𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁩𑁯𑁦. 𑀓𑀸𑀭𑀡𑀧𑁆𑀧𑀥𑀸𑀦𑀸𑀢𑀺 ‘‘𑀅𑀦𑀼𑀧𑁆𑀧𑀦𑁆𑀦𑀧𑀸𑀧𑀓𑀸𑀦𑀼𑀧𑁆𑀧𑀸𑀤𑀸𑀤𑀺𑀅𑀢𑁆𑀣𑀸’’𑀢𑀺 𑀕𑀳𑀺𑀢𑀸 𑀢𑀣𑁂𑀯 𑀢𑁂 𑀳𑁄𑀦𑁆𑀢𑀻𑀢𑀺 𑀢𑀁 𑀅𑀢𑁆𑀣𑀁 𑀲𑀸𑀥𑁂𑀦𑁆𑀢𑀺𑀬𑁂𑀯𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀓𑁄 𑀲𑀫𑁆𑀫𑀸-𑀲𑀤𑁆𑀤𑁄𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀧𑀸𑀧𑀓𑀸𑀦𑀼𑀧𑁆𑀧𑀸𑀤𑀸𑀤𑀺𑀦𑁄 𑀓𑀸𑀭𑀡𑀪𑀽𑀢𑀸, 𑀧𑀥𑀸𑀦𑀓𑀸𑀭𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸𑀲𑀤𑁆𑀤𑀲𑁆𑀲 𑀉𑀧𑀸𑀬𑀬𑁄𑀦𑀺𑀲𑁄𑀅𑀢𑁆𑀣𑀤𑀻𑀧𑀓𑀢𑀁 𑀲𑀦𑁆𑀥𑀸𑀬 ‘‘𑀉𑀧𑀸𑀬𑀧𑁆𑀧𑀥𑀸𑀦𑀸 𑀬𑁄𑀦𑀺𑀲𑁄𑀧𑀥𑀸𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀧𑀦𑁆𑀦𑀓𑁄𑀢𑀺 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑁄. 𑀪𑀼𑀲𑀁 𑀬𑁄𑀕𑁄 𑀧𑀬𑁄𑀕𑁄, 𑀧𑀬𑁄𑀕𑁄𑀯 𑀧𑀭𑀓𑁆𑀓𑀫𑁄 𑀧𑀬𑁄𑀕𑀧𑀭𑀓𑁆𑀓𑀫𑁄. 𑀏𑀢𑀸𑀦𑀻𑀢𑀺 ‘‘𑀯𑀸𑀬𑀫𑀢𑀻’’𑀢𑀺𑀆𑀤𑀻𑀦𑀺 ‘‘𑀆𑀲𑁂𑀯𑀫𑀸𑀦𑁄 𑀯𑀸𑀬𑀫𑀢𑀻’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀅𑀯𑀢𑁆𑀢𑀩𑁆𑀩𑀢𑀁 𑀆𑀧𑀦𑁆𑀦𑀸𑀦𑀦𑁆𑀢𑀺 𑀪𑀽𑀫𑀺𑀮𑀤𑁆𑀥𑀸𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀸𑀯𑀺𑀓𑁆𑀔𑀫𑁆𑀪𑀺𑀢𑀸𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀸𑀦𑀁.

𑁩𑁯𑁧. 𑀥𑀫𑁆𑀫𑀘𑁆𑀙𑀦𑁆𑀤𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀻𑀭𑀺𑀬𑀘𑁆𑀙𑀦𑁆𑀤𑀸 𑀯𑀺𑀬 𑀦 𑀅𑀜𑁆𑀜𑁄 𑀥𑀫𑁆𑀫𑁄, 𑀅𑀣 𑀔𑁄 𑀙𑀦𑁆𑀤𑀦𑀺𑀬𑀲𑀪𑀸𑀯𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀪𑀸𑀯𑀘𑁆𑀙𑀦𑁆𑀤𑁄’’𑀢𑀺. 𑀢𑀢𑁆𑀣 ‘‘𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁧𑁦𑁩) 𑀢𑀡𑁆𑀳𑀸 𑀙𑀦𑁆𑀤𑁄𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑁄, ‘‘𑀲𑀩𑁆𑀩𑁂𑀯 𑀦𑀼 𑀔𑁄, 𑀫𑀸𑀭𑀺𑀲, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀦𑁆𑀢𑀯𑀸𑀤𑀸 𑀏𑀓𑀦𑁆𑀢𑀲𑀻𑀮𑀸 𑀏𑀓𑀦𑁆𑀢𑀙𑀦𑁆𑀤𑀸 𑀏𑀓𑀦𑁆𑀢𑀅𑀚𑁆𑀛𑁄𑀲𑀸𑀦𑀸’’𑀢𑀺 (𑀤𑀻. 𑀦𑀺. 𑁨.𑁩𑁬𑁬) 𑀏𑀢𑁆𑀣 𑀤𑀺𑀝𑁆𑀞𑀺, 𑀧𑀫𑀸𑀤𑀦𑀺𑀤𑁆𑀤𑁂𑀲𑁂 ‘‘𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸’’𑀢𑀺 𑀯𑀻𑀭𑀺𑀬𑀦𑁆𑀢𑀺 𑀯𑀡𑁆𑀡𑁂𑀢𑀺.

𑁩𑁯𑁪. 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀧𑀤𑀤𑁆𑀯𑀬𑀲𑁆𑀲𑀧𑀺 𑀦𑀺𑀤𑁆𑀤𑁂𑀲𑁄 𑀯𑀻𑀭𑀺𑀬𑀦𑀺𑀤𑁆𑀤𑁂𑀲𑁄𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀻𑀭𑀺𑀬𑀦𑀺𑀤𑁆𑀤𑁂𑀲𑁂’’𑀢𑀺.

𑁪𑁦𑁬. 𑀲𑀩𑁆𑀩𑀧𑀼𑀩𑁆𑀩𑀪𑀸𑀕𑁂𑀢𑀺 𑀲𑀩𑁆𑀩𑀫𑀕𑁆𑀕𑀸𑀦𑀁 𑀧𑀼𑀩𑁆𑀩𑀪𑀸𑀕𑁂. 𑀧𑀼𑀭𑀺𑀫𑀲𑁆𑀫𑀺𑀦𑁆𑀢𑀺 ‘‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’’𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀫𑀣𑀯𑀺𑀧𑀲𑁆𑀲𑀦𑀸𑀯 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁, 𑀢𑀁 𑀧𑀦 𑀫𑀕𑁆𑀕𑀸𑀦𑀼𑀧𑁆𑀧𑀦𑁆𑀦𑀢𑀸𑀬 𑀪𑀸𑀯𑀢𑁄 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑁂 𑀘 𑀢𑀲𑁆𑀫𑀺𑀁 𑀯𑀝𑁆𑀝𑀸𑀦𑀢𑁆𑀣𑀲𑀁𑀯𑀢𑁆𑀢𑀦𑀢𑁄 𑀦 𑀬𑀼𑀢𑁆𑀢𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀫𑀳𑀦𑁆𑀢𑀁 𑀕𑀸𑀭𑀯𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀗𑁆𑀖𑀕𑀸𑀭𑀯𑁂𑀦 𑀬𑀣𑀸𑀭𑀼𑀘𑀺 𑀯𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀲𑀗𑁆𑀖𑁂𑀦 𑀲𑀳 𑀦 𑀦𑀺𑀓𑁆𑀔𑀫𑀺. 𑀅𑀢𑀺𑀫𑀦𑁆𑀤𑀸𑀦𑀺 𑀦𑁄𑀢𑀺 𑀦𑀦𑀼 𑀅𑀢𑀺𑀫𑀦𑁆𑀤𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀲𑀫𑀸𑀧𑀢𑁆𑀢𑀺𑀢𑁄 𑀅𑀜𑁆𑀜𑀁 𑀲𑀦𑁆𑀣𑀫𑁆𑀪𑀦𑀓𑀸𑀭𑀡𑀁 𑀩𑀮𑀯𑀁 𑀦𑀢𑁆𑀣𑀻𑀢𑀺 ‘‘𑀢𑀢𑁄 𑀧𑀭𑀺𑀳𑀻𑀦𑀸 𑀲𑀦𑁆𑀣𑀫𑁆𑀪𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀆𑀳. 𑀦 𑀳𑀺 𑀫𑀳𑀸𑀭𑀚𑁆𑀚𑀼𑀫𑁆𑀳𑀺 𑀙𑀺𑀦𑁆𑀦𑁂 𑀲𑀼𑀢𑁆𑀢𑀢𑀦𑁆𑀢𑀽 𑀲𑀦𑁆𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀲𑀫𑀣𑁂 𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀦 𑀲𑀫𑀸𑀦𑀕𑀢𑀺𑀓𑀸 𑀯𑀺𑀧𑀲𑁆𑀲𑀦𑀸 𑀘𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀏𑀯𑀁 𑀉𑀧𑁆𑀧𑀦𑁆𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸…𑀧𑁂… 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀏𑀢𑁆𑀣 𑀢𑀢𑁆𑀣 𑀤𑀼𑀯𑀺𑀥𑀸𑀬 𑀲𑀫𑁆𑀫𑀧𑁆𑀧𑀥𑀸𑀦𑀓𑀣𑀸𑀬, 𑀢𑀢𑁆𑀣 𑀯𑀸 𑀧𑀸𑀴𑀺𑀬𑀁 ‘‘𑀅𑀦𑀼𑀧𑁆𑀧𑀦𑁆𑀦𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀬𑁂𑀯𑀸𑀢𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀉𑀧𑁆𑀧𑀦𑁆𑀦𑀸𑀬𑁂𑀯.

𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀺 𑀔𑀦𑁆𑀥𑀓𑁂 𑀯𑀼𑀢𑁆𑀢𑀸𑀦𑀺 𑀆𑀕𑀦𑁆𑀢𑀼𑀓𑀆𑀯𑀸𑀲𑀺𑀓𑀕𑀫𑀺𑀓𑀅𑀦𑀼𑀫𑁄𑀤𑀦 𑀪𑀢𑁆𑀢𑀕𑁆𑀕 𑀧𑀺𑀡𑁆𑀟𑀘𑀸𑀭𑀺𑀓 𑀆𑀭𑀜𑁆𑀜𑀺𑀓 𑀲𑁂𑀦𑀸𑀲𑀦 𑀚𑀦𑁆𑀢𑀸𑀖𑀭𑀯𑀘𑁆𑀘𑀓𑀼𑀝𑀺 𑀆𑀘𑀭𑀺𑀬𑀉𑀧𑀚𑁆𑀛𑀸𑀬𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀸𑀦𑀺 𑀘𑀼𑀤𑁆𑀤𑀲. 𑀢𑀢𑁄 𑀅𑀜𑁆𑀜𑀸𑀦𑀺 𑀧𑀦 𑀓𑀤𑀸𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸𑀤𑀺𑀓𑀸𑀮𑁂 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀓𑀸𑀮𑁂 𑀘 𑀘𑀭𑀺𑀢𑀩𑁆𑀩𑀸𑀦𑀺 𑀤𑁆𑀯𑀸𑀲𑀻𑀢𑀺 𑀔𑀼𑀤𑁆𑀤𑀓𑀯𑀢𑁆𑀢𑀸𑀦𑀻𑀢𑀺 𑀓𑀣𑀺𑀢𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀦 𑀳𑀺 𑀢𑀸𑀦𑀺 𑀲𑀩𑁆𑀩𑀸𑀲𑀼 𑀅𑀯𑀢𑁆𑀣𑀸𑀲𑀼 𑀘𑀭𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀫𑀳𑀸𑀯𑀢𑁆𑀢𑁂 𑀅𑀕𑀡𑀺𑀢𑀸𑀦𑀺. 𑀢𑀢𑁆𑀣 ‘‘𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁…𑀧𑁂… 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁭𑁬) 𑀯𑀼𑀢𑁆𑀢𑀸𑀦𑀺 𑀧𑀓𑀢𑀢𑁆𑀢𑁂 𑀘𑀭𑀺𑀢𑀩𑁆𑀩𑀯𑀢𑁆𑀢𑀸𑀯𑀲𑀸𑀦𑀸𑀦𑀺 𑀙𑀲𑀝𑁆𑀞𑀺, 𑀢𑀢𑁄 𑀧𑀭𑀁 ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦, 𑀫𑀸𑀦𑀢𑁆𑀢𑀸𑀭𑀳𑁂𑀦, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀻𑀦𑀺 (𑀘𑀽𑀴𑀯. 𑁮𑁨) 𑀧𑀓𑀢𑀢𑁆𑀢𑁂 𑀘𑀭𑀺𑀢𑀩𑁆𑀩𑁂𑀳𑀺 𑀅𑀦𑀜𑁆𑀜𑀢𑁆𑀢𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀕𑀡𑁂𑀢𑁆𑀯𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑀸𑀤𑀻𑀲𑀼 𑀧𑀼𑀕𑁆𑀕𑀮𑀦𑁆𑀢𑀭𑁂𑀲𑀼 𑀘𑀭𑀺𑀢𑀩𑁆𑀩𑀢𑁆𑀢𑀸 𑀢𑁂𑀲𑀁 𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀏𑀓𑁂𑀓𑀁 𑀓𑀢𑁆𑀯𑀸 𑀕𑀡𑁂𑀢𑀩𑁆𑀩𑀸𑀦𑀺 𑀧𑀜𑁆𑀘𑀸𑀢𑀺 𑀏𑀓𑀲𑀢𑁆𑀢𑀢𑀺 𑀯𑀢𑁆𑀢𑀸𑀦𑀺, 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑀯𑀢𑁆𑀢𑁂𑀲𑀼 𑀯𑀢𑁆𑀢𑀧𑀜𑁆𑀜𑀸𑀧𑀦𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁭𑁫) 𑀇𑀤𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀁 𑀅𑀲𑁆𑀲𑀸𑀤𑀺𑀬𑀦𑀁 𑀏𑀓𑀁, ‘‘𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄’’𑀢𑀺𑀆𑀤𑀻𑀦𑀺 (𑀘𑀽𑀴𑀯. 𑁫𑁧) 𑀘 𑀤𑀲𑀸𑀢𑀺 𑀏𑀯𑀁 𑀤𑁆𑀯𑀸𑀲𑀻𑀢𑀺 𑀳𑁄𑀦𑁆𑀢𑀺. 𑀏𑀢𑁂𑀲𑁆𑀯𑁂𑀯 𑀓𑀸𑀦𑀺𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸𑀤𑀺𑀯𑀢𑁆𑀢𑀸𑀦𑀺, 𑀓𑀸𑀦𑀺𑀘𑀺 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀯𑀢𑁆𑀢𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑁆𑀯𑀸𑀲𑀻𑀢𑀺𑀯𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀥 𑀯𑀺𑀧𑀸𑀓𑀸𑀦𑀼𑀪𑀯𑀦𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀁, 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀲𑁆𑀲 𑀲𑀩𑁆𑀩𑀣𑀸 𑀅𑀯𑀺𑀕𑀢𑀢𑁆𑀢𑀸 𑀪𑀯𑀺𑀢𑁆𑀯𑀸 𑀯𑀺𑀕𑀢𑀫𑀢𑁆𑀢𑀯𑀲𑁂𑀦 𑀓𑀫𑁆𑀫𑀜𑁆𑀘 ‘‘𑀪𑀼𑀢𑁆𑀯𑀸 𑀯𑀺𑀕𑀢𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁧) 𑀯𑀺𑀬 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀅𑀦𑀼𑀪𑀼𑀢𑁆𑀯𑀸𑀧𑀕𑀢𑀁 𑀚𑀯𑀦𑀁, 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀢𑀸𑀯𑀲𑁂𑀦 𑀪𑀽𑀢𑀸𑀧𑀕𑀢𑀲𑀗𑁆𑀔𑀸𑀢𑀁 𑀲𑁂𑀲𑀲𑀗𑁆𑀔𑀢𑀜𑁆𑀘 ‘‘𑀪𑀽𑀢𑀸𑀧𑀕𑀢𑀼𑀧𑁆𑀧𑀦𑁆𑀦’’𑀦𑁆𑀢𑀺, 𑀢𑀲𑁆𑀫𑀸 𑀇𑀥 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀯𑀺𑀧𑀸𑀓𑀫𑁂𑀯 𑀯𑀤𑀢𑀺, 𑀦 𑀢𑀢𑁆𑀣 𑀯𑀺𑀬 𑀓𑀫𑁆𑀫𑀫𑁆𑀧𑀻𑀢𑀺. 𑀅𑀦𑀼𑀲𑀬𑀺𑀢𑀓𑀺𑀮𑁂𑀲𑀸𑀢𑀺 𑀅𑀧𑁆𑀧𑀳𑀻𑀦𑀸 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀳 ‘‘𑀅𑀢𑀻𑀢𑀸 𑀯𑀸…𑀧𑁂… 𑀦 𑀯𑀢𑁆𑀢𑀩𑁆𑀩𑀸’’𑀢𑀺. 𑀢𑁂𑀲𑀜𑁆𑀳𑀺 𑀅𑀫𑁆𑀩𑀢𑀭𑀼𑀡𑁄𑀧𑀫𑀸𑀬 𑀯𑀢𑁆𑀢𑀫𑀸𑀦𑀸𑀤𑀺𑀢𑀸 𑀦 𑀯𑀢𑁆𑀢𑀩𑁆𑀩𑀸𑀢𑀺.

𑀆𑀳𑀢𑀔𑀻𑀭𑀭𑀼𑀓𑁆𑀔𑁄 𑀯𑀺𑀬 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦 𑀅𑀥𑀺𑀕𑀢𑀁 𑀆𑀭𑀫𑁆𑀫𑀡𑀁, 𑀅𑀦𑀸𑀳𑀢𑀔𑀻𑀭𑀭𑀼𑀓𑁆𑀔𑁄 𑀯𑀺𑀬 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑀸𑀬 𑀅𑀦𑁆𑀢𑁄𑀕𑀥𑀓𑀺𑀮𑁂𑀲𑀁 𑀆𑀭𑀫𑁆𑀫𑀡𑀁 𑀤𑀝𑁆𑀞𑀩𑁆𑀩𑀁, 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀓𑀸𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀸 𑀯𑀸 𑀧𑀼𑀕𑁆𑀕𑀮𑀸 𑀆𑀳𑀢𑀸𑀦𑀸𑀳𑀢𑀔𑀻𑀭𑀭𑀼𑀓𑁆𑀔𑀲𑀤𑀺𑀲𑀸. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑁂 𑀯𑀺𑀬 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸 𑀅𑀲𑀫𑀼𑀕𑁆𑀖𑀸𑀝𑀺𑀢𑀢𑁆𑀢𑀸’’𑀢𑀺 𑀬𑁄𑀚𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀧𑀸𑀴𑀺𑀬𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀁 (𑀧𑀝𑀺. 𑀫. 𑁩.𑁨𑁧). 𑀫𑀕𑁆𑀕𑁂𑀦 𑀧𑀳𑀻𑀦𑀓𑀺𑀮𑁂𑀲𑀸𑀦𑀫𑁂𑀯 𑀢𑀺𑀥𑀸 𑀦𑀯𑀢𑁆𑀢𑀩𑁆𑀩𑀢𑀁 𑀅𑀧𑀸𑀓𑀝𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀅𑀚𑀸𑀢𑀨𑀮𑀭𑀼𑀓𑁆𑀔𑁄 𑀆𑀪𑀢𑁄, 𑀅𑀢𑀻𑀢𑀸𑀤𑀻𑀦𑀁 𑀅𑀧𑁆𑀧𑀳𑀻𑀦𑀢𑀸𑀤𑀲𑁆𑀲𑀦𑀢𑁆𑀣𑀫𑁆𑀧𑀺 ‘‘𑀚𑀸𑀢𑀨𑀮𑀭𑀼𑀓𑁆𑀔𑁂𑀦 𑀤𑀻𑀧𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀢𑀢𑁆𑀣 𑀬𑀣𑀸 𑀅𑀘𑁆𑀙𑀺𑀦𑁆𑀦𑁂 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀺𑀭𑀳𑀸𑀦𑀺 𑀨𑀮𑀸𑀦𑀺 𑀙𑀺𑀦𑁆𑀦𑁂 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀦 𑀓𑀤𑀸𑀘𑀺 𑀲𑀲𑀪𑀸𑀯𑀸𑀦𑀺 𑀅𑀳𑁂𑀲𑀼𑀁 𑀳𑁄𑀦𑁆𑀢𑀺 𑀪𑀯𑀺𑀲𑁆𑀲𑀦𑁆𑀢𑀺 𑀘𑀸𑀢𑀺 𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑀸𑀦𑀺, 𑀏𑀯𑀁 𑀫𑀕𑁆𑀕𑁂𑀦 𑀧𑀳𑀻𑀦𑀓𑀺𑀮𑁂𑀲𑀸 𑀘 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀘 𑀙𑁂𑀤𑁂 𑀅𑀲𑀢𑀺 𑀨𑀮𑀸𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀢𑀺 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀙𑁂𑀤𑀲𑁆𑀲 𑀲𑀸𑀢𑁆𑀣𑀓𑀢𑀸, 𑀏𑀯𑀁 𑀫𑀕𑁆𑀕𑀪𑀸𑀯𑀦𑀸𑀬 𑀘 𑀲𑀸𑀢𑁆𑀣𑀓𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.