𑀸𑀦𑀦𑁆𑀢𑀺 𑀕𑀼𑀭𑀼𑀝𑁆𑀞𑀸𑀦𑀺𑀬𑀸𑀦𑀁 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁. 𑀯𑀢𑁆𑀢𑀦𑁆𑀢𑀺 𑀢𑁂𑀳𑀺 𑀘𑀭𑀺𑀢𑀩𑁆𑀩𑀆𑀘𑀸𑀭𑀁. 𑀅𑀲𑀺𑀓𑁆𑀔𑀺𑀢𑁄𑀢𑀺 𑀆𑀘𑀸𑀭𑀁 𑀅𑀲𑀺𑀓𑁆𑀔𑀺𑀢𑁄. 𑀢𑀢𑁄 𑀏𑀯 𑀅𑀧𑁆𑀧𑀲𑁆𑀲𑀼𑀢𑁄. 𑀩𑀸𑀳𑀼𑀲𑀘𑁆𑀘𑀜𑁆𑀳𑀺 𑀦𑀸𑀫 𑀬𑀸𑀯𑀤𑁂𑀯 𑀉𑀧𑀲𑀫𑀢𑁆𑀣𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀤𑀪𑀸𑀯𑀢𑁄 𑀅𑀫𑁆𑀩𑀝𑁆𑀞𑁄 𑀅𑀧𑁆𑀧𑀲𑁆𑀲𑀼𑀢𑁄 𑀅𑀲𑀺𑀓𑁆𑀔𑀺𑀢𑁄 ‘‘𑀅𑀯𑀼𑀲𑀺𑀢𑁄’’𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑁂𑀦𑀸𑀳 ‘‘𑀏𑀢𑀲𑁆𑀲 𑀳𑀻’’𑀢𑀺𑀆𑀤𑀺.

𑁨𑁬𑁪. 𑀓𑁄𑀥𑀯𑀲𑀘𑀺𑀢𑁆𑀢𑀢𑀸𑀬 𑀅𑀲𑀓𑀫𑀦𑁄. 𑀫𑀸𑀦𑀦𑀺𑀫𑁆𑀫𑀤𑀦𑀢𑁆𑀣𑀦𑁆𑀢𑀺 𑀫𑀸𑀦𑀲𑁆𑀲 𑀦𑀺𑀫𑁆𑀫𑀤𑀦𑀢𑁆𑀣𑀁. 𑀉𑀕𑁆𑀕𑀺𑀮𑁂𑀢𑁆𑀯𑀸𑀢𑀺 𑀲𑀺𑀦𑁂𑀳𑀧𑀸𑀦𑁂𑀦 𑀓𑀺𑀮𑀺𑀦𑁆𑀦𑀁 𑀉𑀩𑁆𑀩𑀫𑀦𑀁 𑀓𑀢𑁆𑀯𑀸. 𑀕𑁄𑀢𑁆𑀢𑁂𑀦 𑀕𑁄𑀢𑁆𑀢𑀦𑁆𑀢𑀺 𑀢𑁂𑀦 𑀯𑀼𑀢𑁆𑀢𑁂𑀦 𑀧𑀼𑀭𑀸𑀢𑀦𑀕𑁄𑀢𑁆𑀢𑁂𑀦 𑀇𑀤𑀸𑀦𑀺 𑀢𑀁 𑀢𑀁 𑀅𑀦𑀯𑀚𑁆𑀚𑀲𑀜𑁆𑀜𑀺𑀢𑀁 𑀕𑁄𑀢𑁆𑀢𑀁 𑀲𑀸𑀯𑀚𑁆𑀚𑀢𑁄 𑀉𑀝𑁆𑀞𑀸𑀧𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀕𑁄𑀢𑁆𑀢𑀁 𑀆𑀤𑀺𑀧𑀼𑀭𑀺𑀲𑀯𑀲𑁂𑀦, 𑀓𑀼𑀮𑀸𑀧𑀤𑁄𑀲𑁄, 𑀢𑀤𑀦𑁆𑀯𑀬𑁂 𑀉𑀧𑁆𑀧𑀦𑁆𑀦𑀅𑀪𑀺𑀜𑁆𑀜𑀸𑀢𑀧𑀼𑀭𑀺𑀲𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑀬𑀣𑀸 ‘‘𑀆𑀤𑀺𑀘𑁆𑀘𑁄, 𑀫𑀖𑀤𑁂𑀯𑁄’’𑀢𑀺. 𑀕𑁄𑀢𑁆𑀢𑀫𑀽𑀮𑀲𑁆𑀲 𑀕𑀸𑀭𑀬𑁆𑀳𑀢𑀸𑀬 𑀅𑀫𑀸𑀦𑀯𑀢𑁆𑀣𑀼𑀪𑀸𑀯𑀧𑀯𑁂𑀤𑀦𑀢𑁄 ‘‘𑀫𑀸𑀦𑀤𑁆𑀥𑀚𑀁 𑀫𑀽𑀮𑁂 𑀙𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀖𑀝𑁆𑀝𑁂𑀦𑁆𑀢𑁄𑀢𑀺 𑀑𑀫𑀲𑀦𑁆𑀢𑁄.

𑀬𑀲𑁆𑀫𑀺𑀁 𑀫𑀸𑀦𑀼𑀲𑁆𑀲𑀬𑀓𑁄𑀥𑀼𑀲𑁆𑀲𑀬𑀸 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀤𑁆𑀥𑀸, 𑀲𑁄 ‘‘𑀘𑀡𑁆𑀟𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀘𑀡𑁆𑀟𑀸𑀢𑀺 𑀫𑀸𑀦𑀦𑀺𑀲𑁆𑀲𑀺𑀢𑀓𑁄𑀥𑀬𑀼𑀢𑁆𑀢𑀸’’𑀢𑀺. 𑀔𑀭𑀸𑀢𑀺 𑀘𑀺𑀢𑁆𑀢𑁂𑀦, 𑀯𑀸𑀘𑀸𑀬 𑀘 𑀓𑀓𑁆𑀔𑀴𑀸. 𑀮𑀳𑀼𑀓𑀸𑀢𑀺 𑀢𑀭𑀼𑀡𑀸. 𑀪𑀲𑁆𑀲𑀸𑀢𑀺 ‘‘𑀲𑀸𑀳𑀲𑀺𑀓𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, ‘‘𑀲𑀸𑀭𑀫𑁆𑀪𑀓𑀸’’𑀢𑀺 𑀅𑀧𑀭𑁂. 𑀲𑀫𑀸𑀦𑀸𑀢𑀺 𑀳𑁄𑀦𑁆𑀢𑀸, 𑀪𑀯𑀫𑀸𑀦𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀦𑁆𑀢𑀸𑀢𑀺 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀦 𑀲𑀓𑁆𑀓𑀭𑁄𑀦𑁆𑀢𑀻𑀢𑀺 𑀲𑀓𑁆𑀓𑀸𑀭𑀁 𑀦 𑀓𑀭𑁄𑀦𑁆𑀢𑀺. 𑀅𑀧𑀘𑀺𑀢𑀺𑀓𑀫𑁆𑀫𑀦𑁆𑀢𑀺 𑀧𑀡𑀺𑀧𑀸𑀢𑀓𑀫𑁆𑀫 𑀦𑀸𑀦𑀼𑀮𑁄𑀫𑀦𑁆𑀢𑀺 𑀅𑀢𑁆𑀢𑀦𑁄 𑀚𑀸𑀢𑀺𑀬𑀸 𑀦 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀇𑀩𑁆𑀪𑀯𑀸𑀤𑀯𑀡𑁆𑀡𑀦𑀸

𑁨𑁬𑁫. 𑀓𑀸𑀫𑀁 𑀲𑀓𑁆𑀬𑀭𑀸𑀚𑀓𑀼𑀮𑁂 𑀬𑁄 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀢𑀭𑁄 𑀲𑀫𑀢𑁆𑀣𑁄 𑀘, 𑀲𑁄 𑀏𑀯 𑀅𑀪𑀺𑀲𑁂𑀓𑀁 𑀮𑀪𑀢𑀺, 𑀏𑀓𑀘𑁆𑀘𑁄 𑀧𑀦 𑀅𑀪𑀺𑀲𑀺𑀢𑁆𑀢𑁄 𑀲𑀫𑀸𑀦𑁄 ‘‘𑀇𑀤𑀁 𑀭𑀚𑁆𑀚𑀁 𑀦𑀸𑀫 𑀩𑀳𑀼𑀓𑀺𑀘𑁆𑀘𑀁 𑀩𑀳𑀼𑀩𑁆𑀬𑀸𑀧𑀸𑀭’’𑀦𑁆𑀢𑀺 𑀢𑀢𑁄 𑀦𑀺𑀩𑁆𑀩𑀺𑀚𑁆𑀚 𑀭𑀚𑁆𑀚𑀁 𑀯𑀬𑀲𑀸 𑀅𑀦𑀦𑁆𑀢𑀭𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑀺, 𑀓𑀤𑀸𑀘𑀺 𑀲𑁄𑀧𑀺 𑀅𑀜𑁆𑀜𑀲𑁆𑀲𑀸𑀢𑀺 𑀢𑀸𑀤𑀺𑀲𑁂 𑀲𑀦𑁆𑀥𑀸𑀬𑀸𑀳 ‘‘𑀲𑀓𑁆𑀬𑀸𑀢𑀺 𑀅𑀪𑀺𑀲𑀺𑀢𑁆𑀢𑀭𑀸𑀚𑀸𑀦𑁄’’𑀢𑀺. 𑀓𑀼𑀮𑀯𑀁𑀲𑀁 𑀚𑀸𑀦𑀦𑁆𑀢𑀻𑀢𑀺 𑀓𑀡𑁆𑀳𑀸𑀬𑀦𑀢𑁄 𑀧𑀝𑁆𑀞𑀸𑀬 𑀧𑀭𑀫𑁆𑀧𑀭𑀸𑀕𑀢𑀁 𑀅𑀦𑀼𑀲𑁆𑀲𑀯𑀯𑀲𑁂𑀦 𑀚𑀸𑀦𑀦𑁆𑀢𑀺. 𑀓𑀼𑀮𑀸𑀪𑀺𑀫𑀸𑀦𑀺𑀦𑁄 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀧𑀭𑁂𑀲𑀁 𑀉𑀘𑁆𑀘𑀸𑀯𑀘𑀁 𑀓𑀼𑀮𑀁 𑀢𑀣𑀸 𑀢𑀣𑀸 𑀉𑀤𑀸𑀳𑀭𑀦𑁆𑀢𑀺, 𑀅𑀢𑁆𑀢𑀦𑁄 𑀘 𑀓𑀼𑀮𑀯𑀁𑀲𑀁 𑀚𑀸𑀦𑀦𑁆𑀢𑀺, 𑀏𑀯𑀁 𑀅𑀫𑁆𑀩𑀝𑁆𑀞𑁄𑀧𑀺. 𑀢𑀣𑀸 𑀳𑀺 𑀲𑁄 𑀧𑀭𑀢𑁄 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑁄 𑀯𑀚𑀺𑀭𑀧𑀸𑀡𑀺𑀪𑀬𑁂𑀦 𑀬𑀸𑀣𑀸𑀯𑀢𑁄 𑀓𑀣𑁂𑀲𑀺.

𑀢𑀢𑀺𑀬𑀇𑀩𑁆𑀪𑀯𑀸𑀤𑀯𑀡𑁆𑀡𑀦𑀸

𑁨𑁬𑁬. 𑀔𑁂𑀢𑁆𑀢𑀮𑁂𑀟𑁆𑀟𑀽𑀦𑀦𑁆𑀢𑀺 𑀔𑁂𑀢𑁆𑀢𑁂 𑀓𑀲𑀦𑀯𑀲𑁂𑀦 𑀦𑀗𑁆𑀕𑀮𑁂𑀦 𑀉𑀝𑁆𑀞𑀸𑀧𑀺𑀢𑀮𑁂𑀟𑁆𑀟𑀽𑀦𑀁. ‘‘𑀮𑀝𑀼𑀓𑀺𑀓𑀸’’ 𑀇𑀘𑁆𑀘𑁂𑀯 𑀧𑀜𑁆𑀜𑀸𑀢𑀸 𑀔𑀼𑀤𑁆𑀤𑀓𑀲𑀓𑀼𑀡𑀺𑀓𑀸 𑀮𑀝𑀼𑀓𑀺𑀓𑁄𑀧𑀫𑀯𑀡𑁆𑀡𑀦𑀸𑀬𑀁 ‘‘𑀘𑀸𑀢𑀓𑀲𑀓𑀼𑀡𑀺𑀓𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁧𑁫𑁦) 𑀯𑀼𑀢𑁆𑀢𑀸. 𑀓𑁄𑀥𑀯𑀲𑁂𑀦 𑀮𑀕𑁆𑀕𑀺𑀢𑀼𑀦𑁆𑀢𑀺 𑀉𑀧𑀦𑀬𑁆𑀳𑀺𑀢𑀼𑀁, 𑀆𑀖𑀸𑀢𑀁 𑀩𑀦𑁆𑀥𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀫𑁆𑀳𑁂 𑀳𑀁𑀲𑀓𑁄𑀜𑁆𑀘𑀫𑁄𑀭𑀲𑀫𑁂 𑀓𑀭𑁄𑀢𑀻’’𑀢𑀺 𑀇𑀫𑀺𑀦𑀸 ‘‘𑀦 𑀢𑀁 𑀓𑁄𑀘𑀺 𑀳𑀁𑀲𑁄 𑀯𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀗𑁆𑀕𑀻𑀢𑀺𑀁 𑀅𑀦𑀸𑀭𑀼𑀴𑁆𑀳𑀁 𑀢𑀤𑀸 𑀪𑀕𑀯𑀢𑀸 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀯𑀁 𑀦𑀼 𑀢𑁂’’𑀢𑀺𑀆𑀤𑀺𑀯𑀘𑀦𑀁, ‘‘𑀅𑀯𑀼𑀲𑀺𑀢𑀯𑀸𑀬𑁂𑀯𑀸’’𑀢𑀺𑀆𑀤𑀺𑀯𑀘𑀦𑀜𑁆𑀘 𑀫𑀸𑀦𑀯𑀲𑁂𑀦 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀯𑀼𑀢𑁆𑀢𑀦𑁆𑀢𑀺 𑀫𑀜𑁆𑀜𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀦𑀺𑀫𑁆𑀫𑀸𑀦𑁄 𑀤𑀸𑀦𑀺 𑀚𑀸𑀢𑁄𑀢𑀺 𑀫𑀜𑁆𑀜𑀫𑀸𑀦𑁄’’𑀢𑀺.

𑀤𑀸𑀲𑀺𑀧𑀼𑀢𑁆𑀢𑀯𑀸𑀤𑀯𑀡𑁆𑀡𑀦𑀸

𑁨𑁬𑁭. 𑀦𑀺𑀫𑁆𑀫𑀸𑀤𑁂𑀢𑀻𑀢𑀺 𑀅-𑀓𑀸𑀭𑀲𑁆𑀲 𑀆-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀦𑀺𑀫𑁆𑀫𑀤𑁂𑀢𑀻’’𑀢𑀺. 𑀓𑀸𑀫𑀁 𑀕𑁄𑀢𑁆𑀢𑀁 𑀦𑀸𑀫𑁂𑀢𑀁 𑀧𑀺𑀢𑀺𑀢𑁄 𑀮𑀤𑁆𑀥𑀩𑁆𑀩𑀁, 𑀦 𑀫𑀸𑀢𑀺𑀢𑁄 𑀦 𑀳𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀕𑁄𑀢𑁆𑀢𑀸𑀬 𑀆𑀯𑀸𑀳𑀯𑀺𑀯𑀸𑀳𑁄 𑀇𑀘𑁆𑀙𑀺𑀢𑁄, 𑀕𑁄𑀢𑁆𑀢𑀦𑀸𑀫𑀁 𑀧𑀦 𑀬𑀲𑁆𑀫𑀸 𑀚𑀸𑀢𑀺𑀲𑀺𑀤𑁆𑀥𑀁, 𑀦 𑀓𑀺𑀢𑁆𑀢𑀺𑀫𑀁, 𑀚𑀸𑀢𑀺 𑀘 𑀉𑀪𑀬𑀲𑀫𑁆𑀩𑀦𑁆𑀥𑀺𑀦𑀻, 𑀢𑀲𑁆𑀫𑀸 ‘‘𑀫𑀸𑀢𑀸𑀧𑁂𑀢𑁆𑀢𑀺𑀓𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀸𑀫𑀕𑁄𑀢𑁆𑀢𑀦𑁆𑀢𑀺 𑀕𑁄𑀢𑁆𑀢𑀦𑀸𑀫𑀁, 𑀦 𑀓𑀺𑀢𑁆𑀢𑀺𑀫𑀦𑀸𑀫𑀁, 𑀦 𑀕𑀼𑀡𑀦𑀸𑀫𑀁 𑀯𑀸. 𑀢𑀢𑁆𑀣 ‘‘𑀓𑀡𑁆𑀳𑀸𑀬𑀦𑁄’’𑀢𑀺 𑀦𑀺𑀭𑀼𑀴𑁆𑀳𑀸 𑀬𑀸 𑀦𑀸𑀫𑀧𑀡𑁆𑀡𑀢𑁆𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀦𑀸𑀫𑀦𑁆𑀢𑀺. 𑀢𑀁 𑀧𑀦 𑀓𑀡𑁆𑀳𑀇𑀲𑀺𑀢𑁄 𑀧𑀝𑁆𑀞𑀸𑀬 𑀢𑀲𑁆𑀫𑀺𑀁 𑀓𑀼𑀮𑀧𑀭𑀫𑁆𑀧𑀭𑀸𑀯𑀲𑁂𑀦 𑀆𑀕𑀢𑀁, 𑀦 𑀏𑀢𑀲𑁆𑀫𑀺𑀁𑀬𑁂𑀯 𑀦𑀺𑀭𑀼𑀴𑁆𑀳𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀯𑁂𑀡𑀻𑀯𑀲𑁂𑀦 𑀕𑁄𑀢𑁆𑀢’’𑀦𑁆𑀢𑀺. 𑀕𑁄𑀢𑁆𑀢-𑀧𑀤𑀲𑁆𑀲 𑀧𑀦 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀅𑀦𑀼𑀲𑁆𑀲𑀭𑀢𑁄𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀅𑀦𑀼𑀲𑁆𑀲𑀭𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀓𑀼𑀮𑀲𑀼𑀤𑁆𑀥𑀺𑀯𑀻𑀫𑀁𑀲𑀦𑀯𑀲𑁂𑀦𑀸𑀢𑀺 𑀆𑀳 ‘‘𑀓𑀼𑀮𑀓𑁄𑀝𑀺𑀁 𑀲𑁄𑀥𑁂𑀦𑁆𑀢𑀲𑁆𑀲𑀸’’𑀢𑀺. 𑀅𑀬𑁆𑀬𑀧𑀼𑀢𑁆𑀢𑀸𑀢𑀺 𑀅𑀬𑁆𑀬𑀺𑀓𑀧𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀸𑀫𑀺𑀦𑁄 𑀧𑀼𑀢𑁆𑀢𑀸’’𑀢𑀺. 𑀤𑀺𑀲𑀸 𑀑𑀓𑁆𑀓𑀸𑀓𑀭𑀜𑁆𑀜𑁄 𑀅𑀦𑁆𑀢𑁄𑀚𑀸𑀢𑀸 𑀤𑀸𑀲𑀻𑀢𑀺 𑀆𑀳 ‘‘𑀖𑀭𑀤𑀸𑀲𑀺𑀬𑀸 𑀧𑀼𑀢𑁆𑀢𑁄’’𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀫𑁆𑀩𑀝𑁆𑀞𑁄 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀫𑀸𑀦𑀢𑁆𑀣𑀤𑁆𑀥𑁄, 𑀦 𑀘𑀲𑁆𑀲 𑀬𑀸𑀣𑀸𑀯𑀢𑁄 𑀚𑀸𑀢𑀺𑀬𑀸 𑀅𑀯𑀺𑀪𑀸𑀯𑀺𑀢𑀸𑀬 𑀫𑀸𑀦𑀦𑀺𑀕𑁆𑀕𑀳𑁄 𑀳𑁄𑀢𑀺, 𑀫𑀸𑀦𑀦𑀺𑀕𑁆𑀕𑀳𑁂 𑀘 𑀓𑀢𑁂 𑀅𑀧𑀭𑀪𑀸𑀕𑁂 𑀭𑀢𑀦𑀢𑁆𑀢𑀬𑁂 𑀧𑀲𑀻𑀤𑀺𑀲𑁆𑀲𑀢𑀺, 𑀦 ‘‘𑀤𑀸𑀲𑀻’’𑀢𑀺 𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀦𑀸𑀫 𑀳𑁄𑀢𑀺 𑀘𑀺𑀢𑁆𑀢𑀲𑁆𑀲 𑀲𑀡𑁆𑀳𑀪𑀸𑀯𑀢𑁄. 𑀅𑀪𑀬𑀲𑀼𑀢𑁆𑀢𑀜𑁆𑀘𑁂𑀢𑁆𑀣 (𑀫. 𑀦𑀺. 𑁨.𑁮𑁩; 𑀅. 𑀦𑀺. 𑁪.𑁧𑁮𑁪) 𑀦𑀺𑀤𑀲𑁆𑀲𑀦𑀁. 𑀓𑁂𑀘𑀺 𑀘 𑀲𑀢𑁆𑀢𑀸 𑀅𑀕𑁆𑀕𑀺𑀦𑀸 𑀯𑀺𑀬 𑀮𑁄𑀳𑀸𑀤𑀬𑁄 𑀓𑀓𑁆𑀔𑀴𑀸𑀬 𑀯𑀸𑀘𑀸𑀬 𑀫𑀼𑀤𑀼𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀅𑀫𑁆𑀩𑀝𑁆𑀞𑀁 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀸𑀢𑀼𑀓𑀸𑀫𑁄 ‘‘𑀅𑀬𑁆𑀬𑀧𑀼𑀢𑁆𑀢𑀸 𑀲𑀓𑁆𑀬𑀸 𑀪𑀯𑀦𑁆𑀢𑀺, 𑀤𑀸𑀲𑀺𑀧𑀼𑀢𑁆𑀢𑁄 𑀢𑁆𑀯𑀫𑀲𑀺 𑀲𑀓𑁆𑀬𑀸𑀦’’𑀦𑁆𑀢𑀺 𑀅𑀯𑁄𑀘.

𑀞𑀧𑁂𑀦𑁆𑀢𑀻𑀢𑀺 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂𑀦𑀸𑀳 ‘‘𑀑𑀓𑁆𑀓𑀸𑀓𑁄’’𑀢𑀺𑀆𑀤𑀺. 𑀧𑀪𑀸 𑀦𑀺𑀘𑁆𑀙𑀭𑀢𑀺 𑀤𑀦𑁆𑀢𑀸𑀦𑀁 𑀅𑀢𑀺𑀯𑀺𑀬 𑀧𑀪𑀲𑁆𑀲𑀭𑀪𑀸𑀯𑀢𑁄.

𑀧𑀞𑀫𑀓𑀧𑁆𑀧𑀺𑀓𑀸𑀦𑀦𑁆𑀢𑀺 𑀧𑀞𑀫𑀓𑀧𑁆𑀧𑀲𑁆𑀲 𑀆𑀤𑀺𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑀸𑀦𑀁. 𑀓𑀺𑀭-𑀲𑀤𑁆𑀤𑁄 𑀅𑀦𑀼𑀲𑁆𑀲𑀯𑀢𑁆𑀣𑁂, 𑀢𑁂𑀦 𑀬𑁄 𑀯𑀼𑀘𑁆𑀘𑀫𑀸𑀦𑀸𑀬 𑀭𑀸𑀚𑀧𑀭𑀫𑁆𑀧𑀭𑀸𑀬 𑀓𑁂𑀲𑀜𑁆𑀘𑀺 𑀫𑀢𑀺𑀪𑁂𑀤𑁄, 𑀢𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. 𑀫𑀳𑀸𑀲𑀫𑁆𑀫𑀢𑀲𑁆𑀲𑀸𑀢𑀺 ‘‘𑀅𑀬𑀁 𑀦𑁄 𑀭𑀸𑀚𑀸’’𑀢𑀺 𑀫𑀳𑀸𑀚𑀦𑁂𑀦 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 ‘‘𑀫𑀳𑀸𑀲𑀫𑁆𑀫𑀢𑁄’’𑀢𑀺 𑀏𑀯𑀁 𑀲𑀫𑁆𑀫𑀢𑀲𑁆𑀲. 𑀬𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺 𑁋

‘‘𑀆𑀤𑀺𑀘𑁆𑀘𑀓𑀼𑀮𑀲𑀫𑁆𑀪𑀽𑀢𑁄, 𑀲𑀼𑀯𑀺𑀲𑀼𑀤𑁆𑀥𑀕𑀼𑀡𑀸𑀓𑀭𑁄;

𑀫𑀳𑀸𑀦𑀼𑀪𑀸𑀯𑁄 𑀭𑀸𑀚𑀸𑀲𑀺, 𑀫𑀳𑀸𑀲𑀫𑁆𑀫𑀢𑀦𑀸𑀫𑀓𑁄.

𑀬𑁄 𑀘𑀓𑁆𑀔𑀼𑀪𑀽𑀢𑁄 𑀮𑁄𑀓𑀲𑁆𑀲, 𑀕𑀼𑀡𑀭𑀁𑀲𑀺𑀲𑀫𑀼𑀚𑁆𑀚𑀮𑁄;

𑀢𑀫𑁄𑀦𑀼𑀤𑁄 𑀯𑀺𑀭𑁄𑀘𑀺𑀢𑁆𑀣, 𑀤𑀼𑀢𑀺𑀬𑁄 𑀯𑀺𑀬 𑀪𑀸𑀡𑀼𑀫𑀸.

𑀞𑀧𑀺𑀢𑀸 𑀬𑁂𑀦 𑀫𑀭𑀺𑀬𑀸𑀤𑀸, 𑀮𑁄𑀓𑁂 𑀮𑁄𑀓𑀳𑀺𑀢𑁂𑀲𑀺𑀦𑀸;

𑀯𑀯𑀢𑁆𑀣𑀺𑀢𑀸 𑀲𑀓𑁆𑀓𑀼𑀡𑀦𑁆𑀢𑀺, 𑀦 𑀯𑀺𑀮𑀗𑁆𑀖𑀬𑀺𑀢𑀼𑀁 𑀚𑀦𑀸.

𑀬𑀲𑀲𑁆𑀲𑀺𑀦𑀁 𑀢𑁂𑀚𑀲𑁆𑀲𑀺𑀦𑀁, 𑀮𑁄𑀓𑀲𑀻𑀫𑀸𑀦𑀼𑀭𑀓𑁆𑀔𑀓𑀁;

𑀆𑀤𑀺𑀪𑀽𑀢𑀁 𑀫𑀳𑀸𑀯𑀻𑀭𑀁, 𑀓𑀣𑀬𑀦𑁆𑀢𑀺 ‘𑀫𑀦𑀽’𑀢𑀺 𑀬’’𑀦𑁆𑀢𑀺.

𑀢𑀲𑁆𑀲 𑀘 𑀧𑀼𑀢𑁆𑀢𑀧𑀧𑀼𑀢𑁆𑀢𑀧𑀭𑀫𑁆𑀧𑀭𑀁 𑀲𑀦𑁆𑀥𑀸𑀬 𑁋

‘‘𑀢𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀢𑁂𑀚𑁄, 𑀭𑁄𑀚𑁄 𑀦𑀸𑀫 𑀫𑀳𑀻𑀧𑀢𑀺;

𑀢𑀲𑁆𑀲 𑀧𑀼𑀢𑁆𑀢𑁄 𑀯𑀭𑀭𑁄𑀚𑁄, 𑀧𑀯𑀭𑁄 𑀭𑀸𑀚𑀫𑀡𑁆𑀟𑀮𑁂.

𑀢𑀲𑁆𑀲𑀸𑀲𑀺 𑀓𑀮𑁆𑀬𑀸𑀡𑀕𑀼𑀡𑁄, 𑀓𑀮𑁆𑀬𑀸𑀡𑁄 𑀦𑀸𑀫 𑀅𑀢𑁆𑀭𑀚𑁄;

𑀭𑀸𑀚𑀸 𑀢𑀲𑁆𑀲𑀸𑀲𑀺 𑀢𑀦𑀬𑁄, 𑀯𑀭𑀓𑀮𑁆𑀬𑀸𑀡𑀦𑀸𑀫𑀓𑁄.

𑀢𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀯𑀻𑀭𑁄, 𑀫𑀦𑁆𑀥𑀸𑀢𑀸 𑀓𑀸𑀫𑀪𑁄𑀕𑀺𑀦𑀁;

𑀅𑀕𑁆𑀕𑀪𑀽𑀢𑁄 𑀫𑀳𑀺𑀦𑁆𑀤𑁂𑀦, 𑀅𑀟𑁆𑀠𑀭𑀚𑁆𑀚𑁂𑀦 𑀧𑀽𑀚𑀺𑀢𑁄.

𑀢𑀲𑁆𑀲 𑀲𑀽𑀦𑀼 𑀫𑀳𑀸𑀢𑁂𑀚𑁄, 𑀯𑀭𑀫𑀦𑁆𑀥𑀸𑀢𑀼𑀦𑀸𑀫𑀓𑁄;

‘𑀉𑀧𑁄𑀲𑀣𑁄’𑀢𑀺 𑀦𑀸𑀫𑁂𑀦, 𑀢𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀬𑀲𑁄.

𑀯𑀭𑁄 𑀦𑀸𑀫 𑀫𑀳𑀸𑀢𑁂𑀚𑁄, 𑀢𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀯𑀭𑁄;

𑀢𑀲𑁆𑀲𑀸𑀲𑀺 𑀉𑀧𑀯𑀭𑁄𑀢𑀺, 𑀧𑀼𑀢𑁆𑀢𑁄 𑀭𑀸𑀚𑀸 𑀫𑀳𑀸𑀩𑀮𑁄.

𑀢𑀲𑁆𑀲 𑀧𑀼𑀢𑁆𑀢𑁄 𑀫𑀖𑀤𑁂𑀯𑁄, 𑀤𑁂𑀯𑀢𑀼𑀮𑁆𑀬𑁄 𑀫𑀳𑀻𑀧𑀢𑀺;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀢𑀲𑁆𑀲 𑀧𑀼𑀢𑁆𑀢𑀧𑀭𑀫𑁆𑀧𑀭𑀸.

𑀢𑁂𑀲𑀁 𑀧𑀘𑁆𑀙𑀺𑀫𑀓𑁄 𑀭𑀸𑀚𑀸, ‘𑀑𑀓𑁆𑀓𑀸𑀓𑁄’ 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀫𑀳𑀸𑀬𑀲𑁄 𑀫𑀳𑀸𑀢𑁂𑀚𑁄, 𑀅𑀔𑀼𑀤𑁆𑀤𑁄 𑀭𑀸𑀚𑀫𑀡𑁆𑀟𑀮𑁂’’𑀢𑀺.

𑀆𑀤𑀺 𑀢𑁂𑀲𑀁 𑀧𑀘𑁆𑀙𑀢𑁄𑀢𑀺 𑀢𑁂𑀲𑀁 𑀫𑀖𑀤𑁂𑀯 𑀧𑀭𑀫𑁆𑀧𑀭𑀪𑀽𑀢𑀸𑀦𑀁 𑀓𑀴𑀸𑀭𑀚𑀦𑀓𑀧𑀭𑀺𑀬𑁄𑀲𑀸𑀦𑀸𑀦𑀁 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀭𑀸𑀚𑀽𑀦𑀁 𑀅𑀧𑀭𑀪𑀸𑀕𑁂 𑀑𑀓𑁆𑀓𑀸𑀓𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀢𑀲𑁆𑀲 𑀧𑀭𑀫𑁆𑀧𑀭𑀸𑀪𑀽𑀢𑀸𑀦𑀁 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀭𑀸𑀚𑀽𑀦𑀁 𑀅𑀧𑀭𑀪𑀸𑀕𑁂 𑀅𑀧𑀭𑁄 𑀑𑀓𑁆𑀓𑀸𑀓𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀢𑀲𑁆𑀲 𑀧𑀭𑀫𑁆𑀧𑀭𑀪𑀽𑀢𑀸𑀦𑀁 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀭𑀸𑀚𑀽𑀦𑀁 𑀅𑀧𑀭𑀪𑀸𑀕𑁂 𑀧𑀼𑀦𑀸𑀧𑀭𑁄 𑀑𑀓𑁆𑀓𑀸𑀓𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀬𑁄 𑀑𑀓𑁆𑀓𑀸𑀓𑀯𑀁𑀲𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀢𑀢𑀺𑀬𑀑𑀓𑁆𑀓𑀸𑀓𑀲𑁆𑀲𑀸’’𑀢𑀺𑀆𑀤𑀺.

𑀲𑀳𑀲𑀸 𑀯𑀭𑀁 𑀅𑀤𑀸𑀲𑀺𑀦𑁆𑀢𑀺 𑀧𑀼𑀢𑁆𑀢𑀤𑀲𑁆𑀲𑀦𑁂𑀦 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀲𑀳𑀲𑀸 𑀅𑀯𑀻𑀫𑀁𑀲𑀺𑀢𑁆𑀯𑀸 𑀢𑀼𑀝𑁆𑀞𑀺𑀬𑀸 𑀯𑀲𑁂𑀦 𑀯𑀭𑀁 𑀅𑀤𑀸𑀲𑀺𑀁, ‘‘𑀬𑀁 𑀇𑀘𑁆𑀙𑀲𑀺, 𑀢𑀁 𑀕𑀡𑁆𑀳𑀸’’𑀢𑀺. 𑀭𑀚𑁆𑀚𑀁 𑀧𑀭𑀺𑀡𑀸𑀫𑁂𑀢𑀼𑀁 𑀇𑀘𑁆𑀙𑀢𑀻𑀢𑀺 𑀲𑀸 𑀚𑀦𑁆𑀢𑀼𑀓𑀼𑀫𑀸𑀭𑀲𑁆𑀲 𑀫𑀸𑀢𑀸 𑀫𑀫 𑀢𑀁 𑀯𑀭𑀤𑀸𑀦𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀇𑀫𑀁 𑀭𑀚𑁆𑀚𑀁 𑀧𑀭𑀺𑀡𑀸𑀫𑁂𑀢𑀼𑀁 𑀇𑀘𑁆𑀙𑀢𑀻𑀢𑀺.

𑀦𑀧𑁆𑀧𑀲𑀳𑁂𑀬𑁆𑀬𑀸𑀢𑀺 𑀦 𑀧𑀭𑀺𑀬𑀢𑁆𑀢𑁄 𑀪𑀯𑁂𑀬𑁆𑀬.

𑀦𑀺𑀓𑁆𑀔𑀫𑁆𑀫𑀸𑀢𑀺 𑀖𑀭𑀸𑀯𑀸𑀲𑀢𑁄, 𑀓𑀸𑀫𑁂𑀳𑀺 𑀘 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀳𑁂𑀝𑁆𑀞𑀸 𑀘𑀸𑀢𑀺 𑀘-𑀲𑀤𑁆𑀤𑁂𑀦 ‘‘𑀅𑀲𑀻𑀢𑀺𑀳𑀢𑁆𑀣𑁂’’𑀢𑀺 𑀇𑀤𑀁 𑀅𑀦𑀼𑀓𑀟𑁆𑀠𑀢𑀺. 𑀢𑁂𑀳𑀻𑀢𑀺 𑀫𑀺𑀕𑀲𑀽𑀓𑀭𑁂𑀳𑀺, 𑀫𑀡𑁆𑀟𑀽𑀓𑀫𑀽𑀲𑀺𑀓𑁂𑀳𑀺 𑀘. 𑀢𑁂𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄, 𑀲𑀧𑁆𑀧𑀩𑀺𑀴𑀸𑀭𑀸 𑀘.

𑀅𑀯𑀲𑁂𑀲𑀸𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀸𑀳𑀺.

𑀯𑀟𑁆𑀠𑀫𑀸𑀦𑀸𑀦𑀦𑁆𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀓𑀼𑀝𑁆𑀞𑀭𑁄𑀕𑁄 𑀦𑀸𑀫 𑀲𑀸𑀲𑀫𑀲𑀽𑀭𑀻𑀭𑁄𑀕𑀸 𑀯𑀺𑀬 𑀬𑁂𑀪𑀼𑀬𑁆𑀬𑁂𑀦 𑀲𑀗𑁆𑀓𑀫𑀦𑀲𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀬𑀁 𑀭𑁄𑀕𑁄 𑀲𑀗𑁆𑀓𑀫𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸’’𑀢𑀺.

𑀫𑀺𑀕𑀲𑀽𑀓𑀭𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀦𑀘𑀭𑀲𑁄𑀡𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀔𑀢𑁆𑀢𑀺𑀬𑀫𑀸𑀬𑀸𑀭𑁄𑀘𑀦𑁂𑀦 𑀅𑀢𑁆𑀢𑀦𑁄 𑀔𑀢𑁆𑀢𑀺𑀬𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸.

𑀦𑀕𑀭𑀁 𑀫𑀸𑀧𑁂𑀳𑀻𑀢𑀺 𑀲𑀸𑀳𑀸𑀭𑀁 𑀦𑀕𑀭𑀁 𑀫𑀸𑀧𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑁂𑀲𑀕𑁆𑀕𑀳𑀡𑀦𑁆𑀢𑀺 𑀓𑁂𑀲𑀯𑁂𑀡𑀺𑀩𑀦𑁆𑀥𑀦𑀁. 𑀤𑀼𑀲𑁆𑀲𑀕𑁆𑀕𑀳𑀡𑀦𑁆𑀢𑀺 𑀯𑀢𑁆𑀣𑀲𑁆𑀲 𑀦𑀺𑀯𑀸𑀲𑀦𑀸𑀓𑀸𑀭𑁄.

𑁨𑁬𑁮. 𑀅𑀢𑁆𑀢𑀦𑁄 𑀉𑀧𑀸𑀭𑀫𑁆𑀪𑀫𑁄𑀘𑀦𑀢𑁆𑀣𑀸𑀬𑀸𑀢𑀺 𑀆𑀘𑀭𑀺𑀬𑁂𑀦 𑀅𑀫𑁆𑀩𑀝𑁆𑀞𑁂𑀦 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀸𑀧𑁂𑀢𑀩𑁆𑀩𑀉𑀧𑀯𑀸𑀤𑀲𑁆𑀲 𑀅𑀧𑀦𑀬𑀦𑀢𑁆𑀣𑀁. 𑀅𑀲𑁆𑀫𑀺𑀁 𑀯𑀘𑀦𑁂𑀢𑀺 ‘‘𑀘𑀢𑁆𑀢𑀸𑀭𑁄𑀫𑁂 𑀪𑁄 𑀕𑁄𑀢𑀫 𑀯𑀡𑁆𑀡𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀯𑀼𑀢𑁆𑀢𑁂, 𑀪𑁄𑀢𑀸 𑀘 𑀕𑁄𑀢𑀫𑁂𑀦 𑀯𑀼𑀢𑁆𑀢𑁂 ‘‘𑀚𑀸𑀢𑀺𑀯𑀸𑀤𑁂’’𑀢𑀺 𑀇𑀫𑀲𑁆𑀫𑀺𑀁 𑀬𑀣𑀸𑀥𑀺𑀓𑀢𑁂 𑀯𑀘𑀦𑁂. 𑀢𑀢𑁆𑀣 𑀧𑀦 𑀬𑀲𑁆𑀫𑀸 𑀯𑁂𑀤𑁂 𑀯𑀼𑀢𑁆𑀢𑀯𑀺𑀥𑀺𑀦𑀸𑀯 𑀢𑁂𑀦 𑀧𑀝𑀺𑀫𑀦𑁆𑀢𑁂𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑁂𑀤𑀢𑁆𑀢𑀬𑀯𑀘𑀦𑁂’’𑀢𑀺, ‘‘𑀏𑀢𑀲𑁆𑀫𑀺𑀁 𑀯𑀸 𑀤𑀸𑀲𑀺𑀧𑀼𑀢𑁆𑀢𑀯𑀘𑀦𑁂’’𑀢𑀺 𑀘.

𑁨𑁭𑁦. 𑀥𑀫𑁆𑀫𑁄 𑀦𑀸𑀫 𑀓𑀸𑀭𑀡𑀁 ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁧𑁮) 𑀯𑀺𑀬, 𑀲𑀳 𑀥𑀫𑁆𑀫𑁂𑀦𑀸𑀢𑀺 𑀲𑀳𑀥𑀫𑁆𑀫𑁄, 𑀲𑀳𑀥𑀫𑁆𑀫𑁄 𑀏𑀯 𑀲𑀳𑀥𑀫𑁆𑀫𑀺𑀓𑁄𑀢𑀺 𑀆𑀳 ‘‘𑀲𑀳𑁂𑀢𑀼𑀓𑁄’’𑀢𑀺.

𑁨𑁭𑁧. 𑀢𑀲𑁆𑀫𑀸 𑀢𑀤𑀸 𑀧𑀝𑀺𑀜𑁆𑀜𑀸𑀢𑀢𑁆𑀢𑀸. 𑀢𑀸𑀲𑁂𑀢𑁆𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑁆𑀲𑀸𑀫𑀻𑀢𑀺 𑀆𑀕𑀢𑁄 𑀬𑀣𑀸 𑀢𑀁 𑀲𑀘𑁆𑀘𑀓𑀲𑀫𑀸𑀕𑀫𑁂. ‘‘𑀪𑀕𑀯𑀸 𑀘𑁂𑀯 𑀧𑀲𑁆𑀲𑀢𑀺 𑀅𑀫𑁆𑀩𑀝𑁆𑀞𑁄 𑀘𑀸’’𑀢𑀺 𑀏𑀢𑁆𑀣 𑀇𑀢𑀭𑁂𑀲𑀁 𑀅𑀤𑀲𑁆𑀲𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀯𑀸𑀳𑁂𑀢𑁆𑀯𑀸𑀢𑀺 𑀫𑀦𑁆𑀢𑀩𑀮𑁂𑀦 𑀆𑀦𑁂𑀢𑁆𑀯𑀸. 𑀢𑀲𑁆𑀲𑀸𑀢𑀺 𑀅𑀫𑁆𑀩𑀝𑁆𑀞𑀲𑁆𑀲. 𑀯𑀸𑀤𑀲𑀗𑁆𑀖𑀝𑁆𑀝𑁂𑀢𑀺 𑀯𑀸𑀘𑀸𑀲𑀗𑁆𑀖𑀝𑁆𑀝𑁂.

𑁨𑁭𑁨. 𑀢𑀸𑀡𑀦𑁆𑀢𑀺 𑀕𑀯𑁂𑀲𑀫𑀸𑀦𑁄𑀢𑀺, ‘‘𑀅𑀬𑀫𑁂𑀯 𑀲𑀫𑀡𑁄 𑀕𑁄𑀢𑀫𑁄 𑀇𑀢𑁄 𑀪𑀬𑀢𑁄 𑀫𑀫 𑀢𑀸𑀬𑀓𑁄’’𑀢𑀺 𑀪𑀕𑀯𑀦𑁆𑀢𑀁𑀬𑁂𑀯 ‘‘𑀢𑀸𑀡’’𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑁄 𑀉𑀧𑀕𑀘𑁆𑀙𑀦𑁆𑀢𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀸𑀬𑀢𑀻𑀢𑀺 𑀬𑀣𑀸𑀉𑀧𑀝𑁆𑀞𑀺𑀢𑀪𑀬𑀢𑁄 𑀧𑀸𑀮𑁂𑀢𑀺, 𑀢𑁂𑀦𑀸𑀳 ‘‘𑀭𑀓𑁆𑀔𑀢𑀻’’𑀢𑀺, 𑀏𑀢𑁂𑀦 𑀢𑀸𑀡-𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀢𑀫𑀸𑀳. 𑀬𑀣𑀼𑀧𑀝𑁆𑀞𑀺𑀢𑁂𑀦 𑀪𑀬𑁂𑀦 𑀉𑀧𑀤𑁆𑀤𑀼𑀢𑁄 𑀦𑀺𑀮𑀻𑀬𑀢𑀺 𑀏𑀢𑁆𑀣𑀸𑀢𑀺 𑀮𑁂𑀡𑀁, 𑀉𑀧𑀮𑀬𑀦𑀁, 𑀏𑀢𑁂𑀦 𑀮𑁂𑀡-𑀲𑀤𑁆𑀤𑀲𑁆𑀲 𑀅𑀥𑀺𑀓𑀭𑀡𑀲𑀸𑀥𑀦𑀢𑀫𑀸𑀳. ‘‘𑀲𑀭𑀢𑀻’’𑀢𑀺 𑀏𑀢𑁂𑀦 𑀲𑀭𑀡-𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀢𑀫𑀸𑀳.

𑀅𑀫𑁆𑀩𑀝𑁆𑀞𑀯𑀁𑀲𑀓𑀣𑀸𑀯𑀡𑁆𑀡𑀦𑀸

𑁨𑁭𑁪. 𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀢𑁄𑀢𑀺 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀤𑀓𑁆𑀔𑀺𑀡𑀤𑀺𑀲𑀸𑀬. 𑀆𑀯𑀼𑀥𑀁 𑀦 𑀧𑀭𑀺𑀯𑀢𑁆𑀢𑀢𑀻𑀢𑀺 𑀲𑀭𑀁 𑀯𑀸𑀲𑀢𑁆𑀢𑀺𑀆𑀤𑀺𑀁 𑀯𑀸 𑀧𑀭𑀲𑁆𑀲 𑀉𑀧𑀭𑀺 𑀔𑀺𑀧𑀺𑀢𑀼𑀓𑀸𑀫𑀲𑁆𑀲 𑀳𑀢𑁆𑀣𑀁 𑀦 𑀧𑀭𑀺𑀯𑀢𑁆𑀢𑀢𑀺, 𑀳𑀢𑁆𑀣𑁂 𑀧𑀦 𑀅𑀧𑀭𑀺𑀯𑀢𑁆𑀢𑁂𑀦𑁆𑀢𑁂 𑀓𑀼𑀢𑁄 𑀆𑀯𑀼𑀥𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀆𑀳 ‘‘𑀆𑀯𑀼𑀥𑀁 𑀦 𑀧𑀭𑀺𑀯𑀢𑁆𑀢𑀢𑀻’’𑀢𑀺. 𑀲𑁄 𑀓𑀺𑀭 ‘‘𑀓𑀣𑀁 𑀦𑀸𑀫𑀸𑀳𑀁 𑀤𑀺𑀲𑀸𑀬 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀢𑀁 𑀳𑀻𑀦𑀁 𑀚𑀸𑀢𑀺𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀳𑀦𑁆𑀤𑀸𑀳𑀁 𑀬𑀣𑀸 𑀢𑀣𑀸 𑀇𑀫𑀁 𑀚𑀸𑀢𑀺𑀁 𑀲𑁄𑀥𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀕𑁆𑀕𑀢𑁄, 𑀢𑁂𑀦𑀸𑀳 ‘‘𑀇𑀤𑀸𑀦𑀺 𑀫𑁂 𑀫𑀦𑁄𑀭𑀣𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀯𑀺𑀚𑁆𑀚𑀸𑀩𑀮𑁂𑀦 𑀭𑀸𑀚𑀸𑀦𑀁 𑀢𑀸𑀲𑁂𑀢𑁆𑀯𑀸 𑀢𑀲𑁆𑀲 𑀥𑀻𑀢𑀼𑀬𑀸 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑁆𑀬𑀸𑀬𑀁 𑀚𑀸𑀢𑀺𑀲𑁄𑀥𑀺𑀢𑀸 𑀪𑀯𑀺𑀲𑁆𑀲𑀢𑀻𑀢𑀺 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀅𑀫𑁆𑀩𑀝𑁆𑀞𑀁 𑀦𑀸𑀫 𑀯𑀺𑀚𑁆𑀚𑀦𑁆𑀢𑀺 𑀲𑀢𑁆𑀢𑀸𑀦𑀁 𑀲𑀭𑀻𑀭𑁂 𑀅𑀩𑁆𑀪𑀗𑁆𑀕𑀁 𑀞𑀧𑁂𑀢𑀻𑀢𑀺 𑀅𑀫𑁆𑀩𑀝𑁆𑀞𑀸𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑀁 𑀯𑀺𑀚𑁆𑀚𑀁, 𑀫𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁄 𑀅𑀫𑁆𑀩𑀝𑁆𑀞𑀸 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀅𑀫𑁆𑀩𑀝𑁆𑀞𑁄𑀢𑀺 𑀓𑀡𑁆𑀳𑁄 𑀇𑀲𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀢𑀁𑀩𑀁𑀲𑀚𑀸𑀢𑀢𑀸𑀬 𑀅𑀬𑀁 𑀫𑀸𑀡𑀯𑁄 ‘‘𑀅𑀫𑁆𑀩𑀝𑁆𑀞𑁄’’𑀢𑀺 𑀯𑁄𑀳𑀭𑀻𑀬𑀢𑀺.

𑀲𑁂𑀝𑁆𑀞𑀫𑀦𑁆𑀢𑁂 𑀯𑁂𑀤𑀫𑀦𑁆𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑁆𑀢𑀸𑀦𑀼𑀪𑀸𑀯𑁂𑀦 𑀭𑀜𑁆𑀜𑁄 𑀩𑀸𑀳𑀼𑀓𑁆𑀔𑀫𑁆𑀪𑀫𑀢𑁆𑀢𑀁 𑀚𑀸𑀢𑀁 𑀢𑁂𑀦 𑀧𑀦𑀲𑁆𑀲 𑀩𑀸𑀳𑀼𑀓𑁆𑀔𑀫𑁆𑀪𑁂𑀦 𑀭𑀸𑀚𑀸, ‘‘𑀓𑁄 𑀚𑀸𑀦𑀸𑀢𑀺, 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀪𑀻𑀢𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀸𑀲𑁄 𑀅𑀳𑁄𑀲𑀺, 𑀢𑁂𑀦𑀸𑀳 ‘‘𑀪𑀬𑁂𑀦 𑀯𑁂𑀥𑀫𑀸𑀦𑁄 𑀅𑀝𑁆𑀞𑀸𑀲𑀻’’𑀢𑀺. 𑀲𑁄𑀢𑁆𑀣𑀺 𑀪𑀤𑁆𑀤𑀦𑁆𑀢𑁂𑀢𑀺 𑀆𑀤𑀺𑀯𑀘𑀦𑀁 𑀅𑀯𑁄𑀘𑀼𑀁. ‘‘𑀅𑀬𑀁 𑀫𑀳𑀸𑀦𑀼𑀪𑀸𑀯𑁄 𑀇𑀲𑀻’’𑀢𑀺 𑀫𑀜𑁆𑀜𑀫𑀸𑀦𑀸.

𑀉𑀦𑁆𑀤𑁆𑀭𑀺𑀬𑀺𑀲𑁆𑀲𑀢𑀻𑀢𑀺 𑀯𑀺𑀧𑁆𑀧𑀓𑀺𑀭𑀺𑀬𑀺𑀲𑁆𑀲𑀢𑀺, 𑀢𑁂𑀦𑀸𑀳 ‘‘𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑀺𑀢𑁂𑀢𑀺 𑀩𑀸𑀳𑀼𑀓𑁆𑀔𑀫𑁆𑀪𑀓𑀫𑀦𑁆𑀢𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀓𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑁂 𑀫𑀦𑁆𑀢𑁂 ‘‘𑀲𑀭𑁄 𑀑𑀢𑀭𑀢𑀽’’𑀢𑀺 𑀧𑀭𑀺𑀯𑀢𑁆𑀢𑀺𑀢𑁂. 𑀏𑀯𑀭𑀽𑀧𑀸𑀦𑀜𑁆𑀳𑀺 𑀫𑀦𑁆𑀢𑀸𑀦𑀁 𑀏𑀓𑀁𑀲𑁂𑀦𑁂𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀓𑀯𑀺𑀚𑁆𑀚𑀸 𑀳𑁄𑀦𑁆𑀢𑀺𑀬𑁂𑀯 𑀬𑀣𑀸 𑀢𑀁 𑀓𑀼𑀲𑀼𑀫𑀸𑀭𑀓𑀯𑀺𑀚𑁆𑀚𑀸𑀦𑀁. 𑀅𑀢𑁆𑀢𑀦𑁄 𑀥𑀻𑀢𑀼 𑀅𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀢𑀲𑁆𑀲 𑀪𑀼𑀚𑀺𑀲𑁆𑀲𑀓𑀭𑀡𑀁. 𑀢𑀲𑁆𑀲𑀸𑀦𑀼𑀭𑀽𑀧𑁂 𑀇𑀲𑁆𑀲𑀭𑀺𑀬𑁂 𑀞𑀧𑀦𑀢𑁆𑀣𑀁 𑀉𑀴𑀸𑀭𑁂 𑀘 𑀦𑀁 𑀞𑀸𑀦𑁂 𑀞𑀧𑁂𑀲𑀺.

𑀔𑀢𑁆𑀢𑀺𑀬𑀲𑁂𑀝𑁆𑀞𑀪𑀸𑀯𑀯𑀡𑁆𑀡𑀦𑀸

𑁨𑁭𑁫. 𑀲𑀫𑀲𑁆𑀲𑀸𑀲𑀦𑀢𑁆𑀣𑀫𑀸𑀳 𑀓𑀭𑀼𑀡𑀸𑀬𑀦𑁆𑀢𑁄, 𑀦 𑀓𑀼𑀮𑀻𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀢𑁂𑀦𑀸𑀳 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺. 𑀩𑁆𑀭𑀸𑀳𑁆𑀫𑀡𑁂𑀲𑀽𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀫𑀻𑀧𑁂, 𑀢𑀢𑁄 𑀩𑁆𑀭𑀸𑀳𑁆𑀫𑀡𑁂𑀳𑀺 𑀮𑀤𑁆𑀥𑀩𑁆𑀩𑀁 𑀆𑀲𑀦𑀸𑀤𑀺𑀁 𑀲𑀦𑁆𑀥𑀸𑀬 ‘‘𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀦𑁆𑀢𑀭𑁂’’𑀢𑀺 𑀯𑀼𑀢𑁆𑀢𑀁. 𑀓𑁂𑀯𑀮𑀁 𑀲𑀤𑁆𑀥𑀸𑀬 𑀓𑀸𑀢𑀩𑁆𑀩𑀁 𑀲𑀤𑁆𑀥𑀁, 𑀧𑀭𑀮𑁄𑀓𑀕𑀢𑁂 𑀲𑀦𑁆𑀥𑀸𑀬 𑀦 𑀢𑀢𑁄 𑀓𑀺𑀜𑁆𑀘𑀺 𑀅𑀧𑀢𑁆𑀣𑁂𑀦𑁆𑀢𑁂𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀫𑀢𑀓𑁂 𑀉𑀤𑁆𑀤𑀺𑀲𑁆𑀲 𑀓𑀢𑀪𑀢𑁆𑀢𑁂’’𑀢𑀺. 𑀫𑀗𑁆𑀕𑀮𑀸𑀤𑀺𑀪𑀢𑁆𑀢𑁂𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀉𑀲𑁆𑀲𑀯𑀤𑁂𑀯𑀢𑀸𑀭𑀸𑀥𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀜𑁆𑀜𑀪𑀢𑁆𑀢𑁂𑀢𑀺 𑀧𑀸𑀧𑀲𑀜𑁆𑀜𑀫𑀸𑀤𑀺𑀯𑀲𑁂𑀦 𑀓𑀢𑀪𑀢𑁆𑀢𑁂. 𑀧𑀸𑀳𑀼𑀦𑀓𑀸𑀦𑀦𑁆𑀢𑀺 𑀅𑀢𑀺𑀣𑀻𑀦𑀁. 𑀔𑀢𑁆𑀢𑀺𑀬𑀪𑀸𑀯𑀁 𑀅𑀧𑁆𑀧𑀢𑁆𑀢𑁄 𑀉𑀪𑀢𑁄 𑀲𑀼𑀚𑀸𑀢𑀢𑀸𑀪𑀸𑀯𑀢𑁄, 𑀢𑁂𑀦𑀸𑀳 ‘‘𑀅𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀢𑁆𑀣𑁄’’𑀢𑀺.

𑁨𑁭𑁬. 𑀇𑀢𑁆𑀣𑀺𑀁 𑀓𑀭𑀺𑀢𑁆𑀯𑀸𑀢𑀺 𑀏𑀢𑁆𑀣 𑀓𑀭𑀡𑀁 𑀓𑀺𑀭𑀺𑀬𑀸𑀲𑀸𑀫𑀜𑁆𑀜𑀯𑀺𑀲𑀬𑀦𑁆𑀢𑀺 𑀆𑀳 ‘‘𑀇𑀢𑁆𑀣𑀺𑀁 𑀧𑀭𑀺𑀬𑁂𑀲𑀺𑀢𑁆𑀯𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀁 𑀇𑀢𑁆𑀣𑀺𑀁 𑀔𑀢𑁆𑀢𑀺𑀬𑀓𑀼𑀫𑀸𑀭𑀲𑁆𑀲 𑀪𑀭𑀺𑀬𑀸𑀪𑀽𑀢𑀁 𑀕𑀳𑁂𑀢𑁆𑀯𑀸𑀧𑀺 𑀔𑀢𑁆𑀢𑀺𑀬𑀸𑀯 𑀲𑁂𑀝𑁆𑀞𑀸, 𑀳𑀻𑀦𑀸 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁄𑀚𑀦𑀸. 𑀧𑀼𑀭𑀺𑀲𑁂𑀦 𑀯𑀸 𑀧𑀼𑀭𑀺𑀲𑀁 𑀓𑀭𑀺𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀓𑀭𑀡𑁂𑀢𑀺 𑀭𑀸𑀕𑀸𑀤𑀺𑀯𑀲𑁂𑀦 𑀧𑀤𑀼𑀝𑁆𑀞𑁂 𑀧𑀓𑁆𑀔𑀮𑀺𑀢𑁂 𑀓𑀸𑀭𑀡𑁂, 𑀢𑁂𑀦𑀸𑀳 ‘‘𑀤𑁄𑀲𑁂’’𑀢𑀺. 𑀪𑀲𑁆𑀲𑀢𑀺 𑀦𑀺𑀭𑀢𑁆𑀣𑀓𑀪𑀸𑀯𑁂𑀦 𑀔𑀺𑀧𑀻𑀬𑀢𑀻𑀢𑀺 𑀪𑀲𑁆𑀲𑀁, 𑀙𑀸𑀭𑀺𑀓𑀸.

𑁨𑁭𑁭. 𑀚𑀦𑀺𑀢𑀲𑁆𑀫𑀺𑀦𑁆𑀢𑀺 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑁂. 𑀚𑀦𑁂 𑀏𑀢𑀲𑁆𑀫𑀺𑀦𑁆𑀢𑀺 𑀯𑀸 𑀚𑀦𑁂𑀢𑀲𑁆𑀫𑀺𑀁, 𑀫𑀦𑀼𑀲𑁆𑀲𑁂𑀲𑀽𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄’’𑀢𑀺. 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀖𑀝𑁂𑀢𑁆𑀯𑀸, 𑀅𑀯𑀺𑀭𑀼𑀤𑁆𑀥𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀚𑁆𑀚𑀸𑀘𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁭𑁮. 𑀇𑀤𑀁 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀅𑀚𑁆𑀛𑁂𑀦𑀸𑀤𑀺 𑀓𑀢𑁆𑀢𑀼𑀁 𑀮𑀩𑁆𑀪𑀢𑀺. 𑀚𑀸𑀢𑀺𑀯𑀸𑀤𑀯𑀺𑀦𑀺𑀩𑀤𑁆𑀥𑀸𑀢𑀺 𑀚𑀸𑀢𑀺𑀲𑀦𑁆𑀦𑀺𑀲𑁆𑀲𑀺𑀢𑀯𑀸𑀤𑁂 𑀯𑀺𑀦𑀺𑀩𑀤𑁆𑀥𑀸. 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯 𑀅𑀚𑁆𑀛𑁂𑀦𑀚𑁆𑀛𑀸𑀧𑀦𑀬𑀚𑀦𑀬𑀸𑀚𑀦𑀸𑀤𑀬𑁄𑀢𑀺 𑀏𑀯𑀁 𑀬𑁂 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀸, 𑀢𑀢𑁄 𑀏𑀯 𑀢𑁂 𑀫𑀸𑀦𑀯𑀸𑀤𑀧𑀝𑀺𑀩𑀤𑁆𑀥𑀸 𑀘 𑀳𑁄𑀦𑁆𑀢𑀺. 𑀬𑁂 𑀧𑀦 𑀆𑀯𑀸𑀳𑀯𑀺𑀯𑀸𑀳𑀯𑀺𑀦𑀺𑀩𑀤𑁆𑀥𑀸, 𑀢𑁂 𑀏𑀯 𑀲𑀫𑁆𑀩𑀦𑁆𑀥𑀢𑁆𑀢𑀬𑀯𑀲𑁂𑀦 ‘‘𑀅𑀭𑀳𑀲𑀺 𑀯𑀸 𑀫𑀁 𑀢𑁆𑀯𑀁, 𑀦 𑀯𑀸 𑀫𑀁 𑀢𑁆𑀯𑀁 𑀅𑀭𑀳𑀲𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀦𑀓𑀸.

𑀬𑀢𑁆𑀣𑀸𑀢𑀺 𑀬𑀲𑁆𑀲𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀢𑁆𑀢𑀺𑀬𑀁. 𑀮𑀕𑁆𑀕𑀺𑀲𑁆𑀲𑀸𑀫𑀸𑀢𑀺 𑀑𑀮𑀕𑁆𑀕𑀸 𑀅𑀦𑁆𑀢𑁄𑀕𑀥𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀘𑀺𑀦𑁆𑀢𑀬𑀺𑀫𑁆𑀳. 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀸𑀘𑀭𑀡𑀸𑀦𑀺𑀬𑁂𑀯 ‘‘𑀯𑀺𑀚𑁆𑀚𑀸𑀘𑀭𑀡𑀸𑀦𑀻’’𑀢𑀺 𑀕𑀳𑁂𑀢𑁆𑀯𑀸 𑀞𑀺𑀢𑁄 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀸𑀘𑀭𑀡𑁂𑀲𑀼 𑀯𑀺𑀪𑀚𑀺𑀬𑀫𑀸𑀦𑁂𑀲𑀼 𑀲𑁄 𑀢𑀢𑁄 𑀤𑀽𑀭𑀢𑁄 𑀅𑀧𑀦𑀻𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀤𑀽𑀭𑀫𑁂𑀯 𑀅𑀯𑀓𑁆𑀔𑀺𑀧𑀻’’𑀢𑀺. 𑀲𑀫𑀼𑀤𑀸𑀕𑀫𑀢𑁄 𑀧𑀪𑀼𑀢𑀻𑀢𑀺𑀆𑀤𑀺𑀲𑀫𑀼𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬.

𑁨𑁭𑁯. 𑀢𑀺𑀯𑀺𑀥𑀁 𑀲𑀻𑀮𑀦𑁆𑀢𑀺 𑀔𑀼𑀤𑁆𑀤𑀓𑀸𑀤𑀺𑀪𑁂𑀤𑀁 𑀢𑀺𑀯𑀺𑀥𑀁 𑀲𑀻𑀮𑀁. 𑀲𑀻𑀮𑀯𑀲𑁂𑀦𑁂𑀯𑀸𑀢𑀺 𑀲𑀻𑀮𑀧𑀭𑀺𑀬𑀸𑀬𑁂𑀦𑁂𑀯. 𑀓𑀺𑀜𑁆𑀘𑀺 𑀓𑀺𑀜𑁆𑀘𑀻𑀢𑀺 𑀅𑀳𑀺𑀁𑀲𑀦𑀸𑀤𑀺𑀬𑀫𑀦𑀺𑀬𑀫𑀮𑀓𑁆𑀔𑀡𑀁 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀲𑀻𑀮𑀁 𑀅𑀢𑁆𑀣𑀺. 𑀢𑀢𑁆𑀣 𑀢𑀢𑁆𑀣𑁂𑀯 𑀮𑀕𑁆𑀕𑁂𑀬𑁆𑀬𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁𑀬𑁂𑀯 𑀩𑁆𑀭𑀸𑀳𑁆𑀫𑀡𑀲𑀫𑀬𑀲𑀺𑀤𑁆𑀥𑁂 𑀲𑀻𑀮𑀫𑀢𑁆𑀢𑁂 ‘‘𑀘𑀭𑀡’’𑀦𑁆𑀢𑀺 𑀮𑀕𑁆𑀕𑁂𑀬𑁆𑀬. 𑀅𑀝𑁆𑀞𑀧𑀺 𑀲𑀫𑀸𑀧𑀢𑁆𑀢𑀺𑀬𑁄 𑀘𑀭𑀡𑀦𑁆𑀢𑀺 𑀦𑀺𑀬𑁆𑀬𑀸𑀢𑀺𑀢𑀸 𑀳𑁄𑀦𑁆𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀤𑁆𑀤𑁂𑀲𑁂𑀦𑁂𑀯 𑀅𑀭𑀽𑀧𑀚𑁆𑀛𑀸𑀦𑀸𑀦𑀫𑁆𑀧𑀺 𑀦𑀺𑀤𑁆𑀤𑀺𑀝𑁆𑀞𑀪𑀸𑀯𑀸𑀧𑀢𑁆𑀢𑀺𑀢𑁄 𑀦𑀺𑀬𑁆𑀬𑀸𑀢𑀺𑀢𑀸 𑀦𑀺𑀤𑀲𑁆𑀲𑀺𑀢𑀸.

𑀘𑀢𑀼𑀅𑀧𑀸𑀬𑀫𑀼𑀔𑀓𑀣𑀸𑀯𑀡𑁆𑀡𑀦𑀸

𑁨𑁮𑁦. 𑀅𑀲𑀫𑁆𑀧𑀸𑀧𑀼𑀡𑀦𑁆𑀢𑁄𑀢𑀺 𑀆𑀭𑀪𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄. 𑀅𑀯𑀺𑀲𑀳𑀫𑀸𑀦𑁄𑀢𑀺 𑀆𑀭𑀪𑀺𑀢𑀼𑀫𑁂𑀯 𑀅𑀲𑀓𑁆𑀓𑁄𑀦𑁆𑀢𑁄. 𑀔𑀸𑀭𑀺𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑀁. 𑀢𑀁 𑀧𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀡𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀭𑀡𑀻𑀢𑀺 𑀅𑀕𑁆𑀕𑀺𑀥𑀫𑀦𑀓𑀁 𑀅𑀭𑀡𑀻𑀤𑁆𑀯𑀬𑀁. 𑀲𑀼𑀚𑀸𑀢𑀺 𑀤𑀩𑁆𑀩𑀺. 𑀆𑀤𑀺-𑀲𑀤𑁆𑀤𑁂𑀦 𑀢𑀺𑀤𑀡𑁆𑀟𑀢𑀺𑀖𑀝𑀺𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺 𑀔𑀸𑀭𑀺𑀪𑀭𑀺𑀢𑀦𑁆𑀢𑀺 𑀔𑀸𑀭𑀻𑀳𑀺 𑀧𑀼𑀡𑁆𑀡𑀁. 𑀦𑀦𑀼 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀸𑀲𑀦𑀺𑀓𑁄𑀧𑀺 𑀬𑁄 𑀓𑁄𑀘𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀅𑀢𑁆𑀣𑀢𑁄 𑀧𑀭𑀺𑀘𑀸𑀭𑀓𑁄𑀯, 𑀓𑀺𑀁 𑀅𑀗𑁆𑀕𑀁 𑀧𑀦 𑀩𑀸𑀳𑀺𑀭𑀓𑀧𑀩𑁆𑀩𑀚𑀺𑀢𑁂𑀢𑀺 𑀢𑀢𑁆𑀣 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀓𑀧𑁆𑀧𑀺𑀬𑀓𑀭𑀡…𑀧𑁂… 𑀯𑀢𑁆𑀢𑀓𑀭𑀡𑀯𑀲𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀧𑀭𑀺𑀘𑀸𑀭𑀓𑁄 𑀳𑁄𑀢𑀺 𑀉𑀧𑀲𑀫𑁆𑀧𑀦𑁆𑀦𑀪𑀸𑀯𑀲𑁆𑀲 𑀯𑀺𑀲𑀺𑀝𑁆𑀞𑀪𑀸𑀯𑀢𑁄. ‘‘𑀦𑀯𑀓𑁄𑀝𑀺𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁨𑁦; 𑀧𑀝𑀺. 𑀫. 𑀅𑀝𑁆𑀞. 𑁩𑁭) 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀁 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀲𑀁𑀯𑀭𑀯𑀺𑀦𑀬𑀸𑀦𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀯𑀢𑁆𑀢𑀦𑁂𑀦 𑀉𑀧𑀭𑀺𑀪𑀽𑀢𑀸 𑀅𑀕𑁆𑀕𑀪𑀽𑀢𑀸 𑀲𑀫𑁆𑀧𑀤𑀸𑀢𑀺 𑀳𑀺 ‘‘𑀉𑀧𑀲𑀫𑁆𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀕𑀼𑀡𑀸𑀥𑀺𑀓𑁄𑀧𑀻𑀢𑀺 𑀕𑀼𑀡𑁂𑀳𑀺 𑀉𑀓𑁆𑀓𑀝𑁆𑀞𑁄𑀧𑀺. 𑀅𑀬𑀁 𑀧𑀦𑀸𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁄 𑀢𑀸𑀧𑀲𑁄.

𑀢𑀸𑀧𑀲𑀸 𑀦𑀸𑀫 𑀓𑀫𑁆𑀫𑀯𑀸𑀤𑀺𑀓𑀺𑀭𑀺𑀬𑀸𑀯𑀸𑀤𑀺𑀦𑁄, 𑀦 𑀲𑀸𑀲𑀦𑀲𑁆𑀲 𑀧𑀝𑀸𑀡𑀻𑀪𑀽𑀢𑀸, 𑀬𑀢𑁄 𑀦𑁂𑀲𑀁 𑀧𑀩𑁆𑀩𑀚𑀺𑀢𑀼𑀁 𑀆𑀕𑀢𑀸𑀦𑀁 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁂𑀦 𑀯𑀺𑀦𑀸𑀯 𑀧𑀩𑁆𑀩𑀚𑁆𑀚𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀓𑀢𑁆𑀯𑀸 ‘‘𑀓𑀲𑁆𑀫𑀸 𑀧𑀦𑀸’’𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀧𑁂𑀢𑀺 𑀘𑁄𑀤𑀓𑁄. 𑀆𑀘𑀭𑀺𑀬𑁄 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀘𑁄𑀤𑀦𑀁 𑀧𑀭𑀺𑀳𑀭𑀢𑀺. ‘‘𑀑𑀲𑀓𑁆𑀓𑀺𑀲𑁆𑀲𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀫𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀔𑀼𑀭𑀥𑀸𑀭𑀽𑀧𑀫𑀦𑁆𑀢𑀺 𑀔𑀼𑀭𑀥𑀸𑀭𑀸𑀦𑀁 𑀫𑀢𑁆𑀣𑀓𑁂𑀦𑁂𑀯 𑀅𑀓𑁆𑀓𑀫𑀺𑀢𑁆𑀯𑀸 𑀕𑀫𑀦𑀽𑀧𑀫𑀁. 𑀅𑀜𑁆𑀜𑁂𑀢𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽. 𑀅𑀕𑁆𑀕𑀺𑀲𑀸𑀮𑀦𑁆𑀢𑀺 𑀅𑀕𑁆𑀕𑀺𑀳𑀼𑀢𑁆𑀢𑀲𑀸𑀮𑀁. 𑀦𑀸𑀦𑀸𑀤𑀸𑀭𑀽𑀳𑀻𑀢𑀺 𑀧𑀮𑀸𑀲𑀤𑀡𑁆𑀟𑀸𑀤𑀺𑀦𑀸𑀦𑀸𑀯𑀺𑀥𑀲𑀫𑀺𑀥𑀸𑀤𑀸𑀭𑀽𑀳𑀺.

𑀇𑀤𑀦𑁆𑀢𑀺 ‘‘𑀘𑀢𑀼𑀤𑁆𑀯𑀸𑀭𑀁 𑀆𑀕𑀸𑀭𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀧𑀝𑀺𑀧𑀢𑁆𑀢𑀺𑀫𑀼𑀔𑀦𑁆𑀢𑀺 𑀓𑁄𑀳𑀜𑁆𑀜𑀧𑀝𑀺𑀧𑀢𑁆𑀢𑀺𑀬𑀸 𑀫𑀼𑀔𑀫𑀢𑁆𑀢𑀁. 𑀲𑁄 𑀳𑀺 𑀦𑀸𑀦𑀸𑀯𑀺𑀥𑁂𑀦 𑀓𑁄𑀳𑀜𑁆𑀜𑁂𑀦 𑀮𑁄𑀓𑀁 𑀯𑀺𑀫𑁆𑀳𑀸𑀧𑁂𑀦𑁆𑀢𑁄 𑀢𑀢𑁆𑀣 𑀅𑀘𑁆𑀙𑀢𑀺, 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀳𑀺 𑀫𑀼𑀔𑁂𑀦 𑀲𑁄 𑀏𑀯𑀁 𑀧𑀝𑀺𑀧𑀚𑁆𑀚𑀢𑀻’’𑀢𑀺.

𑀔𑀮𑀸𑀤𑀻𑀲𑀼 𑀫𑀦𑀼𑀲𑁆𑀲𑀸𑀦𑀁 𑀲𑀦𑁆𑀢𑀺𑀓𑁂 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀯𑀻𑀳𑀺𑀫𑀼𑀕𑁆𑀕𑀢𑀺𑀮𑀫𑀸𑀲𑀸𑀤𑀻𑀦𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀦𑀺𑀬𑀸𑀫𑁂𑀦 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀉𑀜𑁆𑀙𑀦𑀁 𑀉𑀜𑁆𑀙𑀸, 𑀲𑀸 𑀏𑀯 𑀘𑀭𑀺𑀬𑀸 𑀯𑀼𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀉𑀜𑁆𑀙𑀸𑀘𑀭𑀺𑀬𑀸. 𑀅𑀕𑁆𑀕𑀺𑀧𑀓𑁆𑀓𑁂𑀦 𑀚𑀻𑀯𑀦𑁆𑀢𑀻𑀢𑀺 𑀅𑀕𑁆𑀕𑀺𑀧𑀓𑁆𑀓𑀺𑀓𑀸, 𑀦 𑀅𑀕𑁆𑀕𑀺𑀧𑀓𑁆𑀓𑀺𑀓𑀸 𑀅𑀦𑀕𑁆𑀕𑀺𑀧𑀓𑁆𑀓𑀺𑀓𑀸. 𑀉𑀜𑁆𑀙𑀸𑀘𑀭𑀺𑀬𑀸 𑀳𑀺 𑀔𑀮𑁂𑀲𑀼 𑀕𑀦𑁆𑀢𑁆𑀯𑀸 𑀔𑀮𑀕𑁆𑀕𑀁 𑀦𑀸𑀫 𑀫𑀦𑀼𑀲𑁆𑀲𑁂𑀳𑀺 𑀤𑀺𑀬𑁆𑀬𑀫𑀸𑀦𑀁 𑀥𑀜𑁆𑀜𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀇𑀫𑁂 𑀦 𑀕𑀡𑁆𑀳𑀦𑁆𑀢𑀻𑀢𑀺 𑀅𑀦𑀕𑁆𑀕𑀺𑀧𑀓𑁆𑀓𑀺𑀓𑀸 𑀦𑀸𑀫 𑀚𑀸𑀢𑀸. 𑀅𑀲𑀸𑀫𑀧𑀸𑀓𑀸𑀢𑀺 𑀅𑀲𑀬𑀁𑀧𑀸𑀘𑀓𑀸. 𑀅𑀲𑁆𑀫𑀫𑀼𑀝𑁆𑀞𑀺𑀦𑀸 𑀫𑀼𑀝𑁆𑀞𑀺𑀧𑀸𑀲𑀸𑀡𑁂𑀦 𑀯𑀢𑁆𑀢𑀦𑁆𑀢𑀻𑀢𑀺 𑀅𑀲𑁆𑀫𑀫𑀼𑀝𑁆𑀞𑀺𑀓𑀸. 𑀤𑀦𑁆𑀢𑁂𑀦 𑀉𑀧𑁆𑀧𑀸𑀝𑀺𑀢𑀁 𑀯𑀓𑁆𑀓𑀮𑀁 𑀭𑀼𑀓𑁆𑀔𑀢𑁆𑀢𑀘𑁄 𑀤𑀦𑁆𑀢𑀯𑀓𑁆𑀓𑀮𑀁, 𑀢𑁂𑀦 𑀯𑀢𑁆𑀢𑀦𑁆𑀢𑀻𑀢𑀺 𑀤𑀦𑁆𑀢𑀯𑀓𑁆𑀓𑀮𑀺𑀓𑀸. 𑀧𑀯𑀢𑁆𑀢𑀁 𑀭𑀼𑀓𑁆𑀔𑀸𑀤𑀺𑀢𑁄 𑀧𑀸𑀢𑀺𑀢𑀁 𑀨𑀮𑀁 𑀪𑀼𑀜𑁆𑀚𑀦𑁆𑀢𑀻𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀺𑀦𑁄. 𑀚𑀺𑀡𑁆𑀡𑀧𑀓𑁆𑀓𑀢𑀸𑀬 𑀧𑀡𑁆𑀟𑀼𑀪𑀽𑀢𑀁 𑀧𑀮𑀸𑀲𑀁, 𑀢𑀁𑀲𑀤𑀺𑀲𑀜𑁆𑀘 𑀧𑀡𑁆𑀟𑀼𑀧𑀮𑀸𑀲𑀁, 𑀢𑁂𑀦 𑀯𑀢𑁆𑀢𑀦𑁆𑀢𑀻𑀢𑀺 𑀧𑀡𑁆𑀟𑀼𑀧𑀮𑀸𑀲𑀺𑀓𑀸, 𑀲𑀬𑀁𑀧𑀢𑀺𑀢𑀧𑀼𑀧𑁆𑀨𑀨𑀮𑀧𑀢𑁆𑀢𑀪𑁄𑀚𑀺𑀦𑁄.

𑀇𑀤𑀸𑀦𑀺 𑀢𑁂 𑀅𑀝𑁆𑀞𑀯𑀺𑀥𑁂𑀧𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀗𑁆𑀓𑀟𑁆𑀠𑀺𑀢𑁆𑀯𑀸𑀢𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀯𑀲𑁂𑀦 𑀮𑀤𑁆𑀥𑀥𑀜𑁆𑀜𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸.

𑀧𑀭𑀺𑀬𑁂𑀝𑁆𑀞𑀺 𑀦𑀸𑀫 𑀤𑀼𑀓𑁆𑀔𑀸𑀢𑀺 𑀧𑀭𑁂𑀲𑀁 𑀕𑁂𑀳𑀢𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀭𑀺𑀬𑁂𑀝𑁆𑀞𑀺 𑀦𑀸𑀫 𑀤𑀻𑀦𑀯𑀼𑀢𑁆𑀢𑀺𑀪𑀸𑀯𑁂𑀦 𑀤𑀼𑀓𑁆𑀔𑀸. 𑀧𑀸𑀲𑀸𑀡𑀲𑁆𑀲 𑀧𑀭𑀺𑀕𑁆𑀕𑀳𑁄 𑀤𑀼𑀓𑁆𑀔𑁄 𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀯𑀸 𑀤𑀦𑁆𑀢𑁂𑀳𑁂𑀯 𑀉𑀧𑁆𑀧𑀸𑀝𑁂𑀢𑁆𑀯𑀸 𑀔𑀸𑀤𑀦𑁆𑀢𑀺.

𑀇𑀫𑀸𑀳𑀺 𑀘𑀢𑀽𑀳𑀺𑀬𑁂𑀯𑀸𑀢𑀺 ‘‘𑀔𑀸𑀭𑀺𑀯𑀺𑀥𑀁 𑀆𑀤𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀳𑀺 𑀘𑀢𑀽𑀳𑀺 𑀏𑀯 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀳𑀻𑀢𑀺.

𑁨𑁮𑁨. 𑀅𑀧𑀸𑀬𑁂 𑀯𑀺𑀦𑀸𑀲𑁂 𑀦𑀺𑀬𑀼𑀢𑁆𑀢𑁄 𑀆𑀧𑀸𑀬𑀺𑀓𑁄. 𑀢𑀩𑁆𑀪𑀸𑀯𑀁 𑀧𑀭𑀺𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑁂𑀦 𑀅𑀧𑀭𑀺𑀧𑀼𑀡𑁆𑀡𑁄 𑀅𑀧𑀭𑀺𑀧𑀽𑀭𑀫𑀸𑀦𑁄, 𑀓𑀭𑀡𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑁂𑀦𑀸𑀳 ‘‘𑀆𑀧𑀸𑀬𑀺𑀓𑁂𑀦𑀸𑀧𑀺 𑀅𑀧𑀭𑀺𑀧𑀽𑀭𑀫𑀸𑀦𑁂𑀦𑀸’’𑀢𑀺.

𑀧𑀼𑀩𑁆𑀩𑀓𑀇𑀲𑀺𑀪𑀸𑀯𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁨𑁮𑁩. 𑀤𑀻𑀬𑀢𑀻𑀢𑀺 𑀤𑀢𑁆𑀢𑀺, 𑀤𑀢𑁆𑀢𑀺𑀬𑁂𑀯 𑀤𑀢𑁆𑀢𑀺𑀓𑀦𑁆𑀢𑀺 𑀆𑀳 ‘‘𑀤𑀺𑀦𑁆𑀦𑀓’’𑀦𑁆𑀢𑀺. 𑀬𑀤𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑁄 𑀭𑀜𑁆𑀜𑁄 𑀦 𑀤𑀸𑀢𑀩𑁆𑀩𑁄, 𑀓𑀲𑁆𑀫𑀸𑀲𑁆𑀲 𑀉𑀧𑀲𑀗𑁆𑀓𑀫𑀦𑀁 𑀦 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀔𑁂𑀢𑁆𑀢𑀯𑀺𑀚𑁆𑀚𑀸𑀬𑀸𑀢𑀺 𑀦𑀻𑀢𑀺𑀲𑀢𑁆𑀣𑁂. 𑀧𑀬𑀸𑀢𑀦𑁆𑀢𑀺 𑀲𑀤𑁆𑀥𑀁, 𑀲𑀲𑁆𑀲𑀢𑀺𑀓𑀁 𑀯𑀸, 𑀢𑁂𑀦𑀸𑀳 ‘‘𑀅𑀪𑀺𑀳𑀭𑀺𑀢𑁆𑀯𑀸 𑀤𑀺𑀦𑁆𑀦’’𑀦𑁆𑀢𑀺. 𑀓𑀲𑁆𑀫𑀸 𑀪𑀕𑀯𑀸 ‘‘𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀤𑀢𑁆𑀢𑀺𑀓𑀁 𑀪𑀼𑀜𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀫𑁆𑀫𑀯𑀘𑀦𑀁 𑀅𑀯𑁄𑀘𑀸𑀢𑀺 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀧𑀦 𑀓𑀸𑀭𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁨𑁮𑁪. 𑀭𑀣𑀽𑀧𑀢𑁆𑀣𑀭𑁂𑀢𑀺 𑀭𑀣𑀲𑁆𑀲 𑀉𑀧𑀭𑀺 𑀅𑀢𑁆𑀣𑀭𑀺𑀢𑀧𑀤𑁂𑀲𑁂. 𑀧𑀸𑀓𑀝𑀫𑀦𑁆𑀢𑀦𑀦𑁆𑀢𑀺 𑀧𑀓𑀸𑀲𑀪𑀽𑀢𑀁 𑀫𑀦𑁆𑀢𑀦𑀁. 𑀢𑀜𑁆𑀳𑀺 𑀲𑀼𑀤𑁆𑀤𑀸𑀤𑀻𑀳𑀺 𑀜𑀸𑀬𑀢𑀻𑀢𑀺 𑀦 𑀭𑀳𑀲𑁆𑀲𑀫𑀦𑁆𑀢𑀦𑀁. 𑀪𑀡𑀢𑀻𑀢𑀺 𑀅𑀧𑀺 𑀦𑀼 𑀪𑀡𑀢𑀺.

𑁨𑁮𑁫. 𑀧𑀯𑀢𑁆𑀢𑀸𑀭𑁄𑀢𑀺 𑀧𑀸𑀯𑀘𑀦𑀪𑀸𑀯𑁂𑀦 𑀯𑀢𑁆𑀢𑀸𑀭𑁄, 𑀬𑀲𑁆𑀫𑀸 𑀢𑁂 𑀢𑁂𑀲𑀁 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀓𑀸, 𑀢𑀲𑁆𑀫𑀸 𑀆𑀳 ‘‘𑀧𑀯𑀢𑁆𑀢𑀬𑀺𑀢𑀸𑀭𑁄’’𑀢𑀺. 𑀲𑀼𑀤𑁆𑀤𑁂 𑀩𑀳𑀺 𑀓𑀢𑁆𑀯𑀸 𑀭𑀳𑁄 𑀪𑀸𑀲𑀺𑀢𑀩𑁆𑀩𑀝𑁆𑀞𑁂𑀦 𑀫𑀦𑁆𑀢𑀸 𑀏𑀯, 𑀢𑀁𑀢𑀁𑀅𑀢𑁆𑀣𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀧𑀤𑀦𑁆𑀢𑀺 𑀫𑀦𑁆𑀢𑀧𑀤𑀁, 𑀅𑀦𑀼𑀧𑀦𑀻𑀢𑀸𑀲𑀸𑀥𑀸𑀭𑀡𑀢𑀸𑀬 𑀯𑀸 𑀭𑀳𑀲𑁆𑀲𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀁 𑀳𑀺𑀢𑀓𑀺𑀭𑀺𑀬𑀸𑀬 𑀅𑀥𑀺𑀕𑀫𑀼𑀧𑀸𑀬𑀁. 𑀲𑀚𑁆𑀛𑀸𑀬𑀺𑀢𑀦𑁆𑀢𑀺 𑀕𑀸𑀬𑀦𑀯𑀲𑁂𑀦 𑀲𑀚𑁆𑀛𑀸𑀬𑀺𑀢𑀁, 𑀢𑀁 𑀧𑀦 𑀉𑀤𑀢𑁆𑀢𑀸𑀦𑀼𑀤𑀢𑁆𑀢𑀸𑀤𑀻𑀦𑀁 𑀲𑀭𑀸𑀦𑀁 𑀲𑀫𑁆𑀧𑀸𑀤𑀦𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑀦𑁆𑀢𑀺 𑀆𑀳 ‘‘𑀲𑀭𑀲𑀫𑁆𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺. 𑀅𑀜𑁆𑀜𑁂𑀲𑀁 𑀯𑀼𑀢𑁆𑀢𑀦𑁆𑀢𑀺 𑀧𑀸𑀯𑀘𑀦𑀪𑀸𑀯𑁂𑀦 𑀅𑀜𑁆𑀜𑁂𑀲𑀁 𑀯𑀼𑀢𑁆𑀢𑀁. 𑀲𑀫𑀼𑀧𑀩𑁆𑀬𑀽𑀴𑁆𑀳𑀦𑁆𑀢𑀺 𑀲𑀗𑁆𑀕𑀳𑁂𑀢𑁆𑀯𑀸 𑀉𑀧𑀭𑀽𑀧𑀭𑀺 𑀲𑀜𑁆𑀜𑀽𑀴𑁆𑀳𑀁. 𑀭𑀸𑀲𑀺𑀓𑀢𑀦𑁆𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀸𑀤𑀺𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀧𑀘𑁆𑀘𑁂𑀓𑀁 𑀫𑀦𑁆𑀢𑀩𑁆𑀭𑀳𑁆𑀫𑀸𑀤𑀺𑀯𑀲𑁂𑀦, 𑀅𑀚𑁆𑀛𑀸𑀬𑀸𑀦𑀼𑀯𑀸𑀓𑀸𑀤𑀺𑀯𑀲𑁂𑀦 𑀘 𑀭𑀸𑀲𑀺𑀓𑀢𑀁.

𑀢𑁂𑀲𑀦𑁆𑀢𑀺 𑀫𑀦𑁆𑀢𑀸𑀦𑀁 𑀓𑀢𑁆𑀢𑀽𑀦𑀁. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀪𑀡𑁆𑀟𑁂𑀦 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 𑀲𑀢𑁆𑀢𑀸𑀦𑀁 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀲𑀤𑀺𑀲𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀓𑀧𑁆𑀧𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀦𑁆𑀢𑀚𑁆𑀛𑁂𑀦𑀯𑀺𑀥𑀺𑀜𑁆𑀘 𑀑𑀮𑁄𑀓𑁂𑀢𑁆𑀯𑀸. 𑀧𑀸𑀯𑀘𑀦𑁂𑀦 𑀲𑀳 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀬𑀁 𑀯𑀘𑀦𑀁 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀁, 𑀢𑁂𑀦 𑀲𑀳 𑀅𑀯𑀺𑀭𑀼𑀤𑁆𑀥𑀁 𑀓𑀢𑁆𑀯𑀸. 𑀦 𑀳𑀺 𑀢𑁂𑀲𑀁 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑁄 𑀅𑀢𑁆𑀣𑁄 𑀧𑀘𑁆𑀘𑀓𑁆𑀔𑁄 𑀳𑁄𑀢𑀺. 𑀅𑀧𑀭𑀸𑀧𑀭𑁂 𑀧𑀦𑀸𑀢𑀺 𑀅𑀝𑁆𑀞𑀓𑀸𑀤𑀻𑀳𑀺 𑀅𑀧𑀭𑀸 𑀧𑀭𑁂 𑀧𑀘𑁆𑀙𑀺𑀫𑀸 𑀑𑀓𑁆𑀓𑀸𑀓𑀭𑀸𑀚𑀓𑀸𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀸. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀝𑁆𑀞𑀓𑀸𑀤𑀻𑀳𑀺 𑀕𑀦𑁆𑀣𑀺𑀢𑀫𑀦𑁆𑀢𑀧𑀤𑁂𑀲𑀼 𑀓𑀺𑀮𑁂𑀲𑀲𑀦𑁆𑀦𑀺𑀲𑁆𑀲𑀺𑀢𑀧𑀤𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀤𑁂 𑀧𑀓𑁆𑀔𑀺𑀧𑀦𑀁 𑀓𑀢𑁆𑀯𑀸. 𑀯𑀺𑀭𑀼𑀤𑁆𑀥𑁂 𑀅𑀓𑀁𑀲𑀽𑀢𑀺 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀸𑀤𑀻𑀲𑀼 𑀆𑀕𑀢𑀦𑀬𑁂𑀦 𑀲𑀁𑀓𑀺𑀮𑁂𑀲𑀺𑀓𑀢𑁆𑀣𑀤𑀻𑀧𑀦𑀢𑁄 𑀧𑀘𑁆𑀘𑀦𑀻𑀓𑀪𑀽𑀢𑁂 𑀅𑀓𑀁𑀲𑀼. 𑀇𑀥𑀸𑀢𑀺 ‘‘𑀢𑁆𑀬𑀸𑀳𑀁 𑀫𑀦𑁆𑀢𑁂 𑀅𑀥𑀻𑀬𑀸𑀫𑀻’’𑀢𑀺 𑀏𑀢𑀲𑁆𑀫𑀺𑀁 𑀞𑀸𑀦𑁂. 𑀧𑀝𑀺𑀜𑁆𑀜𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀻’’𑀢𑀺 𑀏𑀯𑀁 𑀧𑀝𑀺𑀜𑁆𑀜𑀁 𑀅𑀕𑁆𑀕𑀳𑁂𑀢𑁆𑀯𑀸𑀯.

𑁨𑁮𑁬. 𑀦𑀺𑀭𑀸𑀫𑀕𑀦𑁆𑀥𑀸𑀢𑀺 𑀓𑀺𑀮𑁂𑀲𑀸𑀲𑀼𑀘𑀺𑀯𑀲𑁂𑀦 𑀯𑀺𑀲𑁆𑀲𑀕𑀦𑁆𑀥𑀭𑀳𑀺𑀢𑀸. 𑀅𑀦𑀺𑀢𑁆𑀣𑀺𑀕𑀦𑁆𑀥𑀸𑀢𑀺 𑀇𑀢𑁆𑀣𑀻𑀦𑀁 𑀕𑀦𑁆𑀥𑀫𑀢𑁆𑀢𑀲𑁆𑀲𑀧𑀺 𑀅𑀯𑀺𑀲𑀳𑀦𑁂𑀦 𑀇𑀢𑁆𑀣𑀺𑀕𑀦𑁆𑀥𑀭𑀳𑀺𑀢𑀸. 𑀏𑀢𑁆𑀣 𑀘 ‘‘𑀦𑀺𑀭𑀸𑀫𑀕𑀦𑁆𑀥𑀸’’𑀢𑀺 𑀏𑀢𑁂𑀦 𑀢𑁂𑀲𑀁 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀢𑀁 𑀤𑀲𑁆𑀲𑁂𑀢𑀺, ‘‘𑀅𑀦𑀺𑀢𑁆𑀣𑀺𑀕𑀦𑁆𑀥𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄’’𑀢𑀺 𑀏𑀢𑁂𑀦 𑀏𑀓𑀯𑀺𑀳𑀸𑀭𑀺𑀢𑀁, ‘‘𑀭𑀚𑁄𑀚𑀮𑁆𑀮𑀥𑀭𑀸’’𑀢𑀺 𑀏𑀢𑁂𑀦 𑀫𑀡𑁆𑀟𑀦𑀯𑀺𑀪𑀽𑀲𑀦𑀸𑀦𑀼𑀬𑁄𑀕𑀸𑀪𑀸𑀯𑀁, ‘‘𑀅𑀭𑀜𑁆𑀜𑀸𑀬𑀢𑀦𑁂 𑀧𑀩𑁆𑀩𑀢𑀧𑀸𑀤𑁂𑀲𑀼 𑀯𑀲𑀺𑀁𑀲𑀽’’𑀢𑀺 𑀏𑀢𑁂𑀦 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀧𑀳𑀸𑀬 𑀯𑀺𑀯𑀺𑀢𑁆𑀢𑀯𑀸𑀲𑀁, ‘‘𑀯𑀦𑀫𑀽𑀮𑀨𑀮𑀸𑀳𑀸𑀭𑀸 𑀯𑀲𑀺𑀁𑀲𑀽’’𑀢𑀺 𑀏𑀢𑁂𑀦 𑀲𑀸𑀮𑀺𑀫𑀁𑀲𑁄𑀤𑀦𑀸𑀤𑀺𑀧𑀡𑀻𑀢𑀸𑀳𑀸𑀭𑀧𑀝𑀺𑀓𑁆𑀔𑁂𑀧𑀁, ‘‘𑀬𑀤𑀸’’𑀢𑀺𑀆𑀤𑀺𑀦𑀸 𑀬𑀸𑀦𑀯𑀸𑀳𑀦𑀧𑀝𑀺𑀓𑁆𑀔𑁂𑀧𑀁, ‘‘𑀲𑀩𑁆𑀩𑀤𑀺𑀲𑀸𑀲𑀽’’𑀢𑀺𑀆𑀤𑀺𑀦𑀸 𑀭𑀓𑁆𑀔𑀸𑀯𑀭𑀡𑀧𑀝𑀺𑀓𑁆𑀔𑁂𑀧𑀁, 𑀏𑀯𑀜𑁆𑀘 𑀯𑀤𑀦𑁆𑀢𑁄 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀧𑀓𑁆𑀔𑀺𑀓𑀁 𑀲𑀸𑀘𑀭𑀺𑀬𑀲𑁆𑀲 𑀅𑀫𑁆𑀩𑀝𑁆𑀞𑀲𑁆𑀲 𑀯𑀼𑀢𑁆𑀢𑀺𑀁 𑀉𑀧𑀸𑀤𑀸𑀬 𑀲𑀫𑁆𑀫𑀸𑀧𑀝𑀺𑀧𑀤𑀸𑀧𑀓𑁆𑀔𑀺𑀓𑀸𑀧𑀺 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀢𑁆𑀢𑀺 𑀅𑀭𑀺𑀬𑀯𑀺𑀦𑀬𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀉𑀧𑀸𑀤𑀸𑀬 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬𑁂𑀯. 𑀓𑀼𑀢𑀲𑁆𑀲 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀼𑀢𑁆𑀢𑀢𑀸𑀢𑀺. ‘‘𑀏𑀯𑀁 𑀲𑀼𑀢𑁂’’𑀢𑀺𑀆𑀤𑀺𑀦𑀸 𑀪𑀕𑀯𑀸 𑀅𑀫𑁆𑀩𑀝𑁆𑀞𑀁 𑀲𑀦𑁆𑀢𑀚𑁆𑀚𑁂𑀦𑁆𑀢𑁄 𑀦𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀯𑁂𑀞𑀓𑁂𑀳𑀻𑀢𑀺 𑀯𑁂𑀞𑀓𑀧𑀝𑁆𑀝𑀓𑀸𑀳𑀺. 𑀲𑀫𑀦𑁆𑀢𑀸𑀦𑀕𑀭𑀦𑁆𑀢𑀺 𑀦𑀕𑀭𑀲𑁆𑀲 𑀲𑀫𑀦𑁆𑀢𑀢𑁄. 𑀓𑀢𑀲𑀼𑀥𑀸𑀓𑀫𑁆𑀫𑀁 𑀧𑀸𑀓𑀸𑀭𑀲𑁆𑀲 𑀅𑀥𑁄𑀪𑀸𑀕𑁂 𑀞𑀸𑀦𑀁 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑁆𑀯𑁂𑀮𑀓𑁆𑀔𑀡𑀤𑀲𑁆𑀲𑀦𑀯𑀡𑁆𑀡𑀦𑀸

𑁨𑁮𑁭. 𑀦 𑀲𑀓𑁆𑀓𑁄𑀢𑀺𑀲𑀗𑁆𑀓𑀼𑀘𑀺𑀢𑁂 𑀇𑀭𑀺𑀬𑀸𑀧𑀣𑁂 𑀅𑀦𑀯𑀲𑁂𑀲𑀢𑁄 𑀢𑁂𑀲𑀁 𑀤𑀼𑀩𑁆𑀩𑀺𑀪𑀸𑀯𑀦𑀢𑁄. 𑀕𑀯𑁂𑀲𑀻𑀢𑀺 𑀜𑀸𑀡𑁂𑀦 𑀧𑀭𑀺𑀬𑁂𑀲𑀦𑀫𑀓𑀸𑀲𑀺. 𑀲𑀫𑀸𑀦𑀬𑀻𑀢𑀺 𑀜𑀸𑀡𑁂𑀦 𑀲𑀗𑁆𑀓𑀮𑁂𑀦𑁆𑀢𑁄 𑀲𑀫𑁆𑀫𑀸 𑀆𑀦𑀬𑀺 𑀲𑀫𑀸𑀳𑀭𑀺. ‘‘𑀓𑀗𑁆𑀔𑀢𑀻’’𑀢𑀺 𑀧𑀤𑀲𑁆𑀲 𑀆𑀓𑀗𑁆𑀔𑀢𑀻𑀢𑀺 𑀅𑀬𑀫𑀢𑁆𑀣𑁄𑀢𑀺 𑀆𑀳 ‘‘𑀅𑀳𑁄 𑀯𑀢 𑀧𑀲𑁆𑀲𑁂𑀬𑁆𑀬𑀦𑁆𑀢𑀺 𑀧𑀢𑁆𑀣𑀦𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺. 𑀓𑀺𑀘𑁆𑀙𑀢𑀻𑀢𑀺 𑀓𑀺𑀮𑀫𑀢𑀺. ‘‘𑀓𑀗𑁆𑀔𑀢𑀻’’𑀢𑀺 𑀧𑀤𑀲𑁆𑀲 𑀧𑀼𑀩𑁆𑀩𑁂 𑀆𑀲𑀺𑀲𑀦𑀢𑁆𑀣𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀲𑀁𑀲𑀬𑀢𑁆𑀣𑀢𑀫𑁂𑀯 𑀯𑀺𑀓𑀧𑁆𑀧𑀦𑁆𑀢𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀗𑁆𑀔𑀸𑀬 𑀯𑀸 𑀤𑀼𑀩𑁆𑀩𑀮𑀸 𑀯𑀺𑀫𑀢𑀺 𑀯𑀼𑀢𑁆𑀢𑀸’’𑀢𑀺 𑀆𑀳. 𑀢𑀻𑀳𑀺 𑀥𑀫𑁆𑀫𑁂𑀳𑀻𑀢𑀺 𑀢𑀺𑀧𑁆𑀧𑀓𑀸𑀭𑁂𑀳𑀺 𑀲𑀁𑀲𑀬𑀥𑀫𑁆𑀫𑁂𑀳𑀺. 𑀓𑀸𑀮𑀼𑀲𑀺𑀬𑀪𑀸𑀯𑁄𑀢𑀺 𑀅𑀧𑁆𑀧𑀲𑀦𑁆𑀦𑀢𑀸𑀬 𑀳𑁂𑀢𑀼𑀪𑀽𑀢𑁄 𑀆𑀯𑀺𑀮𑀪𑀸𑀯𑁄.

𑀬𑀲𑁆𑀫𑀸 𑀪𑀕𑀯𑀢𑁄 𑀓𑁄𑀲𑁄𑀳𑀺𑀢𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀯𑁂𑀡𑀺𑀓𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀯𑀢𑁆𑀣𑀕𑀼𑀬𑁆𑀳𑀁 𑀲𑀼𑀯𑀺𑀲𑀼𑀤𑁆𑀥𑀓𑀜𑁆𑀘𑀦𑀫𑀡𑁆𑀟𑀮𑀲𑀦𑁆𑀦𑀺𑀓𑀸𑀲𑀁, 𑀅𑀢𑁆𑀢𑀦𑁄 𑀲𑀡𑁆𑀞𑀸𑀦𑀲𑀦𑁆𑀦𑀺𑀯𑁂𑀲𑀲𑀼𑀦𑁆𑀤𑀭𑀢𑀸𑀬 𑀆𑀚𑀸𑀦𑁂𑀬𑁆𑀬𑀕𑀦𑁆𑀥𑀳𑀢𑁆𑀣𑀺𑀦𑁄 𑀯𑀭𑀗𑁆𑀕𑀧𑀭𑀫𑀘𑀸𑀭𑀼𑀪𑀸𑀯𑀁, 𑀯𑀺𑀓𑀲𑀫𑀸𑀦𑀢𑀧𑀦𑀺𑀬𑀸𑀭𑀯𑀺𑀦𑁆𑀤𑀲𑀫𑀼𑀚𑁆𑀚𑀮𑀓𑁂𑀲𑀭𑀸𑀯𑀢𑁆𑀢𑀯𑀺𑀮𑀸𑀲𑀁, 𑀲𑀜𑁆𑀛𑀸𑀧𑀪𑀸𑀦𑀼𑀭𑀜𑁆𑀚𑀺𑀢𑀚𑀮𑀯𑀦𑀦𑁆𑀢𑀭𑀸𑀪𑀺𑀮𑀓𑁆𑀔𑀺𑀢𑀲𑀫𑁆𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀲𑁄𑀪𑀜𑁆𑀘 𑀅𑀢𑁆𑀢𑀦𑁄 𑀲𑀺𑀭𑀺𑀬𑀸 𑀅𑀪𑀺𑀪𑀼𑀬𑁆𑀬 𑀯𑀺𑀭𑀸𑀚𑀢𑀺, 𑀬𑀁 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀫𑀮𑁂𑀳𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬, 𑀘𑀺𑀭𑀓𑀸𑀮𑀁 𑀲𑀼𑀧𑀭𑀺𑀘𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀸𑀥𑀺𑀓𑀸𑀭𑀢𑀸𑀬, 𑀲𑀼𑀲𑀡𑁆𑀞𑀺𑀢𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘, 𑀓𑁄𑀧𑀻𑀦𑀫𑁆𑀧𑀺 𑀲𑀦𑁆𑀢𑀁 𑀅𑀓𑁄𑀧𑀻𑀦𑀫𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺. 𑀧𑀳𑀽𑀢𑀪𑀸𑀯𑀦𑁆𑀢𑀺 𑀧𑀼𑀣𑀼𑀮𑀪𑀸𑀯𑀁. 𑀏𑀢𑁆𑀣𑁂𑀯 𑀳𑀺 𑀢𑀲𑁆𑀲 𑀲𑀁𑀲𑀬𑁄, 𑀢𑀦𑀼𑀫𑀼𑀤𑀼𑀲𑀼𑀓𑀼𑀫𑀸𑀭𑀢𑀸𑀤𑀻𑀲𑀼 𑀧𑀦𑀲𑁆𑀲 𑀕𑀼𑀡𑁂𑀲𑀼 𑀯𑀺𑀘𑀸𑀭𑀡𑀸 𑀏𑀯 𑀦𑀸𑀳𑁄𑀲𑀺.

𑁨𑁮𑁮. 𑀳𑀺𑀭𑀺𑀓𑀭𑀡𑁄𑀓𑀸𑀲𑀦𑁆𑀢𑀺 𑀳𑀺𑀭𑀺𑀬𑀺𑀢𑀩𑁆𑀩𑀝𑁆𑀞𑀸𑀦𑀁. 𑀙𑀸𑀬𑀦𑁆𑀢𑀺 𑀧𑀝𑀺𑀩𑀺𑀫𑁆𑀩𑀁. 𑀓𑀣𑀁 𑀓𑀻𑀤𑀺𑀲𑀦𑁆𑀢𑀺 𑀆𑀳 ‘‘𑀇𑀤𑁆𑀥𑀺𑀬𑀸’’𑀢𑀺𑀆𑀤𑀺. 𑀙𑀸𑀬𑀸𑀭𑀽𑀧𑀓𑀫𑀢𑁆𑀢𑀦𑁆𑀢𑀺 𑀪𑀕𑀯𑀢𑁄 𑀧𑀝𑀺𑀩𑀺𑀫𑁆𑀩𑀭𑀽𑀧𑀁. 𑀢𑀜𑁆𑀘 𑀔𑁄 𑀩𑀼𑀤𑁆𑀥𑀲𑀦𑁆𑀢𑀸𑀦𑀢𑁄 𑀯𑀺𑀦𑀺𑀫𑀼𑀢𑁆𑀢𑀢𑁆𑀢𑀸 𑀭𑀽𑀧𑀓𑀫𑀢𑁆𑀢𑀁 𑀪𑀕𑀯𑀢𑁄 𑀲𑀭𑀻𑀭𑀯𑀡𑁆𑀡𑀲𑀡𑁆𑀞𑀸𑀦𑀸𑀯𑀬𑀯𑀁 𑀇𑀤𑁆𑀥𑀺𑀫𑀬𑀁 𑀩𑀺𑀫𑁆𑀩𑀓𑀫𑀢𑁆𑀢𑀁. 𑀢𑀁 𑀧𑀦 𑀭𑀽𑀧𑀓𑀫𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀬𑀣𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀭𑀽𑀧𑀁 𑀦 𑀤𑀺𑀲𑁆𑀲𑀢𑀺, 𑀢𑀣𑀸 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀦𑀺𑀦𑁆𑀦𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀓𑀮𑁆𑀮𑁄𑀲𑀻𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀓𑀼𑀲𑀮𑁄 𑀙𑁂𑀓𑁄 𑀅𑀲𑀺. 𑀢𑀣𑀸𑀓𑀭𑀡𑁂𑀦𑀸𑀢𑀺 𑀓𑀣𑀺𑀦𑀲𑀽𑀘𑀺𑀁 𑀯𑀺𑀬 𑀓𑀭𑀡𑁂𑀦. 𑀏𑀢𑁆𑀣𑀸𑀢𑀺 𑀧𑀳𑀽𑀢𑀚𑀺𑀯𑁆𑀳𑀸𑀬. 𑀫𑀼𑀤𑀼𑀪𑀸𑀯𑁄 𑀧𑀓𑀸𑀲𑀺𑀢𑁄 𑀅𑀫𑀼𑀤𑀼𑀦𑁄 𑀖𑀦𑀲𑀼𑀔𑀼𑀫𑀪𑀸𑀯𑀸𑀧𑀸𑀤𑀦𑀢𑁆𑀣𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀻𑀖𑀪𑀸𑀯𑁄, 𑀢𑀦𑀼𑀪𑀸𑀯𑁄 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁯𑁧. ‘‘𑀅𑀢𑁆𑀣𑀘𑀭𑀓𑁂𑀦𑀸’’𑀢𑀺 𑀇𑀫𑀺𑀦𑀸 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀅𑀦𑀢𑁆𑀣𑀘𑀭𑀓𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀦 𑀅𑀜𑁆𑀜𑀢𑁆𑀭𑀸𑀢𑀺 𑀦 𑀅𑀜𑁆𑀜𑀲𑁆𑀫𑀺𑀁 𑀲𑀼𑀕𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀦𑁂𑀢𑁆𑀯𑀸 𑀉𑀧𑀦𑁂𑀢𑁆𑀯𑀸𑀢𑀺 𑀢𑀁 𑀢𑀁 𑀤𑁄𑀲𑀁 𑀉𑀧𑀦𑁂𑀢𑁆𑀯𑀸 𑀉𑀧𑀦𑁂𑀢𑁆𑀯𑀸, 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼𑀤𑀸𑀲𑀸𑀤𑀺𑀪𑀸𑀯𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺. 𑀧𑀸𑀢𑁂𑀲𑀻𑀢𑀺 𑀧𑀯𑀝𑁆𑀝𑀦𑀯𑀲𑁂𑀦 𑀧𑀸𑀢𑁂𑀲𑀺.

𑀧𑁄𑀓𑁆𑀔𑀭𑀲𑀸𑀢𑀺𑀩𑀼𑀤𑁆𑀥𑀽𑀧𑀲𑀗𑁆𑀓𑀫𑀦𑀯𑀡𑁆𑀡𑀦𑀸

𑁨𑁯𑁩-𑁬. 𑀆𑀕𑀫𑀸 𑀦𑀽𑀢𑀺 𑀆𑀕𑀢𑁄 𑀦𑀼. 𑀔𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀥𑀸𑀢𑀺 𑀏𑀢𑁆𑀣, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀯𑀸𑀲𑁂𑀢𑀽𑀢𑀺 𑀲𑀸𑀤𑀺𑀬𑀢𑀼, 𑀢𑀁 𑀧𑀦 𑀲𑀸𑀤𑀺𑀬𑀦𑀁 𑀫𑀦𑀲𑀸 𑀲𑀫𑁆𑀧𑀝𑀺𑀕𑁆𑀕𑀳𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀝𑀺𑀘𑁆𑀙𑀢𑀽’’𑀢𑀺.

𑁨𑁯𑁭. 𑀬𑀸𑀯𑀤𑀢𑁆𑀣𑀦𑁆𑀢𑀺 𑀬𑀸𑀯 𑀅𑀢𑁆𑀣𑁄, 𑀢𑀸𑀯 𑀪𑁄𑀚𑀦𑁂𑀦 𑀢𑀤𑀸 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀑𑀡𑀺𑀢𑁆𑀢𑀦𑁆𑀢𑀺 𑀆𑀫𑀺𑀲𑀸𑀧𑀦𑀬𑀦𑁂𑀦 𑀲𑀼𑀘𑀺𑀓𑀢𑀁, 𑀢𑁂𑀦𑀸𑀳 ‘‘𑀳𑀢𑁆𑀣𑁂 𑀘 𑀧𑀢𑁆𑀢𑀜𑁆𑀘 𑀥𑁄𑀯𑀺𑀢𑁆𑀯𑀸’’𑀢𑀺.

𑁨𑁯𑁮. 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀁 𑀓𑀣𑁂𑀢𑀩𑁆𑀩𑀓𑀣𑀁, 𑀢𑁂𑀦𑀸𑀳 ‘‘𑀅𑀦𑀼𑀧𑀝𑀺𑀧𑀸𑀝𑀺𑀓𑀣’’𑀦𑁆𑀢𑀺. 𑀓𑀸 𑀧𑀦 𑀲𑀸? 𑀤𑀸𑀦𑀸𑀤𑀺𑀓𑀣𑀸𑀢𑀺 𑀆𑀳 ‘‘𑀤𑀸𑀦𑀸𑀦𑀦𑁆𑀢𑀭𑀁 𑀲𑀻𑀮’’𑀦𑁆𑀢𑀺𑀆𑀤𑀺. 𑀢𑁂𑀦 𑀤𑀸𑀦𑀓𑀣𑀸 𑀢𑀸𑀯 𑀧𑀘𑀼𑀭𑀚𑀦𑁂𑀲𑀼𑀧𑀺 𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸, 𑀲𑀼𑀓𑀭𑀢𑁆𑀢𑀸, 𑀲𑀻𑀮𑁂 𑀧𑀢𑀺𑀝𑁆𑀞𑀸𑀦𑀲𑁆𑀲 𑀉𑀧𑀸𑀬𑀪𑀸𑀯𑀢𑁄 𑀘 𑀆𑀤𑀺𑀢𑁄 𑀓𑀣𑁂𑀢𑀩𑁆𑀩𑀸. 𑀧𑀭𑀺𑀘𑁆𑀘𑀸𑀕𑀲𑀻𑀮𑁄 𑀳𑀺 𑀧𑀼𑀕𑁆𑀕𑀮𑁄 𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀽𑀲𑀼 𑀦𑀺𑀲𑁆𑀲𑀗𑁆𑀕𑀪𑀸𑀯𑀢𑁄 𑀲𑀼𑀔𑁂𑀦𑁂𑀯 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀢𑀺, 𑀢𑀢𑁆𑀣 𑀘 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀲𑀻𑀮𑁂𑀦 𑀤𑀸𑀬𑀓𑀧𑀝𑀺𑀕𑁆𑀕𑀸𑀳𑀓𑀲𑀼𑀤𑁆𑀥𑀺𑀢𑁄 𑀧𑀭𑀸𑀦𑀼𑀕𑁆𑀕𑀳𑀁 𑀯𑀢𑁆𑀯𑀸 𑀧𑀭𑀧𑀻𑀴𑀸𑀦𑀺𑀯𑀢𑁆𑀢𑀺𑀯𑀘𑀦𑀢𑁄, 𑀓𑀺𑀭𑀺𑀬𑀥𑀫𑁆𑀫𑀁 𑀯𑀢𑁆𑀯𑀸 𑀅𑀓𑀺𑀭𑀺𑀬𑀥𑀫𑁆𑀫𑀯𑀘𑀦𑀢𑁄, 𑀪𑁄𑀕𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀁 𑀯𑀢𑁆𑀯𑀸 𑀪𑀯𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀯𑀘𑀦𑀢𑁄 𑀘 𑀤𑀸𑀦𑀓𑀣𑀸𑀦𑀦𑁆𑀢𑀭𑀁 𑀲𑀻𑀮𑀓𑀣𑀸 𑀓𑀣𑁂𑀢𑀩𑁆𑀩𑀸, 𑀢𑀜𑁆𑀘𑁂 𑀤𑀸𑀦𑀲𑀻𑀮𑀁 𑀯𑀝𑁆𑀝𑀦𑀺𑀲𑁆𑀲𑀺𑀢𑀁, 𑀅𑀬𑀁 𑀪𑀯𑀲𑀫𑁆𑀧𑀢𑁆𑀢𑀺 𑀢𑀲𑁆𑀲 𑀨𑀮𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀇𑀫𑁂𑀳𑀺 𑀘 𑀤𑀸𑀦𑀲𑀻𑀮𑀫𑀬𑁂𑀳𑀺 𑀧𑀡𑀻𑀢𑀧𑀡𑀻𑀢𑀢𑀭𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀳𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀳𑀺 𑀏𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀧𑀡𑀻𑀢𑀧𑀡𑀻𑀢𑀢𑀭𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀅𑀧𑀭𑀺𑀫𑁂𑀬𑁆𑀬𑀸 𑀤𑀺𑀩𑁆𑀩𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑁄 𑀮𑀤𑁆𑀥𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀕𑁆𑀕𑀓𑀣𑀸. 𑀲𑁆𑀯𑀸𑀬𑀁 𑀲𑀕𑁆𑀕𑁄 𑀭𑀸𑀕𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑁄, 𑀲𑀩𑁆𑀩𑀣𑀸𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑁄 𑀅𑀭𑀺𑀬𑀫𑀕𑁆𑀕𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑀕𑁆𑀕𑀸𑀦𑀦𑁆𑀢𑀭𑀁 𑀫𑀕𑁆𑀕𑁄 𑀓𑀣𑁂𑀢𑀩𑁆𑀩𑁄. 𑀫𑀕𑁆𑀕𑀜𑁆𑀘 𑀓𑀣𑁂𑀦𑁆𑀢𑁂𑀦 𑀢𑀤𑀥𑀺𑀕𑀫𑀼𑀧𑀸𑀬𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀲𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀧𑀺, 𑀧𑀕𑁂𑀯 𑀇𑀢𑀭𑁂 𑀲𑀩𑁆𑀩𑁂𑀧𑀺 𑀓𑀸𑀫𑀸 𑀦𑀸𑀫 𑀩𑀳𑁆𑀯𑀸𑀤𑀻𑀦𑀯𑀸 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄, 𑀳𑀻𑀦𑀸 𑀕𑀫𑁆𑀫𑀸 𑀧𑁄𑀣𑀼𑀚𑁆𑀚𑀦𑀺𑀓𑀸 𑀅𑀦𑀭𑀺𑀬𑀸 𑀅𑀦𑀢𑁆𑀣𑀲𑀜𑁆𑀳𑀺𑀢𑀸𑀢𑀺 𑀢𑁂𑀲𑀁 𑀑𑀓𑀸𑀭𑁄 𑀮𑀸𑀫𑀓𑀪𑀸𑀯𑁄, 𑀲𑀩𑁆𑀩𑁂𑀧𑀺 𑀪𑀯𑀸 𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀼𑀪𑀽𑀢𑀸𑀢𑀺 𑀢𑀢𑁆𑀣 𑀲𑀁𑀓𑀺𑀮𑁂𑀲𑁄, 𑀲𑀩𑁆𑀩𑀲𑀁𑀓𑀺𑀮𑁂𑀲𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁄 𑀘 𑀓𑀣𑁂𑀢𑀩𑁆𑀩𑁄𑀢𑀺 𑀅𑀬𑀫𑀢𑁆𑀣𑁄 𑀩𑁄𑀥𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀫𑀕𑁆𑀕𑁄𑀢𑀺 𑀘𑁂𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀆𑀤𑀺𑀅𑀢𑁆𑀣𑀤𑀻𑀧𑀦𑀢𑁄 ‘‘𑀓𑀸𑀫𑀸𑀦𑀁 𑀆𑀤𑀻𑀦𑀯𑁄’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄𑀢𑀺 𑀏𑀯𑀫𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀫𑀕𑁆𑀕𑀜𑀸𑀡𑀁 𑀅𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀁, 𑀦 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀝𑀺𑀯𑀺𑀚𑁆𑀛𑀦𑁆𑀢𑀦𑁆𑀢𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀦𑁆𑀢𑀁, 𑀢𑁂𑀦𑀸𑀳 ‘‘𑀓𑀺𑀘𑁆𑀘𑀯𑀲𑁂𑀦𑀸’’𑀢𑀺.

𑀧𑁄𑀓𑁆𑀔𑀭𑀲𑀸𑀢𑀺𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁨𑁯𑁯. 𑀏𑀢𑁆𑀣 𑀘 ‘‘𑀤𑀺𑀝𑁆𑀞𑀥𑀫𑁆𑀫𑁄’’𑀢𑀺𑀆𑀤𑀺 𑀧𑀸𑀴𑀺𑀬𑀁 𑀤𑀲𑁆𑀲𑀦𑀁 𑀦𑀸𑀫 𑀜𑀸𑀡𑀤𑀲𑁆𑀲𑀦𑀢𑁄 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀺, 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀧𑀢𑁆𑀢𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀧𑀢𑁆𑀢𑀺 𑀘 𑀜𑀸𑀡𑀲𑀫𑁆𑀧𑀢𑁆𑀢𑀺𑀢𑁄 𑀅𑀜𑁆𑀜𑀫𑁆𑀧𑀺 𑀯𑀺𑀚𑁆𑀚𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀤𑀺𑀢𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦𑁂𑀲𑀸 𑀯𑀺𑀤𑀺𑀢𑀥𑀫𑁆𑀫𑀢𑀸 𑀏𑀓𑀤𑁂𑀲𑀢𑁄𑀧𑀺 𑀳𑁄𑀢𑀻𑀢𑀺 𑀦𑀺𑀧𑁆𑀧𑀤𑁂𑀲𑀢𑁄 𑀯𑀺𑀤𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀲𑁆𑀲 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀁𑀬𑁂𑀯 𑀤𑀻𑀧𑁂𑀢𑀺. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀏𑀓𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀦𑀺𑀧𑁆𑀧𑀤𑁂𑀲𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀲𑀫𑀦𑁆𑀢𑀢𑁄 𑀑𑀕𑀸𑀴𑁆𑀳𑀁 𑀦𑀸𑀫 𑀳𑁄𑀢𑀺, 𑀢𑁂𑀦𑀸𑀳 ‘‘𑀤𑀺𑀝𑁆𑀞𑁄 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄’’𑀢𑀺. 𑀢𑀺𑀡𑁆𑀡𑀸 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀲𑀧𑁆𑀧𑀝𑀺𑀪𑀬𑀓𑀦𑁆𑀢𑀸𑀭𑀲𑀤𑀺𑀲𑀸 𑀲𑁄𑀴𑀲𑀯𑀢𑁆𑀣𑀼𑀓𑀸, 𑀅𑀝𑁆𑀞𑀯𑀢𑁆𑀣𑀼𑀓𑀸 𑀘 𑀢𑀺𑀡𑁆𑀡𑀸 𑀯𑀺𑀢𑀺𑀡𑁆𑀡𑀸 𑀯𑀺𑀘𑀺𑀓𑀺𑀘𑁆𑀙𑀸. 𑀯𑀺𑀕𑀢𑀸 𑀓𑀣𑀗𑁆𑀓𑀣𑀸𑀢𑀺 𑀧𑀯𑀢𑁆𑀢𑀺𑀆𑀤𑀻𑀲𑀼. ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀺𑀓𑀸 𑀯𑀺𑀕𑀢𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀓𑀣𑀗𑁆𑀓𑀣𑀸. 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄𑀢𑀺 𑀲𑀸𑀭𑀚𑁆𑀚𑀓𑀭𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀧𑀳𑀻𑀦𑀢𑁆𑀢𑀸, 𑀢𑀧𑁆𑀧𑀝𑀺𑀧𑀓𑁆𑀔𑁂𑀲𑀼 𑀘 𑀲𑀻𑀮𑀸𑀤𑀺𑀕𑀼𑀡𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀯𑁂𑀲𑀸𑀭𑀚𑁆𑀚𑀁 𑀯𑀺𑀲𑀸𑀭𑀤𑀪𑀸𑀯𑀁 𑀯𑁂𑀬𑁆𑀬𑀢𑁆𑀢𑀺𑀬𑀁 𑀧𑀢𑁆𑀢𑁄 𑀅𑀥𑀺𑀕𑀢𑁄. 𑀲𑀸𑀬𑀁 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀲𑀢𑁆𑀣𑀼𑀲𑀸𑀲𑀦𑁂’’𑀢𑀺. 𑀅𑀢𑁆𑀢𑀦𑀸 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀢𑁆𑀢𑀸 𑀅𑀥𑀺𑀕𑀢𑀢𑁆𑀢𑀸 𑀦 𑀧𑀭𑀁 𑀧𑀘𑁆𑀘𑁂𑀢𑀺, 𑀦 𑀢𑀲𑁆𑀲 𑀧𑀭𑁄 𑀧𑀘𑁆𑀘𑁂𑀢𑀩𑁆𑀩𑁄 𑀅𑀢𑁆𑀣𑀻𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀅𑀯𑀼𑀢𑁆𑀢𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.