𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑀲𑀬𑀁 𑀚𑁂𑀝𑁆𑀞𑀓𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀘𑀢𑁆𑀢𑀸𑀭𑁄 𑀅𑀥𑀺𑀧𑀢𑀬𑁄 𑀅𑀜𑁆𑀜𑀫𑀜𑁆𑀜𑀁 𑀕𑀭𑀼𑀁 𑀦 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀦 𑀫𑀕𑁆𑀕𑀸𑀥𑀺𑀧𑀢𑀺𑀦𑁄’’𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀦 𑀅𑀥𑀺𑀧𑀢𑀬𑁄 𑀦 𑀪𑀯𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀦𑁆𑀢𑀺 ‘‘𑀅𑀥𑀺𑀧𑀢𑀬𑁄 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀥𑀺𑀧𑀢𑀻 𑀦 𑀪𑀯𑀦𑁆𑀢𑀻’’𑀢𑀺 𑀏𑀢𑀫𑀢𑁆𑀣𑀁. 𑀅𑀥𑀺𑀧𑀢𑀺𑀦𑁄𑀢𑀺 𑀅𑀥𑀺𑀧𑀢𑀺 𑀪𑀯𑀺𑀢𑀼𑀁 𑀲𑀫𑀢𑁆𑀣𑀲𑁆𑀲. 𑀅𑀥𑀺𑀧𑀢𑀺𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀅𑀥𑀺𑀧𑀢𑀺𑀁 𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀅𑀥𑀺𑀧𑀢𑀻𑀦𑀁 𑀲𑀳𑀪𑀸𑀯𑁂𑀢𑀺 𑀅𑀥𑀺𑀧𑀢𑀺𑀓𑀺𑀘𑁆𑀘𑀓𑀭𑀡𑁂𑀦 𑀲𑀳𑀧𑀯𑀢𑁆𑀢𑀺𑀬𑀁. ‘‘𑀅𑀯𑀻𑀫𑀁𑀲𑀸𑀥𑀺𑀧𑀢𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀪𑀸𑀯𑀸’’𑀢𑀺 𑀇𑀤𑀁 ‘‘𑀅𑀥𑀺𑀧𑀢𑀺𑀢𑀸𑀲𑀫𑀢𑁆𑀣𑀸 𑀥𑀫𑁆𑀫𑀸 𑀅𑀥𑀺𑀧𑀢𑀺𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑁂𑀬𑁆𑀬𑀼’’𑀦𑁆𑀢𑀺 𑀤𑁄𑀲𑀸𑀭𑁄𑀧𑀦𑀯𑀲𑁂𑀦𑀸𑀳, 𑀦 𑀬𑀣𑀸𑀥𑀺𑀕𑀢𑀯𑀲𑁂𑀦. 𑀅𑀥𑀺𑀧𑀢𑀺𑀥𑀫𑁆𑀫𑀸𑀦𑀜𑁆𑀳𑀺 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁂 𑀲𑀢𑀺 𑀅𑀥𑀺𑀧𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀲𑀳𑀪𑀸𑀯𑁂𑀧𑀺 𑀢𑀤𑀪𑀸𑀯𑀁 𑀲𑀦𑁆𑀥𑀸𑀬 𑀯𑀺𑀲𑁂𑀲𑀦𑀁 𑀦 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀜𑁆𑀜𑀫𑀜𑁆𑀜𑀸𑀥𑀺𑀧𑀢𑀺𑀓𑀭𑀡𑀪𑀸𑀯𑁂𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀥𑀺𑀧𑀢𑀺𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀁. 𑀯𑀻𑀫𑀁𑀲𑀸𑀥𑀺𑀧𑀢𑀺𑀓𑀢𑁆𑀢𑀯𑀘𑀦𑀦𑁆𑀢𑀺 𑀯𑀻𑀫𑀁𑀲𑀸𑀥𑀺𑀧𑀢𑀺𑀓𑀪𑀸𑀯𑀲𑁆𑀲 𑀯𑀘𑀦𑀁. 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀲𑀩𑁆𑀩𑁂𑀲𑀫𑁆𑀧𑀺 𑀅𑀥𑀺𑀧𑀢𑀻𑀦𑀁 𑀲𑀸𑀥𑀺𑀧𑀢𑀺𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀳𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀏𑀯 𑀲𑀸𑀥𑀺𑀧𑀢𑀺𑀪𑀸𑀯𑀲𑁆𑀲 𑀅𑀦𑁂𑀓𑀁𑀲𑀺𑀓𑀢𑀸𑀯𑀘𑀦𑀢𑁄.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.