𑁨. 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑀭𑀸𑀚𑀸𑀫𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁧𑁫𑁦. 𑀭𑀸𑀚𑀕𑀳𑁂𑀢𑀺 𑀏𑀢𑁆𑀣 𑀤𑀼𑀕𑁆𑀕𑀚𑀦𑀧𑀤𑀝𑁆𑀞𑀸𑀦𑀯𑀺𑀲𑁂𑀲𑀲𑀫𑁆𑀧𑀤𑀸𑀤𑀺𑀬𑁄𑀕𑀢𑁄 𑀧𑀥𑀸𑀦𑀪𑀸𑀯𑁂𑀦 𑀭𑀸𑀚𑀽𑀳𑀺 𑀕𑀳𑀺𑀢𑀦𑁆𑀢𑀺 𑀭𑀸𑀚𑀕𑀳𑀦𑁆𑀢𑀺 𑀆𑀳 ‘‘𑀫𑀦𑁆𑀥𑀸𑀢𑀼…𑀧𑁂… 𑀯𑀼𑀘𑁆𑀘𑀢𑀻’’𑀢𑀺. 𑀢𑀢𑁆𑀣 𑀫𑀳𑀸𑀕𑁄𑀯𑀺𑀦𑁆𑀤𑁂𑀦 𑀫𑀳𑀸𑀲𑀢𑁆𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀭𑁂𑀡𑀼𑀆𑀤𑀻𑀳𑀺 𑀭𑀸𑀚𑀽𑀳𑀺 𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀫𑀳𑀸𑀕𑁄𑀯𑀺𑀦𑁆𑀤𑀕𑁆𑀕𑀳𑀡𑀁. 𑀫𑀳𑀸𑀕𑁄𑀯𑀺𑀦𑁆𑀤𑁄𑀢𑀺 𑀫𑀳𑀸𑀦𑀼𑀪𑀸𑀯𑁄 𑀏𑀓𑁄 𑀧𑀼𑀭𑀸𑀢𑀦𑁄 𑀭𑀸𑀚𑀸𑀢𑀺 𑀓𑁂𑀘𑀺. 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀭𑀸𑀚𑀥𑀸𑀦𑀻𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸. 𑀧𑀓𑀸𑀭𑁂𑀢𑀺 𑀦𑀕𑀭𑀫𑀸𑀧𑀦𑁂𑀦 𑀭𑀜𑁆𑀜𑀸 𑀓𑀸𑀭𑀺𑀢𑀲𑀩𑁆𑀩𑀕𑁂𑀳𑀢𑁆𑀢𑀸 𑀭𑀸𑀚𑀕𑀳𑀁, 𑀕𑀺𑀚𑁆𑀛𑀓𑀽𑀝𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀩𑁆𑀩𑀢𑀭𑀸𑀚𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑁂𑀳𑀲𑀤𑀺𑀲𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀲𑀫𑁆𑀧𑀦𑁆𑀦𑀪𑀯𑀦𑀢𑀸𑀬 𑀭𑀸𑀚𑀫𑀸𑀦𑀁 𑀕𑁂𑀳𑀦𑁆𑀢𑀺 𑀧𑀺 𑀭𑀸𑀚𑀕𑀳𑀁, 𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀢𑀸𑀬 𑀅𑀦𑀢𑁆𑀣𑀸𑀯𑀳𑀪𑀸𑀯𑁂𑀦 𑀉𑀧𑀕𑀢𑀸𑀦𑀁 𑀧𑀝𑀺𑀭𑀸𑀚𑀽𑀦𑀁 𑀕𑀳𑀁 𑀕𑁂𑀳𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀭𑀸𑀚𑀽𑀳𑀺 𑀤𑀺𑀲𑁆𑀯𑀸 𑀲𑀫𑁆𑀫𑀸 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀢𑁂𑀲𑀁 𑀕𑀳𑀁 𑀕𑁂𑀳𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀸𑀤𑀻𑀳𑀺 𑀭𑀸𑀚𑀢𑁂, 𑀦𑀺𑀯𑀸𑀲𑀲𑀼𑀔𑀢𑀸𑀤𑀺𑀦𑀸 𑀲𑀢𑁆𑀢𑁂𑀳𑀺 𑀫𑀫𑀢𑁆𑀢𑀯𑀲𑁂𑀦 𑀕𑀬𑁆𑀳𑀢𑀺, 𑀧𑀭𑀺𑀕𑁆𑀕𑀬𑁆𑀳𑀢𑀻𑀢𑀺 𑀯𑀸 𑀭𑀸𑀚𑀕𑀳𑀦𑁆𑀢𑀺 𑀏𑀤𑀺𑀲𑁂 𑀧𑀓𑀸𑀭𑁂 𑀲𑁄 𑀧𑀤𑁂𑀲𑁄 𑀞𑀸𑀦𑀯𑀺𑀲𑁂𑀲𑀪𑀸𑀯𑁂𑀦 𑀉𑀴𑀸𑀭𑀲𑀢𑁆𑀢𑀧𑀭𑀺𑀪𑁄𑀕𑁄𑀢𑀺 𑀆𑀳 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀬𑀓𑁆𑀔𑀸𑀦𑀁. 𑀯𑀲𑀦𑀯𑀦𑀦𑁆𑀢𑀺 𑀆𑀧𑀸𑀦𑀪𑀽𑀫𑀺𑀪𑀽𑀢𑀁 𑀉𑀧𑀯𑀦𑀁.

𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺’’ (𑀫. 𑀦𑀺. 𑁧.𑁬𑁯; 𑁩.𑁭𑁫; 𑀯𑀺𑀪. 𑁫𑁦𑁮), ‘‘𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, (𑀤𑀻. 𑀦𑀺. 𑁧.𑁨𑁨𑁬; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩; 𑀧𑀸𑀭𑀸. 𑁧𑁧) ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺’’, (𑀤𑀻. 𑀦𑀺. 𑁧.𑁫𑁫𑁬; 𑁩.𑁩𑁦𑁮; 𑀫. 𑀦𑀺. 𑁧.𑁭𑁭, 𑁪𑁫𑁯, 𑁫𑁦𑁯; 𑁨.𑁩𑁦𑁯, 𑁩𑁧𑁫, 𑁪𑁫𑁧, 𑁪𑁭𑁧; 𑁩.𑁨𑁩𑁦; 𑀯𑀺𑀪. 𑁬𑁪𑁨) ‘‘𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁫𑁯) 𑀯𑀺𑀬 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀺𑀤𑁆𑀥𑁂𑀦 𑀯𑀺𑀲𑁂𑀲𑀧𑀭𑀸𑀫𑀲𑀦𑁂𑀦 𑀯𑀺𑀦𑀸. 𑀇𑀭𑀺𑀬𑀸𑀬 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀦𑀽𑀧𑀸𑀬𑀪𑀸𑀯𑀢𑁄 𑀧𑀣𑁄𑀢𑀺 𑀇𑀭𑀺𑀬𑀸𑀧𑀣𑁄. 𑀞𑀸𑀦𑀸𑀤𑀻𑀦𑀜𑁆𑀳𑀺 𑀕𑀢𑀺𑀦𑀺𑀯𑀢𑁆𑀢𑀺 𑀆𑀤𑀺𑀅𑀯𑀢𑁆𑀣𑀸𑀳𑀺 𑀯𑀺𑀦𑀸 𑀦 𑀓𑀜𑁆𑀘𑀺 𑀓𑀸𑀬𑀺𑀓𑀓𑀺𑀭𑀺𑀬𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸. 𑀯𑀺𑀳𑀭𑀢𑀺 𑀧𑀯𑀢𑁆𑀢𑀢𑀺 𑀏𑀢𑁂𑀦, 𑀯𑀺𑀳𑀭𑀡𑀜𑁆𑀘𑀸𑀢𑀺 𑀯𑀺𑀳𑀸𑀭𑁄, 𑀤𑀺𑀩𑁆𑀩𑀪𑀸𑀯𑀸𑀯𑀳𑁄 𑀯𑀺𑀳𑀸𑀭𑁄 𑀤𑀺𑀩𑁆𑀩𑀯𑀺𑀳𑀸𑀭𑁄, 𑀫𑀳𑀕𑁆𑀕𑀢𑀚𑁆𑀛𑀸𑀦𑀸𑀦𑀺. 𑀦𑁂𑀢𑁆𑀢𑀺𑀬𑀁 𑀧𑀦 ‘‘𑀘𑀢𑀲𑁆𑀲𑁄 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄 𑀆𑀦𑁂𑀜𑁆𑀚𑀸 𑀯𑀺𑀳𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀢𑀸𑀲𑀁 𑀫𑁂𑀢𑁆𑀢𑀸𑀛𑀸𑀦𑀸𑀤𑀻𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑀸 𑀯𑀺𑀬 𑀪𑀸𑀯𑀦𑀸𑀯𑀺𑀲𑁂𑀲𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀤𑀺𑀩𑁆𑀩𑀪𑀸𑀯𑀸𑀯𑀳𑀲𑀸𑀫𑀜𑁆𑀜𑀢𑁄 𑀢𑀸𑀧𑀺 ‘‘𑀤𑀺𑀩𑁆𑀩𑀯𑀺𑀳𑀸𑀭𑀸’’ 𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸 𑀯𑀺𑀳𑀸𑀭𑀸𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀫𑁂𑀢𑁆𑀢𑀸𑀛𑀸𑀦𑀸𑀤𑀺𑀓𑀸. 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀅𑀭𑀺𑀬𑀸𑀦𑀁 𑀯𑀺𑀳𑀸𑀭𑀸𑀢𑀺 𑀅𑀭𑀺𑀬𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑁄. 𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀦𑁆𑀢𑀺 𑀲𑀫𑀗𑁆𑀕𑀺𑀪𑀸𑀯𑀧𑀭𑀺𑀤𑀻𑀧𑀦𑀁. 𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁 𑀇𑀢𑀭𑀯𑀺𑀳𑀸𑀭𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀲𑁆𑀲 𑀯𑀺𑀲𑁂𑀲𑀯𑀘𑀦𑀲𑁆𑀲 𑀅𑀪𑀸𑀯𑀢𑁄, 𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀲𑁆𑀲 𑀘 𑀅𑀢𑁆𑀣𑀲𑀺𑀤𑁆𑀥𑀢𑁆𑀢𑀸. 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀺-𑀲𑀤𑁆𑀤𑁄 𑀯𑀺𑀘𑁆𑀙𑁂𑀤𑀢𑁆𑀣𑀚𑁄𑀢𑀦𑁄, 𑀳𑀭𑀢𑀻𑀢𑀺 𑀦𑁂𑀢𑀺, 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀲𑁆𑀲 𑀓𑁂𑀦 𑀯𑀺𑀘𑁆𑀙𑀺𑀦𑁆𑀤𑀦𑀁, 𑀓𑀣𑀁 𑀓𑀲𑁆𑀲 𑀧𑀯𑀢𑁆𑀢𑀦𑀦𑁆𑀢𑀺 𑀅𑀦𑁆𑀢𑁄𑀮𑀻𑀦𑀁 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁄 𑀳𑀻’’𑀢𑀺𑀆𑀤𑀺.

𑀕𑁄𑀘𑀭𑀕𑀸𑀫𑀤𑀲𑁆𑀲𑀦𑀢𑁆𑀣𑀁 ‘‘𑀭𑀸𑀚𑀕𑀳𑁂’’𑀢𑀺 𑀯𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀅𑀦𑀼𑀭𑀽𑀧𑀦𑀺𑀯𑀸𑀲𑀦𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 ‘‘𑀅𑀫𑁆𑀩𑀯𑀦𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀤𑀫𑀲𑁆𑀲𑀸’’𑀢𑀺𑀆𑀤𑀺. 𑀏𑀢𑀦𑁆𑀢𑀺 𑀏𑀢𑀁 ‘‘𑀭𑀸𑀚𑀕𑀳𑁂’’𑀢𑀺 𑀪𑀼𑀫𑁆𑀫𑀯𑀘𑀦𑀁 𑀲𑀫𑀻𑀧𑀢𑁆𑀣𑁂 ‘‘𑀕𑀗𑁆𑀕𑀸𑀬 𑀕𑀸𑀯𑁄 𑀘𑀭𑀦𑁆𑀢𑀺, 𑀓𑀽𑀧𑁂 𑀕𑀕𑁆𑀕𑀓𑀼𑀮’’𑀦𑁆𑀢𑀺 𑀘 𑀬𑀣𑀸. 𑀓𑀼𑀫𑀸𑀭𑁂𑀦 𑀪𑀢𑁄𑀢𑀺 𑀓𑀼𑀫𑀸𑀭𑀪𑀢𑁄, 𑀲𑁄 𑀏𑀯 𑀓𑁄𑀫𑀸𑀭𑀪𑀘𑁆𑀘𑁄 𑀬𑀣𑀸 𑀪𑀺𑀲𑀕𑁆𑀕𑀫𑁂𑀯 𑀪𑁂𑀲𑀚𑁆𑀚𑀁. 𑀤𑁄𑀲𑀸𑀪𑀺𑀲𑀦𑁆𑀦𑀦𑁆𑀢𑀺 𑀯𑀸𑀢𑀧𑀺𑀢𑁆𑀢𑀸𑀤𑀺𑀯𑀲𑁂𑀦 𑀉𑀲𑁆𑀲𑀦𑁆𑀦𑀤𑁄𑀲𑀁. 𑀯𑀺𑀭𑁂𑀘𑁂𑀢𑁆𑀯𑀸𑀢𑀺 𑀤𑁄𑀲𑀧𑀓𑁄𑀧𑀢𑁄 𑀯𑀺𑀯𑁂𑀘𑁂𑀢𑁆𑀯𑀸.

𑀅𑀟𑁆𑀠𑀢𑁂𑀴𑀲𑀳𑀻𑀢𑀺 𑀅𑀟𑁆𑀠𑁂𑀦 𑀢𑁂𑀭𑀲𑀳𑀺 𑀅𑀟𑁆𑀠𑀢𑁂𑀭𑀲𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀢𑀸𑀦𑀺 𑀧𑀦 𑀧𑀜𑁆𑀜𑀸𑀲𑀸𑀬 𑀊𑀦𑀸𑀦𑀺 𑀢𑁂𑀭𑀲𑀪𑀺𑀓𑁆𑀔𑀼𑀲𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀟𑁆𑀠𑀲𑀢𑁂𑀦𑀸’’𑀢𑀺𑀆𑀤𑀺.

𑀭𑀸𑀚𑀢𑀻𑀢𑀺 𑀤𑀺𑀩𑁆𑀩𑀢𑀺, 𑀲𑁄𑀪𑀢𑀻𑀢𑀺 𑀅𑀢𑁆𑀣𑁄. 𑀭𑀜𑁆𑀚𑁂𑀢𑀻𑀢𑀺 𑀭𑀫𑁂𑀢𑀺. 𑀭𑀜𑁆𑀜𑁄𑀢𑀺 𑀧𑀺𑀢𑀼 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄. 𑀲𑀸𑀲𑀦𑀝𑁆𑀞𑁂𑀦 𑀳𑀺𑀁𑀲𑀦𑀝𑁆𑀞𑁂𑀦 𑀲𑀢𑁆𑀢𑀼.

𑀪𑀸𑀭𑀺𑀬𑁂𑀢𑀺 𑀕𑀭𑀼𑀓𑁂 𑀅𑀜𑁆𑀜𑁂𑀲𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 𑀯𑀸. 𑀲𑀼𑀯𑀡𑁆𑀡𑀲𑀢𑁆𑀣𑀓𑁂𑀦𑀸𑀢𑀺 𑀲𑀼𑀯𑀡𑁆𑀡𑀫𑀬𑁂𑀦 𑀲𑀢𑁆𑀣𑀓𑁂𑀦. 𑀅𑀬𑁄𑀫𑀬𑀜𑁆𑀳𑀺 𑀭𑀜𑁆𑀜𑁄 𑀲𑀭𑀻𑀭𑀁 𑀉𑀧𑀦𑁂𑀢𑀼𑀁 𑀅𑀬𑀼𑀢𑁆𑀢𑀦𑁆𑀢𑀺 𑀯𑀤𑀢𑀺. 𑀲𑀼𑀯𑀡𑁆𑀡𑀲𑀢𑁆𑀣𑀓𑁂𑀦𑀸𑀢𑀺 𑀯𑀸 𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀢𑁂𑀦 𑀲𑀢𑁆𑀣𑀓𑁂𑀦 𑀩𑀸𑀳𑀼𑀁 𑀨𑀸𑀮𑀸𑀧𑁂𑀢𑁆𑀯𑀸𑀢𑀺 𑀲𑀺𑀭𑀸𑀯𑁂𑀥𑀯𑀲𑁂𑀦 𑀩𑀸𑀳𑀼𑀁 𑀨𑀮𑀸𑀧𑁂𑀢𑁆𑀯𑀸 𑀉𑀤𑀓𑁂𑀦 𑀲𑀫𑁆𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀬𑁂𑀲𑀺 𑀓𑁂𑀯𑀮𑀲𑁆𑀲 𑀮𑁄𑀳𑀺𑀢𑀲𑁆𑀲 𑀕𑀩𑁆𑀪𑀺𑀦𑀺𑀢𑁆𑀣𑀺𑀬𑀸 𑀤𑀼𑀚𑁆𑀚𑀻𑀭𑀪𑀸𑀯𑀢𑁄. 𑀥𑀼𑀭𑀸𑀢𑀺 𑀥𑀼𑀭𑀪𑀽𑀢𑀸, 𑀕𑀡𑀲𑁆𑀲, 𑀥𑁄𑀭𑀬𑁆𑀳𑀸𑀢𑀺 𑀅𑀢𑁆𑀣𑁄. 𑀥𑀼𑀭𑀁 𑀦𑀻𑀳𑀭𑀸𑀫𑀻𑀢𑀺 𑀕𑀡𑀥𑀼𑀭𑀁 𑀕𑀡𑀩𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀫𑀺. ‘‘𑀧𑀼𑀩𑁆𑀩𑁂 𑀔𑁄’’𑀢𑀺𑀆𑀤𑀺 𑀔𑀦𑁆𑀥𑀓𑀧𑀸𑀴𑀺 𑀏𑀯.

𑀧𑁄𑀢𑁆𑀣𑀦𑀺𑀬𑀦𑁆𑀢𑀺 𑀙𑀼𑀭𑀺𑀓𑀁, 𑀬𑀁 ‘‘𑀦𑀔𑀭’’𑀦𑁆𑀢𑀺𑀧𑀺 [𑀧𑁄𑀣𑀦𑀺𑀓𑀦𑁆𑀢𑀺 𑀙𑀼𑀭𑀺𑀓𑀁, 𑀬𑀁 𑀔𑀭𑀦𑁆𑀢𑀺𑀧𑀺 (𑀲𑀸𑀭𑀢𑁆𑀣. 𑀝𑀻. 𑁩.𑁩𑁩𑁯) 𑀧𑁄𑀣𑀦𑀺𑀓𑀦𑁆𑀢𑀺 𑀙𑀼𑀭𑀺𑀓𑀁, 𑀔𑀭𑀦𑁆𑀢𑀺𑀧𑀺 (𑀯𑀺. 𑀯𑀺. 𑀝𑀻. 𑁨.𑀘𑀽𑀴𑀯𑀕𑁆𑀕𑀯𑀡𑁆𑀡𑀦𑀸 𑁩𑁩𑁯)] 𑀯𑀼𑀘𑁆𑀘𑀢𑀺. 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑁆𑀲𑀧𑀺 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀦𑁆𑀢𑀺 𑀅𑀢𑁆𑀣𑁄.

𑀢𑀲𑁆𑀲𑀸 𑀲𑀭𑀻𑀭𑀁 𑀮𑁂𑀳𑀺𑀢𑁆𑀯𑀸 𑀬𑀸𑀧𑁂𑀢𑀺 𑀅𑀢𑁆𑀢𑀽𑀧𑀓𑁆𑀓𑀫𑁂𑀦 𑀫𑀭𑀡𑀁 𑀦 𑀬𑀼𑀢𑁆𑀢𑀦𑁆𑀢𑀺. 𑀦 𑀳𑀺 𑀅𑀭𑀺𑀬𑀲𑀸𑀯𑀓𑀸 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑁂𑀦𑁆𑀢𑀻𑀢𑀺. 𑀫𑀕𑁆𑀕𑀨𑀮𑀲𑀼𑀔𑁂𑀦𑀸𑀢𑀺 𑀫𑀕𑁆𑀕𑀨𑀮𑀲𑀼𑀔𑀸𑀯𑀳𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀲𑀼𑀔𑀽𑀧𑀲𑀜𑁆𑀳𑀺𑀢𑁂𑀦 𑀘𑀗𑁆𑀓𑀫𑁂𑀦 𑀬𑀸𑀧𑁂𑀢𑀺.𑀘𑁂𑀢𑀺𑀬𑀗𑁆𑀕𑀡𑁂𑀢𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀦𑀝𑁆𑀞𑀸𑀦𑀪𑀽𑀢𑁂 𑀘𑁂𑀢𑀺𑀬𑀗𑁆𑀕𑀡𑁂. 𑀦𑀺𑀲𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀦𑀺𑀲𑀻𑀤𑀦𑀢𑁆𑀣𑀸𑀬. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑁂…𑀧𑁂… 𑀬𑀓𑁆𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 𑀢𑀢𑁆𑀣 𑀩𑀳𑀼𑀮𑀁 𑀦𑀺𑀩𑁆𑀩𑀢𑁆𑀢𑀧𑀼𑀩𑁆𑀩𑀢𑀸𑀬 𑀘𑀺𑀭𑀧𑀭𑀺𑀘𑀺𑀢𑀦𑀺𑀓𑀦𑁆𑀢𑀺𑀯𑀲𑁂𑀦.

𑀔𑁄𑀪𑁂𑀢𑁆𑀯𑀸𑀢𑀺 𑀧𑀼𑀢𑁆𑀢𑀲𑀺𑀦𑁂𑀳𑀲𑁆𑀲 𑀩𑀮𑀯𑀪𑀸𑀯𑀢𑁄, 𑀲𑀳𑀚𑀸𑀢𑀧𑀻𑀢𑀺𑀯𑁂𑀕𑀲𑁆𑀲 𑀘 𑀲𑀯𑀺𑀧𑁆𑀨𑀸𑀭𑀢𑀸𑀬 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀥𑀫𑁆𑀫𑁂𑀳𑀺 𑀨𑀭𑀡𑀯𑀲𑁂𑀦 𑀲𑀓𑀮𑀲𑀭𑀻𑀭𑀁 𑀆𑀮𑁄𑀴𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀻’’𑀢𑀺. 𑀧𑀺𑀢𑀼𑀕𑀼𑀡𑀦𑁆𑀢𑀺 𑀧𑀺𑀢𑀼 𑀅𑀢𑁆𑀢𑀦𑀺 𑀲𑀺𑀦𑁂𑀳𑀕𑀼𑀡𑀁. 𑀫𑀼𑀜𑁆𑀘𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀢𑁂𑀦 ‘‘𑀅𑀪𑀺𑀫𑀸𑀭𑀓𑀧𑀼𑀭𑀺𑀲𑀧𑁂𑀲𑀦𑀸𑀤𑀺𑀧𑁆𑀧𑀓𑀸𑀭𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀏𑀯 𑀧𑀓𑀸𑀭𑁂 𑀧𑀘𑁆𑀘𑀸𑀫𑀲𑀢𑀺. 𑀯𑀺𑀢𑁆𑀣𑀸𑀭𑀓𑀣𑀸𑀦𑀬𑁄𑀢𑀺 𑀅𑀚𑀸𑀢𑀲𑀢𑁆𑀢𑀼𑀧𑀲𑀸𑀤𑀦𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸𑀬 𑀓𑀣𑀸𑀬 𑀦𑀬𑀫𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑀺𑀢𑁆𑀣𑀸𑀭𑀦𑀬𑀸 𑀓𑀣𑀸 𑀦 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀆𑀕𑀢𑀢𑁆𑀢𑀸 𑀧𑀦 𑀲𑀩𑁆𑀩𑀁 𑀦 𑀯𑀼𑀢𑁆𑀢’’𑀦𑁆𑀢𑀺.

𑀓𑁄𑀲𑀮𑀭𑀜𑁆𑀜𑁄𑀢𑀺 𑀫𑀳𑀸𑀓𑁄𑀲𑀮𑀭𑀜𑁆𑀜𑁄. 𑀧𑀡𑁆𑀟𑀺𑀢𑀸𑀥𑀺𑀯𑀘𑀦𑀦𑁆𑀢𑀺 𑀧𑀡𑁆𑀟𑀺𑀢𑀯𑁂𑀯𑀘𑀦𑀁. 𑀯𑀺𑀤𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀺. 𑀯𑁂𑀤𑁂𑀦 𑀜𑀸𑀡𑁂𑀦 𑀓𑀭𑀡𑀪𑀽𑀢𑁂𑀦 𑀈𑀳𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑁂𑀳𑀺.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀤𑀺𑀯𑀲𑁂. 𑀅𑀦𑀲𑀦𑁂𑀦 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀏𑀓𑀘𑁆𑀘𑀫𑀦𑁄𑀤𑀼𑀘𑁆𑀘𑀭𑀺𑀢𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀳𑀺 𑀕𑁄𑀧𑀸𑀮𑀓𑀽𑀧𑁄𑀲𑀣𑁄 𑀅𑀪𑀺𑀚𑁆𑀛𑀸𑀲𑀳𑀕𑀢𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄, 𑀦𑀺𑀕𑀡𑁆𑀞𑀼𑀧𑁄𑀲𑀣𑁄 𑀫𑁄𑀲𑀯𑀚𑁆𑀚𑀸𑀤𑀺𑀯𑀲𑁂𑀦. 𑀬𑀣𑀸𑀳 ‘‘𑀲𑁄 𑀢𑁂𑀦 𑀅𑀪𑀺𑀚𑁆𑀛𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀻’’𑀢𑀺 (𑀅. 𑀦𑀺. 𑁧.𑁭𑁧), ‘‘𑀇𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁂 𑀲𑀫𑀸𑀤𑀧𑁂𑀢𑀩𑁆𑀩𑀸, 𑀫𑀼𑀲𑀸𑀯𑀸𑀤𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑀸𑀤𑀧𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁧.𑁭𑁧) 𑀘 𑀆𑀤𑀺. 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑀲𑀤𑁆𑀤𑁂. 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺 𑀯𑀢𑁆𑀢𑀩𑁆𑀩𑀅𑀢𑁆𑀣𑀸𑀦𑀁 𑀉𑀤𑁆𑀥𑀸𑀭𑀡𑀁.

𑀦𑀦𑀼 𑀘 𑀅𑀢𑁆𑀣𑀫𑀢𑁆𑀢𑀁 𑀧𑀢𑀺 𑀲𑀤𑁆𑀤𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀦 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑁂 𑀅𑀢𑁆𑀣𑀸 𑀅𑀪𑀺𑀥𑀻𑀬𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀲𑀤𑁆𑀤𑀯𑀺𑀲𑁂𑀲𑁂 𑀅𑀧𑁂𑀓𑁆𑀔𑀺𑀢𑁂, 𑀢𑁂𑀲𑀁 𑀧𑀦 𑀅𑀢𑁆𑀣𑀸𑀦𑀁 𑀉𑀧𑁄𑀲𑀣𑀲𑀤𑁆𑀤𑀯𑀘𑀦𑀻𑀬𑀢𑀸 𑀲𑀸𑀫𑀜𑁆𑀜𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀫𑀸𑀦𑁄 𑀅𑀬𑀁 𑀯𑀺𑀘𑀸𑀭𑁄 𑀉𑀧𑁄𑀲𑀣𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀳𑁂𑀝𑁆𑀞𑀸 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀻𑀲𑀼 𑀆𑀕𑀢𑁂 𑀅𑀢𑁆𑀣𑀼𑀤𑁆𑀥𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀫𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀤𑀺𑀯𑀺𑀲𑀬𑁄𑀧𑀺 𑀉𑀧𑁄𑀲𑀣𑀲𑀤𑁆𑀤𑁄 𑀲𑀸𑀫𑀜𑁆𑀜𑀭𑀽𑀧𑁄 𑀏𑀯 𑀯𑀺𑀲𑁂𑀲𑀲𑀤𑁆𑀤𑀲𑁆𑀲 𑀅𑀯𑀸𑀘𑀓𑀪𑀸𑀯𑀢𑁄, 𑀢𑀸𑀤𑀺𑀲𑀁 𑀧𑀦 𑀲𑀸𑀫𑀜𑁆𑀜𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀻𑀮𑀲𑀼𑀤𑁆𑀥𑀺𑀯𑀲𑁂𑀦 𑀉𑀧𑁂𑀢𑁂𑀳𑀺 𑀲𑀫𑀕𑁆𑀕𑁂𑀳𑀺 𑀯𑀲𑀻𑀬𑀢𑀺 𑀅𑀦𑀼𑀝𑁆𑀞𑀻𑀬𑀢𑀻𑀢𑀺 𑀉𑀧𑁄𑀲𑀣𑁄, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀲𑀫𑀸𑀤𑀸𑀦𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀯𑀸 𑀉𑀧𑁂𑀘𑁆𑀘 𑀅𑀭𑀺𑀬𑀯𑀸𑀲𑀸𑀤𑀺𑀅𑀢𑁆𑀣𑀁 𑀯𑀲𑀺𑀢𑀩𑁆𑀩𑀢𑁄 𑀉𑀧𑁄𑀲𑀣𑁄, 𑀲𑀻𑀮𑀁. 𑀅𑀦𑀲𑀦𑀸𑀤𑀺𑀯𑀲𑁂𑀦 𑀉𑀧𑁂𑀘𑁆𑀘 𑀯𑀲𑀺𑀢𑀩𑁆𑀩𑀢𑁄 𑀅𑀦𑀼𑀯𑀲𑀺𑀢𑀩𑁆𑀩𑀢𑁄 𑀉𑀧𑁄𑀲𑀣𑁄. 𑀉𑀧𑀯𑀸𑀲𑁄𑀢𑀺 𑀲𑀫𑀸𑀤𑀸𑀦𑀁. 𑀉𑀧𑁄𑀲𑀣𑀓𑀼𑀮𑀪𑀽𑀢𑀢𑀸𑀬 𑀦𑀯𑀫𑀳𑀢𑁆𑀣𑀺𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂 𑀳𑀢𑁆𑀣𑀺𑀦𑀸𑀕𑁂 𑀓𑀺𑀜𑁆𑀘𑀺 𑀓𑀺𑀭𑀺𑀬𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀭𑀽𑀴𑁆𑀳𑀺𑀯𑀲𑁂𑀦 𑀲𑀫𑀜𑁆𑀜𑀸𑀫𑀢𑁆𑀢𑀁 𑀉𑀧𑁄𑀲𑀣𑁄𑀢𑀺 𑀆𑀳 ‘‘𑀉𑀧𑁄𑀲𑀣𑁄 𑀦𑀸𑀕𑀭𑀸𑀚𑀸𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀻’’𑀢𑀺. 𑀤𑀺𑀯𑀲𑁂 𑀧𑀦 𑀉𑀧𑁄𑀲𑀣𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸 𑀏𑀯. 𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸 𑀨𑀕𑁆𑀕𑀽𑀢𑀺 𑀏𑀢𑁆𑀣 𑀧𑀦 𑀲𑀼𑀤𑁆𑀥𑀲𑁆𑀲𑀸𑀢𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑀫𑀮𑀸𑀪𑀸𑀯𑁂𑀦 𑀲𑀼𑀤𑁆𑀥𑀲𑁆𑀲. 𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀯𑁂𑀢𑀺 𑀯𑀸 𑀩𑁆𑀬𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀤𑀸 𑀨𑀕𑁆𑀕𑀽𑀢𑀺 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀨𑀕𑁆𑀕𑀼𑀡𑀦𑀓𑁆𑀔𑀢𑁆𑀢𑀫𑁂𑀯. 𑀬𑀲𑁆𑀲 𑀳𑀺 𑀨𑀕𑁆𑀕𑀼𑀡𑀫𑀸𑀲𑁂 𑀉𑀢𑁆𑀢𑀭𑀨𑀕𑁆𑀕𑀼𑀡𑀤𑀺𑀯𑀲𑁂 𑀢𑀺𑀢𑁆𑀣𑀦𑁆𑀳𑀸𑀦𑀁 𑀓𑀭𑁄𑀦𑁆𑀢𑀲𑁆𑀲 𑀲𑀁𑀯𑀘𑁆𑀙𑀭𑀺𑀓𑀧𑀸𑀧𑀧𑀯𑀸𑀳𑀦𑀁 𑀳𑁄𑀢𑀻𑀢𑀺 𑀮𑀤𑁆𑀥𑀺, 𑀢𑀁 𑀢𑀢𑁄 𑀯𑀺𑀯𑁂𑀘𑁂𑀢𑀼𑀁 𑀇𑀤𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀲𑁆𑀲𑀼𑀧𑁄𑀲𑀣𑁄 𑀲𑀤𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀼𑀤𑁆𑀥𑀺𑀬𑀸 𑀲𑀼𑀤𑁆𑀥𑀲𑁆𑀲 𑀉𑀧𑁄𑀲𑀣𑀗𑁆𑀕𑀸𑀦𑀺 𑀯𑀢𑀲𑀫𑀸𑀤𑀸𑀦𑀸𑀦𑀺 𑀘 𑀅𑀲𑀫𑀸𑀤𑀺𑀬𑀢𑁄𑀧𑀺 𑀦𑀺𑀘𑁆𑀘𑀁 𑀉𑀧𑁄𑀲𑀣𑁄, 𑀉𑀧𑁄𑀲𑀣𑀯𑀸𑀲𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀤𑀲𑀦𑁆𑀦𑀁 𑀢𑀺𑀣𑀻𑀦𑀁 𑀧𑀽𑀭𑀡𑀯𑀲𑁂𑀦 𑀧𑀦𑁆𑀦𑀭𑀲𑁄.

𑀩𑀳𑀼𑀲𑁄, 𑀅𑀢𑀺𑀲𑀬𑀢𑁄 𑀯𑀸 𑀓𑀼𑀫𑀼𑀤𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀓𑀼𑀫𑀼𑀤𑀯𑀢𑀻, 𑀢𑀺𑀲𑁆𑀲𑀁 𑀓𑀼𑀫𑀼𑀤𑀯𑀢𑀺𑀬𑀸. 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀧𑀸𑀭𑀺𑀧𑀽𑀭𑀺𑀪𑀽𑀢𑀸𑀢𑀺 𑀘𑀸𑀢𑀼𑀫𑀸𑀲𑀻. 𑀲𑀸 𑀏𑀯 𑀧𑀸𑀴𑀺𑀬𑀁 𑀘𑀸𑀢𑀼𑀫𑀸𑀲𑀺𑀦𑀻𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀇𑀥 𑀧𑀦 𑀘𑀸𑀢𑀼𑀫𑀸𑀲𑀺𑀦𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀢𑀤𑀸 𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀧𑀼𑀡𑁆𑀡𑀢𑀸𑀬 𑀫𑀸𑀲𑀧𑀼𑀡𑁆𑀡𑀢𑀸. 𑀯𑀲𑁆𑀲𑀸𑀦𑀲𑁆𑀲 𑀉𑀢𑀼𑀦𑁄 𑀧𑀼𑀡𑁆𑀡𑀢𑀸𑀬 𑀉𑀢𑀼𑀧𑀼𑀡𑁆𑀡𑀢𑀸. 𑀓𑀢𑁆𑀢𑀺𑀓𑀫𑀸𑀲𑀮𑀓𑁆𑀔𑀺𑀢𑀲𑁆𑀲 𑀲𑀁𑀯𑀘𑁆𑀙𑀭𑀲𑁆𑀲 𑀧𑀼𑀡𑁆𑀡𑀢𑀸𑀬 𑀲𑀁𑀯𑀘𑁆𑀙𑀭𑀧𑀼𑀡𑁆𑀡𑀢𑀸. ‘‘𑀫𑀸’’ 𑀇𑀢𑀺 𑀘𑀦𑁆𑀤𑁄 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀕𑀢𑀺𑀬𑀸 𑀤𑀺𑀯𑀲𑀲𑁆𑀲 𑀫𑀺𑀦𑀺𑀢𑀩𑁆𑀩𑀢𑁄. 𑀏𑀢𑁆𑀣 𑀧𑀼𑀡𑁆𑀡𑁄𑀢𑀺 𑀏𑀢𑀺𑀲𑁆𑀲𑀸 𑀭𑀢𑁆𑀢𑀺𑀬𑀸 𑀲𑀩𑁆𑀩𑀓𑀮𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀼𑀡𑁆𑀡𑁄. 𑀢𑀤𑀸 𑀳𑀺 𑀘𑀦𑁆𑀤𑁄 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺. 𑀏𑀢𑁆𑀣 𑀘 ‘‘𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂’’𑀢𑀺 𑀧𑀤𑀸𑀦𑀺 𑀤𑀺𑀯𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, ‘‘𑀓𑁄𑀫𑀼𑀤𑀺𑀬𑀸’’𑀢𑀺𑀆𑀤𑀻𑀦𑀺 𑀭𑀢𑁆𑀢𑀺𑀯𑀲𑁂𑀦.

𑀭𑀸𑀚𑀸𑀫𑀘𑁆𑀘𑀧𑀭𑀺𑀯𑀼𑀢𑁄𑀢𑀺 𑀭𑀸𑀚𑀓𑀼𑀮𑀲𑀫𑀼𑀤𑀸𑀕𑀢𑁂𑀳𑀺 𑀅𑀫𑀘𑁆𑀘𑁂𑀳𑀺 𑀧𑀭𑀺𑀯𑀼𑀢𑁄. 𑀅𑀣 𑀯𑀸 𑀅𑀦𑀼𑀬𑀼𑀢𑁆𑀢𑀓𑀭𑀸𑀚𑀽𑀳𑀺 𑀘𑁂𑀯 𑀅𑀫𑀘𑁆𑀘𑁂𑀳𑀺 𑀘 𑀧𑀭𑀺𑀯𑀼𑀢𑁄. 𑀘𑀢𑀼𑀭𑀼𑀧𑀓𑁆𑀓𑀺𑀮𑁂𑀲𑀸𑀢𑀺 𑀅𑀩𑁆𑀪𑀸 𑀫𑀳𑀺𑀓𑀸 𑀥𑀽𑀫𑀭𑀚𑁄 𑀭𑀸𑀳𑀽𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺. 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁 𑀅𑀝𑁆𑀞𑀓𑀣𑀸𑀬𑀁.

𑀧𑀻𑀢𑀺𑀯𑀘𑀦𑀦𑁆𑀢𑀺 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀁 𑀯𑀘𑀦𑀁. 𑀬𑀜𑁆𑀳𑀺 𑀯𑀘𑀦𑀁 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀁 𑀓𑁂𑀯𑀮𑀁 𑀉𑀴𑀸𑀭𑀸𑀬 𑀧𑀻𑀢𑀺𑀬𑀸 𑀯𑀲𑁂𑀦 𑀲𑀭𑀲𑀢𑁄 𑀲𑀳𑀲𑀸𑀯 𑀫𑀼𑀔𑀢𑁄 𑀦𑀺𑀘𑁆𑀙𑀭𑀢𑀺, 𑀢𑀁 𑀇𑀥 ‘‘𑀉𑀤𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀬𑀁 𑀧𑀻𑀢𑀺𑀯𑀘𑀦𑀁 𑀳𑀤𑀬𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺𑀆𑀤𑀺.

𑀤𑁄𑀲𑁂𑀳𑀺 𑀇𑀢𑀸 𑀕𑀢𑀸 𑀅𑀧𑀕𑀢𑀸𑀢𑀺 𑀤𑁄𑀲𑀺𑀦𑀸 𑀢-𑀓𑀸𑀭𑀲𑁆𑀲 𑀦-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀓𑀺𑀮𑁂𑀲𑁂 𑀚𑀺𑀢𑁄 𑀯𑀺𑀚𑀺𑀢𑀸𑀯𑀻𑀢𑀺 𑀚𑀺𑀦𑁄’’𑀢𑀺. 𑀅𑀦𑀻𑀬-𑀲𑀤𑁆𑀤𑁄 𑀓𑀢𑁆𑀢𑀼𑀅𑀢𑁆𑀣𑁂 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀫𑀦𑀁 𑀭𑀫𑀬𑀢𑀻’’𑀢𑀺 ‘‘𑀭𑀫𑀡𑀻𑀬𑀸’’𑀢𑀺 𑀬𑀣𑀸 ‘‘𑀦𑀺𑀬𑁆𑀬𑀸𑀦𑀺𑀓𑀸 𑀥𑀫𑁆𑀫𑀸’’𑀢𑀺. 𑀚𑀼𑀡𑁆𑀳𑀯𑀲𑁂𑀦 𑀭𑀢𑁆𑀢𑀺𑀬𑀸 𑀲𑀼𑀭𑀽𑀧𑀢𑀸𑀢𑀺 𑀆𑀳 ‘‘𑀯𑀼𑀢𑁆𑀢𑀤𑁄𑀲𑀯𑀺𑀫𑀼𑀢𑁆𑀢𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀩𑁆𑀪𑀸𑀤𑀬𑁄 𑀯𑀼𑀢𑁆𑀢𑀤𑁄𑀲𑀸, 𑀢𑀩𑁆𑀩𑀺𑀕𑀫𑁂𑀦𑁂𑀯 𑀘𑀲𑁆𑀲𑀸 𑀤𑀲𑁆𑀲𑀦𑀻𑀬𑀢𑀸, 𑀢𑁂𑀦, 𑀉𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀸𑀲𑀸𑀤𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀮𑀓𑁆𑀔𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸𑀢𑀺 𑀏𑀢𑀺𑀲𑁆𑀲𑀸 𑀭𑀢𑁆𑀢𑀺𑀬𑀸 𑀬𑀼𑀢𑁆𑀢𑁄 𑀤𑀺𑀯𑀲𑁄 𑀫𑀸𑀲𑁄 𑀉𑀢𑀼 𑀲𑀁𑀯𑀘𑁆𑀙𑀭𑁄𑀢𑀺 𑀏𑀯𑀁 𑀤𑀺𑀯𑀲𑀫𑀸𑀲𑀉𑀢𑀼𑀲𑀁𑀯𑀘𑁆𑀙𑀭𑀸𑀦𑀁 𑀲𑀮𑁆𑀮𑀓𑁆𑀔𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸 𑀮𑀓𑁆𑀔𑀜𑁆𑀜𑀸, 𑀮𑀓𑁆𑀔𑀡𑀻𑀬𑀸𑀢𑀺 𑀅𑀢𑁆𑀣𑁄.

‘‘𑀬𑀁 𑀦𑁄 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸’’𑀢𑀺 𑀏𑀢𑁆𑀣 𑀧𑀭𑀫𑀢𑁆𑀣𑀲𑀫𑀡𑁄 𑀘 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑁄 𑀘 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀲𑀫𑀡𑁄, 𑀦 𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑁄 𑀘𑀸𑀢𑀺 𑀆𑀳 ‘‘𑀲𑀫𑀺𑀢𑀧𑀸𑀧𑀢𑀸𑀬 𑀲𑀫𑀡𑀁. 𑀩𑀸𑀳𑀺𑀢𑀧𑀸𑀧𑀢𑀸𑀬 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. 𑀩𑀳𑀼𑀯𑀘𑀦𑁂 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁, 𑀏𑀓𑀯𑀘𑀦𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀯𑀘𑀦𑀩𑁆𑀬𑀢𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀏𑀓𑀯𑀘𑀦𑀯𑀲𑁂𑀦𑁂𑀯 𑀩𑁆𑀬𑀢𑀬𑁄 𑀤𑀲𑁆𑀲𑀺𑀢𑁄. 𑀅𑀢𑁆𑀢𑀦𑀺, 𑀕𑀭𑀼𑀝𑁆𑀞𑀸𑀦𑀺𑀬𑁂 𑀘 𑀏𑀓𑀲𑁆𑀫𑀺𑀫𑁆𑀧𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄 𑀦𑀺𑀭𑀽𑀴𑁆𑀳𑁄𑀢𑀺. 𑀲𑀩𑁆𑀩𑁂𑀦𑀧𑀻𑀢𑀺 ‘‘𑀭𑀫𑀡𑀻𑀬𑀸 𑀯𑀢𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀦 𑀯𑀘𑀦𑁂𑀦. 𑀑𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 𑀑𑀪𑀸𑀲𑀪𑀽𑀢𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀧𑀭𑀺𑀩𑁆𑀬𑀢𑁆𑀢𑀁 𑀦𑀺𑀫𑀺𑀢𑁆𑀢𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀤𑁂𑀯𑀤𑀢𑁆𑀢𑁄 𑀘𑀸𑀢𑀺. 𑀘-𑀲𑀤𑁆𑀤𑁄 𑀅𑀢𑁆𑀢𑀽𑀧𑀦𑀬𑀦𑁂, 𑀢𑁂𑀦 𑀬𑀣𑀸 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀅𑀢𑁆𑀢𑀦𑁄 𑀧𑀺𑀢𑀼 𑀅𑀭𑀺𑀬𑀲𑀸𑀯𑀓𑀲𑁆𑀲 𑀲𑀢𑁆𑀣𑀼𑀉𑀧𑀝𑁆𑀞𑀸𑀓𑀲𑁆𑀲 𑀖𑀸𑀢𑀦𑁂𑀦 𑀫𑀳𑀸𑀧𑀭𑀸𑀥𑁄, 𑀏𑀯𑀁 𑀪𑀕𑀯𑀢𑁄 𑀫𑀳𑀸𑀅𑀦𑀢𑁆𑀣𑀓𑀭𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀅𑀯𑀲𑁆𑀲𑀬𑀪𑀸𑀯𑁂𑀦 𑀧𑀻𑀢𑀺 𑀇𑀫𑀫𑀢𑁆𑀣𑀁 𑀉𑀧𑀦𑁂𑀢𑀺. 𑀢𑀲𑁆𑀲 𑀧𑀺𑀝𑁆𑀞𑀺𑀙𑀸𑀬𑀸𑀬𑀸𑀢𑀺 𑀢𑀲𑁆𑀲 𑀚𑀻𑀯𑀓𑀲𑁆𑀲 𑀧𑀺𑀝𑁆𑀞𑀺𑀅𑀧𑀲𑁆𑀲𑀬𑁂𑀦, 𑀢𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀢𑀁 𑀅𑀧𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀓𑁆𑀔𑁂𑀧𑀧𑀘𑁆𑀙𑁂𑀤𑀦𑀢𑁆𑀣𑀦𑁆𑀢𑀺 𑀪𑀸𑀯𑀺𑀦𑀺𑀬𑀸 𑀅𑀢𑁆𑀢𑀦𑁄 𑀓𑀣𑀸𑀬 𑀉𑀧𑁆𑀧𑀚𑁆𑀚𑀦𑀓𑀯𑀺𑀓𑁆𑀔𑁂𑀧𑀦𑀲𑁆𑀲 𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁, 𑀅𑀦𑀼𑀧𑁆𑀧𑀢𑁆𑀢𑀺𑀅𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀲𑀁 𑀳𑀻’’𑀢𑀺𑀆𑀤𑀺.

𑁧𑁫𑁧. ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀆𑀕𑀢𑀦𑀬𑁄. 𑀏𑀲𑁂𑀯 𑀦𑀬𑁄 𑀧𑀭𑀢𑁄 𑀫𑀓𑁆𑀔𑀮𑀺𑀧𑀤𑀦𑀺𑀩𑁆𑀩𑀘𑀦𑁂𑀧𑀺. 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀉𑀧𑀕𑀢𑀸. 𑀢𑀤𑁂𑀯 𑀧𑀩𑁆𑀩𑀚𑁆𑀚𑀁 𑀅𑀕𑁆𑀕𑀳𑁂𑀲𑀻𑀢𑀺 𑀢𑀤𑁂𑀯 𑀦𑀕𑁆𑀕𑀭𑀽𑀧𑀁 𑀧𑀩𑁆𑀩𑀚𑁆𑀚𑀁 𑀓𑀢𑁆𑀯𑀸 𑀕𑀡𑁆𑀳𑀺.

𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 𑀲𑀗𑁆𑀖𑁄𑀢𑀺 𑀧𑀩𑁆𑀩𑀚𑀺𑀢𑀲𑀫𑀽𑀳𑀢𑀸𑀫𑀢𑁆𑀢𑁂𑀦 𑀲𑀗𑁆𑀖𑁄, 𑀦 𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀲𑀸𑀫𑀜𑁆𑀜𑀯𑀲𑁂𑀦 𑀲𑀁𑀳𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀲𑁆𑀲 𑀲𑀢𑁆𑀣𑀼𑀧𑀝𑀺𑀜𑁆𑀜𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑁄 𑀅𑀢𑁆𑀣𑀺. 𑀲𑁆𑀯𑁂𑀯𑀸𑀢𑀺 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄𑀯. 𑀓𑁂𑀘𑀺 𑀧𑀦 ‘‘𑀧𑀩𑁆𑀩𑀚𑀺𑀢𑀲𑀫𑀽𑀳𑀯𑀲𑁂𑀦 𑀲𑀗𑁆𑀖𑀻, 𑀕𑀳𑀝𑁆𑀞𑀲𑀫𑀽𑀳𑀯𑀲𑁂𑀦 𑀕𑀡𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀕𑀡𑁂 𑀏𑀯 𑀮𑁄𑀓𑁂 𑀲𑀗𑁆𑀖-𑀲𑀤𑁆𑀤𑀲𑁆𑀲 𑀦𑀺𑀭𑀽𑀴𑁆𑀳𑀢𑁆𑀢𑀸. 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦𑀸𑀢𑀺 𑀅𑀘𑁂𑀮𑀓 𑀯𑀢𑀘𑀭𑀺𑀬𑀸𑀤𑀺𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦. 𑀧𑀸𑀓𑀝𑁄𑀢𑀺 𑀲𑀗𑁆𑀖𑀻𑀆𑀤𑀺𑀪𑀸𑀯𑁂𑀦 𑀧𑀓𑀸𑀲𑀺𑀢𑁄. ‘‘𑀅𑀧𑁆𑀧𑀺𑀘𑁆𑀙𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀮𑀩𑁆𑀪𑀫𑀸𑀦𑀁 𑀅𑀧𑁆𑀧𑀺𑀘𑁆𑀙𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀫𑁆𑀧𑀺 𑀦 𑀦𑀺𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑀲𑁆𑀫𑀺𑀁 𑀲𑀸𑀲𑀦𑀺𑀓𑁂 𑀯𑀺𑀬 𑀲𑀦𑁆𑀢𑀕𑀼𑀡𑀦𑀺𑀕𑀽𑀳𑀡𑀮𑀓𑁆𑀔𑀡𑀸 𑀅𑀧𑁆𑀧𑀺𑀘𑁆𑀙𑀢𑀸 𑀮𑀩𑁆𑀪𑀢𑀻𑀢𑀺. 𑀬𑀲𑁄𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄. ‘‘𑀢𑀭𑀦𑁆𑀢𑀺 𑀏𑀢𑁂𑀦 𑀲𑀁𑀲𑀸𑀭𑁄𑀖’’𑀦𑁆𑀢𑀺 𑀏𑀯𑀁 𑀲𑀫𑁆𑀫𑀢𑀢𑁆𑀢𑀸 𑀢𑀺𑀢𑁆𑀣𑀁 𑀯𑀼𑀘𑁆𑀘𑀢𑀺 𑀮𑀤𑁆𑀥𑀻𑀢𑀺 𑀆𑀳 ‘‘𑀢𑀺𑀢𑁆𑀣𑀓𑀭𑁄𑀢𑀺 𑀮𑀤𑁆𑀥𑀺𑀓𑀭𑁄’’𑀢𑀺. 𑀲𑀸𑀥𑀼𑀲𑀫𑁆𑀫𑀢𑁄𑀢𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀫𑀢𑁄, 𑀦 𑀲𑀸𑀥𑀽𑀳𑀺 𑀲𑀫𑁆𑀫𑀢𑁄𑀢𑀺 𑀆𑀳 ‘‘𑀅𑀬𑀁 𑀲𑀸𑀥𑀽’’𑀢𑀺𑀆𑀤𑀺. ‘‘𑀇𑀫𑀸𑀦𑀺 𑀫𑁂 𑀯𑀢𑀲𑀫𑀸𑀤𑀸𑀦𑀸𑀦𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀲𑀼𑀘𑀺𑀡𑀸𑀦𑀻’’𑀢𑀺 𑀧𑀩𑁆𑀩𑀚𑀺𑀢𑀢𑁄 𑀧𑀝𑁆𑀞𑀸𑀬 𑀅𑀢𑀺𑀓𑁆𑀓𑀦𑁆𑀢𑀸 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀸𑀢𑀻𑀢𑀺 𑀭𑀢𑁆𑀢𑀜𑁆𑀜𑀽. 𑀢𑀸 𑀧𑀦𑀲𑁆𑀲 𑀭𑀢𑁆𑀢𑀺𑀬𑁄 𑀘𑀺𑀭𑀓𑀸𑀮𑀪𑀽𑀢𑀸𑀢𑀺 𑀓𑀢𑁆𑀯𑀸 𑀘𑀺𑀭𑀁 𑀧𑀩𑁆𑀩𑀚𑀺𑀢𑀲𑁆𑀲 𑀅𑀲𑁆𑀲𑀸𑀢𑀺 𑀘𑀺𑀭𑀧𑀩𑁆𑀩𑀚𑀺𑀢𑁄. 𑀢𑀢𑁆𑀣 𑀘𑀺𑀭𑀧𑀩𑁆𑀩𑀚𑀺𑀢𑀢𑀸𑀕𑀳𑀡𑁂𑀦 𑀩𑀼𑀤𑁆𑀥𑀺𑀲𑀻𑀮𑀢𑀁 𑀤𑀲𑁆𑀲𑁂𑀢𑀺, 𑀭𑀢𑁆𑀢𑀜𑁆𑀜𑀼𑀢𑀸𑀕𑀳𑀡𑁂𑀦 𑀢𑀢𑁆𑀣 𑀲𑀫𑁆𑀧𑀚𑀸𑀦𑀢𑀁. 𑀅𑀤𑁆𑀥𑀸𑀦𑀦𑁆𑀢𑀺 𑀤𑀻𑀖𑀓𑀸𑀮𑀁. 𑀓𑀺𑀢𑁆𑀢𑀓𑁄 𑀧𑀦 𑀲𑁄𑀢𑀺 𑀆𑀳 ‘‘𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂’’𑀢𑀺, 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀭𑀸𑀚𑀽𑀦𑀁 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑀧𑀝𑀺𑀧𑀸𑀝𑀺𑀬𑁄𑀢𑀺 𑀅𑀢𑁆𑀣𑁄. ‘‘𑀅𑀤𑁆𑀥𑀕𑀢𑁄’’𑀢𑀺 𑀯𑀢𑁆𑀯𑀸 𑀓𑀢𑀁 𑀯𑀬𑁄𑀕𑀳𑀡𑀁 𑀑𑀲𑀸𑀦𑀯𑀬𑀸𑀧𑁂𑀓𑁆𑀔𑀦𑁆𑀢𑀺 𑀆𑀳 ‘‘𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀉𑀪𑀬𑀦𑁆𑀢𑀺 ‘‘𑀅𑀤𑁆𑀥𑀕𑀢𑁄, 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀧𑀤𑀤𑁆𑀯𑀬𑀁.

𑀧𑀼𑀩𑁆𑀩𑁂 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑁂𑀲𑀦𑀸𑀬 𑀲𑀼𑀢𑀧𑀼𑀩𑁆𑀩𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀛𑀸𑀦𑀸𑀪𑀺𑀜𑁆𑀜𑀸𑀤𑀺…𑀧𑁂… 𑀲𑁄𑀢𑀼𑀓𑀸𑀫𑁄’’𑀢𑀺. 𑀤𑀲𑁆𑀲𑀦𑁂𑀦𑀸𑀢𑀺 𑀦 𑀤𑀲𑁆𑀲𑀦𑀫𑀢𑁆𑀢𑀁, 𑀤𑀺𑀲𑁆𑀯𑀸 𑀧𑀦 𑀢𑁂𑀦 𑀲𑀤𑁆𑀥𑀺𑀁 𑀆𑀮𑀸𑀧𑀲𑀮𑁆𑀮𑀸𑀧𑀁 𑀓𑀢𑁆𑀯𑀸 𑀢𑀢𑁄 𑀅𑀓𑀺𑀭𑀺𑀬𑀯𑀸𑀤𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀕𑀼𑀡𑀓𑀣𑀸𑀬𑀸𑀢𑀺 𑀅𑀪𑀽𑀢𑀕𑀼𑀡𑀓𑀣𑀸𑀬. 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼𑀢𑀭𑀁 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸’’𑀢𑀺. 𑀬𑀤𑀺 𑀅𑀦𑀢𑁆𑀢𑀫𑀦𑁄, 𑀓𑀲𑁆𑀫𑀸 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀆𑀳 ‘‘𑀅𑀦𑀢𑁆𑀢𑀫𑀦𑁄 𑀲𑀫𑀸𑀦𑁄𑀧𑀻’’𑀢𑀺𑀆𑀤𑀺.

𑁧𑁫𑁨. 𑀕𑁄𑀲𑀸𑀮𑀸𑀬𑀸𑀢𑀺 𑀏𑀯𑀁 𑀦𑀸𑀫𑀓𑁂 𑀕𑀸𑀫𑁂. 𑀯𑀲𑁆𑀲𑀸𑀦𑀓𑀸𑀮𑁂 𑀕𑀼𑀦𑁆𑀦𑀁 𑀢𑀺𑀝𑁆𑀞𑀦𑀲𑀸𑀮𑀸𑀢𑀺 𑀏𑀓𑁂.

𑁧𑁫𑁩. 𑀧𑀝𑀺𑀓𑀺𑀝𑁆𑀞𑀢𑀭𑀦𑁆𑀢𑀺 𑀦𑀺𑀳𑀻𑀦𑀢𑀭𑀁. 𑀢𑀦𑁆𑀢𑀸𑀯𑀼𑀢𑀸𑀦𑀻𑀢𑀺 𑀢𑀦𑁆𑀢𑁂 𑀧𑀲𑀸𑀭𑁂𑀢𑁆𑀯𑀸 𑀯𑀻𑀢𑀸𑀦𑀺. ‘‘𑀲𑀻𑀢𑁂 𑀲𑀻𑀢𑁄’’𑀢𑀺𑀆𑀤𑀺𑀦𑀸 𑀙𑀳𑀸𑀓𑀸𑀭𑁂𑀳𑀺 𑀢𑀲𑁆𑀲 𑀦𑀺𑀳𑀻𑀦𑀲𑁆𑀲 𑀦𑀺𑀳𑀻𑀦𑀢𑀭𑀢𑀁 𑀤𑀲𑁆𑀲𑁂𑀢𑀺.

𑁧𑁫𑁪. 𑀯𑀘𑁆𑀘𑀁 𑀓𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸𑀧𑀺 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑁄 𑀧𑀻𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀯𑀸𑀮𑀺𑀓𑀣𑀽𑀧𑀁 𑀓𑀢𑁆𑀯𑀸𑀢𑀺 𑀯𑀢𑁆𑀢𑀯𑀲𑁂𑀦 𑀯𑀸𑀮𑀺𑀓𑀸𑀬 𑀣𑀽𑀧𑀁 𑀓𑀢𑁆𑀯𑀸.

𑁧𑁫𑁬. 𑀧𑀮𑀺𑀩𑀼𑀤𑁆𑀥𑀦𑀓𑀺𑀮𑁂𑀲𑁄𑀢𑀺 𑀲𑀁𑀲𑀸𑀭𑁂 𑀧𑀮𑀺𑀩𑀼𑀤𑁆𑀥𑀦𑀓𑀺𑀘𑁆𑀘𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑁄 𑀔𑁂𑀢𑁆𑀢𑀯𑀢𑁆𑀣𑀼𑀧𑀼𑀢𑁆𑀢𑀤𑀸𑀭𑀸𑀤𑀺𑀯𑀺𑀲𑀬𑁄.

𑀓𑁄𑀫𑀸𑀭𑀪𑀘𑁆𑀘𑀚𑀻𑀯𑀓𑀓𑀣𑀸𑀯𑀡𑁆𑀡𑀦𑀸

𑁧𑁫𑁭. 𑀦 𑀬𑀣𑀸𑀥𑀺𑀧𑁆𑀧𑀸𑀬𑀁 𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀦𑀢𑁆𑀣𑁄 𑀯𑀢 𑀫𑁂’’𑀢𑀺. 𑀚𑀻𑀯𑀓𑀲𑁆𑀲 𑀢𑀼𑀡𑁆𑀳𑀻𑀪𑀸𑀯𑁄 𑀫𑀫 𑀅𑀥𑀺𑀧𑁆𑀧𑀸𑀬𑀲𑁆𑀲 𑀫𑀤𑁆𑀤𑀦𑀲𑀤𑀺𑀲𑁄, 𑀢𑀲𑁆𑀫𑀸 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑀸𑀧𑀦𑁂𑀦 𑀫𑀫 𑀅𑀥𑀺𑀧𑁆𑀧𑀸𑀬𑁄 𑀧𑀽𑀭𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀭𑀜𑁆𑀜𑁄 𑀅𑀚𑁆𑀛𑀸𑀲𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀢𑁆𑀣𑀺𑀫𑁆𑀳𑀺 𑀦𑀼 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀺𑀁 𑀢𑀼𑀡𑁆𑀳𑀻𑀢𑀺 𑀓𑀺𑀁 𑀓𑀸𑀭𑀡𑀸 𑀢𑀼𑀡𑁆𑀳𑀻, 𑀓𑀺𑀁 𑀢𑀁 𑀓𑀸𑀭𑀡𑀁, 𑀬𑁂𑀦 𑀢𑀼𑀯𑀁 𑀢𑀼𑀡𑁆𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀓𑁂𑀦 𑀓𑀸𑀭𑀡𑁂𑀦 𑀢𑀼𑀡𑁆𑀳𑀻’’𑀢𑀺.

𑀓𑀸𑀫𑀁 𑀲𑀩𑁆𑀩𑀸𑀧𑀺 𑀢𑀣𑀸𑀕𑀢𑀲𑁆𑀲 𑀧𑀝𑀺𑀧𑀢𑁆𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀭𑀽𑀧𑀸 𑀘, 𑀢𑀣𑀸𑀧𑀺 𑀕𑀩𑁆𑀪𑁄𑀓𑁆𑀓𑀦𑁆𑀢𑀺- 𑀅𑀪𑀺𑀚𑀸𑀢𑀺𑀅𑀪𑀺𑀦𑀺𑀓𑁆𑀔𑀫𑀦𑀅𑀪𑀺𑀲𑀫𑁆𑀩𑁄𑀥𑀺𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦- 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑁂𑀯𑁄𑀭𑁄𑀳𑀡𑀸𑀦𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀢𑀺𑀯𑀺𑀬 𑀲𑀼𑀧𑀸𑀓𑀝𑀸𑀦𑀺, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺 𑀢𑀸𑀦𑀺𑀬𑁂𑀯𑁂𑀢𑁆𑀣 𑀉𑀤𑁆𑀥𑀝𑀸𑀦𑀺. 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂𑀢𑀺 𑀇𑀢𑁆𑀣𑀁 𑀏𑀯𑀁 𑀧𑀓𑀸𑀭𑁄 𑀪𑀽𑀢𑁄 𑀚𑀸𑀢𑁄𑀢𑀺 𑀏𑀯𑀁 𑀓𑀣𑀦𑀢𑁆𑀣𑁂. 𑀉𑀧𑀬𑁄𑀕𑀯𑀘𑀦𑀦𑁆𑀢𑀺. ‘‘𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀏𑀢𑁆𑀣 𑀅𑀪𑀻𑀢𑀺 𑀉𑀧𑀲𑀕𑁆𑀕𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀚𑁄𑀢𑀓𑁄, 𑀢𑁂𑀦 𑀬𑁄𑀕𑀢𑁄 ‘‘𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢’’𑀦𑁆𑀢𑀺 𑀇𑀤𑀁 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑁂𑀦𑀸𑀳 ‘‘𑀢𑀲𑁆𑀲 𑀔𑁄 𑀧𑀦 𑀪𑀕𑀯𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄𑀢𑀺 𑀓𑀮𑁆𑀬𑀸𑀡𑁂𑀳𑀺 𑀕𑀼𑀡𑁂𑀳𑀺 𑀬𑀼𑀢𑁆𑀢𑁄, 𑀢𑀁 𑀦𑀺𑀲𑁆𑀲𑀺𑀢𑁄 𑀢𑀩𑁆𑀩𑀺𑀲𑀬𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀝𑁆𑀞𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀺𑀢𑁆𑀢𑁂𑀢𑀩𑁆𑀩𑀢𑁄 𑀓𑀺𑀢𑁆𑀢𑀺, 𑀲𑀸 𑀏𑀯 𑀲𑀤𑁆𑀤𑀦𑀻𑀬𑀢𑁄 𑀲𑀤𑁆𑀤𑁄𑀢𑀺 𑀆𑀳 ‘‘𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺𑀬𑁂𑀯𑀸’’𑀢𑀺. 𑀅𑀪𑀺𑀢𑁆𑀣𑀯𑀦𑀯𑀲𑁂𑀦 𑀧𑀯𑀢𑁆𑀢𑁄 𑀲𑀤𑁆𑀤𑁄 𑀣𑀼𑀢𑀺𑀖𑁄𑀲𑁄. 𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑁂 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀢𑁄.

𑀲𑁄 𑀪𑀕𑀯𑀸𑀢𑀺 𑀬𑁄 𑀲𑁄 𑀲𑀫𑀢𑀺𑀁 𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄 𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸 𑀮𑁄𑀓𑀦𑀸𑀣𑁄 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑀤𑁂𑀯𑀓𑁂 𑀮𑁄𑀓𑁂 ‘‘𑀪𑀕𑀯𑀸’’𑀢𑀺 𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀓𑀺𑀢𑁆𑀢𑀺𑀲𑀤𑁆𑀤𑁄, 𑀲𑁄 𑀪𑀕𑀯𑀸. ‘‘𑀪𑀕𑀯𑀸’’𑀢𑀺 𑀘 𑀇𑀤𑀁 𑀲𑀢𑁆𑀣𑀼 𑀦𑀸𑀫𑀓𑀺𑀢𑁆𑀢𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢’’𑀦𑁆𑀢𑀺𑀆𑀤𑀺 (𑀫𑀳𑀸𑀦𑀺. 𑁮𑁪). 𑀧𑀭𑀢𑁄 𑀧𑀦 𑀪𑀕𑀯𑀸𑀢𑀺 𑀕𑀼𑀡𑀓𑀺𑀢𑁆𑀢𑀦𑀁.

𑀬𑀣𑀸 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦 ‘‘𑀅𑀭𑀳’’𑀦𑁆𑀢𑀺𑀆𑀤𑀻𑀲𑀼 𑀦𑀯𑀝𑁆𑀞𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀇𑀢𑀺-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀸 𑀅𑀦𑀼𑀲𑁆𑀲𑀭𑀻𑀬𑀦𑁆𑀢𑀺, 𑀏𑀯𑀁 𑀩𑀼𑀤𑁆𑀥𑀕𑀼𑀡𑀲𑀗𑁆𑀓𑀺𑀢𑁆𑀢𑀓𑁂𑀦𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺𑀧𑀺 𑀅𑀭𑀳𑀁, 𑀇𑀢𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀇𑀢𑀺𑀧𑀺 𑀪𑀕𑀯𑀸’’𑀢𑀺 𑀆𑀳. ‘‘𑀇𑀢𑀺𑀧𑁂𑀢𑀁 𑀅𑀪𑀽𑀢𑀁, 𑀇𑀢𑀺𑀧𑁂𑀢𑀁 𑀅𑀢𑀘𑁆𑀙’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁫) 𑀯𑀺𑀬 𑀇𑀥 𑀇𑀢𑀺-𑀲𑀤𑁆𑀤𑁄 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑁄, 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀘 𑀢𑁂𑀲𑀁 𑀕𑀼𑀡𑀸𑀦𑀁 𑀩𑀳𑀼𑀪𑀸𑀯𑁄 𑀤𑀻𑀧𑀺𑀢𑁄. 𑀢𑀸𑀦𑀺 𑀘 𑀲𑀗𑁆𑀓𑀺𑀢𑁆𑀢𑁂𑀦𑁆𑀢𑁂𑀦 𑀯𑀺𑀜𑁆𑀜𑀼𑀦𑀸 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑁂𑀯 𑀓𑀢𑁆𑀯𑀸 𑀲𑀗𑁆𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀏𑀯𑀜𑁆𑀳𑀺 𑀦𑀺𑀭𑀽𑀧𑁂𑀢𑁆𑀯𑀸 𑀓𑀺𑀢𑁆𑀢𑁂𑀦𑁆𑀢𑁂 𑀬𑀲𑁆𑀲 𑀲𑀗𑁆𑀓𑀺𑀢𑁆𑀢𑁂𑀢𑀺, 𑀢𑀲𑁆𑀲 𑀪𑀕𑀯𑀢𑀺 𑀅𑀢𑀺𑀯𑀺𑀬 𑀅𑀪𑀺𑀧𑁆𑀧𑀲𑀸𑀤𑁄 𑀳𑁄𑀢𑀺. 𑀆𑀭𑀓𑀢𑁆𑀢𑀸𑀢𑀺 𑀲𑀼𑀯𑀺𑀤𑀽𑀭𑀢𑁆𑀢𑀸. 𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁. 𑀅𑀭𑀸𑀦𑀦𑁆𑀢𑀺 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀁. 𑀳𑀢𑀢𑁆𑀢𑀸𑀢𑀺 𑀯𑀺𑀳𑀢𑀢𑁆𑀢𑀸. 𑀧𑀘𑁆𑀘𑀬𑀸𑀤𑀻𑀦𑀦𑁆𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀸𑀦𑀜𑁆𑀘𑁂𑀯 𑀧𑀽𑀚𑀸𑀯𑀺𑀲𑁂𑀲𑀸𑀦𑀜𑁆𑀘. 𑀢𑀢𑁄𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄. 𑀬𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄, 𑀏𑀯𑀁 𑀢𑀁𑀲𑀁𑀯𑀡𑁆𑀡𑀦𑀢𑁄𑀧𑀺 𑀦𑁂𑀲𑀁 𑀯𑀺𑀢𑁆𑀣𑀸𑀭𑁄 𑀕𑀳𑁂𑀢𑀩𑁆𑀩𑁄.

𑀬𑀲𑁆𑀫𑀸 𑀚𑀻𑀯𑀓𑁄 𑀩𑀳𑀼𑀲𑁄 𑀲𑀢𑁆𑀣𑀼𑀲𑀦𑁆𑀢𑀺𑀓𑁂 𑀩𑀼𑀤𑁆𑀥𑀕𑀼𑀡𑁂 𑀲𑀼𑀢𑁆𑀯𑀸 𑀞𑀺𑀢𑁄, 𑀤𑀺𑀝𑁆𑀞𑀲𑀘𑁆𑀘𑀢𑀸𑀬 𑀘 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀆𑀳 ‘‘𑀚𑀻𑀯𑀓𑁄 𑀧𑀦𑀸’’𑀢𑀺𑀆𑀤𑀺. 𑀧𑀜𑁆𑀘𑀯𑀡𑁆𑀡𑀸𑀬𑀸𑀢𑀺 𑀔𑀼𑀤𑁆𑀤𑀺𑀓𑀸𑀤𑀺𑀯𑀲𑁂𑀦 𑀧𑀜𑁆𑀘𑀧𑁆𑀧𑀓𑀸𑀭𑀸𑀬. 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺 𑀓𑀢𑀸𑀥𑀺𑀓𑀸𑀭𑀪𑀸𑀯𑀢𑁄. 𑀓𑀫𑁆𑀫𑀦𑁆𑀢𑀭𑀸𑀬𑀯𑀲𑁂𑀦 𑀳𑀺𑀲𑁆𑀲 𑀭𑀜𑁆𑀜𑁄 𑀕𑀼𑀡𑀲𑀭𑀻𑀭𑀁 𑀔𑀢𑀼𑀧𑀳𑀢𑀁 𑀅𑀳𑁄𑀲𑀺.

𑁧𑁫𑁮. ‘‘𑀉𑀢𑁆𑀢𑀫’’𑀦𑁆𑀢𑀺 𑀯𑀢𑁆𑀯𑀸 𑀦 𑀓𑁂𑀯𑀮𑀁 𑀲𑁂𑀝𑁆𑀞𑀪𑀸𑀯𑁄 𑀏𑀯𑁂𑀢𑁆𑀣 𑀓𑀸𑀭𑀡𑀁, 𑀅𑀣 𑀔𑁄 𑀅𑀧𑁆𑀧𑀲𑀤𑁆𑀤𑀢𑀸𑀧𑀺 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀲𑁆𑀲𑀬𑀸𑀦𑀭𑀣𑀬𑀸𑀦𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀺𑀬𑀸𑀦𑁂𑀲𑀼 𑀦𑀺𑀩𑁆𑀩𑀺𑀲𑁂𑀯𑀦𑀫𑁂𑀯 𑀕𑀡𑁆𑀳𑀦𑁆𑀢𑁄 𑀳𑀢𑁆𑀣𑀺𑀦𑀺𑀬𑁄𑀯 𑀓𑀧𑁆𑀧𑀸𑀧𑁂𑀲𑀺. 𑀭𑀜𑁆𑀜𑁄 𑀆𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀲𑀦𑁆𑀦𑀘𑀸𑀭𑀻𑀪𑀸𑀯𑁂𑀦 𑀢𑀢𑁆𑀣 𑀇𑀢𑁆𑀣𑀺𑀬𑁄𑀯 𑀦𑀺𑀲𑀚𑁆𑀚𑀸𑀧𑀺𑀢𑀸. 𑀭𑀜𑁆𑀜𑁄 𑀧𑀭𑁂𑀲𑀁 𑀤𑀼𑀭𑀼𑀧𑀲𑀗𑁆𑀓𑀫𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀸 𑀧𑀼𑀭𑀺𑀲𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀆𑀯𑀼𑀥𑀳𑀢𑁆𑀣𑀸 𑀓𑀸𑀭𑀺𑀢𑀸. 𑀧𑀝𑀺𑀯𑁂𑀤𑁂𑀲𑀻𑀢𑀺 𑀜𑀸𑀧𑁂𑀲𑀺. 𑀢𑀤𑁂𑀯𑀸𑀢𑀺 𑀕𑀫𑀦𑀁, 𑀅𑀕𑀫𑀦𑀫𑁂𑀯 𑀯𑀸.

𑁧𑁫𑁯. 𑀫𑀳𑀜𑁆𑀘𑀸𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀫𑀳𑀢𑀸𑀘𑀸’’𑀢𑀺. 𑀫𑀳𑀘𑁆𑀘𑀸𑀢𑀺 𑀫𑀳𑀢𑀺𑀬𑀸, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀫𑀳𑀦𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀭𑀸𑀚𑀸𑀦𑀼𑀪𑀸𑀯𑁂𑀦𑀸’’𑀢𑀺 ‘‘𑀤𑁆𑀯𑀺𑀦𑁆𑀦𑀁 𑀫𑀳𑀸𑀭𑀝𑁆𑀞𑀸𑀦𑀁 𑀇𑀲𑁆𑀲𑀭𑀺𑀬𑀲𑀺𑀭𑀻’’𑀢𑀺 𑀅𑀗𑁆𑀕𑀫𑀕𑀥𑀭𑀝𑁆𑀞𑀸𑀦𑀁 𑀆𑀥𑀺𑀧𑀘𑁆𑀘𑀫𑀸𑀳. 𑀆𑀲𑀢𑁆𑀢𑀔𑀕𑁆𑀕𑀸𑀦𑀻𑀢𑀺 𑀅𑀁𑀲𑁂 𑀑𑀮𑀫𑁆𑀩𑀦𑀯𑀲𑁂𑀦 𑀲𑀦𑁆𑀦𑀤𑁆𑀥𑀅𑀲𑀻𑀦𑀺. 𑀓𑀼𑀮𑀪𑁄𑀕𑀇𑀲𑁆𑀲𑀭𑀺𑀬𑀸𑀤𑀺𑀯𑀲𑁂𑀦 𑀫𑀳𑀢𑀻 𑀫𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀫𑀳𑀸𑀫𑀢𑁆𑀢𑀸, 𑀫𑀳𑀸𑀦𑀼𑀪𑀸𑀯𑀸 𑀭𑀸𑀚𑀧𑀼𑀭𑀺𑀲𑀸. 𑀯𑀺𑀚𑁆𑀚𑀸𑀥𑀭𑀢𑀭𑀼𑀡𑀸 𑀯𑀺𑀬𑀸𑀢𑀺 𑀯𑀺𑀚𑁆𑀚𑀸𑀥𑀭𑀓𑀼𑀫𑀸𑀭𑀸 𑀯𑀺𑀬. 𑀭𑀝𑁆𑀞𑀺𑀬𑀧𑀼𑀢𑁆𑀢𑀸𑀢𑀺 𑀪𑁄𑀚𑀧𑀼𑀢𑁆𑀢𑀸. 𑀳𑀢𑁆𑀣𑀺𑀖𑀝𑀸𑀢𑀺 𑀳𑀢𑁆𑀣𑀺𑀲𑀫𑀽𑀳𑀸. 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑀸𑀢𑀺 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀕𑀫𑀦𑁂𑀦 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸.

𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀲𑀬𑀁 𑀪𑀸𑀬𑀦𑀝𑁆𑀞𑁂𑀦 𑀪𑀬𑀁 𑀬𑀣𑀸 𑀢𑀣𑀸 𑀪𑀸𑀬𑀢𑀻𑀢𑀺 𑀓𑀢𑁆𑀯𑀸. 𑀜𑀸𑀡𑀁 𑀪𑀸𑀬𑀺𑀢𑀩𑁆𑀩𑁂 𑀏𑀯 𑀯𑀢𑁆𑀣𑀼𑀲𑁆𑀫𑀺𑀁 𑀪𑀬𑀢𑁄 𑀉𑀧𑀝𑁆𑀞𑀺𑀢𑁂 ‘‘𑀪𑀸𑀬𑀺𑀢𑀩𑁆𑀩𑀫𑀺𑀤’’𑀦𑁆𑀢𑀺 𑀪𑀬𑀢𑁄 𑀢𑀻𑀭𑀡𑀢𑁄 𑀪𑀬𑀁. 𑀢𑁂𑀦𑁂𑀯𑀸𑀳 ‘‘𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀧𑀦 𑀪𑀸𑀬𑀢𑀺 𑀦𑀪𑀸𑀬𑀢𑀻𑀢𑀺? 𑀦 𑀪𑀸𑀬𑀢𑀺. 𑀢𑀜𑁆𑀳𑀺 𑀅𑀢𑀻𑀢𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀦𑀸𑀕𑀢𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻𑀢𑀺 𑀢𑀻𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁭𑁫𑁧). 𑀆𑀭𑀫𑁆𑀫𑀡𑀁 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁. 𑀑𑀢𑀧𑁆𑀧𑀁 𑀧𑀸𑀧𑀢𑁄 𑀪𑀸𑀬𑀢𑀺 𑀏𑀢𑁂𑀦𑀸𑀢𑀺 𑀪𑀬𑀁. 𑀪𑀬𑀸𑀦𑀓𑀦𑁆𑀢𑀺 𑀪𑀸𑀬𑀦𑀸𑀓𑀸𑀭𑁄. 𑀪𑀬𑀦𑁆𑀢𑀺 𑀜𑀸𑀡𑀪𑀬𑀁. 𑀲𑀁𑀯𑁂𑀕𑀦𑁆𑀢𑀺 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁 𑀲𑀦𑁆𑀢𑀸𑀲𑀦𑁆𑀢𑀺 𑀲𑀩𑁆𑀩𑀲𑁄 𑀉𑀩𑁆𑀩𑀺𑀚𑁆𑀚𑀦𑀁. 𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦 𑀪𑀬𑀁 𑀪𑀻𑀫𑀪𑀸𑀯𑁂𑀦 𑀪𑁂𑀭𑀯𑀦𑁆𑀢𑀺 𑀪𑀬𑀪𑁂𑀭𑀯𑀁, 𑀪𑀻𑀢𑀩𑁆𑀩𑀯𑀢𑁆𑀣𑀼. 𑀢𑁂𑀦𑀸𑀳 ‘‘𑀆𑀕𑀘𑁆𑀙𑀢𑀻’’𑀢𑀺.

𑀪𑀻𑀭𑀼𑀁 𑀧𑀲𑀁𑀲𑀦𑁆𑀢𑀻𑀢𑀺 𑀧𑀸𑀧𑀢𑁄 𑀪𑀸𑀬𑀦𑀢𑁄 𑀉𑀢𑁆𑀢𑀲𑀦𑀢𑁄 𑀪𑀻𑀭𑀼𑀁 𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀦 𑀳𑀺 𑀢𑀢𑁆𑀣 𑀲𑀽𑀭𑀦𑁆𑀢𑀺 𑀢𑀲𑁆𑀫𑀺𑀁 𑀧𑀸𑀧𑀓𑀭𑀡𑁂 𑀲𑀽𑀭𑀁 𑀧𑀕𑀩𑁆𑀪𑀥𑀁𑀲𑀺𑀦𑀁 𑀦 𑀳𑀺 𑀧𑀲𑀁𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀪𑀬𑀸 𑀳𑀺 𑀲𑀦𑁆𑀢𑁄 𑀦 𑀓𑀭𑁄𑀦𑁆𑀢𑀺 𑀧𑀸𑀧’’𑀦𑁆𑀢𑀺. 𑀢𑀢𑁆𑀣 𑀪𑀬𑀸𑀢𑀺 𑀧𑀸𑀧𑀼𑀢𑁆𑀭𑀸𑀲𑀢𑁄, 𑀑𑀢𑁆𑀢𑀧𑁆𑀧𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀲𑀭𑀻𑀭𑀘𑀮𑀦𑀦𑁆𑀢𑀺 𑀪𑀬𑀯𑀲𑁂𑀦𑀲𑀭𑀻𑀭𑀲𑀁𑀓𑀫𑁆𑀧𑁄. 𑀏𑀓𑁂𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. ‘‘𑀭𑀸𑀚𑀕𑀳𑁂’’𑀢𑀺𑀆𑀤𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀯𑀺𑀯𑀭𑀡𑀁. 𑀓𑀸𑀫𑀁 𑀯𑀬𑀢𑀼𑀮𑁆𑀬𑁄 ‘‘𑀯𑀬𑀲𑁆𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀭𑀽𑀴𑁆𑀳𑀺𑀭𑁂𑀲𑁄, 𑀬𑁄 𑀓𑁄𑀘𑀺 𑀧𑀦 𑀲𑀳𑀸𑀬𑁄 𑀯𑀬𑀲𑁆𑀲𑁄, 𑀢𑀲𑁆𑀫𑀸 𑀯𑀬𑀲𑁆𑀲𑀸𑀪𑀺𑀮𑀸𑀧𑁄𑀢𑀺 𑀲𑀳𑀸𑀬𑀸𑀪𑀺𑀮𑀸𑀧𑁄. 𑀦 𑀯𑀺𑀧𑁆𑀧𑀮𑀫𑁆𑀪𑁂𑀲𑀻𑀢𑀺 𑀦 𑀯𑀺𑀲𑀁𑀯𑀸𑀤𑁂𑀲𑀺. 𑀯𑀺𑀦𑀲𑁆𑀲𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀯𑀺𑀖𑀸𑀢𑁂𑀦 𑀯𑀺𑀳𑀜𑁆𑀜𑁂𑀬𑁆𑀬.

𑀲𑀸𑀫𑀜𑁆𑀜𑀨𑀮𑀧𑀼𑀘𑁆𑀙𑀸𑀯𑀡𑁆𑀡𑀦𑀸

𑁧𑁬𑁦. 𑀪𑀕𑀯𑀢𑁄 𑀢𑁂𑀚𑁄𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀭𑀜𑁆𑀜𑁄 𑀲𑀭𑀻𑀭𑀁 𑀨𑀭𑀺 𑀬𑀣𑀸 𑀢𑀁 𑀲𑁄𑀡𑀤𑀡𑁆𑀟𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑁄𑀯𑀦𑀲𑀡𑁆𑀟𑀕𑀢𑀲𑁆𑀲. 𑀏𑀓𑁂𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄.

𑁧𑁬𑁧. 𑀬𑁂𑀦, 𑀢𑁂𑀦𑀸𑀢𑀺 𑀘 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺 𑀆𑀳 ‘‘𑀬𑀢𑁆𑀣 𑀪𑀕𑀯𑀸, 𑀢𑀢𑁆𑀣 𑀕𑀢𑁄’’𑀢𑀺. 𑀢𑀤𑀸 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀢𑀼𑀡𑁆𑀳𑀻𑀪𑀸𑀯𑀲𑁆𑀲 𑀅𑀦𑀯𑀲𑁂𑀲𑀢𑁄 𑀩𑁆𑀬𑀸𑀧𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀢𑁄 𑀬𑀢𑁄…𑀧𑁂… 𑀫𑁂𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀳𑀢𑁆𑀣𑀲𑁆𑀲 𑀓𑀼𑀓𑀢𑀢𑁆𑀢𑀸 𑀅𑀲𑀁𑀬𑀫𑁄 𑀅𑀲𑀫𑁆𑀧𑀚𑀜𑁆𑀜𑀓𑀺𑀭𑀺𑀬𑀸 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄, 𑀢𑁂𑀦 𑀢𑀤𑀜𑁆𑀜𑁄 𑀅𑀲𑀁𑀬𑀫𑀪𑀸𑀯𑁄 𑀯𑀺𑀪𑀸𑀯𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀧𑀦 𑀘𑀓𑁆𑀔𑀼𑀅𑀲𑀁𑀬𑀫𑁄 𑀲𑀩𑁆𑀩𑀧𑀞𑀫𑁄, 𑀤𑀼𑀦𑁆𑀦𑀺𑀯𑀸𑀭𑁄 𑀘𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀉𑀧𑀲𑀫𑁂𑀦 𑀮𑀤𑁆𑀥𑁂𑀦 𑀇𑀢𑀭𑁄𑀧𑀺 𑀅𑀦𑀼𑀫𑀸𑀦𑀢𑁄 𑀮𑀤𑁆𑀥𑁄 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀫𑀸𑀦𑀲𑀺𑀓𑁂𑀦 𑀘𑀸’’𑀢𑀺. 𑀉𑀧𑀲𑀫𑀦𑁆𑀢𑀺 𑀲𑀁𑀬𑀫𑀁, 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀧𑀭𑀺𑀯𑀝𑁆𑀝𑁂𑀢𑀺 𑀧𑀜𑁆𑀘𑀧𑀼𑀭𑀺𑀲𑀧𑀭𑀺𑀯𑀝𑁆𑀝𑁂. 𑀧𑀜𑁆𑀘𑀳𑀸𑀓𑀸𑀭𑁂𑀳𑀻𑀢𑀺 ‘‘𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻’’𑀢𑀺 (𑀫𑀳𑀸𑀦𑀺. 𑁩𑁮, 𑁧𑁯𑁨) 𑀏𑀯𑀁 𑀆𑀤𑀺𑀦𑀸 𑀆𑀕𑀢𑁂𑀳𑀺, 𑀧𑀜𑁆𑀘𑀯𑀺𑀥𑀅𑀭𑀺𑀬𑀺𑀤𑁆𑀥𑀺𑀲𑀺𑀤𑁆𑀥𑁂𑀳𑀺 𑀘 𑀧𑀜𑁆𑀘𑀳𑀺 𑀧𑀓𑀸𑀭𑁂𑀳𑀺. 𑀢𑀸𑀤𑀺𑀮𑀓𑁆𑀔𑀡𑁂𑀢𑀺 𑀢𑀸𑀤𑀺𑀪𑀸𑀯𑁂.

𑁧𑁬𑁨. 𑀦 𑀫𑁂 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀪𑀸𑀭𑁄 𑀅𑀢𑁆𑀣𑀻𑀢𑀺 𑀲𑀢𑁆𑀣𑀼 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀤𑀲𑁆𑀲𑀦𑀁. 𑀬𑀤𑀸𑀓𑀗𑁆𑀔𑀲𑀻𑀢𑀺 𑀦 𑀯𑀤𑀦𑁆𑀢𑀺, 𑀓𑀣𑀁 𑀧𑀦 𑀯𑀤𑀦𑁆𑀢𑀻𑀢𑀺 𑀆𑀳 ‘‘𑀲𑀼𑀢𑁆𑀯𑀸 𑀯𑁂𑀤𑀺𑀲𑁆𑀲𑀸𑀫𑀸’’𑀢𑀺 𑀧𑀤𑁂𑀲𑀜𑀸𑀡𑁂 𑀞𑀺𑀢𑀢𑁆𑀢𑀸. 𑀩𑀼𑀤𑁆𑀥𑀸 𑀧𑀦 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀓𑁆𑀔𑀦𑀭𑀺𑀦𑁆𑀤𑀤𑁂𑀯𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀦’’𑀦𑁆𑀢𑀺 𑀇𑀤𑀁 ‘‘𑀧𑀼𑀘𑁆𑀙𑀸𑀯𑀼𑀲𑁄 𑀬𑀤𑀸𑀓𑀗𑁆𑀔𑀲𑀻’’𑀢𑀺𑀆𑀤𑀻𑀦𑀺 (𑀲𑀁. 𑀦𑀺. 𑁧.𑁨𑁩𑁭, 𑁨𑁪𑁬; 𑀲𑀼. 𑀦𑀺. 𑀆𑀴𑀯𑀓𑀲𑀼𑀢𑁆𑀢𑁂) 𑀲𑀼𑀢𑁆𑀢𑀧𑀤𑀸𑀦𑀺 𑀧𑀼𑀘𑁆𑀙𑀦𑁆𑀢𑀸𑀦𑀁 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺, 𑀢𑀁 𑀤𑀲𑁆𑀲𑀦𑀢𑁆𑀣𑀁. ‘‘𑀧𑀼𑀘𑁆𑀙𑀸𑀯𑀼𑀲𑁄 𑀬𑀤𑀸𑀓𑀗𑁆𑀔𑀲𑀻’’𑀢𑀺 𑀇𑀤𑀁 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀑𑀓𑀸𑀲𑀓𑀭𑀡𑀁, 𑀲𑁂𑀲𑀸𑀦𑀺 𑀦𑀭𑀺𑀦𑁆𑀤𑀸𑀤𑀻𑀦𑀁. 𑀫𑀦𑀲𑀺𑀘𑁆𑀙𑀲𑀻𑀢𑀺 𑀫𑀦𑀲𑀸 𑀇𑀘𑁆𑀙𑀲𑀺. 𑀧𑀼𑀘𑁆𑀙𑀯𑁆𑀳𑁄, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀣𑀸𑀢𑀺 𑀩𑀸𑀯𑀭𑀺𑀲𑁆𑀲 𑀲𑀁𑀲𑀬𑀁 𑀫𑀦𑀲𑀸 𑀧𑀼𑀘𑁆𑀙𑀯𑁆𑀳𑁄. 𑀢𑀼𑀫𑁆𑀳𑀸𑀓𑀁 𑀧𑀦 𑀲𑀩𑁆𑀩𑁂𑀲𑀁 𑀬𑀁 𑀓𑀺𑀜𑁆𑀘𑀺 𑀲𑀩𑁆𑀩𑀲𑀁𑀲𑀬𑀁 𑀫𑀦𑀲𑀸, 𑀅𑀜𑁆𑀜𑀣𑀸 𑀘, 𑀬𑀣𑀸 𑀇𑀘𑁆𑀙𑀣, 𑀢𑀣𑀸 𑀧𑀼𑀘𑁆𑀙𑀯𑁆𑀳𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀸𑀥𑀼𑀭𑀽𑀧𑀸𑀢𑀺 𑀲𑀸𑀥𑀼𑀲𑀪𑀸𑀯𑀸. 𑀥𑀫𑁆𑀫𑁄𑀢𑀺 𑀧𑀯𑁂𑀡𑀻𑀥𑀫𑁆𑀫𑁄. 𑀯𑀼𑀤𑁆𑀥𑀦𑁆𑀢𑀺 𑀲𑀻𑀮𑀸𑀤𑀻𑀳𑀺 𑀩𑀼𑀤𑁆𑀥𑀺𑀧𑁆𑀧𑀢𑁆𑀢𑀁, 𑀕𑀭𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀪𑀸𑀭𑁄𑀢𑀺 𑀏𑀲 𑀲𑀁𑀲𑀬𑀽𑀧𑀘𑁆𑀙𑁂𑀤𑀦𑀲𑀗𑁆𑀔𑀸𑀢𑁄 𑀪𑀸𑀭𑁄, 𑀆𑀕𑀢𑁄 𑀪𑀸𑀭𑁄 𑀅𑀯𑀲𑁆𑀲𑀁 𑀆𑀯𑀳𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀜𑀢𑁆𑀯𑀸 𑀲𑀬𑀦𑁆𑀢𑀺 𑀧𑀭𑀽𑀧𑀤𑁂𑀲𑁂𑀦 𑀯𑀺𑀦𑀸 𑀲𑀬𑀫𑁂𑀯 𑀜𑀢𑁆𑀯𑀸.

𑀲𑀼𑀘𑀺𑀭𑀢𑁂𑀦𑀸𑀢𑀺 𑀏𑀯𑀁 𑀦𑀸𑀫𑀓𑁂𑀦 𑀩𑁆𑀭𑀸𑀳𑁆𑀫𑀡𑁂𑀦. 𑀢𑀕𑁆𑀖𑀸𑀢𑀺 𑀏𑀓𑀁𑀲𑁂𑀦. 𑀬𑀣𑀸𑀧𑀺 𑀓𑀼𑀲𑀮𑁄 𑀢𑀣𑀸𑀢𑀺 𑀬𑀣𑀸 𑀲𑀩𑁆𑀩𑀥𑀫𑁆𑀫𑀓𑀼𑀲𑀮𑁄 𑀲𑀩𑁆𑀩𑀯𑀺𑀤𑀽 𑀚𑀸𑀦𑀸𑀢𑀺 𑀓𑀣𑁂𑀢𑀺, 𑀢𑀣𑀸 𑀅𑀳𑀫𑀓𑁆𑀔𑀺𑀲𑁆𑀲𑀁. 𑀭𑀸𑀚𑀸 𑀘 𑀔𑁄 𑀢𑀁 𑀬𑀤𑀺 𑀓𑀸𑀳𑀢𑀺 𑀯𑀸 𑀦 𑀯𑀸𑀢𑀺 𑀬𑁄 𑀢𑀁 𑀇𑀥 𑀧𑀼𑀘𑁆𑀙𑀺𑀢𑀼𑀁 𑀧𑁂𑀲𑁂𑀲𑀺, 𑀲𑁄 𑀭𑀸𑀚𑀸𑀦𑀁 𑀢𑀬𑀸 𑀧𑀼𑀘𑁆𑀙𑀺𑀢𑀁 𑀓𑀭𑁄𑀢𑀼 𑀯𑀸 𑀫𑀸 𑀯𑀸, 𑀅𑀳𑀁 𑀧𑀦 𑀢𑁂 𑀅𑀓𑁆𑀔𑀺𑀲𑁆𑀲𑀁 𑀅𑀓𑁆𑀔𑀺𑀲𑁆𑀲𑀸𑀫𑀺, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑁧𑁬𑁩. 𑀲𑀺𑀧𑁆𑀧𑀦𑀝𑁆𑀞𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀢𑀸𑀬 𑀘 𑀲𑀺𑀧𑁆𑀧𑀫𑁂𑀯 𑀲𑀺𑀧𑁆𑀧𑀸𑀬𑀢𑀦𑀁 𑀚𑀻𑀯𑀺𑀓𑀸𑀬 𑀓𑀸𑀭𑀡𑀪𑀸𑀯𑀢𑁄. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀢𑁂 𑀓𑀢𑀫𑁂𑀢𑀺 𑀅𑀢𑁆𑀣𑁄. 𑀧𑀼𑀣𑀼 𑀲𑀺𑀧𑁆𑀧𑀸𑀬𑀢𑀦𑀸𑀦𑀻𑀢𑀺 𑀳𑀺 𑀲𑀸𑀥𑀸𑀭𑀡𑀢𑁄 𑀲𑀺𑀧𑁆𑀧𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀉𑀧𑀭𑀺 𑀢𑀁𑀢𑀁𑀲𑀺𑀧𑁆𑀧𑀽𑀧𑀚𑀻𑀯𑀺𑀦𑁄 𑀦𑀺𑀤𑁆𑀤𑀺𑀝𑁆𑀞𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀓𑀣𑀸𑀬 𑀧𑀧𑀜𑁆𑀘𑀁 𑀧𑀭𑀺𑀳𑀭𑀺𑀢𑀼𑀁. 𑀅𑀜𑁆𑀜𑀣𑀸 𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀺 𑀢𑀸𑀯 𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀁𑀢𑀁𑀲𑀺𑀧𑁆𑀧𑀽𑀧𑀚𑀻𑀯𑀻𑀲𑀼 𑀤𑀲𑁆𑀲𑀺𑀬𑀫𑀸𑀦𑁂𑀲𑀼 𑀧𑀧𑀜𑁆𑀘𑁄 𑀲𑀺𑀬𑀸𑀢𑀺. 𑀢𑁂𑀦𑀸𑀳 ‘‘𑀳𑀢𑁆𑀣𑀸𑀭𑁄𑀳𑀸’’𑀢𑀺𑀆𑀤𑀺.

𑀳𑀢𑁆𑀣𑀺𑀁 𑀆𑀭𑁄𑀳𑀦𑁆𑀢𑀺, 𑀆𑀭𑁄𑀳𑀸𑀧𑀬𑀦𑁆𑀢𑀺 𑀘𑀸𑀢𑀺 𑀳𑀢𑁆𑀣𑀸𑀭𑁄𑀳𑀸. 𑀬𑁂𑀳𑀺 𑀧𑀬𑁄𑀕𑁂𑀳𑀺 𑀧𑀼𑀭𑀺𑀲𑁄 𑀳𑀢𑁆𑀣𑀺𑀦𑁄 𑀆𑀭𑁄𑀳𑀦𑀬𑁄𑀕𑁆𑀕𑁄 𑀳𑁄𑀢𑀺, 𑀳𑀢𑁆𑀣𑀺𑀲𑁆𑀲 𑀢𑀁 𑀧𑀬𑁄𑀕𑀁 𑀯𑀺𑀥𑀸𑀬𑀢𑀁 𑀲𑀩𑁆𑀩𑁂𑀲𑀁 𑀧𑁂𑀢𑁂𑀲𑀁 𑀕𑀳𑀡𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀢𑁆𑀣𑀸𑀘𑀭𑀺𑀬𑀸 𑀦𑀸𑀫 𑀬𑁂 𑀳𑀢𑁆𑀣𑀺𑀦𑁄 𑀳𑀢𑁆𑀣𑀸𑀭𑁄𑀳𑀓𑀸𑀦𑀜𑁆𑀘 𑀲𑀺𑀓𑁆𑀔𑀧𑀓𑀸. 𑀳𑀢𑁆𑀣𑀺𑀯𑁂𑀚𑁆𑀚𑀸 𑀦𑀸𑀫 𑀳𑀢𑁆𑀣𑀺𑀪𑀺𑀲𑀓𑁆𑀓𑀸. 𑀳𑀢𑁆𑀣𑀺𑀫𑁂𑀡𑁆𑀟𑀸 𑀦𑀸𑀫 𑀳𑀢𑁆𑀣𑀻𑀦𑀁 𑀧𑀸𑀤𑀭𑀓𑁆𑀔𑀓𑀸. 𑀆𑀤𑀺-𑀲𑀤𑁆𑀤𑁂𑀦 𑀳𑀢𑁆𑀣𑀻𑀦𑀁 𑀬𑀯𑀲𑀤𑀸𑀬𑀓𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑁆𑀲𑀸𑀭𑁄𑀳𑀸 𑀭𑀣𑀺𑀓𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀭𑀣𑁂 𑀦𑀺𑀬𑀼𑀢𑁆𑀢𑀸 𑀭𑀣𑀺𑀓𑀸. 𑀭𑀣𑀭𑀓𑁆𑀔𑀸 𑀦𑀸𑀫 𑀭𑀣𑀲𑁆𑀲 𑀆𑀡𑀺𑀭𑀓𑁆𑀔𑀓𑀸. 𑀥𑀦𑀼𑀁 𑀕𑀡𑁆𑀳𑀦𑁆𑀢𑀺, 𑀕𑀡𑁆𑀳𑀸𑀧𑁂𑀦𑁆𑀢𑀺 𑀘𑀸𑀢𑀺 𑀥𑀦𑀼𑀕𑁆𑀕𑀳𑀸, 𑀇𑀲𑁆𑀲𑀸𑀲𑀸 𑀥𑀦𑀼𑀲𑀺𑀧𑁆𑀧𑀲𑁆𑀲 𑀲𑀺𑀓𑁆𑀔𑀸𑀧𑀓𑀸 𑀘. 𑀢𑁂𑀦𑀸𑀳 ‘‘𑀥𑀦𑀼𑀆𑀘𑀭𑀺𑀬𑀸 𑀇𑀲𑁆𑀲𑀸𑀲𑀸’’𑀢𑀺. 𑀘𑁂𑀮𑁂𑀦 𑀘𑁂𑀮𑀧𑀝𑀸𑀓𑀸𑀬 𑀬𑀼𑀤𑁆𑀥𑁂 𑀅𑀓𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀘𑁂𑀮𑀓𑀸𑀢𑀺 𑀆𑀳 ‘‘𑀬𑁂 𑀬𑀼𑀤𑁆𑀥𑁂 𑀚𑀬𑀥𑀚𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀻’’𑀢𑀺. 𑀬𑀣𑀸 𑀢𑀣𑀸 𑀞𑀺𑀢𑁂 𑀲𑁂𑀦𑀺𑀓𑁂 𑀩𑁆𑀬𑀽𑀳𑀓𑀭𑀡𑀯𑀲𑁂𑀦 𑀢𑀢𑁄 𑀘𑀮𑀬𑀦𑁆𑀢𑀺 𑀉𑀘𑁆𑀘𑀸𑀮𑁂𑀦𑁆𑀢𑀻𑀢𑀺 𑀘𑀮𑀓𑀸. 𑀲𑀓𑀼𑀡𑀕𑁆𑀖𑀺𑀆𑀤𑀬𑁄 𑀯𑀺𑀬 𑀫𑀁𑀲𑀧𑀺𑀡𑁆𑀟𑀁 𑀧𑀭𑀲𑁂𑀦𑀸𑀲𑀫𑀽𑀳𑀁 𑀲𑀸𑀳𑀲𑀺𑀓𑀫𑀳𑀸𑀬𑁄𑀥𑀢𑀸𑀬 𑀙𑁂𑀢𑁆𑀯𑀸 𑀙𑁂𑀢𑁆𑀯𑀸 𑀤𑀬𑀦𑁆𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀡𑁆𑀟𑀤𑀸𑀬𑀓𑀸. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀺𑀡𑁆𑀟𑁂 𑀤𑀬𑀦𑁆𑀢𑀺 𑀚𑀦𑀲𑀫𑁆𑀫𑀤𑁆𑀤𑁂 𑀉𑀧𑁆𑀧𑀢𑀦𑁆𑀢𑀸 𑀯𑀺𑀬 𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀡𑁆𑀟𑀤𑀸𑀬𑀓𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀕𑁆𑀕𑀢𑀼𑀕𑁆𑀕𑀢𑀸𑀢𑀺 𑀣𑀸𑀫𑀚𑀯𑀧𑀭𑀓𑁆𑀓𑀫𑀸𑀤𑀺𑀯𑀲𑁂𑀦 𑀅𑀢𑀺𑀯𑀺𑀬 𑀉𑀕𑁆𑀕𑀢𑀸 𑀉𑀕𑁆𑀕𑀸𑀢𑀺 𑀅𑀢𑁆𑀣𑁄. 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀯𑀻𑀭𑀲𑀽𑀭𑀪𑀸𑀯𑁂𑀦 𑀅𑀲𑀚𑁆𑀚𑀫𑀸𑀦𑀸 𑀧𑀭𑀲𑁂𑀦𑀁 𑀅𑀦𑀼𑀧𑀯𑀺𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀣𑀸𑀫𑀚𑀯𑀩𑀮𑀧𑀭𑀓𑁆𑀓𑀫𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀸𑀦𑀸𑀕𑀸 𑀯𑀺𑀬 𑀫𑀳𑀸𑀦𑀸𑀕𑀸. 𑀏𑀓𑀦𑁆𑀢𑀲𑀽𑀭𑀸𑀢𑀺 𑀏𑀓𑀸𑀓𑀺𑀲𑀽𑀭𑀸 𑀅𑀢𑁆𑀢𑀦𑁄 𑀲𑀽𑀭𑀪𑀸𑀯𑁂𑀦𑁂𑀯 𑀏𑀓𑀸𑀓𑀺𑀦𑁄 𑀳𑀼𑀢𑁆𑀯𑀸 𑀬𑀼𑀚𑁆𑀛𑀦𑀓𑀸. 𑀲𑀚𑀸𑀮𑀺𑀓𑀸𑀢𑀺 𑀲𑀯𑀫𑁆𑀫𑀺𑀓𑀸. 𑀲𑀭𑀧𑀭𑀺𑀢𑁆𑀢𑀸𑀡𑀘𑀫𑁆𑀫𑀦𑁆𑀢𑀺 𑀘𑀫𑁆𑀫𑀧𑀭𑀺𑀲𑀺𑀩𑁆𑀩𑀺𑀢𑀁 𑀔𑁂𑀝𑀓𑀁, 𑀘𑀫𑁆𑀫𑀫𑀬𑀁 𑀯𑀸 𑀨𑀮𑀓𑀁. 𑀖𑀭𑀤𑀸𑀲𑀬𑁄𑀥𑀸𑀢𑀺 𑀅𑀦𑁆𑀢𑁄𑀚𑀸𑀢𑀬𑁄𑀥𑀸.

𑀆𑀴𑀸𑀭𑀁 𑀯𑀼𑀘𑁆𑀘𑀢𑀺 𑀫𑀳𑀸𑀦𑀲𑀁, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸𑀢𑀺 𑀆𑀴𑀸𑀭𑀺𑀓𑀸, 𑀪𑀢𑁆𑀢𑀓𑀸𑀭𑀸. 𑀧𑀽𑀯𑀺𑀓𑀸𑀢𑀺 𑀧𑀽𑀯𑀲𑀫𑁆𑀧𑀸𑀤𑀓𑀸, 𑀬𑁂 𑀧𑀽𑀯𑀫𑁂𑀯 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑀸 𑀚𑀻𑀯𑀦𑁆𑀢𑀺. 𑀓𑁂𑀲𑀦𑀔𑀮𑀺𑀔𑀦𑀸𑀤𑀺𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀅𑀮𑀗𑁆𑀓𑀸𑀭𑀯𑀺𑀥𑀺𑀁 𑀓𑀧𑁆𑀧𑁂𑀦𑁆𑀢𑀺 𑀲𑀁𑀯𑀺𑀤𑀳𑀦𑁆𑀢𑀻𑀢𑀺 𑀓𑀧𑁆𑀧𑀓𑀸. 𑀦𑁆𑀳𑀸𑀧𑀓𑀸𑀢𑀺 𑀘𑀼𑀡𑁆𑀡𑀯𑀺𑀮𑁂𑀧𑀦𑀸𑀤𑀻𑀳𑀺 𑀫𑀮𑀳𑀭𑀡𑀯𑀡𑁆𑀡𑀲𑀫𑁆𑀧𑀸𑀤𑀦𑀯𑀺𑀥𑀺𑀦𑀸 𑀦𑁆𑀳𑀸𑀧𑁂𑀦𑁆𑀢𑀻𑀢𑀺 𑀦𑁆𑀳𑀸𑀧𑀓𑀸. 𑀦𑀯𑀦𑁆𑀢𑀸𑀤𑀺𑀯𑀺𑀥𑀺𑀦𑀸 𑀧𑀯𑀢𑁆𑀢𑁄 𑀕𑀡𑀦𑀕𑀦𑁆𑀣𑁄 𑀅𑀦𑁆𑀢𑀭𑀸 𑀙𑀺𑀤𑁆𑀤𑀸𑀪𑀸𑀯𑁂𑀦 𑀅𑀘𑁆𑀙𑀺𑀤𑁆𑀤𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀕𑀡𑀦𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀸 𑀅𑀘𑁆𑀙𑀺𑀤𑁆𑀤𑀓𑀧𑀸𑀞𑀓𑀸. 𑀳𑀢𑁆𑀣𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀁 𑀳𑀢𑁆𑀣𑀫𑀼𑀤𑁆𑀤𑀸 𑀳𑀢𑁆𑀣-𑀲𑀤𑁆𑀤𑁄 𑀘𑁂𑀢𑁆𑀣 𑀢𑀤𑁂𑀓𑀤𑁂𑀲𑁂𑀲𑀼 𑀅𑀗𑁆𑀕𑀼𑀮𑀻𑀲𑀼 𑀤𑀝𑁆𑀞𑀩𑁆𑀩𑁄. ‘‘𑀦 𑀪𑀼𑀜𑁆𑀚𑀫𑀸𑀦𑁄 𑀲𑀩𑁆𑀩𑀁 𑀳𑀢𑁆𑀣𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 𑀯𑀺𑀬, 𑀢𑀲𑁆𑀫𑀸 𑀅𑀗𑁆𑀕𑀼𑀮𑀺𑀲𑀗𑁆𑀓𑁄𑀘𑀦𑀸𑀤𑀺𑀦𑀸 𑀕𑀡𑀦𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀕𑀡𑀦𑀸. 𑀘𑀺𑀢𑁆𑀢𑀓𑀸𑀭𑀸𑀤𑀻𑀦𑀻𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀪𑀫𑀓𑀸𑀭𑀓𑁄𑀝𑁆𑀝𑀓𑀮𑁂𑀔𑀓 𑀯𑀺𑀮𑀻𑀯𑀓𑀸𑀭𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀦𑁆𑀤𑀺𑀝𑁆𑀞𑀺𑀓𑀫𑁂𑀯𑀸𑀢𑀺 𑀅𑀲𑀫𑁆𑀧𑀭𑀸𑀬𑀺𑀓𑀢𑀸𑀬 𑀲𑀸𑀫𑀁 𑀤𑀝𑁆𑀞𑀩𑁆𑀩𑀁, 𑀲𑀬𑀁 𑀅𑀦𑀼𑀪𑀯𑀺𑀢𑀩𑁆𑀩𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀔𑀺𑀢𑀦𑁆𑀢𑀺 𑀲𑀼𑀔𑀧𑁆𑀧𑀢𑁆𑀢𑀁. 𑀉𑀧𑀭𑀻𑀢𑀺 𑀤𑁂𑀯𑀮𑁄𑀓𑁂. 𑀲𑁄 𑀳𑀺 𑀫𑀦𑀼𑀲𑁆𑀲𑀮𑁄𑀓𑀢𑁄 𑀉𑀧𑀭𑀺𑀫𑁄. 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑀢𑁄 𑀢𑀲𑁆𑀲 𑀨𑀮𑀁 𑀢𑀲𑁆𑀲 𑀅𑀕𑁆𑀕𑀺𑀲𑀺𑀔𑀸 𑀯𑀺𑀬 𑀳𑁄𑀢𑀺, 𑀢𑀜𑁆𑀘 𑀉𑀤𑁆𑀥𑀁 𑀤𑁂𑀯𑀮𑁄𑀓𑁂𑀢𑀺 𑀆𑀳 ‘‘𑀉𑀤𑁆𑀥𑀁 𑀅𑀕𑁆𑀕𑀁 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀉𑀤𑁆𑀥𑀕𑁆𑀕𑀺𑀓𑀸’’𑀢𑀺. 𑀲𑀕𑁆𑀕𑀁 𑀅𑀭𑀳𑀢𑀻𑀢𑀺 𑀅𑀢𑁆𑀢𑀦𑁄 𑀨𑀮𑀪𑀽𑀢𑀁 𑀲𑀕𑁆𑀕𑀁 𑀅𑀭𑀳𑀢𑀺, 𑀢𑀢𑁆𑀣 𑀲𑀸 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑁄𑀢𑀺 𑀅𑀢𑁆𑀣𑁄. 𑀲𑀼𑀔𑀯𑀺𑀧𑀸𑀓𑀸𑀢𑀺 𑀇𑀝𑁆𑀞𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀻𑀓𑀸. 𑀲𑀼𑀝𑁆𑀞𑀼 𑀅𑀕𑁆𑀕𑁂𑀢𑀺 𑀅𑀢𑀺𑀯𑀺𑀬 𑀉𑀢𑁆𑀢𑀫𑁂 𑀉𑀴𑀸𑀭𑁂. 𑀤𑀓𑁆𑀔𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀏𑀢𑀸𑀬𑀸𑀢𑀺 𑀤𑀓𑁆𑀔𑀺𑀡𑀸, 𑀧𑀭𑀺𑀘𑁆𑀘𑀸𑀕𑀫𑀬𑀁 𑀧𑀼𑀜𑁆𑀜𑀦𑁆𑀢𑀺 𑀆𑀳 ‘‘𑀤𑀓𑁆𑀔𑀺𑀡𑀁 𑀤𑀸𑀦’’𑀦𑁆𑀢𑀺.

𑀫𑀕𑁆𑀕𑁄 𑀲𑀸𑀫𑀜𑁆𑀜𑀁 𑀲𑀫𑀺𑀢𑀧𑀸𑀧𑀲𑀫𑀡𑀪𑀸𑀯𑁄𑀢𑀺 𑀓𑀢𑁆𑀯𑀸. 𑀬𑀲𑁆𑀫𑀸 𑀅𑀬𑀁 𑀭𑀸𑀚𑀸 𑀧𑀩𑁆𑀩𑀚𑀺𑀢𑀸𑀦𑀁 𑀤𑀸𑀲𑀓𑀲𑁆𑀲𑀓𑀸𑀤𑀻𑀦𑀁 𑀮𑁄𑀓𑀢𑁄 𑀅𑀪𑀺𑀯𑀸𑀤𑀦𑀸𑀤𑀺𑀮𑀸𑀪𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀈𑀤𑀺𑀲𑀫𑀢𑁆𑀣𑀁 𑀚𑀸𑀦𑀦𑁆𑀢𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀧𑀽𑀭𑀡𑀸𑀤𑀺𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀲𑀁 𑀓𑀣𑀸𑀬 𑀅𑀦𑀸𑀭𑀸𑀥𑀺𑀢𑀘𑀺𑀢𑁆𑀢𑁄 𑀪𑀕𑀯𑀦𑁆𑀢𑀫𑁆𑀧𑀺 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀧𑀭𑀺 𑀆𑀕𑀢𑀁 𑀧𑀦 𑀤𑀸𑀲𑀓𑀲𑁆𑀲𑀓𑁄𑀧𑀫𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀻’’𑀢𑀺.

𑀓𑀡𑁆𑀳𑀧𑀓𑁆𑀔𑀦𑁆𑀢𑀺 𑀬𑀣𑀸𑀧𑀼𑀘𑁆𑀙𑀺𑀢𑁂 𑀅𑀢𑁆𑀣𑁂 𑀮𑀩𑁆𑀪𑀫𑀸𑀦𑀁 𑀤𑀺𑀝𑁆𑀞𑀺𑀕𑀢𑀽𑀧𑀲𑀜𑁆𑀳𑀺𑀢𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁. 𑀲𑀼𑀓𑁆𑀓𑀧𑀓𑁆𑀔𑀦𑁆𑀢𑀺 𑀢𑀩𑁆𑀩𑀺𑀥𑀼𑀭𑀁 𑀉𑀧𑀭𑀺𑀲𑀼𑀢𑁆𑀢𑀸𑀕𑀢𑀁 𑀯𑁄𑀤𑀸𑀦𑀧𑀓𑁆𑀔𑀁. 𑀲𑀫𑀡𑀓𑁄𑀮𑀸𑀳𑀮𑀦𑁆𑀢𑀺 𑀲𑀫𑀡𑀓𑁄𑀢𑀽𑀳𑀮𑀁 𑀢𑀁𑀢𑀁𑀲𑀫𑀡𑀯𑀸𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀁. 𑀲𑀫𑀡𑀪𑀡𑁆𑀟𑀦𑀦𑁆𑀢𑀺 𑀢𑁂𑀦𑁂𑀯 𑀯𑀺𑀭𑁄𑀥𑁂𑀦 ‘‘𑀏𑀯𑀁𑀯𑀸𑀤𑀻𑀦𑀁 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀬𑀁 𑀤𑁄𑀲𑁄, 𑀏𑀯𑀁𑀯𑀸𑀤𑀻𑀦𑀁 𑀅𑀬𑀁 𑀤𑁄𑀲𑁄’’𑀢𑀺 𑀏𑀯𑀁 𑀢𑀁𑀢𑀁𑀯𑀸𑀤𑀲𑁆𑀲 𑀧𑀭𑀺𑀪𑀸𑀲𑀦𑀁. 𑀭𑀜𑁆𑀜𑁄 𑀪𑀸𑀭𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑁄 𑀤𑁂𑀲𑀦𑀸𑀓𑁄𑀲𑀮𑁆𑀮𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁬𑁪. 𑀧𑀡𑁆𑀟𑀺𑀢𑀧𑀢𑀺𑀭𑀽𑀧𑀓𑀸𑀦𑀦𑁆𑀢𑀺 𑀆𑀫𑀁 𑀯𑀺𑀬 𑀧𑀓𑁆𑀓𑀸𑀦𑀁 𑀧𑀡𑁆𑀟𑀺𑀢𑀸𑀪𑀸𑀲𑀸𑀦𑀁.

𑀧𑀽𑀭𑀡𑀓𑀲𑁆𑀲𑀧𑀯𑀸𑀤𑀯𑀡𑁆𑀡𑀦𑀸

𑁧𑁬𑁫. 𑀏𑀓𑀁 𑀇𑀤𑀸𑀳𑀦𑁆𑀢𑀺 𑀏𑀓𑀸𑀳𑀁. 𑀇𑀥-𑀲𑀤𑁆𑀤𑁄 𑀘𑁂𑀢𑁆𑀣 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀓𑀸𑀳𑀁 𑀲𑀫𑀬𑀁 𑀢𑀺𑀘𑁆𑀘𑁂𑀯 𑀅𑀢𑁆𑀣𑁄. 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀦𑁆𑀢𑀺 𑀅𑀦𑀼𑀲𑁆𑀲𑀭𑀡𑀸𑀦𑀼𑀘𑁆𑀙𑀯𑀺𑀓𑀁.

𑁧𑁬𑁬. 𑀲𑀳𑀢𑁆𑀣𑀸 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀲𑀳𑀢𑁆𑀣𑁂𑀦𑁂𑀯 𑀓𑀭𑁄𑀦𑁆𑀢𑀲𑁆𑀲. 𑀦𑀺𑀲𑁆𑀲𑀕𑁆𑀕𑀺𑀬𑀣𑀸𑀯𑀭𑀸𑀤𑀬𑁄𑀧𑀺 𑀇𑀥 𑀲𑀳𑀢𑁆𑀣𑀓𑀭𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸. 𑀳𑀢𑁆𑀣𑀸𑀤𑀻𑀦𑀻𑀢𑀺 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀸𑀤𑀻𑀦𑀺. 𑀧𑀘𑀦𑀁 𑀤𑀳𑀦𑀁 𑀯𑀺𑀩𑀸𑀥𑀦𑀦𑁆𑀢𑀺 𑀆𑀳 ‘‘𑀤𑀡𑁆𑀟𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑀲𑁆𑀲𑀸’’𑀢𑀺. 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 ‘‘𑀢𑀚𑁆𑀚𑁂𑀦𑁆𑀢𑀲𑁆𑀲 𑀯𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀇𑀥 𑀧𑀦 𑀢𑀚𑁆𑀚𑀦𑀁 𑀧𑀭𑀺𑀪𑀸𑀲𑀦𑀁 𑀤𑀡𑁆𑀟𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀤𑀡𑁆𑀟𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑀲𑁆𑀲’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀲𑁄𑀓𑀁 𑀲𑀬𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀧𑀭𑀲𑁆𑀲 𑀲𑁄𑀓𑀓𑀸𑀭𑀡𑀁 𑀲𑀬𑀁 𑀓𑀭𑁄𑀦𑁆𑀢𑀲𑁆𑀲, 𑀲𑁄𑀓𑀁 𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀧𑀭𑁂𑀳𑀻𑀢𑀺 𑀅𑀢𑁆𑀢𑀦𑁄 𑀯𑀘𑀦𑀓𑀭𑁂𑀳𑀺. 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄𑀢𑀺 𑀧𑀭𑀲𑁆𑀲 𑀯𑀺𑀩𑀸𑀥𑀦𑀧𑀬𑁄𑀕𑁂𑀦 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄. ‘‘𑀅𑀢𑀺𑀧𑀸𑀢𑀸𑀧𑀬𑀢𑁄’’𑀢𑀺 𑀧𑀤𑀁 𑀲𑀼𑀤𑁆𑀥𑀓𑀢𑁆𑀢𑀼𑀅𑀢𑁆𑀣𑁂 𑀳𑁂𑀢𑀼𑀓𑀢𑁆𑀢𑀼𑀅𑀢𑁆𑀣𑁂 𑀘 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀳𑀦𑀦𑁆𑀢𑀲𑁆𑀲𑀸𑀧𑀺 𑀳𑀦𑀸𑀧𑁂𑀦𑁆𑀢𑀲𑁆𑀲𑀸𑀧𑀻’’𑀢𑀺. 𑀓𑀸𑀭𑀡𑀯𑀲𑁂𑀦𑀸𑀢𑀺 𑀓𑀸𑀭𑀸𑀧𑀦𑀯𑀲𑁂𑀦.

𑀖𑀭𑀲𑁆𑀲 𑀪𑀺𑀢𑁆𑀢𑀺 𑀅𑀦𑁆𑀢𑁄 𑀩𑀳𑀺 𑀘 𑀲𑀦𑁆𑀥𑀺𑀢𑀸 𑀳𑀼𑀢𑁆𑀯𑀸 𑀞𑀺𑀢𑀸 𑀖𑀭𑀲𑀦𑁆𑀥𑀺. 𑀓𑀺𑀜𑁆𑀘𑀺𑀧𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀭𑀯𑀲𑁂𑀲𑁄 𑀮𑁄𑀧𑁄 𑀦𑀺𑀮𑁆𑀮𑁄𑀧𑁄. 𑀏𑀓𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀯𑀺𑀮𑁄𑀧𑁄 𑀏𑀓𑀸𑀕𑀸𑀭𑀺𑀓𑁄. 𑀧𑀭𑀺𑀢𑁄 𑀲𑀩𑁆𑀩𑀲𑁄 𑀧𑀦𑁆𑀣𑁂 𑀳𑀦𑀦𑀁 𑀧𑀭𑀺𑀧𑀦𑁆𑀣𑁄. 𑀧𑀸𑀧𑀁 𑀦 𑀓𑀭𑀻𑀬𑀢𑀺 𑀧𑀼𑀩𑁆𑀩𑁂 𑀅𑀲𑀜𑁆𑀜𑀢𑁄 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀢𑀲𑁆𑀫𑀸 𑀦𑀢𑁆𑀣𑀺 𑀧𑀸𑀧𑀁. 𑀬𑀤𑀺 𑀏𑀯𑀁 𑀓𑀣𑀁 𑀲𑀢𑁆𑀢𑀸 𑀧𑀸𑀧𑁂 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀆𑀳 ‘‘𑀲𑀢𑁆𑀢𑀸 𑀧𑀦 𑀧𑀸𑀧𑀁 𑀓𑀭𑁄𑀫𑀸𑀢𑀺 𑀏𑀯𑀁 𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻’’𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀳𑁄𑀢𑀺 𑁋 𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀸 𑀦 𑀅𑀢𑁆𑀢𑀸𑀦𑀁 𑀨𑀼𑀲𑀢𑀺 𑀢𑀲𑁆𑀲 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀢𑁆𑀢𑀸 𑀲𑀭𑀻𑀭𑀁 𑀧𑀦 𑀅𑀘𑁂𑀢𑀦𑀁 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑀁, 𑀢𑀲𑁆𑀫𑀺𑀁 𑀯𑀺𑀓𑁄𑀧𑀺𑀢𑁂𑀧𑀺 𑀦 𑀓𑀺𑀜𑁆𑀘𑀺 𑀧𑀸𑀧𑀦𑁆𑀢𑀺. 𑀔𑀼𑀭𑀦𑁂𑀫𑀺𑀦𑀸𑀢𑀺 𑀦𑀺𑀲𑀺𑀢𑀔𑀼𑀭𑀫𑀬𑀦𑁂𑀫𑀺𑀦𑀸.

𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀸 𑀤𑀺𑀲𑀸 𑀅𑀧𑁆𑀧𑀢𑀺𑀭𑀽𑀧𑀤𑁂𑀲𑁄, 𑀉𑀢𑁆𑀢𑀭𑀸 𑀤𑀺𑀲𑀸 𑀧𑀢𑀺𑀭𑀽𑀧𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦‘‘𑀤𑀓𑁆𑀔𑀺𑀡𑀜𑁆𑀘’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀓𑁆𑀔𑀺𑀡𑀢𑀻𑀭𑁂 𑀫𑀦𑀼𑀲𑁆𑀲𑀸 𑀓𑀓𑁆𑀔𑀴𑀸’’𑀢𑀺𑀆𑀤𑀺. 𑀫𑀳𑀸𑀬𑀸𑀕𑀦𑁆𑀢𑀺 𑀫𑀳𑀸𑀯𑀺𑀚𑀺𑀢𑀬𑀜𑁆𑀜𑀲𑀤𑀺𑀲𑀁 𑀫𑀳𑀸𑀬𑀸𑀕𑀁. 𑀉𑀧𑁄𑀲𑀣𑀓𑀫𑁆𑀫𑁂𑀦 𑀯𑀸𑀢𑀺 𑀉𑀧𑁄𑀲𑀣𑀓𑀫𑁆𑀫𑁂𑀦 𑀘. 𑀤𑀫-𑀲𑀤𑁆𑀤𑁄 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲 𑀉𑀧𑁄𑀲𑀣𑀲𑀻𑀮𑀲𑁆𑀲 𑀘 𑀯𑀸𑀘𑀓𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀓𑁂𑀘𑀺 𑀧𑀦 ‘‘𑀉𑀧𑁄𑀲𑀣𑀓𑀫𑁆𑀫𑁂𑀦𑀸𑀢𑀺 𑀇𑀤𑀁 𑀇𑀦𑁆𑀤𑁆𑀭𑀺𑀬𑀤𑀫𑀦𑀲𑁆𑀲 𑀯𑀺𑀲𑁂𑀲𑀦𑀁, 𑀢𑀲𑁆𑀫𑀸 ‘𑀉𑀧𑁄𑀲𑀣𑀓𑀫𑁆𑀫𑀪𑀽𑀢𑁂𑀦 𑀇𑀦𑁆𑀤𑁆𑀭𑀺𑀬𑀤𑀫𑀦𑁂𑀦𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀲𑀻𑀮𑀲𑀁𑀬𑀫𑁂𑀦𑀸𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑁂𑀦. 𑀲𑀘𑁆𑀘𑀯𑀚𑁆𑀚𑁂𑀦𑀸𑀢𑀺 𑀲𑀘𑁆𑀘𑀯𑀸𑀘𑀸𑀬, 𑀢𑀲𑁆𑀲𑀸 𑀯𑀺𑀲𑀼𑀁 𑀯𑀘𑀦𑀁 𑀮𑁄𑀓𑁂 𑀕𑀭𑀼𑀢𑀭𑀧𑀼𑀜𑁆𑀜𑀲𑀫𑁆𑀫𑀢𑀪𑀸𑀯𑀢𑁄. 𑀬𑀣𑀸 𑀳𑀺 𑀧𑀸𑀧𑀥𑀫𑁆𑀫𑁂𑀲𑀼 𑀫𑀼𑀲𑀸𑀯𑀸𑀤𑁄 𑀕𑀭𑀼, 𑀏𑀯𑀁 𑀧𑀼𑀜𑁆𑀜𑀥𑀫𑁆𑀫𑁂𑀲𑀼 𑀲𑀘𑁆𑀘𑀯𑀸𑀘𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀏𑀓𑀁 𑀥𑀫𑁆𑀫𑀁 𑀅𑀢𑀻𑀢𑀲𑁆𑀲𑀸’’𑀢𑀺𑀆𑀤𑀺. 𑀧𑀯𑀢𑁆𑀢𑀻𑀢𑀺 𑀬𑁄 ‘‘𑀓𑀭𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀨𑀮𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺. 𑀲𑀩𑁆𑀩𑀣𑀸𑀢𑀺 ‘‘𑀓𑀭𑁄𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀓𑀺𑀭𑀺𑀬𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀭𑀜𑁆𑀜𑀸 𑀧𑀼𑀝𑁆𑀞𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀁 𑀅𑀯𑀥𑀸𑀭𑀡𑀁 𑀯𑀺𑀧𑀸𑀓𑀧𑀝𑀺𑀓𑁆𑀔𑁂𑀧𑀦𑀺𑀯𑀢𑁆𑀢𑀦𑀢𑁆𑀣𑀁. 𑀬𑁄 𑀳𑀺 𑀓𑀫𑁆𑀫𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀢𑁂𑀦 𑀅𑀢𑁆𑀣𑀢𑁄 𑀯𑀺𑀧𑀸𑀓𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀏𑀯 𑀦𑀸𑀫 𑀳𑁄𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀫𑁆𑀫𑀁 𑀧𑀝𑀺𑀩𑀸𑀳𑀦𑁆𑀢𑁂𑀦𑀸𑀧𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁭𑁦-𑁧𑁭𑁨).

𑀧𑀝𑀺𑀭𑀸𑀚𑀽𑀳𑀺 𑀅𑀦𑀪𑀺𑀪𑀯𑀦𑀻𑀬𑀪𑀸𑀯𑁂𑀦 𑀯𑀺𑀲𑁂𑀲𑀢𑁄 𑀚𑀺𑀢𑀦𑁆𑀢𑀺 𑀯𑀺𑀚𑀺𑀢𑀁, 𑀆𑀡𑀸𑀧𑀯𑀢𑁆𑀢𑀺𑀤𑁂𑀲𑁄. ‘‘𑀫𑀸 𑀫𑀬𑁆𑀳𑀁 𑀯𑀺𑀚𑀺𑀢𑁂 𑀯𑀲𑀣𑀸’’𑀢𑀺 𑀅𑀧𑀲𑀸𑀤𑀦𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀺𑀳𑁂𑀞𑀦𑀸 𑀧𑀩𑁆𑀩𑀸𑀚𑀦𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀧𑀲𑀸𑀤𑁂𑀢𑀩𑁆𑀩𑀦𑁆𑀢𑀺 𑀯𑀺𑀳𑁂𑀞𑁂𑀢𑀩𑁆𑀩’’𑀦𑁆𑀢𑀺. 𑀉𑀕𑁆𑀕𑀡𑁆𑀳𑀦𑀁 𑀢𑁂𑀦 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀏𑀯𑀫𑁂𑀢’’𑀦𑁆𑀢𑀺 𑀉𑀧𑀥𑀸𑀭𑀡𑀁 𑀲𑀮𑁆𑀮𑀓𑁆𑀔𑀡𑀁, 𑀦𑀺𑀓𑀼𑀚𑁆𑀚𑀦𑀁 𑀢𑀲𑁆𑀲 𑀅𑀤𑁆𑀥𑀦𑀺𑀬𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀘𑀺𑀢𑁆𑀢𑁂𑀦 𑀲𑀦𑁆𑀥𑀸𑀭𑀡𑀁. 𑀢𑀤𑀼𑀪𑀬𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀺𑀓𑀼𑀚𑁆𑀚𑀦𑁆𑀢𑁄’’𑀢𑀺. 𑀢𑁂𑀦𑀸𑀳 ‘‘𑀲𑀸𑀭𑀯𑀲𑁂𑀦 𑀅𑀕𑁆𑀕𑀡𑁆𑀳𑀦𑁆𑀢𑁄’’𑀢𑀺𑀆𑀤𑀺.

𑀫𑀓𑁆𑀔𑀮𑀺𑀕𑁄𑀲𑀸𑀮𑀯𑀸𑀤𑀯𑀡𑁆𑀡𑀦𑀸

𑁧𑁬𑁮. 𑀉𑀪𑀬𑁂𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀧𑀝𑀺𑀲𑁂𑀥𑀦𑀯𑀘𑀦𑁂𑀦. 𑀲𑀁𑀓𑀺𑀮𑁂𑀲𑀧𑀘𑁆𑀘𑀬𑀦𑁆𑀢𑀺 𑀲𑀁𑀓𑀺𑀮𑀺𑀲𑁆𑀲𑀦𑀲𑁆𑀲 𑀫𑀮𑀻𑀦𑀪𑀸𑀯𑀲𑁆𑀲 𑀓𑀸𑀭𑀡𑀁. 𑀯𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀦𑁆𑀢𑀺 𑀲𑀗𑁆𑀓𑀺𑀓𑀺𑀮𑁂𑀲𑀢𑁄 𑀯𑀺𑀲𑀼𑀤𑁆𑀥𑀺𑀬𑀸 𑀯𑁄𑀤𑀸𑀦𑀲𑁆𑀲 𑀓𑀸𑀭𑀡𑀁. 𑀅𑀢𑁆𑀢𑀓𑀸𑀭𑁄𑀢𑀺 𑀢𑁂𑀦 𑀢𑁂𑀦 𑀲𑀢𑁆𑀢𑁂𑀦 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀫𑁆𑀫𑀁 𑀅𑀢𑁆𑀢𑀦𑀸 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀧𑀬𑁄𑀕𑁄. 𑀧𑀭𑀓𑀸𑀭𑀦𑁆𑀢𑀺 𑀧𑀭𑀲𑁆𑀲 𑀯𑀸𑀳𑀲𑀸 𑀇𑀚𑁆𑀛𑀦𑀓𑀧𑀬𑁄𑀚𑀦𑀁. 𑀢𑁂𑀦𑀸𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀫𑀳𑀸𑀲𑀢𑁆𑀢𑀦𑁆𑀢𑀺 𑀅𑀦𑁆𑀢𑀺𑀫𑀪𑀯𑀺𑀓𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀁, 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀲𑁆𑀲𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀢𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀼𑀪𑀕𑀪𑀸𑀯𑀁. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀓𑀫𑁆𑀫𑀯𑀸𑀤𑀲𑁆𑀲 𑀓𑀺𑀭𑀺𑀬𑀯𑀸𑀤𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑁂𑀦 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁪.𑁨𑁩𑁨) 𑀦𑀬𑀧𑁆𑀧𑀯𑀢𑁆𑀢𑁂 𑀚𑀺𑀦𑀘𑀓𑁆𑀓𑁂 𑀧𑀳𑀸𑀭𑀁 𑀤𑁂𑀢𑀺 𑀦𑀸𑀫. 𑀦𑀢𑁆𑀣𑀺 𑀧𑀼𑀭𑀺𑀲𑀓𑀸𑀭𑁂𑀢𑀺 𑀬𑀣𑀸𑀯𑀼𑀢𑁆𑀢𑀅𑀢𑁆𑀢𑀓𑀸𑀭𑀧𑀭𑀓𑀸𑀭𑀸𑀪𑀸𑀯𑀢𑁄 𑀏𑀯 𑀲𑀢𑁆𑀢𑀸𑀦𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀦𑀢𑁆𑀣𑀺 𑀩𑀮𑀦𑁆𑀢𑀺 𑀲𑀢𑁆𑀢𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀆𑀯𑀳𑀁 𑀩𑀮𑀁 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀬𑀫𑁆𑀳𑀻’’𑀢𑀺𑀆𑀤𑀺. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀲𑀁𑀓𑀺𑀮𑁂𑀲𑀺𑀓𑀫𑁆𑀧𑀺 𑀘𑀸𑀬𑀁 𑀩𑀮𑀁 𑀧𑀝𑀺𑀓𑁆𑀔𑀺𑀧𑀢𑁂𑀯. 𑀬𑀤𑀺 𑀯𑀻𑀭𑀺𑀬𑀸𑀤𑀻𑀦𑀺 𑀧𑀼𑀭𑀺𑀲𑀓𑀸𑀭𑀯𑁂𑀯𑀘𑀦𑀸𑀦𑀺, 𑀓𑀲𑁆𑀫𑀸 𑀯𑀺𑀲𑀼𑀁 𑀕𑀳𑀡𑀦𑁆𑀢𑀺 𑀆𑀳 ‘‘𑀇𑀤𑀁 𑀦𑁄 𑀯𑀻𑀭𑀺𑀬𑁂𑀦𑀸’’𑀢𑀺𑀆𑀤𑀺. 𑀲𑀤𑁆𑀤𑀢𑁆𑀣𑀢𑁄 𑀧𑀦 𑀢𑀲𑁆𑀲𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀉𑀲𑁆𑀲𑀦𑁆𑀦𑀝𑁆𑀞𑁂𑀦 𑀩𑀮𑀁. 𑀲𑀽𑀭𑀯𑀻𑀭𑀪𑀸𑀯𑀸𑀯𑀳𑀝𑁆𑀞𑁂𑀦 𑀯𑀻𑀭𑀺𑀬𑀁. 𑀢𑀤𑁂𑀯 𑀤𑀴𑁆𑀳𑀪𑀸𑀯𑀢𑁄, 𑀧𑁄𑀭𑀺𑀲𑀥𑀼𑀭𑀁 𑀯𑀳𑀦𑁆𑀢𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀢𑁄 𑀘 𑀧𑀼𑀭𑀺𑀲𑀣𑀸𑀫𑁄. 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀧𑁆𑀧𑀯𑀢𑁆𑀢𑀺𑀬𑀸 𑀧𑀼𑀭𑀺𑀲𑀧𑀭𑀓𑁆𑀓𑀫𑁄𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀢𑁆𑀢𑀬𑁄𑀕𑀢𑁄 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀲𑀢𑁆𑀢𑀸. 𑀧𑀸𑀡𑀦𑀢𑁄 𑀅𑀲𑁆𑀲𑀲𑀦𑀧𑀲𑁆𑀲𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀸𑀡𑀸. 𑀢𑁂 𑀧𑀦 𑀲𑁄 𑀏𑀓𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀯𑀤𑀢𑀻𑀢𑀺 𑀆𑀳 ‘‘𑀏𑀓𑀺𑀦𑁆𑀤𑁆𑀭𑀺𑀬𑁄’’𑀢𑀺𑀆𑀤𑀺. 𑀅𑀡𑁆𑀟𑀓𑁄𑀲𑀸𑀤𑀻𑀲𑀼 𑀪𑀯𑀦𑀢𑁄 ‘‘𑀪𑀽𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀅𑀡𑁆𑀟𑀓𑁄𑀲…𑀧𑁂… 𑀯𑀤𑀢𑀻’’𑀢𑀺. 𑀚𑀻𑀯𑀦𑀢𑁄 𑀧𑀸𑀡𑀁 𑀥𑀸𑀭𑁂𑀦𑁆𑀢𑀸 𑀯𑀺𑀬 𑀯𑀟𑁆𑀠𑀦𑀢𑁄 𑀚𑀻𑀯𑀸. 𑀢𑁂𑀦𑀸𑀳 ‘‘𑀲𑀸𑀮𑀺𑀬𑀯𑀸’’𑀢𑀺𑀆𑀤𑀺. 𑀦𑀢𑁆𑀣𑀺 𑀏𑀢𑁂𑀲𑀁 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀲𑀼 𑀯𑀲𑁄𑀢𑀺 𑀅𑀯𑀲𑀸. 𑀦𑀢𑁆𑀣𑀺 𑀦𑁂𑀲𑀁 𑀩𑀮𑀁 𑀯𑀻𑀭𑀺𑀬𑀁 𑀘𑀸𑀢𑀺 𑀅𑀩𑀮𑀸 𑀅𑀯𑀻𑀭𑀺𑀬𑀸. 𑀦𑀺𑀬𑀢𑀸𑀢𑀺 𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀸𑀪𑁂𑀚𑁆𑀚𑀫𑀡𑀺𑀦𑁄 𑀯𑀺𑀬 𑀦𑀺𑀬𑀢𑀧𑁆𑀧𑀯𑀢𑁆𑀢𑀺𑀢𑀸𑀬 𑀕𑀢𑀺𑀚𑀸𑀢𑀺𑀩𑀦𑁆𑀥𑀸𑀧𑀯𑀕𑁆𑀕𑀯𑀲𑁂𑀦 𑀦𑀺𑀬𑀸𑀫𑁄. 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀦𑁆𑀢𑀺 𑀙𑀦𑁆𑀦𑀁 𑀅𑀪𑀺𑀚𑀸𑀢𑀻𑀦𑀁 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀉𑀧𑀕𑀫𑀦𑀁 𑀲𑀫𑀯𑀸𑀬𑁂𑀦 𑀲𑀫𑀸𑀕𑀫𑁄. 𑀲𑀪𑀸𑀯𑁄𑀬𑁂𑀯𑀸𑀢𑀺 𑀬𑀣𑀸 𑀓𑀡𑁆𑀝𑀓𑀲𑁆𑀲 𑀢𑀺𑀔𑀺𑀡𑀢𑀸, 𑀓𑀧𑀺𑀢𑁆𑀣𑀨𑀮𑀸𑀦𑀁 𑀧𑀭𑀺𑀫𑀡𑁆𑀟𑀮𑀢𑀸, 𑀫𑀺𑀕𑀧𑀓𑁆𑀔𑀻𑀦𑀁 𑀯𑀺𑀘𑀺𑀢𑁆𑀢𑀸𑀓𑀸𑀭𑀢𑀸, 𑀏𑀯𑀁 𑀲𑀩𑁆𑀩𑀲𑁆𑀲𑀸𑀧𑀺 𑀮𑁄𑀓𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀯𑀺𑀦𑀸 𑀢𑀣𑀸 𑀢𑀣𑀸 𑀧𑀭𑀺𑀡𑀸𑀫𑁄 𑀅𑀬𑀁 𑀲𑀪𑀸𑀯𑁄 𑀏𑀯 𑀅𑀓𑀺𑀢𑁆𑀢𑀺𑀫𑁄𑀬𑁂𑀯. 𑀢𑁂𑀦𑀸𑀳 ‘‘𑀬𑁂𑀦 𑀳𑀻’’𑀢𑀺𑀆𑀤𑀺. 𑀙𑀴𑀸𑀪𑀺𑀚𑀸𑀢𑀺𑀬𑁄 𑀧𑀭𑀢𑁄 𑀯𑀺𑀢𑁆𑀣𑀸𑀭𑀻𑀬𑀦𑁆𑀢𑀺. ‘‘𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀺𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀚𑀸𑀦𑀸𑀢𑀻𑀢𑀺 𑀉𑀮𑁆𑀮𑀺𑀗𑁆𑀕𑀦𑁆𑀢𑁄 ‘‘𑀅𑀜𑁆𑀜𑀸 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀆𑀳.

𑀧𑀫𑀼𑀔𑀬𑁄𑀦𑀻𑀦𑀦𑁆𑀢𑀺 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀤𑀻𑀲𑀼 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀺𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀲𑁂𑀦 𑀧𑀥𑀸𑀦𑀬𑁄𑀦𑀻𑀦𑀁. 𑀲𑀝𑁆𑀞𑀺𑀲𑀢𑀸𑀦𑀻𑀢𑀺 𑀙𑀲𑀳𑀲𑁆𑀲𑀸𑀦𑀺. ‘‘𑀧𑀜𑁆𑀘 𑀘 𑀓𑀫𑁆𑀫𑀼𑀦𑁄 𑀲𑀢𑀸𑀦𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀁 ‘‘𑀧𑀜𑁆𑀘𑀓𑀫𑁆𑀫𑀲𑀢𑀸𑀦𑀺 𑀘𑀸’’𑀢𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 ‘‘𑀓𑁂𑀯𑀮𑀁 𑀢𑀓𑁆𑀓𑀫𑀢𑁆𑀢𑀓𑁂𑀦 𑀦𑀺𑀭𑀢𑁆𑀣𑀓𑀁 𑀤𑀺𑀝𑁆𑀞𑀺𑀁 𑀤𑀻𑀧𑁂𑀢𑀻’’𑀢𑀺 𑀇𑀫𑀫𑁂𑀯𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀏𑀢𑁆𑀣 𑀘 ‘‘𑀢𑀓𑁆𑀓𑀫𑀢𑁆𑀢𑀓𑁂𑀦𑀸’’𑀢𑀺 𑀇𑀫𑀺𑀦𑀸 𑀬𑀲𑁆𑀫𑀸 𑀢𑀓𑁆𑀓𑀺𑀓𑀸 𑀦𑀺𑀭𑀗𑁆𑀓𑀼𑀲𑀢𑀸𑀬 𑀧𑀭𑀺𑀓𑀧𑁆𑀧𑀦𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀧𑀭𑀺𑀓𑀧𑁆𑀧𑀺𑀢𑀁 𑀲𑀸𑀭𑀢𑁄 𑀫𑀜𑁆𑀜𑀫𑀸𑀦𑀸 𑀢𑀣𑁂𑀯 𑀅𑀪𑀺𑀦𑀺𑀯𑀺𑀲𑁆𑀲 𑀢𑀓𑁆𑀓𑀤𑀺𑀝𑁆𑀞𑀺𑀕𑀸𑀳𑀁 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑁂𑀲𑀁 𑀤𑀺𑀝𑁆𑀞𑀺𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀜𑁆𑀜𑀽𑀳𑀺 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. 𑀢𑁂 𑀳𑀺 ‘‘𑀧𑀜𑁆𑀘 𑀓𑀫𑁆𑀫𑀸𑀦𑀻𑀢𑀺 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 ‘𑀧𑀜𑁆𑀘 𑀓𑀫𑁆𑀫𑀸𑀦𑀻’𑀢𑀺 𑀧𑀜𑁆𑀜𑀸𑀧𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀻𑀢𑀺 𑀑𑀴𑀸𑀭𑀺𑀓𑀪𑀸𑀯𑀢𑁄 𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀺. 𑀫𑀦𑁄𑀓𑀫𑁆𑀫𑀁 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀉𑀧𑀟𑁆𑀠𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀻𑀢𑀺 𑀬𑁄𑀚𑀦𑀸. 𑀤𑁆𑀯𑀝𑁆𑀞𑀺𑀧𑀝𑀺𑀧𑀤𑀸𑀢𑀺 ‘‘𑀤𑁆𑀯𑀸𑀲𑀝𑁆𑀞𑀺 𑀧𑀝𑀺𑀧𑀤𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑁄 ‘‘𑀤𑁆𑀯𑀝𑁆𑀞𑀺𑀧𑀝𑀺𑀧𑀤𑀸’’𑀢𑀺 𑀯𑀤𑀢𑀺. 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂𑀢𑀺 𑀏𑀓𑀲𑁆𑀫𑀺𑀁 𑀫𑀳𑀸𑀓𑀧𑁆𑀧𑁂, 𑀢𑀢𑁆𑀣𑀸𑀧𑀺 𑀘 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀲𑀜𑁆𑀜𑀺𑀢𑁂 𑀏𑀓𑀲𑁆𑀫𑀺𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀓𑀧𑁆𑀧𑁂.

𑀉𑀭𑀩𑁆𑀪𑁂 𑀳𑀦𑀦𑁆𑀢𑀻𑀢𑀺 𑀑𑀭𑀩𑁆𑀪𑀺𑀓𑀸. 𑀏𑀯𑀁 𑀲𑀽𑀓𑀭𑀺𑀓𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀮𑀼𑀤𑁆𑀤𑀸𑀢𑀺 𑀅𑀜𑁆𑀜𑁂𑀧𑀺 𑀬𑁂 𑀓𑁂𑀘𑀺 𑀫𑀸𑀕𑀯𑀺𑀓𑀦𑁂𑀲𑀸𑀤𑀸. 𑀢𑁂 𑀧𑀸𑀧𑀓𑀫𑁆𑀫𑀧𑀲𑀼𑀢𑀢𑀸𑀬 ‘‘𑀓𑀡𑁆𑀳𑀸𑀪𑀺𑀚𑀸𑀢𑀻𑀢𑀺 𑀯𑀤𑀢𑀺. 𑀪𑀺𑀓𑁆𑀔𑀽’’𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀪𑀺𑀓𑁆𑀔𑀽. 𑀢𑁂 𑀓𑀺𑀭 ‘‘𑀲𑀙𑀦𑁆𑀤𑀭𑀸𑀕𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀻’’𑀢𑀺 𑀯𑀤𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 ‘‘𑀢𑁂 𑀧𑀡𑀻𑀢𑀧𑀡𑀻𑀢𑁂 𑀧𑀘𑁆𑀘𑀬𑁂 𑀧𑀝𑀺𑀲𑁂𑀯𑀦𑁆𑀢𑀻’’𑀢𑀺 𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑁄, 𑀢𑀲𑁆𑀫𑀸 𑀜𑀸𑀬𑀮𑀤𑁆𑀥𑁂𑀧𑀺 𑀧𑀘𑁆𑀘𑀬𑁂 𑀪𑀼𑀜𑁆𑀚𑀫𑀸𑀦𑀸 𑀆𑀚𑀻𑀯𑀓𑀲𑀫𑀬𑀲𑁆𑀲 𑀯𑀺𑀮𑁄𑀫𑀕𑀸𑀳𑀺𑀢𑀸𑀬 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀺 𑀦𑀸𑀫𑀸𑀢𑀺 𑀯𑀤𑀢𑀻𑀢𑀺 𑀅𑀧𑀭𑁂. 𑀏𑀓𑁂 𑀧𑀩𑁆𑀩𑀚𑀺𑀢𑀸, 𑀬𑁂 𑀲𑀯𑀺𑀲𑁂𑀲𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸. 𑀢𑀣𑀸 𑀳𑀺 𑀢𑁂 𑀓𑀡𑁆𑀝𑀓𑁂 𑀯𑀢𑁆𑀢𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 ‘‘𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀞𑀢𑁆𑀯𑀸 𑀪𑀼𑀜𑁆𑀚𑀦𑀦𑀳𑀸𑀦𑀧𑀝𑀺𑀓𑁆𑀔𑁂𑀧𑀸𑀤𑀺𑀯𑀢𑀲𑀫𑀸𑀬𑁄𑀕𑁂𑀦 𑀧𑀡𑁆𑀟𑀭𑀢𑀭𑀸. ‘‘𑀅𑀘𑁂𑀮𑀓𑀲𑀸𑀯𑀓𑀸’’𑀢𑀺 𑀆𑀚𑀻𑀯𑀓𑀲𑀸𑀯𑀓𑁂 𑀯𑀤𑀢𑀺. 𑀢𑁂 𑀓𑀺𑀭 𑀆𑀚𑀻𑀯𑀓𑀮𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀦𑀺𑀕𑀡𑁆𑀞𑁂𑀳𑀺𑀧𑀺 𑀧𑀡𑁆𑀟𑀭𑀢𑀭𑀸. 𑀦𑀦𑁆𑀤𑀸𑀤𑀬𑁄 𑀳𑀺 𑀢𑀣𑀸𑀭𑀽𑀧𑀁 𑀆𑀚𑀻𑀯𑀓𑀧𑀝𑀺𑀧𑀢𑁆𑀢𑀺𑀁 𑀉𑀓𑁆𑀓𑀁𑀲𑀁 𑀧𑀸𑀧𑁂𑀢𑁆𑀯𑀸 𑀞𑀺𑀢𑀸. 𑀢𑀲𑁆𑀫𑀸 𑀦𑀺𑀕𑀡𑁆𑀞𑁂𑀳𑀺 𑀆𑀚𑀻𑀯𑀓𑀲𑀸𑀯𑀓𑁂𑀳𑀺 𑀘 𑀧𑀡𑁆𑀟𑀭𑀢𑀭𑀸 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀅𑀬𑀁 𑀢𑀲𑁆𑀲 𑀮𑀤𑁆𑀥𑀺.

𑀧𑀼𑀭𑀺𑀲𑀪𑀽𑀫𑀺𑀬𑁄𑀢𑀺 𑀧𑀥𑀸𑀦𑀧𑀼𑀕𑁆𑀕𑀮𑁂𑀦 𑀦𑀺𑀤𑁆𑀤𑁂𑀲𑁄. 𑀇𑀢𑁆𑀣𑀻𑀦𑀫𑁆𑀧𑀺 𑀢𑀸 𑀪𑀽𑀫𑀺𑀬𑁄 𑀇𑀘𑁆𑀙𑀦𑁆𑀢𑁂𑀯. ‘‘𑀪𑀺𑀓𑁆𑀔𑀼 𑀘 𑀧𑀦𑁆𑀦𑀓𑁄’’𑀢𑀺𑀆𑀤𑀺 𑀢𑁂𑀲𑀁 𑀧𑀸𑀴𑀺𑀬𑁂𑀯. 𑀢𑀢𑁆𑀣 𑀧𑀦𑁆𑀦𑀓𑁄𑀢𑀺 𑀪𑀺𑀓𑁆𑀔𑀸𑀬 𑀯𑀺𑀘𑀭𑀡𑀓𑁄, 𑀢𑁂𑀲𑀁 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀦𑁆𑀦𑀓𑁄. 𑀚𑀺𑀦𑁄𑀢𑀺 𑀚𑀺𑀡𑁆𑀡𑁄 𑀚𑀭𑀸𑀯𑀲𑁂𑀦 𑀳𑀻𑀦𑀥𑀸𑀢𑀼𑀓𑁄, 𑀅𑀢𑁆𑀢𑀦𑁄 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑁄. 𑀲𑁄 𑀓𑀺𑀭 𑀢𑀣𑀸𑀪𑀽𑀢𑁄 𑀥𑀫𑁆𑀫𑀫𑁆𑀧𑀺 𑀓𑀲𑁆𑀲𑀘𑀺 𑀦 𑀓𑀣𑁂𑀲𑀺. 𑀢𑁂𑀦𑀸𑀳 ‘‘𑀦 𑀓𑀺𑀜𑁆𑀘𑀺 𑀆𑀳𑀸’’𑀢𑀺. 𑀑𑀝𑁆𑀞𑀯𑀤𑀦𑀸𑀤𑀺𑀯𑀺𑀧𑁆𑀧𑀓𑀸𑀭𑁂 𑀓𑀢𑁂𑀧𑀺 𑀔𑀫𑀦𑀯𑀲𑁂𑀦 𑀦 𑀓𑀺𑀜𑁆𑀘𑀺 𑀯𑀤𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀮𑀸𑀪𑀺𑀦𑁆𑀢𑀺 ‘‘𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁩𑁯𑁪) 𑀦𑀬𑁂𑀦 𑀯𑀼𑀢𑁆𑀢𑀅𑀮𑀸𑀪𑀳𑁂𑀢𑀼𑀲𑀫𑀸𑀬𑁄𑀕𑁂𑀦 𑀅𑀮𑀸𑀪𑀺𑀁, 𑀢𑀢𑁄𑀬𑁂𑀯 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑀧𑀭𑁂𑀢𑀢𑀸𑀬 𑀲𑀬𑀦𑀧𑀭𑀸𑀬𑀦𑀁 ‘‘𑀲𑀫𑀡𑀁 𑀧𑀦𑁆𑀦𑀪𑀽𑀫𑀻’’𑀢𑀺 𑀯𑀤𑀢𑀺.

𑀆𑀚𑀻𑀯𑀯𑀼𑀢𑁆𑀢𑀺𑀲𑀢𑀸𑀦𑀻𑀢𑀺 𑀲𑀢𑁆𑀢𑀸𑀦𑀁 𑀆𑀚𑀻𑀯𑀪𑀽𑀢𑀸𑀦𑀺 𑀚𑀻𑀯𑀺𑀓𑀸𑀯𑀼𑀢𑁆𑀢𑀺𑀲𑀢𑀸𑀦𑀺. 𑀧𑀲𑀼𑀕𑁆𑀕𑀳𑀡𑁂𑀦 𑀏𑀴𑀓𑀚𑀸𑀢𑀺 𑀕𑀳𑀺𑀢𑀸, 𑀫𑀺𑀕𑀕𑁆𑀕𑀳𑀡𑁂𑀦 𑀭𑀼𑀭𑀼𑀕𑀯𑀬𑀸𑀤𑀺𑀲𑀩𑁆𑀩𑀫𑀺𑀕𑀚𑀸𑀢𑀺. 𑀩𑀳𑀽 𑀤𑁂𑀯𑀸𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀯𑀲𑁂𑀦, 𑀢𑁂𑀲𑀁 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀩𑀳𑀽 𑀤𑁂𑀯𑀸. 𑀢𑀢𑁆𑀣 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀏𑀓𑀘𑁆𑀘𑀪𑁂𑀤𑁄 𑀫𑀳𑀸𑀲𑀫𑀬𑀲𑀼𑀢𑁆𑀢𑀯𑀲𑁂𑀦 (𑀤𑀻. 𑀦𑀺. 𑁨.𑁩𑁩𑁧) 𑀤𑀻𑀧𑁂𑀢𑀩𑁆𑀩𑁄. 𑀫𑀦𑀼𑀲𑁆𑀲𑀸𑀧𑀺 𑀅𑀦𑀦𑁆𑀢𑀸𑀢𑀺 𑀤𑀻𑀧𑀤𑁂𑀲𑀓𑀼𑀮𑀯𑀁𑀲𑀸𑀚𑀻𑀯𑀸𑀤𑀺𑀯𑀺𑀪𑀸𑀕𑀯𑀲𑁂𑀦 𑀫𑀦𑀼𑀲𑁆𑀲𑀸𑀧𑀺 𑀅𑀦𑀦𑁆𑀢𑀪𑁂𑀤𑀸. 𑀧𑀺𑀲𑀸𑀘𑀸 𑀏𑀯 𑀧𑁂𑀲𑀸𑀘𑀸. 𑀢𑁂 𑀅𑀧𑀭𑀧𑁂𑀢𑀸𑀤𑀬𑁄 𑀫𑀳𑀦𑁆𑀢𑀫𑀳𑀦𑁆𑀢𑀸. 𑀙𑀤𑁆𑀤𑀦𑁆𑀢𑀤𑀳𑀫𑀦𑁆𑀤𑀸𑀓𑀺𑀦𑀺𑀬𑁄 𑀓𑀼𑀯𑀸𑀴𑀺𑀬𑀫𑀼𑀘𑀮𑀺𑀦𑁆𑀤𑀦𑀸𑀫𑁂𑀦 𑀯𑀤𑀢𑀺.

𑀧𑀯𑀼𑀝𑀸𑀢𑀺 𑀧𑀩𑁆𑀩𑀕𑀡𑁆𑀞𑀺𑀓𑀸. 𑀧𑀡𑁆𑀟𑀺𑀢𑁄𑀧𑀺 …𑀧𑁂… 𑀉𑀤𑁆𑀥𑀁 𑀦 𑀕𑀘𑁆𑀙𑀢𑀺, 𑀓𑀲𑁆𑀫𑀸? 𑀲𑀢𑁆𑀢𑀸𑀦𑀁 𑀲𑀁𑀲𑀭𑀡𑀓𑀸𑀮𑀲𑁆𑀲 𑀦𑀺𑀬𑀢𑀪𑀸𑀯𑀢𑁄. 𑀅𑀧𑀭𑀺𑀧𑀓𑁆𑀓𑀁 𑀲𑀁𑀲𑀭𑀡𑀦𑀺𑀫𑀺𑀢𑁆𑀢𑀁 𑀲𑀻𑀮𑀸𑀤𑀺𑀦𑀸 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫 𑀲𑀻𑀖𑀁𑀬𑁂𑀯 𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸. 𑀧𑀭𑀺𑀧𑀓𑁆𑀓𑀁 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀧𑀢𑁆𑀯𑀸 𑀧𑀢𑁆𑀯𑀸 𑀓𑀸𑀮𑁂𑀦 𑀧𑀭𑀺𑀧𑀓𑁆𑀓𑀪𑀸𑀯𑀸𑀦𑀸𑀧𑀸𑀤𑀦𑁂𑀦 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀦𑀸𑀫.

𑀲𑀼𑀢𑁆𑀢𑀕𑀼𑀴𑁂𑀢𑀺 𑀲𑀼𑀢𑁆𑀢𑀯𑀝𑁆𑀝𑀺𑀬𑀁. ‘‘𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀫𑁂𑀯 𑀧𑀮𑁂𑀢𑀻’’𑀢𑀺 𑀉𑀧𑀫𑀸𑀬 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑁄 𑀅𑀦𑀼𑀓𑁆𑀓𑀫𑁂𑀦 𑀔𑀻𑀬𑀢𑁂𑀯, 𑀦 𑀢𑀲𑁆𑀲 𑀯𑀟𑁆𑀠𑀢𑀻𑀢𑀺 𑀤𑀲𑁆𑀲𑁂𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀢𑁆𑀢𑀸.

𑀅𑀚𑀺𑀢𑀓𑁂𑀲𑀓𑀫𑁆𑀩𑀮𑀯𑀸𑀤𑀯𑀡𑁆𑀡𑀦𑀸

𑁧𑁭𑁧. 𑀤𑀺𑀦𑁆𑀦𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑀻𑀲𑁂𑀦 𑀤𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀺𑀦𑁆𑀦𑀲𑁆𑀲 𑀨𑀮𑀸𑀪𑀸𑀯𑀁 𑀯𑀤𑀢𑀻’’𑀢𑀺, 𑀤𑀺𑀦𑁆𑀦𑀁 𑀧𑀦 𑀅𑀦𑁆𑀦𑀸𑀤𑀺𑀯𑀢𑁆𑀣𑀼𑀁 𑀓𑀣𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀏𑀲𑁂𑀯 𑀦𑀬𑁄 𑀬𑀺𑀝𑁆𑀞𑀁 𑀳𑀼𑀢𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀫𑀳𑀸𑀬𑀸𑀕𑁄𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀁 𑀫𑀳𑀸𑀤𑀸𑀦𑀁. 𑀧𑀸𑀳𑀼𑀦𑀓𑀲𑀓𑁆𑀓𑀸𑀭𑁄𑀢𑀺 𑀧𑀸𑀳𑀼𑀦𑀪𑀸𑀯𑁂𑀦 𑀓𑀸𑀢𑀩𑁆𑀩𑀲𑀓𑁆𑀓𑀸𑀭𑁄. 𑀨𑀮𑀦𑁆𑀢𑀺 𑀆𑀦𑀺𑀲𑀁𑀲𑀨𑀮𑀁, 𑀦𑀺𑀲𑁆𑀲𑀦𑁆𑀤𑀨𑀮𑀜𑁆𑀘. 𑀯𑀺𑀧𑀸𑀓𑁄𑀢𑀺 𑀲𑀤𑀺𑀲𑀨𑀮𑀁. 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀅𑀬𑀁 𑀮𑁄𑀓𑁄 𑀦𑀢𑁆𑀣𑀻𑀢𑀺 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀓𑀫𑁆𑀫𑀼𑀦𑀸 𑀮𑀤𑁆𑀥𑀩𑁆𑀩𑁄 𑀅𑀬𑀁 𑀮𑁄𑀓𑁄 𑀦 𑀳𑁄𑀢𑀺. 𑀇𑀥𑀮𑁄𑀓𑁂 𑀞𑀺𑀢𑀲𑁆𑀲𑀸𑀧𑀺 𑀧𑀭𑀮𑁄𑀓𑁄 𑀦𑀢𑁆𑀣𑀻𑀢𑀺 𑀇𑀥𑀮𑁄𑀓𑁂 𑀞𑀺𑀢𑀲𑁆𑀲 𑀓𑀫𑁆𑀫𑀼𑀦𑀸 𑀮𑀤𑁆𑀥𑀩𑁆𑀩𑁄 𑀧𑀭𑀮𑁄𑀓𑁄 𑀦 𑀳𑁄𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀲𑀩𑁆𑀩𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀻’’𑀢𑀺. 𑀇𑀫𑁂 𑀲𑀢𑁆𑀢𑀸 𑀬𑀢𑁆𑀣 𑀬𑀢𑁆𑀣 𑀪𑀯𑁂, 𑀬𑁄𑀦𑀺𑀆𑀤𑀻𑀲𑀼 𑀘 𑀞𑀺𑀢𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀺 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀯𑀺𑀦𑀲𑁆𑀲𑀦𑁆𑀢𑀺. 𑀨𑀮𑀸𑀪𑀸𑀯𑀯𑀲𑁂𑀦𑀸𑀢𑀺 𑀫𑀸𑀢𑀸𑀧𑀺𑀢𑀽𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀻𑀦𑀁 𑀨𑀮𑀲𑁆𑀲 𑀅𑀪𑀸𑀯𑀯𑀲𑁂𑀦 ‘‘𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸’’𑀢𑀺 𑀯𑀤𑀢𑀺, 𑀦 𑀫𑀸𑀢𑀸𑀧𑀺𑀢𑀽𑀦𑀁, 𑀦𑀸𑀧𑀺 𑀢𑁂𑀲𑀼 𑀇𑀤𑀸𑀦𑀺 𑀓𑀬𑀺𑀭𑀫𑀸𑀦𑀲𑀓𑁆𑀓𑀸𑀭𑀸𑀲𑀓𑁆𑀓𑀸𑀭𑀸𑀦𑀁 𑀅𑀪𑀸𑀯𑀯𑀲𑁂𑀦 𑀢𑁂𑀲𑀁 𑀮𑁄𑀓𑀧𑀘𑁆𑀘𑀓𑁆𑀔𑀢𑁆𑀢𑀸. 𑀧𑀼𑀩𑁆𑀩𑀼𑀴𑀓𑀲𑁆𑀲 𑀯𑀺𑀬 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑁄 𑀦𑀸𑀫 𑀓𑁂𑀯𑀮𑁄, 𑀦 𑀘𑀯𑀺𑀢𑁆𑀯𑀸 𑀆𑀕𑀫𑀦𑀧𑀼𑀩𑁆𑀩𑀓𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀘𑀯𑀺𑀢𑁆𑀯𑀸 𑀉𑀧𑀧𑀚𑁆𑀚𑀦𑀓𑀲𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑀢𑀻’’𑀢𑀺. 𑀲𑀫𑀡𑁂𑀦 𑀦𑀸𑀫 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁂𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀓𑀣𑁂𑀢𑁆𑀯𑀸 𑀲𑀜𑁆𑀜𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀆𑀳𑁄𑀧𑀼𑀭𑀺𑀲𑀺𑀓𑀸 𑀦𑀸𑀫 𑀲𑀺𑀬𑀸. 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺? 𑀢𑀣𑀸 𑀘 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀦𑀲𑁆𑀲 𑀓𑀲𑁆𑀲𑀘𑀺 𑀅𑀯𑀲𑁆𑀲𑀬𑁄 𑀏𑀯 𑀦 𑀲𑀺𑀬𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑀢𑁄𑀢𑀺 𑀆𑀳 ‘‘𑀬𑁂 𑀇𑀫𑀜𑁆𑀘…𑀧𑁂… 𑀧𑀯𑁂𑀤𑁂𑀦𑁆𑀢𑀻’’𑀢𑀺.

𑀘𑀢𑀽𑀲𑀼 𑀫𑀳𑀸𑀪𑀽𑀢𑁂𑀲𑀼 𑀦𑀺𑀬𑀼𑀢𑁆𑀢𑁄𑀢𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄. 𑀬𑀣𑀸 𑀧𑀦 𑀫𑀢𑁆𑀢𑀺𑀓𑀸𑀬 𑀦𑀺𑀩𑁆𑀩𑀢𑁆𑀢𑀁 𑀪𑀸𑀚𑀦𑀁 𑀫𑀢𑁆𑀢𑀺𑀓𑀸𑀫𑀬𑀁, 𑀏𑀯𑀁 𑀅𑀬𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑁄𑀢𑀺 𑀆𑀳 ‘‘𑀘𑀢𑀼𑀫𑀳𑀸𑀪𑀽𑀢𑀫𑀬𑁄’’𑀢𑀺. 𑀅𑀚𑁆𑀛𑀢𑁆𑀢𑀺𑀓𑀧𑀣𑀯𑀻𑀥𑀸𑀢𑀽𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀸 𑀧𑀣𑀯𑀻𑀥𑀸𑀢𑀼. 𑀩𑀸𑀳𑀺𑀭𑀧𑀣𑀯𑀻𑀥𑀸𑀢𑀼𑀦𑁆𑀢𑀺 𑀩𑀳𑀺𑀤𑁆𑀥𑀸 𑀫𑀳𑀸𑀧𑀣𑀯𑀺𑀁. 𑀉𑀧𑀕𑀘𑁆𑀙𑀢𑀻𑀢𑀺 𑀩𑀸𑀳𑀺𑀭𑀧𑀣𑀯𑀺𑀓𑀸𑀬𑀢𑁄 𑀢𑀤𑁂𑀓𑀤𑁂𑀲𑀪𑀽𑀢𑀸 𑀧𑀣𑀯𑀻 𑀆𑀕𑀦𑁆𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀪𑀸𑀯𑁂𑀦 𑀲𑀡𑁆𑀞𑀺𑀢𑀸 𑀇𑀤𑀸𑀦𑀺 𑀖𑀝𑀸𑀤𑀺𑀕𑀢𑀧𑀣𑀯𑀻 𑀯𑀺𑀬 𑀢𑀫𑁂𑀯 𑀩𑀸𑀳𑀺𑀭𑀧𑀣𑀯𑀺𑀓𑀸𑀬𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺 𑀲𑀩𑁆𑀩𑀲𑁄 𑀢𑁂𑀦 𑀦𑀺𑀩𑁆𑀩𑀺𑀲𑁂𑀲𑀢𑀁 𑀏𑀓𑀻𑀪𑀸𑀯𑀫𑁂𑀯 𑀕𑀘𑁆𑀙𑀢𑀺. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁆𑀣 𑀧𑀚𑁆𑀚𑀼𑀦𑁆𑀦𑁂𑀦 𑀫𑀳𑀸𑀲𑀫𑀼𑀤𑁆𑀤𑀢𑁄 𑀕𑀳𑀺𑀢𑀆𑀧𑁄 𑀯𑀺𑀬 𑀯𑀲𑁆𑀲𑁄𑀤𑀓𑀪𑀸𑀯𑁂𑀦 𑀧𑀼𑀦𑀧𑀺 𑀫𑀳𑀸𑀲𑀫𑀼𑀤𑁆𑀤𑀫𑁂𑀯, 𑀲𑀽𑀭𑀺𑀬𑀭𑀲𑁆𑀫𑀺𑀢𑁄 𑀕𑀳𑀺𑀢𑀁 𑀇𑀦𑁆𑀤𑀕𑁆𑀕𑀺𑀲𑀗𑁆𑀔𑀸𑀢𑀢𑁂𑀚𑁄 𑀯𑀺𑀬 𑀧𑀼𑀦 𑀲𑀽𑀭𑀺𑀬𑀭𑀲𑁆𑀫𑀺𑀁, 𑀫𑀳𑀸𑀯𑀸𑀬𑀼𑀔𑀦𑁆𑀥𑀢𑁄 𑀦𑀺𑀕𑁆𑀕𑀢𑀫𑀳𑀸𑀯𑀸𑀢𑁄 𑀯𑀺𑀬 𑀢𑀫𑁂𑀯 𑀯𑀸𑀬𑀼𑀔𑀦𑁆𑀥𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀦𑁆𑀢𑀺 𑀢𑁂𑀲𑀁 𑀯𑀺𑀲𑀬𑀸𑀪𑀸𑀯𑀸𑀢𑀺 𑀯𑀤𑀦𑁆𑀢𑀺. 𑀯𑀺𑀲𑀬𑀺𑀕𑀳𑀡𑁂𑀦 𑀳𑀺 𑀯𑀺𑀲𑀬𑀸𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺. 𑀕𑀼𑀡𑀸𑀕𑀼𑀡𑀧𑀤𑀸𑀦𑀻𑀢𑀺 𑀕𑀼𑀡𑀤𑁄𑀲𑀓𑁄𑀝𑁆𑀞𑀸𑀲𑀸. 𑀲𑀭𑀻𑀭𑀫𑁂𑀯 𑀧𑀤𑀸𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀁 𑀲𑀭𑀻𑀭𑁂𑀦 𑀢𑀁𑀢𑀁𑀓𑀺𑀭𑀺𑀬𑀸𑀬 𑀧𑀚𑁆𑀚𑀺𑀢𑀩𑁆𑀩𑀢𑁄. 𑀤𑀩𑁆𑀩𑀦𑁆𑀢𑀺 𑀫𑀼𑀬𑁆𑀳𑀦𑁆𑀢𑀻𑀢𑀺 𑀤𑀢𑁆𑀢𑀽, 𑀫𑀽𑀴𑁆𑀳𑀧𑀼𑀕𑁆𑀕𑀮𑀸. 𑀢𑁂𑀳𑀺 𑀤𑀢𑁆𑀢𑀽𑀳𑀺 𑀩𑀸𑀮𑀫𑀦𑀼𑀲𑁆𑀲𑁂𑀳𑀺. ‘‘𑀧𑀭𑀮𑁄𑀓𑁄 𑀅𑀢𑁆𑀣𑀻’’𑀢𑀺 𑀫𑀢𑀺 𑀬𑁂𑀲𑀁, 𑀢𑁂 𑀅𑀢𑁆𑀣𑀺𑀓𑀸, 𑀢𑁂𑀲𑀁 𑀯𑀸𑀤𑁄𑀢𑀺 𑀅𑀢𑁆𑀣𑀺𑀓𑀯𑀸𑀤𑁄, 𑀢𑀁 𑀅𑀢𑁆𑀣𑀺𑀓𑀯𑀸𑀤𑀁.

𑀓𑀫𑁆𑀫𑀁 𑀧𑀝𑀺𑀩𑀸𑀳𑀢𑀺 𑀅𑀓𑀺𑀭𑀺𑀬𑀯𑀸𑀤𑀺𑀪𑀸𑀯𑀢𑁄. 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀬𑀸 𑀧𑀝𑀺𑀓𑁆𑀔𑀺𑀧𑀦𑀢𑁄. 𑀉𑀪𑀬𑀁 𑀧𑀝𑀺𑀩𑀸𑀳𑀢𑀺 𑀲𑀩𑁆𑀩𑀲𑁄 𑀳𑁂𑀢𑀼𑀧𑀝𑀺𑀩𑀸𑀳𑀦𑁂𑀦𑁂𑀯 𑀨𑀮𑀲𑁆𑀲𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀉𑀪𑀬𑀦𑁆𑀢𑀺 𑀳𑀺 𑀓𑀫𑁆𑀫𑀁 𑀯𑀺𑀧𑀸𑀓𑀜𑁆𑀘𑀸𑀢𑀺 𑀉𑀪𑀬𑀁. 𑀲𑁄 𑀳𑀺 ‘‘𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀯𑀺𑀲𑀼𑀚𑁆𑀛𑀦𑁆𑀢𑀺 𑀘𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁮; 𑀫. 𑀦𑀺. 𑁨.𑁧𑁦𑁦, 𑁨𑁨𑁭; 𑀲𑀁. 𑀦𑀺. 𑁩.𑁨𑁧𑁨) 𑀯𑀤𑀦𑁆𑀢𑁄 𑀓𑀫𑁆𑀫𑀲𑁆𑀲 𑀯𑀺𑀬 𑀯𑀺𑀧𑀸𑀓𑀲𑁆𑀲𑀸𑀧𑀺 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀦𑀁 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀯𑀘𑀦𑀢𑁄 𑀢𑀤𑀼𑀪𑀬𑀁 𑀧𑀝𑀺𑀩𑀸𑀳𑀢𑀺 𑀦𑀸𑀫. 𑀯𑀺𑀧𑀸𑀓𑁄 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀺 𑀅𑀲𑀢𑀺 𑀓𑀫𑁆𑀫𑁂 𑀯𑀺𑀧𑀸𑀓𑀸𑀪𑀸𑀯𑀢𑁄. 𑀓𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑀁 𑀳𑁄𑀢𑀺 𑀅𑀲𑀢𑀺 𑀯𑀺𑀧𑀸𑀓𑁂 𑀓𑀫𑁆𑀫𑀲𑁆𑀲 𑀦𑀺𑀭𑀢𑁆𑀣𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀢𑁆𑀣𑀢𑁄𑀢𑀺 𑀲𑀭𑀽𑀧𑁂𑀦. 𑀉𑀪𑀬𑀧𑁆𑀧𑀝𑀺𑀩𑀸𑀳𑀓𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀢𑀁𑀢𑀁𑀤𑀺𑀝𑁆𑀞𑀺𑀤𑀻𑀧𑀓𑀪𑀸𑀯𑁂𑀦 𑀧𑀸𑀴𑀺𑀬𑀁 𑀆𑀕𑀢𑀸𑀧𑀺 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀤𑀺𑀝𑁆𑀞𑀺𑀓𑀸 𑀏𑀯 𑀉𑀪𑀬𑀧𑀝𑀺𑀩𑀸𑀳𑀓𑀢𑁆𑀢𑀸. 𑀉𑀪𑀬𑀧𑁆𑀧𑀝𑀺𑀩𑀸𑀳𑀓𑀸𑀢𑀺 𑀳𑀺 𑀳𑁂𑀢𑀼𑀯𑀘𑀦𑀁. ‘‘𑀅𑀳𑁂𑀢𑀼𑀓𑀯𑀸𑀤𑀸 𑀘𑁂𑀯𑀸’’𑀢𑀺𑀆𑀤𑀺 𑀧𑀝𑀺𑀜𑁆𑀜𑀸𑀯𑀘𑀦𑀁. 𑀬𑁄 𑀳𑀺 𑀯𑀺𑀧𑀸𑀓𑀧𑀝𑀺𑀩𑀸𑀳𑀦𑁂𑀦 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀓𑁄 𑀉𑀘𑁆𑀙𑁂𑀤𑀯𑀸𑀤𑀻, 𑀲𑁄 𑀅𑀢𑁆𑀣𑀢𑁄 𑀓𑀫𑁆𑀫𑀧𑀝𑀺𑀩𑀸𑀳𑀦𑁂𑀦 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀓𑁄, 𑀉𑀪𑀬𑀧𑀝𑀺𑀩𑀸𑀳𑀦𑁂𑀦 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀓𑁄 𑀘 𑀳𑁄𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀢𑀁 𑀤𑀺𑀝𑁆𑀞𑀺𑀤𑀻𑀧𑀓𑀁 𑀕𑀦𑁆𑀣𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀞𑀦𑁆𑀢𑀺. 𑀯𑀻𑀫𑀁𑀲𑀦𑁆𑀢𑀻𑀢𑀺 𑀢𑀲𑁆𑀲 𑀅𑀢𑁆𑀣𑀁 𑀯𑀺𑀘𑀸𑀭𑁂𑀦𑁆𑀢𑀺. ‘‘𑀢𑁂𑀲’’𑀦𑁆𑀢𑀺𑀆𑀤𑀺 𑀯𑀻𑀫𑀁𑀲𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀢𑀺 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀓𑀫𑁆𑀫𑀨𑀮𑀸𑀪𑀸𑀯𑀸𑀤𑀺𑀓𑁂 ‘‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧’’𑀦𑁆𑀢𑀺 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀮𑀤𑁆𑀥𑀺𑀬𑀸 𑀆𑀭𑀫𑁆𑀫𑀡𑁂. 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 ‘‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀅𑀦𑀼𑀲𑁆𑀲𑀯𑀽𑀧𑀮𑀤𑁆𑀥𑁂 𑀅𑀢𑁆𑀣𑁂 𑀢𑀤𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑁂𑀳𑀺 𑀲𑀯𑀺𑀕𑁆𑀕𑀳𑁂 𑀯𑀺𑀬 𑀲𑀭𑀽𑀧𑀢𑁄 𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀘𑀺𑀭𑀓𑀸𑀮𑀧𑀭𑀺𑀘𑀬𑁂𑀦 𑀏𑀯𑀫𑁂𑀢𑀦𑁆𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀫𑀪𑀸𑀯𑀽𑀧𑀕𑀫𑀦𑁂𑀦 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀢𑀣𑀸𑀕𑀳𑀺𑀢𑁂 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀆𑀲𑁂𑀯𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀦 𑀲𑀫𑀸𑀤𑀺𑀬𑀫𑀸𑀦𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑀽𑀧𑀢𑁆𑀣𑀫𑁆𑀪𑀺𑀢𑀸 𑀅𑀢𑀁𑀲𑀪𑀸𑀯𑀁 ‘‘𑀢𑀁𑀲𑀪𑀸𑀯’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀻 𑀫𑀺𑀘𑁆𑀙𑀸𑀲𑀢𑀻𑀢𑀺 𑀮𑀤𑁆𑀥𑀦𑀸𑀫𑀸 𑀢𑀁𑀮𑀤𑁆𑀥𑀺𑀲𑀳𑀕𑀢𑀸 𑀢𑀡𑁆𑀳𑀸 𑀲𑀦𑁆𑀢𑀺𑀝𑁆𑀞𑀢𑀺. 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀻𑀢𑀺 𑀬𑀣𑀸𑀲𑀓𑀁 𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀯𑀝𑁆𑀞𑀺𑀢𑀢𑀸𑀬 𑀅𑀦𑁂𑀓𑀕𑁆𑀕𑀢𑀁 𑀧𑀳𑀸𑀬 𑀏𑀓𑀕𑁆𑀕𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀳𑁄𑀢𑀺. 𑀘𑀺𑀢𑁆𑀢𑀲𑀻𑀲𑁂𑀦 𑀫𑀺𑀘𑁆𑀙𑀸𑀲𑀫𑀸𑀥𑀺 𑀏𑀯 𑀯𑀼𑀢𑁆𑀢𑁄. 𑀲𑁄𑀧𑀺 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀮𑀤𑁆𑀥𑀪𑀸𑀯𑀦𑀸𑀩𑀮𑁄 𑀈𑀤𑀺𑀲𑁂 𑀞𑀸𑀦𑁂 𑀲𑀫𑀸𑀥𑀸𑀦𑀧𑀢𑀺𑀭𑀽𑀧𑀓𑀺𑀘𑁆𑀘𑀓𑀭𑁄𑀬𑁂𑀯, 𑀯𑀸𑀴𑀯𑀺𑀚𑁆𑀛𑀦𑀸𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀚𑀯𑀦𑀸𑀦𑀺 𑀚𑀯𑀦𑁆𑀢𑀻𑀢𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀢𑁂𑀦𑀸𑀓𑀸𑀭𑁂𑀦 𑀧𑀼𑀩𑁆𑀩𑀪𑀸𑀕𑀺𑀬𑁂𑀲𑀼 𑀚𑀯𑀦𑀯𑀸𑀭𑁂𑀲𑀼 𑀧𑀯𑀢𑁆𑀢𑁂𑀲𑀼 𑀲𑀩𑁆𑀩𑀧𑀘𑁆𑀙𑀺𑀫𑁂 𑀚𑀯𑀦𑀯𑀸𑀭𑁂 𑀲𑀢𑁆𑀢 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀧𑀞𑀫𑁂 𑀚𑀯𑀦𑁂 𑀲𑀢𑁂𑀓𑀺𑀘𑁆𑀙𑀸 𑀳𑁄𑀦𑁆𑀢𑀺. 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀽𑀢𑀺 𑀥𑀫𑁆𑀫𑀲𑀪𑀸𑀯𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀦 𑀧𑀦 𑀢𑀲𑁆𑀫𑀺𑀁 𑀔𑀡𑁂 𑀢𑁂𑀲𑀁 𑀢𑀺𑀓𑀺𑀘𑁆𑀙𑀸 𑀓𑁂𑀦𑀘𑀺 𑀲𑀓𑁆𑀓𑀸 𑀓𑀸𑀢𑀼𑀁.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀲𑀼. 𑀓𑁄𑀘𑀺 𑀏𑀓𑀁 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀻𑀢𑀺 𑀬𑀲𑁆𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀪𑀺𑀦𑀺𑀯𑁂𑀲𑁄 𑀆𑀲𑁂𑀯𑀦𑀸 𑀘 𑀧𑀯𑀢𑁆𑀢𑀸, 𑀲𑁄 𑀏𑀓𑀫𑁂𑀯 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀺. 𑀬𑀲𑁆𑀲 𑀧𑀦 𑀤𑁆𑀯𑀻𑀲𑀼 𑀢𑀻𑀲𑀼𑀧𑀺 𑀯𑀸 𑀅𑀪𑀺𑀦𑀺𑀯𑁂𑀲𑁄 𑀆𑀲𑁂𑀯𑀦𑀸 𑀘 𑀧𑀯𑀢𑁆𑀢𑀸, 𑀲𑁄 𑀤𑁆𑀯𑁂 𑀢𑀻𑀡𑀺𑀧𑀺 𑀑𑀓𑁆𑀓𑀫𑀢𑀺, 𑀏𑀢𑁂𑀦 𑀬𑀸 𑀧𑀼𑀩𑁆𑀩𑁂 𑀉𑀪𑀬𑀧𑀝𑀺𑀩𑀸𑀳𑀓𑀢𑀸𑀫𑀼𑀔𑁂𑀦 𑀤𑀻𑀧𑀺𑀢𑀸 𑀅𑀢𑁆𑀣𑀲𑀺𑀤𑁆𑀥𑀸 𑀲𑀩𑁆𑀩𑀤𑀺𑀝𑁆𑀞𑀺𑀓𑀢𑀸, 𑀲𑀸 𑀧𑀼𑀩𑁆𑀩𑀪𑀸𑀕𑀺𑀬𑀸. 𑀬𑀸 𑀧𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀪𑀽𑀢𑀸, 𑀲𑀸 𑀬𑀣𑀸𑀲𑀓𑀁 𑀧𑀘𑁆𑀘𑀬𑀲𑀫𑀼𑀤𑀸𑀕𑀫𑀲𑀺𑀤𑁆𑀥𑀺𑀢𑁄 𑀪𑀺𑀦𑁆𑀦𑀸𑀭𑀫𑁆𑀫𑀡𑀸𑀦𑀁 𑀯𑀺𑀬 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀏𑀓𑀚𑁆𑀛𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀲𑀗𑁆𑀓𑀺𑀡𑁆𑀡𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀓𑀲𑁆𑀫𑀺𑀁 𑀑𑀓𑁆𑀓𑀦𑁆𑀢𑁂𑀧𑀻’’𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀤𑀺𑀝𑁆𑀞𑀻𑀦𑀁 𑀲𑀫𑀸𑀦𑀩𑀮𑀢𑀁 𑀲𑀫𑀸𑀦𑀨𑀮𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀸 𑀏𑀓𑀲𑁆𑀲 𑀉𑀧𑁆𑀧𑀦𑁆𑀦𑀸 𑀅𑀩𑁆𑀩𑁄𑀓𑀺𑀡𑁆𑀡𑀸 𑀏𑀯, 𑀏𑀓𑀸𑀬 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀇𑀢𑀭𑀸 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀓𑀸𑀬𑁄 𑀳𑁄𑀦𑁆𑀢𑀺. ‘‘𑀯𑀝𑁆𑀝𑀔𑀸𑀡𑀼 𑀦𑀸𑀫𑁂𑀲𑀸’’𑀢𑀺 𑀇𑀤𑀁 𑀯𑀘𑀦𑀁 𑀦𑁂𑀬𑁆𑀬𑀢𑁆𑀣𑀁, 𑀦 𑀦𑀻𑀢𑀢𑁆𑀣𑀁. 𑀢𑀣𑀸 𑀳𑀺 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 ‘‘𑀓𑀺𑀁 𑀧𑀦𑁂𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄 𑀳𑁄𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀲𑁆𑀫𑀺𑀁 𑀧𑀻𑀢𑀺? 𑀏𑀓𑀲𑁆𑀫𑀺𑀁𑀬𑁂𑀯 𑀦𑀺𑀬𑀢𑁄, 𑀆𑀲𑁂𑀯𑀦𑀯𑀲𑁂𑀦 𑀧𑀦 𑀪𑀯𑀦𑁆𑀢𑀭𑁂𑀧𑀺 𑀢𑀁 𑀢𑀁 𑀤𑀺𑀝𑁆𑀞𑀺𑀁 𑀭𑁄𑀘𑁂𑀢𑀺 𑀬𑁂𑀯𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁧𑁨𑁯) 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀜𑁆𑀳𑀺 𑀦𑀸𑀫𑁂𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁, 𑀦 𑀓𑀼𑀲𑀮𑀁 𑀯𑀺𑀬 𑀲𑀩𑀮𑀁 𑀫𑀳𑀸𑀩𑀮𑀁. 𑀢𑀲𑁆𑀫𑀸 ‘‘𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀯𑀺𑀬 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀧𑀺 𑀅𑀘𑁆𑀘𑀦𑁆𑀢𑀺𑀓𑁄 𑀲𑀺𑀬𑀸, 𑀦 𑀘 𑀅𑀘𑁆𑀘𑀦𑁆𑀢𑀺𑀓𑁄. 𑀬𑀤𑀺 𑀏𑀯𑀁 𑀯𑀝𑁆𑀝𑀔𑀸𑀡𑀼𑀚𑁄𑀢𑀦𑀸 𑀓𑀣𑀦𑁆𑀢𑀺 𑀆𑀳 ‘‘𑀆𑀲𑁂𑀯𑀦𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺. 𑀢𑀲𑁆𑀫𑀸 𑀬𑀣𑀸 ‘‘𑀲𑀓𑀺𑀁 𑀦𑀺𑀫𑀼𑀕𑁆𑀕𑁄𑀧𑀺 𑀦𑀺𑀫𑀼𑀕𑁆𑀕𑁄 𑀏𑀯 𑀩𑀸𑀮𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀯𑀝𑁆𑀝𑀔𑀸𑀡𑀼𑀚𑁄𑀢𑀦𑀸. 𑀬𑀸𑀤𑀺𑀲𑁂 𑀳𑀺 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀅𑀬𑀁 𑀢𑀁 𑀢𑀁 𑀤𑀲𑁆𑀲𑀦𑀁 𑀑𑀓𑁆𑀓𑀦𑁆𑀢𑁄 𑀧𑀼𑀦 𑀓𑀤𑀸𑀘𑀺 𑀢𑀧𑁆𑀧𑀝𑀺𑀧𑀓𑁆𑀔𑁂 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀢𑀢𑁄 𑀲𑀻𑀲𑀼𑀓𑁆𑀔𑀺𑀧𑀦𑀫𑀲𑁆𑀲 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀬𑁂𑀪𑀼𑀬𑁆𑀬𑁂𑀦 𑀳𑀺 𑀏𑀯𑀭𑀽𑀧𑀲𑁆𑀲 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀲𑀁𑀲𑀸𑀭𑀔𑀸𑀡𑀼𑀪𑀸𑀯𑀲𑁆𑀲𑀧𑀺 𑀧𑀘𑁆𑀘𑀬𑁄 𑀅𑀧𑀡𑁆𑀡𑀓𑀚𑀸𑀢𑁄, 𑀢𑀲𑁆𑀫𑀸. 𑀪𑀽𑀢𑀺𑀓𑀸𑀫𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀸𑀦𑀁 𑀯𑀲𑁂𑀦 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀯𑀟𑁆𑀠𑀺𑀓𑀸𑀫𑁄.

𑀧𑀓𑀼𑀥𑀓𑀘𑁆𑀘𑀸𑀬𑀦𑀯𑀸𑀤𑀯𑀡𑁆𑀡𑀦𑀸

𑁧𑁭𑁪. 𑀅𑀓𑀢𑀸𑀢𑀺 𑀲𑀫𑁂𑀦 𑀯𑀺𑀲𑀫𑁂𑀦 𑀯𑀸 𑀓𑁂𑀦𑀘𑀺 𑀳𑁂𑀢𑀼𑀦𑀸 𑀦 𑀓𑀢𑀸 𑀦 𑀯𑀺𑀳𑀺𑀢𑀸. 𑀓𑀢𑀯𑀺𑀥𑁄 𑀓𑀭𑀡𑀯𑀺𑀥𑀺 𑀦𑀢𑁆𑀣𑀺 𑀏𑀢𑁂𑀲𑀦𑁆𑀢𑀺 𑀅𑀓𑀢𑀯𑀺𑀥𑀸𑀦𑀸. 𑀧𑀤𑀤𑁆𑀯𑀬𑁂𑀦𑀸𑀧𑀺 𑀮𑁄𑀓𑁂 𑀓𑁂𑀦𑀘𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀦𑁂𑀲𑀁 𑀅𑀦𑀺𑀩𑁆𑀩𑀢𑁆𑀢𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸𑀢𑀺 𑀓𑀲𑁆𑀲𑀘𑀺 𑀇𑀤𑁆𑀥𑀺𑀫𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀲𑁆𑀲 𑀤𑁂𑀯𑀲𑁆𑀲, 𑀇𑀲𑁆𑀲𑀭𑀸𑀤𑀺𑀦𑁄 𑀯𑀸 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸. 𑀅𑀦𑀺𑀫𑁆𑀫𑀸𑀧𑀺𑀢𑀸 𑀓𑀲𑁆𑀲𑀘𑀺 𑀅𑀦𑀺𑀫𑁆𑀫𑀸𑀧𑀺𑀢𑀸. 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺 𑀩𑁆𑀭𑀳𑁆𑀫𑀚𑀸𑀮𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦) 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀯𑀜𑁆𑀛𑀸𑀢𑀺 𑀯𑀜𑁆𑀛𑀧𑀲𑀼𑀯𑀜𑁆𑀛𑀢𑀸𑀮𑀸𑀤𑀬𑁄 𑀯𑀺𑀬 𑀅𑀨𑀮𑀸, 𑀓𑀲𑁆𑀲𑀘𑀺 𑀅𑀚𑀦𑀓𑀸𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀧𑀣𑀯𑀺𑀓𑀸𑀬𑀸𑀤𑀻𑀦𑀁 𑀭𑀽𑀧𑀸𑀤𑀺𑀚𑀦𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀭𑀽𑀧𑀲𑀤𑁆𑀤𑀸𑀤𑀬𑁄 𑀳𑀺 𑀧𑀣𑀯𑀺𑀓𑀸𑀬𑀸𑀤𑀻𑀳𑀺 𑀅𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀸𑀢𑀺 𑀢𑀲𑁆𑀲 𑀮𑀤𑁆𑀥𑀺. 𑀧𑀩𑁆𑀩𑀢𑀓𑀽𑀝𑀁 𑀯𑀺𑀬 𑀞𑀺𑀢𑀸𑀢𑀺 𑀓𑀽𑀝𑀝𑁆𑀞𑀸, 𑀬𑀣𑀸 𑀧𑀩𑁆𑀩𑀢𑀓𑀽𑀝𑀁 𑀓𑁂𑀦𑀘𑀺 𑀅𑀦𑀺𑀩𑁆𑀩𑀢𑁆𑀢𑀺𑀢𑀁, 𑀓𑀲𑁆𑀲𑀘𑀺 𑀘 𑀅𑀦𑀺𑀩𑁆𑀩𑀢𑁆𑀢𑀓𑀁, 𑀏𑀯𑀫𑁂𑀢𑁂 𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀫𑀺𑀤𑀁 ‘‘𑀩𑀻𑀚𑀢𑁄 𑀅𑀗𑁆𑀓𑀼𑀭𑀸𑀤𑀺 𑀚𑀸𑀬𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀢𑀢𑁄 𑀦𑀺𑀓𑁆𑀔𑀫𑀢𑀺, 𑀦 𑀅𑀯𑀺𑀚𑁆𑀚𑀫𑀸𑀦𑀁, 𑀅𑀜𑁆𑀜𑀣𑀸 𑀅𑀜𑁆𑀜𑀢𑁄𑀧𑀺 𑀅𑀜𑁆𑀜𑀲𑁆𑀲 𑀉𑀧𑀮𑀤𑁆𑀥𑀺 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀞𑀺𑀢𑀢𑁆𑀢𑀸𑀢𑀺 𑀦𑀺𑀩𑁆𑀩𑀺𑀓𑀸𑀭𑀸𑀪𑀸𑀯𑁂𑀦 𑀞𑀺𑀢𑀢𑁆𑀢𑀸. 𑀦 𑀘𑀮𑀦𑁆𑀢𑀻𑀢𑀺 𑀯𑀺𑀓𑀸𑀭𑀁 𑀦𑀸𑀧𑀚𑁆𑀚𑀦𑁆𑀢𑀺. 𑀯𑀺𑀓𑀸𑀭𑀸𑀪𑀸𑀯𑀢𑁄 𑀳𑀺 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀢𑀸. 𑀅𑀦𑀺𑀜𑁆𑀚𑀦𑀜𑁆𑀘 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀅𑀯𑀝𑁆𑀞𑀸𑀦𑀫𑁂𑀯. 𑀢𑁂𑀦𑀸𑀳 ‘‘𑀦 𑀯𑀺𑀧𑀭𑀺𑀡𑀫𑀦𑁆𑀢𑀻’’𑀢𑀺. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁆𑀢𑀸 𑀏𑀯 𑀳𑀺 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀦 𑀩𑁆𑀬𑀸𑀩𑀸𑀥𑁂𑀦𑁆𑀢𑀺. 𑀲𑀢𑀺 𑀳𑀺 𑀯𑀺𑀓𑀸𑀭𑀁 𑀆𑀧𑀸𑀤𑁂𑀢𑀩𑁆𑀩𑀢𑀸𑀬 𑀩𑁆𑀬𑀸𑀩𑀸𑀥𑀓𑀢𑀸𑀧𑀺 𑀲𑀺𑀬𑀸, 𑀢𑀣𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀢𑀸𑀬 𑀅𑀦𑀼𑀕𑁆𑀕𑀸𑀳𑀓𑀢𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 𑀦𑀸𑀮𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀣𑀯𑀻 𑀏𑀯 𑀓𑀸𑀬𑁂𑀓𑀤𑁂𑀲𑀢𑁆𑀢𑀸 𑀧𑀣𑀯𑀺𑀓𑀸𑀬𑁄. 𑀚𑀻𑀯𑀲𑀢𑁆𑀢𑀫𑀸𑀦𑀁 𑀓𑀸𑀬𑀸𑀦𑀁 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀪𑀸𑀯𑀢𑁄 𑀦 𑀳𑀦𑁆𑀢𑀩𑁆𑀩𑀢𑀸, 𑀦 𑀖𑀸𑀢𑁂𑀢𑀩𑁆𑀩𑀢𑀸 𑀘𑀸𑀢𑀺 𑀦𑁂𑀯 𑀓𑁄𑀘𑀺 𑀳𑀦𑁆𑀢𑀸 𑀯𑀸 𑀖𑀸𑀢𑁂𑀢𑀸 𑀯𑀸, 𑀢𑁂𑀦𑁂𑀯𑀸𑀳 ‘‘𑀲𑀢𑁆𑀢𑀦𑁆𑀦𑀁 𑀢𑁆𑀯𑁂𑀯 𑀓𑀸𑀬𑀸𑀦’’𑀦𑁆𑀢𑀺𑀆𑀤𑀺. 𑀬𑀤𑀺 𑀓𑁄𑀘𑀺 𑀳𑀦𑁆𑀢𑀸 𑀦𑀢𑁆𑀣𑀺, 𑀓𑀣𑀁 𑀲𑀢𑁆𑀣𑀧𑁆𑀧𑀳𑀸𑀭𑁄𑀢𑀺 𑀆𑀳 ‘‘𑀬𑀣𑀸 𑀫𑀼𑀕𑁆𑀕𑀭𑀸𑀲𑀺 𑀆𑀤𑀻𑀲𑀽’’𑀢𑀺𑀆𑀤𑀺. 𑀓𑁂𑀯𑀮𑀁 𑀲𑀜𑁆𑀜𑀸𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀳𑀦𑀦𑀖𑀸𑀢𑀦𑀸𑀤𑀺 𑀧𑀦 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑁂𑀯 𑀓𑀸𑀬𑀸𑀦𑀁 𑀅𑀯𑀺𑀓𑁄𑀧𑀦𑀻𑀬𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀯𑀸𑀤𑀯𑀡𑁆𑀡𑀦𑀸

𑁧𑁭𑁭. 𑀘𑀢𑁆𑀢𑀸𑀭𑁄 𑀬𑀸𑀫𑀸 𑀪𑀸𑀕𑀸 𑀘𑀢𑀼𑀬𑀸𑀫𑀸, 𑀘𑀢𑀼𑀬𑀸𑀫𑀸 𑀏𑀯 𑀘𑀸𑀢𑀼𑀬𑀸𑀫𑀸, 𑀪𑀸𑀕𑀢𑁆𑀣𑁄 𑀳𑀺 𑀇𑀥 𑀬𑀸𑀫-𑀲𑀤𑁆𑀤𑁄 𑀬𑀣𑀸 ‘‘𑀭𑀢𑁆𑀢𑀺𑀬𑀸 𑀧𑀞𑀫𑁄 𑀬𑀸𑀫𑁄’’𑀢𑀺. 𑀲𑁄 𑀧𑀦𑁂𑀢𑁆𑀣 𑀪𑀸𑀕𑁄 𑀲𑀁𑀯𑀭𑀮𑀓𑁆𑀔𑀡𑁄𑀢𑀺 𑀆𑀳 ‘‘𑀘𑀸𑀢𑀼𑀬𑀸𑀫𑀲𑀁𑀯𑀼𑀢𑁄𑀢𑀺 𑀘𑀢𑀼𑀓𑁄𑀝𑁆𑀞𑀸𑀲𑁂𑀦 𑀲𑀁𑀯𑀭𑁂𑀦 𑀲𑀁𑀯𑀼𑀢𑁄’’𑀢𑀺. 𑀧𑀝𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀲𑀻𑀢𑁄𑀤𑀓𑁄𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀲𑀻𑀢𑁄𑀤𑀓𑀧𑀭𑀺𑀪𑁄𑀕𑁄. 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀬𑀼𑀢𑁆𑀢𑁄𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀲𑀁𑀯𑀭𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀥𑀼𑀢𑀧𑀸𑀧𑁄𑀢𑀺 𑀲𑀩𑁆𑀩𑁂𑀦 𑀦𑀺𑀚𑁆𑀚𑀭𑀮𑀓𑁆𑀔𑀡𑁂𑀦 𑀧𑀸𑀧𑀯𑀸𑀭𑀡𑁂𑀦 𑀯𑀺𑀥𑀼𑀢𑀧𑀸𑀧𑁄. 𑀨𑀼𑀝𑁆𑀞𑁄𑀢𑀺 𑀅𑀝𑁆𑀞𑀦𑁆𑀦𑀫𑁆𑀧𑀺 𑀓𑀫𑁆𑀫𑀸𑀦𑀁 𑀔𑁂𑀧𑀦𑁂𑀦 𑀫𑁄𑀓𑁆𑀔𑀧𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀓𑁆𑀔𑀬𑀮𑀓𑁆𑀔𑀡𑁂𑀦 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀨𑀼𑀝𑁆𑀞𑁄 𑀢𑀁 𑀧𑀢𑁆𑀯𑀸 𑀞𑀺𑀢𑁄. 𑀓𑁄𑀝𑀺𑀧𑁆𑀧𑀢𑁆𑀢𑀘𑀺𑀢𑁆𑀢𑁄𑀢𑀺 𑀫𑁄𑀓𑁆𑀔𑀸𑀥𑀺𑀕𑀫𑁂𑀦𑁂𑀯 𑀉𑀢𑁆𑀢𑀫𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑀘𑀺𑀢𑁆𑀢𑁄. 𑀬𑀢𑀢𑁆𑀢𑁄𑀢𑀺 𑀓𑀸𑀬𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀁𑀬𑀫𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀲𑀁𑀬𑀢𑀘𑀺𑀢𑁆𑀢𑁄. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀦𑀺𑀲𑁆𑀲𑁂𑀲𑀢𑁄 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄. 𑀲𑀸𑀲𑀦𑀸𑀦𑀼𑀮𑁄𑀫𑀁 𑀦𑀸𑀫 𑀧𑀸𑀧𑀯𑀸𑀭𑀡𑁂𑀦 𑀬𑀼𑀢𑁆𑀢𑀢𑀸. 𑀢𑁂𑀦𑀸𑀳 ‘‘𑀥𑀼𑀢𑀧𑀸𑀧𑁄’’𑀢𑀺𑀆𑀤𑀺. 𑀅𑀲𑀼𑀤𑁆𑀥𑀮𑀤𑁆𑀥𑀺𑀢𑀸𑀬𑀸𑀢𑀺 ‘‘𑀅𑀢𑁆𑀣𑀺 𑀚𑀻𑀯𑁄, 𑀲𑁄 𑀘 𑀲𑀺𑀬𑀸 𑀦𑀺𑀘𑁆𑀘𑁄, 𑀲𑀺𑀬𑀸 𑀅𑀦𑀺𑀘𑁆𑀘𑁄’’𑀢𑀺 𑀏𑀯𑀫𑀸𑀤𑀺𑀅𑀲𑀼𑀤𑁆𑀥𑀮𑀤𑁆𑀥𑀺𑀢𑀸𑀬. 𑀲𑀩𑁆𑀩𑀸𑀢𑀺 𑀓𑀫𑁆𑀫𑀧𑀓𑀢𑀺𑀯𑀺𑀪𑀸𑀕𑀸𑀤𑀺𑀯𑀺𑀲𑀬𑀸 𑀲𑀩𑁆𑀩𑀸 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑁄. 𑀤𑀺𑀝𑁆𑀞𑀺𑀬𑁂 𑀯𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀏𑀯 𑀚𑀸𑀢𑀸.

𑀲𑀜𑁆𑀘𑀬𑀩𑁂𑀮𑀝𑁆𑀞𑀧𑀼𑀢𑁆𑀢𑀯𑀸𑀤𑀯𑀡𑁆𑀡𑀦𑀸

𑁧𑁭𑁯-𑁧𑁮𑁧. 𑀅𑀫𑀭𑀸𑀯𑀺𑀓𑁆𑀔𑁂𑀧𑁂 𑀯𑀼𑀢𑁆𑀢𑀦𑀬𑁄 𑀏𑀯𑀸𑀢𑀺 𑀩𑁆𑀭𑀳𑁆𑀫𑀚𑀸𑀮𑁂 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑀲𑀁𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁬𑁧-𑁬𑁩) 𑀯𑀼𑀢𑁆𑀢𑀦𑀬𑁄 𑀏𑀯 𑀯𑀺𑀓𑁆𑀔𑁂𑀧𑀩𑁆𑀬𑀸𑀓𑀭𑀡𑀪𑀸𑀯𑀢𑁄, 𑀢𑀣𑁂𑀯 𑀘𑁂𑀢𑁆𑀣 𑀯𑀺𑀓𑁆𑀔𑁂𑀧𑀯𑀸𑀤𑀲𑁆𑀲 𑀆𑀕𑀢𑀢𑁆𑀢𑀸.

𑀧𑀞𑀫𑀲𑀦𑁆𑀤𑀺𑀝𑁆𑀞𑀺𑀓𑀲𑀸𑀫𑀜𑁆𑀜𑀨𑀮𑀯𑀡𑁆𑀡𑀦𑀸

𑁧𑁮𑁩. 𑀬𑀣𑀸 𑀢𑁂 𑀭𑀼𑀘𑁆𑀘𑁂𑀬𑁆𑀬𑀸𑀢𑀺 𑀇𑀤𑀸𑀦𑀺 𑀫𑀬𑀸 𑀧𑀼𑀘𑁆𑀙𑀺𑀬𑀫𑀸𑀦𑁄 𑀅𑀢𑁆𑀣𑁄 𑀬𑀣𑀸 𑀢𑀯 𑀘𑀺𑀢𑁆𑀢𑁂 𑀭𑁄𑀘𑁂𑀬𑁆𑀬. 𑀖𑀭𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀚𑀸𑀢𑁄 𑀅𑀦𑁆𑀢𑁄𑀚𑀸𑀢𑁄. 𑀥𑀦𑁂𑀦 𑀓𑀻𑀢𑁄 𑀥𑀦𑀓𑁆𑀓𑀻𑀢𑁄. 𑀩𑀦𑁆𑀥𑀕𑁆𑀕𑀸𑀳𑀕𑀳𑀺𑀢𑁄 𑀓𑀭𑀫𑀭𑀸𑀦𑀻𑀢𑁄. 𑀲𑀸𑀫𑀦𑁆𑀢𑀺 𑀲𑀬𑀫𑁂𑀯. 𑀤𑀸𑀲𑀩𑁆𑀬𑀦𑁆𑀢𑀺 𑀤𑀸𑀲𑀪𑀸𑀯𑀁. 𑀓𑁄𑀘𑀺 𑀤𑀸𑀲𑁄𑀧𑀺 𑀲𑀫𑀸𑀦𑁄 𑀅𑀮𑀲𑁄 𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑁄 ‘‘𑀓𑀫𑁆𑀫𑀓𑀸𑀭𑁄’’𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀅𑀦𑀮𑀲𑁄 𑀓𑀫𑁆𑀫𑀓𑀭𑀡𑀲𑀻𑀮𑁄𑀬𑁂𑀯𑀸’’𑀢𑀺. 𑀧𑀞𑀫𑀫𑁂𑀯𑀸𑀢𑀺 𑀆𑀲𑀦𑁆𑀦𑀢𑀭𑀝𑁆𑀞𑀸𑀦𑀽𑀧𑀲𑀗𑁆𑀓𑀫𑀦𑀢𑁄 𑀧𑀕𑁂𑀯 𑀧𑀼𑀭𑁂𑀢𑀭𑀫𑁂𑀯. 𑀧𑀘𑁆𑀙𑀸𑀢𑀺 𑀲𑀸𑀫𑀺𑀓𑀲𑁆𑀲 𑀦𑀺𑀧𑀚𑁆𑀚𑀸𑀬 𑀧𑀘𑁆𑀙𑀸. 𑀲𑀬𑀦𑀢𑁄 𑀅𑀯𑀼𑀝𑁆𑀞𑀺𑀢𑁂𑀢𑀺 𑀭𑀢𑁆𑀢𑀺𑀬𑀸 𑀯𑀺𑀪𑀸𑀬𑀦𑀯𑁂𑀮𑀸𑀬 𑀲𑁂𑀬𑁆𑀬𑀢𑁄 𑀅𑀯𑀼𑀝𑁆𑀞𑀺𑀢𑁂. 𑀧𑀘𑁆𑀘𑀽𑀲𑀓𑀸𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑀻𑀢𑀸𑀬 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀓𑀸𑀮𑀢𑁄 𑀧𑀝𑁆𑀞𑀸𑀬. 𑀬𑀸𑀯 𑀲𑀸𑀫𑀺𑀦𑁄 𑀭𑀢𑁆𑀢𑀺𑀁 𑀦𑀺𑀤𑁆𑀤𑁄𑀓𑁆𑀓𑀫𑀦𑀦𑁆𑀢𑀺 𑀅𑀧𑀭𑀸𑀬 𑀧𑀤𑁄𑀲𑀯𑁂𑀮𑀸𑀬𑀁 𑀬𑀸𑀯 𑀦𑀺𑀤𑁆𑀤𑁄𑀓𑁆𑀓𑀫𑀦𑀁. 𑀓𑀺𑀁 𑀓𑀸𑀭𑀦𑁆𑀢𑀺 𑀓𑀺𑀁 𑀓𑀭𑀡𑀻𑀬𑀁, 𑀓𑀺𑀁𑀓𑀸𑀭𑀪𑀸𑀯𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀓𑀸𑀢𑀩𑁆𑀩𑀯𑁂𑀬𑁆𑀬𑀸𑀯𑀘𑁆𑀘𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀯𑁄 𑀯𑀺𑀬𑀸𑀢𑀺 𑀆𑀥𑀺𑀧𑀘𑁆𑀘𑀧𑀭𑀺𑀯𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀲𑀫𑀦𑁆𑀦𑀸𑀕𑀢𑁄 𑀧𑀥𑀸𑀦𑀤𑁂𑀯𑁄 𑀯𑀺𑀬. 𑀲𑁄 𑀯𑀢𑀲𑁆𑀲𑀸𑀳𑀦𑁆𑀢𑀺 𑀲𑁄 𑀯𑀢 𑀅𑀲𑁆𑀲𑀁 𑀅𑀳𑀁. 𑀲𑁄 𑀭𑀸𑀚𑀸 𑀯𑀺𑀬 𑀅𑀳𑀫𑁆𑀧𑀺 𑀪𑀯𑁂𑀬𑁆𑀬𑀁, 𑀓𑀣𑀁 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀁, 𑀬𑀤𑀺 𑀧𑀼𑀜𑁆𑀜𑀸𑀦𑀺 𑀉𑀴𑀸𑀭𑀸𑀦𑀺 𑀓𑀭𑁂𑀬𑁆𑀬𑀦𑁆𑀢𑀺 𑀬𑁄𑀚𑀦𑀸. ‘‘𑀲𑁄 𑀯𑀢𑀲𑁆𑀲’𑀲𑁆𑀲’’𑀦𑁆𑀢𑀺 𑀧𑀸𑀞𑁂 𑀲𑁄 𑀭𑀸𑀚𑀸 𑀅𑀲𑁆𑀲 𑀅𑀳𑀁 𑀅𑀲𑁆𑀲𑀁 𑀯𑀢, 𑀬𑀤𑀺 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀅𑀬𑀫𑁂𑀯𑀢𑁆𑀣𑁄’’𑀢𑀺. 𑀅𑀲𑁆𑀲𑀦𑁆𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑁂 𑀅𑀳𑀁-𑀲𑀤𑁆𑀤𑁄 𑀅𑀧𑁆𑀧𑀬𑀼𑀢𑁆𑀢𑁄𑀧𑀺 𑀧𑀬𑀼𑀢𑁆𑀢𑁄 𑀏𑀯 𑀳𑁄𑀢𑀺. 𑀬𑀸𑀯𑀚𑀻𑀯𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺 𑀤𑀸𑀢𑀼𑀦𑁆𑀢𑀺 𑀬𑀸𑀯𑀚𑀻𑀯𑀁 𑀤𑀸𑀦𑀢𑁆𑀣𑀸𑀬 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑁄𑀧𑀺 𑀬𑀁 𑀭𑀸𑀚𑀸 𑀏𑀓𑀁 𑀤𑀺𑀯𑀲𑀁 𑀤𑁂𑀢𑀺, 𑀢𑀢𑁄 𑀲𑀢𑀪𑀸𑀕𑀫𑁆𑀧𑀺 𑀤𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺. 𑀢𑀲𑁆𑀫𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀧𑀩𑁆𑀩𑀚𑁆𑀚𑀸𑀬𑀁 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸.

𑀓𑀸𑀬𑁂𑀦 𑀲𑀁𑀯𑀼𑀢𑁄𑀢𑀺 𑀓𑀸𑀬𑁂𑀦 𑀲𑀁𑀯𑀭𑀺𑀢𑀩𑁆𑀩𑀁 𑀓𑀸𑀬𑀤𑁆𑀯𑀸𑀭𑁂𑀦 𑀧𑀯𑀢𑁆𑀢𑀦𑀓𑀁 𑀧𑀸𑀧𑀥𑀫𑁆𑀫𑀁 𑀲𑀁𑀯𑀭𑀺𑀢𑁆𑀯𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀓𑀸𑀬𑁂𑀦 𑀧𑀺𑀳𑀺𑀢𑁄 𑀳𑀼𑀢𑁆𑀯𑀸’’𑀢𑀺𑀆𑀤𑀺. 𑀖𑀸𑀲𑀘𑁆𑀙𑀸𑀤𑀦𑁂𑀦 𑀧𑀭𑀫𑀢𑀸𑀬𑀸𑀢𑀺 𑀖𑀸𑀲𑀘𑁆𑀙𑀸𑀤𑀦𑀧𑀭𑀺𑀬𑁂𑀲𑀦𑁂 𑀲𑀮𑁆𑀮𑁂𑀔𑀯𑀲𑁂𑀦 𑀧𑀭𑀫𑀢𑀸𑀬, 𑀉𑀓𑁆𑀓𑀝𑁆𑀞𑀪𑀸𑀯𑁂 𑀲𑀡𑁆𑀞𑀺𑀢𑁄 𑀖𑀸𑀲𑀘𑁆𑀙𑀸𑀤𑀦𑀫𑁂𑀯 𑀯𑀸 𑀧𑀭𑀫𑀁 𑀧𑀭𑀸 𑀓𑁄𑀝𑀺 𑀏𑀢𑀲𑁆𑀲, 𑀦 𑀢𑀢𑁄 𑀧𑀭𑀁 𑀓𑀺𑀜𑁆𑀘𑀺 𑀆𑀫𑀺𑀲𑀚𑀸𑀢𑀁 𑀧𑀭𑀺𑀬𑁂𑀲𑀢𑀺 𑀧𑀘𑁆𑀘𑀸𑀲𑀺𑀲𑀢𑀺 𑀘𑀸𑀢𑀺 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑁄, 𑀢𑀩𑁆𑀪𑀸𑀯𑁄 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸, 𑀢𑀲𑁆𑀲𑀸 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬. 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀦𑁆𑀢𑀺 𑀕𑀡𑀲𑀗𑁆𑀕𑀡𑀺𑀓𑀢𑁄 𑀧𑀯𑀺𑀯𑀺𑀢𑁆𑀢𑁂 𑀞𑀺𑀢𑀓𑀸𑀬𑀸𑀦𑀁. 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀦𑁆𑀢𑀺 𑀛𑀸𑀦𑀸𑀪𑀺𑀭𑀢𑀸𑀦𑀁. 𑀢𑀸𑀬 𑀏𑀯 𑀛𑀸𑀦𑀸𑀪𑀺𑀭𑀢𑀺𑀬𑀸 𑀧𑀭𑀫𑀁 𑀉𑀢𑁆𑀢𑀫𑀁 𑀯𑁄𑀤𑀸𑀦𑀁 𑀯𑀺𑀲𑀼𑀤𑁆𑀥𑀺𑀁 𑀧𑀢𑁆𑀢𑀢𑀸𑀬 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁. 𑀓𑀺𑀮𑁂𑀲𑀽𑀧𑀥𑀺𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀻𑀦𑀁 𑀅𑀘𑁆𑀘𑀦𑁆𑀢𑀯𑀺𑀕𑀫𑁂𑀦 𑀦𑀺𑀭𑀼𑀧𑀥𑀻𑀦𑀁. 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀦𑁆𑀢𑀺 𑀅𑀥𑀺𑀕𑀢𑀦𑀺𑀩𑁆𑀩𑀸𑀦𑀸𑀦𑀁. 𑀏𑀢𑁆𑀣 𑀘 𑀧𑀞𑀫𑁄 𑀯𑀺𑀯𑁂𑀓𑁄 𑀇𑀢𑀭𑁂𑀳𑀺 𑀤𑁆𑀯𑀻𑀳𑀺 𑀯𑀺𑀯𑁂𑀓𑁂𑀳𑀺 𑀲𑀳𑀸𑀧𑀺 𑀧𑀢𑁆𑀢𑀩𑁆𑀩𑁄 𑀯𑀺𑀦𑀸𑀧𑀺, 𑀢𑀣𑀸 𑀤𑀼𑀢𑀺𑀬𑁄. 𑀢𑀢𑀺𑀬𑁄 𑀧𑀦 𑀇𑀢𑀭𑁂𑀳𑀺 𑀤𑁆𑀯𑀻𑀳𑀺 𑀲𑀳𑁂𑀯 𑀧𑀢𑁆𑀢𑀩𑁆𑀩𑁄, 𑀦 𑀯𑀺𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀕𑀡𑁂 𑀚𑀦𑀲𑀫𑀸𑀕𑀫𑁂 𑀲𑀦𑁆𑀦𑀺𑀧𑀢𑀦𑀁 𑀕𑀡𑀲𑀗𑁆𑀕𑀡𑀺𑀓𑀸, 𑀢𑀁 𑀧𑀳𑀸𑀬 𑀏𑀓𑁄 𑀯𑀺𑀳𑀭𑀢𑀺 𑀘𑀭𑀢𑀺 𑀧𑀼𑀕𑁆𑀕𑀮𑀯𑀲𑁂𑀦 𑀅𑀲𑀳𑀸𑀬𑀢𑁆𑀢𑀸. 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀲𑀦𑁆𑀦𑀺𑀧𑀢𑀦𑀁 𑀘𑀺𑀢𑁆𑀢𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸, 𑀢𑀁 𑀧𑀳𑀸𑀬 𑀏𑀓𑁄 𑀯𑀺𑀳𑀭𑀢𑀺 𑀓𑀺𑀮𑁂𑀲𑀯𑀲𑁂𑀦 𑀅𑀲𑀳𑀸𑀬𑀢𑁆𑀢𑀸. 𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸, 𑀕𑁄𑀢𑁆𑀭𑀪𑀼𑀆𑀤𑀻𑀦𑀜𑁆𑀘 𑀆𑀭𑀫𑁆𑀫𑀡𑀫𑀢𑁆𑀢𑀢𑁆𑀢𑀸 𑀦 𑀢𑁂𑀲𑀁 𑀯𑀲𑁂𑀦 𑀲𑀸𑀢𑀺𑀲𑀬𑀸 𑀦𑀺𑀩𑁆𑀩𑀼𑀢𑀺𑀲𑀼𑀔𑀲𑀫𑁆𑀨𑀼𑀲𑀦𑀸, 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀲𑀸𑀢𑀺𑀲𑀬𑀸𑀢𑀺 𑀆𑀳 ‘‘𑀨𑀮𑀲𑀫𑀸𑀧𑀢𑁆𑀢𑀺𑀁 𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸’’𑀢𑀺. 𑀨𑀮𑀧𑀭𑀺𑀬𑁄𑀲𑀸𑀦𑁄 𑀳𑀺 𑀦𑀺𑀭𑁄𑀥𑁄𑀢𑀺.

𑁧𑁮𑁪. 𑀅𑀪𑀺𑀳𑀭𑀺𑀢𑁆𑀯𑀸𑀢𑀺 𑀅𑀪𑀺𑀫𑀼𑀔𑀻𑀪𑀸𑀯𑁂𑀦 𑀦𑁂𑀢𑁆𑀯𑀸. ‘‘𑀅𑀳𑀁 𑀘𑀻𑀯𑀭𑀸𑀤𑀻𑀳𑀺 𑀧𑀬𑁄𑀚𑀦𑀁 𑀲𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀲𑁂𑀲𑁄. 𑀲𑀧𑁆𑀧𑀸𑀬𑀦𑁆𑀢𑀺 𑀲𑀩𑁆𑀩𑀕𑁂𑀮𑀜𑁆𑀜𑀧𑀳𑀭𑀡𑀯𑀲𑁂𑀦 𑀉𑀧𑀓𑀸𑀭𑀸𑀯𑀳𑀁. 𑀪𑀸𑀯𑀺𑀦𑀸 𑀅𑀦𑀢𑁆𑀣𑀢𑁄 𑀧𑀭𑀺𑀧𑀸𑀮𑀦𑀯𑀲𑁂𑀦 𑀕𑁄𑀧𑀦𑀸 𑀭𑀓𑁆𑀔𑀸𑀕𑀼𑀢𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀦𑀺𑀲𑁂𑀥𑀯𑀲𑁂𑀦 𑀆𑀯𑀭𑀡𑀕𑀼𑀢𑁆𑀢𑀺.

𑀤𑀼𑀢𑀺𑀬𑀲𑀦𑁆𑀤𑀺𑀝𑁆𑀞𑀺𑀓𑀲𑀸𑀫𑀜𑁆𑀜𑀨𑀮𑀯𑀡𑁆𑀡𑀦𑀸

𑁧𑁮𑁬. 𑀓𑀲𑀢𑀻𑀢𑀺 𑀓𑀲𑀺𑀁 𑀓𑀭𑁄𑀢𑀺. 𑀕𑀳𑀧𑀢𑀺𑀓𑁄𑀢𑀺 𑀏𑀢𑁆𑀣 𑀓-𑀲𑀤𑁆𑀤𑁄 𑀅𑀧𑁆𑀧𑀢𑁆𑀣𑁄𑀢𑀺 𑀆𑀳 ‘‘𑀏𑀓𑀕𑁂𑀳𑀫𑀢𑁆𑀢𑁂 𑀚𑁂𑀝𑁆𑀞𑀓𑁄’’𑀢𑀺, 𑀢𑁂𑀦 𑀅𑀦𑁂𑀓𑀓𑀼𑀮𑀚𑁂𑀝𑁆𑀞𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀭𑀁 𑀓𑀭𑁄𑀢𑀻𑀢𑀺 𑀓𑀭𑀁 𑀲𑀫𑁆𑀧𑀸𑀤𑁂𑀢𑀺. 𑀯𑀟𑁆𑀠𑁂𑀢𑀻𑀢𑀺 𑀉𑀧𑀭𑀽𑀧𑀭𑀺 𑀲𑀫𑁆𑀧𑀸𑀤𑀦𑁂𑀦 𑀯𑀟𑁆𑀠𑁂𑀢𑀺. 𑀏𑀯𑀁 𑀅𑀧𑁆𑀧𑀫𑁆𑀧𑀺 𑀧𑀳𑀸𑀬 𑀧𑀩𑁆𑀩𑀚𑀺𑀢𑀼𑀁 𑀤𑀼𑀓𑁆𑀓𑀭𑀦𑁆𑀢𑀺 𑀅𑀬𑀫𑀢𑁆𑀣𑁄 𑀮𑀝𑀼𑀓𑀺𑀓𑁄𑀧𑀫𑀲𑀼𑀢𑁆𑀢𑁂𑀦 (𑀫. 𑀦𑀺. 𑁨.𑁧𑁫𑁧, 𑁧𑁫𑁨) 𑀤𑀻𑀧𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀲𑁂𑀬𑁆𑀬𑀣𑀸𑀧𑀺, 𑀉𑀤𑀸𑀬𑀺, 𑀧𑀼𑀭𑀺𑀲𑁄 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀬𑁄, 𑀢𑀲𑁆𑀲𑀲𑁆𑀲 𑀏𑀓𑀁 𑀅𑀕𑀸𑀭𑀓𑀁 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀁 𑀓𑀸𑀓𑀸𑀢𑀺𑀤𑀸𑀬𑀺𑀁 𑀦𑀧𑀭𑀫𑀭𑀽𑀧’’𑀦𑁆𑀢𑀺 𑀯𑀺𑀢𑁆𑀣𑀸𑀭𑁄. 𑀬𑀤𑀺 𑀅𑀧𑁆𑀧𑀫𑁆𑀧𑀺 𑀪𑁄𑀕𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀼𑀁 𑀤𑀼𑀓𑁆𑀓𑀭𑀁, 𑀓𑀲𑁆𑀫𑀸 𑀤𑀸𑀲𑀯𑀸𑀭𑁂 𑀪𑁄𑀕𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺 𑀆𑀳 ‘‘𑀤𑀸𑀲𑀯𑀸𑀭𑁂 𑀧𑀦𑀸’’𑀢𑀺𑀆𑀤𑀺. 𑀬𑀣𑀸 𑀘 𑀤𑀸𑀲𑀲𑁆𑀲 𑀪𑁄𑀕𑀸𑀧𑀺 𑀅𑀪𑁄𑀕𑀸 𑀧𑀭𑀸𑀬𑀢𑁆𑀢𑀪𑀸𑀯𑀢𑁄, 𑀏𑀯𑀁 𑀜𑀸𑀢𑀬𑁄 𑀧𑀻𑀢𑀺 𑀤𑀸𑀲𑀯𑀸𑀭𑁂 𑀜𑀸𑀢𑀺𑀧𑀭𑀺𑀯𑀝𑁆𑀝𑀕𑁆𑀕𑀳𑀡𑀫𑁆𑀧𑀺 𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀡𑀻𑀢𑀢𑀭𑀲𑀸𑀫𑀜𑁆𑀜𑀨𑀮𑀯𑀡𑁆𑀡𑀦𑀸

𑁧𑁮𑁯. 𑀏𑀯𑀭𑀽𑀧𑀸𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀤𑀸𑀲𑀓𑀲𑁆𑀲𑀓𑀽𑀧𑀫𑀸𑀲𑀤𑀺𑀲𑀸𑀳𑀺 𑀉𑀧𑀫𑀸𑀳𑀺 𑀲𑀸𑀫𑀜𑁆𑀜𑀨𑀮𑀁 𑀤𑀻𑀧𑁂𑀢𑀼𑀁 𑀧𑀳𑁄𑀢𑀺 𑀪𑀕𑀯𑀸 𑀲𑀓𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀢𑀢𑁄 𑀪𑀺𑀬𑁆𑀬𑁄𑀧𑀺 𑀅𑀦𑀦𑁆𑀢𑀧𑀝𑀺𑀪𑀸𑀦𑀢𑀸𑀬 𑀯𑀺𑀘𑀺𑀢𑁆𑀢𑀦𑀬𑀤𑁂𑀲𑀦𑀪𑀸𑀯𑀢𑁄. 𑀢𑀣𑀸𑀧𑀻𑀢𑀺 𑀲𑀢𑀺𑀧𑀺 𑀤𑁂𑀲𑀦𑀸𑀬 𑀉𑀢𑁆𑀢𑀭𑀼𑀢𑁆𑀢𑀭𑀸𑀥𑀺𑀓𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀪𑀸𑀯𑁂.

𑀏𑀓𑀢𑁆𑀣𑀫𑁂𑀢𑀁 𑀧𑀤𑀁 𑀲𑀸𑀥𑀼𑀲𑀤𑁆𑀤𑀲𑁆𑀲𑁂𑀯 𑀓-𑀓𑀸𑀭𑁂𑀦 𑀯𑀟𑁆𑀠𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸, 𑀢𑁂𑀦𑁂𑀯 𑀲𑀸𑀥𑀼𑀓-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀲𑀸𑀥𑀼-𑀲𑀤𑁆𑀤𑁄 𑀉𑀤𑀸𑀳𑀝𑁄. 𑀆𑀬𑀸𑀘𑀦𑁂𑀢𑀺 𑀅𑀪𑀺𑀫𑀼𑀔𑀬𑀸𑀘𑀦𑁂, 𑀅𑀪𑀺𑀧𑀢𑁆𑀣𑀦𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀝𑀺𑀘𑁆𑀙𑀦𑁂𑀢𑀺 𑀧𑀝𑀺𑀕𑁆𑀕𑀡𑁆𑀳𑀦𑁂. 𑀲𑀫𑁆𑀧𑀳𑀁𑀲𑀦𑁂𑀢𑀺 𑀲𑀁𑀯𑀺𑀚𑁆𑀚𑀫𑀸𑀦𑀕𑀼𑀡𑀯𑀲𑁂𑀦 𑀳𑀁𑀲𑀦𑁂 𑀢𑁄𑀲𑀦𑁂, 𑀉𑀤𑀕𑁆𑀕𑀢𑀸𑀓𑀭𑀡𑁂𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀭𑀼𑀘𑀻𑀢𑀺 𑀧𑀼𑀜𑁆𑀜𑀓𑀸𑀫𑁄. 𑀧𑀜𑁆𑀜𑀸𑀡𑀯𑀸𑀢𑀺 𑀧𑀜𑁆𑀜𑀯𑀸. 𑀅𑀤𑁆𑀤𑀼𑀩𑁆𑀪𑁄𑀢𑀺 𑀅𑀤𑀽𑀲𑀓𑁄, 𑀅𑀦𑀼𑀧𑀖𑀸𑀢𑀓𑁄𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀻𑀢𑀺 𑀇𑀫𑀲𑁆𑀫𑀺𑀁 𑀲𑀸𑀫𑀜𑁆𑀜𑀨𑀮𑁂𑀧𑀺. 𑀅𑀬𑀁 𑀲𑀸𑀥𑀼-𑀲𑀤𑁆𑀤𑁄. 𑀤𑀴𑁆𑀳𑀻𑀓𑀫𑁆𑀫𑁂𑀢𑀺 𑀲𑀓𑁆𑀓𑀘𑁆𑀘 𑀓𑀺𑀭𑀺𑀬𑀸𑀬𑀁. 𑀆𑀡𑀢𑁆𑀢𑀺𑀬𑀦𑁆𑀢𑀺 𑀆𑀡𑀸𑀧𑀦𑁂. ‘‘𑀲𑀼𑀡𑁄𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀲𑀸𑀥𑀼𑀓-𑀲𑀤𑁆𑀤𑁂𑀦 𑀲𑀯𑀦𑀫𑀦𑀲𑀺𑀓𑀸𑀭𑀸𑀦𑀁 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸 𑀯𑀺𑀬 𑀢𑀤𑀸𑀡𑀸𑀧𑀦𑀫𑁆𑀧𑀺 𑀚𑁄𑀢𑀺𑀢𑀁 𑀳𑁄𑀢𑀺, 𑀆𑀬𑀸𑀘𑀦𑀢𑁆𑀣𑀢𑀸 𑀯𑀺𑀬 𑀘𑀲𑁆𑀲 𑀆𑀡𑀸𑀧𑀦𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀦𑁆𑀤𑀭𑁂𑀧𑀻𑀢𑀺 𑀲𑀼𑀦𑁆𑀤𑀭𑀢𑁆𑀣𑁂𑀧𑀺. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑁂𑀦 𑀲𑀸𑀥𑀼𑀓-𑀲𑀤𑁆𑀤𑀲𑁆𑀲 𑀅𑀢𑁆𑀣𑀢𑁆𑀢𑀬𑁂𑀦 𑀧𑀓𑀸𑀲𑀺𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀫𑀦𑀲𑀺 𑀓𑀭𑁄𑀳𑀻𑀢𑀺 𑀏𑀢𑁆𑀣 𑀫𑀦𑀲𑀺𑀓𑀸𑀭𑁄 𑀦 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀦𑀮𑀓𑁆𑀔𑀡𑁄, 𑀅𑀣 𑀔𑁄 𑀯𑀻𑀣𑀺𑀧𑀝𑀺𑀧𑀸𑀤𑀦𑀚𑀯𑀦𑀧𑀝𑀺𑀧𑀸𑀤𑀦𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀓𑀁 𑀘𑀺𑀢𑁆𑀢𑁂 𑀞𑀧𑀦𑀮𑀓𑁆𑀔𑀡𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀯𑀚𑁆𑀚𑀸’’𑀢𑀺𑀆𑀤𑀺𑀫𑀸𑀳. 𑀲𑁄𑀢𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁 𑀲𑀯𑀦𑁂 𑀦𑀺𑀬𑁄𑀚𑀦𑀯𑀲𑁂𑀦 𑀓𑀺𑀭𑀺𑀬𑀦𑁆𑀢𑀭𑀧𑀝𑀺𑀲𑁂𑀥𑀦𑀪𑀸𑀯𑀢𑁄, 𑀲𑁄𑀢𑀁 𑀑𑀤𑀳𑀸𑀢𑀺 𑀅𑀢𑁆𑀣𑁄. 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁 𑀅𑀜𑁆𑀜𑀘𑀺𑀦𑁆𑀢𑀸𑀧𑀝𑀺𑀲𑁂𑀥𑀦𑀢𑁄. 𑀩𑁆𑀬𑀜𑁆𑀚𑀦𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁 ‘‘𑀲𑀸𑀥𑀼𑀓’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀧𑀘𑁆𑀙𑀺𑀫𑀲𑁆𑀲 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀥𑀸𑀭𑀡𑀽𑀧𑀧𑀭𑀺𑀓𑁆𑀔𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀼𑀮𑀦𑀢𑀻𑀭𑀡𑀸𑀤𑀺𑀓𑁂, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀥𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀬𑀜𑁆𑀚𑀦𑁄𑀢𑀺 𑀏𑀢𑁆𑀣 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺. 𑀲𑀳 𑀩𑁆𑀬𑀜𑁆𑀚𑀦𑁂𑀦𑀸𑀢𑀺 𑀲𑀩𑁆𑀬𑀜𑁆𑀚𑀦𑁄, 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑀸𑀢𑁆𑀣𑁄𑀢𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀅𑀦𑀼𑀥𑀸𑀢𑀩𑁆𑀩𑀢𑁄 𑀅𑀢𑁆𑀣𑁄, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺𑀓𑁄. 𑀢𑁂𑀦 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀸𑀢𑁆𑀣𑁄, 𑀅𑀢𑁆𑀣𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀕𑀫𑁆𑀪𑀻𑀭𑁄𑀢𑀺𑀆𑀤𑀻𑀲𑀼 𑀥𑀫𑁆𑀫𑁄 𑀦𑀸𑀫 𑀢𑀦𑁆𑀢𑀺. 𑀤𑁂𑀲𑀦𑀸 𑀦𑀸𑀫 𑀢𑀲𑁆𑀲𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀢𑀦𑁆𑀢𑀺𑀬𑀸 𑀤𑁂𑀲𑀦𑀸. 𑀅𑀢𑁆𑀣𑁄 𑀦𑀸𑀫 𑀢𑀦𑁆𑀢𑀺𑀬𑀸 𑀅𑀢𑁆𑀣𑁄. 𑀧𑀝𑀺𑀯𑁂𑀥𑁄 𑀦𑀸𑀫 𑀢𑀦𑁆𑀢𑀺𑀬𑀸, 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀬𑀲𑁆𑀫𑀸 𑀘𑁂𑀢𑁂 𑀥𑀫𑁆𑀫𑀤𑁂𑀲𑀦𑀸 𑀅𑀢𑁆𑀣𑀧𑁆𑀧𑀝𑀺𑀯𑁂𑀥𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀳𑀸, 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄…𑀧𑁂… 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺. 𑀏𑀢𑁆𑀣 𑀘 𑀧𑀝𑀺𑀯𑁂𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀥𑀫𑁆𑀫𑀢𑁆𑀣𑀸𑀦𑀁, 𑀤𑁂𑀲𑀦𑀸𑀜𑀸𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑁂𑀲𑀦𑀸𑀬 𑀤𑀼𑀓𑁆𑀔𑁄𑀕𑀸𑀳𑀢𑀸, 𑀧𑀝𑀺𑀯𑁂𑀥𑀲𑁆𑀲 𑀧𑀦 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬, 𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀤𑁂𑀲𑀦𑀁 𑀦𑀸𑀫 𑀉𑀤𑁆𑀤𑀺𑀲𑀦𑀁, 𑀢𑀲𑁆𑀲 𑀦𑀺𑀤𑁆𑀤𑀺𑀲𑀦𑀁 𑀪𑀸𑀲𑀦𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑀢𑁄 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. 𑀧𑀭𑀺𑀩𑁆𑀬𑀢𑁆𑀢𑀁 𑀓𑀣𑀦𑀜𑁆𑀳𑀺 𑀪𑀸𑀲𑀦𑀁, 𑀢𑁂𑀦𑀸𑀳 ‘‘𑀤𑁂𑀲𑁂𑀲𑁆𑀲𑀸𑀫𑀻𑀢𑀺…𑀧𑁂… 𑀯𑀺𑀢𑁆𑀣𑀸𑀭𑀤𑀻𑀧𑀦’’𑀦𑁆𑀢𑀺.

𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀢𑁆𑀢𑀧𑀤𑁂𑀦 𑀲𑀫𑀢𑁆𑀣𑁂𑀢𑀼𑀁 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀴𑀺𑀓𑀸𑀬𑀺𑀯 𑀦𑀺𑀕𑁆𑀖𑁄𑀲𑁄𑀢𑀺 𑀲𑀸𑀴𑀺𑀓𑀸𑀬 𑀆𑀮𑀸𑀧𑁄 𑀯𑀺𑀬 𑀫𑀥𑀼𑀭𑁄 𑀓𑀡𑁆𑀡𑀲𑀼𑀔𑁄 𑀧𑁂𑀫𑀦𑀻𑀬𑁄. 𑀧𑀝𑀺𑀪𑀸𑀦𑀦𑁆𑀢𑀺 𑀲𑀤𑁆𑀤𑁄. 𑀉𑀤𑀻𑀭𑀬𑀻𑀢𑀺 𑀉𑀘𑁆𑀘𑀸𑀭𑀻𑀬𑀢𑀺, 𑀯𑀼𑀘𑁆𑀘𑀢𑀺 𑀯𑀸.

𑀏𑀯𑀁 𑀯𑀼𑀢𑁆𑀢𑁂 𑀉𑀲𑁆𑀲𑀸𑀳𑀚𑀸𑀢𑁄𑀢𑀺 𑀏𑀯𑀁 ‘‘𑀲𑀼𑀡𑁄𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀓𑀺𑀭 𑀪𑀕𑀯𑀸 𑀲𑀗𑁆𑀔𑁂𑀧𑁂𑀦𑁂𑀯 𑀤𑁂𑀲𑁂𑀲𑁆𑀲𑀢𑀺, 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑁄 𑀳𑀝𑁆𑀞𑀢𑀼𑀝𑁆𑀞𑁄 𑀳𑀼𑀢𑁆𑀯𑀸.

𑁧𑁯𑁦. ‘‘𑀇𑀥𑀸’’𑀢𑀺 𑀇𑀫𑀺𑀦𑀸 𑀯𑀼𑀘𑁆𑀘𑀫𑀸𑀦𑀁 𑀅𑀥𑀺𑀓𑀭𑀡𑀁 𑀢𑀣𑀸𑀕𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀤𑁂𑀲𑀸𑀧𑀤𑁂𑀲𑁂 𑀦𑀺𑀧𑀸𑀢𑁄’’𑀢𑀺. ‘‘𑀲𑁆𑀯𑀸𑀬’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀇𑀥𑀲𑀤𑁆𑀤𑀫𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀦 𑀬𑀣𑀸𑀯𑀺𑀲𑁂𑀲𑀺𑀢𑀩𑁆𑀩𑀁 𑀇𑀥-𑀲𑀤𑁆𑀤𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀢𑁆𑀣𑀘𑀺 𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦). 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺 𑀮𑁄𑀓-𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀲𑁂𑀲𑀧𑀤𑀤𑁆𑀯𑀬𑁂 𑀧𑀦 𑀧𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀫𑀢𑁆𑀢𑁂𑀦 𑀢𑀁 𑀢𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀢𑀸 𑀤𑀝𑁆𑀞𑀩𑁆𑀩𑀸. 𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂𑀢𑀺 𑀳𑀺 𑀚𑀸𑀢𑀺𑀔𑁂𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀅𑀬𑀁 𑀘𑀓𑁆𑀓𑀯𑀸𑀴𑁄 ‘‘𑀮𑁄𑀓𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑀫𑀡𑁄𑀢𑀺 𑀲𑁄𑀢𑀸𑀧𑀦𑁆𑀦𑁄. 𑀤𑀼𑀢𑀺𑀬𑁄 𑀲𑀫𑀡𑁄𑀢𑀺 𑀲𑀓𑀤𑀸𑀕𑀸𑀫𑀻. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀲𑀫𑀡𑁄? 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁨𑁪𑁧). ‘‘𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀤𑀼𑀢𑀺𑀬𑁄 𑀲𑀫𑀡𑁄? 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸’’𑀢𑀺𑀆𑀤𑀺 (𑀅. 𑀦𑀺. 𑁪.𑁨𑁪𑁧). 𑀑𑀓𑀸𑀲𑀦𑁆𑀢𑀺 𑀓𑀜𑁆𑀘𑀺 𑀧𑀤𑁂𑀲𑀁. 𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲𑀸𑀢𑀺 𑀇𑀫𑀺𑀲𑁆𑀲𑀸 𑀏𑀯 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀢𑀺𑀝𑁆𑀞𑀫𑀸𑀦𑀲𑁆𑀲.

𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯 𑀑𑀓𑀸𑀲𑀸𑀧𑀤𑀺𑀲𑀦𑀲𑁆𑀲𑀸𑀧𑀺 𑀅𑀲𑀫𑁆𑀪𑀯𑀢𑁄 𑀅𑀢𑁆𑀣𑀦𑁆𑀢𑀭𑀲𑁆𑀲 𑀅𑀩𑁄𑀥𑀦𑀢𑁄. 𑀅𑀭𑀳𑀦𑁆𑀢𑀺 𑀆𑀤𑀬𑁄 𑀲𑀤𑁆𑀤𑀸 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀬𑁄𑀚𑀦𑀸. 𑀅𑀢𑁆𑀣𑀢𑁄 𑀯𑀺𑀢𑁆𑀣𑀸𑀭𑀡𑀁 𑀲𑀤𑁆𑀤𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 𑀲𑀤𑁆𑀤𑀕𑁆𑀕𑀳𑀡𑀁. 𑀬𑀲𑁆𑀫𑀸. ‘‘𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀦𑀸 𑀉𑀤𑀸𑀦𑀝𑁆𑀞𑀓𑀣𑀸𑀤𑀻𑀲𑀼, (𑀉𑀤𑀸. 𑀅𑀝𑁆𑀞. 𑁧𑁮; 𑀇𑀢𑀺𑀯𑀼. 𑀅𑀝𑁆𑀞. 𑁩𑁮) 𑀅𑀭𑀳𑀦𑁆𑀢𑀺 𑀆𑀤𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 𑀅𑀧𑀭𑁂𑀳𑀺 𑀧𑀓𑀸𑀭𑁂𑀳𑀺 𑀯𑀺𑀢𑁆𑀣𑀸𑀭𑀺𑀢𑀸, 𑀢𑀲𑁆𑀫𑀸𑀢𑁂𑀲𑀼 𑀯𑀼𑀢𑁆𑀢𑀸𑀦𑀬𑁂𑀦𑀧𑀺 𑀲𑁄 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁨𑁯, 𑁧𑁩𑁦) 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸𑀕𑀢𑀲𑁆𑀲 𑀲𑀢𑁆𑀢𑀦𑀺𑀓𑀸𑀬𑀦𑁆𑀢𑁄𑀕𑀥𑀢𑀸𑀬 ‘‘𑀇𑀥 𑀧𑀦 𑀲𑀢𑁆𑀢𑀮𑁄𑀓𑁄 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣𑀸𑀬𑀁 𑀬𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀬𑀲𑁆𑀫𑀺𑀜𑁆𑀘 𑀑𑀓𑀸𑀲𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀣𑀸𑀕𑀢𑁄 𑀦 𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀲𑀸𑀭𑀧𑁆𑀧𑀢𑁆𑀢𑀸𑀢𑀺 𑀓𑀼𑀮𑀪𑁄𑀕𑀺𑀲𑁆𑀲𑀭𑀺𑀬𑀸𑀤𑀺𑀯𑀲𑁂𑀦 𑀲𑀸𑀭𑀪𑀽𑀢𑀸. 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀢𑀺 𑀩𑁆𑀭𑀳𑁆𑀫𑀸𑀬𑀼𑀧𑁄𑀓𑁆𑀔𑀭𑀲𑀸𑀢𑀺𑀆𑀤𑀺𑀩𑁆𑀭𑀸𑀳𑁆𑀫𑀡𑀸 𑀘𑁂𑀯 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀺𑀕𑀳𑀧𑀢𑀺𑀓𑀸 𑀘.

‘‘𑀲𑀼𑀚𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼 𑀧𑀞𑀫𑁄 𑀯𑀺𑀓𑀧𑁆𑀧𑁄 𑀩𑀼𑀤𑁆𑀥𑀪𑀸𑀯𑀸𑀬 𑀆𑀲𑀦𑁆𑀦𑀢𑀭𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀆𑀲𑀦𑁆𑀦𑀢𑀭𑀸𑀬 𑀳𑀺 𑀧𑀝𑀺𑀧𑀢𑁆𑀢𑀺𑀬𑀸 𑀞𑀺𑀢𑁄 ‘‘𑀉𑀧𑁆𑀧𑀚𑁆𑀚𑀢𑀻𑀢𑀺’’ 𑀯𑀼𑀘𑁆𑀘𑀢𑀺 𑀉𑀧𑁆𑀧𑀸𑀤𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸, 𑀧𑀕𑁂𑀯 𑀧𑀝𑀺𑀧𑀢𑁆𑀢𑀺𑀬𑀸 𑀫𑀢𑁆𑀣𑀓𑁂 𑀞𑀺𑀢𑁄. 𑀤𑀼𑀢𑀺𑀬𑁄 𑀩𑀼𑀤𑁆𑀥𑀪𑀸𑀯𑀸𑀯𑀳𑀧𑀩𑁆𑀩𑀚𑁆𑀚𑀢𑁄 𑀧𑀝𑁆𑀞𑀸𑀬 𑀆𑀲𑀦𑁆𑀦𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦, 𑀢𑀢𑀺𑀬𑁄 𑀩𑀼𑀤𑁆𑀥𑀓𑀭𑀥𑀫𑁆𑀫 𑀧𑀸𑀭𑀺𑀧𑀽𑀭𑀺𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀪𑀸𑀯𑀸𑀬 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦. 𑀦 𑀳𑀺 𑀫𑀳𑀸𑀲𑀢𑁆𑀢𑀸𑀦𑀁 𑀉𑀧𑁆𑀧𑀢𑀺𑀪𑀯𑀽𑀧𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁 𑀦𑀸𑀫 𑀅𑀢𑁆𑀣𑀺. 𑀘𑀢𑀼𑀢𑁆𑀣𑁄 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀫𑀸𑀭𑀫𑁆𑀪𑀢𑁄 𑀧𑀝𑁆𑀞𑀸𑀬. 𑀩𑁄𑀥𑀺𑀬𑀸 𑀦𑀺𑀬𑀢𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀧𑀪𑀼𑀢𑀺 𑀳𑀺 𑀯𑀺𑀜𑁆𑀜𑀽𑀳𑀺 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸 𑀉𑀧𑁆𑀧𑀸𑀤𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸. 𑀬𑀣𑀸 𑀧𑀦 𑀲𑀦𑁆𑀤𑀦𑁆𑀢𑀺 𑀦𑀤𑀺𑀬𑁄𑀢𑀺 𑀲𑀦𑁆𑀤𑀦𑀓𑀺𑀭𑀺𑀬𑀸𑀬 𑀅𑀯𑀺𑀘𑁆𑀙𑁂𑀤𑀫𑀼𑀧𑀸𑀤𑀸𑀬 𑀯𑀢𑁆𑀢𑀫𑀸𑀦𑀧𑁆𑀧𑀬𑁄𑀕𑁄, 𑀏𑀯𑀁 𑀉𑀧𑁆𑀧𑀸𑀤𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑀓𑀺𑀭𑀺𑀬𑀸𑀬 𑀅𑀯𑀺𑀘𑁆𑀙𑁂𑀤𑀫𑀼𑀧𑀸𑀤𑀸𑀬 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼 ‘‘𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀧𑀞𑀫𑀁 𑀉𑀧𑁆𑀧𑀦𑁆𑀦𑀪𑀸𑀯𑀦𑁆𑀢𑀺 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼 𑀲𑀩𑁆𑀩𑀧𑀞𑀫𑀁 𑀯𑀼𑀢𑁆𑀢𑀁 𑀢𑀣𑀸𑀕𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀺𑀪𑀸𑀯𑀁. 𑀢𑁂𑀦𑀸𑀳 ‘‘𑀉𑀧𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄’’𑀢𑀺.

𑀲𑁄 𑀪𑀕𑀯𑀸𑀢𑀺 𑀬𑁄 ‘‘𑀢𑀣𑀸𑀕𑀢𑁄 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑀺𑀢𑀕𑀼𑀡𑁄, 𑀲𑁄 𑀪𑀕𑀯𑀸. ‘‘𑀇𑀫𑀁 𑀮𑁄𑀓’’𑀦𑁆𑀢𑀺 𑀦𑀬𑀺𑀤𑀁 𑀫𑀳𑀸𑀚𑀦𑀲𑁆𑀲 𑀲𑀫𑁆𑀫𑀼𑀔𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀦𑀯𑀲𑁂𑀲𑀁 𑀧𑀭𑀺𑀬𑀸𑀤𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦𑀸𑀳 ‘‘𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀻’’𑀢𑀺. 𑀧𑀚𑀸𑀢𑀢𑁆𑀢𑀸𑀢𑀺 𑀬𑀣𑀸𑀲𑀓𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸. 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀇𑀢𑀭𑁂𑀲𑀁 𑀧𑀤𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀲𑀤𑁂𑀯𑀓𑀦𑁆𑀢𑀺 𑀘 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄. 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦. 𑀢𑀢𑁆𑀣 𑀳𑀺 𑀲𑁄 𑀚𑀸𑀢𑁄, 𑀢𑀁𑀦𑀺𑀯𑀸𑀲𑀻 𑀘. 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀢𑁆𑀣𑀺𑀓 …𑀧𑁂… 𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀅𑀧𑀘𑁆𑀘𑀢𑁆𑀣𑀺𑀓𑀸𑀦𑀁, 𑀅𑀲𑀫𑀺𑀢𑀸𑀩𑀸𑀳𑀺𑀢𑀧𑀸𑀧𑀸𑀦𑀜𑁆𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀯𑀘𑀦𑁂𑀦 𑀕𑀳𑀺𑀢𑀢𑁆𑀢𑀸. 𑀓𑀸𑀫𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺 𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀲𑀢𑁆𑀢𑀯𑀺𑀲𑀬𑁄 𑀮𑁄𑀓𑀲𑀤𑁆𑀤𑁄𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀼𑀮𑁆𑀬𑀬𑁄𑀕𑀯𑀺𑀲𑀬𑀢𑁆𑀢𑀸 𑀢𑁂𑀲𑀁, ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀧𑀦 𑀅𑀢𑀼𑀮𑁆𑀬𑀬𑁄𑀕𑁂𑀧𑀺 𑀅𑀬𑀁 𑀲𑀫𑀸𑀲𑁄 𑀮𑀩𑁆𑀪𑀢𑀻𑀢𑀺 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀢𑁄 𑀧𑀚𑀸𑀕𑀳𑀡𑀦𑁆𑀢𑀺 𑀆𑀳 ‘‘𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡’’𑀦𑁆𑀢𑀺.

𑀅𑀭𑀽𑀧𑀺𑀦𑁄 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀸 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸𑀢𑀺 𑀇𑀫𑀁 𑀦𑀺𑀩𑁆𑀩𑀘𑀦𑀁 𑀮𑀪𑀦𑁆𑀢𑀻𑀢𑀺 𑀆𑀳 ‘‘𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀮𑁄𑀓𑁄 𑀕𑀳𑀺𑀢𑁄’’𑀢𑀺. 𑀢𑁂𑀦𑀸𑀳 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢’’𑀦𑁆𑀢𑀺 (𑀅. 𑀦𑀺. 𑁩.𑁧𑁧𑁭). 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄 𑀕𑀳𑀺𑀢𑁄 𑀢𑀲𑁆𑀲 𑀲𑀯𑀺𑀲𑁂𑀲𑀁 𑀫𑀸𑀭𑀲𑁆𑀲 𑀯𑀲𑁂 𑀯𑀢𑁆𑀢𑀦𑀢𑁄. 𑀭𑀽𑀧𑀻 𑀩𑁆𑀭𑀳𑁆𑀫𑀮𑁄𑀓𑁄 𑀕𑀳𑀺𑀢𑁄 𑀅𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸. 𑀘𑀢𑀼𑀧𑀭𑀺𑀲𑀯𑀲𑁂𑀦𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀘𑀢𑀼𑀧𑀭𑀺𑀲𑀯𑀲𑁂𑀦, 𑀇𑀢𑀭𑀸 𑀧𑀦 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀫𑀸𑀭𑀓𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀏𑀯𑀸𑀢𑀺. 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀦𑀸𑀕𑀕𑀭𑀼𑀴𑀸𑀤𑀺𑀪𑁂𑀤𑁄.

𑀏𑀢𑁆𑀢𑀸𑀯𑀢𑀸 𑀘 𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀅𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑁂𑀦. 𑀧𑀜𑁆𑀘𑀲𑀼 𑀳𑀺 𑀕𑀢𑀻𑀲𑀼 𑀤𑁂𑀯𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀯 𑀲𑁂𑀝𑁆𑀞𑀸, 𑀢𑀢𑁆𑀣𑀸𑀧𑀺 𑀅𑀭𑀽𑀧𑀺𑀦𑁄 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀓𑀺𑀮𑁂𑀲𑀤𑀼𑀓𑁆𑀔𑀢𑀸𑀬, 𑀲𑀦𑁆𑀢𑀧𑀡𑀻𑀢𑀆𑀦𑁂𑀜𑁆𑀚𑀯𑀺𑀳𑀸𑀭𑀲𑀫𑀗𑁆𑀕𑀺𑀢𑀸𑀬, 𑀅𑀢𑀺𑀤𑀻𑀖𑀸𑀬𑀼𑀓𑀢𑀸𑀬𑀸𑀢𑀺 𑀏𑀯𑀫𑀸𑀤𑀻𑀳𑀺 𑀯𑀺𑀲𑁂𑀲𑁂𑀳𑀺 𑀅𑀢𑀺𑀯𑀺𑀬 𑀉𑀓𑁆𑀓𑀝𑁆𑀞𑀸. ‘‘𑀩𑁆𑀭𑀳𑁆𑀫𑀸 𑀫𑀳𑀸𑀦𑀼𑀪𑀸𑀯𑁄’’𑀢𑀺𑀆𑀤𑀺 𑀤𑀲𑀲𑀳𑀲𑁆𑀲𑀺𑀬𑀁 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀯𑀲𑁂𑀦 𑀯𑀤𑀢𑀺. ‘‘𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀲𑁂𑀝𑁆𑀞𑀁 𑀦𑀯 𑀮𑁄𑀓𑀼𑀢𑁆𑀢𑀭𑀁. 𑀪𑀸𑀯𑀸𑀦𑀼𑀓𑁆𑀓𑀫𑁄𑀢𑀺 𑀪𑀸𑀯𑀯𑀲𑁂𑀦 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀦𑀼𑀓𑁆𑀓𑀫𑁄.

𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀲𑀳𑀺𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺. 𑀢𑀻𑀲𑀼 𑀧𑀤𑁂𑀲𑀽𑀢𑀺 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀻𑀲𑀼 𑀢𑀻𑀲𑀼 𑀧𑀤𑁂𑀲𑀼. 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀲𑀤𑁂𑀯𑀓𑀢𑁆𑀢𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦. 𑀢𑁂𑀥𑀸𑀢𑀼𑀓𑀫𑁂𑀯 𑀧𑀭𑀺𑀬𑀸𑀤𑀺𑀦𑁆𑀦𑀦𑁆𑀢𑀺 𑀧𑁄𑀭𑀸𑀡𑀸 𑀧𑀦𑀸𑀳𑀽𑀢𑀺 𑀬𑁄𑀚𑀦𑀸.

𑀅𑀪𑀺𑀜𑁆𑀜𑀸𑀢𑀺 𑀬-𑀓𑀸𑀭𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄, 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀺𑀜𑁆𑀜𑀸𑀬 𑀅𑀥𑀺𑀓𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸’’𑀢𑀺. 𑀅𑀦𑀼𑀫𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀦𑀼𑀫𑀸𑀦𑀉𑀧𑀫𑀸𑀦𑀅𑀢𑁆𑀣𑀸𑀧𑀢𑁆𑀢𑀺𑀆𑀤𑀺𑀧𑀝𑀺𑀓𑁆𑀔𑁂𑀧𑁄 𑀏𑀓𑀧𑁆𑀧𑀫𑀸𑀡𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀳𑀺 𑀲𑀩𑁆𑀩𑀧𑀘𑁆𑀘𑀓𑁆𑀔𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄.

𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁, 𑀢𑁂𑀦 𑀞𑀺𑀢𑀺𑀫𑀺𑀲𑁆𑀲𑀸𑀧𑀺 [𑀯𑀻𑀣𑀺𑀫𑀺𑀲𑁆𑀲𑀸𑀧𑀺 (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸𑀬𑀁) 𑀥𑀺𑀢𑀺𑀫𑀺𑀲𑁆𑀲𑀸𑀧𑀺 (𑀓)] 𑀓𑀤𑀸𑀘𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻𑀢𑀺 𑀳𑀺𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑀕𑁆𑀕𑀳𑀡𑀁. 𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀬𑀲𑁆𑀫𑀺𑀁 𑀔𑀡𑁂 𑀧𑀭𑀺𑀲𑀸 𑀲𑀸𑀥𑀼𑀓𑀸𑀭𑀁 𑀯𑀸 𑀤𑁂𑀢𑀺, 𑀬𑀣𑀸𑀲𑀼𑀢𑀁 𑀯𑀸 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀔𑀡𑀁 𑀧𑀼𑀩𑁆𑀩𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀬𑀣𑀸𑀧𑀭𑀺𑀘𑁆𑀙𑁂𑀤𑀜𑁆𑀘 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀯𑀸 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲, 𑀦𑁂𑀬𑁆𑀬𑀲𑁆𑀲 𑀯𑀸 𑀯𑀲𑁂𑀦 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄. 𑀥𑀫𑁆𑀫𑀲𑁆𑀲 𑀓𑀮𑁆𑀬𑀸𑀡𑀢𑀸 𑀦𑀺𑀬𑁆𑀬𑀸𑀦𑀺𑀓𑀢𑀸𑀬, 𑀦𑀺𑀬𑁆𑀬𑀸𑀦𑀺𑀓𑀢𑀸 𑀘 𑀲𑀩𑁆𑀩𑀲𑁄 𑀅𑀦𑀯𑀚𑁆𑀚𑀪𑀸𑀯𑁂𑀦𑁂𑀯𑀸𑀢𑀺 𑀆𑀳 ‘‘𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸’’𑀢𑀺. 𑀤𑁂𑀲𑀓𑀸𑀬𑀢𑁆𑀢𑁂𑀦 𑀆𑀡𑀸𑀤𑀺𑀯𑀺𑀥𑀺𑀦𑀸 𑀅𑀪𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸𑀢𑀺 𑀲𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀤𑁂𑀲𑀦𑀸𑀬 𑀢𑀸𑀯 𑀘𑀢𑀼𑀧𑁆𑀧𑀤𑀺𑀓𑀸𑀬𑀧𑀺 𑀕𑀸𑀣𑀸𑀬𑀸’’𑀢𑀺𑀆𑀤𑀺. 𑀦𑀺𑀤𑀸𑀦𑀦𑀺𑀕𑀫𑀦𑀸𑀦𑀺𑀧𑀺 𑀲𑀢𑁆𑀣𑀼𑀦𑁄 𑀤𑁂𑀲𑀦𑀸𑀬 𑀅𑀦𑀼𑀯𑀺𑀥𑀸𑀦𑀢𑁄 𑀢𑀤𑀦𑁆𑀢𑁄𑀕𑀥𑀸𑀦𑀺 𑀏𑀯𑀸𑀢𑀺 𑀆𑀳 ‘‘𑀦𑀺𑀤𑀸𑀦𑀫𑀸𑀤𑀺, 𑀇𑀤𑀁 𑀏𑀯𑁄𑀘𑀸𑀢𑀺 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺.

𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑁂𑀦 𑀬𑀣𑀸𑀧𑀭𑀸𑀥𑀸𑀤𑀺𑀲𑀸𑀲𑀺𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀲𑀸𑀲𑀦𑀁 𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀺𑀦𑀬𑀦𑀁 𑀲𑀸𑀲𑀦𑀦𑁆𑀢𑀺 𑀢𑀁 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸’’𑀢𑀺𑀆𑀤𑀺. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀲𑀻𑀮𑀲𑁆𑀲, 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀜𑁆𑀘 𑀲𑀻𑀮𑀤𑀺𑀝𑁆𑀞𑀻𑀦𑀁 𑀆𑀤𑀺𑀪𑀸𑀯𑁄 𑀢𑀁 𑀫𑀽𑀮𑀓𑀢𑁆𑀢𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑁆𑀢𑀤𑁆𑀯𑀬𑀯𑀺𑀕𑀫𑁂𑀦 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀪𑀸𑀯𑁄 𑀯𑀺𑀬, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀩𑁆𑀪𑀦𑀺𑀧𑁆𑀨𑀢𑁆𑀢𑀻𑀦𑀁 𑀯𑁂𑀫𑀚𑁆𑀛𑀢𑁆𑀢𑀸𑀧𑀺 𑀫𑀚𑁆𑀛𑀪𑀸𑀯𑁄𑀢𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂…𑀧𑁂… 𑀫𑀚𑁆𑀛𑀁 𑀦𑀸𑀫𑀸’’𑀢𑀺. 𑀨𑀮𑀁 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀲𑀉𑀧𑀸𑀤𑀺𑀲𑁂𑀲𑀢𑀸𑀯𑀲𑁂𑀦, 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀅𑀦𑀼𑀧𑀸𑀤𑀺𑀲𑁂𑀲𑀢𑀸𑀯𑀲𑁂𑀦. 𑀇𑀤𑀸𑀦𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀸𑀲𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀢𑀁 𑀆𑀕𑀫𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀢𑀤𑀢𑁆𑀣𑀫𑀺𑀤’’𑀦𑁆𑀢𑀺𑀆𑀤𑀺 𑀆𑀳. 𑀇𑀥 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀅𑀥𑀺𑀧𑁆𑀧𑁂𑀢𑀁 ‘‘𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺𑀆𑀤𑀺 𑀯𑀘𑀦𑀢𑁄. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀓𑀢𑀸𑀯𑀥𑀺𑀲𑀤𑁆𑀤𑀧𑁆𑀧𑀩𑀦𑁆𑀥𑁄 𑀕𑀸𑀣𑀸𑀯𑀲𑁂𑀦, 𑀲𑀼𑀢𑁆𑀢𑀯𑀲𑁂𑀦 𑀘 𑀯𑀯𑀢𑁆𑀣𑀺𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄, 𑀬𑁄 𑀇𑀥 ‘‘𑀤𑁂𑀲𑀦𑀸’’𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀧𑀦 𑀅𑀢𑁆𑀣𑁄 𑀯𑀺𑀲𑁂𑀲𑀢𑁄 𑀲𑀻𑀮𑀸𑀤𑀺 𑀏𑀯𑀸𑀢𑀺 𑀆𑀳 ‘‘𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀢𑀢𑁆𑀣 𑀲𑀻𑀮𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀻𑀮𑀕𑁆𑀕𑀳𑀡𑁂𑀦 𑀲𑀲𑀫𑁆𑀪𑀸𑀭𑀁 𑀲𑀻𑀮𑀁 𑀕𑀳𑀺𑀢𑀁, 𑀢𑀣𑀸 𑀫𑀕𑁆𑀕𑀕𑁆𑀕𑀳𑀡𑁂𑀦 𑀲𑀲𑀫𑁆𑀪𑀸𑀭𑁄 𑀫𑀕𑁆𑀕𑁄𑀢𑀺 𑀢𑀤𑀼𑀪𑀬𑀯𑀲𑁂𑀦 𑀅𑀦𑀯𑀲𑁂𑀲𑀢𑁄 𑀧𑀭𑀺𑀬𑀢𑁆𑀢𑀺 𑀅𑀢𑁆𑀣𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀢𑁂𑀦𑀸𑀢𑀺 𑀲𑀻𑀮𑀸𑀤𑀺𑀤𑀲𑁆𑀲𑀦𑁂𑀦. 𑀅𑀢𑁆𑀣𑀯𑀲𑁂𑀦 𑀳𑀺 𑀇𑀥 𑀤𑁂𑀲𑀦𑀸𑀬 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀣𑀺𑀓𑀲𑀡𑁆𑀞𑀺𑀢𑀻𑀢𑀺 𑀓𑀣𑀺𑀓𑀲𑁆𑀲 𑀲𑀡𑁆𑀞𑀸𑀦𑀁 𑀓𑀣𑀦𑀯𑀲𑁂𑀦 𑀲𑀫𑀯𑀝𑁆𑀞𑀸𑀦𑀁.

𑀦 𑀲𑁄 𑀲𑀸𑀢𑁆𑀣𑀁 𑀤𑁂𑀲𑁂𑀢𑀺 𑀦𑀺𑀬𑁆𑀬𑀸𑀦𑀢𑁆𑀣𑀯𑀺𑀭𑀳𑀢𑁄 𑀢𑀲𑁆𑀲𑀸 𑀤𑁂𑀲𑀦𑀸𑀬. 𑀏𑀓𑀩𑁆𑀬𑀜𑁆𑀚𑀦𑀸𑀤𑀺𑀬𑀼𑀢𑁆𑀢𑀸 𑀯𑀸𑀢𑀺 𑀲𑀺𑀣𑀺𑀮𑀸𑀤𑀺𑀪𑁂𑀤𑁂𑀲𑀼 𑀩𑁆𑀬𑀜𑁆𑀚𑀦𑁂𑀲𑀼 𑀏𑀓𑀧𑁆𑀧𑀓𑀸𑀭𑁂𑀫𑁂𑀯, 𑀤𑁆𑀯𑀺𑀧𑀓𑀸𑀭𑁂𑀫𑁂𑀯 𑀯𑀸 𑀩𑁆𑀬𑀜𑁆𑀚𑀦𑁂𑀦 𑀬𑀼𑀢𑁆𑀢𑀸 𑀯𑀸 𑀤𑀫𑀺𑀴𑀪𑀸𑀲𑀸 𑀯𑀺𑀬. 𑀯𑀺𑀯𑀝𑀓𑀭𑀡𑀢𑀸𑀬 𑀑𑀝𑁆𑀞𑁂 𑀅𑀨𑀼𑀲𑀸𑀧𑁂𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀢𑁄 𑀲𑀩𑁆𑀩𑀦𑀺𑀭𑁄𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀓𑀺𑀭𑀸𑀢𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀲𑁆𑀲𑁂𑀯 [𑀲𑀩𑁆𑀩𑀢𑁆𑀣𑁂𑀯 (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸𑀬𑀁 𑁧)] 𑀯𑀺𑀲𑁆𑀲𑀚𑁆𑀚𑀦𑀻𑀬𑀬𑀼𑀢𑁆𑀢𑀢𑀸𑀬 𑀲𑀩𑁆𑀩𑀯𑀺𑀲𑁆𑀲𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀲𑀯𑀭𑀪𑀸𑀲𑀸 [𑀬𑀯𑀦𑀪𑀸𑀲𑀸 (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸𑀬𑀁)] 𑀯𑀺𑀬. 𑀲𑀩𑁆𑀩𑀲𑁆𑀲𑁂𑀯 [𑀲𑀩𑁆𑀩𑀢𑁆𑀣𑁂𑀯 (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸𑀬𑀁)] 𑀲𑀸𑀦𑀼𑀲𑀸𑀭𑀢𑀸𑀬 𑀲𑀩𑁆𑀩𑀦𑀺𑀕𑁆𑀕𑀳𑀺𑀢𑀩𑁆𑀬𑀜𑁆𑀚𑀦𑀸 𑀯𑀸 𑀧𑀸𑀭𑀲𑀺𑀓𑀸𑀤𑀺𑀫𑀺𑀮𑀓𑁆𑀔𑀼𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀸𑀧𑁂𑀲𑀸 𑀩𑁆𑀬𑀜𑁆𑀚𑀦𑁂𑀓𑀤𑁂𑀲𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀅𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀸𑀢𑀺 𑀓𑀢𑁆𑀯𑀸 ‘‘𑀅𑀩𑁆𑀬𑀜𑁆𑀚𑀦𑀸’’𑀢𑀺 𑀯𑀼𑀢𑁆𑀢𑀸.

𑀞𑀸𑀦𑀓𑀭𑀡𑀸𑀦𑀺 𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀓𑁆𑀔𑀭𑀁 𑀧𑀜𑁆𑀘𑀲𑀼 𑀯𑀕𑁆𑀕𑁂𑀲𑀼 𑀧𑀞𑀫𑀢𑀢𑀺𑀬𑀦𑁆𑀢𑀺 𑀏𑀯𑀫𑀸𑀤𑀺 𑀲𑀺𑀣𑀺𑀮𑀁. 𑀢𑀸𑀦𑀺 𑀅𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀓𑁆𑀔𑀭𑀁 𑀯𑀕𑁆𑀕𑁂𑀲𑀼 𑀤𑀼𑀢𑀺𑀬𑀘𑀢𑀼𑀢𑁆𑀣𑀦𑁆𑀢𑀺 𑀏𑀯𑀫𑀸𑀤𑀺 𑀥𑀦𑀺𑀢𑀁. 𑀤𑁆𑀯𑀺𑀫𑀢𑁆𑀢𑀓𑀸𑀮𑀁 𑀤𑀻𑀖𑀁. 𑀏𑀓𑀫𑀢𑁆𑀢𑀓𑀸𑀮𑀁 𑀭𑀲𑁆𑀲𑀁 𑀢𑀤𑁂𑀯 𑀮𑀳𑀼𑀓𑀁. 𑀮𑀳𑀼𑀓𑀫𑁂𑀯 𑀲𑀁𑀬𑁄𑀕𑀧𑀭𑀁, 𑀤𑀻𑀖𑀜𑁆𑀘 𑀕𑀭𑀼𑀓𑀁. 𑀞𑀸𑀦𑀓𑀭𑀡𑀸𑀦𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀦𑀺𑀕𑁆𑀕𑀳𑀺𑀢𑀁. 𑀧𑀭𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀲𑀫𑁆𑀩𑀦𑁆𑀥𑀁. 𑀢𑀣𑀸 𑀦𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁. 𑀞𑀸𑀦𑀓𑀭𑀡𑀸𑀦𑀺 𑀦𑀺𑀲𑁆𑀲𑀝𑁆𑀞𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀯𑀺𑀫𑀼𑀢𑁆𑀢𑀁. 𑀤𑀲𑀥𑀸𑀢𑀺 𑀏𑀯𑀁 𑀲𑀺𑀣𑀺𑀮𑀸𑀤𑀺𑀯𑀲𑁂𑀦 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀅𑀓𑁆𑀔𑀭𑀼𑀧𑁆𑀧𑀸𑀤𑀓𑀘𑀺𑀢𑁆𑀢𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦 𑀧𑀪𑁂𑀤𑁄. 𑀲𑀩𑁆𑀩𑀸𑀦𑀺 𑀳𑀺 𑀅𑀓𑁆𑀔𑀭𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀁 𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀸𑀦𑀺 𑀘𑀸𑀢𑀺.

𑀅𑀫𑀓𑁆𑀔𑁂𑀢𑁆𑀯𑀸𑀢𑀺 𑀅𑀫𑀺𑀮𑁂𑀘𑁆𑀙𑁂𑀢𑁆𑀯𑀸, 𑀅𑀯𑀺𑀦𑀸𑀲𑁂𑀢𑁆𑀯𑀸, 𑀅𑀳𑀸𑀧𑁂𑀢𑁆𑀯𑀸𑀢𑀺 𑀯𑀸 𑀅𑀢𑁆𑀣𑁄. 𑀪𑀕𑀯𑀸 𑀬𑀫𑀢𑁆𑀣𑀁 𑀜𑀸𑀧𑁂𑀢𑀼𑀁 𑀏𑀓𑀁 𑀕𑀸𑀣𑀁, 𑀏𑀓𑀁 𑀯𑀸𑀓𑁆𑀬𑀁 𑀯𑀸 𑀤𑁂𑀲𑁂𑀢𑀺, 𑀢𑀫𑀢𑁆𑀣𑀁 𑀢𑀸𑀬 𑀤𑁂𑀲𑀦𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸𑀬 𑀏𑀯 𑀤𑁂𑀲𑁂𑀢𑀻𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀫𑁂𑀯 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺. 𑀇𑀥 𑀓𑁂𑀯𑀮𑀲𑀤𑁆𑀤𑁄 𑀅𑀦𑀯𑀲𑁂𑀲𑀯𑀸𑀘𑀓𑁄, 𑀦 𑀅𑀯𑁄𑀫𑀺𑀲𑁆𑀲𑀓𑀸𑀤𑀺𑀯𑀸𑀘𑀓𑁄𑀢𑀺 𑀆𑀳 ‘‘𑀲𑀓𑀮𑀸𑀥𑀺𑀯𑀘𑀦’’𑀦𑁆𑀢𑀺. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀩𑁆𑀩𑀲𑁄 𑀧𑀼𑀡𑁆𑀡𑀁, 𑀢𑀁 𑀧𑀦 𑀓𑁂𑀦𑀘𑀺 𑀊𑀦𑀁, 𑀅𑀥𑀺𑀓𑀁 𑀯𑀸 𑀦 𑀳𑁄𑀢𑀻𑀢𑀺 ‘‘𑀅𑀦𑀽𑀦𑀸𑀥𑀺𑀓𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀢𑁆𑀣𑀁 𑀤𑁂𑀲𑀺𑀢𑁄, 𑀢𑀲𑁆𑀲 𑀲𑀸𑀥𑀓𑀢𑁆𑀢𑀸 𑀅𑀦𑀽𑀦𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀢𑀩𑁆𑀩𑀺𑀥𑀼𑀭𑀲𑁆𑀲 𑀧𑀦 𑀅𑀲𑀸𑀥𑀓𑀢𑁆𑀢𑀸 𑀅𑀦𑀥𑀺𑀓𑀢𑀸. 𑀲𑀓𑀮𑀦𑁆𑀢𑀺 𑀲𑀩𑁆𑀩𑀪𑀸𑀕𑀯𑀦𑁆𑀢𑀁. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀫𑁂𑀯, 𑀢𑁂𑀦𑀸𑀳 ‘‘𑀏𑀓𑀤𑁂𑀲𑀦𑀸𑀧𑀺 𑀅𑀧𑀭𑀺𑀧𑀼𑀡𑁆𑀡𑀸 𑀦𑀢𑁆𑀣𑀻’’𑀢𑀺. 𑀅𑀧𑀭𑀺𑀲𑀼𑀤𑁆𑀥𑀸 𑀤𑁂𑀲𑀦𑀸 𑀳𑁄𑀢𑀺 𑀢𑀡𑁆𑀳𑀸𑀬 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸. 𑀮𑁄𑀓𑀸𑀫𑀺𑀲𑀁 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑀸 𑀢𑀢𑁆𑀣 𑀅𑀕𑀥𑀺𑀢𑀘𑀺𑀢𑁆𑀢𑀢𑀸𑀬 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑁄. 𑀳𑀺𑀢𑀨𑀭𑀡𑁂𑀦𑀸𑀢𑀺 𑀳𑀺𑀢𑀽𑀧𑀲𑀁𑀳𑀸𑀭𑁂𑀦. 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀓𑀭𑀡𑀪𑀽𑀢𑀸𑀬 𑀫𑀼𑀤𑀼𑀳𑀤𑀬𑁄. 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦𑀸𑀢𑀺 𑀲𑀓𑀮𑀲𑀁𑀓𑀺𑀮𑁂𑀲𑀢𑁄, 𑀯𑀝𑁆𑀝𑀤𑀼𑀓𑁆𑀔𑀢𑁄 𑀘 𑀉𑀤𑁆𑀥𑀭𑀡𑀸𑀓𑀸𑀭𑀸𑀯𑀝𑁆𑀞𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀓𑀸𑀭𑀼𑀡𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀅𑀢𑁆𑀣𑁄.

‘‘𑀇𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑀸𑀫𑁂𑀯, 𑀏𑀯𑀜𑁆𑀘 𑀤𑀲𑁆𑀲𑀸𑀫𑀻’’𑀢𑀺 𑀲𑀫𑀸𑀤𑀸𑀢𑀩𑁆𑀩𑀝𑁆𑀞𑁂𑀦 𑀯𑀢𑀁. 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀢𑀸𑀬 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀁 𑀩𑁆𑀭𑀳𑁆𑀫𑀸𑀦𑀁 𑀯𑀸 𑀘𑀭𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀤𑀸𑀦𑀁. 𑀫𑀘𑁆𑀙𑀭𑀺𑀬𑀮𑁄𑀪𑀸𑀤𑀺𑀦𑀺𑀕𑁆𑀕𑀡𑁆𑀳𑀦𑁂𑀦 𑀲𑀼𑀘𑀺𑀡𑁆𑀡𑀲𑁆𑀲. 𑀇𑀤𑁆𑀥𑀻𑀢𑀺 𑀤𑁂𑀯𑀺𑀤𑁆𑀥𑀺. 𑀚𑀼𑀢𑀻𑀢𑀺 𑀧𑀪𑀸, 𑀆𑀦𑀼𑀪𑀸𑀯𑁄 𑀯𑀸. 𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀻𑀢𑀺 𑀏𑀯𑀁 𑀫𑀳𑀢𑀸 𑀩𑀮𑁂𑀦 𑀘 𑀯𑀻𑀭𑀺𑀬𑁂𑀦 𑀘 𑀲𑀫𑀦𑁆𑀦𑀸𑀕𑀫𑁄. 𑀧𑀼𑀜𑁆𑀜𑀦𑁆𑀢𑀺 𑀧𑀼𑀜𑁆𑀜𑀨𑀮𑀁. 𑀯𑁂𑀬𑁆𑀬𑀸𑀯𑀘𑁆𑀘𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑁂𑀝𑁆𑀞𑀸 𑀘𑀭𑀺𑀬𑀸𑀢𑀺 𑀓𑀢𑁆𑀯𑀸. 𑀏𑀲 𑀦𑀬𑁄 𑀲𑁂𑀲𑁂𑀧𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀁 𑀲𑀸𑀲𑀦𑀁 𑀇𑀥 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀢𑀲𑁆𑀫𑀸. ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺 𑀲𑀩𑁆𑀩𑀧𑀤𑀸𑀦𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺…𑀧𑁂… 𑀧𑀓𑀸𑀲𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀆𑀳.

𑁧𑁯𑁧. 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀫𑁆𑀧𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀺𑀕𑀼𑀡𑀲𑀫𑁆𑀧𑀤𑀁, 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀫𑀸𑀦𑀲𑁆𑀲𑁂𑀯 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀲𑀫𑁆𑀪𑀯𑀢𑀺, 𑀦 𑀫𑀸𑀦𑀚𑀸𑀢𑀺𑀓𑀲𑁆𑀲𑀸𑀢𑀺 𑀆𑀳 ‘‘𑀦𑀺𑀳𑀢𑀫𑀸𑀦𑀢𑁆𑀢𑀸’’𑀢𑀺. 𑀉𑀲𑁆𑀲𑀦𑁆𑀦𑀢𑁆𑀢𑀸𑀢𑀺 𑀩𑀳𑀼𑀮𑀪𑀸𑀯𑀢𑁄. 𑀪𑁄𑀕𑀸𑀭𑁄𑀕𑁆𑀬𑀸𑀤𑀺𑀯𑀢𑁆𑀣𑀼𑀓𑀸 𑀫𑀤𑀸 𑀲𑀼𑀧𑁆𑀧𑀳𑁂𑀬𑁆𑀬𑀸 𑀳𑁄𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑀯𑀢𑁆𑀣𑀸𑀦𑀢𑁄, 𑀦 𑀢𑀣𑀸 𑀓𑀼𑀮𑀯𑀺𑀚𑁆𑀚𑀸𑀫𑀤𑀸, 𑀢𑀲𑁆𑀫𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀚𑀸𑀢𑀺𑀯𑀺𑀚𑁆𑀚𑀸 𑀦𑀺𑀲𑁆𑀲𑀸𑀬 𑀫𑀸𑀦𑀚𑀧𑁆𑀧𑀦𑀁 𑀤𑀼𑀧𑁆𑀧𑀚𑀳𑀦𑁆𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑁂𑀦 𑀳𑀺…𑀧𑁂… 𑀫𑀸𑀦𑀁 𑀓𑀭𑁄𑀦𑁆𑀢𑀻’’𑀢𑀺. 𑀯𑀺𑀚𑀸𑀢𑀺𑀢𑀸𑀬𑀸𑀢𑀺 𑀦𑀺𑀳𑀻𑀦𑀚𑀸𑀢𑀺𑀢𑀸𑀬. 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀼𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀻𑀮𑀯𑀲𑁂𑀦 𑀳𑀺 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸, 𑀧𑀢𑀺𑀝𑁆𑀞𑀸𑀢𑀼𑀦𑁆𑀢𑀺 𑀯𑀸 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀮𑁄𑀓𑀼𑀢𑁆𑀢𑀭𑀸𑀬 𑀧𑀢𑀺𑀝𑁆𑀞𑀸𑀬 𑀧𑀢𑀺𑀝𑁆𑀞𑀸𑀢𑀼𑀁. 𑀲𑀸 𑀳𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸 𑀦𑀸𑀫, 𑀬𑁂𑀪𑀼𑀬𑁆𑀬𑁂𑀦 𑀘 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀲𑀼𑀚𑀸𑀢𑀸 𑀏𑀯 𑀳𑁄𑀦𑁆𑀢𑀺, 𑀦 𑀤𑀼𑀚𑁆𑀚𑀸𑀢𑀸.

𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀭𑀸𑀕𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀫𑁂𑀯 𑀧𑀳𑀸𑀦𑀤𑀻𑀧𑀦𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀲𑀩𑁆𑀩𑀲𑁄 𑀧𑀭𑀺𑀲𑀼𑀤𑁆𑀥𑀁. 𑀲𑀤𑁆𑀥𑀁 𑀧𑀝𑀺𑀮𑀪𑀢𑀻𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀲𑀤𑁆𑀥𑀸𑀯𑀲𑁂𑀦 𑀲𑀤𑁆𑀤𑀳𑀢𑀺. 𑀯𑀺𑀜𑁆𑀜𑀽𑀚𑀸𑀢𑀺𑀓𑀸𑀦𑀜𑁆𑀳𑀺 𑀥𑀫𑁆𑀫𑀲𑀫𑁆𑀧𑀢𑁆𑀢𑀺𑀕𑁆𑀕𑀳𑀡𑀧𑀼𑀩𑁆𑀩𑀺𑀓𑀸 𑀲𑀤𑁆𑀥𑀸 𑀲𑀺𑀤𑁆𑀥𑀺 𑀥𑀫𑁆𑀫𑀧𑁆𑀧𑀫𑀸𑀡𑀥𑀫𑁆𑀫𑀧𑁆𑀧𑀲𑀦𑁆𑀦𑀪𑀸𑀯𑀢𑁄. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸, 𑀬𑁄 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑀥𑀫𑁆𑀫𑁄’’𑀢𑀺 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀚𑀸𑀬𑀫𑁆𑀧𑀢𑀺𑀓𑀸𑀢𑀺 𑀖𑀭𑀡𑀻𑀧𑀢𑀺𑀓𑀸. 𑀓𑀸𑀫𑀁 ‘‘𑀚𑀸𑀬𑀫𑁆𑀧𑀢𑀺𑀓𑀸’’𑀢𑀺 𑀯𑀼𑀢𑁆𑀢𑁂 𑀖𑀭𑀲𑀸𑀫𑀺𑀓𑀖𑀭𑀲𑀸𑀫𑀺𑀦𑀻𑀯𑀲𑁂𑀦 𑀤𑁆𑀯𑀺𑀦𑁆𑀦𑀁𑀬𑁂𑀯 𑀕𑀳𑀡𑀁 𑀯𑀺𑀜𑁆𑀜𑀸𑀬𑀢𑀺. 𑀬𑀲𑁆𑀲 𑀧𑀦 𑀧𑀼𑀭𑀺𑀲𑀲𑁆𑀲 𑀅𑀦𑁂𑀓𑀸 𑀧𑀚𑀸𑀧𑀢𑀺𑀬𑁄, 𑀢𑀢𑁆𑀣 𑀓𑀺𑀁 𑀯𑀢𑁆𑀢𑀩𑁆𑀩𑀁, 𑀏𑀓𑀸𑀬𑀸𑀧𑀺 𑀲𑀁𑀯𑀸𑀲𑁄 𑀲𑀫𑁆𑀩𑀸𑀥𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀁. 𑀭𑀸𑀕𑀸𑀤𑀺𑀦𑀸 𑀲𑀓𑀺𑀜𑁆𑀘𑀦𑀝𑁆𑀞𑁂𑀦, 𑀔𑁂𑀢𑁆𑀢𑀯𑀢𑁆𑀣𑀼 𑀆𑀤𑀺𑀦𑀸 𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀭𑀸𑀕𑀭𑀚𑀸𑀤𑀻𑀦𑀁 𑀆𑀕𑀫𑀦𑀧𑀣𑀢𑀸𑀧𑀺 𑀉𑀝𑁆𑀞𑀸𑀦𑀝𑁆𑀞𑀸𑀦𑀢𑀸 𑀏𑀯𑀸𑀢𑀺 𑀤𑁆𑀯𑁂𑀧𑀺 𑀯𑀡𑁆𑀡𑀦𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀅𑀮𑀕𑁆𑀕𑀦𑀝𑁆𑀞𑁂𑀦𑀸𑀢𑀺 𑀅𑀲𑁆𑀲𑀚𑁆𑀚𑀦𑀝𑁆𑀞𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀪𑀸𑀯𑁂𑀦. 𑀏𑀯𑀁 𑀅𑀓𑀼𑀲𑀮𑀓𑀼𑀲𑀮𑀧𑁆𑀧𑀯𑀢𑁆𑀢𑀻𑀦𑀁 𑀞𑀸𑀦𑀪𑀸𑀯𑁂𑀦 𑀖𑀭𑀸𑀯𑀸𑀲𑀧𑀩𑁆𑀩𑀚𑁆𑀚𑀸𑀦𑀁 𑀲𑀫𑁆𑀩𑀸𑀥𑀩𑁆𑀪𑁄𑀓𑀸𑀲𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀅𑀝𑁆𑀞𑀸𑀦𑀝𑁆𑀞𑀸𑀦𑀪𑀸𑀯𑁂𑀦 𑀢𑁂𑀲𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀗𑁆𑀔𑁂𑀧𑀓𑀣𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀤𑀼𑀤𑁆𑀥𑀸𑀭𑀁 𑀅𑀓𑀢𑁆𑀯𑀸 𑀲𑀫𑀸𑀲𑀢𑁄 𑀅𑀢𑁆𑀣𑀯𑀡𑁆𑀡𑀦𑀸. 𑀏𑀓𑀫𑁆𑀧𑀺 𑀤𑀺𑀯𑀲𑀦𑁆𑀢𑀺 𑀏𑀓𑀤𑀺𑀯𑀲𑀫𑀢𑁆𑀢𑀫𑁆𑀧𑀺. 𑀅𑀔𑀡𑁆𑀟𑀁 𑀓𑀢𑁆𑀯𑀸𑀢𑀺 𑀤𑀼𑀓𑁆𑀓𑀝𑀫𑀢𑁆𑀢𑀲𑁆𑀲𑀧𑀺 𑀅𑀦𑀸𑀧𑀚𑁆𑀚𑀦𑁂𑀦 𑀅𑀔𑀡𑁆𑀟𑀺𑀢𑀁 𑀓𑀢𑁆𑀯𑀸. 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀻𑀦𑀦𑁆𑀢𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀦𑀸 𑀅𑀲𑀁𑀓𑀺𑀮𑀺𑀝𑁆𑀞𑀁 𑀓𑀢𑁆𑀯𑀸. 𑀧𑀭𑀺𑀬𑁄𑀤𑀸𑀢𑀝𑁆𑀞𑁂𑀦 𑀦𑀺𑀫𑁆𑀫𑀮𑀪𑀸𑀯𑁂𑀦 𑀲𑀗𑁆𑀔𑀁 𑀯𑀺𑀬 𑀮𑀺𑀔𑀺𑀢𑀁 𑀥𑁄𑀢𑀦𑁆𑀢𑀺 𑀲𑀗𑁆𑀔𑀮𑀺𑀔𑀺𑀢𑀦𑁆𑀢𑀺 𑀆𑀳 ‘‘𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕’’𑀦𑁆𑀢𑀺. ‘‘𑀅𑀚𑁆𑀛𑀸𑀯𑀲𑀢𑀸’’𑀢𑀺 𑀧𑀤𑀧𑁆𑀧𑀬𑁄𑀕𑁂𑀦 ‘‘𑀅𑀕𑀸𑀭’’𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀕𑀸𑀭𑀫𑀚𑁆𑀛𑁂’’𑀢𑀺. 𑀓𑀲𑀸𑀬𑁂𑀦 𑀭𑀢𑁆𑀢𑀸𑀦𑀺 𑀯𑀢𑁆𑀣𑀸𑀦𑀺 𑀓𑀸𑀲𑀸𑀬𑀸𑀦𑀻𑀢𑀺 𑀆𑀳 ‘‘𑀓𑀲𑀸𑀬𑀭𑀲𑀧𑀻𑀢𑀢𑀸𑀬𑀸’’𑀢𑀺. 𑀧𑀭𑀺𑀤𑀳𑀺𑀢𑁆𑀯𑀸𑀢𑀺 𑀦𑀺𑀯𑀸𑀲𑁂𑀢𑁆𑀯𑀸 𑀘𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑀘. 𑀅𑀕𑀸𑀭𑀯𑀸𑀲𑁄 𑀅𑀕𑀸𑀭𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀲𑁆𑀲 𑀯𑀟𑁆𑀠𑀺𑀆𑀯𑀳𑀁 𑀅𑀕𑀸𑀭𑀲𑁆𑀲 𑀳𑀺𑀢𑀁.

𑁧𑁯𑁨. 𑀪𑁄𑀕𑀓𑁆𑀔𑀦𑁆𑀥𑁄𑀢𑀺 𑀪𑁄𑀕𑀲𑀫𑀼𑀤𑀸𑀬𑁄. 𑀆𑀩𑀦𑁆𑀥𑀦𑀝𑁆𑀞𑁂𑀦𑀸𑀢𑀺 ‘‘𑀧𑀼𑀢𑁆𑀢𑁄 𑀦𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑁂𑀫𑀯𑀲𑁂𑀦 𑀲𑀧𑀭𑀺𑀘𑁆𑀙𑁂𑀤𑀁 𑀩𑀦𑁆𑀥𑀦𑀝𑁆𑀞𑁂𑀦. ‘‘𑀅𑀫𑁆𑀳𑀸𑀓𑀫𑁂𑀢𑁂’’𑀢𑀺 𑀜𑀸𑀬𑀦𑁆𑀢𑀻𑀢𑀺 𑀜𑀸𑀢𑀻. 𑀧𑀺𑀢𑀸𑀫𑀳𑀧𑀺𑀢𑀼𑀧𑀼𑀢𑁆𑀢𑀸𑀤𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀝𑁆𑀞𑁂𑀦 𑀧𑀭𑀺𑀯𑀝𑁆𑀝𑁄.

𑁧𑁯𑁩. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀧𑀺𑀳𑀺𑀢𑀓𑀸𑀬𑀯𑀘𑀻𑀤𑁆𑀯𑀸𑀭𑁄, 𑀢𑀣𑀸𑀪𑀽𑀢𑁄 𑀘 𑀬𑀲𑁆𑀫𑀸 𑀢𑁂𑀦 𑀲𑀁𑀯𑀭𑁂𑀦 𑀉𑀧𑁂𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺 𑀢𑀲𑁆𑀲𑁂𑀯 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀫𑀦𑁆𑀦𑀸𑀕𑀫𑀲𑁆𑀲 𑀧𑀘𑁆𑀘𑀬𑀤𑀲𑁆𑀲𑀦𑀁. 𑀅𑀧𑁆𑀧𑀫𑀢𑁆𑀢𑀓𑁂𑀲𑀽𑀢𑀺 𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀅𑀦𑀼𑀔𑀼𑀤𑁆𑀤𑀓𑁂𑀲𑀼 𑀘𑁂𑀯 𑀲𑀳𑀲𑀸 𑀉𑀧𑁆𑀧𑀦𑁆𑀦𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀘. 𑀪𑀬𑀤𑀲𑁆𑀲𑀸𑀯𑀻𑀢𑀺 𑀪𑀬𑀤𑀲𑁆𑀲𑀦𑀲𑀻𑀮𑁄. 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸𑀢𑀺 𑀲𑀓𑁆𑀓𑀘𑁆𑀘𑀁 𑀬𑀸𑀯𑀚𑀻𑀯𑀁 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀆𑀤𑀺𑀬𑀺𑀢𑁆𑀯𑀸. 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀢𑀁 𑀢𑀁 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺 𑀧𑀸𑀞𑁂. 𑀲𑀗𑁆𑀔𑁂𑀧𑁄𑀢𑀺 𑀲𑀗𑁆𑀔𑁂𑀧𑀯𑀡𑁆𑀡𑀦𑀸. 𑀯𑀺𑀢𑁆𑀣𑀸𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪) 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀲𑁄 𑀢𑀢𑁆𑀣, 𑀢𑀁𑀲𑀁𑀯𑀡𑁆𑀡𑀦𑀸𑀬 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁪) 𑀘 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀆𑀘𑀸𑀭𑀕𑁄𑀘𑀭𑀕𑁆𑀕𑀳𑀡𑁂𑀦𑁂𑀯𑀸𑀢𑀺 ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀘𑀦𑁂𑀦𑁂𑀯. 𑀢𑁂𑀦𑀸𑀳 ‘‘𑀓𑀼𑀲𑀮𑁂 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂 𑀕𑀳𑀺𑀢𑁂𑀧𑀻’’𑀢𑀺. 𑀅𑀥𑀺𑀓𑀯𑀘𑀦𑀁 𑀅𑀜𑁆𑀜𑀫𑀢𑁆𑀣𑀁 𑀩𑁄𑀥𑁂𑀢𑀻𑀢𑀺 𑀓𑀢𑁆𑀯𑀸 𑀢𑀲𑁆𑀲 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀤𑀲𑁆𑀲𑀦𑀢𑁆𑀣𑀁…𑀧𑁂… 𑀓𑀼𑀲𑀮𑁂𑀦𑀸𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀲𑁄 𑀅𑀦𑁂𑀲𑀦𑀧𑁆𑀧𑀳𑀸𑀦𑁂𑀦 𑀅𑀦𑀯𑀚𑁆𑀚𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 ‘‘𑀓𑀢𑀫𑁂 𑀘 𑀣𑀧𑀢𑀺 𑀓𑀼𑀲𑀮𑀸 𑀲𑀻𑀮𑀸 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀓𑀼𑀲𑀮𑀁 𑀯𑀘𑀻𑀓𑀫𑁆𑀫’’𑀦𑁆𑀢𑀺 (𑀫. 𑀦𑀺. 𑁨.𑁨𑁬𑁫) 𑀲𑀻𑀮𑀲𑁆𑀲 𑀓𑀼𑀲𑀮𑀓𑀸𑀬𑀯𑀘𑀻𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀆𑀚𑀻𑀯𑀧𑀭𑀺𑀲𑀼𑀤𑁆𑀥𑀫𑁆𑀧𑀺 𑀔𑁄 𑀅𑀳𑀁 𑀣𑀧𑀢𑀺 𑀲𑀻𑀮𑀲𑁆𑀫𑀺𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁨.𑁨𑁬𑁫) 𑀏𑀯𑀁 𑀧𑀯𑀢𑁆𑀢𑀸𑀬 𑀫𑀼𑀡𑁆𑀟𑀺𑀓𑀲𑀼𑀢𑁆𑀢𑀤𑁂𑀲𑀦𑀸𑀬 ‘‘𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀼𑀲𑀮𑁂𑀦, 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄’’𑀢𑀺 𑀅𑀬𑀁 𑀤𑁂𑀲𑀦𑀸 𑀏𑀓𑀲𑀗𑁆𑀕𑀳𑀸 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀼𑀡𑁆𑀟𑀺𑀓𑀲𑀼𑀢𑁆𑀢𑀯𑀲𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺. 𑀲𑀻𑀮𑀲𑁆𑀫𑀺𑀁 𑀯𑀤𑀸𑀫𑀻𑀢𑀺 ‘‘𑀲𑀻𑀮’’𑀦𑁆𑀢𑀺 𑀯𑀤𑀸𑀫𑀺, ‘‘𑀲𑀻𑀮𑀲𑁆𑀫𑀺𑀁 𑀅𑀦𑁆𑀢𑁄𑀕𑀥𑀁 𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 𑀯𑀤𑀸𑀫𑀻𑀢𑀺 𑀯𑀸 𑀅𑀢𑁆𑀣𑁄. 𑀧𑀭𑀺𑀬𑀸𑀤𑀸𑀦𑀢𑁆𑀣𑀦𑁆𑀢𑀺 𑀧𑀭𑀺𑀕𑁆𑀕𑀳𑀢𑁆𑀣𑀁.

𑀢𑀺𑀯𑀺𑀥𑁂𑀦 𑀲𑀻𑀮𑁂𑀦𑀸𑀢𑀺 𑀘𑀽𑀴𑀲𑀻𑀮𑀁 𑀫𑀚𑁆𑀛𑀺𑀫𑀲𑀻𑀮𑀁 𑀫𑀳𑀸𑀲𑀻𑀮𑀦𑁆𑀢𑀺 𑀏𑀯𑀁 𑀢𑀺𑀯𑀺𑀥𑁂𑀦 𑀲𑀻𑀮𑁂𑀦. 𑀫𑀦𑀘𑁆𑀙𑀝𑁆𑀞𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼, 𑀦 𑀓𑀸𑀬𑀧𑀜𑁆𑀘𑀫𑁂𑀲𑀼. 𑀬𑀣𑀸𑀮𑀸𑀪𑀬𑀣𑀸𑀩𑀮𑀬𑀣𑀸𑀲𑀸𑀭𑀼𑀧𑁆𑀧𑀧𑁆𑀧𑀓𑀸𑀭𑀯𑀲𑁂𑀦 𑀢𑀺𑀯𑀺𑀥𑁂𑀦 𑀲𑀦𑁆𑀢𑁄𑀲𑁂𑀦.

𑀘𑀽𑀴𑀫𑀚𑁆𑀛𑀺𑀫𑀫𑀳𑀸𑀲𑀻𑀮𑀯𑀡𑁆𑀡𑀦𑀸

𑁧𑁯𑁪-𑁨𑁧𑁧. ‘‘𑀲𑀻𑀮𑀲𑁆𑀫𑀺’’𑀦𑁆𑀢𑀺 𑀇𑀤𑀁 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀏𑀓𑀁 𑀲𑀻𑀮𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀅𑀬𑀫𑁂𑀯 𑀅𑀢𑁆𑀣𑁄𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀣𑁄 𑀏𑀯. 𑀩𑁆𑀭𑀳𑁆𑀫𑀚𑀸𑀮𑁂𑀢𑀺 𑀩𑁆𑀭𑀳𑁆𑀫𑀚𑀸𑀮𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁭).

𑁨𑁧𑁨. 𑀅𑀢𑁆𑀢𑀸𑀦𑀼𑀯𑀸𑀤𑀧𑀭𑀸𑀦𑀼𑀯𑀸𑀤𑀤𑀡𑁆𑀟𑀪𑀬𑀸𑀤𑀻𑀦𑀺 𑀅𑀲𑀁𑀯𑀭𑀫𑀽𑀮𑀓𑀸𑀦𑀺. 𑀲𑀻𑀮𑀲𑁆𑀲𑀸𑀲𑀁𑀯𑀭𑀢𑁄𑀢𑀺 𑀲𑀻𑀮𑀲𑁆𑀲 𑀅𑀲𑀁𑀯𑀭𑀡𑀢𑁄, 𑀲𑀻𑀮𑀲𑀁𑀯𑀭𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀪𑀯𑁂𑀬𑁆𑀬𑀸𑀢𑀺 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀬𑀣𑀸𑀯𑀺𑀥𑀸𑀦𑀯𑀺𑀳𑀺𑀢𑁂𑀦𑀸𑀢𑀺 𑀬𑀣𑀸𑀯𑀺𑀥𑀸𑀦𑀲𑀫𑁆𑀧𑀸𑀤𑀺𑀢𑁂𑀦. 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀘𑁂𑀢𑀲𑀺𑀓𑀲𑀼𑀔𑀲𑀫𑀼𑀝𑁆𑀞𑀸𑀦𑁂𑀳𑀺 𑀧𑀡𑀻𑀢𑀭𑀽𑀧𑁂𑀳𑀺 𑀨𑀼𑀝𑁆𑀞𑀲𑀭𑀻𑀭𑀲𑁆𑀲 𑀉𑀴𑀸𑀭𑀁 𑀓𑀸𑀬𑀺𑀓𑀁 𑀲𑀼𑀔𑀁 𑀪𑀯𑀢𑀻𑀢𑀺 𑀆𑀳 ‘‘𑀅𑀯𑀺𑀧𑁆𑀧𑀝𑀺𑀲𑀸𑀭…𑀧𑁂… 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸

𑁨𑁧𑁩. 𑀯𑀺𑀲𑁂𑀲𑁄 𑀓𑀫𑁆𑀫𑀢𑁆𑀣𑀸𑀧𑁂𑀓𑁆𑀔𑀢𑀸𑀬 𑀲𑀸𑀫𑀜𑁆𑀜𑀲𑁆𑀲 𑀦 𑀢𑁂𑀳𑀺 𑀧𑀭𑀺𑀘𑀢𑁆𑀢𑁄𑀢𑀺 𑀆𑀳 ‘‘𑀘𑀓𑁆𑀔𑀼-𑀲𑀤𑁆𑀤𑁄 𑀓𑀢𑁆𑀣𑀘𑀺 𑀩𑀼𑀤𑁆𑀥𑀘𑀓𑁆𑀔𑀼𑀫𑁆𑀳𑀺 𑀯𑀢𑁆𑀢𑀢𑀻’’𑀢𑀺. 𑀯𑀺𑀚𑁆𑀚𑀫𑀸𑀦𑀫𑁂𑀯 𑀳𑀺 𑀅𑀪𑀺𑀥𑁂𑀬𑁆𑀬𑁂 𑀯𑀺𑀲𑁂𑀲𑀢𑁆𑀣𑀁 𑀯𑀺𑀲𑁂𑀲𑀦𑁆𑀢𑀭𑀦𑀺𑀯𑀢𑁆𑀢𑀦𑀯𑀲𑁂𑀦 𑀯𑀺𑀲𑁂𑀲𑀲𑀤𑁆𑀤𑁄 𑀯𑀺𑀪𑀸𑀯𑁂𑀢𑀺, 𑀦 𑀅𑀯𑀺𑀚𑁆𑀚𑀫𑀸𑀦𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀘𑀓𑁆𑀔𑀼𑀤𑀲𑁆𑀲𑀦𑀦𑁆𑀢𑀺 𑀩𑀼𑀤𑁆𑀥𑀘𑀓𑁆𑀔𑀼, 𑀆𑀲𑀬𑀸𑀦𑀼𑀲𑀬𑀜𑀸𑀡𑀁, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀜𑁆𑀘. 𑀲𑀫𑀦𑁆𑀢𑀢𑁄 𑀲𑀩𑁆𑀩𑀲𑁄 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑀦𑁆𑀢𑀘𑀓𑁆𑀔𑀼, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀅𑀭𑀺𑀬𑀫𑀕𑁆𑀕𑀢𑁆𑀢𑀬𑀧𑀜𑁆𑀜𑀸𑀢𑀺 𑀳𑁂𑀝𑁆𑀞𑀺𑀫𑁂 𑀅𑀭𑀺𑀬𑀫𑀕𑁆𑀕𑀢𑁆𑀢𑀬𑁂 𑀧𑀜𑁆𑀜𑀸. 𑀇𑀥𑀸𑀢𑀺 ‘‘𑀘𑀓𑁆𑀔𑀼𑀦𑀸 𑀭𑀽𑀧’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀸𑀞𑁂. 𑀅𑀬𑀁 𑀘𑀓𑁆𑀔𑀼-𑀲𑀤𑁆𑀤𑁄 𑀧𑀲𑀸𑀤…𑀧𑁂… 𑀯𑀢𑁆𑀢𑀢𑀺 𑀦𑀺𑀲𑁆𑀲𑀬𑀯𑁄𑀳𑀸𑀭𑁂 𑀦𑀺𑀲𑁆𑀲𑀺𑀢𑀲𑁆𑀲 𑀯𑀢𑁆𑀢𑀩𑁆𑀩𑀢𑁄 𑀬𑀣𑀸. ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀓𑀺𑀮𑁂𑀲𑀤𑀼𑀓𑁆𑀔𑁂𑀦 𑀅𑀯𑁄𑀫𑀺𑀲𑁆𑀲𑀁. 𑀢𑁂𑀦𑀸𑀳 ‘‘𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀲𑀢𑀺 𑀳𑀺 𑀲𑀼𑀯𑀺𑀲𑀼𑀤𑁆𑀥𑁂 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂, 𑀧𑀥𑀸𑀦𑀪𑀽𑀢𑀧𑀸𑀧𑀥𑀫𑁆𑀫𑀯𑀺𑀕𑀫𑁂𑀦 𑀅𑀥𑀺𑀘𑀺𑀢𑁆𑀢𑀸𑀦𑀼𑀬𑁄𑀕𑁄 𑀳𑀢𑁆𑀣𑀕𑀢𑁄 𑀏𑀯𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀥𑀺𑀘𑀺𑀢𑁆𑀢𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺.

𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁨𑁧𑁪. 𑀲𑀫𑀦𑁆𑀢𑀢𑁄, 𑀧𑀓𑀝𑁆𑀞𑀁 𑀯𑀸 𑀲𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄, 𑀲𑀫𑁆𑀧𑀚𑀸𑀦𑀲𑁆𑀲 𑀪𑀸𑀯𑁄 𑀲𑀫𑁆𑀧𑀚𑀜𑁆𑀜𑀁, 𑀢𑀣𑀸𑀧𑀯𑀢𑁆𑀢𑀜𑀸𑀡𑀁. 𑀢𑀲𑁆𑀲 𑀯𑀺𑀪𑀚𑀦𑀁 𑀲𑀫𑁆𑀧𑀚𑀜𑁆𑀜𑀪𑀸𑀚𑀦𑀻𑀬𑀁, 𑀢𑀲𑁆𑀫𑀺𑀁 𑀲𑀫𑁆𑀧𑀚𑀜𑁆𑀜𑀪𑀸𑀚𑀦𑀻𑀬𑀫𑁆𑀳𑀺. 𑀅𑀪𑀺𑀓𑁆𑀓𑀫𑀦𑀁 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀆𑀳 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀯𑀼𑀘𑁆𑀘𑀢𑀺 𑀕𑀫𑀦’’𑀦𑁆𑀢𑀺. 𑀢𑀣𑀸 𑀧𑀝𑀺𑀓𑁆𑀓𑀫𑀦𑀁 𑀧𑀝𑀺𑀓𑁆𑀓𑀦𑁆𑀢𑀦𑁆𑀢𑀺 𑀆𑀳 ‘‘𑀧𑀝𑀺𑀓𑁆𑀓𑀦𑁆𑀢𑀁 𑀦𑀺𑀯𑀢𑁆𑀢𑀦’’𑀦𑁆𑀢𑀺. 𑀦𑀺𑀯𑀢𑁆𑀢𑀦𑀦𑁆𑀢𑀺 𑀘 𑀦𑀺𑀯𑀢𑁆𑀢𑀺𑀫𑀢𑁆𑀢𑀁. 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀦 𑀕𑀫𑀦𑀁 𑀕𑀫𑀦𑀫𑁂𑀯. 𑀅𑀪𑀺𑀳𑀭𑀦𑁆𑀢𑁄𑀢𑀺 𑀕𑀫𑀦𑀯𑀲𑁂𑀦 𑀓𑀸𑀬𑀁 𑀉𑀧𑀦𑁂𑀦𑁆𑀢𑁄. 𑀞𑀸𑀦𑀦𑀺𑀲𑀚𑁆𑀚𑀸𑀲𑀬𑀦𑁂𑀲𑀼 𑀬𑁄 𑀕𑀫𑀦𑀯𑀺𑀥𑀼𑀭𑁄 𑀓𑀸𑀬𑀲𑁆𑀲 𑀧𑀼𑀭𑀢𑁄 𑀅𑀪𑀺𑀳𑀸𑀭𑁄, 𑀲𑁄 𑀅𑀪𑀺𑀓𑁆𑀓𑀫𑁄, 𑀧𑀘𑁆𑀙𑀢𑁄 𑀅𑀧𑀳𑀭𑀡𑀁 𑀧𑀝𑀺𑀓𑁆𑀓𑀫𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀞𑀸𑀦𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀆𑀲𑀦𑀲𑁆𑀲𑀸𑀢𑀺 𑀧𑀻𑀞𑀓𑀸𑀤𑀺𑀆𑀲𑀦𑀲𑁆𑀲. 𑀧𑀼𑀭𑀺𑀫𑀅𑀗𑁆𑀕𑀸𑀪𑀺𑀫𑀼𑀔𑁄𑀢𑀺 𑀅𑀝𑀦𑀺𑀓𑀸𑀤𑀺𑀧𑀼𑀭𑀺𑀫𑀸𑀯𑀬𑀯𑀸𑀪𑀺𑀫𑀼𑀔𑁄. 𑀲𑀁𑀲𑀭𑀦𑁆𑀢𑁄𑀢𑀺 𑀲𑀁𑀲𑀧𑁆𑀧𑀦𑁆𑀢𑁄. 𑀧𑀘𑁆𑀘𑀸𑀲𑀁𑀲𑀭𑀦𑁆𑀢𑁄𑀢𑀺 𑀧𑀝𑀺𑀆𑀲𑀧𑁆𑀧𑀦𑁆𑀢𑁄. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀦𑀺𑀧𑀦𑁆𑀦𑀲𑁆𑀲𑁂𑀯 𑀅𑀪𑀺𑀫𑀼𑀔𑀲𑀁𑀲𑀧𑁆𑀧𑀦𑀧𑀝𑀺𑀆𑀲𑀧𑁆𑀧𑀦𑀸𑀦𑀺 𑀦𑀺𑀤𑀲𑁆𑀲𑁂𑀢𑀺.

𑀲𑀫𑁆𑀫𑀸 𑀧𑀚𑀸𑀦𑀦𑀁 𑀲𑀫𑁆𑀧𑀚𑀸𑀦𑀁, 𑀢𑁂𑀦 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀭𑀡𑀲𑀻𑀮𑁄 𑀲𑀫𑁆𑀧𑀚𑀸𑀦𑀓𑀸𑀭𑀻𑀢𑀺 𑀆𑀳 ‘‘𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀻’’𑀢𑀺. 𑀲𑀫𑁆𑀧𑀚𑀸𑀦𑀲𑀤𑁆𑀤𑀲𑁆𑀲 𑀲𑀫𑁆𑀧𑀚𑀜𑁆𑀜𑀧𑀭𑀺𑀬𑀸𑀬𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀏𑀯. 𑀲𑀫𑁆𑀧𑀚𑀜𑁆𑀜𑀁 𑀓𑀭𑁄𑀢𑁂𑀯𑀸𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀅𑀲𑀫𑁆𑀫𑁄𑀳𑀁 𑀉𑀧𑁆𑀧𑀸𑀤𑁂𑀢𑀺 𑀏𑀯. 𑀲𑀫𑁆𑀧𑀚𑀜𑁆𑀜𑀲𑁆𑀲 𑀯𑀸 𑀓𑀸𑀭𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀫𑁆𑀧𑀚𑀸𑀦𑀓𑀸𑀭𑀻. 𑀥𑀫𑁆𑀫𑀢𑁄 𑀯𑀟𑁆𑀠𑀺𑀲𑀗𑁆𑀔𑀸𑀢𑁂𑀦 𑀲𑀳 𑀅𑀢𑁆𑀣𑁂𑀦 𑀯𑀢𑁆𑀢𑀢𑀻𑀢𑀺 𑀲𑀸𑀢𑁆𑀣𑀓𑀁, 𑀅𑀪𑀺𑀓𑁆𑀓𑀦𑁆𑀢𑀸𑀤𑀺. 𑀲𑀸𑀢𑁆𑀣𑀓𑀲𑁆𑀲 𑀲𑀫𑁆𑀧𑀚𑀸𑀦𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀲𑀧𑁆𑀧𑀸𑀬𑀲𑁆𑀲 𑀅𑀢𑁆𑀢𑀦𑁄 𑀳𑀺𑀢𑀲𑁆𑀲 𑀲𑀫𑁆𑀧𑀚𑀸𑀦𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂, 𑀅𑀜𑁆𑀜𑀢𑁆𑀣𑀸𑀧𑀺 𑀘 𑀧𑀯𑀢𑁆𑀢𑁂𑀲𑀼 𑀅𑀯𑀺𑀚𑀳𑀺𑀢𑁂 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀕𑁄𑀘𑀭𑁂 𑀲𑀫𑁆𑀧𑀚𑀜𑁆𑀜𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀫𑁂𑀯 𑀲𑀫𑁆𑀧𑀚𑀜𑁆𑀜𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀢𑀽𑀮𑁂𑀢𑁆𑀯𑀸 𑀢𑀻𑀭𑁂𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀬𑀸𑀢𑀺, 𑀅𑀢𑁆𑀣𑁄. 𑀲𑀗𑁆𑀖𑀤𑀲𑁆𑀲𑀦𑁂𑀦𑁂𑀯 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀺𑀅𑀢𑁆𑀣𑀁 𑀕𑀫𑀦𑀁 𑀲𑀗𑁆𑀕𑀳𑀺𑀢𑀁. 𑀅𑀲𑀼𑀪𑀤𑀲𑁆𑀲𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀤𑀺𑀲𑁆𑀯𑀸𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀏𑀲𑁄. 𑀲𑀫𑀣𑀯𑀺𑀧𑀲𑁆𑀲𑀦𑀼𑀧𑁆𑀧𑀸𑀤𑀦𑀫𑁆𑀧𑀺 𑀳𑀺 𑀪𑀺𑀓𑁆𑀔𑀼𑀦𑁄 𑀯𑀟𑁆𑀠𑀺𑀬𑁂𑀯. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄.

𑀢𑀲𑁆𑀫𑀺𑀁 𑀧𑀦𑀸𑀢𑀺 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀧𑀭𑀺𑀕𑁆𑀕𑀳𑀺𑀢𑀅𑀢𑁆𑀣𑁂. ‘‘𑀅𑀢𑁆𑀣𑁄𑀢𑀺 𑀥𑀫𑁆𑀫𑀢𑁄 𑀯𑀟𑁆𑀠𑀻’’𑀢𑀺 𑀬𑀁 𑀲𑀸𑀢𑁆𑀣𑀓𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀲𑀧𑁆𑀧𑀸𑀬𑀁 𑀏𑀯𑀸𑀢𑀺 𑀲𑀺𑀬𑀸 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀘𑁂𑀢𑀺𑀬𑀤𑀲𑁆𑀲𑀦𑀁 𑀢𑀸𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀸𑀦𑀺 𑀯𑀺𑀬𑀸𑀢𑀺 𑀘𑀺𑀢𑁆𑀢𑀓𑀫𑁆𑀫𑀓𑀢𑀸 𑀧𑀝𑀺𑀫𑀸𑀬𑁄 𑀯𑀺𑀬, 𑀬𑀦𑁆𑀢𑀧𑀬𑁄𑀕𑁂𑀦 𑀯𑀸 𑀯𑀺𑀘𑀺𑀢𑁆𑀢𑀓𑀫𑁆𑀫𑀸 𑀧𑀝𑀺𑀫𑀸𑀬𑁄 𑀯𑀺𑀬. 𑀅𑀲𑀫𑀧𑁂𑀓𑁆𑀔𑀦𑀁 𑀕𑁂𑀳𑀲𑁆𑀲𑀺𑀢 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀅𑀬𑁄𑀦𑀺𑀲𑁄 𑀕𑀳𑀡𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺 (𑀫. 𑀦𑀺. 𑁩.𑁩𑁦𑁮). 𑀳𑀢𑁆𑀣𑀺𑀆𑀤𑀺𑀲𑀫𑁆𑀫𑀤𑁆𑀤𑁂𑀦 𑀚𑀻𑀯𑀺𑀢𑀦𑁆𑀢𑀭𑀸𑀬𑁄. 𑀯𑀺𑀲𑀪𑀸𑀕𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄.

𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀅𑀦𑀼𑀯𑀢𑁆𑀢𑀦𑀓𑀣𑀸 𑀆𑀘𑀺𑀡𑁆𑀡𑀸, 𑀅𑀦𑀦𑀼𑀯𑀢𑁆𑀢𑀦𑀓𑀣𑀸 𑀧𑀦 𑀢𑀲𑁆𑀲𑀸 𑀤𑀼𑀢𑀺𑀬𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀤𑁆𑀯𑁂 𑀓𑀣𑀸 𑀦𑀸𑀫 𑀦 𑀓𑀣𑀺𑀢𑀧𑀼𑀩𑁆𑀩𑀸’’𑀢𑀺. 𑀏𑀯𑀦𑁆𑀢𑀺 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀯𑀼𑀢𑁆𑀢𑀸𑀓𑀸𑀭𑀁 𑀧𑀘𑁆𑀘𑀸𑀫𑀲𑀢𑀺, 𑀦 ‘‘𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀕𑀸𑀫𑀸𑀲𑀼𑀪’’𑀦𑁆𑀢𑀺𑀆𑀤𑀺𑀓𑀁 𑀯𑀼𑀘𑁆𑀘𑀫𑀸𑀦𑀁.

𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀪𑀸𑀯𑀦𑀸𑀬 𑀆𑀭𑀫𑁆𑀫𑀡𑀁 ‘‘𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀕𑁄𑀘𑀭’’𑀦𑁆𑀢𑀺. 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀬𑀣𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀲𑁆𑀲 𑀲𑀫𑁆𑀧𑀸𑀤𑀦𑀯𑀲𑁂𑀦 𑀉𑀕𑁆𑀕𑀳𑁂𑀢𑁆𑀯𑀸.

𑀳𑀭𑀢𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀯𑀢𑁆𑀢𑁂𑀢𑀺, 𑀬𑀸𑀯 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀫𑀸 𑀅𑀦𑀼𑀬𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦 𑀧𑀘𑁆𑀘𑀸𑀳𑀭𑀢𑀻𑀢𑀺 𑀆𑀳𑀸𑀭𑀽𑀧𑀬𑁄𑀕𑀢𑁄 𑀬𑀸𑀯 𑀤𑀺𑀯𑀸𑀞𑀸𑀦𑀼𑀧𑀲𑀗𑁆𑀓𑀫𑀦𑀸 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀝𑀺𑀦𑁂𑀢𑀺. 𑀲𑀭𑀻𑀭𑀧𑀭𑀺𑀓𑀫𑁆𑀫𑀦𑁆𑀢𑀺 𑀫𑀼𑀔𑀥𑁄𑀯𑀦𑀸𑀤𑀺𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁. 𑀤𑁆𑀯𑁂 𑀢𑀬𑁄 𑀧𑀮𑁆𑀮𑀗𑁆𑀓𑁂𑀢𑀺 𑀤𑁆𑀯𑁂 𑀢𑀬𑁄 𑀦𑀺𑀲𑀚𑁆𑀚𑀸𑀯𑀸𑀭𑁂 𑀤𑁆𑀯𑁂 𑀢𑀻𑀡𑀺 𑀉𑀡𑁆𑀳𑀸𑀲𑀦𑀸𑀦𑀺. 𑀢𑁂𑀦𑀸𑀳 ‘‘𑀉𑀲𑀼𑀫𑀁 𑀕𑀸𑀳𑀸𑀧𑁂𑀦𑁆𑀢𑁄’’𑀢𑀺. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀼𑀔𑁂𑀦𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑁆𑀢𑁄 𑀏𑀯, 𑀢𑁂𑀦 ‘‘𑀧𑀢𑁆𑀢𑁄𑀧𑀺 𑀅𑀘𑁂𑀢𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁪) 𑀯𑀓𑁆𑀔𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀬𑀣𑀸𑀧𑀭𑀺𑀳𑀭𑀺𑀬𑀫𑀸𑀦𑀁 𑀯𑀸 𑀅𑀯𑀺𑀚𑀳𑀺𑀢𑁆𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀣𑁂𑀯𑀸𑀢𑀺 𑀢𑀺𑀓𑁆𑀔𑀢𑁆𑀢𑀼𑀫𑁂𑀯. 𑀧𑀭𑀺𑀪𑁄𑀕𑀘𑁂𑀢𑀺𑀬𑀢𑁄 𑀲𑀸𑀭𑀻𑀭𑀺𑀓𑀘𑁂𑀢𑀺𑀬𑀁 𑀕𑀭𑀼𑀢𑀭𑀦𑁆𑀢𑀺 𑀓𑀢𑁆𑀯𑀸 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀬 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀘𑁂𑀢𑀺𑀬𑀁 𑀩𑀸𑀥𑀬𑀫𑀸𑀦𑀸 𑀩𑁄𑀥𑀺𑀲𑀸𑀔𑀸 𑀳𑀭𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦𑁂𑀯 𑀩𑁄𑀥𑀺𑀬𑀁 𑀧𑀡𑀺𑀧𑀸𑀢𑀓𑀭𑀡𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀯𑀺𑀬 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀕𑀸𑀫𑀲𑀫𑀻𑀧𑁂𑀢𑀺 𑀕𑀸𑀫𑀲𑁆𑀲 𑀉𑀧𑀘𑀸𑀭𑀝𑁆𑀞𑀸𑀦𑁂. 𑀚𑀦𑀲𑀗𑁆𑀕𑀳𑀢𑁆𑀣𑀦𑁆𑀢𑀺 ‘‘𑀫𑀬𑀺 𑀅𑀓𑀣𑁂𑀦𑁆𑀢𑁂 𑀏𑀢𑁂𑀲𑀁 𑀓𑁄 𑀓𑀣𑁂𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀚𑀦𑀲𑀗𑁆𑀕𑀳𑀢𑁆𑀣𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀥𑀫𑁆𑀫𑀓𑀣𑀸 𑀦𑀸𑀫 𑀓𑀣𑁂𑀢𑀩𑁆𑀩𑀸 𑀏𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑀤𑀦𑁆𑀢𑀺, 𑀬𑀲𑁆𑀫𑀸 𑀘 𑀥𑀫𑁆𑀫𑀓𑀣𑀸 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑀸 𑀧𑀭𑀺𑀳𑀭𑀺𑀬𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑁆𑀢𑁄 𑀢𑀤𑀦𑀼𑀕𑀼𑀡𑀁𑀬𑁂𑀯 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸. 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀲𑀫𑁆𑀧𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀦𑁂𑀯𑀸𑀢𑀺 ‘‘𑀧𑀭𑀺𑀘𑀺𑀢𑁄 𑀅𑀧𑀭𑀺𑀘𑀺𑀢𑁄’’𑀢𑀺𑀆𑀤𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀓𑁄𑀝𑀺𑀬𑀸 𑀏𑀯, 𑀲𑀫𑀸𑀕𑀫𑀫𑀢𑁆𑀢𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀪𑀬𑁂𑀢𑀺 𑀧𑀭𑀘𑀓𑁆𑀓𑀸𑀤𑀺𑀪𑀬𑁂.

‘‘𑀓𑀫𑁆𑀫𑀚𑀢𑁂𑀚𑁄’’𑀢𑀺 𑀕𑀳𑀡𑀺𑀁 𑀲𑀦𑁆𑀥𑀸𑀬𑀸𑀳. 𑀓𑀫𑁆𑀫𑀝𑁆𑀞𑀸𑀦𑀁 𑀯𑀻𑀣𑀺𑀁 𑀦𑀸𑀭𑁄𑀳𑀢𑀺 𑀔𑀼𑀤𑀸𑀧𑀭𑀺𑀲𑁆𑀲𑀫𑁂𑀦 𑀓𑀺𑀮𑀦𑁆𑀢𑀓𑀸𑀬𑀢𑁆𑀢𑀸 𑀲𑀫𑀸𑀥𑀸𑀦𑀸𑀪𑀸𑀯𑀢𑁄. 𑀅𑀯𑀲𑁂𑀲𑀝𑁆𑀞𑀸𑀦𑁂𑀢𑀺 𑀬𑀸𑀕𑀼𑀬𑀸 𑀅𑀕𑁆𑀕𑀳𑀺𑀢𑀝𑁆𑀞𑀸𑀦𑁂. 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀼𑀧𑀝𑁆𑀞𑀸𑀦𑀲𑁆𑀲 𑀅𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀫𑁂𑀢𑀁, 𑀬𑀣𑀸 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀧𑀯𑀢𑁆𑀢𑀸𑀬 𑀲𑀭𑀧𑀝𑀺𑀧𑀸𑀢𑀺𑀬𑀸 𑀅𑀦𑀯𑀺𑀘𑁆𑀙𑁂𑀤𑁄, 𑀏𑀯𑀫𑁂𑀢𑀲𑁆𑀲𑀧𑀻𑀢𑀺.

𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀪𑀸𑀯𑀦𑀸𑀦𑀼𑀬𑁄𑀕𑁂. 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑀽𑀭𑀡𑁂𑀦 𑀲𑀩𑁆𑀩𑀯𑀢𑁆𑀢𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸. ‘‘𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺, 𑀓𑀸𑀬𑁂 𑀅𑀯𑀻𑀢𑀭𑀸𑀕𑁄, 𑀭𑀽𑀧𑁂 𑀅𑀯𑀻𑀢𑀭𑀸𑀕𑁄, 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁦; 𑀫. 𑀦𑀺. 𑁧.𑁧𑁮𑁬) 𑀏𑀯𑀁 𑀯𑀼𑀢𑁆𑀢𑀧𑀜𑁆𑀘𑀯𑀺𑀥𑀘𑁂𑀢𑁄𑀔𑀺𑀮𑀯𑀺𑀦𑀺𑀩𑀦𑁆𑀥𑀘𑀺𑀢𑁆𑀢𑁄. 𑀘𑀭𑀺𑀢𑁆𑀯𑀸𑀢𑀺 𑀧𑀯𑀢𑁆𑀢𑀺𑀢𑁆𑀯𑀸.

𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀯𑀲𑁂𑀦𑀸𑀢𑀺 𑀪𑀸𑀯𑀦𑀸𑀲𑀳𑀺𑀢𑀁𑀬𑁂𑀯 𑀪𑀺𑀓𑁆𑀔𑀸𑀬 𑀕𑀢𑀧𑀘𑁆𑀘𑀸𑀕𑀢𑀁 𑀕𑀫𑀦𑀧𑀘𑁆𑀘𑀸𑀕𑀫𑀦𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀕𑀢𑀧𑀘𑁆𑀘𑀸𑀕𑀢𑀺𑀓𑀁, 𑀢𑀤𑁂𑀯 𑀯𑀢𑁆𑀢𑀁, 𑀢𑀲𑁆𑀲 𑀯𑀲𑁂𑀦. 𑀅𑀢𑁆𑀢𑀓𑀸𑀫𑀸𑀢𑀺 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑀸, 𑀥𑀫𑁆𑀫𑀘𑁆𑀙𑀦𑁆𑀤𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄 𑀳𑀺 𑀳𑀺𑀢𑀁 𑀢𑀦𑁆𑀦𑀺𑀫𑀺𑀢𑁆𑀢𑀓𑀜𑁆𑀘 𑀲𑀼𑀔𑀦𑁆𑀢𑀺. 𑀅𑀣 𑀯𑀸 𑀯𑀺𑀜𑁆𑀜𑀽𑀦𑀁 𑀦𑀺𑀩𑁆𑀩𑀺𑀲𑁂𑀲𑀢𑁆𑀢𑀸, 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀘 𑀅𑀢𑁆𑀢𑀸 𑀦𑀸𑀫 𑀥𑀫𑁆𑀫𑁄, 𑀢𑀁 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀢𑀓𑀸𑀫𑀸.

𑀉𑀲𑀪𑀁 𑀦𑀸𑀫 𑀯𑀻𑀲𑀢𑀺 𑀬𑀝𑁆𑀞𑀺𑀬𑁄. 𑀢𑀸𑀬 𑀲𑀜𑁆𑀜𑀸𑀬𑀸𑀢𑀺 𑀢𑀸𑀬 𑀧𑀸𑀲𑀸𑀡𑀲𑀜𑁆𑀜𑀸𑀬, 𑀏𑀢𑁆𑀢𑀓𑀁 𑀞𑀸𑀦𑀁 𑀆𑀕𑀢𑀸𑀢𑀺 𑀚𑀸𑀦𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀬𑁂𑀯 𑀦𑀬𑁄𑀢𑀺 ‘‘𑀅𑀬𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀓𑁄 𑀬𑁄 𑀞𑀸𑀦𑁂 𑀯𑀼𑀢𑁆𑀢𑁄, 𑀲𑁄 𑀏𑀯 𑀦𑀺𑀲𑀚𑁆𑀚𑀸𑀬𑀧𑀺 𑀦𑀬𑁄. 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀸𑀦𑀁 𑀙𑀺𑀦𑁆𑀦𑀪𑀢𑁆𑀢𑀪𑀸𑀯𑀪𑀬𑁂𑀦𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀩𑁆𑀭𑀽𑀳𑁂𑀢𑀺. 𑀫𑀤𑁆𑀤𑀦𑁆𑀢𑀸𑀢𑀺 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑁂 𑀲𑀸𑀮𑀺𑀲𑀻𑀲𑀸𑀦𑀺 𑀫𑀤𑁆𑀤𑀦𑁆𑀢𑀸.

𑀫𑀳𑀸𑀧𑀥𑀸𑀦𑀁 𑀧𑀽𑀚𑁂𑀲𑁆𑀲𑀸𑀫𑀻𑀢𑀺 𑀅𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀮𑁄𑀓𑀦𑀸𑀣𑁂𑀦 𑀙𑀯𑀲𑁆𑀲𑀸𑀦𑀺 𑀓𑀢𑀁 𑀤𑀼𑀓𑁆𑀓𑀭𑀘𑀭𑀺𑀬𑀫𑁂𑀯𑀸𑀳𑀁 𑀬𑀣𑀸𑀲𑀢𑁆𑀢𑀺 𑀧𑀽𑀚𑁂𑀲𑁆𑀲𑀸𑀫𑀻𑀢𑀺. 𑀧𑀝𑀺𑀧𑀢𑁆𑀢𑀺𑀧𑀽𑀚𑀸 𑀳𑀺 𑀲𑀢𑁆𑀣𑀼𑀧𑀽𑀚𑀸, 𑀦 𑀆𑀫𑀺𑀲𑀧𑀽𑀚𑀸𑀢𑀺. ‘‘𑀞𑀸𑀦𑀘𑀗𑁆𑀓𑀫𑀫𑁂𑀯𑀸’’𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀇𑀭𑀺𑀬𑀸𑀧𑀣𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀪𑁄𑀚𑀦𑀸𑀤𑀺𑀓𑀸𑀮𑁂𑀲𑀼 𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀦𑀺𑀲𑀚𑁆𑀚𑀸𑀬 𑀧𑀝𑀺𑀓𑁆𑀔𑁂𑀧𑀯𑀲𑁂𑀦.

𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀞𑀫𑀫𑁂𑀯 𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀘𑁆𑀘𑀢𑀺 ‘‘𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦𑀸’’𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ‘‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮; 𑀫𑀳𑀸𑀦𑀺. 𑁨𑁦𑁬) 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀢𑁆𑀯𑀸. ‘‘𑀦𑁂𑀯 𑀤𑀯𑀸𑀬𑀸’’𑀢𑀺𑀆𑀤𑀺 𑀧𑀝𑀺𑀓𑁆𑀔𑁂𑀧𑀤𑀲𑁆𑀲𑀦𑀁.

𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀬𑀤𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀇𑀢𑁄 𑀧𑀭𑁂𑀲𑀼𑀧𑀺. 𑀢𑀢𑁆𑀣 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸 𑀓𑀧𑁆𑀧𑀸𑀦𑀁 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺, 𑀲𑀢𑀲𑀳𑀲𑁆𑀲𑀜𑁆𑀘 𑀢𑀚𑁆𑀚𑀸𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀭𑀡𑀁. 𑀲𑀸𑀯𑀓𑀩𑁄𑀥𑀺𑀬𑀸 𑀅𑀕𑁆𑀕𑀲𑀸𑀯𑀓𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁, 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀫𑀳𑀸𑀲𑀸𑀯𑀓𑀸𑀦𑀁 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁧𑁨𑁮𑁮) 𑀲𑀢𑀲𑀳𑀲𑁆𑀲𑀫𑁂𑀯 𑀢𑀚𑁆𑀚𑀸𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀭𑀡𑀁. 𑀇𑀢𑀭𑁂𑀲𑀁 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀬𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀓𑀼𑀲𑀮𑀁. 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄𑀢𑀺 𑀩𑀸𑀳𑀺𑀬𑀯𑀺𑀲𑀬𑁂 𑀲𑀜𑁆𑀚𑀸𑀢𑀲𑀁𑀯𑀟𑁆𑀠𑀢𑀸𑀬 𑀩𑀸𑀳𑀺𑀬𑁄, 𑀤𑀸𑀭𑀼𑀘𑀻𑀭𑀧𑀭𑀺𑀳𑀭𑀡𑁂𑀦 𑀤𑀸𑀭𑀼𑀘𑀻𑀭𑀺𑀬𑁄𑀢𑀺 𑀘 𑀲𑀫𑀜𑁆𑀜𑀸𑀢𑁄. 𑀲𑁄 𑀳𑀺 𑀆𑀬𑀲𑁆𑀫𑀸 ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀩𑀸𑀳𑀺𑀬, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂, 𑀫𑀼𑀢𑁂, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺, 𑀏𑀯𑀜𑁆𑀳𑀺 𑀢𑁂 𑀩𑀸𑀳𑀺𑀬 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀬𑀢𑁄 𑀔𑁄 𑀢𑁂 𑀩𑀸𑀳𑀺𑀬 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂, 𑀫𑀼𑀢𑁂, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑁂𑀦. 𑀬𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑁂𑀦, 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑀢𑁆𑀣. 𑀬𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑀢𑁆𑀣, 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺 (𑀉𑀤𑀸. 𑁧𑁦) 𑀏𑀢𑁆𑀢𑀓𑀸𑀬 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀏𑀯𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀦𑀁 𑀫𑀳𑀸𑀧𑀜𑁆𑀜𑀢𑀸𑀤𑀺𑀤𑀻𑀧𑀦𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀦𑁆𑀢𑀺 𑀅𑀲𑀫𑁆𑀫𑀼𑀬𑁆𑀳𑀦𑀁 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀫𑀸𑀓𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀢𑁆𑀢𑀸 𑀅𑀪𑀺𑀓𑁆𑀓𑀫𑀢𑀻’’𑀢𑀺 𑀇𑀫𑀺𑀦𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀲𑁆𑀲 𑀤𑀺𑀝𑁆𑀞𑀺𑀕𑀸𑀳𑀯𑀲𑁂𑀦 𑀅𑀪𑀺𑀓𑁆𑀓𑀫𑁂 𑀲𑀫𑁆𑀫𑀼𑀬𑁆𑀳𑀦𑀁 𑀤𑀲𑁆𑀲𑁂𑀢𑀺, ‘‘𑀅𑀳𑀁 𑀅𑀪𑀺𑀓𑁆𑀓𑀫𑀸𑀫𑀻’’𑀢𑀺 𑀧𑀦 𑀇𑀫𑀺𑀦𑀸 𑀫𑀸𑀦𑀕𑀸𑀳𑀯𑀲𑁂𑀦. 𑀢𑀤𑀼𑀪𑀬𑀁 𑀧𑀦 𑀢𑀡𑁆𑀳𑀸𑀬 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀢𑀡𑁆𑀳𑀕𑀸𑀳𑀯𑀲𑁂𑀦𑀧𑀺 𑀲𑀫𑁆𑀫𑀼𑀬𑁆𑀳𑀦𑀁 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺. ‘‘𑀢𑀣𑀸 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀁 𑀅𑀲𑀫𑁆𑀫𑀼𑀬𑁆𑀳𑀦𑀁 𑀬𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁂𑀦 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀓𑁆𑀓𑀫𑀸𑀫𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀯𑀸𑀬𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀢𑁂𑀚𑁄𑀥𑀸𑀢𑀼 𑀉𑀤𑁆𑀥𑀭𑀡𑀲𑁆𑀲 𑀧𑀘𑁆𑀘𑀬𑁄. 𑀉𑀤𑁆𑀥𑀭𑀡𑀕𑀢𑀺𑀓𑀸 𑀳𑀺 𑀢𑁂𑀚𑁄𑀥𑀸𑀢𑀽𑀢𑀺. 𑀉𑀤𑁆𑀥𑀭𑀡𑁂 𑀯𑀸𑀬𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑁂𑀓𑀧𑀸𑀤𑀼𑀤𑁆𑀥𑀭𑀡𑁂…𑀧𑁂… 𑀩𑀮𑀯𑀢𑀺𑀬𑁄𑀢𑀺 𑀆𑀳. 𑀬𑀲𑁆𑀫𑀸 𑀧𑀦 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀯𑀸𑀬𑁄𑀥𑀸𑀢𑀼 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑀸𑀦𑀁 𑀧𑀘𑁆𑀘𑀬𑁄. 𑀢𑀺𑀭𑀺𑀬𑀕𑀢𑀺𑀓𑀸𑀬 𑀳𑀺 𑀯𑀸𑀬𑁄𑀥𑀸𑀢𑀼𑀬𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀼 𑀲𑀸𑀢𑀺𑀲𑀬𑁄 𑀩𑁆𑀬𑀸𑀧𑀸𑀭𑁄𑀢𑀺. 𑀢𑁂𑀚𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀽’’𑀢𑀺 𑀆𑀳. 𑀲𑀢𑀺𑀧𑀺 𑀅𑀦𑀼𑀕𑀫𑀓𑀅𑀦𑀼𑀕𑀦𑁆𑀢𑀩𑁆𑀩𑀢𑀸𑀯𑀺𑀲𑁂𑀲𑁂 𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀢𑀣𑀸-𑀲𑀤𑁆𑀤𑀕𑁆𑀕𑀳𑀡𑀁,. 𑀢𑀢𑁆𑀣 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀢𑁄 𑀧𑀸𑀤𑀲𑁆𑀲 𑀉𑀓𑁆𑀔𑀺𑀧𑀦𑀁 𑀉𑀤𑁆𑀥𑀭𑀡𑀁. 𑀞𑀺𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀢𑁄 𑀳𑀭𑀡𑀁 𑀅𑀢𑀺𑀳𑀭𑀡𑀁, 𑀔𑀸𑀡𑀼𑀆𑀤𑀺𑀧𑀭𑀺𑀳𑀭𑀡𑀢𑁆𑀣𑀁, 𑀧𑀢𑀺𑀝𑁆𑀞𑀺𑀢𑀧𑀸𑀤𑀖𑀝𑁆𑀝𑀦𑀧𑀭𑀺𑀳𑀭𑀡𑀢𑁆𑀣𑀁 𑀯𑀸 𑀧𑀲𑁆𑀲𑁂𑀦 𑀳𑀭𑀡𑀁 𑀯𑀻𑀢𑀺𑀳𑀭𑀡𑀁. 𑀬𑀸𑀯 𑀧𑀢𑀺𑀝𑁆𑀞𑀺𑀢𑀧𑀸𑀤𑁄, 𑀢𑀸𑀯 𑀆𑀳𑀭𑀡𑀁 𑀅𑀢𑀺𑀳𑀭𑀡𑀁, 𑀢𑀢𑁄 𑀧𑀭𑀁 𑀳𑀭𑀡𑀁 𑀯𑀻𑀢𑀺𑀳𑀭𑀡𑀦𑁆𑀢𑀺 𑀅𑀬𑀁 𑀯𑀸 𑀏𑀢𑁂𑀲𑀁 𑀯𑀺𑀲𑁂𑀲𑁄.

𑀬𑀲𑁆𑀫𑀸 𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀆𑀧𑁄𑀥𑀸𑀢𑀼 𑀯𑁄𑀲𑁆𑀲𑀚𑁆𑀚𑀦𑀲𑁆𑀲 𑀧𑀘𑁆𑀘𑀬𑁄. 𑀕𑀭𑀼𑀢𑀭𑀲𑀪𑀸𑀯𑀸 𑀳𑀺 𑀆𑀧𑁄𑀥𑀸𑀢𑀽𑀢𑀺. 𑀯𑁄𑀲𑁆𑀲𑀚𑁆𑀚𑀦𑁂 𑀧𑀣𑀯𑀻𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀢𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑁄𑀲𑁆𑀲𑀚𑁆𑀚𑀦𑁂…𑀧𑁂… 𑀩𑀮𑀯𑀢𑀺𑀬𑁄’’𑀢𑀺. 𑀬𑀲𑁆𑀫𑀸 𑀧𑀦 𑀆𑀧𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀧𑀣𑀯𑀻𑀥𑀸𑀢𑀼 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑁆𑀲 𑀧𑀘𑁆𑀘𑀬𑁄, 𑀧𑀢𑀺𑀝𑁆𑀞𑀸𑀪𑀸𑀯𑁂 𑀯𑀺𑀬 𑀧𑀢𑀺𑀝𑁆𑀞𑀸𑀧𑀦𑁂𑀧𑀺 𑀢𑀲𑁆𑀲𑀸 𑀲𑀸𑀢𑀺𑀲𑀬𑀓𑀺𑀘𑁆𑀘𑀢𑁆𑀢𑀸 𑀆𑀧𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀣𑀸 𑀖𑀝𑁆𑀝𑀦𑀓𑀺𑀭𑀺𑀬𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀯𑀲𑁂𑀦 𑀲𑀦𑁆𑀦𑀺𑀭𑀼𑀚𑁆𑀛𑀦𑀲𑁆𑀲 𑀲𑀺𑀚𑁆𑀛𑀦𑀢𑁄 𑀢𑀢𑁆𑀣𑀸𑀧𑀺 𑀧𑀣𑀯𑀻𑀥𑀸𑀢𑀼𑀬𑀸 𑀆𑀧𑁄𑀥𑀸𑀢𑀼𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀣𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀚𑁆𑀛𑀦𑁂𑀲𑀽’’𑀢𑀺.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀪𑀺𑀓𑁆𑀓𑀫𑀦𑁂, 𑀢𑁂𑀲𑀼 𑀯𑀸 𑀯𑀼𑀢𑁆𑀢𑁂𑀲𑀼 𑀉𑀤𑁆𑀤𑀭𑀡𑀸𑀤𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀉𑀤𑁆𑀥𑀭𑀡𑁂𑀢𑀺 𑀉𑀤𑁆𑀥𑀭𑀡𑀓𑁆𑀔𑀡𑁂. 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀢𑀺 𑀉𑀤𑁆𑀥𑀭𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀭𑀽𑀧𑀥𑀫𑁆𑀫𑀸, 𑀢𑀁𑀲𑀫𑀼𑀝𑁆𑀞𑀸𑀧𑀓𑀸 𑀅𑀭𑀽𑀧𑀥𑀫𑁆𑀫𑀸 𑀘. 𑀅𑀢𑀺𑀳𑀭𑀡𑀁 𑀦 𑀧𑀸𑀧𑀼𑀡𑀦𑁆𑀢𑀺 𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀦𑀢𑁄. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀦𑁆𑀦𑀸, 𑀢𑀢𑁆𑀣 𑀢𑀢𑁆𑀣𑁂𑀯. 𑀦 𑀳𑀺 𑀥𑀫𑁆𑀫𑀸𑀦𑀁 𑀤𑁂𑀲𑀦𑁆𑀢𑀭𑀲𑀗𑁆𑀓𑀫𑀦𑀁 𑀅𑀢𑁆𑀣𑀺. ‘‘𑀧𑀩𑁆𑀩𑀁 𑀧𑀩𑁆𑀩’’𑀢𑀺𑀆𑀤𑀺 𑀉𑀤𑁆𑀥𑀭𑀡𑀸𑀤𑀺𑀓𑁄𑀝𑁆𑀞𑀸𑀲𑁂 𑀲𑀦𑁆𑀥𑀸𑀬 𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑀺𑀇𑀢𑁆𑀢𑀭𑁄 𑀳𑀺 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀧𑀯𑀢𑁆𑀢𑀺𑀓𑁆𑀔𑀡𑁄, 𑀕𑀫𑀦𑀲𑁆𑀲𑀸𑀤𑀻𑀦𑀁, 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑁂𑀦 𑀧𑀝𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺 𑀧𑀸𑀤𑁂 𑀘 𑀩𑀦𑁆𑀥𑀔𑀼𑀭𑀥𑀸𑀭𑀸 𑀲𑀫𑀸𑀕𑀫𑀢𑁄𑀧𑀺 𑀲𑀻𑀖𑀢𑀭𑁄. 𑀬𑀣𑀸 𑀢𑀺𑀮𑀸𑀦𑀁 𑀪𑀚𑁆𑀚𑀺𑀬𑀫𑀸𑀦𑀸𑀦𑀁 𑀧𑀝𑀧𑀝𑀸𑀬𑀦𑁂𑀦 𑀪𑁂𑀤𑁄 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑁂𑀦𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀧𑀝𑀸𑀬𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀦𑁆𑀦𑀸 𑀳𑀺 𑀏𑀓𑀦𑁆𑀢𑀢𑁄 𑀪𑀺𑀚𑁆𑀚𑀦𑁆𑀢𑀻𑀢𑀺. ‘‘𑀲𑀤𑁆𑀥𑀺𑀁 𑀭𑀽𑀧𑁂𑀦𑀸’’𑀢𑀺 𑀇𑀤𑀁 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀦𑀓𑀭𑀽𑀧𑀥𑀫𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀬𑀁 𑀢𑀢𑁄 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁. 𑀅𑀜𑁆𑀜𑀣𑀸 𑀬𑀤𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀲𑀫𑀸𑀦𑀓𑁆𑀔𑀡𑀸 𑀲𑀺𑀬𑀼𑀁, ‘‘𑀭𑀽𑀧𑀁 𑀕𑀭𑀼𑀧𑀭𑀺𑀡𑀸𑀫𑀁 𑀤𑀦𑁆𑀥𑀦𑀺𑀭𑁄𑀥’’𑀦𑁆𑀢𑀺𑀆𑀤𑀺𑀯𑀘𑀦𑁂𑀳𑀺 𑀯𑀺𑀭𑁄𑀥𑁄 𑀲𑀺𑀬𑀸, 𑀢𑀣𑀸 ‘‘𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀬𑀣𑀬𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁮) 𑀏𑀯𑀁 𑀆𑀤𑀺𑀧𑀸𑀴𑀺𑀬𑀸. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀳𑀺 𑀲𑀸𑀭𑀫𑁆𑀫𑀡𑀲𑀪𑀸𑀯𑀸 𑀬𑀣𑀸𑀩𑀮𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀢𑁂𑀲𑀁 𑀢𑀁𑀲𑀪𑀸𑀯𑀦𑀺𑀧𑁆𑀨𑀢𑁆𑀢𑀺𑀅𑀦𑀦𑁆𑀢𑀭𑀁 𑀦𑀺𑀭𑁄𑀥𑁄. 𑀭𑀽𑀧𑀥𑀫𑁆𑀫𑀸 𑀧𑀦 𑀅𑀦𑀸𑀭𑀫𑁆𑀫𑀡𑀸 𑀧𑀓𑀸𑀲𑁂𑀢𑀩𑁆𑀩𑀸, 𑀏𑀯𑀁 𑀢𑁂𑀲𑀁 𑀧𑀓𑀸𑀲𑁂𑀢𑀩𑁆𑀩𑀪𑀸𑀯𑀦𑀺𑀧𑁆𑀨𑀢𑁆𑀢𑀺 𑀲𑁄𑀴𑀲𑀳𑀺 𑀘𑀺𑀢𑁆𑀢𑁂𑀳𑀺 𑀳𑁄𑀢𑀻𑀢𑀺 𑀢𑀗𑁆𑀔𑀡𑀸𑀬𑀼𑀓𑀢𑀸 𑀢𑁂𑀲𑀁 𑀇𑀘𑁆𑀙𑀺𑀢𑀸, 𑀮𑀳𑀼𑀯𑀺𑀜𑁆𑀜𑀸𑀡𑀯𑀺𑀲𑀬𑀲𑀗𑁆𑀕𑀢𑀺𑀫𑀢𑁆𑀢𑀧𑁆𑀧𑀘𑁆𑀘𑀬𑀢𑀸𑀬 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀯𑀺𑀲𑀬𑀲𑀗𑁆𑀕𑀢𑀺𑀫𑀢𑁆𑀢𑀢𑀸𑀬 𑀘 𑀯𑀺𑀜𑁆𑀜𑀸𑀡𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸, 𑀤𑀦𑁆𑀥𑀫𑀳𑀸𑀪𑀽𑀢𑀧𑁆𑀧𑀘𑁆𑀘𑀬𑀢𑀸𑀬 𑀭𑀽𑀧𑀥𑀫𑁆𑀫𑀸𑀦𑀁 𑀤𑀦𑁆𑀥𑀧𑀭𑀺𑀯𑀢𑁆𑀢𑀺𑀢𑀸. 𑀦𑀸𑀦𑀸𑀥𑀸𑀢𑀼𑀬𑀸 𑀬𑀣𑀸𑀪𑀽𑀢𑀜𑀸𑀡𑀁 𑀔𑁄 𑀧𑀦 𑀢𑀣𑀸𑀕𑀢𑀲𑁆𑀲𑁂𑀯, 𑀢𑁂𑀦 𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀥𑀫𑁆𑀫𑁄𑀯 𑀯𑀼𑀢𑁆𑀢𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀘 𑀢𑀣𑁂𑀯𑀸𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀸𑀦𑀓𑁆𑀔𑀡𑀢𑀸 𑀦 𑀬𑀼𑀚𑁆𑀚𑀢𑁂𑀯. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑀁 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁, 𑀢𑀁 𑀅𑀜𑁆𑀜𑀁, 𑀢𑀁 𑀧𑀦 𑀦𑀺𑀭𑀼𑀚𑁆𑀛𑀦𑁆𑀢𑀁 𑀅𑀧𑀭𑀲𑁆𑀲 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀦𑀺𑀭𑀼𑀚𑁆𑀛𑀢𑀻𑀢𑀺 𑀢𑀣𑀸𑀮𑀤𑁆𑀥𑀧𑀘𑁆𑀘𑀬𑀁 𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁. 𑀬𑀤𑀺 𑀏𑀯𑀁 𑀢𑁂𑀲𑀁 𑀅𑀦𑁆𑀢𑀭𑁄 𑀮𑀩𑁆𑀪𑁂𑀬𑁆𑀬𑀸𑀢𑀺? 𑀦𑁄𑀢𑀺 𑀆𑀳 ‘‘𑀅𑀯𑀻𑀘𑀺 𑀫𑀦𑀼𑀧𑁆𑀧𑀩𑀦𑁆𑀥𑁄’’𑀢𑀺, 𑀬𑀣𑀸 𑀯𑀻𑀘𑀺 𑀅𑀦𑁆𑀢𑀭𑁄 𑀦 𑀮𑀩𑁆𑀪𑀢𑀺, ‘‘𑀢𑀤𑁂𑀯𑁂𑀢’’𑀦𑁆𑀢𑀺 𑀅𑀯𑀺𑀲𑁂𑀲𑀯𑀺𑀤𑀽 𑀫𑀜𑁆𑀜𑀦𑁆𑀢𑀺, 𑀏𑀯𑀁 𑀅𑀦𑀼 𑀅𑀦𑀼 𑀧𑀩𑀦𑁆𑀥𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁄 𑀭𑀽𑀧𑀲𑀦𑁆𑀢𑀸𑀦𑁄 𑀘 𑀦𑀤𑀻𑀲𑁄𑀢𑁄𑀯 𑀦𑀤𑀺𑀬𑀁 𑀉𑀤𑀓𑀧𑁆𑀧𑀯𑀸𑀳𑁄 𑀯𑀺𑀬 𑀯𑀢𑁆𑀢𑀢𑀺.

𑀅𑀪𑀺𑀫𑀼𑀔𑀁 𑀮𑁄𑀓𑀺𑀢𑀁 𑀆𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀧𑀼𑀭𑀢𑁄 𑀧𑁂𑀓𑁆𑀔𑀦’’𑀦𑁆𑀢𑀺. 𑀬𑀲𑁆𑀫𑀸 𑀬𑀁𑀤𑀺𑀲𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺, 𑀢𑀺𑀝𑁆𑀞𑀢𑀺, 𑀦𑀺𑀲𑀻𑀤𑀢𑀺 𑀯𑀸 𑀢𑀤𑀪𑀺𑀫𑀼𑀔𑀁 𑀧𑁂𑀓𑁆𑀔𑀦𑀁 𑀆𑀮𑁄𑀓𑀺𑀢𑀁, 𑀢𑀲𑁆𑀫𑀸 𑀢𑀤𑀦𑀼𑀕𑀢𑀯𑀺𑀤𑀺𑀲𑀸𑀮𑁄𑀓𑀦𑀁 𑀯𑀺𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀯𑀺𑀮𑁄𑀓𑀺𑀢𑀁 𑀦𑀸𑀫 𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦’’𑀦𑁆𑀢𑀺. 𑀲𑀫𑁆𑀫𑀚𑁆𑀚𑀦𑀧𑀭𑀺𑀪𑀡𑁆𑀟𑀸𑀤𑀺𑀓𑀭𑀡𑁂 𑀑𑀮𑁄𑀓𑀺𑀢𑀲𑁆𑀲, 𑀉𑀮𑁆𑀮𑁄𑀓𑀳𑀭𑀡𑀸𑀤𑀻𑀲𑀼 𑀉𑀮𑁆𑀮𑁄𑀓𑀺𑀢𑀲𑁆𑀲, 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀧𑀭𑀺𑀲𑁆𑀲𑀬𑀲𑁆𑀲 𑀧𑀭𑀺𑀯𑀚𑁆𑀚𑀦𑀸𑀤𑀻𑀲𑀼 𑀅𑀧𑀮𑁄𑀓𑀺𑀢𑀲𑁆𑀲 𑀲𑀺𑀬𑀸 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀇𑀫𑀺𑀦𑀸 𑀯𑀸 𑀫𑀼𑀔𑁂𑀦 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀕𑀳𑀺𑀢𑀸𑀦𑁂𑀯𑀸’’𑀢𑀺.

𑀓𑀸𑀬𑀲𑀓𑁆𑀔𑀺𑀦𑁆𑀢𑀺 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑀯𑀦𑁆𑀢𑀁, 𑀧𑀘𑁆𑀘𑀓𑁆𑀔𑀓𑀸𑀭𑀺𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀆𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀓𑀸𑀮𑁂 ‘‘𑀬𑀫𑁂𑀯𑀸𑀳𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀦𑀺𑀲𑁆𑀲𑀸𑀬 𑀲𑀸𑀲𑀦𑁂 𑀅𑀦𑀪𑀺𑀭𑀢𑀺𑀆𑀤𑀺𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄, 𑀢𑀫𑁂𑀯 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑁄, 𑀢𑀢𑁆𑀣 𑀘 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀢𑁂𑀦𑁂𑀯 𑀦𑀁 𑀲𑀢𑁆𑀣𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁, 𑀬𑀤𑀺𑀤𑀁 𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁩𑁫) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑀲𑀸𑀢𑁆𑀣𑀓𑀢𑀸 𑀘 𑀲𑀧𑁆𑀧𑀸𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀲𑁆𑀲𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀲𑁆𑀲𑁂𑀯 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀅𑀢𑁆𑀢𑀦𑁄 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑁂𑀯 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀓𑀸𑀢𑀩𑁆𑀩𑀁, 𑀔𑀦𑁆𑀥𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀸 𑀅𑀜𑁆𑀜𑁄 𑀉𑀧𑀸𑀬𑁄 𑀦 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀮𑁄𑀓𑀺𑀢𑀸𑀤𑀺𑀲𑀫𑀜𑁆𑀜𑀸𑀧𑀺 𑀬𑀲𑁆𑀫𑀸 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀯𑀺𑀲𑁂𑀲𑁄, 𑀢𑀲𑁆𑀫𑀸 𑀢𑀲𑁆𑀲 𑀬𑀸𑀣𑀸𑀯𑀢𑁄 𑀧𑀚𑀸𑀦𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦𑀸𑀢𑀺 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀘𑀮𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦. 𑀅𑀥𑁄 𑀲𑀻𑀤𑀢𑀻𑀢𑀺 𑀅𑀥𑁄 𑀕𑀘𑁆𑀙𑀢𑀺. 𑀉𑀤𑁆𑀥𑀁 𑀮𑀗𑁆𑀖𑁂𑀢𑀻𑀢𑀺 𑀮𑀗𑁆𑀖𑀁 𑀯𑀺𑀬 𑀉𑀧𑀭𑀺 𑀕𑀘𑁆𑀙𑀢𑀺.

𑀅𑀗𑁆𑀕𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀦𑁆𑀢𑀺 𑀧𑀥𑀸𑀦𑀪𑀽𑀢𑀅𑀗𑁆𑀕𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀧𑀞𑀫𑀚𑀯𑀦𑁂𑀧𑀺…𑀧𑁂… 𑀦 𑀳𑁄𑀢𑀻’’𑀢𑀺 𑀇𑀤𑀁 𑀧𑀜𑁆𑀘𑀤𑁆𑀯𑀸𑀭𑀯𑀻𑀣𑀺𑀬𑀁 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀻𑀦𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀆𑀯𑀚𑁆𑀚𑀦 𑀯𑁄𑀝𑁆𑀞𑀩𑁆𑀩𑀧𑀦𑀸𑀦𑀁 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀇𑀝𑁆𑀞𑁂 𑀇𑀢𑁆𑀣𑀺𑀭𑀽𑀧𑀸𑀤𑀺𑀫𑁆𑀳𑀺 𑀮𑁄𑀪𑀫𑀢𑁆𑀢𑀁, 𑀅𑀦𑀺𑀝𑁆𑀞𑁂 𑀘 𑀧𑀝𑀺𑀖𑀫𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀧𑀦 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀺 𑀳𑁄𑀢𑀺. 𑀢𑀲𑁆𑀲 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀁 𑀫𑀽𑀮𑀁, 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀲𑀩𑁆𑀩𑀁 𑀪𑀯𑀗𑁆𑀕𑀸𑀤𑀺. 𑀏𑀯𑀁 𑀫𑀦𑁄𑀤𑁆𑀯𑀸𑀭𑀚𑀯𑀦𑀲𑁆𑀲 𑀫𑀽𑀮𑀯𑀲𑁂𑀦 𑀫𑀽𑀮𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸. 𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀢𑀸 𑀧𑀦 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀲𑁆𑀲𑁂𑀯 𑀅𑀧𑀼𑀩𑁆𑀩𑀪𑀸𑀯𑀯𑀲𑁂𑀦, 𑀇𑀢𑁆𑀢𑀭𑀪𑀸𑀯𑀯𑀲𑁂𑀦 𑀘 𑀯𑀼𑀢𑁆𑀢𑀸. ‘‘𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀺𑀢𑁂𑀲𑀽’’𑀢𑀺 𑀳𑁂𑀝𑁆𑀞𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀘 𑀅𑀧𑀭𑀸𑀧𑀭𑀁 𑀪𑀗𑁆𑀕𑀧𑁆𑀧𑀢𑁆𑀢𑀺𑀫𑀸𑀳.

𑀢𑀦𑁆𑀢𑀺 𑀚𑀯𑀦𑀁, 𑀢𑀲𑁆𑀲 𑀅𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀕𑀦𑁆𑀢𑀼𑀓𑁄 𑀅𑀩𑁆𑀪𑀸𑀕𑀢𑁄.

𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀢𑀸𑀯𑀢𑀓𑁄 𑀓𑀸𑀮𑁄 𑀏𑀢𑁂𑀲𑀦𑁆𑀢𑀺 𑀢𑀸𑀯𑀓𑀸𑀮𑀺𑀓𑀸𑀦𑀺.

𑀏𑀢𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀲𑀫𑀯𑀸𑀬𑁂𑀢𑀺 𑀲𑀸𑀫𑀕𑁆𑀕𑀺𑀬𑀁. 𑀢𑀢𑁆𑀣𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀆𑀮𑁄𑀓𑀦𑀯𑀺𑀮𑁄𑀓𑀦𑁂 𑀧𑀜𑁆𑀜𑀸𑀬𑀫𑀸𑀦𑁂 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺, 𑀓𑁄 𑀯𑀺𑀮𑁄𑀓𑁂𑀢𑀺.

‘‘𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄’’𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁. 𑀲𑀳𑀚𑀸𑀢𑀧𑀘𑁆𑀘𑀬𑁄𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀸𑀦𑀫𑁆𑀧𑀺 𑀮𑀩𑁆𑀪𑀦𑀢𑁄.

𑀓𑀸𑀮𑁂 𑀲𑀫𑀜𑁆𑀙𑀺𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀲𑀫𑀜𑁆𑀙𑀦𑁆𑀢𑀲𑁆𑀲. 𑀢𑀣𑀸 𑀧𑀲𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺. 𑀫𑀡𑀺𑀲𑀧𑁆𑀧𑁄 𑀦𑀸𑀫 𑀏𑀓𑀸 𑀲𑀧𑁆𑀧𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀮𑀴𑀦𑀦𑁆𑀢𑀺 𑀓𑀫𑁆𑀧𑀦𑀁, 𑀮𑀻𑀴𑀸𑀓𑀭𑀡𑀁 𑀯𑀸.

𑀉𑀡𑁆𑀳𑀧𑀓𑀢𑀺𑀓𑁄 𑀧𑀭𑀺𑀴𑀸𑀳𑀩𑀳𑀼𑀮𑀓𑀸𑀬𑁄. 𑀲𑀻𑀮𑀯𑀺𑀤𑀽𑀲𑀦𑁂𑀦 𑀅𑀳𑀺𑀢𑀸𑀯𑀳𑀢𑁆𑀢𑀸 𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀅𑀲𑀧𑁆𑀧𑀸𑀬𑀁. ‘‘𑀘𑀻𑀯𑀭𑀫𑁆𑀧𑀺 𑀅𑀘𑁂𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀘𑀻𑀯𑀭𑀲𑁆𑀲 𑀯𑀺𑀬 𑀓𑀸𑀬𑁄𑀧𑀺 𑀅𑀘𑁂𑀢𑀦𑁄𑀢𑀺 𑀓𑀸𑀬𑀲𑁆𑀲 𑀅𑀢𑁆𑀢𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑁂𑀦 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀭𑀺𑀤𑀻𑀧𑁂𑀦𑁆𑀢𑁄 𑀇𑀢𑀭𑀻𑀢𑀭𑀲𑀦𑁆𑀢𑁄𑀲𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺, 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀢𑁄𑀢𑀺 𑀆𑀳𑀢𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑁄, 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀺 𑀯𑀸 𑀆𑀳𑀢𑁄 𑀢𑀣𑀸.

𑀅𑀝𑁆𑀞𑀯𑀺𑀥𑁄𑀧𑀺 𑀅𑀢𑁆𑀣𑁄𑀢𑀺 𑀅𑀝𑁆𑀞𑀯𑀺𑀥𑁄𑀧𑀺 𑀧𑀬𑁄𑀚𑀦𑀯𑀺𑀲𑁂𑀲𑁄 𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀸𑀤𑀯𑀲𑁂𑀦 ‘‘𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩, 𑁪𑁨𑁨; 𑀫. 𑀦𑀺. 𑁨.𑁩𑁮𑁭; 𑀅. 𑀦𑀺. 𑁨.𑁩𑁪𑁧; 𑁮.𑁯; 𑀥. 𑀲. 𑁧𑁩𑁫𑁫; 𑀯𑀺𑀪. 𑁫𑁧𑁮; 𑀫𑀳𑀸𑀦𑀺. 𑁨𑁦𑁬) 𑀦𑀬𑁂𑀦 𑀯𑀼𑀢𑁆𑀢𑁄 𑀤𑀝𑁆𑀞𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀦𑁂𑀯 𑀤𑀯𑀸𑀬𑀸𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩, 𑁪𑁨𑁨; 𑀫. 𑀦𑀺. 𑁨.𑁩𑁮𑁭; 𑀅. 𑀦𑀺. 𑁮.𑁯; 𑀥. 𑀲. 𑁧𑁩𑁫𑁫; 𑀯𑀺𑀪. 𑁫𑁧𑁮; 𑀫𑀳𑀸𑀦𑀺. 𑁨𑁦𑁬) 𑀦𑀬𑁂𑀦𑀸’’𑀢𑀺 𑀧𑀦 𑀧𑀝𑀺𑀓𑁆𑀔𑁂𑀧𑀗𑁆𑀕𑀤𑀲𑁆𑀲𑀦𑀫𑀼𑀔𑁂𑀦 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀣𑀯𑀺𑀲𑀦𑁆𑀥𑀸𑀭𑀓𑀚𑀮𑀲𑁆𑀲 𑀢𑀁𑀲𑀦𑁆𑀥𑀸𑀭𑀓𑀯𑀸𑀬𑀼𑀦𑀸 𑀯𑀺𑀬 𑀧𑀭𑀺𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀸𑀬𑁄𑀥𑀸𑀢𑀼𑀬𑀸𑀯 𑀆𑀲𑀬𑁂 𑀅𑀯𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀯𑀸𑀬𑁄𑀥𑀸𑀢𑀼𑀯𑀲𑁂𑀦𑁂𑀯 𑀢𑀺𑀝𑁆𑀞𑀢𑀻’’𑀢𑀺. 𑀅𑀢𑀺𑀳𑀭𑀢𑀻𑀢𑀺 𑀬𑀸𑀯 𑀫𑀼𑀔𑀸 𑀅𑀪𑀺𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀢𑀢𑁄 𑀓𑀼𑀘𑁆𑀙𑀺𑀬𑀁 𑀯𑀻𑀫𑀺𑀲𑁆𑀲𑀁 𑀓𑀭𑁄𑀦𑁆𑀢𑁄 𑀳𑀭𑀢𑀺. 𑀅𑀢𑀺𑀳𑀭𑀢𑀻𑀢𑀺 𑀯𑀸 𑀫𑀼𑀔𑀤𑁆𑀯𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑁄 𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑁄 𑀳𑀭𑀢𑀺, 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀅𑀧𑀭𑀸𑀧𑀭𑀁 𑀘𑀸𑀭𑁂𑀢𑀺. 𑀏𑀢𑁆𑀣 𑀘 𑀆𑀳𑀸𑀭𑀲𑁆𑀲 𑀥𑀸𑀭𑀡𑀧𑀭𑀺𑀯𑀢𑁆𑀢𑀦𑀲𑀜𑁆𑀘𑀼𑀡𑁆𑀡𑀦𑀯𑀺𑀲𑁄𑀲𑀦𑀸𑀦𑀺 𑀧𑀣𑀯𑀻𑀥𑀸𑀢𑀼𑀲𑀳𑀺𑀢𑀸 𑀏𑀯 𑀯𑀸𑀬𑁄𑀥𑀸𑀢𑀼 𑀓𑀭𑁄𑀢𑀺, 𑀦 𑀓𑁂𑀯𑀮𑀸𑀢𑀺 𑀢𑀸𑀦𑀺 𑀧𑀣𑀯𑀻𑀥𑀸𑀢𑀼𑀬𑀸𑀧𑀺 𑀓𑀺𑀘𑁆𑀘𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀮𑁆𑀮𑀢𑁆𑀢𑀜𑁆𑀘 𑀅𑀦𑀼𑀧𑀸𑀮𑁂𑀢𑀻𑀢𑀺 𑀬𑀣𑀸 𑀯𑀸𑀬𑁄𑀥𑀸𑀢𑀼 𑀆𑀤𑀻𑀳𑀺 𑀅𑀜𑁆𑀜𑁂𑀳𑀺 𑀯𑀺𑀲𑁄𑀲𑀦𑀁 𑀦 𑀳𑁄𑀢𑀺, 𑀢𑀣𑀸 𑀅𑀮𑁆𑀮𑀢𑁆𑀢𑀜𑁆𑀘 𑀅𑀦𑀼𑀧𑀸𑀮𑁂𑀢𑀺. 𑀢𑁂𑀚𑁄𑀥𑀸𑀢𑀽𑀢𑀺 𑀕𑀳𑀡𑀻𑀲𑀗𑁆𑀔𑀸𑀢𑀸 𑀢𑁂𑀚𑁄𑀥𑀸𑀢𑀼. 𑀲𑀸 𑀳𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑀁 𑀆𑀳𑀸𑀭𑀁 𑀧𑀭𑀺𑀧𑀸𑀘𑁂𑀢𑀺. 𑀅𑀜𑁆𑀚𑀲𑁄 𑀳𑁄𑀢𑀻𑀢𑀺 𑀆𑀳𑀸𑀭𑀲𑁆𑀲 𑀧𑀯𑁂𑀲𑀦𑀸𑀤𑀻𑀦𑀁 𑀫𑀕𑁆𑀕𑁄 𑀳𑁄𑀢𑀺. 𑀆𑀪𑀼𑀚𑀢𑀻𑀢𑀺 𑀧𑀭𑀺𑀬𑁂𑀲𑀦𑀯𑀲𑁂𑀦, 𑀅𑀚𑁆𑀛𑁄𑀳𑀭𑀡𑀚𑀺𑀡𑁆𑀡𑀸𑀚𑀺𑀡𑁆𑀡𑀢𑀸𑀤𑀺𑀧𑀝𑀺𑀲𑀁𑀯𑁂𑀤𑀦𑀯𑀲𑁂𑀦 𑀘 𑀆𑀯𑀚𑁆𑀚𑁂𑀢𑀺, 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀁𑀢𑀁𑀯𑀺𑀚𑀸𑀦𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑁄𑀬𑁂𑀯 𑀳𑀺 𑀧𑀬𑁄𑀕𑁄 ‘‘𑀲𑀫𑁆𑀫𑀸𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑁄. 𑀬𑁂𑀦 𑀳𑀺 𑀧𑀬𑁄𑀕𑁂𑀦 𑀧𑀭𑀺𑀬𑁂𑀲𑀦𑀸𑀤𑀺 𑀦𑀺𑀧𑁆𑀨𑀚𑁆𑀚𑀢𑀺, 𑀲𑁄 𑀢𑀩𑁆𑀩𑀺𑀲𑀬𑀯𑀺𑀚𑀸𑀦𑀦𑀫𑁆𑀧𑀺 𑀦𑀺𑀧𑁆𑀨𑀸𑀤𑁂𑀢𑀺 𑀦𑀸𑀫 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀅𑀣 𑀯𑀸 𑀲𑀫𑁆𑀫𑀸𑀧𑀬𑁄𑀕𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀫𑀦𑁆𑀯𑀸𑀬 𑀆𑀕𑀫𑁆𑀫 𑀆𑀪𑀼𑀚𑀢𑀺 𑀲𑀫𑀦𑁆𑀦𑀸𑀳𑀭𑀢𑀺. 𑀆𑀪𑁄𑀕𑀧𑀼𑀩𑁆𑀩𑀓𑁄 𑀳𑀺 𑀲𑀩𑁆𑀩𑁄𑀧𑀺 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀢𑀺 𑀢𑀣𑀸 𑀯𑀼𑀢𑁆𑀢𑀁.

𑀕𑀫𑀦𑀢𑁄𑀢𑀺 𑀪𑀺𑀓𑁆𑀔𑀸𑀘𑀸𑀭𑀯𑀲𑁂𑀦 𑀕𑁄𑀘𑀭𑀕𑀸𑀫𑀁 𑀉𑀤𑁆𑀤𑀺𑀲𑁆𑀲 𑀕𑀫𑀦𑀢𑁄. 𑀧𑀭𑀺𑀬𑁂𑀲𑀦𑀢𑁄𑀢𑀺 𑀕𑁄𑀘𑀭𑀕𑀸𑀫𑁂 𑀪𑀺𑀓𑁆𑀔𑀢𑁆𑀣𑀁 𑀆𑀳𑀺𑀡𑁆𑀟𑀦𑀢𑁄. 𑀧𑀭𑀺𑀪𑁄𑀕𑀢𑁄𑀢𑀺 𑀆𑀳𑀸𑀭𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑀢𑁄. 𑀆𑀲𑀬𑀢𑁄𑀢𑀺 𑀧𑀺𑀢𑁆𑀢𑀸𑀤𑀺𑀆𑀲𑀬𑀢𑁄. 𑀆𑀲𑀬𑀢𑀺 𑀏𑀢𑁆𑀣 𑀏𑀓𑀚𑁆𑀛𑀁 𑀧𑀯𑀢𑁆𑀢𑀫𑀸𑀦𑁄𑀧𑀺 𑀓𑀫𑁆𑀫𑀨𑀮𑀯𑀯𑀢𑁆𑀣𑀺𑀢𑁄 𑀳𑀼𑀢𑁆𑀯𑀸 𑀫𑀭𑀺𑀬𑀸𑀤𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀲𑀬𑀢𑀺 𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀲𑀬𑁄, 𑀆𑀫𑀸𑀲𑀬𑀲𑁆𑀲 𑀉𑀧𑀭𑀺 𑀢𑀺𑀝𑁆𑀞𑀦𑀓𑁄 𑀧𑀺𑀢𑁆𑀢𑀸𑀤𑀺𑀓𑁄. 𑀫𑀭𑀺𑀬𑀸𑀤𑀢𑁆𑀣𑁄 𑀳𑀺 𑀅𑀬𑀫𑀸𑀓𑀸𑀭𑁄. 𑀦𑀺𑀥𑀸𑀦𑀦𑁆𑀢𑀺 𑀬𑀣𑀸𑀪𑀼𑀢𑁆𑀢𑁄 𑀆𑀳𑀸𑀭𑁄 𑀦𑀺𑀘𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀦𑀺𑀥𑀸𑀦𑀁, 𑀆𑀫𑀸𑀲𑀬𑁄. 𑀢𑀢𑁄 𑀦𑀺𑀥𑀸𑀦𑀢𑁄. 𑀅𑀧𑀭𑀺𑀧𑀓𑁆𑀓𑀢𑁄𑀢𑀺 𑀕𑀳𑀡𑀻𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀚𑀢𑁂𑀚𑁂𑀦 𑀅𑀯𑀺𑀧𑀓𑁆𑀓𑀢𑁄. 𑀧𑀭𑀺𑀧𑀓𑁆𑀓𑀢𑁄𑀢𑀺 𑀬𑀣𑀸𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲 𑀯𑀺𑀧𑀓𑁆𑀓𑀪𑀸𑀯𑀢𑁄. 𑀨𑀮𑀢𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀢𑁄. 𑀦𑀺𑀲𑁆𑀲𑀦𑁆𑀤𑀢𑁄𑀢𑀺 𑀇𑀢𑁄 𑀘𑀺𑀢𑁄 𑀘 𑀦𑀺𑀲𑁆𑀲𑀦𑁆𑀤𑀦𑀢𑁄. 𑀲𑀫𑁆𑀫𑀓𑁆𑀔𑀦𑀢𑁄𑀢𑀺 𑀲𑀩𑁆𑀩𑀲𑁄 𑀫𑀓𑁆𑀔𑀦𑀢𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁨𑁯𑁪) 𑀕𑀳𑁂𑀢𑀩𑁆𑀩𑁄.

𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀻𑀢𑀺 𑀯𑁂𑀕𑀲𑀁𑀥𑀸𑀭𑀡𑁂𑀦 𑀉𑀧𑁆𑀧𑀦𑁆𑀦𑀧𑀭𑀺𑀴𑀸𑀳𑀢𑁄 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀅𑀜𑁆𑀜𑁂 𑀘 𑀭𑁄𑀕𑀸 𑀓𑀡𑁆𑀡𑀲𑀽𑀮𑀪𑀕𑀦𑁆𑀤𑀭𑀸𑀤𑀬𑁄. 𑀅𑀝𑁆𑀞𑀸𑀦𑁂𑀢𑀺 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑁂 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀔𑁂𑀢𑁆𑀢𑀤𑁂𑀯𑀸𑀬𑀢𑀦𑀸𑀤𑀺𑀓𑁂. 𑀓𑀼𑀤𑁆𑀥𑀸 𑀳𑀺 𑀅𑀫𑀦𑀼𑀲𑁆𑀲𑀸, 𑀫𑀦𑀼𑀲𑁆𑀲𑀸𑀧𑀺 𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑀺. 𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦𑁂𑀯 𑀅𑀢𑁆𑀢𑀦𑁄, 𑀓𑀲𑁆𑀲𑀘𑀺 𑀅𑀦𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸, 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀘 𑀦 𑀧𑀭𑀲𑁆𑀲. 𑀉𑀤𑀓𑀢𑀼𑀫𑁆𑀩𑀢𑁄𑀢𑀺 𑀯𑁂𑀴𑀼𑀦𑀸𑀴𑀺𑀆𑀤𑀺𑀉𑀤𑀓𑀪𑀸𑀚𑀦𑀢𑁄. 𑀢𑀦𑁆𑀢𑀺 𑀙𑀟𑁆𑀟𑀺𑀢𑀉𑀤𑀓𑀁.