𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁬𑁪𑁨. 𑀤𑀺𑀲𑀸𑀤𑁂𑀲𑁄𑀥𑀺𑀦𑀸𑀢𑀺 ‘‘𑀏𑀓𑀁 𑀤𑀺𑀲’’𑀦𑁆𑀢𑀺𑀆𑀤𑀺𑀤𑀺𑀲𑁄𑀥𑀺𑀦𑀸, 𑀯𑀺𑀳𑀸𑀭𑀕𑀸𑀫𑀦𑀺𑀕𑀫𑀦𑀕𑀭𑀚𑀦𑀧𑀤𑀭𑀚𑁆𑀚𑀸𑀤𑀺𑀤𑁂𑀲𑁄𑀥𑀺𑀦𑀸 𑀘. 𑀲𑀢𑁆𑀢𑁄𑀥𑀺𑀦𑀸𑀢𑀺 ‘‘𑀲𑀩𑁆𑀩𑀸 𑀇𑀢𑁆𑀣𑀺𑀬𑁄, 𑀲𑀩𑁆𑀩𑁂 𑀧𑀼𑀭𑀺𑀲𑀸, 𑀅𑀭𑀺𑀬𑀸, 𑀅𑀦𑀭𑀺𑀬𑀸’’𑀢𑀺𑀆𑀤𑀺𑀯𑀲𑀧𑁆𑀧𑀯𑀢𑁆𑀢𑁂𑀦 𑀲𑀢𑁆𑀢𑁄𑀥𑀺𑀦𑀸. 𑀏𑀢𑀲𑁆𑀲𑀸𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲, 𑀧𑀤𑀢𑁆𑀣𑀲𑁆𑀲 𑀯𑀸. 𑀅𑀦𑀼𑀯𑀢𑁆𑀢𑀓𑀦𑁆𑀢𑀺 𑀅𑀥𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀓𑀁. 𑀢𑀁 𑀤𑁆𑀯𑀬𑀦𑁆𑀢𑀺 𑀢𑀣𑀸-𑀲𑀤𑁆𑀤𑁄, 𑀇𑀢𑀺-𑀲𑀤𑁆𑀤𑁄𑀢𑀺 𑀉𑀪𑀬𑀁. ‘‘𑀢𑀣𑀸 𑀤𑀼𑀢𑀺𑀬’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 ‘‘𑀢𑀣𑀸-𑀲𑀤𑁆𑀤𑁄 𑀬𑀣𑀸 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀫𑁆𑀧𑀺 𑀤𑀺𑀲𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀸 𑀇𑀢𑀻𑀢𑀺 𑀅𑀬𑀁 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁂, 𑀏𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑀣𑀸 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁, 𑀤𑀼𑀢𑀺𑀬𑀁, 𑀢𑀢𑀺𑀬𑀁, 𑀘𑀢𑀼𑀢𑁆𑀣𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀏𑀯𑀁 𑀉𑀤𑁆𑀥𑀁, 𑀅𑀥𑁄, 𑀢𑀺𑀭𑀺𑀬𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀸…𑀧𑁂… 𑀢𑀁 𑀤𑁆𑀯𑀬’’𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀤𑁆𑀯𑀬𑀲𑁆𑀲. 𑀨𑀭𑀡𑀦𑁆𑀢𑀭𑀸𑀤𑀺𑀝𑁆𑀞𑀸𑀦𑀦𑁆𑀢𑀺 𑀨𑀭𑀡𑀢𑁄 𑀅𑀜𑁆𑀜𑀁 𑀨𑀭𑀡𑀦𑁆𑀢𑀭𑀁, 𑀢𑀁 𑀆𑀤𑀺 𑀬𑀲𑁆𑀲, 𑀢𑀁 𑀨𑀭𑀡𑀦𑁆𑀢𑀭𑀸𑀤𑀺. 𑀨𑀭𑀡𑀦𑁆𑀢𑀭𑀜𑁆𑀳𑁂𑀢𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬, 𑀬𑀤𑀺𑀤𑀁 𑀯𑀺𑀧𑀼𑀮𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀪𑀼𑀫𑁆𑀫𑀦𑁆𑀢𑀭𑀧𑀕𑀼𑀡𑀪𑀸𑀯𑀸𑀤𑀺 𑀕𑀬𑁆𑀳𑀢𑀺, 𑀢𑀲𑁆𑀲 𑀨𑀭𑀡𑀦𑁆𑀢𑀭𑀸𑀤𑀺𑀦𑁄 𑀞𑀸𑀦𑀁 𑀞𑀸𑀦𑀪𑀽𑀢𑁄 ‘‘𑀯𑀺𑀧𑀼𑀮𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀫𑀸𑀦𑁄 𑀫𑁂𑀢𑁆𑀢𑀸𑀪𑀸𑀯𑀦𑀸𑀯𑀺𑀲𑁂𑀲𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑀢𑁆𑀢𑀧𑀭𑀸𑀫𑀲𑀦𑀲𑁆𑀲 𑀢𑀲𑁆𑀲 𑀤𑁆𑀯𑀬𑀲𑁆𑀲 𑀅𑀝𑁆𑀞𑀸𑀦𑀁 𑀅𑀦𑁄𑀓𑀸𑀲𑁄𑀢𑀺. 𑀇𑀢𑀺 𑀓𑀢𑁆𑀯𑀸 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦 𑀯𑀼𑀢𑁆𑀢𑀁 𑀢𑀁 𑀤𑁆𑀯𑀬𑀦𑁆𑀢𑀺 𑀅𑀢𑁆𑀣𑁄.

𑁬𑁪𑁩. 𑀭𑀸𑀕𑀲𑁆𑀲𑀸𑀢𑀺 𑀓𑀸𑀫𑀭𑀸𑀕𑀲𑁆𑀲. 𑀲𑀺𑀦𑁂𑀳𑀲𑁆𑀲𑀸𑀢𑀺 𑀧𑀼𑀢𑁆𑀢𑀲𑀺𑀦𑁂𑀳𑀸𑀤𑀺𑀲𑀺𑀦𑁂𑀳𑀲𑁆𑀲. 𑀯𑀺𑀧𑀢𑁆𑀢𑀺𑀬𑀸𑀢𑀺 𑀭𑀸𑀕𑀲𑀺𑀦𑁂𑀳𑀲𑀗𑁆𑀔𑀸𑀢𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀯𑀺𑀧𑀢𑁆𑀢𑀺𑀬𑀸 𑀯𑀺𑀦𑀸𑀲𑀲𑁆𑀲. 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀳𑀺𑀭𑁄𑀢𑁆𑀢𑀧𑁆𑀧𑀩𑀮𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄.

𑁬𑁪𑁫. 𑀅𑀥𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀲𑀼𑀝𑁆𑀞𑀼 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸, 𑀢𑀁 𑀧𑀦𑁂𑀢𑁆𑀣 𑀅𑀥𑀺𑀫𑀼𑀘𑁆𑀘𑀦𑀁 𑀬𑀲𑁆𑀫𑀸 𑀨𑀭𑀡𑀯𑀲𑁂𑀦𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀼𑀝𑁆𑀞𑀼 𑀧𑀲𑀸𑀭𑁂𑀢𑁆𑀯𑀸’’𑀢𑀺. 𑀬𑀲𑁆𑀫𑀸 𑀧𑀦 𑀆𑀭𑀫𑁆𑀫𑀡𑁂 𑀲𑀼𑀝𑁆𑀞𑀼 𑀅𑀲𑀁𑀲𑀧𑁆𑀧𑀦𑀯𑀲𑁂𑀦𑁂𑀯 𑀢𑀁 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀅𑀥𑀺𑀫𑀼𑀘𑁆𑀘𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀩𑀮𑀯𑀢𑀸 𑀯𑀸 𑀅𑀥𑀺𑀫𑁄𑀓𑁆𑀔𑁂𑀦 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀁.

𑁬𑁪𑁮. 𑀏𑀢𑁂𑀲𑀁 𑀧𑀤𑀸𑀦𑀁 𑀲𑀩𑁆𑀩𑁂𑀦 𑀲𑀓𑀮𑁂𑀦 𑀤𑀺𑀲𑀸𑀤𑁂𑀲𑀸𑀤𑀺𑀪𑁂𑀤𑁂𑀦 𑀅𑀯𑀥𑀺𑀦𑀸. 𑀲𑀩𑁆𑀩𑀸𑀯𑀥𑀺𑀤𑀺𑀲𑀸𑀤𑀺𑀨𑀭𑀡𑀸𑀓𑀸𑀭𑁂𑀳𑀻𑀢𑀺 𑀲𑀩𑁆𑀩𑀸𑀯𑀥𑀺𑀪𑀽𑀢𑀤𑀺𑀲𑀸𑀤𑁂𑀲𑀧𑀼𑀕𑁆𑀕𑀮𑀨𑀭𑀡𑀧𑁆𑀧𑀓𑀸𑀭𑁂𑀳𑀺.

𑁬𑁫𑁦. 𑀯𑀺𑀖𑀸𑀢𑀯𑀲𑁂𑀦𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.